𑁫. 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀸𑀭𑀺𑀧𑀼𑀢𑁆𑀢𑀲𑀻𑀳𑀦𑀸𑀤𑀯𑀡𑁆𑀡𑀦𑀸

𑁧𑁪𑁧. 𑀧𑀸𑀯𑀸𑀭𑁂𑀦𑁆𑀢𑀺 𑀲𑀜𑁆𑀙𑀸𑀤𑁂𑀦𑁆𑀢𑀺 𑀲𑀭𑀻𑀭𑀁 𑀏𑀢𑁂𑀦𑀸𑀢𑀺 𑀧𑀸𑀯𑀸𑀭𑁄, 𑀯𑀢𑁆𑀣𑀁. 𑀧𑀸𑀯𑀭𑀡𑀁 𑀯𑀸 𑀧𑀸𑀯𑀸𑀭𑁄, ‘‘𑀯𑀢𑁆𑀣𑀁 𑀤𑀼𑀲𑁆𑀲’’𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀸 𑀏𑀢𑁂𑀢𑀺 𑀤𑀼𑀲𑁆𑀲𑀫𑁂𑀯 𑀧𑀸𑀯𑀸𑀭𑁄, 𑀲𑁄 𑀏𑀢𑀲𑁆𑀲 𑀩𑀳𑀼𑀯𑀺𑀥𑁄 𑀅𑀦𑁂𑀓𑀓𑁄𑀝𑀺𑀧𑁆𑀧𑀪𑁂𑀤𑁄 𑀪𑀡𑁆𑀟𑀪𑀽𑀢𑁄 𑀅𑀢𑁆𑀣𑀻𑀢𑀺 𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑁄. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂 𑀤𑀼𑀲𑁆𑀲𑀧𑀸𑀯𑀸𑀭𑀪𑀡𑁆𑀟𑀫𑁂𑀯 𑀩𑀳𑀼𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀡𑀺𑀚𑁆𑀚𑀁 𑀅𑀓𑀸𑀲𑀺, 𑀢𑁂𑀦 𑀦𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀺𑀢𑀫𑁆𑀧𑀺 ‘‘𑀧𑀸𑀯𑀸𑀭𑀺𑀓𑁄’’ 𑀢𑁆𑀯𑁂𑀯 𑀲𑀜𑁆𑀚𑀸𑀦𑀦𑁆𑀢𑀺. 𑀪𑀕𑀯𑀢𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀓𑀲𑁆𑀫𑀸 𑀏𑀯𑀁 𑀅𑀯𑁄𑀘𑀸’’𑀢𑀺 𑀢𑀣𑀸𑀯𑀘𑀦𑁂 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀧𑀯𑁂𑀤𑀦𑀢𑁆𑀣’’𑀦𑁆𑀢𑀺 𑀓𑀲𑁆𑀫𑀸 𑀧𑀬𑁄𑀚𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀢𑀬𑀺𑀤𑀁 𑀅𑀫𑁆𑀩𑀁 𑀧𑀼𑀝𑁆𑀞𑀲𑁆𑀲 𑀮𑀩𑀼𑀚𑀁 𑀩𑁆𑀬𑀸𑀓𑀭𑀡𑀲𑀤𑀺𑀲𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀬𑀸 𑀳𑀺𑀲𑁆𑀲 𑀣𑁂𑀭𑀲𑁆𑀲 𑀢𑀤𑀸 𑀪𑀕𑀯𑀢𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺, 𑀲𑀸 𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑀸 𑀓𑀸𑀭𑀡𑀪𑀸𑀯𑁂𑀦 𑀘𑁄𑀤𑀺𑀢𑀸, 𑀢𑀲𑁆𑀫𑀸 𑀏𑀯𑀁 𑀅𑀯𑁄𑀘𑀸𑀢𑀺, 𑀲𑀸 𑀏𑀯 𑀘 𑀬𑀲𑁆𑀫𑀸 𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑀸 𑀧𑀯𑁂𑀤𑀦𑀯𑀲𑁂𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀢𑀣𑀸𑀯𑀘𑀦𑀁 𑀧𑀬𑁄𑀚𑁂𑀢𑀺, 𑀢𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀧𑀯𑁂𑀤𑀦𑀢𑁆𑀣’’𑀦𑁆𑀢𑀺 𑀧𑀬𑁄𑀚𑀦𑀪𑀸𑀯𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀁.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀲𑁄𑀫𑀦𑀲𑁆𑀲𑀧𑀯𑁂𑀤𑀦𑁂. 𑀯𑀺𑀳𑀸𑀭𑁂 𑀦𑀺𑀯𑀸𑀲𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀲𑀼𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀆𑀩𑀦𑁆𑀥𑀺𑀢𑁆𑀯𑀸.

𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀅𑀳𑁄 𑀲𑀦𑁆𑀢𑁄 𑀯𑀢𑀸𑀬𑀁 𑀅𑀭𑀺𑀬𑀯𑀺𑀳𑀸𑀭𑁄’’𑀢𑀺 𑀲𑀫𑀸𑀧𑀢𑁆𑀢𑀺𑀲𑀼𑀔𑀧𑀘𑁆𑀘𑀯𑁂𑀓𑁆𑀔𑀡𑀫𑀼𑀔𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀤𑁆𑀥𑁄, 𑀆𑀭𑀪𑀺𑀢𑁆𑀯𑀸 𑀘 𑀦𑁂𑀲𑀁 𑀢𑀁 𑀢𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀺𑀪𑀸𑀕𑀯𑀲𑁂𑀦 𑀅𑀦𑀼𑀲𑁆𑀲𑀭𑀺. 𑀢𑀣𑀸 𑀳𑀺 ‘‘𑀲𑀫𑀸𑀥𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀲𑁆𑀲𑁂𑀯 ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀯𑀺𑀪𑀸𑀕𑁄, ‘‘𑀧𑀜𑁆𑀜𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀘 𑀕𑀳𑀺𑀢𑀲𑁆𑀲𑁂𑀯 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀯𑀺𑀪𑀸𑀕𑁄 𑀉𑀤𑁆𑀥𑀝𑁄. ‘‘𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲𑁂𑀯 𑀕𑀳𑀡𑀁 𑀣𑁂𑀭𑀲𑁆𑀲 𑀇𑀢𑀭𑁂𑀳𑀺 𑀲𑀸𑀢𑀺𑀲𑀬𑀦𑁆𑀢𑀺 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑁆𑀧𑀺 𑀧𑀦 ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀓𑀺𑀘𑁆𑀘𑀯𑀲𑁂𑀦 𑀤𑀲𑁆𑀲𑀺𑀢𑀫𑁂𑀯, 𑀮𑀓𑁆𑀔𑀡𑀳𑀸𑀭𑀯𑀲𑁂𑀦 𑀯𑀸 𑀇𑀢𑀭𑁂𑀲𑀁 𑀧𑁂𑀢𑁆𑀣 𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀢𑀣𑀸 𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀺𑀬𑀁 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦 𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂, (𑀯𑀺𑀲𑀼𑀤𑁆𑀥𑀺. 𑁨.𑁪𑁨𑁮) 𑀢𑀁 𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁪𑁨𑁮) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀯𑀓𑀯𑀺𑀲𑀬𑁂 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀜𑀸𑀡𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀲𑁆𑀲𑀸𑀧𑀺 𑀳𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀲𑀸𑀯𑀓𑀧𑀸𑀭𑀫𑀺𑀬𑀸 𑀧𑀦 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑀺𑀢𑀢𑁆𑀢𑀸 𑀅𑀕𑁆𑀕𑀫𑀕𑁆𑀕𑀲𑀫𑀥𑀺𑀕𑀫𑁂𑀦𑁂𑀯𑀲𑁆𑀲 𑀲𑀫𑀥𑀺𑀕𑀫𑁄 𑀳𑁄𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀬𑀸𑀯 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑀸 𑀅𑀦𑀼𑀲𑁆𑀲𑀭𑀢𑁄𑀢𑀺 𑀬𑁄𑀚𑀦𑀸.

𑀪𑀕𑀯𑀢𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀫𑀸𑀭𑀤𑁆𑀥𑁄𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑀢𑁄 𑀦𑁂𑀲𑀁 𑀏𑀓𑀚𑁆𑀛𑀁 𑀆𑀧𑀸𑀣𑀸𑀕𑀫𑀦𑀁 𑀦𑀢𑁆𑀣𑀺, 𑀲𑀢𑀺 𑀘 𑀢𑀲𑁆𑀫𑀺𑀁 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦𑁂𑀯 𑀅𑀦𑀼𑀲𑁆𑀲𑀭𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀣𑁂𑀭𑁄 𑀲𑀯𑀺𑀲𑀬𑁂 𑀞𑀢𑁆𑀯𑀸 𑀢𑁂 𑀅𑀦𑀼𑀧𑀤𑀁 𑀲𑀭𑀽𑀧𑀢𑁄 𑀅𑀦𑀼𑀲𑁆𑀲𑀭𑀺, 𑀅𑀦𑀼𑀲𑁆𑀲𑀭𑀦𑁆𑀢𑁄 𑀘 𑀲𑀩𑁆𑀩𑀧𑀞𑀫𑀁 𑀲𑀻𑀮𑀁 𑀅𑀦𑀼𑀲𑁆𑀲𑀭𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀢𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀆𑀳, 𑀲𑀻𑀮𑀁 𑀆𑀭𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀘𑁂𑀢𑁆𑀣 𑀣𑁂𑀭𑁄 𑀏𑀓𑁂𑀓𑀯𑀲𑁂𑀦 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀸𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀭𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂’’𑀢𑀺 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀲𑀸𑀫𑀜𑁆𑀜𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁫𑁨) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑁂 (𑀅. 𑀦𑀺. 𑁪.𑁨𑁮) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀧𑀥𑀸𑀦𑀺𑀬𑀗𑁆𑀕𑀸𑀤𑀬𑁄 𑀲𑀗𑁆𑀕𑀻𑀢𑀺 (𑀤𑀻. 𑀦𑀺. 𑁩.𑁩𑁧𑁭) 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀙 𑀲𑀸𑀭𑀡𑀻𑀬 𑀥𑀫𑁆𑀫𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁧𑁪𑁧) 𑀆𑀕𑀢𑀸 𑀏𑀯. 𑀲𑀼𑀔𑀁 𑀲𑀼𑀧𑀦𑀸𑀤𑀬𑁄 (𑀅. 𑀦𑀺. 𑁧𑁧.𑁧𑁫; 𑀧𑀝𑀺. 𑀫. 𑁨.𑁨𑁨) 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸. ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀲𑀁. 𑀦𑀺. 𑁫.𑁧𑁦𑁮𑁧, 𑀫𑀳𑀸𑀯. 𑁧𑁫, 𑀧𑀝𑀺. 𑀫. 𑁨.𑁩𑁦) 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀢𑀺𑀧𑀭𑀺𑀯𑀢𑁆𑀢𑀯𑀲𑁂𑀦 𑀆𑀕𑀢𑀸 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸. 𑀫𑀕𑁆𑀕𑀨𑀮𑁂𑀲𑀼 𑀧𑀯𑀢𑁆𑀢𑀸𑀦𑀺 𑀅𑀝𑁆𑀞 𑀜𑀸𑀡𑀸𑀦𑀺, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀘𑀸𑀢𑀺 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺. 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑀥𑀫𑁆𑀫𑀸 𑀫𑁂𑀖𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀉𑀤𑀸. 𑀅𑀝𑁆𑀞. 𑁩𑁧) 𑀕𑀳𑁂𑀢𑀩𑁆𑀩𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁪𑁮), 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫; 𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋

𑀅𑀢𑀻𑀢𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑀁𑀲𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬 𑀳𑀸𑀦𑀺, 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀲𑀫𑀸𑀥𑀺𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀧𑀜𑁆𑀜𑀸𑀬 𑀳𑀸𑀦𑀺, 𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀳𑀸𑀦𑀺. 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀤𑀯𑀸, 𑀦𑀢𑁆𑀣𑀺 𑀭𑀯𑀸, 𑀦𑀢𑁆𑀣𑀺 𑀅𑀧𑁆𑀨𑀼𑀝𑁆𑀞𑀁, 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀢𑁆𑀢𑀁, 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄, 𑀦𑀢𑁆𑀣𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸𑀢𑀺.

𑀢𑀢𑁆𑀣 ‘‘𑀦𑀢𑁆𑀣𑀺 𑀤𑀯𑀸𑀢𑀺 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀭𑀯𑀸𑀢𑀺 𑀲𑀳𑀲𑀸 𑀓𑀺𑀭𑀺𑀬𑀸 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀲𑀳𑀲𑀸 𑀧𑀦 𑀓𑀺𑀭𑀺𑀬𑀸 𑀤𑀯𑀸, ‘‘𑀅𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀲𑁆𑀲 𑀓𑀭𑀡𑀁 𑀭𑀯𑀸. 𑀦𑀢𑁆𑀣𑀺 𑀅𑀧𑁆𑀨𑀼𑀝𑀦𑁆𑀢𑀺 𑀜𑀸𑀡𑁂𑀦 𑀅𑀨𑀼𑀲𑀺𑀢𑀁 𑀦𑀢𑁆𑀣𑀺. 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀢𑁆𑀢𑀦𑁆𑀢𑀺 𑀢𑀼𑀭𑀺𑀢𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄𑀢𑀺 𑀦𑀺𑀭𑀢𑁆𑀣𑀓𑀘𑀺𑀢𑁆𑀢𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀺. 𑀦𑀢𑁆𑀣𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬 𑀳𑀸𑀦𑀻’’𑀢𑀺 𑀅𑀧𑀞𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀲𑀢𑀺𑀬𑀸 [𑀲𑀢𑁆𑀢𑀺𑀬𑀸 (𑀯𑀺𑀪. 𑀫𑀽𑀮𑀝𑀻. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸)] 𑀳𑀸𑀦𑀻’’𑀢𑀺 𑀧𑀞𑀦𑁆𑀢𑀺.

𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀸𑀦𑀺𑀬𑁂𑀯 (𑀲𑀁. 𑀦𑀺. 𑁨.𑁩𑁩) 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀜𑀸𑀡𑀯𑀢𑁆𑀣𑀽𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀢𑁄 𑀔𑁄 𑀪𑀺𑀓𑁆𑀔𑀯𑁂 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀚𑀭𑀸𑀫𑀭𑀡𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁩𑁩).

𑀚𑀭𑀸𑀫𑀭𑀡𑀲𑀫𑀼𑀤𑀬𑁄𑀢𑀺 𑀘𑁂𑀢𑁆𑀣 𑀚𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑁂𑀲𑀧𑀤𑁂𑀲𑀼 𑀪𑀯𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀨𑀲𑁆𑀲𑀸𑀤𑀬𑁄 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑀸.

‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁, ‘‘𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁, 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁, ‘‘𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁, ‘‘𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡’’𑀦𑁆𑀢𑀺 𑀜𑀸𑀡𑀁. ‘‘𑀬𑀫𑁆𑀧𑀺 𑀇𑀤𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀸𑀡𑀦𑁆𑀢𑀺 𑀏𑀯𑀁 𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺 (𑀲𑀁. 𑀦𑀺. 𑁨.𑁩𑁪) 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀬𑀫𑁆𑀧𑀻𑀢𑀺 𑀙𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀭𑀫𑁆𑀫𑀡𑀪𑀸𑀯𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀙𑀧𑀺 𑀜𑀸𑀡𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁 𑀜𑀸𑀡𑀁. ‘‘𑀔𑀬𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀧𑀓𑀸𑀭𑁂𑀦 𑀧𑀯𑀢𑁆𑀢𑀜𑀸𑀡𑀲𑁆𑀲 𑀤𑀲𑁆𑀲𑀦𑀁, 𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸 𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑀸𑀢𑀺 𑀦 𑀢𑀁 ‘‘𑀅𑀗𑁆𑀕’’𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀸𑀴𑀺𑀬𑀁 (𑀲𑀁. 𑀦𑀺. 𑁨.𑁩𑁪) 𑀧𑀦 𑀲𑀩𑁆𑀩𑀢𑁆𑀣 𑀜𑀸𑀡𑀯𑀲𑁂𑀦 𑀅𑀗𑁆𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡’’𑀦𑁆𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀧𑀓𑀸𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀢𑁆𑀢𑀫𑀁 𑀜𑀸𑀡𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀺𑀲𑁆𑀲𑀢𑀺. 𑀦 𑀳𑀺 𑀬𑀫𑁆𑀧𑀺 𑀇𑀤𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺 𑀜𑀸𑀡𑀕𑁆𑀕𑀳𑀡𑁂𑀦 𑀏𑀢𑀲𑁆𑀫𑀺𑀁 𑀜𑀸𑀡𑀪𑀸𑀯𑀤𑀲𑁆𑀲𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, ‘‘𑀔𑀬𑀥𑀫𑁆𑀫𑀁…𑀧𑁂… 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀏𑀢𑁂𑀲𑀁 𑀲𑀫𑁆𑀩𑀦𑁆𑀥𑀪𑀸𑀯𑀧𑁆𑀧𑀲𑀗𑁆𑀕𑁄 𑀘𑀸𑀢𑀺. 𑀘𑀢𑀼𑀯𑀻𑀲𑀢𑀺…𑀧𑁂… 𑀯𑀚𑀺𑀭𑀜𑀸𑀡𑀦𑁆𑀢𑀺 𑀏𑀢𑁆𑀣 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀪𑀕𑀯𑀸 𑀤𑁂𑀯𑀲𑀺𑀓𑀁 𑀤𑁆𑀯𑀸𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀤𑁆𑀯𑀸𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁂𑀯 𑀘 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀸𑀲𑀁 𑀧𑀼𑀭𑁂𑀘𑀭𑀁, 𑀲𑀳𑀯𑀘𑀭𑀜𑁆𑀘 𑀜𑀸𑀡𑀁 𑀧𑀝𑀺𑀧𑀓𑁆𑀔𑁂𑀳𑀺 𑀅𑀪𑁂𑀚𑁆𑀚𑀢𑀁, 𑀫𑀳𑀢𑁆𑀢𑀜𑁆𑀘 𑀉𑀧𑀸𑀤𑀸𑀬 𑀫𑀳𑀸𑀯𑀚𑀺𑀭𑀜𑀸𑀡𑀁 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘𑀢𑀣𑀸𑀕𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑁂 𑀯𑀺𑀢𑀓𑁆𑀓𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺 𑁋 𑀔𑁂𑀫𑁄 𑀘 𑀯𑀺𑀢𑀓𑁆𑀓𑁄, 𑀧𑀯𑀺𑀯𑁂𑀓𑁄 𑀘 𑀯𑀺𑀢𑀓𑁆𑀓𑁄’𑀢𑀺 (𑀇𑀢𑀺𑀯𑀼. 𑁩𑁮).

𑀔𑁂𑀫𑀯𑀺𑀢𑀓𑁆𑀓𑁄 𑀳𑀺 𑀪𑀕𑀯𑀢𑁄 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑁄, 𑀧𑀯𑀺𑀯𑁂𑀓𑀯𑀺𑀢𑀓𑁆𑀓𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄, 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄, 𑀢𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀸𑀦𑀺 𑀓𑀢𑀺𑀧𑀬𑀘𑀺𑀢𑁆𑀢𑀓𑁆𑀔𑀡𑁂𑀳𑁂𑀯 𑀇𑀚𑁆𑀛𑀦𑁆𑀢𑀺. 𑀧𑀜𑁆𑀘 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀧𑁆𑀧𑀫𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀤𑀲, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀘𑀸𑀢𑀺 𑀤𑁆𑀯𑀸𑀤𑀲𑁂𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀪𑀕𑀯𑀸 𑀧𑀘𑁆𑀘𑁂𑀓𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀧𑀼𑀭𑁂𑀪𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀣𑀸 𑀧𑀘𑁆𑀙𑀸𑀪𑀢𑁆𑀢’’𑀦𑁆𑀢𑀺. ‘‘𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀢𑀜𑀸𑀡𑀁 𑀫𑀳𑀸𑀯𑀚𑀺𑀭𑀜𑀸𑀡𑀁 𑀦𑀸𑀫𑀸’’𑀢𑀺 𑀓𑁂𑀘𑀺.

𑀅𑀧𑀭𑁂 𑀧𑀦 ‘‘𑀬𑀁 𑀢𑀁 𑀪𑀕𑀯𑀢𑀸 𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀧𑀝𑀺𑀮𑁄𑀫𑀦𑀬𑁂𑀦 𑀚𑀭𑀸𑀫𑀭𑀡𑀢𑁄 𑀧𑀝𑁆𑀞𑀸𑀬 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑁂𑀦 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀲𑀼𑀯𑀺𑀤𑀼𑀕𑁆𑀕𑀁 𑀫𑀳𑀸𑀕𑀳𑀦𑀁 𑀫𑀳𑀸𑀯𑀦𑀁 𑀙𑀺𑀦𑁆𑀤𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀲𑀸𑀦𑀲𑀺𑀮𑀸𑀬𑀁 𑀨𑀭𑀲𑀼𑀁 𑀲𑀼𑀦𑀺𑀲𑀺𑀢𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀦𑀺𑀲𑀸𑀦𑀲𑀺𑀮𑀸𑀲𑀤𑀺𑀲𑀺𑀬𑁄 𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀁 𑀲𑀫𑁆𑀧𑀸𑀤𑁂𑀢𑀼𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀯𑀲𑁂𑀦 𑀲𑀫𑁆𑀫𑀲𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀮𑀓𑁆𑀔𑀓𑁄𑀝𑀺𑀮𑀓𑁆𑀔𑀓𑁄𑀝𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘𑀘𑀢𑀼𑀯𑀻𑀲𑀢𑀺…𑀧𑁂… 𑀫𑀳𑀸𑀯𑀚𑀺𑀭𑀜𑀸𑀡𑀁 𑀦𑀺𑀲𑁆𑀲𑀸𑀬𑀸’𑀢𑀺’’. 𑀦𑀦𑀼 𑀪𑀕𑀯𑀢𑁄 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀧𑀭𑀺𑀓𑀫𑁆𑀫𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺? 𑀦𑀬𑀺𑀤𑀁 𑀏𑀓𑀦𑁆𑀢𑀺𑀓𑀁. 𑀢𑀣𑀸 𑀳𑀺 𑀯𑁂𑀤𑀦𑀸𑀧𑀝𑀺𑀧𑁆𑀧𑀡𑀸𑀫𑀦𑀸𑀤𑀻𑀲𑀼 𑀲𑀯𑀺𑀲𑁂𑀲𑀁 𑀧𑀭𑀺𑀓𑀫𑁆𑀫𑀧𑀼𑀩𑁆𑀩𑀗𑁆𑀕𑀫𑁂𑀦 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺. 𑀅𑀧𑀭𑁂 𑀧𑀦 ‘‘𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀧𑀭𑀺𑀓𑀫𑁆𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀮𑁄𑀓𑀼𑀢𑁆𑀢𑀭𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀢𑀚𑁆𑀚𑀁 𑀧𑀭𑀺𑀓𑀫𑁆𑀫𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺.

‘‘𑀅𑀧𑀭𑀫𑁆𑀧𑀭𑀸’’𑀢𑀺 𑀧𑀤𑀁 𑀬𑁂𑀲𑀁 𑀤𑁂𑀲𑀦𑀸𑀬 𑀅𑀢𑁆𑀣𑀺, 𑀢𑁂 𑀅𑀧𑀭𑀫𑁆𑀧𑀭𑀺𑀬𑀸𑀯. 𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀬𑀦𑁆𑀢𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀧𑀦𑁂. 𑀅𑀦𑀼𑀢𑁆𑀢𑀭𑁄𑀢𑀺 𑀉𑀢𑁆𑀢𑀫𑁄. 𑀉𑀧𑀦𑀺𑀲𑁆𑀲𑀬𑁂 𑀞𑀢𑁆𑀯𑀸𑀢𑀺 𑀜𑀸𑀡𑀽𑀧𑀦𑀺𑀲𑁆𑀲𑀬𑁂 𑀞𑀢𑁆𑀯𑀸 𑀬𑀸𑀤𑀺𑀲𑁄 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑁄 𑀧𑀼𑀩𑁆𑀩𑀬𑁄𑀕𑁄, 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬. 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺 𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀜𑀸𑀡𑀲𑁆𑀲 𑀯𑀺𑀬 𑀲𑀤𑁆𑀥𑀸𑀬𑀧𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀯𑀲𑁂𑀲𑀅𑀭𑀳𑀦𑁆𑀢𑁂𑀳𑀻𑀢𑀺 𑀧𑀓𑀢𑀺𑀲𑀸𑀯𑀓𑁂𑀳𑀺. 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀦𑀸𑀫𑀢𑁄 𑀉𑀤𑁆𑀥𑀝𑀸. 𑀘𑀢𑁆𑀢𑀸𑀭𑁄 𑀫𑀳𑀸𑀣𑁂𑀭𑀸𑀢𑀺 𑀫𑀳𑀸𑀓𑀲𑁆𑀲𑀧𑀅𑀦𑀼𑀭𑀼𑀤𑁆𑀥𑀫𑀳𑀸𑀓𑀘𑁆𑀘𑀸𑀦𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀸. 𑀢𑁂𑀲𑀼𑀧𑀺 𑀅𑀕𑁆𑀕𑀲𑀸𑀯𑀓𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀜𑁆𑀜𑀸𑀬 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀢𑁄𑀧𑀺 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀺𑀓𑁆𑀔𑀯𑀺𑀲𑀤𑀜𑀸𑀡𑁄 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑀸𑀬 𑀲𑀫𑁆𑀪𑀢𑀜𑀸𑀡𑀲𑀫𑁆𑀪𑀸𑀭𑀢𑁆𑀢𑀸. 𑀲𑀢𑀺𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀅𑀯𑀺𑀲𑁂𑀲𑁂𑀲𑀼 𑀩𑀳𑀽𑀲𑀼 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀼𑀩𑁆𑀩𑀬𑁄𑀕𑀯𑀲𑁂𑀦 𑀮𑁄𑀓𑀺𑀬𑁂 𑀯𑀺𑀲𑀬𑁂 𑀲𑀺𑀬𑀸 𑀓𑀲𑁆𑀲𑀘𑀺 𑀜𑀸𑀡𑀲𑁆𑀲 𑀯𑀺𑀲𑀺𑀝𑁆𑀞𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀯 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀻’’𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀆𑀕𑀢𑀤𑁂𑀲𑀦𑀸𑀲𑁄𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀸 𑀳𑀺 𑀩𑀼𑀤𑁆𑀥𑀕𑀼𑀡𑁂 𑀫𑀳𑀢𑁆𑀢𑀁 𑀧𑀘𑁆𑀘𑀓𑁆𑀔𑀢𑁄𑀯 𑀧𑀲𑁆𑀲𑀦𑁆𑀢𑀺, 𑀦 𑀲𑀤𑁆𑀤𑀳𑀦𑀯𑀲𑁂𑀦.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑁄𑀢𑀺 𑀕𑀫𑁆𑀪𑀻𑀭𑁄 𑀯𑀸 𑀉𑀢𑁆𑀢𑀸𑀦𑁄 𑀯𑀸𑀢𑀺 𑀚𑀸𑀦𑀦𑀢𑁆𑀣𑀁. ‘‘𑀏𑀯𑀫𑁂𑀯𑀸’’𑀢𑀺𑀆𑀤𑀺 𑀬𑀣𑀸𑀤𑀲𑁆𑀲𑀺𑀢𑀸𑀬 𑀉𑀧𑀫𑀸𑀬 𑀉𑀧𑀫𑁂𑀬𑁆𑀬𑁂𑀦 𑀲𑀁𑀲𑀦𑁆𑀤𑀦𑀁. 𑀩𑀼𑀤𑁆𑀥𑀕𑀼𑀡𑁂𑀲𑀼 𑀅𑀧𑁆𑀧𑀫𑀢𑁆𑀢𑀯𑀺𑀲𑀬𑀫𑁆𑀧𑀺 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀜𑀸𑀡𑀁 𑀅𑀧𑀯𑀢𑁆𑀢𑀺𑀢𑀭𑀽𑀧𑁂𑀦𑁂𑀯 𑀧𑀯𑀢𑁆𑀢𑀢𑀺 𑀅𑀦𑀯𑀢𑁆𑀢𑀺𑀢𑀲𑀪𑀸𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀩𑁆𑀬𑀸𑀫…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀜𑀸𑀢𑀉𑀤𑀓𑀁 𑀯𑀺𑀬𑀸𑀢𑀺 𑀧𑀫𑀸𑀡𑀢𑁄 𑀜𑀸𑀢𑀉𑀤𑀓𑀁 𑀯𑀺𑀬. 𑀅𑀭𑀺𑀬𑀸𑀦𑀁 𑀧𑀦 𑀢𑀢𑁆𑀣 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀦𑀓𑀜𑀸𑀡𑀁 𑀧𑀯𑀢𑁆𑀢𑀺𑀢𑀭𑀽𑀧𑁂𑀦𑁂𑀯 𑀧𑀯𑀢𑁆𑀢𑀢𑀺 𑀅𑀢𑁆𑀢𑀦𑁄 𑀧𑀝𑀺𑀯𑁂𑀥𑀸𑀦𑀼𑀭𑀽𑀧𑀁, 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀜𑁆𑀘 𑀅𑀯𑀢𑁆𑀢𑀺𑀢𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸𑀦𑀫𑁆𑀧𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀼𑀩𑁆𑀩𑀬𑁄𑀕𑀯𑀺𑀲𑁂𑀲𑀯𑀲𑁂𑀦 𑀜𑀸𑀡𑀁 𑀲𑀸𑀢𑀺𑀲𑀬𑀁, 𑀫𑀳𑀸𑀦𑀼𑀪𑀸𑀯𑀜𑁆𑀘 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑁄𑀢𑀸𑀧𑀦𑁆𑀦𑀜𑀸𑀡𑀲𑁆𑀲 𑀤𑀲𑀩𑁆𑀬𑀸𑀫𑀉𑀤𑀓𑀁 𑀑𑀧𑀫𑁆𑀫𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑁂𑀲𑀁 𑀤𑀲𑀼𑀢𑁆𑀢𑀭𑀤𑀺𑀕𑀼𑀡𑀤𑀲𑀕𑀼𑀡𑀅𑀲𑀻𑀢𑀺𑀕𑀼𑀡𑀯𑀺𑀲𑀺𑀝𑁆𑀞𑀁 𑀉𑀤𑀓𑀁 𑀑𑀧𑀫𑁆𑀫𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀩𑀼𑀤𑁆𑀥𑀕𑀼𑀡𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸, 𑀣𑁂𑀭𑁂𑀦 𑀘 𑀢𑁂 𑀧𑀭𑀺𑀘𑁆𑀙𑀺𑀚𑁆𑀚 𑀜𑀸𑀢𑀸𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀣𑀸 𑀲𑁄 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄 𑀧𑀼𑀭𑀺𑀲𑁄𑀢𑀺 𑀲𑁄 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀧𑁆𑀧𑀫𑀸𑀡𑁂𑀦 𑀬𑁄𑀢𑁆𑀢𑁂𑀦 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀝𑁆𑀞𑀸𑀦𑁂 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑀺𑀢𑁆𑀯𑀸 𑀞𑀺𑀢𑁄 𑀧𑀼𑀭𑀺𑀲𑁄. 𑀲𑁄 𑀳𑀺 𑀣𑁂𑀭𑀲𑁆𑀲 𑀉𑀧𑀫𑀸𑀪𑀸𑀯𑁂𑀦 𑀕𑀳𑀺𑀢𑁄. 𑀥𑀫𑁆𑀫𑀦𑁆𑀯𑀬𑁂𑀦𑀸𑀢𑀺 𑀅𑀦𑀼𑀫𑀸𑀦𑀜𑀸𑀡𑁂𑀦. 𑀢𑀜𑁆𑀳𑀺 𑀲𑀺𑀤𑁆𑀥𑀁 𑀥𑀫𑁆𑀫𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 ‘‘𑀥𑀫𑁆𑀫𑀦𑁆𑀯𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀅𑀦𑁆𑀯𑀬𑀯𑀲𑁂𑀦 𑀅𑀢𑁆𑀣𑀲𑁆𑀲 𑀩𑀼𑀚𑁆𑀛𑀦𑀢𑁄 𑀅𑀦𑁆𑀯𑀬𑀩𑀼𑀤𑁆𑀥𑀺, 𑀅𑀦𑀼𑀫𑁂𑀬𑁆𑀬𑀁 𑀅𑀦𑀼𑀫𑀺𑀦𑁄𑀢𑀻𑀢𑀺 𑀅𑀦𑀼𑀫𑀸𑀦𑀁, 𑀦𑀺𑀤𑀲𑁆𑀲𑀦𑁂 𑀤𑀺𑀝𑁆𑀞𑀦𑀬𑁂𑀦 𑀅𑀦𑀼𑀫𑁂𑀬𑁆𑀬𑀁 𑀕𑀡𑁆𑀳𑀸𑀢𑀻𑀢𑀺 ‘‘𑀦𑀬𑀕𑁆𑀕𑀸𑀳𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀦𑁆𑀯𑀬𑁂𑀦𑀸’’𑀢𑀺𑀆𑀤𑀺. 𑀲𑁆𑀯𑀸𑀬𑀁 𑀥𑀫𑁆𑀫𑀦𑁆𑀯𑀬𑁄 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁄𑀢𑀺, 𑀅𑀣 𑀔𑁄 𑀢𑀣𑀸𑀭𑀽𑀧𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲𑁂𑀯𑀸𑀢𑀺 𑀆𑀳 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀢𑁆𑀯𑀸’’𑀢𑀺. 𑀬𑀤𑀺 𑀣𑁂𑀭𑁄 𑀩𑀼𑀤𑁆𑀥𑀕𑀼𑀡𑁂 𑀏𑀓𑀤𑁂𑀲𑀢𑁄 𑀧𑀘𑁆𑀘𑀓𑁆𑀔𑁂 𑀓𑀢𑁆𑀯𑀸 𑀢𑀤𑀜𑁆𑀜𑁂 𑀦𑀬𑀕𑁆𑀕𑀸𑀳𑁂𑀦 𑀕𑀡𑁆𑀳𑀺, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀩𑀼𑀤𑁆𑀥𑀕𑀼𑀡𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸 𑀆𑀧𑀦𑁆𑀦𑀸𑀢𑀺? 𑀦𑀬𑀺𑀤𑀁 𑀏𑀯𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀦𑁆𑀢𑀸 𑀅𑀧𑀭𑀺𑀫𑀸𑀡𑀸’’𑀢𑀺.

‘‘𑀲𑀤𑁆𑀤𑀳𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀣𑁂𑀭𑁂𑀦 𑀳𑀺…𑀧𑁂… 𑀩𑀳𑀼𑀢𑀭𑀸’’𑀢𑀺 𑀆𑀳. 𑀓𑀣𑀁 𑀧𑀦𑀸𑀬𑀫𑀢𑁆𑀣𑁄 𑀏𑀯𑀁 𑀤𑀝𑁆𑀞𑀩𑁆𑀩𑁄𑀢𑀺 𑀏𑀯𑀁 𑀅𑀥𑀺𑀧𑁆𑀧𑀸𑀬𑀪𑁂𑀤𑀓𑀁 𑀉𑀧𑀫𑀸𑀬 𑀲𑀜𑁆𑀜𑀸𑀧𑁂𑀢𑀼𑀁 ‘‘𑀬𑀣𑀸 𑀓𑀣𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 ‘‘𑀉𑀧𑀫𑀸𑀬𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁬𑁭) 𑀇𑀢𑁄 𑀦𑀯 𑀇𑀢𑁄 𑀦𑀯𑀸𑀢𑀺 𑀇𑀢𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀬𑀸𑀯 𑀤𑀓𑁆𑀔𑀺𑀡𑀢𑀻𑀭𑀸 𑀦𑀯 𑀇𑀢𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀬𑀸𑀯 𑀉𑀢𑁆𑀢𑀭𑀢𑀻𑀭𑀸 𑀦𑀯. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀩𑀼𑀤𑁆𑀥𑁄𑀧𑀻’’𑀢𑀺 𑀕𑀸𑀣𑀫𑀸𑀳.

𑀬𑀫𑀓𑀬𑀼𑀕𑀴𑀫𑀳𑀸𑀦𑀤𑀻𑀫𑀳𑁄𑀖𑁄 𑀯𑀺𑀬𑀸𑀢𑀺 𑀤𑁆𑀯𑀺𑀦𑁆𑀦𑀁 𑀏𑀓𑀢𑁄 𑀲𑀫𑀸𑀕𑀢𑀢𑁆𑀢𑀸 𑀬𑀼𑀕𑀴𑀪𑀽𑀢𑀸𑀦𑀁 𑀫𑀳𑀸𑀦𑀤𑀻𑀦𑀁 𑀫𑀳𑁄𑀖𑁄 𑀯𑀺𑀬.

𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸𑀢𑀺 𑀬𑁄𑀬𑀁 𑀫𑀫 𑀧𑀲𑀸𑀤𑁄 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀑𑀕𑀸𑀴𑁆𑀳𑁄 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄, 𑀢𑀁 𑀅𑀦𑀼𑀘𑁆𑀙𑀯𑀺𑀓𑀁 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸. 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀅𑀜𑁆𑀜𑁄 𑀓𑁄𑀘𑀺 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀬𑀸𑀣𑀸𑀯𑀢𑁄 𑀅𑀦𑀯𑀩𑀼𑀚𑁆𑀛𑀦𑀢𑁄. 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺 𑀢𑀲𑁆𑀲 𑀳𑁂𑀢𑀼𑀢𑁄, 𑀧𑀘𑁆𑀘𑀬𑀢𑁄, 𑀲𑀪𑀸𑀯𑀢𑁄, 𑀓𑀺𑀘𑁆𑀘𑀢𑁄, 𑀨𑀮𑀢𑁄 𑀲𑀫𑁆𑀫𑀤𑁂𑀯 𑀧𑀝𑀺𑀯𑀺𑀚𑁆𑀛𑀦𑀢𑁄. 𑀧𑀽𑀭𑀢𑁆𑀢𑀦𑁆𑀢𑀺 𑀧𑀼𑀡𑁆𑀡𑀪𑀸𑀯𑁄. 𑀧𑀕𑁆𑀖𑀭𑀡𑀓𑀸𑀮𑁂𑀢𑀺 𑀯𑀺𑀓𑀺𑀭𑀡𑀓𑀸𑀮𑁂, 𑀧𑀢𑀦𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀧𑀲𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀧𑀲𑀸𑀤𑀲𑁆𑀲 𑀯𑀢𑁆𑀢𑀫𑀸𑀦𑀢𑀸 𑀤𑀻𑀧𑀺𑀢𑀸𑀢𑀺 ‘‘𑀉𑀧𑁆𑀧𑀦𑁆𑀦𑀲𑀤𑁆𑀥𑁄’’𑀢𑀺 𑀇𑀫𑀺𑀦𑀸𑀧𑀺 𑀲𑀤𑁆𑀥𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀧𑀓𑀸𑀲𑀺𑀢𑀸𑀢𑀺 𑀆𑀳 ‘‘𑀏𑀯𑀁 𑀲𑀤𑁆𑀤𑀳𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀪𑀺𑀜𑁆𑀜𑀸𑀬𑀢𑀻𑀢𑀺 𑀅𑀪𑀺𑀜𑁆𑀜𑁄, 𑀅𑀥𑀺𑀓𑁄 𑀅𑀪𑀺𑀜𑁆𑀜𑁄 𑀪𑀺𑀬𑁆𑀬𑁄𑀪𑀺𑀜𑁆𑀜𑁄, 𑀲𑁄 𑀏𑀯 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 ‘‘𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀪𑀺𑀬𑁆𑀬𑀢𑀭𑁄 𑀅𑀪𑀺𑀜𑁆𑀜𑀸𑀢𑁄’’𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀅𑀪𑀺𑀚𑀸𑀦𑀸𑀢𑀻𑀢𑀺 𑀅𑀪𑀺𑀜𑁆𑀜𑀸, 𑀅𑀪𑀺𑀯𑀺𑀲𑀺𑀝𑁆𑀞𑀸 𑀧𑀜𑁆𑀜𑀸, 𑀪𑀺𑀬𑁆𑀬𑁄 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀪𑀺𑀬𑁆𑀬𑁄𑀪𑀺𑀜𑁆𑀜𑁄, 𑀲𑁄 𑀏𑀯 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄, 𑀲𑁆𑀯𑀸𑀬𑀫𑀲𑁆𑀲 𑀅𑀢𑀺𑀲𑀬𑁄 𑀅𑀪𑀺𑀜𑁆𑀜𑀸𑀬 𑀪𑀺𑀬𑁆𑀬𑁄𑀪𑀸𑀯𑀓𑀢𑁄𑀢𑀺 𑀆𑀳 ‘‘𑀪𑀺𑀬𑁆𑀬𑀢𑀭𑀸𑀪𑀺𑀜𑁆𑀜𑁄 𑀯𑀸’’𑀢𑀺. 𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀜𑁆𑀘. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑁆𑀩𑁄𑀥𑀺 𑀦𑀸𑀫. 𑀢𑀢𑁆𑀣 𑀧𑀥𑀸𑀦𑀯𑀲𑁂𑀦 𑀢𑀤𑀢𑁆𑀣𑀤𑀲𑁆𑀲𑀦𑁂 𑀧𑀞𑀫𑀯𑀺𑀓𑀧𑁆𑀧𑁄, 𑀧𑀤𑀝𑁆𑀞𑀸𑀦𑀯𑀲𑁂𑀦 𑀤𑀼𑀢𑀺𑀬𑀯𑀺𑀓𑀧𑁆𑀧𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲𑁂𑀯 𑀕𑀳𑀡𑀁, 𑀦𑀦𑀼 𑀳𑁂𑀝𑁆𑀞𑀺𑀫𑀸𑀦𑀺𑀧𑀺 𑀪𑀕𑀯𑀢𑁄 𑀫𑀕𑁆𑀕𑀜𑀸𑀡𑀸𑀦𑀺 𑀲𑀯𑀸𑀲𑀦𑀫𑁂𑀯 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺. 𑀲𑀯𑀸𑀲𑀦𑀧𑁆𑀧𑀳𑀸𑀦𑀜𑁆𑀳𑀺 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀅𑀧𑀭𑀺𑀧𑀼𑀡𑁆𑀡𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑁆𑀲 𑀯𑀺𑀧𑁆𑀧𑀓𑀢𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂 𑀯𑀸’’𑀢𑀺. 𑀅𑀕𑁆𑀕𑀫𑀕𑁆𑀕𑀯𑀲𑁂𑀦 𑀘𑁂𑀢𑁆𑀣 𑀅𑀭𑀺𑀬𑀸𑀦𑀁 𑀩𑁄𑀥𑀺𑀢𑁆𑀢𑀬𑀧𑀸𑀭𑀺𑀧𑀽𑀭𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀧𑁆𑀧𑀤𑁂𑀲𑀸𑀢𑀺 𑀅𑀦𑀯𑀲𑁂𑀲𑀸. 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀕𑀳𑀺𑀢𑁂𑀦 𑀅𑀥𑀺𑀕𑀢𑁂𑀦 𑀕𑀳𑀺𑀢𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀦𑁆𑀢𑀺 𑀢𑁂𑀳𑀺 𑀅𑀥𑀺𑀕𑀦𑁆𑀢𑀩𑁆𑀩𑀁. 𑀢𑁂𑀦𑀸𑀢𑀺 𑀲𑀫𑁆𑀩𑁄𑀥𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦.

𑁧𑁪𑁨. 𑀔𑀸𑀤𑀦𑀻𑀬𑀸𑀦𑀁 𑀉𑀴𑀸𑀭𑀢𑀸 𑀲𑀸𑀢𑀭𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀫𑀥𑀼𑀭𑁂 𑀆𑀕𑀘𑁆𑀙𑀢𑀻’’𑀢𑀺. 𑀧𑀲𑀁𑀲𑀸𑀬 𑀉𑀴𑀸𑀭𑀢𑀸 𑀯𑀺𑀲𑀺𑀝𑁆𑀞𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑁂𑀝𑁆𑀞𑁂’’𑀢𑀺, 𑀑𑀪𑀸𑀲𑀲𑁆𑀲 𑀉𑀴𑀸𑀭𑀢𑀸 𑀫𑀳𑀦𑁆𑀢𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀼𑀮𑁂’’𑀢𑀺. 𑀉𑀲𑀪𑀲𑁆𑀲 𑀅𑀬𑀦𑁆𑀢𑀺 𑀆𑀲𑀪𑀻, 𑀇𑀥 𑀧𑀦 𑀆𑀲𑀪𑀻 𑀯𑀺𑀬𑀸𑀢𑀺 𑀆𑀲𑀪𑀻. 𑀢𑁂𑀦𑀸𑀳 ‘‘𑀉𑀲𑀪𑀲𑁆𑀲 𑀯𑀸𑀘𑀸𑀲𑀤𑀺𑀲𑀻’’𑀢𑀺. 𑀬𑁂𑀦 𑀧𑀦 𑀕𑀼𑀡𑁂𑀦𑀲𑁆𑀲𑀸 𑀢𑀁𑀲𑀤𑀺𑀲𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁄 𑀓𑀼𑀢𑁄𑀘𑀺 𑀅𑀦𑀼𑀲𑁆𑀲𑀯𑀦𑀁 𑀅𑀦𑀼𑀲𑁆𑀲𑀯𑁄. 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀓𑀢𑀧𑀭𑀺𑀘𑀬𑀸𑀦𑀁 𑀆𑀘𑀭𑀺𑀬𑀸𑀦𑀁 𑀢𑀁 𑀢𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀻 𑀧𑀯𑁂𑀡𑀻 𑀆𑀘𑀭𑀺𑀬𑀧𑀭𑀫𑁆𑀧𑀭𑀸. 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 ‘‘𑀇𑀢𑀺𑀓𑀺𑀭 𑀏𑀯𑀁𑀓𑀺𑀭𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸 𑀇𑀢𑀺𑀓𑀺𑀭. 𑀧𑀺𑀝𑀓𑀲𑁆𑀲 𑀕𑀦𑁆𑀣𑀲𑁆𑀲 𑀲𑀫𑁆𑀧𑀤𑀸𑀦𑀢𑁄 𑀲𑀬𑀁 𑀲𑀫𑁆𑀧𑀤𑀸𑀦𑀪𑀸𑀯𑁂𑀦 𑀕𑀳𑀡𑀁 𑀧𑀺𑀝𑀓𑀲𑀫𑁆𑀧𑀤𑀸𑀦𑀁. 𑀬𑀣𑀸𑀲𑀼𑀢𑀸𑀦𑀁 𑀅𑀢𑁆𑀣𑀸𑀦𑀁 𑀆𑀓𑀸𑀭𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄. 𑀢𑀣𑁂𑀯 ‘‘𑀏𑀯𑀫𑁂𑀢’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺. 𑀆𑀕𑀫𑀸𑀥𑀺𑀕𑀫𑁂𑀳𑀺 𑀯𑀺𑀦𑀸 𑀢𑀓𑁆𑀓𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀢𑀓𑁆𑀓𑀦𑀁 𑀢𑀓𑁆𑀓𑁄. 𑀅𑀦𑀼𑀫𑀸𑀦𑀯𑀺𑀥𑀺𑀁 𑀦𑀺𑀲𑁆𑀲𑀸𑀬 𑀦𑀬𑀕𑁆𑀕𑀸𑀳𑁄. 𑀬𑀲𑁆𑀫𑀸 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀪𑀕𑀯𑀢𑁄 𑀅𑀬𑀁 𑀣𑁂𑀭𑀲𑁆𑀲 𑀘𑁄𑀤𑀦𑀸, 𑀣𑁂𑀭𑀲𑁆𑀲 𑀘 𑀲𑁄 𑀅𑀯𑀺𑀲𑀬𑁄, 𑀢𑀲𑁆𑀫𑀸 ‘‘𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀻𑀳𑀦𑀸𑀤𑁄 𑀯𑀺𑀬𑀸𑀢𑀺 𑀲𑀻𑀳𑀦𑀸𑀤𑁄, 𑀢𑀁𑀲𑀤𑀺𑀲𑀢𑀸 𑀘𑀲𑁆𑀲 𑀲𑁂𑀝𑁆𑀞𑀪𑀸𑀯𑁂𑀦, 𑀲𑁄 𑀘𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀳𑀦𑀸𑀤𑁄’’𑀢𑀺𑀆𑀤𑀺𑀫𑀸𑀳. 𑀦𑁂𑀯 𑀤𑀦𑁆𑀥𑀸𑀬𑀦𑁆𑀢𑁂𑀦𑀸𑀢𑀺 𑀦 𑀫𑀦𑁆𑀤𑀸𑀬𑀦𑁆𑀢𑁂𑀦. 𑀦 𑀪𑀕𑁆𑀕𑀭𑀸𑀬𑀦𑁆𑀢𑁂𑀦𑀸𑀢𑀺 𑀅𑀧𑀭𑀺𑀲𑀗𑁆𑀓𑀦𑁆𑀢𑁂𑀦.

𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑁄𑀥𑀸𑀧𑁂𑀢𑀼𑀁. 𑀯𑀺𑀫𑀤𑁆𑀤𑀓𑁆𑀔𑀫𑀜𑁆𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀢𑁆𑀣𑀢𑁄 𑀢𑀢𑁆𑀣 𑀅𑀦𑀼𑀬𑁄𑀕𑀁 𑀲𑁄𑀥𑁂𑀢𑀺 𑀦𑀸𑀫. 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀘 𑀦𑀁 𑀲𑁄𑀥𑀸𑀧𑁂𑀢𑀺 𑀦𑀸𑀫. 𑀤𑀸𑀢𑀼𑀦𑁆𑀢𑀺 𑀲𑁄𑀥𑁂𑀢𑀼𑀁. 𑀓𑁂𑀘𑀺 ‘‘𑀤𑀸𑀦𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀦 𑀳𑀺 𑀬𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀲𑁄 𑀏𑀯 𑀢𑀢𑁆𑀣 𑀅𑀦𑀼𑀬𑁄𑀕𑀁 𑀤𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀦𑀺𑀖𑀁𑀲𑀦𑀦𑁆𑀢𑀺 𑀯𑀺𑀫𑀤𑁆𑀤𑀦𑀁. 𑀥𑀫𑀫𑀸𑀦𑀦𑁆𑀢𑀺 𑀢𑀸𑀧𑀬𑀫𑀸𑀦𑀁, 𑀢𑀸𑀧𑀦𑀜𑁆𑀘𑁂𑀢𑁆𑀣 𑀕𑀕𑁆𑀕𑀭𑀺𑀬𑀸 𑀥𑀫𑀸𑀧𑀦𑀲𑀻𑀲𑁂𑀦 𑀯𑀤𑀢𑀺. 𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂 𑀢𑁂 𑀅𑀢𑀻𑀢𑁂 𑀦𑀺𑀭𑀼𑀤𑁆𑀥𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀢𑀯 𑀅𑀪𑀺𑀦𑀻𑀳𑀸𑀭𑀢𑁄 𑀑𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀢𑀸𑀯 𑀲𑀸𑀯𑀓𑀜𑀸𑀡𑀕𑁄𑀘𑀭𑁂 𑀥𑀫𑁆𑀫𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀫𑀸𑀭𑀸𑀤𑀬𑁄 𑀯𑀺𑀬 𑀩𑀼𑀤𑁆𑀥𑀸𑀦𑀁 𑀮𑁄𑀓𑀺𑀬𑀘𑀺𑀢𑁆𑀢𑀘𑀸𑀭𑀁 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺. 𑀬𑁂 𑀧𑀦 𑀢𑁂 𑀅𑀩𑁆𑀪𑀢𑀻𑀢𑀸 𑀢𑀢𑁄 𑀧𑀭𑀢𑁄 𑀙𑀺𑀦𑁆𑀦𑀯𑀝𑀼𑀫𑀸 𑀙𑀺𑀦𑁆𑀦𑀧𑀧𑀜𑁆𑀘𑀸 𑀧𑀭𑀺𑀬𑀸𑀤𑀺𑀡𑁆𑀡𑀯𑀝𑁆𑀝𑀸 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀯𑀓𑀜𑀸𑀡𑀲𑁆𑀲 𑀅𑀯𑀺𑀲𑀬𑀪𑀽𑀢𑁂 𑀥𑀫𑁆𑀫𑁂 𑀓𑀣𑀁 𑀚𑀸𑀦𑀺𑀲𑁆𑀲𑀲𑀻𑀢𑀺.

𑀅𑀦𑀸𑀕𑀢𑀩𑀼𑀤𑁆𑀥𑀸𑀦𑀁 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀅𑀢𑀻𑀢𑁂𑀲𑀼 𑀢𑀸𑀯 𑀔𑀦𑁆𑀥𑀸𑀦𑀁 𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀢𑀢𑁆𑀣 𑀲𑀺𑀬𑀸 𑀜𑀸𑀡𑀲𑁆𑀲 𑀲𑀯𑀺𑀲𑀬𑁂 𑀕𑀢𑀺, 𑀅𑀦𑀸𑀕𑀢𑁂𑀲𑀼 𑀧𑀦 𑀲𑀩𑁆𑀩𑀲𑁄 𑀅𑀲𑀜𑁆𑀚𑀸𑀢𑁂𑀲𑀼 𑀓𑀣𑀦𑁆𑀢𑀺 𑀇𑀫𑀫𑀢𑁆𑀣𑀁 𑀚𑁄𑀢𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑀸𑀧𑀻’’𑀢𑀺𑀆𑀤𑀺. ‘‘𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀢𑀻𑀢𑀸𑀦𑀸𑀕𑀢𑁂 𑀲𑀢𑁆𑀢𑀸𑀳𑁂 𑀏𑀯 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀯𑀺𑀲𑀬𑁄, 𑀦 𑀢𑀢𑁄 𑀧𑀭𑀦𑁆𑀢𑀺? 𑀦𑀬𑀺𑀤𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀸𑀬𑀁 𑀤𑁄𑀲𑁄.

𑀯𑀺𑀤𑀺𑀢𑀝𑁆𑀞𑀸𑀦𑁂 𑀦 𑀓𑀭𑁄𑀢𑀺 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀢𑀸𑀤𑀺𑀲𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀲𑁂𑀢𑀼𑀖𑀸𑀢𑀢𑁄 𑀘. 𑀓𑀣𑀁 𑀧𑀦 𑀣𑁂𑀭𑁄 𑀤𑁆𑀯𑀬𑀲𑀫𑁆𑀪𑀯𑁂 𑀧𑀝𑀺𑀓𑁆𑀔𑁂𑀧𑀫𑁂𑀯 𑀅𑀓𑀸𑀲𑀺, 𑀦 𑀯𑀺𑀪𑀚𑁆𑀚 𑀩𑁆𑀬𑀸𑀓𑀸𑀲𑀻𑀢𑀺 𑀆𑀳 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺. 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀫𑀺𑀦𑁄𑀢𑀻𑀢𑀺 𑀧𑀸𑀭𑀫𑀻, 𑀲𑀸 𑀏𑀯 𑀜𑀸𑀡𑀦𑁆𑀢𑀺 𑀧𑀸𑀭𑀫𑀺𑀜𑀸𑀡𑀁, 𑀲𑀸𑀯𑀓𑀸𑀦𑀁 𑀧𑀸𑀭𑀫𑀺𑀜𑀸𑀡𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁, 𑀢𑀲𑁆𑀫𑀺𑀁. 𑀲𑀸𑀯𑀓𑀸𑀦𑀁 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑁂 𑀚𑀸𑀦𑀦𑁂 𑀦𑀸𑀬𑀁 𑀅𑀦𑀼𑀬𑁄𑀕𑁄, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀲𑀩𑁆𑀩𑀜𑁆𑀜𑀼𑀢𑀸𑀬 𑀚𑀸𑀦𑀦𑁂. 𑀓𑁂𑀘𑀺 𑀧𑀦 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀯𑀺𑀲𑀬𑁂’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀣𑀸 𑀲𑁂𑀲𑀧𑀤𑁂𑀲𑀼𑀧𑀺. 𑀲𑀻𑀮 ..𑀧𑁂… 𑀲𑀫𑀢𑁆𑀣𑀦𑁆𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀓𑀸𑀭𑀡𑀸𑀦𑀁 𑀚𑀸𑀦𑀦𑀲𑀫𑀢𑁆𑀣𑀁. 𑀩𑀼𑀤𑁆𑀥𑀲𑀻𑀮𑀸𑀤𑀬𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲, 𑀧𑀭𑁂𑀳𑀺 ‘‘𑀩𑀼𑀤𑁆𑀥𑀸’’𑀢𑀺 𑀚𑀸𑀦𑀦𑀲𑁆𑀲 𑀘 𑀓𑀸𑀭𑀡𑀁.

𑁧𑁪𑁩. 𑀅𑀦𑀼𑀫𑀸𑀦𑀜𑀸𑀡𑀁 𑀯𑀺𑀬 𑀲𑀁𑀲𑀬𑀧𑀺𑀝𑁆𑀞𑀺𑀓𑀁 𑀅𑀳𑀼𑀢𑁆𑀯𑀸 ‘‘𑀇𑀤𑀫𑀺𑀤’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀜𑁂𑀬𑁆𑀬𑀁 𑀥𑀸𑀭𑁂𑀢𑀺 𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀜𑀸𑀡𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀲𑁆𑀲𑀸’’𑀢𑀺. 𑀅𑀦𑀼𑀏𑀢𑀻𑀢𑀺 𑀅𑀦𑁆𑀯𑀬𑁄𑀢𑀺 𑀆𑀳 ‘‘𑀅𑀦𑀼𑀬𑁄𑀕𑀁 𑀅𑀦𑀼𑀕𑀦𑁆𑀢𑁆𑀯𑀸’’𑀢𑀺. 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀜𑁆𑀳𑀺 𑀅𑀢𑁆𑀣𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀫𑀸𑀦𑀜𑀸𑀡𑀲𑁆𑀲 𑀧𑀯𑀢𑁆𑀢𑀺 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀤𑀺𑀢𑁂 𑀯𑁂𑀤𑀓𑀫𑁆𑀧𑀺 𑀜𑀸𑀡𑀁 𑀅𑀢𑁆𑀣𑀢𑁄 𑀯𑀺𑀤𑀺𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀅𑀦𑀼𑀫𑀸𑀦𑀜𑀸𑀡𑀁 𑀦𑀬𑀕𑁆𑀕𑀸𑀳𑁄 𑀯𑀺𑀤𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀤𑀺𑀢𑁄𑀢𑀺 𑀯𑀺𑀤𑁆𑀥𑁄 𑀧𑀝𑀺𑀮𑀤𑁆𑀥𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑁄𑀢𑀺 𑀅𑀧𑀭𑀺𑀫𑀸𑀡𑁄 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀧𑀭𑀺𑀬𑀦𑁆𑀢𑁄’’𑀢𑀺. 𑀢𑁂𑀦𑀸𑀢𑀺 𑀅𑀧𑀭𑀺𑀬𑀦𑁆𑀢𑀢𑁆𑀢𑀸, 𑀢𑁂𑀦 𑀯𑀸 𑀅𑀧𑀭𑀺𑀬𑀦𑁆𑀢𑁂𑀦 𑀜𑀸𑀡𑁂𑀦, 𑀏𑀢𑁂𑀦𑁂𑀯 𑀣𑁂𑀭𑁄 𑀬𑀁 𑀬𑀁 𑀅𑀦𑀼𑀫𑁂𑀬𑁆𑀬𑀫𑀢𑁆𑀣𑀁 𑀜𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑀲𑁆𑀲 𑀅𑀲𑀗𑁆𑀕𑀫𑀧𑁆𑀧𑀝𑀺𑀳𑀝𑀅𑀦𑀼𑀫𑀸𑀦𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑁄 𑀇𑀫𑀺𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀧𑀸𑀓𑀸𑀭𑀲𑁆𑀲 𑀣𑀺𑀭𑀪𑀸𑀯𑀁 𑀉𑀤𑁆𑀥𑀫𑀼𑀤𑁆𑀥𑀁 𑀆𑀧𑁂𑀢𑀻𑀢𑀺 𑀉𑀤𑁆𑀥𑀸𑀧𑀁, 𑀧𑀸𑀓𑀸𑀭𑀫𑀽𑀮𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀓𑀸𑀭𑀤𑁆𑀯𑀸𑀭𑀩𑀦𑁆𑀥𑀧𑀭𑀺𑀔𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀦𑁆𑀢𑁂 𑀪𑀯𑀁 𑀧𑀘𑁆𑀘𑀦𑁆𑀢𑀺𑀫𑀁. 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀝𑁆𑀞𑀸𑀦𑀺𑀬𑀁 𑀓𑀢𑁆𑀯𑀸 𑀣𑁂𑀭𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀤𑁆𑀯𑀸𑀭𑀦𑁆𑀢𑀺 𑀓𑀲𑁆𑀫𑀸 𑀆𑀳𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀬𑀲𑁆𑀲𑀸 𑀧𑀜𑁆𑀜𑀸𑀬 𑀯𑀲𑁂𑀦 𑀧𑀼𑀭𑀺𑀲𑁄 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀙𑁂𑀓𑀪𑀸𑀯𑁄 𑀩𑁆𑀬𑀢𑁆𑀢𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁. 𑀫𑁂𑀥𑀢𑀺 𑀲𑀫𑁆𑀫𑁄𑀲𑀁 𑀳𑀺𑀁𑀲𑀢𑀺 𑀯𑀺𑀥𑀫𑀢𑀻𑀢𑀺 𑀫𑁂𑀥𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻. 𑀞𑀸𑀦𑁂 𑀞𑀸𑀦𑁂 𑀉𑀧𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸, 𑀞𑀸𑀦𑀲𑁄 𑀉𑀧𑁆𑀧𑀚𑁆𑀚𑀦𑀓𑀧𑀜𑁆𑀜𑀸. 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀭𑀺𑀬𑀸𑀬𑁄, 𑀲𑁄 𑀏𑀯 𑀧𑀣𑁄𑀢𑀺 𑀅𑀦𑀼𑀧𑀭𑀺𑀬𑀸𑀬𑀧𑀣𑁄, 𑀧𑀭𑀺𑀢𑁄 𑀧𑀸𑀓𑀸𑀭𑀲𑁆𑀲 𑀅𑀦𑀼𑀲𑀁𑀬𑀸𑀬𑀦𑀫𑀕𑁆𑀕𑁄. 𑀧𑀸𑀓𑀸𑀭𑀪𑀸𑀕𑀸 𑀲𑀦𑁆𑀥𑀸𑀢𑀩𑁆𑀩𑀸 𑀏𑀢𑁆𑀣𑀸𑀢𑀺 𑀧𑀸𑀓𑀸𑀭𑀲𑀦𑁆𑀥𑀺, 𑀧𑀸𑀓𑀸𑀭𑀲𑁆𑀲 𑀨𑀼𑀮𑁆𑀮𑀺𑀢𑀧𑁆𑀧𑀤𑁂𑀲𑁄. 𑀲𑁄 𑀧𑀦 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀝𑁆𑀞𑀓𑀸𑀦𑀁 𑀯𑀺𑀕𑀫𑁂𑀦 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀇𑀝𑁆𑀞𑀓𑀸𑀦𑀁 𑀅𑀧𑀕𑀢𑀝𑁆𑀞𑀸𑀦’’𑀦𑁆𑀢𑀺. 𑀙𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑁆𑀧𑀤𑁂𑀲𑁄, 𑀙𑀺𑀦𑁆𑀦𑀝𑁆𑀞𑀸𑀦𑀁 𑀯𑀸. 𑀢𑀜𑁆𑀳𑀺 ‘‘𑀯𑀺𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀺𑀮𑀺𑀝𑁆𑀞𑀦𑁆𑀢𑀺 𑀫𑀮𑀻𑀦𑀁. 𑀉𑀧𑀢𑀸𑀧𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁂𑀦 𑀲𑀦𑁆𑀢𑀸𑀧𑁂𑀦𑁆𑀢𑀺. 𑀯𑀺𑀩𑀸𑀥𑁂𑀦𑁆𑀢𑀻𑀢𑀺 𑀧𑀻𑀴𑁂𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀦𑀻𑀯𑀭𑀡𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑀽𑀧𑀖𑀸𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀞𑀧𑀺𑀢𑀘𑀺𑀢𑁆𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑀸𑀬𑀧𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀫𑁆𑀫𑀤𑁂𑀯 𑀞𑀧𑀺𑀢𑀘𑀺𑀢𑁆𑀢𑀸. 𑀬𑀣𑀸𑀲𑀪𑀸𑀯𑁂𑀦 𑀪𑀸𑀯𑁂𑀢𑁆𑀯𑀸𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀬𑀣𑀸 𑀧𑀝𑀺𑀧𑀓𑁆𑀔𑀸 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀪𑀸𑀯𑁂𑀢𑁆𑀯𑀸.

𑀧𑀼𑀭𑀺𑀫𑀦𑀬𑁂 𑀲𑀢𑀺𑀧𑀝𑁆𑀞𑀸𑀦𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸 𑀘 𑀫𑀺𑀲𑁆𑀲𑀓𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸 𑀯𑀢𑁆𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀺𑀲𑁆𑀲𑀓𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀫𑀺𑀲𑁆𑀲𑀓𑀸. ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸’’𑀢𑀺𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀢𑀺 𑀕𑀳𑁂𑀢𑁆𑀯𑀸 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁𑀬𑁂𑀯 𑀘 𑀦𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑀩𑁄𑀚𑁆𑀛𑀗𑁆𑀕𑀪𑀸𑀯𑀢𑁄, 𑀢𑁂𑀲𑀼 𑀘 𑀲𑀩𑁆𑀩𑀲𑁄 𑀅𑀥𑀺𑀕𑀢𑁂𑀲𑀼 𑀮𑁄𑀓𑀦𑀸𑀣𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀅𑀥𑀺𑀕𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀩𑁄𑀚𑁆𑀛𑀗𑁆𑀕𑁂 𑀫𑀕𑁆𑀕𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸𑀢𑀺 𑀕𑀳𑀺𑀢𑁂 𑀲𑀼𑀦𑁆𑀤𑀭𑁄 𑀧𑀜𑁆𑀳𑁄 𑀪𑀯𑁂𑀬𑁆𑀬𑀸’’𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀆𑀳, 𑀦 𑀧𑀦𑁂𑀯𑀁 𑀕𑀳𑀺𑀢𑀁 𑀧𑁄𑀭𑀸𑀡𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀣𑁂𑀭𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀘𑁆𑀘𑀦𑁆𑀢𑀦𑀕𑀭𑀸𑀤𑀻𑀲𑀼. 𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀢𑀤𑀢𑁆𑀣𑀺𑀓𑁂𑀳𑀺 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀧𑀭𑀺𑀲𑁆𑀲𑀬𑀭𑀳𑀺𑀢𑀲𑀼𑀔𑀸𑀥𑀺𑀕𑀫𑀦𑀝𑁆𑀞𑀸𑀦𑀢𑁄. 𑀧𑀸𑀓𑀸𑀭𑁄 𑀯𑀺𑀬 𑀲𑀻𑀮𑀁 𑀢𑀤𑀼𑀧𑀕𑀢𑀸𑀦𑀁 𑀧𑀭𑀺𑀢𑁄 𑀆𑀭𑀓𑁆𑀔𑀪𑀸𑀯𑀢𑁄. 𑀧𑀭𑀺𑀬𑀸𑀬𑀧𑀣𑁄 𑀯𑀺𑀬 𑀳𑀺𑀭𑀻 𑀲𑀻𑀮𑀧𑀸𑀓𑀸𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀭𑀺𑀬𑀸𑀬𑀧𑀣𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀳𑀺𑀭𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀤𑁆𑀯𑀸𑀭𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑀅𑀜𑁆𑀚𑀲𑀪𑀸𑀯𑀢𑁄. 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁄 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀺𑀩𑁆𑀩𑀸𑀦𑀦𑀕𑀭𑀧𑀯𑀺𑀝𑁆𑀞𑀧𑀯𑀺𑀲𑀦𑀓𑀸𑀦𑀁 𑀲𑀢𑁆𑀢𑀸𑀦𑀁 𑀲𑀮𑁆𑀮𑀓𑁆𑀔𑀡𑀢𑁄. 𑀤𑀺𑀦𑁆𑀦𑁄𑀢𑀺 𑀤𑀸𑀧𑀺𑀢𑁄, 𑀲𑁄𑀥𑀺𑀢𑁄𑀢𑀺 𑀅𑀢𑁆𑀣𑁄.

𑁧𑁪𑁪. 𑀦𑀺𑀧𑁆𑀨𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁, 𑀅𑀥𑀺𑀕𑀫𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑁂’’𑀢𑀺 𑀇𑀤𑀁 𑀬𑀲𑁆𑀫𑀸 𑀣𑁂𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀼𑀩𑁆𑀩𑁂𑀯 𑀦𑀺𑀩𑁆𑀩𑀸𑀦𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀢𑁂 𑀢𑁂 𑀧𑀸𑀲𑀡𑁆𑀟𑀺𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀼𑀘𑁆𑀙𑀺, 𑀢𑁂 𑀦𑀸𑀲𑁆𑀲 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀼𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀧𑀦 𑀧𑀸𑀲𑀡𑁆𑀟𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀏𑀯. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀲𑀬𑁂𑀯 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑁂𑀲𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀬. 𑀧𑀭𑀲𑁆𑀲 𑀯𑀟𑁆𑀠𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀳𑀢𑁆𑀣𑀕𑀢𑀁 𑀅𑀓𑀸𑀲𑀺 𑀅𑀥𑀺𑀕𑀘𑁆𑀙𑀺. 𑀉𑀢𑁆𑀢𑀭𑀼𑀢𑁆𑀢𑀭𑀦𑁆𑀢𑀺 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀉𑀢𑁆𑀢𑀭𑀡𑀢𑁄 𑀅𑀢𑀺𑀓𑁆𑀓𑀫𑀦𑀢𑁄 𑀉𑀢𑁆𑀢𑀭𑀼𑀢𑁆𑀢𑀭𑀁, 𑀢𑀢𑁄 𑀏𑀯 𑀧𑀥𑀸𑀦𑀪𑀸𑀯𑀁 𑀧𑀸𑀧𑀺𑀢𑀢𑀸𑀬 𑀧𑀡𑀻𑀢𑀧𑀡𑀻𑀢𑀁. 𑀉𑀢𑁆𑀢𑀭𑀼𑀢𑁆𑀢𑀭𑀦𑁆𑀢𑀺 𑀯𑀸 𑀉𑀧𑀭𑀽𑀧𑀭𑀺. 𑀧𑀡𑀻𑀢𑀧𑀡𑀻𑀢𑀦𑁆𑀢𑀺 𑀧𑀡𑀻𑀢𑀢𑀭𑀁, 𑀧𑀡𑀻𑀢𑀢𑀫𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀓𑀡𑁆𑀳𑀦𑁆𑀢𑀺 𑀓𑀸𑀴𑀓𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀁. 𑀲𑀼𑀓𑁆𑀓𑀦𑁆𑀢𑀺 𑀑𑀤𑀸𑀢𑀁 𑀯𑁄𑀤𑀸𑀦𑀥𑀫𑁆𑀫𑀁. 𑀲𑀯𑀺𑀧𑀓𑁆𑀔𑀁 𑀓𑀢𑁆𑀯𑀸𑀢𑀺 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀉𑀪𑀬𑀁 𑀲𑀯𑀺𑀧𑀓𑁆𑀔𑀁 𑀓𑀢𑁆𑀯𑀸. ‘‘𑀅𑀬𑀁 𑀓𑀡𑁆𑀳𑀥𑀫𑁆𑀫𑁄, 𑀇𑀫𑀲𑁆𑀲 𑀅𑀬𑀁 𑀧𑀳𑀸𑀬𑀓𑁄’’𑀢𑀺 𑀏𑀯𑀁 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀤𑁂𑀲𑀦𑀸𑀯𑀲𑁂𑀦 𑀦𑀻𑀳𑀭𑀺𑀢𑁆𑀯𑀸 𑀲𑀼𑀓𑁆𑀓𑀁, ‘‘𑀅𑀬𑀁 𑀲𑀼𑀓𑁆𑀓𑀥𑀫𑁆𑀫𑁄, 𑀇𑀫𑀺𑀦𑀸 𑀅𑀬𑀁 𑀧𑀳𑀸𑀢𑀩𑁆𑀩𑁄’’𑀢𑀺 𑀏𑀯𑀁 𑀲𑀼𑀓𑁆𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀡𑁆𑀳𑀁.𑀲𑀉𑀲𑁆𑀲𑀸𑀳𑀦𑁆𑀢𑀺 𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀩𑁆𑀬𑀸𑀧𑀸𑀭𑀁. 𑀢𑁂𑀦𑀸𑀳 ‘‘𑀲𑀯𑀺𑀧𑀸𑀓’’𑀦𑁆𑀢𑀺. 𑀯𑀺𑀧𑀸𑀓𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀺𑀁 𑀤𑁂𑀲𑀺𑀢𑁂 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦 𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀏𑀓𑀘𑁆𑀘𑀁 𑀥𑀫𑁆𑀫𑀁 𑀦𑀸𑀫 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀚𑀸𑀦𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀢𑀁𑀚𑀸𑀦𑀦𑁂 𑀳𑀺 𑀯𑀼𑀢𑁆𑀢𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑀚𑀸𑀦𑀦𑀁 𑀅𑀯𑀼𑀢𑁆𑀢𑀲𑀺𑀤𑁆𑀥𑀦𑁆𑀢𑀺. ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀽’’𑀢𑀺 𑀇𑀤𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀁. 𑀯𑀺𑀧𑀓𑁆𑀔𑁄 𑀧𑀦 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀏𑀢𑁆𑀣𑀸𑀢𑀺 ‘‘𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀅𑀕𑀫’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀣𑁂𑀭𑀲𑀮𑁆𑀮𑀸𑀧𑁄𑀢𑀺 𑀣𑁂𑀭𑀸𑀦𑀁 𑀲𑀮𑁆𑀮𑀸𑀧𑀲𑀤𑀺𑀲𑁄 𑀯𑀺𑀦𑀺𑀘𑁆𑀙𑀬𑀯𑀸𑀤𑁄. 𑀓𑀸𑀴𑀯𑀮𑁆𑀮𑀯𑀸𑀲𑀻𑀢𑀺 𑀓𑀸𑀴𑀯𑀮𑁆𑀮𑀯𑀺𑀳𑀸𑀭𑀯𑀸𑀲𑀻. 𑀇𑀤𑀸𑀦𑀻𑀢𑀺 𑀏𑀢𑀭𑀳𑀺 ‘‘𑀇𑀤𑀸𑀳𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀓𑀸𑀮𑁂. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 ‘‘𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀅𑀕𑀫’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂, 𑀇𑀫𑀲𑁆𑀫𑀺𑀁 𑀯𑀸 𑀦𑀺𑀝𑁆𑀞𑀸𑀦𑀓𑀸𑀭𑀡𑀪𑀽𑀢𑁂 𑀬𑁄𑀦𑀺𑀲𑁄 𑀧𑀭𑀺𑀯𑀺𑀢𑀓𑁆𑀓𑀦𑁂. ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀩𑀼𑀤𑁆𑀥𑀕𑀼𑀡𑁂𑀲𑀼 𑀦𑀺𑀝𑁆𑀞𑀗𑁆𑀕𑀢𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑀫𑀥𑀺𑀕𑀢𑀓𑀸𑀮𑁂 𑀏𑀯 𑀣𑁂𑀭𑁄 𑀩𑀼𑀤𑁆𑀥𑀕𑀼𑀡𑁂𑀲𑀼 𑀦𑀺𑀝𑁆𑀞𑀗𑁆𑀕𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀤𑀸𑀦𑀺 𑀧𑀦 𑀢𑀁 𑀧𑀸𑀓𑀝𑀁 𑀚𑀸𑀢𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀦𑁆𑀢𑀺 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀽’’𑀢𑀺𑀆𑀤𑀺 𑀲𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑀲𑀩𑁆𑀩𑀁. 𑀅𑀭𑀳𑀢𑁆𑀢𑁂 𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀬𑁄𑀕𑀧𑀭𑀺𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀺𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀫𑀬𑀸 𑀲𑀫𑀥𑀺𑀕𑀢’’𑀦𑁆𑀢𑀺 𑀇𑀢𑁄 𑀧𑀼𑀩𑁆𑀩𑁂𑀧𑀺 𑀚𑀸𑀦𑀸𑀢𑀺𑀬𑁂𑀯, 𑀇𑀤𑀸𑀦𑀺 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀪𑁂𑀤𑁂 𑀩𑀼𑀤𑁆𑀥𑀕𑀼𑀡𑁂 𑀦𑀬𑀕𑁆𑀕𑀸𑀳𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀦𑀺𑀝𑁆𑀞𑀗𑁆𑀕𑀢𑁄 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀲𑀺𑀯𑀢𑁆𑀣𑁂𑀭𑁄…𑀧𑁂… 𑀥𑀫𑁆𑀫𑁂𑀲𑀽𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀦𑀺𑀝𑁆𑀞𑀗𑁆𑀕𑀢𑁄’’𑀢𑀺 𑀅𑀯𑁄𑀘.

𑀩𑀼𑀤𑁆𑀥𑀕𑀼𑀡𑀸 𑀧𑀦 𑀦𑀬𑀢𑁄 𑀆𑀕𑀢𑀸, 𑀢𑁂 𑀦𑀬𑀕𑁆𑀕𑀸𑀳𑀢𑁄 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀢𑀣𑀸𑀚𑀸𑀦𑀦𑀯𑀲𑁂𑀦 𑀦𑀺𑀝𑁆𑀞𑀗𑁆𑀕𑀢𑀢𑁆𑀢𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀫𑁂𑀯 𑀢𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦, 𑀢𑁂𑀦 𑀢𑁂𑀦 𑀪𑀸𑀯𑁂𑀢𑀩𑁆𑀩𑀓𑀺𑀘𑁆𑀘𑀩𑀳𑀼𑀢𑀸𑀯𑀲𑁂𑀦 𑀘 ‘‘𑀥𑀫𑁆𑀫𑁂𑀲𑀽’’𑀢𑀺 𑀧𑀼𑀣𑀼𑀯𑀘𑀦𑁂𑀦 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀸𑀦𑀁 𑀅𑀦𑀜𑁆𑀜𑀯𑀺𑀲𑀬𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀬𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀣𑁂𑀭𑀲𑁆𑀲 𑀲𑀸𑀢𑀺𑀲𑀬𑁄 𑀪𑀕𑀯𑀢𑀺 𑀧𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬𑀸’’𑀢𑀺𑀆𑀤𑀺. ‘‘𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀏𑀯𑀲𑁆𑀲 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀬𑁆𑀬𑀸𑀦𑀺𑀓𑁄 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀲𑁆𑀯𑀸𑀓𑁆𑀔𑀸𑀢𑀢𑀸 𑀳𑀺 𑀥𑀫𑁆𑀫𑀲𑁆𑀲 𑀬𑀤𑀢𑁆𑀣𑀁 𑀤𑁂𑀲𑀺𑀢𑁄, 𑀢𑀤𑀢𑁆𑀣𑀲𑀸𑀥𑀦𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀢𑁆𑀣𑀸𑀬 𑀦𑀺𑀬𑁆𑀬𑀸𑀢𑀻𑀢𑀺 𑀅𑀦𑀦𑁆𑀢𑀭𑀯𑀺𑀧𑀸𑀓𑀢𑁆𑀢𑀸, 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀘𑀸𑀭𑀓𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀸 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀦𑀲𑀻𑀮𑁄𑀢𑀺 𑀯𑀸. 𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑁆𑀫𑀤𑀦𑀲𑀫𑀢𑁆𑀣𑁄𑀢𑀺 𑀇𑀥𑀸𑀧𑀺 ‘‘𑀧𑀲𑀦𑁆𑀦𑁄𑀲𑁆𑀫𑀺 𑀪𑀕𑀯𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀯𑀗𑁆𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀚𑀺𑀫𑁆𑀳𑀓𑀼𑀝𑀺𑀮𑁂, 𑀅𑀜𑁆𑀜𑁂 𑀘 𑀧𑀝𑀺𑀧𑀢𑁆𑀢𑀺𑀤𑁄𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸 𑀯𑀺𑀬 𑀥𑀫𑁆𑀫𑀲𑀼𑀥𑀫𑁆𑀫𑀢𑀸, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀘 𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀗𑁆𑀕𑀫𑀦𑁂𑀦 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀦𑀺𑀝𑁆𑀞𑀗𑁆𑀕𑀢𑀢𑁆𑀢𑀸 𑀫𑀬𑁆𑀳𑀁 𑀲𑀼𑀝𑁆𑀞𑀼 𑀯𑀺𑀪𑀽𑀢𑀸 𑀲𑀼𑀧𑀸𑀓𑀝𑀸 𑀚𑀸𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀣𑁂𑀭𑁄 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄𑀢𑀺 𑀧𑀲𑀻𑀤𑀺’’𑀦𑁆𑀢𑀺 𑀅𑀯𑁄𑀘.

𑀓𑀼𑀲𑀮𑀥𑀫𑁆𑀫𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁫. 𑀅𑀦𑀼𑀢𑁆𑀢𑀭𑀪𑀸𑀯𑁄𑀢𑀺 𑀲𑁂𑀝𑁆𑀞𑀪𑀸𑀯𑁄. 𑀅𑀦𑀼𑀢𑁆𑀢𑀭𑁄 𑀪𑀕𑀯𑀸 𑀬𑁂𑀦 𑀕𑀼𑀡𑁂𑀦, 𑀲𑁄 𑀅𑀦𑀼𑀢𑁆𑀢𑀭𑀪𑀸𑀯𑁄, 𑀢𑀁 𑀅𑀦𑀼𑀢𑁆𑀢𑀭𑀺𑀬𑀁. 𑀬𑀲𑁆𑀫𑀸 𑀢𑀲𑁆𑀲𑀸𑀧𑀺 𑀕𑀼𑀡𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀢𑀭𑀁 𑀦𑀢𑁆𑀣𑀺 𑀏𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀸 𑀢𑀼𑀫𑁆𑀳𑀸𑀓𑀁 𑀤𑁂𑀲𑀦𑀸 𑀅𑀦𑀼𑀢𑁆𑀢𑀭𑀸𑀢𑀺 𑀯𑀤𑀢𑀻’’𑀢𑀺. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑀥𑀫𑁆𑀫𑀦𑀺𑀫𑀺𑀢𑁆𑀢𑀁. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀏𑀢𑀁 𑀪𑀼𑀫𑁆𑀫𑀁, 𑀢𑀲𑁆𑀫𑀸 𑀓𑀼𑀲𑀮𑀥𑀫𑁆𑀫𑀤𑁂𑀲𑀦𑀸𑀳𑁂𑀢𑀼𑀧𑀺 𑀪𑀕𑀯𑀸𑀯 𑀅𑀦𑀼𑀢𑁆𑀢𑀭𑁄𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄. 𑀓𑀼𑀲𑀮𑀥𑀫𑁆𑀫𑀤𑁂𑀲𑀦𑀸𑀬 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀲𑀬𑁄. 𑀯𑀼𑀢𑁆𑀢𑀧𑀤𑁂𑀢𑀺 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀸𑀓𑁆𑀬𑁂, 𑀏𑀯𑀁 𑀯𑀸 𑀯𑀼𑀢𑁆𑀢𑀥𑀫𑁆𑀫𑀓𑁄𑀝𑁆𑀞𑀸𑀲𑁂. ‘‘𑀧𑀜𑁆𑀘𑀥𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀙𑁂𑀓𑀝𑁆𑀞𑁂𑀦𑀧𑀺 𑀓𑀼𑀲𑀮𑀁 𑀇𑀘𑁆𑀙𑀺𑀢𑀩𑁆𑀩𑀁 ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦’’𑀦𑁆𑀢𑀺𑀆𑀤𑀻𑀲𑀽𑀢𑀺 (𑀫. 𑀦𑀺. 𑁨.𑁮𑁭)? 𑀲𑀘𑁆𑀘𑀫𑁂𑀢𑀁, 𑀲𑁄 𑀧𑀦 𑀙𑁂𑀓𑀝𑁆𑀞𑁄 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀯𑀺𑀲𑀼𑀁 𑀦 𑀕𑀳𑀺𑀢𑁄. ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁨.𑁨𑁦𑁦𑁮) 𑀚𑀸𑀢𑀓𑁂 𑀆𑀕𑀢𑀢𑁆𑀢𑀸 ‘‘𑀚𑀸𑀢𑀓𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀕𑀳𑀧𑀢𑀬𑁄, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺𑀆𑀤𑀻𑀲𑀼 𑀲𑀼𑀢𑁆𑀢𑀧𑀤𑁂𑀲𑁂𑀲𑀼 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸 𑀏𑀯 ‘‘𑀅𑀦𑀯𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁 𑀯𑀝𑁆𑀝𑀢𑀻’’𑀢𑀺. 𑀅𑀪𑀺𑀥𑀫𑁆𑀫𑁂 ‘‘𑀓𑁄𑀲𑀮𑁆𑀮’’𑀦𑁆𑀢𑀺 𑀧𑀜𑁆𑀜𑀸 𑀆𑀕𑀢𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀲𑁆𑀲 𑀓𑀼𑀲𑀮𑀲𑁆𑀲 𑀓𑁄𑀲𑀮𑁆𑀮𑀲𑀫𑁆𑀫𑀽𑀢𑀝𑁆𑀞𑁄, 𑀤𑀭𑀣𑀸𑀪𑀸𑀯𑀤𑀻𑀧𑀦𑀢𑁄 𑀦𑀺𑀤𑁆𑀤𑀭𑀣𑀝𑁆𑀞𑁄, ‘‘𑀓𑀼𑀲𑀮𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀇𑀝𑁆𑀞𑀯𑀺𑀧𑀸𑀓𑀦𑀺𑀤𑁆𑀤𑀺𑀲𑀦𑀢𑁄 𑀲𑀼𑀔𑀯𑀺𑀧𑀸𑀓𑀝𑁆𑀞𑁄 𑀘 𑀅𑀪𑀺𑀥𑀫𑁆𑀫𑀦𑀬𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀅𑀪𑀺𑀥𑀫𑁆𑀫…𑀧𑁂… 𑀯𑀺𑀧𑀸𑀓𑀝𑁆𑀞𑁂𑀦𑀸’’𑀢𑀺. 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁫𑁮) 𑀪𑀕𑀯𑀢𑁄 𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁂 𑀯𑀡𑁆𑀡𑁂𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀬𑁄 𑀔𑁄 𑀫𑀳𑀸𑀭𑀸𑀚 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 𑀓𑀼𑀲𑀮𑁄 𑀓𑀸𑀬𑀲𑀫𑀸𑀘𑀸𑀭𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑁄 𑀲𑀼𑀔𑀯𑀺𑀧𑀸𑀓𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀲𑀩𑁆𑀩𑀲𑀸𑀯𑀚𑁆𑀚𑀭𑀳𑀺𑀢𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀸, 𑀇𑀥 𑀧𑀦 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀸, 𑀢𑁂 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀦𑁆𑀢𑁂𑀦 𑀲𑀼𑀔𑀯𑀺𑀧𑀸𑀓𑀸 𑀏𑀯𑀸𑀢𑀺 𑀅𑀯𑀚𑁆𑀚𑀭𑀳𑀺𑀢𑀢𑀸𑀫𑀢𑁆𑀢𑀁 𑀉𑀧𑀸𑀤𑀸𑀬 𑀅𑀦𑀯𑀚𑁆𑀚𑀢𑁆𑀣𑁄 𑀓𑀼𑀲𑀮-𑀲𑀤𑁆𑀤𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀧𑀦…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀨𑀮𑀲𑀢𑀺𑀧𑀝𑁆𑀞𑀸𑀦𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺 𑀲𑀯𑀺𑀧𑀸𑀓𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸.

‘‘𑀘𑀼𑀤𑁆𑀤𑀲𑀯𑀺𑀥𑁂𑀦𑀸’’𑀢𑀺𑀆𑀤𑀺 𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁬; 𑀫. 𑀦𑀺. 𑁧.𑁧𑁦𑁯) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀕𑁆𑀕𑀳𑀝𑁆𑀞𑁂𑀦𑀸𑀢𑀺 𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀕𑁆𑀕𑀡𑁆𑀳𑀦𑀲𑀪𑀸𑀯𑁂𑀦. 𑀓𑀺𑀘𑁆𑀘𑀯𑀲𑁂𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀓𑀺𑀘𑁆𑀘𑀯𑀲𑁂𑀦. 𑀢𑀢𑁄 𑀏𑀯 𑀘𑀲𑁆𑀲 𑀘𑀢𑀼𑀩𑁆𑀩𑀺𑀥𑀢𑀸. 𑀇𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀦𑀺𑀧𑁆𑀧𑀚𑁆𑀚𑀦𑀲𑀪𑀸𑀯𑁂𑀦. 𑀙𑀦𑁆𑀤𑀸𑀤𑀬𑁄 𑀏𑀯 𑀇𑀤𑁆𑀥𑀺𑀧𑀸𑀤𑁂𑀲𑀼 𑀯𑀺𑀲𑀺𑀝𑁆𑀞𑀲𑀪𑀸𑀯𑀸, 𑀇𑀢𑀭𑁂 𑀅𑀯𑀺𑀲𑀺𑀝𑁆𑀞𑀸, 𑀢𑁂𑀲𑀫𑁆𑀧𑀺 𑀯𑀺𑀲𑁂𑀲𑁄 𑀙𑀦𑁆𑀤𑀸𑀤𑀺𑀓𑀢𑁄𑀢𑀺 𑀆𑀳 ‘‘𑀙𑀦𑁆𑀤𑀸𑀤𑀺𑀯𑀲𑁂𑀦 𑀦𑀸𑀦𑀸𑀲𑀪𑀸𑀯𑀸’’𑀢𑀺.

𑀅𑀥𑀺𑀫𑁄𑀓𑁆𑀔𑀸𑀤𑀺𑀲𑀪𑀸𑀯𑀯𑀲𑁂𑀦𑀸𑀢𑀺 𑀧𑀲𑀸𑀤𑀸𑀥𑀺𑀫𑁄𑀓𑁆𑀔𑀸𑀤𑀺𑀲𑀮𑀓𑁆𑀔𑀡𑀯𑀲𑁂𑀦. 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀓𑀪𑀸𑀯𑁂𑀦. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀲𑀪𑀸𑀯𑁂𑀦. 𑀲𑀮𑀓𑁆𑀔𑀡𑁂𑀦𑀸𑀢𑀺 𑀅𑀥𑀺𑀫𑁄𑀓𑁆𑀔𑀸𑀤𑀺𑀲𑀪𑀸𑀯𑁂𑀦. 𑀦𑀺𑀬𑁆𑀬𑀸𑀦𑀝𑁆𑀞𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄, 𑀯𑀝𑁆𑀝𑀘𑀸𑀭𑀓𑀢𑁄 𑀘 𑀦𑀺𑀕𑁆𑀕𑀫𑀦𑀝𑁆𑀞𑁂𑀦. 𑀉𑀧𑀝𑁆𑀞𑀸𑀦𑀸𑀤𑀺𑀦𑀸𑀢𑀺 𑀉𑀧𑀝𑁆𑀞𑀸𑀦𑀥𑀫𑁆𑀫𑀯𑀺𑀘𑀬𑀧𑀕𑁆𑀕𑀳𑀲𑀫𑁆𑀧𑀺𑀬𑀸𑀬𑀦𑀧𑀲𑁆𑀲𑀫𑁆𑀪𑀦𑀲𑀫𑀸𑀥𑀸𑀦𑀅𑀚𑁆𑀛𑀼𑀧𑁂𑀓𑁆𑀔𑀦𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦. 𑀳𑁂𑀢𑀼𑀝𑁆𑀞𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑁂𑀦. 𑀤𑀲𑁆𑀲𑀦𑀸𑀤𑀺𑀦𑀸𑀢𑀺 𑀤𑀲𑁆𑀲𑀦𑀸𑀪𑀺𑀦𑀺𑀭𑁄𑀧𑀦𑀧𑀭𑀺𑀕𑁆𑀕𑀳𑀲𑀫𑀼𑀝𑁆𑀞𑀸𑀧𑀦𑀯𑁄𑀤𑀸𑀧𑀦𑀧𑀕𑁆𑀕𑀳𑀼𑀧𑀝𑁆𑀞𑀸𑀦𑀲𑀫𑀸𑀥𑀸𑀦𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦.

𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀸𑀲𑀦𑀁 𑀦𑀸𑀫 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀢𑀢𑁆𑀣 𑀬𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸, 𑀢𑁂 𑀲𑀸𑀲𑀦𑀲𑁆𑀲 𑀆𑀤𑀺, 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀫𑀚𑁆𑀛𑁂, 𑀨𑀮𑀪𑀽𑀢𑀸 𑀧𑀭𑀺𑀬𑁄𑀲𑀸𑀦𑀁, 𑀢𑀁𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀲𑀸𑀲𑀦𑀲𑁆𑀲 𑀳𑀻’’𑀢𑀺𑀆𑀤𑀺.

𑀧𑀼𑀦 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁 𑀪𑀦𑁆𑀢𑁂𑀢𑀺 𑀬𑀣𑀸𑀭𑀤𑁆𑀥𑀸𑀬 𑀤𑁂𑀲𑀦𑀸𑀬 𑀦𑀺𑀕𑀫𑀦𑀁. 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀜𑁆𑀳𑀺 𑀦𑀺𑀕𑀫𑀦𑀁 𑀯𑀼𑀢𑁆𑀢𑀁. 𑀢𑀁 𑀤𑁂𑀲𑀦𑀦𑁆𑀢𑀺 𑀢𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀤𑁂𑀲𑀦𑀸𑀧𑁆𑀧𑀓𑀸𑀭𑀁, 𑀤𑁂𑀲𑀦𑀸𑀯𑀺𑀥𑀺𑀁, 𑀤𑁂𑀲𑁂𑀢𑀩𑁆𑀩𑀜𑁆𑀘, 𑀲𑀓𑀮𑀁 𑀯𑀸 𑀲𑀫𑁆𑀧𑀼𑀡𑁆𑀡𑀁 𑀅𑀦𑀯𑀲𑁂𑀲𑀁 𑀅𑀪𑀺𑀚𑀸𑀦𑀸𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀸𑀢𑀺, 𑀅𑀲𑁂𑀲𑀁 𑀅𑀪𑀺𑀚𑀸𑀦𑀦𑀢𑁄 𑀏𑀯 𑀉𑀢𑁆𑀢𑀭𑀺 𑀉𑀧𑀭𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀦𑀢𑁆𑀣𑀺. 𑀇𑀢𑁄𑀢𑀺 𑀪𑀕𑀯𑀢𑀸 𑀅𑀪𑀺𑀜𑁆𑀜𑀸𑀢𑀢𑁄. 𑀅𑀜𑁆𑀜𑁄 𑀧𑀭𑀫𑀢𑁆𑀣𑀯𑀲𑁂𑀦 𑀥𑀫𑁆𑀫𑁄 𑀯𑀸 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀼𑀕𑁆𑀕𑀮𑁄 𑀯𑀸 𑀅𑀬𑀁 𑀦𑀸𑀫 𑀬𑀁 𑀪𑀕𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀇𑀤𑀁 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺 𑀲𑀩𑁆𑀩𑀲𑁆𑀲𑁂𑀯 𑀲𑀫𑁆𑀫𑀤𑁂𑀯 𑀢𑀼𑀫𑁆𑀳𑁂𑀳𑀺 𑀅𑀪𑀺𑀜𑁆𑀜𑀸𑀢𑀢𑁆𑀢𑀸. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀪𑀺𑀚𑀸𑀦𑀦𑁂, 𑀤𑁂𑀲𑀦𑀸𑀬𑀜𑁆𑀘 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑁄 𑀦𑀢𑁆𑀣𑀺.

𑀆𑀬𑀢𑀦𑀧𑀡𑁆𑀡𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁬. 𑀆𑀬𑀢𑀦𑀧𑀜𑁆𑀜𑀸𑀧𑀦𑀸𑀲𑀽𑀢𑀺 𑀘𑀓𑁆𑀔𑀸𑀤𑀻𑀦𑀁, 𑀭𑀽𑀧𑀸𑀤𑀻𑀦𑀜𑁆𑀘 𑀆𑀬𑀢𑀦𑀸𑀦𑀁 𑀲𑀫𑁆𑀩𑁄𑀥𑀦𑁂𑀲𑀼, 𑀢𑁂𑀲𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀪𑀸𑀕𑀢𑁄, 𑀲𑀪𑀸𑀕𑀯𑀺𑀪𑀸𑀕𑀢𑁄, 𑀲𑀫𑀼𑀤𑀬𑀢𑁄, 𑀅𑀢𑁆𑀣𑀗𑁆𑀕𑀫𑀢𑁄, 𑀆𑀳𑀸𑀭𑀢𑁄, 𑀆𑀤𑀻𑀦𑀯𑀢𑁄, 𑀦𑀺𑀲𑁆𑀲𑀭𑀡𑀢𑁄 𑀘 𑀤𑁂𑀲𑀦𑀸𑀬𑀦𑁆𑀢𑀺 𑀅𑀢𑁆𑀣𑁄.

𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁭. 𑀕𑀩𑁆𑀪𑁄𑀓𑁆𑀓𑀫𑀦𑁂𑀲𑀽𑀢𑀺 𑀕𑀩𑁆𑀪𑀪𑀸𑀯𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀅𑀯𑀓𑁆𑀓𑀫𑀦𑁂𑀲𑀼 𑀅𑀦𑀼𑀧𑁆𑀧𑀯𑁂𑀲𑁂𑀲𑀼, 𑀕𑀩𑁆𑀪𑁂 𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀅𑀯𑀓𑁆𑀓𑀫𑀦𑁂𑀲𑀼. 𑀧𑀯𑀺𑀲𑀢𑀻𑀢𑀺 𑀧𑀘𑁆𑀘𑀬𑀯𑀲𑁂𑀦 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀞𑀸𑀢𑀻𑀢𑀺 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸 𑀧𑀯𑀢𑁆𑀢𑀢𑀺, 𑀢𑀣𑀸𑀪𑀽𑀢𑁄 𑀘 𑀢𑀢𑁆𑀣 𑀯𑀲𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀯𑀲𑀢𑀻’’𑀢𑀺. 𑀧𑀓𑀢𑀺𑀮𑁄𑀓𑀺𑀬𑀫𑀦𑀼𑀲𑁆𑀲𑀸𑀦𑀁 𑀧𑀞𑀫𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀻𑀢𑀺 𑀧𑀘𑀼𑀭𑀫𑀦𑀼𑀲𑁆𑀲𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀤𑁂𑀲𑀦𑀸𑀯𑀲𑁂𑀦 𑀇𑀥 𑀧𑀞𑀫𑀸. ‘‘𑀤𑀼𑀢𑀺𑀬𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯.

𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀢𑀣𑀸 𑀯𑀸𑀢𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀫𑁂𑀯 𑀯𑀤𑀢𑀺. 𑀲𑁂𑀲𑀦𑁆𑀢𑀺 𑀧𑀼𑀦 ‘‘𑀏𑀢𑀤𑀸𑀦𑀼𑀢𑁆𑀢𑀭𑀺𑀬’’𑀢𑀺𑀆𑀤𑀺 𑀧𑀸𑀞𑀧𑁆𑀧𑀤𑁂𑀲𑀁 𑀯𑀤𑀢𑀺.

𑀆𑀤𑁂𑀲𑀦𑀯𑀺𑀥𑀸𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁮. 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀆𑀤𑀺𑀲𑀢𑀺 𑀏𑀢𑁂𑀳𑀻𑀢𑀺 𑀆𑀤𑁂𑀲𑀦𑀸𑀦𑀺, 𑀬𑀣𑀸𑀉𑀧𑀝𑁆𑀞𑀺𑀢𑀦𑀺𑀫𑀺𑀢𑁆𑀢𑀸𑀤𑀻𑀦𑀺, 𑀢𑀸𑀦𑀺 𑀏𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀁𑀓𑀺𑀡𑁆𑀡𑀭𑀽𑀧𑁂𑀦 𑀞𑀺𑀢𑀢𑁆𑀢𑀸 𑀆𑀤𑁂𑀲𑀦𑀯𑀺𑀥𑀸, 𑀆𑀤𑁂𑀲𑀦𑀸𑀪𑀸𑀕𑀸, 𑀢𑀸𑀲𑀼 𑀆𑀤𑁂𑀲𑀦𑀯𑀺𑀥𑀸𑀲𑀼. 𑀢𑁂𑀦𑀸𑀳 ‘‘𑀆𑀤𑁂𑀲𑀦𑀓𑁄𑀝𑁆𑀞𑀸𑀲𑁂𑀲𑀽’’𑀢𑀺. 𑀆𑀕𑀢𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀬𑀲𑁆𑀲 𑀆𑀤𑀺𑀲𑀢𑀺, 𑀢𑀲𑁆𑀲, 𑀅𑀢𑁆𑀢𑀦𑁄 𑀘 𑀉𑀧𑀕𑀢𑀦𑀺𑀫𑀺𑀢𑁆𑀢𑁂𑀦, 𑀦𑀺𑀫𑀺𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀮𑀸𑀪𑀸𑀮𑀸𑀪𑀸𑀤𑀺𑀆𑀤𑀺𑀲𑀦𑀯𑀺𑀥𑀺𑀤𑀲𑁆𑀲𑀦𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 ‘‘𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀏𑀯𑀫𑁆𑀧𑀺 𑀢𑁂 𑀫𑀦𑁄’’𑀢𑀺𑀆𑀤𑀺𑀦𑀸 𑀧𑀭𑀲𑁆𑀲 𑀘𑀺𑀢𑁆𑀢𑀸𑀤𑀺𑀲𑀦𑀫𑁂𑀯 𑀆𑀕𑀢𑀁, 𑀢𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 ‘‘𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀯𑀲𑁂𑀦 𑀯𑀢𑁆𑀣𑀼 𑀆𑀕𑀢𑀁. 𑀕𑀢𑀦𑀺𑀫𑀺𑀢𑁆𑀢𑀁 𑀦𑀸𑀫 𑀕𑀫𑀦𑀦𑀺𑀫𑀺𑀢𑁆𑀢𑀁. 𑀞𑀺𑀢𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀞𑀸𑀦𑀦𑀺𑀫𑀺𑀢𑁆𑀢𑀁, 𑀧𑀭𑀲𑁆𑀲 𑀕𑀫𑀦𑀯𑀲𑁂𑀦, 𑀞𑀸𑀦𑀯𑀲𑁂𑀦 𑀘 𑀕𑀳𑁂𑀢𑀩𑁆𑀩𑀦𑀺𑀫𑀺𑀢𑁆𑀢𑀁. 𑀫𑀦𑀼𑀲𑁆𑀲𑀸𑀦𑀁 𑀧𑀭𑀘𑀺𑀢𑁆𑀢𑀯𑀺𑀤𑀽𑀦𑀁, 𑀇𑀢𑀭𑁂𑀲𑀫𑁆𑀧𑀺 𑀯𑀸 𑀲𑀯𑀦𑀯𑀲𑁂𑀦 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀬𑀓𑁆𑀔𑀧𑀺𑀲𑀸𑀘𑀸𑀤𑀻𑀦𑀦𑁆𑀢𑀺 𑀳𑀺𑀗𑁆𑀓𑀸𑀭𑀬𑀓𑁆𑀔𑀸𑀦𑀜𑁆𑀘𑁂𑀯 𑀓𑀡𑁆𑀡𑀧𑀺𑀲𑀸𑀘𑀸𑀤𑀺𑀧𑀺𑀲𑀸𑀘𑀸𑀦𑀁, 𑀓𑀼𑀫𑁆𑀪𑀡𑁆𑀟𑀦𑀸𑀕𑀸𑀤𑀻𑀦𑀜𑁆𑀘.

𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁂𑀦 𑀧𑀯𑀢𑁆𑀢𑀯𑀺𑀢𑀓𑁆𑀓𑀲𑁆𑀲 𑀯𑀲𑁂𑀦. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀢𑀢𑁄 𑀲𑀫𑀼𑀝𑁆𑀞𑀺𑀢𑀁. 𑀯𑀺𑀧𑁆𑀧𑀮𑀧𑀦𑁆𑀢𑀸𑀦𑀦𑁆𑀢𑀺 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀅𑀩𑁄𑀥𑀦𑀢𑁄 𑀯𑀺𑀭𑀽𑀧𑀁, 𑀯𑀺𑀯𑀺𑀥𑀁 𑀯𑀸 𑀧𑀮𑀧𑀦𑁆𑀢𑀸𑀦𑀁. 𑀲𑀼𑀢𑁆𑀢𑀧𑀫𑀢𑁆𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀤𑀦𑀸𑀝𑁆𑀝𑀔𑀺𑀢𑁆𑀢𑀘𑀺𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀁 𑀯𑀓𑁆𑀔𑀸𑀫𑀺, 𑀏𑀯𑀁 𑀯𑀓𑁆𑀔𑀸𑀫𑀻𑀢𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀅𑀪𑀺. 𑀅𑀝𑁆𑀞. 𑁧.𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀧𑀺) 𑀆𑀕𑀢𑀢𑁆𑀢𑀸 𑀚𑀸𑀕𑀭𑀦𑁆𑀢𑀸𑀦𑀁 𑀧𑀓𑀢𑀺𑀬𑀁 𑀞𑀺𑀢𑀸𑀦𑀁 𑀅𑀯𑀺𑀧𑁆𑀧𑀮𑀧𑀦𑁆𑀢𑀸𑀦𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀬𑁄 𑀮𑁄𑀓𑁂 ‘‘𑀫𑀦𑁆𑀢𑀚𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸. 𑀢𑀸𑀤𑀺𑀲𑀜𑁆𑀳𑀺 𑀲𑀦𑁆𑀥𑀸𑀬 𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀫𑁂𑀯 ‘‘𑀚𑀺𑀯𑁆𑀳𑀸𑀢𑀸𑀮𑀼𑀘𑀮𑀦𑀸𑀤𑀺𑀓𑀭𑀯𑀺𑀢𑀓𑁆𑀓𑀲𑀫𑀼𑀝𑁆𑀞𑀺𑀢𑀁 𑀲𑀼𑀔𑀼𑀫𑀲𑀤𑁆𑀤𑀁 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸 𑀆𑀤𑀺𑀲𑀢𑀻𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢’’𑀦𑁆𑀢𑀺 (𑀥. 𑀲. 𑀫𑀽𑀮𑀝𑀻. 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸) 𑀆𑀦𑀦𑁆𑀤𑀸𑀘𑀭𑀺𑀬𑁄 𑀅𑀯𑁄𑀘. 𑀯𑀼𑀢𑁆𑀢𑀮𑀓𑁆𑀔𑀡𑁄 𑀏𑀯 𑀧𑀦 𑀦𑀸𑀢𑀺𑀲𑀼𑀔𑀼𑀫𑁄 𑀅𑀢𑁆𑀢𑀦𑁄, 𑀅𑀘𑁆𑀘𑀸𑀲𑀦𑁆𑀦𑀧𑁆𑀧𑀤𑁂𑀲𑁂 𑀞𑀺𑀢𑀲𑁆𑀲 𑀘 𑀫𑀁𑀲𑀲𑁄𑀢𑀲𑁆𑀲𑀸𑀧𑀺 𑀆𑀧𑀸𑀣𑀁 𑀕𑀘𑁆𑀙𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀯𑀲𑁂𑀦. 𑀏𑀯𑀁 𑀅𑀬𑀫𑁆𑀧𑀺 𑀆𑀤𑁂𑀲𑀦𑀯𑀺𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀯𑀲𑁂𑀦𑁂𑀯 𑀆𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 𑀧𑀦 ‘‘𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀯𑀲𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁. 𑀦 𑀳𑀺 𑀲𑀤𑁆𑀤𑀕𑁆𑀕𑀳𑀡𑁂𑀦 𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀲𑀤𑁆𑀤𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦𑀧𑀺 𑀢𑀤𑀢𑁆𑀣𑀲𑁆𑀲𑁂𑀯 𑀕𑀳𑀡𑀁 𑀳𑁄𑀢𑀺, 𑀦 𑀘𑀺𑀢𑁆𑀢𑀲𑁆𑀲. 𑀏𑀢𑁂𑀦𑁂𑀯 𑀬𑀤𑁂𑀓𑁂 ‘‘𑀬𑀁 𑀯𑀺𑀢𑀓𑁆𑀓𑀬𑀢𑁄𑀢𑀺 𑀬𑀫𑀢𑁆𑀣𑀁 𑀯𑀺𑀢𑀓𑁆𑀓𑀬𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦𑀸’’𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀫𑀦𑀲𑀸 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀫𑀦𑁄𑀲𑀗𑁆𑀔𑀸𑀭𑀸, 𑀯𑁂𑀤𑀦𑀸𑀲𑀜𑁆𑀜𑀸. 𑀧𑀡𑀺𑀳𑀺𑀢𑀸𑀢𑀺 𑀧𑀼𑀭𑀺𑀫𑀧𑀭𑀺𑀩𑀦𑁆𑀥𑀯𑀺𑀦𑀬𑁂𑀦 𑀧𑀥𑀸𑀦𑀪𑀸𑀯𑁂𑀦 𑀦𑀺𑀳𑀺𑀢𑀸 𑀞𑀧𑀺𑀢𑀸. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀲𑀼𑀝𑁆𑀞𑀧𑀺𑀢𑀸’’𑀢𑀺. 𑀯𑀺𑀢𑀓𑁆𑀓𑀲𑁆𑀲 𑀯𑀺𑀢𑀓𑁆𑀓𑀦𑀁 𑀦𑀸𑀫 𑀉𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀯𑀢𑁆𑀢𑁂𑀲𑁆𑀲𑀢𑀻’’𑀢𑀺. ‘‘𑀧𑀚𑀸𑀦𑀸𑀢𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀤𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀯𑀲𑁂𑀦 𑀆𑀦𑁂𑀢𑀺. 𑀆𑀕𑀫𑀦𑁂𑀦𑀸𑀢𑀺 𑀛𑀸𑀦𑀲𑁆𑀲 𑀆𑀕𑀫𑀦𑀝𑁆𑀞𑀸𑀦𑀯𑀲𑁂𑀦. 𑀧𑀼𑀩𑁆𑀩𑀪𑀸𑀕𑁂𑀦𑀸𑀢𑀺 𑀫𑀕𑁆𑀕𑀲𑁆𑀲 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂𑀦 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁂𑀦. 𑀉𑀪𑀬𑀁 𑀧𑁂𑀢𑀁 𑀬𑁄 𑀲𑀬𑀁 𑀛𑀸𑀦𑀮𑀸𑀪𑀻, 𑀅𑀥𑀺𑀕𑀢𑀫𑀕𑁆𑀕𑁄 𑀘 𑀅𑀜𑁆𑀜𑀁 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀤𑁆𑀥𑀸 𑀛𑀸𑀦𑀁 𑀮𑀪𑀺𑀲𑁆𑀲𑀢𑀺, 𑀫𑀕𑁆𑀕𑀁 𑀅𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀪𑀺𑀜𑁆𑀜𑀸𑀬 𑀯𑀺𑀦𑀸 𑀅𑀦𑀼𑀫𑀸𑀦𑀯𑀲𑁂𑀦 𑀚𑀸𑀦𑀸𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀕𑀫𑀦𑁂𑀦 𑀚𑀸𑀦𑀸𑀢𑀺 𑀦𑀸𑀫𑀸’’𑀢𑀺𑀆𑀤𑀺. 𑀅𑀦𑀦𑁆𑀢𑀭𑀸𑀢𑀺 𑀯𑀼𑀝𑁆𑀞𑀺𑀢𑀓𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀢𑀤𑀸 𑀳𑀺 𑀧𑀯𑀢𑁆𑀢𑀯𑀺𑀢𑀓𑁆𑀓𑀧𑀚𑀸𑀦𑀦𑁂𑀦𑁂𑀯 𑀛𑀸𑀦𑀲𑁆𑀲 𑀳𑀸𑀦𑀪𑀸𑀕𑀺𑀬𑀢𑀸𑀤𑀺𑀯𑀺𑀲𑁂𑀲𑀧𑀚𑀸𑀦𑀦𑀁.

𑀓𑀺𑀁 𑀧𑀦𑀺𑀤𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁆𑀢𑀁 𑀇𑀤𑁆𑀥𑀺𑀘𑀺𑀢𑁆𑀢𑀪𑀸𑀯𑀢𑁄 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀁 𑀚𑀸𑀦𑀸𑀢𑀻𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀦 𑀅𑀭𑀺𑀬𑀸𑀦𑀦𑁆𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀢𑁂 𑀅𑀭𑀺𑀬𑀸 𑀦𑀸𑀫 𑀚𑀸𑀢𑀸, 𑀢𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀲𑀩𑁆𑀩𑁂𑀲𑀫𑁆𑀧𑀺 𑀅𑀭𑀺𑀬𑀸𑀦𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸, 𑀏𑀯𑀁 𑀅𑀭𑀺𑀬𑁄𑀧𑀺 𑀳𑁂𑀝𑁆𑀞𑀺𑀫𑁄 𑀉𑀧𑀭𑀺𑀫𑀲𑁆𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀏𑀯. 𑀬𑀣𑀸 𑀧𑀦 𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀢𑀺, 𑀓𑀺𑀁 𑀏𑀯𑀁 𑀲𑁄 𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀧𑀭𑀺𑀫𑁄 𑀧𑀦 𑀳𑁂𑀝𑁆𑀞𑀺𑀫𑀲𑁆𑀲 𑀚𑀸𑀦𑀸𑀢𑀻’’𑀢𑀺, 𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀅𑀭𑀺𑀬𑀸𑀦𑀁. 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀲𑀫𑀸𑀧𑀢𑁆𑀢𑀺 𑀪𑀽𑀫𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀧𑁆𑀧𑀸. 𑀢𑁂𑀦𑀸𑀳 ‘‘𑀢𑀢𑁆𑀭𑀼𑀧𑀧𑀢𑁆𑀢𑀺𑀬𑁂𑀯 𑀳𑁄𑀢𑀻’’𑀢𑀺, 𑀦 𑀉𑀧𑀭𑀺𑀪𑀽𑀫𑀺𑀧𑀢𑁆𑀢𑀺. 𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀜𑀸𑀢𑀲𑁆𑀲 𑀓𑀤𑀸𑀘𑀺 𑀩𑁆𑀬𑀪𑀺𑀘𑀸𑀭𑁄𑀧𑀺 𑀲𑀺𑀬𑀸, 𑀦 𑀧𑀦 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀜𑀸𑀢𑀲𑁆𑀲𑀸𑀢𑀺 𑀆𑀳 ‘‘𑀘𑁂𑀢𑁄…𑀧𑁂… 𑀦𑀢𑁆𑀣𑀻’’𑀢𑀺. ‘‘𑀢𑀁 𑀪𑀕𑀯𑀸’’𑀢𑀺𑀆𑀤𑀺 𑀲𑁂𑀲𑀁 𑀦𑀸𑀫.

𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁯. 𑀩𑁆𑀭𑀳𑁆𑀫𑀚𑀸𑀮𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁. 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀳𑁂𑀲 𑀦𑀺𑀤𑁆𑀤𑁂𑀲𑁄. 𑀆𑀢𑀧𑁆𑀧𑀦𑁆𑀢𑀺 𑀯𑀻𑀭𑀺𑀬𑀁 𑀆𑀢𑀧𑁆𑀧𑀢𑀺 𑀓𑁄𑀲𑀚𑁆𑀚𑀁 𑀲𑀩𑁆𑀩𑀫𑁆𑀧𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀦𑁆𑀢𑀺. 𑀓𑀼𑀲𑀮𑀯𑀻𑀭𑀺𑀬𑀲𑁆𑀲𑁂𑀯 𑀳𑁂𑀢𑁆𑀣 𑀕𑀳𑀡𑀁 𑀅𑀧𑁆𑀧𑀫𑀸𑀤𑀸𑀤𑀺𑀧𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄. 𑀧𑀤𑀳𑀺𑀢𑀩𑁆𑀩𑀢𑁄𑀢𑀺 𑀧𑀤𑀳𑀦𑀢𑁄, 𑀪𑀸𑀯𑀦𑀁 𑀉𑀤𑁆𑀤𑀺𑀲𑁆𑀲 𑀯𑀸𑀬𑀫𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀢𑁄𑀢𑀺 𑀅𑀦𑀼𑀬𑀼𑀜𑁆𑀚𑀦𑀢𑁄. 𑀈𑀤𑀺𑀲𑀸𑀦𑀁 𑀧𑀤𑀸𑀦𑀁 𑀩𑀳𑀼𑀮𑀁𑀓𑀢𑁆𑀢𑀼𑀯𑀺𑀲𑀬𑀢𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀆𑀢𑀧𑁆𑀧𑀧𑀤𑀲𑁆𑀲 𑀯𑀺𑀬 𑀇𑀢𑀭𑁂𑀲𑀫𑁆𑀧𑀺 𑀓𑀢𑁆𑀢𑀼𑀲𑀸𑀥𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀧𑀢𑁆𑀢𑀺𑀬𑀁 𑀦𑀧𑁆𑀧𑀫𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀫𑀸𑀤𑁄, 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁄. 𑀲𑀫𑁆𑀫𑀸 𑀫𑀦𑀲𑀺 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄, 𑀢𑀣𑀸𑀧𑀯𑀢𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀪𑀸𑀯𑀦𑀸𑀦𑀼𑀬𑁄𑀕𑀫𑁂𑀯 𑀢𑀣𑀸 𑀯𑀤𑀢𑀺. 𑀤𑁂𑀲𑀦𑀸𑀓𑁆𑀓𑀫𑁂𑀦 𑀧𑀞𑀫𑀸, 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀦𑀸𑀫 𑀓𑀭𑀚𑀓𑀸𑀬𑁂 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑁆𑀲 𑀲𑀫𑁆𑀫𑀤𑁂𑀯 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀲𑀫𑀸𑀧𑀢𑁆𑀢𑀺𑀪𑀸𑀯𑀢𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸, 𑀤𑀲𑁆𑀲𑀦𑀫𑀕𑁆𑀕𑀨𑀮𑀪𑀸𑀯𑀢𑁄 𑀘 𑀧𑀞𑀫𑀲𑀸𑀫𑀜𑁆𑀜𑀨𑀮𑀁 𑀧𑀭𑀺𑀬𑀸𑀬𑁂𑀦 𑀯𑀺𑀦𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺.

𑀅𑀢𑀺𑀓𑁆𑀓𑀫𑁆𑀫 𑀙𑀯𑀺𑀫𑀁𑀲𑀮𑁄𑀳𑀺𑀢𑀁 𑀅𑀝𑁆𑀞𑀺𑀁 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀢𑀸𑀦𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀝𑁆𑀞𑀺𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀝𑁆𑀞𑀺𑀆𑀭𑀫𑁆𑀫𑀡𑀸 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀺𑀆𑀭𑀫𑁆𑀫𑀡𑀸 𑀤𑀺𑀩𑁆𑀩𑀘𑀓𑁆𑀔𑀼𑀅𑀥𑀺𑀝𑁆𑀞𑀸𑀦𑀸 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀆𑀮𑁄𑀓𑀓𑀲𑀺𑀡𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀥𑀺𑀕𑀢𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁄 𑀳𑀼𑀢𑁆𑀯𑀸 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀝𑁆𑀞𑀺𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀲𑀸𑀬𑀁 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀺 𑀅𑀝𑁆𑀞𑀻’’𑀢𑀺𑀆𑀤𑀺. 𑀬𑁄 𑀧𑀦𑁂𑀢𑁆𑀣 𑀧𑀸𑀴𑀺𑀬𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀫𑀕𑁆𑀕𑀲𑁄𑀥𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀯𑀸 𑀓𑀢𑀧𑀭𑀺𑀘𑀬𑀲𑁆𑀲 𑀲𑀼𑀔𑁂𑀦𑁂𑀯 𑀯𑀼𑀢𑁆𑀢𑀦𑀬𑀸 𑀅𑀝𑁆𑀞𑀺𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀫𑀺𑀚𑁆𑀛𑀢𑀻𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀇𑀫𑀁 𑀘𑁂𑀯𑀸’’𑀢𑀺 ‘‘𑀅𑀢𑀺𑀓𑁆𑀓𑀫𑁆𑀫 𑀘𑀸’’𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀁 𑀛𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀁. 𑀅𑀬𑀦𑁆𑀢𑀺 𑀅𑀬𑀁 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺. 𑀲𑀸𑀢𑀺𑀲𑀬𑀁 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀸𑀕𑀫𑀦𑀢𑁄 𑀧𑀭𑀺𑀬𑀸𑀬𑁂𑀦 𑀯𑀺𑀦𑀸 𑀫𑀼𑀔𑁆𑀬𑀸 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀬𑀸𑀯 𑀢𑀢𑀺𑀬𑀫𑀕𑁆𑀕𑀸 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀔𑀻𑀡𑀸𑀲𑀯𑀲𑁆𑀲 𑀯𑀲𑁂𑀦 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸’’𑀢𑀺.

𑀧𑀸𑀴𑀺𑀬𑀁 𑀧𑀼𑀭𑀺𑀲𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀲𑀫𑀸𑀧𑀢𑁆𑀢𑀺𑀤𑁆𑀯𑀬𑀢𑁄 𑀯𑀼𑀘𑁆𑀘𑀫𑀸𑀦𑀁𑀬𑁂𑀯 𑀇𑀫𑀲𑁆𑀲 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀬𑀸 𑀲𑁄𑀢𑀲𑀤𑀺𑀲𑀢𑀸𑀬 𑀯𑀺𑀜𑁆𑀜𑀸𑀡𑀫𑁂𑀯 𑀯𑀺𑀜𑁆𑀜𑀸𑀡𑀲𑁄𑀢𑀁, 𑀢𑀤𑁂𑀢𑀁 𑀯𑀺𑀜𑁆𑀜𑀸𑀡𑀁 𑀧𑀼𑀭𑀺𑀫𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀬𑀁 𑀅𑀲𑁆𑀲 𑀲𑁄𑀢𑀸𑀕𑀢𑀢𑀸𑀬 𑀲𑁄𑀢𑀲𑀤𑀺𑀲𑀢𑀸, 𑀢𑀲𑁆𑀫𑀸 𑀧𑀚𑀸𑀦𑀺𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀁 𑀏𑀓𑀫𑁂𑀯 𑀘𑁂𑀢𑁆𑀣 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀜𑁆𑀜𑀸𑀡𑀲𑁄𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀻𑀳𑀺𑀧𑀺 𑀪𑀸𑀕𑁂𑀳𑀻𑀢𑀺 𑀑𑀭𑀪𑀸𑀕𑀧𑀭𑀪𑀸𑀕𑁂𑀳𑀺. 𑀇𑀥𑀮𑁄𑀓𑁄 𑀳𑀺𑀲𑁆𑀲 𑀑𑀭𑀪𑀸𑀕𑁄, 𑀧𑀭𑀮𑁄𑀓𑁄 𑀧𑀭𑀪𑀸𑀕𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀲𑁂𑀦𑁂𑀢𑀁 𑀲𑀫𑁆𑀩𑀦𑁆𑀥𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀥𑀮𑁄𑀓𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺. 𑀯𑀺𑀜𑁆𑀜𑀸𑀡𑀲𑁆𑀲 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀁 𑀦𑀢𑁆𑀣𑀺 𑀓𑀲𑁆𑀲𑀘𑀺 𑀧𑀢𑀺𑀝𑁆𑀞𑀺𑀢𑀢𑀸, 𑀢𑀡𑁆𑀳𑀸𑀯𑀲𑁂𑀦 𑀧𑀦 𑀢𑀁 ‘‘𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀙𑀦𑁆𑀤𑀭𑀸𑀕𑀯𑀲𑁂𑀦𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀩𑀴𑀻𑀓𑀸𑀭𑁂 𑀘𑁂 𑀪𑀺𑀓𑁆𑀔𑀯𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄, 𑀅𑀢𑁆𑀣𑀺 𑀦𑀦𑁆𑀤𑀻, 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀁…𑀧𑁂… 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬; 𑀫𑀳𑀸𑀦𑀺. 𑁭).

𑀓𑀫𑁆𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁, 𑀉𑀧𑀬𑁄𑀕𑀯𑀘𑀦𑀫𑁂𑀢𑀁. 𑀓𑀫𑁆𑀫𑀢𑁄 𑀉𑀧𑀕𑀘𑁆𑀙𑀦𑁆𑀢𑀦𑁆𑀢𑀺 𑀓𑀫𑁆𑀫𑀪𑀸𑀯𑁂𑀦 𑀉𑀧𑀕𑀘𑁆𑀙𑀦𑁆𑀢𑀁, 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀜𑁆𑀳𑀺 𑀬𑁂𑀦 𑀓𑀫𑁆𑀫𑀼𑀦𑀸 𑀲𑀳𑀕𑀢𑀁, 𑀅𑀜𑁆𑀜𑀤𑀢𑁆𑀣𑀼 𑀢𑀩𑁆𑀪𑀸𑀯𑀫𑁂𑀯 𑀉𑀧𑀕𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀇𑀥𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫 𑀇𑀥 𑀓𑀢𑀽𑀧𑀘𑀺𑀢𑀓𑀫𑁆𑀫𑀪𑀸𑀯𑀽𑀧𑀕𑀫𑀦𑀢𑁄. 𑀓𑀫𑁆𑀫𑀪𑀯𑀁 𑀆𑀓𑀟𑁆𑀠𑀦𑁆𑀢𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀤𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑀁. 𑀢𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀦𑀲𑀸𑀫𑀢𑁆𑀣𑀺𑀬𑁂𑀦 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑁂𑀦. 𑀓𑁂𑀘𑀺 𑀧𑀦 ‘‘𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀭𑀢𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀫𑀢𑁆𑀣𑀁 𑀇𑀥𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫, 𑀤𑀸𑀢𑀼𑀁 𑀲𑀫𑀢𑁆𑀣𑀁 𑀧𑀦 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀉𑀪𑀬𑀢𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀜𑁆𑀘 𑀢𑁂𑀳𑀺 ‘‘𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀥𑀮𑁄𑀓𑁂𑀧𑀺 𑀧𑀢𑀺𑀝𑁆𑀞𑀺𑀢𑀫𑁂𑀯. 𑀦 𑀳𑀺 𑀢𑀲𑁆𑀲 𑀇𑀥𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦 𑀯𑀺𑀦𑀸 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑁄 𑀲𑀫𑁆𑀪𑀯𑀢𑀺. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀦𑁆𑀢𑀺 𑀲𑁂𑀓𑁆𑀔𑀸𑀦𑀁, 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀘𑁂𑀢𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀜𑀸𑀡𑀁. 𑀓𑀣𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀲𑁆𑀲 𑀘𑁂𑀢𑀲𑁄 𑀙𑀦𑁆𑀤𑀭𑀸𑀕𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑀪𑀸𑀯𑀚𑁄𑀢𑀦𑀢𑁄.

𑀘𑀢𑀼𑀢𑁆𑀣𑀸𑀬 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀬𑀸 𑀢𑀢𑀺𑀬𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀩𑁆𑀩𑁂 𑀲𑀫𑀣𑀯𑀲𑁂𑀦 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀤𑀸𑀦𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀘𑁆𑀘𑀮𑀫𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀧𑀦𑁂𑀢𑀩𑁆𑀩𑀢𑁄. 𑀅𑀢𑁆𑀣𑀦𑁆𑀢𑀭𑀢𑁆𑀣𑀢𑀸𑀬 𑀤𑀲𑁆𑀲𑀺𑀬𑀫𑀸𑀦𑀸𑀬 𑀧𑀤𑀁 𑀘𑀮𑀺𑀢𑀁 𑀦𑀸𑀫 𑀳𑁄𑀢𑀺. 𑀅𑀧𑀭𑁄 𑀦𑀬𑁄𑀢𑀺 𑀏𑀢𑁆𑀣 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀞𑀫𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀪𑀸𑀯𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀤𑀼𑀢𑀺𑀬𑀚𑁆𑀛𑀸𑀦𑀁 𑀤𑀼𑀢𑀺𑀬𑀸𑀢𑀺 𑀏𑀢𑁆𑀣 𑀧𑀦 ‘‘𑀅𑀝𑁆𑀞𑀺𑀓𑀯𑀡𑁆𑀡𑀓𑀲𑀺𑀡𑀯𑀲𑁂𑀦 𑀧𑀝𑀺𑀮𑀤𑁆𑀥𑀤𑀼𑀢𑀺𑀬𑀚𑁆𑀛𑀸𑀦𑀁 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀢𑀺𑀬𑀚𑁆𑀛𑀸𑀦𑀫𑁆𑀧𑀺 𑀢𑀣𑁂𑀯 𑀧𑀝𑀺𑀮𑀤𑁆𑀥𑀁. 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀪𑀸𑀯𑁄 𑀧𑀦 𑀬𑁄 𑀪𑀺𑀓𑁆𑀔𑀼 𑀆𑀮𑁄𑀓𑀓𑀲𑀺𑀡𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀥𑀺𑀕𑀢𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀳𑀼𑀢𑁆𑀯𑀸 𑀲𑀯𑀺𑀜𑁆𑀜𑀸𑀡𑀓𑁂 𑀅𑀝𑁆𑀞𑀺𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀡𑁆𑀡𑀓𑀲𑀺𑀡𑀯𑀲𑁂𑀦 𑀳𑁂𑀝𑁆𑀞𑀺𑀫𑀸𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀲. 𑀢𑀢𑀺𑀬𑀚𑁆𑀛𑀸𑀦𑀁 𑀢𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀯𑀲𑁂𑀦. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀸𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀥𑀺𑀕𑀢𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀇𑀥𑀸𑀧𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑁂𑀢𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀦 𑀢𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺, 𑀅𑀭𑀳𑀢𑁄 𑀘𑀺𑀢𑁆𑀢𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀦 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀳𑁂𑀲𑀸 𑀅𑀢𑁆𑀣𑀯𑀡𑁆𑀡𑀦𑀸 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑁂𑀬𑁆𑀬. ‘‘𑀧𑀞𑀫𑀫𑀕𑁆𑀕𑁄’’𑀢𑀺𑀆𑀤𑀻𑀲𑀼 𑀅𑀝𑁆𑀞𑀺𑀆𑀭𑀫𑁆𑀫𑀡𑀧𑀞𑀫𑀚𑁆𑀛𑀸𑀦𑀧𑀸𑀤𑀓𑁄 𑀧𑀞𑀫𑀫𑀕𑁆𑀕𑁄 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀅𑀝𑁆𑀞𑀺𑀆𑀭𑀫𑁆𑀫𑀡𑀤𑀼𑀢𑀺𑀬𑀚𑁆𑀛𑀸𑀦𑀧𑀸𑀤𑀓𑁄 𑀤𑀼𑀢𑀺𑀬𑀫𑀕𑁆𑀕𑁄 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀧𑀭𑀘𑀺𑀢𑁆𑀢𑀜𑀸𑀡𑀲𑀳𑀕𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑀸 𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑀸 𑀢𑀢𑀺𑀬𑀘𑀢𑀼𑀢𑁆𑀣𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀬𑁄𑀢𑀺. 𑀧𑀼𑀭𑀺𑀲𑀲𑁆𑀲 𑀯𑀺𑀜𑁆𑀜𑀸𑀡𑀧𑀚𑀸𑀦𑀦𑀁 𑀧𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀯𑀲𑁂𑀦 𑀤𑀝𑁆𑀞𑀩𑁆𑀩𑀁.

𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁦. 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀻𑀲𑀽𑀢𑀺 𑀧𑀼𑀕𑁆𑀕𑀮𑀸𑀦𑀁 𑀧𑀜𑁆𑀜𑀸𑀧𑀦𑁂𑀲𑀼. 𑀕𑀼𑀡𑀯𑀺𑀲𑁂𑀲𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀞𑀧𑀦𑁂𑀲𑀼. 𑀮𑁄𑀓𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀮𑁄𑀓𑀲𑀫𑁆𑀫𑀼𑀢𑀺𑀯𑀲𑁂𑀦. 𑀮𑁄𑀓𑀯𑁄𑀳𑀸𑀭𑁄 𑀳𑁂𑀲, 𑀬𑀤𑀺𑀤𑀁 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑁄. 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀧𑀽𑀭𑀡𑀢𑁄 𑀕𑀮𑀦𑀢𑁄, 𑀫𑀭𑀡𑀯𑀲𑁂𑀦 𑀧𑀢𑀦𑀢𑁄 𑀘 𑀧𑀼𑀕𑁆𑀕𑀮𑁄. 𑀲𑀦𑁆𑀢𑀢𑀺𑀬𑀸 𑀦𑀬𑀦𑀢𑁄 𑀦𑀭𑁄. 𑀅𑀢𑁆𑀢𑀪𑀸𑀯𑀲𑁆𑀲 𑀧𑁄𑀲𑀦𑀢𑁄 𑀧𑁄𑀲𑁄. 𑀏𑀯𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀲𑀼 𑀯𑁄𑀳𑀭𑀺𑀢𑀩𑁆𑀩𑀸𑀲𑀼. ‘‘𑀲𑀩𑁆𑀩𑀫𑁂𑀢𑀁 𑀧𑀼𑀕𑁆𑀕𑀮𑁄’’𑀢𑀺 𑀇𑀫𑀺𑀲𑁆𑀲𑀸 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀇𑀥𑀸𑀥𑀺𑀧𑁆𑀧𑁂𑀢𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑀸, 𑀢𑀲𑁆𑀫𑀸 𑀮𑁄𑀓𑀧𑀜𑁆𑀜𑀢𑁆𑀢𑀻𑀲𑀽𑀢𑀺 𑀲𑀢𑁆𑀢𑀮𑁄𑀓𑀕𑀢𑀧𑀜𑁆𑀜𑀢𑁆𑀢𑀻𑀲𑀼. 𑀅𑀦𑀼𑀢𑁆𑀢𑀭𑁄 𑀳𑁄𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀢𑀲𑁆𑀲 𑀧𑀜𑁆𑀜𑀸𑀧𑀦𑀲𑁆𑀲.

𑀤𑁆𑀯𑀻𑀳𑀺 𑀪𑀸𑀕𑁂𑀳𑀻𑀢𑀺 𑀓𑀸𑀭𑀡𑁂, 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀧𑀼𑀣𑀼𑀯𑀘𑀦𑀁, 𑀆𑀯𑀼𑀢𑁆𑀢𑀺𑀆𑀤𑀺𑀯𑀲𑁂𑀦 𑀘𑀸𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺, 𑀏𑀢𑁂𑀦 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁄, ‘‘𑀦𑀸𑀫𑀓𑀸𑀬𑀢𑁄, 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄, ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑁄𑀯 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀯𑀸𑀤𑁄 𑀘𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀣𑁂𑀭𑀯𑀸𑀤𑀸𑀦𑀁 𑀏𑀓𑀚𑁆𑀛𑀁 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀦𑁂𑀳𑀺 𑀯𑀸 𑀓𑀸𑀬𑀤𑁆𑀯𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄𑀢𑀺 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺. 𑀧𑀸𑀴𑀻𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺. 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀗𑁆𑀔𑀸𑀭𑀕𑀢𑀁, 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀤𑀺𑀲𑁆𑀯𑀸𑀢𑀺 𑀤𑀲𑁆𑀲𑀦𑀳𑁂𑀢𑀼. 𑀦 𑀳𑀺 𑀆𑀲𑀯𑁂 𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀦 𑀧𑀭𑀺𑀓𑁆𑀔𑀻𑀡𑀸 ‘‘𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀯𑀼𑀢𑁆𑀢𑀸 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀏𑀯𑀜𑁆𑀳𑀺 𑀤𑀲𑁆𑀲𑀦𑀁 𑀆𑀲𑀯𑀸𑀦𑀁 𑀔𑀬𑀲𑁆𑀲 𑀧𑀼𑀭𑀺𑀫𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀼𑀢𑁆𑀢𑀁.

𑀧𑀜𑁆𑀜𑀸𑀬 𑀯𑀺𑀲𑁂𑀲𑀢𑁄 𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀅𑀦𑀯𑀲𑁂𑀲𑀢𑁄 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯, 𑀦 𑀢𑀤𑁂𑀓𑀤𑁂𑀲𑀪𑀽𑀢𑀭𑀽𑀧𑀚𑁆𑀛𑀸𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀏𑀯𑀜𑁆𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀓𑀤𑁂𑀲𑀸𑀪𑀸𑀯𑁂𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑁄 𑀦 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺, 𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀘𑁆𑀙𑀺𑀓𑀢𑁄 𑀲𑀘𑁆𑀙𑀺𑀓𑀭𑀡𑀽𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑁄 𑀛𑀸𑀦𑀨𑀲𑁆𑀲’’𑀦𑁆𑀢𑀺𑀆𑀤𑀺. 𑀏𑀓𑀘𑁆𑀘𑁂 𑀆𑀲𑀯𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸 𑀆𑀲𑀯𑀸. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄, 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄. 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 𑀯𑀺𑀫𑀼𑀢𑁆𑀢𑁄𑀢𑀺 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸.

𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄, 𑀢𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀲𑁆𑀲 𑀧𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀆𑀳 ‘‘𑀏𑀲𑁄𑀧𑀺 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀻’’𑀢𑀺. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀇𑀤𑀁 𑀬𑀸𑀣𑀸𑀯𑀲𑀭𑀲𑀢𑁄 𑀧𑀚𑀸𑀦𑀸𑀢𑀺, 𑀧𑀚𑀸𑀦𑀦𑁆𑀢𑁄 𑀘 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 ‘‘𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀢𑀡𑁆𑀳𑀁 𑀧𑀦 𑀇𑀤𑀁 𑀤𑀼𑀓𑁆𑀔𑀁 𑀇𑀢𑁄 𑀲𑀫𑀼𑀤𑁂𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀭𑀺𑀬𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀢𑁂𑀦 𑀢𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀓𑁆𑀔𑀡𑁂 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀢𑀁 𑀏𑀓𑀓𑁆𑀔𑀡𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸𑀢𑀺 𑀢𑀣𑀸𑀕𑀢𑁂𑀦 𑀩𑁄𑀥𑀺𑀫𑀡𑁆𑀟𑁂 𑀧𑀝𑀺𑀯𑀺𑀤𑁆𑀥𑀸 𑀯𑀺𑀤𑀺𑀢𑀸 𑀧𑀸𑀓𑀝𑀸 𑀓𑀢𑀸. 𑀥𑀫𑁆𑀫𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸. 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀯𑁄𑀘𑀭𑀺𑀢𑀸𑀢𑀺 𑀲𑀼𑀘𑀭𑀺𑀢𑀸, 𑀢𑁂𑀲𑀼 𑀢𑁂𑀦 𑀧𑀜𑁆𑀜𑀸 𑀲𑀼𑀝𑁆𑀞𑀼 𑀘𑀭𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 ‘‘𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀤𑀳𑀦𑀯𑀲𑁂𑀦 𑀯𑀺𑀫𑀼𑀢𑁆𑀢𑁄, 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲𑀧𑀺 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀓𑀸𑀬𑀲𑀓𑁆𑀔𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀦𑁄 𑀘 𑀔𑁄 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦 𑀏𑀯𑀁 𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀦𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺? 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑀺 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀅𑀧𑁆𑀧𑀤𑀼𑀓𑁆𑀔𑁂𑀦, 𑀅𑀓𑀺𑀮𑀫𑀦𑁆𑀢𑁄 𑀘 𑀲𑀓𑁆𑀓𑁄𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀼𑀁, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑁂𑀲𑀼 𑀳𑀻’’𑀢𑀺𑀆𑀤𑀺.

𑀆𑀭𑀫𑁆𑀫𑀡𑀁 𑀬𑀸𑀣𑀸𑀯𑀢𑁄 𑀥𑀸𑀭𑁂𑀢𑀺 𑀅𑀯𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀧𑀜𑁆𑀜𑀸. 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀧𑀜𑁆𑀜𑀸𑀧𑀥𑀸𑀦𑀁. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻, 𑀧𑀜𑁆𑀜𑀁 𑀲𑀸𑀢𑀺𑀲𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀯𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀸𑀳𑁂𑀢𑀺, 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀕𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄.

𑀢𑀲𑁆𑀫𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁭𑁦, 𑁭𑁭𑁬) 𑀯𑀼𑀢𑁆𑀢𑀢𑁆𑀢𑀸, 𑀢𑀢𑁄 𑀏𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂, 𑀢𑀁 𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁭𑁭𑁬) 𑀯𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀥𑀸𑀦𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁧. 𑀧𑀤𑀳𑀦𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀧𑀥𑀸𑀦𑀸𑀢𑀺 𑀯𑀼𑀢𑁆𑀢𑀸 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸𑀤𑀺𑀪𑀸𑀯𑁂𑀦 𑀧𑀤𑀳𑀺𑀢𑀩𑁆𑀩𑀢𑁄 𑀪𑀸𑀯𑁂𑀢𑀩𑁆𑀩𑀢𑁄.

𑀧𑀝𑀺𑀧𑀤𑀸𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁨. 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀆𑀕𑀫𑀦𑀓𑀸𑀮𑁂 𑀓𑀺𑀘𑁆𑀙𑁂𑀦 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑀲𑁆𑀲 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀤𑀦𑁆𑀥𑀁 𑀢𑀁 𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑁂𑀲𑀼 𑀓𑀺𑀮𑁂𑀲𑁂𑀲𑀼 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀢𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀲𑀗𑁆𑀔𑀸𑀢𑀁 𑀞𑀸𑀦𑀁 𑀤𑀦𑁆𑀥𑀁 𑀲𑀡𑀺𑀓𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲, 𑀲𑀘𑁆𑀙𑀺𑀓𑀭𑁄𑀦𑁆𑀢𑀲𑁆𑀲 𑀧𑀸𑀧𑀼𑀡𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀬𑀸 𑀏𑀲𑀸 𑀏𑀯𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀸𑀬 𑀤𑀼𑀓𑁆𑀔𑀢𑁆𑀢𑀸, 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀧𑀜𑁆𑀜𑀸𑀬 𑀘 𑀤𑀦𑁆𑀥𑀢𑁆𑀢𑀸 𑀫𑀕𑁆𑀕𑀓𑀸𑀮𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀧𑀺 𑀧𑀜𑁆𑀜𑀸 𑀆𑀕𑀫𑀦𑀯𑀲𑁂𑀦 ‘‘𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀭𑀺 𑀢𑀻𑀲𑀼 𑀧𑀤𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀲𑁆𑀲𑀲𑀫𑀸𑀘𑀸𑀭𑀸𑀤𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁩. 𑀪𑀲𑁆𑀲𑀲𑀫𑀸𑀘𑀸𑀭𑁂𑀢𑀺 𑀯𑀘𑀻𑀲𑀫𑀸𑀘𑀸𑀭𑁂. 𑀞𑀺𑀢𑁄𑀢𑀺 𑀬𑀣𑀸𑀭𑀤𑁆𑀥𑀁 𑀢𑀁 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀓𑀣𑁂𑀦𑁆𑀢𑁄. 𑀢𑁂𑀦𑀸𑀳 ‘‘𑀓𑀣𑀸𑀫𑀕𑁆𑀕𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄’’𑀢𑀺. 𑀫𑀼𑀲𑀸𑀯𑀸𑀤𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑁂𑀦 𑀫𑀼𑀲𑀸𑀯𑀸𑀤𑁂𑀦 𑀉𑀧𑀲𑀁𑀳𑀺𑀢𑀁. 𑀯𑀺𑀪𑀽𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑀼𑀁𑀪𑀸𑀯𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀦𑁆𑀢𑀺 𑀯𑁂𑀪𑀽𑀢𑀺𑀓𑀁, 𑀢𑀤𑁂𑀯 𑀯𑁂𑀪𑀽𑀢𑀺𑀬𑀁, 𑀧𑁂𑀲𑀼𑀜𑁆𑀜𑀁. 𑀢𑁂𑀦𑀸𑀳 ‘‘𑀪𑁂𑀤𑀓𑀭𑀯𑀸𑀘’’𑀦𑁆𑀢𑀺. 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀢𑁄 𑀲𑀸𑀭𑀫𑁆𑀪𑀢𑁄 𑀚𑀸𑀢𑀸𑀢𑀺 𑀲𑀸𑀭𑀫𑁆𑀪𑀚𑀸. 𑀢𑀲𑁆𑀲𑀸 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀢𑁆𑀯𑀁 𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀺𑀤𑁆𑀥𑀸𑀓𑀣𑀸 𑀅𑀫𑀦𑀸𑀧𑀸, 𑀫𑀦𑀸𑀧𑀸𑀧𑀺 𑀧𑀭𑀲𑁆𑀲 𑀘𑀺𑀢𑁆𑀢𑀯𑀺𑀖𑀸𑀢𑀸𑀯𑀳𑀢𑁆𑀢𑀸 𑀓𑀭𑀡𑀼𑀢𑁆𑀢𑀭𑀺𑀬𑀧𑀓𑁆𑀔𑀺𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀼𑀬𑁆𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀓𑁆𑀔𑁂𑀧𑀓𑀣𑀸𑀧𑀯𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑁂𑀧𑀓𑀣𑀸𑀯𑀲𑁂𑀦 𑀧𑀯𑀢𑁆𑀢𑀁. 𑀚𑀬𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀚𑀬𑀁 𑀧𑀼𑀭𑀓𑁆𑀔𑀢𑁆𑀯𑀸. 𑀬𑀁 𑀓𑀺𑀜𑁆𑀘𑀺 𑀦 𑀪𑀸𑀲𑀢𑀻𑀢𑀺 𑀬𑁄𑀚𑀦𑀸. ‘‘𑀫𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀫𑀦𑁆𑀢𑀦𑀁 𑀚𑀸𑀦𑀦𑀦𑁆𑀢𑀺 𑀓𑀢𑁆𑀯𑀸. ‘‘𑀫𑀦𑁆𑀢𑀸’’𑀢𑀺 𑀇𑀤𑀁 ‘‘𑀫𑀦𑁆𑀢𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀆𑀳 ‘‘𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸’’𑀢𑀺. 𑀬𑀼𑀢𑁆𑀢𑀓𑀣𑀫𑁂𑀯𑀸𑀢𑀺 𑀅𑀢𑁆𑀢𑀦𑁄, 𑀲𑀼𑀡𑀦𑁆𑀢𑀲𑁆𑀲 𑀘 𑀬𑀼𑀢𑁆𑀢𑀭𑀽𑀧𑀫𑁂𑀯 𑀓𑀣𑀁. 𑀳𑀤𑀬𑁂 𑀦𑀺𑀤𑀳𑀺𑀢𑀩𑁆𑀩𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀯𑁂𑀤𑀸𑀤𑀺𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑀁, 𑀯𑀺𑀫𑀼𑀢𑁆𑀢𑀸𑀬𑀢𑀦𑀪𑀸𑀯𑁂𑀦 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸𑀧𑀺 𑀯𑀸𑀘𑀸 𑀅𑀓𑀸𑀮𑁂 𑀪𑀸𑀲𑀺𑀢𑀸 𑀅𑀪𑀸𑀚𑀦𑁂 𑀪𑀸𑀲𑀺𑀢𑀸 𑀯𑀺𑀬 𑀦 𑀅𑀢𑁆𑀣𑀸𑀯𑀳𑀸𑀢𑀺 𑀆𑀳 ‘‘𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦𑀸’’𑀢𑀺. 𑀅𑀬𑀜𑁆𑀘 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀲𑀼𑀪𑀸𑀲𑀺𑀢𑀯𑀸𑀘𑀸 𑀲𑀘𑁆𑀘𑀲𑀫𑁆𑀩𑁄𑀥𑀸𑀯𑀳𑀸𑀤𑀺𑀢𑀸𑀬 𑀲𑀢𑁆𑀢𑀸𑀦𑀁 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀺𑀲𑀁𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀪𑀸𑀲𑀺𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀻𑀮𑀸𑀘𑀸𑀭𑁂𑀢𑀺 𑀲𑀻𑀮𑁂 𑀘 𑀆𑀘𑀸𑀭𑁂 𑀘 𑀧𑀭𑀺𑀲𑀼𑀤𑁆𑀥𑀲𑀻𑀮𑁂 𑀘𑁂𑀯 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁂 𑀘. 𑀞𑀺𑀢𑁄𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑁄. 𑀲𑀘𑁆𑀘𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀘𑁆𑀘𑁄𑀢𑀺 𑀆𑀳 ‘‘𑀲𑀘𑁆𑀘𑀓𑀣𑁄’’𑀢𑀺. 𑀏𑀲 𑀦𑀬𑁄 𑀲𑀤𑁆𑀥𑁄𑀢𑀺 𑀏𑀢𑁆𑀣𑀸𑀧𑀺. 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄’’𑀢𑀺. ‘‘𑀦𑀦𑀼 𑀘 𑀳𑁂𑀝𑁆𑀞𑀸 𑀲𑀘𑁆𑀘𑀁 𑀓𑀣𑀺𑀢𑀫𑁂𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀳𑁂𑀝𑁆𑀞𑀸 𑀳𑀺 𑀯𑀘𑀻𑀲𑀫𑀸𑀘𑀸𑀭𑀁 𑀓𑀣𑁂𑀦𑁆𑀢𑁂𑀦 𑀲𑀘𑁆𑀘𑀁 𑀓𑀣𑀺𑀢𑀁, 𑀧𑀝𑀺𑀧𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀇𑀥 𑀲𑀻𑀮𑀁 𑀓𑀣𑁂𑀦𑁆𑀢𑁂𑀦 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀘𑁆𑀘𑀁 𑀲𑀭𑀽𑀧𑁂𑀦𑁂𑀯 𑀓𑀣𑀺𑀢𑀁. ‘‘𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀆𑀭𑀩𑁆𑀪𑀦𑁆𑀢𑀭𑀜𑁆𑀘𑁂𑀢𑀁, 𑀢𑀣𑀸𑀧𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 𑀲𑀘𑁆𑀘𑀲𑁆𑀲 𑀓𑀣𑀦𑀁 𑀧𑀼𑀦𑀭𑀼𑀢𑁆𑀢𑀁 𑀳𑁄𑀢𑀻𑀢𑀺 𑀧𑀭𑀲𑁆𑀲 𑀘𑁄𑀤𑀦𑀸𑀯𑀲𑀭𑁄 𑀫𑀸 𑀳𑁄𑀢𑀽’’𑀢𑀺 𑀢𑀢𑁆𑀣 𑀧𑀭𑀺𑀳𑀸𑀭𑀁 𑀤𑀸𑀢𑀼𑀓𑀸𑀫𑁄 ‘‘𑀇𑀥 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀳𑁂𑀝𑁆𑀞𑀸 𑀯𑀸𑀘𑀸𑀲𑀘𑁆𑀘𑀁 𑀓𑀣𑀺𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀼𑀪𑀸𑀲𑀺𑀢𑀯𑀸𑀘𑀁 𑀤𑀲𑁆𑀲𑁂𑀦𑁆𑀢𑁂𑀦. 𑀅𑀦𑁆𑀢𑀫𑀲𑁄…𑀧𑁂… 𑀤𑀲𑁆𑀲𑁂𑀢𑀼𑀁 𑀇𑀥 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀻𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀏𑀯𑀁 𑀧𑀭𑀺𑀢𑁆𑀢𑀓𑀁 𑀔𑁄, 𑀭𑀸𑀳𑀼𑀮, 𑀢𑁂𑀲𑀁 𑀲𑀸𑀫𑀜𑁆𑀜𑀁, 𑀬𑁂𑀲𑀁 𑀦𑀢𑁆𑀣𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀚𑁆𑀚𑀸’’𑀢𑀺𑀆𑀤𑀺 𑀦𑀬𑀧𑁆𑀧𑀯𑀢𑁆𑀢𑀁 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀩𑁆𑀩𑀁.

𑀕𑀼𑀢𑁆𑀢𑀸 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀺𑀢𑀸 𑀤𑁆𑀯𑀸𑀭𑀸 𑀏𑀢𑁂𑀦𑀸𑀢𑀺 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀆𑀳 ‘‘𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀽’’𑀢𑀺𑀆𑀤𑀺. 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀡𑁆𑀳𑀦𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀪𑁄𑀚𑀦𑁂 𑀫𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽. 𑀲𑀫𑀦𑁆𑀢𑀺 𑀅𑀯𑀺𑀲𑀫𑀁. 𑀲𑀫𑀘𑀸𑀭𑀺𑀢𑀸 𑀳𑀺 𑀓𑀸𑀬𑀯𑀺𑀲𑀫𑀸𑀤𑀻𑀦𑀺 𑀧𑀳𑀸𑀬 𑀓𑀸𑀬𑀲𑀫𑀸𑀤𑀺𑀧𑀽𑀭𑀡𑀁. 𑀦𑀺𑀲𑀚𑁆𑀚𑀸𑀬𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀸𑀯𑀦𑀸𑀬 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑀜𑁆𑀳𑀺 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀦 𑀦𑀺𑀤𑁆𑀤𑀸𑀯𑀺𑀦𑁄𑀤𑀦𑀫𑀢𑁆𑀢𑀁. 𑀦𑀺𑀢𑁆𑀢𑀦𑁆𑀤𑀻𑀢𑀺 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄. 𑀲𑀸 𑀧𑀦 𑀦𑀺𑀢𑁆𑀢𑀦𑁆𑀤𑀺𑀢𑀸 𑀓𑀸𑀬𑀸𑀮𑀲𑀺𑀬𑀯𑀺𑀕𑀫𑀦𑁂 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑀸𑀮𑀲𑀺𑀬𑀯𑀺𑀭𑀳𑀺𑀢𑁄’’𑀢𑀺. ‘‘𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀇𑀫𑀺𑀦𑀸 𑀤𑀼𑀯𑀺𑀥𑁄𑀧𑀺 𑀯𑀻𑀭𑀺𑀬𑀸𑀭𑀫𑁆𑀪𑁄 𑀕𑀳𑀺𑀢𑁄𑀢𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀺𑀓𑀯𑀻𑀭𑀺𑀬𑁂𑀦𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀕𑀫𑁆𑀫 𑀕𑀡𑀯𑀺𑀳𑀸𑀭𑁄 𑀲𑀳𑀯𑀸𑀲𑁄 𑀲𑀗𑁆𑀕𑀡𑀺𑀓𑀸, 𑀲𑀸 𑀧𑀦 𑀓𑀺𑀮𑁂𑀲𑁂𑀳𑀺𑀧𑀺 𑀏𑀯𑀁 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀕𑀡𑀲𑀗𑁆𑀕𑀡𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀡𑁂𑀦 𑀲𑀗𑁆𑀕𑀡𑀺𑀓𑀁 𑀕𑀡𑀲𑀗𑁆𑀕𑀡𑀺𑀓𑀦𑁆𑀢𑀺. 𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀅𑀦𑀥𑀺𑀕𑀢𑀯𑀺𑀲𑁂𑀲𑀸𑀥𑀺𑀕𑀫𑀓𑀸𑀭𑀡𑀯𑀲𑁂𑀦 𑀏𑀓𑀯𑀺𑀳𑀸𑀭𑀻, 𑀦 𑀓𑁂𑀯𑀮𑀁 𑀏𑀓𑀻𑀪𑀸𑀯𑀯𑀲𑁂𑀦. 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀦𑁆𑀢𑀺 𑀓𑀺𑀮𑁂𑀲𑀲𑀳𑀺𑀢𑀘𑀺𑀢𑁆𑀢𑀢𑀁. 𑀬𑀣𑀸 𑀢𑀣𑀸𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦 𑀯𑀸. 𑀲𑀫𑀣𑀯𑀲𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁.

𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄𑀢𑀺 𑀲𑀼𑀦𑁆𑀤𑀭𑀧𑀝𑀺𑀪𑀸𑀦𑁄, 𑀲𑀸 𑀧𑀦𑀲𑁆𑀲 𑀧𑀝𑀺𑀪𑀸𑀦𑀲𑀫𑁆𑀧𑀤𑀸 𑀯𑀘𑀦𑀘𑀸𑀢𑀼𑀭𑀺𑀬𑀲𑀳𑀺𑀢𑀸𑀯 𑀇𑀘𑁆𑀙𑀺𑀢𑀸𑀢𑀺 𑀆𑀳 ‘‘𑀯𑀸𑀓𑁆𑀓𑀭𑀡…𑀧𑁂… 𑀲𑀫𑁆𑀧𑀦𑁆𑀦𑁄 𑀘𑀸’’𑀢𑀺. ‘‘𑀧𑀝𑀺𑀪𑀸𑀦’’𑀦𑁆𑀢𑀺 𑀳𑀺 𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺 𑀜𑀸𑀡𑀲𑁆𑀲 𑀉𑀧𑀝𑁆𑀞𑀺𑀢𑀯𑀘𑀦𑀫𑁆𑀧𑀺. 𑀢𑀢𑁆𑀣 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀁 𑀧𑀝𑀺𑀪𑀸𑀦𑀫𑀲𑁆𑀲𑀸𑀢𑀺 𑀬𑀼𑀢𑁆𑀢𑀧𑀝𑀺𑀪𑀸𑀦𑁄. 𑀧𑀼𑀘𑁆𑀙𑀺𑀢𑀸𑀦𑀦𑁆𑀢𑀭𑀫𑁂𑀯 𑀲𑀻𑀖𑀁 𑀩𑁆𑀬𑀸𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁄 𑀫𑀼𑀢𑁆𑀢𑀧𑀝𑀺𑀪𑀸𑀦𑀁 𑀅𑀲𑁆𑀲𑀸𑀢𑀺 𑀦𑁄 𑀫𑀼𑀢𑁆𑀢𑀧𑀝𑀺𑀪𑀸𑀦𑁄. 𑀇𑀥 𑀧𑀦 𑀯𑀺𑀓𑀺𑀡𑁆𑀡𑀯𑀸𑀘𑁄 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀻𑀮𑀲𑀫𑀸𑀘𑀸𑀭𑀲𑁆𑀫𑀺𑀜𑁆𑀳𑀺 𑀞𑀺𑀢𑀪𑀺𑀓𑁆𑀔𑀼 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀫𑀦𑀲𑀫𑀢𑁆𑀣𑀸𑀬𑀸𑀢𑀺 𑀅𑀲𑁆𑀲𑀼𑀢𑀁 𑀥𑀫𑁆𑀫𑀁 𑀕𑀫𑁂𑀢𑀼𑀁 𑀲𑀫𑀢𑁆𑀣𑀸𑀬. 𑀥𑀸𑀭𑀡𑀲𑀫𑀢𑁆𑀣𑀸𑀬𑀸𑀢𑀺 𑀲𑀸𑀢𑀺𑀲𑀬𑀁 𑀲𑀢𑀺𑀯𑀻𑀭𑀺𑀬𑀲𑀳𑀺𑀢𑀢𑀸𑀬 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀬. 𑀫𑀼𑀦𑀦𑀢𑁄 𑀅𑀦𑀼𑀫𑀺𑀦𑀦𑀢𑁄 𑀫𑀼𑀢𑀻𑀢𑀺 𑀅𑀦𑀼𑀫𑀸𑀦 𑀧𑀜𑁆𑀜𑀸𑀬 𑀦𑀸𑀫𑀁. 𑀢𑀻𑀳𑀺 𑀧𑀤𑁂𑀳𑀻𑀢𑀺 ‘‘𑀕𑀢𑀺𑀫𑀸 𑀥𑀺𑀢𑀺𑀫𑀸 𑀫𑀼𑀢𑀺𑀫𑀸’’𑀢𑀺 𑀢𑀻𑀳𑀺 𑀧𑀤𑁂𑀳𑀺. 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀸 ‘‘𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀇𑀥𑀸𑀢𑀺 ‘‘𑀥𑀺𑀢𑀺𑀫𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀯𑀻𑀭𑀺𑀬𑀫𑁆𑀧𑀺 𑀳𑁂𑀝𑁆𑀞𑀸 𑀕𑀼𑀡𑀪𑀽𑀢𑀁 𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀳𑁂𑀝𑁆𑀞𑀸𑀢𑀺 ‘‘𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀛𑀸𑀬𑀻’’𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀓𑀣𑀺𑀢𑀸. 𑀇𑀥𑀸𑀢𑀺 ‘‘𑀥𑀺𑀢𑀺𑀫𑀸 𑀫𑀼𑀢𑀺𑀫𑀸’’𑀢𑀺 𑀏𑀢𑁆𑀣 𑀩𑀼𑀤𑁆𑀥𑀯𑀘𑀦𑀕𑀡𑁆𑀳𑀦𑀧𑀜𑁆𑀜𑀸 𑀓𑀣𑀺𑀢𑀸 𑀓𑀭𑀡𑀧𑀼𑀩𑁆𑀩𑀸𑀧𑀭𑀓𑁄𑀲𑀮𑁆𑀮𑀧𑀜𑁆𑀜𑀸𑀤𑀻𑀧𑀦𑀢𑁄. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀯𑀢𑁆𑀣𑀼𑀓𑀸𑀫𑁄 𑀯𑀺𑀬 𑀬𑀣𑀸𑀧𑀯𑀢𑁆𑀢𑁄 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀅𑀕𑀺𑀤𑁆𑀥𑁄’’𑀢𑀺.

𑀅𑀦𑀼𑀲𑀸𑀲𑀦𑀯𑀺𑀥𑀸𑀤𑁂𑀲𑀦𑀸𑀤𑀺𑀯𑀡𑁆𑀡𑀦𑀸

𑁧𑁫𑁪. 𑀅𑀢𑁆𑀢𑀦𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑁂𑀦 𑀧𑀣𑀫𑀦𑀲𑀺𑀓𑀸𑀭𑁂𑀦 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦. 𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑁄.

𑁧𑁫𑁫. 𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀜𑀸𑀡𑁂𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀚𑀸𑀦𑀦𑁂.

𑁧𑁫𑁬. 𑀧𑀭𑀺𑀬𑀸𑀤𑀺𑀬𑀫𑀸𑀦𑁄𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀓𑁆𑀔𑀦𑁆𑀥𑁂𑀬𑁂𑀯 𑀅𑀦𑀼𑀲𑁆𑀲𑀭𑀢𑀺 𑀦𑀸𑀫𑀕𑁄𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀓𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀓𑁆𑀓𑁄𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑀼𑀁. 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀲𑁂𑀦 𑀕𑀳𑀺𑀢𑀁, ‘‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑀸𑀢𑀺 𑀘 𑀆𑀭𑁄𑀳𑀦𑁂 𑀅𑀲𑀓𑁆𑀓𑁄𑀦𑁆𑀢𑀲𑁆𑀲, 𑀑𑀭𑁄𑀳𑀦𑁂 𑀧𑀦 𑀜𑀸𑀡𑀲𑁆𑀲 𑀣𑀺𑀭𑀪𑀽𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀼𑀤𑁆𑀥𑀓𑁆𑀔𑀦𑁆𑀥𑁂𑀬𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺𑀆𑀤𑀺. 𑀏𑀢𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀁. 𑀦 𑀲𑀮𑁆𑀮𑀓𑁆𑀔𑁂𑀲𑀺 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂𑀦 𑀓𑀼𑀡𑁆𑀞𑀜𑀸𑀡𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀕𑀢𑀺𑀓𑀢𑁆𑀢𑀸’’𑀢𑀺. 𑀞𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀅𑀯𑀝𑁆𑀞𑀸𑀦𑀁. 𑀦𑀺𑀬𑀫𑁄𑀢𑀺 𑀯𑀸𑀤𑀦𑀺𑀬𑀫𑁄 𑀧𑀝𑀺𑀦𑀺𑀬𑀢𑀯𑀸𑀤𑀢𑀸. 𑀢𑁂𑀦𑀸𑀳 ‘‘𑀇𑀫𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺.

𑁧𑁫𑁭. 𑀧𑀺𑀡𑁆𑀟𑀕𑀡𑀦𑀸𑀬𑀸𑀢𑀺 ‘‘𑀏𑀓𑀁 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀅𑀕𑀡𑁂𑀢𑁆𑀯𑀸 𑀲𑀗𑁆𑀓𑀮𑀦𑀧𑀤𑀼𑀧𑁆𑀧𑀸𑀤𑀦𑀸𑀤𑀺𑀦𑀸 𑀧𑀺𑀡𑁆𑀟𑀦𑀯𑀲𑁂𑀦 𑀕𑀡𑀦𑀸𑀬. 𑀅𑀘𑁆𑀙𑀺𑀤𑁆𑀤𑀓𑀯𑀲𑁂𑀦𑀸𑀢𑀺 𑀅𑀯𑀺𑀘𑁆𑀙𑀺𑀦𑁆𑀤𑀓𑀕𑀡𑀦𑀸𑀯𑀲𑁂𑀦 𑀕𑀡𑀦𑀸 𑀓𑀫𑀕𑀡𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀏𑀢𑁆𑀢𑀓𑀸𑀦𑀺 𑀧𑀡𑁆𑀡𑀸𑀦𑀻’’𑀢𑀺 𑀯𑀸 ‘‘𑀇𑀫𑀲𑁆𑀫𑀺𑀁 𑀚𑀮𑀸𑀲𑀬𑁂 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻’’𑀢𑀺 𑀯𑀸 𑀏𑀯𑀁 𑀕𑀡𑁂𑀢𑀩𑁆𑀩𑀲𑁆𑀲 𑀏𑀓𑀚𑁆𑀛𑀫𑁆𑀧𑀺 𑀧𑀺𑀡𑁆𑀟𑁂𑀢𑁆𑀯𑀸 𑀕𑀡𑀦𑀸. 𑀓𑀫𑀕𑀡𑀦𑀸 𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀘𑁆𑀙𑀺𑀚𑁆𑀚 𑀧𑀯𑀢𑁆𑀢𑀺𑀬𑀸 𑀧𑀘𑁆𑀙𑀺𑀦𑁆𑀤𑀺𑀓𑀸. 𑀲𑀸 𑀧𑀦𑁂𑀲𑀸 𑀕𑀡𑀦𑀸 𑀲𑀯𑀦𑀦𑁆𑀢𑀭𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀫𑀦𑀲𑀸𑀯 𑀕𑀡𑁂𑀢𑀩𑁆𑀩𑀢𑁄 ‘‘𑀫𑀦𑁄𑀕𑀡𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀦𑁄𑀕𑀡𑀦𑀸𑀬𑀸’’𑀢𑀺. 𑀧𑀺𑀡𑁆𑀟𑀕𑀡𑀦𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀯𑀺𑀪𑀸𑀕𑀕𑀡𑀦𑀁. 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀪𑀸𑀯𑀢𑁄. 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀢𑀭𑀸𑀲𑀁 𑀧𑀽𑀭𑀡𑁂𑀦 𑀯𑀺𑀦𑀸 𑀢𑀲𑁆𑀲𑀸 𑀧𑀽𑀭𑀡𑀁 𑀦𑀢𑁆𑀣𑀻𑀢𑀺 ‘‘𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸’’𑀢𑀺. 𑀏𑀢𑁆𑀢𑀓𑀦𑁆𑀢𑀺 𑀤𑀲𑁆𑀲𑁂𑀣𑀸𑀢𑀺 𑀤𑀻𑀧𑁂𑀢𑀺 𑀣𑁂𑀭𑁄. 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑀼𑀲𑁆𑀲𑀭𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀆𑀬𑀼𑀦𑁄 𑀯𑀲𑁆𑀲𑀸𑀤𑀺𑀕𑀡𑀦𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀢𑀲𑁆𑀲 𑀅𑀯𑀺𑀲𑀬𑀪𑀸𑀯𑀢𑁄.

𑁧𑁫𑁮. 𑀢𑀼𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀬𑁂𑀯 𑀅𑀦𑀼𑀢𑁆𑀢𑀭𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸. 𑀇𑀤𑀸𑀦𑀺 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀯𑀺𑀪𑀸𑀕𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑀩𑀼𑀤𑁆𑀥𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦𑀸𑀢𑀺 𑀅𑀦𑀼𑀢𑁆𑀢𑀭𑀪𑀸𑀯𑁂𑀦, 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑁂𑀳𑀺 𑀏𑀓𑀲𑀤𑀺𑀲𑀪𑀸𑀯𑁂𑀦 𑀘.

𑁧𑁫𑁯. 𑀆𑀲𑀯𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀽𑀧𑀕𑀫𑀦𑁂𑀦 𑀲𑀸𑀲𑀯𑀸. 𑀉𑀧𑁂𑀘𑁆𑀘 𑀆𑀥𑀻𑀬𑀦𑁆𑀢𑀻𑀢𑀺 𑀉𑀧𑀸𑀥𑀻, 𑀤𑁄𑀲𑀸𑀭𑁄𑀧𑀦𑀸𑀦𑀺, 𑀲𑀳 𑀉𑀧𑀸𑀥𑀻𑀳𑀻𑀢𑀺 𑀲𑀉𑀧𑀸𑀥𑀺𑀓𑀸. 𑀅𑀦𑀭𑀺𑀬𑀺𑀤𑁆𑀥𑀺𑀬𑀜𑁆𑀳𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀤𑁄𑀲𑁂𑀦 𑀏𑀓𑀘𑁆𑀘𑁂 𑀉𑀧𑀸𑀭𑀫𑁆𑀪𑀁 𑀤𑀤𑀦𑁆𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀓𑁂𑀯𑀝𑁆𑀝𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀦𑁄 ‘‘𑀅𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀢𑀺 𑀲𑀸𑀲𑀯𑀪𑀸𑀯𑀢𑁄. 𑀦𑀺𑀤𑁆𑀤𑁄𑀲𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀦𑀺𑀤𑁆𑀤𑁄𑀲𑀸 𑀤𑁄𑀲𑁂𑀳𑀺 𑀲𑀳 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀢𑀢𑁄 𑀏𑀯 𑀅𑀦𑀼𑀧𑀸𑀭𑀫𑁆𑀪𑀸. 𑀅𑀭𑀺𑀬𑀸𑀦𑀁 𑀇𑀤𑁆𑀥𑀻𑀢𑀺 𑀅𑀭𑀺𑀬𑀺𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻𑀢𑀺 𑀇𑀝𑁆𑀞𑀲𑀜𑁆𑀜𑀻 𑀇𑀝𑁆𑀞𑀸𑀓𑀸𑀭𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑁄. 𑀧𑀝𑀺𑀓𑁆𑀓𑀽𑀮𑁂𑀢𑀺 𑀅𑀫𑀦𑀼𑀜𑁆𑀜𑁂 𑀅𑀦𑀺𑀝𑁆𑀞𑁂. 𑀥𑀸𑀢𑀼𑀲𑀜𑁆𑀜𑀦𑁆𑀢𑀺 ‘‘𑀥𑀸𑀢𑀼𑀬𑁄’’𑀢𑀺 𑀲𑀜𑁆𑀜𑀁. 𑀉𑀧𑀲𑀁𑀳𑀭𑀢𑀻𑀢𑀺 𑀉𑀧𑀦𑁂𑀢𑀺 𑀧𑀯𑀢𑁆𑀢𑁂𑀢𑀺. 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀦𑀺𑀝𑁆𑀞𑁂 𑀲𑀢𑁆𑀢𑀲𑀜𑁆𑀜𑀺𑀢𑁂 𑀆𑀭𑀫𑁆𑀫𑀡𑁂. 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀻𑀢𑀺 𑀫𑁂𑀢𑁆𑀢𑀁 𑀳𑀺𑀢𑁂𑀲𑀺𑀢𑀁 𑀉𑀧𑀲𑀁𑀳𑀭𑀦𑁆𑀢𑁄 𑀲𑀩𑁆𑀩𑀢𑁆𑀣𑀓𑀫𑁂𑀯 𑀢𑀁 𑀢𑀢𑁆𑀣 𑀨𑀭𑀢𑀺. 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑁂𑀦 𑀥𑀸𑀢𑀼𑀲𑁄, 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀢𑀢𑁆𑀣 𑀧𑀯𑀢𑁆𑀢𑁂𑀢𑀺. 𑀅𑀧𑁆𑀧𑀝𑀺𑀓𑁆𑀓𑀽𑀮𑁂 𑀲𑀢𑁆𑀢𑁂 𑀜𑀸𑀢𑀺𑀫𑀺𑀢𑁆𑀢𑀸𑀤𑀺𑀓𑁂 𑀬𑀸𑀣𑀸𑀯𑀢𑁄 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑁂𑀦 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀯𑀺𑀲𑀪𑀸𑀕𑀪𑀽𑀢𑁂 ‘‘𑀓𑁂𑀲𑀸𑀤𑀺 𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀫𑁂𑀯𑀸’’𑀢𑀺 𑀅𑀲𑀼𑀪𑀲𑀜𑁆𑀜𑀁 𑀨𑀭𑀢𑀺 𑀅𑀲𑀼𑀪𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑀺. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀮𑀓𑁆𑀔𑀡𑀸𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀦𑀢𑁄 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬.

𑀢𑀁 𑀤𑁂𑀲𑀦𑀦𑁆𑀢𑀺 𑀢𑀁 𑀤𑁆𑀯𑀻𑀲𑀼 𑀇𑀤𑁆𑀥𑀺𑀯𑀺𑀥𑀸𑀲𑀼 𑀤𑁂𑀲𑀦𑀧𑁆𑀧𑀓𑀸𑀭𑀁 𑀤𑁂𑀲𑀦𑀸𑀯𑀺𑀥𑀺𑀁. 𑀅𑀲𑁂𑀲𑀁 𑀲𑀓𑀮𑀦𑁆𑀢𑀺 𑀅𑀲𑁂𑀲𑀁 𑀦𑀺𑀭𑀯𑀲𑁂𑀲𑀁 𑀲𑀫𑁆𑀧𑀼𑀡𑁆𑀡𑀁 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀸𑀢𑀺. 𑀅𑀲𑁂𑀲𑀁 𑀅𑀪𑀺𑀚𑀸𑀦𑀢𑁄 𑀢𑀢𑁄 𑀉𑀢𑁆𑀢𑀭𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀦𑀢𑁆𑀣𑀺. 𑀇𑀢𑁄𑀢𑀺 𑀪𑀕𑀯𑀢𑁄 𑀅𑀪𑀺𑀜𑁆𑀜𑀸𑀢𑀢𑁄. 𑀅𑀜𑁆𑀜𑁄 𑀧𑀭𑀫𑀢𑁆𑀣𑀯𑀲𑁂𑀦 𑀥𑀫𑁆𑀫𑁄 𑀯𑀸 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀼𑀕𑁆𑀕𑀮𑁄 𑀯𑀸 𑀅𑀬𑀁 𑀦𑀸𑀫 𑀬𑀁 𑀪𑀕𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀇𑀤𑀁 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺 𑀲𑀩𑁆𑀩𑀲𑁆𑀲𑁂𑀯 𑀲𑀫𑁆𑀫𑀤𑁂𑀯 𑀢𑀼𑀫𑁆𑀳𑁂𑀳𑀺 𑀅𑀪𑀺𑀜𑁆𑀜𑀸𑀢𑀢𑁆𑀢𑀸. 𑀤𑁆𑀯𑀻𑀲𑀼 𑀇𑀤𑁆𑀥𑀺𑀯𑀺𑀥𑀸𑀲𑀼 𑀅𑀪𑀺𑀚𑀸𑀦𑀦𑁂, 𑀤𑁂𑀲𑀦𑀸𑀬𑀜𑁆𑀘 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑁄 𑀦𑀢𑁆𑀣𑀺. 𑀇𑀫𑀺𑀦𑀸𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄, 𑀅𑀣 𑀔𑁄 𑀅𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀬𑀁 𑀢𑀁 𑀪𑀦𑁆𑀢𑁂𑀢𑀺𑀆𑀤𑀺𑀦𑀸𑀧𑀺 𑀳𑀺 𑀪𑀕𑀯𑀢𑁄 𑀕𑀼𑀡𑀤𑀲𑁆𑀲𑀦𑀁 𑀢𑀲𑁆𑀲𑁂𑀯 𑀧𑀲𑀸𑀤𑀲𑁆𑀲 𑀓𑀸𑀭𑀡𑀯𑀺𑀪𑀸𑀯𑀦𑀁.

𑀅𑀜𑁆𑀜𑀣𑀸𑀲𑀢𑁆𑀣𑀼𑀕𑀼𑀡𑀤𑀲𑁆𑀲𑀦𑀸𑀤𑀺𑀯𑀡𑁆𑀡𑀦𑀸

𑁧𑁬𑁦. 𑀧𑀼𑀩𑁆𑀩𑁂 ‘‘𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀅𑀜𑁆𑀜𑁄 𑀏𑀯𑀸𑀬𑀁 𑀧𑀓𑀸𑀭𑁄 ‘‘𑀬𑀁 𑀢𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀆𑀭𑀤𑁆𑀥𑁄𑀢𑀺 𑀆𑀳 ‘‘𑀅𑀧𑀭𑁂𑀦𑀸𑀧𑀺 𑀆𑀓𑀸𑀭𑁂𑀦𑀸’’𑀢𑀺. 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀲𑀤𑁆𑀤𑀳𑀦𑀢𑁄 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 𑀦𑀸𑀫 𑀩𑁄𑀥𑀺𑀲𑀢𑁆𑀢𑀸, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀳𑀺 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀫𑀳𑀸𑀩𑁄𑀥𑀺𑀬𑀁 𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀦𑀺𑀬𑀢𑀪𑀸𑀯𑀽𑀧𑀕𑀫𑀦𑁂𑀦 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀪𑀸𑀯𑀢𑁄. 𑀬𑀢𑁄 𑀦𑁂𑀲𑀁 𑀦 𑀓𑀣𑀜𑁆𑀘𑀺 𑀢𑀢𑁆𑀣 𑀲𑀤𑁆𑀥𑀸𑀬 𑀅𑀜𑁆𑀜𑀣𑀢𑁆𑀢𑀁 𑀳𑁄𑀢𑀺, 𑀏𑀢𑁂𑀦𑁂𑀯 𑀢𑁂𑀲𑀁 𑀓𑀫𑁆𑀫𑀨𑀮𑀁 𑀲𑀤𑁆𑀥𑀸𑀬𑀧𑀺 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑁄 𑀤𑀻𑀧𑀺𑀢𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦, ‘‘𑀅𑀦𑀼𑀧𑁆𑀧𑀢𑁆𑀢𑀁 𑀢𑀁 𑀪𑀕𑀯𑀢𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀘 𑀯𑀺𑀲𑀺𑀝𑁆𑀞𑀯𑀺𑀲𑀬𑀁 ‘‘𑀲𑀤𑁆𑀥𑁂𑀦 𑀓𑀼𑀮𑀧𑀼𑀢𑁆𑀢𑁂𑀦𑀸’’𑀢𑀺 𑀇𑀤𑀁 𑀧𑀤𑀁, 𑀢𑀲𑁆𑀫𑀸. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑀥𑀺𑀕𑀫𑀫𑀽𑀮𑀓𑀢𑁆𑀢𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀲𑀫𑀥𑀺𑀕𑀫𑀲𑁆𑀲 ‘‘𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸’’𑀢𑀺𑀆𑀤𑀻𑀲𑀼 𑀲𑀫𑀸𑀲𑀧𑀤𑁂𑀲𑀼 ‘‘𑀯𑀻𑀭𑀺𑀬𑀁 𑀣𑀸𑀫𑁄’’𑀢𑀺𑀆𑀤𑀻𑀦𑀺 𑀅𑀯𑀬𑀯𑀧𑀤𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀓𑁆𑀓𑀫𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀦 𑀥𑁄𑀭𑀬𑁆𑀳𑀧𑀤𑀁. 𑀦 𑀳𑀺 𑀢𑀁 𑀯𑀻𑀭𑀺𑀬𑀯𑁂𑀯𑀘𑀦𑀁, 𑀅𑀣 𑀔𑁄 𑀯𑀻𑀭𑀺𑀬𑀯𑀦𑁆𑀢𑀯𑀸𑀘𑀓𑀁. 𑀥𑀼𑀭𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 𑀳𑀺 𑀥𑁄𑀭𑀬𑁆𑀳𑁄. 𑀢𑁂𑀦𑀸𑀳 ‘‘𑀢𑀁 𑀥𑀼𑀭𑀁 𑀯𑀳𑀦𑀲𑀫𑀢𑁆𑀣𑁂𑀦 𑀫𑀳𑀸𑀧𑀼𑀭𑀺𑀲𑁂𑀦𑀸’’𑀢𑀺. 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂𑀦𑀸𑀢𑀺 𑀅𑀲𑀺𑀣𑀺𑀮𑀯𑀻𑀭𑀺𑀬𑁂𑀦. 𑀣𑀺𑀭𑀯𑀻𑀭𑀺𑀬𑁂𑀦𑀸𑀢𑀺 𑀉𑀲𑁆𑀲𑁄𑀴𑁆𑀳𑀻𑀪𑀸𑀯𑀽𑀧𑀕𑀫𑀦𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀯𑀻𑀭𑀺𑀬𑁂𑀦. 𑀅𑀲𑀫𑀥𑀼𑀭𑁂𑀳𑀻𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀥𑀼𑀭𑁂𑀳𑀺. 𑀧𑀭𑁂𑀲𑀁 𑀅𑀲𑀬𑁆𑀳𑀲𑀳𑀦𑀸 𑀳𑀺 𑀮𑁄𑀓𑀦𑀸𑀣𑀸. 𑀢𑀁 𑀲𑀩𑁆𑀩𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀪𑁂𑀤𑀁 𑀩𑀼𑀤𑁆𑀥𑀸𑀦𑀁 𑀕𑀼𑀡𑀚𑀸𑀢𑀁. 𑀧𑀸𑀭𑀫𑀺𑀢𑀸, 𑀩𑀼𑀤𑁆𑀥𑀕𑀼𑀡𑀸, 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀢𑀬𑀁 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀫𑀸𑀦𑀫𑁂𑀯, 𑀢𑀲𑁆𑀫𑀸 𑀆𑀳 ‘‘𑀅𑀢𑀻𑀢𑀸𑀦𑀸𑀕𑀢…𑀧𑁂… 𑀊𑀦𑁄 𑀦𑀢𑁆𑀣𑀻’’𑀢𑀺.

𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀦𑁆𑀢𑀺 𑀓𑀸𑀫𑀲𑀼𑀔𑁂 𑀅𑀮𑁆𑀮𑀻𑀦𑀸 𑀳𑀼𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀦𑀁. 𑀓𑁄 𑀚𑀸𑀦𑀸𑀢𑀺 𑀧𑀭𑀮𑁄𑀓𑀁 ‘‘𑀅𑀢𑁆𑀣𑀻’’𑀢𑀺, 𑀏𑀢𑁆𑀣 ‘‘𑀓𑁄 𑀏𑀓𑀯𑀺𑀲𑀬𑁄𑀬𑀁 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑁄’’𑀢𑀺 𑀏𑀯𑀁𑀤𑀺𑀝𑁆𑀞𑀺 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀔𑁄𑀢𑀺 𑀇𑀝𑁆𑀞𑁄 𑀲𑀼𑀔𑀸𑀯𑀳𑁄. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸𑀢𑀺 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀺𑀬𑀸. 𑀫𑀼𑀤𑀼𑀓𑀸𑀬𑀸𑀢𑀺 𑀲𑀼𑀔𑀼𑀫𑀸𑀮𑀸𑀬. 𑀮𑁄𑀫𑀲𑀸𑀬𑀸𑀢𑀺 𑀢𑀭𑀼𑀡𑀫𑀼𑀤𑀼𑀮𑁄𑀫𑀯𑀢𑀺𑀬𑀸. 𑀫𑁄𑀴𑀺𑀩𑀦𑁆𑀥𑀸𑀳𑀻𑀢𑀺 𑀫𑁄𑀴𑀺𑀁 𑀓𑀢𑁆𑀯𑀸 𑀩𑀦𑁆𑀥𑀓𑁂𑀲𑀸𑀳𑀺. 𑀧𑀭𑀺𑀘𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀸𑀭𑀺𑀘𑀸𑀭𑀺𑀓𑀁 𑀓𑀭𑁄𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀸 𑀢𑀢𑁆𑀣 𑀧𑀭𑀺𑀢𑁄 𑀘𑀸𑀭𑁂𑀦𑁆𑀢𑀺. 𑀮𑀸𑀫𑀓𑀦𑁆𑀢𑀺 𑀧𑀝𑀺𑀓𑀺𑀮𑀺𑀝𑁆𑀞𑀁. 𑀕𑀸𑀫𑀯𑀸𑀲𑀻𑀦𑀁 𑀩𑀸𑀮𑀸𑀦𑀁 𑀥𑀫𑁆𑀫𑀁. 𑀧𑀼𑀣𑀼𑀚𑁆𑀚𑀦𑀸𑀦𑀫𑀺𑀤𑀦𑁆𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀁. 𑀬𑀣𑀸 𑀧𑀦 𑀢𑀁 ‘‘𑀧𑀼𑀣𑀼𑀚𑁆𑀚𑀦𑀸𑀦𑀫𑀺𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀣𑀼𑀚𑁆𑀚𑀦𑁂𑀳𑀺 𑀲𑁂𑀯𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀅𑀦𑀭𑀺𑀬𑁂𑀳𑀺 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀯𑀸 𑀅𑀦𑀭𑀺𑀬𑀁. 𑀬𑀲𑁆𑀫𑀸 𑀧𑀦 𑀦𑀺𑀤𑁆𑀤𑁄𑀲𑀢𑁆𑀣𑁄 𑀅𑀭𑀺𑀬𑀢𑁆𑀣𑁄, 𑀢𑀲𑁆𑀫𑀸 ‘‘𑀅𑀦𑀭𑀺𑀬𑀦𑁆𑀢𑀺 𑀦 𑀦𑀺𑀤𑁆𑀤𑁄𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀢𑁆𑀣𑀲𑀁𑀬𑀼𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀯𑀺𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀲𑀜𑁆𑀳𑀺𑀢𑀁. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀦𑁆𑀢𑀺 𑀅𑀢𑁆𑀢𑀦𑁄 𑀓𑀺𑀮𑀫𑀣𑀲𑁆𑀲 𑀔𑁂𑀤𑀦𑀲𑁆𑀲 𑀅𑀦𑀼𑀬𑀼𑀜𑁆𑀚𑀦𑀁. 𑀤𑀼𑀓𑁆𑀔𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀤𑀼𑀓𑁆𑀔𑀁. 𑀤𑀼𑀓𑁆𑀔𑀫𑀦𑀁 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀫𑀁.

𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑁂𑀢𑁄 𑀯𑀼𑀘𑁆𑀘𑀢𑀺 𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁, 𑀅𑀥𑀺𑀘𑀺𑀢𑁆𑀢𑀁 𑀯𑀸, 𑀢𑀲𑁆𑀫𑀺𑀁 𑀅𑀪𑀺𑀘𑁂𑀢𑀲𑀺 𑀚𑀸𑀢𑀸𑀦𑀻𑀢𑀺 𑀆𑀪𑀺𑀘𑁂𑀢𑀲𑀺𑀓𑀸𑀦𑀺, 𑀅𑀪𑀺𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀺 𑀯𑀸. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀦𑀁, 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀲𑀼𑀔𑀯𑀺𑀳𑀸𑀭𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀭𑀽𑀧𑀸𑀯𑀘𑀭𑀛𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀦𑀺 𑀳𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀛𑀸𑀬𑀺𑀦𑁄 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀲𑀁𑀓𑀺𑀮𑀺𑀝𑁆𑀞𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀓𑀣𑀺𑀢𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄’’𑀢𑀺 𑀲𑀧𑁆𑀧𑀻𑀢𑀺𑀓𑀢𑁆𑀢𑀸, 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑀼𑀔𑀼𑀫𑀲𑀜𑁆𑀳𑀺𑀢𑀢𑁆𑀢𑀸 𑀘. 𑀲𑀳 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀓𑀣𑀺𑀢𑀁 ‘‘𑀘𑀢𑁆𑀢𑀸𑀭𑁄𑀫𑁂 𑀘𑀼𑀦𑁆𑀤 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁮𑁪) 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀪𑀸𑀯𑁂𑀦 𑀓𑀣𑀺𑀢𑀸. 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀸𑀦𑀺 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀚𑁆𑀛𑀸𑀦𑀸𑀦𑀻’’𑀢𑀺 𑀓𑀣𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀦𑀺𑀓𑀸𑀫𑁂𑀦 𑀮𑀸𑀪𑀻 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀮𑀸𑀪𑀻. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀣𑀸𑀓𑀸𑀫𑀮𑀸𑀪𑀻’’𑀢𑀺. 𑀅𑀤𑀼𑀓𑁆𑀔𑀮𑀸𑀪𑀻𑀢𑀺 𑀲𑀼𑀔𑁂𑀦𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀅𑀓𑀲𑀺𑀭𑀸𑀦𑀁 𑀯𑀺𑀧𑀼𑀮𑀸𑀦𑀁 𑀮𑀸𑀪𑀻, 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀮𑀸𑀪𑀻𑀬𑁂𑀯 𑀳𑁄𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀏𑀓𑀘𑁆𑀘𑁄 𑀢𑀣𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀧𑀸𑀭𑀺𑀩𑀦𑁆𑀥𑀓𑁂 𑀧𑀦 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀏𑀓𑀘𑁆𑀘𑁄 𑀢𑀣𑀸 𑀘 𑀲𑀫𑀸𑀧𑀚𑁆𑀚𑀢𑀺, 𑀧𑀸𑀭𑀺𑀩𑀦𑁆𑀥𑀓𑁂 𑀘 𑀅𑀓𑀺𑀘𑁆𑀙𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀦 𑀲𑀓𑁆𑀓𑁄𑀢𑀺 𑀦𑀸𑀴𑀺𑀓𑀬𑀦𑁆𑀢𑀁 𑀯𑀺𑀬 𑀬𑀣𑀸𑀧𑀭𑀺𑀘𑁆𑀙𑁂𑀤𑁂 𑀯𑀼𑀝𑁆𑀞𑀸𑀢𑀼𑀁. 𑀪𑀕𑀯𑀸 𑀧𑀦 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀧𑀸𑀭𑀺𑀩𑀦𑁆𑀥𑀓𑀢𑁆𑀢𑀸 𑀯𑀲𑀺𑀪𑀸𑀯𑀲𑁆𑀲 𑀲𑀫𑁆𑀫𑀤𑁂𑀯 𑀲𑀫𑀥𑀺𑀕𑀢𑀢𑁆𑀢𑀸 𑀲𑀩𑁆𑀩𑀫𑁂𑀢𑀁 𑀲𑀫𑁆𑀫𑀤𑁂𑀯 𑀲𑀓𑁆𑀓𑁄𑀢𑀺.

𑀅𑀦𑀼𑀬𑁄𑀕𑀤𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀦𑀸

𑁧𑁬𑁧. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸𑀢𑀺 𑀇𑀫𑀸𑀬 𑀮𑁄𑀓𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸𑀬 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁂𑀦 𑀳𑀺 𑀢𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀢𑀓𑀸𑀬 𑀏𑀯 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁄 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀭𑀺𑀕𑁆𑀕𑀳𑀯𑀲𑁂𑀦𑀸’’𑀢𑀺 𑀓𑁂𑀘𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀢𑀢𑁆𑀢𑀓𑀁 𑀏𑀯 𑀚𑀸𑀢𑀺𑀔𑁂𑀢𑁆𑀢𑀁. ‘‘𑀢𑀦𑁆𑀦𑀺𑀯𑀸𑀲𑀻𑀦𑀁𑀬𑁂𑀯 𑀘 𑀤𑁂𑀯𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 𑀯𑀤𑀦𑁆𑀢𑀺. 𑀧𑀓𑀫𑁆𑀧𑀦𑀤𑁂𑀯𑀢𑀽𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀚𑀸𑀢𑀘𑀓𑁆𑀓𑀯𑀸𑀴𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑀫𑀝𑁆𑀞𑀸𑀦𑀁 𑀚𑀸𑀢𑀺𑀔𑁂𑀢𑁆𑀢𑀁. 𑀲𑀭𑀲𑁂𑀦𑁂𑀯 𑀆𑀡𑀸𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀆𑀡𑀸𑀔𑁂𑀢𑁆𑀢𑀁. 𑀩𑀼𑀤𑁆𑀥𑀜𑀸𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀞𑀸𑀦𑀁 𑀯𑀺𑀲𑀬𑀔𑁂𑀢𑁆𑀢𑀁. 𑀑𑀓𑁆𑀓𑀫𑀦𑀸𑀤𑀻𑀦𑀁 𑀙𑀦𑁆𑀦𑀫𑁂𑀯 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀫𑀳𑀸𑀪𑀺𑀦𑀻𑀳𑀸𑀭𑀸𑀤𑀺𑀓𑀸𑀮𑁂𑀧𑀺 𑀢𑀲𑁆𑀲 𑀧𑀓𑀫𑁆𑀧𑀦𑀮𑀩𑁆𑀪𑀦𑀢𑁄. 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫, 𑀬𑀁 𑀏𑀓𑀘𑁆𑀘𑀁 𑀲𑀁𑀯𑀝𑁆𑀝𑀢𑀺, 𑀯𑀺𑀯𑀝𑁆𑀝𑀢𑀺 𑀘. 𑀆𑀡𑀸 𑀯𑀢𑁆𑀢𑀢𑀺 𑀢𑀦𑁆𑀦𑀺𑀯𑀸𑀲𑀺𑀤𑁂𑀯𑀢𑀸𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁂𑀦, 𑀢𑀜𑁆𑀘 𑀔𑁄 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁂𑀦𑁂𑀯, 𑀦 𑀅𑀥𑀺𑀧𑁆𑀧𑀸𑀬𑀯𑀲𑁂𑀦. ‘‘𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀘𑀦𑀢𑁄 𑀢𑀢𑁄 𑀧𑀭𑀫𑁆𑀧𑀺 𑀆𑀡𑀸 𑀧𑀯𑀢𑁆𑀢𑁂𑀬𑁆𑀬𑁂𑀯.

𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸, 𑀇𑀫𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀲𑀫𑀲𑀫𑁄 𑀲𑀫𑁆𑀩𑁄𑀥𑀺𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧) 𑀏𑀯𑀁 𑀧𑀼𑀝𑁆𑀞𑁄 ‘‘𑀅𑀳𑀁 𑀪𑀦𑁆𑀢𑁂 𑀦𑁄𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧) 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 (𑀤𑀻. 𑀦𑀺. 𑁩.𑁧𑁬𑁧; 𑀫. 𑀦𑀺. 𑁩.𑁧𑁨𑁯; 𑀅. 𑀦𑀺. 𑁧.𑁨𑁭𑁭; 𑀦𑁂𑀢𑁆𑀢𑀺. 𑁫𑁭; 𑀫𑀺. 𑀧. 𑁫.𑁧.𑁧) 𑀇𑀫𑀁 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀢𑁄𑀢𑀺 𑀲𑀳, 𑀏𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀓𑀸𑀮𑁄 𑀓𑀣𑀁 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺? 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀩𑁄𑀥𑀺𑀧𑀮𑁆𑀮𑀗𑁆𑀓𑁂’’𑀢𑀺𑀆𑀤𑀺𑀫𑀸𑀳. 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀯𑀤𑀢𑀺. 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄𑀯 𑀳𑁄𑀢𑀺 ‘‘𑀇𑀤𑀁 𑀩𑀼𑀤𑁆𑀥𑀸𑀦𑀁 𑀚𑀸𑀢𑀺𑀔𑁂𑀢𑁆𑀢’’𑀦𑁆𑀢𑀺. 𑀓𑁂𑀦 𑀧𑀦 𑀧𑀭𑀺𑀕𑁆𑀕𑀳𑁄 𑀓𑀢𑁄? 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀩𑁄𑀥𑀺𑀲𑀢𑁆𑀢𑁂𑀦. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂.

𑀢𑀺𑀧𑀺𑀝𑀓𑀅𑀦𑁆𑀢𑀭𑀥𑀸𑀦𑀓𑀣𑀸𑀯𑀡𑁆𑀡𑀦𑀸

‘‘𑀦 𑀦𑀺𑀯𑀸𑀭𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀡𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑁂𑀦 𑀲𑀸𑀲𑀦𑀲𑁆𑀲 𑀑𑀲𑀓𑁆𑀓𑀺𑀢𑀢𑁆𑀢𑀸 𑀅𑀧𑀭𑀲𑁆𑀲 𑀉𑀧𑁆𑀧𑀢𑁆𑀢𑀺 𑀮𑀤𑁆𑀥𑀸𑀯𑀲𑀭𑀸 𑀳𑁄𑀢𑀺. 𑀧𑀝𑀺𑀧𑀤𑀸𑀢𑀺 𑀧𑀝𑀺𑀯𑁂𑀥𑀸𑀯𑀳𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸.

‘‘𑀧𑀭𑀺𑀬𑀢𑁆𑀢𑀺 𑀧𑀫𑀸𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀩𑁄𑀥𑀺𑀲𑀢𑁆𑀢𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀳𑀻𑀦𑀁 𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀲𑁆𑀲 𑀳𑀺 𑀞𑀺𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀁 𑀦𑀺𑀤𑀲𑁆𑀲𑁂𑀢𑀺.

𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬𑀸𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺 (𑀧𑀸𑀭𑀸. 𑁩𑁯, 𑁪𑁪; 𑀧𑀸𑀘𑀺. 𑁪𑁫) 𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀺𑀓𑁆𑀔𑀸𑀧𑀤𑀧𑀸𑀴𑀺𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬. 𑀦𑀺𑀤𑀸𑀦𑀼𑀤𑁆𑀤𑁂𑀲𑀲𑀗𑁆𑀔𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀬𑀣𑀸 𑀯𑀸 𑀧𑀸𑀢𑀺𑀫𑁄𑀓𑁆𑀔𑁂 𑀥𑀭𑀦𑁆𑀢𑁂 𑀏𑀯 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘, 𑀏𑀯𑀁 𑀲𑀢𑀺 𑀏𑀯 𑀢𑀤𑀼𑀪𑀬𑁂 𑀧𑀸𑀢𑀺𑀫𑁄𑀓𑁆𑀔𑀁 𑀢𑀤𑀼𑀪𑀬𑀸𑀪𑀸𑀯𑁂 𑀧𑀸𑀢𑀺𑀫𑁄𑀓𑁆𑀔𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀢𑀬𑀺𑀤𑀁 𑀢𑀬𑀁 𑀲𑀸𑀲𑀦𑀲𑁆𑀲 𑀞𑀺𑀢𑀺𑀳𑁂𑀢𑀽𑀢𑀺 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼 𑀞𑀺𑀢𑀸𑀲𑀼 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻’’𑀢𑀺. 𑀬𑀲𑁆𑀫𑀸 𑀯𑀸 𑀉𑀧𑀲𑀫𑁆𑀧𑀤𑀸𑀥𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸, 𑀉𑀧𑀲𑀫𑁆𑀧𑀤𑀸 𑀘 𑀧𑀩𑁆𑀩𑀚𑁆𑀚𑀸𑀥𑀻𑀦𑀸, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑁂, 𑀢𑀁 𑀲𑀺𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀲𑀼 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀑𑀲𑀓𑁆𑀓𑀺𑀢𑀁 𑀦𑀸𑀫𑀸𑀢𑀺 𑀧𑀘𑁆𑀙𑀺𑀫𑀓𑀧𑀝𑀺𑀯𑁂𑀥𑀲𑀻𑀮𑀪𑁂𑀤𑀤𑁆𑀯𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀧𑀘𑁆𑀙𑀺𑀫𑀓𑀧𑀝𑀺𑀯𑁂𑀥𑀢𑁄 𑀧𑀭𑀁 𑀧𑀝𑀺𑀯𑁂𑀥𑀲𑀸𑀲𑀦𑀁, 𑀧𑀘𑁆𑀙𑀺𑀫𑀓𑀲𑀻𑀮𑀪𑁂𑀤𑀢𑁄 𑀧𑀭𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀸𑀲𑀦𑀅𑀦𑁆𑀢𑀭𑀳𑀺𑀢𑀯𑀡𑁆𑀡𑀦𑀸

𑀏𑀢𑁂𑀦 𑀓𑀸𑀫𑀁 ‘‘𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀭𑀺𑀬𑀢𑁆𑀢𑀺 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀭𑀺𑀬𑀢𑁆𑀢𑀺 𑀧𑀦 𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀓𑀸𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀢𑀺 𑀲𑀸 𑀅𑀧𑁆𑀧𑀢𑀺𑀝𑁆𑀞𑀸 𑀳𑁄𑀢𑀺 𑀧𑀝𑀺𑀯𑁂𑀥𑁄 𑀯𑀺𑀬, 𑀢𑀲𑁆𑀫𑀸 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀲𑀸𑀲𑀦𑁄𑀲𑀓𑁆𑀓𑀦𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀬𑀺𑀤𑀁 𑀲𑀸𑀲𑀦𑁄𑀲𑀓𑁆𑀓𑀦𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁄𑀲𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀸𑀢𑀽𑀦𑀁 𑀲𑀦𑁆𑀦𑀺𑀧𑀸𑀢𑀦𑀸𑀤𑀺 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀸𑀢𑀺 𑀭𑀲𑁆𑀫𑀺𑀬𑁄. 𑀓𑀸𑀭𑀼𑀜𑁆𑀜𑀦𑁆𑀢𑀺 𑀧𑀭𑀺𑀤𑁂𑀯𑀦𑀓𑀸𑀭𑀼𑀜𑁆𑀜𑀁. 𑀚𑀫𑁆𑀩𑀼𑀤𑀻𑀧𑁂, 𑀤𑀻𑀧𑀦𑁆𑀢𑀭𑁂𑀲𑀼, 𑀤𑁂𑀯𑀦𑀸𑀕𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀘 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀞𑀺𑀢𑀸𑀦𑀁 𑀥𑀸𑀢𑀽𑀦𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑁂 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀸𑀢𑀦𑀁, 𑀭𑀲𑁆𑀫𑀺𑀯𑀺𑀲𑁆𑀲𑀚𑁆𑀚𑀦𑀁, 𑀢𑀢𑁆𑀣 𑀢𑁂𑀚𑁄𑀥𑀸𑀢𑀼𑀬𑀸 𑀉𑀝𑁆𑀞𑀸𑀦𑀁, 𑀏𑀓𑀚𑀸𑀮𑀺𑀪𑀸𑀯𑁄 𑀘𑀸𑀢𑀺 𑀲𑀩𑁆𑀩𑀫𑁂𑀢𑀁 𑀲𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀘𑁆𑀙𑀭𑀺𑀬𑀢𑁆𑀢𑀸𑀢𑀺 𑀤𑁆𑀯𑀻𑀲𑀼𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀘𑁆𑀙𑀭𑀺𑀬𑀢𑁆𑀢𑀸𑀪𑀸𑀯𑀤𑁄𑀲𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸 𑀦𑀸𑀫 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀸𑀢𑀺 𑀢𑁂𑀲𑀁 𑀤𑁂𑀲𑀦𑀸𑀧𑀺 𑀏𑀓𑀭𑀲𑀸 𑀏𑀯𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄’’𑀢𑀺, 𑀏𑀢𑁂𑀦 𑀘 𑀅𑀦𑀘𑁆𑀙𑀭𑀺𑀬𑀢𑁆𑀢𑀫𑁂𑀯 𑀲𑀸𑀥𑁂𑀢𑀺. ‘‘𑀯𑀺𑀯𑀸𑀤𑀪𑀸𑀯𑀢𑁄’’𑀢𑀺 𑀏𑀢𑁂𑀦 𑀯𑀺𑀯𑀸𑀤𑀸𑀪𑀸𑀯𑀢𑁆𑀣𑀁 𑀤𑁆𑀯𑁂 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣𑀸𑀢𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 (𑀫𑀺. 𑀧. 𑁫.𑁧.𑁧). 𑀏𑀓𑀼𑀤𑁆𑀤𑁂𑀲𑁄𑀢𑀺 𑀏𑀓𑁄 𑀏𑀓𑀯𑀺𑀥𑁄 𑀅𑀪𑀺𑀦𑁆𑀦𑁄 𑀉𑀤𑁆𑀤𑁂𑀲𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀓𑀁 𑀏𑀯 𑀩𑀼𑀤𑁆𑀥𑀁 𑀥𑀸𑀭𑁂𑀢𑀻𑀢𑀺 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀢𑁂𑀦 𑀏𑀯𑀁𑀲𑀪𑀸𑀯𑀸 𑀏𑀢𑁂 𑀩𑀼𑀤𑁆𑀥𑀕𑀼𑀡𑀸, 𑀬𑁂𑀦 𑀤𑀼𑀢𑀺𑀬𑀁 𑀩𑀼𑀤𑁆𑀥𑀕𑀼𑀡𑀁 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑀸 𑀅𑀬𑀁 𑀮𑁄𑀓𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀺𑀲𑁂𑀲𑀦𑀺𑀧𑁆𑀨𑀦𑁆𑀦𑀸𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀲𑁂𑀲𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀦𑁆𑀢𑀺. ‘‘𑀦 𑀥𑀸𑀭𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀥𑀸𑀭𑀡𑀁 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀘𑀮𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀮𑁂𑀬𑁆𑀬𑀸𑀢𑀺 𑀧𑀭𑀺𑀧𑁆𑀨𑀦𑁆𑀤𑁂𑀬𑁆𑀬. 𑀓𑀫𑁆𑀧𑁂𑀬𑁆𑀬𑀸𑀢𑀺 𑀧𑀯𑁂𑀥𑁂𑀬𑁆𑀬. 𑀦𑀫𑁂𑀬𑁆𑀬𑀸𑀢𑀺 𑀏𑀓𑀧𑀲𑁆𑀲𑁂𑀦 𑀦𑀢𑀸 𑀪𑀯𑁂𑀬𑁆𑀬. 𑀑𑀡𑀫𑁂𑀬𑁆𑀬𑀸𑀢𑀺 𑀑𑀲𑀻𑀤𑁂𑀬𑁆𑀬. 𑀯𑀺𑀦𑀫𑁂𑀬𑁆𑀬𑀸𑀢𑀺 𑀯𑀺𑀯𑀺𑀥𑀸 𑀇𑀢𑁄 𑀘𑀺𑀢𑁄 𑀘 𑀦𑀫𑁂𑀬𑁆𑀬. 𑀯𑀺𑀓𑀺𑀭𑁂𑀬𑁆𑀬𑀸𑀢𑀺 𑀯𑀸𑀢𑁂𑀦 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑁂𑀬𑁆𑀬. 𑀯𑀺𑀥𑀫𑁂𑀬𑁆𑀬𑀸𑀢𑀺 𑀯𑀺𑀦𑀲𑁆𑀲𑁂𑀬𑁆𑀬. 𑀯𑀺𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀲𑀩𑁆𑀩𑀲𑁄 𑀯𑀺𑀤𑁆𑀥𑀲𑁆𑀢𑀸 𑀪𑀯𑁂𑀬𑁆𑀬. 𑀢𑀣𑀸𑀪𑀽𑀢𑀸 𑀘 𑀦 𑀓𑀢𑁆𑀣𑀘𑀺 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀆𑀳 ‘‘𑀦 𑀞𑀸𑀦𑀁 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺.

𑀇𑀤𑀸𑀦𑀺 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀼𑀧𑀸𑀤𑀺𑀓𑀸𑀢𑀺 𑀲𑀫𑀁 𑀉𑀤𑁆𑀥𑀁 𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑀼𑀧𑀸𑀤𑀺𑀓𑀸, 𑀉𑀤𑀓𑀲𑁆𑀲 𑀉𑀧𑀭𑀺 𑀲𑀫𑀁𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁂𑀦𑀸𑀢𑀺 𑀲𑀡𑁆𑀞𑀸𑀦𑁂𑀦. 𑀧𑀫𑀸𑀡𑁂𑀦𑀸𑀢𑀺 𑀆𑀭𑁄𑀳𑁂𑀦. 𑀓𑀺𑀲𑀣𑀽𑀮𑁂𑀦𑀸𑀢𑀺 𑀓𑀺𑀲𑀣𑀽𑀮𑀪𑀸𑀯𑁂𑀦, 𑀧𑀭𑀺𑀡𑀸𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀫𑁆𑀧𑀻𑀢𑀺 𑀤𑁆𑀯𑁂𑀧𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀲𑀭𑀻𑀭𑀪𑀸𑀭𑀁.

𑀙𑀸𑀤𑁂𑀦𑁆𑀢𑀦𑁆𑀢𑀺 𑀭𑁄𑀘𑁂𑀦𑁆𑀢𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀁. 𑀢𑀦𑁆𑀤𑀻𑀓𑀢𑁄𑀢𑀺 𑀢𑁂𑀦 𑀪𑁄𑀚𑀦𑁂𑀦 𑀢𑀦𑁆𑀤𑀻𑀪𑀽𑀢𑁄. 𑀅𑀦𑁄𑀡𑀫𑀺𑀢𑀤𑀡𑁆𑀟𑀚𑀸𑀢𑁄𑀢𑀺 𑀬𑀸𑀯𑀤𑀢𑁆𑀣𑀪𑁄𑀚𑀦𑁂𑀦 𑀑𑀡𑀫𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀦𑁄𑀡𑀫𑀺𑀢𑀤𑀡𑁆𑀟𑁄 𑀯𑀺𑀬 𑀚𑀸𑀢𑁄. 𑀲𑀓𑀺𑀁 𑀪𑀼𑀢𑁆𑀢𑁄𑀯𑀸𑀢𑀺 𑀏𑀓𑀁 𑀯𑀟𑁆𑀠𑀺𑀢𑀓𑀁 𑀪𑀼𑀢𑁆𑀢𑀫𑀢𑁆𑀢𑁄𑀯 𑀫𑀭𑁂𑀬𑁆𑀬𑀸𑀢𑀺. 𑀅𑀢𑀺𑀥𑀫𑁆𑀫𑀪𑀸𑀭𑁂𑀦𑀸𑀢𑀺 𑀥𑀫𑁆𑀫𑁂𑀦 𑀦𑀸𑀫 𑀧𑀣𑀯𑀻 𑀢𑀺𑀝𑁆𑀞𑁂𑀬𑁆𑀬, 𑀲𑀓𑀺𑀁 𑀢𑁂𑀦𑁂𑀯 𑀘𑀮𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺. 𑀧𑀼𑀦 𑀣𑁂𑀭𑁄 𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀓𑀼𑀝𑀼𑀫𑁆𑀩𑀁 𑀲𑀦𑁆𑀥𑀸𑀭𑁂𑀦𑁆𑀢𑀁, 𑀅𑀪𑀺𑀫𑀢𑀜𑁆𑀘 𑀮𑁄𑀓𑁂𑀦; 𑀢𑀁 𑀅𑀢𑁆𑀢𑀦𑁄 𑀕𑀭𑀼𑀲𑀪𑀸𑀯𑀢𑀸𑀬 𑀲𑀓𑀝𑀪𑀗𑁆𑀕𑀲𑁆𑀲 𑀓𑀸𑀭𑀡𑀁 𑀅𑀢𑀺𑀪𑀸𑀭𑀪𑀽𑀢𑀁 𑀤𑀺𑀝𑁆𑀞𑀫𑁂𑀯𑀁 𑀥𑀫𑁆𑀫𑁄 𑀘 𑀳𑀺𑀢𑀲𑀼𑀔𑀯𑀺𑀲𑁂𑀲𑁂𑀳𑀺 𑀢𑀁𑀲𑀫𑀗𑁆𑀕𑀺𑀦𑀁 𑀥𑀸𑀭𑁂𑀦𑁆𑀢𑁄, 𑀅𑀪𑀺𑀫𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀕𑀫𑁆𑀪𑀻𑀭𑀧𑁆𑀧𑀫𑁂𑀬𑁆𑀬𑀪𑀸𑀯𑁂𑀦 𑀕𑀭𑀼𑀲𑀪𑀸𑀯𑀢𑁆𑀢𑀸 𑀅𑀢𑀺𑀪𑀸𑀭𑀪𑀽𑀢𑁄 𑀧𑀣𑀯𑀺𑀘𑀮𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥 𑀫𑀳𑀸𑀭𑀸𑀚 𑀤𑁆𑀯𑁂 𑀲𑀓𑀝𑀸’’𑀢𑀺𑀆𑀤𑀺𑀫𑀸𑀳, 𑀏𑀢𑁂𑀦𑁂𑀯 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀸𑀤𑀺𑀓𑀸𑀮𑁂 𑀧𑀣𑀯𑀺𑀓𑀫𑁆𑀧𑀦𑀓𑀸𑀭𑀡𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀫𑀸, 𑀏𑀓𑀲𑁆𑀲 𑀯𑀸 𑀲𑀓𑀝𑀲𑁆𑀲 𑀭𑀢𑀦𑀁 𑀢𑀲𑁆𑀫𑀸 𑀲𑀓𑀝𑀢𑁄 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀑𑀲𑀸𑀭𑀺𑀢𑀦𑁆𑀢𑀺 𑀉𑀘𑁆𑀘𑀸𑀭𑀺𑀢𑀁, 𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀕𑁆𑀕𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀕𑁆𑀕𑁄.

𑀲𑀪𑀸𑀯𑀧𑀓𑀢𑀺𑀓𑀸𑀢𑀺 𑀲𑀪𑀸𑀯𑀪𑀽𑀢𑀸 𑀅𑀓𑀺𑀢𑁆𑀢𑀺𑀫𑀸 𑀧𑀓𑀢𑀺𑀓𑀸. 𑀓𑀸𑀭𑀡𑀫𑀳𑀦𑁆𑀢𑀢𑁆𑀢𑀸𑀢𑀺 𑀓𑀸𑀭𑀡𑀸𑀦𑀁 𑀫𑀳𑀦𑁆𑀢𑀢𑀸𑀬, 𑀫𑀳𑀦𑁆𑀢𑁂𑀳𑀺 𑀩𑀼𑀤𑁆𑀥𑀓𑀭𑀥𑀫𑁆𑀫𑁂𑀳𑀺 𑀧𑀸𑀭𑀫𑀺𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀺𑀆𑀤𑀻𑀦𑀺 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀫𑀳𑀦𑁆𑀢𑀸 𑀘 𑀲𑀓𑁆𑀓𑀪𑀸𑀯𑀸𑀤𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁂𑀓𑀸𑀯, 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀫𑀳𑀦𑁆𑀢𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁄 𑀏𑀯. 𑀓𑁄 𑀘 𑀢𑀲𑁆𑀲 𑀯𑀺𑀲𑀬𑁄? 𑀩𑀼𑀤𑁆𑀥𑀪𑀽𑀫𑀺, 𑀬𑀸𑀯𑀢𑀓𑀁 𑀯𑀸 𑀜𑁂𑀬𑁆𑀬𑀫𑁂𑀯𑀁 ‘‘𑀆𑀓𑀸𑀲𑁄 𑀯𑀺𑀬 𑀅𑀦𑀦𑁆𑀢𑀯𑀺𑀲𑀬𑁄 𑀪𑀕𑀯𑀸 𑀏𑀓𑁄 𑀏𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑁄 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑀮𑁄𑀓𑀥𑀸𑀢𑀼𑀢𑁄 𑀅𑀜𑁆𑀜𑁂𑀲𑀼𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀢𑀁 𑀅𑀢𑁆𑀢𑀦𑁄 𑀩𑁆𑀬𑀸𑀓𑀭𑀡𑀁 𑀅𑀯𑀺𑀧𑀭𑀻𑀢𑀢𑁆𑀣𑀢𑀸𑀬 𑀲𑀢𑁆𑀣𑀭𑀺 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀯𑀳𑀫𑁆𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀥𑀫𑁆𑀫𑀲𑁆𑀲…𑀧𑁂… 𑀧𑀝𑀺𑀧𑀤’’𑀦𑁆𑀢𑀺. 𑀯𑀸𑀤𑀲𑁆𑀲 𑀅𑀦𑀼𑀧𑀢𑀦𑀁 𑀅𑀦𑀼𑀧𑁆𑀧𑀯𑀢𑁆𑀢𑀺 𑀯𑀸𑀤𑀸𑀦𑀼𑀧𑀸𑀢𑁄𑀢𑀺 𑀆𑀳 ‘‘𑀯𑀸𑀤𑁄𑀬𑁂𑀯𑀸’’𑀢𑀺.

𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀯𑀡𑁆𑀡𑀦𑀸

𑁧𑁬𑁨. 𑀉𑀤𑀸𑀬𑀻𑀢𑀺 𑀦𑀸𑀫𑀁, 𑀫𑀳𑀸𑀲𑀭𑀻𑀭𑀢𑀸𑀬 𑀧𑀦 𑀣𑁂𑀭𑁄 𑀫𑀳𑀸𑀉𑀤𑀸𑀬𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀬𑀲𑁆𑀲 𑀯𑀲𑁂𑀦 𑀯𑀺𑀦𑀬𑁂 𑀦𑀺𑀲𑀻𑀤𑀦𑀲𑁆𑀲 𑀤𑀲𑀸 𑀅𑀦𑀼𑀜𑁆𑀜𑀸𑀢𑀸. 𑀧𑀜𑁆𑀘𑀯𑀡𑁆𑀡𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀪𑁂𑀤𑀢𑁄 𑀧𑀜𑁆𑀘𑀧𑁆𑀧𑀓𑀸𑀭𑀸. 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀅𑀢𑀺𑀩𑁆𑀬𑀸𑀧𑀺𑀢𑀤𑁂𑀳𑁄 ‘‘𑀦𑀺𑀭𑀦𑁆𑀢𑀭𑀁 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄’’𑀢𑀺 𑀯𑀼𑀢𑁆𑀢𑁄, 𑀢𑀢𑁄 𑀏𑀯𑀲𑁆𑀲𑀸 𑀧𑀭𑀺𑀬𑀸𑀬𑀢𑁄 𑀨𑀭𑀡𑀮𑀓𑁆𑀔𑀡𑀫𑁆𑀧𑀺 𑀯𑀼𑀢𑁆𑀢𑀁. 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀓𑀲𑀺𑀭𑁂𑀦𑁂𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁦𑁧; 𑁫.𑁧𑁫𑁮; 𑀅. 𑀦𑀺. 𑁭.𑁭𑁧) 𑀯𑀺𑀬 𑀇𑀥 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀦𑀺𑀢𑁆𑀢𑀡𑁆𑀳𑀢𑀸’’𑀢𑀺. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀧𑁆𑀧𑀓𑀸𑀭𑁂𑀳𑀺.

𑀦 𑀦 𑀓𑀣𑁂𑀢𑀺 𑀓𑀣𑁂𑀢𑀺𑀬𑁂𑀯. 𑀘𑀻𑀯𑀭𑀸𑀤𑀺𑀳𑁂𑀢𑀼𑀦𑁆𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀸𑀤𑀺𑀳𑁂𑀢𑀼𑀪𑀽𑀢𑀁 𑀧𑀬𑀼𑀢𑁆𑀢𑀓𑀣𑀁 𑀦 𑀓𑀣𑁂𑀢𑀺. 𑀯𑁂𑀦𑁂𑀬𑁆𑀬𑀯𑀲𑁂𑀦𑀸𑀢𑀺 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦. 𑀓𑀣𑁂𑀢𑀺 ‘‘𑀏𑀯𑀫𑀬𑀁 𑀯𑀺𑀦𑀬𑀁 𑀉𑀧𑀕𑀘𑁆𑀙𑀢𑀻’’𑀢𑀺. ‘‘𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀻’’𑀢𑀺𑀆𑀤𑀺𑀓𑀸 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀥. 𑀧. 𑁩𑁫𑁩) 𑀕𑀸𑀣𑀸𑀧𑀺 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀓𑀸 (𑀲𑀁. 𑀦𑀺. 𑁨.𑁨𑁧, 𑁨𑁨) 𑀲𑀼𑀢𑁆𑀢𑀦𑁆𑀢𑀸𑀧𑀺.

𑁧𑁬𑁩. 𑀅𑀪𑀺𑀓𑁆𑀔𑀡𑀦𑁆𑀢𑀺 𑀅𑀪𑀺𑀡𑁆𑀳𑀁. 𑀦𑀺𑀕𑁆𑀕𑀸𑀣𑀓𑀢𑁆𑀢𑀸, 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸 𑀘 ‘‘𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀏𑀯𑀸𑀢𑀺.

𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.