𑁪. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀯𑀡𑁆𑀡𑀦𑀸

𑁧𑁧𑁧. 𑀏𑀢𑁆𑀣𑀸𑀢𑀺 ‘‘𑀧𑀼𑀩𑁆𑀩𑀸𑀭𑀸𑀫𑁂, 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂. 𑀓𑁄𑀬𑀁 𑀧𑀼𑀩𑁆𑀩𑀸𑀭𑀸𑀫𑁄, 𑀓𑀣𑀜𑁆𑀘 𑀧𑀼𑀩𑁆𑀩𑀸𑀭𑀸𑀫𑁄, 𑀓𑀸 𑀘 𑀫𑀺𑀕𑀸𑀭𑀫𑀸𑀢𑀸, 𑀓𑀣𑀜𑁆𑀘𑀲𑁆𑀲𑀸 𑀧𑀸𑀲𑀸𑀤𑁄 𑀅𑀳𑁄𑀲𑀻𑀢𑀺 𑀏𑀢𑀲𑁆𑀫𑀺𑀁 𑀅𑀦𑁆𑀢𑁄𑀮𑀻𑀦𑁂 𑀅𑀦𑀼𑀬𑁄𑀕𑁂. 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑁂𑀦𑁂𑀯 𑀅𑀦𑀼𑀧𑀼𑀩𑁆𑀩𑀺𑀓𑀣𑀸. 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀺𑀁 𑀤𑀺𑀲𑁆𑀯𑀸𑀦 𑀢𑀢𑁆𑀣 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀢𑀫𑁂𑀯𑀢𑁆𑀣𑀁 𑀧𑀼𑀭𑀓𑁆𑀔𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸. 𑀫𑁂𑀡𑁆𑀟𑀓𑀧𑀼𑀢𑁆𑀢𑀲𑁆𑀲𑀸𑀢𑀺 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲. 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺 𑀢𑀣𑀸 𑀓𑀢𑀸𑀥𑀺𑀓𑀸𑀭𑀢𑁆𑀢𑀸.

𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺 𑀅𑀢𑁆𑀢𑀦𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀕𑀭𑀼𑀝𑁆𑀞𑀸𑀦𑀺𑀬𑀢𑁆𑀢𑀸. 𑀉𑀧𑀬𑁄𑀕𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑁆𑀧𑁂𑀢𑀩𑁆𑀩𑀝𑁆𑀞𑀸𑀦𑁂 𑀅𑀧𑁆𑀧𑀦𑀸𑀯𑀲𑁂𑀦 𑀯𑀺𑀦𑀺𑀬𑁄𑀕𑀁 𑀅𑀕𑀫𑀁𑀲𑀼. 𑀅𑀜𑁆𑀜𑁂𑀳𑀺 𑀘 𑀯𑁂𑀴𑀼𑀭𑀺𑀬𑀮𑁄𑀳𑀺𑀢𑀗𑁆𑀓𑀫𑀲𑀸𑀭𑀕𑀮𑁆𑀮𑀸𑀤𑀻𑀳𑀺. 𑀪𑀲𑁆𑀲𑀢𑀻𑀢𑀺 𑀑𑀢𑀭𑀢𑀺. 𑀲𑀼𑀤𑁆𑀥𑀧𑀸𑀲𑀸𑀤𑁄𑀯 𑀦 𑀲𑁄𑀪𑀢𑀻𑀢𑀺 𑀓𑁂𑀯𑀮𑁄 𑀏𑀓𑀧𑀸𑀲𑀸𑀤𑁄 𑀏𑀯 𑀯𑀺𑀳𑀸𑀭𑁄 𑀦 𑀲𑁄𑀪𑀢𑀺. 𑀦𑀺𑀬𑀽𑀳𑀸𑀦𑀺 𑀩𑀳𑀽𑀦𑀺 𑀦𑀻𑀳𑀭𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀲𑁂𑀦𑀸𑀲𑀦𑀸𑀦𑀺 ‘‘𑀤𑀼𑀯𑀟𑁆𑀠𑀕𑁂𑀳𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀫𑀚𑁆𑀛𑁂 𑀕𑀩𑁆𑀪𑁄 𑀲𑀫𑀦𑁆𑀢𑀢𑁄 𑀅𑀦𑀼𑀧𑀭𑀺𑀬𑀸𑀬𑀢𑁄𑀢𑀺 𑀏𑀯𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀟𑁆𑀠𑁂𑀢𑁆𑀯𑀸 𑀓𑀢𑀲𑁂𑀦𑀸𑀲𑀦𑀸𑀦𑀺 𑀤𑀼𑀯𑀟𑁆𑀠𑀕𑁂𑀳𑀸𑀦𑀺. 𑀘𑀽𑀴𑀧𑀸𑀲𑀸𑀤𑀸𑀢𑀺 𑀔𑀼𑀤𑁆𑀤𑀓𑀧𑀸𑀲𑀸𑀤𑀸.

𑀉𑀢𑁆𑀢𑀭𑀤𑁂𑀯𑀻𑀯𑀺𑀳𑀸𑀭𑁄 𑀦𑀸𑀫 𑀦𑀕𑀭𑀲𑁆𑀲 𑀧𑀸𑀘𑀻𑀦𑀤𑁆𑀯𑀸𑀭𑀲𑀫𑀻𑀧𑁂 𑀓𑀢𑀯𑀺𑀳𑀸𑀭𑁄.

𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀦𑁂𑀯 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀆𑀧𑀢𑁆𑀢𑀺𑀬𑀸 𑀆𑀧𑀦𑁆𑀦𑀸𑀬 𑀅𑀪𑀸𑀯𑀢𑁄 𑀦 𑀆𑀧𑀢𑁆𑀢𑀺𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑀺. 𑀪𑀺𑀓𑁆𑀔𑀼𑀪𑀸𑀯𑀦𑁆𑀢𑀺 𑀉𑀧𑀲𑀫𑁆𑀧𑀤𑀁. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀤𑀻𑀖𑀦𑀺𑀓𑀸𑀬𑁂 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 𑀲𑀼𑀢𑁆𑀯𑀸.

𑁧𑁧𑁩. 𑀅𑀦𑀼𑀯𑀢𑁆𑀢𑀫𑀸𑀦𑀸 𑀘𑀗𑁆𑀓𑀫𑀺𑀁𑀲𑀼 𑀅𑀦𑀦𑀼𑀘𑀗𑁆𑀓𑀫𑀦𑁂 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀼𑀘𑁆𑀙𑀦𑀸𑀤𑀻𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀢𑀭𑁄’’𑀢𑀺. 𑀅𑀢𑁆𑀣𑀸𑀢𑀺 𑀪𑀯𑀢𑁆𑀣. 𑀓𑀼𑀮𑀲𑀫𑁆𑀧𑀦𑁆𑀦𑀸𑀢𑀺 𑀲𑀫𑁆𑀧𑀦𑁆𑀦𑀓𑀼𑀮𑀸 𑀉𑀤𑀺𑀢𑁄𑀤𑀺𑀢𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀢𑀺 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀼𑀧𑀤𑁆𑀤𑀼𑀢𑀸 𑀏𑀯 𑀩𑁆𑀭𑀸𑀳𑁆𑀫𑀡𑀓𑀼𑀮𑀸. 𑀢𑁂𑀦𑀸𑀳 ‘‘𑀪𑁄𑀕𑀸𑀤𑀺𑀲𑀫𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺. 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀘𑀸 𑀳𑀼𑀢𑁆𑀯𑀸 ‘‘𑀇𑀫𑀁 𑀯𑀲𑀮𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀁𑀲𑀽’’𑀢𑀺𑀆𑀤𑀺𑀦𑀸 𑀚𑀸𑀢𑀺𑀆𑀤𑀻𑀦𑀺 𑀖𑀝𑁆𑀝𑁂𑀦𑁆𑀢𑀸 𑀅𑀓𑁆𑀓𑁄𑀲𑀦𑁆𑀢𑀺. 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀧𑀭𑀺𑀪𑀯𑀺𑀢𑁆𑀯𑀸 𑀪𑀸𑀲𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬𑀸𑀢𑀺 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀲𑁆𑀲 𑀅𑀦𑀼𑀭𑀽𑀧𑀸𑀬. 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀘𑁆𑀙𑀺𑀚𑁆𑀚 𑀧𑀯𑀢𑁆𑀢𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀸 𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀦 𑀳𑁄𑀢𑀺 𑀔𑀡𑁆𑀟𑀪𑀸𑀯𑀢𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑁆𑀢𑀭𑀸’’𑀢𑀺𑀆𑀤𑀺.

𑀅𑀧𑁆𑀧𑀢𑀺𑀝𑁆𑀞𑀢𑀸𑀬𑀸𑀢𑀺 𑀅𑀧𑀲𑁆𑀲𑀬𑀭𑀳𑀺𑀢𑀢𑁆𑀢𑀸. 𑀯𑀺𑀪𑀺𑀦𑁆𑀦𑁄𑀢𑀺 𑀯𑀺𑀦𑀝𑁆𑀞𑁄.

𑀇𑀢𑀭𑁂 𑀢𑀬𑁄 𑀯𑀡𑁆𑀡𑀸𑀢𑀺 𑀔𑀢𑁆𑀢𑀺𑀬𑀸𑀤𑀬𑁄 𑀯𑀡𑁆𑀡𑀸 𑀳𑀻𑀦𑀸. 𑀦𑀦𑀼 𑀔𑀢𑁆𑀢𑀺𑀬𑀸𑀯 𑀲𑁂𑀝𑁆𑀞𑀸 𑀯𑀡𑁆𑀡𑀸 𑀬𑀣𑀸 𑀩𑀼𑀤𑁆𑀥𑀸 𑀏𑀢𑀭𑀳𑀺 𑀔𑀢𑁆𑀢𑀺𑀬𑀓𑀼𑀮𑁂 𑀏𑀯 𑀉𑀧𑁆𑀧𑀦𑁆𑀦𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂 𑀧𑀦 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀪𑀺𑀫𑀸𑀦𑁂𑀦, 𑀫𑀺𑀘𑁆𑀙𑀸𑀕𑀸𑀳𑁂𑀦 𑀘 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀯𑀘𑀦𑀫𑀢𑁆𑀢𑀁. ‘‘𑀲𑀼𑀚𑁆𑀛𑀦𑁆𑀢𑀻𑀢𑀺 𑀲𑀼𑀤𑁆𑀥𑀸 𑀳𑁄𑀦𑁆𑀢𑀺, 𑀦 𑀦𑀺𑀦𑁆𑀤𑀁 𑀕𑀭𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀦𑁆𑀢𑀺, 𑀦 𑀲𑁂𑀲𑀸 𑀯𑀡𑁆𑀡𑀸 𑀅𑀲𑀼𑀓𑁆𑀓𑀚𑀸𑀢𑀺𑀓𑀢𑁆𑀢𑀸, 𑀫𑀦𑁆𑀢𑀚𑁆𑀛𑁂𑀦𑀸𑀪𑀸𑀯𑀢𑁄 𑀘𑀸𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸 𑀯𑁂𑀤𑀯𑀘𑀦𑀢𑁄 𑀚𑀸𑀢𑀸𑀢𑀺 𑀫𑀼𑀔𑀢𑁄 𑀚𑀸𑀢𑀸. 𑀢𑀢𑁄 𑀏𑀯 𑀩𑁆𑀭𑀳𑁆𑀫𑀼𑀦𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑁂𑀤𑀯𑀘𑀦𑀢𑁄 𑀯𑀺𑀚𑀸𑀢𑀸𑀢𑀺 𑀩𑁆𑀭𑀳𑁆𑀫𑀚𑀸. 𑀢𑁂𑀦 𑀤𑀼𑀯𑀺𑀥𑁂𑀦𑀸𑀧𑀺 𑀦𑀺𑀫𑁆𑀫𑀺𑀢𑀸𑀢𑀺 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸. 𑀯𑁂𑀤𑀯𑁂𑀤𑀗𑁆𑀕𑀸𑀤𑀺𑀩𑁆𑀭𑀳𑁆𑀫𑀤𑀸𑀬𑀚𑁆𑀚𑀁 𑀅𑀭𑀳𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀤𑀸𑀬𑀸𑀤𑀸. 𑀫𑀼𑀡𑁆𑀟𑀓𑁂 𑀲𑀫𑀡𑀓𑁂𑀢𑀺 𑀏𑀢𑁆𑀣 𑀓-𑀓𑀸𑀭𑁄 𑀕𑀭𑀳𑀸𑀬𑀦𑁆𑀢𑀺 𑀆𑀳 ‘‘𑀦𑀺𑀦𑁆𑀤𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀯𑀤𑀦𑁆𑀢𑀻’’𑀢𑀺. 𑀇𑀩𑁆𑀪𑁂𑀢𑀺 𑀲𑀼𑀤𑁆𑀤𑁂, 𑀢𑁂 𑀧𑀦 𑀖𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀦𑀺𑀳𑀻𑀦𑀢𑀭𑀸𑀢𑀺 𑀆𑀳 ‘‘𑀕𑀳𑀧𑀢𑀺𑀓𑁂’’𑀢𑀺. 𑀓𑀡𑁆𑀳𑁂𑀢𑀺 𑀓𑀡𑁆𑀳𑀚𑀸𑀢𑀺𑀓𑁂. 𑀩𑀦𑁆𑀥𑀦𑀝𑁆𑀞𑁂𑀦 𑀩𑀦𑁆𑀥𑀼, 𑀓𑀲𑁆𑀲 𑀧𑀦 𑀩𑀦𑁆𑀥𑀽𑀢𑀺 𑀆𑀳 ‘‘𑀫𑀸𑀭𑀲𑁆𑀲 𑀩𑀦𑁆𑀥𑀼𑀪𑀽𑀢𑁂’’𑀢𑀺. 𑀧𑀸𑀤𑀸𑀧𑀘𑁆𑀘𑁂𑀢𑀺 𑀧𑀸𑀤𑀢𑁄 𑀚𑀸𑀢𑀸𑀧𑀘𑁆𑀘𑁂. 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸, 𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀊𑀭𑀽𑀳𑀺 𑀯𑁂𑀲𑁆𑀲𑀸, 𑀧𑀸𑀤𑀢𑁄 𑀲𑀼𑀤𑁆𑀤𑀸’’𑀢𑀺.

𑁧𑁧𑁪. 𑀬𑀲𑁆𑀫𑀸 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀘𑀢𑀼𑀯𑀡𑁆𑀡𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀺, 𑀲𑀩𑁆𑀩𑁂𑀯 𑀲𑀢𑁆𑀢𑀸 𑀏𑀓𑀲𑀤𑀺𑀲𑀸, 𑀅𑀧𑀭𑀪𑀸𑀕𑁂 𑀧𑀦 𑀢𑁂𑀲𑀁 𑀧𑀬𑁄𑀕𑀪𑁂𑀤𑀯𑀲𑁂𑀦 𑀅𑀳𑁄𑀲𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑁄𑀭𑀸𑀡𑀁…𑀧𑁂… 𑀅𑀚𑀸𑀦𑀦𑁆𑀢𑀸’’𑀢𑀺. 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀯𑀺𑀦𑀺𑀯𑁂𑀞𑀦𑀢𑁆𑀣𑀁. 𑀧𑀼𑀢𑁆𑀢𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 ‘‘𑀏𑀯𑀁 𑀫𑀬𑀁 𑀧𑁂𑀢𑁆𑀢𑀺𑀓𑀁 𑀇𑀡𑀁 𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀼𑀢𑁆𑀢𑀧𑁆𑀧𑀝𑀺𑀮𑀸𑀪𑀸𑀬. 𑀅𑀬𑀜𑁆𑀳𑁂𑀢𑁆𑀣 𑀥𑀫𑁆𑀫𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀸𑀲𑀬𑁄. 𑀲𑀜𑁆𑀚𑀸𑀢𑀧𑀼𑀧𑁆𑀨𑀸𑀢𑀺 𑀭𑀚𑀲𑁆𑀲𑀮𑀸. 𑀇𑀢𑁆𑀣𑀻𑀦𑀜𑁆𑀳𑀺 𑀓𑀼𑀫𑀸𑀭𑀺𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑀢𑁄 𑀑𑀭𑀁 𑀅𑀲𑀢𑀺 𑀯𑀺𑀩𑀦𑁆𑀥𑁂 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁂 𑀢𑀢𑀺𑀬𑁂 𑀆𑀯𑀢𑁆𑀢𑁂 𑀓𑀢𑀺𑀧𑀬𑀸 𑀮𑁄𑀳𑀺𑀢𑀧𑀻𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀅𑀕𑁆𑀕𑀳𑀺𑀢𑀧𑀼𑀧𑁆𑀨𑀸 𑀏𑀯 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺, 𑀢𑀢𑁆𑀣 𑀉𑀢𑀼𑀲𑀫𑀜𑁆𑀜𑀸, 𑀧𑀼𑀧𑁆𑀨𑀲𑀫𑀜𑁆𑀜𑀸 𑀘. 𑀦𑁂𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀲𑀘𑁆𑀘𑀯𑀘𑀦𑀁 𑀲𑀺𑀬𑀸𑀢𑀺 ‘‘𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀘𑁆𑀘𑀁 𑀬𑀤𑀺 𑀲𑀺𑀬𑀸, 𑀩𑁆𑀭𑀸𑀳𑁆𑀫𑀡𑀻𑀦𑀁…𑀧𑁂… 𑀫𑀼𑀔𑀁 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀅𑀢𑁆𑀣𑀺.

𑀘𑀢𑀼𑀯𑀡𑁆𑀡𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑁧𑁧𑁫. 𑀫𑀼𑀔𑀘𑁆𑀙𑁂𑀤𑀓𑀯𑀸𑀤𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸’’𑀢𑀺 𑀯𑀸𑀤𑀲𑁆𑀲 𑀙𑁂𑀤𑀓𑀯𑀸𑀤𑀁. 𑀅𑀭𑀺𑀬𑀪𑀸𑀯𑁂 𑀅𑀲𑀫𑀢𑁆𑀣𑀸𑀢𑀺 𑀅𑀦𑀭𑀺𑀬𑀪𑀸𑀯𑀸𑀯𑀳𑀸. 𑀧𑀓𑀢𑀺𑀓𑀸𑀴𑀓𑀸𑀢𑀺 𑀲𑀪𑀸𑀯𑁂𑀦𑁂𑀯 𑀦 𑀲𑀼𑀤𑁆𑀥𑀸. 𑀓𑀡𑁆𑀳𑁄𑀢𑀺 𑀓𑀺𑀮𑀺𑀝𑁆𑀞𑁄 𑀉𑀧𑀢𑀸𑀧𑀓𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑁄𑀢𑀺 𑀅𑀢𑁆𑀣𑁄’’𑀢𑀺.

𑀲𑀼𑀓𑁆𑀓𑀪𑀸𑀯𑁄 𑀦𑀸𑀫 𑀧𑀭𑀺𑀲𑀼𑀤𑁆𑀥𑀢𑀸𑀢𑀺 𑀆𑀳 ‘‘𑀦𑀺𑀓𑁆𑀓𑀺𑀮𑁂𑀲𑀪𑀸𑀯𑁂𑀦 𑀧𑀡𑁆𑀟𑀭𑀸’’𑀢𑀺. 𑀲𑀼𑀓𑁆𑀓𑁄𑀢𑀺 𑀦 𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀢𑀸𑀧𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀔𑁄𑀢𑀺 𑀅𑀢𑁆𑀣𑁄’’𑀢𑀺.

𑁧𑁧𑁬. 𑀉𑀪𑀬𑀯𑁄𑀓𑀺𑀡𑁆𑀡𑁂𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀪𑀬𑁂𑀲𑀼 𑀯𑁄𑀓𑀺𑀡𑁆𑀡𑁂𑀲𑀽’’𑀢𑀺. 𑀫𑀺𑀲𑁆𑀲𑀻𑀪𑀽𑀢𑁂𑀲𑀽𑀢𑀺 ‘‘𑀓𑀤𑀸𑀘𑀺 𑀓𑀡𑁆𑀳𑀸 𑀥𑀫𑁆𑀫𑀸, 𑀓𑀤𑀸𑀘𑀺 𑀲𑀼𑀓𑁆𑀓𑀸 𑀥𑀫𑁆𑀫𑀸’’𑀢𑀺 𑀏𑀯𑀁 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂, 𑀏𑀓𑀲𑁆𑀫𑀺𑀁𑀬𑁂𑀯 𑀘 𑀅𑀢𑁆𑀢𑀪𑀸𑀯𑁂 𑀧𑀯𑀢𑁆𑀢𑀺𑀬𑀸 𑀫𑀺𑀲𑁆𑀲𑀻𑀪𑀽𑀢𑁂𑀲𑀼, 𑀦 𑀧𑀦 𑀏𑀓𑀚𑁆𑀛𑀁 𑀧𑀯𑀢𑁆𑀢𑀺𑀬𑀸. 𑀏𑀢𑁆𑀣𑀸𑀢𑀺 𑀅𑀦𑀦𑁆𑀢𑀭𑀯𑀼𑀢𑁆𑀢𑀥𑀫𑁆𑀫𑀸𑀯 𑀅𑀦𑁆𑀯𑀸𑀥𑀺𑀝𑁆𑀞𑀸𑀢𑀺 𑀆𑀳 ‘‘𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑁂𑀲𑀽’’𑀢𑀺. 𑀬𑀲𑁆𑀫𑀸 𑀘 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀦 𑀘𑁂𑀯 𑀢𑁂 𑀥𑀫𑁆𑀫𑁂 𑀅𑀢𑀺𑀓𑁆𑀓𑀦𑁆𑀢𑀸, 𑀬𑀸𑀬 𑀘 𑀧𑀝𑀺𑀧𑀤𑀸𑀬 𑀅𑀢𑀺𑀓𑁆𑀓𑀫𑁂𑀬𑁆𑀬𑀼𑀁, 𑀲𑀸𑀧𑀺 𑀢𑁂𑀲𑀁 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀢𑁆𑀢𑀫𑀸𑀦𑀸𑀧𑀻’’𑀢𑀺. 𑀦𑀸𑀦𑀼𑀚𑀸𑀦𑀦𑁆𑀢𑀺 𑀅𑀬𑀣𑀸𑀪𑀼𑀘𑁆𑀘𑀯𑀸𑀤𑀪𑀸𑀯𑀢𑁄. 𑀅𑀦𑀼𑀚𑀸𑀦𑀦𑀜𑁆𑀘 𑀦𑀸𑀫 𑀅𑀩𑁆𑀪𑀦𑀼𑀫𑁄𑀤𑀦𑀦𑁆𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀦𑀸𑀦𑀼𑀫𑁄𑀤𑀦𑁆𑀢𑀺, 𑀦 𑀧𑀲𑀁𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀲𑀦𑁆𑀢𑀺 𑀧𑀦 𑀲𑀫𑁆𑀩𑀦𑁆𑀥𑁂𑀧𑀺 𑀯𑀸 𑀲𑀸𑀫𑀺𑀯𑀘𑀦𑀁. 𑀢𑁂 𑀘 𑀩𑁆𑀭𑀸𑀳𑁆𑀫𑀡𑀸 𑀦 𑀏𑀯𑀭𑀽𑀧𑀸 𑀦 𑀏𑀤𑀺𑀲𑀸, 𑀬𑀸𑀤𑀺𑀲𑁄 𑀅𑀭𑀳𑀸 𑀏𑀓𑀤𑁂𑀲𑁂𑀦𑀸𑀧𑀺 𑀢𑁂𑀦 𑀢𑁂𑀲𑀁 𑀲𑀤𑀺𑀲𑀢𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦 𑀦𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺 𑀯𑀸𑀤𑀁 𑀯𑀺𑀜𑁆𑀜𑀽 𑀬𑀣𑀸𑀪𑀽𑀢𑀯𑀸𑀤𑀺𑀦𑁄 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀦𑀸𑀦𑀼𑀚𑀸𑀦𑀦𑁆𑀢𑀺.

𑀆𑀭𑀓𑀢𑁆𑀢𑀸𑀤𑀻𑀳𑀻𑀢𑀺 𑀏𑀢𑁆𑀣 𑀓𑀺𑀮𑁂𑀲𑀸𑀦𑀁 𑀆𑀭𑀓𑀢𑁆𑀢𑀸 𑀧𑀳𑀻𑀦𑀪𑀸𑀯𑀢𑁄 𑀤𑀽𑀭𑀢𑁆𑀢𑀸 𑀅𑀭𑀳𑀁, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀁, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳𑀁, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸 𑀅𑀭𑀳𑀁, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑁂𑀦 𑀅𑀭𑀳𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫 𑀆𑀤𑀬𑁄), 𑀢𑀁 𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁨𑁪) 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀆𑀲𑀯𑀸𑀦𑀁 𑀔𑀻𑀡𑀢𑁆𑀢𑀸𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀆𑀲𑀯𑀸𑀦𑀁 𑀅𑀦𑀯𑀲𑁂𑀲𑀢𑁄 𑀧𑀳𑀻𑀦𑀢𑁆𑀢𑀸. 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁. 𑀢𑀲𑁆𑀲 𑀯𑀸𑀲𑀲𑁆𑀲 𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀯𑀼𑀢𑁆𑀣𑀯𑀸𑀲𑁄, 𑀤𑀲𑀦𑁆𑀦𑀫𑁆𑀧𑀺 𑀯𑀸 𑀅𑀭𑀺𑀬𑀯𑀸𑀲𑀸𑀦𑀁 𑀯𑀼𑀢𑁆𑀣𑀢𑁆𑀢𑀸 𑀯𑀼𑀢𑁆𑀣𑀯𑀸𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀯𑀸𑀲𑀸, 𑀬𑀤𑀭𑀺𑀬𑀸 𑀆𑀯𑀲𑀺𑀁𑀲𑀼 𑀯𑀸 𑀆𑀯𑀲𑀦𑁆𑀢𑀺 𑀯𑀸 𑀆𑀯𑀲𑀺𑀲𑁆𑀲𑀦𑁆𑀢𑀺 𑀯𑀸. 𑀓𑀢𑀫𑁂 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀅𑀭𑀺𑀬𑀸𑀯𑀸𑀲𑀸’’𑀢𑀺 (𑀅. 𑀦𑀺. 𑁧𑁦.𑁧𑁯).

𑀯𑀼𑀲𑁆𑀲𑀢𑀻𑀢𑀺 𑀯𑀸 𑀯𑀼𑀲𑀺𑀢𑀁, 𑀅𑀭𑀺𑀬𑀫𑀕𑁆𑀕𑁄, 𑀅𑀭𑀺𑀬𑀨𑀮𑀜𑁆𑀘, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀅𑀭𑀳𑀸 ‘‘𑀯𑀼𑀲𑀺𑀢𑀯𑀸’’𑀢𑀺 𑀯𑀼𑀢𑁆𑀢𑁄. 𑀓𑀭𑀡𑀻𑀬𑀁 𑀦𑀸𑀫 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀓𑀸𑀫𑁂𑀳𑀺 𑀏𑀓𑀦𑁆𑀢𑀢𑁄 𑀓𑀢𑁆𑀢𑀩𑁆𑀩𑀢𑁆𑀢𑀸, 𑀢𑀁 𑀧𑀦 𑀬𑀲𑁆𑀫𑀸 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀘𑁆𑀘𑁂𑀓𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀸𑀢𑀩𑁆𑀩𑀁 𑀓𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑀽𑀳𑀺…𑀧𑁂… 𑀓𑀢𑀓𑀭𑀡𑀻𑀬𑁄’’𑀢𑀺. 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 𑀪𑀸𑀭𑀸 𑀯𑀺𑀬𑀸𑀢𑀺 𑀪𑀸𑀭𑀸, 𑀓𑀺𑀮𑁂𑀲𑀸, 𑀔𑀦𑁆𑀥𑀸 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁨𑁨) 𑀑𑀳𑀸𑀭𑀺𑀢𑁄𑀢𑀺 𑀅𑀧𑀦𑀻𑀢𑁄. 𑀲𑀓𑁄 𑀅𑀢𑁆𑀣𑁄 𑀲𑀤𑀢𑁆𑀣𑁄𑀢𑀺 𑀏𑀢𑁆𑀣 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀓𑀸𑀫𑀁 𑀤𑀺𑀝𑁆𑀞𑀺𑀆𑀤𑀬𑁄𑀧𑀺 𑀲𑀁𑀬𑁄𑀚𑀦𑀸𑀦𑀺 𑀏𑀯, 𑀢𑀣𑀸𑀧𑀺 𑀢𑀡𑁆𑀳𑀸𑀬 𑀪𑀯𑀲𑀁𑀬𑁄𑀚𑀦𑀝𑁆𑀞𑁄 𑀲𑀸𑀢𑀺𑀲𑀬𑁄. 𑀬𑀣𑀸𑀳 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦’’𑀦𑁆𑀢𑀺. (𑀲𑀁. 𑀦𑀺. 𑁨.𑁧𑁨𑁫, 𑁧𑁨𑁬, 𑁧𑁨𑁭, 𑁧𑁩𑁨, 𑁧𑁩𑁪, 𑁧𑁩𑁬, 𑁧𑁪𑁨; 𑁩.𑁫.𑁫𑁨𑁦; 𑀓𑀣𑀸. 𑁭𑁫) 𑀢𑀢𑁄 𑀲𑀸 𑀏𑀯 𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁯𑁩, 𑁧𑁩𑁩; 𑁩.𑁩𑁭𑁩; 𑀲𑀁. 𑀦𑀺. 𑁩.𑁧𑁦𑁮𑁧; 𑀧𑀝𑀺. 𑀫. 𑁧.𑁩𑁪 𑀆𑀤𑀬𑁄) 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀯𑀲𑀁𑀬𑁄𑀚𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸’’𑀢𑀺. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀅𑀜𑁆𑀜𑀸𑀬 𑀚𑀸𑀦𑀦𑀪𑀽𑀢𑀸𑀬 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀬𑀣𑀸𑀪𑀽𑀢𑀁 𑀬𑀁 𑀬𑀣𑀸 𑀚𑀸𑀦𑀺𑀢𑀩𑁆𑀩𑀁, 𑀢𑀁 𑀢𑀣𑀸 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀮𑁄𑀓𑁂𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀇𑀥𑀢𑁆𑀢𑀪𑀸𑀯𑁂𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀧𑀭𑀢𑁆𑀢𑀪𑀸𑀯𑁂𑀢𑀺 𑀧𑀭𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀇𑀥𑀮𑁄𑀓𑁂, 𑀧𑀭𑀮𑁄𑀓𑁂 𑀘𑀸𑀢𑀺 𑀅𑀢𑁆𑀣𑁄.

𑁧𑁧𑁭. 𑀅𑀦𑁆𑀢𑀭𑀯𑀺𑀭𑀳𑀺𑀢𑀸𑀢𑀺 𑀯𑀺𑀪𑀸𑀕𑀯𑀺𑀭𑀳𑀺𑀢𑀸. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀓𑀼𑀮𑁂𑀦 𑀲𑀤𑀺𑀲𑀸’’𑀢𑀺. 𑀅𑀦𑀼𑀬𑀦𑁆𑀢𑀻𑀢𑀺 𑀅𑀦𑀼𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀸 𑀏𑀯 𑀆𑀦𑀼𑀬𑀦𑁆𑀢𑀸, 𑀅𑀦𑀼𑀯𑀢𑁆𑀢𑀓𑀸. 𑀢𑁂𑀦𑀸𑀳 ‘‘𑀯𑀲𑀯𑀢𑁆𑀢𑀺𑀦𑁄’’𑀢𑀺.

𑁧𑁧𑁮. 𑀦𑀺𑀯𑀺𑀝𑁆𑀞𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀦𑀺𑀯𑀺𑀝𑁆𑀞𑀸. 𑀢𑀢𑁄 𑀏𑀯 𑀢𑀲𑁆𑀫𑀺𑀁 𑀅𑀥𑀺𑀓𑀁 𑀦𑀺𑀯𑀺𑀲𑀦𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑀸. 𑀅𑀘𑀮𑀝𑁆𑀞𑀺𑀢𑀸𑀢𑀺 𑀅𑀘𑀮𑀪𑀸𑀯𑁂 𑀞𑀺𑀢𑀸.

𑀬𑀦𑁆𑀢𑀺 𑀬𑀁 𑀓𑀣𑁂𑀢𑀩𑁆𑀩𑀥𑀫𑁆𑀫𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸, 𑀢𑀤𑀢𑁆𑀣𑀜𑁆𑀘 𑀅𑀧𑁆𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀓𑀣𑀦𑀁, 𑀏𑀢𑀁 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀁 𑀢𑀲𑁆𑀲 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀯𑀺𑀘𑁆𑀙𑀺𑀦𑁆𑀤𑀚𑀦𑀦𑀢𑁆𑀣𑀦𑁆𑀢𑀺 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀯𑀺𑀘𑁆𑀙𑀺𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀁, 𑀅𑀜𑁆𑀜𑀣𑀢𑁆𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀫𑀸𑀭𑁄. 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻𑀢𑀺 𑀆𑀕𑀢𑀨𑀮𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀼𑀭𑀢𑁄 𑀫𑀼𑀲𑀸 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀺, 𑀢𑀲𑁆𑀫𑀸 𑀆𑀫 𑀫𑀸𑀭𑁄𑀲𑁆𑀫𑀻𑀢𑀺 𑀧𑀝𑀺𑀚𑀸𑀦𑀺. 𑀲𑀺𑀮𑀸𑀧𑀣𑀯𑀺𑀬𑀦𑁆𑀢𑀺 𑀭𑀢𑀦𑀫𑀬𑀲𑀺𑀮𑀸𑀧𑀣𑀯𑀺𑀬𑀁. 𑀲𑀺𑀦𑁂𑀭𑀼𑀁 𑀓𑀺𑀭 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀲𑀢𑁆𑀢𑀭𑀢𑀦𑀫𑀬𑁄, ‘‘𑀲𑀼𑀯𑀡𑁆𑀡𑀫𑀬𑁄’’𑀢𑀺 𑀓𑁂𑀘𑀺, 𑀲𑀸 𑀯𑀺𑀢𑁆𑀣𑀸𑀭𑀢𑁄, 𑀉𑀩𑁆𑀩𑁂𑀥𑀢𑁄 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑀸 𑀅𑀢𑀺𑀯𑀺𑀬 𑀦𑀺𑀘𑁆𑀘𑀮𑀸. 𑀓𑀺𑀁 𑀢𑁆𑀯𑀁 𑀏𑀢𑁆𑀣𑀸𑀢𑀺 𑀓𑀺𑀁 𑀓𑀸𑀭𑀡𑀸 𑀢𑁆𑀯𑀁 𑀏𑀢𑁆𑀣. ‘‘𑀞𑀺𑀢𑁄’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀼𑀭𑀢𑁄 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀆𑀦𑀼𑀪𑀸𑀯𑁄, 𑀬𑀁 𑀫𑀸𑀭𑁄𑀧𑀺 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄 𑀉𑀚𑀼𑀓𑀁 𑀧𑀝𑀺𑀧𑁆𑀧𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀫𑀕𑁆𑀕𑁄 𑀏𑀯 𑀫𑀽𑀮𑀁 𑀫𑀕𑁆𑀕𑀫𑀽𑀮𑀁, 𑀢𑀲𑁆𑀲. 𑀲𑀜𑁆𑀚𑀸𑀢𑀢𑁆𑀢𑀸 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀢𑁂𑀦 𑀫𑀕𑁆𑀕𑀫𑀽𑀮𑁂𑀦 𑀧𑀢𑀺𑀝𑁆𑀞𑀺𑀢𑀲𑀦𑁆𑀢𑀸𑀦𑁂 𑀮𑀤𑁆𑀥𑀧𑀢𑀺𑀝𑁆𑀞𑀸. 𑀪𑀕𑀯𑀢𑁄 𑀤𑁂𑀲𑀦𑀸𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄 ‘‘𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀅𑀭𑀺𑀬𑀪𑀽𑀫𑀺𑀬𑀁 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁄. ‘‘𑀉𑀭𑁂 𑀯𑀲𑀺𑀢𑁆𑀯𑀸’’𑀢𑀺 𑀇𑀤𑀁 𑀥𑀫𑁆𑀫𑀖𑁄𑀲𑀲𑁆𑀲 𑀉𑀭𑀢𑁄 𑀲𑀫𑀼𑀝𑁆𑀞𑀸𑀦𑀢𑀸𑀬 𑀯𑀼𑀢𑁆𑀢𑀁. 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀯𑀸 𑀑𑀭𑀲𑁄. 𑀫𑀼𑀔𑀢𑁄 𑀚𑀸𑀢𑁂𑀦 𑀚𑀸𑀢𑁄 ‘‘𑀫𑀼𑀔𑀢𑁄 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁄. 𑀓𑀸𑀭𑀡𑀓𑀸𑀭𑀡𑁂𑀧𑀺 𑀳𑀺 𑀓𑀸𑀭𑀡𑁂 𑀯𑀺𑀬 𑀯𑁄𑀳𑀸𑀭𑁄 𑀳𑁄𑀢𑀺 ‘‘𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀺𑀫𑁄𑀓𑁆𑀔𑀫𑀼𑀔𑀲𑁆𑀲 𑀯𑀲𑁂𑀦 𑀚𑀸𑀢𑀢𑁆𑀢𑀸 𑀫𑀼𑀔𑀢𑁄 𑀚𑀸𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑁂𑀦𑀢𑁆𑀣𑁂𑀦 𑀬𑁄𑀦𑀺𑀚𑁄, 𑀲𑁂𑀤𑀚𑁄, 𑀫𑀼𑀔𑀚𑁄𑀢𑀺 𑀢𑀻𑀲𑀼 𑀲𑀫𑁆𑀩𑀦𑁆𑀥𑁂𑀲𑀼 𑀫𑀼𑀔𑀚𑁂𑀦 𑀲𑀫𑁆𑀩𑀦𑁆𑀥𑁂𑀦 𑀪𑀕𑀯𑀢𑁄 𑀧𑀼𑀢𑁆𑀢𑀪𑀸𑀯𑁄 𑀯𑀺𑀪𑀸𑀯𑀺𑀢𑁄. 𑀅𑀢𑁆𑀣𑀤𑁆𑀯𑀬𑁂𑀦𑀸𑀧𑀺 𑀥𑀫𑁆𑀫𑀚𑀪𑀸𑀯𑁄𑀬𑁂𑀯 𑀤𑀻𑀧𑀺𑀢𑁄. 𑀅𑀭𑀺𑀬𑀥𑀫𑁆𑀫𑀧𑁆𑀧𑀢𑁆𑀢𑀺𑀢𑁄 𑀮𑀤𑁆𑀥𑀯𑀺𑀲𑁂𑀲𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑁄 𑀢𑀤𑀼𑀢𑁆𑀢𑀭𑀓𑀸𑀮𑀺𑀓𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 ‘‘𑀅𑀭𑀺𑀬𑀥𑀫𑁆𑀫𑀢𑁄 𑀚𑀸𑀢𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀅𑀭𑀺𑀬𑀥𑀫𑁆𑀫𑀁 𑀯𑀸 𑀫𑀕𑁆𑀕𑀨𑀮𑀁 𑀦𑀺𑀲𑁆𑀲𑀸𑀬, 𑀉𑀧𑀦𑀺𑀲𑁆𑀲𑀸𑀬 𑀘 𑀚𑀸𑀢𑁄 𑀲𑀩𑁆𑀩𑁄𑀧𑀺 𑀥𑀫𑁆𑀫𑀧𑁆𑀧𑀩𑀦𑁆𑀥𑁄 ‘‘𑀅𑀭𑀺𑀬𑀥𑀫𑁆𑀫𑀢𑁄 𑀚𑀸𑀢𑁄’’𑀢𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀲𑀁 𑀧𑀦 𑀅𑀭𑀺𑀬𑀥𑀫𑁆𑀫𑀸𑀦𑀁 𑀅𑀧𑀭𑀺𑀬𑁄𑀲𑀺𑀢𑀓𑀺𑀘𑁆𑀘𑀢𑀸𑀬 𑀅𑀭𑀺𑀬𑀪𑀸𑀯𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀅𑀭𑀺𑀬𑀥𑀫𑁆𑀫𑀢𑁄 𑀚𑀸𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀬𑁄𑀲𑀺𑀢𑀓𑀺𑀘𑁆𑀘𑀢𑀸𑀬 𑀢𑀣𑀸 𑀦𑀺𑀩𑁆𑀩𑀢𑁆𑀢𑀺𑀧𑀸𑀭𑀺𑀧𑀽𑀭𑀺𑀁 𑀉𑀧𑀸𑀤𑀸𑀬 ‘‘𑀦𑀺𑀫𑁆𑀫𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀬𑀢𑁄 ‘‘𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀸𑀬𑀁 𑀆𑀤𑀺𑀬𑀢𑀻𑀢𑀺 𑀥𑀫𑁆𑀫𑀤𑀸𑀬𑀸𑀤𑁄’’ 𑀢𑀺𑀧𑀺 𑀧𑀸𑀞𑁄. 𑀅𑀲𑁆𑀲𑀸𑀢𑀺 ‘‘𑀪𑀕𑀯𑀢𑁄𑀫𑁆𑀳𑀺𑀧𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀯𑀸𑀓𑁆𑀬𑀲𑁆𑀲. 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀪𑀸𑀯𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄. 𑀢𑀣𑀸𑀕𑀢𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑁆𑀲 𑀲𑀫𑀽𑀳𑀦𑀺𑀯𑁂𑀲𑀯𑀲𑁂𑀦 𑀥𑀫𑁆𑀫𑀓𑀸𑀬𑀢𑀸𑀬 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀲𑀢𑁆𑀣𑀼𑀝𑁆𑀞𑀸𑀦𑀺𑀬𑀲𑁆𑀲 𑀧𑀦 𑀥𑀫𑁆𑀫𑀓𑀸𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀢𑀣𑀸𑀕𑀢𑁄 𑀥𑀫𑁆𑀫𑀓𑀸𑀬𑁄𑀢𑀺 𑀯𑀼𑀢𑁆𑀢𑁄’’𑀢𑀺 𑀲𑀬𑀫𑁂𑀯 𑀧𑀼𑀘𑁆𑀙𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 ‘‘𑀢𑀣𑀸𑀕𑀢𑁄 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 ‘‘𑀇𑀫𑀁 𑀥𑀫𑁆𑀫𑀁 𑀇𑀫𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀉𑀧𑀕𑀢𑀲𑁆𑀲 𑀯𑁂𑀦𑁂𑀬𑁆𑀬𑀚𑀦𑀲𑁆𑀲 𑀩𑁄𑀥𑀦𑀢𑁆𑀣𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑁆𑀯𑀸. 𑀯𑀸𑀘𑀸𑀬 𑀅𑀪𑀺𑀦𑀻𑀳𑀭𑀻𑀢𑀺 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀯𑀸𑀘𑀸𑀬 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀸𑀪𑀺𑀫𑀼𑀔𑀁 𑀢𑀤𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀳𑀺𑀢𑀫𑀢𑁆𑀣𑀁 𑀦𑀻𑀳𑀭𑀺 𑀉𑀧𑀦𑁂𑀲𑀺. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀏𑀯𑀁𑀲𑀤𑁆𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀺𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀢𑀣𑀸𑀕𑀢𑀲𑁆𑀲. 𑀥𑀫𑁆𑀫𑀫𑀬𑀢𑁆𑀢𑀸𑀢𑀺 𑀥𑀫𑁆𑀫𑀪𑀽𑀢𑀢𑁆𑀢𑀸. 𑀇𑀥𑀸𑀥𑀺𑀧𑁆𑀧𑁂𑀢𑀥𑀫𑁆𑀫𑁄 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀆𑀳 ‘‘𑀥𑀫𑁆𑀫𑀓𑀸𑀬𑀢𑁆𑀢𑀸 𑀏𑀯 𑀩𑁆𑀭𑀳𑁆𑀫𑀓𑀸𑀬𑁄’’𑀢𑀺. 𑀲𑀩𑁆𑀩𑀲𑁄 𑀅𑀥𑀫𑁆𑀫𑀁 𑀧𑀚𑀳𑀺𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀥𑀫𑁆𑀫𑁄 𑀏𑀯 𑀪𑀽𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀢𑀣𑀸𑀭𑀽𑀧𑁄 𑀘 𑀬𑀲𑁆𑀫𑀸 𑀲𑀪𑀸𑀯𑀢𑁄 𑀥𑀫𑁆𑀫𑁄 𑀏𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀆𑀳 ‘‘𑀥𑀫𑁆𑀫𑀲𑀪𑀸𑀯𑁄’’𑀢𑀺.

𑁧𑁧𑁯. 𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺 (𑀤𑀻. 𑀦𑀺. 𑁩.𑁧𑁧𑁬) 𑀏𑀯𑀁 𑀯𑀼𑀢𑁆𑀢𑀲𑁂𑀝𑁆𑀞𑀪𑀸𑀯𑀘𑁆𑀙𑁂𑀤𑀓𑀯𑀸𑀤𑀁. 𑀅𑀧𑀭𑁂𑀦𑀧𑀺 𑀦𑀬𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀢𑁄 𑀅𑀧𑀭𑁂𑀦𑀧𑀺 𑀧𑁄𑀭𑀸𑀡𑀓𑀮𑁄𑀓𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀦𑀬𑁂𑀦. 𑀲𑁂𑀝𑁆𑀞𑀘𑁆𑀙𑁂𑀤…𑀧𑁂… 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑁄𑀧𑀺 𑀳𑀺 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸’’𑀢𑀺, ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸’’𑀢𑀺 (𑀤𑀻. 𑀦𑀺. 𑁩.𑁧𑁧𑁪) 𑀘 𑀏𑀯𑀁 𑀧𑀯𑀢𑁆𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀺𑀦𑀺𑀯𑁂𑀞𑀦𑁄 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑁂𑀝𑁆𑀞𑀪𑀸𑀯𑀲𑁆𑀲 𑀙𑁂𑀤𑀦𑀢𑁄 𑀲𑁂𑀝𑁆𑀞𑀘𑁆𑀙𑁂𑀤𑀦𑀯𑀸𑀤𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀪𑀸𑀯𑀦𑁆𑀢𑀺 𑀇𑀫𑀁 𑀧𑀓𑀸𑀭𑀢𑀁 𑀫𑀦𑀼𑀲𑁆𑀲𑀪𑀸𑀯𑀁. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺, 𑀧𑀓𑀭𑀡𑀯𑀲𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀅𑀯𑀘𑁆𑀙𑀺𑀦𑁆𑀦𑁄 𑀤𑀝𑁆𑀞𑀩𑁆𑀩𑁄. 𑀫𑀦𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀸𑀢𑀺 𑀩𑀸𑀳𑀺𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀉𑀧𑀘𑀸𑀭𑀛𑀸𑀦𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸. 𑀬𑀸𑀬 𑀉𑀧𑀘𑀸𑀭𑀚𑁆𑀛𑀸𑀦𑀘𑁂𑀢𑀦𑀸𑀬 𑀢𑁂 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸, 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀦𑀸 𑀉𑀴𑀸𑀭𑁄 𑀢𑀲𑁆𑀲𑀸 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀛𑀸𑀦𑀨𑀮𑀓𑀧𑁆𑀧𑁄 𑀢𑀲𑁆𑀲𑀸 𑀨𑀮𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀬𑀸’’𑀢𑀺𑀆𑀤𑀺. ‘‘𑀲𑀬𑀁𑀧𑀪𑀸’’𑀢𑀺 𑀧𑀤𑀸𑀦𑀁 𑀢𑀢𑁆𑀣 𑀲𑀽𑀭𑀺𑀬𑀸𑀮𑁄𑀓𑀸𑀤𑀻𑀳𑀺 𑀯𑀺𑀦𑀸 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀸 𑀲𑀬𑀫𑁂𑀯 𑀧𑀪𑀸𑀲𑀦𑁆𑀢𑀻𑀢𑀺 𑀲𑀬𑀁𑀧𑀪𑀸, 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑁂 𑀘𑀭𑀦𑁆𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑀸, 𑀢𑀤𑀜𑁆𑀜𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀯𑀺𑀬 𑀲𑀭𑀻𑀭𑀲𑁆𑀲 𑀯𑀺𑀘𑀭𑀡𑀝𑁆𑀞𑀸𑀦𑀲𑁆𑀲 𑀅𑀲𑀼𑀪𑀢𑀸𑀪𑀸𑀯𑀢𑁄 𑀲𑀼𑀪𑀁, 𑀲𑀼𑀪𑁂𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀼𑀪𑀝𑁆𑀞𑀸𑀬𑀺𑀦𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀭𑀲𑀧𑀣𑀯𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁦. 𑀲𑀩𑁆𑀩𑀁 𑀘𑀓𑁆𑀓𑀯𑀸𑀴𑀦𑁆𑀢𑀺 𑀅𑀦𑀯𑀲𑁂𑀲𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀘𑀓𑁆𑀓𑀯𑀸𑀴𑀁. 𑀲𑀫𑀢𑀦𑀻𑀢𑀺 𑀲𑀜𑁆𑀙𑀸𑀤𑁂𑀦𑁆𑀢𑀻 𑀯𑀺𑀧𑁆𑀨𑀭𑀺, 𑀲𑀸 𑀧𑀦 𑀢𑀲𑁆𑀫𑀺𑀁 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀸 𑀅𑀳𑁄𑀲𑀻𑀢𑀺 𑀆𑀳 ‘‘𑀧𑀢𑀺𑀝𑁆𑀞𑀳𑀻’’𑀢𑀺. 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸𑀢𑀺 𑀲𑀫𑁆𑀧𑀦𑁆𑀦𑀯𑀡𑁆𑀡𑀸. 𑀫𑀓𑁆𑀔𑀺𑀓𑀡𑁆𑀟𑀓𑀭𑀳𑀺𑀢𑀦𑁆𑀢𑀺 𑀫𑀓𑁆𑀔𑀺𑀓𑀸𑀳𑀺 𑀘 𑀢𑀸𑀲𑀁 𑀅𑀡𑁆𑀟𑀓𑁂𑀳𑀺 𑀘 𑀭𑀳𑀺𑀢𑀁.

𑀅𑀢𑀻𑀢𑀸𑀦𑀦𑁆𑀢𑀭𑁂𑀧𑀺 𑀓𑀧𑁆𑀧𑁂 𑀮𑁄𑀮𑁄𑀬𑁂𑀯. 𑀓𑀲𑁆𑀫𑀸? 𑀏𑀯𑀁 𑀘𑀺𑀭𑀧𑀭𑀺𑀘𑀺𑀢𑀮𑁄𑀮𑀢𑀸𑀯𑀲𑁂𑀦 𑀲𑀩𑁆𑀩𑀧𑀞𑀫𑀁 𑀢𑀣𑀸 𑀅𑀓𑀸𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀫𑁂𑀯𑀺𑀤𑀦𑁆𑀢𑀺 ‘‘𑀯𑀡𑁆𑀡𑀢𑁄, 𑀕𑀦𑁆𑀥𑀢𑁄 𑀘 𑀢𑀸𑀯 𑀜𑀸𑀢𑀁, 𑀭𑀲𑀢𑁄 𑀧𑀦 𑀓𑀺𑀫𑁂𑀯𑀺𑀤𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀁𑀲𑀬𑀚𑀸𑀢𑁄 𑀯𑀤𑀢𑀺. 𑀢𑀺𑀝𑁆𑀞𑀢𑀻𑀢𑀺 𑀅𑀝𑁆𑀞𑀸𑀲𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁧. 𑀆𑀮𑀼𑀧𑁆𑀧𑀓𑀸𑀭𑀓𑀦𑁆𑀢𑀺 𑀏𑀢𑁆𑀣 𑀆𑀮𑁄𑀧𑀧𑀭𑀺𑀬𑀸𑀬𑁄 𑀆𑀮𑀼𑀧𑁆𑀧-𑀲𑀤𑁆𑀤𑁄𑀢𑀺 𑀆𑀳 ‘‘𑀆𑀮𑁄𑀧𑀁 𑀓𑀢𑁆𑀯𑀸’’𑀢𑀺. 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀫𑁆𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀯𑀢𑁆𑀢𑀺𑀬𑀁 𑀮𑁄𑀓𑀺𑀬𑀸𑀦𑀁 𑀲𑀫𑁆𑀫𑁄𑀳𑁄 𑀳𑁄𑀢𑀺, 𑀢𑀁 𑀯𑀺𑀥𑀫𑀺𑀢𑀼𑀁 ‘‘𑀓𑁄 𑀧𑀦 𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀅𑀝𑁆𑀞 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁. 𑀓𑀲𑁆𑀫𑀺𑀦𑁆𑀢𑀺 𑀓𑀲𑁆𑀫𑀺𑀁 𑀞𑀸𑀦𑁂. ‘‘𑀓𑁄 𑀉𑀧𑀭𑀻’’𑀢𑀺 𑀏𑀢𑁂𑀦𑁂𑀯 𑀓𑁄 𑀳𑁂𑀝𑁆𑀞𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀢𑀣𑀸 ‘‘𑀓𑁄 𑀲𑀻𑀖𑀁 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀓𑁄 𑀲𑀡𑀺𑀓𑀁 𑀕𑀘𑁆𑀙𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀯𑀻𑀣𑀺𑀬𑁄𑀢𑀺 𑀕𑀫𑀦𑀯𑀻𑀣𑀺𑀬𑁄. 𑀏𑀓𑀢𑁄𑀢𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀧𑀸𑀢𑀼𑀪𑀯𑀦𑁆𑀢𑀺. 𑀲𑀽𑀭𑀺𑀬𑀫𑀡𑁆𑀟𑀮𑁂 𑀧𑀦 𑀅𑀢𑁆𑀣𑀗𑁆𑀕𑀢𑁂 𑀘𑀦𑁆𑀤𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀺𑀢𑁆𑀣. 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀸𑀢𑀺 𑀭𑀼𑀘𑀺𑀁 𑀜𑀢𑁆𑀯𑀸 𑀯𑀺𑀬.

𑀉𑀪𑀬𑀦𑁆𑀢𑀺 𑀅𑀦𑁆𑀢𑁄, 𑀩𑀳𑀺 𑀘.

𑀉𑀚𑀼𑀓𑀦𑁆𑀢𑀺 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄, 𑀉𑀩𑁆𑀩𑁂𑀥𑀢𑁄 𑀘. 𑀧𑀭𑀺𑀫𑀡𑁆𑀟𑀮𑀢𑁄𑀢𑀺 𑀧𑀭𑀺𑀓𑁆𑀔𑁂𑀧𑀢𑁄.

𑀉𑀚𑀼𑀓𑀁 𑀲𑀡𑀺𑀓𑀁 𑀕𑀘𑁆𑀙𑀢𑀺 𑀅𑀫𑀸𑀯𑀸𑀲𑀺𑀬𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀣𑁄𑀓𑀁 𑀣𑁄𑀓𑀁 𑀑𑀳𑀻𑀬𑀦𑁆𑀢𑁄 𑀧𑀼𑀡𑁆𑀡𑀫𑀸𑀲𑀺𑀬𑀁 𑀉𑀧𑀟𑁆𑀠𑀫𑀕𑁆𑀕𑀫𑁂𑀯 𑀑𑀳𑀻𑀬𑀦𑀢𑁄. 𑀢𑀺𑀭𑀺𑀬𑀁 𑀲𑀻𑀖𑀁 𑀕𑀘𑁆𑀙𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀫𑀸𑀲𑁂 𑀓𑀤𑀸𑀘𑀺 𑀤𑀓𑁆𑀔𑀺𑀡𑀢𑁄, 𑀓𑀤𑀸𑀘𑀺 𑀉𑀢𑁆𑀢𑀭𑀢𑁄 𑀤𑀲𑁆𑀲𑀦𑀢𑁄. ‘‘𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀽’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀦𑁆𑀤𑀲𑁆𑀲 𑀧𑀼𑀭𑀢𑁄, 𑀧𑀘𑁆𑀙𑀢𑁄, 𑀲𑀫𑀜𑁆𑀘 𑀢𑀸𑀭𑀓𑀸 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀅𑀢𑁆𑀢𑀦𑁄 𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦𑀁. 𑀦 𑀯𑀺𑀚𑀳𑀦𑁆𑀢𑀺 𑀅𑀢𑁆𑀢𑀦𑁄 𑀯𑀻𑀣𑀺𑀬𑀸𑀯 𑀕𑀘𑁆𑀙𑀦𑀢𑁄. 𑀲𑀽𑀭𑀺𑀬𑀲𑁆𑀲 𑀉𑀚𑀼𑀓𑀁 𑀕𑀫𑀦𑀲𑁆𑀲 𑀲𑀻𑀖𑀢𑀸 𑀘𑀦𑁆𑀤𑀲𑁆𑀲 𑀕𑀫𑀦𑀁 𑀉𑀧𑀸𑀤𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀭𑀺𑀬𑀁 𑀕𑀫𑀦𑀁 𑀤𑀓𑁆𑀔𑀺𑀡𑀤𑀺𑀲𑀢𑁄 𑀉𑀢𑁆𑀢𑀭𑀤𑀺𑀲𑀸𑀬, 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀤𑀓𑁆𑀔𑀺𑀡𑀤𑀺𑀲𑀸𑀬 𑀕𑀫𑀦𑀁 𑀤𑀦𑁆𑀥𑀁 𑀙𑀳𑀺 𑀙𑀳𑀺 𑀫𑀸𑀲𑁂𑀳𑀺 𑀇𑀚𑁆𑀛𑀦𑀢𑁄. 𑀲𑁄𑀢𑀺 𑀲𑀽𑀭𑀺𑀬𑁄. 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀢𑁄𑀢𑀺 𑀓𑀸𑀴𑀧𑀓𑁆𑀔𑁂 𑀉𑀧𑁄𑀲𑀣𑁂 𑀘𑀦𑁆𑀤𑁂𑀦 𑀲𑀳𑁂𑀯 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑁂. 𑀑𑀳𑀸𑀬 𑀕𑀘𑁆𑀙𑀢𑀺 𑀅𑀢𑁆𑀢𑀦𑁄 𑀲𑀻𑀖𑀕𑀸𑀫𑀺𑀢𑀸𑀬, 𑀢𑀲𑁆𑀲 𑀘 𑀤𑀦𑁆𑀥𑀕𑀸𑀫𑀺𑀢𑀸𑀬. 𑀮𑁂𑀔𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀬𑀁. 𑀬𑀸𑀯 𑀉𑀧𑁄𑀲𑀣𑀤𑀺𑀯𑀲𑀸𑀢𑀺 𑀬𑀸𑀯 𑀲𑀼𑀓𑁆𑀓𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑀸. ‘‘𑀘𑀦𑁆𑀤𑁄 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸’’𑀢𑀺 𑀇𑀤𑀁 𑀉𑀧𑀭𑀺𑀪𑀸𑀕𑀢𑁄 𑀧𑀢𑀺𑀢𑀲𑀽𑀭𑀺𑀬𑀸𑀮𑁄𑀓𑀢𑀸𑀬 𑀳𑁂𑀝𑁆𑀞𑀢𑁄 𑀧𑀯𑀢𑁆𑀢𑀸𑀬 𑀲𑀽𑀭𑀺𑀬𑀲𑁆𑀲 𑀤𑀽𑀭𑀪𑀸𑀯𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀫𑀸𑀦𑀸𑀬 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀯𑀲𑁂𑀦 𑀅𑀦𑀼𑀓𑁆𑀓𑀫𑁂𑀦 𑀘𑀦𑁆𑀤𑀫𑀡𑁆𑀟𑀮𑀧𑁆𑀧𑀤𑁂𑀲𑀲𑁆𑀲 𑀯𑀟𑁆𑀠𑀫𑀸𑀦𑀲𑁆𑀲 𑀯𑀺𑀬 𑀤𑀺𑀲𑁆𑀲𑀫𑀸𑀦𑀢𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀺𑀬. 𑀉𑀧𑁄𑀲𑀣𑀤𑀺𑀯𑀲𑁂 𑀧𑀼𑀡𑁆𑀡𑀫𑀸𑀬𑀁 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀧𑀭𑀺𑀧𑀼𑀡𑁆𑀡𑀫𑀡𑁆𑀟𑀮𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀥𑀸𑀯𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀘𑀦𑁆𑀤𑀲𑁆𑀲 𑀤𑀦𑁆𑀥𑀕𑀢𑀺𑀢𑀸𑀬, 𑀅𑀢𑁆𑀢𑀦𑁄 𑀘 𑀲𑀻𑀖𑀕𑀢𑀺𑀢𑀸𑀬. 𑀅𑀦𑀼𑀓𑁆𑀓𑀫𑁂𑀦 𑀳𑀸𑀬𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀦 𑀙𑀸𑀬𑀸𑀬 𑀳𑀸𑀬𑀫𑀸𑀦𑀢𑀸𑀬 𑀫𑀡𑁆𑀟𑀮𑀁 𑀯𑀟𑁆𑀠𑀫𑀸𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀇𑀥 𑀙𑀸𑀬𑀸𑀬 𑀯𑀟𑁆𑀠𑀫𑀸𑀦𑀢𑀸𑀬 𑀫𑀡𑁆𑀟𑀮𑀁 𑀳𑀸𑀬𑀫𑀸𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑀬𑀸𑀬 𑀯𑀻𑀣𑀺𑀬𑀸 𑀲𑀽𑀭𑀺𑀬𑁂 𑀕𑀘𑁆𑀙𑀦𑁆𑀢𑁂 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀧𑀼𑀢𑁆𑀢𑀸 𑀲𑀽𑀭𑀺𑀬𑀸𑀪𑀺𑀢𑀸𑀧𑀲𑀦𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀢𑁄 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀓𑀻𑀴𑀸𑀧𑀲𑀼𑀢𑀸 𑀳𑀼𑀢𑁆𑀯𑀸 𑀦 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀓𑀺𑀭 𑀲𑀽𑀭𑀺𑀬𑀲𑁆𑀲 𑀯𑀺𑀫𑀸𑀦𑀁 𑀧𑀓𑀢𑀺𑀫𑀕𑁆𑀕𑀢𑁄 𑀅𑀥𑁄 𑀑𑀢𑀭𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀲 𑀑𑀭𑀼𑀬𑁆𑀳 𑀘𑀭𑀡𑁂𑀦𑁂𑀯 𑀘𑀦𑁆𑀤𑀯𑀺𑀫𑀸𑀦𑀫𑁆𑀧𑀺 𑀅𑀥𑁄 𑀑𑀭𑀼𑀬𑁆𑀳 𑀘𑀭𑀢𑀺 𑀢𑀕𑁆𑀕𑀢𑀺𑀓𑀢𑁆𑀢𑀸, 𑀢𑀲𑁆𑀫𑀸 𑀲𑀸 𑀯𑀻𑀣𑀺 𑀉𑀤𑀓𑀸𑀪𑀸𑀯𑁂𑀦 𑀅𑀚𑀸𑀦𑀼𑀭𑀽𑀧𑀢𑀸𑀬 ‘‘𑀅𑀚𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀁 𑀕𑀢𑀸. 𑀬𑀸𑀬 𑀧𑀦 𑀯𑀻𑀣𑀺𑀬𑀸 𑀲𑀽𑀭𑀺𑀬𑁂 𑀕𑀘𑁆𑀙𑀦𑁆𑀢𑁂 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀧𑀼𑀢𑁆𑀢𑀸 𑀲𑀽𑀭𑀺𑀬𑀸𑀪𑀺𑀢𑀸𑀧𑀸𑀪𑀸𑀯𑀢𑁄 𑀅𑀪𑀺𑀡𑁆𑀳𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀻𑀴𑀸𑀧𑀲𑀼𑀢𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀓𑀺𑀭 𑀲𑀽𑀭𑀺𑀬𑀯𑀺𑀫𑀸𑀦𑀁 𑀧𑀓𑀢𑀺𑀫𑀕𑁆𑀕𑀢𑁄 𑀉𑀤𑁆𑀥𑀁 𑀆𑀭𑀼𑀳𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀲 𑀉𑀤𑁆𑀥𑀁 𑀆𑀭𑀼𑀬𑁆𑀳 𑀘𑀭𑀡𑁂𑀦𑁂𑀯 𑀘𑀦𑁆𑀤𑀯𑀺𑀫𑀸𑀦𑀫𑁆𑀧𑀺 𑀉𑀤𑁆𑀥𑀁 𑀆𑀭𑀼𑀬𑁆𑀳 𑀘𑀭𑀢𑀺 𑀢𑀕𑁆𑀕𑀢𑀺𑀓𑀢𑁆𑀢𑀸, 𑀢𑀕𑁆𑀕𑀢𑀺𑀓𑀢𑀸 𑀘 𑀲𑀫𑀸𑀦𑀕𑀢𑀺𑀦𑀸 𑀯𑀸𑀢𑀫𑀡𑁆𑀟𑀮𑁂𑀦 𑀯𑀺𑀫𑀸𑀦𑀲𑁆𑀲 𑀨𑁂𑀮𑁆𑀮𑀺𑀢𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸 𑀲𑀸 𑀯𑀻𑀣𑀺 𑀉𑀤𑀓𑀩𑀳𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀭𑀽𑀧𑀢𑀸𑀬 ‘‘𑀦𑀸𑀕𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀁 𑀕𑀢𑀸. 𑀬𑀤𑀸 𑀲𑀽𑀭𑀺𑀬𑁄 𑀉𑀤𑁆𑀥𑀫𑀦𑀸𑀭𑀼𑀳𑀦𑁆𑀢𑁄, 𑀅𑀥𑁄 𑀘 𑀅𑀦𑁄𑀢𑀭𑀦𑁆𑀢𑁄 𑀧𑀓𑀢𑀺𑀫𑀕𑁆𑀕𑁂𑀦𑁂𑀯 𑀕𑀘𑁆𑀙𑀢𑀺, 𑀢𑀤𑀸 𑀯𑀲𑁆𑀲𑀯𑀮𑀸𑀳𑀓𑀸 𑀬𑀣𑀸𑀓𑀸𑀮𑀁, 𑀬𑀣𑀸𑀭𑀼𑀘𑀺 𑀘 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀔𑁂𑀦 𑀯𑀺𑀘𑀭𑀦𑁆𑀢𑀺, 𑀢𑁂𑀦 𑀓𑀸𑀮𑁂𑀦 𑀓𑀸𑀮𑀁 𑀯𑀲𑁆𑀲𑀦𑀢𑁄 𑀮𑁄𑀓𑁂 𑀉𑀢𑀼𑀲𑀫𑀢𑀸 𑀳𑁄𑀢𑀺, 𑀢𑀸𑀬 𑀉𑀢𑀼𑀲𑀫𑀢𑀸𑀬 𑀳𑁂𑀢𑀼𑀪𑀽𑀢𑀸𑀬 𑀲𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀕𑀢𑀺 𑀕𑀯𑀸𑀦𑀼𑀭𑀽𑀧𑀢𑀸𑀬 ‘‘𑀕𑁄𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀁 𑀕𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀯𑀻𑀣𑀻’’𑀢𑀺𑀆𑀤𑀺.

𑀏𑀯𑀁 ‘‘𑀓𑀢𑀺 𑀦𑁂𑀲𑀁 𑀯𑀻𑀣𑀺𑀬𑁄’’𑀢𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀓𑀣𑀁 𑀯𑀺𑀘𑀭𑀦𑁆𑀢𑀻’’𑀢𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀺𑀦𑁂𑀭𑀼𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀢𑀢𑁄 𑀕𑀫𑀦𑀯𑀻𑀣𑀺𑀢𑁄 𑀩𑀳𑀺 𑀅𑀢𑁆𑀢𑀦𑁄 𑀢𑀺𑀭𑀺𑀬𑀕𑀫𑀦𑁂𑀦 𑀘𑀓𑁆𑀓𑀯𑀸𑀴𑀸𑀪𑀺𑀫𑀼𑀔𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀅𑀦𑁆𑀢𑁄 𑀯𑀺𑀘𑀭𑀦𑁆𑀢𑀻𑀢𑀺 𑀏𑀯𑀁 𑀙 𑀫𑀸𑀲𑁂 𑀔𑀡𑁂 𑀔𑀡𑁂 𑀲𑀺𑀦𑁂𑀭𑀼𑀢𑁄 𑀅𑀧𑀲𑀓𑁆𑀓𑀦𑀯𑀲𑁂𑀦 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀲𑀫𑀻𑀧𑀁 𑀧𑀢𑁆𑀢𑀸, 𑀢𑀢𑁄𑀧𑀺 𑀙 𑀫𑀸𑀲𑁂 𑀔𑀡𑁂 𑀔𑀡𑁂 𑀅𑀧𑀲𑀓𑁆𑀓𑀦𑀯𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀺𑀦𑁂𑀭𑀼𑀲𑀫𑀻𑀧𑀁 𑀧𑀸𑀧𑀼𑀡𑀦𑁆𑀢𑀸 𑀅𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀢𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀺𑀦𑁂𑀭𑀼𑀲𑁆𑀲, 𑀘𑀓𑁆𑀓𑀯𑀸𑀴𑀲𑁆𑀲 𑀘 𑀬𑀁 𑀞𑀸𑀦𑀁 𑀯𑁂𑀫𑀚𑁆𑀛𑀁, 𑀢𑀲𑁆𑀲, 𑀲𑀺𑀦𑁂𑀭𑀼𑀲𑁆𑀲 𑀘 𑀬𑀁 𑀞𑀸𑀦𑀁 𑀯𑁂𑀫𑀚𑁆𑀛𑀁, 𑀢𑁂𑀦 𑀕𑀘𑁆𑀙𑀦𑁆𑀢𑀸 ‘‘𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀯𑀺𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀦 𑀲𑀺𑀦𑁂𑀭𑀼𑀲𑁆𑀲 𑀅𑀕𑁆𑀕𑀸𑀴𑀺𑀦𑁆𑀤𑀅𑀮𑁆𑀮𑀻𑀦𑀸. 𑀘𑀓𑁆𑀓𑀯𑀸𑀴𑀲𑀫𑀻𑀧𑁂𑀦 𑀘𑀭𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀚𑁆𑀛𑁂𑀦𑀸𑀢𑀺 𑀲𑀺𑀦𑁂𑀭𑀼𑀲𑁆𑀲, 𑀘𑀓𑁆𑀓𑀯𑀸𑀴𑀲𑁆𑀲 𑀘 𑀉𑀚𑀼𑀓𑀁 𑀯𑁂𑀫𑀚𑁆𑀛𑁂𑀦 𑀫𑀕𑁆𑀕𑁂𑀦. 𑀘𑀺𑀢𑁆𑀭𑀫𑀸𑀲𑁂 𑀫𑀚𑁆𑀛𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀏𑀓𑀯𑁂𑀮𑀸𑀬, 𑀏𑀓𑁂𑀦𑁂𑀯 𑀯𑀸 𑀅𑀢𑁆𑀢𑀦𑁄 𑀏𑀓𑀧𑁆𑀧𑀳𑀸𑀭𑁂𑀦. 𑀫𑀚𑁆𑀛𑀦𑁆𑀳𑀺𑀓𑁄𑀢𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄 𑀓𑀸𑀮𑁄 𑀳𑁄𑀢𑀺. 𑀢𑀤𑀸 𑀳𑀺 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀕𑁆𑀕𑀘𑁆𑀙𑀦𑁆𑀢𑀁 𑀳𑀼𑀢𑁆𑀯𑀸𑀧𑀺 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀞𑀺𑀢𑀲𑁆𑀲 𑀉𑀧𑀟𑁆𑀠𑀫𑁂𑀯 𑀤𑀺𑀲𑁆𑀲𑀢𑀺, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀞𑀺𑀢𑀲𑁆𑀲 𑀑𑀕𑀘𑁆𑀙𑀦𑁆𑀢𑀁 𑀳𑀼𑀢𑁆𑀯𑀸. 𑀏𑀯𑀜𑁆𑀳𑀺 𑀏𑀓𑀯𑁂𑀮𑀸𑀬𑀫𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀆𑀮𑁄𑀓𑀓𑀭𑀡𑀁.

𑀬𑁂𑀲𑀼 𑀓𑀢𑁆𑀢𑀺𑀓𑀸𑀤𑀺𑀦𑀓𑁆𑀔𑀢𑁆𑀢𑀲𑀫𑀜𑁆𑀜𑀸, 𑀢𑀸𑀦𑀺𑀧𑀺 𑀢𑀸𑀭𑀓𑀭𑀽𑀧𑀸𑀦𑀺 𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀢𑀸𑀭𑀓𑀭𑀽𑀧𑀸𑀦𑀺 𑀘𑀸’’𑀢𑀺, 𑀦𑀓𑁆𑀔𑀢𑁆𑀢𑀲𑀜𑁆𑀜𑀺𑀢𑀢𑀸𑀭𑀓𑀭𑀽𑀧𑀢𑁄 𑀅𑀯𑀲𑀺𑀝𑁆𑀞𑀢𑀸𑀭𑀓𑀭𑀽𑀧𑀸𑀦𑀻𑀢𑀺 𑀅𑀢𑁆𑀣𑁄. 𑀉𑀪𑀬𑀸𑀦𑀺𑀧𑀺 𑀢𑀸𑀦𑀺 𑀤𑁂𑀯𑀢𑀸𑀦𑀁 𑀯𑀲𑀦𑀓𑀯𑀺𑀫𑀸𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀭𑀸-𑀲𑀤𑁆𑀤𑁄 𑀢𑀺𑀬𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀭𑀢𑁆𑀢𑀺, 𑀲𑀢𑁆𑀢𑀸𑀦𑀁 𑀲𑀤𑁆𑀤𑀲𑁆𑀲 𑀯𑀽𑀧𑀲𑀫𑀦𑀓𑀸𑀮𑁄𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀦𑁆𑀢𑀺 𑀲𑀢𑁆𑀢𑀸 𑀓𑀻𑀴𑀦𑁆𑀢𑀺 𑀚𑁄𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀤𑀺𑀯𑀸. 𑀲𑀢𑁆𑀢𑀸𑀦𑀁 𑀆𑀬𑀼𑀁 𑀫𑀺𑀦𑀦𑁆𑀢𑁄 𑀯𑀺𑀬 𑀲𑀺𑀬𑀢𑀺 𑀅𑀦𑁆𑀢𑀁 𑀓𑀭𑁄𑀢𑀻𑀢𑀺 𑀫𑀸𑀲𑁄. 𑀢𑀁 𑀢𑀁 𑀓𑀺𑀭𑀺𑀬𑀁 𑀅𑀭𑀢𑀺 𑀯𑀢𑁆𑀢𑁂𑀢𑀻𑀢𑀺 𑀉𑀢𑀼. 𑀢𑀁 𑀢𑀁 𑀲𑀢𑁆𑀢𑀁, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘 𑀲𑀗𑁆𑀕𑀫𑁆𑀫 𑀯𑀤𑀦𑁆𑀢𑁄 𑀯𑀺𑀬 𑀲𑀭𑀢𑀺 𑀯𑀢𑁆𑀢𑁂𑀢𑀻𑀢𑀺 𑀲𑀁𑀯𑀘𑁆𑀙𑀭𑁄.

𑁧𑁨𑁨. 𑀯𑀺𑀯𑀚𑁆𑀚𑀦𑀁 𑀯𑀺𑀯𑀚𑁆𑀚𑁄, 𑀲𑁄 𑀏𑀯 𑀯𑁂𑀯𑀚𑁆𑀚𑀁, 𑀯𑀡𑁆𑀡𑀲𑁆𑀲 𑀯𑁂𑀯𑀚𑁆𑀚𑀁 𑀯𑀡𑁆𑀡𑀯𑁂𑀯𑀚𑁆𑀚𑀁, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀕𑀫𑁄, 𑀢𑀲𑁆𑀲 𑀧𑀦 𑀅𑀢𑁆𑀣𑀺𑀢𑀸 ‘‘𑀯𑀡𑁆𑀡𑀯𑁂𑀯𑀚𑁆𑀚𑀢𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀺𑀯𑀚𑁆𑀚𑀪𑀸𑀯𑁄’’𑀢𑀺. 𑀢𑁂𑀲𑀦𑁆𑀢𑀺 𑀯𑀡𑁆𑀡𑀯𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀅𑀢𑀺𑀫𑀸𑀦𑀧𑁆𑀧𑀘𑁆𑀘𑀬𑀸𑀢𑀺 𑀤𑀼𑀩𑁆𑀩𑀡𑁆𑀡𑀯𑀫𑁆𑀪𑀦𑀯𑀲𑁂𑀦 𑀅𑀢𑀺𑀓𑁆𑀓𑀫𑁆𑀫 𑀅𑀢𑁆𑀢𑀦𑁄 𑀯𑀡𑁆𑀡𑀁 𑀧𑀝𑀺𑀘𑁆𑀘 𑀫𑀸𑀦𑀧𑀘𑁆𑀘𑀬𑀸, 𑀫𑀸𑀦𑀲𑀫𑁆𑀧𑀕𑁆𑀕𑀡𑁆𑀳𑀦𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀢𑀺𑀲𑀬𑁄 𑀭𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀭𑀲𑀸𑀢𑀺 𑀮𑀤𑁆𑀥𑀫𑀸𑀦𑀸𑀬, 𑀅𑀦𑀼𑀪𑀸𑀲𑀺𑀁𑀲𑀽𑀢𑀺 𑀅𑀦𑀼𑀭𑁄𑀥𑀯𑀲𑁂𑀦 𑀪𑀸𑀲𑀺𑀁𑀲𑀼. 𑀮𑁄𑀓𑀼𑀧𑁆𑀧𑀢𑁆𑀢𑀺𑀯𑀁𑀲𑀓𑀣𑀦𑁆𑀢𑀺 𑀮𑁄𑀓𑀼𑀧𑁆𑀧𑀢𑁆𑀢𑀺𑀯𑀁𑀲𑀚𑀁 𑀧𑀯𑁂𑀡𑀻𑀓𑀣𑀁, 𑀆𑀤𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀧𑀯𑁂𑀡𑀻𑀆𑀕𑀢𑀓𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀧𑀢𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄.

𑀪𑀽𑀫𑀺𑀧𑀧𑁆𑀧𑀝𑀓𑀧𑀸𑀢𑀼𑀪𑀸𑀯𑀸𑀤𑀺𑀯𑀡𑁆𑀡𑀦𑀸

𑁧𑁨𑁩. 𑀏𑀤𑀺𑀲𑁄 𑀳𑀼𑀢𑁆𑀯𑀸𑀢𑀺 𑀅𑀳𑀺𑀘𑁆𑀙𑀢𑁆𑀢𑀓𑀲𑀤𑀺𑀲𑁄 𑀳𑀼𑀢𑁆𑀯𑀸.

𑁧𑁨𑁪. 𑀧𑀤𑀸𑀮𑀢𑀸𑀢𑀺 ‘‘𑀧𑀤𑀸’’𑀢𑀺 𑀏𑀯𑀁𑀦𑀸𑀫𑀸 𑀏𑀓𑀸 𑀮𑀢𑀸, 𑀲𑀸 𑀧𑀦 𑀬𑀲𑁆𑀫𑀸 𑀲𑀫𑁆𑀧𑀦𑁆𑀦𑀯𑀡𑁆𑀡𑀕𑀦𑁆𑀥𑀭𑀲𑀸, 𑀢𑀲𑁆𑀫𑀸 ‘‘𑀪𑀤𑁆𑀤𑀮𑀢𑀸’’𑀢𑀺 𑀯𑀼𑀢𑁆𑀢𑀸. 𑀦𑀸𑀴𑀺𑀓𑀸𑀢𑀺 𑀦𑀸𑀴𑀺𑀯𑀮𑁆𑀮𑀺. 𑀅𑀳𑀸𑀬𑀻𑀢𑀺 𑀦𑀲𑁆𑀲𑀺.

𑁧𑁨𑁫. 𑀅𑀓𑀝𑁆𑀞𑀧𑀸𑀓𑁄𑀢𑀺 𑀅𑀓𑀝𑁆𑀞𑁂𑀬𑁂𑀯 𑀞𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑀦𑀓𑁄, 𑀦𑀻𑀯𑀸𑀭𑁄 𑀯𑀺𑀬 𑀲𑀜𑁆𑀚𑀸𑀢𑁄 𑀳𑀼𑀢𑁆𑀯𑀸 𑀦𑀺𑀧𑁆𑀧𑀚𑁆𑀚𑀦𑀓𑁄𑀢𑀺 𑀅𑀢𑁆𑀣𑁄. 𑀓𑀡𑁄 ‘‘𑀓𑀼𑀡𑁆𑀟𑀓’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀣𑀼𑀲𑀦𑁆𑀢𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀢𑁆𑀢𑀘𑁄, 𑀢𑀤𑀪𑀸𑀯𑀢𑁄 ‘‘𑀅𑀓𑀡𑁄, 𑀅𑀣𑀼𑀲𑁄’’𑀢𑀺 𑀲𑀸𑀮𑀺 𑀯𑀼𑀢𑁆𑀢𑁄. ‘‘𑀧𑀝𑀺𑀯𑀺𑀭𑀽𑀴𑁆𑀳’’𑀦𑁆𑀢𑀺 𑀇𑀤𑀁 𑀧𑀓𑁆𑀓𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀧𑀝𑀺𑀯𑀺𑀭𑀽𑀴𑁆𑀳𑀢𑁄 𑀳𑀺 𑀢𑀁 𑀧𑀓𑁆𑀓𑀦𑁆𑀢𑀺. 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀸𑀬𑀁 𑀧𑀓𑁆𑀓𑁄 𑀲𑀸𑀮𑀺 𑀕𑀳𑀺𑀢𑁄, 𑀢𑀤𑁂𑀯 𑀞𑀸𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄 𑀧𑀓𑁆𑀓𑁂𑀦 𑀲𑀸𑀮𑀺𑀦𑀸 𑀧𑀭𑀺𑀧𑀼𑀡𑁆𑀡𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀲𑀸𑀬𑀁 𑀕𑀳𑀺𑀢𑀝𑁆𑀞𑀸𑀦𑀁 𑀧𑀸𑀢𑁄 𑀧𑀓𑁆𑀓𑀁 𑀳𑁄𑀢𑀻’’𑀢𑀺𑀆𑀤𑀺. 𑀅𑀮𑀸𑀬𑀺𑀢𑀦𑁆𑀢𑀺 𑀮𑀸𑀬𑀺𑀢𑀝𑁆𑀞𑀸𑀦𑀫𑁆𑀧𑀺 𑀢𑁂𑀲𑀁 𑀓𑀫𑁆𑀫𑀧𑁆𑀧𑀘𑁆𑀘𑀬𑀸 𑀅𑀮𑀸𑀬𑀺𑀢𑀫𑁂𑀯 𑀳𑀼𑀢𑁆𑀯𑀸 𑀅𑀦𑀽𑀦𑀁 𑀧𑀭𑀺𑀧𑀼𑀡𑁆𑀡𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀓𑁂𑀯𑀮𑀁 𑀧𑀜𑁆𑀜𑀸𑀬𑀦𑀫𑁂𑀯, 𑀅𑀣 𑀔𑁄 𑀢𑀣𑀸𑀪𑀽𑀢𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁬. ‘‘𑀫𑀦𑀼𑀲𑁆𑀲𑀓𑀸𑀮𑁂’’𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀦𑀁𑀬𑁂𑀯 𑀢𑀢𑁆𑀣 𑀇𑀤𑀸𑀦𑀺 𑀦𑀺𑀓𑀦𑁆𑀢𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀤𑁂𑀯𑀢𑀸𑀦𑀫𑁆𑀧𑀺 𑀧𑀼𑀭𑀺𑀫𑀚𑀸𑀢𑀺𑀬𑀁 𑀇𑀢𑁆𑀣𑀺𑀪𑀸𑀯𑁂 𑀞𑀺𑀢𑀸𑀦𑀁 𑀢𑀢𑁆𑀣 𑀯𑀺𑀭𑀸𑀕𑀸𑀤𑀺𑀧𑀼𑀭𑀺𑀲𑀢𑁆𑀢𑀧𑁆𑀧𑀘𑁆𑀘𑀬𑁂 𑀅𑀲𑀢𑀺 𑀢𑀤𑀸 𑀇𑀢𑁆𑀣𑀺𑀮𑀺𑀗𑁆𑀕𑀫𑁂𑀯 𑀧𑀸𑀢𑀼𑀪𑀯𑀢𑀺. 𑀧𑀼𑀭𑀺𑀲𑀢𑁆𑀢𑀧𑀘𑁆𑀘𑀬𑁂𑀢𑀺 ‘‘𑀅𑀢𑁆𑀢𑀦𑁄𑀧𑀺 𑀅𑀦𑀺𑀲𑁆𑀲𑀭𑀢𑀸, 𑀲𑀩𑁆𑀩𑀓𑀸𑀮𑀁 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸, 𑀭𑀚𑀲𑁆𑀲𑀮𑀢𑀸 𑀯𑀜𑁆𑀘𑀢𑀸, 𑀕𑀩𑁆𑀪𑀥𑀸𑀭𑀡𑀁, 𑀧𑀞𑀫𑀸𑀬 𑀧𑀓𑀢𑀺𑀬𑀸 𑀦𑀺𑀳𑀻𑀦𑀧𑀓𑀢𑀺𑀢𑀸, 𑀲𑀽𑀭𑀯𑀻𑀭𑀢𑀸𑀪𑀸𑀯𑁄, ‘𑀅𑀧𑁆𑀧𑀓𑀸 𑀚𑀦𑀸’𑀢𑀺 ‘𑀳𑀻𑀴𑁂𑀢𑀩𑁆𑀩𑀢𑀸’𑀢𑀺 𑀏𑀯𑀫𑀸𑀤𑀺 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀧𑀼𑀩𑁆𑀩𑀓𑀫𑁆𑀧𑀺 𑀇𑀢𑁆𑀣𑀺𑀪𑀸𑀯𑁂 ‘𑀅𑀮𑀁 𑀇𑀢𑁆𑀣𑀺𑀪𑀸𑀯𑁂𑀦, 𑀦 𑀳𑀺 𑀇𑀢𑁆𑀣𑀺𑀪𑀸𑀯𑁂 𑀞𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁, 𑀦 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀺𑀭𑀺𑀬𑁄 𑀧𑀘𑁆𑀘𑀦𑀼𑀪𑀯𑀺𑀢𑀼𑀁, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀁, 𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸’𑀢𑀺 𑀏𑀯𑀁 𑀇𑀢𑁆𑀣𑀺𑀪𑀸𑀯𑀯𑀺𑀭𑀚𑁆𑀚𑀦𑀁, ‘𑀬𑀣𑀸𑀯𑀼𑀢𑁆𑀢𑀆𑀤𑀻𑀦𑀯𑀯𑀺𑀭𑀳𑀢𑁄 𑀉𑀢𑁆𑀢𑀫𑀧𑀓𑀢𑀺𑀪𑀸𑀯𑀢𑁄 𑀲𑀫𑁆𑀧𑀤𑀫𑀺𑀤𑀁 𑀧𑀼𑀭𑀺𑀲𑀢𑁆𑀢𑀁 𑀦𑀸𑀫 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁, 𑀏𑀢𑁆𑀣 𑀞𑀢𑁆𑀯𑀸 𑀲𑀓𑁆𑀓𑀸 𑀏𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀲𑀫𑁆𑀧𑀸𑀧𑀼𑀡𑀺𑀢𑀼’𑀦𑁆𑀢𑀺 𑀏𑀯𑀁 𑀧𑀼𑀭𑀺𑀲𑀢𑁆𑀢𑀪𑀸𑀯𑁂 𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀓𑀁 𑀧𑀢𑁆𑀣𑀦𑀸𑀞𑀧𑀦𑀁, ‘𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸’𑀢𑀺’’ 𑀏𑀯𑀫𑀸𑀤𑀺𑀓𑁂 𑀧𑀼𑀭𑀺𑀲𑀪𑀸𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑁂 𑀥𑀫𑁆𑀫𑁂. 𑀧𑀽𑀭𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸. 𑀧𑀘𑁆𑀘𑀓𑁆𑀔𑀁 𑀪𑀽𑀢𑀁, 𑀲𑀤𑀺𑀲𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀲𑀼𑀯𑀺𑀧𑀼𑀮𑀁 𑀅𑀦𑀢𑁆𑀣𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀭𑀡𑀁 𑀓𑁂𑀯𑀮𑀁 𑀇𑀢𑁆𑀣𑀺𑀬𑀁 𑀆𑀲𑀸𑀧𑀢𑁆𑀢𑀺 𑀨𑀮𑁂𑀦𑁂𑀯𑀸𑀢𑀺 𑀆𑀲𑀸𑀆𑀧𑀢𑁆𑀢𑀺 𑀇𑀢𑁆𑀣𑀺𑀪𑀸𑀯𑀸𑀯𑀳𑀸𑀧𑀺 𑀳𑁄𑀢𑀺𑀬𑁂𑀯. 𑀢𑀦𑁆𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀢𑀦𑁆𑀦𑀺𑀓𑀦𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑀸𑀧𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀲𑁄 𑀇𑀢𑁆𑀣𑀢𑁆𑀢𑀪𑀸𑀯𑀁 𑀮𑀪𑀦𑁆𑀢𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀦𑀺𑀲𑁆𑀲𑀸𑀬 𑀮𑀪𑀢𑀻’’𑀢𑀺. 𑀢𑀤𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂. 𑀧𑀓𑀢𑀺𑀬𑀸𑀢𑀺 𑀲𑀪𑀸𑀯𑁂𑀦. 𑀫𑀸𑀢𑀼𑀕𑀸𑀫𑀲𑁆𑀲𑀸𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀫𑀸𑀢𑀼𑀕𑀸𑀫𑀪𑀽𑀢𑀲𑁆𑀲. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀓𑀢𑀺𑀬𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀉𑀧𑀦𑀺𑀚𑁆𑀛𑀸𑀬𑀢𑀦𑁆𑀢𑀺 𑀉𑀧𑁂𑀘𑁆𑀘 𑀦𑀺𑀚𑁆𑀛𑀸𑀬𑀦𑁆𑀢𑀸𑀦𑀁. 𑀬𑀣𑀸 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀲𑀸𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀸𑀧𑁂𑀓𑁆𑀔𑀪𑀸𑀯𑁂𑀦 𑀑𑀮𑁄𑀓𑁂𑀦𑁆𑀢𑀸𑀦𑀁. 𑀭𑀸𑀕𑀧𑀭𑀺𑀴𑀸𑀳𑁄𑀢𑀺 𑀭𑀸𑀕𑀚𑁄 𑀧𑀭𑀺𑀴𑀸𑀳𑁄.

𑀦𑀺𑀩𑁆𑀩𑀼𑀬𑁆𑀳𑀫𑀸𑀦𑀸𑀬𑀸𑀢𑀺 𑀧𑀭𑀺𑀡𑀢𑀸 𑀳𑀼𑀢𑁆𑀯𑀸 𑀦𑀺𑀬𑁆𑀬𑀫𑀸𑀦𑀸𑀬.

𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀘𑀸𑀭𑀯𑀡𑁆𑀡𑀦𑀸

𑁧𑁨𑁭. 𑀕𑁄𑀫𑀬𑀧𑀺𑀡𑁆𑀟𑀫𑀢𑁆𑀢𑀫𑁆𑀧𑀺 𑀦𑀸𑀮𑀢𑁆𑀣𑀸𑀢𑀺 𑀲𑀫𑁆𑀫𑀤𑁂𑀯 𑀯𑀺𑀯𑀸𑀳𑀓𑀫𑁆𑀫𑀁 𑀦𑀸𑀮𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀺. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀢𑀲𑁆𑀫𑀺𑀁 𑀅𑀲𑀤𑁆𑀥𑀫𑁆𑀫𑁂 𑀓𑀺𑀮𑁂𑀲𑀓𑀸𑀫𑁂𑀦 𑀧𑀺𑀯𑀺𑀢𑀩𑁆𑀩𑀢𑀁 𑀓𑀺𑀜𑁆𑀘𑀺 𑀧𑀺𑀯𑀺𑀢𑀩𑁆𑀩𑀯𑀢𑁆𑀣𑀼𑀁 𑀧𑀺𑀯𑀦𑁆𑀢𑀸 𑀯𑀺𑀬 𑀅𑀢𑀺𑀯𑀺𑀬 𑀢𑁄𑀲𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀁 𑀆𑀧𑀚𑁆𑀚𑀺𑀁𑀲𑀼, 𑀧𑀸𑀢𑀩𑁆𑀬𑀢𑀦𑁆𑀢𑀺 𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑀢𑀁 𑀆𑀧𑀚𑁆𑀚𑀺𑀁𑀲𑀼 𑀉𑀧𑀕𑀘𑁆𑀙𑀺𑀁𑀲𑀼. 𑀧𑀭𑀺𑀪𑁄𑀕𑀢𑁆𑀣𑁄 𑀳𑀺 𑀅𑀬𑀁 𑀧𑀸-𑀲𑀤𑁆𑀤𑁄, 𑀓𑀢𑁆𑀢𑀼𑀲𑀸𑀥𑀦𑁄 𑀘 𑀢𑀩𑁆𑀬-𑀲𑀤𑁆𑀤𑁄, 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀲𑀦𑁆𑀦𑀺𑀥𑀺𑀓𑀸𑀭𑀓𑀦𑁆𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀁, 𑀓-𑀓𑀸𑀭𑁄 𑀧𑀤𑀯𑀟𑁆𑀠𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸’’𑀢𑀺. 𑀅𑀧𑀤𑀸𑀦𑀦𑁆𑀢𑀺 𑀅𑀯𑀔𑀡𑁆𑀟𑀦𑀁. 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀢𑁆𑀣 𑀬𑀢𑁆𑀣 𑀯𑀳𑀺𑀢𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂. 𑀕𑀼𑀫𑁆𑀩𑀕𑀼𑀫𑁆𑀩𑀸𑀢𑀺 𑀧𑀼𑀜𑁆𑀚𑀧𑀼𑀜𑁆𑀚𑀸.

𑀲𑀸𑀮𑀺𑀯𑀺𑀪𑀸𑀕𑀯𑀡𑁆𑀡𑀦𑀸

𑁧𑁨𑁮. 𑀲𑀻𑀫𑀁 𑀞𑀧𑁂𑀬𑁆𑀬𑀸𑀫𑀸𑀢𑀺 ‘‘𑀅𑀬𑀁 𑀪𑀽𑀫𑀺𑀪𑀸𑀕𑁄 𑀅𑀲𑀼𑀓𑀲𑁆𑀲, 𑀅𑀬𑀁 𑀪𑀽𑀫𑀺𑀪𑀸𑀕𑁄 𑀅𑀲𑀼𑀓𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑁂𑀤𑀁 𑀓𑀭𑁂𑀬𑁆𑀬𑀸𑀫. 𑀢𑀁 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀢𑀁 𑀆𑀤𑀺𑀁 𑀓𑀢𑁆𑀯𑀸.

𑀫𑀳𑀸𑀲𑀫𑁆𑀫𑀢𑀭𑀸𑀚𑀯𑀡𑁆𑀡𑀦𑀸

𑁧𑁩𑁦. 𑀧𑀓𑀸𑀲𑁂𑀢𑀩𑁆𑀩𑀦𑁆𑀢𑀺 𑀤𑁄𑀲𑀯𑀲𑁂𑀦 𑀧𑀓𑀸𑀲𑁂𑀢𑀩𑁆𑀩𑀁. 𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀔𑁂𑀧𑀁 𑀓𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀳𑀸𑀭𑁂𑀢𑀩𑁆𑀩’’𑀦𑁆𑀢𑀺, 𑀲𑀢𑁆𑀢𑀦𑀺𑀓𑀸𑀬𑀢𑁄 𑀦𑀻𑀳𑀭𑀺𑀢𑀩𑁆𑀩𑀁.

𑀦𑁂𑀲𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁.

𑁧𑁩𑁧. 𑀅𑀓𑁆𑀔𑀭𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀁. 𑀲𑀸 𑀳𑀺 𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑁄𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑁄 𑀦𑀺𑀭𑀼𑀢𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀦𑀺𑀭𑀽𑀴𑁆𑀳𑀪𑀸𑀯𑀢𑁄, 𑀅𑀜𑁆𑀜𑀢𑁆𑀣 𑀅𑀲𑀜𑁆𑀘𑀭𑀡𑀢𑁄 𑀅𑀓𑁆𑀔𑀭𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀣𑀸 𑀲𑀗𑁆𑀔𑀸𑀢𑀩𑁆𑀩𑀢𑁄 𑀲𑀗𑁆𑀔𑀸, 𑀲𑀫𑀜𑁆𑀜𑀸𑀬𑀢𑀻𑀢𑀺 𑀲𑀫𑀜𑁆𑀜𑀸, 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺, 𑀯𑁄𑀳𑀭𑀡𑀢𑁄 𑀯𑁄𑀳𑀸𑀭𑁄. 𑀉𑀧𑁆𑀧𑀦𑁆𑀦𑁄𑀢𑀺 𑀧𑀯𑀢𑁆𑀢𑁄. 𑀦 𑀓𑁂𑀯𑀮𑀁 𑀅𑀓𑁆𑀔𑀭𑀫𑁂𑀯𑀸𑀢𑀺 𑀦 𑀓𑁂𑀯𑀮𑀁 𑀲𑀫𑀜𑁆𑀜𑀸𑀓𑀭𑀡𑀫𑁂𑀯. 𑀔𑁂𑀢𑁆𑀢𑀲𑀸𑀫𑀺𑀦𑁄𑀢𑀺 𑀢𑀁 𑀢𑀁 𑀪𑀽𑀫𑀺𑀪𑀸𑀕𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑀢𑁆𑀢𑀸. 𑀢𑀻𑀳𑀺 𑀲𑀗𑁆𑀔𑁂𑀳𑀻𑀢𑀺 𑀢𑀺𑀯𑀺𑀥𑀓𑀺𑀭𑀺𑀬𑀸𑀪𑀺𑀲𑀗𑁆𑀔𑀢𑁂𑀳𑀺 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀔𑀢𑁆𑀢𑀺𑀬𑀸𑀤𑀻𑀳𑀺 𑀢𑀻𑀳𑀺 𑀯𑀡𑁆𑀡𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑁂𑀳𑀺. ‘‘𑀔𑀢𑁆𑀢𑀺𑀬𑀸𑀦𑀼𑀬𑀦𑁆𑀢𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀦𑁂𑀕𑀫𑀚𑀸𑀦𑀧𑀤𑁂𑀳𑀺 𑀢𑀻𑀳𑀺 𑀕𑀳𑀧𑀢𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑁂𑀳𑀻’’𑀢𑀺 𑀘 𑀯𑀤𑀦𑁆𑀢𑀺. 𑀅𑀕𑁆𑀕𑀦𑁆𑀢𑀺 𑀜𑀸𑀢𑁂𑀦𑀸𑀢𑀺 𑀅𑀕𑁆𑀕𑀁 𑀓𑀼𑀮𑀦𑁆𑀢𑀺 𑀜𑀸𑀢𑁂𑀦. 𑀔𑀢𑁆𑀢𑀺𑀬𑀓𑀼𑀮𑀜𑁆𑀳𑀺 𑀮𑁄𑀓𑁂 𑀲𑀩𑁆𑀩𑀲𑁂𑀝𑁆𑀞𑀁. 𑀬𑀣𑀸𑀳 ‘‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺, (𑀤𑀻. 𑀦𑀺. 𑁧.𑁨𑁭𑁭; 𑁩.𑁧𑁪𑁦; 𑀫. 𑀦𑀺. 𑁨.𑁩𑁦; 𑀲𑀁. 𑀦𑀺. 𑁧.𑁧𑁮𑁨, 𑁨𑁪𑁫) 𑀅𑀪𑁂𑀤𑁄𑀧𑀘𑀸𑀭𑁂𑀦 𑀧𑀦 𑀅𑀓𑁆𑀔𑀭𑀲𑁆𑀲 𑀔𑀢𑁆𑀢𑀺𑀬𑀲𑀤𑁆𑀤𑀲𑁆𑀲𑀧𑀺 𑀲𑁂𑀝𑁆𑀞𑀢𑀸𑀢𑀺 𑀧𑀸𑀴𑀺𑀬𑀁 ‘‘𑀅𑀕𑁆𑀕𑀜𑁆𑀜𑁂𑀦 𑀅𑀓𑁆𑀔𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀅𑀪𑁂𑀤𑁄𑀧𑀘𑀸𑀭𑁂𑀦 𑀯𑀺𑀦𑀸 𑀏𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀕𑁆𑀕𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀩𑁆𑀭𑀸𑀳𑁆𑀫𑀡𑀫𑀡𑁆𑀟𑀮𑀸𑀤𑀺𑀯𑀡𑁆𑀡𑀦𑀸

𑁧𑁩𑁨. 𑀬𑁂𑀦 𑀅𑀦𑀸𑀭𑀫𑁆𑀪𑀪𑀸𑀯𑁂𑀦 𑀩𑀸𑀳𑀺𑀢𑀸𑀓𑀼𑀲𑀮𑀸 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸, 𑀢𑀫𑁂𑀯 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀯𑀻𑀢𑀗𑁆𑀕𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀫𑁂𑀦𑀦𑁆𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀢𑁂 𑀏𑀢𑁂’’𑀢𑀺. 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸𑀢𑀺 𑀘𑀺𑀢𑁆𑀢𑀫𑀦𑁆𑀢𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀯𑀺𑀲𑀺𑀝𑁆𑀞𑁂 𑀓𑀭𑁄𑀦𑁆𑀢𑀸, 𑀩𑁆𑀭𑀸𑀳𑁆𑀫𑀡𑀸𑀓𑀧𑁆𑀧𑀪𑀸𑀯𑁂𑀦 𑀲𑀗𑁆𑀔𑀭𑁄𑀦𑁆𑀢𑀸 𑀘. 𑀯𑀸𑀘𑁂𑀦𑁆𑀢𑀸𑀢𑀺 𑀧𑀭𑁂𑀲𑀁 𑀓𑀣𑁂𑀦𑁆𑀢𑀸, 𑀬𑁂 𑀢𑀣𑀸 𑀕𑀦𑁆𑀣𑁂 𑀓𑀸𑀢𑀼𑀁 𑀦 𑀚𑀸𑀦𑀦𑁆𑀢𑀺. 𑀅𑀘𑁆𑀙𑀦𑁆𑀢𑀻𑀢𑀺 𑀆𑀲𑀦𑁆𑀢𑀺, 𑀉𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀲𑀦𑁆𑀢𑀻’’𑀢𑀺. 𑀅𑀘𑁆𑀙𑁂𑀦𑁆𑀢𑀻𑀢𑀺 𑀓𑀸𑀮𑀁 𑀔𑁂𑀧𑁂𑀦𑁆𑀢𑀺. 𑀳𑀻𑀦𑀲𑀫𑁆𑀫𑀢𑀁 𑀛𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑀁 𑀙𑀟𑁆𑀟𑁂𑀢𑁆𑀯𑀸 𑀕𑀦𑁆𑀣𑁂 𑀧𑀲𑀼𑀢𑀢𑀸𑀤𑀻𑀧𑀦𑀢𑁄. 𑀲𑁂𑀝𑁆𑀞𑀲𑀫𑁆𑀫𑀢𑀁 𑀚𑀸𑀢𑀁 ‘‘𑀯𑁂𑀤𑀥𑀭𑀸 𑀲𑁄𑀢𑁆𑀢𑀺𑀬𑀸 𑀲𑀼𑀩𑁆𑀭𑀸𑀳𑁆𑀫𑀡𑀸𑀢𑀺 𑀏𑀯𑀁 𑀲𑁂𑀝𑁆𑀞𑀲𑀫𑁆𑀫𑀢𑀁 𑀚𑀸𑀢𑀁.

𑁧𑁩𑁩. 𑀫𑁂𑀣𑀼𑀦𑀥𑀫𑁆𑀫𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀚𑀸𑀬𑀸𑀧𑀢𑀺𑀓𑀪𑀸𑀯𑁂𑀦 𑀤𑁆𑀯𑀬𑀁 𑀤𑁆𑀯𑀬𑀁 𑀦𑀺𑀯𑀸𑀲𑀁 𑀅𑀚𑁆𑀛𑀼𑀧𑀕𑀦𑁆𑀢𑁆𑀯𑀸. 𑀯𑀸𑀡𑀺𑀚𑀓𑀫𑁆𑀫𑀸𑀤𑀺𑀓𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀲𑀺𑀓𑀫𑁆𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁩𑁪. 𑀮𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀔𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸𑀢𑀺 𑀧𑀭𑀯𑀺𑀳𑁂𑀞𑀦𑀸𑀤𑀺𑀮𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸, 𑀦𑀴𑀓𑀸𑀭𑀤𑀸𑀭𑀼𑀓𑀫𑁆𑀫𑀸𑀤𑀺𑀔𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸 𑀘. 𑀲𑀼𑀤𑁆𑀤𑀦𑁆𑀢𑀺 𑀏𑀢𑁆𑀣 𑀲𑀼-𑀇𑀢𑀺 𑀲𑀻𑀖𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀸-𑀇𑀢𑀺 𑀕𑀭𑀳𑀡𑀢𑁆𑀣𑁂𑀢𑀺 𑀆𑀳 ‘‘𑀲𑀼𑀤𑁆𑀤𑀁 𑀲𑀼𑀤𑁆𑀤𑀁 𑀮𑀳𑀼𑀁 𑀮𑀳𑀼𑀁 𑀓𑀼𑀘𑁆𑀙𑀺𑀢𑀁 𑀕𑀘𑁆𑀙𑀦𑁆𑀢𑀻’’𑀢𑀺.

𑁧𑁩𑁫. 𑀅𑀳𑀽𑀢𑀺 𑀓𑀸𑀮𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑁄𑀢𑀺 𑀔𑁄’’𑀢𑀺 𑀆𑀳. 𑀇𑀫𑀺𑀦𑀸𑀢𑀺 ‘‘𑀇𑀫𑁂𑀳𑀺 𑀔𑁄, 𑀯𑀸𑀲𑁂𑀝𑁆𑀞, 𑀘𑀢𑀽𑀳𑀺 𑀫𑀡𑁆𑀟𑀮𑁂𑀳𑀺 𑀲𑀫𑀡𑀫𑀡𑁆𑀟𑀮𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀇𑀫𑀁 𑀤𑀲𑁆𑀲𑁂𑀢𑀻𑀢𑀺 𑀲𑀫𑀡𑀫𑀡𑁆𑀟𑀮𑀁 𑀦𑀸𑀫…𑀧𑁂… 𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀇𑀫𑀁 𑀅𑀢𑁆𑀣𑀚𑀸𑀢𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀇𑀫𑁂𑀳𑀺…𑀧𑁂… 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀫𑀡𑁆𑀟𑀮𑀸𑀦𑀺 𑀧𑀥𑀸𑀦𑀸𑀦𑀺, 𑀲𑀫𑀡𑀫𑀡𑁆𑀟𑀮𑀁 𑀅𑀧𑁆𑀧𑀥𑀸𑀦𑀁 𑀢𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑁆𑀢𑀸𑀢𑀺? 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀡𑀫𑀡𑁆𑀟𑀮𑀁 𑀅𑀦𑀼𑀯𑀢𑁆𑀢𑀦𑁆𑀢𑀺 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. 𑀕𑀼𑀡𑁄 𑀳𑀺 𑀯𑀺𑀜𑁆𑀜𑀽𑀦𑀁 𑀅𑀦𑀼𑀯𑀢𑁆𑀢𑀦𑀳𑁂𑀢𑀼, 𑀦 𑀓𑁄𑀮𑀧𑀼𑀢𑁆𑀢𑀺𑀬𑀁, 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀯𑀸𑀓𑁆𑀓𑀭𑀡𑀫𑀢𑁆𑀢𑀁 𑀯𑀸. 𑀢𑁂𑀦𑀸𑀳 ‘‘𑀥𑀫𑁆𑀫𑁂𑀦𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀦𑁄 𑀅𑀥𑀫𑁆𑀫𑁂𑀦𑀸’’𑀢𑀺. 𑀲𑁄 𑀥𑀫𑁆𑀫𑁄 𑀘 𑀮𑁄𑀓𑀼𑀢𑁆𑀢𑀭𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀬𑁂𑀦 𑀲𑀁𑀲𑀸𑀭𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀫𑀡𑀫𑀡𑁆𑀟𑀮𑀦𑁆𑀢𑀺 𑀘 𑀲𑀸𑀲𑀦𑀺𑀓𑀫𑁂𑀯 𑀲𑀫𑀡𑀕𑀡𑀁 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑀫𑀡𑀫𑀡𑁆𑀟𑀮𑀜𑁆𑀳𑀻’’𑀢𑀺𑀆𑀤𑀺.

𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁩𑁬. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀓𑀫𑁆𑀫𑀁 𑀦𑀸𑀫 ‘‘𑀓𑁄 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄. 𑀅𑀚𑁄𑀢𑀕𑁆𑀕𑀺𑀲𑁄𑀝𑁆𑀞𑀺𑀫𑀺𑀲𑁄’’𑀢𑀺𑀆𑀤𑀺𑀦𑀸 𑀬𑀜𑁆𑀜𑀯𑀺𑀥𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀳𑀺𑀁𑀲𑀸𑀤𑀺𑀧𑀸𑀧𑀓𑀫𑁆𑀫𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑁆𑀲𑀸𑀢𑀺 ‘‘𑀏𑀲 𑀲𑀤𑁆𑀥𑀸𑀥𑀺𑀕𑀢𑁄 𑀤𑁂𑀯𑀬𑀸𑀦𑁄, 𑀬𑁂𑀦 𑀬𑀦𑁆𑀢𑀺 𑀧𑀼𑀢𑁆𑀢𑀺𑀦𑁄 𑀯𑀺𑀲𑁄𑀓𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀢𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀳𑀕𑀢𑀓𑀫𑁆𑀫𑀲𑁆𑀲. 𑀲𑀫𑀸𑀤𑀸𑀦𑀁 𑀢𑀲𑁆𑀲 𑀢𑀣𑀸 𑀧𑀯𑀢𑁆𑀢𑀦𑀁, 𑀢𑀲𑁆𑀲𑀸 𑀯𑀸 𑀤𑀺𑀝𑁆𑀞𑀺𑀬𑀸 𑀉𑀧𑀕𑀫𑀦𑀁.

𑁧𑁩𑁭. 𑀤𑁆𑀯𑀬𑀓𑀸𑀭𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀤𑁆𑀯𑀬𑀲𑁆𑀲 𑀓𑀢𑁆𑀢𑀸. 𑀢𑀬𑀺𑀤𑀁 𑀤𑁆𑀯𑀬𑀁 𑀬𑀲𑁆𑀫𑀸 𑀏𑀓𑀚𑁆𑀛𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀆𑀳 ‘‘𑀓𑀸𑀮𑁂𑀦𑀸’’𑀢𑀺𑀆𑀤𑀺. 𑀏𑀓𑀓𑁆𑀔𑀡𑁂 𑀉𑀪𑀬𑀯𑀺𑀧𑀸𑀓𑀤𑀸𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀘𑀺𑀢𑁆𑀢𑀤𑁆𑀯𑀬𑀽𑀧𑀲𑀜𑁆𑀳𑀺𑀢𑀸𑀬 𑀲𑀢𑁆𑀢𑀲𑀦𑁆𑀢𑀢𑀺𑀬𑀸 𑀅𑀪𑀸𑀯𑀢𑁄. 𑀬𑀣𑀸 𑀧𑀦 𑀤𑁆𑀯𑀬𑀓𑀸𑀭𑀺𑀦𑁄 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀺𑀢𑀸 𑀲𑀫𑁆𑀪𑀯𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁𑀪𑀽𑀢𑁄𑀢𑀺 𑀯𑀺𑀓𑀮𑀸𑀯𑀬𑀯𑁄. 𑀤𑁆𑀯𑁂𑀧𑀺𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀢𑀽𑀧𑀘𑀺𑀢𑀸𑀦𑀺 𑀲𑀪𑀸𑀯𑀢𑁄 𑀩𑀮𑀯𑀦𑁆𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀫𑀭𑀡𑀓𑀸𑀮𑁂 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀲𑀼 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀳𑁄𑀢𑀺 𑀧𑀘𑁆𑀘𑀬𑀮𑀸𑀪𑀢𑁄. 𑀦𑀺𑀓𑀦𑁆𑀢𑀺𑀆𑀤𑀬𑁄 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑀸 𑀅𑀓𑀼𑀲𑀮𑀲𑁆𑀲𑁂𑀯 𑀲𑀪𑀸𑀕𑀸, 𑀦 𑀓𑀼𑀲𑀮𑀲𑁆𑀲, 𑀢𑀲𑁆𑀫𑀸 𑀓𑀢𑀽𑀧𑀘𑀺𑀢𑀪𑀸𑀯𑁂𑀦 𑀲𑀫𑀸𑀦𑀩𑀮𑁂𑀲𑀼𑀧𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀧𑀘𑁆𑀘𑀬𑀮𑀸𑀪𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀮𑀤𑁆𑀥𑁄𑀓𑀸𑀲𑀢𑀸𑀬 𑀓𑀼𑀲𑀮𑀢𑁄 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀳𑁄𑀢𑀻𑀢𑀺, 𑀢𑀣𑀸𑀪𑀽𑀢𑀫𑁆𑀧𑀺 𑀢𑀁 𑀬𑀣𑀸 𑀯𑀺𑀧𑀸𑀓𑀤𑀸𑀦𑁂 𑀮𑀤𑁆𑀥𑁄𑀓𑀸𑀲𑀲𑁆𑀲 𑀓𑀼𑀲𑀮𑀲𑁆𑀲𑀸𑀧𑀺 𑀅𑀯𑀲𑀭𑁄 𑀳𑁄𑀢𑀺, 𑀢𑀣𑀸 𑀮𑀤𑁆𑀥𑀧𑀘𑁆𑀘𑀬𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀺𑀫𑀼𑀔𑀁 𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀤𑁂𑀦𑁆𑀢𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀻𑀢𑀺. ‘‘𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀳𑁄𑀢𑀻’’𑀢𑀺 𑀏𑀢𑁆𑀣 ‘‘𑀅𑀓𑀼𑀲𑀮𑀁 𑀘𑁂 𑀩𑀮𑀯𑀢𑀭𑀁 𑀳𑁄𑀢𑀺, 𑀢𑀁 𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀁 𑀯𑀢𑁆𑀯𑀸 𑀢𑁂𑀲𑀼 𑀓𑀼𑀲𑀮𑀁 𑀘𑁂 𑀩𑀮𑀯𑀢𑀭𑀁 𑀳𑁄𑀢𑀺, 𑀢𑀜𑁆𑀘 𑀅𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀫𑀦𑀼𑀲𑁆𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀺, 𑀅𑀓𑀼𑀲𑀮𑀁 𑀧𑀯𑀢𑁆𑀢𑀺𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀅𑀣 𑀦𑀁 𑀢𑀁 𑀓𑀸𑀡𑀫𑁆𑀧𑀺 𑀓𑀭𑁄𑀢𑀺 𑀔𑀼𑀚𑁆𑀚𑀫𑁆𑀧𑀺 𑀧𑀻𑀞𑀲𑀧𑁆𑀧𑀺𑀫𑁆𑀧𑀺 𑀓𑀼𑀘𑁆𑀙𑀺𑀭𑁄𑀕𑀸𑀤𑀻𑀳𑀺 𑀯𑀸 𑀉𑀧𑀤𑁆𑀤𑀼𑀢𑀁. 𑀏𑀯𑀁 𑀲𑁄 𑀧𑀯𑀢𑁆𑀢𑀺𑀬𑀁 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀻’’𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀯𑀼𑀢𑁆𑀢𑀓𑀸𑀮𑁂 𑀯𑀸 𑀓𑀸𑀭𑁂𑀦 𑀲𑀫𑀸𑀦𑀩𑀮𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀫𑀭𑀡𑀲𑁆𑀲 𑀆𑀲𑀦𑁆𑀦𑀯𑁂𑀮𑀸𑀬𑀁 𑀬𑀤𑀺 𑀩𑀮𑀯𑀢𑀭𑀸𑀦𑀺 𑀓𑀼𑀲𑀮𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀬𑀣𑀸𑀉𑀧𑀝𑁆𑀞𑀺𑀢𑀁 𑀅𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀼𑀲𑀮𑀁 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀅𑀣 𑀩𑀮𑀯𑀢𑀭𑀸𑀦𑀺 𑀅𑀓𑀼𑀲𑀮𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀬𑀣𑀸𑀉𑀧𑀝𑁆𑀞𑀺𑀢𑀁 𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀓𑀼𑀲𑀮𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀪𑀺𑀦𑁆𑀦𑀁 𑀓𑀫𑁆𑀫𑀸𑀦𑀁 𑀲𑀫𑀸𑀦𑀩𑀮𑀯𑀪𑀸𑀯𑀢𑁄, 𑀧𑀘𑁆𑀘𑀬𑀦𑁆𑀢𑀭𑀲𑀸𑀧𑁂𑀓𑁆𑀔𑀢𑁄 𑀘𑀸𑀢𑀺, 𑀲𑀩𑁆𑀩𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀦𑀸𑀯𑀡𑁆𑀡𑀦𑀸

𑁧𑁩𑁮. 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸, 𑀲𑀪𑀸𑀯𑀢𑁄, 𑀢𑀁𑀲𑀪𑀸𑀯𑀢𑁄 𑀘 𑀢𑀲𑁆𑀲𑀸 𑀧𑀓𑁆𑀔𑁂 𑀪𑀯𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸, 𑀲𑀢𑀺𑀯𑀻𑀭𑀺𑀬𑀸𑀤𑀬𑁄 𑀥𑀫𑁆𑀫𑀸, 𑀢𑁂𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀤𑁂𑀲𑀦𑀸𑀧𑀝𑀺𑀧𑀸𑀝𑀺𑀬𑀸. 𑀪𑀸𑀯𑀦𑀁 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀯𑀢𑁆𑀢𑀁 𑀪𑀸𑀯𑀦𑀁 𑀧𑀢𑁆𑀯𑀸. 𑀢𑁂𑀦𑀸𑀳 ‘‘𑀧𑀝𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺. 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀯𑀲𑁂𑀦 𑀔𑀻𑀡𑀸𑀲𑀯𑀲𑁆𑀲 𑀲𑁂𑀝𑁆𑀞𑀪𑀸𑀯𑀁 𑀮𑁄𑀓𑀲𑁆𑀲 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑀸, 𑀦 𑀇𑀢𑀭𑀸𑀬 𑀲𑀩𑁆𑀩𑀲𑁄 𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀽𑀧𑀕𑀫𑀦𑁂 𑀢𑀲𑁆𑀲 𑀅𑀤𑀲𑁆𑀲𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺. 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀢𑀢𑁄 𑀘𑀢𑀼𑀯𑀡𑁆𑀡𑀢𑁄 𑀦𑀻𑀳𑀭𑀺𑀢𑁆𑀯𑀸.

𑁧𑁪𑁦. 𑀢𑀫𑁂𑀯𑀢𑁆𑀣𑀦𑁆𑀢𑀺 ‘‘𑀔𑀻𑀡𑀸𑀲𑀯𑁄𑀯 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑁂𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁.

𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀫𑁂𑀯𑀸𑀢𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑁂𑀝𑁆𑀞𑀪𑀸𑀯𑀲𑀫𑀼𑀘𑁆𑀙𑁂𑀤𑀓𑀫𑁂𑀯 𑀓𑀣𑀁. 𑀤𑀲𑁆𑀲𑁂𑀢𑁆𑀯𑀸 𑀪𑀸𑀲𑀺𑀢𑁆𑀯𑀸. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀮𑁄𑀓𑀺𑀬𑀥𑀫𑁆𑀫𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀁 ‘‘𑀲𑀢𑁆𑀢𑀦𑁆𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀫𑀦𑁆𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀢𑀢𑁄 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀢𑁂𑀦 𑀅𑀲𑀁𑀲𑀝𑁆𑀞𑀁 𑀓𑀢𑁆𑀯𑀸. 𑀆𑀯𑀚𑁆𑀚𑀦𑁆𑀢𑀸𑀢𑀺 𑀲𑀫𑀦𑁆𑀦𑀸𑀳𑀭𑀦𑁆𑀢𑀸. 𑀅𑀦𑀼𑀫𑀚𑁆𑀚𑀦𑁆𑀢𑀸𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀢𑁆𑀣𑀢𑁄 𑀯𑀺𑀘𑀭𑀦𑁆𑀢𑀸𑀢𑀺.

𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.