𑁩. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀢𑁆𑀢𑀤𑀻𑀧𑀲𑀭𑀡𑀢𑀸𑀯𑀡𑁆𑀡𑀦𑀸

𑁮𑁦. 𑀉𑀢𑁆𑀢𑀸𑀦𑀁 𑀯𑀼𑀘𑁆𑀘𑀢𑀺 𑀧𑀸𑀓𑀝𑀁, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀼𑀢𑁆𑀢𑀸𑀦𑀁 𑀅𑀧𑀸𑀓𑀝𑀁, 𑀧𑀝𑀺𑀘𑁆𑀙𑀦𑁆𑀦𑀁, 𑀅𑀧𑀘𑀼𑀭𑀁, 𑀤𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀘. 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀁 𑀯𑀡𑁆𑀡𑀦𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀉𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀸𑀦𑀕𑁆𑀕𑀳𑀡𑀁. ‘‘𑀫𑀸𑀢𑀼𑀮𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀏𑀓𑁄 𑀭𑀼𑀓𑁆𑀔𑁄, 𑀢𑀲𑁆𑀲𑀸 𑀆𑀲𑀦𑁆𑀦𑀧𑁆𑀧𑀤𑁂𑀲𑁂 𑀫𑀸𑀧𑀺𑀢𑀢𑁆𑀢𑀸 𑀦𑀕𑀭𑀫𑁆𑀧𑀺 ‘‘𑀫𑀸𑀢𑀼𑀮𑀸’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀢𑀼𑀮𑀸𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂’’𑀢𑀺. 𑀅𑀯𑀺𑀤𑀽𑀭𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂.

𑀓𑀸𑀫𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑁂 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀤𑀴𑁆𑀳𑀦𑁂𑀫𑀺 𑀦𑀸𑀫 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 𑀅𑀢𑀻𑀢𑀯𑀁𑀲𑀤𑀻𑀧𑀺𑀓𑀸 𑀓𑀣𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑀸, ‘‘𑀅𑀟𑁆𑀠𑀢𑁂𑀬𑁆𑀬𑀯𑀲𑁆𑀲𑀲𑀢𑀸𑀬𑀼𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑀲𑀢𑀸𑀬𑀼𑀓𑀸 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀯𑀺𑀲𑁂𑀲𑀁 𑀅𑀦𑀸𑀕𑀢𑀢𑁆𑀣𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀆𑀕𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀢𑀯𑀁𑀲𑀤𑀻𑀧𑀺𑀓𑀸𑀬 𑀲𑀼𑀢𑁆𑀢𑀦𑁆𑀢𑀓𑀣𑀸𑀬𑀸’’𑀢𑀺. 𑀅𑀦𑀸𑀕𑀢𑀢𑁆𑀣𑀤𑀻𑀧𑀦𑀜𑁆𑀳𑀺 𑀅𑀘𑁆𑀙𑀭𑀺𑀬𑀁, 𑀢𑀢𑁆𑀣𑀸𑀧𑀺 𑀅𑀦𑀸𑀕𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀁 𑀅𑀘𑁆𑀙𑀭𑀺𑀬𑀢𑀫𑀁. 𑀲𑀫𑀸𑀕𑀫𑁂𑀦𑀸𑀢𑀺 𑀲𑀦𑁆𑀦𑀺𑀧𑀸𑀢𑁂𑀦.

‘‘𑀪𑀢𑁆𑀢𑀕𑁆𑀕𑀁 𑀅𑀫𑀦𑀸𑀧’’𑀦𑁆𑀢𑀺𑀆𑀤𑀺 𑀓𑁂𑀯𑀮𑀁 𑀢𑁂𑀲𑀁 𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀁. 𑀅𑀫𑀦𑀸𑀧𑀦𑁆𑀢𑀺 𑀅𑀫𑀦𑀼𑀜𑁆𑀜𑀁. 𑀩𑀼𑀤𑁆𑀥𑁂𑀲𑀼 𑀓𑀢𑁄 𑀅𑀧𑁆𑀧𑀓𑁄𑀧𑀺 𑀅𑀧𑀭𑀸𑀥𑁄 𑀅𑀧𑁆𑀧𑀓𑁄 𑀓𑀸𑀭𑁄 𑀯𑀺𑀬 𑀕𑀭𑀼𑀢𑀭𑀯𑀺𑀧𑀸𑀓𑁄𑀢𑀺 𑀆𑀳 ‘‘𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁…𑀧𑁂… 𑀲𑀤𑀺𑀲𑀁 𑀳𑁄𑀢𑀻’’𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀫𑀸𑀢𑀼𑀮𑀦𑀕𑀭𑀲𑁆𑀲 𑀲𑀫𑀻𑀧𑁂, 𑀢𑀲𑁆𑀲𑀁 𑀯𑀸 𑀧𑀭𑀺𑀲𑀸𑀬𑀁.

𑀅𑀢𑁆𑀢𑀤𑀻𑀧𑀸𑀢𑀺 𑀏𑀢𑁆𑀣 𑀓𑀸𑀫𑀁 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸𑀢𑀺 𑀲𑀲𑀦𑁆𑀢𑀸𑀦𑁄 ‘‘𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀳𑀺𑀢𑀲𑀼𑀔𑁂𑀲𑀺𑀪𑀸𑀯𑁂𑀦 𑀧𑀦 𑀅𑀢𑁆𑀢𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸 𑀥𑀫𑁆𑀫𑁄 𑀇𑀥 ‘‘𑀅𑀢𑁆𑀢𑀸’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀸 𑀦𑀸𑀫 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄’’𑀢𑀺. 𑀤𑁆𑀯𑀺𑀥𑀸 𑀆𑀧𑁄 𑀕𑀢𑁄 𑀏𑀢𑁆𑀣𑀸𑀢𑀺 𑀤𑀻𑀧𑁄, 𑀑𑀖𑁂𑀦 𑀅𑀦𑀚𑁆𑀛𑁄𑀢𑁆𑀣𑀢𑁄 𑀪𑀽𑀫𑀺𑀪𑀸𑀕𑁄. 𑀇𑀥 𑀧𑀦 𑀓𑀸𑀫𑁄𑀖𑀸𑀤𑀻𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀢𑁆𑀢𑀸 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, 𑀅𑀢𑁆𑀢𑀸 𑀤𑀻𑀧𑁄 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀅𑀢𑁆𑀢𑀤𑀻𑀧𑀸. 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦𑀁 𑀤𑀻𑀧’’𑀦𑁆𑀢𑀺𑀆𑀤𑀺. 𑀤𑀻𑀧𑀪𑀸𑀯𑁄 𑀘𑁂𑀢𑁆𑀣 𑀧𑀝𑀺𑀲𑀭𑀡𑀢𑀸𑀢𑀺 𑀆𑀳 ‘‘𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀅𑀜𑁆𑀜𑀲𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀅𑀜𑁆𑀜𑀲𑀭𑀡𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀇𑀤𑀜𑁆𑀳𑀺 𑀦 𑀅𑀜𑁆𑀜𑀁 𑀲𑀭𑀡𑀁 𑀓𑀢𑁆𑀯𑀸 𑀯𑀺𑀳𑀭𑀡𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀅𑀣 𑀔𑁄 𑀅𑀜𑁆𑀜𑀲𑁆𑀲 𑀲𑀭𑀡𑀲𑀪𑀸𑀯𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑁂 𑀘 𑀢𑁂𑀦 𑀇𑀢𑀭𑀲𑁆𑀲𑀸𑀧𑀺 𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑀺𑀢𑁄. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀬𑀤𑀺 𑀏𑀢𑁆𑀣 𑀧𑀸𑀓𑀢𑀺𑀓𑁄 𑀅𑀢𑁆𑀢𑀸 𑀇𑀘𑁆𑀙𑀺𑀢𑁄, 𑀓𑀣𑀁 𑀢𑀲𑁆𑀲 𑀤𑀻𑀧𑀲𑀭𑀡𑀪𑀸𑀯𑁄, 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀺𑀓𑁄 𑀏𑀢𑁆𑀣 𑀅𑀢𑁆𑀢𑀸 𑀪𑀯𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀢𑀺 ‘‘𑀓𑁄 𑀧𑀦𑁂𑀢𑁆𑀣 𑀅𑀢𑁆𑀢𑀸 𑀦𑀸𑀫𑀸’’𑀢𑀺. 𑀇𑀢𑀭𑁄 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄’’𑀢𑀺. 𑀤𑀼𑀢𑀺𑀬𑀯𑀸𑀭𑁄𑀧𑀺 𑀧𑀞𑀫𑀯𑀸𑀭𑀲𑁆𑀲𑁂𑀯 𑀧𑀭𑀺𑀬𑀸𑀬𑀪𑀸𑀯𑁂𑀦 𑀤𑁂𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑁄𑀘𑀭𑁂𑀢𑀺 𑀪𑀺𑀓𑁆𑀔𑀽𑀦𑀁 𑀕𑁄𑀘𑀭𑀝𑁆𑀞𑀸𑀦𑀪𑀽𑀢𑁂. 𑀢𑁂𑀦𑀸𑀳 ‘‘𑀘𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂’’𑀢𑀺. 𑀲𑀓𑁂𑀢𑀺 𑀓𑀣𑀁 𑀧𑀦𑀸𑀬𑀁 𑀪𑀺𑀓𑁆𑀔𑀽𑀦𑀁 𑀲𑀓𑁄𑀢𑀺 𑀆𑀳 ‘‘𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺. 𑀧𑀺𑀢𑀺𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀆𑀕𑀢𑀢𑁆𑀢𑀸 ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁 𑀕𑁄𑀘𑀭𑁄’’𑀢𑀺 𑀢𑁂𑀦 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂𑀢𑀺. 𑀘𑀭𑀦𑁆𑀢𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺, 𑀘𑀭𑀦𑁆𑀢𑀸𑀦𑀦𑁆𑀢𑀺 𑀘 𑀅𑀢𑁆𑀣𑁄, 𑀢𑁂𑀦𑀸𑀬𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦𑀧𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀮𑁂𑀲𑀫𑀸𑀭𑀲𑁆𑀲 𑀑𑀢𑀸𑀭𑀸𑀮𑀸𑀪𑁂𑀦𑁂𑀯 𑀇𑀢𑀭𑀫𑀸𑀭𑀸𑀦𑀫𑁆𑀧𑀺 𑀑𑀢𑀸𑀭𑀸𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑀢𑁆𑀣𑁄𑀢𑀺 𑀕𑁄𑀘𑀭𑁂 𑀘𑀭𑀡𑀁 𑀲𑀦𑁆𑀥𑀸𑀬𑀸𑀳, 𑀯𑀢𑁆𑀣𑀼 𑀧𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀆𑀕𑀢𑀁.

𑀲𑀓𑀼𑀡𑁂 𑀳𑀦𑁆𑀢𑀻𑀢𑀺 𑀲𑀓𑀼𑀡𑀕𑁆𑀖𑀺, 𑀫𑀳𑀸𑀲𑁂𑀦𑀲𑀓𑀼𑀡𑁄. 𑀅𑀚𑁆𑀛𑀧𑁆𑀧𑀢𑁆𑀢𑀸𑀢𑀺 𑀅𑀪𑀺𑀪𑀯𑀦𑀯𑀲𑁂𑀦 𑀧𑀢𑁆𑀢𑀸 𑀉𑀧𑀕𑀢𑀸. 𑀦 𑀫𑁆𑀬𑀸𑀬𑀦𑁆𑀢𑀺 𑀫𑁂 𑀅𑀬𑀁 𑀲𑀓𑀼𑀡𑀕𑁆𑀖𑀺 𑀦𑀸𑀮𑀁 𑀅𑀪𑀯𑀺𑀲𑁆𑀲. 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀦𑁆𑀢𑀺 𑀦𑀗𑁆𑀕𑀮𑁂𑀦 𑀓𑀲𑀺𑀢𑀧𑁆𑀧𑀤𑁂𑀲𑁄. 𑀮𑁂𑀟𑁆𑀟𑀼𑀝𑁆𑀞𑀸𑀦𑀦𑁆𑀢𑀺 𑀮𑁂𑀟𑁆𑀟𑀽𑀦𑀁 𑀉𑀝𑁆𑀞𑀧𑀺𑀢𑀝𑁆𑀞𑀸𑀦𑀁. 𑀲𑀓𑁂 𑀩𑀮𑁂𑀢𑀺 𑀅𑀢𑁆𑀢𑀦𑁄 𑀩𑀮𑀳𑁂𑀢𑀼. 𑀅𑀧𑀢𑁆𑀣𑀤𑁆𑀥𑀸𑀢𑀺 𑀅𑀯𑀕𑀸𑀴𑁆𑀳𑀢𑁆𑀣𑀫𑁆𑀪𑀸 𑀲𑀜𑁆𑀚𑀸𑀢𑀢𑁆𑀣𑀫𑁆𑀪𑀸. 𑀅𑀲𑁆𑀲𑀭𑀫𑀸𑀦𑀸𑀢𑀺 𑀅𑀯𑁆𑀳𑀸𑀬𑀦𑁆𑀢𑀻.

𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀦𑁆𑀢𑀺 𑀦𑀗𑁆𑀕𑀮𑁂𑀦 𑀪𑀺𑀦𑁆𑀦𑀝𑁆𑀞𑀸𑀦𑁂 𑀲𑀼𑀓𑁆𑀔𑀢𑀸𑀬 𑀢𑀺𑀔𑀺𑀡𑀲𑀺𑀗𑁆𑀕𑀅𑀬𑁄𑀖𑀦𑀲𑀤𑀺𑀲𑀁 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁. 𑀅𑀪𑀺𑀭𑀼𑀳𑀺𑀢𑁆𑀯𑀸𑀢𑀺 𑀢𑀲𑁆𑀲 𑀅𑀥𑁄𑀪𑀸𑀕𑁂𑀦 𑀅𑀢𑁆𑀢𑀦𑀸 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀦𑀬𑁄𑀕𑁆𑀕𑀧𑁆𑀧𑀤𑁂𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀘𑀗𑁆𑀓𑀫𑀦𑁆𑀢𑁄 𑀅𑀲𑁆𑀲𑀭𑀫𑀸𑀦𑁄 𑀅𑀝𑁆𑀞𑀸𑀲𑀺. ‘‘𑀏𑀳𑀺 𑀔𑁄’’𑀢𑀺𑀆𑀤𑀺 𑀢𑀲𑁆𑀲 𑀅𑀲𑁆𑀲𑀭𑀫𑀸𑀦𑀸𑀓𑀸𑀭𑀤𑀲𑁆𑀲𑀦𑀁. 𑀲𑀦𑁆𑀦𑀬𑁆𑀳𑀸𑀢𑀺 𑀯𑀸𑀢𑀕𑁆𑀕𑀳𑀡𑀯𑀲𑁂𑀦 𑀉𑀪𑁄 𑀧𑀓𑁆𑀔𑁂 𑀲𑀫𑀁 𑀞𑀧𑁂𑀢𑁆𑀯𑀸. 𑀧𑀘𑁆𑀘𑀼𑀧𑀸𑀤𑀻𑀢𑀺 𑀧𑀸𑀯𑀺𑀲𑀺. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀧𑀼𑀩𑁆𑀩𑁂 𑀮𑀸𑀧𑁄 𑀞𑀺𑀢𑁄, 𑀢𑀢𑁆𑀣𑁂𑀯 𑀮𑁂𑀟𑁆𑀟𑀼𑀫𑁆𑀳𑀺. 𑀉𑀭𑀦𑁆𑀢𑀺 𑀅𑀢𑁆𑀢𑀦𑁄 𑀉𑀭𑀧𑁆𑀧𑀤𑁂𑀲𑀁. 𑀧𑀘𑁆𑀘𑀢𑀸𑀴𑁂𑀲𑀻𑀢𑀺 𑀧𑀢𑀺 𑀅𑀢𑀸𑀴𑁂𑀲𑀺 𑀲𑀸𑀭𑀫𑁆𑀪𑀯𑀲𑁂𑀦 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀳𑀭𑀡𑀢𑁄 𑀯𑀺𑀥𑀸𑀭𑁂𑀦𑁆𑀢𑀻 𑀧𑀢𑀸𑀴𑁂𑀲𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀬𑀁. ‘‘𑀅𑀯𑀲𑀭’’𑀦𑁆𑀢𑀺 𑀓𑁂𑀘𑀺.

‘‘𑀓𑀼𑀲𑀮𑀸𑀦’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀓𑁄 𑀅𑀦𑀼𑀲𑀦𑁆𑀥𑀺? 𑀬𑀣𑀸𑀅𑀦𑀼𑀲𑀦𑁆𑀥𑀺 𑀏𑀯. 𑀆𑀤𑀺𑀢𑁄 𑀳𑀺 ‘‘𑀅𑀢𑁆𑀢𑀤𑀻𑀧𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁮𑁦) 𑀬𑁂𑀯 𑀅𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀕𑀳𑀺𑀢𑀸, 𑀢𑁂 𑀬𑁂𑀯𑁂𑀢𑁆𑀣 𑀓𑀼𑀲𑀮𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺. 𑀅𑀦𑀯𑀚𑁆𑀚𑀮𑀓𑁆𑀔𑀡𑀸𑀦𑀦𑁆𑀢𑀺 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀲𑀪𑀸𑀯𑀸𑀦𑀁. ‘‘𑀅𑀯𑀚𑁆𑀚𑀭𑀳𑀺𑀢𑀲𑀪𑀸𑀯𑀸𑀦’’𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣 𑀧𑀼𑀭𑀺𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸, 𑀤𑀼𑀢𑀺𑀬𑁂 𑀧𑀦 𑀯𑀺𑀧𑀸𑀓𑀥𑀫𑁆𑀫𑀸𑀧𑀺. 𑀬𑀤𑀺 𑀏𑀯𑀁, 𑀓𑀣𑀁 𑀢𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀯𑀺𑀧𑀸𑀓𑀥𑀫𑁆𑀫𑀸 𑀲𑀻𑀮𑀸𑀤𑀺 𑀯𑀺𑀬 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩𑀸’’𑀢𑀺. 𑀲𑀫𑀸𑀤𑀸𑀦𑀦𑁆𑀢𑀺 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀫𑁆𑀫𑀸 𑀆𑀤𑀸𑀦𑀁 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀺 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀸𑀓𑀥𑀫𑁆𑀫𑀸 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑀫𑁆𑀫𑀤𑁂𑀯 𑀆𑀳𑀺𑀢𑀸 𑀆𑀬𑀼𑀆𑀤𑀺𑀲𑀫𑁆𑀧𑀢𑁆𑀢𑀺𑀯𑀺𑀲𑁂𑀲𑀪𑀽𑀢𑀸 𑀉𑀧𑀭𑀽𑀧𑀭𑀺𑀓𑀼𑀲𑀮𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀏𑀢𑁆𑀣 𑀧𑀼𑀜𑁆𑀜𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀼𑀜𑁆𑀜𑀨𑀮𑀁 𑀯𑀟𑁆𑀠𑀢𑀻’’𑀢𑀺. 𑀧𑀼𑀜𑁆𑀜𑀨𑀮𑀦𑁆𑀢𑀺 𑀘 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀜𑁆𑀘 𑀧𑀼𑀜𑁆𑀜𑀨𑀮𑀜𑁆𑀘 𑀧𑀼𑀜𑁆𑀜𑀨𑀮’’𑀦𑁆𑀢𑀺 𑀆𑀳 ‘‘𑀉𑀧𑀭𑀽𑀧𑀭𑀺 𑀧𑀼𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀯𑀺𑀧𑀸𑀓𑁄𑀧𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺.

‘‘𑀫𑀸𑀢𑀸𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀲𑁆𑀫𑀸 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀳𑁂𑀢𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀤𑀝𑁆𑀞𑀩𑁆𑀩𑀁. 𑀲𑀺𑀦𑁂𑀳𑀯𑀲𑁂𑀦𑀸𑀢𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀲𑀺𑀦𑁂𑀳𑀲𑁆𑀲 𑀯𑀲𑁂𑀦, 𑀦 𑀲𑀫𑁆𑀧𑀬𑀼𑀢𑁆𑀢𑀲𑁆𑀲. 𑀦 𑀳𑀺 𑀲𑀺𑀦𑁂𑀳𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫 𑀓𑀼𑀲𑀮𑀁 𑀅𑀢𑁆𑀣𑀺. 𑀫𑀼𑀤𑀼𑀫𑀤𑁆𑀤𑀯𑀘𑀺𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀯𑀲𑁂𑀦 𑀅𑀢𑀺𑀯𑀺𑀬 𑀫𑀤𑁆𑀤𑀯𑀦𑁆𑀢𑀁 𑀘𑀺𑀢𑁆𑀢𑀁. 𑀬𑀣𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀸𑀧𑀺𑀢𑀽𑀦𑀁 …𑀧𑁂… 𑀫𑀼𑀤𑀼𑀫𑀤𑁆𑀤𑀯𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀫𑁂𑀯 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺…𑀧𑁂… 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀜𑁆𑀜𑁂𑀧𑀺 𑀧𑀦 𑀤𑀸𑀦𑀲𑀻𑀮𑀸𑀤𑀺𑀥𑀫𑁆𑀫𑀸 𑀯𑀝𑁆𑀝𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀯𑀺𑀯𑀝𑁆𑀝𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀨𑀮𑀯𑀺𑀲𑁂𑀲𑀸𑀯𑀳𑀢𑀸𑀬 𑀨𑀮𑀤𑀸𑀬 𑀓𑁄𑀝𑀺 𑀲𑀺𑀔𑀸𑀧𑁆𑀧𑀢𑁆𑀢𑀺, 𑀤𑁂𑀯𑀮𑁄𑀓𑁂 𑀘 𑀧𑀯𑀢𑁆𑀢𑀺𑀲𑀺𑀭𑀺𑀯𑀺𑀪𑀯𑁄𑀢𑀺 𑀧𑀭𑀺𑀬𑁄𑀲𑀸𑀦𑀁 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺 𑀯𑀺𑀲𑁂𑀲𑀺𑀢𑀁, 𑀫𑀦𑀼𑀲𑁆𑀲𑀮𑁄𑀓𑀯𑀲𑁂𑀦𑁂𑀯 𑀘𑀸𑀬𑀁 𑀤𑁂𑀲𑀦𑀸 𑀆𑀕𑀢𑀸𑀢𑀺. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀤𑀲𑁆𑀲𑀺𑀲𑁆𑀲𑀢𑀺 ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁦𑁮).

𑀤𑀴𑁆𑀳𑀦𑁂𑀫𑀺𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀣𑀸𑀯𑀡𑁆𑀡𑀦𑀸

𑁮𑁧. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁧𑁦) 𑀲𑀼𑀢𑁆𑀢𑀤𑁂𑀲𑀦𑀸𑀬 𑀆𑀭𑀤𑁆𑀥𑀝𑁆𑀞𑀸𑀦𑁂 𑀯𑀝𑁆𑀝𑀯𑀺𑀯𑀝𑁆𑀝𑀕𑀸𑀫𑀺𑀪𑀸𑀯𑁂𑀦 𑀲𑀸𑀥𑀸𑀭𑀡𑁂 𑀓𑀼𑀲𑀮𑀕𑁆𑀕𑀳𑀡𑁂. 𑀢𑀢𑁆𑀣 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀸𑀦𑀼𑀲𑀦𑁆𑀥𑀺𑀯𑀲𑁂𑀦 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺 𑀤𑁂𑀲𑀦𑀁 𑀆𑀭𑀪𑀺, 𑀆𑀭𑀪𑀦𑁆𑀢𑁄 𑀘 𑀤𑁂𑀲𑀺𑀬𑀫𑀸𑀦𑀫𑀢𑁆𑀢𑀁. 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀤𑀻𑀧𑁂𑀢𑁆𑀯𑀸 𑀆𑀭𑀪𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀞𑀫𑀁 𑀢𑀣𑀸 𑀅𑀤𑀻𑀧𑁂𑀦𑁆𑀢𑁄𑀧𑀺 𑀪𑀕𑀯𑀸 𑀅𑀢𑁆𑀣𑀢𑁄 𑀤𑀻𑀧𑁂𑀢𑀺 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁨. 𑀈𑀲𑀓𑀫𑁆𑀧𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀅𑀯𑀲𑀓𑁆𑀓𑀺𑀢𑀦𑁆𑀢𑀺 𑀑𑀕𑀢𑀪𑀝𑁆𑀞𑀁. 𑀦𑁂𑀫𑀺𑀅𑀪𑀺𑀫𑀼𑀔𑀦𑁆𑀢𑀺 𑀦𑁂𑀫𑀺𑀧𑁆𑀧𑀤𑁂𑀲𑀲𑁆𑀲 𑀲𑀫𑁆𑀫𑀼𑀔𑀸. 𑀩𑀦𑁆𑀥𑀺𑀁𑀲𑀼 𑀘𑀓𑁆𑀓𑀭𑀢𑀦𑀲𑁆𑀲 𑀑𑀲𑀓𑁆𑀓𑀺𑀢𑀸𑀦𑁄𑀲𑀓𑁆𑀓𑀺𑀢𑀪𑀸𑀯𑀁 𑀚𑀸𑀦𑀺𑀢𑀼𑀁. 𑀢𑀤𑁂𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀸 𑀘𑀯𑀦𑀁. 𑀅𑀢𑀺𑀩𑀮𑀯𑀤𑁄𑀲𑁂𑀢𑀺 𑀭𑀜𑁆𑀜𑁄 𑀩𑀮𑀯𑀢𑀺 𑀅𑀦𑀢𑁆𑀣𑁂 𑀉𑀧𑀝𑁆𑀞𑀺𑀢𑁂 𑀲𑀢𑀺.

𑀅𑀧𑁆𑀧𑀫𑀢𑁆𑀢𑁄𑀢𑀺 𑀭𑀜𑁆𑀜𑁄 𑀆𑀡𑀸𑀬 𑀧𑀫𑀸𑀤𑀁 𑀅𑀓𑀭𑁄𑀦𑁆𑀢𑁄.

𑀏𑀓𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀫𑁂𑀯𑀸𑀢𑀺 𑀚𑀫𑁆𑀩𑀼𑀤𑀻𑀧𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄 𑀉𑀢𑁆𑀢𑀭𑀢𑁄 𑀅𑀲𑁆𑀲𑀓𑀡𑁆𑀡𑀧𑀩𑁆𑀩𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀏𑀓𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑁄. 𑀧𑀼𑀜𑁆𑀜𑀺𑀤𑁆𑀥𑀺𑀯𑀲𑁂𑀦𑀸𑀢𑀺 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀸𑀬 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀯𑀲𑁂𑀦.

𑁮𑁩. 𑀏𑀯𑀁 𑀓𑀢𑁆𑀯𑀸𑀢𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸. 𑀲𑀼𑀓𑀢𑀁 𑀓𑀫𑁆𑀫𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀫𑁂𑀯 𑀯𑀤𑀢𑀺.

‘‘𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥’’𑀦𑁆𑀢𑀺 𑀘 𑀯𑀼𑀢𑁆𑀢𑀯𑀺𑀪𑀸𑀕𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀧𑀽𑀭𑁂𑀦𑁆𑀢𑁂𑀦𑁂𑀯𑀸𑀢𑀺 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀦𑁂𑀯. 𑀦𑀺𑀤𑁆𑀤𑁄𑀲𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀤𑁄𑀲𑀸𑀦𑀁 𑀅𑀧𑀕𑀫𑀦𑁂 𑀦𑀺𑀤𑁆𑀤𑁄𑀲𑁂. 𑀘𑀓𑁆𑀓𑀯𑀢𑁆𑀢𑀻𑀦𑀁 𑀯𑀢𑁆𑀢𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀯𑀢𑁆𑀢𑁂. 𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀳𑀺 𑀉𑀧𑀘𑀸𑀭𑁄 𑀬𑀣𑀸 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺 (𑀲𑀼. 𑀦𑀺. 𑁪𑁧𑁦). 𑀅𑀥𑀺𑀕𑀢𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀧𑀺 𑀳𑀺 𑀢𑁂 𑀢𑀢𑁆𑀣 𑀯𑀢𑁆𑀢𑀦𑁆𑀢𑁂𑀯𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀘𑀓𑁆𑀓𑀯𑀢𑁆𑀢𑀺𑀅𑀭𑀺𑀬𑀯𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀅𑀜𑁆𑀜𑀣𑀸 𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀲𑁄 𑀥𑀫𑁆𑀫𑁄 𑀅𑀥𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑀁, 𑀢𑁂𑀦 𑀢𑀤𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑀲𑀸. 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀆𑀤𑀭𑀓𑀺𑀭𑀺𑀬𑀸𑀯𑀲𑁂𑀦 𑀓𑀭𑁄𑀦𑁆𑀢𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀭𑀡𑀯𑀲𑁂𑀦 𑀕𑀭𑀼𑀁 𑀓𑀭𑁄𑀦𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀺𑀁 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀬𑀸’’𑀢𑀺. 𑀫𑀸𑀦𑁂𑀦𑁆𑀢𑁄𑀢𑀺 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑁄. 𑀢𑁂𑀦𑀸𑀳 ‘‘𑀢𑀫𑁂𑀯𑀸’’𑀢𑀺𑀆𑀤𑀺. 𑀏𑀯𑀁 𑀧𑀽𑀚𑀬𑀢𑁄 𑀅𑀧𑀘𑀸𑀬𑀢𑁄 𑀏𑀯𑀜𑁆𑀘 𑀬𑀣𑀸𑀯𑀼𑀢𑁆𑀢𑀲𑀓𑁆𑀓𑀸𑀭𑀸𑀤𑀺𑀲𑀫𑁆𑀪𑀯𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀅𑀧𑀤𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀸𑀥𑀺𑀧𑀢𑀺𑀪𑀽𑀢𑁄 𑀆𑀕𑀢𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀚𑁂𑀝𑁆𑀞𑀓𑀪𑀸𑀯𑁂𑀦 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀅𑀢𑁆𑀢𑀪𑀸𑀯𑁂𑀲𑀼 𑀲𑀓𑁆𑀓𑀘𑁆𑀘 𑀲𑀫𑀼𑀧𑀘𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀥𑀫𑁆𑀫𑀯𑀲𑁂𑀦𑁂𑀯 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀓𑀭𑀡𑁂𑀦𑀸’’𑀢𑀺 𑀏𑀢𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸. 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑀢𑁄 𑀭𑀓𑁆𑀔𑀦𑁆𑀢𑁄 𑀢𑁂𑀦𑁂𑀯 𑀧𑀭𑀢𑁆𑀣𑀲𑀸𑀥𑀦𑁂𑀦 𑀔𑀦𑁆𑀢𑀺𑀆𑀤𑀺𑀕𑀼𑀡𑁂𑀦 𑀅𑀢𑁆𑀢𑀸𑀦𑀁 𑀢𑀢𑁄 𑀏𑀯 𑀭𑀓𑁆𑀔𑀢𑀺. 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀕𑁂𑀳𑀸𑀤𑀻𑀦𑀁 𑀲𑀻𑀢𑀼𑀡𑁆𑀳𑀸𑀤𑀺𑀧𑀝𑀺𑀩𑀸𑀳𑀦𑁂𑀦 𑀆𑀯𑀭𑀡𑀁. 𑀅𑀦𑁆𑀢𑁄 𑀚𑀦𑀲𑁆𑀫𑀺𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀪𑀽𑀢𑁂 𑀧𑀼𑀢𑁆𑀢𑀤𑀸𑀭𑀸𑀤𑀺𑀚𑀦𑁂.

‘‘𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀇𑀫𑀺𑀦𑀸 𑀭𑀓𑁆𑀔𑀁 𑀤𑀲𑁆𑀲𑁂𑀢𑀺, ‘‘𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀤𑁂𑀳𑀻’’𑀢𑀺 𑀇𑀫𑀺𑀦𑀸 𑀆𑀯𑀭𑀡𑀁, 𑀇𑀢𑀭𑁂𑀦 𑀕𑀼𑀢𑁆𑀢𑀺𑀁. 𑀪𑀢𑁆𑀢𑀯𑁂𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑀦𑀸𑀤𑀻𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑁂𑀲𑀼. 𑀦𑀺𑀕𑀫𑁄 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀦𑁂𑀕𑀫𑀸, 𑀏𑀯𑀁 𑀚𑀸𑀦𑀧𑀤𑀸𑀢𑀺 𑀆𑀳 ‘‘𑀦𑀺𑀕𑀫𑀯𑀸𑀲𑀺𑀦𑁄’’𑀢𑀺𑀆𑀤𑀺.

𑀦𑀯𑀯𑀺𑀥𑀸 𑀫𑀸𑀦𑀫𑀤𑀸𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁧𑁦𑁮; 𑀥. 𑀲. 𑁧𑁧𑁨𑁧; 𑀯𑀺𑀪. 𑁮𑁬𑁬; 𑀫𑀳𑀸𑀦𑀺. 𑁨𑁧, 𑁧𑁭𑁮) 𑀦𑀬𑀧𑁆𑀧𑀯𑀢𑁆𑀢𑀺𑀬𑀸 𑀦𑀯𑀯𑀺𑀥𑀸 𑀫𑀸𑀦𑀲𑀗𑁆𑀔𑀸𑀢𑀸 𑀫𑀤𑀸. 𑀫𑀸𑀦𑁄 𑀏𑀯 𑀳𑁂𑀢𑁆𑀣 𑀧𑀫𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀫𑀸𑀦𑀫𑀤𑁄. 𑀲𑁄𑀪𑀦𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀫𑁆𑀫𑁂 𑀭𑀢𑁄𑀢𑀺 𑀲𑀽𑀭𑀢𑁄 𑀉-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀲𑀩𑁆𑀩𑀁 𑀯𑀸 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁. 𑀲𑀼𑀝𑁆𑀞𑀼 𑀑𑀭𑀢𑁄𑀢𑀺 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀬𑀣𑀸𑀯𑀼𑀢𑁆𑀢𑀫𑁂𑀯 𑀲𑀼𑀘𑀭𑀺𑀢𑀁. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀸𑀤𑀻𑀦𑀁. 𑀤𑀫𑀦𑀸𑀤𑀻𑀳𑀻𑀢𑀺 𑀤𑀫𑀦𑀲𑀫𑀦𑀧𑀭𑀺𑀦𑀺𑀩𑁆𑀩𑀸𑀧𑀦𑁂𑀳𑀺. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀏𑀓𑀁 𑀘𑀺𑀢𑁆𑀢𑀁, 𑀏𑀓𑀘𑁆𑀘𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀦𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑀺𑀬𑀁 𑀤𑀫𑀦𑀸𑀤𑀺𑀧𑀘𑁆𑀘𑁂𑀓𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀦 𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀏𑀓𑀚𑁆𑀛𑀁 𑀧𑀝𑀺𑀲𑀗𑁆𑀔𑀸𑀦𑀫𑀼𑀔𑁂𑀦 𑀧𑀚𑀳𑀦𑀢𑁄. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀏𑀓𑀁 𑀏𑀓𑀸𑀓𑀺𑀦𑀁 𑀅𑀢𑁆𑀢𑀸𑀦𑀁. 𑀓𑀸𑀮𑁂 𑀓𑀸𑀮𑁂𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁂 𑀓𑀸𑀮𑁂 𑀓𑀸𑀮𑁂.

𑀇𑀥 𑀞𑀢𑁆𑀯𑀸𑀢𑀺 ‘‘𑀇𑀤𑀁 𑀔𑁄, 𑀢𑀸𑀢, 𑀢’’𑀦𑁆𑀢𑀺 𑀏𑀯𑀁 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀞𑀢𑁆𑀯𑀸. 𑀯𑀢𑁆𑀢𑀦𑁆𑀢𑀺 𑀅𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁. 𑀲𑀫𑀸𑀦𑁂𑀢𑀩𑁆𑀩𑀦𑁆𑀢𑀺 ‘‘𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥’’𑀦𑁆𑀢𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀡𑀦𑀸𑀬 𑀘 𑀲𑀫𑀸𑀦𑀁 𑀓𑀸𑀢𑀩𑁆𑀩𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀁. 𑀅𑀥𑀫𑁆𑀫𑀭𑀸𑀕𑀲𑁆𑀲𑀸𑀢𑀺 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀭𑀸𑀕𑀲𑁆𑀲. 𑀯𑀺𑀲𑀫𑀮𑁄𑀪𑀲𑁆𑀲𑀸𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀅𑀢𑀺𑀯𑀺𑀬 𑀩𑀮𑀯𑀪𑀸𑀯𑁂𑀦 𑀧𑀯𑀢𑁆𑀢𑀮𑁄𑀪𑀲𑁆𑀲.

𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁮𑁫. 𑀯𑀢𑁆𑀢𑀫𑀸𑀦𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑁂 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂 𑀯𑀢𑁆𑀢𑀫𑀸𑀦𑀲𑁆𑀲, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁂𑀢𑀺 𑀆𑀳 ‘‘𑀧𑀽𑀭𑁂𑀢𑁆𑀯𑀸 𑀯𑀢𑁆𑀢𑀫𑀸𑀦𑀲𑁆𑀲𑀸’’𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀧𑀦𑀲𑁆𑀲 𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺? 𑀢𑀢𑁆𑀣 ‘‘𑀓𑀢𑀸𑀥𑀺𑀓𑀸𑀭𑀲𑁆𑀲 𑀢𑀸𑀯 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀸𑀤𑀲𑀳𑀺𑀧𑀺 𑀲𑀁𑀯𑀘𑁆𑀙𑀭𑁂𑀳𑀺 𑀧𑀽𑀭𑀢𑀺, 𑀧𑀜𑁆𑀘𑀯𑀻𑀲𑀢𑀺𑀬𑀸, 𑀧𑀜𑁆𑀜𑀸𑀲𑀸𑀬 𑀯𑀸 𑀲𑀁𑀯𑀘𑁆𑀙𑀭𑁂𑀳𑀺. 𑀅𑀬𑀜𑁆𑀘 𑀪𑁂𑀤𑁄 𑀥𑀫𑁆𑀫𑀘𑁆𑀙𑀦𑁆𑀤𑀲𑁆𑀲𑀧𑀺 𑀢𑀺𑀓𑁆𑀔𑀫𑀚𑁆𑀛𑀫𑀼𑀤𑀼𑀢𑀸𑀯𑀲𑁂𑀦, 𑀇𑀢𑀭𑀲𑁆𑀲 𑀢𑀢𑁄 𑀪𑀺𑀬𑁆𑀬𑁄𑀧𑀻’’𑀢𑀺 𑀯𑀤𑀦𑁆𑀢𑀺.

𑀤𑀼𑀢𑀺𑀬𑀸𑀤𑀺𑀘𑀓𑁆𑀓𑀯𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁯𑁦. 𑀅𑀢𑁆𑀢𑀦𑁄 𑀫𑀢𑀺𑀬𑀸𑀢𑀺 𑀧𑀭𑀫𑁆𑀧𑀭𑀸𑀕𑀢𑀁 𑀧𑀼𑀭𑀸𑀡𑀁 𑀢𑀦𑁆𑀢𑀺𑀁 𑀧𑀯𑁂𑀡𑀺𑀁 𑀮𑀗𑁆𑀖𑀺𑀢𑁆𑀯𑀸 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀸𑀓𑀸𑀭𑁂𑀦. 𑀢𑁂𑀦𑀸𑀳 ‘‘𑀧𑁄𑀭𑀸𑀡𑀓’’𑀦𑁆𑀢𑀺𑀆𑀤𑀺.

𑀦 𑀧𑀩𑁆𑀩𑀦𑁆𑀢𑀻𑀢𑀺 𑀲𑀫𑀺𑀤𑁆𑀥𑀺𑀬𑀸 𑀦 𑀧𑀽𑀭𑁂𑀦𑁆𑀢𑀺, 𑀨𑀻𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀯𑀟𑁆𑀠𑀦𑁆𑀢𑀻’’𑀢𑀺. 𑀢𑀣𑀸 𑀘𑀸𑀳 ‘‘𑀓𑀢𑁆𑀣𑀘𑀺 𑀲𑀼𑀜𑁆𑀜𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀓𑀺𑀘𑁆𑀘𑁂 𑀭𑀜𑁆𑀜𑀸 𑀅𑀫𑀸 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀅𑀫𑀘𑁆𑀘𑀸, 𑀬𑁂𑀳𑀺 𑀯𑀺𑀦𑀸 𑀭𑀸𑀚𑀓𑀺𑀘𑁆𑀘𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀧𑀭𑀫𑁆𑀧𑀭𑀸𑀕𑀢𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀧𑀭𑀺𑀲𑀸𑀬 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸. 𑀢𑁂𑀦𑀸𑀳 ‘‘𑀧𑀭𑀺𑀲𑀸𑀯𑀘𑀭𑀸’’𑀢𑀺. 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑀺𑀢𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀆𑀬𑀁, 𑀯𑀬𑀜𑁆𑀘 𑀬𑀸𑀣𑀸𑀯𑀢𑁄 𑀕𑀡𑁂𑀦𑁆𑀢𑀻𑀢𑀺 𑀕𑀡𑀓𑀸. 𑀚𑀸𑀢𑀺𑀓𑀼𑀮𑀲𑀼𑀢𑀸𑀘𑀸𑀭𑀸𑀤𑀺𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀢𑀢𑁆𑀢𑀸 𑀫𑀳𑀢𑀻 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀢𑁂 𑀧𑀦 𑀫𑀳𑀸𑀦𑀼𑀪𑀸𑀯𑀸 𑀅𑀫𑀘𑁆𑀘𑀸 𑀏𑀯𑀸𑀢𑀺 𑀆𑀳 ‘‘𑀫𑀳𑀸𑀅𑀫𑀘𑁆𑀘𑀸’’𑀢𑀺. 𑀬𑁂 𑀭𑀜𑁆𑀜𑁄 𑀳𑀢𑁆𑀣𑀸𑀦𑀻𑀓𑀸𑀤𑀻𑀲𑀼 𑀅𑀯𑀝𑁆𑀞𑀺𑀢𑀸, 𑀢𑁂 𑀅𑀦𑀻𑀓𑀝𑁆𑀞𑀸𑀢𑀺 𑀆𑀳 ‘‘𑀳𑀢𑁆𑀣𑀺𑀆𑀘𑀭𑀺𑀬𑀸𑀤𑀬𑁄’’𑀢𑀺. 𑀫𑀦𑁆𑀢𑀁 𑀧𑀜𑁆𑀜𑀁 𑀅𑀲𑀺𑀢𑀸 𑀳𑀼𑀢𑁆𑀯𑀸 𑀚𑀻𑀯𑀦𑁆𑀢𑀻𑀢𑀺 𑀫𑀦𑁆𑀢𑀲𑁆𑀲𑀸𑀚𑀻𑀯𑀺𑀦𑁄, 𑀫𑀢𑀺𑀲𑀚𑀻𑀯𑀸𑀢𑀺 𑀅𑀢𑁆𑀣𑁄, 𑀬𑁂 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀓𑀺𑀘𑁆𑀘𑁂 𑀉𑀧𑀤𑁂𑀲𑀤𑀸𑀬𑀺𑀦𑁄. 𑀢𑁂𑀦𑀸𑀳 ‘‘𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸’’𑀢𑀺𑀆𑀤𑀺.

𑀆𑀬𑀼𑀯𑀡𑁆𑀡𑀸𑀤𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁯𑁧. 𑀩𑀮𑀯𑀮𑁄𑀪𑀢𑁆𑀢𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀤𑀸𑀦𑀺 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀽, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀥𑀦𑁂 𑀅𑀦𑀼𑀧𑁆𑀧𑀤𑀺𑀬𑀫𑀸𑀦𑁂 𑀫𑀬𑁆𑀳𑀁 𑀓𑁄𑀲𑀲𑁆𑀲 𑀧𑀭𑀺𑀓𑁆𑀔𑀬𑁄 𑀳𑁄𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀩𑀮𑀯𑀮𑁄𑀪𑀢𑁆𑀢𑀸. 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀽𑀢𑀺 𑀙𑀓𑀸𑀫𑀲𑀕𑁆𑀕𑀲𑀗𑁆𑀔𑀸𑀢𑀸𑀲𑀼 𑀉𑀧𑀭𑀽𑀧𑀭𑀺𑀓𑀸𑀫𑀪𑀽𑀫𑀻𑀲𑀼. 𑀓𑀫𑁆𑀫𑀲𑁆𑀲 𑀨𑀮𑀁 𑀅𑀕𑁆𑀕𑀁 𑀦𑀸𑀫, 𑀢𑀁 𑀧𑀦𑁂𑀢𑁆𑀣 𑀉𑀤𑁆𑀥𑀕𑀸𑀫𑀻𑀢𑀺 𑀆𑀳 ‘‘𑀉𑀤𑁆𑀥𑀁 𑀅𑀕𑁆𑀕𑀁 𑀅𑀲𑁆𑀲𑀸’’𑀢𑀺. 𑀲𑀕𑁆𑀕𑁂 𑀦𑀺𑀬𑀼𑀢𑁆𑀢𑀸, 𑀲𑀕𑁆𑀕𑀧𑁆𑀧𑀬𑁄𑀚𑀦𑀸𑀢𑀺 𑀯𑀸 𑀲𑁄𑀯𑀕𑁆𑀕𑀺𑀓𑀸. 𑀤𑀲𑀦𑁆𑀦𑀁 𑀯𑀺𑀲𑁂𑀲𑀸𑀦𑀦𑁆𑀢𑀺 𑀤𑀺𑀩𑁆𑀩𑀆𑀬𑀼𑀯𑀡𑁆𑀡𑀬𑀲𑀲𑀼𑀔𑀆𑀥𑀺𑀧𑀢𑁂𑀬𑁆𑀬𑀸𑀦𑀜𑁆𑀘𑁂𑀯 𑀤𑀺𑀩𑁆𑀩𑀭𑀽𑀧𑀸𑀤𑀻𑀦𑀜𑁆𑀘 𑀨𑀮𑀯𑀺𑀲𑁂𑀲𑀸𑀦𑀁. 𑀯𑀡𑁆𑀡𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀓𑁄 𑀅𑀢𑁆𑀢𑀪𑀸𑀯𑀯𑀡𑁆𑀡𑁄 𑀕𑀳𑀺𑀢𑁄, 𑀭𑀽𑀧𑀕𑁆𑀕𑀳𑀡𑁂𑀦 𑀩𑀳𑀺𑀤𑁆𑀥𑀸 𑀭𑀽𑀧𑀸𑀭𑀫𑁆𑀫𑀡𑀁.

𑁯𑁨. 𑀲𑀼𑀝𑁆𑀞𑀼 𑀦𑀺𑀲𑀺𑀤𑁆𑀥𑀦𑁆𑀢𑀺 𑀬𑀣𑀸𑀬𑀁 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀅𑀤𑀺𑀦𑁆𑀦𑀁 𑀆𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀢𑀢𑁄 𑀦𑀺𑀲𑁂𑀥𑀺𑀢𑀁 𑀓𑀢𑁆𑀯𑀸. 𑀫𑀽𑀮𑀳𑀢𑀦𑁆𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂𑀦 𑀫𑀽𑀮𑁂 𑀏𑀯 𑀳𑀢𑀁.

𑁯𑁬. 𑀭𑀸𑀕𑀯𑀲𑁂𑀦 𑀘𑀭𑀡𑀁 𑀘𑀭𑀺𑀢𑁆𑀢𑀁, 𑀘𑀭𑀺𑀢𑁆𑀢𑀫𑁂𑀯 𑀘𑀸𑀭𑀺𑀢𑁆𑀢𑀁, 𑀫𑁂𑀣𑀼𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀁 𑀧𑀦 ‘‘𑀧𑀭𑁂𑀲𑀁 𑀤𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀺𑀘𑁆𑀙𑀸𑀘𑀸𑀭’’𑀦𑁆𑀢𑀺 𑀆𑀳.

𑁧𑁦𑁦. 𑀧𑀘𑁆𑀘𑀦𑀻𑀓𑀤𑀺𑀝𑁆𑀞𑀻𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 (𑀫. 𑀦𑀺. 𑁧.𑁪𑁪𑁧; 𑁨.𑁯𑁪; 𑀯𑀺𑀪. 𑁭𑁯𑁩) 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀝𑀺𑀧𑀓𑁆𑀔𑀪𑀽𑀢𑀸 𑀤𑀺𑀝𑁆𑀞𑀺.

𑁧𑁦𑁧. 𑀫𑀸𑀢𑀼𑀘𑁆𑀙𑀸𑀤𑀺𑀓𑀸 𑀉𑀧𑀭𑀺 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀅𑀢𑀺𑀩𑀮𑀯𑀮𑁄𑀪𑁄𑀢𑀺 𑀅𑀢𑀺𑀯𑀺𑀬 𑀩𑀮𑀯𑀸 𑀩𑀳𑀮𑀓𑀺𑀮𑁂𑀲𑁄, 𑀬𑁂𑀦 𑀅𑀓𑀸𑀮𑁂, 𑀅𑀤𑁂𑀲𑁂 𑀘 𑀧𑀯𑀢𑁆𑀢𑀢𑀺. 𑀫𑀺𑀘𑁆𑀙𑀸𑀥𑀫𑁆𑀫𑁄𑀢𑀺 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑁄 𑀅𑀯𑀺𑀲𑀪𑀸𑀕𑀯𑀢𑁆𑀣𑀼𑀓𑁄 𑀮𑁄𑀪𑀥𑀫𑁆𑀫𑁄. 𑀢𑁂𑀦𑀸𑀳 ‘‘𑀧𑀼𑀭𑀺𑀲𑀸𑀦’’𑀦𑁆𑀢𑀺𑀆𑀤𑀺.

𑀢𑀲𑁆𑀲 𑀪𑀸𑀯𑁄𑀢𑀺 𑀬𑁂𑀦 𑀫𑁂𑀢𑁆𑀢𑀸𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀘𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑁄 ‘‘𑀫𑀢𑁆𑀢𑁂𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀢𑀁𑀲𑀫𑀼𑀝𑁆𑀞𑀸𑀦𑀸 𑀘 𑀓𑀺𑀭𑀺𑀬𑀸 𑀫𑀢𑁆𑀢𑁂𑀬𑁆𑀬𑀢𑀸. 𑀢𑁂𑀦𑀸𑀳 ‘‘𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀏𑀢𑀁 𑀦𑀸𑀫’’𑀦𑁆𑀢𑀺. 𑀬𑀸 𑀲𑀫𑁆𑀫𑀸 𑀧𑀚𑁆𑀚𑀺𑀢𑀩𑁆𑀩𑁂 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀲𑁄𑀧𑀺 𑀤𑁄𑀲𑁄 𑀅𑀕𑀸𑀭𑀯𑀓𑀺𑀭𑀺𑀬𑀸𑀤𑀺𑀪𑀸𑀯𑀢𑁄. 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑀲𑁆𑀲𑀸 𑀅𑀪𑀸𑀯𑁄 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀢𑀸 𑀘 𑀅𑀫𑀢𑁆𑀢𑁂𑀬𑁆𑀬𑀢𑀸’’𑀢𑀺. 𑀓𑀼𑀮𑁂 𑀚𑁂𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀓𑀼𑀮𑁂 𑀯𑀼𑀤𑁆𑀥𑀸𑀦𑀁 𑀫𑀳𑀸𑀧𑀺𑀢𑀼𑀘𑀽𑀴𑀧𑀺𑀢𑀼𑀚𑁂𑀝𑁆𑀞𑀓𑀪𑀸𑀢𑀺𑀓𑀸𑀤𑀻𑀦𑀁.

𑀤𑀲𑀯𑀲𑁆𑀲𑀸𑀬𑀼𑀓𑀲𑀫𑀬𑀯𑀡𑁆𑀡𑀦𑀸

𑁧𑁦𑁩. ‘‘𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀬𑁄 𑀆𑀫𑀝𑁆𑀞𑁄, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺. 𑀅𑀮𑀁 𑀧𑀢𑀺𑀦𑁄𑀢𑀺 𑀅𑀮𑀁𑀧𑀢𑁂𑀬𑁆𑀬𑀸. 𑀢𑀲𑁆𑀲𑀸 𑀧𑀭𑀺𑀬𑀢𑁆𑀢𑀢𑀸 𑀪𑀭𑀺𑀬𑀸𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀤𑀸𑀢𑀼𑀁 𑀬𑀼𑀢𑁆𑀢𑀸’’𑀢𑀺. 𑀅𑀕𑁆𑀕𑀭𑀲𑀸𑀦𑀻𑀢𑀺 𑀫𑀥𑀼𑀭𑀪𑀸𑀯𑁂𑀦, 𑀪𑁂𑀲𑀚𑁆𑀚𑀪𑀸𑀯𑁂𑀦 𑀘 𑀅𑀕𑁆𑀕𑀪𑀽𑀢𑀭𑀲𑀸𑀦𑀺.

𑀤𑀺𑀧𑁆𑀧𑀺𑀲𑁆𑀲𑀦𑁆𑀢𑀻𑀢𑀺 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀲𑀫𑀼𑀚𑁆𑀚𑀮𑀺𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀼𑀲𑀮𑀦𑁆𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀳𑁄 𑀧𑀼𑀭𑀺𑀲𑁄𑀢𑀺 𑀫𑀸𑀢𑀸𑀤𑀻𑀲𑀼𑀧𑀺 𑀈𑀤𑀺𑀲𑁄, 𑀅𑀜𑁆𑀜𑁂𑀲𑀁 𑀓𑁂𑀲𑀁 𑀓𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀅𑀳𑁄 𑀢𑁂𑀚𑀯𑀧𑀼𑀭𑀺𑀲𑁄𑀢𑀺.

𑀕𑁂𑀳𑁂 𑀫𑀸𑀢𑀼𑀕𑀸𑀫𑀁 𑀯𑀺𑀬𑀸𑀢𑀺 𑀅𑀢𑁆𑀢𑀦𑁄 𑀕𑁂𑀳𑁂 𑀤𑀸𑀲𑀺𑀪𑀭𑀺𑀬𑀸𑀪𑀽𑀢𑀫𑀸𑀢𑀼𑀕𑀸𑀫𑀁 𑀯𑀺𑀬. 𑀫𑀺𑀲𑁆𑀲𑀻𑀪𑀸𑀯𑀦𑁆𑀢𑀺 𑀫𑀸𑀢𑀸𑀤𑀻𑀲𑀼 𑀪𑀭𑀺𑀬𑀸𑀬 𑀯𑀺𑀬 𑀘𑀸𑀭𑀺𑀢𑁆𑀢𑀲𑀗𑁆𑀓𑀭𑀁.

𑀩𑀮𑀯𑀓𑁄𑀧𑁄𑀢𑀺 𑀳𑀦𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀓𑁄𑀧𑁄. 𑀆𑀖𑀸𑀢𑁂𑀢𑀻𑀢𑀺 𑀆𑀳𑀦𑀢𑀺, 𑀅𑀢𑁆𑀢𑀦𑁄 𑀓𑀓𑁆𑀔𑀴𑀨𑀭𑀼𑀲𑀪𑀸𑀯𑁂𑀦 𑀘𑀺𑀢𑁆𑀢𑀁 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀳𑀺 𑀤𑁄𑀲𑁄. 𑀩𑁆𑀬𑀸𑀧𑀸𑀤𑁂𑀢𑀻𑀢𑀺 𑀯𑀺𑀦𑀸𑀲𑁂𑀢𑀺, 𑀫𑀦𑁄𑀧𑀤𑀽𑀲𑀦𑀢𑁄 𑀫𑀦𑀲𑁆𑀲 𑀧𑀓𑁄𑀧𑀦𑀢𑁄. 𑀢𑀺𑀩𑁆𑀩𑀦𑁆𑀢𑀺 𑀢𑀺𑀓𑁆𑀔𑀁, 𑀲𑀸 𑀧𑀦𑀲𑁆𑀲 𑀢𑀺𑀓𑁆𑀔𑀢𑀸 𑀲𑀭𑀻𑀭𑁂 𑀅𑀯𑀳𑀦𑁆𑀢𑁂𑀧𑀺 𑀲𑀺𑀦𑁂𑀳𑀯𑀢𑁆𑀣𑀼𑀁 𑀮𑀗𑁆𑀖𑀺𑀢𑁆𑀯𑀸𑀧𑀺 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀧𑀺𑀬𑀫𑀸𑀦𑀲𑁆𑀲𑀧𑀻’’𑀢𑀺𑀆𑀤𑀺.

𑁧𑁦𑁪. 𑀓𑀧𑁆𑀧𑀯𑀺𑀦𑀸𑀲𑁄 𑀓𑀧𑁆𑀧𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀅𑀦𑁆𑀢𑀭𑀸𑀯 𑀓𑀧𑁆𑀧𑁄 𑀅𑀦𑁆𑀢𑀭𑀓𑀧𑁆𑀧𑁄. 𑀢𑀡𑁆𑀳𑀸𑀤𑀺𑀪𑁂𑀤𑁄 𑀓𑀧𑁆𑀧𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑁄, 𑀲𑀢𑁆𑀢𑀮𑁄𑀓𑁄𑀢𑀺 𑀆𑀳 ‘‘𑀅𑀦𑁆𑀢𑀭𑀸𑀯 𑀮𑁄𑀓𑀯𑀺𑀦𑀸𑀲𑁄’’𑀢𑀺. 𑀲𑁆𑀯𑀸𑀬𑀁 𑀅𑀦𑁆𑀢𑀭𑀓𑀧𑁆𑀧𑁄 𑀓𑀢𑀺𑀯𑀺𑀥𑁄, 𑀓𑀣𑀜𑁆𑀘𑀲𑁆𑀲 𑀲𑀫𑁆𑀪𑀯𑁄, 𑀓𑀺𑀁 𑀕𑀢𑀺𑀓𑁄𑀢𑀺 𑀅𑀦𑁆𑀢𑁄𑀕𑀥𑀁 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑁆𑀢𑀭𑀓𑀧𑁆𑀧𑁄 𑀘 𑀦𑀸𑀫𑀸’’𑀢𑀺𑀆𑀤𑀺. 𑀮𑁄𑀪𑀼𑀲𑁆𑀲𑀤𑀸𑀬𑀸𑀢𑀺 𑀮𑁄𑀪𑀸𑀥𑀺𑀓𑀸𑀬 𑀧𑀚𑀸𑀬 𑀯𑀢𑁆𑀢𑀫𑀸𑀦𑀸𑀬.

𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀽𑀢𑀺 𑀧𑀼𑀩𑁆𑀩𑁂 𑀬𑀣𑀸𑀦𑀼𑀲𑁆𑀲𑀯𑀸𑀦𑀼𑀲𑁆𑀲𑀭𑀡𑁂𑀦, 𑀅𑀢𑁆𑀢𑀦𑁄 𑀘 𑀆𑀬𑀼𑀯𑀺𑀲𑁂𑀲𑀲𑁆𑀲 𑀮𑀪𑀦𑀢𑁄. 𑀕𑀼𑀫𑁆𑀩𑀮𑀢𑀸𑀤𑀻𑀳𑀺 𑀕𑀳𑀦𑀁 𑀞𑀸𑀦𑀦𑁆𑀢𑀺 𑀕𑀼𑀫𑁆𑀩𑀮𑀢𑀸𑀤𑀻𑀳𑀺 𑀲𑀜𑁆𑀙𑀦𑁆𑀦𑀢𑀸𑀬 𑀕𑀳𑀦𑀪𑀽𑀢𑀁 𑀞𑀸𑀦𑀁. 𑀭𑀼𑀓𑁆𑀔𑁂𑀳𑀺 𑀕𑀳𑀦𑀦𑁆𑀢𑀺 𑀭𑀼𑀓𑁆𑀔𑁂𑀳𑀺 𑀦𑀺𑀭𑀦𑁆𑀢𑀭𑀦𑀺𑀘𑀺𑀢𑁂𑀳𑀺 𑀕𑀳𑀦𑀪𑀽𑀢𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀙𑀺𑀦𑁆𑀦𑀢𑀝𑀸𑀳𑀺 𑀦𑀤𑀻𑀳𑀺 𑀑𑀭𑀢𑁄, 𑀧𑀸𑀭𑀢𑁄 𑀘 𑀯𑀺𑀤𑀼𑀕𑁆𑀕𑀁. 𑀢𑁂𑀦𑀸𑀳 ‘‘𑀦𑀤𑀻𑀦’’𑀦𑁆𑀢𑀺𑀆𑀤𑀺. 𑀧𑀩𑁆𑀩𑀢𑁂𑀳𑀺 𑀯𑀺𑀲𑀫𑀁 𑀧𑀩𑁆𑀩𑀢𑀦𑁆𑀢𑀭𑀁. 𑀧𑀩𑁆𑀩𑀢𑁂𑀲𑀼 𑀯𑀸 𑀙𑀺𑀦𑁆𑀦𑀢𑀝𑁂𑀲𑀼 𑀤𑀼𑀭𑀸𑀭𑁄𑀳𑀁 𑀯𑀺𑀲𑀫𑀝𑁆𑀞𑀸𑀦𑀁. 𑀲𑀪𑀸𑀕𑁂𑀢𑀺 𑀚𑀻𑀯𑀦𑀯𑀲𑁂𑀦 𑀲𑀫𑀸𑀦𑀪𑀸𑀕𑁂 𑀲𑀤𑀺𑀲𑁂 𑀓𑀭𑀺𑀲𑁆𑀲𑀦𑁆𑀢𑀺.

𑀆𑀬𑀼𑀯𑀡𑁆𑀡𑀸𑀤𑀺𑀯𑀟𑁆𑀠𑀦𑀓𑀣𑀸𑀯𑀡𑁆𑀡𑀦𑀸

𑁧𑁦𑁫. 𑀆𑀬𑀢𑀦𑁆𑀢𑀺 𑀯𑀸 𑀤𑀻𑀖𑀁 𑀘𑀺𑀭𑀓𑀸𑀮𑀺𑀓𑀁. 𑀫𑀭𑀡𑀯𑀲𑁂𑀦 𑀳𑀺 𑀜𑀸𑀢𑀺𑀓𑁆𑀔𑀬𑁄 𑀆𑀬𑀢𑁄 𑀅𑀧𑀼𑀦𑀭𑀸𑀯𑀢𑁆𑀢𑀦𑀢𑁄, 𑀦 𑀭𑀸𑀚𑀪𑀬𑀸𑀤𑀺𑀦𑀸 𑀉𑀓𑁆𑀓𑀫𑀦𑀯𑀲𑁂𑀦 𑀧𑀼𑀦𑀭𑀸𑀯𑀢𑁆𑀢𑀺𑀬𑀸𑀧𑀺 𑀢𑀲𑁆𑀲 𑀮𑀩𑁆𑀪𑀦𑀢𑁄. 𑀑𑀲𑀓𑁆𑀓𑁂𑀬𑁆𑀬𑀸𑀫𑀸𑀢𑀺 𑀑𑀭𑀫𑁂𑀬𑁆𑀬𑀸𑀫. 𑀯𑀺𑀭𑀫𑀡𑀫𑁆𑀧𑀺 𑀅𑀢𑁆𑀣𑀢𑁄 𑀧𑀚𑀳𑀦𑀫𑁂𑀯 𑀧𑀭𑀺𑀘𑁆𑀘𑀚𑀦𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀚𑀳𑁂𑀬𑁆𑀬𑀸𑀫𑀸𑀢𑀺 𑀅𑀢𑁆𑀣𑁄’’𑀢𑀺. 𑀲𑀻𑀮𑀕𑀩𑁆𑀪𑁂 𑀯𑀟𑁆𑀠𑀺𑀢𑀢𑁆𑀢𑀸𑀢𑀺 𑀫𑀸𑀢𑀼, 𑀧𑀺𑀢𑀼 𑀘 𑀲𑀻𑀮𑀯𑀦𑁆𑀢𑀢𑀸𑀬 𑀢𑀤𑀯𑀬𑀯𑀪𑀽𑀢𑁂 𑀕𑀩𑁆𑀪𑁂 𑀯𑀟𑁆𑀠𑀺 ‘‘𑀲𑀻𑀮𑀕𑀩𑁆𑀪𑁂 𑀯𑀟𑁆𑀠𑀺𑀢𑀸’’𑀢𑀺 𑀯𑀼𑀢𑁆𑀢𑀸, 𑀏𑀢𑁂𑀦 𑀉𑀢𑀼𑀆𑀳𑀸𑀭𑀲𑁆𑀲 𑀯𑀺𑀬 𑀢𑀤𑀜𑁆𑀜𑀲𑁆𑀲𑀸𑀧𑀺 𑀩𑀸𑀳𑀺𑀭𑀲𑁆𑀲 𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀸𑀥𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁭) 𑀯𑀼𑀢𑁆𑀢𑀫𑁂𑀯. 𑀔𑁂𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑀯𑀢𑁆𑀣𑀼𑀯𑀺𑀲𑀼𑀤𑁆𑀥𑀺𑀬𑀸. 𑀦𑀦𑀼 𑀘 𑀢𑀁 𑀯𑀺𑀲𑁂𑀲𑀸𑀥𑀸𑀦𑀁 𑀚𑀸𑀬𑀫𑀸𑀦𑀁 𑀭𑀽𑀧𑀲𑀦𑁆𑀢𑀢𑀺𑀬𑀸 𑀏𑀯 𑀪𑀯𑁂𑀬𑁆𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀭𑀽𑀧𑀲𑀦𑁆𑀢𑀢𑀺𑀬𑀸 𑀧𑀦 𑀢𑀣𑀸 𑀆𑀳𑀺𑀢𑀯𑀺𑀲𑁂𑀲𑀸𑀬 𑀅𑀭𑀽𑀧𑀲𑀦𑁆𑀢𑀢𑀺𑀧𑀺 𑀮𑀤𑁆𑀥𑀽𑀧𑀓𑀸𑀭𑀸 𑀏𑀯 𑀳𑁄𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀪𑀸𑀯𑀢𑁄. 𑀬𑀣𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁂 𑀭𑀽𑀧𑀓𑀸𑀬𑁂 𑀲𑀩𑁆𑀩𑁄𑀧𑀺 𑀅𑀢𑁆𑀢𑀪𑀸𑀯𑁄 𑀅𑀦𑀼𑀕𑁆𑀕𑀳𑀺𑀢𑁄 𑀏𑀯 𑀦𑀸𑀫 𑀳𑁄𑀢𑀺, 𑀬𑀣𑀸 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀼𑀜𑁆𑀜𑀯𑀺𑀲𑁂𑀲𑀁 𑀉𑀧𑀦𑀺𑀲𑁆𑀲𑀸𑀬 𑀢𑀲𑁆𑀲 𑀇𑀢𑁆𑀣𑀺𑀭𑀢𑀦𑀸𑀤𑀻𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀢𑁂 𑀢𑁂 𑀯𑀺𑀲𑁂𑀲𑀸 𑀲𑀫𑁆𑀪𑀯𑀦𑁆𑀢𑀺 𑀢𑀩𑁆𑀪𑀸𑀯𑁂 𑀪𑀸𑀯𑀢𑁄, 𑀢𑀤𑀪𑀸𑀯𑁂 𑀘 𑀅𑀪𑀸𑀯𑀢𑁄, 𑀏𑀯𑀫𑁂𑀯 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀦𑀁 𑀬𑀣𑀸𑀯𑀼𑀢𑁆𑀢𑀧𑀼𑀜𑁆𑀜𑀯𑀺𑀲𑁂𑀲𑀁 𑀉𑀧𑀦𑀺𑀲𑁆𑀲𑀸𑀬 𑀢𑁂𑀲𑀁 𑀧𑀼𑀢𑁆𑀢𑀸𑀦𑀁 𑀚𑀸𑀬𑀫𑀸𑀦𑀸𑀦𑀁 𑀤𑀻𑀖𑀸𑀬𑀼𑀓𑀢𑀸 𑀔𑁂𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀲𑀁𑀯𑁂𑀕𑀥𑀫𑁆𑀫𑀙𑀦𑁆𑀤𑀸𑀤𑀺𑀲𑀫𑀼𑀧𑀩𑁆𑀭𑀽𑀳𑀺𑀢𑀸𑀬 𑀢𑀤𑀸 𑀢𑁂𑀲𑀁 𑀓𑀼𑀲𑀮𑀘𑁂𑀢𑀦𑀸𑀬 𑀢𑀣𑀸 𑀉𑀴𑀸𑀭𑀪𑀸𑀯𑁂𑀦 𑀲𑀫𑀼𑀧𑁆𑀧𑀚𑁆𑀚𑀦𑀢𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂, 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀓𑀼𑀲𑀮𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀢𑁆𑀢𑀦𑀺𑀓𑀸𑀬𑁂. ‘‘𑀅𑀢𑁆𑀢𑀦𑁄𑀯 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀢𑀢𑁆𑀣 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀪𑀸𑀯𑀢𑁄. 𑀔𑁂𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀺 𑀧𑀦 𑀇𑀥𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸.

𑀓𑁄𑀝𑁆𑀞𑀸𑀲𑀸𑀢𑀺 𑀘𑀢𑁆𑀢𑀸𑀭𑀻𑀲𑀯𑀲𑁆𑀲𑀸𑀬𑀼𑀓𑀸𑀢𑀺𑀆𑀤𑀬𑁄 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀧𑀭𑀺𑀬𑁄𑀲𑀸𑀦𑀸 𑀏𑀓𑀸𑀤𑀲 𑀓𑁄𑀝𑁆𑀞𑀸𑀲𑀸. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸𑀧𑀭𑀺𑀬𑁄𑀲𑀸𑀦𑀸𑀦𑀁 𑀤𑀲𑀦𑁆𑀦𑀁 𑀧𑀸𑀧𑀓𑁄𑀝𑁆𑀞𑀸𑀲𑀸𑀦𑀁 𑀕𑀳𑀡𑀁.

𑀲𑀗𑁆𑀔𑀭𑀸𑀚𑀉𑀧𑁆𑀧𑀢𑁆𑀢𑀺𑀯𑀡𑁆𑀡𑀦𑀸

𑁧𑁦𑁬. 𑀏𑀯𑀁 𑀉𑀧𑁆𑀧𑀚𑁆𑀚𑀦𑀓𑀢𑀡𑁆𑀳𑀸𑀢𑀺 𑀏𑀯𑀁 𑀯𑀘𑀻𑀪𑁂𑀤𑀁 𑀧𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸. 𑀅𑀦𑀲𑀦𑀦𑁆𑀢𑀺 𑀓𑀸𑀬𑀺𑀓𑀓𑀺𑀭𑀺𑀬𑀸𑀅𑀲𑀫𑀢𑁆𑀣𑀢𑀸𑀳𑁂𑀢𑀼𑀪𑀽𑀢𑁄 𑀲𑀭𑀻𑀭𑀲𑀗𑁆𑀓𑁄𑀘𑁄. 𑀢𑁂𑀦𑀸𑀳 ‘‘𑀅𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁄’’𑀢𑀺𑀆𑀤𑀺. 𑀖𑀦𑀦𑀺𑀯𑀸𑀲𑀢𑀦𑁆𑀢𑀺 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀦𑀁 𑀖𑀦𑀦𑀺𑀯𑀺𑀝𑁆𑀞𑀢𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀸𑀢𑀺𑀤𑀽𑀭𑀯𑀢𑁆𑀢𑀺𑀢𑀁. 𑀦𑀺𑀭𑀦𑁆𑀢𑀭𑀧𑀽𑀭𑀺𑀢𑁄𑀢𑀺 𑀦𑀺𑀭𑀦𑁆𑀢𑀭𑀁 𑀯𑀺𑀬 𑀧𑀼𑀡𑁆𑀡𑁄 𑀢𑀢𑁆𑀭𑀼𑀧𑀕𑀸𑀦𑀁 𑀲𑀢𑁆𑀢𑀸𑀦𑀁 𑀩𑀳𑀼𑀪𑀸𑀯𑀢𑁄.

𑀫𑁂𑀢𑁆𑀢𑁂𑀬𑁆𑀬𑀩𑀼𑀤𑁆𑀥𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁧𑁦𑁭. 𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑁂 𑀯𑀟𑁆𑀠𑀫𑀸𑀦𑀓𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀁, 𑀇𑀤𑀁 𑀧𑀦 𑀦 𑀯𑀟𑁆𑀠𑀫𑀸𑀦𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀢𑁆𑀢𑀸𑀦𑀁 𑀯𑀟𑁆𑀠𑀫𑀸𑀦𑀸𑀬𑀼𑀓𑀓𑀸𑀮𑁂 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀲𑀁𑀲𑀸𑀭𑁂 𑀲𑀁𑀯𑁂𑀕𑀲𑁆𑀲 𑀤𑀼𑀩𑁆𑀩𑀺𑀪𑀸𑀯𑀦𑀻𑀬𑀢𑁆𑀢𑀸. 𑀢𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀑𑀭𑀫𑁂𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄.

𑁧𑁦𑁮. 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦 𑀬𑀽𑀧𑁄 𑀯𑀺𑀬𑀸𑀢𑀺 𑀬𑀽𑀧𑁄, 𑀬𑀽𑀧𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀅𑀦𑁂𑀓𑀪𑀽𑀫𑀺𑀓𑀽𑀝𑀸𑀕𑀸𑀭𑁄𑀯𑀭𑀓𑀸𑀤𑀺𑀯𑀦𑁆𑀢𑀢𑀸𑀬𑀸𑀢𑀺 𑀬𑀽𑀧𑁄, 𑀧𑀸𑀲𑀸𑀤𑁄. 𑀭𑀜𑁆𑀜𑁄 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺𑀤𑀲𑁆𑀲𑁂𑀢𑀺𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸. 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦, 𑀫𑀳𑀢𑀸 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀫𑀳𑀸𑀚𑀦𑀲𑁆𑀲 𑀭𑀜𑁆𑀚𑀦𑀢𑁄 𑀫𑀳𑀸𑀧𑀦𑀸𑀤𑁄 𑀦𑀸𑀫 𑀭𑀸𑀚𑀸 𑀚𑀸𑀢𑁄. 𑀚𑀸𑀢𑀓𑁂𑀢𑀺 𑀫𑀳𑀸𑀧𑀦𑀸𑀤𑀚𑀸𑀢𑀓𑁂 (𑀚𑀸. 𑁧.𑁩.𑁪𑁦 𑀫𑀳𑀸𑀧𑀦𑀸𑀤𑀚𑀸𑀢𑀓𑁂).

𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸𑀢𑀺 ‘‘𑀅𑀢𑀻𑀢𑁂 𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸 𑀅𑀲𑁆𑀲𑁄𑀲𑀻’’𑀢𑀺 𑀅𑀢𑁆𑀢𑀪𑀸𑀯𑀦𑁆𑀢𑀭𑀢𑀸𑀬 𑀅𑀢𑁆𑀢𑀸𑀦𑀁 𑀧𑀭𑀁 𑀯𑀺𑀬 𑀦𑀺𑀤𑁆𑀤𑀺𑀲𑀢𑀺. 𑀆𑀬𑀲𑁆𑀫𑀸 𑀳𑀺 𑀪𑀤𑁆𑀤𑀚𑀺𑀢𑁆𑀣𑁂𑀭𑁄 𑀅𑀢𑁆𑀢𑀦𑀸 𑀅𑀚𑁆𑀛𑀸𑀯𑀼𑀢𑁆𑀣𑀧𑀼𑀩𑁆𑀩𑀁 𑀲𑀼𑀯𑀡𑁆𑀡𑀧𑀸𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀫𑀸𑀳. 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄𑀢𑀺 𑀬𑀲𑁆𑀲 𑀭𑀜𑁆𑀜𑁄 𑀅𑀬𑀁 𑀬𑀽𑀧𑁄 𑀧𑀸𑀲𑀸𑀤𑁄 𑀲𑀼𑀯𑀡𑁆𑀡𑀬𑁄 𑀲𑀼𑀯𑀡𑁆𑀡𑀫𑀬𑁄. 𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄𑀢𑀺 𑀯𑀺𑀢𑁆𑀣𑀸𑀭𑀢𑁄 𑀲𑁄𑀴𑀲𑀲𑀭𑀧𑀸𑀢𑀧𑁆𑀧𑀫𑀸𑀡𑁄, 𑀲𑁄 𑀧𑀦 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑁄 𑀳𑁄𑀢𑀺. 𑀉𑀩𑁆𑀪𑀫𑀸𑀳𑀼 𑀲𑀳𑀲𑁆𑀲𑀥𑀸𑀢𑀺 𑀉𑀩𑁆𑀪𑀁 𑀉𑀘𑁆𑀘𑀪𑀸𑀯𑀁 𑀅𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀳𑀲𑁆𑀲𑀥𑀸 𑀲𑀳𑀲𑁆𑀲𑀓𑀡𑁆𑀟𑀧𑁆𑀧𑀫𑀸𑀡𑀁 𑀆𑀳𑀼, 𑀲𑁄 𑀧𑀦 𑀬𑁄𑀚𑀦𑀢𑁄 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑁄 𑀳𑁄𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀕𑀸𑀣𑀸𑀲𑀼𑀔𑀢𑁆𑀣𑀁 ‘‘𑀆𑀳𑀽’’𑀢𑀺 𑀤𑀻𑀖𑀁 𑀓𑀢𑀁, 𑀅𑀳𑀼 𑀅𑀳𑁄𑀲𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀲𑀳𑀲𑁆𑀲𑀓𑀡𑁆𑀟𑁄𑀢𑀺 𑀲𑀳𑀲𑁆𑀲𑀪𑀽𑀫𑀺𑀓𑁄, ‘‘𑀲𑀳𑀲𑁆𑀲𑀔𑀡𑁆𑀟𑁄’’ 𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯 𑀅𑀢𑁆𑀣𑁄. 𑀲𑀢𑀕𑁂𑀡𑁆𑀟𑀽𑀢𑀺 𑀅𑀦𑁂𑀓𑀲𑀢𑀦𑀺𑀬𑀽𑀳𑀓𑁄. 𑀥𑀚𑀸𑀮𑀽𑀢𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀬𑀽𑀳𑀲𑀺𑀔𑀭𑀸𑀤𑀻𑀲𑀼 𑀧𑀢𑀺𑀝𑁆𑀞𑀧𑀺𑀢𑁂𑀳𑀺 𑀲𑀢𑁆𑀢𑀺𑀥𑀚𑀯𑀻𑀭𑀗𑁆𑀕𑀥𑀚𑀸𑀤𑀻𑀳𑀺 𑀥𑀚𑁂𑀳𑀺 𑀲𑀫𑁆𑀧𑀦𑁆𑀦𑁄. 𑀳𑀭𑀺𑀢𑀸𑀫𑀬𑁄𑀢𑀺 𑀘𑀸𑀫𑀻𑀓𑀭𑀲𑀼𑀯𑀡𑁆𑀡𑀫𑀬𑁄. 𑀓𑁂𑀘𑀺 𑀧𑀦 𑀳𑀭𑀺𑀢𑀸𑀫𑀬𑁄𑀢𑀺 ‘‘𑀳𑀭𑀺𑀢𑀫𑀡𑀺𑀧𑀭𑀺𑀓𑁆𑀔𑀝𑁄’’𑀢𑀺 𑀯𑀤𑀦𑁆𑀢𑀺. 𑀕𑀦𑁆𑀥𑀩𑁆𑀩𑀸𑀢𑀺 𑀦𑀝𑀸. 𑀙𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸𑀢𑀺 𑀙𑀫𑀢𑁆𑀢𑀸𑀦𑀺 𑀕𑀦𑁆𑀥𑀩𑁆𑀩𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀭𑀜𑁆𑀜𑁄 𑀅𑀪𑀺𑀭𑀫𑀸𑀧𑀦𑀢𑁆𑀣𑀁 𑀦𑀘𑁆𑀘𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂 𑀏𑀯𑀁 𑀦𑀘𑁆𑀘𑀦𑁆𑀢𑀸𑀧𑀺 𑀓𑀺𑀭 𑀭𑀸𑀚𑀸𑀦𑀁 𑀳𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀦𑀝𑀁 𑀧𑁂𑀲𑁂𑀢𑁆𑀯𑀸 𑀲𑀫𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀤𑀸 𑀭𑀸𑀚𑀸 𑀳𑀲𑀻𑀢𑀺.

𑀓𑁄𑀝𑀺𑀕𑀸𑀫𑁄 𑀦𑀸𑀫 𑀫𑀸𑀧𑀺𑀢𑁄. 𑀯𑀢𑁆𑀣𑀽𑀢𑀺 𑀪𑀤𑁆𑀤𑀚𑀺𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼. 𑀢𑀁 𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬𑀁 (𑀣𑁂𑀭𑀕𑀸. 𑀅𑀝𑁆𑀞. 𑀪𑀤𑁆𑀤𑀚𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬) 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀫𑁂𑀯. 𑀇𑀢𑀭𑀲𑁆𑀲𑀸𑀢𑀺 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑀲𑁆𑀲. 𑀆𑀦𑀼𑀪𑀸𑀯𑀸𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀫𑀺𑀢𑁆𑀢𑀁.

𑀤𑀸𑀦𑀯𑀲𑁂𑀦 𑀤𑀢𑁆𑀯𑀸𑀢𑀺 𑀢𑀁 𑀧𑀸𑀲𑀸𑀤𑀁 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀸𑀯𑀯𑀺𑀬𑁄𑀚𑀦𑁂𑀦 𑀤𑀸𑀦𑀫𑀼𑀔𑁂 𑀦𑀺𑀬𑁄𑀚𑁂𑀢𑁆𑀯𑀸. 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑁂𑀦𑁂𑀯 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀤𑀢𑁆𑀯𑀸 𑀧𑀼𑀦 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀦𑁆𑀢𑀓𑀪𑀸𑀯𑀓𑀭𑀡𑁂𑀦 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀏𑀢𑁆𑀢𑀓𑁂𑀦𑀸𑀢𑀺 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘‘𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀧𑀤𑀁 𑀏𑀢𑁆𑀢𑀓𑁂𑀦 𑀤𑁂𑀲𑀦𑀸𑀫𑀕𑁆𑀕𑁂𑀦.

𑀪𑀺𑀓𑁆𑀔𑀼𑀦𑁄 𑀆𑀬𑀼𑀯𑀡𑁆𑀡𑀸𑀤𑀺𑀯𑀟𑁆𑀠𑀦𑀓𑀣𑀸𑀯𑀡𑁆𑀡𑀦𑀸

𑁧𑁧𑁦. 𑀇𑀤𑀁 𑀪𑀺𑀓𑁆𑀔𑀼𑀦𑁄 𑀆𑀬𑀼𑀲𑁆𑀫𑀺𑀦𑁆𑀢𑀺 𑀆𑀬𑀼𑀲𑁆𑀫𑀺𑀁 𑀲𑀸𑀥𑁂𑀢𑀩𑁆𑀩𑁂 𑀇𑀤𑀁 𑀪𑀺𑀓𑁆𑀔𑀼𑀦𑁄 𑀇𑀘𑁆𑀙𑀺𑀢𑀩𑁆𑀩𑀁 𑀘𑀺𑀭𑀚𑀻𑀯𑀺𑀢𑀸𑀬 𑀳𑁂𑀢𑀼𑀪𑀸𑀯𑀢𑁄𑀢𑀺. 𑀢𑁂𑀦𑀸𑀳 ‘‘𑀇𑀤𑀁 𑀆𑀬𑀼𑀓𑀸𑀭𑀡’’𑀦𑁆𑀢𑀺.

𑀲𑀫𑁆𑀧𑀦𑁆𑀦𑀲𑀻𑀮𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀲𑀫𑀸𑀥𑀺𑀬𑀣𑀸𑀪𑀽𑀢𑀜𑀸𑀡𑀸𑀤𑀺𑀲𑀫𑁆𑀪𑀯𑀢𑁄 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀨𑀼𑀝𑀢𑁆𑀢𑀸 𑀲𑀭𑀻𑀭𑁂 𑀯𑀡𑁆𑀡𑀥𑀸𑀢𑀼 𑀯𑀺𑀧𑁆𑀧𑀲𑀦𑁆𑀦𑀸 𑀳𑁄𑀢𑀺, 𑀓𑀮𑁆𑀬𑀸𑀡𑁄 𑀘 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀻𑀮𑀯𑀢𑁄 𑀳𑀻’’𑀢𑀺𑀆𑀤𑀺.

𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁, 𑀅𑀧𑀻𑀢𑀺𑀚𑀁 𑀓𑀸𑀬𑀲𑀼𑀔𑀁, 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚𑀁 𑀉𑀧𑁂𑀓𑁆𑀔𑀸𑀲𑀼𑀔𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀧𑁆𑀧𑀝𑀺𑀓𑁆𑀓𑀽𑀮𑀢𑀸𑀯𑀳𑁄𑀢𑀺 𑀅𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀢𑁂𑀲𑀼 𑀅𑀧𑁆𑀧𑀝𑀺𑀓𑁆𑀓𑀽𑀮𑀪𑀸𑀯𑀢𑁄. 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀤𑀺𑀲𑀸𑀲𑀼 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀲𑀩𑁆𑀩𑀤𑀺𑀲𑀸𑀲𑀼 𑀯𑀺𑀧𑁆𑀨𑀸𑀭𑀺𑀓𑀢𑀸.

‘‘𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀩𑀮’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀓𑁂𑀦𑀘𑀺 𑀅𑀦𑀪𑀺𑀪𑀯𑀦𑀻𑀬𑀪𑀸𑀯𑀢𑁄.

‘‘𑀮𑁄𑀓𑁂’’𑀢𑀺 𑀇𑀤𑀁 𑀬𑀣𑀸 ‘‘𑀏𑀓𑀩𑀮𑀫𑁆𑀧𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀻𑀬𑀢𑀺, 𑀏𑀯𑀁 ‘‘𑀤𑀼𑀧𑁆𑀧𑀲𑀳𑀁 𑀤𑀼𑀭𑀪𑀺𑀲𑀫𑁆𑀪𑀯’’𑀦𑁆𑀢𑀺 𑀇𑀫𑁂𑀳𑀺𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁂𑀳𑁂𑀯 𑀳𑀺 𑀥𑀫𑁆𑀫𑁂𑀳𑀺 𑀢𑁂𑀲𑀁 𑀩𑀮𑀲𑁆𑀲 𑀤𑀼𑀧𑁆𑀧𑀲𑀳𑀢𑀸, 𑀤𑀼𑀭𑀪𑀺𑀲𑀫𑁆𑀪𑀯𑀢𑀸, 𑀦 𑀮𑁄𑀓𑀼𑀢𑁆𑀢𑀭𑁂𑀳𑀻𑀢𑀺. 𑀏𑀢𑁆𑀣𑁂𑀯𑀸𑀢𑀺 𑀏𑀢𑀲𑁆𑀫𑀺𑀁 𑀅𑀭𑀳𑀢𑁆𑀢𑀨𑀮𑁂 𑀏𑀯, 𑀢𑀤𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀮𑁄𑀓𑀼𑀢𑁆𑀢𑀭𑀧𑀼𑀜𑁆𑀜𑀫𑁆𑀧𑀻𑀢𑀺 𑀮𑁄𑀓𑀼𑀢𑁆𑀢𑀭𑀧𑀼𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀨𑀮𑀫𑁆𑀧𑀺. 𑀬𑀸𑀯 𑀆𑀲𑀯𑀓𑁆𑀔𑀬𑀸 𑀧𑀯𑀟𑁆𑀠𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀽𑀢𑀺 𑀬𑁄𑀚𑀦𑀸. 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀲𑀫𑀥𑀺𑀕𑀫𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.