𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁨. 𑀧𑀳𑀸𑀢𑀩𑁆𑀩𑀸𑀤𑀺𑀥𑀫𑁆𑀫𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀘𑀥𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀬𑀫𑀢𑁆𑀣𑁄 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀫𑀢𑁆𑀣𑀁 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑁄 ‘‘𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀼’’𑀦𑁆𑀢𑀺 𑀆𑀳. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀦𑀻𑀯𑀭𑀡𑀸𑀤𑀺𑀯𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀬𑁂𑀲𑀜𑁆𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑁂𑀲𑀼 𑀧𑀞𑀫𑀁 𑀦𑀻𑀯𑀭𑀡𑀸𑀦𑀺 𑀯𑀺𑀪𑀸𑀕𑁂𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀢𑁂𑀲𑀁 𑀯𑀲𑁂𑀦𑁂𑀢𑁆𑀣 𑀪𑀕𑀯𑀢𑀸 𑀧𑀞𑀫𑀁 𑀦𑀻𑀯𑀭𑀡𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀢𑀣𑀸 𑀳𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀧𑀺 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸 𑀤𑁂𑀲𑀺𑀢𑀸, 𑀢𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑁂𑀲𑀼 𑀔𑀦𑁆𑀥𑁂𑀲𑀼, 𑀆𑀬𑀢𑀦𑁂𑀲𑀼 𑀘 𑀪𑀸𑀯𑁂𑀢𑀩𑁆𑀩𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼, 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀺𑀪𑀸𑀕𑁂𑀲𑀼 𑀲𑀘𑁆𑀘𑁂𑀲𑀼 𑀘 𑀉𑀢𑁆𑀢𑀭𑀸 𑀤𑁂𑀲𑀦𑀸, 𑀢𑀲𑁆𑀫𑀸 𑀘𑁂𑀢𑁆𑀣 𑀲𑀫𑀣𑀪𑀸𑀯𑀦𑀸𑀧𑀺 𑀬𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀢𑁆𑀣𑀸 𑀇𑀘𑁆𑀙𑀺𑀢𑀸. 𑀯𑀺𑀧𑀲𑁆𑀲𑀦𑀸𑀧𑀥𑀸𑀦𑀸, 𑀯𑀺𑀧𑀲𑁆𑀲𑀦𑀸𑀩𑀳𑀼𑀮𑀸 𑀘 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀯𑀺𑀪𑀸𑀕𑁂𑀦 𑀤𑁂𑀲𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀦𑁆𑀥𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀫𑀺𑀲𑁆𑀲𑀓𑀧𑀭𑀺𑀕𑁆𑀕𑀳𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀓𑀮𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀁 𑀲𑀫𑁆𑀧𑀺𑀡𑁆𑀟𑁂𑀢𑀺 𑀇𑀢𑀭𑁂𑀲𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸.

‘‘𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸𑀦𑀁 𑀬𑀼𑀕𑀦𑀦𑁆𑀥𑀢𑀸 𑀦𑀢𑁆𑀣𑀻’’𑀢𑀺 𑀧𑀚𑀸𑀦𑀦𑀓𑀸𑀮𑁂 𑀅𑀪𑀸𑀯𑀸 ‘‘𑀅𑀪𑀺𑀡𑁆𑀳𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀁𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑀮𑀩𑁆𑀪𑀫𑀸𑀦𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀲𑁄 𑀧𑀦 ‘‘𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀓𑀸𑀭𑀡𑀸𑀓𑀸𑀭𑁄𑀯, 𑀅𑀢𑁆𑀣𑀢𑁄 𑀓𑀸𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀘-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄.

𑀢𑀢𑁆𑀣𑀸𑀢𑀺 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀤𑁂. 𑀲𑀼𑀪𑀫𑁆𑀧𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑁄𑀧𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀕𑀳𑀡𑀸𑀓𑀸𑀭𑁂𑀦 ‘‘𑀲𑀼𑀪’’𑀦𑁆𑀢𑀺 𑀯𑀼𑀢𑁆𑀢𑁄, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘. 𑀇𑀝𑁆𑀞𑀁, 𑀇𑀝𑁆𑀞𑀸𑀓𑀸𑀭𑁂𑀦 𑀯𑀸 𑀕𑀬𑁆𑀳𑀫𑀸𑀦𑀁 𑀭𑀽𑀧𑀸𑀤𑀺 𑀲𑀼𑀪𑀸𑀭𑀫𑁆𑀫𑀡𑀁. 𑀆𑀓𑀗𑁆𑀔𑀺𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄. 𑀢𑀦𑁆𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀪𑀸𑀕𑀳𑁂𑀢𑀼𑀪𑀽𑀢𑁂, 𑀆𑀭𑀫𑁆𑀫𑀡𑀪𑀽𑀢𑁂 𑀘 𑀤𑀼𑀯𑀺𑀥𑁂 𑀲𑀼𑀪𑀦𑀺𑀫𑀺𑀢𑁆𑀢𑁂. 𑀆𑀳𑀸𑀭𑁄𑀢𑀺 𑀧𑀘𑁆𑀘𑀬𑁄 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀓𑀢𑁆𑀯𑀸.

𑀅𑀲𑀼𑀪𑀦𑁆𑀢𑀺 𑀅𑀲𑀼𑀪𑀚𑁆𑀛𑀸𑀦𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀁 𑀧𑀦 𑀤𑀲𑀲𑀼 𑀅𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑁂𑀲𑀼 𑀘 𑀓𑁂𑀲𑀸𑀤𑀻𑀲𑀼 𑀲𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑁂𑀲𑀼 𑀘 𑀧𑀯𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀓𑁂𑀲𑀸𑀤𑀻𑀲𑀼 𑀳𑀺 𑀲𑀜𑁆𑀜𑀸 ‘‘𑀅𑀲𑀼𑀪𑀲𑀜𑁆𑀜𑀸’’𑀢𑀺 𑀕𑀺𑀭𑀺𑀫𑀸𑀦𑀦𑁆𑀤𑀲𑀼𑀢𑁆𑀢𑁂 (𑀅. 𑀦𑀺. 𑁧𑁦.𑁬𑁦) 𑀯𑀼𑀢𑁆𑀢𑀸. 𑀏𑀢𑁆𑀣 𑀘 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀘 𑀕𑀳𑀡𑀁 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀲𑀼 𑀧𑀦 𑀅𑀲𑀼𑀪𑁂𑀲𑀼 ‘‘𑀲𑀼𑀪’’𑀦𑁆𑀢𑀺, ‘‘𑀅𑀲𑀼𑀪’’𑀦𑁆𑀢𑀺 𑀘 𑀫𑀦𑀲𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀤𑀦𑀼𑀓𑀽𑀮𑀢𑁆𑀢𑀸 𑀧𑀦 𑀇𑀢𑀭𑁂 𑀧𑀻𑀢𑀺.

𑀏𑀓𑀸𑀤𑀲𑀲𑀼 𑀅𑀲𑀼𑀪𑁂𑀲𑀼 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀬𑀣𑀸 𑀯𑀸 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀸𑀬 𑀅𑀲𑀼𑀪𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀸 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄. ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀫𑀺𑀢𑀸𑀳𑀸𑀭𑀲𑁆𑀲 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀸𑀪𑀸𑀯𑀸 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻’’𑀢𑀺 𑀯𑀤𑀦𑁆𑀢𑀺, 𑀅𑀬𑀫𑁂𑀯 𑀘 𑀅𑀢𑁆𑀣𑁄 𑀦𑀺𑀤𑁆𑀤𑁂𑀲𑁂𑀧𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀓𑀽𑀮𑀢𑀁, 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲 𑀢𑀤𑀸𑀥𑀸𑀭𑀲𑁆𑀲 𑀢𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀅𑀢𑀺𑀯𑀺𑀬 𑀚𑁂𑀕𑀼𑀘𑁆𑀙𑀢𑀁, 𑀓𑀸𑀬𑀲𑁆𑀲 𑀘 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑁆𑀢𑀁 𑀲𑀫𑁆𑀫𑀤𑁂𑀯 𑀚𑀸𑀦𑀸𑀢𑀺, 𑀲𑁄 𑀲𑀩𑁆𑀩𑀲𑁄 𑀪𑁄𑀚𑀦𑁂 𑀧𑀫𑀸𑀡𑀲𑁆𑀲 𑀚𑀸𑀦𑀦𑁂𑀦 𑀪𑁄𑀚𑀦𑁂𑀫𑀢𑁆𑀢𑀜𑁆𑀜𑀽 𑀦𑀸𑀫. 𑀢𑀸𑀤𑀺𑀲𑀲𑁆𑀲 𑀳𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯.

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀸𑀯𑀻. 𑀧𑀳𑀻𑀦𑀲𑁆𑀲𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀲𑁆𑀲. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 (𑀥. 𑀲. 𑁧𑁧𑁫𑁯, 𑁧𑁫𑁦𑁩) 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸’’𑀢𑀺.

𑀧𑀝𑀺𑀖𑀫𑁆𑀧𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀧𑀝𑀺𑀖𑀲𑁆𑀲 𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸.

𑀫𑁂𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀳𑀺𑀢𑁂𑀲𑀻 𑀧𑀼𑀕𑁆𑀕𑀮𑁄, 𑀢𑀲𑁆𑀫𑀺𑀁 𑀫𑀺𑀢𑁆𑀢𑁂 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸𑀢𑀺 𑀫𑁂𑀢𑁆𑀢𑀸, 𑀳𑀺𑀢𑁂𑀲𑀺𑀢𑀸, 𑀢𑀲𑁆𑀲𑀸 𑀫𑁂𑀢𑁆𑀢𑀸𑀬. 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺 𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄. ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸𑀬 𑀧𑀝𑀺𑀧𑀓𑁆𑀔𑀢𑁄 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀲𑁆𑀲 𑀅𑀪𑀸𑀯𑀢𑁄. 𑀢𑀦𑁆𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁. 𑀢𑀢𑁆𑀣𑀸𑀢𑀺 𑀫𑁂𑀢𑁆𑀢𑀸𑀬. 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄𑀢𑀺 𑀩𑀳𑀼𑀮𑀻𑀓𑀸𑀭𑀯𑀢𑁄.

𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬𑀦𑀲𑁆𑀲 𑀳𑀺𑀢𑀽𑀧𑀲𑀁𑀳𑀸𑀭𑀲𑁆𑀲 𑀉𑀧𑁆𑀧𑀸𑀤𑀦𑀁 𑀧𑀯𑀢𑁆𑀢𑀦𑀁 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀧𑀞𑀫𑀼𑀧𑁆𑀧𑀦𑁆𑀦𑁄 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑁄 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑁄𑀯 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀁. 𑀓𑀫𑁆𑀫𑀫𑁂𑀯 𑀲𑀓𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀸, 𑀲𑀢𑁆𑀢𑀸, 𑀢𑀩𑁆𑀪𑀸𑀯𑁄 𑀓𑀫𑁆𑀫𑀲𑁆𑀲𑀓𑀢𑀸, 𑀓𑀫𑁆𑀫𑀤𑀸𑀬𑀸𑀤𑀢𑀸. 𑀤𑁄𑀲𑀫𑁂𑀢𑁆𑀢𑀸𑀲𑀼 𑀬𑀸𑀣𑀸𑀯𑀢𑁄 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀯𑀻𑀫𑀁𑀲𑀸 𑀇𑀥 𑀧𑀝𑀺𑀲𑀗𑁆𑀔𑀸𑀦𑀁. 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀦𑁆𑀢𑀢𑀸 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀦𑁆𑀢𑀺 (𑀑𑀥𑀺𑀲𑀓𑀅𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀸𑀦𑀁 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁫) 𑀅𑀢𑁆𑀢𑀅𑀢𑀺𑀧𑀺𑀬𑀲𑀳𑀸𑀬𑀫𑀚𑁆𑀛𑀢𑁆𑀢𑀯𑁂𑀭𑀺𑀯𑀲𑁂𑀦 𑀑𑀤𑀺𑀲𑁆𑀲𑀓𑀢𑀸, 𑀲𑀻𑀫𑀸𑀲𑀫𑁆𑀪𑁂𑀤𑁂 𑀓𑀢𑁂 𑀅𑀦𑁄𑀤𑀺𑀲𑁆𑀲𑀓𑀢𑀸. 𑀏𑀓𑀸𑀤𑀺𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑀺𑀲𑀸𑀨𑀭𑀡𑀢𑀸 𑀫𑁂𑀢𑁆𑀢𑀸𑀬 𑀉𑀕𑁆𑀕𑀳𑀡𑁂 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀭𑀘𑁆𑀙𑀸𑀕𑀸𑀫𑀸𑀤𑀺𑀯𑀲𑁂𑀦 𑀯𑀸 𑀑𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀁. 𑀯𑀺𑀳𑀸𑀭𑀸𑀤𑀺𑀉𑀤𑁆𑀤𑁂𑀲𑀭𑀳𑀺𑀢𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀲𑁂𑀦 𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀉𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 ‘‘𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄𑀢𑀺 𑀘 𑀬𑀸𑀯 𑀉𑀧𑀘𑀸𑀭𑀸 𑀤𑀝𑁆𑀞𑀩𑁆𑀩𑁄. 𑀉𑀕𑁆𑀕𑀳𑀺𑀢𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸. 𑀢𑀢𑁆𑀣 𑀲𑀩𑁆𑀩𑁂 𑀲𑀢𑁆𑀢𑀸, 𑀧𑀸𑀡𑀸, 𑀪𑀽𑀢𑀸, 𑀧𑀼𑀕𑁆𑀕𑀮𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸, 𑀏𑀓𑁂𑀓𑀲𑁆𑀫𑀺𑀁 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀛𑀸, 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀘𑀢𑀼𑀥𑀸 𑀧𑀯𑀢𑁆𑀢𑀺𑀢𑁄 𑀯𑀻𑀲𑀢𑀺𑀯𑀺𑀥𑀸 𑀅𑀦𑁄𑀤𑀺𑀲𑁆𑀲𑀓𑀨𑀭𑀡𑀸 𑀫𑁂𑀢𑁆𑀢𑀸. 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄, 𑀧𑀼𑀭𑀺𑀲𑀸, 𑀅𑀭𑀺𑀬𑀸, 𑀅𑀦𑀭𑀺𑀬𑀸, 𑀤𑁂𑀯𑀸, 𑀫𑀦𑀼𑀲𑁆𑀲𑀸, 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀲𑀢𑁆𑀢𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀸, 𑀅𑀝𑁆𑀞𑀯𑀻𑀲𑀢𑀺 𑀯𑀺𑀥𑀸 𑀯𑀸, 𑀤𑀲𑀳𑀺 𑀤𑀺𑀲𑀸𑀳𑀺 𑀤𑀺𑀲𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀤𑀲𑀯𑀺𑀥𑀸, 𑀏𑀓𑁂𑀓𑀸𑀬 𑀯𑀸 𑀤𑀺𑀲𑀸𑀬 𑀲𑀢𑁆𑀢𑀸𑀤𑀺𑀇𑀢𑁆𑀣𑀸𑀤𑀺𑀅𑀯𑁂𑀭𑀸𑀤𑀺𑀪𑁂𑀤𑁂𑀦 𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸 𑀘 𑀑𑀥𑀺𑀲𑁄 𑀨𑀭𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀅𑀭𑀢𑀺𑀆𑀤𑀺𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀉𑀓𑁆𑀓𑀡𑁆𑀞𑀺𑀢𑀸 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀉𑀧𑁆𑀧𑀚𑁆𑀚𑀦𑀪𑀸𑀯𑀭𑀺𑀜𑁆𑀘𑀦𑀸. 𑀓𑀸𑀬𑀯𑀺𑀦𑀫𑀦𑀸𑀢𑀺 𑀓𑀭𑀚𑀓𑀸𑀬𑀲𑁆𑀲 𑀯𑀺𑀭𑀽𑀧𑁂𑀦𑀸𑀓𑀸𑀭𑁂𑀦 𑀦𑀫𑀦𑀸. 𑀮𑀻𑀦𑀸𑀓𑀸𑀭𑁄𑀢𑀺 𑀲𑀗𑁆𑀓𑁄𑀘𑀸𑀧𑀢𑁆𑀢𑀺.

𑀓𑀼𑀲𑀮𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑁆𑀞𑀧𑀦𑀲𑀪𑀸𑀯𑀢𑀸𑀬, 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀯𑀺𑀲𑁄𑀲𑀦𑀲𑀪𑀸𑀯𑀢𑀸𑀬 𑀘 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀢𑁄 𑀧𑀯𑀢𑁆𑀢𑀯𑀻𑀭𑀺𑀬𑀦𑁆𑀢𑀺 𑀆𑀳 ‘‘𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬’’𑀦𑁆𑀢𑀺. 𑀬𑀲𑁆𑀫𑀸 𑀧𑀞𑀫𑀸𑀭𑀫𑁆𑀪𑀫𑀢𑁆𑀢𑀲𑁆𑀲 𑀓𑁄𑀲𑀚𑁆𑀚𑀯𑀺𑀥𑀫𑀦𑀁, 𑀣𑀸𑀫𑀕𑀫𑀦𑀜𑁆𑀘 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑀸𑀬 𑀢𑀢𑁄 𑀩𑀮𑀯𑀢𑀭’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀸𑀲𑁂𑀯𑀦𑀁 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀁 𑀅𑀢𑀺𑀯𑀺𑀬 𑀣𑀸𑀫𑀕𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭’’𑀦𑁆𑀢𑀺.

𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀅𑀢𑀺𑀪𑁄𑀚𑀦𑁂 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀢𑀁 𑀪𑁄𑀚𑀦𑀁 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀏𑀢𑁆𑀢𑀓𑁂 𑀦 𑀳𑁄𑀢𑀻𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀸𑀓𑀸𑀭𑀡𑀕𑀸𑀳𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀢𑀁 𑀪𑁄𑀚𑀦𑀁 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻’’𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀘 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀘𑀢𑀼𑀧𑀜𑁆𑀘…𑀧𑁂… 𑀦 𑀳𑁄𑀢𑀻’’𑀢𑀺. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀦𑁆𑀢𑀺 𑀤𑀺𑀯𑀸 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀲𑀽𑀭𑀺𑀬𑀸𑀮𑁄𑀓𑀁 𑀭𑀢𑁆𑀢𑀺𑀬𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲𑀸𑀧𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀼𑀢𑀗𑁆𑀕𑀸𑀦𑀁 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀻’’𑀢𑀺.

𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑁂𑀢𑀲𑁄 𑀅𑀯𑀽𑀧𑀲𑀫𑀸𑀯𑀳𑀢𑀸𑀬 𑀉𑀤𑁆𑀥𑀘𑁆𑀘𑁂𑀦 𑀲𑀫𑀸𑀦𑀮𑀓𑁆𑀔𑀡𑀫𑁂𑀯𑀸𑀢𑀺 ‘‘𑀅𑀯𑀽𑀧𑀲𑀫𑁄 𑀦𑀸𑀫 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯𑁂𑀢𑀁 𑀅𑀢𑁆𑀣𑀢𑁄’’𑀢𑀺 𑀯𑀼𑀢𑁆𑀢𑀁.

𑀩𑀳𑀼𑀲𑁆𑀲𑀼𑀢𑀲𑁆𑀲 𑀕𑀦𑁆𑀣𑀢𑁄, 𑀅𑀢𑁆𑀣𑀢𑁄 𑀘 𑀲𑀼𑀢𑁆𑀢𑀸𑀤𑀻𑀦𑀺 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄 𑀅𑀢𑁆𑀣𑀯𑁂𑀤𑀸𑀤𑀺𑀧𑀝𑀺𑀮𑀸𑀪𑀲𑀩𑁆𑀪𑀸𑀯𑀢𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀻𑀢𑀺, 𑀬𑀣𑀸𑀯𑀺𑀥𑀺𑀧𑀝𑀺𑀧𑀢𑁆𑀢𑀺𑀬𑀸, 𑀬𑀣𑀸𑀦𑀼𑀭𑀽𑀧𑀧𑀢𑀺𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀜𑁆𑀘 𑀦 𑀳𑁄𑀢𑀻𑀢𑀺 ‘‘𑀩𑀸𑀳𑀼𑀲𑀘𑁆𑀘𑁂𑀦𑀧𑀺…𑀧𑁂… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻’’𑀢𑀺 𑀆𑀳. 𑀬𑀤𑀕𑁆𑀕𑁂𑀦 𑀩𑀸𑀳𑀼𑀲𑀘𑁆𑀘𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀧𑀭𑀺𑀧𑀼𑀘𑁆𑀙𑀓𑀢𑀸𑀯𑀺𑀦𑀬𑀧𑀓𑀢𑀜𑁆𑀜𑀼𑀢𑀸𑀳𑀺𑀧𑀺 𑀢𑀁 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀤𑁆𑀥𑀲𑁂𑀯𑀺𑀢𑀸 𑀘 𑀯𑀼𑀤𑁆𑀥𑀲𑀻𑀮𑀺𑀢𑀁 𑀆𑀯𑀳𑀢𑀻𑀢𑀺 𑀘𑁂𑀢𑁄𑀯𑀽𑀧𑀲𑀫𑀓𑀭𑀢𑁆𑀢𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀓𑀸𑀭𑀻 𑀯𑀼𑀢𑁆𑀢𑀸. 𑀯𑀼𑀤𑁆𑀥𑀢𑁆𑀢𑀁 𑀧𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀓𑀸 𑀯𑀺𑀦𑀬𑀥𑀭𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀓𑁆𑀔𑁂𑀧𑁄 𑀘 𑀧𑀩𑁆𑀩𑀚𑀺𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀓𑀼𑀓𑁆𑀓𑀼𑀘𑁆𑀘𑀳𑁂𑀢𑀼𑀓𑁄 𑀳𑁄𑀢𑀻𑀢𑀺 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀦𑀬𑁂𑀦𑁂𑀯 𑀧𑀭𑀺𑀧𑀼𑀘𑁆𑀙𑀓𑀢𑀸𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸. 𑀧𑀳𑀻𑀦𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀤𑁄𑀫𑀦𑀲𑁆𑀲𑀲𑀳𑀕𑀢𑀢𑁆𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄.

𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀻𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀞𑀸𑀦𑀻𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀸𑀭𑀡𑀪𑀽𑀢𑀸 𑀥𑀫𑁆𑀫𑀸, 𑀢𑀺𑀝𑁆𑀞𑀢𑀻𑀢𑀺 𑀯𑀸 𑀞𑀸𑀦𑀻𑀬𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀞𑀸𑀦𑀻𑀬𑀸 𑀏𑀢𑀺𑀲𑁆𑀲𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸, 𑀅𑀢𑁆𑀣𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀏𑀯. 𑀲𑀸 𑀳𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀪𑀸𑀕𑀳𑁂𑀢𑀼𑀢𑀸𑀬 𑀅𑀲𑀸𑀥𑀸𑀭𑀡𑀁 𑀓𑀸𑀭𑀡𑀁.

𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀸. 𑀬𑁂 𑀅𑀓𑀼𑀲𑀮𑀸, 𑀢𑁂 𑀲𑀸𑀯𑀚𑁆𑀚𑀸, 𑀅𑀲𑁂𑀯𑀺𑀢𑀩𑁆𑀩𑀸, 𑀳𑀻𑀦𑀸 𑀘. 𑀬𑁂 𑀓𑀼𑀲𑀮𑀸, 𑀢𑁂 𑀅𑀦𑀯𑀚𑁆𑀚𑀸, 𑀲𑁂𑀯𑀺𑀢𑀩𑁆𑀩𑀸,𑀧𑀡𑀻𑀢𑀸 𑀘. 𑀓𑀼𑀲𑀮𑀸 𑀯𑀸 𑀳𑀻𑀦𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀆𑀭𑀤𑁆𑀥𑀸 𑀳𑀻𑀦𑀸, 𑀧𑀡𑀻𑀢𑁂𑀳𑀺 𑀧𑀡𑀻𑀢𑀸. 𑀓𑀡𑁆𑀳𑀸𑀢𑀺 𑀓𑀸𑀴𑀓𑀸 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀲𑀼𑀓𑁆𑀓𑀸𑀢𑀺 𑀑𑀤𑀸𑀢𑀸 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀓𑀡𑁆𑀳𑀸. 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀲𑀼𑀓𑁆𑀓𑀸. 𑀢𑁂 𑀏𑀯 𑀲𑀧𑁆𑀧𑀝𑀺𑀪𑀸𑀕𑀸. 𑀓𑀡𑁆𑀳𑀸 𑀳𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸, 𑀢𑀣𑀸 𑀲𑀼𑀓𑁆𑀓𑀸𑀧𑀺 𑀇𑀢𑀭𑁂𑀳𑀺. 𑀅𑀣 𑀯𑀸 𑀓𑀡𑁆𑀳𑀲𑀼𑀓𑁆𑀓𑀸 𑀘 𑀲𑀧𑁆𑀧𑀝𑀺𑀪𑀸𑀕𑀸 𑀘 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸. 𑀲𑀼𑀔𑀸 𑀳𑀺 𑀯𑁂𑀤𑀦𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀧𑁆𑀧𑀝𑀺𑀪𑀸𑀕𑀸, 𑀤𑀼𑀓𑁆𑀔𑀸 𑀘 𑀯𑁂𑀤𑀦𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀧𑁆𑀧𑀝𑀺𑀪𑀸𑀕𑀸𑀢𑀺.

𑀓𑀸𑀫𑀁 𑀩𑀸𑀳𑀼𑀲𑀘𑁆𑀘𑀧𑀭𑀺𑀧𑀼𑀘𑁆𑀙𑀓𑀢𑀸𑀳𑀺 𑀲𑀩𑁆𑀩𑀸𑀧𑀺 𑀅𑀝𑁆𑀞𑀯𑀢𑁆𑀣𑀼𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀣𑀸𑀧𑀺 𑀭𑀢𑀦𑀢𑁆𑀢𑀬𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀺𑀓𑀸 𑀲𑁂𑀲𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪𑀸’’𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀯𑀩𑁄𑀥𑁂 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺 (𑀥. 𑀲. 𑁧𑁦𑁦𑁮, 𑁧𑁧𑁨𑁩, 𑁧𑁧𑁬𑁭, 𑁧𑁨𑁪𑁧, 𑁧𑁨𑁬𑁩, 𑁧𑁨𑁭𑁦; 𑀯𑀺𑀪. 𑁯𑁧𑁫) 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀲𑀫𑁆𑀪𑀯𑁄𑀢𑀺. 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸 ‘‘𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀸𑀧𑀻’’𑀢𑀺. 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀅𑀦𑀼𑀧𑀯𑀺𑀲𑀦𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀘𑁆𑀘𑀦𑀩𑀳𑀼𑀮𑀲𑁆𑀲, 𑀅𑀥𑀺𑀫𑀼𑀘𑁆𑀘𑀦𑀜𑁆𑀘 𑀅𑀥𑀺𑀫𑁄𑀓𑁆𑀔𑀼𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀲𑀤𑁆𑀥𑀸𑀬 𑀯𑀸 𑀦𑀺𑀦𑁆𑀦𑀧𑁄𑀡𑀢𑀸𑀅𑀥𑀺𑀫𑀼𑀢𑁆𑀢𑀺 𑀅𑀥𑀺𑀫𑁄𑀓𑁆𑀔𑁄.

𑀲𑀫𑀼𑀤𑀬𑀯𑀬𑀸𑀢𑀺 𑀲𑀫𑀼𑀤𑀬𑀯𑀬𑀥𑀫𑁆𑀫𑀸. 𑀲𑀼𑀪𑀦𑀺𑀫𑀺𑀢𑁆𑀢𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀽𑀢𑀺 ‘‘𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀽’’𑀢𑀺 𑀆𑀤𑀺-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀧𑀝𑀺𑀖𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄, 𑀤𑀼𑀢𑀺𑀬𑁂𑀦𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀆𑀤𑀻𑀦𑀁. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁩. 𑀉𑀧𑀸𑀤𑀸𑀦𑁂𑀳𑀺 𑀆𑀭𑀫𑁆𑀫𑀡𑀓𑀭𑀡𑀸𑀤𑀺𑀯𑀲𑁂𑀦 𑀉𑀧𑀸𑀤𑀸𑀢𑀩𑁆𑀩𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸.

𑀇𑀢𑀺 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀇𑀤𑀁-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀇𑀤𑀁 𑀭𑀽𑀧’’𑀦𑁆𑀢𑀺. 𑀢𑀬𑀺𑀤𑀁 𑀲𑀭𑀽𑀧𑀕𑁆𑀕𑀳𑀡𑀪𑀸𑀯𑀢𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀧𑀭𑀁 𑀭𑀽𑀧𑀁 𑀅𑀢𑁆𑀣𑀻’’𑀢𑀺. 𑀇𑀢𑀻𑀢𑀺 𑀯𑀸 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 ‘‘𑀇𑀢𑀺 𑀭𑀽𑀧’’𑀦𑁆𑀢𑀺 𑀇𑀫𑀺𑀦𑀸 𑀪𑀽𑀢𑀼𑀧𑀸𑀤𑀸𑀤𑀺𑀯𑀲𑁂𑀦 𑀬𑀢𑁆𑀢𑀓𑁄 𑀭𑀽𑀧𑀲𑁆𑀲 𑀧𑀪𑁂𑀤𑁄, 𑀢𑁂𑀦 𑀲𑀤𑁆𑀥𑀺𑀁 𑀭𑀽𑀧𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀪𑀸𑀯𑀢𑁄𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀢𑁄, 𑀘𑀓𑁆𑀔𑀸𑀤𑀺𑀯𑀡𑁆𑀡𑀸𑀤𑀺𑀲𑀪𑀸𑀯𑀢𑁄 𑀘. 𑀯𑁂𑀤𑀦𑀸𑀤𑀻𑀲𑀼𑀧𑀻𑀢𑀺 𑀏𑀢𑁆𑀣 ‘‘𑀅𑀬𑀁 𑀯𑁂𑀤𑀦𑀸, 𑀏𑀢𑁆𑀢𑀓𑀸 𑀯𑁂𑀤𑀦𑀸, 𑀦 𑀇𑀢𑁄 𑀧𑀭𑀁 𑀯𑁂𑀤𑀦𑀸 𑀅𑀢𑁆𑀣𑀻𑀢𑀺 𑀲𑀪𑀸𑀯𑀢𑁄 𑀯𑁂𑀤𑀦𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸, 𑀲𑀪𑀸𑀯𑀢𑁄𑀢𑀺 𑀘 ‘‘𑀅𑀦𑀼𑀪𑀯𑀦𑀲𑀪𑀸𑀯𑀢𑁄, 𑀲𑀸𑀢𑀸𑀤𑀺𑀲𑀪𑀸𑀯𑀢𑁄 𑀘𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀔𑀦𑁆𑀥𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁪. 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀽𑀢𑀺 ‘‘𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀙𑀲𑀼 𑀩𑀸𑀳𑀺𑀭𑁂𑀲𑀽’’𑀢𑀺 ‘‘𑀙𑀲𑀽’’𑀢𑀺 𑀧𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀓𑀲𑁆𑀫𑀸 𑀧𑀦𑁂𑀢𑀸𑀦𑀺 𑀉𑀪𑀬𑀸𑀦𑀺 𑀙𑀴𑁂𑀯 𑀯𑀼𑀢𑁆𑀢𑀸𑀦𑀺? 𑀙𑀯𑀺𑀜𑁆𑀜𑀸𑀡𑀓𑀸𑀬𑀼𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀭𑀽𑀧𑀸𑀬𑀢𑀦𑀫𑁂𑀯 𑀘 𑀆𑀭𑀫𑁆𑀫𑀡𑀁, 𑀢𑀣𑀸 𑀇𑀢𑀭𑀸𑀦𑀺 𑀇𑀢𑀭𑁂𑀲𑀁, 𑀙𑀝𑁆𑀞𑀲𑁆𑀲 𑀧𑀦 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄 𑀫𑀦𑀸𑀬𑀢𑀦𑁂𑀓𑀤𑁂𑀲𑁄 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀅𑀲𑀸𑀥𑀸𑀭𑀡𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀆𑀭𑀫𑁆𑀫𑀡𑀁. 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺, 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀢𑀸𑀬 𑀭𑀲𑁄 𑀚𑀻𑀯𑀺𑀢𑀁, 𑀢𑀁 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄 𑀉𑀧𑁆𑀧𑀢𑁆𑀢𑀺𑀤𑁂𑀲𑁄𑀢𑀺 𑀓𑀸𑀬𑁄. 𑀫𑀼𑀦𑀸𑀢𑀺 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀭𑀽𑀧𑀬𑀢𑀺 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀭𑀽𑀧𑀁. 𑀲𑀧𑁆𑀧𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀳𑀭𑀻𑀬𑀢𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀕𑀫𑀻𑀬𑀢𑀻𑀢𑀺 𑀲𑀤𑁆𑀤𑁄. 𑀕𑀦𑁆𑀥𑀬𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑁂𑀢𑀻𑀢𑀺 𑀕𑀦𑁆𑀥𑁄. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀭𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀲𑀩𑁆𑀩𑀸𑀦𑀺 𑀧𑀦 𑀆𑀬𑀸𑀦𑀁 𑀢𑀦𑀦𑀸𑀤𑀺𑀅𑀢𑁆𑀣𑁂𑀦 𑀆𑀬𑀢𑀦𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁫𑁧𑁦, 𑁫𑁧𑁧, 𑁫𑁧𑁨; 𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁫𑁧𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀘𑀓𑁆𑀔𑀼𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 (𑀤𑀻. 𑀦𑀺. 𑁨.𑁩𑁮𑁪; 𑀫. 𑀦𑀺. 𑁧.𑁧𑁧𑁭) 𑀏𑀢𑁆𑀣 𑀘𑀓𑁆𑀔𑀼 𑀦𑀸𑀫 𑀧𑀲𑀸𑀤𑀘𑀓𑁆𑀔𑀼, 𑀦 𑀲𑀲𑀫𑁆𑀪𑀸𑀭𑀘𑀓𑁆𑀔𑀼, 𑀦𑀸𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀺𑀓𑀦𑁆𑀢𑀺 𑀆𑀳 𑀘𑀓𑁆𑀔𑀼𑀧𑀲𑀸𑀤𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄’’𑀢𑀺. (𑀥. 𑀲. 𑁫𑁯𑁬) 𑀘-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀅𑀯𑀺𑀧𑀭𑀻𑀢𑀲𑁆𑀲 𑀅𑀢𑁆𑀢𑀦𑁄 𑀭𑀲𑀲𑁆𑀲 𑀘𑁂𑀯 𑀮𑀓𑁆𑀔𑀡𑀲𑁆𑀲 𑀘 𑀯𑀲𑁂𑀦, 𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀓𑀺𑀘𑁆𑀘𑀲𑁆𑀲 𑀘𑁂𑀯 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀲𑁆𑀲 𑀘 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀲𑁆𑀲 𑀘 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀬𑀸𑀣𑀸𑀯𑀲𑀭𑀲𑀯𑀲𑁂𑀦 𑀘𑁂𑀯 𑀮𑀓𑁆𑀔𑀡𑀯𑀲𑁂𑀦 𑀘, 𑀬𑀸𑀣𑀸𑀯𑀲𑀭𑀲𑁄𑀢𑀺 𑀘 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀭𑀲𑀻𑀬𑀢𑀺 𑀅𑀯𑀺𑀭𑀤𑁆𑀥𑀧𑀝𑀺𑀯𑁂𑀥𑀯𑀲𑁂𑀦 𑀅𑀲𑁆𑀲𑀸𑀤𑀻𑀬𑀢𑀺 𑀭𑀫𑀻𑀬𑀢𑀻𑀢𑀺 ‘‘𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦.

‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑀫. 𑀦𑀺. 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩, 𑁪𑁫; 𑁨.𑁪.𑁬𑁦) 𑀲𑀫𑀼𑀤𑀺𑀢𑀸𑀦𑀺𑀬𑁂𑀯 𑀭𑀽𑀧𑀸𑀬𑀢𑀦𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼, 𑀦 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀚𑁄𑀢𑀦𑀢𑁆𑀣𑀁 ‘‘𑀭𑀽𑀧𑁂 𑀘𑀸’’𑀢𑀺 𑀧𑀼𑀣𑀼𑀯𑀘𑀦𑀕𑁆𑀕𑀳𑀡𑀁, 𑀢𑀸𑀬 𑀏𑀯 𑀘 𑀤𑁂𑀲𑀦𑀸𑀕𑀢𑀺𑀬𑀸 𑀓𑀸𑀫𑀁 𑀇𑀥𑀸𑀧𑀺 ‘‘𑀭𑀽𑀧𑁂 𑀘 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀭𑀽𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀲𑀩𑁆𑀩𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀜𑁆𑀘𑀸𑀢𑀺 𑀏𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑁄. 𑀲𑀭𑀲𑀮𑀓𑁆𑀔𑀡 𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀓𑀺𑀘𑁆𑀘𑀲𑁆𑀲 𑀯𑀲𑁂𑀦 𑀘𑁂𑀯 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀲𑁆𑀲 𑀯𑀲𑁂𑀦 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀉𑀪𑀬𑀁 𑀧𑀝𑀺𑀘𑁆𑀘𑀸𑀢𑀺 𑀘𑀓𑁆𑀔𑀼𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑀁, 𑀭𑀽𑀧𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑁂 𑀘 𑀧𑀝𑀺𑀘𑁆𑀘. 𑀓𑀸𑀫𑀁 𑀅𑀬𑀁 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸, 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸 𑀦𑀸𑀫 𑀅𑀪𑀺𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀸 𑀏𑀯𑀸𑀢𑀺 𑀅𑀪𑀺𑀥𑀫𑁆𑀫𑀦𑀬𑁂𑀦𑁂𑀯 𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀭𑀸𑀕…𑀧𑁂… 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀆𑀳. 𑀢𑀢𑁆𑀣 𑀓𑀸𑀫𑁂𑀲𑀼 𑀭𑀸𑀕𑁄, 𑀓𑀸𑀫𑁄 𑀘 𑀲𑁄 𑀭𑀸𑀕𑁄 𑀘𑀸𑀢𑀺 𑀯𑀸 𑀓𑀸𑀫𑀭𑀸𑀕𑁄. 𑀲𑁄 𑀏𑀯 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀁. 𑀅𑀬𑀜𑁆𑀳𑀺 𑀬𑀲𑁆𑀲 𑀲𑀁𑀯𑀺𑀚𑁆𑀚𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀢𑀺 𑀩𑀦𑁆𑀥𑀢𑀺 𑀇𑀢𑀺 𑀤𑀼𑀓𑁆𑀔𑁂𑀦 𑀲𑀢𑁆𑀢𑀁, 𑀪𑀯𑀸𑀤𑀺𑀓𑁂 𑀯𑀸 𑀪𑀯𑀦𑁆𑀢𑀭𑀸𑀤𑀻𑀳𑀺, 𑀓𑀫𑁆𑀫𑀼𑀦𑀸 𑀯𑀸 𑀯𑀺𑀧𑀸𑀓𑀁 𑀲𑀁𑀬𑁄𑀚𑁂𑀢𑀺 𑀩𑀦𑁆𑀥𑀢𑀻𑀢𑀺 𑀲𑀁𑀬𑁄𑀚𑀦𑀁. 𑀏𑀯𑀁 𑀧𑀝𑀺𑀖𑀲𑀁𑀬𑁄𑀚𑀁𑀆𑀤𑀻𑀦𑀫𑁆𑀧𑀺 𑀬𑀣𑀸𑀭𑀳𑀫𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀲𑀭𑀲𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀲𑀢𑁆𑀢𑀲𑁆𑀲 𑀯𑀝𑁆𑀝𑀢𑁄 𑀅𑀦𑀺𑀲𑁆𑀲𑀚𑁆𑀚𑀦𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑁆𑀲 𑀘𑁂𑀯 𑀬𑀣𑀸𑀯𑀼𑀢𑁆𑀢𑀩𑀦𑁆𑀥𑀦𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀘 𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀪𑀯𑀲𑁆𑀲𑀸𑀤𑀤𑀺𑀝𑁆𑀞𑀺𑀲𑁆𑀲𑀸𑀤𑀦𑀺𑀯𑀢𑁆𑀢𑀦𑀢𑁆𑀣𑀁 𑀓𑀸𑀫𑀲𑁆𑀲𑀸𑀤𑀕𑁆𑀕𑀳𑀡𑀁. 𑀅𑀲𑁆𑀲𑀸𑀤𑀬𑀢𑁄𑀢𑀺 𑀅𑀪𑀺𑀭𑀫𑀦𑁆𑀢𑀲𑁆𑀲. 𑀅𑀪𑀺𑀦𑀦𑁆𑀤𑀢𑁄𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦 𑀦𑀦𑁆𑀤𑀦𑁆𑀢𑀲𑁆𑀲. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀩𑀮𑀯𑀢𑁄 𑀓𑀸𑀫𑀭𑀸𑀕𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀓𑀸𑀫𑀭𑀸𑀕𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀢𑀺 𑀏𑀢𑁆𑀣 ‘‘𑀆𑀧𑀸𑀣𑀕𑀢𑁂’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀦𑀯𑀲𑁂𑀦 ‘‘𑀆𑀧𑀸𑀣𑀕𑀢’’𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀏𑀢𑀁 𑀏𑀯𑀁𑀲𑀼𑀔𑀼𑀫𑀁 𑀏𑀯𑀁𑀤𑀼𑀩𑁆𑀩𑀺𑀪𑀸𑀕𑀁 𑀆𑀭𑀫𑁆𑀫𑀡𑀁. ‘‘𑀦𑀺𑀘𑁆𑀘𑀁 𑀥𑀼𑀯’’𑀦𑁆𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. ‘‘𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀕𑀡𑁆𑀳𑀢𑁄’’𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀧𑀞𑀫𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀦𑀼𑀭𑁄𑀥𑀯𑀲𑁂𑀦 ‘‘𑀲𑀢𑁆𑀢𑁄 𑀦𑀼 𑀔𑁄’’𑀢𑀺, 𑀇𑀢𑀭𑀸𑀬 𑀅𑀦𑀼𑀭𑁄𑀥𑀯𑀲𑁂𑀦 ‘‘𑀲𑀢𑁆𑀢𑀲𑁆𑀲 𑀦𑀼 𑀔𑁄’’𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑁄. 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑀸𑀳𑀸𑀦𑀼𑀕𑀢𑀸 𑀳𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑀺𑀝𑁆𑀞𑀺𑀬𑀸 𑀅𑀲𑀢𑀺 𑀅𑀪𑀸𑀯𑀢𑁄. 𑀪𑀯𑀁 𑀧𑀢𑁆𑀣𑁂𑀦𑁆𑀢𑀲𑁆𑀲𑀸𑀢𑀺 ‘‘𑀈𑀤𑀺𑀲𑁂 𑀲𑀫𑁆𑀧𑀢𑁆𑀢𑀺𑀪𑀯𑁂 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀇𑀤𑀁 𑀇𑀝𑁆𑀞𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀼𑀮𑀪𑀁 𑀚𑀸𑀢𑀁, 𑀢𑀲𑁆𑀫𑀸 𑀆𑀬𑀢𑀺𑀫𑁆𑀧𑀺 𑀏𑀤𑀺𑀲𑁄, 𑀇𑀢𑁄 𑀯𑀸 𑀉𑀢𑁆𑀢𑀭𑀺𑀢𑀭𑁄 𑀲𑀫𑁆𑀧𑀢𑁆𑀢𑀺𑀪𑀯𑁄 𑀪𑀯𑁂𑀬𑁆𑀬𑀸’’𑀢𑀺 𑀪𑀯𑀁 𑀦𑀺𑀓𑀸𑀫𑁂𑀦𑁆𑀢𑀲𑁆𑀲. 𑀏𑀯𑀭𑀽𑀧𑀦𑁆𑀢𑀺 𑀏𑀯𑀭𑀽𑀧𑀁 𑀭𑀽𑀧𑀁. 𑀢𑀁𑀲𑀤𑀺𑀲𑁂 𑀳𑀺 𑀢𑀩𑁆𑀩𑁄𑀳𑀸𑀭𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺. 𑀉𑀲𑀽𑀬𑀢𑁄𑀢𑀺 𑀉𑀲𑀽𑀬𑀁 𑀇𑀲𑁆𑀲𑀁 𑀉𑀧𑁆𑀧𑀸𑀤𑀬𑀢𑁄. 𑀅𑀜𑁆𑀜𑀲𑁆𑀲 𑀫𑀘𑁆𑀙𑀭𑀸𑀬𑀢𑁄𑀢𑀺 𑀅𑀜𑁆𑀜𑁂𑀦 𑀅𑀲𑀸𑀥𑀸𑀭𑀡𑀪𑀸𑀯𑀓𑀭𑀡𑁂𑀦 𑀫𑀘𑁆𑀙𑀭𑀺𑀬𑀁 𑀓𑀭𑁄𑀢𑁄. 𑀲𑀩𑁆𑀩𑁂𑀳𑁂𑀯 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀲𑀁𑀬𑁄𑀚𑀦𑁂𑀳𑀺.

𑀢𑀜𑁆𑀘 𑀓𑀸𑀭𑀡𑀦𑁆𑀢𑀺 𑀲𑀼𑀪𑀦𑀺𑀫𑀺𑀢𑁆𑀢𑀧𑀝𑀺𑀖𑀦𑀺𑀫𑀺𑀢𑁆𑀢𑀸𑀤𑀺𑀯𑀺𑀪𑀸𑀕𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀭𑀽𑀧𑀸𑀭𑀫𑁆𑀫𑀡𑀜𑁆𑀘𑁂𑀯 𑀢𑀚𑁆𑀚𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀜𑁆𑀘𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀓𑀸𑀭𑀡𑀁. 𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀽𑀳𑀢𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀢𑀁 𑀲𑀦𑁆𑀥𑀸𑀬 ‘‘𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀉𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀢𑀸 𑀲𑀫𑀼𑀤𑀸𑀘𑀸𑀭𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑁂𑀦 𑀯𑀺𑀧𑀲𑁆𑀲𑀦𑀸𑀲𑀫𑀣𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀢𑀜𑁆𑀳𑀺 𑀢𑀲𑁆𑀲 𑀢𑀤𑀗𑁆𑀕𑀯𑀲𑁂𑀦 𑀘𑁂𑀯 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀧𑀳𑀸𑀦𑀓𑀸𑀭𑀡𑀁. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀁 𑀅𑀧𑀸𑀬𑀕𑀫𑀦𑀻𑀬𑀢𑀸𑀬 𑀧𑀞𑀫𑀫𑀕𑁆𑀕𑀯𑀚𑁆𑀛𑀢𑀸 𑀯𑀼𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁧) 𑀲𑀼𑀢𑁆𑀢𑀧𑀤𑀁 𑀓𑀣𑀦𑁆𑀢𑀺? 𑀢𑀁 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸, 𑀅𑀬𑀁 𑀧𑀦 𑀅𑀪𑀺𑀥𑀫𑁆𑀫𑀦𑀬𑁂𑀦 𑀲𑀁𑀯𑀡𑁆𑀡𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄𑀢𑀺. 𑀑𑀴𑀸𑀭𑀺𑀓𑀲𑁆𑀲𑀸𑀢𑀺 𑀣𑀽𑀮𑀲𑁆𑀲, 𑀬𑀢𑁄 𑀅𑀪𑀺𑀡𑁆𑀳𑀲𑀫𑀼𑀧𑁆𑀧𑀢𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑀢𑀺𑀩𑁆𑀩𑀢𑀸𑀯 𑀳𑁄𑀢𑀺. 𑀅𑀡𑀼𑀲𑀳𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀪𑀸𑀯𑁂𑀦 𑀅𑀡𑀼𑀪𑀸𑀯𑀁 𑀲𑀼𑀔𑀼𑀫𑀪𑀸𑀯𑀁 𑀕𑀢𑀲𑁆𑀲. 𑀉𑀤𑁆𑀥𑀘𑁆𑀘𑀲𑀁𑀬𑁄𑀚𑀦𑀲𑁆𑀲𑀧𑁂𑀢𑁆𑀣 𑀅𑀦𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄 𑀬𑀣𑀸𑀯𑀼𑀢𑁆𑀢𑀲𑀁𑀬𑁄𑀚𑀦𑁂𑀳𑀺 𑀅𑀯𑀺𑀦𑀸𑀪𑀸𑀯𑀢𑁄. 𑀏𑀓𑀢𑁆𑀣𑀢𑀸𑀬 𑀲𑁄𑀢𑀸𑀤𑀻𑀦𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦 𑀧𑀚𑀸𑀦𑀦𑀸, 𑀢𑀧𑁆𑀧𑀘𑁆𑀘𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀉𑀧𑁆𑀧𑀸𑀤𑀸𑀤𑀺𑀧𑀚𑀸𑀦𑀦𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑀺𑀲𑀢𑀺.

𑀅𑀢𑁆𑀢𑀦𑁄 𑀯𑀸 𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀥𑀫𑁆𑀫𑁂𑀲𑀼, 𑀅𑀢𑁆𑀢𑀦𑁄 𑀉𑀪𑀬𑀥𑀫𑁆𑀫𑁂𑀲𑀼 𑀯𑀸. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀧𑀭𑀺𑀕𑁆𑀕𑀡𑁆𑀳𑀦𑁂𑀦𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀧𑀭𑀺𑀕𑁆𑀕𑀡𑁆𑀳𑀦𑀫𑀼𑀔𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀅𑀦𑀯𑀲𑁂𑀲𑀢𑁄 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀆𑀬𑀢𑀦𑀸𑀦𑀁 𑀧𑀭𑀺𑀕𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀭𑀲𑁆𑀲 𑀯𑀸 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀽𑀧𑀸𑀬𑀢𑀦𑀲𑁆𑀲𑀸𑀢𑀺 𑀅𑀟𑁆𑀠𑁂𑀓𑀸𑀤𑀲𑀧𑁆𑀧𑀪𑁂𑀤𑀲𑁆𑀲 𑀭𑀽𑀧𑀲𑀪𑀸𑀯𑀲𑁆𑀲 𑀆𑀬𑀢𑀦𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁂 ‘‘𑀯𑀼𑀢𑁆𑀢𑀦𑀬𑁂𑀦 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑁂𑀲𑀓𑁆𑀔𑀦𑁆𑀥𑁂𑀲𑀽𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀲𑀼. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀅𑀢𑀺𑀤𑁂𑀲𑁂𑀦 𑀭𑀽𑀧𑀓𑁆𑀔𑀦𑁆𑀥𑁂 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸’’𑀢𑀺 𑀲𑁂𑀲𑀔𑀦𑁆𑀥𑁂𑀲𑀼 ‘‘𑀨𑀲𑁆𑀲𑀲𑀫𑀼𑀤𑀬𑀸’’𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀯𑀺𑀪𑀸𑀯𑁂𑀢𑀺, 𑀇𑀢𑀭𑀁 𑀧𑀦 𑀲𑀩𑁆𑀩𑀢𑁆𑀣 𑀲𑀫𑀸𑀦𑀦𑁆𑀢𑀺 𑀔𑀦𑁆𑀥𑀧𑀩𑁆𑀩𑁂 𑀯𑀺𑀬 𑀆𑀬𑀢𑀦𑀧𑀩𑁆𑀩𑁂𑀧𑀺 𑀮𑁄𑀓𑀼𑀢𑁆𑀢𑀭𑀦𑀺𑀯𑀢𑁆𑀢𑀦𑀁 𑀧𑀸𑀴𑀺𑀬𑀁 𑀕𑀳𑀺𑀢𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦 𑀕𑀳𑁂𑀢𑀩𑁆𑀩𑀸’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀆𑀬𑀢𑀦𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁫. 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀢𑀺 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀧𑀝𑀺𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀯𑀸 𑀧𑀝𑀺𑀯𑀺𑀚𑁆𑀛𑀦𑀓𑀲𑀢𑁆𑀢𑀲𑁆𑀲. 𑀅𑀗𑁆𑀕𑁂𑀲𑀽𑀢𑀺 𑀓𑀸𑀭𑀡𑁂𑀲𑀼, 𑀅𑀯𑀬𑀯𑁂𑀲𑀼 𑀯𑀸. 𑀉𑀤𑀬𑀯𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀲𑀫𑁆𑀩𑁄𑀥𑀺𑀧𑀝𑀺𑀧𑀤𑀸𑀬𑀁 𑀞𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀢𑁄 𑀧𑀝𑁆𑀞𑀸𑀬 𑀬𑁄𑀕𑀸𑀯𑀘𑀭𑁄𑀢𑀺 𑀲𑀫𑁆𑀩𑁄𑀥𑀻’’𑀢𑀺. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀦𑀸𑀫 𑀧𑀭𑀺𑀬𑀸𑀬𑀓𑀣𑀸, 𑀅𑀬𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸 𑀮𑁄𑀓𑀺𑀬𑀫𑀕𑁆𑀕𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁄𑀕𑀸𑀯𑀘𑀭𑁄𑀢𑀺 𑀲𑀫𑁆𑀩𑁄𑀥𑀻’’𑀢𑀺, 𑀅𑀜𑁆𑀜𑀣𑀸 ‘‘𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀯𑀤𑁂𑀬𑁆𑀬.

‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 ‘‘𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀻𑀬𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀦𑁆𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁. 𑀢𑀢𑁆𑀣𑀸𑀢𑀺 𑀲𑀢𑀺𑀬𑀁, 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀘𑁂𑀢𑀁 𑀪𑀼𑀫𑁆𑀫𑀁.

𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀅𑀣 𑀯𑀸 𑀲𑀢𑀺𑀧𑁆𑀧𑀥𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀸𑀤𑀺𑀲𑀸𑀢𑁆𑀣𑀓𑀪𑀸𑀯𑀧𑀭𑀺𑀕𑁆𑀕𑀡𑁆𑀳𑀦𑀜𑀸𑀡𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀲𑀩𑁆𑀩𑀢𑁆𑀣 𑀲𑀢𑁄𑀓𑀸𑀭𑀻𑀪𑀸𑀯𑀸𑀯𑀳𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀺. 𑀬𑀣𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑁆𑀧𑀳𑀸𑀦𑀁, 𑀅𑀦𑀼𑀭𑀽𑀧𑀥𑀫𑁆𑀫𑀲𑁂𑀯𑀦𑀸 𑀘 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀳𑁄𑀢𑀺, 𑀏𑀯𑀁 𑀲𑀢𑀺𑀭𑀳𑀺𑀢𑀧𑀼𑀕𑁆𑀕𑀮𑀯𑀺𑀯𑀚𑁆𑀚𑀦𑀸, 𑀲𑀢𑁄𑀓𑀸𑀭𑀻𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀢𑁆𑀣 𑀘 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸. 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫, 𑀬𑁄 𑀩𑁄𑀥𑀺𑀫𑀡𑁆𑀟𑁂 𑀲𑀼𑀯𑀡𑁆𑀡𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲𑀲𑀼 𑀪𑀸𑀲𑀸𑀲𑀼 𑀓𑀢𑀭𑀪𑀸𑀲𑀸𑀬 𑀥𑀫𑁆𑀫𑀁 𑀓𑀣𑁂𑀫𑀻’’𑀢𑀺 𑀧𑀭𑀺𑀲𑀁 𑀧𑀯𑀸𑀭𑁂𑀲𑀺. 𑀅𑀪𑀬𑀢𑁆𑀣𑁂𑀭𑁄𑀢𑀺 𑀤𑀢𑁆𑀢𑀸𑀪𑀬𑀢𑁆𑀣𑁂𑀭𑀫𑀸𑀳.

𑀥𑀫𑁆𑀫𑀸𑀦𑀁, 𑀥𑀫𑁆𑀫𑁂𑀲𑀼 𑀯𑀸 𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄, 𑀲𑁄 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲. ‘‘𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄𑀢𑀺 𑀓𑀼𑀲𑀮𑀸𑀤𑀻𑀦𑀁 𑀢𑀁𑀢𑀁𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀆𑀤𑀺𑀓𑀲𑁆𑀲 𑀬𑀸𑀣𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑁄 𑀳𑀺 𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀢𑀸𑀬 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄, 𑀢𑀤𑀸𑀪𑁄𑀕𑀢𑀸𑀬 𑀆𑀯𑀚𑁆𑀚𑀦𑀸𑀧𑀺 𑀢𑀕𑁆𑀕𑀢𑀺𑀓𑀸 𑀏𑀯, 𑀢𑀲𑁆𑀲 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀦𑀁 𑀩𑀳𑀼𑀮𑀻𑀓𑀸𑀭𑁄. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀩𑁆𑀭𑀽𑀳𑀦𑀸𑀬.

𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀼𑀘𑁆𑀙𑀓𑀪𑀸𑀯𑁄. 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀲𑀳 𑀅𑀝𑁆𑀞𑀓𑀣𑀸𑀬 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀬𑀁 𑀬𑀁 𑀢𑀢𑁆𑀣 𑀕𑀡𑁆𑀞𑀺𑀝𑁆𑀞𑀸𑀦𑀪𑀽𑀢𑀁, 𑀢𑀁 𑀢𑀁 ‘‘𑀇𑀤𑀁 𑀪𑀦𑁆𑀢𑁂 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀅𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀔𑀦𑁆𑀥𑀥𑀸𑀢𑀼…𑀧𑁂… 𑀩𑀳𑀼𑀮𑀢𑀸’’𑀢𑀺. 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀭𑀻𑀭𑀁, 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀘𑀻𑀯𑀭𑀸𑀦𑀺 𑀘 ‘‘𑀯𑀢𑁆𑀣𑀽𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀢𑀸𑀦𑀺 𑀬𑀣𑀸 𑀘𑀺𑀢𑁆𑀢𑀲𑁆𑀲 𑀲𑀼𑀔𑀸𑀯𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀡𑀁 𑀢𑁂𑀲𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦’’𑀦𑁆𑀢𑀺𑀆𑀤𑀺. 𑀉𑀲𑁆𑀲𑀦𑁆𑀦𑀤𑁄𑀲𑀦𑁆𑀢𑀺 𑀯𑀸𑀢𑀸𑀤𑀺𑀉𑀲𑁆𑀲𑀦𑁆𑀦𑀤𑁄𑀲𑀁. 𑀲𑁂𑀤𑀫𑀮𑀫𑀓𑁆𑀔𑀺𑀢𑀦𑁆𑀢𑀺 𑀲𑁂𑀤𑁂𑀦 𑀘𑁂𑀯 𑀚𑀮𑁆𑀮𑀺𑀓𑀸𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑀫𑀮𑁂𑀦 𑀘 𑀫𑀓𑁆𑀔𑀺𑀢𑀁. 𑀘-𑀲𑀤𑁆𑀤𑁂𑀦 𑀅𑀜𑁆𑀜𑀫𑁆𑀧𑀺 𑀲𑀭𑀻𑀭𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀘 𑀧𑀻𑀴𑀸𑀯𑀳𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀦𑀸𑀲𑀦𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀧𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀲𑀤𑁂 𑀲𑀢𑀺, 𑀯𑀺𑀲𑀬𑀪𑀽𑀢𑁂 𑀯𑀸. 𑀓𑀣𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀢𑀸𑀦𑀺 𑀯𑀺𑀲𑀬𑁄? 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀦𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀢𑁂 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀲𑀼. 𑀜𑀸𑀡𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀢𑀁 𑀯𑀢𑁆𑀣𑀼𑀬𑁂𑀯, 𑀅𑀣 𑀔𑁄 𑀢𑀲𑁆𑀫𑀺𑀁 𑀅𑀧𑀭𑀺𑀲𑀼𑀤𑁆𑀥𑁂 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀻𑀢𑀺 𑀦𑀺𑀲𑁆𑀲𑀬𑀸𑀧𑀭𑀺𑀲𑀼𑀤𑁆𑀥𑀺𑀬𑀸 𑀢𑀁𑀦𑀺𑀲𑁆𑀲𑀺𑀢𑀸𑀧𑀭𑀺𑀲𑀼𑀤𑁆𑀥𑀺 𑀯𑀺𑀬 𑀯𑀺𑀲𑀬𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀯𑀺𑀲𑀬𑀺𑀦𑁄 𑀅𑀧𑀭𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀲𑀫𑀪𑀸𑀯𑀓𑀭𑀡𑀦𑁆𑀢𑀺 𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀪𑀸𑀯𑀓𑀭𑀡𑀁. 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀘𑁆𑀘𑀬𑀯𑀲𑁂𑀦 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑁆𑀲 𑀧𑀝𑀼𑀢𑀭𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀅𑀯𑀺𑀲𑀤𑀢𑀸𑀬, 𑀯𑀻𑀭𑀺𑀬𑀸𑀤𑀻𑀦𑀜𑁆𑀘 𑀲𑀺𑀣𑀺𑀮𑀢𑀸𑀤𑀺𑀦𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀻’’𑀢𑀺. 𑀢𑀢𑁄𑀢𑀺 𑀢𑀲𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀇𑀢𑀭𑁂𑀲𑀜𑁆𑀘 𑀫𑀦𑁆𑀤𑀢𑁆𑀢𑀸. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄, 𑀧𑀕𑁆𑀕𑀳𑁄𑀯 𑀓𑀺𑀘𑁆𑀘𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, ‘‘𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁. 𑀯𑀺𑀓𑁆𑀔𑁂𑀧𑀧𑀝𑀺𑀓𑁆𑀔𑁂𑀧𑁄, 𑀬𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀅𑀯𑀺𑀓𑁆𑀔𑁂𑀧𑁄. 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀬𑁂𑀦 𑀬𑀸𑀣𑀸𑀯𑀢𑁄 𑀯𑀺𑀲𑀬𑀲𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁. 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀮𑀯𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀅𑀪𑀺𑀪𑀽𑀢𑀢𑁆𑀢𑀸. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀳𑀺 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀦𑁆𑀢𑀸𑀦𑀁 𑀲𑀳𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀭𑀲𑀢𑀸𑀯𑀲𑁂𑀦𑁂𑀯 𑀅𑀢𑁆𑀣𑀲𑀺𑀤𑁆𑀥𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀢𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸𑀢𑀺 𑀬𑀲𑁆𑀲 𑀲𑀤𑁆𑀥𑁂𑀬𑁆𑀬𑀲𑁆𑀲 𑀯𑀢𑁆𑀣𑀼𑀦𑁄 𑀉𑀴𑀸𑀭𑀢𑀸𑀤𑀺𑀕𑀼𑀡𑁂 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀲𑁆𑀲 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀺𑀯𑀺𑀪𑀸𑀕𑀢𑁄 𑀬𑀸𑀣𑀸𑀯𑀢𑁄 𑀯𑀻𑀫𑀁𑀲𑀦𑁂𑀦. 𑀏𑀯𑀜𑁆𑀳𑀺 𑀏𑀯𑀁𑀥𑀫𑁆𑀫𑀢𑀸𑀦𑀬𑁂𑀦 𑀲𑀪𑀸𑀯𑀲𑀭𑀲𑀢𑁄 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀲𑀯𑀺𑀧𑁆𑀨𑀸𑀭𑁄 𑀅𑀥𑀺𑀫𑁄𑀓𑁆𑀔𑁄 𑀦 𑀳𑁄𑀢𑀺 ‘‘𑀅𑀬𑀁 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄’’𑀢𑀺 𑀧𑀭𑀺𑀚𑀸𑀦𑀦𑀯𑀲𑁂𑀦 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸. 𑀥𑀼𑀭𑀺𑀬𑀥𑀫𑁆𑀫𑁂𑀲𑀼 𑀳𑀺 𑀬𑀣𑀸 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑁂 𑀧𑀜𑁆𑀜𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀜𑀸𑀬 𑀩𑀮𑀯𑀪𑀸𑀯𑁂 𑀲𑀤𑁆𑀥𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸, 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀸𑀬 𑀅𑀦𑀦𑀼𑀬𑀼𑀜𑁆𑀚𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀤𑀼𑀯𑀺𑀥𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀅𑀢𑁆𑀢𑀦𑁄 𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀓𑀺𑀘𑁆𑀘𑀼𑀢𑁆𑀢𑀭𑀺𑀬𑀢𑁄, 𑀯𑀻𑀭𑀺𑀬𑀸𑀤𑀻𑀦𑀁 𑀯𑀸 𑀫𑀦𑁆𑀤𑀓𑀺𑀘𑁆𑀘𑀢𑀸𑀬. 𑀢𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑁂 𑀳𑀸𑀧𑀦𑀯𑀺𑀥𑀺 𑀤𑀲𑁆𑀲𑀺𑀢𑁄. 𑀤𑀼𑀢𑀺𑀬𑀓𑀧𑁆𑀧𑁂 𑀧𑀦 𑀬𑀣𑀸 𑀫𑀦𑀲𑀺 𑀓𑀭𑁄𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀓𑀺𑀘𑁆𑀘𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦, 𑀯𑀻𑀭𑀺𑀬𑀸𑀤𑀻𑀦𑀁 𑀧𑀝𑀼𑀓𑀺𑀘𑁆𑀘𑀪𑀸𑀯𑀸𑀯𑀳𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀢𑁂𑀳𑀺 𑀲𑀫𑀭𑀲𑀁 𑀓𑀭𑁄𑀦𑁆𑀢𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀳𑀸𑀧𑀦𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀽𑀢𑀺. 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀢𑀸𑀬 𑀓𑀢𑀸𑀥𑀺𑀓𑀸𑀭𑁄 𑀲𑀢𑁆𑀣𑀼 𑀭𑀽𑀧𑀓𑀸𑀬𑀤𑀲𑁆𑀲𑀦𑀧𑁆𑀧𑀲𑀼𑀢𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀢𑁂 𑀯𑀓𑁆𑀓𑀮𑀺 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄 𑀯𑀓𑁆𑀓𑀮𑀺 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁭; 𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁮; 𑀥. 𑀧. 𑀅𑀝𑁆𑀞. 𑁨.𑁩𑁮𑁦; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁧𑁩𑁦; 𑀥. 𑀲. 𑀅𑀝𑁆𑀞. 𑁧𑁦𑁦𑁭; 𑀣𑁂𑀭𑀕𑀸. 𑀅𑀝𑁆𑀞. 𑁨.𑀯𑀓𑁆𑀓𑀮𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀑𑀯𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑀺𑀢𑁄𑀧𑀺 𑀢𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀡𑀸𑀫𑀺𑀢𑁄 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑀼𑀁 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺, 𑀅𑀣 𑀦𑀁 𑀲𑀢𑁆𑀣𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺 𑀯𑀓𑁆𑀓𑀮𑀻’’𑀢𑀺 𑀆𑀳. 𑀲𑁄 𑀢𑁂𑀦 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀦 𑀑𑀢𑀭𑀢𑀺, 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀪𑀸𑀯𑁂 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀓𑀺𑀘𑁆𑀘𑀸𑀓𑀭𑀡𑁂.

𑀇𑀢𑀭𑀓𑀺𑀘𑁆𑀘𑀪𑁂𑀤𑀦𑁆𑀢𑀺 𑀉𑀧𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀁. 𑀧𑀲𑁆𑀲𑀤𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀬𑀢𑀺, 𑀏𑀯𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀸 𑀧𑀲𑁆𑀲𑀤𑁆𑀥𑀺𑀆𑀤𑀺𑀪𑀸𑀯𑀦𑀸𑀬 𑀳𑀸𑀬𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀬𑀢𑁆𑀢𑀸 𑀢𑀲𑁆𑀲𑀸. 𑀢𑀣𑀸 𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀯𑀻𑀭𑀺𑀬𑀸𑀤𑀺𑀪𑀸𑀯𑀦𑀸 𑀯𑀺𑀬 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀏𑀓𑀁𑀲𑀢𑁄 𑀳𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀲𑁆𑀲𑀤𑁆𑀥𑀆𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀽𑀢𑀺 𑀲𑀼𑀓𑀼𑀫𑀸𑀭𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼. (𑀫𑀳𑀸𑀯. 𑁨𑁪𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁫) 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀻𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀺𑀮𑀫𑁂𑀢𑁆𑀯𑀸𑀧𑀺 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄’’𑀢𑀺 𑀢𑀁 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀬 𑀧𑀥𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑀽𑀧𑀫𑁄𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀻𑀣𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺.

𑀲𑀫𑀢𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀽𑀦𑀸𑀦𑀥𑀺𑀓𑀪𑀸𑀯𑀁, 𑀢𑀣𑀸 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁. 𑀬𑀣𑀸 𑀳𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀥𑀼𑀭𑀺𑀬𑀥𑀫𑁆𑀫𑀪𑀽𑀢𑀸𑀦𑀁 𑀓𑀺𑀘𑁆𑀘𑀢𑁄 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑀁 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀁, 𑀬𑀢𑁄 𑀦𑁂𑀲𑀁 𑀲𑀫𑀥𑀼𑀭𑀢𑀸𑀬 𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀓𑁄𑀲𑀚𑁆𑀚𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀫𑀭𑀲𑀢𑀸𑀬 𑀲𑀢𑀺 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑀦𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑁆𑀢𑀤𑁆𑀯𑀬𑀧𑀸𑀢𑀸𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀅𑀧𑁆𑀧𑀦𑀸 𑀇𑀚𑁆𑀛𑀢𑀺. ‘‘𑀩𑀮𑀯𑀲𑀤𑁆𑀥𑁄’’𑀢𑀺𑀆𑀤𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀁. 𑀢𑀲𑁆𑀲𑀢𑁆𑀣𑁄 𑀬𑁄 𑀩𑀮𑀯𑀢𑀺𑀬𑀸 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀯𑀺𑀲𑀤𑀜𑀸𑀡𑁄, 𑀲𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀦 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑁄. 𑀢𑀣𑀸 𑀳𑀺 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀓𑁂𑀭𑀸𑀝𑀺𑀓𑀧𑀓𑁆𑀔𑀦𑁆𑀢𑀺 𑀲𑀸𑀞𑁂𑀬𑁆𑀬𑀧𑀓𑁆𑀔𑀁 𑀪𑀚𑀢𑀺. 𑀲𑀤𑁆𑀥𑀸𑀳𑀻𑀦𑀸𑀬 𑀧𑀜𑁆𑀜𑀸𑀬 𑀅𑀢𑀺𑀥𑀸𑀯𑀦𑁆𑀢𑁄 ‘‘𑀤𑁂𑀬𑁆𑀬𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀧𑁆𑀧𑁂𑀢𑀺 𑀳𑁂𑀢𑀼𑀧𑀢𑀺𑀭𑀽𑀧𑀓𑁂𑀳𑀺 𑀯𑀜𑁆𑀘𑀺𑀢𑁄, 𑀏𑀯𑀁𑀪𑀽𑀢𑁄 𑀘 𑀲𑀼𑀓𑁆𑀔𑀢𑀓𑁆𑀓𑀯𑀺𑀮𑀼𑀢𑁆𑀢𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀦𑀸𑀤𑀺𑀬𑀢𑀺 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀻’’𑀢𑀺. 𑀬𑀣𑀸 𑀘𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀫𑀪𑀸𑀯𑁄 𑀦 𑀅𑀢𑁆𑀣𑀸𑀯𑀳𑁄, 𑀅𑀦𑀢𑁆𑀣𑀸𑀯𑀳𑁄𑀯, 𑀏𑀯𑀁, 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀫𑀪𑀸𑀯𑁄 𑀦 𑀅𑀢𑁆𑀣𑀸𑀯𑀳𑁄, 𑀅𑀦𑀢𑁆𑀣𑀸𑀯𑀳𑁄𑀯, 𑀢𑀣𑀸 𑀦 𑀅𑀯𑀺𑀓𑁆𑀔𑁂𑀧𑀸𑀯𑀳𑁄, 𑀯𑀺𑀓𑁆𑀔𑁂𑀧𑀸𑀯𑀳𑁄𑀯𑀸𑀢𑀺. 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺, 𑀢𑁂𑀦 𑀅𑀧𑁆𑀧𑀦𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀤𑀼𑀪𑀬𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀤𑁆𑀯𑀬𑀁, 𑀲𑀫𑀸𑀥𑀺𑀯𑀻𑀭𑀺𑀬𑀤𑁆𑀯𑀬𑀜𑁆𑀘. 𑀲𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑀭𑀲𑀁 𑀓𑀸𑀢𑀩𑁆𑀩𑀁.

𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲. 𑀏𑀯𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂, 𑀲𑀤𑁆𑀥𑀸𑀬 𑀣𑁄𑀓𑀁 𑀩𑀮𑀯𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀦𑁆𑀢𑁄𑀢𑀺 ‘‘𑀧𑀣𑀯𑀻 𑀧𑀣𑀯𑀻𑀢𑀺 𑀫𑀦𑀲𑀺𑀓𑀭𑀡𑀫𑀢𑁆𑀢𑁂𑀦 𑀓𑀣𑀁 𑀛𑀸𑀦𑀼𑀧𑁆𑀧𑀢𑁆𑀢𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀯𑀺𑀥𑀺 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀳𑀦𑁆𑀢𑁄 𑀲𑀤𑁆𑀥𑀁 𑀚𑀦𑁂𑀦𑁆𑀢𑁄. 𑀑𑀓𑀧𑁆𑀧𑁂𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀅𑀯𑀓𑀧𑁆𑀧𑁂𑀦𑁆𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑁄. 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺 𑀲𑀫𑀸𑀥𑀺𑀧𑁆𑀧𑀥𑀸𑀦𑀢𑁆𑀢𑀸 𑀛𑀸𑀦𑀲𑁆𑀲. 𑀉𑀪𑀺𑀦𑁆𑀦𑀦𑁆𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀦𑀁. 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺𑀦𑁄 𑀅𑀥𑀺𑀫𑀢𑁆𑀢𑀢𑀸𑀬 𑀧𑀜𑁆𑀜𑀸𑀬 𑀅𑀥𑀺𑀫𑀢𑁆𑀢𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀫𑀢𑀸𑀬𑀧𑀻’’𑀢𑀺, 𑀲𑀫𑀪𑀸𑀯𑁂𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀢𑀺 𑀮𑁄𑀓𑀺𑀬𑀧𑁆𑀧𑀦𑀸. 𑀢𑀣𑀸 𑀳𑀺 ‘‘𑀳𑁄𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀮𑁄𑀓𑀼𑀢𑁆𑀢𑀭𑀧𑁆𑀧𑀦𑀸 𑀧𑀦 𑀢𑁂𑀲𑀁 𑀲𑀫𑀪𑀸𑀯𑁂𑀦𑁂𑀯 𑀇𑀘𑁆𑀙𑀺𑀢𑀸. 𑀬𑀣𑀸𑀳 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀦𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦; 𑀧𑀝𑀺. 𑀫. 𑁨.𑁫).

𑀬𑀤𑀺 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀦𑀁, 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀸𑀯 𑀇𑀘𑁆𑀙𑀺𑀢𑀸, 𑀓𑀣𑀁 𑀲𑀢𑀻𑀢𑀺 𑀆𑀳 ‘‘𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀻’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀓𑀤𑁂𑀲𑁂 𑀕𑀡𑁆𑀳𑀦𑁆𑀢𑁄 ‘‘𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦’’𑀦𑁆𑀢𑀺 𑀆𑀳. 𑀅𑀜𑁆𑀜𑀣𑀸 𑀧𑀻𑀢𑀺 𑀘 𑀕𑀳𑁂𑀢𑀩𑁆𑀩𑀸 𑀲𑀺𑀬𑀸. 𑀢𑀣𑀸 𑀳𑀺 ‘‘𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀲𑀫𑀸𑀥𑀺𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀳𑀻’’𑀢𑀺. 𑀲𑀸𑀢𑀺 𑀲𑀢𑀺. 𑀲𑀩𑁆𑀩𑁂𑀲𑀼 𑀭𑀸𑀚𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄 𑀲𑀩𑁆𑀩𑀓𑀫𑁆𑀫𑀺𑀓𑁄. 𑀢𑁂𑀦𑀸𑀢𑀺 𑀢𑁂𑀦 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀭𑀡𑁂𑀦. 𑀆𑀳 𑀅𑀝𑁆𑀞𑀓𑀣𑀸𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀬𑀼𑀢𑁆𑀢𑀸 𑀲𑀩𑁆𑀩𑀢𑁆𑀣𑀺𑀓𑀸 𑀲𑀩𑁆𑀩𑀢𑁆𑀣 𑀮𑀻𑀦𑁂, 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑁂 𑀯𑀸 𑀮𑀻𑀦𑁂, 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀪𑀸𑀯𑁂𑀢𑀩𑁆𑀩𑀸 𑀩𑁄𑀚𑁆𑀛𑀗𑁆𑀕𑀸 𑀅𑀢𑁆𑀣𑀺𑀓𑀸 𑀏𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀁 𑀘𑀺𑀢𑁆𑀢𑀁. 𑀢𑀲𑁆𑀲 𑀳𑀺 𑀲𑀢𑀺 𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑁂𑀦𑀸𑀳 ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀔𑀦𑁆𑀥𑀸𑀤𑀺𑀪𑁂𑀤𑁂 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀯𑀲𑁂𑀦𑀧𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁. 𑀩𑀳𑀼𑀲𑁆𑀲𑀼𑀢𑀲𑁂𑀯𑀦𑀸 𑀳𑀺 𑀲𑀼𑀢𑀫𑀬𑀜𑀸𑀡𑀸𑀯𑀳𑀸. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀲𑀫𑀗𑁆𑀕𑀻𑀧𑀺 𑀪𑀸𑀯𑀦𑀸𑀫𑀬𑀜𑀸𑀡𑁂 𑀞𑀺𑀢𑀢𑁆𑀢𑀸 𑀏𑀓𑀁𑀲𑀢𑁄 𑀧𑀜𑁆𑀜𑀯𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀉𑀤𑀬𑀩𑁆𑀩𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀧𑀼𑀕𑁆𑀕𑀮𑀲𑁂𑀯𑀦𑀸’’𑀢𑀺. 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀲𑁂𑀦 𑀢𑀧𑁆𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬𑀸’’𑀢𑀺. 𑀢𑀜𑁆𑀳𑀺 𑀜𑁂𑀬𑁆𑀬𑀁 𑀢𑀸𑀤𑀺𑀲𑀸𑀬 𑀧𑀜𑁆𑀜𑀸𑀬 𑀘𑀭𑀺𑀢𑀩𑁆𑀩𑀢𑁄 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁, 𑀢𑀲𑁆𑀲𑀸 𑀯𑀸 𑀧𑀜𑁆𑀜𑀸𑀬 𑀢𑀢𑁆𑀣 𑀧𑀪𑁂𑀤𑀢𑁄 𑀧𑀯𑀢𑁆𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀸, 𑀢𑀲𑁆𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺. 𑀬𑀣𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀦𑀸𑀫 𑀅𑀭𑀳𑀸 𑀏𑀯, 𑀏𑀯𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄𑀢𑀺𑀧𑀺 𑀲𑁄 𑀏𑀯𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻’’𑀢𑀺. 𑀯𑀻𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘‘𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁫𑁦, 𑁨𑁬𑁭; 𑀅. 𑀦𑀺. 𑁩.𑁩𑁬) 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑀩𑁆𑀩𑀧𑀞𑀫𑀁 𑀓𑀭𑁄𑀦𑁆𑀢𑀻𑀢𑀺, 𑀤𑁂𑀯𑀤𑀽𑀢𑀲𑀼𑀢𑁆𑀢𑀸𑀤𑀻𑀲𑀼 𑀢𑀲𑁆𑀲 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀆𑀳 ‘‘𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀜𑁆𑀜𑀫𑀦𑀼𑀲𑁆𑀲𑁂𑀳𑀺, 𑀢𑀺𑀭𑀘𑁆𑀙𑀸𑀦𑁂𑀳𑀺 𑀘 𑀯𑀺𑀩𑀸𑀥𑀺𑀬𑀫𑀸𑀦𑀓𑀸𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀏𑀓𑀁 𑀩𑀼𑀤𑁆𑀥𑀦𑁆𑀢𑀭’’𑀦𑁆𑀢𑀺 𑀇𑀤𑀁 𑀅𑀧𑀭𑀸𑀧𑀭𑀁 𑀧𑁂𑀢𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀓𑀘𑁆𑀘𑀸𑀦𑀁 𑀯𑀸 𑀧𑁂𑀢𑀸𑀦𑀁 𑀏𑀓𑀘𑁆𑀘𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀺𑀬 𑀢𑀣𑀸 𑀤𑀻𑀖𑀸𑀬𑀼𑀓𑀢𑀸𑀧𑀺 𑀲𑀺𑀬𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 ‘‘𑀓𑀸𑀮𑁄 𑀦𑀸𑀕𑀭𑀸𑀚𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀮𑀪𑀺𑀢𑁆𑀯𑀸 𑀞𑀺𑀢𑁄 𑀫𑁂𑀢𑁆𑀢𑁂𑀬𑁆𑀬𑀲𑁆𑀲𑀧𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺, 𑀬𑀁 𑀢𑀲𑁆𑀲 𑀓𑀧𑁆𑀧𑀸𑀬𑀼𑀓𑀢𑀸 𑀯𑀼𑀢𑁆𑀢𑀸.

𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀢𑀺 ‘‘𑀯𑀻𑀭𑀺𑀬𑀸𑀬𑀢𑁆𑀢𑁄 𑀏𑀯 𑀲𑀩𑁆𑀩𑁄 𑀮𑁄𑀓𑀼𑀢𑁆𑀢𑀭𑁄, 𑀮𑁄𑀓𑀺𑀬𑁄 𑀘 𑀯𑀺𑀲𑁂𑀲𑀸𑀥𑀺𑀕𑀫𑁄’’𑀢𑀺 𑀏𑀯𑀁 𑀯𑀻𑀭𑀺𑀬𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑀲𑀻𑀮𑀲𑁆𑀲. 𑀕𑀫𑀦𑀯𑀻𑀣𑀺𑀦𑁆𑀢𑀺 𑀲𑀧𑀼𑀩𑁆𑀩𑀪𑀸𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁, 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑀧𑀝𑀺𑀧𑀸𑀝𑀺, 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸 𑀯𑀸. 𑀲𑀸 𑀳𑀺 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀦𑀺𑀬𑁆𑀬𑀸𑀦𑀸𑀬 𑀕𑀦𑁆𑀢𑀩𑁆𑀩𑀸 𑀧𑀝𑀺𑀧𑀤𑀸𑀢𑀺 𑀓𑀢𑁆𑀯𑀸 𑀕𑀫𑀦𑀯𑀻𑀣𑀺 𑀦𑀸𑀫. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄𑀢𑀺 𑀬𑀣𑀸 𑀢𑀣𑀸 𑀓𑀸𑀬𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀧𑁆𑀧𑀲𑀼𑀢𑁄. 𑀧𑀺𑀡𑁆𑀟𑀦𑁆𑀢𑀺 𑀭𑀝𑁆𑀞𑀧𑀺𑀡𑁆𑀟𑀁. 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑀺 𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀓𑀭𑀡𑁂𑀦 𑀧𑀺𑀡𑁆𑀟𑀲𑁆𑀲 𑀪𑀺𑀓𑁆𑀔𑀸𑀬 𑀧𑀝𑀺𑀧𑀽𑀚𑀦𑀸 𑀧𑀺𑀡𑁆𑀟𑀸𑀧𑀘𑀸𑀬𑀦𑀁.

𑀦𑀻𑀳𑀭𑀦𑁆𑀢𑁄𑀢𑀺 𑀧𑀢𑁆𑀢𑀣𑀯𑀺𑀓𑀢𑁄 𑀦𑀻𑀳𑀭𑀦𑁆𑀢𑁄. 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀢𑀁 𑀉𑀧𑀸𑀲𑀺𑀓𑀸𑀬 𑀯𑀘𑀦𑀁 𑀅𑀢𑁆𑀢𑀦𑁄 𑀯𑀲𑀦𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀺𑀢𑁄𑀯 𑀧𑀜𑁆𑀘𑀸𑀪𑀺𑀜𑁆𑀜𑀢𑀸𑀬 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸. 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄. 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 ‘‘𑀢𑀬𑀺 𑀓𑀢𑁂𑀦 𑀤𑀸𑀦𑀫𑀬𑁂𑀦, 𑀯𑁂𑀬𑁆𑀬𑀸𑀯𑀘𑁆𑀘𑀫𑀬𑁂𑀦 𑀘 𑀧𑀼𑀜𑁆𑀜𑀓𑀫𑁆𑀫𑁂𑀦 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀽𑀧𑀕𑀫𑀦𑁂𑀦 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄, 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀣𑁂𑀭𑁄 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀢𑀺. 𑀲𑀺𑀢𑀁 𑀓𑀭𑁄𑀦𑁆𑀢𑁄 𑀯𑀸𑀢𑀺 ‘‘𑀅𑀓𑀺𑀘𑁆𑀙𑁂𑀦𑁂𑀯 𑀫𑀬𑀸 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑀸𑀦𑁂 𑀲𑀜𑁆𑀚𑀸𑀢𑀧𑀸𑀫𑁄𑀚𑁆𑀚𑀯𑀲𑁂𑀦 𑀲𑀺𑀢𑀁 𑀓𑀭𑁄𑀦𑁆𑀢𑁄 𑀏𑀯.

𑀯𑀺𑀧𑁆𑀧𑀝𑀺𑀧𑀦𑁆𑀦𑀦𑁆𑀢𑀺 𑀚𑀸𑀢𑀺𑀥𑀫𑁆𑀫𑀓𑀼𑀮𑀥𑀫𑁆𑀫𑀸𑀤𑀺𑀮𑀗𑁆𑀖𑀦𑁂𑀦 𑀅𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀁. 𑀏𑀯𑀁 𑀬𑀣𑀸 𑀅𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀧𑀼𑀢𑁆𑀢𑁄 𑀢𑀸𑀬 𑀏𑀯 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀼𑀮𑀲𑀦𑁆𑀢𑀸𑀦𑀢𑁄 𑀩𑀸𑀳𑀺𑀭𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀤𑀸𑀬𑀚𑁆𑀚𑀲𑁆𑀲 𑀦 𑀪𑀸𑀕𑀻, 𑀏𑀯𑀁. 𑀓𑀼𑀲𑀻𑀢𑁄𑀧𑀺 𑀢𑁂𑀦 𑀓𑀼𑀲𑀻𑀢𑀪𑀸𑀯𑁂𑀦 𑀅𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀤𑁆𑀥𑀩𑁆𑀩𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀲𑁆𑀲 𑀦 𑀪𑀸𑀕𑀻. 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀺 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀢𑁄. 𑀉𑀧𑁆𑀧𑀚𑁆𑀚𑀢𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀬𑁄𑀚𑀦𑀸, 𑀏𑀯𑀁 𑀲𑀩𑁆𑀩𑀢𑁆𑀣.

𑀫𑀳𑀸𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀫𑀳𑀦𑁆𑀢𑁄 𑀯𑀺𑀧𑀼𑀮𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄. 𑀢𑀁 𑀧𑀦𑀲𑁆𑀲 𑀕𑀼𑀡𑀫𑀳𑀢𑁆𑀢𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑁂𑀦 𑀮𑁄𑀓𑁂 𑀧𑀸𑀓𑀝𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀣𑀼𑀦𑁄 𑀳𑀻’’𑀢𑀺𑀆𑀤𑀺𑀫𑀸𑀳.

𑀬𑀲𑁆𑀫𑀸 𑀲𑀢𑁆𑀣𑀼𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀚𑁆𑀚𑀽𑀧𑀕𑀫𑁂𑀦 𑀲𑀓𑁆𑀬𑀧𑀼𑀢𑁆𑀢𑀲𑁆𑀲𑀪𑀸𑀯𑁄 𑀲𑀫𑁆𑀧𑀚𑀸𑀬𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀧𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀫𑁆𑀪𑀺𑀦𑁆𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀅𑀮𑀲𑀸𑀦𑀁 𑀪𑀸𑀯𑀦𑀸𑀬 𑀦𑀸𑀫𑀫𑀢𑁆𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀁 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸𑀦𑀁 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀸𑀤𑀺𑀅𑀦𑀼𑀬𑀼𑀜𑁆𑀚𑀦𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀤𑀽𑀭𑀢𑁄 𑀯𑀚𑁆𑀚𑀦𑀸 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸. ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁨𑁩; 𑁩.𑁬𑁫; 𑀲𑀁. 𑀦𑀺. 𑁪.𑁧𑁨𑁦; 𑀫𑀳𑀸𑀦𑀺. 𑁧𑁬𑁧) 𑀪𑀸𑀯𑀦𑀸𑀭𑀤𑁆𑀥𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀸 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀸. 𑀢𑁂𑀦𑀸𑀳 ‘‘𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁪) 𑀧𑀦 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀦 𑀕𑀳𑀺𑀢𑀁, 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀕𑀳𑀺𑀢𑀁. 𑀢𑀢𑁆𑀣 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀏𑀯 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀕𑀳𑀺𑀢𑀸 𑀳𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀻𑀭𑀺𑀬𑀸𑀬𑀢𑁆𑀢𑀢𑀸𑀤𑀲𑁆𑀲𑀦𑀪𑀸𑀯𑀢𑁄. 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀏𑀯 𑀕𑀳𑀺𑀢𑀁 𑀳𑁄𑀢𑀺, 𑀯𑀻𑀭𑀺𑀬𑀼𑀧𑁆𑀧𑀸𑀤𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀅𑀢𑁆𑀣𑀲𑀺𑀤𑁆𑀥𑀫𑁂𑀯. 𑀢𑀢𑁆𑀣 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦- 𑀢𑀤𑀥𑀺𑀫𑀼𑀢𑁆𑀢𑀢𑀸𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀘𑁆𑀘𑀬𑀽𑀧𑀲𑀁𑀳𑀸𑀭𑀯𑀲𑁂𑀦, 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀬𑁄 𑀲𑀫𑀼𑀢𑁆𑀢𑁂𑀚𑀦𑀯𑀲𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑀸 𑀤𑀝𑁆𑀞𑀩𑁆𑀩𑀸.

𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀧𑀻𑀢𑀺 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀲𑀪𑀸𑀕𑀳𑁂𑀢𑀼𑀪𑀸𑀯𑀢𑁄 ‘‘𑀧𑀻𑀢𑀺𑀬𑁂𑀯 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀧𑀦 𑀩𑀳𑀼𑀲𑁄 𑀧𑀯𑀢𑁆𑀢𑀺𑀬𑀸 𑀧𑀼𑀣𑀼𑀢𑁆𑀢𑀁 𑀉𑀧𑀸𑀤𑀸𑀬 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀬𑀣𑀸 𑀲𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀧𑀝𑀺𑀧𑀢𑁆𑀢𑀺 𑀢𑀲𑁆𑀲𑀸 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄.

‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀉𑀧𑀘𑀸𑀭𑀲𑀫𑀸𑀥𑀺𑀦𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀸𑀯 𑀉𑀧𑀘𑀸𑀭𑀸’’𑀢𑀺. 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄. 𑀥𑀫𑁆𑀫𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸, 𑀏𑀯𑀁 𑀲𑁂𑀲𑀅𑀦𑀼𑀲𑁆𑀲𑀢𑀻𑀲𑀼. 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑀜𑁆𑀘 𑀬𑁄𑀚𑁂𑀢𑀩𑁆𑀩𑀁 𑀢𑀲𑁆𑀲𑀸𑀧𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀪𑀸𑀯𑁂𑀦 𑀢𑀕𑁆𑀕𑀢𑀺𑀓𑀢𑁆𑀢𑀸. 𑀲𑀗𑁆𑀔𑀸𑀭𑀸𑀦𑀁 𑀲𑀧𑁆𑀧𑀤𑁂𑀲𑀯𑀽𑀧𑀲𑀫𑁂𑀧𑀺 𑀦𑀺𑀧𑁆𑀧𑀤𑁂𑀲𑀯𑀽𑀧𑀲𑀫𑁂 𑀯𑀺𑀬 𑀢𑀣𑀸 𑀧𑀜𑁆𑀜𑀸𑀬 𑀧𑀯𑀢𑁆𑀢𑀺𑀢𑁄 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀁 𑀆𑀯𑀳𑀦𑁆𑀢𑁄 𑀢𑀣𑀸𑀭𑀽𑀧𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀦𑁆𑀦𑀸𑀕𑀢𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀻’’𑀢𑀺. 𑀢𑀢𑁆𑀣 ‘‘𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸’’𑀢𑀺 𑀧𑀸𑀞𑁄. 𑀢𑁂 𑀳𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺. 𑀇𑀢𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄, 𑀬𑀲𑁆𑀫𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀦𑁂𑀲𑀁 𑀅𑀲𑀫𑀼𑀤𑀸𑀘𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦 𑀳𑀺 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑁄𑀚𑁆𑀛𑀗𑁆𑀕𑀼𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸. 𑀧𑀲𑀸𑀤𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀣𑀽𑀲𑀲𑀫𑀳𑀤𑀬𑀢𑀸 𑀮𑀽𑀔𑀢𑀸, 𑀲𑀸 𑀢𑀢𑁆𑀣 𑀆𑀤𑀭𑀕𑀸𑀭𑀯𑀸𑀓𑀭𑀡𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂’’𑀢𑀺.

𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺 𑀏𑀯 𑀬𑀣𑀸𑀯𑀼𑀢𑁆𑀢𑀩𑁄𑀥𑀺𑀅𑀗𑁆𑀕𑀪𑀽𑀢𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸𑀢𑀺 𑀧𑀡𑀻𑀢𑀲𑀧𑁆𑀧𑀸𑀬𑀪𑁄𑀚𑀦𑀲𑁂𑀯 𑀦𑀢𑀸. 𑀉𑀢𑀼𑀇𑀭𑀺𑀬𑀸𑀧𑀣𑀲𑀼𑀔𑀕𑁆𑀕𑀳𑀡𑁂𑀦 𑀲𑀧𑁆𑀧𑀸𑀬𑀉𑀢𑀼𑀇𑀭𑀺𑀬𑀸𑀧𑀣𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀜𑁆𑀳𑀺 𑀢𑀺𑀯𑀺𑀥𑀫𑁆𑀧𑀺 𑀲𑀧𑁆𑀧𑀸𑀬𑀁 𑀲𑁂𑀯𑀺𑀬𑀫𑀸𑀦𑀁 𑀓𑀸𑀬𑀲𑁆𑀲 𑀓𑀮𑁆𑀮𑀢𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀓𑀮𑁆𑀮𑀢𑀁 𑀆𑀯𑀳𑀦𑁆𑀢𑀁 𑀤𑀼𑀯𑀺𑀥𑀸𑀬𑀧𑀺 𑀧𑀲𑁆𑀲𑀤𑁆𑀥𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺. 𑀅𑀳𑁂𑀢𑀼𑀓𑀁 𑀲𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀦𑁆𑀢𑀺 𑀧𑀦 𑀅𑀬𑀁 𑀤𑀼𑀢𑀺𑀬𑁄. 𑀏𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀬𑀣𑀸𑀲𑀓𑀁 𑀓𑀫𑁆𑀫𑀼𑀦𑀸 𑀳𑁄𑀢𑀻𑀢𑀺 𑀅𑀬𑀁 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺. 𑀫𑀚𑁆𑀛𑀢𑁆𑀢𑁄 𑀧𑀬𑁄𑀕𑁄 𑀬𑀲𑁆𑀲 𑀲𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑁄, 𑀢𑀲𑁆𑀲 𑀪𑀸𑀯𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸. 𑀅𑀬𑀜𑁆𑀳𑀺 𑀧𑀳𑀸𑀬 𑀲𑀸𑀭𑀤𑁆𑀥𑀓𑀸𑀬𑀢𑀁 𑀧𑀲𑁆𑀲𑀤𑁆𑀥𑀓𑀸𑀬𑀢𑀸𑀬 𑀓𑀸𑀭𑀡𑀁 𑀳𑁄𑀦𑁆𑀢𑀻 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁 𑀆𑀯𑀳𑀢𑀺, 𑀏𑀢𑁂𑀦𑁂𑀯 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀸𑀦𑀁 𑀢𑀤𑀸𑀯𑀳𑀦𑀢𑀸 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀣𑀸𑀲𑀫𑀸𑀳𑀺𑀢𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀕𑀬𑁆𑀳𑀫𑀸𑀦𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑁄 𑀲𑀫𑀣𑁄 𑀏𑀯 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀦𑀸𑀦𑀸𑀭𑀫𑁆𑀫𑀡𑁂 𑀧𑀭𑀺𑀩𑁆𑀪𑀫𑀦𑁂𑀦 𑀯𑀺𑀯𑀺𑀥𑀁 𑀅𑀕𑁆𑀕𑀁 𑀏𑀢𑀲𑁆𑀲𑀸𑀢𑀺 𑀩𑁆𑀬𑀕𑁆𑀕𑁄, 𑀯𑀺𑀓𑁆𑀔𑁂𑀧𑁄. 𑀢𑀣𑀸 𑀳𑀺 𑀲𑁄 𑀅𑀦𑀯𑀝𑁆𑀞𑀸𑀦𑀭𑀲𑁄, 𑀪𑀦𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘 𑀯𑀼𑀢𑁆𑀢𑁄, 𑀏𑀓𑀕𑁆𑀕𑀢𑀸𑀪𑀸𑀯𑀢𑁄 𑀩𑁆𑀬𑀕𑁆𑀕𑀧𑀝𑀺𑀧𑀓𑁆𑀔𑁄𑀢𑀺 𑀅𑀩𑁆𑀬𑀕𑁆𑀕𑁄, 𑀲𑀫𑀸𑀥𑀺. 𑀲𑁄 𑀏𑀯 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀘 𑀧𑀜𑁆𑀜𑀸𑀯𑀳𑀸 𑀯𑀼𑀢𑁆𑀢𑀸, 𑀲𑀫𑀸𑀥𑀸𑀦𑀸𑀯𑀳𑀸𑀧𑀺 𑀢𑀸 𑀳𑁄𑀦𑁆𑀢𑀺 𑀲𑀫𑀸𑀥𑀸𑀦𑀸𑀯𑀳𑀪𑀸𑀯𑁂𑀦𑁂𑀯 𑀧𑀜𑁆𑀜𑀸𑀯𑀳𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀯𑀺𑀲𑀤…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑀭𑀡𑀪𑀸𑀯𑀦𑀸𑀓𑁄𑀲𑀮𑁆𑀮𑀸𑀦𑀁 𑀅𑀯𑀺𑀦𑀸𑀪𑀸𑀯𑀢𑁄, 𑀭𑀓𑁆𑀔𑀦𑀓𑁄𑀲𑀮𑁆𑀮𑀲𑁆𑀲 𑀘 𑀢𑀁𑀫𑀽𑀮𑀓𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑀼𑀲𑀮𑀢𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀛𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑁄𑀲𑀮𑁆𑀮𑀁 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀏𑀯𑀸𑀢𑀺. 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀁, 𑀧𑀫𑁄𑀤𑀯𑁂𑀓𑀮𑁆𑀮𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀮𑀬𑀸𑀧𑀢𑁆𑀢𑀺𑀢𑁄 𑀲𑀫𑀼𑀤𑁆𑀥𑀭𑀡𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀺𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀺𑀢𑀼𑀦𑁆𑀢𑀺. 𑀏𑀯𑀁 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣 𑀘 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀅𑀦𑀦𑁆𑀢𑀭𑀁 𑀯𑀺𑀪𑀸𑀯𑀺𑀢𑀸 𑀏𑀯. 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀩𑀮𑀯𑀢𑀁, 𑀧𑀫𑁄𑀤𑀼𑀩𑁆𑀩𑀺𑀮𑀸𑀯𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀉𑀤𑁆𑀥𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀉𑀤𑁆𑀥𑀢𑀸𑀧𑀢𑁆𑀢𑀺𑀢𑁄 𑀦𑀺𑀲𑁂𑀥𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺…𑀧𑁂… 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺. 𑀏𑀯𑀁 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣𑀸𑀧𑀺 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀢𑁆𑀣 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸 𑀯𑀼𑀢𑁆𑀢𑀸 𑀏𑀯. 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀁 𑀯𑀓𑁆𑀔𑀢𑀺. 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸𑀢𑀺 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀅𑀧𑁆𑀧𑀪𑀸𑀯𑁂𑀦. 𑀬𑀣𑀸 𑀳𑀺 𑀤𑀸𑀦𑀁 𑀅𑀮𑁄𑀪𑀧𑀥𑀸𑀦𑀁, 𑀲𑀻𑀮𑀁 𑀅𑀤𑁄𑀲𑀧𑀥𑀸𑀦𑀁, 𑀏𑀯𑀁 𑀪𑀸𑀯𑀦𑀸 𑀅𑀫𑁄𑀳𑀧𑀥𑀸𑀦𑀸. 𑀢𑀢𑁆𑀣 𑀬𑀤𑀸 𑀧𑀜𑁆𑀜𑀸 𑀦 𑀩𑀮𑀯𑀢𑀻 𑀳𑁄𑀢𑀺, 𑀢𑀤𑀸 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀯𑀳𑀸 𑀦 𑀳𑁄𑀢𑀺, 𑀅𑀦𑀪𑀺𑀲𑀗𑁆𑀔𑀢𑁄 𑀯𑀺𑀬 𑀆𑀳𑀸𑀭𑁄 𑀧𑀼𑀭𑀺𑀲𑀲𑁆𑀲 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀼𑀘𑀺𑀁 𑀦 𑀚𑀦𑁂𑀢𑀺, 𑀢𑁂𑀦 𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺, 𑀢𑀣𑀸 𑀪𑀸𑀯𑀦𑀸𑀬 𑀲𑀫𑁆𑀫𑀤𑁂𑀯 𑀅𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀲𑀫𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀢𑁂𑀦𑀸𑀧𑀺 𑀘𑀺𑀢𑁆𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀬𑁄𑀕…𑀧𑁂… 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀻’’𑀢𑀺. 𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀸𑀤𑀦𑀁, 𑀧𑀲𑀸𑀤𑀼𑀧𑁆𑀧𑀸𑀤𑀦𑀜𑁆𑀘 𑀢𑀺𑀓𑀺𑀘𑁆𑀙𑀦𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀬𑀣𑀸𑀭𑀳𑀁 𑀲𑀼𑀕𑀢𑀺𑀬𑀁, 𑀤𑀼𑀕𑁆𑀕𑀢𑀺𑀬𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀤𑀜𑁆𑀜𑀫𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀔𑀼𑀧𑁆𑀧𑀺𑀧𑀸𑀲𑀸𑀤𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀩𑀸𑀥𑀦𑀸𑀤𑀺𑀳𑁂𑀢𑀼𑀓𑀁 𑀅𑀧𑀸𑀬𑀤𑀼𑀓𑁆𑀔𑀁 𑀤𑀝𑁆𑀞𑀩𑁆𑀩𑀁, 𑀢𑀬𑀺𑀤𑀁 𑀲𑀩𑁆𑀩𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀦𑀺𑀲𑁆𑀲𑀺𑀢𑀁 𑀕𑀳𑀺𑀢𑀦𑁆𑀢𑀺 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀘 𑀓𑀸𑀮𑁂 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀸𑀦𑀺 𑀯𑀺𑀲𑀼𑀁 𑀕𑀳𑀺𑀢𑀸𑀦𑀺. 𑀬𑁂 𑀧𑀦 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄, 𑀢𑀢𑁆𑀣 𑀘 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀚𑀻𑀯𑀺𑀓𑀸𑀤𑀼𑀓𑁆𑀔𑀁 𑀅𑀝𑁆𑀞𑀫𑀁 𑀲𑀁𑀯𑁂𑀕𑀯𑀢𑁆𑀣𑀼 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀸𑀢𑀺 𑀅𑀬𑀁 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀲𑀫𑀬𑁂 𑀯𑀼𑀢𑁆𑀢𑀦𑀬𑁂𑀦 𑀲𑀁𑀯𑁂𑀕𑀚𑀦𑀦𑀯𑀲𑁂𑀦 𑀘𑁂𑀯 𑀧𑀲𑀸𑀤𑀼𑀧𑁆𑀧𑀸𑀤𑀦𑀯𑀲𑁂𑀦 𑀘 𑀲𑀫𑁆𑀫𑀤𑁂𑀯 𑀧𑀳𑀁𑀲𑀦𑀸, 𑀲𑀁𑀯𑁂𑀕𑀚𑀦𑀦𑀧𑀼𑀩𑁆𑀩𑀓𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀢𑁄𑀲𑀦𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀭𑀳𑁂𑀦, 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀫𑁆𑀫𑀸 𑀅𑀯𑀺𑀲𑀫𑀁 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫. ‘‘𑀅𑀮𑀻𑀦’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀮𑀻𑀦𑀁, 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀢𑀁, 𑀧𑀜𑁆𑀜𑀸𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸, 𑀉𑀧𑀲𑀫𑀲𑀼𑀔𑀸𑀥𑀺𑀕𑀫𑁂𑀦 𑀘 𑀅𑀦𑀺𑀭𑀲𑁆𑀲𑀸𑀤𑀁, 𑀢𑀢𑁄 𑀏𑀯 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁. 𑀢𑀢𑁆𑀣 𑀅𑀮𑀻𑀦𑀢𑀸𑀬 𑀧𑀕𑁆𑀕𑀳𑁂, 𑀅𑀦𑀼𑀤𑁆𑀥𑀢𑀢𑀸𑀬 𑀦𑀺𑀕𑁆𑀕𑀳𑁂, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑁆𑀧𑀳𑀁𑀲𑀦𑁂 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀢𑀸 𑀳𑀺 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁, 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁. 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸𑀢𑀺 𑀅𑀬𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀲𑀫𑀬𑁂 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀧𑁂𑀓𑁆𑀔𑀦𑀸 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀢𑁄, 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀽𑀧𑀕𑀫𑀦𑀢𑁄 𑀘 𑀉𑀧𑀘𑀸𑀭𑀚𑁆𑀛𑀸𑀦𑀫𑁆𑀧𑀺 𑀲𑀫𑀸𑀥𑀸𑀦 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀧𑀼𑀕𑁆𑀕𑀮𑀲𑁆𑀲 𑀲𑀫𑀸𑀳𑀺𑀢𑀪𑀸𑀯𑀲𑀸𑀥𑀦𑀁 𑀏𑀯𑀸𑀢𑀺 𑀢𑀢𑁆𑀣 𑀲𑀫𑀥𑀼𑀭𑀪𑀸𑀯𑁂𑀦𑀸𑀳 ‘‘𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸’’𑀢𑀺.

𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀸𑀦𑀯𑀲𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀓𑀸𑀭𑀡𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀺𑀚𑁆𑀛𑀦𑀢𑁄, 𑀅𑀲𑀢𑀺 𑀘 𑀅𑀲𑀺𑀚𑁆𑀛𑀦𑀢𑁄. 𑀲𑁄 𑀘 𑀫𑀚𑁆𑀛𑀢𑁆𑀢𑀪𑀸𑀯𑁄 𑀯𑀺𑀲𑀬𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀆𑀳 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺. 𑀢𑀤𑀼𑀪𑀬𑁂 𑀘 𑀯𑀺𑀭𑀼𑀚𑁆𑀛𑀦𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀬 𑀏𑀯 𑀤𑀽𑀭𑀻𑀓𑀢𑀦𑁆𑀢𑀺 𑀅𑀦𑀼𑀭𑀼𑀚𑁆𑀛𑀦𑀲𑁆𑀲𑁂𑀯 𑀧𑀳𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸’’𑀢𑀺. 𑀉𑀧𑁂𑀓𑁆𑀔𑀸𑀬 𑀳𑀺 𑀯𑀺𑀲𑁂𑀲𑀢𑁄 𑀭𑀸𑀕𑁄 𑀧𑀝𑀺𑀧𑀓𑁆𑀔𑁄. 𑀢𑀣𑀸 𑀘𑀸𑀳 ‘‘𑀉𑀧𑁂𑀓𑁆𑀔𑀸 𑀭𑀸𑀕𑀩𑀳𑀼𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁬𑁭). 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀁, 𑀅𑀢𑁆𑀢𑀲𑀼𑀜𑁆𑀜𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀤𑁆𑀯𑀻𑀳𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀲𑀗𑁆𑀔𑁆𑀬𑀸𑀲𑀫𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁. 𑀲𑀗𑁆𑀔𑁆𑀬𑀸 𑀏𑀯𑁂𑀢𑁆𑀣 𑀲𑀫𑀸𑀦𑀸, 𑀦 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀩𑁆𑀩𑀣𑀸 𑀲𑀫𑀸𑀦𑀦𑁆𑀢𑀺. 𑀅𑀲𑁆𑀲𑀸𑀫𑀺𑀓𑀪𑀸𑀯𑁄 𑀅𑀦𑀢𑁆𑀢𑀦𑀺𑀬𑀢𑀸. 𑀲𑀢𑀺 𑀳𑀺 𑀅𑀢𑁆𑀢𑀦𑀺 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀘𑀻𑀯𑀭𑀁, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀲𑀺𑀬𑀸, 𑀲𑁄 𑀧𑀦 𑀓𑁄𑀘𑀺 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀤𑁆𑀥𑀦𑀺𑀬𑀦𑁆𑀢𑀺 𑀦 𑀅𑀤𑁆𑀥𑀸𑀦𑀓𑁆𑀔𑀫𑀁 𑀦 𑀘𑀺𑀭𑀝𑁆𑀞𑀸𑀬𑀺, 𑀇𑀢𑁆𑀢𑀭𑀁 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀫𑀫𑀸𑀬𑀢𑀻𑀢𑀺 𑀫𑀫𑀢𑁆𑀢𑀁 𑀓𑀭𑁄𑀢𑀺 ‘‘𑀫𑀫𑀸’’𑀢𑀺 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺.

𑀫𑀫𑀸𑀬𑀦𑁆𑀢𑀸𑀢𑀺 𑀫𑀸𑀦𑀁 𑀤𑀩𑁆𑀩𑀁 𑀓𑀭𑁄𑀦𑁆𑀢𑀸.

𑀅𑀬𑀁 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀯𑀲𑁂𑀦 𑀤𑁂𑀲𑀺𑀢𑀸𑀢𑀺 𑀧𑀼𑀩𑁆𑀩𑀪𑀸𑀕𑀺𑀬𑀩𑁄𑀚𑁆𑀛𑀗𑁆𑀕𑁂 𑀲𑀦𑁆𑀥𑀸𑀬𑀸𑀳 ‘‘𑀩𑁄𑀚𑁆𑀛𑀗𑁆𑀕𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀲𑀘𑁆𑀘𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁬. 𑀬𑀣𑀸𑀲𑀪𑀸𑀯𑀢𑁄𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁄. 𑀩𑀸𑀥𑀦𑀓𑁆𑀔𑀡𑀢𑁄 𑀬𑁄 𑀬𑁄 𑀯𑀸 𑀲𑀪𑀸𑀯𑁄 𑀬𑀣𑀸𑀲𑀪𑀸𑀯𑁄, 𑀢𑀢𑁄, 𑀭𑀼𑀧𑁆𑀧𑀦𑀸𑀤𑀺 𑀓𑀓𑁆𑀔𑀴𑀸𑀤𑀺𑀲𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀚𑀦𑀺𑀓𑀁 𑀲𑀫𑀼𑀝𑁆𑀞𑀸𑀧𑀺𑀓𑀦𑁆𑀢𑀺 𑀧𑀯𑀢𑁆𑀢𑀮𑀓𑁆𑀔𑀡𑀲𑁆𑀲 𑀤𑀼𑀓𑁆𑀔𑀲𑁆𑀲 𑀚𑀦𑀺𑀓𑀁 𑀦𑀺𑀫𑀺𑀢𑁆𑀢𑀮𑀓𑁆𑀔𑀡𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀁. 𑀧𑀼𑀭𑀺𑀫𑀢𑀡𑁆𑀳𑀦𑁆𑀢𑀺 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀁 𑀲𑀺𑀤𑁆𑀥𑀁 𑀢𑀡𑁆𑀳𑀁. 𑀲𑀺𑀤𑁆𑀥𑁂 𑀳𑀺 𑀓𑀸𑀭𑀡𑁂 𑀢𑀲𑁆𑀲 𑀨𑀮𑀼𑀧𑁆𑀧𑀢𑁆𑀢𑀺. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀔𑀁, 𑀲𑀫𑀼𑀤𑀬𑁄 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀢𑀤𑀼𑀪𑀬𑀁 𑀦 𑀧𑀯𑀢𑁆𑀢𑀺 𑀏𑀢𑀸𑀬𑀸𑀢𑀺 𑀅𑀧𑁆𑀧𑀯𑀢𑁆𑀢𑀺, 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄, 𑀅𑀭𑀺𑀬𑀫𑀕𑁆𑀕𑁄, 𑀢𑀁 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮𑁮. 𑀏𑀯𑀁 𑀯𑀼𑀢𑁆𑀢𑀸𑀢𑀺 𑀏𑀯𑀁 𑀉𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀭𑀺𑀬𑀸𑀤𑀸𑀦𑀯𑀘𑀦𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦 𑀆𑀫𑁂𑀟𑀺𑀢𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀲𑀢𑁆𑀢𑀸𑀦𑀁 𑀦𑀺𑀓𑀸𑀬𑁂, 𑀲𑀢𑁆𑀢𑀖𑀝𑁂 𑀲𑀢𑁆𑀢𑀲𑀫𑀽𑀳𑁂𑀢𑀺 𑀅𑀢𑁆𑀣𑁄. 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀲𑀼 𑀳𑀺 𑀕𑀢𑀻𑀲𑀼 𑀪𑀼𑀫𑁆𑀫𑀤𑁂𑀯𑀸𑀤𑀺𑀔𑀢𑁆𑀢𑀺𑀬𑀸𑀤𑀺𑀳𑀢𑁆𑀣𑀺𑀆𑀤𑀺𑀔𑀼𑀧𑁆𑀧𑀺𑀧𑀸𑀲𑀺𑀓𑀸𑀤𑀺𑀢𑀁𑀢𑀁𑀚𑀸𑀢𑀺𑀯𑀺𑀲𑀺𑀝𑁆𑀞𑁄 𑀲𑀢𑁆𑀢𑀲𑀫𑀽𑀳𑁄 𑀲𑀢𑁆𑀢𑀦𑀺𑀓𑀸𑀬𑁄. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀔𑀦𑁆𑀥𑀸𑀦𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀻𑀢𑀺 𑀓𑀢𑁆𑀯𑀸 ‘‘𑀚𑀦𑀦𑀁 𑀚𑀸𑀢𑀻’’𑀢𑀺 𑀯𑀢𑁆𑀯𑀸 𑀲𑁆𑀯𑀸𑀬𑀁 𑀉𑀧𑁆𑀧𑀸𑀤𑀯𑀺𑀓𑀸𑀭𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑁄 𑀬𑁂𑀲𑀼 𑀔𑀦𑁆𑀥𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑁄, 𑀢𑁂 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀺𑀓𑀸𑀭𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀯𑀺𑀓𑀸𑀭𑀸𑀦𑀦𑁆𑀢𑀺 𑀉𑀧𑁆𑀧𑀸𑀤𑀲𑀗𑁆𑀔𑀸𑀢𑁂𑀦 𑀯𑀺𑀓𑀸𑀭𑁂𑀦 𑀲𑀯𑀺𑀓𑀸𑀭𑀸𑀦𑀁. 𑀚𑀸𑀢𑀺𑀆𑀤𑀻𑀦𑀺 𑀳𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀯𑀺𑀲𑁂𑀲𑀸𑀢𑀺. ‘‘𑀉𑀧𑀲𑀕𑁆𑀕𑀫𑀡𑁆𑀟𑀺𑀢𑀯𑁂𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀓𑁂𑀯𑀮𑀁 𑀉𑀧𑀲𑀕𑁆𑀕𑁂𑀦 𑀧𑀤𑀯𑀟𑁆𑀠𑀦𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀧𑀯𑀺𑀝𑁆𑀞𑀸𑀓𑀸𑀭𑁂𑀦𑀸𑀢𑀺 𑀅𑀡𑁆𑀟𑀓𑁄𑀲𑀁, 𑀯𑀢𑁆𑀣𑀺𑀓𑁄𑀲𑀜𑁆𑀘 𑀑𑀕𑀸𑀳𑀦𑀸𑀓𑀸𑀭𑁂𑀦. 𑀦𑀺𑀩𑁆𑀩𑀢𑁆𑀢𑀺𑀲𑀗𑁆𑀔𑀸𑀢𑁂𑀦𑀸𑀢𑀺 𑀆𑀬𑀢𑀦𑀸𑀦𑀁 𑀧𑀸𑀭𑀺𑀧𑀽𑀭𑀺𑀲𑀁𑀲𑀺𑀤𑁆𑀥𑀺𑀲𑀗𑁆𑀔𑀸𑀢𑁂𑀦.

𑀅𑀣 𑀯𑀸 𑀚𑀦𑀦𑀁 𑀚𑀸𑀢𑀻𑀢𑀺 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀁 𑀚𑀸𑀢𑀺𑀫𑀸𑀳. 𑀲𑀜𑁆𑀚𑀸𑀢𑀻𑀢𑀺 𑀲𑀫𑁆𑀧𑀼𑀡𑁆𑀡𑀸𑀬𑀢𑀦𑀁. 𑀲𑀫𑁆𑀧𑀼𑀡𑁆𑀡𑀸 𑀳𑀺 𑀚𑀸𑀢𑀺 𑀲𑀜𑁆𑀚𑀸𑀢𑀺. 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀻𑀢𑀺 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀚𑀸𑀢𑀺. 𑀢𑁂 𑀳𑀺 𑀅𑀡𑁆𑀟𑀓𑁄𑀲𑀁, 𑀯𑀢𑁆𑀣𑀺𑀓𑁄𑀲𑀜𑁆𑀘 𑀑𑀓𑁆𑀓𑀫𑀦𑁆𑀢𑀸 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦. 𑀢𑁂 𑀳𑀺 𑀧𑀸𑀓𑀝𑀸 𑀏𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀪𑀺𑀩𑁆𑀬𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. ‘‘𑀚𑀦𑀦𑀁 𑀚𑀸𑀢𑀻’’𑀢𑀺𑀆𑀤𑀺 𑀆𑀬𑀢𑀦𑀯𑀲𑁂𑀦, 𑀬𑁄𑀦𑀺𑀯𑀲𑁂𑀦 𑀘 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀅𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀼𑀢𑀺𑀓𑀣𑀸. 𑀧𑀸𑀢𑀼𑀪𑀸𑀯𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 ‘‘𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀫𑁆𑀧𑀺 𑀳𑀺 𑀧𑀭𑀫𑀢𑁆𑀣𑀓𑀣𑀸𑀢𑀺. 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀽𑀢𑀺 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼. 𑀢𑀲𑁆𑀫𑀺𑀁 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁂 𑀲𑀢𑀺. 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄𑀢𑀺 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁 𑀯𑀲𑁂𑀦, 𑀲𑁂𑀲𑁂𑀲𑀼 𑀭𑀽𑀧𑀥𑀸𑀢𑀼𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀓𑀸𑀫𑀥𑀸𑀢𑀼𑀬𑀁 𑀯𑀺𑀓𑀮𑀸𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀲𑀢𑁆𑀢𑀦𑁆𑀦𑀁, 𑀦𑀯𑀦𑁆𑀦𑀁, 𑀤𑀲𑀦𑁆𑀦𑀁, 𑀧𑀼𑀦𑀤𑀲𑀦𑁆𑀦𑀁, 𑀏𑀓𑀸𑀤𑀲𑀦𑁆𑀦𑀜𑁆𑀘 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯, 𑀦 𑀓𑀼𑀢𑁄𑀘𑀺 𑀆𑀕𑀢𑀸𑀦𑀺. 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀢𑀲𑁆𑀲 𑀲𑀁𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄𑀢𑀺 𑀯𑀸 𑀆𑀬𑀢𑀦𑀸𑀦𑀁 𑀅𑀢𑁆𑀢𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁮𑁯. 𑀲𑀪𑀸𑀯𑀦𑀺𑀤𑁆𑀤𑁂𑀲𑁄𑀢𑀺 𑀲𑀭𑀽𑀧𑀦𑀺𑀤𑁆𑀤𑁂𑀲𑁄. 𑀲𑀭𑀽𑀧𑀜𑁆𑀳𑁂𑀢𑀁 𑀚𑀺𑀡𑁆𑀡𑀢𑀸𑀬, 𑀬𑀤𑀺𑀤𑀁 ‘‘𑀚𑀭𑀸’’𑀢𑀺, ‘‘𑀯𑀬𑁄𑀳𑀸𑀦𑀻𑀢𑀺 𑀯𑀸. 𑀚𑀻𑀭𑀡𑀫𑁂𑀯 𑀚𑀻𑀭𑀡𑀢𑀸, 𑀚𑀻𑀭𑀦𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀢𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄’’𑀢𑀺. 𑀔𑀡𑁆𑀟𑀺𑀢𑀤𑀦𑁆𑀢𑀸 𑀔𑀡𑁆𑀟𑀺𑀢𑀸 𑀦𑀸𑀫 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀬𑀲𑁆𑀲 𑀯𑀺𑀓𑀸𑀭𑀲𑁆𑀲 𑀯𑀲𑁂𑀦 𑀲𑀢𑁆𑀢𑁄 ‘‘𑀔𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀔𑀡𑁆𑀟𑀺𑀘𑁆𑀘𑀁. 𑀢𑀣𑀸 𑀧𑀮𑀺𑀢𑀸𑀦𑀺 𑀅𑀲𑁆𑀲 𑀲𑀦𑁆𑀢𑀻𑀢𑀺 ‘‘𑀧𑀮𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀸𑀮𑀺𑀘𑁆𑀘𑀁. 𑀯𑀮𑀺𑀢𑁆𑀢𑀘𑀢𑀸𑀬 𑀯𑀸 𑀯𑀮𑀺 𑀢𑀘𑁄 𑀅𑀲𑁆𑀲𑀸𑀢𑀺 𑀯𑀮𑀺𑀢𑁆𑀢𑀘𑁄.

𑀨𑀮𑀽𑀧𑀘𑀸𑀭𑁂𑀦𑀸𑀢𑀺 𑀨𑀮𑀯𑁄𑀳𑀸𑀭𑁂𑀦.

𑁩𑁯𑁦. 𑀘𑀯𑀦𑀫𑁂𑀯 𑀘𑀯𑀦𑀢𑀸, 𑀘𑀯𑀦𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀢𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑀻𑀢𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀸 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑀺, 𑀢𑁂𑀦𑁂𑀯 𑀪𑁂𑀤𑁂𑀦 𑀦𑀺𑀭𑁄𑀥𑀦𑀁 𑀅𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀭𑀡𑀁. 𑀫𑀘𑁆𑀘𑀼𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀪𑀽𑀢𑀁 𑀫𑀭𑀡𑀁. 𑀢𑁂𑀦𑀸𑀳 ‘‘𑀦 𑀔𑀡𑀺𑀓𑀫𑀭𑀡’’𑀦𑁆𑀢𑀺. ‘‘𑀫𑀘𑁆𑀘𑀼 𑀫𑀭𑀡’’𑀦𑁆𑀢𑀺 𑀲𑀫𑀸𑀲𑀁 𑀅𑀓𑀢𑁆𑀯𑀸 𑀬𑁄 ‘‘𑀫𑀘𑁆𑀘𑀽’’𑀢𑀺 𑀯𑀼𑀘𑁆𑀘𑀢𑀺 𑀪𑁂𑀤𑁄, 𑀬𑀜𑁆𑀘 𑀫𑀭𑀡𑀁 𑀧𑀸𑀡𑀘𑀸𑀕𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀦𑁆𑀢𑀺 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑁄 𑀦 𑀦 𑀬𑀼𑀚𑁆𑀚𑀢𑀺. 𑀓𑀸𑀮𑀓𑀺𑀭𑀺𑀬𑀸𑀢𑀺 𑀫𑀭𑀡𑀓𑀸𑀮𑁄, 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀯𑀺𑀲𑁂𑀲𑁂𑀦 ‘‘𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀢𑀲𑁆𑀲 𑀓𑀺𑀭𑀺𑀬𑀸, 𑀅𑀢𑁆𑀣𑀢𑁄 𑀘𑀼𑀢𑀺𑀔𑀦𑁆𑀥𑀸𑀦𑀁 𑀪𑁂𑀤𑀧𑁆𑀧𑀢𑁆𑀢𑀺𑀬𑁂𑀯, 𑀓𑀸𑀮𑀲𑁆𑀲 𑀯𑀸 𑀅𑀦𑁆𑀢𑀓𑀲𑁆𑀲 𑀓𑀺𑀭𑀺𑀬𑀸𑀢𑀺 𑀬𑀸 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀲𑀸 𑀘𑀼𑀢𑀺, 𑀫𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀲𑀩𑁆𑀩𑀸𑀧𑀺 𑀲𑀫𑁆𑀫𑀼𑀢𑀺𑀓𑀣𑀸𑀯 ‘‘𑀬𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀅𑀬𑀁 𑀧𑀭𑀫𑀢𑁆𑀣𑀓𑀣𑀸 𑀧𑀭𑀫𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀸𑀦𑀁 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀲𑁆𑀲𑀦𑀚𑁄𑀢𑀦𑀸𑀪𑀸𑀯𑀢𑁄.

𑀅𑀢𑁆𑀢𑀸𑀢𑀺 𑀪𑀯𑀢𑀺 𑀏𑀢𑁆𑀣 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀪𑀸𑀯𑁄, 𑀔𑀦𑁆𑀥𑀲𑀫𑀽𑀳𑁄, 𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀦𑀺𑀓𑁆𑀔𑀺𑀧𑀦𑀁, 𑀧𑀸𑀢𑀦𑀁 𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁𑀧𑀦 ‘‘𑀫𑀭𑀡𑀁 𑀧𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀺𑀓𑁆𑀔𑁂𑀧𑀳𑁂𑀢𑀼𑀢𑀸𑀬 𑀧𑀢𑀦𑀁 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀥𑀫𑁆𑀫𑀲𑀫𑀽𑀳𑀲𑁆𑀲 𑀯𑀺𑀦𑀸𑀲𑀚𑁄𑀢𑀦𑀸𑀢𑀺 𑀏𑀓𑀤𑁂𑀲𑀢𑁄 𑀧𑀭𑀫𑀢𑁆𑀣𑀓𑀣𑀸, ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄’’𑀢𑀺 𑀧𑀦𑁂𑀢𑁆𑀣 𑀦 𑀓𑁄𑀘𑀺 𑀯𑁄𑀳𑀸𑀭𑀮𑁂𑀲𑁄 𑀧𑀻𑀢𑀺 𑀆𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄 𑀧𑀦 𑀲𑀩𑁆𑀩𑀸𑀓𑀸𑀭𑀢𑁄 𑀧𑀭𑀫𑀢𑁆𑀣𑀢𑁄 𑀫𑀭𑀡’’𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀲 𑀔𑀦𑁆𑀥𑀪𑁂𑀤𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 ‘‘𑀢𑀺𑀲𑁆𑀲𑁄 𑀫𑀢𑁄, 𑀨𑀼𑀲𑁆𑀲𑁄 𑀫𑀢𑁄’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺, 𑀲𑁄 𑀪𑁂𑀤𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑀲𑁆𑀲 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 ‘‘𑀲𑀫𑁆𑀫𑀼𑀢𑀺𑀫𑀭𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀆𑀳 ‘‘𑀏𑀢𑀤𑁂𑀯 𑀲𑀫𑁆𑀫𑀼𑀢𑀺𑀫𑀭𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑁂𑀦𑀸𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀫𑁂𑀯 𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀲𑁄 𑀧𑀩𑀦𑁆𑀥𑀲𑀫𑀼𑀘𑁆𑀙𑁂𑀤𑁄 𑀳𑀺 𑀲𑀫𑀼𑀘𑁆𑀙𑁂𑀤𑀫𑀭𑀡𑀦𑁆𑀢𑀺.

𑁩𑁯𑁧. 𑀩𑁆𑀬𑀲𑀦𑁂𑀦𑀸𑀢𑀺 𑀅𑀦𑀢𑁆𑀣𑁂𑀦. ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁧) 𑀯𑀺𑀬 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀓𑀸𑀭𑀡𑁂𑀦𑀸’’𑀢𑀺. 𑀲𑁄𑀘𑀦𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀢𑀸𑀬 𑀲𑁄𑀘𑀦𑀮𑀓𑁆𑀔𑀡𑁄. 𑀲𑁄𑀘𑀺𑀢𑀲𑁆𑀲 𑀲𑁄𑀘𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀯𑀸 𑀪𑀸𑀯𑁄 𑀲𑁄𑀘𑀺𑀢𑀪𑀸𑀯𑁄. 𑀅𑀩𑁆𑀪𑀦𑁆𑀢𑀭𑁂𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑁆𑀢𑁄. 𑀅𑀢𑁆𑀢𑀦𑁄 𑀮𑀽𑀔𑀲𑀪𑀸𑀯𑀢𑀸𑀬 𑀲𑁄𑀲𑁂𑀦𑁆𑀢𑁄. 𑀣𑀸𑀫𑀕𑀫𑀦𑁂𑀦 𑀲𑀫𑀦𑁆𑀢𑀢𑁄 𑀲𑁄𑀲𑀦𑀯𑀲𑁂𑀦 𑀧𑀭𑀺𑀲𑁄𑀲𑁂𑀦𑁆𑀢𑁄.

𑁩𑁯𑁨. ‘‘𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀤𑁂𑀯𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑁂𑀯𑁄’’𑀢𑀺 𑀆𑀤𑁂𑀯𑀦-𑀲𑀤𑁆𑀤𑀁 𑀓𑀢𑁆𑀯𑀸 𑀅𑀲𑁆𑀲𑀼𑀫𑁄𑀘𑀦𑀸𑀤𑀺𑀯𑀺𑀓𑀸𑀭𑀁 𑀆𑀧𑀚𑁆𑀚𑀦𑁆𑀢𑀸𑀦𑀁 𑀢𑀩𑁆𑀩𑀺𑀓𑀸𑀭𑀸𑀧𑀢𑁆𑀢𑀺𑀬𑀸 𑀲𑁄 𑀲𑀤𑁆𑀤𑁄 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀢𑀁 𑀢𑀁 𑀯𑀡𑁆𑀡𑀦𑁆𑀢𑀺 𑀢𑀁 𑀢𑀁 𑀕𑀼𑀡𑀁. 𑀢𑀲𑁆𑀲𑁂𑀯𑀸𑀢𑀺 𑀆𑀤𑁂𑀯𑀧𑀭𑀺𑀤𑁂𑀯𑀲𑁆𑀲𑁂𑀯. 𑀪𑀸𑀯𑀦𑀺𑀤𑁆𑀤𑁂𑀲𑀸𑀢𑀺 ‘‘𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢’’𑀦𑁆𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑀸.

𑁩𑁯𑁩. 𑀦𑀺𑀲𑁆𑀲𑀬𑀪𑀽𑀢𑁄 𑀓𑀸𑀬𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀸𑀬𑀺𑀓𑀁. 𑀢𑁂𑀦𑀸𑀳 ‘‘𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓’’𑀦𑁆𑀢𑀺. 𑀤𑀼𑀓𑁆𑀓𑀭𑀁 𑀔𑀫𑀦𑀁 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀫𑀦𑀁, 𑀲𑁄 𑀏𑀯 𑀅𑀢𑁆𑀣𑁄 𑀲𑀪𑀸𑀯𑁄𑀢𑀺 𑀤𑀼𑀓𑁆𑀔𑀫𑀦𑀝𑁆𑀞𑁄, 𑀢𑁂𑀦. 𑀲𑀸𑀢𑀯𑀺𑀥𑀼𑀭𑀢𑀸𑀬 𑀅𑀲𑀸𑀢𑀁.

𑁩𑁯𑁪. 𑀘𑁂𑀢𑀲𑀺 𑀪𑀯𑀦𑁆𑀢𑀺 𑀘𑁂𑀢𑀲𑀺𑀓𑀁, 𑀢𑀁 𑀧𑀦 𑀬𑀲𑁆𑀫𑀸 𑀘𑀺𑀢𑁆𑀢𑁂𑀦 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀳 ‘‘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺.

𑁩𑁯𑁫. 𑀲𑀩𑁆𑀩𑀯𑀺𑀲𑀬𑀧𑀝𑀺𑀧𑀢𑁆𑀢𑀺𑀦𑀺𑀯𑀸𑀭𑀡𑀯𑀲𑁂𑀦 𑀲𑀫𑀦𑁆𑀢𑀢𑁄 𑀲𑀻𑀤𑀦𑀁 𑀲𑀁𑀲𑀻𑀤𑀦𑀁. 𑀉𑀝𑁆𑀞𑀸𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀓𑀭𑀡𑀯𑀲𑁂𑀦 𑀅𑀢𑀺𑀩𑀮𑀯𑀁, 𑀯𑀺𑀭𑀽𑀧𑀁 𑀯𑀸 𑀲𑀻𑀤𑀦𑀁 𑀯𑀺𑀲𑀻𑀤𑀦𑀁. 𑀘𑀺𑀢𑁆𑀢𑀓𑀺𑀮𑀫𑀣𑁄𑀢𑀺 𑀯𑀺𑀲𑀻𑀤𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀧𑀭𑀺𑀔𑁂𑀤𑁄. 𑀉𑀧𑀸𑀬𑀸𑀲𑁄, 𑀲𑀬𑀁 𑀦 𑀤𑀼𑀓𑁆𑀔𑁄 𑀤𑁄𑀲𑀢𑁆𑀢𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀦𑁆𑀢𑀭𑀢𑁆𑀢𑀸 𑀯𑀸. 𑀬𑁂 𑀧𑀦 𑀤𑁄𑀫𑀦𑀲𑁆𑀲𑀫𑁂𑀯 ‘‘𑀉𑀧𑀸𑀬𑀸𑀲𑁄’’𑀢𑀺 𑀯𑀤𑁂𑀬𑁆𑀬𑀼𑀁, 𑀢𑁂 ‘‘𑀉𑀧𑀸𑀬𑀸𑀲𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁪𑁯). 𑀇𑀫𑀸𑀬 𑀧𑀸𑀴𑀺𑀬𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀉𑀧-𑀲𑀤𑁆𑀤𑁄 𑀪𑀼𑀲𑀢𑁆𑀣𑁄𑀢𑀺 𑀆𑀳 ‘‘𑀩𑀮𑀯𑀢𑀭𑀁 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄’’𑀢𑀺. 𑀥𑀫𑁆𑀫𑀫𑀢𑁆𑀢𑀢𑀸𑀤𑀻𑀧𑀦𑁄 𑀪𑀸𑀯𑀦𑀺𑀤𑁆𑀤𑁂𑀲𑁄 𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀅𑀪𑀸𑀯𑀚𑁄𑀢𑀦𑁄, 𑀅𑀲𑀢𑀺 𑀘 𑀓𑀢𑁆𑀢𑀭𑀺 𑀢𑁂𑀦 𑀓𑀢𑁆𑀢𑀩𑁆𑀩𑀲𑁆𑀲, 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀲𑁆𑀲 𑀘 𑀅𑀪𑀸𑀯𑁄 𑀏𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀢𑁆𑀢𑀦𑀺𑀬𑀸𑀪𑀸𑀯𑀤𑀻𑀧𑀓𑀸𑀪𑀸𑀯𑀦𑀺𑀤𑁆𑀤𑁂𑀲𑀸’’𑀢𑀺.

𑁩𑁯𑁮. 𑀚𑀸𑀢𑀺𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀧𑀓𑀢𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀚𑀸𑀢𑀺𑀲𑀪𑀸𑀯𑀸𑀦’’𑀦𑁆𑀢𑀺, 𑀚𑀸𑀬𑀦𑀧𑀓𑀢𑀺𑀓𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑁆𑀕𑀪𑀸𑀯𑀦𑀸𑀬 𑀫𑀕𑁆𑀕𑀪𑀸𑀯𑀦𑀺𑀘𑁆𑀙𑀸𑀳𑁂𑀢𑀼𑀓𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀢𑀸𑀤𑀺𑀲𑀁 𑀇𑀘𑁆𑀙𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀯𑀺𑀦𑀸 𑀫𑀕𑁆𑀕𑀪𑀸𑀯𑀦’’𑀦𑁆𑀢𑀺 𑀆𑀳. 𑀅𑀧𑀭𑁄 𑀦𑀬𑁄 𑀦 𑀔𑁄 𑀧𑀦𑁂𑀢𑀦𑁆𑀢𑀺 𑀬𑀫𑁂𑀢𑀁 ‘‘𑀅𑀳𑁄 𑀯𑀢 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀸𑀢𑀺 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀳𑀻𑀦𑀲𑀫𑀼𑀤𑀬𑁂𑀲𑀼 𑀅𑀭𑀺𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑀁 𑀅𑀚𑀸𑀢𑀺𑀥𑀫𑁆𑀫𑀢𑁆𑀢𑀁, 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀘 𑀯𑀺𑀚𑁆𑀚𑀫𑀸𑀦𑀁 𑀚𑀸𑀢𑀺𑀬𑀸 𑀅𑀦𑀸𑀕𑀫𑀦𑀁 𑀇𑀘𑁆𑀙𑀺𑀢𑀁, 𑀢𑀁 𑀇𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀫𑀕𑁆𑀕𑀪𑀸𑀯𑀦𑀸𑀬 𑀯𑀺𑀦𑀸 𑀅𑀧𑁆𑀧𑀢𑁆𑀢𑀩𑁆𑀩𑀢𑁄, 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀪𑀸𑀯𑀦𑀸𑀬 𑀧𑀢𑁆𑀢𑀩𑁆𑀩𑀢𑁄 𑀦 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀓𑁆𑀔𑀫𑀸𑀦𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀉𑀧𑀭𑀺 𑀲𑁂𑀲𑀸𑀦𑀺 𑀉𑀧𑀸𑀤𑀸𑀬 𑀧𑀺-𑀓𑀸𑀭𑁄’’𑀢𑀺. 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦𑀧𑀺 𑀥𑀫𑁆𑀫𑁂𑀦𑀸’’𑀢𑀺. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄, 𑀅𑀮𑀩𑁆𑀪𑀦𑁂𑀬𑁆𑀬𑀪𑀸𑀯𑁄 𑀏𑀢𑁆𑀣 𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄. 𑀢𑀦𑁆𑀢𑀺 𑀯𑀸 𑀇𑀘𑁆𑀙𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀮𑀩𑁆𑀪𑀦𑀁, 𑀏𑀯𑀫𑁂𑀢𑁆𑀣 ‘‘𑀬𑀫𑁆𑀧𑀻𑀢𑀺 𑀬𑁂𑀦𑀧𑀻’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑀤𑀸 𑀧𑀦 𑀬𑀁-𑀲𑀤𑁆𑀤𑁄 ‘‘𑀇𑀘𑁆𑀙’’𑀦𑁆𑀢𑀺 𑀏𑀢𑀁 𑀅𑀧𑁂𑀓𑁆𑀔𑀢𑀺, 𑀢𑀤𑀸 𑀅𑀮𑀸𑀪𑀯𑀺𑀲𑀺𑀝𑁆𑀞𑀸 𑀇𑀘𑁆𑀙𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀬𑀤𑀸 𑀧𑀦 ‘‘𑀦 𑀮𑀪𑀢𑀻’’𑀢𑀺 𑀏𑀢𑀁 𑀅𑀧𑁂𑀓𑁆𑀔𑀢𑀺, 𑀢𑀤𑀸 𑀇𑀘𑁆𑀙𑀸𑀯𑀺𑀲𑀺𑀝𑁆𑀞𑁄 𑀅𑀮𑀸𑀪𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀲𑁄 𑀧𑀦 𑀅𑀢𑁆𑀣𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀕𑀢𑀸 𑀇𑀘𑁆𑀙𑀸𑀯 𑀯𑀼𑀢𑁆𑀢𑀸 𑀳𑁄𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀚𑀭𑀸𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀲𑀩𑁆𑀩𑀯𑀸𑀭𑁂𑀲𑀼.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁦. 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑁄𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 𑀫𑀦𑁄-𑀲𑀤𑁆𑀤𑀲𑁆𑀲 𑀯𑀺𑀬 𑀧𑀼𑀭𑀺𑀫𑀧𑀤𑀲𑁆𑀲 𑀑-𑀓𑀸𑀭𑀦𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀲𑀻𑀮𑀦𑀝𑁆𑀞𑁂𑀦 𑀇𑀓-𑀲𑀤𑁆𑀤𑁂𑀦 𑀕𑀫𑀺𑀢𑀢𑁆𑀣𑀢𑁆𑀢𑀸 𑀓𑀺𑀭𑀺𑀬𑀸𑀯𑀸𑀘𑀓𑀲𑁆𑀲 𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀅𑀲𑀽𑀧𑀪𑀓𑁆𑀔𑀦𑀲𑀻𑀮𑁄 𑀅𑀲𑀽𑀧𑀺𑀓𑁄’’𑀢𑀺. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀧𑀼𑀦𑀩𑁆𑀪𑀯𑀁 𑀤𑁂𑀢𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁦𑁩) 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀲𑁄 ‘‘𑀢𑀤𑁆𑀥𑀺𑀢𑀸’’ 𑀇𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀢𑁄, 𑀯𑀺𑀘𑀺𑀢𑁆𑀢𑀢𑁆𑀢𑀸 𑀯𑀸 𑀢𑀤𑁆𑀥𑀺𑀢𑀯𑀼𑀢𑁆𑀢𑀺𑀬𑀸, 𑀅𑀪𑀺𑀥𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸 𑀢𑀤𑁆𑀥𑀺𑀢𑀸𑀦𑀁 𑀢𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀧𑁄𑀦𑁄𑀩𑁆𑀪𑀯𑀺𑀓𑀲𑀤𑁆𑀤𑀲𑀺𑀤𑁆𑀥𑀺 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀢𑁆𑀣 𑀓𑀫𑁆𑀫𑀼𑀦𑀸 𑀲𑀳𑀚𑀸𑀢𑀸 𑀧𑀼𑀦𑀩𑁆𑀪𑀯𑀁 𑀤𑁂𑀢𑀺, 𑀅𑀲𑀳𑀚𑀸𑀢𑀸 𑀓𑀫𑁆𑀫𑀲𑀳𑀸𑀬𑀪𑀽𑀢𑀸 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀤𑀼𑀯𑀺𑀥𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀦𑀦𑁆𑀤𑀦𑀝𑁆𑀞𑁂𑀦, 𑀭𑀜𑁆𑀚𑀦𑀝𑁆𑀞𑁂𑀦 𑀘 𑀦𑀦𑁆𑀤𑀻𑀭𑀸𑀕𑁄, 𑀬𑁄 𑀘 𑀦𑀦𑁆𑀤𑀻𑀭𑀸𑀕𑁄, 𑀬𑀸 𑀘 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀢𑀡𑁆𑀳𑀸 ‘‘𑀦𑀦𑁆𑀤𑀻𑀭𑀸𑀕𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀫𑁂𑀯 𑀕𑀢𑀸’’𑀢𑀺 𑀯𑀼𑀢𑁆𑀢𑀸. 𑀢𑀩𑁆𑀪𑀸𑀯𑀢𑁆𑀣𑁄 𑀳𑁂𑀢𑁆𑀣 𑀲𑀳-𑀲𑀤𑁆𑀤𑁄 ‘‘𑀲𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯) 𑀯𑀺𑀬. 𑀢𑀲𑁆𑀫𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸𑀢𑀺 𑀦𑀦𑁆𑀤𑀻𑀭𑀸𑀕𑀪𑀸𑀯𑀁 𑀕𑀢𑀸 𑀲𑀩𑁆𑀩𑀸𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀦𑀦𑁆𑀤𑀻𑀭𑀸𑀕𑀪𑀸𑀯𑀲𑁆𑀲 𑀅𑀧𑀘𑁆𑀘𑀓𑁆𑀔𑀸𑀬 𑀯𑀢𑁆𑀢𑀦𑀢𑁄𑀢𑀺 𑀅𑀢𑁆𑀣𑁄. 𑀭𑀸𑀕𑀲𑀫𑁆𑀩𑀦𑁆𑀥𑁂𑀦 𑀉𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑀲𑁆𑀲 𑀯𑀺𑀲𑀼𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀓𑀸𑀫𑀪𑀯𑁂 𑀏𑀯 𑀪𑀯𑀧𑀢𑁆𑀣𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀺𑀬𑀭𑀽𑀧𑁂 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 ‘‘𑀦𑀺𑀯𑀺𑀲𑀢𑀻’’𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀼𑀲𑀬𑀯𑀲𑁂𑀦 𑀯𑀸 𑀉𑀧𑁆𑀧𑀢𑁆𑀢𑀺𑀦𑀺𑀯𑁂𑀲𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀫𑁆𑀧𑀢𑁆𑀢𑀺𑀬𑀦𑁆𑀢𑀺 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑁂, 𑀤𑁂𑀯𑀢𑁆𑀢𑁂 𑀘. 𑀅𑀢𑁆𑀢𑀦𑁄 𑀘𑀓𑁆𑀔𑀼𑀦𑁆𑀢𑀺 𑀲𑀯𑀢𑁆𑀣𑀼𑀓𑀁 𑀘𑀓𑁆𑀔𑀼𑀁 𑀯𑀤𑀢𑀺, 𑀲𑀧𑀲𑀸𑀤𑀁 𑀯𑀸 𑀫𑀁𑀲𑀧𑀺𑀡𑁆𑀟𑀁. 𑀯𑀺𑀧𑁆𑀧𑀲𑀦𑁆𑀦𑀁 𑀧𑀜𑁆𑀘𑀧𑀲𑀸𑀤𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀼𑀧𑁆𑀧𑀲𑀦𑁆𑀦𑀦𑀻𑀮𑀧𑀻𑀢𑀮𑁄𑀳𑀺𑀢𑀓𑀡𑁆𑀳𑀑𑀤𑀸𑀢𑀯𑀡𑁆𑀡𑀯𑀦𑁆𑀢𑀁. 𑀭𑀚𑀢𑀧𑀦𑀸𑀴𑀺𑀓𑀁 𑀯𑀺𑀬 𑀙𑀺𑀤𑁆𑀤𑀁 𑀅𑀩𑁆𑀪𑀦𑁆𑀢𑀭𑁂 𑀑𑀤𑀸𑀢𑀢𑁆𑀢𑀸. 𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬 𑀆𑀮𑀫𑁆𑀩𑀓𑀡𑁆𑀡𑀩𑀤𑁆𑀥𑀁. 𑀢𑀼𑀗𑁆𑀕𑀸 𑀉𑀘𑁆𑀘𑀸 𑀤𑀻𑀖𑀸 𑀦𑀸𑀲𑀺𑀓𑀸 𑀢𑀼𑀗𑁆𑀕𑀦𑀸𑀲𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀁 𑀅𑀢𑁆𑀢𑀦𑁄 𑀖𑀸𑀦𑀁. ‘‘𑀮𑀤𑁆𑀥𑀯𑁄𑀳𑀸𑀭𑀸’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀫𑀺𑀁 𑀲𑀢𑀺 𑀢𑀼𑀗𑁆𑀕𑀸 𑀦𑀸𑀲𑀸 𑀬𑁂𑀲𑀁 𑀢𑁂 𑀢𑀼𑀗𑁆𑀕𑀦𑀸𑀲𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀖𑀸𑀦𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀚𑀺𑀯𑁆𑀳𑀁…𑀧𑁂… 𑀫𑀜𑁆𑀜𑀦𑁆𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄, 𑀓𑀺𑀘𑁆𑀘𑀢𑁄 𑀘. 𑀓𑀸𑀬𑀁…𑀧𑁂… 𑀫𑀜𑁆𑀜𑀦𑁆𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸. 𑀫𑀦𑀁…𑀧𑁂… 𑀫𑀜𑁆𑀜𑀦𑁆𑀢𑀺 𑀅𑀢𑀻𑀢𑀸𑀤𑀺𑀅𑀢𑁆𑀣𑀘𑀺𑀦𑁆𑀢𑀦𑀲𑀫𑀢𑁆𑀣𑀁. 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸𑀦𑀺 𑀅𑀚𑁆𑀛𑀢𑁆𑀢𑀜𑁆𑀘 𑀲𑀭𑀻𑀭𑀕𑀦𑁆𑀥𑀸𑀤𑀻𑀦𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀮𑁂𑀧𑀦𑀕𑀦𑁆𑀥𑀸𑀤𑀻𑀦𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀺, 𑀢𑀤𑀸 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀸 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀮𑀓𑁆𑀔𑀡𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀯𑀺𑀲𑀬𑀯𑀺𑀲𑀺𑀝𑁆𑀞𑀸 𑀘 𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦. 𑀦 𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀳𑀺 𑀦𑀸𑀦𑀢𑁆𑀢𑀯𑁄𑀳𑀸𑀭𑁄 𑀦 𑀳𑁄𑀢𑀻𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀯𑀸 𑀅𑀦𑀺𑀘𑁆𑀙𑀺𑀢𑁄 𑀉𑀧𑁆𑀧𑀸𑀤𑁄 𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀙𑀺𑀢𑁄 𑀨𑀮𑀪𑀸𑀯𑁂𑀦 𑀬𑀤𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀺, 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁧. ‘‘𑀲𑀩𑁆𑀩𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀦𑀺𑀩𑁆𑀩𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀆𑀕𑀫𑁆𑀫𑀸𑀢𑀺 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸. 𑀦𑀺𑀩𑁆𑀩𑀸𑀦𑀳𑁂𑀢𑀼𑀓𑁄 𑀳𑀺 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄. 𑀔𑀬𑀕𑀫𑀦𑀯𑀲𑁂𑀦 𑀯𑀺𑀭𑀚𑁆𑀚𑀢𑀺. 𑀅𑀧𑁆𑀧𑀯𑀢𑁆𑀢𑀺𑀕𑀫𑀦𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺. 𑀅𑀦𑀧𑁂𑀓𑁆𑀔𑀢𑀸𑀬 𑀘𑀚𑀦𑀯𑀲𑁂𑀦, 𑀳𑀸𑀦𑀺𑀯𑀲𑁂𑀦 𑀯𑀸 𑀘𑀚𑀻𑀬𑀢𑀺. 𑀧𑀼𑀦 𑀬𑀣𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀣𑀸 𑀤𑀽𑀭 𑀔𑀺𑀧𑀦𑀯𑀲𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀢𑀺. 𑀩𑀦𑁆𑀥𑀦𑀪𑀽𑀢𑀸𑀬 𑀫𑁄𑀘𑀦𑀯𑀲𑁂𑀦 𑀫𑀼𑀘𑁆𑀘𑀢𑀺. 𑀅𑀲𑀁𑀓𑀺𑀮𑁂𑀲𑀯𑀲𑁂𑀦 𑀦 𑀅𑀮𑁆𑀮𑀻𑀬𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀁 𑀦𑀺𑀩𑁆𑀩𑀸𑀦𑀁 𑀏𑀓𑀫𑁂𑀯 𑀲𑀫𑀸𑀦𑀁 𑀦𑀸𑀦𑀸𑀦𑀸𑀫𑁂𑀳𑀺 𑀯𑀼𑀘𑁆𑀘𑀢𑀻𑀢𑀺? 𑀧𑀝𑀺𑀧𑀓𑁆𑀔𑀦𑀸𑀦𑀢𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀫𑁂𑀯 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀗𑁆𑀔𑀢𑀥𑀫𑁆𑀫𑀯𑀺𑀥𑀼𑀭𑀲𑀪𑀸𑀯𑀢𑁆𑀢𑀸 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀸𑀦𑀺𑀧𑀺 𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀢𑁆𑀢𑀸 𑀲𑀗𑁆𑀔𑀢𑀥𑀫𑁆𑀫𑀯𑀺𑀥𑀼𑀭𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀦𑀸𑀫𑀧𑀝𑀺𑀧𑀓𑁆𑀔𑀯𑀲𑁂𑀦𑀸’’𑀢𑀺. 𑀅𑀲𑁂𑀲𑀁 𑀯𑀺𑀭𑀚𑁆𑀚𑀢𑀺 𑀢𑀡𑁆𑀳𑀸 𑀏𑀢𑁆𑀣𑀸𑀢𑀺 𑀅𑀲𑁂𑀲𑀯𑀺𑀭𑀸𑀕𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀧𑁆𑀧𑀸𑀤𑁄, 𑀦 𑀯𑀸 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑁄𑀢𑀺 𑀅𑀦𑀼𑀧𑁆𑀧𑀸𑀤𑁄, 𑀅𑀲𑀗𑁆𑀔𑀢𑀥𑀫𑁆𑀫𑁄. ‘‘𑀅𑀧𑁆𑀧𑀯𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀬𑀽𑀳𑀦𑀁 𑀲𑀫𑀼𑀤𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑀸𑀬𑀽𑀳𑀦𑀁.

𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑁂 𑀲𑀢𑀺 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀧𑀳𑀸𑀦𑁂 𑀧𑀦 𑀲𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯𑀲𑁆𑀲𑀸 𑀅𑀪𑀸𑀯𑁄 𑀲𑀼𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀢𑀢𑁆𑀣𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀅𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀅𑀧𑀜𑁆𑀜𑀸𑀧𑀦𑀁, ‘‘𑀢𑀺𑀢𑁆𑀢 𑀅𑀮𑀸𑀩𑀼 𑀅𑀢𑁆𑀣𑀻’’𑀢𑀺 𑀯𑁄𑀳𑀸𑀭𑀸𑀪𑀸𑀯𑀁 𑀯𑀸. 𑀢𑀺𑀢𑁆𑀢𑀅𑀮𑀸𑀩𑀼𑀯𑀮𑁆𑀮𑀺𑀬𑀸 𑀅𑀧𑁆𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀢𑀲𑁆𑀲 𑀢𑀲𑁆𑀲𑀸 𑀅𑀧𑁆𑀧𑀯𑀢𑁆𑀢𑀺𑀦𑀺𑀦𑁆𑀦𑀘𑀺𑀢𑁆𑀢𑀲𑁆𑀲 𑀫𑀽𑀮𑀘𑁆𑀙𑁂𑀤𑀦𑀁 𑀯𑀺𑀬 𑀫𑀕𑁆𑀕𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀢𑀡𑁆𑀳𑀸𑀬 𑀧𑀳𑀸𑀦𑀁, 𑀢𑀤𑀧𑁆𑀧𑀯𑀢𑁆𑀢𑀺 𑀯𑀺𑀬 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁.

𑀤𑀼𑀢𑀺𑀬𑀉𑀧𑀫𑀸𑀬𑀁 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀘𑁄𑀭𑀖𑀸𑀢𑀓𑀸 𑀯𑀺𑀬 𑀫𑀕𑁆𑀕𑁄. 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀖𑀸𑀢𑀺𑀢𑀸𑀧𑀺 𑀘𑁄𑀭𑀸 𑀧𑀘𑁆𑀙𑀸 ‘‘𑀅𑀝𑀯𑀺𑀬𑀁 𑀘𑁄𑀭𑀸 𑀖𑀸𑀢𑀺𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀧𑀺 𑀢𑀡𑁆𑀳𑀸 ‘‘𑀘𑀓𑁆𑀔𑀸𑀤𑀻𑀲𑀼 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀼𑀘𑁆𑀘𑀢𑀺 𑀢𑀢𑁆𑀣 𑀓𑀺𑀘𑁆𑀘𑀓𑀭𑀡𑀸𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀸 𑀯𑀸 𑀉𑀧𑀫𑀸 𑀫𑀕𑁆𑀕𑁂𑀦 𑀦𑀺𑀭𑀼𑀤𑁆𑀥𑀸𑀬 ‘‘𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀬 ‘‘𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀏𑀢𑀸𑀲𑀁 𑀯𑀺𑀲𑁂𑀲𑁄.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁨. 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀦𑁆𑀢𑀺 𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀸𑀯𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁, 𑀅𑀜𑁆𑀜𑀲𑁆𑀲 𑀯𑀸 𑀫𑀕𑁆𑀕𑀪𑀸𑀯𑀧𑀝𑀺𑀓𑁆𑀔𑁂𑀧𑁄 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑁄, 𑀢𑀤𑀢𑁆𑀣𑀁. ‘‘𑀅𑀬’’𑀦𑁆𑀢𑀺 𑀧𑀦 𑀅𑀢𑁆𑀢𑀦𑁄, 𑀢𑁂𑀲𑀼 𑀘 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑀸𑀦𑀁 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀘𑀦𑀁. 𑀆𑀭𑀓𑀢𑁆𑀢𑀸𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀭𑀺𑀬𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳. 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸𑀢𑀺 𑀅𑀭𑀺𑀬𑀓𑀭𑀡𑁄 𑀅𑀭𑀺𑀬𑁄𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀧𑀼𑀕𑁆𑀕𑀮𑀲𑁆𑀲 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀅𑀭𑀺𑀬𑀁 𑀓𑀭𑁄𑀢𑀻𑀢𑀺 𑀯𑀸 𑀅𑀭𑀺𑀬𑁄, 𑀅𑀭𑀺𑀬𑀨𑀮𑀧𑀝𑀺𑀮𑀸𑀪𑀓𑀭𑀢𑁆𑀢𑀸 𑀯𑀸 𑀅𑀭𑀺𑀬𑀁 𑀨𑀮𑀁 𑀮𑀪𑀸𑀧𑁂𑀢𑀺 𑀚𑀦𑁂𑀢𑀻𑀢𑀺 𑀅𑀭𑀺𑀬𑁄. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀲𑁂𑀦, 𑀧𑀘𑁆𑀙𑀺𑀫𑁂𑀦 𑀨𑀮𑀯𑀲𑁂𑀦 𑀅𑀭𑀺𑀬𑀦𑀸𑀫𑀮𑀸𑀪𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀯𑀳𑀁 𑀓𑀫𑁆𑀫𑀝𑁆𑀞𑀸𑀦𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁, 𑀘𑀢𑀼𑀲𑀘𑁆𑀘𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀁 𑀪𑀸𑀯𑀦𑀸𑀓𑀫𑁆𑀫𑀁 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀞𑀸𑀦𑀪𑀽𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁 𑀦𑀺𑀯𑀢𑁆𑀢𑀺𑀢𑀤𑀥𑀺𑀕𑀫𑀼𑀧𑀸𑀬𑀪𑀸𑀯𑀢𑁄. 𑀯𑀝𑁆𑀝𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀲𑀭𑀽𑀧𑀢𑁄 𑀧𑀭𑀺𑀕𑁆𑀕𑀳𑀲𑀩𑁆𑀪𑀸𑀯𑀢𑁄. 𑀯𑀺𑀯𑀝𑁆𑀝𑁂 𑀦𑀢𑁆𑀣𑀺 𑀅𑀯𑀺𑀲𑀬𑀢𑁆𑀢𑀸, 𑀯𑀺𑀲𑀬𑀢𑁆𑀢𑁂 𑀘 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀝𑁆𑀞𑀸𑀦𑀧𑀸𑀴𑀺𑀬𑀸 𑀳𑀺 𑀢𑀤𑀢𑁆𑀣𑀲𑀮𑁆𑀮𑀓𑁆𑀔𑀡𑁂𑀦 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀢𑁂𑀦𑀸𑀳 ‘‘𑀯𑀸𑀘𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄’’𑀢𑀺. 𑀇𑀝𑁆𑀞𑀁 𑀓𑀦𑁆𑀢𑀦𑁆𑀢𑀺 𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀅𑀪𑀺𑀦𑀦𑁆𑀤𑀦𑀁, 𑀢𑀦𑁆𑀦𑀺𑀦𑁆𑀦𑀪𑀸𑀯𑁄𑀬𑁂𑀯 𑀘 𑀢𑀢𑁆𑀣 𑀓𑀫𑁆𑀫𑀓𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀏𑀓𑀧𑀝𑀺𑀯𑁂𑀥𑁂𑀦𑁂𑀯𑀸𑀢𑀺 𑀏𑀓𑀜𑀸𑀡𑁂𑀦𑁂𑀯 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀧𑀝𑀺𑀯𑁂𑀥𑁄 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀯𑀺𑀲𑀬𑁂 𑀦𑀺𑀲𑁆𑀲𑀗𑁆𑀕𑀘𑀸𑀭𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀺𑀚𑁆𑀛𑀦𑀁. 𑀅𑀪𑀺𑀲𑀫𑀬𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀺𑀲𑀬𑀲𑁆𑀲 𑀅𑀥𑀺𑀕𑀫𑀲𑀗𑁆𑀔𑀸𑀢𑁄 𑀅𑀯𑀩𑁄𑀥𑁄. ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄, 𑀢𑁂𑀦. 𑀇𑀤𑀜𑁆𑀘 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀫𑀕𑁆𑀕𑀜𑀸𑀡𑀲𑁆𑀲 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁪𑁮𑁪; 𑁩.𑁧𑁦𑁪) 𑀧𑀯𑀢𑁆𑀢𑀦𑀢𑁄. 𑀧𑀳𑀻𑀦𑀲𑁆𑀲 𑀧𑀼𑀦 𑀅𑀧𑁆𑀧𑀳𑀸𑀢𑀩𑁆𑀩𑀢𑀸𑀬 𑀧𑀓𑀝𑁆𑀞𑀁 𑀳𑀸𑀦𑀁 𑀘𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁, 𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀳𑀸𑀦𑀧𑀝𑀺𑀯𑁂𑀥𑁄, 𑀢𑁂𑀦. 𑀅𑀬𑀫𑁆𑀧𑀺 𑀬𑀲𑁆𑀫𑀺𑀁 𑀓𑀺𑀮𑁂𑀲𑁂 𑀅𑀧𑁆𑀧𑀳𑀻𑀬𑀫𑀸𑀦𑁂 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀪𑀯𑀺𑀢𑀩𑁆𑀩𑀁, 𑀅𑀲𑀢𑀺 𑀘 𑀫𑀕𑁆𑀕𑀪𑀸𑀯𑀦𑀸𑀬 𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀓𑀺𑀮𑁂𑀲𑀲𑁆𑀲 𑀧𑀝𑀺𑀖𑀸𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑀲𑁆𑀲 𑀜𑀸𑀡𑀲𑁆𑀲 𑀢𑀣𑀸𑀧𑀯𑀢𑁆𑀢𑀺𑀬𑀁 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀦𑀺𑀲𑁆𑀲𑀗𑁆𑀕𑀘𑀸𑀭𑀁 𑀉𑀧𑀸𑀤𑀸𑀬 𑀏𑀯𑀁 𑀯𑀼𑀢𑁆𑀢𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀼𑀜𑁆𑀘𑀺𑀢𑁆𑀯𑀸 𑀲𑀭𑀽𑀧𑀢𑁄 𑀆𑀭𑀫𑁆𑀫𑀡𑀓𑀭𑀡𑀁 ‘‘𑀇𑀤𑀁 𑀢’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀕𑀳𑀡𑀁, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄, 𑀢𑁂𑀦. 𑀅𑀬𑀁 𑀧𑀦𑀲𑁆𑀲 𑀆𑀯𑀭𑀡𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀜𑀸𑀡𑀁 𑀦𑀺𑀭𑁄𑀥𑀁 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀢𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁄. 𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸, 𑀯𑀟𑁆𑀠𑀦𑀸 𑀘. 𑀢𑀢𑁆𑀣 𑀧𑀞𑀫𑀫𑀕𑁆𑀕𑁂 𑀉𑀧𑁆𑀧𑀸𑀤𑀦𑀝𑁆𑀞𑁂𑀦, 𑀤𑀼𑀢𑀺𑀬𑀸𑀤𑀻𑀲𑀼 𑀯𑀟𑁆𑀠𑀦𑀝𑁆𑀞𑁂𑀦, 𑀉𑀪𑀬𑀢𑁆𑀣𑀸𑀧𑀺 𑀯𑀸 𑀉𑀪𑀬𑀣𑀸𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀞𑀫𑀫𑀕𑁆𑀕𑁂𑀧𑀺 𑀳𑀺 𑀬𑀣𑀸𑀭𑀳𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀁 𑀧𑀯𑀢𑁆𑀢𑀁 𑀧𑀭𑀺𑀚𑀸𑀦𑀦𑀸𑀤𑀺𑀁 𑀯𑀟𑁆𑀠𑁂𑀦𑁆𑀢𑁄 𑀧𑀯𑀢𑁆𑀢𑁄𑀢𑀺 𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄, 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀲𑀸𑀥𑀦𑀢𑁄 𑀘 𑀉𑀧𑁆𑀧𑀸𑀤𑀦𑀝𑁆𑀞𑁂𑀦 𑀪𑀸𑀯𑀦𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀪𑀸𑀯𑀦𑀸𑀧𑀝𑀺𑀯𑁂𑀥𑁄, 𑀢𑁂𑀦. 𑀅𑀬𑀫𑁆𑀧𑀺 𑀳𑀺 𑀬𑀣𑀸 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀫𑀕𑁆𑀕𑀥𑀫𑁆𑀫𑀸𑀦𑀁 𑀲𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄.

𑀢𑀺𑀝𑁆𑀞𑀦𑁆𑀢𑀼 𑀢𑀸𑀯 𑀬𑀣𑀸𑀥𑀺𑀕𑀢𑀸 𑀫𑀕𑁆𑀕𑀥𑀫𑁆𑀫𑀸, 𑀬𑀣𑀸𑀧𑀯𑀢𑁆𑀢𑁂𑀲𑀼 𑀨𑀮𑀥𑀫𑁆𑀫𑁂𑀲𑀼𑀧𑀺 𑀅𑀬𑀁 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑁂𑀲𑀼 𑀯𑀺𑀬 𑀯𑀺𑀕𑀢𑀲𑀫𑁆𑀫𑁄𑀳𑁄𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 (𑀫𑀳𑀸𑀯. 𑁧𑁮; 𑀤𑀻. 𑀦𑀺. 𑁧.𑁨𑁯𑁯; 𑀫. 𑀦𑀺. 𑁨.𑁬𑁯) 𑀬𑀢𑁄 𑀲𑀘𑀲𑁆𑀲 𑀥𑀫𑁆𑀫𑀢𑀸𑀲𑀜𑁆𑀘𑁄𑀤𑀺𑀢𑀸 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑀸𑀮𑀫𑁆𑀩𑀦𑀺𑀬𑁄 𑀫𑀕𑁆𑀕𑀯𑀻𑀣𑀺𑀢𑁄 𑀧𑀭𑀢𑁄 𑀫𑀕𑁆𑀕𑀨𑀮𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀦𑁆𑀢𑀺, 𑀤𑀼𑀓𑁆𑀔𑀲𑀘𑁆𑀘𑀫𑁆𑀫𑁄𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄. 𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 ‘‘𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀻𑀢𑀺 𑀏𑀢𑁆𑀣𑀸𑀳 𑀯𑀺𑀢𑀡𑁆𑀟𑀯𑀸𑀤𑀻 ‘‘𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀓𑀺𑀘𑁆𑀘𑀓𑀭’’𑀦𑁆𑀢𑀺, 𑀲𑁄 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁨𑁭𑁪) 𑀑𑀥𑀺𑀲𑁄𑀓𑀣𑀸𑀬 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀇𑀤𑀸𑀦𑀺 𑀢𑀫𑁂𑀯 𑀏𑀓𑀸𑀪𑀺𑀲𑀫𑀬𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀯𑀫𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀼𑀩𑁆𑀩𑀪𑀸𑀕𑁂…𑀧𑁂… 𑀧𑀝𑀺𑀯𑁂𑀥𑁄 𑀳𑁄𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀝𑀺𑀯𑁂𑀥𑁄 𑀧𑀼𑀩𑁆𑀩𑀪𑀸𑀕𑀺𑀬𑁄 𑀦 𑀳𑁄𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄, 𑀇𑀥 𑀧𑀦 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀯𑀩𑁄𑀥𑁄 𑀧𑀭𑀺𑀬𑀸𑀬𑀢𑁄 𑀢𑀣𑀸 𑀯𑀼𑀢𑁆𑀢𑁄. 𑀧𑀝𑀺𑀯𑁂𑀥𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀸 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀤𑀼𑀓𑁆𑀔𑀸𑀤𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀜𑀸𑀡𑀁 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀝𑀺𑀯𑀺𑀚𑁆𑀛𑀦𑀲𑀪𑀸𑀯𑀁. 𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂𑀳𑀺 𑀤𑀼𑀓𑁆𑀔𑀸𑀤𑀺𑀜𑀸𑀡𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀇𑀥 𑀦𑀺𑀧𑁆𑀨𑀢𑁆𑀢𑀺𑀢𑁄, 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑀢𑁄, 𑀧𑀭𑀺𑀜𑁆𑀜𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀫𑀸𑀳. 𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀉𑀕𑁆𑀕𑀳𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼 𑀦 𑀯𑀼𑀢𑁆𑀢𑀸 𑀅𑀦𑀯𑀲𑀭𑀢𑁆𑀢𑀸. 𑀅𑀥𑀺𑀕𑀫𑁂 𑀳𑀺 𑀲𑀢𑀺 𑀢𑀲𑁆𑀲𑀸 𑀲𑀺𑀬𑀸 𑀅𑀯𑀲𑀭𑁄.

𑀢𑀁𑀬𑁂𑀯 𑀳𑀺 𑀅𑀦𑀯𑀲𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀧𑀭𑀺𑀕𑁆𑀕𑀳𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀢𑁄 𑀧𑀼𑀩𑁆𑀩𑁂. 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀜𑁆𑀳𑀺 𑀧𑀭𑀺𑀕𑁆𑀕𑀳𑁄. 𑀢𑀣𑀸 𑀢𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑀢𑁄 𑀫𑀦𑀲𑀺𑀓𑀸𑀭𑀤𑀴𑁆𑀳𑀢𑀸𑀬 𑀧𑀼𑀩𑁆𑀩𑀪𑀸𑀕𑀺𑀬𑀸 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀤𑀬𑁄 𑀳𑁄𑀦𑁆𑀢𑀺 𑀬𑁂𑀯𑀸𑀢𑀺 𑀆𑀳 ‘‘𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀳𑁄𑀢𑀻’’𑀢𑀺. 𑀅𑀧𑀭𑀪𑀸𑀕𑁂𑀢𑀺 𑀫𑀕𑁆𑀕𑀓𑁆𑀔𑀡𑁂. 𑀤𑀼𑀤𑁆𑀤𑀲𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑀯𑀲𑁂𑀦 𑀧𑀸𑀓𑀝𑀸𑀦𑀺𑀧𑀺 𑀧𑀓𑀢𑀺𑀜𑀸𑀡𑁂𑀦 𑀲𑀪𑀸𑀯𑀭𑀲𑀢𑁄 𑀤𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀕𑀫𑁆𑀪𑀻𑀭𑁂𑀦𑁂𑀯 𑀘 𑀪𑀸𑀯𑀦𑀸𑀜𑀸𑀡𑁂𑀦, 𑀢𑀣𑀸𑀧𑀺 𑀫𑀢𑁆𑀣𑀓𑀧𑁆𑀧𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦𑁂𑀯 𑀬𑀸𑀣𑀸𑀯𑀢𑁄 𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺. 𑀢𑁂𑀦𑀸𑀳 ‘‘𑀮𑀓𑁆𑀔𑀡𑀧𑀝𑀺𑀯𑁂𑀥𑀢𑁄 𑀧𑀦 𑀉𑀪𑀬𑀫𑁆𑀧𑀺 𑀕𑀫𑁆𑀪𑀻𑀭’’𑀦𑁆𑀢𑀺. 𑀇𑀢𑀭𑀸𑀦𑀺 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀢𑀸𑀬 𑀅𑀘𑁆𑀘𑀦𑁆𑀢𑀲𑀼𑀔𑀧𑁆𑀧𑀢𑁆𑀢𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀪𑀯𑀢𑀸𑀬, 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑀸𑀬 𑀘 𑀧𑀯𑀢𑁆𑀢𑀺𑀯𑀲𑁂𑀦 𑀅𑀧𑀸𑀓𑀝𑀢𑁆𑀢𑀸 𑀘 𑀧𑀭𑀫𑀕𑀫𑁆𑀪𑀻𑀭𑀢𑁆𑀢𑀸, 𑀢𑀣𑀸 𑀧𑀭𑀫𑀕𑀫𑁆𑀪𑀻𑀭𑀜𑀸𑀡𑁂𑀦𑁂𑀯 𑀧𑀲𑁆𑀲𑀺𑀢𑀩𑁆𑀩𑀢𑀸𑀬 𑀧𑀓𑀢𑀺𑀜𑀸𑀡𑁂𑀦 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀻𑀢𑀺 𑀤𑀼𑀤𑁆𑀤𑀲𑀸𑀦𑀺. 𑀢𑁂𑀦𑀸𑀳 ‘‘𑀇𑀢𑀭𑁂𑀲𑀁 𑀧𑀦𑀸’’𑀢𑀺𑀆𑀤𑀺. 𑀧𑀬𑁄𑀕𑁄𑀢𑀺 𑀓𑀺𑀭𑀺𑀬𑀸, 𑀯𑀸𑀬𑀸𑀫𑁄 𑀯𑀸. 𑀢𑀲𑁆𑀲 𑀫𑀳𑀦𑁆𑀢𑀢𑀭𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑀁, 𑀤𑀼𑀓𑁆𑀓𑀭𑀢𑀭𑀢𑀜𑁆𑀘 𑀉𑀧𑀫𑀸𑀳𑀺 𑀤𑀲𑁆𑀲𑁂𑀢𑀺 ‘‘𑀪𑀯𑀕𑁆𑀕𑀕𑁆𑀕𑀳𑀡𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸. 𑀧𑀝𑀺𑀯𑁂𑀥𑀓𑁆𑀔𑀡𑁂𑀢𑀺 𑀅𑀭𑀺𑀬𑀲𑁆𑀲 𑀫𑀕𑁆𑀕𑀲𑁆𑀲 𑀘𑀢𑀼𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀓𑁆𑀔𑀡𑁂. 𑀏𑀓𑀫𑁂𑀯 𑀢𑀁 𑀜𑀸𑀡𑀦𑁆𑀢𑀺 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀏𑀓𑀫𑁂𑀯 𑀢𑀁 𑀫𑀕𑁆𑀕𑀜𑀸𑀡𑀁 𑀳𑁄𑀢𑀺.

𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀇𑀫𑁂𑀲𑀼 𑀯𑀺𑀭𑀫𑀺𑀢𑀩𑁆𑀩𑀢𑀸𑀯𑀲𑁂𑀦 𑀚𑁄𑀢𑀺𑀢𑁂𑀲𑀼 𑀢𑀻𑀲𑀼 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀢𑁆𑀣𑀽𑀲𑀼. 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁆𑀧𑀦𑁆𑀦𑀲𑁆𑀲 𑀢𑀺𑀯𑀺𑀥𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀲𑁆𑀲. 𑀧𑀤𑀧𑀘𑁆𑀙𑁂𑀤𑀢𑁄𑀢𑀺 𑀏𑀢𑁆𑀣 𑀕𑀢𑀫𑀕𑁆𑀕𑁄 ‘‘𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑁂𑀦 𑀘 𑀉𑀧𑀸𑀬𑁂𑀦 𑀓𑀸𑀭𑀡𑁂𑀦 𑀓𑀸𑀫𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀲𑁆𑀲 𑀕𑀢𑀫𑀕𑁆𑀕𑁄𑀢𑀺 𑀢𑀲𑁆𑀲 𑀧𑀘𑁆𑀙𑁂𑀤𑁄 𑀖𑀸𑀢𑁄 𑀧𑀤𑀧𑀘𑁆𑀙𑁂𑀤𑁄, 𑀢𑀢𑁄 𑀧𑀤𑀧𑀘𑁆𑀙𑁂𑀤𑀢𑁄. 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀁, 𑀢𑀲𑁆𑀲 𑀯𑀲𑁂𑀦. 𑀫𑀕𑁆𑀕𑀓𑀺𑀘𑁆𑀘𑀲𑀸𑀥𑀦𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀏𑀓𑁄𑀯 𑀢𑀺𑀯𑀺𑀥𑀓𑀺𑀘𑁆𑀘𑀲𑀸𑀥𑀦𑁄 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀺𑀯𑀺𑀥𑀸𑀓𑀼𑀲𑀮𑀲𑀗𑁆𑀓𑀧𑁆𑀧𑀲𑀫𑀼𑀘𑁆𑀙𑁂𑀤𑀦𑀫𑁂𑀯 𑀳𑁂𑀢𑁆𑀣 𑀢𑀺𑀯𑀺𑀥𑀓𑀺𑀘𑁆𑀘𑀲𑀸𑀥𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 ‘‘𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀽’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀬𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩) 𑀯𑀺𑀭𑀢𑀺𑀘𑁂𑀢𑀦𑀸, 𑀲𑀩𑁆𑀩𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀆𑀕𑀢𑀸𑀦𑀻𑀢𑀺 𑀢𑀢𑁆𑀣 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁦𑁩) 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑁂𑀘𑀺 ‘‘𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀺𑀲𑀼𑀡𑀯𑀸𑀘𑀸 𑀯𑁂𑀭𑀫𑀡𑀺𑀆𑀤𑀻𑀦𑀁𑀬𑁂𑀯 𑀲𑀗𑁆𑀕𑀳𑁄, 𑀅𑀣 𑀔𑁄 𑀢𑀸𑀤𑀺𑀲𑀸𑀦𑀁 𑀘𑁂𑀢𑀦𑀸𑀦𑀫𑁆𑀧𑀺 𑀲𑀗𑁆𑀕𑀳𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀬𑀼𑀚𑁆𑀚𑁂𑀬𑁆𑀬, 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄, 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘 𑀘𑁂𑀢𑀦𑀸𑀬𑁄 𑀬𑁄𑀚𑁂𑀢𑀩𑁆𑀩𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯 𑀇𑀘𑁆𑀙𑀺𑀢𑀩𑁆𑀩𑀸 𑀘𑁂𑀢𑀦𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸. 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬, 𑀏𑀓𑀸𑀬 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀲𑀪𑀸𑀯𑀸𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄, 𑀢𑀁𑀲𑀺𑀤𑁆𑀥𑀺𑀬𑀁 𑀅𑀗𑁆𑀕𑀢𑁆𑀢𑀬𑀢𑀸𑀲𑀺𑀤𑁆𑀥𑀺𑀢𑁄 𑀘.

𑀪𑀺𑀓𑁆𑀔𑀼𑀲𑁆𑀲 𑀆𑀚𑀻𑀯𑀳𑁂𑀢𑀼𑀓𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀅𑀬𑁄𑀦𑀺𑀲𑁄 𑀆𑀳𑀸𑀭𑀧𑀭𑀺𑀬𑁂𑀲𑀦𑀳𑁂𑀢𑀼𑀓𑀫𑁂𑀯 𑀲𑀺𑀬𑀸𑀢𑀺 𑀆𑀳 ‘‘𑀔𑀸𑀤𑀦𑀻𑀬…𑀧𑁂… 𑀤𑀼𑀘𑁆𑀘𑀭𑀺𑀢’’𑀦𑁆𑀢𑀺. 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑀜𑁆𑀘 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀬𑁂𑀯 𑀆𑀚𑀻𑀯𑀧𑀓𑁄𑀧𑁄, 𑀦 𑀫𑀦𑁄𑀤𑁆𑀯𑀸𑀭𑁂𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀇𑀫𑁂𑀲𑀼𑀬𑁂𑀯 𑀲𑀢𑁆𑀢𑀲𑀼 𑀞𑀸𑀦𑁂𑀲𑀽’’𑀢𑀺.

𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸 𑀅𑀦𑀼𑀧𑁆𑀧𑀦𑁆𑀦𑀸𑀦𑀁. 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫 𑀦 𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀓𑀲𑁆𑀫𑀺𑀁 𑀪𑀯𑁂’’𑀢𑀺𑀆𑀤𑀺. 𑀬𑀲𑁆𑀫𑀺𑀁 𑀪𑀯𑁂 𑀅𑀬𑀁 𑀇𑀫𑀁 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀢𑀲𑁆𑀫𑀺𑀁 𑀏𑀓𑀲𑁆𑀫𑀺𑀁 𑀪𑀯𑁂.𑀚𑀦𑁂𑀢𑀻𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀢𑀸𑀤𑀺𑀲𑀁 𑀙𑀦𑁆𑀤𑀁 𑀓𑀼𑀭𑀼𑀫𑀸𑀦𑁄 𑀏𑀯𑀁 𑀙𑀦𑁆𑀤𑀁 𑀚𑀦𑁂𑀢𑀺 𑀦𑀸𑀫. 𑀯𑀸𑀬𑀸𑀫𑀁 𑀓𑀭𑁄𑀢𑀻𑀢𑀺 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀧𑀓𑀸𑀭𑀢𑁄 𑀯𑀢𑁆𑀢𑁂𑀢𑀺. 𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀧𑀕𑁆𑀕𑀳𑀺𑀢𑀁 𑀓𑀭𑁄𑀢𑀻𑀢𑀺 𑀢𑁂𑀦𑁂𑀯 𑀲𑀳𑀚𑀸𑀢𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀓𑁄𑀲𑀚𑁆𑀚𑀧𑀸𑀢𑀢𑁄 𑀦𑀺𑀲𑁂𑀥𑀦𑁂𑀦 𑀧𑀕𑁆𑀕𑀳𑀺𑀢𑀁 𑀓𑀭𑁄𑀢𑀺. 𑀧𑀤𑀳𑀦𑀁 𑀧𑀯𑀢𑁆𑀢𑁂𑀢𑀻𑀢𑀺 𑀧𑀥𑀸𑀦𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀧𑀝𑀺𑀧𑀸𑀝𑀺𑀬𑀸 𑀧𑀦𑁂𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀆𑀲𑁂𑀯𑀦𑀸𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀦𑀦𑁆𑀢𑀺 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀺, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀢𑀸𑀤𑀺𑀲𑁂’’𑀢𑀺. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀸𑀬. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀲𑀜𑁆𑀘 𑀉𑀧𑁆𑀧𑀸𑀤𑁄 𑀦𑀸𑀫 𑀅𑀥𑀺𑀕𑀫𑁄 𑀧𑀝𑀺𑀮𑀸𑀪𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀼𑀧𑁆𑀧𑀸𑀤𑁄 𑀅𑀧𑁆𑀧𑀝𑀺𑀮𑀸𑀪𑁄𑀢𑀺 𑀆𑀳 ‘‘𑀅𑀧𑁆𑀧𑀝𑀺𑀮𑀤𑁆𑀥𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦’’𑀦𑁆𑀢𑀺. ‘‘𑀞𑀺𑀢𑀺𑀬𑀸 𑀯𑀻𑀭𑀺𑀬𑀁 𑀆𑀭𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀦 𑀔𑀡𑀞𑀺𑀢𑀺 𑀅𑀥𑀺𑀧𑁆𑀧𑁂𑀢𑀸 𑀢𑀤𑀢𑁆𑀣𑀁 𑀯𑀻𑀭𑀺𑀬𑀸𑀭𑀩𑁆𑀪𑁂𑀦 𑀧𑀬𑁄𑀚𑀦𑀸𑀪𑀸𑀯𑀢𑁄, 𑀅𑀣 𑀔𑁄 𑀧𑀩𑀦𑁆𑀥𑀞𑀺𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀧𑀩𑀦𑁆𑀥𑀯𑀲𑁂𑀦 𑀞𑀺𑀢𑀢𑁆𑀣’’𑀦𑁆𑀢𑀺. 𑀲𑀫𑁆𑀫𑀼𑀲𑁆𑀲𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀯𑀲𑁂𑀦 𑀅𑀤𑀲𑁆𑀲𑀦𑀫𑀼𑀧𑀕𑀫𑀦𑀦𑁆𑀢𑀺 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀲𑀫𑁆𑀫𑀼𑀲𑁆𑀲𑀦𑀁 𑀅𑀲𑀫𑁆𑀫𑁄𑀲𑁄𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀯𑀺𑀦𑀸𑀲𑀦𑀢𑁆𑀣’’𑀦𑁆𑀢𑀺. 𑀪𑀺𑀬𑁆𑀬𑁄𑀪𑀸𑀯𑁄 𑀧𑀼𑀦𑀧𑁆𑀧𑀼𑀦𑀁 𑀪𑀯𑀦𑀁, 𑀲𑁄 𑀧𑀦 𑀉𑀧𑀭𑀽𑀧𑀭𑀺 𑀉𑀧𑁆𑀧𑀢𑁆𑀢𑀻𑀢𑀺 𑀆𑀳 ‘‘𑀉𑀧𑀭𑀺𑀪𑀸𑀯𑀸𑀬𑀸’’𑀢𑀺. 𑀯𑁂𑀧𑀼𑀮𑁆𑀮𑀁 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀬𑀸 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬𑀸’’𑀢𑀺, 𑀫𑀳𑀦𑁆𑀢𑀪𑀸𑀯𑀸𑀬𑀸𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀬 𑀧𑀭𑀺𑀧𑀽𑀭𑀡𑀢𑁆𑀣𑀦𑁆𑀢𑀺 𑀛𑀸𑀦𑀸𑀤𑀺𑀪𑀸𑀯𑀦𑀸𑀧𑀭𑀺𑀩𑁆𑀭𑀽𑀳𑀦𑀢𑁆𑀣𑀁.

𑀘𑀢𑀽𑀲𑀼 𑀞𑀸𑀦𑁂𑀲𑀽𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀓𑀺𑀘𑁆𑀘𑀲𑁆𑀲 𑀏𑀓𑀚𑁆𑀛𑀁 𑀦𑀺𑀧𑁆𑀨𑀸𑀤𑀦𑀯𑀲𑁂𑀦.

𑀛𑀸𑀦𑀸𑀦𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀦𑀸𑀦𑀸𑀢𑀺 𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀩𑁆𑀭𑀽𑀳𑀦𑀲𑀦𑁆𑀢𑀲𑀼𑀔𑀲𑀪𑀸𑀯𑁂𑀳𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀪𑀸𑀯𑀦𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑁆𑀧𑀳𑀸𑀦𑀘𑀢𑀼𑀲𑀢𑀺𑀓𑀺𑀘𑁆𑀘𑀁, 𑀏𑀓𑁄 𑀲𑀫𑀸𑀥𑀺 𑀘𑀢𑀼𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀺, 𑀢𑀣𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂 𑀧𑀻𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀫𑀕𑁆𑀕𑀯𑀲𑁂𑀦𑀸𑀢𑀺 𑀧𑀞𑀫𑀫𑀕𑁆𑀕𑀸𑀤𑀺𑀦𑀸𑀦𑀸𑀫𑀕𑁆𑀕𑀯𑀲𑁂𑀦 𑀛𑀸𑀦𑀸𑀦𑀺 𑀦𑀸𑀦𑀸. 𑀤𑀼𑀢𑀺𑀬𑀸𑀤𑀬𑁄𑀧𑀺 𑀫𑀕𑁆𑀕𑀸 𑀤𑀼𑀢𑀺𑀬𑀸𑀤𑀻𑀦𑀁 𑀛𑀸𑀦𑀸𑀦𑀁. 𑀅𑀬𑀁 𑀧𑀦𑀲𑁆𑀲𑀸𑀢𑀺 𑀏𑀢𑁆𑀣 𑀫𑀕𑁆𑀕𑀪𑀸𑀯𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 ‘‘𑀅𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀅𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀧𑀦 𑀅𑀬𑀁 𑀛𑀸𑀦𑀯𑀲𑁂𑀦 𑀲𑀩𑁆𑀩𑀲𑀤𑀺𑀲𑀲𑀩𑁆𑀩𑀸𑀲𑀤𑀺𑀲𑁂𑀓𑀘𑁆𑀘𑀲𑀤𑀺𑀲𑀢𑀸 𑀯𑀺𑀲𑁂𑀲𑁄.

𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀳𑁄𑀢𑀻𑀢𑀺 𑀇𑀥 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑀁 𑀥𑀼𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺𑀪. 𑀅𑀝𑁆𑀞. 𑁨𑁦𑁫). 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁩𑁫𑁦) 𑀧𑀦 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑁄 𑀲𑀩𑁆𑀩𑀯𑀸𑀤𑀸𑀯𑀺𑀭𑁄𑀥𑀢𑁄, 𑀇𑀥 𑀧𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀸𑀤𑀦𑀺𑀯𑀢𑁆𑀢𑀦𑀢𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁄 𑀯𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀧𑀦 𑀲𑀸𑀥𑀸𑀭𑀡𑀢𑁆𑀢𑀸 𑀇𑀥𑀸𑀧𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑁂 𑀘 𑀆𑀘𑀭𑀺𑀬𑀯𑀸𑀤𑀸 𑀧𑀭𑀢𑁄 𑀯𑀓𑁆𑀔𑀫𑀸𑀦𑀸 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀢𑀸𑀯 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑀁 𑀯𑀺𑀪𑀚𑀦𑁆𑀢𑁄 𑀆𑀳 ‘‘𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀢𑀸𑀯𑀸’’𑀢𑀺. 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀬𑀲𑁆𑀫𑀸 𑀆𑀲𑀦𑁆𑀦𑀧𑀤𑁂𑀲𑁂 𑀯𑀼𑀝𑁆𑀞𑀺𑀢𑀲𑀫𑀸𑀧𑀢𑁆𑀢𑀺 𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑁄 𑀲𑀤𑀺𑀲𑀪𑀸𑀯𑀁 𑀓𑀭𑁄𑀢𑀺 𑀪𑀽𑀫𑀺𑀯𑀡𑁆𑀡𑁄 𑀯𑀺𑀬 𑀕𑁄𑀥𑀸𑀯𑀡𑁆𑀡𑀲𑁆𑀲. 𑀧𑀭𑀺𑀧𑀼𑀡𑁆𑀡𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀅𑀝𑁆𑀞 𑀲𑀢𑁆𑀢 𑀘 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢 𑀳𑁄𑀦𑁆𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀅𑀪𑀸𑀯𑀢𑁄. 𑀙 𑀳𑁄𑀦𑁆𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀪𑀸𑀯𑀢𑁄. 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀢𑁆𑀢𑀙𑀪𑀸𑀯𑀁 𑀅𑀢𑀺𑀤𑀺𑀲𑀢𑀺 ‘‘𑀏𑀲 𑀦𑀬𑁄’’𑀢𑀺. 𑀅𑀭𑀽𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁…𑀧𑁂… 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀢𑀢𑁆𑀣 ‘‘𑀅𑀭𑀽𑀧𑁂 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁩𑁫𑁦) 𑀯𑀼𑀢𑁆𑀢𑀁, 𑀦 ‘‘𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦’’𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑁂𑀲𑀼 𑀧𑀦 𑀲𑀁𑀲𑀬𑁄 𑀅𑀢𑁆𑀣𑀺, 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦, 𑀢𑁂𑀦 𑀅𑀢𑁆𑀣𑀢𑁄 ‘‘𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀼𑀤𑀸𑀬𑀜𑁆𑀘 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀦 𑀮𑁄𑀓𑀺𑀬’’𑀦𑁆𑀢𑀺 𑀆𑀳 ‘‘𑀅𑀯𑀬𑀯𑁂𑀓𑀢𑁆𑀢𑀁 𑀮𑀺𑀗𑁆𑀕𑀲𑀫𑀼𑀤𑀸𑀬𑀲𑁆𑀲 𑀯𑀺𑀲𑁂𑀲𑀓𑀁 𑀳𑁄𑀢𑀻’’𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀳𑀺 𑀢𑀢𑁆𑀣 𑀮𑁄𑀓𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀢𑀼𑀓𑁆𑀓𑀁, 𑀧𑀜𑁆𑀘𑀓𑀁 𑀯𑀸𑀢𑀺. 𑀏𑀢𑁆𑀣 𑀓𑀣𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀅𑀪𑀸𑀯𑀸 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀁𑀛𑀸𑀦𑀺𑀓𑀸𑀯𑀲𑁆𑀲 𑀢𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀚𑁆𑀛𑀸𑀦𑀺𑀓𑀁𑀧𑀞𑀫𑀨𑀮𑀸𑀤𑀺𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀁 𑀧𑀦 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑁆𑀲 𑀅𑀭𑀽𑀧𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀚𑁆𑀛𑀸𑀦𑀺𑀓𑀁 𑀨𑀮𑀜𑁆𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀪𑀸𑀯𑀦𑀸𑀬 𑀅𑀜𑁆𑀜𑀛𑀸𑀦𑀺𑀓𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺, 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀸𑀫𑀺𑀓𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑀫𑀸𑀧𑀢𑁆𑀢𑀺𑀧𑀸𑀤𑀓𑀁, 𑀦 𑀲𑀫𑁆𑀫𑀲𑀺𑀢𑀩𑁆𑀩𑀸𑀢𑀺 𑀨𑀮𑀲𑁆𑀲𑀸𑀧𑀺 𑀧𑀸𑀤𑀓𑀢𑀸 𑀤𑀝𑁆𑀞𑀩𑁆𑀩𑀸.

𑀓𑁂𑀘𑀺 𑀧𑀦𑀸𑀢𑀺 𑀫𑁄𑀭𑀯𑀸𑀧𑀻𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀧𑀼𑀦 𑀓𑁂𑀘𑀻𑀢𑀺 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀁. 𑀢𑀢𑀺𑀬𑀯𑀸𑀭𑁂 𑀓𑁂𑀘𑀻𑀢𑀺 ‘‘𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀻’’𑀢𑀺 𑀏𑀯𑀁 𑀯𑀸𑀤𑀺𑀦𑀁 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀜𑁆𑀘𑁂𑀯 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑁂 𑀤𑁆𑀯𑁂 𑀘 𑀣𑁂𑀭𑁂 𑀞𑀧𑁂𑀢𑁆𑀯𑀸 𑀇𑀢𑀭𑁂 𑀣𑁂𑀭𑁂 𑀲𑀦𑁆𑀥𑀸𑀬 𑀯𑀤𑀢𑀺.

𑁪𑁦𑁩. 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁄 𑀦𑀺𑀭𑁄𑀥𑁄𑀧𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺. 𑀧𑀭𑀲𑁆𑀲 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀸𑀧𑁂𑀫𑀺, 𑀮𑁄𑀓𑀲𑀫𑀼𑀤𑀬𑀜𑁆𑀘 𑀧𑀜𑁆𑀜𑀸𑀧𑁂𑀫𑀺, 𑀮𑁄𑀓𑀦𑀺𑀭𑁄𑀥𑀜𑁆𑀘 𑀧𑀜𑁆𑀜𑀸𑀧𑁂𑀫𑀺, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀜𑁆𑀘 𑀧𑀜𑁆𑀜𑀸𑀧𑁂𑀫𑀻’’𑀢𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫) 𑀓𑀣𑀁 𑀧𑀦 𑀆𑀤𑀺𑀓𑀫𑁆𑀫𑀺𑀓𑁄 𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺? 𑀅𑀦𑀼𑀲𑁆𑀲𑀯𑀸𑀤𑀺𑀲𑀺𑀤𑁆𑀥𑀫𑀸𑀓𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀤𑀺𑀲𑁆𑀲𑀸𑀧𑀺 𑀧𑀭𑀺𑀕𑁆𑀕𑀳𑁄 𑀦 𑀯𑀺𑀭𑀼𑀚𑁆𑀛𑀢𑀺. 𑀬𑀣𑀸𑀲𑀫𑁆𑀪𑀯𑀢𑁄𑀢𑀺 𑀲𑀫𑁆𑀪𑀯𑀸𑀦𑀼𑀭𑀽𑀧𑀁, 𑀞𑀧𑁂𑀢𑁆𑀯𑀸 𑀦𑀺𑀭𑁄𑀥𑀲𑀘𑁆𑀘𑀁 𑀲𑁂𑀲𑀲𑀘𑁆𑀘𑀯𑀲𑁂𑀦 𑀲𑀫𑀼𑀤𑀬𑀯𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀲𑀘𑁆𑀘𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁦𑁪. ‘‘𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀲𑀫𑀁𑀲’’𑀦𑁆𑀢𑀺𑀆𑀤𑀺𑀓𑀸 𑀲𑀢𑁆𑀢 𑀲𑀺𑀯𑀣𑀺𑀓𑀸 𑀅𑀝𑁆𑀞𑀺𑀓𑀓𑀫𑁆𑀫𑀝𑁆𑀞𑀸𑀦𑀢𑀸𑀬 𑀇𑀢𑀭𑀸𑀲𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀁 𑀲𑀪𑀸𑀯𑁂𑀦𑁂𑀯𑀸𑀢𑀺 𑀦𑀯𑀦𑁆𑀦𑀁 𑀲𑀺𑀯𑀣𑀺𑀓𑀸𑀦𑀁 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸. 𑀤𑁆𑀯𑁂𑀬𑁂𑀯𑀸𑀢𑀺 𑀆𑀦𑀸𑀧𑀸𑀦𑀁, 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂𑀬𑁂𑀯. 𑀅𑀪𑀺𑀦𑀺𑀯𑁂𑀲𑁄𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄, 𑀲𑁄 𑀧𑀦 𑀲𑀫𑁆𑀫𑀲𑀦𑀺𑀬𑀥𑀫𑁆𑀫𑀧𑀭𑀺𑀕𑁆𑀕𑀳𑁄. 𑀇𑀭𑀺𑀬𑀸𑀧𑀣𑀸, 𑀆𑀮𑁄𑀓𑀺𑀢𑀸𑀤𑀬𑁄 𑀘 𑀭𑀽𑀧𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀫𑀢𑁆𑀢𑀢𑀸𑀬 𑀦 𑀲𑀫𑁆𑀫𑀲𑀦𑀼𑀧𑀕𑀸 𑀯𑀺𑀜𑁆𑀜𑀢𑁆𑀢𑀺𑀆𑀤𑀬𑁄 𑀯𑀺𑀬. 𑀦𑀻𑀯𑀭𑀡𑀩𑁄𑀚𑁆𑀛𑀗𑁆𑀕𑀸 𑀆𑀤𑀺𑀢𑁄 𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀭𑀺𑀬𑀸𑀧𑀣…𑀧𑁂… 𑀦 𑀚𑀸𑀬𑀢𑀻’’𑀢𑀺. 𑀓𑁂𑀲𑀸𑀤𑀺𑀅𑀧𑀤𑁂𑀲𑁂𑀦 𑀢𑀤𑀼𑀧𑀸𑀤𑀸𑀦𑀥𑀫𑁆𑀫𑀸 𑀯𑀺𑀬 𑀇𑀭𑀺𑀬𑀸𑀧𑀣𑀸𑀤𑀺𑀅𑀧𑀤𑁂𑀲𑁂𑀦 𑀢𑀤𑀯𑀢𑁆𑀣𑀸 𑀭𑀽𑀧𑀥𑀫𑁆𑀫𑀸 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺, 𑀦𑀻𑀯𑀭𑀡𑀸𑀤𑀺𑀫𑀼𑀔𑁂𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀢𑀁𑀦𑀺𑀲𑁆𑀲𑀬𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀘 𑀇𑀭𑀺𑀬𑀸𑀧𑀣𑀸𑀤𑀻𑀲𑀼𑀧𑀺 ‘‘𑀅𑀪𑀺𑀦𑀺𑀯𑁂𑀲𑁄 𑀚𑀸𑀬𑀢𑀻’’𑀢𑀺 𑀅𑀯𑁄𑀘. ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂’’𑀢𑀺𑀆𑀤𑀺 𑀧𑀦 𑀲𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑀸𑀤𑀻𑀦𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀺𑀘𑁆𑀙𑀺𑀢𑀪𑀸𑀯𑀤𑀲𑁆𑀲𑀦𑀁. 𑀅𑀧𑀭𑀺𑀜𑁆𑀜𑀸𑀧𑀼𑀩𑁆𑀩𑀺𑀓𑀸 𑀳𑀺 𑀧𑀭𑀺𑀜𑁆𑀜𑀸𑀢𑀺.

𑀓𑀸𑀫𑀁 ‘‘𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀼𑀕𑁆𑀕𑀳𑀡𑀁 𑀓𑀢𑀁 𑀢𑀁𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀤𑁂𑀲𑀦𑀸 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀯𑁂’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀪𑀺𑀓𑁆𑀔𑀼 𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀯𑀸’’𑀢𑀺𑀆𑀤𑀺𑀫𑀸𑀳. 𑀤𑀲𑁆𑀲𑀦𑀫𑀕𑁆𑀕𑁂𑀦 𑀜𑀸𑀢𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀦𑀦𑁆𑀢𑀻 𑀲𑀺𑀔𑀸𑀧𑁆𑀧𑀢𑁆𑀢𑀸 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸 𑀅𑀜𑁆𑀜𑀸 𑀦𑀸𑀫, 𑀢𑀲𑁆𑀲 𑀨𑀮𑀪𑀸𑀯𑀢𑁄 𑀅𑀕𑁆𑀕𑀨𑀮𑀁 𑀧𑀻𑀢𑀺 𑀆𑀳 ‘‘𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺.

𑀅𑀧𑁆𑀧𑀢𑀭𑁂𑀧𑀺 𑀓𑀸𑀮𑁂 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀦𑀺𑀬𑁆𑀬𑀸𑀢𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄.

𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.