𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀫𑀳𑀸𑀯𑀕𑁆𑀕𑀝𑀻𑀓𑀸

𑁧. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧. 𑀬𑀣𑀸𑀚𑀸𑀢𑀸𑀦𑀁 𑀓𑀭𑁂𑀭𑀺𑀭𑀼𑀓𑁆𑀔𑀸𑀦𑀁 𑀖𑀦𑀧𑀢𑁆𑀢𑀲𑀸𑀔𑀸𑀯𑀺𑀝𑀧𑁂𑀳𑀺 𑀫𑀡𑁆𑀟𑀧𑀲𑀗𑁆𑀔𑁂𑀧𑁂𑀳𑀺 𑀲𑀜𑁆𑀙𑀦𑁆𑀦𑁄 𑀧𑀤𑁂𑀲𑁄 ‘‘𑀓𑀭𑁂𑀭𑀺𑀫𑀡𑁆𑀟𑀧𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀤𑁆𑀯𑀸𑀭𑁂𑀢𑀺 𑀤𑁆𑀯𑀸𑀭𑀲𑀫𑀻𑀧𑁂. 𑀤𑁆𑀯𑀸𑀭𑁂 𑀞𑀺𑀢𑀭𑀼𑀓𑁆𑀔𑀯𑀲𑁂𑀦 𑀅𑀜𑁆𑀜𑀢𑁆𑀣𑀸𑀧𑀺 𑀲𑀫𑀜𑁆𑀜𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀪𑀕𑀯𑀸 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁 𑀅𑀯𑀲𑀺𑀢𑁆𑀯𑀸 𑀢𑀤𑀸 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀁 𑀯𑀺𑀳𑀸𑀲𑀻𑀢𑀺? 𑀲𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀲𑀦𑀕𑀦𑁆𑀥𑀓𑀼𑀝𑀺 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀢𑁄𑀚𑁂𑀢𑀯𑀦𑁂’’𑀢𑀺𑀆𑀤𑀺𑀫𑀸𑀳. 𑀲𑀮𑀴𑀸𑀕𑀸𑀭𑀦𑁆𑀢𑀺 𑀤𑁂𑀯𑀤𑀸𑀭𑀼𑀭𑀼𑀓𑁆𑀔𑁂𑀳𑀺 𑀓𑀢𑀕𑁂𑀳𑀁. 𑀧𑀓𑀢𑀺𑀪𑀢𑁆𑀢𑀲𑁆𑀲 𑀧𑀘𑁆𑀙𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀧𑀸𑀓𑀢𑀺𑀓𑀪𑀢𑁆𑀢𑀓𑀸𑀮𑀢𑁄 𑀧𑀘𑁆𑀙𑀸, 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀢𑁄 𑀉𑀧𑀭𑀻𑀢𑀺 𑀅𑀢𑁆𑀣𑁄. 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑀸𑀦𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑀢𑁄 𑀅𑀧𑁂𑀢𑀸𑀦𑀁. 𑀢𑁂𑀦𑀸𑀳 ‘‘𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺.

𑀫𑀡𑁆𑀟𑀮𑀲𑀡𑁆𑀞𑀸𑀦𑀸 𑀫𑀸𑀴𑀲𑀗𑁆𑀔𑁂𑀧𑁂𑀦 𑀓𑀢𑀸 𑀦𑀺𑀲𑀻𑀤𑀦𑀲𑀸𑀮𑀸 ‘‘𑀫𑀡𑁆𑀟𑀮𑀫𑀸𑀴’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀦𑀺𑀲𑀻𑀤𑀦𑀲𑀸𑀮𑀸𑀬𑀸’’𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩-𑀲𑀤𑁆𑀤𑁄 𑀅𑀢𑀻𑀢𑀯𑀺𑀲𑀬𑁄, 𑀦𑀺𑀯𑀸𑀲-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄, 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀘 𑀦𑀺𑀯𑀲𑀺𑀢𑀥𑀫𑁆𑀫𑁄 𑀦𑀢𑁆𑀣𑀺, 𑀔𑀦𑁆𑀥𑀸 𑀘 𑀲𑀦𑁆𑀢𑀸𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀲𑀗𑁆𑀔𑀸𑀢𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑁂𑀦𑀸’’𑀢𑀺. 𑀬𑁄𑀚𑁂𑀢𑁆𑀯𑀸𑀢𑀺 𑀯𑀺𑀲𑀬𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸. 𑀧𑀯𑀢𑁆𑀢𑀺𑀢𑀸𑀢𑀺 𑀓𑀣𑀺𑀢𑀸. 𑀥𑀫𑁆𑀫𑀽𑀧𑀲𑀁𑀳𑀺𑀢𑀢𑁆𑀢𑀸 𑀥𑀫𑁆𑀫𑀢𑁄 𑀅𑀦𑀧𑁂𑀢𑀸𑀢𑀺 𑀥𑀫𑁆𑀫𑀻. 𑀢𑁂𑀦𑀸𑀳 ‘‘𑀥𑀫𑁆𑀫𑀲𑀁𑀬𑀼𑀢𑁆𑀢𑀸’’𑀢𑀺.

𑀉𑀤𑀧𑀸𑀤𑀻𑀢𑀺 𑀧𑀤𑀼𑀤𑁆𑀥𑀸𑀭𑁄, 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀚𑀸𑀢𑀸𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀦𑀲𑁆𑀲𑀸 𑀉𑀧𑁆𑀧𑀦𑁆𑀦𑀸𑀓𑀸𑀭𑀁 𑀧𑀸𑀴𑀺𑀬𑀁 𑀲𑀗𑁆𑀔𑁂𑀧𑀢𑁄𑀯 𑀤𑀲𑁆𑀲𑀺𑀢𑀁, 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀳𑁄 𑀅𑀘𑁆𑀙𑀭𑀺𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀓𑁂 𑀦𑀸𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀧𑀤𑀤𑁆𑀯𑀬𑁂 𑀧𑀞𑀫𑀁𑀬𑁂𑀯 𑀲𑀧𑁆𑀧𑀧𑀜𑁆𑀘𑀦𑀁, 𑀦 𑀇𑀢𑀭𑀦𑁆𑀢𑀺 𑀢𑀤𑁂𑀯 𑀧𑀼𑀕𑁆𑀕𑀮𑀪𑁂𑀤𑀢𑁄, 𑀓𑀸𑀮𑀯𑀺𑀪𑀸𑀕𑀢𑁄, 𑀅𑀦𑀼𑀲𑁆𑀲𑀭𑀡𑀸𑀓𑀸𑀭𑀢𑁄, 𑀑𑀧𑀫𑁆𑀫𑀢𑁄 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 ‘‘𑀢𑀺𑀢𑁆𑀣𑀺𑀬𑀸 𑀅𑀦𑀼𑀲𑁆𑀲𑀭𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀧𑁆𑀧𑀢𑁆𑀢𑀓𑀫𑁆𑀫𑀯𑀸𑀤𑀺𑀦𑁄𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀓𑀫𑁆𑀫𑀯𑀸𑀤𑀺𑀦𑁄 ‘‘𑀅𑀢𑁆𑀣𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂 𑀞𑀺𑀢𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸. 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁩) 𑀪𑀕𑀯𑀢𑀸 𑀢𑀣𑀸 𑀧𑀭𑀺𑀘𑁆𑀙𑀺𑀚𑁆𑀚 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁄 𑀧𑀭𑀁 𑀦 𑀅𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀢𑀣𑀸𑀯𑀘𑀦𑀜𑁆𑀘 𑀤𑀺𑀝𑁆𑀞𑀺𑀕𑀢𑁄𑀧𑀝𑁆𑀞𑀓𑀲𑁆𑀲 𑀢𑁂𑀲𑀁 𑀜𑀸𑀡𑀲𑁆𑀲 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄.

𑀲𑀸𑀯𑀓𑀸𑀢𑀺 𑀫𑀳𑀸𑀲𑀸𑀯𑀓𑀸 𑀢𑁂𑀲𑀜𑁆𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀼𑀩𑁆𑀩𑀸𑀪𑀺𑀦𑀻𑀳𑀸𑀭𑁄. 𑀧𑀓𑀢𑀺𑀲𑀸𑀯𑀓𑀸 𑀧𑀦 𑀢𑀢𑁄 𑀊𑀦𑀓𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀬𑀲𑁆𑀫𑀸 ‘‘𑀓𑀧𑁆𑀧𑀸𑀦𑀁 𑀮𑀓𑁆𑀔𑀸𑀥𑀺𑀓𑀁 𑀏𑀓𑀁, 𑀤𑁆𑀯𑁂 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 𑀓𑀸𑀮𑀯𑀲𑁂𑀦 𑀏𑀯𑀁 𑀧𑀭𑀺𑀫𑀸𑀡𑁄 𑀬𑀣𑀸𑀓𑁆𑀓𑀫𑀁 𑀅𑀕𑁆𑀕𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀼𑀜𑁆𑀜𑀜𑀸𑀡𑀸𑀪𑀺𑀦𑀻𑀳𑀸𑀭𑁄, 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀺𑀢𑀸𑀲𑀫𑁆𑀪𑀭𑀡𑀜𑁆𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸…𑀧𑁂… 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘𑀸’’𑀢𑀺. 𑀬𑀤𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀓𑀸𑀮𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑁂𑀲𑀁 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀯𑀺𑀪𑀯𑁄, 𑀏𑀯𑀁 𑀲𑀦𑁆𑀢𑁂 𑀩𑀼𑀤𑁆𑀥𑀸𑀦𑀫𑁆𑀧𑀺𑀲𑁆𑀲 𑀲𑀧𑀭𑀺𑀘𑁆𑀙𑁂𑀤𑀢𑀸 𑀆𑀧𑀦𑁆𑀦𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀏𑀢𑁆𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯𑀢𑀓𑀁 𑀆𑀓𑀗𑁆𑀔𑀦𑁆𑀢𑀺, 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀦𑁆𑀢𑀻’’𑀢𑀺 ‘‘𑀬𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩, 𑁫) 𑀯𑀘𑀦𑀢𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀳𑀺 𑀩𑀼𑀤𑁆𑀥𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀫𑁆𑀧𑀺 𑀲𑀯𑀺𑀲𑀬𑁂 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀁 𑀬𑀁 𑀜𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀢𑀁 𑀢𑀁 𑀚𑀸𑀦𑀦𑁆𑀢𑀺 𑀏𑀯. 𑀅𑀣 𑀯𑀸 𑀲𑀢𑀺𑀧𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀸𑀤𑀺𑀦𑀸 𑀲𑀸𑀢𑀺𑀲𑀬𑀢𑁆𑀢𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀢𑀦𑁆𑀦𑀺𑀫𑀺𑀢𑁆𑀢𑀓𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀸𑀦𑀁…𑀧𑁂… 𑀦𑀢𑁆𑀣𑀻’’𑀢𑀺.

𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀢𑀺 𑀬𑀣𑀸𑀧𑀘𑁆𑀘𑀬𑀁 𑀅𑀦𑀼𑀧𑀼𑀩𑁆𑀩𑀧𑀯𑀢𑁆𑀢𑀫𑀸𑀦𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀼𑀧𑀼𑀩𑁆𑀩𑀺𑀬𑀸. 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀁. 𑀢𑁂𑀲𑀜𑁆𑀳𑀺 𑀅𑀦𑀼𑀪𑀯𑀦𑀸𑀤𑀺𑀆𑀓𑀸𑀭𑀕𑁆𑀕𑀳𑀡𑀫𑀲𑁆𑀲 𑀲𑀸𑀢𑀺𑀲𑀬𑀁, 𑀢𑀁 𑀲𑀜𑁆𑀜𑀸𑀪𑀯𑁂 𑀢𑀢𑁆𑀣 𑀢𑀢𑁆𑀣 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀏𑀓𑀯𑁄𑀓𑀸𑀭𑀪𑀯𑁂 𑀅𑀮𑀪𑀦𑁆𑀢𑀸 ‘‘𑀦 𑀧𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀚𑀸𑀮𑁂 𑀧𑀢𑀺𑀢𑀸 𑀯𑀺𑀬 𑀲𑀓𑀼𑀡𑀸, 𑀫𑀘𑁆𑀙𑀸 𑀯𑀺𑀬 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀡𑁆𑀞𑀸 𑀯𑀺𑀬𑀸𑀢𑀺 𑀤𑀦𑁆𑀥𑀸 𑀯𑀺𑀬. 𑀧𑀗𑁆𑀕𑀼𑀴𑀸 𑀯𑀺𑀬𑀸𑀢𑀺 𑀧𑀻𑀞𑀲𑀧𑁆𑀧𑀺𑀦𑁄 𑀯𑀺𑀬. 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺. 𑀬𑀝𑁆𑀞𑀺𑀓𑁄𑀝𑀺𑀳𑁂𑀢𑀼𑀓𑀁 𑀕𑀫𑀦𑀁 𑀬𑀝𑁆𑀞𑀺𑀓𑁄𑀝𑀺𑀕𑀫𑀦𑀁 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸 𑀅𑀫𑀼𑀜𑁆𑀘𑀦𑀢𑁄.

𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀓𑀸𑀫𑀁 𑀩𑀼𑀤𑁆𑀥𑀲𑀸𑀯𑀓𑀸𑀧𑀺 𑀅𑀲𑀜𑁆𑀜𑀪𑀯𑁂 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀁 𑀦 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂 𑀩𑀼𑀤𑁆𑀥𑀲𑀸𑀯𑀓𑀸 𑀅𑀲𑀜𑁆𑀜𑀪𑀯𑀁 𑀮𑀗𑁆𑀖𑀺𑀢𑁆𑀯𑀸 𑀧𑀭𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑀺. ‘‘𑀯𑀝𑁆𑀝𑁂’’𑀢𑀺𑀆𑀤𑀺 𑀢𑀣𑀸 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀩𑀼𑀤𑁆𑀥𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸𑀢𑀺 ‘‘𑀬𑀢𑁆𑀣 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺 𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑁂𑀯, 𑀦 𑀅𑀭𑀽𑀧𑀧𑁆𑀧𑀯𑀢𑁆𑀢𑀺, 𑀲𑁄 𑀅𑀲𑀜𑁆𑀜𑀪𑀯𑁄’’𑀢𑀺 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀤𑁂𑀲𑀺𑀢𑀸𑀬𑀁 𑀥𑀫𑁆𑀫𑀦𑁂𑀢𑁆𑀢𑀺𑀬𑀁 𑀞𑀢𑁆𑀯𑀸. 𑀏𑀯𑀜𑁆𑀳𑀺 𑀅𑀦𑁆𑀢𑀭𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀅𑀧𑀲𑁆𑀲𑀦𑁆𑀢𑀸 𑀧𑀭𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀲𑁄𑀪𑀺𑀢𑁄𑀢𑀺 (𑀣𑁂𑀭𑀕𑀸. 𑀅𑀝𑁆𑀞. 𑁧.𑁨.𑁧𑁬𑁪 𑀲𑁄𑀪𑀺𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸). 𑀲𑁄 𑀓𑀺𑀭 𑀧𑀼𑀩𑁆𑀩𑁂𑀦𑀺𑀯𑀸𑀲𑁂 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀬𑀸𑀯 𑀅𑀲𑀜𑁆𑀜𑀪𑀯𑁂 𑀅𑀢𑁆𑀢𑀦𑁄 𑀅𑀘𑀺𑀢𑁆𑀢𑀓𑀧𑀝𑀺𑀲𑀦𑁆𑀥𑀺 𑀢𑀸𑀯 𑀅𑀤𑁆𑀤𑀲, 𑀢𑀢𑁄 𑀧𑀭𑀁 𑀧𑀜𑁆𑀘𑀓𑀧𑁆𑀧𑀲𑀢𑀧𑀭𑀺𑀫𑀸𑀡𑁂 𑀓𑀸𑀮𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀅𑀤𑀺𑀲𑁆𑀯𑀸 𑀅𑀯𑀲𑀸𑀦𑁂 𑀘𑀼𑀢𑀺𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀆𑀯𑀚𑁆𑀚𑀬𑀫𑀸𑀦𑁄 𑀦𑀬𑀯𑀲𑁂𑀦 ‘‘𑀅𑀲𑀜𑁆𑀜𑀪𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑀢𑀁 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. ‘‘𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀑𑀮𑁄𑀓𑁂𑀢𑁆𑀯𑀸’’𑀢𑀺 𑀇𑀤𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀢𑁂𑀲𑀁 𑀜𑀸𑀡𑀲𑁆𑀲 𑀲𑀗𑁆𑀓𑀫𑀦𑀤𑀲𑁆𑀲𑀦𑀁, 𑀢𑁂𑀦 𑀲𑀩𑁆𑀩𑀲𑁄 𑀪𑀯𑁂 𑀅𑀦𑀸𑀫𑀲𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀁 𑀢𑀤𑁂𑀯 𑀧𑀲𑁆𑀲𑀦𑁆𑀢𑀻𑀢𑀺 𑀬𑀣𑀸 𑀦𑀸𑀫 𑀲𑀭𑀤𑀲𑀫𑀬𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬 𑀘𑀢𑀼𑀭𑀢𑀦𑀺𑀓𑁂 𑀕𑁂𑀳𑁂 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀭𑀽𑀧𑀕𑀢𑀁 𑀲𑀼𑀧𑀸𑀓𑀝𑀫𑁂𑀯 𑀳𑁄𑀢𑀻𑀢𑀺 𑀮𑁄𑀓𑀲𑀺𑀤𑁆𑀥𑀫𑁂𑀢𑀁, 𑀲𑀺𑀬𑀸 𑀧𑀦 𑀢𑀲𑁆𑀲 𑀲𑀼𑀔𑀼𑀫𑀢𑀭𑀢𑀺𑀭𑁄𑀳𑀺𑀢𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀕𑀢𑀲𑁆𑀲 𑀅𑀕𑁄𑀘𑀭𑀢𑀸. 𑀦 𑀢𑁆𑀯𑁂𑀯 𑀩𑀼𑀤𑁆𑀥𑀸𑀦𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀕𑁄𑀘𑀭𑀢𑀸, 𑀅𑀣 𑀔𑁄 𑀢𑀁 𑀜𑀸𑀡𑀸𑀮𑁄𑀓𑁂𑀦 𑀑𑀪𑀸𑀲𑀺𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀼𑀧𑀸𑀓𑀝𑀁 𑀲𑀼𑀯𑀺𑀪𑀽𑀢𑀫𑁂𑀯 𑀳𑁄𑀢𑀺 𑀢𑀣𑀸 𑀜𑁂𑀬𑁆𑀬𑀸𑀯𑀭𑀡𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸 𑀧𑀦 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀳𑀺 𑀯𑀸 𑀤𑀺𑀝𑁆𑀞𑀓𑀢𑀲𑀼𑀢𑀁, 𑀲𑀽𑀭𑀺𑀬𑀫𑀡𑁆𑀟𑀮𑁄𑀪𑀸𑀲𑀲𑀤𑀺𑀲’’𑀦𑁆𑀢𑀺 𑀘 𑀆𑀤𑀺.

𑀢𑀣𑀸 𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘𑀸𑀢𑀺. 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁂𑀦 ‘‘𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀢𑀲𑀼𑀢𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀻’’𑀢𑀺 𑀇𑀤𑀁 𑀉𑀧𑀲𑀁𑀳𑀭𑀢𑀺, 𑀢𑁂𑀦 𑀲𑀧𑁆𑀧𑀤𑁂𑀲𑀫𑁂𑀯 𑀦𑁂𑀲𑀁 𑀅𑀦𑀼𑀲𑁆𑀲𑀭𑀡𑀁, 𑀦 𑀦𑀺𑀧𑁆𑀧𑀤𑁂𑀲𑀦𑁆𑀢𑀺 𑀦𑀺𑀤𑀲𑁆𑀲𑁂𑀢𑀺.

𑀔𑀚𑁆𑀚𑁄𑀧𑀦𑀓𑀑𑀪𑀸𑀲𑀲𑀤𑀺𑀲𑀁 𑀜𑀸𑀡𑀲𑁆𑀲 𑀅𑀢𑀺𑀯𑀺𑀬 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬. 𑀲𑀸𑀯𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀓𑀢𑀺𑀲𑀸𑀯𑀓𑀸𑀦𑀁 𑀧𑀸𑀓𑀢𑀺𑀓𑀧𑀤𑀻𑀧𑁄𑀪𑀸𑀲𑀲𑀤𑀺𑀲𑀁. 𑀫𑀳𑀸𑀲𑀸𑀯𑀓𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁨𑁧 𑀯𑀗𑁆𑀕𑀻𑀲𑁂𑀢𑁆𑀣𑀭𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁄) 𑀫𑀳𑀸𑀧𑀤𑀻𑀧𑁄𑀪𑀸𑀲𑀲𑀤𑀺𑀲𑀁. 𑀢𑁂𑀦𑀸𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁨) ‘‘𑀉𑀓𑁆𑀓𑀸𑀧𑀪𑀸𑀲𑀤𑀺𑀲’’𑀦𑁆𑀢𑀺. 𑀑𑀲𑀥𑀺𑀢𑀸𑀭𑀓𑁄𑀪𑀸𑀲𑀲𑀤𑀺𑀲𑀦𑁆𑀢𑀺 𑀉𑀲𑁆𑀲𑀦𑁆𑀦𑀸 𑀧𑀪𑀸 𑀏𑀢𑀸𑀬 𑀥𑀻𑀬𑀢𑀺, 𑀑𑀲𑀥𑀻𑀦𑀁 𑀯𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀢𑁆𑀢𑀸 ‘‘𑀑𑀲𑀥𑀻’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀸𑀬 𑀢𑀸𑀭𑀓𑀸𑀬 𑀧𑀪𑀸𑀲𑀤𑀺𑀲𑀁. 𑀲𑀭𑀤𑀲𑀽𑀭𑀺𑀬𑀫𑀡𑁆𑀟𑀮𑁄𑀪𑀸𑀲𑀲𑀤𑀺𑀲𑀁 𑀲𑀩𑁆𑀩𑀲𑁄 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄. 𑀅𑀧𑀝𑀼𑀪𑀸𑀯𑀳𑁂𑀢𑀼𑀓𑁄 𑀯𑀺𑀲𑀬𑀕𑁆𑀕𑀳𑀡𑁂 𑀘𑀜𑁆𑀘𑀮𑀪𑀸𑀯𑁄 𑀔𑀮𑀺𑀢𑀁, 𑀓𑀼𑀡𑁆𑀞𑀺𑀪𑀸𑀯𑀳𑁂𑀢𑀼𑀓𑁄 𑀯𑀺𑀲𑀬𑀲𑁆𑀲 𑀅𑀦𑀪𑀺𑀲𑀫𑀬𑁄 𑀧𑀝𑀺𑀖𑀸𑀢𑁄.𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀫𑁂𑀯𑀸𑀢𑀺 𑀆𑀯𑀚𑁆𑀚𑀦𑀫𑀢𑁆𑀢𑀸𑀥𑀻𑀦𑀁, 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀏𑀯 𑀬𑀣𑀺𑀘𑁆𑀙𑀺𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀗𑁆𑀕𑀅𑀧𑁆𑀧𑀝𑀺𑀳𑀢𑀁 𑀧𑀯𑀢𑁆𑀢𑀫𑀸𑀦𑀁 𑀪𑀕𑀯𑀢𑁄 𑀜𑀸𑀡𑀁 𑀮𑀳𑀼𑀢𑀭𑁂𑀧𑀺 𑀯𑀺𑀲𑀬𑁂, 𑀕𑀭𑀼𑀢𑀭𑁂 𑀘 𑀏𑀓𑀲𑀤𑀺𑀲𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀩𑁆𑀩𑀮𑀧𑀢𑁆𑀢𑀧𑀼𑀝𑁂’’𑀢𑀺𑀆𑀤𑀺𑀦𑀸 𑀉𑀧𑀫𑀸𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀓𑀸𑀬𑀢𑁆𑀢𑀸 𑀪𑀕𑀯𑀢𑁄 𑀕𑀼𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 ‘‘𑀪𑀕𑀯𑀦𑁆𑀢𑀁𑀬𑁂𑀯 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁. 𑀢𑀺𑀢𑁆𑀣𑀺𑀬𑀸𑀦𑀁, 𑀲𑀸𑀯𑀓𑀸𑀦𑀜𑁆𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀪𑀕𑀯𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀲𑁆𑀲 𑀳𑀻𑀦𑀼𑀤𑀸𑀳𑀭𑀡𑀤𑀲𑁆𑀲𑀦𑀯𑀲𑁂𑀦𑁂𑀢𑁆𑀣 𑀓𑀣𑀺𑀢𑀁. 𑀏𑀯𑀜𑁆𑀳𑀺 𑀪𑀕𑀯𑀢𑁄 𑀫𑀳𑀦𑁆𑀢𑀪𑀸𑀯𑁄 𑀯𑀺𑀲𑁂𑀲𑀢𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑀸𑀲𑀢𑁄. 𑀬𑀢𑁆𑀢𑀓𑁄𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀪𑁂𑀤𑁄 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀯𑀺𑀲𑀬𑀪𑀽𑀢𑁄, 𑀢𑀁 𑀲𑀩𑁆𑀩𑀁 𑀢𑀤𑀸 𑀬𑀣𑀸𑀓𑀣𑀺𑀢𑀁 𑀢𑁂 𑀪𑀺𑀓𑁆𑀔𑀽 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀇𑀢𑀺𑀧𑀻’’𑀢𑀺 𑀆𑀳𑀁𑀲𑀼. 𑀢𑀲𑁆𑀲 𑀘 𑀅𑀦𑁂𑀓𑀸𑀓𑀸𑀭𑀢𑀸𑀬 𑀆𑀫𑁂𑀟𑀺𑀢𑀯𑀘𑀦𑀁, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, ‘‘𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁪; 𑀅. 𑀦𑀺. 𑁩.𑁧) 𑀯𑀺𑀬 𑀆𑀓𑀸𑀭𑀢𑁆𑀣𑁄 𑀇𑀢𑀺-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁆𑀧𑀻’’𑀢𑀺 𑀢𑀤𑀢𑁆𑀣𑀫𑀸𑀳.

𑁨-𑁩. 𑀯𑀼𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀘 𑀇𑀥 𑀧𑀸𑀞𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀢𑁂𑀦 𑀧𑀸𑀞𑁂𑀦 𑀲𑀸𑀥𑀸𑀭𑀡𑀁, 𑀢𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀲𑀸𑀥𑀸𑀭𑀡𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀬 𑀅𑀥𑀺𑀓𑀢𑀢𑁆𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀫𑀸𑀳. ‘‘𑀅𑀲𑁆𑀲𑁄𑀲𑀻’’𑀢𑀺 𑀇𑀤𑀁 𑀲𑀯𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀯𑀼𑀢𑁆𑀢𑀁 𑀲𑀤𑁆𑀤𑀕𑁆𑀕𑀳𑀡𑀫𑀼𑀔𑁂𑀦 𑀢𑀤𑀢𑁆𑀣𑀸𑀯𑀩𑁄𑀥𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀢𑀢𑁆𑀣 𑀧𑀦 𑀧𑀸𑀴𑀺𑀬𑀁 ‘‘𑀇𑀫𑀁 𑀲𑀁𑀔𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸’’ 𑀇𑀘𑁆𑀘𑁂𑀯 (𑀤𑀻. 𑀦𑀺. 𑁧.𑁨) 𑀯𑀼𑀢𑁆𑀢𑀁. 𑀇𑀫𑁂 𑀪𑀺𑀓𑁆𑀔𑀽 𑀫𑀫 𑀕𑀼𑀡𑁂 𑀣𑁄𑀫𑁂𑀦𑁆𑀢𑀺, 𑀓𑀣𑀁? 𑀫𑀫 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀆𑀭𑀩𑁆𑀪𑀸𑀢𑀺 𑀬𑁄𑀚𑀦𑀸. 𑀦𑀺𑀧𑁆𑀨𑀢𑁆𑀢𑀺𑀦𑁆𑀢𑀺 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀁, 𑀢𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀦𑁄𑀢𑀺 𑀧𑀼𑀘𑁆𑀙𑀸𑀯𑀸𑀘𑀻 𑀦𑀼-𑀇𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀇𑀘𑁆𑀙𑁂𑀬𑁆𑀬𑀸𑀣 𑀦𑀽’’𑀢𑀺. 𑀦𑀦𑁆𑀢𑀺 𑀪𑀕𑀯𑀦𑁆𑀢𑀁. ‘‘𑀬𑀁 𑀪𑀕𑀯𑀸’’𑀢𑀺 𑀏𑀢𑁆𑀣 𑀬𑀁-𑀲𑀤𑁆𑀤𑁂𑀦 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀪𑀽𑀢𑁂𑀦 ‘‘𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀺𑀓𑀣𑀸𑀓𑀭𑀡𑀁 𑀧𑀭𑀸𑀫𑀝𑁆𑀞𑀁 ‘‘𑀏𑀢𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄𑀢𑀺 𑀆𑀳 ‘‘𑀏𑀢𑀲𑁆𑀲 𑀥𑀫𑁆𑀫𑀺𑀓𑀣𑀸𑀓𑀭𑀡𑀲𑁆𑀲𑀸’’𑀢𑀺, 𑀆𑀤𑀭𑀯𑀲𑁂𑀦 𑀧𑀦 𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁.

𑁪. 𑀲𑀼𑀡𑀸𑀣𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀏𑀢𑁂𑀦 ‘‘𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁄𑀢𑀸𑀯𑀥𑀸𑀦𑀁 𑀲𑁄𑀢𑀲𑁆𑀲 𑀑𑀤𑀳𑀦𑀁, 𑀲𑀼𑀲𑁆𑀲𑀽𑀲𑀸𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑀁 𑀉𑀧𑀘𑁆𑀙𑀺𑀦𑁆𑀦𑀁 𑀯𑀝𑀼𑀫𑀁 𑀲𑀁𑀲𑀸𑀭𑀯𑀝𑁆𑀝𑀁 𑀏𑀢𑁂𑀲𑀦𑁆𑀢𑀺 𑀙𑀺𑀦𑁆𑀦𑀯𑀝𑀼𑀫𑀓𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀜𑁆𑀜𑁂 𑀘 𑀔𑀻𑀡𑀸𑀲𑀯𑀸, 𑀇𑀥 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑀲𑁄 𑀅𑀦𑀼𑀲𑁆𑀲𑀭𑀡𑀁 𑀇𑀢𑀭𑁂𑀲𑀁 𑀅𑀯𑀺𑀲𑀬𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡’’𑀦𑁆𑀢𑀺. 𑀧𑀘𑁆𑀘𑀢𑁆𑀢𑀯𑀘𑀦𑁂 𑀤𑀺𑀲𑁆𑀲𑀢𑀺 𑀬𑀁-𑀲𑀤𑁆𑀤𑁄 𑀓𑀫𑁆𑀫𑀢𑁆𑀣𑀤𑀻𑀧𑀦𑀢𑁄. 𑀉𑀧𑀬𑁄𑀕𑀯𑀘𑀦𑁂 𑀤𑀺𑀲𑁆𑀲𑀢𑀺 𑀬𑀁-𑀲𑀤𑁆𑀤𑁄 𑀧𑀼𑀘𑁆𑀙𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀢𑁆𑀣𑀤𑀻𑀧𑀦𑀢𑁄. 𑀢𑀦𑁆𑀢𑀺 𑀘 𑀉𑀧𑀬𑁄𑀕𑀯𑀘𑀦𑀫𑁂𑀯 𑀧𑀼𑀘𑁆𑀙𑀢𑀺-𑀲𑀤𑁆𑀤𑀲𑁆𑀲 𑀤𑁆𑀯𑀺𑀓𑀫𑁆𑀫𑀓𑀪𑀸𑀯𑀢𑁄. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀭𑀡𑀯𑀘𑀦𑁂 𑀤𑀺𑀲𑁆𑀲𑀢𑀻’’𑀢𑀺. 𑀪𑀼𑀫𑁆𑀫𑁂𑀢𑀺 𑀤𑀝𑁆𑀞𑀩𑁆𑀩𑁄𑀢𑀺 𑀬𑀣𑀸 𑀬𑀁-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀧𑀘𑁆𑀘𑀢𑁆𑀢𑀉𑀧𑀬𑁄𑀕𑁂𑀲𑀼 𑀏𑀯, 𑀅𑀣 𑀔𑁄 𑀓𑀭𑀡𑁂𑀧𑀺 𑀤𑀺𑀲𑁆𑀲𑀢𑀺, 𑀏𑀯𑀁 𑀇𑀥 𑀪𑀼𑀫𑁆𑀫𑁂𑀢𑀺 𑀤𑀝𑁆𑀞𑀩𑁆𑀩𑁄. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀦𑁆𑀢𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀽𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁. 𑀉𑀦𑁆𑀦𑀸𑀤𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀺 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑁆𑀲.

𑀓𑀸𑀮𑀲𑁆𑀲 𑀪𑀤𑁆𑀤𑀢𑀸 𑀦𑀸𑀫 𑀢𑀢𑁆𑀣 𑀲𑀢𑁆𑀢𑀸𑀦𑀁 𑀕𑀼𑀡𑀯𑀺𑀪𑀽𑀢𑀺𑀬𑀸, 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀘 𑀕𑀼𑀡𑀯𑀺𑀪𑀽𑀢𑀻𑀢𑀺 𑀢𑀩𑁆𑀩𑀳𑀼𑀮𑀢𑀸 𑀬𑀲𑁆𑀲 𑀓𑀧𑁆𑀧𑀲𑁆𑀲 𑀪𑀤𑁆𑀤𑀢𑀸𑀢𑀺 𑀆𑀳 ‘‘𑀧𑀜𑁆𑀘𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀲𑀼𑀦𑁆𑀤𑀭𑀓𑀧𑁆𑀧𑁂’’𑀢𑀺, 𑀢𑀣𑀸 𑀲𑀸𑀭𑀪𑀽𑀢𑀕𑀼𑀡𑀯𑀲𑁂𑀦 ‘‘𑀲𑀸𑀭𑀓𑀧𑁆𑀧𑁂’’𑀢𑀺. ‘‘𑀇𑀫𑀁 𑀓𑀧𑁆𑀧𑀁 𑀣𑁄𑀫𑁂𑀦𑁆𑀢𑁄 𑀏𑀯𑀫𑀸𑀳𑀸’’𑀢𑀺 𑀯𑀢𑁆𑀯𑀸 𑀇𑀫𑀲𑁆𑀲 𑀓𑀧𑁆𑀧𑀲𑁆𑀲 𑀢𑀣𑀸 𑀣𑁄𑀫𑁂𑀢𑀩𑁆𑀩𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀢𑁄 𑀧𑀪𑀼𑀢𑀺 𑀅𑀪𑀺𑀦𑀻𑀳𑀸𑀭𑁄 𑀓𑀢𑁄𑀢𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀪𑀺𑀦𑀻𑀳𑀸𑀭𑁄 𑀧𑀯𑀢𑁆𑀢𑀺𑀢𑁄. 𑀲𑀁𑀲𑀸𑀭𑀲𑁆𑀲 𑀅𑀦𑀸𑀤𑀺𑀪𑀸𑀯𑀢𑁄 𑀇𑀫𑀲𑁆𑀲 𑀪𑀕𑀯𑀢𑁄 𑀅𑀪𑀺𑀦𑀻𑀳𑀸𑀭𑀢𑁄 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀦𑀦𑁆𑀢𑀸 𑀅𑀧𑀭𑀺𑀫𑁂𑀬𑁆𑀬𑀸𑀢𑀺 𑀢𑁂𑀳𑀺 𑀉𑀧𑁆𑀧𑀦𑁆𑀦𑀓𑀧𑁆𑀧𑁂 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂’’𑀢𑀺 𑀆𑀳. 𑀓𑀸𑀫𑀁 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀬𑀁 𑀪𑀕𑀯𑀸 𑀅𑀪𑀺𑀦𑀻𑀳𑀸𑀭𑀫𑀓𑀸𑀲𑀺, 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀺𑀩𑁆𑀩𑀢𑁆𑀢𑀺 𑀇𑀫𑀲𑁆𑀲 𑀅𑀪𑀺𑀦𑀻𑀳𑀸𑀭𑀢𑁄 𑀧𑀼𑀭𑀺𑀫𑀢𑀭𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀫𑁆𑀳𑀸𑀓𑀁…𑀧𑁂… 𑀦𑀺𑀩𑁆𑀩𑀢𑁆𑀢𑀺𑀁𑀲𑀽’’𑀢𑀺.

𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂𑀢𑀺 𑀫𑀳𑀸𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀬𑁄𑀲𑀸𑀦𑁂. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. ‘‘𑀇𑀢𑁄 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀉𑀧𑀭𑀻’’𑀢𑀺 𑀏𑀢𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀲𑀼𑀫𑁂𑀥𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁆𑀢𑀭𑁂 𑀏𑀓𑀽𑀦𑀲𑀢𑁆𑀢𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀇𑀢𑁄 𑀅𑀝𑁆𑀞𑀸𑀭𑀲𑀦𑁆𑀦𑀁 𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀉𑀧𑀭𑀻’’𑀢𑀺 𑀇𑀫𑀺𑀦𑀸 𑀲𑀼𑀚𑀸𑀢𑀲𑁆𑀲 𑀪𑀕𑀯𑀢𑁄, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁆𑀢𑀭𑁂 𑀏𑀓𑁂𑀦𑀽𑀦𑀸𑀦𑀺 𑀤𑁆𑀯𑀸𑀤𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀇𑀢𑁄 𑀘𑀢𑀼𑀦𑀯𑀼𑀢𑁂 𑀓𑀧𑁆𑀧𑁂’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁆𑀢𑀭𑁂 𑀙𑀸𑀥𑀺𑀓𑀦𑀯𑀲𑀢𑀼𑀢𑁆𑀢𑀭𑀸𑀦𑀺 𑀲𑀢𑁆𑀢𑀭𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀢𑀺𑀁𑀲𑁂 𑀓𑀧𑁆𑀧𑁂’’𑀢𑀺 𑀇𑀫𑀺𑀦𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀲𑀺𑀔𑀺𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁆𑀢𑀭𑁂 𑀲𑀝𑁆𑀞𑀺 𑀓𑀧𑁆𑀧𑀸𑀦𑀺 𑀩𑀼𑀤𑁆𑀥𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀑𑀭𑀁 𑀲𑀼𑀫𑁂𑀥𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑀓𑀧𑁆𑀧𑁂𑀳𑀺 𑀲𑀤𑁆𑀥𑀺𑀁 𑀲𑀫𑁄𑀥𑀸𑀦𑀺𑀬𑀫𑀸𑀦𑀸 𑀲𑀢𑀲𑀳𑀲𑁆𑀲𑀸 𑀓𑀧𑁆𑀧𑀸 𑀳𑁄𑀦𑁆𑀢𑀺, 𑀬𑀢𑁆𑀣 𑀫𑀳𑀸𑀲𑀸𑀯𑀓𑀸𑀤𑀬𑁄 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁨𑁧 𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀯𑀺𑀯𑀝𑁆𑀝𑀽 𑀧𑀦𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀺 𑀲𑀫𑁆𑀪𑀭𑀺𑀁𑀲𑀼. 𑀩𑀼𑀤𑁆𑀥𑀲𑀼𑀜𑁆𑀜𑁂𑀧𑀺 𑀮𑁄𑀓𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀧𑀼𑀭𑀺𑀲𑀯𑀺𑀲𑁂𑀲𑀸𑀦𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸𑀪𑀺𑀩𑀼𑀤𑁆𑀥𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. ‘‘𑀏𑀯𑀫𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀯𑀤𑀢𑀺.

‘‘𑀓𑀺𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀯𑀺𑀪𑀸𑀯𑀦𑀢𑁆𑀣𑀸𑀬 𑀆𑀭𑀤𑁆𑀥𑀁. 𑀢𑀢𑁆𑀣 𑀏𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀁. 𑀓𑀧𑁆𑀧𑀲𑀡𑁆𑀞𑀸𑀦𑀓𑀸𑀮𑀲𑁆𑀫𑀺𑀦𑁆𑀢𑀺 𑀯𑀺𑀯𑀝𑁆𑀝𑀓𑀧𑁆𑀧𑀲𑁆𑀲 𑀲𑀡𑁆𑀞𑀳𑀦𑀓𑀸𑀮𑁂. 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺 𑀲𑀁𑀯𑀝𑁆𑀝𑀝𑁆𑀞𑀸𑀬𑀺𑀁 𑀲𑀦𑁆𑀥𑀸𑀬𑀸𑀳. 𑀏𑀓𑀗𑁆𑀕𑀡𑀁 𑀳𑀼𑀢𑁆𑀯𑀸 𑀞𑀺𑀢𑁂𑀢𑀺 𑀧𑀩𑁆𑀩𑀢𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁, 𑀫𑁂𑀖𑀸𑀤𑀻𑀦𑀜𑁆𑀘 𑀅𑀪𑀸𑀯𑁂𑀦 𑀯𑀺𑀯𑀝𑀁𑀅𑀗𑁆𑀕𑀡𑀁 𑀳𑀼𑀢𑁆𑀯𑀸 𑀞𑀺𑀢𑁂. 𑀮𑁄𑀓𑀲𑀦𑁆𑀦𑀺𑀯𑀸𑀲𑁂𑀢𑀺 𑀪𑀸𑀚𑀦𑀮𑁄𑀓𑁂𑀦 𑀲𑀦𑁆𑀦𑀺𑀯𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑁂. 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄 𑀉𑀲𑀪𑀁. ‘‘𑀉𑀲𑀪𑀫𑀢𑁆𑀢𑀸, 𑀤𑁆𑀯𑁂 𑀉𑀲𑀪𑀫𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀫𑀢𑁆𑀢𑀸-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑀸 𑀳𑀼𑀢𑁆𑀯𑀸𑀢𑀺 𑀧𑀢𑀫𑀸𑀦𑀸𑀯 𑀉𑀤𑀓𑀥𑀸𑀭𑀸 𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑀁 𑀆𑀓𑀸𑀲𑀝𑁆𑀞𑀸𑀦𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑀸 𑀳𑀼𑀢𑁆𑀯𑀸. 𑀬𑀸𑀯 𑀅𑀯𑀺𑀦𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀬𑀸𑀯 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀸, 𑀬𑀸𑀯 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑀸, 𑀬𑀸𑀯 𑀯𑁂𑀳𑀧𑁆𑀨𑀮𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀅𑀢𑁆𑀣𑁄.

𑀯𑀸𑀢𑀯𑀲𑁂𑀦𑀸𑀢𑀺 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑁆𑀲 𑀲𑀦𑁆𑀥𑀸𑀭𑀓𑀯𑀸𑀢𑀫𑀡𑁆𑀟𑀮𑀲𑁆𑀲 𑀯𑀲𑁂𑀦. 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁄𑀢𑀺 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀧𑁆𑀧𑀤𑁂𑀲𑀫𑀸𑀳. 𑀢𑀲𑁆𑀲 𑀧𑀘𑁆𑀙𑀸 𑀯𑀺𑀦𑀸𑀲𑁄, 𑀧𑀞𑀫𑀁 𑀲𑀡𑁆𑀞𑀳𑀦𑀜𑁆𑀘 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸𑀢𑀺 𑀩𑀼𑀤𑁆𑀥𑀧𑁆𑀧𑀸𑀤𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀳𑀺 𑀕𑀘𑁆𑀙𑁄 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 𑀢𑀣𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀓𑀡𑁆𑀡𑀺𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸𑀢𑀺 𑀆𑀩𑀤𑁆𑀥𑀓𑀡𑁆𑀡𑀺𑀓𑀸 𑀯𑀺𑀬 𑀳𑀼𑀢𑁆𑀯𑀸. 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 𑀅𑀢𑁆𑀢𑀫𑀦𑀸…𑀧𑁂… 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀯𑁂𑀳𑀧𑁆𑀨𑀮𑁂𑀧𑀺 𑀲𑀼𑀪𑀓𑀺𑀡𑁆𑀳𑁂 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀦𑀯 𑀩𑁆𑀭𑀳𑁆𑀫𑀮𑁄𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑁂 𑀘𑀢𑀼𑀢𑁆𑀣𑀺𑀁𑀬𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀪𑀚𑀦𑁆𑀢𑀺. 𑀦𑀺𑀓𑁆𑀔𑀫𑀦𑁆𑀢𑁂𑀲𑀽𑀢𑀺 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀅𑀪𑀺𑀦𑀺𑀓𑁆𑀔𑀫𑀦𑁆𑀢𑁂𑀲𑀼. 𑀅𑀪𑀺𑀚𑀸𑀢𑀺 𑀧𑀦𑁂𑀢𑁆𑀣 𑀚𑀸𑀢𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀸𑀯 𑀲𑀗𑁆𑀕𑀳𑀺𑀢𑀸. 𑀦𑀺𑀫𑀻𑀬𑀢𑀺 𑀅𑀦𑀼𑀫𑀻𑀬𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀦𑀺𑀫𑀺𑀢𑁆𑀢𑀁, 𑀓𑀸𑀭𑀡𑀁. 𑀜𑀸𑀧𑀓𑀫𑁆𑀧𑀺 𑀳𑀺 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀦 𑀨𑀮𑀁 𑀲𑀺𑀤𑁆𑀥𑀫𑁂𑀯 𑀓𑀢𑁆𑀯𑀸 𑀕𑀡𑁆𑀳𑀺, 𑀬𑀣𑀸 𑀢𑀁 𑀅𑀲𑀺𑀢𑁄 𑀇𑀲𑀺 𑀅𑀪𑀺𑀚𑀸𑀢𑀺𑀬𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀦 𑀩𑀼𑀤𑁆𑀥𑀕𑀼𑀡𑁂 𑀲𑀺𑀤𑁆𑀥𑁂 𑀏𑀯 𑀓𑀢𑁆𑀯𑀸 𑀕𑀡𑁆𑀳𑀺, 𑀏𑀯𑀁 𑀧𑀦 𑀕𑀬𑁆𑀳𑀫𑀸𑀦𑀁 𑀢𑀦𑁆𑀦𑀺𑀫𑀺𑀢𑁆𑀢𑀓𑀁 𑀨𑀮𑀁 𑀢𑀤𑀸𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑀁 𑀯𑀺𑀬 𑀯𑁄𑀳𑀭𑀻𑀬𑀢𑀺 𑀢𑀩𑁆𑀪𑀸𑀯𑁂 𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀢𑀣𑀸 𑀘𑀸𑀳 𑀪𑀕𑀯𑀸 ‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺, 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁦𑁨, 𑁨𑁦𑁪) 𑀘 𑀏𑀯𑀫𑀸𑀤𑀺. 𑀇𑀫𑀫𑀢𑁆𑀣𑀦𑁆𑀢𑀺 𑀧𑀜𑁆𑀘 𑀩𑀼𑀤𑁆𑀥𑀸 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀬𑀸𑀣𑀸𑀯𑀢𑁄 𑀚𑀸𑀦𑀺𑀁𑀲𑀼.

𑀚𑀸𑀢𑀺𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀡𑁆𑀡𑀦𑀸

𑁫-𑁭. 𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 ‘‘𑀇𑀢𑁄 𑀲𑁄 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂’’𑀢𑀺𑀆𑀤𑀺𑀦𑀸 𑀬𑀢𑁆𑀣 𑀬𑀢𑁆𑀣 𑀓𑀧𑁆𑀧𑁂 𑀢𑁂 𑀢𑁂 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀢𑀲𑁆𑀲 𑀓𑀧𑁆𑀧𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀭𑀺𑀚𑀸𑀦𑀦𑀯𑀲𑁂𑀦. ‘‘𑀇𑀤𑀁 𑀢’’𑀦𑁆𑀢𑀺 𑀳𑀺 𑀦𑀺𑀬𑀫𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀧𑀭𑀺𑀘𑁆𑀙𑁂𑀤𑁄. 𑀧𑀭𑀺𑀢𑁆𑀢𑀦𑁆𑀢𑀺 𑀇𑀢𑁆𑀢𑀭𑀁. 𑀮𑀳𑀼𑀓𑀦𑁆𑀢𑀺 𑀲𑀮𑁆𑀮𑀳𑀼𑀓𑀁, 𑀆𑀬𑀼𑀦𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀭𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀉𑀪𑀬𑀫𑁂𑀢𑀁 𑀅𑀧𑁆𑀧𑀓𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺.

‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 𑀅𑀯𑀺𑀲𑁂𑀲𑀚𑁄𑀢𑀦𑀁 ‘‘𑀯𑀻𑀲𑀁 𑀯𑀸 𑀢𑀺𑀁𑀲𑀁 𑀯𑀸’’𑀢𑀺𑀆𑀤𑀺𑀦𑀸 𑀅𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀬𑀣𑀸𑀮𑀸𑀪𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀬𑀜𑁆𑀘 𑀦𑀬𑁄 𑀅𑀧𑀘𑀼𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀤𑀻𑀖𑀸𑀬𑀼𑀓𑁄 𑀧𑀦 𑀅𑀢𑀺𑀤𑀼𑀮𑁆𑀮𑀪𑁄’’𑀢𑀺 𑀆𑀳. 𑀇𑀤𑀁 𑀢𑀁 𑀯𑀺𑀲𑁂𑀲𑀯𑀯𑀢𑁆𑀣𑀸𑀧𑀦𑀁 𑀧𑀼𑀕𑁆𑀕𑀮𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀯𑀺𑀲𑀸𑀔𑀸’’𑀢𑀺𑀆𑀤𑀺𑀫𑀸𑀳.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀢𑀢𑁆𑀢𑀓𑀫𑁆𑀧𑀺 𑀓𑀸𑀮𑀁 𑀦 𑀚𑀻𑀯𑀺, 𑀦𑀦𑀼 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀅𑀢𑀺𑀯𑀺𑀬𑀉𑀴𑀸𑀭𑀢𑀫𑁂𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀦𑁆𑀢𑀺. 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀲𑁆𑀲𑀻𑀆𑀤𑀬𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀚𑀸𑀢𑀺𑀬𑀸 𑀫𑁂𑀢𑁆𑀢𑀸𑀞𑀸𑀦𑀢𑀸𑀬 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀢𑀸. 𑀢𑀤𑀦𑀼𑀕𑀼𑀡𑀜𑁆𑀳𑀺 𑀢𑁂𑀲𑀁 𑀯𑀺𑀲𑁂𑀲𑀢𑁄 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀢𑀲𑁆𑀲 𑀯𑀺𑀲𑁂𑀲𑀢𑁄 𑀩𑀳𑀼𑀮𑀁 𑀔𑁂𑀫𑀯𑀺𑀢𑀓𑁆𑀓𑀽𑀧𑀦𑀺𑀲𑁆𑀲𑀬𑀢𑀸𑀬 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀭𑁄𑀧𑀤𑁂𑀲𑀭𑀳𑀺𑀢𑀜𑀸𑀡𑀯𑀺𑀲𑁂𑀲𑀽𑀧𑀦𑀺𑀲𑁆𑀲𑀬𑀢𑀸𑀬 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸, 𑀅𑀲𑀗𑁆𑀔𑀸𑀭𑀺𑀓𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸, 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀆𑀬𑀼 𑀆𑀥𑀸𑀭𑀯𑀺𑀲𑁂𑀲𑀢𑁄, 𑀦𑀺𑀲𑁆𑀲𑀬𑀯𑀺𑀲𑁂𑀲𑀢𑁄, 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀢𑁄 𑀘 𑀅𑀧𑀭𑀺𑀫𑁂𑀬𑁆𑀬𑀸𑀦𑀼𑀪𑀸𑀯𑀢𑀸𑀬 𑀓𑀸𑀭𑀡𑀲𑁆𑀲. 𑀢𑀢𑁆𑀣 𑀘𑀺𑀭𑀢𑀭𑀁 𑀓𑀸𑀮𑀁 𑀲𑀦𑁆𑀢𑀸𑀦𑀲𑁆𑀲 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑀢𑀸 𑀆𑀥𑀸𑀭𑀯𑀺𑀲𑁂𑀲𑀢𑀸. 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀆𑀲𑀬𑀲𑀫𑁆𑀧𑀤𑀸 𑀦𑀺𑀲𑁆𑀲𑀬𑀯𑀺𑀲𑁂𑀲𑀢𑀸. 𑀮𑀸𑀪𑀫𑀘𑁆𑀙𑀭𑀺𑀬𑀸𑀤𑀺𑀧𑀸𑀧𑀥𑀫𑁆𑀫𑀯𑀺𑀓𑁆𑀔𑀫𑁆𑀪𑀦𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁄. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀆𑀬𑀽𑀳𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀜𑁆𑀘 𑀦𑀬𑁄 𑀲𑀩𑁆𑀩𑁂𑀲𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀸𑀬𑀽𑀳𑀦𑁂 𑀲𑀸𑀥𑀸𑀭𑀡𑁄𑀢𑀺 𑀢𑀲𑁆𑀲 𑀨𑀮𑁂𑀦𑀸𑀧𑀺 𑀏𑀓𑀲𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀇𑀢𑀺 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸’’𑀢𑀺, 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀸𑀮𑀸𑀯𑀢𑁆𑀣𑀸𑀦𑀸𑀬𑀼𑀓𑀸𑀢𑀺 𑀅𑀢𑁆𑀣𑁄. 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀲𑀁𑀯𑀢𑁆𑀢𑀦𑀲𑀫𑀢𑁆𑀣𑀁 𑀧𑀭𑀺𑀘𑀺𑀢𑀁 𑀓𑀫𑁆𑀫𑀁 𑀳𑁄𑀢𑀺, 𑀩𑀼𑀤𑁆𑀥𑀸 𑀧𑀦 𑀢𑀤𑀸 𑀫𑀦𑀼𑀲𑁆𑀲𑀸𑀦𑀁 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑀸𑀦𑀼𑀭𑀽𑀧𑀫𑁂𑀯 𑀓𑀸𑀮𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺 𑀢𑀢𑁄 𑀧𑀭𑀁 𑀞𑀢𑁆𑀯𑀸 𑀲𑀸𑀥𑁂𑀢𑀩𑁆𑀩𑀧𑀬𑁄𑀚𑀦𑀸𑀪𑀸𑀯𑀢𑁄, 𑀥𑀫𑁆𑀫𑀢𑀸𑀯𑁂𑀲𑀸𑀢𑀺 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀢𑁄 𑀧𑀭𑀁 𑀧𑀦 𑀅𑀝𑁆𑀞𑀸𑀦𑀲𑁆𑀲 ‘‘𑀉𑀢𑀼𑀪𑁄𑀚𑀦𑀯𑀺𑀧𑀢𑁆𑀢𑀺𑀬𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁫) 𑀓𑀸𑀭𑀡𑀁 𑀯𑀼𑀢𑁆𑀢𑀁, ‘‘𑀢𑀁 𑀮𑁄𑀓𑀲𑀸𑀥𑀸𑀭𑀡𑀁 𑀮𑁄𑀓𑁂 𑀚𑀸𑀢𑀲𑀁𑀯𑀼𑀤𑁆𑀥𑀸𑀦𑀁 𑀢𑀣𑀸𑀕𑀢𑀸𑀦𑀁 𑀦 𑀳𑁄𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀦𑁂𑀲𑀁 𑀭𑁄𑀕𑀓𑀺𑀮𑀫𑀣𑀸𑀤𑀬𑁄 𑀳𑁄𑀦𑁆𑀢𑀺𑀬𑁂𑀯. 𑀉𑀢𑀼𑀪𑁄𑀚𑀦𑀯𑀲𑁂𑀦𑀸𑀢𑀺 𑀅𑀲𑀫𑁆𑀧𑀦𑁆𑀦𑀲𑁆𑀲, 𑀲𑀫𑁆𑀧𑀦𑁆𑀦𑀲𑁆𑀲 𑀘 𑀉𑀢𑀼𑀦𑁄, 𑀪𑁄𑀚𑀦𑀲𑁆𑀲 𑀘 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀆𑀬𑀼 𑀳𑀸𑀬𑀢𑀺𑀧𑀺 𑀯𑀟𑁆𑀠𑀢𑀺𑀧𑀺. 𑀆𑀬𑀽𑀢𑀺 𑀘 𑀧𑀭𑀫𑀸𑀬𑀼 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁪𑁦) 𑀯𑀼𑀢𑁆𑀢𑀫𑁂𑀯.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑀸 𑀥𑀫𑁆𑀫𑀺𑀓𑀸, 𑀦 𑀥𑀫𑁆𑀫𑀺𑀓𑀸 𑀅𑀥𑀫𑁆𑀫𑀺𑀓𑀸, 𑀳𑀺𑀁𑀲𑀸𑀤𑀺𑀅𑀥𑀫𑁆𑀫𑀧𑀲𑀼𑀢𑀸. 𑀅𑀥𑀫𑁆𑀫𑀺𑀓𑀫𑁂𑀯 𑀳𑁄𑀢𑀺 𑀇𑀲𑁆𑀲𑀭𑀚𑀦𑀸𑀦𑀁 𑀅𑀦𑀼𑀯𑀢𑁆𑀢𑀦𑁂𑀦, 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂𑀦 𑀘. 𑀉𑀡𑁆𑀳𑀯𑀮𑀸𑀳𑀓𑀸 𑀤𑁂𑀯𑀢𑀸𑀢𑀺 𑀉𑀡𑁆𑀳𑀉𑀢𑀼𑀦𑁄 𑀧𑀘𑁆𑀘𑀬𑀪𑀽𑀢𑀫𑁂𑀖𑀫𑀸𑀮𑀸𑀲𑀫𑀼𑀝𑁆𑀞𑀸𑀧𑀓𑀸 𑀤𑁂𑀯𑀧𑀼𑀢𑁆𑀢𑀸. 𑀢𑁂𑀲𑀁 𑀓𑀺𑀭 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀓𑀸𑀮𑀫𑁂𑀯 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀡𑁆𑀳𑀁 𑀨𑀭𑀫𑀸𑀦𑀸 𑀯𑀮𑀸𑀳𑀓𑀫𑀸𑀮𑀸 𑀦𑀸𑀢𑀺𑀩𑀳𑀮𑀸 𑀇𑀢𑁄 𑀘𑀺𑀢𑁄 𑀦𑀪𑀁 𑀙𑀸𑀤𑁂𑀦𑁆𑀢𑀻 𑀯𑀺𑀢𑀦𑁄𑀢𑀺. 𑀏𑀲 𑀦𑀬𑁄 𑀲𑀻𑀢𑀯𑀮𑀸𑀳𑀓𑀯𑀲𑁆𑀲𑀯𑀮𑀸𑀳𑀓𑀸𑀲𑀼. 𑀅𑀩𑁆𑀪𑀯𑀮𑀸𑀳𑀓𑀸 𑀧𑀦 𑀤𑁂𑀯𑀢𑀸 𑀲𑀻𑀢𑀼𑀡𑁆𑀳𑀯𑀲𑁆𑀲𑁂𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀅𑀩𑁆𑀪𑀧𑀝𑀮𑀲𑁆𑀲𑁂𑀯 𑀲𑀫𑀼𑀝𑁆𑀞𑀸𑀧𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀫𑀺𑀢𑁆𑀢𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀓𑀸𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀢𑁆𑀢𑀯𑀺𑀥𑀸𑀧𑀺 𑀤𑁂𑀯𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀯 𑀢𑀸 𑀧𑀦 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀤𑀜𑁆𑀜𑁂 𑀧𑀞𑀫𑀪𑀽𑀫𑀺𑀓𑁂 𑀓𑀸𑀫𑀸𑀯𑀘𑀭𑀤𑁂𑀯𑁂 𑀲𑀸𑀫𑀜𑁆𑀜𑀢𑁄 𑀕𑀡𑁆𑀳𑀦𑁆𑀢𑁄 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸’’𑀢𑀺 𑀆𑀳. 𑀢𑀸𑀲𑀁 𑀅𑀥𑀫𑁆𑀫𑀺𑀓𑀢𑀸𑀬𑀸𑀢𑀺 𑀭𑀸𑀚𑀽𑀦𑀁 𑀅𑀥𑀫𑁆𑀫𑀺𑀓𑀪𑀸𑀯𑀫𑀽𑀮𑀓𑁂𑀦 𑀉𑀧𑀭𑀸𑀚𑀸𑀤𑀺𑀅𑀥𑀫𑁆𑀫𑀺𑀓𑀪𑀸𑀯𑀧𑀭𑀫𑁆𑀧𑀭𑀸𑀪𑀢𑁂𑀦 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀅𑀥𑀫𑁆𑀫𑀺𑀓𑀪𑀸𑀯𑁂𑀦. 𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 𑀩𑀳𑁆𑀯𑀸𑀩𑀸𑀥𑀢𑀸𑀤𑀺 𑀅𑀦𑀺𑀝𑁆𑀞𑀨𑀮𑀽𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀅𑀥𑀫𑁆𑀫𑀺𑀓𑀢𑀸𑀲𑀜𑁆𑀜𑀺𑀢𑀲𑁆𑀲 𑀲𑀸𑀥𑀸𑀭𑀡𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀩𑀮𑁂𑀦 𑀯𑀺𑀲𑀫𑀁 𑀯𑀸𑀬𑀦𑁆𑀢𑁂𑀦 𑀯𑀸𑀬𑀼𑀦𑀸 𑀧𑀻𑀴𑀺𑀬𑀫𑀸𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀯𑀺𑀲𑀫𑀁 𑀧𑀭𑀺𑀯𑀢𑁆𑀢𑀦𑁆𑀢𑀺 𑀬𑀣𑀸𑀫𑀕𑁆𑀕𑁂𑀦 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺. 𑀅𑀲𑁆𑀲𑀺𑀤𑀁 𑀬𑀣𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀯𑀺𑀲𑀫𑀧𑀭𑀺𑀯𑀢𑁆𑀢𑀦𑀁 𑀯𑀺𑀲𑀫𑀯𑀸𑀢𑀲𑀗𑁆𑀔𑁄𑀪𑀳𑁂𑀢𑀼𑀓𑀁, 𑀏𑀯𑀁 𑀉𑀢𑀼𑀯𑀲𑁆𑀲𑀸𑀤𑀺𑀯𑀺𑀲𑀫𑀧𑁆𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀸𑀢𑁄 𑀬𑀣𑀸𑀫𑀕𑁆𑀕𑁂𑀦 𑀦 𑀯𑀸𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑀢𑀸𑀦𑀦𑁆𑀢𑀺 𑀲𑀻𑀢𑀯𑀮𑀸𑀳𑀓𑀤𑁂𑀯𑀢𑀸𑀤𑀺𑀤𑁂𑀯𑀢𑀸𑀦𑀁. 𑀢𑁂𑀦𑀸𑀳 ‘‘𑀲𑀻𑀢𑀼𑀡𑁆𑀳𑀪𑁂𑀤𑁄 𑀉𑀢𑀽’’𑀢𑀺𑀆𑀤𑀺. 𑀢𑀲𑁆𑀫𑀺𑀁 𑀅𑀲𑀫𑁆𑀧𑀚𑁆𑀚𑀦𑁆𑀢𑁂𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀯𑀲𑁆𑀲𑀩𑀻𑀚𑀪𑀽𑀢𑁂 𑀉𑀢𑀼𑀫𑁆𑀳𑀺 𑀬𑀣𑀸𑀓𑀸𑀮𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁂.

‘‘𑀦 𑀲𑀫𑁆𑀫𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀤𑀸𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀤𑀸𑀘𑀺 𑀯𑀲𑁆𑀲𑀢𑀻𑀢𑀺 𑀓𑀤𑀸𑀘𑀺 𑀅𑀯𑀲𑁆𑀲𑀦𑀓𑀸𑀮𑁂 𑀯𑀲𑁆𑀲𑀢𑀺. 𑀓𑀤𑀸𑀘𑀺 𑀦 𑀯𑀲𑁆𑀲𑀢𑀻𑀢𑀺 𑀓𑀤𑀸𑀘𑀺 𑀯𑀲𑁆𑀲𑀺𑀢𑀩𑁆𑀩𑀓𑀸𑀮𑁂 𑀦 𑀯𑀲𑁆𑀲𑀢𑀺. 𑀓𑀢𑁆𑀣𑀘𑀺 𑀯𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀦 𑀯𑀲𑁆𑀲𑀢𑀻𑀢𑀺 𑀧𑀤𑁂𑀲𑀫𑀸𑀳. ‘‘𑀯𑀲𑁆𑀲𑀦𑁆𑀢𑁄𑀧𑀻’’𑀢𑀺𑀆𑀤𑀺 ‘‘𑀓𑀤𑀸𑀘𑀺 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀦 𑀯𑀲𑁆𑀲𑀢𑀻’’𑀢𑀺 𑀧𑀤𑀤𑁆𑀯𑀬𑀲𑁆𑀲𑁂𑀯 𑀅𑀢𑁆𑀣𑀯𑀺𑀯𑀭𑀡𑀁. 𑀯𑀺𑀕𑀢𑀕𑀦𑁆𑀥𑀯𑀡𑁆𑀡𑀭𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀭𑁄𑀚𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀪𑀢𑁆𑀢𑀧𑀘𑀦𑀪𑀸𑀚𑀦𑀲𑁆𑀲 𑀏𑀓𑀧𑀲𑁆𑀲𑁂. 𑀉𑀢𑁆𑀢𑀡𑁆𑀟𑀼𑀮𑀦𑁆𑀢𑀺 𑀧𑀸𑀓𑀢𑁄 𑀉𑀓𑁆𑀓𑀦𑁆𑀢𑀢𑀡𑁆𑀟𑀼𑀮𑀁. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀲𑀩𑁆𑀩𑀲𑁄 𑀅𑀧𑀭𑀺𑀡𑀢𑀁, 𑀏𑀓𑀤𑁂𑀲𑁂𑀦 𑀧𑀭𑀺𑀡𑀢𑀁, 𑀤𑀼𑀧𑀭𑀺𑀡𑀢𑀜𑁆𑀘𑀸𑀢𑀺 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺. 𑀧𑀘𑁆𑀘𑀢𑀺 𑀧𑀓𑁆𑀓𑀸𑀲𑀬𑀁 𑀉𑀧𑀕𑀘𑁆𑀙𑀢𑀺. 𑀅𑀧𑁆𑀧𑀸𑀬𑀼𑀓𑀸𑀢𑀺 𑀏𑀢𑁆𑀣 ‘‘𑀤𑀼𑀩𑁆𑀩𑀡𑁆𑀡𑀸 𑀘𑀸’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀉𑀢𑀼𑀪𑁄𑀚𑀦𑀯𑀲𑁂𑀦 𑀆𑀬𑀼 𑀳𑀸𑀬𑀢𑀺 𑀳𑁂𑀢𑀼𑀫𑁆𑀳𑀺 𑀅𑀧𑀭𑀺𑀓𑁆𑀔𑀻𑀡𑁂𑀧𑀺 𑀧𑀘𑁆𑀘𑀬𑀲𑁆𑀲 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸.

‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀯𑀟𑁆𑀠𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀦 𑀳𑀺 𑀏𑀓𑀲𑁆𑀫𑀺𑀁 𑀅𑀦𑁆𑀢𑀭𑀓𑀧𑁆𑀧𑁂 𑀅𑀦𑁂𑀓𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑁄 𑀏𑀯 𑀧𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑀺 𑀞𑀢𑁆𑀯𑀸𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀬𑀁𑀬𑀁𑀆𑀬𑀼𑀧𑀭𑀺𑀫𑀸𑀡𑁂𑀲𑀽𑀢𑀺 𑀬𑀢𑁆𑀢𑀓𑀬𑀢𑁆𑀢𑀓𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑁂𑀲𑀼. 𑀢𑁂𑀲𑀫𑁆𑀧𑀻𑀢𑀺 𑀩𑀼𑀤𑁆𑀥𑀸𑀦𑀁. 𑀢𑀁 𑀢𑀤𑁂𑀯 𑀆𑀬𑀼𑀧𑀭𑀺𑀫𑀸𑀡𑀁 𑀳𑁄𑀢𑀺, 𑀢𑀢𑁆𑀣 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀚𑀸𑀢𑀺𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸

𑀩𑁄𑀥𑀺𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁮. 𑀫𑀽𑀮𑁂𑀢𑀺 𑀫𑀽𑀮𑀸𑀯𑀬𑀯𑀲𑁆𑀲 𑀲𑀫𑀻𑀧𑁂. 𑀢𑀁 𑀧𑀦 𑀢𑀲𑁆𑀲𑀸 𑀳𑁂𑀝𑁆𑀞𑀸𑀧𑀤𑁂𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀸𑀝𑀮𑀺𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸’’𑀢𑀺. 𑀢𑀁𑀤𑀺𑀯𑀲𑀦𑁆𑀢𑀺 𑀅𑀢𑁆𑀢𑀦𑀸 𑀚𑀸𑀢𑀤𑀺𑀯𑀲𑁂, 𑀢𑀁𑀤𑀺𑀯𑀲𑀦𑁆𑀢𑀺 𑀯𑀸 𑀢𑀁 𑀪𑀕𑀯𑀢𑁄 𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂. 𑀲𑁄 𑀓𑀺𑀭 𑀩𑁄𑀥𑀺𑀭𑀼𑀓𑁆𑀔𑁄 𑀲𑀸𑀮𑀓𑀮𑁆𑀬𑀸𑀡𑀻 𑀯𑀺𑀬 𑀧𑀣𑀯𑀺𑀬𑀸 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀧𑀼𑀭𑁂𑀢𑀭𑀁 𑀯𑀟𑁆𑀠𑁂𑀦𑁆𑀢𑁄 𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀧𑀣𑀯𑀺𑀁 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 𑀭𑀢𑀦𑀲𑀢𑀁 𑀉𑀘𑁆𑀘𑁄, 𑀢𑀸𑀯𑀤𑁂𑀯 𑀘 𑀯𑀺𑀢𑁆𑀣𑀢𑁄 𑀳𑀼𑀢𑁆𑀯𑀸 𑀦𑀪𑀁 𑀧𑀽𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀬𑀫𑁆𑀧𑀺 𑀓𑀺𑀭𑁂𑀢𑀲𑁆𑀲 𑀭𑀼𑀓𑁆𑀔𑀪𑀸𑀯𑁂𑀦 𑀯𑀺𑀬 𑀅𑀜𑁆𑀜𑁂𑀳𑀺 𑀯𑁂𑀫𑀢𑁆𑀢𑀢𑀸. 𑀖𑀦𑀲𑀁𑀳𑀢𑀦𑀸𑀴𑀯𑀡𑁆𑀝𑀢𑀸𑀬 𑀓𑀡𑁆𑀡𑀺𑀓𑀩𑀤𑁆𑀥𑁂𑀳𑀺 𑀯𑀺𑀬 𑀧𑀼𑀧𑁆𑀨𑁂𑀳𑀺. 𑀏𑀓𑀲𑀜𑁆𑀙𑀦𑁆𑀦𑀸𑀢𑀺 𑀧𑀼𑀧𑁆𑀨𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀏𑀓𑀚𑁆𑀛𑀁 𑀲𑀜𑁆𑀙𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣 𑀦𑀺𑀩𑀤𑁆𑀥…𑀧𑁂… 𑀲𑀫𑀼𑀚𑁆𑀚𑀮𑀦𑁆𑀢𑀺 𑀢𑀳𑀁 𑀢𑀳𑀁 𑀑𑀮𑀫𑁆𑀩𑀺𑀢𑀓𑀼𑀲𑀼𑀫𑀤𑀸𑀫𑁂𑀳𑀺 𑀘𑁂𑀯 𑀢𑀳𑀁 𑀢𑀳𑀁 𑀔𑀺𑀢𑁆𑀢𑀫𑀸𑀮𑀸𑀧𑀺𑀡𑁆𑀟𑀻𑀳𑀺 𑀘 𑀇𑀢𑁄 𑀘𑀺𑀢𑁄 𑀯𑀺𑀧𑁆𑀧𑀓𑀺𑀡𑁆𑀡𑀯𑀺𑀯𑀺𑀥𑀯𑀡𑁆𑀝𑀫𑀼𑀢𑁆𑀢𑀧𑀼𑀧𑁆𑀨𑁂𑀳𑀺 𑀘 𑀲𑀫𑁆𑀫𑀤𑁂𑀯 𑀉𑀚𑁆𑀚𑀮𑀁. 𑀅𑀜𑁆𑀜𑀫𑀜𑁆𑀜𑀁 𑀲𑀺𑀭𑀻𑀲𑀫𑁆𑀧𑀢𑁆𑀢𑀸𑀦𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀺𑀭𑀺𑀬𑀸 𑀲𑁄𑀪𑀸𑀬 𑀲𑀫𑁆𑀧𑀦𑁆𑀦𑀸𑀦𑀺. 𑀩𑀼𑀤𑁆𑀥𑀕𑀼𑀡𑀯𑀺𑀪𑀯𑀲𑀺𑀭𑀺𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀪𑀺𑀕𑀦𑁆𑀢𑀩𑁆𑀩𑀕𑀼𑀡𑀯𑀺𑀪𑀽𑀢𑀺𑀲𑁄𑀪𑀁. 𑀧𑀝𑀺𑀯𑀺𑀚𑁆𑀛𑀫𑀸𑀦𑁄𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑁄.

𑀲𑁂𑀢𑀫𑁆𑀩𑀭𑀼𑀓𑁆𑀔𑁄𑀢𑀺 𑀲𑁂𑀢𑀯𑀡𑁆𑀡𑀨𑀮𑁄 𑀅𑀫𑁆𑀩𑀭𑀼𑀓𑁆𑀔𑁄. 𑀢𑀤𑁂𑀯𑀸𑀢𑀺 𑀧𑀸𑀝𑀮𑀺𑀬𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀫𑁂𑀯. 𑀏𑀓𑀢𑁄𑀢𑀺 𑀏𑀓𑀧𑀲𑁆𑀲𑁂. 𑀲𑀼𑀭𑀲𑀸𑀦𑀻𑀢𑀺 𑀲𑀼𑀫𑀥𑀼𑀭𑀭𑀲𑀸𑀦𑀺.

𑀏𑀓𑁄𑀯 𑀧𑀮𑁆𑀮𑀗𑁆𑀓𑁄𑀢𑀺 𑀏𑀓𑁄𑀯 𑀧𑀮𑁆𑀮𑀗𑁆𑀓𑀧𑁆𑀧𑀤𑁂𑀲𑁄. 𑀲𑁄 𑀲𑁄 𑀭𑀼𑀓𑁆𑀔𑁄 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺 𑀩𑀼𑀚𑁆𑀛𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀢𑁆𑀯𑀸.

𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁯. 𑀲𑀸𑀯𑀓𑀧𑀭𑀺𑀘𑁆𑀙𑁂𑀤𑁂𑀢𑀺 𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑁂. ‘‘𑀔𑀡𑁆𑀟𑀢𑀺𑀲𑁆𑀲’’𑀦𑁆𑀢𑀺 𑀤𑁆𑀯𑁂𑀧𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀏𑀓𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀔𑀡𑁆𑀟𑁄 𑀘 𑀢𑀺𑀲𑁆𑀲𑁄 𑀘𑀸’’𑀢𑀺, 𑀩𑀼𑀤𑁆𑀥𑀸𑀦𑀁 𑀲𑀳𑁄𑀤𑀭𑁄, 𑀯𑁂𑀫𑀸𑀢𑀺𑀓𑁄𑀧𑀺 𑀯𑀸 𑀚𑁂𑀝𑁆𑀞𑀪𑀸𑀢𑀸 𑀦 𑀳𑁄𑀢𑀻𑀢𑀺 ‘‘𑀏𑀓𑀧𑀺𑀢𑀺𑀓𑁄 𑀓𑀦𑀺𑀝𑁆𑀞𑀪𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁂𑀲𑁂𑀳𑀺 𑀧𑀼𑀢𑁆𑀢𑁂𑀳𑀺. ‘‘𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀕𑀼𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀔𑀺𑀦𑀸 𑀪𑀕𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀢𑁆𑀢𑀭𑁄𑀢𑀺 𑀉𑀢𑁆𑀢𑀫𑁄. 𑀧𑀼𑀦 𑀉𑀢𑁆𑀢𑀭𑁄𑀢𑀺 𑀣𑁂𑀭𑀁 𑀦𑀸𑀫𑁂𑀦 𑀯𑀤𑀢𑀺. 𑀧𑀸𑀭𑀦𑁆𑀢𑀺 𑀧𑀭𑀓𑁄𑀝𑀺𑀫𑀢𑁆𑀣𑀓𑀁. 𑀧𑀜𑁆𑀜𑀸𑀯𑀺𑀲𑀬𑁂𑀢𑀺 𑀧𑀜𑁆𑀜𑀸𑀥𑀺𑀓𑀸𑀭𑁂. 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀳𑀺 𑀧𑀯𑀢𑁆𑀢𑀺𑀁 𑀯𑀤𑀢𑀺.

𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧𑁦. 𑀉𑀧𑁄𑀲𑀣𑀦𑁆𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁. 𑀤𑀼𑀢𑀺𑀬𑀢𑀢𑀺𑀬𑁂𑀲𑀽𑀢𑀺 𑀤𑀼𑀢𑀺𑀬𑁂, 𑀢𑀢𑀺𑀬𑁂 𑀘 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁂. 𑀏𑀲𑁂𑀯 𑀦𑀬𑁄𑀢𑀺 𑀘𑀢𑀼𑀭𑀗𑁆𑀕𑀺𑀓𑀢𑀁 𑀅𑀢𑀺𑀤𑀺𑀲𑀢𑀺. 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸 𑀤𑀻𑀧𑁂𑀢𑀩𑁆𑀩𑀸, 𑀲𑀸 𑀧𑀦 𑀬𑀲𑁆𑀫𑀸 𑀫𑀦𑁄𑀭𑀣𑀧𑀽𑀭𑀡𑀺𑀬𑀁 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁧) 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧𑁧. 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀪𑀸𑀯𑀦𑁆𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀦𑀺𑀬𑀢𑀉𑀧𑀝𑁆𑀞𑀸𑀓𑀪𑀸𑀯𑀁. 𑀅𑀦𑀺𑀬𑀢𑀼𑀉𑀧𑀝𑁆𑀞𑀸𑀓𑀸 𑀧𑀦 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀁 𑀩𑀳𑀽 𑀅𑀳𑁂𑀲𑀼𑀁. 𑀢𑁂𑀦𑀸𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀬𑁂𑀦 𑀓𑀸𑀭𑀡𑁂𑀦 𑀲𑀢𑁆𑀣𑀼 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀪𑀸𑀯𑀁 𑀉𑀧𑀕𑀢𑁄, 𑀬𑀣𑀸 𑀘 𑀉𑀧𑀕𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀏𑀓𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳 𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀓𑁂𑀦 𑀓𑀫𑁆𑀫𑀼𑀦𑀸 𑀘𑁄𑀤𑀺𑀬𑀫𑀸𑀦𑁄. 𑀅𑀣 𑀦𑀁 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀔𑁂𑀫𑀁 𑀫𑀕𑁆𑀕𑀁 𑀲𑀦𑁆𑀥𑀸𑀬 ‘‘𑀏𑀳𑀺 𑀪𑀺𑀓𑁆𑀔𑀼 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀓𑀲𑁆𑀫𑀸 𑀧𑀦𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀦𑀸𑀭𑁄𑀘𑁂𑀲𑀻𑀢𑀺? 𑀆𑀭𑁄𑀘𑀺𑀢𑁂𑀧𑀺 𑀅𑀲𑀤𑁆𑀤𑀳𑀦𑁆𑀢𑁄 𑀦𑀸𑀤𑀺𑀬𑀺𑀲𑁆𑀲𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺𑀢𑀺. 𑀢𑁂𑀢𑀺 𑀢𑁂 𑀕𑀫𑀦𑀁, ‘‘𑀢’’𑀦𑁆𑀢𑀺 𑀯𑀸 𑀧𑀸𑀞𑁄.

𑀅𑀦𑁆𑀯𑀸𑀲𑀢𑁆𑀢𑁄𑀢𑀺 𑀅𑀦𑀼𑀩𑀤𑁆𑀥𑁄, 𑀉𑀧𑀤𑁆𑀤𑀼𑀢𑁄 𑀯𑀸. 𑀥𑀫𑁆𑀫𑀕𑀸𑀭𑀯𑀦𑀺𑀲𑁆𑀲𑀺𑀢𑁄 𑀲𑀁𑀯𑁂𑀕𑁄 𑀥𑀫𑁆𑀫𑀲𑀁𑀯𑁂𑀕𑁄 ‘‘𑀅𑀫𑁆𑀳𑁂𑀲𑀼 𑀦𑀸𑀫 𑀢𑀺𑀝𑁆𑀞𑀦𑁆𑀢𑁂𑀲𑀼 𑀪𑀕𑀯𑀢𑁄𑀧𑀺 𑀈𑀤𑀺𑀲𑀁 𑀚𑀸𑀢’’𑀦𑁆𑀢𑀺. ‘‘𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 ‘‘𑀅𑀳𑀁 𑀪𑀦𑁆𑀢𑁂 𑀢𑀼𑀫𑁆𑀳𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀜𑁆𑀜𑀸𑀬𑁂𑀯 𑀫𑁂 𑀲𑀸 𑀤𑀺𑀲𑀸𑀢𑀺 𑀅𑀲𑀼𑀜𑁆𑀜𑀸𑀬𑁂𑀯 𑀫𑀫 𑀲𑀸 𑀤𑀺𑀲𑀸. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀯 𑀑𑀯𑀸𑀤𑁄 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀲𑀤𑀺𑀲𑁄’’𑀢𑀺.

𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀻𑀢𑀺 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀸𑀲𑀁 𑀦 𑀮𑀪𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀲𑁆𑀲𑀸𑀧𑀺 𑀥𑀫𑁆𑀫𑀲𑁆𑀲𑀸𑀢𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦𑀲𑁆𑀲 𑀧𑀭𑀫𑁆𑀫𑀼𑀔𑀸𑀯 𑀧𑀯𑀢𑁆𑀢𑀸 𑀧𑀕𑁂𑀯 𑀬𑀸𑀘𑀦𑀸𑀬. 𑀢𑀲𑁆𑀲𑀸 𑀯𑀸𑀘𑀦𑀸𑀫𑀕𑁆𑀕𑁄𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀪𑀯𑁄. 𑀓𑀲𑁆𑀫𑀸? 𑀲𑁄 𑀦𑀺𑀤𑁆𑀤𑁂𑀲𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀬 𑀣𑁂𑀭𑀲𑁆𑀲 𑀪𑀺𑀓𑁆𑀔𑀼𑀢𑁄 𑀕𑀳𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀧𑀓𑁆𑀔𑀺𑀬𑁄. 𑀅𑀧𑀭𑁂 𑀧𑀦 ‘‘𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀧𑀝𑀺𑀧𑀸𑀝𑀺𑀬𑀸 𑀢𑀺𑀓𑀤𑀼𑀓𑁂𑀲𑀼 𑀤𑁂𑀯𑀲𑀺𑀓𑀁 𑀓𑀢𑁄𑀓𑀸𑀲𑁄 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀪𑀕𑀯𑀸𑀧𑀺𑀲𑁆𑀲 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀦𑀬𑀤𑀸𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀏𑀯𑀁 𑀅𑀪𑀺𑀥𑀫𑁆𑀫𑁄𑀧𑀺 𑀲𑀢𑁆𑀣𑀸𑀭𑀸 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑁄𑀧𑀺 𑀣𑁂𑀭𑁂𑀦 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑁄𑀯 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀕𑁆𑀕𑀼𑀧𑀝𑁆𑀞𑀸𑀓𑁄𑀢𑀺 𑀉𑀧𑀝𑁆𑀞𑀸𑀦𑁂 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀅𑀕𑁆𑀕𑀪𑀽𑀢𑁄 𑀉𑀧𑀝𑁆𑀞𑀸𑀓𑁄. 𑀣𑁂𑀭𑁄 𑀳𑀺 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦, 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦, 𑀧𑀸𑀤𑀧𑀭𑀺𑀓𑀫𑁆𑀫𑁂𑀦, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀺𑀘𑁆𑀘𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀲𑀢𑁆𑀣𑀼 𑀇𑀤𑀁 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀢𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀫𑀳𑀢𑀺𑀁 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀺𑀁 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀦𑀯 𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀺. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 ‘‘𑀲𑀘𑁂 𑀫𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑁂𑀬𑁆𑀬, 𑀪𑀕𑀯𑀢𑀺 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀦𑀸𑀳𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀭𑀢𑁆𑀢𑀺𑀁 𑀤𑀡𑁆𑀟𑀤𑀻𑀧𑀺𑀓𑀁 𑀳𑀢𑁆𑀣𑁂𑀦 𑀦 𑀫𑀼𑀜𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀼𑀧𑀝𑁆𑀞𑀸𑀓𑁄’’𑀢𑀺.

𑁧𑁨. 𑀧𑀺𑀢𑀼𑀫𑀸𑀢𑀼𑀚𑀸𑀢𑀦𑀕𑀭𑀧𑀭𑀺𑀘𑁆𑀙𑁂𑀤𑁄 𑀧𑀺𑀢𑀼𑀫𑀼𑀔𑁂𑀦 𑀆𑀕𑀢𑀢𑁆𑀢𑀸 ‘‘𑀧𑀺𑀢𑀺𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀯𑀼𑀢𑁆𑀢𑁄.

𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀏𑀢𑁆𑀢𑀓𑀁 𑀓𑀣𑁂𑀢𑁆𑀯𑀸𑀢𑀺 𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑀸𑀤𑀺𑀦𑀯𑀯𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀏𑀢𑁆𑀢𑀸𑀯𑀢𑀸 𑀤𑁂𑀲𑀦𑀁 𑀤𑁂𑀲𑁂𑀢𑁆𑀯𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁𑀬𑁂𑀯 𑀩𑀼𑀤𑁆𑀥𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀓𑀣𑁂𑀲𑀺, 𑀦 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬𑀁 (𑀩𑀼. 𑀯𑀁. 𑁬𑁪 𑀕𑀸𑀣𑀸𑀤𑀬𑁄) 𑀯𑀺𑀬 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁, 𑀢𑀢𑁄 𑀯𑀸 𑀧𑀦 𑀪𑀺𑀬𑁆𑀬𑁄𑀢𑀺? 𑀅𑀦𑀥𑀺𑀓𑀸𑀭𑀢𑁄, 𑀧𑀬𑁄𑀚𑀦𑀸𑀪𑀸𑀯𑀢𑁄 𑀘. 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬𑀜𑁆𑀳𑀺 (𑀩𑀼. 𑀯𑀁. 𑁭𑁫) 𑁋

‘‘𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭, 𑀅𑀪𑀺𑀦𑀻𑀳𑀸𑀭𑁄 𑀦𑀭𑀼𑀢𑁆𑀢𑀫;

𑀓𑀫𑁆𑀳𑀺 𑀓𑀸𑀮𑁂 𑀢𑀬𑀸 𑀯𑀻𑀭, 𑀧𑀢𑁆𑀣𑀺𑀢𑀸 𑀩𑁄𑀥𑀺𑀫𑀼𑀢𑁆𑀢𑀫𑀸’’𑀢𑀺. 𑀆𑀤𑀺𑀦𑀸 𑁋

𑀧𑀯𑀢𑁆𑀢𑀁 𑀢𑀁 𑀧𑀼𑀘𑁆𑀙𑀁 𑀅𑀥𑀺𑀓𑀸𑀭𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀅𑀢𑁆𑀢𑀦𑀸 𑀫𑀳𑀸𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀢𑀁 𑀤𑀻𑀧𑀗𑁆𑀓𑀭𑀁 𑀪𑀕𑀯𑀦𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀬𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀸 𑀩𑁄𑀥𑀺𑀬𑀸 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀭𑀫𑀺𑀬𑁄 𑀧𑀽𑀭𑁂𑀲𑀺, 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀅𑀢𑁆𑀢𑀦𑁄 𑀘 𑀧𑀝𑀺𑀧𑀢𑁆𑀢𑀺 𑀓𑀣𑀺𑀢𑀸, 𑀇𑀥 𑀧𑀦 𑀢𑀸𑀤𑀺𑀲𑁄 𑀅𑀥𑀺𑀓𑀸𑀭𑁄 𑀦𑀢𑁆𑀣𑀺, 𑀬𑁂𑀦 𑀤𑀻𑀧𑀗𑁆𑀓𑀭𑀢𑁄 𑀧𑀝𑁆𑀞𑀸𑀬, 𑀢𑀢𑁄 𑀯𑀸 𑀧𑀦 𑀧𑀼𑀭𑀢𑁄 𑀩𑀼𑀤𑁆𑀥𑁂 𑀆𑀭𑀩𑁆𑀪 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀓𑀣𑁂𑀬𑁆𑀬. 𑀢𑀲𑁆𑀫𑀸 𑀦 𑀏𑀢𑁆𑀣 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬𑀁 𑀯𑀺𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀯𑀺𑀢𑁆𑀣𑀸𑀭𑀺𑀢𑁄. 𑀬𑀲𑁆𑀫𑀸 𑀘 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀦𑀸𑀫 𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀜𑀸𑀡𑀩𑀮𑀸𑀦𑀼𑀭𑀽𑀧𑀸, 𑀦 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀸, 𑀢𑀲𑁆𑀫𑀸 𑀢𑀢𑁆𑀣 𑀅𑀕𑁆𑀕𑀲𑀸𑀯𑀓𑀸𑀦𑀁, 𑀫𑀳𑀸𑀲𑀸𑀯𑀓𑀸𑀦𑀁, (𑀣𑁂𑀭𑀕𑀸. 𑀅𑀝𑁆𑀞. 𑁨.𑁨𑁧 𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀢𑀸𑀤𑀺𑀲𑀸𑀦𑀜𑁆𑀘 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀺𑀢𑀸. 𑀇𑀥 𑀧𑀦 𑀧𑀓𑀢𑀺𑀲𑀸𑀯𑀓𑀸𑀦𑀁, 𑀢𑀸𑀤𑀺𑀲𑀸𑀦𑀜𑁆𑀘 𑀤𑁂𑀯𑀢𑀸𑀦𑀁 𑀯𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀓𑀣𑁂𑀦𑁆𑀢𑁄 𑀲𑀢𑁆𑀢𑀦𑁆𑀦𑀫𑁂𑀯 𑀩𑀼𑀤𑁆𑀥𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀓𑀣𑁂𑀲𑀺. 𑀢𑀣𑀸 𑀳𑀺 𑀦𑁂 𑀪𑀕𑀯𑀸 𑀧𑀮𑁄𑀪𑀦𑀯𑀲𑁂𑀦 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀧𑁆𑀧𑀧𑀜𑁆𑀘𑀢𑀸𑀬 𑀓𑀣𑀸𑀬 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀅𑀧𑀸𑀧𑁂𑀢𑁆𑀯𑀸𑀯 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀢𑀣𑀸 𑀘 𑀇𑀫𑀺𑀲𑁆𑀲𑀸 𑀏𑀯 𑀤𑁂𑀲𑀦𑀸𑀬 𑀅𑀦𑀼𑀲𑀸𑀭𑀢𑁄 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢- (𑀤𑀻. 𑀦𑀺. 𑁩.𑁨𑁭𑁫) 𑀤𑁂𑀲𑀦𑀸𑀤𑀬𑁄 𑀧𑀯𑀢𑁆𑀢𑀸.

𑀅𑀧𑀺𑀘𑁂𑀢𑁆𑀣 𑀪𑀕𑀯𑀸 𑀅𑀢𑁆𑀢𑀦𑁄 𑀲𑀼𑀤𑁆𑀥𑀸𑀯𑀸𑀲𑀘𑀸𑀭𑀺𑀓𑀸𑀯𑀺𑀪𑀸𑀯𑀺𑀦𑀺𑀬𑀸 𑀉𑀧𑀭𑀺𑀤𑁂𑀲𑀦𑀸𑀬 𑀲𑀗𑁆𑀕𑀳𑀢𑁆𑀣𑀁 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀏𑀯 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀓𑀣𑁂𑀲𑀺. 𑀢𑁂𑀲𑀁𑀬𑁂𑀯 𑀳𑀺 𑀲𑀸𑀯𑀓𑀸 𑀢𑀤𑀸 𑀘𑁂𑀯 𑀏𑀢𑀭𑀳𑀺 𑀘 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑀁 𑀞𑀺𑀢𑀸, 𑀦 𑀅𑀜𑁆𑀜𑁂𑀲𑀁 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸. ‘‘𑀲𑀺𑀤𑁆𑀥𑀢𑁆𑀣𑀢𑀺𑀲𑁆𑀲𑀨𑀼𑀲𑁆𑀲𑀸𑀦𑀁 𑀓𑀺𑀭 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀉𑀧𑀓𑀸𑀤𑀬𑁄 𑀯𑀺𑀬 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀦 𑀢𑀢𑁆𑀣 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀅𑀝𑁆𑀞𑀁𑀲𑀽’’𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀬𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀝𑀺𑀯𑁂𑀥𑀲𑀸𑀲𑀦𑀁 𑀏𑀓𑀁𑀲𑀢𑁄 𑀦𑀺𑀘𑁆𑀙𑀬𑁂 𑀦 𑀅𑀚𑁆𑀚𑀸𑀧𑀺 𑀥𑀭𑀢𑀺, 𑀦 𑀅𑀦𑁆𑀢𑀭𑀳𑀺𑀢𑀁, 𑀢𑁂 𑀏𑀯 𑀓𑀺𑀢𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀻𑀆𑀤𑀻𑀦𑀁𑀬𑁂𑀯 𑀪𑀕𑀯𑀦𑁆𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀣𑁂𑀲𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦. 𑀅𑀧𑀼𑀩𑁆𑀩𑀸𑀘𑀭𑀺𑀫𑀦𑀺𑀬𑀫𑁄 𑀧𑀦 𑀅𑀧𑀭𑀸𑀧𑀭𑀁 𑀲𑀁𑀲𑀭𑀡𑀓𑀲𑀢𑁆𑀢𑀯𑀸𑀲𑀯𑀲𑁂𑀦 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀇𑀘𑁆𑀙𑀺𑀢𑁄𑀢𑀺 𑀦 𑀢𑁂𑀦𑁂𑀢𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀭𑀦𑁆𑀢𑀭𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸𑀢𑀺 𑀅𑀪𑀺𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀬𑀸𑀯 𑀢𑀸 𑀩𑀼𑀤𑁆𑀥𑀓𑀺𑀘𑁆𑀘𑀲𑀺𑀤𑁆𑀥𑀺, 𑀢𑀸𑀯 𑀫𑀢𑁆𑀣𑀓𑀁 𑀲𑀺𑀔𑀁 𑀧𑀸𑀧𑁂𑀢𑁆𑀯𑀸. 𑀦 𑀢𑀸𑀯 𑀓𑀣𑀺𑀢𑁄𑀢𑀺 𑀬𑁄𑀚𑀦𑀸.

𑀢𑀦𑁆𑀢𑀺𑀦𑁆𑀢𑀺 𑀥𑀫𑁆𑀫𑀢𑀦𑁆𑀢𑀺𑀁, 𑀧𑀭𑀺𑀬𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀢𑁆𑀢𑀧𑀼𑀢𑁆𑀢𑀫𑀸𑀢𑀼𑀬𑀸𑀦𑀯𑀺𑀳𑀸𑀭𑀥𑀦𑀯𑀺𑀳𑀸𑀭𑀤𑀸𑀬𑀓𑀸𑀤𑀻𑀦𑀁 𑀲𑀫𑁆𑀩𑀳𑀼𑀮𑀸𑀦𑀁 𑀅𑀢𑁆𑀣𑀸𑀦𑀁 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀭𑁄 𑀲𑀫𑁆𑀩𑀳𑀼𑀮𑀯𑀸𑀭𑁄.

𑀲𑀫𑁆𑀩𑀳𑀼𑀮𑀯𑀸𑀭𑀯𑀡𑁆𑀡𑀦𑀸

𑀓𑀸𑀫𑀜𑁆𑀘𑀸𑀬𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑁄, 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀢𑀸 𑀧𑀦 𑀆𑀦𑁂𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄𑀢𑀺 𑀢𑀁 𑀤𑀻𑀧𑁂𑀦𑁆𑀢𑁄 ‘‘𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀼𑀮𑀯𑀁𑀲𑁄 𑀓𑀼𑀮𑀸𑀦𑀼𑀓𑁆𑀓𑀫𑁄. 𑀧𑀯𑁂𑀡𑀻𑀢𑀺 𑀧𑀭𑀫𑁆𑀧𑀭𑀸. ‘‘𑀓𑀲𑁆𑀫𑀸’’𑀢𑀺 𑀧𑀼𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀢𑁂𑀲𑀁 𑀚𑀸𑀢𑀦𑀕𑀭𑀸𑀤𑀺 𑀧𑀜𑁆𑀜𑀸𑀬𑀫𑀸𑀦𑀁 𑀏𑀓𑀁𑀲𑀢𑁄 𑀫𑀦𑀼𑀲𑁆𑀲𑀪𑀸𑀯𑀲𑀜𑁆𑀚𑀸𑀦𑀦𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀬𑀣𑀸𑀥𑀺𑀧𑁆𑀧𑁂𑀢𑀩𑀼𑀤𑁆𑀥𑀓𑀺𑀘𑁆𑀘𑀲𑀺𑀤𑁆𑀥𑀺 𑀏𑀯 𑀦 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺, 𑀬𑀢𑁄 𑀫𑀳𑀸𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀧𑀸𑀢𑀼𑀪𑀸𑀯𑁄, 𑀦 𑀅𑀜𑁆𑀜𑀢𑁆𑀣.

𑀲𑀫𑁆𑀩𑀳𑀼𑀮𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑀘𑀦𑁆𑀤𑀸𑀤𑀻𑀦𑀁 𑀲𑁄𑀪𑀸𑀯𑀺𑀲𑁂𑀲𑀁 𑀭𑀳𑁂𑀢𑀺 𑀘𑀚𑀸𑀧𑁂𑀢𑀻𑀢𑀺 𑀭𑀸𑀳𑀼, 𑀭𑀸𑀳𑀼𑀕𑁆𑀕𑀳𑁄, 𑀇𑀥 𑀧𑀦 𑀭𑀸𑀳𑀼 𑀯𑀺𑀬𑀸𑀢𑀺 𑀭𑀸𑀳𑀼. 𑀩𑀦𑁆𑀥𑀦𑀦𑁆𑀢𑀺 𑀘 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀫𑀳𑀸𑀲𑀢𑁆𑀢𑁂𑀦 𑀯𑀼𑀢𑁆𑀢𑀯𑀘𑀦𑀫𑁂𑀯 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 ‘‘𑀭𑀸𑀳𑀼𑀮𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀭𑁄𑀘𑀺𑀦𑀻𑀢𑀺 𑀭𑁄𑀘𑀦𑀲𑀻𑀮𑀸, 𑀉𑀚𑁆𑀚𑀮𑀭𑀽𑀧𑀸𑀢𑀺 𑀅𑀢𑁆𑀣𑁄. 𑀭𑀼𑀘𑀕𑁆𑀕𑀢𑀻𑀢𑀺 𑀭𑀼𑀘𑀁 𑀧𑀪𑀸𑀢𑀁 𑀆𑀕𑀢𑀺𑀪𑀽𑀢𑀸, 𑀕-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀢𑁆𑀣𑀺𑀭𑀢𑀦𑀪𑀸𑀯𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑀸𑀲𑀁 𑀇𑀢𑁆𑀣𑀻𑀦𑀁 𑀩𑀺𑀫𑁆𑀩𑀧𑀝𑀺𑀘𑁆𑀙𑀦𑁆𑀦𑀪𑀽𑀢𑀸𑀢𑀺 𑀩𑀺𑀫𑁆𑀩𑀸.

𑀛𑀸𑀦𑀸 𑀯𑀼𑀝𑁆𑀞𑀸𑀬𑀸𑀢𑀺 𑀧𑀸𑀤𑀓𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬.

𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑀸𑀢𑀺 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀩𑀳𑀮𑀪𑀸𑀯𑀸. 𑀘𑀽𑀴𑀁𑀲𑁂𑀦 𑀙𑀸𑀤𑁂𑀢𑁆𑀯𑀸𑀢𑀺 𑀢𑀺𑀭𑀺𑀬𑀪𑀸𑀕𑁂𑀦 𑀞𑀧𑀦𑀯𑀲𑁂𑀦 𑀲𑀩𑁆𑀩𑀁 𑀯𑀺𑀳𑀸𑀭𑀝𑁆𑀞𑀸𑀦𑀁 𑀙𑀸𑀤𑁂𑀢𑁆𑀯𑀸. 𑀲𑀼𑀯𑀡𑁆𑀡𑀬𑀝𑁆𑀞𑀺𑀨𑀸𑀮𑁂𑀳𑀻𑀢𑀺 𑀨𑀸𑀮𑀧𑁆𑀧𑀫𑀸𑀡𑀸𑀳𑀺 𑀲𑀼𑀯𑀡𑁆𑀡𑀬𑀝𑁆𑀞𑀻𑀳𑀺. 𑀲𑀼𑀯𑀡𑁆𑀡𑀳𑀢𑁆𑀣𑀺𑀧𑀸𑀤𑀸𑀦𑀻𑀢𑀺 𑀧𑀓𑀢𑀺𑀳𑀢𑁆𑀣𑀺𑀧𑀸𑀤𑀧𑀭𑀺𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀔𑀡𑁆𑀟𑀸𑀦𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀘𑀽𑀴𑀁𑀲𑁂𑀦𑁂𑀯. 𑀲𑀼𑀯𑀡𑁆𑀡𑀓𑀝𑁆𑀝𑀻𑀳𑀻𑀢𑀺 𑀲𑀼𑀯𑀡𑁆𑀡𑀔𑀡𑁆𑀟𑁂𑀳𑀺. 𑀲𑀮𑀓𑁆𑀔𑀡𑀸𑀦𑀦𑁆𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸𑀦𑀁 𑀲𑀳𑀲𑁆𑀲𑀸𑀭𑀸𑀦𑀁.

𑀩𑁄𑀥𑀺𑀧𑀮𑁆𑀮𑀗𑁆𑀓𑁄𑀢𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀸𑀮𑁂 𑀦𑀺𑀲𑀚𑁆𑀚𑀝𑁆𑀞𑀸𑀦𑀁. 𑀅𑀯𑀺𑀚𑀳𑀺𑀢𑁄𑀢𑀺 𑀩𑀼𑀤𑁆𑀥𑀸𑀦𑀁 𑀢𑀣𑀸𑀦𑀺𑀲𑀚𑁆𑀚𑀸𑀬 𑀅𑀦𑀜𑁆𑀜𑀢𑁆𑀣𑀪𑀸𑀯𑀻𑀪𑀸𑀯𑀢𑁄 𑀅𑀧𑀭𑀺𑀘𑁆𑀘𑀢𑁆𑀢𑁄. 𑀢𑁂𑀦𑀸𑀳 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀳𑁄𑀢𑀻’’𑀢𑀺. 𑀧𑀞𑀫𑀧𑀤𑀕𑀡𑁆𑀞𑀺𑀓𑀸𑀢𑀺 𑀧𑀘𑁆𑀙𑀺𑀫𑁂 𑀲𑁄𑀧𑀸𑀦𑀨𑀮𑀓𑁂 𑀞𑀢𑁆𑀯𑀸 𑀞𑀧𑀺𑀬𑀫𑀸𑀦𑀲𑁆𑀲 𑀤𑀓𑁆𑀔𑀺𑀡𑀧𑀸𑀤𑀲𑁆𑀲 𑀧𑀢𑀺𑀝𑁆𑀞𑀳𑀦𑀝𑁆𑀞𑀸𑀦𑀁. 𑀢𑀁 𑀧𑀦 𑀬𑀲𑁆𑀫𑀸 𑀤𑀴𑁆𑀳𑀁 𑀣𑀺𑀭𑀁 𑀓𑁂𑀦𑀘𑀺 𑀅𑀪𑁂𑀚𑁆𑀚𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀤𑀕𑀡𑁆𑀞𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀇𑀤𑀸𑀦𑀺 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁄, 𑀢𑀢𑁆𑀣 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀺𑀫𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀫𑀜𑁆𑀘𑀸 𑀧𑀜𑁆𑀜𑀢𑁆𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀢𑁄 𑀫𑀜𑁆𑀘𑁄 𑀧𑀜𑁆𑀜𑀢𑁆𑀢𑁄𑀢𑀺 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀜𑁆𑀘𑀸𑀦𑀁 𑀧𑀦 𑀫𑀳𑀦𑁆𑀢𑀔𑀼𑀤𑁆𑀤𑀓𑀪𑀸𑀯𑁂𑀦 𑀫𑀜𑁆𑀘𑀧𑀜𑁆𑀜𑀸𑀧𑀦𑀧𑀤𑁂𑀲𑀲𑁆𑀲 𑀫𑀳𑀦𑁆𑀢𑀸𑀫𑀳𑀦𑁆𑀢𑀢𑀸 𑀅𑀧𑁆𑀧𑀫𑀸𑀡𑀁, 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀦 𑀲𑁄 𑀧𑀤𑁂𑀲𑁄 𑀲𑀩𑁆𑀩𑀤𑀸 𑀏𑀓𑀧𑁆𑀧𑀫𑀸𑀡𑁄𑀬𑁂𑀯 𑀳𑁄𑀢𑀻𑀢𑀺 ‘‘𑀘𑀢𑁆𑀢𑀸𑀭𑀺 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀳𑀸𑀭𑁄𑀧𑀺 𑀦 𑀯𑀺𑀚𑀳𑀺𑀢𑁄 𑀬𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑀁 𑀯𑀺𑀳𑀸𑀭𑀝𑁆𑀞𑀸𑀦𑀁 𑀦 𑀧𑀭𑀺𑀘𑁆𑀘𑀚𑀢𑀻𑀢𑀺 𑀳𑀺 𑀅𑀢𑁆𑀣𑁄.

𑀯𑀺𑀲𑀺𑀝𑁆𑀞𑀸 𑀫𑀢𑁆𑀢𑀸 𑀯𑀺𑀫𑀢𑁆𑀢𑀸, 𑀯𑀺𑀫𑀢𑁆𑀢𑀸𑀯 𑀯𑁂𑀫𑀢𑁆𑀢𑀁, 𑀯𑀺𑀲𑀤𑀺𑀲𑀢𑀸𑀢𑀺 𑀅𑀢𑁆𑀣𑁄. 𑀧𑀫𑀸𑀡𑀁 𑀆𑀭𑁄𑀳𑁄. 𑀧𑀥𑀸𑀦𑀁 𑀤𑀼𑀓𑁆𑀓𑀭𑀓𑀺𑀭𑀺𑀬𑀸. 𑀭𑀲𑁆𑀫𑀻𑀢𑀺 𑀲𑀭𑀻𑀭𑀧𑁆𑀧𑀪𑀸.

‘‘𑀲𑀢𑁆𑀢𑀸𑀦𑀁 𑀧𑀸𑀓𑀢𑀺𑀓𑀳𑀢𑁆𑀣𑁂𑀦 𑀙𑀳𑀢𑁆𑀣𑁄 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀢𑀢𑁄 𑀢𑀺𑀕𑀼𑀡𑀁 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀫𑀸𑀡𑀦𑁆𑀢𑀺 𑀪𑀕𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀫𑀦𑀼𑀲𑁆𑀲𑀸𑀦𑀁 𑀧𑀸𑀓𑀢𑀺𑀓𑀳𑀢𑁆𑀣𑁂𑀦 𑀘𑀢𑀼𑀳𑀢𑁆𑀣𑁄 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀢𑀢𑁄 𑀢𑀺𑀕𑀼𑀡𑀁 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀫𑀸𑀡𑀦𑁆𑀢𑀺 𑀪𑀕𑀯𑀸 𑀤𑁆𑀯𑀸𑀤𑀲𑀳𑀢𑁆𑀣𑁄 𑀉𑀧𑀸𑀤𑀺𑀦𑁆𑀦𑀓𑀭𑀽𑀧𑀥𑀫𑁆𑀫𑀯𑀲𑁂𑀦, 𑀲𑀫𑀦𑁆𑀢𑀢𑁄 𑀧𑀦 𑀩𑁆𑀬𑀸𑀫𑀫𑀢𑁆𑀢𑀁 𑀩𑁆𑀬𑀸𑀫𑀧𑁆𑀧𑀪𑀸 𑀨𑀭𑀢𑀻𑀢𑀺 𑀉𑀧𑀭𑀺 𑀙𑀳𑀢𑁆𑀣𑀁 𑀅𑀩𑁆𑀪𑀼𑀕𑁆𑀕𑀢𑁄, 𑀩𑀳𑀮𑀢𑀭𑀧𑁆𑀧𑀪𑀸 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑁄 𑀳𑁄𑀢𑀻’’𑀢𑀺.

𑀅𑀤𑁆𑀥𑀦𑀺𑀬𑀦𑁆𑀢𑀺 𑀤𑀻𑀖𑀓𑀸𑀮𑀁.

𑀅𑀚𑁆𑀛𑀸𑀲𑀬𑀧𑀝𑀺𑀩𑀤𑁆𑀥𑀦𑁆𑀢𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀓𑀸𑀮𑁂 𑀢𑀣𑀸𑀧𑀯𑀢𑁆𑀢𑀚𑁆𑀛𑀸𑀲𑀬𑀸𑀥𑀻𑀦𑀁, 𑀢𑀣𑀸𑀧𑀯𑀢𑁆𑀢𑀧𑀢𑁆𑀣𑀦𑀸𑀦𑀼𑀭𑀽𑀧𑀁 𑀯𑀺𑀧𑀼𑀮𑀁, 𑀯𑀺𑀧𑀼𑀮𑀢𑀭𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀭𑀻𑀭𑀧𑁆𑀧𑀫𑀸𑀡𑀁, 𑀧𑀥𑀸𑀦𑀁, 𑀲𑀭𑀻𑀭𑀧𑁆𑀧𑀪𑀸 𑀘 𑀩𑀼𑀤𑁆𑀥𑀸𑀦𑀁 𑀯𑀺𑀲𑀤𑀺𑀲𑀸𑀢𑀺 𑀇𑀥 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸, 𑀢𑀲𑁆𑀫𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀯𑁂𑀫𑀢𑁆𑀢𑀢𑀸𑀲𑀸𑀫𑀜𑁆𑀜𑁂𑀦 𑀆𑀬𑀼𑀓𑀼𑀮𑀸𑀦𑀺𑀧𑀺 𑀇𑀥 𑀆𑀳𑀭𑀺𑀢𑁆𑀯𑀸 𑀤𑀻𑀧𑀺𑀢𑀸𑀦𑀺. 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀲𑀽𑀢𑀺 𑀅𑀥𑀺𑀕𑀢𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀲𑀼. 𑀦𑀦𑀼 𑀘 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼, 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀧𑀭𑀺𑀫𑀸𑀡𑁂 𑀘 𑀯𑁂𑀫𑀢𑁆𑀢𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀢𑀤𑀼𑀪𑀬𑀁 𑀧𑀦 𑀩𑀼𑀤𑁆𑀥𑀕𑀼𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀦 𑀉𑀤𑁆𑀥𑀝𑀁. 𑀬𑀤𑀕𑁆𑀕𑁂𑀦 𑀳𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀕𑀼𑀡𑁂𑀲𑀼 𑀯𑁂𑀫𑀢𑁆𑀢𑀁 𑀦𑀢𑁆𑀣𑀺, 𑀢𑀤𑀕𑁆𑀕𑁂𑀦 𑀦𑁂𑀲𑀁 𑀲𑀫𑁆𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼𑀧𑀺 𑀯𑁂𑀫𑀢𑁆𑀢𑀁 𑀦𑀢𑁆𑀣𑀻𑀢𑀺. 𑀓𑀲𑁆𑀫𑀸? 𑀳𑁂𑀢𑀼𑀅𑀦𑀼𑀭𑀽𑀧𑀢𑀸𑀬 𑀨𑀮𑀲𑁆𑀲, 𑀏𑀓𑀦𑁆𑀢𑁂𑀦𑁂𑀯 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀧𑀭𑀺𑀫𑀸𑀡𑁂 𑀯𑁂𑀫𑀢𑁆𑀢𑀪𑀸𑀯𑁄 𑀯𑀺𑀪𑀸𑀯𑀺𑀢𑁄. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀳𑁂𑀢𑀼𑀅𑀯𑀢𑁆𑀣𑀸𑀬𑀁 𑀲𑀫𑁆𑀪𑀢𑀽𑀧𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸 𑀘𑀭𑀺𑀫𑀪𑀯𑁂 𑀅𑀭𑀳𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑁄𑀲𑀺𑀢𑀸𑀦𑀺 𑀓𑀫𑀮𑀯𑀦𑀸𑀦𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀯𑀺𑀬 𑀢𑀣𑀸𑀕𑀢𑀕𑀼𑀡𑀸𑀦𑀼𑀪𑀸𑀯𑀲𑀫𑁆𑀨𑀲𑁆𑀲𑁂𑀦 𑀯𑀺𑀩𑁄𑀥𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀤𑀻𑀧𑁂𑀲𑀼𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸.

𑀦𑀺𑀥𑀺𑀓𑀼𑀫𑁆𑀪𑁄𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀦𑀺𑀥𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺. 𑀚𑀸𑀢𑁄 𑀘𑀸𑀢𑀺. 𑀘-𑀲𑀤𑁆𑀤𑁂𑀦 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀘𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑀩𑀼𑀤𑁆𑀥𑀯𑀁𑀲𑁂 𑁋

‘‘𑀢𑀸𑀭𑀸𑀕𑀡𑀸 𑀯𑀺𑀭𑁄𑀘𑀦𑁆𑀢𑀺, 𑀦𑀓𑁆𑀔𑀢𑁆𑀢𑀸 𑀕𑀕𑀦𑀫𑀡𑁆𑀟𑀮𑁂;

𑀯𑀺𑀲𑀸𑀔𑀸 𑀘𑀦𑁆𑀤𑀺𑀫𑀸𑀬𑀼𑀢𑁆𑀢𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. (𑀩𑀼. 𑀯𑀁. 𑁬𑁫);

‘‘𑀏𑀢𑁂𑀦𑁂𑀯 𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀯𑀺𑀲𑀸𑀔𑀸𑀦𑀓𑁆𑀔𑀢𑁆𑀢𑁂𑀦𑁂𑀯 𑀫𑀳𑀸𑀪𑀺𑀦𑀻𑀳𑀸𑀭𑁄 𑀳𑁄𑀢𑀻’’𑀢𑀺 𑀘 𑀯𑀤𑀦𑁆𑀢𑀺.

𑁧𑁩. 𑀅𑀬𑀁 𑀕𑀢𑀻𑀢𑀺 𑀅𑀬𑀁 𑀧𑀯𑀢𑁆𑀢𑀺 𑀧𑀯𑀢𑁆𑀢𑀦𑀸𑀓𑀸𑀭𑁄, 𑀅𑀜𑁆𑀜𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀬𑀲𑁆𑀫𑀸 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀝𑀺𑀲𑀦𑁆𑀥𑀺, 𑀢𑀸𑀯 𑀅𑀦𑀼𑀲𑁆𑀲𑀭𑀡𑀁 𑀆𑀭𑁄𑀳𑀦𑀁 𑀅𑀢𑀻𑀢𑀅𑀢𑀻𑀢𑀢𑀭𑀅𑀢𑀻𑀢𑀢𑀫𑀸𑀤𑀺𑀚𑀸𑀢𑀺𑀲𑀗𑁆𑀔𑀸𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑁂 𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀼𑀢𑀺, 𑀢𑀸𑀯 𑀅𑀦𑀼𑀲𑁆𑀲𑀭𑀡𑀁 𑀑𑀭𑁄𑀳𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑁂 𑀧𑀝𑀺𑀫𑀼𑀔𑀪𑀸𑀯𑁂𑀦 𑀜𑀸𑀡𑀲𑁆𑀲 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀸𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸’’𑀢𑀺. 𑀘𑀼𑀢𑀺𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑀁 𑀧𑀦𑀺𑀤𑀁 𑀘𑀼𑀢𑀺𑀬𑀸 𑀜𑀸𑀡𑀕𑀢𑀺𑀬𑀸 𑀕𑀦𑁆𑀢𑀩𑁆𑀩𑀁, 𑀢𑀁 𑀕𑀫𑀦𑀁 𑀩𑀼𑀚𑁆𑀛𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀭𑀼𑀓𑀦𑁆𑀢𑀺 𑀪𑀸𑀭𑀺𑀬𑀁 𑀤𑀼𑀓𑁆𑀓𑀭𑀁. 𑀢𑁂𑀦𑀸𑀳 ‘‘𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬𑀸’’𑀢𑀺. 𑀅𑀧𑀭𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀙𑀺𑀦𑁆𑀦𑀯𑀝𑀼𑀫𑀸𑀦𑀼𑀲𑁆𑀲𑀭𑀡𑀁 𑀧𑀘𑁆𑀙𑀸𑀫𑀼𑀔𑀁 𑀜𑀸𑀡𑀁 𑀧𑁂𑀲𑀦𑀢𑁄 𑀅𑀧𑀭𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀓𑀸𑀭𑀡𑀁. 𑀬𑀢𑁆𑀭𑀸𑀢𑀺 𑀧𑀘𑁆𑀘𑀢𑁆𑀢𑀢𑁆𑀣𑁂, 𑀦𑀸𑀫𑀸𑀢𑀺 𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄, 𑀳𑀺-𑀲𑀤𑁆𑀤𑁄 𑀅𑀦𑀢𑁆𑀣𑀓𑁄. 𑀢𑁂𑀦𑀸𑀳 ‘‘𑀬𑁄 𑀦𑀸𑀫 𑀢𑀣𑀸𑀕𑀢𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀬𑀢𑁆𑀭𑀸’’𑀢𑀺 𑀦𑀺𑀧𑀸𑀢𑀯𑀲𑁂𑀦 𑀯𑀺𑀲𑀼𑀁 𑀬𑀢𑁆𑀭-𑀲𑀤𑁆𑀤𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀧𑀧𑀜𑁆𑀘𑁂𑀦𑁆𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑁂 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀁. 𑀓𑀫𑁆𑀫𑀯𑀝𑁆𑀝𑀁 𑀯𑀼𑀘𑁆𑀘𑀢𑀻𑀢𑀺 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀧𑀧𑀜𑁆𑀘𑀕𑁆𑀕𑀳𑀡𑁂𑀦, 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂𑀢𑀺 𑀲𑀩𑁆𑀩𑀲𑁄 𑀔𑁂𑀧𑀺𑀢𑀯𑀝𑁆𑀝𑁂. ‘‘𑀫𑀕𑁆𑀕𑀲𑀻𑀮𑁂𑀦 𑀨𑀮𑀲𑀻𑀮𑁂𑀦𑀸’’𑀢𑀺 𑀯𑀢𑁆𑀯𑀸 𑀢𑀬𑀺𑀤𑀁 𑀫𑀕𑁆𑀕𑀨𑀮𑀲𑀻𑀮𑀁 𑀮𑁄𑀓𑀺𑀬𑀲𑀻𑀮𑀧𑀼𑀩𑁆𑀩𑀓𑀁, 𑀩𑀼𑀤𑁆𑀥𑀸𑀦𑀜𑁆𑀘 𑀮𑁄𑀓𑀺𑀬𑀲𑀻𑀮𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀯𑀺𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀸𑀥𑀺𑀧𑀓𑁆𑀔𑀸𑀢𑀺 𑀲𑀫𑀸𑀥𑀺 𑀘 𑀲𑀫𑀸𑀥𑀺𑀧𑀓𑁆𑀔𑀸 𑀘 𑀲𑀫𑀸𑀥𑀺𑀧𑀓𑁆𑀔𑀸, 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑀲𑀫𑀸𑀥𑀺𑀦𑀸’’𑀢𑀺𑀆𑀤𑀺, ‘‘𑀯𑀺𑀳𑀸𑀭𑁄 𑀕𑀳𑀺𑀢𑁄 𑀯𑀸’’𑀢𑀺 𑀘. 𑀲𑀫𑀸𑀥𑀺𑀧𑀓𑁆𑀔𑀸 𑀦𑀸𑀫 𑀯𑀻𑀭𑀺𑀬𑀲𑀢𑀺𑀆𑀤𑀬𑁄.

𑀲𑀬𑀦𑁆𑀢𑀺 𑀅𑀢𑁆𑀢𑀦𑀸. 𑀦𑀻𑀯𑀭𑀡𑀸𑀤𑀻𑀳𑀻𑀢𑀺 𑀦𑀻𑀯𑀭𑀡𑁂𑀳𑀺 𑀘𑁂𑀯 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀧𑀸𑀧𑀥𑀫𑁆𑀫𑁂𑀳𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀳𑀺 𑀘. ‘‘𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀫𑀼𑀢𑁆𑀢𑀺-𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀁 𑀆𑀳 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀆𑀤𑀺𑀯𑀺𑀲𑀬𑀢𑁆𑀢𑀸 𑀢𑀲𑁆𑀲. 𑀯𑀺𑀫𑀼𑀢𑁆𑀢𑀢𑁆𑀢𑀸𑀢𑀺 𑀘 ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀫𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀲𑁆𑀲. 𑀧𑀘𑁆𑀘𑀦𑀻𑀓𑀗𑁆𑀕𑀯𑀲𑁂𑀦𑀸𑀢𑀺 𑀧𑀳𑀸𑀢𑀩𑁆𑀩𑀧𑀝𑀺𑀧𑀓𑁆𑀔𑀅𑀗𑁆𑀕𑀯𑀲𑁂𑀦. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁, 𑀲𑁄 𑀏𑀯 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀪𑀸𑀯𑀢𑁄, 𑀢𑀲𑁆𑀫𑀺𑀁 𑀲𑀸𑀥𑁂𑀢𑀩𑁆𑀩𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀢𑀸, 𑀅𑀧𑀕𑀫𑁄 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀢𑁂𑀳𑀺 𑀯𑀺𑀯𑀺𑀢𑁆𑀢𑀢𑁆𑀢𑀸 𑀏𑀯𑀸𑀢𑀺 𑀆𑀳 ‘‘𑀤𑀽𑀭𑁂 𑀞𑀺𑀢𑀢𑁆𑀢𑀸’’𑀢𑀺.

𑁧𑁬. 𑀥𑀫𑁆𑀫𑀥𑀸𑀢𑀽𑀢𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄, 𑀅𑀢𑁆𑀣𑀢𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀸 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀚𑀳𑀦𑀢𑁄. 𑀏𑀯𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀸, 𑀤𑀲𑀩𑀮𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀪𑀕𑀯𑀢𑀸 𑀅𑀥𑀺𑀕𑀢𑀸 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀁 𑀥𑀫𑁆𑀫𑀥𑀸𑀢𑀽𑀢𑀺 𑀓𑁂𑀘𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑁆𑀢𑀺 𑀅𑀧𑀭𑁂. 𑀤𑁆𑀯𑀻𑀳𑀺 𑀧𑀤𑁂𑀳𑀻𑀢𑀺 𑀤𑁆𑀯𑀻𑀳𑀺 𑀯𑀸𑀓𑁆𑀬𑁂𑀳𑀺. 𑀆𑀩𑀤𑁆𑀥𑀦𑁆𑀢𑀺 𑀧𑀝𑀺𑀩𑀤𑁆𑀥𑀁 𑀢𑀁𑀫𑀽𑀮𑀓𑀢𑁆𑀢𑀸 𑀉𑀧𑀭𑀺𑀤𑁂𑀲𑀦𑀸𑀬. 𑀤𑁂𑀯𑀘𑀸𑀭𑀺𑀓𑀓𑁄𑀮𑀸𑀳𑀮𑀦𑁆𑀢𑀺 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑁂 𑀘𑀸𑀭𑀺𑀓𑀸𑀬𑀁 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀸𑀦𑀁 𑀓𑀼𑀢𑀽𑀳𑀮𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁧) 𑀯𑀺𑀘𑀸𑀭𑁂𑀲𑁆𑀲𑀢𑀺, 𑀅𑀢𑁆𑀣𑀢𑁄 𑀯𑀺𑀪𑀸𑀯𑁂𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀁 𑀤𑁂𑀲𑀦𑀸𑀢𑀺 ‘‘𑀇𑀢𑁄 𑀲𑁄 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁪) 𑀯𑀺𑀢𑁆𑀣𑀸𑀭𑀢𑁄 𑀧𑀯𑀢𑁆𑀢𑀺𑀢𑀤𑁂𑀲𑀦𑀫𑀸𑀳. 𑀦𑀺𑀤𑀸𑀦𑀓𑀡𑁆𑀟𑁂𑀢𑀺𑀆𑀤𑀺𑀢𑁄 𑀤𑁂𑀲𑀺𑀢𑀁 𑀉𑀤𑁆𑀤𑁂𑀲𑀤𑁂𑀲𑀦𑀫𑀸𑀳. 𑀲𑀸 𑀳𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀤𑀸𑀦𑀝𑁆𑀞𑀸𑀦𑀺𑀬𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀸.

𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸𑀯𑀡𑁆𑀡𑀦𑀸

𑁧𑁭. ‘‘𑀯𑀺𑀧𑀲𑁆𑀲𑀻𑀢𑀺 𑀢𑀲𑁆𑀲 𑀦𑀸𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀦𑁆𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀯𑀺𑀥𑁂 𑀅𑀢𑁆𑀣𑁂𑀢𑀺 𑀢𑀺𑀭𑁄𑀳𑀺𑀢𑀯𑀺𑀤𑀽𑀭𑀤𑁂𑀲𑀕𑀢𑀸𑀤𑀺𑀓𑁂 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑁂, 𑀢𑀤𑀜𑁆𑀜𑁂 𑀘 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀪𑀽𑀢𑁂 𑀢𑁂 𑀘 𑀬𑀣𑀽𑀧𑀕𑀢𑁂, 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁂 𑀘𑀸𑀢𑀺 𑀦𑀸𑀦𑀸𑀯𑀺𑀥𑁂 𑀅𑀢𑁆𑀣𑁂. 𑀧𑀲𑁆𑀲𑀦𑀓𑀼𑀲𑀮𑀢𑀸𑀬𑀸𑀢𑀺 𑀤𑀲𑁆𑀲𑀦𑁂 𑀦𑀺𑀧𑀼𑀡𑀪𑀸𑀯𑁂𑀦. 𑀬𑀸𑀣𑀸𑀯𑀢𑁄 𑀜𑁂𑀬𑁆𑀬𑀁 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀲𑁄 𑀏𑀯 𑀲𑀢𑁆𑀢𑀬𑁄𑀕𑀢𑁄 𑀩𑁄𑀥𑀺𑀲𑀢𑁆𑀢𑁄𑀢𑀺 𑀆𑀳 ‘‘𑀧𑀡𑁆𑀟𑀺𑀢𑀲𑀢𑁆𑀢𑁄 𑀩𑀼𑀚𑁆𑀛𑀦𑀓𑀲𑀢𑁆𑀢𑁄’’𑀢𑀺. 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀺𑀦𑀸 𑀧𑀦 𑀧𑀡𑁆𑀟𑀺𑀢𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀤𑀸 𑀘 𑀧𑀦𑀸𑀦𑁂𑀦 𑀫𑀳𑀸𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀩𑁄𑀥𑀺𑀬𑀁 𑀏𑀓𑀦𑁆𑀢𑀦𑀺𑀦𑁆𑀦𑀢𑁆𑀢𑀸 𑀩𑁄𑀥𑀺𑀫𑁆𑀳𑀺 𑀲𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄𑀢𑀺 𑀆𑀳 ‘‘𑀩𑁄𑀥𑀺𑀲𑀗𑁆𑀔𑀸𑀢𑁂𑀲𑀽’’𑀢𑀺𑀆𑀤𑀺. 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀫𑀕𑁆𑀕𑀜𑀸𑀡𑀁 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀸𑀬 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑀸 𑀑𑀓𑁆𑀓𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀲𑁆𑀲𑁄 𑀳𑀺 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑁄 𑀇𑀥𑁂𑀓𑀘𑁆𑀘𑁄 𑀕𑀩𑁆𑀪𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀑𑀓𑁆𑀓𑀫𑀦𑁂, 𑀞𑀸𑀦𑁂, 𑀦𑀺𑀓𑁆𑀔𑀫𑀦𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀲𑀫𑁆𑀧𑀚𑀸𑀦𑁄 𑀳𑁄𑀢𑀺, 𑀏𑀓𑀘𑁆𑀘𑁄 𑀧𑀞𑀫𑁂 𑀞𑀸𑀦𑁂 𑀲𑀫𑁆𑀧𑀚𑀸𑀦𑁄, 𑀦 𑀇𑀢𑀭𑁂𑀲𑀼, 𑀏𑀓𑀘𑁆𑀘𑁄 𑀧𑀞𑀫𑁂, 𑀤𑀼𑀢𑀺𑀬𑁂 𑀘 𑀞𑀸𑀦𑁂 𑀲𑀫𑁆𑀧𑀚𑀸𑀦𑁄, 𑀦 𑀢𑀢𑀺𑀬𑁂, 𑀏𑀓𑀘𑁆𑀘𑁄 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑀢𑁆𑀣 𑀧𑀞𑀫𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁨𑁧 𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁄) 𑀯𑀲𑁂𑀦, 𑀢𑀢𑀺𑀬𑀸 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀯𑀲𑁂𑀦. 𑀢𑁂 𑀓𑀺𑀭 𑀓𑀫𑁆𑀫𑀚𑀯𑀸𑀢𑁂𑀳𑀺 𑀉𑀤𑁆𑀥𑀁𑀧𑀸𑀤𑀸 𑀅𑀥𑁄𑀲𑀺𑀭𑀸 𑀅𑀦𑁂𑀓𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀯𑀺𑀬 𑀬𑁄𑀦𑀺𑀫𑀼𑀔𑁂 𑀔𑀺𑀢𑁆𑀢𑀸 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀳𑀢𑁆𑀣𑀻 𑀯𑀺𑀬 𑀲𑀫𑁆𑀩𑀸𑀥𑁂𑀦 𑀬𑁄𑀦𑀺𑀫𑀼𑀔𑁂𑀦 𑀦𑀺𑀓𑁆𑀔𑀫𑀦𑁆𑀢𑀸 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺, 𑀢𑁂𑀦 𑀦𑁂𑀲𑀁 ‘‘𑀫𑀬𑀁 𑀦𑀺𑀓𑁆𑀔𑀫𑀸𑀫𑀸’’𑀢𑀺 𑀲𑀫𑁆𑀧𑀚𑀜𑁆𑀜𑀁 𑀦 𑀳𑁄𑀢𑀺. 𑀘𑀢𑀼𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀲𑁂𑀦. 𑀢𑁂 𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀸𑀧𑀺 𑀧𑀚𑀸𑀦𑀦𑁆𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀸𑀧𑀺 𑀧𑀚𑀸𑀦𑀦𑁆𑀢𑀺, 𑀦𑀺𑀓𑁆𑀔𑀫𑀦𑀓𑀸𑀮𑁂𑀧𑀺 𑀧𑀚𑀸𑀦𑀦𑁆𑀢𑀺. 𑀦 𑀳𑀺 𑀢𑁂 𑀓𑀫𑁆𑀫𑀚𑀯𑀸𑀢𑀸 𑀉𑀤𑁆𑀥𑀁𑀧𑀸𑀤𑁂 𑀅𑀥𑁄𑀲𑀺𑀭𑁂 𑀓𑀢𑁆𑀯𑀸 𑀔𑀺𑀧𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀤𑁆𑀯𑁂 𑀳𑀢𑁆𑀣𑁂 𑀧𑀲𑀸𑀭𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀞𑀺𑀢𑀓𑀸𑀯 𑀦𑀺𑀓𑁆𑀔𑀫𑀦𑁆𑀢𑀻𑀢𑀺. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀜𑀸𑀡𑁂𑀳𑀺 𑀘𑁂𑀯 ‘‘𑀇𑀤𑀸𑀦𑀺 𑀘𑀯𑀸𑀫𑀻’’𑀢𑀺 𑀘𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀤𑀦𑀜𑀸𑀡𑁂𑀦 𑀘 𑀅𑀧𑀭𑀪𑀸𑀕𑁂 ‘‘𑀇𑀥 𑀫𑀬𑀸 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀧𑀭𑀺𑀘𑁆𑀙𑀺𑀦𑁆𑀤𑀦𑀜𑀸𑀡𑁂𑀦 𑀘 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀺𑀢𑁆𑀯𑀸.

𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁, 𑀜𑀸𑀢𑀢𑁆𑀣𑀘𑀭𑀺𑀬𑀸𑀤𑀻𑀦𑀜𑁆𑀘 𑀲𑀢𑀺𑀧𑀺 𑀧𑀸𑀭𑀫𑀺𑀬𑀸 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂 𑀲𑀫𑁆𑀪𑀸𑀭𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀢𑁆𑀣 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄, 𑀦𑀬𑀦𑀧𑀭𑀺𑀘𑁆𑀘𑀸𑀕𑁄, 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑁄, 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸. 𑀢𑀢𑁆𑀣𑀸𑀧𑀺 𑀓𑀸𑀫𑀁 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀬𑁄𑀧𑀺 𑀤𑀸𑀦𑀧𑀸𑀭𑀫𑀻𑀬𑁂𑀯, 𑀢𑀣𑀸𑀧𑀺 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀢𑁄 𑀏𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄𑀧𑀺 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁, 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀲𑀸 𑀘 𑀔𑁄 𑀓𑀭𑀼𑀡𑀸𑀬𑀦𑀯𑀲𑁂𑀦. 𑀢𑀣𑀸 𑀲𑀢𑁆𑀢𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀳𑀺𑀢𑀘𑀭𑀺𑀬𑀸 𑀮𑁄𑀓𑀢𑁆𑀣𑀘𑀭𑀺𑀬𑀸. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀯𑀲𑁂𑀦, 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀞𑀸𑀦𑀯𑀲𑁂𑀦, 𑀔𑀦𑁆𑀥𑀸𑀬𑀢𑀦𑀸𑀤𑀺𑀯𑀲𑁂𑀦, 𑀮𑀓𑁆𑀔𑀡𑀢𑁆𑀢𑀬𑀸𑀤𑀺𑀢𑀻𑀭𑀡𑀯𑀲𑁂𑀦 𑀘 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑁂𑀦 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀘𑀭𑀺𑀬𑀸, 𑀲𑀸 𑀧𑀦𑀢𑁆𑀣𑀢𑁄 𑀧𑀜𑁆𑀜𑀸𑀧𑀸𑀭𑀫𑀻𑀬𑁂𑀯, 𑀜𑀸𑀡𑀲𑀫𑁆𑀪𑀸𑀭𑀯𑀺𑀲𑁂𑀲𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀦 𑀯𑀺𑀲𑀼𑀁 𑀕𑀳𑀡𑀁. 𑀩𑀼𑀤𑁆𑀥𑀘𑀭𑀺𑀬𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀧𑀼𑀩𑁆𑀩𑀬𑁄𑀕𑀧𑀼𑀩𑁆𑀩𑀘𑀭𑀺𑀬𑀸𑀥𑀫𑁆𑀫𑀓𑁆𑀔𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀲𑀗𑁆𑀔𑀸𑀢𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀬𑁄𑀕𑁄. 𑀤𑀸𑀦𑀸𑀤𑀻𑀲𑀼𑀬𑁂𑀯 𑀲𑀸𑀢𑀺𑀲𑀬𑀧𑀝𑀺𑀧𑀢𑁆𑀢𑀺 𑀧𑀼𑀩𑁆𑀩𑀘𑀭𑀺𑀬𑀸. ‘‘𑀬𑀸𑀯 𑀘𑀭𑀺𑀬𑀸𑀧𑀺𑀝𑀓𑁂 𑀲𑀗𑁆𑀕𑀳𑀺𑀢𑀸 𑀅𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑀬𑁄𑀕𑁄, 𑀓𑀸𑀬𑀸𑀤𑀺𑀯𑀺𑀯𑁂𑀓𑀯𑀲𑁂𑀦 𑀏𑀓𑀘𑀭𑀺𑀬𑀸 𑀧𑀼𑀩𑁆𑀩𑀘𑀭𑀺𑀬𑀸’’𑀢𑀺 𑀓𑁂𑀘𑀺. 𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀜𑁆𑀘 𑀲𑀁𑀲𑀸𑀭𑀦𑀺𑀩𑁆𑀩𑀸𑀦𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀺𑀪𑀸𑀯𑀦𑀯𑀲𑁂𑀦, 𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑀦𑀧𑀭𑀺𑀧𑀸𑀘𑀦𑀯𑀲𑁂𑀦 𑀘 𑀧𑀯𑀢𑁆𑀢𑀓𑀣𑀸 𑀥𑀫𑁆𑀫𑀓𑁆𑀔𑀸𑀦𑀁. 𑀓𑁄𑀝𑀺𑀁 𑀧𑀢𑁆𑀯𑀸𑀢𑀺 𑀧𑀭𑀁 𑀧𑀭𑀺𑀬𑀦𑁆𑀢𑀁 𑀧𑀭𑀫𑀼𑀓𑁆𑀓𑀁𑀲𑀁 𑀧𑀸𑀧𑀼𑀡𑀺𑀢𑁆𑀯𑀸. 𑀲𑀢𑁆𑀢𑀫𑀳𑀸𑀤𑀸𑀦𑀸𑀦𑀻𑀢𑀺 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 ‘‘𑀳𑀤𑀬𑀫𑀁𑀲𑀸𑀤𑀻𑀦𑀺𑀧𑀺 𑀬𑀸𑀘𑀓𑀸𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀁, 𑀫𑀗𑁆𑀕𑀮𑀳𑀢𑁆𑀣𑀺𑀤𑀸𑀦𑀁, 𑀕𑀫𑀦𑀓𑀸𑀮𑁂 𑀤𑀺𑀦𑁆𑀦𑀁 𑀲𑀢𑁆𑀢𑀲𑀢𑁆𑀢𑀓𑀫𑀳𑀸𑀤𑀸𑀦𑀁, 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦 𑀤𑀺𑀦𑁆𑀦𑀁 𑀅𑀲𑁆𑀲𑀤𑀸𑀦𑀁, 𑀭𑀣𑀤𑀸𑀦𑀁, 𑀧𑀼𑀢𑁆𑀢𑀤𑀸𑀦𑀁, 𑀪𑀭𑀺𑀬𑀸𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀫𑀳𑀸𑀤𑀸𑀦𑀸𑀦𑀺 (𑀘𑀭𑀺𑀬𑀸. 𑁭𑁯) 𑀤𑀢𑁆𑀯𑀸.

‘‘𑀇𑀤𑀸𑀦𑁂𑀯 𑀫𑁂 𑀫𑀭𑀡𑀁 𑀳𑁄𑀢𑀽’’𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀓𑀸𑀮𑀓𑀭𑀡𑀁 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀓𑀺𑀭𑀺𑀬𑀸, 𑀢𑀁 𑀩𑁄𑀥𑀺𑀲𑀢𑁆𑀢𑀸𑀦𑀁𑀬𑁂𑀯, 𑀦 𑀅𑀜𑁆𑀜𑁂𑀲𑀁. 𑀩𑁄𑀥𑀺𑀲𑀢𑁆𑀢𑀸 𑀓𑀺𑀭 𑀤𑀻𑀖𑀸𑀬𑀼𑀓𑀤𑁂𑀯𑀮𑁄𑀓𑁂 𑀞𑀺𑀢𑀸 ‘‘𑀇𑀥 𑀞𑀺𑀢𑀲𑁆𑀲 𑀫𑁂 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦 𑀲𑀫𑁆𑀪𑀯𑀢𑀻’’𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀯𑀸𑀲𑀢𑁄 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀲𑀸 𑀳𑁄𑀦𑁆𑀢𑀺, 𑀢𑀤𑀸 𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑁆𑀯𑀸 ‘‘𑀇𑀢𑁄 𑀉𑀤𑁆𑀥𑀁 𑀫𑁂 𑀚𑀻𑀯𑀺𑀢𑀁 𑀦𑀧𑁆𑀧𑀯𑀢𑁆𑀢𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀻𑀤𑀦𑁆𑀢𑀺, 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀭𑀡𑀁 𑀳𑁄𑀢𑀺. 𑀧𑀸𑀭𑀫𑀻𑀥𑀫𑁆𑀫𑀸𑀦𑀜𑁆𑀳𑀺 𑀉𑀓𑁆𑀓𑀁𑀲𑀧𑁆𑀧𑀯𑀢𑁆𑀢𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀳𑀺 𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀢𑀦𑀼𑀪𑀸𑀯𑁂𑀦, 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀉𑀴𑀸𑀭𑀪𑀸𑀯𑁂𑀦 𑀅𑀥𑀺𑀝𑁆𑀞𑀸𑀦𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀬𑀸 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀸 𑀲𑀫𑀺𑀚𑁆𑀛𑀦𑁆𑀢𑀺. 𑀘𑀺𑀢𑁆𑀢𑁂, 𑀯𑀺𑀬 𑀓𑀫𑁆𑀫𑁂𑀲𑀼 𑀘 𑀦𑁂𑀲𑀁 𑀯𑀲𑀻𑀪𑀸𑀯𑁄, 𑀢𑀲𑁆𑀫𑀸 𑀬𑀢𑁆𑀣 𑀉𑀧𑀧𑀦𑁆𑀦𑀸𑀦𑀁 𑀧𑀸𑀭𑀫𑀺𑀬𑁄 𑀲𑀫𑁆𑀫𑀤𑁂𑀯 𑀧𑀭𑀺𑀩𑁆𑀭𑀽𑀳𑀦𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺 𑀅𑀫𑁆𑀳𑀸𑀓𑀁 𑀫𑀳𑀸𑀲𑀢𑁆𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀦𑀸𑀦𑀸𑀚𑀸𑀢𑀻𑀲𑀼 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀧𑁆𑀧𑀓𑀫𑁂𑀯 𑀓𑀸𑀮𑀁 𑀢𑀢𑁆𑀣 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀧𑀸𑀭𑀫𑀻𑀲𑀫𑁆𑀪𑀭𑀡𑀧𑀲𑀼𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑀸𑀦𑀁𑀬𑁂𑀯, 𑀦 𑀅𑀜𑁆𑀜𑁂𑀲’’𑀦𑁆𑀢𑀺. ‘‘𑀏𑀓𑁂𑀦𑀅𑀢𑁆𑀢𑀪𑀸𑀯𑁂𑀦 𑀅𑀦𑁆𑀢𑀭𑁂𑀦 𑀧𑀸𑀭𑀫𑀻𑀦𑀁 𑀲𑀩𑁆𑀩𑀲𑁄 𑀧𑀽𑀭𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀸𑀪𑀸𑀯𑀢𑁄 𑀢𑀢𑁆𑀣 𑀞𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦𑀸𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀺 𑀘 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀝𑁆𑀞𑀸𑀦𑀁 𑀘𑀭𑀺𑀫𑀪𑀯𑁂 𑀅𑀦𑁂𑀓𑀫𑀳𑀸𑀦𑀺𑀥𑀺𑀲𑀫𑀼𑀝𑁆𑀞𑀸𑀦𑀧𑀼𑀩𑁆𑀩𑀺𑀓𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀺 𑀯𑀺𑀬, 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀲𑀤𑀺𑀲𑀤𑀸𑀦𑀸𑀤𑀺𑀯𑀲𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀮𑀸𑀪𑀼𑀧𑁆𑀧𑀢𑁆𑀢𑀺 𑀯𑀺𑀬 𑀘 ‘‘𑀇𑀢𑁄 𑀧𑀭𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀅𑀦𑀼𑀪𑀯𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀥𑀫𑁆𑀫𑀢𑀸.

𑀫𑀦𑀼𑀲𑁆𑀲𑀕𑀡𑀦𑀸𑀯𑀲𑁂𑀦, 𑀦 𑀤𑁂𑀯𑀕𑀡𑀦𑀸𑀯𑀲𑁂𑀦. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀘𑀼𑀢𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺. 𑀅𑀫𑀺𑀮𑀸𑀬𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀫𑀺𑀮𑀸𑀢𑀕𑁆𑀕𑀳𑀡𑁂𑀦𑁂𑀯 𑀢𑀸𑀲𑀁 𑀫𑀸𑀮𑀸𑀦𑀁 𑀯𑀡𑁆𑀡𑀲𑀫𑁆𑀧𑀤𑀸𑀬𑀧𑀺 𑀕𑀦𑁆𑀥𑀲𑀫𑁆𑀧𑀤𑀸𑀬𑀧𑀺 𑀲𑁄𑀪𑀸𑀲𑀫𑁆𑀧𑀤𑀸𑀬𑀧𑀺 𑀅𑀯𑀺𑀦𑀸𑀲𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀸𑀦𑀁 𑀭𑀚𑁄𑀚𑀮𑁆𑀮𑀸𑀦𑀁 𑀮𑁂𑀧𑀲𑁆𑀲𑀧𑀺 𑀅𑀪𑀸𑀯𑀢𑁄 𑀤𑁂𑀯𑀸𑀦𑀁 𑀲𑀭𑀻𑀭𑀕𑀢𑀸𑀦𑀺 𑀯𑀢𑁆𑀣𑀸𑀦𑀺 𑀲𑀩𑁆𑀩𑀓𑀸𑀮𑀁 𑀧𑀭𑀺𑀲𑀼𑀤𑁆𑀥𑀧𑁆𑀧𑀪𑀲𑁆𑀲𑀭𑀸𑀦𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀆𑀳 ‘‘𑀯𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀦𑁂𑀯 𑀲𑀻𑀢𑀁 𑀦 𑀉𑀡𑁆𑀳𑀦𑁆𑀢𑀺 𑀬𑀲𑁆𑀲 𑀲𑀻𑀢𑀲𑁆𑀲 𑀧𑀝𑀺𑀓𑀸𑀭𑀯𑀲𑁂𑀦 𑀅𑀥𑀺𑀓𑀁 𑀲𑁂𑀯𑀺𑀬𑀫𑀸𑀦𑀁 𑀉𑀡𑁆𑀳𑀁, 𑀲𑀬𑀫𑁂𑀯 𑀯𑀸 𑀔𑀭𑀢𑀭𑀁 𑀳𑀼𑀢𑁆𑀯𑀸 𑀅𑀪𑀺𑀪𑀯𑀦𑁆𑀢𑀁 𑀲𑀭𑀻𑀭𑁂 𑀲𑁂𑀤𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀸𑀤𑀺𑀲𑀁 𑀦𑁂𑀯 𑀲𑀻𑀢𑀁, 𑀦 𑀉𑀡𑁆𑀳𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀬𑀣𑀸𑀯𑀼𑀢𑁆𑀢𑀫𑀭𑀡𑀸𑀲𑀦𑁆𑀦𑀓𑀸𑀮𑁂. 𑀩𑀺𑀦𑁆𑀤𑀼𑀩𑀺𑀦𑁆𑀤𑀼𑀯𑀲𑁂𑀦𑀸𑀢𑀺 𑀙𑀺𑀦𑁆𑀦𑀲𑀼𑀢𑁆𑀢𑀸𑀬 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀯𑀮𑀺𑀬𑀸 𑀦𑀺𑀧𑀢𑀦𑁆𑀢𑀸 𑀫𑀼𑀢𑁆𑀢𑀕𑀼𑀴𑀺𑀓𑀸 𑀯𑀺𑀬 𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀳𑀼𑀢𑁆𑀯𑀸. 𑀲𑁂𑀤𑀸𑀢𑀺 𑀲𑁂𑀤𑀥𑀸𑀭𑀸 𑀫𑀼𑀘𑁆𑀘𑀦𑁆𑀢𑀺. 𑀤𑀦𑁆𑀢𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑁄 𑀔𑀡𑁆𑀟𑀺𑀘𑁆𑀘𑀁. 𑀓𑁂𑀲𑀸𑀦𑀁 𑀧𑀮𑀺𑀢𑀪𑀸𑀯𑁄 𑀧𑀸𑀮𑀺𑀘𑁆𑀘𑀁.𑀆𑀤𑀺-𑀲𑀤𑁆𑀤𑁂𑀦 𑀯𑀮𑀺𑀢𑁆𑀢𑀘𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀺𑀮𑀦𑁆𑀢𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀧𑀦 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀅𑀦𑀪𑀺𑀭𑀢𑀺. 𑀲𑀸 𑀦𑀢𑁆𑀣𑀺 𑀉𑀧𑀭𑀽𑀧𑀭𑀺 𑀉𑀴𑀸𑀭𑀉𑀴𑀸𑀭𑀸𑀦𑀫𑁂𑀯 𑀪𑁄𑀕𑀸𑀦𑀁 𑀯𑀺𑀲𑁂𑀲𑀢𑁄 𑀤𑀼𑀯𑀺𑀚𑀸𑀦𑀦𑀸𑀦𑀁 𑀉𑀧𑀢𑀺𑀝𑁆𑀞𑀳𑀦𑀢𑁄. 𑀦𑀺𑀲𑁆𑀲𑀲𑀦𑁆𑀢𑀻𑀢𑀺 𑀉𑀡𑁆𑀳𑀁 𑀦𑀺𑀲𑁆𑀲𑀲𑀦𑁆𑀢𑀺. 𑀯𑀺𑀚𑀫𑁆𑀪𑀦𑁆𑀢𑀻𑀢𑀺 𑀅𑀦𑀪𑀺𑀭𑀢𑀺𑀯𑀲𑁂𑀦 𑀯𑀺𑀚𑀫𑁆𑀪𑀦𑀁 𑀓𑀭𑁄𑀦𑁆𑀢𑀺.

𑀧𑀡𑁆𑀟𑀺𑀢𑀸 𑀏𑀯𑀸𑀢𑀺 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀏𑀯 𑀤𑁂𑀯𑀢𑀸. 𑀬𑀣𑀸 𑀤𑁂𑀯𑀢𑀸 𑀲𑀫𑁆𑀧𑀢𑀺𑀚𑀸𑀢𑀸 ‘‘𑀓𑀻𑀤𑀺𑀲𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑀸 𑀓𑀢𑀁, 𑀅𑀜𑁆𑀜𑀤𑀸𑀧𑀺 𑀯𑀸 𑀏𑀓𑀘𑁆𑀘𑀁 𑀧𑀼𑀜𑁆𑀜𑀓𑀫𑁆𑀫𑀁 𑀚𑀸𑀦𑀦𑁆𑀢𑀺𑀬𑁂𑀯 𑀫𑀳𑀸𑀧𑀼𑀜𑁆𑀜𑀸𑀢𑀺 𑀆𑀳 ‘‘𑀬𑁂 𑀫𑀳𑀸𑀧𑀼𑀜𑁆𑀜𑀸’’𑀢𑀺𑀆𑀤𑀺.

𑀦 𑀧𑀜𑁆𑀜𑀸𑀬𑀦𑁆𑀢𑀺 𑀘𑀺𑀭𑀢𑀭𑀓𑀸𑀮𑀢𑁆𑀢𑀸 𑀧𑀭𑀫𑀸𑀬𑀼𑀦𑁄. 𑀅𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀦 𑀦𑀺𑀬𑁆𑀬𑀸𑀦𑀸𑀯𑀳𑀁 𑀲𑀢𑁆𑀢𑀸𑀦𑀁 𑀅𑀪𑀸𑀚𑀦𑀪𑀸𑀯𑀢𑁄. 𑀲𑀢𑁆𑀢𑀸 𑀦 𑀧𑀭𑀫𑀸𑀬𑀼𑀦𑁄 𑀳𑁄𑀦𑁆𑀢𑀺 𑀦𑀸𑀫 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀆𑀳 ‘‘𑀢𑀤𑀸 𑀳𑀺 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀻’’𑀢𑀺. 𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁂𑀲𑀽𑀢𑀺? 𑀤𑁂𑀯𑀮𑁄𑀓𑁂 𑀢𑀸𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀅𑀦𑁄𑀓𑀸𑀲𑀪𑀸𑀯𑀢𑁄, 𑀢𑀣𑀸 𑀅𑀦𑀘𑁆𑀙𑀭𑀺𑀬𑀪𑀸𑀯𑀢𑁄. 𑀅𑀘𑁆𑀙𑀭𑀺𑀬𑀥𑀫𑁆𑀫𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂𑀲𑀁 𑀲𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀢𑀸 𑀤𑁂𑀯𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀦 𑀧𑀸𑀓𑀝𑀸 𑀳𑁄𑀢𑀺 𑀬𑀣𑀸 𑀫𑀦𑀼𑀲𑁆𑀲𑀪𑀽𑀢𑀸𑀦𑀁, 𑀤𑁂𑀯𑀪𑀽𑀢𑁂 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀤𑀺𑀲𑁆𑀲𑀫𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑁂𑀯𑀸𑀦𑀼𑀪𑀸𑀯𑀢𑁄 𑀮𑁄𑀓𑁄 𑀤𑀳𑀢𑀺, 𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄, 𑀢𑀣𑀸 𑀲𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺, 𑀇𑀲𑁆𑀲𑀭𑀕𑀼𑀢𑁆𑀢𑀕𑁆𑀕𑀸𑀳𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀤𑁂𑀯𑀢𑁆𑀢𑀪𑀸𑀯𑀲𑁆𑀲 𑀘 𑀘𑀺𑀭𑀓𑀸𑀮𑀸𑀥𑀺𑀝𑁆𑀞𑀸𑀦𑀢𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑀕𑁆𑀕𑀸𑀳𑀯𑀺𑀦𑀺𑀫𑁄𑀘𑀦𑀢𑁆𑀣𑀜𑁆𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀫𑀦𑀼𑀲𑁆𑀲𑀲𑀼𑀕𑀢𑀺𑀬𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀤𑁂𑀯𑀲𑀼𑀕𑀢𑀺𑀬𑀁. 𑀫𑀦𑀼𑀲𑁆𑀲𑀲𑀼𑀕𑀢𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀑𑀧𑀧𑀸𑀢𑀺𑀓𑀸 𑀦 𑀳𑁄𑀦𑁆𑀢𑀺, 𑀲𑀢𑀺 𑀘 𑀑𑀧𑀧𑀸𑀢𑀺𑀓𑀽𑀧𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄, 𑀥𑀫𑁆𑀫𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀢𑀦𑁆𑀢𑀺𑀬𑀸 𑀞𑀧𑀦𑀲𑁆𑀲 𑀯𑀺𑀬 𑀥𑀸𑀢𑀼𑀯𑁂𑀦𑁂𑀬𑁆𑀬𑀸𑀦𑀁 𑀥𑀸𑀢𑀽𑀦𑀁 𑀞𑀧𑀦𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘. 𑀦 𑀳𑀺 𑀑𑀧𑀧𑀸𑀢𑀺𑀓𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀁 𑀲𑀭𑀻𑀭𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀧𑀸𑀓𑀝𑀪𑀸𑀯𑀓𑀭𑀡𑀸𑀬 𑀧𑀦 𑀤𑀸𑀭𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀭𑁄𑀦𑁆𑀢𑀸 𑀬𑀸𑀯 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸 𑀅𑀕𑀸𑀭𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑀺, 𑀧𑀭𑀺𑀧𑀸𑀓𑀕𑀢𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀤𑀺𑀧𑀸𑀭𑀫𑀺𑀓𑀸𑀧𑀺 𑀦 𑀅𑀪𑀺𑀦𑀺𑀓𑁆𑀔𑀫𑀦𑁆𑀢𑀻𑀢𑀺. 𑀓𑀺𑀁 𑀯𑀸 𑀏𑀢𑀸𑀬 𑀓𑀸𑀭𑀡𑀘𑀺𑀦𑁆𑀢𑀸𑀬 ‘‘𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸, 𑀬𑀤𑀺𑀤𑀁 𑀫𑀦𑀼𑀲𑁆𑀲𑀪𑀽𑀢𑀸𑀦𑀁𑀬𑁂𑀯 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀸, 𑀦 𑀤𑁂𑀯𑀪𑀽𑀢𑀸𑀦’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸. 𑀢𑀣𑀸 𑀳𑀺 𑀢𑀤𑀢𑁆𑀣𑁄 𑀫𑀳𑀸𑀪𑀺𑀦𑀻𑀳𑀸𑀭𑁄𑀧𑀺 𑀫𑀦𑀼𑀲𑁆𑀲𑀪𑀽𑀢𑀸𑀦𑀁𑀬𑁂𑀯 𑀇𑀚𑁆𑀛𑀢𑀺, 𑀦 𑀤𑁂𑀯𑀪𑀽𑀢𑀸𑀦𑀁.

𑀓𑀲𑁆𑀫𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀼? 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀬𑀲𑁆𑀫𑀸 𑀧𑀣𑀯𑀺𑀬𑀸 𑀦𑀸𑀪𑀺𑀪𑀽𑀢𑀸, 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑀳𑀺𑀢𑀸 𑀅𑀘𑀮𑀝𑁆𑀞𑀸𑀦𑀪𑀽𑀢𑀸 𑀩𑁄𑀥𑀺𑀫𑀡𑁆𑀟𑀪𑀽𑀫𑀺 𑀚𑀫𑁆𑀩𑀼𑀤𑀻𑀧𑁂 𑀏𑀯, 𑀢𑀲𑁆𑀫𑀸 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺, 𑀢𑀣𑀸 ‘‘𑀇𑀢𑀭𑁂𑀲𑀫𑁆𑀧𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀁 𑀢𑀢𑁆𑀣𑁂𑀯 𑀮𑀩𑁆𑀪𑀦𑀢𑁄’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀯𑀓𑀩𑁄𑀥𑀺𑀬𑀸 𑀅𑀪𑀺𑀦𑀻𑀳𑀸𑀭𑁄, 𑀲𑀸𑀯𑀓𑀧𑀸𑀭𑀫𑀺𑀬𑀸 𑀲𑀫𑁆𑀪𑀭𑀡𑀁, 𑀧𑀭𑀺𑀧𑀸𑀘𑀦𑀜𑁆𑀘 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑁂 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀢𑁆𑀣. 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀣𑁄 𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑁄𑀢𑀺 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀸𑀤𑀺 𑀯𑁂𑀦𑁂𑀬𑁆𑀬𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀏𑀢𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀼. 𑀅𑀬𑀜𑁆𑀘 𑀦𑀬𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀢𑀺. 𑀢𑁂𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀬𑀢𑁄 𑀅𑀧𑀭𑀸𑀧𑀭𑀁 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀢𑁂𑀦𑁂𑀯 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀘𑀓𑁆𑀓𑀯𑀸𑀴𑀸𑀦𑀁 𑀤𑀲𑀲𑀳𑀲𑁆𑀲𑀲𑁆𑀲𑁂𑀯 𑀔𑁂𑀢𑁆𑀢𑀪𑀸𑀯𑁄 𑀤𑀻𑀧𑀺𑀢𑁄 𑀇𑀢𑁄 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀢𑁂𑀦𑀸𑀳 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀤𑀻𑀧𑀁 𑀧𑀲𑁆𑀲𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀤𑁂𑀲𑀦𑀺𑀬𑀸𑀫𑁂𑀧𑀺 𑀓𑀸𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀫𑁆𑀧𑀺 𑀧𑀽𑀚𑀦𑀻𑀬𑀪𑀸𑀯𑀢𑁄. ‘‘𑀭𑀸𑀚𑀸 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺 𑀧𑀺𑀢𑀼𑀯𑀲𑁂𑀦 𑀓𑀼𑀮𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄.

‘‘𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺, 𑀢𑁂𑀦 𑀅𑀢𑁆𑀢𑀦𑁄 𑀅𑀦𑁆𑀢𑀭𑀸𑀬𑀸𑀪𑀸𑀯𑀁 𑀅𑀜𑁆𑀜𑀸𑀲𑀺, 𑀢𑀲𑁆𑀲𑀸 𑀘 𑀢𑀼𑀲𑀺𑀢𑀪𑀯𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀦𑀼𑀪𑀯𑀦𑀁.

𑀢𑀸 𑀤𑁂𑀯𑀢𑀸𑀢𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑀤𑁂𑀯𑀢𑀸. 𑀓𑀣𑀁 𑀧𑀦 𑀢𑀸 𑀤𑁂𑀯𑀢𑀸 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀽𑀭𑀺𑀢𑀧𑀸𑀭𑀫𑀺𑀪𑀸𑀯𑀁, 𑀓𑀣𑀁 𑀘𑀲𑁆𑀲 𑀩𑀼𑀤𑁆𑀥𑀪𑀸𑀯𑀁 𑀚𑀸𑀦𑀦𑁆𑀢𑀻𑀢𑀺? 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁 𑀯𑀲𑁂𑀦, 𑀬𑁂𑀪𑀼𑀬𑁆𑀬𑁂𑀦 𑀘 𑀢𑀸 𑀤𑁂𑀯𑀢𑀸 𑀅𑀪𑀺𑀲𑀫𑀬𑀪𑀸𑀕𑀺𑀦𑁄. 𑀢𑀣𑀸 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑀸𑀦𑀲𑀁𑀯𑀺𑀪𑀸𑀕𑁂 𑀅𑀦𑁂𑀓𑀯𑀸𑀭𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

‘‘𑀘𑀯𑀸𑀫𑀻’’𑀢𑀺 𑀚𑀸𑀦𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑁂𑀳𑀺 𑀜𑀸𑀡𑀲𑀳𑀺𑀢𑁂𑀳𑀺 𑀘𑀼𑀢𑀺𑀬𑀸 𑀉𑀧𑀝𑁆𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑁆𑀲𑀧𑀺 𑀅𑀯𑀺𑀲𑀬𑁄𑀯. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀯𑀚𑁆𑀚𑀦𑀧𑀭𑀺𑀬𑀸𑀬𑁄𑀢𑀺 𑀆𑀯𑀚𑁆𑀚𑀦𑀓𑁆𑀓𑀫𑁄. 𑀬𑀲𑁆𑀫𑀸 𑀏𑀓𑀯𑀸𑀭𑀁 𑀆𑀯𑀚𑁆𑀚𑀺𑀢𑀫𑀢𑁆𑀢𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑀁 𑀏𑀯𑀸𑀭𑀫𑁆𑀫𑀡𑀁 𑀤𑀼𑀢𑀺𑀬𑀁, 𑀢𑀢𑀺𑀬𑀜𑁆𑀘 𑀆𑀯𑀚𑁆𑀚𑀺𑀢𑁆𑀯𑀸 𑀦𑀺𑀘𑁆𑀙𑀬𑀢𑀺. 𑀆𑀯𑀚𑁆𑀚𑀦𑀲𑀻𑀲𑁂𑀦 𑀘𑁂𑀢𑁆𑀣 𑀚𑀯𑀦𑀯𑀸𑀭𑁄 𑀕𑀳𑀺𑀢𑁄. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀏𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀘𑀼𑀢𑀺𑀬𑀸 𑀧𑀼𑀭𑁂𑀢𑀭𑀁 𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑀢𑁄 𑀧𑀝𑁆𑀞𑀸𑀬 ‘‘𑀫𑀭𑀡𑀁 𑀫𑁂 𑀆𑀲𑀦𑁆𑀦’’𑀦𑁆𑀢𑀺 𑀚𑀸𑀦𑀦𑀢𑁄 ‘‘𑀘𑀼𑀢𑀺𑀓𑁆𑀔𑀡𑁂𑀧𑀺 𑀘𑀯𑀸𑀫𑀻𑀢𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀅𑀧𑀼𑀩𑁆𑀩𑀪𑀸𑀯𑀢𑁄 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀦𑀺𑀓𑀦𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀭𑀢𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸’’𑀢𑀺 𑀚𑀸𑀦𑀸𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀢𑀻𑀢𑀺 𑀏𑀢𑁆𑀣 𑀓𑀫𑁆𑀧𑀦𑀓𑀸𑀭𑀡𑀁 𑀳𑁂𑀝𑁆𑀞𑀸 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁧𑁪𑁯) 𑀯𑀼𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭𑁧) 𑀆𑀕𑀫𑀺𑀲𑁆𑀲𑀢𑀺. 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀢𑀸𑀬 𑀩𑀳𑀼𑀮𑀁 𑀲𑁄𑀫𑀦𑀲𑁆𑀲𑀺𑀓𑀸𑀯 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀧𑀞𑀫𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭; 𑀥. 𑀲. 𑀅𑀝𑁆𑀞. 𑁪𑁯𑁮; 𑀫. 𑀦𑀺. 𑀅𑀝𑁆𑀞. 𑁪.𑁨𑁦𑁦) 𑀯𑀼𑀢𑁆𑀢𑀁. 𑀫𑀳𑀸𑀲𑀺𑀯𑀢𑁆𑀣𑁂𑀭𑁄𑀧𑀦 𑀬𑀤𑀺𑀧𑀺 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀯, 𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀧𑀦 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑀩𑀳𑀼𑀮𑀸𑀢𑀺 𑀧𑀜𑁆𑀘𑀫𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀫𑀸𑀳.

𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀼𑀡𑁆𑀡𑀫𑀸𑀬 𑀧𑀼𑀭𑁂 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬, 𑀲𑀼𑀓𑁆𑀓𑀧𑀓𑁆𑀔𑁂 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀫𑁂 𑀤𑀺𑀯𑀲𑁂𑀢𑀺 𑀦𑀯𑀫𑀺𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀲𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁. 𑀇𑀤𑀁 𑀲𑀼𑀧𑀺𑀦𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀁. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀤𑁂𑀯𑀺𑀬𑁄 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀫𑀮𑀳𑀭𑀡𑀢𑁆𑀣𑀁 𑀦𑁆𑀳𑀸𑀧𑁂𑀢𑁆𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁪.𑁨𑁦𑁦) 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀲𑀁 𑀤𑁂𑀯𑀺𑀬𑁄𑀢𑀺 𑀫𑀳𑀸𑀭𑀸𑀚𑀽𑀦𑀁 𑀤𑁂𑀯𑀺𑀬𑁄. 𑀘𑀭𑀺𑀢𑁆𑀯𑀸𑀢𑀺 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸.

𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬𑀸𑀢𑀺 𑀳𑀭𑀺𑀢𑁂𑀦 𑀕𑁄𑀫𑀬𑁂𑀦 𑀓𑀢𑀧𑀭𑀺𑀪𑀡𑁆𑀟𑀸𑀬. ‘‘𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄, 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀲𑀼𑀧𑀺𑀦𑀲𑀢𑁆𑀣𑀦𑀬𑁂𑀦 𑀓𑀣𑁂𑀲𑀼𑀁. ‘‘𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀻’’𑀢𑀺𑀆𑀤𑀺 𑀧𑀦 𑀤𑁂𑀯𑀢𑀸𑀯𑀺𑀕𑁆𑀕𑀳𑁂𑀦 𑀢𑀫𑀢𑁆𑀣𑀁 𑀬𑀸𑀣𑀸𑀯𑀢𑁄 𑀧𑀯𑁂𑀤𑁂𑀲𑀼𑀁.

𑀥𑀫𑁆𑀫𑀢𑀸𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁩𑁧; 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀯𑀺𑀬 𑀧𑀓𑀢𑀺𑀧𑀭𑀺𑀬𑀸𑀬𑁄, 𑀥𑀫𑁆𑀫𑁄 𑀏𑀯 𑀥𑀫𑁆𑀫𑀢𑀸 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸𑀢𑀺 𑀆𑀳 ‘‘𑀅𑀬𑀁 𑀲𑀪𑀸𑀯𑁄’’𑀢𑀺, 𑀅𑀬𑀁 𑀧𑀓𑀢𑀻𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀁 𑀲𑀪𑀸𑀯𑁄 𑀅𑀢𑁆𑀣𑀢𑁄 𑀢𑀣𑀸 𑀦𑀺𑀬𑀢𑀪𑀸𑀯𑁄𑀢𑀺 𑀆𑀳 ‘‘𑀅𑀬𑀁 𑀦𑀺𑀬𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀺𑀬𑀸𑀫𑁄 𑀧𑀦 𑀩𑀳𑀼𑀯𑀺𑀥𑁄𑀢𑀺 𑀢𑁂 𑀲𑀩𑁆𑀩𑁂 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀦𑀺𑀬𑀸𑀫𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀬𑀸𑀫𑁄 𑀘 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀸𑀦𑀁 𑀦𑀺𑀬𑀸𑀫𑁄 𑀓𑀫𑁆𑀫𑀦𑀺𑀬𑀸𑀫𑁄. 𑀏𑀲 𑀦𑀬𑁄 𑀉𑀢𑀼𑀦𑀺𑀬𑀸𑀫𑀸𑀤𑀻𑀲𑀼 𑀢𑀻𑀲𑀼. 𑀇𑀢𑀭𑁄 𑀧𑀦 𑀥𑀫𑁆𑀫𑁄 𑀏𑀯 𑀦𑀺𑀬𑀸𑀫𑁄 𑀥𑀫𑁆𑀫𑀦𑀺𑀬𑀸𑀫𑁄, 𑀥𑀫𑁆𑀫𑀢𑀸.

𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲. 𑀦𑀺𑀲𑁂𑀦𑁆𑀢𑁄 𑀢𑀺𑀔𑀺𑀡𑀁 𑀓𑀭𑁄𑀦𑁆𑀢𑁄.

𑀅𑀭𑀽𑀧𑀸𑀤𑀺𑀪𑀽𑀫𑀺𑀪𑀸𑀕𑀯𑀺𑀲𑁂𑀲𑀯𑀲𑁂𑀦 𑀉𑀢𑀼𑀯𑀺𑀲𑁂𑀲𑀤𑀲𑁆𑀲𑀦𑀢𑁄 𑀉𑀢𑀼𑀯𑀺𑀲𑁂𑀲𑁂𑀦 𑀲𑀺𑀚𑁆𑀛𑀫𑀸𑀦𑀸𑀦𑀁 𑀭𑀼𑀓𑁆𑀔𑀸𑀤𑀻𑀦𑀁 𑀧𑀼𑀧𑁆𑀨𑀨𑀮𑀸𑀤𑀺𑀕𑁆𑀕𑀳𑀡𑀁 ‘‘𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀽’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀲𑀦𑁆𑀢𑀸𑀤𑀺𑀓𑀸𑀮𑁂.

𑀫𑀥𑀼𑀭𑀢𑁄 𑀩𑀻𑀚𑀢𑁄 𑀢𑀺𑀢𑁆𑀢𑀢𑁄 𑀩𑀻𑀚𑀢𑁄𑀢𑀺 𑀬𑁄𑀚𑀦𑀸.

𑁧𑁮. 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑁂 𑀯𑀺𑀬 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 ‘‘𑀑𑀓𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀬𑀫𑁂𑀯𑀢𑁆𑀣𑁄’’𑀢𑀺. 𑀏𑀯𑀁 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀲𑁆𑀲 𑀲𑀫𑁆𑀧𑀚𑀸𑀦𑀦𑀸 𑀳𑁄𑀢𑀺. 𑀦 𑀑𑀓𑁆𑀓𑀫𑀫𑀸𑀦𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬. 𑀬𑀣𑀸 𑀘 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀢𑁆𑀣𑀭𑀡𑁂𑀦 𑀯𑀸 𑀅𑀧𑁆𑀧𑀫𑀸𑀡𑁄. 𑀅𑀢𑀺𑀯𑀺𑀬 𑀲𑀫𑀼𑀚𑁆𑀚𑀮𑀦𑀪𑀸𑀯𑁂𑀦 𑀉𑀴𑀸𑀭𑁄. 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀤𑁂𑀯𑀸𑀦𑀁 𑀧𑀪𑀸𑀦𑀼𑀪𑀸𑀯𑀁. 𑀤𑁂𑀯𑀸𑀦𑀜𑁆𑀳𑀺 𑀧𑀪𑀁 𑀲𑁄 𑀑𑀪𑀸𑀲𑁄 𑀅𑀪𑀺𑀪𑀯𑀢𑀺, 𑀦 𑀢𑁂𑀲𑀁 𑀆𑀥𑀺𑀧𑀘𑁆𑀘𑀁. 𑀢𑁂𑀦𑀸𑀳 ‘‘𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺.

𑀮𑁄𑀓𑀸𑀦𑀁 𑀮𑁄𑀓𑀥𑀸𑀢𑀽𑀦𑀁 𑀅𑀦𑁆𑀢𑀭𑁄 𑀯𑀺𑀯𑀭𑁄 𑀮𑁄𑀓𑀦𑁆𑀢𑀭𑁄, 𑀲𑁄 𑀏𑀯 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀮𑁄𑀓𑀦𑁆𑀢𑀭𑀺𑀓𑀸’’𑀢𑀺 𑀯𑀼𑀢𑁆𑀢𑁄. 𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀦𑀸 𑀓𑁂𑀦𑀘𑀺 𑀦 𑀳𑀜𑁆𑀜𑀦𑁆𑀢𑀻𑀢𑀺 𑀅𑀖𑀸, 𑀅𑀲𑀫𑁆𑀩𑀸𑀥𑀸. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀯𑀺𑀯𑀝𑀸’’𑀢𑀺. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸, 𑀉𑀧𑀭𑀺 𑀘 𑀓𑁂𑀦𑀘𑀺 𑀦 𑀧𑀺𑀳𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸’’𑀢𑀺. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀧𑀺𑀥𑀸𑀬𑀺𑀓𑀸 𑀧𑀣𑀯𑀻 𑀦𑀢𑁆𑀣𑀻𑀢𑀺 𑀅𑀲𑀁𑀯𑀼𑀢𑀸 𑀮𑁄𑀓𑀦𑁆𑀢𑀭𑀺𑀓𑀸, 𑀏𑀯𑀁 𑀉𑀧𑀭𑀺𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀯𑀺𑀬 𑀤𑁂𑀯𑀯𑀺𑀫𑀸𑀦𑀸𑀦𑀁 𑀅𑀪𑀸𑀯𑀢𑁄 𑀅𑀲𑀁𑀯𑀼𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀥𑀓𑀸𑀭𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀦𑁆𑀥𑀓𑀸𑀭𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺 𑀆𑀮𑁄𑀓𑀲𑁆𑀲 𑀅𑀪𑀸𑀯𑀢𑁄, 𑀦 𑀘𑀓𑁆𑀔𑀼𑀦𑁄. 𑀢𑀣𑀸 𑀳𑀺 ‘‘𑀢𑁂𑀦 𑀑𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀧𑀭𑀕𑁄𑀬𑀸𑀦𑀯𑀸𑀲𑀻𑀦𑀁 𑀉𑀕𑁆𑀕𑀫𑀦𑀯𑀲𑁂𑀦, 𑀏𑀯𑀁 𑀲𑁂𑀲𑀤𑀻𑀧𑁂𑀲𑀼 𑀧𑀻𑀢𑀺 𑀆𑀳 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺. 𑀇𑀢𑁄 𑀅𑀜𑁆𑀜𑀣𑀸 𑀧𑀦 𑀤𑁆𑀯𑀻𑀲𑀼 𑀏𑀯 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦 𑀧𑀜𑁆𑀜𑀸𑀬𑀦𑁆𑀢𑀻𑀢𑀺. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀤𑀝𑁆𑀞𑀩𑁆𑀩𑀁. 𑀧𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑀺𑀢𑀼𑀁 𑀅𑀦𑀪𑀺𑀲𑀫𑁆𑀪𑀼𑀦𑀦𑁆𑀢𑀺. 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀯𑀺𑀘𑀭𑀡𑀢𑁄 ‘‘𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀯𑀺𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀸𑀯𑀝𑀸𑀢𑀺 𑀔𑀸𑀤𑀦𑀢𑁆𑀣𑀁 𑀕𑀡𑁆𑀳𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀸. 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀺𑀯𑀢𑁆𑀢𑀺𑀢𑁆𑀯𑀸. 𑀙𑀺𑀚𑁆𑀚𑀺𑀢𑁆𑀯𑀸𑀢𑀺 𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸 𑀞𑀺𑀢𑀝𑁆𑀞𑀸𑀦𑀢𑁄 𑀫𑀼𑀘𑁆𑀘𑀺𑀢𑁆𑀯𑀸, 𑀅𑀗𑁆𑀕𑀧𑀘𑁆𑀘𑀗𑁆𑀕𑀙𑁂𑀤𑀦𑁂𑀦 𑀯𑀸 𑀙𑀺𑀚𑁆𑀚𑀺𑀢𑁆𑀯𑀸. 𑀅𑀘𑁆𑀘𑀦𑁆𑀢𑀔𑀸𑀭𑁂𑀢𑀺 𑀆𑀢𑀧𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀢𑀺𑀲𑀻𑀢𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀦 𑀳𑀺 𑀢𑀁 𑀓𑀧𑁆𑀧𑀲𑀡𑁆𑀞𑀳𑀦𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀧𑀣𑀯𑀺𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀓𑀁 𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀣𑀸 𑀳𑀺 𑀲𑀢𑀺 𑀧𑀣𑀯𑀻𑀧𑀺 𑀯𑀺𑀮𑀻𑀬𑁂𑀬𑁆𑀬, 𑀢𑁂𑀲𑀁 𑀯𑀸 𑀧𑀸𑀧𑀓𑀫𑁆𑀫𑀩𑀮𑁂𑀦 𑀧𑁂𑀢𑀸𑀦𑀁 𑀉𑀤𑀓𑀲𑁆𑀲 𑀧𑀼𑀩𑁆𑀩𑀔𑁂𑀴𑀪𑀸𑀯𑀸𑀧𑀢𑁆𑀢𑀺 𑀯𑀺𑀬 𑀢𑀲𑁆𑀲 𑀉𑀤𑀓𑀲𑁆𑀲 𑀢𑀤𑀸 𑀔𑀸𑀭𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂’’𑀢𑀺.

𑀏𑀓𑀬𑀸𑀕𑀼𑀧𑀸𑀦𑀫𑀢𑁆𑀢𑀫𑁆𑀧𑀻𑀢𑀺 𑀧𑀢𑁆𑀢𑀸𑀤𑀺𑀪𑀸𑀚𑀦𑀕𑀢𑀁 𑀬𑀸𑀕𑀼𑀁 𑀕𑀴𑁄𑀘𑀺𑀆𑀤𑀺𑀉𑀤𑁆𑀥𑀭𑀡𑀺𑀬𑀸 𑀕𑀳𑁂𑀢𑁆𑀯𑀸 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀁. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀪𑀸𑀕𑀢𑁄 𑀙𑀧𑁆𑀧𑀓𑀸𑀭𑀫𑁆𑀧𑀺.

𑁧𑁯. 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀯𑀲𑁂𑀦𑀸𑀢𑀺 𑀯𑁂𑀲𑁆𑀲𑀯𑀡𑀸𑀤𑀺𑀘𑀢𑀼𑀫𑀳𑀸𑀭𑀸𑀚𑀪𑀸𑀯𑀲𑀸𑀫𑀜𑁆𑀜𑁂𑀦.

𑀬𑀣𑀸𑀯𑀺𑀳𑀸𑀭𑀦𑁆𑀢𑀺 𑀬𑀣𑀸𑀲𑀓𑀁 𑀯𑀺𑀳𑀸𑀭𑀁.

𑁨𑁦. 𑀧𑀓𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀏𑀯. 𑀢𑁂𑀦𑀸𑀳 ‘‘𑀲𑀪𑀸𑀯𑁂𑀦𑁂𑀯𑀸’’𑀢𑀺. 𑀧𑀭𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀡𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀬𑀫𑁂𑀯 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀻𑀢𑀺 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺. 𑀓𑀸𑀮𑀤𑁂𑀯𑀺𑀮𑀲𑁆𑀲𑀸𑀢𑀺 𑀬𑀣𑀸 𑀓𑀸𑀮𑀤𑁂𑀯𑀺𑀮𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑀤𑀸 𑀕𑀡𑁆𑀳𑀸𑀢𑀺, 𑀩𑁄𑀥𑀺𑀲𑀢𑁆𑀢𑁂 𑀧𑀦…𑀧𑁂… 𑀲𑀬𑀫𑁂𑀯 𑀲𑀻𑀮𑀁 𑀅𑀕𑁆𑀕𑀳𑁂𑀲𑀺, 𑀢𑀣𑀸 𑀯𑀺𑀧𑀲𑁆𑀲𑀻𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁧. ‘‘𑀫𑀦𑀼𑀲𑁆𑀲𑁂𑀲𑀽’’𑀢𑀺 𑀇𑀤𑀁 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀲𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀬𑀸 𑀧𑀦 𑀤𑁂𑀯𑁂𑀲𑀼𑀧𑀺 𑀢𑀸𑀤𑀺𑀲𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑁂𑀯. 𑀬𑀣𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦𑁂𑀯 𑀲𑀸 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀅𑀦𑀪𑀺𑀪𑀯𑀦𑀻𑀬𑀸𑀢𑀺 𑀆𑀳 ‘‘𑀧𑀸𑀤𑀸 𑀦 𑀯𑀳𑀦𑁆𑀢𑀺 𑀤𑀺𑀩𑁆𑀩𑀲𑀗𑁆𑀔𑀮𑀺𑀓𑀸 𑀯𑀺𑀬 𑀩𑀚𑁆𑀛𑀦𑁆𑀢𑀻’’𑀢𑀺.

𑁨𑁨. 𑀧𑀼𑀩𑁆𑀩𑁂 ‘‘𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀧𑀼𑀦 ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀓𑀣𑀫𑀺𑀤𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂’’𑀢𑀺𑀆𑀤𑀺. 𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀢𑁆𑀣𑀼𑀧𑀝𑀺𑀲𑁂𑀥𑁄. 𑀢𑁂𑀦𑀸𑀳 ‘‘𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀯𑀲𑁂𑀦𑀸’’𑀢𑀺. 𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀲𑁆𑀲𑁂𑀯 𑀧𑀝𑀺𑀮𑀸𑀪𑁄.

𑁨𑁩. 𑀓𑀺𑀮𑀫𑀣𑁄𑀢𑀺 𑀔𑁂𑀤𑁄, 𑀓𑀸𑀬𑀲𑁆𑀲 𑀕𑀭𑀼𑀪𑀸𑀯𑀓𑀣𑀺𑀦𑀪𑀸𑀯𑀸𑀤𑀬𑁄𑀧𑀺 𑀢𑀲𑁆𑀲𑀸 𑀢𑀤𑀸 𑀦 𑀳𑁄𑀦𑁆𑀢𑀺 𑀏𑀯. ‘‘𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀤𑀸 𑀧𑀝𑁆𑀞𑀸𑀬 𑀧𑀲𑁆𑀲𑀢𑀻𑀢𑀺 𑀆𑀳 ‘‘𑀓𑀮𑀮𑀸𑀤𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺. 𑀤𑀲𑁆𑀲𑀦𑁂 𑀧𑀬𑁄𑀚𑀦𑀁 𑀲𑀬𑀫𑁂𑀯 𑀯𑀤𑀢𑀺. 𑀢𑀲𑁆𑀲 𑀅𑀪𑀸𑀯𑀢𑁄 𑀓𑀮𑀮𑀸𑀤𑀺𑀓𑀸𑀮𑁂 𑀦 𑀧𑀲𑁆𑀲𑀢𑀺. 𑀧𑀼𑀢𑁆𑀢𑁂𑀦 𑀤𑀳𑀭𑁂𑀦 𑀫𑀦𑁆𑀤𑁂𑀦 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁂𑀦 𑀲𑀤𑁆𑀥𑀺𑀁. ‘‘𑀬𑀁 𑀢𑀁 𑀫𑀸𑀢𑀽’’𑀢𑀺𑀆𑀤𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑀢𑁄𑀧𑀺 𑀳𑀺 𑀲𑀯𑀺𑀲𑁂𑀲𑀁 𑀩𑁄𑀥𑀺𑀲𑀢𑁆𑀢𑀕𑀩𑁆𑀪𑁄 𑀧𑀭𑀺𑀳𑀸𑀭𑀁 𑀮𑀪𑀢𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀅𑀢𑀺𑀯𑀺𑀬 𑀲𑀧𑁆𑀧𑀸𑀬𑀸𑀳𑀸𑀭𑀸𑀘𑀸𑀭𑀸 𑀘 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀳𑀭𑀢𑀺. 𑀲𑀼𑀔𑀯𑀸𑀲𑀢𑁆𑀣𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀼𑀔𑀯𑀸𑀲𑀢𑁆𑀣𑀁. 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄𑀢𑀺 𑀫𑀸𑀢𑀼 𑀧𑀼𑀭𑀺𑀫𑀪𑀸𑀕𑀸𑀪𑀺𑀫𑀼𑀔𑁄. 𑀇𑀤𑀸𑀦𑀺 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀲𑁆𑀲 𑀤𑀺𑀲𑁆𑀲𑀫𑀸𑀦𑀢𑀸𑀬 𑀅𑀩𑁆𑀪𑀦𑁆𑀢𑀭𑀁, 𑀩𑀸𑀳𑀺𑀭𑀜𑁆𑀘 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀓𑀢𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀤𑁂𑀯𑀺𑀬𑀸. 𑀯𑀢𑁆𑀣𑀼𑀦𑁆𑀢𑀺 𑀓𑀼𑀘𑁆𑀙𑀺𑀁. 𑀨𑀮𑀺𑀓𑀅𑀩𑁆𑀪𑀧𑀝𑀮𑀸𑀤𑀺𑀦𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀓𑀼𑀘𑁆𑀙𑀺𑀢𑀘𑀲𑁆𑀲 𑀧𑀢𑀦𑀼𑀪𑀸𑀯𑁂𑀦 𑀆𑀮𑁄𑀓𑀲𑁆𑀲 𑀯𑀺𑀩𑀦𑁆𑀥𑀸𑀪𑀸𑀯𑀢𑁄 𑀬𑀣𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀼𑀘𑁆𑀙𑀺𑀕𑀢𑀁 𑀩𑁄𑀥𑀺𑀲𑀢𑁆𑀢𑀁 𑀧𑀲𑁆𑀲𑀢𑀺, 𑀓𑀺𑀁 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀸𑀢𑀭𑀁, 𑀅𑀜𑁆𑀜𑀜𑁆𑀘 𑀧𑀼𑀭𑀢𑁄 𑀞𑀺𑀢𑀁 𑀭𑀽𑀧𑀕𑀢𑀁 𑀧𑀲𑁆𑀲𑀢𑀺, 𑀦𑁄𑀢𑀺 𑀆𑀳 ‘‘𑀩𑁄𑀥𑀺𑀲𑀢𑁆𑀢𑁄 𑀧𑀦𑀸’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦 𑀲𑀢𑀺 𑀘𑀓𑁆𑀔𑀼𑀫𑁆𑀳𑀺, 𑀆𑀮𑁄𑀓𑁂 𑀘 𑀦 𑀧𑀲𑁆𑀲𑀢𑀻𑀢𑀺 𑀆𑀳 ‘‘𑀦 𑀳𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀬 𑀳𑀺 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀚𑁆𑀚𑀲𑁆𑀲 𑀲𑀫𑀦𑁆𑀦𑀸𑀳𑀸𑀭𑀲𑁆𑀲 𑀅𑀪𑀸𑀯𑀢𑁄.

𑁨𑁪. 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀯𑀺𑀚𑀸𑀢𑀧𑁆𑀧𑀘𑁆𑀘𑀬𑀸 𑀢𑀸𑀤𑀺𑀲𑁂𑀦 𑀭𑁄𑀕𑁂𑀦 𑀅𑀪𑀺𑀪𑀽𑀢𑀸𑀧𑀺 𑀳𑀼𑀢𑁆𑀯𑀸 𑀫𑀭𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀢𑀲𑁆𑀲 𑀯𑀺𑀚𑀸𑀬𑀦𑀦𑀺𑀫𑀺𑀢𑁆𑀢𑀁, 𑀦 𑀓𑁄𑀘𑀺 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀆𑀬𑀼𑀧𑀭𑀺𑀓𑁆𑀔𑀬𑁂𑀦𑁂𑀯 𑀓𑀸𑀮𑀁 𑀓𑀭𑁄𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. ‘‘𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀝𑁆𑀞𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀅𑀜𑁆𑀜𑁂𑀲𑀁 𑀅𑀧𑀭𑀺𑀪𑁄𑀕𑀦𑁆𑀢𑀺 𑀅𑀜𑁆𑀜𑁂𑀳𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀭𑀺𑀪𑁄𑀕𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀲𑀢𑀺 𑀩𑁄𑀥𑀺𑀲𑀢𑁆𑀢𑀧𑀺𑀢𑀼 𑀅𑀜𑁆𑀜𑀸𑀬 𑀅𑀕𑁆𑀕𑀫𑀳𑁂𑀲𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀢𑀣𑀸𑀧𑀺 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀺 𑀥𑀭𑀦𑁆𑀢𑀺𑀬𑀸 𑀅𑀬𑀼𑀚𑁆𑀚𑀫𑀸𑀦𑀓𑀦𑁆𑀢𑀺 𑀆𑀳 ‘‘𑀦 𑀘 𑀲𑀓𑁆𑀓𑀸’’𑀢𑀺𑀆𑀤𑀺. 𑀅𑀧𑀦𑁂𑀢𑁆𑀯𑀸𑀢𑀺 𑀅𑀕𑁆𑀕𑀫𑀳𑁂𑀲𑀺𑀞𑀸𑀦𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀅𑀢𑁆𑀢𑀦𑀺 𑀙𑀦𑁆𑀤𑀭𑀸𑀕𑀯𑀲𑁂𑀦𑁂𑀯 𑀩𑀳𑀺𑀤𑁆𑀥𑀸 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸𑀢𑀺 𑀯𑀺𑀲𑀬𑀺𑀦𑀺𑀲𑀸𑀭𑀸𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀬𑁂𑀲𑀼 𑀲𑀸𑀭𑀸𑀕𑀲𑁆𑀲 𑀩𑀮𑀯𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀻’’𑀢𑀺. 𑀅𑀦𑀼𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀫𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀦𑀸𑀦𑀼𑀬𑀼𑀜𑁆𑀚𑀢𑀺. 𑀢𑁂𑀦 𑀕𑀩𑁆𑀪𑁄 𑀩𑀳𑁆𑀯𑀸𑀩𑀸𑀥𑁄 𑀳𑁄𑀢𑀺. 𑀯𑀢𑁆𑀣𑀼 𑀯𑀺𑀲𑀤𑀁 𑀳𑁄𑀢𑀻𑀢𑀺 𑀕𑀩𑁆𑀪𑀸𑀲𑀬𑁄 𑀯𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀫𑀸𑀢𑀼 𑀫𑀚𑁆𑀛𑀺𑀫𑀯𑀬𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀩𑁄𑀥𑀺𑀲𑀢𑁆𑀢𑀕𑀩𑁆𑀪𑁄𑀓𑁆𑀓𑀫𑀦𑀫𑁆𑀧𑀺 𑀢𑀲𑁆𑀲𑀸 𑀆𑀬𑀼𑀧𑀭𑀺𑀫𑀸𑀡𑀯𑀺𑀮𑁄𑀓𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁 𑀯𑀬𑁄𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑀸𑀭𑀲𑁆𑀲 𑀧𑀭𑀺𑀯𑀚𑁆𑀚𑀦𑀢𑁄. 𑀇𑀢𑁆𑀣𑀺𑀲𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑀸𑀭𑁄 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦𑁂𑀯 𑀯𑀽𑀧𑀲𑀫𑀢𑀺.

𑁨𑁫. 𑀲𑀢𑁆𑀢𑀫𑀸𑀲𑀚𑀸𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀲𑀢𑁆𑀢𑀫𑁂 𑀫𑀸𑀲𑁂 𑀚𑀸𑀢𑁄. 𑀲𑁄 𑀲𑀻𑀢𑀼𑀡𑁆𑀳𑀓𑁆𑀔𑀫𑁄 𑀦 𑀳𑁄𑀢𑀺 𑀅𑀢𑀺𑀯𑀺𑀬 𑀲𑀼𑀔𑀼𑀫𑀸𑀮𑀢𑀸𑀬. 𑀅𑀝𑁆𑀞𑀫𑀸𑀲𑀚𑀸𑀢𑁄 𑀓𑀸𑀫𑀁 𑀲𑀢𑁆𑀢𑀫𑀸𑀲𑀚𑀸𑀢𑀢𑁄 𑀩𑀼𑀤𑁆𑀥𑀺𑀯𑀬𑀯𑀸, 𑀏𑀓𑀘𑁆𑀘𑁂 𑀧𑀦 𑀘𑀫𑁆𑀫𑀧𑀤𑁂𑀲𑀸 𑀯𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀸 𑀖𑀝𑁆𑀝𑀦𑀁 𑀦 𑀲𑀳𑀦𑁆𑀢𑀺, 𑀢𑁂𑀦 𑀲𑁄 𑀦 𑀚𑀻𑀯𑀢𑀺. ‘‘𑀲𑀢𑁆𑀢𑀫𑀸𑀲𑀚𑀸𑀢𑀲𑁆𑀲 𑀧𑀦 𑀦 𑀢𑀸𑀯 𑀢𑁂 𑀚𑀸𑀢𑀸’’𑀢𑀺 𑀯𑀤𑀦𑁆𑀢𑀺.

𑁨𑁭. 𑀤𑁂𑀯𑀸 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 ‘‘𑀮𑁄𑀓𑀦𑀸𑀣𑀁 𑀫𑀳𑀸𑀧𑀼𑀭𑀺𑀲𑀁 𑀲𑀬𑀫𑁂𑀯 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀅𑀢𑁆𑀢𑀦𑁄 𑀧𑀻𑀢𑀺𑀁 𑀧𑀯𑁂𑀤𑁂𑀦𑁆𑀢𑀸 𑀔𑀻𑀡𑀸𑀲𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 𑀆𑀤𑀺𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀲𑀽𑀢𑀺𑀯𑁂𑀲𑀦𑁆𑀢𑀺 𑀲𑀽𑀢𑀺𑀚𑀕𑁆𑀕𑀦𑀥𑀸𑀢𑀺𑀯𑁂𑀲𑀁. 𑀏𑀓𑁂𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀫𑀘𑁆𑀙𑀓𑁆𑀔𑀺𑀲𑀤𑀺𑀲𑀁 𑀙𑀯𑀺𑀯𑀲𑁂𑀦. 𑀅𑀝𑁆𑀞𑀸𑀲𑀺 𑀦 𑀦𑀺𑀲𑀻𑀤𑀺, 𑀦 𑀦𑀺𑀧𑀚𑁆𑀚𑀺 𑀯𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀸𑀯 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀻’’𑀢𑀺. 𑀦𑀺𑀤𑁆𑀤𑀼𑀓𑁆𑀔𑀢𑀸𑀬 𑀞𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀯𑀺𑀚𑀸𑀬𑀢𑀺. 𑀤𑀼𑀓𑁆𑀔𑀲𑁆𑀲 𑀳𑀺 𑀩𑀮𑀯𑀪𑀸𑀯𑀢𑁄 𑀢𑀁 𑀤𑀼𑀓𑁆𑀔𑀁 𑀅𑀲𑀳𑀫𑀸𑀦𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀯𑀺𑀚𑀸𑀬𑀦𑁆𑀢𑀺.

𑁨𑁮. 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸𑀢𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀧𑀯𑁂𑀡𑀺𑀬𑀸. 𑀫𑀳𑀸𑀢𑁂𑀚𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄, 𑀯𑀺𑀧𑀼𑀮𑀓𑀺𑀢𑁆𑀢𑀺𑀖𑁄𑀲𑁄 𑀘.

𑁨𑁯. 𑀪𑀕𑁆𑀕𑀯𑀺𑀪𑀕𑁆𑀕𑀸𑀢𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀦𑁂𑀦 𑀯𑀺𑀪𑀸𑀯𑀺𑀢𑀢𑁆𑀢𑀸 𑀪𑀕𑁆𑀕𑀸, 𑀯𑀺𑀪𑀕𑁆𑀕𑀸 𑀯𑀺𑀬 𑀘 𑀳𑀼𑀢𑁆𑀯𑀸, 𑀢𑁂𑀦 𑀦𑁂𑀲𑀁 𑀅𑀯𑀺𑀲𑀤𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀅𑀮𑀕𑁆𑀕𑁄 𑀳𑀼𑀢𑁆𑀯𑀸𑀢𑀺 𑀕𑀩𑁆𑀪𑀸𑀲𑀬𑁂, 𑀬𑁄𑀦𑀺𑀧𑀤𑁂𑀲𑁂 𑀘 𑀓𑀢𑁆𑀣𑀘𑀺 𑀅𑀮𑀕𑁆𑀕𑁄 𑀅𑀲𑀢𑁆𑀢𑁄 𑀳𑀼𑀢𑁆𑀯𑀸, 𑀬𑀢𑁄 ‘‘𑀥𑀫𑀓𑀭𑀡𑀢𑁄 𑀉𑀤𑀓𑀦𑀺𑀓𑁆𑀔𑀫𑀦𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀤𑀓𑁂𑀦𑀸𑀢𑀺 𑀕𑀩𑁆𑀪𑀸𑀲𑀬𑀕𑀢𑁂𑀦 𑀉𑀤𑀓𑁂𑀦. 𑀅𑀫𑀓𑁆𑀔𑀺𑀢𑁄𑀯 𑀦𑀺𑀓𑁆𑀔𑀫𑀢𑀺 𑀲𑀫𑁆𑀫𑀓𑁆𑀔𑀺𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀉𑀤𑀓𑀲𑁂𑀫𑁆𑀳𑀸𑀤𑀺𑀓𑀲𑁆𑀲𑁂𑀯 𑀢𑀢𑁆𑀣 𑀅𑀪𑀸𑀯𑀢𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑀢𑁄 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀢𑀁 𑀞𑀸𑀦𑀁 𑀧𑀼𑀩𑁆𑀩𑁂𑀧𑀺 𑀯𑀺𑀲𑀼𑀤𑁆𑀥𑀁 𑀯𑀺𑀲𑁂𑀲𑀢𑁄 𑀧𑀭𑀫𑀲𑀼𑀕𑀦𑁆𑀥𑀕𑀦𑁆𑀥𑀓𑀼𑀝𑀺 𑀯𑀺𑀬 𑀘𑀦𑁆𑀤𑀦𑀕𑀦𑁆𑀥𑀁 𑀯𑀸𑀬𑀦𑁆𑀢𑀁 𑀢𑀺𑀝𑁆𑀞𑀢𑀺.

𑀉𑀤𑀓𑀯𑀝𑁆𑀝𑀺𑀬𑁄𑀢𑀺 𑀉𑀤𑀓𑀓𑁆𑀔𑀦𑁆𑀥𑀸.

𑁩𑁧. 𑀫𑀼𑀳𑀼𑀢𑁆𑀢𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑁂𑀦 𑀚𑀸𑀢𑁄 𑀳𑀼𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑀢𑁆𑀢𑁄𑀯. 𑀅𑀦𑀼𑀥𑀸𑀭𑀺𑀬𑀫𑀸𑀦𑁂𑀢𑀺 𑀅𑀦𑀼𑀓𑀽𑀮𑀯𑀲𑁂𑀦 𑀦𑀻𑀬𑀫𑀸𑀦𑁂. 𑀆𑀕𑀢𑀸𑀦𑁂𑀯𑀸𑀢𑀺 𑀢𑀁 𑀞𑀸𑀦𑀁 𑀉𑀧𑀕𑀢𑀸𑀦𑀺 𑀏𑀯. 𑀅𑀦𑁂𑀓𑀲𑀸𑀔𑀦𑁆𑀢𑀺 𑀭𑀢𑀦𑀫𑀬𑀸𑀦𑁂𑀓𑀲𑀢𑀧𑀢𑀺𑀝𑁆𑀞𑀸𑀦𑀳𑀻𑀭𑀓𑀁. 𑀲𑀳𑀲𑁆𑀲𑀫𑀡𑁆𑀟𑀮𑀦𑁆𑀢𑀺 𑀢𑁂𑀲𑀁 𑀉𑀧𑀭𑀺𑀝𑁆𑀞𑀺𑀢𑀁 𑀅𑀦𑁂𑀓𑀲𑀳𑀲𑁆𑀲𑀫𑀡𑁆𑀟𑀮𑀳𑀻𑀭𑀓𑀁. 𑀫𑀭𑀽𑀢𑀺 𑀤𑁂𑀯𑀸. 𑀦 𑀔𑁄 𑀧𑀦𑀏𑀯𑀁 𑀤𑀝𑁆𑀞𑀩𑁆𑀩𑀁 𑀧𑀤𑀯𑀻𑀢𑀺𑀳𑀸𑀭𑀢𑁄 𑀧𑀕𑁂𑀯 𑀤𑀺𑀲𑀸𑀯𑀺𑀮𑁄𑀓𑀦𑀲𑁆𑀲 𑀓𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀳𑀸𑀲𑀢𑁆𑀢𑁄 𑀳𑀻’’𑀢𑀺𑀆𑀤𑀺. 𑀏𑀓𑀗𑁆𑀕𑀡𑀸𑀦𑀻𑀢𑀺 𑀯𑀺𑀯𑀝𑀪𑀸𑀯𑁂𑀦 𑀯𑀺𑀳𑀸𑀭𑀗𑁆𑀕𑀡𑀧𑀭𑀺𑀯𑁂𑀡𑀗𑁆𑀕𑀡𑀸𑀦𑀺 𑀯𑀺𑀬 𑀏𑀓𑀗𑁆𑀕𑀡𑀲𑀤𑀺𑀲𑀸𑀦𑀺 𑀅𑀳𑁂𑀲𑀼𑀁. 𑀲𑀤𑀺𑀲𑁄𑀧𑀺 𑀦𑀢𑁆𑀣𑀻𑀢𑀺 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀯𑀺𑀮𑁄𑀓𑀦𑀁 𑀯𑀺𑀲𑀺𑀝𑁆𑀞𑁂 𑀧𑀲𑁆𑀲𑀺𑀢𑀼𑀁 ‘‘𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀅𑀕𑁆𑀕𑁄𑀢𑀺 𑀧𑀥𑀸𑀦𑁄, 𑀓𑁂𑀦 𑀧𑀦𑀲𑁆𑀲 𑀧𑀥𑀸𑀦𑀢𑀸𑀢𑀺 𑀆𑀳 ‘‘𑀕𑀼𑀡𑁂𑀳𑀻’’𑀢𑀺. 𑀧𑀞𑀫-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀥𑀸𑀦𑀧𑀭𑀺𑀬𑀸𑀬𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀧𑀥𑀸𑀦𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀢𑀺 𑀆𑀳 ‘‘𑀲𑀩𑁆𑀩𑀧𑀞𑀫𑁄’’𑀢𑀺, 𑀲𑀩𑁆𑀩𑀧𑀥𑀸𑀦𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲𑁂𑀯𑀸𑀢𑀺 𑀅𑀕𑁆𑀕𑀲𑀤𑁆𑀤𑀲𑁆𑀲𑁂𑀯. 𑀏𑀢𑁆𑀣 𑀘 𑀫𑀳𑁂𑀲𑀓𑁆𑀔𑀸 𑀢𑀸𑀯 𑀤𑁂𑀯𑀸 𑀢𑀣𑀸 𑀘 𑀯𑀤𑀦𑁆𑀢𑀺, 𑀇𑀢𑀭𑁂 𑀧𑀦 𑀓𑀣𑀦𑁆𑀢𑀺? 𑀫𑀳𑀸𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑀤𑀲𑁆𑀲𑀦𑀸𑀤𑀺𑀦𑀸. 𑀫𑀳𑁂𑀲𑀓𑁆𑀔𑀸𑀦𑀜𑁆𑀳𑀺 𑀤𑁂𑀯𑀸𑀦𑀁 𑀫𑀳𑀸𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁄 𑀯𑀺𑀬 𑀢𑁂𑀦 𑀲𑀤𑀺𑀲𑀸𑀦𑀫𑁆𑀧𑀺 𑀆𑀦𑀼𑀪𑀸𑀯𑁄 𑀧𑀘𑁆𑀘𑀓𑁆𑀔𑁄 𑀅𑀳𑁄𑀲𑀻𑀢𑀺, 𑀇𑀢𑀭𑁂 𑀧𑀦 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀦𑁆𑀢𑀸 𑀅𑀦𑀼𑀫𑀺𑀦𑀦𑁆𑀢𑀸 𑀢𑀣𑀸 𑀆𑀳𑀁𑀲𑀼. 𑀧𑀭𑀺𑀧𑀸𑀓𑀕𑀢𑀧𑀼𑀩𑁆𑀩𑀳𑁂𑀢𑀼𑀲𑀁𑀲𑀺𑀤𑁆𑀥𑀸𑀬 𑀥𑀫𑁆𑀫𑀢𑀸𑀬 𑀘𑁄𑀤𑀺𑀬𑀫𑀸𑀦𑁄 𑀇𑀫𑀲𑁆𑀫𑀺𑀁…𑀧𑁂… 𑀩𑁆𑀬𑀸𑀓𑀸𑀲𑀺.

𑀚𑀸𑀢𑀫𑀢𑁆𑀢𑀲𑁆𑀲𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀞𑀸𑀦𑀸𑀤𑀻𑀦𑀺 𑀬𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀻𑀢𑀺 𑀢𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀇𑀤𑁆𑀥𑀺𑀧𑀸𑀤𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀫𑀺𑀚𑁆𑀛𑀦𑀢𑁄. 𑀉𑀢𑁆𑀢𑀭𑀸𑀪𑀺𑀫𑀼𑀔𑀪𑀸𑀯𑁄 𑀮𑁄𑀓𑀲𑁆𑀲 𑀉𑀢𑁆𑀢𑀭𑀡𑀯𑀲𑁂𑀦 𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀢𑁂𑀦 𑀳𑀺 𑀪𑀕𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀪𑀺𑀪𑀽𑀢𑁄, 𑀓𑁂𑀦𑀘𑀺 𑀅𑀦𑀪𑀺𑀪𑀽𑀢𑁄 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀫𑀳𑀸𑀚𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀢𑀣𑀸 𑀲𑀢𑁆𑀢𑀧𑀤𑀕𑀫𑀦𑀁 𑀲𑀢𑁆𑀢𑀧𑀤𑀩𑁄𑀚𑁆𑀛𑀗𑁆𑀕𑀲𑀫𑁆𑀧𑀦𑁆𑀦𑀅𑀭𑀺𑀬𑀫𑀕𑁆𑀕𑀕𑀫𑀦𑀲𑁆𑀲. 𑀲𑀼𑀯𑀺𑀲𑀼𑀤𑁆𑀥𑀲𑁂𑀢𑀘𑁆𑀙𑀢𑁆𑀢𑀥𑀸𑀭𑀡𑀁 𑀲𑀼𑀯𑀺𑀲𑀼𑀤𑁆𑀥𑀯𑀺𑀫𑀼𑀢𑁆𑀢𑀺𑀙𑀢𑁆𑀢𑀥𑀸𑀭𑀡𑀲𑁆𑀲. 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀲𑀫𑀸𑀬𑁄𑀕𑁄 𑀧𑀜𑁆𑀘𑀯𑀺𑀥𑀯𑀺𑀫𑀼𑀢𑁆𑀢𑀺𑀕𑀼𑀡𑀲𑀫𑀸𑀬𑁄𑀕𑀲𑁆𑀲. 𑀅𑀦𑀸𑀯𑀝𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀅𑀦𑀸𑀯𑀝𑀜𑀸𑀡𑀢𑀸𑀬. ‘‘𑀅𑀕𑁆𑀕𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀅𑀙𑀫𑁆𑀪𑀺𑀢𑀯𑀸𑀘𑀸𑀪𑀸𑀲𑀦𑀁 𑀓𑁂𑀦𑀘𑀺 𑀅𑀯𑀺𑀩𑀦𑁆𑀥𑀦𑀻𑀬𑀢𑀸𑀬 𑀅𑀧𑁆𑀧𑀯𑀢𑁆𑀢𑀺𑀬𑀲𑁆𑀲 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑁆𑀲. ‘‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻’’𑀢𑀺 𑀆𑀬𑀢𑀺𑀁 𑀚𑀸𑀢𑀺𑀬𑀸 𑀅𑀪𑀸𑀯𑀓𑀺𑀢𑁆𑀢𑀦𑀸 𑀅𑀦𑀼𑀧𑀸𑀤𑀺…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀢𑀲𑁆𑀲 𑀢𑀲𑁆𑀲 𑀅𑀦𑀸𑀕𑀢𑁂 𑀮𑀤𑁆𑀥𑀩𑁆𑀩𑀯𑀺𑀲𑁂𑀲𑀲𑁆𑀲 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀪𑀺𑀘𑀸𑀭𑀻𑀢𑀺 𑀓𑀢𑁆𑀯𑀸. 𑀦 𑀆𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀅𑀜𑁆𑀜𑀢𑁆𑀣 𑀘 𑀯𑀓𑁆𑀔𑀫𑀸𑀦𑀸𑀬 𑀅𑀦𑀼𑀧𑀼𑀩𑁆𑀩𑀺𑀬𑀸 𑀦 𑀆𑀕𑀢𑁄. 𑀆𑀳𑀭𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀅𑀝𑁆𑀞𑀓𑀣𑀸𑀲𑀼 𑀘 𑀆𑀕𑀢𑀦𑀬𑁂𑀦 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀻’’𑀢𑀺 𑀇𑀤𑀁 𑀲𑀢𑀺𑀧𑀺 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑁂 𑀯𑀓𑁆𑀔𑀫𑀸𑀦𑀸𑀦𑀁 𑀅𑀘𑁆𑀙𑀭𑀺𑀬𑀸𑀦𑀁 𑀫𑀽𑀮𑀪𑀽𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀢𑀺𑀩𑀤𑁆𑀥𑀸 𑀯𑀻𑀡𑀸 𑀘𑀫𑁆𑀫𑀩𑀤𑁆𑀥𑀸 𑀪𑁂𑀭𑀺𑀬𑁄𑀢𑀺 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀘-𑀲𑀤𑁆𑀤𑁂𑀦 𑀯𑀸 𑀇𑀢𑀭𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀢𑀗𑁆𑀔𑀡𑁂 𑀏𑀯 𑀙𑀚𑁆𑀚𑀺𑀢𑁆𑀯𑀸 𑀧𑀼𑀦 𑀧𑀸𑀓𑀢𑀺𑀓𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀣𑀸 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺 𑀢𑀣𑀸𑀭𑀽𑀧𑀓𑀫𑁆𑀫𑀧𑀘𑁆𑀘𑀬𑀸 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀸𑀯𑀤𑁂𑀯 𑀯𑀺𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀙𑀺𑀚𑁆𑀚𑀺𑀁𑀲𑀽𑀢𑀺 𑀘 𑀧𑀸𑀤𑁂𑀲𑀼 𑀩𑀦𑁆𑀥𑀝𑁆𑀞𑀸𑀦𑁂𑀲𑀼 𑀙𑀺𑀚𑁆𑀚𑀺𑀁𑀲𑀼. 𑀯𑀺𑀕𑀘𑁆𑀙𑀺𑀁𑀲𑀽𑀢𑀺 𑀯𑀽𑀧𑀲𑀫𑀺𑀁𑀲𑀼. 𑀆𑀓𑀸𑀲𑀝𑁆𑀞𑀓𑀭𑀢𑀦𑀸𑀦𑀺 𑀦𑀸𑀫 𑀢𑀁𑀢𑀁𑀯𑀺𑀫𑀸𑀦𑀕𑀢𑀫𑀡𑀺𑀭𑀢𑀦𑀸𑀤𑀻𑀦𑀺. 𑀲𑀓𑀢𑁂𑀚𑁄𑀪𑀸𑀲𑀺𑀢𑀸𑀦𑀻𑀢𑀺 𑀅𑀢𑀺𑀯𑀺𑀬 𑀲𑀫𑀼𑀚𑁆𑀚𑀮𑀸𑀬 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀦𑀧𑁆𑀧𑀯𑀢𑁆𑀢𑀻𑀢𑀺 𑀦 𑀲𑀦𑁆𑀦𑀺𑀧𑀸𑀢𑁄. 𑀦 𑀯𑀸𑀬𑀻𑀢𑀺 𑀔𑀭𑁄 𑀯𑀸𑀢𑁄 𑀦 𑀯𑀸𑀬𑀺. 𑀫𑀼𑀤𑀼𑀲𑀼𑀔𑁄 𑀧𑀦 𑀲𑀢𑁆𑀢𑀸𑀦𑀁 𑀲𑀼𑀔𑀸𑀯𑀳𑁄 𑀯𑀸𑀬𑀺. 𑀧𑀣𑀯𑀺𑀕𑀢𑀸 𑀅𑀳𑁂𑀲𑀼𑀁 𑀉𑀘𑁆𑀘𑀝𑁆𑀞𑀸𑀦𑁂 𑀞𑀸𑀢𑀼𑀁 𑀅𑀯𑀺𑀲𑀳𑀦𑁆𑀢𑀸. 𑀉𑀢𑀼𑀲𑀫𑁆𑀧𑀦𑁆𑀦𑁄𑀢𑀺 𑀅𑀦𑀼𑀡𑁆𑀳𑀸𑀲𑀻𑀢𑀢𑀸𑀲𑀗𑁆𑀔𑀸𑀢𑁂𑀦 𑀉𑀢𑀼𑀦𑀸 𑀲𑀫𑁆𑀧𑀦𑁆𑀦𑁄. 𑀅𑀧𑁆𑀨𑁄𑀝𑀦𑀁 𑀯𑀼𑀘𑁆𑀘𑀢𑀺 𑀪𑀼𑀚𑀳𑀢𑁆𑀣𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑁄, 𑀅𑀢𑁆𑀣𑀢𑁄 𑀧𑀦 𑀯𑀸𑀫𑀳𑀢𑁆𑀣𑀁 𑀉𑀭𑁂 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀼𑀣𑀼𑀧𑀸𑀡𑀺𑀦𑀸 𑀳𑀢𑁆𑀣𑀢𑀸𑀴𑀦𑁂𑀦 𑀲𑀤𑁆𑀤𑀓𑀭𑀡𑀁. 𑀫𑀼𑀔𑁂𑀦 𑀉𑀲𑁆𑀲𑁂𑀴𑀦𑀁 𑀲𑀤𑁆𑀤𑀲𑁆𑀲 𑀫𑀼𑀜𑁆𑀘𑀦𑀁 𑀲𑁂𑀴𑀦𑀁. 𑀏𑀓𑀤𑁆𑀥𑀚𑀫𑀸𑀮𑀸 𑀅𑀳𑁄𑀲𑀺 𑀦𑀺𑀭𑀦𑁆𑀢𑀭𑀁 𑀥𑀚𑀫𑀸𑀮𑀸𑀲𑀫𑁄𑀥𑀸𑀦𑀕𑀢𑀸𑀬. 𑀦 𑀓𑁂𑀯𑀮𑀜𑁆𑀘 𑀏𑀢𑀸𑀦𑀺 𑀏𑀯, 𑀅𑀣 𑀔𑁄 𑀅𑀜𑁆𑀜𑀸𑀦𑀺𑀧𑀺 ‘‘𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀲𑀼𑀕𑀦𑁆𑀥𑀧𑀼𑀧𑁆𑀨𑀯𑀲𑁆𑀲𑀤𑁂𑀯𑁄𑀧𑀯𑀲𑁆𑀲𑀺 𑀲𑀽𑀭𑀺𑀬𑁂 𑀤𑀺𑀲𑁆𑀲𑀫𑀸𑀦𑁂 𑀏𑀯 𑀢𑀸𑀭𑀓𑀸 𑀑𑀪𑀸𑀲𑀺𑀁𑀲𑀼, 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀉𑀤𑀓𑀁 𑀧𑀣𑀯𑀺𑀢𑁄 𑀉𑀩𑁆𑀪𑀺𑀚𑁆𑀚𑀺, 𑀩𑀺𑀮𑀸𑀲𑀬𑀸 𑀘 𑀢𑀺𑀭𑀘𑁆𑀙𑀸𑀦𑀸 𑀆𑀲𑀬𑀢𑁄 𑀦𑀺𑀓𑁆𑀔𑀫𑀺𑀁𑀲𑀼, 𑀭𑀸𑀕𑀤𑁄𑀲𑀫𑁄𑀳𑀸𑀧𑀺 𑀢𑀦𑀼 𑀪𑀯𑀺𑀁𑀲𑀼, 𑀧𑀣𑀯𑀺𑀬𑀁 𑀭𑀚𑁄 𑀯𑀽𑀧𑀲𑀫𑀺, 𑀅𑀦𑀺𑀝𑁆𑀞𑀕𑀦𑁆𑀥𑁄 𑀯𑀺𑀕𑀘𑁆𑀙𑀺, 𑀤𑀺𑀩𑁆𑀩𑀕𑀦𑁆𑀥𑁄 𑀯𑀸𑀬𑀺, 𑀭𑀽𑀧𑀺𑀦𑁄 𑀤𑁂𑀯𑀸 𑀲𑀭𑀽𑀧𑁂𑀦𑁂𑀯 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀣𑀁 𑀅𑀕𑀫𑀁𑀲𑀼, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀸 𑀦𑀸𑀳𑁂𑀲𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀬𑀸𑀦𑀺 𑀫𑀳𑀸𑀪𑀺𑀦𑀻𑀳𑀸𑀭𑀲𑀫𑀬𑁂 𑀉𑀧𑁆𑀧𑀦𑁆𑀦𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀦𑀯𑀲𑁂𑀲𑀢𑁄 𑀢𑀤𑀸 𑀅𑀳𑁂𑀲𑀼𑀦𑁆𑀢𑀺.

𑀢𑀢𑁆𑀭𑀸𑀧𑀻𑀢𑀺 𑀢𑁂𑀲𑀼𑀧𑀺 𑀧𑀣𑀯𑀺𑀓𑀫𑁆𑀧𑀸𑀤𑀻𑀲𑀼 𑀏𑀯𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀓𑁂𑀯𑀮𑀁 𑀲𑀫𑁆𑀧𑀢𑀺𑀚𑀸𑀢𑀲𑁆𑀲 𑀞𑀸𑀦𑀸𑀤𑀻𑀲𑀼 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁆𑀲 𑀜𑁂𑀬𑁆𑀬𑀲𑁆𑀲, 𑀢𑀺𑀢𑁆𑀣𑀓𑀭𑀫𑀢𑀲𑁆𑀲 𑀘 𑀘𑀸𑀮𑀦𑀢𑁄. 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁𑀬𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀸𑀢𑁄 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁𑀬𑁂𑀯 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀡𑁆𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀞𑀫𑀁 𑀤𑁂𑀯𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀤𑀺𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀢𑀢𑁆𑀣𑁂𑀯 𑀞𑀸𑀦𑀲𑁆𑀲 𑀦𑀺𑀘𑁆𑀘𑀮𑀲𑀪𑀸𑀯𑀢𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀯𑀻𑀡𑀸𑀦𑀁 𑀲𑀬𑀁 𑀯𑀚𑁆𑀚𑀦𑀁 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀪𑁂𑀭𑀻𑀦𑀁 𑀯𑀚𑁆𑀚𑀦𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬 𑀧𑀭𑀺𑀲𑀸𑀬 𑀧𑀯𑁂𑀤𑀦𑀲𑀫𑀢𑁆𑀣𑀲𑁆𑀲 𑀥𑀫𑁆𑀫𑀪𑁂𑀭𑀺𑀬𑀸 𑀅𑀦𑀼𑀲𑀸𑀯𑀦𑀲𑁆𑀲 𑀅𑀫𑀢𑀤𑀼𑀦𑁆𑀤𑀼𑀪𑀺𑀖𑁄𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀁 𑀙𑁂𑀤𑁄 𑀫𑀸𑀦𑀯𑀺𑀦𑀺𑀩𑀦𑁆𑀥𑀪𑁂𑀤𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀫𑀳𑀸𑀚𑀦𑀲𑁆𑀲 𑀭𑁄𑀕𑀯𑀺𑀕𑀫𑁄 𑀢𑀲𑁆𑀲𑁂𑀯 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀭𑁄𑀕𑀯𑀺𑀕𑀫𑀪𑀽𑀢𑀲𑁆𑀲 𑀲𑀘𑁆𑀘𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. ‘‘𑀫𑀳𑀸𑀚𑀦𑀲𑁆𑀲𑀸’’𑀢𑀺 𑀧𑀤𑀁 ‘‘𑀫𑀳𑀸𑀚𑀦𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲, 𑀫𑀳𑀸𑀚𑀦𑀲𑁆𑀲 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀯𑀲𑁂𑀦 𑀲𑀸𑀢𑀺𑀲𑀬𑀜𑀸𑀡𑀚𑀯𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀻𑀢𑀺 𑀆𑀳 ‘‘𑀧𑀻𑀞𑀲𑀧𑁆𑀧𑀻𑀦𑀁 𑀚𑀯𑀲𑀫𑁆𑀧𑀤𑀸 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀲𑀼𑀧𑀝𑁆𑀝𑀦𑀲𑀫𑁆𑀧𑀸𑀧𑀼𑀡𑀦𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀅𑀢𑁆𑀣𑀸𑀤𑀻𑀲𑀼 𑀲𑀫𑁆𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀭𑀢𑀦𑀸𑀦𑀁 𑀲𑀓𑀢𑁂𑀚𑁄𑀪𑀸𑀲𑀺𑀢𑀢𑁆𑀢𑀁 𑀬𑀁 𑀮𑁄𑀓𑀲𑁆𑀲 𑀥𑀫𑁆𑀫𑁄𑀪𑀸𑀲𑀁 𑀤𑀲𑁆𑀲𑁂𑀲𑁆𑀲𑀢𑀺, 𑀢𑁂𑀦 𑀢𑀲𑁆𑀲 𑀲𑀓𑀢𑁂𑀚𑁄𑀪𑀸𑀲𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀢𑀲𑁆𑀲 𑀲𑀩𑁆𑀩𑀲𑁄 𑀯𑁂𑀭𑀯𑀽𑀧𑀲𑀫𑀦𑀢𑁄. 𑀏𑀓𑀸𑀤𑀲𑀅𑀕𑁆𑀕𑀺𑀦𑀺𑀩𑁆𑀩𑀸𑀧𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀤𑀼𑀦𑁆𑀦𑀺𑀩𑁆𑀩𑀸𑀧𑀦𑀦𑀺𑀩𑁆𑀩𑀸𑀦𑀪𑀸𑀯𑀢𑁄. 𑀜𑀸𑀡𑀸𑀮𑁄𑀓𑀸𑀤𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀅𑀦𑀸𑀮𑁄𑀓𑁂 𑀆𑀮𑁄𑀓𑀤𑀲𑁆𑀲𑀦𑀪𑀸𑀯𑀢𑁄. 𑀦𑀺𑀩𑁆𑀩𑀸𑀦𑀭𑀲𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀸𑀬𑀦𑀭𑀲𑁂𑀦. 𑀏𑀓𑀭𑀲𑀪𑀸𑀯𑀲𑁆𑀲𑀸𑀢𑀺 𑀲𑀸𑀲𑀦𑀲𑁆𑀲 𑀲𑀩𑁆𑀩𑀢𑁆𑀣 𑀏𑀓𑀭𑀲𑀪𑀸𑀯𑀲𑁆𑀲, 𑀢𑀜𑁆𑀘 𑀔𑁄 𑀅𑀫𑀥𑀼𑀭𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀲𑁄 𑀫𑀥𑀼𑀭𑀪𑀸𑀯𑀸𑀧𑀸𑀤𑀦𑁂𑀦. 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑀺𑀦𑁆𑀤𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀤𑀺𑀝𑁆𑀞𑀺𑀕𑀢𑀯𑀸𑀢𑀸𑀧𑀦𑀬𑀦𑀯𑀲𑁂𑀦. 𑀆𑀓𑀸𑀲𑀸𑀤𑀺𑀅𑀧𑁆𑀧𑀢𑀺𑀝𑁆𑀞𑀯𑀺𑀲𑀫𑀘𑀜𑁆𑀘𑀮𑀝𑁆𑀞𑀸𑀦𑀁 𑀧𑀳𑀸𑀬 𑀲𑀓𑀼𑀡𑀸𑀦𑀁 𑀧𑀣𑀯𑀺𑀕𑀫𑀦𑀁 𑀢𑀸𑀤𑀺𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀧𑀳𑀸𑀬 𑀲𑀢𑁆𑀢𑀸𑀦𑀁 𑀧𑀸𑀡𑁂𑀳𑀺 𑀭𑀢𑀦𑀢𑁆𑀢𑀬𑀲𑀭𑀡𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀢𑁆𑀢𑀁. 𑀩𑀳𑀼𑀚𑀦𑀓𑀦𑁆𑀢𑀢𑀸𑀬𑀸𑀢𑀺 𑀘𑀦𑁆𑀤𑀲𑁆𑀲 𑀯𑀺𑀬 𑀩𑀳𑀼𑀚𑀦𑀲𑁆𑀲 𑀓𑀦𑁆𑀢𑀢𑀸𑀬. 𑀲𑀽𑀭𑀺𑀬𑀲𑁆𑀲 𑀉𑀡𑁆𑀳𑀲𑀻𑀢𑀯𑀺𑀯𑀚𑁆𑀚𑀺𑀢𑀉𑀢𑀼𑀲𑀼𑀔𑀢𑀸 𑀧𑀭𑀺𑀴𑀸𑀳𑀯𑀺𑀯𑀚𑁆𑀚𑀺𑀢𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.𑀤𑁂𑀯𑀢𑀸𑀦𑀁 𑀅𑀧𑁆𑀨𑁄𑀝𑀦𑀸𑀤𑀻𑀳𑀺 𑀓𑀻𑀴𑀦𑀁 𑀧𑀫𑁄𑀤𑀼𑀧𑁆𑀧𑀢𑁆𑀢𑀺 𑀪𑀯𑀦𑁆𑀢𑀕𑀫𑀦𑁂𑀦, 𑀥𑀫𑁆𑀫𑀲𑀪𑀸𑀯𑀩𑁄𑀥𑀦𑁂𑀦 𑀘 𑀉𑀤𑀸𑀦𑀯𑀲𑁂𑀦 𑀧𑀫𑁄𑀤𑀯𑀺𑀪𑀸𑀯𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀯𑁂𑀕𑀯𑀲𑁆𑀲𑀦𑀲𑁆𑀲𑀸𑀢𑀺 𑀤𑁂𑀲𑀦𑀸𑀜𑀸𑀡𑀯𑁂𑀕𑁂𑀦 𑀥𑀫𑁆𑀫𑀸𑀫𑀢𑀲𑁆𑀲 𑀯𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀓𑀸𑀬𑀕𑀢𑀸𑀲𑀢𑀺𑀯𑀲𑁂𑀦 𑀮𑀤𑁆𑀥𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀨𑀮𑀲𑀼𑀔𑀸𑀦𑀼𑀪𑀯𑁄 𑀓𑀸𑀬𑀕𑀢𑀸𑀲𑀢𑀺𑀅𑀫𑀢𑀧𑀝𑀺𑀮𑀸𑀪𑁄, 𑀢𑀲𑁆𑀲 𑀧𑀦 𑀓𑀸𑀬𑀲𑁆𑀲𑀸𑀧𑀺 𑀅𑀢𑀧𑁆𑀧𑀓𑀲𑀼𑀔𑀸𑀯𑀳𑀢𑁆𑀢𑀸 𑀔𑀼𑀤𑀸𑀧𑀺𑀧𑀸𑀲𑀸𑀧𑀻𑀴𑀦𑀸𑀪𑀸𑀯𑁄 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁𑀧𑀦 𑀔𑀼𑀤𑀁, 𑀧𑀺𑀧𑀸𑀲𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀪𑁂𑀤𑁄 𑀯𑀺𑀲𑁂𑀲𑀲𑀸𑀫𑀜𑁆𑀜𑀯𑀺𑀪𑀸𑀕𑁂𑀦, 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦 𑀘 𑀕𑀳𑁂𑀢𑀩𑁆𑀩𑁄. ‘‘𑀲𑀬𑀫𑁂𑀯𑀸’’𑀢𑀺 𑀧𑀤𑀁 ‘‘𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀲𑁆𑀲𑀸’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀪𑀭𑀺𑀢𑀪𑀸𑀯𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀪𑀸𑀯𑀲𑁆𑀲. ‘‘𑀅𑀭𑀺𑀬𑀤𑁆𑀥𑀚𑀫𑀸𑀮𑀸𑀫𑀸𑀮𑀺𑀢𑀸𑀬𑀸𑀢𑀺 𑀓𑀸𑀲𑀸𑀬𑀤𑁆𑀥𑀚𑀫𑀸𑀮𑀸𑀯𑀦𑁆𑀢𑀢𑀸𑀬𑀸’’𑀢𑀺 𑀓𑁂𑀘𑀺, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀦 𑀅𑀭𑀺𑀬𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀤𑁆𑀥𑀚𑀫𑀸𑀮𑀸𑀳𑀺 𑀫𑀸𑀮𑀺𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀦𑀼𑀤𑁆𑀥𑀝𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣𑀸𑀢𑀺 ‘‘𑀲𑀫𑁆𑀧𑀢𑀺𑀚𑀸𑀢𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀯𑀸𑀭𑁂. 𑀯𑀺𑀲𑁆𑀲𑀚𑁆𑀚𑀺𑀢𑁄𑀯, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀇𑀥 𑀅𑀧𑀼𑀩𑁆𑀩𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀧𑀣𑀯𑀺𑀬𑀁 𑀕𑀘𑁆𑀙𑀦𑁆𑀢𑁄𑀧𑀺 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀲𑀻𑀢𑀺 𑀅𑀬𑀫𑁂𑀢𑁆𑀣 𑀦𑀺𑀬𑀢𑀺 𑀥𑀫𑁆𑀫𑀦𑀺𑀬𑀸𑀫𑁄 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀸 𑀢𑀺 𑀇𑀤𑀁 𑀦𑀺𑀬𑀢𑀺𑀯𑀸𑀤𑀯𑀲𑁂𑀦 𑀓𑀣𑀦𑀁. 𑀧𑀼𑀩𑁆𑀩𑁂 𑀧𑀼𑀭𑀺𑀫𑀚𑀸𑀢𑀻𑀲𑀼 𑀢𑀸𑀤𑀺𑀲𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀲𑀻𑀢𑀺 𑀇𑀤𑀁 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀯𑀸𑀤𑀯𑀲𑁂𑀦 𑀓𑀣𑀦𑀁. 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑀭𑀺 𑀈𑀲𑀦𑀲𑀻𑀮𑀢𑀸𑀬 𑀬𑀣𑀸𑀲𑀓𑀁 𑀓𑀫𑁆𑀫𑀫𑁂𑀯 𑀇𑀲𑁆𑀲𑀭𑁄 𑀦𑀸𑀫, 𑀢𑀲𑁆𑀲 𑀦𑀺𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁 𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑁂𑀦 𑀉𑀴𑀸𑀭𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄, 𑀢𑁂𑀦 𑀇𑀲𑁆𑀲𑀭𑁂𑀦 𑀦𑀺𑀫𑁆𑀫𑀺𑀢𑁄 𑀦𑀸𑀫, 𑀢𑀲𑁆𑀲 𑀘𑀸𑀬𑀁 𑀦𑀺𑀫𑁆𑀫𑀸𑀦𑀯𑀺𑀲𑁂𑀲𑁄, 𑀬𑀤𑀺𑀤𑀁 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀸𑀬 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀲𑀻𑀢𑀺 𑀇𑀤𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀲𑁂𑀦 𑀓𑀣𑀦𑀁. 𑀏𑀯𑀁 𑀢𑀁 𑀢𑀁 𑀩𑀳𑀼𑀮𑀁 𑀯𑀢𑁆𑀯𑀸 𑀓𑀺𑀁 𑀇𑀫𑀸𑀬 𑀧𑀭𑀺𑀬𑀸𑀬𑀓𑀣𑀸𑀬𑀸𑀢𑀺 𑀅𑀯𑀲𑀸𑀦𑁂 𑀉𑀚𑀼𑀓𑀫𑁂𑀯 𑀩𑁆𑀬𑀸𑀓𑀭𑀺. 𑀲𑀫𑁆𑀧𑀢𑀺𑀚𑀸𑀢𑁄 𑀧𑀣𑀯𑀺𑀬𑀁 𑀓𑀣𑀁 𑀧𑀤𑀲𑀸 𑀕𑀘𑁆𑀙𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀆𑀓𑀸𑀲𑁂𑀦 𑀫𑀜𑁆𑀜𑁂 𑀕𑀘𑁆𑀙𑀢𑀻𑀢𑀺 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑀻𑀖𑀢𑀭𑀁 𑀧𑀦 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀢𑁆𑀢𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄𑀧𑀺 𑀫𑀳𑀸𑀚𑀦𑀲𑁆𑀲 𑀅𑀤𑀺𑀲𑁆𑀲𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀘𑁂𑀮𑀓𑀪𑀸𑀯𑁄, 𑀔𑀼𑀤𑁆𑀤𑀓𑀲𑀭𑀻𑀭𑀢𑀸 𑀘 𑀢𑀸𑀤𑀺𑀲𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀦 𑀅𑀦𑀼𑀘𑁆𑀙𑀯𑀺𑀓𑀸𑀢𑀺 𑀓𑀫𑁆𑀫𑀸𑀦𑀼𑀪𑀸𑀯𑀲𑀜𑁆𑀚𑀦𑀺𑀢𑀧𑀸𑀝𑀺𑀳𑀸𑀭𑀺𑀬𑀯𑀲𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀯𑀺𑀬, 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬 𑀘 𑀫𑀳𑀸𑀚𑀦𑀲𑁆𑀲 𑀉𑀧𑀝𑁆𑀞𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀤𑀸 𑀢𑀣𑀸 𑀉𑀧𑀝𑁆𑀞𑀸𑀦𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺. 𑀧𑀘𑁆𑀙𑀸 𑀩𑀸𑀮𑀤𑀸𑀭𑀓𑁄𑀯 𑀅𑀳𑁄𑀲𑀺, 𑀦 𑀢𑀸𑀤𑀺𑀲𑁄𑀢𑀺. 𑀩𑀼𑀤𑁆𑀥𑀪𑀸𑀯𑀸𑀦𑀼𑀘𑁆𑀙𑀯𑀺𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀸𑀦𑀼𑀪𑀸𑀯𑀲𑁆𑀲 𑀬𑀸𑀣𑀸𑀯𑀢𑁄 𑀧𑀯𑁂𑀤𑀺𑀢𑀢𑁆𑀢𑀸 𑀧𑀭𑀺𑀲𑀸 𑀘𑀲𑁆𑀲 𑀩𑁆𑀬𑀸𑀓𑀭𑀡𑁂𑀦 𑀩𑀼𑀤𑁆𑀥𑁂𑀦 𑀯𑀺𑀬…𑀧𑁂… 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺.

𑀲𑀩𑁆𑀩𑀥𑀫𑁆𑀫𑀢𑀸𑀢𑀺 𑀲𑀩𑁆𑀩𑀸 𑀲𑁄𑀴𑀲𑀯𑀺𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀸 𑀥𑀫𑁆𑀫𑀢𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀤𑀲𑁆𑀲𑀦𑁂𑀦 𑀦𑁂𑀲𑀁 𑀏𑀓𑀲𑀤𑀺𑀲𑀢𑁆𑀢𑀸.

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁩𑁩. 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀢𑀺 𑀤𑀳𑀭𑀲𑁆𑀲 𑀦𑀺𑀧𑀚𑁆𑀚𑀦𑀬𑁄𑀕𑁆𑀬𑀢𑀸𑀯𑀲𑁂𑀦 𑀧𑀝𑀺𑀲𑀁𑀳𑀝𑀤𑀼𑀓𑀽𑀮𑀲𑀼𑀔𑀼𑀫𑁂. ‘‘𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀯𑀫𑀸𑀤𑀺 𑀚𑀸𑀢𑀺. ‘‘𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑀫𑁄’’𑀢𑀺 𑀏𑀯𑀫𑀸𑀤𑀺 𑀕𑁄𑀢𑁆𑀢𑀁. ‘‘𑀧𑁄𑀡𑀺𑀓𑀸 𑀘𑀺𑀓𑁆𑀔𑀮𑁆𑀮𑀺𑀓𑀸 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸’’𑀢𑀺 𑀏𑀯𑀫𑀸𑀤𑀺 𑀓𑀼𑀮𑀧𑀤𑁂𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀭𑀽𑀧𑀺𑀲𑁆𑀲𑀭𑀺𑀬𑀧𑀭𑀺𑀯𑀸𑀭𑀸𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀳𑀦𑁆𑀢𑀲𑁆𑀲𑀸𑀢𑀺 𑀯𑀺𑀧𑀼𑀮𑀲𑁆𑀲, 𑀉𑀴𑀸𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀺𑀧𑁆𑀨𑀢𑁆𑀢𑀺𑀬𑁄𑀢𑀺 𑀲𑀺𑀤𑁆𑀥𑀺𑀬𑁄. 𑀕𑀦𑁆𑀢𑀩𑁆𑀩𑀕𑀢𑀺𑀬𑀸𑀢𑀺 𑀕𑀢𑀺-𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀫𑀸𑀳. 𑀉𑀧𑀧𑀚𑁆𑀚𑀦𑀯𑀲𑁂𑀦 𑀳𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑁂𑀳𑀺 𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑁄. 𑀕𑀘𑁆𑀙𑀢𑀺 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀕𑀢𑀺, 𑀅𑀚𑁆𑀛𑀸𑀲𑀬𑁄. 𑀧𑀝𑀺𑀲𑀭𑀡𑁂𑀢𑀺 𑀧𑀭𑀸𑀬𑀡𑁂 𑀅𑀯𑀲𑁆𑀲𑀬𑁂. 𑀲𑀩𑁆𑀩𑀲𑀗𑁆𑀔𑀢𑀯𑀺𑀲𑀁𑀬𑀼𑀢𑁆𑀢𑀲𑁆𑀲 𑀳𑀺 𑀅𑀭𑀳𑀢𑁄 𑀦𑀺𑀩𑁆𑀩𑀸𑀦𑀫𑁂𑀯 𑀢𑀁𑀧𑀝𑀺𑀲𑀭𑀡𑀁. 𑀢𑁆𑀬𑀸𑀳𑀦𑁆𑀢𑀺 𑀢𑁂 𑀅𑀳𑀁.

𑀤𑀲𑀯𑀺𑀥𑁂 𑀓𑀼𑀲𑀮𑀥𑀫𑁆𑀫𑁂, 𑀅𑀕𑀭𑀳𑀺𑀢𑁂 𑀘 𑀭𑀸𑀚𑀥𑀫𑁆𑀫𑁂 (𑀚𑀸. 𑁨 𑀫𑀳𑀸𑀫𑀁𑀲𑀚𑀸𑀢𑀓𑁂 𑀯𑀺𑀢𑁆𑀣𑀸𑀭𑁄) 𑀦𑀺𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀺𑀓𑁄. 𑀢𑁂𑀦 𑀘 𑀥𑀫𑁆𑀫𑁂𑀦 𑀲𑀓𑀮𑀁 𑀮𑁄𑀓𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀬𑀲𑁆𑀫𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀭𑀚𑁆𑀚𑀁 𑀅𑀥𑀺𑀕𑀘𑁆𑀙𑀢𑀺, 𑀦 𑀅𑀥𑀫𑁆𑀫𑁂𑀦, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑁂𑀦 𑀮𑀤𑁆𑀥𑀭𑀚𑁆𑀚𑀢𑁆𑀢𑀸 𑀥𑀫𑁆𑀫𑀭𑀸𑀚𑀸’’𑀢𑀺. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀫𑀼𑀤𑁆𑀤𑀧𑀭𑀺𑀬𑁄𑀲𑀸𑀦𑀢𑀸𑀬 𑀘𑀢𑀼𑀭𑀦𑁆𑀢𑀸 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀤𑀻𑀧𑁂 𑀫𑀳𑀸𑀧𑀣𑀯𑀻𑀢𑀺 𑀆𑀳 ‘‘𑀧𑀼𑀭𑀢𑁆𑀣𑀺𑀫…𑀧𑁂… 𑀇𑀲𑁆𑀲𑀭𑁄’’𑀢𑀺. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑁂𑀢𑀩𑁆𑀩𑀲𑁆𑀲 𑀯𑀺𑀚𑀺𑀢𑀯𑀸, 𑀓𑀸𑀫𑀓𑁄𑀥𑀸𑀤𑀺𑀓𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑁆𑀲, 𑀧𑀝𑀺𑀭𑀸𑀚𑀪𑀽𑀢𑀲𑁆𑀲 𑀩𑀸𑀳𑀺𑀭𑀲𑁆𑀲 𑀘 𑀅𑀭𑀺𑀕𑀡𑀲𑁆𑀲 𑀯𑀺𑀚𑀬𑀺, 𑀯𑀺𑀚𑁂𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀫𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑁂𑀦𑀘𑀺 𑀬𑀼𑀤𑁆𑀥𑀁 𑀦𑀸𑀫 𑀦𑀢𑁆𑀣𑀺, 𑀬𑀼𑀤𑁆𑀥𑁂𑀦 𑀧𑀦 𑀲𑀸𑀥𑁂𑀢𑀩𑁆𑀩𑀲𑁆𑀲 𑀯𑀺𑀚𑀬𑀲𑁆𑀲 𑀲𑀺𑀤𑁆𑀥𑀺𑀬𑀸 ‘‘𑀯𑀺𑀚𑀺𑀢𑀲𑀗𑁆𑀕𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀚𑀦𑀧𑀤𑁄𑀯 𑀘𑀢𑀼𑀩𑁆𑀩𑀺𑀥𑀅𑀘𑁆𑀙𑀭𑀺𑀬𑀥𑀫𑁆𑀫𑀸𑀤𑀺𑀲𑀫𑀦𑁆𑀦𑀸𑀕𑀢𑁂 𑀅𑀲𑁆𑀫𑀺𑀁 𑀭𑀸𑀚𑀺𑀦𑀺 𑀣𑀸𑀯𑀭𑀺𑀬𑀁 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀁 𑀤𑀴𑁆𑀳𑀁 𑀪𑀢𑁆𑀢𑀪𑀸𑀯𑀁 𑀧𑀢𑁆𑀢𑁄, 𑀚𑀦𑀧𑀤𑁂 𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀺𑀓𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀣𑀸𑀯𑀭𑀺𑀬𑀁 𑀣𑀺𑀭𑀪𑀸𑀯𑀁 𑀧𑀢𑁆𑀢𑁄𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀫𑀦𑀼𑀲𑁆𑀲𑀸𑀦𑀁 𑀉𑀭𑁂 𑀲𑀢𑁆𑀣𑀁 𑀞𑀧𑁂𑀢𑁆𑀯𑀸 𑀇𑀘𑁆𑀙𑀺𑀢𑀥𑀦𑀳𑀭𑀡𑀸𑀤𑀺𑀦𑀸 𑀧𑀭𑀲𑀸𑀳𑀲𑀓𑀸𑀭𑀺𑀢𑀸𑀬 𑀲𑀸𑀳𑀲𑀺𑀓𑀸.

𑀭𑀢𑀺𑀚𑀦𑀦𑀝𑁆𑀞𑁂𑀦𑀸𑀢𑀺 𑀅𑀢𑀧𑁆𑀧𑀓𑀧𑀻𑀢𑀺𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑁂𑀦. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀭𑀫𑁂𑀢𑀻𑀢𑀺 𑀭𑀢𑀦𑀁. ‘‘𑀅𑀳𑁄 𑀫𑀦𑁄𑀳𑀭’’𑀦𑁆𑀢𑀺 𑀘𑀺𑀢𑁆𑀢𑁂 𑀓𑀢𑁆𑀢𑀩𑁆𑀩𑀢𑀸𑀬 𑀘𑀺𑀢𑁆𑀢𑀻𑀓𑀢𑀁. ‘‘𑀲𑁆𑀯𑀸𑀬𑀁 𑀘𑀺𑀢𑁆𑀢𑀻𑀓𑀸𑀭𑁄 𑀢𑀲𑁆𑀲 𑀧𑀽𑀚𑀦𑀻𑀬𑀢𑀸𑀬𑀸’’𑀢𑀺 𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀧𑀽𑀚𑀦𑀻𑀬𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁 𑀅𑀧𑀭𑀺𑀫𑀺𑀢𑀁 𑀫𑀽𑀮𑀁 𑀅𑀕𑁆𑀖𑀢𑀻𑀢𑀺 𑀫𑀳𑀕𑁆𑀖𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀢𑀼𑀮𑀸 𑀉𑀧𑀫𑀸𑀢𑀺 𑀅𑀢𑀼𑀮𑀁, 𑀅𑀲𑀤𑀺𑀲𑀁. 𑀓𑀤𑀸𑀘𑀺 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀓𑁆𑀔𑁂𑀦 𑀮𑀤𑁆𑀥𑀩𑁆𑀩𑀢𑁆𑀢𑀸 𑀤𑀼𑀮𑁆𑀮𑀪𑀤𑀲𑁆𑀲𑀦𑀁. 𑀅𑀦𑁄𑀫𑁂𑀳𑀺 𑀉𑀴𑀸𑀭𑀕𑀼𑀡𑁂𑀳𑁂𑀯 𑀲𑀢𑁆𑀢𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁. 𑀇𑀤𑀸𑀦𑀺 𑀦𑁂𑀲𑀁 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑀸𑀦𑀁 𑀲𑀯𑀺𑀲𑁂𑀲𑀁 𑀘𑀓𑁆𑀓𑀭𑀢𑀦𑁂 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀼𑀧𑀺 𑀢𑁂 𑀅𑀢𑀺𑀤𑀺𑀲𑀺𑀢𑀼𑀁 ‘‘𑀘𑀓𑁆𑀓𑀭𑀢𑀦𑀲𑁆𑀲 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀜𑁆𑀜𑀁 𑀤𑁂𑀯𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺 𑀭𑀜𑁆𑀜𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀺𑀲𑁆𑀲𑀭𑀺𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑁄, 𑀲𑀢𑁆𑀢𑀸𑀦𑀜𑁆𑀘 𑀬𑀣𑀺𑀘𑁆𑀙𑀺𑀢𑀢𑁆𑀣𑀧𑀝𑀺𑀮𑀸𑀪𑀳𑁂𑀢𑀼𑀢𑁄. 𑀅𑀕𑁆𑀖𑁄 𑀦𑀢𑁆𑀣𑀺 𑀅𑀢𑀺𑀯𑀺𑀬 𑀉𑀴𑀸𑀭𑀲𑀫𑀼𑀚𑁆𑀚𑀮𑀲𑀢𑁆𑀢𑀭𑀢𑀦𑀫𑀬𑀢𑁆𑀢𑀸, 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀫𑀳𑀸𑀦𑀼𑀪𑀸𑀯𑀢𑀸𑀬 𑀘. 𑀬𑀤𑀕𑁆𑀕𑁂𑀦 𑀫𑀳𑀕𑁆𑀖𑀁, 𑀢𑀤𑀕𑁆𑀕𑁂𑀦 𑀅𑀢𑀼𑀮𑀁. 𑀲𑀢𑁆𑀢𑀸𑀦𑀁 𑀧𑀸𑀧𑀚𑀺𑀕𑀼𑀘𑁆𑀙𑀦𑁂𑀦 𑀯𑀺𑀕𑀢𑀓𑀸𑀴𑀓𑁄 𑀧𑀼𑀜𑁆𑀜𑀧𑀲𑀼𑀢𑀢𑀸𑀬 𑀫𑀡𑁆𑀟𑀪𑀽𑀢𑁄 𑀬𑀸𑀤𑀺𑀲𑁄 𑀓𑀸𑀮𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀭𑀳𑁄, 𑀢𑀸𑀤𑀺𑀲𑁂 𑀏𑀯 𑀘𑀓𑁆𑀓𑀯𑀢𑁆𑀢𑀻𑀦𑀫𑁆𑀧𑀺 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀘 𑀧𑀦𑀸’’𑀢𑀺𑀆𑀤𑀺. 𑀉𑀧𑀫𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀉𑀧𑀫𑁄𑀧𑀫𑁂𑀬𑁆𑀬𑀸𑀦𑀜𑁆𑀘 𑀦 𑀅𑀘𑁆𑀘𑀦𑁆𑀢𑀫𑁂𑀯 𑀲𑀤𑀺𑀲𑀢𑀸. 𑀢𑀲𑁆𑀫𑀸 𑀬𑀣𑀸 𑀩𑀼𑀤𑁆𑀥𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀣𑀸 𑀘𑀓𑁆𑀓𑀯𑀢𑁆𑀢𑀺𑀦𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀧𑀭𑀺𑀧𑀽𑀭𑀡𑀲𑁆𑀲𑀸𑀧𑀺 𑀤𑀼𑀓𑁆𑀓𑀭𑀪𑀸𑀯𑀢𑁄𑀧𑀺 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑀸𑀬𑁂𑀯𑀸𑀢𑀺, 𑀇𑀫𑀺𑀦𑀸 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑀢𑀸𑀲𑀸𑀫𑀜𑁆𑀜𑁂𑀦 𑀢𑁂𑀲𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀁 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀲𑀺𑀚𑁆𑀛𑀫𑀸𑀦𑁄 𑀕𑀼𑀡𑁄 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀯𑀸𑀭𑀲𑀸𑀥𑀸𑀭𑀡𑁄, 𑀢𑀣𑀸𑀧𑀺 ‘‘𑀘𑀓𑁆𑀓𑀯𑀢𑁆𑀢𑀻 𑀏𑀯 𑀦𑀁 𑀲𑀸𑀫𑀺𑀪𑀸𑀯𑁂𑀦 𑀯𑀺𑀲𑀯𑀺𑀢𑀸𑀬 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀢𑀤𑀢𑁆𑀣𑀁 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀙𑀦𑁆𑀦𑀫𑁆𑀧𑀺 𑀯𑀸 𑀅𑀢𑁆𑀣𑀸𑀦𑀁 𑀇𑀢𑀭𑀭𑀢𑀦𑁂𑀲𑀼𑀧𑀺 𑀮𑀩𑁆𑀪𑀦𑀢𑁄 ‘‘𑀏𑀯𑀁 𑀲𑁂𑀲𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀅𑀲𑁆𑀲-𑀧𑀭𑀺𑀡𑀸𑀬𑀓𑀭𑀢𑀦𑁂𑀳𑀺 𑀅𑀚𑀺𑀢𑀯𑀺𑀚𑀬𑀢𑁄, 𑀘𑀓𑁆𑀓𑀭𑀢𑀦𑁂𑀦 𑀘 𑀧𑀭𑀺𑀯𑀸𑀭𑀪𑀸𑀯𑁂𑀦, 𑀲𑁂𑀲𑁂𑀳𑀺 𑀧𑀭𑀺𑀪𑁄𑀕𑀽𑀧𑀓𑀭𑀡𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀳𑀢𑁆𑀣𑀺𑀅𑀲𑁆𑀲𑀫𑀡𑀺𑀇𑀢𑁆𑀣𑀺𑀭𑀢𑀦𑁂𑀳𑀺 𑀧𑀭𑀺𑀪𑁄𑀕𑀽𑀧𑀓𑀭𑀡𑀪𑀸𑀯𑁂𑀦 𑀲𑁂𑀲𑁂𑀳𑀺 𑀧𑀭𑀺𑀯𑀸𑀭𑀪𑀸𑀯𑁂𑀦𑀸𑀢𑀺 𑀬𑁄𑀚𑀦𑀸.

𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀲𑀺𑀭𑀺𑀯𑀺𑀪𑀯𑀦𑁆𑀢𑀺 𑀢𑀢𑁆𑀣 𑀮𑀤𑁆𑀥𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀪𑁄𑀕𑀲𑀫𑁆𑀧𑀢𑁆𑀢𑀺𑀜𑁆𑀘. 𑀢𑀸𑀤𑀺𑀲𑀫𑁂𑀯𑀸𑀢𑀺 ‘‘𑀧𑀼𑀭𑁂𑀪𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀼𑀪𑀸𑀯𑀫𑁂𑀯. 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀩𑁆𑀬𑀸𑀧𑀦𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀦𑁆𑀥𑀓𑀸𑀭𑀁. 𑀅𑀢𑀺𑀤𑀻𑀖𑀢𑀸𑀤𑀺𑀙𑀩𑁆𑀩𑀺𑀥𑀤𑁄𑀲𑀧𑀭𑀺𑀯𑀚𑁆𑀚𑀺𑀢𑀁.

𑀲𑀽𑀭𑀸𑀢𑀺 𑀲𑀢𑁆𑀢𑀺𑀯𑀦𑁆𑀢𑁄, 𑀦𑀺𑀩𑁆𑀪𑀬𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀻𑀭𑀼𑀓𑀸’’𑀢𑀺. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁. 𑀬𑁂𑀦 𑀓𑀸𑀭𑀡𑁂𑀦 ‘‘𑀯𑀻𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀢𑀁 𑀯𑀻𑀭𑀗𑁆𑀕𑀁. 𑀢𑁂𑀦𑀸𑀳 ‘‘𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀬𑀸𑀯 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸 𑀘𑀓𑁆𑀓𑀲𑁆𑀲 𑀯𑀢𑁆𑀢𑀦𑀢𑁄 ‘‘𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀲𑀻𑀫𑀁 𑀓𑀢𑁆𑀯𑀸 𑀞𑀺𑀢𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀤𑀡𑁆𑀟𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀥𑀦𑀤𑀡𑁆𑀟𑀲𑁆𑀲, 𑀲𑀭𑀻𑀭𑀤𑀡𑁆𑀟𑀲𑁆𑀲 𑀘 𑀅𑀓𑀭𑀡𑀁 𑀯𑀼𑀢𑁆𑀢𑀁. ‘‘𑀅𑀲𑀢𑁆𑀣𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀦 𑀲𑁂𑀦𑀸𑀬 𑀬𑀼𑀚𑁆𑀛𑀦𑀲𑁆𑀲𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀓𑀢𑀸𑀧𑀭𑀸𑀥𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀲𑀸𑀕𑀭𑀧𑀭𑀺𑀬𑀦𑁆𑀢𑀁.

‘‘𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸’’𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀮𑁄𑀪𑁄 𑀏𑀯 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄. 𑀢𑀣𑀸 𑀳𑀺𑀲𑁆𑀲 𑀤𑁆𑀯𑀺𑀥𑀸𑀧𑀺 𑀙𑀤𑀦𑀝𑁆𑀞𑁄 𑀏𑀓𑀦𑁆𑀢𑀺𑀓𑁄. 𑀬𑀣𑀸𑀳 ‘‘𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺, (𑀦𑁂𑀢𑁆𑀢𑀺. 𑁧𑁧, 𑁨𑁭) ‘‘𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸’’𑀢𑀺 (𑀉𑀤𑀸. 𑁬𑁪) 𑀘. 𑀇𑀫𑀺𑀦𑀸 𑀦𑀬𑁂𑀦 𑀤𑁄𑀲𑀸𑀤𑀻𑀦𑀫𑁆𑀧𑀺 𑀙𑀤𑀦𑀝𑁆𑀞𑁄 𑀯𑀢𑁆𑀢𑀩𑁆𑀩𑁄. 𑀓𑀺𑀮𑁂𑀲𑀕𑁆𑀕𑀳𑀡𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀲𑁂𑀲𑀓𑀺𑀮𑁂𑀲𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀢𑁂 𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑁆𑀢𑀲𑀦𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 ‘‘𑀙𑀤𑀦𑀸, 𑀙𑀤𑀸’’𑀢𑀺 𑀘 𑀯𑀼𑀢𑁆𑀢𑀸. 𑀯𑀺𑀯𑀝𑁆𑀝𑀘𑁆𑀙𑀤𑀸𑀢𑀺 𑀘 𑀑-𑀓𑀸𑀭𑀲𑁆𑀲 𑀆-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄.

𑁩𑁫. 𑀢𑀸𑀲𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀧𑁆𑀨𑀢𑁆𑀢𑀻𑀦𑀁. 𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀻𑀢𑀺 𑀜𑀸𑀧𑀓𑀓𑀸𑀭𑀡𑀪𑀽𑀢𑀸𑀦𑀺. 𑀢𑀣𑀸 𑀳𑀺 𑀮𑀓𑁆𑀔𑀻𑀬𑀢𑀺 𑀫𑀳𑀸𑀧𑀼𑀭𑀺𑀲𑀪𑀸𑀯𑁄 𑀏𑀢𑁂𑀳𑀻𑀢𑀺 𑀮𑀓𑁆𑀔𑀡𑀸𑀦𑀺. 𑀞𑀸𑀦𑀕𑀫𑀦𑀸𑀤𑀻𑀲𑀼 𑀪𑀽𑀫𑀺𑀬𑀁 𑀲𑀼𑀝𑁆𑀞𑀼 𑀲𑀫𑀁 𑀧𑀢𑀺𑀝𑁆𑀞𑀺𑀢𑀸 𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀢𑀁 𑀧𑀦𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀕𑁆𑀕𑀢𑀮𑀦𑁆𑀢𑀺 𑀅𑀕𑁆𑀕𑀧𑀸𑀤𑀢𑀮𑀁. 𑀧𑀡𑁆𑀳𑀻𑀢𑀺 𑀧𑀡𑁆𑀳𑀺𑀢𑀮𑀁. 𑀧𑀲𑁆𑀲𑀦𑁆𑀢𑀺 𑀧𑀸𑀤𑀢𑀮𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀁, 𑀉𑀪𑀬𑀫𑁂𑀯 𑀯𑀸 𑀧𑀭𑀺𑀬𑀦𑁆𑀢𑀁 𑀧𑀲𑁆𑀲𑀁. ‘‘𑀅𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀅𑀦𑁆𑀯𑀬𑀢𑁄 𑀅𑀢𑁆𑀣𑀯𑀺𑀪𑀸𑀯𑀦𑀁. 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀫𑀺𑀯 𑀉𑀚𑀼𑀓𑀁 𑀦𑀺𑀓𑁆𑀔𑀺𑀧𑀺𑀬𑀫𑀸𑀦𑀁. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀓𑁆𑀔𑀡𑁂𑀬𑁂𑀯. 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀁 𑀨𑀼𑀲𑀢𑀺 𑀦𑀺𑀓𑁆𑀔𑀺𑀧𑀦𑁂. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀢𑁄 𑀉𑀝𑁆𑀞𑀳𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸 𑀅𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄𑀢𑀺 𑀦𑀺𑀕𑀫𑀦𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑀸𑀤𑀺𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀁 𑀦𑀺𑀲𑁆𑀲𑀦𑁆𑀤𑀨𑀮𑀁, 𑀢𑀁 𑀧𑀭𑀢𑁄 𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁦𑁧) 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺.

𑀦𑀸𑀪𑀺 𑀤𑀺𑀲𑁆𑀲𑀢𑀻𑀢𑀺 𑀮𑀓𑁆𑀔𑀡𑀘𑀓𑁆𑀓𑀲𑁆𑀲 𑀦𑀸𑀪𑀺 𑀧𑀭𑀺𑀫𑀡𑁆𑀟𑀮𑀲𑀡𑁆𑀞𑀸𑀦𑀸 𑀲𑀼𑀧𑀭𑀺𑀩𑁆𑀬𑀢𑁆𑀢𑀸 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺, 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀪𑀺𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀢𑀲𑁆𑀲𑀁 𑀦𑀸𑀪𑀺𑀬𑀁 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀞𑀺𑀢𑀸. 𑀦𑀸𑀪𑀺𑀫𑀼𑀔𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄𑀢𑀺 𑀧𑀓𑀢𑀺𑀘𑀓𑁆𑀓𑀲𑁆𑀲 𑀅𑀓𑁆𑀔𑀩𑁆𑀪𑀸𑀳𑀢𑀧𑀭𑀺𑀳𑀭𑀡𑀢𑁆𑀣𑀁 𑀦𑀸𑀪𑀺𑀫𑀼𑀔𑁂 𑀞𑀧𑁂𑀢𑀩𑁆𑀩𑀁 𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄, 𑀢𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀦𑁂𑀫𑀺𑀫𑀡𑀺𑀓𑀸𑀢𑀺 𑀦𑁂𑀫𑀺𑀬𑀁 𑀆𑀯𑀮𑀺𑀪𑀸𑀯𑁂𑀦 𑀞𑀺𑀢𑀫𑀡𑀺𑀓𑀸𑀮𑁂𑀔𑀸. 𑀲𑀫𑁆𑀩𑀳𑀼𑀮𑀯𑀸𑀭𑁄𑀢𑀺 𑀩𑀳𑀼𑀯𑀺𑀥𑀮𑁂𑀔𑀗𑁆𑀕𑀯𑀺𑀪𑀸𑀯𑀦𑀯𑀸𑀭𑁄. 𑀲𑀢𑁆𑀢𑀻𑀢𑀺 𑀆𑀯𑀼𑀥𑀲𑀢𑁆𑀢𑀺. 𑀲𑀺𑀭𑀺𑀯𑀘𑁆𑀙𑁄𑀢𑀺 𑀲𑀺𑀭𑀺𑀅𑀗𑁆𑀕𑀸. 𑀦𑀦𑁆𑀤𑀻𑀢𑀺 𑀤𑀓𑁆𑀔𑀺𑀡𑀸𑀯𑀢𑁆𑀢𑀁. 𑀲𑁄𑀯𑀢𑁆𑀢𑀺𑀓𑁄𑀢𑀺 𑀲𑁄𑀯𑀢𑁆𑀢𑀺𑀅𑀗𑁆𑀕𑁄. 𑀯𑀝𑀁𑀲𑀓𑁄𑀢𑀺 𑀆𑀯𑁂𑀴𑀁. 𑀯𑀟𑁆𑀠𑀫𑀸𑀦𑀓𑀦𑁆𑀢𑀺 𑀧𑀼𑀭𑀺𑀫𑀳𑀸𑀤𑀻𑀲𑀼 𑀤𑀻𑀧𑀗𑁆𑀓𑀁. 𑀫𑁄𑀭𑀳𑀢𑁆𑀣𑀓𑁄𑀢𑀺 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄, 𑀫𑁄𑀭𑀧𑀺𑀜𑁆𑀙𑀧𑀝𑀺𑀲𑀺𑀩𑁆𑀩𑀺𑀢𑁄 𑀯𑀸 𑀩𑀻𑀚𑀦𑀻𑀯𑀺𑀲𑁂𑀲𑁄. 𑀯𑀸𑀴𑀩𑀻𑀚𑀦𑀻𑀢𑀺 𑀘𑀸𑀫𑀭𑀺𑀯𑀸𑀮𑀁. 𑀲𑀺𑀤𑁆𑀥𑀢𑁆𑀣𑀸𑀤𑀺 𑀧𑀼𑀡𑁆𑀡𑀖𑀝𑀧𑀼𑀡𑁆𑀡𑀧𑀸𑀢𑀺𑀬𑁄. ‘‘𑀘𑀓𑁆𑀓𑀯𑀸𑀴𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀥𑀸𑀦𑀸𑀯𑀬𑀯𑁂 𑀤𑀲𑁆𑀲𑁂𑀢𑀼𑀁 ‘‘𑀳𑀺𑀫𑀯𑀸 𑀲𑀺𑀦𑁂𑀭𑀼…𑀧𑁂… 𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀭𑀺𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀇𑀤𑀁 𑀳𑀢𑁆𑀣𑀺𑀭𑀢𑀦𑀸𑀤𑀻𑀦𑀫𑁆𑀧𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀪𑀸𑀯𑀤𑀲𑁆𑀲𑀦𑀁. 𑀲𑀩𑁆𑀩𑁄𑀢𑀺𑀲𑀢𑁆𑀢𑀺𑀆𑀤𑀺𑀓𑁄 𑀬𑀣𑀸𑀯𑀼𑀢𑁆𑀢𑁄 𑀅𑀗𑁆𑀕𑀯𑀺𑀲𑁂𑀲𑁄 𑀘𑀓𑁆𑀓𑀮𑀓𑁆𑀔𑀡𑀲𑁆𑀲𑁂𑀯 𑀧𑀭𑀺𑀯𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀆𑀬𑀢𑀧𑀡𑁆𑀳𑀻’’𑀢𑀺 𑀇𑀤𑀁 𑀅𑀜𑁆𑀜𑁂𑀲𑀁 𑀧𑀡𑁆𑀳𑀺𑀢𑁄 𑀤𑀻𑀖𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀅𑀢𑀺𑀤𑀻𑀖𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀻’’𑀢𑀺. 𑀬𑀣𑀸 𑀧𑀦 𑀧𑀡𑁆𑀳𑀺𑀮𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀺, 𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀕𑁆𑀕𑁂𑀦𑀸𑀢𑀺 𑀫𑀡𑁆𑀟𑀮𑀸𑀬 𑀲𑀺𑀔𑀸𑀬. 𑀯𑀝𑁆𑀝𑁂𑀢𑁆𑀯𑀸𑀢𑀺 𑀬𑀣𑀸 𑀲𑀼𑀯𑀝𑁆𑀝𑀁 𑀳𑁄𑀢𑀺, 𑀏𑀯𑀁 𑀯𑀝𑁆𑀝𑁂𑀢𑁆𑀯𑀸. 𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀲𑀤𑀺𑀲𑀸𑀢𑀺 𑀭𑀢𑁆𑀢𑀓𑀫𑁆𑀩𑀮𑀫𑀬𑀕𑁂𑀡𑁆𑀟𑀼𑀓𑀲𑀤𑀺𑀲𑀸.

‘‘𑀫𑀓𑁆𑀓𑀝𑀲𑁆𑀲𑁂𑀯𑀸’’𑀢𑀺 𑀤𑀻𑀖𑀪𑀸𑀯𑀁, 𑀲𑀫𑀢𑀜𑁆𑀘 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀺𑀬𑁆𑀬𑀸𑀲𑀢𑁂𑀮𑁂𑀦𑀸𑀢𑀺 𑀙𑀢𑁆𑀢𑀺𑀭𑀺𑀢𑀦𑀺𑀬𑁆𑀬𑀸𑀲𑀸𑀤𑀺𑀦𑀺𑀬𑁆𑀬𑀸𑀲𑀲𑀫𑁆𑀫𑀺𑀲𑁆𑀲𑁂𑀦 𑀢𑁂𑀮𑁂𑀦, 𑀬𑀁 ‘‘𑀲𑀼𑀭𑀪𑀺𑀦𑀺𑀬𑁆𑀬𑀸𑀲’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀺𑀬𑁆𑀬𑀸𑀲𑀢𑁂𑀮𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀳𑀭𑀺𑀢𑀸𑀮𑀯𑀝𑁆𑀝𑀺𑀬𑀸 𑀖𑀦𑀲𑀺𑀦𑀺𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀬𑀣𑀸 𑀲𑀢𑀓𑁆𑀔𑀢𑁆𑀢𑀼𑀁 𑀯𑀺𑀳𑀢𑀁 𑀓𑀧𑁆𑀧𑀸𑀲𑀧𑀝𑀮𑀁 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀭𑀺𑀢𑀁 𑀅𑀢𑀺𑀯𑀺𑀬 𑀫𑀼𑀤𑀼 𑀳𑁄𑀢𑀺, 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀤𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀧𑁆𑀧𑀺𑀫𑀡𑁆𑀟𑁂’’𑀢𑀺𑀆𑀤𑀺𑀫𑀸𑀳. 𑀢𑀮𑀼𑀦𑀸𑀢𑀺 𑀲𑀼𑀔𑀼𑀫𑀸𑀮𑀸.

𑀘𑀫𑁆𑀫𑁂𑀦𑀸𑀢𑀺 𑀅𑀗𑁆𑀕𑀼𑀮𑀦𑁆𑀢𑀭𑀯𑁂𑀞𑀺𑀢𑀘𑀫𑁆𑀫𑁂𑀦. 𑀧𑀝𑀺𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄𑀢𑀺 𑀏𑀓𑀢𑁄 𑀲𑀫𑁆𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄 𑀦 𑀳𑁄𑀢𑀺. 𑀏𑀓𑀧𑁆𑀧𑀫𑀸𑀡𑀸𑀢𑀺 𑀤𑀻𑀖𑀢𑁄 𑀲𑀫𑀸𑀦𑀧𑁆𑀧𑀫𑀸𑀡𑀸. 𑀬𑀯𑀮𑀓𑁆𑀔𑀡𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀅𑀗𑁆𑀕𑀼𑀮𑀺𑀧𑀩𑁆𑀩𑁂 𑀞𑀺𑀢𑀁 𑀬𑀯𑀮𑀓𑁆𑀔𑀡𑀁. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀁𑀢𑀁𑀧𑀩𑁆𑀩𑀸𑀦𑀁 𑀲𑀫𑀸𑀦𑀤𑁂𑀲𑀢𑀸𑀬 𑀅𑀗𑁆𑀕𑀼𑀮𑀻𑀦𑀁 𑀧𑀲𑀸𑀭𑀺𑀢𑀓𑀸𑀮𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑁆𑀛𑀺𑀢𑀸𑀦𑀺 𑀯𑀺𑀬 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺.

𑀲𑀗𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀕𑁄𑀧𑁆𑀨𑀓𑀸, 𑀉𑀤𑁆𑀥𑀁 𑀲𑀗𑁆𑀔𑀸 𑀏𑀢𑁂𑀲𑀦𑁆𑀢𑀺 𑀉𑀲𑁆𑀲𑀗𑁆𑀔𑀸, 𑀧𑀸𑀤𑀸. 𑀧𑀺𑀝𑁆𑀞𑀺𑀧𑀸𑀤𑁂𑀢𑀺 𑀧𑀺𑀝𑁆𑀞𑀺𑀧𑀸𑀤𑀲𑀫𑀻𑀧𑁂. 𑀢𑁂𑀦𑀸𑀢𑀺 𑀧𑀺𑀝𑁆𑀞𑀺𑀧𑀸𑀤𑁂 𑀞𑀺𑀢𑀕𑁄𑀧𑁆𑀨𑀓𑀪𑀸𑀯𑁂𑀦 𑀩𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀬𑀺𑀤𑀁 ‘‘𑀢𑁂𑀦𑀸’’𑀢𑀺 𑀧𑀤𑀁 𑀉𑀧𑀭𑀺𑀧𑀤𑀤𑁆𑀯𑀬𑁂𑀧𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀢𑁂𑀦 𑀩𑀤𑁆𑀥𑀪𑀸𑀯𑁂𑀦 𑀦 𑀬𑀣𑀸𑀲𑀼𑀔𑀁 𑀧𑀭𑀺𑀯𑀝𑁆𑀝𑀦𑁆𑀢𑀺, 𑀢𑁂𑀦 𑀬𑀣𑀸𑀲𑀼𑀔𑀁 𑀦𑀧𑀭𑀺𑀯𑀝𑁆𑀝𑀦𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺𑀧𑀺 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺. 𑀉𑀧𑀭𑀻𑀢𑀺 𑀧𑀺𑀝𑁆𑀞𑀺𑀧𑀸𑀤𑀢𑁄 𑀤𑁆𑀯𑀺𑀢𑀺𑀅𑀗𑁆𑀕𑀼𑀮𑀺𑀫𑀢𑁆𑀢𑀁 𑀉𑀤𑁆𑀥𑀁, ‘‘𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢’’𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀦𑀺𑀕𑀽𑀴𑁆𑀳𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀸𑀦𑀺. 𑀢𑁂𑀦𑀸𑀢𑀺 𑀕𑁄𑀧𑁆𑀨𑀓𑀸𑀦𑀁 𑀉𑀧𑀭𑀺 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲. 𑀲𑀢𑀺𑀧𑀺 𑀤𑁂𑀲𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀬𑀁 𑀦𑀺𑀘𑁆𑀘𑀮𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀦𑀸𑀪𑀺𑀕𑁆𑀕𑀳𑀡𑀁. ‘‘𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀻’’𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀺, 𑀢𑀲𑁆𑀫𑀸 𑀦𑀸𑀪𑀺𑀢𑁄…𑀧𑁂… 𑀦𑀺𑀘𑁆𑀘𑀮𑁄 𑀳𑁄𑀢𑀺. ‘‘𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀝𑁆𑀝𑀦𑁆𑀢𑀻’’𑀢𑀺 𑀇𑀤𑀁 𑀧𑀦 𑀧𑀼𑀭𑀺𑀫𑀲𑁆𑀲, 𑀧𑀘𑁆𑀙𑀺𑀫𑀲𑁆𑀲 𑀘 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀺, 𑀬𑀲𑁆𑀫𑀸 𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀭𑀢𑁄𑀧𑀺…𑀧𑁂… 𑀧𑀘𑁆𑀙𑀢𑁄𑀬𑁂𑀯𑀸𑀢𑀺.

𑀬𑀲𑁆𑀫𑀸 𑀏𑀡𑀺𑀫𑀺𑀕𑀲𑁆𑀲 𑀲𑀫𑀦𑁆𑀢𑀢𑁄 𑀏𑀓𑀲𑀤𑀺𑀲𑀫𑀁𑀲𑀸 𑀅𑀦𑀼𑀓𑁆𑀓𑀫𑁂𑀦 𑀉𑀤𑁆𑀥𑀁 𑀣𑀽𑀮𑀸 𑀚𑀗𑁆𑀖𑀸 𑀳𑁄𑀦𑁆𑀢𑀺, 𑀢𑀣𑀸 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀧𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀡𑀺𑀫𑀺𑀕𑀲𑀤𑀺𑀲𑀚𑀗𑁆𑀖𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄𑀢𑀺 𑀲𑀫𑀦𑁆𑀢𑀢𑁄 𑀫𑀁𑀲𑀽𑀧𑀘𑀬𑁂𑀦 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄. 𑀢𑁂𑀦𑀸𑀳 ‘‘𑀦 𑀏𑀓𑀢𑁄’’𑀢𑀺𑀆𑀤𑀺.

𑀏𑀢𑁂𑀦𑀸𑀢𑀺 ‘‘𑀅𑀦𑁄𑀦𑀫𑀦𑁆𑀢𑁄’’𑀢𑀺𑀆𑀤𑀺𑀯𑀘𑀦𑁂𑀦, 𑀚𑀸𑀡𑀼𑀨𑀸𑀲𑀼𑀪𑀸𑀯𑀤𑀻𑀧𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀚𑀦𑀸𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀭𑀳𑀺𑀢𑀚𑀦𑀸. 𑀔𑀼𑀚𑁆𑀚𑀸 𑀯𑀸 𑀳𑁄𑀦𑁆𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀧𑀭𑀺𑀫𑀓𑀸𑀬𑀲𑁆𑀲 𑀭𑀲𑁆𑀲𑀢𑀸𑀬, 𑀯𑀸𑀫𑀦𑀸 𑀯𑀸 𑀉𑀧𑀭𑀺𑀫𑀓𑀸𑀬𑀢𑁄 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀭𑀲𑁆𑀲𑀢𑀸𑀬, 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀘𑀓𑁆𑀓𑀯𑀢𑁆𑀢𑀺𑀦𑀜𑁆𑀘 𑀇𑀢𑀭𑁂 𑀲𑀢𑁆𑀢𑀸 𑀔𑀼𑀚𑁆𑀚𑀧𑀓𑁆𑀔𑀺𑀓𑀸, 𑀯𑀸𑀫𑀦𑀧𑀓𑁆𑀔𑀺𑀓𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺.

𑀓𑀸𑀫𑀁 𑀲𑀩𑁆𑀩𑀸𑀧𑀺 𑀧𑀤𑀼𑀫𑀓𑀡𑁆𑀡𑀺𑀓𑀸 𑀲𑀼𑀯𑀡𑁆𑀡𑀯𑀡𑁆𑀡𑀸𑀯, 𑀓𑀜𑁆𑀘𑀦𑀧𑀤𑀼𑀫𑀓𑀡𑁆𑀡𑀺𑀓𑀸 𑀧𑀦 𑀧𑀪𑀲𑁆𑀲𑀭𑀪𑀸𑀯𑁂𑀦 𑀢𑀢𑁄 𑀲𑀸𑀢𑀺𑀲𑀬𑀸𑀢𑀺 𑀆𑀳 ‘‘𑀲𑀼𑀯𑀡𑁆𑀡𑀧𑀤𑀼𑀫𑀓𑀡𑁆𑀡𑀺𑀓𑀲𑀤𑀺𑀲𑁂𑀳𑀻’’𑀢𑀺. 𑀑𑀳𑀺𑀢𑀦𑁆𑀢𑀺 𑀲𑀫𑁄𑀳𑀺𑀢𑀁 𑀅𑀦𑁆𑀢𑁄𑀕𑀥𑀁. 𑀢𑀣𑀸𑀪𑀽𑀢𑀁 𑀧𑀦 𑀢𑀁 𑀢𑁂𑀦 𑀙𑀦𑁆𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺.

𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀯𑀡𑁆𑀡𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦𑀸’’𑀢𑀺𑀆𑀤𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀆𑀯𑀼𑀢𑁆𑀢𑀺𑀜𑀸𑀬𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑀭𑀻𑀭𑀧𑀭𑀺𑀬𑀸𑀬𑁄 𑀇𑀥 𑀯𑀡𑁆𑀡-𑀲𑀤𑁆𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀯𑀺𑀓𑀧𑁆𑀧𑀁 𑀯𑀢𑁆𑀯𑀸 𑀢𑀣𑀸𑀭𑀽𑀧𑀸𑀬 𑀧𑀦 𑀭𑀼𑀴𑁆𑀳𑀺𑀬𑀸 𑀅𑀪𑀸𑀯𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀡𑁆𑀡𑀥𑀸𑀢𑀼𑀧𑀭𑀺𑀬𑀸𑀬𑀫𑁂𑀯 𑀯𑀡𑁆𑀡-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀧𑀤𑀤𑁆𑀯𑀬𑁂𑀦𑀸𑀧𑀺 𑀲𑀼𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀲𑀤𑀺𑀲𑀙𑀯𑀺𑀯𑀡𑁆𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀚𑁄𑀢𑀺 𑀲𑀼𑀔𑀼𑀫𑀭𑀚𑁄. 𑀚𑀮𑁆𑀮𑀦𑁆𑀢𑀺 𑀫𑀮𑀻𑀦𑀪𑀸𑀯𑀸𑀯𑀳𑁄 𑀭𑁂𑀡𑀼𑀲𑀜𑁆𑀘𑀬𑁄. 𑀢𑁂𑀦𑀸𑀳 ‘‘𑀫𑀮𑀁 𑀯𑀸’’𑀢𑀺. 𑀬𑀤𑀺 𑀯𑀺𑀯𑀢𑁆𑀢𑀢𑀺, 𑀓𑀣𑀁 𑀦𑁆𑀳𑀸𑀦𑀸𑀤𑀻𑀦𑀻𑀢𑀺 𑀆𑀳 ‘‘𑀳𑀢𑁆𑀣𑀥𑁄𑀯𑀦𑀸𑀤𑀻𑀦𑀻’’𑀢𑀺𑀆𑀤𑀺.

𑀆𑀯𑀝𑁆𑀝𑀧𑀭𑀺𑀬𑁄𑀲𑀸𑀦𑁂𑀢𑀺 𑀧𑀤𑀓𑁆𑀔𑀺𑀡𑀸𑀯𑀝𑁆𑀝𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀆𑀯𑀝𑁆𑀝𑀲𑁆𑀲 𑀅𑀦𑁆𑀢𑁂.

𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀁 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀅𑀦𑁄𑀦𑀫𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀉𑀕𑁆𑀕𑀢𑀦𑁆𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀸 𑀯𑀺𑀬 𑀉𑀚𑀼𑀕𑀢𑁆𑀢𑁄’’𑀢𑀺. 𑀲𑀸 𑀧𑀦𑀸𑀬𑀁 𑀉𑀚𑀼𑀕𑀢𑁆𑀢𑀢𑀸 𑀅𑀯𑀬𑀯𑁂𑀲𑀼 𑀩𑀼𑀤𑁆𑀥𑀺𑀧𑁆𑀧𑀢𑁆𑀢𑁂𑀲𑀼 𑀤𑀝𑁆𑀞𑀩𑁆𑀩𑀸, 𑀦 𑀤𑀳𑀭𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 ‘‘𑀉𑀕𑁆𑀕𑀢𑀤𑀻𑀖𑀲𑀭𑀻𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀇𑀢𑀭𑁂𑀲𑀽𑀢𑀺 ‘‘𑀔𑀦𑁆𑀥𑀚𑀸𑀡𑀽𑀲𑀽’’𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀸 𑀧𑀼𑀭𑀢𑁄 𑀦𑀫𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀲𑁆𑀲𑀯𑀗𑁆𑀓𑀸𑀢𑀺 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀯𑀸 𑀯𑀸𑀫𑀧𑀲𑁆𑀲𑁂𑀦 𑀯𑀸 𑀯𑀗𑁆𑀓𑀸. 𑀲𑀽𑀮𑀲𑀤𑀺𑀲𑀸𑀢𑀺 𑀧𑁄𑀢𑁆𑀣𑀓𑀭𑀽𑀧𑀓𑀭𑀡𑁂 𑀞𑀧𑀺𑀢𑀲𑀽𑀮𑀧𑀸𑀤𑀲𑀤𑀺𑀲𑀸.

𑀳𑀢𑁆𑀣𑀧𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀲𑀢𑁆𑀢 𑀲𑀭𑀻𑀭𑀸𑀯𑀬𑀯𑀸 𑀉𑀲𑁆𑀲𑀤𑀸 𑀉𑀧𑀘𑀺𑀢𑀫𑀁𑀲𑀸 𑀏𑀢𑀲𑁆𑀲𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑁄. 𑀅𑀝𑁆𑀞𑀺𑀓𑁄𑀝𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀕𑀽𑀴𑁆𑀳𑀲𑀺𑀭𑀸𑀚𑀸𑀮𑁂𑀳𑀻𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀦𑁆𑀢𑀺 𑀢𑁂𑀦 𑀦𑀺𑀕𑀽𑀴𑁆𑀳𑀅𑀝𑁆𑀞𑀺𑀓𑁄𑀝𑀻𑀳𑀻𑀢𑀺𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺. 𑀳𑀢𑁆𑀣𑀧𑀺𑀝𑁆𑀞𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀁𑀲𑀓𑀽𑀝𑀔𑀦𑁆𑀥𑀓𑀽𑀝𑀸𑀦𑀁 𑀲𑀗𑁆𑀕𑀳𑁂 𑀲𑀺𑀤𑁆𑀥𑁂 𑀢𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀝𑁆𑀝𑁂𑀢𑁆𑀯𑀸…𑀧𑁂… 𑀔𑀦𑁆𑀥𑁂𑀦𑀸’’𑀢𑀺 𑀆𑀳. ‘‘𑀲𑀺𑀮𑀸𑀭𑀽𑀧𑀓𑀁 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀸 𑀦𑀺𑀕𑀽𑀴𑁆𑀳𑀅𑀁𑀲𑀓𑀽𑀝𑀢𑀸𑀧𑀺 𑀯𑀺𑀪𑀸𑀯𑀺𑀢𑀸 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀲𑀻𑀳𑀧𑀼𑀩𑁆𑀩𑀤𑁆𑀥𑀁, 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀢𑀸𑀬 𑀲𑀻𑀳𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀲𑀓𑀮𑁄 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄. 𑀢𑁂𑀦𑀸𑀳 ‘‘𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀓𑀸𑀬𑁄 𑀯𑀺𑀬 𑀲𑀩𑁆𑀩𑁄 𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺. 𑀲𑀻𑀳𑀲𑁆𑀲𑁂𑀯𑀸𑀢𑀺 𑀲𑀻𑀳𑀲𑁆𑀲 𑀯𑀺𑀬. 𑀤𑀼𑀲𑁆𑀲𑀡𑁆𑀞𑀺𑀢𑀯𑀺𑀲𑀡𑁆𑀞𑀺𑀢𑁄 𑀦 𑀳𑁄𑀢𑀻𑀢𑀺 𑀤𑀼𑀝𑁆𑀞𑀼 𑀲𑀡𑁆𑀞𑀺𑀢𑁄, 𑀯𑀺𑀭𑀽𑀧𑀲𑀡𑁆𑀞𑀺𑀢𑁄 𑀘 𑀦 𑀳𑁄𑀢𑀺, 𑀢𑁂𑀲𑀁 𑀢𑁂𑀲𑀁 𑀅𑀯𑀬𑀯𑀸𑀦𑀁 𑀅𑀬𑀼𑀢𑁆𑀢𑀪𑀸𑀯𑁂𑀦, 𑀯𑀺𑀭𑀽𑀧𑀪𑀸𑀯𑁂𑀦 𑀘 𑀲𑀡𑁆𑀞𑀺𑀢𑀺 𑀉𑀧𑀕𑀢𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀡𑁆𑀞𑀦𑁆𑀢𑀻𑀢𑀺 𑀲𑀡𑁆𑀞𑀳𑀦𑁆𑀢𑀺. 𑀤𑀻𑀖𑁂𑀳𑀻𑀢𑀺 𑀅𑀗𑁆𑀕𑀼𑀮𑀺𑀦𑀸𑀲𑀸𑀤𑀻𑀳𑀺. 𑀭𑀲𑁆𑀲𑁂𑀳𑀻𑀢𑀺 𑀕𑀻𑀯𑀸𑀤𑀻𑀳𑀺. 𑀣𑀽𑀮𑁂𑀳𑀻𑀢𑀺 𑀊𑀭𑀼𑀩𑀸𑀳𑀼𑀆𑀤𑀻𑀳𑀺. 𑀓𑀺𑀲𑁂𑀳𑀻𑀢𑀺 𑀓𑁂𑀲𑀮𑁄𑀫𑀫𑀚𑁆𑀛𑀸𑀤𑀻𑀳𑀺. 𑀧𑀼𑀣𑀼𑀮𑁂𑀳𑀻𑀢𑀺 𑀅𑀓𑁆𑀔𑀺𑀳𑀢𑁆𑀣𑀢𑀮𑀸𑀤𑀻𑀳𑀺. 𑀯𑀝𑁆𑀝𑁂𑀳𑀻𑀢𑀺 𑀚𑀗𑁆𑀖𑀳𑀢𑁆𑀣𑀸𑀤𑀻𑀳𑀺.

𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀢𑀸𑀬 𑀦𑀸𑀦𑀸𑀘𑀺𑀢𑁆𑀢𑁂𑀦 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀺𑀢𑁄 𑀲𑀜𑁆𑀚𑀸𑀢𑀘𑀺𑀢𑁆𑀢𑀪𑀸𑀯𑁄 ‘‘𑀈𑀤𑀺𑀲𑁄 𑀏𑀯 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀓𑀸𑀬𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀤𑀲𑀧𑀸𑀭𑀫𑀻𑀳𑀺 𑀲𑀚𑁆𑀚𑀺𑀢𑁄 𑀅𑀪𑀺𑀲𑀗𑁆𑀔𑀢𑁄, ‘‘𑀤𑀸𑀦𑀘𑀺𑀢𑁆𑀢𑁂𑀦 𑀧𑀼𑀜𑁆𑀜𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀤𑀸𑀦𑀯𑀲𑁂𑀦, 𑀲𑀻𑀮𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀧𑀼𑀜𑁆𑀜𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀝𑀸𑀦𑀁 𑀅𑀦𑁆𑀢𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀺𑀝𑁆𑀞𑀺𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑀁 𑀧𑀺𑀝𑁆𑀞𑀺𑀫𑀚𑁆𑀛𑀲𑁆𑀲 𑀉𑀧𑀭𑀺𑀪𑀸𑀕𑁄. 𑀘𑀺𑀢𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀺𑀦𑁆𑀦𑀪𑀸𑀯𑁂𑀦 𑀘𑀺𑀢𑀁, 𑀤𑁆𑀯𑀻𑀳𑀺 𑀓𑁄𑀝𑁆𑀝𑁂𑀳𑀺 𑀲𑀫𑀢𑀮𑀢𑀸𑀬 𑀧𑀭𑀺𑀧𑀼𑀡𑁆𑀡𑀁. 𑀉𑀕𑁆𑀕𑀫𑁆𑀫𑀸𑀢𑀺 𑀉𑀕𑁆𑀕𑀦𑁆𑀢𑁆𑀯𑀸, 𑀅𑀦𑀺𑀦𑁆𑀦𑀁 𑀲𑀫𑀢𑀮𑀁 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀼𑀯𑀡𑁆𑀡𑀨𑀮𑀓𑀁 𑀯𑀺𑀬𑀸’’𑀢𑀺.

𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄𑀢𑀺 𑀧𑀭𑀺𑀫𑀡𑁆𑀟𑀮𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄, ‘‘𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑀧𑀭𑀺𑀫𑀡𑁆𑀟𑀮𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀧𑀭𑀺𑀫𑀡𑁆𑀟𑀮-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀫𑀓𑁆𑀔𑀦𑁆𑀥𑀲𑀸𑀔𑁄 𑀦𑀺𑀕𑁆𑀭𑁄𑀥𑁄’’𑀢𑀺𑀆𑀤𑀺. 𑀦 𑀳𑀺 𑀲𑀩𑁆𑀩𑁄 𑀦𑀺𑀕𑁆𑀭𑁄𑀥𑁄 𑀧𑀭𑀺𑀫𑀡𑁆𑀟𑀮𑁄𑀢𑀺, 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀧𑀭𑀺𑀫𑀡𑁆𑀟𑀮𑁄𑀯 𑀦𑀺𑀕𑁆𑀭𑁄𑀥𑁄 𑀕𑀬𑁆𑀳𑀢𑀻𑀢𑀺 𑀏𑀓𑀲𑁆𑀲 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀲𑁆𑀲 𑀮𑁄𑀧𑁂𑀦 𑀯𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄’’𑀢𑀺. 𑀬𑀸𑀯𑀢𑀓𑁄 𑀅𑀲𑁆𑀲𑀸𑀢𑀺 𑀬𑀸𑀯𑀢𑀓𑁆𑀯𑀲𑁆𑀲 𑀑-𑀓𑀸𑀭𑀲𑁆𑀲 𑀯-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸.

𑀲𑀫𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄𑀢𑀺 𑀲𑀫𑀁 𑀲𑀼𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄. 𑀓𑁄𑀜𑁆𑀘𑀸 𑀯𑀺𑀬 𑀤𑀻𑀖𑀕𑀮𑀸, 𑀩𑀓𑀸 𑀯𑀺𑀬 𑀯𑀗𑁆𑀓𑀕𑀮𑀸, 𑀯𑀭𑀸𑀳𑀸 𑀯𑀺𑀬 𑀧𑀼𑀣𑀼𑀮𑀕𑀮𑀸𑀢𑀺 𑀬𑁄𑀚𑀦𑀸. 𑀲𑀼𑀯𑀡𑁆𑀡𑀸𑀴𑀺𑀗𑁆𑀕𑀲𑀤𑀺𑀲𑁄𑀢𑀺 𑀲𑀼𑀯𑀡𑁆𑀡𑀫𑀬𑀔𑀼𑀤𑁆𑀤𑀓𑀫𑀼𑀤𑀺𑀗𑁆𑀕𑀲𑀤𑀺𑀲𑁄.

𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀫𑀥𑀼𑀭𑀸𑀤𑀺𑀪𑁂𑀤𑀁 𑀭𑀲𑀁 𑀕𑀲𑀦𑁆𑀢𑀺 𑀅𑀦𑁆𑀢𑁄 𑀧𑀯𑁂𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸 𑀭𑀲𑀕𑁆𑀕𑀲𑀸𑀦𑀁 𑀅𑀕𑁆𑀕𑀸 𑀭𑀲𑀕𑁆𑀕𑀲𑀕𑁆𑀕𑀸, 𑀢𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀕𑁆𑀕𑀻. 𑀢𑁂𑀦𑀸𑀢𑀺 𑀑𑀚𑀸𑀬 𑀅𑀨𑀭𑀡𑁂𑀦 𑀳𑀻𑀦𑀥𑀸𑀢𑀼𑀓𑀢𑁆𑀢𑀸 𑀢𑁂 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺.

𑀳𑀦𑀽𑀢𑀺 𑀲𑀦𑁆𑀦𑀺𑀲𑁆𑀲𑀬𑀤𑀦𑁆𑀢𑀸𑀥𑀸𑀭𑀲𑁆𑀲 𑀲𑀫𑀜𑁆𑀜𑀸, 𑀢𑀁 𑀪𑀕𑀯𑀢𑁄 𑀲𑀻𑀳𑀲𑁆𑀲 𑀳𑀦𑀼 𑀯𑀺𑀬, 𑀢𑀲𑁆𑀫𑀸 𑀪𑀕𑀯𑀸 𑀲𑀻𑀳𑀳𑀦𑀼. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀭𑀽𑀧𑀓𑀸𑀬𑀲𑁆𑀲, 𑀥𑀫𑁆𑀫𑀓𑀸𑀬𑀲𑁆𑀲 𑀘 𑀉𑀧𑀫𑀸 𑀦𑀸𑀫 𑀳𑀻𑀦𑀽𑀧𑀫𑀸𑀯, 𑀦𑀢𑁆𑀣𑀺 𑀲𑀫𑀸𑀦𑀽𑀧𑀫𑀸, 𑀓𑀼𑀢𑁄 𑀅𑀥𑀺𑀓𑀽𑀧𑀫𑀸, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀳𑀻𑀦𑀽𑀧𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀺𑀫𑀸𑀦𑀼𑀭𑀽𑀧𑀯𑀲𑁂𑀦𑁂𑀯 𑀉𑀧𑀭𑀺𑀫𑀫𑁆𑀧𑀺 𑀲𑀡𑁆𑀞𑀺𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀻’’𑀢𑀺, 𑀢𑀜𑁆𑀘 𑀔𑁄 𑀦 𑀲𑀩𑁆𑀩𑀲𑁄 𑀧𑀭𑀺𑀫𑀡𑁆𑀟𑀮𑀢𑀸𑀬, 𑀅𑀣 𑀔𑁄 𑀢𑀺𑀪𑀸𑀕𑀸𑀯𑀲𑁂𑀲𑀫𑀡𑁆𑀟𑀮𑀢𑀸𑀬𑀸𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀺𑀬𑀸 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀻’’𑀢𑀺. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀮𑀓𑁆𑀔𑀡𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑁂𑀢𑁆𑀯𑀸. 𑀤𑀦𑁆𑀢𑀸𑀦𑀁 𑀉𑀘𑁆𑀘𑀦𑀻𑀘𑀢𑀸 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀧𑀲𑁆𑀲𑀯𑀲𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀅𑀕𑁆𑀕𑀯𑀲𑁂𑀦𑁂𑀯. 𑀢𑁂𑀦𑀸𑀳 ‘‘𑀅𑀬𑀧𑀝𑁆𑀝𑀓𑁂𑀦 𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀁 𑀯𑀺𑀬𑀸’’𑀢𑀺. 𑀅𑀬𑀧𑀝𑁆𑀝𑀓𑀦𑁆𑀢𑀺 𑀓𑀓𑀘𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀯𑀺𑀲𑀫𑀸, 𑀲𑀫𑀲𑀡𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑀲𑀸𑀢𑀺𑀲𑀬𑀁 𑀫𑀼𑀤𑀼𑀤𑀻𑀖𑀧𑀼𑀣𑀼𑀮𑀢𑀸𑀤𑀺𑀧𑁆𑀧𑀓𑀸𑀭𑀕𑀼𑀡𑀸 𑀳𑀼𑀢𑁆𑀯𑀸 𑀪𑀽𑀢𑀸 𑀚𑀸𑀢𑀸𑀢𑀺 𑀧𑀪𑀽𑀢𑀸, 𑀪-𑀓𑀸𑀭𑀲𑁆𑀲 𑀳-𑀓𑀸𑀭𑀁 𑀓𑀢𑁆𑀯𑀸 𑀧𑀳𑀽𑀢𑀸 𑀚𑀺𑀯𑁆𑀳𑀸 𑀏𑀢𑀲𑁆𑀲𑀸𑀢𑀺 𑀧𑀳𑀽𑀢𑀚𑀺𑀯𑁆𑀳𑁄.

𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀲𑀭𑀢𑀸𑀬 𑀙𑀺𑀦𑁆𑀦𑀲𑁆𑀲𑀭𑀸𑀧𑀺. 𑀅𑀦𑁂𑀓𑀸𑀓𑀸𑀭𑀢𑀸𑀬 𑀪𑀺𑀦𑁆𑀦𑀲𑁆𑀲𑀭𑀸𑀧𑀺. 𑀓𑀸𑀓𑀲𑁆𑀲 𑀯𑀺𑀬 𑀅𑀫𑀦𑀼𑀜𑁆𑀜𑀲𑀭𑀢𑀸𑀬 𑀓𑀸𑀓𑀲𑁆𑀲𑀭𑀸𑀧𑀺. 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸𑀢𑀺 𑀅𑀦𑀼𑀧𑀤𑁆𑀤𑀼𑀢𑀯𑀢𑁆𑀣𑀼𑀓𑀢𑁆𑀢𑀸, 𑀯𑀢𑁆𑀣𑀽𑀢𑀺 𑀘 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀅𑀗𑁆𑀕𑀸𑀦𑀺 𑀧𑀭𑀢𑁄 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀫𑀜𑁆𑀚𑀼𑀖𑁄𑀲𑁄𑀢𑀺 𑀫𑀥𑀼𑀭𑀲𑁆𑀲𑀭𑁄.

𑀅𑀪𑀺𑀦𑀻𑀮𑀦𑁂𑀢𑁆𑀢𑁄𑀢𑀺 𑀅𑀥𑀺𑀓𑀦𑀻𑀮𑀦𑁂𑀢𑁆𑀢𑁄, 𑀅𑀥𑀺𑀓𑀢𑀸 𑀘 𑀲𑀸𑀢𑀺𑀲𑀬𑀁 𑀦𑀻𑀮𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀦𑁂𑀢𑁆𑀢𑀦𑀻𑀮𑀪𑀸𑀯𑀲𑁆𑀲𑁂𑀯 𑀅𑀥𑀺𑀓𑀪𑀸𑀯𑀢𑁄𑀢𑀺 𑀆𑀳 ‘‘𑀦 𑀲𑀓𑀮𑀦𑀻𑀮𑀦𑁂𑀢𑁆𑀢𑁄’’𑀢𑀺𑀆𑀤𑀺. 𑀧𑀻𑀢𑀮𑁄𑀳𑀺𑀢𑀯𑀡𑁆𑀡𑀸 𑀲𑁂𑀢𑀫𑀡𑁆𑀟𑀮𑀕𑀢𑀭𑀸𑀚𑀺𑀯𑀲𑁂𑀦. 𑀦𑀻𑀮𑀲𑁂𑀢𑀓𑀸𑀴𑀯𑀡𑁆𑀡𑀸 𑀧𑀦 𑀢𑀁𑀢𑀁𑀫𑀡𑁆𑀟𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

‘‘𑀘𑀓𑁆𑀔𑀼𑀪𑀡𑁆𑀟𑀦𑁆𑀢𑀺 𑀅𑀓𑁆𑀔𑀺𑀤𑀮’’𑀦𑁆𑀢𑀺 𑀓𑁂𑀘𑀺. ‘‘𑀅𑀓𑁆𑀔𑀺𑀤𑀮𑀯𑀝𑀼𑀫’’𑀦𑁆𑀢𑀺 𑀅𑀜𑁆𑀜𑁂. 𑀅𑀓𑁆𑀔𑀺𑀤𑀮𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀅𑀓𑁆𑀔𑀺𑀩𑀺𑀫𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀯𑀺𑀦𑀺𑀕𑁆𑀕𑀢𑀕𑀫𑁆𑀪𑀻𑀭𑀚𑁄𑀢𑀦𑀸𑀧𑀺 𑀬𑀼𑀢𑁆𑀢𑀸 𑀳𑁄𑀢𑀺. ‘‘𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀇𑀫𑀺𑀦𑀸 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀼𑀧𑀮𑀓𑁆𑀔𑀡𑀜𑀸𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀧𑀔𑀼𑀫-𑀲𑀤𑁆𑀤𑁄 𑀮𑁄𑀓𑁂 𑀅𑀓𑁆𑀔𑀺𑀤𑀮𑀮𑁄𑀫𑁂𑀲𑀼 𑀦𑀺𑀭𑀼𑀴𑁆𑀳𑁄, 𑀢𑁂𑀦𑁂𑀯𑀸𑀳 ‘‘𑀫𑀼𑀤𑀼𑀲𑀺𑀦𑀺𑀤𑁆𑀥𑀦𑀻𑀮𑀲𑀼𑀔𑀼𑀫𑀧𑀔𑀼𑀫𑀸𑀘𑀺𑀢𑀸𑀦𑀺 𑀅𑀓𑁆𑀔𑀻𑀦𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀡𑁆𑀡𑀸-𑀲𑀤𑁆𑀤𑁄 𑀮𑁄𑀓𑁂 𑀅𑀯𑀺𑀲𑁂𑀲𑀢𑁄 𑀮𑁄𑀫𑀧𑀭𑀺𑀬𑀸𑀬𑁄, 𑀇𑀥 𑀧𑀦 𑀮𑁄𑀫𑀯𑀺𑀲𑁂𑀲𑀯𑀸𑀘𑀓𑁄𑀢𑀺 𑀆𑀳 ‘‘𑀉𑀡𑁆𑀡𑀸 𑀮𑁄𑀫’’𑀦𑁆𑀢𑀺. 𑀦𑀮𑀸𑀝𑀯𑁂𑀫𑀚𑁆𑀛𑁂 𑀚𑀸𑀢𑀸𑀢𑀺 𑀦𑀮𑀸𑀝𑀫𑀚𑁆𑀛𑀕𑀢𑀸 𑀚𑀸𑀢𑀸. 𑀑𑀤𑀸𑀢𑀢𑀸𑀬 𑀉𑀧𑀫𑀸, 𑀦 𑀫𑀼𑀤𑀼𑀢𑀸𑀬. 𑀉𑀡𑁆𑀡𑀸 𑀳𑀺 𑀢𑀢𑁄𑀧𑀺 𑀲𑀸𑀢𑀺𑀲𑀬𑀁 𑀫𑀼𑀤𑀼𑀢𑀭𑀸. 𑀢𑁂𑀦𑀸𑀳‘‘𑀲𑀧𑁆𑀧𑀺 𑀫𑀡𑁆𑀟𑁂’’𑀢𑀺𑀆𑀤𑀺. 𑀭𑀚𑀢𑀧𑀼𑀩𑁆𑀩𑀼𑀴𑀓𑀦𑁆𑀢𑀺 𑀭𑀚𑀢𑀫𑀬𑀢𑀸𑀭𑀓𑀫𑀸𑀳.

𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑀸, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀸𑀬, 𑀧𑀭𑀺𑀧𑀼𑀡𑁆𑀡𑀲𑀻𑀲𑀩𑀺𑀫𑁆𑀩𑀢𑀸𑀬 𑀘 ‘‘𑀉𑀡𑁆𑀳𑀻𑀲𑀲𑀻𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 ‘‘𑀉𑀡𑁆𑀳𑀻𑀲𑀲𑀻𑀲𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀅𑀢𑁆𑀣𑀤𑁆𑀯𑀬𑀁 𑀫𑀳𑀸𑀧𑀼𑀭𑀺𑀲𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑁆𑀢𑀺 ‘‘𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀡𑁆𑀳𑀢𑀫𑀢𑀸𑀬, 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬, 𑀧𑀪𑀲𑁆𑀲𑀭𑀢𑀸𑀬, 𑀧𑀭𑀺𑀧𑀼𑀡𑁆𑀡𑀢𑀸𑀬 𑀘 𑀭𑀜𑁆𑀜𑁄 𑀩𑀦𑁆𑀥𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀢𑀺. 𑀓𑀧𑀺𑀲𑀻𑀲𑀸𑀢𑀺 𑀤𑁆𑀯𑀺𑀥𑀸𑀪𑀽𑀢𑀲𑀻𑀲𑀸. 𑀨𑀮𑀲𑀻𑀲𑀸𑀢𑀺 𑀨𑀮𑀺𑀢𑀲𑀻𑀲𑀸. 𑀅𑀝𑁆𑀞𑀺𑀲𑀻𑀲𑀸𑀢𑀺 𑀫𑀁𑀲𑀲𑁆𑀲 𑀅𑀪𑀸𑀯𑀢𑁄 𑀅𑀢𑀺𑀯𑀺𑀬 𑀅𑀝𑁆𑀞𑀺𑀢𑀸𑀬, 𑀧𑀢𑀦𑀼𑀪𑀸𑀯𑀢𑁄 𑀯𑀸 𑀢𑀘𑁄𑀦𑀤𑁆𑀥𑀅𑀝𑁆𑀞𑀺𑀫𑀢𑁆𑀢𑀲𑀻𑀲𑀸. 𑀢𑀼𑀫𑁆𑀩𑀲𑀻𑀲𑀸𑀢𑀺 𑀮𑀸𑀩𑀼𑀲𑀤𑀺𑀲𑀲𑀻𑀲𑀸. 𑀧𑀩𑁆𑀪𑀸𑀭𑀲𑀻𑀲𑀸𑀢𑀺 𑀧𑀺𑀝𑁆𑀞𑀺𑀪𑀸𑀕𑁂𑀦 𑀑𑀮𑀫𑁆𑀩𑀫𑀸𑀦𑀲𑀻𑀲𑀸. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀸𑀧𑀓𑁆𑀔𑁂𑀦. 𑀉𑀡𑁆𑀳𑀻𑀲𑀯𑁂𑀞𑀺𑀢𑀲𑀻𑀲𑁄 𑀯𑀺𑀬𑀸𑀢𑀺 𑀉𑀡𑁆𑀳𑀻𑀲𑀧𑀝𑁆𑀝𑁂𑀦 𑀯𑁂𑀞𑀺𑀢𑀲𑀻𑀲𑀧𑀤𑁂𑀲𑁄 𑀯𑀺𑀬. 𑀉𑀡𑁆𑀳𑀻𑀲𑀁 𑀯𑀺𑀬𑀸𑀢𑀺 𑀙𑁂𑀓𑁂𑀦 𑀲𑀺𑀧𑁆𑀧𑀺𑀦𑀸 𑀯𑀺𑀭𑀘𑀺𑀢𑀉𑀡𑁆𑀳𑀻𑀲𑀫𑀡𑁆𑀟𑀮𑀁 𑀯𑀺𑀬.

𑀯𑀺𑀧𑀲𑁆𑀲𑀻𑀲𑀫𑀜𑁆𑀜𑀸𑀯𑀡𑁆𑀡𑀦𑀸

𑁩𑁭. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄𑀢𑀺 𑀢𑀲𑁆𑀲 𑀮𑀓𑁆𑀔𑀡𑀧𑀭𑀺𑀕𑁆𑀕𑀡𑁆𑀳𑀦𑁂 𑀦𑁂𑀫𑀺𑀢𑁆𑀢𑀓𑀸𑀦𑀁 𑀲𑀦𑁆𑀢𑀧𑁆𑀧𑀦𑀲𑁆𑀲 𑀯𑀺𑀢𑁆𑀣𑀸𑀭𑁄 𑀯𑀺𑀢𑁆𑀣𑀸𑀭𑀓𑀣𑀸. 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀁 𑀦𑀺𑀫𑀺𑀢𑁆𑀢𑀪𑀽𑀢 𑀲𑀼𑀧𑀺𑀦𑀧𑀝𑀺𑀕𑁆𑀕𑀸𑀳𑀓𑀲𑀦𑁆𑀢𑀧𑁆𑀧𑀦𑁂 𑀯𑀼𑀢𑁆𑀢𑁄𑀬𑁂𑀯. 𑀦𑀺𑀤𑁆𑀤𑁄𑀲𑁂𑀦𑀸𑀢𑀺 𑀔𑀸𑀭𑀺𑀓𑀮𑁄𑀡𑀺𑀓𑀸𑀤𑀺𑀤𑁄𑀲𑀭𑀳𑀺𑀢𑁂𑀦. 𑀥𑀸𑀢𑀺𑀬𑁄𑀢𑀺 𑀣𑀜𑁆𑀜𑀧𑀸𑀬𑀺𑀓𑀸 𑀥𑀸𑀢𑀺𑀬𑁄. 𑀢𑀸 𑀳𑀺 𑀥𑀸𑀧𑁂𑀦𑁆𑀢𑀺 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀻𑀢𑀺 𑀥𑀸𑀢𑀺𑀬𑁄.‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀲𑀝𑁆𑀞𑀺’’𑀦𑁆𑀢𑀺 𑀧𑀤𑀁 𑀉𑀧𑀲𑀁𑀳𑀭𑀢𑀺, 𑀲𑁂𑀲𑀸𑀧𑀻𑀢𑀺 𑀦𑁆𑀳𑀸𑀧𑀺𑀓𑀸, 𑀥𑀸𑀭𑀺𑀓𑀸, 𑀧𑀭𑀺𑀳𑀸𑀭𑀺𑀓𑀸𑀢𑀺 𑀇𑀫𑀸 𑀢𑀺𑀯𑀺𑀥𑀸. 𑀢𑀸𑀧𑀺 𑀤𑀳𑀦𑁆𑀢𑀺 𑀯𑀺𑀤𑀳𑀦𑁆𑀢𑀺 𑀦𑁆𑀳𑀸𑀦𑀁 𑀤𑀳𑀦𑁆𑀢𑀺 𑀥𑀸𑀭𑁂𑀦𑁆𑀢𑀻𑀢𑀺 ‘‘𑀥𑀸𑀢𑀺𑀬𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀥𑀸𑀭𑀡𑀁 𑀉𑀭𑀲𑀸, 𑀊𑀭𑀼𑀦𑀸, 𑀳𑀢𑁆𑀣𑁂𑀳𑀺 𑀯𑀸 𑀲𑀼𑀘𑀺𑀭𑀁 𑀯𑁂𑀮𑀁 𑀲𑀦𑁆𑀥𑀸𑀭𑀡𑀁. 𑀧𑀭𑀺𑀳𑀭𑀡𑀁 𑀅𑀜𑁆𑀜𑀲𑁆𑀲 𑀅𑀗𑁆𑀓𑀢𑁄 𑀅𑀢𑁆𑀢𑀦𑁄 𑀅𑀗𑁆𑀓𑀁, 𑀅𑀜𑁆𑀜𑀲𑁆𑀲 𑀩𑀸𑀳𑀼𑀢𑁄 𑀅𑀢𑁆𑀢𑀦𑁄 𑀩𑀸𑀳𑀼𑀁 𑀉𑀧𑀲𑀁𑀳𑀭𑀦𑁆𑀢𑁂𑀳𑀺 𑀳𑀭𑀡𑀁 𑀲𑀫𑁆𑀧𑀸𑀧𑀦𑀁.

𑁩𑁮. 𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀲𑀡𑁆𑀳𑀲𑁆𑀲𑀭𑁄. 𑀬𑁄 𑀳𑀺 𑀲𑀡𑁆𑀳𑁄, 𑀲𑁄 𑀔𑀭𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀔𑀭𑀲𑁆𑀲𑀭𑁄’’𑀢𑀺. 𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀫𑀦𑁄𑀭𑀫𑁆𑀫𑀲𑁆𑀲𑀭𑁄, 𑀫𑀦𑁄𑀭𑀫𑁆𑀫𑀢𑀸 𑀘𑀲𑁆𑀲 𑀘𑀸𑀢𑀼𑀭𑀺𑀬𑀦𑁂 𑀧𑀼𑀜𑁆𑀜𑀬𑁄𑀕𑀢𑁄𑀢𑀺 𑀆𑀳 ‘‘𑀙𑁂𑀓𑀦𑀺𑀧𑀼𑀡𑀲𑁆𑀲𑀭𑁄’’𑀢𑀺. 𑀫𑀥𑀼𑀭𑀲𑁆𑀲𑀭𑁄𑀢𑀺 𑀲𑁄𑀢𑀲𑀼𑀔𑀲𑁆𑀲𑀭𑁄, 𑀲𑁄𑀢𑀲𑀼𑀔𑀢𑀸 𑀘𑀲𑁆𑀲 𑀅𑀢𑀺𑀯𑀺𑀬 𑀇𑀝𑁆𑀞𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀸𑀢𑀲𑁆𑀲𑀭𑁄’’𑀢𑀺. 𑀧𑁂𑀫𑀦𑀻𑀬𑀲𑁆𑀲𑀭𑁄𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀲𑁆𑀲𑀭𑁄, 𑀧𑀺𑀬𑀸𑀬𑀺𑀢𑀩𑁆𑀩𑀢𑀸 𑀘𑀲𑁆𑀲 𑀲𑀼𑀡𑀦𑁆𑀢𑀸𑀦𑀁 𑀅𑀢𑁆𑀢𑀦𑀺 𑀪𑀢𑁆𑀢𑀺𑀲𑀫𑀼𑀧𑁆𑀧𑀸𑀤𑀦𑁂𑀦𑀸𑀢𑀺 𑀆𑀳 ‘‘𑀧𑁂𑀫𑀚𑀦𑀓𑀲𑁆𑀲𑀭𑁄’’𑀢𑀺. 𑀓𑀭𑀯𑀻𑀓𑀲𑁆𑀲𑀭𑁄𑀢𑀺. 𑀓𑀭𑀯𑀻𑀓𑀲𑀤𑁆𑀤𑁄 𑀬𑁂𑀲𑀁 𑀲𑀢𑁆𑀢𑀸𑀦𑀁 𑀲𑁄𑀢𑀧𑀣𑀁 𑀉𑀧𑀕𑀘𑁆𑀙𑀢𑀺, 𑀢𑁂 𑀅𑀢𑁆𑀢𑀦𑁄 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀁 𑀚𑀳𑀸𑀧𑁂𑀢𑁆𑀯𑀸 𑀅𑀯𑀲𑁂 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺, 𑀏𑀯𑀁 𑀫𑀥𑀼𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑀭𑀯𑀻𑀓𑀲𑀓𑀼𑀡𑁂’’𑀢𑀺𑀆𑀤𑀺 𑀢𑀲𑁆𑀲 𑀲𑀪𑀸𑀯𑀓𑀣𑀦𑀁. 𑀮𑀴𑀺𑀢𑀦𑁆𑀢𑀺 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀺𑀢𑀁 𑀮𑀻𑀴𑀁. 𑀙𑀟𑁆𑀟𑁂𑀢𑁆𑀯𑀸𑀢𑀺 ‘‘𑀲𑀗𑁆𑀔𑀭𑀡𑀫𑁆𑀧𑀺 𑀫𑀥𑀼𑀭𑀲𑀤𑁆𑀤𑀲𑀯𑀦𑀦𑁆𑀢𑀭𑀸𑀬𑀓𑀭’’𑀦𑁆𑀢𑀺 𑀢𑀺𑀡𑀸𑀦𑀺 𑀅𑀧𑀦𑁂𑀢𑁆𑀯𑀸. 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑀕𑀢𑀫𑁂𑀯 𑀓𑀢𑁆𑀯𑀸. 𑀅𑀦𑀼𑀩𑀤𑁆𑀥𑀫𑀺𑀕𑀸 𑀯𑀸𑀴𑀫𑀺𑀕𑁂𑀳𑀺. 𑀢𑀢𑁄 𑀫𑀭𑀡𑀪𑀬𑀁 𑀳𑀺𑀢𑁆𑀯𑀸. 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸𑀢𑀺 𑀧𑀓𑁆𑀔𑁂 𑀬𑀣𑀸𑀧𑀲𑀸𑀭𑀺𑀢𑁂 𑀓𑀢𑁆𑀯𑀸 𑀅𑀧𑀢𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺.

𑀲𑀼𑀯𑀡𑁆𑀡𑀧𑀜𑁆𑀚𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 𑀬𑁄𑀚𑀦𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀅𑀢𑁆𑀢𑀦𑁄 𑀆𑀡𑀸𑀬 𑀧𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀲𑁄 𑀭𑀸𑀚𑀸𑀡𑀸𑀬𑀸’’𑀢𑀺𑀆𑀤𑀺. 𑀮𑀴𑀺𑀁𑀲𑀽𑀢𑀺 𑀮𑀴𑀺𑀢𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀢𑀁 𑀧𑀻𑀢𑀺𑀦𑁆𑀢𑀺 𑀢𑀁 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑀓𑁆𑀓𑀜𑀸𑀡𑀢𑀸𑀬 𑀲𑀢𑁆𑀢𑀳𑀺…𑀧𑁂… 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀢𑀲𑀢𑀫𑀢𑁆𑀢𑁂𑀦 𑀑𑀭𑁄𑀥𑀚𑀦𑁂𑀦 𑀲𑀤𑁆𑀥𑀺𑀁 𑀧𑀤𑀲𑀸𑀯 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀕𑀢𑀢𑁆𑀢𑀸 ‘‘𑀲𑀢𑁆𑀢𑀳𑀺 𑀚𑀗𑁆𑀖𑀲𑀢𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀓𑀭𑀯𑀻𑀓𑀲𑀤𑁆𑀤𑀢𑁄. 𑀲𑀢𑀪𑀸𑀕𑁂𑀦…𑀧𑁂… 𑀯𑁂𑀤𑀺𑀢𑀩𑁆𑀩𑁄 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑀲𑀫𑁆𑀪𑀽𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑀫𑀼𑀤𑀸𑀕𑀢𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀪𑀸𑀯𑀢𑁄.