𑁧𑁦. 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁬. 𑀪𑀕𑀯𑀢𑀸 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀭𑀸𑀚𑀧𑀼𑀢𑁆𑀢𑀸 𑀮𑁄𑀓𑁂 ‘‘𑀓𑀼𑀫𑀸𑀭𑁄’’𑀢𑀺 𑀯𑁄𑀳𑀭𑀻𑀬𑀦𑁆𑀢𑀺. 𑀅𑀬𑀜𑁆𑀘 𑀭𑀜𑁆𑀜𑁄 𑀓𑀺𑀢𑁆𑀢𑀺𑀫𑀧𑀼𑀢𑁆𑀢𑁄, 𑀢𑀲𑁆𑀫𑀸 𑀆𑀳 ‘‘𑀭𑀜𑁆𑀜𑁄…𑀧𑁂… 𑀲𑀜𑁆𑀚𑀸𑀦𑀺𑀁𑀲𑀽’’𑀢𑀺.

𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀢𑁆𑀢𑀸. 𑀢𑀢𑀺𑀬𑀤𑀺𑀯𑀲𑁂𑀢𑀺 𑀧𑀩𑁆𑀩𑀢𑀁 𑀆𑀭𑀼𑀴𑁆𑀳𑀤𑀺𑀯𑀲𑀢𑁄 𑀢𑀢𑀺𑀬𑁂 𑀤𑀺𑀯𑀲𑁂.

𑀢𑁂𑀲𑀁 𑀲𑀸𑀯𑀓𑀩𑁄𑀥𑀺𑀬𑀸 𑀦𑀺𑀬𑀢𑀢𑀸𑀬, 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀘 𑀲𑀸𑀢𑀺𑀲𑀬𑀢𑁆𑀢𑀸 𑀯𑀺𑀦𑀺𑀧𑀸𑀢𑀁 𑀅𑀕𑀦𑁆𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁…𑀧𑁂… 𑀅𑀦𑀼𑀪𑀯𑀦𑁆𑀢𑀸𑀦𑀁. 𑀤𑁂𑀯𑀢𑀸𑀬𑀸𑀢𑀺 𑀧𑀼𑀩𑁆𑀩𑁂 𑀲𑀳𑀥𑀫𑁆𑀫𑀘𑀸𑀭𑀺𑀦𑀺𑀬𑀸 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀢𑀸𑀬.

‘‘𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀢𑁆𑀯𑀸 𑀢𑀁 𑀏𑀯𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀢𑀺 𑀓𑀼𑀮𑀤𑀸𑀭𑀺𑀓𑀸. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀯𑀼𑀘𑁆𑀘𑀫𑀸𑀦𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀓𑀼𑀮𑀖𑀭𑀦𑁆𑀢𑀺 𑀧𑀢𑀺𑀓𑀼𑀮𑀕𑁂𑀳𑀁. 𑀕𑀩𑁆𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀕𑀩𑁆𑀪𑀲𑁆𑀲 𑀲𑀡𑁆𑀞𑀺𑀢𑀪𑀸𑀯𑀦𑀺𑀫𑀺𑀢𑁆𑀢𑀁. 𑀲𑀢𑀺𑀧𑀺 𑀯𑀺𑀲𑀸𑀔𑀸𑀬 𑀘 𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂 𑀢𑀲𑁆𑀲𑀸 𑀢𑀢𑁆𑀣 𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀲𑀸𑀔𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀆𑀕𑀢𑀸 𑀯𑀸𑀲𑀺𑀝𑁆𑀞𑁄𑀧𑀺 𑀆𑀕𑀢𑁄’’𑀢𑀺. 𑀤𑁂𑀯𑀢𑀸𑀢𑀺 𑀇𑀥𑀧𑀺 𑀲𑀸 𑀏𑀯 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀢𑀸. 𑀧𑀜𑁆𑀳𑁂𑀢𑀺 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼 𑀅𑀬𑀁 𑀯𑀫𑁆𑀫𑀺𑀓𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪𑁯) 𑀆𑀕𑀢𑁂 𑀧𑀦𑁆𑀦𑀭𑀲𑀧𑀜𑁆𑀳𑁂.

𑀲𑁂𑀢𑀩𑁆𑀬𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀸𑀫𑀁.𑀉𑀢𑁆𑀢𑀭𑁂𑀦𑀸𑀢𑀺 𑀏𑀦-𑀲𑀤𑁆𑀤𑀬𑁄𑀕𑁂𑀦 ‘‘𑀲𑁂𑀢𑀩𑁆𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀯𑀘𑀦𑁂𑀦 𑀧𑀦 𑀉𑀢𑁆𑀢𑀭𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑁂𑀢𑀩𑁆𑀬𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀧𑁆𑀧𑀬𑁄𑀕𑁄 𑀓𑀢𑁄. 𑀅𑀦𑀪𑀺𑀲𑀺𑀢𑁆𑀢𑀓𑀭𑀸𑀚𑀸𑀢𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑁄 𑀅𑀪𑀺𑀲𑁂𑀓𑀁 𑀅𑀧𑁆𑀧𑀢𑁆𑀢𑁄.

𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁦𑁭. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀕𑀢-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀫𑀸𑀳, 𑀤𑀺𑀝𑁆𑀞𑀺𑀬𑀸 𑀯𑀸 𑀕𑀢𑀫𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁, 𑀅𑀬𑀸𑀣𑀸𑀯𑀕𑁆𑀕𑀸𑀳𑀺𑀢𑀸𑀬 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀁, 𑀓𑁂𑀯𑀮𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄𑀢𑀺 𑀅𑀢𑁆𑀣𑁄, 𑀢𑀁 𑀧𑀦 𑀤𑀺𑀝𑁆𑀞𑀺𑀕𑀢𑀁 𑀢𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀧𑀓𑁆𑀔𑀲𑀫𑁆𑀫𑀼𑀔𑀻𑀪𑀸𑀯𑀸𑀪𑀸𑀯𑀢𑁄, 𑀅𑀦𑀼𑀭𑀽𑀧𑀸𑀳𑀸𑀭𑀮𑀸𑀪𑀢𑁄 𑀘 𑀲𑀫𑀼𑀤𑀸𑀘𑀸𑀭𑀧𑁆𑀧𑀢𑁆𑀢𑀁 𑀚𑀸𑀢𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀁 𑀓𑀸𑀭𑀡𑀁 𑀅𑀧𑀤𑀺𑀲𑀺𑀢𑁆𑀯𑀸𑀢𑀺 𑀢𑀢𑁄 𑀇𑀥𑀸𑀕𑀘𑁆𑀙𑀦𑀓𑀲𑁆𑀲, 𑀇𑀢𑁄 𑀢𑀢𑁆𑀣 𑀕𑀘𑁆𑀙𑀦𑀓𑀲𑁆𑀲 𑀘 𑀅𑀧𑀤𑀺𑀲𑀦𑀢𑁄 ‘‘𑀢𑀢𑁆𑀣 𑀢𑀢𑁆𑀣𑁂𑀯 𑀲𑀢𑁆𑀢𑀸𑀦𑀁 𑀉𑀘𑁆𑀙𑀺𑀚𑁆𑀚𑀦𑀢𑁄’’𑀢𑀺 𑀏𑀯𑀫𑀸𑀤𑀺 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀭𑀽𑀧𑀓𑀁 𑀅𑀧𑀤𑀺𑀲𑀺𑀢𑁆𑀯𑀸.

𑁪𑁦𑁮. 𑀆𑀧𑀦𑁆𑀦𑀸𑀦𑀥𑀺𑀧𑁆𑀧𑁂𑀢𑀢𑁆𑀣𑀯𑀺𑀲𑀬𑁂 𑀅𑀬𑀁 𑀧𑀼𑀭𑀸-𑀲𑀤𑁆𑀤𑀧𑀬𑁄𑀕𑁄𑀢𑀺 𑀆𑀳 ‘‘𑀧𑀼𑀭𑀸…𑀧𑁂… 𑀲𑀜𑁆𑀜𑀸𑀧𑁂𑀢𑀻𑀢𑀺 𑀬𑀸𑀯 𑀦 𑀲𑀜𑁆𑀜𑀸𑀧𑁂𑀢𑀻’’𑀢𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀉𑀧𑀫𑀸𑀯𑀡𑁆𑀡𑀦𑀸

𑁪𑁧𑁧. 𑀬𑀣𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀴𑀸𑀭𑀯𑀺𑀧𑀼𑀮𑁄𑀪𑀸𑀲𑀢𑀸𑀬 𑀅𑀜𑁆𑀜𑁂𑀦 𑀑𑀪𑀸𑀲𑁂𑀦 𑀅𑀦𑀪𑀺𑀪𑀯𑀦𑀻𑀬𑀸, 𑀏𑀯𑀫𑀬𑀫𑁆𑀧𑀺 𑀧𑀜𑁆𑀜𑀸𑀑𑀪𑀸𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀦𑁆𑀤𑀺𑀫…𑀧𑁂… 𑀅𑀜𑁆𑀜𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀆𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀺𑀢𑁆𑀢𑀓𑁂 𑀞𑀸𑀦𑁂 𑀏𑀢𑁂 𑀧𑀯𑀢𑁆𑀢𑁂𑀦𑁆𑀢𑀺, 𑀓𑀺𑀢𑁆𑀢𑀓𑀜𑁆𑀘 𑀞𑀸𑀦𑀁 𑀦𑁂𑀲𑀁 𑀆𑀪𑀸 𑀨𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀫𑁆𑀧𑀺 𑀘𑁄𑀤𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑀺𑀯𑁂𑀞𑁂𑀲𑁆𑀲𑀢𑀻𑀢𑀺 𑀆𑀩𑀦𑁆𑀥𑀺𑀲𑁆𑀲𑀢𑀺, 𑀅𑀦𑀼𑀬𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑁂𑀞𑁂𑀢𑀼𑀁 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀁 𑀘𑁄𑀤𑀦𑀁 𑀦𑀺𑀩𑁆𑀩𑁂𑀞𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸. 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀺𑀢𑀁 𑀲𑀗𑁆𑀖𑀸𑀢𑀦𑀁 𑀧𑀓𑁆𑀔𑀁 𑀧𑀝𑀺𑀚𑀸𑀦𑀦𑁆𑀢𑁄 ‘‘𑀧𑀭𑀲𑁆𑀫𑀺𑀁 𑀮𑁄𑀓𑁂, 𑀦 𑀇𑀫𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑀣𑀁 𑀧𑀦𑀸𑀬𑀁 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 ‘‘𑀤𑁂𑀯𑁄’’𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀤𑁂𑀯𑀸𑀧𑀺 𑀤𑁂𑀯𑀢𑁆𑀢𑀪𑀸𑀯𑁂𑀦𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀦𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀯𑀸 𑀅𑀲𑁆𑀲 𑀤𑀺𑀝𑁆𑀞𑀺, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀤𑁂𑀯𑀸 𑀢𑁂, 𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀘𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀯𑀁 𑀘𑀦𑁆𑀤𑁂𑀢𑀺 𑀘𑀦𑁆𑀤𑀯𑀺𑀫𑀸𑀦𑁂, 𑀦 𑀘 𑀘𑀦𑁆𑀤𑁂 𑀯𑀸 𑀓𑀣𑀺𑀬𑀦𑁆𑀢𑁂.

𑁪𑁧𑁨. 𑀆𑀩𑀸𑀥𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑀸. 𑀤𑀼𑀓𑁆𑀔𑀁 𑀲𑀜𑁆𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀤𑀼𑀓𑁆𑀔𑀺𑀢𑀸. 𑀲𑀤𑁆𑀥𑀸𑀬 𑀅𑀬𑀺𑀢𑀩𑁆𑀩𑀸 𑀲𑀤𑁆𑀥𑀸𑀬𑀺𑀓𑀸, 𑀲𑀤𑁆𑀥𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸. 𑀢𑁂𑀦𑀸𑀳 ‘‘𑀅𑀳𑀁 𑀢𑀼𑀫𑁆𑀳𑁂’’𑀢𑀺𑀆𑀤𑀺. 𑀧𑀘𑁆𑀘𑀬𑁄 𑀧𑀢𑁆𑀢𑀺𑀬𑀸𑀬𑀦𑀁 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀧𑀘𑁆𑀘𑀬𑀺𑀓𑀸.

𑀘𑁄𑀭𑀉𑀧𑀫𑀸𑀯𑀡𑁆𑀡𑀦𑀸

𑁪𑁧𑁩. 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀉𑀧𑁂𑀘𑁆𑀘 𑀤𑀲𑁆𑀲𑁂𑀢𑁆𑀯𑀸. 𑀓𑀫𑁆𑀫𑀓𑀸𑀭𑀡𑀺𑀓𑀲𑀢𑁆𑀢𑁂𑀲𑀽𑀢𑀺 𑀦𑁂𑀭𑀬𑀺𑀓𑀸𑀦𑀁 𑀲𑀗𑁆𑀖𑀸𑀢𑀦𑀓𑀲𑀢𑁆𑀢𑁂𑀲𑀼. 𑀓𑀫𑁆𑀫𑀫𑁂𑀯𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀦𑁂𑀭𑀬𑀺𑀓𑁂𑀳𑀺 𑀓𑀢𑀓𑀫𑁆𑀫𑀫𑁂𑀯. 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀢𑀻𑀢𑀺 𑀆𑀬𑀽𑀳𑀦𑀸𑀦𑀼𑀭𑀽𑀧𑀁 𑀢𑀁 𑀢𑀁 𑀓𑀸𑀭𑀡𑀁 𑀓𑀭𑁄𑀢𑀺, 𑀢𑀣𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀭𑀬𑀧𑀸𑀮𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀢𑀢𑁆𑀣 𑀲𑀩𑁆𑀩𑀁 𑀦𑀺𑀭𑀬𑀓𑀡𑁆𑀟𑀧𑀸𑀴𑀺𑀁 (𑀫. 𑀦𑀺. 𑁩.𑁨𑁫𑁯) 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀼𑀢𑁆𑀢𑀢𑁄 (𑀫. 𑀦𑀺. 𑁩.𑁨𑁫𑁯) 𑀦𑀺𑀭𑀬𑀧𑀸𑀮𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀺𑀢𑁄𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀭𑀬𑀺𑀓𑁂 𑀦𑀺𑀭𑀬𑁂 𑀧𑀸𑀮𑁂𑀦𑁆𑀢𑀺 𑀢𑀢𑁄 𑀦𑀺𑀕𑁆𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀭𑀬𑀧𑀸𑀮𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀧𑀜𑁆𑀘𑀲𑀽𑀤𑀦𑀻𑀝𑀻𑀓𑀸𑀬𑀁 𑀕𑀳𑁂𑀢𑀩𑁆𑀩𑀁.

𑀕𑀽𑀣𑀓𑀽𑀧𑀧𑀼𑀭𑀺𑀲𑀉𑀧𑀫𑀸𑀯𑀡𑁆𑀡𑀦𑀸

𑁪𑁧𑁫. 𑀦𑀺𑀫𑁆𑀫𑀚𑁆𑀚𑀣𑀸𑀢𑀺 𑀦𑀺𑀭𑀯𑀲𑁂𑀲𑀢𑁄 𑀫𑀚𑁆𑀚𑀣 𑀲𑁄𑀥𑁂𑀣. 𑀢𑀁 𑀧𑀦 𑀢𑀲𑁆𑀲 𑀢𑀲𑁆𑀲 𑀕𑀽𑀣𑀲𑁆𑀲 𑀢𑀣𑀸 𑀲𑁄𑀥𑀦𑀁 𑀅𑀧𑀦𑀬𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀧𑀦𑁂𑀣𑀸’’𑀢𑀺.

𑀅𑀲𑀼𑀘𑀻𑀢𑀺 𑀅𑀲𑀼𑀤𑁆𑀥𑁄, 𑀲𑁄 𑀧𑀦 𑀬𑀲𑁆𑀫𑀸 𑀫𑀦𑀯𑀟𑁆𑀠𑀦𑀓𑁄 𑀫𑀦𑁄𑀳𑀭𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀆𑀳 ‘‘𑀅𑀫𑀦𑀸𑀧𑁄’’𑀢𑀺. 𑀅𑀲𑀼𑀘𑀺𑀲𑀗𑁆𑀔𑀸𑀢𑀁 𑀅𑀲𑀼𑀘𑀺𑀪𑀸𑀕𑀢𑀁 𑀅𑀢𑁆𑀢𑀦𑁄 𑀲𑀪𑀸𑀯𑀢𑀁 𑀕𑀢𑁄 𑀧𑀢𑁆𑀢𑁄𑀢𑀺 𑀅𑀲𑀼𑀘𑀺𑀲𑀗𑁆𑀔𑀸𑀢𑁄𑀢𑀺 𑀆𑀳 ‘‘𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀪𑀽𑀢𑁄’’𑀢𑀺. 𑀤𑀼𑀕𑁆𑀕𑀦𑁆𑀥𑁄𑀢𑀺 𑀤𑀼𑀝𑁆𑀞𑀕𑀦𑁆𑀥𑁄 𑀅𑀦𑀺𑀝𑁆𑀞𑀕𑀦𑁆𑀥𑁄, 𑀲𑁄 𑀧𑀦 𑀦 𑀬𑁄 𑀓𑁄𑀘𑀺, 𑀅𑀣 𑀔𑁄 𑀧𑀽𑀢𑀺𑀕𑀦𑁆𑀥𑁄𑀢𑀺 𑀆𑀳 ‘‘𑀓𑀼𑀡𑀧𑀕𑀦𑁆𑀥𑁄’’𑀢𑀺. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀬𑀼𑀢𑁆𑀢𑁄𑀢𑀺 𑀳𑀻𑀴𑀺𑀢𑀩𑁆𑀩𑀬𑀼𑀢𑁆𑀢𑁄. 𑀧𑀝𑀺𑀓𑀽𑀮𑁄 𑀖𑀸𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀝𑀺𑀓𑀽𑀮𑀭𑀽𑀧𑁄. 𑀉𑀩𑁆𑀩𑀸𑀥𑀢𑀻𑀢𑀺 𑀉𑀧𑀭𑀽𑀧𑀭𑀺 𑀩𑀸𑀥𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀕𑀦𑁆𑀥𑁄…𑀧𑁂… 𑀩𑀸𑀥𑀢𑀺 𑀅𑀢𑀺𑀯𑀺𑀬 𑀅𑀲𑀼𑀘𑀺𑀲𑀪𑀸𑀯𑀢𑁆𑀢𑀸, 𑀅𑀲𑀼𑀘𑀺𑀫𑁆𑀳𑀺𑀬𑁂𑀯 𑀚𑀸𑀢𑀲𑀁𑀯𑀤𑁆𑀥𑀦𑀪𑀸𑀯𑀢𑁄, 𑀤𑁂𑀯𑀸𑀦𑀜𑁆𑀘 𑀖𑀸𑀦𑀧𑀲𑀸𑀤𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀢𑁄.

𑁪𑁧𑁬. 𑀤𑀽𑀭𑁂 𑀦𑀺𑀩𑁆𑀩𑀢𑁆𑀢𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀆𑀤𑀬𑁄.

𑁪𑁧𑁯. 𑀲𑀼𑀦𑁆𑀤𑀭𑀥𑀫𑁆𑀫𑁂𑀢𑀺 𑀲𑁄𑀪𑀦𑀕𑀼𑀡𑁂. 𑀲𑀼𑀕𑀢𑀺𑀲𑀼𑀔𑀦𑁆𑀢𑀺 𑀲𑀼𑀕𑀢𑀺 𑀘𑁂𑀯 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀲𑀼𑀔𑀜𑁆𑀘.

𑀕𑀩𑁆𑀪𑀺𑀦𑀻𑀉𑀧𑀫𑀸𑀯𑀡𑁆𑀡𑀦𑀸

𑁪𑁨𑁦. 𑀧𑀼𑀜𑁆𑀜𑀓𑀫𑁆𑀫𑀢𑁄 𑀏𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑁄, 𑀲𑀼𑀔𑀁. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀬𑁄, 𑀤𑀼𑀓𑁆𑀔𑀁. 𑀅𑀧𑀓𑁆𑀓𑀦𑁆𑀢𑀺 𑀦 𑀲𑀺𑀤𑁆𑀥𑀁 𑀦 𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀁. 𑀦 𑀧𑀭𑀺𑀧𑀸𑀘𑁂𑀦𑁆𑀢𑀺 𑀦 𑀦𑀺𑀝𑁆𑀞𑀸𑀦𑀁 𑀧𑀸𑀧𑁂𑀦𑁆𑀢𑀺. 𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺 𑀅𑀢𑁆𑀢𑀯𑀺𑀦𑀺𑀧𑀸𑀢𑀲𑁆𑀲 𑀲𑀸𑀯𑀚𑁆𑀚𑀪𑀸𑀯𑀢𑁄. 𑀆𑀕𑀫𑁂𑀦𑁆𑀢𑀻𑀢𑀺 𑀉𑀤𑀺𑀓𑁆𑀔𑀦𑁆𑀢𑀺. 𑀦𑀺𑀩𑁆𑀩𑀺𑀲𑀦𑁆𑀢𑀺 𑀬𑀲𑁆𑀲 𑀧𑀦 𑀢𑀁 𑀓𑀫𑁆𑀫𑀨𑀮𑀁 𑀦𑀺𑀩𑁆𑀩𑀺𑀲𑀦𑁆𑀢𑁄 𑀦𑀺𑀬𑀼𑀜𑁆𑀚𑀦𑁆𑀢𑁄, 𑀦𑀺𑀩𑁆𑀩𑀺𑀲𑀦𑁆𑀢𑀺 𑀯𑀸 𑀦𑀺𑀩𑁆𑀩𑁂𑀲𑀁 𑀯𑁂𑀢𑀦𑀁 𑀧𑀝𑀺𑀓𑀗𑁆𑀔𑀦𑁆𑀢𑁄 𑀪𑀢𑀧𑀼𑀭𑀺𑀲𑁄 𑀬𑀣𑀸.

𑁪𑁨𑁧. 𑀉𑀩𑁆𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀯𑀟𑁆𑀠𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀺𑀦𑁆𑀤𑀺𑀢𑁆𑀯𑀸’’𑀢𑀺.

𑀲𑀼𑀧𑀺𑀦𑀓𑀉𑀧𑀫𑀸𑀯𑀡𑁆𑀡𑀦𑀸

𑁪𑁨𑁨. ‘‘𑀦𑀺𑀓𑁆𑀔𑀫𑀦𑁆𑀢𑀁 𑀯𑀸 𑀧𑀯𑀺𑀲𑀦𑁆𑀢𑀁 𑀯𑀸 𑀚𑀻𑀯’’𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 ‘‘𑀲𑀢𑁆𑀢𑀸𑀦𑀁 𑀲𑀼𑀧𑀺𑀦𑀤𑀲𑁆𑀲𑀦𑀓𑀸𑀮𑁂 𑀅𑀢𑁆𑀢𑀪𑀸𑀯𑀢𑁄 𑀚𑀻𑀯𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁𑀢𑀁𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦𑀤𑁂𑀯 𑀅𑀢𑁆𑀢𑀪𑀸𑀯𑀁 𑀅𑀦𑀼𑀧𑀯𑀺𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀺𑀘𑁆𑀙𑀸𑀕𑀸𑀳𑀯𑀺𑀧𑀮𑁆𑀮𑀢𑁆𑀢𑀘𑀺𑀢𑁆𑀢𑁄. 𑀅𑀣𑀲𑁆𑀲 𑀣𑁂𑀭𑁄 𑀔𑀼𑀤𑁆𑀤𑀓𑀸𑀬 𑀆𑀡𑀺𑀬𑀸 𑀯𑀺𑀧𑀼𑀮𑀁 𑀆𑀡𑀺𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀚𑀻𑀯𑀲𑀫𑀜𑁆𑀜𑀸𑀫𑀼𑀔𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀦𑀻𑀳𑀭𑀺𑀢𑀼𑀓𑀸𑀫𑁄 ‘‘𑀅𑀧𑀺 𑀦𑀼 𑀢𑀸 𑀢𑀼𑀬𑁆𑀳𑀁 𑀚𑀻𑀯𑀁 𑀧𑀲𑁆𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀁 𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸’’𑀢𑀺 𑀆𑀳. 𑀬𑀢𑁆𑀣 𑀧𑀦 𑀢𑀣𑀸𑀭𑀽𑀧𑀸 𑀚𑀻𑀯𑀲𑀫𑀜𑁆𑀜𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀸𑀘𑀸𑀭𑀁 𑀚𑀻𑀯𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳𑀸’’𑀢𑀺 𑀯𑀼𑀢𑁆𑀢𑀁.

𑁪𑁨𑁩. 𑀯𑁂𑀞𑁂𑀢𑁆𑀯𑀸𑀢𑀺 𑀯𑁂𑀔𑀤𑀸𑀦𑀲𑀗𑁆𑀔𑁂𑀧𑁂𑀦 𑀯𑁂𑀞𑁂𑀢𑁆𑀯𑀸. 𑀘𑀯𑀦𑀓𑀸𑀮𑁂𑀢𑀺 𑀘𑀯𑀦𑀲𑁆𑀲 𑀘𑀼𑀢𑀺𑀬𑀸 𑀧𑀢𑁆𑀢𑀓𑀸𑀮𑁂, 𑀦 𑀘𑀯𑀫𑀸𑀦𑀓𑀸𑀮𑁂. 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯𑀸𑀢𑀺 𑀓𑀢𑀺𑀧𑀬𑀭𑀽𑀧𑀥𑀫𑁆𑀫𑀲𑀗𑁆𑀖𑀸𑀢𑀫𑀢𑁆𑀢𑀫𑁂𑀯. 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑀫𑁂𑀯 𑀳𑀺 𑀢𑀤𑀸 𑀮𑀩𑁆𑀪𑀢𑀺, 𑀫𑀢𑁆𑀢-𑀲𑀤𑁆𑀤𑁄 𑀯𑀸 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦 𑀓𑀫𑁆𑀫𑀚𑀸𑀤𑀺𑀢𑀺𑀲𑀦𑁆𑀢𑀢𑀺𑀭𑀽𑀧𑀯𑀺𑀲𑁂𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀧𑁆𑀧𑀯𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑁂 𑀧𑀦 𑀚𑀻𑀯𑀲𑀜𑁆𑀜𑀻, 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺 𑀆𑀳, 𑀢𑀢𑁆𑀣 𑀅𑀦𑀼𑀧𑀮𑀩𑁆𑀪𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀦𑁆𑀢𑀢𑁆𑀢𑀅𑀬𑁄𑀕𑀼𑀴𑀉𑀧𑀫𑀸𑀯𑀡𑁆𑀡𑀦𑀸

𑁪𑁨𑁪. 𑀯𑀽𑀧𑀲𑀦𑁆𑀢𑀢𑁂𑀚𑀦𑁆𑀢𑀺 𑀯𑀺𑀕𑀢𑀼𑀲𑁆𑀫𑀁.

𑁪𑁨𑁫. 𑀆𑀫𑀢𑁄𑀢𑀺 𑀏𑀢𑁆𑀣 𑀆-𑀲𑀤𑁆𑀤𑁄 𑀆𑀫𑀺𑀲-𑀲𑀤𑁆𑀤𑁄 𑀯𑀺𑀬 𑀉𑀧𑀟𑁆𑀠𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀤𑁆𑀥𑀫𑀢𑁄’’𑀢𑀺, 𑀆𑀫𑀢𑁄𑀢𑀺 𑀯𑀸 𑀈𑀲𑀁 𑀤𑀭𑀣𑁂𑀦 𑀉𑀲𑁆𑀫𑀦𑀸 𑀬𑀼𑀢𑁆𑀢𑀫𑀭𑀡𑁄 𑀫𑀭𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀻𑀬𑀫𑀸𑀦𑁄 𑀳𑀺 𑀅𑀯𑀺𑀕𑀢𑀼𑀲𑁆𑀫𑁄 𑀳𑁄𑀢𑀺, 𑀦 𑀫𑀢𑁄 𑀯𑀺𑀬 𑀯𑀺𑀕𑀢𑀼𑀲𑁆𑀫𑁄. 𑀢𑁂𑀦𑀸𑀳 ‘‘𑀫𑀭𑀺𑀢𑀼𑀁 𑀆𑀭𑀤𑁆𑀥𑁄 𑀳𑁄𑀢𑀻’’𑀢𑀺. 𑀢𑀣𑀸 𑀭𑀽𑀧𑀲𑁆𑀲 𑀑𑀥𑀼𑀦𑀦𑀁 𑀦𑀸𑀫𑀲𑁆𑀲 𑀑𑀭𑀢𑁄 𑀧𑀭𑀺𑀯𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀑𑀭𑀢𑁄 𑀓𑀭𑁄𑀣𑀸’’𑀢𑀺. 𑀑𑀭𑀢𑁄 𑀓𑀸𑀢𑀼𑀓𑀸𑀫𑀲𑁆𑀲 𑀧𑀦 𑀲𑀁𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀼𑀦𑀦𑀁, 𑀢𑀁 𑀧𑀦 𑀧𑀭𑀢𑁄 𑀓𑀭𑀡𑀦𑁆𑀢𑀺 𑀆𑀳 ‘‘𑀧𑀭𑀢𑁄 𑀓𑀭𑁄𑀣𑀸’’𑀢𑀺. 𑀧𑀭𑀫𑀼𑀔𑀁 𑀓𑀢𑀲𑁆𑀲 𑀇𑀢𑁄 𑀘𑀺𑀢𑁄 𑀧𑀭𑀺𑀯𑀢𑁆𑀢𑀦𑀁 𑀦𑀺𑀤𑁆𑀥𑀼𑀦𑀦𑀦𑁆𑀢𑀺 𑀆𑀳 ‘‘𑀅𑀧𑀭𑀸𑀧𑀭𑀁 𑀓𑀭𑁄𑀣𑀸’’𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀭𑀺𑀪𑀺𑀦𑁆𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀜𑁆𑀘𑀸𑀬𑀢𑀦𑀁 𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀗𑁆𑀔𑀥𑀫𑀉𑀧𑀫𑀸𑀯𑀡𑁆𑀡𑀦𑀸

𑁪𑁨𑁬. 𑀲𑀗𑁆𑀔𑀁 𑀥𑀫𑀢𑀺, 𑀥𑀫𑀸𑀧𑁂𑀢𑀻𑀢𑀺 𑀯𑀸 𑀲𑀗𑁆𑀔𑀥𑀫𑁄. 𑀉𑀧𑀮𑀸𑀧𑁂𑀢𑁆𑀯𑀸𑀢𑀺 𑀉𑀧𑀭𑀽𑀧𑀭𑀺 𑀲𑀤𑁆𑀤𑀬𑁄𑀕𑀯𑀲𑁂𑀦 𑀲𑀮𑁆𑀮𑀸𑀧𑁂𑀢𑁆𑀯𑀸, 𑀲𑀤𑁆𑀤𑀬𑀼𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀅𑀢𑁆𑀣𑀢𑁄 𑀥𑀫𑀦𑀫𑁂𑀯𑀸𑀢𑀺 𑀆𑀳 ‘‘𑀥𑀫𑀺𑀢𑁆𑀯𑀸’’𑀢𑀺.

𑀅𑀕𑁆𑀕𑀺𑀓𑀚𑀝𑀺𑀮𑀉𑀧𑀫𑀸𑀯𑀡𑁆𑀡𑀦𑀸

𑁪𑁨𑁮. 𑀆𑀳𑀺𑀢𑁄 𑀅𑀕𑁆𑀕𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀕𑁆𑀕𑀺𑀓𑁄, 𑀲𑁆𑀯𑀸𑀲𑁆𑀲 𑀅𑀕𑁆𑀕𑀺𑀓𑀪𑀸𑀯𑁄 𑀬𑀲𑁆𑀫𑀸 𑀅𑀕𑁆𑀕𑀺𑀳𑀼𑀢𑀫𑀸𑀮𑀸𑀯𑁂𑀤𑀺𑀲𑀫𑁆𑀧𑀸𑀤𑀦𑁂𑀳𑀺 𑀘𑁂𑀯 𑀇𑀦𑁆𑀥𑀦𑀥𑀽𑀫𑀩𑀭𑀺𑀳𑀺𑀲𑀲𑀧𑁆𑀧𑀺𑀢𑁂𑀮𑀽𑀧𑀳𑀭𑀡𑁂𑀳𑀺 𑀩𑀮𑀺𑀧𑀼𑀧𑁆𑀨𑀥𑀽𑀫𑀕𑀦𑁆𑀥𑀸𑀤𑀺𑀉𑀧𑀳𑀸𑀭𑁂𑀳𑀺 𑀘 𑀢𑀲𑁆𑀲 𑀧𑀬𑀺𑀭𑀼𑀧𑀸𑀲𑀦𑀸𑀬 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀺𑀧𑀭𑀺𑀘𑀸𑀭𑀓𑁄’’𑀢𑀺. 𑀆𑀬𑀼𑀁 𑀧𑀸𑀧𑀼𑀡𑀸𑀧𑁂𑀬𑁆𑀬𑀦𑁆𑀢𑀺 𑀬𑀣𑀸 𑀘𑀺𑀭𑀚𑀻𑀯𑀻 𑀳𑁄𑀢𑀺, 𑀏𑀯𑀁 𑀆𑀬𑀼𑀁 𑀧𑀘𑁆𑀙𑀺𑀫𑀯𑀬𑀁 𑀧𑀸𑀧𑁂𑀬𑁆𑀬𑀁. 𑀯𑀟𑁆𑀠𑀺𑀁 𑀕𑀫𑁂𑀬𑁆𑀬𑀦𑁆𑀢𑀺 𑀲𑀭𑀻𑀭𑀸𑀯𑀬𑀯𑁂, 𑀕𑀼𑀡𑀸𑀯𑀬𑀯𑁂 𑀘 𑀨𑀸𑀢𑀺𑀁 𑀧𑀸𑀧𑁂𑀬𑁆𑀬𑀁. 𑀅𑀭𑀡𑀻 𑀬𑀼𑀕𑀴𑀦𑁆𑀢𑀺 𑀉𑀢𑁆𑀢𑀭𑀸𑀭𑀡𑀻, 𑀅𑀥𑀭𑀸𑀭𑀡𑀻𑀢𑀺 𑀅𑀭𑀡𑀻𑀤𑁆𑀯𑀬𑀁.

𑁪𑁨𑁯. 𑀏𑀯𑀦𑁆𑀢𑀺 ‘‘𑀩𑀸𑀮𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄’’𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦. 𑀢𑀬𑀸𑀢𑀺 𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀼𑀢𑁆𑀢𑀬𑀼𑀢𑁆𑀢𑀓𑀸𑀭𑀡𑀫𑀓𑁆𑀔𑀮𑀓𑁆𑀔𑀡𑁂𑀦𑀸𑀢𑀺 𑀯𑀼𑀢𑁆𑀢𑀬𑀼𑀢𑁆𑀢𑀓𑀸𑀭𑀡𑀲𑁆𑀲 𑀫𑀓𑁆𑀔𑀦𑀲𑀪𑀸𑀯𑁂𑀦. 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦𑀸𑀢𑀺 𑀲𑀫𑀥𑀼𑀭𑀕𑁆𑀕𑀳𑀡𑀮𑀓𑁆𑀔𑀡𑁂𑀦. 𑀧𑀮𑀸𑀲𑁂𑀦𑀸𑀢𑀺 𑀧𑀮𑀸𑀲𑁂𑀢𑀻𑀢𑀺 𑀧𑀮𑀸𑀲𑁄, 𑀧𑀭𑀲𑁆𑀲 𑀕𑀼𑀡𑁂 𑀉𑀢𑁆𑀢𑀭𑀺𑀢𑀭𑁂 𑀟𑀁𑀲𑀺𑀢𑁆𑀯𑀸 𑀯𑀺𑀬 𑀙𑀟𑁆𑀟𑁂𑀦𑁆𑀢𑁄 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀓𑀭𑀡𑀭𑀲𑁄 𑀳𑀺 𑀧𑀮𑀸𑀲𑁄, 𑀢𑁂𑀦 𑀧𑀮𑀸𑀲𑁂𑀦.

𑀤𑁆𑀯𑁂𑀲𑀢𑁆𑀣𑀯𑀸𑀳𑀉𑀧𑀫𑀸𑀯𑀡𑁆𑀡𑀦𑀸

𑁪𑁩𑁦. 𑀳𑀭𑀺𑀢𑀓𑀧𑀢𑁆𑀢𑀦𑁆𑀢𑀺 𑀳𑀭𑀺𑀢𑀩𑁆𑀩𑀧𑀢𑁆𑀢𑀁, 𑀅𑀧𑁆𑀧𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀲𑀦𑁆𑀦𑀤𑁆𑀥𑀥𑀦𑀼𑀓𑀮𑀸𑀧𑀦𑁆𑀢𑀺 𑀏𑀢𑁆𑀣 𑀓𑀮𑀸𑀧𑀦𑁆𑀢𑀺 𑀢𑀽𑀡𑀻𑀭𑀫𑀸𑀳, 𑀢𑀜𑁆𑀘 𑀲𑀦𑁆𑀦𑀬𑁆𑀳𑀢𑁄 𑀥𑀦𑀼𑀦𑀸 𑀯𑀺𑀦𑀸 𑀦 𑀲𑀦𑁆𑀦𑀬𑁆𑀳𑀢𑀻𑀢𑀺 𑀆𑀳 ‘‘𑀲𑀦𑁆𑀦𑀤𑁆𑀥𑀥𑀦𑀼𑀓𑀮𑀸𑀧’’𑀦𑁆𑀢𑀺. 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀻𑀢𑀺 𑀕𑀫𑀦𑀫𑀕𑁆𑀕𑀸 𑀘𑁂𑀯 𑀢𑀁𑀢𑀁𑀉𑀤𑀓𑀫𑀕𑁆𑀕𑀸 𑀘 𑀲𑀫𑁆𑀫𑀤𑁂𑀯 𑀤𑁂𑀯𑁂𑀦 𑀨𑀼𑀝𑁆𑀞𑀢𑁆𑀢𑀸 𑀢𑀳𑀁 𑀢𑀳𑀁 𑀧𑀕𑁆𑀖𑀭𑀺𑀢𑀉𑀤𑀓 𑀲𑀦𑁆𑀤𑀫𑀸𑀦𑀉𑀤𑀓𑀸. 𑀢𑁂𑀦𑀸𑀳 ‘‘𑀧𑀭𑀺𑀧𑀼𑀡𑁆𑀡𑀲𑀮𑀺𑀮𑀸 𑀫𑀕𑁆𑀕𑀸 𑀘 𑀓𑀦𑁆𑀤𑀭𑀸 𑀘𑀸’’𑀢𑀺.

𑀬𑀣𑀸𑀪𑀢𑁂𑀦𑀸𑀢𑀺 𑀲𑀓𑀝𑁂𑀲𑀼 𑀬𑀣𑀸𑀞𑀧𑀺𑀢𑁂𑀦, 𑀬𑀣𑀸 ‘‘𑀅𑀫𑁆𑀫 𑀇𑀢𑁄 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀞𑀧𑁂𑀲𑀻𑀢𑀺 𑀅𑀢𑁆𑀣𑁄 𑀓𑀭𑀡𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀸𑀘𑀻𑀪𑀸𑀯𑀢𑁄. 𑀢𑀲𑁆𑀫𑀸 𑀬𑀣𑀸𑀭𑁄𑀧𑀺𑀢𑁂𑀦, 𑀬𑀣𑀸𑀕𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀅𑀓𑁆𑀔𑀥𑀼𑀢𑁆𑀢𑀓𑀉𑀧𑀫𑀸𑀯𑀡𑁆𑀡𑀦𑀸

𑁪𑁩𑁪. 𑀧𑀭𑀸𑀚𑀬𑀕𑀼𑀴𑀦𑁆𑀢𑀺 𑀬𑁂𑀦 𑀕𑀼𑀴𑁂𑀦, 𑀬𑀸𑀬 𑀲𑀮𑀸𑀓𑀸𑀬 𑀞𑀺𑀢𑀸𑀬 𑀘 𑀧𑀭𑀸𑀚𑀬𑁄 𑀳𑁄𑀢𑀺, 𑀢𑀁 𑀅𑀤𑀲𑁆𑀲𑀦𑀁 𑀕𑀫𑁂𑀦𑁆𑀢𑁄 𑀕𑀺𑀮𑀢𑀺.𑀧𑀚𑁆𑀚𑁄𑀳𑀦𑀦𑁆𑀢𑀺 𑀧𑀓𑀸𑀭𑁂𑀳𑀺 𑀚𑀼𑀳𑀦𑀓𑀫𑁆𑀫𑀁. 𑀢𑀁 𑀧𑀦 𑀩𑀮𑀺𑀤𑀸𑀦𑀯𑀲𑁂𑀦 𑀓𑀭𑀻𑀬𑀢𑀻𑀢𑀺 𑀆𑀳 ‘‘𑀩𑀮𑀺𑀓𑀫𑁆𑀫’’𑀦𑁆𑀢𑀺.

𑀲𑀸𑀡𑀪𑀸𑀭𑀺𑀓𑀉𑀧𑀫𑀸𑀯𑀡𑁆𑀡𑀦𑀸

𑁪𑁩𑁬. 𑀕𑀸𑀫𑀧𑀢𑁆𑀢𑀦𑁆𑀢𑀺 𑀕𑀸𑀫𑁄 𑀏𑀯 𑀳𑀼𑀢𑁆𑀯𑀸 𑀆𑀧𑀚𑁆𑀚𑀺𑀢𑀩𑁆𑀩𑀁, 𑀲𑀼𑀜𑁆𑀜𑀪𑀸𑀯𑁂𑀦 𑀅𑀦𑀸𑀯𑀲𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀯𑀼𑀝𑁆𑀞𑀺𑀢𑀕𑀸𑀫𑀧𑀤𑁂𑀲𑁄’’𑀢𑀺. 𑀕𑀸𑀫𑀧𑀤𑀦𑁆𑀢𑀺 𑀬𑀣𑀸 𑀧𑀼𑀭𑀺𑀲𑀲𑁆𑀲 𑀧𑀸𑀤𑀦𑀺𑀓𑁆𑀔𑀺𑀢𑁆𑀢𑀝𑁆𑀞𑀸𑀦𑀁 𑀅𑀥𑀺𑀕𑀢𑀧𑀭𑀺𑀘𑁆𑀙𑁂𑀤𑀁 ‘‘𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀕𑀸𑀫𑀯𑀸𑀲𑀻𑀳𑀺 𑀆𑀯𑀲𑀺𑀢𑀝𑁆𑀞𑀸𑀦𑀁 𑀅𑀥𑀺𑀕𑀢𑀦𑀺𑀯𑀼𑀢𑁆𑀣𑀸𑀕𑀸𑀭𑀁 ‘‘𑀕𑀸𑀫𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺. 𑀲𑀼𑀲𑀦𑁆𑀦𑀤𑁆𑀥𑁄𑀢𑀺 𑀲𑀼𑀔𑁂𑀦 𑀕𑀳𑁂𑀢𑁆𑀯𑀸 𑀕𑀫𑀦𑀬𑁄𑀕𑁆𑀬𑀢𑀸𑀯𑀲𑁂𑀦 𑀲𑀼𑀝𑁆𑀞𑀼 𑀲𑀚𑁆𑀚𑀺𑀢𑁄. 𑀢𑀁 𑀧𑀦 𑀲𑀼𑀲𑀚𑁆𑀚𑀦𑀁 𑀲𑀼𑀝𑁆𑀞𑀼 𑀩𑀦𑁆𑀥𑀦𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀲𑀼𑀩𑀤𑁆𑀥𑁄’’𑀢𑀺.

𑀅𑀬𑀸𑀤𑀻𑀦𑀫𑁆𑀧𑀺 𑀮𑁄𑀳𑀪𑀸𑀯𑁂 𑀲𑀢𑀺𑀧𑀺 𑀮𑁄𑀳-𑀲𑀤𑁆𑀤𑁄 𑀲𑀸𑀲𑀦𑁂 𑀢𑀫𑁆𑀩𑀮𑁄𑀳𑁂 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀮𑁄𑀳𑀦𑁆𑀢𑀺 𑀢𑀫𑁆𑀩𑀮𑁄𑀳’’𑀦𑁆𑀢𑀺.

𑀲𑀭𑀡𑀕𑀫𑀦𑀯𑀡𑁆𑀡𑀦𑀸

𑁪𑁩𑁭. 𑀅𑀪𑀺𑀭𑀤𑁆𑀥𑁄𑀢𑀺 𑀆𑀭𑀸𑀥𑀺𑀢𑀘𑀺𑀢𑁆𑀢𑁄, 𑀲𑀸𑀲𑀦𑀲𑁆𑀲 𑀆𑀭𑀸𑀥𑀺𑀢𑀘𑀺𑀢𑁆𑀢𑀢𑀸 𑀧𑀲𑀻𑀤𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀅𑀪𑀺𑀧𑁆𑀧𑀲𑀦𑁆𑀦𑁄’’𑀢𑀺. 𑀧𑀜𑁆𑀳𑀼𑀧𑀝𑁆𑀞𑀸𑀦𑀸𑀦𑀻𑀢𑀺 𑀧𑀜𑁆𑀳𑁂𑀲𑀼 𑀉𑀧𑀝𑁆𑀞𑀸𑀦𑀸𑀦𑀺 𑀫𑀬𑀸 𑀧𑀼𑀘𑁆𑀙𑀺𑀢𑀢𑁆𑀣𑁂𑀲𑀼 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀜𑀸𑀡𑀼𑀧𑀝𑁆𑀞𑀸𑀦𑀸𑀦𑀺.

𑀬𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁪𑁩𑁮. 𑀲𑀗𑁆𑀖𑀸𑀢𑀦𑁆𑀢𑀺 𑀲𑀁-𑀲𑀤𑁆𑀤𑁄 𑀧𑀤𑀯𑀟𑁆𑀠𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀖𑀸𑀢’’𑀦𑁆𑀢𑀺. 𑀯𑀺𑀧𑀸𑀓𑀨𑀮𑁂𑀦𑀸𑀢𑀺 𑀲𑀤𑀺𑀲𑀨𑀮𑁂𑀦. 𑀫𑀳𑀧𑁆𑀨𑀮𑁄 𑀦 𑀳𑁄𑀢𑀺 𑀕𑀯𑀸𑀤𑀺𑀧𑀸𑀡𑀖𑀸𑀢𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀕𑀼𑀡𑀸𑀦𑀺𑀲𑀁𑀲𑁂𑀦𑀸𑀢𑀺 𑀉𑀤𑁆𑀤𑀬𑀨𑀮𑁂𑀦. 𑀆𑀦𑀼𑀪𑀸𑀯𑀚𑀼𑀢𑀺𑀬𑀸𑀢𑀺 𑀧𑀝𑀺𑀧𑀓𑁆𑀔𑀯𑀺𑀕𑀫𑀦𑀚𑀦𑀺𑀢𑁂𑀦 𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀢𑁂𑀚𑁂𑀦. 𑀦 𑀫𑀳𑀸𑀚𑀼𑀢𑀺𑀓𑁄 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀢𑁄. 𑀯𑀺𑀧𑀸𑀓𑀯𑀺𑀧𑁆𑀨𑀸𑀭𑀢𑀸𑀬𑀸𑀢𑀺 𑀯𑀺𑀧𑀸𑀓𑀨𑀮𑀲𑁆𑀲 𑀯𑀺𑀧𑀼𑀮𑀢𑀸𑀬, 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼𑀔𑁂𑀢𑁆𑀢𑁂𑀢𑀺 𑀉𑀲𑀪𑀸𑀤𑀺𑀤𑁄𑀲𑁂𑀳𑀺 𑀤𑀽𑀲𑀺𑀢𑀔𑁂𑀢𑁆𑀢𑁂, 𑀢𑀁 𑀧𑀦 𑀯𑀧𑁆𑀧𑀸𑀪𑀸𑀯𑀢𑁄 𑀅𑀲𑀸𑀭𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀲𑁆𑀲𑀸𑀭𑀔𑁂𑀢𑁆𑀢𑁂’’𑀢𑀺. 𑀤𑀼𑀩𑁆𑀪𑀽𑀫𑁂𑀢𑀺 𑀓𑀼𑀘𑁆𑀙𑀺𑀢𑀪𑀽𑀫𑀺𑀪𑀸𑀕𑁂, 𑀲𑁆𑀯𑀸𑀲𑁆𑀲 𑀓𑀼𑀘𑁆𑀙𑀺𑀢𑀪𑀸𑀯𑁄 𑀅𑀲𑀸𑀭𑀢𑀸𑀬 𑀯𑀸 𑀲𑀺𑀬𑀸 𑀦𑀺𑀦𑁆𑀦𑀢𑀸𑀤𑀺𑀤𑁄𑀲𑀯𑀲𑁂𑀦 𑀯𑀸. 𑀢𑀢𑁆𑀣 𑀧𑀞𑀫𑁄 𑀧𑀓𑁆𑀔𑁄 𑀧𑀞𑀫𑀧𑀤𑁂𑀦 𑀤𑀲𑁆𑀲𑀺𑀢𑁄𑀢𑀺 𑀇𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑀫𑀪𑀽𑀫𑀺𑀪𑀸𑀕𑁂’’𑀢𑀺 𑀆𑀳. 𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺𑀦𑀸 𑀙𑀺𑀦𑁆𑀦𑀪𑀺𑀦𑁆𑀦𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀕𑁄𑀫𑀬𑀮𑁂𑀧𑀤𑀸𑀦𑀸𑀤𑀺𑀲𑀼𑀔𑁂𑀦 𑀅𑀲𑀼𑀓𑁆𑀔𑀸𑀧𑀺𑀢𑀢𑁆𑀢𑀸 𑀧𑀽𑀢𑀺𑀪𑀸𑀯𑀁 𑀕𑀢𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀲𑀸𑀭𑀯𑀦𑁆𑀢𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀺𑀲𑁆𑀲𑀸𑀭𑀸𑀦𑀻’’𑀢𑀺. 𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀯𑀺𑀦𑀝𑁆𑀞𑀩𑀻𑀚𑀲𑀸𑀫𑀢𑁆𑀣𑀺𑀬𑀸𑀦𑀺. 𑀢𑁂𑀦𑀸𑀳 ‘‘𑀧𑀭𑀺𑀬𑀸𑀤𑀺𑀦𑁆𑀦𑀢𑁂𑀚𑀸𑀦𑀻’’𑀢𑀺. 𑀬𑀁 𑀬𑀣𑀸𑀚𑀸𑀢𑀯𑀻𑀳𑀺𑀆𑀤𑀺𑀕𑀢𑁂𑀦 𑀢𑀡𑁆𑀟𑀼𑀮𑁂𑀦 𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀬𑁄𑀕𑁆𑀬𑀩𑀻𑀚𑀲𑀸𑀫𑀢𑁆𑀣𑀺𑀬𑀁, 𑀢𑀁 𑀢𑀡𑁆𑀟𑀼𑀮𑀲𑀸𑀭𑁄, 𑀢𑀲𑁆𑀲 𑀆𑀤𑀸𑀦𑀁 𑀕𑀳𑀡𑀁 𑀢𑀣𑀸𑀉𑀧𑁆𑀧𑀚𑁆𑀚𑀦𑀫𑁂𑀯. 𑀏𑀢𑀸𑀦𑀺 𑀧𑀦 𑀩𑀻𑀚𑀸𑀦𑀺 𑀦 𑀢𑀸𑀤𑀺𑀲𑀸𑀦𑀺 𑀔𑀡𑁆𑀟𑀸𑀤𑀺𑀤𑁄𑀲𑀯𑀦𑁆𑀢𑀢𑀸𑀬. 𑀥𑀸𑀭𑀸𑀬 𑀔𑁂𑀢𑁆𑀢𑁂 𑀅𑀦𑀼𑀧𑁆𑀧𑀯𑁂𑀲𑀦𑀁 𑀦𑀸𑀫 𑀯𑀲𑁆𑀲𑀦𑀫𑁂𑀯, 𑀢𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀲𑀫𑁆𑀫𑀸 𑀯𑀲𑁆𑀲𑁂𑀬𑁆𑀬𑀸’’𑀢𑀺. 𑀅𑀗𑁆𑀓𑀼𑀭𑀫𑀽𑀮𑀧𑀢𑁆𑀢𑀸𑀤𑀻𑀳𑀻𑀢𑀺 𑀘𑁂𑀢𑁆𑀣 𑀅𑀗𑁆𑀓𑀼𑀭𑀓𑀦𑁆𑀤𑀸𑀤𑀻𑀳𑀺 𑀉𑀤𑁆𑀥𑀁 𑀯𑀼𑀤𑁆𑀥𑀺𑀁, 𑀫𑀽𑀮𑀚𑀝𑀸𑀤𑀻𑀳𑀺 𑀳𑁂𑀝𑁆𑀞𑀸 𑀯𑀺𑀭𑀼𑀴𑁆𑀳𑀺𑀁, 𑀧𑀢𑁆𑀢𑀧𑀼𑀧𑁆𑀨𑀸𑀤𑀻𑀳𑀺 𑀲𑀫𑀦𑁆𑀢𑀢𑁄 𑀘 𑀯𑁂𑀧𑀼𑀮𑁆𑀮𑀦𑁆𑀢𑀺 𑀬𑁄𑀚𑀦𑀸.

𑀅𑀧𑀭𑀽𑀧𑀖𑀸𑀢𑁂𑀦𑀸𑀢𑀺 𑀧𑀭𑁂𑀲𑀁 𑀯𑀺𑀩𑀸𑀥𑀦𑁂𑀦. 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀢𑁄. 𑀕𑀯𑀸𑀤𑀺𑀖𑀸𑀢𑁂𑀦𑀧𑀺 𑀳𑀺 𑀢𑀢𑁆𑀣 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀖𑀸𑀲𑁄 𑀲𑀗𑁆𑀓𑀻𑀬𑀢𑀺. ‘‘𑀅𑀧𑀭𑀽𑀧𑀖𑀸𑀢𑀺𑀢𑀸𑀬𑀸’’𑀢𑀺 𑀇𑀤𑀁 𑀲𑀻𑀮𑀯𑀦𑁆𑀢𑀢𑀸𑀬 𑀓𑀸𑀭𑀡𑀯𑀘𑀦𑀁. 𑀕𑀼𑀡𑀸𑀢𑀺𑀭𑁂𑀓𑀦𑁆𑀢𑀺 𑀕𑀼𑀡𑀸𑀢𑀺𑀭𑀺𑀢𑁆𑀢𑀁, 𑀲𑀻𑀮𑀸𑀤𑀺𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀧𑀼𑀮𑀸𑀢𑀺 𑀲𑀤𑁆𑀥𑀸𑀲𑀫𑁆𑀧𑀤𑀸𑀤𑀺𑀯𑀲𑁂𑀦 𑀉𑀴𑀸𑀭𑀸.

𑀉𑀢𑁆𑀢𑀭𑀫𑀸𑀡𑀯𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁩𑁯. 𑀅𑀣 𑀔𑁄 𑀢𑁂𑀳𑀺 𑀲𑀓𑀼𑀡𑁆𑀟𑀓𑁂𑀳𑀺 𑀢𑀡𑁆𑀟𑀼𑀮𑁂𑀳𑀺 𑀲𑀺𑀤𑁆𑀥𑀁𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢’’𑀦𑁆𑀢𑀺. 𑀩𑀺𑀮𑀗𑁆𑀕𑀁 𑀯𑀼𑀘𑁆𑀘𑀢𑀺 𑀆𑀭𑀦𑀸𑀮𑀁 𑀩𑀺𑀮𑀗𑁆𑀕𑀢𑁄 𑀦𑀺𑀩𑁆𑀩𑀢𑁆𑀢𑀦𑀢𑁄, 𑀢𑀤𑁂𑀯 𑀓𑀜𑁆𑀚𑀺𑀬𑀢𑁄 𑀚𑀸𑀢𑀦𑁆𑀢𑀺 𑀓𑀜𑁆𑀚𑀺𑀬𑀁, 𑀢𑀁 𑀤𑀼𑀢𑀺𑀬𑀁 𑀏𑀢𑀲𑁆𑀲𑀸𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬𑀁, 𑀢𑀁 ‘‘𑀓𑀜𑁆𑀚𑀺𑀓𑀤𑀼𑀢𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀥𑁄𑀭𑀓𑀸𑀦𑀻𑀢𑀺 𑀥𑁄𑀯𑀺𑀬𑀸𑀦𑀺. 𑀬𑀲𑁆𑀫𑀸 𑀣𑀽𑀮𑀢𑀭𑀸𑀦𑀺𑀧𑀺 ‘‘𑀣𑀽𑀮𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀣𑀽𑀮𑀸𑀦𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀕𑀼𑀴𑀤𑀲𑀸𑀦𑀻𑀢𑀺 𑀲𑀼𑀢𑁆𑀢𑀸𑀦𑀁 𑀣𑀽𑀮𑀢𑀸𑀬, 𑀓𑀜𑁆𑀚𑀺𑀓𑀲𑁆𑀲 𑀩𑀳𑀮𑀢𑀸𑀬 𑀘 𑀧𑀺𑀡𑁆𑀟𑀺𑀢𑀤𑀲𑀸𑀦𑀺. 𑀢𑁂𑀦𑀸𑀳 ‘‘𑀧𑀼𑀜𑁆𑀚𑀧𑀼𑀜𑁆𑀚…𑀧𑁂… 𑀤𑀲𑀸𑀦𑀻’’𑀢𑀺. 𑀅𑀦𑀼𑀤𑁆𑀤𑀺𑀲𑀢𑀻𑀢𑀺 𑀅𑀦𑀼 𑀅𑀦𑀼 𑀓𑀣𑁂𑀢𑀺.

𑁪𑁪𑁦. 𑀅𑀲𑀓𑁆𑀓𑀘𑁆𑀘𑀦𑁆𑀢𑀺 𑀦 𑀲𑀓𑁆𑀓𑀘𑁆𑀘𑀁 𑀅𑀦𑀸𑀤𑀭𑀓𑀸𑀭𑀁, 𑀢𑀁 𑀧𑀦 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀅𑀪𑀸𑀯𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀤𑁆𑀥𑀸𑀯𑀺𑀭𑀳𑀺𑀢’’𑀦𑁆𑀢𑀺. 𑀅𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀘𑀺𑀢𑁆𑀢𑀻𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀯𑀲𑁂𑀦 𑀦 𑀘𑀺𑀢𑁆𑀢𑀻𑀓𑀢𑀁. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀻𑀓𑀸𑀭𑀯𑀺𑀭𑀳𑀺𑀢’’𑀦𑁆𑀢𑀺𑀆𑀤𑀺. 𑀘𑀺𑀢𑁆𑀢𑀻𑀓𑀸𑀭𑀭𑀳𑀺𑀢𑀁 𑀯𑀸 𑀅𑀘𑀺𑀢𑁆𑀢𑀻𑀓𑀢𑀁, 𑀬𑀣𑀸 𑀓𑀢𑀁 𑀧𑀭𑁂𑀲𑀁 𑀯𑀺𑀫𑁆𑀳𑀬𑀸𑀯𑀳𑀁 𑀳𑁄𑀢𑀺, 𑀢𑀣𑀸 𑀅𑀓𑀢𑀁. 𑀘𑀺𑀢𑁆𑀢𑀲𑁆𑀲 𑀉𑀴𑀸𑀭𑀧𑀡𑀻𑀢𑀪𑀸𑀯𑁄 𑀧𑀦 𑀅𑀲𑀓𑁆𑀓𑀘𑁆𑀘𑀤𑀸𑀦𑁂𑀦𑁂𑀯 𑀩𑀸𑀥𑀺𑀢𑁄. 𑀅𑀧𑀯𑀺𑀤𑁆𑀥𑀦𑁆𑀢𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀯𑀺𑀬 𑀅𑀧𑀯𑀺𑀤𑁆𑀥𑀁 𑀓𑀢𑁆𑀯𑀸, 𑀏𑀢𑁂𑀦 𑀢𑀲𑁆𑀫𑀺𑀁 𑀤𑀸𑀦𑁂 𑀕𑀸𑀭𑀯𑀸𑀓𑀭𑀡𑀁 𑀯𑀤𑀢𑀺. 𑀲𑁂𑀭𑀻𑀲𑀓𑀁 𑀦𑀸𑀫𑀸𑀢𑀺 ‘‘𑀲𑁂𑀭𑀻𑀲𑀓’’𑀦𑁆𑀢𑀺 𑀏𑀯𑀁 𑀦𑀸𑀫𑀓𑀁. 𑀢𑀼𑀘𑁆𑀙𑀦𑁆𑀢𑀺 𑀧𑀭𑀺𑀚𑀦𑀧𑀭𑀺𑀘𑁆𑀙𑁂𑀤𑀯𑀺𑀭𑀳𑀢𑁄 𑀭𑀺𑀢𑁆𑀢𑀁.

𑀧𑀸𑀬𑀸𑀲𑀺𑀤𑁂𑀯𑀧𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁧. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀢𑀲𑁆𑀲 𑀤𑀸𑀦𑀲𑁆𑀲 𑀆𑀦𑀼𑀪𑀸𑀯𑁂𑀦. 𑀲𑀺𑀭𑀻𑀲𑀭𑀼𑀓𑁆𑀔𑁄𑀢𑀺 𑀧𑀪𑀲𑁆𑀲𑀭𑀔𑀦𑁆𑀥𑀯𑀺𑀝𑀧𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄 𑀫𑀦𑀼𑀜𑁆𑀜𑀤𑀲𑁆𑀲𑀦𑁄 𑀤𑀺𑀩𑁆𑀩𑁄 𑀲𑀺𑀭𑀻𑀲𑀭𑀼𑀓𑁆𑀔𑁄. 𑀅𑀝𑁆𑀞𑀸𑀲𑀻𑀢𑀺 𑀨𑀮𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀫𑀸𑀦𑀤𑁆𑀯𑀸𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦𑀸𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁 𑀢𑀢𑁆𑀣 𑀦𑀺𑀯𑀸𑀲𑀧𑀭𑀺𑀘𑀬𑀦𑀯𑀲𑁂𑀦. 𑀦 𑀓𑁂𑀯𑀮𑀁 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦𑁂𑀯, 𑀅𑀣 𑀔𑁄 𑀉𑀢𑀼𑀲𑀼𑀔𑀼𑀫𑀯𑀲𑁂𑀦 𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀓𑀺𑀭𑀲𑁆𑀲 𑀉𑀢𑀼𑀲𑀼𑀔𑀁 𑀳𑁄𑀢𑀻’’𑀢𑀺 𑀆𑀳.

𑀲𑁄𑀢𑀺 𑀉𑀢𑁆𑀢𑀭𑁄 𑀫𑀸𑀡𑀯𑁄. 𑀬𑀤𑀺 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀸𑀬𑀸𑀲𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄, 𑀧𑀸𑀬𑀸𑀲𑀺𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀣𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀆𑀳 ‘‘𑀧𑀸𑀬𑀸𑀲𑀺𑀲𑁆𑀲 𑀧𑀦𑀸’’𑀢𑀺. 𑀦𑀺𑀓𑀦𑁆𑀢𑀺𑀯𑀲𑁂𑀦𑀸𑀢𑀺 𑀧𑀸𑀬𑀸𑀲𑀺𑀫𑁆𑀳𑀺 𑀲𑀸𑀧𑁂𑀓𑁆𑀔𑀸𑀯𑀲𑁂𑀦, 𑀧𑀼𑀩𑁆𑀩𑁂𑀧𑀺 𑀯𑀸 𑀢𑀢𑁆𑀣 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀢𑀸𑀬. 𑀤𑀺𑀲𑀸𑀘𑀸𑀭𑀺𑀓𑀯𑀺𑀫𑀸𑀦𑀦𑁆𑀢𑀺 𑀆𑀓𑀸𑀲𑀝𑁆𑀞𑀁 𑀳𑀼𑀢𑁆𑀯𑀸 𑀤𑀺𑀲𑀸𑀲𑀼 𑀯𑀺𑀘𑀭𑀡𑀓𑀯𑀺𑀫𑀸𑀦𑀁, 𑀦 𑀭𑀼𑀓𑁆𑀔𑀧𑀩𑁆𑀩𑀢𑀲𑀺𑀔𑀭𑀸𑀤𑀺𑀲𑀫𑁆𑀩𑀦𑁆𑀥𑀁. 𑀯𑀝𑁆𑀝𑀦𑀺𑀅𑀝𑀯𑀺𑀬𑀦𑁆𑀢𑀺 𑀯𑀺𑀫𑀸𑀦𑀯𑀻𑀣𑀺𑀬𑀦𑁆𑀢𑀺.

𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.