𑁭. 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁩𑁧. 𑀉𑀤𑀸𑀦𑀦𑁆𑀢𑀺 𑀭𑀜𑁆𑀜𑀸 𑀑𑀓𑁆𑀓𑀸𑀓𑁂𑀦 𑀚𑀸𑀢𑀺𑀲𑀫𑁆𑀪𑁂𑀤𑀧𑀭𑀺𑀳𑀸𑀭𑀦𑀺𑀫𑀺𑀢𑁆𑀢𑀁 𑀧𑀯𑀢𑁆𑀢𑀺𑀢𑀁 𑀉𑀤𑀸𑀦𑀁 𑀧𑀝𑀺𑀘𑁆𑀘. 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 ‘‘𑀲𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀭𑁄𑀧𑀺𑀢𑁂𑀢𑀺 𑀓𑁂𑀦𑀘𑀺 𑀅𑀭𑁄𑀧𑀺𑀢𑁂.

𑀆𑀯𑀭𑀡𑁂𑀦𑀸𑀢𑀺 𑀲𑁂𑀢𑀼𑀦𑀸. 𑀩𑀦𑁆𑀥𑀸𑀧𑁂𑀢𑁆𑀯𑀸𑀢𑀺 𑀧𑀁𑀲𑀼𑀧𑀮𑀸𑀲𑀧𑀸𑀲𑀸𑀡𑀫𑀢𑁆𑀢𑀺𑀓𑀸𑀔𑀡𑁆𑀟𑀸𑀤𑀻𑀳𑀺 𑀆𑀴𑀺𑀁 𑀣𑀺𑀭𑀁 𑀓𑀸𑀭𑀸𑀧𑁂𑀢𑁆𑀯𑀸.

‘‘𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀽’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑁄𑀮𑀺𑀬𑀓𑀫𑁆𑀫𑀓𑀭𑀸 𑀯𑀤𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀻𑀡𑀺 𑀚𑀸𑀢𑀓𑀸𑀦𑀻𑀢𑀺 𑀨𑀦𑁆𑀤𑀦𑀚𑀸𑀢𑀓𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀚𑀸𑀢𑀓𑀮𑀝𑀼𑀓𑀺𑀓𑀚𑀸𑀢𑀓𑀸𑀦𑀺 𑀤𑁆𑀯𑁂 𑀚𑀸𑀢𑀓𑀸𑀦𑀻𑀢𑀺 𑀭𑀼𑀓𑁆𑀔𑀥𑀫𑁆𑀫 𑀯𑀝𑁆𑀝𑀓𑀚𑀸𑀢𑀓𑀸𑀦𑀺.

𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀓𑀮𑀳𑀓𑀸𑀭𑀡𑀪𑀸𑀯𑁄𑀢𑀺 𑀓𑀮𑀳𑀓𑀸𑀭𑀡𑀲𑁆𑀲 𑀅𑀢𑁆𑀣𑀺𑀪𑀸𑀯𑁄.

𑀅𑀝𑁆𑀞𑀸𑀦𑁂𑀢𑀺 𑀅𑀓𑀸𑀭𑀡𑁂. 𑀯𑁂𑀭𑀁 𑀓𑀢𑁆𑀯𑀸𑀢𑀺 𑀯𑀺𑀭𑁄𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. ‘‘𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀨𑀦𑁆𑀤𑀦𑀚𑀸𑀢𑀓𑀁 𑀓𑀣𑁂𑀲𑀺. ‘‘𑀤𑀼𑀤𑁆𑀤𑀼𑀪𑀸𑀬𑀢𑀺 𑀪𑀤𑁆𑀤𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀚𑀸𑀢𑀓𑀁 𑀓𑀣𑁂𑀲𑀺. ‘‘𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭𑀸’’𑀢𑀺𑀆𑀤𑀺𑀦𑀸 𑀮𑀝𑀼𑀓𑀺𑀓𑀚𑀸𑀢𑀓𑀁 𑀓𑀣𑁂𑀲𑀺.

‘‘𑀲𑀸𑀥𑀽 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻; 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸;

𑀯𑀸𑀢𑁄 𑀯𑀳𑀢𑀺 𑀏𑀓𑀝𑁆𑀞𑀁, 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺’’𑀦𑁆𑀢𑀺. 𑁋

𑀆𑀤𑀺𑀦𑀸 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 𑀓𑀣𑁂𑀲𑀺.

‘‘𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀁 𑀆𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲’’𑀦𑁆𑀢𑀺. 𑁋

𑀆𑀤𑀺𑀦𑀸 𑀯𑀝𑁆𑀝𑀓𑀚𑀸𑀢𑀓𑀁 𑀓𑀣𑁂𑀲𑀺.

‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺. (𑀲𑀼. 𑀦𑀺. 𑁧.𑁯𑁪𑁧);

𑀆𑀤𑀺𑀦𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀓𑀣𑁂𑀲𑀺.

𑀢𑀁𑀢𑀁𑀧𑀮𑁄𑀪𑀦𑀓𑀺𑀭𑀺𑀬𑀸 𑀓𑀸𑀬𑀯𑀸𑀘𑀸𑀳𑀺 𑀧𑀭𑀓𑁆𑀓𑀫𑀦𑁆𑀢𑀺𑀬𑁄 ‘‘𑀉𑀓𑁆𑀓𑀡𑁆𑀞𑀦𑁆𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺.

𑀓𑀼𑀡𑀸𑀮𑀤𑀳𑁂𑀢𑀺 𑀓𑀼𑀡𑀸𑀮𑀤𑀳𑀢𑀻𑀭𑁂 𑀧𑀢𑀺𑀝𑁆𑀞𑀸𑀬. 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺 (𑀚𑀸. 𑁨.𑀓𑀼𑀡𑀸𑀮𑀚𑀸𑀢𑀓) ‘‘𑀅𑀦𑀼𑀓𑁆𑀓𑀫𑁂𑀦 𑀓𑀼𑀡𑀸𑀮𑀲𑀓𑀼𑀡𑀭𑀸𑀚𑀲𑁆𑀲 𑀧𑀼𑀘𑁆𑀙𑀦𑀧𑁆𑀧𑀲𑀗𑁆𑀕𑁂𑀦 𑀓𑀼𑀡𑀸𑀮𑀚𑀸𑀢𑀓𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺 𑀇𑀢𑁆𑀣𑀻𑀦𑀁 𑀤𑁄𑀲𑀤𑀲𑁆𑀲𑀦𑀫𑀼𑀔𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄𑀓𑀸𑀭𑀲𑀁𑀓𑀺𑀮𑁂𑀲𑀯𑀺𑀪𑀸𑀯𑀦𑁂𑀦.

𑀓𑁄𑀲𑀚𑁆𑀚𑀁 𑀯𑀺𑀥𑀫𑀺𑀢𑁆𑀯𑀸 𑀧𑀼𑀭𑀺𑀲𑀣𑀸𑀫𑀧𑀭𑀺𑀩𑁆𑀭𑀽𑀳𑀦𑁂𑀦 ‘‘𑀉𑀢𑁆𑀢𑀫𑀧𑀼𑀭𑀺𑀲𑀲𑀤𑀺𑀲𑁂𑀳𑀺 𑀦𑁄 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸.

𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑀸𑀢𑀺 𑀅𑀭𑀢𑀺𑀯𑀺𑀦𑁄𑀤𑀦𑀢𑁄 𑀧𑀝𑁆𑀞𑀸𑀬 𑀅𑀯𑀺𑀲𑁆𑀲𑀝𑁆𑀞𑀲𑀫𑀡𑀓𑀫𑁆𑀫𑀦𑁆𑀢𑀸, 𑀅𑀧𑀭𑀺𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀪𑀕𑀯𑀸 𑀘𑀺𑀦𑁆𑀢𑁂𑀲𑀻𑀢𑀺 𑀬𑁄𑀚𑀦𑀸.

𑀧𑀤𑀼𑀫𑀺𑀦𑀺𑀬𑀦𑁆𑀢𑀺 𑀧𑀤𑀼𑀫𑀲𑁆𑀲𑀭𑁂. 𑀯𑀺𑀓𑀲𑀺𑀁𑀲𑀼 𑀕𑀼𑀡𑀕𑀡𑀯𑀺𑀩𑁄𑀥𑁂𑀦. ‘‘𑀅𑀬𑀁 𑀇𑀫𑀲𑁆𑀲…𑀧𑁂… 𑀦 𑀓𑀣𑁂𑀲𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀢𑀸𑀯𑀤𑁂𑀯 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀮𑀚𑁆𑀚𑀫𑀸𑀦𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀯𑀺𑀲𑁂𑀲𑀁 𑀪𑀕𑀯𑀢𑁄 𑀦𑀸𑀭𑁄𑀘𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀔𑀻𑀡𑀸𑀲𑀯𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳.

𑀑𑀲𑀻𑀤𑀫𑀢𑁆𑀢𑁂𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀫𑀢𑁆𑀢𑁂. 𑀅𑀭𑀺𑀬𑀫𑀡𑁆𑀟𑀮𑁂𑀢𑀺 𑀅𑀭𑀺𑀬𑀲𑀫𑀽𑀳𑁂. 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄𑀢𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀲𑁆𑀲 𑀧𑀸𑀘𑀻𑀦𑀧𑀭𑀺𑀓𑁆𑀔𑁂𑀧𑀢𑁄, 𑀦 𑀩𑀸𑀳𑀺𑀭𑀓𑁂𑀳𑀺 𑀉𑀘𑁆𑀘𑀫𑀸𑀦𑀉𑀤𑀬𑀧𑀩𑁆𑀩𑀢𑀢𑁄. 𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀯𑀺𑀲𑁂𑀲𑀢𑁄 𑀭𑀫𑀡𑀻𑀬𑀲𑁆𑀲 𑀮𑁄𑀓𑀲𑁆𑀲 𑀭𑀫𑀡𑀻𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀢𑀺 𑀉𑀝𑁆𑀞𑀳𑀺𑀢𑁆𑀯𑀸. 𑀏𑀯𑀭𑀽𑀧𑁂 𑀔𑀡𑁂 𑀮𑀬𑁂 𑀫𑀼𑀳𑀼𑀢𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀉𑀝𑁆𑀞𑀺𑀢𑀓𑁆𑀔𑀡𑁂 𑀉𑀝𑁆𑀞𑀺𑀢𑀯𑁂𑀮𑀸𑀬𑀁 𑀉𑀝𑁆𑀞𑀺𑀢𑀫𑀼𑀳𑀼𑀢𑁆𑀢𑁂𑀢𑀺 𑀉𑀧𑀭𑀽𑀧𑀭𑀺 𑀓𑀸𑀮𑀲𑁆𑀲 𑀯𑀟𑁆𑀠𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀢𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀚𑀸𑀢𑀺𑀆𑀤𑀺𑀯𑀲𑁂𑀦 𑀪𑀕𑀯𑀢𑁄 𑀅𑀦𑀼𑀭𑀽𑀧𑀧𑀭𑀺𑀯𑀸𑀭𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺 𑀆𑀤𑀺𑀫𑀸𑀳.

𑀲𑀫𑀸𑀧𑀦𑁆𑀦𑀤𑁂𑀯𑀢𑀸𑀢𑀺 𑀆𑀲𑀦𑁆𑀦𑀝𑁆𑀞𑀸𑀦𑁂 𑀛𑀸𑀦𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀦𑁆𑀦𑀤𑁂𑀯𑀢𑀸. 𑀘𑀮𑀺𑀁𑀲𑀽𑀢𑀺 𑀉𑀝𑁆𑀞𑀳𑀺𑀁𑀲𑀼. 𑀓𑁄𑀲𑀫𑀢𑁆𑀢𑀁 𑀞𑀸𑀦𑀁 𑀲𑀤𑁆𑀤𑀦𑁆𑀢𑀭𑀁. 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀆𑀤𑀺𑀢𑁄 𑀢𑁂𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀽’’𑀢𑀺. 𑀢𑁂 𑀧𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀢𑁄 𑀧𑀭𑀁 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀦𑀯𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀲𑀽𑀢𑀺 𑀦𑀯𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀤𑁄𑀡𑀫𑀼𑀔𑁂𑀲𑀼. 𑀤𑁄𑀡𑀫𑀼𑀔𑀦𑁆𑀢𑀺 𑀘 𑀫𑀳𑀸𑀦𑀕𑀭𑀲𑁆𑀲 𑀆𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀸𑀤𑀦𑀕𑀭𑀁 𑀯𑀼𑀘𑁆𑀘𑀢𑀺. 𑀙𑀦𑁆𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀽𑀢𑀺 𑀙𑀓𑁄𑀝𑀺𑀅𑀥𑀺𑀓𑀦𑀯𑀼𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀝𑁆𑀝𑀦𑁂𑀲𑀼. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀸𑀤𑀻𑀲𑀼 𑀙𑀧𑀡𑁆𑀡𑀸𑀲𑀸𑀬 𑀭𑀢𑀦𑀸𑀓𑀭𑁂𑀲𑀼. 𑀏𑀯𑀁 𑀧𑀦 𑀦𑀕𑀭𑀤𑁄𑀡𑀺𑀫𑀼𑀔𑀧𑀝𑁆𑀝𑀦𑀭𑀢𑀦𑀸𑀓𑀭𑀸𑀤𑀺𑀯𑀺𑀪𑀸𑀕𑁂𑀦 𑀓𑀣𑀦𑀁 𑀢𑀁𑀢𑀁𑀅𑀥𑀺𑀯𑀢𑁆𑀣𑀸𑀬 𑀯𑀲𑀦𑁆𑀢𑀻𑀦𑀁 𑀤𑁂𑀯𑀢𑀸𑀦𑀁 𑀩𑀳𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑀤𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀲𑀲𑀳𑀲𑁆𑀲…𑀧𑁂… 𑀅𑀥𑀺𑀧𑁆𑀧𑁂𑀢𑀸’’𑀢𑀺, 𑀢𑁂𑀦 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀇𑀥 ‘‘𑀏𑀓𑀸 𑀮𑁄𑀓𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑁄𑀳𑀧𑀸𑀲𑀸𑀤𑁂𑀢𑀺 𑀆𑀤𑀺𑀢𑁄 𑀓𑀢𑁂 𑀮𑁄𑀳𑀧𑀸𑀲𑀸𑀤𑁂. 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀳𑁂𑀝𑁆𑀞𑀺𑀫𑁂 𑀩𑁆𑀭𑀳𑁆𑀫𑀮𑁄𑀓𑁂. 𑀬𑀤𑀺 𑀢𑀸 𑀤𑁂𑀯𑀢𑀸 𑀏𑀯𑀁 𑀦𑀺𑀭𑀦𑁆𑀢𑀭𑀸, 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀑𑀓𑀸𑀲𑁄 𑀏𑀯 𑀦 𑀪𑀯𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸 𑀔𑁄 𑀧𑀦𑀸’’𑀢𑀺𑀆𑀤𑀺. 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀁 𑀉𑀧𑀧𑀦𑁆𑀦𑀸 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸, 𑀢𑀸𑀲𑀁 𑀧𑀦 𑀬𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀻𑀦’’𑀦𑁆𑀢𑀺. 𑀆𑀯𑀸𑀲𑀸𑀢𑀺 𑀆𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑀸, 𑀤𑁂𑀯𑀢𑀸 𑀧𑀦 𑀑𑀭𑀫𑁆𑀪𑀸𑀕𑀺𑀬𑀸𑀦𑀁, 𑀇𑀢𑀭𑁂𑀲𑀜𑁆𑀘 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀲𑀼𑀤𑁆𑀥𑁄 𑀆𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀸.

𑁩𑁩𑁨. 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺 𑀅𑀜𑁆𑀜𑀢𑁆𑀣 𑀑𑀓𑀸𑀲𑀁 𑀅𑀮𑀪𑀫𑀸𑀦𑁄. 𑀏𑀯𑀁 𑀲𑁂𑀲𑀸𑀧𑀺. 𑀩𑀼𑀤𑁆𑀥𑀸𑀦𑀁 𑀅𑀪𑀺𑀫𑀼𑀔𑀫𑀕𑁆𑀕𑁄 𑀩𑀼𑀤𑁆𑀥𑀯𑀻𑀣𑀺. 𑀬𑀸𑀯 𑀘𑀓𑁆𑀓𑀯𑀸𑀴𑀸 𑀑𑀢𑁆𑀣𑀭𑀺𑀢𑀼𑀁 𑀑𑀯𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀧𑀳𑀝𑀩𑀼𑀤𑁆𑀥𑀯𑀻𑀣𑀺𑀬𑀸𑀯𑀸𑀢𑀺 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀳𑀺 𑀢𑁂𑀳𑀺 𑀤𑁂𑀯𑀩𑁆𑀭𑀳𑁆𑀫𑁂𑀳𑀺 𑀯𑀴𑀜𑁆𑀚𑀺𑀢𑀯𑀻𑀣𑀺𑀬𑀸𑀯. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀬𑁄, 𑀫𑀳𑀦𑁆𑀢𑁄 𑀲𑀫𑀬𑁄 𑀫𑀳𑀸𑀲𑀫𑀬𑁄𑀢𑀺 𑀆𑀳 ‘‘𑀫𑀳𑀸𑀲𑀫𑀽𑀳𑁄’’𑀢𑀺. 𑀧𑀯𑀤𑁆𑀥𑀁 𑀯𑀦𑀁 𑀧𑀯𑀦𑀦𑁆𑀢𑀺 𑀆𑀳 ‘‘𑀯𑀦𑀲𑀡𑁆𑀟𑁄’’𑀢𑀺. 𑀤𑁂𑀯𑀖𑀝𑀸𑀢𑀺 𑀤𑁂𑀯𑀲𑀫𑀽𑀳𑀸.

𑀲𑀫𑀸𑀤𑀳𑀁𑀲𑀽𑀢𑀺 𑀲𑀫𑀸𑀤𑀳𑀺𑀢𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀅𑀓𑀁𑀲𑀼, 𑀬𑀣𑀸𑀲𑀫𑀸𑀳𑀺𑀢𑀁 𑀧𑀦 𑀲𑀫𑀸𑀥𑀺𑀦𑀸 𑀬𑁄𑀚𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀦𑀸 𑀬𑁄𑀚𑁂𑀲𑀼’’𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀕𑁄𑀫𑀼𑀢𑁆𑀢𑀯𑀗𑁆𑀓𑀸𑀤𑀻𑀦𑀁 𑀤𑀽𑀭𑀲𑀫𑀽𑀳𑀦𑀺𑀢𑀢𑁆𑀢𑀸 𑀲𑀩𑁆𑀩𑁂…𑀧𑁂… 𑀅𑀓𑀭𑀺𑀁𑀲𑀼. 𑀦𑀬𑀢𑀺 𑀅𑀲𑁆𑀲𑁂 𑀏𑀢𑁂𑀳𑀻𑀢𑀺 𑀦𑁂𑀢𑁆𑀢𑀸𑀦𑀺, 𑀬𑁄𑀢𑁆𑀢𑀸𑀦𑀺. 𑀅𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀦𑀁 𑀅𑀲𑁆𑀲𑀸𑀦𑀁 𑀯𑀻𑀣𑀺𑀧𑀝𑀺𑀧𑀸𑀤𑀦𑀁 𑀭𑀲𑁆𑀫𑀺𑀕𑁆𑀕𑀳𑀡𑁂𑀦 𑀧𑀳𑁄𑀢𑀻𑀢𑀺 ‘‘𑀲𑀩𑁆𑀩𑀬𑁄𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁄𑀤𑁂𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀅𑀘𑁄𑀤𑀦𑀁 𑀅𑀯𑀸𑀭𑀡𑀁 𑀏𑀯𑀸𑀢𑀺 𑀆𑀳 ‘‘𑀅𑀘𑁄𑀤𑁂𑀦𑁆𑀢𑁄 𑀅𑀯𑀸𑀭𑁂𑀦𑁆𑀢𑁄’’𑀢𑀺.

𑀬𑀣𑀸 𑀔𑀻𑀮𑀁 𑀪𑀺𑀢𑁆𑀢𑀺𑀬𑀁 𑀯𑀸 𑀪𑀽𑀫𑀺𑀬𑀁 𑀯𑀸 𑀆𑀓𑁄𑀝𑀺𑀢𑀁 𑀤𑀼𑀦𑁆𑀦𑀻𑀳𑀭𑀡𑀁, 𑀬𑀣𑀸 𑀘 𑀧𑀮𑀺𑀖𑀁 𑀦𑀕𑀭𑀧𑁆𑀧𑀯𑁂𑀲𑀦𑀺𑀯𑀸𑀭𑀡𑀁, 𑀬𑀣𑀸 𑀘 𑀇𑀦𑁆𑀤𑀔𑀻𑀮𑀁 𑀕𑀫𑁆𑀪𑀻𑀭𑀦𑁂𑀫𑀺 𑀲𑀼𑀦𑀺𑀔𑀸𑀢𑀁 𑀤𑀼𑀦𑁆𑀦𑀻𑀳𑀭𑀡𑀁, 𑀏𑀯𑀁 𑀭𑀸𑀕𑀸𑀤𑀬𑁄 𑀲𑀢𑁆𑀢𑀲𑀦𑁆𑀢𑀸𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀸, 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑀺𑀯𑀸𑀭𑀡𑀸 𑀘𑀸𑀢𑀺 𑀢𑁂 ‘‘𑀔𑀻𑀮𑀁, 𑀧𑀮𑀺𑀖𑀁, 𑀇𑀦𑁆𑀤𑀔𑀻𑀮’’𑀦𑁆𑀢𑀺 𑀘 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑀸 𑀧𑀭𑀫𑀲𑀦𑁆𑀢𑀼𑀝𑁆𑀞𑀪𑀸𑀯𑁂𑀦 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑀺.

𑀕𑀢𑀸𑀲𑁂𑀢𑀺 𑀕𑀢𑀸 𑀏𑀯, 𑀦 𑀧𑀦 𑀕𑀫𑀺𑀲𑁆𑀲𑀦𑁆𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀲𑀭𑀡𑀕𑀫𑀦𑀢𑁆𑀢𑀸𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀦𑀺𑀩𑁆𑀩𑁂𑀫𑀢𑀺𑀓𑀲𑀭𑀡𑀕𑀫𑀦𑁂𑀦 𑀕𑀢𑀸’’𑀢𑀺. 𑀢𑁂 𑀳𑀺 𑀦𑀺𑀬𑀫𑁂𑀦 𑀅𑀧𑀸𑀬𑀪𑀽𑀫𑀺𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀤𑁂𑀯𑀓𑀸𑀬𑀜𑁆𑀘 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀮𑁄𑀓𑀺𑀬𑁂𑀦 𑀲𑀭𑀡𑀕𑀫𑀦𑁂𑀦 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁, 𑀲𑀢𑀺 𑀘 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀯𑀡𑁆𑀡𑀦𑀸

𑁩𑁩𑁩. 𑀏𑀢𑁂𑀲𑀦𑁆𑀢𑀺 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀸𑀦𑀁. 𑀇𑀤𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂. 𑀩𑀼𑀤𑁆𑀥𑀸𑀦𑀦𑁆𑀢𑀺 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑀸. 𑀘𑀺𑀢𑁆𑀢𑀓𑀮𑁆𑀮𑀢𑀸 𑀘𑀺𑀢𑁆𑀢𑀫𑀤𑁆𑀤𑀯𑀁.

𑀓𑀺𑀁 𑀧𑀦 𑀪𑀕𑀯𑀢𑀸𑀯 𑀫𑀳𑀦𑁆𑀢𑁂 𑀤𑁂𑀯𑀢𑀸𑀲𑀫𑀸𑀕𑀫𑁂 𑀢𑁂𑀲𑀁 𑀦𑀸𑀫𑀕𑁄𑀢𑁆𑀢𑀁 𑀓𑀣𑁂𑀢𑀼𑀁 𑀲𑀓𑁆𑀓𑀸𑀢𑀺? 𑀆𑀫 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀸 𑀦𑀸𑀫 𑀫𑀳𑀦𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀫𑀸𑀳, 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁, 𑀫𑀼𑀢𑀦𑁆𑀢𑀺 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀺𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀁 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀲𑀩𑁆𑀩𑀁 𑀜𑁂𑀬𑁆𑀬𑀁, 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀲𑀫𑁆𑀧𑀢𑁆𑀢𑀁, 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁, 𑀅𑀧𑁆𑀧𑀢𑁆𑀢𑀁 𑀯𑀸 𑀧𑀭𑀺𑀬𑀺𑀝𑁆𑀞𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀓𑁂𑀯𑀮𑀁 𑀫𑀦𑀲𑀸 𑀆𑀮𑁄𑀘𑀺𑀢𑀁. 𑀓𑀢𑁆𑀣𑀘𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀭𑀽𑀧𑀸𑀭𑀫𑁆𑀫𑀡𑁂𑀢𑀺 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁬𑁧𑁫) ‘‘𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀽𑀧𑀸𑀭𑀫𑁆𑀫𑀡𑁂 𑀓𑀺𑀜𑁆𑀘𑀺 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀪𑁂𑀭𑀺𑀲𑀤𑁆𑀤𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀦𑁆𑀢𑀺 𑀬𑀁 𑀆𑀭𑀫𑁆𑀫𑀡𑀁. 𑀏𑀢𑁂𑀲𑀦𑁆𑀢𑀺 𑀩𑀼𑀤𑁆𑀥𑀸𑀦𑀁.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑀸 𑀚𑀸𑀦𑀦𑀓𑀺𑀭𑀺𑀬𑀸𑀬 𑀅𑀧𑀭𑀺𑀬𑁄𑀲𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀚𑀸𑀦𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫, 𑀲𑀩𑁆𑀩𑀁 𑀢𑀁 𑀪𑀕𑀯𑀢𑀸 𑀅𑀜𑁆𑀜𑀸𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺.

𑀦 𑀑𑀮𑁄𑀓𑁂𑀦𑁆𑀢𑀺 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀯𑀺𑀧𑀭𑀻𑀢𑀸 ‘‘𑀦 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸. ‘‘𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸’’𑀢𑀺 (𑀲𑀼. 𑀦𑀺. 𑁩𑁬𑁨) 𑀆𑀭𑀪𑀺𑀢𑁆𑀯𑀸 ‘‘𑀭𑀸𑀕𑀁 𑀯𑀺𑀦𑀬𑁂𑀣 𑀫𑀸𑀦𑀼𑀲𑁂𑀲𑀼 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀘𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁩𑁬𑁩) 𑀘 𑀭𑀸𑀕𑀦𑀺𑀕𑁆𑀕𑀳𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀁 𑀭𑀸𑀕𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁, ‘‘𑀧𑀺𑀬𑀫𑀧𑁆𑀧𑀺𑀬𑀪𑀽𑀢𑀸 𑀓𑀮𑀳 𑀯𑀺𑀯𑀸𑀤𑀸 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁮𑁬𑁯; 𑀫𑀳𑀸𑀦𑀺. 𑁯𑁮) 𑀓𑀮𑀳𑀸𑀤𑀬𑁄 𑀬𑀢𑁄 𑀤𑁄𑀲𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀲𑁄 𑀘 𑀤𑁄𑀲𑁄 𑀬𑀢𑁄 𑀧𑀺𑀬𑀪𑀸𑀯𑀢𑁄, 𑀲𑁄 𑀘 𑀧𑀺𑀬𑀪𑀸𑀯𑁄 𑀬𑀢𑁄 𑀙𑀦𑁆𑀤𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀇𑀢𑀺 𑀨𑀮𑀢𑁄, 𑀓𑀸𑀭𑀡𑀧𑀭𑀫𑁆𑀧𑀭𑀢𑁄 𑀘 𑀤𑁄𑀲𑁂 𑀆𑀤𑀻𑀦𑀯𑀯𑀺𑀪𑀸𑀯𑀦𑀩𑀸𑀳𑀼𑀮𑁆𑀮𑀢𑁄 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁬𑁯; 𑀫𑀳𑀸𑀦𑀺. 𑁯𑁮) 𑀤𑁄𑀲𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁 𑁋

‘‘𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬,

𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣,

𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺’’𑀦𑁆𑀢𑀺. (𑀲𑀼. 𑀦𑀺. 𑁯𑁦𑁨; 𑀫𑀳𑀸𑀦𑀺. 𑁧𑁩𑁧) 𑁋

𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑁄𑀳𑀯𑀺𑀥𑀫𑀦𑀢𑁄, 𑀧𑀜𑁆𑀜𑀸𑀧𑀭𑀺𑀩𑁆𑀭𑀽𑀳𑀦𑀢𑁄 𑀘 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁 𑀫𑁄𑀳𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁 𑁋

‘‘𑀧𑀭𑀲𑁆𑀲 𑀘𑁂 𑀥𑀫𑁆𑀫𑀁 𑀅𑀦𑀸𑀦𑀼𑀚𑀸𑀦𑀁,

𑀩𑀸𑀮𑁄, 𑀫𑀕𑁄 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀲𑀩𑁆𑀩𑁂𑀯 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸,

𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸’’𑀢𑀺. (𑀲𑀼. 𑀦𑀺. 𑁮𑁮𑁬; 𑀫𑀳𑀸𑀦𑀺. 𑁧𑁧𑁫) 𑁋

𑀆𑀤𑀺𑀦𑀸 𑀦𑀬𑁂𑀦 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸𑀧𑀦𑀬𑀦𑀫𑀼𑀔𑁂𑀦 𑀲𑀯𑀺𑀲𑀬𑁂𑀲𑀼 𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀲𑀼 𑀯𑀺𑀲𑀝𑀯𑀺𑀢𑀓𑁆𑀓𑀯𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁 𑁋

‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 (𑀇𑀢𑀺 𑀪𑀕𑀯𑀸),

𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀁 𑀉𑀧𑀭𑀼𑀦𑁆𑀥𑁂;

𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀁,

𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂’’𑀢𑀺. (𑀲𑀼. 𑀦𑀺. 𑁯𑁨𑁨; 𑀫𑀳𑀸𑀦𑀺. 𑁧𑁫𑁧) 𑁋

𑀧𑀧𑀜𑁆𑀘𑀲𑀗𑁆𑀔𑀸𑀬 𑀫𑀽𑀮𑀁 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀢𑀁 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀫𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑀁 𑀫𑀦𑁆𑀢𑀸 𑀧𑀜𑁆𑀜𑀸𑀬 𑀉𑀧𑀭𑀼𑀦𑁆𑀥𑁂𑀬𑁆𑀬. 𑀬𑀸 𑀓𑀸𑀘𑀺 𑀅𑀚𑁆𑀛𑀢𑁆𑀢𑀁 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀸𑀲𑀁 𑀯𑀺𑀦𑀬𑀸 𑀯𑀽𑀧𑀲𑀫𑀸𑀬 𑀲𑀤𑀸 𑀲𑀢𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑀼𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀏𑀯𑀫𑀸𑀤𑀺 𑀉𑀧𑀤𑁂𑀲𑀲𑁆𑀲 𑀲𑀤𑁆𑀥𑁄𑀯 𑀪𑀸𑀚𑀦𑀁. 𑀢𑀲𑁆𑀲 𑀳𑀺 𑀲𑁄 𑀅𑀢𑁆𑀣𑀸𑀯𑀳𑁄𑀢𑀺 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀁 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁 𑁋

‘‘𑀯𑀻𑀢𑀢𑀡𑁆𑀳𑁄 𑀧𑀼𑀭𑀸 𑀪𑁂𑀤𑀸 (𑀇𑀢𑀺 𑀪𑀕𑀯𑀸),

𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄;

𑀯𑁂𑀫𑀚𑁆𑀛𑁂 𑀦𑀼𑀧𑀲𑀗𑁆𑀔𑁂𑀬𑁆𑀬𑁄,

𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢’’𑀦𑁆𑀢𑀺. (𑀲𑀼. 𑀦𑀺. 𑁮𑁫𑁫; 𑀫𑀳𑀸𑀦𑀺. 𑁮𑁪) 𑁋

𑀬𑁄 𑀲𑀭𑀻𑀭𑀪𑁂𑀤𑀢𑁄 𑀧𑀼𑀩𑁆𑀩𑁂𑀯 𑀧𑀳𑀻𑀦𑀢𑀡𑁆𑀳𑁄, 𑀢𑀢𑁄 𑀏𑀯 𑀅𑀢𑀻𑀢𑀤𑁆𑀥𑀲𑀜𑁆𑀜𑀺𑀢𑀁 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁂𑀦 𑀅𑀦𑀺𑀲𑁆𑀲𑀺𑀢𑁄, 𑀯𑁂𑀫𑀚𑁆𑀛𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀦𑀺 ‘‘𑀭𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀉𑀧𑀲𑀗𑁆𑀔𑀸𑀢𑀩𑁆𑀩𑁄, 𑀢𑀲𑁆𑀲 𑀅𑀭𑀳𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀼𑀭𑀓𑁆𑀔𑀸𑀭𑀸𑀦𑀁 𑀅𑀪𑀸𑀯𑀸 𑀅𑀦𑀸𑀕𑀢𑁂 𑀅𑀤𑁆𑀥𑀦𑀺 𑀓𑀺𑀜𑁆𑀘𑀺 𑀧𑀼𑀭𑀓𑁆𑀔𑀢𑀁 𑀦𑀢𑁆𑀣𑀻𑀢𑀺 𑀆𑀤𑀺𑀦𑀸 𑀏𑀯𑀁 𑀕𑀫𑁆𑀪𑀻𑀭𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀧𑀽𑀭𑀸𑀪𑁂𑀤𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁫𑁫; 𑀫𑀳𑀸𑀦𑀺. 𑁮𑁪) 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀣 𑀦𑁂𑀲𑀁 𑀲𑀧𑁆𑀧𑀸𑀬𑀁 …𑀧𑁂… 𑀯𑀯𑀢𑁆𑀣𑀧𑁂𑀢𑁆𑀯𑀸’’𑀢𑀺. 𑀫𑀦𑀲𑀸𑀓𑀸𑀲𑀻𑀢𑀺 𑀏𑀯𑀁 𑀘𑀭𑀺𑀬𑀸𑀬 𑀯𑀲𑁂𑀦 𑀫𑀦𑀲𑀺 𑀓𑀢𑁆𑀯𑀸 𑀧𑀼𑀦 𑀢𑀁 𑀲𑀤𑀺𑀲𑀁 𑀅𑀢𑁆𑀢𑀦𑁄 𑀤𑁂𑀲𑀦𑀸𑀦𑀺𑀓𑁆𑀔𑁂𑀧𑀬𑁄𑀕𑁆𑀬𑀢𑀸𑀯𑀲𑁂𑀦 𑀫𑀦𑀲𑀺 𑀅𑀓𑀸𑀲𑀺. 𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀦𑀼 𑀔𑁄 𑀚𑀸𑀦𑁂𑀬𑁆𑀬𑀸𑀢𑀺 𑀧𑀭𑀚𑁆𑀛𑀸𑀲𑀬𑀸𑀤𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀫𑀬𑁆𑀳𑀁𑀬𑁂𑀯 𑀅𑀚𑁆𑀛𑀸𑀲𑀬𑁂𑀦 𑀆𑀭𑀤𑁆𑀥 𑀤𑁂𑀲𑀦𑀁 𑀚𑀸𑀦𑁂𑀬𑁆𑀬 𑀦𑀼 𑀔𑁄. 𑀧𑀭𑀚𑁆𑀛𑀸𑀲𑀬𑁂𑀦𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀓𑀲𑁆𑀲𑀘𑀺 𑀅𑀚𑁆𑀛𑀸𑀲𑀬𑁂𑀦. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁂𑀦𑀸𑀢𑀺 𑀇𑀥 𑀲𑀫𑀼𑀝𑁆𑀞𑀺𑀢𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸. 𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 𑀓𑀲𑁆𑀲𑀘𑀺 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦. 𑀆𑀭𑀤𑁆𑀥𑀤𑁂𑀲𑀦𑀁 𑀚𑀸𑀦𑁂𑀬𑁆𑀬𑀸𑀢𑀺. ‘‘𑀲𑀘𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸’’𑀢𑀺 𑀇𑀤𑀁 𑀇𑀫𑁂𑀲𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀬 𑀧𑀼𑀘𑁆𑀙𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀪𑀸𑀭𑀺𑀬𑀸, 𑀅𑀯𑀺𑀲𑀬𑀸 𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑁄𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺.

𑀏𑀢𑁆𑀣 𑀘 𑀬𑀲𑁆𑀫𑀸 𑀦 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀯𑀸 𑀬𑀼𑀢𑁆𑀢𑀸, 𑀅𑀣 𑀔𑁄 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀧𑀼𑀘𑁆𑀙𑀸𑀲𑀤𑀺𑀲𑀻 𑀯𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀧𑀼𑀘𑁆𑀙𑀸𑀲𑀤𑀺𑀲𑀻 𑀯𑀸 𑀧𑀼𑀘𑁆𑀙𑀸 𑀬𑀼𑀢𑁆𑀢𑀸, 𑀢𑀸𑀯 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀦 𑀬𑀣𑀸𑀥𑀫𑁆𑀫𑀯𑀲𑁂𑀦, 𑀢𑀢𑁆𑀣 𑀬𑀤𑀺 𑀪𑀕𑀯𑀸 𑀢𑀣𑀸 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀬𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀲𑀼𑀡𑀦𑁆𑀢𑀻𑀦𑀁 𑀤𑁂𑀯𑀢𑀸𑀦𑀁 𑀲𑀫𑁆𑀫𑁄𑀳𑁄 𑀪𑀯𑁂𑀬𑁆𑀬 ‘‘𑀓𑀺𑀁 𑀦𑀸𑀫𑁂𑀢𑀁 𑀪𑀕𑀯𑀸 𑀧𑀞𑀫𑀁 𑀏𑀯𑀫𑀸𑀳, 𑀧𑀼𑀦𑀧𑀺 𑀏𑀯𑀫𑀸𑀳𑀸’’𑀢𑀺, 𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀯𑀁 𑀧𑁂𑀢𑀸 𑀤𑁂𑀯𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼’’𑀦𑁆𑀢𑀺. 𑀬𑀣𑀸𑀥𑀫𑁆𑀫𑀤𑁂𑀲𑀦𑀸𑀬𑀁 𑀧𑀦 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀧𑀼𑀘𑁆𑀙𑀦𑁂𑀦 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺. 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄𑀢𑀺 𑀆𑀳 𑀤𑁂𑀯𑀲𑀗𑁆𑀖𑁄 𑀆𑀲𑀦𑁆𑀦𑀢𑀭𑀪𑀸𑀯𑁂𑀦 𑀑𑀪𑀸𑀲𑀲𑁆𑀲 𑀯𑀺𑀧𑀼𑀮𑀉𑀴𑀸𑀭𑀪𑀸𑀯𑀢𑁄. 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁬𑁧; 𑀫. 𑀦𑀺. 𑁩.𑁧𑁨𑁯; 𑀅. 𑀦𑀺. 𑁧.𑁨𑁭𑁭; 𑀯𑀺𑀪. 𑁮𑁦𑁯; 𑀦𑁂𑀢𑁆𑀢𑀺. 𑁫𑁭; 𑀫𑀺. 𑀧. 𑁫.𑁧.𑁧) 𑀆𑀕𑀢𑀦𑀬𑁂𑀦 𑀲𑀩𑁆𑀩𑀢𑁆𑀣𑁂𑀯 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑁆𑀯𑁂 𑀩𑀼𑀤𑁆𑀥𑀸 𑀦 𑀳𑁄𑀦𑁆𑀢𑁂𑀯. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀦𑁆𑀢𑀸𑀲𑀼…𑀧𑁂… 𑀅𑀤𑁆𑀤𑀲𑀸’’𑀢𑀺.

𑀕𑀸𑀣𑀸𑀬𑀁 𑀧𑀼𑀘𑁆𑀙𑀸𑀫𑀻𑀢𑀺 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀢𑀼𑀁 𑀑𑀓𑀸𑀲𑀁 𑀓𑀸𑀭𑀸𑀧𑁂𑀲𑀺. 𑀫𑀼𑀦𑀺𑀦𑁆𑀢𑀺 𑀩𑀼𑀤𑁆𑀥𑀫𑀼𑀦𑀺𑀁. 𑀧𑀳𑀽𑀢𑀧𑀜𑁆𑀜𑀦𑁆𑀢𑀺 𑀫𑀳𑀸𑀧𑀜𑁆𑀜𑀁. 𑀢𑀺𑀡𑁆𑀡𑀦𑁆𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑀁. 𑀧𑀸𑀭𑀗𑁆𑀕𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀁, 𑀲𑀩𑁆𑀩𑀲𑁆𑀲 𑀯𑀸 𑀜𑁂𑀬𑁆𑀬𑀲𑁆𑀲 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑀁. 𑀧𑀭𑀺𑀦𑀺𑀩𑁆𑀩𑀼𑀢𑀁 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀯𑀲𑁂𑀦. 𑀞𑀺𑀢𑀢𑁆𑀢𑀦𑁆𑀢𑀺 𑀅𑀯𑀝𑁆𑀞𑀺𑀢𑀘𑀺𑀢𑁆𑀢𑀁 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑁂𑀬𑁆𑀬𑀢𑀸𑀬. 𑀦𑀺𑀓𑁆𑀔𑀫𑁆𑀫 𑀖𑀭𑀸 𑀧𑀦𑀼𑀚𑁆𑀚 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀦𑀽𑀤𑀺𑀢𑁆𑀯𑀸 𑀖𑀭𑀸𑀯𑀸𑀲𑀸 𑀦𑀺𑀓𑁆𑀔𑀫𑁆𑀫. 𑀓𑀣𑀁 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸𑀢𑀺 𑀲𑁄 𑀪𑀺𑀓𑁆𑀔𑀼 𑀓𑀣𑀁 𑀲𑀫𑁆𑀫𑀸 𑀧𑀭𑀺𑀩𑁆𑀩𑀚𑁂𑀬𑁆𑀬 𑀕𑀘𑁆𑀙𑁂𑀬𑁆𑀬 𑀯𑀺𑀳𑀭𑁂𑀬𑁆𑀬, 𑀅𑀦𑀼𑀧𑀮𑀺𑀢𑁆𑀢𑁄 𑀳𑀼𑀢𑁆𑀯𑀸 𑀮𑁄𑀓𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁩𑁪. 𑀲𑀺𑀮𑁄𑀓𑀁 𑀅𑀦𑀼𑀓𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀲𑀺𑀮𑁄𑀓𑁄 𑀦𑀸𑀫 𑀧𑀸𑀤𑀲𑀫𑀼𑀤𑀬𑁄, 𑀇𑀲𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀕𑀸𑀣𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀸𑀤𑁄𑀯 𑀦𑀺𑀬𑀢𑀯𑀡𑁆𑀡𑀸𑀦𑀼𑀧𑀼𑀩𑁆𑀩𑀺𑀓𑀸𑀦𑀁 𑀧𑀤𑀸𑀦𑀁 𑀲𑀫𑀽𑀳𑁄, 𑀢𑀁 𑀲𑀺𑀮𑁄𑀓𑀁 𑀅𑀦𑀼𑀓𑀲𑁆𑀲𑀸𑀫𑀺 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀓𑁆𑀔𑀭…𑀧𑁂… 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺. 𑀬𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀁. 𑀆𑀫𑁂𑀟𑀺𑀢𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀬𑁂𑀲𑀼 𑀬𑁂𑀲𑀼 𑀞𑀸𑀦𑁂𑀲𑀽’’𑀢𑀺. 𑀪𑀼𑀫𑁆𑀫𑀸𑀢𑀺 𑀪𑀽𑀫𑀺𑀧𑀝𑀺𑀩𑀤𑁆𑀥𑀦𑀺𑀯𑀸𑀲𑀸. 𑀢𑀁 𑀢𑀁 𑀦𑀺𑀲𑁆𑀲𑀺𑀢𑀸 𑀢𑀁 𑀢𑀁 𑀞𑀸𑀦𑀁 𑀦𑀺𑀲𑁆𑀲𑀺𑀢𑀯𑀦𑁆𑀢𑁄 𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀺𑀮𑁄𑀓𑀁 𑀅𑀦𑀼𑀓𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑁂 𑀲𑀺𑀢𑀸 𑀕𑀺𑀭𑀺𑀕𑀩𑁆𑀪𑀭’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀯𑀺𑀯𑁂𑀓𑀯𑀸𑀲𑀁 𑀤𑀲𑁆𑀲𑁂𑀢𑀺, ‘‘𑀧𑀳𑀺𑀢𑀢𑁆𑀢𑀸 𑀲𑀫𑀸𑀳𑀺𑀢𑀸’’𑀢𑀺 𑀇𑀫𑀺𑀦𑀸 𑀪𑀸𑀯𑀦𑀸𑀪𑀺𑀬𑁄𑀕𑀁.

𑀩𑀳𑀼𑀚𑀦𑀸 𑀧𑀜𑁆𑀘𑀲𑀢𑀲𑀗𑁆𑀔𑁆𑀬𑀢𑁆𑀢𑀸. 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀢𑁄, 𑀢𑁂𑀚𑀼𑀲𑁆𑀲𑀤𑀢𑀸𑀬 𑀘 𑀲𑀻𑀳𑀸 𑀯𑀺𑀬 𑀧𑀯𑀺𑀯𑀺𑀢𑁆𑀢𑀢𑀸𑀬 𑀦𑀺𑀮𑀻𑀦𑀸. 𑀏𑀓𑀢𑁆𑀢𑀦𑁆𑀢𑀺 𑀏𑀓𑀻𑀪𑀸𑀯𑀁. 𑀑𑀤𑀸𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀸𑀥𑀺𑀕𑀫𑁂𑀦 𑀧𑀭𑀺𑀬𑁄𑀤𑀸𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸, 𑀦 𑀓𑁂𑀯𑀮𑀁 𑀲𑀭𑀻𑀭𑀲𑀼𑀤𑁆𑀥𑀺𑀬𑀸𑀯. 𑀯𑀺𑀧𑁆𑀧𑀲𑀦𑁆𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑁆𑀧𑀲𑀸𑀤𑁂𑀦 𑀯𑀺𑀲𑁂𑀲𑀢𑁄 𑀧𑀲𑀦𑁆𑀦𑀸. 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀪𑀸𑀯𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀯𑀺𑀮𑀸.

𑀪𑀺𑀓𑁆𑀔𑀽 𑀚𑀸𑀦𑀺𑀢𑁆𑀯𑀸𑀢𑀺 𑀪𑀺𑀦𑁆𑀦𑀓𑀺𑀮𑁂𑀲𑁂 𑀪𑀺𑀓𑁆𑀔𑀽 ‘‘𑀇𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀏𑀢𑁂 𑀤𑁂𑀯𑀓𑀸𑀬𑁂 𑀧𑀲𑁆𑀲𑀦𑁆𑀢𑀻𑀢𑀺 𑀚𑀸𑀦𑀺𑀢𑁆𑀯𑀸. 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀧𑀭𑀺𑀬𑁄𑀲𑀸𑀦𑁂 𑀅𑀭𑀺𑀬𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸. 𑀇𑀤𑀁 𑀲𑀩𑁆𑀩𑀦𑁆𑀢𑀺 𑀇𑀤𑀁 ‘‘𑀪𑀺𑀬𑁆𑀬𑁄 𑀧𑀜𑁆𑀘𑀲𑀢𑁂’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀁.

𑀢𑀤𑀢𑁆𑀣𑀸𑀬 𑀯𑀻𑀭𑀺𑀬𑀁 𑀓𑀭𑀺𑀁𑀲𑀽𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀯𑀻𑀭𑀺𑀬𑀁 𑀉𑀲𑁆𑀲𑀸𑀳𑀁 𑀅𑀓𑀁𑀲𑀼. 𑀢𑁂𑀦𑀸𑀳 ‘‘𑀦 𑀢𑀁 𑀢𑁂𑀳𑀻’’𑀢𑀺𑀆𑀤𑀺. 𑀲𑀢𑁆𑀢𑀭𑀺𑀦𑁆𑀢𑀺 𑀢-𑀓𑀸𑀭𑀲𑁆𑀲 𑀭-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀢𑁆𑀢𑀢𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀳𑀲𑁆𑀲’’𑀦𑁆𑀢𑀺 𑀧𑀦 𑀅𑀦𑀼𑀯𑀢𑁆𑀢𑀢𑀺, 𑀲𑀢𑁆𑀢𑀢𑀺𑀬𑁄𑀕𑁂𑀦 𑀩𑀳𑀼𑀯𑀘𑀦𑀁. 𑀢𑁂𑀦𑀸𑀳 ‘‘𑀏𑀓𑁂 𑀲𑀳𑀲𑁆𑀲𑀁. 𑀏𑀓𑁂 𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀦𑀻’’𑀢𑀺.

𑀅𑀦𑀦𑁆𑀢𑀦𑁆𑀢𑀺 𑀅𑀦𑁆𑀢𑀭𑀳𑀺𑀢𑀁, 𑀢𑀁 𑀧𑀦 𑀅𑀢𑀺𑀯𑀺𑀬 𑀫𑀳𑀦𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀧𑀼𑀮’’𑀦𑁆𑀢𑀺.

𑀅𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 ‘‘𑀯𑀯𑀢𑁆𑀣𑀺𑀢𑁆𑀯𑀸𑀦𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄 𑀏𑀯𑀢𑁆𑀣𑁄. 𑀢𑀁 𑀅𑀯𑁂𑀓𑁆𑀔𑀦𑀁 𑀦𑀺𑀘𑁆𑀙𑀬𑀓𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀯𑀢𑁆𑀣𑀧𑁂𑀢𑁆𑀯𑀸’’𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀕𑀸𑀣𑀸𑀲𑀼 𑀢𑀢𑀺𑀬𑀕𑀸𑀣𑀸𑀬 𑀧𑀘𑁆𑀙𑀺𑀫𑀤𑁆𑀥𑀁, 𑀘𑀢𑀼𑀢𑁆𑀣𑀕𑀸𑀣𑀸𑀬 𑀧𑀼𑀭𑀺𑀫𑀤𑁆𑀥𑀜𑁆𑀘 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀕𑀸𑀣𑀫𑁂𑀯𑀸’’𑀢𑀺.

𑀯𑀺𑀚𑀸𑀦𑀦𑀫𑁆𑀧𑀺 𑀤𑀲𑁆𑀲𑀦𑀁 𑀏𑀯𑀸𑀢𑀺 𑀆𑀳 ‘‘𑀧𑀲𑁆𑀲𑀣 𑀑𑀮𑁄𑀓𑁂𑀣𑀸’’𑀢𑀺. 𑀯𑀸𑀘𑀸𑀬𑀢𑀧𑀯𑀢𑁆𑀢𑀺𑀢𑀪𑀸𑀯𑀢𑁄 ‘‘𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀯 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺.

𑁩𑁩𑁫. 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀗𑁆𑀔𑀸𑀬𑀸𑀢𑀺 𑀲𑀢𑁆𑀢 𑀲𑀳𑀲𑁆𑀲𑀸. 𑀬𑀓𑁆𑀔𑀸𑀬𑁂𑀯𑀸𑀢𑀺 𑀬𑀓𑁆𑀔𑀚𑀸𑀢𑀺𑀓𑀸 𑀏𑀯. 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸𑀢𑀺 𑀫𑀳𑁂𑀲𑀓𑁆𑀔𑀸. 𑀇𑀤𑁆𑀥𑀺𑀫𑀦𑁆𑀢𑁄𑀢𑀺 𑀯𑀸 𑀫𑀳𑀸𑀦𑀼𑀪𑀸𑀯𑀸. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀫𑀳𑀧𑁆𑀧𑀪𑀸. 𑀯𑀡𑁆𑀡𑀯𑀦𑁆𑀢𑁄𑀢𑀺 𑀅𑀢𑀺𑀓𑁆𑀓𑀦𑁆𑀢𑀯𑀡𑁆𑀡𑀸. 𑀬𑀲𑀲𑁆𑀲𑀺𑀦𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑀸 𑀘𑁂𑀯 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑀸 𑀘. 𑀲𑀫𑀺𑀢𑀺-𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓’’𑀦𑁆𑀢𑀺.

𑀳𑁂𑀫𑀯𑀢𑀧𑀩𑁆𑀩𑀢𑁂𑀢𑀺 𑀳𑀺𑀫𑀯𑀢𑁄 𑀲𑀫𑀻𑀧𑁂 𑀞𑀺𑀢𑀧𑀩𑁆𑀩𑀢𑁂.

𑀏𑀢𑁂 𑀲𑀩𑁆𑀩𑁂𑀧𑀻𑀢𑀺 𑀏𑀢𑁂 𑀲𑀢𑁆𑀢𑀲𑀳𑀲𑁆𑀲𑀸 𑀓𑀸𑀧𑀺𑀮𑀯𑀢𑁆𑀣𑀯𑀸, 𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀸, 𑀢𑀺𑀲𑀳𑀲𑁆𑀲𑀸 𑀲𑀸𑀢𑀸𑀕𑀺𑀭𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑁄𑀴𑀲𑀲𑀳𑀲𑁆𑀲𑀸.

𑀭𑀸𑀚𑀕𑀳𑀦𑀕𑀭𑁂𑀢𑀺 𑀭𑀸𑀚𑀕𑀳𑀦𑀕𑀭𑀲𑁆𑀲 𑀲𑀫𑀻𑀧𑁂. 𑀢𑀦𑁆𑀢𑀺 𑀓𑀼𑀫𑁆𑀪𑀻𑀭𑀁.

𑁩𑁩𑁬. 𑀓𑀸𑀫𑀁 𑀧𑀸𑀘𑀻𑀦𑀤𑀺𑀲𑀁 𑀧𑀲𑀸𑀲𑀢𑀺, 𑀢𑀣𑀸𑀧𑀺 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀲𑀧𑀭𑀺𑀯𑀸𑀭𑀤𑀻𑀧𑁂𑀲𑀼 𑀘𑀢𑀽𑀲𑀼𑀧𑀺 𑀫𑀳𑀸𑀤𑀻𑀧𑁂𑀲𑀼 𑀕𑀦𑁆𑀥𑀩𑁆𑀩𑀸𑀦𑀁 𑀚𑁂𑀝𑁆𑀞𑀓𑁄, 𑀓𑀣𑀁? 𑀲𑀩𑁆𑀩𑁂 𑀢𑁂 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺.𑀓𑀼𑀫𑁆𑀪𑀡𑁆𑀟𑀸𑀦𑀁 𑀅𑀥𑀺𑀧𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀲𑁆𑀲𑀸𑀧𑀺 𑀯𑀺𑀭𑀼𑀴𑁆𑀳𑀲𑁆𑀲. 𑀢𑀸𑀤𑀺𑀲𑀸𑀬𑁂𑀯𑀸𑀢𑀺 𑀥𑀢𑀭𑀝𑁆𑀞𑀲𑁆𑀲 𑀧𑀼𑀢𑁆𑀢𑀲𑀤𑀺𑀲𑀸 𑀏𑀯 𑀧𑀼𑀣𑀼𑀢𑁆𑀣𑀢𑁄, 𑀦𑀸𑀫𑀢𑁄, 𑀩𑀮𑀢𑁄, 𑀇𑀤𑁆𑀥𑀺𑀆𑀤𑀺𑀯𑀺𑀲𑁂𑀲𑀢𑁄 𑀘.

𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀧𑀘𑁆𑀘𑁂𑀓𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄𑀢𑀺 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀡𑁆𑀳𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀅𑀬𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺.

𑀘𑀢𑀼𑀭𑁄 𑀤𑀺𑀲𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼. 𑀘𑀢𑀼𑀭𑁄 𑀤𑀺𑀲𑀸 𑀚𑀮𑀫𑀸𑀦𑀸 𑀲𑀫𑀼𑀚𑁆𑀚𑀮𑀦𑁆𑀢𑀸 𑀑𑀪𑀸𑀲𑁂𑀦𑁆𑀢𑀸. 𑀬𑀤𑀺 𑀏𑀯𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀆𑀕𑀢𑀸𑀦𑀁 𑀓𑀣𑀁 𑀓𑀸𑀧𑀺𑀮𑀯𑀢𑁆𑀣𑀯𑁂 𑀯𑀦𑁂 𑀞𑀺𑀢𑀸𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺.

𑁩𑁩𑁭. 𑀢𑁂𑀲𑀁 𑀫𑀳𑀸𑀭𑀸𑀚𑀸𑀦𑀁 𑀤𑀸𑀲𑀸𑀢𑀺 𑀬𑁄𑀚𑀦𑀸. 𑀫𑀸𑀬𑀸𑀬 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀫𑀸𑀬𑀸𑀯𑀺𑀦𑁄. 𑀯𑀜𑁆𑀘𑀦𑀁 𑀏𑀢𑁂𑀲𑀼 𑀅𑀢𑁆𑀣𑀺, 𑀯𑀜𑁆𑀘𑀦𑁂 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀯𑀜𑁆𑀘𑀦𑀺𑀓𑀸. 𑀓𑁂𑀭𑀸𑀝𑀺𑀬𑀲𑀸𑀞𑁂𑀬𑁆𑀬𑁂𑀦𑀸𑀢𑀺 𑀦𑀺𑀳𑀻𑀦𑀲𑀞𑁂𑀦 𑀓𑀫𑁆𑀫𑁂𑀦. 𑀫𑀸𑀬𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀸𑀬𑀸, 𑀢𑁂 𑀘 𑀧𑀭𑁂𑀲𑀁 𑀯𑀜𑁆𑀘𑀦𑀢𑁆𑀣𑀁 𑀬𑁂𑀦 𑀫𑀸𑀬𑀸𑀓𑀭𑀡𑁂𑀦 ‘‘𑀫𑀸𑀬𑀸’’𑀢𑀺 𑀯𑀼𑀢𑁆𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀬𑀸𑀓𑀸𑀭𑀓𑀸’’𑀢𑀺 𑀆𑀳.

𑀏𑀢𑁆𑀢𑀓𑀸 𑀤𑀸𑀲𑀸𑀢𑀺 𑀏𑀢𑁆𑀢𑀓𑀸 𑀓𑀼𑀝𑁂𑀡𑁆𑀟𑀼𑀆𑀤𑀺𑀓𑀸 𑀦𑀺𑀖𑀡𑁆𑀟𑀼𑀧𑀭𑀺𑀬𑁄𑀲𑀸𑀦𑀸 𑀅𑀝𑁆𑀞𑀫𑀳𑀸𑀭𑀸𑀚𑀸𑀦𑀁 𑀤𑀸𑀲𑀸.

𑀤𑁂𑀯𑀭𑀸𑀚𑀸𑀦𑁄𑀢𑀺 𑀤𑁂𑀯𑀸 𑀳𑀼𑀢𑁆𑀯𑀸 𑀢𑀁𑀢𑀁𑀤𑁂𑀯𑀓𑀸𑀬𑀲𑁆𑀲 𑀭𑀸𑀚𑀸𑀦𑁄. 𑀘𑀺𑀢𑁆𑀢𑁄 𑀘 𑀲𑁂𑀦𑁄 𑀘 𑀘𑀺𑀢𑁆𑀢𑀲𑁂𑀦𑁄 𑀘𑀸𑀢𑀺 𑀢𑀬𑁄 𑀏𑀢𑁂 𑀤𑁂𑀯𑀧𑀼𑀢𑁆𑀢𑀸 𑀧𑀸𑀴𑀺𑀬𑀁 𑀏𑀓𑀲𑁂𑀲𑀦𑀬𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀘𑀺𑀢𑁆𑀢𑁄 𑀘𑀸’’𑀢𑀺𑀆𑀤𑀺.

𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀫𑀺𑀢𑁄 𑀲𑀦𑁆𑀦𑀺𑀧𑀢𑀺𑀢𑁄 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑀫𑀺𑀢𑀺, 𑀇𑀫𑀁 𑀯𑀦𑀁.

𑁩𑁩𑁮. 𑀦𑀸𑀕𑀲𑀤𑀳𑀯𑀸𑀲𑀺𑀓𑀸𑀢𑀺 𑀦𑀸𑀕𑀲𑀤𑀳𑀦𑀺𑀯𑀸𑀲𑀺𑀦𑁄. 𑀢𑀢𑁆𑀣𑁂𑀓𑁄 𑀓𑀺𑀭 𑀦𑀸𑀕𑀭𑀸𑀚𑀸, 𑀘𑀺𑀭𑀓𑀸𑀮𑀁 𑀯𑀲𑀢𑁄 𑀢𑀲𑁆𑀲 𑀧𑀭𑀺𑀲𑀸 𑀫𑀳𑀢𑀻 𑀧𑀭𑀫𑁆𑀧𑀭𑀸𑀕𑀢𑀸 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀘𑁆𑀙𑀓𑀦𑀸𑀕𑀧𑀭𑀺𑀲𑀸𑀬𑀸’’𑀢𑀺.

𑀬𑀫𑀼𑀦𑀯𑀸𑀲𑀺𑀦𑁄𑀢𑀺 𑀬𑀫𑀼𑀦𑀸𑀬𑀁 𑀯𑀲𑀦𑀓𑀦𑀸𑀕𑀸. 𑀦𑀸𑀕𑀯𑁄𑀳𑀸𑀭𑁂𑀦𑀸𑀢𑀺 𑀳𑀢𑁆𑀣𑀺𑀦𑀸𑀕𑀯𑁄𑀳𑀸𑀭𑁂𑀦.

𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 𑀓𑀫𑁆𑀩𑀮𑀲𑁆𑀲𑀢𑀭𑁂 𑀞𑀧𑁂𑀢𑁆𑀯𑀸 𑀇𑀢𑀭𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀸𑀕𑀸. 𑀮𑁄𑀪𑀸𑀪𑀺𑀪𑀽𑀢𑀸𑀢𑀺 𑀆𑀳𑀸𑀭𑀮𑁄𑀪𑁂𑀦 𑀅𑀪𑀺𑀪𑀽𑀢𑀸. 𑀤𑀺𑀩𑁆𑀩𑀸𑀦𑀼𑀪𑀸𑀯𑀢𑀸𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑀢𑁄, 𑀤𑀺𑀩𑁆𑀩𑀸𑀦𑀼𑀪𑀸𑀯𑀳𑁂𑀢𑀼 𑀯𑀸 𑀤𑀺𑀩𑁆𑀩𑀸. ‘‘𑀘𑀺𑀢𑁆𑀭𑀲𑀼𑀧𑀡𑁆𑀡𑀸’’𑀢𑀺 𑀦𑀸𑀫𑀁 𑀯𑀺𑀘𑀺𑀢𑁆𑀭𑀲𑀼𑀦𑁆𑀤𑀭𑀧𑀢𑁆𑀢𑀯𑀦𑁆𑀢𑀢𑀸𑀬.

𑀉𑀧𑀯𑁆𑀳𑀬𑀦𑁆𑀢𑀸𑀢𑀺 𑀉𑀧𑁂𑀘𑁆𑀘 𑀓𑀣𑁂𑀦𑁆𑀢𑀸. 𑀓𑀸𑀓𑁄𑀮𑀽𑀓𑀅𑀳𑀺𑀦𑀓𑀼𑀮𑀸𑀤𑀬𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀯𑁂𑀭𑀸𑀧𑀺 𑀲𑀫𑀸𑀦𑀸 𑀫𑀺𑀢𑁆𑀢𑀸 𑀯𑀺𑀬…𑀧𑁂… 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑀁𑀬𑁂𑀯 𑀢𑁂 𑀲𑀭𑀡𑀁 𑀕𑀢𑀸 ‘‘𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑁂𑀯 𑀫𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀫𑁂𑀢𑁆𑀢𑀺𑀁 𑀧𑀝𑀺𑀮𑀪𑀺𑀫𑁆𑀳𑀸’’𑀢𑀺.

𑁩𑁩𑁯. 𑀪𑀸𑀢𑀭𑁄𑀢𑀺 𑀫𑁂𑀣𑀼𑀦𑀪𑀸𑀢𑀭𑁄. 𑀢𑁂𑀦𑀸𑀳 ‘‘𑀲𑀼𑀚𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀓𑀸𑀭𑀡𑀸’’𑀢𑀺.

𑀢𑁂𑀲𑀽𑀢𑀺 𑀅𑀲𑀼𑀭𑁂𑀲𑀼. 𑀓𑀸𑀮𑀓𑀜𑁆𑀘𑀸𑀢𑀺 𑀏𑀯𑀁 𑀦𑀸𑀫𑀸. 𑀫𑀳𑀸𑀪𑀺𑀲𑁆𑀫𑀸𑀢𑀺 𑀪𑀺𑀁𑀲𑀦𑀓𑀫𑀳𑀸𑀲𑀭𑀻𑀭𑀸. 𑀅𑀪𑀩𑁆𑀩𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀦 𑀪𑀩𑁆𑀩𑀸 𑀅𑀘𑁆𑀙𑀦𑁆𑀤𑀺𑀓𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀙𑀦𑁆𑀤𑀲𑁆𑀲𑁂𑀯 𑀅𑀪𑀸𑀯𑀢𑁄.

𑀩𑀮𑀺𑀦𑁄 𑀫𑀳𑀸𑀅𑀲𑀼𑀭𑀲𑁆𑀲 𑀅𑀩𑁆𑀪𑀢𑀻𑀢𑀢𑁆𑀢𑀸 𑀢𑀲𑁆𑀲 𑀧𑀼𑀢𑁆𑀢𑁂 𑀏𑀯 𑀓𑀺𑀢𑁆𑀢𑁂𑀦𑁆𑀢𑁄 𑀪𑀕𑀯𑀸 ‘‘𑀲𑀢𑀜𑁆𑀘 𑀩𑀮𑀺𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀆𑀤𑀺𑀫𑀸𑀳. 𑀲𑁄 𑀓𑀺𑀭 𑀲𑀼𑀔𑀼𑀫𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀉𑀧𑀕𑀘𑁆𑀙𑀺.

𑁩𑁪𑁦. 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀦𑀺𑀩𑁆𑀩𑀢𑁆𑀢𑀸𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀅𑀧𑁆𑀧𑀦𑀸𑀛𑀸𑀦𑁂𑀦 𑀧𑀦 𑀦𑀺𑀩𑁆𑀩𑀢𑁆𑀢𑀸 𑀩𑁆𑀭𑀳𑁆𑀫𑀸𑀦𑁄 𑀳𑁄𑀦𑁆𑀢𑀺, 𑀢𑁂 𑀧𑀭𑀢𑁄 𑀯𑀓𑁆𑀔𑀢𑀺 ‘‘𑀲𑀼𑀩𑁆𑀭𑀳𑁆𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁪𑁧), 𑀅𑀬𑀜𑁆𑀘 𑀓𑀸𑀫𑀸𑀯𑀘𑀭𑀤𑁂𑀯𑀢𑀸 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀫𑁂𑀢𑁆𑀢𑀸𑀓𑀭𑀼𑀡𑀸𑀓𑀸𑀬𑀺𑀓𑀸𑀢𑀺 𑀫𑁂𑀢𑁆𑀢𑀸𑀛𑀸𑀦𑁂 𑀘 𑀓𑀭𑀼𑀡𑀸𑀛𑀸𑀦𑁂 𑀘 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀤𑁂𑀯𑀸’’𑀢𑀺. 𑀫𑁂𑀢𑁆𑀢𑀸𑀛𑀸𑀦𑁂 𑀓𑀭𑀼𑀡𑀸𑀛𑀸𑀦𑁂𑀢𑀺 𑀫𑁂𑀢𑁆𑀢𑀸𑀛𑀸𑀦𑀦𑀺𑀫𑀺𑀢𑁆𑀢𑀁 𑀓𑀭𑀼𑀡𑀸𑀛𑀸𑀦𑀦𑀺𑀫𑀺𑀢𑁆𑀢𑀁, 𑀢𑀤𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀢𑁂 𑀆𑀧𑁄𑀤𑁂𑀯𑀸𑀤𑀬𑁄 𑀬𑀣𑀸𑀲𑀓𑀁 𑀯𑀕𑁆𑀕𑀯𑀲𑁂𑀦 𑀞𑀺𑀢𑀢𑁆𑀢𑀸 𑀤𑀲𑀥𑀸 𑀞𑀺𑀢𑀸. 𑀬𑀸𑀯 𑀓𑀭𑀼𑀡𑀸𑀓𑀸𑀬𑀺𑀓𑀸 𑀤𑀲 𑀤𑁂𑀯𑀓𑀸𑀬𑀸.𑀦𑀸𑀦𑀢𑁆𑀢𑀯𑀡𑁆𑀡𑀸𑀢𑀺 𑀦𑀸𑀦𑀸𑀲𑀪𑀸𑀯𑀯𑀡𑁆𑀡𑀯𑀦𑁆𑀢𑁄.

𑀯𑁂𑀡𑁆𑀟𑀼𑀤𑁂𑀯𑀢𑀸𑀢𑀺 𑀯𑁂𑀡𑁆𑀟𑀼 𑀦𑀸𑀫 𑀤𑁂𑀯𑀢𑀸, 𑀏𑀯𑀁 𑀲𑀳𑀮𑀺 𑀤𑁂𑀯𑀢𑀸. 𑀅𑀲𑀫𑀤𑁂𑀯𑀢𑀸, 𑀬𑀫𑀓𑀤𑁂𑀯𑀢𑀸𑀢𑀺 ‘‘𑀤𑁆𑀯𑁂 𑀅𑀬𑀦𑀺𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀧𑁆𑀧𑀫𑀼𑀔𑀸 𑀤𑁆𑀯𑁂 𑀤𑁂𑀯𑀦𑀺𑀓𑀸𑀬𑀸𑀢𑀺. 𑀘𑀦𑁆𑀤𑀲𑁆𑀲𑀽𑀧𑀦𑀺𑀲𑀸 𑀤𑁂𑀯𑀸 𑀘𑀦𑁆𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁄 𑀯𑀢𑁆𑀢𑀫𑀸𑀦𑀸 𑀢𑀲𑁆𑀲 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀲𑁆𑀲𑀢𑁄 𑀘 𑀥𑀸𑀯𑀦𑀓𑀤𑁂𑀯𑀸. 𑀢𑁂𑀦𑀸𑀳 ‘‘𑀘𑀦𑁆𑀤𑀦𑀺𑀲𑁆𑀲𑀺𑀢𑀓𑀸 𑀤𑁂𑀯𑀸’’𑀢𑀺. 𑀲𑀽𑀭𑀺𑀬𑀲𑁆𑀲𑀽𑀧𑀦𑀺𑀲𑀸, 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀁 𑀯𑀸𑀢𑀯𑀸𑀬𑀦𑀳𑁂𑀢𑀯𑁄 𑀤𑁂𑀯𑀢𑀸 𑀯𑀸𑀢𑀯𑀮𑀸𑀳𑀓𑀸. 𑀢𑀣𑀸 𑀓𑁂𑀯𑀮𑀁 𑀅𑀩𑁆𑀪𑀧𑀝𑀮𑀲𑀜𑁆𑀘𑀭𑀡𑀳𑁂𑀢𑀯𑁄 𑀅𑀩𑁆𑀪𑀯𑀮𑀸𑀳𑀓𑀸. 𑀉𑀡𑁆𑀳𑀧𑁆𑀧𑀯𑀢𑁆𑀢𑀺𑀳𑁂𑀢𑀯𑁄 𑀉𑀡𑁆𑀳𑀯𑀮𑀸𑀳𑀓𑀸. 𑀯𑀲𑁆𑀲𑀯𑀮𑀸𑀳𑀓𑀸 𑀧𑀦 𑀧𑀚𑁆𑀚𑀼𑀦𑁆𑀦𑀲𑀤𑀺𑀲𑀸𑀢𑀺. 𑀢𑁂 𑀇𑀥 𑀦 𑀯𑀼𑀢𑁆𑀢𑀸. 𑀯𑀲𑀼𑀤𑁂𑀯𑀢𑀸 𑀦𑀸𑀫 𑀏𑀓𑁄 𑀤𑁂𑀯𑀦𑀺𑀓𑀸𑀬𑁄, 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀯𑀸𑀲𑀯𑁄, 𑀲𑀓𑁆𑀓𑁄.

𑀤𑀲𑁂𑀢𑁂𑀢𑀺 𑀏𑀢𑁂 𑀯𑁂𑀡𑁆𑀟𑀼𑀤𑁂𑀯𑀢𑀸𑀤𑀬𑁄 𑀯𑀸𑀲𑀯𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑁂𑀯𑀓𑀸𑀬𑀸.

𑀇𑀫𑀸𑀦𑀻𑀢𑀺 ‘‘𑀚𑀮𑀫𑀕𑁆𑀕𑀻’’𑀢𑀺 𑀘 ‘‘𑀲𑀺𑀔𑀸𑀭𑀺𑀯𑀸’’𑀢𑀺 𑀘 𑀇𑀫𑀸𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀓𑁂𑀘𑀺 𑀧𑀦 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 ‘‘𑀚𑀮𑀸’’𑀢𑀺 𑀘 ‘‘𑀅𑀕𑁆𑀕𑀻’’𑀢𑀺 𑀘 ‘‘𑀲𑀺𑀔𑀸𑀭𑀺𑀯𑀸’’𑀢𑀺 𑀘 𑀇𑀫𑀸𑀦𑀺 𑀢𑁂𑀲𑀁 𑀦𑀸𑀫𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀏𑀢𑁂𑀢𑀺 𑀢𑁂𑀲𑀼 𑀏𑀯 ‘‘𑀅𑀭𑀺𑀝𑁆𑀞𑀓𑀸, 𑀭𑁄𑀚𑀸’’𑀢𑀺 𑀘 𑀯𑀼𑀢𑁆𑀢𑀤𑁂𑀯𑁂𑀲𑀼 𑀏𑀓𑀘𑁆𑀘𑁂,𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄 𑀯𑀡𑁆𑀡𑀢𑁄 𑀉𑀫𑀸𑀧𑀼𑀧𑁆𑀨𑀲𑀤𑀺𑀲𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀅𑀜𑁆𑀜𑀣𑀸 𑀏𑀓𑀸𑀤𑀲 𑀤𑁂𑀯𑀓𑀸𑀬𑀸 𑀲𑀺𑀬𑀼𑀁.

𑀤𑀲𑁂𑀢𑁂𑀢𑀺 𑀏𑀢𑁂 𑀤𑀲 𑀲𑀳𑀪𑀽𑀤𑁂𑀯𑀸𑀤𑀬𑁄 𑀯𑀸𑀲𑀯𑀦𑁂𑀲𑀺𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑁂𑀯𑀓𑀸𑀬𑀸. 𑀢𑁂𑀦𑁂𑀯 𑀦𑀺𑀓𑀸𑀬𑀪𑁂𑀤𑀯𑀲𑁂𑀦 𑀤𑀲𑀥𑀸𑀯 𑀆𑀕𑀢𑀸.

‘‘𑀲𑀫𑀸𑀦𑀸’’𑀢𑀺𑀆𑀤𑀺 𑀢𑁂𑀲𑀁 𑀤𑁂𑀯𑀸𑀦𑀁 𑀦𑀺𑀓𑀸𑀬𑀲𑀫𑀼𑀤𑀸𑀬𑀕𑀢𑀁 𑀦𑀸𑀫𑀁. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺.

𑀤𑀲𑁂𑀢𑁂𑀢𑀺 𑀏𑀢𑁂 𑀲𑀫𑀸𑀦𑀸𑀤𑀺𑀓𑀸 𑀫𑀳𑀸𑀧𑀸𑀭𑀕𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑁂𑀯𑀓𑀸𑀬𑀸. 𑀢𑁂𑀦𑁂𑀯 𑀦𑀺𑀓𑀸𑀬𑀪𑁂𑀤𑁂𑀦 𑀤𑀲𑀥𑀸 𑀆𑀕𑀢𑀸.

𑀲𑀼𑀓𑁆𑀓𑀸𑀤𑀬𑁄 𑀢𑀬𑁄 𑀤𑁂𑀯𑀓𑀸𑀬𑀸. 𑀧𑀸𑀫𑁄𑀓𑁆𑀔𑀤𑁂𑀯𑀸𑀢𑀺 𑀧𑀫𑀼𑀔𑀸 𑀧𑀥𑀸𑀦𑀪𑀽𑀢𑀸 𑀤𑁂𑀯𑀸.

𑀤𑀺𑀲𑀸𑀢𑀺 𑀤𑀺𑀲𑀸𑀲𑀼. 𑀤𑁂𑀯𑁄𑀢𑀺 𑀫𑁂𑀖𑁄. 𑀤𑀲𑁂𑀢𑁂𑀢𑀺 𑀏𑀢𑁂 𑀲𑀼𑀓𑁆𑀓𑀸𑀤𑀬𑁄 𑀧𑀚𑁆𑀚𑀼𑀦𑁆𑀦𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑁂𑀯𑀓𑀸𑀬𑀸, 𑀢𑁂 𑀤𑁂𑀯𑀦𑀺𑀓𑀸𑀬𑀪𑁂𑀤𑁂𑀦 𑀤𑀲𑀥𑀸 𑀆𑀕𑀢𑀸.

𑀤𑀲𑁂𑀢𑁂𑀢𑀺 𑀏𑀢𑁂 𑀔𑁂𑀫𑀺𑀬𑀸𑀤𑀬𑁄 𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀬𑁄𑀲𑀸𑀦𑀸 𑀤𑀲 𑀤𑁂𑀯𑀓𑀸𑀬𑀸, 𑀢𑁂 𑀤𑁂𑀯𑀦𑀺𑀓𑀸𑀬𑀪𑁂𑀤𑁂𑀦 𑀤𑀲𑀥𑀸𑀯 𑀆𑀕𑀢𑀸. 𑀢𑀢𑁆𑀣 ‘‘𑀔𑁂𑀫𑀺𑀬𑀸, 𑀓𑀝𑁆𑀞𑀓𑀸𑀤𑀬𑁄 𑀘 𑀧𑀜𑁆𑀘𑀸𑀧𑀺 𑀲𑀤𑁂𑀯𑀓𑀸𑀬𑀸 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸’’𑀢𑀺 𑀯𑀤𑀦𑁆𑀢𑀺. 𑀦𑀸𑀫𑀦𑁆𑀯𑀬𑁂𑀦𑀸𑀢𑀺 𑀦𑀸𑀫𑀸𑀦𑀼𑀕𑀫𑁂𑀦 ‘‘𑀆𑀧𑁄𑀤𑁂𑀯𑀢𑀸’’𑀢𑀺𑀆𑀤𑀺𑀦𑀸𑀫𑀲𑀪𑀸𑀕𑁂𑀦. 𑀢𑁂𑀦𑁂𑀯𑀸𑀳 ‘‘𑀦𑀸𑀫𑀪𑀸𑀕𑁂𑀦 𑀦𑀸𑀫𑀓𑁄𑀝𑁆𑀞𑀸𑀲𑁂𑀦𑀸’’𑀢𑀺. 𑀲𑀩𑁆𑀩𑀸 𑀤𑁂𑀯𑀢𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀸𑀧𑀺 𑀤𑁂𑀯𑀢𑀸. 𑀦𑀺𑀤𑁆𑀤𑀺𑀲𑀢𑀺 𑀢𑀁𑀢𑀁𑀦𑀸𑀫𑀲𑀪𑀸𑀕𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸.

𑀧𑀯𑀼𑀢𑁆𑀣𑀸𑀢𑀺 𑀧𑀯𑀸𑀲𑀁 𑀕𑀢𑀸 𑀯𑀺𑀬 𑀅𑀧𑁂𑀢𑀸𑀢𑀺 𑀆𑀳 ‘‘𑀯𑀺𑀕𑀢𑀸’’𑀢𑀺. 𑀧𑀯𑀼𑀢𑁆𑀣𑀸 𑀯𑀸 𑀧𑀓𑀸𑀭𑀢𑁄 𑀯𑀼𑀢𑁆𑀣𑀸 𑀯𑀼𑀲𑀺𑀢𑀸, 𑀢𑁂𑀦 𑀚𑀸𑀢𑀺 𑀯𑀼𑀲𑀺𑀢𑀩𑁆𑀩𑀸 𑀅𑀲𑁆𑀲𑀸𑀢𑀺 𑀧𑀯𑀼𑀝𑁆𑀞𑀚𑀸𑀢𑀺. 𑀓𑀸𑀴𑀓𑀪𑀸𑀯𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀲𑀩𑁆𑀩𑀲𑁄 𑀢𑀤𑀪𑀸𑀯𑀢𑁄 𑀓𑀸𑀴𑀓𑀪𑀸𑀯𑀸𑀢𑀻𑀢𑀁 𑀤𑀲𑀩𑀮𑀁. 𑀮𑀜𑁆𑀘𑀦𑀸𑀪𑀸𑀯𑁂𑀦 𑀯𑀸 𑀅𑀲𑀺𑀢𑀸𑀢𑀺𑀕𑁄 𑀓𑀸𑀴𑀓𑀪𑀸𑀯𑀸𑀢𑀻𑀢𑀸𑀬 𑀲𑀺𑀭𑀺𑀬𑀸 𑀘𑀦𑁆𑀤𑁄, 𑀢𑀸𑀤𑀺𑀲𑀁 𑀘𑀦𑁆𑀤𑀁 𑀯𑀺𑀬 𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁.

𑁩𑁪𑁧. 𑀏𑀓𑁄 𑀩𑁆𑀭𑀳𑁆𑀫𑀸𑀢𑀺 𑀲𑀕𑀸𑀣𑀓𑀯𑀕𑁆𑀕𑁂 (𑀲𑀁. 𑀦𑀺. 𑁧.𑁯𑁮) 𑀆𑀕𑀢𑁄 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑁄. 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑁂𑀝𑁆𑀞𑀺𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸 𑀅𑀭𑀺𑀬𑀩𑁆𑀭𑀳𑁆𑀫𑀸𑀦𑁄, 𑀦 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄. 𑀢𑀺𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀸 𑀧𑀼𑀣𑀼𑀚𑁆𑀚𑀦𑁄, 𑀬𑁄 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀚𑀸𑀢𑁄.

𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑁄 𑀏𑀢𑁂𑀲𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑀸, 𑀩𑁆𑀭𑀳𑁆𑀫𑀸𑀦𑁄, 𑀢𑁂𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀲𑀳𑀲𑁆𑀲𑀁 𑀲𑀢𑁆𑀢𑀮𑁄𑀓𑀧𑀭𑀺𑀬𑀸𑀬𑁄 𑀘𑀸𑀬𑀁 𑀮𑁄𑀓𑀲𑀤𑁆𑀤𑁄𑀢𑀺 𑀆𑀳 ‘‘𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀳𑀲𑁆𑀲𑀁 𑀆𑀕𑀢’’𑀦𑁆𑀢𑀺. 𑀅𑀦𑀦𑁆𑀢𑀭𑀕𑀸𑀣𑀸𑀬𑀁 ‘‘𑀆𑀕𑀢𑀸’’𑀢𑀺 𑀯𑀼𑀢𑁆𑀢𑀧𑀤𑀫𑁂𑀯 𑀅𑀢𑁆𑀣𑀯𑀲𑁂𑀦 𑀯𑀤𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀩𑁆𑀭𑀳𑁆𑀫𑀲𑀳𑀲𑁆𑀲𑁂. 𑀅𑀜𑁆𑀜𑁂 𑀩𑁆𑀭𑀳𑁆𑀫𑁂𑀢𑀺 𑀢𑀤𑀜𑁆𑀜𑁂 𑀩𑁆𑀭𑀳𑁆𑀫𑀸𑀦𑁄. 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀡𑁆𑀡𑁂𑀦, 𑀬𑀲𑀲𑀸 𑀆𑀬𑀼𑀦𑀸 𑀘.

𑀇𑀲𑁆𑀲𑀭𑀸𑀢𑀺 𑀢𑁂𑀦𑁂𑀯 𑀯𑀲𑀧𑀯𑀢𑁆𑀢𑀦𑁂𑀦 𑀲𑁂𑀲𑀩𑁆𑀭𑀳𑁆𑀫𑀸𑀦𑀁 𑀅𑀥𑀺𑀧𑀢𑀺𑀦𑁄.

𑁩𑁪𑁨. 𑀓𑀸𑀴𑀓𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀓𑀸𑀴𑀓𑀲𑁆𑀲 𑀧𑀸𑀧𑀺𑀫𑀲𑁆𑀲 𑀫𑀸𑀭𑀲𑁆𑀲 𑀩𑀸𑀮𑀪𑀸𑀯𑀁 𑀧𑀲𑁆𑀲𑀣, 𑀬𑁄 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂 𑀦𑀺𑀭𑀢𑁆𑀣𑀓𑀁 𑀧𑀭𑀓𑁆𑀓𑀫𑀺𑀢𑀼𑀁 𑀯𑀸𑀬𑀫𑀢𑀺.

𑀯𑀻𑀢𑀭𑀸𑀕𑀪𑀸𑀯𑀸𑀯𑀳𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑁂𑀦 𑀅𑀯𑀻𑀢𑀭𑀸𑀕𑀸 𑀭𑀸𑀕𑁂𑀦 𑀩𑀤𑁆𑀥𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀸𑀕𑁂𑀦 𑀩𑀤𑁆𑀥𑀁 𑀳𑁄𑀢𑀽’’𑀢𑀺.

𑀪𑀬𑀸𑀦𑀓𑀁 𑀲𑀭𑀜𑁆𑀘 𑀓𑀢𑁆𑀯𑀸𑀢𑀺 𑀪𑁂𑀭𑀯𑀁 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀲𑀫𑀼𑀝𑁆𑀞𑀧𑁂𑀢𑁆𑀯𑀸.

𑀇𑀤𑀸𑀦𑀺 𑀢𑀁 𑀲𑀤𑁆𑀤𑀁 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺 𑀆𑀤𑀺𑀫𑀸𑀳. 𑀓𑀜𑁆𑀘𑀻𑀢𑀺 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀓𑀜𑁆𑀘𑀺 𑀤𑁂𑀯𑀢𑀁, 𑀫𑀸𑀦𑀼𑀲𑀓𑀁 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑀬𑀁𑀯𑀲𑁂 𑀲𑀬𑀜𑁆𑀘 𑀦 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑁄. 𑀢𑁂𑀦𑀸𑀳 ‘‘𑀅𑀲𑀬𑀁𑀯𑀲𑀻’’𑀢𑀺𑀆𑀤𑀺.

𑁩𑁪𑁩. ‘‘𑀯𑀻𑀢𑀭𑀸𑀕𑁂𑀳𑀻’’𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁. 𑀲𑀩𑁆𑀩𑀸𑀬𑀧𑀺 𑀳𑀺 𑀢𑀢𑁆𑀣 𑀲𑀫𑀸𑀕𑀢𑀧𑀭𑀺𑀲𑀸𑀬 𑀫𑀸𑀭𑀲𑁂𑀦𑀸 𑀅𑀧𑀓𑁆𑀓𑀦𑁆𑀢𑀸𑀯. 𑀦𑁂𑀲𑀁 𑀮𑁄𑀫𑀫𑁆𑀧𑀺 𑀇𑀜𑁆𑀚𑀬𑀼𑀁 𑀢𑁂𑀲𑀁 𑀮𑁄𑀫𑀫𑀢𑁆𑀢𑀫𑁆𑀧𑀺 𑀦 𑀘𑀸𑀮𑁂𑀲𑀼𑀁, 𑀓𑀼𑀢𑁄 𑀅𑀦𑁆𑀢𑀭𑀸𑀬𑀓𑀭𑀡𑀁. 𑀇𑀢𑀺 𑀬𑀢𑁆𑀢𑀓𑀸 𑀢𑀢𑁆𑀣 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀺𑀁𑀲𑀼, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑁆𑀢𑀭𑀸𑀬𑀸𑀓𑀭𑀡𑀯𑀲𑁂𑀦 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀯𑀻𑀢𑀭𑀸𑀕𑀕𑁆𑀕𑀳𑀡𑁂𑀦 𑀯𑀸 𑀲𑀭𑀸𑀕𑀯𑀻𑀢𑀭𑀸𑀕𑀯𑀺𑀪𑀸𑀯𑀺𑀦𑁄 𑀘 𑀢𑀢𑁆𑀣 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀭𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄. 𑀓𑀣𑀜𑁆𑀳𑀺 𑀦𑀸𑀫 𑀢𑀸𑀯 𑀖𑁄𑀭𑀢𑀭𑀁 𑀫𑀳𑀢𑀺𑀁 𑀯𑀺𑀪𑀺𑀁𑀲𑀓𑀁 𑀫𑀬𑀺 𑀓𑀭𑁄𑀦𑁆𑀢𑁂𑀧𑀺 𑀲𑀩𑁆𑀩𑁂 𑀧𑀺𑀫𑁂 𑀦𑀺𑀩𑁆𑀩𑀺𑀓𑀸𑀭𑀸 𑀲𑀫𑀸𑀳𑀺𑀢𑀸 𑀏𑀯. 𑀓𑀲𑁆𑀫𑀸? 𑀯𑀺𑀚𑀺𑀢𑀸𑀯𑀺𑀦𑁄 𑀇𑀫𑁂 𑀉𑀢𑁆𑀢𑀫𑀧𑀼𑀭𑀺𑀲𑀸𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁂’’𑀢𑀺𑀆𑀤𑀺. 𑀬𑀸𑀤𑀺𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑀦𑀺𑀲𑁆𑀲𑀺𑀢𑁄 𑀧𑀫𑁄𑀤𑁄, 𑀦 𑀓𑀤𑀸𑀘𑀺 𑀢𑀸𑀤𑀺𑀲𑁄 𑀅𑀦𑀭𑀺𑀬𑀸𑀦𑀁 𑀳𑁄𑀢𑀻𑀢𑀺 ‘‘𑀲𑀸𑀲𑀦𑁂 𑀪𑀽𑀢𑁂𑀳𑀺 𑀅𑀭𑀺𑀬𑁂𑀳𑀺’’ 𑀇𑀘𑁆𑀘𑁂𑀢𑀁 𑀯𑀼𑀢𑁆𑀢𑀁. 𑀯𑀺-𑀲𑀤𑁆𑀤𑁂𑀦 𑀯𑀺𑀦𑀸 𑀓𑁂𑀯𑀮𑁄𑀧𑀺 𑀲𑀼𑀢-𑀲𑀤𑁆𑀤𑁄 𑀯𑀺𑀔𑁆𑀬𑀸𑀢𑀢𑁆𑀣𑀯𑀘𑀦𑁄 𑀳𑁄𑀢𑀺 ‘‘𑀲𑀼𑀢𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁫; 𑀉𑀤𑀸. 𑁧𑁧) 𑀯𑀺𑀬𑀸𑀢𑀺 𑀆𑀳 ‘‘𑀚𑀦𑁂 𑀯𑀺𑀲𑁆𑀲𑀼𑀢𑀸’’𑀢𑀺.

𑀤𑀽𑀭𑁂𑀢𑀺 𑀤𑀽𑀭𑁂 𑀧𑀤𑁂𑀲𑁂. 𑀤𑀳𑀭𑀲𑁆𑀲 𑀅𑀦𑁆𑀢𑀭𑀸𑀬𑀁 𑀧𑀭𑀺𑀳𑀭𑀦𑁆𑀢𑀻 ‘‘𑀦 𑀲𑀓𑁆𑀓𑀸 𑀪𑀦𑁆𑀢𑁂 𑀲𑀓𑀮𑀁 𑀓𑀸𑀬𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀅𑀯𑁄𑀘𑀸𑀢𑀺.

𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.