𑁮. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁪𑁪. 𑀅𑀫𑁆𑀩𑀲𑀡𑁆𑀟𑀸𑀦𑀁 𑀅𑀤𑀽𑀭𑀪𑀯𑀢𑁆𑀢𑀸 𑀏𑀓𑁄𑀧𑀺 𑀲𑁄 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 ‘‘𑀅𑀫𑁆𑀩𑀲𑀡𑁆𑀟𑀸’’𑀢𑁆𑀯𑁂𑀯 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀬𑀣𑀸 ‘‘𑀯𑀭𑀡𑀸 𑀦𑀕𑀭’’𑀦𑁆𑀢𑀺. 𑀯𑁂𑀤𑀺 𑀏𑀯 𑀯𑁂𑀤𑀺𑀓𑁄, 𑀯𑁂𑀤𑀺𑀓𑁄 𑀏𑀯 𑀯𑁂𑀤𑀺𑀬𑁄 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸, 𑀢𑀲𑁆𑀫𑀺𑀁 𑀯𑁂𑀤𑀺𑀬𑀓𑁂. 𑀢𑁂𑀦𑀸𑀳 ‘‘𑀫𑀡𑀺𑀯𑁂𑀤𑀺𑀓𑀸𑀲𑀤𑀺𑀲𑁂𑀦𑀸’’𑀢𑀺𑀆𑀤𑀺, 𑀇𑀦𑁆𑀤𑀦𑀻𑀮𑀸𑀤𑀺𑀫𑀡𑀺𑀫𑀬𑀯𑁂𑀤𑀺𑀓𑀸𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀧𑀻𑀢𑀺 𑀮𑁂𑀡𑀓𑀭𑀡𑀢𑁄 𑀧𑀼𑀩𑁆𑀩𑁂, 𑀕𑀼𑀳𑀸𑀭𑀽𑀧𑁂𑀦 𑀞𑀺𑀢𑀸, 𑀤𑁆𑀯𑀸𑀭𑁂 𑀇𑀦𑁆𑀤𑀲𑀸𑀮𑀭𑀼𑀓𑁆𑀔𑀯𑀢𑀻 𑀘, 𑀢𑀲𑁆𑀫𑀸 ‘‘𑀇𑀦𑁆𑀤𑀲𑀸𑀮𑀕𑀼𑀳𑀸’’𑀢𑀺 𑀯𑀼𑀢𑁆𑀢𑀸 𑀧𑀼𑀭𑀺𑀫𑀯𑁄𑀳𑀸𑀭𑁂𑀦.

𑀉𑀲𑁆𑀲𑀼𑀓𑁆𑀓𑀁 𑀯𑀼𑀘𑁆𑀘𑀢𑀺 𑀅𑀪𑀺𑀭𑀼𑀘𑀺, 𑀢𑀁 𑀧𑀦 𑀩𑀼𑀤𑁆𑀥𑀤𑀲𑁆𑀲𑀦𑀓𑀸𑀫𑀢𑀸𑀯𑀲𑁂𑀦, 𑀢𑀣𑀸 𑀉𑀲𑁆𑀲𑀸𑀳𑀦𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀸 ‘‘𑀥𑀫𑁆𑀫𑀺𑀓𑁄 𑀉𑀲𑁆𑀲𑀸𑀳𑁄’’𑀢𑀺 𑀯𑀼𑀢𑁆𑀢𑀁. 𑀲𑀓𑁆𑀓𑁂𑀦 𑀲𑀤𑀺𑀲𑁄…𑀧𑁂… 𑀦𑀢𑁆𑀣𑀻𑀢𑀺. 𑀬𑀣𑀸𑀳 ‘‘𑀅𑀧𑁆𑀧𑀫𑀸𑀤𑁂𑀦 𑀫𑀖𑀯𑀸, 𑀤𑁂𑀯𑀸𑀦𑀁 𑀲𑁂𑀝𑁆𑀞𑀢𑀁 𑀕𑀢𑁄’’𑀢𑀺 (𑀥. 𑀧. 𑁩𑁦). 𑀧𑀭𑀺𑀢𑁆𑀢𑀓𑁂𑀦𑀸𑀢𑀺 𑀅𑀧𑀭𑀸𑀧𑀭𑀁 𑀩𑀳𑀼𑀁 𑀧𑀼𑀜𑁆𑀜𑀓𑀫𑁆𑀫𑀁 𑀅𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦.

𑀲𑀓𑁆𑀓𑁄𑀧𑀺 𑀓𑀸𑀫𑀁 𑀫𑀳𑀸𑀧𑀼𑀜𑁆𑀜𑀓𑀢𑀪𑀻𑀭𑀼𑀢𑁆𑀢𑀸𑀦𑁄 𑀳𑁄𑀢𑀺, 𑀲𑀸𑀢𑀺𑀲𑀬𑀸𑀬 𑀧𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀬𑁄𑀕𑀳𑁂𑀢𑀼𑀓𑁂𑀦 𑀲𑁄𑀓𑁂𑀦 𑀤𑀺𑀕𑀼𑀡𑀺𑀢𑁂𑀦 𑀫𑀭𑀡𑀪𑀬𑁂𑀦 𑀲𑀁𑀢𑀚𑁆𑀚𑀺𑀢𑁄 𑀚𑀸𑀢𑁄. 𑀢𑁂𑀦𑀸𑀳 ‘‘𑀲𑀓𑁆𑀓𑁄 𑀧𑀦 𑀫𑀭𑀡𑀪𑀬𑀸𑀪𑀺𑀪𑀽𑀢𑁄 𑀅𑀳𑁄𑀲𑀻’’𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑁂𑀯𑀢𑀸𑀦𑀁 𑀤𑀲𑁆𑀲𑀦𑀁 𑀦𑀸𑀫 𑀧𑀝𑀺𑀯𑀺𑀚𑁆𑀛𑀦𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀧𑀝𑀺𑀯𑀺𑀚𑁆𑀛𑀻’’𑀢𑀺. 𑀧𑀸𑀝𑀺𑀬𑁂𑀓𑁆𑀓𑁄 𑀯𑁄𑀳𑀸𑀭𑁄𑀢𑀺 𑀆𑀯𑁂𑀡𑀺𑀓𑁄 𑀧𑀺𑀬𑀲𑀫𑀼𑀤𑀸𑀳𑀸𑀭𑁄. 𑀫𑀭𑀺𑀲𑀦𑀺𑀬𑀲𑀫𑁆𑀧𑀢𑁆𑀢𑀺𑀓𑀸𑀢𑀺 𑀫𑀸𑀭𑀺𑀲𑀸. 𑀢𑁂𑀲𑀜𑁆𑀳𑀺 𑀲𑀫𑁆𑀧𑀢𑁆𑀢𑀺𑀬𑁄 𑀫𑀳𑀸𑀦𑀼𑀪𑀸𑀯𑀢𑀸𑀬 𑀲𑀳𑀦𑁆𑀢𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀜𑁆𑀜𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑀸𑀬 𑀘𑁂𑀯 𑀅𑀧𑁆𑀧𑀳𑀼𑀓𑀸𑀬 𑀘 𑀦 𑀲𑀳𑀦𑁆𑀢𑀺𑀬𑁂𑀯, 𑀲𑀸 𑀧𑀦 𑀦𑁂𑀲𑀁 𑀫𑀭𑀺𑀲𑀦𑀺𑀬𑀲𑀫𑁆𑀧𑀢𑁆𑀢𑀺𑀓𑀢𑀸 𑀤𑀼𑀓𑁆𑀔𑀯𑀺𑀭𑀳𑀺𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀤𑁆𑀤𑀼𑀓𑁆𑀔𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀏𑀓𑀓𑁄 𑀯𑀸𑀢𑀺 𑀤𑁂𑀯𑀧𑀭𑀺𑀲𑀸𑀬 𑀯𑀺𑀦𑀸 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀫𑀸𑀢𑀮𑀺𑀆𑀤𑀬𑁄 𑀧𑀦 𑀢𑀸𑀤𑀺𑀲𑀸 𑀲𑀳𑀸𑀬𑀸 𑀢𑀤𑀸𑀧𑀺 𑀅𑀳𑁂𑀲𑀼𑀁𑀬𑁂𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀧𑀺 𑀘𑀸𑀬𑀁 𑀆𑀬𑀲𑁆𑀫𑀢𑁄 𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁫𑁨). 𑀑𑀓𑀸𑀲𑀁 𑀦𑀸𑀓𑀸𑀲𑀺 𑀲𑀓𑁆𑀓𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀩𑀳𑀽𑀦𑀁 𑀤𑁂𑀯𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀉𑀧𑀧𑀭𑀺𑀓𑁆𑀔𑀫𑀸𑀦𑁄. 𑀲𑁄𑀢𑀺 𑀲𑀓𑁆𑀓𑁄.

𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀏𑀯𑀁 𑀳𑁄𑀢𑀽’’𑀢𑀺𑀆𑀤𑀺. 𑀪𑀤𑁆𑀤𑀁𑀢𑀯𑀸𑀢𑀺 𑀧𑀦 𑀲𑀓𑁆𑀓𑀁 𑀉𑀤𑁆𑀤𑀺𑀲𑁆𑀲 𑀦𑁂𑀲𑀁 𑀆𑀲𑀺 𑀯𑀸𑀤𑁄.

𑁩𑁪𑁫. 𑀯𑀮𑁆𑀮𑀪𑁄…𑀧𑁂… 𑀥𑀫𑁆𑀫𑀁 𑀲𑀼𑀡𑀸𑀢𑀻𑀢𑀺 𑀅𑀬𑀫𑀢𑁆𑀣𑁄 𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀸𑀤𑀻𑀳𑀺 (𑀤𑀻. 𑀦𑀺. 𑁨.𑁨𑁯𑁪) 𑀤𑀻𑀧𑁂𑀢𑀩𑁆𑀩𑁄. 𑀇𑀫𑀺𑀦𑀸 𑀓𑀢𑁄𑀓𑀸𑀲𑁂𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀺𑀔𑁂𑀦 𑀓𑀢𑁄𑀓𑀸𑀲𑁂 𑀪𑀕𑀯𑀢𑀺.

𑀅𑀦𑀼𑀘𑀭𑀺𑀬𑀦𑁆𑀢𑀺 𑀅𑀦𑀼𑀘𑀭𑀡𑀪𑀸𑀯𑀁, 𑀢𑀁 𑀧𑀦𑀲𑁆𑀲 𑀅𑀦𑀼𑀘𑀭𑀡𑀁 𑀦𑀸𑀫 𑀲𑀤𑁆𑀥𑀺𑀁 𑀕𑀫𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀳𑀘𑀭𑀡𑀁 𑀏𑀓𑀢𑁄 𑀕𑀫𑀦’’𑀦𑁆𑀢𑀺.

𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁. 𑀧𑁄𑀓𑁆𑀔𑀭𑀦𑁆𑀢𑀺 𑀯𑀻𑀡𑀸𑀬 𑀤𑁄𑀡𑀺𑀫𑀸𑀳. 𑀤𑀡𑁆𑀟𑁄𑀢𑀺 𑀯𑀻𑀡𑀤𑀡𑁆𑀟𑁄. 𑀯𑁂𑀞𑀓𑀸𑀢𑀺 𑀢𑀦𑁆𑀢𑀻𑀦𑀁 𑀩𑀦𑁆𑀥𑀦𑀸𑀬 𑀘𑁂𑀯 𑀉𑀧𑁆𑀧𑀻𑀴𑀦𑀸𑀬 𑀘 𑀥𑀫𑁂𑀢𑀩𑁆𑀩𑀸 𑀯𑁂𑀞𑀓𑀸. 𑀧𑀢𑁆𑀢𑀓𑀦𑁆𑀢𑀺 𑀧𑁄𑀓𑁆𑀔𑀭𑀁. 𑀲𑀫𑀧𑀜𑁆𑀜𑀸𑀲𑀫𑀼𑀘𑁆𑀙𑀦𑀸 𑀫𑀼𑀘𑁆𑀙𑁂𑀢𑁆𑀯𑀸𑀢𑀺 𑀬𑀣𑀸 𑀲𑀫𑀧𑀜𑁆𑀜𑀸𑀲𑀫𑀼𑀘𑁆𑀙𑀦𑀸 𑀓𑀫𑀢𑁄 𑀢𑀢𑁆𑀣 𑀲𑀁𑀫𑀼𑀘𑁆𑀙𑀦𑀁 𑀓𑀸𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀢𑀁 𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀲𑀫𑀧𑀜𑁆𑀜𑀸𑀲𑀫𑀼𑀘𑁆𑀙𑀦𑀸 𑀲𑀁𑀫𑀼𑀘𑁆𑀙𑁂𑀢𑁆𑀯𑀸’’𑀢𑀺 𑀘 𑀇𑀤𑀁 𑀤𑁂𑀯𑀮𑁄𑀓𑁂 𑀦𑀺𑀬𑀢𑀁 𑀯𑀻𑀡𑀸𑀯𑀸𑀤𑀦𑀯𑀺𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀮𑁄𑀓𑁂 𑀧𑀦 𑀏𑀓𑀯𑀻𑀲𑀢𑀺 𑀫𑀼𑀘𑁆𑀙𑀦𑀸. 𑀢𑁂𑀦𑁂𑀯𑀸𑀳 𑀯𑀻𑀡𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑁋

‘‘𑀲𑀢𑁆𑀢 𑀲𑀭𑀸 𑀢𑀬𑁄 𑀕𑀸𑀫𑀸, 𑀫𑀼𑀘𑁆𑀙𑀦𑀸 𑀏𑀓𑀯𑀻𑀲𑀢𑀺;

𑀢𑀸𑀦𑀸 𑀘𑁂𑀓𑀽𑀦𑀧𑀜𑁆𑀜𑀸𑀲, 𑀇𑀘𑁆𑀘𑁂𑀢𑁂 𑀲𑀭𑀫𑀡𑁆𑀟𑀮𑀸’’𑀢𑀺. (𑀅. 𑀦𑀺. 𑀅𑀝𑁆𑀞. 𑁩.𑁫𑁫; 𑀲𑀸𑀭𑀢𑁆𑀣. 𑀝𑀻. 𑁩.𑁨𑁪𑁩);

𑀢𑀢𑁆𑀣 𑀙𑀚𑁆𑀚𑁄, 𑀉𑀲𑀪𑁄, 𑀕𑀦𑁆𑀥𑀸𑀭𑁄, 𑀫𑀚𑁆𑀛𑀺𑀫𑁄, 𑀧𑀜𑁆𑀘𑀫𑁄, 𑀥𑁂𑀯𑀢𑁄, 𑀦𑀺𑀲𑀸𑀤𑁄𑀢𑀺 𑀏𑀢𑁂 𑀲𑀢𑁆𑀢 𑀲𑀭𑀸. 𑀙𑀚𑁆𑀚𑀕𑀸𑀫𑁄, 𑀫𑀚𑁆𑀛𑀺𑀫𑀕𑀸𑀫𑁄, 𑀲𑀸𑀥𑀸𑀭𑀡𑀕𑀸𑀫𑁄𑀢𑀺 𑀢𑀬𑁄 𑀕𑀸𑀫𑀸, 𑀲𑀭𑀲𑀫𑀽𑀳𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸𑀤𑀦𑀯𑀺𑀥𑀺𑀦𑀸 𑀏𑀓𑁂𑀓𑀲𑁆𑀲𑁂𑀯 𑀘 𑀲𑀭𑀲𑁆𑀲 𑀯𑀲𑁂𑀦 𑀢𑀬𑁄 𑀢𑀬𑁄 𑀫𑀼𑀘𑁆𑀙𑀦𑀸 𑀓𑀢𑁆𑀯𑀸 𑀏𑀓𑀯𑀻𑀲𑀢𑀺 𑀫𑀼𑀘𑁆𑀙𑀦𑀸. 𑀏𑀓𑁂𑀓𑀲𑁆𑀲𑁂𑀯 𑀘 𑀲𑀭𑀲𑁆𑀲 𑀲𑀢𑁆𑀢 𑀲𑀢𑁆𑀢 𑀢𑀸𑀦𑀪𑁂𑀤𑀸, 𑀬𑀢𑁄 𑀲𑀭𑀲𑁆𑀲 𑀫𑀦𑁆𑀤𑀢𑀭𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀢𑁂 𑀏𑀓𑀽𑀦𑀧𑀜𑁆𑀜𑀸𑀲 𑀢𑀸𑀦𑀯𑀺𑀲𑁂𑀲𑀸𑀢𑀺, 𑀢𑀺𑀲𑁆𑀲𑁄 𑀤𑀼𑀯𑁂 𑀘𑀢𑀲𑁆𑀲𑁄, 𑀘𑀢𑀲𑁆𑀲𑁄 𑀢𑀺𑀲𑁆𑀲𑁄 𑀤𑀼𑀯𑁂 𑀘𑀢𑀲𑁆𑀲𑁄𑀢𑀺 𑀤𑁆𑀯𑀸𑀯𑀻𑀲𑀢𑀺 𑀲𑀼𑀢𑀺𑀪𑁂𑀤𑀸 𑀇𑀘𑁆𑀙𑀺𑀢𑀸, 𑀅𑀬𑀁 𑀧𑀦 𑀏𑀓𑁂𑀓𑀲𑁆𑀲 𑀲𑀭𑀲𑁆𑀲 𑀯𑀲𑁂𑀦 𑀲𑀢𑁆𑀢 𑀲𑀢𑁆𑀢 𑀫𑀼𑀘𑁆𑀙𑀦𑀸, 𑀅𑀦𑁆𑀢𑀭𑀲𑀭𑀲𑁆𑀲 𑀘 𑀏𑀓𑀸𑀢𑀺 𑀲𑀫𑀧𑀜𑁆𑀜𑀸𑀲𑀸𑀬 𑀫𑀼𑀘𑁆𑀙𑀦𑀸𑀦𑀁 𑀬𑁄𑀕𑁆𑀬𑀪𑀸𑀯𑁂𑀦 𑀯𑀻𑀡𑀁 𑀯𑀚𑁆𑀚𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸 𑀲𑀁𑀫𑀼𑀘𑁆𑀙𑁂𑀢𑁆𑀯𑀸’’𑀢𑀺. 𑀲𑁂𑀲𑀤𑁂𑀯𑁂 𑀚𑀸𑀦𑀸𑀧𑁂𑀦𑁆𑀢𑁄 𑀲𑀓𑁆𑀓𑀲𑁆𑀲 𑀕𑀫𑀦𑀓𑀸𑀮𑀦𑁆𑀢𑀺 𑀬𑁄𑀚𑀦𑀸.

𑁩𑁪𑁬. 𑀅𑀢𑀺𑀭𑀺𑀯𑀸𑀢𑀺 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀢𑀻𑀯 𑀅𑀢𑀺𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑀢𑀺 …𑀧𑁂… 𑀅𑀕𑀫𑀸𑀲𑀺 𑀫𑀭𑀡𑀪𑀬𑀲𑀁𑀢𑀚𑁆𑀚𑀺𑀢𑀢𑁆𑀢𑀸 𑀢𑀭𑀫𑀸𑀦𑀭𑀽𑀧𑁄. 𑀢𑁂𑀦𑁂𑀯𑀸𑀳 ‘‘𑀦𑀦𑀼 𑀘𑀸’’𑀢𑀺𑀆𑀤𑀺.

𑁩𑁪𑁭. 𑀩𑀼𑀤𑁆𑀥𑀸 𑀦𑀸𑀫 𑀫𑀳𑀸𑀓𑀸𑀭𑀼𑀡𑀺𑀓𑀸, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀢𑁆𑀣𑀸𑀬 𑀏𑀯 𑀉𑀧𑁆𑀧𑀦𑁆𑀦𑀸, 𑀢𑁂 𑀓𑀣𑀁 𑀅𑀢𑁆𑀣𑀺𑀓𑁂𑀳𑀺 𑀤𑀼𑀭𑀼𑀧𑀲𑀗𑁆𑀓𑀫𑀸𑀢𑀺 𑀆𑀳 ‘‘𑀅𑀳𑀁 𑀲𑀭𑀸𑀕𑁄’’𑀢𑀺𑀆𑀤𑀺. 𑀢𑀤𑀦𑁆𑀢𑀭𑀁 𑀧𑀝𑀺𑀲𑀮𑁆𑀮𑀻𑀦𑀸𑀢𑀺 𑀬𑁂𑀦 𑀅𑀦𑁆𑀢𑀭𑁂𑀦 𑀬𑁂𑀦 𑀔𑀡𑁂𑀦 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀢𑀤𑀦𑁆𑀢𑀭𑀁 𑀧𑀝𑀺𑀲𑀮𑁆𑀮𑀻𑀦𑀸 𑀛𑀸𑀦𑀁 𑀲𑀫𑀸𑀧𑀦𑁆𑀦𑀸. 𑀢𑀤𑀦𑁆𑀢𑀭-𑀲𑀤𑁆𑀤𑁄 𑀯𑀸 ‘‘𑀏𑀢𑀭𑀳𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀲𑀫𑁆𑀧𑀢𑀺 𑀧𑀝𑀺𑀲𑀮𑁆𑀮𑀻𑀦𑀸 𑀯𑀸’’𑀢𑀺.

𑀧𑀜𑁆𑀘𑀲𑀺𑀔𑀕𑀻𑀢𑀕𑀸𑀣𑀸𑀯𑀡𑁆𑀡𑀦𑀸

𑁩𑁪𑁮. 𑀲𑀸𑀯𑁂𑀲𑀻𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀫𑀼𑀘𑁆𑀙𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀢𑀁𑀢𑀁𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀸𑀓𑀝𑀻𑀪𑀽𑀢𑀫𑀦𑁆𑀤𑀢𑀸𑀯𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑀼𑀫𑀥𑀼𑀭𑀓𑁄𑀫𑀮𑀫𑀥𑀼𑀧𑀸𑀦𑀫𑀢𑁆𑀢𑀫𑀥𑀼𑀓𑀸𑀭𑀯𑀺𑀭𑀼𑀢𑀸𑀧𑀳𑀸𑀲𑀺𑀦𑀺𑀮𑀓𑁆𑀔𑀡𑁄 𑀧𑀲𑀦𑁆𑀦𑀪𑀸𑀦𑀻 𑀲𑀫𑀭𑀯𑀁 𑀢𑀦𑁆𑀢𑀺𑀲𑁆𑀲𑀭𑀁 𑀲𑀸𑀯𑁂𑀲𑀺.

‘‘𑀲𑀓𑁆𑀬𑀧𑀼𑀢𑁆𑀢𑁄𑀯 𑀛𑀸𑀦𑁂𑀦, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀅𑀫𑀢𑀁 𑀫𑀼𑀦𑀺 𑀚𑀺𑀕𑀻𑀲𑀸𑀦𑁄….

𑀬𑀣𑀸𑀧𑀺 𑀫𑀼𑀦𑀺 𑀦𑀦𑁆𑀤𑁂𑀬𑁆𑀬, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀉𑀢𑁆𑀢𑀫’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁪𑁮);

𑀘 𑀏𑀯𑀁 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸. 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀲𑀭𑀻𑀭𑀁 𑀆𑀭𑀩𑁆𑀪 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀸𑀢𑀺 𑀆𑀳 ‘‘𑀥𑀫𑁆𑀫𑁄 𑀅𑀭𑀳𑀢𑀸𑀁 𑀇𑀯𑀸’’𑀢𑀺. 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸, 𑀅𑀭𑀳𑀢𑁆𑀢𑀽𑀧𑀲𑀜𑁆𑀳𑀺𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀲𑀽𑀭𑀺𑀬𑀲𑀫𑀸𑀦𑀲𑀭𑀻𑀭𑀸𑀢𑀺 𑀲𑀽𑀭𑀺𑀬𑀲𑀫𑀸𑀦𑀧𑁆𑀧𑀪𑀸𑀲𑀭𑀻𑀭𑀸. 𑀢𑁂𑀦𑀸𑀳 ‘‘𑀢𑀲𑁆𑀲𑀸 𑀓𑀺𑀭𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀢𑀺𑀫𑁆𑀩𑀭𑀼𑀦𑁄 𑀕𑀦𑁆𑀥𑀩𑁆𑀩𑀤𑁂𑀯𑀭𑀸𑀚𑀲𑁆𑀲 𑀲𑀽𑀭𑀺𑀬𑀯𑀘𑁆𑀙 𑀲𑀸 𑀅𑀗𑁆𑀓𑁂 𑀚𑀸𑀢𑀸, 𑀢𑀲𑁆𑀫𑀸 𑀆𑀳 ‘‘𑀬𑀁 𑀢𑀺𑀫𑁆𑀩𑀭𑀼𑀁 𑀤𑁂𑀯𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀢𑁆𑀯𑀁 𑀚𑀸𑀢𑀸’’𑀢𑀺. 𑀓𑀮𑁆𑀬𑀸𑀡𑀗𑁆𑀕𑀢𑀸𑀬 ‘‘𑀓𑀮𑁆𑀬𑀸𑀡𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀩𑁆𑀩𑀗𑁆𑀕𑀲𑁄𑀪𑀦𑀸’’𑀢𑀺.

𑀭𑀸𑀕𑀸𑀯𑁂𑀲𑀯𑀲𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀕𑀸𑀣𑀸 𑀇𑀤𑀸𑀦𑀺𑀧𑀺 𑀢𑀫𑁂𑀯 𑀆𑀭𑀩𑁆𑀪 𑀧𑀼𑀭𑀢𑁄 𑀞𑀺𑀢𑀁 𑀯𑀺𑀬 𑀆𑀮𑀧𑀦𑁆𑀢𑁄 𑀯𑀤𑀢𑀺.

𑀣𑀦𑀼𑀤𑀭𑀦𑁆𑀢𑀺 𑀧𑀬𑁄𑀥𑀭𑀜𑁆𑀘 𑀉𑀤𑀭𑀜𑁆𑀘 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀣𑀦𑀯𑁂𑀫𑀚𑁆𑀛𑀁 𑀉𑀤𑀭𑀜𑁆𑀘𑀸’’𑀢𑀺.

𑀓𑀺𑀜𑁆𑀘𑀺 𑀓𑀸𑀭𑀡𑀦𑁆𑀢𑀺 𑀓𑀺𑀜𑁆𑀘𑀺 𑀧𑀻𑀴𑀁.

𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀞𑀺𑀢𑀁 𑀅𑀪𑀺𑀭𑀢𑁆𑀢𑀪𑀸𑀯𑁂𑀦.

𑀯𑀸𑀫𑀽𑀭𑀽𑀢𑀺 𑀭𑀼𑀘𑀺𑀭𑀊𑀭𑀽. 𑀢𑁂𑀦𑀸𑀳 ‘‘𑀯𑀸𑀫𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀯𑀸𑀫𑀯𑀺𑀓𑀲𑀺𑀢𑀭𑀼𑀘𑀺𑀭𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀘𑀸𑀭𑀼𑀲𑀤𑁆𑀤𑀸 𑀳𑀺 𑀏𑀓𑀢𑁆𑀣𑀸 𑀤𑀝𑁆𑀞𑀩𑁆𑀩𑀸. 𑀦 𑀢𑀺𑀔𑀺𑀡𑀦𑁆𑀢𑀺 𑀦 𑀢𑀺𑀓𑁆𑀔𑀁 𑀦 𑀮𑀽𑀔𑀁 𑀦 𑀓𑀓𑁆𑀔𑀴𑀁. 𑀫𑀦𑁆𑀤𑀦𑁆𑀢𑀺 𑀫𑀼𑀤𑀼 𑀲𑀺𑀦𑀺𑀤𑁆𑀥𑀁.

𑀅𑀦𑁂𑀓𑀪𑀸𑀯𑁄𑀢𑀺 𑀅𑀦𑁂𑀓𑀲𑀪𑀸𑀯𑁄, 𑀲𑁄 𑀧𑀦 𑀩𑀳𑀼𑀯𑀺𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑁂𑀓𑀯𑀺𑀥𑁄 𑀚𑀸𑀢𑁄’’𑀢𑀺. 𑀅𑀦𑁂𑀓𑀪𑀸𑀕𑁄𑀢𑀺 𑀅𑀦𑁂𑀓𑀓𑁄𑀝𑁆𑀞𑀸𑀲𑁄.

𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀦𑁆𑀢𑀺 𑀢𑀬𑀸 𑀲𑀳𑀺𑀢𑀁𑀬𑁂𑀯 𑀫𑁂 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀼, 𑀢𑀬𑀸 𑀲𑀳𑁂𑀯 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀅𑀦𑀼𑀪𑀯𑁂𑀬𑁆𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀬𑀸 𑀲𑀤𑁆𑀥𑀺𑀫𑁂𑀯𑀸𑀢𑀺 𑀬𑀣𑀸 𑀘𑀓𑁆𑀓𑀯𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀁 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀪𑀽𑀢𑁂𑀦 𑀇𑀢𑁆𑀣𑀺𑀭𑀢𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀏𑀯𑀁 𑀢𑀁 𑀫𑁂 𑀓𑀫𑁆𑀫𑀁 𑀢𑀬𑀸 𑀲𑀤𑁆𑀥𑀺𑀁𑀬𑁂𑀯 𑀫𑀬𑁆𑀳𑀁 𑀯𑀺𑀧𑀸𑀓𑀁 𑀤𑁂𑀢𑀼.

𑀏𑀓𑁄𑀤𑀻𑀢𑀺 𑀏𑀓𑁄𑀤𑀺𑀪𑀸𑀯𑀁 𑀕𑀢𑁄, 𑀲𑀫𑀸𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀚𑀺𑀕𑀻𑀲𑀸𑀦𑁄𑀢𑀺 𑀚𑀺𑀕𑀻𑀲𑀫𑀸𑀦𑁄 𑀳𑁄𑀢𑀺. 𑀢𑀣𑀸𑀪𑀽𑀢𑁄𑀯 𑀚𑀺𑀕𑀻𑀲𑀢𑀺 𑀦𑀸𑀫𑀸𑀢𑀺 𑀢𑀣𑀸 𑀧𑀞𑀫𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 ‘‘𑀯𑀺𑀘𑀭𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀦𑀦𑁆𑀤𑁂𑀬𑁆𑀬𑀦𑁆𑀢𑀺 𑀲𑀫𑀸𑀕𑀫𑀁 𑀧𑀢𑁆𑀣𑁂𑀦𑁆𑀢𑁄 𑀯𑀤𑀢𑀺 𑀅𑀢𑀺𑀲𑀲𑁆𑀲𑀺𑀭𑀺𑀓𑀭𑀽𑀧𑀲𑁄𑀪𑀸𑀬.

𑁩𑁪𑁯. 𑀲𑀁𑀲𑀦𑁆𑀤𑀢𑀻𑀢𑀺 𑀲𑀫𑁂𑀢𑀺, 𑀬𑀸𑀬 𑀫𑀼𑀘𑁆𑀙𑀦𑀸𑀬, 𑀬𑁂𑀦 𑀘 𑀆𑀓𑀸𑀭𑁂𑀦 𑀢𑀦𑁆𑀢𑀺𑀲𑁆𑀲𑀭𑁄 𑀧𑀯𑀢𑁆𑀢𑁄, 𑀢𑀁 𑀫𑀼𑀘𑁆𑀙𑀦𑀁 𑀅𑀦𑀢𑀺𑀯𑀢𑁆𑀢𑁂𑀦𑁆𑀢𑁄, 𑀢𑁂𑀦𑁂𑀯 𑀘 𑀆𑀓𑀸𑀭𑁂𑀦 𑀕𑀻𑀢𑀲𑁆𑀲𑀭𑁄𑀧𑀺 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀅𑀚𑁆𑀛𑀸𑀲𑀬𑁂𑀦 𑀪𑀕𑀯𑀸 𑀧𑀜𑁆𑀘𑀲𑀺𑀔𑀲𑁆𑀲 𑀕𑀦𑁆𑀥𑀩𑁆𑀩𑁂 𑀯𑀡𑁆𑀡𑀁 𑀓𑀣𑁂𑀲𑀺, 𑀬𑀤𑀢𑁆𑀣𑀜𑁆𑀘 𑀓𑀣𑁂𑀲𑀺, 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀦𑀢𑁆𑀣𑀺 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀉𑀧𑁂𑀓𑁆𑀔𑀓𑁄 𑀪𑀕𑀯𑀸 𑀅𑀦𑀼𑀧𑀮𑀺𑀢𑁆𑀢𑀪𑀸𑀯𑀢𑁄. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸 𑀙𑀦𑁆𑀤𑀭𑀸𑀕𑀢𑁄, 𑀲𑀩𑁆𑀩𑀲𑁆𑀫𑀸 𑀘 𑀓𑀺𑀮𑁂𑀲𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀜𑁆𑀘𑀲𑀺𑀔𑀲𑁆𑀲 𑀕𑀦𑁆𑀥𑀩𑁆𑀩𑁂 𑀯𑀡𑁆𑀡𑀁 𑀓𑀣𑁂𑀲𑀻𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺.

𑀕𑀦𑁆𑀣𑀺𑀢𑀸𑀢𑀺 𑀲𑀦𑁆𑀤𑀳𑀺𑀢𑀸, 𑀢𑀸 𑀧𑀦 𑀦𑀺𑀭𑀦𑁆𑀢𑀭𑀁 𑀓𑀣𑀺𑀬𑀫𑀸𑀦𑀸 𑀭𑀸𑀲𑀺𑀓𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀺𑀡𑁆𑀟𑀺𑀢𑀸’’𑀢𑀺. 𑀯𑁄𑀳𑀸𑀭𑀯𑀘𑀦𑀦𑁆𑀢𑀺 𑀪𑀕𑀯𑀢𑁄, 𑀪𑀺𑀓𑁆𑀔𑀽𑀦𑀜𑁆𑀘 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀁 𑀉𑀧𑀘𑀸𑀭𑀯𑀘𑀦𑀁.

𑀉𑀧𑀦𑀘𑁆𑀘𑀦𑁆𑀢𑀺𑀬𑀸𑀢𑀺 𑀉𑀧𑀕𑀦𑁆𑀢𑁆𑀯𑀸 𑀦𑀘𑁆𑀘𑀦𑁆𑀢𑀺𑀬𑀸.

𑀲𑀓𑁆𑀓𑀽𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁩𑁫𑁦. ‘‘𑀓𑀤𑀸 𑀲𑀁𑀬𑀽𑀴𑁆𑀳𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀝𑀺𑀲𑀫𑁆𑀫𑁄𑀤𑀢𑀺. 𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀬𑁆𑀬𑀸𑀢𑀺 𑀅𑀟𑁆𑀠𑀓𑀢𑀸𑀪𑀺𑀦𑀬𑀯𑀲𑁂𑀦 𑀦𑀘𑁆𑀘𑀫𑁆𑀧𑀺 𑀤𑀲𑁆𑀲𑁂𑀬𑁆𑀬.

𑁩𑁫𑁧. ‘‘𑀅𑀪𑀺𑀯𑀤𑀺𑀢𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺𑀆𑀤𑀻𑀦𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀻𑀦𑀁 (𑀧𑀸𑀭𑀸. 𑁧𑁬, 𑁨𑁪) 𑀯𑀺𑀬 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀪𑀸𑀯𑁂 𑀲𑀁𑀲𑀬𑁄 𑀦𑀢𑁆𑀣𑀺, ‘‘𑀏𑀯𑀜𑁆𑀘 𑀧𑀦 𑀢𑀣𑀸𑀕𑀢𑀸’’𑀢𑀺 𑀇𑀥 𑀧𑀦 𑀲𑀺𑀬𑀸 𑀲𑀁𑀲𑀬𑁄𑀢𑀺 ‘‘𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀯𑀘𑀦’’𑀦𑁆𑀢𑀺 𑀯𑀢𑁆𑀯𑀸 𑀇𑀢𑀭𑀲𑁆𑀲𑀸𑀧𑀺 𑀢𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀫𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀟𑁆𑀠𑀺𑀯𑀘𑀦𑁂𑀦 𑀯𑀼𑀢𑁆𑀢𑁄𑀢𑀺 ‘‘𑀲𑀼𑀔𑀻 𑀳𑁄𑀢𑀼 𑀧𑀜𑁆𑀘𑀲𑀺𑀔 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀇𑀦𑁆𑀤𑁄’’𑀢𑀺 𑀆𑀲𑀻𑀲𑀯𑀸𑀤𑀁 𑀯𑀼𑀢𑁆𑀢𑁄. ‘‘𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺 𑀯𑀤𑀦𑁆𑀢𑁄 𑀅𑀪𑀺𑀯𑀸𑀤𑁂𑀢𑀺 𑀦𑀸𑀫 ‘‘𑀲𑀼𑀔𑀻 𑀳𑁄𑀢𑀽’’𑀢𑀺 𑀆𑀲𑀻𑀲𑀯𑀸𑀤𑀲𑁆𑀲 𑀯𑀤𑀸𑀧𑀦𑀢𑁄. 𑀢𑀣𑀸 𑀧𑀦 𑀆𑀲𑀻𑀲𑀯𑀸𑀤𑀁 𑀯𑀤𑀦𑁆𑀢𑁄 𑀅𑀪𑀺𑀯𑀤𑀢𑀺 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀢𑀣𑁂𑀯 𑀢𑀺𑀝𑁆𑀞𑀦𑀢𑁄.

𑀉𑀭𑀼𑀁 𑀯𑁂𑀧𑀼𑀮𑁆𑀮𑀁 𑀤𑀲𑁆𑀲𑀢𑀺 𑀤𑀓𑁆𑀔𑀢𑀻𑀢𑀺 𑀉𑀭𑀼𑀦𑁆𑀤𑀸 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦. 𑀯𑀺𑀯𑀝𑀸 𑀅𑀗𑁆𑀕𑀡𑀝𑁆𑀞𑀸𑀦𑀁. 𑀬𑁄 𑀧𑀓𑀢𑀺𑀬𑀸 𑀕𑀼𑀳𑀸𑀬𑀁 𑀅𑀦𑁆𑀥𑀓𑀸𑀭𑁄, 𑀲𑁄 𑀅𑀦𑁆𑀢𑀭𑀳𑀺𑀢𑁄𑀢𑀺 𑀬𑁄 𑀢𑀲𑁆𑀲𑀁 𑀕𑀼𑀳𑀸𑀬𑀁 𑀲𑀢𑁆𑀣𑀼 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀢𑁄 𑀅𑀬𑀁 𑀧𑀸𑀓𑀢𑀺𑀓𑁄 𑀅𑀦𑁆𑀥𑀓𑀸𑀭𑁄, 𑀲𑁄 𑀤𑁂𑀯𑀸𑀦𑀁 𑀯𑀢𑁆𑀣𑀸𑀪𑀭𑀡𑀲𑀭𑀻𑀭𑁄𑀪𑀸𑀲𑁂𑀳𑀺 𑀅𑀦𑁆𑀢𑀭𑀳𑀺𑀢𑁄, 𑀆𑀮𑁄𑀓𑁄 𑀲𑀫𑁆𑀧𑀚𑁆𑀚𑀺. 𑀅𑀲𑀻𑀢𑀺𑀳𑀢𑁆𑀣𑁂 𑀧𑀦 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀳𑀺𑀢𑁄, 𑀦 𑀘 𑀲𑀫𑀢𑁆𑀣𑁄 𑀤𑁂𑀯𑀸𑀦𑀁 𑀑𑀪𑀸𑀲𑁄 𑀩𑀼𑀤𑁆𑀥𑀸𑀦𑀁 𑀅𑀪𑀺𑀪𑀯𑀺𑀢𑀼𑀁.

𑁩𑁫𑁨. 𑀘𑀺𑀭𑀧𑁆𑀧𑀝𑀺𑀓𑀸𑀳𑀦𑁆𑀢𑀺 𑀘𑀺𑀭𑀧𑁆𑀧𑀪𑀼𑀢𑀺𑀓𑁄 𑀅𑀳𑀁. 𑀅𑀟𑁆𑀟𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺 𑀅𑀯𑀺𑀯𑀸𑀤𑀸𑀥𑀺𑀓𑀭𑀡𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀓𑀻𑀴𑀸𑀤𑀻𑀦𑀺𑀧𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀮𑀴𑀫𑀬𑀕𑀦𑁆𑀥𑀓𑀼𑀝𑀺𑀬𑀦𑁆𑀢𑀺 𑀲𑀮𑀴𑀭𑀼𑀓𑁆𑀔𑁂𑀳𑀺 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑀸𑀭𑀺𑀢𑀕𑀦𑁆𑀥𑀓𑀼𑀝𑀺𑀬𑀁. 𑀢𑁂𑀦𑀲𑁆𑀲𑀸𑀢𑀺 𑀢𑁂𑀦 𑀨𑀮𑀤𑁆𑀯𑀬𑀸𑀥𑀺𑀕𑀫𑁂𑀦 𑀧𑀳𑀻𑀦𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀢𑀸𑀬 𑀅𑀲𑁆𑀲𑀸 𑀪𑀽𑀚𑀢𑀺𑀬𑀸 𑀤𑁂𑀯𑀮𑁄𑀓𑁂 𑀅𑀪𑀺𑀭𑀢𑀺𑀬𑁂𑀯 𑀦𑀢𑁆𑀣𑀺. 𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑀸 ‘‘𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀫𑀢𑁆𑀢𑀢𑀸𑀬 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀚𑀸𑀢’’𑀦𑁆𑀢𑀺 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀳. 𑀲𑀢𑀺 𑀘 𑀆𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀸𑀬𑀁 𑀕𑀳𑀡𑁂𑀦𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀢𑀭𑁄 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑀲𑁆𑀲𑀸𑀧𑀺 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀓𑁆𑀔𑁂𑀧𑀁 𑀅𑀲𑀳𑀦𑁆𑀢𑁄 ‘‘𑀦𑀦𑀼 𑀪𑀕𑀯𑀸…𑀧𑁂… 𑀪𑀡𑀢𑀻’’𑀢𑀺 𑀇𑀫𑀫𑁂𑀯 𑀲𑀼𑀢𑁆𑀢𑀧𑀤𑀁 𑀉𑀤𑁆𑀥𑀭𑀺. 𑀢𑀢𑁆𑀣 𑀬𑀣𑀸 𑀤𑁄𑀲𑀤𑀲𑁆𑀲𑀦𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀖𑀲𑀜𑁆𑀜𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀫𑀳𑀢𑀸𑀧𑀺 𑀲𑀤𑁆𑀤𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀦 𑀯𑀼𑀝𑁆𑀞𑀸𑀦𑀁, 𑀏𑀯𑀁 ‘‘𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀤𑁂𑀯 𑀤𑁄𑀲𑀤𑀲𑁆𑀲𑀦𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀯𑀲𑁂𑀦 𑀲𑀩𑁆𑀩𑀸𑀲𑀫𑁆𑀧𑀺 𑀮𑁄𑀓𑀺𑀬𑀲𑀜𑁆𑀜𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑀸𑀥𑀺𑀕𑀫𑀢𑀸𑀬 𑀦 𑀓𑀤𑀸𑀘𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. 𑀢𑀣𑀸 𑀧𑀦 𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀲𑀩𑁆𑀩𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀧𑀞𑀫𑀚𑁆𑀛𑀸𑀦𑀁 𑀧𑀦 𑀅𑀧𑁆𑀧𑀓𑀫𑁆𑀧𑀺 𑀲𑀤𑁆𑀤𑀁 𑀦 𑀲𑀳𑀢𑀻𑀢𑀺 𑀢𑀁𑀲𑀫𑀸𑀧𑀦𑁆𑀦𑀲𑁆𑀲 ‘‘𑀲𑀤𑁆𑀤𑁄 𑀓𑀡𑁆𑀝𑀓𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀧𑀝𑀺𑀖𑀲𑀜𑁆𑀜𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀫𑀳𑀢𑀸𑀧𑀺 𑀲𑀤𑁆𑀤𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀦 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀧𑀕𑁂𑀯 𑀫𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀢𑁄. 𑀢𑁂𑀦𑀸𑀳 ‘‘𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦𑀸’’𑀢𑀺𑀆𑀤𑀺. 𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦𑀸𑀢𑀺 𑀘 𑀦𑀬𑀺𑀤𑀁 𑀓𑀭𑀡𑀯𑀘𑀦𑀁 𑀳𑁂𑀢𑀼𑀫𑁆𑀳𑀺, 𑀓𑀭𑀡𑁂 𑀯𑀸 𑀅𑀣 𑀔𑁄 𑀲𑀳𑀬𑁄𑀕𑁂. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑁄𑀧𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁩. 𑀧𑀭𑀺𑀧𑀽𑀭𑀓𑀸𑀭𑀺𑀦𑀻𑀢𑀺 𑀧𑀭𑀺𑀧𑀼𑀡𑁆𑀡𑀸𑀦𑀺, 𑀧𑀭𑀺𑀲𑀼𑀤𑁆𑀥𑀸𑀦𑀺 𑀘 𑀓𑀢𑁆𑀯𑀸 𑀭𑀓𑁆𑀔𑀺𑀢𑀯𑀢𑀻. ‘‘𑀇𑀢𑁆𑀣𑀺𑀢𑁆𑀢’’𑀦𑁆𑀢𑀺𑀆𑀤𑀺 𑀢𑀢𑁆𑀣 𑀯𑀺𑀭𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀥𑀺𑀢𑁆𑀣𑀺𑀪𑀸𑀯𑀁𑀇𑀢𑁆𑀣𑀺𑀪𑀸𑀯𑀲𑁆𑀲 𑀥𑀺𑀓𑁆𑀓𑀸𑀭𑁄 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀸𑀚𑁂𑀢𑀻𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀏𑀢𑀸 𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀆𑀤𑀺𑀓𑀸 𑀏𑀢𑀸 𑀬𑀣𑀸𑀯𑀼𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑁄. 𑀢𑀲𑁆𑀫𑀸 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 𑀉𑀧𑀝𑁆𑀞𑀺𑀢𑀦𑀺𑀓𑀦𑁆𑀢𑀺𑀯𑀲𑁂𑀦. 𑀉𑀧𑀝𑁆𑀞𑀸𑀦𑀲𑀸𑀮𑀦𑁆𑀢𑀺 𑀲𑀼𑀥𑀫𑁆𑀫𑀤𑁂𑀯𑀲𑀪𑀁.

𑀲𑁄𑀢𑀺 𑀕𑁄𑀧𑀓𑀤𑁂𑀯𑀧𑀼𑀢𑁆𑀢𑁄. 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸𑀢𑀺 𑀢𑁄𑀫𑀭𑀸𑀤𑀺𑀁 𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘𑁄𑀤𑀦𑀯𑀘𑀦𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀧𑀭𑀺𑀯𑀝𑁆𑀝𑁂𑀢𑁆𑀯𑀸. 𑀕𑀸𑀴𑁆𑀳𑀁 𑀯𑀺𑀚𑁆𑀛𑀺𑀢𑀩𑁆𑀩𑀸𑀢𑀺 𑀕𑀸𑀴𑁆𑀳𑀢𑀭𑀁 𑀖𑀝𑁆𑀝𑁂𑀢𑀩𑁆𑀩𑀸.

𑀓𑀼𑀢𑁄 𑀫𑀼𑀔𑀸𑀢𑀺 𑀓𑀼𑀢𑁄 𑀧𑀯𑀢𑁆𑀢𑀜𑀸𑀡𑀫𑀼𑀔𑀸. 𑀢𑁂𑀦𑀸𑀳 ‘‘𑀅𑀜𑁆𑀜𑀯𑀺𑀳𑀺𑀢𑀓𑀸’’𑀢𑀺. 𑀓𑀢𑀧𑀼𑀜𑁆𑀜𑁂𑀢𑀺 𑀲𑀫𑁆𑀫𑀸 𑀓𑀢𑀧𑀼𑀜𑁆𑀜𑁂 𑀥𑀫𑁆𑀫𑁂.

𑀤𑀸𑀬𑁄𑀢𑀺 𑀮𑀸𑀪𑁄. 𑀲𑁄 𑀳𑀺 𑀤𑀻𑀬𑀢𑀺 𑀢𑁂𑀳𑀺 𑀤𑀸𑀢𑀩𑁆𑀩𑀢𑁆𑀢𑀸 𑀤𑀸𑀬𑁄, 𑀬𑁂𑀲𑀁 𑀤𑀻𑀬𑀢𑀺, 𑀢𑁂𑀳𑀺 𑀮𑀤𑁆𑀥𑀢𑁆𑀢𑀸 𑀮𑀸𑀪𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑁂…𑀧𑁂… 𑀧𑀢𑀺𑀝𑁆𑀞𑀳𑀺𑀁𑀲𑀼 𑀓𑀢𑀸𑀥𑀺𑀓𑀸𑀭𑀢𑁆𑀢𑀸. 𑀢𑀢𑁆𑀣 𑀢𑀸𑀯𑀢𑀺𑀁𑀲𑀪𑀯𑀦𑁂 𑀞𑀺𑀢𑀸𑀦𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑁄 𑀬𑀣𑀸 𑀲𑀓𑁆𑀓𑀲𑁆𑀲 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀞𑀺𑀢𑀲𑁆𑀲𑁂𑀯 𑀲𑀓𑁆𑀓𑀢𑁆𑀢𑀪𑀸𑀯𑁄.

𑀦𑀺𑀓𑀦𑁆𑀢𑀺𑀁 𑀢𑀲𑁆𑀫𑀺𑀁 𑀕𑀦𑁆𑀥𑀩𑁆𑀩𑀓𑀸𑀬𑁂 𑀆𑀮𑀬𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑁄.

𑁩𑁫𑁪. 𑀅𑀢𑁆𑀢𑀦𑀸𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸𑀯 𑀅𑀥𑀺𑀕𑀦𑁆𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀭𑀧𑁆𑀧𑀘𑁆𑀘𑀬𑀺𑀓𑁂𑀦. 𑀢𑀼𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀻𑀢𑀺 𑀓𑁂𑀯𑀮𑀁 𑀢𑀼𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀺.

𑀯𑀺𑀬𑀸𑀬𑀸𑀫𑀸𑀢𑀺 𑀯𑀺𑀲𑁆𑀲𑀝𑁆𑀞𑀁 𑀯𑀻𑀭𑀺𑀬𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑁂𑀫. 𑀧𑀓𑀢𑀺𑀬𑀸𑀢𑀺 𑀭𑀽𑀧𑀸𑀯𑀘𑀭𑀪𑀸𑀯𑁂𑀦, ‘‘𑀅𑀦𑀼𑀲𑁆𑀲𑀭’’𑀦𑁆𑀢𑀺 𑀯𑀸 𑀧𑀸𑀞𑁄.

𑀓𑀸𑀫𑀭𑀸𑀕𑁄 𑀏𑀯 ‘‘𑀙𑀦𑁆𑀤𑁄 𑀭𑀸𑀕𑁄 𑀙𑀦𑁆𑀤𑀭𑀸𑀕𑁄’’𑀢𑀺𑀆𑀤𑀺 𑀧𑀯𑀢𑁆𑀢𑀺𑀪𑁂𑀤𑁂𑀦 𑀲𑀁𑀬𑁄𑀚𑀦𑀝𑁆𑀞𑁂𑀦 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀦𑀻’’𑀢𑀺, 𑀬𑁄𑀕𑀕𑀦𑁆𑀣𑀸𑀤𑀺𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 ‘‘𑀓𑀸𑀫𑀩𑀦𑁆𑀥𑀦𑀸𑀦𑀻’’𑀢𑀺 𑀘 𑀯𑀼𑀢𑁆𑀢𑁄. 𑀧𑀸𑀧𑀺𑀫𑀬𑁄𑀕𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀲𑁂𑀲𑀬𑁄𑀕𑀕𑀦𑁆𑀣𑀸𑀦𑀫𑁆𑀧𑀺 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀯𑀺𑀥𑀸𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀤𑀼𑀯𑀺𑀥𑀸𑀦𑀁.

‘‘𑀏𑀢𑁆𑀣 𑀓𑀺𑀁, 𑀢𑀢𑁆𑀣 𑀓𑀺’’𑀦𑁆𑀢𑀺 𑀘 𑀧𑀤𑀤𑁆𑀯𑀬𑁂 𑀓𑀺𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑁂𑀢𑀺 𑀢𑁂𑀲𑀁 𑀩𑀼𑀤𑁆𑀥𑀸𑀤𑀻𑀦𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀘𑀢𑀼𑀤𑁆𑀤𑀺𑀲𑀬𑁄𑀕𑁆𑀬𑀪𑀸𑀯𑁂 𑀅𑀧𑁆𑀧𑀝𑀺𑀳𑀝𑀪𑀸𑀯𑁂. 𑀩𑀼𑀤𑁆𑀥𑀭𑀢𑀦𑀜𑁆𑀳𑀺 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬, 𑀅𑀦𑀸𑀯𑀭𑀡𑀜𑀸𑀡𑀢𑀸𑀬, 𑀧𑀭𑀫𑀲𑀦𑁆𑀢𑀼𑀝𑁆𑀞𑀢𑀸𑀬 𑀘 𑀘𑀸𑀢𑀼𑀤𑁆𑀤𑀺𑀲𑀁, 𑀥𑀫𑁆𑀫𑀭𑀢𑀦𑀁 𑀲𑁆𑀯𑀸𑀓𑁆𑀔𑀸𑀢𑀢𑀸𑀬, 𑀲𑀗𑁆𑀖𑀭𑀢𑀦𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬. 𑀢𑁂𑀦𑀸𑀳 ‘‘𑀲𑀩𑁆𑀩𑀤𑀺𑀲𑀸𑀲𑀼 𑀅𑀲𑀚𑁆𑀚𑀫𑀸𑀦𑁄’’𑀢𑀺.

𑀫𑀚𑁆𑀛𑀺𑀫𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀢𑀸𑀯𑀤𑁂𑀯 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀸𑀯𑀤𑁂𑀯 𑀧𑀼𑀭𑀺𑀫𑀁 𑀛𑀸𑀦𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀫𑀕𑁆𑀕𑀨𑀮𑀯𑀺𑀲𑁂𑀲𑀁 𑀅𑀦𑀸𑀕𑀸𑀫𑀺𑀨𑀮𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁 𑀅𑀚𑁆𑀛𑀕𑀁𑀲𑀼 𑀅𑀥𑀺𑀕𑀘𑁆𑀙𑀺𑀁𑀲𑀼. 𑀓𑁂𑀘𑀺 𑀧𑀦 ‘‘𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁂𑀦 𑀫𑀕𑁆𑀕𑀨𑀮𑀸𑀦𑀺 𑀅𑀥𑀺𑀕𑀘𑁆𑀙𑀺𑀁𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀜𑁆𑀘𑀫𑀲𑁆𑀲 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀢𑀸𑀬 𑀧𑀦 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀽’’𑀢𑀺 𑀯𑀤𑀦𑁆𑀢𑀺.

𑀫𑀖𑀫𑀸𑀡𑀯𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁫. 𑀯𑀺𑀲𑀼𑀤𑁆𑀥𑁄𑀢𑀺 𑀯𑀺𑀲𑀼𑀤𑁆𑀥𑀅𑀚𑁆𑀛𑀸𑀲𑀬𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀸𑀫𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀦𑁆𑀢𑀺 𑀕𑀸𑀫𑀺𑀓𑀸𑀦𑀁 𑀉𑀧𑀝𑁆𑀞𑀸𑀦𑀝𑁆𑀞𑀸𑀦𑀁 𑀯𑀤𑀢𑀺. 𑀢𑀸𑀯𑀢𑀓𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀲𑁄𑀥𑀺𑀢𑀝𑁆𑀞𑀸𑀦𑁂𑀯 𑀅𑀜𑁆𑀜𑀲𑁆𑀲 𑀆𑀕𑀦𑁆𑀢𑁆𑀯𑀸 𑀅𑀯𑀝𑁆𑀞𑀸𑀦𑁂𑀦𑁂𑀯. 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 ‘‘𑀅𑀳𑁄 𑀫𑀬𑀸 𑀓𑀢𑀓𑀫𑁆𑀫𑀁 𑀲𑀨𑀮𑀁 𑀚𑀸𑀢’’𑀦𑁆𑀢𑀺 𑀬𑁄𑀦𑀺𑀲𑁄 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸.

𑀧𑀸𑀲𑀸𑀡𑁂𑀢𑀺 𑀫𑀕𑁆𑀕𑀫𑀚𑁆𑀛𑁂 𑀉𑀘𑁆𑀘𑀢𑀭𑀪𑀸𑀯𑁂𑀦 𑀞𑀺𑀢𑀧𑀸𑀲𑀸𑀡𑁂. 𑀉𑀘𑁆𑀘𑀸𑀮𑁂𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. 𑀏𑀢𑀲𑁆𑀲 𑀲𑀕𑁆𑀕𑀲𑁆𑀲 𑀕𑀫𑀦𑀫𑀕𑁆𑀕𑀦𑁆𑀢𑀺 𑀏𑀢𑀲𑁆𑀲 𑀘𑀦𑁆𑀤𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀲𑁆𑀲 𑀲𑀕𑁆𑀕𑀲𑁆𑀲 𑀕𑀫𑀦𑀫𑀕𑁆𑀕𑀁 𑀧𑀼𑀜𑁆𑀜𑀓𑀫𑁆𑀫𑀁.

𑀲𑀼𑀕𑀢𑀺𑀯𑀲𑁂𑀦 𑀮𑀤𑁆𑀥𑀩𑁆𑀩𑀁, 𑀓𑀳𑀸𑀧𑀡𑀜𑁆𑀘𑀸𑀢𑀺 𑀓𑀳𑀸𑀧𑀡𑀁, 𑀤𑀡𑁆𑀟𑀯𑀲𑁂𑀦 𑀮𑀤𑁆𑀥𑀩𑁆𑀩𑀁 𑀩𑀮𑀺 𑀤𑀡𑁆𑀟𑀩𑀮𑀺. 𑀕𑀳𑀧𑀢𑀺𑀓𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀕𑀳𑀧𑀢𑀺𑀓𑀸 𑀦𑀸𑀫 𑀅𑀝𑀯𑀺𑀓𑀸 𑀯𑀺𑀬 𑀯𑀺𑀲𑀫𑀦𑀺𑀲𑁆𑀲𑀺𑀢𑀸, 𑀢𑁂 𑀦 𑀓𑀜𑁆𑀘𑀺 𑀅𑀦𑀢𑁆𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀢𑀬𑀸 𑀚𑀸𑀦𑀫𑀸𑀦𑁂𑀦 𑀓𑀲𑁆𑀫𑀸 𑀫𑀬𑁆𑀳𑀁 𑀦 𑀓𑀣𑀺𑀢𑀦𑁆𑀢𑀺 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀦 𑀓𑀣𑀺𑀢𑀁, 𑀏𑀢𑀭𑀳𑀺 𑀧𑀦 𑀪𑀬𑁂𑀦 𑀓𑀣𑀺𑀢𑀁, 𑀫𑀸 𑀫𑀬𑁆𑀳𑀁 𑀤𑁄𑀲𑀁 𑀓𑀭𑁂𑀬𑁆𑀬𑀸𑀣, 𑀆𑀭𑁄𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀫𑀬𑁆𑀳𑀁 𑀤𑁄𑀲𑁄𑀢𑀺 𑀯𑀤𑀢𑀺.

𑀦𑀺𑀩𑀤𑁆𑀥𑀦𑁆𑀢𑀺 𑀏𑀓𑀦𑁆𑀢𑀺𑀓𑀁.

𑀧𑀺𑀲𑀼𑀡𑁂𑀲𑀻𑀢𑀺 𑀧𑀺𑀲𑀼𑀡𑀓𑀫𑁆𑀫𑀫𑀓𑀸𑀲𑀺, 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀫𑀬𑁆𑀳𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀦 𑀅𑀳𑀭𑀡𑀻𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀓𑀢𑁆𑀯𑀸. 𑀫𑀬𑁆𑀳𑀫𑁆𑀧𑀻𑀢𑀺 𑀫𑀬𑁆𑀳𑀫𑁆𑀧𑀺 𑀅𑀢𑁆𑀣𑀸𑀬 𑀫𑀁 𑀉𑀤𑁆𑀤𑀺𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀣. 𑀦𑀻𑀮𑀼𑀧𑁆𑀧𑀮𑀁 𑀦𑀸𑀫 𑀯𑀺𑀓𑀲𑀫𑀸𑀦𑀁 𑀉𑀤𑀓𑀢𑁄 𑀉𑀕𑁆𑀕𑀦𑁆𑀢𑁆𑀯𑀸𑀯 𑀯𑀺𑀓𑀲𑀢𑀺, 𑀏𑀯𑀁 𑀅𑀳𑀼𑀢𑁆𑀯𑀸 𑀅𑀦𑁆𑀢𑁄𑀉𑀤𑀓𑁂 𑀧𑀼𑀧𑁆𑀨𑀺𑀢𑀁 𑀦𑀻𑀮𑀼𑀧𑁆𑀧𑀮𑀁 𑀯𑀺𑀬. 𑀅𑀫𑁆𑀳𑀸𑀓𑀁 𑀧𑀦𑀺𑀤𑀁 𑀧𑀼𑀜𑁆𑀜𑀓𑀫𑁆𑀫𑀁 𑀪𑀯𑀦𑁆𑀢𑀭𑀽𑀧𑀧𑀢𑁆𑀢𑀺𑀬𑀸 𑀯𑀺𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀘𑀺𑀦𑁆𑀢𑀸𑀫𑀢𑁆𑀢𑀓𑀫𑁆𑀧𑀻𑀢𑀺 𑀤𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀦𑁆𑀢𑀸𑀫𑀢𑁆𑀢𑀓𑀫𑁆𑀧𑀺.

𑀧𑀕𑁂𑀯𑀸𑀢𑀺 𑀓𑀸𑀮𑀲𑁆𑀲𑁂𑀯, 𑀅𑀢𑀺𑀯𑀺𑀬 𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀓𑀡𑁆𑀡𑀺𑀓𑀽𑀧𑀕𑀦𑁆𑀢𑀺 𑀓𑀡𑁆𑀡𑀺𑀓𑀬𑁄𑀕𑁆𑀬𑀁. 𑀢𑀘𑁆𑀙𑁂𑀢𑁆𑀯𑀸 𑀫𑀝𑁆𑀞𑀁 𑀓𑀢𑁆𑀯𑀸 𑀓𑀡𑁆𑀡𑀺𑀓𑀸𑀬 𑀓𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀦𑀺𑀝𑁆𑀞𑀧𑁂𑀢𑁆𑀯𑀸. 𑀢𑀣𑀸 𑀳𑀺 𑀲𑀸 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀸.

𑀘𑀬𑀩𑀦𑁆𑀥𑀦𑀁 𑀲𑀸𑀮𑀸𑀬 𑀅𑀥𑀺𑀝𑁆𑀞𑀸𑀦𑀲𑀚𑁆𑀚𑀦𑀁. 𑀓𑀡𑁆𑀡𑀺𑀓𑀫𑀜𑁆𑀘𑀩𑀦𑁆𑀥𑀦𑀁 𑀓𑀡𑁆𑀡𑀺𑀓𑀸𑀭𑁄𑀳𑀦𑀓𑀸𑀮𑁂 𑀆𑀭𑀼𑀳𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀅𑀝𑁆𑀝𑀓𑀭𑀡𑀁.

𑀬𑀲𑁆𑀲 𑀅𑀢𑁆𑀣𑀢𑁂 𑀨𑀮𑀓𑁂 𑀬𑀲𑁆𑀲 𑀨𑀮𑀓𑁂 𑀅𑀢𑁆𑀣𑀢𑁂𑀢𑀺 𑀬𑁄𑀚𑀦𑀸.

𑀅𑀯𑀺𑀤𑀽𑀭𑁂𑀢𑀺 𑀲𑀸𑀮𑀸𑀬, 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀲𑁆𑀲 𑀘 𑀅𑀯𑀺𑀤𑀽𑀭𑁂. 𑀲𑀩𑁆𑀩𑀚𑁂𑀝𑁆𑀞𑀺𑀓𑀸𑀢𑀺 𑀲𑀩𑁆𑀩𑀸𑀲𑀁 𑀢𑀲𑁆𑀲 𑀪𑀭𑀺𑀬𑀸𑀦𑀁 𑀚𑁂𑀝𑁆𑀞𑀺𑀓𑀸 𑀲𑀼𑀚𑀸𑀢𑀸.

𑀢𑀲𑁆𑀲𑁂𑀯𑀸𑀢𑀺 𑀲𑀓𑁆𑀓𑀲𑁆𑀲𑁂𑀯. 𑀲𑀦𑁆𑀢𑀺𑀓𑁂𑀢𑀺 𑀲𑀫𑀻𑀧𑁂 𑀲𑀦𑁆𑀢𑀺𑀓𑀸𑀯𑀘𑀭𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀥𑀚𑁂𑀦 𑀲𑀤𑁆𑀥𑀺𑀁 𑀲𑀳𑀲𑁆𑀲𑀬𑁄𑀚𑀦𑀺𑀓𑁄 𑀧𑀸𑀲𑀸𑀤𑁄.

𑀓𑀓𑁆𑀓𑀝𑀓𑀯𑀺𑀚𑁆𑀛𑀦𑀲𑀽𑀮𑀲𑀤𑀺𑀲𑀦𑁆𑀢𑀺 𑀓𑀓𑁆𑀓𑀝𑀓𑁂 𑀕𑀡𑁆𑀳𑀺𑀢𑀼𑀁 𑀢𑀲𑁆𑀲 𑀩𑀺𑀮𑀧𑀭𑀺𑀬𑀦𑁆𑀢𑀲𑁆𑀲 𑀯𑀺𑀚𑁆𑀛𑀦𑀲𑀽𑀘𑀺𑀲𑀤𑀺𑀲𑀁.

𑀫𑀘𑁆𑀙𑀭𑀽𑀧𑁂𑀦𑀸𑀢𑀺 𑀫𑀢𑀫𑀘𑁆𑀙𑀭𑀽𑀧𑁂𑀦. 𑀑𑀲𑀭𑀢𑀻𑀢𑀺 𑀧𑀺𑀮𑀯𑀦𑁆𑀢𑁄 𑀕𑀘𑁆𑀙𑀢𑀺. 𑀢𑀲𑁆𑀲𑀸𑀧𑀺 𑀩𑀓𑀲𑀓𑀼𑀡𑀺𑀓𑀸𑀬 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀆𑀬𑀼 𑀅𑀳𑁄𑀲𑀺 𑀤𑁂𑀯𑀦𑁂𑀭𑀬𑀺𑀓𑀸𑀦𑀁 𑀯𑀺𑀬 𑀫𑀦𑀼𑀲𑁆𑀲𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀆𑀬𑀼𑀦𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸.

𑀉𑀓𑁆𑀓𑀼𑀝𑁆𑀞𑀺𑀫𑀓𑀸𑀲𑀻𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀓𑀸𑀲𑀺.

𑀧𑀼𑀩𑁆𑀩𑀲𑀦𑁆𑀦𑀺𑀯𑀸𑀲𑁂𑀦𑀸𑀢𑀺 𑀧𑀼𑀭𑀺𑀫𑀚𑀸𑀢𑀻𑀲𑀼 𑀘𑀺𑀭𑀲𑀦𑁆𑀦𑀺𑀯𑀸𑀲𑁂𑀦. 𑀏𑀯𑀜𑁆𑀳𑀺 𑀏𑀓𑀘𑁆𑀘𑀸𑀦𑀁 𑀤𑀺𑀝𑁆𑀞𑀫𑀢𑁆𑀢𑁂𑀦𑀧𑀺 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀅𑀯𑀲𑁂𑀲𑁂𑀲𑀽𑀢𑀺 𑀅𑀲𑀼𑀭𑁂, 𑀲𑀓𑁆𑀓𑀁 𑀞𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀢𑁆𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀅𑀢𑁆𑀣𑀫𑁂𑀯 𑀳𑀺𑀢𑀫𑁂𑀯 𑀦𑀺𑀲𑁆𑀲𑀺𑀢𑀁, 𑀢𑀁 𑀧𑀦 𑀳𑀺𑀢𑀁 𑀲𑀼𑀔𑀲𑁆𑀲 𑀦𑀺𑀤𑀸𑀦𑀦𑁆𑀢𑀺 𑀆𑀳 ‘‘𑀓𑀸𑀭𑀡𑀦𑀺𑀲𑁆𑀲𑀺𑀢’’𑀦𑁆𑀢𑀺.

𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁩𑁫𑁭. 𑀓𑀺𑀁𑀲𑀁𑀬𑁄𑀚𑀦𑀸𑀢𑀺 𑀓𑀻𑀤𑀺𑀲𑀲𑀁𑀬𑁄𑀚𑀦𑀸. 𑀲𑀢𑁆𑀢𑁂 𑀅𑀦𑀢𑁆𑀣𑁂 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀻𑀢𑀺 𑀆𑀳 ‘‘𑀓𑀺𑀁𑀩𑀦𑁆𑀥𑀦𑀸, 𑀓𑁂𑀦 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸’’𑀢𑀺. 𑀧𑀼𑀣𑀼𑀓𑀸𑀬𑀸𑀢𑀺 𑀩𑀳𑀽 𑀲𑀢𑁆𑀢𑀓𑀸𑀬𑀸𑀢𑀺 𑀆𑀳 ‘‘𑀩𑀳𑀽 𑀚𑀦𑀸’’𑀢𑀺. 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄𑀢𑀺 𑀆𑀳 ‘‘𑀅𑀯𑁂𑀭𑀸𑀢𑀺 𑀅𑀧𑁆𑀧𑀝𑀺𑀖𑀸’’𑀢𑀺. 𑀆𑀯𑀼𑀥𑁂𑀦 𑀲𑀭𑀻𑀭𑁂 𑀤𑀡𑁆𑀟𑁄 𑀆𑀯𑀼𑀥𑀤𑀡𑁆𑀟𑁄, 𑀥𑀦𑀲𑁆𑀲 𑀤𑀸𑀧𑀦𑀢𑁆𑀣𑁂𑀦 𑀤𑀡𑁆𑀟𑁄 𑀥𑀦𑀤𑀡𑁆𑀟𑁄, 𑀢𑀤𑀼𑀪𑀬𑀸𑀓𑀭𑀡𑁂𑀦 𑀢𑀢𑁄 𑀯𑀺𑀦𑀺𑀫𑀼𑀢𑁆𑀢𑁄 𑀅𑀤𑀡𑁆𑀟𑁄, 𑀲𑀫𑁆𑀧𑀢𑁆𑀢𑀺𑀳𑀭𑀡𑀢𑁄, 𑀲𑀳 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘 𑀲𑀧𑀢𑁆𑀢𑁄, 𑀧𑀝𑀺𑀲𑀢𑁆𑀢𑀽𑀢𑀺 𑀆𑀳 ‘‘𑀅𑀲𑀧𑀢𑁆𑀢𑀸𑀢𑀺 𑀅𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺. 𑀩𑁆𑀬𑀸𑀧𑀚𑁆𑀛𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀁, 𑀢𑀩𑁆𑀩𑀺𑀭𑀳𑀺𑀢𑀸 𑀅𑀩𑁆𑀬𑀸𑀧𑀚𑁆𑀛𑀸𑀢𑀺 𑀆𑀳 ‘‘𑀯𑀺𑀕𑀢𑀤𑁄𑀫𑀦𑀲𑁆𑀲𑀸’’𑀢𑀺. 𑀧𑀼𑀩𑁆𑀩𑁂 ‘‘𑀅𑀯𑁂𑀭𑀸’’𑀢𑀺 𑀧𑀤𑁂𑀦 𑀲𑀫𑁆𑀩𑀤𑁆𑀥𑀸𑀖𑀸𑀢𑀓𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀝𑀺𑀖𑀸’’𑀢𑀺. ‘‘𑀅𑀯𑁂𑀭𑀺𑀦𑁄’’𑀢𑀺 𑀧𑀦 𑀇𑀫𑀺𑀦𑀸𑀧𑀺 𑀓𑁄𑀧𑀫𑀢𑁆𑀢𑀲𑁆𑀲𑀧𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀢𑁂𑀦𑀸𑀳 ‘‘𑀓𑀢𑁆𑀣𑀘𑀺 𑀓𑁄𑀧𑀁 𑀦 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺. ‘‘𑀯𑀺𑀳𑀭𑁂𑀫𑀽’’𑀢𑀺 𑀘 𑀧𑀤𑀁 𑀧𑀼𑀭𑀺𑀫𑀧𑀤𑁂𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀅𑀯𑁂𑀭𑀸 𑀯𑀺𑀳𑀭𑁂𑀫𑀽’’𑀢𑀺𑀆𑀤𑀺𑀦𑀸. 𑀅𑀬𑀜𑁆𑀘 𑀅𑀯𑁂𑀭𑀸𑀤𑀺𑀪𑀸𑀯𑁄 𑀲𑀁𑀯𑀺𑀪𑀸𑀕𑁂𑀦 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑀭𑀸𑀬𑀸’’𑀢𑀺 𑀆𑀤𑀺𑀁 𑀯𑀢𑁆𑀯𑀸 ‘‘𑀇𑀢𑀺 𑀘𑁂 𑀦𑁂𑀲𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀤𑀴𑁆𑀳𑀢𑀭𑀸𑀧𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀁 𑀤𑀢𑁆𑀯𑀸, 𑀧𑀽𑀚𑀁 𑀓𑀢𑁆𑀯𑀸 𑀘 𑀧𑀢𑁆𑀣𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀘𑁂𑀢𑀺 𑀘𑁂-𑀲𑀤𑁆𑀤𑁄 𑀅𑀦𑁆𑀯𑀬𑀲𑀁𑀲𑀕𑁆𑀕𑁂𑀦 𑀧𑀭𑀺𑀓𑀧𑁆𑀧𑁂𑀢𑀻𑀢𑀺 𑀆𑀳 ‘‘𑀏𑀯𑀜𑁆𑀘 𑀦𑁂𑀲’’𑀦𑁆𑀢𑀺.

𑀬𑀸𑀬 𑀓𑀸𑀬𑀘𑀺 𑀧𑀭𑁂𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 𑀔𑀻𑀬𑀦𑀁 𑀉𑀲𑀽𑀬𑀦𑀁 𑀅𑀲𑀳𑀦𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀸, 𑀬𑀤𑀕𑁆𑀕𑁂𑀦 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀦𑀮𑀓𑁆𑀔𑀡𑀁, 𑀢𑀤𑀕𑁆𑀕𑁂𑀦𑀲𑁆𑀲 ‘‘𑀦𑀺𑀕𑀽𑀳𑀦𑀮𑀓𑁆𑀔𑀡’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀳𑀺𑀲𑁆𑀲 𑀧𑁄𑀭𑀸𑀡𑀸 ‘‘𑀫𑀸 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀅𑀜𑁆𑀜𑁂𑀲𑀁 𑀳𑁄𑀢𑀼, 𑀫𑀬𑁆𑀳𑀫𑁂𑀯 𑀳𑁄𑀢𑀽𑀢𑀺 𑀫𑀘𑁆𑀙𑀭𑀺𑀬’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀯𑀤𑀦𑁆𑀢𑀺. 𑀅𑀪𑀺𑀥𑀫𑁆𑀫𑁂 ‘‘𑀬𑀸 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀸 𑀇𑀲𑁆𑀲𑀸𑀬𑀦𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁨𑁬) 𑀦𑀺𑀓𑁆𑀔𑁂𑀧𑀓𑀡𑁆𑀟𑁂, ‘‘𑀬𑀸 𑀏𑀢𑁂𑀲𑀼 𑀧𑀭𑁂𑀲𑀁 𑀮𑀸𑀪𑀸𑀤𑀻𑀲𑀼 𑀓𑀺𑀁 𑀇𑀫𑀺𑀦𑀸 𑀇𑀫𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 𑀯𑀼𑀢𑁆𑀢𑀸𑀦𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀸 𑀧𑀦 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀩𑀳𑁆𑀯𑀸𑀤𑀻𑀦𑀯𑀸𑀦𑀺, 𑀢𑁂𑀲𑀁 𑀯𑀺𑀪𑀸𑀯𑀦𑀸 𑀮𑁄𑀓𑀲𑁆𑀲 𑀩𑀳𑀼𑀓𑀸𑀭𑀸, 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁧𑁨𑁫) 𑀯𑀺𑀪𑀸𑀯𑀺𑀢𑀸𑀦𑀫𑁆𑀧𑀺 𑀢𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀧𑀺 𑀲𑀫𑁆𑀧𑀭𑀸𑀬𑀺𑀓𑁂 𑀧𑀺𑀆𑀤𑀻𑀦𑀯𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑁂𑀲𑀼, 𑀏𑀢𑁂𑀲𑀼 𑀯𑀸 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀲𑀼 𑀧𑀜𑁆𑀘𑀲𑀼 𑀫𑀘𑁆𑀙𑀭𑀺𑀬𑁂𑀲𑀼. 𑀲𑀗𑁆𑀓𑀸𑀭𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸𑀯 𑀯𑀺𑀘𑀭𑀢𑀺 𑀢𑀢𑁆𑀣 𑀮𑀕𑁆𑀕𑀘𑀺𑀢𑁆𑀢𑀢𑀸𑀬, 𑀦𑀺𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀘. 𑀫𑀫𑀸𑀢𑀺 𑀫𑀬𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀮𑁄𑀳𑀺𑀢𑀫𑁆𑀧𑀺 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑁂𑀦 𑀲𑀁𑀢𑀢𑁆𑀢𑀳𑀤𑀬𑀢𑀸𑀬. 𑀓𑀼𑀘𑁆𑀙𑀺𑀯𑀺𑀭𑁂𑀘𑀦𑀫𑁆𑀧𑀺 𑀳𑁄𑀢𑀺 𑀅𑀢𑀺𑀚𑀮𑀕𑁆𑀕𑀺𑀦𑁄. 𑀅𑀜𑁆𑀜𑁄 𑀯𑀺𑀪𑀯𑀧𑀝𑀺𑀯𑁂𑀥𑀥𑀫𑁆𑀫𑁄 𑀅𑀭𑀺𑀬𑀸𑀦𑀁𑀬𑁂𑀯 𑀳𑁄𑀢𑀺, 𑀢𑁂 𑀘 𑀢𑀁 𑀦 𑀫𑀘𑁆𑀙𑀭𑀸𑀬𑀦𑁆𑀢𑀺 𑀫𑀘𑁆𑀙𑀭𑀺𑀬𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸. 𑀧𑀝𑀺𑀯𑁂𑀥𑀥𑀫𑁆𑀫𑁂 𑀫𑀘𑁆𑀙𑀭𑀺𑀬𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀆𑀳 ‘‘𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀘𑀸’’𑀢𑀺. 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀤𑀼𑀩𑁆𑀩𑀡𑁆𑀡𑁄, 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀏𑀴𑀫𑀽𑀕𑁄 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺.

‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀧𑀜𑁆𑀘𑀦𑁆𑀦𑀁 𑀫𑀘𑁆𑀙𑀭𑀺𑀬𑀸𑀦𑀁 𑀯𑀲𑁂𑀦 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀲𑁆𑀲𑀦𑀁. 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀮𑁄𑀳𑀕𑁂𑀳𑁂 𑀧𑀘𑁆𑀘𑀢𑀺 𑀧𑀭𑁂𑀲𑀁 𑀆𑀯𑀸𑀲𑀧𑀘𑁆𑀘𑀬𑀳𑀺𑀢𑀲𑀼𑀔𑀦𑀺𑀲𑁂𑀥𑀦𑀢𑁄. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀅𑀧𑁆𑀧𑀮𑀸𑀪𑁄 𑀳𑁄𑀢𑀺 𑀧𑀭𑁂𑀳𑀺 𑀓𑀼𑀮𑁂𑀲𑀼 𑀮𑀤𑁆𑀥𑀩𑁆𑀩𑀮𑀸𑀪𑀦𑀺𑀲𑁂𑀥𑀦𑀢𑁄, 𑀅𑀧𑁆𑀧𑀮𑀸𑀪𑁄𑀢𑀺 𑀘 𑀅𑀮𑀸𑀪𑁄𑀢𑀺 𑀅𑀢𑁆𑀣𑁄. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀕𑀽𑀣𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺 𑀮𑀸𑀪𑀳𑁂𑀢𑀼 𑀧𑀭𑁂𑀳𑀺 𑀮𑀤𑁆𑀥𑀩𑁆𑀩𑀲𑁆𑀲 𑀅𑀲𑁆𑀲𑀸𑀤𑀦𑀺𑀲𑁂𑀥𑀦𑀢𑁄. 𑀲𑀩𑁆𑀩𑀣𑀸𑀧𑀺 𑀦𑀺𑀭𑀲𑁆𑀲𑀸𑀤𑁄 𑀳𑀺 𑀕𑀽𑀣𑀦𑀺𑀭𑀬𑁄. 𑀯𑀡𑁆𑀡𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀲𑀭𑀻𑀭𑀯𑀡𑁆𑀡𑁄, 𑀕𑀼𑀡𑀯𑀡𑁆𑀡𑁄𑀢𑀺 𑀤𑀼𑀯𑀺𑀥𑁄𑀧𑀺 𑀯𑀡𑁆𑀡𑁄 𑀦𑀸𑀫𑀫𑀢𑁆𑀢𑁂𑀦𑀧𑀺 𑀦 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀯𑀺𑀭𑀽𑀧𑁄 𑀏𑀯 𑀳𑁄𑀢𑀺. 𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀲𑀪𑀸𑀯𑁂𑀦 𑀫𑀘𑁆𑀙𑀭𑀺𑀬𑁂𑀦 𑀯𑀺𑀭𑀽𑀧𑀺𑀢𑁂 𑀲𑀦𑁆𑀢𑀸𑀦𑁂 𑀬𑁂𑀪𑀼𑀬𑁆𑀬𑁂𑀦 𑀕𑀼𑀡𑀸 𑀧𑀢𑀺𑀝𑁆𑀞𑀫𑁂𑀯 𑀦 𑀮𑀪𑀦𑁆𑀢𑀺, 𑀬𑁂 𑀘 𑀧𑀢𑀺𑀝𑁆𑀞𑀳𑁂𑀬𑁆𑀬𑀼𑀁, 𑀢𑁂𑀲𑀫𑁆𑀧𑀺 𑀯𑀲𑁂𑀦𑀲𑁆𑀲 𑀯𑀡𑁆𑀡𑁄 𑀦 𑀪𑀯𑁂𑀬𑁆𑀬. 𑀢𑁂 𑀳𑀺 𑀢𑀲𑁆𑀲 𑀮𑁄𑀓𑁂 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀲𑀭𑀸 𑀯𑀺𑀬 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦𑀓𑀼𑀓𑁆𑀓𑀼𑀴𑀦𑀺𑀭𑀬𑁂.𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀢𑀺 𑀅𑀧𑀸𑀬𑀕𑀫𑀦𑀻𑀬𑀪𑀸𑀯𑀢𑁄. 𑀯𑁂𑀭𑀸𑀤𑀻𑀳𑀺 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺𑀬𑁂𑀯 𑀢𑀧𑁆𑀧𑀭𑀺𑀫𑀼𑀘𑁆𑀘𑀦𑀸𑀬 𑀇𑀘𑁆𑀙𑀸𑀬 𑀅𑀧𑁆𑀧𑀢𑁆𑀢𑀩𑁆𑀩𑀢𑁆𑀢𑀸 𑀚𑀸𑀢𑀺𑀆𑀤𑀺𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁 𑀚𑀸𑀢𑀺𑀆𑀤𑀻𑀳𑀺 𑀯𑀺𑀬.

𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂𑀢𑀺 𑀏𑀢𑀲𑁆𑀫𑀺𑀁 ‘‘𑀓𑀺𑀁𑀲𑀁𑀬𑁄𑀚𑀦𑀸 𑀦𑀼 𑀔𑁄’’𑀢𑀺 𑀏𑀯𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀅𑀢𑁆𑀣𑁂. 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 ‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀚𑁆𑀚𑀦𑀯𑀘𑀦𑀁 𑀲𑀼𑀢𑁆𑀯𑀸. 𑀓𑀗𑁆𑀔𑀸 𑀢𑀺𑀡𑁆𑀡𑀸𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀲𑀁𑀲𑀬𑁄 𑀢𑀭𑀺𑀢𑁄 𑀯𑀺𑀕𑀢𑁄 𑀤𑁂𑀲𑀦𑀸𑀦𑀼𑀲𑁆𑀲𑀭𑀡𑀫𑀢𑁆𑀢𑁂𑀦, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀆𑀳 ‘‘𑀦 𑀫𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺. 𑀅𑀬𑀫𑁆𑀧𑀺 𑀓𑀣𑀁𑀓𑀣𑀸 𑀯𑀺𑀕𑀢𑀸𑀢𑀺 𑀓𑀗𑁆𑀔𑀸𑀬 𑀯𑀺𑀕𑀢𑀢𑁆𑀢𑀸 𑀏𑀯 𑀢𑀲𑁆𑀲𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀪𑀽𑀢𑀸 ‘‘𑀇𑀤𑀁 𑀓𑀣 𑀇𑀤𑀁 𑀓𑀣’’𑀦𑁆𑀢𑀺 𑀅𑀬𑀫𑁆𑀧𑀺 𑀓𑀣𑀁𑀓𑀣𑀸 𑀯𑀺𑀕𑀢𑀸 𑀅𑀧𑀕𑀢𑀸.

𑁩𑁫𑁮. 𑀦𑀺𑀤𑀸𑀦𑀸𑀤𑀻𑀦𑀺 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫) 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀧𑀺𑀬𑀸𑀦𑀁 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀽𑀢𑀸𑀦𑀁 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑀯𑀲𑁂𑀦, 𑀦𑀺𑀕𑀽𑀳𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀢𑁄 𑀧𑀺𑀬𑀲𑀢𑁆𑀢𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀫𑀘𑁆𑀙𑀭𑀺𑀬𑀁, 𑀅𑀧𑁆𑀧𑀺𑀬𑀸𑀦𑀁 𑀧𑀭𑀺𑀕𑁆𑀕𑀳𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀧𑁆𑀧𑀺𑀬𑀲𑀢𑁆𑀢𑀲𑀗𑁆𑀔𑀸𑀭𑀦𑀺𑀤𑀸𑀦𑀸 𑀇𑀲𑁆𑀲𑀸. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀅𑀧𑁆𑀧𑀺𑀬𑀲𑀫𑁆𑀩𑀦𑁆𑀥𑀁 𑀪𑀤𑁆𑀤𑀓𑀫𑁆𑀧𑀺 𑀢𑀁 𑀓𑁄𑀥𑀦𑀲𑁆𑀲 𑀅𑀧𑁆𑀧𑀺𑀬𑀫𑁂𑀯𑀸𑀢𑀺. 𑀉𑀪𑀬𑀦𑁆𑀢𑀺 𑀫𑀘𑁆𑀙𑀭𑀺𑀬𑀁, 𑀇𑀲𑁆𑀲𑀸 𑀘𑀸𑀢𑀺 𑀉𑀪𑀬𑀁. 𑀉𑀪𑀬𑀦𑀺𑀤𑀸𑀦𑀦𑁆𑀢𑀺 𑀧𑀺𑀬𑀦𑀺𑀤𑀸𑀦𑀜𑁆𑀘𑁂𑀯 𑀅𑀧𑁆𑀧𑀺𑀬𑀦𑀺𑀤𑀸𑀦𑀜𑁆𑀘. 𑀧𑀺𑀬𑀸𑀢𑀺 𑀇𑀝𑁆𑀞𑀸. 𑀓𑁂𑀴𑀸𑀬𑀺𑀢𑀸𑀢𑀺 𑀥𑀦𑀸𑀬𑀺𑀢𑀸. 𑀫𑀫𑀸𑀬𑀺𑀢𑀸𑀢𑀺 𑀫𑀫𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑀸. 𑀇𑀲𑁆𑀲𑀁 𑀓𑀭𑁄𑀢𑀻𑀢𑀺 ‘‘𑀓𑀺𑀁 𑀇𑀫𑀲𑁆𑀲 𑀇𑀫𑀺𑀦𑀸’’𑀢𑀺 𑀢𑀲𑁆𑀲 𑀧𑀺𑀬𑀲𑀢𑁆𑀢𑀮𑀸𑀪𑀸𑀲𑀳𑀦𑀯𑀲𑁂𑀦 𑀉𑀲𑁆𑀲𑀽𑀬𑀢𑀺, 𑀢𑀫𑁂𑀯 𑀧𑀺𑀬𑀲𑀢𑁆𑀢𑀁 𑀬𑀸𑀘𑀺𑀢𑁄. 𑀅𑀳𑁄 𑀯𑀢𑀲𑁆𑀲𑀸𑀢𑀺 𑀲𑀸𑀥𑀼 𑀯𑀢 𑀅𑀲𑁆𑀲. ‘‘𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀭𑀽𑀧𑀁 𑀧𑀺𑀬𑀯𑀢𑁆𑀣𑀼 𑀦 𑀪𑀯𑁂𑀬𑁆𑀬𑀸’’𑀢𑀺 𑀇𑀲𑁆𑀲𑀁 𑀓𑀭𑁄𑀢𑀺 𑀉𑀲𑀽𑀬𑀁 𑀉𑀧𑁆𑀧𑀸𑀤𑁂𑀢𑀺. 𑀫𑀫𑀸𑀬𑀦𑁆𑀢𑀸𑀢𑀺 𑀓𑁂𑀴𑀸𑀬𑀦𑁆𑀢𑀸. 𑀅𑀧𑁆𑀧𑀺𑀬𑁂𑀢𑀺 𑀅𑀧𑁆𑀧𑀺𑀬𑁂 𑀲𑀢𑁆𑀢𑁂 𑀢𑁂𑀲𑀁 𑀲𑀢𑀸𑀧𑀢𑁄. 𑀅𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲, 𑀬𑁂𑀦 𑀢𑁂 𑀮𑀤𑁆𑀥𑀸. 𑀢𑁂𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑀸, 𑀲𑀘𑁂𑀧𑀺 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺 𑀅𑀧𑁆𑀧𑀺𑀬𑁂𑀳𑀺 𑀲𑀫𑀼𑀤𑀸𑀕𑀢𑀢𑁆𑀢𑀸. 𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀅𑀬𑀸𑀣𑀸𑀯𑀕𑀸𑀳𑀺𑀢𑀸𑀬. 𑀓𑁄 𑀅𑀜𑁆𑀜𑁄 𑀏𑀯𑀭𑀽𑀧𑀲𑁆𑀲 𑀮𑀸𑀪𑀻𑀢𑀺 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 𑀇𑀲𑁆𑀲𑀁 𑀯𑀸 𑀓𑀭𑁄𑀢𑀺. 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 ‘‘𑀅𑀳𑁄 𑀯𑀢𑀲𑁆𑀲 𑀏𑀯𑀭𑀽𑀧𑀁 𑀦 𑀪𑀯𑁂𑀬𑁆𑀬𑀸’’𑀢𑀺 𑀇𑀲𑁆𑀲𑀁 𑀯𑀸 𑀓𑀭𑁄𑀢𑀺, 𑀅𑀬𑀜𑁆𑀘 𑀦𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀦 𑀕𑀳𑀺𑀢𑁄.

𑀯𑀢𑁆𑀣𑀼𑀓𑀸𑀫𑀸𑀦𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 𑀙𑀦𑁆𑀤𑁄 𑀧𑀭𑀺𑀬𑁂𑀲𑀦𑀙𑀦𑁆𑀤𑁄. 𑀧𑀝𑀺𑀮𑀸𑀪𑀧𑀘𑁆𑀘𑀬𑁄 𑀙𑀦𑁆𑀤𑁄 𑀧𑀝𑀺𑀮𑀸𑀪𑀙𑀦𑁆𑀤𑁄. 𑀧𑀭𑀺𑀪𑀼𑀜𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀙𑀦𑁆𑀤𑁄 𑀧𑀭𑀺𑀪𑁄𑀕𑀙𑀦𑁆𑀤𑁄. 𑀧𑀝𑀺𑀮𑀤𑁆𑀥𑀸𑀦𑀁 𑀲𑀦𑁆𑀦𑀺𑀥𑀸𑀧𑀦𑀯𑀲𑁂𑀦, 𑀲𑀗𑁆𑀕𑁄𑀧𑀦𑀯𑀲𑁂𑀦 𑀘 𑀧𑀯𑀢𑁆𑀢𑁄 𑀙𑀦𑁆𑀤𑁄 𑀲𑀦𑁆𑀦𑀺𑀥𑀺𑀙𑀦𑁆𑀤𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯 𑀧𑀬𑁄𑀚𑀦𑀁 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀙𑀦𑁆𑀤𑁄 𑀯𑀺𑀲𑁆𑀲𑀚𑁆𑀚𑀦𑀙𑀦𑁆𑀤𑁄. 𑀢𑁂𑀦𑀸𑀳 ‘‘𑀓𑀢𑀫𑁄’’𑀢𑀺𑀆𑀤𑀺.

𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀅𑀢𑁆𑀣𑀢𑁄 𑀢𑀡𑁆𑀳𑀸𑀬𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀫𑀢𑁆𑀢𑀫𑁂𑀯𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁄 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀏𑀯𑀁 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁧𑁦𑁩) 𑀯𑀼𑀢𑁆𑀢𑁄 𑀯𑀺𑀦𑀺𑀘𑁆𑀙𑀬𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀦𑀸𑀫, 𑀦 𑀬𑁄 𑀓𑁄𑀘𑀺 𑀯𑀺𑀢𑀓𑁆𑀓𑁄. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀦𑀺𑀘𑁆𑀙𑀬𑀯𑀺𑀢𑀓𑁆𑀓𑀁 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀢𑀦𑁆𑀢𑀺 𑀅𑀝𑁆𑀞𑀸𑀥𑀺𑀓𑀁 𑀲𑀢𑀁, 𑀢𑀜𑁆𑀘 𑀔𑁄 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀁 𑀲𑀢𑀁, 𑀦 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀯𑀺𑀘𑀭𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀦𑀸𑀫 𑀢𑀡𑁆𑀳𑀸𑀬 𑀯𑀲𑁂𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀆𑀭𑀫𑁆𑀫𑀡𑀲𑁆𑀲 𑀯𑀺𑀦𑀺𑀘𑁆𑀙𑀺𑀦𑀦𑀢𑁄. 𑀤𑀺𑀝𑁆𑀞𑀺𑀤𑀲𑁆𑀲𑀦𑀯𑀲𑁂𑀦 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀁 𑀅𑀜𑁆𑀜’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀺𑀦𑀦𑀢𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀦𑀸𑀫. 𑀇𑀝𑁆𑀞𑀁 𑀧𑀡𑀻𑀢𑀁, 𑀅𑀦𑀺𑀝𑁆𑀞𑀁 𑀅𑀧𑁆𑀧𑀡𑀻𑀢𑀁, 𑀧𑀺𑀬𑀸𑀬𑀺𑀢𑀩𑁆𑀩𑀁 𑀧𑀺𑀬𑀁, 𑀅𑀧𑁆𑀧𑀺𑀬𑀸𑀬𑀺𑀢𑀩𑁆𑀩𑀁 𑀅𑀧𑁆𑀧𑀺𑀬𑀁, 𑀢𑁂𑀲𑀁 𑀯𑀯𑀢𑁆𑀣𑀸𑀦𑀁 𑀢𑀡𑁆𑀳𑀸𑀯𑀲𑁂𑀦 𑀦 𑀳𑁄𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀳𑀺 𑀏𑀓𑀘𑁆𑀘𑁄 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀧𑀡𑀻𑀢𑀁 𑀫𑀜𑁆𑀜𑀢𑀺, 𑀏𑀓𑀘𑁆𑀘𑁄 𑀳𑀻𑀦𑀁, 𑀏𑀓𑀘𑁆𑀘𑁄 𑀧𑀺𑀬𑀸𑀬𑀢𑀺, 𑀏𑀓𑀘𑁆𑀘𑁄 𑀦𑀧𑁆𑀧𑀺𑀬𑀸𑀬𑀢𑀺. 𑀢𑁂𑀦𑀸𑀳 ‘‘𑀢𑀤𑁂𑀯 𑀳𑀻’’𑀢𑀺𑀆𑀤𑀺. ‘‘𑀤𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀙𑀦𑁆𑀤𑁂 𑀯𑀼𑀢𑁆𑀢𑀦𑀬𑁂𑀦 𑀘𑁂𑀯 𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀤𑀸𑀦𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑀢𑀡𑁆𑀳𑀸𑀙𑀦𑁆𑀤𑀳𑁂𑀢𑀼𑀓𑀦𑁆𑀢𑀺.

𑀬𑀢𑁆𑀣 𑀲𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑀬𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀬𑀲𑁆𑀲 𑀘 𑀉𑀧𑁆𑀧𑀦𑁆𑀦𑀸, 𑀢𑀁 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄’’𑀢𑀺 𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀩𑁆𑀬𑀜𑁆𑀚𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀬𑀲𑁆𑀫𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀅𑀥𑀺𑀫𑀢𑁆𑀢𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀧𑀫𑀢𑁆𑀢𑀸𑀓𑀸𑀭𑀁 𑀧𑀸𑀧𑁂𑀦𑁆𑀢𑀺, 𑀫𑀸𑀦𑁄 𑀧𑀦 𑀚𑀸𑀢𑀺𑀫𑀤𑀸𑀤𑀺 𑀯𑀲𑁂𑀦 𑀫𑀢𑁆𑀢𑀸𑀓𑀸𑀭𑀫𑁆𑀧𑀺, 𑀢𑀲𑁆𑀫𑀸 ‘‘𑀫𑀢𑁆𑀢𑀧𑀫𑀢𑁆𑀢𑀸𑀓𑀸𑀭𑀧𑀸𑀧𑀦𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀓𑁄𑀝𑁆𑀞𑀸𑀲𑁄 𑀪𑀸𑀕𑀲𑁄 𑀲𑀗𑁆𑀔𑀸𑀬𑀢𑀺 𑀉𑀧𑀝𑁆𑀞𑀸𑀢𑀻𑀢𑀺. 𑀬𑀲𑁆𑀫𑀸 𑀧𑀧𑀜𑁆𑀘𑀲𑀜𑁆𑀜𑀸 𑀢𑀁𑀢𑀁𑀤𑁆𑀯𑀸𑀭𑀯𑀲𑁂𑀦, 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀪𑀸𑀕𑀲𑁄 𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀓𑁂𑀯𑀮𑀸, 𑀢𑀲𑁆𑀫𑀸 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀤𑀸𑀦𑁄 𑀯𑀺𑀢𑀓𑁆𑀓𑁄 𑀯𑀼𑀢𑁆𑀢𑁄, 𑀧𑀧𑀜𑁆𑀘𑀲𑀜𑁆𑀜𑀸𑀦𑀁 𑀯𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀢𑀁𑀲𑀫𑀼𑀤𑀸𑀬𑁄 ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸’’𑀢𑀺 𑀯𑀼𑀢𑁆𑀢𑁄. 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀕𑁆𑀕𑀳𑀡𑁂𑀦 𑀘 𑀅𑀦𑀯𑀲𑁂𑀲𑁄 𑀤𑀼𑀓𑁆𑀔𑀲𑀫𑀼𑀤𑀬𑁄 𑀯𑀼𑀢𑁆𑀢𑁄 𑀢𑀁𑀢𑀁 𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲𑀸𑀢𑀺.

𑀬𑁄 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄𑀢𑀺 𑀦𑀺𑀭𑁄𑀥𑀲𑀘𑁆𑀘𑀫𑀸𑀳. 𑀢𑀲𑁆𑀲 𑀲𑀸𑀭𑀼𑀧𑁆𑀧𑀦𑁆𑀢𑀺 𑀢𑀲𑁆𑀲 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀦𑀺𑀭𑁄𑀥𑀲𑁆𑀲 𑀯𑀽𑀧𑀲𑀫𑀲𑁆𑀲 𑀅𑀥𑀺𑀕𑀫𑀼𑀧𑀸𑀬𑀢𑀸𑀬 𑀲𑀸𑀭𑀼𑀧𑁆𑀧𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀏𑀢𑁂𑀦 𑀯𑀺𑀧𑀲𑁆𑀲𑀦𑀁 𑀯𑀤𑀢𑀺. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀦𑀺𑀭𑁄𑀥𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀢𑀢𑁆𑀣𑀕𑀸𑀫𑀺𑀦𑀻, 𑀏𑀢𑁂𑀦 𑀫𑀕𑁆𑀕𑀁. 𑀢𑁂𑀦𑀸𑀳 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀁 𑀧𑀼𑀘𑁆𑀙𑀢𑀻’’𑀢𑀺.

𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁩𑁫𑁯. 𑀧𑀼𑀘𑁆𑀙𑀺𑀢𑀫𑁂𑀯 𑀓𑀣𑀺𑀢𑀁. 𑀬𑀲𑁆𑀫𑀸 𑀲𑀓𑁆𑀓𑁂𑀦 𑀤𑁂𑀯𑀸𑀦𑀁 𑀇𑀦𑁆𑀤𑁂𑀦 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸 𑀧𑀼𑀘𑁆𑀙𑀺𑀢𑀸𑀯, 𑀪𑀕𑀯𑀸 𑀘 𑀢𑀤𑀥𑀺𑀕𑀫𑀼𑀧𑀸𑀬𑀁 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑁂𑀤𑀦𑀸𑀫𑀼𑀔𑁂𑀦 𑀓𑀣𑁂𑀦𑁆𑀢𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀭𑀪𑀺, 𑀇𑀢𑀺 𑀧𑀼𑀘𑁆𑀙𑀺𑀢𑀫𑁂𑀯 𑀓𑀣𑁂𑀦𑁆𑀢𑁂𑀦 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀲𑀸𑀦𑀼𑀲𑀦𑁆𑀥𑀺𑀫𑁂𑀯 𑀘 𑀓𑀣𑀺𑀢𑀁. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀅𑀦𑀦𑀼𑀲𑀦𑁆𑀥𑀺𑀓𑀸 𑀓𑀣𑀸 𑀦𑀸𑀫 𑀅𑀢𑁆𑀣𑀺. 𑀇𑀤𑀸𑀦𑀺𑀲𑁆𑀲 𑀯𑁂𑀤𑀦𑀸𑀫𑀼𑀔𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑁂𑀯 𑀓𑀣𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀯𑀢𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀭𑀚𑀓𑀸𑀬𑀲𑁆𑀲 𑀲𑀼𑀔𑀼𑀫𑀢𑀸𑀯𑀘𑀦𑁂𑀦𑁂𑀯 𑀅𑀘𑁆𑀘𑀦𑁆𑀢𑀫𑀼𑀤𑀼𑀲𑀼𑀔𑀼𑀫𑀸𑀮𑀪𑀸𑀯𑀸𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀫𑁆𑀫𑀚𑀦𑁆𑀢𑀺 𑀓𑀫𑁆𑀫𑀚𑀢𑁂𑀚𑀁. 𑀢𑀲𑁆𑀲 𑀩𑀮𑀯𑀪𑀸𑀯𑁄 𑀉𑀴𑀸𑀭𑀧𑀼𑀜𑁆𑀜𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀅𑀢𑀺𑀯𑀺𑀬 𑀕𑀭𑀼𑀫𑀥𑀼𑀭𑀲𑀺𑀦𑀺𑀤𑁆𑀥𑀲𑀼𑀤𑁆𑀥𑀸𑀳𑀸𑀭𑀚𑀻𑀭𑀡𑀢𑁄 𑀘. 𑀏𑀓𑀸𑀳𑀸𑀭𑀫𑁆𑀧𑀻𑀢𑀺 𑀏𑀓𑀸𑀳𑀸𑀭𑀯𑀸𑀭𑀫𑁆𑀧𑀺. ‘‘𑀯𑀺𑀮𑀻𑀬𑀦𑁆𑀢𑀻’’𑀢𑀺 𑀏𑀢𑁂𑀦 𑀓𑀭𑀚𑀓𑀸𑀬𑀲𑁆𑀲 𑀫𑀦𑁆𑀤𑀢𑀸𑀬 𑀓𑀫𑁆𑀫𑀚𑀢𑁂𑀚𑀲𑁆𑀲 𑀩𑀮𑀯𑀪𑀸𑀯𑁂𑀦 𑀆𑀳𑀸𑀭𑀯𑁂𑀮𑀸𑀢𑀺𑀓𑁆𑀓𑀫𑁂𑀦 𑀦𑁂𑀲𑀁 𑀩𑀮𑀯𑀢𑀻 𑀤𑀼𑀓𑁆𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀼𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀲𑀼𑀔𑀯𑁂𑀤𑀦𑀸𑀧𑀺 𑀧𑀦 𑀦𑁂𑀲𑀁 𑀉𑀴𑀸𑀭𑀧𑀡𑀻𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑀭𑀽𑀧𑀭𑀺 𑀅𑀦𑀺𑀕𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀲𑀼𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺𑀬𑁂𑀯. 𑀉𑀧𑁂𑀓𑁆𑀔𑀸𑀧𑀺 𑀢𑁂𑀲𑀁 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀦𑁆𑀢𑀧𑀡𑀻𑀢𑀭𑀽𑀧𑀸 𑀏𑀯 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀏𑀯 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀭𑀽𑀧𑀧𑀭𑀺𑀕𑁆𑀕𑀳𑀁, 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂𑀦 𑀲𑀫𑀣𑀸𑀪𑀺𑀦𑀺𑀯𑁂𑀲𑁄𑀧𑀺 𑀲𑀗𑁆𑀕𑀬𑁆𑀳𑀢𑀺, 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺𑀧𑀺 𑀏𑀢𑀤𑁂𑀯 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸𑀯 𑀓𑀣𑁂𑀢𑀺 ‘‘𑀏𑀯𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀘𑁆𑀘𑀫𑀸𑀦𑀁 𑀲𑀼𑀝𑁆𑀞𑀼 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻’’𑀢𑀺. ‘‘𑀏𑀢𑁂𑀦 𑀇𑀥𑀸𑀧𑀺 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀤𑁂𑀲𑁂𑀦 𑀯𑀺𑀪𑀸𑀯𑀺𑀢𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁, 𑀢𑀤𑀜𑁆𑀜𑀥𑀫𑁆𑀫𑀯𑀲𑁂𑀦𑀧𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀮𑀩𑁆𑀪𑀢𑀻𑀢𑀺 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀯𑀺𑀥𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑁄𑀢𑀺 𑀅𑀦𑀼𑀧𑁆𑀧𑀯𑁂𑀲𑁄, 𑀆𑀭𑀫𑁆𑀪𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀪𑁂 𑀏𑀯 𑀳𑀺 𑀅𑀬𑀁 𑀯𑀺𑀪𑀸𑀕𑁄, 𑀲𑀫𑁆𑀫𑀲𑀦𑀁 𑀧𑀦 𑀅𑀦𑀯𑀲𑁂𑀲𑀢𑁄𑀯 𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. ‘‘𑀧𑀭𑀺𑀕𑁆𑀕𑀳𑀺𑀢𑁂 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂’’𑀢𑀺 𑀇𑀤𑀁 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀭𑀽𑀧𑀫𑀼𑀔𑁂𑀦 𑀧𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀬𑁂𑀪𑀼𑀬𑁆𑀬𑁂𑀦 𑀲𑀫𑀣𑀬𑀸𑀦𑀺𑀓𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑁄, 𑀲𑁄 𑀘 𑀧𑀞𑀫𑀁 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑁂𑀲𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀧𑀞𑀫𑀸𑀪𑀺𑀦𑀺𑀧𑀸𑀢𑁄𑀢𑀺 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀸𑀬𑀢𑁆𑀢𑀸 𑀘𑀺𑀢𑁆𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀨𑀲𑁆𑀲𑁄 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀼𑀢𑁆𑀢𑁄. 𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀲𑀜𑁆𑀜𑀺𑀢𑀁 𑀆𑀭𑀫𑁆𑀫𑀡𑀁. 𑀉𑀧𑁆𑀧𑀦𑁆𑀦𑀨𑀲𑁆𑀲𑁄 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀯𑀸 𑀆𑀭𑀫𑁆𑀫𑀡𑁂𑀦 𑀨𑀼𑀝𑁆𑀞𑁄 𑀨𑀲𑁆𑀲𑀲𑀳𑀚𑀸𑀢𑀸𑀬 𑀯𑁂𑀤𑀦𑀸𑀬 𑀢𑀁𑀲𑀫𑀓𑀸𑀮𑀫𑁂𑀯 𑀯𑁂𑀤𑁂𑀢𑀺, 𑀨𑀲𑁆𑀲𑁄 𑀧𑀦 𑀑𑀪𑀸𑀲𑀲𑁆𑀲 𑀯𑀺𑀬 𑀧𑀤𑀻𑀧𑁄 𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀧𑀼𑀭𑀺𑀫𑀓𑀸𑀮𑁄 𑀯𑀺𑀬 𑀯𑀼𑀘𑁆𑀘𑀢𑀺, 𑀬𑀸 𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑀢𑀸 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀨𑀼𑀲𑀦𑀸𑀓𑀸𑀭𑁂𑀦. 𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑀢𑁆𑀢𑀸 𑀏𑀓𑀤𑁂𑀲𑁂𑀦 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁, 𑀘𑀺𑀢𑁆𑀢𑀁, 𑀆𑀭𑀫𑁆𑀫𑀡𑀜𑁆𑀘 𑀨𑀼𑀲𑀦𑁆𑀢𑁄 𑀯𑀺𑀬, 𑀲𑀗𑁆𑀖𑀝𑁆𑀝𑁂𑀦𑁆𑀢𑁄 𑀯𑀺𑀬 𑀘 𑀧𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀳𑁂𑀲 ‘‘𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻𑀢𑀺 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀭𑀲𑀁 𑀲𑀁𑀯𑁂𑀤𑁂𑀦𑁆𑀢𑀻. 𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀏𑀓𑀤𑁂𑀲𑁂𑀦𑁂𑀯 𑀧𑀯𑀢𑁆𑀢𑀺 𑀨𑀼𑀲𑀦𑀸𑀤𑀺𑀫𑀢𑁆𑀢𑀪𑀸𑀯𑀢𑁄, 𑀯𑁂𑀤𑀦𑀸𑀬 𑀧𑀦 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀆𑀭𑀫𑁆𑀫𑀡𑁂 𑀦𑀺𑀧𑁆𑀧𑀤𑁂𑀲𑀢𑁄 𑀧𑀯𑀢𑁆𑀢𑀺. 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀳𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀏𑀓𑀤𑁂𑀲𑀸𑀦𑀼𑀪𑀯𑀦𑀁, 𑀯𑁂𑀤𑀬𑀺𑀢𑀪𑀸𑀯𑁂𑀦 𑀕𑀳𑀡𑀁 𑀬𑀣𑀸𑀓𑀸𑀫𑀁 𑀲𑀩𑁆𑀩𑀸𑀦𑀼𑀪𑀯𑀦𑀁, 𑀏𑀯𑀁𑀲𑀪𑀸𑀯𑀸𑀦𑁂𑀯 𑀢𑀸𑀦𑀺 𑀕𑀳𑀡𑀸𑀦𑀻𑀢𑀺 𑀦 𑀯𑁂𑀤𑀦𑀸𑀬 𑀯𑀺𑀬 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀬𑀣𑀸 𑀲𑀓𑀓𑀺𑀘𑁆𑀘𑀓𑀭𑀡𑁂𑀦 𑀲𑀸𑀫𑀺𑀪𑀸𑀯𑀸𑀦𑀼𑀪𑀯𑀦𑀁 𑀘𑁄𑀤𑁂𑀢𑀩𑁆𑀩𑀁. 𑀯𑀺𑀚𑀸𑀦𑀦𑁆𑀢𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀯𑀺𑀲𑁂𑀲𑀢𑁄 𑀚𑀸𑀦𑀦𑁆𑀢𑀁. 𑀯𑀺𑀜𑁆𑀜𑀸𑀡𑀜𑁆𑀳𑀺 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼𑀁 𑀦𑀸𑀴𑀺𑀬𑀸 𑀫𑀺𑀦𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀧𑀭𑀺𑀘𑁆𑀙𑀺𑀚𑁆𑀚 𑀯𑀺𑀪𑀸𑀯𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀦 𑀲𑀜𑁆𑀜𑀸 𑀯𑀺𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀁 𑀳𑀼𑀢𑁆𑀯𑀸. 𑀢𑀣𑀸 𑀳𑀺 𑀅𑀦𑁂𑀦 𑀓𑀤𑀸𑀘𑀺 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀸𑀧𑀺 𑀳𑁄𑀢𑀺, 𑀇𑀫𑁂𑀲𑀁 𑀧𑀦 𑀨𑀲𑁆𑀲𑀸𑀤𑀻𑀦𑀁 𑀢𑀲𑁆𑀲 𑀢𑀲𑁆𑀲 𑀧𑀸𑀓𑀝𑀪𑀸𑀯𑁄 𑀧𑀘𑁆𑀘𑀬𑀯𑀺𑀲𑁂𑀲𑀲𑀺𑀤𑁆𑀥𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀸𑀓𑀝𑀪𑀸𑀯𑁂𑀧𑀺 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬; 𑀧𑀝𑀺. 𑀫. 𑁧.𑁩), ‘‘𑀲𑀩𑁆𑀩𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁭) 𑀘 𑀏𑀯𑀫𑀸𑀤𑀺 𑀯𑀘𑀦𑀢𑁄 𑀲𑀩𑁆𑀩𑁂 𑀲𑀫𑁆𑀫𑀲𑀦𑀼𑀧𑀕𑀸 𑀥𑀫𑁆𑀫𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁. 𑀨𑀲𑁆𑀲𑀧𑀜𑁆𑀘𑀫𑀓𑀕𑁆𑀕𑀳𑀡𑀜𑁆𑀳𑀺 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀪𑀸𑀯𑀢𑁄. 𑀢𑀢𑁆𑀣 𑀘 𑀨𑀲𑁆𑀲𑀘𑁂𑀢𑀦𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑀗𑁆𑀕𑀳𑁄 𑀘𑁂𑀢𑀦𑀧𑁆𑀧𑀥𑀸𑀦𑀢𑁆𑀢𑀸 𑀢𑁂𑀲𑀁. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁧) 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸, 𑀇𑀢𑀭𑁂 𑀧𑀦 𑀔𑀦𑁆𑀥𑀸 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀸.

𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼-𑀲𑀤𑁆𑀤𑁄 𑀓𑀭𑀚𑀓𑀸𑀬𑀯𑀺𑀲𑀬𑁄, 𑀦 𑀙𑀩𑁆𑀩𑀢𑁆𑀣𑀼𑀯𑀺𑀲𑀬𑁄𑀢𑀺. 𑀓𑀣𑀫𑀺𑀤𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀓𑀢𑁆𑀣 𑀧𑀦 𑀯𑀼𑀢𑁆𑀢𑀁? 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑁂. 𑀲𑁄𑀢𑀺 𑀓𑀭𑀚𑀓𑀸𑀬𑁄. ‘‘𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀦𑀸𑀫𑀭𑀽𑀧𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀳𑀺 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀫𑁆𑀧𑀺 𑀦𑀸𑀫𑀁 𑀅𑀢𑁆𑀣𑁂𑀯𑀸𑀢𑀺. 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀓𑀸𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀺𑀳𑁂𑀢𑀼𑀓𑀸. ‘‘𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀲𑀫𑁆𑀫𑀲𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺 𑀇𑀫𑀺𑀦𑀸 𑀩𑀮𑀯𑀯𑀺𑀧𑀲𑁆𑀲𑀦𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀉𑀲𑁆𑀲𑀼𑀓𑁆𑀓𑀸𑀧𑀦𑀁, 𑀯𑀺𑀲𑁂𑀲𑀸𑀥𑀺𑀕𑀫𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄’’𑀢𑀺𑀆𑀤𑀺𑀫𑀸𑀳.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂. 𑀯𑁂𑀤𑀦𑀸𑀯𑀲𑁂𑀦 𑀘𑁂𑀢𑁆𑀣 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀘 𑀢𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁂𑀲𑀼 𑀯𑁂𑀤𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀲𑀼𑀓𑀭𑁄 𑀯𑁂𑀤𑀦𑀸𑀦𑀁 𑀯𑀺𑀪𑀽𑀢𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀨𑀲𑁆𑀲𑀯𑀲𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦 𑀧𑀸𑀓𑀝𑀁 𑀳𑁄𑀢𑀻’’𑀢𑀺 𑀇𑀤𑀁 𑀲𑀓𑁆𑀓𑀧𑀫𑀼𑀔𑀸𑀦𑀁 𑀢𑁂𑀲𑀁 𑀤𑁂𑀯𑀸𑀦𑀁 𑀬𑀣𑀸 𑀯𑁂𑀤𑀦𑀸 𑀯𑀺𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀦 𑀏𑀯𑀁 𑀇𑀢𑀭𑀤𑁆𑀯𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀬 𑀏𑀯 𑀘 𑀦𑁂𑀲𑀁 𑀯𑀺𑀪𑀽𑀢𑀪𑀸𑀯𑁄 𑀯𑁂𑀤𑀦𑀸𑀫𑀼𑀔𑁂𑀦𑁂𑀯𑁂𑀢𑁆𑀣 𑀪𑀕𑀯𑀢𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸. ‘‘𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀸𑀓𑀝𑀢𑀸𑀬𑀸’’𑀢𑀺 𑀇𑀤𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀸𑀲𑀜𑁆𑀳𑀺 𑀧𑀯𑀢𑁆𑀢𑀺 𑀑𑀴𑀸𑀭𑀺𑀓𑀸, 𑀦 𑀇𑀢𑀭𑀸𑀬. 𑀢𑀤𑀼𑀪𑀬𑀕𑁆𑀕𑀳𑀡𑀫𑀼𑀔𑁂𑀦 𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 𑀇𑀢𑀭𑀸𑀬𑀧𑀺 𑀧𑀯𑀢𑁆𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀸 𑀏𑀯𑀸𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀜𑁆𑀳𑀻’’𑀢𑀺 𑀯𑀺𑀲𑁂𑀲𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. ‘‘𑀬𑀤𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀲𑀼𑀔𑀯𑁂𑀤𑀦𑀸𑀬 𑀧𑀸𑀓𑀝𑀪𑀸𑀯𑀯𑀺𑀪𑀸𑀯𑀦𑀁, 𑀢𑀬𑀺𑀤𑀁 𑀅𑀲𑀫𑀸𑀳𑀺𑀢𑀪𑀽𑀫𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀲𑀓𑀮𑀁 𑀲𑀭𑀻𑀭𑀁 𑀔𑁄 𑀪𑀦𑁆𑀢𑁂’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀫𑀁 𑀧𑀯𑀢𑁆𑀢𑀺𑀑𑀴𑀸𑀭𑀺𑀓𑀢𑀸𑀬 𑀅𑀯𑀽𑀧𑀲𑀦𑁆𑀢𑀲𑀪𑀸𑀯𑀫𑁂𑀢𑀁 𑀲𑀼𑀔𑀁, 𑀲𑀸𑀢𑀮𑀓𑁆𑀔𑀡𑀢𑀸𑀬 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂, 𑀦𑀺𑀲𑁆𑀲𑀬𑀜𑁆𑀘 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀤𑀸 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀤𑁆𑀤𑀻𑀧𑀦𑀸𑀢𑀺 𑀜𑀸𑀡𑁂𑀦 𑀤𑀻𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑁆𑀥𑀓𑀸𑀭𑀸 𑀅𑀪𑀺𑀪𑀽𑀢𑀸’’𑀢𑀺. 𑀅𑀦𑁆𑀥𑀓𑀸𑀭𑀸𑀢𑀺 𑀅𑀦𑁆𑀥𑀓𑀸𑀭𑀕𑀢𑀲𑀤𑀺𑀲𑀻, 𑀚𑀸𑀦𑀺𑀢𑀼𑀓𑀸𑀫𑁂 𑀘 𑀅𑀦𑁆𑀥𑀓𑀸𑀭𑀺𑀦𑀻. 𑀧𑀼𑀩𑁆𑀩𑀸𑀧𑀭𑀁 𑀲𑀫𑀁 𑀲𑀼𑀓𑀭𑁂 𑀲𑀼𑀧𑀮𑀓𑁆𑀔𑀺𑀢𑀫𑀕𑁆𑀕𑀯𑀲𑁂𑀦 𑀧𑀸𑀲𑀸𑀡𑀢𑀮𑁂 𑀫𑀺𑀕𑀕𑀢𑀫𑀕𑁆𑀕𑁄 𑀯𑀺𑀬 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀼𑀪𑀯𑀦𑁂𑀳𑀺 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀅𑀦𑀼𑀫𑀺𑀦𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁 ‘‘𑀲𑀸 𑀲𑀼𑀔𑀤𑀼𑀓𑁆𑀔𑀸𑀦𑀁…𑀧𑁂… 𑀧𑀸𑀓𑀝𑀸 𑀳𑁄𑀢𑀻’’𑀢𑀺. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀬𑀁 𑀦𑀬𑁄 𑁋 𑀬𑀲𑁆𑀫𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀸𑀬 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺𑀬𑀸 𑀅𑀦𑀼𑀪𑀯𑀦𑀢𑁄 𑀦𑀺𑀝𑁆𑀞𑀸𑀫𑀚𑁆𑀛𑀢𑁆𑀢𑀯𑀺𑀲𑀬𑀸 𑀘 𑀉𑀧𑀮𑀤𑁆𑀥𑀺, 𑀢𑀲𑁆𑀫𑀸 𑀦 𑀢𑀸𑀬 𑀦𑀺𑀭𑀦𑀼𑀪𑀯𑀦𑀸𑀬 𑀪𑀯𑀺𑀢𑀩𑁆𑀩𑀁, 𑀬𑀁 𑀢𑀢𑁆𑀣𑀸𑀦𑀼𑀪𑀯𑀦𑀁, 𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸. 𑀢𑀣𑀸 𑀅𑀦𑀼𑀧𑀮𑀩𑁆𑀪𑀫𑀸𑀦𑀁 𑀭𑀽𑀧𑀸𑀤𑀺𑀅𑀦𑀼𑀪𑀼𑀬𑁆𑀬𑀫𑀸𑀦𑀁 𑀤𑀺𑀝𑁆𑀞𑀁 𑀉𑀧𑀮𑀩𑁆𑀪𑀢𑀺, 𑀬𑁄 𑀧𑀦 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀢𑀩𑁆𑀩𑀺𑀲𑀬𑀲𑁆𑀲 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀁, 𑀢𑀲𑁆𑀫𑀸 𑀅𑀦𑀦𑀼𑀪𑀼𑀬𑁆𑀬𑀫𑀸𑀦𑁂𑀦 𑀢𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀅𑀦𑀼𑀪𑀯𑀫𑀸𑀦𑀸 𑀫𑀚𑁆𑀛𑀢𑁆𑀢𑀯𑀺𑀲𑀬𑀼𑀧𑀮𑀤𑁆𑀥𑀺 𑀉𑀧𑀮𑀤𑁆𑀥𑀺𑀪𑀸𑀯𑀢𑁄. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀼𑀧𑀮𑀤𑁆𑀥𑀺𑀯𑀺𑀲𑀬𑀁 𑀧𑀦 𑀦𑀺𑀭𑀦𑀼𑀪𑀯𑀦𑀁 𑀢𑀁 𑀅𑀦𑀼𑀧𑀮𑀤𑁆𑀥𑀺𑀲𑀪𑀸𑀯𑀫𑁂𑀯 𑀤𑀺𑀝𑁆𑀞𑀁, 𑀢𑀁 𑀬𑀣𑀸𑀭𑀽𑀧𑀦𑁆𑀢𑀺. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸, ‘‘𑀲𑁄𑀫𑀦𑀲𑁆𑀲𑀁𑀧𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀦𑀚𑀸𑀢𑀺𑀬𑀫𑁆𑀧𑀺 𑀪𑀺𑀦𑁆𑀤𑀦𑁆𑀢𑁄 𑀅𑀜𑁆𑀜𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀯𑀺𑀯𑁂𑀘𑁂𑀢𑁆𑀯𑀸 𑀅𑀲𑀁𑀲𑀝𑁆𑀞𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀬𑀜𑁆𑀘 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀲𑀦𑀸 𑀢𑀣𑀸𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀸𑀬 𑀲𑀼𑀢𑁆𑀢𑀦𑁆𑀢𑀭𑁂𑀲𑀼𑀧𑀺 (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬, 𑁩𑁯𑁦, 𑁪𑁧𑁩, 𑁪𑁫𑁦, 𑁪𑁬𑁫, 𑁪𑁬𑁭; 𑀫. 𑀦𑀺. 𑁨.𑁩𑁦𑁬, 𑁨𑁦𑁯; 𑁩.𑁬𑁭, 𑁩𑁪𑁨; 𑀲𑀁. 𑀦𑀺. 𑁪.𑁨𑁪𑁮) 𑀆𑀕𑀢𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁨𑁭𑁩) 𑀢𑀣𑀸 𑀤𑁂𑀲𑀦𑀸𑀬 𑀆𑀕𑀢𑀪𑀸𑀯𑁄 𑀅𑀦𑀦𑁆𑀢𑀭𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀧𑀺 (𑀫. 𑀦𑀺. 𑁧.𑁧𑁦𑁬) 𑀢𑀸𑀤𑀺𑀲𑀻 𑀏𑀯. 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑁂 ‘‘𑀏𑀯𑀁 𑀘𑁂𑀢𑀁, 𑀤𑁂𑀯𑀸𑀦𑀁 𑀇𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺, 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁯𑁦) 𑀆𑀕𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀻’’𑀢𑀺. 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑁂 𑀧𑀦 ‘‘𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁧𑁪) 𑀆𑀕𑀢𑀁. 𑀘𑀽𑀴𑀯𑁂𑀤𑀮𑁆𑀮𑁂 ‘‘𑀓𑀢𑀺 𑀧𑀦𑀸𑀬𑁆𑀬𑁂𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁫) 𑀆𑀕𑀢𑀁. 𑀫𑀳𑀸𑀯𑁂𑀤𑀮𑁆𑀮𑁂 ‘‘𑀯𑁂𑀤𑀦𑀸𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, ‘𑀯𑁂𑀤𑀦𑀸’𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁫𑁦) 𑀆𑀕𑀢𑀁. 𑀏𑀯𑀁 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀸𑀤𑀻𑀲𑀼𑀧𑀺 (𑀫. 𑀦𑀺. 𑁨.𑁩𑁦𑁫) 𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀆𑀕𑀢𑀝𑁆𑀞𑀸𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

‘‘𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀢𑀫𑁂𑀢𑁆𑀣 𑀓𑀣𑀺𑀢𑀦𑁆𑀢𑀺 𑀆𑀳 ‘‘𑀭𑀽𑀧𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀲𑀗𑁆𑀔𑀺𑀢𑁆𑀢𑀁, 𑀓𑀣𑀁 𑀲𑀗𑁆𑀔𑀺𑀢𑁆𑀢𑀁? 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀫𑀢𑁆𑀢𑀓𑀁𑀬𑁂𑀯, 𑀬𑁂𑀪𑀼𑀬𑁆𑀬𑁂𑀦 𑀯𑁂𑀤𑀦𑀸 𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑀸 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀢𑁂𑀦 𑀘𑀲𑁆𑀲𑀸 𑀧𑀼𑀭𑀺𑀫𑀲𑀺𑀤𑁆𑀥𑀸 𑀏𑀯 𑀆𑀭𑀫𑁆𑀫𑀡𑀦𑁆𑀢𑀺 𑀯𑁂𑀤𑀦𑀁 𑀯𑀤𑀦𑁆𑀢𑁂𑀦 𑀢𑀲𑁆𑀲𑀸𑀭𑀫𑁆𑀫𑀡𑀥𑀫𑁆𑀫𑀸 𑀅𑀢𑁆𑀣𑀢𑁄 𑀧𑀞𑀫𑀢𑀭𑀁 𑀕𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀇𑀫𑀸𑀬 𑀅𑀢𑁆𑀣𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑁂𑀯𑁂𑀢𑁆𑀣 𑀧𑀞𑀫𑀁 𑀕𑀳𑀺𑀢𑀢𑀸 𑀚𑁄𑀢𑀺𑀢𑀸, 𑀦 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀧𑀸𑀴𑀺𑀬𑀁 𑀦𑀸𑀭𑀼𑀴𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑁩𑁬𑁦. 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀪𑀸𑀕𑁂𑀳𑀺. 𑀏𑀯𑀭𑀽𑀧𑀦𑁆𑀢𑀺 𑀬𑀁 𑀅𑀓𑀼𑀲𑀮𑀸𑀦𑀁 𑀅𑀪𑀺𑀩𑀼𑀤𑁆𑀥𑀺𑀬𑀸, 𑀓𑀼𑀲𑀮𑀸𑀦𑀜𑁆𑀘 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀏𑀯𑀭𑀽𑀧𑀁, 𑀢𑀁 𑀧𑀦 𑀓𑀸𑀫𑀽𑀧𑀲𑀜𑁆𑀳𑀺𑀢𑀢𑀸𑀬 ‘‘𑀕𑁂𑀳𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲’’𑀦𑁆𑀢𑀺. 𑀇𑀝𑁆𑀞𑀸𑀦𑀦𑁆𑀢𑀺 𑀧𑀺𑀬𑀸𑀦𑀁. 𑀓𑀦𑁆𑀢𑀸𑀦𑀦𑁆𑀢𑀺 𑀓𑀫𑀦𑀻𑀬𑀸𑀦𑀁. 𑀫𑀦𑀸𑀧𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀸𑀦𑀁. 𑀢𑀢𑁄 𑀏𑀯 𑀫𑀦𑁄 𑀭𑀫𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸𑀦𑀁. 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀦𑀁. 𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄𑀢𑀺 ‘‘𑀅𑀳𑁄 𑀫𑀬𑀸 𑀇𑀫𑀸𑀦𑀺 𑀮𑀤𑁆𑀥𑀸𑀦𑀻’’𑀢𑀺 𑀬𑀣𑀸𑀮𑀤𑁆𑀥𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀲𑁆𑀲𑀸𑀤𑀬𑀢𑁄. 𑀅𑀢𑀻𑀢𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀁. 𑀦𑀺𑀭𑀼𑀤𑁆𑀥𑀦𑁆𑀢𑀺 𑀦𑀺𑀭𑁄𑀥𑀧𑁆𑀧𑀢𑁆𑀢𑀁. 𑀯𑀺𑀧𑀭𑀺𑀡𑀢𑀦𑁆𑀢𑀺 𑀲𑀪𑀸𑀯𑀯𑀺𑀕𑀫𑁂𑀦 𑀯𑀺𑀕𑀢𑀁. 𑀲𑀫𑀦𑀼𑀲𑁆𑀲𑀭𑀢𑁄𑀢𑀺 𑀅𑀲𑁆𑀲𑀸𑀤𑀦𑀯𑀲𑁂𑀦 𑀅𑀦𑀼𑀘𑀺𑀦𑁆𑀢𑀬𑀢𑁄. 𑀕𑁂𑀳𑀲𑀺𑀢𑀦𑁆𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁. 𑀓𑀸𑀫𑀕𑀼𑀡𑀸 𑀳𑀺 𑀓𑀸𑀫𑀭𑀸𑀕𑀲𑁆𑀲 𑀕𑁂𑀳𑀲𑀤𑀺𑀲𑀢𑁆𑀢𑀸 𑀇𑀥 ‘‘𑀕𑁂𑀳’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀏𑀯𑀭𑀽𑀧𑀦𑁆𑀢𑀺 𑀬𑀁 𑀅𑀓𑀼𑀲𑀮𑀸𑀦𑀁 𑀧𑀭𑀺𑀳𑀸𑀦𑀸𑀬, 𑀓𑀼𑀲𑀮𑀸𑀦𑀜𑁆𑀘 𑀅𑀪𑀺𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀏𑀯𑀭𑀽𑀧𑀁, 𑀢𑀁 𑀧𑀦 𑀧𑀩𑁆𑀩𑀚𑁆𑀚𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀦𑁂𑀓𑁆𑀔𑀫𑁆𑀫𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺. 𑀇𑀤𑀸𑀦𑀺 𑀢𑀁 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂 𑀦𑁂𑀓𑁆𑀔𑀫𑁆𑀫𑁂 𑀤𑀲𑁆𑀲𑀺𑀢𑁂 𑀇𑀢𑀭𑀸𑀦𑀺 𑀢𑀲𑁆𑀲 𑀓𑀸𑀭𑀡𑀢𑁄, 𑀨𑀮𑀢𑁄, 𑀅𑀢𑁆𑀣𑀢𑁄 𑀘 𑀤𑀲𑁆𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁂𑀯 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀸𑀦𑀦𑁆𑀢𑁆𑀯𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀦𑁆𑀢𑀺 𑀚𑀭𑀸𑀬 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀜𑁆𑀘𑁂𑀯 𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀁 𑀦𑀺𑀭𑀼𑀚𑁆𑀛𑀦𑀜𑁆𑀘 𑀯𑀺𑀤𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀓𑀫𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀻𑀦𑀁 𑀉𑀧𑀭𑀺 𑀅𑀦𑀧𑁆𑀧𑀓𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪) 𑀘 𑁋

𑀦𑁂𑀓𑁆𑀔𑀫𑁆𑀫𑀯𑀲𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀤𑀺𑀯𑀲𑁂𑀦. ‘‘𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀢𑁆𑀣𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑀼𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀲𑁆𑀲, 𑀧𑀩𑁆𑀩𑀚𑀦𑁆𑀢𑀲𑁆𑀲, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀅𑀦𑀼𑀢𑀺𑀝𑁆𑀞𑀦𑁆𑀢𑀲𑁆𑀲, 𑀢𑀁 𑀲𑁄𑀥𑁂𑀦𑁆𑀢𑀲𑁆𑀲, 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀲𑁆𑀲, 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀘 𑀬𑀸 𑀧𑀝𑀺𑀧𑀢𑁆𑀢𑀺, 𑀲𑀩𑁆𑀩𑀸 𑀲𑀸 𑀇𑀥 ‘‘𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀅𑀦𑀼𑀲𑁆𑀲𑀢𑀺𑀬𑀸 𑀉𑀧𑀘𑀸𑀭𑀚𑁆𑀛𑀸𑀦𑀁 𑀦𑀺𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀦𑀼𑀲𑁆𑀲𑀢𑀺𑀯𑀲𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀣𑀸 𑀧𑀩𑁆𑀩𑀚𑁆𑀚𑀸 𑀖𑀭𑀩𑀦𑁆𑀥𑀦𑀢𑁄 𑀦𑀺𑀓𑁆𑀔𑀫𑀦𑀝𑁆𑀞𑁂𑀦 𑀦𑁂𑀓𑁆𑀔𑀫𑁆𑀫𑀁, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀤𑀬𑁄𑀧𑀺 𑀢𑀁𑀧𑀝𑀺𑀧𑀓𑁆𑀔𑀢𑁄. 𑀢𑁂𑀦𑀸𑀳 𑁋

‘‘𑀧𑀩𑁆𑀩𑀚𑁆𑀚𑀸 𑀧𑀞𑀫𑀁 𑀛𑀸𑀦𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁧𑁦𑁯);

𑀬𑀁 𑀘𑁂𑀢𑀺 𑀏𑀢𑁆𑀣 𑀘𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀘𑀢𑀼𑀓𑁆𑀓𑀦𑀬𑀯𑀲𑁂𑀦𑁂𑀯 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀛𑀸𑀦𑀓𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺. 𑀤𑁆𑀯𑀻𑀲𑀽𑀢𑀺 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀲𑁄𑀫𑀦𑀲𑁆𑀲𑁂𑀲𑀼.

𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀲𑁄𑀫𑀦𑀲𑁆𑀲𑁂𑀢𑀺 𑀧𑀭𑀺𑀢𑁆𑀢𑀪𑀽𑀫𑀺𑀓𑁂, 𑀧𑀞𑀫𑀚𑁆𑀛𑀸𑀦𑁂 𑀯𑀸 𑀲𑁄𑀫𑀦𑀲𑁆𑀲𑁂. 𑀅𑀪𑀺𑀦𑀺𑀯𑀺𑀝𑁆𑀞𑀲𑁄𑀫𑀦𑀲𑁆𑀲𑁂𑀲𑀽𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑀺𑀢𑀲𑁄𑀫𑀦𑀲𑁆𑀲𑁂𑀲𑀼. 𑀧𑀺-𑀲𑀤𑁆𑀤𑁂𑀦 𑀲𑀫𑁆𑀫𑀝𑁆𑀞𑀲𑁄𑀫𑀦𑀲𑁆𑀲𑁂𑀲𑀼 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁄𑀫𑀦𑀲𑁆𑀲𑀯𑀺𑀧𑀲𑁆𑀲𑀦𑀸𑀢𑁄𑀧𑀻𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑁄𑀫𑀦𑀲𑁆𑀲𑀧𑀯𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀢𑁄𑀧𑀺. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭 𑀯𑀺𑀧𑀲𑁆𑀲𑀦𑀸 𑀧𑀡𑀻𑀢𑀢𑀭𑀸 𑀲𑀫𑁆𑀫𑀲𑀺𑀢𑀥𑀫𑁆𑀫𑀯𑀲𑁂𑀦𑀧𑀺 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀲𑀺𑀤𑁆𑀥𑀺𑀢𑁄, 𑀬𑀢𑁄 𑀫𑀕𑁆𑀕𑁂𑀧𑀺 𑀢𑀣𑀸𑀭𑀽𑀧𑀸 𑀯𑀺𑀲𑁂𑀲𑀸 𑀇𑀚𑁆𑀛𑀦𑁆𑀢𑀺. 𑀅𑀬𑀁 𑀧𑀦𑀢𑁆𑀣𑁄 ‘‘𑀅𑀭𑀺𑀬𑀫𑀕𑁆𑀕 𑀩𑁄𑀚𑁆𑀛𑀗𑁆𑀕𑀸𑀤𑀺𑀯𑀺𑀲𑁂𑀲𑀁 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀫𑁄𑀭𑀯𑀸𑀧𑀻𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀯𑀸𑀤𑁂𑀦 𑀤𑀻𑀧𑁂𑀢𑀩𑁆𑀩𑁄.

𑁩𑁬𑁧. 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀁 𑀦𑀸𑀫 𑀓𑀸𑀫𑀕𑀼𑀡𑀸𑀦𑀁 𑀅𑀧𑁆𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁, 𑀯𑀺𑀕𑀢𑀦𑀺𑀫𑀺𑀢𑁆𑀢𑀜𑁆𑀘 𑀉𑀧𑁆𑀧𑀚𑁆𑀚𑀦𑀓𑀤𑁄𑀫𑀦𑀲𑁆𑀲𑀁. 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄𑀢𑀺 𑀅𑀧𑁆𑀧𑀝𑀺𑀮𑀸𑀪𑁂𑀦 ‘‘𑀅𑀳𑀫𑁂𑀯 𑀦 𑀮𑀪𑀸𑀫𑀻’’𑀢𑀺 𑀧𑀭𑀺𑀢𑀲𑁆𑀲𑀦𑀢𑁄. 𑀲𑀫𑀦𑀼𑀲𑁆𑀲𑀭𑀢𑁄𑀢𑀺 ‘‘𑀅𑀳𑀼 𑀯𑀢 𑀫𑁂 𑀢𑀁 𑀯𑀢 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀘𑀺𑀦𑁆𑀢𑀬𑀢𑁄. 𑀢𑁂𑀦𑀸𑀳 ‘‘𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀽’’𑀢𑀺𑀆𑀤𑀺.

𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀽𑀢𑀺 𑀲𑀼𑀜𑁆𑀜𑀢𑀨𑀮𑀸𑀤𑀺𑀅𑀭𑀺𑀬𑀨𑀮𑀯𑀺𑀫𑁄𑀓𑁆𑀔𑁂𑀲𑀼. 𑀧𑀺𑀳𑀦𑁆𑀢𑀺 𑀅𑀧𑁂𑀓𑁆𑀔𑀁, 𑀆𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀆𑀲𑀸 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀬𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀢𑁆𑀣 𑀧𑀺𑀳𑀸 𑀧𑀯𑀢𑁆𑀢𑀢𑀻’’𑀢𑀺 𑀅𑀯𑀺𑀲𑀬𑀢𑁆𑀢𑀸, 𑀧𑀼𑀕𑁆𑀕𑀮𑀲𑁆𑀲 𑀘 𑀅𑀦𑀥𑀺𑀕𑀢𑀪𑀸𑀯𑀢𑁄. 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀧𑀦 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲 𑀧𑀺𑀳𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 ‘‘𑀢𑀢𑁆𑀣 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳’’𑀦𑁆𑀢𑀺𑀆𑀤𑀺. 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀇𑀝𑁆𑀞𑀸𑀭𑀫𑁆𑀫𑀡𑁂’’𑀢𑀺 𑀘 𑀇𑀫𑀺𑀦𑀸 𑀦𑀬𑀺𑀤𑀁 𑀤𑁄𑀫𑀦𑀲𑁆𑀲𑀁 𑀲𑀪𑀸𑀯𑀢𑁄 𑀅𑀦𑀺𑀝𑁆𑀞𑀥𑀫𑁆𑀫𑁂𑀬𑁂𑀯 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀁, 𑀅𑀣 𑀔𑁄 𑀇𑀘𑁆𑀙𑀺𑀢𑀸𑀮𑀸𑀪𑀳𑁂𑀢𑀼𑀓𑀁 𑀇𑀘𑁆𑀙𑀸𑀪𑀺𑀖𑀸𑀢𑀯𑀲𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳’’𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀏𑀯𑀁 𑀇𑀫𑀫𑁆𑀧𑀺 𑀧𑀓𑁆𑀔𑀁…𑀧𑁂… 𑀦𑀸𑀲𑀓𑁆𑀔𑀺𑀦𑁆𑀢𑀺 𑀅𑀦𑀼𑀲𑁄𑀘𑀢𑁄𑀢𑀺 𑀬𑁄𑀚𑀦𑀸. ‘‘𑀇𑀫𑀲𑁆𑀫𑀺𑀁 𑀧𑀓𑁆𑀔𑁂, 𑀇𑀫𑀲𑁆𑀫𑀺𑀁 𑀫𑀸𑀲𑁂, 𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀧𑀩𑁆𑀩𑀚𑀺𑀢𑀼𑀁 𑀦𑀸𑀮𑀤𑁆𑀥𑀁, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀦𑀸𑀮𑀤𑁆𑀥’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀦𑁂𑀓𑁆𑀔𑀫𑁆𑀫𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀢𑁄 𑀏𑀯-𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁆𑀣 𑀦𑀺𑀬𑀫𑁄𑀢𑀺 𑀓𑀢𑁆𑀯𑀸 ‘‘𑀢𑀲𑁆𑀫𑀺𑀫𑁆𑀧𑀺…𑀧𑁂… 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑁂𑀢𑁆𑀣 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀢𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀦𑀺𑀬𑀢𑀸, 𑀅𑀣 𑀔𑁄 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸 𑀦𑀺𑀬𑀢𑀸 𑀧𑀝𑀺𑀬𑁄𑀕𑀺𑀦𑀺𑀯𑀢𑁆𑀢𑀦𑀢𑁆𑀣𑀢𑁆𑀢𑀸 𑀏𑀯-𑀓𑀸𑀭𑀲𑁆𑀲. ‘‘𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯, 𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭’’𑀦𑁆𑀢𑀺. 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀁 𑀧𑀦 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑁆𑀲𑁂𑀯 𑀓𑀸𑀭𑀡𑀪𑀽𑀢𑀁 𑀤𑁄𑀫𑀦𑀲𑁆𑀲𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀁. 𑀓𑀺𑀁 𑀢𑀁? 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀁, 𑀬𑀁 𑀧𑀦 𑀦𑁂𑀓𑁆𑀔𑀫𑁆𑀫𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀲𑁆𑀲 𑀓𑀸𑀭𑀡𑀪𑀽𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀦𑁆𑀢𑀺. 𑀅𑀬𑀜𑁆𑀘 𑀦𑀬𑁄 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀫𑀜𑁆𑀜𑀦𑀯𑀲𑁂𑀦𑀸𑀢𑀺 𑀧𑀭𑀺𑀓𑀧𑁆𑀧𑀦𑀯𑀲𑁂𑀦. 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀫𑀜𑁆𑀜𑀦𑁂. 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀦𑀬𑁄. 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀪𑀽𑀢𑁂𑀢𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀽𑀢𑁂. 𑀉𑀧𑀘𑀸𑀭𑀚𑁆𑀛𑀸𑀦𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀯𑀸 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀓𑀸𑀫𑀲𑁆𑀲 𑀢𑁂𑀲𑀁 𑀅𑀮𑀸𑀪𑁂 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑁂 𑀢𑀸𑀦𑀺 𑀢𑀲𑁆𑀲 𑀧𑀘𑁆𑀘𑀬𑀸 𑀦𑀸𑀫 𑀳𑁄𑀦𑁆𑀢𑀺 𑀇𑀢𑀺 𑀢𑁂 𑀥𑀫𑁆𑀫𑀸 𑀨𑀮𑀽𑀧𑀘𑀸𑀭𑁂𑀦 ‘‘𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀸. 𑀬𑁄 𑀧𑀦 𑀢𑀣𑀸 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁄 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀨𑀮𑀥𑀫𑁆𑀫𑁂 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑁂 𑀓𑀸𑀭𑀡𑀽𑀧𑀘𑀸𑀭𑁂𑀦 ‘‘𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀏𑀢𑀲𑁆𑀲 𑀢𑀤𑀸 𑀤𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀦𑁆𑀦𑀁, 𑀦 𑀤𑁄𑀫𑀦𑀲𑁆𑀲𑀳𑁂𑀢𑀼𑀓𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑀸 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀓𑀣𑀁 𑀤𑁄𑀫𑀦𑀲𑁆𑀲𑀲𑀫𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀯𑁄𑀳𑀭𑀢𑀻𑀢𑀺 𑀆𑀳 ‘‘𑀅𑀜𑁆𑀜𑁂𑀲𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀤𑁄𑀫𑀦𑀲𑁆𑀲𑀦𑁆𑀢𑀺 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑁂𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀦𑀺𑀫𑀺𑀢𑁆𑀢𑁂 𑀤𑁄𑀫𑀦𑀲𑁆𑀲𑁂. 𑀢𑀻𑀳𑀺 𑀫𑀸𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸 𑀢𑁂𑀫𑀸𑀲𑀺𑀓𑀸, 𑀢𑀁 𑀢𑁂𑀫𑀸𑀲𑀺𑀓𑀁. 𑀇𑀫𑀸 𑀘 𑀢𑁂𑀫𑀸𑀲𑀺𑀓𑀸𑀤𑀬𑁄 𑀧𑀝𑀺𑀧𑀤𑀸 𑀢𑀣𑀸𑀧𑀯𑀢𑁆𑀢𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀫𑀼𑀤𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀅𑀥𑀺𑀓𑀫𑀚𑁆𑀛𑀺𑀫𑀫𑀼𑀤𑀼𑀲𑁆𑀲𑀸𑀳𑀯𑀲𑁂𑀦 𑀯𑀸. 𑀚𑀕𑁆𑀕𑀢𑀻𑀢𑀺 𑀚𑀸𑀕𑀭𑀺𑀓𑀁 𑀅𑀦𑀼𑀬𑀼𑀜𑁆𑀚𑀢𑀺.

𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀢𑁆𑀣𑀼𑀯𑀡𑁆𑀡𑀦𑀸

𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀲𑀗𑁆𑀔𑁆𑀬𑀢𑁆𑀢𑀸 𑀫𑀳𑀸𑀕𑀡𑁂.

𑀅𑀝𑁆𑀞𑀓𑀣𑀸𑀣𑁂𑀭𑀸𑀢𑀺 𑀅𑀝𑁆𑀞𑀓𑀣𑀸𑀬 𑀅𑀢𑁆𑀣𑀧𑀝𑀺𑀧𑀼𑀘𑁆𑀙𑀦𑀓𑀣𑁂𑀭𑀸. 𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀸𑀫𑀢𑁄 𑀯𑀺𑀳𑀸𑀭𑀁 𑀧𑀝𑀺𑀕𑀫𑀦𑀫𑀕𑁆𑀕𑁂. 𑀢𑀬𑁄…𑀧𑁂… 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀉𑀡𑁆𑀳𑀸𑀧𑀦𑀸𑀦𑀺.

𑀓𑁂𑀦𑀘𑀺 𑀧𑀧𑀜𑁆𑀘𑁂𑀦𑀸𑀢𑀺 𑀓𑁂𑀦𑀘𑀺 𑀲𑀭𑀻𑀭𑀓𑀺𑀘𑁆𑀘𑀪𑀽𑀢𑁂𑀦 𑀧𑀧𑀜𑁆𑀘𑁂𑀦. 𑀲𑀜𑁆𑀜𑀁 𑀅𑀓𑀸𑀲𑀺 𑀭𑀢𑁆𑀢𑀺𑀬𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄.

𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀕𑀢𑁄𑀢𑀺 𑀆𑀳 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺. 𑀅𑀭𑀳𑀢𑁆𑀢𑀁 𑀦𑀸𑀫 𑀓𑀺𑀦𑁆𑀢𑀺 𑀢𑀤𑀥𑀺𑀕𑀫𑀲𑁆𑀲 𑀅𑀤𑀼𑀓𑁆𑀓𑀭𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀻𑀢𑀺 𑀘𑀢𑀽𑀳𑀺𑀧𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀯𑀢𑁆𑀢𑀫𑀸𑀦𑀲𑁆𑀲, 𑀢𑀲𑁆𑀫𑀸 𑀬𑀸𑀯 𑀅𑀭𑀳𑀢𑁆𑀢𑀸𑀥𑀺𑀕𑀫𑀸 𑀲𑀬𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀅𑀦𑀼𑀘𑁆𑀙𑀯𑀺𑀓𑀁 𑀦𑀼 𑀔𑁄 𑀢𑁂 𑀏𑀢’’𑀦𑁆𑀢𑀺 𑀲𑀁𑀯𑁂𑀕𑀚𑀸𑀢𑁄 𑀯𑀻𑀭𑀺𑀬𑀁 𑀲𑀫𑀼𑀢𑁆𑀢𑁂𑀚𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀺𑀧𑀲𑁆𑀲𑀦𑀸𑀬 𑀲𑀼𑀘𑀺𑀡𑁆𑀡𑀪𑀸𑀯𑀢𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸.

𑀧𑀭𑀺𑀫𑀚𑁆𑀚𑀻𑀢𑀺 𑀧𑀭𑀺𑀫𑀲𑀺. 𑀓𑁂𑀘𑀺 𑀧𑀦 ‘‘𑀧𑀭𑀺𑀫𑀚𑁆𑀚𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀣𑁂𑀭𑁂𑀦 𑀥𑁄𑀯𑀺𑀬𑀫𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀥𑁄𑀯𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀁 𑀦𑀸𑀫 𑀉𑀧𑀘𑀸𑀭𑀚𑁆𑀛𑀸𑀦𑀧𑀞𑀫𑀚𑁆𑀛𑀸𑀦𑀸𑀤𑀺.

‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑁂’’𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀲𑁄𑀫𑀦𑀲𑁆𑀲𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁩𑁬𑁨. 𑀏𑀯𑀭𑀽𑀧𑀸𑀢𑀺 𑀬𑀸 𑀅𑀓𑀼𑀲𑀮𑀸𑀦𑀁 𑀅𑀪𑀺𑀩𑀼𑀤𑁆𑀥𑀺𑀬𑀸, 𑀓𑀼𑀲𑀮𑀸𑀦𑀁 𑀧𑀭𑀺𑀳𑀸𑀦𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀏𑀯𑀭𑀽𑀧𑀸, 𑀲𑀸 𑀧𑀦 𑀓𑀸𑀫𑀽𑀧𑀲𑀜𑁆𑀳𑀺𑀢𑀢𑀸𑀬 ‘‘𑀕𑁂𑀳𑀲𑀺𑀢𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸’’𑀢𑀺. ‘‘𑀩𑀸𑀮𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀩𑀸𑀮𑀓𑀭𑀥𑀫𑁆𑀫𑀬𑁄𑀕𑀢𑁄 𑀩𑀸𑀮𑀲𑁆𑀲 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀩𑁆𑀬𑀸𑀫𑀽𑀴𑁆𑀳𑀢𑀸𑀬 𑀫𑀽𑀴𑁆𑀳𑀲𑁆𑀲 𑀧𑀼𑀣𑀽𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀺𑀮𑁂𑀲𑁄𑀥𑀻𑀦𑀁 𑀫𑀕𑁆𑀕𑁄𑀥𑀻𑀳𑀺 𑀅𑀚𑀺𑀢𑀢𑁆𑀢𑀸 𑀅𑀦𑁄𑀥𑀺𑀚𑀺𑀦𑀲𑁆𑀲, 𑀑𑀥𑀺𑀚𑀺𑀦𑁄 𑀯𑀸𑀬𑀧𑁂𑀓𑁆𑀔𑀸, 𑀑𑀥𑀺𑀲𑁄 𑀘 𑀓𑀺𑀮𑁂𑀲𑀸𑀦𑀁 𑀚𑀺𑀢𑀢𑁆𑀢𑀸, 𑀢𑁂𑀦𑀲𑁆𑀲 𑀲𑁂𑀓𑁆𑀔𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑀯𑀺𑀧𑀸𑀓𑀲𑁆𑀲 𑀅𑀚𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀚𑀺𑀦𑀲𑁆𑀲, 𑀯𑀺𑀧𑀸𑀓𑀚𑀺𑀦𑀸 𑀯𑀸 𑀅𑀭𑀳𑀦𑁆𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸, 𑀢𑁂𑀦𑀲𑁆𑀲 𑀅𑀲𑁂𑀓𑁆𑀔𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑁂𑀓𑀸𑀤𑀻𑀦𑀯𑁂 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀥𑀫𑁆𑀫𑀸𑀦𑀁 𑀫𑀽𑀮𑀪𑀽𑀢𑁂 𑀲𑀫𑁆𑀫𑁄𑀳𑁂 𑀆𑀤𑀻𑀦𑀯𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑀢𑀸𑀬 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄. 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀅𑀲𑁆𑀲𑀼𑀢𑀯𑀢𑁄. 𑀏𑀤𑀺𑀲𑁄 𑀏𑀓𑀁𑀲𑁂𑀦 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦𑀧𑀺 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀫𑁆𑀫𑁄𑀳𑀧𑀼𑀩𑁆𑀩𑀺𑀓𑀸. 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀭𑀽𑀧𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀸𑀬 𑀓𑀸𑀭𑀡𑀁 𑀦 𑀳𑁄𑀢𑀺, 𑀭𑀽𑀧𑀸𑀭𑀫𑁆𑀫𑀡𑁂 𑀓𑀺𑀮𑁂𑀲𑁂 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀸𑀡𑀸𑀯𑀺𑀪𑀽𑀢𑀢𑀸𑀬 𑀆𑀭𑀫𑁆𑀫𑀡𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀉𑀧𑁂𑀓𑁆𑀔𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀢𑀲𑁆𑀲 𑀮𑁄𑀪𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀝𑁆𑀞𑀸𑀭𑀫𑁆𑀫𑀡𑁂’’𑀢𑀺 𑀆𑀳. 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬. 𑀢𑀢𑁄 𑀏𑀯 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀢𑁄 𑀢𑀢𑁆𑀣𑁂𑀯 𑀮𑀕𑁆𑀕𑀸. 𑀅𑀪𑀺𑀲𑀗𑁆𑀕𑀲𑁆𑀲 𑀮𑁄𑀪𑀲𑁆𑀲 𑀯𑀲𑁂𑀦, 𑀤𑀼𑀫𑁆𑀫𑁄𑀘𑀦𑀻𑀬𑀢𑀸𑀬 𑀘 𑀢𑁂𑀦 𑀮𑀕𑁆𑀕𑀺𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸.

𑀏𑀯𑀭𑀽𑀧𑀸𑀢𑀺 𑀬𑀸 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀜𑁆𑀘 𑀅𑀪𑀺𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀏𑀯𑀭𑀽𑀧𑀸, 𑀲𑀸 𑀧𑀦 𑀧𑀩𑁆𑀩𑀚𑁆𑀚𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀦𑁂𑀓𑁆𑀔𑀫𑁆𑀫𑀽𑀧𑀲𑀜𑁆𑀳𑀺𑀢𑀸𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀲𑀺𑀢𑀸’’𑀢𑀺. 𑀇𑀤𑀸𑀦𑀺 𑀢𑀁 𑀧𑀸𑀴𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 𑀲𑀫𑁆𑀫𑀤𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑀢𑁄. 𑀭𑀽𑀧𑀦𑀺𑀬𑀸𑀢𑀸𑀢𑀺 𑀓𑀺𑀮𑁂𑀲𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄. 𑀇𑀝𑁆𑀞𑁂𑀢𑀺 𑀲𑀪𑀸𑀯𑀢𑁄, 𑀲𑀗𑁆𑀓𑀧𑁆𑀧𑀢𑁄 𑀘 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂. 𑀅𑀭𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀦 𑀭𑀚𑁆𑀚𑀦𑁆𑀢𑀲𑁆𑀲 𑀭𑀸𑀕𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀁 𑀲𑀫𑁆𑀫𑀸 𑀬𑁄𑀦𑀺𑀲𑁄 𑀦 𑀧𑁂𑀓𑁆𑀔𑀦𑀁 𑀅𑀲𑀫𑀧𑁂𑀓𑁆𑀔𑀦𑀁, 𑀢𑀁 𑀧𑀦 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂 𑀯𑀺𑀬 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼𑀧𑀺 𑀩𑀸𑀮𑀲𑁆𑀲 𑀳𑁄𑀢𑀻𑀢𑀺 ‘‘𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂’’𑀢𑀺 𑀅𑀯𑀢𑁆𑀯𑀸 ‘‘𑀅𑀲𑀫𑀧𑁂𑀓𑁆𑀔𑀦𑁂𑀦 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀺𑀯𑀺𑀥𑁂𑀧𑀺 𑀆𑀭𑀫𑁆𑀫𑀡𑁂 𑀅𑀲𑀫𑀧𑁂𑀓𑁆𑀔𑀦𑀯𑀲𑁂𑀦 𑀫𑀼𑀬𑁆𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀉𑀧𑁂𑀓𑁆𑀔𑀸. 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀲𑀪𑀸𑀕𑀸𑀢𑀺 𑀉𑀤𑀸𑀲𑀺𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸, 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀬 𑀘 𑀲𑀪𑀸𑀕𑀸. 𑀏𑀢𑁆𑀣 𑀉𑀧𑁂𑀓𑁆𑀔𑀸 𑀯𑀸𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀉𑀧𑁂𑀓𑁆𑀔𑀸𑀦𑀺𑀤𑁆𑀤𑁂𑀲𑁂 ‘‘𑀉𑀧𑁂𑀓𑁆𑀔𑀸’’𑀢𑀺 𑀕𑀳𑀺𑀢𑀸 𑀏𑀯. 𑀢𑀲𑁆𑀫𑀸𑀢𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬𑀧𑀺 𑀇𑀥 𑀉𑀧𑁂𑀓𑁆𑀔𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀢𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀉𑀧𑁂𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁.

𑀢𑀸𑀬𑀧𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸𑀬𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. ‘‘𑀬𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦𑀸’’𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸 𑀦𑀢𑁆𑀣𑀫𑁂𑀯.

𑁩𑁬𑁩. 𑀬𑀤𑀺 𑀲𑀓𑁆𑀓𑀲𑁆𑀲 𑀢𑀤𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑀢𑁆𑀢𑀺𑀬𑀸𑀯 𑀉𑀧𑀦𑀺𑀲𑁆𑀲𑀬𑁄, 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀬𑀸𑀯 𑀅𑀭𑀳𑀢𑁆𑀢𑀁 𑀤𑁂𑀲𑀦𑀁 𑀯𑀟𑁆𑀠𑁂𑀲𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀢𑀭𑀼𑀡𑀲𑀓𑁆𑀓𑁄𑀢𑀺 𑀅𑀪𑀺𑀦𑀯𑁄 𑀅𑀥𑀼𑀦𑀸 𑀧𑀸𑀢𑀼𑀪𑀽𑀢𑁄 𑀲𑀓𑁆𑀓𑁄. 𑀲𑀫𑁆𑀧𑀢𑀺 𑀧𑀸𑀢𑀼𑀪𑀸𑀯𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀢𑀭𑀼𑀡𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀓𑀼𑀫𑀸𑀭𑀢𑀸, 𑀯𑀼𑀤𑁆𑀥𑀢𑀸 𑀯𑀸 𑀅𑀢𑁆𑀣𑀺. 𑀕𑀢𑀸𑀕𑀢𑀝𑁆𑀞𑀸𑀦𑀦𑁆𑀢𑀺 𑀕𑀫𑀦𑀸𑀕𑀫𑀦𑀓𑀸𑀭𑀡𑀁. 𑀦 𑀧𑀜𑁆𑀜𑀸𑀬𑀢𑀺 𑀦 𑀉𑀧𑀮𑀩𑁆𑀪𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀳𑀺 𑀘𑀯𑀦𑁆𑀢𑀸𑀦𑀁 𑀓𑀫𑁆𑀫𑀚𑀭𑀽𑀧𑀁 𑀯𑀺𑀕𑀘𑁆𑀙𑀢𑀺 𑀅𑀦𑀼𑀤𑁂𑀯 𑀘𑀺𑀢𑁆𑀢𑀚𑀁, 𑀆𑀳𑀸𑀭𑀚𑀜𑁆𑀘 𑀧𑀘𑁆𑀘𑀬𑀸𑀪𑀸𑀯𑀢𑁄, 𑀉𑀢𑀼𑀚𑀁 𑀧𑀦 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀧𑀯𑁂𑀡𑀺𑀁 𑀖𑀝𑁆𑀝𑁂𑀦𑁆𑀢𑀁 𑀪𑀲𑁆𑀲𑀦𑁆𑀢𑀁 𑀯𑀸 𑀲𑁄𑀲𑀦𑁆𑀢𑀁 𑀯𑀸 𑀓𑀺𑀮𑁂𑀲𑀦𑁆𑀢𑀁 𑀯𑀸 𑀯𑀺𑀝𑁆𑀞𑀢𑀁 𑀯𑀸 𑀳𑁄𑀢𑀺, 𑀦 𑀏𑀯𑀁 𑀤𑁂𑀯𑀸𑀦𑀁. 𑀢𑁂𑀲𑀜𑁆𑀳𑀺 𑀑𑀧𑀧𑀸𑀢𑀺𑀓𑀢𑁆𑀢𑀸 𑀓𑀫𑁆𑀫𑀚𑀭𑀽𑀧𑁂 𑀅𑀦𑁆𑀢𑀭𑀥𑀸𑀬𑀦𑁆𑀢𑁂 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀫𑁆𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀢𑁂𑀦𑀸𑀳 ‘‘𑀤𑀻𑀧𑀲𑀺𑀔𑀸𑀕𑀫𑀦𑀁 𑀯𑀺𑀬 𑀳𑁄𑀢𑀻’’𑀢𑀺. 𑀲𑁂𑀲𑀤𑁂𑀯𑀢𑀸 𑀦 𑀚𑀸𑀦𑀺𑀁𑀲𑀼 𑀧𑀼𑀦𑀧𑀺 𑀲𑀓𑁆𑀓𑀢𑁆𑀢𑀪𑀸𑀯𑁂𑀦 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑀝𑁆𑀞𑀸𑀦𑁂𑀲𑀼. 𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀫𑁂𑀯𑀸𑀢𑀺 𑀲𑀧𑁆𑀧𑀺𑀫𑁆𑀳𑀸 𑀲𑀧𑁆𑀧𑀺𑀫𑀡𑁆𑀟𑁄 𑀯𑀺𑀬 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀪𑀽𑀢𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀨𑀮𑀫𑁂𑀯 𑀓𑀣𑀺𑀢𑀁. 𑀲𑀓𑀼𑀡𑀺𑀓𑀸𑀬 𑀯𑀺𑀬 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀉𑀧𑁆𑀧𑀢𑀺𑀢𑁆𑀯𑀸 𑀉𑀟𑁆𑀟𑁂𑀢𑁆𑀯𑀸 𑀉𑀮𑁆𑀮𑀗𑁆𑀖𑀺𑀢𑁆𑀯𑀸. 𑀅𑀲𑁆𑀲𑀸𑀢𑀺 𑀫𑀕𑁆𑀕𑀨𑀮𑀲𑀜𑁆𑀜𑀺𑀢𑀲𑁆𑀲 𑀅𑀭𑀺𑀬𑀲𑁆𑀲 𑀥𑀫𑁆𑀫𑀲𑁆𑀲.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀡𑁆𑀡𑀦𑀸

𑁩𑁬𑁪. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀪𑀽𑀢𑀲𑀻𑀮𑀲𑀁𑀯𑀭𑀸𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀉𑀢𑁆𑀢𑀫𑀚𑁂𑀝𑁆𑀞𑀓𑀲𑀻𑀮𑀲𑀁𑀯𑀭𑀸𑀬𑀸’’𑀢𑀺. ‘‘𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀜𑁆𑀳𑀺 𑀲𑀩𑁆𑀩𑀲𑀻𑀮𑀢𑁄 𑀚𑁂𑀝𑁆𑀞𑀓𑀲𑀻𑀮’’𑀦𑁆𑀢𑀺 𑀤𑀻𑀖𑀯𑀸𑀧𑀻𑀯𑀺𑀳𑀸𑀭𑀯𑀸𑀲𑀺 𑀲𑀼𑀫𑀢𑁆𑀣𑁂𑀭𑁄 𑀯𑀤𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦𑀲𑁆𑀲 𑀢𑁂𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀏𑀯 𑀲𑀻𑀮𑀁, 𑀇𑀢𑀭𑀸𑀦𑀺 𑀧𑀦 ‘𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻’𑀢𑀺 𑀅𑀦𑀦𑀼𑀚𑀸𑀦𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀦𑀸𑀫 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀁, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀫𑀢𑁆𑀢𑀓𑀁, 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀝𑀺𑀮𑀤𑁆𑀥𑀧𑀘𑁆𑀘𑀬𑁂 ‘𑀇𑀤 𑀫𑀢𑁆𑀣’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀫𑀢𑁆𑀢𑀓𑀁, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁. 𑀢𑀣𑀸 𑀳𑀺 𑀬𑀲𑁆𑀲 𑀲𑁄 𑀪𑀺𑀦𑁆𑀦𑁄, 𑀲𑁄 𑀇𑀢𑀭𑀸𑀦𑀺 𑀭𑀓𑁆𑀔𑀺𑀢𑀼𑀁 𑀅𑀪𑀩𑁆𑀩𑀢𑁆𑀢𑀸 𑀅𑀲𑀻𑀮𑁄 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑀲𑁄 𑀅𑀭𑁄𑀕𑁄 𑀲𑁂𑀲𑀸𑀦𑀁 𑀭𑀓𑁆𑀔𑀺𑀢𑀼𑀁 𑀪𑀩𑁆𑀩𑀢𑁆𑀢𑀸 𑀲𑀫𑁆𑀧𑀦𑁆𑀦𑀲𑀻𑀮𑁄’’𑀢𑀺 𑀯𑀤𑀢𑀺, 𑀢𑀲𑁆𑀫𑀸 𑀇𑀢𑀭𑁂𑀲𑀁 𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑀢𑁄, 𑀲𑀩𑁆𑀩𑀲𑁄 𑀏𑀓𑀤𑁂𑀲𑁂𑀦 𑀘 𑀢𑀤𑀦𑁆𑀢𑁄𑀕𑀥𑀪𑀸𑀯𑀢𑁄 𑀢𑀤𑁂𑀯 𑀧𑀥𑀸𑀦𑀲𑀻𑀮𑀁 𑀦𑀸𑀫𑀸𑀢𑀺 𑀆𑀳 ‘‘𑀉𑀢𑁆𑀢𑀫𑀚𑁂𑀝𑁆𑀞𑀓𑀲𑀻𑀮𑀲𑀁𑀯𑀭𑀸𑀬𑀸’’𑀢𑀺. 𑀢𑀢𑁆𑀣 𑀬𑀣𑀸 𑀳𑁂𑀝𑁆𑀞𑀸 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸 𑀧𑀧𑀜𑁆𑀘𑀲𑀜𑁆𑀜𑀸𑀦𑀁, 𑀧𑀝𑀺𑀧𑀤𑀸𑀬 𑀘 𑀫𑀽𑀮𑀪𑀽𑀢𑀁 𑀯𑁂𑀤𑀦𑀁 𑀯𑀺𑀪𑀚𑀺𑀢𑁆𑀯𑀸 𑀧𑀝𑀺𑀧𑀤𑀸 𑀤𑁂𑀲𑀺𑀢𑀸 𑀲𑀓𑁆𑀓𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀲𑀁𑀓𑀺𑀮𑁂𑀲𑀥𑀫𑁆𑀫𑀧𑁆𑀧𑀳𑀸𑀦𑀫𑀼𑀔𑁂𑀦 𑀯𑁄𑀤𑀸𑀦𑀥𑀫𑁆𑀫𑀧𑀸𑀭𑀺𑀧𑀽𑀭𑀻𑀢𑀺, 𑀏𑀯𑀁 𑀢𑀲𑁆𑀲𑀸 𑀏𑀯 𑀧𑀝𑀺𑀧𑀤𑀸𑀬 𑀫𑀽𑀮𑀪𑀽𑀢𑀫𑁆𑀧𑀺 𑀲𑀻𑀮𑀲𑀁𑀯𑀭𑀁 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸 𑀬𑀢𑁄 𑀲𑁄 𑀯𑀺𑀲𑀼𑀚𑁆𑀛𑀢𑀺, 𑀬𑀣𑀸 𑀘 𑀯𑀺𑀲𑀼𑀚𑁆𑀛𑀢𑀺, 𑀢𑀤𑀼𑀪𑀬𑀁 𑀲𑀓𑁆𑀓𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀧𑁆𑀧𑀳𑀸𑀦𑀫𑀼𑀔𑁂𑀦 𑀯𑁄𑀤𑀸𑀦𑀥𑀫𑁆𑀫𑀧𑀸𑀭𑀺𑀧𑀽𑀭𑀻𑀢𑀺 𑀓𑀢𑁆𑀯𑀸. 𑀲𑀻𑀮𑀓𑀣𑀸𑀬𑀁 𑀅𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑀣𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦.

𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺 𑀘 𑀓𑀫𑁆𑀫𑀧𑀣𑀯𑀺𑀘𑀸𑀭𑀯𑀲𑁂𑀦. 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑀢𑁆𑀢𑀸𑀦𑀫𑁆𑀧𑀺 𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀅𑀲𑁂𑀯𑀺𑀢𑀩𑁆𑀩𑀓𑀸𑀤𑀻𑀦𑀁 𑀅𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀪𑀸𑀯𑁄 𑀇𑀥 𑀯𑀼𑀘𑁆𑀘𑀢𑀻𑀢𑀺. 𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀬𑀢𑁄 𑀬𑀢𑁄 𑀳𑀺 𑀬𑀸 𑀬𑀸 𑀯𑁂𑀭𑀫𑀡𑀻, 𑀢𑀤𑀼𑀪𑀬𑁂𑀧𑀺 𑀯𑀺𑀪𑀸𑀯𑁂𑀦𑁆𑀢𑁄 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀓𑀣𑁂𑀢𑀺 𑀦𑀸𑀫. 𑀢𑁂𑀦𑀸𑀳 ‘‘𑀓𑀸𑀬𑀤𑁆𑀯𑀸𑀭𑁂’’𑀢𑀺𑀆𑀤𑀺. 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑀏𑀢𑁂𑀦𑀸𑀢𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄, 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀅𑀓𑀼𑀲𑀮𑀥𑀫𑁆𑀫𑁄 𑀬𑀁, 𑀢𑀲𑁆𑀲 𑀅𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀢𑀸. 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀦 𑀯𑀻𑀢𑀺𑀓𑁆𑀓𑀫𑀢𑀺 𑀏𑀢𑁂𑀦𑀸𑀢𑀺 𑀅𑀯𑀻𑀢𑀺𑀓𑁆𑀓𑀫𑁄, 𑀲𑀻𑀮𑀁.

𑀫𑀺𑀘𑁆𑀙𑀸 𑀲𑀫𑁆𑀫𑀸 𑀘 𑀧𑀭𑀺𑀬𑁂𑀲𑀢𑀺 𑀏𑀢𑀸𑀬𑀸𑀢𑀺 𑀧𑀭𑀺𑀬𑁂𑀲𑀦𑀸, 𑀆𑀚𑀻𑀯𑁄, 𑀅𑀢𑁆𑀣𑀢𑁄 𑀧𑀘𑁆𑀘𑀬𑀕𑀯𑁂𑀲𑀦𑀩𑁆𑀬𑀸𑀧𑀸𑀭𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀺𑀓𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀅𑀭𑀺𑀬𑀸 𑀦𑀺𑀤𑁆𑀤𑁄𑀲𑀸 𑀧𑀭𑀺𑀬𑁂𑀲𑀦𑀸 𑀕𑀯𑁂𑀲𑀦𑀸𑀢𑀺 𑀅𑀭𑀺𑀬𑀧𑀭𑀺𑀬𑁂𑀲𑀦𑀸, 𑀅𑀭𑀺𑀬𑁂𑀳𑀺 𑀲𑀸𑀥𑀽𑀳𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀢𑀺𑀧𑀺 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀚𑀸𑀢𑀺𑀥𑀫𑁆𑀫𑁄𑀢𑀺 𑀚𑀸𑀬𑀦𑀲𑀪𑀸𑀯𑁄 𑀚𑀸𑀬𑀦𑀧𑀓𑀢𑀺𑀓𑁄. 𑀚𑀭𑀸𑀥𑀫𑁆𑀫𑁄𑀢𑀺 𑀚𑀻𑀭𑀡𑀲𑀪𑀸𑀯𑁄. 𑀩𑁆𑀬𑀸𑀥𑀺𑀥𑀫𑁆𑀫𑁄𑀢𑀺 𑀩𑁆𑀬𑀸𑀥𑀺𑀲𑀪𑀸𑀯𑁄. 𑀫𑀭𑀡𑀥𑀫𑁆𑀫𑁄𑀢𑀺 𑀫𑀻𑀬𑀦𑀲𑀪𑀸𑀯𑁄. 𑀲𑁄𑀓𑀥𑀫𑁆𑀫𑁄𑀢𑀺 𑀲𑁄𑀘𑀦𑀓𑀲𑀪𑀸𑀯𑁄. 𑀲𑀁𑀓𑀺𑀮𑁂𑀲𑀥𑀫𑁆𑀫𑁄𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑀪𑀸𑀯𑁄.

𑀧𑀼𑀢𑁆𑀢𑀪𑀭𑀺𑀬𑀦𑁆𑀢𑀺 𑀧𑀼𑀢𑁆𑀢𑀸 𑀘 𑀪𑀭𑀺𑀬𑀸 𑀘. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀤𑁆𑀯𑀦𑁆𑀤𑁂𑀓𑀢𑁆𑀢𑀯𑀲𑁂𑀦 𑀢𑁂𑀲𑀁 𑀦𑀺𑀤𑁆𑀤𑁂𑀲𑁄. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀢𑁄 𑀯𑀺𑀓𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀁 𑀚𑀸𑀢𑀭𑀽𑀧𑀫𑁂𑀯 𑀳𑁄𑀢𑀻𑀢𑀺 𑀚𑀸𑀢𑀭𑀽𑀧𑀁 𑀦𑀸𑀫 𑀲𑀼𑀯𑀡𑁆𑀡𑀁. 𑀥𑀯𑀮𑀲𑀪𑀸𑀯𑀢𑀸𑀬 𑀭𑀚𑀢𑀻𑀢𑀺 𑀭𑀚𑀢𑀁, 𑀭𑀽𑀧𑀺𑀬𑀁. 𑀇𑀥 𑀧𑀦 𑀲𑀼𑀯𑀡𑁆𑀡𑀁 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀁 ‘‘𑀭𑀚𑀢’’𑀦𑁆𑀢𑁆𑀯𑁂𑀯 𑀕𑀳𑀺𑀢𑀁 𑀯𑁄𑀳𑀸𑀭𑀽𑀧𑀕𑀫𑀸𑀲𑀓𑀸𑀤𑀺. 𑀚𑀸𑀢𑀺𑀥𑀫𑁆𑀫𑀸 𑀳𑁂𑀢𑁂, 𑀪𑀺𑀓𑁆𑀔𑀯𑁂, 𑀉𑀧𑀥𑀬𑁄𑀢𑀺 𑀏𑀢𑁂 𑀓𑀸𑀫𑀕𑀼𑀡𑀽𑀧𑀥𑀬𑁄 𑀦𑀸𑀫 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀚𑀸𑀢𑀺𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀩𑁆𑀬𑀸𑀥𑀺𑀥𑀫𑁆𑀫𑀯𑀸𑀭𑀸𑀤𑀻𑀲𑀼 𑀚𑀸𑀢𑀭𑀽𑀧𑀭𑀚𑀢𑀁 𑀦 𑀕𑀳𑀺𑀢𑀁. 𑀦 𑀳𑁂𑀢𑀲𑁆𑀲 𑀲𑀻𑀲𑀭𑁄𑀕𑀸𑀤𑀬𑁄 𑀩𑁆𑀬𑀸𑀥𑀬𑁄 𑀦𑀸𑀫 𑀲𑀦𑁆𑀢𑀺, 𑀦 𑀲𑀢𑁆𑀢𑀸𑀦𑀁 𑀯𑀺𑀬 𑀘𑀼𑀢𑀺𑀲𑀗𑁆𑀔𑀸𑀢𑀁 𑀫𑀭𑀡𑀁, 𑀦 𑀲𑁄𑀓𑁂 𑀉𑀧𑁆𑀧𑀚𑁆𑀚𑀢𑀺, 𑀘𑀼𑀢𑀺𑀲𑀗𑁆𑀔𑀸𑀢𑀁 𑀫𑀭𑀡𑀦𑁆𑀢𑀺 𑀘 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀔𑀦𑁆𑀥𑀦𑀺𑀭𑁄𑀥𑁄, 𑀲𑁄 𑀢𑀲𑁆𑀲 𑀦𑀢𑁆𑀣𑀺, 𑀔𑀡𑀺𑀓𑀦𑀺𑀭𑁄𑀥𑁄 𑀧𑀦 𑀔𑀡𑁂 𑀔𑀡𑁂 𑀮𑀩𑁆𑀪𑀢𑁂𑀯. 𑀭𑀸𑀕𑀸𑀤𑀻𑀳𑀺 𑀧𑀦 𑀲𑀁𑀓𑀺𑀮𑁂𑀲𑁂𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀯𑀸𑀭𑁂 𑀕𑀳𑀺𑀢𑀁 𑀚𑀸𑀢𑀭𑀽𑀧𑀁, 𑀢𑀣𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀚𑀸𑀢𑀺𑀥𑀫𑁆𑀫𑀯𑀸𑀭𑁂, 𑀫𑀮𑀁 𑀕𑀳𑁂𑀢𑁆𑀯𑀸 𑀚𑀻𑀭𑀡𑀢𑁄 𑀚𑀭𑀸𑀥𑀫𑁆𑀫𑀯𑀸𑀭𑁂 𑀘. 𑀅𑀭𑀺𑀬𑁂𑀳𑀺 𑀦 𑀅𑀭𑀡𑀻𑀬𑀸, 𑀧𑀭𑀺𑀬𑁂𑀲𑀦𑀸𑀢𑀺𑀧𑀺 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸.

𑀇𑀤𑀸𑀦𑀺 𑀅𑀦𑁂𑀲𑀦𑀸𑀯𑀲𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀪𑀸𑀭𑀧𑀭𑀺𑀬𑁂𑀲𑀦𑀁 𑀧𑀳𑀭𑀡𑀯𑀺𑀲𑀸𑀤𑀺𑀕𑀯𑁂𑀲𑀦𑀁, 𑀧𑀬𑁄𑀕𑀯𑀲𑁂𑀦 𑀧𑀬𑁄𑀕𑀓𑀭𑀡𑀁 𑀢𑀚𑁆𑀚𑀸𑀯𑀸𑀬𑀸𑀫𑀚𑀦𑀦𑀁 𑀢𑀸𑀤𑀺𑀲𑀁 𑀉𑀧𑀓𑁆𑀓𑀫𑀦𑀺𑀩𑁆𑀩𑀢𑁆𑀢𑀦𑀁, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀢𑁆𑀣𑀁 𑀕𑀫𑀦𑀁, 𑀧𑀘𑁆𑀘𑁂𑀓𑀁 𑀓𑀸𑀮-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀫𑁆𑀪𑀸𑀭𑀧𑀭𑀺𑀬𑁂𑀲𑀦𑀓𑀸𑀮𑀢𑁄 𑀧𑀝𑁆𑀞𑀸𑀬, 𑀧𑀬𑁄𑀕𑀓𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬, 𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀇𑀢𑀭𑁄𑀢𑀺 ‘‘𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁄. 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀢𑀣𑀸 𑀉𑀧𑁆𑀧𑀸𑀤𑀺𑀢𑀘𑀺𑀢𑁆𑀢𑁄 𑀳𑀺 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀢𑀸𑀤𑀺𑀲𑀁 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑀁 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀩𑀳𑀼𑀧𑀓𑀸𑀭𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁧.𑁮𑁪).

𑀇𑀤𑀸𑀦𑀺 𑀢𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀅𑀲𑁂𑀯𑀺𑀢𑀩𑁆𑀩𑀁, 𑀲𑁂𑀯𑀺𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀪𑁂𑀤𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀳𑀺𑀢𑀼𑀧𑁆𑀧𑀸𑀤𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀩𑀼𑀤𑁆𑀥𑀭𑀢𑀦𑀲𑀗𑁆𑀖𑀭𑀢𑀦𑀼𑀧𑀝𑁆𑀞𑀸𑀦𑁂𑀳𑁂𑀯 𑀥𑀫𑁆𑀫𑀭𑀢𑀦𑀼𑀧𑀝𑁆𑀞𑀸𑀦𑀲𑀺𑀤𑁆𑀥𑀻𑀢𑀺 𑀆𑀳 ‘‘𑀤𑀺𑀯𑀲𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑀝𑁆𑀞𑀸𑀦𑀕𑀫𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀥𑀦𑀼𑀕𑁆𑀕𑀳𑀧𑁂𑀲𑀦𑀁 𑀥𑀦𑀼𑀕𑁆𑀕𑀳𑀧𑀼𑀭𑀺𑀲𑀸𑀦𑀁 𑀉𑀬𑁆𑀬𑁄𑀚𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀘𑀯𑀭𑀬𑀸𑀘𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀚𑀸𑀢𑀲𑀢𑁆𑀢𑀼𑀁 𑀧𑀲𑀸𑀤𑁂𑀢𑁆𑀯𑀸 𑀮𑀸𑀪𑀼𑀧𑁆𑀧𑀸𑀤𑀯𑀲𑁂𑀦 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁.

𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀸𑀭𑀺𑀧𑀽𑀭𑀺𑀅𑀢𑁆𑀣𑀁. 𑀅𑀕𑁆𑀕𑀫𑀕𑁆𑀕𑀨𑀮𑀯𑀲𑁂𑀦𑁂𑀯 𑀳𑀺 𑀲𑁂𑀯𑀺𑀢𑀩𑁆𑀩𑀸𑀦𑀁 𑀧𑀸𑀭𑀺𑀧𑀽𑀭𑀻𑀢𑀺 𑀢𑀤𑀢𑁆𑀣𑀁 𑀲𑀩𑁆𑀩𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀧𑀺 𑀅𑀕𑁆𑀕𑀫𑀕𑁆𑀕𑁂𑀦𑁂𑀯 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀻𑀢𑀺 𑀢𑀤𑀢𑁆𑀣𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀯𑀢𑁆𑀯𑀸 𑀦𑀺𑀕𑀫𑁂𑀦𑁆𑀢𑁄 ‘‘𑀧𑀸𑀢𑀺𑀫𑁄𑀓𑁆𑀔𑁄…𑀧𑁂… 𑀳𑁄𑀢𑀻’’𑀢𑀺 𑀆𑀳.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀡𑁆𑀡𑀦𑀸

𑁩𑁬𑁫. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀥𑀸𑀦𑀸𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀤𑀳𑀦𑀢𑁆𑀣𑀸𑀬. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀘𑀓𑁆𑀔𑀸𑀤𑀻𑀦𑀺 𑀤𑁆𑀯𑀸𑀭𑀸𑀦𑀺, 𑀢𑁂𑀲𑀁 𑀧𑀺𑀥𑀸𑀦𑀁 𑀲𑀁𑀯𑀭𑀡𑀁 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀢𑁄 𑀕𑁄𑀧𑀦𑀸𑀢𑀺 𑀆𑀳 ‘‘𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬𑀸’’𑀢𑀺. 𑀅𑀲𑁂𑀯𑀺𑀢𑀩𑁆𑀩𑀭𑀽𑀧𑀸𑀤𑀺𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀅𑀲𑀁𑀯𑀭𑁄, 𑀲𑀁𑀓𑀺𑀮𑁂𑀲𑀥𑀫𑁆𑀫𑀯𑀺𑀧𑁆𑀧𑀳𑀸𑀦𑀯𑀲𑁂𑀦 𑀯𑁄𑀤𑀸𑀦𑀥𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀻𑀢𑀺. 𑀓𑀸𑀫𑀁 𑀧𑀸𑀴𑀺𑀬𑀁 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀭𑀽𑀧𑀸𑀤𑀺 𑀤𑀲𑁆𑀲𑀺𑀢𑀁, 𑀲𑀓𑁆𑀓𑁂𑀦 𑀧𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀬 𑀧𑀝𑀺𑀧𑀢𑁆𑀢𑀺 𑀧𑀼𑀘𑁆𑀙𑀺𑀢𑀸𑀢𑀺 𑀢𑀫𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀫𑁆𑀧𑀻𑀢𑀺𑀆𑀤𑀺 𑀲𑁂𑀯𑀺𑀢𑀩𑁆𑀩𑀭𑀽𑀧𑀸𑀤𑀺𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. ‘‘𑀢𑀼𑀡𑁆𑀳𑀻 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀓𑀸𑀭𑀡𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀣𑁂𑀢𑀼𑀓𑀸𑀫𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀦𑁆𑀢𑀺 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀇𑀦𑁆𑀤𑁄.

𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀁, 𑀢𑀲𑁆𑀲 𑀅𑀲𑁂𑀯𑀦𑀁 𑀦𑀸𑀫 𑀅𑀤𑀲𑁆𑀲𑀦𑀁 𑀏𑀯𑀸𑀢𑀺 𑀆𑀳 ‘‘𑀦 𑀲𑁂𑀯𑀺𑀢𑀩𑁆𑀩𑀁 𑀦 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀬𑀁 𑀧𑀦 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀁 𑀭𑀽𑀧𑀁 𑀧𑀲𑁆𑀲𑀢𑁄 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦, 𑀅𑀲𑀼𑀪𑀲𑀜𑁆𑀜𑀸 𑀯𑀸 𑀲𑀡𑁆𑀞𑀸𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀯𑀲𑁂𑀦. 𑀅𑀣 𑀯𑀸 𑀓𑀫𑁆𑀫𑀨𑀮𑀲𑀤𑁆𑀤𑀳𑀦𑀯𑀲𑁂𑀦 𑀧𑀲𑀸𑀤𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑁂𑀦 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀝𑀺𑀮𑀸𑀪𑁄 𑀯𑀸 𑀳𑁄𑀢𑀺.

𑀧𑀭𑀺𑀬𑀸𑀬𑀓𑁆𑀔𑀭𑀡𑀢𑁄 𑀅𑀓𑁆𑀔𑀭𑀁, 𑀯𑀡𑁆𑀡𑁄, 𑀲𑁄 𑀏𑀯 𑀦𑀺𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑀼𑀤𑁆𑀤𑀺𑀢𑁄 𑀧𑀤𑀯𑀸𑀓𑁆𑀬𑀲𑀜𑁆𑀜𑀺𑀢𑁄, 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀢𑀬𑀺𑀤𑀁 𑀓𑀸𑀩𑁆𑀬𑀦𑀸𑀝𑀓𑀸𑀤𑀺𑀕𑀢𑀯𑁂𑀯𑀘𑀦𑀯𑀲𑁂𑀦, 𑀉𑀘𑁆𑀘𑀸𑀭𑀡𑀯𑀲𑁂𑀦 𑀘 𑀯𑀺𑀘𑀺𑀢𑁆𑀢𑀲𑀦𑁆𑀦𑀺𑀯𑁂𑀲𑀢𑀸𑀬 𑀢𑀣𑀸𑀧𑀯𑀢𑁆𑀢𑀯𑀺𑀓𑀧𑁆𑀧𑀦𑀯𑀲𑁂𑀦 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀪𑀸𑀯𑁂𑀦 𑀉𑀧𑀢𑀺𑀝𑁆𑀞𑀦𑀓𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀁 𑀘𑀺𑀢𑁆𑀢𑀓𑁆𑀔𑀭𑀁 𑀘𑀺𑀢𑁆𑀢𑀩𑁆𑀬𑀜𑁆𑀚𑀦𑀫𑁆𑀧𑀺 𑀲𑀤𑁆𑀤𑀁 𑀲𑀼𑀡𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀢𑁆𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀦𑀺𑀲𑁆𑀲𑀺𑀢𑀁. 𑀥𑀫𑁆𑀫𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑀝𑁆𑀝𑀥𑀫𑁆𑀫𑀦𑀺𑀲𑁆𑀲𑀺𑀢𑀁, 𑀮𑁄𑀓𑀼𑀢𑁆𑀢𑀭𑀭𑀢𑀦𑀢𑁆𑀢𑀬𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀯𑀸. 𑀧𑀲𑀸𑀤𑁄𑀢𑀺 𑀭𑀢𑀦𑀢𑁆𑀢𑀬𑀲𑀤𑁆𑀥𑀸, 𑀓𑀫𑁆𑀫𑀨𑀮𑀲𑀤𑁆𑀥𑀸𑀧𑀺. 𑀦𑀺𑀩𑁆𑀩𑀺𑀤𑀸 𑀯𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀯𑀲𑁂𑀦 𑀯𑀝𑁆𑀝𑀢𑁄 𑀉𑀓𑁆𑀓𑀡𑁆𑀞𑀸 𑀯𑀸.

𑀕𑀦𑁆𑀥𑀭𑀲𑀸𑀯𑀺𑀧𑀭𑁄𑀥𑀸𑀤𑀺𑀯𑀲𑁂𑀦 𑀲𑁂𑀯𑀺𑀬𑀫𑀸𑀦𑀁 𑀅𑀬𑁄𑀦𑀺𑀲𑁄 𑀧𑀝𑀺𑀧𑀦𑁆𑀦𑀢𑁆𑀢𑀸 𑀅𑀲𑁂𑀯𑀺𑀢𑀩𑁆𑀩𑀁 𑀦𑀸𑀫. 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁂𑀯𑀺𑀬𑀫𑀸𑀦𑀁 𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀕𑀳𑀡𑀢𑁄 𑀲𑁂𑀯𑀺𑀢𑀩𑁆𑀩𑀁 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀕𑀦𑁆𑀥𑀁 𑀖𑀸𑀬𑀢𑁄’’𑀢𑀺𑀆𑀤𑀺.

𑀬𑀁 𑀧𑀦 𑀨𑀼𑀲𑀢𑁄𑀢𑀺 𑀬𑀁 𑀧𑀦 𑀲𑁂𑀯𑀺𑀢𑀩𑁆𑀩𑀁 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀧𑁆𑀨𑀦𑁆𑀦𑀲𑁆𑀲𑁂𑀯 𑀨𑀼𑀲𑀢𑁄. 𑀆𑀲𑀯𑀓𑁆𑀔𑀬𑁄 𑀘𑁂𑀯 𑀳𑁄𑀢𑀺 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀢𑁄. 𑀯𑀻𑀭𑀺𑀬𑀜𑁆𑀘 𑀲𑀼𑀧𑀕𑁆𑀕𑀳𑀺𑀢𑀁 𑀳𑁄𑀢𑀺 𑀘𑀢𑀼𑀢𑁆𑀣𑀲𑁆𑀲 𑀅𑀭𑀺𑀬𑀯𑀁𑀲𑀲𑁆𑀲 𑀉𑀓𑁆𑀓𑀁𑀲𑀦𑀢𑁄. 𑀧𑀘𑁆𑀙𑀺𑀫𑀸 𑀘…𑀧𑁂… 𑀅𑀦𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑀦𑀢𑁄.

𑀬𑁂 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀇𑀝𑁆𑀞𑀸𑀤𑀺𑀪𑁂𑀤𑁂 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀆𑀯𑀚𑁆𑀚𑀦𑁆𑀢𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. ‘‘𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸’’𑀢𑀺 𑀯𑀺𑀪𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀸, 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀬𑁂 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀏𑀯𑀭𑀽𑀧𑀸 𑀲𑁂𑀯𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀓𑀭𑀼𑀡𑀸𑀤𑀻𑀦𑀜𑁆𑀘𑁂𑀯 𑀅𑀦𑀺𑀘𑁆𑀘𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀥𑀫𑁆𑀫𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀧𑀝𑀺𑀧𑀢𑁆𑀢𑀻𑀦𑀁 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀩𑀳𑀺 𑀥𑀸𑀯𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺 𑀅𑀦𑁆𑀢𑁄𑀧𑀭𑀺𑀯𑁂𑀡𑀁 𑀆𑀕𑀢𑀫𑁂𑀯 𑀭𑀽𑀧𑀸𑀤𑀺𑀁 𑀆𑀭𑀩𑁆𑀪 𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑁂 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀤𑀸𑀘𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀅𑀦𑁆𑀢𑁄𑀧𑀭𑀺𑀯𑁂𑀡𑁂 𑀘 𑀯𑀺𑀲𑀪𑀸𑀕𑀭𑀽𑀧𑀸𑀤𑀻𑀦𑀁 𑀅𑀲𑀫𑁆𑀪𑀯𑁄 𑀏𑀯, 𑀢𑀲𑁆𑀫𑀸 𑀯𑀺𑀲𑀝𑀯𑀺𑀢𑀓𑁆𑀓𑀯𑀲𑁂𑀦 𑀘𑀺𑀢𑁆𑀢𑀁 𑀩𑀳𑀺 𑀥𑀸𑀯𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀯𑀸𑀲𑀕𑁂𑀳𑀢𑁄 𑀦𑀺𑀯𑀸𑀲𑀦𑀕𑀩𑁆𑀪𑀢𑁄. 𑀦𑀺𑀬𑀓𑀚𑁆𑀛𑀢𑁆𑀢𑀔𑀦𑁆𑀥𑀧𑀜𑁆𑀘𑀓𑀢𑁄 𑀯𑀺𑀧𑀲𑁆𑀲𑀦𑀸𑀕𑁄𑀘𑀭𑀢𑁄. 𑀣𑁂𑀭𑁄 𑀓𑀺𑀭 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀭𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀧𑀝𑀺𑀧𑀚𑁆𑀚𑀢𑀺.

𑁩𑁬𑁬. 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀅𑀤𑁆𑀯𑁂𑀚𑁆𑀛𑀸𑀪𑀸𑀯𑀢𑁄 𑀏𑀓𑁄 𑀅𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀏𑀓𑀦𑁆𑀢𑁄, 𑀏𑀓𑀦𑁆𑀢𑁄 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀦𑁆𑀢𑀯𑀸𑀤𑀸. 𑀢𑁂𑀦𑀸𑀳 ‘‘𑀏𑀓𑀁𑀬𑁂𑀯 𑀯𑀤𑀦𑁆𑀢𑀻’’𑀢𑀺, 𑀅𑀪𑀺𑀦𑁆𑀦𑀯𑀸𑀤𑀸𑀢𑀺 𑀅𑀢𑁆𑀣𑁄. 𑀏𑀓𑀸𑀘𑀸𑀭𑀸𑀢𑀺 𑀲𑀫𑀸𑀦𑀸𑀘𑀸𑀭𑀸. 𑀏𑀓𑀮𑀤𑁆𑀥𑀺𑀓𑀸𑀢𑀺 𑀲𑀫𑀸𑀦𑀮𑀤𑁆𑀥𑀺𑀓𑀸. 𑀏𑀓𑀧𑀭𑀺𑀬𑁄𑀲𑀸𑀦𑀸𑀢𑀺 𑀲𑀫𑀸𑀦𑀦𑀺𑀝𑁆𑀞𑀸𑀦𑀸.

𑀇𑀢𑀺 𑀲𑀓𑁆𑀓𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀲𑀼𑀢𑀁 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀸𑀦𑀸𑀯𑀸𑀤𑀸 𑀘𑀸𑀭𑀮𑀤𑁆𑀥𑀺𑀦𑀺𑀝𑁆𑀞𑀸𑀦𑀁 𑀇𑀤𑀸𑀦𑀺 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀅𑀲𑀸𑀭𑀢𑁄 𑀜𑀢𑁆𑀯𑀸 𑀞𑀺𑀢𑁄, 𑀢𑀲𑁆𑀲 𑀓𑀸𑀭𑀡𑀁 𑀜𑀸𑀢𑀼𑀓𑀸𑀫𑁄 𑀢𑀫𑁂𑀯 𑀢𑀸𑀯 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀼𑀘𑁆𑀙𑀢𑀺 ‘‘𑀲𑀩𑁆𑀩𑁂𑀯 𑀥𑀫𑁆𑀫𑀸 𑀦𑀼 𑀔𑁄’’𑀢𑀺𑀆𑀤𑀺𑀦𑀸.

𑀥𑀸𑀢𑀽𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀸, 𑀅𑀚𑁆𑀛𑀸𑀲𑀬𑀥𑀸𑀢𑀽𑀢𑀺 𑀘 𑀅𑀢𑁆𑀣𑀢𑁄 𑀅𑀚𑁆𑀛𑀸𑀲𑀬𑁄 𑀏𑀯𑀸𑀢𑀺 𑀆𑀳 ‘‘𑀅𑀦𑁂𑀓𑀚𑁆𑀛𑀸𑀲𑀬𑁄 𑀦𑀸𑀦𑀚𑁆𑀛𑀸𑀲𑀬𑁄’’𑀢𑀺. ‘‘𑀏𑀓𑀲𑁆𑀫𑀺𑀁 𑀕𑀦𑁆𑀢𑀼𑀓𑀸𑀫𑁂 𑀏𑀓𑁄 𑀞𑀸𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁 𑀇𑀭𑀺𑀬𑀸𑀧𑀣𑁂𑀧𑀺 𑀦𑀸𑀫 𑀲𑀢𑁆𑀢𑀸 𑀏𑀓𑀚𑁆𑀛𑀸𑀲𑀬𑀸 𑀤𑀼𑀮𑁆𑀮𑀪𑀸, 𑀧𑀕𑁂𑀯 𑀮𑀤𑁆𑀥𑀻𑀲𑀽𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀬𑀁 𑀬𑀤𑁂𑀯 𑀅𑀚𑁆𑀛𑀸𑀲𑀬𑀦𑁆𑀢𑀺 𑀬𑀁 𑀬𑀫𑁂𑀯 𑀲𑀲𑁆𑀲𑀢𑀸𑀤𑀺𑀅𑀚𑁆𑀛𑀸𑀲𑀬𑀁. 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀢𑀁 𑀢𑀁 𑀮𑀤𑁆𑀥𑀺𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀪𑀸𑀯𑁂𑀦 𑀦𑀺𑀯𑀺𑀲𑀦𑁆𑀢𑀺, 𑀆𑀤𑀸𑀦𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀺. 𑀣𑀸𑀫𑁂𑀦 𑀘 𑀧𑀭𑀸𑀫𑀸𑀲𑁂𑀦 𑀘𑀸𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦 𑀘 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘. 𑀲𑀼𑀝𑁆𑀞𑀼 𑀕𑀡𑁆𑀳𑀺𑀢𑁆𑀯𑀸𑀢𑀺 𑀅𑀢𑀺𑀯𑀺𑀬 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸. 𑀯𑁄𑀳𑀭𑀦𑁆𑀢𑀻𑀢𑀺 𑀬𑀣𑀸𑀪𑀺𑀦𑀺𑀯𑀺𑀝𑁆𑀞𑀁 𑀤𑀺𑀝𑁆𑀞𑀺𑀯𑀸𑀤𑀁 𑀧𑀜𑁆𑀜𑀸𑀧𑁂𑀦𑁆𑀢𑀺 𑀧𑀭𑁂 𑀳𑀺 𑀕𑀸𑀳𑁂𑀦𑁆𑀢𑀺 𑀧𑀢𑀺𑀝𑁆𑀞𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀻’’𑀢𑀺, 𑀉𑀕𑁆𑀖𑁄𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁆𑀢𑀁 𑀅𑀢𑀻𑀢𑀸 𑀅𑀘𑁆𑀘𑀦𑁆𑀢𑀸, 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀬𑁄𑀕𑀓𑁆𑀔𑁂𑀫𑁄𑀢𑀺𑀧𑀺 𑀦𑀺𑀩𑁆𑀩𑀸𑀦𑀁 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺 𑀅𑀦𑀼𑀧𑁆𑀧𑀤𑀼𑀝𑁆𑀞𑀢𑁆𑀢𑀸. ‘‘𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀇-𑀓𑀸𑀭𑁂𑀦 𑀦𑀺𑀤𑁆𑀤𑁂𑀲𑁂𑀦 ‘‘𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻’’𑀢𑀺 𑀯𑀼𑀢𑁆𑀢𑀁, 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻𑀢𑀺. 𑀘𑀭𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺, 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀲𑁆𑀲𑀢𑀺 𑀧𑀭𑀺𑀓𑁆𑀔𑀺𑀲𑁆𑀲𑀢𑀺 𑀯𑀝𑁆𑀝𑀤𑀼𑀓𑁆𑀔𑀦𑁆𑀢𑀁 𑀆𑀕𑀫𑁆𑀫𑀸𑀢𑀺 𑀧𑀭𑀺𑀬𑁄𑀲𑀸𑀦𑀦𑁆𑀢𑀺𑀧𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀁.

𑀲𑀗𑁆𑀔𑀺𑀡𑀸𑀢𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀔𑁂𑀧𑁂𑀢𑀺. 𑀯𑀺𑀦𑀸𑀲𑁂𑀢𑀻𑀢𑀺 𑀢𑀢𑁄 𑀏𑀯 𑀲𑀩𑁆𑀩𑀲𑁄 𑀅𑀤𑀲𑁆𑀲𑀦𑀁 𑀧𑀸𑀧𑁂𑀢𑀺. 𑀯𑀺𑀫𑀼𑀢𑁆𑀢𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀅𑀘𑁆𑀘𑀦𑁆𑀢𑀦𑀺𑀕𑁆𑀕𑀫𑁂𑀦 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑀸.

‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀏𑀓𑁄 𑀧𑀜𑁆𑀳𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑁄 𑀧𑀦 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄, 𑀲𑁄 𑀧𑀜𑁆𑀳𑁄. 𑀲𑁄 𑀏𑀯 𑀘 𑀯𑀺𑀲𑁆𑀲𑀚𑁆𑀚𑀻𑀬𑀢𑀻𑀢𑀺 𑀦𑀸𑀬𑀁 𑀤𑁄𑀲𑁄, 𑀅𑀜𑁆𑀜𑀣𑀸 𑀅𑀫𑁆𑀩𑀁 𑀧𑀼𑀝𑁆𑀞𑀲𑁆𑀲 𑀮𑀩𑀼𑀚𑀁 𑀩𑁆𑀬𑀸𑀓𑀭𑀡𑀁 𑀯𑀺𑀬 𑀲𑀺𑀬𑀸, 𑀏𑀯𑀁 𑀧𑀜𑁆𑀳𑀲𑀻𑀲𑁂𑀦 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀯𑀤𑀢𑀺. 𑀢𑀣𑀸 𑀳𑀺 ‘‘𑀧𑀺𑀬𑀸𑀧𑁆𑀧𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀧𑀤𑀸𑀦𑁂𑀯 𑀕𑀳𑀺𑀢𑀸𑀦𑀺, ‘‘𑀧𑀺𑀬𑀸𑀧𑁆𑀧𑀺𑀬𑀁 𑀏𑀓𑁄’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀧𑀜𑁆𑀘𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀧𑀧𑀜𑁆𑀘𑀸 𑀏𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀧𑀜𑁆𑀘𑁄 𑀏𑀓𑁄’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀧𑀼𑀘𑁆𑀙𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀯𑀺𑀪𑀸𑀕𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀢𑀬𑁄 𑀧𑀜𑁆𑀳𑀸 𑀚𑀸𑀢𑀸, 𑀏𑀯𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀼𑀘𑁆𑀙𑀸 𑀭𑀽𑀧𑀸𑀤𑀺𑀯𑀺𑀪𑀸𑀕𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀙 𑀧𑀜𑁆𑀳𑀸 𑀲𑀺𑀬𑀼𑀁. 𑀢𑀣𑀸 𑀲𑀢𑀺 𑀏𑀓𑀽𑀦𑀯𑀻𑀲𑀢𑀺 𑀧𑀼𑀘𑁆𑀙𑀸 𑀲𑀺𑀬𑀼𑀁, 𑀅𑀣 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑀸𑀲𑀸𑀫𑀜𑁆𑀜𑁂𑀦 𑀏𑀓𑁄𑀯 𑀧𑀜𑁆𑀳𑁄 𑀓𑀢𑁄, 𑀏𑀯𑀁 𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀧𑀼𑀘𑁆𑀙𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀢𑁂𑀧𑀺 𑀢𑀬𑁄 𑀏𑀓𑁄𑀯 𑀧𑀜𑁆𑀳𑁄𑀢𑀺 𑀲𑀩𑁆𑀩𑁂𑀯 𑀤𑁆𑀯𑀸𑀤𑀲𑁂𑀯 𑀧𑀜𑁆𑀳𑀸 𑀪𑀯𑁂𑀬𑁆𑀬𑀼𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁. 𑀬𑀲𑁆𑀫𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀻𑀲𑀼 𑀯𑀺𑀪𑀚𑁆𑀚 𑀯𑀼𑀘𑁆𑀘𑀫𑀸𑀦𑁂𑀲𑀼 𑀫𑀳𑀸𑀯𑀺𑀲𑀬𑀢𑀸𑀬 𑀅𑀧𑀭𑀺𑀫𑀸𑀡𑁄 𑀯𑀺𑀪𑀸𑀕𑁄 𑀲𑀫𑁆𑀪𑀯𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀲𑀓𑀮𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀢𑀲𑁆𑀲 𑀦𑀺𑀤𑁆𑀤𑁂𑀲𑁄. 𑀭𑀽𑀧𑀸𑀤𑀻𑀲𑀼 𑀧𑀦 𑀯𑀺𑀪𑀚𑁆𑀚 𑀯𑀼𑀘𑁆𑀘𑀫𑀸𑀦𑁂𑀲𑀼 𑀅𑀧𑁆𑀧𑀯𑀺𑀲𑀬𑀢𑀸𑀬 𑀦 𑀢𑀸𑀤𑀺𑀲𑁄 𑀯𑀺𑀪𑀸𑀕𑁄 𑀲𑀫𑁆𑀪𑀯𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀇𑀢𑀺 𑀫𑀳𑀸𑀯𑀺𑀲𑀬𑀢𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀧𑀼𑀘𑁆𑀙𑀸 𑀢𑀬𑁄 𑀧𑀜𑁆𑀳𑀸 𑀓𑀢𑀸, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀼𑀘𑁆𑀙𑀸 𑀧𑀦 𑀅𑀧𑁆𑀧𑀯𑀺𑀲𑀬𑀢𑀸𑀬 𑀏𑀓𑁄𑀯 𑀧𑀜𑁆𑀳𑁄 𑀓𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀤𑁆𑀤𑀲 𑀫𑀳𑀸𑀧𑀜𑁆𑀳𑀸’’𑀢𑀺.

𑁩𑁬𑁭. 𑀘𑀮𑀦𑀝𑁆𑀞𑁂𑀦𑀸𑀢𑀺 𑀓𑀫𑁆𑀧𑀦𑀝𑁆𑀞𑁂𑀦. 𑀢𑀡𑁆𑀳𑀸 𑀳𑀺 𑀓𑀸𑀫𑀭𑀸𑀕𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀦𑀯𑀝𑁆𑀞𑀺𑀢𑀢𑀸𑀬 𑀲𑀬𑀫𑁆𑀧𑀺 𑀘𑀮𑀢𑀺, 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀫𑁆𑀧𑀺 𑀲𑀦𑁆𑀢𑀸𑀦𑀁 𑀪𑀯𑀸𑀤𑀻𑀲𑀼 𑀧𑀭𑀺𑀓𑀟𑁆𑀠𑀦𑁂𑀦 𑀘𑀸𑀮𑁂𑀢𑀺, 𑀢𑀲𑁆𑀫𑀸 𑀘𑀮𑀦𑀝𑁆𑀞𑁂𑀦 𑀢𑀡𑁆𑀳𑀸 𑀏𑀚𑀸 𑀦𑀸𑀫. 𑀧𑀻𑀴𑀦𑀝𑁆𑀞𑁂𑀦𑀸𑀢𑀺 𑀯𑀺𑀩𑀸𑀥𑀦𑀝𑁆𑀞𑁂𑀦 𑀢𑀲𑁆𑀲 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑁂𑀦. 𑀧𑀤𑀼𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀅𑀥𑀫𑁆𑀫𑀭𑀸𑀕𑀸𑀤𑀺𑀪𑀸𑀯𑁂𑀦, 𑀲𑀫𑁆𑀫𑀼𑀔𑀧𑀭𑀁𑀫𑀼𑀔𑁂𑀦, 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀘 𑀧𑀓𑀸𑀭𑀢𑁄 𑀤𑀼𑀲𑁆𑀲𑀦𑀝𑁆𑀞𑁂𑀦 𑀕𑀡𑁆𑀟𑁄. 𑀅𑀦𑀼𑀧𑁆𑀧𑀯𑀺𑀝𑁆𑀞𑀝𑁆𑀞𑁂𑀦𑀸𑀢𑀺 𑀆𑀲𑀬𑀲𑁆𑀲 𑀤𑀼𑀦𑁆𑀦𑀻𑀳𑀭𑀡𑀻𑀬𑀪𑀸𑀯𑁂𑀦 𑀅𑀦𑀼𑀧𑁆𑀧𑀯𑀺𑀲𑀦𑀝𑁆𑀞𑁂𑀦. 𑀓𑀟𑁆𑀠𑀢𑀺 𑀅𑀢𑁆𑀢𑀦𑁄 𑀘 𑀭𑀼𑀘𑀺𑀬𑀸 𑀉𑀧𑀦𑁂𑀢𑀺. 𑀉𑀘𑁆𑀘𑀸𑀯𑀘𑀦𑁆𑀢𑀺 𑀧𑀡𑀻𑀢𑀪𑀸𑀯𑀁, 𑀦𑀺𑀳𑀻𑀦𑀪𑀸𑀯𑀜𑁆𑀘. 𑀬𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. ‘‘𑀬𑁂𑀲𑀸𑀳’’𑀦𑁆𑀢𑀺𑀧𑀺 𑀧𑀸𑀴𑀺, 𑀢𑀲𑁆𑀲𑀸 𑀓𑁂𑀘𑀺 ‘‘𑀬𑁂𑀲𑀁 𑀅𑀳’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀯𑀦𑁆𑀢𑀺 𑀲𑀼𑀢𑀸𑀦𑀼𑀭𑀽𑀧𑀁, 𑀉𑀕𑁆𑀕𑀳𑀸𑀦𑀼𑀭𑀽𑀧𑀜𑁆𑀘. ‘‘𑀅𑀳𑀁 𑀔𑁄 𑀧𑀦 𑀪𑀦𑁆𑀢𑁂 𑀅𑀜𑁆𑀜𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀥𑀫𑁆𑀫𑀸𑀘𑀭𑀺𑀬𑁄 𑀳𑁄𑀦𑁆𑀢𑁄𑀧𑀺 𑀪𑀕𑀯𑀢𑁄 𑀲𑀸𑀯𑀓𑁄…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀧𑁂𑀢𑀺.

𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀓𑀣𑀸𑀯𑀡𑁆𑀡𑀦𑀸

𑁩𑁬𑁮. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁄𑀕𑀸𑀴𑁆𑀳𑁄 𑀧𑀯𑀢𑁆𑀢𑀲𑀫𑁆𑀧𑀳𑀸𑀭𑁄 𑀯𑀺𑀬𑀸𑀢𑀺𑀩𑁆𑀬𑀽𑀴𑁆𑀳𑁄. 𑀚𑀺𑀦𑀺𑀁𑀲𑀽𑀢𑀺 𑀬𑀣𑀸 𑀅𑀲𑀼𑀭𑀸 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀏𑀯𑀁 𑀤𑁂𑀯𑀸 𑀯𑀺𑀚𑀺𑀦𑀺𑀁𑀲𑀼𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀯𑀸 𑀧𑀼𑀦 𑀅𑀧𑀘𑁆𑀘𑀸𑀕𑀫𑀦𑀸𑀬 𑀅𑀲𑀼𑀭𑁂 𑀚𑀺𑀦𑀺𑀁𑀲𑀽’’𑀢𑀺. 𑀢𑀸𑀤𑀺𑀲𑁄 𑀳𑀺𑀲𑁆𑀲 𑀚𑀬𑁄 𑀲𑀸𑀢𑀺𑀲𑀬𑀁 𑀯𑁂𑀤𑀧𑀝𑀺𑀮𑀸𑀪𑀸𑀬 𑀅𑀳𑁄𑀲𑀺. 𑀤𑀼𑀯𑀺𑀥𑀫𑁆𑀧𑀺 𑀑𑀚𑀦𑁆𑀢𑀺 𑀤𑀺𑀩𑁆𑀩𑀁, 𑀅𑀲𑀼𑀭𑀁 𑀘𑀸𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀑𑀚𑀁. 𑀤𑁂𑀯𑀸𑀬𑁂𑀯 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺 𑀅𑀲𑀼𑀭𑀸𑀦𑀁 𑀧𑀯𑁂𑀲𑀸𑀪𑀸𑀯𑀢𑁄. 𑀤𑀡𑁆𑀟𑀲𑁆𑀲 𑀅𑀯𑀘𑀭𑀡𑀁 𑀆𑀯𑀭𑀡𑀁 𑀤𑀡𑁆𑀟𑀸𑀯𑀘𑀭𑁄, 𑀲𑀳 𑀤𑀡𑁆𑀟𑀸𑀯𑀘𑀭𑁂𑀦𑀸𑀢𑀺 𑀲𑀤𑀡𑁆𑀟𑀸𑀯𑀘𑀭𑁄, 𑀤𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀯𑀸 𑀆𑀯𑀭𑀺𑀢𑁆𑀯𑀸 𑀯𑀸 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁩𑁬𑁯. 𑀇𑀫𑀲𑁆𑀫𑀺𑀁𑀬𑁂𑀯 𑀑𑀓𑀸𑀲𑁂𑀢𑀺 𑀇𑀫𑀺𑀲𑁆𑀲𑀫𑁂𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀤𑁂𑀯𑀪𑀽𑀢𑀲𑁆𑀲 𑀫𑁂𑀢𑀺 𑀧𑀼𑀩𑁆𑀩𑁂𑀧𑀺 𑀤𑁂𑀯𑀪𑀽𑀢𑀲𑁆𑀲 𑀲𑀓𑁆𑀓𑀲𑁆𑀲𑁂𑀯 𑀫𑁂 𑀪𑀽𑀢𑀲𑁆𑀲. 𑀲𑀢𑁄𑀢𑀺 𑀇𑀤𑀸𑀦𑀺𑀧𑀺 𑀲𑀓𑁆𑀓𑀲𑁆𑀲𑁂𑀯 𑀲𑀢𑁄 𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄.