𑁬. 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁩. 𑀧𑀜𑁆𑀘𑀓𑀼𑀡𑁆𑀟𑀮𑀺𑀓𑁄𑀢𑀺 𑀯𑀺𑀲𑁆𑀲𑀝𑁆𑀞𑀧𑀜𑁆𑀘𑀯𑁂𑀡𑀺𑀓𑁄. 𑀘𑀢𑀼𑀫𑀕𑁆𑀕𑀝𑁆𑀞𑀸𑀦𑁂𑀲𑀽𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑁂𑀲𑀼. 𑀢𑀢𑁆𑀣 𑀳𑀺 𑀓𑀢𑀸 𑀲𑀸𑀮𑀸𑀤𑀬𑁄 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀓𑁆𑀔𑀫𑀸 𑀳𑁄𑀦𑁆𑀢𑀺. ‘‘𑀏𑀯𑀭𑀽𑀧𑀸𑀦𑀻’’𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀫𑀽𑀮𑀲𑁄𑀥𑀦𑀸𑀤𑀻𑀦𑀺 𑀘𑁂𑀯 𑀬𑀣𑀸𑀲𑀢𑁆𑀢𑀺 𑀅𑀦𑁆𑀦𑀤𑀸𑀦𑀸𑀤𑀻𑀦𑀺 𑀘 𑀧𑀼𑀜𑁆𑀜𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀤𑀺𑀲𑁄 𑀅𑀢𑁆𑀢𑀪𑀸𑀯𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀅𑀳𑁄𑀲𑀻’’𑀢𑀺 𑀧𑀸𑀞𑁄. 𑀲𑀓𑀝𑀲𑀳𑀲𑁆𑀲𑀫𑀢𑁆𑀢𑀦𑁆𑀢𑀺 𑀯𑀸𑀳𑀲𑀳𑀲𑁆𑀲𑀫𑀢𑁆𑀢𑀁, 𑀯𑀸𑀳𑁄 𑀧𑀦 𑀯𑀻𑀲𑀢𑀺 𑀔𑀸𑀭𑀻, 𑀔𑀸𑀭𑀻 𑀲𑁄𑀴𑀲𑀤𑁄𑀡𑀫𑀢𑁆𑀢𑀸, 𑀤𑁄𑀡𑀁 𑀲𑁄𑀴𑀲 𑀦𑀸𑀴𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀫𑁆𑀪𑀁 𑀤𑀲𑀫𑁆𑀩𑀡𑀸𑀦𑀺. ‘‘𑀲𑀳𑀲𑁆𑀲𑀦𑀸𑀴𑀺𑀬𑁄’’𑀢𑀺 𑀓𑁂𑀘𑀺. 𑀭𑀢𑁆𑀢𑀲𑀼𑀯𑀡𑁆𑀡𑀓𑀡𑁆𑀡𑀺𑀓𑀦𑁆𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀁 𑀯𑀝𑀁𑀲𑀓𑀁.

𑀬𑀲𑁆𑀫𑀸 𑀫𑀚𑁆𑀛𑀺𑀫𑀬𑀸𑀫𑁂 𑀏𑀯 𑀤𑁂𑀯𑀢𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀯𑀲𑀭𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 ‘‘𑀏𑀓𑀓𑁄𑀝𑁆𑀞𑀸𑀲𑀁 𑀅𑀢𑀻𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀓𑁆𑀓𑀦𑁆𑀢𑀯𑀡𑁆𑀡𑁄𑀢𑀺 𑀅𑀢𑀺𑀯𑀺𑀬 𑀓𑀫𑀦𑀻𑀬𑀭𑀽𑀧𑁄, 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀯𑀸 𑀫𑀦𑀁 𑀊𑀦𑀁 𑀅𑀯𑀲𑁂𑀲𑀁, 𑀈𑀲𑀓𑀁 𑀅𑀲𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀪𑀕𑀯𑀢𑁄 𑀳𑀺 𑀲𑀫𑀻𑀧𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑁄 𑀕𑀺𑀚𑁆𑀛𑀓𑀽𑀝𑀯𑀺𑀳𑀸𑀭𑁄 𑀢𑁂𑀦 𑀑𑀪𑀸𑀲𑀺𑀢𑁄. 𑀢𑁂𑀦𑀸𑀳 ‘‘𑀘𑀦𑁆𑀤𑀺𑀫𑀸 𑀯𑀺𑀬𑀸’’𑀢𑀺𑀆𑀤𑀺.

𑀤𑁂𑀯𑀲𑀪𑀸𑀯𑀡𑁆𑀡𑀦𑀸

𑁨𑁯𑁪. 𑀭𑀢𑀦𑀫𑀢𑁆𑀢𑀓𑀡𑁆𑀡𑀺𑀓𑀭𑀼𑀓𑁆𑀔𑀦𑀺𑀲𑁆𑀲𑀦𑁆𑀤𑁂𑀦𑀸𑀢𑀺 𑀭𑀢𑀦𑀧𑁆𑀧𑀫𑀸𑀡𑀭𑀼𑀓𑁆𑀔𑀫𑀬𑀓𑀽𑀝𑀤𑀸𑀦𑀧𑀼𑀜𑁆𑀜𑀦𑀺𑀲𑁆𑀲𑀦𑁆𑀤𑁂𑀦, 𑀢𑀲𑁆𑀲 𑀯𑀸 𑀧𑀼𑀜𑁆𑀜𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀪𑀸𑀯𑁂𑀦. 𑀦𑀺𑀩𑁆𑀩𑀢𑁆𑀢𑀲𑀪𑀸𑀬𑀦𑁆𑀢𑀺 𑀲𑀫𑀼𑀝𑁆𑀞𑀺𑀢𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁. 𑀫𑀡𑀺𑀫𑀬𑀸𑀢𑀺 𑀧𑀤𑀼𑀫𑀭𑀸𑀕𑀸𑀤𑀺𑀫𑀡𑀺𑀫𑀬𑀸. 𑀆𑀡𑀺𑀬𑁄𑀢𑀺 𑀣𑀫𑁆𑀪𑀢𑀼𑀮𑀸𑀲𑀗𑁆𑀖𑀸𑀝𑀓𑀸𑀤𑀻𑀲𑀼 𑀯𑀸𑀴𑀭𑀽𑀧𑀸𑀤𑀺𑀲𑀗𑁆𑀖𑀸𑀝𑀦𑀓𑀆𑀡𑀺𑀬𑁄.

𑀕𑀦𑁆𑀥𑀩𑁆𑀩𑀭𑀸𑀚𑀸𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸𑀦𑀁 𑀤𑁂𑀯𑀢𑀸𑀦𑀁 𑀭𑀸𑀚𑀸. 𑀬𑁂 𑀢𑀸𑀯𑀢𑀺𑀁𑀲𑀸𑀦𑀁 𑀆𑀲𑀦𑁆𑀦𑀯𑀸𑀲𑀺𑀦𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸, 𑀢𑁂 𑀧𑀼𑀭𑀢𑁄 𑀓𑀭𑁄𑀦𑁆𑀢𑁄 ‘‘𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄. 𑀲𑁂𑀲𑁂𑀲𑀼𑀧𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄.

𑀦𑀸𑀕𑀭𑀸𑀚𑀸𑀢𑀺 𑀦𑀸𑀕𑀸𑀦𑀁 𑀅𑀥𑀺𑀧𑀢𑀺, 𑀦 𑀧𑀦 𑀲𑀬𑀁 𑀦𑀸𑀕𑀚𑀸𑀢𑀺𑀓𑁄.

𑀆𑀲𑀢𑀺 𑀦𑀺𑀲𑀻𑀤𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁, 𑀦𑀺𑀲𑀚𑁆𑀚𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀦𑀺𑀲𑀻𑀤𑀺𑀢𑀼𑀁 𑀑𑀓𑀸𑀲𑁄’’𑀢𑀺. ‘‘𑀏𑀢𑁆𑀣𑀸’’𑀢𑀺 𑀧𑀤𑀁 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀢𑁆𑀣𑀸𑀢𑀺 𑀯𑀸 𑀏𑀢𑀲𑁆𑀫𑀺𑀁 𑀧𑀸𑀞𑁂. 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀯𑀢𑁆𑀢𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀫𑁂𑀯. 𑀢𑀸𑀯𑀢𑀺𑀁𑀲𑀸, 𑀏𑀓𑀘𑁆𑀘𑁂 𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀬𑀣𑀸𑀮𑀤𑁆𑀥𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀣𑀸𑀯𑀭𑀪𑀸𑀯𑀸𑀬, 𑀆𑀬𑀢𑀺𑀁 𑀲𑁄𑀥𑀦𑀸𑀬 𑀘 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑀺, 𑀢𑁂 𑀢𑀲𑁆𑀲 𑀯𑀺𑀲𑁄𑀥𑀦𑀢𑁆𑀣𑀁 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀸𑀧𑀯𑀸𑀭𑀡𑀸𑀬𑀸’’𑀢𑀺𑀆𑀤𑀺.

𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀫𑀦𑀼𑀲𑁆𑀲𑀕𑀡𑀦𑀸𑀬 𑀯𑀲𑁆𑀲𑀲𑀳𑀲𑁆𑀲𑀁.

𑀧𑀦𑁆𑀦𑀧𑀮𑀸𑀲𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀔𑀸𑀭𑀓𑀚𑀸𑀢𑁄𑀢𑀺 𑀚𑀸𑀢𑀔𑀼𑀤𑁆𑀤𑀓𑀫𑀓𑀼𑀴𑁄. 𑀬𑁂 𑀳𑀺 𑀦𑀻𑀮𑀧𑀢𑁆𑀢𑀓𑀸 𑀅𑀢𑀺𑀯𑀺𑀬 𑀔𑀼𑀤𑁆𑀤𑀓𑀸 𑀫𑀓𑀼𑀴𑀸, 𑀢𑁂 ‘‘𑀔𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀚𑀸𑀮𑀓𑀚𑀸𑀢𑁄𑀢𑀺 𑀢𑁂𑀳𑀺𑀬𑁂𑀯 𑀔𑀼𑀤𑁆𑀤𑀓𑀫𑀓𑀼𑀴𑁂𑀳𑀺 𑀚𑀸𑀢𑀚𑀸𑀮𑀓𑁄 𑀲𑀩𑁆𑀩𑀲𑁄 𑀚𑀸𑀮𑁄 𑀯𑀺𑀬 𑀚𑀸𑀢𑁄. 𑀓𑁂𑀘𑀺 𑀧𑀦 ‘‘𑀚𑀸𑀮𑀓𑀚𑀸𑀢𑁄𑀢𑀺 𑀏𑀓𑀚𑀸𑀮𑁄 𑀯𑀺𑀬 𑀚𑀸𑀢𑁄’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀧𑀸𑀭𑀺𑀙𑀢𑁆𑀢𑀓𑁄 𑀓𑀺𑀭 𑀔𑀸𑀭𑀓𑀕𑁆𑀕𑀳𑀡𑀓𑀸𑀮𑁂 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀮𑁆𑀮𑀯𑀺𑀓𑁄 𑀳𑁄𑀢𑀺, 𑀢𑁂 𑀘𑀲𑁆𑀲 𑀧𑀮𑁆𑀮𑀯𑀸 𑀧𑀪𑀲𑁆𑀲𑀭𑀧𑀯𑀸𑀴𑀯𑀡𑁆𑀡𑀲𑀫𑀼𑀚𑁆𑀚𑀮𑀸 𑀳𑁄𑀦𑁆𑀢𑀺, 𑀢𑁂𑀦 𑀲𑁄 𑀲𑀩𑁆𑀩𑀲𑁄 𑀲𑀫𑀼𑀚𑁆𑀚𑀮𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀓𑀼𑀝𑀼𑀫𑀮𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀫𑀳𑀸𑀫𑀓𑀼𑀴𑁄. 𑀓𑁄𑀭𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀲𑀽𑀘𑀺𑀪𑁂𑀤𑁄 𑀲𑀫𑁆𑀧𑀢𑀺 𑀯𑀺𑀓𑀲𑀫𑀸𑀦𑀸𑀯𑀢𑁆𑀣𑁄. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀲𑀩𑁆𑀩𑀲𑁄 𑀨𑀼𑀮𑁆𑀮𑀺𑀢𑀯𑀺𑀓𑀲𑀺𑀢𑁄.

𑀓𑀦𑁆𑀢𑀦𑀓𑀯𑀸𑀢𑁄𑀢𑀺 𑀤𑁂𑀯𑀸𑀦𑀁 𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀸 𑀧𑀼𑀧𑁆𑀨𑀸𑀦𑀁 𑀙𑀺𑀦𑁆𑀤𑀦𑀓𑀯𑀸𑀢𑁄. 𑀓𑀦𑁆𑀢𑀢𑀻𑀢𑀺 𑀙𑀺𑀦𑁆𑀤𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀓𑀯𑀸𑀢𑁄𑀢𑀺 𑀙𑀺𑀦𑁆𑀦𑀸𑀦𑀁 𑀙𑀺𑀦𑁆𑀦𑀸𑀦𑀁 𑀧𑀼𑀧𑁆𑀨𑀸𑀦𑀁 𑀲𑀫𑁆𑀧𑀝𑀺𑀕𑁆𑀕𑀡𑁆𑀳𑀦𑀓𑀯𑀸𑀢𑁄. 𑀦𑀘𑁆𑀘𑀦𑁆𑀢𑁄𑀢𑀺 𑀦𑀸𑀦𑀸𑀯𑀺𑀥𑀪𑀢𑁆𑀢𑀺𑀁 𑀲𑀦𑁆𑀦𑀺𑀯𑁂𑀲𑀯𑀲𑁂𑀦 𑀦𑀘𑁆𑀘𑀦𑀁 𑀓𑀭𑁄𑀦𑁆𑀢𑁄. 𑀅𑀜𑁆𑀜𑀢𑀭𑀤𑁂𑀯𑀢𑀸𑀦𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑁆𑀧𑀜𑁆𑀜𑀸𑀢𑀤𑁂𑀯𑀢𑀸𑀦𑀁.

𑀭𑁂𑀡𑀼𑀯𑀝𑁆𑀝𑀻𑀢𑀺 𑀭𑁂𑀡𑀼𑀲𑀗𑁆𑀖𑀸𑀢𑁄. 𑀓𑀡𑁆𑀡𑀺𑀓𑀁 𑀆𑀳𑀘𑁆𑀘𑀸𑀢𑀺 𑀲𑀼𑀥𑀫𑁆𑀫𑀸𑀬 𑀓𑀽𑀝𑀁 𑀆𑀳𑀦𑁆𑀢𑁆𑀯𑀸.

𑀅𑀝𑁆𑀞 𑀤𑀺𑀯𑀲𑁂𑀢𑀺 𑀧𑀜𑁆𑀘𑀫𑀺𑀬𑀸 𑀲𑀤𑁆𑀥𑀺𑀁 𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 𑀤𑀺𑀯𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀩𑀤𑁆𑀥𑀁 𑀢𑀤𑀸 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀅𑀜𑁆𑀜𑀤𑀸 𑀓𑀸𑀭𑀺𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀓𑀸𑀮𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑀺𑀢’’𑀦𑁆𑀢𑀺. 𑀘𑁂𑀢𑀺𑀬𑁂 𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀓𑀸𑀢𑀩𑁆𑀩𑀯𑁂𑀤𑀺𑀓𑀸 𑀙𑀢𑁆𑀢𑀯𑁂𑀤𑀺𑀓𑀸. 𑀘𑁂𑀢𑀺𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀓𑀭𑀡𑀝𑁆𑀞𑀸𑀦𑀁 𑀅𑀦𑁆𑀢𑁄𑀓𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀤𑀺𑀓𑀸 𑀧𑀼𑀝𑀯𑁂𑀤𑀺𑀓𑀸. 𑀘𑁂𑀢𑀺𑀬𑀲𑁆𑀲 𑀓𑀼𑀘𑁆𑀙𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀫𑁆𑀩𑀦𑁆𑀥𑀫𑁂𑀯 𑀓𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀤𑀺𑀓𑀸 𑀓𑀼𑀘𑁆𑀙𑀺𑀯𑁂𑀤𑀺𑀓𑀸. 𑀲𑀻𑀳𑀭𑀽𑀧𑀧𑀸𑀤𑀓𑀁 𑀆𑀲𑀦𑀁 𑀲𑀻𑀳𑀸𑀲𑀦𑀁. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀻𑀳𑀭𑀽𑀧𑀬𑀼𑀢𑁆𑀢𑀁 𑀲𑁄𑀧𑀸𑀦𑀁 𑀲𑀻𑀳𑀲𑁄𑀧𑀸𑀦𑀁.

𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀅𑀦𑀺𑀬𑀸𑀫𑀦𑀓𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀫𑀳𑀸𑀧𑀼𑀜𑁆𑀜𑁂 𑀧𑀼𑀭𑀓𑁆𑀔𑀢𑁆𑀯𑀸’’𑀢𑀺𑀆𑀤𑀺. 𑀧𑀯𑀸𑀭𑀡𑀸𑀲𑀗𑁆𑀕𑀳𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀯𑀸𑀭𑀡𑀸𑀬 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁪) 𑀯𑀘𑀦𑀢𑁄.

𑁨𑁯𑁫. 𑀦𑀯𑀳𑀺 𑀓𑀸𑀭𑀡𑁂𑀳𑀻𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫) 𑀯𑀼𑀢𑁆𑀢𑁂𑀳𑀺 𑀅𑀭𑀳𑀢𑁆𑀢𑀸𑀤𑀻𑀳𑀺 𑀦𑀯𑀳𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀤𑀻𑀧𑀦𑁂𑀳𑀺 𑀓𑀸𑀭𑀡𑁂𑀳𑀺. 𑀥𑀫𑁆𑀫𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀪𑁂𑀤𑀁 𑀲𑀗𑁆𑀖𑀲𑁆𑀲 𑀘 𑀲𑀼𑀧𑁆𑀧𑀝𑀺𑀧𑀢𑁆𑀢𑀺’’𑀦𑁆𑀢𑀺 𑀆𑀳.

𑀅𑀝𑁆𑀞𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀦𑀸

𑁨𑁯𑁬. 𑀬𑀣𑀸 𑀅𑀦𑀦𑁆𑀢𑀫𑁂𑀯 𑀆𑀦𑀜𑁆𑀘𑀁, 𑀪𑀺𑀲𑀓𑁆𑀓𑀫𑁂𑀯 𑀪𑁂𑀲𑀚𑁆𑀚𑀁, 𑀏𑀯𑀁 𑀬𑀣𑀸𑀪𑀽𑀢𑀸 𑀏𑀯 𑀬𑀣𑀸𑀪𑀼𑀘𑁆𑀘𑀸𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀣𑀸𑀪𑀼𑀘𑁆𑀘𑁂𑀢𑀺 𑀬𑀣𑀸𑀪𑀽𑀢𑁂’’𑀢𑀺. 𑀯𑀡𑁆𑀡𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀯𑀡𑁆𑀡𑀸, 𑀕𑀼𑀡𑀸. 𑀓𑀣𑀁 𑀧𑀝𑀺𑀧𑀦𑁆𑀦𑁄𑀢𑀺 𑀳𑁂𑀢𑀼𑀅𑀯𑀢𑁆𑀣𑀸𑀬𑀁, 𑀨𑀮𑀅𑀯𑀢𑁆𑀣𑀸𑀬𑀁, 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸 𑀯𑀢𑁆𑀣𑀸𑀬𑀦𑁆𑀢𑀺 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀮𑁄𑀓𑀦𑀸𑀣𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀢𑀣𑀸 𑀳𑀺 𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀦𑀻𑀳𑀭𑀫𑀸𑀦𑁄𑀢𑀺 𑀅𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁄. 𑀬𑀁 𑀧𑀦𑁂𑀢𑁆𑀣 𑀫𑀳𑀸𑀪𑀺𑀦𑀻𑀳𑀸𑀭𑁂, 𑀧𑀸𑀭𑀫𑀻𑀲𑀼 𑀘 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁭) 𑀯𑀼𑀢𑁆𑀢𑀁 𑀏𑀯𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

‘‘𑀔𑀦𑁆𑀢𑀺𑀯𑀸𑀤𑀺𑀢𑀸𑀧𑀲𑀓𑀸𑀮𑁂’’𑀢𑀺𑀆𑀤𑀺 (𑀚𑀸. 𑁧.𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓) 𑀳𑁂𑀢𑀼𑀅𑀯𑀢𑁆𑀣𑀸𑀬𑀫𑁂𑀯 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀲𑀼𑀤𑀼𑀓𑁆𑀓𑀭𑀸𑀬 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀁. 𑀬𑀣𑀸𑀥𑀺𑀧𑁆𑀧𑁂𑀢𑀁 𑀳𑀺𑀢𑀲𑀼𑀔𑀁 𑀬𑀸𑀬 𑀓𑀺𑀭𑀺𑀬𑀸𑀬 𑀯𑀺𑀦𑀸 𑀦 𑀇𑀚𑁆𑀛𑀢𑀺, 𑀲𑀸𑀧𑀺 𑀢𑀤𑀢𑁆𑀣𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀲𑀺𑀢𑀧𑀼𑀭𑁂 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸𑀤𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁩.𑁩𑁦) 𑀧𑀦 𑀦𑀺𑀩𑁆𑀩𑀢𑁆𑀢𑀺𑀢𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺. 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀫𑁆𑀧𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀢𑀺𑀝𑁆𑀞𑀸𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀬𑀸𑀯𑀲𑁆𑀲𑀸’’𑀢𑀺𑀆𑀤𑀺. 𑀲𑁂𑀲𑀧𑀤𑀸𑀦𑀻𑀢𑀺 ‘‘𑀩𑀳𑀼𑀚𑀦𑀲𑀼𑀔𑀸𑀬𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺. 𑀧𑀘𑁆𑀙𑀺𑀫𑀦𑁆𑀢𑀺 ‘‘𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀧𑀤𑀢𑁆𑀢𑀬𑀁. 𑀧𑀼𑀭𑀺𑀫𑀲𑁆𑀲𑀸𑀢𑀺 𑀢𑀢𑁄 𑀧𑀼𑀭𑀺𑀫𑀲𑁆𑀲 𑀧𑀤𑀢𑁆𑀢𑀬𑀲𑁆𑀲. 𑀅𑀢𑁆𑀣𑁄𑀢𑀺 𑀅𑀢𑁆𑀣𑀦𑀺𑀤𑁆𑀤𑁂𑀲𑁄.

𑀬𑀤𑀺𑀧𑀺 𑀅𑀢𑀻𑀢𑁂𑀦𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀣𑀸𑀭𑁄 𑀅𑀳𑁂𑀲𑀼𑀁, 𑀢𑁂𑀧𑀺 𑀧𑀦 𑀩𑀼𑀤𑁆𑀥𑀸 𑀏𑀯𑀸𑀢𑀺 𑀅𑀢𑁆𑀣𑀢𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀦𑀜𑁆𑀜𑁄𑀢𑀺 𑀆𑀳 ‘‘𑀅𑀢𑀻𑀢𑁂𑀧𑀺 𑀩𑀼𑀤𑁆𑀥𑀢𑁄 𑀅𑀜𑁆𑀜𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀸’’𑀢𑀺. 𑀬𑀣𑀸 𑀘 𑀅𑀢𑀻𑀢𑁂, 𑀏𑀯𑀁 𑀅𑀦𑀸𑀕𑀢𑁂 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀦𑀬𑀢𑁄 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀢𑁂𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀸’’𑀢𑀺. 𑀲𑀓𑁆𑀓𑁄 𑀧𑀦 𑀤𑁂𑀯𑀭𑀸𑀚𑀸 𑀢𑀫𑀢𑁆𑀣𑀁 𑀅𑀢𑁆𑀣𑀸𑀧𑀦𑁆𑀦𑀫𑁂𑀯 𑀓𑀢𑁆𑀯𑀸 ‘‘𑀦 𑀧𑀦𑁂𑀢𑀭𑀳𑀺’’ 𑀇𑀘𑁆𑀘𑁂𑀯𑀸𑀳. 𑀓𑀺𑀁 𑀲𑀓𑁆𑀓𑁄 𑀓𑀣𑁂𑀢𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸𑀢𑀺 ‘‘𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀫𑀸’𑀢𑀺 𑀯𑀤𑀦𑁆𑀢𑁄 𑀲𑀓𑁆𑀓𑁄 𑀓𑀺𑀁 𑀓𑀣𑁂𑀢𑀻’’𑀢𑀺 𑀯𑀺𑀘𑀸𑀭𑀡𑀁 𑀲𑀫𑀼𑀝𑁆𑀞𑀧𑁂𑀢𑁆𑀯𑀸. 𑀬𑀲𑁆𑀫𑀸 𑀅𑀢𑀻𑀢𑁂 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁, 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦𑀸𑀬𑀫𑀢𑁆𑀣𑁄 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀧𑀭𑀺𑀜𑁆𑀜𑀸𑀢𑁄, 𑀢𑁂 𑀧𑀦 𑀩𑀼𑀤𑁆𑀥𑀲𑀸𑀫𑀜𑁆𑀜𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀢𑀭𑀳𑀺 𑀅𑀜𑁆𑀜𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑀭𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁆𑀯𑀸𑀓𑁆𑀔𑀸𑀢𑀸𑀤𑀻𑀦𑀻𑀢𑀺 𑀲𑁆𑀯𑀸𑀓𑁆𑀔𑀸𑀢𑀧𑀤𑀸𑀤𑀻𑀦𑀺. 𑀓𑀼𑀲𑀮𑀸𑀤𑀻𑀦𑀻𑀢𑀺 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺.

𑀕𑀗𑁆𑀕𑀸𑀬𑀫𑀼𑀦𑀸𑀦𑀁 𑀅𑀲𑀫𑀸𑀕𑀫𑀝𑁆𑀞𑀸𑀦𑁂 𑀉𑀤𑀓𑀁 𑀪𑀺𑀦𑁆𑀦𑀯𑀡𑁆𑀡𑀁 𑀳𑁄𑀦𑁆𑀢𑀫𑁆𑀧𑀺 𑀲𑀫𑀸𑀕𑀫𑀝𑁆𑀞𑀸𑀦𑁂 𑀅𑀪𑀺𑀦𑁆𑀦𑀯𑀡𑁆𑀡𑀁 𑀏𑀯𑀸𑀢𑀺 𑀆𑀳 ‘‘𑀯𑀡𑁆𑀡𑁂𑀦𑀧𑀺 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻’’𑀢𑀺. 𑀢𑀢𑁆𑀣 𑀓𑀺𑀭 𑀕𑀗𑁆𑀕𑁄𑀤𑀓𑀲𑀤𑀺𑀲𑀫𑁂𑀯 𑀬𑀫𑀼𑀦𑁄𑀤𑀓𑀁. 𑀬𑀣𑀸 𑀦𑀺𑀩𑁆𑀩𑀸𑀦𑀁 𑀓𑁂𑀦𑀘𑀺 𑀓𑀺𑀮𑁂𑀲𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀧𑀭𑀺𑀲𑀼𑀤𑁆𑀥𑀁, 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀧𑀺 𑀓𑁂𑀦𑀘𑀺 𑀓𑀺𑀮𑁂𑀲𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀯 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀬𑁂𑀦 𑀧𑀭𑀺𑀲𑀼𑀤𑁆𑀥𑀢𑁆𑀣𑁂𑀦 𑀦𑀺𑀩𑁆𑀩𑀸𑀦𑀲𑁆𑀲, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀘 𑀆𑀓𑀸𑀲𑀽𑀧𑀫𑀢𑀸, 𑀲𑁄 𑀓𑁂𑀦𑀘𑀺 𑀅𑀦𑀼𑀧𑀮𑁂𑀧𑁄, 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀘𑀸𑀢𑀺 𑀆𑀳 ‘‘𑀆𑀓𑀸𑀲𑀫𑁆𑀧𑀺 𑀅𑀮𑀕𑁆𑀕𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀁𑀲𑀦𑁆𑀤𑀢𑀺 𑀬𑀼𑀚𑁆𑀚𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀧𑀝𑀺𑀧𑀚𑁆𑀚𑀦𑁂𑀳𑀺 𑀅𑀜𑁆𑀜𑀫𑀜𑁆𑀜𑀸𑀦𑀼𑀘𑁆𑀙𑀯𑀺𑀓𑀢𑀸𑀬.

𑀧𑀝𑀺𑀧𑀤𑀸𑀬 𑀞𑀺𑀢𑀸𑀦𑀦𑁆𑀢𑀺 𑀧𑀝𑀺𑀧𑀤𑀁 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑀸𑀦𑀁. 𑀯𑀼𑀲𑀺𑀢𑀯𑀢𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀼𑀲𑀺𑀢𑀯𑀦𑁆𑀢𑀸𑀦𑀁 𑀏𑀢𑁂𑀲𑀁. 𑀮𑀤𑁆𑀥𑀲𑀳𑀸𑀬𑁄𑀢𑀺 𑀏𑀢𑀸𑀲𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀮𑀤𑁆𑀥𑀲𑀳𑀸𑀬𑁄. 𑀢𑀢𑁆𑀣 𑀢𑀢𑁆𑀣 𑀲𑀸𑀯𑀓𑁂𑀳𑀺 𑀲𑀢𑁆𑀣𑀼 𑀓𑀸𑀢𑀩𑁆𑀩𑀓𑀺𑀘𑁆𑀘𑁂. 𑀇𑀤𑀁 𑀧𑀦 ‘‘𑀅𑀤𑀼𑀢𑀺𑀬𑁄’’𑀢𑀺𑀆𑀤𑀺 𑀲𑀼𑀢𑁆𑀢𑀦𑁆𑀢𑀭𑁂 𑀆𑀕𑀢𑀯𑀘𑀦𑀁 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀝𑁆𑀞𑁂𑀦 𑀯𑀼𑀢𑁆𑀢𑀁, 𑀦 𑀬𑀣𑀸𑀯𑀼𑀢𑁆𑀢𑀲𑀳𑀸𑀬𑀸𑀪𑀸𑀯𑀢𑁄. 𑀅𑀧𑀦𑀼𑀚𑁆𑀚𑀸𑀢𑀺 𑀅𑀧𑀦𑀻𑀬 𑀯𑀺𑀯𑀚𑁆𑀚𑁂𑀢𑁆𑀯𑀸. ‘‘𑀅𑀧𑀦𑀼𑀚𑁆𑀚𑀸’’𑀢𑀺 𑀘 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁 𑀇𑀤𑀁 𑀯𑀘𑀦𑀁 𑀏𑀓𑀦𑁆𑀢𑀺𑀓𑀢𑁆𑀢𑀸 𑀢𑀲𑁆𑀲 𑀅𑀧𑀦𑁄𑀤𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀧𑀦𑀼𑀚𑁆𑀚𑁂𑀯𑀸’’𑀢𑀺.

𑀮𑀩𑁆𑀪𑀢𑀻𑀢𑀺 𑀮𑀸𑀪𑁄, 𑀲𑁄 𑀧𑀦 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀲𑀸𑀢𑀺𑀲𑀬𑁄, 𑀯𑀺𑀧𑀼𑀮𑁄 𑀏𑀯 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀫𑀳𑀸𑀮𑀸𑀪𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀦𑀺𑀲𑁆𑀲𑀦𑁆𑀤𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀁 𑀲𑀫𑁆𑀪𑀢𑀲𑀼𑀯𑀺𑀧𑀼𑀮𑀉𑀴𑀸𑀭𑀢𑀭𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀢𑁄 𑀦𑀺𑀩𑁆𑀩𑀢𑁆𑀢𑁄.‘‘𑀇𑀫𑁂 𑀦𑀺𑀩𑁆𑀩𑀢𑁆𑀢𑀸, 𑀇𑀢𑁄 𑀧𑀭𑀁 𑀫𑀬𑁆𑀳𑀁 𑀑𑀓𑀸𑀲𑁄 𑀦𑀢𑁆𑀣𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀯𑀺𑀬 𑀉𑀧𑀭𑀽𑀧𑀭𑀺 𑀯𑀟𑁆𑀠𑀫𑀸𑀦𑁄 𑀉𑀤𑀧𑀸𑀤𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀳𑀺 𑀬𑀫𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀸𑀫𑁂𑀖𑀁 𑀯𑀺𑀬 𑀲𑀩𑁆𑀩𑀧𑀸𑀭𑀫𑀺𑀬𑁄 ‘‘𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀪𑀕𑀯𑀢𑁄 𑀇𑀤𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼, 𑀢𑀢𑁄 𑀅𑀦𑁆𑀦𑀧𑀸𑀦𑀯𑀢𑁆𑀣𑀬𑀸𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀉𑀧𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄, 𑀓𑀳𑀁 𑀦𑀭𑀸𑀲𑀪𑁄, 𑀓𑀳𑀁 𑀧𑀼𑀭𑀺𑀲𑀲𑀻𑀳𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀲𑀓𑀝𑀲𑀢𑁂𑀳𑀺𑀧𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀫𑁆𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬. 𑀲𑀩𑁆𑀩𑀁 𑀔𑀦𑁆𑀥𑀓𑁂, 𑀢𑁂𑀲𑀼 𑀢𑁂𑀲𑀼 𑀘 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑁄𑀖𑁄 𑀯𑀺𑀬𑀸’’𑀢𑀺𑀆𑀤𑀺.

𑀧𑀝𑀺𑀧𑀸𑀝𑀺𑀪𑀢𑁆𑀢𑀦𑁆𑀢𑀺 𑀩𑀳𑀽𑀲𑀼 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀝𑀧𑀝𑀺𑀧𑀸𑀝𑀺𑀓𑀸𑀬 𑀉𑀝𑁆𑀞𑀺𑀢𑁂𑀲𑀼 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀤𑀸𑀢𑀩𑁆𑀩 𑀪𑀢𑁆𑀢𑀁.

𑀫𑀢𑁆𑀣𑀓𑀁 𑀧𑀢𑁆𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀢𑀲𑁆𑀲 𑀤𑀸𑀦𑀲𑁆𑀲. 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺 𑀦𑀸𑀕𑀭𑀸𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁂𑀦 𑀤𑀸𑀦𑀁 𑀤𑀸𑀧𑁂𑀢𑀼𑀁. 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑀸 𑀭𑀸𑀚𑀧𑀭𑀺𑀕𑁆𑀕𑀳𑀸 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸, 𑀢𑀲𑁆𑀫𑀸 𑀢𑁂𑀲𑀁 𑀧𑀤𑀭𑁂𑀳𑀺 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄, 𑀳𑀢𑁆𑀣𑀺𑀦𑁄 𑀘 𑀭𑀸𑀚𑀪𑀡𑁆𑀟𑀪𑀽𑀢𑀸 𑀦𑀸𑀕𑀭𑁂𑀳𑀺 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺 𑀢𑁂𑀳𑀺 𑀙𑀢𑁆𑀢𑀁 𑀥𑀸𑀭𑀸𑀧𑀺𑀢𑀁, 𑀢𑀣𑀸 𑀔𑀢𑁆𑀢𑀺𑀬𑀥𑀻𑀢𑀸𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀭𑀺𑀢𑀁. ‘‘𑀧𑀜𑁆𑀘 𑀆𑀲𑀦𑀲𑀢𑀸𑀦𑀻’’𑀢𑀺 𑀇𑀤𑀁 𑀲𑀸𑀮𑀓𑀮𑁆𑀬𑀸𑀡𑀺𑀫𑀡𑁆𑀟𑀧𑁂 𑀧𑀜𑁆𑀜𑀢𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀢𑁄 𑀩𑀳𑀺 𑀧𑀦 𑀩𑀳𑀽𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀁 𑀧𑀺𑀲𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀽𑀚𑀦𑀢𑁆𑀣𑀜𑁆𑀘𑁂𑀯 𑀧𑀢𑁆𑀢𑀲𑁆𑀲 𑀉𑀩𑁆𑀩𑀝𑀦𑀢𑁆𑀣𑀜𑁆𑀘. 𑀉𑀤𑀓𑀦𑁆𑀢𑀺 𑀧𑀢𑁆𑀢𑀥𑁄𑀯𑀦𑀉𑀤𑀓𑀁. 𑀅𑀦𑀕𑁆𑀖𑀸𑀦𑀺 𑀅𑀳𑁂𑀲𑀼𑀁 𑀅𑀦𑀕𑁆𑀖𑀭𑀢𑀦𑀸𑀪𑀺𑀲𑀗𑁆𑀔𑀢𑀢𑁆𑀢𑀸.

𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀺 𑀅𑀦𑀸𑀤𑀭𑀓𑀸𑀭𑀡𑀸𑀤𑀺𑀦𑀸. 𑀓𑀸𑀴𑀁 𑀑𑀮𑁄𑀓𑁂𑀲𑁆𑀲𑀸𑀫𑀻𑀢𑀺 𑀓𑀸𑀴𑀁 𑀏𑀯𑀁 𑀅𑀦𑀼𑀧𑁂𑀓𑁆𑀔𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀁 𑀅𑀦𑀢𑁆𑀣𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀓𑀤𑀭𑀺𑀬𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀦𑁄 𑀧𑀼𑀜𑁆𑀜𑀓𑀫𑁆𑀫𑀯𑀺𑀫𑀼𑀔𑀸. 𑀤𑁂𑀯𑀮𑁄𑀓𑀁 𑀦 𑀯𑀚𑀦𑁆𑀢𑀺 𑀧𑀼𑀜𑁆𑀜𑀲𑁆𑀲 𑀅𑀓𑀢𑀢𑁆𑀢𑀸, 𑀫𑀘𑁆𑀙𑀭𑀺𑀪𑀸𑀯𑁂𑀦 𑀘 𑀧𑀸𑀧𑀲𑁆𑀲 𑀧𑀲𑀼𑀢𑀢𑁆𑀢𑀸. 𑀩𑀸𑀮𑀸𑀢𑀺 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀦𑀸𑀤𑀺𑀦𑀸 𑀩𑀸𑀮𑀮𑀓𑁆𑀔𑀡𑀬𑀼𑀢𑁆𑀢𑀸. 𑀦𑀧𑁆𑀧𑀲𑀁𑀲𑀦𑁆𑀢𑀺 𑀤𑀸𑀦𑀁 𑀧𑀲𑀁𑀲𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀦𑁆𑀢𑀺. 𑀥𑀻𑀭𑁄𑀢𑀺 𑀥𑀻𑀢𑀺𑀲𑀫𑁆𑀧𑀦𑁆𑀦𑁄 𑀉𑀴𑀸𑀭𑀧𑀜𑁆𑀜𑁄 𑀧𑀭𑁂𑀳𑀺 𑀓𑀢𑀁 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄𑀧𑀺, 𑀢𑁂𑀦𑁂𑀯 𑀤𑀸𑀦𑀸𑀦𑀼𑀫𑁄𑀤𑀦𑁂𑀦𑁂𑀯. 𑀲𑀼𑀔𑀻 𑀧𑀭𑀢𑁆𑀣𑀸𑀢𑀺 𑀧𑀭𑀮𑁄𑀓𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀲𑀫𑀗𑁆𑀕𑀻 𑀳𑁄𑀢𑀺.

𑀯𑀭𑀭𑁄𑀚𑁄 𑀦𑀸𑀫 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀔𑀢𑁆𑀢𑀺𑀬𑁄, 𑀢𑀲𑁆𑀲 𑀯𑀭𑀭𑁄𑀚𑀲𑁆𑀲. 𑀅𑀦𑀯𑀚𑁆𑀚…𑀧𑁂… 𑀨𑀮𑁂𑀬𑁆𑀬 𑀅𑀪𑀽𑀢𑀯𑀸𑀤𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑀺𑀭𑁂𑀓𑀧𑀤𑀲𑀳𑀲𑁆𑀲𑁂𑀦 𑀢𑀺𑀁𑀲𑀸𑀥𑀺𑀓𑁂𑀦 𑀅𑀟𑁆𑀠𑀢𑁂𑀬𑁆𑀬𑀕𑀸𑀣𑀸𑀲𑀢𑁂𑀦 𑀯𑀡𑁆𑀡𑀫𑁂𑀯 𑀓𑀣𑁂𑀲𑀺 𑀭𑀽𑀧𑀧𑁆𑀧𑀲𑀦𑁆𑀦𑀢𑀸𑀬 𑀘.

𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀬𑀸𑀯𑀸𑀢𑀺 𑀅𑀯𑀥𑀺𑀧𑀭𑀺𑀘𑁆𑀙𑁂𑀤𑀯𑀘𑀦𑀁, 𑀅𑀜𑁆𑀜𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀸𑀯 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑁂 𑀅𑀯𑀥𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺. 𑀫𑀤𑀧𑀫𑀢𑁆𑀢𑁄𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀫𑀤𑁂𑀦 𑀧𑀫𑀢𑁆𑀢𑁄 𑀘𑁂𑀯 𑀢𑀤𑀦𑁆𑀯𑀬𑁂𑀦 𑀧𑀫𑀸𑀤𑁂𑀦 𑀧𑀫𑀢𑁆𑀢𑁄 𑀘 𑀳𑀼𑀢𑁆𑀯𑀸.

𑀢𑀤𑀦𑁆𑀯𑀬𑀫𑁂𑀯𑀸𑀢𑀺 𑀢𑀤𑀦𑀼𑀕𑀢𑀫𑁂𑀯. 𑀯𑀸𑀘𑀸…𑀧𑁂… 𑀲𑀫𑁂𑀢𑀻𑀢𑀺 𑀯𑀘𑀻𑀓𑀫𑁆𑀫𑀓𑀸𑀬𑀓𑀫𑁆𑀫𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀭𑀼𑀤𑁆𑀥𑀸𑀦𑀺, 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀦𑁆𑀢𑀺. 𑀅𑀚𑀸 𑀏𑀯 𑀫𑀺𑀕𑀸𑀢𑀺 𑀅𑀚𑀸𑀫𑀺𑀕𑀸, 𑀢𑁂 𑀅𑀚𑀸𑀫𑀺𑀕𑁂.

𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑀩𑁆𑀩𑀲𑁄 𑀅𑀢𑀺𑀓𑁆𑀓𑀦𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀓𑀦𑁆𑀢𑀸𑀭𑁄. 𑀦𑀦𑀼 𑀘 𑀲𑀩𑁆𑀩𑁂𑀧𑀺 𑀲𑁄𑀢𑀸𑀧𑀦𑁆𑀦𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸, 𑀯𑀺𑀕𑀢𑀓𑀣𑀁𑀓𑀣𑀸 𑀘? 𑀲𑀘𑁆𑀘𑀫𑁂𑀢𑀁, 𑀇𑀤𑀁 𑀧𑀦 𑀦 𑀢𑀸𑀤𑀺𑀲𑀁 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑀩𑁆𑀩𑀲𑁆𑀫𑀺𑀁 𑀜𑁂𑀬𑁆𑀬𑀥𑀫𑁆𑀫𑁂 𑀲𑀩𑁆𑀩𑀸𑀓𑀸𑀭𑀸𑀯𑀩𑁄𑀥𑀲𑀗𑁆𑀔𑀸𑀢𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀲𑀩𑁆𑀩𑀲𑁄 𑀦𑀺𑀭𑀸𑀓𑀢𑀁 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺 𑀆𑀤𑀺𑀫𑀸𑀳. 𑀉𑀲𑁆𑀲𑀦𑁆𑀦𑀼𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀧𑀭𑁄𑀧𑀭𑀪𑀸𑀯𑀢𑁄, 𑀅𑀬𑀜𑁆𑀘 𑀅𑀢𑁆𑀣𑁄 𑀪𑀕𑀯𑀢𑁄 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀩𑀮𑁂𑀦𑀧𑀺 𑀇𑀚𑁆𑀛𑀢𑀺. 𑀲𑀩𑁆𑀩𑀢𑁆𑀣 𑀯𑀺𑀕𑀢𑀓𑀣𑀁𑀓𑀣𑁄 𑀲𑀩𑁆𑀩𑀤𑀲𑁆𑀲𑀸𑀯𑀺𑀪𑀸𑀯𑀢𑁄. 𑀲𑀩𑁆𑀩𑁂𑀲𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀲𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑁄𑀳𑀸𑀭𑀯𑀲𑁂𑀦𑀸’’𑀢𑀺 𑀯𑀸 𑀦𑀸𑀫𑀕𑁄𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀲𑀩𑁆𑀩𑀲𑁄 𑀦𑀺𑀝𑁆𑀞𑀺𑀢𑀫𑀦𑁄𑀭𑀣𑁄. 𑀦𑀦𑀼 𑀘 𑀅𑀭𑀺𑀬𑀫𑀕𑁆𑀕𑁂𑀦 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀢𑀸 𑀦𑀸𑀫 𑀲𑁄𑀴𑀲𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀓𑀢𑀓𑀭𑀡𑀻𑀬𑀪𑀸𑀯𑁂𑀦, 𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀯𑀩𑁄𑀥𑁂𑀦𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽’’𑀢𑀺𑀆𑀤𑀺. 𑀲𑀸𑀯𑀓𑀸𑀦𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀯𑀺𑀬, 𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀯𑀺𑀬 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀧𑀼𑀩𑁆𑀩𑀓𑀫𑁂𑀯𑀸𑀢𑀺. 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 𑀦 𑀅𑀦𑀼𑀲𑁆𑀲𑀼𑀢𑁂𑀲𑀼. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀧𑀭𑀢𑁄 𑀖𑁄𑀲𑁂𑀦 𑀯𑀺𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁄 𑀘 𑀅𑀕𑁆𑀕𑀫𑀕𑁆𑀕𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀦𑁆𑀢𑀺 𑀤𑀲𑀦𑁆𑀦𑀁 𑀩𑀮𑀜𑀸𑀡𑀸𑀦𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺. 𑀚𑀸𑀢𑀢𑁆𑀢𑀸 𑀚𑀸𑀢𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀯𑀤𑀢𑀺.

𑁨𑁯𑁭. 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀥𑀸𑀦𑀺𑀆𑀤𑀺𑀓𑁂 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑁄. 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀬𑀣𑀸𑀓𑀸𑀮𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄.

𑁨𑁯𑁮. 𑀅𑀲𑁆𑀲𑀸𑀢𑀺 𑀨𑀮𑀲𑁆𑀲. 𑀢𑀦𑁆𑀢𑀺 𑀓𑀸𑀭𑀡𑀁. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦𑀢𑁆𑀣𑀺, 𑀧𑀕𑁂𑀯 𑀢𑀺𑀡𑁆𑀡𑀁, 𑀘𑀢𑀼𑀦𑁆𑀦𑀁 𑀯𑀸𑀢𑀺. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑀮𑁄𑀓𑀥𑀸𑀢𑀼𑀬𑀸 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁.

𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑁂𑀦 𑀞𑀸𑀦𑁂𑀦. 𑀧𑀭𑀺𑀳𑀭𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀤𑀺𑀲𑀸𑀢𑀺 𑀤𑀺𑀲𑀸𑀲𑀼, 𑀪𑀼𑀫𑁆𑀫𑀢𑁆𑀣𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀪𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀺. 𑀯𑀺𑀭𑁄𑀘𑀦𑀸𑀢𑀺 𑀑𑀪𑀸𑀲𑀦𑁆𑀢𑀸, 𑀯𑀺𑀭𑁄𑀘𑀦𑀸 𑀯𑀸 𑀲𑁄𑀪𑀫𑀸𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀪𑀦𑁆𑀢𑀺, 𑀢𑀢𑁄 𑀏𑀯 𑀤𑀺𑀲𑀸 𑀘 𑀪𑀦𑁆𑀢𑀺.𑀢𑀸𑀯 𑀲𑀳𑀲𑁆𑀲𑀥𑀸𑀢𑀺 𑀢𑀢𑁆𑀢𑀓𑁄 𑀲𑀳𑀲𑁆𑀲𑀮𑁄𑀓𑁄.

𑀏𑀢𑁆𑀢𑀓𑀦𑁆𑀢𑀺 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀇𑀫𑀺𑀦𑀸𑀯 𑀲𑀤𑁆𑀥𑀺𑀁 𑀘𑀓𑁆𑀓𑀯𑀸𑀴𑀁 𑀤𑀲𑀲𑀳𑀲𑁆𑀲𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀧𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀦𑀸𑀕𑀢𑀢𑁆𑀢𑀸.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀯𑀡𑁆𑀡𑁂𑀦𑀸𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸. 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀬𑀲𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀫𑀸𑀳. 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑁂𑀦𑀸𑀢𑀺 𑀅𑀮𑀗𑁆𑀓𑀸𑀭𑁂𑀦 𑀘 𑀧𑀭𑀺𑀯𑀸𑀭𑁂𑀦 𑀘. 𑀧𑀼𑀜𑁆𑀜𑀲𑀺𑀭𑀺𑀬𑀸𑀢𑀺 𑀧𑀼𑀜𑁆𑀜𑀺𑀤𑁆𑀥𑀺𑀬𑀸.

𑁩𑁦𑁧. 𑀲𑀫𑁆𑀧𑀲𑀸𑀤𑀦𑁂𑀢𑀺 𑀲𑀫𑁆𑀧𑀲𑀸𑀤𑀚𑀦𑀦𑁂. 𑀲𑀁𑀧𑀼𑀩𑁆𑀩𑁄 𑀔𑀸-𑀲𑀤𑁆𑀤𑁄 𑀚𑀸𑀦𑀦𑀢𑁆𑀣𑁄 ‘‘𑀲𑀗𑁆𑀔𑀸𑀬𑁂𑀢𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁬𑁮) 𑀯𑀺𑀬𑀸𑀢𑀺 𑀆𑀳 ‘‘𑀚𑀸𑀦𑀺𑀢𑁆𑀯𑀸 𑀫𑁄𑀤𑀸𑀫𑀸’’𑀢𑀺.

𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁦𑁪. 𑀬𑀸𑀯 𑀤𑀻𑀖𑀭𑀢𑁆𑀢𑀦𑁆𑀢𑀺 𑀬𑀸𑀯 𑀧𑀭𑀺𑀫𑀸𑀡𑀢𑁄, 𑀅𑀧𑀭𑀺𑀫𑀺𑀢𑀓𑀸𑀮𑀧𑀭𑀺𑀤𑀻𑀧𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀢𑀓𑀦𑁆𑀢𑀺…𑀧𑁂… 𑀅𑀢𑀺𑀘𑀺𑀭𑀭𑀢𑁆𑀢’’𑀦𑁆𑀢𑀺. 𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸𑀢𑀺 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀯𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸. 𑀦𑁄𑀢𑀺 𑀓𑀣𑀁 𑀢𑀼𑀫𑁆𑀳𑁂 𑀫𑀜𑁆𑀜𑀣𑀸’’𑀢𑀺 𑀆𑀳. 𑀲𑀬𑀫𑁂𑀯𑁂𑀢𑀁 𑀧𑀜𑁆𑀳𑀁 𑀩𑁆𑀬𑀸𑀓𑀸𑀢𑀼𑀓𑀸𑀫𑁄 ‘‘𑀪𑀽𑀢𑀧𑀼𑀩𑁆𑀩𑀁 𑀪𑁄’’𑀢𑀺 𑀆𑀤𑀺𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀧𑀦 𑀩𑁆𑀬𑀸𑀓𑀭𑁄𑀦𑁆𑀢𑁂𑀦 𑀅𑀢𑁆𑀣𑀢𑁄 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀘𑁆𑀙𑀭𑀺𑀬𑀫𑁂𑀢’’𑀦𑁆𑀢𑀺 𑀆𑀤𑀺𑀫𑀸𑀳. 𑀢𑀺𑀡𑁆𑀡𑀁 𑀫𑀸𑀭𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁. ‘‘𑀅𑀦𑀘𑁆𑀙𑀭𑀺𑀬𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 ‘‘𑀓𑀺𑀫𑁂𑀢𑁆𑀣 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀧𑀼𑀦𑀧𑀺 𑀯𑀼𑀢𑁆𑀢𑀁.

𑀭𑀜𑁆𑀜𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀅𑀢𑁆𑀣𑀸𑀦𑀁 𑀧𑀼𑀭𑁄 𑀥𑀸𑀦𑀢𑁄 𑀧𑀼𑀭𑁂 𑀧𑀼𑀭𑁂 𑀲𑀁𑀯𑀺𑀥𑀸𑀦𑀢𑁄 𑀧𑀼𑀭𑁄𑀳𑀺𑀢𑁄𑀢𑀺 𑀆𑀳 ‘‘𑀲𑀩𑁆𑀩𑀓𑀺𑀘𑁆𑀘𑀸𑀦𑀺𑀅𑀦𑀼𑀲𑀸𑀲𑀦𑀧𑀼𑀭𑁄𑀳𑀺𑀢𑁄’’𑀢𑀺. 𑀕𑁄𑀯𑀺𑀦𑁆𑀤𑀺𑀬𑀸𑀪𑀺𑀲𑁂𑀓𑁂𑀦𑀸𑀢𑀺 𑀕𑁄𑀯𑀺𑀦𑁆𑀤𑀲𑁆𑀲 𑀞𑀸𑀦𑁂 𑀞𑀧𑀦𑀸𑀪𑀺𑀲𑁂𑀓𑁂𑀦. 𑀢𑀁 𑀓𑀺𑀭 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑀧𑀭𑀫𑁆𑀧𑀭𑀸𑀕𑀢𑀁 𑀞𑀸𑀦𑀦𑁆𑀢𑀭𑀁. 𑀚𑁄𑀢𑀺𑀢𑀢𑁆𑀢𑀸𑀢𑀺 𑀆𑀯𑀼𑀥𑀸𑀦𑀁 𑀚𑁄𑀢𑀺𑀢𑀢𑁆𑀢𑀸. 𑀧𑀸𑀮𑀦𑀲𑀫𑀢𑁆𑀣𑀢𑀸𑀬𑀸𑀢𑀺 𑀭𑀜𑁆𑀜𑁄, 𑀅𑀧𑀭𑀺𑀫𑀺𑀢𑀲𑁆𑀲 𑀘 𑀲𑀢𑁆𑀢𑀓𑀸𑀬𑀲𑁆𑀲 𑀅𑀦𑀢𑁆𑀣𑀢𑁄 𑀧𑀭𑀺𑀧𑀸𑀮𑀦𑀲𑀫𑀢𑁆𑀣𑀢𑀸𑀬.

𑀲𑀫𑁆𑀫𑀸 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀲𑁆𑀲𑁂𑀯𑀸𑀕𑀸𑀭𑀯𑀪𑀸𑀯𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸. 𑀢𑀁 𑀢𑀫𑀢𑁆𑀣𑀁 𑀓𑀺𑀘𑁆𑀘𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑀤𑀲𑁄.

𑁩𑁦𑁫. 𑀪𑀯𑀦𑀁 𑀯𑀟𑁆𑀠𑀦𑀁 𑀪𑀯𑁄, 𑀪𑀯𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀪𑀯𑁄, 𑀯𑀟𑁆𑀠𑀺𑀓𑀸𑀭𑀡𑀁 𑀲𑀦𑁆𑀥𑀺𑀯𑀲𑁂𑀦 𑀫-𑀓𑀸𑀭𑀸𑀕𑀫𑁄, 𑀑-𑀓𑀸𑀭𑀲𑁆𑀲 𑀘 𑀅-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀪𑀯𑀫𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀦𑁆𑀢𑀺 𑀧𑀦 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀪𑁄𑀢𑁄’’𑀢𑀺. 𑀫𑀸 𑀧𑀘𑁆𑀘𑀩𑁆𑀬𑀸𑀳𑀸𑀲𑀻𑀢𑀺 𑀫𑀸 𑀧𑀝𑀺𑀓𑁆𑀔𑀺𑀧𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀧𑀝𑀺𑀓𑁆𑀔𑁂𑀧𑁄 𑀧𑀝𑀺𑀯𑀘𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀫𑀸 𑀧𑀝𑀺𑀩𑁆𑀬𑀸𑀳𑀸𑀲𑀻’’𑀢𑀺. 𑀅𑀪𑀺𑀲𑀫𑁆𑀪𑁄𑀲𑀻𑀢𑀺 𑀓𑀫𑁆𑀫𑀦𑁆𑀢𑀸𑀦𑀁 𑀲𑀁𑀯𑀺𑀥𑀸𑀦𑁂 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀁𑀯𑀺𑀤𑀳𑀺𑀢𑁆𑀯𑀸’’𑀢𑀺. 𑀪𑀯𑀸𑀪𑀯𑀁, 𑀧𑀜𑁆𑀜𑀜𑁆𑀘 𑀯𑀺𑀦𑁆𑀤𑀺 𑀧𑀝𑀺𑀮𑀪𑀻𑀢𑀺 𑀕𑁄𑀯𑀺𑀦𑁆𑀤𑁄, 𑀫𑀳𑀦𑁆𑀢𑁄 𑀕𑁄𑀯𑀺𑀦𑁆𑀤𑁄 𑀫𑀳𑀸𑀕𑁄𑀯𑀺𑀦𑁆𑀤𑁄. ‘‘𑀕𑁄’’𑀢𑀺 𑀳𑀺 𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁 𑀕𑀘𑁆𑀙𑀢𑀺 𑀅𑀢𑁆𑀣𑁂 𑀩𑀼𑀚𑁆𑀛𑀢𑀻𑀢𑀺.

𑀭𑀚𑁆𑀚𑀲𑀁𑀯𑀺𑀪𑀚𑀦𑀯𑀡𑁆𑀡𑀦𑀸

𑁩𑁦𑁬. 𑀏𑀓𑀧𑀺𑀢𑀺𑀓𑀸 𑀯𑁂𑀫𑀸𑀢𑀼𑀓𑀸 𑀓𑀦𑀺𑀝𑁆𑀞𑀪𑀸𑀢𑀭𑁄. 𑀅𑀬𑀁 𑀅𑀪𑀺𑀲𑀺𑀢𑁆𑀢𑁄𑀢𑀺 𑀅𑀬𑀁 𑀭𑁂𑀡𑀼 𑀭𑀸𑀚𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑁄. 𑀭𑀸𑀚𑀓𑀸𑀭𑀓𑀸𑀢𑀺 𑀭𑀸𑀚𑀧𑀼𑀢𑁆𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑀸𑀭𑁄.

𑁩𑁦𑁭. 𑀫𑀤𑁂𑀦𑁆𑀢𑀻𑀢𑀺 𑀫𑀤𑀦𑀻𑀬𑀸𑀢𑀺 𑀓𑀢𑁆𑀢𑀼𑀲𑀸𑀥𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀤𑀓𑀭𑀸’’𑀢𑀺 𑀆𑀳. 𑀫𑀤𑀓𑀭𑀡𑀁 𑀧𑀦 𑀧𑀫𑀸𑀤𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀫𑀸𑀤𑀓𑀭𑀸’’𑀢𑀺.

𑁩𑁦𑁮. 𑀭𑁂𑀡𑀼𑀲𑁆𑀲 𑀭𑀚𑁆𑀚𑀲𑀫𑀻𑀧𑁂 𑀤𑀲𑀕𑀸𑀯𑀼𑀢𑀫𑀢𑁆𑀢𑀯𑀺𑀢𑁆𑀣𑀢𑀸𑀦𑀺 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀺𑀬𑁄𑀚𑀦𑀲𑀢𑀁 𑀯𑀺𑀢𑁆𑀣𑀢𑀢𑁆𑀢𑀸 𑀲𑀩𑁆𑀩𑀸𑀦𑀺 𑀙 𑀭𑀚𑁆𑀚𑀸𑀦𑀺 𑀲𑀓𑀝𑀫𑀼𑀔𑀸𑀦𑀺 𑀧𑀝𑁆𑀞𑀧𑁂𑀲𑀺. 𑀯𑀺𑀢𑀸𑀦𑀲𑀤𑀺𑀲𑀁 𑀘𑀢𑀼𑀭𑀲𑁆𑀲𑀪𑀸𑀯𑀢𑁄.

𑁩𑁧𑁦. 𑀲𑀳𑀸𑀢𑀺 𑀕𑀸𑀣𑀸𑀬 𑀧𑀤𑀧𑀭𑀺𑀧𑀽𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦𑁂𑀯 𑀲𑀳𑀸’’𑀢𑀺 𑀆𑀳. 𑀲𑀳𑀸𑀢𑀺 𑀯𑀸 𑀅𑀯𑀺𑀦𑀸𑀪𑀸𑀯𑀢𑁆𑀣𑁂 𑀦𑀺𑀧𑀸𑀢𑁄, 𑀲𑁄 𑀲𑀳 𑀆𑀲𑀼𑀁 𑀲𑀢𑁆𑀢 𑀪𑀸𑀭𑀥𑀸𑀢𑀺 𑀬𑁄𑀚𑁂𑀢𑀩𑁆𑀩𑁄, 𑀢𑁂𑀦 𑀢𑁂 𑀤𑁂𑀲𑀦𑁆𑀢𑀭𑁂 𑀯𑀲𑀦𑁆𑀢𑀸 𑀯𑀺𑀘𑀺𑀢𑁆𑀢𑁂𑀦 𑀲𑀳𑀪𑀸𑀯𑀺𑀦𑁄 𑀅𑀯𑀺𑀦𑀸𑀪𑀸𑀯𑀺𑀦𑁄𑀢𑀺 𑀤𑀻𑀧𑁂𑀢𑀺. 𑀭𑀚𑁆𑀚𑀪𑀸𑀭𑀁 𑀥𑀸𑀭𑁂𑀦𑁆𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀦𑁆𑀢𑀺 𑀯𑀳𑀦𑁆𑀢𑀻𑀢𑀺 𑀪𑀸𑀭𑀥𑀸.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀢𑁆𑀢𑀺𑀲𑀤𑁆𑀤𑀅𑀩𑁆𑀪𑀼𑀕𑁆𑀕𑀫𑀦𑀯𑀡𑁆𑀡𑀦𑀸

𑁩𑁧𑁧. 𑀅𑀦𑀼𑀧𑀼𑀭𑁄𑀳𑀺𑀢𑁂 𑀞𑀧𑁂𑀲𑀻𑀢𑀺 𑀅𑀦𑀼𑀧𑀼𑀭𑁄𑀳𑀺𑀢𑁂 𑀓𑀢𑁆𑀯𑀸 𑀞𑀧𑁂𑀲𑀺, 𑀅𑀦𑀼𑀧𑀼𑀭𑁄𑀳𑀺𑀢𑁂 𑀯𑀸 𑀞𑀸𑀦𑁂 𑀞𑀧𑁂𑀲𑀺. 𑀢𑀺𑀲𑀯𑀦𑀁 𑀓𑀭𑁄𑀦𑁆𑀢𑁂 𑀲𑀦𑁆𑀥𑀸𑀬 ‘‘𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼 𑀲𑀦𑁆𑀥𑀻𑀲𑀼 𑀲𑀯𑀦𑀁 𑀓𑀭𑁄𑀦𑁆𑀢𑁂 𑀲𑀦𑁆𑀥𑀸𑀬 ‘‘𑀲𑀸𑀬𑀁, 𑀧𑀸𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀢𑀘𑀭𑀺𑀬𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀦𑁆𑀳𑀸𑀢𑀓𑀸𑀮𑀢𑁄 𑀧𑀪𑀼𑀢𑀺.

𑁩𑁧𑁨. 𑀅𑀪𑀺𑀉𑀕𑁆𑀕𑀘𑁆𑀙𑀻𑀢𑀺 𑀉𑀝𑁆𑀞𑀳𑀺 𑀉𑀤𑀧𑀸𑀤𑀺. 𑀅𑀘𑀺𑀦𑁆𑀢𑁂𑀢𑁆𑀯𑀸𑀢𑀺 ‘‘𑀓𑀣𑀁 𑀔𑁄 𑀅𑀳𑀁 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀬𑁆𑀬’’𑀦𑁆𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀁 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀢𑁂𑀦 𑀲𑀫𑀸𑀕𑀫𑀦𑀲𑁆𑀲𑁂𑀯 𑀅𑀪𑀸𑀯𑀢𑁄 𑀅𑀫𑀦𑁆𑀢𑁂𑀢𑁆𑀯𑀸. 𑀢𑀁 𑀤𑀺𑀲𑁆𑀯𑀸𑀢𑀺 𑀢𑀁 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀩𑁆𑀭𑀳𑁆𑀫𑀤𑀲𑁆𑀲𑀦𑀽𑀧𑀸𑀬𑀁 𑀤𑀺𑀲𑁆𑀯𑀸 𑀜𑀸𑀡𑀘𑀓𑁆𑀔𑀼𑀦𑀸.

𑁩𑁧𑁩. 𑀏𑀯𑀦𑁆𑀢𑀺 𑀏𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀁 𑀉𑀧𑀕𑀢𑁂. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀦𑀸𑀝𑀓𑀲𑀢𑀸𑀦𑀁, 𑀘𑀢𑁆𑀢𑀸𑀭𑀻𑀲𑀸𑀬 𑀘 𑀪𑀭𑀺𑀬𑀸𑀦𑀁 𑀆𑀧𑀼𑀘𑁆𑀙𑀦𑀯𑀸𑀭𑁂𑀲𑀼.

𑁩𑁧𑁬. 𑀲𑀸𑀤𑀺𑀲𑀺𑀬𑁄𑀢𑀺 𑀚𑀸𑀢𑀺𑀬𑀸 𑀲𑀸𑀤𑀺𑀲𑀺𑀬𑁄𑀢𑀺 𑀆𑀳 ‘‘𑀲𑀫𑀯𑀡𑁆𑀡𑀸 𑀲𑀫𑀚𑀸𑀢𑀺𑀓𑀸’’𑀢𑀺.

𑁩𑁧𑁭. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀛𑀸𑀦𑀫𑀦𑀲𑀺𑀓𑀸𑀭𑁂𑀦 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑀯𑀽𑀧𑀲𑀫𑀦𑁂𑀦 𑀘𑀺𑀢𑁆𑀢𑀲𑁆𑀲 𑀲𑀦𑁆𑀣𑀫𑁆𑀪𑀦𑀁 𑀅𑀕𑀸𑀭𑀁, 𑀛𑀸𑀦𑀲𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀕𑀳𑀺𑀢𑀸𑀯𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀫𑀳𑀸𑀲𑀢𑁆𑀢𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀕𑀳𑀺𑀢𑀸 𑀏𑀯. 𑀦𑀢𑁆𑀣𑀺 𑀛𑀸𑀦𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀳𑀺𑀲𑁆𑀲 𑀓𑀭𑀼𑀡𑀸𑀬 𑀪𑀸𑀯𑀺𑀢𑀢𑁆𑀢𑀸 𑀅𑀦𑀪𑀺𑀭𑀢𑀺 𑀉𑀓𑁆𑀓𑀡𑁆𑀞𑀦𑀸 𑀦𑀢𑁆𑀣𑀺, 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀪𑀬𑀧𑀭𑀺𑀢𑀲𑁆𑀲𑀦𑀸 𑀦𑀢𑁆𑀣𑀺. 𑀉𑀓𑁆𑀓𑀡𑁆𑀞𑀦𑀸𑀢𑀺 𑀧𑀦 𑀩𑁆𑀭𑀳𑁆𑀫𑀤𑀲𑁆𑀲𑀦𑁂 𑀉𑀲𑁆𑀲𑀼𑀓𑁆𑀓𑀁, 𑀧𑀭𑀺𑀢𑀲𑁆𑀲𑀦𑀸𑀢𑀺 𑀢𑀤𑀪𑀺𑀧𑀢𑁆𑀣𑀦𑀸𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀼𑀦𑁄 𑀧𑀦𑀸’’𑀢𑀺𑀆𑀤𑀺.

𑀩𑁆𑀭𑀳𑁆𑀫𑀼𑀦𑀸𑀲𑀸𑀓𑀘𑁆𑀙𑀸𑀯𑀡𑁆𑀡𑀦𑀸

𑁩𑁧𑁮. 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀢𑀺 𑀘𑀺𑀢𑁆𑀢𑀲𑁆𑀲 𑀉𑀢𑁆𑀭𑀸𑀲𑀦𑀫𑀢𑁆𑀢𑀁. 𑀓𑀣𑀦𑁆𑀢𑀺 𑀲𑀢𑁆𑀢𑀦𑀺𑀓𑀸𑀬𑀦𑀺𑀯𑀸𑀲𑀝𑁆𑀞𑀸𑀦𑀦𑀸𑀫𑀕𑁄𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀓𑁂𑀦 𑀧𑀓𑀸𑀭𑁂𑀦. 𑀢𑁂𑀦𑀸𑀳 ‘‘𑀓𑀺’’𑀦𑁆𑀢𑀺𑀆𑀤𑀺.

𑀲𑁄𑀢𑀺 𑀬𑁂 𑀢𑁂 𑀧𑀦𑀓𑀦𑀲𑀦𑀦𑁆𑀢𑀩𑀦𑁆𑀥𑀲𑀢𑀦𑀲𑀦𑀗𑁆𑀓𑀼𑀫𑀸𑀭𑀓𑀸𑀮𑀦𑀸𑀫𑀓𑀸 𑀮𑁄𑀓𑁂 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸 𑀩𑁆𑀭𑀳𑁆𑀫𑀸𑀦𑁄, 𑀢𑁂𑀲𑀼 𑀲𑀦𑀗𑁆𑀓𑀼𑀫𑀸𑀭𑁄 𑀦𑀸𑀫𑀸𑀳𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀕𑁆𑀖𑀦𑁆𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀤𑀸𑀢𑀩𑁆𑀩𑀁𑀆𑀳𑀸𑀭𑀁. 𑀫𑀥𑀼𑀲𑀸𑀓𑀦𑁆𑀢𑀺 𑀫𑀥𑀼𑀭𑀸𑀳𑀸𑀭𑀁, 𑀬𑀁 𑀓𑀺𑀜𑁆𑀘𑀺 𑀅𑀢𑀺𑀣𑀺𑀦𑁄 𑀤𑀸𑀢𑀩𑁆𑀩𑀁 𑀆𑀳𑀸𑀭𑀁 𑀉𑀧𑀘𑀸𑀭𑀯𑀲𑁂𑀦 𑀏𑀯𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀫𑀥𑀼𑀲𑀸𑀓𑀁 𑀧𑀦𑀸’’𑀢𑀺𑀆𑀤𑀺. 𑀧𑀼𑀘𑁆𑀙𑀸𑀫𑀸𑀢𑀺 𑀦𑀺𑀫𑀦𑁆𑀢𑀦𑀯𑀲𑁂𑀦 𑀧𑀼𑀘𑁆𑀙𑀸𑀫.

𑁩𑁧𑁯. 𑀫𑀳𑀸𑀲𑀢𑁆𑀢𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀞𑀺𑀢𑁄𑀧𑀺 𑀢𑁂𑀲𑀼 ‘‘𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑁄’’𑀢𑀺 𑀅𑀦𑀺𑀩𑁆𑀩𑁂𑀫𑀢𑀺𑀓𑀢𑀸𑀬 ‘‘𑀓𑀗𑁆𑀔𑀻’’𑀢𑀺 𑀅𑀯𑁄𑀘. 𑀓𑁂𑀘𑀺 𑀧𑀦 ‘‘𑀢𑀧𑁄𑀓𑀫𑁆𑀫𑁂𑀦 𑀧𑀭𑀺𑀓𑁆𑀔𑀻𑀡𑀲𑀭𑀻𑀭𑀢𑀸𑀬, 𑀩𑁆𑀭𑀳𑁆𑀫𑀲𑀫𑀸𑀕𑀫𑁂𑀦 𑀪𑀬𑀸𑀤𑀺𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀝𑀺𑀮𑀤𑁆𑀥𑀫𑀢𑁆𑀢𑁂𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀳𑀺 𑀧𑀭𑀺𑀳𑀻𑀦𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀯𑀺𑀘𑀺𑀓𑀺𑀘𑁆𑀙𑀢𑀸𑀬 ‘𑀓𑀗𑁆𑀔𑀻’𑀢𑀺 𑀅𑀯𑁄𑀘𑀸’’𑀢𑀺 𑀯𑀤𑀦𑁆𑀢𑀺. 𑀧𑀭𑀲𑁆𑀲 𑀯𑁂𑀤𑀺𑀬𑀸 𑀯𑀺𑀤𑀺𑀢𑀸 𑀧𑀭𑀯𑁂𑀤𑀺𑀬𑀸, 𑀢𑁂 𑀧𑀦 𑀢𑀲𑁆𑀲 𑀧𑀸𑀓𑀝𑀸 𑀯𑀺𑀪𑀽𑀢𑀸𑀢𑀺 𑀆𑀳 ‘‘𑀧𑀭𑀲𑁆𑀲 𑀧𑀸𑀓𑀝𑁂𑀲𑀼 𑀧𑀭𑀯𑁂𑀤𑀺𑀬𑁂𑀲𑀽’’𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀭𑁂𑀦 𑀲𑀬𑀁 𑀅𑀪𑀺𑀲𑀗𑁆𑀔𑀢𑀢𑁆𑀢𑀸’’𑀢𑀺. 𑀫𑀫𑀸𑀢𑀺 𑀓𑀫𑁆𑀫𑀁 𑀫𑀫𑀁𑀓𑀸𑀭𑁄, 𑀫𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀫𑀫…𑀧𑁂… 𑀢𑀡𑁆𑀳’’𑀦𑁆𑀢𑀺. ‘‘𑀫𑀫’’𑀦𑁆𑀢𑀺 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀫𑀫𑀁𑀓𑀸𑀭𑁄, 𑀢𑀣𑀸𑀧𑀯𑀢𑁆𑀢𑀸 𑀢𑀡𑁆𑀳𑀸. 𑀫𑀦𑀼𑀚𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀆𑀳 ‘‘𑀫𑀦𑀼𑀚𑁂𑀲𑀼 𑀬𑁄 𑀓𑁄𑀘𑀻’’𑀢𑀺. ‘‘𑀏𑀓𑁄𑀤𑀺𑀪𑀽𑀢𑁄’’𑀢𑀺 𑀧𑀤𑀲𑁆𑀲 𑀪𑀸𑀯𑀢𑁆𑀣𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀻𑀪𑀽𑀢𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀏𑀓𑁄 𑀢𑀺𑀝𑁆𑀞𑀦𑁆𑀢𑁄 𑀏𑀓𑁄 𑀦𑀺𑀲𑀻𑀤𑀦𑁆𑀢𑁄’’𑀢𑀺 𑀆𑀳. 𑀢𑀸𑀤𑀺𑀲𑁄𑀢𑀺 𑀏𑀓𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀓𑁄. 𑀪𑀽𑀢𑁄𑀢𑀺 𑀚𑀸𑀢𑁄. 𑀛𑀸𑀦𑁂 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁂, 𑀅𑀦𑀺𑀩𑁆𑀩𑀢𑁆𑀢𑀺𑀢𑁂 𑀓𑀼𑀢𑁄 𑀅𑀥𑀺𑀫𑀼𑀢𑁆𑀢𑀻𑀢𑀺 𑀆𑀳 ‘‘𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀯𑀺𑀲𑁆𑀲𑀕𑀦𑁆𑀥𑁄 𑀦𑀸𑀫 𑀓𑁄𑀥𑀸𑀤𑀺𑀓𑀺𑀮𑁂𑀲𑀧𑀭𑀺𑀪𑀸𑀯𑀦𑀸𑀢𑀺 𑀢𑁂𑀲𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀺𑀲𑁆𑀲𑀕𑀦𑁆𑀥𑀯𑀺𑀭𑀳𑀺𑀢𑁄. 𑀏𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀧𑀩𑁆𑀩𑀚𑁆𑀚𑀸𑀦𑀁 𑀯𑀺𑀯𑁂𑀓𑀯𑀸𑀲𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀺𑀥𑀫𑁆𑀫𑁂𑀲𑀼.

𑁩𑁨𑁦. 𑀅𑀯𑀺𑀤𑁆𑀯𑀸𑀢𑀺 𑀦 𑀯𑀺𑀤𑀺𑀢𑀯𑀸. 𑀆𑀯𑀭𑀺𑀢𑀸𑀢𑀺 𑀓𑀼𑀲𑀮𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀆𑀯𑀭𑀺𑀢𑀸. 𑀧𑀽𑀢𑀺𑀓𑀸𑀢𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀢𑀸𑀤𑀺𑀦𑀸 𑀧𑀽𑀢𑀺𑀪𑀽𑀢𑀸. 𑀓𑀺𑀮𑁂𑀲𑀯𑀲𑁂𑀦 𑀤𑀼𑀕𑁆𑀕𑀦𑁆𑀥𑀁 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀢𑀺. 𑀦𑀺𑀭𑀬𑀸𑀤𑀺𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀲𑀻𑀮𑀢𑀸𑀬 𑀆𑀧𑀸𑀬𑀺𑀓𑀸𑀢𑀺 𑀆𑀳 ‘‘𑀅𑀧𑀸𑀬𑀽𑀧𑀕𑀸’’𑀢𑀺. 𑀘𑁄𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀲𑁆𑀲 𑀧𑀯𑀺𑀲𑀺𑀢𑀼𑀓𑀸𑀫𑀲𑁆𑀲 𑀧𑀸𑀓𑀸𑀭𑀓𑀯𑀸𑀝𑀧𑀭𑀺𑀔𑀸𑀤𑀻𑀳𑀺 𑀯𑀺𑀬 𑀦𑀕𑀭𑀁 𑀓𑁄𑀥𑀸𑀤𑀻𑀳𑀺 𑀦𑀺𑀯𑀼𑀢𑁄 𑀧𑀺𑀳𑀺𑀢𑁄 𑀩𑁆𑀭𑀳𑁆𑀫𑀮𑁄𑀓𑁄 𑀅𑀲𑁆𑀲𑀸𑀢𑀺 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑁄. 𑀧𑀼𑀘𑁆𑀙𑀢𑀺 ‘‘𑀓𑁂𑀦𑀸𑀯𑀝𑀸’’𑀢𑀺 𑀯𑀤𑀦𑁆𑀢𑁄.

𑀫𑀼𑀲𑀸𑀯𑀸𑀤𑁄𑀯 𑀫𑁄𑀲𑀯𑀚𑁆𑀚𑀁 𑀬𑀣𑀸 𑀪𑀺𑀲𑀓𑁆𑀓𑀫𑁂𑀯 𑀪𑁂𑀲𑀚𑁆𑀚𑀁. 𑀓𑀼𑀚𑁆𑀛𑀦𑀁 𑀤𑀼𑀲𑁆𑀲𑀦𑀁. 𑀤𑀺𑀝𑁆𑀞𑀸𑀤𑀻𑀲𑀼 𑀅𑀤𑀺𑀝𑁆𑀞𑀸𑀤𑀺𑀯𑀸𑀤𑀺𑀢𑀸𑀯𑀲𑁂𑀦 𑀧𑀭𑁂𑀲𑀁 𑀯𑀺𑀲𑀁𑀯𑀸𑀤𑀦𑀁 𑀧𑀭𑀯𑀺𑀲𑀁𑀯𑀸𑀤𑀦𑀁. 𑀲𑀤𑀺𑀲𑀁 𑀧𑀢𑀺𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑁄𑀪𑀦𑀁 𑀲𑀤𑀺𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀜𑁆𑀘𑀦𑀁. 𑀫𑀺𑀢𑁆𑀢𑀸𑀦𑀁 𑀯𑀺𑀳𑀺𑀁𑀲𑀦𑀁 𑀫𑁂𑀢𑁆𑀢𑀺𑀪𑁂𑀤𑁄 𑀫𑀺𑀢𑁆𑀢𑀤𑀼𑀩𑁆𑀪𑀦𑀁. 𑀤𑀴𑁆𑀳𑀫𑀘𑁆𑀙𑀭𑀺𑀢𑀸 𑀣𑀤𑁆𑀥𑀫𑀘𑁆𑀙𑀭𑀺𑀬𑀁. 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀦𑀺𑀳𑀻𑀦𑀢𑀁, 𑀲𑀤𑀺𑀲𑀢𑀁 𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀁. 𑀧𑀭𑁂𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 𑀅𑀲𑀳𑀦𑀁 𑀔𑀻𑀬𑀦𑀁. 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀕𑀽𑀳𑀦𑀯𑀲𑁂𑀦, 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑀯𑀲𑁂𑀦 𑀘 𑀯𑀺𑀯𑀺𑀥𑀸 𑀇𑀘𑁆𑀙𑀸 𑀭𑀼𑀘𑀺 𑀏𑀢𑀲𑁆𑀲𑀸𑀢𑀺 𑀯𑀺𑀯𑀺𑀘𑁆𑀙𑀸. 𑀓𑀤𑀭𑀺𑀬𑀢𑀸𑀬 𑀫𑀼𑀤𑀼𑀓𑀁 𑀫𑀘𑁆𑀙𑀭𑀺𑀬𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀲𑀓𑀲𑀦𑁆𑀢𑀓𑁂, 𑀧𑀭𑀲𑀦𑁆𑀢𑀓𑁂, 𑀳𑀻𑀦𑀸𑀢𑀺𑀓𑁂 𑀘𑀸𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂. 𑀮𑀼𑀩𑁆𑀪𑀦𑀁 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀁 𑀅𑀪𑀺𑀕𑀺𑀚𑁆𑀛𑀦𑀁. 𑀫𑀚𑁆𑀚𑀦𑀁 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀫𑀤𑀦𑀁 𑀲𑀫𑁆𑀧𑀕𑁆𑀕𑀳𑁄. 𑀫𑀼𑀬𑁆𑀳𑀦𑀁 𑀆𑀭𑀫𑁆𑀫𑀡𑀲𑁆𑀲 𑀅𑀦𑀯𑀩𑁄𑀥𑁄. 𑀏𑀢𑁂𑀲𑀽𑀢𑀺 𑀏𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀓𑁄𑀥𑀸𑀤𑀻𑀲𑀼 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀓𑀺𑀮𑀺𑀲𑁆𑀲𑀦𑀢𑁄 𑀯𑀺𑀩𑀸𑀥𑀦𑀢𑁄, 𑀉𑀧𑀢𑀸𑀧𑀦𑀢𑁄 𑀘 𑀓𑀺𑀮𑁂𑀲𑀲𑀜𑁆𑀜𑀺𑀢𑁂𑀲𑀼 𑀧𑀸𑀧𑀥𑀫𑁆𑀫𑁂𑀲𑀼. 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀭𑀳𑀺𑀢𑀸.

𑀏𑀢𑁆𑀣 𑀘𑀸𑀬𑀁 𑀩𑁆𑀭𑀳𑁆𑀫𑀸 𑀫𑀳𑀸𑀲𑀢𑁆𑀢𑁂𑀦 𑀆𑀫𑀕𑀦𑁆𑀥𑁂 𑀲𑀼𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀬𑀣𑀸𑀉𑀧𑀝𑁆𑀞𑀺𑀢𑁂 𑀧𑀸𑀧𑀥𑀫𑁆𑀫𑁂 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀲𑀺, 𑀢𑁂 𑀧𑀦 𑀢𑀸𑀤𑀺𑀲𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀸𑀧𑀺 𑀓𑁂𑀘𑀺 𑀧𑀼𑀦 𑀯𑀼𑀢𑁆𑀢𑀸, 𑀆𑀫𑀕𑀦𑁆𑀥𑀲𑀼𑀢𑁆𑀢𑁂 (𑀲𑀼. 𑀦𑀺. 𑁨𑁪𑁨) 𑀧𑀦 𑀯𑀼𑀢𑁆𑀢𑀸𑀧𑀺 𑀓𑁂𑀘𑀺 𑀇𑀥 𑀲𑀩𑁆𑀩𑀲𑁄 𑀦 𑀯𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦, 𑀢𑀤𑁂𑀓𑀝𑁆𑀞𑀢𑀸𑀬 𑀯𑀸 𑀢𑁂𑀲𑀁 𑀧𑁂𑀢𑁆𑀣 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀫𑀕𑀦𑁆𑀥𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑁆𑀯𑀸𑀢𑀺 𑀇𑀥 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑁂 𑀆𑀫𑀕𑀦𑁆𑀥𑁂𑀧𑀺 𑀯𑀼𑀢𑁆𑀢𑁂𑀳𑀺 𑀏𑀓𑀮𑀓𑁆𑀔𑀡𑀢𑀸𑀤𑀺𑀦𑀸 𑀆𑀫𑀕𑀦𑁆𑀥𑀲𑀼𑀢𑁆𑀢𑁂𑀦 𑀧𑀓𑀸𑀲𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁 𑀢𑀢𑁆𑀣 𑀦𑁂𑀲𑀁 𑀲𑀭𑀽𑀧𑀢𑁄 𑀓𑀣𑀺𑀢𑀢𑁆𑀢𑀸. 𑀆𑀫𑀕𑀦𑁆𑀥𑀲𑀼𑀢𑁆𑀢𑀫𑁆𑀧𑀺 𑀇𑀫𑀺𑀦𑀸 𑀤𑀻𑀧𑁂𑀢𑀩𑁆𑀩𑀁 𑀇𑀥 𑀯𑀼𑀢𑁆𑀢𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀆𑀫𑀕𑀦𑁆𑀥𑀸𑀦𑀁 𑀢𑀢𑁆𑀣 𑀅𑀯𑀼𑀢𑁆𑀢𑀪𑀸𑀯𑀢𑁄. 𑀬𑀲𑁆𑀫𑀸 𑀆𑀫𑀕𑀦𑁆𑀥𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀧𑀺 𑀆𑀫𑀕𑀦𑁆𑀥𑀸 𑀅𑀢𑁆𑀣𑀢𑁄 𑀇𑀥 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑁂 𑀧𑀭𑀺𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁂𑀦 𑀬𑀲𑁆𑀫𑀸 𑀘𑁂𑀢𑁆𑀣 𑀓𑁂𑀘𑀺 𑀅𑀪𑀺𑀥𑀫𑁆𑀫𑀦𑀬𑁂𑀦 𑀅𑀓𑀺𑀮𑁂𑀲𑀲𑀪𑀸𑀯𑀸𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀩𑀸𑀥𑀦𑀝𑁆𑀞𑁂𑀦 ‘‘𑀓𑀺𑀮𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀘𑀼𑀤𑁆𑀤𑀲𑀲𑀼 𑀓𑀺𑀮𑁂𑀲𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀦𑀺𑀫𑁆𑀫𑀸𑀤𑀁 𑀫𑀺𑀮𑀸𑀧𑀦𑀁 𑀔𑁂𑀧𑀦𑀦𑁆𑀢𑀺 𑀆𑀳 ‘‘𑀦𑀺𑀫𑁆𑀫𑀸𑀤𑁂𑀢𑀩𑁆𑀩𑀸 𑀧𑀳𑀸𑀢𑀩𑁆𑀩𑀸’’𑀢𑀺. 𑀩𑀼𑀤𑁆𑀥𑀢𑀦𑁆𑀢𑀻𑀢𑀺 𑀩𑀼𑀤𑁆𑀥𑀪𑀸𑀯𑀻𑀦𑀁 𑀧𑀯𑁂𑀡𑀻, 𑀩𑀼𑀤𑁆𑀥𑀪𑀸𑀯𑀺𑀦𑁄𑀧𑀺 ‘‘𑀩𑀼𑀤𑁆𑀥𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀬𑀣𑀸 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀯𑀸.

𑀭𑁂𑀡𑀼𑀭𑀸𑀚𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁧. 𑀫𑀫 𑀫𑀦𑀁 𑀳𑀭𑀺𑀢𑁆𑀯𑀸𑀢𑀺 𑀫𑀫 𑀘𑀺𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀅𑀯𑀢𑁆𑀢𑀺𑀢𑁆𑀯𑀸.

𑀏𑀓𑀻𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀯𑀼𑀢𑁆𑀣𑀲𑁆𑀲𑀸𑀢𑀺 𑀓𑀸𑀬𑀯𑀺𑀯𑁂𑀓𑀧𑀭𑀺𑀩𑁆𑀭𑀽𑀳𑀦𑁂𑀦 𑀏𑀓𑀻𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀢𑀧𑁄𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀣𑀲𑁆𑀲. 𑀓𑀼𑀲𑀧𑀢𑁆𑀢𑁂𑀳𑀺 𑀧𑀭𑀺𑀢𑁆𑀣𑀢𑁄𑀢𑀺 𑀩𑀭𑀺𑀳𑀺𑀲𑁂𑀳𑀺 𑀯𑁂𑀤𑀺𑀬𑀸 𑀲𑀫𑀦𑁆𑀢𑀢𑁄 𑀲𑀦𑁆𑀣𑀭𑀺𑀢𑁄. 𑀅𑀓𑀸𑀘𑁄𑀢𑀺 𑀯𑀡𑁄 𑀯𑀡𑀲𑀤𑀺𑀲𑀔𑀡𑁆𑀟𑀺𑀘𑁆𑀘𑀯𑀺𑀭𑀳𑀺𑀢𑁄. 𑀢𑁂𑀦𑀸𑀳 ‘‘𑀅𑀓𑀓𑁆𑀓𑀲𑁄’’𑀢𑀺.

𑀙𑀔𑀢𑁆𑀢𑀺𑀬𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁨. 𑀲𑀺𑀓𑁆𑀔𑁂𑀬𑁆𑀬𑀸𑀫𑀸𑀢𑀺 𑀲𑀺𑀓𑁆𑀔𑀸𑀧𑁂𑀬𑁆𑀬𑀸𑀫, 𑀲𑀺𑀓𑁆𑀔𑀸𑀧𑀦𑀜𑁆𑀘𑁂𑀢𑁆𑀣 𑀅𑀢𑁆𑀣𑀺𑀪𑀸𑀯𑀸𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀉𑀧𑀮𑀸𑀧𑁂𑀬𑁆𑀬𑀸𑀫𑀸’’𑀢𑀺.

𑁩𑁨𑁩. 𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲, 𑀔𑀦𑁆𑀢𑀺𑀩𑀮𑀲𑁆𑀲 𑀘 𑀅𑀪𑀸𑀯𑁂𑀦 𑀧𑀩𑁆𑀩𑀚𑀺𑀢𑀸𑀦𑀁 𑀲𑀫𑀡𑀥𑀫𑁆𑀫𑁄 𑀧𑀭𑀺𑀧𑀼𑀡𑁆𑀡𑁄, 𑀧𑀭𑀺𑀲𑀼𑀤𑁆𑀥𑁄 𑀘 𑀦 𑀳𑁄𑀢𑀺, 𑀢𑁂𑀲𑀼 𑀯𑀻𑀭𑀺𑀬𑀸𑀭𑀫𑁆𑀪𑀔𑀦𑁆𑀢𑀺𑀩𑀮𑁂𑀲𑀼 𑀢𑁂 𑀢𑁂 𑀦𑀺𑀬𑁄𑀚𑁂𑀢𑀼𑀁 ‘‘𑀆𑀭𑀫𑁆𑀪𑀯𑁆𑀳𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀭𑀼𑀡𑀸𑀛𑀸𑀦𑀫𑀕𑁆𑀕𑁄𑀢𑀺 𑀓𑀭𑀼𑀡𑀸𑀛𑀸𑀦𑀲𑀗𑁆𑀔𑀸𑀢𑁄 𑀫𑀕𑁆𑀕𑁄. 𑀉𑀚𑀼𑀫𑀕𑁆𑀕𑁄𑀢𑀺 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑁂 𑀉𑀚𑀼𑀪𑀽𑀢𑁄 𑀫𑀕𑁆𑀕𑁄. 𑀅𑀦𑀼𑀢𑁆𑀢𑀭𑁄𑀢𑀺 𑀲𑁂𑀝𑁆𑀞𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀫𑀕𑁆𑀕𑁄 𑀦𑀸𑀫𑀸’’𑀢𑀺. 𑀲𑀩𑁆𑀪𑀺 𑀭𑀓𑁆𑀔𑀺𑀢𑁄 𑀲𑀸𑀥𑀽𑀳𑀺 𑀬𑀣𑀸 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀺, 𑀏𑀯𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀓𑀭𑀡𑁂𑀦 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄. ‘‘𑀲𑀤𑁆𑀥𑀫𑁆𑀫𑁄 𑀲𑀩𑁆𑀪𑀺 𑀯𑀓𑁆𑀔𑀺𑀢𑁄’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀧𑀭𑀳𑀺𑀢𑀲𑀸𑀥𑀦𑁂𑀦 𑀲𑀸𑀥𑀽𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀣𑀺𑀢𑁄 𑀧𑀯𑁂𑀤𑀺𑀢𑁄𑀢𑀺 𑀅𑀢𑁆𑀣𑁄.

𑀢𑀗𑁆𑀔𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀦𑁆𑀢𑀺 𑀬𑀲𑁆𑀫𑀺𑀁 𑀔𑀡𑁂 𑀯𑀺𑀭𑁄𑀥𑀺𑀥𑀫𑁆𑀫𑀲𑀫𑀸𑀬𑁄𑀕𑁄, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀯𑀺𑀦𑀲𑁆𑀲𑀦𑀲𑀪𑀸𑀯𑀁, 𑀬𑁄 𑀯𑀸 𑀲𑁄 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺, 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀫𑀸𑀕𑀫𑀦𑀢𑁄𑀧𑀺 𑀲𑀻𑀖𑀢𑀭𑀢𑀸𑀬 𑀅𑀢𑀺𑀇𑀢𑁆𑀢𑀭𑁄 𑀧𑀯𑀢𑁆𑀢𑀺𑀓𑁆𑀔𑀡𑁄, 𑀢𑁂𑀦𑁂𑀯 𑀯𑀺𑀦𑀲𑁆𑀲𑀦𑀲𑀪𑀸𑀯𑀁. 𑀢𑀲𑁆𑀲 𑀚𑀻𑀯𑀺𑀢𑀲𑁆𑀲. 𑀕𑀢𑀺𑀦𑁆𑀢𑀺 𑀦𑀺𑀝𑁆𑀞𑀁. 𑀫𑀦𑁆𑀢𑀸𑀬𑀦𑁆𑀢𑀺 𑀫𑀦𑁆𑀢𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑁆𑀢𑁂𑀢𑀩𑁆𑀩’’𑀦𑁆𑀢𑀺. 𑀓𑀭𑀡𑀢𑁆𑀣𑁂 𑀯𑀸 𑀪𑀼𑀫𑁆𑀫𑀦𑁆𑀢𑀺 ‘‘𑀫𑀦𑁆𑀢𑀸𑀬’’𑀦𑁆𑀢𑀺 𑀇𑀤𑀁 𑀪𑀼𑀫𑁆𑀫𑀁 𑀓𑀭𑀡𑀢𑁆𑀣𑁂 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀜𑀸𑀢𑀸𑀬’’𑀦𑁆𑀢𑀺. 𑀲𑀩𑁆𑀩𑀧𑀮𑀺𑀩𑁄𑀥𑁂𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀺𑀩𑀦𑁆𑀥𑁂 𑀉𑀧𑀭𑁄𑀥𑁂.

𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀤𑀻𑀦𑀁 𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁪. 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀸𑀢𑀺 𑀆𑀳 ‘‘𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺.

𑀘𑀓𑁆𑀓𑀯𑀢𑁆𑀢𑀺 𑀭𑀸𑀚𑀸 𑀯𑀺𑀬 𑀲𑀫𑁆𑀪𑀸𑀯𑀺𑀢𑁄.

𑀫𑀳𑀸𑀕𑁄𑀯𑀺𑀦𑁆𑀤𑀧𑀩𑁆𑀩𑀚𑁆𑀚𑀸𑀯𑀡𑁆𑀡𑀦𑀸

𑁩𑁨𑁮. 𑀲𑀫𑀸𑀧𑀢𑁆𑀢𑀻𑀦𑀁 𑀆𑀚𑀸𑀦𑀦𑀁 𑀦𑀸𑀫 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸, 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀦 𑀲𑀓𑁆𑀔𑀺𑀁𑀲𑀼 𑀦𑀺𑀩𑁆𑀩𑀢𑁆𑀢𑁂𑀢𑀼’’𑀦𑁆𑀢𑀺.

𑁩𑁨𑁯. 𑀇𑀫𑀺𑀦𑀸𑀢𑀺 ‘‘𑀲𑀭𑀸𑀫𑀳’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦. ‘‘𑀲𑀭𑀸𑀫𑀳’’𑀦𑁆𑀢𑀺 𑀳𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀓𑀣𑀺𑀢𑀁 ‘‘𑀢𑀣𑁂𑀯 𑀢’’𑀦𑁆𑀢𑀺 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸𑀢𑀫𑁂𑀯 𑀚𑀸𑀢𑀦𑁆𑀢𑀺. 𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬 𑀅𑀪𑀸𑀯𑀢𑁄. 𑀅𑀲𑀢𑀺 𑀧𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀆𑀳 ‘‘𑀦 𑀯𑀺𑀭𑀸𑀕𑀸𑀬𑀸’’𑀢𑀺𑀆𑀤𑀺. 𑀏𑀓𑀦𑁆𑀢𑀫𑁂𑀯 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀯𑀝𑁆𑀝𑁂 𑀆𑀤𑀻𑀦𑀯𑀯𑀺𑀪𑀸𑀯𑀦𑀢𑁄.

‘‘𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀯𑀯𑀢𑁆𑀣𑀸𑀦𑀓𑀣𑀸𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀢𑀁𑀢𑀁𑀧𑀤𑁂𑀳𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀓𑀣𑀸. 𑀅𑀬𑀫𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸𑀢𑀺 𑀆𑀳 ‘‘𑀧𑀭𑀺𑀬𑀸𑀬𑁂𑀦 𑀧𑀦𑀸’’𑀢𑀺𑀆𑀤𑀺.

𑁩𑁩𑁦. 𑀧𑀭𑀺𑀧𑀽𑀭𑁂𑀢𑀼𑀦𑁆𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀧𑀼𑀡𑁆𑀡𑁂 𑀓𑀸𑀢𑀼𑀁, 𑀦𑀺𑀩𑁆𑀩𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀘𑀺𑀡𑁆𑀡𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀘𑀺𑀡𑁆𑀡𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑀅𑀪𑀺𑀦𑀦𑁆𑀤𑀦𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀦𑀁 ‘‘𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀜𑁆𑀘𑁂𑀢𑁆𑀣 𑀅𑀢𑁆𑀣𑀢𑁄 𑀘𑀺𑀢𑁆𑀢𑀲𑁆𑀲 𑀅𑀢𑁆𑀢𑀫𑀦𑀢𑀸𑀢𑀺 𑀆𑀳 ‘‘𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀅𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺. ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀯𑀸𑀘𑀸𑀬 𑀲𑀫𑁆𑀧𑀳𑀁𑀲𑀦𑀸 𑀅𑀦𑀼𑀫𑁄𑀤𑀦𑀸𑀢𑀺 𑀆𑀳 ‘‘𑀯𑀸𑀘𑀸𑀬 𑀲𑀫𑁆𑀧𑀳𑀁𑀲𑀫𑀸𑀦𑁄 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.