𑁫. 𑀚𑀦𑀯𑀲𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀸𑀢𑀺𑀓𑀺𑀬𑀸𑀤𑀺𑀩𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁨𑁭𑁩-𑁨𑁭𑁫. ‘‘𑀧𑀭𑀺𑀢𑁄’’𑀢𑀺 𑀧𑀤𑀁 𑀬𑀣𑀸 𑀲𑀫𑀦𑁆𑀢𑀢𑁆𑀣𑀯𑀸𑀘𑀓𑁄, 𑀏𑀯𑀁 𑀲𑀫𑀻𑀧𑀢𑁆𑀣𑀯𑀸𑀘𑀓𑁄𑀧𑀺 𑀳𑁄𑀢𑀻𑀢𑀺 𑀲𑀫𑀦𑁆𑀢𑀸 𑀲𑀸𑀫𑀦𑁆𑀢𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀆𑀫𑁂𑀟𑀺𑀢𑁂𑀦 𑀧𑀦 𑀲𑀫𑀦𑁆𑀢𑀢𑁆𑀣𑁄 𑀚𑁄𑀢𑀺𑀢𑁄. 𑀬𑀲𑁆𑀲 𑀧𑀦 𑀲𑀸𑀫𑀦𑁆𑀢𑀸 𑀚𑀦𑀧𑀤𑁂𑀲𑀼 ‘‘𑀦𑀸𑀢𑀺𑀓𑁂 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀸𑀢𑀺𑀓𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀢𑁄 𑀬𑀫𑀢𑁆𑀣𑁄. 𑀬𑀲𑁆𑀲 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀩𑁆𑀬𑀸𑀓𑀭𑁄𑀢𑀺, 𑀢𑀢𑁆𑀣 𑀧𑀭𑀺𑀘𑀸𑀭𑀓𑀸𑀭𑀓𑀸𑀦𑀁 𑀩𑁆𑀬𑀸𑀓𑀭𑀡𑀁 𑀅𑀯𑀼𑀢𑁆𑀢𑀲𑀺𑀤𑁆𑀥𑀁, 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀸 𑀢𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀭𑀺𑀘𑀸𑀭𑀓𑁂𑀢𑀺 𑀉𑀧𑀸𑀲𑀓𑁂. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸𑀦𑀁 𑀧𑀭𑀺𑀘𑀸𑀭𑀓𑁂’’𑀢𑀺. 𑀉𑀧𑀧𑀢𑁆𑀢𑀻𑀲𑀽𑀢𑀺 𑀦𑀺𑀩𑁆𑀩𑀢𑁆𑀢𑀻𑀲𑀼. 𑀜𑀸𑀡𑀕𑀢𑀺𑀧𑀼𑀜𑁆𑀜𑀸𑀦𑀁 𑀉𑀧𑀧𑀢𑁆𑀢𑀻𑀲𑀽𑀢𑀺 𑀏𑀢𑁆𑀣 𑀜𑀸𑀡𑀕𑀢𑀽𑀧𑀧𑀢𑁆𑀢𑀺 𑀦𑀸𑀫 𑀢𑀲𑁆𑀲 𑀢𑀲𑁆𑀲 𑀫𑀕𑁆𑀕𑀜𑀸𑀡𑀕𑀫𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺𑀆𑀤𑀺. 𑀧𑀼𑀜𑁆𑀜𑀽𑀧𑀧𑀢𑁆𑀢𑀺 𑀦𑀸𑀫 𑀢𑀁𑀢𑀁𑀤𑁂𑀯𑀦𑀺𑀓𑀸𑀬𑀽𑀧𑀧𑀢𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀯𑀚𑁆𑀚𑀺𑀫𑀮𑁆𑀮𑁂𑀲𑀽’’𑀢𑀺𑀆𑀤𑀺𑀓𑁂 𑀲𑀩𑁆𑀩𑀢𑁆𑀣 𑀘𑀢𑀽𑀲𑀼𑀧𑀺 𑀧𑀤𑁂𑀲𑀼. 𑀧𑀼𑀭𑀺𑀫𑁂𑀲𑀽𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂 𑀲𑀦𑁆𑀥𑀸𑀬𑀸𑀳. 𑀤𑀲𑀲𑀼𑀬𑁂𑀯𑀸𑀢𑀺 𑀢𑁂𑀲𑀼 𑀏𑀯 𑀤𑀲𑀲𑀼 𑀚𑀦𑀧𑀤𑁂𑀲𑀼. 𑀧𑀭𑀺𑀘𑀸𑀭𑀓𑁂 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀓𑀸𑀢𑀩𑁆𑀩𑀸𑀦𑀁 𑀩𑀳𑀽𑀦𑀁 𑀢𑀢𑁆𑀣 𑀮𑀩𑁆𑀪𑀦𑀢𑁄. 𑀦𑀸𑀢𑀺𑀓𑁂 𑀪𑀯𑀸 𑀦𑀸𑀢𑀺𑀓𑀺𑀬𑀸.

𑀦𑀺𑀝𑁆𑀞𑀗𑁆𑀕𑀢𑀸𑀢𑀺 𑀦𑀺𑀝𑁆𑀞𑀁 𑀦𑀺𑀘𑁆𑀙𑀬𑀁 𑀉𑀧𑀕𑀢𑀸.

𑀆𑀦𑀦𑁆𑀤𑀧𑀭𑀺𑀓𑀣𑀸𑀯𑀡𑁆𑀡𑀦𑀸

𑁨𑁭𑁬. 𑀬𑀲𑁆𑀫𑀸 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀦𑀸𑀫 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸 𑀘 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬, 𑀢𑀲𑁆𑀫𑀸 ‘‘𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀲𑀗𑁆𑀖𑁄’’𑀢𑀺 𑀥𑀫𑁆𑀫𑀲𑀗𑁆𑀖𑀕𑀼𑀡𑀓𑀺𑀢𑁆𑀢𑀦𑀸𑀧𑀺 𑀅𑀢𑁆𑀣𑀢𑁄 𑀩𑀼𑀤𑁆𑀥𑀕𑀼𑀡𑀓𑀺𑀢𑁆𑀢𑀦𑀸 𑀏𑀯 𑀳𑁄𑀢𑀻𑀢𑀺 ‘‘𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑀸’’𑀢𑀺 𑀧𑀤𑀲𑁆𑀲 ‘‘𑀅𑀳𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑁨𑁭𑁮. 𑀜𑀸𑀡𑀕𑀢𑀻𑀢𑀺 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀁 𑀧𑀳𑀸𑀢𑀩𑁆𑀩𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀁 𑀫𑀕𑁆𑀕𑀜𑀸𑀡𑀕𑀫𑀦𑀁. 𑀬𑀲𑁆𑀫𑀸 𑀢𑀲𑁆𑀲𑀸 𑀏𑀯 𑀜𑀸𑀡𑀕𑀢𑀺𑀬𑀸 𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀑𑀧𑀧𑀸𑀢𑀺𑀓𑀢𑀸𑀤𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀁 𑀢𑀸𑀤𑀺𑀲𑀁 𑀢𑀲𑁆𑀲 𑀅𑀪𑀺𑀲𑀫𑁆𑀧𑀭𑀸𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀫𑁂𑀯𑀸’’𑀢𑀺.

𑁨𑁭𑁯. 𑀉𑀧𑀲𑀦𑁆𑀢𑀁 𑀧𑀢𑀺 𑀲𑀫𑁆𑀫𑀢𑀺 𑀆𑀮𑁄𑀓𑀻𑀬𑀢𑀻𑀢𑀺 𑀉𑀧𑀲𑀦𑁆𑀢𑀧𑀢𑀺𑀲𑁄. 𑀉𑀧𑀲𑀦𑁆𑀢𑀤𑀲𑁆𑀲𑀦𑁄 𑀉𑀧𑀲𑀦𑁆𑀢𑀉𑀲𑁆𑀲𑀦𑁆𑀦𑁄. 𑀪𑀸𑀢𑀺𑀭𑀺𑀯𑀸𑀢𑀺 𑀏𑀢𑁆𑀣 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀇𑀯-𑀲𑀤𑁆𑀤𑁄 𑀪𑀼𑀲𑀢𑁆𑀣𑁄𑀢𑀺 𑀆𑀳 ‘‘𑀅𑀢𑀺𑀯𑀺𑀬 𑀪𑀸𑀢𑀻’’𑀢𑀺.

𑀚𑀦𑀯𑀲𑀪𑀬𑀓𑁆𑀔𑀯𑀡𑁆𑀡𑀦𑀸

𑁨𑁮𑁦. 𑀚𑁂𑀝𑁆𑀞𑀓𑀪𑀸𑀯𑁂𑀦 𑀚𑀦𑁂 𑀯𑀲𑀪𑀲𑀤𑀺𑀲𑁄𑀢𑀺 𑀚𑀦𑀯𑀲𑀪𑁄𑀢𑀺 𑀅𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀇𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑀮𑁄𑀓𑁂 𑀭𑀸𑀚𑀪𑀽𑀢𑀲𑁆𑀲. 𑀫𑀦𑀼𑀲𑁆𑀲𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑀪𑀽𑀢𑀲𑁆𑀲. 𑀏𑀢𑁆𑀣𑁂𑀯𑀸𑀢𑀺 𑀏𑀢𑀲𑁆𑀫𑀺𑀁𑀬𑁂𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑁂, 𑀏𑀢𑁆𑀣𑀸𑀧𑀺 𑀯𑁂𑀲𑁆𑀲𑀯𑀡𑀲𑁆𑀲 𑀲𑀳𑀩𑁆𑀬𑀢𑀸𑀯𑀲𑁂𑀦.

𑁨𑁮𑁧. 𑀆𑀲𑀺𑀲𑀦𑀁 𑀆𑀲𑀸, 𑀧𑀢𑁆𑀣𑀦𑀸. 𑀆𑀲𑀸𑀲𑀻𑀲𑁂𑀦 𑀘𑁂𑀢𑁆𑀣 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀁 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀬𑀤𑀕𑁆𑀕𑁂𑀢𑀺 𑀏𑀢𑁆𑀣 𑀅𑀕𑁆𑀕-𑀲𑀤𑁆𑀤𑁄 𑀆𑀤𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀢𑀁 𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸’’𑀢𑀺. ‘‘𑀧𑀼𑀭𑀺𑀫𑀁…𑀧𑁂… 𑀅𑀯𑀺𑀦𑀺𑀧𑀸𑀢𑁄’’𑀢𑀺 𑀇𑀤𑀁 𑀬𑀣𑀸 𑀢𑀢𑁆𑀢𑀓𑀁 𑀓𑀸𑀮𑀁 𑀲𑀼𑀕𑀢𑀺𑀢𑁄 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑁂𑀯 𑀅𑀳𑁄𑀲𑀺, 𑀢𑀣𑀸 𑀓𑀢𑀽𑀧𑀘𑀺𑀢𑀓𑀼𑀲𑀮𑀓𑀫𑁆𑀫𑀢𑁆𑀢𑀸. 𑀨𑀼𑀲𑁆𑀲𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀸𑀮𑀢𑁄 𑀧𑀪𑀼𑀢𑀺 𑀳𑀺 𑀲𑀫𑁆𑀪𑀢𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀓𑀼𑀲𑀮𑀲𑀫𑁆𑀪𑀸𑀭𑁄 𑀏𑀲 𑀤𑁂𑀯𑀧𑀼𑀢𑁆𑀢𑁄. 𑀅𑀦𑀘𑁆𑀙𑀭𑀺𑀬𑀦𑁆𑀢𑀺 𑀅𑀦𑀼 𑀅𑀦𑀼 𑀅𑀘𑁆𑀙𑀭𑀺𑀬𑀁. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀅𑀘𑁆𑀙𑀭𑀺𑀬𑀫𑁂𑀯𑀸’’𑀢𑀺. 𑀲𑀬𑀁𑀧𑀭𑀺𑀲𑀸𑀬𑀸𑀢𑀺 𑀲𑀓𑀸𑀬 𑀧𑀭𑀺𑀲𑀸𑀬. 𑀪𑀕𑀯𑀢𑁄 𑀤𑀺𑀝𑁆𑀞𑀲𑀤𑀺𑀲𑀫𑁂𑀯𑀸𑀢𑀺 𑀆𑀯𑀚𑁆𑀚𑀦𑀲𑀫𑀦𑀦𑁆𑀢𑀭𑀁 𑀬𑀣𑀸 𑀢𑁂 𑀪𑀕𑀯𑀢𑁄 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀲𑀢𑁆𑀢𑀸 𑀜𑀸𑀡𑀕𑀢𑀺𑀢𑁄 𑀤𑀺𑀝𑁆𑀞𑀸, 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀲𑀤𑀺𑀲𑀫𑁂𑀯. 𑀯𑁂𑀲𑁆𑀲𑀯𑀡𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀫𑀬𑀸𑀢𑀺 𑀯𑀤𑀢𑀺.

𑀤𑁂𑀯𑀲𑀪𑀸𑀯𑀡𑁆𑀡𑀦𑀸

𑁨𑁮𑁨. 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀗𑁆𑀕𑀳𑀢𑁆𑀣𑀦𑁆𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀆𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀯𑀲𑁂𑀦 𑀪𑀺𑀓𑁆𑀔𑀽𑀦𑀁 𑀲𑀗𑁆𑀕𑀳𑀡𑀢𑁆𑀣𑀁 ‘‘𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀏𑀯𑀁 𑀲𑀼𑀔𑁂𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺, 𑀧𑀯𑀸𑀭𑀡𑀲𑀗𑁆𑀕𑀳𑁄 𑀧𑀦𑀲𑁆𑀲 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀭𑀺𑀲𑁆𑀲𑀬𑀧𑀭𑀺𑀳𑀭𑀡𑀢𑁆𑀣𑀁. 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀤𑀽𑀭𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑀸𑀧𑀺 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀬𑁂𑀯. 𑀏𑀢𑁆𑀣𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑁆𑀣 𑀅𑀬𑁆𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑁂.

𑀢𑀤𑀸𑀧𑀻𑀢𑀺 ‘‘𑀧𑀼𑀭𑀺𑀫𑀸𑀦𑀺 𑀪𑀦𑁆𑀢𑁂 𑀤𑀺𑀯𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀓𑀸𑀮𑁂𑀧𑀺. 𑀏𑀢𑁂𑀦𑁂𑀯 𑀓𑀸𑀭𑀡𑁂𑀦𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀦𑀺𑀫𑀺𑀢𑁆𑀢𑀫𑁂𑀯. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬𑀸’’𑀢𑀺𑀆𑀤𑀺. 𑀆𑀲𑀦𑁂𑀧𑀺 𑀦𑀺𑀲𑀚𑁆𑀚𑀸𑀬 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀧𑀞𑀫𑀁 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀢𑀲𑁆𑀲𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀦𑀺𑀲𑀻𑀤𑀦𑁆𑀢𑀺, 𑀇𑀤𑀁 𑀦𑁂𑀲𑀁 𑀆𑀲𑀦𑁂 𑀦𑀺𑀲𑀚𑁆𑀚𑀸𑀬 𑀘𑀸𑀭𑀺𑀢𑁆𑀢𑀁 𑀳𑁄𑀢𑀺.

𑀬𑁂𑀦𑀢𑁆𑀣𑁂𑀦𑀸𑀢𑀺 𑀬𑁂𑀦 𑀓𑀺𑀘𑁆𑀘𑁂𑀦 𑀬𑁂𑀦 𑀧𑀬𑁄𑀚𑀦𑁂𑀦. 𑀆𑀭𑀓𑁆𑀔𑀢𑁆𑀣𑀦𑁆𑀢𑀺 𑀆𑀭𑀓𑁆𑀔𑀪𑀽𑀢𑀫𑀢𑁆𑀣𑀁. 𑀯𑀼𑀢𑁆𑀢𑀁 𑀯𑀘𑀦𑀁 𑀏𑀢𑁂𑀲𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀸, 𑀫𑀳𑀸𑀭𑀸𑀚𑀸𑀦𑁄.

𑁨𑁮𑁩. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁮𑁪. 𑀅𑀪𑀺𑀲𑀫𑁆𑀪𑀯𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀢𑁆𑀢𑀩𑁆𑀩𑁄’’𑀢𑀺𑀆𑀤𑀺. 𑀘𑀓𑁆𑀔𑀼𑀬𑁂𑀯 𑀧𑀣𑁄 𑀭𑀽𑀧𑀤𑀲𑁆𑀲𑀦𑀲𑁆𑀲 𑀫𑀕𑁆𑀕𑁄 𑀉𑀧𑀸𑀬𑁄𑀢𑀺 𑀘𑀓𑁆𑀔𑀼𑀧𑀣𑁄, 𑀢𑀲𑁆𑀫𑀺𑀁 𑀘𑀓𑁆𑀔𑀼𑀧𑀣𑀲𑁆𑀫𑀺𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼𑀧𑀲𑀸𑀤𑁂’’𑀢𑀺, 𑀘𑀓𑁆𑀔𑀼𑀲𑁆𑀲 𑀕𑁄𑀘𑀭𑀬𑁄𑀕𑁆𑀕𑁄 𑀯𑀸 𑀘𑀓𑁆𑀔𑀼𑀧𑀣𑁄𑀢𑀺 𑀆𑀳 ‘‘𑀆𑀧𑀸𑀣𑁂 𑀯𑀸’’𑀢𑀺. 𑀦𑀸𑀪𑀺𑀪𑀯𑀢𑀻𑀢𑀺 𑀦 𑀅𑀪𑀺𑀪𑀯𑀢𑀺, 𑀕𑁄𑀘𑀭𑀪𑀸𑀯𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸𑀢𑀺 𑀢𑀸𑀯𑀢𑀺𑀁𑀲𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸, 𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬, 𑀦𑀸𑀧𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀢𑁄 𑀧𑀝𑁆𑀞𑀸𑀬. ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀳𑀺 𑀢𑀸𑀯𑀢𑀺𑀁𑀲𑀸𑀦𑀁 𑀬𑀣𑀸 𑀚𑀸𑀢𑀺𑀭𑀽𑀧𑀸𑀦𑀺 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀣𑀸 𑀩𑁆𑀭𑀳𑁆𑀫𑀸𑀦𑁄 𑀳𑁂𑀝𑁆𑀞𑀺𑀫𑀸 𑀉𑀧𑀭𑀺𑀫𑀸𑀦’’𑀦𑁆𑀢𑀺 𑀓𑁂𑀘𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀳𑁂𑀝𑁆𑀞𑀺𑀫𑀸 𑀩𑁆𑀭𑀳𑁆𑀫𑀸𑀦𑁄 𑀉𑀧𑀭𑀺𑀫𑀸𑀦𑀁 𑀫𑀽𑀮𑀧𑀝𑀺𑀲𑀦𑁆𑀥𑀺𑀭𑀽𑀧𑀁 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀸𑀧𑀺𑀢𑀫𑁂𑀯 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀡𑀦𑁆𑀢𑁄𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀻𑀢𑀺 𑀕𑀢𑀺𑀬𑁄 𑀉𑀧𑀥𑀸𑀭𑁂𑀦𑁆𑀢𑁄 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑀯𑀺𑀘𑁆𑀙𑁂𑀤𑁂𑀦 𑀲𑀗𑁆𑀓𑁄𑀘𑀁 𑀆𑀧𑀦𑁆𑀦𑀘𑀺𑀢𑁆𑀢𑀢𑀸𑀬. 𑀫𑀬𑁆𑀳𑀁 𑀅𑀬𑁆𑀬𑀓𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀧𑀜𑁆𑀘 𑀲𑀺𑀔𑀸 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀲𑀺𑀔𑁄, 𑀧𑀜𑁆𑀘𑀲𑀺𑀔𑁄 𑀯𑀺𑀬 𑀧𑀜𑁆𑀘𑀲𑀺𑀔𑁄𑀢𑀺 𑀆𑀳 ‘‘𑀧𑀜𑁆𑀘𑀲𑀺𑀔𑀕𑀦𑁆𑀥𑀩𑁆𑀩𑀲𑀤𑀺𑀲𑁄’’𑀢𑀺. 𑀫𑀫𑀸𑀬𑀦𑁆𑀢𑀻𑀢𑀺 𑀧𑀺𑀬𑀸𑀬𑀦𑁆𑀢𑀺.

𑁨𑁮𑁫. 𑀲𑀼𑀫𑀼𑀢𑁆𑀢𑁄𑀢𑀺 𑀲𑀭𑀤𑁄𑀲𑁂𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄. 𑀬𑁂𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀲𑀭𑁄 𑀅𑀯𑀺𑀲𑁆𑀲𑀝𑁆𑀞𑁄 𑀲𑀺𑀬𑀸, 𑀢𑀤𑀪𑀸𑀯𑀢𑁄 𑀯𑀺𑀲𑁆𑀲𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀮𑀺𑀩𑀼𑀤𑁆𑀥𑁄’’𑀢𑀺. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀦𑁆𑀢𑁄𑀕𑀥𑀳𑁂𑀢𑀼𑀅𑀢𑁆𑀣𑁄 𑀓𑀢𑁆𑀢𑀼𑀲𑀸𑀥𑀦𑁄 𑀏𑀲 𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁄’’𑀢𑀺. 𑀲𑀭𑀲𑁆𑀲 𑀫𑀥𑀼𑀭𑀢𑀸 𑀦𑀸𑀫 𑀫𑀤𑁆𑀤𑀯𑀦𑁆𑀢𑀺 𑀆𑀳 ‘‘𑀫𑀥𑀼𑀭𑁄 𑀫𑀼𑀤𑀽’’𑀢𑀺. 𑀲𑀯𑀦𑀁 𑀅𑀭𑀳𑀢𑀻𑀢𑀺 𑀲𑀯𑀦𑀻𑀬𑁄. 𑀲𑀯𑀦𑀸𑀭𑀳𑀢𑀸𑀬 𑀘 𑀆𑀧𑀸𑀣𑀲𑀼𑀔𑀢𑀸𑀬𑀸𑀢𑀺 𑀆𑀳 ‘‘𑀓𑀡𑁆𑀡𑀲𑀼𑀔𑁄’’𑀢𑀺. 𑀩𑀺𑀦𑁆𑀤𑀽𑀢𑀺 𑀧𑀺𑀡𑁆𑀟𑀺𑀢𑁄. 𑀆𑀓𑁄𑀝𑀺𑀢𑀪𑀺𑀦𑁆𑀦𑀓𑀁𑀲𑀲𑀤𑁆𑀤𑁄 𑀯𑀺𑀬 𑀅𑀦𑁂𑀓𑀸𑀯𑀬𑀯𑁄 𑀅𑀳𑀼𑀢𑁆𑀯𑀸 𑀦𑀺𑀭𑀯𑀬𑀯𑁄, 𑀏𑀓𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀕𑁆𑀖𑀦𑁄’’𑀢𑀺, 𑀏𑀢𑁂𑀦𑁂𑀯𑀲𑁆𑀲 𑀅𑀯𑀺𑀲𑀸𑀭𑀺𑀢𑀸 𑀲𑀁𑀯𑀡𑁆𑀡𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀕𑀫𑁆𑀪𑀻𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀘𑀲𑁆𑀲 𑀕𑀫𑁆𑀪𑀻𑀭𑀢𑀸𑀢𑀺 𑀆𑀳 ‘‘𑀦𑀸𑀪𑀺𑀫𑀽𑀮𑀢𑁄’’𑀢𑀺𑀆𑀤𑀺. 𑀏𑀯𑀁 𑀲𑀫𑀼𑀝𑁆𑀞𑀺𑀢𑁄𑀢𑀺 𑀚𑀻𑀯𑁆𑀳𑀸𑀤𑀺𑀧𑁆𑀧𑀳𑀸𑀭𑀫𑀢𑁆𑀢𑀲𑀫𑀼𑀝𑁆𑀞𑀺𑀢𑁄. 𑀅𑀫𑀥𑀼𑀭𑁄 𑀘 𑀳𑁄𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀧𑀭𑀺𑀮𑀳𑀼𑀪𑀸𑀯𑀢𑁄. 𑀦 𑀘 𑀤𑀽𑀭𑀁 𑀲𑀸𑀯𑁂𑀢𑀺 𑀯𑀻𑀭𑀪𑀸𑀯𑀸𑀪𑀸𑀯𑀢𑁄. 𑀦𑀺𑀦𑁆𑀦𑀸𑀤𑀻 𑀲𑀼𑀯𑀺𑀧𑀼𑀮𑀪𑀸𑀯𑀢𑁄 𑀲𑀯𑀺𑀲𑁂𑀲𑀁 𑀦𑀺𑀦𑁆𑀦𑀸𑀤𑁄, 𑀧𑀸𑀲𑀁𑀲𑀦𑀺𑀦𑁆𑀦𑀸𑀤𑁄 𑀯𑀸. 𑀢𑁂𑀦𑀸𑀳 ‘‘𑀫𑀳𑀸𑀫𑁂𑀖…𑀧𑁂… 𑀬𑀼𑀢𑁆𑀢𑁄’’𑀢𑀺.

𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀦𑁆𑀢𑀺 𑀤𑀼𑀢𑀺𑀬𑀁, 𑀘𑀢𑀼𑀢𑁆𑀣𑀁, 𑀙𑀝𑁆𑀞𑀁, 𑀅𑀝𑁆𑀞𑀫𑀜𑁆𑀘 𑀧𑀤𑀁. 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲𑀸𑀢𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀲𑁆𑀲, 𑀢𑀢𑀺𑀬𑀲𑁆𑀲, 𑀧𑀜𑁆𑀘𑀫𑀲𑁆𑀲, 𑀲𑀢𑁆𑀢𑀫𑀲𑁆𑀲 𑀘. 𑀅𑀢𑁆𑀣𑁄𑀬𑁂𑀯𑀸𑀢𑀺 𑀅𑀢𑁆𑀣𑀦𑀺𑀤𑁆𑀤𑁂𑀲𑁄 𑀏𑀯. 𑀯𑀺𑀲𑁆𑀲𑀝𑁆𑀞𑀢𑀸 𑀳𑀺𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀫𑀜𑁆𑀚𑀼𑀪𑀸𑀯𑁄 𑀲𑀯𑀦𑀻𑀬𑀢𑀸𑀬, 𑀩𑀺𑀦𑁆𑀤𑀼𑀪𑀸𑀯𑁄 𑀅𑀯𑀺𑀲𑀸𑀭𑀺𑀢𑀸𑀬, 𑀕𑀫𑁆𑀪𑀻𑀭𑀪𑀸𑀯𑁄 𑀦𑀺𑀦𑁆𑀦𑀸𑀤𑀺𑀢𑀸𑀬𑀸𑀢𑀺. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀏𑀢𑁆𑀣 𑀬𑀣𑀸-𑀲𑀤𑁆𑀤𑁄 𑀧𑀭𑀺𑀫𑀸𑀡𑀯𑀸𑀘𑀻, 𑀦 𑀧𑀓𑀸𑀭𑀸𑀤𑀺𑀯𑀸𑀘𑀻𑀢𑀺 𑀆𑀳 ‘‘𑀬𑀢𑁆𑀢𑀓𑀸 𑀧𑀭𑀺𑀲𑀸’’𑀢𑀺, 𑀢𑁂𑀦 𑀧𑀭𑀺𑀲𑀧𑁆𑀧𑀫𑀸𑀡𑀁 𑀏𑀯𑀲𑁆𑀲 𑀲𑀭𑁄 𑀦𑀺𑀘𑁆𑀙𑀭𑀢𑀺, 𑀅𑀬𑀫𑀲𑁆𑀲 𑀥𑀫𑁆𑀫𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀢𑀓𑀫𑁂𑀯𑀸’’𑀢𑀺𑀆𑀤𑀺.

‘‘𑀬𑁂 𑀳𑀺 𑀓𑁂𑀘𑀻’’𑀢𑀺𑀆𑀤𑀺 ‘‘𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀳𑁂𑀢𑀼𑀓𑀺𑀢𑁆𑀢𑀦𑀯𑀲𑁂𑀦 𑀲𑀫𑀢𑁆𑀣𑀦𑀁 𑀲𑀭𑀡𑁂𑀲𑀼 𑀦𑁂𑀲𑀁 𑀦𑀺𑀘𑁆𑀘𑀲𑁂𑀯𑀦𑁂𑀦, 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀦𑁂𑀦 𑀙𑀓𑀸𑀫𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀅𑀦𑀼𑀧𑁆𑀧𑀸𑀤𑀦𑀢𑁄. 𑀢𑁂𑀦𑀸𑀳 ‘‘𑀬𑁂 𑀳𑀺 𑀓𑁂𑀘𑀺…𑀧𑁂… 𑀯𑀤𑀢𑀻’’𑀢𑀺. 𑀦𑀺𑀩𑁆𑀩𑁂𑀫𑀢𑀺𑀓𑀕𑀳𑀺𑀢𑀲𑀭𑀡𑁂𑀢𑀺 𑀫𑀕𑁆𑀕𑁂𑀦𑀸𑀕𑀢𑀲𑀭𑀡𑀕𑀫𑀦𑁂. 𑀢𑁂 𑀳𑀺 𑀲𑀩𑁆𑀩𑀲𑁄 𑀲𑀫𑀼𑀕𑁆𑀖𑀸𑀢𑀺𑀢𑀯𑀺𑀘𑀺𑀓𑀺𑀘𑁆𑀙𑀢𑀸𑀬 𑀭𑀢𑀦𑀢𑁆𑀢𑀬𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸𑀬𑁂𑀯, 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀬 𑀯𑀲𑁂𑀦 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑁂 𑀑𑀕𑀸𑀳𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀅𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀦𑁄 𑀢𑁂 𑀧𑀭𑀺𑀬𑀸𑀬𑀢𑁄 𑀦𑀺𑀩𑁆𑀩𑁂𑀫𑀢𑀺𑀓𑀕𑀳𑀺𑀢𑀲𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀦𑁆𑀥𑀩𑁆𑀩𑀤𑁂𑀯𑀕𑀡𑀦𑁆𑀢𑀺 𑀕𑀦𑁆𑀥𑀩𑁆𑀩𑀤𑁂𑀯𑀲𑀫𑀽𑀳𑀁. 𑀢𑀼𑀓𑀸 𑀯𑀼𑀘𑁆𑀘𑀢𑀺 𑀔𑀻𑀭𑀺𑀡𑀻 𑀬𑀸 𑀢𑀼𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸 𑀘𑀼𑀡𑁆𑀡𑀁 𑀢𑀼𑀓𑀸𑀧𑀺𑀝𑁆𑀞𑀁. 𑀢𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀖𑀦𑀁 𑀦𑀺𑀭𑀦𑁆𑀢𑀭𑀘𑀺𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀪𑀸𑀯𑀺𑀢𑀇𑀤𑁆𑀥𑀺𑀧𑀸𑀤𑀯𑀡𑁆𑀡𑀦𑀸

𑁨𑁮𑁭. 𑀲𑀼𑀧𑀜𑁆𑀜𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀧𑀓𑀸𑀭𑁂𑀳𑀺 𑀜𑀸𑀧𑀺𑀢𑀸 𑀩𑁄𑀥𑀺𑀢𑀸, 𑀅𑀲𑀗𑁆𑀓𑀭𑀢𑁄 𑀯𑀸 𑀞𑀧𑀺𑀢𑀸, 𑀢𑀁 𑀧𑀦 𑀩𑁄𑀥𑀦𑀁, 𑀅𑀲𑀗𑁆𑀓𑀭𑀢𑁄 𑀞𑀧𑀦𑀜𑁆𑀘 𑀅𑀢𑁆𑀣𑀢𑁄 𑀤𑁂𑀲𑀦𑀸 𑀏𑀯𑀸𑀢𑀺 𑀆𑀳 ‘‘𑀲𑀼𑀓𑀣𑀺𑀢𑀸’’𑀢𑀺. 𑀇𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀲𑀫𑀺𑀚𑁆𑀛𑀦𑀝𑁆𑀞𑁂𑀦, 𑀦𑀺𑀧𑁆𑀧𑀚𑁆𑀚𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀬𑀸 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑀲𑁆𑀫𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀸𑀯 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑁆𑀥𑀺𑀧𑀳𑁄𑀦𑀓𑀢𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀦𑀺𑀧𑁆𑀨𑀸𑀤𑀦𑁂 𑀲𑀫𑀢𑁆𑀣𑀪𑀸𑀯𑀸𑀬. 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀦𑀺𑀧𑁆𑀨𑀸𑀤𑀦𑁂 𑀬𑁄𑀕𑁆𑀬𑀪𑀸𑀯𑀸𑀬. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀳𑀺 𑀥𑀸𑀢𑀽𑀦𑀁 𑀬𑁄𑀕𑁆𑀬𑀢𑁆𑀣𑁄 𑀯𑀺-𑀧𑀼𑀩𑁆𑀩𑁄 𑀲𑀼-𑀲𑀤𑁆𑀤𑁄, 𑀯𑀺𑀲𑀯𑀦𑀁 𑀯𑀸 𑀧𑀚𑁆𑀚𑀦𑀁 𑀯𑀺𑀲𑀯𑀺𑀢𑀸, 𑀢𑀢𑁆𑀣 𑀓𑀸𑀫𑀓𑀸𑀭𑀺𑀢𑀸 𑀯𑀺𑀲𑀯𑀺𑀢𑀸. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺. 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬𑀸𑀢𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸 𑀯𑀺𑀯𑀺𑀥𑀭𑀽𑀧𑀓𑀭𑀡𑀸𑀬. 𑀢𑁂𑀦𑀸𑀳 ‘‘𑀦𑀸𑀦𑀧𑁆𑀧𑀓𑀸𑀭𑀢𑁄 𑀓𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺.

‘‘𑀙𑀦𑁆𑀤𑀜𑁆𑀘 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 (𑀯𑀺𑀪. 𑁪𑁩𑁨) 𑀇𑀫𑀸𑀬 𑀧𑀸𑀴𑀺𑀬𑀸 𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀅𑀥𑀺𑀧𑀢𑀺𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀲𑀫𑀸𑀲𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀧𑀦 ‘‘𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀲𑀫𑀸𑀥𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀥𑀸𑀦𑀪𑀽𑀢𑀸𑀢𑀺 𑀯𑀻𑀭𑀺𑀬𑀪𑀽𑀢𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀫𑁆𑀧𑀺 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀅𑀜𑁆𑀜𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺 𑀧𑀥𑀸𑀦𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀦 𑀯𑀻𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀯𑀺𑀲𑀼𑀁 𑀲𑀫𑀸𑀲𑀬𑁄𑀚𑀦𑀯𑀲𑁂𑀦 𑀬𑁄 𑀧𑀼𑀩𑁆𑀩𑁂 𑀇𑀤𑁆𑀥𑀺𑀧𑀸𑀤𑀢𑁆𑀣𑁄 𑀧𑀸𑀤𑀲𑁆𑀲 𑀉𑀧𑀸𑀬𑀢𑁆𑀣𑀢𑀁, 𑀓𑁄𑀝𑁆𑀞𑀸𑀲𑀢𑁆𑀣𑀢𑀜𑁆𑀘 𑀕𑀳𑁂𑀢𑁆𑀯𑀸 𑀬𑀣𑀸𑀬𑁄𑀕𑀯𑀲𑁂𑀦 𑀇𑀥 𑀯𑀼𑀢𑁆𑀢𑁄, 𑀲𑁄 𑀯𑀓𑁆𑀔𑀫𑀸𑀦𑀸𑀦𑀁 𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀁 𑀓𑀢𑁆𑀢𑀼𑀓𑀭𑀡𑀺𑀤𑁆𑀥𑀺𑀪𑀸𑀯𑀁, 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀯𑀸 𑀯𑀼𑀢𑁆𑀢𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺 𑀲𑀸𑀥𑁂𑀢𑀩𑁆𑀩𑀸𑀬 𑀇𑀤𑁆𑀥𑀺𑀬𑀸 𑀓𑀢𑁆𑀢𑀺𑀤𑁆𑀥𑀺𑀪𑀸𑀯𑀁, 𑀙𑀦𑁆𑀤𑀸𑀤𑀻𑀦𑀜𑁆𑀘 𑀓𑀭𑀡𑀺𑀤𑁆𑀥𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’’𑀢𑀺 𑀏𑀢𑁆𑀣 𑀓𑀢𑁆𑀢𑀼𑀅𑀢𑁆𑀣𑁄, 𑀓𑀭𑀡𑀢𑁆𑀣𑁄 𑀘 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀓𑀢𑁆𑀢𑀼𑀅𑀢𑁆𑀣𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀇𑀚𑁆𑀛𑀦𑀝𑁆𑀞𑁂𑀦 𑀯𑀸’’𑀢𑀺 𑀯𑀢𑁆𑀯𑀸 𑀇𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀚𑁆𑀛𑀦𑁆𑀢𑀺 𑀏𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀣 𑀯𑀼𑀢𑁆𑀢𑀁? 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀧𑀸𑀞𑁂. (𑀯𑀺𑀪. 𑁪𑁩𑁪) 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀢𑁂𑀦𑀸𑀓𑀸𑀭𑁂𑀦 𑀪𑀽𑀢𑀲𑁆𑀲, 𑀢𑁂 𑀙𑀦𑁆𑀤𑀸𑀤𑀺𑀥𑀫𑁆𑀫𑁂 𑀧𑀝𑀺𑀮𑀪𑀺𑀢𑁆𑀯𑀸 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀳𑀺 𑀙𑀦𑁆𑀤𑀸𑀤𑀬𑁄 𑀅𑀦𑁆𑀢𑁄𑀓𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀔𑀦𑁆𑀥𑀸 𑀓𑀣𑀺𑀢𑀸. 𑀲𑁂𑀲𑁂𑀲𑀽𑀢𑀺 𑀲𑁂𑀲𑀺𑀤𑁆𑀥𑀺𑀧𑀸𑀤𑁂𑀲𑀼.

𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂 ‘‘𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀲𑀫𑀸𑀥𑀺𑀯𑀺𑀲𑁂𑀲𑀦𑀁 ‘‘𑀯𑀻𑀭𑀺𑀬𑀸𑀥𑀺𑀧𑀢𑀺 𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀻’’𑀢𑀺, 𑀤𑀼𑀢𑀺𑀬𑀁 𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀁. 𑀤𑁆𑀯𑁂𑀬𑁂𑀯 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺, 𑀲𑀫𑀸𑀥𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀘. 𑀙𑀦𑁆𑀤𑀸𑀤𑀬𑁄 𑀳𑀺 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀧𑀦 𑀧𑀥𑀸𑀦𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑀺𑀢𑁄, 𑀦 𑀙𑀦𑁆𑀤𑀸𑀤𑀻𑀳𑀻𑀢𑀺 𑀦 𑀇𑀥 𑀯𑀻𑀭𑀺𑀬𑀸𑀥𑀺𑀧𑀢𑀺𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 𑀞𑀺𑀢𑀫𑁂𑀯, 𑀲𑀫𑀦𑁆𑀦𑀸𑀕𑀫𑀗𑁆𑀕𑀯𑀲𑁂𑀦 𑀧𑀦 𑀧𑀥𑀸𑀦𑀲𑀗𑁆𑀔𑀸𑀭𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀸𑀧𑀺 𑀤𑁆𑀯𑀻𑀳𑀺 𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀲𑀫𑀸𑀥𑀺, 𑀢𑀣𑀸𑀯𑀺𑀲𑀺𑀝𑁆𑀞𑁂𑀦𑁂𑀯 𑀘 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀥𑀸𑀦𑀲𑀗𑁆𑀔𑀸𑀭𑁄, 𑀲𑁂𑀲𑀥𑀫𑁆𑀫𑀸 𑀘, 𑀢𑀲𑁆𑀫𑀸 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀼𑀢𑁆𑀢𑀸, 𑀯𑀺𑀲𑁂𑀲𑀦𑀪𑀸𑀯𑁄 𑀘 𑀙𑀦𑁆𑀤𑀸𑀤𑀻𑀦𑀁 𑀢𑀁𑀢𑀁𑀅𑀯𑀲𑁆𑀲𑀬𑀤𑀲𑁆𑀲𑀦𑀯𑀲𑁂𑀦 𑀳𑁄𑀢𑀻𑀢𑀺 ‘‘𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀢𑁆𑀣𑁂𑀧𑀺 𑀧𑀸𑀤-𑀲𑀤𑁆𑀤𑁂 𑀉𑀧𑀸𑀬𑀢𑁆𑀣𑁂𑀦 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑁂𑀦𑁂𑀯 𑀳𑀺 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 (𑀯𑀺𑀪. 𑁪𑁫𑁬) ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 𑀙𑀦𑁆𑀤𑀸𑀤𑀻𑀦𑀫𑁂𑀯 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸. 𑀧𑀜𑁆𑀳𑀧𑀼𑀘𑁆𑀙𑀓𑁂 (𑀯𑀺𑀪. 𑁪𑁫𑁭 𑀆𑀤𑀬𑁄) ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀘 𑀉𑀤𑁆𑀤𑁂𑀲𑀁 𑀓𑀢𑁆𑀯𑀸𑀧𑀺 𑀧𑀼𑀦 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑀺 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁, 𑀅𑀜𑁆𑀜𑀣𑀸 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀲𑀺𑀬𑀸𑀢𑀺. 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀸𑀦𑀺 𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀁 𑀯𑀲𑁂𑀦 𑀇𑀤𑁆𑀥𑀺𑀧𑀸𑀤𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀥 𑀇𑀤𑁆𑀥𑀺𑀧𑀸𑀤𑀓𑀣𑀸 𑀲𑀗𑁆𑀔𑁂𑀧𑁂𑀦𑁂𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑁂𑀦 𑀧𑀦…𑀧𑁂… 𑀯𑀼𑀢𑁆𑀢𑀸’’𑀢𑀺.

𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀢𑁂𑀲𑀼 𑀳𑀺 𑀏𑀓𑀘𑁆𑀘𑁂 ‘‘𑀇𑀤𑁆𑀥𑀺 𑀦𑀸𑀫 𑀅𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑁂 ‘‘𑀇𑀤𑁆𑀥𑀺𑀧𑀸𑀤𑁄 𑀧𑀦 𑀅𑀦𑀺𑀧𑁆𑀨𑀦𑁆𑀦𑁄’’𑀢𑀺 𑀯𑀤𑀦𑁆𑀢𑀺, 𑀅𑀦𑀺𑀧𑁆𑀨𑀦𑁆𑀦𑁄𑀢𑀺 𑀘 𑀧𑀭𑀫𑀢𑁆𑀣𑀢𑁄 𑀅𑀲𑀺𑀤𑁆𑀥𑁄, 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀆𑀪𑀢𑁄𑀢𑀺 𑀅𑀪𑀺𑀥𑀫𑁆𑀫𑀧𑀸𑀞𑀢𑁄 (𑀯𑀺𑀪. 𑁪𑁫𑁮) 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁮𑁭) 𑀆𑀦𑀻𑀢𑁄 𑀧𑀼𑀭𑀺𑀫𑀦𑀬𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀙𑀦𑁆𑀤𑁄 𑀏𑀯 𑀇𑀤𑁆𑀥𑀺𑀧𑀸𑀤𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀫𑁂 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀸 𑀇𑀤𑁆𑀥𑀺𑀧𑀸𑀤𑀸. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 (𑀫. 𑀦𑀺. 𑁨.𑁨𑁯𑁩; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁦; 𑀅𑀧. 𑀅𑀝𑁆𑀞. 𑁨.𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁄) ‘‘𑀙𑀦𑁆𑀤𑁂 𑀲𑀢𑀺 𑀓𑀣𑀁 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀢𑁆𑀢𑀸𑀳𑀁 𑀪𑀢𑁆𑀢𑀸𑀦𑀺 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀦𑁆𑀤𑀫𑁂𑀯 𑀅𑀯𑀲𑁆𑀲𑀸𑀬 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀆𑀳 ‘‘𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺. 𑀲𑁄𑀡𑀢𑁆𑀣𑁂𑀭𑁄 (𑀫𑀳𑀸𑀯. 𑁨𑁪𑁩; 𑀅. 𑀦𑀺. 𑁬.𑁫𑁫; 𑀣𑁂𑀭𑀕𑀸. 𑀅𑀝𑁆𑀞. 𑀢𑁂𑀭𑀲𑀦𑀺𑀧𑀸𑀢; 𑀅𑀧. 𑀅𑀝𑁆𑀞. 𑁨.𑀲𑁄𑀡𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁄) 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀲𑀼𑀔𑀼𑀫𑀸𑀮𑁄 𑀧𑀸𑀤𑁂𑀲𑀼 𑀨𑁄𑀝𑁂𑀲𑀼 𑀚𑀸𑀢𑁂𑀲𑀼𑀧𑀺 𑀯𑀻𑀭𑀺𑀬𑀁 𑀦𑀧𑁆𑀧𑀝𑀺𑀧𑀲𑁆𑀲𑀫𑁆𑀪𑁂𑀲𑀻𑀢𑀺 𑀆𑀳 ‘‘𑀲𑁄𑀡𑀢𑁆𑀣𑁂𑀭𑁄 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺. 𑀲𑀫𑁆𑀪𑀽𑀢𑀢𑁆𑀣𑁂𑀭𑁄 (𑀣𑁂𑀭𑀕𑀸. 𑀅𑀝𑁆𑀞. 𑁨.𑀲𑀫𑁆𑀫𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁄) ‘‘𑀘𑀺𑀢𑁆𑀢𑀯𑀢𑁄 𑀓𑀺𑀁 𑀦𑀸𑀫 𑀦 𑀲𑀺𑀚𑁆𑀛𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀪𑀸𑀯𑀦𑀁 𑀆𑀭𑀸𑀥𑁂𑀲𑀻𑀢𑀺 𑀆𑀳 ‘‘𑀲𑀫𑁆𑀪𑀽𑀢𑀢𑁆𑀣𑁂𑀭𑁄 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺. 𑀫𑁄𑀖𑀢𑁆𑀣𑁂𑀭𑁄 𑀯𑀻𑀫𑀁𑀲𑀁 𑀅𑀯𑀲𑁆𑀲𑀬𑀺, 𑀢𑀲𑁆𑀫𑀸 𑀢𑀲𑁆𑀲 𑀪𑀕𑀯𑀸 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫; 𑀩𑀼. 𑀯𑀁. 𑁫𑁪.𑁩𑁫𑁩; 𑀫𑀳𑀸. 𑀦𑀺. 𑁧𑁮𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁪; 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁂 𑁮𑁮; 𑀦𑁂𑀢𑁆𑀢𑀺. 𑁫; 𑀧𑁂𑀝𑀓𑁄. 𑁨𑁨, 𑁩𑁧) 𑀲𑀼𑀜𑁆𑀜𑀢𑀸𑀓𑀣𑀁 𑀓𑀣𑁂𑀲𑀺, 𑀧𑀜𑁆𑀜𑀸𑀦𑀺𑀲𑁆𑀲𑀺𑀢𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀁, 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀢𑁆𑀣𑀜𑁆𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑁄 𑀲𑀫𑀸𑀦𑁄 𑀧𑀜𑁆𑀳𑀁 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑀸 𑀯𑀻𑀫𑀁𑀲𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺.

𑀧𑀼𑀦𑀧𑁆𑀧𑀼𑀦𑀁 𑀙𑀦𑁆𑀤𑀼𑀧𑁆𑀧𑀸𑀤𑀦𑀁 𑀧𑁂𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀙𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀲𑀤𑀺𑀲𑀢𑀸 𑀯𑀼𑀢𑁆𑀢𑀸.

𑀧𑀭𑀓𑁆𑀓𑀫𑁂𑀦𑀸𑀢𑀺 𑀧𑀭𑀓𑁆𑀓𑀫𑀲𑀻𑀲𑁂𑀦 𑀲𑀽𑀭𑀪𑀸𑀯𑀁 𑀯𑀤𑀢𑀺. 𑀣𑀸𑀫𑀪𑀸𑀯𑀢𑁄 𑀘 𑀯𑀻𑀭𑀺𑀬𑀲𑁆𑀲 𑀲𑀽𑀭𑀪𑀸𑀯𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀘𑀺𑀦𑁆𑀢𑀦𑀧𑁆𑀧𑀥𑀸𑀦𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀫𑀦𑁆𑀢𑀲𑀁𑀯𑀺𑀥𑀸𑀦𑀲𑀤𑀺𑀲𑀢𑀸 𑀯𑀼𑀢𑁆𑀢𑀸.

𑀚𑀸𑀢𑀺𑀲𑀫𑁆𑀧𑀢𑁆𑀢𑀺 𑀦𑀸𑀫 𑀯𑀺𑀲𑀺𑀝𑁆𑀞𑀚𑀸𑀢𑀺𑀢𑀸. ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀘 𑀧𑀜𑁆𑀜𑀸 𑀲𑁂𑀝𑁆𑀞𑀸’’𑀢𑀺 𑀯𑀻𑀫𑀁𑀲𑀸𑀬 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀢𑀸 𑀯𑀼𑀢𑁆𑀢𑀸. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁪𑁩𑁩) 𑀧𑀦 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀲𑁆𑀲 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀢𑀸, 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀲𑁆𑀲 𑀫𑀦𑁆𑀢𑀩𑀮𑀲𑀤𑀺𑀲𑀢𑀸 𑀘 𑀬𑁄𑀚𑀺𑀢𑀸.

𑀅𑀦𑁂𑀓𑀁 𑀯𑀺𑀳𑀺𑀢𑀁 𑀯𑀺𑀥𑀁 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀆𑀳 ‘‘𑀅𑀦𑁂𑀓𑀯𑀺𑀥’’𑀦𑁆𑀢𑀺. 𑀯𑀺𑀥-𑀲𑀤𑁆𑀤𑁄 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄 ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁫𑁧) 𑀯𑀺𑀬𑀸𑀢𑀺 𑀆𑀳 ‘‘𑀇𑀤𑁆𑀥𑀺𑀯𑀺𑀥𑀦𑁆𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲’’𑀦𑁆𑀢𑀺.

𑀢𑀺𑀯𑀺𑀥𑀑𑀓𑀸𑀲𑀸𑀥𑀺𑀕𑀫𑀯𑀡𑁆𑀡𑀦𑀸

𑁨𑁮𑁮. ‘‘𑀲𑀼𑀔𑀲𑁆𑀲𑀸’’𑀢𑀺 𑀇𑀤𑀁 𑀢𑀺𑀡𑁆𑀡𑀫𑁆𑀧𑀺 𑀲𑀼𑀔𑀸𑀦𑀁 𑀲𑀸𑀥𑀸𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀛𑀸𑀦𑀲𑀼𑀔𑀲𑁆𑀲 𑀫𑀕𑁆𑀕𑀲𑀼𑀔𑀲𑁆𑀲 𑀨𑀮𑀲𑀼𑀔𑀲𑁆𑀲𑀸’’𑀢𑀺. 𑀦𑀸𑀦𑀧𑁆𑀧𑀦𑀸𑀧𑀢𑁆𑀢𑀢𑀸𑀬 𑀧𑀦 𑀅𑀧𑁆𑀧𑀥𑀸𑀦𑀢𑁆𑀢𑀸 𑀉𑀧𑀘𑀸𑀭𑀚𑁆𑀛𑀸𑀦𑀲𑀼𑀔𑀲𑁆𑀲, 𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑁆𑀲 𑀘𑁂𑀢𑁆𑀣 𑀅𑀕𑁆𑀕𑀳𑀡𑀁. 𑀧𑀼𑀭𑀺𑀫𑁂𑀲𑀼 𑀢𑀸𑀯 𑀤𑁆𑀯𑀻𑀲𑀼 𑀑𑀓𑀸𑀲𑀸𑀥𑀺𑀕𑀫𑁂𑀲𑀼 𑀢𑀻𑀡𑀺𑀧𑀺 𑀲𑀼𑀔𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑀢𑀺𑀬𑁂 𑀧𑀦 𑀓𑀣𑀦𑁆𑀢𑀺? 𑀢𑀢𑁆𑀣 𑀓𑀸𑀫𑀁 𑀢𑀻𑀡𑀺 𑀦 𑀮𑀩𑁆𑀪𑀦𑁆𑀢𑀺, 𑀤𑁆𑀯𑁂 𑀧𑀦 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀬𑀣𑀸𑀮𑀸𑀪𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. ‘‘𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁪𑁯; 𑀫. 𑀦𑀺. 𑁧.𑁪𑁩𑁩; 𑁨.𑁨𑁫𑁯; 𑀅. 𑀦𑀺. 𑁧.𑁪𑁫, 𑁪𑁬) 𑀯𑀺𑀬. 𑀲𑀁𑀲𑀝𑁆𑀞𑁄𑀢𑀺 𑀲𑀁𑀲𑀕𑁆𑀕𑀁 𑀉𑀧𑀕𑀢𑁄 𑀲𑀫𑀗𑁆𑀕𑀻𑀪𑀽𑀢𑁄, 𑀲𑁄 𑀧𑀦 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀘𑀺𑀢𑁆𑀢𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄’’𑀢𑀺. 𑀅𑀭𑀺𑀬𑀥𑀫𑁆𑀫𑀦𑁆𑀢𑀺 𑀅𑀭𑀺𑀬𑀪𑀸𑀯𑀓𑀭𑀁 𑀥𑀫𑁆𑀫𑀁. 𑀉𑀧𑀸𑀬𑀢𑁄𑀢𑀺 𑀯𑀺𑀥𑀺𑀢𑁄. 𑀧𑀣𑀢𑁄𑀢𑀺 𑀫𑀕𑁆𑀕𑀢𑁄. 𑀓𑀸𑀭𑀡𑀢𑁄𑀢𑀺 𑀳𑁂𑀢𑀼𑀢𑁄. 𑀬𑁂𑀦 𑀳𑀺 𑀯𑀺𑀥𑀺𑀦𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀳𑁄𑀢𑀺, 𑀲𑁄 𑀉𑀧𑁂𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀬𑁄, 𑀲𑁄 𑀢𑀤𑀥𑀺𑀕𑀫𑀲𑁆𑀲 𑀫𑀕𑁆𑀕𑀪𑀸𑀯𑀢𑁄 𑀧𑀣𑁄, 𑀢𑀲𑁆𑀲 𑀓𑀭𑀡𑀢𑁄 𑀓𑀸𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

‘‘𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀸𑀬𑀫𑀦𑀲𑀺𑀓𑀸𑀭𑁄𑀢𑀺 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑁄 𑀫𑀦𑀲𑀺𑀓𑀸𑀭𑁄. 𑀧𑀣𑀫𑀦𑀲𑀺𑀓𑀸𑀭𑁄𑀢𑀺 𑀢𑀲𑁆𑀲 𑀏𑀯 𑀫𑀕𑁆𑀕𑀪𑀽𑀢𑁄 𑀫𑀦𑀲𑀺𑀓𑀸𑀭𑁄. 𑀅𑀦𑀺𑀘𑁆𑀘𑁂𑀢𑀺 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬, 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬 𑀘 𑀅𑀦𑀺𑀘𑁆𑀘𑁂 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀢𑀲𑁆𑀫𑀺𑀁𑀬𑁂𑀯 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀢𑀸𑀬 𑀤𑀼𑀓𑁆𑀔𑀦𑀢𑁄, 𑀤𑀼𑀓𑁆𑀔𑀫𑀢𑁄 𑀘 𑀤𑀼𑀓𑁆𑀔𑁂, 𑀅𑀯𑀲𑀯𑀢𑁆𑀢𑀦𑀢𑁆𑀣𑁂𑀦, 𑀅𑀦𑀢𑁆𑀢𑀲𑀪𑀸𑀯𑀢𑀸𑀬 𑀘 𑀅𑀦𑀢𑁆𑀢𑀦𑀺, 𑀅𑀲𑀼𑀘𑀺𑀲𑀪𑀸𑀯𑀢𑀸𑀬 𑀅𑀲𑀼𑀪𑁂. 𑀲𑀩𑁆𑀩𑀫𑁆𑀧𑀺 𑀳𑀺 𑀢𑁂𑀪𑀽𑀫𑀓𑀁 𑀲𑀗𑁆𑀔𑀢𑀁 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 ‘‘𑀅𑀲𑀼𑀪’’𑀦𑁆𑀢𑁆𑀯𑁂𑀯 𑀯𑀢𑁆𑀢𑀼𑀁 𑀅𑀭𑀳𑀢𑀺. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑁂𑀦 𑀯𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀅𑀦𑀼𑀮𑁄𑀫𑀦𑀯𑀲𑁂𑀦. ‘‘𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸’’𑀢𑀺𑀆𑀤𑀺𑀦𑀸 𑀆𑀯𑀚𑁆𑀚𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀢𑀢𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀫𑀦𑁄𑀤𑁆𑀯𑀸𑀭𑀺𑀓𑀸 𑀓𑀼𑀲𑀮𑀚𑀯𑀦𑀧𑁆𑀧𑀯𑀢𑁆𑀢𑀺 𑀨𑀮𑀯𑁄𑀳𑀸𑀭𑁂𑀦𑁂𑀯 𑀢𑀣𑀸 𑀯𑀼𑀢𑁆𑀢𑀸. 𑀢𑀲𑁆𑀲𑀸 𑀳𑀺 𑀯𑀲𑁂𑀦 𑀲𑀸 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺. 𑀆𑀯𑀚𑁆𑀚𑀦𑀸 𑀳𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀯𑀝𑁆𑀝𑁂𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸, 𑀅𑀦𑀼 𑀅𑀦𑀼 𑀆𑀯𑀝𑁆𑀝𑁂𑀢𑀻𑀢𑀺 𑀅𑀦𑁆𑀯𑀸𑀯𑀝𑁆𑀝𑀦𑀸. 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀆𑀪𑀼𑀚𑀢𑀻𑀢𑀺 𑀆𑀪𑁄𑀕𑁄. 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀲𑀫𑀦𑁆𑀦𑀸𑀳𑀸𑀭𑁄. 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀢𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀫𑀦𑀲𑀺 𑀓𑀭𑁄𑀢𑀺 𑀞𑀧𑁂𑀢𑀻𑀢𑀺 𑀫𑀦𑀲𑀺𑀓𑀸𑀭𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀉𑀧𑀸𑀬𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀤𑀻𑀦𑀺 𑀲𑀘𑁆𑀘𑀸𑀦𑀺 𑀆𑀯𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺.

𑀅𑀲𑀁𑀲𑀝𑁆𑀞𑁄𑀢𑀺 𑀦 𑀲𑀁𑀲𑀝𑁆𑀞𑁄 𑀓𑀸𑀫𑀸𑀤𑀻𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀦𑀸𑀪𑀽𑀢𑁄. 𑀓𑀸𑀫𑀸𑀤𑀺𑀯𑀺𑀲𑀁𑀲𑀕𑁆𑀕𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀦𑀸𑀫 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀆𑀳 ‘‘𑀧𑀞𑀫𑀚𑁆𑀛𑀸𑀦𑀲𑀼𑀔’’𑀦𑁆𑀢𑀺. 𑀓𑀸𑀫𑀁 𑀧𑀞𑀫𑀚𑁆𑀛𑀸𑀦𑀲𑀼𑀔𑀫𑁆𑀧𑀺 𑀲𑁄𑀫𑀦𑀲𑁆𑀲𑀫𑁂𑀯, 𑀲𑀼𑀢𑁆𑀢𑁂𑀲𑀼 𑀧𑀦 𑀢𑀁 𑀓𑀸𑀬𑀺𑀓𑀲𑀼𑀔𑀲𑁆𑀲𑀸𑀧𑀺 𑀧𑀘𑁆𑀘𑀬𑀪𑀸𑀯𑀢𑁄 𑀯𑀺𑀲𑁂𑀲𑀢𑁄 ‘‘𑀲𑀼𑀔’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀇𑀥𑀸𑀧𑀺 𑀛𑀸𑀦𑀪𑀽𑀢𑀁 𑀲𑁄𑀫𑀦𑀲𑁆𑀲𑀁 𑀲𑀼𑀔𑀦𑁆𑀢𑀺, 𑀇𑀢𑀭𑀁 𑀲𑁄𑀫𑀦𑀲𑁆𑀲𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀔𑀸’’𑀢𑀺. 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀛𑀸𑀦𑀲𑀼𑀔𑀧𑀘𑁆𑀘𑀬𑀸’’𑀢𑀺. 𑀅𑀧𑀭𑀸𑀧𑀭𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀛𑀸𑀦𑀸𑀥𑀺𑀕𑀫𑀳𑁂𑀢𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀓𑀲𑁄𑀫𑀦𑀲𑁆𑀲𑀁.

𑀧𑀫𑁄𑀤𑀦𑀁 𑀧𑀫𑀼𑀤𑁄, 𑀢𑀭𑀼𑀡𑀧𑀻𑀢𑀺, 𑀢𑀢𑁄 𑀧𑀫𑀼𑀤𑀸. ‘‘𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀢𑀭𑀼𑀡𑀧𑀻𑀢𑀺 ‘‘𑀧𑀸𑀫𑁄𑀚𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀧𑀓𑀝𑁆𑀞𑁄 𑀫𑀼𑀤𑁄 𑀧𑀫𑀼𑀤𑁄 𑀧𑀸𑀫𑁄𑀚𑁆𑀚𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀲𑁄𑀫𑀦𑀲𑁆𑀲𑀭𑀳𑀺𑀢𑀁 𑀦𑀢𑁆𑀣𑀻𑀢𑀺 𑀅𑀯𑀺𑀦𑀸𑀪𑀸𑀯𑀺𑀢𑀸𑀬 ‘‘𑀩𑀮𑀯𑀢𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀁 𑀲𑀦𑁆𑀥𑀸𑀬 ‘‘𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀁 𑀧𑀦 𑀢𑀤𑁂𑀓𑀝𑁆𑀞𑁂 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑁂, 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀢𑀺𑀬𑁂𑀯, 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄. 𑀢𑀲𑁆𑀫𑀸𑀢𑀺 𑀑𑀓𑀸𑀲𑀕𑁆𑀕𑀳𑀡𑀢𑁄, 𑀮𑀤𑁆𑀥𑁄𑀓𑀸𑀲𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀨𑀮𑀲𑀼𑀔𑀸𑀥𑀺𑀕𑀫𑀸𑀬 𑀑𑀓𑀸𑀲𑀪𑀸𑀯𑀢𑁄 𑀯𑀸 𑀑𑀓𑀸𑀲𑁄, 𑀅𑀲𑁆𑀲 𑀅𑀥𑀺𑀕𑀫𑁄 𑀑𑀓𑀸𑀲𑀸𑀥𑀺𑀕𑀫𑁄. 𑀧𑀼𑀭𑀺𑀫𑀧𑀓𑁆𑀔𑁂 𑀧𑀦 𑀑𑀓𑀸𑀲𑀁 𑀅𑀯𑀲𑀭𑀁 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀑𑀓𑀸𑀲𑀸𑀥𑀺𑀕𑀫𑁄.

𑀭𑀽𑀧𑀲𑀪𑀸𑀯𑀢𑀸𑀬, 𑀏𑀓𑀦𑁆𑀢𑀭𑀽𑀧𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬, 𑀲𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀘 𑀆𑀦𑀸𑀧𑀸𑀦𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀣𑀽𑀮𑀪𑀸𑀯𑀁 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀸 𑀢𑀸𑀯 𑀑𑀴𑀸𑀭𑀺𑀓𑀸 𑀳𑁄𑀦𑁆𑀢𑀽’’𑀢𑀺 𑀆𑀳. 𑀢𑀩𑁆𑀩𑀺𑀥𑀼𑀭𑀢𑀸𑀬 𑀧𑀦 𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀲𑀜𑁆𑀜𑀸𑀦𑀁 𑀣𑀽𑀮𑀢𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀓𑀣𑀁 𑀑𑀴𑀸𑀭𑀺𑀓𑀸’’𑀢𑀺 𑀆𑀳. 𑀇𑀢𑀭𑁄 ‘‘𑀅𑀧𑁆𑀧𑀳𑀻𑀦𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀓𑀸𑀬𑀲𑀗𑁆𑀔𑀸𑀭𑀸 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀢𑁂𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸. 𑀅𑀧𑁆𑀧𑀳𑀻𑀦𑀸 𑀲𑀗𑁆𑀔𑀸𑀭𑀸 𑀮𑀩𑁆𑀪𑀫𑀸𑀦𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀢𑀸𑀬 ‘‘𑀑𑀴𑀸𑀭𑀺𑀓𑀸’’𑀢𑀺 𑀯𑀢𑁆𑀢𑀼𑀁 𑀅𑀭𑀳𑀦𑁆𑀢𑀺, 𑀧𑀳𑀻𑀦𑀸 𑀧𑀦 𑀢𑀤𑀪𑀸𑀯𑀢𑁄 ‘‘𑀲𑀼𑀔𑀼𑀫𑀸’’𑀢𑀺 𑀆𑀳 ‘‘𑀧𑀳𑀻𑀦𑁂 𑀉𑀧𑀸𑀤𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀑𑀴𑀸𑀭𑀺𑀓𑀸 𑀦𑀸𑀫 𑀚𑀸𑀢𑀸’’𑀢𑀺. 𑀧𑀸𑀴𑀺𑀬𑀁 ‘‘𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀼𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀘𑀻𑀲𑀗𑁆𑀔𑀸𑀭𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀓𑀸𑀬𑀲𑀗𑁆𑀔𑀸𑀭𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀯 𑀲𑀺𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀤𑀼𑀢𑀺𑀬…𑀧𑁂… 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀻’’𑀢𑀺. 𑀧𑀸𑀴𑀺𑀬𑀁 𑀧𑀦 𑀅𑀢𑁆𑀣𑀢𑁄 𑀲𑀺𑀤𑁆𑀥𑀸𑀧𑀺 𑀲𑀼𑀧𑀸𑀓𑀝𑀪𑀸𑀯𑁂𑀦 𑀯𑀺𑀪𑀸𑀯𑁂𑀢𑀼𑀁 𑀲𑀭𑀽𑀧𑀢𑁄 𑀕𑀡𑁆𑀳𑀸𑀢𑀺. 𑀦 𑀳𑀺 𑀅𑀭𑀺𑀬𑀯𑀺𑀦𑀬𑁂 𑀅𑀢𑁆𑀣𑀸𑀧𑀢𑁆𑀢𑀺𑀯𑀺𑀪𑀸𑀯𑀦𑀸 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀧𑀓𑀢𑀻𑀢𑀺. 𑀬𑀣𑀸 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀜𑁆𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀉𑀧𑀸𑀬𑁄, 𑀏𑀯𑀁 𑀲𑀼𑀔𑀤𑀼𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀁 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀉𑀧𑀸𑀬𑁄𑀢𑀺 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀯𑀺𑀚𑁆𑀚𑀸𑀭𑀸𑀕𑀸𑀤𑀻𑀳𑀺 𑀲𑀳 𑀯𑀚𑁆𑀚𑁂𑀳𑀻𑀢𑀺 𑀲𑀸𑀯𑀚𑁆𑀚𑀁, 𑀅𑀓𑀼𑀲𑀮𑀁, 𑀢𑀤𑀪𑀸𑀯𑀢𑁄 𑀅𑀦𑀯𑀚𑁆𑀚𑀁 𑀓𑀼𑀲𑀮𑀁. 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀆𑀓𑀗𑁆𑀔𑀦𑁆𑀢𑁂𑀦 𑀲𑁂𑀯𑀦𑀻𑀬𑀢𑁄 𑀲𑁂𑀯𑀺𑀢𑀩𑁆𑀩𑀁, 𑀓𑀼𑀲𑀮𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀦 𑀲𑁂𑀯𑀺𑀢𑀩𑁆𑀩𑀁, 𑀅𑀓𑀼𑀲𑀮𑀁. 𑀮𑀸𑀫𑀓𑀪𑀸𑀯𑁂𑀦 𑀳𑀻𑀦𑀁, 𑀅𑀓𑀼𑀲𑀮𑀁, 𑀲𑁂𑀝𑁆𑀞𑀪𑀸𑀯𑁂𑀦 𑀧𑀡𑀻𑀢𑀁, 𑀓𑀼𑀲𑀮𑀦𑁆𑀢𑀺 𑀲𑀸𑀯𑀚𑁆𑀚𑀤𑀼𑀓𑀸𑀤𑀬𑁄 𑀢𑀬𑁄𑀧𑀺 𑀤𑀼𑀓𑀸 𑀬𑀣𑀸𑀭𑀳𑀁 𑀏𑀢𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀁 𑀘𑀢𑀽𑀳𑀺 𑀤𑀼𑀓𑁂𑀳𑀺 𑀲𑀗𑁆𑀕𑀳𑀺𑀢𑀁 𑀥𑀫𑁆𑀫𑀚𑀸𑀢𑀁. 𑀬𑀣𑀸𑀭𑀳𑀁 𑀓𑀡𑁆𑀳𑀜𑁆𑀘 𑀲𑀼𑀓𑁆𑀓𑀜𑁆𑀘 𑀧𑀝𑀺𑀤𑁆𑀯𑀦𑁆𑀤𑀺𑀪𑀸𑀯𑀢𑁄, 𑀲𑀧𑁆𑀧𑀝𑀺𑀪𑀸𑀕𑀜𑁆𑀘 𑀅𑀧𑁆𑀧𑀝𑀺𑀪𑀸𑀕𑀜𑁆𑀘 𑀅𑀤𑁆𑀯𑀬𑀪𑀸𑀯𑀢𑁄. 𑀯𑀝𑁆𑀝𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀫𑁆𑀫𑀤𑁂𑀯 𑀧𑀝𑀺𑀯𑀺𑀚𑁆𑀛𑀦𑀢𑁄. 𑀢𑀢𑁄 𑀏𑀯 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀦𑁆𑀢𑀺 𑀏𑀯𑀁 𑀓𑀫𑁆𑀫𑀧𑀣𑀫𑀼𑀔𑁂𑀦 𑀢𑁂𑀪𑀽𑀫𑀓𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀦𑁆𑀢𑀲𑁆𑀲 𑀬𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑀼𑀔𑀜𑁆𑀘𑁂𑀯 𑀅𑀭𑀳𑀢𑁆𑀢𑀨𑀮𑀲𑀼𑀔𑀜𑁆𑀘, 𑀢𑀁 𑀇𑀥 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀦𑁆𑀢𑁄𑀕𑀥𑀸 𑀏𑀯 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄.

𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀯𑀲𑁂𑀦. 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀆𑀕𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀣’’𑀦𑁆𑀢𑀺𑀆𑀤𑀺𑀦𑀸 𑀢𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑀦𑀁 𑀦𑀬𑀢𑁄 𑀤𑀲𑁆𑀲𑁂𑀢𑀺. ‘‘𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀽’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁧𑁯) 𑀯𑀼𑀢𑁆𑀢𑀫𑁂𑀯. ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀧𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀭𑀽𑀧𑀚𑁆𑀛𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺 𑀢𑁂𑀳𑀺 𑀯𑀺𑀦𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀪𑀸𑀯𑀢𑁆𑀢𑀸 𑀘 𑀢𑁂𑀲𑀁. 𑀤𑀲 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀻𑀢𑀺 𑀞𑀧𑁂𑀢𑁆𑀯𑀸 𑀓𑀸𑀬𑀕𑀢𑀸𑀲𑀢𑀺𑀁 𑀆𑀦𑀸𑀧𑀸𑀦𑀜𑁆𑀘 𑀅𑀝𑁆𑀞 𑀅𑀦𑀼𑀲𑁆𑀲𑀢𑀺𑀬𑁄, 𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑀜𑁆𑀘𑀸𑀢𑀺 𑀤𑀲 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀺. 𑀅𑀥𑀺𑀲𑀻𑀮𑀁 𑀦𑀸𑀫 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀬𑀦𑁆𑀢𑀺 𑀢𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀧𑀞𑀫𑀚𑁆𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀞𑀫𑀁 𑀑𑀓𑀸𑀲𑀸𑀥𑀺𑀕𑀫𑀁 𑀪𑀚𑀢𑀻’’𑀢𑀺. 𑀅𑀥𑀺𑀘𑀺𑀢𑁆𑀢𑀁 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀝𑁆𑀞𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀅𑀭𑀽𑀧𑀚𑁆𑀛𑀸𑀦𑀸𑀦𑀁, 𑀢𑀧𑁆𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀨𑀮𑀚𑁆𑀛𑀸𑀦𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀤𑀼𑀢𑀺𑀬’’𑀦𑁆𑀢𑀺. 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀦𑀸𑀫 𑀅𑀕𑁆𑀕𑀫𑀕𑁆𑀕𑀯𑀺𑀚𑁆𑀚𑀸𑀢𑀺 𑀆𑀳 ‘‘𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀢𑀢𑀺𑀬’’𑀦𑁆𑀢𑀺. 𑀲𑀺𑀓𑁆𑀔𑀢𑁆𑀢𑀬𑀯𑀲𑁂𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑁂 𑀦𑀻𑀳𑀭𑀦𑁆𑀢𑁂𑀦 𑀬𑀣𑀸𑀭𑀳𑀁 𑀢𑀁𑀢𑀁𑀲𑀼𑀢𑁆𑀢𑀯𑀲𑁂𑀦𑀧𑀺 𑀦𑀻𑀳𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀫𑀜𑁆𑀜𑀨𑀮𑁂𑀧𑀻’’𑀢𑀺𑀆𑀤𑀺𑀫𑀸𑀳.

𑀬𑀤𑀕𑁆𑀕𑁂𑀦 𑀘 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀬𑀣𑀸𑀓𑁆𑀓𑀫𑀁 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑁂 𑀪𑀚𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀢𑀧𑁆𑀧𑀥𑀸𑀦𑀢𑁆𑀢𑀸 𑀬𑀣𑀸𑀓𑁆𑀓𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀢𑁂 𑀪𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀯𑀺𑀪𑀚𑀺𑀢𑁆𑀯𑀸𑀢𑀺 𑀢𑀺𑀡𑁆𑀡𑀁 𑀑𑀓𑀸𑀲𑀸𑀥𑀺𑀕𑀫𑀸𑀦𑀁 𑀯𑀲𑁂𑀦 𑀬𑀣𑀸𑀦𑀼𑀧𑀼𑀩𑁆𑀩𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀼𑀁 𑀮𑀪𑀺𑀲𑁆𑀲𑀸𑀫𑀸𑀢𑀺. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀲𑀫𑀸𑀬𑁄𑀚𑁂𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀫𑀢𑁆𑀣𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀲𑀫𑀸𑀦𑁂𑀢𑁆𑀯𑀸. 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀅𑀲𑀫𑁆𑀩𑀦𑁆𑀥𑀓𑀣𑀦𑁂𑀦, 𑀅𑀢𑀺𑀧𑀧𑀜𑁆𑀘𑀓𑀣𑀦𑁂𑀦 𑀯𑀸 𑀤𑀼𑀝𑁆𑀞𑀼 𑀓𑀣𑀺𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀣𑀸𑀓𑀣𑀦𑀲𑁆𑀲𑁂𑀯 𑀲𑀼𑀓𑀣𑀦𑀪𑀸𑀯𑀢𑁄𑀢𑀺 𑀆𑀳 ‘‘𑀢𑁂𑀧𑀺𑀝𑀓𑀁…𑀧𑁂… 𑀲𑀼𑀓𑀣𑀺𑀢𑀁 𑀳𑁄𑀢𑀻’’𑀢𑀺.

𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁮𑁯. 𑀦 𑀓𑁂𑀯𑀮𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦𑁂𑀯 𑀓𑀼𑀲𑀮𑀝𑁆𑀞𑁄 𑀕𑀳𑁂𑀢𑀩𑁆𑀩𑁄, 𑀅𑀣 𑀔𑁄 𑀩𑀸𑀳𑀺𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀻𑀢𑀺 𑀆𑀳 ‘‘𑀨𑀮𑀓𑀼𑀲𑀮𑀲𑁆𑀲 𑀘𑀸’’𑀢𑀺. 𑀔𑁂𑀫𑀝𑁆𑀞𑁂𑀦𑀸𑀢𑀺 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀯𑀪𑀸𑀯𑁂𑀦. 𑀲𑀫𑁆𑀫𑀸 𑀲𑀫𑀸𑀳𑀺𑀢𑁄𑀢𑀺 𑀲𑀫𑀣𑀯𑀲𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄. 𑀏𑀓𑀕𑁆𑀕𑀘𑀺𑀢𑁆𑀢𑁄𑀢𑀺 𑀯𑀺𑀓𑁆𑀔𑁂𑀧𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀢𑁆𑀢𑀘𑀺𑀢𑁆𑀢𑁄. 𑀅𑀢𑁆𑀢𑀦𑁄 𑀓𑀸𑀬𑀢𑁄𑀢𑀺 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀫𑁆𑀫𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀲𑀫𑀸𑀦𑁄 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁫.𑁧𑁦𑁭𑁧, 𑁧𑁦𑁭𑁨; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁧.𑁧𑁪) 𑀯𑀘𑀦𑀢𑁄. 𑀢𑀢𑁆𑀣 𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀢𑀢𑁄 𑀩𑀳𑀺𑀤𑁆𑀥𑀸 𑀧𑀭𑀲𑁆𑀲 𑀓𑀸𑀬𑁂𑀧𑀺 𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀧𑀭𑀲𑁆𑀲 𑀓𑀸𑀬𑀸𑀪𑀺𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑀻’’𑀢𑀺. 𑀲𑀫𑁆𑀫𑀸 𑀯𑀺𑀧𑁆𑀧𑀲𑀻𑀤𑀢𑀻𑀢𑀺 𑀲𑀫𑁆𑀫𑀸 𑀲𑀫𑀸𑀥𑀸𑀦𑀧𑀘𑁆𑀘𑀬𑁂𑀦 𑀅𑀪𑀺𑀧𑁆𑀧𑀲𑀸𑀤𑁂𑀦 𑀜𑀸𑀡𑀽𑀧𑀲𑀜𑁆𑀳𑀺𑀢𑁂𑀦 𑀅𑀚𑁆𑀛𑀢𑁆𑀢𑀁 𑀓𑀸𑀬𑀁 𑀑𑀓𑀧𑁆𑀧𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀝𑁆𑀞𑀸𑀦𑁂𑀲𑀼. 𑀲𑀢𑀺 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑀤𑀲𑁆𑀲𑀦𑀸𑀦𑀁 𑀢𑀤𑀼𑀪𑀬𑀲𑀸𑀥𑀸𑀭𑀡𑀪𑀸𑀯𑀢𑁄.

𑀲𑀢𑁆𑀢𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁨𑁯𑁦. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀸 𑀓𑀣𑀸𑀬. 𑀛𑀸𑀦𑀓𑁆𑀔𑀲𑁆𑀲 𑀯𑀻𑀭𑀺𑀬𑀘𑀓𑁆𑀓𑀲𑁆𑀲 𑀅𑀭𑀺𑀬𑀫𑀕𑁆𑀕𑀭𑀣𑀲𑁆𑀲 𑀲𑀻𑀮𑀁 𑀯𑀺𑀪𑀽𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀮𑀗𑁆𑀓𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫𑀸’’𑀢𑀺. 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀻𑀢𑀺 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀡𑀓𑁂𑀳𑀺 𑀓𑀢𑀧𑀭𑀺𑀓𑁆𑀔𑁂𑀧𑁄, 𑀧𑀭𑀺𑀔𑀸, 𑀉𑀤𑁆𑀤𑀸𑀧𑁄, 𑀧𑀸𑀓𑀸𑀭𑁄, 𑀏𑀲𑀺𑀓𑀸, 𑀧𑀮𑀺𑀖𑀸, 𑀧𑀸𑀓𑀸𑀭𑀧𑀓𑁆𑀔𑀡𑁆𑀟𑀺𑀮𑀦𑁆𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑀫𑁆𑀪𑀭𑀻𑀬𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀲𑀫𑁆𑀪𑀸𑀭𑁄, 𑀓𑀸𑀭𑀡𑀁. 𑀪𑁂𑀲𑀚𑁆𑀚𑀜𑁆𑀳𑀺 𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑁂𑀦 𑀚𑀻𑀯𑀺𑀢𑀲𑁆𑀲 𑀓𑀸𑀭𑀡𑀁. 𑀧𑀭𑀺𑀯𑀸𑀭𑀧𑀭𑀺𑀓𑁆𑀔𑀸𑀭𑀯𑀲𑁂𑀦𑀸𑀢𑀺 𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑀧𑀭𑀺𑀓𑁆𑀔𑀸𑀭𑀯𑀲𑁂𑀦. 𑀧𑀭𑀺𑀓𑁆𑀔𑀸𑀭𑁄 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀤𑀬𑁄 𑀫𑀕𑁆𑀕𑀥𑀫𑁆𑀫𑀸 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀭𑀺𑀓𑀭𑀡𑀢𑁄 𑀅𑀪𑀺𑀲𑀗𑁆𑀔𑀭𑀡𑀢𑁄. 𑀉𑀧𑁂𑀘𑁆𑀘 𑀦𑀺𑀲𑁆𑀲𑀻𑀬𑀢𑀻𑀢𑀺 𑀉𑀧𑀦𑀺𑀲𑀸, 𑀲𑀳 𑀉𑀧𑀦𑀺𑀲𑀸𑀬𑀸𑀢𑀺 𑀲𑀉𑀧𑀦𑀺𑀲𑁄𑀢𑀺 𑀆𑀳 ‘‘𑀲𑀉𑀧𑀦𑀺𑀲𑁆𑀲𑀬𑁄’’𑀢𑀺, 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁄 𑀥𑀫𑁆𑀫𑀲𑀫𑀽𑀳𑁄 𑀇𑀥 ‘‘𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀫𑁆𑀫𑀸 𑀧𑀲𑀢𑁆𑀣𑀸 𑀲𑀼𑀦𑁆𑀤𑀭𑀸 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲. 𑀲𑁄 𑀧𑀦 𑀬𑀲𑁆𑀫𑀸 𑀧𑀢𑀺𑀝𑁆𑀞𑀺𑀢𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲𑀸’’𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀲𑀫𑀼𑀕𑁆𑀖𑀸𑀝𑁂𑀦𑁆𑀢𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀬𑀣𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑀸𑀥𑀦𑁂 𑀧𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀁 𑀧𑀦𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀯𑀢𑁆𑀢𑀢𑀻’’𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀲𑁂𑀲𑀧𑀤𑁂𑀲𑀼 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀏𑀢𑁆𑀣 𑀘 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀩𑀳𑀽𑀧𑀓𑀸𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀣𑀸 𑀳𑀺 𑀲𑀸 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄, 𑀧𑀜𑁆𑀜𑀸𑀲𑀢𑁆𑀣’’𑀦𑁆𑀢𑀺 𑀘 𑀯𑀼𑀢𑁆𑀢𑀸. 𑀢𑀸𑀬 𑀳𑀺 𑀲𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄 𑀔𑁂𑀫𑁂𑀦 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑀓𑀣𑀸𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀆𑀤𑀺𑀢𑁄 𑀕𑀬𑁆𑀳𑀢𑀺, 𑀇𑀥 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀸𑀬 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦 𑀲𑀫𑁆𑀫𑀤𑁂𑀯 𑀲𑀗𑁆𑀓𑀧𑁆𑀧𑁂𑀢𑀺, 𑀦 𑀫𑀺𑀘𑁆𑀙𑀸𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦, 𑀢𑀲𑁆𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺. 𑀬𑀲𑁆𑀫𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸𑀬 𑀉𑀧𑀓𑀸𑀭𑀓𑁄. 𑀬𑀣𑀸𑀳 ‘‘𑀧𑀼𑀩𑁆𑀩𑁂 𑀔𑁄 𑀕𑀳𑀧𑀢𑀺 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺, (𑀲𑀁. 𑀦𑀺. 𑁨.𑁩𑁪𑁮) 𑀢𑀲𑁆𑀫𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀺. 𑀬𑀲𑁆𑀫𑀸 𑀧𑀦 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀳𑀺 𑀧𑀞𑀫𑀁 𑀯𑀸𑀘𑀸𑀬 𑀲𑀁𑀯𑀺𑀤𑀳𑀺𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀢𑁂 𑀢𑁂 𑀓𑀫𑁆𑀫𑀦𑁆𑀢𑀸 𑀲𑀫𑁆𑀫𑀸 𑀧𑀬𑁄𑀚𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀯𑀸𑀘𑀸 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑀓𑀸𑀭𑀺𑀓𑀸𑀢𑀺 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀺𑀯𑀺𑀥𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀉𑀪𑀬𑀁 𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲𑁂𑀯 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀽𑀭𑀢𑀺, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀘 𑀲𑀫𑁆𑀫𑀸𑀆𑀚𑀻𑀯𑁄 𑀧𑀳𑁄𑀢𑀺. 𑀯𑀺𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀲𑀫𑀼𑀤𑀸𑀕𑀢𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀬𑁄𑀦𑀺𑀲𑁄 𑀧𑀥𑀸𑀦𑀲𑁆𑀲 𑀲𑀫𑁆𑀪𑀯𑀢𑁄 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀳𑁄𑀢𑀺. 𑀬𑁄𑀦𑀺𑀲𑁄 𑀧𑀤𑀳𑀦𑁆𑀢𑀲𑁆𑀲 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺 𑀧𑀳𑁄𑀢𑀺. 𑀬𑀲𑁆𑀫𑀸 𑀏𑀯𑀁 𑀲𑀽𑀧𑀝𑁆𑀞𑀺𑀢𑀸 𑀲𑀢𑀺 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀺𑀢𑁆𑀯𑀸 𑀧𑀳𑁄𑀢𑀺 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀸𑀥𑀸𑀢𑀼𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀻𑀢𑀺. 𑀅𑀬𑀜𑁆𑀘 𑀦𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀺𑀓𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀢𑀲𑁆𑀲 𑀢𑀲𑁆𑀲 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁄 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀫𑀢𑁆𑀣𑁄 𑀬𑀼𑀢𑁆𑀢𑁄, 𑀅𑀬𑀫𑁂𑀯 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀅𑀬𑀁 𑀧𑀦𑀢𑁆𑀣𑁄’’𑀢𑀺𑀆𑀤𑀺.

𑀫𑀕𑁆𑀕𑀜𑀸𑀡𑁂𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀜𑀸𑀡𑁂 𑀞𑀺𑀢𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄. 𑀫𑀕𑁆𑀕𑀧𑀜𑁆𑀜𑀸 𑀳𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀲𑀫𑁆𑀫𑀸𑀤𑀲𑁆𑀲𑀦𑀝𑁆𑀞𑁂𑀦 ‘‘𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸, 𑀲𑀸 𑀏𑀯 𑀦𑁂𑀲𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑀢𑁄 𑀧𑀝𑀺𑀯𑀺𑀚𑁆𑀛𑀦𑀢𑁄 𑀇𑀥 ‘‘𑀫𑀕𑁆𑀕𑀜𑀸𑀡’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀸. 𑀫𑀕𑁆𑀕𑀯𑀺𑀫𑀼𑀢𑁆𑀢𑀻𑀢𑀺 𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀫𑀼𑀘𑁆𑀘𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀫𑁂𑀯. 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀯 ‘‘𑀨𑀮𑀲𑀫𑁆𑀫𑀸𑀜𑀸𑀡’’𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁, 𑀧𑀭𑀺𑀬𑀸𑀬𑀯𑀘𑀦𑀜𑁆𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀨𑀮𑀯𑀺𑀫𑀼𑀢𑁆𑀢𑀺 𑀧𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀫𑀢𑀲𑁆𑀲 𑀤𑁆𑀯𑀸𑀭𑀸𑀢𑀺 𑀅𑀭𑀺𑀬𑀫𑀕𑁆𑀕𑀫𑀸𑀳. 𑀲𑁄 𑀧𑀦 𑀯𑀺𑀦𑀸 𑀘 𑀆𑀘𑀭𑀺𑀬𑀫𑀼𑀝𑁆𑀞𑀺𑀦𑀸 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸 𑀬𑀸𑀯𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀢𑁆𑀢𑀸 𑀯𑀺𑀯𑀝𑁄. 𑀥𑀫𑁆𑀫𑀯𑀺𑀦𑀻𑀢𑀸𑀢𑀺 𑀅𑀭𑀺𑀬𑀥𑀫𑁆𑀫𑁂 𑀯𑀺𑀦𑀻𑀢𑀸. 𑀲𑁄 𑀧𑀦𑁂𑀢𑁆𑀣 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀫𑁆𑀫𑀸𑀦𑀺𑀬𑁆𑀬𑀸𑀦𑁂𑀦 𑀦𑀺𑀬𑁆𑀬𑀸𑀢𑀸’’𑀢𑀺.

𑀅𑀢𑁆𑀣𑀻𑀢𑀺 𑀧𑀼𑀣𑀼𑀢𑁆𑀣𑀯𑀺𑀲𑀬𑀁 𑀦𑀺𑀧𑀸𑀢𑀧𑀤𑀁 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑁩.𑁧𑁫𑁪; 𑀲𑀁. 𑀦𑀺. 𑁪.𑁧𑁨𑁭; 𑀅. 𑀦𑀺. 𑁬.𑁨𑁯; 𑁧𑁦.𑁬𑁦; 𑀯𑀺𑀪. 𑁩𑁫𑁬; 𑀔𑀼. 𑀧𑀸. 𑁨.𑁧.𑀤𑁆𑀯𑀢𑁆𑀢𑀺𑀁𑀲𑀆𑀓𑀸𑀭; 𑀦𑁂𑀢𑁆𑀢𑀺. 𑁪𑁭) 𑀯𑀺𑀬𑀸𑀢𑀺 𑀆𑀳 ‘‘𑀅𑀦𑀸𑀕𑀸𑀫𑀺𑀦𑁄 𑀘 𑀅𑀢𑁆𑀣𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀲𑀓𑀤𑀸𑀕𑀸𑀫𑀺𑀦𑁄’’𑀢𑀺. 𑀩𑀳𑀺𑀤𑁆𑀥𑀸 𑀲𑀁𑀬𑁄𑀚𑀦𑀧𑀘𑁆𑀘𑀬𑁄 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀧𑀼𑀜𑁆𑀜𑀪𑀸𑀕𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀧𑀼𑀜𑁆𑀜𑀪𑀸𑀕𑀸, 𑀅𑀢𑀺𑀲𑀬𑀯𑀺𑀲𑀺𑀝𑁆𑀞𑁄 𑀘𑁂𑀢𑁆𑀣 𑀅𑀢𑁆𑀣𑀺𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀑𑀢𑁆𑀢𑀧𑁆𑀧𑀫𑀸𑀦𑁄𑀢𑀺 𑀉𑀢𑁆𑀢𑀲𑀦𑁆𑀢𑁄 𑀪𑀸𑀬𑀦𑁆𑀢𑁄. 𑀦 𑀧𑀦 𑀦𑀢𑁆𑀣𑀺, 𑀅𑀢𑁆𑀣𑀺 𑀏𑀯𑀸𑀢𑀺 𑀤𑀻𑀧𑁂𑀢𑀺.

𑁨𑁯𑁧. 𑀅𑀲𑁆𑀲𑀸𑀢𑀺 𑀯𑁂𑀲𑁆𑀲𑀯𑀡𑀲𑁆𑀲. 𑀮𑀤𑁆𑀥𑀺 𑀧𑀦 𑀦 𑀅𑀢𑁆𑀣𑀺 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀢𑁆𑀢𑀸. ‘‘𑀅𑀪𑀺𑀲𑀫𑀬𑁂 𑀯𑀺𑀲𑁂𑀲𑁄 𑀦𑀢𑁆𑀣𑀻’’𑀢𑀺 𑀏𑀢𑁂𑀦 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀤𑀺𑀲𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁯𑁨. 𑀓𑀸𑀭𑀡𑀲𑁆𑀲 𑀏𑀓𑀭𑀽𑀧𑀢𑁆𑀢𑀸 𑀇𑀫𑀸𑀦𑀺 𑀧𑀦 𑀧𑀤𑀸𑀦𑀻𑀢𑀺 𑀦 𑀓𑁂𑀯𑀮𑀁 ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺, 𑀅𑀣 𑀔𑁄 ‘‘𑀇𑀫𑀫𑀢𑁆𑀣𑀁 𑀚𑀦𑀯𑀲𑀪𑁄 𑀬𑀓𑁆𑀔𑁄’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀧𑀻𑀢𑀺.

𑀚𑀦𑀯𑀲𑀪𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.