𑁪. 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻𑀯𑀡𑁆𑀡𑀦𑀸

𑁨𑁪𑁨. 𑀲𑁄𑀯𑀡𑁆𑀡𑀫𑀬𑀸𑀢𑀺 𑀲𑀼𑀯𑀡𑁆𑀡𑀫𑀬𑀸. 𑀅𑀬𑀁 𑀧𑀸𑀓𑀸𑀭𑁄𑀢𑀺 𑀲𑀩𑁆𑀩𑀭𑀢𑀦𑀫𑀬𑁄 𑀧𑀸𑀓𑀸𑀭𑁄. 𑀢𑀬𑁄 𑀢𑀬𑁄𑀢𑀺 𑀅𑀦𑁆𑀢𑁄 𑀘 𑀢𑀬𑁄, 𑀩𑀳𑀺 𑀘 𑀢𑀬𑁄𑀢𑀺 𑀢𑀬𑁄 𑀢𑀬𑁄.

𑀏𑀲𑀺𑀓𑀢𑁆𑀣𑀫𑁆𑀪𑁄 𑀇𑀦𑁆𑀤𑀔𑀻𑀮𑁄 𑀦𑀕𑀭𑀲𑁄𑀪𑀦𑁄 𑀅𑀮𑀗𑁆𑀓𑀸𑀭𑀢𑁆𑀣𑀫𑁆𑀪𑁄. 𑀅𑀗𑁆𑀕𑀻𑀬𑀢𑀺 𑀜𑀸𑀬𑀢𑀺 𑀧𑀼𑀣𑀼𑀮𑀪𑀸𑀯𑁄 𑀏𑀢𑁂𑀦𑀸𑀢𑀺 𑀅𑀗𑁆𑀕𑀁, 𑀧𑀭𑀺𑀓𑁆𑀔𑁂𑀧𑁄. 𑀢𑀺𑀧𑁄𑀭𑀺𑀲𑀁 𑀅𑀗𑁆𑀕𑀁 𑀏𑀢𑀺𑀲𑁆𑀲𑀸𑀢𑀺 𑀢𑀺𑀧𑁄𑀭𑀺𑀲𑀗𑁆𑀕𑀸. 𑀢𑁂𑀦𑀸𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀜𑁆𑀘𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀢𑀺𑀧𑁄𑀭𑀺𑀲𑁂𑀦. 𑀧𑀡𑁆𑀡𑀨𑀮𑁂𑀲𑀼𑀧𑀻𑀢𑀺 𑀲𑀩𑁆𑀩𑀭𑀢𑀦𑀫𑀬𑀸𑀦𑀁 𑀢𑀸𑀮𑀸𑀦𑀁 𑀧𑀡𑁆𑀡𑀨𑀮𑁂𑀲𑀼𑀧𑀺. 𑀏𑀲𑁂𑀯 𑀦𑀬𑁄𑀢𑀺 ‘‘𑀧𑀡𑁆𑀡𑁂𑀲𑀼 𑀏𑀓𑀁 𑀧𑀢𑁆𑀢𑀓𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁. 𑀨𑀮𑁂𑀲𑀼𑀧𑀺 𑀏𑀓𑁄 𑀮𑁂𑀔𑀸𑀪𑀸𑀯𑁄 𑀲𑁄𑀯𑀡𑁆𑀡𑀫𑀬𑁄, 𑀏𑀓𑁄 𑀭𑀽𑀧𑀺𑀬𑀫𑀬𑁄’’𑀢𑀺𑀆𑀤𑀺𑀓𑁄 𑀅𑀬𑀫𑀢𑁆𑀣𑁄 𑀅𑀢𑀺𑀤𑀺𑀝𑁆𑀞𑁄. 𑀧𑀸𑀓𑀸𑀭𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀸𑀓𑀸𑀭𑀸𑀦𑀁 𑀅𑀦𑁆𑀢𑀭𑁂. 𑀏𑀓𑁂𑀓𑀸 𑀳𑀼𑀢𑁆𑀯𑀸 𑀞𑀺𑀢𑀸 𑀢𑀸𑀮𑀧𑀦𑁆𑀢𑀺.

𑀙𑁂𑀓𑁄𑀢𑀺 𑀧𑀝𑀼 𑀲𑀼𑀯𑀺𑀲𑀤𑁄, 𑀲𑁄 𑀘𑀲𑁆𑀲 𑀧𑀝𑀼𑀪𑀸𑀯𑁄 𑀫𑀦𑁄𑀲𑀸𑀭𑁄𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁄’’𑀢𑀺. 𑀭𑀜𑁆𑀚𑁂𑀢𑀼𑀦𑁆𑀢𑀺 𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀔𑀫𑀢𑁂𑀯𑀸𑀢𑀺 𑀭𑁄𑀘𑀢𑁂𑀯. 𑀦 𑀩𑀻𑀪𑀘𑁆𑀙𑁂𑀢𑀻𑀢𑀺 𑀦 𑀢𑀚𑁆𑀚𑁂𑀢𑀺, 𑀲𑁄𑀢𑀲𑀼𑀔𑀪𑀸𑀯𑀢𑁄 𑀧𑀺𑀬𑀸𑀬𑀺𑀢𑀩𑁆𑀩𑁄 𑀘 𑀳𑁄𑀢𑀺. 𑀓𑀼𑀫𑁆𑀪𑀣𑀼𑀡𑀤𑀤𑁆𑀤𑀭𑀺𑀓𑀸𑀤𑀺 𑀏𑀓𑀢𑀮𑀁 𑀢𑀽𑀭𑀺𑀬𑀁. 𑀉𑀪𑀬𑀢𑀮𑀁 𑀧𑀸𑀓𑀝𑀫𑁂𑀯. 𑀲𑀩𑁆𑀩𑀢𑁄 𑀧𑀭𑀺𑀬𑁄𑀦𑀤𑁆𑀥𑀁 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀁, 𑀧𑀡𑀯𑀸𑀤𑀺 𑀘. 𑀯𑀁𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀫𑀼𑀘𑁆𑀙𑀺𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀧𑀭𑀺𑀬𑀢𑁆𑀢𑀲𑁆𑀲. 𑀧𑀫𑀸𑀡𑁂𑀢𑀺 𑀦𑀸𑀢𑀺𑀤𑀴𑁆𑀳𑀦𑀸𑀢𑀺𑀲𑀺𑀣𑀺𑀮𑀢𑀸𑀲𑀗𑁆𑀔𑀸𑀢𑁂 𑀫𑀚𑁆𑀛𑀺𑀫𑁂 𑀫𑀼𑀘𑁆𑀙𑀦𑀧𑁆𑀧𑀫𑀸𑀡𑁂. 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀘𑀸𑀮𑁂𑀢𑁆𑀯𑀸𑀢𑀺 𑀳𑀢𑁆𑀣𑀮𑀬𑀧𑀸𑀤𑀮𑀬𑁂 𑀲𑀚𑁆𑀚𑁂𑀢𑁆𑀯𑀸. 𑀦𑀘𑁆𑀘𑀦𑁆𑀢𑀸𑀢𑀺 𑀲𑀸𑀔𑀸𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀸.

𑀘𑀓𑁆𑀓𑀭𑀢𑀦𑀯𑀡𑁆𑀡𑀦𑀸

𑁨𑁪𑁩. 𑀉𑀧𑁄𑀲𑀣𑀁 𑀯𑀼𑀘𑁆𑀘𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀩𑁆𑀩𑀤𑀺𑀯𑀲𑁂𑀲𑀼 𑀕𑀳𑀝𑁆𑀞𑁂𑀳𑀺 𑀭𑀓𑁆𑀔𑀺𑀢𑀩𑁆𑀩𑀲𑀻𑀮𑀁, 𑀲𑀫𑀸𑀤𑀸𑀦𑀯𑀲𑁂𑀦 𑀢𑀁 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑁄𑀲𑀣𑀺𑀓𑁄, 𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲. 𑀢𑁂𑀦𑀸𑀳 ‘‘𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀗𑁆𑀕𑀲𑁆𑀲𑀸’’𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀓𑀲𑁆𑀫𑀺𑀁 𑀧𑀦 𑀓𑀸𑀮𑁂𑀢𑀺? 𑀬𑀲𑁆𑀫𑀺𑀁 𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀲𑀁𑀯𑀢𑁆𑀢𑀦𑀺𑀬𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑀫𑀼𑀤𑀸𑀕𑀫𑀲𑀫𑁆𑀧𑀦𑁆𑀦𑁄 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄 𑀓𑀸𑀮𑀤𑀻𑀧𑀤𑁂𑀲𑀯𑀺𑀲𑁂𑀲𑀧𑀘𑁆𑀘𑀸𑀚𑀸𑀢𑀺𑀬𑀸 𑀘𑁂𑀯 𑀓𑀼𑀮𑀭𑀽𑀧𑀪𑁄𑀕𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀤𑀦𑀼𑀭𑀽𑀧𑁂 𑀅𑀢𑁆𑀢𑀪𑀸𑀯𑁂 𑀞𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑀸𑀤𑀺𑀲𑁂 𑀳𑀺 𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀻 𑀧𑀼𑀭𑀺𑀲𑀯𑀺𑀲𑁂𑀲𑁄 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀯𑀺𑀲𑀼𑀤𑁆𑀥𑀲𑀻𑀮𑁄 𑀅𑀦𑀼𑀧𑁄𑀲𑀣𑀁 𑀲𑀢𑀲𑀳𑀲𑁆𑀲𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀦 𑀬𑀤𑀸 𑀘𑀓𑁆𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀏𑀯. 𑀇𑀫𑁂 𑀘 𑀯𑀺𑀲𑁂𑀲𑀸 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀸𑀢𑁄𑀯…𑀧𑁂… 𑀥𑀫𑁆𑀫𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀕𑀼𑀡𑀸𑀧𑀺 𑀘𑀓𑁆𑀓𑀯𑀢𑁆𑀢𑀺𑀕𑀼𑀡𑀸𑀧𑀺 𑀲𑀸𑀢𑀺𑀲𑀬𑀸𑀯 𑀳𑁄𑀦𑁆𑀢𑀺.

𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀤𑀸𑀦𑀤𑀫𑀲𑀁𑀬𑀫𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀳𑁂𑀢𑀼𑀓𑀁. 𑀦𑀻𑀮𑀫𑀡𑀺𑀲𑀗𑁆𑀖𑀸𑀢𑀲𑀤𑀺𑀲𑀦𑁆𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀲𑀜𑁆𑀘𑀬𑀲𑀫𑀸𑀦𑀁. 𑀤𑀺𑀩𑁆𑀩𑀸𑀦𑀼𑀪𑀸𑀯𑀬𑀼𑀢𑁆𑀢𑀢𑁆𑀢𑀸𑀢𑀺 𑀤𑀲𑁆𑀲𑀦𑁂𑀬𑁆𑀬𑀢𑀸, 𑀫𑀦𑀼𑀜𑁆𑀜𑀖𑁄𑀲𑀢𑀸, 𑀆𑀓𑀸𑀲𑀕𑀸𑀫𑀺𑀢𑀸, 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑀸, 𑀅𑀧𑁆𑀧𑀝𑀺𑀖𑀸𑀢𑀢𑀸, 𑀭𑀜𑁆𑀜𑁄 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑀸𑀢𑀺 𑀏𑀯𑀫𑀸𑀤𑀻𑀳𑀺 𑀤𑀺𑀩𑁆𑀩𑀲𑀤𑀺𑀲𑁂𑀳𑀺 𑀆𑀦𑀼𑀪𑀸𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀏𑀢𑁂𑀦 𑀤𑀺𑀩𑁆𑀩𑀁 𑀯𑀺𑀬𑀸𑀢𑀺 𑀤𑀺𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀢𑀁 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀁. 𑀲𑀳𑀲𑁆𑀲𑀁 𑀅𑀭𑀸 𑀏𑀢𑀲𑁆𑀲𑀸𑀢𑀺 𑀯𑀸 𑀲𑀳𑀲𑁆𑀲𑀸𑀭𑀁. 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀲𑀼𑀦𑁆𑀤𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑁂 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂 𑀘𑀓𑁆𑀓𑁂 𑀇𑀘𑁆𑀙𑀺𑀢𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺. 𑀧𑀭𑀺𑀧𑀽𑀭𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁, 𑀲𑀸 𑀘𑀲𑁆𑀲𑀸 𑀧𑀸𑀭𑀺𑀧𑀽𑀭𑀺𑀁 𑀇𑀤𑀸𑀦𑁂𑀯 𑀯𑀺𑀢𑁆𑀣𑀸𑀭𑁂𑀲𑁆𑀲𑀢𑀺.

𑀧𑀦𑀸𑀴𑀻𑀢𑀺 𑀙𑀺𑀤𑁆𑀤𑀁. 𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀤𑀦𑁆𑀢𑀧𑀦𑁆𑀢𑀺𑀬𑀸 𑀦𑀺𑀩𑁆𑀩𑀺𑀯𑀭𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸 𑀧𑀦 𑀧𑀦𑀸𑀴𑀺𑀬𑀸 𑀲𑀫𑀦𑁆𑀢𑀢𑁄 𑀧𑀲𑁆𑀲𑀲𑁆𑀲 𑀭𑀚𑀢𑀫𑀬𑀢𑁆𑀢𑀸 𑀲𑀸𑀭𑀭𑀚𑀢𑀫𑀬𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀘𑀲𑁆𑀲 𑀘𑀓𑁆𑀓𑀲𑁆𑀲 𑀭𑀣𑀘𑀓𑁆𑀓𑀲𑁆𑀲 𑀯𑀺𑀬 𑀅𑀦𑁆𑀢𑁄𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀪𑁄𑀲𑀼𑀧𑀺 𑀩𑀸𑀳𑀺𑀭𑀦𑁆𑀢𑁂𑀲𑀽’’𑀢𑀺. 𑀓𑀢𑀧𑀭𑀺𑀓𑁆𑀔𑁂𑀧𑀸 𑀳𑁄𑀢𑀺 𑀧𑀦𑀸𑀴𑀻𑀢𑀺 𑀬𑁄𑀚𑀦𑀸. 𑀦𑀸𑀪𑀺𑀧𑀦𑀸𑀴𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂𑀲𑀽𑀢𑀺 𑀦𑀸𑀪𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂 𑀘𑁂𑀯 𑀦𑀸𑀪𑀺𑀬𑀸 𑀧𑀦𑀸𑀴𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂 𑀘.

𑀢𑁂𑀲𑀦𑁆𑀢𑀺 𑀅𑀭𑀸𑀦𑀁. 𑀖𑀝𑀓𑀸 𑀦𑀸𑀫 𑀅𑀮𑀗𑁆𑀓𑀸𑀭𑀪𑀽𑀢𑀸 𑀔𑀼𑀤𑁆𑀤𑀓𑀧𑀼𑀡𑁆𑀡𑀖𑀝𑀸. 𑀢𑀣𑀸 𑀫𑀡𑀺𑀓𑀸 𑀦𑀸𑀫 𑀫𑀼𑀢𑁆𑀢𑀸𑀯𑀴𑀺𑀓𑀸. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 𑀞𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀮𑁂𑀔𑀸. 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀮𑀸𑀓𑀫𑁆𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀯𑀺𑀪𑀢𑁆𑀢𑀸𑀦𑁂𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀢𑁆𑀢𑀸 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸𑀦𑀺.

‘‘𑀲𑀼𑀭𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀲𑀼𑀭𑀢𑁆𑀢𑀕𑁆𑀕𑀳𑀡𑁂𑀦 𑀫𑀳𑀸𑀦𑀸𑀫𑀯𑀡𑁆𑀡𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀼𑀤𑁆𑀥𑀕𑁆𑀕𑀳𑀡𑁂𑀦 𑀲𑀁𑀗𑁆𑀓𑀺𑀮𑀺𑀝𑁆𑀞𑀢𑀁, 𑀲𑀺𑀦𑀺𑀤𑁆𑀥𑀕𑁆𑀕𑀳𑀡𑁂𑀦 𑀮𑀽𑀔𑀢𑀁. 𑀓𑀸𑀫𑀁 𑀢𑀲𑁆𑀲 𑀘𑀓𑁆𑀓𑀭𑀢𑀦𑀲𑁆𑀲 𑀦𑁂𑀫𑀺𑀫𑀡𑁆𑀟𑀮𑀁 𑀅𑀲𑀦𑁆𑀥𑀺𑀓𑀫𑁂𑀯 𑀦𑀺𑀩𑁆𑀩𑀢𑁆𑀢𑀁, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀦 𑀓𑁂𑀯𑀮𑀁 𑀧𑀯𑀸𑀴𑀯𑀡𑁆𑀡𑁂𑀦 𑀘 𑀲𑁄𑀪𑀢𑀻𑀢𑀺 𑀧𑀓𑀢𑀺𑀘𑀓𑁆𑀓𑀲𑁆𑀲 𑀲𑀦𑁆𑀥𑀺𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀼𑀭𑀢𑁆𑀢𑀲𑀼𑀯𑀡𑁆𑀡𑀧𑀝𑁆𑀝𑀸𑀤𑀺𑀫𑀬𑀸𑀳𑀺 𑀯𑀝𑁆𑀝𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀳𑀺 𑀧𑀜𑁆𑀜𑀸𑀬𑀫𑀸𑀦𑀸𑀳𑀺 𑀲𑀲𑀦𑁆𑀥𑀺𑀓𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀲𑀦𑁆𑀥𑀻𑀲𑀼 𑀧𑀦𑀲𑁆𑀲𑀸’’𑀢𑀺𑀆𑀤𑀺.

𑀦𑁂𑀫𑀺𑀫𑀡𑁆𑀟𑀮𑀧𑀺𑀝𑁆𑀞𑀺𑀬𑀦𑁆𑀢𑀺 𑀦𑁂𑀫𑀺𑀫𑀡𑁆𑀟𑀮𑀲𑁆𑀲 𑀧𑀺𑀝𑁆𑀞𑀺𑀧𑀤𑁂𑀲𑁂. 𑀆𑀓𑀸𑀲𑀘𑀸𑀭𑀺𑀪𑀸𑀯𑀢𑁄 𑀳𑀺𑀲𑁆𑀲 𑀢𑀢𑁆𑀣 𑀯𑀸𑀢𑀕𑁆𑀕𑀸𑀳𑀻 𑀧𑀯𑀸𑀴𑀤𑀡𑁆𑀟𑁄 𑀳𑁄𑀢𑀺. 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀁 𑀅𑀦𑁆𑀢𑀭𑁂𑀢𑀺 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀁 𑀅𑀦𑁆𑀢𑀭𑁂 𑀲𑀫𑀻𑀧𑁂 𑀧𑀤𑁂𑀲𑁂. 𑀙𑀺𑀤𑁆𑀤𑀫𑀡𑁆𑀟𑀮𑀔𑀘𑀺𑀢𑁄𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑀙𑀺𑀤𑁆𑀤𑀯𑀺𑀘𑀺𑀢𑁆𑀢𑁄. 𑀲𑀼𑀓𑀼𑀲𑀮𑀲𑀫𑀦𑁆𑀦𑀸𑀳𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀓𑀼𑀲𑀮𑁂𑀦 𑀲𑀺𑀧𑁆𑀧𑀺𑀦𑀸 𑀧𑀳𑀢𑀲𑁆𑀲, 𑀯𑀸𑀤𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀽𑀢𑀺 𑀫𑀦𑁄𑀭𑀫𑁄. 𑀭𑀚𑀦𑀻𑀬𑁄𑀢𑀺 𑀲𑀼𑀡𑀦𑁆𑀢𑀸𑀦𑀁 𑀭𑀸𑀕𑀼𑀧𑁆𑀧𑀸𑀤𑀓𑁄. 𑀓𑀫𑀦𑀻𑀬𑁄𑀢𑀺 𑀓𑀦𑁆𑀢𑁄. 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀸𑀢𑀺 𑀑𑀮𑀫𑁆𑀩𑀺𑀢𑀲𑀼𑀕𑀦𑁆𑀥𑀓𑀼𑀲𑀼𑀫𑀤𑀸𑀫𑀸. 𑀦𑁂𑀫𑀺𑀧𑀭𑀺𑀓𑁆𑀔𑁂𑀧𑀲𑁆𑀲𑀸𑀢𑀺 𑀦𑁂𑀫𑀺𑀧𑀭𑀺𑀬𑀦𑁆𑀢𑀧𑀭𑀺𑀓𑁆𑀔𑁂𑀧𑀲𑁆𑀲. 𑀦𑀸𑀪𑀺𑀧𑀦𑀸𑀴𑀺𑀬𑀸 𑀤𑁆𑀯𑀺𑀦𑁆𑀦𑀁 𑀧𑀲𑁆𑀲𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀪𑀺𑀧𑀦𑀸𑀴𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀸 𑀏𑀯 𑀳𑀺 𑀲𑀸 𑀧𑀦𑀸𑀴𑀺. 𑀬𑁂𑀳𑀻𑀢𑀺 𑀬𑁂𑀳𑀺 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺. 𑀧𑀼𑀦 𑀬𑁂𑀳𑀻𑀢𑀺 𑀬𑁂𑀳𑀺 𑀫𑀼𑀢𑁆𑀢𑀓𑀮𑀸𑀧𑁂𑀳𑀺.

𑀑𑀥𑀸𑀧𑀬𑀫𑀸𑀦𑀦𑁆𑀢𑀺 𑀲𑁄𑀢𑀼𑀁 𑀅𑀯𑀳𑀺𑀢𑀸𑀦𑀺 𑀓𑀼𑀭𑀼𑀫𑀸𑀦𑀁.

𑀘𑀦𑁆𑀤𑁄 𑀧𑀼𑀭𑀢𑁄 𑀘𑀓𑁆𑀓𑀭𑀢𑀦𑀁 𑀧𑀘𑁆𑀙𑀸𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦.

𑀅𑀦𑁆𑀢𑁂𑀧𑀼𑀭𑀲𑁆𑀲𑀸𑀢𑀺 𑀅𑀦𑀼𑀭𑀸𑀥𑀧𑀼𑀭𑁂 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀲𑁆𑀲. 𑀉𑀢𑁆𑀢𑀭𑀲𑀻𑀳𑀧𑀜𑁆𑀚𑀭𑀲𑀤𑀺𑀲𑁂𑀢𑀺 𑀢𑀤𑀸 𑀭𑀜𑁆𑀜𑁄 𑀧𑀸𑀲𑀸𑀤𑁂 𑀢𑀸𑀤𑀺𑀲𑀲𑁆𑀲 𑀉𑀢𑁆𑀢𑀭𑀤𑀺𑀲𑀸𑀬 𑀲𑀻𑀳𑀧𑀜𑁆𑀚𑀭𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀔𑁂𑀦 𑀲𑀓𑁆𑀓𑀸𑀢𑀺 𑀓𑀺𑀜𑁆𑀘𑀺 𑀅𑀦𑀸𑀭𑀼𑀳𑀺𑀢𑁆𑀯𑀸, 𑀲𑀭𑀻𑀭𑀜𑁆𑀘 𑀅𑀦𑀼𑀮𑁆𑀮𑀗𑁆𑀖𑀺𑀢𑁆𑀯𑀸 𑀬𑀣𑀸𑀞𑀺𑀢𑁂𑀦𑁂𑀯 𑀳𑀢𑁆𑀣𑁂𑀦 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀔𑀺𑀧𑀺𑀢𑁆𑀯𑀸 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀽𑀚𑁂𑀢𑀼𑀁.

𑀦𑀸𑀦𑀸𑀯𑀺𑀭𑀸𑀕𑀭𑀢𑀦𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀦𑁆𑀢𑀺 𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀯𑀡𑁆𑀡𑀭𑀢𑀦𑁄𑀪𑀸𑀲𑀧𑀪𑀲𑁆𑀲𑀭𑀁. 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂𑀢𑀺 𑀆𑀕𑀦𑁆𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀉𑀧𑀭𑀺 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂.

𑁨𑁪𑁪. 𑀭𑀸𑀚𑀸𑀬𑀼𑀢𑁆𑀢𑀸𑀢𑀺 𑀭𑀜𑁆𑀜𑁄 𑀓𑀺𑀘𑁆𑀘𑁂 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑀸.

𑀲𑀺𑀦𑁂𑀭𑀼𑀁 𑀯𑀸𑀫𑀧𑀲𑁆𑀲𑁂𑀦 𑀓𑀢𑁆𑀯𑀸 𑀢𑀲𑁆𑀲 𑀥𑀼𑀭𑀢𑀭𑀁 𑀕𑀘𑁆𑀙𑀦𑁆𑀢𑁄 ‘‘𑀯𑀸𑀫𑀧𑀲𑁆𑀲𑁂𑀦 𑀲𑀺𑀦𑁂𑀭𑀼𑀁 𑀧𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀯𑀺𑀦𑀺𑀩𑁆𑀩𑁂𑀥𑁂𑀦𑀸𑀢𑀺 𑀢𑀺𑀭𑀺𑀬𑀁 𑀯𑀺𑀦𑀺𑀯𑀺𑀚𑁆𑀛𑀦𑀯𑀲𑁂𑀦. 𑀲𑀦𑁆𑀦𑀺𑀯𑁂𑀲𑀓𑁆𑀔𑀫𑁄𑀢𑀺 𑀔𑀦𑁆𑀥𑀸𑀯𑀸𑀭𑀲𑀦𑁆𑀦𑀺𑀯𑁂𑀲𑀬𑁄𑀕𑁆𑀬𑁄. 𑀲𑀼𑀮𑀪𑀸𑀳𑀸𑀭𑀼𑀧𑀓𑀭𑀡𑁄𑀢𑀺 𑀲𑀼𑀔𑁂𑀦𑁂𑀯 𑀮𑀤𑁆𑀥𑀩𑁆𑀩𑀥𑀜𑁆𑀜𑀕𑁄𑀭𑀲𑀤𑀸𑀭𑀼𑀢𑀺𑀡𑀸𑀤𑀺𑀪𑁄𑀚𑀦𑀲𑀸𑀥𑀦𑁄.

𑀧𑀭𑀘𑀓𑁆𑀓𑀦𑁆𑀢𑀺 𑀧𑀭𑀲𑁆𑀲 𑀭𑀜𑁆𑀜𑁄 𑀲𑁂𑀦𑀸, 𑀆𑀡𑀸 𑀯𑀸.

𑀆𑀕𑀫𑀦𑀦𑀦𑁆𑀤𑀦𑁄𑀢𑀺 𑀆𑀕𑀫𑀦𑁂𑀦 𑀦𑀦𑁆𑀤𑀺𑀚𑀦𑀦𑁄. 𑀕𑀫𑀦𑁂𑀦 𑀲𑁄𑀘𑁂𑀢𑀻𑀢𑀺 𑀕𑀫𑀦𑀲𑁄𑀘𑀦𑁄. 𑀉𑀧𑀓𑀧𑁆𑀧𑁂𑀣𑀸𑀢𑀺 𑀉𑀧𑀭𑀽𑀧𑀭𑀺 𑀓𑀧𑁆𑀧𑁂𑀣, 𑀲𑀁𑀯𑀺𑀤𑀳𑀣 𑀉𑀧𑀦𑁂𑀣𑀸𑀢𑀺 𑀅𑀢𑁆𑀣𑁄. 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀢𑀺 𑀳𑁂𑀢𑀼𑀢𑁄𑀧𑀺 𑀲𑀪𑀸𑀯𑀢𑁄𑀧𑀺 𑀨𑀮𑀢𑁄𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀆𑀤𑀻𑀦𑀯𑀢𑁄𑀧𑀺 𑀯𑀻𑀫𑀁𑀲𑀺𑀢𑁆𑀯𑀸. 𑀯𑀺𑀪𑀸𑀯𑁂𑀦𑁆𑀢𑀺 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑀻𑀢𑀺 𑀯𑀺𑀪𑀸𑀯𑀺𑀦𑁄, 𑀧𑀜𑁆𑀜𑀯𑀦𑁆𑀢𑁄. 𑀅𑀦𑀼𑀬𑀦𑁆𑀢𑀸𑀢𑀺 𑀅𑀦𑀼𑀯𑀢𑁆𑀢𑀓𑀸, 𑀅𑀦𑀼𑀯𑀢𑁆𑀢𑀓𑀪𑀸𑀯𑁂𑀦𑁂𑀯, 𑀧𑀦 𑀭𑀜𑁆𑀜𑁄 𑀘 𑀫𑀳𑀸𑀦𑀼𑀪𑀸𑀯𑁂𑀦 𑀢𑁂 𑀚𑀺𑀕𑀼𑀘𑁆𑀙𑀦𑀯𑀲𑁂𑀦 𑀧𑀸𑀧𑀢𑁄 𑀅𑀦𑁄𑀭𑀫𑀦𑁆𑀢𑀸𑀧𑀺 𑀏𑀓𑀘𑁆𑀘𑁂 𑀑𑀢𑁆𑀢𑀧𑁆𑀧𑀯𑀲𑁂𑀦 𑀑𑀭𑀫𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀑𑀕𑀘𑁆𑀙𑀫𑀸𑀦𑀦𑁆𑀢𑀺 𑀑𑀲𑀻𑀤𑀦𑁆𑀢𑀁. 𑀬𑁄𑀚𑀦𑀫𑀢𑁆𑀢𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄 𑀬𑁄𑀚𑀦𑀫𑀢𑁆𑀢𑀁 𑀧𑀤𑁂𑀲𑀁. 𑀕𑀫𑁆𑀪𑀻𑀭𑀪𑀸𑀯𑁂𑀦 𑀧𑀦 𑀬𑀣𑀸 𑀪𑀽𑀫𑀺 𑀤𑀺𑀲𑁆𑀲𑀢𑀺, 𑀏𑀯𑀁 𑀑𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀫𑀳𑀸𑀲𑀫𑀼𑀤𑁆𑀤𑀢𑀮’’𑀦𑁆𑀢𑀺𑀆𑀤𑀺. 𑀅𑀦𑁆𑀢𑁂 𑀘𑀓𑁆𑀓𑀭𑀢𑀦𑀁 𑀉𑀤𑀓𑁂𑀦 𑀲𑁂𑀦𑀸𑀬 𑀅𑀦𑀚𑁆𑀛𑁄𑀢𑁆𑀣𑀭𑀡𑀢𑁆𑀣𑀁. 𑀧𑀼𑀭𑀢𑁆𑀣𑀺𑀫𑁄 𑀫𑀳𑀸𑀲𑀫𑀼𑀤𑁆𑀤𑁄 𑀧𑀭𑀺𑀬𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀧𑀼𑀭𑀢𑁆𑀣𑀺𑀫𑀫𑀳𑀸𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑁄, 𑀢𑀁 𑀧𑀼𑀭𑀢𑁆𑀣𑀺𑀫𑀫𑀳𑀸𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁, 𑀧𑀼𑀭𑀢𑁆𑀣𑀺𑀫𑀫𑀳𑀸𑀲𑀫𑀼𑀤𑁆𑀤𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀘𑀸𑀢𑀼𑀭𑀦𑁆𑀢𑀸𑀬𑀸𑀢𑀺 𑀘𑀢𑀼𑀲𑀫𑀼𑀤𑁆𑀤𑀦𑁆𑀢𑀸𑀬, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀺𑀘𑀢𑀼𑀓𑁄𑀝𑁆𑀞𑀸𑀲𑀦𑁆𑀢𑀸𑀬 𑀯𑀸. 𑀲𑁄𑀪𑀬𑀫𑀸𑀦𑀁 𑀯𑀺𑀬𑀸𑀢𑀺 𑀯𑀺𑀬-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀢𑁆𑀢𑀦𑁄 𑀅𑀘𑁆𑀙𑀭𑀺𑀬𑀕𑀼𑀡𑁂𑀳𑀺 𑀲𑁄𑀪𑀦𑁆𑀢𑀫𑁂𑀯 𑀳𑀺 𑀢𑀁 𑀢𑀺𑀝𑁆𑀞𑀢𑀺. 𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀉𑀧𑀲𑁄𑀪𑀬𑀫𑀸𑀦𑀁’’ 𑀢𑁆𑀯𑁂𑀯 𑀯𑀼𑀢𑁆𑀢𑀁.

𑀳𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁬. 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀕𑀫𑀦𑀁 𑀘𑀺𑀦𑁆𑀢𑁂𑀣𑀸𑀢𑀺 𑀯𑀤𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑁆𑀲 𑀧𑀽𑀭𑀺𑀢𑀢𑀸𑀬 𑀧𑀭𑀺𑀘𑀺𑀢𑀢𑁆𑀢𑀸. 𑀓𑀸𑀴𑀢𑀺𑀮𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀲𑁂𑀢𑀲𑀭𑀻𑀭𑁄. 𑀲𑀢𑁆𑀢𑀧𑀢𑀺𑀝𑁆𑀞𑁄𑀢𑀺 𑀪𑀽𑀫𑀺𑀨𑀼𑀲𑀦𑀓𑁂𑀳𑀺 𑀯𑀸𑀮𑀥𑀺, 𑀯𑀭𑀗𑁆𑀕𑀁, 𑀳𑀢𑁆𑀣𑁄𑀢𑀺 𑀇𑀫𑁂𑀳𑀺 𑀘 𑀢𑀻𑀳𑀺, 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀘𑀸𑀢𑀺 𑀲𑀢𑁆𑀢𑀳𑀺 𑀅𑀯𑀬𑀯𑁂𑀳𑀺 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀢𑁆𑀢𑀧𑀢𑀺𑀝𑁆𑀞𑁄. 𑀲𑀩𑁆𑀩𑀓𑀦𑀺𑀝𑁆𑀞𑁄𑀢𑀺 𑀲𑀩𑁆𑀩𑁂𑀳𑀺 𑀙𑀤𑁆𑀤𑀦𑁆𑀢𑀓𑀼𑀮𑀳𑀢𑁆𑀣𑀻𑀳𑀺 𑀳𑀻𑀦𑁄. 𑀉𑀧𑁄𑀲𑀣𑀓𑀼𑀮𑀸 𑀲𑀩𑁆𑀩𑀚𑁂𑀝𑁆𑀞𑁄𑀢𑀺 𑀉𑀧𑁄𑀲𑀣𑀓𑀼𑀮𑀢𑁄 𑀆𑀕𑀘𑁆𑀙𑀦𑁆𑀢𑁄 𑀢𑀢𑁆𑀣 𑀲𑀩𑁆𑀩𑀧𑁆𑀧𑀥𑀸𑀦𑁄 𑀆𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀳𑀸𑀤𑀸𑀦𑀁 𑀤𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀘𑀓𑁆𑀓𑀯𑀢𑁆𑀢𑀺𑀧𑀼𑀢𑁆𑀢𑀸𑀦𑀜𑁆𑀘 𑀘𑀓𑁆𑀓𑀯𑀢𑁆𑀢𑀺𑀁 𑀉𑀤𑁆𑀤𑀺𑀲𑁆𑀲 𑀘𑀺𑀦𑁆𑀢𑀬𑀦𑁆𑀢𑀸𑀦𑀁 𑀆𑀕𑀘𑁆𑀙𑀢𑀺. 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀧𑀦𑁂𑀢𑁆𑀯𑀸. 𑀕𑀦𑁆𑀥𑀫𑁂𑀯 𑀳𑀺 𑀢𑀲𑁆𑀲 𑀇𑀢𑀭𑁂 𑀳𑀢𑁆𑀣𑀻 𑀦 𑀲𑀳𑀦𑁆𑀢𑀺.

𑀖𑀭𑀥𑁂𑀦𑀼𑀯𑀘𑁆𑀙𑀓𑁄 𑀯𑀺𑀬𑀸𑀢𑀺 𑀖𑀭𑁂 𑀧𑀭𑀺𑀘𑀺𑀢𑀥𑁂𑀦𑀼𑀬𑀸 𑀢𑀢𑁆𑀣𑁂𑀯 𑀚𑀸𑀢𑀲𑀁𑀯𑀤𑁆𑀥𑀯𑀘𑁆𑀙𑀓𑁄 𑀯𑀺𑀬. 𑀲𑀓𑀮𑀧𑀣𑀯𑀺𑀦𑁆𑀢𑀺 𑀲𑀓𑀮𑀁 𑀚𑀫𑁆𑀩𑀼𑀤𑀻𑀧𑀲𑀜𑁆𑀜𑀺𑀢𑀁 𑀧𑀣𑀯𑀺𑀁.

𑀅𑀲𑁆𑀲𑀭𑀢𑀦𑀯𑀡𑁆𑀡𑀦𑀸

𑁨𑁪𑁭. 𑀲𑀺𑀦𑁆𑀥𑀯𑀓𑀼𑀮𑀢𑁄𑀢𑀺 𑀲𑀺𑀦𑁆𑀥𑀯𑀲𑁆𑀲𑀸𑀚𑀸𑀦𑀻𑀬𑀓𑀼𑀮𑀢𑁄.

𑀫𑀡𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁮. 𑀲𑀓𑀝𑀦𑀸𑀪𑀺𑀲𑀫𑀧𑀭𑀺𑀡𑀸𑀳𑀦𑁆𑀢𑀺 𑀧𑀭𑀺𑀡𑀸𑀳𑀢𑁄 𑀫𑀳𑀸𑀲𑀓𑀝𑀲𑁆𑀲 𑀦𑀸𑀪𑀺𑀬𑀸 𑀲𑀫𑀧𑁆𑀧𑀫𑀸𑀡𑀁. 𑀉𑀪𑁄𑀲𑀼 𑀅𑀦𑁆𑀢𑁂𑀲𑀽𑀢𑀺 𑀳𑁂𑀝𑁆𑀞𑀸, 𑀉𑀧𑀭𑀺 𑀘𑀸𑀢𑀺 𑀤𑁆𑀯𑀻𑀲𑀼 𑀅𑀦𑁆𑀢𑁂𑀲𑀼. 𑀓𑀡𑁆𑀡𑀺𑀓𑀧𑀭𑀺𑀬𑀦𑁆𑀢𑀢𑁄𑀢𑀺 𑀤𑁆𑀯𑀺𑀦𑁆𑀦𑀁 𑀓𑀜𑁆𑀘𑀦𑀧𑀤𑀼𑀫𑀸𑀦𑀁 𑀓𑀡𑁆𑀡𑀺𑀓𑀸𑀬 𑀧𑀭𑀺𑀬𑀦𑁆𑀢𑀢𑁄. 𑀫𑀼𑀢𑁆𑀢𑀸𑀚𑀸𑀮𑀓𑁂 𑀞𑀧𑁂𑀢𑁆𑀯𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑁂 𑀫𑀼𑀢𑁆𑀢𑀫𑀬𑁂 𑀚𑀸𑀮𑀓𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸 𑀯𑀺𑀬𑀸𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀲𑀻𑀲𑁂𑀦 𑀲𑀽𑀭𑀺𑀬𑀉𑀤𑀬𑀓𑁆𑀔𑀡𑀁 𑀉𑀧𑀮𑀓𑁆𑀔𑁂𑀢𑀺.

𑀇𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁯. ‘‘𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀻’’𑀢𑀺 𑀯𑀢𑁆𑀯𑀸 𑀓𑀼𑀢𑀲𑁆𑀲𑀸 𑀧𑀸𑀢𑀼𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀤𑁆𑀤𑀭𑀸𑀚𑀓𑀼𑀮𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀤𑁆𑀤𑀭𑀝𑁆𑀞𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀅𑀪𑀺𑀭𑀽𑀧𑀸𑀦𑀁 𑀇𑀢𑁆𑀣𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀢𑀣𑀸 𑀳𑀺 ‘‘𑀲𑀺𑀜𑁆𑀘𑀬𑀫𑀳𑀸𑀭𑀸𑀚𑀲𑁆𑀲 𑀤𑁂𑀯𑀻, 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀲𑁆𑀲 𑀤𑁂𑀯𑀻, 𑀪𑀤𑁆𑀤𑀓𑀸𑀧𑀺𑀮𑀸𑀦𑀻’’𑀢𑀺 𑀏𑀯𑀫𑀸𑀤𑀺 𑀇𑀢𑁆𑀣𑀺𑀭𑀢𑀦𑀁 𑀫𑀤𑁆𑀤𑀭𑀝𑁆𑀞𑁂 𑀏𑀯 𑀉𑀧𑁆𑀧𑀦𑁆𑀦𑀁. 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦𑀸𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀼𑀜𑁆𑀜𑀢𑁂𑀚𑁂𑀦.

𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀲𑀭𑀻𑀭𑀸𑀯𑀬𑀯𑀸𑀦𑀁 𑀲𑀼𑀲𑀡𑁆𑀞𑀺𑀢𑀸𑀬. 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀳𑀺 𑀲𑀫𑀼𑀤𑀸𑀬𑀧𑀸𑀭𑀺𑀧𑀽𑀭𑀺𑀲𑀺𑀤𑁆𑀥𑀺. 𑀭𑀽𑀧𑀦𑁆𑀢𑀺 𑀲𑀭𑀻𑀭𑀁 ‘‘𑀭𑀽𑀧𑀁 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀯𑀺𑀬. 𑀤𑀲𑁆𑀲𑀦𑀻𑀬𑀸𑀢𑀺 𑀲𑀼𑀭𑀽𑀧𑀪𑀸𑀯𑁂𑀦 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀺𑀲𑁆𑀲𑀫𑀸𑀦𑀸𑀯𑀸’’𑀢𑀺𑀆𑀤𑀺. 𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺 𑀬𑁄𑀦𑀺𑀲𑁄 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀯𑀲𑁂𑀦. 𑀧𑀲𑀸𑀤𑀸𑀯𑀳𑀢𑁆𑀢𑀸𑀢𑀺 𑀓𑀸𑀭𑀡𑀯𑀘𑀦𑁂𑀦 𑀬𑀣𑀸 𑀧𑀸𑀲𑀸𑀤𑀺𑀓𑀢𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀲𑀺𑀤𑁆𑀥𑀺 𑀯𑀼𑀢𑁆𑀢𑀸, 𑀏𑀯𑀁 𑀤𑀲𑁆𑀲𑀦𑀻𑀬𑀢𑀸𑀬 𑀧𑀸𑀲𑀸𑀤𑀺𑀓𑀢𑀸𑀲𑀺𑀤𑁆𑀥𑀺, 𑀅𑀪𑀺𑀭𑀽𑀧𑀢𑀸𑀬 𑀘 𑀤𑀲𑁆𑀲𑀦𑀻𑀬𑀢𑀸𑀲𑀺𑀤𑁆𑀥𑀺 𑀯𑀢𑁆𑀢𑀩𑁆𑀩𑀸𑀢𑀺 𑀦𑀬𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀮𑁄𑀫𑀢𑁄 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀧𑀸𑀲𑀸𑀤𑀺𑀓𑀢𑀸𑀲𑀺𑀤𑁆𑀥𑀺, 𑀧𑀸𑀲𑀸𑀤𑀺𑀓𑀢𑀸𑀬 𑀤𑀲𑁆𑀲𑀦𑀻𑀬𑀢𑀸𑀲𑀺𑀤𑁆𑀥𑀺, 𑀤𑀲𑁆𑀲𑀦𑀻𑀬𑀢𑀸𑀬 𑀅𑀪𑀺𑀭𑀽𑀧𑀢𑀸𑀲𑀺𑀤𑁆𑀥𑀺 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀪𑀺𑀭𑀽𑀧𑀢𑀸𑀤𑀺𑀓𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀭𑀻𑀭𑁂 𑀤𑁄𑀲𑀸𑀪𑀸𑀯𑀯𑀲𑁂𑀦𑀧𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀭𑀽𑀧𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀧𑀫𑀸𑀡𑀬𑀼𑀢𑁆𑀢𑀸, 𑀏𑀯𑀁 𑀆𑀭𑁄𑀳𑀧𑀭𑀺𑀡𑀸𑀳𑀬𑁄𑀕𑀢𑁄 𑀘 𑀧𑀸𑀲𑀸𑀤𑀺𑀓𑀸 𑀦𑀸𑀢𑀺𑀤𑀻𑀖𑀢𑀸𑀤𑀬𑁄, 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀤𑀺𑀩𑁆𑀩𑀭𑀽𑀧𑀢𑀸𑀲𑀫𑁆𑀧𑀢𑁆𑀢𑀺𑀧𑀻𑀢𑀺 ‘‘𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀭𑁄𑀳𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀉𑀩𑁆𑀩𑁂𑀥𑁂𑀦 𑀧𑀸𑀲𑀸𑀤𑀺𑀓𑀪𑀸𑀯𑀢𑁄. 𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀓𑀺𑀲𑀣𑀽𑀮𑀤𑁄𑀲𑀸𑀪𑀸𑀯𑀢𑁄. 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀯𑀺𑀯𑀡𑁆𑀡𑀢𑀸𑀪𑀸𑀯𑀢𑁄. 𑀓𑀸𑀬𑀯𑀺𑀧𑀢𑁆𑀢𑀺𑀬𑀸𑀢𑀺 𑀲𑀭𑀻𑀭𑀤𑁄𑀲𑀲𑁆𑀲. 𑀲𑀢𑀯𑀸𑀭𑀯𑀺𑀳𑀢𑀲𑁆𑀲𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀺𑀳𑀢𑀲𑁆𑀲, ‘‘𑀲𑀢𑀯𑀸𑀭𑀯𑀺𑀳𑀢𑀲𑁆𑀲𑀸’’𑀢𑀺 𑀘 𑀇𑀤𑀁 𑀓𑀧𑁆𑀧𑀸𑀲𑀧𑀺𑀘𑀼𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀽𑀮𑀧𑀺𑀘𑀼𑀦𑁄 𑀧𑀦 𑀯𑀺𑀳𑀦𑀦𑀫𑁂𑀯 𑀦𑀢𑁆𑀣𑀺. 𑀓𑀼𑀗𑁆𑀓𑀼𑀫𑀢𑀕𑀭𑀢𑀼𑀭𑀼𑀓𑁆𑀔𑀬𑀯𑀦𑀧𑀼𑀧𑁆𑀨𑀸𑀦𑀺 𑀘𑀢𑀼𑀚𑁆𑀚𑀸𑀢𑀺. ‘‘𑀢𑀫𑀸𑀮𑀢𑀕𑀭𑀢𑀼𑀭𑀼𑀓𑁆𑀔𑀬𑀯𑀦𑀧𑀼𑀧𑁆𑀨𑀸𑀦𑀻’’𑀢𑀺 𑀅𑀧𑀭𑁂.

𑀅𑀕𑁆𑀕𑀺𑀤𑀟𑁆𑀠𑀸 𑀯𑀺𑀬𑀸𑀢𑀺 𑀆𑀲𑀦𑀕𑀢𑁂𑀦 𑀅𑀕𑁆𑀕𑀺𑀦𑀸 𑀤𑀟𑁆𑀠𑀸 𑀯𑀺𑀬. 𑀧𑀞𑀫𑀫𑁂𑀯𑀸𑀢𑀺 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 𑀓𑀺𑀘𑁆𑀘𑀦𑁆𑀢𑀭𑀧𑁆𑀧𑀲𑀼𑀢𑀸 𑀅𑀳𑀼𑀢𑁆𑀯𑀸 𑀓𑀺𑀘𑁆𑀘𑀦𑁆𑀢𑀭𑀢𑁄 𑀧𑀞𑀫𑀫𑁂𑀯, 𑀤𑀲𑁆𑀲𑀦𑀲𑀫𑀓𑀸𑀮𑀁 𑀏𑀯𑀸𑀢𑀺 𑀅𑀢𑁆𑀣𑁄. 𑀭𑀜𑁆𑀜𑁄 𑀦𑀺𑀲𑀚𑁆𑀚𑀸𑀬 𑀧𑀘𑁆𑀙𑀸 𑀦𑀺𑀧𑀸𑀢𑀦𑀁 𑀦𑀺𑀲𑀻𑀤𑀦𑀁 𑀲𑀻𑀮𑀁 𑀏𑀢𑀺𑀲𑁆𑀲𑀸𑀢𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻. 𑀢𑀁 𑀢𑀁 𑀅𑀢𑁆𑀢𑀦𑀸 𑀭𑀜𑁆𑀜𑁄 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑀸𑀬 𑀓𑀺𑀁 𑀓𑀭𑀡𑀁 𑀧𑀝𑀺𑀲𑀸𑀯𑁂𑀢𑀻𑀢𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 𑀲𑀞𑀚𑀸𑀢𑀺𑀓𑁄, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀧𑀦 𑀢𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁆𑀯𑀸𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑀼𑀡𑀸𑀢𑀺 𑀭𑀽𑀧𑀕𑀼𑀡𑀸 𑀘𑁂𑀯 𑀆𑀘𑀸𑀭𑀕𑀼𑀡𑀸 𑀘. 𑀧𑀼𑀭𑀺𑀫𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀓𑀢𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀇𑀢𑁆𑀣𑀺𑀭𑀢𑀦𑀲𑁆𑀲 𑀢𑀩𑁆𑀪𑀸𑀯𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦. 𑀘𑀓𑁆𑀓𑀯𑀢𑁆𑀢𑀺𑀦𑁄𑀧𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀁 𑀧𑀼𑀜𑁆𑀜𑀓𑀫𑁆𑀫𑀁 𑀢𑀸𑀤𑀺𑀲𑀲𑁆𑀲 𑀨𑀮𑀯𑀺𑀲𑁂𑀲𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀼𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺, 𑀏𑀢𑁂𑀦 𑀲𑁂𑀲𑁂𑀲𑀼𑀧𑀺 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑁂𑀲𑀼 𑀅𑀢𑁆𑀢𑀦𑁄 𑀓𑀫𑁆𑀫𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀲𑀼𑀧𑀺 𑀢𑁂𑀲𑀁 𑀢𑁂𑀲𑀁 𑀯𑀺𑀲𑁂𑀲𑀸𑀦𑀁 𑀢𑀤𑀼𑀧𑀦𑀺𑀲𑁆𑀲𑀬𑀢𑀸 𑀯𑀺𑀪𑀸𑀯𑀺𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀼𑀩𑁆𑀩𑁂 𑀏𑀓𑀤𑁂𑀲𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀧𑀸𑀭𑀺𑀧𑀽𑀭𑀻 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀽𑀧𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀚𑀸𑀢𑀸.

𑀕𑀳𑀧𑀢𑀺𑀭𑀢𑀦𑀯𑀡𑁆𑀡𑀦𑀸

𑁨𑁫𑁦. 𑀧𑀓𑀢𑀺𑀬𑀸 𑀯𑀸𑀢𑀺 𑀲𑀪𑀸𑀯𑁂𑀦𑁂𑀯 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀼𑀩𑁆𑀩𑁂𑀧𑀺. 𑀬𑀸𑀤𑀺𑀲𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀜𑁆𑀜𑀩𑀮𑀁 𑀦𑀺𑀲𑁆𑀲𑀸𑀬 𑀬𑀣𑀸𑀯𑀼𑀢𑁆𑀢𑀸 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀺, 𑀢𑀸𑀤𑀺𑀲𑀁 𑀏𑀢𑀲𑁆𑀲 𑀧𑀼𑀜𑁆𑀜𑀩𑀮𑀁 𑀦𑀺𑀲𑁆𑀲𑀸𑀬 𑀕𑀳𑀧𑀢𑀺𑀭𑀢𑀦𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀆𑀳 ‘‘𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑀲𑀳𑀺𑀢’’𑀦𑁆𑀢𑀺. 𑀓𑀸𑀭𑀡𑀲𑁆𑀲 𑀳𑀺 𑀏𑀓𑀲𑀦𑁆𑀢𑀢𑀺𑀧𑀢𑀺𑀢𑀢𑀸𑀬, 𑀨𑀮𑀲𑁆𑀲 𑀘 𑀲𑀫𑀸𑀦𑀓𑀸𑀮𑀺𑀓𑀢𑀸𑀬 𑀢𑀣𑀸𑀯𑀘𑀦𑀁.

𑀧𑀭𑀺𑀡𑀸𑀬𑀓𑀭𑀢𑀦𑀯𑀡𑁆𑀡𑀦𑀸

𑁨𑁫𑁧. ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀅𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑁆𑀲𑀓𑀢𑀸𑀯𑀩𑁄𑀥𑀦𑀲𑀗𑁆𑀔𑀸𑀢𑀲𑁆𑀲 𑀧𑀡𑁆𑀟𑀺𑀢𑀪𑀸𑀯𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀡𑁆𑀟𑀺𑀢𑁄. 𑀩𑀸𑀳𑀼𑀲𑀘𑁆𑀘𑀩𑁆𑀬𑀢𑁆𑀢𑀺𑀬𑀸 𑀩𑁆𑀬𑀢𑁆𑀢𑁄. 𑀲𑀪𑀸𑀯𑀲𑀺𑀤𑁆𑀥𑀸𑀬 𑀫𑁂𑀥𑀸𑀲𑀗𑁆𑀔𑀸𑀢𑀸𑀬 𑀧𑀓𑀢𑀺𑀧𑀜𑁆𑀜𑀸𑀬 𑀅𑀢𑁆𑀣𑀺𑀢𑀸𑀬 𑀫𑁂𑀥𑀸𑀯𑀻. 𑀅𑀢𑁆𑀢𑀦𑁄 𑀬𑀸𑀣𑀸𑀯𑀩𑀼𑀤𑁆𑀥𑀫𑀢𑁆𑀣𑀁 𑀧𑀭𑁂𑀲𑀁 𑀯𑀺𑀪𑀸𑀯𑁂𑀢𑀼𑀁 𑀧𑀓𑀸𑀲𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀯𑀺𑀪𑀸𑀯𑀻. 𑀯𑀯𑀢𑁆𑀣𑀧𑁂𑀢𑀼𑀦𑁆𑀢𑀺 𑀦𑀺𑀘𑁆𑀙𑀺𑀢𑀼𑀁.

𑀘𑀢𑀼𑀇𑀤𑁆𑀥𑀺𑀲𑀫𑀦𑁆𑀦𑀸𑀕𑀢𑀯𑀡𑁆𑀡𑀦𑀸

𑁨𑁫𑁨. 𑀯𑀺𑀧𑀘𑁆𑀘𑀦𑀁 𑀯𑀺𑀧𑀸𑀓𑁄, 𑀯𑀺𑀧𑀸𑀓𑁄 𑀏𑀯 𑀯𑁂𑀧𑀸𑀓𑁄 𑀬𑀣𑀸 ‘‘𑀯𑀺𑀓𑀢𑀫𑁂𑀯 𑀯𑁂𑀓𑀢’’𑀦𑁆𑀢𑀺. 𑀲𑀫𑀁 𑀦𑀸𑀢𑀺𑀲𑀻𑀢𑀦𑀸𑀘𑁆𑀘𑀼𑀡𑁆𑀳𑀢𑀸𑀬 𑀅𑀯𑀺𑀲𑀫𑀁 𑀪𑀼𑀢𑁆𑀢𑀲𑁆𑀲 𑀯𑁂𑀧𑀸𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀫𑀯𑁂𑀧𑀸𑀓𑀺𑀦𑀻, 𑀢𑀸𑀬 𑀲𑀫𑀯𑁂𑀧𑀸𑀓𑀺𑀦𑀺𑀬𑀸.

𑀥𑀫𑁆𑀫𑀧𑀸𑀲𑀸𑀤𑀧𑁄𑀓𑁆𑀔𑀭𑀡𑀺𑀯𑀡𑁆𑀡𑀦𑀸

𑁨𑁫𑁩. 𑀚𑀦𑀭𑀸𑀲𑀺𑀁 𑀓𑀸𑀭𑁂𑀢𑁆𑀯𑀸 𑀢𑁂𑀦 𑀚𑀦𑀭𑀸𑀲𑀺𑀦𑀸 𑀔𑀡𑀺𑀢𑁆𑀯𑀸 𑀦 𑀫𑀸𑀧𑁂𑀲𑀺. 𑀓𑀺𑀜𑁆𑀘𑀭𑀳𑀻𑀢𑀺 𑀆𑀳 ‘‘𑀭𑀜𑁆𑀜𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀭𑀡𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀏𑀓𑀸𑀬 𑀯𑁂𑀤𑀺𑀓𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑀸 𑀧𑁄𑀓𑁆𑀔𑀭𑀡𑀺𑀬𑁄. 𑀧𑀭𑀺𑀯𑁂𑀡𑀧𑀭𑀺𑀘𑁆𑀙𑁂𑀤𑀧𑀭𑀺𑀬𑀦𑁆𑀢𑁂𑀢𑀺 𑀏𑀢𑁆𑀣 𑀧𑀭𑀺𑀯𑁂𑀡𑀁 𑀦𑀸𑀫 𑀲𑀫𑀦𑁆𑀢𑀢𑁄 𑀯𑀺𑀯𑀝𑀗𑁆𑀕𑀡𑀪𑀽𑀢𑀁 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑀁, 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀪𑀽𑀢𑁂 𑀧𑀭𑀺𑀬𑀦𑁆𑀢𑁂 𑀏𑀓𑀸𑀬 𑀯𑁂𑀤𑀺𑀓𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑀸 𑀧𑁄𑀓𑁆𑀔𑀭𑀡𑀺𑀬𑁄. 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀽’’𑀢𑀺𑀆𑀤𑀺𑀓𑀁 𑀅𑀳𑁄𑀲𑀻𑀢𑀺. 𑀲𑀩𑁆𑀩𑁄𑀢𑀼𑀓𑀦𑁆𑀢𑀺 𑀲𑀩𑁆𑀩𑁂𑀲𑀼 𑀉𑀢𑀽𑀲𑀼 𑀧𑀼𑀧𑁆𑀨𑀦𑀓𑀁. 𑀦𑀸𑀦𑀸𑀯𑀡𑁆𑀡𑀉𑀧𑁆𑀧𑀮𑀩𑀻𑀚𑀸𑀤𑀻𑀦𑀻𑀢𑀺 𑀭𑀢𑁆𑀢𑀦𑀻𑀮𑀸𑀤𑀺𑀦𑀸𑀦𑀸𑀯𑀡𑁆𑀡𑀧𑀼𑀧𑁆𑀨𑁂𑀦 𑀧𑀼𑀧𑁆𑀨𑀦𑀓𑀉𑀧𑁆𑀧𑀮𑀩𑀻𑀚𑀸𑀤𑀻𑀦𑀺. 𑀚𑀮𑀚𑀣𑀮𑀚𑀫𑀸𑀮𑀦𑁆𑀢𑀺 𑀚𑀮𑀚𑀣𑀮𑀚𑀧𑀼𑀧𑁆𑀨𑀫𑀸𑀮𑀁.

𑁨𑁫𑁪. 𑀧𑀭𑀺𑀘𑀸𑀭𑀯𑀲𑁂𑀦𑀸𑀢𑀺 𑀢𑀗𑁆𑀔𑀡𑀺𑀓𑀧𑀭𑀺𑀘𑀸𑀭𑀯𑀲𑁂𑀦, 𑀇𑀤𑀜𑁆𑀘 𑀧𑀞𑀫𑀁 𑀧𑀝𑁆𑀞𑀧𑀺𑀢𑀦𑀺𑀬𑀸𑀫𑁂𑀦𑁂𑀯 𑀯𑀼𑀢𑁆𑀢𑀁, 𑀧𑀘𑁆𑀙𑀸 𑀧𑀦 𑀬𑀸𑀦𑀲𑀬𑀦𑀸𑀤𑀻𑀦𑀺 𑀯𑀺𑀬 𑀇𑀢𑁆𑀣𑀺𑀬𑁄𑀧𑀺 𑀅𑀢𑁆𑀣𑀺𑀓𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀸 𑀏𑀯. 𑀢𑁂𑀦𑀸𑀳 ‘‘𑀇𑀢𑁆𑀣𑀻𑀳𑀺𑀧𑀻’’𑀢𑀺𑀆𑀤𑀺. 𑀧𑀭𑀺𑀘𑁆𑀘𑀸𑀕𑀯𑀲𑁂𑀦𑀸𑀢𑀺 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑀯𑀲𑁂𑀦. 𑀤𑀻𑀬𑀢𑀻𑀢𑀺 𑀤𑀸𑀦𑀁, 𑀤𑁂𑀬𑁆𑀬𑀯𑀢𑁆𑀣𑀼. 𑀢𑀁 𑀅𑀕𑁆𑀕𑀻𑀬𑀢𑀺 𑀦𑀺𑀲𑁆𑀲𑀚𑁆𑀚𑀻𑀬𑀢𑀺 𑀏𑀢𑁆𑀣𑀸𑀢𑀺 𑀤𑀸𑀦𑀕𑁆𑀕𑀁, 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁. 𑀢𑀸𑀤𑀺𑀲𑀸𑀦𑀺 𑀅𑀢𑁆𑀣𑀻𑀢𑀺 𑀬𑀸𑀤𑀺𑀲𑀸𑀦𑀺 𑀭𑀜𑁆𑀜𑁄 𑀤𑀸𑀦𑀕𑁆𑀕𑁂 𑀔𑁄𑀫𑀲𑀼𑀔𑀼𑀫𑀸𑀤𑀻𑀦𑀺 𑀯𑀢𑁆𑀣𑀸𑀦𑀺, 𑀢𑀸𑀤𑀺𑀲𑀸𑀦𑀺 𑀬𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀺 𑀲𑀦𑁆𑀢𑀺. 𑀑𑀳𑀸𑀬𑀸𑀢𑀺 𑀧𑀳𑀸𑀬 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸. 𑀅𑀢𑁆𑀣𑁄 𑀅𑀢𑁆𑀣𑀺 𑀬𑁂𑀲𑀁 𑀢𑁂𑀢𑀺 𑀅𑀢𑁆𑀣𑀺𑀓𑀸. 𑀏𑀯𑀁 𑀅𑀦𑀢𑁆𑀣𑀺𑀓𑀸𑀧𑀺 𑀤𑀝𑁆𑀞𑀩𑁆𑀩𑀸.

𑁨𑁫𑁫. 𑀓𑀮𑀳𑀲𑀤𑁆𑀤𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀸𑀦𑀸𑀥𑀺𑀧𑁆𑀧𑀸𑀬𑁂𑀦 𑀕𑁂𑀳𑀢𑁄 𑀦𑀻𑀳𑀢𑀁 𑀧𑀼𑀦 𑀕𑁂𑀳𑀁 𑀧𑀯𑁂𑀲𑁂𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀘𑁆𑀘𑁂𑀢𑀺. 𑀢𑁂𑀦𑀸𑀳 ‘‘𑀦 𑀔𑁄 𑀏𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁫𑁫).

𑁨𑁫𑁭. 𑀉𑀡𑁆𑀳𑀻𑀲𑀫𑀢𑁆𑀣𑀓𑁂𑀢𑀺 𑀲𑀺𑀔𑀸𑀧𑀭𑀺𑀬𑀦𑁆𑀢𑀫𑀢𑁆𑀣𑀓𑁂. 𑀧𑀭𑀺𑀘𑁆𑀙𑁂𑀤𑀫𑀢𑁆𑀣𑀓𑁂𑀢𑀺 𑀧𑀸𑀲𑀸𑀤𑀗𑁆𑀕𑀡𑀧𑀭𑀺𑀘𑁆𑀙𑁂𑀤𑀲𑁆𑀲 𑀫𑀢𑁆𑀣𑀓𑁂.

𑁨𑁫𑁮. 𑀳𑀭𑀢𑀻𑀢𑀺 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀪𑀸𑀯𑁂𑀦 𑀘𑀓𑁆𑀔𑀽𑀦𑀺 𑀧𑀝𑀺𑀳𑀭𑀦𑁆𑀢𑀁 𑀤𑀼𑀤𑁆𑀤𑀺𑀓𑁆𑀔𑀢𑀸𑀬 𑀤𑀺𑀝𑁆𑀞𑀺𑀬𑁄 𑀳𑀭𑀢𑀺 𑀅𑀧𑀦𑁂𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀢𑀁 𑀧𑀦 𑀳𑀭𑀡𑀁 𑀦𑁂𑀲𑀁 𑀧𑀭𑀺𑀧𑁆𑀨𑀦𑁆𑀤𑀦𑁂𑀦𑀸𑀢𑀺 𑀆𑀳 ‘‘𑀨𑀦𑁆𑀤𑀸𑀧𑁂𑀢𑀻’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀲𑀫𑁆𑀧𑀢𑁆𑀢𑀺𑀯𑀡𑁆𑀡𑀦𑀸

𑁨𑁬𑁦. 𑀫𑀳𑀢𑀺𑀬𑀸 𑀇𑀤𑁆𑀥𑀺𑀬𑀸𑀢𑀺 𑀫𑀳𑀦𑁆𑀢𑁂𑀦 𑀇𑀘𑁆𑀙𑀺𑀢𑀢𑁆𑀣𑀲𑀫𑀺𑀚𑁆𑀛𑀦𑁂𑀦. 𑀢𑁂𑀲𑀁𑀬𑁂𑀯 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀢𑁆𑀣𑀸𑀦𑀁. ‘‘𑀅𑀦𑀼𑀪𑀯𑀺𑀢𑀩𑁆𑀩𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀆𑀦𑀼𑀪𑀸𑀯-𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀩𑁆𑀩𑁂 𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀲𑁆𑀲 𑀓𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀢𑁆𑀢𑀺𑀧𑀭𑀺𑀘𑁆𑀘𑀸𑀕𑀲𑁆𑀲𑀸’’𑀢𑀺 𑀆𑀳. 𑀅𑀢𑁆𑀢𑀸𑀦𑀁 𑀤𑀫𑁂𑀢𑀺 𑀏𑀢𑁂𑀦𑀸𑀢𑀺 𑀤𑀫𑁄.

𑀩𑁄𑀥𑀺𑀲𑀢𑁆𑀢𑀧𑀼𑀩𑁆𑀩𑀬𑁄𑀕𑀯𑀡𑁆𑀡𑀦𑀸

𑀅𑀲𑁆𑀲𑀸𑀢𑀺 𑀫𑀳𑀸𑀲𑀼𑀤𑀲𑁆𑀲𑀦𑀭𑀜𑁆𑀜𑁄. 𑀏𑀓𑁄 𑀣𑁂𑀭𑁄𑀢𑀺 𑀅𑀧𑁆𑀧𑀜𑁆𑀜𑀸𑀢𑁄 𑀦𑀸𑀫𑀕𑁄𑀢𑁆𑀢𑀢𑁄 𑀅𑀜𑁆𑀜𑀢𑀭𑁄 𑀧𑀼𑀣𑀼𑀚𑁆𑀚𑀦𑁄 𑀣𑁂𑀭𑁄. 𑀣𑁂𑀭𑀁 𑀤𑀺𑀲𑁆𑀯𑀸𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸. 𑀓𑀝𑁆𑀞𑀢𑁆𑀣𑀭𑀡𑀦𑁆𑀢𑀺 𑀓𑀝𑁆𑀞𑀫𑀬𑀁 𑀅𑀢𑁆𑀣𑀭𑀡𑀁, 𑀤𑀸𑀭𑀼𑀨𑀮𑀓𑀦𑁆𑀢𑀺 𑀅𑀢𑁆𑀣𑁄.

𑀧𑀭𑀺𑀪𑁄𑀕𑀪𑀸𑀚𑀦𑀦𑁆𑀢𑀺 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀸𑀤𑀺𑀧𑀭𑀺𑀪𑁄𑀕𑀬𑁄𑀕𑁆𑀬𑀁 𑀪𑀸𑀚𑀦𑀁. 𑀆𑀭𑀓𑀡𑁆𑀝𑀓𑀦𑁆𑀢𑀺 𑀲𑀽𑀘𑀺𑀯𑀺𑀚𑁆𑀛𑀦𑀓𑀓𑀡𑁆𑀝𑀓𑀁. 𑀧𑀺𑀧𑁆𑀨𑀮𑀺𑀓𑀦𑁆𑀢𑀺 𑀔𑀼𑀤𑁆𑀤𑀓𑀲𑀢𑁆𑀣𑀓𑀁. 𑀉𑀤𑀓𑀢𑀼𑀫𑁆𑀩𑀓𑀦𑁆𑀢𑀺 𑀓𑀼𑀡𑁆𑀟𑀺𑀓𑀁.

𑀓𑀽𑀝𑀸𑀕𑀸𑀭𑀤𑁆𑀯𑀸𑀭𑁂𑀬𑁂𑀯 𑀦𑀺𑀯𑀢𑁆𑀢𑁂𑀲𑀻𑀢𑀺 𑀓𑀽𑀝𑀸𑀕𑀸𑀭𑀁 𑀧𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀧𑀯𑀢𑁆𑀢𑀺𑀬𑀸 𑀑𑀓𑀸𑀲𑀁 𑀦𑀸𑀤𑀸𑀲𑀺.

𑁨𑁬𑁧. 𑀓𑀲𑀺𑀡𑀫𑁂𑀯 𑀧𑀜𑁆𑀜𑀸𑀬𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀢𑁆𑀢𑀸, 𑀢𑁂𑀲𑀜𑁆𑀘 𑀧𑀤𑁂𑀲𑀸𑀦𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀓𑀲𑀺𑀡𑀲𑀤𑀺𑀲𑀢𑁆𑀢𑀸.

𑁨𑁬𑁨. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀺. 𑀓𑀲𑀺𑀡𑀚𑁆𑀛𑀸𑀦𑀧𑁆𑀧𑀫𑀜𑁆𑀜𑀸𑀦𑀁𑀬𑁂𑀯 𑀯𑀘𑀦𑀁 𑀢𑀸𑀲𑀁 𑀢𑀤𑀸 𑀆𑀤𑀭𑀕𑀸𑀭𑀯𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀆𑀤𑀭𑁄 𑀦𑀢𑁆𑀣𑀺, 𑀅𑀪𑀺𑀜𑁆𑀜𑀸𑀧𑀤𑀝𑁆𑀞𑀸𑀦𑀢𑀁 𑀧𑀦 𑀲𑀦𑁆𑀥𑀸𑀬 𑀢𑀸𑀦𑀺𑀧𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑀲𑁆𑀫𑀸 𑀫𑀳𑀸𑀲𑀢𑁆𑀢𑁄 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂 𑀬𑀢𑁆𑀢𑀓𑁂 𑀮𑁄𑀓𑀺𑀬𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀢𑀤𑀸 𑀦𑀺𑀩𑁆𑀩𑀢𑁆𑀢𑁂𑀲𑀺𑀬𑁂𑀯. 𑀢𑁂𑀦𑀸𑀳 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀦𑀸’’𑀢𑀺𑀆𑀤𑀺.

𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀤𑀺𑀯𑀡𑁆𑀡𑀦𑀸

𑁨𑁬𑁩. 𑀅𑀪𑀺𑀳𑀭𑀺𑀢𑀩𑁆𑀩𑀪𑀢𑁆𑀢𑀦𑁆𑀢𑀺 𑀉𑀧𑀦𑁂𑀢𑀩𑁆𑀩𑀪𑀢𑁆𑀢𑀁.

𑁨𑁬𑁪. 𑀦𑀺𑀩𑀤𑁆𑀥𑀯𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑁂 𑀉𑀧𑀦𑀺𑀩𑀤𑁆𑀥𑀁 𑀧𑀸𑀓𑀯𑀢𑁆𑀢𑀁.

𑀲𑀼𑀪𑀤𑁆𑀤𑀸𑀤𑁂𑀯𑀺𑀉𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁨𑁬𑁫. 𑀆𑀯𑀝𑁆𑀝𑁂𑀢𑁆𑀯𑀸𑀢𑀺 𑀅𑀢𑀺𑀯𑀺𑀲𑀺𑀢𑁆𑀯𑀸. 𑀬𑀁 𑀬𑀁 𑀭𑀜𑁆𑀜𑁄 𑀇𑀘𑁆𑀙𑀺𑀢𑀁 𑀤𑀸𑀦𑀽𑀧𑀓𑀭𑀡𑀜𑁆𑀘𑁂𑀯 𑀪𑁄𑀕𑀽𑀧𑀓𑀭𑀡𑀜𑁆𑀘, 𑀢𑀲𑁆𑀲 𑀢𑀲𑁆𑀲 𑀢𑀣𑁂𑀯 𑀲𑀫𑀺𑀤𑁆𑀥𑀪𑀸𑀯𑀁 𑀯𑀺𑀢𑁆𑀣𑀯𑀢𑀺.

𑁨𑁬𑁬. 𑀲𑀘𑁂 𑀧𑀦 𑀭𑀸𑀚𑀸 𑀚𑀻𑀯𑀺𑀢𑁂 𑀙𑀦𑁆𑀤𑀁 𑀚𑀦𑁂𑀬𑁆𑀬, 𑀇𑀢𑁄 𑀧𑀭𑀫𑁆𑀧𑀺 𑀘𑀺𑀭𑀁 𑀓𑀸𑀮𑀁 𑀢𑀺𑀝𑁆𑀞𑁂𑀬𑁆𑀬 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄𑀢𑀺 𑀏𑀯𑀁 𑀫𑀳𑀚𑁆𑀛𑀸𑀲𑀬𑀸 𑀤𑁂𑀯𑀻 𑀪𑁄𑀕𑁂𑀲𑀼, 𑀚𑀻𑀯𑀺𑀢𑁂 𑀘 𑀭𑀸𑀚𑀸𑀦𑀁 𑀲𑀸𑀧𑁂𑀓𑁆𑀔𑀁 𑀓𑀸𑀢𑀼𑀁 𑀯𑀸𑀬𑀫𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸 𑀳𑁂𑀯 𑀔𑁄 𑀭𑀸𑀚𑀸’’𑀢𑀺𑀆𑀤𑀺. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀁 𑀅𑀦𑀺𑀘𑁆𑀙𑀫𑀸𑀦𑀸’’𑀢𑀺𑀆𑀤𑀺. 𑀙𑀦𑁆𑀤𑀁 𑀚𑀦𑁂𑀳𑀻𑀢𑀺 𑀏𑀢𑁆𑀣 𑀙𑀦𑁆𑀤-𑀲𑀤𑁆𑀤𑁄 𑀢𑀡𑁆𑀳𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑁂𑀫𑀁 𑀉𑀧𑁆𑀧𑀸𑀤𑁂𑀳𑀻’’𑀢𑀺. 𑀅𑀧𑁂𑀓𑁆𑀔𑀢𑀺 𑀆𑀭𑀫𑁆𑀫𑀡𑀁 𑀏𑀢𑀸𑀬 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀧𑁂𑀓𑁆𑀔𑀸, 𑀢𑀡𑁆𑀳𑀸.

𑁨𑁬𑁭. 𑀕𑀭𑀳𑀺𑀢𑀸𑀢𑀺 𑀏𑀢𑁆𑀣 𑀓𑁂𑀳𑀺 𑀕𑀭𑀳𑀺𑀢𑀸, 𑀓𑀲𑁆𑀫𑀸 𑀘 𑀕𑀭𑀳𑀺𑀢𑀸𑀢𑀺 𑀅𑀦𑁆𑀢𑁄𑀮𑀻𑀦𑀁 𑀘𑁄𑀤𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀩𑀼𑀤𑁆𑀥𑁂𑀳𑀻’’𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀯𑀺𑀜𑁆𑀜𑀼𑀕𑀭𑀳𑀺𑀢𑀢𑁆𑀢𑀸, 𑀤𑀼𑀕𑁆𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀢𑁄 𑀘 𑀲𑀸𑀧𑁂𑀓𑁆𑀔𑀓𑀸𑀮𑀓𑀺𑀭𑀺𑀬𑀸 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁬𑁮. 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸𑀢𑀺 𑀭𑀜𑁆𑀜𑁄 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀺𑀢𑁆𑀯𑀸.

𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀦𑀯𑀡𑁆𑀡𑀦𑀸

𑁨𑁬𑁯. 𑀲𑁄𑀡𑀲𑁆𑀲𑀸𑀢𑀺 𑀓𑁄𑀴𑀺𑀯𑀻𑀲𑀲𑁆𑀲 𑀲𑁄𑀡𑀲𑁆𑀲. 𑀏𑀓𑀸 𑀪𑀢𑁆𑀢𑀧𑀸𑀢𑀻𑀢𑀺 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁. 𑀢𑀸𑀤𑀺𑀲𑀁 𑀪𑀢𑁆𑀢𑀦𑁆𑀢𑀺 𑀢𑀣𑀸𑀭𑀽𑀧𑀁 𑀕𑀭𑀼𑀁 𑀫𑀥𑀼𑀭𑀁 𑀲𑀺𑀦𑀺𑀤𑁆𑀥𑀁 𑀪𑀢𑁆𑀢𑀁. 𑀪𑀼𑀢𑁆𑀢𑀸𑀦𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀸𑀦𑀁.

𑁨𑁭𑁧. 𑀤𑀸𑀲𑀫𑀦𑀼𑀲𑁆𑀲𑀸𑀢𑀺 𑀤𑀸𑀲𑀸 𑀘𑁂𑀯 𑀆𑀬𑀼𑀢𑁆𑀢𑀓𑀫𑀦𑀼𑀲𑁆𑀲𑀸 𑀘.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀬 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀲𑀭𑀺𑀓𑁆𑀔𑀢𑀁 𑀉𑀤𑁆𑀥𑀭𑀦𑁆𑀢𑁄 ‘‘𑀏𑀢𑀸𑀦𑀺 𑀧𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁨𑁭𑁨. 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀲𑀫𑀼𑀤𑀸𑀕𑀫𑀦𑀢𑁄 𑀧𑀝𑁆𑀞𑀸𑀬. 𑀬𑀢𑁆𑀣 𑀢𑀁 𑀧𑀼𑀜𑁆𑀜𑀁 𑀆𑀬𑀽𑀳𑀺𑀢𑀁, 𑀬𑀢𑁄 𑀲𑀸 𑀲𑀫𑁆𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀸, 𑀢𑀢𑁄 𑀢𑀢𑀺𑀬𑀢𑁆𑀢𑀪𑀸𑀯𑀢𑁄 𑀧𑀪𑀼𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀚𑀸𑀢𑀓𑀤𑁂𑀲𑀦𑀸 𑀳𑀺 𑀢𑀤𑀸 𑀲𑀫𑀼𑀤𑀸𑀕𑀫𑀦𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑀸 𑀤𑁂𑀲𑀺𑀢𑀸𑀢𑀺. 𑀧𑀁𑀲𑁆𑀯𑀸𑀕𑀸𑀭𑀓𑀻𑀴𑀁 𑀯𑀺𑀬𑀸𑀢𑀺 𑀬𑀣𑀸 𑀦𑀸𑀫 𑀤𑀸𑀭𑀓𑀸 𑀧𑀁𑀲𑀽𑀳𑀺 𑀯𑀸𑀧𑀺𑀕𑁂𑀳𑀪𑁄𑀚𑀦𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑀸 𑀬𑀣𑀸𑀭𑀼𑀘𑀺 𑀓𑀻𑀴𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀲𑀩𑁆𑀩𑀁 𑀢𑀁 𑀯𑀺𑀥𑀁𑀲𑁂𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀫𑀳𑀸𑀲𑀼𑀤𑀲𑁆𑀲𑀦𑀓𑀸𑀮𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀤𑁂𑀲𑀦𑀁 𑀆𑀤𑀻𑀦𑀯𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑀯𑀲𑁂𑀦 𑀯𑀺𑀯𑀝𑁆𑀝𑀸𑀪𑀺𑀫𑀼𑀔𑀁 𑀯𑀺𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀲𑀩𑁆𑀩𑀸 𑀲𑀸 𑀲𑀫𑁆𑀧𑀢𑁆𑀢𑀺 𑀅𑀦𑀺𑀘𑁆𑀘𑀢𑀸𑀬 𑀯𑀺𑀧𑀭𑀺𑀡𑀢𑀸 𑀯𑀺𑀥𑀁𑀲𑀺𑀢𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀲𑁆𑀲𑀸𑀦𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀭𑀺𑀡𑀢𑀸𑀢𑀺 𑀯𑀺𑀧𑀭𑀺𑀡𑀸𑀫𑀁 𑀲𑀪𑀸𑀯𑀯𑀺𑀕𑀫𑀁 𑀕𑀢𑀸. 𑀢𑁂𑀦𑀸𑀳 ‘‘𑀧𑀓𑀢𑀺𑀯𑀺𑀚𑀳𑀦𑁂𑀦𑀸’’𑀢𑀺𑀆𑀤𑀺. 𑀧𑀓𑀢𑀻𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁄, 𑀲𑁄 𑀪𑀗𑁆𑀕𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀚𑀳𑀺𑀢𑁄, 𑀧𑀭𑀺𑀘𑁆𑀘𑀚𑀦𑁆𑀢𑁄 𑀲𑀩𑁆𑀩𑀲𑁄 𑀦𑀢𑁆𑀣𑁂𑀯. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀼𑀢𑀧𑀤𑀻𑀧𑁄 𑀯𑀺𑀬 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀁 𑀕𑀢𑀸’’𑀢𑀺.

𑀏𑀢𑁆𑀢𑀸𑀯𑀢𑀸𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑁂𑀦 𑀏𑀢𑁆𑀢𑀓𑁂𑀦 𑀤𑁂𑀲𑀦𑀸𑀫𑀕𑁆𑀕𑁂𑀦. 𑀅𑀦𑁂𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺𑀬𑁂𑀯 𑀉𑀩𑁆𑀩𑁂𑀥𑁄 𑀏𑀢𑀺𑀲𑁆𑀲𑀸𑀢𑀺 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀸. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀤𑀸𑀬𑀸𑀢𑀺 𑀢𑀁 𑀲𑀫𑁆𑀧𑀢𑁆𑀢𑀺𑀕𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑁂𑀲𑀦𑀸𑀬 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑁂𑀢𑁆𑀯𑀸. 𑀬𑀣𑀸 𑀦𑀺𑀲𑁆𑀲𑁂𑀡𑀺𑀫𑀼𑀘𑁆𑀘𑀦𑁂 𑀢𑀸𑀤𑀺𑀲𑀁 𑀲𑀢𑀳𑀢𑁆𑀣𑀼𑀩𑁆𑀩𑁂𑀥𑀁 𑀭𑀼𑀓𑁆𑀔𑀁 𑀧𑀓𑀢𑀺𑀧𑀼𑀭𑀺𑀲𑁂𑀦 𑀆𑀭𑁄𑀳𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀅𑀦𑀺𑀘𑁆𑀘𑀢𑀸𑀯𑀺𑀪𑀸𑀯𑀦𑁂𑀦 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁂𑀓𑁆𑀔𑀸𑀦𑀺𑀲𑁆𑀲𑁂𑀡𑀺𑀫𑀼𑀘𑁆𑀘𑀦𑁂 𑀓𑁂𑀦𑀘𑀺 𑀆𑀭𑁄𑀳𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀤𑀸𑀬 𑀦𑀺𑀲𑁆𑀲𑁂𑀡𑀺𑀁 𑀫𑀼𑀜𑁆𑀘𑀦𑁆𑀢𑁄 𑀯𑀺𑀬𑀸’’𑀢𑀺. 𑀢𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯, 𑀆𑀤𑀺𑀢𑁄 𑀲𑀸𑀢𑀺𑀲𑀬𑀁 𑀓𑀸𑀫𑁂𑀲𑀼 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸𑀧𑀺 𑀉𑀧𑀭𑀺 𑀦𑁂𑀲𑀁 ‘‘𑀧𑀲𑁆𑀲𑀸𑀦𑀦𑁆𑀤𑀸’’𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀁, 𑀑𑀓𑀸𑀭𑀁, 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸 𑀤𑁂𑀲𑀦𑀸𑀬 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸. 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑀓𑀸𑀮𑁂. 𑀯𑀲𑀪𑀭𑀸𑀚𑀸𑀢𑀺 𑀯𑀲𑀪𑀦𑀸𑀫𑀓𑁄 𑀲𑀻𑀳𑀴𑀫𑀳𑀸𑀭𑀸𑀚𑀸.

𑀉𑀤𑀓𑀧𑀼𑀧𑁆𑀨𑀼𑀴𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀫𑀳𑀸𑀲𑀼𑀤𑀲𑁆𑀲𑀦𑀫𑀳𑀸𑀭𑀸𑀚𑀸 𑀛𑀸𑀦𑀸𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀢𑀤𑀕𑁆𑀕𑁂𑀦 𑀧𑀭𑀺𑀲𑀼𑀤𑁆𑀥𑁂 𑀘 𑀲𑀫𑀡𑀪𑀸𑀯𑁂 𑀧𑀢𑀺𑀝𑁆𑀞𑀺𑀢𑁄, 𑀬𑀢𑁄 𑀯𑀺𑀥𑀼𑀬 𑀏𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀲𑀫𑀡𑀪𑀸𑀯𑀲𑀁𑀓𑀺𑀮𑁂𑀲𑀁 𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀺, 𑀏𑀯𑀁𑀪𑀽𑀢𑀲𑁆𑀲𑀸𑀧𑀺 𑀢𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀸 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸, 𑀦 𑀢𑀢𑁄 𑀧𑀭𑀁, 𑀅𑀳𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀯𑀺𑀲𑁂𑀲𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑀅𑀦𑀸𑀭𑀼𑀴𑁆𑀳𑀦𑁆𑀢𑀺 ‘‘𑀭𑀸𑀚𑀸 𑀓𑀺𑀭 𑀧𑀼𑀩𑁆𑀩𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀺𑀦𑀸, (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁬𑁦) ‘‘𑀧𑀼𑀦 𑀣𑁂𑀭𑀁 𑀆𑀫𑀦𑁆𑀢𑁂𑀲𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁭𑁨) 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑁄, 𑀅𑀜𑁆𑀜𑀢𑁆𑀣 𑀧𑀦 𑀆𑀕𑀢𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀺𑀝𑁆𑀞𑀺𑀯𑀢𑁆𑀢𑀓𑀪𑀸𑀯𑁂𑀦. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀏𑀯𑀸𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.