𑁩. 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁩𑁧. 𑀧𑀽𑀚𑀦𑀻𑀬𑀪𑀸𑀯𑀢𑁄, 𑀩𑀼𑀤𑁆𑀥𑀲𑀫𑁆𑀧𑀤𑀜𑁆𑀘 𑀧𑀳𑀸𑀬 𑀧𑀯𑀢𑁆𑀢𑀢𑀸 𑀫𑀳𑀦𑁆𑀢𑀜𑁆𑀘 𑀢𑀁 𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑁄 𑀫𑀳𑀦𑁆𑀢𑀁 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀫𑀳𑀢𑀸 𑀓𑀸𑀮𑁂𑀦 𑀫𑀳𑀢𑀸 𑀯𑀸 𑀕𑀼𑀡𑀭𑀸𑀲𑀺𑀦𑀸 𑀲𑀸𑀥𑀺𑀢𑀁 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀫𑀳𑀦𑁆𑀢𑀪𑀸𑀯𑀸𑀬, 𑀥𑀸𑀢𑀽𑀦𑀁 𑀩𑀳𑀼𑀪𑀸𑀯𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀫𑀳𑀢𑁄 𑀮𑁄𑀓𑀢𑁄 𑀦𑀺𑀲𑁆𑀲𑀝𑀁 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀲𑀩𑁆𑀩𑀮𑁄𑀓𑀸𑀲𑀸𑀥𑀸𑀭𑀡𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀫𑀳𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁; 𑀫𑀳𑀢𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀺𑀢𑁂 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺𑀧𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀢𑁆𑀢𑀁 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁. 𑀕𑀺𑀚𑁆𑀛𑀸 𑀏𑀢𑁆𑀣 𑀯𑀲𑀦𑁆𑀢𑀻𑀢𑀺 𑀕𑀺𑀚𑁆𑀛𑀁, 𑀕𑀺𑀚𑁆𑀛𑀁 𑀓𑀽𑀝𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀕𑀺𑀚𑁆𑀛𑀁 𑀯𑀺𑀬 𑀯𑀸 𑀕𑀺𑀚𑁆𑀛𑀁, 𑀓𑀽𑀝𑀁, 𑀢𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀧𑀩𑁆𑀩𑀢𑁄, 𑀢𑀲𑁆𑀫𑀺𑀁 𑀕𑀺𑀚𑁆𑀛𑀓𑀽𑀝𑁂. 𑀢𑁂𑀦𑀸𑀳 ‘‘𑀕𑀺𑀚𑁆𑀛𑀸’’𑀢𑀺𑀆𑀤𑀺. 𑀅𑀪𑀺𑀬𑀸𑀢𑀼𑀓𑀸𑀫𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀅𑀪𑀺𑀪𑀯𑀦𑀢𑁆𑀣𑁄, ‘‘𑀅𑀪𑀺𑀯𑀺𑀚𑀸𑀦𑀸𑀢𑀽’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁪; 𑁩.𑁮𑁫; 𑀫. 𑀦𑀺. 𑁩.𑁨𑁫𑁬) 𑀯𑀺𑀬𑀸𑀢𑀺 𑀆𑀳 ‘‘𑀅𑀪𑀺𑀪𑀯𑀦𑀢𑁆𑀣𑀸𑀬 𑀬𑀸𑀢𑀼𑀓𑀸𑀫𑁄’’𑀢𑀺. 𑀯𑀚𑁆𑀚𑀺𑀭𑀸𑀚𑀸𑀦𑁄𑀢𑀺 ‘‘𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺𑀆𑀤𑀺𑀢𑁄 𑀧𑀯𑀢𑁆𑀢𑀁 𑀯𑀘𑀦𑀁 𑀉𑀧𑀸𑀤𑀸𑀬 ‘‘𑀯𑀚𑁆𑀚𑀻’’𑀢𑀺 𑀮𑀤𑁆𑀥𑀦𑀸𑀫𑀸 𑀭𑀸𑀚𑀸𑀦𑁄, 𑀯𑀚𑁆𑀚𑀻𑀭𑀝𑁆𑀞𑀲𑁆𑀲 𑀯𑀸 𑀭𑀸𑀚𑀸𑀦𑁄 𑀯𑀚𑁆𑀚𑀺𑀭𑀸𑀚𑀸𑀦𑁄. 𑀯𑀚𑁆𑀚𑀺𑀭𑀝𑁆𑀞𑀲𑁆𑀲 𑀧𑀦 𑀯𑀚𑁆𑀚𑀺𑀲𑀫𑀜𑁆𑀜𑀸 𑀢𑀦𑁆𑀦𑀺𑀯𑀸𑀲𑀺𑀭𑀸𑀚𑀓𑀼𑀫𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀭𑀸𑀚𑀺𑀤𑁆𑀥𑀺𑀬𑀸𑀢𑀺 𑀭𑀸𑀚𑀪𑀸𑀯𑀸𑀦𑀼𑀕𑀢𑁂𑀦 𑀲𑀪𑀸𑀯𑁂𑀦. 𑀲𑁄 𑀧𑀦 𑀲𑀪𑀸𑀯𑁄 𑀦𑁂𑀲𑀁 𑀕𑀡𑀭𑀸𑀚𑀽𑀦𑀁 𑀫𑀺𑀣𑁄 𑀲𑀸𑀫𑀕𑁆𑀕𑀺𑀬𑀸 𑀮𑁄𑀓𑁂 𑀧𑀸𑀓𑀝𑁄, 𑀘𑀺𑀭𑀝𑁆𑀞𑀸𑀬𑀻 𑀘 𑀅𑀳𑁄𑀲𑀻𑀢𑀺 ‘‘𑀲𑀫𑀕𑁆𑀕𑀪𑀸𑀯𑀁 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀼 𑀅𑀦𑀼 𑀢𑀁𑀲𑀫𑀗𑁆𑀕𑀺𑀦𑁄 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀦𑀼𑀪𑀸𑀯𑁄, 𑀅𑀦𑀼𑀪𑀸𑀯𑁄 𑀏𑀯 𑀆𑀦𑀼𑀪𑀸𑀯𑁄, 𑀧𑀢𑀸𑀧𑁄, 𑀲𑁄 𑀧𑀦 𑀦𑁂𑀲𑀁 𑀧𑀢𑀸𑀧𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀸𑀳𑀦𑀲𑀫𑁆𑀧𑀢𑁆𑀢𑀺𑀬𑀸, 𑀢𑀢𑁆𑀣 𑀘 𑀲𑀼𑀲𑀺𑀓𑁆𑀔𑀺𑀢𑀪𑀸𑀯𑁂𑀦 𑀮𑁄𑀓𑁂 𑀧𑀸𑀓𑀝𑁄 𑀚𑀸𑀢𑁄𑀢𑀺 ‘‘𑀏𑀢𑁂𑀦…𑀧𑁂… 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀴𑀘𑁆𑀙𑀺𑀕𑁆𑀕𑀮𑁂𑀦𑀸𑀢𑀺 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑁂𑀦. 𑀅𑀲𑀦𑀦𑁆𑀢𑀺 𑀲𑀭𑀁. 𑀅𑀢𑀺𑀧𑀸𑀢𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀧𑁄𑀗𑁆𑀔𑀲𑁆𑀲 𑀅𑀦𑀼𑀧𑁄𑀗𑁆𑀔𑀁, 𑀧𑀼𑀭𑀺𑀫𑀲𑀭𑀲𑁆𑀲 𑀧𑁄𑀗𑁆𑀔𑀧𑀤𑀸𑀦𑀼𑀕𑀢𑀧𑁄𑀗𑁆𑀔𑀁 𑀇𑀢𑀭𑀁 𑀲𑀭𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀭𑀸𑀥𑀺𑀢𑀦𑁆𑀢𑀺 𑀅𑀯𑀺𑀭𑀚𑁆𑀛𑀺𑀢𑀁. 𑀉𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀉𑀫𑁆𑀫𑀽𑀮𑀦𑀯𑀲𑁂𑀦 𑀓𑀼𑀮𑀲𑀦𑁆𑀢𑀢𑀺𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀺. 𑀅𑀬𑀦𑀁 𑀯𑀟𑁆𑀠𑀦𑀁 𑀅𑀬𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀬𑁄𑀢𑀺 𑀆𑀳 ‘‘𑀅𑀯𑀟𑁆𑀠𑀺𑀬𑀸 𑀏𑀢𑀁 𑀦𑀸𑀫’’𑀦𑁆𑀢𑀺. 𑀯𑀺𑀓𑁆𑀔𑀺𑀧𑀢𑀻𑀢𑀺 𑀯𑀺𑀤𑀽𑀭𑀢𑁄 𑀔𑀺𑀧𑀢𑀺, 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄.
𑀕𑀗𑁆𑀕𑀸𑀬𑀦𑁆𑀢𑀺 𑀕𑀗𑁆𑀕𑀸𑀲𑀫𑀻𑀧𑁂. 𑀧𑀝𑁆𑀝𑀦𑀕𑀸𑀫𑀦𑁆𑀢𑀺 𑀲𑀓𑀝𑀧𑀝𑁆𑀝𑀦𑀕𑀸𑀫𑀁. 𑀆𑀡𑀸𑀢𑀺 𑀆𑀡𑀸 𑀯𑀢𑁆𑀢𑀢𑀺. 𑀅𑀟𑁆𑀠𑀬𑁄𑀚𑀦𑀦𑁆𑀢𑀺 𑀘 𑀢𑀲𑁆𑀫𑀺𑀁 𑀧𑀝𑁆𑀝𑀦𑁂 𑀅𑀟𑁆𑀠𑀬𑁄𑀚𑀦𑀝𑁆𑀞𑀸𑀦𑀯𑀸𑀲𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀝𑁆𑀝𑀦𑁂. 𑀩𑀮𑀯𑀸𑀖𑀸𑀢𑀚𑀸𑀢𑁄𑀢𑀺 𑀉𑀧𑁆𑀧𑀦𑁆𑀦𑀩𑀮𑀯𑀓𑁄𑀥𑁄.
𑀫𑁂𑀢𑀺 𑀫𑀬𑁆𑀳𑀁. 𑀕𑀢𑁂𑀦𑀸𑀢𑀺 𑀕𑀫𑀦𑁂𑀦.
𑀭𑀸𑀚𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀯𑀡𑁆𑀡𑀦𑀸
𑁧𑁩𑁪. 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦𑀢𑁆𑀣𑀺, 𑀢𑀸𑀬𑀁 𑀯𑁂𑀮𑀸𑀬𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀓𑀸𑀮𑀁 𑀲𑀫𑀲𑀻𑀢𑀼𑀡𑁆𑀳𑀸𑀯 𑀉𑀢𑀼 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀁. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀦𑀺𑀘𑁆𑀘𑀲𑀦𑁆𑀦𑀺𑀧𑀸𑀢𑀸, 𑀢𑀁 𑀧𑀦 𑀦𑀺𑀘𑁆𑀘𑀲𑀦𑁆𑀦𑀺𑀧𑀸𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀯𑀲𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸𑀢𑀺 𑀧𑀘𑀼𑀭𑀲𑀦𑁆𑀦𑀺𑀧𑀸𑀢𑀸. 𑀯𑁄𑀲𑀸𑀦𑀦𑁆𑀢𑀺 𑀲𑀗𑁆𑀓𑁄𑀘𑀁. ‘‘𑀬𑀸𑀯𑀓𑀻𑀯’’𑀦𑁆𑀢𑀺 𑀏𑀓𑀫𑁂𑀯𑁂𑀢𑀁 𑀧𑀤𑀁 𑀅𑀦𑀺𑀬𑀫𑀢𑁄 𑀧𑀭𑀺𑀫𑀸𑀡𑀯𑀸𑀘𑀻, 𑀓𑀸𑀮𑁄 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀬𑀢𑁆𑀢𑀓𑀁 𑀓𑀸𑀮’’𑀦𑁆𑀢𑀺. ‘‘𑀯𑀼𑀤𑁆𑀥𑀺𑀬𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀦𑁆𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀓𑀼𑀮𑀸𑀢𑀺 𑀔𑀼𑀪𑀺𑀢𑀸, 𑀦 𑀧𑀲𑀦𑁆𑀦𑀸. 𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀯𑀕𑁆𑀕𑀩𑀦𑁆𑀥𑀢𑁄 𑀯𑀺𑀪𑀚𑁆𑀚 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸.
𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀬𑀸𑀢𑀺 𑀲𑀦𑁆𑀦𑀺𑀧𑀸𑀢𑀸𑀭𑁄𑀘𑀦𑀪𑁂𑀭𑀺𑀬𑀸. 𑀅𑀟𑁆𑀠𑀪𑀼𑀢𑁆𑀢𑀸 𑀯𑀸𑀢𑀺 𑀲𑀸𑀫𑀺𑀪𑀼𑀢𑁆𑀢𑀸 𑀘. 𑀑𑀲𑀻𑀤𑀫𑀸𑀦𑁂𑀢𑀺 𑀳𑀸𑀬𑀫𑀸𑀦𑁂.
𑀧𑀼𑀩𑁆𑀩𑁂 𑀅𑀓𑀢𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀺𑀩𑁆𑀩𑀢𑁆𑀢𑀁. 𑀲𑀼𑀗𑁆𑀓𑀦𑁆𑀢𑀺 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀧𑀩𑁆𑀩𑀢𑀔𑀡𑁆𑀟 𑀦𑀤𑀻𑀢𑀺𑀢𑁆𑀣𑀕𑀸𑀫𑀤𑁆𑀯𑀸𑀭𑀸𑀤𑀻𑀲𑀼 𑀭𑀸𑀚𑀧𑀼𑀭𑀺𑀲𑀸𑀦𑀁 𑀤𑀸𑀢𑀩𑁆𑀩𑀪𑀸𑀕𑀁. 𑀩𑀮𑀺𑀦𑁆𑀢𑀺 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀸𑀤𑀺𑀢𑁄 𑀙𑀪𑀸𑀕𑀁, 𑀲𑀢𑁆𑀢𑀪𑀸𑀕𑀦𑁆𑀢𑀺𑀆𑀤𑀺𑀦𑀸 𑀮𑀤𑁆𑀥𑀓𑀭𑀁. 𑀤𑀡𑁆𑀟𑀦𑁆𑀢𑀺 𑀤𑀲𑀯𑀻𑀲𑀢𑀺𑀓𑀳𑀸𑀧𑀡𑀸𑀤𑀺𑀓𑀁 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀕𑀳𑁂𑀢𑀩𑁆𑀩𑀥𑀦𑀤𑀡𑁆𑀟𑀁. 𑀯𑀚𑁆𑀚𑀺𑀥𑀫𑁆𑀫𑀦𑁆𑀢𑀺 𑀯𑀚𑁆𑀚𑀺𑀭𑀸𑀚𑀥𑀫𑁆𑀫𑀁. 𑀇𑀤𑀸𑀦𑀺 𑀅𑀧𑀜𑁆𑀜𑀢𑁆𑀢𑀧𑀜𑁆𑀜𑀸𑀧𑀦𑀸𑀤𑀻𑀲𑀼 𑀢𑀧𑁆𑀧𑀝𑀺𑀓𑁆𑀔𑁂𑀧 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀅𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸𑀢𑀺 𑀉𑀧𑀝𑁆𑀞𑀸𑀦𑀓𑁆𑀔𑀫𑀸.
𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀫𑀳𑀢𑀻 𑀫𑀢𑁆𑀢𑀸 𑀧𑀫𑀸𑀡𑀁 𑀏𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀦𑀻𑀢𑀺𑀲𑀢𑁆𑀣𑀯𑀺𑀳𑀺𑀢𑁂 𑀯𑀺𑀦𑀺𑀘𑁆𑀙𑀬𑁂 𑀞𑀧𑀺𑀢𑀸 𑀫𑀳𑀸𑀫𑀢𑁆𑀢𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀸, 𑀢𑁂𑀲𑀁. 𑀤𑁂𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀲𑀘𑁂 𑀘𑁄𑀭𑁄𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀲𑀘𑁂 𑀳𑁄𑀦𑁆𑀢𑀺. 𑀧𑀸𑀧𑀪𑀻𑀭𑀼𑀢𑀸𑀬 𑀅𑀢𑁆𑀢𑀦𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸. 𑀤𑀡𑁆𑀟𑀦𑀻𑀢𑀺𑀲𑀜𑁆𑀜𑀺𑀢𑁂 𑀯𑁄𑀳𑀸𑀭𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑁄𑀳𑀸𑀭𑀺𑀓𑀸, 𑀬𑁂 ‘‘𑀥𑀫𑁆𑀫𑀝𑁆𑀞𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀢𑁆𑀢𑀥𑀭𑀸 𑀦𑀻𑀢𑀺𑀲𑀼𑀢𑁆𑀢𑀥𑀭𑀸, 𑀈𑀤𑀺𑀲𑁂 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀸. 𑀧𑀭𑀫𑁆𑀧𑀭𑀸𑀪𑀢𑁂𑀲𑀼 𑀅𑀝𑁆𑀞𑀲𑀼 𑀓𑀼𑀮𑁂𑀲𑀼 𑀚𑀸𑀢𑀸 𑀅𑀕𑀢𑀺𑀕𑀫𑀦𑀯𑀺𑀭𑀢𑀸 𑀅𑀝𑁆𑀞𑀫𑀳𑀮𑁆𑀮𑀓𑀧𑀼𑀭𑀺𑀲𑀸 𑀅𑀝𑁆𑀞𑀓𑀼𑀮𑀺𑀓𑀸.
𑀲𑀓𑁆𑀓𑀸𑀭𑀦𑁆𑀢𑀺 𑀉𑀧𑀓𑀸𑀭𑀁. 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸𑀢𑀺 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀕𑀭𑀼𑀦𑁄’’𑀢𑀺 𑀢𑀢𑁆𑀣 𑀕𑀭𑀼𑀪𑀸𑀯𑀁 𑀧𑀢𑀺 𑀧𑀢𑀺 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀫𑀸𑀦𑁂𑀦𑁆𑀢𑀻𑀢𑀺 𑀲𑀫𑁆𑀫𑀸𑀦𑁂𑀦𑁆𑀢𑀺, 𑀢𑀁 𑀧𑀦 𑀲𑀫𑁆𑀫𑀸𑀦𑀦𑀁 𑀢𑁂𑀲𑀼 𑀦𑁂𑀲𑀁 𑀅𑀢𑁆𑀢𑀫𑀦𑀢𑀸𑀧𑀼𑀩𑁆𑀩𑀓𑀦𑁆𑀢𑀺 𑀆𑀳 ‘‘𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑀻’’𑀢𑀺. 𑀦𑀺𑀧𑀘𑁆𑀘𑀓𑀸𑀭𑀦𑁆𑀢𑀺 𑀧𑀡𑀺𑀧𑀸𑀢𑀁. 𑀤𑀲𑁆𑀲𑁂𑀦𑁆𑀢𑀻𑀢𑀺 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀧𑀺𑀢𑀸𑀫𑀳𑀸, 𑀫𑀸𑀢𑀸𑀫𑀳𑀸’’𑀢𑀺𑀆𑀤𑀺𑀦𑀸 𑀦𑀻𑀘𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀕𑀭𑀼𑀘𑀺𑀢𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀖𑀝𑁂𑀢𑀼𑀁.
𑀧𑀲𑀬𑁆𑀳𑀸𑀓𑀸𑀭𑀲𑁆𑀲𑀸𑀢𑀺 𑀩𑀮𑀓𑁆𑀓𑀸𑀭𑀲𑁆𑀲. 𑀓𑀸𑀫𑀁 𑀯𑀼𑀤𑁆𑀥𑀺𑀬𑀸 𑀧𑀽𑀚𑀦𑀻𑀬𑀢𑀸𑀬 ‘‘𑀯𑀼𑀤𑁆𑀥𑀺𑀳𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑁄 𑀧𑀦 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑁄, 𑀧𑀸𑀴𑀺𑀬𑀁 𑀯𑀸 𑀬𑀲𑁆𑀫𑀸 ‘‘𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀓𑁆𑀓𑀫𑁂𑀦 ‘‘𑀯𑀼𑀤𑁆𑀥𑀺𑀳𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁.
𑀯𑀺𑀧𑀘𑁆𑀘𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑁂 𑀧𑀸𑀧𑀓𑀫𑁆𑀫𑁂, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂 𑀯𑀸 𑀅𑀦𑀯𑀲𑀭𑁄𑀯 𑀤𑁂𑀯𑀢𑁄𑀧𑀲𑀕𑁆𑀕𑁄, 𑀢𑀲𑁆𑀫𑀺𑀁 𑀧𑀦 𑀮𑀤𑁆𑀥𑁄𑀓𑀸𑀲𑁂 𑀲𑀺𑀬𑀸 𑀤𑁂𑀯𑀢𑁄𑀧𑀲𑀕𑁆𑀕𑀲𑁆𑀲 𑀅𑀯𑀲𑀭𑁄𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀟𑁆𑀠𑁂𑀦𑁆𑀢𑀻’’𑀢𑀺. 𑀏𑀢𑁂𑀦𑁂𑀯 𑀅𑀦𑀼𑀧𑁆𑀧𑀦𑁆𑀦𑀁 𑀲𑀼𑀔𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀩𑀮𑀓𑀸𑀬𑀲𑁆𑀲 𑀤𑀺𑀕𑀼𑀡𑀢𑀺𑀕𑀼𑀡𑀢𑀸𑀤𑀲𑁆𑀲𑀦𑀁, 𑀧𑀝𑀺𑀪𑀬𑀪𑀸𑀯𑀤𑀲𑁆𑀲𑀦’’𑀦𑁆𑀢𑀺 𑀏𑀯𑀁 𑀆𑀤𑀺𑀦𑀸 𑀤𑁂𑀯𑀢𑀸𑀦𑀁 𑀲𑀗𑁆𑀕𑀸𑀫𑀲𑀻𑀲𑁂 𑀲𑀳𑀸𑀬𑀢𑀸 𑀯𑁂𑀤𑀺𑀢𑀩𑁆𑀩𑀸.
𑀅𑀦𑀺𑀘𑁆𑀙𑀺𑀢𑀦𑁆𑀢𑀺 𑀅𑀦𑀺𑀝𑁆𑀞𑀁. 𑀆𑀯𑀭𑀡𑀢𑁄𑀢𑀺 𑀦𑀺𑀲𑁂𑀥𑀦𑀢𑁄. 𑀬𑀲𑁆𑀲 𑀥𑀫𑁆𑀫𑀢𑁄 𑀅𑀦𑀧𑁂𑀢𑀸 𑀥𑀫𑁆𑀫𑀺𑀬𑀸𑀢𑀺 𑀇𑀥 ‘‘𑀥𑀫𑁆𑀫𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀫𑀺𑀕𑀲𑀽𑀓𑀭𑀸𑀤𑀺𑀖𑀸𑀢𑀸𑀬 𑀲𑀼𑀦𑀔𑀸𑀤𑀻𑀦𑀁 𑀓𑀟𑁆𑀠𑀺𑀢𑁆𑀯𑀸 𑀯𑀦𑀘𑀭𑀡𑀁 𑀯𑀸𑀚𑁄, 𑀫𑀺𑀕𑀯𑀸, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸, 𑀢𑁂 𑀯𑀸 𑀯𑀸𑀚𑁂𑀦𑁆𑀢𑀺 𑀦𑁂𑀦𑁆𑀢𑀻𑀢𑀺 𑀯𑀸𑀚𑀺𑀓𑀸, 𑀫𑀺𑀕𑀯𑀥𑀘𑀸𑀭𑀺𑀦𑁄. 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀢𑀺. 𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑀬𑁄𑀕𑁂𑀦 𑀳𑀺 𑀲𑀸 𑀮𑁄𑀓𑁂 𑀧𑀸𑀓𑀝𑀸 𑀧𑀓𑀸𑀲𑀪𑀽𑀢𑀸𑀢𑀺.
𑁧𑁩𑁫. 𑀤𑁂𑀯𑀸𑀬𑀢𑀦𑀪𑀸𑀯𑁂𑀦 𑀘𑀺𑀢𑀢𑁆𑀢𑀸, 𑀮𑁄𑀓𑀲𑁆𑀲 𑀘𑀺𑀢𑁆𑀢𑀻𑀓𑀸𑀭𑀝𑁆𑀞𑀸𑀦𑀢𑁆𑀢𑀸 𑀘 𑀘𑁂𑀢𑀺𑀬𑀁 𑀅𑀳𑁄𑀲𑀺.
𑀓𑀸𑀫𑀁𑀓𑀸𑀭𑀯𑀲𑁂𑀦 𑀓𑀺𑀜𑁆𑀘𑀺𑀧𑀺 𑀦 𑀓𑀭𑀡𑀻𑀬𑀸𑀢𑀺 𑀅𑀓𑀭𑀡𑀻𑀬𑀸. 𑀓𑀸𑀫𑀁𑀓𑀸𑀭𑁄 𑀧𑀦 𑀳𑀢𑁆𑀣𑀕𑀢𑀓𑀭𑀡𑀯𑀲𑁂𑀦𑀸𑀢𑀺 𑀆𑀳 ‘‘𑀅𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀪𑀺𑀫𑀼𑀔𑀬𑀼𑀤𑁆𑀥𑁂𑀦𑀸𑀢𑀺 𑀅𑀪𑀺𑀫𑀼𑀔𑀁 𑀉𑀚𑀼𑀓𑀫𑁂𑀯 𑀲𑀗𑁆𑀕𑀸𑀫𑀓𑀭𑀡𑁂𑀦. 𑀉𑀧𑀮𑀸𑀧𑀦𑀁 𑀲𑀸𑀫𑀁 𑀤𑀸𑀦𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑁂𑀤𑁄𑀧𑀺 𑀇𑀥 𑀉𑀧𑀸𑀬𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸𑀬𑀸’’𑀢𑀺. 𑀬𑀼𑀤𑁆𑀥𑀲𑁆𑀲 𑀧𑀦 𑀅𑀦𑀼𑀧𑀸𑀬𑀢𑀸 𑀧𑀕𑁂𑀯 𑀧𑀓𑀸𑀲𑀺𑀢𑀸. 𑀇𑀤𑀦𑁆𑀢𑀺 ‘‘𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬, 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸’’𑀢𑀺 𑀘 𑀇𑀤𑀁 𑀯𑀘𑀦𑀁. 𑀓𑀣𑀸𑀬 𑀦𑀬𑀁 𑀮𑀪𑀺𑀢𑁆𑀯𑀸𑀢𑀺 ‘‘𑀬𑀸𑀯𑀓𑀻𑀯𑀜𑁆𑀘…𑀧𑁂… 𑀦𑁄 𑀧𑀭𑀺𑀳𑀸𑀦𑀻’’𑀢𑀺 𑀇𑀫𑀸𑀬 𑀪𑀕𑀯𑀢𑁄 𑀓𑀣𑀸𑀬 𑀦𑀬𑀁 𑀉𑀧𑀸𑀬𑀁 𑀮𑀪𑀺𑀢𑁆𑀯𑀸.
𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀯𑀚𑁆𑀚𑀺𑀭𑀸𑀚𑁂𑀲𑀼 𑀅𑀦𑀼𑀕𑁆𑀕𑀳𑁂𑀦. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄.
𑀓𑀣𑀦𑁆𑀢𑀺 𑀯𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀓𑀸𑀢𑀩𑁆𑀩𑀬𑀼𑀤𑁆𑀥𑀓𑀣𑀁. 𑀉𑀚𑀼𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀔𑀸𑀦𑀁 𑀅𑀜𑁆𑀜𑀣𑀸𑀪𑀸𑀯𑀸𑀧𑀸𑀤𑀦𑁂𑀦 𑀉𑀚𑀼𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀺.
𑀧𑀢𑀺𑀝𑁆𑀞𑀺𑀢𑀕𑀼𑀡𑁄𑀢𑀺 𑀧𑀢𑀺𑀝𑁆𑀞𑀺𑀢𑀸𑀘𑀭𑀺𑀬𑀕𑀼𑀡𑁄. 𑀇𑀲𑁆𑀲𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀼, 𑀫𑀬𑀁 𑀅𑀦𑀺𑀲𑁆𑀲𑀭𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀮𑀺𑀘𑁆𑀙𑀯𑀺𑀦𑁄 𑀦 𑀲𑀦𑁆𑀦𑀺𑀧𑀢𑀺𑀁𑀲𑀽𑀢𑀺 𑀬𑁄𑀚𑀦𑀸. 𑀲𑀽𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀽𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.
𑀩𑀮𑀪𑁂𑀭𑀺𑀦𑁆𑀢𑀺 𑀬𑀼𑀤𑁆𑀥𑀸𑀬 𑀩𑀮𑀓𑀸𑀬𑀲𑁆𑀲 𑀉𑀝𑁆𑀞𑀸𑀦𑀪𑁂𑀭𑀺𑀁.
𑀪𑀺𑀓𑁆𑀔𑀼𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀯𑀡𑁆𑀡𑀦𑀸
𑁧𑁩𑁬. 𑀅𑀧𑀭𑀺𑀳𑀸𑀦𑀸𑀬 𑀳𑀺𑀢𑀸𑀢𑀺 𑀅𑀧𑀭𑀺𑀳𑀸𑀦𑀺𑀬𑀸, 𑀦 𑀧𑀭𑀺𑀳𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀅𑀧𑀭𑀺𑀳𑀸𑀦𑀺𑀬𑀸, 𑀢𑁂 𑀧𑀦 𑀬𑀲𑁆𑀫𑀸 𑀅𑀧𑀭𑀺𑀳𑀸𑀦𑀺𑀬𑀸 𑀓𑀸𑀭𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀧𑀭𑀺𑀳𑀸𑀦𑀺𑀓𑀭𑁂’’𑀢𑀺. 𑀬𑀲𑁆𑀫𑀸 𑀧𑀦 𑀢𑁂 𑀧𑀭𑀺𑀳𑀸𑀦𑀺𑀓𑀭𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀽𑀢𑀸, 𑀢𑀲𑁆𑀫𑀸 𑀆𑀳 ‘‘𑀯𑀼𑀤𑁆𑀥𑀺𑀳𑁂𑀢𑀼𑀪𑀽𑀢𑁂’’𑀢𑀺. 𑀬𑀲𑁆𑀫𑀸 𑀪𑀕𑀯𑀢𑁄 𑀤𑁂𑀲𑀦𑀸 𑀉𑀧𑀭𑀽𑀧𑀭𑀺 𑀜𑀸𑀡𑀸𑀮𑁄𑀓𑀁 𑀧𑀲𑀸𑀤𑁂𑀦𑁆𑀢𑀻 𑀲𑀢𑁆𑀢𑀸𑀦𑀁 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀧𑀓𑀸𑀲𑁂𑀢𑀩𑁆𑀩𑁂 𑀘 𑀅𑀢𑁆𑀣𑁂 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀧𑀸𑀓𑀝𑁂 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀦𑁆𑀤𑀲𑀳𑀲𑁆𑀲𑀁…𑀧𑁂… 𑀓𑀣𑀬𑀺𑀲𑁆𑀲𑀸𑀫𑀻’’𑀢𑀺.
𑀬𑀲𑁆𑀫𑀸 𑀪𑀕𑀯𑀸 ‘‘𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀫𑀼𑀔𑀸 𑀯𑀚𑁆𑀚𑀻𑀦𑀁 𑀅𑀪𑀺𑀡𑁆𑀳𑀲𑀦𑁆𑀦𑀺𑀧𑀸𑀢𑀸𑀤𑀺𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄𑀬𑁂𑀯 𑀅𑀬𑀁 𑀅𑀧𑀭𑀺𑀳𑀸𑀦𑀺𑀬𑀓𑀣𑀸 𑀅𑀦𑀺𑀬𑁆𑀬𑀸𑀦𑀺𑀓𑀸 𑀯𑀝𑁆𑀝𑀦𑀺𑀲𑁆𑀲𑀺𑀢𑀸, 𑀫𑀬𑁆𑀳𑀁 𑀧𑀦 𑀲𑀸𑀲𑀦𑁂 𑀢𑀣𑀸𑀭𑀽𑀧𑀻 𑀓𑀣𑀸 𑀓𑀣𑁂𑀢𑀩𑁆𑀩𑀸, 𑀲𑀸 𑀳𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑀸 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸, 𑀬𑀸𑀬 𑀲𑀸𑀲𑀦𑀁 𑀫𑀬𑁆𑀳𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀭𑀫𑁆𑀧𑀺 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑁂𑀲𑀁 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀤𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀤𑀁 𑀯𑀚𑁆𑀚𑀺𑀲𑀢𑁆𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸’’𑀢𑀺. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑀸𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑀢𑁄’’𑀢𑀺𑀆𑀤𑀺 𑀤𑀺𑀲𑀸𑀲𑀼 𑀆𑀕𑀢𑀲𑀸𑀲𑀦𑁂 𑀯𑀼𑀢𑁆𑀢𑀁 𑀢𑀁 𑀓𑀣𑀦𑀁. 𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀺𑀢𑀸.
𑀑𑀮𑀻𑀬𑀫𑀸𑀦𑀓𑁄𑀢𑀺 𑀧𑀸𑀴𑀺𑀢𑁄, 𑀅𑀢𑁆𑀣𑀢𑁄 𑀘 𑀯𑀺𑀦𑀲𑁆𑀲𑀫𑀸𑀦𑁄. 𑀉𑀓𑁆𑀔𑀺𑀧𑀸𑀧𑁂𑀦𑁆𑀢𑀸𑀢𑀺 𑀧𑀕𑀼𑀡𑀪𑀸𑀯𑀓𑀭𑀡𑁂𑀦, 𑀅𑀢𑁆𑀣𑀲𑀁𑀯𑀡𑁆𑀡𑀦𑁂𑀦 𑀘 𑀧𑀕𑁆𑀕𑀡𑁆𑀳𑀦𑁆𑀢𑀸.
𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀽 𑀯𑀺𑀬 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 (𑀧𑀸𑀭𑀸. 𑁫𑁬𑁫 𑀯𑀺𑀢𑁆𑀣𑀸𑀭𑀯𑀢𑁆𑀣𑀼). 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬 𑀤𑀲𑀯𑀢𑁆𑀣𑀼𑀤𑀻𑀧𑀦𑁂𑀦 (𑀘𑀽𑀴𑀯. 𑁪𑁪𑁬 𑀯𑀺𑀢𑁆𑀣𑀸𑀭𑀯𑀢𑁆𑀣𑀼). ‘‘𑀕𑀺𑀳𑀺𑀕𑀢𑀸𑀦𑀻𑀢𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀕𑀺𑀳𑀻𑀲𑀼 𑀕𑀢𑀸𑀦𑀺, 𑀢𑁂𑀳𑀺 𑀜𑀸𑀢𑀸𑀦𑀺 𑀕𑀺𑀳𑀺𑀕𑀢𑀸𑀦𑀺. 𑀥𑀽𑀫𑀓𑀸𑀮𑁄 𑀏𑀢𑀲𑁆𑀲𑀸𑀢𑀺 𑀥𑀽𑀫𑀓𑀸𑀮𑀺𑀓𑀁 𑀘𑀺𑀢𑀓𑀥𑀽𑀫𑀯𑀽𑀧𑀲𑀫𑀢𑁄 𑀧𑀭𑀁 𑀅𑀧𑁆𑀧𑀯𑀢𑁆𑀢𑀦𑀢𑁄.
𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀁 𑀅𑀦𑀺𑀯𑀢𑁆𑀢𑀺𑀢𑀪𑀸𑀯𑀁 𑀉𑀧𑀕𑀢𑀸. 𑀣𑁂𑀭𑀓𑀸𑀭𑀓𑁂𑀳𑀻𑀢𑀺 𑀣𑁂𑀭𑀪𑀸𑀯𑀲𑀸𑀥𑀓𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀲𑁂𑀓𑁆𑀔𑀥𑀫𑁆𑀫𑁂𑀳𑀺. 𑀩𑀳𑀽 𑀭𑀢𑁆𑀢𑀺𑀬𑁄𑀢𑀺 𑀧𑀩𑁆𑀩𑀚𑀺𑀢𑀸 𑀳𑀼𑀢𑁆𑀯𑀸 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺. 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀫𑁂𑀯 𑀲𑀸𑀲𑀦𑁂 𑀧𑀭𑀺𑀡𑀸𑀬𑀓𑀢𑀸𑀢𑀺 𑀆𑀳 ‘‘𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀯𑀢𑁆𑀢𑁂𑀦𑁆𑀢𑀻’’𑀢𑀺.
𑀑𑀯𑀸𑀤𑀁 𑀦 𑀤𑁂𑀦𑁆𑀢𑀺 𑀅𑀪𑀸𑀚𑀦𑀪𑀸𑀯𑀢𑁄. 𑀧𑀯𑁂𑀡𑀻𑀓𑀣𑀦𑁆𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀤𑀻𑀧𑀦𑀁 𑀥𑀫𑁆𑀫𑀓𑀣𑀁. 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀫𑁆𑀧𑀸𑀧𑀦𑁂𑀦 𑀲𑀸𑀭𑀪𑀽𑀢𑀁 𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀅𑀦𑀼𑀢𑁆𑀢𑀭𑀲𑀻𑀢𑀻𑀪𑀸𑀯𑀅𑀥𑀺𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀢𑀦𑁆𑀢𑀺𑀁.
𑀧𑀼𑀦𑀩𑁆𑀪𑀯𑀤𑀸𑀦𑀁 𑀧𑀼𑀦𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀇𑀢𑀭𑁂𑀢𑀺 𑀬𑁂 𑀦 𑀧𑀘𑁆𑀘𑀬𑀯𑀲𑀺𑀓𑀸 𑀦 𑀆𑀫𑀺𑀲𑀘𑀓𑁆𑀔𑀼𑀓𑀸, 𑀢𑁂 𑀦 𑀕𑀘𑁆𑀙𑀦𑁆𑀢𑀺 𑀢𑀡𑁆𑀳𑀸𑀬 𑀯𑀲𑀁.
𑀆𑀭𑀜𑁆𑀜𑀓𑁂𑀲𑀽𑀢𑀺 𑀅𑀭𑀜𑁆𑀜𑀪𑀸𑀕𑁂𑀲𑀼 𑀅𑀭𑀜𑁆𑀜𑀧𑀭𑀺𑀬𑀸𑀧𑀦𑁆𑀦𑁂𑀲𑀼. 𑀦𑀦𑀼 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀢𑀡𑁆𑀳𑀸 𑀲𑀸𑀯𑀚𑁆𑀚𑀸 𑀏𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀳𑀻’’𑀢𑀺𑀆𑀤𑀺, 𑀢𑁂𑀦 ‘‘𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀺𑀦𑁂𑀳𑀸𑀤𑀬𑁄 𑀯𑀺𑀬 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀮𑀬𑀢𑀸 𑀲𑁂𑀯𑀺𑀢𑀩𑁆𑀩𑀧𑀓𑁆𑀔𑀺𑀬𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.
𑀅𑀢𑁆𑀢𑀦𑀸𑀯𑀸𑀢𑀺 𑀲𑀬𑀫𑁂𑀯, 𑀢𑁂𑀦 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁 𑀲𑀭𑀲𑁂𑀦𑁂𑀯 𑀅𑀦𑀸𑀕𑀢𑀸𑀦𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀁, 𑀆𑀕𑀢𑀸𑀦𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀁 𑀧𑀘𑁆𑀘𑀸𑀲𑀺𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦𑀸𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀅𑀕𑁆𑀕𑀳𑀺𑀢𑀥𑀫𑁆𑀫𑀕𑁆𑀕𑀳𑀡𑀦𑁆𑀢𑀺 𑀅𑀕𑁆𑀕𑀳𑀺𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀉𑀕𑁆𑀕𑀳𑀡𑀁. 𑀕𑀳𑀺𑀢𑀲𑀚𑁆𑀛𑀸𑀬𑀓𑀭𑀡𑀦𑁆𑀢𑀺 𑀉𑀕𑁆𑀕𑀳𑀺𑀢𑀲𑁆𑀲 𑀲𑀼𑀝𑁆𑀞𑀼 𑀅𑀢𑁆𑀣𑀘𑀺𑀦𑁆𑀢𑀦𑀁. 𑀘𑀺𑀦𑁆𑀢𑀦𑀢𑁆𑀣𑁄 𑀳𑀺 𑀲𑀚𑁆𑀛𑀸𑀬𑀲𑀤𑁆𑀤𑁄.
𑀏𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀦𑀺𑀲𑀻𑀤𑀦𑁆𑀢𑀺 𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀺𑀦𑀸.
𑁧𑁩𑁭. 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀓𑀫𑁆𑀫𑀁 𑀆𑀭𑀸𑀫𑁄. 𑀓𑀫𑁆𑀫𑁂 𑀭𑀢𑀸, 𑀦 𑀕𑀦𑁆𑀣𑀥𑀼𑀭𑁂, 𑀯𑀸𑀲𑀥𑀼𑀭𑁂 𑀯𑀸𑀢𑀺 𑀓𑀫𑁆𑀫𑀭𑀢𑀸, 𑀅𑀦𑀼𑀬𑀼𑀢𑁆𑀢𑀸𑀢𑀺 𑀢𑀧𑁆𑀧𑀭𑀪𑀸𑀯𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀲𑀼𑀢𑀸. 𑀇𑀢𑀺 𑀓𑀸𑀢𑀩𑁆𑀩𑀓𑀫𑁆𑀫𑀦𑁆𑀢𑀺 𑀢𑀁 𑀢𑀁 𑀪𑀺𑀓𑁆𑀔𑀽𑀦𑀁 𑀓𑀸𑀢𑀩𑁆𑀩𑀁 𑀉𑀘𑁆𑀘𑀸𑀯𑀘𑀓𑀫𑁆𑀫𑀁 𑀘𑀻𑀯𑀭𑀯𑀺𑀘𑀸𑀭𑀡𑀸𑀤𑀺. 𑀢𑁂𑀦𑀸𑀳 ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺. 𑀉𑀧𑀢𑁆𑀣𑀫𑁆𑀪𑀦𑀦𑁆𑀢𑀺 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀤𑀺𑀓𑀭𑀡𑀁. 𑀢𑀜𑁆𑀳𑀺 𑀧𑀞𑀫𑀧𑀝𑀮𑀸𑀤𑀻𑀦𑀁 𑀉𑀧𑀢𑁆𑀣𑀫𑁆𑀪𑀦𑀓𑀸𑀭𑀡𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀓𑀣𑀁 𑀅𑀬𑀁 𑀓𑀫𑁆𑀫𑀭𑀸𑀫𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀆𑀳 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺.
𑀓𑀭𑁄𑀦𑁆𑀢𑁄 𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑁄𑀬𑁂𑀯. 𑀅𑀢𑀺𑀭𑀘𑁆𑀙𑀸𑀦𑀓𑀣𑀸𑀪𑀸𑀯𑁂𑀧𑀺 𑀢𑀲𑁆𑀲 𑀢𑀢𑁆𑀣 𑀢𑀧𑁆𑀧𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀯𑀘𑀦𑀁. 𑀧𑀭𑀺𑀬𑀦𑁆𑀢𑀓𑀸𑀭𑀻𑀢𑀺 𑀲𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀢𑁆𑀢𑀸. ‘‘𑀧𑀭𑀺𑀬𑀦𑁆𑀢𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 (𑀤𑀻. 𑀦𑀺. 𑁧.𑁯, 𑁧𑁯𑁪) 𑀳𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀪𑀲𑁆𑀲𑁄 𑀯𑀸𑀢𑀺 𑀧𑀭𑀺𑀫𑀺𑀢𑀓𑀣𑁄𑀬𑁂𑀯 𑀏𑀓𑀦𑁆𑀢𑁂𑀦 𑀓𑀣𑁂𑀢𑀩𑁆𑀩𑀲𑁆𑀲𑁂𑀯 𑀓𑀣𑀦𑀢𑁄. 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄.
𑀦𑀺𑀤𑁆𑀤𑀸𑀬𑀢𑀺𑀬𑁂𑀯𑀸𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀻 𑀦𑀺𑀤𑁆𑀤𑀸𑀬𑀢𑀺𑀬𑁂𑀯. 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀺𑀦𑀸 𑀦 𑀦𑀁 𑀯𑀺𑀦𑁄𑀤𑁂𑀢𑀺.
𑀏𑀯𑀁 𑀲𑀁𑀲𑀝𑁆𑀞𑁄 𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀕𑀡𑀲𑀗𑁆𑀕𑀡𑀺𑀓𑀸𑀬 𑀲𑀁𑀲𑀝𑁆𑀞𑁄 𑀏𑀯 𑀯𑀺𑀳𑀭𑀢𑀺.
𑀤𑀼𑀲𑁆𑀲𑀻𑀮𑀸 𑀧𑀸𑀧𑀺𑀘𑁆𑀙𑀸 𑀦𑀸𑀫𑀸𑀢𑀺 𑀲𑀬𑀁 𑀦𑀺𑀲𑁆𑀲𑀻𑀮𑀸 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑀸 𑀮𑀸𑀫𑀓𑀸 𑀇𑀘𑁆𑀙𑀸 𑀏𑀢𑁂𑀲𑀦𑁆𑀢𑀺 𑀧𑀸𑀧𑀺𑀘𑁆𑀙𑀸.
𑀧𑀸𑀧𑀧𑀼𑀕𑁆𑀕𑀮𑁂𑀳𑀺 𑀫𑁂𑀢𑁆𑀢𑀺𑀓𑀭𑀡𑀢𑁄 𑀧𑀸𑀧𑀫𑀺𑀢𑁆𑀢𑀸. 𑀢𑁂𑀳𑀺 𑀲𑀤𑀸 𑀲𑀳 𑀧𑀯𑀢𑁆𑀢𑀦𑁂𑀦 𑀧𑀸𑀧𑀲𑀳𑀸𑀬𑀸. 𑀢𑀢𑁆𑀣 𑀦𑀺𑀦𑁆𑀦𑀢𑀸𑀤𑀺𑀦𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀧𑀸𑀧𑀲𑀫𑁆𑀧𑀯𑀗𑁆𑀓𑀸.
𑁧𑁩𑁮. 𑀲𑀤𑁆𑀥𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀤𑁆𑀥𑀸𑀢𑀺 𑀆𑀳 ‘‘𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸’’𑀢𑀺. 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 𑀆𑀕𑀢𑀲𑀤𑁆𑀥𑀸 𑀆𑀕𑀫𑀦𑀻𑀬𑀲𑀤𑁆𑀥𑀸, 𑀲𑀸 𑀲𑀸𑀢𑀺𑀲𑀬𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀅𑀯𑀺𑀧𑀭𑀻𑀢𑀢𑁄 𑀑𑀕𑀸𑀳𑁂𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀦𑀢𑁄𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑁄𑀢𑀻’’𑀢𑀺. 𑀲𑀘𑁆𑀘𑀧𑀝𑀺𑀯𑁂𑀥𑀢𑁄 𑀆𑀕𑀢𑀲𑀤𑁆𑀥𑀸 𑀅𑀥𑀺𑀕𑀫𑀲𑀤𑁆𑀥𑀸 𑀲𑀼𑀭𑀩𑀦𑁆𑀥𑀸𑀤𑀻𑀦𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁧𑁮; 𑀥. 𑀧. 𑀅𑀝𑁆𑀞. 𑁧.𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀯𑀢𑁆𑀣𑀼; 𑀉𑀤𑀸. 𑀅𑀝𑁆𑀞. 𑁪𑁩) 𑀯𑀺𑀬. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀧𑀲𑀸𑀤𑁄 𑀧𑀲𑀸𑀤𑀲𑀤𑁆𑀥𑀸 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸𑀤𑀻𑀦𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁧; 𑀥. 𑀧. 𑀅𑀝𑁆𑀞. 𑁧.𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼; 𑀣𑁂𑀭𑀕𑀸. 𑀅𑀝𑁆𑀞. 𑁨.𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸, 𑀯𑀺𑀢𑁆𑀣𑀸𑀭𑁄) 𑀯𑀺𑀬. ‘‘𑀏𑀯𑀫𑁂𑀢’’𑀦𑁆𑀢𑀺 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑀳𑀦𑀯𑀲𑁂𑀦 𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀁. 𑀤𑀼𑀯𑀺𑀥𑀸𑀧𑀻𑀢𑀺 𑀧𑀲𑀸𑀤𑀲𑀤𑁆𑀥𑀸𑀧𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀧𑀺. 𑀢𑀢𑁆𑀣 𑀧𑀲𑀸𑀤𑀲𑀤𑁆𑀥𑀸 𑀅𑀧𑀭𑀦𑁂𑀬𑁆𑀬𑀭𑀽𑀧𑀸 𑀳𑁄𑀢𑀺 𑀲𑀯𑀦𑀫𑀢𑁆𑀢𑁂𑀦 𑀧𑀲𑀻𑀤𑀦𑀢𑁄. 𑀑𑀓𑀧𑁆𑀧𑀦𑀲𑀤𑁆𑀥𑀸 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 ‘‘𑀏𑀯𑀫𑁂𑀢’’𑀦𑁆𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑀻 𑀯𑀺𑀬 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁄 𑀳𑁄𑀢𑀻’’𑀢𑀺. 𑀢𑀲𑁆𑀲 𑀳𑀻𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀳𑀺𑀭𑀻 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺𑀭𑀺, 𑀳𑀺𑀭𑀺 𑀫𑀦𑁄 𑀏𑀢𑁂𑀲𑀦𑁆𑀢𑀺 𑀳𑀺𑀭𑀺𑀫𑀦𑀸𑀢𑀺 𑀆𑀳 ‘‘𑀧𑀸𑀧…𑀧𑁂… 𑀘𑀺𑀢𑁆𑀢𑀸’’𑀢𑀺. 𑀧𑀸𑀧𑀢𑁄 𑀑𑀢𑁆𑀢𑀧𑁆𑀧𑁂𑀦𑁆𑀢𑀺 𑀉𑀩𑁆𑀩𑀺𑀚𑁆𑀚𑀦𑁆𑀢𑀺 𑀪𑀸𑀬𑀦𑁆𑀢𑀻𑀢𑀺 𑀑𑀢𑁆𑀢𑀧𑁆𑀧𑀻.
𑀩𑀳𑀼 𑀲𑀼𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀏𑀢𑁂𑀦𑀸𑀢𑀺 𑀩𑀳𑀼𑀲𑁆𑀲𑀼𑀢𑁄, 𑀲𑀼𑀢𑀕𑁆𑀕𑀳𑀡𑀁 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀦𑀼𑀧𑁂𑀓𑁆𑀔𑀦𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀸𑀦𑀁 𑀧𑁂𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀲𑀯𑀦𑀫𑀽𑀮𑀓𑀢𑁆𑀢𑀸 𑀯𑀸 𑀢𑁂𑀲𑀫𑁆𑀧𑀺 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀣𑀓𑀸𑀫𑁂𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀧𑀼𑀭𑀺𑀲𑀢𑁆𑀣𑀲𑀺𑀤𑁆𑀥𑀺𑀬𑀸 𑀧𑀭𑀺𑀬𑀢𑁆𑀢𑀪𑀸𑀯𑀢𑁄 𑀘 𑀧𑀭𑀺𑀬𑀢𑁆𑀢𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀁. 𑀢𑀤𑀧𑀺 𑀩𑀸𑀳𑀼𑀲𑀘𑁆𑀘𑀁 𑀬𑀣𑀸𑀯𑀼𑀢𑁆𑀢𑀩𑀸𑀳𑀼𑀲𑀘𑁆𑀘𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀧𑀭𑀺𑀬𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸 𑀲𑀘𑁆𑀘𑀧𑀝𑀺𑀯𑁂𑀥𑀸𑀯𑀳𑁂𑀦 𑀩𑀸𑀳𑀼𑀲𑀘𑁆𑀘𑁂𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑀲𑁆𑀲 𑀇𑀥 𑀇𑀘𑁆𑀙𑀺𑀢𑀢𑁆𑀢𑀸. 𑀲𑁄𑀢𑀺 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁄. 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀧𑀜𑁆𑀘𑀫𑀲𑁆𑀲 𑀧𑀓𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀲𑀩𑁆𑀩𑀢𑁆𑀣𑀓𑀩𑀳𑀼𑀲𑁆𑀲𑀼𑀢𑁄𑀢𑀺 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑀩𑀳𑀼𑀲𑁆𑀲𑀼𑀢𑀸𑀤𑀬𑁄 𑀯𑀺𑀬 𑀧𑀤𑁂𑀲𑀺𑀓𑁄 𑀅𑀳𑀼𑀢𑁆𑀯𑀸 𑀧𑀺𑀝𑀓𑀢𑁆𑀢𑀬𑁂 𑀲𑀩𑁆𑀩𑀢𑁆𑀣𑀓𑀫𑁂𑀯 𑀩𑀸𑀳𑀼𑀲𑀘𑁆𑀘𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀬𑀦𑀢𑁄 𑀓𑀣𑀦𑀢𑁄 𑀲𑀩𑁆𑀩𑀢𑁆𑀣𑀓𑀩𑀳𑀼𑀲𑁆𑀲𑀼𑀢𑁄. 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀸𑀦𑀁 𑀫𑀽𑀮𑀪𑀽𑀢𑁂 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄.
𑀆𑀭𑀤𑁆𑀥𑀦𑁆𑀢𑀺 𑀧𑀕𑁆𑀕𑀳𑀺𑀢𑀁. 𑀢𑀁 𑀧𑀦 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀸𑀭𑀫𑁆𑀪𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀓𑀸𑀢𑀺 𑀏𑀓𑀸𑀓𑀺𑀦𑁄, 𑀯𑀽𑀧𑀓𑀝𑁆𑀞𑀯𑀺𑀳𑀸𑀭𑀺𑀦𑁄𑀢𑀺 𑀅𑀢𑁆𑀣𑁄.
𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀧𑀭𑀢𑁄 𑀧𑀼𑀘𑁆𑀙𑀺𑀢𑁆𑀯𑀸. 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀦𑁆𑀢𑀺 ‘‘𑀢𑁆𑀯𑀁 𑀅𑀲𑀼𑀓𑀦𑀸𑀫𑁄’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀸𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀺𑀭𑀓𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀲𑀢𑀺𑀦𑁂𑀧𑀓𑁆𑀓𑀸𑀦𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀯𑀭𑀽𑀧𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺.
𑁧𑁩𑁯. 𑀩𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 ‘‘𑀩𑁄𑀥𑀻’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄, 𑀧𑀲𑀢𑁆𑀣𑁄, 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁄𑀢𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀪𑀸𑀯𑀲𑀮𑁆𑀮𑀓𑁆𑀔𑀡𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑁂 𑀉𑀧𑀝𑁆𑀞𑀸𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁄. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀻𑀴𑀦𑀸𑀤𑀺𑀧𑁆𑀧𑀓𑀸𑀭𑀢𑁄 𑀯𑀺𑀘𑀬𑁄 𑀉𑀧𑀧𑀭𑀺𑀓𑁆𑀔𑀸 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀧𑀯𑀺𑀘𑀬𑀮𑀓𑁆𑀔𑀡𑁄. 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑁄 𑀧𑀕𑁆𑀕𑀡𑁆𑀳𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀧𑀕𑁆𑀕𑀳𑀮𑀓𑁆𑀔𑀡𑁄. 𑀨𑀭𑀡𑀁 𑀯𑀺𑀧𑁆𑀨𑀸𑀭𑀺𑀓𑀢𑀸 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀨𑀭𑀡𑀮𑀓𑁆𑀔𑀡𑁄. 𑀉𑀧𑀲𑀫𑁄 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀉𑀧𑀲𑀫𑀮𑀓𑁆𑀔𑀡𑁄. 𑀅𑀯𑀺𑀓𑁆𑀔𑁂𑀧𑁄 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄. 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑁂 𑀅𑀥𑀺𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑁆𑀢𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑁄.
𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀙𑀳𑀺 𑀓𑀸𑀭𑀡𑁂𑀳𑀻𑀢𑀺 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀙𑀳𑀺 𑀓𑀸𑀭𑀡𑁂𑀳𑀺. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀻’’ (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮) 𑀯𑀓𑁆𑀔𑀢𑀺, 𑀢𑀁 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀇𑀫𑀁 𑀓𑀸𑀭𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀦𑀯𑀳𑀺 𑀓𑀸𑀭𑀡𑁂𑀳𑀻𑀢𑀺 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀺𑀡𑁆𑀟𑀧𑀸𑀢𑀲𑁆𑀲 𑀅𑀧𑀘𑀸𑀬𑀦𑀢𑀸, 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮) 𑀧𑀦 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸, 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀇𑀫𑁂𑀳𑀺 𑀲𑀤𑁆𑀥𑀺𑀁 ‘‘𑀏𑀓𑀸𑀤𑀲𑀸’’𑀢𑀺 𑀯𑀓𑁆𑀔𑀢𑀺. 𑀤𑀲𑀳𑀺 𑀓𑀸𑀭𑀡𑁂𑀳𑀻𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀸𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮) 𑀧𑀦 𑀧𑀲𑀸𑀤𑀦𑀺𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀲𑀤𑁆𑀥𑀺𑀁 ‘‘𑀏𑀓𑀸𑀤𑀲𑀸’’𑀢𑀺 𑀯𑀓𑁆𑀔𑀢𑀺. 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀻𑀢𑀺 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸, 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺. 𑀤𑀲𑀳𑀺 𑀓𑀸𑀭𑀡𑁂𑀳𑀻𑀢𑀺 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀡𑀁, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀡𑀁, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀳𑀁𑀲𑀦𑀁, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀁, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀁, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮) 𑀧𑀦 ‘‘𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 ‘‘𑀏𑀓𑀸𑀤𑀲𑀳𑀻’’𑀢𑀺 𑀯𑀓𑁆𑀔𑀢𑀺. 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀻𑀢𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮) 𑀆𑀕𑀫𑀺𑀲𑁆𑀲𑀢𑀺. 𑀓𑀸𑀫𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦𑀸𑀫 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀏𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀦𑀸𑀫 𑀧𑀭𑀺𑀬𑀸𑀬𑀓𑀣𑀸𑀢𑀺 ‘‘𑀇𑀫𑀺𑀦𑀸 𑀯𑀺𑀧𑀲𑁆𑀲𑀦𑀸…𑀧𑁂… 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁.
𑁧𑁪𑁦. 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂 ‘‘𑀅𑀦𑀺𑀘𑁆𑀘𑀸’’𑀢𑀺 𑀅𑀦𑀼𑀧𑀲𑁆𑀲𑀢𑀺 𑀏𑀢𑀸𑀬𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑀣𑀸 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸, 𑀲𑀸 𑀧𑀦 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀲𑀳𑀕𑀢𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀯𑀺𑀪𑀸𑀯𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀲𑀜𑁆𑀜𑀸’’𑀢𑀺. 𑀲𑀜𑁆𑀜𑀸𑀲𑀻𑀲𑁂𑀦 𑀯𑀸𑀬𑀁 𑀯𑀺𑀧𑀲𑁆𑀲𑀦𑀸𑀬 𑀏𑀯 𑀦𑀺𑀤𑁆𑀤𑁂𑀲𑁄. 𑀅𑀦𑀢𑁆𑀢𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀧𑀺 𑀳𑁄𑀦𑁆𑀢𑀺, 𑀬𑀲𑁆𑀫𑀸 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀢𑀸 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀫𑀺𑀲𑁆𑀲𑀓𑀸𑀧𑁂𑀢𑁆𑀣 𑀲𑀦𑁆𑀢𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀲𑀺𑀤𑁆𑀥𑀫𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀭𑀸𑀕𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀕𑀢𑀯𑀲𑁂𑀦𑀸𑀢𑀺 𑀢𑀣𑀸 𑀆𑀕𑀢𑀧𑀸𑀴𑀺𑀯𑀲𑁂𑀦 ‘‘𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺 𑀳𑀺 𑀢𑀢𑁆𑀣 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 ‘‘𑀯𑀺𑀭𑀸𑀕𑀲𑀜𑁆𑀜𑀸, 𑀦𑀺𑀭𑁄𑀥𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀲𑀜𑁆𑀜𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀧𑀺 𑀲𑀺𑀬𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀮𑁄𑀓𑀼𑀢𑁆𑀢𑀭𑀸𑀧𑀺 𑀳𑁄𑀦𑁆𑀢𑀻’’𑀢𑀺.
𑁧𑁪𑁧. 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀘𑀺𑀢𑁆𑀢𑀁. 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀏𑀲 𑀦𑀬𑁄 𑀲𑁂𑀲𑀤𑁆𑀯𑀬𑁂𑀧𑀺. 𑀇𑀫𑀸𑀦𑀺𑀧𑀺 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀢𑁂𑀲𑀁 𑀲𑁂𑀝𑁆𑀞𑀧𑀭𑀺𑀲𑀪𑀸𑀯𑀢𑁄. 𑀬𑀣𑀸 𑀧𑀦 𑀪𑀺𑀓𑁆𑀔𑀽𑀲𑀼𑀧𑀺 𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺 𑀘𑀢𑀼𑀧𑀭𑀺𑀲𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀽𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀥𑀫𑁆𑀫𑀲𑁆𑀲𑀯𑀦𑁂𑀦𑀧𑀺 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀘𑀸𑀭𑀺𑀢𑁆𑀢𑀥𑀫𑁆𑀫𑀲𑁆𑀲𑀯𑀦𑁂𑀦 𑀅𑀬𑀫𑀢𑁆𑀣𑁄 𑀇𑀘𑁆𑀙𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀽𑀭𑀡’’𑀦𑁆𑀢𑀺 𑀆𑀳. 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀧𑀼𑀘𑁆𑀙𑀦𑀅𑀢𑁆𑀣𑀓𑀣𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀁 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑀩𑁆𑀩𑀢𑁄.
𑀆𑀯𑀻𑀢𑀺 𑀧𑀓𑀸𑀲𑀁, 𑀧𑀓𑀸𑀲𑀪𑀸𑀯𑁄 𑀘𑁂𑀢𑁆𑀣 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀫𑁆𑀫𑀼𑀔𑀸’’𑀢𑀺. 𑀭𑀳𑁄𑀢𑀺 𑀅𑀧𑁆𑀧𑀓𑀸𑀲𑀁, 𑀅𑀧𑁆𑀧𑀓𑀸𑀲𑀢𑀸 𑀘 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀧𑀘𑁆𑀘𑀓𑁆𑀔𑀸𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀭𑀫𑁆𑀫𑀼𑀔𑀸’’𑀢𑀺. 𑀲𑀳𑀸𑀬𑀪𑀸𑀯𑀕𑀫𑀦𑀁 𑀢𑁂𑀲𑀁 𑀧𑀼𑀭𑀢𑁄. 𑀉𑀪𑀬𑁂𑀳𑀻𑀢𑀺 𑀦𑀯𑀓𑁂𑀳𑀺, 𑀣𑁂𑀭𑁂𑀳𑀺 𑀘.
𑀧𑀕𑁆𑀕𑀬𑁆𑀳𑀸𑀢𑀺 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀘𑁆𑀘𑀁 𑀓𑀢𑁆𑀯𑀸.
𑀓𑀸𑀫𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀁 𑀦𑀬𑀦𑀸𑀦𑀁 𑀉𑀫𑁆𑀫𑀻𑀮𑀦𑀸, 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀜𑁆𑀘 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀬𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀬𑀦𑀸𑀦𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀢𑀸, 𑀫𑀼𑀔𑀲𑁆𑀲 𑀘 𑀧𑀲𑀦𑁆𑀦𑀢𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸’’𑀢𑀺.
𑀮𑀸𑀪𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄 ‘‘𑀮𑀸𑀪𑀸𑀯𑀢, 𑀮𑀸𑀪𑁄 𑀮𑀤𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀲𑁄 𑀘𑁂𑀢𑁆𑀣 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀅𑀢𑀻𑀢𑀓𑀸𑀮𑀺𑀓𑁄𑀢𑀺 𑀆𑀳 ‘‘𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸’’𑀢𑀺. 𑀥𑀫𑁆𑀫𑀢𑁄 𑀆𑀕𑀢𑀸𑀢𑀺 𑀥𑀫𑁆𑀫𑀺𑀓𑀸. 𑀢𑁂𑀦𑀸𑀳 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀳𑀦𑀸𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀧𑀼𑀩𑁆𑀩𑀓𑀁 𑀓𑀸𑀬𑁂𑀦 𑀯𑀺𑀪𑀚𑀦𑀦𑁆𑀢𑀺 𑀫𑀽𑀮𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀧𑀝𑀺𑀯𑀺𑀪𑀸𑀕𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀯𑀸 𑀮𑀸𑀪𑀁 𑀪𑀼𑀜𑁆𑀚𑀢𑀻𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄 𑀏𑀯.
𑀢𑀁 𑀢𑀁 𑀦𑁂𑀯 𑀕𑀺𑀳𑀻𑀦𑀁 𑀤𑁂𑀢𑀺 𑀅𑀢𑁆𑀢𑀦𑁄 𑀆𑀚𑀻𑀯𑀲𑁄𑀥𑀦𑀢𑁆𑀣𑀁. 𑀦 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀢𑀦𑀸𑀯 𑀦 𑀧𑀭𑀺𑀪𑀼𑀜𑁆𑀚𑀢𑀺 ‘‘𑀫𑀬𑁆𑀳𑀁 𑀅𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀫𑀸 𑀳𑁄𑀢𑀽’’𑀢𑀺. ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘…𑀧𑁂… 𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀮𑀸𑀪𑀲𑁆𑀲 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀲𑀸𑀥𑀸𑀭𑀡𑀢𑁄 𑀞𑀧𑀦𑀁 𑀤𑀲𑁆𑀲𑀺𑀢𑀁. ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽’’𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀡𑀓𑀸𑀮𑁄 𑀤𑀲𑁆𑀲𑀺𑀢𑁄, ‘‘𑀕𑀳𑁂𑀢𑁆𑀯𑀸…𑀧𑁂… 𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀺𑀢𑀓𑀸𑀮𑁄, 𑀢𑀤𑀼𑀪𑀬𑀁 𑀧𑀦 𑀢𑀸𑀤𑀺𑀲𑁂𑀦 𑀧𑀼𑀩𑁆𑀩𑀸𑀪𑁄𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑁄 𑀧𑀼𑀭𑀺𑀫𑀓𑀸𑀮𑁄. 𑀢𑀬𑀺𑀤𑀁 𑀧𑀝𑀺𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑁂 𑀯𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀳𑀺𑀢𑀁 𑀫𑀬𑀸’’𑀢𑀺 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀮𑀤𑁆𑀥𑀮𑀸𑀪𑀁 𑀑𑀲𑀸𑀦𑀮𑀓𑁆𑀔𑀡𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀸𑀥𑀸𑀭𑀡𑀪𑁄𑀕𑀻, 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀘 𑀳𑁄𑀢𑀺.
𑀇𑀫𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀦𑁆𑀢𑀺 𑀇𑀫𑀁 𑀘𑀢𑀼𑀢𑁆𑀣𑀁 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀥𑀫𑁆𑀫𑀁. 𑀦 𑀳𑀺…𑀧𑁂… 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀏𑀯 𑀤𑀼𑀲𑁆𑀲𑀻𑀮𑀲𑁆𑀲 𑀦𑀢𑁆𑀣𑀻𑀢𑀺 𑀆𑀭𑀫𑁆𑀪𑁄𑀧𑀺 𑀢𑀸𑀯 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀧𑀽𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄’’𑀢𑀺 𑀇𑀫𑀺𑀦𑀸 𑀮𑀸𑀪𑀲𑁆𑀲 𑀥𑀫𑁆𑀫𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀢𑀁, 𑀲𑀸𑀥𑀸𑀭𑀡𑀪𑁄𑀕𑀺𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀢𑀺 𑀧𑀦 𑀢𑀤𑀼𑀪𑀬𑁂 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀽𑀭𑀺𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀽𑀭𑁂𑀢𑀻’’𑀢𑀺. ‘‘𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀧𑀺𑀢𑀼𑀦𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑁂𑀦𑁆𑀢𑀲𑁆𑀲 𑀲𑀸𑀭𑀡𑀻𑀬𑀥𑀫𑁆𑀫𑁄𑀬𑁂𑀯 𑀳𑁄𑀢𑀻𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀻𑀢𑀺 𑀧𑀝𑀺𑀚𑀕𑁆𑀕𑀦𑀝𑁆𑀞𑀸𑀦𑁂 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲 𑀑𑀤𑀺𑀲𑁆𑀲𑀓𑀤𑀸𑀦𑀁 𑀦 𑀯𑀝𑁆𑀝𑀢𑀻𑀢𑀺? 𑀦𑁄 𑀦 𑀯𑀝𑁆𑀝𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀕𑀺𑀮𑀸𑀦𑀸𑀤𑀻𑀦𑀁 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀧𑁆𑀧𑀝𑀺𑀯𑀺𑀪𑀸𑀕𑀧𑀓𑁆𑀔𑀺𑀓𑀁 ‘‘𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀪𑀸𑀯𑀢𑁄. 𑀩𑁆𑀬𑀢𑀺𑀭𑁂𑀓𑀧𑁆𑀧𑀥𑀸𑀦𑁄 𑀳𑀺 𑀧𑀝𑀺𑀯𑀺𑀪𑀸𑀕𑁄. 𑀢𑁂𑀦𑀸𑀳 ‘‘𑀅𑀯𑀲𑁂𑀲’’𑀦𑁆𑀢𑀺𑀆𑀤𑀺. 𑀅𑀤𑀸𑀢𑀼𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀜𑁆𑀘 𑀔𑁄 𑀓𑀭𑀼𑀡𑀸𑀬𑀦𑀯𑀲𑁂𑀦, 𑀦 𑀯𑀢𑁆𑀢𑀧𑀽𑀭𑀡𑀯𑀲𑁂𑀦.
𑀲𑀼𑀲𑀺𑀓𑁆𑀔𑀺𑀢𑀸𑀬𑀸𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀡𑀯𑀺𑀥𑀺𑀫𑁆𑀳𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀸𑀬, 𑀲𑀼𑀓𑀼𑀲𑀮𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀲𑁆𑀲𑀸 𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑀢𑀺, 𑀦 𑀢𑀢𑁄 𑀑𑀭’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀤𑀼𑀧𑁆𑀧𑀽𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀲𑁄 𑀫𑀳𑀧𑁆𑀨𑀮𑁄 𑀫𑀳𑀸𑀦𑀺𑀲𑀁𑀲𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀳𑀺𑀧𑀺 𑀢𑀸𑀯 𑀕𑀭𑀼𑀢𑀭𑁂𑀳𑀺 𑀨𑀮𑀸𑀦𑀺𑀲𑀁𑀲𑁂𑀳𑀺 𑀘 𑀅𑀦𑀼𑀕𑀢𑁄. 𑀢𑀁𑀲𑀫𑀗𑁆𑀕𑀻 𑀘 𑀧𑀼𑀕𑁆𑀕𑀮𑁄 𑀯𑀺𑀲𑁂𑀲𑀮𑀸𑀪𑀻 𑀅𑀭𑀺𑀬𑀧𑀼𑀕𑁆𑀕𑀮𑁄 𑀯𑀺𑀬 𑀮𑁄𑀓𑁂 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀢𑀣𑀸 𑀳𑀺 𑀲𑁄 𑀤𑀼𑀧𑁆𑀧𑀚𑀳𑀁 𑀤𑀸𑀦𑀫𑀬𑀲𑁆𑀲, 𑀲𑀻𑀮𑀫𑀬𑀲𑁆𑀲 𑀘 𑀧𑀼𑀜𑁆𑀜𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀁 𑀲𑀼𑀤𑀽𑀭𑁂 𑀯𑀺𑀓𑁆𑀔𑀫𑁆𑀪𑀺𑀢𑀁 𑀓𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀲𑀺𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄, 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.
𑀇𑀤𑀸𑀦𑀺 𑀬𑁂 𑀲𑀫𑁆𑀧𑀭𑀸𑀬𑀺𑀓𑁂, 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀘 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑁂𑀯 𑀇𑀲𑁆𑀲𑀸, 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺 𑀘𑀺𑀭𑀓𑀸𑀮𑀪𑀸𑀯𑀦𑀸𑀬 𑀯𑀺𑀥𑀼𑀢𑀪𑀸𑀯𑀢𑁄. 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀧𑀭𑀺𑀘𑁆𑀘𑀸𑀕𑀲𑀻𑀮𑀢𑀸𑀬 𑀯𑀺𑀲𑀼𑀤𑁆𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀤𑀁 𑀧𑀺𑀬𑁄 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽’’𑀢𑀺𑀆𑀤𑀺 (𑀅. 𑀦𑀺. 𑁫.𑁩𑁪). 𑀲𑀼𑀮𑀪𑀧𑀘𑁆𑀘𑀬𑁄 𑀳𑁄𑀢𑀺 𑀤𑀸𑀦𑀯𑀲𑁂𑀦 𑀉𑀴𑀸𑀭𑀚𑁆𑀛𑀸𑀲𑀬𑀸𑀦𑀁 𑀧𑀘𑁆𑀘𑀬𑀮𑀸𑀪𑀲𑁆𑀲 𑀇𑀥𑀸𑀦𑀺𑀲𑀁𑀲𑀪𑀸𑀯𑀢𑁄 𑀤𑀸𑀦𑀲𑁆𑀲. 𑀧𑀢𑁆𑀢𑀕𑀢𑀁 𑀅𑀲𑁆𑀲 𑀤𑀺𑀬𑁆𑀬𑀫𑀸𑀦𑀁𑀦 𑀔𑀻𑀬𑀢𑀺 𑀧𑀢𑁆𑀢𑀕𑀢𑀯𑀲𑁂𑀦 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀲𑁆𑀲 𑀫𑀳𑀸𑀧𑀢𑁆𑀢𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀧𑀽𑀭𑀺𑀢𑀢𑁆𑀢𑀸. 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺 𑀤𑁂𑀯𑀲𑀺𑀓𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀪𑀬𑁂𑀯𑀸…𑀧𑁂… 𑀆𑀧𑀚𑁆𑀚𑀦𑁆𑀢𑀺 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀺 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁂𑀦 𑀘𑀺𑀭𑀓𑀸𑀮𑀁 𑀤𑀸𑀦𑀧𑀽𑀭𑀢𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑀢𑁆𑀢𑀸.
𑀢𑀢𑁆𑀭𑀸𑀢𑀺 𑀢𑁂𑀲𑀼 𑀆𑀦𑀺𑀲𑀁𑀲𑁂𑀲𑀼 𑀯𑀺𑀪𑀸𑀯𑁂𑀢𑀩𑁆𑀩𑁂𑀲𑀼. 𑀇𑀫𑀸𑀦𑀺 𑀢𑀁 𑀤𑀻𑀧𑀦𑀸𑀦𑀺 𑀯𑀢𑁆𑀣𑀽𑀦𑀺 𑀓𑀸𑀭𑀡𑀸𑀦𑀺. 𑀅𑀮𑀪𑀦𑁆𑀢𑀸𑀧𑀻𑀢𑀺 𑀅𑀫𑀳𑀸𑀧𑀼𑀜𑁆𑀜𑀢𑀸𑀬 𑀦 𑀮𑀸𑀪𑀺𑀦𑁄 𑀲𑀫𑀸𑀦𑀸𑀧𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀕𑀦𑁆𑀢𑀺 𑀲𑀪𑀸𑀕𑀁 𑀢𑀩𑁆𑀪𑀸𑀕𑀺𑀬𑀁 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀁 𑀚𑀸𑀦𑀦𑁆𑀢𑀺.
𑀅𑀦𑀼𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑁆𑀢𑀸, 𑀣𑁂𑀭𑀸𑀦𑀁 𑀲𑀁𑀲𑀬𑀯𑀺𑀦𑁄𑀤𑀦𑀢𑁆𑀣𑀜𑁆𑀘 ‘‘𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂 𑀪𑀦𑁆𑀢𑁂 𑀧𑀽𑀭𑀺𑀢𑁄’’𑀢𑀺 𑀆𑀳. 𑀢𑀣𑀸 𑀳𑀺 𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀣𑁂𑀭𑁂𑀦 𑀅𑀢𑁆𑀢𑀸 𑀧𑀓𑀸𑀲𑀺𑀢𑁄. 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑀢𑀸𑀬, 𑀲𑀼𑀮𑀪𑀧𑀘𑁆𑀘𑀬𑀢𑀸𑀬𑀧𑀺 𑀇𑀤𑀁 𑀯𑀢𑁆𑀣𑀼𑀫𑁂𑀯. 𑀧𑀢𑁆𑀢𑀕𑀢𑀸𑀔𑀻𑀬𑀦𑀲𑁆𑀲 𑀧𑀦 𑀯𑀺𑀲𑁂𑀲𑀁 𑀯𑀺𑀪𑀸𑀯𑀦𑀢𑁄 ‘‘𑀇𑀤𑀁 𑀢𑀸𑀯…𑀧𑁂… 𑀏𑀢𑁆𑀣 𑀯𑀢𑁆𑀣𑀼’’𑀦𑁆𑀢𑀺 𑀯𑀼𑀢𑁆𑀢𑀁.
𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬𑀸𑀢𑀺 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀲𑀓𑀮𑀮𑀗𑁆𑀓𑀸𑀤𑀻𑀧𑁂, 𑀬𑁄𑀚𑀦𑀧𑁆𑀧𑀫𑀸𑀡𑁂 𑀲𑀫𑀼𑀤𑁆𑀤𑁂 𑀘 𑀦𑀸𑀯𑀸𑀲𑀗𑁆𑀖𑀸𑀝𑀸𑀤𑀺𑀓𑁂 𑀞𑀧𑁂𑀢𑁆𑀯𑀸 𑀤𑀻𑀧𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀓𑀭𑀺𑀬𑀫𑀸𑀦𑀫𑀳𑀸𑀧𑀽𑀚𑀸𑀬𑀁. 𑀧𑀭𑀺𑀬𑀸𑀬𑁂𑀦𑀧𑀻𑀢𑀺 𑀮𑁂𑀲𑁂𑀦𑀧𑀺. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀡𑀢𑁄𑀧𑀺 𑀇𑀤𑀁 𑀬𑀣𑀸𑀪𑀽𑀢𑀧𑁆𑀧𑀯𑁂𑀤𑀦𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.
𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼 𑀘𑁄𑀭𑀪𑀬𑁂𑀦. ‘‘𑀅𑀢𑁆𑀢𑀦𑁄 𑀤𑀼𑀚𑁆𑀚𑀻𑀯𑀺𑀓𑀸𑀬𑀸’’𑀢𑀺 𑀘 𑀯𑀤𑀦𑁆𑀢𑀺.
𑀯𑀝𑁆𑀝𑀺𑀲𑁆𑀲𑀢𑀻𑀢𑀺 𑀓𑀧𑁆𑀧𑀺𑀲𑁆𑀲𑀢𑀺. 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺, 𑀣𑁂𑀭𑀲𑁆𑀲 𑀧𑀦 𑀲𑀻𑀮𑀢𑁂𑀚𑁂𑀦𑁂𑀯 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺.
𑀦𑀢𑁆𑀣𑀺 𑀏𑀢𑁂𑀲𑀁 𑀔𑀡𑁆𑀟𑀦𑁆𑀢𑀺 𑀅𑀔𑀡𑁆𑀟𑀸𑀦𑀺. 𑀢𑀁 𑀧𑀦 𑀦𑁂𑀲𑀁 𑀔𑀡𑁆𑀟𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀆𑀤𑀺 𑀅𑀦𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀽’’𑀢𑀺𑀆𑀤𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀧𑀦 𑀲𑀫𑀸𑀤𑀸𑀦𑀓𑁆𑀓𑀫𑁂𑀦𑀧𑀺 𑀆𑀤𑀺 𑀅𑀦𑁆𑀢𑀸 𑀮𑀩𑁆𑀪𑀦𑁆𑀢𑀺. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀯𑀢𑁆𑀣𑀦𑁆𑀢𑁂, 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬, 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀁 𑀘𑁂𑀢𑀁 ‘‘𑀅𑀔𑀡𑁆𑀟𑀸𑀦𑀻’’𑀢𑀺 𑀇𑀫𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀉𑀤𑀸𑀳𑀭𑀡𑀸𑀦𑀺. 𑀔𑀡𑁆𑀟𑀺𑀢𑀪𑀺𑀦𑁆𑀦𑀢𑀸 𑀔𑀡𑁆𑀟𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀔𑀡𑁆𑀟𑀁, 𑀲𑀻𑀮𑀁. ‘‘𑀙𑀺𑀤𑁆𑀤’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁 𑀯𑀺𑀦𑀺𑀯𑀺𑀚𑁆𑀛𑀦𑀯𑀲𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀕𑀸𑀯𑀻 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑀮𑀭𑀳𑀺𑀢𑀸𑀦𑀺 𑀅𑀲𑀩𑀮𑀸𑀦𑀺. 𑀢𑀣𑀸 𑀅𑀓𑀫𑁆𑀫𑀸𑀲𑀸𑀦𑀺. 𑀲𑀻𑀮𑀲𑁆𑀲 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀸𑀯𑀸𑀧𑀸𑀤𑀦𑀁. 𑀬𑀲𑁆𑀫𑀸 𑀘 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀲𑁂𑀭𑀻 𑀲𑀬𑀁𑀯𑀲𑀻 𑀪𑀼𑀚𑀺𑀲𑁆𑀲𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀪𑀼𑀚𑀺𑀲𑁆𑀲𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀪𑀼𑀚𑀺𑀲𑁆𑀲𑀪𑀸𑀯𑀓𑀸𑀭𑀡𑀢𑁄 𑀪𑀼𑀚𑀺𑀲𑁆𑀲𑀸𑀦𑀻’’𑀢𑀺. 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀧𑀸𑀲𑀁𑀲𑀢𑁆𑀢𑀸 𑀯𑀺𑀜𑁆𑀜𑀼𑀧𑀲𑀢𑁆𑀣𑀸𑀦𑀺. 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑁂𑀬𑁆𑀬𑀁, 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀢𑀢𑁆𑀣 ‘‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺, ‘‘𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 𑀘 𑀏𑀯𑀁 𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸. ‘‘𑀅𑀬𑀁 𑀢𑁂 𑀲𑀻𑀮𑁂𑀲𑀼 𑀤𑁄𑀲𑁄’’𑀢𑀺 𑀘𑀢𑀽𑀲𑀼𑀧𑀺 𑀯𑀺𑀧𑀢𑁆𑀢𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀯𑀺𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑁂𑀦 𑀧𑀭𑀸𑀫𑀝𑁆𑀞𑀼𑀁 𑀅𑀦𑀼𑀤𑁆𑀥𑀁𑀲𑁂𑀢𑀼𑀁. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀧𑁆𑀧𑀬𑁄𑀚𑀦𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.
𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑀸𑀢𑀺 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸𑀦𑀪𑀸𑀯𑀁 𑀉𑀧𑀕𑀢𑀲𑀻𑀮𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸. 𑀓𑀸𑀫𑀁 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀦𑀸𑀦𑀢𑁆𑀢𑀁 𑀦 𑀲𑀺𑀬𑀸, 𑀢𑀁 𑀧𑀦 𑀦 𑀏𑀓𑀦𑁆𑀢𑀺𑀓𑀁, 𑀇𑀤𑀁 𑀏𑀓𑀦𑁆𑀢𑀺𑀓𑀁 𑀦𑀺𑀬𑀢𑀪𑀸𑀯𑀢𑁄𑀢𑀺 𑀆𑀳 ‘‘𑀦𑀢𑁆𑀣𑀺 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢’’𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀫𑀕𑁆𑀕𑀲𑀻𑀮𑀁 𑀲𑀦𑁆𑀥𑀸𑀬 𑀏𑀢𑀁 ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.
𑀬𑀸𑀬𑀦𑁆𑀢𑀺 𑀬𑀸 𑀅𑀬𑀁 𑀫𑀬𑁆𑀳𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸. 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀦𑀺𑀤𑁆𑀤𑁄𑀲𑀸𑀢𑀺 𑀦𑀺𑀥𑀼𑀢𑀤𑁄𑀲𑀸, 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀢𑀺 𑀦𑀺𑀕𑀘𑁆𑀙𑀢𑀺. 𑀲𑀬𑀁 𑀦𑀺𑀬𑁆𑀬𑀦𑁆𑀢𑀲𑁆𑀲𑁂𑀯 𑀳𑀺 ‘‘𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀧𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀲𑀢𑁆𑀣𑀼 𑀅𑀦𑀼𑀲𑀺𑀝𑁆𑀞𑀺, 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀢𑀲𑁆𑀲, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀦𑁆𑀢𑀺 𑀲𑀤𑀺𑀲𑀤𑀺𑀝𑁆𑀞𑀺𑀪𑀸𑀯𑀁 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁂𑀦 𑀅𑀪𑀺𑀦𑁆𑀦𑀤𑀺𑀝𑁆𑀞𑀺𑀪𑀸𑀯𑀁. 𑀯𑀼𑀤𑁆𑀥𑀺𑀬𑁂𑀯𑀸𑀢𑀺 𑀅𑀭𑀺𑀬𑀯𑀺𑀦𑀬𑁂 𑀕𑀼𑀡𑁂𑀳𑀺 𑀯𑀼𑀟𑁆𑀠𑀺𑀬𑁂𑀯, 𑀦𑁄 𑀧𑀭𑀺𑀳𑀸𑀦𑀻𑀢𑀺 𑀅𑀬𑀁 𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀢𑀦𑁄𑀧𑀺 𑀲𑀸𑀲𑀦𑀲𑁆𑀲 𑀅𑀤𑁆𑀥𑀦𑀺𑀬𑀢𑀁 𑀆𑀓𑀗𑁆𑀔𑀦𑁆𑀢𑁂𑀦 𑀪𑀕𑀯𑀢𑀸 𑀇𑀥 𑀤𑁂𑀲𑀺𑀢𑀸.
𑁧𑁪𑁨. 𑀆𑀲𑀦𑁆𑀦𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀢𑀸𑀢𑀺 𑀓𑀢𑀺𑀧𑀬𑀫𑀸𑀲𑀸𑀥𑀺𑀓𑁂𑀦 𑀲𑀁𑀯𑀘𑁆𑀙𑀭𑀫𑀢𑁆𑀢𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑀁𑀬𑁂𑀯𑀸𑀢𑀺 ‘‘𑀇𑀢𑀺 𑀲𑀻𑀮’’𑀦𑁆𑀢𑀺𑀆𑀤𑀺𑀓𑀁𑀬𑁂𑀯 𑀇𑀢𑀺 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀧𑀭𑀺𑀫𑀸𑀡𑀢𑁆𑀣𑁄 𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀕𑀳𑀺𑀢𑁄𑀢𑀺 𑀆𑀳 ‘‘𑀏𑀯𑀁 𑀲𑀻𑀮𑀁 𑀏𑀢𑁆𑀢𑀓𑀁 𑀲𑀻𑀮’’𑀦𑁆𑀢𑀺. 𑀏𑀯𑀁 𑀲𑀻𑀮𑀦𑁆𑀢𑀺 𑀏𑀯𑀁 𑀧𑀪𑁂𑀤𑀁 𑀲𑀻𑀮𑀁. 𑀏𑀢𑁆𑀢𑀓𑀦𑁆𑀢𑀺 𑀏𑀢𑀁 𑀧𑀭𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺 𑀫𑀕𑁆𑀕𑀲𑁆𑀲 𑀲𑀫𑁆𑀪𑀸𑀭𑀪𑀽𑀢𑀁 𑀮𑁄𑀓𑀺𑀬𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀲𑀻𑀮𑁂 𑀞𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑁂 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧; 𑀓𑀣𑀸. 𑁮𑁭𑁪) 𑀏𑀯𑀁 𑀯𑀼𑀢𑁆𑀢𑀲𑀻𑀮𑁂 𑀧𑀢𑀺𑀝𑁆𑀞𑀸𑀬. 𑀏𑀲𑁄𑀢𑀺 𑀫𑀕𑁆𑀕𑀨𑀮𑀲𑀫𑀸𑀥𑀺. 𑀧𑀭𑀺𑀪𑀸𑀯𑀺𑀢𑁄𑀢𑀺 𑀢𑁂𑀦 𑀲𑀻𑀮𑁂𑀦 𑀲𑀩𑁆𑀩𑀲𑁄 𑀪𑀸𑀯𑀺𑀢𑁄 𑀲𑀫𑁆𑀪𑀸𑀯𑀺𑀢𑁄. 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄𑀢𑀺 𑀫𑀕𑁆𑀕𑀲𑀫𑀸𑀥𑀺 𑀢𑀸𑀯 𑀲𑀸𑀫𑀜𑁆𑀜𑀨𑀮𑁂𑀳𑀺 𑀫𑀳𑀧𑁆𑀨𑀮𑁄, 𑀯𑀝𑁆𑀝𑀤𑀼𑀓𑁆𑀔𑀯𑀽𑀧𑀲𑀫𑁂𑀦 𑀫𑀳𑀸𑀦𑀺𑀲𑀁𑀲𑁄. 𑀇𑀢𑀭𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑁂𑀦 𑀫𑀳𑀧𑁆𑀨𑀮𑁄, 𑀦𑀺𑀩𑁆𑀩𑀼𑀢𑀺𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀺𑀲𑀁𑀲𑁄. 𑀬𑀫𑁆𑀳𑀺 𑀲𑀫𑀸𑀥𑀺𑀫𑁆𑀳𑀺 𑀞𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑁂 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀥𑀺𑀫𑁆𑀳𑀺 𑀘𑁂𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀲𑀫𑀸𑀥𑀺𑀫𑁆𑀳𑀺 𑀘 𑀞𑀢𑁆𑀯𑀸. 𑀲𑀸𑀢𑀺 𑀫𑀕𑁆𑀕𑀨𑀮𑀧𑀜𑁆𑀜𑀸. 𑀢𑁂𑀦 𑀧𑀭𑀺𑀪𑀸𑀯𑀺𑀢𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀦𑀸 𑀲𑀩𑁆𑀩𑀲𑁄 𑀪𑀸𑀯𑀺𑀢𑀸 𑀧𑀭𑀺𑀪𑀸𑀯𑀺𑀢𑀸. 𑀫𑀳𑀧𑁆𑀨𑀮𑀫𑀳𑀸𑀦𑀺𑀲𑀁𑀲𑀢𑀸 𑀲𑀫𑀸𑀥𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺 𑀘 𑀢𑁂 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀧𑁆𑀧𑀪𑁂𑀤𑀳𑁂𑀢𑀼𑀢𑀸𑀬 𑀫𑀳𑀧𑁆𑀨𑀮𑀸 𑀲𑀢𑁆𑀢𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀳𑁂𑀢𑀼𑀢𑀸𑀬 𑀫𑀳𑀸𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸𑀬 𑀧𑀜𑁆𑀜𑀸𑀬 𑀞𑀢𑁆𑀯𑀸𑀢𑀺 𑀬𑀸𑀬𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀁, 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀁 𑀯𑀸 𑀞𑀢𑁆𑀯𑀸. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀳𑀺 𑀲𑀫𑀸𑀥𑀺𑀲𑀳𑀕𑀢𑀸𑀧𑀺 𑀧𑀜𑁆𑀜𑀸 𑀫𑀕𑁆𑀕𑀸𑀥𑀺𑀕𑀫𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀲𑀫𑁆𑀫𑀤𑁂𑀯𑀸𑀢𑀺 𑀲𑀼𑀝𑁆𑀞𑀼𑀬𑁂𑀯 𑀬𑀣𑀸 𑀆𑀲𑀯𑀸𑀦𑀁 𑀮𑁂𑀲𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺, 𑀏𑀯𑀁 𑀲𑀩𑁆𑀩𑀲𑁄 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺. 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑀜𑁆𑀳𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.
𑁧𑁪𑁩. 𑀮𑁄𑀓𑀺𑀬𑀢𑁆𑀣𑀲𑀤𑁆𑀤𑀸𑀦𑀁 𑀯𑀺𑀬 𑀅𑀪𑀺𑀭𑀦𑁆𑀢-𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀅𑀪𑀺𑀭𑀦𑁆𑀢𑀁 𑀅𑀪𑀺𑀭𑀢𑀁 𑀅𑀪𑀺𑀭𑀢𑀻𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀅𑀪𑀺𑀭𑀦𑁆𑀢-𑀲𑀤𑁆𑀤𑁄 𑀘𑀸𑀬𑀁 𑀅𑀪𑀺𑀭𑀼𑀘𑀺𑀧𑀭𑀺𑀬𑀸𑀬𑁄, 𑀦 𑀅𑀲𑁆𑀲𑀸𑀤𑀧𑀭𑀺𑀬𑀸𑀬𑁄. 𑀅𑀲𑁆𑀲𑀸𑀤𑀯𑀲𑁂𑀦 𑀳𑀺 𑀓𑀢𑁆𑀣𑀘𑀺 𑀯𑀲𑀦𑁆𑀢𑀲𑁆𑀲 𑀅𑀲𑁆𑀲𑀸𑀤𑀯𑀢𑁆𑀣𑀼𑀯𑀺𑀕𑀫𑁂𑀦 𑀲𑀺𑀬𑀸 𑀢𑀲𑁆𑀲 𑀢𑀢𑁆𑀣 𑀅𑀦𑀪𑀺𑀭𑀢𑀺, 𑀬𑀤𑀺𑀤𑀁 𑀔𑀻𑀡𑀸𑀲𑀯𑀸𑀦𑀁 𑀦𑀢𑁆𑀣𑀺, 𑀧𑀕𑁂𑀯 𑀩𑀼𑀤𑁆𑀥𑀸𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁…𑀧𑁂… 𑀦𑀢𑁆𑀣𑀻’’𑀢𑀺. 𑀅𑀪𑀺𑀭𑀢𑀺𑀯𑀲𑁂𑀦 𑀓𑀢𑁆𑀣𑀘𑀺 𑀯𑀲𑀺𑀢𑁆𑀯𑀸 𑀢𑀤𑀪𑀸𑀯𑀢𑁄 𑀅𑀜𑁆𑀜𑀢𑁆𑀣 𑀕𑀫𑀦𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀢𑁆𑀣𑀁 𑀧𑀦 𑀓𑀢𑁆𑀣𑀘𑀺 𑀯𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀢𑁆𑀣𑀫𑁂𑀯 𑀢𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀬𑀣𑀸𑀭𑀼𑀘𑀺. 𑀆𑀬𑀸𑀫𑀸𑀢𑀺 𑀏𑀢𑁆𑀣 𑀆-𑀲𑀤𑁆𑀤𑁄 ‘‘𑀆𑀕𑀘𑁆𑀙𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀏𑀳𑀺 𑀬𑀸𑀫𑀸’’𑀢𑀺. 𑀅𑀬𑀸𑀫𑀸𑀢𑀺 𑀧𑀦 𑀧𑀸𑀞𑁂 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸 𑀣𑁂𑀭𑀁 𑀆𑀮𑀧𑀢𑀺, 𑀦 𑀧𑀦 𑀢𑀤𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀸𑀯𑀢𑁄. 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑁄 𑀳𑀺 𑀢𑀤𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀢𑁂𑀦𑀸𑀳 ‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀅𑀫𑁆𑀩𑀮𑀝𑁆𑀞𑀺𑀓𑀸𑀕𑀫𑀦𑀦𑁆𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀕𑀫𑀦𑀧𑀝𑀺𑀲𑀁𑀬𑀼𑀢𑁆𑀢𑀧𑀸𑀞𑀫𑀸𑀳. 𑀧𑀸𑀝𑀮𑀺𑀕𑀫𑀦𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀢𑁆𑀢𑀸𑀦𑀫𑁂𑀯 𑀅𑀦𑀦𑁆𑀢𑀭𑀁, 𑀳𑁂𑀝𑁆𑀞𑀸 𑀘 𑀲𑀁𑀯𑀡𑁆𑀡𑀺𑀢𑀭𑀽𑀧𑀢𑁆𑀢𑀸.
𑀲𑀸𑀭𑀺𑀧𑀼𑀢𑁆𑀢𑀲𑀻𑀳𑀦𑀸𑀤𑀯𑀡𑁆𑀡𑀦𑀸
𑁧𑁪𑁫. ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺𑀆𑀤𑀺 𑀧𑀸𑀞𑀚𑀸𑀢𑀁. 𑀲𑀫𑁆𑀧𑀲𑀸𑀤𑀦𑀻𑀬𑁂𑀢𑀺 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁪𑁧) 𑀯𑀺𑀢𑁆𑀣𑀸𑀭𑀺𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁, 𑀢𑀲𑁆𑀫𑀸 𑀫𑀬𑀫𑁆𑀧𑀺 𑀢𑀢𑁆𑀣𑁂𑀯 𑀦𑀁 𑀅𑀢𑁆𑀣𑀢𑁄 𑀯𑀺𑀢𑁆𑀣𑀸𑀭𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀤𑀼𑀲𑁆𑀲𑀻𑀮𑀆𑀤𑀻𑀦𑀯𑀯𑀡𑁆𑀡𑀦𑀸
𑁧𑁪𑁮. 𑀆𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀺 𑀏𑀢𑁆𑀣 𑀆𑀕𑀦𑁆𑀢𑀼𑀓𑀸𑀢𑀺 𑀆𑀯𑀲𑀣𑁄, 𑀢𑀤𑁂𑀯 𑀅𑀕𑀸𑀭𑀦𑁆𑀢𑀺 𑀆𑀳 ‘‘𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀆𑀯𑀲𑀣𑀕𑁂𑀳’’𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀦𑁆𑀢𑀺 𑀮𑀺𑀘𑁆𑀙𑀯𑀺𑀭𑀸𑀚𑀫𑀕𑀥𑀭𑀸𑀚𑀽𑀦𑀁. 𑀲𑀳𑀸𑀬𑀓𑀸𑀢𑀺 𑀲𑁂𑀯𑀓𑀸. 𑀓𑀼𑀮𑀸𑀦𑀻𑀢𑀺 𑀓𑀼𑀝𑀼𑀫𑁆𑀩𑀺𑀓𑁂. 𑀲𑀦𑁆𑀣𑀢𑀦𑁆𑀢𑀺 𑀲𑀦𑁆𑀣𑀭𑀺, 𑀲𑀩𑁆𑀩𑀁 𑀲𑀦𑁆𑀣𑀭𑀺 𑀲𑀩𑁆𑀩𑀲𑀦𑁆𑀣𑀭𑀺, 𑀢𑀁 𑀲𑀩𑁆𑀩𑀲𑀦𑁆𑀣𑀭𑀺𑀁. 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀘𑀸𑀬𑀁. 𑀢𑁂𑀦𑀸𑀳 ‘‘𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯’’𑀦𑁆𑀢𑀺.
𑁧𑁪𑁯. 𑀤𑀼𑀲𑁆𑀲𑀻𑀮𑁄𑀢𑀺 𑀏𑀢𑁆𑀣 𑀤𑀼-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄 ‘‘𑀤𑀼𑀧𑁆𑀧𑀜𑁆𑀜𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁪𑁯; 𑀅. 𑀦𑀺. 𑁫.𑁧𑁦) 𑀯𑀺𑀬, 𑀦 𑀕𑀭𑀳𑀢𑁆𑀣𑁄𑀢𑀺 𑀆𑀳 ‘‘𑀅𑀲𑀻𑀮𑁄 𑀦𑀺𑀲𑁆𑀲𑀻𑀮𑁄’’𑀢𑀺. 𑀪𑀺𑀦𑁆𑀦𑀲𑀁𑀯𑀭𑁄𑀢𑀺 𑀏𑀢𑁆𑀣 𑀬𑁄 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀲𑀻𑀮𑀪𑁂𑀤𑀁 𑀧𑀢𑁆𑀢𑁄, 𑀲𑁄 𑀢𑀸𑀯 𑀪𑀺𑀦𑁆𑀦𑀲𑀁𑀯𑀭𑁄 𑀳𑁄𑀢𑀺. 𑀬𑁄 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀆𑀘𑀸𑀭𑀳𑀻𑀦𑁄, 𑀲𑁄 𑀓𑀣𑀁 𑀪𑀺𑀦𑁆𑀦𑀲𑀁𑀯𑀭𑁄 𑀦𑀸𑀫 𑀳𑁄𑀢𑀻𑀢𑀺? 𑀲𑁄𑀧𑀺 𑀲𑀸𑀥𑀼𑀲𑀫𑀸𑀘𑀸𑀭𑀲𑁆𑀲 𑀧𑀭𑀺𑀳𑀸𑀦𑀺𑀬𑀲𑁆𑀲 𑀪𑁂𑀤𑀺𑀢𑀢𑁆𑀢𑀸 𑀪𑀺𑀦𑁆𑀦𑀲𑀁𑀯𑀭𑁄 𑀏𑀯 𑀦𑀸𑀫. 𑀯𑀺𑀲𑁆𑀲𑀝𑁆𑀞𑀲𑀁𑀯𑀭𑁄 𑀲𑀁𑀯𑀭𑀭𑀳𑀺𑀢𑁄𑀢𑀺 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀢𑀁 𑀢𑀁 𑀲𑀺𑀧𑁆𑀧𑀝𑁆𑀞𑀸𑀦𑀁. 𑀫𑀸𑀖𑀸𑀢𑀓𑀸𑀮𑁂𑀢𑀺 ‘‘𑀫𑀸 𑀖𑀸𑀢𑁂𑀣 𑀧𑀸𑀡𑀺𑀦𑁄’’𑀢𑀺 𑀏𑀯𑀁 𑀫𑀸𑀖𑀸𑀢𑀸𑀢𑀺 𑀖𑁄𑀲𑀦𑀁 𑀖𑁄𑀲𑀺𑀢𑀤𑀺𑀯𑀲𑁂.
𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄.
𑀅𑀚𑁆𑀛𑀸𑀲𑀬𑁂𑀦 𑀫𑀗𑁆𑀓𑀼 𑀳𑁄𑀢𑀺𑀬𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑀺𑀪𑀸𑀯𑀢𑁄.
𑀢𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀲𑁆𑀲. 𑀲𑀫𑀸𑀤𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀓𑀢𑀓𑀸𑀭𑀡𑀁. 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺 𑀢𑀁 𑀫𑀦𑀲𑁄 𑀉𑀧𑀝𑁆𑀞𑀸𑀢𑀺. 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀦𑁆𑀢𑀺 𑀉𑀫𑁆𑀫𑀻𑀮𑀦𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀇𑀥 𑀮𑁄𑀓𑀁 𑀧𑀲𑁆𑀲𑀢𑀺. 𑀦𑀺𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀦𑁆𑀢𑀺 𑀦𑀺𑀫𑀻𑀮𑀦𑀓𑀸𑀮𑁂 𑀕𑀢𑀺𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀧𑀭𑀮𑁄𑀓𑀁 𑀧𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑁄 𑀅𑀧𑀸𑀬𑀸’’𑀢𑀺𑀆𑀤𑀺. 𑀧𑀜𑁆𑀘𑀫𑀧𑀤𑀦𑁆𑀢𑀺 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀧𑀜𑁆𑀘𑀫𑁄 𑀆𑀤𑀻𑀦𑀯𑀓𑁄𑀝𑁆𑀞𑀸𑀲𑁄.
𑀲𑀻𑀮𑀯𑀦𑁆𑀢𑀆𑀦𑀺𑀲𑀁𑀲𑀯𑀡𑁆𑀡𑀦𑀸
𑁧𑁫𑁦. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀸𑀬 𑀆𑀤𑀻𑀦𑀯𑀓𑀣𑀸𑀬 𑀯𑀺𑀧𑀭𑀺𑀬𑀸𑀬𑁂𑀦. ‘‘𑀅𑀧𑁆𑀧𑀫𑀢𑁆𑀢𑁄 𑀢𑀁 𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀁 𑀬𑀣𑀸𑀓𑀸𑀮𑀁 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺𑀆𑀤𑀺𑀦𑀸 ‘‘𑀧𑀸𑀲𑀁𑀲𑀁 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀫𑁆𑀧𑀦𑁆𑀦𑀲𑀻𑀮𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀧𑀦 𑀅𑀢𑁆𑀣𑀯𑀘𑀦𑀁 𑀲𑀼𑀓𑀭𑀦𑁆𑀢𑀺 𑀅𑀦𑀸𑀫𑀝𑁆𑀞𑀁.
𑁧𑁫𑁧. 𑀧𑀸𑀴𑀺𑀫𑀼𑀢𑁆𑀢𑀓𑀸𑀬𑀸𑀢𑀺 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑀸𑀬 𑀥𑀫𑁆𑀫𑀺𑀓𑀣𑀸𑀬. 𑀢𑀢𑁆𑀣𑁂𑀯𑀸𑀢𑀺 𑀆𑀯𑀲𑀣𑀸𑀕𑀸𑀭𑁂 𑀏𑀯.
𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀫𑀸𑀧𑀦𑀯𑀡𑁆𑀡𑀦𑀸
𑁧𑁫𑁨. 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬𑀸𑀢𑀺 𑀇𑀲𑁆𑀲𑀭𑀺𑀬𑀧𑁆𑀧𑀫𑀸𑀡𑁂𑀦, 𑀇𑀲𑁆𑀲𑀭𑀺𑀬𑁂𑀦 𑀘𑁂𑀯 𑀯𑀺𑀢𑁆𑀢𑀽𑀧𑀓𑀭𑀡𑁂𑀦 𑀘𑀸𑀢𑀺 𑀏𑀯𑀁 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀺𑀧𑀺 𑀳𑀺 𑀮𑁄𑀓𑁂 ‘‘𑀫𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀸𑀝𑀮𑀺𑀕𑀸𑀫𑀁 𑀦𑀕𑀭𑀁 𑀓𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 ‘‘𑀧𑀸𑀝𑀮𑀺𑀕𑀸𑀫𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀞𑀸𑀦𑀁 𑀇𑀤𑀸𑀦𑀺 𑀦𑀕𑀭𑀁 𑀓𑀢𑁆𑀯𑀸. 𑀫𑀸𑀧𑁂𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺. 𑀆𑀬𑀫𑀼𑀔𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀦𑁆𑀢𑀺 𑀆𑀬𑀤𑁆𑀯𑀸𑀭𑀸𑀦𑀁 𑀉𑀧𑀘𑁆𑀙𑁂𑀤𑀦𑀸𑀬. ‘‘𑀲𑀳𑀲𑁆𑀲𑀲𑁂𑀯𑀸’’𑀢𑀺 𑀯𑀸 𑀧𑀸𑀞𑁄, 𑀲𑀳𑀲𑁆𑀲𑀲𑁄 𑀏𑀯. 𑀢𑁂𑀦𑀸𑀳 ‘‘𑀏𑀓𑁂𑀓𑀯𑀕𑁆𑀕𑀯𑀲𑁂𑀦 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀳𑀼𑀢𑁆𑀯𑀸’’𑀢𑀺. 𑀖𑀭𑀯𑀢𑁆𑀣𑀽𑀦𑀻𑀢𑀺 𑀖𑀭𑀧𑀢𑀺𑀝𑁆𑀞𑀸𑀧𑀦𑀝𑁆𑀞𑀸𑀦𑀸𑀦𑀺. 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀻𑀢𑀺 𑀢𑀁𑀢𑀁𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀢𑀢𑁆𑀣 𑀢𑀢𑁆𑀣𑁂𑀯 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀧𑀸𑀞𑀓𑀸𑀦𑀁, 𑀬𑀢𑁆𑀣 𑀬𑀢𑁆𑀣 𑀢𑀸𑀳𑀺 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺. 𑀲𑀺𑀧𑁆𑀧𑀸𑀦𑀼𑀪𑀸𑀯𑁂𑀦𑀸𑀢𑀺 𑀲𑀺𑀧𑁆𑀧𑀸𑀦𑀼𑀕𑀢𑀯𑀺𑀚𑁆𑀚𑀸𑀦𑀼𑀪𑀸𑀯𑁂𑀦. 𑀦𑀸𑀕𑀕𑁆𑀕𑀸𑀳𑁄𑀢𑀺 𑀦𑀸𑀕𑀸𑀦𑀁 𑀦𑀺𑀯𑀸𑀲𑀧𑁆𑀧𑀭𑀺𑀕𑁆𑀕𑀳𑁄. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀲𑀸𑀡𑁄𑀢𑀺 𑀅𑀧𑁆𑀧𑀮𑀓𑁆𑀔𑀡𑀧𑀸𑀲𑀸𑀡𑁄. 𑀔𑀸𑀡𑀼𑀓𑁄𑀢𑀺 𑀬𑁄 𑀓𑁄𑀘𑀺 𑀔𑀸𑀡𑀼𑀓𑁄. 𑀲𑀺𑀧𑁆𑀧𑀁 𑀚𑀧𑁆𑀧𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑀸𑀭𑀫𑁆𑀪𑀝𑁆𑀞𑀸𑀦𑀁 𑀧𑀭𑀺𑀳𑀭𑀺𑀢𑁆𑀯𑀸 𑀅𑀦𑀸𑀭𑀫𑁆𑀪𑁂 𑀞𑀸𑀦𑁂 𑀢𑀸𑀳𑀺 𑀯𑀢𑁆𑀣𑀼𑀧𑀭𑀺𑀕𑁆𑀕𑀸𑀳𑀺𑀓𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸𑀯𑀺𑀬 𑀢𑀁𑀢𑀁𑀕𑁂𑀳𑀸𑀦𑀺 𑀫𑀸𑀧𑁂𑀦𑁆𑀢𑀺 𑀉𑀧𑀤𑁂𑀲𑀤𑀸𑀦𑀯𑀲𑁂𑀦. 𑀦𑁂𑀲𑀦𑁆𑀢𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀧𑀸𑀞𑀓𑀸𑀦𑀁, 𑀲𑀩𑁆𑀩𑀸𑀲𑀁 𑀤𑁂𑀯𑀢𑀸𑀦𑀁. 𑀫𑀗𑁆𑀕𑀮𑀁 𑀯𑀟𑁆𑀠𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀫𑀗𑁆𑀕𑀮𑀁 𑀩𑁆𑀭𑀽𑀳𑁂𑀲𑁆𑀲𑀦𑁆𑀢𑀺. 𑀧𑀡𑁆𑀟𑀺𑀢𑀤𑀲𑁆𑀲𑀦𑀸𑀤𑀻𑀦𑀺 𑀳𑀺 𑀉𑀢𑁆𑀢𑀫𑀫𑀗𑁆𑀕𑀮𑀸𑀦𑀺. 𑀢𑁂𑀦𑀸𑀳 ‘‘𑀅𑀣 𑀫𑀬’’𑀦𑁆𑀢𑀺𑀆𑀤𑀺.
𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑀅𑀯𑀬𑀯𑀥𑀫𑁆𑀫𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀬𑀣𑀸 ‘‘𑀅𑀮𑀗𑁆𑀓𑀢𑁄 𑀤𑁂𑀯𑀤𑀢𑁆𑀢𑁄’’𑀢𑀺.
𑀅𑀭𑀺𑀬𑀓𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀅𑀭𑀺𑀬𑀤𑁂𑀲𑀯𑀸𑀲𑀺𑀫𑀦𑀼𑀲𑁆𑀲𑀸𑀦𑀁. 𑀭𑀸𑀲𑀺𑀯𑀲𑁂𑀦𑁂𑀯𑀸𑀢𑀺 ‘‘𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀭𑀸𑀲𑀺𑀯𑀲𑁂𑀦𑁂𑀯, 𑀅𑀧𑁆𑀧𑀓𑀲𑁆𑀲 𑀧𑀦 𑀪𑀡𑁆𑀟𑀲𑁆𑀲 𑀓𑀬𑀯𑀺𑀓𑁆𑀓𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 ‘‘𑀭𑀸𑀲𑀺𑀯𑀲𑁂𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀸𑀡𑀺𑀚𑀸𑀬 𑀧𑀣𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀯𑀡𑀺𑀧𑁆𑀧𑀣𑁄𑀢𑀺 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀅𑀢𑁆𑀣𑁄 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀯𑀸𑀡𑀺𑀚𑀸𑀦𑀁 𑀧𑀣𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺, 𑀯𑀡𑀺𑀧𑁆𑀧𑀣𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀸𑀡𑀺𑀚𑀸𑀦𑀁 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀪𑀡𑁆𑀟𑀧𑀼𑀝𑁂 𑀪𑀺𑀦𑁆𑀤𑀦𑁆𑀢𑀺 𑀫𑁄𑀘𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀼𑀝𑀪𑁂𑀤𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀪𑀡𑁆𑀟𑀧𑀼𑀝𑁂…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.
𑀘-𑀓𑀸𑀭𑀢𑁆𑀣𑁄 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸-𑀲𑀤𑁆𑀤𑁄.
𑁧𑁫𑁩. 𑀓𑀸𑀴𑀓𑀡𑁆𑀡𑀻 𑀲𑀢𑁆𑀢𑀸𑀢𑀺 𑀅𑀢𑁆𑀢𑀦𑀸 𑀓𑀡𑁆𑀳𑀥𑀫𑁆𑀫𑀩𑀳𑀼𑀮𑀢𑀸𑀬 𑀧𑀭𑁂𑀲𑀜𑁆𑀘 𑀓𑀡𑁆𑀳𑀯𑀺𑀧𑀸𑀓𑀸𑀦𑀢𑁆𑀣𑀦𑀺𑀩𑁆𑀩𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 ‘‘𑀓𑀸𑀴𑀓𑀡𑁆𑀡𑀻’’𑀢𑀺 𑀮𑀤𑁆𑀥𑀦𑀸𑀫𑀸 𑀧𑀭𑀽𑀧𑀤𑁆𑀤𑀯𑀓𑀭𑀸 𑀅𑀧𑁆𑀧𑁂𑀲𑀓𑁆𑀔𑀲𑀢𑁆𑀢𑀸. 𑀢𑀦𑁆𑀢𑀺 𑀪𑀕𑀯𑀦𑁆𑀢𑀁. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀲𑀫𑀬𑀁. 𑀕𑀸𑀫𑀧𑁆𑀧𑀯𑀺𑀲𑀦𑀦𑀻𑀳𑀸𑀭𑁂𑀦𑀸𑀢𑀺 𑀕𑀸𑀫𑀧𑁆𑀧𑀯𑁂𑀲𑀦 𑀦𑀺𑀯𑀲𑀦𑀸𑀓𑀸𑀭𑁂𑀦. 𑀓𑀸𑀬𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.
𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀸 𑀲𑀓𑀧𑁆𑀧𑀺𑀢𑀧𑁆𑀧𑀤𑁂𑀲𑁂. 𑀲𑀜𑁆𑀜𑀢𑁂𑀢𑀺 𑀲𑀫𑁆𑀫𑀤𑁂𑀯 𑀲𑀜𑁆𑀜𑀢𑁂 𑀲𑀼𑀲𑀁𑀯𑀼𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂.
𑀧𑀢𑁆𑀢𑀺𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑀸 𑀧𑀲𑀼𑀢𑀁 𑀧𑀼𑀜𑁆𑀜𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀅𑀦𑀼𑀧𑁆𑀧𑀤𑀚𑁆𑀚𑁂𑀬𑁆𑀬. ‘‘𑀧𑀽𑀚𑀺𑀢𑀸’’𑀢𑀺𑀆𑀤𑀻𑀲𑀼 𑀢𑀤𑁂𑀯 𑀧𑀢𑁆𑀢𑀺𑀤𑀸𑀦𑀁 𑀧𑀽𑀚𑀸, 𑀅𑀦𑀸𑀕𑀢𑁂 𑀏𑀯 𑀉𑀧𑀤𑁆𑀤𑀯𑁂 𑀆𑀭𑀓𑁆𑀔𑀲𑀁𑀯𑀺𑀥𑀸𑀦𑀁 𑀧𑀝𑀺𑀧𑀽𑀚𑀸. ‘‘𑀬𑁂𑀪𑀼𑀬𑁆𑀬𑁂𑀦 𑀜𑀸𑀢𑀺𑀫𑀦𑀼𑀲𑁆𑀲𑀸 𑀜𑀸𑀢𑀺𑀧𑁂𑀢𑀸𑀦𑀁 𑀧𑀢𑁆𑀢𑀺𑀤𑀸𑀦𑀸𑀤𑀺𑀦𑀸 𑀧𑀽𑀚𑀦𑀫𑀸𑀦𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺 𑀇𑀫𑁂 𑀧𑀦 𑀅𑀜𑁆𑀜𑀸𑀢𑀓𑀸𑀧𑀺 𑀲𑀫𑀸𑀦𑀸 𑀢𑀣𑀸 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀦𑁂𑀲𑀁 𑀲𑀓𑁆𑀓𑀘𑁆𑀘𑀁 𑀆𑀭𑀓𑁆𑀔𑀸 𑀲𑀁𑀯𑀺𑀥𑀸𑀢𑀩𑁆𑀩𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀤𑁂𑀯𑀢𑀸 𑀢𑀢𑁆𑀣 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀩𑀮𑀺𑀓𑀫𑁆𑀫𑀓𑀭𑀡𑀁 𑀫𑀸𑀦𑀦𑀁, 𑀲𑀫𑁆𑀧𑀢𑀺 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀳𑀭𑀡𑀁 𑀧𑀝𑀺𑀫𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.
𑀲𑀼𑀦𑁆𑀤𑀭𑀸𑀦𑀺 𑀧𑀲𑁆𑀲𑀢𑀻𑀢𑀺 𑀲𑀼𑀦𑁆𑀤𑀭𑀸𑀦𑀺 𑀇𑀝𑁆𑀞𑀸𑀦𑀺 𑀏𑀯 𑀧𑀲𑁆𑀲𑀢𑀺, 𑀦 𑀅𑀦𑀺𑀝𑁆𑀞𑀸𑀦𑀺.
𑁧𑁫𑁪. 𑀆𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀮𑀳𑀼𑀓𑁂 𑀤𑀸𑀭𑀼𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀓𑀯𑀸𑀝𑀨𑀮𑀓𑁂 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑁂 𑀓𑀸𑀢𑀼𑀁 𑀆𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸. 𑀦𑀸𑀯𑀸𑀲𑀗𑁆𑀔𑁂𑀧𑁂𑀦 𑀓𑀢𑀁 𑀉𑀴𑀼𑀫𑁆𑀧𑀁, 𑀯𑁂𑀴𑀼𑀦𑀴𑀸𑀤𑀺𑀓𑁂 𑀲𑀗𑁆𑀖𑀭𑀺𑀢𑁆𑀯𑀸 𑀯𑀮𑁆𑀮𑀺𑀆𑀤𑀻𑀳𑀺 𑀓𑀮𑀸𑀧𑀯𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀼𑀮𑁆𑀮𑀁.
𑀉𑀤𑀓𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀤𑀓𑀝𑁆𑀞𑀸𑀦𑀲𑁆𑀲 𑀏𑀢𑀁 ‘‘𑀅𑀡𑁆𑀡𑀯’’𑀦𑁆𑀢𑀺 𑀅𑀥𑀺𑀯𑀘𑀦𑀁, 𑀲𑀫𑀼𑀤𑁆𑀤𑀲𑁆𑀲𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀦𑁆𑀢𑀺 𑀇𑀥 𑀦𑀤𑀻 𑀅𑀥𑀺𑀧𑁆𑀧𑁂𑀢𑀸 𑀲𑀭𑀢𑀺 𑀲𑀦𑁆𑀤𑀢𑀻𑀢𑀺 𑀓𑀢𑁆𑀯𑀸. 𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑀦𑁆𑀢𑀺 𑀅𑀕𑀸𑀥𑀝𑁆𑀞𑁂𑀦 𑀕𑀫𑁆𑀪𑀻𑀭𑀁, 𑀲𑀓𑀮𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀺𑀢𑀸𑀬 𑀯𑀺𑀢𑁆𑀣𑀢𑀁. 𑀯𑀺𑀲𑀚𑁆𑀚𑀸𑀢𑀺 𑀅𑀦𑀸𑀲𑀚𑁆𑀚 𑀅𑀧𑁆𑀧𑀢𑁆𑀯𑀸. 𑀧𑀮𑁆𑀮𑀮𑀸𑀦𑀺 𑀢𑁂𑀲𑀁 𑀅𑀢𑀭𑀡𑀢𑁄. 𑀯𑀺𑀦𑀸𑀬𑁂𑀯 𑀓𑀼𑀮𑁆𑀮𑁂𑀦𑀸𑀢𑀺 𑀈𑀤𑀺𑀲𑀁 𑀉𑀤𑀓𑀁 𑀓𑀼𑀮𑁆𑀮𑁂𑀦 𑀈𑀤𑀺𑀲𑁂𑀦 𑀯𑀺𑀦𑀸 𑀏𑀯 𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸, 𑀢𑀡𑁆𑀳𑀸𑀲𑀭𑀁 𑀧𑀦 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑁂𑀢𑀼𑀁 𑀓𑀢𑁆𑀯𑀸 𑀦𑀺𑀢𑁆𑀢𑀺𑀡𑁆𑀡𑀸𑀢𑀺 𑀬𑁄𑀚𑀦𑀸.
𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀅𑀭𑀺𑀬𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸
𑁧𑁫𑁫. 𑀫𑀳𑀸𑀧𑀦𑀸𑀤𑀲𑁆𑀲 𑀭𑀜𑁆𑀜𑁄. 𑀧𑀸𑀲𑀸𑀤𑀓𑁄𑀝𑀺𑀬𑀁𑀓𑀢𑀕𑀸𑀫𑁄𑀢𑀺 𑀧𑀸𑀲𑀸𑀤𑀲𑁆𑀲 𑀧𑀢𑀺𑀢𑀣𑀼𑀧𑀺𑀓𑀸𑀬 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀦𑀺𑀯𑀺𑀝𑁆𑀞𑀕𑀸𑀫𑁄. 𑀅𑀭𑀺𑀬𑀪𑀸𑀯𑀓𑀭𑀸𑀦𑀦𑁆𑀢𑀺 𑀬𑁂 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀅𑀭𑀺𑀬𑀪𑀸𑀯𑀓𑀭𑀸𑀦𑀁 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀪𑀸𑀯𑀽𑀧𑀘𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀪𑀽𑀢𑀪𑀸𑀯𑁂𑀦 𑀲𑀘𑁆𑀘𑀸𑀦𑀁. 𑀅𑀦𑀼𑀩𑁄𑀥𑁄 𑀧𑀼𑀩𑁆𑀩𑀪𑀸𑀕𑀺𑀬𑀁 𑀜𑀸𑀡𑀁, 𑀧𑀝𑀺𑀯𑁂𑀥𑁄 𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀫𑀬𑁄, 𑀢𑀢𑁆𑀣 𑀬𑀲𑁆𑀫𑀸 𑀅𑀦𑀼𑀩𑁄𑀥𑀧𑀼𑀩𑁆𑀩𑀓𑁄 𑀧𑀝𑀺𑀯𑁂𑀥𑁄 𑀅𑀦𑀼𑀩𑁄𑀥𑁂𑀦 𑀯𑀺𑀦𑀸 𑀦 𑀳𑁄𑀢𑀺, 𑀅𑀦𑀼𑀩𑁄𑀥𑁄𑀧𑀺 𑀏𑀓𑀘𑁆𑀘𑁄 𑀧𑀝𑀺𑀯𑁂𑀥𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀤𑀼𑀪𑀬𑀸𑀪𑀸𑀯𑀳𑁂𑀢𑀼𑀓𑀜𑁆𑀘 𑀯𑀝𑁆𑀝𑁂𑀯 𑀲𑀁𑀲𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀅𑀦𑀦𑀼𑀩𑁄𑀥𑀸…𑀧𑁂… 𑀢𑀼𑀫𑁆𑀳𑀸𑀓𑀜𑁆𑀘𑀸’’𑀢𑀺. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀪𑀯𑀢𑁄 𑀪𑀯𑀦𑁆𑀢𑀭𑀽𑀧𑀕𑀫𑀦𑀁 𑀲𑀦𑁆𑀥𑀸𑀯𑀦𑀁, 𑀅𑀧𑀭𑀸𑀧𑀭𑀁 𑀘𑀯𑀦𑀼𑀧𑀧𑀚𑁆𑀚𑀦𑀯𑀲𑁂𑀦 𑀲𑀜𑁆𑀘𑀭𑀡𑀁 𑀲𑀁𑀲𑀭𑀡𑀦𑁆𑀢𑀺 𑀆𑀳 ‘‘𑀪𑀯𑀢𑁄’’𑀢𑀺𑀆𑀤𑀺. 𑀲𑀦𑁆𑀥𑀸𑀯𑀺𑀢𑀲𑀁𑀲𑀭𑀺𑀢𑀧𑀤𑀸𑀦𑀁 𑀓𑀫𑁆𑀫𑀲𑀸𑀥𑀦𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘𑀸’’𑀢𑀺 𑀧𑀞𑀫𑀯𑀺𑀓𑀧𑁆𑀧𑁂. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀪𑀸𑀯𑀲𑀸𑀥𑀦𑀢𑀁 𑀳𑀤𑀬𑁂 𑀓𑀢𑁆𑀯𑀸 ‘‘𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸’’𑀢𑀺 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀦𑀬𑀦𑀲𑀫𑀢𑁆𑀣𑀸𑀢𑀺 𑀧𑀸𑀧𑀦𑀲𑀫𑀢𑁆𑀣𑀸, 𑀤𑀻𑀖𑀭𑀚𑁆𑀚𑀼𑀦𑀸 𑀩𑀤𑁆𑀥𑀲𑀓𑀼𑀡𑀁 𑀯𑀺𑀬 𑀭𑀚𑁆𑀚𑀼𑀳𑀢𑁆𑀣𑁄 𑀧𑀼𑀭𑀺𑀲𑁄 𑀤𑁂𑀲𑀦𑁆𑀢𑀭𑀁 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀩𑀤𑁆𑀥𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀪𑀯𑀦𑁆𑀢𑀭𑀁 𑀦𑁂𑀢𑀺 𑀏𑀢𑀸𑀬𑀸𑀢𑀺 𑀪𑀯𑀦𑁂𑀢𑁆𑀢𑀺, 𑀢𑀡𑁆𑀳𑀸, 𑀲𑀸 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀲𑀼𑀝𑁆𑀞𑀼 𑀳𑀢𑀸 𑀙𑀺𑀦𑁆𑀦𑀸𑀢𑀺 𑀪𑀯𑀦𑁂𑀢𑁆𑀢𑀺𑀲𑀫𑀽𑀳𑀢𑀸.
𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀯𑀡𑁆𑀡𑀦𑀸
𑁧𑁫𑁬. 𑀤𑁆𑀯𑁂 𑀕𑀸𑀫𑀸 ‘‘𑀦𑀸𑀢𑀺𑀓𑀸’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑁄, 𑀜-𑀓𑀸𑀭𑀲𑁆𑀲 𑀘𑀸𑀬𑀁 𑀦-𑀓𑀸𑀭𑀸𑀤𑁂𑀲𑁂𑀦 𑀦𑀺𑀤𑁆𑀤𑁂𑀲𑁄 ‘‘𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁪; 𑀚𑀸. 𑀅𑀝𑁆𑀞. 𑁨.𑁨.𑁩𑁪) 𑀯𑀺𑀬. 𑀢𑁂𑀦𑀸𑀳 ‘‘𑀜𑀸𑀢𑀺𑀕𑀸𑀫𑀓𑁂’’𑀢𑀺. 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺 𑀏𑀯 𑀓𑀢𑁄 𑀆𑀯𑀲𑀣𑁄𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀲𑁄 𑀓𑀺𑀭 𑀆𑀯𑀸𑀲𑁄 𑀬𑀣𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑁂𑀦 𑀲𑀫𑁆𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀏𑀯𑀁 𑀇𑀝𑁆𑀞𑀓𑀸𑀳𑀺 𑀏𑀯 𑀘𑀺𑀦𑀺𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀝𑁆𑀞𑀓𑀸𑀫𑀬𑁂 𑀆𑀯𑀲𑀣𑁂’’𑀢𑀺. 𑀢𑀼𑀮𑀸𑀤𑀡𑁆𑀟𑀓𑀯𑀸𑀝𑀨𑀮𑀓𑀸𑀦𑀺 𑀧𑀦 𑀤𑀸𑀭𑀼𑀫𑀬𑀸𑀦𑁂𑀯.
𑁧𑁫𑁭. 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀘𑁆𑀘𑀬𑀪𑀸𑀯𑁂𑀦 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺, 𑀑𑀭𑀫𑁆𑀪𑀸𑀕𑀲𑁆𑀲 𑀯𑀸 𑀳𑀺𑀢𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦’’𑀦𑁆𑀢𑀺𑀆𑀤𑀺. 𑀢𑀻𑀳𑀺 𑀫𑀕𑁆𑀕𑁂𑀳𑀻𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀫𑀕𑁆𑀕𑁂𑀳𑀺. 𑀢𑁂𑀳𑀺 𑀧𑀳𑀸𑀢𑀩𑁆𑀩𑀢𑀸𑀬 𑀳𑀺 𑀦𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀑𑀭𑀫𑁆𑀪𑀸𑀕𑀺𑀬𑀢𑀸. 𑀑𑀭𑀫𑁆𑀪𑀜𑁆𑀚𑀺𑀬𑀸𑀦𑀺 𑀯𑀸 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀦𑁂𑀲𑀁 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑁂𑀦 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀲𑀩𑁆𑀩𑀲𑁄 𑀅𑀪𑀸𑀯𑁂𑀦 𑀅𑀭𑀺𑀬𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀸𑀬 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀻’’𑀢𑀺. 𑀦𑀺𑀩𑁆𑀩𑀢𑁆𑀢𑀯𑀲𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦. 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺 𑀫𑀳𑀕𑁆𑀕𑀢𑀕𑀸𑀫𑀺𑀓𑀫𑁆𑀫𑀸𑀬𑀽𑀳𑀦𑀲𑁆𑀲 𑀯𑀺𑀦𑀺𑀩𑀦𑁆𑀥𑀦𑀢𑁄. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸 𑀯𑀺𑀬 𑀫𑀳𑀕𑁆𑀕𑀢𑀽𑀧𑀧𑀢𑁆𑀢𑀺𑀬𑀸 𑀅𑀯𑀺𑀦𑀺𑀩𑀦𑁆𑀥𑀪𑀽𑀢𑀸𑀦𑀺𑀧𑀺 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀢𑀢𑁆𑀣 𑀫𑀳𑀕𑁆𑀕𑀢𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑁆𑀧𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀓𑀫𑁆𑀫𑀧𑀭𑀺𑀓𑁆𑀔𑀬𑁂 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀧𑀘𑁆𑀘𑀬𑀢𑀸𑀬 𑀫𑀳𑀕𑁆𑀕𑀢𑀪𑀯𑀢𑁄 𑀆𑀦𑁂𑀢𑁆𑀯𑀸 𑀧𑀼𑀦 𑀇𑀥𑁂𑀯 𑀓𑀸𑀫𑀪𑀯𑁂 𑀏𑀯 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀧𑀺 𑀲𑀁𑀬𑁄𑀚𑀦𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀏𑀯. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀸𑀕𑀫𑀦𑀲𑀪𑀸𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀢𑀲𑁆𑀫𑀸 𑀮𑁄𑀓𑀸 𑀇𑀥 𑀦 𑀆𑀕𑀫𑀦𑀲𑀪𑀸𑀯𑀸. 𑀩𑀼𑀤𑁆𑀥𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑀸𑀦𑀁 𑀧𑀦𑀢𑁆𑀣𑀸𑀬𑀲𑁆𑀲 𑀆𑀕𑀫𑀦𑀁 𑀅𑀦𑀺𑀯𑀸𑀭𑀺𑀢𑀁.
𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀭𑀴𑀸𑀓𑀸𑀭𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀅𑀩𑀳𑀮𑀢𑀸𑀢𑀺 𑀤𑁆𑀯𑁂𑀥𑀸𑀧𑀺 𑀢𑀦𑀼𑀪𑀸𑀯𑁄. 𑀅𑀪𑀺𑀡𑁆𑀳𑀦𑁆𑀢𑀺 𑀩𑀳𑀼𑀲𑁄. 𑀩𑀳𑀮𑀩𑀳𑀮𑀸𑀢𑀺 𑀢𑀺𑀩𑁆𑀩𑀢𑀺𑀩𑁆𑀩𑀸. 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀲𑀦𑁆𑀢𑀸𑀦𑀁 𑀫𑀤𑁆𑀤𑀦𑁆𑀢𑀸, 𑀨𑀭𑀦𑁆𑀢𑀸, 𑀲𑀸𑀥𑁂𑀦𑁆𑀢𑀸, 𑀅𑀦𑁆𑀥𑀓𑀸𑀭𑀁 𑀓𑀭𑁄𑀦𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑁆𑀯𑀻𑀳𑀺 𑀧𑀦 𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑀸 𑀢𑀦𑀼𑀓𑀢𑀦𑀼𑀓𑀸 𑀫𑀦𑁆𑀤𑀫𑀦𑁆𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀧𑀼𑀢𑁆𑀢𑀥𑀻𑀢𑀭𑁄 𑀳𑁄𑀦𑁆𑀢𑀻’’𑀢𑀺 𑀇𑀤𑀁 𑀅𑀓𑀸𑀭𑀡𑀁. 𑀢𑀣𑀸 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀫𑀢𑁆𑀢𑁂𑀦𑀧𑀺 𑀢𑁂 𑀳𑁄𑀦𑁆𑀢𑀺. 𑀇𑀤𑀦𑁆𑀢𑀺 ‘‘𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁. 𑀪𑀯𑀢𑀦𑀼𑀓𑀯𑀲𑁂𑀦𑀸𑀢𑀺 𑀅𑀧𑁆𑀧𑀓𑀪𑀯𑀯𑀲𑁂𑀦. 𑀢𑀦𑁆𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑀲𑁆𑀲 𑀯𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀪𑀯𑀸 𑀅𑀭𑀺𑀬𑀸𑀦𑀁 𑀮𑀩𑁆𑀪𑀦𑁆𑀢𑀺, 𑀢𑁂 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀪𑀯𑀸 𑀏𑀯. 𑀬𑁂 𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀣 𑀓𑀻𑀤𑀺𑀲𑀁 𑀢𑀁 𑀪𑀯𑀢𑀦𑀼𑀓𑀁, 𑀢𑀲𑁆𑀫𑀸 𑀉𑀪𑀬𑀣𑀸𑀧𑀺 𑀪𑀯𑀢𑀦𑀼𑀓𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑁂 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺 𑀅𑀝𑁆𑀞𑀫𑀲𑁆𑀲𑁂𑀯 𑀪𑀯𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑀓𑀸𑀫𑀸𑀯𑀘𑀭𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀇𑀢𑀭𑀲𑁆𑀲 𑀮𑁄𑀓𑀲𑁆𑀲 𑀯𑀲𑁂𑀦 𑀢𑀣𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀬𑁄 𑀳𑀺 𑀲𑀓𑀤𑀸𑀕𑀸𑀫𑀻 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀲𑀼 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁄𑀧𑀺 𑀓𑀸𑀫𑀪𑀯𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀪𑀕𑀯𑀢𑀸 𑀘 𑀓𑀸𑀫𑀮𑁄𑀓𑁂 𑀞𑀢𑁆𑀯𑀸 ‘‘𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀘 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀥 𑀦 𑀮𑀩𑁆𑀪𑀦𑁆𑀢𑀺. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀇𑀫𑀁 𑀮𑁄𑀓𑀦𑁆𑀢𑀺 𑀓𑀸𑀫𑀪𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀁𑀬𑁂𑀯 𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁.
𑀘𑀢𑀽𑀲𑀼 …𑀧𑁂… 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄 𑀅𑀧𑀸𑀬𑀕𑀫𑀦𑀻𑀬𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀫𑀕𑁆𑀕𑀥𑀫𑁆𑀫𑀦𑀺𑀬𑀸𑀫𑁂𑀦. 𑀦𑀺𑀬𑀢𑁄 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺.
𑀥𑀫𑁆𑀫𑀸𑀤𑀸𑀲𑀥𑀫𑁆𑀫𑀧𑀭𑀺𑀬𑀸𑀬𑀯𑀡𑁆𑀡𑀦𑀸
𑁧𑁫𑁮. 𑀢𑁂𑀲𑀁 𑀢𑁂𑀲𑀁 𑀜𑀸𑀡𑀕𑀢𑀺𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 ‘‘𑀅𑀲𑀼𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀅𑀲𑀼𑀓𑁄 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀜𑀸𑀡𑀸𑀥𑀺𑀕𑀫𑀦𑀁. 𑀜𑀸𑀡𑀽𑀧𑀧𑀢𑁆𑀢𑀺𑀁 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀢𑀢𑁄 𑀧𑀭𑀫𑁆𑀧𑀺 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘 𑀜𑀸𑀡𑀲𑀳𑀺𑀢𑀁 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑀁. 𑀑𑀮𑁄𑀓𑁂𑀦𑁆𑀢𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑀸 𑀧𑁂𑀓𑁆𑀔𑀦𑁆𑀢𑀲𑁆𑀲 𑀓𑀸𑀬𑀓𑀺𑀮𑀫𑀣𑁄𑀯, 𑀦 𑀢𑁂𑀦 𑀓𑀸𑀘𑀺 𑀯𑁂𑀦𑁂𑀬𑁆𑀬𑀸𑀦𑀁 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀯𑀺𑀳𑁂𑀲𑀸𑀢𑀺 𑀘𑀺𑀢𑁆𑀢𑀔𑁂𑀤𑁄, 𑀲𑀸 𑀓𑀺𑀮𑁂𑀲𑀽𑀧𑀲𑀁𑀳𑀺𑀢𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀆𑀤𑀻𑀬𑀢𑀺 𑀆𑀮𑁄𑀓𑀻𑀬𑀢𑀺 𑀅𑀢𑁆𑀢𑀸 𑀏𑀢𑁂𑀦𑀸𑀢𑀺 𑀆𑀤𑀸𑀲𑀁, 𑀥𑀫𑁆𑀫𑀪𑀽𑀢𑀁 𑀆𑀤𑀸𑀲𑀁 𑀥𑀫𑁆𑀫𑀸𑀤𑀸𑀲𑀁, 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀦 𑀅𑀭𑀺𑀬𑀲𑀸𑀯𑀓𑀸 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀯𑀺𑀤𑁆𑀥𑀲𑁆𑀢𑀲𑀫𑁆𑀫𑁄𑀳𑀢𑁆𑀢𑀸 𑀅𑀢𑁆𑀢𑀸𑀦𑀫𑁆𑀧𑀺 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀬𑀸𑀣𑀸𑀯𑀢𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀢𑀧𑁆𑀧𑀓𑀸𑀲𑀦𑀢𑁄 𑀧𑀦 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀥𑀫𑁆𑀫𑀸𑀤𑀸𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀦 𑀥𑀫𑁆𑀫𑀸𑀤𑀸𑀲𑁂𑀦𑀸𑀢𑀺 𑀇𑀥 𑀧𑀦 𑀫𑀕𑁆𑀕𑀥𑀫𑁆𑀫𑀫𑁂𑀯 𑀯𑀤𑀢𑀺.
𑀅𑀯𑁂𑀘𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸 𑀢𑀦𑁆𑀦𑀺𑀫𑀺𑀢𑁆𑀢𑀉𑀧𑁆𑀧𑀦𑁆𑀦𑀧𑀲𑀸𑀤𑁄 𑀅𑀯𑁂𑀘𑁆𑀘𑀧𑀲𑀸𑀤𑁄, 𑀫𑀕𑁆𑀕𑀸𑀥𑀺𑀕𑀫𑁂𑀦 𑀉𑀧𑁆𑀧𑀦𑁆𑀦𑀧𑀲𑀸𑀤𑁄, 𑀲𑁄 𑀧𑀦 𑀬𑀲𑁆𑀫𑀸 𑀧𑀸𑀲𑀸𑀡𑀧𑀩𑁆𑀩𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄, 𑀦 𑀘 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀯𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀘𑀮𑁂𑀦 𑀅𑀘𑁆𑀘𑀼𑀢𑁂𑀦𑀸’’𑀢𑀺.
‘‘𑀧𑀜𑁆𑀘𑀲𑀻𑀮𑀸𑀦𑀻’’𑀢𑀺 𑀕𑀳𑀝𑁆𑀞𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 𑀢𑁂𑀳𑀺 𑀏𑀓𑀦𑁆𑀢𑀧𑀭𑀺𑀳𑀭𑀡𑀻𑀬𑀢𑁄. 𑀅𑀭𑀺𑀬𑀸𑀦𑀁 𑀧𑀦 𑀲𑀩𑁆𑀩𑀸𑀦𑀺 𑀲𑀻𑀮𑀸𑀦𑀺 𑀓𑀦𑁆𑀢𑀸𑀦𑁂𑀯. 𑀢𑁂𑀦𑀸𑀳 ‘‘𑀲𑀩𑁆𑀩𑁄𑀧𑀺 𑀧𑀦𑁂𑀢𑁆𑀣 𑀲𑀁𑀯𑀭𑁄 𑀮𑀩𑁆𑀪𑀢𑀺𑀬𑁂𑀯𑀸’’𑀢𑀺.
𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁. 𑀲𑀺𑀓𑁆𑀔𑀸𑀧𑀤𑀸𑀯𑀺𑀭𑁄𑀥𑁂𑀦𑀸𑀢𑀺 𑀬𑀣𑀸 𑀪𑀽𑀢𑀭𑁄𑀘𑀦𑀸𑀧𑀢𑁆𑀢𑀺 𑀦 𑀳𑁄𑀢𑀺, 𑀏𑀯𑀁. 𑀬𑀼𑀢𑁆𑀢𑀝𑁆𑀞𑀸𑀦𑁂𑀢𑀺 𑀓𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂.
𑀅𑀫𑁆𑀩𑀧𑀸𑀮𑀻𑀕𑀡𑀺𑀓𑀸𑀯𑀢𑁆𑀣𑀼𑀯𑀡𑁆𑀡𑀦𑀸
𑁧𑁬𑁧. 𑀢𑀤𑀸 𑀓𑀺𑀭 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀨𑀻𑀢𑀸 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀲𑀸𑀮𑀺𑀬𑀸 𑀲𑀫𑁆𑀧𑀦𑁆𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀜𑁆𑀘𑀲𑀢𑀫𑀢𑁆𑀢𑀸 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀳𑁂𑀲𑀼𑀁 𑀑𑀲𑀦𑁆𑀦𑀯𑀻𑀭𑀺𑀬𑀸 𑀘. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀢𑀢𑁆𑀣 𑀓𑀺𑀭 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀑𑀲𑀦𑁆𑀦𑀯𑀻𑀭𑀺𑀬𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁬𑁫). 𑀲𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁆𑀣𑀦𑁆𑀢𑀺 𑀢𑁂𑀲𑀁 𑀲𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀢𑁆𑀣𑀁. 𑀲𑀭𑀢𑀻𑀢𑀺 𑀓𑀸𑀬𑀸𑀤𑀺𑀓𑁂 𑀬𑀣𑀸𑀲𑀪𑀸𑀯𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀢𑀺𑀬𑀸 𑀅𑀦𑀼𑀲𑁆𑀲𑀭𑀢𑀺 𑀉𑀧𑀥𑀸𑀭𑁂𑀢𑀺. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑀁 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀺 𑀅𑀯𑀩𑀼𑀚𑁆𑀛𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀢𑁄 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) 𑀆𑀕𑀫𑀺𑀲𑁆𑀲𑀢𑀺.
𑀲𑀩𑁆𑀩𑀲𑀗𑁆𑀕𑀸𑀳𑀓𑀦𑁆𑀢𑀺 𑀲𑀭𑀻𑀭𑀕𑀢𑀲𑁆𑀲 𑀘𑁂𑀯 𑀯𑀢𑁆𑀣𑀸𑀮𑀗𑁆𑀓𑀸𑀭𑀕𑀢𑀲𑁆𑀲 𑀘𑀸𑀢𑀺 𑀲𑀩𑁆𑀩𑀲𑁆𑀲 𑀦𑀻𑀮𑀪𑀸𑀯𑀲𑁆𑀲 𑀲𑀗𑁆𑀕𑀸𑀳𑀓𑀁 𑀯𑀘𑀦𑀁. 𑀢𑀲𑁆𑀲𑁂𑀯𑀸𑀢𑀺 𑀦𑀻𑀮𑀸𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀅𑀢𑁆𑀣𑀲𑁆𑀲𑁂𑀯. 𑀯𑀺𑀪𑀸𑀕𑀤𑀲𑁆𑀲𑀦𑀦𑁆𑀢𑀺 𑀧𑀪𑁂𑀤𑀤𑀲𑁆𑀲𑀦𑀁. 𑀬𑀣𑀸 𑀢𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀅𑀧𑀻𑀢𑀸𑀤𑀺𑀯𑀡𑁆𑀡𑀸 𑀏𑀯 𑀓𑁂𑀘𑀺 𑀯𑀺𑀮𑁂𑀧𑀦𑀯𑀲𑁂𑀦 𑀧𑀻𑀢𑀸𑀤𑀺𑀯𑀡𑁆𑀡𑀸 𑀔𑀸𑀬𑀺𑀁𑀲𑀼, 𑀏𑀯𑀁 𑀅𑀦𑀻𑀮𑀸𑀤𑀺𑀯𑀡𑁆𑀡𑀸 𑀏𑀯 𑀓𑁂𑀘𑀺 𑀯𑀺𑀮𑁂𑀧𑀦𑀯𑀲𑁂𑀦 𑀦𑀻𑀮𑀸𑀤𑀺𑀯𑀡𑁆𑀡𑀸 𑀔𑀸𑀬𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 ‘‘𑀦 𑀢𑁂𑀲𑀁 𑀧𑀓𑀢𑀺𑀯𑀡𑁆𑀡𑁄 𑀦𑀻𑀮𑁄’’𑀢𑀺𑀆𑀤𑀺. 𑀦𑀻𑀮𑁄 𑀫𑀡𑀺 𑀏𑀢𑁂𑀲𑀽𑀢𑀺 𑀦𑀻𑀮𑀫𑀡𑀺, 𑀇𑀦𑁆𑀤𑀦𑀻𑀮𑀫𑀳𑀸𑀦𑀻𑀮𑀸𑀤𑀺𑀦𑀻𑀮𑀭𑀢𑀦𑀯𑀺𑀦𑀤𑁆𑀥𑀸 𑀅𑀮𑀗𑁆𑀓𑀸𑀭𑀸. 𑀢𑁂 𑀓𑀺𑀭 𑀲𑀼𑀯𑀡𑁆𑀡𑀯𑀺𑀭𑀘𑀺𑀢𑁂 𑀳𑀺 𑀫𑀡𑀺𑀑𑀪𑀸𑀲𑁂𑀳𑀺 𑀏𑀓𑀦𑀻𑀮𑀸 𑀯𑀺𑀬 𑀔𑀸𑀬𑀦𑁆𑀢𑀺. 𑀦𑀻𑀮𑀫𑀡𑀺𑀔𑀘𑀺𑀢𑀸𑀢𑀺 𑀦𑀻𑀮𑀭𑀢𑀦𑀧𑀭𑀺𑀓𑁆𑀔𑀺𑀢𑁆𑀢𑀸. 𑀦𑀻𑀮𑀯𑀢𑁆𑀣𑀧𑀭𑀺𑀓𑁆𑀔𑀺𑀢𑁆𑀢𑀸𑀢𑀺 𑀦𑀻𑀮𑀯𑀢𑁆𑀣𑀦𑀻𑀮𑀓𑀫𑁆𑀧𑀮𑀧𑀭𑀺𑀓𑁆𑀔𑁂𑀧𑀸. 𑀦𑀻𑀮𑀯𑀫𑁆𑀫𑀺𑀓𑁂𑀳𑀻𑀢𑀺 𑀦𑀻𑀮𑀓𑀖𑀝𑀧𑀭𑀺𑀓𑁆𑀔𑀺𑀢𑁆𑀢𑁂𑀳𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀧𑀻𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀲𑀩𑁆𑀩𑀧𑀤𑁂𑀲𑀼. 𑀧𑀭𑀺𑀯𑀝𑁆𑀝𑁂𑀲𑀻𑀢𑀺 𑀧𑀝𑀺𑀖𑀝𑁆𑀝𑁂𑀲𑀺. 𑀆𑀳𑀭𑀦𑁆𑀢𑀺 𑀇𑀫𑀲𑁆𑀫𑀸 𑀭𑀸𑀚𑀧𑀼𑀭𑀺𑀲𑀸 𑀩𑀮𑀺𑀦𑁆𑀢𑀺 𑀆𑀳𑀸𑀭𑁄, 𑀢𑀧𑁆𑀧𑀢𑁆𑀢𑀚𑀦𑀧𑀤𑁄𑀢𑀺 𑀆𑀳 ‘‘𑀲𑀸𑀳𑀸𑀭𑀦𑁆𑀢𑀺 𑀲𑀚𑀦𑀧𑀤’’𑀦𑁆𑀢𑀺. 𑀅𑀗𑁆𑀕𑀼𑀮𑀺𑀨𑁄𑀝𑁄𑀧𑀺 𑀅𑀗𑁆𑀕𑀼𑀮𑀺𑀬𑀸 𑀘𑀸𑀮𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀲𑀼’’𑀦𑁆𑀢𑀺. 𑀅𑀫𑁆𑀩𑀓𑀸𑀬𑀸𑀢𑀺 𑀫𑀸𑀢𑀼𑀕𑀸𑀫𑁂𑀦. 𑀉𑀧𑀘𑀸𑀭𑀯𑀘𑀦𑀁 𑀳𑁂𑀢𑀁 𑀇𑀢𑁆𑀣𑀻𑀲𑀼, 𑀬𑀤𑀺𑀤𑀁 ‘‘𑀅𑀫𑁆𑀩𑀓𑀸 𑀫𑀸𑀢𑀼𑀕𑀸𑀫𑁄 𑀚𑀦𑀦𑀺𑀓𑀸’’𑀢𑀺.
𑀅𑀯𑀮𑁄𑀓𑁂𑀣𑀸𑀢𑀺 𑀅𑀧𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀦𑀁 𑀑𑀮𑁄𑀓𑁂𑀣. 𑀢𑀁 𑀧𑀦 𑀅𑀧𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀦𑀁 𑀅𑀦𑀼 𑀅𑀦𑀼 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀣𑀸’’𑀢𑀺. 𑀉𑀧𑀦𑁂𑀣𑀸𑀢𑀺 ‘‘𑀬𑀣𑀸𑀬𑀁 𑀮𑀺𑀘𑁆𑀙𑀯𑀺𑀭𑀸𑀚𑀧𑀭𑀺𑀲𑀸 𑀲𑁄𑀪𑀸𑀢𑀺𑀲𑀬𑁂𑀦 𑀬𑀼𑀢𑁆𑀢𑀸, 𑀏𑀯𑀁 𑀢𑀸𑀯𑀢𑀺𑀁𑀲𑀧𑀭𑀺𑀲𑀸’’𑀢𑀺 𑀉𑀧𑀦𑀬𑀁 𑀓𑀭𑁄𑀣. 𑀢𑁂𑀦𑀸𑀳 ‘‘𑀢𑀸𑀯𑀢𑀺𑀁𑀲𑁂𑀳𑀺 𑀲𑀫𑀓𑁂 𑀓𑀢𑁆𑀯𑀸 𑀧𑀲𑁆𑀲𑀣𑀸’’𑀢𑀺.
‘‘𑀉𑀧𑀲𑀁𑀳𑀭𑀣 𑀪𑀺𑀓𑁆𑀔𑀯𑁂 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑀢𑀸𑀯𑀢𑀺𑀁𑀲𑀲𑀤𑀺𑀲’’𑀦𑁆𑀢𑀺 𑀦𑀬𑀺𑀤𑀁 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁂 𑀦𑀺𑀬𑁄𑀚𑀦𑀁, 𑀓𑁂𑀯𑀮𑀁 𑀧𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸 𑀏𑀢𑁂𑀲𑀁 𑀭𑀸𑀚𑀽𑀦𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀢𑀺 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀓𑀣𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀧𑀦 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑀸𑀦𑀁 𑀢𑀢𑁆𑀣 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀧𑀺 𑀲𑀺𑀬𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁂 𑀉𑀬𑁆𑀬𑁄𑀚𑁂𑀢𑀻’’𑀢𑀺. 𑀳𑀺𑀢𑀓𑀸𑀫𑀢𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀬𑀣𑀸 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀳𑀺𑀢𑀓𑀸𑀫𑀢𑀸𑀬 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀢𑀢𑁆𑀭 𑀓𑀺𑀭𑀸’’𑀢𑀺𑀆𑀤𑀺. 𑀑𑀲𑀦𑁆𑀦𑀯𑀻𑀭𑀺𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀅𑀯𑀲𑀦𑁆𑀦𑀯𑀻𑀭𑀺𑀬𑀸, 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀸 𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀦𑁆𑀢𑀺 𑀢𑁂𑀲𑀁 𑀭𑀸𑀚𑀽𑀦𑀁 𑀯𑀲𑁂𑀦 𑀪𑀺𑀓𑁆𑀔𑀽𑀦𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀺𑀪𑀽𑀢𑀪𑀸𑀯𑀢𑁆𑀣𑀁.
𑀯𑁂𑀴𑀼𑀯𑀕𑀸𑀫𑀯𑀲𑁆𑀲𑀽𑀧𑀕𑀫𑀦𑀯𑀡𑁆𑀡𑀦𑀸
𑁧𑁬𑁩. 𑀲𑀫𑀻𑀧𑁂 𑀯𑁂𑀴𑀼𑀯𑀕𑀸𑀫𑁄𑀢𑀺 𑀧𑀼𑀩𑁆𑀩𑀡𑁆𑀳𑀁 𑀯𑀸 𑀲𑀸𑀬𑀦𑁆𑀳𑀁 𑀯𑀸 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑀬𑁄𑀕𑁆𑀬𑁂 𑀆𑀲𑀦𑁆𑀦𑀝𑁆𑀞𑀸𑀦𑁂 𑀦𑀺𑀯𑀺𑀝𑁆𑀞𑀸 𑀧𑀭𑀺𑀯𑀸𑀭𑀕𑀸𑀫𑁄. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀫𑁆𑀫𑀸 𑀕𑀦𑁆𑀢𑁆𑀯𑀸. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄.
𑁧𑁬𑁪. 𑀨𑀭𑀼𑀲𑁄𑀢𑀺 𑀓𑀓𑁆𑀔𑀴𑁄, 𑀕𑀭𑀼𑀢𑀭𑁄𑀢𑀺 𑀅𑀢𑁆𑀣𑁄. 𑀯𑀺𑀲𑀪𑀸𑀕𑀭𑁄𑀕𑁄𑀢𑀺 𑀥𑀸𑀢𑀼𑀯𑀺𑀲𑀪𑀸𑀕𑀢𑀸𑀬 𑀲𑀫𑀼𑀝𑁆𑀞𑀺𑀢𑁄 𑀩𑀳𑀮𑀢𑀭𑀭𑁄𑀕𑁄, 𑀦 𑀆𑀩𑀸𑀥𑀫𑀢𑁆𑀢𑀁. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑁂𑀤𑀦𑀸𑀦𑀁 𑀔𑀡𑀺𑀓𑀢𑀁, 𑀤𑀼𑀓𑁆𑀔𑀢𑀁, 𑀅𑀢𑁆𑀢𑀲𑀼𑀜𑁆𑀜𑀢𑀜𑁆𑀘 𑀬𑀸𑀣𑀸𑀯𑀢𑁄 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀢𑀼𑀮𑁂𑀢𑁆𑀯𑀸. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀢𑀸 𑀅𑀪𑀺𑀪𑀯𑀦𑁆𑀢𑁄 𑀬𑀣𑀸𑀧𑀭𑀺𑀫𑀤𑁆𑀤𑀺𑀢𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑁂𑀦 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀲𑀺, 𑀦 𑀢𑀸𑀳𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑁄. 𑀢𑁂𑀦𑀸𑀳 ‘‘𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺𑀆𑀤𑀺. 𑀅𑀤𑀼𑀓𑁆𑀔𑀺𑀬𑀫𑀸𑀦𑁄𑀢𑀺 𑀘𑁂𑀢𑁄𑀤𑀼𑀓𑁆𑀔𑀯𑀲𑁂𑀦 𑀅𑀤𑀼𑀓𑁆𑀔𑀺𑀬𑀫𑀸𑀦𑁄, 𑀓𑀸𑀬𑀤𑀼𑀓𑁆𑀔𑀁 𑀧𑀦 ‘‘𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀲𑀢𑀺 𑀳𑀺 𑀢𑀲𑁆𑀫𑀺𑀁 𑀅𑀥𑀺𑀯𑀸𑀲𑀦𑀸𑀬 𑀏𑀯 𑀅𑀲𑀫𑁆𑀪𑀯𑁄𑀢𑀺. 𑀅𑀦𑀸𑀫𑀦𑁆𑀢𑁂𑀢𑁆𑀯𑀸𑀢𑀺 𑀅𑀦𑀸𑀮𑀧𑀺𑀢𑁆𑀯𑀸. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀅𑀤𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑁂𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀯𑀻𑀭𑀺𑀬𑁂𑀦. 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀭𑀺𑀬𑁂𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑁂𑀦. 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀯𑀺𑀦𑁄𑀤𑁂𑀢𑁆𑀯𑀸. 𑀬𑀣𑀸 𑀦𑀸𑀫 𑀧𑀼𑀧𑁆𑀨𑀦𑀲𑀫𑀬𑁂 𑀘𑀫𑁆𑀧𑀓𑀸𑀤𑀺𑀭𑀼𑀓𑁆𑀔𑁂 𑀯𑁂𑀔𑁂 𑀤𑀺𑀦𑁆𑀦𑁂 𑀬𑀸𑀯 𑀲𑁄 𑀯𑁂𑀔𑁄 𑀦𑀸𑀧𑀦𑀻𑀬𑀢𑀺, 𑀢𑀸𑀯𑀲𑁆𑀲 𑀧𑀼𑀧𑁆𑀨𑀦𑀲𑀫𑀢𑁆𑀣𑀢𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀯𑀺𑀦𑁄𑀤𑀺𑀢𑀸 𑀳𑁄𑀢𑀺, 𑀏𑀯𑀫𑁂𑀯 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀯𑁂𑀔𑀤𑀸𑀦𑁂𑀦 𑀢𑀸 𑀯𑁂𑀤𑀦𑀸 𑀲𑀢𑁆𑀣𑀼 𑀲𑀭𑀻𑀭𑁂 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀮𑀁 𑀯𑀺𑀓𑁆𑀔𑀫𑁆𑀪𑀺𑀢𑀸 𑀯𑀺𑀦𑁄𑀤𑀺𑀢𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀯𑀺𑀦𑁄𑀤𑁂𑀢𑁆𑀯𑀸’’𑀢𑀺. 𑀚𑀻𑀯𑀺𑀢𑀫𑁆𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄 𑀓𑀫𑁆𑀫𑀼𑀦𑀸 𑀲𑀗𑁆𑀔𑀭𑀻𑀬𑀢𑀻𑀢𑀺 𑀓𑀢𑁆𑀯𑀸. 𑀙𑀺𑀚𑁆𑀚𑀫𑀸𑀦𑀁 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀬𑁄𑀕𑁂𑀦 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀖𑀝𑁂𑀢𑁆𑀯𑀸 𑀞𑀧𑀻𑀬𑀢𑀺. 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀤𑀲𑀫𑀸𑀲𑁂 𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀻’’𑀢𑀺. 𑀢𑀁 𑀧𑀦 ‘‘𑀅𑀥𑀺𑀝𑁆𑀞𑀸𑀦𑀁, 𑀧𑀯𑀢𑁆𑀢𑀦’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸’’𑀢𑀺.
𑀔𑀡𑀺𑀓𑀲𑀫𑀸𑀧𑀢𑁆𑀢𑀻𑀢𑀺 𑀢𑀸𑀤𑀺𑀲𑀁 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀁 𑀅𑀓𑀢𑁆𑀯𑀸 𑀞𑀸𑀦𑀲𑁄 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀲𑀫𑀸𑀧𑀢𑁆𑀢𑀺. 𑀧𑀼𑀦 𑀲𑀭𑀻𑀭𑀁 𑀯𑁂𑀤𑀦𑀸 𑀅𑀚𑁆𑀛𑁄𑀢𑁆𑀣𑀭𑀢𑀺 𑀲𑀯𑀺𑀲𑁂𑀲𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀓𑀢𑀢𑁆𑀢𑀸. 𑀭𑀽𑀧𑀲𑀢𑁆𑀢𑀓𑀅𑀭𑀽𑀧𑀲𑀢𑁆𑀢𑀓𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁭𑁦𑁬, 𑁭𑁧𑁭) 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑁂𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀩𑁆𑀬𑀽𑀴𑁆𑀳𑁄𑀢𑀺 𑀅𑀧𑀦𑀻𑀢𑁄. 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀲𑀦𑁆𑀦𑁂𑀢𑁆𑀯𑀸𑀢𑀺 𑀢𑁂𑀲𑀁𑀬𑁂𑀯 𑀭𑀽𑀧𑀲𑀢𑁆𑀢𑀓𑀅𑀭𑀽𑀧𑀲𑀢𑁆𑀢𑀓𑀸𑀦𑀁 𑀯𑀲𑁂𑀦 𑀘𑀼𑀤𑁆𑀤𑀲𑀳𑀺 𑀧𑀓𑀸𑀭𑁂𑀳𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁, 𑀲𑀓𑀮𑀫𑁂𑀯 𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀲𑀪𑀸𑀕𑀭𑁄𑀕𑀲𑀜𑁆𑀚𑀦𑀺𑀢𑀮𑀽𑀔𑀪𑀸𑀯𑀦𑀺𑀭𑁄𑀕𑀓𑀭𑀡𑀸𑀬 𑀲𑀺𑀦𑁂𑀳𑁂𑀢𑁆𑀯𑀸 𑀦 𑀉𑀧𑁆𑀧𑀚𑁆𑀚𑀺𑀬𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀢𑀺𑀲𑀬𑀲𑀫𑀸𑀧𑀢𑁆𑀢𑀺𑀯𑁂𑀕𑁂𑀦 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸.
𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀯𑀼𑀝𑁆𑀞𑀺𑀢𑁄𑀢𑀺 𑀧𑀼𑀩𑁆𑀩𑁂 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀢𑀢𑁄 𑀕𑀺𑀮𑀸𑀦𑀪𑀸𑀯𑀢𑁄 𑀯𑀼𑀝𑁆𑀞𑀺𑀢𑁄. 𑀫𑀥𑀼𑀭𑀓𑀪𑀸𑀯𑁄 𑀦𑀸𑀫 𑀲𑀭𑀻𑀭𑀲𑁆𑀲 𑀣𑀫𑁆𑀪𑀺𑀢𑀢𑁆𑀢𑀁, 𑀢𑀁 𑀧𑀦 𑀕𑀭𑀼𑀪𑀸𑀯𑀧𑀼𑀩𑁆𑀩𑀓𑀦𑁆𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀲𑀜𑁆𑀚𑀸𑀢𑀣𑀤𑁆𑀥𑀪𑀸𑀯𑁄’’𑀢𑀺. ‘‘𑀦𑀸𑀦𑀸𑀓𑀸𑀭𑀢𑁄 𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀲𑀸𑀲𑀫𑁆𑀫𑁄𑀳𑁄𑀧𑀺 𑀫𑁂 𑀅𑀳𑁄𑀲𑀺 𑀲𑁄𑀓𑀩𑀮𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀅𑀦𑀼𑀧𑀲𑁆𑀲𑀦𑀸𑀥𑀫𑁆𑀫𑀸 𑀧𑀼𑀩𑁆𑀩𑁂 𑀯𑀺𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀸𑀧𑀺 𑀇𑀤𑀸𑀦𑀺 𑀫𑀬𑁆𑀳𑀁 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀺.
𑁧𑁬𑁫. 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫 𑀅𑀢𑁆𑀢𑀦𑀺𑀬𑁂𑀯 𑀞𑀧𑀦𑀢𑁄. 𑀧𑀼𑀕𑁆𑀕𑀮𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫 𑀲𑀫𑀸𑀦𑀢𑁆𑀢𑀢𑀸𑀯𑀲𑁂𑀦 𑀥𑀫𑁆𑀫𑁂𑀦 𑀧𑀼𑀩𑁆𑀩𑁂 𑀢𑀲𑁆𑀲 𑀲𑀗𑁆𑀕𑀡𑁆𑀳𑀢𑁄. 𑀤𑀳𑀭𑀓𑀸𑀮𑁂𑀢𑀺 𑀅𑀢𑁆𑀢𑀦𑁄 𑀤𑀳𑀭𑀓𑀸𑀮𑁂. 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸𑀢𑀺 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀉𑀧𑀦𑀺𑀕𑀽𑀳𑀪𑀽𑀢𑀁 𑀕𑀦𑁆𑀣𑀁 𑀅𑀓𑀣𑁂𑀢𑁆𑀯𑀸. 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀫𑀼𑀝𑁆𑀞𑀺𑀕𑀢𑀁 𑀯𑀺𑀬 𑀭𑀳𑀲𑀺𑀪𑀽𑀢𑀁 𑀓𑀢𑁆𑀯𑀸. 𑀬𑀲𑁆𑀫𑀺𑀁 𑀯𑀸 𑀦𑀝𑁆𑀞𑁂 𑀲𑀩𑁆𑀩𑁄 𑀢𑀁𑀫𑀽𑀮𑀓𑁄 𑀥𑀫𑁆𑀫𑁄 𑀯𑀺𑀦𑀲𑁆𑀲𑀢𑀺, 𑀲𑁄 𑀆𑀤𑀺𑀢𑁄 𑀫𑀽𑀮𑀪𑀽𑀢𑁄 𑀥𑀫𑁆𑀫𑁄, 𑀫𑀼𑀲𑁆𑀲𑀢𑀺 𑀯𑀺𑀦𑀲𑁆𑀲𑀢𑀺 𑀥𑀫𑁆𑀫𑁄 𑀏𑀢𑁂𑀦 𑀦𑀝𑁆𑀞𑁂𑀦𑀸𑀢𑀺 𑀫𑀼𑀝𑁆𑀞𑀺, 𑀢𑀁 𑀢𑀣𑀸𑀭𑀽𑀧𑀁 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀧𑀭𑀺𑀳𑀭𑀺𑀢𑁆𑀯𑀸 𑀞𑀧𑀺𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.
𑀅𑀳𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀳𑀭𑀡𑀲𑁆𑀲 𑀅𑀜𑁆𑀜𑀲𑀸𑀥𑀸𑀭𑀡𑀺𑀘𑁆𑀙𑀸𑀤𑀲𑁆𑀲𑀦𑀢𑁆𑀣𑀁, 𑀅𑀯𑀥𑀸𑀭𑀡𑁂𑀦 𑀧𑀦 𑀯𑀺𑀦𑀸 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺𑀆𑀤𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀳𑀭𑀡𑁂 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 ‘‘𑀲𑀢𑁆𑀣𑀸’’𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦. 𑀫𑀸 𑀯𑀸 𑀅𑀳𑁂𑀲𑀼𑀁 𑀪𑀺𑀓𑁆𑀔𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀫𑀸 𑀯𑀸 𑀅𑀳𑁄𑀲𑀻’’𑀢𑀺 𑀯𑀸 𑀧𑀸𑀞𑁄. 𑀏𑀯𑀁 𑀦 𑀳𑁄𑀢𑀻𑀢𑀺 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺 𑀆𑀓𑀸𑀭𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦 𑀳𑁄𑀢𑀺. ‘‘𑀧𑀘𑁆𑀙𑀺𑀫𑀯𑀬𑀅𑀦𑀼𑀧𑁆𑀧𑀢𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑀬𑁄 𑀯𑀺𑀬 𑀩𑀼𑀤𑁆𑀥𑀓𑀺𑀘𑁆𑀘𑀫𑁆𑀧𑀺 𑀧𑀭𑀺𑀬𑁄𑀲𑀺𑀢𑀓𑀫𑁆𑀫𑀦𑁆𑀢𑀺 𑀤𑀻𑀧𑁂𑀢𑀺. 𑀲𑀓𑀝𑀲𑁆𑀲 𑀩𑀸𑀳𑀧𑁆𑀧𑀤𑁂𑀲𑁂 𑀤𑀴𑁆𑀳𑀻𑀪𑀸𑀯𑀸𑀬 𑀯𑁂𑀞𑀤𑀸𑀦𑀁 𑀩𑀸𑀳𑀩𑀦𑁆𑀥𑁄. 𑀘𑀓𑁆𑀓𑀦𑁂𑀫𑀺𑀲𑀦𑁆𑀥𑀻𑀦𑀁 𑀤𑀴𑁆𑀳𑀻𑀪𑀸𑀯𑀸𑀬 𑀯𑁂𑀞𑀤𑀸𑀦𑀁 𑀘𑀓𑁆𑀓𑀩𑀦𑁆𑀥𑁄.
𑀢𑀫𑀢𑁆𑀣𑀦𑁆𑀢𑀺 𑀯𑁂𑀞𑀫𑀺𑀲𑁆𑀲𑀓𑁂𑀦 𑀫𑀜𑁆𑀜𑁂𑀢𑀺 𑀯𑀼𑀢𑁆𑀢𑀫𑀢𑁆𑀣𑀁. 𑀭𑀽𑀧𑀸𑀤𑀬𑁄 𑀏𑀯 𑀥𑀫𑁆𑀫𑀸 𑀲𑀯𑀺𑀕𑁆𑀕𑀳𑁄 𑀯𑀺𑀬 𑀉𑀧𑀝𑁆𑀞𑀸𑀦𑀢𑁄 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀬𑁄, 𑀢𑁂𑀲𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁. 𑀮𑁄𑀓𑀺𑀬𑀸𑀦𑀁 𑀯𑁂𑀤𑀦𑀸𑀦𑀦𑁆𑀢𑀺 𑀬𑀸𑀲𑀁 𑀦𑀺𑀭𑁄𑀥𑀦𑁂𑀦 𑀨𑀮𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸, 𑀢𑀸𑀲𑀁 𑀦𑀺𑀭𑁄𑀥𑀸 𑀨𑀸𑀲𑀼 𑀳𑁄𑀢𑀺, 𑀢𑀣𑀸 𑀩𑀸𑀴𑁆𑀳𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑀲𑀭𑀻𑀭𑀲𑁆𑀲𑀸𑀧𑀺. 𑀢𑀤𑀢𑁆𑀣𑀸𑀬𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀢𑁆𑀣𑀸𑀬. 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀆𑀧𑁄 𑀕𑀢𑁄 𑀏𑀢𑁆𑀣𑀸𑀢𑀺 𑀤𑀻𑀧𑁄, 𑀑𑀖𑁂𑀦 𑀧𑀭𑀺𑀕𑀢𑁄 𑀳𑀼𑀢𑁆𑀯𑀸 𑀅𑀦𑀚𑁆𑀛𑁄𑀢𑁆𑀣𑀝𑁄 𑀪𑀽𑀫𑀺𑀪𑀸𑀕𑁄, 𑀇𑀥 𑀧𑀦 𑀘𑀢𑀽𑀳𑀺𑀧𑀺 𑀑𑀖𑁂𑀳𑀺, 𑀲𑀁𑀲𑀸𑀭𑀫𑀳𑁄𑀖𑁂𑀦𑁂𑀯 𑀯𑀸 𑀅𑀦𑀚𑁆𑀛𑁄𑀢𑁆𑀣𑀝𑁄 𑀅𑀢𑁆𑀢𑀸 ‘‘𑀤𑀻𑀧𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀫𑀳𑀸𑀲𑀫𑀼𑀤𑁆𑀤𑀕𑀢𑀸’’𑀢𑀺𑀆𑀤𑀺. 𑀅𑀢𑁆𑀢𑀲𑁆𑀲𑀭𑀡𑀸𑀢𑀺 𑀅𑀢𑁆𑀢𑀧𑁆𑀧𑀝𑀺𑀲𑀭𑀡𑀸. 𑀅𑀢𑁆𑀢𑀕𑀢𑀺𑀓𑀸 𑀯𑀸𑀢𑀺 𑀅𑀢𑁆𑀢𑀧𑀭𑀸𑀬𑀡𑀸𑀯. 𑀫𑀸 𑀅𑀜𑁆𑀜𑀕𑀢𑀺𑀓𑀸𑀢𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀕𑀢𑀺𑀁 𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣. 𑀓𑀲𑁆𑀫𑀸? 𑀅𑀢𑁆𑀢𑀸 𑀦𑀸𑀫𑁂𑀢𑁆𑀣 𑀧𑀭𑀫𑀢𑁆𑀣𑀢𑁄 𑀥𑀫𑁆𑀫𑁄 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦, 𑀲𑁄 𑀏𑀯𑀁 𑀲𑀫𑁆𑀧𑀸𑀤𑀺𑀢𑁄 𑀢𑀼𑀫𑁆𑀳𑀸𑀓𑀁 𑀤𑀻𑀧𑀁 𑀢𑀸𑀡𑀁 𑀕𑀢𑀺 𑀧𑀭𑀸𑀬𑀡𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀤𑀻𑀧𑀸’’𑀢𑀺𑀆𑀤𑀺. 𑀢𑀣𑀸 𑀘𑀸𑀳 ‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, 𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸’’𑀢𑀺 (𑀥. 𑀧. 𑁧𑁬𑁦, 𑁩𑁮𑁦) 𑀉𑀧𑀤𑁂𑀲𑀫𑀢𑁆𑀢𑀫𑁂𑀯 𑀳𑀺 𑀧𑀭𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀁, 𑀅𑀜𑁆𑀜𑀸 𑀲𑀩𑁆𑀩𑀸 𑀲𑀫𑁆𑀧𑀢𑁆𑀢𑀺 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸𑀥𑀻𑀦𑀸 𑀏𑀯. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀺𑀘𑁆𑀘𑀁 𑀆𑀢𑀧𑁆𑀧𑀁, 𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸’’𑀢𑀺 (𑀥. 𑀧. 𑁨𑁭𑁬). 𑀢𑀫𑀕𑁆𑀕𑁂𑀢𑀺 𑀢𑀫𑀬𑁄𑀕𑀲𑁆𑀲 𑀅𑀕𑁆𑀕𑁂 𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀸𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀇𑀫𑁂 𑀅𑀕𑁆𑀕𑀢𑀫𑀸’’𑀢𑀺𑀆𑀤𑀺. 𑀫𑀫𑀸𑀢𑀺 𑀫𑀫 𑀲𑀸𑀲𑀦𑁂. 𑀲𑀩𑁆𑀩𑁂𑀧𑀺 𑀢𑁂 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸 𑀯𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸 𑀢𑀤𑁂𑀯 𑀕𑁄𑀘𑀭𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀞𑀺𑀢𑀸 𑀏𑀯 𑀪𑀺𑀓𑁆𑀔𑀽 𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀺.
𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀣𑀸𑀯𑀡𑁆𑀡𑀦𑀸
𑁧𑁬𑁬. 𑀅𑀦𑁂𑀓𑀯𑀸𑀭𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺, 𑀢𑀲𑁆𑀫𑀸 𑀇𑀫𑀁 𑀯𑁂𑀲𑀸𑀮𑀺𑀧𑁆𑀧𑀯𑁂𑀲𑀦𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀤𑀸 𑀧𑀸𑀯𑀺𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀆𑀕𑀢𑀫𑀕𑁆𑀕𑁂𑀦𑁂𑀯𑀸𑀢𑀺 𑀧𑀼𑀩𑁆𑀩𑁂 𑀬𑀸𑀯 𑀯𑁂𑀴𑀼𑀯𑀕𑀸𑀫𑀓𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀦. 𑀢𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄. 𑀅𑀬𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄. 𑀤𑀺𑀯𑀸𑀝𑁆𑀞𑀸𑀦𑁄𑀮𑁄𑀓𑀦𑀸𑀤𑀺 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀏𑀓𑀦𑁆𑀢𑀺𑀓𑀪𑀸𑀯𑀤𑀲𑁆𑀲𑀦𑀁. 𑀑𑀲𑁆𑀲𑀝𑁆𑀞𑁄𑀢𑀺 𑀯𑀺𑀲𑁆𑀲𑀝𑁆𑀞𑁄 𑀆𑀬𑀼𑀲𑀗𑁆𑀔𑀸𑀭𑁄 ‘‘𑀲𑀢𑁆𑀢𑀸𑀳𑀫𑁂𑀯 𑀫𑀬𑀸 𑀚𑀻𑀯𑀺𑀢𑀩𑁆𑀩’’𑀦𑁆𑀢𑀺.
𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀺𑀓𑀸𑀦𑀦𑁆𑀢𑀺 𑀲𑀩𑁆𑀩𑁂𑀯 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀦𑁆𑀥𑀸𑀬 𑀯𑀤𑀢𑀺.
𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀬𑁄𑀚𑁂𑀲𑁆𑀲𑀸𑀫𑀺. 𑀫𑀡𑀺𑀨𑀮𑀓𑁂𑀢𑀺 𑀫𑀡𑀺𑀔𑀘𑀺𑀢𑁂 𑀧𑀫𑀼𑀔𑁂 𑀅𑀢𑁆𑀣𑀢𑀨𑀮𑀓𑁂. 𑀢𑀁 𑀧𑀞𑀫𑀁 𑀤𑀲𑁆𑀲𑀦𑀦𑁆𑀢𑀺 𑀬𑀁 𑀯𑁂𑀴𑀼𑀯𑀦𑁂 𑀧𑀭𑀺𑀩𑁆𑀩𑀸𑀚𑀓𑀭𑀽𑀧𑁂𑀦 𑀆𑀕𑀢𑀲𑁆𑀲 𑀲𑀺𑀤𑁆𑀥𑀁 𑀤𑀲𑁆𑀲𑀦𑀁, 𑀢𑀁 𑀧𑀞𑀫𑀤𑀲𑁆𑀲𑀦𑀁. 𑀬𑀁 𑀯𑀸 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀤𑁆𑀤𑀳𑀦𑁆𑀢𑁂𑀦 𑀢𑀤𑀸 𑀅𑀪𑀺𑀦𑀻𑀳𑀸𑀭𑀓𑀸𑀮𑁂 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀲𑀺𑀤𑁆𑀥𑀁, 𑀢𑀁 𑀧𑀞𑀫𑀤𑀲𑁆𑀲𑀦𑀁. 𑀧𑀘𑁆𑀘𑀸𑀕𑀫𑀦𑀘𑀸𑀭𑀺𑀓𑀦𑁆𑀢𑀺 𑀧𑀘𑁆𑀘𑀸𑀕𑀫𑀦𑀢𑁆𑀣𑀁 𑀘𑀸𑀭𑀺𑀓𑀁.
𑀲𑀢𑁆𑀢𑀸𑀳𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀣𑁂𑀭𑀲𑁆𑀲 𑀚𑀸𑀢𑁄𑀯𑀭𑀓𑀕𑁂𑀳𑀁 𑀓𑀺𑀭 𑀇𑀢𑀭𑀕𑁂𑀳𑀢𑁄 𑀯𑀺𑀯𑁂𑀓𑀝𑁆𑀞𑀁, 𑀯𑀺𑀯𑀝𑀗𑁆𑀕𑀡𑀜𑁆𑀘, 𑀢𑀲𑁆𑀫𑀸 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀉𑀧𑀲𑀗𑁆𑀓𑀫𑀦𑀬𑁄𑀕𑁆𑀬𑀦𑁆𑀢𑀺 ‘‘𑀚𑀸𑀢𑁄𑀯𑀭𑀓𑀁 𑀧𑀝𑀺𑀚𑀕𑁆𑀕𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑁄𑀢𑀺 𑀉𑀧𑀭𑁂𑀯𑀢𑁄. 𑀢𑀁 𑀧𑀯𑀢𑁆𑀢𑀺𑀦𑁆𑀢𑀺 𑀢𑀢𑁆𑀣 𑀯𑀲𑀺𑀢𑀼𑀓𑀸𑀫𑀢𑀸𑀬 𑀯𑀼𑀢𑁆𑀢𑀁 𑀢𑀁.
‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 (𑀧𑀸𑀭𑀸. 𑁧𑁬, 𑁧𑁬𑁫) 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀣𑁂𑀭𑁄 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀢𑁆𑀯𑀁 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀫𑀳𑀦𑁆𑀢𑀢𑀭𑁄’’𑀢𑀺 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀫𑀳𑀢𑁆𑀢𑀁 𑀲𑀢𑁆𑀣𑀼 𑀉𑀧𑀭𑀺 𑀧𑀓𑁆𑀔𑀺𑀧𑀦𑁆𑀢𑁄 ‘‘𑀆𑀭𑀸𑀫𑀺𑀓𑀲𑀤𑀺𑀲𑀸 𑀏𑀢𑁂 𑀉𑀧𑀸𑀲𑀺𑀓𑁂 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄’’𑀢𑀺 𑀆𑀳. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑁆𑀧𑀺 𑀳𑀺 𑀅𑀢𑁆𑀣𑀢𑁄 𑀲𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀯𑀺𑀪𑀸𑀯𑁂𑀢𑀺.
𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀣𑁂𑀭𑀲𑁆𑀲 𑀤𑁂𑀲𑀦𑀸𑀦𑀼𑀪𑀸𑀯𑁂𑀦, 𑀅𑀢𑁆𑀢𑀦𑁄 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑁆𑀲 𑀧𑀭𑀺𑀧𑀓𑁆𑀓𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸.
𑀅𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸. 𑀏𑀢𑁆𑀣𑀸𑀢𑀺 ‘‘𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻’’𑀢𑀺 𑀏𑀢𑀲𑁆𑀫𑀺𑀁 𑀯𑁂𑀲𑀸𑀮𑀻𑀧𑀯𑁂𑀲𑁂. 𑀅𑀦𑀼𑀧𑀼𑀩𑁆𑀩𑀻𑀓𑀣𑀸𑀢𑀺 𑀅𑀦𑀼𑀧𑀼𑀩𑁆𑀩𑀤𑀻𑀧𑀦𑀻 𑀓𑀣𑀸.
𑁧𑁬𑁭. 𑀉𑀤𑁂𑀦𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂𑀢𑀺 𑀉𑀤𑁂𑀦𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀆𑀬𑀢𑀦𑀪𑀸𑀯𑁂𑀦 𑀇𑀝𑁆𑀞𑀓𑀸𑀳𑀺 𑀘𑀺𑀢𑁂 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀦𑁂. 𑀓𑀢𑀯𑀺𑀳𑀸𑀭𑁄𑀢𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄. 𑀯𑀼𑀘𑁆𑀘𑀢𑀻𑀢𑀺 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 ‘‘𑀉𑀤𑁂𑀦𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀻𑀢𑀺 ‘‘𑀕𑁄𑀢𑀫𑀓𑀘𑁂𑀢𑀺𑀬’’𑀦𑁆𑀢𑀺 𑀏𑀯𑀁 𑀆𑀤𑀻𑀲𑀼𑀧𑀺. 𑀏𑀲𑁂𑀯 𑀦𑀬𑁄𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑀪𑀸𑀯𑀁 𑀅𑀢𑀺𑀤𑀺𑀲𑀢𑀺. 𑀯𑀟𑁆𑀠𑀺𑀢𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸. 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀢𑀺 𑀬𑀣𑀸 𑀬𑀼𑀢𑁆𑀢𑀁 𑀆𑀚𑀜𑁆𑀜𑀬𑀸𑀦𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺𑀧𑀯𑀢𑁆𑀢𑀺𑀭𑀳𑀢𑀁 𑀕𑀫𑀺𑀢𑀸. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦 𑀇𑀤𑁆𑀥𑀺𑀯𑀺𑀲𑀬𑀢𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑁆𑀲𑀬𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀢𑀁𑀢𑀁𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀬𑀢𑀸𑀬 𑀞𑀧𑀺𑀢𑀸. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀼𑀧𑀘𑀬𑀁 𑀕𑀫𑀺𑀢𑀸. 𑀢𑁂𑀦𑀸𑀳 ‘‘𑀲𑀼𑀯𑀟𑁆𑀠𑀺𑀢𑀸’’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀇𑀤𑁆𑀥𑀺𑀪𑀸𑀯𑀦𑀸𑀬 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀁𑀲𑁂𑀯𑀺𑀢𑀸.
𑀅𑀦𑀺𑀬𑀫𑁂𑀦𑀸𑀢𑀺 ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺 𑀅𑀦𑀺𑀬𑀫𑀯𑀘𑀦𑁂𑀦. 𑀦𑀺𑀬𑀫𑁂𑀢𑁆𑀯𑀸𑀢𑀺 ‘‘𑀢𑀣𑀸𑀕𑀢𑀲𑁆𑀲𑀸’’𑀢𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀦𑀺𑀬𑀫𑁂𑀢𑁆𑀯𑀸. 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑀁 𑀯𑀤𑀢𑀺, 𑀢𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁦; 𑀤𑀻. 𑀦𑀺. 𑀝𑀻. 𑁧.𑁪𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀧𑀦 ‘‘𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀲𑀫𑀢𑁆𑀣𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀧𑀭𑀺𑀲𑁆𑀲𑀬𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀏𑀯𑀸𑀢𑀺 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀅𑀯𑁄𑀘. ‘‘𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀻’’𑀢𑀺 𑀏𑀢𑁂𑀦 𑀬𑀣𑀸 𑀇𑀤𑁆𑀥𑀺𑀩𑀮𑁂𑀦 𑀚𑀭𑀸𑀬 𑀦 𑀧𑀝𑀺𑀖𑀸𑀢𑁄, 𑀏𑀯𑀁 𑀢𑁂𑀦 𑀫𑀭𑀡𑀲𑁆𑀲𑀧𑀺 𑀦 𑀧𑀝𑀺𑀖𑀸𑀢𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺. ‘‘𑀓𑁆𑀯 𑀲𑀭𑁄 𑀔𑀺𑀢𑁆𑀢𑁄, 𑀓𑁆𑀯 𑀘 𑀦𑀺𑀧𑀢𑀺𑀢𑁄’’𑀢𑀺 𑀅𑀜𑁆𑀜𑀣𑀸 𑀯𑀼𑀝𑁆𑀞𑀺𑀢𑁂𑀦𑀸𑀧𑀺 𑀣𑁂𑀭𑀯𑀸𑀤𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑁄 𑀦 𑀭𑀼𑀘𑁆𑀘𑀢𑀺…𑀧𑁂… 𑀦𑀺𑀬𑀫𑀺𑀢’’𑀦𑁆𑀢𑀺.
𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀅𑀢𑁆𑀣𑀸𑀦𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀅𑀪𑀺𑀪𑀽𑀢𑀘𑀺𑀢𑁆𑀢𑁄. 𑀲𑁄 𑀧𑀦 𑀅𑀪𑀺𑀪𑀯𑁄 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀅𑀧𑁆𑀧𑀓𑀲𑁆𑀲 𑀉𑀤𑀓𑀲𑁆𑀲 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄’’𑀢𑀺. 𑀅𑀜𑁆𑀜𑁄𑀧𑀻𑀢𑀺 𑀣𑁂𑀭𑀢𑁄, 𑀅𑀭𑀺𑀬𑁂𑀳𑀺 𑀯𑀸 𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄. 𑀧𑀼𑀣𑀼𑀚𑁆𑀚𑀦𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀣𑁂𑀭𑁄 𑀪𑀕𑀯𑀢𑀸 𑀓𑀢𑀁 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀲𑀩𑁆𑀩𑀲𑁄 𑀦 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀫𑀸𑀭𑁄 𑀳𑀻’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸𑀢𑀺 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀢𑁂𑀦𑀸𑀢𑀺 𑀬𑀤𑀺𑀧𑀺 𑀇𑀢𑀭𑁂 𑀅𑀝𑁆𑀞 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀦𑀸, 𑀢𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀫𑀤𑁆𑀤𑀢𑀻𑀢𑀺 𑀨𑀼𑀲𑀦𑀫𑀢𑁆𑀢𑁂𑀦 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀅𑀜𑁆𑀜𑀣𑀸 𑀢𑁂𑀦 𑀫𑀤𑁆𑀤𑀺𑀢𑁂 𑀲𑀢𑁆𑀢𑀸𑀦𑀁 𑀫𑀭𑀡𑀫𑁂𑀯 𑀲𑀺𑀬𑀸. 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦𑀦𑀼 𑀏𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑁄𑀢𑀺? 𑀲𑀘𑁆𑀘𑀁 𑀧𑀯𑀺𑀝𑁆𑀞𑁄, 𑀢𑀜𑁆𑀘 𑀔𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀦 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦. 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦 𑀇𑀥 ‘‘𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁 𑀳𑀤𑀬𑀫𑀤𑁆𑀤𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀦𑀺𑀫𑀺𑀢𑁆𑀢𑁄𑀪𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧’’𑀦𑁆𑀢𑀺 𑀲𑀓𑀮𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀬𑀸𑀘𑀦𑀸𑀬 ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀆𑀦𑀦𑁆𑀤 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀜𑁆𑀜𑀼𑀧𑁆𑀧𑀸𑀤𑀦𑀁 𑀦𑀺𑀫𑀺𑀢𑁆𑀢𑀁, 𑀢𑀣𑀸 𑀧𑀦 𑀧𑀭𑀺𑀬𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀚𑀼𑀓𑀁𑀬𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁 𑀑𑀪𑀸𑀲𑁄. 𑀚𑀸𑀦𑀦𑁆𑀢𑁄𑀬𑁂𑀯 𑀯𑀸𑀢𑀺 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑁄 𑀏𑀯. 𑀅𑀢𑁆𑀢𑀦𑁄 𑀅𑀧𑀭𑀸𑀥𑀳𑁂𑀢𑀼𑀢𑁄 𑀲𑀢𑁆𑀢𑀸𑀦𑀁 𑀲𑁄𑀓𑁄 𑀢𑀦𑀼𑀓𑁄 𑀳𑁄𑀢𑀺, 𑀦 𑀩𑀮𑀯𑀸𑀢𑀺 𑀆𑀳 ‘‘𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣’’𑀦𑁆𑀢𑀺. 𑀓𑀺𑀁 𑀧𑀦 𑀣𑁂𑀭𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀺𑀁 𑀧𑀘𑁆𑀙𑀸 𑀚𑀸𑀦𑀸𑀢𑀻𑀢𑀺? 𑀦 𑀚𑀸𑀦𑀸𑀢𑀺 𑀲𑀪𑀸𑀯𑁂𑀦, 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀦 𑀅𑀦𑀼𑀚𑀸𑀦𑀸𑀢𑀺.
𑀫𑀸𑀭𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸
𑁧𑁬𑁮. 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀕𑀼𑀡𑀫𑀸𑀭𑀡𑁂𑀦 𑀫𑀸𑀭𑁂𑀢𑀺, 𑀯𑀺𑀭𑀸𑀕𑀯𑀺𑀩𑀦𑁆𑀥𑀦𑁂𑀦 𑀯𑀸 𑀚𑀸𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀁 𑀚𑀸𑀢𑀁 𑀫𑀸𑀭𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀫𑀸𑀭𑁂𑀢𑀻𑀢𑀺 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀯𑀺𑀬 𑀧𑀸𑀧𑀢𑀸𑀬 𑀧𑀸𑀧𑀺𑀫𑀸. 𑀓𑀡𑁆𑀳𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀡𑁆𑀳𑁄. 𑀯𑀺𑀭𑀸𑀕𑀸𑀤𑀺𑀕𑀼𑀡𑀸𑀦𑀁 𑀅𑀦𑁆𑀢𑀓𑀭𑀡𑀢𑁄 𑀅𑀦𑁆𑀢𑀓𑁄. 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀧𑀝𑀺𑀧𑀢𑁆𑀢𑀺𑀁 𑀦 𑀫𑀼𑀘𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀅𑀢𑁆𑀢𑀦𑁄 𑀫𑀸𑀭𑀧𑀸𑀲𑁂𑀦 𑀧𑀫𑀢𑁆𑀢𑁂 𑀩𑀦𑁆𑀥𑀢𑀺, 𑀧𑀫𑀢𑁆𑀢𑀸 𑀯𑀸 𑀩𑀦𑁆𑀥𑀽 𑀏𑀢𑀲𑁆𑀲𑀸𑀢𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀲𑀢𑁆𑀢𑀫𑀲𑀢𑁆𑀢𑀸𑀳𑀢𑁄 𑀧𑀭𑀁 𑀲𑀢𑁆𑀢 𑀅𑀳𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺 𑀦 𑀧𑀦 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀸𑀤𑀺 𑀯𑀺𑀬 𑀦𑀺𑀬𑀢𑀓𑀺𑀘𑁆𑀘𑀲𑁆𑀲 𑀅𑀝𑁆𑀞𑀫𑀲𑀢𑁆𑀢𑀸𑀳𑀲𑁆𑀲 𑀦𑀸𑀫 𑀮𑀩𑁆𑀪𑀦𑀢𑁄. 𑀲𑀢𑁆𑀢𑀫𑀲𑀢𑁆𑀢𑀸𑀳𑀲𑁆𑀲 𑀳𑀺 𑀧𑀭𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑁄, 𑀲𑀓𑁆𑀓𑀲𑁆𑀲 𑀘 𑀤𑁂𑀯𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀢𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀦𑁆𑀢𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀢𑁆𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀸𑀧𑁂𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀤𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀳𑀦𑁆𑀤 𑀤𑀸𑀦𑀸𑀳𑀁 𑀦𑀁 𑀉𑀧𑀸𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀺, 𑀏𑀯𑀫𑀲𑁆𑀲 𑀫𑀦𑁄𑀭𑀣𑁄 𑀅𑀜𑁆𑀜𑀣𑀢𑁆𑀢𑀁 𑀕𑀫𑀺𑀲𑁆𑀲𑀢𑀺, 𑀫𑀫 𑀘 𑀫𑀦𑁄𑀭𑀣𑁄 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁 𑀅𑀦𑁆𑀢𑀁 𑀞𑀺𑀢𑁄 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀬𑀸𑀘𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺𑀆𑀤𑀺. 𑀢𑀢𑁆𑀣 𑀅𑀚𑁆𑀚𑀸𑀢𑀺 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀤𑀺𑀯𑀲𑀁 𑀲𑀦𑁆𑀥𑀸𑀬𑀸𑀳. 𑀪𑀕𑀯𑀸 𑀘𑀲𑁆𑀲 𑀅𑀪𑀺𑀲𑀦𑁆𑀥𑀺𑀁 𑀚𑀸𑀦𑀦𑁆𑀢𑁄𑀧𑀺 𑀢𑀁 𑀅𑀦𑀸𑀯𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀅𑀓𑀸𑀮𑀪𑀸𑀯𑀫𑁂𑀯 𑀧𑀓𑀸𑀲𑁂𑀦𑁆𑀢𑁄 𑀬𑀸𑀘𑀦𑀁 𑀧𑀝𑀺𑀓𑁆𑀔𑀺𑀧𑀺. 𑀢𑁂𑀦𑀸𑀳 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀺.
𑀫𑀕𑁆𑀕𑀯𑀲𑁂𑀦 𑀯𑀺𑀬𑀢𑁆𑀢𑀸𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀩𑁆𑀬𑀢𑁆𑀢𑀸. 𑀢𑀣𑁂𑀯 𑀯𑀺𑀦𑀻𑀢𑀸𑀢𑀺 𑀫𑀕𑁆𑀕𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑀦𑁂𑀦 𑀯𑀺𑀦𑀻𑀢𑀸. 𑀢𑀣𑀸 𑀯𑀺𑀲𑀸𑀭𑀤𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀲𑀢𑁆𑀣𑀼𑀲𑀸𑀲𑀦𑁂 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀸𑀭𑀤𑀸, 𑀲𑀸𑀭𑀚𑁆𑀚𑀓𑀭𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀕𑀫𑁂𑀦 𑀯𑀺𑀲𑀸𑀭𑀤𑀪𑀸𑀯𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀲𑀼𑀢𑀲𑁆𑀲 𑀯𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀁 𑀲𑀫𑁆𑀪𑀯𑀢𑀺, 𑀢𑀁 𑀇𑀥 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 ‘‘𑀲𑀼𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀢𑁂𑀧𑀺𑀝𑀓𑀯𑀲𑁂𑀦𑀸’’𑀢𑀺. 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀽𑀳𑁄 𑀢𑁂𑀧𑀺𑀝𑀓𑀁, 𑀢𑀻𑀡𑀺 𑀯𑀸 𑀧𑀺𑀝𑀓𑀸𑀦𑀺 𑀢𑀺𑀧𑀺𑀝𑀓𑀁, 𑀢𑀺𑀧𑀺𑀝𑀓𑀫𑁂𑀯 𑀢𑁂𑀧𑀺𑀝𑀓𑀁, 𑀢𑀲𑁆𑀲 𑀯𑀲𑁂𑀦. 𑀢𑀫𑁂𑀯𑀸𑀢𑀺 𑀬𑀁 𑀢𑀁 𑀢𑁂𑀧𑀺𑀝𑀓𑀁 𑀲𑁄𑀢𑀩𑁆𑀩𑀪𑀸𑀯𑁂𑀦 ‘‘𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁂𑀯. 𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀥𑀸𑀭𑁂𑀦𑁆𑀢𑀻𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀁 𑀯𑀺𑀬 𑀅𑀯𑀺𑀦𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀲𑀼𑀧𑁆𑀧𑀕𑀼𑀡𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀥𑀸𑀭𑁂𑀦𑁆𑀢𑀺 𑀳𑀤𑀬𑁂 𑀞𑀧𑁂𑀦𑁆𑀢𑀺. 𑀇𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀥𑀫𑁆𑀫𑀥𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀯𑁂𑀥𑀥𑀫𑁆𑀫𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀫𑀕𑁆𑀕𑀨𑀮𑀥𑀫𑁆𑀫𑀲𑁆𑀲, 𑀦𑀯𑀯𑀺𑀥𑀲𑁆𑀲𑀸𑀧𑀺 𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲. 𑀅𑀦𑀼𑀥𑀫𑁆𑀫𑀪𑀽𑀢𑀦𑁆𑀢𑀺 𑀅𑀥𑀺𑀕𑀫𑀸𑀬 𑀅𑀦𑀼𑀭𑀽𑀧𑀥𑀫𑁆𑀫𑀪𑀽𑀢𑀁. 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀦𑁆𑀢𑀺 𑀘 𑀢𑀫𑁂𑀯 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀫𑀸𑀳, 𑀙𑀩𑁆𑀩𑀺𑀥𑀸 𑀯𑀺𑀲𑀼𑀤𑁆𑀥𑀺𑀬𑁄 𑀯𑀸. 𑀅𑀦𑀼𑀥𑀫𑁆𑀫𑀦𑁆𑀢𑀺 𑀢𑀲𑁆𑀲𑀸 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸𑀬 𑀅𑀦𑀼𑀭𑀽𑀧𑀁 𑀅𑀪𑀺𑀲𑀮𑁆𑀮𑁂𑀔𑀺𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀥𑀫𑁆𑀫𑀁. 𑀘𑀭𑀡𑀲𑀻𑀮𑀸𑀢𑀺 𑀲𑀫𑀸𑀤𑀸𑀬 𑀧𑀯𑀢𑁆𑀢𑀦𑀲𑀻𑀮𑀸. 𑀅𑀦𑀼 𑀫𑀕𑁆𑀕𑀨𑀮𑀥𑀫𑁆𑀫𑁄 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀅𑀦𑀼𑀥𑀫𑁆𑀫𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲𑀸 𑀘𑀭𑀡𑀲𑀻𑀮𑀸. 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸𑀤𑀁. 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑁄, 𑀪𑀕𑀯𑀸. 𑀢𑀲𑁆𑀲 𑀯𑀸𑀤𑁄, 𑀘𑀢𑀼𑀲𑀘𑁆𑀘𑀤𑁂𑀲𑀦𑀸.
𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀆𑀤𑀺𑀢𑁄 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀧𑀭𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀯𑀸𑀘𑁂𑀲𑁆𑀲𑀦𑁆𑀢𑀺, 𑀧𑀸𑀴𑀺𑀁 𑀲𑀫𑁆𑀫𑀸 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀧𑁂𑀲𑁆𑀲𑀦𑁆𑀢𑀺, 𑀲𑀗𑁆𑀓𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀓𑀸𑀭𑁂𑀳𑀺 𑀞𑀧𑁂𑀲𑁆𑀲𑀦𑁆𑀢𑀺, 𑀧𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀯𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀪𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀸𑀦𑀺𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁭𑁦) 𑀯𑀺𑀬𑀸𑀢𑀺 𑀆𑀳 ‘‘𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦𑀸’’𑀢𑀺. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀦𑀺𑀲𑁆𑀲𑀭𑀡𑀁, 𑀬𑀣𑀸 𑀧𑀭𑀯𑀸𑀤𑀁 𑀪𑀜𑁆𑀚𑀺𑀢𑁆𑀯𑀸 𑀲𑀓𑀯𑀸𑀤𑁄 𑀧𑀢𑀺𑀝𑁆𑀞𑀳𑀢𑀺, 𑀏𑀯𑀁 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀬𑀣𑀸𑀥𑀺𑀕𑀢𑀫𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺, 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀙 𑀅𑀢𑁆𑀣𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀆𑀤𑀺𑀢𑁄 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀬𑀁 ‘‘𑀤𑁆𑀯𑀸𑀤𑀲𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀔𑀸𑀭𑁂).
𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀡𑀁. 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀦𑀯𑀲𑁂𑀲𑀁 𑀲𑀢𑁆𑀣𑀼𑀲𑀸𑀲𑀦𑀪𑀽𑀢𑀁 𑀲𑁂𑀝𑁆𑀞𑀘𑀭𑀺𑀬𑀁. 𑀲𑀫𑀺𑀤𑁆𑀥𑀦𑁆𑀢𑀺 𑀲𑀫𑁆𑀫𑀤𑁂𑀯 𑀯𑀟𑁆𑀠𑀺𑀢𑀁. 𑀛𑀸𑀦𑀲𑁆𑀲𑀸𑀤𑀯𑀲𑁂𑀦𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑀥𑀺𑀕𑀢𑀛𑀸𑀦𑀲𑀼𑀔𑀯𑀲𑁂𑀦. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀦𑁆𑀢𑀺 𑀉𑀴𑀸𑀭𑀧𑀡𑀻𑀢𑀪𑀸𑀯𑀕𑀫𑀦𑁂𑀦 𑀲𑀩𑁆𑀩𑀲𑁄 𑀧𑀭𑀺𑀯𑀼𑀤𑁆𑀥𑀺𑀁 𑀉𑀧𑀕𑀢𑀁. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀪𑀺𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀲𑀸𑀲𑀦𑀸𑀪𑀺𑀯𑀼𑀤𑁆𑀥𑀺𑀬𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀢𑁄. 𑀧𑀢𑀺𑀝𑁆𑀞𑀺𑀢𑀯𑀲𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀦𑀯𑀲𑁂𑀦, 𑀧𑀢𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀥𑀯𑀲𑁂𑀦 𑀩𑀳𑀼𑀦𑁄 𑀚𑀦𑀲𑁆𑀲 𑀳𑀺𑀢𑀦𑁆𑀢𑀺 𑀩𑀸𑀳𑀼𑀚𑀜𑁆𑀜𑀁. 𑀢𑁂𑀦𑀸𑀳 ‘‘𑀩𑀳𑀼𑀚𑀦𑀸𑀪𑀺𑀲𑀫𑀬𑀯𑀲𑁂𑀦𑀸’’𑀢𑀺. 𑀧𑀼𑀣𑀼 𑀧𑀼𑀣𑀼𑀮𑀁 𑀪𑀽𑀢𑀁 𑀚𑀸𑀢𑀁, 𑀧𑀼𑀣𑀼 𑀯𑀸 𑀧𑀼𑀣𑀼𑀢𑁆𑀢𑀁 𑀪𑀽𑀢𑀁 𑀧𑀢𑁆𑀢𑀦𑁆𑀢𑀺 𑀧𑀼𑀣𑀼𑀪𑀽𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀓𑀸𑀭…𑀧𑁂… 𑀧𑀢𑁆𑀢’’𑀦𑁆𑀢𑀺. 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁂𑀦 𑀧𑀯𑁂𑀤𑀺𑀢𑀁.
𑀆𑀬𑀼𑀲𑀗𑁆𑀔𑀸𑀭𑀑𑀲𑁆𑀲𑀚𑁆𑀚𑀦𑀯𑀡𑁆𑀡𑀦𑀸
𑁧𑁬𑁯. 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸𑀢𑀺 𑀅𑀬𑀁 𑀓𑀸𑀬𑀸𑀤𑀺𑀯𑀺𑀪𑀸𑀕𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀳𑀺𑀢𑁄, 𑀇𑀤𑀸𑀦𑀺 𑀧𑀦 𑀦 𑀯𑀳𑀺𑀢𑀩𑁆𑀩𑁄, 𑀏𑀢𑀲𑁆𑀲 𑀅𑀯𑀳𑀦𑀢𑁆𑀣𑀁 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀭𑀺𑀬𑀫𑀕𑁆𑀕𑀲𑀫𑁆𑀪𑀸𑀭𑁄 𑀲𑀫𑁆𑀪𑀢𑁄, 𑀲𑁆𑀯𑀸𑀬𑀁 𑀅𑀭𑀺𑀬𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑁄, 𑀬𑀢𑁄 𑀇𑀫𑁂 𑀓𑀸𑀬𑀸𑀤𑀬𑁄 𑀅𑀲𑀼𑀪𑀸𑀤𑀺𑀢𑁄 𑀲𑀫𑁆𑀫𑀤𑁂𑀯 𑀧𑀭𑀺𑀜𑁆𑀜𑀸𑀢𑀸, 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀫𑁆𑀫𑀸𑀲𑀢𑀺𑀁 𑀬𑀣𑀸𑀢𑀣𑀁 𑀯𑀺𑀲𑀬𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀁 𑀓𑀢𑁆𑀯𑀸. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀲𑁆𑀫𑀸 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀲𑁆𑀲 𑀤𑀼𑀓𑁆𑀔𑀪𑀸𑀭𑀲𑁆𑀲 𑀯𑀳𑀦𑁂 𑀧𑀬𑁄𑀚𑀦𑀪𑀽𑀢𑀁 𑀅𑀢𑁆𑀢𑀳𑀺𑀢𑀁 𑀢𑀸𑀯 𑀫𑀳𑀸𑀩𑁄𑀥𑀺𑀫𑀽𑀮𑁂 𑀏𑀯 𑀧𑀭𑀺𑀲𑀫𑀸𑀧𑀺𑀢𑀁, 𑀧𑀭𑀳𑀺𑀢𑀁 𑀧𑀦 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀁 𑀧𑀭𑀺𑀲𑀫𑀸𑀧𑀺𑀢𑀩𑁆𑀩𑀁, 𑀢𑀁 𑀇𑀤𑀸𑀦𑀺 𑀫𑀸𑀲𑀢𑁆𑀢𑀬𑁂𑀦𑁂𑀯 𑀧𑀭𑀺𑀲𑀫𑀸𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀪𑀸𑀲𑀺 ‘‘𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀁 𑀩𑀼𑀤𑁆𑀥𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀦 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸. 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑀻𑀢𑀺 𑀆𑀬𑀼𑀦𑁄 𑀚𑀻𑀯𑀺𑀢𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀁 ‘‘𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺 𑀢𑀁𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀢𑁂𑀦 𑀅𑀪𑀺𑀲𑀗𑁆𑀔𑀭𑀺𑀬𑀫𑀸𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 ‘‘𑀦𑀧𑁆𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀞𑀸𑀦𑀫𑀳𑀦𑁆𑀢𑀢𑀸𑀬𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀢𑁆𑀣 𑀞𑀸𑀦𑀫𑀳𑀦𑁆𑀢𑀢𑀸𑀬 𑀪𑀽𑀫𑀺𑀘𑀸𑀮𑀲𑁆𑀲 𑀫𑀳𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀓𑀺𑀭…𑀧𑁂… 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀽𑀢𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀯, 𑀦 𑀬𑀸 𑀓𑀸𑀘𑀺, 𑀬𑀸 𑀫𑀳𑀸𑀪𑀺𑀦𑀻𑀳𑀸𑀭𑀫𑀳𑀸𑀚𑀸𑀢𑀺𑀆𑀤𑀻𑀲𑀼𑀧𑀺 𑀓𑀫𑁆𑀧𑀺𑀢𑁆𑀣. 𑀢𑀤𑀸𑀧𑀺 𑀢𑀢𑁆𑀢𑀺𑀓𑀸𑀬 𑀏𑀯 𑀓𑀫𑁆𑀧𑀦𑁂 𑀓𑀺𑀁 𑀓𑀸𑀭𑀡𑀁? 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀸𑀯𑁂𑀦 𑀢𑀲𑁆𑀲𑁂𑀯 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸. 𑀧𑀭𑀺𑀕𑁆𑀕𑀳𑀓𑀭𑀡𑀁 𑀘𑀲𑁆𑀲 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀢𑀸𑀯𑀢𑀓𑀫𑁂𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀅𑀳𑁄𑀲𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽, 𑀦𑀺𑀲𑁆𑀲𑀤𑁆𑀤𑀸 𑀳𑁄𑀦𑁆𑀢𑀺 𑀦𑀺𑀭𑀸𑀓𑀼𑀮𑀸…𑀧𑁂… 𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀻’’𑀢𑀺 𑀘 𑀆𑀤𑀺 (𑀩𑀼. 𑀯𑀁. 𑁮𑁪-𑁯𑁧). 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀙𑀧𑁆𑀧𑀓𑀸𑀭𑀧𑀯𑁂𑀥𑀦𑁂𑀦 𑀅𑀯𑀻𑀢𑀭𑀸𑀕𑁂 𑀪𑀺𑀁𑀲𑁂𑀢𑀻𑀢𑀺 𑀪𑀺𑀁𑀲𑀦𑁄, 𑀲𑁄 𑀏𑀯 𑀪𑀺𑀁𑀲𑀦𑀓𑁄𑀢𑀺 𑀆𑀳 ‘‘𑀪𑀬𑀚𑀦𑀓𑁄’’𑀢𑀺. 𑀤𑁂𑀯𑀪𑁂𑀭𑀺𑀬𑁄𑀢𑀺 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁. 𑀦 𑀘𑁂𑀢𑁆𑀣 𑀓𑀸𑀘𑀺 𑀪𑁂𑀭𑀻 ‘‘𑀤𑁂𑀯𑀤𑀼𑀦𑁆𑀤𑀼𑀪𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀅𑀣 𑀔𑁄 𑀉𑀧𑁆𑀧𑀸𑀢𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 𑀆𑀓𑀸𑀲𑀕𑀢𑁄 𑀦𑀺𑀕𑁆𑀖𑁄𑀲𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀤𑁂𑀯𑁄’’𑀢𑀺𑀆𑀤𑀺. 𑀤𑁂𑀯𑁄𑀢𑀺 𑀫𑁂𑀖𑁄. 𑀢𑀲𑁆𑀲 𑀳𑀺 𑀅𑀘𑁆𑀙𑀪𑀸𑀯𑁂𑀦 𑀆𑀓𑀸𑀲𑀲𑁆𑀲 𑀯𑀲𑁆𑀲𑀸𑀪𑀸𑀯𑁂𑀦 𑀲𑀼𑀓𑁆𑀔𑀕𑀚𑁆𑀚𑀺𑀢𑀲𑀜𑁆𑀜𑀺𑀢𑁂 𑀲𑀤𑁆𑀤𑁂 𑀦𑀺𑀘𑁆𑀙𑀭𑀦𑁆𑀢𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀻’’𑀢𑀺.
𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀦𑁆𑀢𑀺 ‘‘𑀏𑀯𑀁 𑀘𑀺𑀭𑀢𑀭𑀁 𑀓𑀸𑀮𑀁 𑀯𑀳𑀺𑀢𑁄 𑀅𑀬𑀁 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄, 𑀇𑀤𑀸𑀦𑀺 𑀦 𑀘𑀺𑀭𑀲𑁆𑀲𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀪𑀕𑀯𑀸 𑀲𑀪𑀸𑀯𑁂𑀦𑁂𑀯 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀏𑀯𑀁 𑀧𑀦 𑀉𑀤𑀸𑀦𑁂𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.
𑀢𑀼𑀮𑀻𑀬𑀢𑀻𑀢𑀺 𑀢𑀼𑀮𑀦𑁆𑀢𑀺 𑀢𑀼𑀮-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀮𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀣𑀸 𑀳𑀺 𑀢𑀁 𑀧𑀭𑀺𑀢𑁄 𑀔𑀡𑁆𑀟𑀺𑀢𑀪𑀸𑀯𑁂𑀦 ‘‘𑀧𑀭𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀢𑁄 𑀤𑀻𑀖𑀲𑀦𑁆𑀢𑀸𑀦𑀢𑀸𑀬, 𑀯𑀺𑀧𑀼𑀮𑀨𑀮𑀢𑀸𑀬 𑀘 𑀦 𑀢𑀼𑀮𑀁 𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀧𑀼𑀩𑁆𑀩𑁂 𑀅𑀯𑀺𑀲𑁂𑀲𑀢𑁄 𑀫𑀳𑀕𑁆𑀕𑀢𑀁 ‘‘𑀅𑀢𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀭𑀽𑀧𑀸𑀯𑀘𑀭𑀢𑁄 𑀆𑀭𑀼𑀧𑁆𑀧𑀲𑁆𑀲 𑀲𑀸𑀢𑀺𑀲𑀬𑀸𑀦𑀺 𑀯𑀺𑀚𑁆𑀚𑀦𑁆𑀢𑀻𑀢𑀺 ‘‘𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀜𑁆𑀘 ‘‘𑀢𑀼𑀮’’𑀦𑁆𑀢𑀺, 𑀅𑀧𑁆𑀧𑀯𑀺𑀧𑀸𑀓𑀁 𑀢𑀻𑀲𑀼𑀧𑀺 𑀓𑀫𑁆𑀫𑁂𑀲𑀼 𑀬𑀁 𑀢𑀦𑀼𑀯𑀺𑀧𑀸𑀓𑀁 𑀳𑀻𑀦𑀁, 𑀢𑀁 𑀢𑀼𑀮𑀁. 𑀩𑀳𑀼𑀯𑀺𑀧𑀸𑀓𑀦𑁆𑀢𑀺 𑀬𑀁 𑀫𑀳𑀸𑀯𑀺𑀧𑀸𑀓𑀁 𑀧𑀡𑀻𑀢𑀁, 𑀢𑀁 𑀅𑀢𑀼𑀮𑀁. 𑀬𑀁 𑀧𑀦𑁂𑀢𑁆𑀣 𑀫𑀚𑁆𑀛𑀺𑀫𑀁, 𑀢𑀁 𑀳𑀻𑀦𑀁, 𑀉𑀓𑁆𑀓𑀝𑁆𑀞𑀦𑁆𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀲𑀼 𑀪𑀸𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀳𑀻𑀦𑀢𑁆𑀢𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀧𑁆𑀧𑀩𑀳𑀼𑀯𑀺𑀧𑀸𑀓𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀢𑀼𑀮𑀸𑀢𑀼𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀲𑀫𑁆𑀪𑀯𑀲𑁆𑀲 𑀳𑁂𑀢𑀼𑀪𑀽𑀢’’𑀦𑁆𑀢𑀺. 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄𑀢𑀺 𑀲𑀲𑀦𑁆𑀢𑀸𑀦𑀥𑀫𑁆𑀫𑁂𑀲𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀕𑁄𑀘𑀭𑀸𑀲𑁂𑀯𑀦𑀸𑀬 𑀘 𑀦𑀺𑀭𑀢𑁄. 𑀲𑀯𑀺𑀧𑀸𑀓𑀁 𑀲𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀤𑀸𑀬𑀺𑀓𑀫𑁆𑀫𑀁 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁. 𑀦 𑀘 𑀢𑀁 𑀓𑀸𑀫𑀸𑀤𑀺𑀪𑀯𑀸𑀪𑀺𑀲𑀗𑁆𑀔𑀸𑀭𑀓𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀫𑁆𑀪𑀯’’𑀦𑁆𑀢𑀺 𑀯𑀢𑁆𑀯𑀸 ‘‘𑀪𑀯𑀲𑀗𑁆𑀔𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀲𑁆𑀲𑀚𑁆𑀚𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑁆𑀚𑀺. 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀢𑁆𑀢𑀸 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀪𑀺𑀦𑁆𑀤𑀻𑀢𑀺 𑀓𑀺𑀮𑁂𑀲𑀪𑁂𑀤𑀲𑀳𑀪𑀸𑀯𑀺𑀓𑀫𑁆𑀫𑁄𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀤𑀼𑀪𑀬𑀲𑁆𑀲 𑀓𑀸𑀭𑀡𑀁 𑀅𑀯𑁄𑀘 ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺.
𑀢𑀻𑀭𑁂𑀦𑁆𑀢𑁄𑀢𑀺 ‘‘𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺𑀆𑀤𑀺𑀦𑀸 𑀯𑀻𑀫𑀁𑀲𑀦𑁆𑀢𑁄. ‘‘𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀆𑀤𑀺𑀁 𑀯𑀢𑁆𑀯𑀸 𑀪𑀯𑀲𑀗𑁆𑀔𑀸𑀭𑀲𑁆𑀲 𑀅𑀯𑀲𑁆𑀲𑀚𑁆𑀚𑀦𑀸𑀓𑀸𑀭𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀲𑀺. ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀉𑀤𑀸𑀦𑀯𑀡𑁆𑀡𑀦𑀸𑀬𑀁 𑀆𑀤𑀺𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀲𑀺.
𑀫𑀳𑀸𑀪𑀽𑀫𑀺𑀘𑀸𑀮𑀯𑀡𑁆𑀡𑀦𑀸
𑁧𑁭𑁧. 𑀬𑀦𑁆𑀢𑀺 𑀓𑀭𑀡𑁂 𑀯𑀸 𑀅𑀥𑀺𑀓𑀭𑀡𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳 ‘‘𑀬𑁂𑀦 𑀲𑀫𑀬𑁂𑀦, 𑀬𑀲𑁆𑀫𑀺𑀁 𑀯𑀸 𑀲𑀫𑀬𑁂’’𑀢𑀺. 𑀉𑀓𑁆𑀔𑁂𑀧𑀓𑀯𑀸𑀢𑀸𑀢𑀺 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀔𑁂𑀧𑀓𑀯𑀸𑀢𑀸. ‘‘𑀲𑀝𑁆𑀞𑀺…𑀧𑁂… 𑀩𑀳𑀮’’𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀯𑀸𑀢𑀲𑁆𑀲 𑀉𑀩𑁆𑀩𑁂𑀥𑀧𑁆𑀧𑀫𑀸𑀡𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀧𑀦 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑁆𑀧𑀫𑀸𑀡𑀫𑁆𑀧𑀺 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀢𑀺𑀬𑁂𑀯. 𑀆𑀓𑀸𑀲𑁂𑀢𑀺 𑀧𑀼𑀩𑁆𑀩𑁂 𑀯𑀸𑀢𑁂𑀦 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂. 𑀧𑀼𑀦 𑀯𑀸𑀢𑁄𑀢𑀺 𑀉𑀓𑁆𑀔𑁂𑀧𑀓𑀯𑀸𑀢𑁂 𑀢𑀣𑀸𑀓𑀢𑁆𑀯𑀸 𑀯𑀺𑀕𑀢𑁂 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑁄 𑀧𑀼𑀦 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀬𑀣𑀸 𑀢𑀁 𑀉𑀤𑀓𑀁 𑀦 𑀪𑀲𑁆𑀲𑀢𑀺, 𑀏𑀯𑀁 𑀉𑀢𑁆𑀣𑀫𑁆𑀪𑁂𑀦𑁆𑀢𑀁 𑀆𑀩𑀦𑁆𑀥𑀦𑀯𑀺𑀢𑀸𑀦𑀯𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀢𑁄 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀻𑀢𑀺 𑀢𑀢𑁄 𑀆𑀩𑀦𑁆𑀥𑀺𑀢𑁆𑀯𑀸 𑀕𑀳𑀡𑀢𑁄 𑀢𑁂𑀦 𑀯𑀸𑀢𑁂𑀦 𑀉𑀢𑁆𑀣𑀫𑁆𑀪𑀺𑀢𑀁 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀺 𑀉𑀧𑀭𑀺 𑀕𑀘𑁆𑀙𑀢𑀺. 𑀳𑁄𑀢𑀺𑀬𑁂𑀯𑀸𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀳𑁄𑀢𑀺𑀬𑁂𑀯. 𑀩𑀳𑀮𑀪𑀸𑀯𑁂𑀦𑀸𑀢𑀺 𑀫𑀳𑀸𑀧𑀣𑀯𑀺𑀬𑀸 𑀫𑀳𑀦𑁆𑀢𑀪𑀸𑀯𑁂𑀦. 𑀲𑀓𑀮𑀸 𑀳𑀺 𑀫𑀳𑀸𑀧𑀣𑀯𑀻 𑀢𑀤𑀸 𑀑𑀕𑁆𑀕𑀘𑁆𑀙𑀢𑀺, 𑀉𑀕𑁆𑀕𑀘𑁆𑀙𑀢𑀺 𑀘, 𑀢𑀲𑁆𑀫𑀸 𑀓𑀫𑁆𑀧𑀦𑀁 𑀦 𑀧𑀜𑁆𑀜𑀸𑀬𑀢𑀺.
𑀇𑀚𑁆𑀛𑀦𑀲𑁆𑀲𑀸𑀢𑀺 𑀇𑀘𑁆𑀙𑀺𑀢𑀢𑁆𑀣𑀲𑀺𑀚𑁆𑀛𑀦𑀲𑁆𑀲. 𑀅𑀦𑀼𑀪𑀯𑀺𑀢𑀩𑁆𑀩𑀲𑁆𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀆𑀤𑀺𑀓𑀲𑁆𑀲. 𑀧𑀭𑀺𑀢𑁆𑀢𑀸𑀢𑀺 𑀧𑀝𑀺𑀮𑀤𑁆𑀥𑀫𑀢𑁆𑀢𑀸 𑀦𑀸𑀢𑀺𑀲𑀼𑀪𑀸𑀯𑀺𑀢𑀸. 𑀢𑀣𑀸 𑀘 𑀪𑀸𑀯𑀦𑀸 𑀩𑀮𑀯𑀢𑀻 𑀦 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀩𑁆𑀩𑀮𑀸’’𑀢𑀺. 𑀲𑀜𑁆𑀜𑀸𑀲𑀻𑀲𑁂𑀦 𑀳𑀺 𑀪𑀸𑀯𑀦𑀸 𑀯𑀼𑀢𑁆𑀢𑀸. 𑀅𑀧𑁆𑀧𑀫𑀸𑀡𑀸𑀢𑀺 𑀧𑀕𑀼𑀡𑀸 𑀲𑀼𑀪𑀸𑀯𑀺𑀢𑀸. 𑀲𑀸 𑀳𑀺 𑀣𑀺𑀭𑀸 𑀤𑀴𑁆𑀳𑀢𑀭𑀸 𑀳𑁄𑀢𑀻𑀢𑀺 𑀆𑀳 ‘‘𑀩𑀮𑀯𑀸’’𑀢𑀺. ‘‘𑀧𑀭𑀺𑀢𑁆𑀢𑀸 𑀧𑀣𑀯𑀻𑀲𑀜𑁆𑀜𑀸, 𑀅𑀧𑁆𑀧𑀫𑀸𑀡𑀸 𑀆𑀧𑁄𑀲𑀜𑁆𑀜𑀸’’𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀯, 𑀆𑀧𑁄𑀲𑀜𑁆𑀜𑀸𑀬 𑀧𑀦 𑀲𑀼𑀪𑀸𑀯𑀺𑀢𑀸𑀬 𑀧𑀣𑀯𑀻𑀓𑀫𑁆𑀧𑁄 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑁂𑀚𑁂𑀦𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀢𑁆𑀢𑀁 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁. 𑀯𑀻𑀫𑀁𑀲𑀦𑁆𑀢𑁄 𑀯𑀸 𑀢𑀸𑀯𑀤𑁂𑀯 𑀲𑀫𑀥𑀺𑀕𑀢𑀁 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑀁. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀧𑀸𑀲𑀸𑀤𑀓𑀫𑁆𑀧𑀦𑀁 𑀧𑀸𑀓𑀝𑀦𑁆𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑀲𑀸𑀫𑀡𑁂𑀭𑀲𑁆𑀲 𑀧𑀸𑀲𑀸𑀤𑀓𑀫𑁆𑀧𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀺𑀭𑀸𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀽𑀢𑀺𑀫𑀺𑀲𑁆𑀲𑁄 𑀕𑀦𑁆𑀥𑁄 𑀏𑀢𑀲𑁆𑀲𑀸𑀢𑀺 𑀧𑀽𑀢𑀺𑀕𑀦𑁆𑀥𑁄, 𑀢𑁂𑀦 𑀧𑀽𑀢𑀺𑀕𑀦𑁆𑀥𑁂𑀦𑁂𑀯 𑀅𑀥𑀺𑀕𑀢𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑀁 𑀯𑀺𑀬 𑀕𑀦𑁆𑀥𑁂𑀦𑁂𑀯 𑀲𑀻𑀲𑁂𑀦, 𑀅𑀢𑀺𑀯𑀺𑀬 𑀤𑀸𑀭𑀓𑁄 𑀏𑀯𑀸𑀢𑀺 𑀅𑀢𑁆𑀣𑁄.
𑀆𑀘𑀭𑀺𑀬𑀦𑁆𑀢𑀺 𑀆𑀘𑀭𑀺𑀬𑀽𑀧𑀤𑁂𑀲𑀁. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫 𑀇𑀤𑁆𑀥𑀺𑀯𑀺𑀥𑀧𑁆𑀧𑀝𑀺𑀧𑀓𑁆𑀔𑀸𑀤𑀻𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑁄, 𑀲𑁄 𑀘 𑀉𑀧𑀸𑀬𑁂 𑀓𑁄𑀲𑀮𑁆𑀮𑀲𑁆𑀲 𑀅𑀢𑁆𑀢𑀦𑀸 𑀦 𑀲𑀫𑁆𑀫𑀸 𑀉𑀕𑁆𑀕𑀳𑀺𑀢𑀢𑁆𑀢𑀸 𑀦 𑀢𑀸𑀯 𑀲𑀺𑀓𑁆𑀔𑀺𑀢𑁄𑀢𑀺 𑀆𑀳 ‘‘𑀅𑀲𑀺𑀓𑁆𑀔𑀺𑀢𑁆𑀯𑀸𑀯 𑀬𑀼𑀤𑁆𑀥𑀁 𑀧𑀯𑀺𑀝𑁆𑀞𑁄𑀲𑀻’’𑀢𑀺. ‘‘𑀧𑀺𑀮𑀯𑀦𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀓𑀮𑀫𑁂𑀯 𑀧𑀸𑀲𑀸𑀤𑀯𑀢𑁆𑀣𑀼𑀁 𑀉𑀤𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀧𑀸𑀲𑀸𑀤𑁄𑀯 𑀢𑀢𑁆𑀣 𑀧𑀺𑀮𑀯𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀝𑁆𑀞𑀸𑀦𑀓𑁆𑀓𑀫𑀁 𑀧𑀦 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀢…𑀧𑁂… 𑀚𑀸𑀦𑀸𑀳𑀻’’𑀢𑀺 𑀆𑀳. 𑀢𑀢𑁆𑀣 𑀓𑀧𑀮𑁆𑀮𑀓𑀧𑀽𑀯𑀦𑁆𑀢𑀺 𑀆𑀲𑀺𑀢𑁆𑀢𑀓𑀧𑀽𑀯𑀁, 𑀢𑀁 𑀧𑀘𑀦𑁆𑀢𑀸 𑀓𑀧𑀸𑀮𑁂 𑀧𑀞𑀫𑀁 𑀓𑀺𑀜𑁆𑀘𑀺 𑀧𑀺𑀝𑁆𑀞𑀁 𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑁂𑀢𑁆𑀯𑀸 𑀅𑀦𑁆𑀢𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀺 𑀧𑀽𑀯𑀁 𑀲𑀫𑀦𑁆𑀢𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀏𑀯𑀁 ‘‘𑀆𑀧𑁄𑀓𑀲𑀺𑀡𑀯𑀲𑁂𑀦 ‘𑀧𑀸𑀲𑀸𑀤𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀉𑀤𑀓𑀁 𑀳𑁄𑀢𑀽’𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀫𑀦𑁆𑀢𑀢𑁄 𑀧𑀸𑀲𑀸𑀤𑀲𑁆𑀲 𑀬𑀸𑀯 𑀧𑀭𑀺𑀬𑀦𑁆𑀢𑀸 𑀬𑀣𑀸 𑀉𑀤𑀓𑀁 𑀳𑁄𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀉𑀧𑀫𑀸𑀬 𑀉𑀧𑀤𑀺𑀲𑀢𑀺.
𑀫𑀳𑀸𑀧𑀤𑀸𑀦𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮) 𑀯𑀢𑁆𑀯𑀸 ‘‘𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮), 𑀢𑀣𑀸 ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁦) 𑀯𑀢𑁆𑀯𑀸 ‘‘𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁨) 𑀘 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀁, 𑀅𑀪𑀺𑀚𑀸𑀢𑀺𑀬𑀜𑁆𑀘 𑀥𑀫𑁆𑀫𑀢𑀸𑀯𑀲𑁂𑀦 𑀫𑀳𑀸𑀧𑀤𑀸𑀦𑁂𑀧𑀣𑀯𑀻𑀓𑀫𑁆𑀧𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑁂𑀲𑀼𑀧𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀣𑀯𑀻𑀓𑀫𑁆𑀧𑁄 𑀥𑀫𑁆𑀫𑀢𑀸𑀯𑀲𑁂𑀦𑁂𑀯𑀸𑀢𑀺 𑀫𑀳𑀸𑀧𑀤𑀸𑀦𑁂𑀅𑀢𑁆𑀣𑀢𑁄 𑀯𑀼𑀢𑁆𑀢𑀁 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀇𑀤𑀸𑀦𑀺 𑀦𑁂𑀲𑀁 𑀧𑀣𑀯𑀻𑀓𑀫𑁆𑀧𑀦𑀁 𑀓𑀸𑀭𑀡𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺 𑀇𑀫𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀸𑀢𑀼𑀓𑁄𑀧𑁂𑀦𑀸𑀢𑀺 𑀉𑀓𑁆𑀔𑁂𑀧𑀓𑀥𑀸𑀢𑀼𑀲𑀗𑁆𑀔𑀸𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀧𑀓𑁄𑀧𑁂𑀦. 𑀇𑀤𑁆𑀥𑀸𑀦𑀼𑀪𑀸𑀯𑁂𑀦𑀸𑀢𑀺 𑀜𑀸𑀡𑀺𑀤𑁆𑀥𑀺𑀬𑀸 𑀯𑀸 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀬𑀸 𑀯𑀸 𑀧𑀪𑀸𑀯𑁂𑀦, 𑀢𑁂𑀚𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀢𑁂𑀚𑁂𑀦𑀸𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀩𑀮𑁂𑀦𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀢𑁂𑀚𑁂𑀦𑀸𑀢𑀺 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁂𑀦. 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸𑀢𑀺 𑀬𑀣𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁂𑀦 𑀅𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀅𑀓𑀫𑁆𑀧𑀺𑀢𑁆𑀣, 𑀏𑀯𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑁂𑀦 𑀅𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣, 𑀢𑀁 𑀧𑀦𑀲𑁆𑀲𑀸 𑀲𑀸𑀥𑀼𑀓𑀸𑀭𑀤𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.
𑀬𑁂𑀦 𑀧𑀦 𑀪𑀕𑀯𑀸 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡- (𑀤𑀻. 𑀦𑀺. 𑁨.𑁩𑁩; 𑁩.𑁧𑁯𑁮; 𑀫. 𑀦𑀺. 𑁨.𑁩𑁮𑁫) 𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀭𑀢𑀦𑀲𑀫𑀺𑀤𑁆𑀥𑀺𑀥𑀫𑁆𑀫𑀓𑀸𑀬𑁄 𑀧𑀼𑀜𑁆𑀜𑀫𑀳𑀢𑁆𑀢𑀣𑀸𑀫𑀫𑀳𑀢𑁆𑀢𑀬𑀲𑀫𑀳𑀆𑀇𑀤𑁆𑀥𑀺𑀫𑀳𑀢𑁆𑀢𑀧𑀜𑁆𑀜𑀸𑀫𑀳𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀓𑀧𑁆𑀧𑀁 𑀯𑀸 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀧𑀺 𑀲𑀗𑁆𑀔𑀢𑀥𑀫𑁆𑀫𑀁 𑀧𑀝𑀺𑀚𑀺𑀕𑀼𑀘𑁆𑀙𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀯𑀺𑀥𑀺𑀦𑀸 𑀦𑀺𑀭𑀧𑁂𑀓𑁆𑀔𑁄 𑀑𑀲𑁆𑀲𑀚𑁆𑀚𑀺. 𑀢𑀤𑀦𑀼𑀪𑀸𑀯𑀸𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑁂 𑀅𑀓𑀫𑁆𑀧𑀺𑀢𑁆𑀣, 𑀢𑀁 𑀧𑀦𑀲𑁆𑀲𑀸 𑀓𑀸𑀭𑀼𑀜𑁆𑀜𑀲𑀪𑀸𑀯𑀲𑀡𑁆𑀞𑀺𑀢𑀸 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀼𑀜𑁆𑀜𑀲𑀪𑀸𑀯𑁂𑀦𑀸’’𑀢𑀺. 𑀬𑀲𑁆𑀫𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺 𑀅𑀦𑁆𑀢𑀭𑀦𑁆𑀢𑀭𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦, 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀲𑀸𑀢𑀺𑀲𑀬𑀁 𑀢𑀺𑀓𑁆𑀔𑀁 𑀲𑀽𑀭𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀧𑀯𑀢𑁆𑀢𑁂𑀲𑀺, ‘‘𑀬𑀤𑀢𑁆𑀣𑀜𑁆𑀘 𑀫𑀬𑀸 𑀏𑀯𑀁 𑀲𑀼𑀘𑀺𑀭𑀓𑀸𑀮𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀜𑀸𑀡𑀲𑀫𑁆𑀪𑀸𑀭𑁄 𑀲𑀫𑁆𑀪𑀢𑁄, 𑀅𑀦𑀼𑀢𑁆𑀢𑀭𑁄 𑀘 𑀯𑀺𑀫𑁄𑀓𑁆𑀔𑁄 𑀲𑀫𑀥𑀺𑀕𑀢𑁄, 𑀢𑀲𑁆𑀲 𑀯𑀢 𑀫𑁂 𑀲𑀺𑀔𑀸𑀧𑁆𑀧𑀢𑁆𑀢𑀨𑀮𑀪𑀽𑀢𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀚𑁆𑀚 𑀲𑀫𑀺𑀚𑁆𑀛𑀢𑀻’’𑀢𑀺 𑀪𑀺𑀬𑁆𑀬𑁄 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀧𑀻𑀢𑀺𑀯𑀺𑀧𑁆𑀨𑀸𑀭𑀸𑀤𑀺𑀕𑀼𑀡𑀯𑀺𑀧𑀼𑀮𑀢𑀭𑀸𑀦𑀼𑀪𑀸𑀯𑁄 𑀧𑀭𑁂𑀳𑀺 𑀅𑀲𑀸𑀥𑀸𑀭𑀡𑀜𑀸𑀡𑀸𑀢𑀺𑀲𑀬𑁄 𑀉𑀤𑀧𑀸𑀤𑀺, 𑀬𑀲𑁆𑀲 𑀲𑀫𑀸𑀧𑀢𑁆𑀢𑀺𑀩𑀮𑀲𑀫𑀼𑀧𑀩𑁆𑀭𑀽𑀳𑀺𑀢𑀲𑁆𑀲 𑀜𑀸𑀡𑀸𑀢𑀺𑀲𑀬𑀲𑁆𑀲 𑀆𑀦𑀼𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑁂𑀫𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀲𑀫𑀯𑀺𑀧𑀸𑀓𑀸’’𑀢𑀺𑀆𑀤𑀺 (𑀉𑀤𑀸. 𑁭𑁫), 𑀢𑀲𑁆𑀫𑀸 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀫𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀢𑀁 𑀧𑀦𑀲𑁆𑀲𑀸 𑀢𑀲𑁆𑀲𑀁 𑀯𑁂𑀮𑀸𑀬𑀁 𑀆𑀭𑁄𑀤𑀦𑀸𑀓𑀸𑀭𑀧𑁆𑀧𑀢𑁆𑀢𑀺 𑀯𑀺𑀬 𑀳𑁄𑀢𑀻𑀢𑀺 ‘‘𑀅𑀝𑁆𑀞𑀫𑁄 𑀆𑀭𑁄𑀤𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁.
𑀇𑀤𑀸𑀦𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀧𑀦𑀢𑁆𑀣𑁄𑀢𑀺 ‘‘𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀅𑀢𑁆𑀣𑁄. 𑀧𑀣𑀯𑀻𑀤𑁂𑀯𑀢𑀸𑀬 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀲𑀫𑀼𑀤𑁆𑀤𑀤𑁂𑀯𑀢𑀸 𑀯𑀺𑀬 𑀫𑀳𑀸𑀧𑀣𑀯𑀺𑀬𑀸 𑀅𑀥𑀺𑀤𑁂𑀯𑀢𑀸 𑀓𑀺𑀭 𑀦𑀸𑀫 𑀅𑀢𑁆𑀣𑀺. 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 𑀢𑀲𑁆𑀲𑀸 𑀘𑀺𑀢𑁆𑀢𑀯𑀲𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺, 𑀬𑀣𑀸 𑀯𑀸𑀢𑀯𑀮𑀸𑀳𑀓𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀯𑀲𑁂𑀦 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀻𑀢𑀼𑀡𑁆𑀳𑀅𑀩𑁆𑀪𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀯𑀲𑁂𑀦 𑀲𑀻𑀢𑀸𑀤𑀬𑁄 𑀪𑀯𑀦𑁆𑀢𑀺. 𑀢𑀣𑀸 𑀳𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀅𑀪𑀺𑀲𑀫𑁆𑀩𑁄𑀥𑀺𑀅𑀢𑁆𑀣𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀉𑀧𑀝𑁆𑀞𑀺𑀢𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑀼𑀁 𑁋
‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;
𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪) 𑁋
𑀯𑀘𑀦𑀲𑀫𑀦𑀦𑁆𑀢𑀭𑀁 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀲𑀧𑀭𑀺𑀲𑀁 𑀫𑀸𑀭𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀏𑀢𑀦𑁆𑀢𑀺 𑀲𑀸𑀥𑀼𑀓𑀸𑀭𑀤𑀸𑀦𑀸𑀤𑀺. 𑀬𑀤𑀺𑀧𑀺 𑀦𑀢𑁆𑀣𑀺 𑀅𑀘𑁂𑀢𑀦𑀢𑁆𑀢𑀸, 𑀥𑀫𑁆𑀫𑀢𑀸𑀯𑀲𑁂𑀦 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀥𑀫𑁆𑀫𑀢𑀸 𑀧𑀦 𑀅𑀢𑁆𑀣𑀢𑁄 𑀥𑀫𑁆𑀫𑀲𑀪𑀸𑀯𑁄, 𑀲𑁄 𑀧𑀼𑀜𑁆𑀜𑀥𑀫𑁆𑀫𑀲𑁆𑀲 𑀯𑀸 𑀜𑀸𑀡𑀥𑀫𑁆𑀫𑀲𑁆𑀲 𑀯𑀸 𑀆𑀦𑀼𑀪𑀸𑀯𑀲𑀪𑀸𑀯𑁄𑀢𑀺. 𑀢𑀬𑀺𑀤𑀁 𑀲𑀩𑁆𑀩𑀁 𑀯𑀺𑀘𑀸𑀭𑀺𑀢𑀫𑁂𑀯, 𑀏𑀯𑀜𑁆𑀘 𑀓𑀢𑁆𑀯𑀸 𑁋
‘‘𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑁂;
𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣𑀸’’𑀢𑀺. (𑀩𑀼. 𑀯𑀁. 𑁧.𑁧𑁬𑁬);
𑀆𑀤𑀺 𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.
𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑀲𑁆𑀲𑀦𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀬𑁆𑀬𑀸𑀢𑀦𑀁, 𑀦𑀺𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀧𑀣𑀯𑀻𑀓𑀫𑁆𑀧𑀸𑀤𑀺𑀉𑀧𑁆𑀧𑀸𑀤𑀚𑀦𑀦𑁂𑀦 𑀘𑁂𑀯 𑀧𑀣𑀯𑀻𑀓𑀫𑁆𑀧𑀲𑁆𑀲 𑀪𑀕𑀯𑀢𑁄 𑀳𑁂𑀢𑀼𑀦𑀺𑀤𑀲𑁆𑀲𑀦𑁂𑀦 𑀘. ‘‘𑀅𑀤𑁆𑀥𑀸 𑀅𑀚𑁆𑀚 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺 𑀧𑀸𑀭𑀺𑀲𑁂𑀲𑀜𑀸𑀬𑁂𑀦. 𑀏𑀯𑀜𑁆𑀳𑀺 𑀢𑀤𑀸 𑀣𑁂𑀭𑁄 𑀢𑀫𑀢𑁆𑀣𑀁 𑀯𑀻𑀫𑀁𑀲𑁂𑀬𑁆𑀬 𑀦𑀸𑀬𑀁 𑀪𑀽𑀫𑀺𑀓𑀫𑁆𑀧𑁄 𑀥𑀸𑀢𑀼𑀧𑁆𑀧𑀓𑁄𑀧𑀳𑁂𑀢𑀼𑀓𑁄 𑀢𑀲𑁆𑀲 𑀅𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑀢𑁆𑀢𑀸, 𑀩𑀸𑀳𑀺𑀭𑀓𑁄𑀧𑀺 𑀇𑀲𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀩𑀼𑀤𑁆𑀥𑀓𑀸𑀮𑁂 𑀦𑀢𑁆𑀣𑀺, 𑀲𑀸𑀲𑀦𑀺𑀓𑁄𑀧𑀺 𑀲𑀢𑁆𑀣𑀼 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀯𑀁 𑀓𑀭𑁄𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀤𑀸𑀦𑀺 𑀅𑀲𑀫𑁆𑀪𑀯𑁄, 𑀏𑀯𑀁 𑀪𑀽𑀫𑀺𑀓𑀫𑁆𑀧𑁄 𑀘𑀸𑀬𑀁 𑀫𑀳𑀸𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀧𑀸𑀭𑀺𑀲𑁂𑀲𑀢𑁄 𑀆𑀳 ‘‘𑀅𑀚𑁆𑀚 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄𑀢𑀺 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺.