𑁨. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁯𑁫. 𑀚𑀦𑀧𑀤𑀺𑀦𑁄𑀢𑀺 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀲𑀸𑀫𑀺𑀦𑁄 𑀭𑀸𑀚𑀓𑀼𑀫𑀸𑀭𑀸 𑀕𑁄𑀢𑁆𑀢𑀯𑀲𑁂𑀦 𑀓𑀼𑀭𑀽 𑀦𑀸𑀫. 𑀢𑁂𑀲𑀁 𑀦𑀺𑀯𑀸𑀲𑁄 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀺𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀈𑀤𑀺𑀲𑀮𑀺𑀗𑁆𑀕𑀯𑀘𑀦𑀸𑀦𑀺 𑀇𑀘𑁆𑀙𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀺 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀺, 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂𑀧𑀺 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 ‘‘𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑁂𑀢𑀁 𑀧𑀼𑀣𑀼𑀯𑀘𑀦’’𑀦𑁆𑀢𑀺 ‘‘𑀩𑀳𑀼𑀓𑁂 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀲𑀼𑀢𑁆𑀯𑀸𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀲𑁆𑀲 𑀆𑀦𑀼𑀪𑀸𑀯𑀤𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀧𑀭𑀫𑁆𑀧𑀭𑀸𑀦𑀼𑀕𑀢𑀁 𑀓𑀣𑀁 𑀲𑀼𑀢𑁆𑀯𑀸. 𑀅𑀦𑀼𑀲𑀁𑀬𑀸𑀬𑀦𑁆𑀢𑁂𑀦𑀸𑀢𑀺 𑀅𑀦𑀼𑀯𑀺𑀘𑀭𑀦𑁆𑀢𑁂𑀦. 𑀏𑀢𑁂𑀲𑀁 𑀞𑀸𑀦𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀫𑀼𑀔𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀫𑀸𑀳. 𑀢𑁂𑀦𑀸𑀳 ‘‘𑀢𑀢𑁆𑀣 𑀅𑀕𑀫𑀸𑀲𑀻’’𑀢𑀺𑀆𑀤𑀺. 𑀲𑁄𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸. 𑀢𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀭𑀚𑁆𑀚𑀁. 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀧𑀼𑀦 𑀧𑀼𑀘𑁆𑀙𑀺 𑀧𑀭𑀺𑀡𑀸𑀬𑀓𑀭𑀢𑀦𑀁.

𑀤𑁄𑀯𑀸𑀭𑀺𑀓𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬, 𑀤𑁂𑀯𑀧𑀼𑀭𑀲𑁆𑀲 𑀘 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀓𑁆𑀔𑀸𑀬 𑀅𑀥𑀺𑀕𑀢𑀢𑁆𑀢𑀸. ‘‘𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺 𑀇𑀤𑀁 ‘‘𑀘𑀺𑀢𑁆𑀢𑀮𑀢𑀸𑀯𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀻𑀢𑀺 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀬𑀸 𑀆𑀲𑀦𑁆𑀦𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀦 𑀳𑀺 𑀘𑀓𑁆𑀓𑀭𑀢𑀦𑀁 𑀪𑀽𑀫𑀺𑀬𑀁 𑀧𑀢𑀢𑀺, 𑀢𑀣𑀸𑀞𑀺𑀢𑀜𑁆𑀘 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀘𑀓𑁆𑀓𑀯𑀢𑁆𑀢𑀺𑀇𑀲𑁆𑀲𑀭𑀺𑀬𑀲𑁆𑀲 𑀅𑀪𑀸𑀯𑀢𑁄. ‘‘𑀘𑀺𑀭𑀢𑀭𑀁 𑀓𑀸𑀮𑀁 𑀞𑀢𑁆𑀯𑀸’’𑀢𑀺 𑀅𑀧𑀭𑁂. 𑀭𑀸𑀚𑀸 𑀏𑀓𑀓𑁄𑀯 𑀅𑀕𑀫𑀸𑀲𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦. 𑀫𑀦𑀼𑀲𑁆𑀲𑀪𑀸𑀯𑁄𑀢𑀺 𑀫𑀦𑀼𑀲𑁆𑀲𑀕𑀦𑁆𑀥𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑀸𑀤𑀺𑀫𑀦𑀼𑀲𑁆𑀲𑀪𑀸𑀯𑁄. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀤𑁂𑀯𑀮𑁄𑀓𑁂 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀅𑀧𑀭𑀸𑀧𑀭𑀺𑀬𑀸𑀬 𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑁄𑀓𑀸𑀲𑀢𑁆𑀢𑀸 𑀲𑀩𑁆𑀩𑀤𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀢𑀸 𑀫𑀸𑀮𑀸𑀫𑀺𑀮𑀸𑀬𑀦𑀸𑀤𑀺 𑀤𑀺𑀩𑁆𑀩𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀤𑀸 𑀫𑀦𑀼𑀲𑁆𑀲𑀸𑀦𑀁 𑀅𑀲𑀗𑁆𑀔𑁂𑀬𑁆𑀬𑀸𑀬𑀼𑀓𑀢𑀸𑀬 𑀲𑀓𑁆𑀓𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸. ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀉𑀧𑀤𑁆𑀥𑀭𑀚𑁆𑀚𑁂𑀦𑀸’’𑀢𑀺 𑀅𑀢𑁆𑀭𑀺𑀘𑁆𑀙𑀢𑀸𑀬 𑀅𑀢𑀺𑀢𑁆𑀢𑁄𑀯. 𑀫𑀦𑀼𑀲𑁆𑀲𑀮𑁄𑀓𑁂 𑀉𑀢𑀼𑀦𑁄 𑀓𑀓𑁆𑀔𑀴𑀢𑀸𑀬 𑀯𑀸𑀢𑀸𑀢𑀧𑁂𑀦 𑀨𑀼𑀝𑁆𑀞𑀕𑀢𑁆𑀢𑁄 𑀓𑀸𑀮𑀫𑀓𑀸𑀲𑀺.

𑀅𑀯𑀬𑀯𑁂𑀲𑀼 𑀲𑀺𑀤𑁆𑀥𑁄 𑀯𑀺𑀲𑁂𑀲𑁄 𑀲𑀫𑀼𑀤𑀸𑀬𑀲𑁆𑀲 𑀯𑀺𑀲𑁂𑀲𑀓𑁄 𑀳𑁄𑀢𑀻𑀢𑀺 𑀏𑀓𑀫𑁆𑀧𑀺 𑀭𑀝𑁆𑀞𑀁 𑀩𑀳𑀼𑀯𑀘𑀦𑁂𑀦 𑀯𑁄𑀳𑀭𑀺𑀬𑀢𑀺.

𑀤-𑀓𑀸𑀭𑁂𑀦 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀓𑀫𑁆𑀫𑀸𑀲𑁄𑀢𑀺 𑀓𑀫𑁆𑀫𑀸𑀲𑀧𑀸𑀤𑁄 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺. 𑀓𑀣𑀁 𑀧𑀦 𑀲𑁄 ‘‘𑀓𑀫𑁆𑀫𑀸𑀲𑀧𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀤𑀫𑀺𑀢𑁄𑀢𑀺 𑀏𑀢𑁆𑀣 𑀓𑀻𑀤𑀺𑀲𑀁 𑀤𑀫𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑁄𑀭𑀺𑀲𑀸𑀤𑀪𑀸𑀯𑀢𑁄 𑀧𑀝𑀺𑀲𑁂𑀥𑀺𑀢𑁄’’𑀢𑀺. ‘‘𑀇𑀫𑁂 𑀧𑀦 𑀣𑁂𑀭𑀸𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸’’𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑀸’’𑀢𑀺, ‘‘𑀤𑀻𑀖𑀪𑀸𑀡𑀓𑀸’’𑀢𑀺 𑀯𑀤𑀦𑁆𑀢𑀺. 𑀉𑀪𑀬𑀣𑀸𑀧𑀺 𑀘𑀽𑀴𑀓𑀫𑁆𑀫𑀸𑀲𑀤𑀫𑁆𑀫𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀤𑀦𑁆𑀢𑀺. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀳𑀺 𑀓𑀫𑁆𑀫𑀸𑀲𑀧𑀸𑀤𑁄 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑀓𑀸𑀮𑁂 (𑀘𑀭𑀺𑀬𑀸. 𑁨.𑁭𑁫) 𑀩𑁄𑀥𑀺𑀲𑀢𑁆𑀢𑁂𑀦 𑀢𑀢𑁆𑀣 𑀤𑀫𑀺𑀢𑁄. 𑀲𑀼𑀢𑀲𑁄𑀫𑀓𑀸𑀮𑁂 (𑀚𑀸. 𑁨.𑁨𑁧.𑁩𑁭𑁧) 𑀧𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑁄𑀭𑀺𑀲𑀸𑀤𑀪𑀸𑀯𑀧𑀝𑀺𑀲𑁂𑀥𑀦𑁂𑀦 𑀬𑀢𑁆𑀣 𑀤𑀫𑀺𑀢𑁄, 𑀢𑀁 𑀫𑀳𑀸𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫. ‘‘𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀅𑀢𑁆𑀭𑀚𑁄’’𑀢𑀺 𑀯𑀘𑀦𑀁 𑀑𑀭𑀲𑀧𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀬𑁂𑀳𑀺 𑀆𑀯𑀲𑀺𑀢𑀧𑁆𑀧𑀤𑁂𑀲𑁄 ‘‘𑀓𑀼𑀭𑀼𑀭𑀝𑁆𑀞’’𑀦𑁆𑀢𑀺 𑀦𑀸𑀫𑀁 𑀮𑀪𑀺, 𑀢𑁂 𑀉𑀢𑁆𑀢𑀭𑀓𑀼𑀭𑀼𑀢𑁄 𑀆𑀕𑀢𑀫𑀦𑀼𑀲𑁆𑀲𑀸 𑀢𑀢𑁆𑀣 𑀭𑀓𑁆𑀔𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀬𑀸 𑀧𑀘𑁆𑀙𑀺𑀫𑀚𑀦𑀢𑀸𑀢𑀺 𑀲𑁄 𑀤𑁂𑀲𑀥𑀫𑁆𑀫𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀢𑁄 𑀧𑀯𑀢𑁆𑀢𑀫𑀸𑀦𑁄 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀬𑀜𑁆𑀘 𑀅𑀢𑁆𑀣𑁄 𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀲𑁄 𑀅𑀧𑀭𑀪𑀸𑀕𑁂 𑀧𑀞𑀫𑀁 𑀬𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀪𑀕𑀯𑀢𑁄 𑀯𑀲𑀦𑁄𑀓𑀸𑀲𑀪𑀽𑀢𑁄 𑀓𑁄𑀘𑀺 𑀯𑀺𑀳𑀸𑀭𑁄 𑀦 𑀳𑁄𑀢𑀺, 𑀢𑀢𑁆𑀣 𑀓𑁂𑀯𑀮𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀦𑀺𑀤𑀸𑀦𑀓𑀣𑀸𑀬 𑀧𑀓𑀢𑀺 𑀬𑀣𑀸 𑀢𑀁 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀤𑁂𑀯𑀤𑀳𑀁 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀲𑀦𑁄𑀓𑀸𑀲𑀢𑁄’’𑀢𑀺𑀆𑀤𑀺𑀫𑀸𑀳.

‘‘𑀆𑀬𑀲𑁆𑀫𑀸’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸 ‘‘𑀢𑀢𑁆𑀭 𑀪𑀯’’𑀦𑁆𑀢𑀺 𑀯𑀸 𑀧𑀺𑀬𑀲𑀫𑀼𑀤𑀸𑀳𑀸𑀭𑁄 𑀏𑀲𑁄𑀢𑀺 𑀆𑀳 ‘‘𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢’’𑀦𑁆𑀢𑀺. 𑀢𑀬𑀺𑀤𑀁 𑀧𑀺𑀬𑀯𑀘𑀦𑀁 𑀕𑀭𑀼𑀕𑀸𑀭𑀯𑀯𑀲𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀸𑀭𑀯𑀯𑀘𑀦𑀫𑁂𑀢’’𑀦𑁆𑀢𑀺.

𑀅𑀢𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀯𑀚𑁆𑀚𑀦𑁂𑀦 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀁 𑀦𑀸𑀫 𑀕𑀳𑀺𑀢𑀁, 𑀢𑀁 𑀧𑀦 𑀅𑀯𑀓𑀁𑀲𑀢𑁄 𑀉𑀪𑀺𑀦𑁆𑀦𑀁 𑀧𑀲𑀸𑀭𑀺𑀢𑀳𑀢𑁆𑀣𑀸𑀦𑀁 𑀲𑀗𑁆𑀖𑀝𑁆𑀝𑀦𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺, 𑀢𑁂𑀦𑀸𑀧𑀺 𑀅𑀕𑀸𑀭𑀯𑀫𑁂𑀯 𑀓𑀢𑀁 𑀳𑁄𑀢𑀺. 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸.

𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬𑀸𑀢𑀺 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀯𑀲𑁂𑀦 𑀓𑀼𑀮𑀸𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀸𑀬 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀪𑀺𑀓𑁆𑀔𑀧𑀝𑀺𑀕𑁆𑀕𑀡𑁆𑀳𑀦𑁂𑀦 𑀢𑁂𑀲𑀁 𑀫𑀳𑀢𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑁆𑀲 𑀚𑀦𑀦𑁂𑀦. 𑀧𑀝𑀺𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀫𑁆𑀫𑀚𑁆𑀚𑀦𑀝𑁆𑀞𑀸𑀦𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀧𑀼𑀦 𑀲𑀫𑁆𑀫𑀚𑁆𑀚𑀺𑀢𑁆𑀯𑀸. 𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀘𑀢𑀼𑀭𑀸𑀓𑀸𑀭𑀽𑀧𑀲𑀜𑁆𑀳𑀺𑀢𑁂 𑀢𑀬𑁄 𑀯𑀸𑀭𑁂, 𑀢𑁂𑀦𑀲𑁆𑀲 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀲𑀫𑁆𑀫𑀲𑀺𑀢𑀪𑀸𑀯𑀫𑀸𑀳.

𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀕𑀫𑁆𑀪𑀻𑀭𑀪𑀸𑀯𑁂𑀦𑁂𑀯 𑀓𑀣𑀺𑀢𑀢𑁆𑀢𑀸 𑀲𑁂𑀲𑀩𑀼𑀤𑁆𑀥𑁂𑀳𑀺𑀧𑀺 𑀏𑀯𑀫𑁂𑀯 𑀓𑀣𑀺𑀢𑁄𑀢𑀺 𑀥𑀫𑁆𑀫𑀦𑁆𑀯𑀬𑁂 𑀞𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀩𑀼𑀤𑁆𑀥𑁂𑀳𑀺…𑀧𑁂… 𑀓𑀣𑀺𑀢𑁄’’𑀢𑀺. 𑀲𑀸𑀮𑀺𑀦𑁆𑀤𑀦𑁆𑀢𑀺 𑀲𑀧𑀭𑀺𑀪𑀡𑁆𑀟𑀁. ‘‘𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄𑀯𑀺𑀬𑀸’’𑀢𑀺 𑀇𑀫𑀺𑀦𑀸 𑀢𑀸𑀤𑀺𑀲𑀸𑀬 𑀤𑁂𑀲𑀦𑀸𑀬 𑀲𑀼𑀤𑀼𑀓𑁆𑀓𑀭𑀪𑀸𑀯𑀫𑀸𑀳. 𑀲𑀼𑀢𑁆𑀢𑀫𑁂𑀯 ‘‘𑀲𑀼𑀢𑁆𑀢𑀦𑁆𑀢𑀓𑀣’’𑀦𑁆𑀢𑀺 𑀆𑀳 𑀥𑀫𑁆𑀫𑀓𑁆𑀔𑀦𑁆𑀥𑀪𑀸𑀯𑀢𑁄. 𑀬𑀣𑀸 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀪𑀽𑀫𑀦𑁆𑀢𑀭𑀲𑀫𑀬𑀦𑁆𑀢𑀭𑀸𑀦𑀁 𑀯𑀺𑀚𑀸𑀦𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑁄, 𑀏𑀯𑀁 𑀅𑀦𑁆𑀢𑀤𑁆𑀯𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀪𑀚𑀦𑀁 𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀳𑁄𑀢𑀻𑀢𑀺 𑀢𑀁 𑀤𑁂𑀲𑁂𑀢𑀩𑁆𑀩𑀲𑁆𑀲𑁂𑀯 𑀅𑀦𑁂𑀓𑀯𑀺𑀥𑀢𑀸𑀬, 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀘 𑀦𑀸𑀦𑀸𑀦𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀁 𑀤𑁂𑀲𑀦𑀸𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁, 𑀩𑀳𑀼𑀪𑁂𑀤𑀜𑁆𑀘 𑀳𑁄𑀢𑀺. 𑀜𑀸𑀡𑀁 𑀅𑀦𑀼𑀧𑀯𑀺𑀲𑀢𑀻𑀢𑀺 𑀢𑀢𑁄 𑀏𑀯 𑀤𑁂𑀲𑀦𑀸𑀜𑀸𑀡𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀯𑀺𑀪𑀸𑀕𑀲𑁄 𑀓𑀼𑀭𑀼𑀫𑀸𑀦𑀁 𑀅𑀦𑀼 𑀅𑀦𑀼 𑀧𑀯𑀺𑀲𑀢𑀺, 𑀢𑁂𑀦 𑀅𑀦𑀼𑀧𑀯𑀺𑀲𑁆𑀲 𑀞𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀜𑀸𑀡𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀧𑀜𑁆𑀜𑀸𑀬𑀢𑀻𑀢𑀺 𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀥𑀫𑁆𑀫𑀲𑁆𑀲 𑀤𑁂𑀲𑀓𑀁, 𑀧𑀝𑀺𑀯𑁂𑀥𑀓𑀜𑁆𑀘𑀸𑀢𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀲𑁆𑀲, 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀘 𑀉𑀴𑀸𑀭𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯, 𑁧𑁬𑁯; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫; 𑀦𑁂𑀢𑁆𑀢𑀺. 𑁧𑁪) 𑀯𑀘𑀦𑀢𑁄 𑀲𑀩𑁆𑀩𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀜𑀸𑀡𑀭𑀳𑀺𑀢𑀸 𑀦𑀢𑁆𑀣𑀺, 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀲𑀩𑁆𑀩𑀢𑁆𑀣 𑀲𑀫𑀸𑀦𑀧𑁆𑀧𑀯𑀢𑁆𑀢𑀺. 𑀤𑁂𑀲𑁂𑀢𑀩𑁆𑀩𑀯𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀺𑀲𑁂𑀲𑀢𑁄 𑀜𑀸𑀡𑁂𑀦 𑀅𑀦𑀼𑀧𑀯𑀺𑀝𑁆𑀞𑀸, 𑀕𑀫𑁆𑀪𑀻𑀭𑀢𑀭𑀸 𑀘 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀧𑀦 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀧𑀢𑁆𑀯𑀸 𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀸 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀸 𑀳𑁄𑀢𑀻𑀢𑀺? 𑀢𑀢𑁆𑀣𑀸𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀫𑀸𑀦𑀸 𑀤𑁂𑀲𑀦𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀯𑀺𑀪𑀸𑀯𑀦𑀁, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸𑀪𑀸𑀯𑀧𑁆𑀧𑀓𑀸𑀲𑀦𑀜𑁆𑀘 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸’’𑀢𑀺𑀆𑀤𑀺.

𑀆𑀧𑀚𑁆𑀚𑀸𑀢𑀺 𑀧𑀢𑁆𑀯𑀸 𑀬𑀣𑀸 𑀜𑀸𑀡𑀓𑁄𑀜𑁆𑀘𑀦𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀏𑀯𑀁 𑀧𑀸𑀧𑀼𑀡𑀺𑀢𑁆𑀯𑀸.

𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀢𑀺 𑀅𑀧𑀭𑀺𑀫𑀸𑀡𑀢𑁆𑀣𑁂 ‘‘𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪) 𑀯𑀺𑀬. 𑀅𑀧𑀭𑀺𑀫𑁂𑀬𑁆𑀬𑀪𑀸𑀯𑀚𑁄𑀢𑀦𑁄 𑀳𑀺 𑀅𑀬𑀁 𑀬𑀸𑀯-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀅𑀢𑀺𑀕𑀫𑁆𑀪𑀻𑀭𑁄 𑀅𑀢𑁆𑀣𑁄’’𑀢𑀺. 𑀅𑀯𑀪𑀸𑀲𑀢𑀻𑀢𑀺 𑀜𑀸𑀬𑀢𑀺 𑀉𑀧𑀝𑁆𑀞𑀸𑀢𑀺. 𑀜𑀸𑀡𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀦𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀏𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀏𑀓𑀦𑁆𑀢𑀕𑀫𑁆𑀪𑀻𑀭𑁄𑀯, 𑀢𑀢𑁆𑀣 𑀓𑀲𑁆𑀫𑀸 𑀕𑀫𑁆𑀪𑀻𑀭𑀸𑀯𑀪𑀸𑀲𑀢𑀸 𑀚𑁄𑀢𑀺𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀏𑀓𑀦𑁆𑀢𑀕𑀫𑁆𑀪𑀻𑀭𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀧𑀦𑀲𑁆𑀲 𑀕𑀫𑁆𑀪𑀻𑀭𑀸𑀯𑀪𑀸𑀲𑀕𑁆𑀕𑀳𑀡𑀁. 𑀢𑀲𑁆𑀫𑀸 𑀅𑀜𑁆𑀜𑀢𑁆𑀣 𑀮𑀩𑁆𑀪𑀫𑀸𑀦𑀁 𑀘𑀢𑀼𑀓𑁄𑀝𑀺𑀓𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀦𑀺𑀤𑀲𑁆𑀲𑁂𑀢𑁆𑀯𑀸 𑀢𑀁 𑀏𑀯𑀲𑁆𑀲 𑀏𑀓𑀦𑁆𑀢𑀕𑀫𑁆𑀪𑀻𑀭𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀓𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑀁 𑀦𑀢𑁆𑀣𑀻𑀢𑀺 𑀅𑀕𑀫𑁆𑀪𑀻𑀭𑁄, 𑀅𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸𑀢𑀺 𑀏𑀢𑀁 𑀤𑁆𑀯𑀬𑀁 𑀦𑀢𑁆𑀣𑀺, 𑀢𑁂𑀦 𑀬𑀣𑀸𑀤𑀲𑁆𑀲𑀺𑀢𑁂 𑀘𑀢𑀼𑀓𑁄𑀝𑀺𑀓𑁂 𑀧𑀘𑁆𑀙𑀺𑀫𑀸 𑀏𑀓 𑀓𑁄𑀝𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺.

𑀬𑁂𑀳𑀺 𑀕𑀫𑁆𑀪𑀻𑀭𑀪𑀸𑀯𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ‘‘𑀕𑀫𑁆𑀪𑀻𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑁄 ‘‘𑀪𑀯𑀕𑁆𑀕𑀕𑁆𑀕𑀳𑀡𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀪𑀯𑀕𑁆𑀕𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸 𑀤𑀽𑀭𑀪𑀸𑀯𑀢𑁄, 𑀏𑀯𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀧𑀸𑀓𑀢𑀺𑀓𑀜𑀸𑀡𑁂𑀦 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀲𑀺𑀦𑁂𑀭𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀧𑀩𑁆𑀩𑀢𑀭𑀲𑀁 𑀧𑀸𑀓𑀢𑀺𑀓𑀧𑀼𑀭𑀺𑀲𑁂𑀦 𑀦𑀻𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀢𑁂 𑀥𑀫𑁆𑀫𑀢𑁆𑀣𑀸𑀤𑀺𑀓𑁂 𑀧𑀸𑀓𑀢𑀺𑀓𑀜𑀸𑀡𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀪𑀚𑁆𑀚 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀓𑀢𑀺𑀓𑀧𑀼𑀭𑀺𑀲𑀲𑁆𑀲 𑀩𑀸𑀳𑀼𑀤𑁆𑀯𑀬𑁂𑀦 𑀧𑀥𑀸𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀯𑁂𑀧𑀼𑀮𑁆𑀮𑀝𑁆𑀞𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑀤𑀺𑀲𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀸𑀓𑀢𑀺𑀓𑀜𑀸𑀡𑁂𑀦 𑀤𑁂𑀲𑀦𑀸𑀯𑀲𑁂𑀦 𑀧𑀥𑀸𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀣𑀸 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀸𑀓𑀢𑀺𑀓𑀧𑀼𑀭𑀺𑀲𑀲𑁆𑀲 𑀧𑀣𑀯𑁄𑀚𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 ‘‘𑀇𑀢𑁆𑀣𑀁 𑀅𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄 𑀧𑀸𑀓𑀢𑀺𑀓𑀜𑀸𑀡𑁂𑀦 𑀦𑀻𑀳𑀭𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀏𑀯𑀁 𑀘𑀢𑀼𑀩𑁆𑀩𑀺𑀥𑀕𑀫𑁆𑀪𑀻𑀭𑀢𑀸𑀯𑀲𑁂𑀦 𑀘𑀢𑀲𑁆𑀲𑁄 𑀉𑀧𑀫𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀸𑀓𑀢𑀺𑀓𑀜𑀸𑀡𑀯𑀲𑁂𑀦 𑀘𑀸𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀢𑀢𑁆𑀣 𑀧𑀝𑀺𑀯𑁂𑀥𑀲𑀪𑀸𑀯𑀢𑁄, 𑀢𑀣𑀸𑀧𑀺 𑀬𑀲𑁆𑀫𑀸 𑀲𑀸𑀯𑀓𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀢𑀢𑁆𑀣 𑀲𑀧𑁆𑀧𑀤𑁂𑀲𑀫𑁂𑀯 𑀜𑀸𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀦𑀺𑀧𑁆𑀧𑀤𑁂𑀲𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀯𑀺𑀲𑀬𑀁 𑀧𑀜𑁆𑀳’’𑀦𑁆𑀢𑀺𑀆𑀤𑀺.

𑀉𑀲𑁆𑀲𑀸𑀤𑁂𑀦𑁆𑀢𑁄𑀢𑀺 𑀧𑀜𑁆𑀜𑀸𑀬 𑀉𑀓𑁆𑀓𑀁𑀲𑁂𑀦𑁆𑀢𑁄, 𑀉𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀲𑀸𑀤𑁂𑀦𑁆𑀢𑁄𑀢𑀺 𑀦𑀺𑀩𑁆𑀪𑀘𑁆𑀙𑀦𑁆𑀢𑁄, 𑀦𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀉𑀲𑁆𑀲𑀸𑀤𑀦𑀸𑀯𑀡𑁆𑀡𑀦𑀸

𑀢𑁂𑀦𑀸𑀢𑀺 𑀫𑀳𑀸𑀧𑀜𑁆𑀜𑀸𑀪𑀸𑀯𑁂𑀦. 𑀢𑀢𑁆𑀣𑀸𑀢𑀺 𑀣𑁂𑀭𑀲𑁆𑀲 𑀲𑀢𑀺𑀧𑀺 𑀉𑀢𑁆𑀢𑀸𑀦𑀪𑀸𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲𑀅𑀜𑁆𑀜𑁂𑀲𑀁 𑀕𑀫𑁆𑀪𑀻𑀭𑀪𑀸𑀯𑁂. 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑀲𑁆𑀲𑀸𑀢𑀺 𑀲𑀼𑀦𑁆𑀤𑀭𑁂𑀦 𑀪𑁄𑀚𑀦𑀭𑀲𑁂𑀦 𑀧𑁄𑀲𑀺𑀢𑀲𑁆𑀲. 𑀓𑀢𑀬𑁄𑀕𑀲𑁆𑀲𑀸𑀢𑀺 𑀦𑀺𑀩𑀤𑁆𑀥𑀧𑀬𑁄𑀕𑁂𑀦 𑀓𑀢𑀧𑀭𑀺𑀘𑀬𑀲𑁆𑀲. 𑀫𑀮𑁆𑀮𑀧𑀸𑀲𑀸𑀡𑀦𑁆𑀢𑀺 𑀫𑀮𑁆𑀮𑁂𑀳𑀺 𑀫𑀳𑀩𑁆𑀩𑀮𑁂𑀳𑁂𑀯 𑀉𑀓𑁆𑀔𑀺𑀧𑀺𑀢𑀩𑁆𑀩𑀧𑀸𑀲𑀸𑀡𑀁. 𑀓𑀼𑀳𑀺𑀁 𑀇𑀫𑀲𑁆𑀲 𑀪𑀸𑀭𑀺𑀬𑀝𑁆𑀞𑀸𑀦𑀦𑁆𑀢𑀺 𑀓𑀲𑁆𑀫𑀺𑀁 𑀧𑀲𑁆𑀲𑁂 𑀇𑀫𑀲𑁆𑀲 𑀧𑀸𑀲𑀸𑀡𑀲𑁆𑀲 𑀕𑀭𑀼𑀢𑀭𑀧𑁆𑀧𑀤𑁂𑀲𑁄𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀯𑀤𑀢𑀺.

𑀢𑀺𑀫𑀺𑀭𑀧𑀺𑀗𑁆𑀕𑀮𑁂𑀦𑁂𑀯 𑀤𑀻𑀧𑁂𑀦𑁆𑀢𑀺 𑀢𑀲𑁆𑀲 𑀫𑀳𑀸𑀯𑀺𑀧𑁆𑀨𑀸𑀭𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀧𑀓𑁆𑀓𑀼𑀣𑀢𑀻𑀢𑀺 𑀧𑀓𑁆𑀓𑀼𑀣𑀦𑁆𑀢𑀁 𑀯𑀺𑀬 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀢𑁄 𑀯𑀺𑀯𑀢𑁆𑀢𑀢𑀺. 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁. 𑀧𑀺𑀝𑁆𑀞𑀺𑀬𑀁 𑀲𑀓𑀮𑀺𑀦𑀧𑀤𑀓𑀸𑀧𑀺𑀝𑁆𑀞𑀁. 𑀓𑀸𑀬𑀽𑀧𑀧𑀦𑁆𑀦𑀲𑁆𑀲𑀸𑀢𑀺 𑀫𑀳𑀢𑀸 𑀓𑀸𑀬𑁂𑀦 𑀉𑀧𑁂𑀢𑀲𑁆𑀲, 𑀫𑀳𑀸𑀓𑀸𑀬𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀧𑀺𑀜𑁆𑀙𑀯𑀝𑁆𑀝𑀻𑀢𑀺 𑀧𑀺𑀜𑁆𑀙𑀓𑀮𑀸𑀧𑁄. 𑀲𑀼𑀧𑀡𑁆𑀡𑀯𑀸𑀢𑀦𑁆𑀢𑀺 𑀦𑀸𑀕𑀕𑁆𑀕𑀳𑀡𑀸𑀤𑀻𑀲𑀼 𑀧𑀓𑁆𑀔𑀧𑀧𑁆𑀨𑁄𑀝𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀸𑀢𑀁.

𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

‘‘𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑀓𑀸𑀭𑀡𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀯𑀭𑀺𑀢𑀼𑀁 ‘‘𑀇𑀢𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑁄𑀢𑀺 𑀇𑀢𑁄 𑀓𑀧𑁆𑀧𑀢𑁄. 𑀲𑀢𑀲𑀳𑀲𑁆𑀲𑀺𑀫𑁂𑀢𑀺 𑀲𑀢𑀲𑀳𑀲𑁆𑀲𑀫𑁂. 𑀳𑀁𑀲𑀸𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺 𑀚𑀸𑀢𑀦𑀕𑀭𑀁. 𑀥𑀼𑀭𑀧𑀢𑁆𑀢𑀸𑀦𑀻𑀢𑀺 𑀩𑀸𑀳𑀺𑀭𑀧𑀢𑁆𑀢𑀸𑀦𑀺, 𑀬𑀸𑀦𑀺 𑀤𑀻𑀖𑀢𑀫𑀸𑀦𑀺.

𑀓𑀦𑀺𑀝𑁆𑀞𑀪𑀸𑀢𑀸𑀢𑀺 𑀯𑁂𑀫𑀸𑀢𑀺𑀓𑀪𑀸𑀢𑀸 𑀓𑀦𑀺𑀝𑁆𑀞𑁄 𑀬𑀣𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀦𑀦𑁆𑀤𑀢𑁆𑀣𑁂𑀭𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀳𑁄𑀤𑀭𑀸 𑀪𑀸𑀢𑀭𑁄 𑀦𑀸𑀫 𑀦 𑀳𑁄𑀦𑁆𑀢𑀺. 𑀓𑀣𑀁 𑀚𑁂𑀝𑁆𑀞𑀸 𑀢𑀸𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀦𑀺𑀝𑁆𑀞𑀸𑀦𑀁 𑀧𑀦 𑀅𑀲𑀫𑁆𑀪𑀯𑁄 𑀏𑀯. 𑀪𑁄𑀕𑀦𑁆𑀢𑀺 𑀯𑀺𑀪𑀯𑀁. 𑀉𑀧𑀲𑀦𑁆𑀢𑁄𑀢𑀺 𑀘𑁄𑀭𑀚𑀦𑀺𑀢𑀲𑀗𑁆𑀔𑁄𑀪𑀯𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑁄 𑀚𑀦𑀧𑀤𑁄.

𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀸𑀝𑀓𑀤𑁆𑀯𑀬𑀫𑁂𑀯 𑀅𑀢𑁆𑀢𑀦𑁄 𑀓𑀸𑀬𑀧𑀭𑀺𑀳𑀸𑀭𑀺𑀓𑀁 𑀓𑀢𑁆𑀯𑀸 𑀇𑀢𑀭𑀁 𑀲𑀩𑁆𑀩𑀲𑀫𑁆𑀪𑀸𑀭𑀁 𑀅𑀢𑁆𑀢𑀢𑁄 𑀫𑁄𑀘𑁂𑀢𑁆𑀯𑀸.

𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀦𑁆𑀢𑀺 𑀅𑀦𑁆𑀢𑁄𑀧𑀓𑁆𑀔𑀺𑀢𑁆𑀢𑀉𑀡𑁆𑀳𑀪𑁄𑀚𑀦𑀢𑁆𑀢𑀸 𑀅𑀧𑀭𑀸𑀧𑀭𑀁 𑀳𑀢𑁆𑀣𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁. 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀺 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀲𑀸𑀝𑀓𑀁. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀧𑀸𑀓𑀝𑀸𑀦𑀺 𑀣𑁂𑀭𑀲𑁆𑀲 𑀧𑀼𑀜𑁆𑀜𑀓𑀭𑀡𑀝𑁆𑀞𑀸𑀦𑀸𑀦𑀺.

𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀢𑀺 𑀅𑀫𑁆𑀳𑀸𑀓𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀏𑀯 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸.

𑀢𑀺𑀢𑁆𑀣𑀯𑀸𑀲𑀸𑀤𑀺𑀯𑀡𑁆𑀡𑀦𑀸

𑀉𑀕𑁆𑀕𑀳𑀡𑀁 𑀧𑀸𑀴𑀺𑀬𑀸 𑀉𑀕𑁆𑀕𑀡𑁆𑀳𑀦𑀁. 𑀲𑀯𑀦𑀁 𑀅𑀢𑁆𑀣𑀲𑀯𑀦𑀁. 𑀧𑀭𑀺𑀧𑀼𑀘𑁆𑀙𑀦𑀁 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁. 𑀥𑀸𑀭𑀡𑀁 𑀧𑀸𑀴𑀺𑀬𑀸𑀧𑀺 𑀧𑀸𑀴𑀺𑀅𑀢𑁆𑀣𑀲𑁆𑀲𑀧𑀺 𑀘𑀺𑀢𑁆𑀢𑁂 𑀞𑀧𑀦𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀇𑀥 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀲𑁄𑀢𑀸𑀧𑀦𑁆𑀦𑀸𑀦𑀜𑁆𑀘…𑀧𑁂... 𑀉𑀧𑀝𑁆𑀞𑀸𑀢𑀺𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁂𑀦 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁯𑁮; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀘𑀽𑀴𑀦𑀺. 𑁪, 𑁭, 𑁮) 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀲𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀳 𑀧𑀘𑁆𑀘𑀬𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀅𑀯𑀩𑁄𑀥𑁄.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀫𑁆𑀪𑀻𑀭𑀢𑀸𑀯𑀡𑁆𑀡𑀦𑀸

‘‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀢𑁄 𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑀯𑀢𑁆𑀢𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄. ‘‘𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺,’’ 𑀦 𑀘 𑀚𑀸𑀢𑀺𑀁 𑀯𑀺𑀦𑀸 ‘‘𑀅𑀜𑁆𑀜𑀢𑁄 𑀳𑁄𑀢𑀻’’𑀢𑀺 𑀳𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄 𑀯𑀼𑀢𑁆𑀢𑁄, 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄, 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑁄 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑀸𑀦𑀁 𑀜𑀸𑀡𑀲𑁆𑀲 𑀢𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀢𑀸𑀬 𑀅𑀕𑀸𑀥𑀝𑁆𑀞𑁂𑀦 𑀕𑀫𑁆𑀪𑀻𑀭𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄𑀢𑀺 𑀬𑁂𑀦𑀸𑀓𑀸𑀭𑁂𑀦 𑀬𑀤𑀯𑀢𑁆𑀣𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑁂𑀦 𑀳𑀺 𑀧𑀯𑀢𑁆𑀢𑀺𑀆𑀓𑀸𑀭𑁂𑀦, 𑀬𑀸𑀬 𑀘 𑀅𑀯𑀢𑁆𑀣𑀸𑀬 𑀅𑀯𑀢𑁆𑀣𑀺𑀢𑀸 𑀅𑀯𑀺𑀚𑁆𑀚𑀸 𑀢𑁂𑀲𑀁 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀼𑀪𑀬𑀲𑁆𑀲𑀧𑀺 𑀤𑀼𑀭𑀯𑀩𑁄𑀥𑀦𑀻𑀬𑀢𑁄 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀧𑀘𑁆𑀘𑀬𑀝𑁆𑀞𑁄 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑀸𑀦𑀁 𑀜𑀸𑀡𑀲𑁆𑀲 𑀢𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀢𑀸𑀬 𑀅𑀕𑀸𑀥𑀝𑁆𑀞𑁂𑀦 𑀕𑀫𑁆𑀪𑀻𑀭𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺.

𑀓𑀢𑁆𑀣𑀘𑀺 𑀅𑀦𑀼𑀮𑁄𑀫𑀢𑁄 𑀤𑁂𑀲𑀻𑀬𑀢𑀺, 𑀓𑀢𑁆𑀣𑀘𑀺 𑀧𑀝𑀺𑀮𑁄𑀫𑀢𑁄𑀢𑀺 𑀇𑀥 𑀧𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑁄 𑀅𑀦𑀼𑀮𑁄𑀫𑁄, 𑀧𑀘𑁆𑀘𑀬𑀦𑀺𑀭𑁄𑀥𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀘 𑀧𑀝𑀺𑀮𑁄𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬 𑀅𑀦𑁆𑀢𑀕𑀫𑀦𑀁 𑀅𑀦𑀼𑀮𑁄𑀫𑁄, 𑀅𑀦𑁆𑀢𑀢𑁄 𑀘 𑀆𑀤𑀺𑀕𑀫𑀦𑀁 𑀧𑀝𑀺𑀮𑁄𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸𑀬, 𑀅𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸𑀬 𑀘 𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑁄. ‘‘𑀇𑀫𑁂 𑀪𑀺𑀓𑁆𑀔𑀯𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁 𑀦𑀺𑀤𑀸𑀦𑀸’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁨.𑁧𑁧) 𑀘 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸𑀬, ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁨.𑁪𑁩, 𑁪𑁫) 𑀅𑀦𑀼𑀮𑁄𑀫𑀤𑁂𑀲𑀦𑀸𑀬 𑀘 𑀤𑁆𑀯𑀺𑀲𑀦𑁆𑀥𑀺 𑀢𑀺𑀲𑀗𑁆𑀔𑁂𑀧𑁄. ‘‘𑀲𑀁𑀬𑁄𑀚𑀦𑀺𑀬𑁂𑀲𑀼 𑀪𑀺𑀓𑁆𑀔𑀯𑁂 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁩, 𑁫𑁭) 𑀏𑀓𑀲𑀦𑁆𑀥𑀺 𑀤𑁆𑀯𑀺𑀲𑀗𑁆𑀔𑁂𑀧𑁄. 𑀏𑀓𑀗𑁆𑀕𑁄 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄. 𑀮𑀩𑁆𑀪𑀢𑁂𑀯 𑀳𑀺 𑀲𑁄 ‘‘𑀢𑀢𑁆𑀭 𑀪𑀺𑀓𑁆𑀔𑀯𑁂 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺…𑀧𑁂… 𑀦𑀺𑀭𑀼𑀚𑁆𑀛𑀢𑀻’𑀢𑀺. 𑀲𑀼𑀔𑀯𑁂𑀤𑀦𑀺𑀬𑀁 𑀪𑀺𑀓𑁆𑀔𑀯𑁂 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸’’𑀢𑀺 (𑀲𑀁. 𑀦𑀺. 𑁨.𑁬𑁨) 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸 𑀢𑀣𑀸 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀦𑀸𑀬 𑀕𑀫𑁆𑀪𑀻𑀭𑁄. 𑀢𑁂𑀦𑀸𑀳 ‘‘𑀅𑀬𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸’’𑀢𑀺. 𑀦 𑀳𑀺 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀢𑁄 𑀅𑀜𑁆𑀜𑀁 𑀜𑀸𑀡𑀁 𑀧𑀢𑀺𑀝𑁆𑀞𑀁 𑀮𑀪𑀢𑀺.

‘‘𑀅𑀯𑀺𑀚𑁆𑀚𑀸𑀬 𑀧𑀦𑀸’’𑀢𑀺𑀆𑀤𑀻𑀲𑀼 𑀚𑀸𑀦𑀦𑀮𑀓𑁆𑀔𑀡𑀲𑁆𑀲 𑀜𑀸𑀡𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀝𑁆𑀞𑁄. 𑀆𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀤𑀲𑁆𑀲𑀦𑀪𑀽𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀤𑀲𑁆𑀲𑀦𑀝𑁆𑀞𑁄. 𑀬𑁂𑀦𑁂𑀲𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀤𑀼𑀓𑁆𑀔𑀸𑀤𑀻𑀦𑀁 𑀬𑀸𑀣𑀸𑀯𑀲𑀭𑀲𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀢𑀲𑁆𑀲𑀸 𑀲𑀘𑁆𑀘𑀸𑀲𑀫𑁆𑀧𑀝𑀺𑀯𑁂𑀥𑀝𑁆𑀞𑁄. 𑀅𑀪𑀺𑀲𑀗𑁆𑀔𑀭𑀡𑀁 𑀲𑀁𑀯𑀺𑀥𑀸𑀦𑀁, 𑀧𑀓𑀧𑁆𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀬𑀽𑀳𑀦𑀁 𑀲𑀫𑁆𑀧𑀺𑀡𑁆𑀟𑀦𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀦𑀼𑀭𑀽𑀧𑀢𑀸𑀬 𑀭𑀸𑀲𑀻𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀓𑀤𑁂𑀲𑁄 𑀲𑀭𑀸𑀕𑁄. 𑀅𑀜𑁆𑀜𑁄 𑀯𑀺𑀭𑀸𑀕𑁄. 𑀭𑀸𑀕𑀲𑁆𑀲 𑀯𑀸 𑀅𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀭𑀸𑀕𑀧𑁆𑀧𑀯𑀟𑁆𑀠𑀓𑁄, 𑀭𑀸𑀕𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑁄 𑀘 𑀲𑀩𑁆𑀩𑁄𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀭𑀸𑀕𑁄. 𑀇𑀢𑀭𑁄 𑀢𑀩𑁆𑀩𑀺𑀤𑀽𑀭𑀪𑀸𑀯𑀢𑁄 𑀯𑀺𑀭𑀸𑀕𑁄. ‘‘𑀤𑀻𑀖𑀭𑀢𑁆𑀢𑀁 𑀳𑁂𑀢𑀁 𑀪𑀺𑀓𑁆𑀔𑀯𑁂 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺’’ (𑀲𑀁. 𑀦𑀺. 𑁨.𑁬𑁧) 𑀅𑀢𑁆𑀢𑀧𑀭𑀸𑀫𑀸𑀲𑀲𑁆𑀲 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑀢𑁄 𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀝𑁆𑀞𑁄 𑀕𑀫𑁆𑀪𑀻𑀭𑁄. 𑀅𑀢𑁆𑀢𑀸 𑀯𑀺𑀚𑀸𑀦𑀸𑀢𑀺 𑀲𑀁𑀲𑀭𑀢𑀻𑀢𑀺 𑀲𑀩𑁆𑀬𑀸𑀧𑀸𑀭𑀢𑀸𑀲𑀗𑁆𑀓𑀦𑁆𑀢𑀺𑀅𑀪𑀺𑀦𑀺𑀯𑁂𑀲𑀩𑀮𑀯𑀢𑀸𑀬 𑀅𑀩𑁆𑀬𑀸𑀧𑀸𑀭𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑀸 𑀘 𑀕𑀫𑁆𑀪𑀻𑀭𑀸. 𑀦𑀸𑀫𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀓𑀢𑁄𑀯 𑀉𑀧𑁆𑀧𑀸𑀤𑁄 𑀏𑀓𑀼𑀧𑁆𑀧𑀸𑀤𑁄, 𑀧𑀯𑀢𑁆𑀢𑀺𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀬𑀣𑀸𑀭𑀳𑀁 𑀏𑀓𑀼𑀧𑁆𑀧𑀸𑀤𑁄. 𑀦𑀸𑀫𑀲𑁆𑀲 𑀭𑀽𑀧𑁂𑀦, 𑀭𑀽𑀧𑀲𑁆𑀲 𑀘 𑀦𑀸𑀫𑁂𑀦 𑀅𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀩𑁆𑀪𑁄𑀕𑁄 𑀦𑀸𑀫𑀲𑁆𑀲 𑀦𑀸𑀫𑁂𑀦, 𑀭𑀽𑀧𑀲𑁆𑀲 𑀘 𑀭𑀽𑀧𑁂𑀦 𑀏𑀓𑀘𑁆𑀘𑀲𑁆𑀲 𑀏𑀓𑀘𑁆𑀘𑁂𑀦 𑀅𑀯𑀺𑀦𑀺𑀩𑁆𑀪𑁄𑀕𑁄 (𑀦𑀸𑀫𑀲𑁆𑀲 𑀦𑀸𑀫𑁂𑀦 𑀅𑀯𑀺𑀦𑀺𑀩𑁆𑀪𑁄𑀕𑁄 𑀯𑀺𑀪. 𑀫𑀽𑀮𑀝𑀻. 𑁨𑁪𑁨) 𑀬𑁄𑀚𑁂𑀢𑀩𑁆𑀩𑁄. 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑁂𑀳𑀺 𑀅𑀯𑀺𑀦𑀺𑀩𑁆𑀪𑁄𑀕𑁂 𑀅𑀥𑀺𑀧𑁆𑀧𑁂𑀢𑁂 𑀲𑁄 𑀭𑀽𑀧𑀲𑁆𑀲 𑀘 𑀏𑀓𑀓𑀮𑀸𑀧𑀧𑀯𑀢𑁆𑀢𑀺𑀦𑁄 𑀭𑀽𑀧𑁂𑀦 𑀮𑀩𑁆𑀪𑀢𑀻𑀢𑀺. 𑀅𑀣 𑀯𑀸 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀦𑀸𑀫𑀭𑀽𑀧𑀸𑀦𑀁 𑀅𑀲𑀳𑀯𑀢𑁆𑀢𑀦𑀢𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀺𑀩𑁆𑀪𑁄𑀕𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀳𑀯𑀢𑁆𑀢𑀦𑀢𑁄 𑀅𑀯𑀺𑀦𑀺𑀩𑁆𑀪𑁄𑀕𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀦𑀸𑀫𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀁 𑀦𑀫𑀦𑀝𑁆𑀞𑁄. 𑀭𑀽𑀧𑀲𑁆𑀲 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀝𑁆𑀞𑁄. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀅𑀥𑀺𑀧𑀢𑀺𑀬𑀝𑁆𑀞𑁄. ‘‘𑀮𑁄𑀓𑁄𑀧𑁂𑀲𑁄, 𑀤𑁆𑀯𑀸𑀭𑀸𑀧𑁂𑀲𑀸, 𑀔𑁂𑀢𑁆𑀢𑀁 𑀧𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀮𑁄𑀓𑀸𑀤𑀺𑀅𑀢𑁆𑀣𑁄 𑀘𑀓𑁆𑀔𑀸𑀤𑀻𑀲𑀼 𑀧𑀜𑁆𑀘𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀫𑀦𑀸𑀬𑀢𑀦𑀲𑁆𑀲 𑀧𑀦 𑀮𑀼𑀚𑁆𑀚𑀦𑀢𑁄, 𑀫𑀦𑁄𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀤𑁆𑀯𑀸𑀭𑀔𑁂𑀢𑁆𑀢𑀪𑀸𑀯𑀢𑁄 𑀘 𑀏𑀢𑁂 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀧𑀓𑀸𑀲𑀦𑀬𑁄𑀕𑁆𑀬𑀢𑀸𑀮𑀓𑁆𑀔𑀡𑀁 𑀑𑀪𑀸𑀲𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑀺𑀪𑀸𑀯𑁄, 𑀫𑀦𑀸𑀬𑀢𑀦𑀲𑁆𑀲 𑀯𑀺𑀚𑀸𑀦𑀦𑀁. 𑀲𑀗𑁆𑀖𑀝𑁆𑀝𑀦𑀝𑁆𑀞𑁄 𑀯𑀺𑀲𑁂𑀲𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁, 𑀇𑀢𑀭𑁂 𑀙𑀦𑁆𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀨𑀼𑀲𑀦𑀜𑁆𑀘 𑀨𑀲𑁆𑀲𑀲𑁆𑀲 𑀲𑀪𑀸𑀯𑁄. 𑀲𑀗𑁆𑀖𑀝𑁆𑀝𑀦𑀁 𑀭𑀲𑁄, 𑀇𑀢𑀭𑁂 𑀉𑀧𑀝𑁆𑀞𑀸𑀦𑀸𑀓𑀸𑀭𑀸. 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑁄 𑀭𑀲𑀯𑀲𑁂𑀦 𑀯𑀼𑀢𑁆𑀢𑁄, 𑀯𑁂𑀤𑀬𑀺𑀢𑀝𑁆𑀞𑁄 𑀮𑀓𑁆𑀔𑀡𑀯𑀲𑁂𑀦. 𑀲𑀼𑀔𑀤𑀼𑀓𑁆𑀔𑀫 𑀅𑀚𑁆𑀛𑀢𑁆𑀢𑀪𑀸𑀯𑁄 𑀬𑀣𑀸𑀓𑁆𑀓𑀫𑀁 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀅𑀢𑁆𑀢𑀸 𑀯𑁂𑀤𑀬𑀢𑀻’’𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀢𑁄 𑀦𑀺𑀚𑁆𑀚𑀻𑀯𑀝𑁆𑀞𑁄 𑀯𑁂𑀤𑀦𑀸𑀬 𑀕𑀫𑁆𑀪𑀻𑀭𑁄. 𑀦𑀺𑀚𑁆𑀚𑀻𑀯𑀸𑀬 𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀁 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀁, 𑀲𑁄 𑀏𑀯 𑀅𑀢𑁆𑀣𑁄𑀢𑀺 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄.

𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀺𑀢𑀝𑁆𑀞𑁄. 𑀩𑀮𑀯𑀢𑀭𑀢𑀡𑁆𑀳𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀁 𑀅𑀚𑁆𑀛𑁄𑀲𑀸𑀦𑀝𑁆𑀞𑁄. 𑀇𑀢𑀭𑁂 𑀧𑀦 𑀚𑁂𑀝𑁆𑀞𑀪𑀸𑀯𑀑𑀲𑀸𑀭𑀡𑀲𑀫𑀼𑀤𑁆𑀤𑀤𑀼𑀭𑀢𑀺𑀓𑁆𑀓𑀫𑀅𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀆𑀤𑀸𑀦𑀕𑁆𑀕𑀳𑀡𑀸𑀪𑀺𑀦𑀺𑀯𑁂𑀲𑀝𑁆𑀞𑀸 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀲𑀫𑀸𑀦𑀸, 𑀧𑀭𑀸𑀫𑀸𑀲𑀝𑁆𑀞𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀫𑁂𑀯, 𑀢𑀣𑀸 𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄. ‘‘𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄’’𑀢𑀺 (𑀥. 𑀲. 𑁩𑁯𑁨) 𑀳𑀺 𑀯𑀘𑀦𑀢𑁄 𑀤𑀺𑀝𑁆𑀞𑀻𑀦𑀁 𑀤𑀼𑀭𑀢𑀺𑀓𑁆𑀓𑀫𑀢𑀸. 𑀤𑀴𑁆𑀳𑀕𑁆𑀕𑀳𑀡𑀢𑁆𑀢𑀸 𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼𑀔𑀺𑀧𑀦𑀦𑁆𑀢𑀺 𑀲𑀫𑀸𑀲𑁂 𑀪𑀼𑀫𑁆𑀫𑀯𑀘𑀦𑀲𑁆𑀲 𑀅𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀢𑁂𑀦 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀧𑀤𑀸𑀦𑀁 𑀲𑀫𑀸𑀲𑁄 𑀳𑁄𑀢𑀺. 𑀬𑀣𑀸 𑀢𑀣𑀸 𑀚𑀸𑀬𑀦𑀁 𑀚𑀸𑀢𑀺𑀅𑀢𑁆𑀣𑁄. 𑀢𑀲𑁆𑀲𑀸 𑀧𑀦 𑀲𑀦𑁆𑀦𑀺𑀧𑀸𑀢𑀢𑁄 𑀚𑀸𑀬𑀦𑀁 𑀲𑀜𑁆𑀚𑀸𑀢𑀺𑀅𑀢𑁆𑀣𑁄. 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀬 𑀚𑀸𑀬𑀦𑀁 𑀑𑀓𑁆𑀓𑀦𑁆𑀢𑀺𑀅𑀢𑁆𑀣𑁄. 𑀲𑁄 𑀚𑀸𑀢𑀺𑀢𑁄 𑀦𑀺𑀩𑁆𑀩𑀢𑁆𑀢𑀦𑀁 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁄. 𑀓𑁂𑀯𑀮𑀁 𑀧𑀸𑀢𑀼𑀪𑀯𑀦𑀁 𑀧𑀸𑀢𑀼𑀪𑀸𑀯𑀝𑁆𑀞𑁄.

𑀚𑀭𑀸𑀫𑀭𑀡𑀗𑁆𑀕𑀁 𑀫𑀭𑀡𑀧𑁆𑀧𑀥𑀸𑀦𑀦𑁆𑀢𑀺 𑀢𑀲𑁆𑀲 𑀫𑀭𑀡𑀝𑁆𑀞𑀸 𑀏𑀯 𑀔𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀤𑀲𑁆𑀲𑀺𑀢𑀸. 𑀉𑀧𑁆𑀧𑀦𑁆𑀦𑀉𑀧𑁆𑀧𑀦𑁆𑀦𑀸𑀦𑀜𑁆𑀳𑀺 𑀦𑀯𑀦𑀯𑀸𑀦𑀁 𑀔𑀬𑁂𑀦 𑀓𑀫𑁂𑀦 𑀔𑀡𑁆𑀟𑀺𑀘𑁆𑀘𑀸𑀤𑀺𑀧𑀭𑀺𑀧𑀓𑁆𑀓𑀧𑀯𑀢𑁆𑀢𑀺𑀬𑀁 𑀮𑁄𑀓𑁂 𑀚𑀭𑀸𑀯𑁄𑀳𑀸𑀭𑁄𑀢𑀺. 𑀔𑀬𑀝𑁆𑀞𑁄 𑀯𑀸 𑀚𑀭𑀸𑀬 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀯𑀪𑀸𑀯𑀸𑀧𑀕𑀫𑁄 𑀳𑀺 ‘‘𑀔𑀬𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄, 𑀲𑀦𑁆𑀢𑀢𑀺𑀯𑀲𑁂𑀦 𑀯𑀸 𑀚𑀭𑀸𑀬 𑀔𑀬𑀯𑀬𑀪𑀸𑀯𑀸, 𑀲𑀫𑁆𑀫𑀼𑀢𑀺𑀔𑀡𑀺𑀓𑀯𑀲𑁂𑀦 𑀫𑀭𑀡𑀲𑁆𑀲 𑀪𑁂𑀤𑀯𑀺𑀧𑀭𑀺𑀡𑀸𑀫𑀝𑁆𑀞𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑀸𑀦𑀓𑀣𑀸𑀬𑀁 ‘‘𑀢𑁂𑀲𑀁 𑀢𑁂𑀲𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀧𑀝𑀺𑀯𑁂𑀥𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀅𑀪𑀺. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀲𑁄 𑀳𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄 𑀫𑀕𑁆𑀕𑀜𑀸𑀡𑁂𑀦𑁂𑀯 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁄 𑀅𑀜𑁆𑀜𑀸𑀡𑀲𑁆𑀲 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀢𑀸𑀬 𑀅𑀕𑀸𑀥𑀝𑁆𑀞𑁂𑀦 𑀕𑀫𑁆𑀪𑀻𑀭𑁄. 𑀲𑀸 𑀲𑀩𑁆𑀩𑀸𑀧𑀻𑀢𑀺 𑀲𑀸 𑀬𑀣𑀸𑀯𑀼𑀢𑁆𑀢𑀸 𑀲𑀗𑁆𑀔𑁂𑀧𑀢𑁄 𑀘𑀢𑀼𑀩𑁆𑀩𑀺𑀥𑀸 𑀯𑀺𑀢𑁆𑀣𑀸𑀭𑀢𑁄 𑀅𑀦𑁂𑀓𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀕𑀫𑁆𑀪𑀻𑀭𑀢𑀸 𑀣𑁂𑀭𑀲𑁆𑀲 𑀉𑀢𑁆𑀢𑀸𑀦𑀓𑀸 𑀯𑀺𑀬 𑀉𑀧𑀝𑁆𑀞𑀸𑀲𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻𑀢𑀺 ‘‘𑀫𑀬𑁆𑀳𑀁 𑀢𑀸𑀯 𑀏𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀓𑀺𑀁 𑀦𑀼 𑀔𑁄 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀁 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻’’𑀢𑀺 𑀫𑀸 𑀏𑀯𑀁 𑀅𑀯𑀘 𑀫𑀬𑀸𑀯 𑀤𑀺𑀦𑁆𑀦𑀦𑀬𑁂 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀺𑀫𑁆𑀳𑀺 𑀞𑀢𑁆𑀯𑀸.

𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸

𑀑𑀴𑀸𑀭𑀺𑀓𑀦𑁆𑀢𑀺 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀫𑀢𑁆𑀣𑀢𑀸𑀯𑀲𑁂𑀦 𑀣𑀽𑀮𑀁. 𑀓𑀸𑀫𑀁 𑀓𑀸𑀫𑀭𑀸𑀕𑀧𑀝𑀺𑀖𑀸𑀬𑁂𑀯 𑀅𑀢𑁆𑀣𑀢𑁄 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺, 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸 𑀘, 𑀢𑀣𑀸𑀧𑀺 𑀅𑀜𑁆𑀜𑁄𑀬𑁂𑀯 𑀲𑀁𑀬𑁄𑀚𑀦𑀝𑁆𑀞𑁄 𑀩𑀦𑁆𑀥𑀦𑀪𑀸𑀯𑀢𑁄, 𑀅𑀜𑁆𑀜𑁄 𑀅𑀦𑀼𑀲𑀬𑀦𑀝𑁆𑀞𑁄 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀣𑀸𑀫𑀕𑀫𑀦𑀦𑁆𑀢𑀺 𑀓𑀢𑁆𑀯𑀸, 𑀇𑀢𑀺 𑀓𑀺𑀘𑁆𑀘𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀪𑁂𑀤𑁂 𑀕𑀳𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂’’𑀢𑀺 𑀘 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀲𑀪𑀸𑀯𑀁 𑀉𑀧𑀕𑀢𑁂. 𑀢𑀩𑁆𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀲𑀳𑀕𑀢-𑀲𑀤𑁆𑀤𑁄 ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁯𑁧, 𑁧𑁩𑁩, 𑁪𑁬𑁦; 𑁩.𑁩𑁭𑁪; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁪; 𑀯𑀺𑀪. 𑁨𑁦𑁩; 𑀧𑀝𑀺. 𑀫. 𑁧.𑁩𑁪; 𑁨.𑁩𑁦) 𑀯𑀺𑀬.

𑀬𑀣𑀸 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀦𑀯𑀲𑁂𑀦 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀯𑀲𑁂𑀦, 𑀏𑀯𑀁 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀅𑀥𑀺𑀕𑀫𑀦𑀯𑀲𑁂𑀦𑀧𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀣𑀸𑀯𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑁂𑀯 𑀓𑀺𑀜𑁆𑀘𑀺𑀧𑀺 𑀧𑀓𑀸𑀭𑀁 𑀅𑀲𑁂𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀻𑀭𑀺𑀬𑀲𑁆𑀲 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀫𑀼𑀤𑀼𑀢𑀸𑀯𑀲𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑁂 𑀓𑀸𑀮𑀪𑁂𑀤𑀸 𑀇𑀘𑁆𑀙𑀺𑀢𑀸, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑀺, 𑀅𑀝𑁆𑀞, 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 𑀆𑀳, 𑀲𑁆𑀯𑀸𑀬𑀫𑀢𑁆𑀣𑁄 𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀬 𑀕𑀳𑁂𑀢𑀩𑁆𑀩𑁄. 𑀲𑀸𑀯𑀓𑁄 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄𑀢𑀺 𑀲𑀸𑀯𑀓𑁄 𑀳𑀼𑀢𑁆𑀯𑀸 𑀲𑁂𑀓𑁆𑀔𑀪𑀸𑀯𑀢𑁄 𑀢𑀢𑁆𑀣𑀸𑀧𑀺 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄. 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 ‘‘𑀢𑀁 𑀢𑀣𑀸𑀕𑀢𑁄 𑀅𑀪𑀺𑀲𑀫𑁂𑀢𑀻’’𑀢𑀺𑀆𑀤𑀺𑀓𑀸𑀬 𑀧𑀘𑁆𑀘𑀦𑀻𑀓𑀁 𑀳𑁄𑀢𑀺. 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑁆𑀲 𑀳𑀺 𑀯𑀲𑁂𑀦 𑀩𑀼𑀤𑁆𑀥𑀸𑀦𑀁 𑀲𑀻𑀳𑀦𑀸𑀤𑁄, 𑀦 𑀅𑀜𑁆𑀜𑀲𑀸𑀥𑀸𑀭𑀡𑀲𑁆𑀲.

‘‘𑀯𑀸𑀬𑀫𑀦𑁆𑀢𑀲𑁆𑀲𑁂𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀢𑁄 𑀜𑀸𑀡𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀧𑀽𑀭𑀡𑀁 𑀯𑀤𑀢𑀺. 𑀢𑀲𑁆𑀲 𑀘 𑀲𑀩𑁆𑀩𑀫𑁆𑀧𑀺 𑀧𑀼𑀜𑁆𑀜𑀁 𑀉𑀧𑀦𑀺𑀲𑁆𑀲𑀬𑁄.

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦) 𑁋

𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀬𑀸𑀯𑀤𑁂𑀯 𑀜𑀸𑀡𑀲𑀫𑁆𑀪𑀸𑀭𑀢𑁆𑀣𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀲𑀫𑀢𑁆𑀣𑀢𑁆𑀢𑀸𑀢𑀺 𑀆𑀳 ‘‘𑀧𑀘𑁆𑀘𑀬𑀸𑀓𑀸𑀭𑀁 …𑀧𑁂… 𑀦𑀢𑁆𑀣𑀻’’𑀢𑀺. 𑀇𑀤𑀸𑀦𑀺 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀲𑁆𑀲𑁂𑀯 𑀯𑀸 𑀫𑀳𑀸𑀦𑀼𑀪𑀸𑀯𑀢𑀸𑀤𑀲𑁆𑀲𑀦𑀫𑀼𑀔𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲𑁂𑀯 𑀧𑀭𑀫𑀕𑀫𑁆𑀪𑀻𑀭𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀯𑀳𑀺 𑀆𑀓𑀸𑀭𑁂𑀳𑀻𑀢𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺. 𑀅𑀯𑀺𑀚𑁆𑀚𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀯𑀢𑁆𑀢𑀁 𑀳𑀼𑀢𑁆𑀯𑀸 𑀦𑀺𑀫𑀺𑀢𑁆𑀢𑀁, 𑀆𑀬𑀽𑀳𑀦𑀁, 𑀲𑀁𑀬𑁄𑀕𑁄, 𑀧𑀮𑀺𑀩𑁄𑀥𑁄, 𑀲𑀫𑀼𑀤𑀬𑁄, 𑀳𑁂𑀢𑀼, 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀲𑀗𑁆𑀔𑀸𑀭𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀓𑀣𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁? 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀜𑁆𑀜𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁪𑁫).

𑀢𑀢𑁆𑀣 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀦𑀯𑀳𑀺 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀸𑀓𑀸𑀭𑁂𑀳𑀺. 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀉𑀧𑁆𑀧𑀸𑀤𑁄, 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁄. 𑀲𑀢𑀺 𑀘 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀺, 𑀦𑀻𑀬𑀦𑁆𑀢𑀺 𑀘. 𑀬𑀣𑀸 𑀘 𑀪𑀯𑀸𑀤𑀻𑀲𑀼 𑀔𑀺𑀧𑀦𑁆𑀢𑀺, 𑀏𑀯𑀁 𑀢𑁂𑀲𑀁 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀆𑀬𑀽𑀳𑀦𑁆𑀢𑀺 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀖𑀝𑁂𑀦𑁆𑀢𑀺, 𑀲𑀁𑀬𑀼𑀚𑁆𑀚𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑁂𑀦. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑀁 𑀧𑀮𑀺𑀩𑀼𑀦𑁆𑀥𑀦𑁆𑀢𑀺. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀉𑀤𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀳𑀺𑀦𑁄𑀢𑀺 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀺. 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀁 𑀲𑀗𑁆𑀔𑀸𑀭𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀯𑀺𑀲𑁂𑀲𑀸 𑀉𑀧𑁆𑀧𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀆𑀤𑀻𑀲𑀼𑀧𑀺. 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀓𑀸𑀭𑀡𑀁. 𑀉𑀧𑁆𑀧𑀸𑀤𑁄 𑀏𑀯 𑀞𑀺𑀢𑀺 𑀉𑀧𑁆𑀧𑀸𑀤𑀝𑁆𑀞𑀺𑀢𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀇𑀤𑀁 𑀇𑀥 𑀮𑁄𑀓𑀦𑀸𑀣𑁂𑀦 𑀢𑀤𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲 𑀆𑀭𑀤𑁆𑀥𑀪𑀸𑀯𑀤𑀲𑁆𑀲𑀦𑀁. 𑀲𑁄 𑀘 𑀆𑀭𑀫𑁆𑀪𑁄 𑀜𑀸𑀬𑀸𑀭𑀼𑀴𑁆𑀳𑁄 ‘‘𑀬𑀣𑀸 𑀘 𑀧𑀼𑀭𑀺𑀫𑁂𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀳𑀺 𑀩𑁄𑀥𑀺𑀫𑀽𑀮𑁂 𑀧𑀯𑀢𑁆𑀢𑀺𑀢𑁄, 𑀢𑀣𑁂𑀯 𑀘 𑀧𑀯𑀢𑁆𑀢𑀺𑀢𑁄’’𑀢𑀺. 𑀅𑀘𑁆𑀙𑀭𑀺𑀬𑀯𑁂𑀕𑀸𑀪𑀺𑀳𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀫𑀢𑁆𑀢𑁂𑀯𑀸’’𑀢𑀺𑀆𑀤𑀺𑀫𑀸𑀳.

𑀏𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀲𑁆𑀲 𑀥𑀫𑁆𑀫𑀲𑁆𑀲. 𑀲𑁄 𑀧𑀦 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀳𑁂𑀢𑀼𑀧𑀪𑀯𑀸𑀦𑀁 𑀳𑁂𑀢𑀼. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲𑀸’’𑀢𑀺, 𑀚𑀸𑀢𑀺𑀆𑀤𑀻𑀦𑀁 𑀚𑀭𑀸𑀫𑀭𑀡𑀸𑀤𑀺𑀧𑀘𑁆𑀘𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀲 𑀘 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀦 𑀧𑀞𑀫𑀸𑀪𑀺𑀦𑀺𑀯𑁂𑀲𑀫𑀢𑁆𑀢𑁂𑀦 𑀳𑁄𑀢𑀺, 𑀅𑀣 𑀔𑁄 𑀢𑀢𑁆𑀣 𑀅𑀧𑀭𑀸𑀧𑀭𑀁 𑀜𑀸𑀡𑀼𑀧𑁆𑀧𑀢𑁆𑀢𑀺𑀲𑀜𑁆𑀜𑀺𑀢𑁂𑀦 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑁂𑀦, 𑀢𑀤𑀼𑀪𑀬𑀸𑀪𑀸𑀯𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀦𑀦𑀼𑀩𑀼𑀚𑁆𑀛𑀦𑀸’’𑀢𑀺 𑀆𑀳. 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀚𑀳𑀦𑀯𑀲𑁂𑀦 𑀯𑀢𑁆𑀢𑀫𑀸𑀦𑀸 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑁂 𑀘 𑀧𑀝𑀺𑀯𑀺𑀚𑁆𑀛𑀦𑁆𑀢𑀻 𑀏𑀯 𑀦𑀸𑀫 𑀳𑁄𑀢𑀺 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑁂𑀦 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀢𑁄, 𑀢𑀤𑀥𑀺𑀝𑁆𑀞𑀸𑀦𑀪𑀽𑀢𑀸 𑀘 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀅𑀭𑀺𑀬𑀫𑀕𑁆𑀕𑁄 𑀘 𑀧𑀭𑀺𑀜𑁆𑀜𑀸𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀲𑀗𑁆𑀕𑀳𑁄 𑀘𑀸𑀢𑀺 𑀢𑀤𑀼𑀪𑀬𑀧𑀝𑀺𑀯𑁂𑀥𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀭𑀡…𑀧𑁂… 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀸’’𑀢𑀺 𑀆𑀳. 𑀢𑀦𑁆𑀢𑀁 𑀯𑀼𑀘𑁆𑀘𑀢𑀺 𑀯𑀢𑁆𑀣𑀯𑀻𑀦𑀦𑀢𑁆𑀣𑀁 𑀢𑀦𑁆𑀢𑀯𑀸𑀬𑁂𑀳𑀺 𑀤𑀡𑁆𑀟𑀓𑁂 𑀆𑀲𑀜𑁆𑀚𑀺𑀢𑁆𑀯𑀸 𑀧𑀲𑀸𑀭𑀺𑀢𑀲𑀼𑀢𑁆𑀢𑀧𑀝𑁆𑀝𑀻 𑀢𑀦𑀻𑀬𑀢𑀻𑀢𑀺 𑀓𑀢𑁆𑀯𑀸. 𑀢𑀁 𑀧𑀦 𑀲𑀼𑀢𑁆𑀢𑀲𑀦𑁆𑀢𑀸𑀦𑀸𑀓𑀼𑀮𑀢𑀸𑀬 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀆𑀓𑀼𑀮𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀓𑀚𑀸𑀢𑀸’’𑀢𑀺. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀸𑀦𑁂𑀢𑀼𑀦𑁆𑀢𑀺 𑀧𑀼𑀩𑁆𑀩𑁂𑀦 𑀧𑀭𑀁 𑀲𑀫𑀁 𑀓𑀢𑁆𑀯𑀸 𑀆𑀦𑁂𑀢𑀼𑀁, 𑀅𑀯𑀺𑀲𑀫𑀁 𑀉𑀚𑀼𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀫𑁂𑀯 𑀯𑀸 𑀆𑀓𑀼𑀮𑀁 𑀢𑀦𑁆𑀢𑀸𑀓𑀼𑀮𑀁, 𑀢𑀦𑁆𑀢𑀸𑀓𑀼𑀮𑀁 𑀯𑀺𑀬 𑀚𑀸𑀢𑀸 𑀪𑀽𑀢𑀸𑀢𑀺 𑀢𑀦𑁆𑀢𑀸𑀓𑀼𑀮𑀚𑀸𑀢𑀸. 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑀤𑁆𑀯𑀬𑀧𑀢𑀦𑁂𑀦 𑀧𑀘𑁆𑀘𑀬𑀸𑀓𑀸𑀭𑁂 𑀔𑀮𑀺𑀢𑀸 𑀆𑀓𑀼𑀮𑀸 𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀅𑀦𑁆𑀢𑀤𑁆𑀯𑀬𑀧𑀢𑀦𑁂𑀦 𑀢𑀁𑀢𑀁𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀸 𑀉𑀚𑀼𑀓𑀁 𑀥𑀫𑁆𑀫𑀝𑁆𑀞𑀺𑀢𑀺 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀦 𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼’’𑀦𑁆𑀢𑀺. 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂𑀢𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀫𑀳𑀸𑀩𑁄𑀥𑀺𑀲𑀢𑁆𑀢𑁂. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦, 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣 𑀕𑀼𑀴𑀓𑀚𑀸𑀢𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀚𑀸𑀢𑀕𑀼𑀴𑀓𑀫𑁆𑀧𑀺 𑀕𑀡𑁆𑀞𑀻𑀢𑀺 𑀲𑀼𑀢𑁆𑀢𑀕𑀡𑁆𑀞𑀺. 𑀢𑀢𑁄 𑀏𑀯 𑀕𑀡𑁆𑀞𑀺𑀩𑀤𑁆𑀥𑀁 𑀩𑀤𑁆𑀥𑀕𑀡𑁆𑀞𑀺𑀓𑀁. 𑀧𑀘𑁆𑀘𑀬𑁂𑀲𑀼 𑀧𑀓𑁆𑀔𑀮𑀺𑀢𑁆𑀯𑀸𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀤𑀺𑀲𑀪𑀸𑀯𑁂𑀲𑀼 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀧𑀓𑁆𑀔𑀮𑀺𑀢𑁆𑀯𑀸. 𑀧𑀘𑁆𑀘𑀬𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀢𑀺 𑀢𑀲𑁆𑀲𑁂𑀯 𑀦𑀺𑀘𑁆𑀘𑀸𑀤𑀺𑀕𑁆𑀕𑀸𑀳𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀢𑁄 𑀧𑀘𑁆𑀘𑀬𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀯𑀲𑁂𑀦 𑀕𑀡𑁆𑀞𑀺𑀓𑀚𑀸𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺…𑀧𑁂… 𑀕𑀡𑁆𑀞𑀺𑀩𑀤𑁆𑀥𑀸’’𑀢𑀺. 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀺𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸.

𑀯𑀺𑀦𑀦𑀢𑁄 ‘‘𑀓𑀼𑀮𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀢𑀦𑁆𑀢𑀯𑀸𑀬𑀲𑁆𑀲 𑀕𑀡𑁆𑀞𑀺𑀓𑀁 𑀦𑀸𑀫 𑀆𑀓𑀼𑀮𑀪𑀸𑀯𑁂𑀦 𑀅𑀕𑁆𑀕𑀢𑁄 𑀯𑀸 𑀫𑀽𑀮𑀢𑁄 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀬𑁂𑀯 𑀔𑀮𑀺𑀢𑀢𑀦𑁆𑀢𑀲𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢’’𑀦𑁆𑀢𑀺. 𑀲𑀓𑀼𑀡𑀺𑀓𑀸𑀢𑀺 𑀓𑀼𑀮𑀸𑀯𑀓𑀲𑀓𑀼𑀡𑀺𑀓𑀸. 𑀲𑀸 𑀳𑀺 𑀭𑀼𑀓𑁆𑀔𑀲𑀸𑀔𑀸𑀲𑀼 𑀑𑀮𑀫𑁆𑀩𑀦𑀓𑀼𑀮𑀸𑀯𑀓𑀸 𑀳𑁄𑀢𑀺. 𑀢𑀜𑁆𑀳𑀺 𑀲𑀸 𑀓𑀼𑀮𑀸𑀯𑀓𑀁 𑀢𑀢𑁄 𑀢𑀢𑁄 𑀢𑀺𑀡𑀳𑀻𑀭𑀸𑀤𑀺𑀓𑁂 𑀆𑀦𑁂𑀢𑁆𑀯𑀸 𑀢𑀣𑀸 𑀯𑀺𑀦𑀦𑁆𑀥𑀢𑀺, 𑀬𑀣𑀸 𑀢𑁂𑀲𑀁 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢𑀁 𑀯𑀺𑀬 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀯𑀺𑀯𑁂𑀘𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀢𑀤𑀼𑀪𑀬𑀫𑁆𑀧𑀻𑀢𑀺 ‘‘𑀓𑀼𑀮𑀸𑀕𑀡𑁆𑀞𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀓𑀜𑁆𑀚𑀺𑀬𑀲𑀼𑀢𑁆𑀢𑀁, 𑀓𑀼𑀮𑀸𑀯𑀓𑀜𑁆𑀘. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀏𑀯𑀫𑁂𑀯 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀓𑀸𑀫𑀁 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀸𑀦𑀺 𑀬𑀣𑀸𑀚𑀸𑀢𑀸𑀦𑀺𑀧𑀺 𑀤𑀻𑀖𑀪𑀸𑀯𑁂𑀦 𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀆𑀓𑀼𑀮𑀩𑁆𑀬𑀸𑀓𑀼𑀮𑀸𑀦𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀦𑀺 𑀧𑀦 𑀦 𑀢𑀣𑀸 𑀤𑀼𑀩𑁆𑀩𑀺𑀯𑁂𑀘𑀺𑀬𑀸𑀦𑀺, 𑀬𑀣𑀸 𑀭𑀚𑁆𑀚𑀼𑀪𑀽𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀸𑀬𑀸𑀢𑀺 𑀅𑀯𑀟𑁆𑀠𑀺𑀢𑀸, 𑀲𑀼𑀔𑁂𑀦, 𑀲𑀼𑀔𑀳𑁂𑀢𑀼𑀦𑀸 𑀯𑀸 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄𑀢𑀺 𑀆𑀧𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄𑀢𑀺 𑀅𑀩𑁆𑀪𑀼𑀤𑀬𑀢𑁄. 𑀯𑀺𑀦𑀺𑀧𑀢𑀺𑀢𑀢𑁆𑀢𑀸𑀢𑀺 𑀯𑀺𑀭𑀽𑀧𑀁 𑀦𑀺𑀧𑀢𑀺𑀢𑀢𑁆𑀢𑀸 𑀬𑀣𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀼𑀔𑀲𑀫𑀼𑀲𑁆𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀦𑀺𑀧𑀢𑀺𑀢𑀢𑁆𑀢𑀸. 𑀇𑀢𑀭𑁄𑀢𑀺 𑀲𑀁𑀲𑀸𑀭𑁄. 𑀦𑀦𑀼 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀧𑀺 𑀲𑀁𑀲𑀸𑀭𑁄 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀦𑀺𑀭𑀬𑀸𑀤𑀻𑀦𑀁 𑀧𑀦 𑀅𑀥𑀺𑀫𑀢𑁆𑀢𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀧𑀸𑀬𑀸𑀤𑀺𑀕𑁆𑀕𑀳𑀡𑀁. 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦𑀸𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺. 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀫𑀸𑀦𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀧𑀸𑀬𑀤𑀼𑀓𑁆𑀔𑀜𑁆𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑀜𑁆𑀘. ‘‘𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀼𑀓𑁆𑀔𑀺𑀢𑁆𑀢𑀦𑀸𑀯𑀸 𑀯𑀺𑀬𑀸’’𑀢𑀺 𑀇𑀤𑀁 𑀧𑀭𑀺𑀩𑁆𑀪𑀫𑀝𑁆𑀞𑀸𑀦𑀲𑁆𑀲 𑀫𑀳𑀦𑁆𑀢𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀧𑀭𑀺𑀩𑁆𑀪𑀫𑀦𑀲𑁆𑀲 𑀅𑀦𑀯𑀝𑁆𑀞𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀉𑀧𑀫𑀸𑀬. 𑀬𑀦𑁆𑀢𑁂𑀲𑀼 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬𑀸’’𑀢𑀺 𑀇𑀤𑀁 𑀧𑀦 𑀅𑀯𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀤𑀼𑀧𑁆𑀧𑀫𑁄𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑀇𑀫𑀺𑀦𑀸 𑀢𑀸𑀯𑀸𑀢𑀺 𑀏𑀢𑁆𑀣 𑀢𑀸𑀯-𑀲𑀤𑁆𑀤𑁄 𑀓𑀫𑀢𑁆𑀣𑁄, 𑀢𑁂𑀦 ‘‘𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸’’𑀢𑀺 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀅𑀬𑀁 𑀧𑀘𑁆𑀘𑀬𑁄𑀢𑀺 𑀇𑀤𑀧𑁆𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀫𑀲𑁆𑀫𑀸 𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀫𑀸 𑀦𑀸𑀫 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀅𑀢𑁆𑀣𑀺 𑀦𑀼 𑀔𑁄 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀣𑀺 𑀦𑀼 𑀔𑁄…𑀧𑁂… 𑀪𑀯𑁂𑀬𑁆𑀬𑀸’’𑀢𑀺. 𑀏𑀢𑁆𑀣 𑀳𑀺 ‘‘𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁? 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀉𑀧𑀭𑀺 𑀚𑀸𑀢𑀺𑀲𑀤𑁆𑀤𑀧𑀘𑁆𑀘𑀬𑀲𑀤𑁆𑀤𑀲𑀫𑀸𑀦𑀸𑀥𑀺𑀓𑀭𑀡𑁂𑀦 𑀓𑀺𑀁-𑀲𑀤𑁆𑀤𑁂𑀦 𑀇𑀤𑀁-𑀲𑀤𑁆𑀤𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀤𑀲𑁆𑀲𑀦𑀢𑁄 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀢𑀸 𑀇𑀤𑀧𑁆𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀬𑀼𑀚𑁆𑀚𑀢𑀺. 𑀦 𑀳𑁂𑀢𑁆𑀣 ‘‘𑀇𑀫𑀲𑁆𑀲 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸’’𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀧𑀘𑁆𑀘𑀬𑀢𑁄 𑀚𑀭𑀸𑀫𑀭𑀡𑀲𑀫𑁆𑀪𑀯𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀺 𑀯𑀺𑀜𑁆𑀜𑀸𑀢𑀪𑀸𑀯𑀢𑁄, 𑀅𑀲𑀫𑁆𑀪𑀯𑀢𑁄 𑀘, 𑀚𑀭𑀸𑀫𑀭𑀡𑀲𑁆𑀲 𑀧𑀦 𑀧𑀘𑁆𑀘𑀬𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀧𑀘𑁆𑀘𑀬𑀲𑀤𑁆𑀤𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬𑀜𑁆𑀘 𑀇𑀤𑀁-𑀲𑀤𑁆𑀤𑀲𑁆𑀲 ‘‘𑀇𑀫𑀲𑁆𑀫𑀸 𑀧𑀘𑁆𑀘𑀬𑀸’’𑀢𑀺 𑀧𑀘𑁆𑀘𑀬𑀧𑀼𑀘𑁆𑀙𑀸 𑀬𑀼𑀚𑁆𑀚𑀢𑀺.

𑀲𑀸 𑀧𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀬𑀤𑀺𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂𑀧𑀺 𑀮𑀩𑁆𑀪𑀢𑀺, 𑀅𑀜𑁆𑀜𑀧𑀤𑀢𑁆𑀣𑀯𑀘𑀦𑀺𑀘𑁆𑀙𑀸𑀪𑀸𑀯𑀢𑁄 𑀧𑀦𑁂𑀢𑁆𑀣 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀫𑀺𑀯𑀘𑀦𑀲𑀫𑀸𑀲𑀧𑀓𑁆𑀔𑁂 𑀧𑀦 𑀦𑀢𑁆𑀣𑁂𑀯 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀲𑀫𑁆𑀪𑀯𑁄𑀢𑀺. 𑀦𑀦𑀼 𑀘 ‘‘𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁆𑀣 𑀇𑀤𑀧𑁆𑀧𑀘𑁆𑀘𑀬-𑀲𑀤𑁆𑀤𑁄 𑀲𑀸𑀫𑀺𑀯𑀘𑀦𑀲𑀫𑀸𑀲𑁄 𑀇𑀘𑁆𑀙𑀺𑀢𑁄𑀢𑀺? 𑀲𑀘𑁆𑀘𑀁 𑀇𑀘𑁆𑀙𑀺𑀢𑁄 𑀉𑀚𑀼𑀓𑀫𑁂𑀯 𑀢𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀘𑀦𑀺𑀘𑁆𑀙𑀸𑀢𑀺 𑀓𑀢𑁆𑀯𑀸, 𑀇𑀥 𑀧𑀦 𑀓𑁂𑀯𑀮𑀁 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀧𑀭𑀺𑀧𑀼𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀬𑀣𑀸 𑀢𑀢𑁆𑀣 𑀇𑀤𑀁-𑀲𑀤𑁆𑀤𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀲𑁂𑀲𑀦𑀢𑀸, 𑀇𑀥 𑀘 ‘‘𑀧𑀼𑀘𑁆𑀙𑀺𑀢𑀩𑁆𑀩𑀧𑀘𑁆𑀘𑀬𑀢𑁆𑀣𑀢𑀸 𑀲𑀫𑁆𑀪𑀯𑀢𑀺, 𑀢𑀣𑀸 𑀢𑀢𑁆𑀣, 𑀇𑀥 𑀘 𑀲𑀫𑀸𑀲𑀓𑀧𑁆𑀧𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀲𑁆𑀫𑀸 𑀧𑀦 𑀢𑀢𑁆𑀣 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀦 𑀇𑀘𑁆𑀙𑀺𑀢𑁄𑀢𑀺? 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀅𑀲𑀫𑁆𑀪𑀯𑀢𑁄𑀢𑀺 𑀇𑀫𑀲𑁆𑀲, 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀅𑀦𑀼𑀭𑀽𑀧𑁄 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄𑀢𑀺 𑀏𑀢𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀬𑁄 𑀧𑀦𑁂𑀢𑁆𑀣 𑀇𑀤𑀁-𑀲𑀤𑁆𑀤𑁂𑀦 𑀕𑀳𑀺𑀢𑁄 𑀅𑀢𑁆𑀣𑁄, 𑀲𑁄 ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄𑀢𑀺 𑀇𑀤𑀁-𑀲𑀤𑁆𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁄 𑀧𑀭𑀺𑀘𑁆𑀘𑀚𑀦𑀢𑁄 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄 𑀧𑀘𑁆𑀘𑀬𑁂 𑀅𑀯𑀢𑀺𑀝𑁆𑀞𑀢𑀺, 𑀢𑁂𑀦𑁂𑀢𑁆𑀣 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄. 𑀢𑀢𑁆𑀣 𑀧𑀦 𑀇𑀤𑀁-𑀲𑀤𑁆𑀤𑀲𑁆𑀲 𑀢𑀢𑁄 𑀧𑀭𑀺𑀘𑁆𑀘𑀚𑀦𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀲𑀸𑀫𑀺𑀯𑀘𑀦𑀲𑀫𑀸𑀲𑁄 𑀏𑀯 𑀇𑀘𑁆𑀙𑀺𑀢𑁄. 𑀅𑀝𑁆𑀞𑀓𑀣𑀸𑀬𑀁𑀧𑀦 𑀬𑀲𑁆𑀫𑀸 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀧𑀼𑀘𑁆𑀙𑀸𑀫𑀼𑀔𑁂𑀦𑀸𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘 𑀦𑀸𑀫 𑀅𑀢𑁆𑀣𑀢𑁄 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀽𑀢𑀺 𑀯𑀼𑀢𑁆𑀢𑁄 𑀯𑀸𑀬𑀫𑀢𑁆𑀣𑁄, 𑀢𑀲𑁆𑀫𑀸 ‘‘𑀇𑀫𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀢𑁆𑀣𑀯𑀡𑁆𑀡𑀦𑀸 𑀓𑀢𑀸.

𑀧𑀡𑁆𑀟𑀺𑀢𑁂𑀦𑀸𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸𑀤𑀺𑀧𑀜𑁆𑀳𑀸𑀯𑀺𑀲𑁂𑀲𑀚𑀸𑀦𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦. 𑀢𑀫𑁂𑀯 𑀳𑀺𑀲𑁆𑀲 𑀧𑀡𑁆𑀟𑀺𑀘𑁆𑀘𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸𑀤𑀺𑀲𑀲𑁆𑀲 𑀚𑀻𑀯𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑁄 𑀲𑀭𑀻𑀭𑀢𑁄 𑀅𑀦𑀜𑁆𑀜𑀢𑁆𑀢𑀁 𑀧𑀼𑀘𑁆𑀙𑀢𑀺 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺, 𑀲𑁄 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀦𑀼𑀧𑀮𑀩𑁆𑀪𑀢𑀺, 𑀓𑀣𑀁 𑀢𑀲𑁆𑀲 𑀯𑀜𑁆𑀛𑀸𑀢𑀦𑀬𑀲𑁆𑀲 𑀯𑀺𑀬 𑀤𑀻𑀖𑀭𑀲𑁆𑀲𑀢𑀸 𑀲𑀭𑀻𑀭𑀢𑁄 𑀅𑀜𑁆𑀜𑀢𑀸 𑀯𑀸 𑀅𑀦𑀜𑁆𑀜𑀢𑀸 𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀸 𑀲𑀺𑀬𑀸, 𑀢𑀲𑁆𑀫𑀸𑀲𑁆𑀲 𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫𑁂𑀲 𑀧𑀼𑀘𑁆𑀙𑀢𑁄 𑀅𑀦𑀸𑀤𑀭𑁄 𑀯𑀺𑀳𑁂𑀲𑀸 𑀯𑀺𑀬 𑀳𑁄𑀢𑀻𑀢𑀺 ‘‘𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺 𑀧𑀓𑀸𑀭𑀦𑁆𑀢𑀭𑀫𑀸𑀳. 𑀏𑀯𑀁 𑀅𑀩𑁆𑀬𑀸𑀓𑀭𑀡𑀓𑀸𑀭𑀡𑀁 𑀜𑀸𑀢𑀼𑀓𑀸𑀫𑀲𑁆𑀲 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺, 𑀓𑀣𑀺𑀢𑁂 𑀘 𑀚𑀸𑀦𑀦𑁆𑀢𑀲𑁆𑀲 𑀧𑀫𑀸𑀤𑁄𑀧𑀺 𑀏𑀯𑀁 𑀲𑀺𑀬𑀸, 𑀓𑀣𑀦𑀯𑀺𑀥𑀺 𑀧𑀦 ‘‘𑀬𑀸𑀤𑀺𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁄 𑀏𑀯. 𑀏𑀯𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀏𑀯𑀁 𑀞𑀧𑀦𑀻𑀬𑀧𑀜𑁆𑀳𑁂 𑀯𑀺𑀬 𑀢𑀼𑀡𑁆𑀳𑀻𑀪𑀸𑀯𑀸𑀤𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀏𑀯. ‘‘𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀯𑀘𑀦𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. ‘‘𑀓𑀺𑀁 𑀲𑀩𑁆𑀩𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀲𑀗𑁆𑀔𑀢𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀲𑀺, 𑀉𑀤𑀸𑀳𑀼 𑀅𑀲𑀗𑁆𑀔𑀢’’𑀦𑁆𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀁 𑀳𑁄𑀢𑀺 ‘‘𑀓𑀺𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀅𑀢𑁆𑀣𑀺 𑀢𑀢𑁆𑀣 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀅𑀢𑁆𑀣𑀺 𑀦 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀯𑀺𑀪𑀚𑁆𑀚 𑀩𑁆𑀬𑀸𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀘 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀇𑀘𑁆𑀙𑀺𑀢𑁄𑀢𑀺. 𑀧𑀼𑀩𑁆𑀩𑁂 𑀬𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀘𑁄𑀤𑀺𑀢𑀦𑁆𑀢𑀺 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺. 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀲𑀭𑀽𑀧𑀧𑀼𑀘𑁆𑀙𑀸 𑀓𑀭𑀻𑀬𑀢𑀻𑀢𑀺 ‘‘𑀧𑀼𑀦 𑀓𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 ‘‘𑀬𑀣𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

‘‘𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀽’’𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀢𑁆𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀅𑀧𑀯𑀸𑀤𑁄 𑀆𑀭𑀤𑁆𑀥𑁄. 𑀬𑀲𑁆𑀫𑀸 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀙𑀦𑁆𑀦𑀁 𑀯𑀺𑀧𑀸𑀓𑀲𑀫𑁆𑀨𑀲𑁆𑀲𑀸𑀦𑀁𑀬𑁂𑀯 𑀕𑀳𑀡𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀸𑀤𑀺 𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸 𑀯𑀺𑀧𑀸𑀓𑀯𑀺𑀥𑀻𑀢𑀺 𑀓𑀢𑁆𑀯𑀸 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼, (𑀫. 𑀦𑀺. 𑁩.𑁧𑁨𑁬; 𑀉𑀤𑀸. 𑁧) 𑀅𑀪𑀺𑀥𑀫𑁆𑀫𑁂 (𑀯𑀺𑀪. 𑁨𑁨𑁫) 𑀘 𑀬𑁂𑀪𑀼𑀬𑁆𑀬𑁂𑀦 𑀢𑁂𑀲𑀁𑀬𑁂𑀯 𑀕𑀳𑀡𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦𑁂𑀢𑁆𑀣 ‘‘𑀕𑀳𑀺𑀢𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀁𑀬𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀧𑁂𑀓𑁆𑀔𑁄 𑀢𑁂𑀦 𑀯𑀺𑀦𑀸 𑀢𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀲𑀴𑀸𑀬𑀢𑀦𑀧𑁆𑀧𑀘𑁆𑀘𑀬𑀸𑀢𑀺 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 𑀬𑁄𑀚𑀦𑀸. 𑀅𑀯𑀬𑀯𑁂𑀦 𑀯𑀸 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀫𑁂𑀢𑀁 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸’’𑀢𑀺, 𑀢𑀲𑁆𑀫𑀸 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀳𑀺𑀢𑀫𑁆𑀧𑀻𑀢𑀺 𑀙𑀩𑁆𑀩𑀺𑀥𑀁 𑀯𑀺𑀧𑀸𑀓𑀨𑀲𑁆𑀲𑀫𑁆𑀧𑀺. 𑀅𑀕𑁆𑀕𑀳𑀺𑀢𑀫𑁆𑀧𑀻𑀢𑀺 𑀅𑀯𑀺𑀧𑀸𑀓𑀨𑀲𑁆𑀲𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀨𑀲𑁆𑀲𑀫𑁆𑀧𑀺. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄𑀢𑀺 𑀬𑁄𑀚𑀦𑀸. 𑀦 𑀘𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄𑀯 𑀉𑀧𑀸𑀤𑀺𑀦𑁆𑀦𑁄 𑀇𑀘𑁆𑀙𑀺𑀢𑁄, 𑀅𑀣 𑀔𑁄 𑀧𑀘𑁆𑀘𑀬𑁄𑀧𑀺 𑀉𑀧𑀸𑀤𑀺𑀦𑁆𑀦𑁄 𑀇𑀘𑁆𑀙𑀺𑀢𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀲𑁆𑀲𑁂𑀯 𑀲𑀴𑀸𑀬𑀢𑀦𑀕𑁆𑀕𑀳𑀡𑁂𑀦 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀴𑀸𑀬𑀢𑀦𑀢𑁄…𑀧𑁂… 𑀤𑀲𑁆𑀲𑁂𑀢𑀼𑀓𑀸𑀫𑁄’’𑀢𑀺. 𑀦 𑀳𑀺 𑀨𑀲𑁆𑀲𑀲𑁆𑀲 𑀘𑀓𑁆𑀔𑀸𑀤𑀺𑀲𑀴𑀸𑀬𑀢𑀦𑀫𑁂𑀯 𑀧𑀘𑁆𑀘𑀬𑁄, 𑀅𑀣 𑀔𑁄 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺 (𑀫. 𑀦𑀺. 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁪, 𑁪𑁫; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀯𑀘𑀦𑀢𑁄 𑀭𑀽𑀧𑀸𑀬𑀢𑀦𑀸𑀤𑀺𑀭𑀽𑀧𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀦𑀸𑀫𑀜𑁆𑀘 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀇𑀫𑀁 𑀘𑀓𑁆𑀔𑀸𑀤𑀺𑀲𑀴𑀸𑀬𑀢𑀦𑀢𑁄 𑀅𑀢𑀺𑀭𑀺𑀢𑁆𑀢𑀁 𑀆𑀯𑀚𑁆𑀚𑀦𑀸𑀤𑀺 𑀯𑀺𑀬 𑀲𑀸𑀥𑀸𑀭𑀡𑀁 𑀅𑀳𑀼𑀢𑁆𑀯𑀸, 𑀢𑀲𑁆𑀲 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀲𑀸𑀥𑀸𑀭𑀡𑀢𑀸𑀬 𑀅𑀜𑁆𑀜𑀁 𑀯𑀺𑀲𑁂𑀲𑀧𑀘𑁆𑀘𑀬𑀁 𑀧𑀺-𑀲𑀤𑁆𑀤𑁂𑀦 𑀅𑀯𑀺𑀲𑀺𑀝𑁆𑀞𑀁 𑀲𑀸𑀥𑀸𑀭𑀡𑀧𑀘𑁆𑀘𑀬𑀁 𑀧𑀺𑀤𑀲𑁆𑀲𑁂𑀢𑀼𑀓𑀸𑀫𑁄 𑀪𑀕𑀯𑀸, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀇𑀫𑀫𑁂𑀯 𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁪𑁩) ‘‘𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀫𑀳𑀸𑀦𑀺𑀤𑀸𑀦𑀤𑁂𑀲𑀦𑀸𑀲𑀗𑁆𑀕𑀳𑀢𑁆𑀣𑀜𑁆𑀘𑀸’’𑀢𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸. 𑀧𑀘𑁆𑀘𑀬𑀸𑀦𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀦𑀺𑀤𑀸𑀦𑀁 𑀓𑀣𑀺𑀢𑀦𑁆𑀢𑀺 𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀦𑀺𑀤𑀸𑀦𑀢𑁆𑀢𑀁 𑀓𑀣𑀺𑀢𑀁 𑀏𑀓𑀁𑀲𑀺𑀓𑁄 𑀧𑀘𑁆𑀘𑀬𑀪𑀸𑀯𑁄 𑀓𑀣𑀺𑀢𑁄. 𑀢𑀜𑁆𑀳𑀺 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁂 𑀅𑀩𑁆𑀬𑀪𑀺𑀘𑀸𑀭𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀦𑀺𑀚𑁆𑀚𑀝𑁂𑀢𑀺 𑀦𑀺𑀚𑁆𑀚𑀸𑀮𑀓𑁂. 𑀦𑀺𑀕𑁆𑀕𑀼𑀫𑁆𑀩𑁂𑀢𑀺 𑀦𑀺𑀓𑁆𑀔𑁂𑀧𑁂. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀆𑀓𑀼𑀮𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀅𑀦𑀸𑀓𑀼𑀮𑀁 𑀅𑀩𑁆𑀬𑀸𑀓𑀼𑀮𑀁 𑀫𑀳𑀦𑁆𑀢𑀁 𑀧𑀘𑁆𑀘𑀬𑀦𑀺𑀤𑀸𑀦𑀫𑁂𑀢𑁆𑀣 𑀓𑀣𑀺𑀢𑀦𑁆𑀢𑀺 𑀫𑀳𑀸𑀦𑀺𑀤𑀸𑀦𑀁 𑀲𑀼𑀢𑁆𑀢𑀁 𑀅𑀜𑁆𑀜𑀣𑀸𑀪𑀸𑀯𑀲𑁆𑀲 𑀅𑀪𑀸𑀯𑀢𑁄.

𑁯𑁮. 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀚𑀸𑀢𑀺𑀆𑀤𑀻𑀦𑀁 𑀧𑀘𑁆𑀘𑀬𑀸𑀦𑀁. 𑀬𑀲𑁆𑀫𑀸 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀽𑀦𑀸𑀥𑀺𑀓𑁂𑀳𑁂𑀯 𑀢𑀲𑁆𑀲 𑀢𑀲𑁆𑀲 𑀨𑀮𑀲𑁆𑀲 𑀲𑀫𑁆𑀪𑀯𑀢𑁄 𑀢𑀣𑁄 𑀢𑀘𑁆𑀙𑁄, 𑀢𑀧𑁆𑀧𑀓𑀸𑀭𑁄 𑀯𑀸 𑀲𑀸𑀫𑀕𑁆𑀕𑀺𑀉𑀧𑀕𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀫𑀼𑀳𑀼𑀢𑁆𑀢𑀫𑁆𑀧𑀺 𑀢𑀣𑁄 𑀦𑀺𑀩𑁆𑀩𑀢𑁆𑀢𑀦𑀥𑀫𑁆𑀫𑀸𑀦𑀁 𑀅𑀲𑀫𑁆𑀪𑀯𑀸𑀪𑀸𑀯𑀢𑁄. 𑀅𑀯𑀺𑀢𑀣𑁄 𑀅𑀯𑀺𑀲𑀁𑀯𑀸𑀤𑀦𑀓𑁄 𑀯𑀺𑀲𑀁𑀯𑀸𑀤𑀦𑀸𑀓𑀸𑀭𑀯𑀺𑀭𑀳𑀺𑀢𑁄 𑀅𑀜𑁆𑀜𑀥𑀫𑁆𑀫𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄. ‘‘𑀅𑀦𑀜𑁆𑀜𑀣𑀸’’𑀢𑀺 𑀯𑀼𑀘𑁆𑀘𑀢𑀺 𑀅𑀜𑁆𑀜𑀣𑀸𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀢𑀲𑁆𑀫𑀸 ‘‘𑀢𑀣𑀁 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀳𑁂𑀢𑀽𑀢𑀺 𑀆𑀳 ‘‘𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦𑀸’’𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀤𑁂𑀯𑀢𑁆𑀢𑀸𑀤𑀺𑀦𑀸 𑀲𑀩𑁆𑀩𑀪𑀸𑀯𑁂𑀦 𑀲𑀩𑁆𑀩𑀸 𑀚𑀸𑀢𑀺. 𑀲𑀩𑁆𑀩𑀣𑀸 𑀲𑀩𑁆𑀩𑀦𑁆𑀢𑀺 𑀢𑀢𑁆𑀣𑀸𑀧𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀸, 𑀦𑀺𑀧𑀸𑀢𑀤𑁆𑀯𑀬𑀫𑁂𑀢𑀁, 𑀦𑀺𑀧𑀸𑀢𑀜𑁆𑀘 𑀅𑀩𑁆𑀬𑀬𑀁, 𑀢𑀜𑁆𑀘 𑀲𑀩𑁆𑀩𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀏𑀓𑀸𑀓𑀸𑀭𑀫𑁂𑀯 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀯𑀘𑀦𑁂 𑀧𑀦 𑀢𑀲𑁆𑀲 𑀢𑀲𑁆𑀲 𑀚𑀸𑀢𑀺𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀇𑀢𑁆𑀣𑀺𑀅𑀢𑁆𑀣𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀯 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀚𑀸𑀢𑀺𑀯𑀸𑀭𑁂 𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦. 𑀤𑁂𑀯𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑀦𑁆𑀥𑀩𑁆𑀩𑀬𑀓𑁆𑀔𑀸𑀤𑀺𑀓𑁂 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁨.𑁯𑁮) 𑀆𑀕𑀢𑁂, 𑀢𑀤𑀦𑁆𑀢𑀭𑀪𑁂𑀤𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺.

𑀇𑀥 𑀦𑀺𑀓𑁆𑀔𑀺𑀢𑁆𑀢𑀅𑀢𑁆𑀣𑀯𑀺𑀪𑀚𑀦𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 ‘‘𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀻’’𑀢𑀺 𑀅𑀦𑀺𑀬𑀫𑀢𑁄 𑀉𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀢𑁆𑀣𑀲𑁆𑀲 𑀦𑀺𑀤𑁆𑀤𑀺𑀲𑀦𑀢𑁆𑀣𑁂 𑀚𑁄𑀢𑁂𑀢𑀩𑁆𑀩𑁂 𑀦𑀺𑀧𑀸𑀢𑁄, 𑀢𑀤𑀢𑁆𑀣𑀚𑁄𑀢𑀦𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀤𑀲𑁆𑀲. 𑀢𑁂𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀲𑀫𑁆𑀧𑀤𑀸𑀦𑀪𑀽𑀢𑀁 𑀣𑁂𑀭𑀁 𑀯𑀤𑀢𑀺. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀯𑀸 𑀢𑁂 𑀓𑀢𑀫𑁂𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀬𑁂 𑀳𑀺 ‘‘𑀓𑀲𑁆𑀲𑀘𑀻’’𑀢𑀺, ‘‘𑀓𑀺𑀫𑁆𑀳𑀺𑀘𑀻’’𑀢𑀺 𑀘 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄 𑀅𑀢𑁆𑀣𑁄, 𑀢𑁂 𑀓𑀢𑀫𑁂𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀳𑁂𑀲𑀸. 𑀤𑁂𑀯𑀪𑀸𑀯𑀸𑀬𑀸𑀢𑀺 𑀤𑁂𑀯𑀪𑀸𑀯𑀢𑁆𑀣𑀁. 𑀔𑀦𑁆𑀥𑀚𑀸𑀢𑀻𑀢𑀺 𑀔𑀦𑁆𑀥𑀧𑀸𑀢𑀼𑀪𑀸𑀯𑁄, 𑀬𑀣𑀸 𑀔𑀦𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀤𑁂𑀯𑀸’’𑀢𑀺 𑀲𑀫𑀜𑁆𑀜𑀸 𑀳𑁄𑀢𑀺, 𑀢𑀣𑀸 𑀢𑁂𑀲𑀁 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀸𑀬𑀸’’𑀢𑀺 𑀆𑀳. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀕𑀦𑁆𑀥𑀩𑁆𑀩𑀸𑀦𑀁 𑀕𑀦𑁆𑀥𑀩𑁆𑀩𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀚𑀸𑀢𑀺𑀦𑀺𑀤𑁆𑀤𑁂𑀲𑀧𑀤𑁂𑀲𑀼, 𑀪𑀯𑀸𑀤𑀺𑀧𑀤𑁂𑀲𑀼 𑀘. 𑀬𑁂𑀦 𑀳𑀺 𑀦𑀬𑁂𑀦 𑀲𑀘𑁂 𑀳𑀺 𑀚𑀸𑀢𑀻𑀢𑀺 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸, 𑀚𑀸𑀢𑀺𑀦𑀺𑀤𑁆𑀤𑁂𑀲𑀧𑀤𑁂𑀲𑁄𑀯 ‘‘𑀪𑀯𑁄’’𑀢𑀺𑀆𑀤𑀺𑀦𑀸 𑀪𑀯𑀸𑀤𑀺𑀧𑀤𑁂𑀲𑀼𑀧𑀺 𑀲𑁄 𑀓𑀸𑀢𑀩𑁆𑀩𑁄𑀢𑀺. 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀯𑀕𑁆𑀕𑀸 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀚𑁄𑀢𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀕𑀦𑁆𑀥𑀁 𑀅𑀩𑁆𑀩𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀕𑀦𑁆𑀥𑀩𑁆𑀩𑀸, 𑀥𑀢𑀭𑀝𑁆𑀞𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸. 𑀬𑀚𑀦𑁆𑀢𑀺 𑀯𑁂𑀲𑁆𑀲𑀯𑀡𑀲𑀓𑁆𑀓𑀸𑀤𑀺𑀓𑁂 𑀧𑀽𑀚𑁂𑀦𑁆𑀢𑀻𑀢𑀺 𑀬𑀓𑁆𑀔𑀸, 𑀢𑁂𑀦 𑀢𑁂𑀦 𑀯𑀸 𑀧𑀡𑀺𑀥𑀺𑀓𑀫𑁆𑀫𑀸𑀤𑀺𑀦𑀸 𑀬𑀚𑀺𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸𑀢𑀺 𑀬𑀓𑁆𑀔𑀸, 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀫𑀦𑀼𑀲𑁆𑀲𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀪𑀽𑀢𑀸𑀢𑀺 𑀓𑀼𑀫𑁆𑀪𑀡𑁆𑀟𑀸, 𑀯𑀺𑀭𑀽𑀴𑁆𑀳𑀓𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁂 𑀓𑁂𑀘𑀺 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀅𑀝𑁆𑀞𑀺𑀧𑀓𑁆𑀔𑀸 𑀪𑀫𑀭𑀢𑀼𑀧𑁆𑀧𑀴𑀸𑀤𑀬𑁄. 𑀘𑀫𑁆𑀫𑀧𑀓𑁆𑀔𑀸 𑀚𑀢𑀼𑀲𑀺𑀗𑁆𑀕𑀸𑀮𑀸𑀤𑀬𑁄. 𑀮𑁄𑀫𑀧𑀓𑁆𑀔𑀸 𑀳𑀁𑀲𑀫𑁄𑀭𑀸𑀤𑀬𑁄. 𑀲𑀭𑀻𑀲𑀧𑀸 𑀅𑀳𑀺𑀯𑀺𑀘𑁆𑀙𑀺𑀓𑀲𑀢𑀧𑀤𑀺𑀆𑀤𑀬𑁄.

‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺 𑀇𑀤𑀁 𑀦 𑀬𑁂𑀯𑀸𑀧𑀦𑀓𑀦𑀺𑀤𑁆𑀤𑁂𑀲𑁄 𑀯𑀺𑀬 𑀅𑀯𑀼𑀢𑁆𑀢𑀲𑀗𑁆𑀕𑀳𑀢𑁆𑀣𑀁 𑀯𑀘𑀦𑀁, 𑀅𑀣 𑀔𑁄 𑀅𑀬𑁂𑀯𑀸𑀧𑀦𑀓𑀦𑀺𑀤𑁆𑀤𑁂𑀲𑁄 𑀯𑀺𑀬 𑀯𑀼𑀢𑁆𑀢𑀲𑀗𑁆𑀕𑀳𑀢𑁆𑀣𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦𑁂𑀯 𑀘 𑀆𑀫𑁂𑀟𑀺𑀢𑀢𑁆𑀣𑁄 𑀲𑀗𑁆𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀢𑁂𑀲𑀁 𑀢𑁂𑀲𑀁 𑀤𑁂𑀯𑀕𑀦𑁆𑀥𑀩𑁆𑀩𑀸𑀤𑀻𑀦’’𑀦𑁆𑀢𑀺. 𑀢𑀤𑀢𑁆𑀢𑀸𑀬𑀸𑀢𑀺 𑀢𑀁𑀪𑀸𑀯𑀸𑀬, 𑀬𑀣𑀸𑀭𑀽𑀧𑁂𑀲𑀼 𑀔𑀦𑁆𑀥𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 ‘‘𑀤𑁂𑀯𑀸 𑀕𑀦𑁆𑀥𑀩𑁆𑀩𑀸’’𑀢𑀺 𑀮𑁄𑀓𑀲𑀫𑀜𑁆𑀜𑀸 𑀳𑁄𑀢𑀺, 𑀢𑀣𑀸𑀭𑀽𑀧𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑁂𑀯𑀕𑀦𑁆𑀥𑀩𑁆𑀩𑀸𑀤𑀺𑀪𑀸𑀯𑀸𑀬𑀸’’𑀢𑀺. ‘‘𑀦𑀺𑀭𑁄𑀥𑁄, 𑀯𑀺𑀕𑀫𑁄’’𑀢𑀺 𑀘 𑀧𑀝𑀺𑀮𑀤𑁆𑀥𑀢𑁆𑀢𑀸𑀮𑀸𑀪𑀲𑁆𑀲 𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀅𑀘𑁆𑀘𑀦𑁆𑀢𑀸𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄 ‘‘𑀲𑀩𑁆𑀩𑀲𑁄 𑀚𑀸𑀢𑀺𑀬𑀸 𑀅𑀲𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀚𑀸𑀢𑀺𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀆𑀳 ‘‘𑀅𑀪𑀸𑀯𑀸𑀢𑀺 𑀅𑀢𑁆𑀣𑁄’’𑀢𑀺.

𑀨𑀮𑀢𑁆𑀣𑀸𑀬 𑀳𑀺𑀦𑁄𑀢𑀻𑀢𑀺 𑀬𑀣𑀸 𑀨𑀮𑀁 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀯𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀳𑁂𑀢𑀼𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀕𑀡𑁆𑀳𑀣 𑀦𑀦𑁆𑀢𑀺 ‘‘𑀇𑀤𑀁 𑀫𑁂 𑀨𑀮𑀁, 𑀕𑀡𑁆𑀳𑀣 𑀦’’𑀦𑁆𑀢𑀺 𑀏𑀯𑀁 𑀅𑀧𑁆𑀧𑁂𑀢𑀺 𑀯𑀺𑀬 𑀦𑀺𑀬𑁆𑀬𑀸𑀢𑁂𑀢𑀺 𑀯𑀺𑀬. ‘‘𑀏𑀲 𑀦𑀬𑁄’’𑀢𑀺 𑀅𑀯𑀺𑀲𑁂𑀲𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀯𑀺𑀲𑁂𑀲𑀫𑀢𑁆𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑀼 𑀘𑀸𑀬𑀁 𑀚𑀸𑀢𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀲𑀗𑁆𑀔𑀢𑀪𑀸𑀯𑀸 𑀘 𑀦 𑀳𑁄𑀢𑀺 𑀯𑀺𑀓𑀸𑀭𑀪𑀸𑀯𑀢𑁄, 𑀢𑀣𑀸 𑀚𑀭𑀸𑀫𑀭𑀡𑀁, 𑀢𑀲𑁆𑀲 𑀓𑀣𑀁 𑀲𑀸 𑀳𑁂𑀢𑀼 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀚𑀭𑀸𑀫𑀭𑀡𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀩𑁆𑀪𑀸𑀯𑁂 𑀪𑀸𑀯𑁄, 𑀢𑀤𑀪𑀸𑀯𑁂 𑀘 𑀅𑀪𑀸𑀯𑁄 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀢𑀸.

𑁯𑁯. 𑀑𑀓𑀸𑀲𑀧𑀭𑀺𑀕𑁆𑀕𑀳𑁄𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄. 𑀉𑀧𑀧𑀢𑁆𑀢𑀺𑀪𑀯𑁂 𑀬𑀼𑀚𑁆𑀚𑀢𑀺 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀓𑀸𑀫𑀪𑀯𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀓𑀫𑁆𑀫𑀪𑀯𑁂 𑀬𑀼𑀚𑁆𑀚𑀢𑀺 𑀓𑀸𑀫𑀪𑀯𑀸𑀤𑀺𑀚𑁄𑀢𑀦𑀸 𑀯𑀺𑀲𑁂𑀲𑀢𑁄 𑀢𑀲𑁆𑀲 𑀚𑀸𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄𑀢𑀺. 𑀢𑁂𑀦𑀸𑀳 ‘‘𑀲𑁄 𑀳𑀺 𑀚𑀸𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀧𑀘𑁆𑀘𑀬𑁄’’𑀢𑀺. 𑀦𑀦𑀼 𑀘 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀚𑀸𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺? 𑀲𑀘𑁆𑀘𑀁 𑀳𑁄𑀢𑀺, 𑀲𑁄 𑀧𑀦 𑀦 𑀢𑀣𑀸 𑀧𑀥𑀸𑀦𑀪𑀽𑀢𑁄, 𑀓𑀫𑁆𑀫𑀪𑀯𑁄 𑀧𑀦 𑀧𑀥𑀸𑀦𑀪𑀽𑀢𑁄 𑀧𑀘𑁆𑀘𑀬𑁄 𑀚𑀦𑀓𑀪𑀸𑀯𑀢𑁄𑀢𑀺. ‘‘𑀲𑁄 𑀳𑀺 𑀚𑀸𑀢𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀸𑀫𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺. 𑀑𑀓𑀸𑀲𑀧𑀭𑀺𑀕𑁆𑀕𑀳𑁄𑀯 𑀓𑀢𑁄‘‘𑀓𑀺𑀫𑁆𑀳𑀺𑀘𑀻’’𑀢𑀺 𑀇𑀫𑀺𑀦𑀸 𑀲𑀢𑁆𑀢𑀧𑀭𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸.

𑁧𑁦𑁦. 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀪𑀯𑀸𑀦𑀦𑁆𑀢𑀺 𑀓𑀸𑀫𑀓𑀫𑁆𑀫𑀪𑀯𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀪𑀯𑀸𑀦𑀁. 𑀢𑀺𑀡𑁆𑀡𑀜𑁆𑀘 𑀉𑀧𑀧𑀢𑁆𑀢𑀺𑀪𑀯𑀸𑀦𑀦𑁆𑀢𑀺 𑀓𑀸𑀫𑀼𑀧𑀧𑀢𑁆𑀢𑀺𑀪𑀯𑀸𑀤𑀻𑀦𑀁 𑀢𑀺𑀡𑁆𑀡𑀜𑁆𑀘 𑀉𑀧𑀧𑀢𑁆𑀢𑀺𑀪𑀯𑀸𑀦𑀁. 𑀢𑀣𑀸 𑀲𑁂𑀲𑀸𑀦𑀺𑀧𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀲𑁂𑀲𑀼𑀧𑀸𑀤𑀸𑀦𑀸𑀦𑀺𑀧𑀺 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀪𑀯𑀸𑀦𑀁, 𑀢𑀺𑀡𑁆𑀡𑀜𑁆𑀘 𑀉𑀧𑀧𑀢𑁆𑀢𑀺𑀪𑀯𑀸𑀦𑀁 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦. 𑀤𑁆𑀯𑀸𑀤𑀲 𑀓𑀫𑁆𑀫𑀪𑀯𑀸 𑀤𑁆𑀯𑀸𑀤𑀲 𑀉𑀧𑀧𑀢𑁆𑀢𑀺𑀪𑀯𑀸𑀢𑀺 𑀘𑀢𑀼𑀯𑀻𑀲𑀢𑀺𑀪𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀓𑀫𑁆𑀫𑀪𑀯𑀲𑁆𑀲 𑀧𑀘𑁆𑀘𑀬𑀪𑀸𑀯𑀫𑀼𑀔𑁂𑀦𑁂𑀯 𑀉𑀧𑀸𑀤𑀸𑀦𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀧𑀘𑁆𑀘𑀬𑁄 𑀦𑀸𑀫 𑀳𑁄𑀢𑀺, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀁 𑀓𑀫𑁆𑀫𑀪𑀯𑀲𑁆𑀲 𑀉𑀚𑀼𑀓𑀫𑁂𑀯 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀢𑁆𑀣 𑀤𑁆𑀯𑀸𑀤𑀲 𑀓𑀫𑁆𑀫𑀪𑀯𑀸 𑀮𑀩𑁆𑀪𑀦𑁆𑀢𑀻’’𑀢𑀺. 𑀢𑁂𑀲𑀦𑁆𑀢𑀺 𑀓𑀫𑁆𑀫𑀪𑀯𑀸𑀦𑀁. 𑀲𑀳𑀚𑀸𑀢𑀓𑁄𑀝𑀺𑀬𑀸𑀢𑀺 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀪𑀯𑀲𑁆𑀲 𑀲𑀳𑀚𑀸𑀢𑀁 𑀉𑀧𑀸𑀤𑀸𑀦𑀁 𑀲𑀳𑀚𑀸𑀢𑀓𑁄𑀝𑀺𑀬𑀸, 𑀇𑀢𑀭𑀁 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀓𑀼𑀲𑀮𑀲𑁆𑀲 𑀓𑀫𑁆𑀫𑀪𑀯𑀲𑁆𑀲 𑀧𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀧𑀘𑁆𑀘𑀬𑁄. 𑀏𑀢𑁆𑀣 𑀘 𑀬𑀣𑀸 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀏𑀓𑀲𑀗𑁆𑀕𑀳𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀚𑀸𑀢𑀓𑁄𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀦𑀁 𑀏𑀓𑀚𑁆𑀛𑀁 𑀕𑀳𑀡𑀯𑀲𑁂𑀦 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁦𑁧. 𑀉𑀧𑀸𑀤𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀢𑀡𑁆𑀳𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀧𑀘𑁆𑀘𑀬𑁄, 𑀲𑁂𑀲𑀼𑀧𑀸𑀤𑀸𑀦𑀸𑀦𑀁 𑀲𑀳𑀚𑀸𑀢𑀓𑁄𑀝𑀺𑀬𑀸𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀧𑀺 𑀯𑀺𑀜𑁆𑀜𑀸𑀡𑀸𑀤𑀺 𑀘 𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸 𑀯𑀺𑀧𑀸𑀓𑀯𑀺𑀥𑀻𑀢𑀺 𑀓𑀢𑁆𑀯𑀸.

𑁧𑁦𑁨. 𑀬𑀤𑀺𑀤𑀁 𑀯𑁂𑀤𑀦𑀸𑀢𑀺 𑀏𑀢𑁆𑀣 𑀯𑀺𑀧𑀸𑀓𑀯𑁂𑀤𑀦𑀸𑀢𑀺 𑀢𑀫𑁂𑀯 𑀢𑀸𑀯 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀇𑀢𑀭𑀓𑁄𑀝𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀅𑀜𑁆𑀜𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑁂𑀤𑀦𑀸. 𑀅𑀜𑁆𑀜𑀣𑀸𑀧𑀻𑀢𑀺 𑀲𑀳𑀚𑀸𑀢𑀓𑁄𑀝𑀺𑀬𑀸𑀧𑀺.

𑁧𑁦𑁩. 𑀏𑀢𑁆𑀢𑀸𑀯𑀢𑀸𑀢𑀺 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀧𑀭𑀫𑁆𑀧𑀭𑀸𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀬 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬. 𑀧𑀼𑀭𑀺𑀫𑀢𑀡𑁆𑀳𑀦𑁆𑀢𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀁 𑀢𑀡𑁆𑀳𑀁. ‘‘𑀏𑀲 𑀧𑀘𑁆𑀘𑀬𑁄 𑀢𑀡𑁆𑀳𑀸𑀬, 𑀬𑀤𑀺𑀤𑀁 𑀯𑁂𑀤𑀦𑀸’’𑀢𑀺 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀲𑁆𑀲 𑀨𑀲𑁆𑀲𑀲𑁆𑀲 𑀉𑀤𑁆𑀥𑀭𑀡𑀁 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀸𑀫𑀕𑁆𑀕𑁄, 𑀢𑀁 𑀧𑀦 𑀅𑀦𑁄𑀢𑀭𑀺𑀢𑁆𑀯𑀸 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀸𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀢𑀡𑁆𑀳𑀸𑀫𑀽𑀮𑀓𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀆𑀘𑀺𑀡𑁆𑀡𑀤𑁂𑀲𑀦𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑀦𑁆𑀢𑁄 𑀯𑀺𑀬, 𑀢𑀜𑁆𑀘 𑀤𑁂𑀲𑀦𑀁 𑀧𑀲𑁆𑀲𑀢𑁄 𑀅𑀧𑁆𑀧𑀯𑀢𑁆𑀢𑀦𑁆𑀢𑀺 𑀧𑀲𑀬𑁆𑀳 𑀩𑀮𑀓𑁆𑀓𑀸𑀭𑁂𑀦 𑀤𑁂𑀲𑁂𑀦𑁆𑀢𑁄 𑀯𑀺𑀬 𑀘 𑀳𑁄𑀢𑀻𑀢𑀺 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀤𑁆𑀯𑁂 𑀢𑀡𑁆𑀳𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀢𑀡𑁆𑀳𑀸 𑀏𑀯 𑀤𑁆𑀯𑀺𑀥𑀸 𑀪𑀺𑀦𑁆𑀤𑀦𑁆𑀢𑁄 𑀆𑀳. 𑀏𑀲𑀦𑀢𑀡𑁆𑀳𑀸𑀢𑀺 𑀪𑁄𑀕𑀸𑀦𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸. 𑀏𑀲𑀺𑀢𑀢𑀡𑁆𑀳𑀸𑀢𑀺 𑀧𑀭𑀺𑀬𑀺𑀝𑁆𑀞𑁂𑀲𑀼 𑀪𑁄𑀕𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀢𑀡𑁆𑀳𑀸. 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀸𑀬𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸𑀬. 𑀤𑀼𑀯𑀺𑀥𑀸𑀧𑁂𑀲𑀸 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸 𑀦𑀸𑀫 𑀯𑁂𑀤𑀦𑀸𑀧𑀘𑁆𑀘𑀬𑀸 𑀘 𑀅𑀧𑁆𑀧𑀝𑀺𑀮𑀤𑁆𑀥𑀸𑀦𑀁 𑀪𑁄𑀕𑀸𑀦𑀁 𑀧𑀝𑀺𑀮𑀸𑀪𑀸𑀬 𑀧𑀭𑀺𑀬𑁂𑀲𑀦𑀸, 𑀮𑀤𑁆𑀥𑁂𑀲𑀼 𑀘 𑀢𑁂𑀲𑀼𑀧𑀸𑀢𑀩𑁆𑀬𑀢𑀸𑀧𑀢𑁆𑀢𑀺𑀆𑀤𑀺 𑀳𑁄𑀢𑀻𑀢𑀺.

𑀧𑀭𑀺𑀢𑀲𑁆𑀲𑀦𑀯𑀲𑁂𑀦 𑀧𑀭𑀺𑀬𑁂𑀲𑀢𑀺 𑀏𑀢𑀸𑀬𑀸𑀢𑀺 𑀧𑀭𑀺𑀬𑁂𑀲𑀦𑀸. 𑀆𑀲𑀬𑀢𑁄, 𑀧𑀬𑁄𑀕𑀢𑁄 𑀘 𑀧𑀭𑀺𑀬𑁂𑀲𑀦𑀸 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀻’’𑀢𑀺. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄𑀢𑀺 𑀲𑀯𑀢𑁆𑀣𑀼𑀓𑀸𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀕𑀯𑁂𑀲𑀦𑀯𑀲𑁂𑀦, 𑀧𑀯𑀢𑁆𑀢𑀺𑀬𑀁 𑀧𑀦 𑀅𑀧𑀭𑀺𑀬𑀺𑀝𑁆𑀞𑀁𑀬𑁂𑀯 𑀮𑀩𑁆𑀪𑀢𑀺, 𑀢𑀫𑁆𑀧𑀺 𑀅𑀢𑁆𑀣𑀢𑁄 𑀧𑀭𑀺𑀬𑁂𑀲𑀦𑀸𑀬 𑀮𑀤𑁆𑀥𑀫𑁂𑀯 𑀦𑀸𑀫 𑀢𑀣𑀸𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀧𑀼𑀩𑁆𑀩𑁂𑀓𑀢𑀢𑁆𑀢𑀸 𑀏𑀯 𑀮𑀩𑁆𑀪𑀦𑀢𑁄. 𑀢𑁂𑀦𑀸𑀳 ‘‘𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀻’’𑀢𑀺. 𑀲𑀼𑀔𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀲𑀼𑀔𑀁 𑀯𑀺𑀲𑁂𑀲𑀢𑁄 𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀲𑀼𑀔𑀯𑀺𑀦𑀺𑀘𑁆𑀙𑀬𑁄, 𑀲𑀼𑀔𑀁 𑀲𑀪𑀸𑀯𑀢𑁄, 𑀲𑀫𑀼𑀤𑀬𑀢𑁄, 𑀅𑀢𑁆𑀣𑀗𑁆𑀕𑀫𑀦𑀢𑁄, 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀁, 𑀢𑀁 𑀲𑀼𑀔𑀯𑀺𑀦𑀺𑀘𑁆𑀙𑀬𑀁. 𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. ‘‘𑀲𑀼𑀪𑀲𑀼𑀔’’𑀦𑁆𑀢𑀺𑀆𑀤𑀺𑀓𑀁 𑀆𑀭𑀫𑁆𑀫𑀡𑁂 𑀅𑀪𑀽𑀢𑀸𑀓𑀸𑀭𑀁 𑀯𑀺𑀯𑀺𑀥𑀁 𑀦𑀺𑀦𑁆𑀦𑀪𑀸𑀯𑁂𑀦 𑀦𑀺𑀘𑁆𑀙𑀺𑀦𑁄𑀢𑀺 𑀆𑀭𑁄𑀧𑁂𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑀸𑀧𑀺 𑀏𑀯𑀫𑁂𑀯 𑀯𑀺𑀦𑀺𑀘𑁆𑀙𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂𑀢𑀺 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂. (𑀤𑀻. 𑀦𑀺. 𑁨.𑁩𑁫𑁮) 𑀢𑀢𑁆𑀣 𑀳𑀺 ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀁 𑀇𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 𑀆𑀕𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂.‘‘𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀻’’𑀢𑀺 𑀏𑀢𑁂𑀦 ‘‘𑀯𑀺𑀦𑀺𑀘𑁆𑀙𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀯𑀺𑀦𑀺𑀘𑁆𑀙𑀬-𑀲𑀤𑁆𑀤𑀲𑁆𑀲 𑀓𑀭𑀡𑀲𑀸𑀥𑀦𑀫𑀸𑀳. ‘‘𑀏𑀢𑁆𑀢𑀓’’𑀦𑁆𑀢𑀺𑀆𑀤𑀺 𑀯𑀺𑀦𑀺𑀘𑁆𑀙𑀬𑀦𑀸𑀓𑀸𑀭𑀤𑀲𑁆𑀲𑀦𑀁.

𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄, 𑀏𑀯𑀁 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀲𑁆𑀯𑀸𑀬𑀁 𑀅𑀦𑀸𑀲𑁂𑀯𑀦𑀢𑀸𑀬 𑀫𑀦𑁆𑀤𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦’’𑀦𑁆𑀢𑀺. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀦𑀁. ‘‘𑀫𑀬𑁆𑀳𑀁 𑀇𑀤’’𑀦𑁆𑀢𑀺 𑀳𑀺 𑀢𑀡𑁆𑀳𑀸𑀕𑀸𑀳𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀕𑁆𑀕𑀸𑀳𑀲𑀦𑁆𑀦𑀺𑀲𑁆𑀲𑀬𑁄𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀳𑀁 𑀫𑀫’’𑀦𑁆𑀢𑀺, ‘‘𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀘 𑀢𑁂𑀲𑀁 𑀕𑀸𑀳𑀸𑀦𑀁 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀫𑀸𑀳. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀦𑁆𑀢𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀦𑁄 𑀅𑀜𑁆𑀜𑀸𑀲𑀸𑀥𑀸𑀭𑀡𑀁 𑀯𑀺𑀬 𑀓𑀢𑁆𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀸𑀦𑀁, 𑀢𑀣𑀸𑀧𑀯𑀢𑁆𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀅𑀢𑁆𑀢𑀦𑀸 𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀬𑀲𑁆𑀲 𑀯𑀲𑁂𑀦 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀫𑀸𑀦𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄, 𑀲𑁄 𑀥𑀫𑁆𑀫𑁄 𑀅𑀲𑀳𑀦𑀢𑀸. 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑀤𑁆𑀤𑀮𑀓𑁆𑀔𑀡𑁂 𑀧𑀦 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀫𑀘𑁆𑀙𑀭𑀺𑀬𑀬𑁄𑀕𑀢𑁄 𑀧𑀼𑀕𑁆𑀕𑀮𑁄 𑀫𑀘𑁆𑀙𑀭𑁄, 𑀢𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑁂𑀭𑁄 𑀥𑀫𑁆𑀫𑁄. 𑀫𑀘𑁆𑀙𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄 𑀆𑀤𑀭𑁂𑀦 𑀭𑀓𑁆𑀔𑀡𑀁 𑀆𑀭𑀓𑁆𑀔𑁄𑀢𑀺 𑀆𑀳 ‘‘𑀤𑁆𑀯𑀸𑀭…𑀧𑁂… 𑀲𑀼𑀝𑁆𑀞𑀼 𑀭𑀓𑁆𑀔𑀡’’𑀦𑁆𑀢𑀺. 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀭𑀡𑀁, 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁, 𑀅𑀥𑀺𑀓𑀁 𑀓𑀭𑀡𑀦𑁆𑀢𑀺 𑀅𑀥𑀺𑀓𑀭𑀡𑀁, 𑀯𑀺𑀲𑁂𑀲𑀓𑀸𑀭𑀡𑀁. 𑀯𑀺𑀲𑁂𑀲𑀓𑀸𑀭𑀡𑀜𑁆𑀘 𑀪𑁄𑀕𑀸𑀦𑀁 𑀆𑀭𑀓𑁆𑀔𑀤𑀡𑁆𑀟𑀸𑀤𑀸𑀦𑀸𑀤𑀺𑀅𑀦𑀢𑁆𑀣𑀲𑀫𑁆𑀪𑀯𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀭𑀓𑁆𑀔𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺. 𑀧𑀭𑀦𑀺𑀲𑁂𑀥𑀦𑀢𑁆𑀣𑀦𑁆𑀢𑀺 𑀫𑀸𑀭𑀡𑀸𑀤𑀺𑀦𑀸 𑀧𑀭𑁂𑀲𑀁 𑀯𑀺𑀩𑀸𑀥𑀦𑀢𑁆𑀣𑀁. 𑀆𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀆𑀤𑀸𑀦𑀁, 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁, 𑀅𑀪𑀺𑀪𑀯𑀺𑀢𑁆𑀯𑀸 𑀧𑀭𑀯𑀺𑀳𑁂𑀞𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀢𑁆𑀣𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀓𑀸𑀬𑁂𑀦 𑀓𑀸𑀢𑀩𑁆𑀩𑀓𑀮𑀳𑁄 𑀓𑀸𑀬𑀓𑀮𑀳𑁄. 𑀫𑀫𑁆𑀫𑀖𑀝𑁆𑀝𑀦𑀸𑀤𑀺𑀯𑀲𑁂𑀦 𑀯𑀸𑀘𑀸𑀬 𑀓𑀸𑀢𑀩𑁆𑀩𑀓𑀮𑀳𑁄 𑀯𑀸𑀘𑀸𑀓𑀮𑀳𑁄. 𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀯𑀺𑀭𑀽𑀧𑀁 𑀕𑀡𑁆𑀳𑀸𑀢𑀺 𑀏𑀢𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀭𑀼𑀤𑁆𑀥𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀺𑀯𑀸𑀤𑁄. 𑀢𑀼𑀯𑀁 𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀘𑀦𑀲𑀳𑀘𑀭𑀡𑀢𑁄 𑀢𑀼𑀯𑀁 𑀢𑀼𑀯𑀁, 𑀲𑀩𑁆𑀩𑁂𑀢𑁂 𑀢𑀣𑀸𑀧𑀯𑀢𑁆𑀢𑀸 𑀤𑁄𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁦𑁪).

𑁧𑁧𑁨. 𑀤𑁂𑀲𑀦𑀁 𑀦𑀺𑀯𑀢𑁆𑀢𑁂𑀲𑀻𑀢𑀺 ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀮𑁄𑀫𑀦𑀬𑁂𑀦 𑀧𑀯𑀢𑁆𑀢𑀺𑀢𑀁 𑀤𑁂𑀲𑀦𑀁 𑀧𑀝𑀺𑀮𑁄𑀫𑀦𑀬𑁂𑀦 𑀧𑀼𑀦 ‘‘𑀆𑀭𑀓𑁆𑀔𑀸𑀥𑀺𑀓𑀭𑀡’’𑀦𑁆𑀢𑀺 𑀆𑀭𑀪𑀦𑁆𑀢𑁄 𑀦𑀺𑀯𑀢𑁆𑀢𑁂𑀲𑀺. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄, 𑀢𑀢𑁆𑀣 𑀭𑀜𑁆𑀚𑀦𑀯𑀲𑁂𑀦 𑀅𑀪𑀺𑀭𑀫𑀡𑀯𑀲𑁂𑀦 𑀧𑀯𑀢𑁆𑀢𑀭𑀸𑀕𑁄, 𑀢𑀲𑁆𑀲 𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀭𑀜𑁆𑀚𑀦𑀯𑀲𑁂𑀦 𑀢𑀡𑁆𑀳𑀸𑀬𑀦𑀯𑀲𑁂𑀦 𑀧𑀯𑀢𑁆𑀢𑀸 𑀭𑀽𑀧𑀸𑀤𑀺𑀢𑀡𑁆𑀳𑀸𑀯 𑀓𑀸𑀫𑁂𑀲𑀼 𑀢𑀡𑁆𑀳𑀸𑀢𑀺 𑀓𑀸𑀫𑀢𑀡𑁆𑀳𑀸. 𑀪𑀯𑀢𑀺 𑀅𑀢𑁆𑀣𑀺 𑀲𑀩𑁆𑀩𑀓𑀸𑀮𑀁 𑀢𑀺𑀝𑁆𑀞𑀢𑀻𑀢𑀺 𑀧𑀯𑀢𑁆𑀢𑀸 𑀪𑀯𑀤𑀺𑀝𑁆𑀞𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀪𑀯𑁄, 𑀢𑀁𑀲𑀳𑀕𑀢𑀸 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸. 𑀯𑀺𑀪𑀯𑀢𑀺 𑀯𑀺𑀦𑀲𑁆𑀲𑀢𑀺 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀪𑀯𑀤𑀺𑀝𑁆𑀞𑀺 𑀯𑀺𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀁𑀲𑀳𑀕𑀢𑀸 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀆𑀳 ‘‘𑀲𑀲𑁆𑀲𑀢𑀤𑀺𑀝𑁆𑀞𑀻’’𑀢𑀺𑀆𑀤𑀺. 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸𑀢𑀺 ‘‘𑀏𑀲 𑀧𑀘𑁆𑀘𑀬𑁄 𑀉𑀧𑀸𑀤𑀸𑀦𑀲𑁆𑀲, 𑀬𑀤𑀺𑀤𑀁 𑀢𑀡𑁆𑀳𑀸’’𑀢𑀺 (𑀤𑀻. 𑀦𑀺. 𑁨.𑁧𑁦𑁧) 𑀏𑀯𑀁 𑀯𑀼𑀢𑁆𑀢𑀸 𑀯𑀝𑁆𑀝𑀫𑀽𑀮𑀢𑀡𑁆𑀳𑀸 𑀘 ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸’’𑀢𑀺 (𑀤𑀻. 𑀦𑀺. 𑁨.𑁧𑁦𑁩) 𑀏𑀯𑀁 𑀯𑀼𑀢𑁆𑀢𑀸 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸. 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸𑀢𑀺 𑀯𑀝𑁆𑀝𑀫𑀽𑀮𑀯𑀲𑁂𑀦 𑀘𑁂𑀯 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀘. 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺. 𑀤𑁆𑀯𑀻𑀳𑀺 𑀅𑀯𑀬𑀯𑁂𑀳𑀺 𑀲𑀫𑁄𑀲𑀭𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀲𑀫𑀁 𑀯𑀢𑁆𑀢𑀦𑁆𑀢𑀺 𑀇𑀢𑁄𑀢𑀺 𑀲𑀫𑁄𑀲𑀭𑀡𑀁, 𑀧𑀘𑁆𑀘𑀬𑁄, 𑀏𑀓𑀁 𑀲𑀫𑁄𑀲𑀭𑀡𑀁 𑀏𑀢𑀸𑀲𑀦𑁆𑀢𑀺 𑀏𑀓𑀲𑀫𑁄𑀲𑀭𑀡𑀸. 𑀓𑁂𑀦 𑀧𑀦 𑀏𑀓𑀲𑀫𑁄𑀲𑀭𑀡𑀸𑀢𑀺 𑀆𑀳 ‘‘𑀯𑁂𑀤𑀦𑀸𑀬𑀸’’𑀢𑀺. 𑀤𑁆𑀯𑁂𑀧𑀺 𑀳𑀺 𑀢𑀡𑁆𑀳𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀏𑀯𑀸𑀢𑀺. 𑀢𑁂𑀦𑀸𑀳 ‘‘𑀯𑁂𑀤𑀦𑀸𑀧𑀘𑁆𑀘𑀬𑁂𑀦 𑀏𑀓𑀧𑀘𑁆𑀘𑀬𑀸’’𑀢𑀺. 𑀢𑀢𑁄 𑀢𑀢𑁄 𑀑𑀲𑀭𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀫𑀯𑀲𑀦𑀝𑁆𑀞𑀸𑀦𑀁 𑀑𑀲𑀭𑀡 𑀲𑀫𑁄𑀲𑀭𑀡𑀁. 𑀯𑁂𑀤𑀦𑀸𑀬 𑀲𑀫𑀁 𑀲𑀳 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀑𑀲𑀭𑀡𑀓𑀧𑀯𑀢𑁆𑀢𑀦𑀓𑀸 𑀯𑁂𑀤𑀦𑀸 𑀲𑀫𑁄𑀲𑀭𑀡𑀸𑀢𑀺 𑀆𑀳 ‘‘𑀇𑀤𑀁 𑀲𑀳𑀚𑀸𑀢𑀲𑀫𑁄𑀲𑀭𑀡𑀁 𑀦𑀸𑀫𑀸’’𑀢𑀺.

𑁧𑁧𑁩. 𑀲𑀩𑁆𑀩𑁂𑀢𑀺 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀯𑀲𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀸 𑀲𑀯𑀺𑀧𑀸𑀓𑀨𑀲𑁆𑀲𑀸 𑀏𑀯 𑀯𑀺𑀜𑁆𑀜𑀸𑀡𑀸𑀤𑀺 𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸 𑀯𑀺𑀧𑀸𑀓𑀯𑀺𑀣𑀻𑀢𑀺 𑀓𑀢𑁆𑀯𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀦𑀸𑀫 𑀯𑀝𑁆𑀝𑀓𑀣𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀨𑀲𑁆𑀲𑁂’’𑀢𑀺. 𑀩𑀳𑀼𑀥𑀸𑀢𑀺 𑀩𑀳𑀼𑀧𑁆𑀧𑀓𑀸𑀭𑁂𑀦. 𑀅𑀬𑀜𑁆𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑁂𑀤𑀦𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀸𑀦𑀁 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑁄 𑀢𑀣𑁂𑀯 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀁. 𑀬𑀸 𑀧𑀦 𑀢𑀸 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀸𑀯𑀘𑀭𑀯𑁂𑀤𑀦𑀸, 𑀢𑀸𑀲𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀬𑀼𑀢𑁆𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀁 𑀨𑀲𑁆𑀲𑁄 𑀩𑀳𑀼𑀥𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁪. 𑀯𑁂𑀤𑀦𑀸𑀤𑀻𑀦𑀦𑁆𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁. 𑀅𑀲𑀤𑀺𑀲𑀪𑀸𑀯𑀸𑀢𑀺 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀸𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑀪𑀸𑀯𑀸. 𑀢𑁂 𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀥𑀼𑀭𑁂𑀦 𑀯𑁂𑀤𑀬𑀺𑀢𑀸𑀤𑀺𑀭𑀽𑀧𑁂𑀦 𑀆𑀓𑀺𑀭𑀺𑀬𑀦𑁆𑀢𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀆𑀓𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀬𑁂𑀯𑀸𑀢𑀺 𑀯𑁂𑀤𑀦𑀸𑀤𑀻𑀦𑀁 𑀢𑁂 𑀏𑀯 𑀯𑁂𑀤𑀬𑀺𑀢𑀸𑀤𑀺𑀆𑀓𑀸𑀭𑀸. 𑀲𑀸𑀥𑀼𑀓𑀁 𑀤𑀲𑁆𑀲𑀺𑀬𑀫𑀸𑀦𑀸𑀢𑀺 𑀲𑀓𑁆𑀓𑀘𑁆𑀘𑀁 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀧𑀓𑀸𑀲𑀺𑀬𑀫𑀸𑀦𑀸. 𑀢𑀁 𑀢𑀁 𑀮𑀻𑀦𑀫𑀢𑁆𑀣𑀁 𑀕𑀫𑁂𑀦𑁆𑀢𑀻𑀢𑀺 ‘‘𑀅𑀭𑀽𑀧𑀝𑁆𑀞𑁄 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀫𑀦𑀝𑁆𑀞𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀢𑀁 𑀢𑀁 𑀮𑀻𑀦𑀁 𑀅𑀧𑀸𑀓𑀝𑀫𑀢𑁆𑀣𑀁 𑀕𑀫𑁂𑀦𑁆𑀢𑀺 𑀜𑀸𑀧𑁂𑀦𑁆𑀢𑀻𑀢𑀺 𑀮𑀺𑀗𑁆𑀕𑀸𑀦𑀺. 𑀢𑀲𑁆𑀲 𑀢𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁄𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀭𑀽𑀧𑀝𑁆𑀞𑀸𑀤𑀺𑀓𑀲𑁆𑀲 𑀲𑀮𑁆𑀮𑀓𑁆𑀔𑀡𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀦𑀺𑀫𑀻𑀬𑀦𑁆𑀢𑀺 𑀅𑀦𑀼𑀫𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀢𑀣𑀸 𑀢𑀣𑀸 𑀅𑀭𑀽𑀧𑀪𑀸𑀯𑀸𑀤𑀺𑀧𑁆𑀧𑀓𑀸𑀭𑁂𑀦, 𑀯𑁂𑀤𑀬𑀺𑀢𑀸𑀤𑀺𑀧𑁆𑀧𑀓𑀸𑀭𑁂𑀦 𑀘 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀓𑀣𑁂𑀢𑀩𑁆𑀩𑀢𑁄 𑀉𑀤𑁆𑀤𑁂𑀲𑀸. 𑀢𑀲𑁆𑀫𑀸𑀢𑀺 ‘‘𑀅𑀲𑀤𑀺𑀲𑀪𑀸𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀬𑀲𑁆𑀫𑀸 𑀯𑁂𑀤𑀦𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀅𑀲𑀤𑀺𑀲𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀆𑀓𑀸𑀭𑀸𑀤𑀬𑁄, 𑀢𑀲𑁆𑀫𑀸 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀏𑀢𑁆𑀣 𑀧𑀸𑀴𑀺𑀧𑀤𑁂 𑀅𑀢𑁆𑀣𑁄.

𑀦𑀸𑀫𑀲𑀫𑀽𑀳𑀲𑁆𑀲𑀸𑀢𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀝𑁆𑀞𑁂𑀦 ‘‘𑀦𑀸𑀫’’𑀦𑁆𑀢𑀺 𑀮𑀤𑁆𑀥𑀲𑀫𑀜𑁆𑀜𑀲𑁆𑀲 𑀯𑁂𑀤𑀦𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀭𑀽𑀧𑀥𑀫𑁆𑀫𑀧𑀼𑀜𑁆𑀚𑀲𑁆𑀲. 𑀧𑀜𑁆𑀜𑀢𑁆𑀢𑀻𑀢𑀺 ‘‘𑀦𑀸𑀫𑀓𑀸𑀬𑁄 𑀅𑀭𑀽𑀧𑀓𑀮𑀸𑀧𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸 𑀳𑁄𑀢𑀺. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀓𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀚𑀦𑁂 ‘‘𑀬𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀲𑀜𑁆𑀘𑁂𑀢𑀬𑀺𑀢𑀢𑁆𑀢’’𑀦𑁆𑀢𑀺 (𑀯𑀺𑀪. 𑁨𑁪𑁯 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂) 𑀘𑁂𑀢𑀦𑀸𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀲𑀢𑀻𑀢𑀺 𑀅𑀲𑀦𑁆𑀢𑁂𑀲𑀼. 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 𑀏𑀯𑀁 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸𑀢𑀺 𑀯𑁂𑀤𑀦𑀸 𑀲𑀜𑁆𑀜𑀸 𑀘𑀺𑀢𑁆𑀢𑀁 𑀘𑁂𑀢𑀦𑀸𑀤𑀬𑁄𑀢𑀺 𑀇𑀫𑁂 𑀘𑀢𑀼𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂 𑀥𑀫𑁆𑀫𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸. 𑀅𑀬𑀜𑁆𑀘 𑀦𑀬𑁄 𑀧𑀜𑁆𑀘𑀤𑁆𑀯𑀸𑀭𑁂𑀧𑀺 𑀲𑀫𑁆𑀪𑀯𑀢𑀻𑀢𑀺 ‘‘𑀫𑀦𑁄𑀤𑁆𑀯𑀸𑀭𑁂’’𑀢𑀺 𑀯𑀺𑀲𑁂𑀲𑀺𑀢𑀁. 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀯𑁂𑀯𑀘𑀦𑁄𑀢𑀺 𑀅𑀥𑀺𑀯𑀘𑀦𑀫𑀼𑀔𑁂𑀦 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄’’𑀢𑀺 𑀮𑀤𑁆𑀥𑀦𑀸𑀫𑁄. 𑀲𑁄𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑁄. 𑀧𑀜𑁆𑀘𑀯𑁄𑀓𑀸𑀭𑁂 𑀘 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀮𑀩𑁆𑀪𑀦𑀢𑁄 𑀭𑀽𑀧𑀓𑀸𑀬𑁂 𑀧𑀜𑁆𑀜𑀸𑀬𑀢𑁂𑀯, 𑀅𑀬𑀁 𑀧𑀦 𑀦𑀬𑁄 𑀇𑀥 𑀦 𑀇𑀘𑁆𑀙𑀺𑀢𑁄 𑀯𑁂𑀤𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀲𑀫𑁆𑀪𑀯𑀧𑀭𑀺𑀬𑀸𑀬𑀲𑁆𑀲 𑀚𑁄𑀢𑀺𑀢𑀢𑁆𑀢𑀸𑀢𑀺 ‘‘𑀧𑀜𑁆𑀘𑀧𑀲𑀸𑀤𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀦 𑀳𑀺 𑀯𑁂𑀤𑀦𑀸𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀧𑀜𑁆𑀘𑀧𑀲𑀸𑀤𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀅𑀲𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀓𑀤𑀸𑀘𑀺𑀧𑀺 𑀦𑀢𑁆𑀣𑀻𑀢𑀺 𑀇𑀫𑀫𑀢𑁆𑀣𑀁 𑀬𑀣𑀸𑀥𑀺𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀫𑁆𑀩𑀭𑀼𑀓𑁆𑀔𑁂’’𑀢𑀺𑀆𑀤𑀺𑀫𑀸𑀳. 𑀭𑀽𑀧𑀓𑀸𑀬𑀢𑁄𑀢𑀺 𑀓𑁂𑀯𑀮𑀁 𑀭𑀽𑀧𑀓𑀸𑀬𑀢𑁄. 𑀢𑀲𑁆𑀲𑀸𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲.

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀪𑀽𑀢𑀢𑀭𑀸 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀺𑀁 𑀯𑀸 𑀲𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀭𑀼𑀧𑁆𑀧𑀦𑀸𑀓𑀸𑀭𑁄. 𑀲𑁄 𑀏𑀯 𑀭𑀼𑀧𑁆𑀧𑀦𑀸𑀓𑀸𑀭𑁄 𑀯𑀢𑁆𑀣𑀼𑀲𑀧𑁆𑀧𑀝𑀺𑀖𑀸𑀤𑀺𑀓𑀁 𑀢𑀁 𑀢𑀁 𑀮𑀻𑀦𑀫𑀢𑁆𑀣𑀁 𑀕𑀫𑁂𑀢𑀻𑀢𑀺 𑀮𑀺𑀗𑁆𑀕𑀁. 𑀢𑀲𑁆𑀲 𑀢𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁄 𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀢𑀣𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀉𑀤𑁆𑀤𑁂𑀲𑁄𑀢𑀺 𑀏𑀯𑀫𑁂𑀢𑁆𑀣 𑀆𑀓𑀸𑀭𑀸𑀤𑀬𑁄 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀳𑀦𑀦𑀁 𑀧𑀝𑀺𑀖𑁄, 𑀢𑀢𑁄 𑀧𑀝𑀺𑀖𑀢𑁄 𑀚𑀸𑀢𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄. 𑀢𑁂𑀦𑀸𑀳 ‘‘𑀲𑀧𑁆𑀧𑀝𑀺𑀖’’𑀦𑁆𑀢𑀺𑀆𑀤𑀺. 𑀦𑀸𑀫𑀓𑀸𑀬𑀢𑁄𑀢𑀺 𑀓𑁂𑀯𑀮𑀁 𑀦𑀸𑀫𑀓𑀸𑀬𑀢𑁄. 𑀢𑀲𑁆𑀲𑀸𑀢𑀺 𑀧𑀝𑀺𑀖𑀲𑀫𑁆𑀨𑀲𑁆𑀲𑀲𑁆𑀲. 𑀲𑁂𑀲𑀁 𑀧𑀞𑀫𑀧𑀜𑁆𑀳𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀪𑀬𑀯𑀲𑁂𑀦𑀸𑀢𑀺 𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄𑀢𑀺 𑀉𑀪𑀬𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀢𑀺 𑀉𑀪𑀬𑀲𑀫𑁆𑀨𑀲𑁆𑀲𑀲𑁆𑀲 𑀯𑀲𑁂𑀦.

𑀯𑀺𑀲𑀼𑀁 𑀯𑀺𑀲𑀼𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀘𑁆𑀘𑁂𑀓𑀁 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀜𑁆𑀜𑀺𑀢𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸. 𑀢𑁂𑀲𑀦𑁆𑀢𑀺 𑀨𑀲𑁆𑀲𑀸𑀦𑀁. 𑀅𑀯𑀺𑀲𑁂𑀲𑀢𑁄𑀢𑀺 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁄. 𑀤𑀲𑁆𑀲𑁂𑀢𑀼𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦𑁂𑀯 𑀤𑀲𑁆𑀲𑁂𑀢𑀼𑀁. 𑀏𑀲𑁂𑀯 𑀳𑁂𑀢𑀽𑀢𑀺 𑀏𑀲 𑀙𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑁄 𑀦𑀸𑀫𑀭𑀽𑀧𑀲𑀗𑁆𑀔𑀸𑀢𑁄 𑀳𑁂𑀢𑀼 𑀬𑀣𑀸𑀭𑀳𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀨𑀲𑁆𑀲𑀸𑀦𑀁. 𑀇𑀤𑀸𑀦𑀺 𑀢𑀁 𑀬𑀣𑀸𑀭𑀳𑀁 𑀧𑀯𑀢𑁆𑀢𑀺𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑁆𑀧𑀬𑀼𑀢𑁆𑀢𑀓𑀸 𑀔𑀦𑁆𑀥𑀸𑀢𑀺 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀔𑀦𑁆𑀥𑀸. 𑀆𑀯𑀚𑁆𑀚𑀦𑀲𑁆𑀲𑀸𑀧𑀺 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀧𑀭𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀯𑀺𑀥𑁄𑀧𑀻𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄𑀧𑀺. 𑀲𑁄 𑀨𑀲𑁆𑀲𑁄𑀢𑀺 𑀧𑀝𑀺𑀖𑀲𑀫𑁆𑀨𑀲𑁆𑀲𑁄. 𑀩𑀳𑀼𑀥𑀸𑀢𑀺 𑀩𑀳𑀼𑀧𑁆𑀧𑀓𑀸𑀭𑁂𑀦. 𑀢𑀣𑀸 𑀳𑀺 𑀯𑀺𑀧𑀸𑀓𑀦𑀸𑀫𑀁 𑀯𑀺𑀧𑀸𑀓𑀲𑁆𑀲 𑀅𑀦𑁂𑀓𑀪𑁂𑀤𑀲𑁆𑀲 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀆𑀳𑀸𑀭𑀓𑀺𑀘𑁆𑀘𑀁, 𑀢𑀁 𑀆𑀳𑀸𑀭𑀧𑀘𑁆𑀘𑀬𑀯𑀲𑁂𑀦. 𑀬𑀁 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀁, 𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀧𑀸𑀓𑀁 𑀧𑀦 𑀦𑀸𑀫𑀁 𑀅𑀯𑀺𑀧𑀸𑀓𑀲𑁆𑀲 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀞𑀧𑁂𑀢𑁆𑀯𑀸 𑀯𑀺𑀧𑀸𑀓𑀧𑀘𑁆𑀘𑀬𑀁 𑀇𑀢𑀭𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀁 𑀧𑀦 𑀘𑀓𑁆𑀔𑀸𑀬𑀢𑀦𑀸𑀤𑀺𑀪𑁂𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀬𑀢𑀦𑀸𑀤𑀺𑀪𑁂𑀤𑀁 𑀢𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀧𑀦 𑀢𑀸𑀦𑀺 𑀭𑀽𑀧𑀸𑀬𑀢𑀦𑀸𑀤𑀻𑀦𑀺, 𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘 𑀢𑀣𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀢𑁆𑀣𑀼𑀭𑀽𑀧𑀁 𑀧𑀦 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀦𑀸𑀫𑀭𑀽𑀧𑀁 𑀅𑀲𑁆𑀲 𑀨𑀲𑁆𑀲𑀲𑁆𑀲 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁫. 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀇𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦 𑀑𑀓𑁆𑀓𑀫𑀺𑀲𑁆𑀲𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀲𑁂𑀬𑁆𑀬𑀓𑀧𑀝𑀺𑀲𑀦𑁆𑀥𑀺 𑀳𑀺 𑀩𑀸𑀳𑀺𑀭𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀯𑀺𑀬 𑀳𑁄𑀦𑁆𑀢𑀻𑀧𑀺 𑀅𑀢𑁆𑀣𑀢𑁄 𑀬𑀣𑀸𑀧𑀘𑁆𑀘𑀬𑀁 𑀔𑀦𑁆𑀥𑀸𑀦𑀁 𑀢𑀢𑁆𑀣 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀧𑀯𑀺𑀲𑀺𑀢𑁆𑀯𑀸…𑀧𑁂… 𑀦 𑀯𑀢𑁆𑀢𑀺𑀲𑁆𑀲𑀣𑀸’’𑀢𑀺. 𑀲𑀼𑀤𑁆𑀥𑀦𑁆𑀢𑀺 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑁂𑀦 𑀅𑀫𑀺𑀲𑁆𑀲𑀺𑀢𑀁 𑀯𑀺𑀭𑀳𑀺𑀢𑀁. ‘‘𑀅𑀯𑀲𑁂𑀲’’𑀦𑁆𑀢𑀺 𑀇𑀤𑀁 𑀦𑀸𑀫𑀸𑀧𑁂𑀓𑁆𑀔𑀁, 𑀢𑀲𑁆𑀫𑀸 𑀅𑀯𑀲𑁂𑀲𑀁 𑀦𑀸𑀫𑀭𑀽𑀧𑀦𑁆𑀢𑀺 𑀇𑀫𑀁 𑀯𑀺𑀜𑁆𑀜𑀸𑀡𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀦𑀸𑀫𑀭𑀽𑀧𑀁 𑀯𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦, 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀧𑀞𑀫𑀸𑀯𑀬𑀯𑀪𑀸𑀯𑁂𑀦 𑀑𑀢𑀺𑀡𑁆𑀡𑀁. 𑀯𑁄𑀓𑁆𑀓𑀫𑀺𑀲𑁆𑀲𑀣𑀸𑀢𑀺 𑀲𑀦𑁆𑀢𑀢𑀺𑀯𑀺𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀉𑀧𑀕𑀫𑀺𑀲𑁆𑀲𑀣, 𑀢𑀁 𑀧𑀦 𑀫𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀘𑀼𑀢𑀺𑀯𑀲𑁂𑀦𑀸’’𑀢𑀺. 𑀅𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀲𑁆𑀲, 𑀢𑀜𑁆𑀘 𑀔𑁄 𑀯𑀺𑀜𑁆𑀜𑀸𑀡𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦𑀸’’𑀢𑀺, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲𑁂𑀯 𑀦𑀺𑀭𑁄𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲, 𑀢𑀢𑁄 𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑀸𑀦𑀁 𑀯𑀸 𑀦𑀺𑀭𑁄𑀥𑁂𑀦 𑀘𑀼𑀢𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀬𑀼𑀢𑁆𑀢𑀺𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑁂 𑀓𑀸𑀮𑁂. 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀤𑀸𑀭𑀓𑀲𑁆𑀲 𑀢𑀸𑀯 𑀫𑀭𑀡𑀦𑁆𑀢𑀭𑀸𑀬𑁄 𑀫𑀸 𑀳𑁄𑀢𑀼 𑀢𑀤𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀫𑀸𑀢𑀼 𑀧𑀦 𑀓𑀣𑀁 𑀢𑀤𑀸 𑀫𑀭𑀡𑀦𑁆𑀢𑀭𑀸𑀬𑀸𑀪𑀸𑀯𑁄𑀢𑀺? 𑀢𑀁 𑀢𑀁 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀤𑀦𑁆𑀢𑀭𑁂𑀬𑁂𑀯 𑀘𑀯𑀦𑀥𑀫𑁆𑀫𑀸𑀬 𑀕𑀩𑁆𑀪𑀕𑁆𑀕𑀳𑀡𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀺 𑀅𑀦𑁄𑀓𑀸𑀲𑁄 𑀦𑀸𑀫𑀸’’𑀢𑀺, 𑀘𑀼𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀻𑀢𑀺 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀓𑀫𑁆𑀫𑀚𑀭𑀽𑀧𑀸𑀦𑀺 𑀯𑀤𑀢𑀺. 𑀢𑀸𑀦𑀺 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀺 𑀦𑀸𑀫, 𑀦 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀢𑁄 𑀧𑀘𑁆𑀙𑀸 𑀲𑀫𑀼𑀝𑁆𑀞𑀺𑀢𑀢𑁆𑀢𑀸. 𑀘𑀺𑀢𑁆𑀢𑀚𑀸𑀳𑀸𑀭𑀚𑀸𑀦𑀁 𑀧𑀦 𑀢𑀤𑀸 𑀅𑀲𑀫𑁆𑀪𑀯𑁄 𑀏𑀯. 𑀬𑀸𑀦𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀺, 𑀢𑀸𑀦𑀺 𑀢𑀺𑀯𑀺𑀥𑀸𑀦𑀺 𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀺, 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀺, 𑀪𑀗𑁆𑀕𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀻𑀢𑀺. 𑀢𑁂𑀲𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀺 𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀺 𑀞𑀺𑀢𑀺𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀪𑀗𑁆𑀕𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀸𑀦𑀺 𑀪𑀗𑁆𑀕𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀢𑁆𑀣 ‘‘𑀪𑀜𑁆𑀚𑀫𑀸𑀦𑁄 𑀥𑀫𑁆𑀫𑁄 𑀪𑀜𑁆𑀚𑀫𑀸𑀦𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀉𑀧𑁆𑀧𑀸𑀤𑁂, 𑀧𑀦 𑀞𑀺𑀢𑀺𑀬𑀜𑁆𑀘 𑀦 𑀦 𑀲𑀓𑁆𑀓𑀸𑀢𑀺 ‘‘𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀞𑀺𑀢𑀺𑀓𑁆𑀔𑀡𑁂 𑀘 𑀥𑀭𑀦𑁆𑀢𑀸𑀦𑀁 𑀯𑀲𑁂𑀦 𑀢𑀲𑁆𑀲 𑀧𑀘𑁆𑀘𑀬𑀫𑁆𑀧𑀺 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀓𑀸𑀬𑀽𑀧𑀢𑁆𑀣𑀫𑁆𑀪𑀺𑀢𑀲𑁆𑀲𑁂𑀯 𑀳𑀺 𑀦𑀸𑀫𑀓𑀸𑀬𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀻𑀢𑀺. 𑀢𑁂𑀳𑀺 𑀭𑀽𑀧𑀥𑀫𑁆𑀫𑁂𑀳𑀺 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀩𑀮𑀯𑀢𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀢𑁆𑀢𑀭𑀲𑀫𑀲𑁆𑀲…𑀧𑁂… 𑀧𑀯𑀢𑁆𑀢𑀺 𑀧𑀯𑀢𑁆𑀢𑀢𑀻’’𑀢𑀺. 𑀧𑀯𑁂𑀡𑀻 𑀖𑀝𑀺𑀬𑀢𑀻𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀚𑀲𑁆𑀲 𑀭𑀽𑀧𑀧𑀯𑁂𑀡𑀻 𑀲𑀫𑁆𑀩𑀦𑁆𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀧𑀞𑀫𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀢𑀢𑁄 𑀬𑀸𑀯 𑀲𑁄𑀴𑀲𑀫𑀁 𑀪𑀯𑀗𑁆𑀕𑀘𑀺𑀢𑁆𑀢𑀁, 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀉𑀧𑁆𑀧𑀸𑀤𑀞𑀺𑀢𑀺𑀪𑀗𑁆𑀕𑀯𑀲𑁂𑀦 𑀢𑀬𑁄 𑀢𑀬𑁄 𑀔𑀡𑀸. 𑀢𑀢𑁆𑀣 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼 𑀲𑀫𑀢𑀺𑀁𑀲 𑀲𑀫𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀢𑀺 𑀲𑁄𑀴𑀲𑀢𑀺𑀓𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀢𑀢𑁄 𑀧𑀭𑁂𑀲𑀼𑀧𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀚𑀲𑁆𑀲 𑀭𑀽𑀧𑀧𑀯𑁂𑀡𑀻 𑀲𑀫𑁆𑀩𑀦𑁆𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻’’𑀢𑀺. 𑀲𑀘𑁂 𑀧𑀦 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀺 𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀲𑁆𑀲 𑀧𑀘𑁆𑀘𑀬𑀁 𑀤𑀸𑀢𑀼𑀁 𑀲𑀘𑁂 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀤𑀺 𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀲𑀢𑁆𑀢𑀭𑀲𑀫𑀁 𑀘𑀼𑀢𑀺𑀘𑀺𑀢𑁆𑀢𑀁 𑀲𑀺𑀬𑀸, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼𑀧𑀺 𑀓𑀫𑁆𑀫𑀚𑀭𑀽𑀧𑀁 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀕𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑀓𑁆𑀔𑀡𑁂𑀲𑀼. 𑀢𑀣𑀸 𑀲𑀢𑀺 𑀦𑀢𑁆𑀣𑁂𑀯 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀮𑀸𑀪𑁄𑀢𑀺 𑀧𑀯𑀢𑁆𑀢𑀺 𑀦𑀧𑁆𑀧𑀯𑀢𑁆𑀢𑀢𑀺, 𑀧𑀯𑁂𑀡𑀻 𑀦 𑀖𑀝𑀺𑀬𑀢𑁂𑀯, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀘𑁆𑀙𑀺𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀯𑁄𑀓𑁆𑀓𑀫𑀢𑀺𑀢𑀺𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺.

𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀁𑀧𑀓𑀸𑀭𑀢𑀸𑀬. 𑀬𑀸𑀤𑀺𑀲𑁄 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀅𑀢𑁆𑀢𑀪𑀸𑀯𑁄, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀽𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀯𑀸𑀬𑀸’’𑀢𑀺. 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀣𑀸𑀢𑀺 𑀲𑀦𑁆𑀢𑀸𑀦𑀯𑀺𑀘𑁆𑀙𑁂𑀤𑁂𑀦 𑀯𑀺𑀘𑁆𑀙𑀺𑀦𑁆𑀤𑁂𑀬𑁆𑀬. 𑀲𑀼𑀤𑁆𑀥𑀁 𑀦𑀸𑀫𑀭𑀽𑀧𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀡𑀯𑀺𑀭𑀳𑀺𑀢𑀁 𑀓𑁂𑀯𑀮𑀁 𑀦𑀸𑀫𑀭𑀽𑀧𑀫𑁂𑀯. 𑀅𑀯𑀬𑀯𑀸𑀦𑀁 𑀧𑀸𑀭𑀺𑀧𑀽𑀭𑀺 𑀯𑀼𑀟𑁆𑀠𑀺. 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺 𑀯𑀺𑀭𑀽𑀴𑁆𑀳𑀺. 𑀫𑀳𑀮𑁆𑀮𑀓𑀪𑀸𑀯𑀧𑁆𑀧𑀢𑁆𑀢𑀺 𑀯𑁂𑀧𑀼𑀮𑁆𑀮𑀁. 𑀢𑀸𑀦𑀺 𑀘 𑀬𑀣𑀸𑀓𑁆𑀓𑀫𑀁 𑀧𑀞𑀫𑀸𑀤𑀺𑀯𑀬𑀯𑀲𑁂𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀯𑀬𑀯𑀲𑁂𑀦𑀸’’𑀢𑀺𑀆𑀤𑀺. 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀯𑀲𑁆𑀲𑀲𑀳𑀲𑁆𑀲𑀤𑁆𑀯𑀬𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀜𑁆𑀜𑀸𑀡𑀫𑁂𑀯𑀸𑀢𑀺 𑀦𑀺𑀬𑀫𑀯𑀘𑀦𑀁, 𑀇𑀢𑁄 𑀩𑀸𑀳𑀺𑀭𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄, 𑀇𑀲𑁆𑀲𑀭𑀸𑀤𑀻𑀦𑀜𑁆𑀘 𑀧𑀝𑀺𑀓𑁆𑀔𑁂𑀧𑀧𑀤𑀁, 𑀦 𑀅𑀯𑀺𑀚𑁆𑀚𑀸𑀤𑀺𑀨𑀲𑁆𑀲𑀸𑀤𑀺𑀧𑀝𑀺𑀓𑁆𑀔𑁂𑀧𑀧𑀤𑀁 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀧𑀤𑀢𑁆𑀢𑀸 𑀅𑀯𑀥𑀸𑀭𑀡𑀲𑁆𑀲. 𑀢𑁂𑀦𑀸𑀳 ‘‘𑀏𑀲𑁂𑀯 𑀳𑁂𑀢𑀽’’𑀢𑀺𑀆𑀤𑀺. 𑀅𑀬𑀜𑁆𑀘 𑀦𑀬𑁄 𑀳𑁂𑀝𑁆𑀞𑀸𑀧𑀺 𑀲𑀩𑁆𑀩𑀧𑀤𑁂𑀲𑀼 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄. 𑀇𑀤𑀸𑀦𑀺 𑀯𑀺𑀜𑁆𑀜𑀸𑀡𑀫𑁂𑀯 𑀦𑀸𑀫𑀭𑀽𑀧𑀲𑁆𑀲 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀑𑀧𑀫𑁆𑀫𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀓𑀁 𑀯𑀺𑀬 𑀲𑀫𑀼𑀤𑀺𑀢𑀲𑁆𑀲𑀸𑀧𑀺 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑁂𑀦 𑀯𑀺𑀦𑀸 𑀅𑀢𑁆𑀢𑀓𑀺𑀘𑁆𑀘𑀸𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁆𑀯𑀁 𑀦𑀸𑀫𑀭𑀽𑀧𑀁 𑀦𑀸𑀫𑀸’’𑀢𑀺 𑀏𑀓𑀚𑁆𑀛𑀁 𑀕𑀳𑀡𑀁. 𑀧𑀼𑀭𑁂𑀘𑀸𑀭𑀺𑀓𑁂𑀢𑀺 𑀧𑀼𑀩𑁆𑀩𑀗𑁆𑀕𑀫𑁂𑀯. 𑀯𑀺𑀜𑁆𑀜𑀸𑀡𑀜𑁆𑀳𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺. (𑀥. 𑀧. 𑁧; 𑀦𑁂𑀢𑁆𑀢𑀺. 𑁯𑁦, 𑁯𑁨; 𑀧𑁂𑀝𑀓𑁄. 𑁧𑁩, 𑁮𑁩) 𑀩𑀳𑀼𑀥𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀣𑀁? 𑀯𑀺𑀧𑀸𑀓𑀦𑀸𑀫𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀅𑀜𑁆𑀜𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀢𑁆𑀣𑀼𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀯𑀢𑁆𑀣𑀼𑀭𑀽𑀧𑀁 𑀲𑁂𑀲𑀭𑀽𑀧𑀲𑁆𑀲 𑀇𑀫𑁂𑀲𑀼 𑀦𑀯𑀲𑀼 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂𑀳𑀺 𑀅𑀝𑁆𑀞𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀦 𑀅𑀲𑀜𑁆𑀜𑀲𑀢𑁆𑀢𑀭𑀽𑀧𑀲𑁆𑀲, 𑀧𑀜𑁆𑀘𑀯𑁄𑀓𑀸𑀭𑁂 𑀯𑀸 𑀓𑀫𑁆𑀫𑀚𑀲𑁆𑀲 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀲𑁂𑀲𑀜𑁆𑀳𑀺 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀘𑁆𑀘𑀬𑀦𑀬𑁂 𑀤𑀲𑁆𑀲𑀺𑀬𑀫𑀸𑀦𑁂 𑀲𑀩𑁆𑀩𑀸𑀧𑀺 𑀫𑀳𑀸𑀧𑀓𑀭𑀡𑀓𑀣𑀸 𑀆𑀦𑁂𑀢𑀩𑁆𑀩𑀸 𑀳𑁄𑀢𑀻𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀸. 𑀓𑀣𑀁 𑀧𑀦𑁂𑀢𑀁 𑀧𑀘𑁆𑀘𑁂𑀢𑀩𑁆𑀩𑀁 ‘‘𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀲𑀼𑀢𑁆𑀢𑀢𑁄, 𑀬𑀼𑀢𑁆𑀢𑀺𑀢𑁄 𑀘. 𑀧𑀸𑀴𑀺𑀬𑀜𑁆𑀳𑀺 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀫𑀸𑀢𑀺𑀓𑀸 𑁬𑁨) 𑀦𑀬𑁂𑀦 𑀩𑀳𑀼𑀥𑀸 𑀯𑁂𑀤𑀦𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀆𑀕𑀢𑀸. 𑀬𑀼𑀢𑁆𑀢𑀺𑀢𑁄 𑀧𑀦 𑀇𑀥 𑀘𑀺𑀢𑁆𑀢𑀚𑁂𑀦 𑀭𑀽𑀧𑁂𑀦 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀘𑀺𑀢𑁆𑀢𑁂𑀳𑀺 𑀧𑀲𑀦𑁆𑀦𑁂, 𑀅𑀧𑁆𑀧𑀲𑀦𑁆𑀦𑁂 𑀯𑀸 𑀢𑀤𑀦𑀼𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀤𑀺𑀝𑁆𑀞𑁂𑀦 𑀘 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀁 𑀳𑁄𑀢𑀻𑀢𑀺. 𑀇𑀫𑀺𑀦𑀸 𑀇𑀥 ‘‘𑀤𑀺𑀝𑁆𑀞𑁂𑀦 𑀘𑀺𑀢𑁆𑀢𑀚𑀭𑀽𑀧𑁂𑀦 𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀧𑀘𑁆𑀘𑁂𑀢𑀩𑁆𑀩𑀫𑁂𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀳𑀺 𑀭𑀽𑀧𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀬 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀧𑀝𑁆𑀞𑀸𑀦𑁂 𑀆𑀕𑀢𑀸𑀢𑀺.

𑁧𑁧𑁬. 𑀇𑀥 𑀲𑀫𑀼𑀤𑀬-𑀲𑀤𑁆𑀤𑁄 𑀲𑀫𑀼𑀤𑀸𑀬-𑀲𑀤𑁆𑀤𑁄 𑀯𑀺𑀬 𑀲𑀫𑀽𑀳𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀭𑀸𑀲𑀺𑀲𑀫𑁆𑀪𑀯𑁄’’𑀢𑀺. 𑀏𑀓𑀓𑁄𑀢𑀺 𑀅𑀲𑀳𑀸𑀬𑁄 𑀭𑀸𑀚𑀧𑀭𑀺𑀲𑀸𑀭𑀳𑀺𑀢𑁄. 𑀧𑀲𑁆𑀲𑁂𑀬𑁆𑀬𑀸𑀫 𑀢𑁂 𑀭𑀸𑀚𑀪𑀸𑀯𑀁 𑀅𑀫𑁆𑀳𑁂𑀳𑀺 𑀯𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀭𑀳𑀁 𑀧𑀭𑀺𑀲𑀁 𑀭𑀜𑁆𑀚𑁂𑀢𑀻𑀢𑀺 𑀳𑀺 𑀭𑀸𑀚𑀸. 𑀅𑀢𑁆𑀣𑀢𑁄𑀢𑀺 𑀅𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀯𑀤𑀦𑁆𑀢𑀫𑁆𑀧𑀺 𑀯𑀤𑀢𑀺 𑀯𑀺𑀬. ‘‘𑀳𑀤𑀬𑀯𑀢𑁆𑀣𑀼’’𑀦𑁆𑀢𑀺 𑀇𑀫𑀺𑀦𑀸𑀯 𑀢𑀦𑁆𑀦𑀺𑀲𑁆𑀲𑀬𑁄𑀧𑀺 𑀕𑀳𑀺𑀢𑁄 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀦𑀦𑁆𑀢𑀭𑀺𑀬𑀪𑀸𑀯𑀢𑁄 𑀦𑀺𑀲𑁆𑀲𑀬𑀦𑀺𑀲𑁆𑀲𑀬𑁄𑀧𑀺 ‘‘𑀦𑀺𑀲𑁆𑀲𑀬𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀸𑀫 𑀪𑀯𑁂𑀬𑁆𑀬𑀸𑀲𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀲𑁆𑀲𑁂𑀬𑁆𑀬𑀸𑀫𑀸’’𑀢𑀺𑀆𑀤𑀺. 𑀩𑀳𑀼𑀥𑀸𑀢𑀺 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀣𑀁? 𑀦𑀸𑀫𑀁 𑀢𑀸𑀯 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀲𑀢𑁆𑀢𑀥𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀧𑀸𑀓𑀁 𑀧𑀦 𑀦𑀸𑀫𑀁 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀧𑀸𑀓𑀧𑀘𑁆𑀘𑀬𑀁 𑀇𑀢𑀭𑁂𑀳𑀺 𑀙𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀜𑁆𑀘 𑀔𑁄 𑀧𑀯𑀢𑁆𑀢𑀺𑀬𑀁𑀬𑁂𑀯, 𑀦 𑀧𑀝𑀺𑀲𑀦𑁆𑀥𑀺𑀬𑀁. 𑀭𑀽𑀧𑀢𑁄 𑀧𑀦 𑀳𑀤𑀬𑀯𑀢𑁆𑀣𑀼 𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺 𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀙𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀯𑀢𑁆𑀢𑀺𑀬𑀁 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀚𑁆𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀲𑀳 𑀢𑁂𑀳𑁂𑀯 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀸𑀬𑀢𑀦𑀸𑀤𑀺𑀪𑁂𑀤𑀁 𑀧𑀦 𑀧𑀜𑁆𑀘𑀯𑀺𑀥𑀫𑁆𑀧𑀺 𑀭𑀽𑀧𑀁 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀁 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑁆𑀯𑀸𑀬𑀫𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀦𑀸𑀫𑀭𑀽𑀧𑀁, 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀲𑁆𑀲, 𑀘 𑀯𑀺𑀜𑁆𑀜𑀸𑀡𑀁 𑀧𑀢𑀺 𑀧𑀘𑁆𑀘𑀬𑀪𑀸𑀯𑁄, 𑀲𑁄 𑀓𑀤𑀸𑀘𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀸𑀢𑀺𑀲𑀬𑁄, 𑀓𑀤𑀸𑀘𑀺 𑀦𑀸𑀫𑀭𑀽𑀧𑀲𑁆𑀲, 𑀓𑀤𑀸𑀘𑀺 𑀉𑀪𑀺𑀦𑁆𑀦𑀁 𑀲𑀤𑀺𑀲𑁄𑀢𑀺 𑀢𑀺𑀯𑀺𑀥𑁄𑀧𑀺 𑀲𑁄 ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀧𑀤𑁂𑀦 𑀏𑀓𑀚𑁆𑀛𑀁 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑁂…𑀧𑁂… 𑀧𑀯𑀢𑁆𑀢𑁂𑀲𑀽’’𑀢𑀺 𑀯𑀢𑁆𑀯𑀸 𑀧𑀼𑀦 𑀬𑀫𑀺𑀤𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑀜𑁆𑀜𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀸𑀦𑀁 𑀏𑀢𑁆𑀢𑀓𑁂𑀦 𑀲𑀩𑁆𑀩𑀸 𑀲𑀁𑀲𑀸𑀭𑀯𑀝𑁆𑀝𑀧𑁆𑀧𑀯𑀢𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀓𑁂𑀦…𑀧𑁂… 𑀧𑀝𑀺𑀲𑀦𑁆𑀥𑀺𑀬𑁄’’𑀢𑀺 𑀆𑀳. 𑀢𑀢𑁆𑀣 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑁆𑀢𑀓𑁂𑀦𑁂𑀯, 𑀦 𑀇𑀢𑁄 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀓𑀯𑁂𑀤𑀓𑀲𑀪𑀸𑀯𑁂𑀦 𑀅𑀢𑁆𑀢𑀦𑀸, 𑀇𑀲𑁆𑀲𑀭𑀸𑀤𑀺𑀦𑀸 𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀜𑁆𑀳𑁂𑀢𑀁 𑀧𑀤𑀁.

𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀺𑀘𑁆𑀘𑀸𑀢𑀺 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀅𑀢𑀣𑀢𑁆𑀢𑀸 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀲𑁆𑀲. 𑀢𑁂𑀦𑀸𑀳 ‘‘𑀅𑀢𑁆𑀣𑀁 𑀅𑀤𑀺𑀲𑁆𑀯𑀸’’𑀢𑀺. 𑀯𑁄𑀳𑀸𑀭𑀲𑁆𑀲𑀸𑀢𑀺 𑀯𑁄𑀳𑀭𑀡𑀫𑀢𑁆𑀢𑀲𑁆𑀲. 𑀧𑀣𑁄𑀢𑀺 𑀧𑀯𑀢𑁆𑀢𑀺𑀫𑀕𑁆𑀕𑁄 𑀧𑀯𑀢𑁆𑀢𑀺𑀬𑀸 𑀯𑀺𑀲𑀬𑁄. 𑀬𑀲𑁆𑀫𑀸 𑀲𑀭𑀡𑀓𑀺𑀭𑀺𑀬𑀸𑀯𑀲𑁂𑀦 𑀧𑀼𑀕𑁆𑀕𑀮𑁄 ‘‘𑀲𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑀫𑁆𑀧𑀚𑀸𑀦𑀦𑀓𑀺𑀭𑀺𑀬𑀸𑀯𑀲𑁂𑀦 ‘‘𑀲𑀫𑁆𑀧𑀚𑀸𑀦𑁄’’𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀸𑀧𑀤𑁂𑀲𑀯𑀲𑁂𑀦𑀸’’𑀢𑀺. 𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀉𑀢𑁆𑀢𑀺 𑀦𑀺𑀭𑀼𑀢𑁆𑀢𑀻𑀢𑀺. 𑀏𑀓𑀫𑁂𑀯 𑀅𑀢𑁆𑀣𑀁 ‘‘𑀧𑀡𑁆𑀟𑀺𑀢𑁄’’𑀢𑀺𑀆𑀤𑀺𑀦𑀸 𑀧𑀓𑀸𑀭𑀢𑁄 𑀜𑀸𑀧𑀦𑀢𑁄 ‘‘𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑁄 𑀏𑀯 𑀳𑀺 ‘‘𑀧𑀡𑁆𑀟𑀺𑀢𑁄’’𑀢𑀺 𑀘 ‘‘𑀩𑁆𑀬𑀢𑁆𑀢𑁄’’𑀢𑀺 𑀘 ‘‘𑀫𑁂𑀥𑀸𑀯𑀻’’𑀢𑀺 𑀘 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀧𑀡𑁆𑀟𑀺𑀘𑁆𑀘𑀧𑁆𑀧𑀓𑀸𑀭𑀢𑁄 𑀧𑀦 𑀧𑀡𑁆𑀟𑀺𑀢𑁄, 𑀯𑁂𑀬𑁆𑀬𑀢𑁆𑀢𑀺𑀬𑀧𑁆𑀧𑀓𑀸𑀭𑀢𑁄 𑀩𑁆𑀬𑀢𑁆𑀢𑁄𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀏𑀯𑀁 𑀧𑀓𑀸𑀭𑀢𑁄 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺. 𑀬𑀲𑁆𑀫𑀸 𑀇𑀥 𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀧𑀤𑀸𑀦𑀺 𑀲𑀫𑀸𑀦𑀢𑁆𑀣𑀸𑀦𑀺. 𑀲𑀩𑁆𑀩𑀜𑁆𑀘 𑀯𑀘𑀦𑀁 𑀅𑀥𑀺𑀯𑀘𑀦𑀸𑀤𑀺𑀪𑀸𑀯𑀁 𑀪𑀚𑀢𑀺, 𑀢𑀲𑁆𑀫𑀸 𑀓𑁂𑀲𑀼𑀘𑀺 𑀯𑀘𑀦𑀯𑀺𑀲𑁂𑀲𑁂𑀲𑀼 𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑁂𑀳𑀺 𑀅𑀥𑀺𑀯𑀘𑀦𑀸𑀤𑀺𑀲𑀤𑁆𑀤𑁂𑀳𑀺 𑀲𑀩𑁆𑀩𑀸𑀦𑀺 𑀯𑀘𑀦𑀸𑀦𑀺 𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀯𑁂, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀲 𑀉𑀧𑀭𑀺? 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀧𑀸𑀓𑀝𑁄 𑀬𑀫𑀢𑁆𑀣𑁄. 𑀅𑀥𑀻𑀦𑀁 𑀯𑀸 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑁂𑀦 𑀅𑀥𑀻𑀦𑀁? 𑀅𑀢𑁆𑀣𑁂𑀦. 𑀢𑀣𑀸 𑀢𑀁𑀢𑀁𑀅𑀢𑁆𑀣𑀧𑁆𑀧𑀓𑀸𑀲𑁂𑀦 𑀦𑀺𑀘𑁆𑀙𑀺𑀢𑀁, 𑀦𑀺𑀬𑀢𑀁 𑀯𑀸 𑀯𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀧𑀣𑀯𑀻𑀥𑀸𑀢𑀼𑀧𑀼𑀭𑀺𑀲𑀸𑀤𑀺𑀢𑀁𑀢𑀁𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀅𑀥𑀺𑀯𑀘𑀦𑀸𑀤𑀺𑀧𑀤𑀸𑀦𑀁 𑀲𑀩𑁆𑀩𑀯𑀘𑀦𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀜𑁆𑀜𑀣𑀸 𑀲𑀺𑀭𑀺𑀯𑀟𑁆𑀠𑀓𑀥𑀦𑀯𑀟𑁆𑀠𑀓𑀧𑁆𑀧𑀓𑀸𑀭𑀸𑀦𑀫𑁂𑀯 𑀦𑀺𑀭𑀼𑀢𑁆𑀢𑀺𑀢𑀸, ‘‘𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄’’𑀢𑀺 𑀏𑀯𑀁 𑀧𑀓𑀸𑀭𑀸𑀦𑀫𑁂𑀯 𑀏𑀓𑀫𑁂𑀯 𑀅𑀢𑁆𑀣𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑁂𑀦𑁆𑀢𑀸𑀦𑀁 𑀧𑀜𑁆𑀜𑀢𑁆𑀢𑀺𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀏𑀯𑀁 𑀢𑀻𑀳𑀺𑀧𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀲𑁆𑀲 𑀯𑁄𑀳𑀸𑀭𑀲𑁆𑀲 𑀧𑀯𑀢𑁆𑀢𑀺𑀫𑀕𑁆𑀕𑁄𑀧𑀺 𑀲𑀳 𑀯𑀺𑀜𑁆𑀜𑀸𑀡𑁂𑀦 𑀦𑀸𑀫𑀭𑀽𑀧𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀯 𑀇𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀢𑀻’’𑀢𑀺𑀆𑀤𑀺. 𑀧𑀜𑁆𑀜𑀸𑀬 𑀅𑀯𑀘𑀭𑀺𑀢𑀩𑁆𑀩𑀦𑁆𑀢𑀺 𑀧𑀜𑁆𑀜𑀸𑀬 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺. 𑀯𑀝𑁆𑀝𑀦𑁆𑀢𑀺 𑀓𑀺𑀮𑁂𑀲𑀯𑀝𑁆𑀝𑀁, 𑀓𑀫𑁆𑀫𑀯𑀝𑁆𑀝𑀁, 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀯𑀝𑁆𑀝𑀁. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀢𑀬𑀺𑀤𑀁 ‘‘𑀚𑀸𑀬𑁂𑀣𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀇𑀢𑁆𑀣𑀻𑀢𑀺𑀧𑀼𑀭𑀺𑀲𑀸𑀢𑀺𑀆𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀫𑀧𑀜𑁆𑀜𑀢𑁆𑀢𑀢𑁆𑀣𑀸𑀬𑀸𑀢𑀺 𑀔𑀦𑁆𑀥𑀸𑀤𑀺𑀨𑀲𑁆𑀲𑀸𑀤𑀺𑀲𑀢𑁆𑀢𑀸𑀤𑀺𑀇𑀢𑁆𑀣𑀸𑀤𑀺𑀦𑀸𑀫𑀲𑁆𑀲 𑀧𑀜𑁆𑀜𑀸𑀧𑀦𑀢𑁆𑀣𑀸𑀬. 𑀯𑀢𑁆𑀣𑀼𑀧𑀺 𑀏𑀢𑁆𑀢𑀸𑀯𑀢𑀸𑀯. 𑀢𑁂𑀦𑀸𑀳 ‘‘𑀔𑀦𑁆𑀥𑀧𑀜𑁆𑀘𑀓𑀫𑁆𑀧𑀺 𑀏𑀢𑁆𑀢𑀸𑀯𑀢𑀸𑀯 𑀧𑀜𑁆𑀜𑀸𑀬𑀢𑀻’’𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦, 𑀲𑀳 𑀯𑀺𑀜𑁆𑀜𑀸𑀡𑁂𑀦 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁧𑁧𑁭. 𑀅𑀦𑀼𑀲𑀦𑁆𑀥𑀺𑀬𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀲𑀦𑁆𑀥𑀺, 𑀳𑁂𑀝𑁆𑀞𑀸 𑀆𑀕𑀢𑀤𑁂𑀲𑀦𑀸𑀬 𑀅𑀦𑀼𑀲𑀦𑁆𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀧𑀭𑀺𑀤𑁂𑀲𑀦𑀸, 𑀲𑀸 𑀧𑀞𑀫𑀧𑀤𑀲𑁆𑀲 𑀤𑀲𑁆𑀲𑀺𑀢𑀸, 𑀇𑀤𑀸𑀦𑀺 𑀤𑀼𑀢𑀺𑀬𑀧𑀤𑀲𑁆𑀲 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀭𑀽𑀧𑀺𑀦𑁆𑀢𑀺 𑀭𑀽𑀧𑀯𑀦𑁆𑀢𑀁. 𑀧𑀭𑀺𑀢𑁆𑀢𑀦𑁆𑀢𑀺 𑀦 𑀯𑀺𑀧𑀼𑀮𑀁, 𑀅𑀧𑁆𑀧𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺. 𑀓𑁂𑀯𑀮𑀁 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀢𑀁, 𑀢𑀲𑁆𑀫𑀸 𑀬𑀢𑁆𑀣 𑀦𑁂𑀲𑀁 𑀅𑀢𑁆𑀢𑀲𑀜𑁆𑀜𑀸, 𑀬𑀣𑀸 𑀘𑀲𑁆𑀲 𑀭𑀽𑀧𑀺𑀪𑀸𑀯𑀸𑀤𑀺𑀧𑀭𑀺𑀓𑀧𑁆𑀧𑀦𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄’’𑀢𑀺𑀆𑀤𑀺𑀫𑀸𑀳. 𑀭𑀽𑀧𑀺𑀁 𑀧𑀭𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀺𑀢𑀓𑀲𑀺𑀡𑀭𑀽𑀧𑀯𑀲𑁂𑀦 𑀭𑀽𑀧𑀺𑀁, 𑀢𑀲𑁆𑀲 𑀅𑀯𑀟𑁆𑀠𑀺𑀢𑀪𑀸𑀯𑁂𑀦 𑀧𑀭𑀺𑀢𑁆𑀢𑀁. 𑀧𑀜𑁆𑀜𑀧𑁂𑀢𑀺 𑀦𑀻𑀮𑀓𑀲𑀺𑀡𑀸𑀤𑀺𑀯𑀲𑁂𑀦 𑀦𑀸𑀦𑀸𑀓𑀲𑀺𑀡𑀮𑀸𑀪𑀻. 𑀢𑀦𑁆𑀢𑀺 𑀅𑀢𑁆𑀢𑀸𑀦𑀁. 𑀅𑀦𑀦𑁆𑀢𑀦𑁆𑀢𑀺 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀅𑀧𑁆𑀧𑀫𑀸𑀡𑀢𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑀼𑀧𑀝𑁆𑀞𑀸𑀦𑀢𑁄 𑀅𑀦𑁆𑀢𑀭𑀳𑀺𑀢𑀁. 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀪𑀸𑀯𑀦𑀸𑀬 𑀅𑀧𑀦𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀨𑀼𑀝𑁆𑀞𑁄𑀓𑀸𑀲𑀦𑁆𑀢𑀺 𑀢𑁂𑀦 𑀓𑀲𑀺𑀡𑀦𑀺𑀫𑀺𑀢𑁆𑀢𑁂𑀦 𑀨𑀼𑀝𑁆𑀞𑀧𑁆𑀧𑀤𑁂𑀲𑀁. 𑀢𑁂𑀲𑀽𑀢𑀺 𑀘𑀢𑀽𑀲𑀼 𑀅𑀭𑀽𑀧𑀓𑁆𑀔𑀦𑁆𑀥𑁂𑀲𑀼. 𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯𑀸𑀢𑀺 ‘‘𑀯𑀺𑀜𑁆𑀜𑀸𑀡𑀫𑀬𑁄 𑀅𑀢𑁆𑀢𑀸’’𑀢𑀺 𑀏𑀯𑀁𑀯𑀸𑀤𑀻.

𑁧𑁧𑁮. ‘‘𑀏𑀢𑀭𑀳𑀻’’𑀢𑀺 𑀲𑀸𑀯𑀥𑀸𑀭𑀡𑀫𑀺𑀤𑀁 𑀧𑀤𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀆𑀳 ‘‘𑀦 𑀇𑀢𑁄 𑀧𑀭’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀉𑀘𑁆𑀙𑁂𑀤𑀯𑀸𑀤𑀻, 𑀢𑁂𑀦𑀸𑀳 ‘‘𑀉𑀘𑁆𑀙𑁂𑀤𑀯𑀲𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀪𑀸𑀯𑀺𑀦𑁆𑀢𑀺 𑀲𑀩𑁆𑀩𑀁 𑀲𑀤𑀸 𑀪𑀸𑀯𑀺𑀁 𑀅𑀯𑀺𑀦𑀲𑁆𑀲𑀦𑀓𑀁. 𑀢𑁂𑀦𑀸𑀳 ‘‘𑀲𑀲𑁆𑀲𑀢𑀯𑀲𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀅𑀢𑀣𑀸𑀲𑀪𑀸𑀯𑀦𑁆𑀢𑀺 𑀬𑀣𑀸 𑀧𑀭𑀯𑀸𑀤𑀻 𑀯𑀤𑀦𑁆𑀢𑀺, 𑀦 𑀢𑀣𑀸 𑀲𑀪𑀸𑀯𑀁. 𑀢𑀣𑀪𑀸𑀯𑀸𑀬𑀸𑀢𑀺 𑀉𑀘𑁆𑀙𑁂𑀤𑀪𑀸𑀯𑀸𑀬 𑀯𑀸 𑀲𑀲𑁆𑀲𑀢𑀪𑀸𑀯𑀸𑀬 𑀯𑀸. 𑀅𑀦𑀺𑀬𑀫𑀯𑀘𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀲𑀸𑀫𑀜𑁆𑀜𑀚𑁄𑀢𑀦𑀸𑀯𑀲𑁂𑀦. 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀢𑀣𑀪𑀸𑀯𑀁 𑀅𑀲𑁆𑀲 𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀲𑁆𑀲𑀢𑀯𑀸𑀤𑀜𑁆𑀘 𑀚𑀸𑀦𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁧𑁮) 𑀇𑀫𑀺𑀦𑀸𑀢𑀺 ‘‘𑀅𑀢𑀣𑀁 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀘𑀦𑁂𑀦, 𑀅𑀦𑀼𑀘𑁆𑀙𑁂𑀤𑀲𑀪𑀸𑀯𑀫𑁆𑀧𑀺 𑀲𑀫𑀸𑀦𑀁 𑀲𑀲𑁆𑀲𑀢𑀯𑀸𑀤𑀺𑀦𑁄 𑀫𑀢𑀺𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀉𑀧𑁂𑀘𑁆𑀘 𑀲𑀫𑀢𑁆𑀣𑀬𑀺𑀲𑁆𑀲𑀸𑀫𑀺.

𑀏𑀯𑀁 𑀲𑀫𑀸𑀦𑀦𑁆𑀢𑀺 𑀏𑀯𑀁 𑀪𑀽𑀢𑀁 𑀲𑀫𑀸𑀦𑀁. 𑀭𑀽𑀧𑀓𑀲𑀺𑀡𑀚𑁆𑀛𑀸𑀦𑀁 𑀭𑀽𑀧𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀅𑀥𑀺𑀕𑀫𑀦𑀯𑀲𑁂𑀦 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻𑀢𑀺 𑀆𑀳 ‘‘𑀭𑀽𑀧𑀺𑀦𑁆𑀢𑀺 𑀭𑀽𑀧𑀓𑀲𑀺𑀡𑀮𑀸𑀪𑀺’’𑀦𑁆𑀢𑀺. 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀻𑀢𑀺 𑀏𑀢𑁆𑀣 𑀭𑀽𑀧𑀻-𑀲𑀤𑁆𑀤𑁄𑀧𑀺𑀆𑀯𑀼𑀢𑁆𑀢𑀺𑀆𑀤𑀺𑀦𑀬𑁂𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄, 𑀭𑀽𑀧𑀻𑀪𑀸𑀯𑀫𑁆𑀧𑀺 𑀳𑀺 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀭𑀺𑀢𑁆𑀢𑀪𑀸𑀯𑀁 𑀯𑀺𑀬 𑀅𑀢𑁆𑀢𑀦𑁄 𑀅𑀪𑀺𑀦𑀺𑀯𑀺𑀲𑁆𑀲 𑀞𑀺𑀢𑁄𑀢𑀺. 𑀅𑀭𑀽𑀧𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀢𑁆𑀢𑀧𑀮𑀸𑀲𑀩𑀳𑀼𑀮𑀕𑀘𑁆𑀙𑀲𑀗𑁆𑀔𑁂𑀧𑁂𑀦 𑀖𑀦𑀕𑀳𑀦𑀚𑀝𑀸𑀯𑀺𑀢𑀸𑀦𑀸 𑀦𑀸𑀢𑀺𑀤𑀻𑀖𑀲𑀦𑁆𑀢𑀸𑀦𑀸 𑀯𑀮𑁆𑀮𑀺, 𑀢𑀩𑁆𑀩𑀺𑀧𑀭𑀻𑀢𑀸 𑀮𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦𑀸𑀢𑀺 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀪𑀸𑀯𑁂𑀦. 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸 𑀅𑀦𑀼𑀲𑀬𑀦𑀝𑁆𑀞𑁄.

𑀅𑀭𑀽𑀧𑀓𑀲𑀺𑀡𑀁 𑀦𑀸𑀫 𑀓𑀲𑀺𑀡𑀼𑀕𑁆𑀖𑀸𑀝𑀺𑀁 𑀆𑀓𑀸𑀲𑀁, 𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁. ‘‘𑀉𑀪𑀬𑀫𑁆𑀧𑀺 𑀅𑀭𑀽𑀧𑀓𑀲𑀺𑀡𑀫𑁂𑀯𑀸’’𑀢𑀺 𑀓𑁂𑀘𑀺. 𑀅𑀭𑀽𑀧𑀓𑁆𑀔𑀦𑁆𑀥𑀕𑁄𑀘𑀭𑀁 𑀯𑀸𑀢𑀺 𑀯𑁂𑀤𑀦𑀸𑀤𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 ‘‘𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑀕𑁄𑀘𑀭𑁄, 𑀤𑀺𑀝𑁆𑀞𑀺𑀕𑀢𑀺𑀓𑁄, 𑀢𑀁 𑀅𑀭𑀽𑀧𑀓𑁆𑀔𑀦𑁆𑀥𑀕𑁄𑀘𑀭𑀁. 𑀯𑀸-𑀲𑀤𑁆𑀤𑁄 𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄. 𑀲𑀤𑁆𑀤𑀬𑁄𑀚𑀦𑀸 𑀧𑀦 𑀅𑀭𑀽𑀧𑀁 𑀅𑀭𑀽𑀧𑀓𑁆𑀔𑀦𑁆𑀥𑀸 𑀕𑁄𑀘𑀭𑀪𑀽𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀭𑀽𑀧𑀻, 𑀢𑀁 𑀅𑀭𑀽𑀧𑀺𑀁. 𑀮𑀸𑀪𑀺𑀦𑁄 𑀘𑀢𑁆𑀢𑀸𑀭𑁄𑀢𑀺 𑀭𑀽𑀧𑀓𑀲𑀺𑀡𑀸𑀤𑀺𑀮𑀸𑀪𑀯𑀲𑁂𑀦 𑀢𑀁 𑀢𑀁 𑀤𑀺𑀝𑁆𑀞𑀺𑀯𑀸𑀤𑀁 𑀲𑀬𑀫𑁂𑀯 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀧𑀕𑁆𑀕𑀬𑁆𑀳 𑀧𑀜𑁆𑀜𑀸𑀧𑀦𑀓𑀸 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀢𑁂𑀲𑀁 𑀮𑀸𑀪𑀻𑀦𑀁 𑀯𑀸𑀤𑀁 𑀧𑀘𑁆𑀘𑀓𑁆𑀔𑀢𑁄, 𑀧𑀭𑀫𑁆𑀧𑀭𑀸𑀬 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀢𑀣𑁂𑀯 𑀦𑀁 𑀔𑀫𑀺𑀢𑁆𑀯𑀸 𑀭𑁄𑀘𑁂𑀢𑁆𑀯𑀸 𑀧𑀜𑁆𑀜𑀸𑀧𑀦𑀓𑀸 𑀘𑀢𑁆𑀢𑀸𑀭𑁄. 𑀢𑀓𑁆𑀓𑀺𑀓𑀸 𑀘𑀢𑁆𑀢𑀸𑀭𑁄𑀢𑀺 𑀓𑀲𑀺𑀡𑀚𑁆𑀛𑀸𑀦𑀲𑁆𑀲 𑀅𑀮𑀸𑀪𑀺𑀦𑁄 𑀓𑁂𑀯𑀮𑀁 𑀢𑀓𑁆𑀓𑀦𑀯𑀲𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀸𑀤𑁂 𑀲𑀬𑀫𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀧𑀕𑁆𑀕𑀬𑁆𑀳 𑀞𑀺𑀢𑀸 𑀘𑀢𑁆𑀢𑀸𑀭𑁄. 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀦𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁧𑁧𑁯. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄𑀧𑀻𑀢𑀺 𑀲𑀫𑁆𑀧𑀭𑀸𑀬𑀺𑀓𑀯𑀺𑀧𑀲𑁆𑀲𑀓𑁄𑀧𑀺, 𑀢𑁂𑀦 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺. 𑀦 𑀧𑀜𑁆𑀜𑀧𑁂𑀢𑀺 𑀏𑀯 𑀅𑀩𑀳𑀼𑀲𑁆𑀲𑀼𑀢𑁄 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀤𑀺𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀆𑀦𑀼𑀪𑀸𑀯𑁄. 𑀲𑀸𑀲𑀦𑀺𑀓𑁄𑀧𑀺 𑀛𑀸𑀦𑀸𑀪𑀺𑀜𑁆𑀜𑀸𑀮𑀸𑀪𑀻 ‘‘𑀦 𑀧𑀜𑁆𑀜𑀧𑁂𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀲𑁄 𑀇𑀥 𑀦 𑀉𑀤𑁆𑀥𑀝𑁄. 𑀇𑀤𑀸𑀦𑀺 𑀦𑁂𑀲𑀁 𑀅𑀧𑀜𑁆𑀜𑀸𑀧𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀏𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀇𑀘𑁆𑀘𑁂𑀯 𑀜𑀸𑀡𑀁 𑀳𑁄𑀢𑀺, 𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸. 𑀅𑀭𑀽𑀧𑀓𑁆𑀔𑀦𑁆𑀥𑀸 𑀇𑀘𑁆𑀘𑁂𑀯 𑀜𑀸𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀅𑀢𑁆𑀢𑀲𑀫𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁧𑁨𑁧. 𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸, 𑀦 𑀜𑀸𑀡𑀯𑀲𑁂𑀦. 𑀲𑀸 𑀘 𑀲𑀫𑀦𑀼𑀧𑀲𑁆𑀲𑀦𑀸 𑀅𑀢𑁆𑀣𑀢𑁄 𑀤𑀺𑀝𑁆𑀞𑀺𑀤𑀲𑁆𑀲𑀦𑀯𑀲𑁂𑀦.

‘‘𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀆𑀕𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀇𑀝𑁆𑀞𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄𑀢𑀺 𑀯𑁂𑀤𑀓𑀪𑀸𑀯𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀲𑀜𑁆𑀚𑀸𑀦𑀦𑀸𑀤𑀺𑀪𑀸𑀯𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀓𑀣𑀺𑀢𑀸’’𑀢𑀺. ‘‘𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀻’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦𑀸𑀳 ‘‘𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄’’𑀢𑀺. ‘‘𑀯𑁂𑀤𑀦𑀸𑀥𑀫𑁆𑀫𑁄’’𑀢𑀺 𑀧𑀦 𑀇𑀫𑀺𑀦𑀸 ‘‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’’𑀢𑀺 𑀇𑀫𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀯𑁂𑀤𑀦𑀸𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺 𑀯𑁂𑀤𑀦𑀸𑀥𑀫𑁆𑀫𑁄𑀢𑀺 𑀯𑁂𑀤𑀦𑀸𑀬 𑀲𑀫𑀦𑁆𑀦𑀸𑀕𑀢𑀪𑀸𑀯𑀁 𑀢𑀲𑁆𑀲 𑀧𑀝𑀺𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀘 𑀯𑁂𑀤𑀦𑀸𑀥𑀫𑁆𑀫𑁄 𑀅𑀯𑀺𑀧𑁆𑀧𑀬𑀼𑀢𑁆𑀢𑀲𑀪𑀸𑀯𑁄’’𑀢𑀺. 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀓𑀣𑀺𑀢𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. ‘‘𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀯𑁂𑀤𑀺𑀬𑀢𑀻’’𑀢𑀺 𑀢𑀁𑀲𑀫𑁆𑀧𑀬𑁄𑀕𑀢𑁄 𑀢𑀁𑀓𑀺𑀘𑁆𑀘𑀓𑀢𑀫𑀸𑀳 𑀬𑀣𑀸 𑀘𑁂𑀢𑀦𑀸𑀬𑁄𑀕𑀢𑁄 𑀘𑁂𑀢𑀦𑁄 𑀧𑀼𑀭𑀺𑀲𑁄𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀢𑀁 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀁 𑀮𑀩𑁆𑀪𑀢𑁂𑀯, 𑀢𑀜𑁆𑀘 𑀔𑁄 𑀏𑀓𑀤𑁂𑀲𑀢𑁄 𑀨𑀼𑀝𑁆𑀞𑀢𑀸𑀫𑀢𑁆𑀢𑀢𑁄, 𑀯𑁂𑀤𑀦𑀸𑀬 𑀧𑀦 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀦𑁆𑀢𑀺. 𑀢𑀲𑁆𑀲𑀸 𑀯𑀲𑁂𑀦 𑀲𑀜𑁆𑀜𑀸𑀤𑀬𑁄𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 ‘‘𑀯𑁂𑀤𑀺𑀬𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀓𑀤𑁂𑀲𑀫𑀢𑁆𑀢𑀓𑀫𑁂𑀯 𑀅𑀦𑀼𑀪𑀯𑀦𑁆𑀢𑀻’’𑀢𑀺, (𑀥. 𑀲. 𑀅𑀝𑁆𑀞. 𑁧 𑀥𑀫𑁆𑀫𑀼𑀤𑁆𑀤𑁂𑀲𑀓𑀣𑀸) 𑀭𑀸𑀚𑀲𑀽𑀤𑀦𑀺𑀤𑀲𑁆𑀲𑀦𑁂𑀦 𑀯𑀸𑀬𑀫𑀢𑁆𑀣𑁄 𑀢𑀢𑁆𑀣 𑀯𑀺𑀪𑀸𑀯𑀺𑀢𑁄 𑀏𑀯. 𑀏𑀢𑀲𑁆𑀲𑀸𑀢𑀺 𑀲𑀜𑁆𑀜𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲. ‘‘𑀅𑀯𑀺𑀧𑁆𑀧𑀬𑀼𑀢𑁆𑀢𑀲𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀅𑀯𑀺𑀲𑀁𑀬𑁄𑀕𑀚𑀦𑀺𑀢𑀁 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀞𑀸𑀦𑀁 𑀤𑀻𑀧𑁂𑀢𑀺.

𑁧𑁨𑁨. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀸𑀭𑁂𑀲𑀼. 𑀢𑀻𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀽𑀢𑀺 ‘‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’’𑀢𑀺, ‘‘𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’’𑀢𑀺, ‘‘𑀯𑁂𑀤𑀦𑀸𑀥𑀫𑁆𑀫𑁄 𑀫𑁂 𑀅𑀢𑁆𑀢𑀸’’𑀢𑀺 𑀘 𑀏𑀯𑀁𑀯𑀸𑀤𑁂𑀲𑀼 𑀢𑀻𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼. 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸 𑀲𑀼𑀔𑀁 𑀯𑁂𑀤𑀦𑀁 ‘‘𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀢𑁄 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀯𑁂𑀤𑀦𑀁 ‘‘𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀦𑀸 𑀦 𑀬𑀼𑀢𑁆𑀢𑀸. 𑀏𑀯𑀁 𑀲𑁂𑀲𑀤𑁆𑀯𑀬𑁂 𑀧𑀻𑀢𑀺 𑀆𑀳 ‘‘𑀬𑁄 𑀬𑁄 𑀬𑀁 𑀬𑀁 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺.

𑁧𑁨𑁩. ‘‘𑀳𑀼𑀢𑁆𑀯𑀸 𑀅𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀸𑀢𑀺 𑀤𑀲𑁆𑀲𑁂𑀢𑀺, ‘‘𑀢𑁂𑀳𑀺 𑀢𑁂𑀳𑀻’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀓𑀸𑀭𑀡𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀢𑀸𑀢𑀺. 𑀢𑀁 𑀢𑀁 𑀧𑀘𑁆𑀘𑀬𑀦𑁆𑀢𑀺 ‘‘𑀇𑀦𑁆𑀤𑁆𑀭𑀺𑀬𑀁, 𑀆𑀭𑀫𑁆𑀫𑀡𑀁, 𑀯𑀺𑀜𑁆𑀜𑀸𑀡𑀁, 𑀲𑀼𑀔, 𑀯𑁂𑀤𑀦𑀻𑀬𑁄 𑀨𑀲𑁆𑀲𑁄’’𑀢𑀺 𑀏𑀯𑀁 𑀆𑀤𑀺𑀓𑀁 𑀢𑀁 𑀢𑀁 𑀅𑀢𑁆𑀢𑀦𑁄 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬 𑀲𑀫𑁆𑀫𑀸 𑀲𑀲𑁆𑀲𑀢𑀸𑀤𑀺𑀪𑀸𑀯𑀲𑁆𑀲, 𑀉𑀘𑁆𑀙𑁂𑀤𑀸𑀤𑀺𑀪𑀸𑀯𑀲𑁆𑀲 𑀘 𑀅𑀪𑀸𑀯𑁂𑀦 𑀜𑀸𑀬𑁂𑀦 𑀲𑀫𑀓𑀸𑀭𑀡𑁂𑀦 𑀲𑀤𑀺𑀲𑀓𑀸𑀭𑀡𑁂𑀦 𑀅𑀦𑀼𑀭𑀽𑀧𑀓𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀸. 𑀔𑀬𑀲𑀪𑀸𑀯𑀸𑀢𑀺 𑀔𑀬𑀥𑀫𑁆𑀫𑀸, 𑀯𑀬𑀲𑀪𑀸𑀯𑀸𑀢𑀺 𑀯𑀬𑀥𑀫𑁆𑀫𑀸 𑀯𑀺𑀭𑀚𑁆𑀚𑀦𑀲𑀪𑀸𑀯𑀸𑀢𑀺 𑀯𑀺𑀭𑀸𑀕𑀥𑀫𑁆𑀫𑀸, 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸𑀢𑀺 𑀦𑀺𑀭𑁄𑀥𑀥𑀫𑁆𑀫𑀸, 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀯𑁂𑀤𑀦𑀸𑀬 𑀪𑀗𑁆𑀕𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀔𑀬𑁄𑀢𑀺…𑀧𑁂… 𑀔𑀬𑀥𑀫𑁆𑀫𑀸𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺.

𑀯𑀺𑀕𑀢𑁄𑀢𑀺 𑀲𑀪𑀸𑀯𑀯𑀺𑀕𑀫𑁂𑀦 𑀯𑀺𑀕𑀢𑁄. 𑀏𑀓𑀲𑁆𑀲𑁂𑀯𑀸𑀢𑀺 𑀏𑀓𑀲𑁆𑀲𑁂𑀯 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲. 𑀢𑀻𑀲𑀼𑀧𑀺 𑀓𑀸𑀮𑁂𑀲𑀽𑀢𑀺 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀧𑀯𑀢𑁆𑀢𑀺𑀓𑀸𑀮𑁂𑀲𑀼. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 ‘‘𑀏𑀲𑁄 𑀲𑀼𑀔𑀯𑁂𑀤𑀦𑀸𑀲𑀪𑀸𑀯𑁄, 𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀪𑀸𑀯𑁄 𑀫𑁂 𑀅𑀢𑁆𑀢𑀸’’𑀢𑀺 𑀓𑀺𑀁 𑀧𑀦 𑀳𑁄𑀢𑀻, 𑀏𑀓𑀲𑁆𑀲𑁂𑀯 𑀪𑀺𑀦𑁆𑀦𑀲𑀪𑀸𑀯𑀢𑀁 𑀅𑀦𑀼𑀫𑁆𑀫𑀢𑁆𑀢𑀓𑁄 𑀓𑀣𑀁 𑀧𑀘𑁆𑀘𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀏𑀯𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀺 𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀧𑀦 𑀦 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑁂𑀲𑁂𑀦𑀸𑀢𑀺 𑀲𑀼𑀔𑀸𑀤𑀺𑀯𑀺𑀪𑀸𑀕𑁂𑀦. 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀲𑀼𑀔𑀲𑀗𑁆𑀕𑀳𑀫𑁂𑀯 𑀯𑀸 𑀢𑁂𑀦 𑀓𑀢𑀁 𑀲𑀦𑁆𑀢𑀲𑀼𑀔𑀼𑀫𑀪𑀸𑀯𑀢𑁄. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀅𑀯𑀺𑀪𑀸𑀕𑁂𑀦 𑀯𑁂𑀤𑀦𑀸𑀲𑀸𑀫𑀜𑁆𑀜𑁂𑀦. 𑀯𑁄𑀓𑀺𑀡𑁆𑀡𑀦𑁆𑀢𑀺 𑀲𑀼𑀔𑀸𑀤𑀺𑀪𑁂𑀤𑁂𑀦 𑀯𑁄𑀫𑀺𑀲𑁆𑀲𑀓𑀁. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀯𑁂𑀤𑀦𑀁 𑀏𑀲 𑀤𑀺𑀝𑁆𑀞𑀺𑀕𑀢𑀺𑀓𑁄 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀓𑀓𑁆𑀔𑀡𑁂 𑀘 𑀩𑀳𑀽𑀦𑀁 𑀯𑁂𑀤𑀦𑀸𑀦𑀁 𑀉𑀧𑁆𑀧𑀸𑀤𑁄 𑀆𑀧𑀚𑁆𑀚𑀢𑀺 𑀅𑀯𑀺𑀲𑁂𑀲𑁂𑀦 𑀯𑁂𑀤𑀦𑀸𑀲𑀪𑀸𑀯𑀢𑁆𑀢𑀸. 𑀅𑀢𑁆𑀢𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀢𑀺 𑀲𑀤𑀸 𑀲𑀩𑁆𑀩𑀯𑁂𑀤𑀦𑀸𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀕𑀢𑀺𑀬𑀸 𑀏𑀓𑀓𑁆𑀔𑀡𑁂𑀧𑀺 𑀩𑀳𑀽𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑁂𑀬𑁆𑀬𑀸𑀢𑀺 𑀢𑀲𑁆𑀲 𑀅𑀯𑀲𑀭𑀁 𑀅𑀤𑁂𑀦𑁆𑀢𑁄 ‘‘𑀦 𑀏𑀓𑀓𑁆𑀔𑀡𑁂 𑀩𑀳𑀽𑀦𑀁 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀻’’𑀢𑀺 𑀆𑀳, 𑀧𑀘𑁆𑀘𑀓𑁆𑀔𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀻𑀢𑀺 𑀏𑀢𑁂𑀦 𑀯𑀺𑀭𑀼𑀤𑁆𑀥𑀢𑁆𑀢𑀲𑀸𑀥𑀦𑁂𑀦𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀅𑀪𑀸𑀯𑁂𑀦𑀧𑀺 𑀧𑀡𑁆𑀟𑀺𑀢𑀸𑀦𑀁 𑀦 𑀭𑀼𑀘𑁆𑀘𑀢𑀺, 𑀏𑀢𑀁 𑀤𑀲𑁆𑀲𑀦𑀁 𑀥𑀻𑀭𑀸 𑀦𑀓𑁆𑀔𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁨𑁪. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀧𑀺 𑀭𑀽𑀧𑀧𑁆𑀧𑀩𑀦𑁆𑀥𑁂 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀸𑀫 𑀮𑀩𑁆𑀪𑀢𑀻𑀢𑀺 𑀲𑀼𑀤𑁆𑀥𑀭𑀽𑀧𑀓𑁆𑀔𑀦𑁆𑀥𑁂𑀧𑀺 𑀬𑀢𑁆𑀣 𑀓𑀤𑀸𑀘𑀺 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁄 𑀮𑀩𑁆𑀪𑀢𑀺, 𑀢𑀫𑁂𑀯 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀡𑁆𑀳𑀦𑁆𑀢𑁄 ‘‘𑀢𑀸𑀮𑀯𑀡𑁆𑀝𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸’’𑀢𑀺 𑀆𑀳. 𑀯𑁂𑀤𑀦𑀸𑀥𑀫𑁆𑀫𑁂𑀲𑀽𑀢𑀺 𑀯𑁂𑀤𑀦𑀸𑀥𑀫𑁆𑀫𑀯𑀦𑁆𑀢𑁂𑀲𑀼. ‘‘𑀅𑀳𑀫𑀲𑁆𑀫𑀻’’𑀢𑀺 𑀇𑀫𑀺𑀦𑀸 𑀢𑀬𑁄𑀧𑀺 𑀔𑀦𑁆𑀥𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀅𑀳𑀁𑀓𑀸𑀭𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑁄 𑀯𑀼𑀢𑁆𑀢𑁄𑀢𑀺. ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀧𑀦 𑀇𑀫𑀺𑀦𑀸 𑀢𑀢𑁆𑀣 𑀏𑀓𑀁 𑀏𑀓𑀁 𑀕𑀳𑁂𑀢𑁆𑀯𑀸 𑀅𑀳𑀁𑀓𑀸𑀭𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀏𑀓𑀥𑀫𑁆𑀫𑁄𑀧𑀻’’𑀢𑀺𑀆𑀤𑀺. 𑀢𑀦𑁆𑀢𑀺 ‘‘𑀅𑀳𑀫𑀲𑁆𑀫𑀻’’𑀢𑀺 𑀅𑀳𑀁𑀓𑀸𑀭𑀼𑀧𑁆𑀧𑀢𑁆𑀢𑀺𑀁. 𑀲𑀸 𑀳𑀺 𑀘𑀢𑀼𑀓𑁆𑀔𑀦𑁆𑀥𑀦𑀺𑀭𑁄𑀥𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀦𑁆𑀦𑀺𑀲𑁆𑀲𑀬𑀸 𑀲𑀲𑀯𑀺𑀲𑀸𑀡𑀢𑀺𑀔𑀺𑀡𑀢𑀸 𑀯𑀺𑀬 𑀦 𑀪𑀯𑁂𑀬𑁆𑀬𑀸𑀯𑀸𑀢𑀺.

𑀏𑀢𑁆𑀢𑀸𑀯𑀢𑀸𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀘 𑀆𑀦𑀦𑁆𑀤𑀸’’𑀢𑀺𑀆𑀤𑀺𑀦𑀸 ‘‘𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸’’𑀢𑀺 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 𑀏𑀢𑁆𑀢𑀓𑁂𑀦 𑀤𑁂𑀲𑀦𑀸𑀥𑀫𑁆𑀫𑁂𑀦. 𑀓𑀸𑀫𑀁 𑀳𑁂𑀝𑁆𑀞𑀸𑀧𑀺 𑀯𑀝𑁆𑀝𑀓𑀣𑀸𑀯 𑀓𑀣𑀺𑀢𑀸, 𑀇𑀥 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀝𑁆𑀝𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀸𑀲𑀫𑀢𑁆𑀣𑀢𑀸𑀯𑀺𑀪𑀸𑀯𑀦𑀯𑀲𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀻𑀧𑀦𑀺𑀬𑀓𑀣𑀸 𑀧𑀓𑀸𑀲𑀺𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀝𑁆𑀝𑀓𑀣𑀸 𑀓𑀣𑀺𑀢𑀸’’𑀢𑀺 𑀆𑀳. 𑀦𑀦𑀼 𑀯𑀝𑁆𑀝𑀫𑀽𑀮𑀁 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸, 𑀢𑀸 𑀅𑀦𑀸𑀫𑀲𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀣𑀸 𑀓𑀲𑁆𑀫𑀸 𑀇𑀥 𑀯𑀝𑁆𑀝𑀓𑀣𑀸 𑀓𑀣𑀺𑀢𑀸𑀢𑀺 𑀆𑀳 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀅𑀯𑀺𑀚𑁆𑀚𑀸𑀲𑀻𑀲𑁂𑀦𑀸𑀢𑀺 𑀅𑀯𑀺𑀚𑁆𑀚𑀁 𑀉𑀢𑁆𑀢𑀫𑀗𑁆𑀕𑀁 𑀓𑀢𑁆𑀯𑀸, 𑀅𑀯𑀺𑀚𑁆𑀚𑀸𑀫𑀼𑀔𑁂𑀦𑀸𑀢𑀺 𑀅𑀢𑁆𑀣𑁄. 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑀸 𑀓𑀸𑀮𑁂 𑀅𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀦 𑀢𑀢𑁄 𑀧𑀼𑀩𑁆𑀩𑁂 𑀅𑀢𑁆𑀣𑀻’’𑀢𑀺 𑀅𑀯𑀺𑀚𑁆𑀚𑀸𑀬 𑀆𑀤𑀺 𑀫𑀭𑀺𑀬𑀸𑀤𑀸 𑀅𑀧𑁆𑀧𑀝𑀺𑀳𑀢𑀲𑁆𑀲 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀸𑀧𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀫𑀲𑁆𑀫𑀸 𑀆𑀲𑀯𑀸𑀤𑀺𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀪𑀯𑀢𑀡𑁆𑀳𑀸𑀬𑀸𑀢𑀺 𑀪𑀯𑀲𑀁𑀬𑁄𑀚𑀦𑀪𑀽𑀢𑀸𑀬 𑀢𑀡𑁆𑀳𑀸𑀬. 𑀪𑀯𑀤𑀺𑀝𑁆𑀞𑀺𑀬𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸. ‘‘𑀢𑀢𑁆𑀣 𑀢𑀢𑁆𑀣 𑀉𑀧𑀧𑀚𑁆𑀚𑀦𑁆𑀢𑁄’’𑀢𑀺 𑀇𑀫𑀺𑀦𑀸 ‘‘𑀇𑀢𑁄 𑀏𑀢𑁆𑀣 𑀏𑀢𑁆𑀢𑁄 𑀇𑀥𑀸’’𑀢𑀺 𑀏𑀯𑀁 𑀅𑀧𑀭𑀺𑀬𑀦𑁆𑀢𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀫𑀳𑀸𑀲𑀫𑀼𑀤𑁆𑀤𑁂’’𑀢𑀺𑀆𑀤𑀺.

𑁧𑁨𑁬. 𑀧𑀘𑁆𑀘𑀬𑀸𑀓𑀸𑀭𑀫𑀽𑀴𑁆𑀳𑀲𑁆𑀲𑀸𑀢𑀺 𑀪𑀽𑀢𑀓𑀣𑀦𑀫𑁂𑀢𑀁, 𑀦 𑀯𑀺𑀲𑁂𑀲𑀦𑀁. 𑀲𑀩𑁆𑀩𑁄𑀧𑀺 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑀫𑀽𑀴𑁆𑀳𑁄 𑀏𑀯𑀸𑀢𑀺. 𑀯𑀺𑀯𑀝𑁆𑀝𑀁 𑀓𑀣𑁂𑀦𑁆𑀢𑁄𑀢𑀺 𑀯𑀝𑁆𑀝𑀢𑁄 𑀯𑀺𑀦𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀯𑀝𑁆𑀝𑀁, 𑀯𑀺𑀫𑁄𑀓𑁆𑀔𑁄, 𑀢𑀁 𑀓𑀣𑁂𑀦𑁆𑀢𑁄. 𑀓𑀸𑀭𑀓𑀲𑁆𑀲𑀸𑀢𑀺 𑀲𑀢𑁆𑀣𑀼𑀑𑀯𑀸𑀤𑀓𑀸𑀭𑀓𑀲𑁆𑀲, 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀢𑀺𑀧𑀝𑁆𑀞𑀸𑀦𑀯𑀺𑀳𑀸𑀭𑀺𑀦𑁄’’𑀢𑀺. 𑀲𑁄 𑀳𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀬, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 ‘‘𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀢𑁂𑀦𑀸𑀳 ‘‘𑀏𑀯𑀭𑀽𑀧𑁄 𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼. 𑀢𑁂 𑀳𑀺 𑀲𑀫𑁆𑀫𑀲𑀦𑀻𑀬𑀸. 𑀦 𑀅𑀜𑁆𑀜𑀦𑁆𑀢𑀺 𑀯𑁂𑀤𑀦𑀸𑀬 𑀅𑀜𑁆𑀜𑀁 𑀲𑀜𑁆𑀜𑀸𑀤𑀺𑀥𑀫𑁆𑀫𑀁 𑀅𑀢𑁆𑀢𑀸𑀦𑀁 𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺. ‘‘𑀔𑀦𑁆𑀥𑀮𑁄𑀓𑀸𑀤𑀬𑁄’’𑀢𑀺 𑀭𑀽𑀧𑀸𑀤𑀺𑀥𑀫𑁆𑀫𑀸 𑀏𑀯 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀲𑀫𑀽𑀳𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀤𑀻𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀦 𑀉𑀧𑀸𑀤𑀺𑀬𑀢𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀕𑀸𑀳𑀯𑀲𑁂𑀦. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁧𑁦𑁮; 𑀫𑀳𑀸𑀦𑀺. 𑁨𑁧, 𑁧𑁭𑁮; 𑀥. 𑀲. 𑁧𑁧𑁨𑁧; 𑀯𑀺𑀪. 𑁮𑁩𑁨, 𑁮𑁬𑁬) 𑀧𑀯𑀢𑁆𑀢𑀫𑀸𑀦𑀫𑀜𑁆𑀜𑀦𑀸𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀯𑀺𑀬 𑀧𑀭𑀺𑀢𑀲𑁆𑀲𑀦𑀭𑀽𑀧𑀸 𑀏𑀯𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀧𑀭𑀺𑀢𑀲𑁆𑀲𑀦𑀸𑀬𑀧𑀻’’𑀢𑀺.

𑀲𑀸 𑀏𑀯𑀁 𑀤𑀺𑀝𑁆𑀞𑀻𑀢𑀺 𑀲𑀸 𑀅𑀭𑀳𑀢𑁄 𑀏𑀯𑀁𑀧𑀓𑀸𑀭𑀸 𑀤𑀺𑀝𑁆𑀞𑀻𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀤𑀓𑀮𑁆𑀮𑀁, 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑀲𑁆𑀲 𑀤𑀺𑀝𑁆𑀞𑀻𑀢𑀺 𑀏𑀢𑁆𑀣𑀸𑀧𑀺 𑀏𑀯𑀁𑀧𑀓𑀸𑀭𑀸 𑀅𑀲𑁆𑀲 𑀅𑀭𑀳𑀢𑁄 𑀤𑀺𑀝𑁆𑀞𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀻𑀢𑀺 𑀬𑁄 𑀯𑀤𑁂𑀬𑁆𑀬 ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’’𑀢𑀺, 𑀢𑀲𑁆𑀲 𑀘𑁂 𑀯𑀘𑀦𑀁 𑀢𑀣𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀭𑀳𑀸 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬 𑀚𑀸𑀦𑀢𑁄 𑀢𑀣𑀸 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀦𑁂𑀯𑀸𑀢𑀺 𑀢𑀣𑀸 𑀯𑀢𑁆𑀢𑀼𑀫𑀬𑀼𑀢𑁆𑀢𑀢𑁆𑀢𑀸 𑀏𑀯. 𑀘𑀢𑀼𑀦𑁆𑀦𑀫𑁆𑀧𑀺 𑀦𑀬𑀸𑀦𑀦𑁆𑀢𑀺 ‘‘𑀳𑁄𑀢𑀺 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁. 𑀆𑀤𑀺𑀢𑁄 𑀢𑀻𑀲𑀼 𑀯𑀸𑀭𑁂𑀲𑀼 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀯𑀸𑀭𑁂 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 ‘‘𑀅𑀯𑀲𑀸𑀦𑁂 ‘𑀢𑀁 𑀓𑀺𑀲𑁆𑀲 𑀳𑁂𑀢𑀽’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. ‘‘𑀆𑀤𑀺𑀢𑁄 𑀢𑀻𑀲𑀼 𑀯𑀸𑀭𑁂𑀲𑀼 𑀢𑀣𑁂𑀯 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀬𑀣𑀸 𑀧𑀭𑀺𑀬𑁄𑀲𑀸𑀦𑀯𑀸𑀭𑁂, 𑀧𑀸𑀴𑀺 𑀧𑀦 𑀲𑀗𑁆𑀔𑀺𑀢𑁆𑀢𑀸’’𑀢𑀺 𑀓𑁂𑀘𑀺.

𑀯𑁄𑀳𑀸𑀭𑁄𑀢𑀺 ‘‘𑀲𑀢𑁆𑀢𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸, ‘‘𑀔𑀦𑁆𑀥𑀸𑀆𑀬𑀢𑀦𑀸𑀦𑀻’’𑀢𑀺𑀆𑀤𑀺𑀦𑀸, ‘‘𑀨𑀲𑁆𑀲𑁄 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀘 𑀯𑁄𑀳𑀸𑀭𑀺𑀢𑀩𑁆𑀩𑀯𑁄𑀳𑀸𑀭𑁄. 𑀢𑀲𑁆𑀲 𑀧𑀦 𑀯𑁄𑀳𑀸𑀭𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀇𑀫𑁂 𑀏𑀯𑀸𑀢𑀺 𑀆𑀳 ‘‘𑀔𑀦𑁆𑀥𑀸 𑀆𑀬𑀢𑀦𑀸𑀦𑀺 𑀥𑀸𑀢𑀼𑀬𑁄’’𑀢𑀺. 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀪𑀸𑀯𑁂𑀦𑁂𑀯 𑀧𑀜𑁆𑀜𑀸𑀧𑀺𑀬𑀢𑀺 𑀘, 𑀢𑀲𑁆𑀫𑀸 𑀢𑀲𑁆𑀲𑀸𑀧𑀺 𑀔𑀦𑁆𑀥𑀫𑀼𑀔𑁂𑀦 𑀅𑀯𑀘𑀭𑀺𑀢𑀩𑁆𑀩𑀢𑀸 𑀮𑀩𑁆𑀪𑀢𑀻𑀢𑀺 ‘‘𑀧𑀜𑁆𑀜𑀸𑀬 𑀅𑀯𑀘𑀭𑀺𑀢𑀩𑁆𑀩𑀁 𑀔𑀦𑁆𑀥𑀧𑀜𑁆𑀘𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫) 𑀧𑀜𑁆𑀜𑀸𑀯𑀘𑀭𑀦𑁆𑀢𑀺 𑀯𑀸 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀫𑁂𑀢𑀁 𑀕𑀳𑀡𑀦𑁆𑀢𑀺 ‘‘𑀔𑀦𑁆𑀥𑀧𑀜𑁆𑀘𑀓’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀬𑀸𑀯𑀢𑀸 𑀧𑀜𑁆𑀜𑀸’’𑀢𑀺 𑀏𑀢𑁆𑀣𑀸𑀧𑀺 𑀮𑁄𑀓𑀺𑀬𑀧𑀜𑁆𑀜𑀸𑀬 𑀏𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀯𑀝𑁆𑀝𑀓𑀣𑀸 𑀳𑁂𑀲𑀸𑀢𑀺. 𑀢𑀣𑀸 𑀳𑀺 ‘‘𑀬𑀸𑀯𑀢𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀦𑁆𑀢𑀸𑀓𑀼𑀮𑀓𑀧𑀤𑀲𑁆𑀲𑁂𑀯 𑀅𑀦𑀼𑀲𑀦𑁆𑀥𑀺 𑀤𑀲𑁆𑀲𑀺𑀢𑁄’’𑀢𑀺. 𑀬𑀲𑁆𑀫𑀸 𑀪𑀕𑀯𑀸 𑀤𑀺𑀝𑁆𑀞𑀺𑀲𑀻𑀲𑁂𑀦𑁂𑀢𑁆𑀣 𑀯𑀝𑁆𑀝𑀓𑀣𑀁 𑀓𑀣𑁂𑀢𑁆𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀧𑀺 𑀯𑀝𑁆𑀝𑀓𑀣𑀁 𑀓𑀣𑁂𑀲𑀺, 𑀢𑀲𑁆𑀫𑀸 ‘‘𑀢𑀦𑁆𑀢𑀸𑀓𑀼𑀮𑀓𑀧𑀤𑀲𑁆𑀲𑁂𑀯 𑀅𑀦𑀼𑀲𑀦𑁆𑀥𑀺 𑀤𑀲𑁆𑀲𑀺𑀢𑁄’’𑀢𑀺 𑀲𑀸𑀯𑀥𑀸𑀭𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀧𑀦𑁂𑀢𑁆𑀣 𑀬𑀸𑀯𑀤𑁂𑀯 𑀢𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀸𑀬 𑀯𑀺𑀢𑁆𑀣𑀸𑀭𑀺𑀢𑀸, 𑀯𑀺𑀯𑀝𑁆𑀝𑀓𑀣𑀸𑀧𑀺 𑀲𑀫𑀸𑀦𑀸 𑀇𑀥 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀡𑁆𑀡𑀦𑀸

𑁧𑁨𑁭. 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄𑀢𑀺 𑀲𑀫𑀣𑀧𑀝𑀺𑀧𑀢𑁆𑀢𑀺𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀕𑀫𑀦𑁂𑀦, 𑀫𑀕𑁆𑀕𑀕𑀫𑀦𑁂𑀦 𑀘 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄. 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀫𑀼𑀘𑁆𑀘𑀦𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀲𑁄 ‘‘𑀏𑀯𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄𑀢𑀺 𑀓𑀢𑁆𑀯𑀸 ‘‘𑀬𑁄 𑀘 𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑁄 𑀲𑁄 𑀬𑀲𑁆𑀫𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀦𑁆𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀸𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁧𑁯), ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁨𑁫 𑀆𑀤𑀬𑁄) 𑀘 𑀳𑁂𑀝𑁆𑀞𑀸 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽𑀦𑀁. 𑀦𑀺𑀕𑀫𑀦𑀦𑁆𑀢𑀺 𑀦𑀺𑀲𑁆𑀲𑀭𑀡𑀁. 𑀦𑀸𑀫𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸𑀤𑀺𑀦𑀸𑀫𑀁.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑀁 𑀧𑀢𑀺 𑀦𑀺𑀲𑁆𑀲𑀬𑀢𑁄 𑀳𑀺 𑀦𑀸𑀦𑀢𑁆𑀢𑀓𑀸𑀬𑀸𑀤𑀺𑀢𑀸 𑀢𑀁𑀧𑀭𑀺𑀬𑀸𑀧𑀦𑁆𑀦𑀧𑀝𑀺𑀲𑀦𑁆𑀥𑀺𑀲𑀫𑀼𑀤𑀸𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀪𑀯𑀲𑁆𑀲 𑀢𑀣𑀸 𑀆𑀬𑀽𑀳𑀺𑀢𑀢𑁆𑀢𑀸. 𑀘𑀢𑀲𑁆𑀲𑁄 𑀆𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀆𑀕𑀫𑀺𑀲𑁆𑀲𑀦𑁆𑀢𑀺 ‘‘𑀭𑀽𑀧𑀼𑀧𑀸𑀬𑀁 𑀯𑀸 𑀆𑀯𑀼𑀲𑁄 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁧𑁧). 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀏𑀢𑀭𑀳𑀺 𑀧𑀢𑀺𑀝𑁆𑀞𑀸𑀦𑀓𑀸𑀭𑀡𑀲𑁆𑀲. 𑀅𑀢𑁆𑀣𑀢𑁄 𑀯𑀼𑀢𑁆𑀢𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀸 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸, 𑀘𑀢𑀼𑀯𑁄𑀓𑀸𑀭𑁂 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀸𑀯𑀸𑀲𑀪𑀸𑀯𑀁 𑀉𑀧𑀸𑀤𑀸𑀬 ‘‘𑀤𑁆𑀯𑁂 𑀘 𑀆𑀬𑀢𑀦𑀸𑀦𑀻𑀢𑀺 𑀤𑁆𑀯𑁂 𑀦𑀺𑀯𑀸𑀲𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀬𑀸𑀬𑁄𑀧𑀺 𑀆𑀬𑀢𑀦𑀲𑀤𑁆𑀤𑁄 𑀳𑁄𑀢𑀺 𑀬𑀣𑀸 ‘‘𑀤𑁂𑀯𑀸𑀬𑀢𑀦𑀤𑁆𑀯𑀬’’𑀦𑁆𑀢𑀺. 𑀲𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀆𑀬𑀢𑀦𑀤𑁆𑀯𑀬𑀦𑁆𑀢𑀺 𑀲𑀓𑀮𑀁. 𑀢𑀲𑁆𑀫𑀸 𑀕𑀳𑀺𑀢𑀁 𑀢𑀢𑁆𑀣 𑀏𑀓𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀸𑀤𑀸𑀦𑀁 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀦 𑀕𑀘𑁆𑀙𑀢𑀺 𑀯𑀝𑁆𑀝𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀆𑀬𑀢𑀦𑀤𑁆𑀯𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀦𑁆𑀢𑁄𑀕𑀥𑀢𑁆𑀢𑀸.

𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑁂𑀲𑁄 𑀳𑁄𑀢𑀺𑀬𑁂𑀯 𑀲𑀢𑀺𑀧𑀺 𑀩𑀸𑀳𑀺𑀭𑀲𑁆𑀲 𑀓𑀸𑀭𑀓𑀲𑁆𑀲 𑀅𑀪𑁂𑀤𑁂 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀦𑀸𑀦𑀢𑁆𑀢𑀁 𑀓𑀸𑀬𑁂 𑀏𑀢𑁂𑀲𑀁, 𑀦𑀸𑀦𑀢𑁆𑀢𑁄 𑀯𑀸 𑀓𑀸𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀸, 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁. 𑀦𑀸𑀦𑀢𑁆𑀢𑀸 𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀦𑀺𑀧𑀸𑀢𑀺𑀓𑀸 𑀲𑀢𑀺𑀧𑀺 𑀤𑁂𑀯𑀪𑀸𑀯𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀅𑀧𑀸𑀬𑁂𑀲𑀼 𑀯𑀸 𑀕𑀢𑁄 𑀦𑀢𑁆𑀣𑀺 𑀦𑀺𑀧𑀸𑀢𑁄 𑀏𑀢𑁂𑀲𑀦𑁆𑀢𑀺 𑀯𑀺𑀦𑀺𑀧𑀸𑀢𑀺𑀓𑀸. 𑀢𑁂𑀦𑀸𑀳 ‘‘𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀸’’𑀢𑀺. 𑀥𑀫𑁆𑀫𑀧𑀤𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑀓𑁄𑀝𑁆𑀞𑀸𑀲𑀁. 𑀯𑀺𑀚𑀸𑀦𑀺𑀬𑀸𑀢𑀺 𑀲𑀼𑀢𑀫𑀬𑁂𑀦 𑀢𑀸𑀯 𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑁆𑀯𑀸. 𑀢𑀤𑀦𑀼𑀲𑀸𑀭𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑀦𑁆𑀢𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀧𑀺 𑀧𑀝𑀺𑀧𑀚𑁆𑀚𑁂𑀫. 𑀲𑀸 𑀘 𑀧𑀝𑀺𑀧𑀢𑁆𑀢𑀺 𑀳𑀺𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀲𑀓𑀮𑀳𑀺𑀢𑀸𑀬 𑀅𑀫𑁆𑀳𑀸𑀓𑀁 𑀲𑀺𑀬𑀸. 𑀇𑀤𑀸𑀦𑀺 𑀢𑀢𑁆𑀣 𑀲𑀻𑀮𑀧𑀝𑀺𑀧𑀢𑁆𑀢𑀺𑀁 𑀢𑀸𑀯 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀡𑁂𑀲𑀼 𑀘𑀸’’𑀢𑀺 𑀕𑀸𑀣𑀫𑀸𑀳.

𑀩𑁆𑀭𑀳𑁆𑀫𑀓𑀸𑀬𑁂 𑀧𑀞𑀫𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑁂 𑀩𑁆𑀭𑀳𑁆𑀫𑀲𑀫𑀽𑀳𑁂, 𑀩𑁆𑀭𑀳𑁆𑀫𑀦𑀺𑀓𑀸𑀬𑁂 𑀯𑀸 𑀪𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀭𑀺𑀲𑀸𑀬 𑀪𑀯𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀢𑀲𑁆𑀲 𑀧𑀭𑀺𑀘𑀸𑀭𑀓𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀆𑀬𑀼𑀯𑀡𑁆𑀡𑀸𑀤𑀻𑀳𑀺 𑀫𑀳𑀦𑁆𑀢𑁄 𑀩𑁆𑀭𑀳𑁆𑀫𑀸𑀦𑁄𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄. 𑀲𑀢𑀺𑀧𑀺 𑀢𑁂𑀲𑀁 𑀢𑀺𑀯𑀺𑀥𑀸𑀦𑀫𑁆𑀧𑀺 𑀧𑀞𑀫𑁂𑀦 𑀛𑀸𑀦𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀛𑀸𑀦𑀲𑁆𑀲 𑀧𑀦 𑀧𑀯𑀢𑁆𑀢𑀺𑀪𑁂𑀤𑁂𑀦 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑁂𑀦𑀸𑀢𑀺 𑀳𑀻𑀦𑁂𑀦, 𑀲𑀸 𑀘𑀲𑁆𑀲 𑀳𑀻𑀦𑀢𑀸 𑀙𑀦𑁆𑀤𑀸𑀤𑀻𑀦𑀁 𑀳𑀻𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀯𑀸 𑀳𑀻𑀦𑀁. 𑀓𑀧𑁆𑀧𑀲𑁆𑀲𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲. 𑀳𑀻𑀦𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑁂𑀦, 𑀲𑀸 𑀘𑀲𑁆𑀲 𑀫𑀚𑁆𑀛𑀺𑀫𑀢𑀸 𑀙𑀦𑁆𑀤𑀸𑀤𑀻𑀦𑀁 𑀫𑀚𑁆𑀛𑀺𑀫𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀧𑀝𑀺𑀮𑀪𑀺𑀢𑁆𑀯𑀸 𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀯𑀸 𑀫𑀚𑁆𑀛𑀺𑀫𑀁. 𑀉𑀧𑀟𑁆𑀠𑀓𑀧𑁆𑀧𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 𑀉𑀧𑀟𑁆𑀠𑀓𑀧𑁆𑀧𑁄. 𑀯𑀺𑀧𑁆𑀨𑀸𑀭𑀺𑀓𑀢𑀭𑁄𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀳𑀺 𑀧𑀫𑀸𑀡𑀢𑁄 𑀯𑀺𑀧𑀼𑀮𑀢𑀭𑁄, 𑀲𑀪𑀸𑀯𑀢𑁄 𑀉𑀴𑀸𑀭𑀢𑀭𑁄 𑀘 𑀳𑁄𑀢𑀺. 𑀲𑀪𑀸𑀯𑁂𑀦𑀧𑀺 𑀳𑀺 𑀉𑀴𑀸𑀭𑀢𑀭𑁄𑀯, 𑀢𑀁 𑀧𑀦𑁂𑀢𑁆𑀣 𑀅𑀧𑁆𑀧𑀫𑀸𑀡𑀁. 𑀢𑀣𑀸 𑀳𑀺 𑀧𑀭𑀺𑀢𑁆𑀢𑀸𑀪𑀸𑀤𑀻𑀦𑀁, 𑀧𑀭𑀺𑀢𑁆𑀢𑀲𑀼𑀪𑀸𑀤𑀻𑀦𑀜𑁆𑀘 𑀓𑀸𑀬𑁂 𑀲𑀢𑀺𑀧𑀺 𑀲𑀪𑀸𑀯𑀯𑁂𑀫𑀢𑁆𑀢𑁂 𑀏𑀓𑀢𑁆𑀢𑀯𑀲𑁂𑀦𑁂𑀯 𑀯𑀯𑀢𑁆𑀣𑀸𑀧𑀻𑀬𑀢𑀻𑀢𑀺 ‘‘𑀏𑀓𑀢𑁆𑀢𑀓𑀸𑀬𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀧𑀡𑀻𑀢𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑁂𑀦, 𑀲𑀸 𑀘𑀲𑁆𑀲 𑀉𑀓𑁆𑀓𑀝𑁆𑀞𑀢𑀸 𑀙𑀦𑁆𑀤𑀸𑀤𑀻𑀦𑀁 𑀉𑀓𑁆𑀓𑀝𑁆𑀞𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀲𑀼𑀪𑀸𑀯𑀺𑀢𑀁 𑀯𑀸 𑀲𑀫𑁆𑀫𑀤𑁂𑀯 𑀯𑀲𑀺𑀪𑀸𑀯𑀁 𑀧𑀸𑀧𑀺𑀢𑀁 𑀧𑀡𑀻𑀢𑀁 𑀧𑀥𑀸𑀦𑀪𑀸𑀯𑀁 𑀦𑀻𑀢𑀦𑁆𑀢𑀺 𑀓𑀢𑁆𑀯𑀸, 𑀇𑀥𑀸𑀧𑀺 𑀓𑀧𑁆𑀧𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 𑀧𑀭𑀺𑀧𑀼𑀡𑁆𑀡𑀲𑁆𑀲 𑀫𑀳𑀸𑀓𑀧𑁆𑀧𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑁂𑀢𑀺 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀩𑁆𑀭𑀳𑁆𑀫𑀸𑀦𑁄. 𑀲𑀜𑁆𑀜𑀸𑀬 𑀏𑀓𑀢𑁆𑀢𑀸𑀢𑀺 𑀢𑀺𑀳𑁂𑀢𑀼𑀓𑀪𑀸𑀯𑁂𑀦 𑀲𑀜𑁆𑀜𑀸𑀬 𑀏𑀓𑀢𑁆𑀢𑀲𑀪𑀸𑀯𑀢𑁆𑀢𑀸. 𑀦 𑀳𑀺 𑀢𑀲𑁆𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑁂𑀤𑁄 𑀅𑀢𑁆𑀣𑀺.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀤𑀲𑁆𑀲𑁂𑀢𑀺.

𑀤𑀡𑁆𑀟𑀉𑀓𑁆𑀓𑀸𑀬𑀸𑀢𑀺 𑀤𑀡𑁆𑀟𑀤𑀻𑀧𑀺𑀓𑀸𑀬. 𑀲𑀭𑀢𑀻𑀢𑀺 𑀥𑀸𑀯𑀢𑀺 𑀯𑀺𑀬. 𑀯𑀺𑀲𑁆𑀲𑀭𑀢𑀻𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀸 𑀯𑀺𑀬 𑀥𑀸𑀯𑀢𑀺. 𑀤𑁆𑀯𑁂 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀫𑀳𑀸𑀓𑀧𑁆𑀧𑀸. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀆𑀪𑀲𑁆𑀲𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑁂𑀧𑀺 𑀢𑁂 𑀧𑀭𑀺𑀢𑁆𑀢𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸𑀧𑀺 𑀕𑀳𑀺𑀢𑀸.

𑀲𑁄𑀪𑀦𑀸 𑀧𑀪𑀸 𑀲𑀼𑀪𑀸, 𑀲𑀼𑀪𑀸𑀬 𑀓𑀺𑀡𑁆𑀡𑀸 𑀲𑀼𑀪𑀸𑀓𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑁂 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀅𑀦𑁆𑀢𑀺𑀫-𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀁𑀧𑀦 𑀦𑀺𑀘𑁆𑀘𑀮𑀸𑀬 𑀏𑀓𑀕𑁆𑀖𑀦𑀸𑀬 𑀧𑀪𑀸𑀬 𑀲𑀼𑀪𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 ‘‘𑀲𑀼𑀪𑁂𑀦 𑀑𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀢𑁆𑀣𑀸𑀧𑀺 𑀅𑀦𑁆𑀢𑀺𑀫-𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀓𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀦 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀪𑀸 𑀕𑀘𑁆𑀙𑀢𑀺 𑀏𑀓𑀕𑁆𑀖𑀦𑀢𑁆𑀢𑀸. 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺 𑀓𑀸𑀬𑀲𑁆𑀲, 𑀲𑀜𑁆𑀜𑀸𑀬 𑀘 𑀏𑀓𑀭𑀽𑀧𑀢𑁆𑀢𑀸. 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀸𑀬𑀼𑀯𑀡𑁆𑀡𑀸𑀤𑀺𑀨𑀮𑀢𑁆𑀢𑀸 𑀯𑁂𑀳𑀧𑁆𑀨𑀮𑀸. 𑀏𑀢𑁆𑀣𑀸𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁.

𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸 𑀦𑀧𑀼𑀦𑀭𑀸𑀯𑀢𑁆𑀢𑀦𑀢𑁄. ‘‘𑀦 𑀲𑀩𑁆𑀩𑀓𑀸𑀮𑀺𑀓𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀩𑀼𑀤𑁆𑀥𑀲𑀼𑀜𑁆𑀜𑁂𑀮𑁄𑀓𑁂 𑀲𑀼𑀜𑁆𑀜𑀁 𑀢𑀁 𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀸 𑀦 𑀲𑀩𑁆𑀩𑀓𑀸𑀮𑀺𑀓𑀸, 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑁄. 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀲𑀢𑁆𑀢𑀸𑀯𑀸𑀲𑀪𑀸𑀯𑀤𑀻𑀧𑀦𑁂𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀁𑀬𑁂𑀯 𑀪𑀚𑀦𑁆𑀢𑀺.

𑀲𑀼𑀔𑀼𑀫𑀢𑁆𑀢𑀸𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀢𑁆𑀢𑀸. 𑀧𑀭𑀺𑀩𑁆𑀬𑀢𑁆𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀸𑀪𑀸𑀯𑀢𑁄 𑀦𑁂𑀯 𑀯𑀺𑀜𑁆𑀜𑀸𑀡𑀁, 𑀲𑀩𑁆𑀩𑀲𑁄 𑀅𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀻𑀢𑀺 𑀦𑀸𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀧𑀭𑀺𑀧𑁆𑀨𑀼𑀝𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀦𑁆𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀅𑀯𑀢𑁆𑀯𑀸.

𑁧𑁨𑁮. 𑀢𑀜𑁆𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀦𑁆𑀢𑀺 𑀧𑀞𑀫𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀭𑀽𑀧𑀢𑁄, 𑀫𑀦𑀼𑀲𑁆𑀲𑀸𑀤𑀺𑀯𑀺𑀪𑀸𑀕𑀢𑁄, 𑀲𑀗𑁆𑀔𑁂𑀧𑀢𑁄, ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀪𑁂𑀤𑀢𑁄 𑀘 𑀧𑀚𑀸𑀦𑀸𑀢𑀺. 𑀢𑀲𑁆𑀲𑀸 𑀲𑀫𑀼𑀤𑀬𑀜𑁆𑀘𑀸𑀢𑀺 𑀢𑀲𑁆𑀲𑀸 𑀧𑀞𑀫𑀸𑀬 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀁 𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺. 𑀅𑀢𑁆𑀣𑀗𑁆𑀕𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁄, 𑀅𑀲𑁆𑀲𑀸𑀤𑀢𑁄 𑀘 𑀅𑀲𑁆𑀲𑀸𑀤𑀁. 𑀅𑀬𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁄 𑀆𑀤𑀻𑀦𑀯𑁄. 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀙𑀦𑁆𑀤𑀭𑀸𑀕𑀯𑀺𑀦𑀬𑁄, 𑀲𑀳 𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀁. 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀸𑀦𑀤𑀺𑀝𑁆𑀞𑀻𑀦𑀁 𑀯𑀲𑁂𑀦𑀸𑀳𑀦𑁆𑀢𑀺 𑀯𑀸, 𑀢𑀡𑁆𑀳𑀸𑀯𑀲𑁂𑀦 𑀫𑀫𑀦𑁆𑀢𑀺 𑀯𑀸 𑀅𑀪𑀺𑀦𑀦𑁆𑀤𑀦𑀸𑀧𑀺 𑀫𑀸𑀦𑀲𑁆𑀲 𑀧𑀭𑀺𑀢𑀲𑁆𑀲𑀦𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑁂𑀲𑁂𑀲𑀼 𑀅𑀝𑁆𑀞𑀲𑀼𑀧𑀺 𑀯𑀸𑀭𑁂𑀲𑀼. 𑀢𑀢𑁆𑀣𑀸𑀢𑀺 𑀉𑀧𑀭𑀺 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀤𑀼𑀢𑀺𑀬𑀸𑀬𑀢𑀦𑁂𑀲𑀼. 𑀢𑀢𑁆𑀣 𑀳𑀺 𑀭𑀽𑀧𑀁 𑀦𑀢𑁆𑀣𑀺. 𑀧𑀼𑀦 𑀢𑀢𑁆𑀣𑀸𑀢𑀺 𑀧𑀞𑀫𑀸𑀬𑀢𑀦𑁂. 𑀢𑀢𑁆𑀣 𑀳𑀺 𑀏𑀓𑁄 𑀭𑀽𑀧𑀓𑁆𑀔𑀦𑁆𑀥𑁄𑀯. 𑀏𑀢𑁆𑀣𑀸𑀢𑀺 𑀘 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀆𑀳𑀸𑀭𑀯𑀲𑁂𑀦 𑀬𑁄𑀚𑀦𑀸 𑀦 𑀲𑀫𑁆𑀪𑀯𑀢𑀺.

𑀬𑀢𑁄 𑀔𑁄𑀢𑀺 𑀏𑀢𑁆𑀣 𑀢𑁄-𑀲𑀤𑁆𑀤𑁄 𑀤𑀸-𑀲𑀤𑁆𑀤𑁄 𑀯𑀺𑀬 𑀓𑀸𑀮𑀯𑀘𑀦𑁄 ‘‘𑀬𑀢𑁄 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁧) 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀬𑀤𑀸 𑀔𑁄’’𑀢𑀺. 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀓𑀜𑁆𑀘𑀺𑀧𑀺 𑀲𑀗𑁆𑀔𑀸𑀭𑀁 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀅𑀕𑁆𑀕𑀳𑁂𑀢𑁆𑀯𑀸. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀦𑀥𑀺𑀕𑀢𑀢𑁆𑀢𑀸 𑀲𑀸𑀢𑀺𑀲𑀬𑀲𑁆𑀲 𑀲𑀫𑀸𑀥𑀺𑀩𑀮𑀲𑁆𑀲 𑀅𑀪𑀸𑀯𑀢𑁄 𑀧𑀜𑁆𑀜𑀸𑀩𑀮𑁂𑀦𑁂𑀯 𑀯𑀺𑀫𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀲𑀘𑁆𑀙𑀺𑀓𑀢𑁆𑀯𑀸 𑀧𑀜𑁆𑀜𑀸𑀩𑀮𑁂𑀦𑁂𑀯𑀸’’𑀢𑀺𑀆𑀤𑀺. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀆𑀬𑀢𑀺𑀁 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸. 𑀧𑀚𑀸𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀧𑀞𑀫𑀚𑁆𑀛𑀸𑀦𑀨𑀲𑁆𑀲𑁂𑀦 𑀯𑀺𑀦𑀸 𑀧𑀭𑀺𑀚𑀸𑀦𑀦𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑁂𑀲𑀁 𑀓𑀺𑀘𑁆𑀘𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑁄𑀢𑀺 𑀯𑀺𑀫𑀼𑀢𑁆𑀢𑁄. 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀢𑀺 𑀲𑀫𑀣𑀪𑀸𑀯𑀦𑀸𑀲𑀺𑀦𑁂𑀳𑀸𑀪𑀸𑀯𑁂𑀦 𑀲𑀼𑀓𑁆𑀔𑀸 𑀮𑀽𑀔𑀸, 𑀅𑀲𑀺𑀦𑀺𑀤𑁆𑀥𑀸 𑀯𑀸 𑀯𑀺𑀧𑀲𑁆𑀲𑀦𑀸 𑀏𑀢𑀲𑁆𑀲𑀸𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄. 𑀞𑀢𑁆𑀯𑀸𑀢𑀺 𑀧𑀸𑀤𑀓𑀓𑀭𑀡𑀯𑀲𑁂𑀦 𑀞𑀢𑁆𑀯𑀸. 𑀅𑀜𑁆𑀜𑀢𑀭𑀲𑁆𑀫𑀺𑀦𑁆𑀢𑀺 𑀘 𑀅𑀜𑁆𑀜𑀢𑀭𑀅𑀜𑁆𑀜𑀢𑀭𑀲𑁆𑀫𑀺𑀁, 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺𑀲𑁆𑀲 𑀧𑀜𑁆𑀘𑀯𑀺𑀥𑀢𑀸 𑀲𑀺𑀬𑀸. ‘‘𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀢𑀺𑀲𑀬𑀲𑁆𑀲 𑀲𑀫𑀸𑀥𑀺𑀩𑀮𑀲𑁆𑀲 𑀅𑀪𑀸𑀯𑁄 𑀤𑀻𑀧𑀺𑀢𑁄. ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀸𑀢𑀺𑀲𑀬𑀲𑁆𑀲 𑀧𑀜𑁆𑀜𑀸𑀩𑀮𑀲𑁆𑀲 𑀪𑀸𑀯𑁄. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀦 𑀆𑀲𑀯𑀸 𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀦 𑀧𑀭𑀺𑀓𑁆𑀔𑀻𑀡𑀸 ‘‘𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀯𑀼𑀢𑁆𑀢𑀸. 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸 𑀏𑀯 𑀳𑀺 𑀤𑀲𑁆𑀲𑀦𑀁 𑀆𑀲𑀯𑀸𑀦𑀁 𑀔𑀬𑀲𑁆𑀲 𑀧𑀼𑀭𑀺𑀫𑀓𑀺𑀭𑀺𑀬𑀸 𑀳𑁄𑀢𑀺.

𑀅𑀝𑁆𑀞𑀯𑀺𑀫𑁄𑀓𑁆𑀔𑀯𑀡𑁆𑀡𑀦𑀸

𑁧𑁨𑁯. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀢𑁆𑀢𑀲𑀼 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀆𑀤𑀺𑀦𑀸 𑀧𑀭𑀺𑀚𑀸𑀦𑀦𑀸𑀤𑀺𑀯𑀲𑀧𑁆𑀧 𑀯𑀢𑁆𑀢𑀦𑀺𑀕𑁆𑀕𑀫𑀦𑀜𑁆𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀦𑀸𑀫𑀜𑁆𑀘. 𑀇𑀢𑀭𑀲𑁆𑀲𑀸𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲. 𑀇𑀫𑁂 𑀲𑀦𑁆𑀥𑀸𑀬 𑀳𑀺 𑀧𑀼𑀩𑁆𑀩𑁂 ‘‘𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀦𑀝𑁆𑀞𑁂𑀦𑀸𑀢𑀺 𑀓𑁂𑀦 𑀲𑀪𑀸𑀯𑁂𑀦. 𑀲𑀪𑀸𑀯𑁄 𑀳𑀺 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀅𑀭𑀡𑀻𑀬𑀢𑁄 𑀜𑀸𑀢𑀩𑁆𑀩𑀢𑁄 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀏𑀯 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄. 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀓𑀁 𑀲𑀯𑀺𑀲𑁂𑀲𑀁 𑀫𑀼𑀘𑁆𑀘𑀦𑀝𑁆𑀞𑁂𑀦, 𑀏𑀢𑁂𑀦 𑀲𑀢𑀺𑀧𑀺 𑀲𑀩𑁆𑀩𑀲𑁆𑀲𑀸𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀪𑀸𑀯𑁂 𑀬𑁂𑀦 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀢𑀁 𑀛𑀸𑀦𑀁 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑁄 𑀪𑀸𑀯𑀦𑀸𑀯𑀺𑀲𑁂𑀲𑁄 𑀤𑀻𑀧𑀺𑀢𑁄. 𑀪𑀯𑀢𑀺 𑀳𑀺 𑀲𑀫𑀸𑀦𑀚𑀸𑀢𑀺𑀬𑀼𑀢𑁆𑀢𑁄𑀧𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄, 𑀬𑀣𑀸 𑀢𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲. 𑀢𑀣𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀢𑀸𑀬, 𑀏𑀯𑀁 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦𑀧𑀺 𑀯𑀺𑀫𑁄𑀓𑁆𑀔𑁄. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑁂 𑀘𑀸’’𑀢𑀺𑀆𑀤𑀺. 𑀅𑀬𑀁 𑀧𑀦𑀢𑁆𑀣𑁄𑀢𑀺 𑀅𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀧𑀘𑁆𑀙𑀺𑀫𑁂 𑀯𑀺𑀫𑁄𑀓𑁆𑀔𑁂 𑀦𑀺𑀭𑁄𑀥𑁂 𑀦𑀢𑁆𑀣𑀺, 𑀓𑁂𑀯𑀮𑁄 𑀯𑀺𑀫𑀼𑀢𑁆𑀢𑀝𑁆𑀞𑁄 𑀏𑀯 𑀢𑀢𑁆𑀣 𑀮𑀩𑁆𑀪𑀢𑀺, 𑀢𑀁 𑀲𑀬𑀫𑁂𑀯 𑀧𑀭𑀢𑁄 𑀯𑀓𑁆𑀔𑀢𑀺.

𑀭𑀽𑀧𑀻𑀢𑀺 𑀬𑁂𑀦𑀸𑀬𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀁 𑀬𑀲𑁆𑀲 𑀛𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀁 𑀭𑀽𑀧𑀁 𑀳𑁄𑀢𑀺, 𑀬𑁂𑀦 𑀯𑀺𑀲𑀺𑀝𑁆𑀞𑁂𑀦 𑀭𑀽𑀧𑁂𑀦 ‘‘𑀭𑀽𑀧𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬 𑀭𑀽𑀧𑀻-𑀲𑀤𑁆𑀤𑀲𑁆𑀲 𑀅𑀢𑀺𑀲𑀬𑀢𑁆𑀣𑀤𑀻𑀧𑀦𑀢𑁄, 𑀢𑀤𑁂𑀯 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀭𑀽𑀧𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀛𑀸𑀦𑀁 𑀇𑀥 𑀧𑀭𑀫𑀢𑁆𑀣𑀢𑁄 𑀭𑀽𑀧𑀻𑀪𑀸𑀯𑀲𑀸𑀥𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺. 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀭𑀽𑀧𑀸𑀦𑀻𑀢𑀺 𑀧𑀦𑁂𑀢𑁆𑀣 𑀧𑀼𑀭𑀺𑀫𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀸𑀦𑀻’’𑀢𑀺. 𑀭𑀽𑀧𑁂 𑀓𑀲𑀺𑀡𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀲𑀜𑁆𑀜𑀻, 𑀲𑀜𑁆𑀜𑀸𑀲𑀻𑀲𑁂𑀦 𑀛𑀸𑀦𑀁 𑀯𑀤𑀢𑀺. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀭𑀽𑀧𑀲𑀜𑁆𑀜𑀻. 𑀢𑁂𑀦𑀸𑀳 ‘‘𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻’’𑀢𑀺𑀆𑀤𑀺.

‘‘𑀅𑀦𑁆𑀢𑁄 𑀅𑀧𑁆𑀧𑀦𑀸𑀬𑀁 𑀲𑀼𑀪𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀸𑀪𑁄𑀕𑀯𑀲𑁂𑀦 𑀢𑀣𑀸 𑀅𑀥𑀺𑀫𑀼𑀢𑁆𑀢𑀺 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑁂𑀢𑁆𑀣 𑀢𑀣𑀸𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺𑀘𑁄𑀤𑀦𑀸 𑀲𑀫𑀢𑁆𑀣𑀺𑀢𑀸 𑀳𑁄𑀢𑀺. 𑀬𑀲𑁆𑀫𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀸𑀦𑀁 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀢𑀢𑀺𑀬𑁄 𑀯𑀺𑀫𑁄𑀓𑁆𑀔𑁄 𑀲𑀁𑀯𑀡𑁆𑀡𑀺𑀢𑁄, 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸 𑀲𑀢𑁆𑀢𑁂 𑀅𑀧𑁆𑀧𑀝𑀺𑀓𑀽𑀮𑀢𑁄 𑀤𑀳𑀦𑁆𑀢𑀺 𑀢𑁂𑀲𑀼 𑀢𑀢𑁄 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸𑀯 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁨𑁧𑁨) ‘‘𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸 𑀲𑀼𑀪𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀸, 𑀢𑀬𑀺𑀤𑀁 𑀉𑀪𑀬𑀫𑁆𑀧𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁄𑀢𑀺 𑀅𑀦𑀯𑀲𑁂𑀲𑀢𑁄. 𑀦 𑀳𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑁄𑀧𑀺 𑀢𑀢𑁆𑀣 𑀅𑀯𑀲𑁆𑀲𑀺𑀲𑁆𑀲𑀢𑀺. 𑀯𑀺𑀲𑀼𑀤𑁆𑀥𑀢𑁆𑀢𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀦𑀺𑀭𑁄𑀥𑀺𑀢𑀢𑁆𑀢𑀸. 𑀉𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀭𑀺𑀬𑁂𑀳𑁂𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄, 𑀅𑀭𑀺𑀬𑀨𑀮𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀪𑀸𑀯𑀢𑁄 𑀘.

𑁧𑁩𑁦. 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀞𑀫𑀲𑀫𑀸𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬. 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀫𑀸𑀧𑀢𑁆𑀢𑀺, 𑀢𑀸𑀯. 𑀅𑀝𑁆𑀞𑀢𑁆𑀯𑀸𑀢𑀺 𑀓𑀢𑁆𑀣𑀘𑀺 𑀲𑀫𑀸𑀧𑀢𑁆𑀢𑀺𑀬𑀁 𑀅𑀝𑁆𑀞𑀺𑀢𑁄 𑀏𑀯, 𑀦𑀺𑀭𑀦𑁆𑀢𑀭𑀫𑁂𑀯 𑀧𑀝𑀺𑀧𑀸𑀝𑀺𑀬𑀸, 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀘 𑀲𑀫𑀸𑀧𑀚𑁆𑀚𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀇𑀘𑁆𑀙𑀢𑀺 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀢𑀢𑁆𑀣 ‘‘𑀲𑀫𑀸𑀧𑀚𑁆𑀚𑀢𑀺 𑀧𑀯𑀺𑀲𑀢𑀻’’𑀢𑀺 𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀢𑀁 𑀢𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑀤𑁆𑀯𑀻𑀳𑀺 𑀯𑀺𑀫𑀼𑀘𑁆𑀘𑀦𑀪𑀸𑀕𑁂𑀳𑀺, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄𑀢𑀺 𑀤𑁆𑀯𑀻𑀳𑀺 𑀯𑀺𑀫𑀼𑀘𑁆𑀘𑀺𑀢𑀩𑁆𑀩𑀪𑀸𑀕𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺. 𑀯𑀺𑀫𑀼𑀢𑁆𑀢𑁄𑀢𑀺 𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀯𑀺𑀫𑀼𑀘𑁆𑀘𑀦𑁆𑀢𑁄 𑀘 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀳𑀺 𑀓𑀸𑀬𑀤𑁆𑀯𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀕𑀸𑀣𑀸𑀬 𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀉𑀧𑀲𑀺𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑀸 ‘‘𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄’’𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀫𑀼𑀦𑀺 𑀅𑀓𑁆𑀔𑀸𑀢𑁄. 𑀢𑀢𑁆𑀣 𑀅𑀢𑁆𑀣𑀁 𑀧𑀮𑁂𑀢𑀻𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀤𑀺𑀲𑀁 𑀕𑀢𑁄’’𑀢𑀺 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺. 𑀏𑀯𑀁 𑀫𑀼𑀦𑀺 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀅𑀭𑀽𑀧𑀁 𑀉𑀧𑀧𑀦𑁆𑀦𑁄 𑀲𑁂𑀓𑁆𑀔𑀫𑀼𑀦𑀺 𑀧𑀓𑀢𑀺𑀬𑀸 𑀧𑀼𑀩𑁆𑀩𑁂𑀯 𑀭𑀽𑀧𑀓𑀸𑀬𑀸 𑀯𑀺𑀫𑀼𑀢𑁆𑀢𑁄, 𑀢𑀢𑁆𑀣 𑀘 𑀘𑀢𑀼𑀢𑁆𑀣𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀸𑀫𑀓𑀸𑀬𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀧𑀼𑀦 𑀦𑀸𑀫𑀓𑀸𑀬𑀸𑀧𑀺 𑀯𑀺𑀫𑀼𑀢𑁆𑀢𑁄. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁, ‘‘𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀯𑀁 𑀆𑀤𑀺𑀓𑀁 𑀲𑀫𑀜𑁆𑀜𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

‘‘𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺 𑀇𑀤𑀁 𑀓𑀺𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀮𑀸𑀪𑀻𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀤𑀸𑀳𑀼 𑀲𑀩𑁆𑀩𑀸𑀭𑀼𑀧𑁆𑀧𑀮𑀸𑀪𑀻𑀯𑀲𑁂𑀦𑀸𑀢𑀺 𑀬𑀣𑀺𑀘𑁆𑀙𑀲𑀺, 𑀢𑀣𑀸 𑀳𑁄𑀢𑀼, 𑀬𑀤𑀺 𑀲𑀩𑁆𑀩𑀸𑀭𑀼𑀧𑁆𑀧𑀮𑀸𑀪𑀻𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀅𑀣 𑀢𑀢𑁆𑀣 𑀅𑀜𑁆𑀜𑀢𑀭𑀮𑀸𑀪𑀻𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀦𑀼𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺? 𑀬𑀲𑁆𑀫𑀸 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀏𑀓𑀲𑁆𑀲𑀸𑀧𑀺 𑀮𑀸𑀪𑀻 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑁂 𑀏𑀓𑀤𑁂𑀲𑀲𑁆𑀲𑀸𑀧𑀺 𑀢𑀁𑀦𑀸𑀫𑀤𑀸𑀦𑀲𑀫𑀢𑁆𑀣𑀢𑀸𑀲𑀫𑁆𑀪𑀯𑀢𑁄. 𑀅𑀬𑀜𑁆𑀳𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀲𑀫𑀜𑁆𑀜𑀸 𑀲𑀫𑀼𑀤𑀸𑀬𑁂 𑀯𑀺𑀬 𑀢𑀤𑁂𑀓𑀤𑁂𑀲𑁂𑀧𑀺 𑀦𑀺𑀭𑀼𑀴𑁆𑀳𑀸𑀧𑀢𑁆𑀢𑀺𑀲𑀫𑀜𑁆𑀜𑀸 𑀯𑀺𑀬𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺. ‘‘𑀧𑀜𑁆𑀘𑀯𑀺𑀥𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀙𑀩𑁆𑀩𑀺𑀥𑀢𑀁𑀧𑀺𑀲𑁆𑀲 𑀓𑁂𑀘𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀦𑀺𑀘𑁆𑀙𑀺𑀢𑁄𑀯𑀸𑀬𑀁 𑀧𑀜𑁆𑀳𑁄 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄, 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸 𑀘. 𑀢𑁂 𑀳𑀺 ‘‘𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀬𑀪𑀸𑀕𑀯𑀺𑀫𑀼𑀢𑁆𑀢𑁄 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀢𑁄’’𑀢𑀺 𑀯𑀢𑁆𑀯𑀸 𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀦𑀸𑀧𑀺 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀢𑁄 𑀯𑀺𑀫𑀼𑀢𑁆𑀢𑀺𑀁 𑀫𑀜𑁆𑀜𑀦𑁆𑀢𑀺. 𑀏𑀯𑀁 𑀭𑀽𑀧𑀚𑁆𑀛𑀸𑀦𑀪𑀸𑀕𑁂𑀦, 𑀅𑀭𑀽𑀧𑀚𑁆𑀛𑀸𑀦𑀪𑀸𑀕𑁂𑀦 𑀘 𑀉𑀪𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀧𑀸𑀬𑀲𑀫𑀸𑀦𑁄. ‘‘𑀢𑀸𑀤𑀺𑀲𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀬𑀸𑀤𑀺𑀲𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂, 𑀢𑀸𑀤𑀺𑀲𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀉𑀮𑁆𑀮𑀗𑁆𑀕𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀧𑀜𑁆𑀳𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲 𑀙𑀩𑁆𑀩𑀺𑀥𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀧𑀜𑁆𑀳𑁄. 𑀯𑀡𑁆𑀡𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁 𑀦𑀺𑀲𑁆𑀲𑀸𑀬. 𑀘𑀺𑀭𑁂𑀦𑀸𑀢𑀺 𑀣𑁂𑀭𑀲𑁆𑀲 𑀅𑀧𑀭𑀪𑀸𑀕𑁂 𑀘𑀺𑀭𑁂𑀦 𑀓𑀸𑀮𑁂𑀦. 𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀲𑀁𑀲𑀬𑀙𑁂𑀤𑀓𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀧𑀢𑁆𑀢𑁄.𑀢𑀁 𑀧𑀜𑁆𑀳𑀦𑁆𑀢𑀺 𑀢𑀫𑀢𑁆𑀣𑀁. 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀧𑀜𑁆𑀳𑁄. 𑀦 𑀓𑁂𑀦𑀘𑀺 𑀲𑀼𑀢𑀧𑀼𑀩𑁆𑀩𑀦𑁆𑀢𑀺 𑀓𑁂𑀦𑀘𑀺 𑀓𑀺𑀜𑁆𑀘𑀺 𑀦 𑀲𑀼𑀢𑀧𑀼𑀩𑁆𑀩𑀁, 𑀇𑀤𑀁 𑀅𑀢𑁆𑀣𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀜𑁆𑀘𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀓𑀺𑀜𑁆𑀘𑀸𑀧𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀧𑀘𑁆𑀘𑁂𑀓𑀁 𑀓𑀺𑀜𑁆𑀘𑀸𑀧𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀇𑀫𑁂 𑀳𑀻’’𑀢𑀺𑀆𑀤𑀺𑀦𑀸, 𑀢𑁂𑀦 𑀭𑀽𑀧𑀸𑀯𑀘𑀭𑀪𑀸𑀯𑀦𑀢𑁄 𑀆𑀭𑀼𑀧𑁆𑀧𑀪𑀸𑀯𑀦𑀸 𑀲𑀯𑀺𑀲𑁂𑀲𑀁 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑀢𑁄, 𑀉𑀧𑀭𑀺𑀪𑀸𑀯𑀦𑀸𑀪𑀸𑀯𑀢𑁄 𑀘𑀸𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀆𑀭𑀼𑀧𑁆𑀧𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁂 𑀬𑀁 𑀯𑀼𑀢𑁆𑀢𑀁 ‘‘𑀢𑀲𑁆𑀲𑁂𑀯𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀁 𑀘𑀸𑀭𑁂𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺𑀆𑀤𑀺, (𑀯𑀺𑀲𑀼𑀤𑁆𑀥𑀺. 𑁧.𑁨𑁮𑁧) 𑀢𑀁 𑀲𑀫𑀢𑁆𑀣𑀢𑀁 𑀳𑁄𑀢𑀻𑀢𑀺. 𑀇𑀤𑀁 𑀲𑀼𑀢𑁆𑀢𑀦𑁆𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀞𑀫𑀸𑀳 (𑀧𑀼. 𑀧. 𑀦𑀺𑀤𑁆𑀤𑁂𑀲 𑁨𑁭). 𑀲𑀩𑁆𑀩𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀅𑀢𑁆𑀣𑀲𑀽𑀘𑀦𑀸𑀤𑀺𑀅𑀢𑁆𑀣𑁂𑀦 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑁄 𑀯𑀸𑀬𑀫𑀢𑁆𑀣𑁄. 𑀬𑀁 𑀧𑀦 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀦𑀼𑀮𑁄𑀫𑀸𑀤𑀺𑀢𑁄 𑀲𑀫𑀸𑀧𑀚𑁆𑀚𑀦𑁂𑀦 𑀲𑀸𑀢𑀺𑀲𑀬𑀁 𑀲𑀦𑁆𑀢𑀸𑀦𑀲𑁆𑀲 𑀅𑀪𑀺𑀲𑀗𑁆𑀔𑀢𑀢𑁆𑀢𑀸, 𑀅𑀝𑁆𑀞𑀫𑀜𑁆𑀘 𑀉𑀢𑁆𑀢𑀫𑀁 𑀯𑀺𑀫𑁄𑀓𑁆𑀔𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀘𑁆𑀘𑀦𑀢𑁄 𑀘 𑀇𑀫𑀸𑀬 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀬𑀸 𑀲𑀩𑁆𑀩𑀲𑁂𑀝𑁆𑀞𑀢𑀸 𑀯𑁂𑀤𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.