𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁩𑁧. 𑀧𑀞𑀫𑁄 𑀓𑀢𑁆𑀢𑀼𑀅𑀢𑁆𑀣𑁄 ‘‘𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀻’’𑀢𑀺. 𑀤𑀼𑀢𑀺𑀬𑁄 𑀓𑀭𑀡𑀢𑁆𑀣𑁄 ‘‘𑀇𑀚𑁆𑀛𑀦𑁆𑀢𑀺 𑀏𑀢𑀸𑀬𑀸’’𑀢𑀺. 𑀧𑀚𑁆𑀚𑀺𑀢𑀩𑁆𑀩𑀸 𑀇𑀤𑁆𑀥𑀺 𑀯𑀼𑀢𑁆𑀢𑀸 ‘‘𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀓𑀢𑁆𑀢𑀼𑀲𑀸𑀥𑀦𑀲𑁆𑀲 𑀇𑀤𑁆𑀥𑀺𑀲𑀤𑁆𑀤𑀲𑁆𑀲 𑀓𑀭𑀡𑀲𑀸𑀥𑀦𑁂𑀦 𑀧𑀸𑀤𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀅𑀲𑀫𑁆𑀪𑀯𑀢𑁄, 𑀇𑀚𑁆𑀛𑀦𑀓𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀓𑀭𑀡𑀪𑀽𑀢𑁂𑀦 𑀧𑀸𑀤𑁂𑀦 𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 ‘‘𑀇𑀤𑁆𑀥𑀺 𑀏𑀯 𑀧𑀸𑀤𑁄’’𑀢𑀺 𑀲𑀤𑁆𑀤𑀬𑁄𑀚𑀦𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀦 𑀘…𑀧𑁂… 𑀯𑀢𑁆𑀢𑀼’’𑀦𑁆𑀢𑀺. 𑀇𑀤𑁆𑀥𑀺𑀓𑀺𑀭𑀺𑀬𑀸𑀓𑀭𑀡𑁂𑀦𑀸𑀢𑀺 𑀇𑀚𑁆𑀛𑀦𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀲𑀸𑀥𑁂𑀢𑀩𑁆𑀩𑀸 𑀘 𑀇𑀤𑁆𑀥𑀺 𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀤𑁆𑀯𑀺𑀦𑁆𑀦𑀁 𑀓𑀭𑀡𑀸𑀦𑀦𑁆𑀢𑀺 𑀇𑀚𑁆𑀛𑀦𑀧𑀚𑁆𑀚𑀦𑀓𑀺𑀭𑀺𑀬𑀸𑀓𑀭𑀡𑀸𑀦𑀁 𑀇𑀤𑁆𑀥𑀺𑀧𑀸𑀤𑀢𑁆𑀣𑀸𑀦𑀁. 𑀦 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀲𑀫𑁆𑀪𑀯𑀢𑀺 𑀧𑀝𑀺𑀲𑁂𑀥𑀤𑁆𑀯𑀬𑀁 𑀧𑀓𑀢𑀺𑀬𑀁 𑀞𑀧𑁂𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀞𑀫𑁂𑀦𑀢𑁆𑀣𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑁄, 𑀤𑀼𑀢𑀺𑀬𑁂𑀦 𑀲𑀸𑀫𑀺𑀯𑀘𑀦𑀲𑀫𑀸𑀲𑁄 𑀇𑀤𑁆𑀥𑀺𑀧𑀸𑀤𑀲𑀤𑁆𑀤𑀸𑀦𑀁 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸. 𑀬𑀣𑀸𑀯𑀼𑀢𑁆𑀢𑀸 𑀯𑀸 𑀧𑀞𑀫𑁂𑀦𑀢𑁆𑀣𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀯𑀲𑁂𑀦𑁂𑀯 𑀬𑁄𑀚𑀦𑀸 𑀬𑀼𑀚𑁆𑀚𑀢𑀺 𑀧𑀸𑀤𑀲𑁆𑀲 𑀧𑀚𑁆𑀚𑀫𑀸𑀦𑀓𑁄𑀝𑁆𑀞𑀸𑀲𑀪𑀸𑀯𑀢𑁄. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀢𑀭𑀲𑀫𑀸𑀲𑁂𑀦𑁂𑀯 𑀬𑁄𑀚𑀦𑀸 𑀬𑀼𑀚𑁆𑀚𑀢𑀺 𑀧𑀸𑀤𑀲𑁆𑀲 𑀇𑀚𑁆𑀛𑀦𑀓𑀭𑀡𑀽𑀧𑀸𑀬𑀪𑀸𑀯𑀢𑁄.

𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑀼𑀯𑀺𑀥𑀢𑁆𑀣𑀸𑀬𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀸𑀬, 𑀯𑀼𑀤𑁆𑀥𑀺𑀅𑀢𑁆𑀣𑀸𑀬 𑀘. 𑀯𑀺𑀲𑀼𑀦𑁆𑀢𑀺 ‘‘𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀇𑀫𑀲𑁆𑀫𑀸 𑀯𑀺𑀲𑀼𑀁. 𑀲𑀫𑀸𑀲𑀬𑁄𑀚𑀦𑀸𑀯𑀲𑁂𑀦𑀸𑀢𑀺 ‘‘𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀏𑀯𑀁 𑀲𑀫𑀸𑀲𑀬𑁄𑀚𑀦𑀸𑀯𑀲𑁂𑀦. 𑀬𑀣𑀸𑀬𑀼𑀢𑁆𑀢𑁄𑀢𑀺 𑀓𑀢𑁆𑀢𑀼𑀓𑀭𑀡𑀢𑁆𑀣𑁂𑀲𑀼 𑀬𑁄 𑀬𑁄 𑀬𑀼𑀢𑁆𑀢𑁄. 𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀦𑁆𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀢𑀁𑀧𑀼𑀩𑁆𑀩𑀪𑀸𑀕𑀸𑀦𑀁 𑀬𑀣𑀸𑀓𑁆𑀓𑀫𑀁 𑀓𑀢𑁆𑀢𑀺𑀤𑁆𑀥𑀺𑀓𑀭𑀡𑀺𑀤𑁆𑀥𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 ‘‘𑀙𑀦𑁆𑀤𑁄𑀬𑁂𑀯 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄, 𑀘𑀺𑀢𑁆𑀢𑀫𑁂𑀯, 𑀯𑀻𑀭𑀺𑀬𑀫𑁂𑀯, 𑀯𑀻𑀫𑀁𑀲𑀸𑀯 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀯𑀸 𑀯𑀼𑀢𑁆𑀢𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀻’’𑀢𑀺𑀆𑀤𑀺.

𑀙𑀦𑁆𑀤𑀘𑀺𑀢𑁆𑀢𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁂𑀲𑀼 𑀢𑀸𑀯 𑀬𑀼𑀢𑁆𑀢𑀁 𑀧𑀥𑀸𑀦𑀲𑀗𑁆𑀔𑀸𑀭𑀕𑁆𑀕𑀳𑀡𑀁 𑀅𑀧𑀼𑀩𑁆𑀩𑀢𑁆𑀢𑀸, 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁂 𑀧𑀦 𑀓𑀣𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂’’𑀢𑀺𑀆𑀤𑀺. 𑀬𑀤𑀺 𑀤𑁆𑀯𑁂𑀬𑁂𑀯 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺, 𑀙𑀦𑁆𑀤𑀸𑀤𑀬𑁄 𑀓𑀺𑀫𑀢𑁆𑀣𑀺𑀬𑀸𑀢𑀺 𑀆𑀳 ‘‘𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀻’’𑀢𑀺. 𑀦 𑀇𑀥…𑀧𑁂… 𑀯𑀼𑀢𑁆𑀢𑀸 𑀳𑁄𑀢𑀺 𑀅𑀢𑀩𑁆𑀩𑀺𑀲𑁂𑀲𑀦𑀢𑁆𑀢𑀸. 𑀬𑀤𑀺𑀧𑀺 𑀲𑀫𑀸𑀥𑀺𑀯𑀺𑀲𑁂𑀲𑀦𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 ‘‘𑀯𑀻𑀭𑀺𑀬𑀲𑀫𑀸𑀥𑀺𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀏𑀯𑀁 𑀲𑀺𑀤𑁆𑀥𑁂 𑀲𑀢𑀺 𑀧𑀼𑀦 𑀯𑀘𑀦𑀁 𑀯𑀻𑀭𑀺𑀬𑀦𑁆𑀢𑀭𑀲𑀩𑁆𑀪𑀸𑀯𑀁 𑀦𑀼 𑀔𑁄 𑀤𑀻𑀧𑁂𑀢𑀻𑀢𑀺 𑀓𑀤𑀸𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀻𑀭𑀺𑀬𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄𑀢𑀺 𑀙𑀦𑁆𑀤𑀸𑀤𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑁄. 𑀢𑁂𑀦𑁂𑀯 𑀳𑀺 𑀙𑀦𑁆𑀤𑀸𑀤𑀺𑀫𑀼𑀔𑁂𑀦𑁂𑀯 𑀇𑀤𑁆𑀥𑀺𑀧𑀸𑀤𑀸 𑀤𑁂𑀲𑀺𑀢𑀸. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀙𑀦𑁆𑀤𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺’’𑀦𑁆𑀢𑀺𑀆𑀤𑀺. 𑀢𑀁𑀢𑀁𑀅𑀯𑀲𑁆𑀲𑀬𑀦𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀙𑀦𑁆𑀤𑀲𑁆𑀲 𑀲𑀫𑀸𑀥𑀺𑀦𑁄 𑀅𑀯𑀲𑁆𑀲𑀬𑀢𑀸𑀯𑀲𑁂𑀦, 𑀧𑀘𑁆𑀘𑀬𑀯𑀺𑀲𑁂𑀲𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀬𑀢𑁆𑀣𑁂𑀦…𑀧𑁂… 𑀯𑀼𑀢𑁆𑀢𑀸 𑀳𑁄𑀢𑀺 𑀅𑀥𑀺𑀕𑀫𑀽𑀧𑀸𑀬𑀢𑀸𑀧𑀺 𑀦𑀺𑀲𑁆𑀲𑀬𑀪𑀸𑀯𑁄𑀬𑁂𑀯𑀸𑀢𑀺. ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀁 𑀧𑀸𑀴𑀺𑀬𑀸𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀢𑁂𑀦𑁂𑀯𑀸𑀢𑀺 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀉𑀧𑀸𑀬𑀢𑁆𑀣𑀪𑀸𑀯𑁂𑀦𑁂𑀯 𑀇𑀤𑁆𑀥𑀺𑀧𑀸𑀤𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀙𑀦𑁆𑀤𑀸𑀤𑀺𑀓𑁂 𑀥𑀼𑀭𑁂 𑀚𑁂𑀝𑁆𑀞𑀓𑁂 𑀧𑀼𑀩𑁆𑀩𑀗𑁆𑀕𑀫𑁂 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀲𑀫𑀸𑀥𑀺 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀬𑀸 𑀅𑀥𑀺𑀕𑀫𑀽𑀧𑀸𑀬𑀢𑀸𑀤𑀲𑁆𑀲𑀦𑀁 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁, 𑀢𑀤𑀢𑁆𑀣𑀫𑁂𑀯 ‘‘𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁 𑀙𑀦𑁆𑀤𑀸𑀤𑀺𑀯𑀺𑀲𑀺𑀝𑁆𑀞𑀸𑀦𑀁𑀬𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀓𑁂𑀯𑀮𑀁 𑀇𑀤𑁆𑀥𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀁𑀬𑁂𑀯 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀇𑀤𑁆𑀥𑀺𑀧𑀸𑀤𑀪𑀸𑀯𑁂 𑀕𑀬𑁆𑀳𑀫𑀸𑀦𑁂 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀳𑁄𑀢𑀺 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁩𑁩. 𑀢𑁄𑀲𑀦𑀁 𑀲𑀢𑁆𑀣𑀼 𑀆𑀭𑀸𑀥𑀦𑀁, 𑀲𑀺𑀓𑁆𑀔𑀸𑀬 𑀯𑀸. 𑀣𑀸𑀫𑀪𑀸𑀯𑀢𑁄𑀢𑀺 𑀣𑀺𑀭𑀪𑀸𑀯𑀢𑁄. 𑀓𑀼𑀮𑀸𑀧𑀤𑁂𑀲𑁂 𑀚𑀸𑀢𑀺𑀫𑀸 𑀧𑀼𑀭𑀺𑀲𑁆𑀲𑀭𑁄 𑀳𑁄𑀢𑀻𑀢𑀺 ‘‘𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑀺𑀝𑁆𑀞𑀚𑀸𑀢𑀺𑀲𑀤𑀺𑀲𑀢𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑀸𑀭𑀡𑀸𑀧𑀜𑁆𑀜𑀸𑀳𑁂𑀢𑀼𑀓𑀢𑁆𑀢𑀸 𑀫𑀦𑁆𑀢𑀲𑁆𑀲 𑀯𑀻𑀫𑀁𑀲𑀸𑀲𑀤𑀺𑀲𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀦 𑀉𑀤𑁆𑀥𑀝𑀸.

𑀙𑀦𑁆𑀤𑀸𑀤𑀺𑀓𑁂𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸, 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀢𑀺 𑀇𑀫𑁂 𑀢𑀬𑁄 𑀢𑀬𑁄 𑀥𑀫𑁆𑀫𑁂. 𑀅𑀪𑁂𑀤𑀢𑁄 𑀪𑁂𑀤𑀁 𑀅𑀓𑀢𑁆𑀯𑀸 𑀅𑀪𑀺𑀦𑁆𑀤𑀺𑀢𑁆𑀯𑀸 𑀇𑀤𑁆𑀥𑀺𑀪𑀸𑀯𑀲𑀸𑀫𑀜𑁆𑀜𑁂𑀦, 𑀇𑀤𑁆𑀥𑀺𑀧𑀸𑀤𑀪𑀸𑀯𑀲𑀸𑀫𑀜𑁆𑀜𑁂𑀦 𑀘 𑀲𑀗𑁆𑀕𑀡𑁆𑀳𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸’’𑀢𑀺. 𑀪𑁂𑀤𑀦𑀁 𑀯𑀸 𑀲𑀫𑁆𑀪𑁂𑀤𑀦𑀁 𑀫𑀺𑀲𑁆𑀲𑀻𑀓𑀭𑀡𑀦𑁆𑀢𑀺 𑀆𑀳 ‘‘𑀅𑀫𑀺𑀲𑁆𑀲𑁂𑀢𑁆𑀯𑀸’’𑀢𑀺. 𑀢𑀣𑀸 𑀳𑀺 ‘‘𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁪𑁩𑁩) 𑀇𑀤𑁆𑀥𑀺𑀇𑀤𑁆𑀥𑀺𑀧𑀸𑀤𑁂 𑀅𑀫𑀺𑀲𑁆𑀲𑁂𑀢𑁆𑀯𑀸𑀧𑀺 𑀓𑀣𑀺𑀢𑀁. 𑀯𑀺𑀲𑁂𑀲𑁂𑀦𑀸𑀢𑀺 𑀪𑁂𑀤𑁂𑀦 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀅𑀲𑀫𑁆𑀫𑀺𑀲𑁆𑀲𑀪𑀸𑀯𑁂𑀦 𑀆𑀯𑁂𑀡𑀺𑀓𑀢𑁆𑀢𑀸. 𑀆𑀯𑁂𑀡𑀺𑀓𑀸 𑀳𑀺 𑀙𑀦𑁆𑀤𑀸𑀤𑀬𑁄 𑀢𑀲𑁆𑀲 𑀢𑀲𑁆𑀲 𑀇𑀤𑁆𑀥𑀺𑀧𑀸𑀤𑀲𑁆𑀲. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀅𑀪𑁂𑀤𑁂𑀦, 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀲𑀸𑀥𑀸𑀭𑀡𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑀫𑀸𑀥𑀺𑀤𑁆𑀥𑀺𑀧𑀸𑀤𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀁, 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀤𑁄𑀢𑀺 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀓𑁆𑀔𑀦𑁆𑀥𑀫𑀸𑀳. ‘‘𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁂 𑀧𑀯𑀺𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀲𑀺𑀝𑁆𑀞𑁂𑀲𑁆𑀯𑁂𑀯 𑀧𑀯𑁂𑀲𑀁 𑀅𑀯𑀢𑁆𑀯𑀸. 𑀘𑀢𑀽𑀲𑀽𑀢𑀺 𑀙𑀦𑁆𑀤𑁄, 𑀲𑀫𑀸𑀥𑀺, 𑀧𑀥𑀸𑀦𑀲𑀗𑁆𑀔𑀸𑀭𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀔𑀦𑁆𑀥𑀸𑀢𑀺 𑀏𑀯𑀁 𑀘𑀢𑀽𑀲𑀼. 𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀙𑀦𑁆𑀤𑀯𑀢𑁄 𑀓𑁄 𑀲𑀫𑀸𑀥𑀺 𑀦 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀇𑀢𑀻𑀢𑀺 𑀏𑀯𑀁 𑀅𑀦𑁂𑀦 𑀧𑀓𑀸𑀭𑁂𑀦, 𑀬𑀁 𑀲𑀫𑀸𑀥𑀺𑀪𑀸𑀯𑀦𑀸𑀫𑀼𑀔𑀁. 𑀲𑀫𑀸𑀥𑀺𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀪𑀸𑀯𑀺𑀢𑀸 𑀔𑀦𑁆𑀥𑀸 𑀲𑀫𑀸𑀥𑀺𑀪𑀸𑀯𑀺𑀢𑀸.

‘‘𑀬𑁂 𑀳𑀻’’𑀢𑀺𑀆𑀤𑀺𑀦𑀸 ‘‘𑀅𑀪𑀺𑀦𑀯𑀁 𑀦𑀢𑁆𑀣𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀯𑀺𑀯𑀭𑀢𑀺. 𑀢𑀺𑀡𑁆𑀡𑀦𑁆𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁. 𑀇𑀤𑀦𑁆𑀢𑀺 ‘‘𑀇𑀫𑁂 𑀳𑀺 𑀢𑀬𑁄’’𑀢𑀺𑀆𑀤𑀺𑀯𑀘𑀦𑀁. 𑀧𑀼𑀭𑀺𑀫𑀲𑁆𑀲𑀸𑀢𑀺 ‘‘𑀙𑀦𑁆𑀤𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲. 𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀲𑀸𑀥𑀦𑀪𑀸𑀯𑁂𑀦. 𑀢𑁂𑀦𑀸𑀢𑀺 ‘‘𑀇𑀫𑁂 𑀳𑀺 𑀢𑀬𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀬𑀲𑁆𑀫𑀸 𑀙𑀦𑁆𑀤𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀇𑀤𑁆𑀥𑀺𑀧𑀸𑀤𑀪𑀸𑀯𑁄 𑀯𑀼𑀢𑁆𑀢𑁄. 𑀲𑁄 𑀧𑀦 𑀦𑀺𑀲𑁆𑀲𑀬𑀪𑀸𑀯𑁄 𑀲𑀫𑁆𑀧𑀬𑁄𑀕𑀸𑀯𑀺𑀦𑀸𑀪𑀸𑀯𑀻𑀢𑀺 𑀆𑀳 ‘‘𑀢𑀤𑀦𑁆𑀢𑁄𑀕𑀥𑀢𑁆𑀢𑀸’’𑀢𑀺, 𑀲𑀫𑁆𑀧𑀬𑀼𑀢𑁆𑀢𑀓𑀦𑁆𑀢𑁄𑀕𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀸𑀤𑀻𑀦𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀁 𑀲𑀪𑀸𑀯𑀢𑁄 𑀇𑀤𑁆𑀥𑀺𑀪𑀸𑀯𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀇𑀤𑁆𑀥𑀺𑀪𑀸𑀯𑀧𑀭𑀺𑀬𑀸𑀬𑁄 𑀅𑀢𑁆𑀣𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸…𑀧𑁂… 𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑀸’’𑀢𑀺. 𑀏𑀓𑀤𑁂𑀲𑀲𑁆𑀲𑀸𑀢𑀺 𑀙𑀦𑁆𑀤𑀸𑀤𑀻𑀦𑀁. 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁, 𑀙𑀦𑁆𑀤𑀸𑀤𑀻𑀦𑀁 𑀯𑀸 𑀘𑀢𑀼𑀦𑁆𑀦𑀁. 𑀧𑀼𑀦𑀧𑀻𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀓𑀸 𑀧𑀦𑀸’’𑀢𑀺𑀆𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀇𑀫𑀺𑀦𑀸 𑀘𑀢𑀼𑀓𑁆𑀔𑀦𑁆𑀥𑀢𑀤𑁂𑀓𑀤𑁂𑀲𑀸𑀦𑀁 𑀇𑀤𑁆𑀥𑀺𑀪𑀸𑀯𑀤𑀻𑀧𑀦𑁂𑀦.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁄 𑀯𑀘𑀦𑀓𑁆𑀓𑀫𑁂𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀅𑀧𑀼𑀩𑁆𑀩𑀦𑁆𑀢𑀺 𑀓𑀢𑁆𑀯𑀸’’𑀢𑀺. 𑀓𑁂𑀦𑀝𑁆𑀞𑁂𑀦 𑀇𑀤𑁆𑀥𑀺 𑀧𑀝𑀺𑀮𑀸𑀪𑁄, 𑀓𑁂𑀦𑀝𑁆𑀞𑁂𑀦 𑀧𑀸𑀤𑁄 𑀧𑀼𑀩𑁆𑀩𑀪𑀸𑀕𑁄𑀢𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑀦𑀸. 𑀬𑀤𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑁄, 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑁄𑀬𑁂𑀯 𑀯𑀼𑀢𑁆𑀢𑁄 𑀲𑀺𑀬𑀸, 𑀦 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑁄𑀢𑀺 𑀆𑀳 ‘‘𑀉𑀧𑀸𑀬𑁄 𑀘𑀸’’𑀢𑀺𑀆𑀤𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀘. 𑀢𑁂𑀦𑀸𑀳 ‘‘𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀳𑀻’’𑀢𑀺𑀆𑀤𑀺. 𑀲𑀫𑀸𑀥𑀺𑀯𑀺𑀲𑁂𑀲𑀦𑀪𑀸𑀯𑁂𑀦𑀸𑀢𑀺 ‘‘𑀙𑀦𑁆𑀤𑀸𑀥𑀺𑀧𑀢𑀺, 𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦. ‘‘𑀲𑀫𑀸𑀥𑀺𑀲𑁂𑀯𑀦𑀯𑀲𑁂𑀦𑀸’’𑀢𑀺 𑀘 𑀧𑀸𑀞𑁄. 𑀢𑀢𑁆𑀣 𑀲𑀫𑀸𑀥𑀺𑀲𑁂𑀯𑀦𑀯𑀲𑁂𑀦𑀸𑀢𑀺 𑀙𑀦𑁆𑀤𑀸𑀥𑀺𑀓𑁂 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀲𑀫𑀸𑀥𑀺𑀲𑁆𑀲 𑀆𑀲𑁂𑀯𑀦𑀯𑀲𑁂𑀦. 𑀉𑀧𑀸𑀬𑀪𑀽𑀢𑀸𑀦𑀦𑁆𑀢𑀺 ‘‘𑀙𑀦𑁆𑀤𑀯𑀢𑁄 𑀘𑁂 𑀲𑀫𑀸𑀥𑀺 𑀇𑀚𑁆𑀛𑀢𑀺, 𑀫𑀬𑁆𑀳𑁂𑀯 𑀇𑀚𑁆𑀛𑀢𑀻’’𑀢𑀺 𑀲𑀫𑀸𑀥𑀺𑀆𑀲𑁂𑀯𑀦𑀸𑀬 𑀉𑀧𑀸𑀬𑀪𑀽𑀢𑀸𑀦𑀁.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.