𑀯𑀺𑀪𑀗𑁆𑀕-𑀅𑀦𑀼𑀝𑀻𑀓𑀸

𑁧. 𑀔𑀦𑁆𑀥𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀕𑀸𑀣𑀸𑀬𑀁 ‘‘𑀘𑀢𑀼𑀲𑀘𑁆𑀘𑀤𑀲𑁄’’𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀲𑀘𑁆𑀘𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀏𑀯 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀸𑀳𑀝𑀸𑀦𑀻𑀢𑀺 𑀲𑀫𑀸𑀦𑀻𑀢𑀸𑀦𑀺, 𑀘𑀺𑀢𑁆𑀢𑁂𑀦 𑀏𑀓𑀢𑁄 𑀕𑀳𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀫𑀸𑀳𑀝𑀸𑀦𑀻’’𑀢𑀺 𑀘 𑀏𑀢𑁂𑀦 𑀲𑀫𑀸𑀳𑀸𑀭𑁂 𑀅𑀬𑀁 𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀲𑁆𑀲 𑀓𑀢𑁂𑀓𑀢𑁆𑀢𑀲𑁆𑀲 𑀘𑀢𑀼𑀲𑀘𑁆𑀘𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀢𑀺𑀯𑀝𑁆𑀝’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀢𑁆𑀢𑀸𑀤𑀺𑀧𑀓𑁆𑀔𑁂𑀧𑁂𑀦 𑀳𑀺𑀲𑁆𑀲 𑀦 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀬𑀣𑀸 𑀧𑀜𑁆𑀘𑀧𑀢𑁆𑀢𑀁, 𑀘𑀢𑀼𑀬𑀼𑀕𑀁, 𑀢𑀺𑀪𑀼𑀯𑀦𑀦𑁆𑀢𑀺, 𑀢𑀁 𑀘𑀢𑀼𑀲𑀘𑁆𑀘𑀁 𑀧𑀲𑁆𑀲𑀺 𑀅𑀤𑀓𑁆𑀔𑀺, 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑁂𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀲𑀼 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀲𑀼 𑀩𑀼𑀤𑁆𑀥𑀕𑀼𑀡𑁂𑀲𑀼 𑀲𑀁𑀯𑀺𑀚𑁆𑀚𑀫𑀸𑀦𑁂𑀲𑀼 𑀲𑀸𑀯𑀓𑁂𑀳𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀘 𑀲𑀸𑀥𑀸𑀭𑀡𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀢𑀺𑀧𑀺 𑀲𑀸𑀯𑀓𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀦𑀜𑁆𑀜𑀧𑀼𑀩𑁆𑀩𑀓𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀸𑀯𑀓𑁂𑀳𑀺, ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀘 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀅𑀲𑀸𑀥𑀸𑀭𑀡𑀢𑀁, 𑀦𑀺𑀭𑀢𑀺𑀲𑀬𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀧𑀭𑀲𑀦𑁆𑀢𑀸𑀦𑁂𑀲𑀼 𑀧𑀲𑀸𑀭𑀺𑀢𑀪𑀸𑀯𑁂𑀦 𑀲𑀼𑀧𑀸𑀓𑀝𑀢𑁆𑀢𑀸𑀢𑀺 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀯𑀺𑀢𑁆𑀣𑀸𑀭𑀺𑀢𑀪𑀸𑀯𑁂𑀦 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀼𑀧𑁆𑀧𑀓𑀸𑀲𑀺𑀢𑀢𑁆𑀢𑀸. 𑀦𑀸𑀣𑀲𑀤𑁆𑀤𑀁 𑀮𑁄𑀓𑁂 𑀬𑀸𑀘𑀦𑀼𑀧𑀢𑀸𑀧𑀺𑀲𑁆𑀲𑀭𑀺𑀬𑀸𑀲𑀻𑀲𑀸𑀲𑀼 𑀧𑀞𑀦𑁆𑀢𑀻𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀣𑀢𑀻𑀢𑀺 𑀦𑀸𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀪𑀕𑀯𑀸 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀪𑀸𑀯𑁂𑀦𑁂𑀯 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀸𑀲𑀻𑀲𑀸𑀬 𑀓𑀺𑀮𑁂𑀲𑀩𑁆𑀬𑀲𑀦𑀼𑀧𑀢𑀸𑀧𑀦𑀲𑁆𑀲, 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸𑀘𑀦𑀲𑁆𑀲 𑀘 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀁 𑀢𑁂𑀦𑁂𑀯 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 𑀦𑀸𑀣𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀆𑀲𑀻𑀲𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀘𑀢𑀼𑀲𑀘𑁆𑀘𑀤𑀲𑁄’’𑀢𑀺 𑀯𑀸 𑀇𑀫𑀺𑀦𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀪𑀕𑀯𑀢𑁄 𑀜𑀸𑀡𑀸𑀦𑀼𑀪𑀸𑀯𑁄 𑀧𑀓𑀸𑀲𑀺𑀢𑁄𑀢𑀺 ‘‘𑀦𑀸𑀣𑁄’’𑀢𑀺 𑀇𑀫𑀺𑀦𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀓𑀭𑀼𑀡𑀸𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀯𑁂𑀦𑁂𑀬𑁆𑀬𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀦𑀸𑀣𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀢𑀣𑀸 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀕𑀼𑀡𑁂𑀳𑀺 𑀈𑀲𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦𑀸𑀢𑀺 𑀅𑀭𑀺𑀬𑀺𑀤𑁆𑀥𑀺𑀆𑀤𑀺𑀦𑀸 𑀘𑀺𑀢𑁆𑀢𑁂 𑀯𑀲𑀻𑀪𑀸𑀯𑁂𑀦. 𑀕𑀼𑀡𑁂𑀳𑀺 𑀈𑀲𑀢𑀻𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑁂𑀳𑀺 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀥𑀫𑁆𑀫𑁂𑀦 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑁄 𑀬𑀲𑁆𑀫𑀸 𑀲𑀩𑁆𑀩𑀸𑀪𑀺𑀪𑀽 𑀦𑀸𑀫 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀪𑀯𑀢𑀻’’𑀢𑀺. 𑀢𑀣𑀸 𑀘𑀸𑀳 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩; 𑀤𑀻. 𑀦𑀺. 𑁧.𑁧𑁮𑁮). 𑀤𑀼𑀯𑀺𑀥𑁂𑀦𑀸𑀧𑀺 𑀇𑀲𑁆𑀲𑀭𑀺𑀬𑀢𑁆𑀣𑀁 𑀦𑀸𑀣𑀲𑀤𑁆𑀤𑀁 𑀤𑀲𑁆𑀲𑁂𑀢𑀺.

𑀅𑀝𑁆𑀞𑀸𑀭𑀲𑀧𑁆𑀧𑀪𑁂𑀤𑀸𑀬 𑀤𑁂𑀲𑀦𑀸𑀬 𑀣𑁄𑀫𑀦𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀲𑀫𑀸𑀦𑀕𑀡𑀦𑀕𑀼𑀡𑁂𑀳𑀻𑀢𑀺 𑀲𑀫𑀸𑀦𑀕𑀡𑀦𑁂𑀳𑀺 𑀕𑀼𑀡𑁂𑀳𑀺 𑀓𑀭𑀡𑀪𑀽𑀢𑁂𑀳𑀺. 𑀬𑀣𑀸𑀯𑀼𑀢𑁆𑀢𑁂𑀦 𑀦𑀺𑀭𑀢𑀺𑀲𑀬𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲, 𑀤𑀲𑀩𑀮𑁂𑀲𑀼 𑀯𑀲𑀻𑀪𑀸𑀯𑀲𑁆𑀲 𑀘 𑀧𑀤𑀝𑁆𑀞𑀸𑀦𑀪𑀽𑀢𑁂𑀦. 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁂𑀦 𑀳𑀺 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑀧𑁆𑀧𑀯𑀢𑁆𑀢𑁂𑀦 𑀲𑀸𑀢𑀺𑀲𑀬𑀁 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀧𑁆𑀧𑀪𑁂𑀤𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑀸𑀯𑁂𑀡𑀺𑀓𑁂𑀦 𑀲𑀫𑁆𑀫𑀲𑀦𑁂𑀦 𑀲𑀫𑁆𑀪𑀽𑀢𑁂𑀦 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀧𑀢𑀺𑀝𑁆𑀞𑀺𑀢𑁄𑀯 𑀓𑀼𑀲𑀮𑀸𑀤𑀺𑀪𑁂𑀤𑁂𑀦, 𑀨𑀲𑁆𑀲𑀸𑀤𑀺𑀪𑁂𑀤𑁂𑀦 𑀘 𑀥𑀫𑁆𑀫𑁂 𑀯𑀺𑀪𑀚𑀦𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀸𑀤𑀺𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀳𑀁 𑀘𑀢𑀼𑀥𑀸 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺. 𑀢𑀣𑀸 𑀅𑀢𑀻𑀢𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀤𑀺𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀔𑀦𑁆𑀥𑀸𑀤𑀺𑀓𑁂 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀯𑀼𑀢𑁆𑀢𑁂𑀦…𑀧𑁂… 𑀯𑀺𑀪𑀗𑁆𑀕’’𑀦𑁆𑀢𑀺. ‘‘𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀲𑀩𑁆𑀩𑀜𑁆𑀜𑀼𑀦𑀸 𑀤𑁂𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀏𑀢𑁂𑀦 𑀥𑀫𑁆𑀫𑀲𑀗𑁆𑀕𑀡𑀻𑀯𑀺𑀪𑀗𑁆𑀕𑀸𑀦𑀁 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀢𑀜𑁆𑀜𑁂𑀯 𑀯𑀺𑀪𑀸𑀯𑁂𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀤𑀺𑀕𑀼𑀡𑁂𑀢𑀺 𑀩𑀼𑀤𑁆𑀥𑀭𑀢𑀦𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸, 𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀁 𑀲𑁆𑀯𑀸𑀓𑁆𑀔𑀸𑀢𑀢𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀢𑀺 𑀏𑀯𑀫𑀸𑀤𑀺𑀕𑀼𑀡𑁂 𑀧𑀓𑀸𑀲𑁂𑀢𑀺.

𑀦𑀦𑀼 𑀘 ‘‘𑀘𑀢𑀼𑀲𑀘𑁆𑀘𑀤𑀲𑁄’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄𑀯 𑀕𑀼𑀡𑀸 𑀯𑀺𑀪𑀸𑀯𑀺𑀢𑀸𑀢𑀺? 𑀲𑀘𑁆𑀘𑀁, 𑀢𑁂𑀦𑁂𑀯 𑀥𑀫𑁆𑀫𑀲𑀗𑁆𑀖𑀸𑀦𑀫𑁆𑀧𑀺 𑀕𑀼𑀡𑀸 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 𑀢𑀧𑁆𑀧𑀪𑀯𑀲𑁆𑀲 𑀅𑀦𑀜𑁆𑀜𑀣𑀸𑀪𑀸𑀯𑀢𑁄, 𑀢𑀤𑀧𑀤𑁂𑀲𑁂𑀦 𑀯𑀸 𑀥𑀫𑁆𑀫𑁄, 𑀢𑀤𑀸𑀥𑀸𑀭𑁄 𑀘 𑀲𑀗𑁆𑀖𑁄 𑀯𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀸𑀤𑀻𑀦𑀁…𑀧𑁂… 𑀯𑀺𑀪𑀸𑀯𑁂𑀢𑀻’’𑀢𑀺.

𑀅𑀢𑀻𑀢𑀁𑀲𑁂𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂, 𑀧𑀼𑀩𑁆𑀩𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀳𑀢𑀦𑁆𑀢𑀺 𑀦𑀧𑁆𑀧𑀝𑀺𑀳𑀢𑀁, 𑀜𑀸𑀡𑀲𑁆𑀲 𑀧𑀝𑀺𑀖𑀸𑀢𑁄 𑀦𑀸𑀫 𑀅𑀜𑁆𑀜𑀸𑀡𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀓𑀺𑀮𑁂𑀲𑀚𑀸𑀢𑀁. 𑀢𑀁 𑀬𑀲𑁆𑀫𑀸 𑀪𑀕𑀯𑀢𑁄 𑀲𑀳 𑀯𑀸𑀲𑀦𑀸𑀬 𑀧𑀳𑀻𑀦𑀁, 𑀢𑀲𑁆𑀫𑀸𑀲𑁆𑀲 𑀅𑀢𑀻𑀢𑀁𑀲𑁂 𑀲𑀩𑁆𑀩𑀢𑁆𑀣𑀓𑀫𑁂𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑁂𑀦 𑀜𑀸𑀡𑀁 𑀅𑀧𑁆𑀧𑀝𑀺𑀳𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑀺𑀁 𑀧𑀦𑁂𑀢𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀲𑀼𑀁 𑀜𑀸𑀡𑀸𑀦𑀺, 𑀉𑀤𑀸𑀳𑀼 𑀅𑀢𑀻𑀢𑀸𑀤𑀻𑀲𑀼 𑀧𑀯𑀢𑁆𑀢𑀦𑀓𑀜𑀸𑀡𑀸𑀦𑀺 𑀏𑀯? 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀦𑀺 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀪𑀕𑀯𑀢𑁄 𑀢𑀻𑀡𑀺 𑀜𑀸𑀡𑀸𑀦𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀏𑀓𑀁𑀬𑁂𑀯 𑀳𑀼𑀢𑁆𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯. 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀓𑀢𑁆𑀢𑀩𑁆𑀩𑀁 𑀓𑀸𑀬𑀓𑀫𑁆𑀫𑀁. 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀜𑀸𑀡𑀧𑀼𑀭𑁂𑀘𑀸𑀭𑀺𑀓𑀁. 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀦𑀓𑀁, 𑀲𑀩𑁆𑀩𑀁 𑀓𑀸𑀬𑀧𑀬𑁄𑀕𑀁 𑀧𑀯𑀢𑁆𑀢𑁂𑀦𑁆𑀢𑁄 𑀪𑀕𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀡𑀲𑀳𑀺𑀢𑀫𑁂𑀯 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀙𑀦𑁆𑀤𑀲𑁆𑀲𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀬, 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑀢𑁄 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑁂𑀲𑀺𑀢𑀸𑀬 𑀳𑀺𑀢𑀓𑀺𑀭𑀺𑀬𑀸𑀙𑀦𑁆𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺 𑀥𑀫𑁆𑀫𑀓𑀣𑀸𑀬. 𑀅𑀧𑀭𑀺𑀓𑁆𑀔𑀬𑀸𑀧𑀭𑀺𑀫𑁂𑀬𑁆𑀬𑀧𑀝𑀺𑀪𑀸𑀦𑀢𑀸𑀬 𑀳𑀺 𑀪𑀕𑀯𑀢𑁄 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀥𑀫𑁆𑀫𑀤𑁂𑀲𑀦𑀸 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀦 𑀓𑀤𑀸𑀘𑀺𑀧𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀉𑀧𑀭𑀽𑀧𑀭𑀺 𑀯𑀟𑁆𑀠𑀢𑁂𑀯. 𑀯𑀻𑀭𑀺𑀬𑀲𑁆𑀲𑀸𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀉𑀲𑁆𑀲𑀸𑀳𑀲𑁆𑀲. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸. 𑀏𑀢𑁆𑀣 𑀘 𑀲𑀫𑀸𑀥𑀺𑀆𑀤𑀻𑀦𑀁 𑀅𑀳𑀸𑀦𑀺 𑀢𑀁𑀢𑀁𑀧𑀝𑀺𑀧𑀓𑁆𑀔𑀲𑁆𑀲 𑀲𑀯𑀸𑀲𑀦𑀧𑀳𑀻𑀦𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀙𑀦𑁆𑀤𑀸𑀤𑀻𑀦𑀁 𑀧𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑀢𑁄𑀧𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧. 𑀢𑁂 𑀏𑀯 𑀥𑀫𑁆𑀫𑁂𑀢𑀺 𑀢𑁂 𑀏𑀯 𑀓𑀼𑀲𑀮𑀸𑀤𑀺𑀓𑁂 𑀢𑀺𑀓𑀤𑀼𑀓𑁂𑀳𑀺 𑀲𑀗𑁆𑀕𑀳𑀺𑀢𑁂 𑀥𑀫𑁆𑀫𑁂. 𑀲𑀼𑀢𑁆𑀢𑀦𑁆𑀢𑁂 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁂 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀦𑀦𑀼 𑀲𑀼𑀢𑁆𑀢𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀢𑁂 𑀦 𑀯𑀼𑀢𑁆𑀢𑀸𑀢𑀺? 𑀬𑀤𑀺𑀧𑀺 𑀲𑀭𑀽𑀧𑀢𑁄 𑀦 𑀯𑀼𑀢𑁆𑀢𑀸, ‘‘𑀚𑀭𑀸𑀫𑀭𑀡𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩𑁩) 𑀧𑀦 𑀳𑁂𑀢𑀼𑀳𑁂𑀢𑀼𑀨𑀮𑀸𑀤𑀻𑀲𑀼 𑀜𑀸𑀡𑀯𑀺𑀪𑀸𑀕𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁨.𑁩𑁦) 𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀆𑀕𑀢𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦𑀧𑀺 𑀢𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀏𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂. 𑀲𑀗𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀲𑁂𑀦. 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀳𑀺 𑀲𑀼𑀢𑁆𑀢𑀦𑁆𑀢𑁂 𑀔𑀦𑁆𑀥𑀸𑀤𑀬𑁄 𑀤𑁂𑀲𑀺𑀢𑀸, 𑀦 𑀧𑀝𑀺𑀦𑀺𑀤𑁆𑀤𑁂𑀲𑀸𑀤𑀺𑀦𑀸𑀢𑀺 𑀲𑀗𑁆𑀔𑁂𑀧𑁂𑀦 𑀢𑁂 𑀢𑀢𑁆𑀣 𑀯𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀯𑀸 𑀥𑀫𑁆𑀫𑀲𑀗𑁆𑀕𑀳𑁂. 𑀢𑀢𑁆𑀣𑀸𑀧𑀺 𑀳𑀺 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮) 𑀔𑀦𑁆𑀥𑀸𑀤𑀬𑁄 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀸𑀢𑀺. 𑀯𑀺𑀪𑀚𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀔𑀦𑁆𑀥𑀸𑀤𑀬𑁄𑀢𑀺 𑀯𑀺𑀪𑀗𑁆𑀕𑁄, 𑀢𑁂 𑀏𑀯 𑀧𑀓𑀺𑀭𑀻𑀬𑀦𑁆𑀢𑀺 𑀧𑀝𑁆𑀞𑀧𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀧𑀓𑀭𑀡𑀁, 𑀯𑀺𑀪𑀗𑁆𑀕𑁄 𑀘 𑀲𑁄 𑀧𑀓𑀭𑀡𑀜𑁆𑀘𑀸𑀢𑀺 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁. 𑀆𑀤𑀺𑀲𑀤𑁆𑀤𑀢𑁆𑀣𑀚𑁄𑀢𑀓𑁂𑀦𑀸𑀢𑀺 ‘‘𑀇𑀢𑀺 𑀯𑀸, 𑀇𑀢𑀺 𑀏𑀯𑀭𑀽𑀧𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁩) 𑀯𑀺𑀬 𑀆𑀤𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀻𑀧𑀓𑁂𑀦. 𑀧𑀓𑀸𑀭𑀢𑁆𑀣𑀚𑁄𑀢𑀓𑁂𑀦𑀸𑀢𑀺 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧) 𑀯𑀺𑀬 𑀧𑀓𑀸𑀭𑀢𑁆𑀣𑀯𑀺𑀪𑀸𑀯𑀓𑁂𑀦. ‘‘𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺 𑀏𑀢𑁂𑀦 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀦𑀺𑀤𑀲𑁆𑀲𑀦𑀢𑁆𑀣𑁄𑀧𑀺 𑀳𑀺 𑀇𑀢𑀺-𑀲𑀤𑁆𑀤𑁄 𑀤𑀺𑀝𑁆𑀞𑁄 𑀬𑀣𑀸 ‘‘𑀅𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦). 𑀧𑀭𑀺𑀲𑀫𑀸𑀧𑀦𑀢𑁆𑀣𑁄 𑀯𑀸 ‘‘𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺’’ (𑀫. 𑀦𑀺. 𑁧.𑁨𑁯) 𑀏𑀯𑀫𑀸𑀤𑀻𑀲𑀼 𑀯𑀺𑀬. 𑀧𑀭𑀺𑀲𑀫𑀸𑀧𑀦𑀜𑁆𑀳𑁂𑀢𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲 𑀏𑀓𑀤𑁂𑀲𑀤𑀲𑁆𑀲𑀦𑁂𑀦 𑀬𑀤𑀺𑀤𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀢𑀸𑀯 𑀢𑀤𑀢𑁆𑀣𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂. ‘‘𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦’’𑀦𑁆𑀢𑀺 𑀏𑀢𑁆𑀣 𑀬𑀤𑀺 𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦𑀁…𑀧𑁂… 𑀅𑀧𑁆𑀧𑀓𑀢𑀭𑀧𑀤𑀢𑁆𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁄, 𑀦𑀦𑀼 𑀲𑀳 𑀦𑀺𑀩𑁆𑀩𑀸𑀦𑁂𑀦 𑀲𑀩𑁆𑀩𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀢𑀸, 𑀲𑀩𑁆𑀩𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀘 𑀆𑀬𑀢𑀦𑀸𑀤𑀻𑀳𑀺 𑀔𑀦𑁆𑀥𑁂𑀳𑀺 𑀘 𑀅𑀧𑁆𑀧𑀓𑀢𑀭𑀧𑀤𑀢𑁆𑀢𑀸 𑀲𑀘𑁆𑀘𑀯𑀺𑀪𑀗𑁆𑀕𑁄 𑀆𑀤𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀢𑀢𑁆𑀣𑀸𑀧𑀺 𑀤𑀼𑀓𑁆𑀔𑀲𑀘𑁆𑀘𑀯𑀺𑀪𑀗𑁆𑀕𑁂 𑀏𑀓𑀤𑁂𑀲𑁂𑀦 𑀔𑀦𑁆𑀥𑀸𑀦𑀁 𑀏𑀯 𑀯𑀺𑀪𑀚𑀺𑀢𑀩𑁆𑀩𑀢𑁄. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸…𑀧𑁂… 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀯𑀺𑀪. 𑁧𑁯𑁦; 𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁨𑁦; 𑁩.𑁩𑁭𑁩). 𑀇𑀥 𑀧𑀦 𑀅𑀦𑀯𑀲𑁂𑀲𑀢𑁄𑀯 𑀔𑀦𑁆𑀥𑀸 𑀯𑀺𑀪𑀚𑀻𑀬𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦𑀁…𑀧𑁂… 𑀅𑀧𑁆𑀧𑀓𑀢𑀭𑀧𑀤𑀢𑁆𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁄.

𑀅𑀧𑀺𑀘 𑀭𑀽𑀧𑀲𑀫𑁆𑀫𑀽𑀴𑁆𑀳𑀸 𑀅𑀭𑀽𑀧𑀲𑀫𑁆𑀫𑀽𑀴𑁆𑀳𑀸 𑀉𑀪𑀬𑀲𑀫𑁆𑀫𑀽𑀴𑁆𑀳𑀸𑀢𑀺 𑀢𑀺𑀯𑀺𑀥𑀸 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸, 𑀢𑀣𑀸 𑀲𑀁𑀔𑀺𑀢𑁆𑀢𑀭𑀼𑀘𑀺𑀦𑁄 𑀯𑀺𑀢𑁆𑀣𑀸𑀭𑀭𑀼𑀘𑀺𑀦𑁄 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀭𑀼𑀘𑀺𑀦𑁄, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀸𑀢𑀺 𑀘. 𑀢𑁂𑀲𑀼 𑀅𑀭𑀽𑀧𑀲𑀫𑁆𑀫𑀽𑀴𑁆𑀳𑀸𑀦𑀁 𑀉𑀧𑀓𑀸𑀭𑀸𑀬 𑀔𑀦𑁆𑀥𑀤𑁂𑀲𑀦𑀸, 𑀭𑀽𑀧𑀲𑀫𑁆𑀫𑀽𑀴𑁆𑀳𑀸𑀦𑀁 𑀆𑀬𑀢𑀦𑀤𑁂𑀲𑀦𑀸, 𑀉𑀪𑀬𑀲𑀫𑁆𑀫𑀽𑀴𑁆𑀳𑀸𑀦𑀁 𑀥𑀸𑀢𑀼𑀤𑁂𑀲𑀦𑀸. 𑀢𑀣𑀸 𑀲𑀁𑀔𑀺𑀢𑁆𑀢𑀭𑀼𑀘𑀻𑀦𑀁 𑀔𑀦𑁆𑀥𑀤𑁂𑀲𑀦𑀸, 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀭𑀼𑀘𑀻𑀦𑀁 𑀆𑀬𑀢𑀦𑀤𑁂𑀲𑀦𑀸, 𑀯𑀺𑀢𑁆𑀣𑀸𑀭𑀭𑀼𑀘𑀻𑀦𑀁 𑀥𑀸𑀢𑀼𑀤𑁂𑀲𑀦𑀸. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀁 𑀔𑀦𑁆𑀥𑀤𑁂𑀲𑀦𑀸, 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀸𑀦𑀁 𑀆𑀬𑀢𑀦𑀤𑁂𑀲𑀦𑀸, 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀦𑀁 𑀥𑀸𑀢𑀼𑀤𑁂𑀲𑀦𑀸𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑁂𑀦 𑀅𑀦𑀼𑀓𑁆𑀓𑀫𑁂𑀦 𑀘 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀯𑀺𑀪𑀗𑁆𑀕𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁄𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀦𑁂𑀢𑀁 𑀔𑀦𑁆𑀥𑀸𑀤𑀺𑀢𑁆𑀢𑀬𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀫𑀼𑀔𑁂𑀦𑁂𑀯 𑀜𑀸𑀬𑀫𑀸𑀦𑀁 𑀬𑀣𑀸𑀪𑀽𑀢𑀸𑀯𑀩𑁄𑀥𑀸𑀬 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀘𑁆𑀘𑀯𑀺𑀪𑀗𑁆𑀕𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀲𑁄 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄 𑀯𑀺𑀲𑁂𑀲𑀢𑁄 𑀇𑀦𑁆𑀤𑁆𑀭𑀺𑀬𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀤𑁂𑀲𑀦𑀸. 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀇𑀦𑁆𑀤𑀝𑁆𑀞𑁄 𑀢𑀁𑀢𑀁𑀧𑀘𑁆𑀘𑀬𑀥𑀫𑁆𑀫𑀪𑀽𑀢𑀸𑀦𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁂𑀦𑁂𑀯𑀸𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀲𑀦𑁆𑀤𑀲𑁆𑀲𑀦𑀻 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀤𑁂𑀲𑀦𑀸. 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀔𑀦𑁆𑀥𑀸𑀤𑀻𑀦𑀜𑁆𑀘 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀤𑁂𑀲𑀦𑀸. 𑀲𑁆𑀯𑀸𑀬𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀳𑁄𑀢𑀻𑀢𑀺 𑀛𑀸𑀦𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀤𑁂𑀲𑀦𑀸, 𑀲𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀏𑀢𑁆𑀢𑀓𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀲𑀫𑁆𑀪𑀯𑀢𑀻𑀢𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀤𑁂𑀲𑀦𑀸, 𑀬𑀣𑀸𑀯𑀼𑀢𑁆𑀢𑀸𑀬 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀇𑀫𑁂 𑀆𑀦𑀺𑀲𑀁𑀲𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀯𑀺𑀪𑀗𑁆𑀕𑀤𑁂𑀲𑀦𑀸, 𑀢𑁂 𑀘𑀺𑀫𑁂 𑀜𑀸𑀡𑀯𑀺𑀲𑁂𑀲𑀸 𑀇𑀫𑁂𑀲𑀼 𑀓𑀺𑀮𑁂𑀲𑁂𑀲𑀼 𑀧𑀳𑀻𑀬𑀦𑁆𑀢𑁂𑀲𑀼 𑀘 𑀲𑀫𑁆𑀪𑀯𑀦𑁆𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀓𑀺𑀮𑁂𑀲𑀯𑀺𑀪𑀗𑁆𑀕𑀤𑁂𑀲𑀦𑀸, 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀤𑁂𑀲𑀺𑀢𑁂 𑀔𑀦𑁆𑀥𑀸𑀤𑀺𑀓𑁂 𑀲𑀗𑁆𑀔𑁂𑀧𑀢𑁄𑀧𑀺 𑀚𑀸𑀦𑀦𑁆𑀢𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀬𑁄𑀲𑀸𑀦𑁂 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀏𑀯𑀫𑁂𑀢𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀯𑀺𑀪𑀗𑁆𑀕𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀸𑀤𑀻𑀦𑀦𑁆𑀢𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁. 𑀯𑁂𑀤𑀬𑀺𑀢𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸𑀢𑀺 𑀬𑀣𑀸𑀓𑁆𑀓𑀫𑀁 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀸𑀪𑀺𑀲𑀗𑁆𑀔𑀭𑀡𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸. 𑀦 𑀳𑀺 𑀭𑀽𑀧𑀁 𑀯𑁂𑀤𑀬𑀺𑀢𑀸𑀤𑀺𑀲𑀪𑀸𑀯𑀁, 𑀯𑁂𑀤𑀦𑀸𑀤𑀺 𑀯𑀸 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀁. 𑀬𑀢𑁄 𑀭𑀽𑀧𑀸𑀤𑀻𑀦𑀁 𑀯𑁂𑀤𑀦𑀸𑀲𑀫𑀯𑀭𑁄𑀥𑀦𑁂𑀦 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀔𑀦𑁆𑀥𑀸 𑁦𑁬 𑀤𑁂𑀲𑁂𑀢𑀩𑁆𑀩𑀸 𑀲𑀺𑀬𑀼𑀁. 𑀭𑀼𑀧𑁆𑀧𑀦𑀸𑀤𑀺𑀢𑁄 𑀅𑀜𑁆𑀜𑀲𑁆𑀲𑀸𑀪𑀸𑀯𑀸𑀢𑀺 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑀢𑁄 𑀅𑀜𑁆𑀜𑀲𑁆𑀲 𑀅𑀢𑀻𑀢𑀸𑀤𑀺𑀓𑁂 𑀕𑀳𑁂𑀢𑁆𑀯𑀸 𑀭𑀸𑀲𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀲𑁆𑀲 𑀲𑀁𑀔𑀺𑀢𑁆𑀢𑀲𑁆𑀲 𑀲𑀪𑀸𑀯𑀲𑁆𑀲 𑀅𑀪𑀸𑀯𑀸. 𑀦 𑀳𑀺 𑀘𑁂𑀢𑀲𑀺𑀓𑀸𑀤𑀺𑀪𑀸𑀯𑁄 𑀯𑁂𑀤𑀦𑀸𑀤𑀻𑀦𑀁 𑀲𑀪𑀸𑀯𑁄. 𑀳𑁂𑀝𑁆𑀞𑀸 𑀕𑀡𑀦𑁂𑀲𑀽𑀢𑀺 𑀧𑀜𑁆𑀘𑀢𑁄 𑀳𑁂𑀝𑁆𑀞𑀸 𑀕𑀡𑀦𑁂𑀲𑀼. 𑀅𑀦𑀺𑀝𑁆𑀞𑀸𑀦𑀦𑁆𑀢𑀺 𑀅𑀧𑀭𑀺𑀬𑁄𑀲𑀸𑀦𑀁. 𑀭𑀽𑀧𑀸𑀤𑀻𑀲𑀼 𑀳𑀺 𑀓𑀢𑀺𑀧𑀬𑁂, 𑀏𑀓𑀫𑁆𑀧𑀺 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀅𑀦𑀯𑀲𑁂𑀲𑀲𑀗𑁆𑀔𑀢𑀥𑀫𑁆𑀫𑀲𑀗𑁆𑀕𑀸𑀳𑀺𑀦𑀻 𑀦 𑀲𑀫𑁆𑀪𑀯𑀢𑀺. 𑀔𑀦𑁆𑀥𑀲𑁆𑀲𑀸𑀢𑀺 𑀭𑀸𑀲𑀝𑁆𑀞𑀲𑁆𑀲 𑀔𑀦𑁆𑀥𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀯𑀺𑀪𑀸𑀕𑀥𑀫𑁆𑀫𑁂𑀳𑀻𑀢𑀺 𑀲𑀧𑁆𑀧𑀪𑁂𑀤𑀥𑀫𑁆𑀫𑁂𑀳𑀺.

‘‘𑀲𑀤𑁆𑀤𑀢𑁆𑀣𑀲𑀳𑀺𑀢𑀁 𑀔𑀦𑁆𑀥𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀻’’𑀢𑀺 𑀏𑀢𑁂𑀦 𑀭𑀸𑀲𑀺𑀲𑀤𑁆𑀤𑀲𑁆𑀲 𑀯𑀺𑀬 𑀭𑀸𑀲𑀝𑁆𑀞𑁂 𑀔𑀦𑁆𑀥𑀲𑀤𑁆𑀤𑀲𑁆𑀲 𑀯𑀸𑀘𑀓𑀪𑀸𑀯𑁂𑀦 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑀪𑀸𑀯𑀢𑁄. 𑀕𑀼𑀡𑀸𑀤𑀻𑀲𑀼 𑀧𑀦 𑀓𑁂𑀯𑀮𑀁 𑀢𑀩𑁆𑀩𑀺𑀲𑀬𑀧𑀬𑁄𑀕𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀺, 𑀦 𑀯𑀸𑀘𑀓𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀕𑀼𑀡𑁂…𑀧𑁂… 𑀦 𑀲𑀤𑁆𑀤𑀢𑁆𑀣’’𑀦𑁆𑀢𑀺. 𑀔𑀦𑁆𑀥𑀲𑀤𑁆𑀤𑁄𑀢𑀺 𑀲𑀻𑀮𑀸𑀤𑀺𑀲𑀤𑁆𑀤𑁂 𑀲𑀦𑁆𑀦𑀺𑀥𑀸𑀧𑀺𑀢𑁄 𑀔𑀦𑁆𑀥𑀲𑀤𑁆𑀤𑁄. 𑀢𑁂𑀦𑁂𑀯𑀸𑀳 ‘‘𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑀺𑀝𑁆𑀞𑀁 𑀭𑀸𑀲𑀝𑁆𑀞𑀁 𑀤𑀻𑀧𑁂𑀢𑀻’’𑀢𑀺. 𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀢𑁆𑀣𑀸𑀢𑀺 ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺 (𑀤𑀻. 𑀦𑀺. 𑁩.𑁩𑁫𑁫) 𑀏𑀢𑁆𑀣. 𑀦 𑀓𑁂𑀯𑀮𑀜𑁆𑀘 𑀲𑁄 𑀏𑀯, 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺𑀧𑀺 𑀏𑀢𑁆𑀣 𑀕𑀼𑀡𑀢𑁆𑀣𑀢𑀸 𑀇𑀘𑁆𑀙𑀺𑀢𑀸 𑀏𑀯. 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀲𑀼 𑀕𑀼𑀡𑀝𑁆𑀞𑁂𑀦𑀸’’𑀢𑀺 (𑀥. 𑀲. 𑀅𑀝𑁆𑀞. 𑁫) 𑀯𑀼𑀢𑁆𑀢𑀁. 𑀦𑀦𑀼 𑀘 𑀓𑁂𑀯𑀮𑁄𑀧𑀺 𑀔𑀦𑁆𑀥𑀲𑀤𑁆𑀤𑁄 ‘‘𑀢𑀺𑀡𑁆𑀡𑀁 𑀔𑁄, 𑀫𑀸𑀡𑀯, 𑀔𑀦𑁆𑀥𑀸𑀦𑀁 𑀯𑀡𑁆𑀡𑀯𑀸𑀤𑀻, 𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀘 𑀆𑀤𑀻𑀲𑀼 𑀲𑀻𑀮𑀸𑀤𑀺𑀯𑀸𑀘𑀓𑁄 𑀤𑀺𑀝𑁆𑀞𑁄𑀢𑀺? 𑀦, 𑀢𑀢𑁆𑀣𑀸𑀧𑀺 𑀅𑀥𑀺𑀓𑀸𑀭𑀸𑀤𑀺𑀯𑀘𑁆𑀙𑁂𑀤𑀓𑀯𑀲𑁂𑀦𑁂𑀯𑀲𑁆𑀲 𑀲𑀻𑀮𑀸𑀤𑀻𑀲𑀼 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄. 𑀦 𑀔𑀦𑁆𑀥𑀲𑀤𑁆𑀤𑁄 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑀸𑀤𑀺𑀲𑀤𑁆𑀤𑀸 𑀯𑀺𑀬 𑀧𑀜𑁆𑀜𑀢𑁆𑀢𑀺𑀧𑀭𑀺𑀬𑀸𑀬𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀭𑀼𑀓𑁆𑀔𑀦𑁆𑀥𑁄𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀻𑀢𑀺 𑀢𑀲𑁆𑀲 𑀔𑀦𑁆𑀥𑀲𑀤𑁆𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀔𑀦𑁆𑀥𑀲𑀤𑁆𑀤𑁄𑀢𑀺 ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀬𑀫. 𑁧.𑀔𑀦𑁆𑀥𑀬𑀫𑀓.𑁩𑁨) 𑀏𑀢𑁆𑀣 𑀯𑀼𑀢𑁆𑀢𑁄 𑀔𑀦𑁆𑀥𑀲𑀤𑁆𑀤𑁄. 𑀲𑀫𑀼𑀤𑀸𑀬𑁂 𑀦𑀺𑀭𑀼𑀴𑁆𑀳𑁄𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀧𑀜𑁆𑀜𑀸𑀬 𑀅𑀪𑀺𑀲𑀁𑀬𑀽𑀳𑀦𑁂𑀦 𑀭𑀸𑀲𑀺𑀓𑀢𑁂 𑀯𑀺𑀜𑁆𑀜𑀸𑀡𑀲𑀫𑀽𑀳𑁂 𑀦𑀺𑀭𑀼𑀴𑁆𑀳𑁄. 𑀢𑀸𑀬 𑀏𑀯 𑀭𑀼𑀴𑁆𑀳𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀢𑀸𑀬 𑀲𑀫𑀼𑀤𑀸𑀬𑁂 𑀦𑀺𑀭𑀼𑀴𑁆𑀳𑀢𑀸𑀬 𑀢𑀤𑀯𑀬𑀯𑁂 𑀏𑀓𑀲𑁆𑀫𑀺𑀫𑁆𑀧𑀺 𑀯𑀺𑀜𑁆𑀜𑀸𑀡𑁂 𑀧𑀯𑀢𑁆𑀢𑀢𑀻𑀢𑀺. 𑀏𑀢𑁆𑀣 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀦𑀺𑀭𑀼𑀴𑁆𑀳𑁄 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀪𑀸𑀯𑁄 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀯𑀺𑀜𑁆𑀜𑀸𑀡𑀲𑀫𑀼𑀤𑀸𑀬𑁂 𑀦𑀺𑀭𑀼𑀴𑁆𑀳𑁄 𑀢𑀤𑁂𑀓𑀤𑁂𑀲𑁂𑀧𑀺 𑀭𑀼𑀴𑁆𑀳𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀢𑀦𑁆𑀦𑀺𑀫𑀺𑀢𑁆𑀢𑀬𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀺𑀲𑀬𑁂 𑀲𑀫𑁆𑀫𑀼𑀢𑀺𑀬𑀸 𑀘𑀺𑀭𑀓𑀸𑀮𑀢𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀧𑀺 𑀧𑀯𑀢𑁆𑀢𑀺 𑀭𑀼𑀴𑁆𑀳𑀺 𑀦𑀸𑀫, 𑀬𑀣𑀸 𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄, 𑀕𑀘𑁆𑀙𑀦𑁆𑀢𑀻𑀢𑀺 𑀕𑀸𑀯𑁄𑀢𑀺, 𑀏𑀯𑀁 𑀔𑀦𑁆𑀥𑀲𑀤𑁆𑀤𑀲𑁆𑀲𑀸𑀧𑀺 𑀭𑀼𑀴𑁆𑀳𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀭𑀸𑀲𑀺𑀢𑁄 𑀕𑀼𑀡𑀢𑁄𑀢𑀺 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀬𑀫𑁂𑀢𑁆𑀯𑀸𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸. 𑀧𑀺𑀡𑁆𑀟𑀝𑁆𑀞𑁄𑀢𑀺 𑀲𑀗𑁆𑀖𑀸𑀢𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀓𑁄𑀝𑁆𑀞𑀸𑀲𑀝𑁆𑀞𑁂 𑀘 𑀔𑀦𑁆𑀥𑀝𑁆𑀞𑁂 𑀦𑀺𑀩𑁆𑀩𑀸𑀦𑀲𑁆𑀲 𑀯𑀲𑁂𑀦 𑀙𑀝𑁆𑀞𑁂𑀦𑀸𑀧𑀺 𑀔𑀦𑁆𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀔𑀦𑁆𑀥𑀝𑁆𑀞𑁄 𑀦𑀸𑀫 𑀭𑀸𑀲𑀝𑁆𑀞𑁄𑀢𑀺 𑀬𑀼𑀢𑁆𑀢𑀁. ‘‘𑀬𑁂𑀲𑀁 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀪𑁂𑀤𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂𑀲𑀼 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀥𑀫𑁆𑀫𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑁂𑀲𑀼 𑀢𑀩𑁆𑀩𑀺𑀪𑀸𑀕𑀭𑀳𑀺𑀢𑀲𑁆𑀲 𑀏𑀓𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀸𑀲𑀝𑁆𑀞𑀢𑀸 𑀯𑀺𑀬 𑀓𑁄𑀝𑁆𑀞𑀸𑀲𑀝𑁆𑀞𑀢𑀸𑀧𑀺 𑀦 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀔𑀦𑁆𑀥𑁂𑀲𑀼 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑀸𑀤𑀺𑀓𑁂 𑀯𑀺𑀬 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀅𑀦𑀯𑀭𑁄𑀥𑁂𑀢𑁆𑀯𑀸 𑀯𑁂𑀤𑀦𑀸𑀲𑀜𑁆𑀜𑀸 𑀯𑀺𑀲𑀼𑀁 𑀔𑀦𑁆𑀥𑀪𑀸𑀯𑁂𑀦 𑀕𑀳𑀺𑀢𑀸𑀢𑀺? 𑀯𑀺𑀯𑀸𑀤𑀫𑀽𑀮𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀕𑀳𑀝𑁆𑀞𑀸𑀦𑀜𑁆𑀳𑀺 𑀯𑀺𑀯𑀸𑀤𑀓𑀸𑀭𑀡𑀁 𑀓𑀸𑀫𑀚𑁆𑀛𑁄𑀲𑀸𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁬𑁮, 𑁧𑁭𑁮). 𑀧𑀩𑁆𑀩𑀚𑀺𑀢𑀸𑀦𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, ‘𑀇𑀤𑀫𑁂𑀯 𑀲𑀘𑁆𑀘’𑀦𑁆𑀢𑀺 (𑀲𑀼. 𑀦𑀺. 𑁮𑁩𑁮; 𑀫𑀳𑀸𑀦𑀺. 𑁬𑁭) 𑀘 𑀯𑀸𑀤𑀬𑀦𑁆𑀢𑀻’’𑀢𑀺𑀆𑀤𑀺. 𑀢𑁂𑀲𑀼 𑀓𑀸𑀫𑀚𑁆𑀛𑁄𑀲𑀸𑀦𑀁 𑀯𑁂𑀤𑀦𑀲𑁆𑀲𑀸𑀤𑁂𑀦 𑀳𑁄𑀢𑀺, 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀧𑀧𑀜𑁆𑀘𑀸𑀦𑀁 𑀯𑀺𑀧𑀮𑁆𑀮𑀸𑀲𑁄𑀢𑀺. 𑀢𑀣𑀸 𑀯𑁂𑀤𑀦𑀸𑀦𑀼𑀕𑀺𑀤𑁆𑀥𑁄 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑁄 𑀘 𑀲𑀁𑀲𑀭𑀢𑀺. 𑀯𑁂𑀤𑀦𑀸𑀦𑀼𑀕𑀺𑀤𑁆𑀥𑀲𑁆𑀲 𑀳𑀺 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 𑀲𑀺𑀤𑁆𑀥𑀸 𑀳𑁄𑀢𑀺, 𑀢𑀢𑁄 𑀘 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀆𑀯𑀝𑁆𑀝𑀢𑀺 𑀪𑀯𑀘𑀓𑁆𑀓𑀁. 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑀺𑀲𑁆𑀲 𑀘 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 (𑀲𑀼. 𑀦𑀺. 𑁮𑁮𑁦) 𑀯𑀘𑀦𑀢𑁄 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀧𑀧𑀜𑁆𑀘𑀸𑀦𑀁 𑀅𑀦𑀼𑀧𑀘𑁆𑀙𑁂𑀤𑀢𑁄 𑀲𑀁𑀲𑀸𑀭𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑁄𑀯. 𑀇𑀢𑀺 𑀯𑀺𑀯𑀸𑀤𑀓𑀸𑀭𑀡𑀸𑀦𑀁 𑀓𑀸𑀫𑀚𑁆𑀛𑁄𑀲𑀸𑀦𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑁄 𑀲𑀁𑀲𑀸𑀭𑀳𑁂𑀢𑀼𑀪𑀸𑀯𑁄𑀢𑀺 𑀇𑀫𑀲𑁆𑀲 𑀯𑀺𑀯𑀸𑀤𑀫𑀽𑀮𑀢𑀸𑀤𑀺𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀅𑀦𑀯𑀭𑁄𑀥𑁂𑀢𑁆𑀯𑀸 𑀯𑁂𑀤𑀦𑀸𑀲𑀜𑁆𑀜𑀸 𑀯𑀺𑀲𑀼𑀁 𑀔𑀦𑁆𑀥𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀑𑀓𑀸𑀲𑁂𑀲𑀽𑀢𑀺 𑀯𑀺𑀪𑀚𑀦𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀅𑀢𑀻𑀢𑀸𑀤𑀬𑁄 𑀑𑀓𑀸𑀲𑀸𑀢𑀺 𑀯𑀼𑀢𑁆𑀢𑀸. 𑀇𑀢𑀺𑀲𑀤𑁆𑀤𑁂𑀦𑀸𑀢𑀺 ‘‘𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀇𑀢𑀺𑀲𑀤𑁆𑀤𑁂𑀦. 𑀦𑀺𑀤𑀲𑁆𑀲𑀦𑀢𑁆𑀣𑁂𑀦𑀸𑀢𑀺 𑀉𑀤𑀸𑀳𑀭𑀡𑀢𑁆𑀣𑁂𑀦. 𑀲𑀩𑁆𑀩𑁄𑀢𑀺 𑀲𑀓𑀮𑁄 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 𑀯𑀺𑀪𑀚𑀦𑀦𑀬𑁄. 𑀇𑀤𑀜𑁆𑀘 𑀯𑀺𑀪𑀚𑀦𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸…𑀧𑁂… 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀏𑀯𑀁 𑀯𑀺𑀪𑀢𑁆𑀢𑀁 𑀇𑀤𑀜𑁆𑀘 𑀯𑀺𑀪𑀚𑀦𑀁. 𑀑𑀴𑀸𑀭𑀺𑀓𑀸𑀤𑀻𑀲𑀽𑀢𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀳𑀻𑀦𑀧𑀡𑀻𑀢𑀤𑀽𑀭𑀲𑀦𑁆𑀢𑀺𑀓𑁂𑀲𑀼. 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺𑀯𑀺𑀪𑀚𑀦𑀜𑁆𑀘𑀸𑀢𑀺 ‘‘𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀪𑀚𑀦𑀜𑁆𑀘. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀭𑀳𑀁. 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀬𑀁 𑀬𑀢𑁆𑀣 𑀯𑀺𑀪𑀚𑀦𑀁 𑀬𑀼𑀢𑁆𑀢𑀁, 𑀢𑀁 𑀢𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂 𑀬𑀣𑀸𑀲𑀫𑁆𑀪𑀯𑀁 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀚𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀚𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀢𑀸𑀯 𑀧𑀼𑀭𑀺𑀫𑁂 𑀑𑀓𑀸𑀲𑀧𑀜𑁆𑀘𑀓𑁂 𑀲𑀼𑀔𑀸𑀤𑀺𑀯𑁂𑀤𑀦𑀸𑀢𑁆𑀢𑀺𑀓𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀇𑀢𑀭𑀲𑁆𑀫𑀺𑀁 𑀓𑀼𑀲𑀮𑀢𑁆𑀢𑀺𑀓𑀯𑁂𑀤𑀦𑀸𑀢𑁆𑀢𑀺𑀓𑀲𑀫𑀸𑀧𑀦𑁆𑀦𑀤𑀼𑀓𑀲𑀸𑀲𑀯𑀤𑀼𑀓𑀯𑀲𑁂𑀦. 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀧𑀦 𑀧𑀼𑀭𑀺𑀫𑁂 𑀑𑀓𑀸𑀲𑀧𑀜𑁆𑀘𑀓𑁂 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦, 𑀇𑀢𑀭𑀲𑁆𑀫𑀺𑀁 𑀑𑀴𑀸𑀭𑀺𑀓𑀤𑀼𑀓𑁂 𑀧𑀝𑀺𑀖𑀲𑀫𑁆𑀨𑀲𑁆𑀲𑀤𑀼𑀓𑀯𑀲𑁂𑀦 𑀘𑁂𑀯 𑀬𑀣𑀸𑀯𑀼𑀢𑁆𑀢𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀯𑀲𑁂𑀦 𑀘 𑀯𑀺𑀪𑀢𑁆𑀢𑁄. 𑀲𑁂𑀲𑁂𑀲𑀼 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀯𑀲𑁂𑀦𑁂𑀯. 𑀢𑀣𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀧𑀝𑀺𑀖𑀲𑀫𑁆𑀨𑀲𑁆𑀲𑀤𑀼𑀓𑁄 𑀧𑀦𑁂𑀢𑁆𑀣 𑀦𑀢𑁆𑀣𑁂𑀯. 𑀘𑁂𑀢𑀦𑀸𑀬 𑀏𑀯 𑀘𑁂𑀢𑁆𑀣 𑀦𑀺𑀤𑁆𑀤𑁂𑀲𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀧𑁆𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 𑀳𑀺 𑀲𑀸 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀚𑀦𑁂 𑀧𑀝𑀺𑀦𑀺𑀤𑁆𑀤𑁂𑀲𑁂. 𑀢𑀁 𑀧𑀦 𑀤𑁆𑀯𑀬𑀦𑁆𑀢𑀺 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁. 𑀬𑀜𑁆𑀳𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁂𑀲𑀦𑀸𑀬𑀁 ‘‘𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀤𑁆𑀯𑀬𑀁 𑀤𑁂𑀲𑀺𑀢𑀁, 𑀢𑀁 𑀙𑀯𑀺𑀜𑁆𑀜𑀸𑀡𑀓𑀸𑀬𑀤𑁂𑀲𑀦𑀸𑀬𑀁 ‘‘𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺.

𑀧𑀸𑀴𑀺𑀦𑀬𑁂𑀦𑀸𑀢𑀺 𑀔𑀦𑁆𑀥𑀯𑀺𑀪𑀗𑁆𑀕𑀧𑀸𑀴𑀺𑀦𑀬𑁂𑀦. 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑁂, 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀆𑀕𑀢𑁂𑀦 𑀧𑀓𑀸𑀭𑀦𑁆𑀢𑀭𑁂𑀦.

𑁧. 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨. ‘‘𑀓𑀺𑀜𑁆𑀘𑀻’’𑀢𑀺 𑀧𑀤𑀁 ‘‘𑀏𑀓𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀻𑀢𑀺 𑀧𑀓𑀸𑀭𑀦𑁆𑀢𑀭𑀪𑁂𑀤𑀁 𑀆𑀫𑀲𑀺𑀢𑁆𑀯𑀸 𑀅𑀦𑀺𑀬𑀫𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀉𑀪𑀬𑁂𑀦𑀸𑀢𑀺 𑀧𑀓𑀸𑀭𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀆𑀫𑀲𑀺𑀢𑁆𑀯𑀸 𑀘 𑀅𑀦𑀺𑀬𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀧𑀤𑀤𑁆𑀯𑀬𑁂𑀦. 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑁆𑀢𑀺 𑀭𑀽𑀧𑀁. 𑀅𑀢𑀺𑀘𑁆𑀘𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀧𑀯𑀢𑁆𑀢𑀺𑀢𑁄𑀢𑀺 𑀧𑀯𑀢𑁆𑀢𑀦𑀢𑁄. 𑀦𑀺𑀬𑀫𑀦𑀢𑁆𑀣𑀦𑁆𑀢𑀺 𑀦𑀺𑀯𑀢𑁆𑀢𑀦𑀢𑁆𑀣𑀁.

‘‘𑀓𑀺𑀜𑁆𑀘𑀸’’𑀢𑀺 𑀏𑀢𑁆𑀣 𑀓𑀺𑀁-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁 𑀳𑁂𑀢𑀼𑀅𑀢𑁆𑀣𑀤𑀻𑀧𑀓𑁄, 𑀓𑀭𑀡𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀘-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄𑀢𑀺 𑀆𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀯𑀤𑁂𑀣𑀸’’𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀭𑀡𑀢𑁆𑀣𑁂 𑀧𑀯𑀢𑁆𑀢𑀁 𑀓𑀺𑀁-𑀲𑀤𑁆𑀤𑀁 ‘‘𑀯𑀤𑁂𑀣𑀸’’𑀢𑀺 𑀓𑀺𑀭𑀺𑀬𑀸𑀧𑀤𑀲𑀫𑁆𑀩𑀦𑁆𑀥𑀦𑁂𑀦 𑀉𑀧𑀬𑁄𑀕𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 𑀯𑀤𑀢𑀺 ‘‘𑀢𑀁 𑀓𑀸𑀭𑀡𑀁 𑀯𑀤𑁂𑀣𑀸’’𑀢𑀺.

𑀧𑀼𑀭𑀺𑀫𑀲𑀦𑁆𑀢𑀸𑀦𑀲𑁆𑀲 𑀪𑁂𑀤𑀦𑁆𑀢𑀺 𑀧𑀼𑀭𑀺𑀫𑀲𑀦𑁆𑀢𑀸𑀦𑀲𑁆𑀲 𑀯𑀺𑀦𑀸𑀲𑀁, 𑀯𑀺𑀦𑀸𑀲𑀸𑀧𑀤𑁂𑀲𑁂𑀦 𑀘𑁂𑀢𑁆𑀣 𑀲𑀦𑁆𑀢𑀸𑀦𑁂 𑀯𑀺𑀲𑀤𑀺𑀲𑀼𑀧𑁆𑀧𑀸𑀤𑀫𑁂𑀯 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀯𑀺𑀲𑀤𑀺𑀲𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁄’’𑀢𑀺. 𑀦𑀦𑀼 𑀘 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺, 𑀲𑀸 𑀧𑀦 𑀦 𑀧𑀸𑀓𑀝𑀢𑀭𑀸, 𑀧𑀸𑀓𑀝𑀢𑀭𑀸 𑀘 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀻𑀢𑀸𑀤𑀺𑀲𑀦𑁆𑀦𑀺𑀧𑀸𑀢𑁂’’𑀢𑀺. 𑀢𑀣𑀸 𑀘𑀸𑀳 𑀪𑀕𑀯𑀸 ‘‘𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁭𑁯). 𑀇𑀤𑀸𑀦𑀺 𑀪𑁂𑀤-𑀲𑀤𑁆𑀤𑁄 𑀉𑀚𑀼𑀓𑀫𑁂𑀯 𑀯𑀺𑀓𑀸𑀭𑀸𑀧𑀢𑁆𑀢𑀺𑀁 𑀯𑀤𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑁂𑀤𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑁂𑀯, 𑀦 𑀉𑀧𑁆𑀧𑀦𑁆𑀦𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀓𑀸𑀧𑀺𑀮𑀺𑀬𑀁 𑀧𑀭𑀺𑀡𑀸𑀫𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀤𑀺 𑀧𑀼𑀭𑀺𑀫𑀲𑀦𑁆𑀢𑀸𑀦𑀢𑁄 𑀪𑁂𑀤𑁄 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁, 𑀏𑀯𑀁 𑀲𑀦𑁆𑀢𑁂 𑀮𑀓𑁆𑀔𑀡𑀲𑁆𑀲 𑀅𑀢𑀺𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀅𑀭𑀽𑀧𑀓𑁆𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀲𑀻𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸 𑀉𑀡𑁆𑀳𑀚𑀺𑀖𑀘𑁆𑀙𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀏𑀯𑀁 𑀆𑀳𑀸𑀭𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦𑀸𑀢𑀺 𑀬𑁂𑀦 𑀲𑀻𑀢𑀸𑀤𑀻𑀳𑀺 𑀲𑀫𑀸𑀕𑀫𑁂𑀦. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀽𑀧𑀥𑀫𑁆𑀫𑁂𑀲𑀼. 𑀆𑀳𑀸𑀭𑀸𑀤𑀺𑀓𑀲𑁆𑀲 𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀞𑀺𑀢𑀺𑀓𑁆𑀔𑀡𑁂 𑀲𑀻𑀢𑀸𑀤𑀻𑀳𑀺 𑀲𑀫𑀸𑀕𑀫𑁄 𑀳𑁄𑀢𑀺, 𑀏𑀯𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑁂𑀳𑀺 𑀲𑀫𑀸𑀕𑀫𑁄 𑀦𑀢𑁆𑀣𑀺 𑀅𑀢𑀺𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑀸 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀧𑀸𑀓𑀝𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀪𑀸𑀯𑀢𑁄 ‘‘𑀭𑀼𑀧𑁆𑀧𑀦𑁆𑀢𑀻’’𑀢𑀺, ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀸’’𑀢𑀺 𑀘 𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀭𑀼𑀧𑁆𑀧𑀢𑀻’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀼𑀓𑀫𑁆𑀫𑀲𑀸𑀥𑀦𑀸𑀦𑀁 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺 𑀪𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀼𑀧𑁆𑀧𑀢𑀻𑀢𑀺 𑀏𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑁄𑀧𑀸𑀤𑀺𑀓𑀺𑀭𑀺𑀬𑀸𑀢𑀺 𑀓𑁄𑀧𑀲𑀗𑁆𑀖𑀝𑁆𑀝𑀦𑀧𑀻𑀴𑀦𑀓𑀺𑀭𑀺𑀬𑀸. 𑀓𑁄𑀧-𑀲𑀤𑁆𑀤𑁄 𑀘𑁂𑀢𑁆𑀣 𑀔𑁄𑀪𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀢𑁆𑀢𑀼𑀪𑀽𑀢𑁄 𑀓𑀫𑁆𑀫𑀪𑀽𑀢𑁄 𑀘 𑀅𑀢𑁆𑀣𑁄𑀢𑀺 𑀓𑀢𑁆𑀢𑀼𑀓𑀫𑁆𑀫𑀲𑀸𑀥𑀦𑀸𑀦𑀁 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀲𑀗𑁆𑀔𑀸𑀢𑁄 𑀅𑀢𑁆𑀣𑁄. 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁂𑀦 𑀪𑀺𑀚𑁆𑀚𑀢𑀺-𑀲𑀤𑁆𑀤𑁂𑀦𑀸𑀢𑀺 𑀬𑀤𑀸 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁄 𑀭𑀼𑀧𑁆𑀧𑀢𑀺-𑀲𑀤𑁆𑀤𑁄, 𑀢𑀤𑀸 𑀪𑀺𑀚𑁆𑀚𑀢𑀺-𑀲𑀤𑁆𑀤𑁄𑀧𑀺 𑀢𑀤𑀢𑁆𑀣𑁄 𑀏𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑀤𑀸 𑀓𑀫𑁆𑀫𑀢𑁆𑀣𑁂 ‘‘𑀭𑀼𑀧𑁆𑀧𑀢𑀻’’𑀢𑀺 𑀧𑀤𑀁, 𑀢𑀤𑀸 ‘‘𑀲𑀻𑀢𑁂𑀦𑀸’’𑀢𑀺𑀆𑀤𑀻𑀲𑀼 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀬𑀤𑀸 𑀧𑀦 ‘‘𑀭𑀼𑀧𑁆𑀧𑀢𑀻’’𑀢𑀺 𑀧𑀤𑀁 𑀓𑀢𑁆𑀢𑀼𑀅𑀢𑁆𑀣𑁂 𑀓𑀫𑁆𑀫𑀓𑀢𑁆𑀢𑀼𑀅𑀢𑁆𑀣𑁂 𑀯𑀸, 𑀢𑀤𑀸 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀁 𑀧𑀦 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺𑀦𑀸 ‘‘𑀓𑀼𑀧𑁆𑀧𑀢𑀻’’𑀢𑀺𑀆𑀤𑀻𑀦𑀁 𑀓𑀢𑁆𑀢𑀼𑀓𑀫𑁆𑀫𑀢𑁆𑀣𑀸𑀦𑀫𑁆𑀧𑀺 𑀅𑀢𑁆𑀣𑀯𑀘𑀦𑀸𑀦𑀁 𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 𑀅𑀢𑁆𑀣-𑀲𑀤𑁆𑀤𑁄 ‘‘𑀧𑀻𑀴𑀦𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁭; 𑁨.𑁮) 𑀲𑀪𑀸𑀯𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺, ‘‘𑀓𑁂𑀦𑀝𑁆𑀞𑁂𑀦𑀸’’𑀢𑀺 𑀧𑀦𑁂𑀢𑁆𑀣 𑀅𑀪𑀺𑀥𑁂𑀬𑁆𑀬𑀧𑀭𑀺𑀬𑀸𑀬𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀓𑁂𑀦𑀝𑁆𑀞𑁂𑀦𑀸𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑀯𑀲𑁂𑀦 𑀭𑀼𑀧𑁆𑀧𑀦𑀝𑁆𑀞𑁂𑀦𑀸’’𑀢𑀺, 𑀭𑀼𑀧𑁆𑀧𑀦𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀦 𑀓𑁂𑀯𑀮𑀁 𑀲𑀤𑁆𑀤𑀢𑁆𑀣𑁄𑀬𑁂𑀯 𑀭𑀼𑀧𑁆𑀧𑀦’’𑀦𑁆𑀢𑀺. 𑀢𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀢𑀲𑁆𑀲 𑀪𑀽𑀢𑀼𑀧𑀸𑀤𑀸𑀬𑀧𑁆𑀧𑀪𑁂𑀤𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲. 𑀭𑀼𑀧𑁆𑀧𑀦𑀮𑀓𑁆𑀔𑀡𑀜𑁆𑀘 𑀦𑀸𑀫𑁂𑀢𑀁 𑀅𑀦𑀺𑀘𑁆𑀘𑀢𑀸𑀤𑀺 𑀯𑀺𑀬 𑀓𑀓𑁆𑀔𑀴𑀢𑁆𑀢𑀸𑀤𑀺𑀢𑁄 𑀅𑀜𑁆𑀜𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀧𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑁄 𑀳𑀺 𑀢𑀦𑁆𑀢𑀺, 𑀓𑀓𑁆𑀔𑀴𑀢𑁆𑀢𑀸𑀤𑀻𑀦𑀁𑀬𑁂𑀯 𑀧𑀦 𑀅𑀭𑀽𑀧𑀥𑀫𑁆𑀫𑀯𑀺𑀥𑀼𑀭𑁄 𑀲𑀪𑀸𑀯𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸𑀢𑀺 𑀫𑀼𑀘𑁆𑀙𑀸𑀬 𑀫𑁄𑀳𑀲𑁆𑀲 𑀆𑀧𑀚𑁆𑀚𑀦𑁂𑀦. 𑀓𑀧𑁆𑀧𑀲𑀡𑁆𑀞𑀸𑀦𑀁 𑀉𑀤𑀓𑀦𑁆𑀢𑀺 𑀓𑀧𑁆𑀧𑀲𑀡𑁆𑀞𑀸𑀧𑀓𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀉𑀤𑀓𑀁. 𑀢𑀣𑀸𑀢𑀺 𑀢𑀧𑁆𑀧𑀓𑀸𑀭𑀢𑀸𑀬 𑀔𑀸𑀭𑀪𑀸𑀯𑁂 𑀲𑀢𑀺 𑀉𑀤𑀓𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑁂 𑀯𑀺𑀬 𑀧𑀣𑀯𑀻 𑀯𑀺𑀮𑀻𑀬𑁂𑀬𑁆𑀬. 𑀮𑁄𑀓𑀦𑁆𑀢𑀭𑀺𑀬𑀲𑀢𑁆𑀢𑀸𑀦𑀁 𑀧𑀦 𑀧𑀸𑀧𑀓𑀫𑁆𑀫𑀩𑀮𑁂𑀦 𑀅𑀔𑀸𑀭𑁂𑀧𑀺 𑀔𑀸𑀭𑁂 𑀯𑀺𑀬 𑀲𑀭𑀻𑀭𑀲𑁆𑀲 𑀯𑀺𑀮𑀻𑀬𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀢𑀺 𑀲𑀉𑀲𑁆𑀲𑀤𑀦𑀺𑀲𑁆𑀲𑀬𑀦𑀺𑀭𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀦 𑀳𑀺 𑀅𑀯𑀻𑀘𑀺𑀫𑁆𑀳𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺.

𑁩. 𑀧𑀓𑀭𑀡𑀧𑁆𑀧𑀢𑁆𑀢𑀁 𑀭𑀽𑀧𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀢𑀺𑀓𑀸 𑀞𑀧𑀺𑀢𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀪𑀽𑀢𑀼…𑀧𑁂… 𑀆𑀧𑀚𑁆𑀚𑀢𑀺 𑀢𑀧𑁆𑀧𑀓𑀸𑀭𑀪𑀸𑀯𑁂𑀦 𑀅𑀢𑀻𑀢𑀁𑀲𑁂 𑀕𑀡𑀦𑀁 𑀕𑀢𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀦𑁆𑀢𑀭𑀦𑀺𑀯𑀢𑁆𑀢𑀦𑀢𑁆𑀣𑀢𑀸 𑀧𑀓𑀸𑀭𑀦𑁆𑀢𑀭𑀦𑀺𑀯𑀢𑁆𑀢𑀦𑀢𑁆𑀣𑀢𑀸 𑀘 𑀪𑀽𑀢𑀼𑀧𑀸𑀤𑀸𑀬𑀕𑀳𑀡𑀲𑁆𑀲 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁𑀤𑀲𑁆𑀲𑀦𑁂𑀢𑀺 𑀕𑀡𑀦𑀦𑁆𑀢𑀭𑀤𑀲𑁆𑀲𑀦𑁂. 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀪𑀽𑀢𑀼𑀧𑀸𑀤𑀸𑀬𑀲𑀪𑀸𑀯𑀢𑁆𑀢𑀸. ‘‘𑀦 𑀘𑀸’’𑀢𑀺𑀆𑀤𑀺𑀦𑀸 𑀪𑀽𑀢𑀼𑀧𑀸𑀤𑀸𑀬𑀲𑀪𑀸𑀯𑁄 𑀅𑀢𑀻𑀢𑀁𑀲𑀕𑀡𑀺𑀢𑀢𑀸𑀬 𑀢𑀁𑀲𑀪𑀸𑀯𑀲𑁆𑀲𑀧𑀺 𑀅𑀜𑁆𑀜𑀣𑀸 𑀕𑀡𑀺𑀢𑀢𑁆𑀢𑀸, 𑀅𑀢𑀁𑀲𑀪𑀸𑀯𑀲𑁆𑀲 𑀘 𑀢𑀣𑀸 𑀕𑀡𑀺𑀢𑀢𑁆𑀢𑀸 𑀅𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀚𑁆𑀛𑀢𑁆𑀢…𑀧𑁂… 𑀮𑀩𑁆𑀪𑀢𑀻’’𑀢𑀺 𑀏𑀢𑁂𑀦 𑀤𑀼𑀢𑀺𑀬𑀦𑀬𑁂 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑁄𑀯 𑀤𑁄𑀲𑁄, 𑀅𑀣 𑀔𑁄 𑀅𑀩𑁆𑀬𑀸𑀧𑀺𑀢𑁄𑀧𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀤𑁂𑀢𑀁 𑀧𑀦 𑀅𑀓𑀸𑀭𑀡𑀁 𑀓𑀸𑀭𑀡𑀪𑀸𑀯𑀲𑁆𑀲𑁂𑀯 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑁂𑀢𑁆𑀣 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀪𑀸𑀯𑁄 𑀅𑀢𑀻𑀢𑀁𑀲𑁂 𑀕𑀡𑀦𑀲𑁆𑀲 𑀓𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀬𑀢𑁄 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀧𑀢𑁆𑀢𑀺 𑀲𑀺𑀬𑀸.

‘‘𑀓𑀺𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀓𑀺’’𑀦𑁆𑀢𑀺 𑀧𑀼𑀩𑁆𑀩𑁂 𑀬𑀁 ‘‘𑀭𑀽𑀧’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀁, 𑀢𑀲𑁆𑀲 𑀲𑀭𑀽𑀧𑀧𑀼𑀘𑁆𑀙𑀸. 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄, 𑀦 𑀓𑀸𑀭𑀡𑀢𑁆𑀣𑁄. 𑀢𑁂𑀦𑀲𑁆𑀲 𑀬𑀁 𑀭𑀽𑀧𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁…𑀧𑁂… 𑀅𑀢𑀻𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑀁 𑀅𑀢𑀻𑀢𑀓𑁄𑀝𑁆𑀞𑀸𑀲𑁂 𑀕𑀡𑀦𑀁 𑀕𑀢𑀁, 𑀢𑀁 𑀓𑀺𑀦𑁆𑀢𑀺 𑀘𑁂? ‘‘𑀘𑀢𑁆𑀢𑀸𑀭𑁄 𑀘…𑀧𑁂… 𑀭𑀽𑀧’’𑀦𑁆𑀢𑀺 𑀪𑀽𑀢𑀼𑀧𑀸𑀤𑀸𑀬𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦 𑀯𑀺𑀲𑁂𑀲𑀁 𑀦𑀺𑀤𑀲𑁆𑀲𑁂𑀢𑀺. 𑀬𑀢𑁆𑀢𑀓𑀸 𑀳𑀺 𑀇𑀥 𑀯𑀺𑀲𑁂𑀲𑀸 𑀦𑀺𑀤𑁆𑀤𑀺𑀝𑁆𑀞𑀸 𑀘𑀓𑁆𑀔𑀸𑀬𑀢𑀦𑀸𑀤𑀬𑁄, 𑀢𑁂𑀲𑀫𑀺𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺. 𑀦 𑀘𑁂𑀢𑁆𑀣 𑀧𑀼𑀭𑀺𑀫𑀦𑀬𑀢𑁄 𑀅𑀯𑀺𑀲𑁂𑀲𑁄. 𑀢𑀢𑁆𑀣 𑀳𑀺 𑀭𑀽𑀧𑀲𑁆𑀲 𑀪𑀽𑀢𑀼𑀧𑀸𑀤𑀸𑀬𑀢𑀸𑀫𑀢𑁆𑀢𑀲𑀪𑀸𑀯𑀤𑀲𑁆𑀲𑀦𑀢𑀸 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑀻𑀢𑀭𑀽𑀧𑀫𑁆𑀧𑀺 𑀪𑀽𑀢𑀸𑀦𑀺 𑀘𑁂𑀯𑀸’’𑀢𑀺𑀆𑀤𑀺. 𑀇𑀥 𑀧𑀦 𑀪𑀽𑀢𑀼𑀧𑀸𑀤𑀸𑀬𑁂𑀦 𑀦𑀺𑀤𑀲𑁆𑀲𑀦𑀪𑀽𑀢𑁂𑀦 𑀭𑀽𑀧𑀲𑁆𑀲 𑀲𑀩𑁆𑀩𑀯𑀺𑀲𑁂𑀲𑀯𑀺𑀪𑀸𑀯𑀦𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀩𑁆𑀬𑀸𑀧𑀺𑀢𑀤𑁄𑀲𑁄𑀧𑀺 𑀘𑁂𑀢𑁆𑀣 𑀅𑀦𑁄𑀓𑀸𑀲𑁄𑀯, 𑀬𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀁…𑀧𑁂… 𑀉𑀧𑀸𑀤𑀺𑀦𑁆𑀦𑀁, 𑀓𑀺𑀦𑁆𑀢𑀺? 𑀘𑀢𑁆𑀢𑀸𑀭𑁄 𑀘…𑀧𑁂… 𑀭𑀽𑀧𑀦𑁆𑀢𑀺 𑀢𑀤𑀜𑁆𑀜𑀯𑀺𑀲𑁂𑀲𑀦𑀺𑀤𑀲𑁆𑀲𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀘𑀸𑀳 ‘‘𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸𑀢𑀺 𑀲𑀪𑀸𑀯𑀢𑁄 𑀧𑀭𑀺𑀬𑀸𑀬𑀦𑀁 𑀧𑀭𑀺𑀯𑀢𑁆𑀢𑀦𑀁 𑀧𑀭𑀺𑀬𑀸𑀬𑁄, 𑀉𑀚𑀼𑀓𑀁 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀬𑁂𑀦, 𑀧𑀭𑀺𑀬𑀸𑀬𑀪𑀽𑀢𑀸 𑀯𑀸 𑀤𑁂𑀲𑀦𑀸 𑀏𑀢𑁆𑀣𑀸𑀢𑀺 𑀧𑀭𑀺𑀬𑀸𑀬𑀤𑁂𑀲𑀦𑀁, 𑀲𑀼𑀢𑁆𑀢𑀦𑁆𑀢𑀁. 𑀲𑀼𑀢𑁆𑀢𑀦𑁆𑀢𑀜𑁆𑀳𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀮𑁂𑀲𑀢𑁄 𑀮𑀩𑁆𑀪𑀫𑀸𑀦𑀪𑀸𑀯𑀓𑀣𑀦𑀁, 𑀦 𑀉𑀚𑀼𑀦𑀺𑀧𑁆𑀧𑀤𑁂𑀲𑀪𑀸𑀯𑀓𑀣𑀦𑀦𑁆𑀢𑀺 𑀧𑀭𑀺𑀬𑀸𑀬𑀤𑁂𑀲𑀦𑀁 𑀦𑀸𑀫. 𑀢𑁂𑀦𑁂𑀯 𑀢𑀁 ‘‘𑀬𑀣𑀸𑀦𑀼𑀮𑁄𑀫𑀲𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀥𑀫𑁆𑀫𑁄 𑀧𑀦 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀉𑀚𑀼𑀦𑀺𑀧𑁆𑀧𑀤𑁂𑀲𑀓𑀣𑀦𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀁 𑀦𑀸𑀫, 𑀬𑀢𑁄 ‘‘𑀬𑀣𑀸𑀥𑀫𑁆𑀫𑀲𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀘𑁆𑀙𑀬𑁂𑀦 𑀤𑁂𑀲𑁄𑀢𑀺 𑀯𑀯𑀢𑁆𑀣𑀸𑀦𑀢𑁄 𑀓𑀣𑀦𑀁. 𑀢𑀣𑀸 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁭𑁨 𑀆𑀤𑀬𑁄) 𑀯𑀺𑀬 𑀅𑀢𑀻𑀢𑀸𑀤𑀺𑀪𑀸𑀯𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄 𑀅𑀤𑁆𑀥𑀸𑀯𑀲𑁂𑀦 𑀇𑀥𑀸𑀧𑀺 𑀔𑀦𑁆𑀥𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀢𑁆𑀢𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀲𑀦𑁆𑀦𑀺𑀧𑀢𑀺𑀢𑀦𑁆𑀢𑀺 𑀲𑀫𑀸𑀕𑀢𑀁. 𑀲𑀦𑁆𑀢𑀸𑀦𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀸𑀧𑀭𑀯𑀲𑁂𑀦. 𑀧𑀼𑀩𑁆𑀩𑁂𑀦𑀸𑀧𑀭𑀲𑁆𑀲 𑀲𑀫𑀧𑁆𑀧𑀫𑀸𑀡𑀢𑀸𑀬 𑀅𑀦𑀽𑀦𑀁 𑀅𑀦𑀥𑀺𑀓𑀁, 𑀢𑀢𑁄 𑀏𑀯 𑀏𑀓𑀸𑀓𑀸𑀭𑀁. 𑀧𑀯𑀢𑁆𑀢𑀺𑀓𑀸𑀮𑀯𑀲𑁂𑀦 𑀯𑀸 𑀅𑀦𑀽𑀦𑀁 𑀅𑀦𑀥𑀺𑀓𑀁, 𑀲𑀫𑀸𑀦𑀲𑀪𑀸𑀯𑀢𑀸𑀬 𑀏𑀓𑀸𑀓𑀸𑀭𑀁. 𑀢𑁂𑀦 𑀯𑀺𑀲𑀪𑀸𑀕𑀉𑀢𑀼𑀦𑀸 𑀅𑀦𑀦𑁆𑀢𑀭𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀆𑀳𑀸𑀭𑁂𑀧𑀻𑀢𑀺 𑀏𑀢𑁆𑀣 𑀯𑀺𑀲𑀪𑀸𑀕𑀸𑀳𑀸𑀭𑁂𑀦 𑀅𑀦𑀦𑁆𑀢𑀭𑀺𑀢𑁄 𑀅𑀦𑁂𑀓𑀯𑀸𑀭𑀁 𑀅𑀦𑁂𑀓𑀤𑀺𑀯𑀲𑀫𑁆𑀧𑀺 𑀪𑀼𑀢𑁆𑀢𑁄 𑀲𑀪𑀸𑀕𑁂𑀓𑀸𑀳𑀸𑀭𑀁 𑀦𑀸𑀫. ‘‘𑀢𑀢𑁄 𑀧𑀼𑀩𑁆𑀩𑁂 𑀯𑀺𑀲𑀪𑀸𑀕𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺. ‘‘𑀏𑀓𑀸𑀳𑀸𑀭𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀏𑀓𑀲𑁆𑀲𑁂𑀯 𑀆𑀳𑀸𑀭𑀲𑁆𑀲 𑀬𑁄𑀚𑀦𑀸 𑀬𑀼𑀢𑁆𑀢𑀭𑀽𑀧𑀸𑀢𑀺 𑀅𑀧𑀭𑁂. 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀤𑀸𑀭𑀫𑁆𑀫𑀡𑀁, 𑀬𑀸𑀯 𑀚𑀯𑀦𑀁, 𑀬𑀸𑀯 𑀯𑀸 𑀯𑁄𑀝𑁆𑀞𑀩𑁆𑀩𑀦𑀁, 𑀢𑀸𑀯 𑀧𑀯𑀢𑁆𑀢𑀸 𑀘𑀺𑀢𑁆𑀢𑀲𑀦𑁆𑀢𑀢𑀺 𑀏𑀓𑀯𑀻𑀣𑀺. 𑀏𑀓𑀚𑀯𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀓𑀚𑀯𑀦𑀯𑀸𑀭𑀲𑀫𑀼𑀝𑁆𑀞𑀸𑀦𑀁. 𑀏𑀢𑁆𑀣 𑀘 𑀲𑀫𑀬𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀲𑀦𑁆𑀢𑀢𑀺𑀯𑀲𑁂𑀦, 𑀲𑀦𑁆𑀢𑀢𑀺𑀜𑁆𑀘 𑀅𑀦𑀸𑀫𑀲𑀺𑀢𑁆𑀯𑀸𑀯 𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁄 𑀕𑀳𑁂𑀢𑀩𑁆𑀩𑁄.

𑀢𑁂𑀲𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀦𑀁. 𑀓𑀮𑀸𑀧𑀲𑁆𑀲𑀸𑀢𑀺 𑀭𑀽𑀧𑀓𑀮𑀸𑀧𑀲𑁆𑀲. 𑀓𑀫𑁆𑀫𑀸𑀦𑀦𑁆𑀢𑀭𑀸𑀤𑀻𑀢𑀺 𑀓𑀫𑁆𑀫𑀸𑀤𑀺, 𑀅𑀦𑀦𑁆𑀢𑀭𑀸𑀤𑀻𑀢𑀺 𑀧𑀘𑁆𑀘𑁂𑀓𑀁 𑀆𑀤𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑁂𑀦 𑀆𑀤𑀺𑀲𑀤𑁆𑀤𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀆𑀳𑀸𑀭𑀸𑀤𑀺𑀦𑁄 𑀘 𑀤𑀼𑀢𑀺𑀬𑁂𑀦 𑀲𑀫𑀦𑀦𑁆𑀢𑀭𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀤𑀺𑀦𑁄 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘𑁂𑀢𑁆𑀣 𑀓𑀫𑁆𑀫𑀸𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦, 𑀇𑀢𑀭𑀲𑁆𑀲 𑀓𑀫𑁆𑀫𑀸𑀤𑀺𑀯𑀲𑁂𑀦𑁂𑀯 𑀚𑀦𑀓𑀪𑀸𑀯𑁂 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀼𑀭𑁂𑀚𑀸𑀢𑀯𑀲𑁂𑀦, 𑀇𑀢𑀭𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀲𑁂𑀦, 𑀉𑀪𑀬𑁂𑀲𑀫𑁆𑀧𑀺 𑀲𑀳𑀚𑀸𑀢𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀳𑁂𑀢𑀼𑀓𑀺𑀘𑁆𑀘𑀓𑁆𑀔𑀡𑁂. 𑀳𑁂𑀢𑀼𑀓𑀺𑀘𑁆𑀘𑀁 𑀦𑀸𑀫 𑀢𑀲𑁆𑀲 𑀢𑀲𑁆𑀲 𑀉𑀧𑁆𑀧𑀸𑀤𑁂𑀢𑀩𑁆𑀩𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀭𑀡𑀁, 𑀢𑀜𑁆𑀘 𑀢𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀦𑁆𑀦𑀨𑀮𑀢𑁆𑀢𑀸 𑀢𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄 𑀦𑀺𑀝𑁆𑀞𑀺𑀢𑀜𑁆𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀁 𑀧𑀦 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀧𑀘𑁆𑀘𑀬𑀓𑀺𑀘𑁆𑀘𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁬. 𑀅𑀦𑀺𑀝𑁆𑀞𑀦𑀸𑀫𑀦𑀺𑀯𑀢𑁆𑀢𑀦𑀲𑁆𑀲𑀸𑀢𑀺 𑀅𑀦𑀺𑀝𑁆𑀞𑀦𑀸𑀫𑀦𑀺𑀯𑀢𑁆𑀢𑀺𑀬𑀸 𑀅𑀓𑀸𑀭𑀡𑀪𑀸𑀯𑀤𑀲𑁆𑀲𑀦𑁂𑀦 𑀇𑀝𑁆𑀞𑀦𑀸𑀫𑀮𑀸𑀪𑀸𑀧𑀦𑀲𑁆𑀲 𑀅𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀪𑀯𑁂𑀢𑀺 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂 𑀲𑀫𑁆𑀧𑀦𑁆𑀦𑁂 𑀤𑁂𑀯𑀫𑀦𑀼𑀲𑁆𑀲𑀪𑀯𑁂. 𑀲𑀫𑀺𑀤𑁆𑀥𑀲𑁄𑀪𑀦𑀢𑀸𑀢𑀺 𑀅𑀪𑀺𑀯𑀼𑀤𑁆𑀥𑀲𑁄𑀪𑀦𑀢𑀸. 𑀢𑀢𑁄 𑀏𑀯𑀸𑀢𑀺 𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑀢𑁄 𑀏𑀯, 𑀅𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁𑀬𑁂𑀯 𑀳𑀢𑁆𑀣𑀺𑀆𑀤𑀻𑀦𑀁 𑀲𑀼𑀔𑀲𑁆𑀲 𑀳𑁂𑀢𑀼𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺 𑀲𑀸𑀭𑀡𑀸𑀤𑀺𑀯𑀲𑁂𑀦 𑀤𑀼𑀓𑁆𑀔𑀧𑀘𑁆𑀘𑀬𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀳𑀢𑁆𑀣𑀺𑀭𑀽𑀧𑀸𑀤𑀻𑀦𑀁. ‘‘𑀢𑀲𑁆𑀲 𑀢𑀲𑁆𑀲𑁂𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀅𑀓𑀼𑀲𑀮𑁂𑀦 𑀅𑀢𑁆𑀢𑀦𑀸 𑀓𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀫𑁆𑀫𑀁 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀁, 𑀢𑀢𑁆𑀣𑁂𑀯 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀅𑀜𑁆𑀜𑀢𑁆𑀣, 𑀢𑀲𑁆𑀫𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦𑀸𑀢𑀺 𑀏𑀓𑀘𑁆𑀘𑀫𑀢𑀤𑀲𑁆𑀲𑀦𑀁. 𑀢𑀢𑁆𑀣 ‘‘𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀬𑀲𑁆𑀫𑀸 𑀧𑀝𑀺𑀲𑁂𑀥𑀤𑁆𑀯𑀬𑁂𑀦 𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀇𑀝𑁆𑀞𑀪𑀸𑀯𑁄 𑀦𑀺𑀬𑀢𑁄, 𑀢𑀲𑁆𑀫𑀸 ‘‘𑀓𑀼𑀲𑀮𑀓𑀫𑁆𑀫𑀚𑀫𑁂𑀯 𑀇𑀝𑁆𑀞’’𑀦𑁆𑀢𑀺 𑀏𑀯𑀁 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀓𑀼𑀲𑀮𑀓𑀫𑁆𑀫𑀚𑀁 𑀇𑀝𑁆𑀞𑀫𑁂𑀯𑀸’’𑀢𑀺 𑀏𑀯𑀫𑁂𑀢𑁆𑀣 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑀼𑀲𑀮𑀓𑀫𑁆𑀫𑀚𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀓𑀺𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀚𑀁 𑀲𑁄𑀪𑀦𑀁, 𑀬𑀁 𑀧𑀭𑁂𑀲𑀁 𑀇𑀝𑁆𑀞𑀁 𑀦𑀸𑀫 𑀲𑀺𑀬𑀸? 𑀬𑀤𑀺 𑀤𑀼𑀕𑁆𑀕𑀢𑀺𑀬𑀁 𑀓𑁂𑀲𑀜𑁆𑀘𑀺 𑀢𑀺𑀭𑀘𑁆𑀙𑀸𑀦𑀸𑀦𑀁 𑀲𑀡𑁆𑀞𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺 𑀲𑀼𑀕𑀢𑀺𑀬𑀁 𑀲𑀢𑁆𑀢𑀸𑀦𑀁 𑀅𑀓𑀼𑀲𑀮𑀦𑀺𑀲𑁆𑀲𑀦𑁆𑀤𑁂𑀦 𑀯𑀺𑀭𑀽𑀧𑀭𑀽𑀧𑀢𑀸 𑀯𑀺𑀬 𑀓𑀼𑀲𑀮𑀦𑀺𑀲𑁆𑀲𑀦𑁆𑀤𑁂𑀦, 𑀓𑀣𑀁 𑀢𑀲𑁆𑀲𑀸 𑀅𑀓𑀼𑀲𑀮𑀓𑀫𑁆𑀫𑀚𑀢𑀸. 𑀅𑀣 𑀧𑀦 𑀬𑀁 𑀓𑁂𑀲𑀜𑁆𑀘𑀺 𑀅𑀫𑀦𑀸𑀧𑀫𑁆𑀧𑀺 𑀲𑀫𑀸𑀦𑀁 𑀭𑀽𑀧𑀁 𑀫𑀦𑀸𑀧𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀫𑁆𑀧𑀺 𑀬𑀣𑀸 𑀓𑁂𑀲𑀜𑁆𑀘𑀺 𑀢𑀺𑀭𑀘𑁆𑀙𑀸𑀦𑀸𑀤𑀻𑀦𑀁 𑀓𑀼𑀲𑀮𑀓𑀫𑁆𑀫𑀚𑀁 𑀫𑀦𑀼𑀲𑁆𑀲𑀸𑀤𑀺𑀭𑀽𑀧𑀁 𑀅𑀫𑀦𑀸𑀧𑀢𑁄 𑀉𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀪𑀸𑀯𑀢𑁄 𑀅𑀢𑁆𑀣𑀢𑁄 𑀇𑀝𑁆𑀞𑀫𑁂𑀯 𑀦𑀸𑀫 𑀳𑁄𑀢𑀺, 𑀏𑀯𑀁 𑀅𑀓𑀼𑀲𑀮𑀓𑀫𑁆𑀫𑀚𑀁 𑀓𑁂𑀲𑀜𑁆𑀘𑀺 𑀫𑀦𑀸𑀧𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀪𑀸𑀯𑀢𑁄 𑀅𑀢𑁆𑀣𑀢𑁄 𑀅𑀦𑀺𑀝𑁆𑀞𑀫𑁂𑀯 𑀦𑀸𑀫 𑀳𑁄𑀢𑀺, 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀺𑀅𑀝𑁆𑀞𑀸𑀦𑀧𑀸𑀴𑀺𑀬𑀸 (𑀫. 𑀦𑀺. 𑁩.𑁧𑁩𑁧) 𑀯𑀺𑀭𑁄𑀥𑁄 𑀲𑀺𑀬𑀸. 𑀢𑁂𑀦𑁂𑀯𑀸𑀳 ‘‘𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘. 𑀇𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀬𑀣𑀸 ‘‘𑀓𑀼𑀲𑀮𑀓𑀫𑁆𑀫𑀚𑀁 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀓𑀺𑀜𑁆𑀘𑀸𑀧𑀺 ‘‘𑀅𑀓𑀼𑀲𑀮𑀓𑀫𑁆𑀫𑀚𑀁 𑀇𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑀁, 𑀢𑁂𑀦 𑀧𑀦 𑀦𑀬𑀤𑀲𑁆𑀲𑀦𑁂𑀦 𑀅𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀅𑀪𑀸𑀯𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀲𑁄 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀓𑀼𑀲𑀮𑀓𑀫𑁆𑀫𑀚𑀫𑁂𑀯 𑀇𑀝𑁆𑀞𑀦𑁆𑀢𑀺 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀲𑁆𑀲 𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 ‘‘𑀳𑀢𑁆𑀣𑀺𑀆𑀤𑀻𑀦𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺. 𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀇𑀢𑀭𑁂𑀲𑀫𑁆𑀧𑀺 𑀘 𑀅𑀓𑀼𑀲𑀮𑀓𑀫𑁆𑀫𑀚𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯, 𑀓𑀼𑀲𑀮𑀓𑀫𑁆𑀫𑀚𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀤𑀲𑁆𑀲𑀺𑀢𑁄𑀯𑀸𑀬𑀁 𑀦𑀬𑁄𑀢𑀺. 𑀓𑀲𑁆𑀫𑀸 𑀧𑀦 𑀇𑀝𑁆𑀞𑀸𑀦𑀺𑀝𑁆𑀞𑀫𑀺𑀲𑁆𑀲𑀺𑀢𑁂 𑀯𑀢𑁆𑀣𑀼𑀫𑁆𑀳𑀺 𑀫𑀦𑀸𑀧𑀢𑀸𑀯 𑀲𑀡𑁆𑀞𑀸𑀢𑀻𑀢𑀺 𑀆𑀳 ‘‘𑀇𑀝𑁆𑀞𑀸𑀭𑀫𑁆𑀫𑀡𑁂𑀦…𑀧𑁂… 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺. 𑀲𑀼𑀝𑁆𑀞𑀼 𑀯𑀼𑀢𑁆𑀢𑀦𑁆𑀢𑀺 ‘‘𑀇𑀝𑁆𑀞𑀸𑀦𑀺𑀝𑁆𑀞𑀁 𑀏𑀓𑀦𑁆𑀢𑀢𑁄 𑀯𑀺𑀧𑀸𑀓𑁂𑀦𑁂𑀯 𑀧𑀭𑀺𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑁂𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀲𑀫𑁆𑀫𑀤𑁂𑀯 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀅𑀦𑀼𑀕𑀦𑁆𑀢𑁆𑀯𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼, 𑀲𑀩𑁆𑀩𑁂𑀲𑀼 𑀯𑀸 𑀆𑀭𑀫𑁆𑀫𑀡𑁂𑀲𑀼.

‘‘𑀅𑀦𑀺𑀝𑁆𑀞𑀸’’𑀢𑀺 𑀯𑀘𑀦𑁂𑀦𑁂𑀯 𑀢𑁂𑀲𑀁 𑀇𑀝𑁆𑀞𑀢𑀸 𑀦𑀺𑀯𑀢𑁆𑀢𑀺𑀢𑀸𑀢𑀺 𑀆𑀳 ‘‘𑀲𑀤𑀺𑀲𑀢𑀸 𑀘 𑀭𑀽𑀧𑀸𑀤𑀺𑀪𑀸𑀯𑁄𑀬𑁂𑀯𑀸’’𑀢𑀺. 𑀇𑀝𑁆𑀞𑀸𑀦𑁂𑀯 𑀭𑀽𑀧𑀸𑀤𑀻𑀦𑀺 𑀓𑀸𑀫𑀕𑀼𑀡𑀸𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀻𑀢𑀺 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬 𑀇𑀝𑁆𑀞𑀧𑀝𑀺𑀧𑀓𑁆𑀔𑀸 𑀅𑀦𑀺𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀺𑀝𑁆𑀞𑀸𑀢𑀺…𑀧𑁂… 𑀯𑁄𑀳𑀸𑀭𑁄 𑀯𑀺𑀬𑀸’’𑀢𑀺. 𑀲𑀩𑁆𑀩𑀸𑀦𑀺 𑀯𑀸𑀢𑀺 𑀏𑀢𑁆𑀣 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩) 𑀯𑀘𑀦𑀢𑁄 𑀓𑀣𑀁 𑀅𑀦𑀺𑀝𑁆𑀞𑀸𑀦𑀁 𑀭𑀽𑀧𑀸𑀤𑀻𑀦𑀁 𑀓𑀸𑀫𑀕𑀼𑀡𑀪𑀸𑀯𑀸𑀧𑀢𑁆𑀢𑀻𑀢𑀺 𑀘𑁂? 𑀢𑁂𑀲𑀫𑁆𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀢𑁄 𑀧𑀺𑀬𑀭𑀽𑀧𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀣𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀇𑀝𑁆𑀞𑀸𑀦𑀻’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑀁 (𑀫. 𑀦𑀺. 𑁧.𑁧𑁬𑁬; 𑁨.𑁧𑁫𑁫; 𑁩.𑁫𑁭; 𑀲𑀁. 𑀦𑀺. 𑁫.𑁩𑁦) 𑀦𑀻𑀬𑀢𑀻𑀢𑀺 𑀆𑀳 ‘‘𑀅𑀢𑀺𑀲𑀬𑁂𑀦𑀸’’𑀢𑀺𑀆𑀤𑀺.

𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀯𑀲𑁂𑀦 𑀧𑀸𑀴𑀺𑀬𑀁 𑀳𑀻𑀦𑀤𑀼𑀓𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀻𑀲𑀼𑀧𑀺 𑀳𑀻𑀦𑀧𑀡𑀻𑀢𑀧𑀤𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀅𑀯𑀬𑀯𑀬𑁄𑀕𑁂 𑀲𑀸𑀫𑀺𑀯𑀘𑀦𑀁, 𑀦 𑀓𑀢𑁆𑀢𑀭𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’’𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀦𑀺𑀤𑁆𑀤𑀺𑀝𑁆𑀞𑁂 𑀓𑀲𑁆𑀫𑀸 𑀓𑀫𑁆𑀫𑀚𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀘𑀢𑀼𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀲𑀢𑁆𑀢𑀲𑀦𑁆𑀢𑀸𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀧𑀥𑀸𑀦𑀢𑁆𑀢𑀸 𑀳𑀺 𑀓𑀫𑁆𑀫𑀚𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀲𑁂𑀲𑁂𑀲𑀼 ‘‘𑀏𑀯𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀢𑀺𑀤𑁂𑀲𑁄 𑀓𑀢𑁄. ‘‘𑀢𑁂𑀳𑀺 𑀢𑁂𑀳𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂’’𑀢𑀺 𑀇𑀫𑀺𑀦𑀸 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁 𑀆𑀲𑀗𑁆𑀓𑀢𑀺. 𑀢𑀣𑀸 𑀲𑀢𑀺 𑀯𑀺𑀲𑀬𑁂 𑀯𑀸 𑀲𑀸𑀫𑀺𑀯𑀘𑀦𑁂 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺 ‘‘𑀦 𑀓𑀫𑁆𑀫𑀚𑀯𑀲𑁂𑀦𑁂𑀯𑀸’’𑀢𑀺𑀆𑀤𑀺𑀦𑀸, 𑀓𑀫𑁆𑀫𑀚𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀧𑀮𑀓𑁆𑀔𑀡𑀁 𑀤𑀝𑁆𑀞𑀩𑁆𑀩𑀁.

𑀫𑀭𑀺𑀬𑀸𑀤𑀸𑀪𑀽𑀢𑀦𑁆𑀢𑀺 𑀉𑀢𑁆𑀢𑀫𑀫𑀭𑀺𑀬𑀸𑀤𑀸𑀪𑀽𑀢𑀁. 𑀢𑁂𑀦𑁂𑀯𑀸𑀳 ‘‘𑀬𑀲𑁆𑀲 𑀬𑁂𑀯 𑀫𑀦𑀸𑀧𑀸, 𑀢𑀲𑁆𑀲 𑀢𑁂𑀯 𑀧𑀭𑀫𑀸’’𑀢𑀺. 𑀢𑁂𑀲𑀦𑁆𑀢𑀺 𑀓𑀸𑀫𑀕𑀼𑀡𑀸𑀦𑀁. 𑀲𑀪𑀸𑀯𑀢𑁄𑀢𑀺 𑀮𑀓𑁆𑀔𑀡𑀢𑁄.

‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀲𑁆𑀲𑀸𑀤𑀦𑀓𑀼𑀚𑁆𑀛𑀦𑀢𑁄’’𑀢𑀺𑀆𑀤𑀺𑀦𑀸 ‘‘𑀬𑀲𑁆𑀫𑀸 𑀢𑁂𑀬𑁂𑀯 𑀭𑀽𑀧𑀸𑀤𑀬𑁄 𑀏𑀓𑁄 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀓𑀁 𑀲𑀼𑀢𑁆𑀢𑀦𑁆𑀢𑀯𑀺𑀯𑀭𑀡𑀁 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁂 𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀝𑁆𑀞𑀸𑀦𑀺𑀝𑁆𑀞𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀦𑀺𑀩𑁆𑀩𑀸𑀦𑁂 𑀯𑀺𑀬 𑀅𑀦𑀺𑀝𑁆𑀞𑀕𑁆𑀕𑀳𑀡𑀁 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀅𑀜𑁆𑀜𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀪𑀸𑀕𑁄 𑀦𑀸𑀫 𑀅𑀲𑀗𑁆𑀓𑀭𑁄, 𑀯𑀺𑀢𑁆𑀣𑀸𑀭𑁄 𑀘𑀸𑀢𑀺 ‘‘𑀯𑀺𑀪𑀢𑁆𑀢’’𑀦𑁆𑀢𑀺 𑀧𑀤𑀲𑁆𑀲 ‘‘𑀯𑀯𑀢𑁆𑀣𑀺𑀢𑀁, 𑀧𑀓𑀸𑀲𑀺𑀢’’𑀦𑁆𑀢𑀺 𑀘 𑀅𑀢𑁆𑀣𑀫𑀸𑀳. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑀺𑀅𑀟𑁆𑀠𑀤𑀮𑀺𑀤𑁆𑀤𑀸𑀦𑀁. 𑀇𑀤𑀁 𑀇𑀝𑁆𑀞𑀁, 𑀅𑀦𑀺𑀝𑁆𑀞𑀜𑁆𑀘 𑀳𑁄𑀢𑀻𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀅𑀦𑀺𑀝𑁆𑀞𑀁, 𑀇𑀝𑁆𑀞𑀜𑁆𑀘 𑀳𑁄𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀝𑁆𑀞𑀁 𑀇𑀝𑁆𑀞𑀦𑁆𑀢𑀺 𑀇𑀝𑁆𑀞𑀲𑁆𑀲 ‘‘𑀅𑀦𑀺𑀝𑁆𑀞’’𑀦𑁆𑀢𑀺, 𑀅𑀦𑀺𑀝𑁆𑀞𑀲𑁆𑀲 ‘‘𑀇𑀝𑁆𑀞’’𑀦𑁆𑀢𑀺 𑀕𑀳𑀡𑁂 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑀦𑀸. 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀸𑀧𑀢𑁆𑀢𑀺𑀆𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀼𑀭𑁂𑀢𑀭𑀁 𑀧𑀯𑀢𑁆𑀢𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀧𑀺 𑀳𑀺 𑀯𑀺𑀦𑀸𑀯 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀁 𑀇𑀝𑁆𑀞𑀁 ‘‘𑀅𑀦𑀺𑀝𑁆𑀞’’𑀦𑁆𑀢𑀺, 𑀅𑀦𑀺𑀝𑁆𑀞𑀜𑁆𑀘 ‘‘𑀇𑀝𑁆𑀞’’𑀦𑁆𑀢𑀺 𑀕𑀬𑁆𑀳𑀢𑀻𑀢𑀺.

𑀢𑁂𑀦 𑀯𑀺𑀧𑀸𑀓𑁂𑀦𑀸𑀢𑀺 𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑁂𑀦. 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀢𑀦𑁆𑀢𑀺 𑀬𑀢𑁆𑀣 𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀩𑀼𑀤𑁆𑀥𑀭𑀽𑀧𑀸𑀤𑀺𑀓𑀲𑁆𑀲 𑀕𑀽𑀣𑀸𑀤𑀺𑀓𑀲𑁆𑀲 𑀘 𑀆𑀭𑀫𑁆𑀫𑀡𑀲𑁆𑀲 𑀬𑀣𑀸𑀓𑁆𑀓𑀫𑀁 𑀇𑀝𑁆𑀞𑀢𑀁 𑀅𑀦𑀺𑀝𑁆𑀞𑀢𑀜𑁆𑀘 𑀦𑀺𑀤𑀲𑁆𑀲𑁂𑀢𑀺. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂 𑀆𑀭𑀫𑁆𑀫𑀡𑁂𑀦 𑀯𑀺𑀧𑀸𑀓𑀦𑀺𑀬𑀫𑀤𑀲𑁆𑀲𑀦𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀓𑀼𑀲𑀮𑀯𑀺𑀧𑀸𑀓𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀅𑀓𑀼𑀲𑀮𑀯𑀺𑀧𑀸𑀓𑁄𑀯𑀸𑀢𑀺 𑀏𑀯𑀁 𑀆𑀭𑀫𑁆𑀫𑀡𑁂𑀦 𑀯𑀺𑀧𑀸𑀓𑀦𑀺𑀬𑀫𑀤𑀲𑁆𑀲𑀦𑀁. 𑀆𑀭𑀫𑁆𑀫𑀡𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀬𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀁 𑀇𑀝𑁆𑀞𑀁 𑀦𑀸𑀫. 𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀁 𑀅𑀦𑀺𑀝𑁆𑀞𑀁 𑀦𑀸𑀫𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀆𑀭𑀫𑁆𑀫𑀡𑁂𑀦 𑀦𑀺𑀬𑀸𑀫𑀺𑀢𑁄 𑀳𑀺 𑀯𑀺𑀧𑀸𑀓𑁄 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀦𑀺𑀬𑀸𑀫𑀓𑁄 𑀳𑁄𑀢𑀻𑀢𑀺.

𑀤𑁆𑀯𑀸𑀭𑀦𑁆𑀢𑀭𑁂 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑁂 𑀲𑀼𑀔𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀢𑁄, 𑀤𑁆𑀯𑀸𑀭𑀦𑁆𑀢𑀭𑁂 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑁂 𑀤𑀼𑀓𑁆𑀔𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀢𑁄 𑀯𑀺𑀧𑀸𑀓𑁂𑀦 𑀆𑀭𑀫𑁆𑀫𑀡𑀦𑀺𑀬𑀫𑀤𑀲𑁆𑀲𑀦𑁂𑀦 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀤𑀲𑁆𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁭. 𑀤𑀼𑀧𑁆𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑁂𑀦 𑀮𑀓𑁆𑀔𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀤𑀺𑀲𑀪𑀸𑀯𑀲𑁆𑀲 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸, 𑀏𑀯𑀁 𑀲𑀼𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀮𑀓𑁆𑀔𑀡𑀲𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀤𑀽𑀭𑁂’’𑀢𑀺 𑀅𑀯𑀼𑀢𑁆𑀢𑀲𑁆𑀲𑀸𑀢𑀺 𑀮𑀓𑁆𑀔𑀡𑀢𑁄 ‘‘𑀤𑀽𑀭𑁂’’𑀢𑀺 𑀅𑀓𑀣𑀺𑀢𑀲𑁆𑀲. 𑀯𑀼𑀢𑁆𑀢𑀫𑁆𑀧𑀻𑀢𑀺 𑀮𑀓𑁆𑀔𑀡𑀢𑁄 ‘‘𑀤𑀽𑀭𑁂’’𑀢𑀺 𑀯𑀼𑀢𑁆𑀢𑀫𑁆𑀧𑀺 𑀲𑀼𑀔𑀼𑀫𑀭𑀽𑀧𑀁.

‘‘𑀪𑀺𑀦𑁆𑀤𑀫𑀸𑀦𑁄’’𑀢𑀺 𑀲𑀫𑁆𑀪𑀺𑀦𑁆𑀤𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀫𑀺𑀲𑁆𑀲𑀓𑀁 𑀓𑀭𑁄𑀦𑁆𑀢𑁄’’𑀢𑀺. 𑀬𑀲𑁆𑀫𑀸 𑀧𑀦 𑀪𑁂𑀤𑀦𑀁 𑀯𑀺𑀪𑀸𑀕𑀓𑀭𑀡𑀫𑁆𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 ‘‘𑀪𑀺𑀦𑁆𑀤𑀫𑀸𑀦𑁄’’𑀢𑀺 𑀧𑀤𑀲𑁆𑀲 ‘‘𑀯𑀺𑀲𑀼𑀁 𑀓𑀭𑁄𑀦𑁆𑀢𑁄’’𑀢𑀺 𑀅𑀢𑁆𑀣𑀫𑀸𑀳. 𑀢𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀪𑀺𑀦𑁆𑀤𑀫𑀸𑀦𑁄𑀢𑀺 𑀯𑀺𑀦𑀸𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀦𑁆𑀢𑀺𑀓𑀪𑀸𑀯𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀽𑀭𑀪𑀸𑀯𑀁, 𑀤𑀽𑀭𑀪𑀸𑀯𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀢𑀺𑀓𑀪𑀸𑀯𑀁 𑀓𑀭𑁄𑀦𑁆𑀢𑁄’’𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀦𑁆𑀢𑀺𑀓𑀲𑁆𑀲 𑀢𑀩𑁆𑀪𑀸𑀯𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀤𑀽𑀭𑀪𑀸𑀯𑀁 𑀓𑀸𑀢𑀼𑀁, 𑀢𑀣𑀸 𑀇𑀢𑀭𑀲𑁆𑀲𑀸𑀧𑀺. 𑀲𑀦𑁆𑀢𑀺𑀓𑀪𑀸𑀯𑀓𑀭𑀡𑁂𑀦 𑀦 𑀪𑀺𑀦𑁆𑀤𑀢𑀺 𑀦 𑀯𑀺𑀦𑀸𑀲𑁂𑀢𑀺, 𑀦 𑀘 𑀑𑀓𑀸𑀲𑀤𑀽𑀭𑀢𑁄 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀯𑀺𑀲𑀼𑀁 𑀓𑀭𑀡𑁂𑀦 𑀪𑀺𑀦𑁆𑀤𑀢𑀺 𑀯𑀺𑀪𑀸𑀕𑀁 𑀓𑀭𑁄𑀢𑀺, 𑀦𑀸𑀧𑀺 𑀑𑀓𑀸𑀲𑀤𑀽𑀭𑁂𑀦 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀯𑁄𑀫𑀺𑀲𑁆𑀲𑀓𑀓𑀭𑀡𑁂𑀦 𑀪𑀺𑀦𑁆𑀤𑀢𑀺 𑀲𑀫𑁆𑀪𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀺𑀥𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀯𑀺𑀲𑀼𑀁 𑀓𑀭𑁄𑀢𑀺, 𑀯𑁄𑀫𑀺𑀲𑁆𑀲𑀓𑀁 𑀓𑀭𑁄𑀢𑀻𑀢𑀺 𑀓𑀭𑁄𑀢𑀺-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. ‘‘𑀏𑀢𑁆𑀣𑀸𑀧𑀻’’𑀢𑀺𑀆𑀤𑀺𑀦𑀸 𑀬𑀣𑀸 ‘‘𑀑𑀓𑀸𑀲𑀢𑁄 𑀤𑀽𑀭𑀫𑁂𑀯 𑀪𑀺𑀦𑁆𑀤𑀢𑀻’’𑀢𑀺 𑀏𑀢𑁆𑀣 𑀑𑀓𑀸𑀲𑀢𑁄 𑀤𑀽𑀭𑀲𑁆𑀲 𑀑𑀓𑀸𑀲𑀢𑁄 𑀲𑀦𑁆𑀢𑀺𑀓𑀪𑀸𑀯𑀓𑀭𑀡𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀦𑀸𑀲𑀦𑀁 𑀪𑁂𑀤𑀦𑀁, 𑀏𑀯𑀁 ‘‘𑀦 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀪𑀺𑀦𑁆𑀤𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀮𑀓𑁆𑀔𑀡𑀢𑁄 𑀤𑀽𑀭𑀲𑁆𑀲 𑀮𑀓𑁆𑀔𑀡𑀢𑁄 𑀲𑀦𑁆𑀢𑀺𑀓𑀪𑀸𑀯𑀸𑀓𑀭𑀡𑀁 𑀅𑀪𑁂𑀤𑀦𑀁 𑀅𑀯𑀺𑀦𑀸𑀲𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑁄𑀫𑀺𑀲𑁆𑀲𑀓𑀓𑀭𑀡𑀯𑀺𑀪𑀸𑀕𑀓𑀭𑀡𑀢𑁆𑀣𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀪𑀺𑀦𑁆𑀤𑀫𑀸𑀦𑁄𑀢𑀺 𑀏𑀢𑁆𑀣 𑀘 𑀅𑀜𑁆𑀜𑀣𑀸 𑀪𑁂𑀤𑀦𑀁 𑀯𑀼𑀢𑁆𑀢’’𑀦𑁆𑀢𑀺. 𑀧𑀘𑁆𑀙𑀺𑀫𑀦𑀬𑁂 𑀯𑀺𑀦𑀸𑀲𑀦𑀢𑁆𑀣𑀫𑁂𑀯 𑀲𑀦𑁆𑀥𑀸𑀬 ‘‘𑀪𑁂𑀤𑀦𑀁 𑀇𑀥 𑀘 𑀅𑀜𑁆𑀜𑀣𑀸 𑀯𑀼𑀢𑁆𑀢’’𑀦𑁆𑀢𑀺 𑀅𑀯𑁄𑀘.

𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮. 𑀘𑀓𑁆𑀔𑀸𑀤𑀬𑁄 𑀧𑀲𑀸𑀤𑀸𑀢𑀺 𑀑𑀴𑀸𑀭𑀺𑀓𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀧𑀲𑀸𑀤𑀸, 𑀫𑀦𑁄𑀫𑀬𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀘𑀓𑁆𑀔𑀼𑀲𑁄𑀢𑀧𑁆𑀧𑀲𑀸𑀤𑀸 𑀘. 𑀓𑀸𑀬𑀯𑁄𑀳𑀸𑀭𑀁 𑀅𑀭𑀳𑀦𑁆𑀢𑀻𑀢𑀺 𑀓𑀸𑀬𑀦𑁆𑀢𑁄𑀕𑀥𑀢𑁆𑀢𑀸 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀘 𑀓𑀸𑀬𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀓𑀸𑀬𑁄𑀢𑀺 𑀳𑀺 𑀅𑀢𑁆𑀢𑀪𑀸𑀯𑁄𑀧𑀺 𑀯𑀼𑀘𑁆𑀘𑀢𑀺 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁧; 𑁩.𑁧𑁫𑁫), 𑀓𑀭𑀚𑀓𑀸𑀬𑁄𑀧𑀺 ‘‘𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁩.𑁧𑁪). 𑀢𑀩𑁆𑀩𑀢𑁆𑀣𑀼𑀓𑀸𑀢𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀸 𑀓𑀸𑀬𑀺𑀓𑀸𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀘𑁂𑀢𑀲𑀺𑀓𑀸𑀯. 𑀬𑀣𑀸𑀳 ‘‘𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢’’𑀦𑁆𑀢𑀺𑀆𑀤𑀺 (𑀥. 𑀲. 𑁧𑁫𑁨). ‘‘𑀦 𑀳𑀺 𑀘𑀓𑁆𑀔𑀸𑀤𑀬𑁄 𑀓𑀸𑀬𑀧𑁆𑀧𑀲𑀸𑀤𑀸 𑀳𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑀲𑀸𑀤𑀦𑀺𑀲𑁆𑀲𑀺𑀢𑀸 𑀯𑁂𑀤𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀸𑀬𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀤𑀺𑀪𑀸𑀯𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀪𑀸𑀯𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂𑀦𑀸𑀢𑀺 𑀲𑀼𑀔𑀸𑀤𑀺𑀯𑁂𑀤𑀦𑁂𑀓𑀤𑁂𑀲𑀲𑁆𑀲 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑀸𑀪𑀸𑀯𑁂𑀦. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀢𑁆𑀢𑀸 𑀧𑀸𑀓𑀝𑀢𑁆𑀢𑀸 𑀅𑀤𑁆𑀥𑀸𑀯𑀲𑁂𑀦, 𑀏𑀓𑀫𑀼𑀳𑀼𑀢𑁆𑀢𑀸𑀤𑀺𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀉𑀢𑀼𑀆𑀤𑀺𑀦𑀸 𑀭𑀽𑀧𑀲𑁆𑀲 𑀯𑀺𑀬 𑀯𑁂𑀤𑀦𑀸𑀬 𑀯𑀺𑀪𑀸𑀕𑁄 𑀦 𑀕𑀬𑁆𑀳𑀢𑀻𑀢𑀺 𑀲𑀫𑀬𑀯𑀲𑁂𑀦 𑀘 𑀅𑀢𑀻𑀢𑀸𑀤𑀺𑀪𑁂𑀤𑁄 𑀦 𑀤𑀲𑁆𑀲𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀘𑀺𑀢𑁆𑀢𑁂𑀦 𑀲𑀫𑀽𑀳𑀢𑁄 𑀕𑀳𑁂𑀢𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀯𑁂𑀤𑀦𑀸𑀲𑀫𑀼𑀤𑀸𑀬𑁄’’𑀢𑀺. 𑀢𑁂𑀳𑀻𑀢𑀺 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑁂𑀳𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀪𑀗𑁆𑀕𑁂. 𑀢𑁂𑀢𑀺 ‘‘𑀯𑁂𑀤𑀦𑁂𑀓𑀤𑁂𑀲𑀸’’𑀢𑀺 𑀯𑀼𑀢𑁆𑀢𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀤𑀺𑀪𑀸𑀯𑁂𑀦 𑀪𑀺𑀦𑁆𑀦𑀸 𑀲𑀼𑀔𑀸𑀤𑀺𑀯𑁂𑀤𑀦𑀸𑀯𑀺𑀲𑁂𑀲𑀸. 𑀬𑀤𑀺 𑀯𑁂𑀤𑀦𑁂𑀓𑀤𑁂𑀲𑀸 𑀏𑀢𑁆𑀣 𑀕𑀳𑀺𑀢𑀸, 𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸𑀯 𑀢𑁂 𑀕𑀳𑁂𑀢𑀩𑁆𑀩𑀸, 𑀦 𑀲𑀦𑁆𑀢𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀆𑀳 ‘‘𑀏𑀓𑀲𑀦𑁆𑀢𑀢𑀺𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑁂𑀲𑀽𑀢𑀺 𑀲𑀼𑀔𑀸𑀤𑀺𑀪𑁂𑀤𑁂𑀲𑀼. 𑀪𑁂𑀤𑁄𑀢𑀺 𑀯𑀺𑀲𑁂𑀲𑁄. 𑀢𑀲𑁆𑀲𑀸𑀢𑀺 𑀲𑀼𑀔𑀸𑀤𑀺𑀯𑀺𑀲𑁂𑀲𑀲𑁆𑀲. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀢𑀁𑀲𑀳𑀺𑀢𑀢𑀤𑀼𑀧𑁆𑀧𑀸𑀤𑀓𑀸’’𑀢𑀺 𑀏𑀢𑁆𑀣𑀸𑀧𑀺 𑀢𑀁-𑀲𑀤𑁆𑀤𑁂𑀦 𑀲𑀼𑀔𑀸𑀤𑀺𑀯𑀺𑀲𑁂𑀲𑁄 𑀧𑀘𑁆𑀘𑀸𑀫𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀦𑁆𑀢𑀢𑀺 𑀧𑀭𑀺𑀘𑁆𑀙𑁂𑀤𑀺𑀓𑀸 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀢𑀢𑀺𑀔𑀡𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀦 𑀅𑀤𑁆𑀥𑀸𑀲𑀫𑀬𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀕𑀢𑀸’’𑀢𑀺 𑀦𑀺𑀝𑁆𑀞𑀺𑀢𑀳𑁂𑀢𑀼𑀓𑀺𑀘𑁆𑀘𑀸 𑀅𑀦𑀺𑀝𑁆𑀞𑀺𑀢𑀧𑀘𑁆𑀘𑀬𑀓𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀸, 𑀢𑀁 𑀧𑀦 𑀅𑀢𑀺𑀓𑁆𑀓𑀦𑁆𑀢𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀦𑀬𑀲𑁆𑀲 𑀉𑀧𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀕𑀢𑀸𑀢𑀺 𑀏𑀢𑁂𑀦 𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀻’’𑀢𑀺. 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑁂𑀤𑀦𑀸𑀦𑀁 𑀭𑀽𑀧𑀲𑁆𑀲 𑀯𑀺𑀬, 𑀯𑀺𑀧𑀸𑀓𑀸𑀦𑀁 𑀯𑀺𑀬 𑀘 𑀅𑀬𑀁 𑀦𑀸𑀫 𑀚𑀦𑀓𑀳𑁂𑀢𑀽𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀧𑀭𑀺𑀬𑀸𑀬𑁂𑀦 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁄 𑀳𑁂𑀢𑀽𑀢𑀺 𑀯𑀢𑁆𑀢𑀩𑁆𑀩𑁄.

𑁧𑁧. 𑀲𑀦𑁆𑀢𑀸𑀧𑀦𑀓𑀺𑀘𑁆𑀘𑀦𑁆𑀢𑀺 𑀧𑀭𑀺𑀟𑀳𑀦𑀓𑀺𑀘𑁆𑀘𑀁. 𑀚𑀸𑀢𑀺𑀆𑀤𑀺𑀲𑀗𑁆𑀓𑀭𑀦𑁆𑀢𑀺 𑀚𑀸𑀢𑀺𑀲𑀪𑀸𑀯𑀧𑀼𑀕𑁆𑀕𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄 𑀲𑀗𑁆𑀓𑀭𑀁 𑀲𑀫𑁆𑀪𑁂𑀤𑀁 𑀅𑀓𑀢𑁆𑀯𑀸. 𑀲𑀫𑀸𑀦𑀚𑀸𑀢𑀺𑀬𑀦𑁆𑀢𑀺 𑀏𑀓𑀚𑀸𑀢𑀺𑀬𑀁. 𑀲𑀼𑀔𑀢𑁄 𑀢𑀚𑁆𑀚𑀸𑀢𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀧𑀡𑀻𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀦𑀪𑁂𑀤𑁂𑀢𑀺 𑀪𑀽𑀫𑀦𑁆𑀢𑀭𑀸𑀤𑀺𑀲𑀫𑀸𑀦𑀯𑀺𑀪𑀸𑀕𑁂. 𑀉𑀧𑀩𑁆𑀭𑀽𑀳𑀺𑀢𑀸𑀦𑀁 𑀥𑀸𑀢𑀽𑀦𑀦𑁆𑀢𑀺 𑀉𑀴𑀸𑀭𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀦 𑀧𑀡𑀻𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁. 𑀯𑀺𑀩𑀸𑀥𑀺𑀢𑀸𑀦𑀦𑁆𑀢𑀺 𑀦𑀺𑀧𑁆𑀧𑀻𑀴𑀺𑀢𑀸𑀦𑀁 𑀫𑀺𑀮𑀸𑀧𑀺𑀢𑀸𑀦𑀁. 𑀉𑀪𑀬𑀦𑁆𑀢𑀺 𑀲𑀼𑀔𑀸𑀤𑀺𑀤𑁆𑀯𑀬𑀁. 𑀏𑀢𑁆𑀣 𑀘 𑀔𑁄𑀪𑀦𑀸, 𑀆𑀮𑀼𑀴𑀦𑀸 𑀘 𑀓𑀸𑀬𑀺𑀓𑀲𑀼𑀔𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀲𑀦𑁆𑀤𑀦𑀸 𑀛𑀸𑀦𑀲𑀼𑀔𑀲𑁆𑀲. 𑀫𑀤𑀬𑀦𑀸 𑀓𑀸𑀫𑀲𑀼𑀔𑀲𑁆𑀲. 𑀢𑀣𑀸 𑀙𑀸𑀤𑀦𑀸. 𑀆𑀲𑀺𑀜𑁆𑀘𑀦𑀸 𑀲𑀩𑁆𑀩𑀲𑁆𑀲. 𑀙𑀸𑀤𑀦𑀸 𑀆𑀲𑀺𑀜𑁆𑀘𑀦𑀸 𑀯𑀸 𑀲𑀩𑁆𑀩𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑀪𑀸𑀯𑀸𑀤𑀺𑀪𑁂𑀤𑁂𑀦 𑀘𑀸𑀢𑀺 𑀲𑀪𑀸𑀯𑀧𑀼𑀕𑁆𑀕𑀮𑀮𑁄𑀓𑀺𑀬𑀸𑀤𑀺𑀪𑁂𑀤𑁂𑀦 𑀘. 𑀏𑀓𑀦𑁆𑀢𑀧𑀡𑀻𑀢𑁂 𑀮𑁄𑀓𑀼𑀢𑁆𑀢𑀭𑁂 𑀳𑀻𑀦𑀧𑀡𑀻𑀢𑀸𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀳𑀻𑀦𑀧𑀡𑀻𑀢𑀢𑀸. 𑀏𑀓𑀦𑁆𑀢𑀳𑀻𑀦𑁂 𑀅𑀓𑀼𑀲𑀮𑁂 𑀙𑀦𑁆𑀤𑀸𑀤𑀺𑀯𑀲𑁂𑀦 𑀳𑀻𑀦𑀧𑀡𑀻𑀢𑀢𑀸, 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀘. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸 𑀑𑀴𑀸𑀭𑀺𑀓𑀸, 𑀲𑀸 𑀳𑀻𑀦𑀸. 𑀬𑀸 𑀲𑀼𑀔𑀼𑀫𑀸, 𑀲𑀸 𑀧𑀡𑀻𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁧). 𑀅𑀓𑀼𑀲𑀮𑀸𑀤𑀻𑀲𑀼 𑀤𑁄𑀲𑀲𑀳𑀕𑀢𑀸𑀤𑀺𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀢𑀁𑀢𑀁𑀯𑀸𑀧𑀦𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀦 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀁𑀢𑀁𑀯𑀸𑀧𑀦𑀯𑀲𑁂𑀦 𑀓𑀣𑀦𑁂𑀧𑀺 𑀧𑀭𑀺𑀯𑀢𑁆𑀢𑀦𑀁 𑀦𑀢𑁆𑀣𑀻’’𑀢𑀺. 𑀤𑁄𑀲𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀓𑀺𑀮𑁂𑀲𑀸𑀥𑀺𑀓𑀢𑀸𑀬. 𑀢𑀣𑀸𑀢𑀺 𑀤𑁄𑀲𑀼𑀲𑁆𑀲𑀦𑁆𑀦𑀢𑀸𑀬. 𑀓𑀣𑀁 𑀧𑀦 𑀓𑀼𑀲𑀮𑁂𑀲𑀼 𑀤𑁄𑀲𑀼𑀲𑁆𑀲𑀦𑁆𑀦𑀢𑀸? 𑀉𑀧𑀦𑀺𑀲𑁆𑀲𑀬𑀯𑀲𑁂𑀦, 𑀓𑀺𑀮𑁂𑀲𑀸𑀥𑀺𑀓𑁂𑀳𑀺 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀺𑀮𑁂𑀲𑁂𑀳𑀺 𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑀺𑀬𑀸 𑀢𑀺𑀡𑀸𑀤𑀻𑀳𑀺 𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑀸𑀦𑀺 𑀯𑀺𑀬 𑀲𑀲𑁆𑀲𑀸𑀦𑀺 𑀯𑀺𑀧𑀼𑀮𑀨𑀮𑀉𑀴𑀸𑀭𑀨𑀮𑀸 𑀦 𑀳𑁄𑀦𑁆𑀢𑀻𑀢𑀺. 𑀢𑀣𑀸𑀢𑀺 𑀫𑀦𑁆𑀤𑀤𑁄𑀲𑀢𑀸𑀬. 𑀓𑀼𑀲𑀮𑀸𑀦𑀁 𑀫𑀦𑁆𑀤𑀤𑁄𑀲𑀢𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀑𑀴𑀸𑀭𑀺𑀓𑀲𑀼𑀔𑀼𑀫𑀦𑀺𑀓𑀦𑁆𑀢𑀻𑀢𑀺 𑀏𑀢𑁆𑀣 𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀁 𑀦𑀺𑀓𑀦𑁆𑀢𑀺𑀬𑀸 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀲𑀸𑀫𑀜𑁆𑀜𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑁂𑀢𑁆𑀣 𑀑𑀴𑀸𑀭𑀺𑀓𑀲𑀸𑀫𑀜𑁆𑀜𑁂𑀦 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀢𑀭𑁄𑀴𑀸𑀭𑀺𑀓𑀢𑀫𑀸 𑀦𑀺𑀓𑀦𑁆𑀢𑀺𑀬𑁄 𑀕𑀬𑁆𑀳𑀦𑁆𑀢𑀺, 𑀢𑀣𑀸 𑀲𑀼𑀔𑀼𑀫𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀸 𑀲𑀼𑀔𑀼𑀫𑀢𑀸𑀲𑀸𑀫𑀜𑁆𑀜𑁂𑀦 𑀕𑀬𑁆𑀳𑀦𑁆𑀢𑀻𑀢𑀺. 𑀲𑀼𑀔𑀼𑀫𑀢𑀫𑀦𑀺𑀓𑀦𑁆𑀢𑀺𑀯𑀢𑁆𑀣𑀼𑀦𑁆𑀢𑀺 𑀘𑁂𑀢𑁆𑀣 𑀬𑀸𑀯 𑀪𑀯𑀕𑁆𑀕𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁧𑁩. 𑀬𑀤𑀺 𑀲𑀺𑀬𑀸𑀢𑀺 𑀬𑀤𑀺 𑀅𑀲𑀫𑁆𑀧𑀬𑁄𑀕𑁄 𑀯𑀺𑀲𑀁𑀲𑀝𑁆𑀞𑁄 𑀲𑀺𑀬𑀸.

𑀲𑀦𑁆𑀢𑀺𑀓𑀢𑁄 𑀅𑀓𑀼𑀲𑀮𑀢𑁄𑀢𑀺 𑀅𑀓𑀼𑀲𑀮𑀪𑀸𑀯𑁂𑀦 𑀲𑀦𑁆𑀢𑀺𑀓𑀢𑁄 𑀮𑁄𑀪𑀲𑀳𑀕𑀢𑀸𑀤𑀺𑀅𑀓𑀼𑀲𑀮𑀯𑁂𑀤𑀬𑀺𑀢𑀢𑁄. 𑀅𑀓𑀼𑀲𑀮𑀸𑀢𑀺 𑀤𑁄𑀲𑀲𑀳𑀕𑀢𑀸𑀤𑀺𑀅𑀓𑀼𑀲𑀮𑀯𑁂𑀤𑀦𑀸 𑀤𑀽𑀭𑁂𑀢𑀺 𑀬𑀣𑀸 𑀉𑀤𑁆𑀥𑀭𑀻𑀬𑀢𑀺. 𑀢𑀢𑁄 𑀤𑀽𑀭𑀢𑁄 𑀓𑀼𑀲𑀮𑀢𑁄𑀢𑀺 𑀢𑀢𑁄 𑀅𑀓𑀼𑀲𑀮𑀢𑁄 𑀤𑀽𑀭𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀓𑀼𑀲𑀮𑀯𑁂𑀤𑀬𑀺𑀢𑀢𑁄 𑀓𑀼𑀲𑀮𑀸 𑀓𑀸𑀫𑀸𑀯𑀘𑀭𑀸𑀤𑀺𑀓𑀼𑀲𑀮𑀯𑁂𑀤𑀦𑀸. ‘‘𑀦 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑀁 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 ‘‘𑀢𑀣𑀸 𑀳𑀺 𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀽𑀭𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀁 𑀯𑀼𑀢𑁆𑀢𑀦𑀬𑁂𑀦 𑀲𑀦𑁆𑀢𑀺𑀓𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀫𑁂𑀯 𑀳𑁄𑀢𑀺, 𑀢𑀣𑀸 𑀲𑀢𑀺 𑀅𑀢𑁆𑀣𑀯𑀺𑀲𑁂𑀲𑁄 𑀦 𑀳𑁄𑀢𑀺, 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀢𑀸 𑀇𑀥 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀦𑁆𑀢𑀺𑀓𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀜𑁆𑀘 𑀦 𑀲𑀓𑁆𑀓𑀸 𑀓𑀸𑀢𑀼𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄, 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀦𑀼 𑀘 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀅𑀢𑁆𑀣𑁂𑀯 𑀅𑀢𑁆𑀣𑀯𑀺𑀲𑁂𑀲𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀤𑀽𑀭𑀤𑀽𑀭𑀢𑀭𑀢𑀸𑀬 𑀯𑀺𑀬 𑀲𑀦𑁆𑀢𑀺𑀓𑀲𑀦𑁆𑀢𑀺𑀓𑀢𑀭𑀢𑀸𑀬 𑀘 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸’’𑀢𑀺. 𑀬𑀸𑀢𑀺 𑀅𑀓𑀼𑀲𑀮𑀯𑁂𑀤𑀦𑀸. 𑀢𑀢𑁄𑀢𑀺 𑀓𑀼𑀲𑀮𑀯𑁂𑀤𑀬𑀺𑀢𑀢𑁄. 𑀇𑀥 𑀯𑀼𑀢𑁆𑀢𑀲𑁆𑀲 𑀤𑀽𑀭𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 ‘‘𑀅𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀯𑁂𑀤𑀦𑀸𑀳𑀺 𑀤𑀽𑀭𑁂’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁩) 𑀯𑀼𑀢𑁆𑀢𑀲𑁆𑀲 𑀤𑀽𑀭𑀲𑁆𑀲. 𑀤𑀽𑀭𑀢𑁄 𑀅𑀘𑁆𑀘𑀦𑁆𑀢𑀯𑀺𑀲𑀪𑀸𑀕𑀢𑁆𑀢𑀸𑀢𑀺 𑀬𑀢𑁄 𑀬𑀁 ‘‘𑀤𑀽𑀭𑁂’’𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀅𑀘𑁆𑀘𑀦𑁆𑀢𑀯𑀺𑀲𑀤𑀺𑀲𑀢𑁆𑀢𑀸 𑀢𑀲𑁆𑀲 𑀯𑀲𑁂𑀦 𑀤𑀽𑀭𑁂 𑀲𑀦𑁆𑀢𑀺𑀓𑀁 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀼𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀳𑁂𑀝𑁆𑀞𑀸 𑀬𑀸 𑀯𑁂𑀤𑀦𑀸 𑀬𑀸𑀬 𑀯𑁂𑀤𑀦𑀸𑀬 𑀤𑀽𑀭𑁂𑀢𑀺 𑀯𑀼𑀢𑁆𑀢𑀸, 𑀲𑀸 𑀏𑀯 𑀢𑀲𑁆𑀲𑀸 𑀓𑁂𑀦𑀘𑀺𑀧𑀺 𑀧𑀭𑀺𑀬𑀸𑀬𑁂𑀦 𑀲𑀦𑁆𑀢𑀺𑀓𑁂𑀢𑀺 𑀦 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺. 𑀲𑀦𑁆𑀢𑀺𑀓𑁂𑀢𑀺 𑀯𑀼𑀢𑁆𑀢𑀯𑁂𑀤𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀺𑀦𑁆𑀦𑁂𑀢𑀺 𑀮𑁄𑀪𑀲𑀳𑀕𑀢𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑁂. 𑀢𑀢𑁆𑀣𑁂𑀯𑀸𑀢𑀺 ‘‘𑀲𑀦𑁆𑀢𑀺𑀓𑁂’’𑀢𑀺 𑀯𑀼𑀢𑁆𑀢𑀅𑀢𑁆𑀣𑁂 𑀏𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀓𑀼𑀲𑀮𑀸 𑀯𑁂𑀤𑀦𑀸 𑀅𑀓𑀼𑀲𑀮𑀸𑀬 𑀯𑁂𑀤𑀦𑀸𑀬 𑀲𑀦𑁆𑀢𑀺𑀓𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑀅𑀓𑀼𑀲𑀮𑀸𑀬 𑀯𑁂𑀤𑀦𑀸𑀬𑀫𑁂𑀯 𑀮𑁄𑀪𑀲𑀳𑀕𑀢𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀸𑀬 𑀤𑀽𑀭𑀪𑀸𑀯𑁄𑀧𑀺 𑀮𑀩𑁆𑀪𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺.

𑀬𑀤𑀺 𑀲𑀦𑁆𑀢𑀺𑀓𑀢𑁄 𑀤𑀽𑀭𑀁 𑀮𑀩𑁆𑀪𑀢𑀺, 𑀬𑀤𑀕𑁆𑀕𑁂𑀦 𑀤𑀽𑀭𑀁 𑀮𑀩𑁆𑀪𑀢𑀺, 𑀢𑀤𑀕𑁆𑀕𑁂𑀦 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀬𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀢𑁄 𑀘 𑀲𑀦𑁆𑀢𑀺𑀓𑀁 𑀦 𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀲𑀦𑁆𑀢𑀺𑀓𑀢𑁄 𑀤𑀽𑀭𑀁 𑀮𑀩𑁆𑀪𑀢𑀺, 𑀬𑀤𑀺𑀧𑀺 𑀢𑀁 𑀯𑀺𑀲𑀪𑀸𑀕𑀝𑁆𑀞𑁂𑀦 𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀬𑀁 𑀢𑀢𑁆𑀣 𑀲𑀦𑁆𑀢𑀺𑀓𑀁 𑀮𑀩𑁆𑀪𑀢𑀺, 𑀢𑀁 𑀲𑀪𑀸𑀕𑀝𑁆𑀞𑁂𑀦𑁂𑀯 𑀮𑀩𑁆𑀪𑀢𑀻𑀢𑀺 𑀲𑀦𑁆𑀢𑀺𑀓𑀢𑁄𑀯 𑀲𑀦𑁆𑀢𑀺𑀓𑀁 𑀉𑀤𑁆𑀥𑀝𑀁 𑀲𑀺𑀬𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀲𑀪𑀸𑀕𑀝𑁆𑀞𑁂𑀦 𑀤𑀽𑀭𑀢𑀸, 𑀲𑀪𑀸𑀕𑀝𑁆𑀞𑁂𑀦 𑀘 𑀲𑀦𑁆𑀢𑀺𑀓𑀢𑀸 𑀇𑀘𑁆𑀙𑀺𑀢𑀸, 𑀢𑀲𑁆𑀫𑀸. 𑀮𑁄𑀪𑀲𑀳𑀕𑀢𑀸𑀬 𑀤𑁄𑀲𑀲𑀳𑀕𑀢𑀸 𑀯𑀺𑀲𑀪𑀸𑀕𑀢𑀸𑀬 𑀤𑀽𑀭𑁂 𑀲𑀫𑀸𑀦𑀸 𑀓𑀣𑀁 𑀲𑀦𑁆𑀢𑀺𑀓𑁂 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀢𑀸𑀲𑀁 𑀅𑀓𑀼𑀲𑀮𑀲𑀪𑀸𑀕𑀢𑀸 𑀮𑀩𑁆𑀪𑀢𑁂𑀯𑀸𑀢𑀺 𑀢𑀢𑁆𑀣 𑀉𑀢𑁆𑀢𑀭𑀫𑀸𑀳 ‘‘𑀯𑀺𑀲𑀪𑀸𑀕𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦 𑀧𑀯𑀢𑁆𑀢𑀢𑀻𑀢𑀺 𑀪𑁂𑀤𑀁 𑀯𑀺𑀲𑁂𑀲𑀁 𑀅𑀲𑀤𑀺𑀲𑀢𑀁 𑀕𑀳𑁂𑀢𑁆𑀯𑀸 𑀏𑀯 𑀧𑀯𑀢𑁆𑀢𑀢𑀺 𑀯𑀺𑀲𑀪𑀸𑀕𑀢𑀸. 𑀤𑀽𑀭𑀢𑀸𑀬𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀬 𑀤𑀽𑀭𑀢𑀸𑀬 𑀲𑀪𑀸𑀕𑀲𑁆𑀲 𑀅𑀩𑁆𑀬𑀸𑀧𑀓𑀢𑁆𑀢𑀸 𑀤𑀽𑀭𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀲𑀢𑀺 𑀳𑀺 𑀲𑀪𑀸𑀕𑀩𑁆𑀬𑀸𑀧𑀓𑀢𑁆𑀢𑁂 𑀲𑀺𑀬𑀸 𑀲𑀦𑁆𑀢𑀺𑀓𑀢𑀸𑀢𑀺 𑀤𑀽𑀭𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀲𑀪𑀸𑀕𑀢𑀸𑀢𑀺 𑀲𑀸𑀫𑀜𑁆𑀜𑀁. 𑀪𑁂𑀤𑀦𑁆𑀢𑀺 𑀯𑀺𑀲𑁂𑀲𑀁. 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸𑀯𑀸𑀢𑀺 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸𑀯. 𑀯𑀺𑀲𑀪𑀸𑀕𑀩𑁆𑀬𑀸𑀧𑀓𑀢𑁆𑀢𑀸 𑀲𑀦𑁆𑀢𑀺𑀓𑀢𑀸𑀬𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀯𑀺𑀲𑀪𑀸𑀕𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀦𑁆𑀢𑀺𑀓𑀢𑀸𑀬 𑀲𑀦𑁆𑀢𑀺𑀓𑀢𑁄 𑀤𑀽𑀭𑀼𑀤𑁆𑀥𑀭𑀡𑀁 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀫𑁂𑀯𑀢𑁆𑀣𑀁 ‘‘𑀅𑀓𑀼𑀲𑀮𑀢𑀸 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀁 𑀓𑀭𑁄𑀢𑀺.

𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭. 𑀢𑀲𑁆𑀲𑀸𑀧𑀻𑀢𑀺 𑀲𑀜𑁆𑀜𑀸𑀬𑀧𑀺. 𑀢𑀩𑁆𑀩𑀢𑁆𑀣𑀼𑀓𑀢𑁆𑀢𑀸𑀢𑀺 𑀘𑀓𑁆𑀔𑀼𑀯𑀢𑁆𑀣𑀼𑀓𑀢𑁆𑀢𑀸. 𑀧𑀝𑀺𑀖𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀖𑀢𑁄 𑀯𑀺𑀚𑀸𑀦𑀺𑀢𑀩𑁆𑀩𑁄 𑀧𑀝𑀺𑀖𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸.

𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂, 𑀦 𑀉𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀘𑀦𑀦𑁆𑀢𑀺 𑀲𑀤𑁆𑀤𑁄, 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀯𑀘𑀦𑀸𑀥𑀻𑀦𑀸𑀢𑀺 𑀕𑀳𑁂𑀢𑀩𑁆𑀩𑀢𑀁 𑀧𑀢𑀺 𑀲𑀤𑁆𑀤𑀸𑀥𑀻𑀦𑀸, 𑀦𑀸𑀫𑀸𑀬𑀢𑁆𑀢𑀕𑀳𑀡𑀸𑀢𑀺 𑀅𑀢𑁆𑀣𑁄. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀸𑀫𑀭𑀽𑀧𑀤𑀼𑀓𑁂 (𑀥. 𑀲. 𑀫𑀽𑀮𑀝𑀻. 𑁧𑁦𑁧-𑁧𑁦𑁮) 𑀯𑀼𑀢𑁆𑀢𑀫𑁂𑀯. 𑀅𑀥𑀺𑀯𑀘𑀦𑀁 𑀧𑀜𑁆𑀜𑀢𑁆𑀢𑀺𑀧𑀓𑀸𑀲𑀓𑀁 𑀜𑀸𑀧𑀓𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀥𑀺𑀯𑀘𑀦𑀸 𑀬𑀣𑀸 𑀅𑀭𑀺𑀲𑀲𑁄𑀢𑀺. 𑀢𑀢𑁄𑀚𑁄𑀢𑀺 𑀅𑀥𑀺𑀯𑀘𑀦𑀲𑀗𑁆𑀔𑀸𑀢𑀢𑁄 𑀅𑀭𑀽𑀧𑀓𑁆𑀔𑀦𑁆𑀥𑀢𑁄 𑀚𑀸𑀢𑁄. 𑀅𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀨𑀲𑁆𑀲𑁂𑀧𑀺 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀨𑀲𑁆𑀲𑁄𑀬𑁂𑀯 𑀯𑀸’’𑀢𑀺𑀆𑀤𑀺𑀫𑀸𑀳. 𑀦 𑀓𑁂𑀯𑀮𑀁 𑀫𑀦𑁄𑀤𑁆𑀯𑀸𑀭𑀺𑀓𑀨𑀲𑁆𑀲𑁂 𑀏𑀯, 𑀅𑀣 𑀔𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀨𑀲𑁆𑀲𑁂𑀧𑀺 ‘‘𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂 𑀯𑀘𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸’’𑀢𑀺𑀆𑀤𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸. 𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀧𑀭𑀺𑀬𑀸𑀬𑁂𑀦. 𑀢𑀢𑁄𑀚𑀸𑀧𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀨𑀲𑁆𑀲𑀚𑀸𑀢𑀸𑀧𑀺. 𑀅𑀜𑁆𑀜𑀧𑁆𑀧𑀓𑀸𑀭𑀸𑀲𑀫𑁆𑀪𑀯𑀢𑁄𑀢𑀺 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀧𑀭𑀺𑀬𑀸𑀬𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀆𑀯𑁂𑀡𑀺𑀓𑀁 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀢𑀸. 𑀧𑀓𑀸𑀭𑀦𑁆𑀢𑀭𑀁 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀢𑀸.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀨𑀲𑁆𑀲𑁂𑀳𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀧𑀭𑀺𑀬𑀸𑀬𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀏𑀯𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂 𑀲𑀜𑁆𑀜𑀸𑀯 𑀓𑀲𑁆𑀫𑀸 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀺𑀡𑁆𑀡𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀦𑁆𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀦𑀁. 𑀅𑀢𑁆𑀣𑀯𑀲𑁂𑀦𑀸𑀢𑀺 ‘‘𑀯𑀘𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀅𑀢𑁆𑀣𑀯𑀲𑁂𑀦 𑀅𑀦𑁆𑀯𑀢𑁆𑀣𑀢𑀸𑀯𑀲𑁂𑀦. 𑀅𑀢𑁆𑀢𑀦𑁄 𑀧𑀢𑁆𑀢𑀫𑁆𑀧𑀺 𑀦𑀸𑀫𑀦𑁆𑀢𑀺 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀦𑀼𑀧𑁆𑀧𑀢𑁆𑀢𑀫𑁆𑀧𑀺 𑀦𑀸𑀫𑀁. 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺. 𑀧𑀼𑀩𑁆𑀩𑁂 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀲𑀸𑀥𑀸𑀭𑀡𑁄𑀧𑀺 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀯𑁄𑀳𑀸𑀭𑁄 𑀭𑀼𑀴𑁆𑀳𑀺𑀯𑀲𑁂𑀦 𑀲𑀜𑁆𑀜𑀸𑀬 𑀏𑀯 𑀧𑀯𑀢𑁆𑀢𑁄𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀲𑁄 𑀢𑀤𑀜𑁆𑀜𑀸𑀭𑀽𑀧𑀓𑁆𑀔𑀦𑁆𑀥𑀲𑀸𑀥𑀸𑀭𑀡𑁄 𑀲𑀜𑁆𑀜𑀸𑀬 𑀦𑀺𑀯𑁂𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀭𑀚𑁆𑀚𑀺𑀢𑁆𑀯𑀸 𑀑𑀮𑁄𑀓𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀸𑀤𑀺 𑀯𑀺𑀬 𑀭𑀚𑁆𑀚𑀺𑀢𑁆𑀯𑀸 𑀲𑀯𑀦𑀸𑀤𑀺𑀧𑀺 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀣𑀸𑀲𑁄𑀢𑀸𑀯𑀥𑀸𑀦𑀸𑀤𑀺𑀦𑁄𑀧𑀺 𑀭𑀢𑁆𑀢𑀢𑀸𑀤𑀺𑀯𑀺𑀚𑀸𑀦𑀦𑀦𑀺𑀫𑀺𑀢𑁆𑀢𑀢𑀸𑀲𑀫𑁆𑀪𑀯𑀢𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀲𑀜𑁆𑀜𑀸𑀬 𑀧𑀦 𑀧𑀸𑀓𑀝𑀪𑀸𑀯𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀑𑀮𑁄𑀓𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀫𑀸𑀕𑀫𑁂’’𑀢𑀺𑀆𑀤𑀺𑀫𑀸𑀳.

𑀑𑀮𑁄𑀓𑀦𑀲𑁆𑀲 𑀅𑀧𑀸𑀓𑀝𑀪𑀸𑀯𑁂 𑀭𑀢𑁆𑀢𑀢𑀸𑀤𑀺𑀯𑀺𑀚𑀸𑀦𑀦𑀁 𑀦 𑀳𑁄𑀢𑀺, 𑀧𑀸𑀓𑀝𑀪𑀸𑀯𑁂 𑀘 𑀳𑁄𑀢𑀻𑀢𑀺 𑀆𑀳 ‘‘𑀧𑀲𑀸𑀤𑀯𑀢𑁆𑀣𑀼𑀓𑀸 𑀏𑀯𑀸’’𑀢𑀺. ‘‘𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢’’𑀦𑁆𑀢𑀺 𑀬𑀁 𑀧𑀼𑀩𑁆𑀩𑁂 𑀢𑁂𑀦 𑀓𑀣𑀺𑀢𑀁, 𑀓𑀸𑀬𑁂𑀦 𑀯𑀸 𑀧𑀓𑀸𑀲𑀺𑀢𑀁, 𑀢𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀘𑀺𑀦𑁆𑀢𑁂𑀦𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀜𑀸𑀢’’𑀦𑁆𑀢𑀺.

𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦. ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸𑀢𑀺 𑀏𑀢𑁆𑀣𑀸’’𑀢𑀺 𑀇𑀤𑀁 𑀧𑀞𑀫𑀁 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀪𑀼𑀫𑁆𑀫𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀢𑀢𑁆𑀣 𑀳𑀺 𑀧𑀥𑀸𑀦𑀁 𑀤𑀲𑁆𑀲𑀺𑀢’’𑀦𑁆𑀢𑀺. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸𑀯 𑀧𑀥𑀸𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀬𑀤𑀺 𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀥𑀸𑀦𑀫𑁂𑀯 𑀤𑀲𑁆𑀲𑀺𑀢’’𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀭𑀺𑀫𑀓𑁄𑀝𑀺𑀕𑀢𑀪𑀸𑀯𑁂𑀦𑀸’’𑀢𑀺𑀆𑀤𑀺𑀦𑀸 𑀢𑀁 𑀧𑀭𑀺𑀳𑀭𑀢𑀺. 𑀧𑀥𑀸𑀦𑀲𑁆𑀲𑁂𑀯 𑀤𑀲𑁆𑀲𑀦𑀁. 𑀧𑀥𑀸𑀦𑁂 𑀳𑀺 𑀤𑀲𑁆𑀲𑀺𑀢𑁂 𑀅𑀧𑁆𑀧𑀥𑀸𑀦𑀫𑁆𑀧𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀸 𑀧𑀦 𑀢𑀸𑀬 𑀕𑀳𑀺𑀢𑀸𑀬 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻’’𑀢𑀺. 𑀬𑀁 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀁 𑀮𑀩𑁆𑀪𑀢𑀺, 𑀢𑀁 𑀉𑀧𑀭𑀺𑀫𑀓𑁄𑀝𑀺𑀬𑀫𑁆𑀧𑀺 𑀮𑀩𑁆𑀪𑀢𑀺 𑀏𑀯𑀸𑀢𑀺 𑀆𑀳 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺 𑀳𑀺 𑀲𑀩𑁆𑀩𑀩𑁆𑀬𑀸𑀧𑀺𑀓𑀸’’𑀢𑀺. 𑀤𑀼𑀢𑀺𑀬𑁂 𑀓𑀭𑀡𑀦𑀺𑀤𑁆𑀤𑁂𑀲𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄’’𑀢𑀺 𑀆𑀳. 𑀆𑀕𑀫𑀦𑀓𑀺𑀭𑀺𑀬𑀸 𑀳𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀓𑀭𑀡𑀪𑀸𑀯𑁂𑀦 𑀢𑀢𑁆𑀣 𑀯𑀼𑀢𑁆𑀢𑀸𑀢𑀺. 𑀬𑀣𑀸 𑀘 𑀆𑀕𑀫𑀦𑀓𑀺𑀭𑀺𑀬𑀸𑀬, 𑀏𑀯𑀁 𑀯𑀘𑀦𑀓𑀺𑀭𑀺𑀬𑀸𑀬𑀧𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀓𑀭𑀡𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑁂𑀧𑀺 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀏𑀓𑀽𑀦𑀧𑀜𑁆𑀜𑀸𑀲𑀧𑁆𑀧𑀪𑁂𑀤𑁂’’𑀢𑀺 𑀇𑀤𑀁 𑀮𑁄𑀓𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀧𑀸𑀴𑀺𑀆𑀕𑀢𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀉𑀧𑀭𑀺𑀫𑀓𑁄𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂𑀯𑀸𑀧𑀦𑀓𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀉𑀧𑀭𑀺𑀫𑀓𑁄𑀝𑀺𑀬𑀸 𑀕𑀬𑁆𑀳𑀫𑀸𑀦𑀸𑀬 ‘‘𑀢𑁂𑀧𑀜𑁆𑀜𑀸𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀦 ‘‘𑀲𑀢𑁆𑀢𑀧𑀜𑁆𑀜𑀸𑀲𑀸’’𑀢𑀺.

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀲𑀫𑀼𑀕𑁆𑀕𑀫-𑀧𑀤𑀲𑁆𑀲 𑀢𑀢𑁆𑀯𑀢𑁄 𑀧𑀭𑀺𑀬𑀸𑀬𑀢𑁄 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀜𑁆𑀚𑀸𑀢𑀺𑀬𑀁 𑀆𑀤𑀺𑀉𑀧𑁆𑀧𑀢𑁆𑀢𑀺𑀬’’𑀦𑁆𑀢𑀺. 𑀪𑁂𑀤𑀢𑁄 𑀧𑀦 𑀲𑀫𑀸𑀬𑁄𑀕𑁂 𑀉𑀕𑁆𑀕𑀫𑀦𑀦𑁆𑀢𑀺. 𑀢𑀢𑁆𑀣 𑀓𑁂𑀦 𑀲𑀫𑀸𑀬𑁄𑀕𑁂, 𑀓𑀼𑀢𑁄, 𑀓𑀣𑀜𑁆𑀘 𑀉𑀕𑁆𑀕𑀫𑀦𑀦𑁆𑀢𑀺 𑀯𑀺𑀘𑀸𑀭𑀡𑀸𑀬𑀁 𑀆𑀳 ‘‘𑀢𑀁𑀢𑀁𑀧𑀘𑁆𑀘𑀬𑀲𑀫𑀸𑀬𑁄𑀕𑁂’’𑀢𑀺𑀆𑀤𑀺. 𑀢𑀢𑁆𑀣𑁂𑀯𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀏𑀯. 𑀢𑀢𑁆𑀣 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀲𑀫𑀼𑀕𑁆𑀕𑀘𑁆𑀙𑀦𑁆𑀢𑀺. 𑀬𑀣𑀸𑀥𑀺𑀕𑀢𑀸𑀦𑀁 𑀅𑀥𑀺𑀕𑀢𑀧𑁆𑀧𑀓𑀸𑀭𑀸𑀦𑀁, 𑀧𑀝𑀺𑀲𑀦𑁆𑀥𑀺𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀑𑀧𑀧𑀸𑀢𑀺𑀓𑀲𑀫𑀼𑀕𑁆𑀕𑀫𑁂𑀦𑁂𑀯 𑀘𑁂𑀢𑁆𑀣 𑀲𑀁𑀲𑁂𑀤𑀚𑀲𑀫𑀼𑀕𑁆𑀕𑀫𑁄𑀧𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄 𑀧𑀜𑁆𑀘𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀢𑀤𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀢𑀢𑁆𑀣 𑀲𑀁𑀲𑁂𑀤𑀚𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀟𑁆𑀠𑀦𑁆𑀢𑀺, 𑀇𑀢𑀭𑁂 𑀦 𑀯𑀟𑁆𑀠𑀦𑁆𑀢𑀻𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀲𑀼𑀔𑀼𑀫𑀚𑀸𑀢𑀺𑀬𑀮𑁄𑀫𑀸 𑀏𑀯 𑀓𑀺𑀭 𑀓𑁂𑀘𑀺 𑀏𑀴𑀓𑀸 𑀳𑀺𑀫𑀯𑀦𑁆𑀢𑁂 𑀯𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀮𑁄𑀫𑀁 𑀲𑀦𑁆𑀥𑀸𑀬 ‘‘𑀚𑀸𑀢𑀺𑀫𑀦𑁆𑀢𑀏𑀴𑀓𑀮𑁄𑀫’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀢𑀺𑀲𑀼𑀔𑀼𑀫𑀢𑁆𑀢𑀸 𑀢𑁂𑀲𑀁 𑀮𑁄𑀫𑀸𑀦𑀁. 𑀓𑁂𑀘𑀺 𑀧𑀦 ‘‘𑀅𑀚𑀧𑀸𑀓𑀢𑀺𑀓𑁂𑀴𑀓𑀸𑀤𑀻𑀳𑀺 𑀲𑀗𑁆𑀓𑀭𑀭𑀳𑀺𑀢𑀸𑀦𑀁 𑀢𑁂𑀲𑀁 𑀏𑀴𑀓𑀯𑀺𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀴𑀓𑀲𑁆𑀲 𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸, 𑀢𑀫𑁆𑀧𑀺 𑀢𑀗𑁆𑀔𑀡𑀦𑀺𑀩𑁆𑀩𑀢𑁆𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀲𑁆𑀲𑀸𑀢𑀺 𑀅𑀧𑀭𑁂. 𑀏𑀯𑀁𑀲𑀡𑁆𑀞𑀸𑀦𑀦𑁆𑀢𑀺 𑀚𑀸𑀢𑀺𑀉𑀡𑁆𑀡𑀁𑀲𑀼𑀦𑁄 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀢𑁂𑀮𑀩𑀺𑀦𑁆𑀤𑀼𑀲𑀡𑁆𑀞𑀸𑀦𑀁. 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑁄𑀢𑀺 𑀭𑀽𑀧𑀧𑀝𑀺𑀘𑁆𑀙𑀦𑁆𑀦𑁄 𑀲𑀡𑁆𑀞𑀸𑀦𑀧𑀝𑀺𑀘𑁆𑀙𑀦𑁆𑀦𑁄 𑀘.

𑀲𑀦𑁆𑀢𑀢𑀺𑀫𑀽𑀮𑀸𑀦𑀻𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀭𑀽𑀧𑀲𑀦𑁆𑀢𑀢𑀺𑀬𑀸 𑀫𑀽𑀮𑀪𑀽𑀢𑀸𑀦𑀺. 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀲𑀫𑀸𑀳𑀸𑀭𑀪𑀸𑀯𑀢𑁄𑀢𑀺 𑀬𑀣𑀸𑀭𑀳𑀁 𑀘𑀓𑁆𑀔𑀸𑀤𑀺𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀲𑀗𑁆𑀖𑀸𑀢𑀪𑀸𑀯𑀢𑁄. 𑀧𑀥𑀸𑀦𑀗𑁆𑀕𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀁 𑀲𑀺𑀭𑁄.

𑀦 𑀢𑀲𑁆𑀲 𑀢𑀲𑁆𑀲 𑀔𑀦𑁆𑀥𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀁, 𑀢𑀁𑀢𑀁𑀔𑀦𑁆𑀥𑁂𑀓𑀤𑁂𑀲𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀸𑀯𑀘𑀭𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁. 𑀧𑀭𑀺𑀳𑀻𑀦𑀸𑀬𑀢𑀦𑀲𑁆𑀲𑀸𑀢𑀺 𑀧𑀭𑀺𑀳𑀻𑀦𑀲𑁆𑀲 𑀘𑀓𑁆𑀔𑀸𑀤𑀺𑀆𑀬𑀢𑀦𑀲𑁆𑀲 𑀯𑀲𑁂𑀦. 𑀢𑀢𑁆𑀣 𑀤𑀼𑀕𑁆𑀕𑀢𑀺𑀬𑀁 𑀅𑀦𑁆𑀥𑀲𑁆𑀲 𑀘𑀓𑁆𑀔𑀼𑀤𑀲𑀓𑀯𑀲𑁂𑀦, 𑀩𑀥𑀺𑀭𑀲𑁆𑀲 𑀲𑁄𑀢𑀤𑀲𑀓𑀯𑀲𑁂𑀦, 𑀅𑀦𑁆𑀥𑀩𑀥𑀺𑀭𑀲𑁆𑀲 𑀉𑀪𑀬𑀯𑀲𑁂𑀦 𑀲𑀦𑁆𑀢𑀢𑀺𑀲𑀻𑀲𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀧𑀼𑀁𑀲𑀓𑀲𑁆𑀲 𑀧𑀦 𑀪𑀸𑀯𑀳𑀸𑀦𑀺 𑀯𑀼𑀢𑁆𑀢𑀸 𑀏𑀯. 𑀢𑀣𑀸 𑀅𑀦𑁆𑀥𑀩𑀥𑀺𑀭𑀸𑀖𑀸𑀦𑀓𑀲𑁆𑀲 𑀘𑀓𑁆𑀔𑀼𑀲𑁄𑀢𑀖𑀸𑀦𑀯𑀲𑁂𑀦. 𑀢𑀁 𑀧𑀦 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀭𑀽𑀧𑀸𑀯𑀘𑀭𑀸𑀦𑀁 𑀧𑀦 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀚𑀻𑀯𑀺𑀢𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀦𑁆𑀢𑀢𑀺𑀲𑀻𑀲𑀸𑀦𑀻𑀢𑀺 𑀇𑀢𑀭𑁂𑀲𑀁 𑀯𑀲𑁂𑀦 𑀲𑀦𑁆𑀢𑀢𑀺𑀲𑀻𑀲𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀯𑀢𑁆𑀣𑀼𑀪𑀸𑀯𑁂𑀦𑀸𑀢𑀺 𑀯𑀺𑀘𑀸𑀭𑀡𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦. 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀦𑁆𑀦𑀸 𑀧𑀯𑀢𑁆𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀘 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀲𑁆𑀲𑁂𑀢𑀺. 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄𑀢𑀺 ‘‘𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀽’’𑀢𑀺 𑀅𑀬𑀁 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄. 𑀅𑀜𑁆𑀜𑀣𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀅𑀦𑀥𑀺𑀧𑁆𑀧𑁂𑀢𑁂. ‘‘𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁂’’𑀢𑀺 𑀇𑀤𑀁 𑀯𑀺𑀲𑀬𑀸𑀤𑀺𑀅𑀢𑁆𑀣𑀸𑀦𑀁 𑀇𑀥𑀸𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁. 𑀉𑀪𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀁. 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀦𑁆𑀢𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀁 𑀭𑀽𑀧𑀲𑀦𑁆𑀢𑀢𑀺𑀁 𑀅𑀭𑀽𑀧𑀲𑀦𑁆𑀢𑀢𑀺𑀜𑁆𑀘. ‘‘𑀯𑀢𑁆𑀣𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀤𑀼𑀩𑁆𑀩𑀮𑀁 𑀳𑁄𑀢𑀻’’𑀢𑀺 𑀇𑀤𑀁 𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀁 𑀏𑀯, 𑀦𑀸𑀧𑀺 𑀯𑀢𑁆𑀣𑀼𑀭𑀽𑀧𑀁 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀤𑀼𑀩𑁆𑀩𑀮𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. ‘‘𑀢𑀤𑀸 𑀳𑀻’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀣 𑀢𑀦𑁆𑀢𑀺 𑀭𑀽𑀧𑀁. ‘‘𑀓𑀫𑁆𑀫𑀓𑁆𑀔𑀺𑀢𑁆𑀢𑀢𑁆𑀢𑀸’’𑀢𑀺 𑀇𑀤𑀁 𑀦 𑀓𑀫𑁆𑀫𑀚𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀓𑀫𑁆𑀫𑀚𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀅𑀧𑀢𑀺𑀝𑁆𑀞𑀺𑀢𑀢𑀁 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀧𑀝𑀺𑀲𑀦𑁆𑀥𑀺𑀢𑁄 𑀧𑀭𑀁. 𑀲𑀤𑀺𑀲𑀲𑀦𑁆𑀢𑀸𑀦𑁂 𑀬𑀣𑀸 𑀧𑀢𑀺𑀝𑁆𑀞𑀺𑀢𑀁, 𑀦 𑀢𑀣𑀸 𑀯𑀺𑀲𑀤𑀺𑀲𑀲𑀦𑁆𑀢𑀸𑀦𑁂𑀢𑀺 𑀆𑀳 ‘‘𑀲𑀫𑀸𑀦𑀲𑀦𑁆𑀢𑀢𑀺𑀬’’𑀦𑁆𑀢𑀺.

𑀅𑀗𑁆𑀕𑀪𑀸𑀯𑀦𑁆𑀢𑀺 𑀓𑀸𑀭𑀡𑀪𑀸𑀯𑀁. 𑀢𑁂𑀦𑁂𑀯𑀸𑀳 ‘‘𑀲𑀳𑀸𑀬𑀪𑀸𑀯’’𑀦𑁆𑀢𑀺. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁, 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀬𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁. 𑀢𑀤𑀸𑀢𑀺 𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀘 𑀭𑀽𑀧𑀼𑀧𑁆𑀧𑀸𑀤𑀦𑀫𑁂𑀯 𑀦𑀢𑁆𑀣𑀺. 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀘𑀺𑀢𑁆𑀢𑀲𑁆𑀲 𑀩𑀮𑀯𑀪𑀸𑀯𑁄, 𑀦 𑀇𑀢𑀭𑀢𑁆𑀭. 𑀢𑁂𑀦𑀸𑀳 ‘‘𑀬𑀤𑀸 𑀘 𑀭𑀽𑀧𑀼𑀧𑁆𑀧𑀸𑀤𑀦𑀁, 𑀢𑀤𑀸 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺.

𑀬𑁂𑀳𑀸𑀓𑀸𑀭𑁂𑀳𑀻𑀢𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀳𑀺. 𑀬𑀣𑀸𑀲𑀫𑁆𑀪𑀯𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀨𑀲𑁆𑀲𑀸𑀤𑀬𑁄 𑀆𑀳𑀸𑀭𑀸𑀤𑀺𑀯𑀲𑁂𑀦 𑀬𑀣𑀸𑀭𑀳𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁, 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁪𑁨𑁯).

𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀘𑀼𑀢𑀺𑀘𑀺𑀢𑁆𑀢𑁂𑀦 𑀯𑀸 𑀓𑀸𑀭𑀡𑀪𑀽𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀢𑀢𑁄 𑀧𑀼𑀭𑀺𑀫𑀢𑀭𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀬𑀸𑀢𑀺 𑀬𑀣𑀸 𑀘𑀼𑀢𑀺𑀘𑀺𑀢𑁆𑀢𑀢𑁄 𑀆𑀲𑀦𑁆𑀦𑁂𑀳𑀺 𑀧𑀼𑀭𑀺𑀫𑀢𑀭𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁 𑀪𑀯𑀦𑁆𑀢𑀭𑁂 𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀧𑀺 𑀯𑀝𑁆𑀝𑀫𑀽𑀮𑁂𑀢𑀺 𑀅𑀓𑀸𑀭𑀡𑀁 𑀯𑀝𑁆𑀝𑀫𑀽𑀮𑀸𑀯𑀽𑀧𑀲𑀫𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀭𑀽𑀧𑀼𑀧𑁆𑀧𑀸𑀤𑀦𑁂𑀢𑀺 𑀤𑀲𑁆𑀲𑁂𑀢𑀺.

𑀅𑀭𑀽𑀧𑀲𑁆𑀲𑀸𑀢𑀺 𑀆𑀭𑀼𑀧𑁆𑀧𑀲𑁆𑀲.

𑀉𑀢𑀼𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀦 𑀉𑀢𑀼𑀦𑀸. 𑀲𑀫𑀼𑀝𑁆𑀞𑀺𑀢𑁂 𑀭𑀽𑀧𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀭𑀽𑀧𑁂 𑀲𑀫𑀼𑀝𑁆𑀞𑀺𑀢𑁂 𑀧𑀝𑀺𑀲𑀦𑁆𑀥𑀺𑀅𑀦𑀦𑁆𑀢𑀭𑀁 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀡𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑁄𑀴𑀲𑀲𑀼 𑀘𑀺𑀢𑁆𑀢𑁂𑀲𑀼 𑀆𑀤𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁄, 𑀲𑁄𑀴𑀲𑀫𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑀓𑁆𑀔𑀡𑁄 𑀘𑀸𑀢𑀺 𑀯𑀤𑀦𑁆𑀢𑀺, 𑀭𑀽𑀧𑀲𑁆𑀲𑁂𑀯 𑀧𑀦 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀥𑀭𑀫𑀸𑀦𑀓𑁆𑀔𑀡𑁂 𑀏𑀯𑀸𑀢𑀺 𑀢𑀲𑁆𑀲 𑀉𑀢𑀼𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀏𑀯 𑀬𑀤𑀺 𑀕𑀳𑀺𑀢𑀸, ‘‘𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀲𑁄𑀴𑀲𑀳𑁂𑀯 𑀘𑀺𑀢𑁆𑀢𑁂𑀳𑀺 𑀢𑀲𑁆𑀲 𑀥𑀭𑀫𑀸𑀦𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀉𑀢𑀼𑀦𑁄 𑀥𑀭𑀫𑀸𑀦𑀓𑁆𑀔𑀡𑁂 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀭𑁄𑀥𑀓𑁆𑀔𑀡𑁄 𑀅𑀣 𑀕𑀳𑀺𑀢𑁄, ‘‘𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀳𑀺𑀢𑁂𑀦 𑀘 𑀏𑀓𑀲𑁆𑀲 𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀕𑀳𑀺𑀢𑀢𑁆𑀢𑀸. ‘‘𑀅𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀦𑀺𑀭𑁄𑀥𑀓𑁆𑀔𑀡𑀲𑁆𑀲 𑀩𑀳𑀺𑀓𑀢𑀢𑁆𑀢𑀸.

𑀏𑀯𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀡𑁂𑀲𑀼 𑀕𑀳𑀺𑀢𑁂𑀲𑀼 𑀅𑀕𑁆𑀕𑀳𑀺𑀢𑁂𑀲𑀼 𑀘 𑀲𑁄𑀴𑀲𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸, 𑀢𑀢𑁄 𑀅𑀥𑀺𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀘 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀞𑀺𑀢𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲 𑀥𑀭𑀫𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀲𑀽𑀢𑀺 𑀢𑀲𑁆𑀲 𑀉𑀢𑀼𑀦𑁄 𑀥𑀭𑀫𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀲𑀼 𑀲𑁄𑀴𑀲𑀲𑀼 𑀘𑀺𑀢𑁆𑀢𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀺 𑀬𑀲𑁆𑀫𑀸 𑀕𑀳𑀺𑀢𑀸, 𑀢𑀲𑁆𑀫𑀸 𑀉𑀢𑀼𑀦𑁄 𑀉𑀧𑁆𑀧𑀸𑀤𑀓𑁆𑀔𑀡𑁄 𑀥𑀭𑀫𑀸𑀦𑀓𑁆𑀔𑀡𑁂 𑀕𑀳𑀺𑀢𑁄𑀢𑀺 𑀦𑀺𑀭𑁄𑀥𑀓𑁆𑀔𑀡𑁂 𑀅𑀕𑁆𑀕𑀳𑀺𑀢𑁂 ‘‘𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀧𑀦 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸) 𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀫𑀸𑀦𑀸 𑀅𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀕𑀳𑀺𑀢𑁂 𑀯𑀸 𑀦𑀺𑀭𑁄𑀥𑀓𑁆𑀔𑀡𑁂 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 ‘‘𑀅𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸’’𑀢𑀺 𑀇𑀤𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁄 𑀕𑀳𑀺𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 ‘‘𑀤𑁆𑀯𑁂 𑀪𑀯𑀗𑁆𑀕𑀸𑀦𑀺, 𑀆𑀯𑀚𑁆𑀚𑀦𑀁, 𑀤𑀲𑁆𑀲𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑀦𑁆𑀢𑀻𑀭𑀡𑀁, 𑀯𑁄𑀝𑁆𑀞𑀩𑁆𑀩𑀦𑀁, 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺, 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺, 𑀅𑀣𑀸𑀯𑀲𑁂𑀲𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭), 𑀢𑀣𑀸 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀺, ‘‘𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁, 𑀢𑀤𑀯𑀲𑀸𑀦𑁂 𑀢𑀲𑁆𑀫𑀺𑀜𑁆𑀜𑁂𑀯 𑀏𑀓𑀘𑀺𑀢𑁆𑀢𑀓𑁆𑀔𑀡𑀝𑁆𑀞𑀺𑀢𑀺𑀓𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀘 𑀯𑀓𑁆𑀔𑀢𑀺. 𑀢𑀲𑁆𑀫𑀸 𑀭𑀽𑀧𑀲𑁆𑀲 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸𑀬𑀧𑀺 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺. 𑀢𑀣𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀑𑀚𑀸𑀬 𑀲𑀪𑀸𑀯𑀲𑀼𑀔𑀼𑀫𑀢𑀸 𑀉𑀧𑀸𑀤𑀸𑀭𑀽𑀧𑀪𑀸𑀯𑀢𑁄. 𑀏𑀢𑁆𑀣 𑀘 𑀫𑀸𑀢𑀭𑀸 𑀅𑀚𑁆𑀛𑁄𑀳𑀝𑀸 𑀑𑀚𑀸 𑀩𑀸𑀳𑀺𑀭𑀩𑁆𑀪𑀜𑁆𑀚𑀦𑀁 𑀯𑀺𑀬 𑀕𑀩𑁆𑀪𑀫𑀮𑁆𑀮𑀺𑀦𑀸 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀑𑀚𑀝𑁆𑀞𑀫𑀓𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀧𑀯𑁂𑀡𑀺𑀬𑀸 𑀑𑀚𑀸𑀬 𑀯𑀺𑀬 𑀲𑁂𑀲𑀢𑀺𑀲𑀦𑁆𑀢𑀢𑀺𑀑𑀚𑀸𑀬 𑀭𑀽𑀧𑀼𑀧𑁆𑀧𑀸𑀤𑀦𑀦𑁆𑀢𑀺 𑀉𑀤𑀭𑀺𑀬𑁂 𑀑𑀚𑀸 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄, 𑀉𑀧𑀸𑀤𑀺𑀦𑁆𑀦𑀓𑀝𑁆𑀞𑀸𑀦𑁂 𑀏𑀯 𑀧𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀭𑀲𑀳𑀭𑀡𑀻𑀳𑀺 𑀕𑀦𑁆𑀢𑁆𑀯𑀸 𑀓𑀸𑀬𑀸𑀦𑀼𑀲𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀺𑀢𑁆𑀢𑀜𑁆𑀘𑁂𑀯𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀧𑀝𑀺𑀬𑁄𑀕𑀻𑀦𑀁 𑀓𑀫𑁆𑀫𑀫𑁂𑀯 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀦 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀢𑀺 𑀓𑀢𑁆𑀯𑀸 𑀆𑀳 ‘‘𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀼𑀢𑁆𑀢’’𑀦𑁆𑀢𑀺. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀕𑀡𑁆𑀳𑀸𑀢𑀺 ‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’𑀢𑀺𑀆𑀤𑀻𑀲𑀼 (𑀥. 𑀲. 𑁧) 𑀯𑀺𑀬, 𑀦 𑀓𑀫𑁆𑀫𑀘𑁂𑀢𑀦𑀁 𑀯𑀺𑀬 𑀏𑀓𑀥𑀫𑁆𑀫𑀫𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀳𑁂𑀢𑀼𑀆𑀤𑀬𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀲𑀫𑀼𑀝𑁆𑀞𑀸𑀧𑀓𑀸𑀯, 𑀏𑀯𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀯𑀢𑁆𑀢𑀼𑀁 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳.

𑀭𑀽𑀧𑀲𑁆𑀲𑀸𑀢𑀺 𑀭𑀽𑀧𑀓𑁆𑀔𑀡𑀲𑁆𑀲, 𑀭𑀽𑀧𑀲𑁆𑀲 𑀯𑀸 𑀅𑀤𑁆𑀥𑀼𑀦𑁄. 𑀦𑀬𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀧𑀸𑀢𑀼𑀪𑀸𑀯𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀢𑀢𑁄 𑀧𑀭𑀫𑁆𑀧𑀺 𑀭𑀽𑀧𑀸𑀭𑀽𑀧𑀸𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄’’𑀢𑀺. 𑀬𑀣𑀸 𑀘 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀯𑀸’’𑀢𑀺 𑀦𑀺𑀬𑀫𑁄 𑀦 𑀕𑀳𑁂𑀢𑀩𑁆𑀩𑁄, 𑀏𑀯𑀁 ‘‘𑀏𑀓𑀓𑁆𑀔𑀡𑁂 𑀏𑀯 𑀧𑀸𑀢𑀼𑀪𑀸𑀯𑁄’’𑀢𑀺𑀧𑀺 𑀦𑀺𑀬𑀫𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁𑀤𑀻𑀧𑀦𑀢𑁆𑀣𑀫𑁂𑀯𑀸𑀢𑀺 𑀅𑀲𑀫𑀸𑀦𑀓𑀸𑀮𑀢𑀸𑀤𑀻𑀧𑀦𑀢𑁆𑀣𑀫𑁂𑀯, 𑀦 𑀲𑀳𑀼𑀧𑁆𑀧𑀸𑀤𑀤𑀻𑀧𑀦𑀢𑁆𑀣𑀁. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀣𑀸 𑀳𑀺 𑀅𑀬𑀦𑁆𑀢𑀺.

𑀬𑀤𑀺 𑀏𑀯𑀦𑁆𑀢𑀺 𑀬𑀣𑀸 𑀨𑀮𑀧𑀢𑁆𑀢𑀸𑀦𑀺, 𑀏𑀯𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀬𑀤𑀺 𑀤𑀦𑁆𑀥𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄. 𑀅𑀲𑀫𑀸𑀦𑀤𑁆𑀥𑀢𑁆𑀢𑀸𑀢𑀺 𑀅𑀢𑀼𑀮𑁆𑀬𑀓𑀸𑀮𑀢𑁆𑀢𑀸. 𑀦𑀺𑀘𑁆𑀙𑀺𑀤𑁆𑀤𑁂𑀲𑀽𑀢𑀺 𑀦𑀺𑀩𑁆𑀩𑀺𑀯𑀭𑁂𑀲𑀼. 𑀢𑁂𑀦 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀁 𑀏𑀯 𑀯𑀺𑀪𑀸𑀯𑁂𑀢𑀺. 𑀅𑀬𑀦𑁆𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀣𑀸. 𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀁 𑀦 𑀢𑀣𑀸 𑀦𑀺𑀭𑀦𑁆𑀢𑀭𑀪𑀸𑀯𑁂𑀦 𑀧𑀯𑀢𑁆𑀢𑀺, 𑀬𑀣𑀸 𑀓𑀫𑁆𑀫𑀚𑀭𑀽𑀧𑀸𑀦𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸’’𑀢𑀺. 𑀓𑀫𑁆𑀫𑀚𑀭𑀽𑀧𑀸𑀦𑀁 𑀯𑀸 𑀇𑀢𑀭𑁂𑀲𑀁 𑀫𑀽𑀮𑀪𑀸𑀯𑀢𑁄 𑀧𑀥𑀸𑀦𑀦𑁆𑀢𑀺 ‘‘𑀓𑀫𑁆𑀫𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀢𑁆𑀢𑀸 𑀅𑀩𑁆𑀬𑀸𑀩𑀚𑁆𑀛𑀢𑀸𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀸𑀦𑀧𑀝𑀺𑀪𑀸𑀕𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀤𑁂 𑀧𑀤𑀁 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀮𑀓𑀼𑀡𑁆𑀟𑀓𑀧𑀸𑀤𑀢𑀸𑀬 𑀅𑀢𑁆𑀢𑀦𑁄 𑀅𑀓𑁆𑀓𑀦𑁆𑀢𑀧𑀤𑀲𑀫𑀻𑀧𑁂 𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀬𑁄 𑀳𑀺 𑀲𑀻𑀖𑀧𑀤𑀯𑀺𑀓𑁆𑀓𑀫𑁄 𑀮𑀓𑀼𑀡𑁆𑀟𑀓𑀧𑀸𑀤𑁄, 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀮𑀳𑀼𑀁 𑀮𑀳𑀼𑀁 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀲𑀳𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀭𑀽𑀧𑀁 𑀓𑀫𑁆𑀫𑀚𑀫𑀺𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀢𑀼𑀚𑀁 𑀧𑀦 𑀘𑀼𑀢𑀺𑀢𑁄 𑀉𑀤𑁆𑀥𑀫𑁆𑀧𑀺 𑀧𑀯𑀢𑁆𑀢𑀢𑀺 𑀏𑀯. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑁆𑀢𑀺 ‘‘𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸, 𑀅𑀭𑀽𑀧𑀲𑁆𑀲 𑀢𑀢𑁄 𑀏𑀓𑀪𑀸𑀕𑁄’’𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨𑁦 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸) 𑀏𑀯𑀁 𑀯𑀼𑀢𑁆𑀢𑀁 𑀅𑀤𑁆𑀥𑀸𑀦𑀧𑁆𑀧𑀓𑀸𑀭𑀁.

𑀏𑀓𑀼𑀧𑁆𑀧𑀸𑀤𑀢𑁄𑀢𑀺 𑀲𑀫𑀸𑀦𑀼𑀧𑁆𑀧𑀸𑀤𑀢𑁄. 𑀲𑀫𑀸𑀦𑀢𑁆𑀣𑁄 𑀳𑀺 𑀅𑀬𑀁 𑀏𑀓-𑀲𑀤𑁆𑀤𑁄. 𑀏𑀓𑁄 𑀤𑀝𑁆𑀞𑀩𑁆𑀩𑀸𑀓𑀸𑀭𑁄𑀢𑀺 𑀏𑀓𑁄 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀲𑁆𑀲𑀺𑀢𑀩𑁆𑀩𑀸𑀓𑀸𑀭𑁄. 𑀏𑀯𑀜𑁆𑀳𑀺 𑀲𑁄𑀴𑀲𑀸𑀓𑀸𑀭𑀸 𑀲𑀺𑀬𑀼𑀁, 𑀇𑀢𑀭𑀣𑀸 𑀯𑀻𑀲𑀢𑀺, 𑀢𑀢𑁄 𑀅𑀥𑀺𑀓𑀸 𑀯𑀸 𑀏𑀢𑁂 𑀆𑀓𑀸𑀭𑀸 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀓𑀫𑁆𑀫𑀚𑀲𑁆𑀲. 𑀳𑁂𑀝𑁆𑀞𑀸 𑀲𑁄𑀴𑀲𑀓𑁂𑀢𑀺 𑀧𑀭𑀺𑀬𑁄𑀲𑀸𑀦𑀲𑁄𑀴𑀲𑀓𑀲𑁆𑀲 𑀅𑀦𑀦𑁆𑀢𑀭𑀸𑀢𑀻𑀢𑀲𑁄𑀴𑀲𑀓𑁂. 𑀧𑀘𑁆𑀙𑀺𑀫𑀲𑁆𑀲𑀸𑀢𑀺 𑀢𑀢𑁆𑀣 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲. 𑀦𑀸𑀦𑀸𑀦𑀺𑀭𑁄𑀥𑀪𑀸𑀯𑀁 𑀯𑀺𑀬 𑀏𑀓𑀼𑀧𑁆𑀧𑀸𑀤𑀪𑀸𑀯𑀫𑁆𑀧𑀺 𑀧𑀘𑁆𑀙𑀺𑀫𑀓𑀫𑁆𑀫𑀚𑀲𑁆𑀲 𑀞𑀧𑀦𑁂 𑀓𑀸𑀭𑀡𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀬𑀤𑀺 𑀧𑀦𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. ‘‘𑀲𑀩𑁆𑀩𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀅𑀢𑀺𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀺. 𑀯𑀚𑁆𑀚𑁂𑀢𑀩𑁆𑀩𑀁 𑀦𑀸𑀦𑀼𑀧𑁆𑀧𑀸𑀤𑀁 𑀏𑀓𑀦𑀺𑀭𑁄𑀥𑀁. 𑀕𑀳𑁂𑀢𑀩𑁆𑀩𑀁 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀁. 𑀉𑀪𑀬𑀫𑁆𑀧𑀺 𑀢𑀤𑀸 𑀦𑀢𑁆𑀣𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀚𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄’’𑀢𑀺. 𑀢𑀢𑁄 𑀧𑀼𑀩𑁆𑀩𑁂𑀢𑀺 𑀧𑀘𑁆𑀙𑀺𑀫𑀓𑀫𑁆𑀫𑀚𑀭𑀽𑀧𑀼𑀧𑁆𑀧𑀚𑁆𑀚𑀦𑀢𑁄 𑀑𑀭𑀁. 𑀅𑀜𑁆𑀜𑀲𑁆𑀲𑀸𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀢𑀢𑁄 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀲𑁆𑀲. 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑁆𑀲 𑀏𑀓𑀼𑀧𑁆𑀧𑀸𑀤𑀢𑀸, 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑁆𑀲 𑀦𑀸𑀦𑀸𑀦𑀺𑀭𑁄𑀥𑀢𑀸 𑀘 𑀦𑀢𑁆𑀣𑀻𑀢𑀺 𑀆𑀳 ‘‘𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀉𑀧𑁆𑀧𑀦𑁆𑀦𑀭𑀽𑀧𑀸𑀦𑀺 𑀯𑀚𑁆𑀚𑁂𑀢𑁆𑀯𑀸’’𑀢𑀺. 𑀢𑁂𑀦𑀸𑀢𑀺 𑀭𑀽𑀧𑁂𑀦. ‘‘𑀲𑀗𑁆𑀔𑀮𑀺𑀓𑀲𑁆𑀲 𑀯𑀺𑀬 𑀲𑀫𑁆𑀩𑀦𑁆𑀥𑁄’’𑀢𑀺 𑀏𑀢𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑀲𑀫𑁆𑀩𑀦𑁆𑀥𑁄 𑀇𑀥 ‘‘𑀧𑀯𑁂𑀡𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀣𑀸𑀢𑀺 𑀯𑀺𑀘𑁆𑀙𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀳𑁂𑀢𑁆𑀯𑀸 ‘‘𑀧𑀯𑁂𑀡𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂. 𑀦 𑀳𑀺 𑀭𑀽𑀧𑀥𑀫𑁆𑀫𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀻𑀢𑀺 𑀭𑀽𑀧𑀥𑀫𑁆𑀫𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀭𑀽𑀧𑀥𑀫𑁆𑀫𑁂 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑀕𑀳𑀡𑁂 𑀏𑀓𑀽𑀦𑀧𑀜𑁆𑀜𑀸𑀲𑀸𑀯 𑀲𑀺𑀬𑀸𑀢𑀺 𑀆𑀳 ‘‘𑀏𑀓𑀽𑀦𑀧𑀜𑁆𑀜𑀸𑀲𑀓𑀫𑁆𑀫𑀚𑀺𑀬𑀯𑀘𑀦𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺.

𑀲𑀼𑀤𑀻𑀧𑀦𑀢𑁆𑀢𑀸𑀢𑀺 𑀲𑀼𑀔𑀤𑀻𑀧𑀦𑀢𑁆𑀢𑀸, 𑀦𑀬𑀤𑀲𑁆𑀲𑀦𑀪𑀸𑀯𑁂𑀦 𑀯𑀸 𑀲𑀼𑀝𑁆𑀞𑀼 𑀤𑀻𑀧𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀏𑀢𑁂𑀦 𑀳𑀺 𑀦𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀦𑁆𑀢𑀺 𑀭𑀽𑀧𑀁. 𑀢𑁂𑀦𑀸𑀢𑀺 𑀭𑀽𑀧𑁂𑀦. 𑀉𑀪𑀬𑀢𑁆𑀣𑀸𑀢𑀺 𑀧𑀘𑁆𑀙𑀺𑀫𑀓𑀫𑁆𑀫𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀁, 𑀢𑀢𑁄 𑀧𑀼𑀩𑁆𑀩𑁂 𑀘. 𑀅𑀜𑁆𑀜𑀲𑁆𑀲𑀸𑀢𑀺 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀲𑁆𑀲. 𑀢𑀲𑁆𑀲𑀸𑀢𑀺 𑀭𑀽𑀧𑀲𑁆𑀲. 𑀏𑀢𑁆𑀣 𑀘 𑀧𑀘𑁆𑀙𑀺𑀫𑀓𑀫𑁆𑀫𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀁 𑀦𑀺𑀭𑀼𑀚𑁆𑀛𑀦𑀓𑀦𑁆𑀢𑀺 𑀯𑀼𑀢𑁆𑀢𑀁 𑀢𑀢𑁄 𑀧𑀼𑀭𑁂𑀢𑀭𑀧𑁆𑀧𑀯𑀢𑁆𑀢𑀁 𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀲𑀦𑁆𑀢𑀢𑀺𑀓𑀭𑀽𑀧𑁂𑀦𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑀗𑁆𑀕𑀳𑀕𑀫𑀦𑀤𑀲𑁆𑀲𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀸𑀦𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑀸𑀤𑀻𑀧𑀦𑁂. 𑀞𑀺𑀢𑀺𑀓𑁆𑀔𑀡𑁂𑀢𑀺 𑀅𑀭𑀽𑀧𑀲𑁆𑀲 𑀭𑀽𑀧𑀲𑁆𑀲 𑀘 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀘 𑀅𑀭𑀽𑀧𑀲𑁆𑀲 𑀘 𑀤𑀲𑁆𑀲𑀺𑀢𑀢𑁆𑀢𑀸. 𑀅𑀤𑀲𑁆𑀲𑀺𑀢𑀲𑁆𑀲𑀸𑀢𑀺 𑀬𑀣𑀸 𑀏𑀯 𑀏𑀢𑁆𑀣, 𑀏𑀯𑀁 𑀢𑀢𑁆𑀣 𑀯𑀺𑀪𑀚𑀺𑀢𑁆𑀯𑀸 𑀅𑀤𑀲𑁆𑀲𑀺𑀢𑀲𑁆𑀲. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀘𑁆𑀙𑀺𑀫𑀓𑀫𑁆𑀫𑀚𑁂𑀦 𑀤𑀻𑀧𑀦𑀸𑀬𑀁 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀲𑀫𑀢𑀺𑀁𑀲…𑀧𑁂… 𑀬𑁄𑀚𑀺𑀢’’𑀦𑁆𑀢𑀺. 𑀢𑀢𑁄 𑀓𑀫𑁆𑀫𑀢𑁄 𑀚𑀸𑀢𑀸 𑀢𑀁𑀓𑀫𑁆𑀫𑀚𑀸, 𑀢𑁂𑀲𑀼. 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀚𑀻𑀯𑀺𑀢𑀜𑁆𑀘 𑀢𑀁 𑀲𑀗𑁆𑀔𑀸𑀭𑁄 𑀘𑀸𑀢𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄, 𑀆𑀬𑀼. 𑀚𑀻𑀯𑀺𑀢𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑀸, 𑀉𑀲𑁆𑀫𑀸𑀤𑀬𑁄.

𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀜𑁆𑀜𑀲𑁆𑀲 𑀢𑀢𑁄 𑀲𑀢𑁆𑀢𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑀲𑁆𑀲 𑀞𑀺𑀢𑀺𑀓𑁆𑀔𑀡𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀇𑀤𑀁 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀦𑁆𑀢𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀦𑁆𑀥𑀸𑀬 𑀧𑀸𑀴𑀺 𑀧𑀯𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀫𑁆𑀫𑀚𑀭𑀽𑀧𑀦𑁆𑀢𑀺 𑀲𑀸 𑀢𑀸𑀬 𑀓𑁂𑀦 𑀓𑀸𑀭𑀡𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀘𑀢𑀼…𑀧𑁂… 𑀪𑀯𑀺𑀢𑀩𑁆𑀩𑀢𑁆𑀢𑀸’’𑀢𑀺, 𑀦𑀺𑀧𑁆𑀨𑀦𑁆𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀘𑀸𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲…𑀧𑁂… 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀅𑀬𑀫𑁂𑀯 𑀔𑀡𑀦𑀺𑀬𑀫𑁄’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸). 𑀏𑀢𑁂𑀳𑀻𑀢𑀺 𑀬𑀣𑀸𑀦𑀻𑀢𑁄 𑀬𑀫𑀓𑀧𑀸𑀞𑁄, ‘‘𑀓𑀸𑀬𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄’’𑀢𑀺𑀆𑀤𑀺𑀓𑁄 𑀅𑀝𑁆𑀞𑀓𑀣𑀸𑀧𑀤𑁂𑀲𑁄𑀢𑀺 𑀏𑀢𑁂𑀳𑀺. 𑀦𑀢𑁆𑀣𑀺𑀬𑁂𑀯 𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀤𑀻𑀧𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀳𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺.

𑀧𑀼𑀦 ‘‘𑀏𑀢𑁂𑀳𑀻’’𑀢𑀺 𑀇𑀫𑀺𑀦𑀸 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀦𑀸𑀦𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸𑀧𑀤𑁂𑀲𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀉𑀪𑀬𑀢𑁆𑀣𑀸𑀧𑀺 𑀯𑀸 𑀏𑀢𑁂𑀳𑀺 𑀆𑀘𑀭𑀺𑀬𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀢𑀺𑀬𑁄 𑀪𑀸𑀕𑁄, 𑀢𑁂𑀦 𑀅𑀥𑀺𑀓𑀸 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀢𑀢𑀺𑀬…𑀧𑁂… 𑀬𑀼𑀓𑀢𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑀺𑀬 𑀪𑀸𑀕𑁄𑀢𑀺 𑀘 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀓𑁆𑀔𑀡𑁂 𑀉𑀧𑀸𑀤𑀸𑀬 𑀪𑀗𑁆𑀕𑀓𑁆𑀔𑀡𑁄 𑀅𑀥𑀺𑀧𑁆𑀧𑁂𑀢𑁄. 𑀬𑀲𑁆𑀫𑀺𑀁 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸, 𑀅𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂, 𑀬𑀲𑁆𑀫𑀺𑀁 𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸, 𑀅𑀯𑀲𑁂𑀲𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀬𑀜𑁆𑀘𑁂𑀢𑀁 𑀬𑀣𑀸𑀓𑁆𑀓𑀫𑀁 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀆𑀧𑀸𑀣𑀕𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀔𑁄 𑀧𑀦𑁂𑀯𑀁 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀤𑀲𑀸𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀬𑀢𑁆𑀣 𑀔𑀡𑁂𑀓𑀤𑁂𑀲𑀁 𑀅𑀕𑁆𑀕𑀳𑀺𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀏𑀯𑀁 𑀢𑀸𑀯 𑀦 𑀭𑀽𑀧𑀁 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁, 𑀦𑀸𑀧𑀺 𑀢𑀢𑀺𑀬𑀪𑀸𑀕𑀸𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁, 𑀅𑀣 𑀔𑁄 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀫𑁂𑀯𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀭𑀽𑀧𑀫𑁂𑀯 𑀲𑀫𑀸𑀦𑁂𑀧𑀺 𑀅𑀦𑀺𑀘𑁆𑀘𑀲𑀗𑁆𑀔𑀢𑀸𑀤𑀺𑀪𑀸𑀯𑁂 𑀘𑀺𑀭𑀸𑀬𑀼𑀓𑀁 𑀚𑀸𑀢𑀦𑁆𑀢𑀺? 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀪𑀸𑀯𑀢𑁄. 𑀅𑀭𑀽𑀧𑀥𑀫𑁆𑀫𑀸 𑀳𑀺 𑀲𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀸, 𑀢𑁂 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀤𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀦𑀺𑀭𑀼𑀚𑁆𑀛𑀦𑀢𑁄 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄. 𑀢𑁂𑀦𑀸𑀳 𑀪𑀕𑀯𑀸, ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀤𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮). 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸, 𑀢𑁂 𑀆𑀭𑀫𑁆𑀫𑀡𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑁂𑀳𑀺 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀲𑀸 𑀘 𑀦𑁂𑀲𑀁 𑀯𑁄𑀳𑀸𑀭𑀸𑀦𑀼𑀕𑀼𑀡𑀸 𑀯𑀺𑀪𑀸𑀯𑁂𑀢𑀩𑁆𑀩𑀢𑀸 𑀅𑀢𑁆𑀢𑀦𑁄 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸𑀬, 𑀢𑁂𑀲𑀜𑁆𑀘 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀲𑁄𑀴𑀲𑀳𑀺 𑀲𑀢𑁆𑀢𑀭𑀲𑀳𑀺 𑀯𑀸 𑀘𑀺𑀢𑁆𑀢𑀓𑁆𑀔𑀡𑁂𑀳𑀺 𑀦𑀺𑀧𑁆𑀧𑀚𑁆𑀚𑀢𑀻𑀢𑀺 𑀭𑀽𑀧𑀫𑁂𑀯𑁂𑀢𑁆𑀣 𑀘𑀺𑀭𑀸𑀬𑀼𑀓𑀁 𑀚𑀸𑀢𑀁. 𑀓𑀺𑀜𑁆𑀘 𑁋 𑀮𑀳𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀦𑁆𑀢𑀢𑀺𑀫𑀢𑁆𑀢𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺𑀫𑀢𑁆𑀢𑀪𑀸𑀯𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀘 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑁆𑀧𑀘𑁆𑀘𑀬𑀢𑀸𑀬 𑀧𑀦 𑀭𑀽𑀧𑀲𑁆𑀲 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸. 𑀦𑀸𑀦𑀸𑀥𑀸𑀢𑀽𑀲𑀼 𑀢𑀣𑀸𑀕𑀢𑀲𑁆𑀲𑁂𑀯 𑀬𑀣𑀸𑀪𑀽𑀢𑀜𑀸𑀡𑀁, 𑀢𑁂𑀦 𑀘 𑀭𑀽𑀧𑀫𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀲𑁆𑀲𑁂𑀯𑀸𑀢𑀺 𑀦 𑀏𑀢𑁆𑀣 𑀅𑀦𑀺𑀘𑁆𑀘𑀲𑀗𑁆𑀔𑀢𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀭𑀽𑀧𑀸𑀭𑀽𑀧𑀁 𑀲𑀫𑀸𑀦𑀸𑀬𑀼𑀓𑀁 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑀁. 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀫𑁂𑀯 𑀘𑀺𑀭𑀸𑀬𑀼𑀓𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀬𑀣𑀸 𑀘 𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸, 𑀢𑀢𑀺𑀬𑀪𑀸𑀕𑀸𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀯𑀸 𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀬𑁆𑀯𑀸𑀬𑀁 𑀅𑀝𑁆𑀞𑀓𑀣𑀸𑀬𑀁 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀞𑀺𑀢𑀺𑀓𑁆𑀔𑀡𑀫𑁂𑀯 𑀢𑀸𑀯 𑀘𑀺𑀢𑁆𑀢𑀲𑁆𑀲 𑀅𑀦𑀦𑀼𑀚𑀸𑀦𑀦𑁆𑀢𑁄 ‘‘𑀬𑁄 𑀘𑁂𑀢𑁆𑀣…𑀧𑁂… 𑀯𑀺𑀘𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀬𑀫𑀓𑁂 𑀉𑀧𑁆𑀧𑀦𑁆𑀦𑀉𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑀸𑀤𑀺𑀧𑀸𑀴𑀺𑀁 𑀆𑀳𑀭𑀦𑁆𑀢𑁄 ‘‘𑀘𑀺𑀢𑁆𑀢𑀬𑀫𑀓𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑁂𑀢𑀺 𑀉𑀪𑀬𑀫𑁆𑀧𑀺 𑀬𑀫𑀓𑀧𑀤𑀁 𑀅𑀳𑀸𑀧𑁂𑀢𑁆𑀯𑀸 𑀓𑀢𑀯𑀺𑀲𑁆𑀲𑀚𑁆𑀚𑀦𑁂. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀘𑀺𑀢𑁆𑀢𑀁, 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀤𑁆𑀥𑀁, 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀞𑀺𑀢𑀺𑀓𑁆𑀔𑀡𑀸𑀪𑀸𑀯𑀁 𑀘𑀺𑀢𑁆𑀢𑀲𑁆𑀲 𑀤𑀻𑀧𑁂𑀢𑀻𑀢𑀺 𑀉𑀧𑁆𑀧𑀦𑁆𑀦𑀉𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑀸𑀤𑀻𑀲𑀼 ‘‘𑀞𑀺𑀢𑀺𑀓𑁆𑀔𑀡𑁂’’𑀢𑀺 𑀅𑀯𑀘𑀦𑀁 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑀩𑁄𑀥𑁂𑀢𑀺. 𑀦 𑀳𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑁂 𑀮𑀩𑁆𑀪𑀫𑀸𑀦𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀤𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀓𑁂𑀯𑀮𑀫𑀪𑀺𑀥𑀫𑁆𑀫𑁂 𑀅𑀯𑀘𑀦𑀫𑁂𑀯 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀸𑀪𑀸𑀯𑀚𑁄𑀢𑀓𑀁, 𑀅𑀧𑀺𑀘 𑀔𑁄 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀢𑁆𑀢𑁂𑀲𑀼𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲𑁄. 𑀔𑀡𑀤𑁆𑀯𑀬𑀲𑀫𑀗𑁆𑀕𑀺𑀁 𑀞𑀺𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀞𑀺𑀢𑀪𑀸𑀯𑀫𑀸𑀳. 𑀅𑀜𑁆𑀜𑀣𑀢𑁆𑀢𑀁 𑀧𑀦 𑀲𑀦𑁆𑀢𑀸𑀦𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀓𑁂𑀘𑀺 ‘‘𑀬𑀣𑀸𑀪𑀽𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀢𑀣𑀸𑀪𑀽𑀢𑁄𑀯 𑀪𑀺𑀚𑁆𑀚𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀣𑀸𑀪𑀽𑀢𑁄? 𑀬𑀤𑀺 𑀢𑀣𑀸𑀪𑀽𑀢𑁄𑀯 𑀪𑀺𑀚𑁆𑀚𑀢𑀺, 𑀦 𑀚𑀭𑀢𑀸𑀬 𑀲𑀫𑁆𑀪𑀯𑁄. 𑀅𑀣 𑀅𑀜𑁆𑀜𑀣𑀸𑀪𑀽𑀢𑁄, 𑀅𑀜𑁆𑀜𑁄 𑀏𑀯 𑀲𑁄𑀢𑀺 𑀲𑀩𑁆𑀩𑀣𑀸𑀧𑀺 𑀞𑀺𑀢𑀺𑀓𑁆𑀔𑀡𑀲𑁆𑀲 𑀅𑀪𑀸𑀯𑁄𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀏𑀓𑀥𑀫𑁆𑀫𑀸𑀥𑀸𑀭𑀪𑀸𑀯𑁂𑀧𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀅𑀜𑁆𑀜𑁄𑀯 𑀉𑀧𑁆𑀧𑀸𑀤𑀓𑁆𑀔𑀡𑁄, 𑀅𑀜𑁆𑀜𑁄 𑀦𑀺𑀭𑁄𑀥𑀓𑁆𑀔𑀡𑁄. 𑀉𑀧𑁆𑀧𑀸𑀤𑀸𑀯𑀢𑁆𑀣𑀜𑁆𑀳𑀺 𑀉𑀧𑀸𑀤𑀸𑀬 𑀉𑀧𑁆𑀧𑀸𑀤𑀓𑁆𑀔𑀡𑁄, 𑀦𑀺𑀭𑁄𑀥𑀸𑀯𑀢𑁆𑀣𑀁 𑀉𑀧𑀸𑀤𑀸𑀬 𑀦𑀺𑀭𑁄𑀥𑀓𑁆𑀔𑀡𑁄. 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀘 𑀪𑀺𑀦𑁆𑀦𑀸 𑀦𑀺𑀭𑁄𑀥𑀸𑀯𑀢𑁆𑀣𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀲𑀪𑀸𑀯𑀥𑀫𑁆𑀫𑁂 𑀬𑀣𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀅𑀜𑁆𑀜𑀣𑀸 𑀅𑀜𑁆𑀜𑁄𑀯 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀦𑀺𑀭𑁄𑀥𑀸𑀯𑀢𑁆𑀣𑀸𑀬 𑀯𑀺𑀬 𑀦𑀺𑀭𑁄𑀥𑀸𑀪𑀺𑀫𑀼𑀔𑀸𑀯𑀢𑁆𑀣𑀸𑀬𑀧𑀺 𑀪𑀯𑀺𑀢𑀩𑁆𑀩𑀁. 𑀲𑀸 𑀞𑀺𑀢𑀺, 𑀚𑀭𑀢𑀸 𑀘𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀞𑀺𑀢𑀺𑀓𑁆𑀔𑀡𑁄 𑀦 𑀯𑀼𑀢𑁆𑀢𑁄𑀢𑀺? 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀸𑀴𑀺 𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀧𑀺 𑀳𑀺 𑀓𑀤𑀸𑀘𑀺 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 ‘‘𑀉𑀧𑀘𑀬𑁄, 𑀲𑀦𑁆𑀢𑀢𑀻’’𑀢𑀺 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑁄. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀤𑀺𑀤𑁂𑀲𑀦𑀸 𑀘𑁂𑀢𑁆𑀣 𑀦𑀺𑀤𑀲𑁆𑀲𑀺𑀢𑀩𑁆𑀩𑀸.

‘‘𑀬𑀲𑁆𑀲 𑀯𑀸 𑀧𑀦𑀸’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀢𑀲𑁆𑀲 ‘‘𑀦𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀦𑀺𑀭𑁄𑀥𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀭𑀽𑀧𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀓𑀢𑁆𑀯𑀸 ‘‘𑀦𑁄’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀯𑀼𑀢𑁆𑀢𑀜𑁆𑀘𑁂𑀢𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑁄 𑀦𑀢𑁆𑀣𑀻’’𑀢𑀺. 𑀢𑀬𑀺𑀤𑀫𑀓𑀸𑀭𑀡𑀁. 𑀅𑀭𑀽𑀧𑀮𑁄𑀓𑀜𑁆𑀳𑀺 𑀲𑀦𑁆𑀥𑀸𑀬, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀯𑀸 ‘‘𑀦𑁄’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀅𑀬𑀜𑁆𑀳𑀺 𑀬𑀫𑀓𑀤𑁂𑀲𑀦𑀸𑀬 𑀧𑀓𑀢𑀺, 𑀬𑀤𑀺𑀤𑀁 𑀬𑀣𑀸𑀲𑀫𑁆𑀪𑀯𑀬𑁄𑀚𑀦𑀸. 𑀏𑀢𑁂𑀦 ‘‘𑀦 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦 𑀬𑀁 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑁂𑀦 𑀬𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀢𑀧𑁆𑀧𑀝𑀺𑀩𑀤𑁆𑀥𑀭𑀽𑀧𑀲𑀗𑁆𑀔𑀸𑀢𑀁, 𑀢𑀲𑁆𑀲 𑀢𑀤𑀸 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀦𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁, 𑀦 𑀲𑀩𑁆𑀩𑀲𑁆𑀲.

𑀲𑀳𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀯𑀘𑀦𑀢𑁄𑀢𑀺 ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁭𑁯) 𑀏𑀯𑀁 𑀲𑀳𑀼𑀧𑁆𑀧𑀸𑀤𑀲𑀳𑀦𑀺𑀭𑁄𑀥𑀯𑀘𑀦𑀢𑁄. 𑀢𑁂𑀦 𑀯𑀘𑀦𑁂𑀦𑀸𑀢𑀺 ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀯𑀘𑀦𑁂𑀦. 𑀅𑀜𑁆𑀜𑀭𑀽𑀧𑀸𑀦𑀦𑁆𑀢𑀺 𑀓𑀫𑁆𑀫𑀉𑀢𑀼𑀆𑀳𑀸𑀭𑀚𑀭𑀽𑀧𑀸𑀦𑀁. 𑀲𑀳𑀼𑀧𑁆𑀧𑀸𑀤𑀲𑀳𑀦𑀺𑀭𑁄𑀥𑀸𑀤𑀺𑀓𑀸𑀦𑀦𑁆𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀲𑀳𑀼𑀧𑁆𑀧𑀸𑀤𑀲𑀳𑀦𑀺𑀭𑁄𑀥𑀅𑀦𑀦𑀼𑀜𑁆𑀜𑀸𑀢𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀅𑀦𑀺𑀯𑀸𑀭𑀺𑀢𑀅𑀩𑁆𑀬𑀸𑀓𑀢𑀪𑀸𑀯𑀸𑀦𑀁 𑀓𑀫𑁆𑀫𑀚𑀸𑀤𑀻𑀦𑀦𑁆𑀢𑀺. 𑀏𑀢𑁂𑀦𑀸𑀢𑀺 ‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀓𑁂𑀦 (𑀬𑀫. 𑁩.𑀥𑀫𑁆𑀫𑀬𑀫𑀓.𑁧𑁬𑁩) 𑀧𑀸𑀞𑁂𑀦, ‘‘𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸’’𑀢𑀺 𑀬𑀼𑀢𑁆𑀢𑀺𑀯𑀘𑀦𑁂𑀦 𑀘. 𑀬𑀫𑀓𑀧𑀸𑀴𑀺𑀅𑀦𑀼𑀲𑁆𑀲𑀭𑀡𑁂𑀢𑀺 𑀬𑀣𑀸𑀤𑀲𑁆𑀲𑀺𑀢𑀘𑀺𑀢𑁆𑀢𑀬𑀫𑀓𑀧𑀸𑀴𑀺𑀬𑀸 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀅𑀦𑀼𑀲𑁆𑀲𑀭𑀡𑁂 𑀯𑀺𑀚𑁆𑀚𑀫𑀸𑀦𑁂. 𑀪𑀺𑀚𑁆𑀚𑀫𑀸𑀦𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀪𑀺𑀚𑁆𑀚𑀫𑀸𑀦𑀢𑀸 𑀦𑀸𑀫 𑀦𑀺𑀭𑀼𑀚𑁆𑀛𑀫𑀸𑀦𑀢𑀸 𑀞𑀺𑀢𑀺𑀬𑀸 𑀅𑀪𑀸𑀯𑀢𑁄. 𑀲𑀳𑀸𑀬𑀪𑀸𑀯𑀁 𑀦𑀸𑀧𑀺 𑀕𑀘𑁆𑀙𑀢𑀺 𑀦𑀺𑀲𑁆𑀲𑀬𑀢𑁆𑀣𑀺𑀪𑀸𑀯𑀸𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀳𑀺 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀘𑀺𑀢𑁆𑀢𑀲𑁆𑀲 𑀩𑀮𑀯𑀢𑀸. 𑀏𑀯𑀜𑁆𑀘 𑀲𑀢𑀻𑀢𑀺 𑀏𑀯𑀜𑁆𑀘 𑀉𑀢𑀼𑀦𑀸𑀧𑀺 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀲𑀢𑀺. 𑀢𑀁𑀘𑀺𑀢𑁆𑀢𑀓𑁆𑀔𑀡𑁂𑀢𑀺 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀔𑀡𑁂, 𑀔𑀡𑀤𑁆𑀯𑀬𑁂𑀧𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀢𑀺 𑀅𑀢𑀺𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦𑁂𑀯. 𑀅𑀣 𑀯𑀸 𑀢𑁂𑀦𑁂𑀯𑀸𑀢𑀺 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀓𑀢𑀸𑀬 𑀭𑀽𑀧𑀲𑁆𑀲 𑀲𑀓𑀮𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀪𑀸𑀯𑁂𑀦𑁂𑀯. 𑀢𑀦𑁆𑀢𑀺 𑀘𑀺𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀬 𑀲𑀳𑀚𑀸𑀢𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥’’𑀦𑁆𑀢𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀁. 𑀢𑀦𑁆𑀢𑀺 𑀭𑀽𑀧𑀁. 𑀢𑀤𑀦𑀦𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀲𑀳𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀲𑀓𑀮𑀁 𑀘𑀺𑀢𑁆𑀢𑀓𑁆𑀔𑀡𑀁 𑀭𑀽𑀧𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑀸𑀭𑀫𑁆𑀪𑁄𑀢𑀺 𑀆𑀳 ‘‘𑀦, 𑀘𑀺𑀢𑁆𑀢𑀦𑀺𑀭𑁄𑀥𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑀸𑀭𑀫𑁆𑀪𑀸𑀪𑀸𑀯𑀢𑁄’’𑀢𑀺. 𑀘𑀺𑀢𑁆𑀢𑀓𑁆𑀔𑀡𑁂𑀢𑀺 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀔𑀡𑁂. 𑀢𑀦𑁆𑀢𑀺 𑀭𑀽𑀧𑀁. 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀓𑀺𑀘𑁆𑀘𑀦𑁆𑀢𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀓𑀺𑀘𑁆𑀘𑀜𑁆𑀘. 𑀞𑀺𑀢𑀺𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀸𑀮𑀸𑀪𑀦𑁆𑀢𑀺 𑀞𑀺𑀢𑀺𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀩𑁆𑀩𑁄 𑀬𑁄 𑀯𑀺𑀲𑁂𑀲𑁄, 𑀢𑀲𑁆𑀲 𑀅𑀮𑀸𑀪𑀁. 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀬𑁂𑀦 𑀲𑀳𑀼𑀧𑁆𑀧𑀚𑁆𑀚𑀢𑀺, 𑀢𑀁𑀘𑀺𑀢𑁆𑀢𑀓𑁆𑀔𑀡𑁂 𑀭𑀽𑀧𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯𑀸’’𑀢𑀺 𑀇𑀤𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁.

𑀬𑀁 𑀬𑀲𑁆𑀲 𑀲𑀫𑁆𑀩𑀦𑁆𑀥𑀺𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀢𑀁 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀢𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀦𑁆𑀢𑀺 𑀆𑀳 ‘‘𑀢𑀢𑁄 𑀧𑀭𑀁…𑀧𑁂… 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄’’𑀢𑀺. 𑀢𑀲𑁆𑀫𑀸 ‘‘𑀢𑀢𑁄’’𑀢𑀺 𑀏𑀢𑁆𑀣 𑀢𑀁𑀲𑀤𑁆𑀤𑁂𑀦 𑀘𑀼𑀢𑀺𑀁 𑀧𑀘𑁆𑀘𑀸𑀫𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀼𑀢𑀺𑀢𑁄 𑀧𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀦𑀢𑁆𑀣𑀻𑀢𑀺 𑀓𑀢𑁆𑀯𑀸𑀢𑀺 𑀬𑀤𑀺𑀧𑀺 𑀬𑀣𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑀸 𑀭𑀽𑀧𑀸𑀦𑀁 𑀅𑀭𑀽𑀧𑁂𑀳𑀺, 𑀅𑀭𑀽𑀧𑀸𑀦𑀜𑁆𑀘 𑀭𑀽𑀧𑁂𑀳𑀺 𑀦𑀢𑁆𑀣𑀺. 𑀬𑀣𑀸 𑀘 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀣𑀸 𑀅𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀢𑀼𑀢𑁆𑀣𑀲𑁆𑀲 𑀧𑀓𑀸𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀢𑀬𑁄 𑀧𑀓𑀸𑀭𑁂 𑀆𑀳𑀸’’𑀢𑀺 𑀯𑀼𑀢𑁆𑀢𑀁.

‘‘𑀢𑁂𑀲𑀁𑀬𑁂𑀯 𑀭𑀽𑀧𑀸𑀦𑀁 𑀓𑀸𑀬𑀯𑀺𑀓𑀸𑀭𑁄’’𑀢𑀺𑀆𑀤𑀺𑀦𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀁 𑀯𑀺𑀓𑀸𑀭𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀩𑁆𑀩𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀲𑀗𑁆𑀔𑀢𑀫𑁂𑀯𑀸’’𑀢𑀺 𑀯𑀤𑀦𑁆𑀢𑁂𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸𑀧𑀭𑀺𑀬𑀸𑀬𑁄 𑀤𑀲𑁆𑀲𑀺𑀢𑁄. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀧𑀸𑀢𑀼𑀪𑀸𑀯𑀯𑀺𑀤𑁆𑀥𑀁𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑁄, 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀸. ‘‘𑀅𑀬𑀁 𑀤𑀢𑁆𑀢𑁄 𑀦𑀸𑀫 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀦𑀸𑀫𑀓𑀭𑀡𑀁 𑀦𑀸𑀫𑀕𑁆𑀕𑀳𑀡𑀁. 𑀲𑀫𑀸𑀧𑀚𑁆𑀚𑀦𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀦𑀸𑀫𑀓𑀸𑀬𑀲𑁆𑀲 𑀦𑀺𑀭𑁄𑀥𑀫𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀢𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑁄𑀢𑀺 𑀲𑀸𑀥𑀺𑀬𑀫𑀸𑀦𑁄.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀤𑁂𑀲𑀦𑀸𑀓𑁆𑀓𑀫𑁄𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀺𑀓𑁄 𑀤𑁂𑀲𑀦𑀸𑀓𑁆𑀓𑀫𑁄𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀼𑀩𑁆𑀩𑀼𑀓𑁆𑀓𑀁𑀲𑀢𑁄𑀢𑀺 𑀤𑀸𑀦𑀲𑀻𑀮𑀓𑀸𑀫𑀸𑀤𑀻𑀦𑀯𑀸𑀤𑀺𑀤𑀲𑁆𑀲𑀦𑀦𑁂𑀓𑁆𑀔𑀫𑁆𑀫𑀓𑀣𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀉𑀓𑁆𑀓𑀝𑁆𑀞𑀪𑀸𑀯𑀢𑁄 𑀓𑀣𑀸𑀦𑀁 𑀅𑀦𑀼𑀧𑀼𑀩𑁆𑀩𑀼𑀓𑁆𑀓𑀁𑀲𑀢𑀸 𑀯𑀼𑀢𑁆𑀢𑀸. 𑀢𑁂𑀦 𑀉𑀓𑁆𑀓𑀁𑀲𑀓𑁆𑀓𑀫𑁄 𑀦𑀸𑀫𑀸𑀬𑀁 𑀯𑀺𑀲𑀼𑀁 𑀓𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸𑀧𑀺 𑀤𑀸𑀦𑀸𑀤𑀻𑀦𑀁 𑀤𑁂𑀲𑀦𑀸𑀓𑁆𑀓𑀫𑀸𑀯𑀭𑁄𑀥𑀦𑁂 𑀓𑀸𑀭𑀡𑀫𑀸𑀳 ‘‘𑀉𑀧𑁆𑀧𑀢𑁆𑀢𑀺𑀆𑀤𑀺𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄’’𑀢𑀺. 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀳𑀸𑀦𑀧𑀝𑀺𑀧𑀢𑁆𑀢𑀺𑀪𑀽𑀫𑀺𑀓𑁆𑀓𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀘𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀯𑀺𑀲𑀬𑀪𑀽𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀘𑀭𑀽𑀧𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑀢𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀏𑀓𑀤𑁂𑀲𑁂𑀦𑀸’’𑀢𑀺𑀆𑀤𑀺. 𑀏𑀓𑀤𑁂𑀲𑁂𑀦𑀸𑀢𑀺 𑀩𑀸𑀳𑀺𑀭𑁄𑀴𑀸𑀭𑀺𑀓𑀸𑀬𑀢𑀦𑁂𑀳𑀺. 𑀏𑀢𑁆𑀣𑀸𑀢𑀺 ‘‘𑀬𑀁 𑀯𑁂𑀤𑀬𑀢𑀺, 𑀢𑀁 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 𑀯𑀼𑀢𑁆𑀢𑀦𑀬𑁂𑀦.

𑀢𑀁𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀦𑁆𑀢𑀺 𑀅𑀦𑀸𑀲𑀯𑀥𑀫𑁆𑀫𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀁. 𑀅𑀦𑀸𑀲𑀯𑀸 𑀔𑀦𑁆𑀥𑁂𑀲𑁆𑀯𑁂𑀯 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄 𑀲𑀸𑀲𑀯𑀸𑀦𑀫𑁆𑀧𑀺 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀢𑁆𑀢𑀸. 𑀦𑀦𑀼 𑀘 𑀅𑀦𑀸𑀲𑀯𑀥𑀫𑁆𑀫𑁄 𑀔𑀦𑁆𑀥𑁂𑀲𑀼 𑀅𑀯𑀼𑀢𑁆𑀢𑁄𑀧𑀺 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺, 𑀔𑀦𑁆𑀥𑀸𑀥𑀺𑀓𑀸𑀭𑁂 𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀅𑀦𑀸𑀲𑀯𑀸 𑀕𑀬𑁆𑀳𑀦𑁆𑀢𑀻𑀢𑀺 𑀦𑀸𑀬𑀁 𑀤𑁄𑀲𑁄.

𑀬𑀣𑀸 𑀨𑀲𑁆𑀲𑀸𑀤𑀬𑁄 𑀯𑀺𑀲𑁂𑀲𑀢𑁄 𑀢𑀤𑀦𑀼𑀕𑀼𑀡𑀯𑀼𑀢𑁆𑀢𑀺𑀢𑀸𑀬 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀲𑀪𑀸𑀯𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀲𑀫𑀯𑀭𑀼𑀤𑁆𑀥𑀸, 𑀦 𑀏𑀯𑀁 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀭𑀽𑀧𑀥𑀫𑁆𑀫𑀸 𑀯𑀺𑀬 𑀢𑀸𑀦𑀺 𑀯𑀺𑀲𑀼𑀁 𑀔𑀦𑁆𑀥𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀏𑀢𑁂𑀦 𑀨𑀲𑁆𑀲𑀸𑀤𑀻𑀦𑀁 𑀯𑀺𑀲𑀼𑀁 𑀔𑀦𑁆𑀥𑀲𑀤𑁆𑀤𑀯𑀘𑀦𑀻𑀬𑀢𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀨𑀼𑀲𑀦𑀸𑀤𑀬𑁄 𑀧𑀦𑀸’’𑀢𑀺𑀆𑀤𑀺. 𑀇𑀢𑀺𑀆𑀤𑀻𑀦𑀜𑁆𑀘 𑀲𑀼𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺 𑀭𑀽𑀧𑀁 𑀉𑀧𑀸𑀤𑀸𑀬 𑀭𑀽𑀧𑀁 𑀅𑀪𑀺𑀦𑀺𑀯𑀺𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀁𑀬𑁄𑀚𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑀸. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀁𑀬𑁄𑀚𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁧𑁫𑁮), 𑀢𑀣𑀸 ‘‘𑀅𑀳𑀁 𑀭𑀽𑀧𑀁, 𑀫𑀫 𑀭𑀽𑀧𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁩.𑁧) 𑀘 𑀏𑀯𑀫𑀸𑀤𑀻𑀦𑀁 𑀲𑀼𑀢𑁆𑀢𑀧𑀤𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀦𑀸𑀢𑀺 𑀅𑀢𑁆𑀢𑀦𑀸 𑀤𑀲𑁆𑀲𑀺𑀢𑀲𑀼𑀢𑁆𑀢𑁂𑀦. 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀯𑀲𑁂𑀦 𑀘𑀸𑀢𑀺 ‘‘𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸) 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦. ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀏𑀢𑁂𑀦 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀧𑀺 𑀤𑀺𑀝𑁆𑀞𑀺 𑀔𑀦𑁆𑀥𑁂 𑀏𑀯 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀔𑀦𑁆𑀥𑀸𑀭𑀫𑁆𑀫𑀡𑀸𑀢𑀺 𑀤𑀲𑁆𑀲𑁂𑀢𑀺.

𑀯𑁂𑀤𑀦𑀸𑀓𑀸𑀭𑀡𑀸𑀬𑀸𑀢𑀺 𑀯𑁂𑀤𑀦𑀸𑀬𑀸𑀢𑀦𑀸𑀬. 𑀙𑀸𑀤𑀸𑀧𑀦𑀢𑁄𑀢𑀺 𑀭𑁄𑀘𑀸𑀧𑀦𑀢𑁄. 𑀩𑀸𑀳𑀼𑀮𑁆𑀮𑁂𑀦𑀸𑀢𑀺 𑀩𑀳𑀼𑀮𑀪𑀸𑀯𑁂𑀦. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀳𑀺 𑀩𑀸𑀳𑀼𑀮𑁆𑀮𑀧𑁆𑀧𑀯𑀢𑁆𑀢𑀺𑀓𑀸, 𑀦 𑀇𑀢𑀭𑁂.

𑀧𑀼𑀝𑀁 𑀓𑀢𑁆𑀯𑀸𑀢𑀺 𑀘 𑀙𑀢𑁆𑀢𑀲𑀤𑀺𑀲𑀁 𑀧𑀼𑀝𑀁 𑀩𑀦𑁆𑀥𑀁 𑀓𑀢𑁆𑀯𑀸. 𑀯𑀢𑁆𑀣𑀼𑀫𑁆𑀳𑀻𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼𑀫𑁆𑀳𑀺. 𑀯𑀝𑁆𑀝𑀕𑀢𑀯𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸 𑀳𑀺 𑀇𑀥 𑀤𑀝𑁆𑀞𑀩𑁆𑀩𑀪𑀸𑀯𑁂 𑀞𑀺𑀢𑀸. 𑀊𑀦𑁂𑀳𑀻𑀢𑀺 𑀯𑀢𑁆𑀣𑀼𑀦𑀸, 𑀓𑀺𑀮𑁂𑀲𑁂𑀳𑀺 𑀘 𑀊𑀦𑁂𑀳𑀺.

𑀫𑀸𑀬𑀸𑀬𑀸𑀢𑀺 𑀇𑀦𑁆𑀤𑀚𑀸𑀮𑀸𑀤𑀺𑀫𑀸𑀬𑀸𑀬 𑀧𑀬𑁄𑀕𑁄 𑀫𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀫𑀸𑀬𑀸𑀬 𑀤𑀲𑁆𑀲𑀺𑀢𑀁 𑀭𑀽𑀧𑀁 ‘𑀫𑀸𑀬𑀸’𑀢𑀺 𑀆𑀳𑀸’’𑀢𑀺. 𑀯𑀢𑁆𑀣𑀼𑀪𑀸𑀯𑀸𑀤𑀺𑀢𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀢𑁆𑀣𑀘𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑁂. 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀅𑀲𑀼𑀪𑀸𑀤𑀺𑀓𑁄𑀯.

𑀢𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀲𑁆𑀲. 𑀬𑀲𑁆𑀲 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀫𑀼𑀔𑁂𑀦 𑀲𑀩𑁆𑀩𑀭𑀸𑀕𑀧𑁆𑀧𑀳𑀸𑀦𑀁 𑀲𑀫𑁆𑀪𑀯𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀫𑀭𑀸𑀕𑀫𑀼𑀔𑁂𑀦 𑀯𑀸 𑀲𑀩𑁆𑀩𑀮𑁄𑀪𑀧𑁆𑀧𑀳𑀸𑀦𑀁 𑀯𑀤𑀢𑀻’’𑀢𑀺. 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑁄 𑀢𑀲𑁆𑀲𑀸 𑀲𑀫𑀼𑀤𑀬𑀪𑀽𑀢𑁂 𑀨𑀲𑁆𑀲𑁂𑀧𑀺 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺. 𑀧𑀭𑀺𑀜𑁆𑀜𑀢𑁆𑀢𑀬𑀲𑁆𑀲 𑀬𑁄𑀚𑀦𑀸 𑀧𑀸𑀓𑀝𑀸 𑀏𑀯.

𑀢𑀢𑁄𑀢𑀺 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀲𑀼𑀔𑀯𑀺𑀦𑀸𑀲𑀦𑀸𑀦𑀁 𑀅𑀤𑀲𑁆𑀲𑀦𑀢𑁄. 𑀪𑀺𑀦𑁆𑀤𑀢𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀢𑀦𑁆𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀁 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀢𑀻𑀭𑁂𑀢𑀺.

𑀢𑀁 𑀧𑀚𑀳𑀦𑁆𑀢𑁄𑀢𑀺 𑀅𑀯𑀺𑀚𑁆𑀚𑀁 𑀧𑀚𑀳𑀦𑁆𑀢𑁄. 𑀧𑀭𑀸𑀫𑀝𑁆𑀞𑀦𑁆𑀢𑀺 𑀧𑀭𑀸𑀫𑀸𑀲𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀺𑀢𑀁. 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑀻𑀢𑀺 𑀅𑀬𑀫𑀢𑁆𑀣𑁄 ‘‘𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑁂𑀳𑀺 (𑀫. 𑀦𑀺. 𑁧.𑁩𑁯𑁬) 𑀤𑀻𑀧𑁂𑀢𑀩𑁆𑀩𑁄.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁪. 𑀢𑀁 𑀯𑀢𑁆𑀯𑀸𑀢𑀺 𑀢𑀁 𑀪𑀽𑀫𑀺𑀯𑀲𑁂𑀦 𑀚𑀸𑀦𑀺𑀢𑀩𑁆𑀩𑀢𑀁 ‘‘𑀲𑀩𑁆𑀩𑀸𑀧𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸. 𑀲𑀫𑁆𑀧𑀬𑀼𑀢𑁆𑀢𑀢𑁄 𑀤𑀲𑁆𑀲𑀺𑀢𑀢𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀳𑁂𑀢𑀼𑀚𑀸𑀢𑀺𑀪𑀽𑀫𑀺𑀇𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀲𑀫𑁆𑀨𑀲𑁆𑀲𑀚𑀪𑁂𑀤𑀢𑁄 𑀤𑀲𑁆𑀲𑀺𑀢𑀢𑀁 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀡𑁆𑀳𑀸𑀢𑀺.

𑀬𑀤𑀺𑀧𑀺 𑀢𑀁-𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀲𑀸𑀫𑀜𑁆𑀜𑀢𑁄 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀢𑀣𑀸𑀧𑀺 𑀅𑀦𑀦𑁆𑀢𑀭𑀫𑁂𑀯 𑀧𑀘𑁆𑀘𑀸𑀫𑀲𑀺𑀢𑀼𑀁 𑀬𑀼𑀢𑁆𑀢𑁄 𑀇𑀢𑀭𑀢𑁆𑀣 𑀅𑀲𑀫𑁆𑀪𑀯𑀢𑁄𑀢𑀺 𑀆𑀳 ‘‘𑀅𑀝𑁆𑀞…𑀧𑁂… 𑀬𑁄𑀚𑀦𑀸’’𑀢𑀺. ‘‘𑀅𑀝𑁆𑀞𑀯𑀺𑀥𑀢𑁆𑀢𑀸𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀢𑀁 𑀅𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺.

𑀧𑀽𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑁄, 𑀅𑀧𑀼𑀩𑁆𑀩𑀢𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄.

𑀕𑀳𑀡𑀯𑀟𑁆𑀠𑀦𑀯𑀲𑁂𑀦𑀸𑀢𑀺 𑀕𑀳𑀡𑀲𑁆𑀲 𑀯𑀟𑁆𑀠𑀦𑀯𑀲𑁂𑀦. 𑀕𑀳𑀡𑀦𑁆𑀢𑀺 𑀘𑁂𑀢𑁆𑀣 𑀓𑀣𑀦𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀲 𑀯𑀟𑁆𑀠𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀯𑀼𑀢𑁆𑀢𑀲𑁆𑀲 𑀓𑀣𑀦𑀁. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀕𑀳𑀺𑀢𑀢𑁄 𑀅𑀜𑁆𑀜𑀲𑁆𑀲 𑀕𑀳𑀡𑀁 𑀯𑀟𑁆𑀠𑀦’’𑀦𑁆𑀢𑀺, 𑀢𑀢𑁄 𑀏𑀯 𑀘 ‘‘𑀧𑀼𑀭𑀺𑀫𑀕𑀳𑀺𑀢𑁂 𑀅𑀜𑁆𑀜𑀼𑀧𑀘𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀯𑀟𑁆𑀠𑀦𑀲𑀤𑁆𑀤𑁄 𑀙𑁂𑀤𑀦𑀢𑁆𑀣𑁄’’𑀢𑀺 𑀇𑀤𑀁 𑀬𑀣𑀸 𑀅𑀲𑀺𑀯𑀸 ‘‘𑀲𑀺𑀯𑀸’’𑀢𑀺, 𑀤𑀺𑀝𑁆𑀞𑀜𑁆𑀘 ‘‘𑀅𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀦𑀬𑀦𑀻𑀳𑀭𑀡𑀦𑁆𑀢𑀺 𑀦𑀻𑀬𑀢𑀻𑀢𑀺 𑀦𑀬𑁄, 𑀤𑁂𑀲𑀦𑀸, 𑀢𑀲𑁆𑀲 𑀦𑀻𑀳𑀭𑀡𑀁 𑀧𑀯𑀢𑁆𑀢𑀦𑀁. 𑀯𑀟𑁆𑀠𑀦𑀓𑀦𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀟𑁆𑀠𑀦𑀓𑀯𑀲𑁂𑀦 𑀧𑀯𑀢𑁆𑀢𑁄 𑀤𑁂𑀲𑀦𑀸𑀦𑀬𑁄. 𑀅𑀜𑁆𑀜𑁂 𑀪𑁂𑀤𑀸𑀢𑀺 𑀏𑀓𑀯𑀺𑀥𑀘𑀢𑀼𑀩𑁆𑀩𑀺𑀥𑀸𑀤𑀬𑁄 𑀪𑁂𑀤𑀸. 𑀬𑀤𑀺 𑀅𑀯𑀺𑀲𑀺𑀝𑁆𑀞𑀸, 𑀓𑀲𑁆𑀫𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀣𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀜𑁆𑀜𑀸𑀧𑁆𑀧𑀪𑁂𑀤𑀚𑀦𑀦𑀢𑁆𑀣𑀦𑁆𑀢𑀺 𑀥𑀫𑁆𑀫𑀯𑀺𑀲𑀬𑀸𑀬 𑀧𑀪𑁂𑀤𑀕𑀢𑀸𑀬 𑀧𑀜𑁆𑀜𑀸𑀬 𑀯𑀺𑀦𑁂𑀬𑁆𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁, 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀯𑀺𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀯𑀺𑀪𑀸𑀕𑀢𑀸𑀬 𑀲𑀫𑁆𑀫𑀲𑀦𑀯𑀸𑀭𑀲𑁆𑀲 𑀯𑀺𑀲𑀬𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀏𑀓𑁂𑀓𑀲𑁆𑀲 𑀯𑀸𑀭𑀲𑁆𑀲 𑀕𑀳𑀺𑀢𑀲𑁆𑀲 𑀦𑀺𑀬𑁆𑀬𑀸𑀦𑀫𑀼𑀔𑀪𑀸𑀯𑀢𑁄’’𑀢𑀺. 𑀇𑀢𑀭𑁂𑀧𑀺 𑀪𑁂𑀤𑀸 𑀯𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀢𑀺𑀯𑀺𑀥𑀪𑁂𑀤𑀸𑀦𑀁 𑀬𑀁 𑀦𑀸𑀦𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦 𑀇𑀢𑀭𑁂 𑀪𑁂𑀤𑀸 𑀅𑀦𑀸𑀦𑀢𑁆𑀢𑀸𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 𑀯𑀼𑀢𑁆𑀢𑀸. ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀦𑀸 𑀪𑁂𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑁂𑀓𑁆𑀔𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀯𑀺𑀲𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺.

𑀬𑀣𑀸 𑀤𑀼𑀓𑀫𑀽𑀮𑀓𑀸𑀤𑀻𑀲𑀼 𑀪𑁂𑀤𑀸 𑀕𑀡𑀦𑀸𑀦𑀼𑀧𑀼𑀩𑁆𑀩𑀺𑀬𑀸 𑀧𑀯𑀢𑁆𑀢𑀸 𑀧𑀪𑁂𑀤𑀦𑁆𑀢𑀭𑀸𑀧𑁂𑀓𑁆𑀔𑀸, 𑀦 𑀏𑀯𑀫𑁂𑀢𑁂. 𑀏𑀢𑁂 𑀧𑀦 𑀲𑀢𑁆𑀢𑀯𑀺𑀥𑀸𑀤𑀺𑀪𑁂𑀤𑀸 𑀧𑀪𑁂𑀤𑀦𑁆𑀢𑀭𑀦𑀺𑀭𑀧𑁂𑀓𑁆𑀔𑀸 𑀓𑁂𑀯𑀮𑀁 𑀩𑀳𑀼𑀯𑀺𑀥𑀪𑀸𑀯𑀲𑀸𑀫𑀜𑁆𑀜𑁂𑀦𑁂𑀯 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀜𑁆𑀜𑀧𑁆𑀧𑀪𑁂𑀤𑀦𑀺𑀭𑀧𑁂𑀓𑁆𑀔𑀸’’𑀢𑀺𑀆𑀤𑀺𑀦𑀸. 𑀤𑀼𑀓𑀢𑀺𑀓𑀧𑀤𑀢𑁆𑀣𑀸𑀦𑀁 𑀬𑀣𑀸𑀭𑀳𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀧𑁂𑀓𑁆𑀔𑀓𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀤𑀼𑀓𑁂 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀸 𑀢𑀺𑀓𑀸 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀸 𑀦𑀸𑀫 𑀚𑀸𑀢𑀸, 𑀏𑀯𑀁 𑀢𑀺𑀓𑀤𑀼𑀓𑀧𑀤𑀢𑁆𑀣𑀸𑀦𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀧𑁂𑀓𑁆𑀔𑀓𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁂 𑀯𑀢𑁆𑀯𑀸 𑀯𑀼𑀢𑁆𑀢𑁂𑀲𑀼𑀧𑀺 𑀢𑀺𑀓𑁂𑀲𑀼 𑀢𑁂 𑀧𑀓𑁆𑀔𑀺𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀭𑀢𑁄…𑀧𑁂… 𑀬𑁄𑀚𑀺𑀢𑀢𑁆𑀢𑀸’’𑀢𑀺.

𑀲𑀫𑀸𑀦𑀯𑀻𑀣𑀺𑀬𑀦𑁆𑀢𑀺 𑀏𑀓𑀯𑀻𑀣𑀺𑀬𑀁. 𑀘𑀓𑁆𑀔𑀼𑀲𑀗𑁆𑀖𑀝𑁆𑀝𑀦𑀸𑀬𑀸𑀢𑀺 𑀘𑀓𑁆𑀔𑀼𑀭𑀽𑀧𑀧𑀝𑀺𑀖𑀸𑀢𑁂𑀦. 𑀲𑁄𑀢𑀺 𑀘𑀓𑁆𑀔𑀼𑀭𑀽𑀧𑀧𑀝𑀺𑀖𑀸𑀢𑁄. 𑀢𑀤𑀼𑀧𑁆𑀧𑀸𑀤𑀺𑀓𑀸𑀢𑀺 𑀢𑀲𑁆𑀲 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑀺𑀓𑀸. 𑀲𑀸𑀢𑀺 𑀆𑀯𑀚𑁆𑀚𑀦𑀯𑁂𑀤𑀦𑀸. 𑀦𑀦𑀼 𑀘 𑀯𑁂𑀤𑀦𑀸𑀧𑀘𑁆𑀘𑀬𑁄 𑀨𑀲𑁆𑀲𑁄 𑀯𑀼𑀢𑁆𑀢𑁄, 𑀦 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺? 𑀦, 𑀯𑁂𑀤𑀦𑀸𑀲𑀻𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀕𑀳𑀺𑀢𑀢𑁆𑀢𑀸𑀢𑀺. 𑀢𑀧𑁆𑀧𑀬𑁄𑀚𑀦𑀢𑁆𑀢𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀬𑁄𑀚𑀦𑀢𑁆𑀢𑀸. 𑀧𑀬𑁄𑀚𑀬𑀢𑀻𑀢𑀺 𑀧𑀬𑁄𑀚𑀦𑀁, 𑀨𑀮𑀁.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸𑀦𑀁 𑀯𑀺𑀧𑀸𑀓𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀳𑀺 𑀇𑀥 𑀅𑀕𑁆𑀕𑀳𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀢𑁂𑀲𑀁 𑀲𑀬𑀫𑁂𑀯 𑀫𑀦𑁄𑀤𑁆𑀯𑀸𑀭𑀪𑀽𑀢𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁄𑀢𑀺 𑀪𑀯𑀗𑁆𑀕𑀢𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀤𑀺𑀓𑀼𑀲𑀮𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀏𑀯𑀫𑀸𑀤𑀬𑁄 𑀲𑀗𑁆𑀕𑀳𑀺𑀢𑀸, 𑀤𑀼𑀢𑀺𑀬𑁂𑀦 𑀅𑀓𑀼𑀲𑀮𑀸𑀤𑀬𑁄. ‘‘𑀓𑀸𑀫𑀸𑀯𑀘𑀭𑀅𑀝𑁆𑀞𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀓𑀸𑀫𑀸𑀯𑀘𑀭𑀸𑀦𑀁𑀬𑁂𑀯 𑀬𑁄𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀯𑀻𑀣𑀺𑀬𑀁 𑀮𑀩𑁆𑀪𑀫𑀸𑀦𑀢𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸’’𑀢𑀺. 𑀯𑁂𑀤𑀦𑀸𑀧𑀻𑀢𑀺𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀯𑀚𑁆𑀚𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀢𑀺𑀓𑀸𑀦𑀁 𑀯𑀲𑁂𑀦 𑀏𑀓𑀽𑀦𑀯𑀻𑀲𑀢𑀺𑀘𑀢𑀼𑀯𑀻𑀲𑀢𑀺𑀓𑀸. 𑀬𑀤𑀺 𑀅𑀲𑀫𑀸𑀦𑀯𑀻𑀣𑀺𑀬𑀫𑁆𑀧𑀺 𑀓𑀼𑀲𑀮𑀸𑀤𑀻𑀦𑀁 𑀮𑀩𑁆𑀪𑀫𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸, 𑀅𑀣 𑀓𑀲𑁆𑀫𑀸 𑀲𑀫𑀸𑀦𑀯𑀻𑀣𑀺𑀬𑀁𑀬𑁂𑀯 𑀬𑁄𑀚𑀺𑀢𑀸𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑁂𑀦𑁂𑀯𑀸𑀢𑀺 𑀅𑀲𑀫𑀸𑀦𑀯𑀻𑀣𑀺𑀬𑀁 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀬𑁂𑀯.

𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑁄𑀢𑀺 𑀘𑀺𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑁄 𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑀻𑀲𑁂𑀦 𑀯𑁂𑀤𑀦𑀸𑀬 𑀓𑀣𑀦𑀁. 𑀢𑀺𑀓𑀪𑀽𑀫𑀺𑀯𑀲𑁂𑀦𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀢𑀺𑀓𑀯𑀲𑁂𑀦, 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀯𑀲𑁂𑀦 𑀘. 𑀤𑁆𑀯𑀸𑀭𑀢𑀺𑀓𑀯𑀲𑁂𑀦𑀸𑀢𑀺 𑀘𑀓𑁆𑀔𑀸𑀤𑀺𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀯𑀲𑁂𑀦, 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀢𑀺𑀓𑀯𑀲𑁂𑀦 𑀘. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀤𑀻𑀧𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑁂𑀲𑀸𑀪𑀸𑀯𑀢𑁄 𑀲𑀢𑁆𑀢𑀯𑀺𑀥𑀪𑁂𑀤𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺. 𑀦 𑀘 𑀤𑁆𑀯𑀸𑀭𑀁 𑀅𑀦𑀸𑀫𑀝𑁆𑀞𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦 𑀲𑀢𑁆𑀢𑀯𑀺𑀥𑀪𑁂𑀤𑀢𑁄 𑀢𑀺𑀁𑀲𑀯𑀺𑀥𑀪𑁂𑀤𑁂 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 𑀉𑀪𑀬𑀢𑁆𑀣 𑀪𑀽𑀫𑀺𑀬𑁄 𑀆𑀕𑀢𑀸, 𑀭𑀽𑀧𑀸𑀯𑀘𑀭𑀸𑀤𑀺𑀪𑀽𑀫𑀺𑀆𑀫𑀲𑀦𑁂𑀦 𑀧𑀦 𑀅𑀲𑀫𑀸𑀦𑀯𑀻𑀣𑀺𑀬𑀁 𑀮𑀩𑁆𑀪𑀫𑀸𑀦𑀢𑀸 𑀤𑀲𑁆𑀲𑀺𑀢𑀸𑀢𑀺 𑀆𑀳 ‘‘𑀅𑀢𑀺𑀩𑁆𑀬𑀢𑁆𑀢𑀸 𑀘 𑀏𑀢𑁆𑀣 𑀲𑀫𑀸𑀦𑀸𑀲𑀫𑀸𑀦𑀯𑀻𑀣𑀻𑀲𑀼 𑀮𑀩𑁆𑀪𑀫𑀸𑀦𑀢𑀸’’𑀢𑀺. 𑀲𑀼𑀔𑀤𑀻𑀧𑀦𑀸𑀦𑀺 𑀳𑁄𑀦𑁆𑀢𑀺 𑀤𑁆𑀯𑀸𑀭𑀪𑀽𑀫𑀺𑀆𑀫𑀲𑀦𑀫𑀼𑀔𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀢𑁆𑀢𑀢𑁆𑀢𑀸. 𑀦 𑀪𑀽𑀫𑀺𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀞𑀧𑀺𑀢𑀸𑀢𑀺 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀪𑀽𑀫𑀺𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦 𑀞𑀧𑀺𑀢𑀸, 𑀪𑀽𑀫𑀺𑀯𑀺𑀪𑀸𑀕𑁂𑀦 𑀦 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀧𑁂𑀓𑁆𑀔𑀺𑀢𑀩𑁆𑀩𑀭𑀳𑀺𑀢𑀸𑀢𑀺 𑀤𑁆𑀯𑀸𑀭𑀪𑀽𑀫𑀻𑀦𑀁 𑀅𑀕𑁆𑀕𑀳𑀺𑀢𑀢𑁆𑀢𑀸 𑀆𑀓𑀗𑁆𑀔𑀺𑀢𑀩𑁆𑀩𑀤𑁆𑀯𑀸𑀭𑀸𑀤𑀺𑀯𑀺𑀲𑁂𑀲𑀭𑀳𑀺𑀢𑀸.

‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸’’𑀢𑀺 𑀏𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀭𑀺𑀬𑀸𑀬𑀢𑁄 𑀘 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀤𑀲𑁆𑀲𑀦𑀫𑀼𑀔𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀦𑀺𑀲𑁆𑀲𑀬𑀸𑀦𑀦𑁆𑀢𑀺 𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀁. 𑀤𑀲𑁆𑀲𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀤𑀺𑀲𑁆𑀯𑀸 𑀯𑀸 𑀕𑀳𑀡𑀁. 𑀉𑀧𑀦𑀺𑀲𑁆𑀲𑀬𑀦𑁆𑀢𑀪𑀸𑀯𑁂𑀦𑀸𑀢𑀺 𑀮𑀸𑀫𑀓𑀽𑀧𑀦𑀺𑀲𑁆𑀲𑀬𑀪𑀸𑀯𑁂𑀦. 𑀬𑀤𑀺 𑀖𑀸𑀬𑀦𑀸𑀤𑀻𑀦𑀺 𑀉𑀧𑀦𑀺𑀲𑁆𑀲𑀬𑁄 𑀪𑀯𑁂𑀬𑁆𑀬𑀼𑀁, 𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀦𑁂𑀯 𑀲𑀺𑀬𑀼𑀁. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀘 𑀦𑀸𑀦𑀸𑀯𑀻𑀣𑀺𑀬𑀁𑀬𑁂𑀯𑀸𑀢𑀺 𑀢𑀤𑀮𑀸𑀪𑀯𑀘𑀦𑀁 𑀇𑀥 𑀦𑀸𑀦𑀸𑀯𑀻𑀣𑀺𑀚𑁄𑀢𑀓𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀖𑀸𑀦𑀸𑀤𑀺𑀤𑁆𑀯𑀸𑀭𑁂𑀲𑀽’’𑀢𑀺𑀆𑀤𑀺𑀦𑀸. 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀦𑁆𑀢𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀯𑀺𑀧𑀲𑁆𑀲𑀦𑀸𑀯𑀟𑁆𑀠𑀦𑀸𑀤𑀻𑀦𑀁. 𑀢𑀤𑀮𑀸𑀪𑁄𑀢𑀺 𑀉𑀧𑀦𑀺𑀲𑁆𑀲𑀬𑀸𑀮𑀸𑀪𑁄, 𑀲𑁄 𑀘 𑀖𑀸𑀬𑀦𑀸𑀤𑀻𑀳𑀺 𑀧𑀭𑁂𑀲𑀁 𑀧𑀝𑀺𑀧𑀢𑁆𑀢𑀺𑀬𑀸 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀅𑀦𑁆𑀢𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀤𑀻𑀦𑀁 𑀲𑀯𑀦𑁂𑀦 𑀯𑀺𑀦𑀸 𑀢𑀁𑀨𑀼𑀲𑀦𑀁 𑀲𑀺𑀬𑀸 𑀫𑀽𑀮𑀽𑀧𑀦𑀺𑀲𑁆𑀲𑀬𑁄𑀢𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄𑀢𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄. 𑀢𑁂𑀦𑀸𑀢𑀺 ‘‘𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑁂𑀦. 𑀢𑀤𑀼𑀧𑀦𑀺𑀲𑁆𑀲𑀬𑀦𑁆𑀢𑀺 𑀢𑀢𑁄 𑀧𑀭𑀁 𑀉𑀧𑁆𑀧𑀦𑁆𑀦𑀓𑀲𑀺𑀡𑀭𑀽𑀧𑀤𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑀁.

𑀣𑀸𑀫𑀕𑀫𑀦𑀁 𑀦𑀸𑀫 𑀓𑀸𑀫𑀭𑀸𑀕𑀸𑀤𑀻𑀦𑀁𑀬𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄𑀢𑀺 𑀆𑀳 ‘‘𑀅𑀧𑁆𑀧𑀳𑀻𑀦𑀓𑀸𑀫𑀭𑀸𑀕𑀸𑀤𑀺𑀓𑀲𑁆𑀲 𑀯𑀸’’𑀢𑀺. ‘‘𑀭𑀸𑀕𑁄 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀧𑀝𑀺𑀖𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀺𑀘𑀸𑀭𑀡𑀸𑀯 𑀯𑀼𑀢𑁆𑀢𑀸, 𑀦 𑀦𑁂𑀲𑀁 𑀓𑀺𑀘𑁆𑀘𑀯𑀺𑀲𑁂𑀲𑁄𑀢𑀺 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀫𑀧𑁂𑀓𑁆𑀔𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀧𑀯𑀢𑁆𑀢𑀸 𑀯𑁂𑀤𑀦𑀸𑀢𑀺 𑀅𑀢𑁆𑀣𑁄. 𑀧𑀓𑀸𑀭𑀦𑁆𑀢𑀭𑁂𑀦𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀲𑀗𑁆𑀔𑀸𑀢𑁂𑀦 𑀧𑀓𑀸𑀭𑀦𑁆𑀢𑀭𑁂𑀦. 𑀢𑀣𑀸 𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀏𑀯 𑀧𑀓𑀸𑀭𑀦𑁆𑀢𑀭𑁂𑀦 𑀓𑀣𑀺𑀢𑁄𑀢𑀺 𑀇𑀫𑀫𑁂𑀯𑀢𑁆𑀣𑀁 𑀆𑀓𑀟𑁆𑀠𑀢𑀺. 𑀪𑀸𑀯𑀦𑀸𑀬𑁂𑀯𑁂𑀢𑁆𑀣 𑀧𑀓𑀸𑀭𑀦𑁆𑀢𑀭𑀁.

𑀲𑀩𑁆𑀩𑀁 𑀲𑀫𑁆𑀫𑀲𑀦𑀁 𑀪𑀸𑀯𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯.

𑀅𑀜𑁆𑀜𑀫𑀜𑁆𑀜𑀲𑁆𑀲 𑀘𑀸𑀢𑀺 𑀨𑁄𑀝𑁆𑀞𑀩𑁆𑀩𑀫𑀳𑀸𑀪𑀽𑀢𑁂𑀲𑀼 𑀇𑀢𑀭𑀻𑀢𑀭𑀲𑁆𑀲, 𑀆𑀧𑁄𑀥𑀸𑀢𑀼𑀬𑀸 𑀘 𑀯𑀲𑁂𑀦.

𑀢𑁂𑀲𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀁, 𑀓𑀫𑁆𑀫𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀳𑀚𑀸𑀢𑀲𑁆𑀲 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀩𑀮𑀯𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀯𑀸 𑀤𑀲𑁆𑀲𑀦𑀲𑁆𑀲𑀸𑀢𑀺 𑀢𑀲𑁆𑀲 𑀯𑀸 𑀚𑀸𑀢𑀺𑀆𑀤𑀺𑀓𑁂 𑀪𑀬𑀢𑁄 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀓𑀸𑀫𑀸𑀯𑀘𑀭𑀜𑀸𑀡𑀲𑁆𑀲.

𑀢𑀤𑁂𑀯 𑀅𑀢𑁆𑀢𑀦𑁄 𑀨𑀮𑀲𑁆𑀲𑁂𑀯 𑀨𑀮𑀪𑀸𑀯𑁂𑀦𑀸𑀢𑀺 ‘‘𑀫𑀦𑁄𑀲𑀫𑁆𑀨𑀲𑁆𑀲𑁄’’𑀢𑀺 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀬𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀨𑀮𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀨𑀲𑁆𑀲𑀲𑁆𑀲 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚’’𑀦𑁆𑀢𑀺𑀆𑀤𑀺𑀦𑀸 𑀨𑀮𑀪𑀸𑀯𑁂𑀦 𑀯𑀢𑁆𑀢𑀼𑀁 𑀦 𑀬𑀼𑀢𑁆𑀢𑀁. ‘‘𑀫𑀦𑁄𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑀼𑀨𑀮𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 𑀦 𑀯𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀬𑀤𑀺𑀧𑀺 𑀨𑀲𑁆𑀲𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀦 𑀨𑀲𑁆𑀲𑀲𑁆𑀲 𑀯𑀺𑀬 𑀯𑀺𑀜𑁆𑀜𑀸𑀡𑀁 𑀲𑁄 𑀢𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁫𑁦. 𑀢𑀁 𑀢𑀁 𑀲𑀫𑀼𑀤𑀸𑀬𑀦𑁆𑀢𑀺 𑀢𑀁 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀥𑀫𑁆𑀫𑀲𑀫𑀼𑀤𑀸𑀬𑀁, 𑀅𑀦𑀯𑀲𑁂𑀲𑀭𑀽𑀧𑀥𑀫𑁆𑀫𑀲𑀫𑀼𑀤𑀸𑀬𑀜𑁆𑀘. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀘𑁄𑀧𑀦𑀁 𑀧𑀢𑁆𑀢𑁄 𑀲𑀁𑀯𑀭𑁄 𑀙𑀝𑁆𑀞𑀤𑁆𑀯𑀸𑀭𑁂, 𑀇𑀢𑀭𑁄 𑀙𑀲𑀼𑀧𑀻𑀢𑀺 𑀏𑀯𑀁 𑀬𑀣𑀸𑀲𑀫𑁆𑀪𑀯𑀁. 𑀢𑀢𑁄𑀢𑀺 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀤𑀺𑀢𑁄. 𑀬𑀣𑀸𑀬𑁄𑀕𑀦𑁆𑀢𑀺 𑀬𑁄 𑀲𑀁𑀯𑀭𑀺𑀢𑀩𑁆𑀩𑁄, 𑀢𑀤𑀦𑀼𑀭𑀽𑀧𑀁.

𑀓𑀢𑁆𑀣𑀘𑀻𑀢𑀺 𑀢𑁂 𑀏𑀯 𑀧𑀭𑀺𑀯𑀝𑁆𑀝𑁂 𑀲𑀸𑀫𑀜𑁆𑀜𑁂𑀦 𑀯𑀤𑀢𑀺. 𑀓𑀢𑁆𑀣𑀘𑀻𑀢𑀺 𑀯𑀸 𑀢𑁂𑀲𑀼 𑀧𑀭𑀺𑀯𑀝𑁆𑀝𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀧𑀤𑁂𑀲𑁂. 𑀓𑀺𑀜𑁆𑀘𑀺𑀧𑀺 𑀅𑀧𑁆𑀧𑀓𑀫𑁆𑀧𑀺. 𑀏𑀓𑁄𑀯 𑀧𑀭𑀺𑀘𑁆𑀙𑁂𑀤𑁄, 𑀦 𑀆𑀬𑀢𑀦𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀺𑀬 𑀦𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀬𑀢𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁪. 𑀅𑀲𑀸𑀥𑀸𑀭𑀡𑀢𑁄𑀢𑀺 𑀆𑀯𑁂𑀡𑀺𑀓𑀢𑁄. 𑀢𑀁 𑀦𑁂𑀲𑀁 𑀅𑀲𑀸𑀥𑀸𑀭𑀡𑀪𑀸𑀯𑀁 𑀯𑀺𑀧𑀓𑁆𑀔𑀯𑀲𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀸𑀥𑀸𑀭𑀡𑀁 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀯𑀺𑀬𑀸’’𑀢𑀺. 𑀅𑀣 𑀯𑀸 𑀘𑀓𑁆𑀔𑀸𑀤𑀺𑀅𑀢𑁆𑀣𑁄 𑀏𑀯 𑀘𑀓𑁆𑀔𑀸𑀤𑀺𑀲𑀤𑁆𑀤𑀯𑀺𑀲𑁂𑀲𑀺𑀢𑁄 𑀆𑀬𑀢𑀦𑀢𑁆𑀣𑁄𑀢𑀺 𑀢𑀁 𑀢𑀸𑀤𑀺𑀲𑀁 𑀆𑀬𑀢𑀦𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀯𑀺𑀬 𑀅𑀲𑀸𑀥𑀸𑀭𑀡𑀢𑁄’’𑀢𑀺.

𑀬𑀤𑀺 𑀯𑀺𑀲𑀬𑀲𑁆𑀲𑀸𑀤𑀦𑀢𑁆𑀣𑁄 𑀘𑀓𑁆𑀔𑀼-𑀲𑀤𑁆𑀤𑁄, 𑀲𑁄𑀢𑀸𑀤𑀻𑀦𑀫𑁆𑀧𑀺 𑀅𑀬𑀁 𑀲𑀫𑀜𑁆𑀜𑀸 𑀲𑀺𑀬𑀸𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀢𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀘𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀢𑀺, 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬, 𑀯𑀺𑀪𑀸𑀯𑁂𑀦𑁆𑀢𑀁 𑀯𑀺𑀬 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀫𑀺𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀯𑀺𑀬 𑀲𑀯𑀺𑀕𑁆𑀕𑀳𑀫𑀺𑀯 𑀲𑀩𑀺𑀫𑁆𑀩𑀓𑀁 𑀯𑀺𑀬 𑀯𑀡𑁆𑀡𑀯𑀸𑀘𑀓𑁄 𑀭𑀽𑀧-𑀲𑀤𑁆𑀤𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀡𑀁 𑀯𑀸 𑀭𑀽𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺.

𑀯𑀘𑀦𑀫𑁂𑀯𑀸𑀢𑀺 𑀲𑀯𑀺𑀜𑁆𑀜𑀢𑁆𑀢𑀺𑀓𑀲𑀤𑁆𑀤𑀫𑁂𑀯. 𑀕𑀫𑀻𑀬𑀢𑀻𑀢𑀺 𑀉𑀧𑀦𑀻𑀬𑀢𑀺. 𑀅𑀚𑁆𑀛𑁄𑀳𑀭𑀡𑀲𑁆𑀲 𑀭𑀲𑀕𑁆𑀕𑀳𑀡𑀫𑀽𑀮𑀢𑀸𑀯𑀘𑀦𑁂𑀦 𑀭𑀲𑀲𑁆𑀲 𑀧𑀭𑀫𑁆𑀧𑀭𑀸𑀬 𑀚𑀻𑀯𑀺𑀢𑀳𑁂𑀢𑀼𑀢𑀁 𑀤𑀲𑁆𑀲𑁂𑀢𑀺. 𑀭𑀲𑀦𑀺𑀫𑀺𑀢𑁆𑀢𑀜𑁆𑀳𑀺 𑀭𑀲𑀕𑁆𑀕𑀳𑀡𑀁, 𑀭𑀲𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀡𑀁, 𑀢𑀁𑀦𑀺𑀫𑀺𑀢𑁆𑀢𑀁 𑀚𑀻𑀯𑀺𑀢𑀦𑁆𑀢𑀺. 𑀭𑀲𑀕𑁆𑀕𑀳𑀡𑀫𑀽𑀮𑀢𑀸 𑀘 𑀅𑀚𑁆𑀛𑁄𑀳𑀭𑀡𑀲𑁆𑀲 𑀬𑁂𑀪𑀼𑀬𑁆𑀬𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺 𑀏𑀢𑁂𑀦 𑀨𑀮𑀦𑁆𑀢𑀺 𑀤𑁂𑀲𑁄, 𑀳𑁂𑀢𑀽𑀢𑀺 𑀆𑀳 ‘‘𑀉𑀧𑁆𑀧𑀢𑁆𑀢𑀺𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡’’𑀦𑁆𑀢𑀺. 𑀢𑀣𑀸𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑁆𑀧𑀓𑀸𑀭𑁂𑀦. 𑀫𑀦𑁄𑀕𑁄𑀘𑀭𑀪𑀽𑀢𑀸𑀢𑀺 𑀫𑀦𑀲𑁄 𑀏𑀯 𑀕𑁄𑀘𑀭𑀪𑀽𑀢𑀸. 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑁂𑀯𑀸𑀢𑀺 𑀅𑀦𑀼𑀪𑀯𑀦𑀸𑀤𑀺𑀯𑀺𑀲𑁂𑀲𑀮𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀪𑀸𑀯𑀲𑀗𑁆𑀔𑀸𑀢𑀲𑀸𑀥𑀸𑀭𑀡𑀮𑀓𑁆𑀔𑀡𑁂𑀦𑁂𑀯. 𑀏𑀓𑀸𑀬𑀢𑀦𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲 𑀏𑀓𑀲𑀪𑀸𑀯𑀢𑁆𑀢𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀘𑀦𑁂 𑀧𑀬𑁄𑀚𑀦𑀸𑀪𑀸𑀯𑀸. 𑀤𑁆𑀯𑀸𑀭𑀸𑀮𑀫𑁆𑀩𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀸 𑀳𑀺 𑀆𑀬𑀢𑀦𑀤𑁂𑀲𑀦𑀸𑀢𑀺.

𑀧𑀼𑀩𑁆𑀩𑀦𑁆𑀢𑀢𑁄𑀢𑀺 𑀧𑀼𑀭𑀺𑀫𑀪𑀸𑀕𑀢𑁄 𑀧𑀸𑀓𑀪𑀸𑀯𑀢𑁄. 𑀧𑀸𑀓𑀪𑀸𑀯𑁄 𑀳𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑁄, 𑀯𑀺𑀤𑁆𑀥𑀁𑀲𑀸𑀪𑀸𑀯𑁄 𑀅𑀧𑀭𑀦𑁆𑀢𑁄.

𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀻𑀲𑀼 𑀆𑀬𑀢𑀦-𑀲𑀤𑁆𑀤𑁄 𑀦 𑀆𑀬𑀢𑀦𑀢𑁆𑀣𑀸𑀤𑀻𑀲𑀼 𑀯𑀺𑀬 𑀧𑀤𑀢𑁆𑀣𑀯𑀺𑀯𑀭𑀡𑀫𑀼𑀔𑁂𑀦 𑀧𑀯𑀢𑁆𑀢𑁄, 𑀅𑀣 𑀔𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀯𑀖𑀭𑀸𑀤𑀺𑀓𑁂 𑀦𑀺𑀭𑀼𑀴𑁆𑀳𑀢𑀸𑀬 𑀏𑀯𑀫𑀢𑁆𑀣𑁄𑀢𑀺 𑀆𑀳 ‘‘𑀭𑀼𑀴𑁆𑀳𑀺𑀯𑀲𑁂𑀦 𑀆𑀬𑀢𑀦𑀲𑀤𑁆𑀤𑀲𑁆𑀲𑀢𑁆𑀣𑀁 𑀯𑀢𑁆𑀢𑀼’’𑀦𑁆𑀢𑀺. 𑀫𑀦𑁄𑀢𑀺 𑀤𑁆𑀯𑀸𑀭𑀪𑀽𑀢𑀫𑀦𑁄. 𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀲𑀤𑀺𑀲𑁄 𑀦𑀺𑀲𑁆𑀲𑀬𑁄, 𑀲𑀤𑀺𑀲𑀢𑀸 𑀘 𑀨𑀮𑀲𑁆𑀲 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀤𑀝𑁆𑀞𑀩𑁆𑀩𑀸. 𑀯𑀘𑀦𑀻𑀬𑀢𑁆𑀣𑁄 𑀪𑀸𑀯𑀢𑁆𑀣𑁄.

𑀢𑀸𑀯𑀢𑁆𑀯𑀢𑁄𑀢𑀺 𑀢𑀢𑁆𑀢𑀓𑀢𑁄. 𑀊𑀦𑀘𑁄𑀤𑀦𑀸𑀢𑀺 𑀤𑁆𑀯𑀸𑀤𑀲𑀢𑁄 𑀊𑀦𑀸𑀦𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀘𑁄𑀤𑀦𑀸. 𑀬𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁 𑀥𑀫𑁆𑀫𑀚𑀸𑀢𑀁 𑀥𑀫𑁆𑀫𑀸𑀬𑀢𑀦𑀁, 𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀥𑀫𑁆𑀫𑀸𑀬𑀢𑀦𑀪𑀸𑀯𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀢𑀺𑀧𑀻’’𑀢𑀺𑀆𑀤𑀺. 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀻𑀢𑀺 𑀦 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀯 𑀅𑀲𑀸𑀥𑀸𑀭𑀡𑀁, 𑀅𑀣 𑀔𑁄 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀘𑀦𑀲𑁂𑀲𑁄.

𑀬𑁂𑀪𑀼𑀬𑁆𑀬𑀲𑀳𑀼𑀧𑁆𑀧𑀢𑁆𑀢𑀺𑀆𑀤𑀻𑀳𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀓𑀲𑁆𑀲𑀘𑀺 𑀓𑀤𑀸𑀘𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀆𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀦 𑀧𑀳𑀸𑀦𑀓𑁆𑀓𑀫𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄, 𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀅𑀓𑀼𑀲𑀮𑀸𑀦𑀁, 𑀏𑀓𑀘𑁆𑀘𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄, 𑀦 𑀪𑀽𑀫𑀺𑀓𑁆𑀓𑀫𑁄 𑀅𑀟𑁆𑀠𑁂𑀓𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀢𑁆𑀢𑀸, 𑀇𑀢𑀭𑁂𑀲𑀁 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀏𑀓𑀘𑁆𑀘𑀲𑁆𑀲 𑀮𑁄𑀓𑀼𑀢𑁆𑀢𑀭𑀪𑀸𑀯𑀢𑁄 𑀘. 𑀏𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀺𑀅𑀬𑀼𑀢𑁆𑀢𑀺𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀪𑀸𑀯𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀢𑁂 ‘‘𑀫𑀬𑁆𑀳𑀁 𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀪𑀽𑀢𑀸 𑀘𑀓𑁆𑀔𑀸𑀤𑀬𑁄 𑀬𑀣𑀸 𑀅𑀚𑁆𑀛𑀢𑁆𑀢𑀺𑀓𑀢𑀸𑀬, 𑀏𑀯𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀓𑀭𑀇𑀦𑁆𑀤𑁆𑀭𑀺𑀬𑀢𑀸 𑀘 𑀧𑀥𑀸𑀦𑀸𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁂𑀦, 𑀯𑀺𑀲𑀬𑀺𑀪𑀸𑀯𑁂𑀦 𑀘𑀸’’𑀢𑀺. 𑀖𑀸𑀦𑀸𑀤𑀺𑀓𑁆𑀓𑀫𑁂𑀦𑀸𑀢𑀺 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄𑀢𑀺 𑀇𑀫𑀺𑀦𑀸 𑀓𑀫𑁂𑀦.

𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀫𑀦𑁄 𑀧𑀦 𑀓𑀺𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀓𑀺𑀜𑁆𑀘𑀺 𑀬𑀸𑀯𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼𑀧𑀺 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀘𑀢𑁆𑀢𑀸𑀭𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀢𑀢𑁄 𑀪𑀽𑀢𑀭𑀽𑀧𑀸𑀭𑀫𑁆𑀫𑀡𑀁. 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀤𑀽𑀭𑀢𑀭𑁂 𑀤𑀽𑀭𑁂, 𑀲𑀻𑀖𑀢𑀭𑀁 𑀲𑀻𑀖𑀜𑁆𑀘 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀤𑀻𑀧𑀦𑀢𑁆𑀣𑀁 𑀘𑀓𑁆𑀔𑀸𑀤𑀻𑀦𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀘𑀓𑁆𑀔𑀼𑀲𑁄𑀢𑀤𑁆𑀯𑀬𑀜𑁆𑀳𑀺 𑀤𑀽𑀭𑀕𑁄𑀘𑀭𑀦𑁆𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀘𑀓𑁆𑀔𑀼 𑀤𑀽𑀭𑀢𑀭𑀕𑁄𑀘𑀭𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀲𑁆𑀲𑀦𑁆𑀢𑁄𑀧𑀺 𑀳𑀺 𑀤𑀽𑀭𑀢𑀭𑁂 𑀦𑀤𑀺𑀲𑁄𑀢𑀁 𑀦 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀖𑀸𑀦𑀚𑀺𑀯𑁆𑀳𑀸𑀲𑀼𑀧𑀺 𑀖𑀸𑀦𑀁 𑀲𑀻𑀖𑀢𑀭𑀯𑀼𑀢𑁆𑀢𑀻𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀼𑀭𑀢𑁄 𑀞𑀧𑀺𑀢𑀫𑀢𑁆𑀢𑀲𑁆𑀲 𑀳𑀺 𑀪𑁄𑀚𑀦𑀲𑁆𑀲 𑀕𑀦𑁆𑀥𑁄 𑀕𑀬𑁆𑀳𑀢𑀻𑀢𑀺. 𑀬𑀣𑀸𑀞𑀸𑀦𑀁 𑀯𑀸 𑀢𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀭𑀻𑀭𑁂 𑀲𑀩𑁆𑀩𑀼𑀧𑀭𑀺 𑀘𑀓𑁆𑀔𑀼𑀲𑁆𑀲 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀲 𑀅𑀥𑁄 𑀲𑁄𑀢𑀲𑁆𑀲, 𑀢𑀲𑁆𑀲 𑀅𑀥𑁄 𑀖𑀸𑀦𑀲𑁆𑀲, 𑀢𑀲𑁆𑀲 𑀅𑀥𑁄 𑀚𑀺𑀯𑁆𑀳𑀸𑀬, 𑀢𑀣𑀸 𑀓𑀸𑀬𑀲𑁆𑀲 𑀬𑁂𑀪𑀼𑀬𑁆𑀬𑁂𑀦, 𑀫𑀦𑁄 𑀧𑀦 𑀅𑀭𑀽𑀧𑀻𑀪𑀸𑀯𑀢𑁄 𑀲𑀩𑁆𑀩𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀢𑀁𑀢𑀁𑀕𑁄𑀘𑀭𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲𑀸𑀦𑀦𑁆𑀢𑀭𑀁 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀏𑀯𑀫𑁆𑀧𑀺 𑀇𑀫𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄𑀢𑀺 𑀳𑀤𑀬𑀯𑀢𑁆𑀣𑀼𑀪𑁂𑀤𑀢𑁄. 𑀬𑀜𑁆𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀏𑀓𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀦 𑀢𑀤𑁂𑀯 𑀦𑀺𑀲𑁆𑀲𑀸𑀬 𑀅𑀜𑁆𑀜𑀁 𑀧𑀯𑀢𑁆𑀢𑀢𑀺. 𑀦𑀺𑀤𑁆𑀤𑁂𑀲𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀺𑀤𑁆𑀤𑁂𑀲𑀯𑀲𑁂𑀦. 𑀬𑁄𑀚𑁂𑀢𑀩𑁆𑀩𑀁 ‘‘𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀪𑀸𑀕’’𑀦𑁆𑀢𑀺𑀆𑀤𑀺𑀦𑀸.

𑀲𑀪𑀸𑀯𑁄𑀢𑀺 𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀜𑁆𑀘 𑀬𑁄𑀕𑁆𑀬𑀢𑀸. 𑀓𑀸𑀭𑀡𑀲𑀫𑀢𑁆𑀣𑀢𑀸𑀢𑀺 𑀓𑀸𑀭𑀡𑀪𑀽𑀢𑀸 𑀲𑀫𑀢𑁆𑀣𑀢𑀸 𑀧𑀘𑁆𑀘𑀬𑀪𑀸𑀯𑁄. 𑀤𑁆𑀯𑀸𑀭𑀸𑀤𑀺𑀪𑀸𑀯𑁄𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑁂 𑀤𑁆𑀯𑀸𑀭𑀯𑀼𑀢𑁆𑀢𑀺𑀪𑀸𑀯𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀅𑀢𑁆𑀣𑁂. 𑀬𑀲𑁆𑀫𑀸𑀢𑀺 𑀬𑀸𑀬 𑀥𑀫𑁆𑀫𑀢𑀸𑀬 𑀬𑁂𑀦 𑀤𑁆𑀯𑀸𑀭𑀸𑀤𑀺𑀪𑀸𑀯𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀲𑀫𑁆𑀪𑀯𑀦𑀯𑀺𑀲𑁂𑀲𑀦𑀦𑁆𑀢𑀺 𑀓𑀺𑀭𑀺𑀬𑀸𑀬 𑀧𑀭𑀸𑀫𑀲𑀦𑀫𑀸𑀳. 𑀬𑀁 𑀲𑀫𑁆𑀪𑀯𑀦𑀁, 𑀥𑀫𑁆𑀫𑀢𑀸𑀯𑁂𑀲𑀸𑀢𑀺 𑀅𑀢𑁆𑀣𑁄. 𑀭𑀺𑀢𑁆𑀢𑀓𑀸𑀦𑁂𑀯𑀸𑀢𑀺 𑀥𑀼𑀯𑀸𑀤𑀺𑀪𑀸𑀯𑀭𑀺𑀢𑁆𑀢𑀓𑀸𑀦𑁂𑀯. 𑀯𑀺𑀲𑀫𑀸𑀤𑀻𑀲𑀼 𑀅𑀚𑁆𑀛𑀸𑀲𑀬𑁄 𑀏𑀢𑁂𑀲𑀦𑁆𑀢𑀺 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺, 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺, 𑀘𑀓𑁆𑀔𑀸𑀤𑀻𑀦𑀺. 𑀯𑀺𑀲𑀫𑀪𑀸𑀯…𑀧𑁂… 𑀯𑀦𑀪𑀸𑀯𑁂𑀳𑀻𑀢𑀺 𑀯𑀺𑀲𑀫𑀪𑀸𑀯𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀅𑀳𑀺𑀆𑀤𑀺𑀲𑀤𑀺𑀲𑀼𑀧𑀸𑀤𑀺𑀦𑁆𑀦𑀥𑀫𑁆𑀫𑁂𑀳𑀺 𑀘𑀓𑁆𑀔𑀸𑀤𑀻𑀳𑀺, 𑀯𑀦𑀲𑀦𑁆𑀦𑀺𑀲𑁆𑀲𑀺𑀢𑀫𑀓𑁆𑀓𑀝𑀲𑀤𑀺𑀲𑁂𑀦 𑀘𑀺𑀢𑁆𑀢𑁂𑀦 𑀘 𑀅𑀪𑀺𑀭𑀫𑀺𑀢𑀢𑁆𑀢𑀸. 𑀯𑀦𑀪𑀸𑀯𑁄𑀢𑀺 𑀳𑀺 𑀯𑀦𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀦𑁆𑀢𑀯𑀺𑀯𑀺𑀢𑁆𑀢𑀢𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑀺𑀭𑀳𑁄. 𑀉𑀧𑁆𑀧𑀸𑀤𑀢𑁄 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁄 𑀳𑀺 𑀇𑀥 𑀧𑀼𑀭𑀺𑀫𑀦𑁆𑀢𑁄. 𑀅𑀧𑀭𑀦𑁆𑀢𑁂𑀢𑀺 𑀅𑀧𑀭𑀪𑀸𑀕𑁂, 𑀪𑀗𑁆𑀕𑀢𑁄 𑀉𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑀺 𑀲𑀪𑀸𑀯𑀥𑀫𑁆𑀫𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂’’𑀢𑀺 (𑀫𑀳𑀸𑀦𑀺. 𑁧𑁦). 𑀲𑀤𑀸 𑀅𑀪𑀸𑀯𑁄𑀢𑀺 𑀦 𑀲𑀤𑀸 𑀅𑀪𑀸𑀯𑀧𑀢𑀺𑀝𑁆𑀞𑀸𑀧𑀦𑀁 𑀲𑀩𑁆𑀩𑀓𑀸𑀮𑀫𑁆𑀧𑀺 𑀦𑀢𑁆𑀣𑀻𑀢𑀺, 𑀅𑀣 𑀔𑁄 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀤𑀸𑀪𑀸𑀯𑀧𑀝𑀺𑀓𑁆𑀔𑁂𑀧𑁄𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀮𑀓𑁆𑀔𑀡’’𑀦𑁆𑀢𑀺. 𑀲𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳. 𑀯𑀺𑀧𑀭𑀺𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑀚𑀭𑀸𑀯𑀢𑁆𑀣𑀸𑀳𑀺 𑀲𑀦𑁆𑀢𑀸𑀦𑀁 𑀯𑀺𑀦𑀸 𑀦 𑀯𑀺𑀓𑀸𑀭𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀲𑀦𑁆𑀢𑀸𑀦𑀯𑀺𑀓𑀸𑀭𑀸𑀧𑀢𑁆𑀢𑀺 𑀯𑀸’’𑀢𑀺.

𑀚𑀸𑀢𑀺𑀥𑀫𑁆𑀫𑀢𑀸𑀤𑀻𑀳𑀻𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀺𑀲𑀪𑀸𑀯𑀢𑀸𑀳𑀺. 𑀅𑀦𑀺𑀝𑁆𑀞𑀢𑀸𑀢𑀺 𑀦 𑀇𑀝𑁆𑀞𑀢𑀸, 𑀤𑀼𑀓𑁆𑀔𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 ‘‘𑀧𑀝𑀺𑀧𑀻𑀴𑀦𑀝𑁆𑀞𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀤𑀼𑀓𑁆𑀔𑀮𑀓𑁆𑀔𑀡𑀁. 𑀧𑀘𑁆𑀘𑀬𑀯𑀲𑁂𑀦 𑀤𑀼𑀓𑁆𑀔𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀦𑀁 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀲𑁂𑀦 𑀤𑀼𑀓𑁆𑀔𑀫𑀢𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲 𑀧𑀻𑀴𑀦𑀢𑁄 𑀤𑀼𑀓𑁆𑀔𑀫’’𑀦𑁆𑀢𑀺. 𑀤𑀼𑀓𑁆𑀔𑀯𑀘𑀦𑀦𑁆𑀢𑀺 ‘‘𑀤𑀼𑀓𑁆𑀔’’𑀦𑁆𑀢𑀺 𑀲𑀢𑁆𑀣𑀼 𑀯𑀘𑀦𑀁.

‘‘𑀦𑀢𑁆𑀣𑀺 𑀏𑀢𑀲𑁆𑀲 𑀯𑀲𑀯𑀢𑁆𑀢𑀓𑁄’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀦𑀸𑀧𑀺 𑀇𑀤𑀁 𑀯𑀲𑀯𑀢𑁆𑀢𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀦 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸𑀢𑀺. 𑀅𑀢𑁆𑀢𑀦𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀭𑀲𑁆𑀫𑀺𑀦𑁆𑀢𑀺 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀧𑀭𑀲𑁆𑀲 𑀘 𑀅𑀢𑁆𑀢𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀧𑀭𑀧𑀭𑀺𑀓𑀧𑁆𑀧𑀺𑀢𑀁 𑀯𑀲𑀯𑀢𑁆𑀢𑀓𑀁 𑀏𑀢𑀲𑁆𑀲 𑀘𑀓𑁆𑀔𑀸𑀤𑀺𑀦𑁄 𑀦𑀢𑁆𑀣𑀺, 𑀏𑀢𑁂𑀦 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀬 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀲𑀼𑀜𑁆𑀜𑀁 𑀢𑀁 𑀢𑁂𑀦 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀪𑀬𑀣𑀸𑀧𑀺 𑀅𑀯𑀲𑀯𑀢𑁆𑀢𑀦𑀝𑁆𑀞𑁂 𑀤𑀲𑁆𑀲𑀺𑀢𑀩𑁆𑀩𑁂 𑀢𑀢𑁆𑀣 𑀢𑀸𑀯 𑀏𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀇𑀢𑀭𑀁 𑀤𑀲𑁆𑀲𑁂𑀢𑀺. 𑀲𑀸𑀫𑀺 𑀏𑀯 𑀲𑀸𑀫𑀺𑀓𑁄, 𑀦 𑀲𑀸𑀫𑀺𑀓𑁄 𑀅𑀲𑁆𑀲𑀸𑀫𑀺𑀓𑁄𑀢𑀺 𑀏𑀯𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 ‘‘𑀅𑀲𑁆𑀲𑀸𑀫𑀺𑀓𑀢𑁄’’𑀢𑀺 𑀧𑀤𑀲𑁆𑀲 𑀲𑀼𑀜𑁆𑀜𑀯𑀺𑀲𑁂𑀲𑀦𑀢𑀸𑀬 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀓𑀸𑀫𑀓𑀸𑀭𑀺𑀬𑀦𑁆𑀢𑀺 𑀬𑀣𑀸𑀓𑀸𑀫𑀓𑀭𑀡𑀻𑀬𑀁. 𑀅𑀯𑀲𑀯𑀢𑁆𑀢𑀦𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀲𑀫𑀸𑀲𑀤𑁆𑀯𑀬𑀢𑁆𑀣𑀲𑀗𑁆𑀕𑀳𑀢𑁄.

𑀲𑀲𑀦𑁆𑀢𑀸𑀦𑁂 𑀥𑀫𑁆𑀫𑀸𑀦𑀁 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀇𑀥 𑀪𑀸𑀯𑀲𑀗𑁆𑀓𑀦𑁆𑀢𑀺𑀕𑀫𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀲𑀦𑁆𑀢𑀢𑀺𑀬𑀁 𑀪𑀸𑀯𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯𑀸’’𑀢𑀺. 𑀢𑀣𑀸 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑀁 𑀧𑀼𑀭𑀺𑀫𑀸𑀓𑀸𑀭𑀯𑀺𑀕𑀫𑁄 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀆𑀳 ‘‘𑀲𑀦𑁆𑀢𑀢𑀺𑀬𑀸 𑀬𑀣𑀸𑀧𑀯𑀢𑁆𑀢𑀸𑀓𑀸𑀭𑀯𑀺𑀚𑀳𑀦’’𑀦𑁆𑀢𑀺. 𑀪𑀯𑀢𑀻𑀢𑀺 𑀯𑀸 𑀪𑀸𑀯𑁄, 𑀅𑀯𑀢𑁆𑀣𑀸𑀯𑀺𑀲𑁂𑀲𑁄, 𑀢𑀲𑁆𑀲 𑀲𑀗𑁆𑀓𑀫𑀦𑀁 𑀪𑀸𑀯𑀲𑀗𑁆𑀓𑀦𑁆𑀢𑀺. 𑀲𑀪𑀸𑀯𑀥𑀫𑁆𑀫𑁄 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑀁 𑀞𑀺𑀢𑀺𑀓𑁆𑀔𑀡𑀜𑁆𑀘 𑀧𑀢𑁆𑀯𑀸 𑀪𑀺𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀚𑀭𑀸𑀯𑀢𑁆𑀣𑀁, 𑀢𑀢𑁄 𑀪𑀗𑁆𑀕𑀸𑀯𑀢𑁆𑀣𑀁 𑀲𑀗𑁆𑀓𑀫𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀲𑀗𑁆𑀓𑀫𑀢𑁄 𑀘 𑀅𑀢𑁆𑀢𑀮𑀸𑀪𑀓𑁆𑀔𑀡𑀢𑁄 𑀉𑀤𑁆𑀥𑀁 𑀚𑀭𑀸𑀫𑀭𑀡𑁂𑀳𑀺 𑀢𑀁𑀲𑀪𑀸𑀯𑀧𑀭𑀺𑀘𑁆𑀘𑀸𑀕𑁄 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀔𑀡𑀯𑀲𑁂𑀦 𑀘𑁂𑀢𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀘 𑀔𑀡𑀸𑀦𑀁 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀏𑀓𑀢𑁆𑀣𑀢𑁆𑀢𑀸𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸, 𑀦 𑀧𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀸𑀦𑀁 𑀏𑀓𑀢𑁆𑀢𑀸. ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀺𑀘𑁆𑀘𑀁 𑀘𑀓𑁆𑀔𑀼’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀬𑀁 𑀘𑀓𑁆𑀔𑀼, 𑀢𑀁 𑀅𑀦𑀺𑀘𑁆𑀘𑀁, 𑀬𑀁 𑀅𑀦𑀺𑀘𑁆𑀘𑀁, 𑀢𑀁 𑀘𑀓𑁆𑀔𑀼’’𑀦𑁆𑀢𑀺 𑀆𑀧𑀦𑁆𑀦𑀫𑁂𑀯𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀸𑀦𑀁 𑀲𑁂𑀲𑀥𑀫𑁆𑀫𑀸𑀦𑀫𑁆𑀧𑀺 𑀘𑀓𑁆𑀔𑀼𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺.

𑀢𑁂𑀳𑀺 𑀘 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑁂𑀳𑀺 𑀘 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀁 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬, 𑁮𑁫; 𑁨.𑁪.𑁧, 𑁨; 𑀧𑀝𑀺. 𑀫. 𑁨.𑁧𑁦) 𑀯𑀺𑀬. 𑀤𑁄𑀲𑀮𑀓𑁆𑀔𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀤𑁄𑀲𑀲𑁆𑀲 𑀮𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀁 𑀤𑀼𑀓𑁆𑀔𑁂𑀦𑀸𑀢𑀺 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀅𑀓𑁆𑀔𑀺𑀭𑁄𑀕𑀸𑀤𑀺𑀤𑀼𑀓𑁆𑀔𑁂𑀦 𑀆𑀩𑀸𑀥𑀢𑀸𑀬. 𑀅𑀦𑀢𑁆𑀢𑀮𑀓𑁆𑀔𑀡𑀤𑀻𑀧𑀓𑀸𑀦𑀦𑁆𑀢𑀺 𑀅𑀦𑀢𑁆𑀢𑀢𑀸𑀧𑀜𑁆𑀜𑀸𑀧𑀦𑀲𑁆𑀲 𑀚𑁄𑀢𑀓𑀸𑀦𑀁 𑀉𑀧𑀸𑀬𑀪𑀽𑀢𑀸𑀦𑀁. 𑀦 𑀳𑀺 𑀖𑀝𑀪𑁂𑀤𑀓𑀡𑁆𑀝𑀓𑀯𑁂𑀥𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀢𑁄 𑀅𑀦𑀢𑁆𑀢𑀢𑀸𑀥𑀺𑀕𑀫𑀳𑁂𑀢𑀽 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀢𑀸𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀦 𑀮𑀩𑁆𑀪𑀫𑀸𑀦𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀘𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀤𑀺𑀫𑀳𑀸𑀪𑀽𑀢𑀸𑀤𑀺𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀦𑀺, 𑀢𑀢𑁄 𑀏𑀯 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀸𑀦𑀺, 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀸𑀦𑀺, 𑀏𑀯𑀁𑀪𑀽𑀢𑀸𑀦𑀺 𑀘 𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀓𑀸𑀦𑀻𑀢𑀺 𑀧𑀭𑀺𑀕𑁆𑀕𑀳𑁂 𑀞𑀺𑀢𑁂𑀳𑀺 𑀲𑀫𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑀸.

𑀓𑀣𑀁 𑀧𑀦𑁂𑀢𑁂𑀲𑀁 𑀳𑀼𑀢𑁆𑀯𑀸 𑀅𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀤𑀲𑁆𑀲𑀦𑀢𑁄. 𑀢𑀁 𑀓𑀣𑀁 𑀜𑀸𑀬𑀢𑀻𑀢𑀺? 𑀬𑀼𑀢𑁆𑀢𑀺𑀢𑁄. 𑀓𑀸 𑀧𑀦𑁂𑀢𑁆𑀣 𑀬𑀼𑀢𑁆𑀢𑀻𑀢𑀺? 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀬𑀤𑀺 𑀘𑀓𑁆𑀔𑀸𑀤𑀻𑀦𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀦 𑀲𑀺𑀬𑀸, 𑀩𑀳𑀺𑀧𑀘𑁆𑀘𑀬𑀪𑁂𑀤𑁂 𑀬𑀤𑀺𑀤𑀁 𑀧𑀘𑁆𑀙𑀸 𑀯𑀺𑀲𑁂𑀲𑀕𑁆𑀕𑀳𑀡𑀁, 𑀢𑀁 𑀦 𑀲𑀺𑀬𑀸. 𑀬𑀲𑁆𑀲 𑀳𑀺 𑀢𑀸𑀤𑀺𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀲 𑀅𑀲𑀢𑀺 𑀩𑀳𑀺𑀧𑀘𑁆𑀘𑀬𑀯𑀺𑀲𑁂𑀲𑁂 𑀓𑀣𑀁 𑀧𑀘𑁆𑀙𑀸 𑀯𑀺𑀲𑁂𑀲𑀕𑁆𑀕𑀳𑀡𑀁 𑀪𑀯𑁂𑀬𑁆𑀬, 𑀪𑀯𑀢𑀺 𑀘 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑀲𑁆𑀫𑀸 𑀅𑀢𑁆𑀣𑀺 𑀦𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀬𑀁 𑀲𑀡𑀺𑀓𑀁 𑀲𑀡𑀺𑀓𑀁 𑀯𑀟𑁆𑀠𑁂𑀦𑁆𑀢𑀁 𑀧𑀘𑁆𑀙𑀸 𑀧𑀸𑀓𑀝𑀢𑀭𑀁 𑀚𑀸𑀬𑀢𑀻𑀢𑀺. 𑀢𑀣𑀸 𑀳𑀺 𑀲𑀭𑀻𑀭𑀲𑁆𑀲 𑀢𑀸𑀯 𑀆𑀦𑀸𑀧𑀸𑀦𑀸𑀦𑀁 𑀅𑀦𑀯𑀢𑁆𑀣𑀸𑀦𑀢𑁄 𑀧𑀭𑀺𑀲𑁆𑀲𑀫𑀢𑁄 𑀘 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀅𑀦𑀯𑀢𑁆𑀣𑀺𑀢𑀸 𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀸𑀢𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀤𑀺 𑀳𑀺 𑀅𑀲𑁆𑀲𑀲𑀺𑀢𑁂 𑀯𑀸 𑀧𑀲𑁆𑀲𑀲𑁆𑀲𑀺𑀢𑁂 𑀯𑀸 𑀲𑀭𑀻𑀭𑀲𑁆𑀲 𑀓𑁄𑀘𑀺 𑀧𑀘𑁆𑀙𑀸 𑀯𑀺𑀲𑁂𑀲𑁄 𑀦 𑀲𑀺𑀬𑀸, 𑀦 𑀦𑁂𑀲𑀁 𑀓𑁄𑀘𑀺 𑀪𑁂𑀤𑁄 𑀲𑀺𑀬𑀸, 𑀤𑀺𑀝𑁆𑀞𑁄 𑀘 𑀲𑁄. 𑀢𑀲𑁆𑀫𑀸 𑀅𑀲𑁆𑀲𑀲𑀺𑀢𑀁 𑀲𑀭𑀻𑀭𑀁 𑀅𑀜𑁆𑀜𑀣𑀸 𑀳𑁄𑀦𑁆𑀢𑀁 𑀓𑀫𑁂𑀦 𑀢𑀸𑀤𑀺𑀲𑀁 𑀅𑀯𑀢𑁆𑀣𑀁 𑀧𑀸𑀧𑀼𑀡𑀸𑀢𑀺. 𑀬𑀸 𑀧𑀲𑁆𑀲𑀸𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀲𑁆𑀲𑀲𑀺𑀢𑁂 𑀘 𑀧𑀼𑀦 𑀢𑀣𑁂𑀯 𑀅𑀲𑁆𑀲𑀸𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀦𑀸𑀧𑀸𑀦𑀸𑀦𑀁 𑀅𑀦𑀯𑀢𑁆𑀣𑀸𑀦𑀢𑁄𑀧𑀺 𑀲𑀭𑀻𑀭𑀲𑁆𑀲 𑀯𑀺𑀲𑁂𑀲𑀕𑁆𑀕𑀳𑀡𑀁 𑀅𑀜𑁆𑀜𑀣𑀢𑁆𑀢𑀲𑀺𑀤𑁆𑀥𑀺. 𑀢𑀣𑀸 𑀧𑀭𑀺𑀲𑁆𑀲𑀫𑁄𑀧𑀺 𑀅𑀲𑀢𑀺 𑀯𑀺𑀲𑁂𑀲𑁂 𑀧𑀘𑁆𑀙𑀸 𑀲𑀭𑀻𑀭𑀲𑁆𑀲 𑀦 𑀲𑀺𑀬𑀸, 𑀬𑁂𑀦𑀸𑀬𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀸𑀤𑀻𑀦𑀺 𑀲𑁂𑀯𑀦𑁂𑀦 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀁 𑀓𑀭𑁄𑀢𑀺.

𑀅𑀣 𑀯𑀸 𑀭𑀽𑀧𑀸𑀤𑀺𑀪𑁂𑀤𑀢𑁄𑀧𑀺 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀭𑀽𑀧𑀕𑀦𑁆𑀥𑀭𑀲𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀯𑀺𑀲𑁂𑀲𑁂𑀦 𑀬𑁄 𑀲𑀭𑀻𑀭𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀘 𑀔𑀻𑀭𑀽𑀤𑀓𑀯𑀢𑁆𑀣𑀧𑀼𑀧𑁆𑀨𑀨𑀮𑁄𑀲𑀥𑀺𑀥𑀜𑁆𑀜𑀸𑀤𑀻𑀦𑀁 𑀧𑀘𑁆𑀙𑀸 𑀯𑀺𑀲𑁂𑀲𑁄 𑀕𑀬𑁆𑀳𑀢𑀺, 𑀲𑁄 𑀅𑀲𑀢𑀺 𑀩𑀳𑀺𑀧𑀘𑁆𑀘𑀬𑀯𑀺𑀲𑁂𑀲𑁂 𑀦𑁂𑀲𑀁 𑀚𑀭𑀸𑀤𑀺𑀅𑀯𑀢𑁆𑀣𑀸𑀲𑀼 𑀯𑀡𑁆𑀡𑀩𑀮𑀸𑀤𑀺𑀪𑁂𑀤𑁄, 𑀭𑀲𑀯𑀻𑀭𑀺𑀬𑀯𑀺𑀧𑀸𑀓𑀸𑀦𑀼𑀪𑀸𑀯𑀪𑁂𑀤𑁄 𑀘 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑀺𑀦𑀸 𑀓𑀣𑀫𑀼𑀧𑀮𑀩𑁆𑀪𑁂𑀬𑁆𑀬. 𑀬𑀁 𑀧𑀦 𑀢𑀁 𑀥𑀫𑁆𑀫𑀢𑀸𑀭𑀽𑀧𑀁 𑀲𑀺𑀮𑀸𑀤𑀺, 𑀢𑀢𑁆𑀣 𑀓𑀣𑀦𑁆𑀢𑀺? 𑀢𑀲𑁆𑀲𑀸𑀧𑀺 𑀲𑀻𑀢𑀼𑀡𑁆𑀳𑀲𑀫𑁆𑀨𑀲𑁆𑀲𑀪𑁂𑀤𑀢𑁄 𑀅𑀢𑁆𑀣𑁂𑀯 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑀺𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺. 𑀲𑀢𑀺 𑀘 𑀭𑀽𑀧𑀸𑀤𑀺𑀪𑁂𑀤𑁂 𑀲𑀺𑀤𑁆𑀥𑁄𑀯 𑀢𑀁𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑀪𑁂𑀤𑁄𑀧𑀺. 𑀦 𑀳𑀺 𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑀪𑁂𑀤𑁂𑀦 𑀯𑀺𑀦𑀸 𑀦𑀺𑀲𑁆𑀲𑀺𑀢𑀪𑁂𑀤𑁄 𑀲𑀫𑁆𑀪𑀯𑀢𑀻𑀢𑀺. 𑀏𑀯𑀁 𑀢𑀸𑀯 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀢𑁄 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀢𑀢𑁄 𑀘 𑀳𑀼𑀢𑁆𑀯𑀸 𑀅𑀪𑀸𑀯𑀲𑀺𑀤𑁆𑀥𑀺.

𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀆𑀭𑀫𑁆𑀫𑀡𑀸𑀤𑀺𑀪𑁂𑀤𑁂𑀦 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀆𑀭𑀫𑁆𑀫𑀡𑁂 𑀅𑀭𑀽𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀢𑁂 𑀪𑀺𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑀁 𑀲𑀗𑁆𑀓𑀫𑀦𑁆𑀢𑀺, 𑀆𑀭𑀫𑁆𑀫𑀡𑀥𑀫𑁆𑀫𑀸 𑀘 𑀬𑀣𑀸𑀲𑀓𑀁 𑀔𑀡𑀢𑁄 𑀉𑀤𑁆𑀥𑀁 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀤𑀻𑀧𑀸𑀤𑀺𑀉𑀤𑀸𑀳𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂 𑀏𑀯 𑀳𑀺 𑀔𑀡𑁂 𑀔𑀡𑁂 𑀭𑀽𑀧𑀸𑀤𑀬𑁄 𑀧𑀤𑀻𑀧𑀚𑀸𑀮𑀸𑀬, 𑀢𑀣𑀸 𑀔𑀻𑀭𑀥𑀸𑀭𑀸𑀤𑀻𑀲𑀼 𑀧𑀢𑀦𑁆𑀢𑀻𑀲𑀼, 𑀯𑀸𑀬𑀼𑀫𑁆𑀳𑀺 𑀘 𑀧𑀳𑀭𑀦𑁆𑀢𑁂 𑀲𑀫𑁆𑀨𑀲𑁆𑀲𑀸𑀦𑀺. 𑀬𑀣𑀸 𑀘𑁂𑀢𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀓𑀺𑀫𑀗𑁆𑀕𑀁 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁. 𑀓𑀺𑀜𑁆𑀘 𑀲𑀤𑁆𑀤𑀪𑁂𑀤𑀢𑁄, 𑀲𑀤𑁆𑀤𑀯𑀺𑀲𑁂𑀲𑀢𑁄𑀧𑀺 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀢𑀢𑁄 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀧𑀕𑀼𑀡𑀜𑁆𑀳𑀺 𑀕𑀦𑁆𑀣𑀁 𑀲𑀻𑀖𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀲𑀤𑁆𑀤𑀸𑀦𑀁 𑀪𑁂𑀤𑁄 𑀤𑀺𑀝𑁆𑀞𑁄. 𑀦 𑀳𑀺 𑀓𑀸𑀭𑀡𑀪𑁂𑀤𑁂𑀦 𑀯𑀺𑀦𑀸 𑀨𑀮𑀪𑁂𑀤𑁄 𑀅𑀢𑁆𑀣𑀺. 𑀬𑀣𑀸 𑀢𑀁 𑀯𑀸𑀤𑀺𑀢𑀲𑀤𑁆𑀤𑀸𑀦𑀁, 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑁂𑀦𑁂𑀯 𑀦𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀺𑀪𑀽𑀫𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑁂𑀤𑁂𑀦 𑀯𑀺𑀲𑁂𑀲𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀢𑁄 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀲𑀺𑀤𑁆𑀥𑀺. 𑀬𑀢𑁄 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀘𑀓𑁆𑀔𑀸𑀤𑀻𑀦𑀺 𑀅𑀦𑀺𑀘𑁆𑀘𑀸𑀦𑀻𑀢𑀺 𑀲𑀺𑀤𑁆𑀥𑀸𑀦𑀺, 𑀅𑀦𑀺𑀘𑁆𑀘𑀢𑁆𑀢𑀸 𑀏𑀯 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀸𑀦𑀺, 𑀢𑀢𑁄 𑀘 𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀓𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬, 𑁮𑁫; 𑁨.𑁪.𑁧, 𑁨; 𑀧𑀝𑀺. 𑀫. 𑁨.𑁧𑁦).

𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀲𑁆𑀲𑀸𑀢𑀺 𑀅𑀪𑀺𑀡𑁆𑀳𑀲𑀤𑁆𑀤𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀢𑀺. 𑀥𑀸𑀢𑀼𑀫𑀢𑁆𑀢𑀢𑀸𑀬𑀸𑀢𑀺 𑀥𑀸𑀢𑀼𑀫𑀢𑁆𑀢𑀪𑀸𑀯𑁂𑀦. 𑀲𑀫𑀽𑀳𑀢𑁄𑀢𑀺 𑀲𑀲𑀫𑁆𑀪𑀸𑀭𑀘𑀓𑁆𑀔𑀸𑀤𑀺𑀧𑀺𑀡𑁆𑀟𑀢𑁄. ‘‘𑀘𑀓𑁆𑀔𑀸𑀤𑀻𑀦’’𑀦𑁆𑀢𑀺 𑀇𑀤𑀁 ‘‘𑀲𑀫𑀽𑀳𑀢𑁄’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, ‘‘𑀯𑀺𑀦𑀺𑀩𑁆𑀪𑀼𑀚𑀦’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀫𑁆𑀫𑀢𑁆𑀣𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑀺𑀧𑀺 𑀖𑀦𑀸𑀦𑀻𑀢𑀺 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀸𑀦𑀺. 𑀧𑀯𑀢𑁆𑀢𑀭𑀽𑀧𑀸𑀤𑀺𑀕𑁆𑀕𑀳𑀡𑀢𑁄𑀢𑀺 𑀭𑀼𑀧𑁆𑀧𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀜𑁆𑀘 𑀢𑀁 𑀭𑀽𑀧𑀸𑀤𑀺𑀕𑁆𑀕𑀳𑀡𑀜𑁆𑀘𑀸𑀢𑀺 𑀧𑀯𑀢𑁆𑀢𑀭𑀽𑀧𑀸𑀤𑀺𑀕𑁆𑀕𑀳𑀡𑀁, 𑀢𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀲𑁆𑀲 𑀲𑀩𑁆𑀪𑀸𑀯𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀜𑀸𑀡𑀢𑁄 𑀪𑀺𑀦𑁆𑀦𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀜𑀸𑀡𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦 𑀲𑀢𑀺𑀧𑀺 𑀭𑀽𑀧𑀸𑀤𑀺𑀅𑀢𑁆𑀣𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂 𑀭𑀼𑀧𑁆𑀧𑀦𑀸𑀤𑀺𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀲𑁆𑀲 𑀪𑁂𑀤𑀫𑀸𑀳. 𑀇𑀤𑀸𑀦𑀺 𑀢𑀫𑁂𑀯 𑀪𑁂𑀤𑀁 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀺𑀲𑀬𑀢𑀸𑀬 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀸𑀢𑀺𑀥𑀸𑀯𑀺𑀢𑀼𑀦𑁆𑀢𑀺 𑀇𑀥 𑀮𑀓𑁆𑀔𑀡𑀮𑀓𑁆𑀔𑀡𑀯𑀦𑁆𑀢𑀸 𑀪𑀺𑀦𑁆𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀔𑀦𑁆𑀥𑀸𑀭𑀫𑁆𑀫𑀡𑀢𑀸𑀯𑀘𑀦𑁂𑀦 𑀅𑀪𑀺𑀦𑁆𑀦𑀸𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀸𑀧𑀸𑀤𑀦𑁂𑀦 𑀅𑀢𑀺𑀥𑀸𑀯𑀺𑀢𑀼𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀯𑀼𑀢𑁆𑀢𑀁 ‘‘𑀢𑁂 𑀧𑀦𑀸𑀓𑀸𑀭𑀸’’𑀢𑀺𑀆𑀤𑀺. 𑀅𑀥𑀺𑀧𑁆𑀧𑀸𑀬𑁄𑀧𑀺 𑀘𑁂𑀢𑁆𑀣 𑀮𑀓𑁆𑀔𑀡𑀸𑀦𑀁 𑀭𑀽𑀧𑀸𑀤𑀺𑀆𑀓𑀸𑀭𑀫𑀢𑁆𑀢𑀢𑀸𑀯𑀺𑀪𑀸𑀯𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀳𑀺 𑀲𑀗𑁆𑀔𑀸𑀭𑁂 𑀲𑀪𑀸𑀯𑀢𑁄 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀬𑁂𑀯 𑀮𑀓𑁆𑀔𑀡𑀸𑀦𑀺 𑀘 𑀲𑀮𑁆𑀮𑀓𑁆𑀔𑁂𑀢𑀻𑀢𑀺. 𑀬𑀣𑀸 𑀅𑀦𑀺𑀘𑁆𑀘𑀸𑀤𑀺𑀢𑁄 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀯𑀼𑀢𑁆𑀢𑀦𑀬𑁂𑀦 𑀪𑁂𑀤𑁄, 𑀏𑀯𑀁 𑀅𑀦𑀺𑀘𑁆𑀘𑀢𑀸𑀤𑀻𑀦𑀫𑁆𑀧𑀺 𑀲𑀢𑀺𑀧𑀺 𑀮𑀓𑁆𑀔𑀡𑀪𑀸𑀯𑀲𑀸𑀫𑀜𑁆𑀜𑁂 𑀦𑀸𑀦𑀸𑀜𑀸𑀡𑀕𑁄𑀘𑀭𑀢𑀸𑀬, 𑀦𑀸𑀦𑀸𑀧𑀝𑀺𑀧𑀓𑁆𑀔𑀢𑀸𑀬, 𑀦𑀸𑀦𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀢𑀸𑀬 𑀘 𑀯𑀺𑀫𑁄𑀓𑁆𑀔𑀫𑀼𑀔𑀢𑁆𑀢𑀬𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀪𑁂𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀘 𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁫. 𑀧𑀘𑁆𑀘𑀬𑀬𑀼𑀕𑀴𑀯𑀲𑁂𑀦𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀧𑀘𑁆𑀘𑀬𑀤𑁆𑀯𑀬𑀯𑀲𑁂𑀦. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀅𑀩𑁆𑀩𑁄𑀓𑀸𑀭𑀢𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀯𑀲𑁂𑀦 𑀘𑁂𑀯 𑀩𑀸𑀳𑀺𑀭𑀯𑀲𑁂𑀦 𑀘 𑀅𑀲𑀗𑁆𑀓𑀭𑀢𑁄.

𑁧𑁬𑁭. 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑁄𑀡𑀲𑁆𑀲. 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀳𑀺 𑀲𑀫𑀼𑀔𑁂𑀦, 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀘 𑀲𑀼𑀝𑁆𑀞𑀼 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦, 𑀕𑀢𑀺𑀪𑀸𑀯𑁂𑀦 𑀘 𑀧𑀢𑀺𑀝𑁆𑀞𑀸𑀦𑀪𑀽𑀢𑁂. ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀝𑀺. 𑁩𑁩𑁯) 𑀳𑀺 𑀯𑀼𑀢𑁆𑀢𑀁. 𑀞𑀺𑀢𑀺𑀪𑀸𑀯𑁂𑀦𑀸𑀢𑀺 𑀘 𑀧𑀸𑀞𑁄. 𑀢𑀁𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂𑀢𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂. 𑀦𑀻𑀢𑁄𑀢𑀺 𑀧𑀸𑀧𑀺𑀢𑁄, 𑀧𑀓𑀸𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀘𑀼𑀡𑁆𑀡𑀺𑀢𑀦𑁆𑀢𑀺 𑀪𑁂𑀤𑀺𑀢𑀁. 𑀢𑁆𑀯𑀫𑁂𑀯 𑀓𑀺𑀁 𑀦 𑀚𑀸𑀦𑀸𑀲𑀻𑀢𑀺 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀓𑀺𑀁 𑀢𑁆𑀯𑀁 𑀏𑀓𑀁 𑀦𑀸𑀦𑀁 𑀚𑀸𑀦𑀸𑀲𑀺, 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀏𑀯𑀸’’𑀢𑀺 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀁 𑀧𑀭𑀯𑀸𑀤𑀺𑀁 ‘‘𑀦𑀦𑀼 𑀜𑀸𑀢𑁂’’𑀢𑀺𑀆𑀤𑀺𑀦𑀸 𑀲𑀓𑀯𑀸𑀤𑀻 𑀦𑀺𑀩𑀦𑁆𑀥𑀢𑀺. 𑀯𑀺𑀪𑀚𑀺𑀢𑁆𑀯𑀸𑀢𑀺 ‘‘𑀭𑀸𑀕𑀸𑀤𑀻𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀪𑀸𑀯𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸. 𑀭𑀸𑀕𑀸𑀤𑀻𑀦𑀁 𑀔𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀲𑀪𑀸𑀯𑀢𑀸 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀆𑀧𑀦𑁆𑀦𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀳𑁂𑀢𑀼𑀅𑀢𑁆𑀣𑁂 𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀢𑀁 𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀇𑀘𑁆𑀙𑀢𑁄 𑀓𑀺𑀮𑁂𑀲𑀓𑁆𑀔𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀁 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀔𑁂𑀧𑁂𑀢𑀩𑁆𑀩𑀸 𑀓𑀺𑀮𑁂𑀲𑀸 𑀩𑀳𑀼𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀸, 𑀫𑀕𑁆𑀕𑁄 𑀘 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺. 𑀲𑁆𑀯𑀸𑀬𑀁 ‘‘𑀓𑀢𑀫𑀁 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀢𑀫𑁂 𑀓𑀺𑀮𑁂𑀲𑁂 𑀔𑁂𑀧𑁂𑀢𑀻’’𑀢𑀺 𑀧𑀼𑀭𑀺𑀫𑀧𑀼𑀘𑁆𑀙𑀸𑀤𑁆𑀯𑀬𑀫𑁂𑀯 𑀯𑀤𑀢𑀺. 𑀢𑀤𑁂𑀯𑀸𑀢𑀺 𑀬𑀁 ‘‘𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀓𑀺𑀜𑁆𑀘𑀺 𑀏𑀓𑀤𑁂𑀲𑀫𑀢𑁆𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯.