𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁨𑁫. ‘‘𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀇𑀤𑀁 𑀦𑀺𑀲𑁆𑀲𑀓𑁆𑀓𑀁 𑀓𑀺𑀁 𑀮𑀓𑁆𑀔𑀡𑀁? 𑀳𑁂𑀢𑀼𑀮𑀓𑁆𑀔𑀡𑀁. 𑀬𑀤𑀺 𑀏𑀯𑀁 𑀢𑀁𑀳𑁂𑀢𑀼𑀓𑁄 𑀯𑀺𑀪𑀚𑁆𑀚𑀯𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀦 𑀳𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀲𑀸𑀯𑀓𑀸 𑀯𑀺𑀪𑀚𑁆𑀚𑀯𑀸𑀤𑀺𑀦𑁄 𑀅𑀳𑁂𑀲𑀼𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁. 𑀢𑀺𑀯𑀺𑀥𑁄 𑀳𑀺 𑀳𑁂𑀢𑀼 𑀜𑀸𑀧𑀓𑁄, 𑀓𑀸𑀭𑀓𑁄, 𑀲𑀫𑁆𑀧𑀸𑀧𑀓𑁄𑀢𑀺. 𑀢𑁂𑀲𑀼 𑀜𑀸𑀧𑀓𑀳𑁂𑀢𑀼 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀢𑁂𑀦 𑀫𑀳𑀸𑀣𑁂𑀭𑁂𑀦 ‘‘𑀓𑀺𑀁 𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀼𑀝𑁆𑀞𑁂𑀦 ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺 𑀢𑀤𑀸 𑀯𑀼𑀢𑁆𑀢𑀯𑀘𑀦𑁂𑀦 𑀜𑀸𑀬𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸 𑀯𑀺𑀪𑀚𑁆𑀚𑀯𑀸𑀤𑀺𑀦𑁄’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑀓𑀺𑀁…𑀧𑁂… 𑀯𑀼𑀢𑁆𑀢𑀢𑁆𑀢𑀸…𑀧𑁂… 𑀯𑀺𑀪𑀚𑁆𑀚𑀯𑀸𑀤𑀺𑀦𑁄’’𑀢𑀺. ‘‘𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀭𑀸𑀕𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫-𑁯) 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑀸 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑁄 𑀯𑀺𑀪𑀚𑁆𑀚 𑀯𑀼𑀢𑁆𑀢𑁄𑀢𑀺 𑀢𑀁 𑀅𑀦𑀼𑀯𑀤𑀦𑁆𑀢𑀸 𑀲𑀸𑀯𑀓𑀸𑀧𑀺 𑀢𑀣𑀸 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀢𑁂 𑀳𑀺 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑀁 𑀯𑀺𑀪𑀚𑁆𑀚 𑀯𑀤𑀦𑁆𑀢𑀻’’𑀢𑀺. 𑀘𑀻𑀯𑀭𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑁄𑀫𑀦𑀲𑁆𑀲𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀸𑀦𑀺𑀧𑀺 𑀳𑀺 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀪𑀸𑀯𑁂𑀦 𑀯𑀺𑀪𑀚𑁆𑀚 𑀯𑀼𑀢𑁆𑀢𑀸𑀦𑀺. 𑀯𑀺𑀪𑀚𑁆𑀚𑀯𑀸𑀤𑀺𑀧𑀭𑀺𑀲𑀸 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀬𑀣𑀸 𑀢𑀁 𑀑𑀢𑀺𑀡𑁆𑀡𑁄 𑀦𑀸𑀫 𑀳𑁄𑀢𑀺, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀓𑀲𑀫𑀬𑀸𑀯𑁄𑀓𑁆𑀓𑀫𑀸𑀤𑀺 𑀳𑀺 𑀧𑀭𑀫𑀢𑁆𑀣𑀢𑁄 𑀢𑀤𑁄𑀢𑀸𑀭𑁄. ‘‘𑀅𑀲𑀁𑀓𑀺𑀮𑀺𑀝𑁆𑀞𑀸𑀧𑀺 𑀅𑀯𑀺𑀚𑁆𑀚𑀸 𑀅𑀢𑁆𑀣𑀺 𑀅𑀫𑀕𑁆𑀕𑀯𑀚𑁆𑀛𑀸, 𑀬𑀸𑀬 𑀦𑀺𑀯𑀼𑀢𑀸 𑀔𑀻𑀡𑀸𑀲𑀯𑀸𑀧𑀺 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀏𑀓𑀘𑁆𑀘𑀁 𑀦 𑀚𑀸𑀦𑀦𑁆𑀢𑀺, 𑀲𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼𑀧𑀺 𑀧𑀯𑀢𑁆𑀢𑀢𑀻’’𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀬𑀸. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀻𑀢𑀺𑀆𑀤𑀺𑀁 𑀯𑀤𑀦𑁆𑀢𑁄’’𑀢𑀺. 𑀉𑀧𑀮𑀓𑁆𑀔𑀡𑀜𑁆𑀳𑁂𑀢𑀁 𑀲𑀳𑀚𑀸𑀢𑀓𑁄𑀝𑀺𑀬𑀸. 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑀧𑀺 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀬𑀸 𑀲𑀁𑀓𑀺𑀮𑀺𑀝𑁆𑀞𑀸 𑀧𑀜𑁆𑀜𑀸𑀢𑀺, 𑀅𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀅𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀭𑀽𑀧𑀪𑀸𑀯𑀁 𑀤𑀼𑀲𑁆𑀲𑀺𑀮𑁆𑀬𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀲𑀫𑀬𑀸𑀬𑀽𑀳𑀦𑀁 𑀧𑀭𑀲𑀫𑀬𑁂 𑀩𑁆𑀬𑀸𑀧𑀸𑀭𑀸𑀧𑀢𑁆𑀢𑀺𑀬𑀸. 𑀬𑁄 𑀢𑀢𑁆𑀣 𑀲𑀓𑀲𑀫𑀬𑁂𑀦 𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑁄, 𑀢𑀲𑁆𑀲 𑀯𑀸 𑀤𑀻𑀧𑀦𑁂𑀦 𑀲𑀺𑀬𑀸, 𑀧𑀭𑀲𑀫𑀬𑁂 𑀯𑀸𑀤𑀸𑀭𑁄𑀧𑀦𑁂𑀦 𑀯𑀸. 𑀢𑁂𑀲𑀼 𑀧𑀼𑀭𑀺𑀫𑀁 ‘‘𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀧𑀦𑀻𑀢𑀦𑁆𑀢𑀺 𑀇𑀢𑀭𑀁 𑀤𑀲𑁆𑀲𑁂𑀢𑀺 ‘‘𑀧𑀭𑀲𑀫𑀬𑀁…𑀧𑁂… 𑀅𑀦𑀸𑀬𑀽𑀳𑀦𑁆𑀢𑁂𑀦𑀸’’𑀢𑀺. 𑀅𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑁂𑀦𑀸𑀢𑀺 𑀉𑀧𑀘𑀬𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀆𑀬𑀽𑀳𑀦-𑀲𑀤𑁆𑀤𑁄 𑀧𑀦 𑀉𑀧𑀘𑀬𑀢𑁆𑀣𑁄 𑀦 𑀳𑁄𑀢𑀻𑀢𑀺 𑀓𑁂𑀘𑀺𑀯𑀸𑀤𑁄 𑀦 𑀲𑀸𑀭𑀢𑁄 𑀕𑀳𑁂𑀢𑀩𑁆𑀩𑁄.

𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀬𑀣𑀸𑀯𑀺𑀦𑀬𑀁 𑀅𑀯𑀝𑁆𑀞𑀸𑀦𑁂𑀦. 𑀲𑀸𑀯𑀚𑁆𑀚𑀲𑁆𑀲 𑀅𑀦𑀯𑀚𑁆𑀚𑀢𑀸𑀤𑀻𑀧𑀦𑀸𑀤𑀺𑀦𑀸 𑀓𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀦𑀸𑀲𑁂𑀦𑁆𑀢𑁄, 𑀆𑀮𑁄𑀴𑁂𑀦𑁆𑀢𑁄 𑀯𑀸 𑀥𑀫𑁆𑀫𑀢𑀁 𑀥𑀫𑁆𑀫𑀲𑀪𑀸𑀯𑀁 𑀯𑀺𑀮𑁄𑀫𑁂𑀢𑀺 𑀯𑀺𑀧𑀭𑀻𑀢𑀢𑁄 𑀤𑀳𑀢𑀺. 𑀫𑀳𑀸𑀧𑀤𑁂𑀲𑁂𑀢𑀺 𑀫𑀳𑀸𑀅𑀧𑀤𑁂𑀲𑁂, 𑀩𑀼𑀤𑁆𑀥𑀸𑀤𑀬𑁄 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀅𑀧𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀫𑀳𑀸𑀓𑀸𑀭𑀡𑀸𑀦𑀺. 𑀫𑀳𑀸𑀧𑀤𑁂𑀲𑁂𑀢𑀺 𑀯𑀸 𑀫𑀳𑀸𑀑𑀓𑀸𑀲𑁂, 𑀫𑀳𑀦𑁆𑀢𑀸𑀦𑀺 𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀅𑀧𑀤𑀺𑀲𑀻𑀬𑀢𑀻𑀢𑀺 𑀅𑀧𑀤𑁂𑀲𑁄, 𑀩𑀼𑀤𑁆𑀥𑁄 𑀅𑀧𑀤𑁂𑀲𑁄 𑀏𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀧𑀤𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀢𑁆𑀣𑀢𑁄 𑀘𑀸𑀬𑀁 𑀫𑀳𑀸𑀧𑀤𑁂𑀲𑁄 ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁 𑀪𑀕𑀯𑀢𑁄 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀓𑁂𑀦𑀘𑀺 𑀆𑀪𑀢𑀲𑁆𑀲 ‘‘𑀥𑀫𑁆𑀫𑁄’’𑀢𑀺 𑀯𑀸 ‘‘𑀅𑀥𑀫𑁆𑀫𑁄’’𑀢𑀺 𑀯𑀸 𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀢𑀲𑁆𑀲 𑀬𑀣𑀸𑀪𑀢𑀲𑁆𑀲 𑀲𑀼𑀢𑁆𑀢𑁄𑀢𑀭𑀡𑀸𑀤𑀺 𑀏𑀯. 𑀬𑀤𑀺 𑀏𑀯𑀁 𑀓𑀣𑀁 𑀘𑀢𑁆𑀢𑀸𑀭𑁄𑀢𑀺? 𑀥𑀫𑁆𑀫𑀲𑁆𑀲 𑀤𑁆𑀯𑁂 𑀲𑀫𑁆𑀧𑀤𑀸𑀬𑁄 𑀪𑀕𑀯𑀸, 𑀲𑀸𑀯𑀓𑀸 𑀘. 𑀢𑁂𑀲𑀼 𑀲𑀸𑀯𑀓𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀯𑀲𑁂𑀦 𑀢𑀺𑀯𑀺𑀥𑀸. 𑀏𑀯𑀁 ‘‘𑀅𑀫𑀼𑀫𑁆𑀳𑀸 𑀫𑀬𑀸 𑀅𑀬𑀁 𑀥𑀫𑁆𑀫𑁄 𑀧𑀝𑀺𑀕𑁆𑀕𑀳𑀺𑀢𑁄’’𑀢𑀺 𑀅𑀧𑀤𑀺𑀲𑀺𑀢𑀩𑁆𑀩𑀸𑀦𑀁 𑀪𑁂𑀤𑁂𑀦 𑀘𑀢𑁆𑀢𑀸𑀭𑁄. 𑀢𑁂𑀦𑀸𑀳 ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁 𑀪𑀕𑀯𑀢𑁄 𑀲𑀼𑀢’’𑀦𑁆𑀢𑀺𑀆𑀤𑀺. 𑀦𑁂𑀢𑁆𑀢𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀸𑀧𑀤𑁂𑀲𑁄 𑀲𑀗𑁆𑀖𑀸𑀧𑀤𑁂𑀲𑁄 𑀲𑀫𑁆𑀩𑀳𑀼𑀮𑀢𑁆𑀣𑁂𑀭𑀸𑀧𑀤𑁂𑀲𑁄 𑀏𑀓𑀢𑁆𑀣𑁂𑀭𑀸𑀧𑀤𑁂𑀲𑁄’’𑀢𑀺.

𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀺𑀫𑀳𑀸𑀧𑀤𑁂𑀲𑁂𑀢𑀺 𑀏𑀢𑁆𑀣 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀅𑀢𑁆𑀣𑀲𑀽𑀘𑀦𑀸𑀤𑀺𑀅𑀢𑁆𑀣𑁂𑀦 𑀲𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀢𑁄 𑀬𑀣𑀸𑀯𑀼𑀢𑁆𑀢𑀸 𑀏𑀯 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀧𑀸𑀴𑀺𑀬𑀸 𑀅𑀢𑁆𑀣𑀕𑀸𑀳𑀡𑁂𑀦 𑀥𑀫𑁆𑀫𑀢𑀸𑀬𑀁 𑀧𑀢𑀺𑀝𑁆𑀞𑀸𑀧𑀦𑀢𑁄 𑀅𑀝𑁆𑀞𑀓𑀣𑀸 𑀆𑀘𑀭𑀺𑀬𑀯𑀸𑀤𑁄. 𑀦𑀬𑀕𑁆𑀕𑀸𑀳𑁂𑀦 𑀅𑀦𑀼𑀩𑀼𑀤𑁆𑀥𑀺𑀬𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀅𑀢𑁆𑀢𑀦𑁄𑀫𑀢𑀺. 𑀏𑀢𑁆𑀣 𑀘 𑀲𑀼𑀢𑁆𑀢𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀦𑀫𑁆𑀧𑀺 𑀓𑁂𑀦𑀘𑀺 𑀆𑀪𑀢𑀲𑁆𑀲 𑀥𑀫𑁆𑀫𑀸𑀥𑀫𑁆𑀫𑀸𑀤𑀺𑀪𑀸𑀯𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀪𑀸𑀯𑀲𑀪𑀸𑀯𑀢𑁄 𑀫𑀳𑀸𑀧𑀤𑁂𑀲𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀺𑀝𑁆𑀞𑀢𑀺 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁄, 𑀅𑀯𑀺𑀮𑁄𑀫𑁂𑀦𑁆𑀢𑁄 𑀘. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀢𑀺𑀥𑀸𑀯𑀢𑀺. 𑀏𑀓𑀲𑁆𑀲 𑀧𑀤𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀲𑁆𑀲𑁂𑀯 𑀧𑀼𑀦 𑀧𑀓𑀸𑀭𑀦𑁆𑀢𑀭𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 𑀯𑀸 𑀅𑀧𑀭𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀺𑀲𑀢𑀺 𑀦𑀸𑀫 𑀬𑀣𑀸 ‘‘𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 ‘‘𑀅𑀬𑀁 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀧𑀺 ‘‘𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀏𑀓𑀤𑁂𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁. 𑀅𑀣 𑀯𑀸 𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀼𑀦 𑀨𑀮𑀪𑀸𑀯𑁂𑀦 𑀯𑀘𑀦𑀁 𑀢𑀫𑁂𑀯𑀢𑁆𑀣𑀁 𑀧𑀼𑀦𑀭𑀸𑀯𑀢𑁆𑀢𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀦𑀁 𑀬𑀣𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀯𑀘𑀦𑀁. 𑀅𑀣 𑀯𑀸 ‘‘𑀲𑀩𑁆𑀩𑀫𑁂𑀢𑀁 𑀪𑀯𑀘𑀓𑁆𑀓𑀁 𑀓𑀫𑁆𑀫𑀜𑁆𑀘𑁂𑀯 𑀯𑀺𑀧𑀸𑀓𑁄 𑀘. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀢𑀺𑀯𑀺𑀥’’𑀦𑁆𑀢𑀺 𑀘 𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀤𑀼𑀯𑀺𑀥𑀢𑀺𑀯𑀺𑀥𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀁 𑀢𑀫𑁂𑀯𑀢𑁆𑀣𑀁 𑀧𑀼𑀦𑀭𑀸𑀯𑀢𑁆𑀢𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀢𑁆𑀢𑀯𑁄𑀳𑀸𑀭𑁄𑀢𑀺 ‘‘𑀲𑀢𑁆𑀢𑁄’’𑀢𑀺 𑀲𑀫𑀜𑁆𑀜𑀸. 𑀬𑁂 𑀳𑀺 𑀥𑀫𑁆𑀫𑁂 𑀲𑀫𑀽𑀳𑀪𑀽𑀢𑁂 𑀲𑀦𑁆𑀢𑀸𑀦𑀯𑀲𑁂𑀦 𑀯𑀢𑁆𑀢𑀫𑀸𑀦𑁂 𑀉𑀧𑀸𑀤𑀸𑀬 𑀲𑀢𑁆𑀢𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀸 𑀢𑀢𑁄 𑀅𑀜𑁆𑀜𑀣𑀸𑀦𑀸𑀜𑁆𑀜𑀣𑀸𑀅𑀘𑁆𑀘𑀦𑁆𑀢𑀸𑀪𑀸𑀯𑀲𑀗𑁆𑀔𑀸𑀢𑁂 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀬𑀸𑀣𑀸𑀯𑀢𑁄 𑀲𑀗𑁆𑀕𑀳𑀡𑀁, 𑀩𑁄𑀥𑀦𑀜𑁆𑀘 𑀥𑀫𑁆𑀫𑀢𑀸𑀬𑀁 𑀅𑀓𑀼𑀲𑀮𑀲𑁆𑀲 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀦𑁆𑀢𑀺. 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀁 𑀧𑀢𑀺 𑀳𑁂𑀢𑀼𑀆𑀤𑀺𑀦𑀸 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄.

𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀓𑀸𑀫𑀜𑁆𑀘𑁂𑀢𑁆𑀣 𑀲𑀩𑁆𑀩𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀇𑀫𑀺𑀦𑀸𑀯 𑀦𑀬𑁂𑀦 𑀓𑀸𑀢𑀩𑁆𑀩𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸𑀬 𑀧𑀦 𑀕𑀭𑀼𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀯𑀤𑀢𑀺.

𑀧𑀸𑀴𑀺𑀥𑀫𑁆𑀫𑀦𑁆𑀢𑀺 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀸𑀴𑀺𑀁.

𑀅𑀢𑁆𑀣𑀁 𑀓𑀢𑁆𑀯𑀸𑀢𑀺 𑀳𑀺𑀢𑀁 𑀓𑀢𑁆𑀯𑀸. 𑀬𑀣𑀸𑀬𑀁 𑀳𑀺𑀢𑀸𑀯𑀳𑁄 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀣𑀺𑀓𑀁 𑀓𑀢𑁆𑀯𑀸. 𑀲𑀼𑀢𑀘𑀺𑀦𑁆𑀢𑀸𑀫𑀬𑀸𑀤𑀺𑀁 𑀜𑀸𑀡𑀯𑀺𑀲𑁂𑀲𑀁. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀦𑀸 𑀓𑀺𑀮𑁂𑀲𑀓𑁆𑀔𑀬𑀯𑀺𑀲𑁂𑀲𑀁.

𑀪𑀯𑀸𑀤𑀻𑀲𑀼 𑀆𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁄, 𑀩𑀮𑀯𑀽𑀧𑀦𑀺𑀲𑁆𑀲𑀬𑀢𑁄, 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀢𑁄 𑀘 𑀯𑀝𑁆𑀝𑀲𑁆𑀲 𑀫𑀽𑀮𑀓𑀸𑀭𑀡𑀁 𑀅𑀯𑀺𑀚𑁆𑀚𑀸. 𑀯𑀺𑀧𑀸𑀓𑀯𑀝𑁆𑀝𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀓𑀸𑀭𑀡𑀪𑀽𑀢𑀫𑁆𑀧𑀺 𑀓𑀺𑀮𑁂𑀲𑀯𑀝𑁆𑀝𑀁 𑀅𑀯𑀺𑀚𑁆𑀚𑀸𑀫𑀽𑀮𑀓𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀯𑀺𑀚𑁆𑀚𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀧𑀺 𑀳𑀺 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀏𑀯 𑀯𑀺𑀲𑀬𑁂 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀧𑀯𑀢𑁆𑀢𑀢𑀺, 𑀦 𑀅𑀜𑁆𑀜𑀣𑀸. 𑀫𑀽𑀮𑀸𑀤𑀺𑀤𑀲𑁆𑀲𑀦𑀲𑀸𑀫𑀜𑁆𑀜𑀜𑁆𑀘𑀸𑀢𑀺 𑀯𑀮𑁆𑀮𑀺𑀬𑀸 𑀫𑀽𑀮𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀲𑁆𑀲 𑀤𑀲𑁆𑀲𑀦𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀢𑀁𑀤𑀲𑁆𑀲𑀦𑀲𑀸𑀫𑀜𑁆𑀜𑀜𑁆𑀘 𑀬𑁄𑀚𑁂𑀢𑀩𑁆𑀩𑀁, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀲𑀩𑁆𑀩𑀲𑁆𑀲 𑀤𑀺𑀝𑁆𑀞𑀢𑁆𑀢𑁂𑀧𑀺 𑀤𑁂𑀲𑀦𑀸𑀓𑀸𑀮𑁂 𑀤𑁂𑀲𑀦𑀸𑀜𑀸𑀡𑀘𑀓𑁆𑀔𑀼𑀦𑀸 𑀩𑁄𑀥𑁂𑀢𑀩𑁆𑀩𑀢𑀸𑀯𑀲𑁂𑀦 𑀏𑀓𑀤𑁂𑀲𑀤𑀲𑁆𑀲𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀤𑀺𑀝𑁆𑀞𑀺𑀲𑀳𑀺𑀢𑀸𑀬 𑀫𑀸𑀦𑀲𑀳𑀺𑀢𑀸𑀬 𑀯𑀸 𑀢𑀡𑁆𑀳𑀸𑀬 ‘‘𑀅𑀳’’𑀦𑁆𑀢𑀺, 𑀇𑀢𑀭𑀸𑀬 ‘‘𑀫𑀫’’𑀦𑁆𑀢𑀺 𑀅𑀪𑀺𑀯𑀤𑀢𑁄. ‘‘𑀅𑀪𑀺𑀦𑀦𑁆𑀤𑀦𑀢𑁄’’𑀢𑀺 𑀳𑀺 𑀇𑀫𑀺𑀦𑀸 𑀲𑀧𑁆𑀧𑀻𑀢𑀺𑀓𑀸𑀬 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. ‘‘𑀅𑀪𑀺𑀯𑀤𑀢𑁄’’𑀢𑀺 𑀇𑀫𑀺𑀦𑀸 𑀢𑀢𑁄 𑀩𑀮𑀯𑀢𑀭𑀸𑀬 𑀤𑀺𑀝𑁆𑀞𑀺𑀲𑀳𑀺𑀢𑀸𑀬 𑀫𑀸𑀦𑀲𑀳𑀺𑀢𑀸𑀬 𑀯𑀸. ‘‘𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄’’𑀢𑀺 𑀇𑀫𑀺𑀦𑀸 𑀧𑀦 𑀢𑀢𑁄𑀧𑀺 𑀩𑀮𑀯𑀢𑀫𑀸𑀬 𑀤𑀺𑀝𑁆𑀞𑀺𑀲𑀳𑀺𑀢𑀸𑀬, 𑀓𑁂𑀯𑀮𑀸𑀬 𑀯𑀸 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀞𑀸𑀦𑀜𑁆𑀳𑀺 𑀅𑀚𑁆𑀛𑁄𑀲𑀸𑀦𑀁. 𑀢𑀧𑁆𑀧𑀘𑁆𑀘𑀬𑀦𑁆𑀢𑀺 𑀢𑀡𑁆𑀳𑀸𑀧𑀘𑁆𑀘𑀬𑀁. 𑀓𑀣𑀁 𑀧𑀦 𑀦𑀦𑁆𑀤𑀺𑀯𑀘𑀦𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀦𑁆𑀤𑀺𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀦𑁆𑀤𑀺𑀢𑀸𑀢𑀤𑀯𑀺𑀧𑁆𑀧𑀬𑁄𑀕𑀢𑀸𑀳𑀻𑀢𑀺 𑀦𑀦𑁆𑀤𑀺𑀪𑀸𑀯𑁂𑀦 𑀲𑀪𑀸𑀯𑀢𑁄 𑀢𑀡𑁆𑀳𑀼𑀧𑀸𑀤𑀸𑀦𑀁, 𑀢𑀸𑀬 𑀦𑀦𑁆𑀤𑀺𑀬𑀸 𑀢𑀡𑁆𑀳𑀸𑀬 𑀅𑀯𑀺𑀧𑁆𑀧𑀬𑁄𑀕𑁂𑀦 𑀅𑀯𑀺𑀦𑀸𑀪𑀸𑀯𑁂𑀦 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀬𑀸𑀧𑀺 𑀦𑀦𑁆𑀤𑀺𑀪𑀸𑀯𑀫𑀸𑀳.

𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀨𑀲𑁆𑀲𑀸𑀤𑀬𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀉𑀧𑁆𑀧𑀦𑁆𑀦𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀦𑀺. ‘‘𑀯𑀺𑀧𑀸𑀓𑀯𑀝𑁆𑀝𑀪𑀽𑀢𑁂’’𑀢𑀺 𑀘 𑀇𑀤𑀁 𑀧𑀯𑀢𑁆𑀢𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀝𑁆𑀝𑀽𑀧𑀢𑁆𑀣𑀫𑁆𑀪𑀓𑀸𑀢𑀺 𑀯𑀝𑁆𑀝𑀢𑁆𑀢𑀬𑀽𑀧𑀦𑀺𑀲𑁆𑀲𑀬𑀸. 𑀇𑀢𑀭𑁂𑀢𑀺 𑀅𑀓𑀫𑁆𑀫𑀚𑀸. 𑀢𑀲𑁆𑀫𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀆𑀳𑀸𑀭𑀘𑀢𑀼𑀓𑁆𑀓𑁂. 𑀯𑀢𑁆𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀢𑀡𑁆𑀳𑀸𑀦𑀺𑀤𑀸𑀦𑀽𑀧𑀦𑀺𑀲𑁆𑀲𑀬𑀢𑁄 ‘‘𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀦𑁆𑀢𑀺.

𑀬𑀣𑀸 𑀅𑀭𑀺𑀬𑀫𑀕𑁆𑀕𑁄 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑀺𑀢𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀸𑀯𑀢𑁄 ‘‘𑀜𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀧𑀻𑀢𑀺 𑀆𑀳 ‘‘𑀜𑀸𑀬𑁄𑀢𑀺 𑀫𑀕𑁆𑀕𑁄, 𑀲𑁄𑀬𑁂𑀯 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺. 𑀅𑀢𑁆𑀢𑀦𑁄 𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸. 𑀲𑀁𑀯𑀢𑁆𑀢𑀢𑀻𑀢𑀺 𑀘 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀽𑀧𑀘𑀸𑀭𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺. 𑀧𑀓𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀲𑀘𑁆𑀘𑀯𑀺𑀪𑀗𑁆𑀕𑁂 𑀳𑁂𑀢𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀓𑀣𑀸𑀬𑀁 𑀤𑀲𑁆𑀲𑀺𑀢𑀸 𑀏𑀯. 𑀅𑀓𑀸𑀭𑀡𑀁 ‘‘𑀓𑀸𑀭𑀡’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀬𑀣𑀸 𑀓𑀸𑀧𑀺𑀮𑀸𑀤𑀬𑁄. 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀩𑀼𑀚𑁆𑀛𑀦𑁆𑀢𑀺 𑀬𑀣𑀸 𑀢𑀁 𑀅𑀜𑁆𑀜𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸. 𑀇𑀢𑀭𑀸𑀲𑀦𑁆𑀢𑀺 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀤𑁂𑀲𑀦𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁. 𑀢𑀤𑀢𑁆𑀣𑀢𑀸𑀲𑀫𑁆𑀪𑀯𑁂𑀧𑀻𑀢𑀺 𑀬𑀣𑀸𑀲𑀓𑁂𑀳𑀺 𑀓𑀸𑀭𑀡𑁂𑀳𑀺 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀢𑀸𑀲𑀫𑁆𑀪𑀯𑁂𑀧𑀺. 𑀅𑀢𑁆𑀣𑀦𑁆𑀢𑀭𑀲𑀩𑁆𑀪𑀸𑀯𑀢𑁄𑀢𑀺 𑀧𑀬𑁄𑀚𑀦𑀦𑁆𑀢𑀭𑀲𑀩𑁆𑀪𑀸𑀯𑀢𑁄. 𑀯𑀼𑀢𑁆𑀢𑀸𑀦𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁫) ‘‘𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀭𑀡𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀆𑀳𑀸𑀭𑀦𑀺𑀤𑀸𑀦𑀯𑀯𑀢𑁆𑀣𑀸𑀧𑀦𑀸𑀦𑀼𑀲𑀸𑀭𑁂𑀦 𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀅𑀢𑀻𑀢𑀤𑁆𑀥𑀢𑁄 𑀧𑀪𑀼𑀢𑀺 𑀳𑁂𑀢𑀼𑀨𑀮𑀧𑀝𑀺𑀧𑀸𑀝𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀅𑀦𑀸𑀕𑀢𑀤𑁆𑀥𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀅𑀦𑀸𑀕𑀢𑀤𑁆𑀥𑀲𑀦𑁆𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀬𑀣𑀸𑀓𑁆𑀓𑀫𑀁 𑀢𑀻𑀡𑀺 𑀧𑀬𑁄𑀚𑀦𑀸𑀦𑀺.

𑀢𑀁𑀢𑀁𑀨𑀮𑀧𑀝𑀺𑀯𑁂𑀥𑁄𑀢𑀺 𑀚𑀸𑀢𑀺𑀆𑀤𑀻𑀦𑀁 𑀚𑀭𑀸𑀫𑀭𑀡𑀸𑀤𑀺𑀢𑀁𑀢𑀁𑀨𑀮𑀸𑀯𑀕𑀫𑁄. 𑀅𑀦𑀼𑀯𑀺𑀮𑁄𑀓𑀬𑀢𑁄𑀢𑀺 𑀧𑀼𑀭𑀺𑀫𑁂 𑀯𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀅𑀦𑀼𑀯𑀺𑀮𑁄𑀓𑀦𑀁, 𑀤𑀼𑀢𑀺𑀬𑁂 𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁. 𑀓𑀸𑀫𑀼𑀧𑀸𑀤𑀸𑀦𑀪𑀽𑀢𑀸 𑀢𑀡𑁆𑀳𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀲𑀗𑁆𑀔𑀸𑀢𑀲𑁆𑀲 𑀪𑀯𑀲𑁆𑀲, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀲𑁂𑀲𑀸𑀳𑀸𑀭𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀆𑀳𑀸𑀭𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀬𑀸𑀯 𑀯𑀺𑀜𑁆𑀜𑀸𑀡𑀁 𑀕𑀳𑁂𑀢𑀩𑁆𑀩𑀁. 𑀆𑀳𑀸𑀭𑀢𑀡𑁆𑀳𑀸𑀤𑀬𑁄𑀢𑀺 𑀏𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑁂 𑀆𑀳𑀸𑀭𑁂 𑀕𑀳𑁂𑀢𑁆𑀯𑀸 𑀅𑀤𑁆𑀥𑀬𑁄𑀚𑀦𑀁 𑀓𑀢𑁆𑀯𑀸 𑀅𑀦𑀸𑀕𑀢𑀯𑀺𑀧𑀸𑀓𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑁂 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀳𑀸𑀭𑀸 𑀯𑀸 𑀢𑀡𑁆𑀳𑀸𑀬 𑀧𑀪𑀸𑀯𑁂𑀢𑀩𑁆𑀩𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸’’𑀢𑀺. 𑀧𑀪𑀸𑀯𑁂𑀢𑀩𑁆𑀩𑀸𑀢𑀺 𑀆𑀬𑀢𑀺𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀸. 𑀬𑀼𑀚𑁆𑀚𑀢𑀻𑀢𑀺 𑀨𑀮𑀪𑀽𑀢𑁂 𑀆𑀳𑀸𑀭𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀁𑀦𑀺𑀤𑀸𑀦𑀁 𑀢𑀡𑁆𑀳𑀁 𑀢𑀲𑁆𑀲𑀸 𑀦𑀺𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀨𑀮𑀧𑀭𑀫𑁆𑀧𑀭𑀸𑀬 𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀘 𑀤𑀲𑁆𑀲𑀦𑀁 𑀢𑀣𑀸𑀩𑀼𑀚𑁆𑀛𑀦𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑀢𑁄, 𑀥𑀫𑁆𑀫𑀲𑀪𑀸𑀯𑀸𑀯𑀺𑀮𑁄𑀫𑀦𑀢𑁄 𑀘 𑀬𑀼𑀢𑁆𑀢𑀺𑀬𑀸 𑀲𑀗𑁆𑀕𑀬𑁆𑀳𑀢𑀺. 𑀬𑀤𑀺 𑀢𑀡𑁆𑀳𑀸𑀤𑀬𑁄 𑀅𑀢𑀻𑀢𑁄 𑀅𑀤𑁆𑀥𑀸, 𑀢𑀡𑁆𑀳𑀸𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀕𑀳𑀺𑀢𑀸𑀢𑀺 𑀓𑀺𑀫𑀢𑁆𑀣𑀁 𑀧𑀼𑀦 𑀢𑁂 𑀕𑀳𑀺𑀢𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀢𑀢𑁄𑀧𑀺 𑀅𑀢𑀻𑀢𑀢𑀭𑁄 𑀅𑀤𑁆𑀥𑀸 𑀯𑀼𑀢𑁆𑀢𑁄 𑀲𑀁𑀲𑀸𑀭𑀲𑁆𑀲 𑀅𑀦𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀅𑀢𑀻𑀢𑀦𑁆𑀢𑀺 𑀯𑀸 𑀅𑀢𑀻𑀢𑀢𑀸𑀲𑀸𑀫𑀜𑁆𑀜𑁂𑀦 𑀅𑀢𑀻𑀢𑀢𑀭𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀤𑀝𑁆𑀞𑀩𑁆𑀩𑀁.

𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀳𑀸𑀭𑀓𑀸𑀢𑀺 𑀧𑀼𑀦𑀩𑁆𑀪𑀯𑀽𑀧𑀧𑀢𑁆𑀢𑀺𑀧𑀘𑁆𑀘𑀬𑀸. 𑀇𑀢𑀺 𑀯𑀘𑀦𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀯𑀘𑀦𑀲𑀩𑁆𑀪𑀸𑀯𑀢𑁄. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀢𑀸𑀯 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀳𑁂𑀢𑀼, 𑀇𑀢𑀭𑁂 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸…𑀧𑁂… 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲𑀸’’𑀢𑀺. 𑀢𑀲𑁆𑀲 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀳𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑁆𑀥𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀢𑀸 𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀸𑀮𑁂, 𑀭𑀸𑀕𑀸𑀤𑀻𑀦𑀁 𑀕𑀥𑀺𑀢𑀲𑁆𑀲 𑀪𑁄𑀚𑀦𑀸𑀤𑀺𑀓𑀸𑀮𑁂. 𑀢𑁂𑀦 𑀬𑀣𑀸𑀓𑁆𑀓𑀫𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀺𑀜𑁆𑀜𑀸𑀡𑀸𑀬𑀽𑀳𑀦𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀳𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀕𑀬𑁆𑀳𑀦𑁆𑀢𑀺, 𑀢𑀲𑁆𑀫𑀸. 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄𑀢𑀺 ‘‘𑀆𑀳𑀸𑀭𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀅𑀢𑁆𑀣𑁄. 𑀅𑀢𑀻𑀢𑁂𑀢𑀺 𑀅𑀢𑀻𑀢𑁂 𑀅𑀤𑁆𑀥𑀦𑀺. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀅𑀢𑀻𑀢𑀤𑁆𑀥𑀢𑁄 𑀧𑀭𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀦𑀸𑀕𑀢𑁂 𑀘 𑀅𑀤𑁆𑀥𑀦𑀺 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸. 𑀧𑀘𑁆𑀘𑀓𑁆𑀔𑀸𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁂𑀢𑀼𑀦𑁆𑀢𑀺 𑀏𑀢𑀭𑀳𑀺 𑀯𑀢𑁆𑀢𑀫𑀸𑀦𑀁 𑀢𑀡𑁆𑀳𑀸𑀤𑀺𑀓𑀁 𑀆𑀳𑀸𑀭𑀸𑀤𑀻𑀦𑀁 𑀳𑁂𑀢𑀼𑀁.

𑀲𑀼𑀢𑁆𑀢𑀁 𑀆𑀳𑀭𑀢𑀺 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩). 𑀯𑀝𑁆𑀝𑀳𑁂𑀢𑀼𑀦𑁄𑀢𑀺 𑀯𑀺𑀧𑀸𑀓𑀯𑀝𑁆𑀝𑀳𑁂𑀢𑀼𑀦𑁄, 𑀲𑀓𑀮𑀯𑀝𑁆𑀝𑀳𑁂𑀢𑀼𑀦𑁄 𑀯𑀸. 𑀅𑀓𑀼𑀲𑀮𑀜𑁆𑀳𑀺 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. ‘‘𑀪𑀯𑀢𑀡𑁆𑀳𑀸𑀬𑀧𑀺 𑀳𑁂𑀢𑀼𑀪𑀽𑀢𑀸’’𑀢𑀺 𑀇𑀫𑀺𑀦𑀸 𑀓𑀺𑀮𑁂𑀲𑀯𑀝𑁆𑀝𑀲𑁆𑀲𑀸𑀧𑀺 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑀫𑀸𑀳. 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀯𑀝𑁆𑀝𑀲𑀻𑀲𑀸𑀦𑀫𑁆𑀧𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀲𑀧𑁆𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀸𑀧𑀤𑁂𑀲𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀯𑀺𑀘𑁆𑀙𑁂𑀤𑀯𑀼𑀢𑁆𑀢𑀺𑀬𑀸 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀦𑀁 𑀯𑀺𑀪𑀸𑀯𑁂𑀢𑀺.

𑀅𑀯𑀺𑀚𑁆𑀚𑀁 𑀢𑀡𑁆𑀳𑀸 𑀅𑀦𑀼𑀯𑀢𑁆𑀢𑀢𑀻𑀢𑀺 𑀤𑀼𑀓𑁆𑀔𑁂 𑀢𑀡𑁆𑀳𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀢𑀢𑁄 𑀅𑀯𑀺𑀚𑁆𑀚𑀸𑀬 𑀩𑀮𑀯𑀪𑀸𑀯𑀫𑀸𑀳. 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀸 𑀳𑀺 𑀲𑀢𑁆𑀢𑀸 𑀲𑀢𑀺𑀧𑀺 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀺𑀢𑁂 𑀏𑀓𑀦𑁆𑀢𑀸𑀦𑀢𑁆𑀣𑀲𑀜𑁆𑀜𑀺𑀢𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀤𑀼𑀓𑁆𑀔𑀫𑀦𑀼𑀬𑀼𑀜𑁆𑀚𑀦𑁆𑀢𑀺. 𑀢𑀡𑁆𑀳𑀁 𑀅𑀯𑀺𑀚𑁆𑀚𑀸 𑀅𑀦𑀼𑀯𑀢𑁆𑀢𑀢𑀻𑀢𑀺 𑀲𑀼𑀔𑁂 𑀅𑀯𑀺𑀚𑁆𑀚𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀢𑀢𑁄 𑀢𑀡𑁆𑀳𑀸𑀬 𑀩𑀮𑀯𑀪𑀸𑀯𑀫𑀸𑀳. 𑀬𑀤𑀺𑀧𑀺 𑀲𑀸𑀯𑀚𑁆𑀚𑀲𑀼𑀔𑀸𑀦𑀼𑀪𑀯𑁂 𑀩𑀮𑀯𑀢𑀻𑀬𑁂𑀯 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀫𑀸𑀦𑀆𑀤𑀻𑀦𑀯𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀢𑀡𑁆𑀳𑀸 𑀧𑀦 𑀢𑀢𑁄𑀧𑀺 𑀩𑀮𑀯𑀢𑀭𑀢𑀸𑀬 𑀲𑀢𑁆𑀢𑁂 𑀯𑀺𑀧𑀼𑀮𑀸𑀦𑀢𑁆𑀣𑀲𑀜𑁆𑀳𑀺𑀢𑁂 𑀅𑀦𑀭𑀺𑀬𑁂 𑀲𑀼𑀔𑁂 𑀦𑀺𑀬𑁄𑀚𑁂𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀢𑀤𑀦𑀼𑀯𑀢𑁆𑀢𑀦𑀁 𑀯𑀼𑀢𑁆𑀢𑀁.

𑀆𑀬𑀢𑀦𑀙𑀓𑁆𑀓𑀁 𑀯𑀸 𑀓𑀸𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑁂 𑀲𑁂𑀲𑀥𑀫𑁆𑀫𑁂𑀢𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀪𑀽𑀢𑁂, 𑀢𑀧𑁆𑀧𑀝𑀺𑀩𑀤𑁆𑀥𑁂 𑀘 𑀲𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁂 𑀥𑀫𑁆𑀫𑁂. 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑁂 𑀏𑀯 𑀓𑀢𑁆𑀯𑀸𑀢𑀺 𑀘𑀓𑁆𑀔𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁂 𑀓𑀢𑁆𑀯𑀸. 𑀘𑀓𑁆𑀔𑀸𑀤𑀺𑀓𑀸𑀬𑀦𑁆𑀢𑀺 𑀘𑀓𑁆𑀔𑀸𑀤𑀺𑀥𑀫𑁆𑀫𑀲𑀫𑀽𑀳𑀁 𑀧𑀭𑁂𑀲𑀁 𑀧𑀜𑁆𑀘𑀓𑁆𑀔𑀦𑁆𑀥𑀁. 𑀨𑀲𑁆𑀲𑁂𑀦 𑀨𑀼𑀝𑁆𑀞𑁄𑀢𑀺 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁂𑀦 𑀯𑀺𑀬 𑀉𑀧𑁆𑀧𑀦𑁆𑀦𑁂𑀦 𑀲𑀼𑀔𑀯𑁂𑀤𑀦𑀺𑀬𑁂𑀦, 𑀤𑀼𑀓𑁆𑀔𑀯𑁂𑀤𑀦𑀺𑀬𑁂𑀦 𑀘 𑀨𑀲𑁆𑀲𑁂𑀦 𑀨𑀼𑀝𑁆𑀞𑁄. 𑀨𑀲𑁆𑀲𑁂 𑀳𑀺 𑀢𑀣𑀸 𑀉𑀧𑁆𑀧𑀦𑁆𑀦𑁂 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀨𑀼𑀝𑁆𑀞𑁄𑀢𑀺 𑀯𑁄𑀳𑀸𑀭𑁄 𑀳𑁄𑀢𑀻𑀢𑀺.

𑀬𑀣𑀸 𑀲𑀴𑀸𑀬𑀢𑀦𑀸𑀦𑀺 𑀨𑀲𑁆𑀲𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀁 𑀯𑁂𑀤𑀦𑀸𑀬𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀴𑀸𑀬𑀢𑀦𑀸𑀦𑀁 𑀯𑁂𑀤𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯’’𑀦𑁆𑀢𑀺 𑀆𑀳. 𑀢𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀲𑀴𑀸𑀬𑀢𑀦𑀦𑀺𑀲𑁆𑀲𑀺𑀢𑀁. 𑀅𑀢𑀻𑀢𑀤𑁆𑀥𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑁄𑀢𑀺 𑀅𑀢𑀻𑀢𑀤𑁆𑀥𑀪𑀽𑀢𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑁄. 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄𑀢𑀺 𑀉𑀪𑀬𑀢𑁆𑀣𑀸𑀧𑀺 𑀓𑀸𑀬𑀲𑀤𑁆𑀤𑁂𑀦 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁄 𑀕𑀳𑀺𑀢𑁄. 𑀢𑀤𑀼𑀧𑀕𑀢𑀸 𑀉𑀧𑀧𑀚𑁆𑀚𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁. 𑀉𑀪𑀬𑀫𑀽𑀮𑁄𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑁄.

𑀅𑀦𑀪𑀺𑀲𑀫𑀬𑀪𑀽𑀢𑀢𑁆𑀢𑀸𑀢𑀺 𑀅𑀪𑀺𑀲𑀫𑀬𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸. 𑀅𑀯𑀺𑀚𑁆𑀚𑀸𑀬𑀸𑀢𑀺 𑀅𑀯𑀺𑀚𑁆𑀚𑀸𑀬 𑀲𑀢𑀺.

𑀕𑀳𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀢𑀺 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀢𑁆𑀢𑁂𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀢𑀸𑀬 𑀯𑀺𑀲𑀼𑀁 𑀯𑀼𑀢𑁆𑀢𑀸 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦, 𑀢𑀲𑁆𑀫𑀸. 𑀢𑀢𑁆𑀣 𑀯𑀼𑀢𑁆𑀢𑀫𑁆𑀧𑀻𑀢𑀺 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑁂𑀲𑀼 𑀯𑀼𑀢𑁆𑀢𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀇𑀢𑀭𑁂 𑀲𑀗𑁆𑀔𑀸𑀭𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀼𑀤𑁆𑀥𑀭𑀺𑀢𑀩𑁆𑀩𑀢𑀸𑀤𑁆𑀯𑀬𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀇𑀥 𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀦𑀁 𑀲𑀢𑀺𑀧𑀺 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀪𑀸𑀯𑁂 𑀬𑀣𑀸𑀯𑀼𑀢𑁆𑀢𑀫𑁂𑀯 𑀧𑀥𑀸𑀦𑀪𑀸𑀯𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀢𑀤𑁂𑀓𑀤𑁂𑀲𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑁂𑀳𑀺 𑀲𑀗𑁆𑀕𑀳𑀺𑀢𑀸𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀇𑀥 𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀧𑀥𑀸𑀦𑀸𑀢𑀺 𑀯𑀺𑀲𑀼𑀁 𑀕𑀳𑀺𑀢𑀸, 𑀧𑀼𑀭𑀺𑀫𑀲𑁆𑀫𑀺𑀁 𑀢𑁂 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀯𑀡𑁆𑀡𑁂𑀢𑀩𑁆𑀩𑀲𑀩𑁆𑀩𑀲𑀗𑁆𑀕𑀳𑀡𑀯𑀲𑁂𑀦 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸’’𑀢𑀺. 𑀲𑀸𑀫𑀜𑁆𑀜𑀢𑁄 𑀲𑀗𑁆𑀕𑀬𑁆𑀳𑀫𑀸𑀦𑀫𑁆𑀧𑀺 𑀧𑀥𑀸𑀦𑀪𑀸𑀯𑀚𑁄𑀢𑀦𑀢𑁆𑀣𑀁 𑀯𑀺𑀲𑀼𑀁 𑀕𑀬𑁆𑀳𑀢𑀺 𑀬𑀣𑀸 𑀢𑀁 ‘‘𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸’’𑀢𑀺.

𑀬𑁂𑀦 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸 ‘‘𑀯𑀺𑀧𑀸𑀓𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀆𑀬𑀽𑀳𑀦𑀁, 𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀸𑀦𑁂 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺…𑀧𑁂… 𑀆𑀬𑀽𑀳𑀦𑀭𑀲𑀸’’𑀢𑀺. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀧𑀦 𑀢𑀲𑁆𑀲 𑀘𑁂𑀢𑀦𑀸𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀭𑀸𑀲𑀺𑀓𑀭𑀡𑀁, 𑀆𑀬𑀽𑀳𑀦𑀦𑁆𑀢𑀺 𑀘 𑀭𑀸𑀲𑀺𑀪𑀽𑀢𑀲𑁆𑀲 𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀯𑀼𑀢𑁆𑀢𑀁. ‘‘𑀅𑀦𑀸𑀭𑀫𑁆𑀫𑀡𑀢𑀸 𑀅𑀩𑁆𑀬𑀸𑀓𑀢𑀢𑀸’’𑀢𑀺 𑀇𑀤𑀁 𑀅𑀩𑁆𑀬𑀸𑀓𑀢𑀲𑁆𑀲𑁂𑀯 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀅𑀩𑁆𑀬𑀸𑀓𑀢𑀲𑀫𑁆𑀩𑀦𑁆𑀥𑀺𑀦𑀻 𑀅𑀦𑀸𑀭𑀫𑁆𑀫𑀡𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀬𑀢𑀦𑀁, 𑀖𑀝𑀦𑀦𑁆𑀢𑀺 𑀘 𑀢𑀁𑀢𑀁𑀤𑁆𑀯𑀸𑀭𑀺𑀓𑀥𑀫𑁆𑀫𑀧𑁆𑀧𑀯𑀢𑁆𑀢𑀦𑀫𑁂𑀯 𑀤𑀝𑁆𑀞𑀩𑁆𑀩𑀁.

𑀅𑀦𑀦𑀼𑀩𑁄𑀥𑀸𑀤𑀬𑁄 𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑁂 𑀆𑀕𑀢𑀸. 𑀅𑀯𑀺𑀚𑁆𑀚𑀸𑀧𑀤𑀲𑀫𑁆𑀩𑀦𑁆𑀥𑁂𑀦 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀅𑀲𑀡𑁆𑀞𑀸𑀦𑀢𑁆𑀢𑀸𑀢𑀺 𑀅𑀯𑀺𑀕𑁆𑀕𑀳𑀢𑁆𑀢𑀸.

𑀲𑁄𑀓𑀸𑀤𑀻𑀦𑀁 𑀲𑀩𑁆𑀪𑀸𑀯𑀸𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀅𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑁄𑀓𑀸𑀤𑀻𑀦𑀫𑁆𑀧𑀺 𑀯𑀼𑀢𑁆𑀢𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀅𑀗𑁆𑀕𑀩𑀳𑀼𑀢𑁆𑀢𑀧𑁆𑀧𑀲𑀗𑁆𑀕𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀁 𑀩𑀳𑀼𑀪𑀸𑀯𑁂 𑀆𑀧𑀦𑁆𑀦𑁂. 𑀤𑁆𑀯𑀸𑀤𑀲𑁂𑀯𑀸𑀢𑀺 𑀓𑀣𑀁 𑀤𑁆𑀯𑀸𑀤𑀲𑁂𑀯, 𑀦𑀦𑀼 𑀲𑁄𑀓𑀸𑀤𑀬𑁄𑀧𑀺 𑀥𑀫𑁆𑀫𑀦𑁆𑀢𑀭𑀪𑀽𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑀁 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑀸, 𑀦 𑀧𑀦 𑀅𑀗𑁆𑀕𑀦𑁆𑀢𑀭𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀮𑁂𑀦𑀸𑀢𑀺 𑀨𑀮𑀪𑀽𑀢𑁂𑀦 𑀚𑀭𑀸𑀫𑀭𑀡𑀗𑁆𑀕𑀲𑀗𑁆𑀕𑀳𑀺𑀢𑁂𑀦 𑀲𑁄𑀓𑀸𑀤𑀺𑀦𑀸. 𑀫𑀽𑀮𑀗𑁆𑀕𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀇𑀫𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬 𑀫𑀽𑀮𑀪𑀽𑀢𑀁 𑀅𑀯𑀺𑀚𑁆𑀚𑀗𑁆𑀕𑀁 𑀲𑁄𑀘𑀦𑀸𑀤𑀻𑀳𑀺 𑀲𑀫𑁆𑀫𑁄𑀳𑀸𑀧𑀢𑁆𑀢𑀺𑀓𑀣𑀦𑁂𑀦 𑀤𑀲𑁆𑀲𑁂𑀢𑀼𑀁 𑀢𑁂 𑀲𑁄𑀓𑀸𑀤𑀬𑁄 𑀯𑀼𑀢𑁆𑀢𑀸 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁. 𑀚𑀭𑀸𑀫𑀭𑀡𑀁 𑀓𑀸𑀭𑀡𑀁 𑀏𑀢𑁂𑀲𑀦𑁆𑀢𑀺 𑀚𑀭𑀸𑀫𑀭𑀡𑀓𑀸𑀭𑀡𑀸, 𑀲𑁄𑀓𑀸𑀤𑀬𑁄, 𑀢𑀩𑁆𑀪𑀸𑀯𑁄 𑀚𑀭𑀸𑀫𑀭𑀡𑀓𑀸𑀭𑀡𑀢𑀸. 𑀚𑀭𑀸𑀫𑀭𑀡𑀁 𑀦𑀺𑀫𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀁. 𑀢𑀁 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀲𑀼𑀢𑁆𑀢𑀁. 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀁 𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀸𑀦𑀁 𑀲𑁄𑀓𑀸𑀤𑀻𑀦𑀁. 𑀢𑀢𑁄 𑀧𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀤𑀼𑀢𑀺𑀬𑀢𑁆𑀢𑀪𑀸𑀯𑀢𑁄 𑀧𑀭𑀸𑀬 𑀢𑀢𑀺𑀬𑀢𑁆𑀢𑀪𑀸𑀯𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺𑀬𑀸. 𑀳𑁂𑀢𑀼𑀳𑁂𑀢𑀼𑀪𑀽𑀢𑀸𑀢𑀺 𑀓𑀸𑀭𑀡𑀲𑁆𑀲 𑀓𑀸𑀭𑀡𑀪𑀽𑀢𑀸. 𑀧𑀝𑀺𑀲𑀦𑁆𑀥𑀺𑀬𑀸 𑀳𑀺 𑀲𑀗𑁆𑀔𑀸𑀭𑀸 𑀓𑀸𑀭𑀡𑀁, 𑀢𑁂𑀲𑀁 𑀅𑀯𑀺𑀚𑁆𑀚𑀸. 𑀲𑀼𑀢𑁆𑀢𑀦𑁆𑀢𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 (𑀫. 𑀦𑀺. 𑁧.𑁨, 𑁧𑁭; 𑀲𑀁. 𑀦𑀺. 𑁨.𑁬𑁧; 𑀥. 𑀲. 𑁧𑁦𑁦𑁭) 𑀇𑀫𑀁 𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀯𑀺𑀚𑁆𑀚𑀸 𑀲𑁄𑀓𑀸𑀤𑀻𑀦𑀁 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀸 𑀅𑀲𑁆𑀲𑀼𑀢𑀯𑀢𑀸𑀬 𑀅𑀯𑀺𑀚𑁆𑀚𑀸𑀪𑀺𑀪𑀯𑀦𑀤𑀻𑀧𑀦𑀺𑀬𑀸 𑀢𑀤𑀼𑀧𑁆𑀧𑀢𑁆𑀢𑀺𑀯𑀘𑀦𑀢𑁄. ‘‘𑀦 𑀲𑁄𑀓𑀸𑀤𑀻𑀦𑀁 𑀩𑀸𑀮𑀲𑁆𑀲 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀢𑀸𑀫𑀢𑁆𑀢𑀲𑁆𑀲 𑀲𑀸𑀥𑀓𑀁 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀦 𑀘 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀫𑁂𑀯 𑀤𑀼𑀓𑁆𑀔𑀁 𑀤𑀼𑀓𑁆𑀔𑀁, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀦𑀺𑀫𑀺𑀢𑁆𑀢𑀫𑁆𑀧𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀚𑀭𑀸𑀫𑀭𑀡𑁂𑀦 𑀲𑁄𑀓𑀸𑀤𑀻𑀦𑀁 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀚𑀭𑀸𑀫𑀭𑀡𑀦𑁆𑀢𑀸 𑀏𑀯 𑀤𑁂𑀲𑀦𑀸 𑀓𑀢𑀸, 𑀓𑀺𑀁 𑀢𑀢𑁄 𑀧𑀭𑀸 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀳𑀺 𑀓𑀫𑁆𑀫𑀢𑁄, 𑀯𑀺𑀜𑁆𑀜𑀸𑀡𑀸𑀤𑀺𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀬 𑀘 𑀘𑀼𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑁄𑀢𑀺 𑀧𑀯𑀢𑁆𑀢𑀺𑀢𑀤𑀼𑀧𑀭𑀫𑀪𑀽𑀢𑀁 𑀚𑀭𑀸𑀫𑀭𑀡𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀢𑀁 𑀧𑀦 𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑀯𑀢𑁄 𑀚𑀸𑀢𑀺𑀬𑀸 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀇𑀫𑀺𑀦𑀸𑀯 𑀧𑀓𑀸𑀲𑀺𑀢𑀦𑁆𑀢𑀺 𑀦 𑀧𑀼𑀦 𑀯𑀼𑀘𑁆𑀘𑀢𑀺, 𑀦 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀘 𑀲𑀦𑁆𑀢𑀸𑀦𑀲𑁆𑀲 𑀚𑀭𑀸𑀫𑀭𑀡𑀁 𑀧𑀭𑀺𑀬𑁄𑀲𑀸𑀦𑀁. 𑀲𑀢𑀺 𑀓𑀺𑀮𑁂𑀲𑀯𑀝𑁆𑀝𑁂 𑀓𑀫𑁆𑀫𑀼𑀦𑀸 𑀢𑀢𑁄 𑀧𑀼𑀦𑀩𑁆𑀪𑀯𑀽𑀧𑀧𑀢𑁆𑀢𑀺, 𑀅𑀲𑀢𑀺 𑀧𑀦 𑀢𑀲𑁆𑀫𑀺𑀁 ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀚𑀭𑀸𑀫𑀭𑀡𑀧𑀭𑀺𑀬𑁄𑀲𑀸𑀦𑀸𑀯 𑀤𑁂𑀲𑀦𑀸 𑀓𑀢𑀸. 𑀬𑀲𑁆𑀫𑀸 𑀧𑀦 𑀦 𑀅𑀫𑀭𑀡𑀸 𑀚𑀭𑀸 𑀅𑀢𑁆𑀣𑀺 𑀲𑀩𑁆𑀩𑁂𑀲𑀁 𑀉𑀧𑁆𑀧𑀢𑁆𑀢𑀺𑀫𑀦𑁆𑀢𑀸𑀦𑀁 𑀧𑀸𑀓𑀸𑀦𑀦𑁆𑀢𑀭𑀪𑁂𑀤𑀢𑁄, 𑀦 𑀘𑀸𑀚𑀭𑀁 𑀫𑀭𑀡𑀁 𑀅𑀧𑀸𑀓𑀪𑁂𑀤𑀸𑀪𑀸𑀯𑀸, 𑀢𑀲𑁆𑀫𑀸 𑀢𑀤𑀼𑀪𑀬𑀫𑁂𑀓𑀫𑀗𑁆𑀕𑀁 𑀓𑀢𑀁, 𑀦 𑀦𑀸𑀫𑀭𑀽𑀧𑀁 𑀯𑀺𑀬 𑀉𑀪𑀬𑀝𑁆𑀞𑀸𑀦𑁂 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀬𑀸, 𑀲𑀴𑀸𑀬𑀢𑀦𑀁 𑀯𑀺𑀬 𑀯𑀸 𑀆𑀬𑀢𑀦𑀪𑀸𑀯𑁂𑀦 𑀓𑀺𑀘𑁆𑀘𑀲𑀫𑀢𑀸𑀬. 𑀬𑀸 𑀧𑀦𑀸𑀬𑀁 𑀑𑀲𑀸𑀦𑀁 𑀕𑀢𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀤𑀻𑀧𑀺𑀢𑀸, 𑀢𑀸𑀬 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀺, 𑀓𑀺𑀮𑁂𑀲𑀓𑀫𑁆𑀫𑀸𑀪𑀸𑀯𑁂 𑀢𑀤𑀪𑀸𑀯𑀢𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀫𑀸𑀤𑀺 𑀏𑀯 𑀯𑀸 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑀝𑁆𑀝𑀢𑁆𑀢𑀬𑀲𑁆𑀲 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀅𑀣 𑀯𑀸 𑀚𑀭𑀸𑀕𑀳𑀡𑁂𑀦 𑀧𑀭𑀺𑀧𑀓𑁆𑀓𑀧𑀭𑀺𑀧𑀓𑁆𑀓𑀢𑀭𑀸𑀤𑀺𑀓𑁆𑀓𑀫𑁂𑀦 𑀯𑀢𑁆𑀢𑀫𑀸𑀦𑀁 𑀦𑀸𑀫𑀭𑀽𑀧𑀸𑀤𑀺, 𑀲𑁄𑀓𑀸𑀤𑀺 𑀘 𑀕𑀬𑁆𑀳𑀢𑀺, 𑀢𑀣𑀸𑀲𑁆𑀲 𑀧𑀭𑀺𑀧𑀸𑀓𑀓𑀸𑀮𑀯𑀢𑁆𑀢𑀺𑀦𑀻 𑀅𑀯𑀺𑀚𑁆𑀚𑀸 𑀘. 𑀬𑀣𑀸𑀳 𑁋

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀭𑀽𑀧𑁂𑀳𑀺…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺…𑀧𑁂… 𑀭𑀚𑀦𑀻𑀬𑁂𑀳𑀺. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁦𑁮).

𑀏𑀢𑁆𑀣 𑀳𑀺 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀲𑁆𑀲 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀭𑀸𑀕𑀸𑀤𑀺𑀕𑁆𑀕𑀳𑀡𑁂𑀦 𑀢𑀤𑀯𑀺𑀦𑀸𑀪𑀸𑀯𑀺𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀧𑁆𑀧𑀚𑀸𑀦𑀦𑁂 𑀘 𑀲𑁄𑀓𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀸 𑀅𑀯𑀺𑀚𑁆𑀚𑀸 𑀧𑀓𑀸𑀲𑀺𑀢𑀸. 𑀅𑀧𑀺𑀘 ‘‘𑀧𑀺𑀬𑀧𑁆𑀧𑀪𑀯𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 𑀯𑀘𑀦𑀢𑁄 𑀓𑀸𑀫𑀸𑀲𑀯𑀪𑀯𑀸𑀲𑀯𑁂𑀳𑀺, ‘‘𑀢𑀲𑁆𑀲 ‘𑀅𑀳𑀁 𑀭𑀽𑀧𑀁, 𑀫𑀫 𑀭𑀽𑀧𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄…𑀧𑁂… 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 (𑀲𑀁. 𑀦𑀺. 𑁩.𑁧) 𑀯𑀘𑀦𑀢𑁄 𑀤𑀺𑀝𑁆𑀞𑀸𑀲𑀯𑀢𑁄, ‘‘𑀅𑀲𑁆𑀲𑀼𑀢𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀅𑀯𑀺𑀚𑁆𑀚𑀸𑀲𑀯𑀢𑁄 𑀲𑁄𑀓𑀸𑀤𑀻𑀦𑀁 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸𑀢𑀺 𑀢𑁂𑀲𑀁 𑀳𑁂𑀢𑀼𑀢𑀸𑀬 𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀆𑀲𑀯𑀸. 𑀢𑁂𑀲𑀁 𑀲𑀬𑀜𑁆𑀘 𑀚𑀭𑀸𑀲𑀪𑀸𑀯𑀢𑀸𑀬 𑀚𑀭𑀸𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀺, 𑀢𑀢𑁄 𑀘 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 𑀯𑀘𑀦𑀢𑁄 𑀆𑀲𑀯𑀦𑀺𑀫𑀺𑀢𑁆𑀢𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀚𑀭𑀸𑀕𑀳𑀡𑁂𑀦 𑀕𑀳𑀡𑀁. 𑀢𑀢𑁄 𑀘 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀆𑀯𑀝𑁆𑀝𑀢𑀺 𑀪𑀯𑀘𑀓𑁆𑀓𑀁. 𑀅𑀧𑀺𑀘 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀢𑁆𑀯𑀸 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀯𑀤𑀦𑁆𑀢𑁂𑀦𑀧𑀺 𑀪𑀯𑀘𑀓𑁆𑀓𑀲𑁆𑀲 𑀅𑀦𑀯𑀝𑁆𑀞𑀸𑀦𑀢𑁄 𑀧𑀭𑀺𑀩𑁆𑀪𑀫𑀦𑀁 𑀤𑀲𑁆𑀲𑀺𑀢𑀁. 𑀏𑀢𑁆𑀣 𑀳𑀺 𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀲𑁆𑀲 𑀧𑀼𑀦𑀩𑁆𑀪𑀯𑁄 𑀤𑀲𑁆𑀲𑀺𑀢𑁄, 𑀚𑀸𑀢𑀺𑀬𑀸 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲, 𑀉𑀪𑀬𑀢𑁆𑀣 𑀉𑀪𑀺𑀦𑁆𑀦𑀁 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀺𑀫𑀺𑀢𑁆𑀢𑀁 𑀪𑀯𑀘𑀓𑁆𑀓𑀁 𑀅𑀦𑀯𑀝𑁆𑀞𑀸𑀦𑀢𑁄 𑀧𑀭𑀺𑀩𑁆𑀪𑀫𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀚𑀭𑀸𑀫𑀭𑀡𑀦𑁆𑀢𑀸𑀧𑀺 𑀤𑁂𑀲𑀦𑀸 𑀦 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀁 𑀲𑀽𑀘𑁂𑀢𑀺 𑀅𑀢𑀤𑀢𑁆𑀣𑀢𑁆𑀢𑀸, 𑀦 𑀘 𑀧𑀘𑁆𑀘𑀬𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀫𑁂𑀯 𑀧𑀼𑀦 𑀯𑀘𑀦𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀏𑀓𑀢𑁆𑀭𑁂𑀯 𑀢𑀤𑀼𑀪𑀬𑀤𑁂𑀲𑀦𑀸𑀬 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀢𑀣𑀸 𑀬𑀁 𑀓𑀫𑁆𑀫𑀁 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑀁, 𑀢𑀁 𑀢𑀡𑁆𑀳𑀸𑀳𑁂𑀢𑀼𑀓𑀫𑁆𑀧𑀺. 𑀬𑀁 𑀢𑀡𑁆𑀳𑀸𑀳𑁂𑀢𑀼𑀓𑀁, 𑀢𑀁 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀪𑀯𑀫𑀽𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑀳𑀢𑁄. 𑀬𑀣𑀸 𑀳𑀺 𑀢𑀡𑁆𑀳𑀸𑀧𑀘𑁆𑀘𑀬𑀸 𑀓𑀸𑀫𑀼𑀧𑀸𑀤𑀸𑀦𑀳𑁂𑀢𑀼𑀓𑀁 𑀓𑀫𑁆𑀫𑀪𑀯𑀲𑀗𑁆𑀔𑀸𑀭𑀁 𑀯𑀤𑀦𑁆𑀢𑁄 𑀦 𑀯𑀺𑀦𑀸 𑀪𑀯𑀢𑀡𑁆𑀳𑀸𑀬 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀢𑀫𑁂𑀯 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑁄 𑀦 𑀅𑀦𑁆𑀢𑀭𑁂𑀦 𑀅𑀯𑀺𑀚𑁆𑀚𑀸𑀬 𑀪𑀯𑀢𑀡𑁆𑀳𑀸 𑀓𑀫𑁆𑀫𑀪𑀯𑀲𑁆𑀲 𑀧𑀘𑁆𑀘𑀬𑁄𑀢𑀺. 𑀢𑀢𑁄 𑀘 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀤𑀬𑁄, 𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀺𑀧𑀘𑁆𑀘𑀬𑀸 𑀪𑀯𑀸𑀤𑀬𑁄 𑀘, 𑀢𑀣𑀸 𑀢𑀡𑁆𑀳𑀸𑀳𑁂𑀢𑀼𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀯𑀺𑀜𑁆𑀜𑀸𑀡𑀸𑀤𑀺𑀧𑀘𑁆𑀘𑀬𑀸𑀦𑀸𑀫𑀭𑀽𑀧𑀸𑀤𑀻𑀢𑀺 𑀏𑀯𑀫𑁂𑀢𑁂𑀲𑀁 𑀅𑀗𑁆𑀕𑀸𑀦𑀁 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁬. 𑀧𑀺𑀢𑀸 𑀓𑀣𑀻𑀬𑀢𑀻𑀢𑀺 𑀅𑀲𑀼𑀓𑁄 𑀅𑀲𑀼𑀓𑀲𑁆𑀲 𑀧𑀺𑀢𑀸𑀢𑀺 𑀧𑀺𑀢𑀼𑀪𑀸𑀯𑁂𑀦 𑀓𑀣𑀻𑀬𑀢𑀺. 𑀓𑀣𑀺𑀬𑀫𑀸𑀦𑁄 𑀘 𑀅𑀲𑀦𑁆𑀤𑁂𑀳𑀢𑁆𑀣𑀁 𑀅𑀜𑁆𑀜𑁂𑀳𑀺 𑀫𑀺𑀢𑁆𑀢𑀤𑀢𑁆𑀢𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀓𑀣𑀻𑀬𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀻𑀖𑁄…𑀧𑁂… 𑀤𑀢𑁆𑀢𑁄’’𑀢𑀺.

𑀬𑀸𑀣𑀸𑀯𑁄𑀢𑀺 𑀅𑀯𑀺𑀧𑀭𑀻𑀢𑁄. 𑀓𑀺𑀘𑁆𑀘𑀚𑀸𑀢𑀺𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀦𑀓𑀺𑀘𑁆𑀘𑀢𑁄, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀢𑁄 𑀘.

𑀕𑀳𑀡𑀓𑀸𑀭𑀡𑀯𑀲𑁂𑀦𑀸𑀢𑀺 𑀕𑀳𑀡𑀲𑁆𑀲 𑀓𑀸𑀭𑀡𑀪𑀸𑀯𑀯𑀲𑁂𑀦. 𑀅𑀜𑁆𑀜𑀲𑁂𑀢𑀸𑀤𑀻𑀦𑀁 𑀦𑀺𑀯𑀢𑁆𑀢𑀓𑀸𑀦𑀻𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀙𑀸𑀤𑁂𑀦𑁆𑀢𑀺𑀬𑀸𑀢𑀺 𑀙𑀸𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀺𑀬𑀸. 𑀢𑀣𑀸 𑀧𑀯𑀢𑁆𑀢𑀦𑀳𑁂𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺.

𑀢𑀲𑁆𑀫𑀸𑀢𑀺 𑀲𑀪𑀸𑀯𑀢𑁄 𑀅𑀕𑀫𑁆𑀪𑀻𑀭𑀢𑁆𑀢𑀸 𑀢𑁂𑀲𑀁 𑀤𑀼𑀤𑁆𑀤𑀲𑀪𑀸𑀯𑀓𑀭𑀡𑀻 𑀢𑀤𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀲𑀦𑁆𑀢𑀺 𑀦𑀺𑀭𑁄𑀥𑀫𑀕𑁆𑀕𑀸𑀦𑀁. 𑀲𑀫𑀸𑀦𑁂𑀧𑀺 𑀧𑀡𑀻𑀢𑀅𑀲𑀁𑀓𑀺𑀮𑁂𑀲𑀺𑀓𑀸𑀤𑀺𑀪𑀸𑀯𑁂 𑀲𑀧𑁆𑀧𑀘𑁆𑀘𑀬𑀢𑁄 𑀅𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

‘‘𑀲𑁄𑀥𑁂𑀢𑀺 𑀅𑀧𑀼𑀜𑁆𑀜𑀨𑀮𑀢𑁄’’𑀢𑀺 𑀇𑀫𑀺𑀦𑀸 𑀧𑀼𑀜𑁆𑀜𑀲𑁆𑀲 𑀯𑀺𑀧𑀸𑀓𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀢𑀁 𑀆𑀳, ‘‘𑀤𑀼𑀓𑁆𑀔𑀢𑁄’’𑀢𑀺 𑀇𑀫𑀺𑀦𑀸 𑀘𑁂𑀢𑁄𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀢𑀁, ‘‘𑀲𑀁𑀓𑀺𑀮𑁂𑀲𑀢𑁄’’𑀢𑀺 𑀇𑀫𑀺𑀦𑀸 𑀓𑀺𑀮𑁂𑀲𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀢𑀁. ‘‘𑀅𑀧𑀼𑀜𑁆𑀜𑀨𑀮𑀢𑁄’’𑀢𑀺 𑀯𑀸 𑀇𑀫𑀺𑀦𑀸 𑀧𑀼𑀜𑁆𑀜𑀲𑁆𑀲 𑀆𑀬𑀢𑀺𑀁 𑀳𑀺𑀢𑀢𑀁 𑀤𑀲𑁆𑀲𑁂𑀢𑀺. ‘‘𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄’’𑀢𑀺 𑀇𑀫𑀺𑀦𑀸 𑀧𑀯𑀢𑁆𑀢𑀺𑀳𑀺𑀢𑀢𑀁 𑀧𑀯𑀢𑁆𑀢𑀺𑀲𑀼𑀔𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀁𑀦𑀺𑀧𑁆𑀨𑀸𑀤𑀦𑁂𑀦𑀸𑀢𑀺 𑀳𑀺𑀢𑀲𑀼𑀔𑀦𑀺𑀩𑁆𑀩𑀢𑁆𑀢𑀦𑁂𑀦. 𑀧𑀼𑀚𑁆𑀚𑀪𑀯𑀦𑀺𑀩𑁆𑀩𑀢𑁆𑀢𑀓𑁄 𑀧𑀼𑀚𑁆𑀚𑀦𑀺𑀩𑁆𑀩𑀢𑁆𑀢𑀓𑁄.

‘‘𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 𑀧𑀼𑀜𑁆𑀜𑀨𑀮𑀫𑁆𑀧𑀺 𑀧𑀼𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀼𑀜𑁆𑀜𑀼𑀧𑀕𑀦𑁆𑀢𑀺 𑀪𑀯𑀲𑀫𑁆𑀧𑀢𑁆𑀢𑀼𑀧𑀕’’𑀦𑁆𑀢𑀺.

𑀆𑀤𑀺𑀪𑀸𑀯𑀦𑀸𑀢𑀺 ‘‘𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀓𑀲𑀺𑀡𑁂𑀲𑀼 𑀧𑀯𑀢𑁆𑀢𑀪𑀸𑀯𑀦𑀸. 𑀧𑀣𑀯𑀻 𑀧𑀣𑀯𑀻𑀢𑀺 𑀯𑀸 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 𑀇𑀢𑀭𑀓𑀲𑀺𑀡𑀸𑀦𑀁 𑀕𑀳𑀡𑀁. 𑀆𑀤𑀺𑀪𑀸𑀯𑀦𑀸𑀢𑀺𑀆𑀤𑀺𑀪𑀽𑀢𑀸 𑀪𑀸𑀯𑀦𑀸. 𑀲𑀸 𑀳𑀺 ‘‘𑀧𑀭𑀺𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀡𑁆𑀟𑀮𑀓𑀭𑀡𑀁 𑀓𑀲𑀺𑀡𑀫𑀡𑁆𑀟𑀮𑀓𑀭𑀡𑀁.

𑀤𑀸𑀦𑀯𑀲𑁂𑀦𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀯𑀲𑁂𑀦. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀤𑀸𑀦𑀁 𑀤𑀺𑀬𑁆𑀬𑀢𑀺 𑀏𑀢𑁂𑀦𑀸𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼. 𑀤𑀸𑀦𑀁 𑀆𑀭𑀩𑁆𑀪𑀸𑀢𑀺 𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀁 𑀧𑀭𑀺𑀘𑁆𑀘𑀸𑀕𑀁 𑀉𑀤𑁆𑀤𑀺𑀲𑁆𑀲. 𑀬𑀣𑀸 𑀯𑀸 𑀲𑁄 𑀦𑀺𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀞𑀧𑁂𑀢𑁆𑀯𑀸. 𑀅𑀥𑀺𑀓𑀺𑀘𑁆𑀘𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀣𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀸 𑀤𑀸𑀦𑀓𑀺𑀭𑀺𑀬𑀸 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀅𑀥𑀺𑀓𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀓𑀢𑁆𑀯𑀸. 𑀘𑁂𑀢𑀦𑀸𑀯𑀲𑁂𑀦𑁂𑀯 𑀳𑀺 𑀤𑀸𑀦𑀸𑀤𑀺𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀺. 𑀇𑀢𑀭𑁂𑀲𑀽𑀢𑀺 ‘‘𑀲𑀻𑀮𑀁 𑀆𑀭𑀩𑁆𑀪𑀸’’𑀢𑀺𑀆𑀤𑀻𑀲𑀼.

𑀅𑀲𑀭𑀺𑀓𑁆𑀔𑀓𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀅𑀲𑀤𑀺𑀲𑀫𑁆𑀧𑀺 𑀓𑀝𑀢𑁆𑀢𑀸𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀦𑀸𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑁂𑀦. 𑀭𑀽𑀧𑀢𑀡𑁆𑀳𑀸𑀲𑀗𑁆𑀔𑀸𑀢𑀲𑁆𑀲𑀸𑀢𑀺 ‘‘𑀭𑀽𑀧𑀢𑀡𑁆𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀭𑀽𑀧𑀢𑀡𑁆𑀳𑀫𑀸𑀳. 𑀕𑀼𑀜𑁆𑀚𑀦𑁆𑀢𑀺 𑀕𑀼𑀜𑁆𑀚𑀨𑀮𑀧𑀭𑀺𑀫𑀸𑀡𑀁 𑀥𑀸𑀭𑀡𑀻𑀬𑀯𑀢𑁆𑀣𑀼𑀁. 𑀢𑀣𑀸 𑀢𑀡𑁆𑀟𑀼𑀮𑀁.

‘‘𑀯𑀘𑀦𑀯𑀺𑀲𑁂𑀲𑀫𑀢𑁆𑀢𑀫𑁂𑀯𑀸’’𑀢𑀺 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀫𑀸𑀳 ‘‘𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺 𑀏𑀯 𑀳𑀺 𑀆𑀤𑀸𑀦𑀸𑀤𑀺𑀧𑀸𑀧𑀦𑀸’’𑀢𑀺. 𑀧𑀼𑀭𑀺𑀫𑁂𑀦𑀸𑀢𑀺 ‘‘𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀢𑀜𑁆𑀳𑀺 𑀧𑀯𑀢𑁆𑀢𑀺𑀫𑀢𑁆𑀢𑀓𑀣𑀦𑀢𑁄 𑀤𑁆𑀯𑀸𑀭𑀽𑀧𑀮𑀓𑁆𑀔𑀡𑀁 𑀳𑁄𑀢𑀺. 𑀧𑀘𑁆𑀙𑀺𑀫𑁂𑀦𑀸𑀢𑀺 ‘‘𑀆𑀤𑀸𑀦𑀸’’𑀤𑀺𑀯𑀘𑀦𑁂𑀦.

𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀢𑀺 𑀉𑀤𑁆𑀤𑁂𑀲𑀁 𑀲𑀦𑁆𑀥𑀸𑀬𑀸𑀳. 𑀓𑀸𑀬𑀯𑀘𑀻𑀲𑀜𑁆𑀘𑁂𑀢𑀦𑀸𑀕𑀳𑀡𑁂𑀢𑀺 𑀦𑀺𑀤𑁆𑀤𑁂𑀲𑀁. 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲. 𑀲𑀳𑀚𑀸𑀢𑀲𑁆𑀲 𑀧𑀦 𑀅𑀦𑀦𑁆𑀢𑀭𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. ‘‘𑀓𑀼𑀲𑀮𑀸 𑀯𑀺𑀧𑀸𑀓𑀥𑀫𑁆𑀫𑀸 𑀘𑀸’’𑀢𑀺 𑀇𑀤𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀦 𑀇𑀢𑀭𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀲𑀺𑀬𑀸 𑀓𑀼𑀲𑀮𑀲𑀪𑀸𑀯𑀢𑁆𑀢𑀸, 𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸 𑀯𑀸 𑀢𑀤𑀜𑁆𑀜𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀬𑀺𑀤𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀬 𑀅𑀦𑁂𑀓𑀦𑁆𑀢𑀺𑀓𑀁. 𑀦 𑀳𑀺 𑀲𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄. 𑀅𑀣 𑀯𑀺𑀧𑀸𑀓𑀤𑀸𑀬𑀺𑀦𑀻𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀫𑁆𑀧𑀺 𑀅𑀳𑁄𑀲𑀺𑀓𑀫𑁆𑀫𑁂𑀦 𑀅𑀦𑁂𑀓𑀦𑁆𑀢𑀺𑀓𑀁. 𑀦 𑀳𑀺 𑀢𑀲𑁆𑀲𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀅𑀢𑁆𑀣𑀻𑀢𑀺 𑀆𑀳 ‘‘𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂𑀦 𑀓𑀼𑀲𑀮𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑀸 𑀘𑀸’’𑀢𑀺. 𑀓𑁂𑀯𑀮𑀜𑁆𑀳𑀺 𑀬𑀸 𑀅𑀜𑁆𑀜𑁂𑀲𑀁 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀲𑀩𑁆𑀬𑀸𑀧𑀸𑀭𑀸 𑀲𑀉𑀲𑁆𑀲𑀸𑀳𑀸 𑀧𑀯𑀢𑁆𑀢𑀺, 𑀢𑀤𑀸𑀓𑀸𑀭𑀸𑀯𑀲𑁆𑀲𑀸 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀻𑀢𑀺 𑀯𑀺𑀧𑀸𑀓𑀥𑀫𑁆𑀫𑀢𑀸, 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀢𑀸 𑀘 𑀯𑀼𑀢𑁆𑀢𑀸. 𑀏𑀯𑀫𑁆𑀧𑀺 𑀬𑀤𑀺 𑀯𑀺𑀧𑀸𑀓𑀥𑀫𑁆𑀫𑀸 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀓𑀣𑀁 𑀅𑀯𑀺𑀧𑀸𑀓𑀸𑀢𑀺? 𑀅𑀲𑀫𑁆𑀪𑀯𑀢𑁄𑀢𑀺 𑀢𑀁 𑀅𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀳𑀺 𑀬𑀤𑀺 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀪𑀽𑀫𑀺𑀓𑀁 𑀯𑀸 𑀉𑀧𑁆𑀧𑀸𑀤𑁂𑀬𑁆𑀬 𑀅𑀜𑁆𑀜𑀪𑀽𑀫𑀺𑀓𑀁 𑀯𑀸. 𑀢𑀢𑁆𑀣 𑀅𑀜𑁆𑀜𑀪𑀽𑀫𑀺𑀓𑀲𑁆𑀲 𑀢𑀸𑀯 𑀉𑀧𑁆𑀧𑀸𑀤𑀦𑀁 𑀅𑀬𑀼𑀢𑁆𑀢𑀁 𑀧𑀘𑁆𑀘𑀬𑀸𑀪𑀸𑀯𑀢𑁄, 𑀢𑀣𑀸 𑀅𑀤𑀲𑁆𑀲𑀦𑀢𑁄 𑀘. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀪𑀽𑀫𑀺𑀓𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀉𑀧𑁆𑀧𑀸𑀤𑁂𑀬𑁆𑀬 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀯𑀸, 𑀢𑁂𑀲𑀼 𑀅𑀢𑁆𑀢𑀦𑁄 𑀓𑀫𑁆𑀫𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀬 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸, 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑁆𑀢𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬. 𑀢𑀣𑀸 𑀏𑀓𑀦𑁆𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀜𑁆𑀘 𑀦 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀬𑀫𑀲𑀫𑁆𑀪𑀯𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀲𑀤𑀺𑀲𑀸𑀭𑀫𑁆𑀫𑀡𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀺𑀝𑁆𑀞𑀸𑀦𑀺𑀓𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀞𑀸𑀦𑀢𑁆𑀢𑀬𑀯𑀦𑁆𑀢𑀁. ‘‘𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀓𑀲𑀺𑀡’’𑀦𑁆𑀢𑀺𑀆𑀤𑀺𑀦𑀸 𑀓𑀼𑀲𑀮𑁂𑀦 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀤𑁂𑀲𑀺𑀢𑀦𑁆𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺. ‘‘𑀭𑀽𑀧𑀸𑀯𑀘𑀭𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀺 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀸 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺 ‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’𑀢𑀺𑀧𑀻’’𑀢𑀺 𑀯𑀘𑀦𑀢𑁄 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀏𑀓𑀦𑁆𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑁄𑀢𑀺 𑀆𑀳 ‘‘𑀦 𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑁄 𑀅𑀢𑁆𑀣𑀻’’𑀢𑀺. 𑀲𑁆𑀯𑀸𑀬𑀫𑀲𑀫𑁆𑀪𑀯𑁄 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀬 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀯𑀺𑀧𑀸𑀓𑀸𑀪𑀸𑀯𑀁 𑀲𑀸𑀥𑁂𑀢𑀺, 𑀦 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬. 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀧𑀺 𑀳𑀺 𑀲𑀸 𑀅𑀢𑁆𑀣𑀻𑀢𑀺 𑀦 𑀩𑁆𑀬𑀸𑀧𑀻𑀢𑀺 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂 𑀢𑀲𑁆𑀲𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑀺𑀡𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑀸𑀥𑀺𑀯𑀺𑀚𑀫𑁆𑀪𑀦𑀪𑀽𑀢𑀸 𑀅𑀪𑀺𑀜𑁆𑀜𑀸 𑀲𑀫𑀸𑀥𑀺𑀲𑁆𑀲 𑀆𑀦𑀺𑀲𑀁𑀲𑀫𑀢𑁆𑀢𑀦𑁆𑀢𑀺 ‘‘𑀲𑀫𑀸𑀥𑀺𑀨𑀮𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀺𑀓𑀼𑀩𑁆𑀩𑀦𑀤𑀺𑀩𑁆𑀩𑀲𑀤𑁆𑀤𑀲𑀯𑀦𑀸𑀤𑀺𑀓𑀲𑁆𑀲 𑀬𑀤𑀺𑀘𑁆𑀙𑀺𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀸𑀤𑀦𑀫𑀢𑁆𑀢𑀁 𑀧𑀦 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀦 𑀓𑀸𑀮𑀦𑁆𑀢𑀭𑀨𑀮𑀸, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀺𑀬 𑀦𑀸𑀧𑀺 𑀯𑀺𑀧𑀸𑀓𑀨𑀮𑀸, 𑀅𑀣 𑀔𑁄 𑀬𑀣𑀸𑀯𑀼𑀢𑁆𑀢𑀆𑀦𑀺𑀲𑀁𑀲𑀨𑀮𑀸 𑀤𑀝𑁆𑀞𑀩𑁆𑀩𑀸.

𑀓𑁂𑀘𑀺 𑀧𑀦 ‘‘𑀲𑀫𑀸𑀦𑀪𑀽𑀫𑀺𑀓𑀢𑁄 𑀆𑀲𑁂𑀯𑀦𑀮𑀸𑀪𑁂𑀦 𑀩𑀮𑀯𑀦𑁆𑀢𑀸𑀦𑀺 𑀛𑀸𑀦𑀸𑀦𑀻𑀢𑀺 𑀢𑀸𑀦𑀺 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀪𑀸𑀯𑀢𑁄, 𑀅𑀪𑀺𑀜𑁆𑀜𑀸 𑀧𑀦 𑀲𑀢𑀺𑀧𑀺 𑀛𑀸𑀦𑀪𑀸𑀯𑁂 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀕𑀦𑁆𑀢𑀼𑀓𑀸𑀯𑀸𑀢𑀺 𑀤𑀼𑀩𑁆𑀩𑀮𑀸, 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀪𑀺𑀜𑁆𑀜𑀸𑀬𑀧𑀺 𑀯𑀲𑀻𑀪𑀸𑀯𑀲𑀩𑁆𑀪𑀸𑀯𑀢𑁄. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀧𑀸𑀤𑀓𑀚𑁆𑀛𑀸𑀦𑁂 𑀅𑀢𑁆𑀢𑀦𑀸 𑀲𑀫𑀸𑀦𑀲𑀪𑀸𑀯𑁂𑀳𑀺 𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑁂 𑀲𑀫𑁆𑀫𑀤𑁂𑀯 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑀢𑀸𑀤𑀺𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀲𑀸𑀢𑀺𑀲𑀬𑁂 𑀚𑀸𑀢𑁂 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀸𑀲𑀜𑁆𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀓𑁄 𑀏𑀯 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀲𑁄 𑀘 𑀬𑀣𑀸𑀯𑀼𑀢𑁆𑀢𑀕𑀼𑀡𑁂𑀦 𑀩𑀮𑀯𑀢𑀸 𑀧𑀸𑀤𑀓𑀚𑁆𑀛𑀸𑀦𑁂𑀦𑁂𑀯 𑀓𑀢𑁄𑀓𑀸𑀲𑁂𑀦 𑀲𑀺𑀚𑁆𑀛𑀢𑀻𑀢𑀺 𑀅𑀦𑁄𑀓𑀸𑀲𑀢𑀸𑀬 𑀅𑀪𑀺𑀜𑁆𑀜𑀸 𑀦 𑀯𑀺𑀧𑀸𑀓𑀁 𑀤𑁂𑀢𑀻’’𑀢𑀺. 𑀢𑀫𑁆𑀧𑀺 𑀅𑀓𑀸𑀭𑀡𑀁 𑀅𑀯𑀺𑀧𑀸𑀓𑀪𑀸𑀯𑀢𑁄 𑀢𑀸𑀲𑀁. 𑀲𑀢𑀺 𑀳𑀺 𑀯𑀺𑀧𑀸𑀓𑀤𑀸𑀬𑀺𑀪𑀸𑀯𑁂 𑀯𑀺𑀧𑀸𑀓𑀲𑁆𑀲 𑀅𑀦𑁄𑀓𑀸𑀲𑀘𑁄𑀤𑀦𑀸 𑀬𑀼𑀢𑁆𑀢𑀸, 𑀅𑀯𑀺𑀧𑀸𑀓𑀢𑀸 𑀘 𑀢𑀸𑀲𑀁 𑀯𑀼𑀢𑁆𑀢𑀦𑀬𑀸 𑀏𑀯.

𑀦 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀢𑁄 𑀦𑀺𑀩𑁆𑀩𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀯𑀺𑀧𑀸𑀓𑁂’’𑀢𑀺 𑀘 𑀯𑀘𑀦𑀁 𑀦 𑀯𑀺𑀧𑀸𑀓𑀸𑀭𑀳𑀢𑀸𑀫𑀢𑁆𑀢𑀯𑀸𑀘𑀓𑁄, 𑀅𑀣 𑀔𑁄 𑀯𑀺𑀧𑀸𑀓𑀲𑀩𑁆𑀪𑀸𑀯𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀦 𑀳𑀺 ‘𑀯𑀺𑀧𑀸𑀓𑁂’𑀢𑀺 𑀯𑀘𑀦𑀁 𑀯𑀺𑀧𑀸𑀓𑀥𑀫𑁆𑀫𑀯𑀘𑀦𑀁 𑀯𑀺𑀬 𑀯𑀺𑀧𑀸𑀓𑀸𑀭𑀳𑀢𑀁 𑀯𑀤𑀢𑀻’’𑀢𑀺. 𑀢𑀢𑁆𑀣 𑀬𑀁 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀬𑀲𑁆𑀫𑀸 𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑁂𑀯 𑀤𑁂𑀢𑀺, 𑀦 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀯𑀲𑁂𑀦 𑀯𑀺𑀪𑀗𑁆𑀕𑁂 𑀯𑀺𑀧𑀸𑀓𑁄 𑀉𑀤𑁆𑀥𑀝𑁄. 𑀉𑀪𑀬𑀯𑀺𑀧𑀸𑀓𑀤𑀸𑀬𑀺𑀓𑀸𑀬 𑀧𑀦 𑀘𑁂𑀢𑀦𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀯𑀼𑀘𑁆𑀘𑀢𑀻𑀢𑀺 𑀢𑀤𑀪𑀸𑀯𑀢𑁄 𑀧𑀝𑁆𑀞𑀸𑀦𑁂 𑀢𑀲𑁆𑀲𑀸 𑀲𑁄 𑀦 𑀯𑀼𑀢𑁆𑀢𑁄. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲) 𑀯𑀼𑀢𑁆𑀢𑀁, 𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀻’’𑀢𑀺 𑀇𑀤𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀢𑀸𑀪𑀸𑀯𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀳𑁂𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀯𑀺𑀭𑁄𑀥𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣𑀸𑀢𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀬 𑀯𑀺𑀧𑀸𑀓𑀤𑀸𑀦𑁂. 𑀅𑀫𑀢𑀕𑁆𑀕𑀧𑀣𑁂𑀢𑀺 𑀏𑀯𑀁𑀦𑀸𑀫𑀓𑁂 𑀧𑀓𑀭𑀡𑁂. ‘‘𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀅𑀓𑀼𑀲𑀮𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀼𑀣𑀼𑀚𑁆𑀚𑀦𑁂 𑀧𑀯𑀢𑁆𑀢𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀸𑀤𑀻𑀦𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀬𑀼𑀢𑁆𑀢𑀺𑀢𑁄 𑀘 𑀆𑀕𑀫𑀢𑁄 𑀘 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀓𑁂𑀲𑀜𑁆𑀘𑀻𑀢𑀺 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁. 𑀓𑁂𑀘𑀻𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄. 𑀓𑀤𑀸𑀘𑀻𑀢𑀺 𑀅𑀢𑀻𑀢𑀸𑀤𑀺𑀓𑁂 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂. 𑀘𑀢𑁆𑀢𑀢𑁆𑀢𑀸𑀢𑀺𑀆𑀤𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀓𑀢𑁆𑀯𑀸.

𑀇𑀢𑀭𑁂𑀲𑀦𑁆𑀢𑀺 𑀦𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀁. 𑀦 𑀘 𑀦 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀬𑀁 𑀉𑀤𑁆𑀥𑀘𑁆𑀘𑀕𑁆𑀕𑀳𑀡𑁂𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀕𑀳𑀺𑀢𑁄, 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀤𑁆𑀥𑀘𑁆𑀘𑀦𑁆𑀢𑀺 𑀏𑀯𑀫𑀢𑁆𑀣𑁂 𑀲𑀢𑀺. 𑀢𑀦𑁆𑀢𑀺 𑀤𑀺𑀝𑁆𑀞𑀺𑀁. ‘‘𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀦𑀸𑀕𑀢𑀸 𑀏𑀯 𑀧𑀳𑀸𑀢𑀩𑁆𑀩𑀸𑀢𑀺? 𑀦, 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀦𑀸𑀕𑀢𑀸 𑀦𑀸𑀫, 𑀧𑀳𑀸𑀢𑀩𑁆𑀩𑀸 𑀧𑀦 𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀢𑀺 𑀢𑁂𑀲𑀁 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀤𑀲𑁆𑀲𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀪𑀸𑀯𑀺𑀢𑀁 𑀤𑀲𑁆𑀲𑀦𑀫𑀕𑁆𑀕𑀁 𑀉𑀧𑀦𑀺𑀥𑀸𑀬. 𑀲𑀳𑀸𑀬𑀯𑀺𑀭𑀳𑀸𑀢𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀲𑀗𑁆𑀔𑀸𑀢𑀲𑀳𑀓𑀸𑀭𑀺𑀓𑀸𑀭𑀡𑀸𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀦 𑀚𑀦𑀬𑀦𑁆𑀢𑀻𑀢𑀺 𑀲𑀓𑀮𑀓𑀺𑀮𑁂𑀲𑀧𑀭𑀺𑀓𑁆𑀔𑀬𑁂 𑀯𑀺𑀬 𑀏𑀓𑀘𑁆𑀘𑀧𑀭𑀺𑀓𑁆𑀔𑀬𑁂𑀧𑀺 𑀢𑀦𑁆𑀦𑀺𑀫𑀺𑀢𑁆𑀢𑀁 𑀢𑀁 𑀏𑀓𑀘𑁆𑀘𑀁 𑀓𑀫𑁆𑀫𑀁 𑀦 𑀯𑀺𑀧𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀸𑀓𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀪𑁂𑀤𑀁 𑀤𑀼𑀯𑀺𑀥𑀫𑁆𑀧𑀺 𑀯𑀺𑀧𑀸𑀓𑀁 𑀲𑀦𑁆𑀥𑀸𑀬𑀸𑀳.

𑀅𑀓𑀼𑀲𑀮𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀸𑀦𑀁 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀅𑀓𑀼𑀲𑀮𑀸𑀦𑀁. 𑀅𑀧𑁆𑀧𑀳𑀸𑀢𑀩𑁆𑀩𑀸𑀦𑀦𑁆𑀢𑀺 𑀅𑀧𑁆𑀧𑀳𑀸𑀢𑀩𑁆𑀩𑀲𑀪𑀸𑀯𑀸𑀦𑀁 𑀓𑀼𑀲𑀮𑀸𑀤𑀻𑀦𑀁. 𑀅𑀧𑁆𑀧𑀳𑀸𑀢𑀩𑁆𑀩𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑀸 𑀲𑀸𑀯𑀚𑁆𑀚𑀢𑀸. ‘‘𑀏𑀯𑀫𑁆𑀧𑀻’’𑀢𑀺𑀆𑀤𑀺 𑀤𑁄𑀲𑀦𑁆𑀢𑀭𑀤𑀲𑁆𑀲𑀦𑀁. 𑀢𑁂𑀦 𑀬𑀤𑀺𑀧𑀺 𑀢𑁂𑀲𑀁 𑀅𑀓𑀼𑀲𑀮𑀸𑀦𑀁 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀢𑀢𑀺𑀬𑀧𑀤𑀲𑀗𑁆𑀕𑀳𑁄 𑀦 𑀲𑀺𑀬𑀸, 𑀦𑀯𑀢𑁆𑀢𑀩𑁆𑀩𑀢𑀸 𑀧𑀦 𑀆𑀧𑀚𑁆𑀚𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀥𑀫𑁆𑀫𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀲𑁆𑀲 𑀢𑀺𑀓𑀤𑀼𑀓𑁂𑀲𑀼 𑀦𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀦𑀸𑀧𑀚𑁆𑀚𑀢𑀻’’𑀢𑀺. 𑀇𑀤𑀸𑀦𑀺 𑀢𑀁 𑀦𑀯𑀢𑁆𑀢𑀩𑁆𑀩𑀢𑀸𑀦𑀸𑀧𑀚𑁆𑀚𑀦𑀁 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀢𑁄, 𑀦𑀺𑀤𑀲𑁆𑀲𑀦𑀢𑁄 𑀘 𑀯𑀺𑀪𑀸𑀯𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀢𑀺𑀓𑁂. 𑀦𑀺𑀬𑁄𑀕𑀢𑁄𑀢𑀺 𑀦𑀺𑀬𑀫𑀢𑁄 𑀏𑀓𑀦𑁆𑀢𑀢𑁄. 𑀢𑁂𑀲𑀦𑁆𑀢𑀺 𑀧𑀤𑀢𑁆𑀢𑀬𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀦𑀁. 𑀬𑀣𑀸𑀯𑀼𑀢𑁆𑀢𑀧𑀤𑁂𑀲𑀼 𑀯𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀞𑀫𑀸𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀬𑀣𑀸 𑀪𑀺𑀦𑁆𑀤𑀺𑀢𑀩𑁆𑀩𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀇𑀢𑀭𑁂 𑀘 𑀬𑀣𑀸𑀭𑀳𑀁 𑀭𑀸𑀲𑀺𑀢𑁆𑀢𑀬𑀯𑀲𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀪𑀚𑀸𑀧𑀺𑀢𑀸 𑀢𑀁𑀢𑀁𑀓𑁄𑀝𑁆𑀞𑀸𑀲𑀢𑁄 𑀓𑀢𑀸, 𑀏𑀯𑀁. 𑀢𑀢𑁆𑀣𑀸𑀧𑀻𑀢𑀺 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑁂𑀧𑀺. 𑀪𑀚𑀸𑀧𑁂𑀢𑀩𑁆𑀩𑁂𑀢𑀺 𑀦𑀯𑀢𑁆𑀢𑀩𑁆𑀩𑀪𑀸𑀯𑀁 𑀪𑀚𑀸𑀧𑁂𑀢𑀩𑁆𑀩𑁂. 𑀢𑀤𑀪𑀸𑀯𑀸𑀢𑀺 𑀢𑀲𑁆𑀲 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑀲𑁆𑀲 𑀅𑀪𑀸𑀯𑀸. 𑀢𑀣𑀸𑀢𑀺 𑀦𑀯𑀢𑁆𑀢𑀩𑁆𑀩𑀪𑀸𑀯𑁂𑀦.

𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀅𑀢𑀻𑀢𑀸, 𑀇𑀥 𑀬𑀣𑀸𑀯𑀼𑀢𑁆𑀢𑀅𑀓𑀼𑀲𑀮𑀸 𑀦 𑀯𑀼𑀢𑁆𑀢𑀸, 𑀅𑀧𑁂𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦𑀸𑀭𑀳𑀺𑀢𑀸𑀧𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺𑀤𑁄𑀲𑀁 𑀧𑀭𑀺𑀳𑀭𑀦𑁆𑀢𑁄 𑀢𑀲𑁆𑀲 𑀉𑀤𑀸𑀳𑀭𑀡𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸 𑀬𑀣𑀸 𑀲𑀧𑁆𑀧𑀝𑀺𑀖𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀁𑀲𑀪𑀸𑀯𑁄 𑀘𑁂𑀢𑁆𑀣 𑀲𑀸𑀯𑀚𑁆𑀚𑀢𑀸𑀯𑀺𑀲𑀺𑀝𑁆𑀞𑁄 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀪𑀸𑀯𑀸𑀪𑀸𑀯𑁄. ‘‘𑀏𑀯𑀜𑁆𑀘 𑀲𑀢𑀻’’𑀢𑀺𑀆𑀤𑀺𑀦𑀸 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁, 𑀢𑀢𑁆𑀣 𑀧𑀼𑀭𑀺𑀫𑀸𑀦𑀁 𑀅𑀫𑀼𑀔𑁆𑀬𑀲𑀪𑀸𑀯𑀢𑁆𑀢𑀸, 𑀧𑀘𑁆𑀙𑀺𑀫𑀸𑀦𑀁 𑀅𑀯𑀺𑀧𑀸𑀓𑀢𑁆𑀢𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺, 𑀏𑀯𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀦𑀁 𑀯𑀲𑁂𑀦 𑀢𑁂𑀲𑀁 𑀧𑀘𑁆𑀘𑀬𑀮𑀸𑀪𑁄𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘…𑀧𑁂… 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀬𑁂 𑀳𑀺…𑀧𑁂… 𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀢𑀢𑁆𑀣 𑀦 𑀢𑁂 𑀤𑀲𑁆𑀲𑀦𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀸 𑀓𑀺𑀮𑁂𑀲𑀸, 𑀢𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀓𑁆𑀔𑀺𑀓𑀸 𑀏𑀯𑀸𑀢𑀺 𑀢𑁂𑀲𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑁄 𑀏𑀯 𑀦𑀢𑁆𑀣𑀺, 𑀓𑀣𑀁 𑀢𑁂𑀲𑀁 𑀯𑀲𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁂 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀦 𑀢𑁂 𑀧𑀭𑀫𑀢𑁆𑀣𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀬𑁂 𑀧𑀦 𑀢𑁂 𑀲𑁂𑀓𑁆𑀔𑀲𑀦𑁆𑀢𑀸𑀦𑁂, 𑀦 𑀢𑁂𑀲𑀁 𑀧𑀘𑁆𑀘𑀬𑀪𑀽𑀢𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀸 𑀓𑀺𑀮𑁂𑀲𑀸 𑀤𑀲𑁆𑀲𑀦𑀧𑀓𑁆𑀔𑀺𑀓𑀸, 𑀢𑀧𑁆𑀧𑀘𑁆𑀘𑀬𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀺𑀬𑀸𑀢𑀺 𑀓𑀣𑀁 𑀢𑀲𑁆𑀲 𑀏𑀓𑀦𑁆𑀢𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀭𑀸𑀕𑀯𑀻𑀢𑀭𑀸𑀕𑀲𑀦𑁆𑀢𑀸𑀦𑁂𑀲𑀼 𑀲𑀳𑀸𑀬𑀯𑁂𑀓𑀮𑁆𑀮𑁂𑀦 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀲𑀦𑁆𑀢𑀸𑀦𑁂𑀲𑀼 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑀸 𑀲𑀺𑀤𑁆𑀥𑀸, 𑀢𑀲𑁆𑀫𑀸. 𑀢𑀲𑁆𑀲𑀸𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲. 𑀢𑀸𑀤𑀺𑀲𑀲𑁆𑀲𑁂𑀯𑀸𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀪𑀸𑀯𑁂𑀦 𑀏𑀓𑀲𑀪𑀸𑀯𑀲𑁆𑀲.

𑀏𑀢𑁆𑀣 𑀘 𑀬𑀁 ‘‘𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺 𑀉𑀤𑁆𑀥𑀘𑁆𑀘𑀲𑀳𑀕𑀢’’𑀦𑁆𑀢𑀺𑀆𑀤𑀺 𑀅𑀫𑀢𑀕𑁆𑀕𑀧𑀣𑁂 𑀯𑀼𑀢𑁆𑀢𑀁, 𑀢𑀁 𑀅𑀓𑀸𑀭𑀡𑀁, 𑀓𑀲𑁆𑀫𑀸? 𑀢𑀲𑁆𑀲 𑀏𑀓𑀦𑁆𑀢𑁂𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀬𑀣𑀸𑀳 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁫𑁮𑁩). 𑀬𑀤𑀺 𑀳𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀫𑁆𑀧𑀺 𑀅𑀪𑀯𑀺𑀲𑁆𑀲, 𑀬𑀣𑀸 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 ‘‘𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀢𑁄 𑀤𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 𑀧𑀼𑀦 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀦𑀺𑀬𑁄𑀕𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄 ‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄’𑀢𑀺𑀧𑀺 ‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄’𑀢𑀺𑀧𑀻’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀣𑀸 𑀯𑀼𑀢𑁆𑀢𑀁. 𑀬𑀸 𑀘 𑀢𑀫𑀢𑁆𑀣𑀁 𑀧𑀝𑀺𑀧𑀸𑀤𑁂𑀦𑁆𑀢𑁂𑀦 ‘‘𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀸𑀧𑀺 𑀅𑀬𑀼𑀢𑁆𑀢𑀺. 𑀓𑀲𑁆𑀫𑀸? 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀁 𑀭𑀸𑀕𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑀲𑁆𑀲𑁂𑀯 𑀇𑀘𑁆𑀙𑀺𑀢𑀢𑁆𑀢𑀸.

𑀬𑀜𑁆𑀘 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀦𑀼𑀤𑁆𑀥𑀭𑀡𑀁 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀓𑀸𑀭𑀡𑀁 𑀅𑀜𑁆𑀜𑀣𑀸𑀧𑀺 𑀲𑀸𑀯𑀲𑁂𑀲𑀧𑀸𑀞𑀤𑀲𑁆𑀲𑀦𑀢𑁄. 𑀢𑀣𑀸 𑀳𑀺 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀦𑀸𑀕𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁨) 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀦 𑀓𑀢𑀁.

𑀲𑀳𑀸𑀬𑀪𑀸𑀯𑁄 𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀦𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀧𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀓𑀺𑀁 𑀅𑀯𑀺𑀚𑁆𑀚𑀸𑀤𑀺 𑀯𑀺𑀬 𑀤𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀯𑀺𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀧𑀸𑀤𑀦𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀲𑀳𑀓𑀸𑀭𑀺𑀓𑀸𑀭𑀡𑀁 𑀳𑁄𑀦𑁆𑀢𑀺, 𑀉𑀤𑀸𑀳𑀼 𑀓𑀺𑀮𑁂𑀲𑁄 𑀯𑀺𑀬 𑀓𑀫𑁆𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑁂 𑀲𑀢𑀻𑀢𑀺, 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀧𑀼𑀭𑀺𑀫𑀦𑀬𑁄, 𑀲𑁄𑀢𑀸𑀧𑀦𑁆𑀦𑀸𑀤𑀺𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀓𑀺𑀭𑀺𑀬𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀲𑀳𑀸𑀬𑀯𑁂𑀓𑀮𑁆𑀮𑁂𑀦 𑀅𑀯𑀺𑀧𑀸𑀓𑀲𑀪𑀸𑀯𑀢𑀸𑀬 𑀆𑀧𑀸𑀤𑀺𑀢𑀢𑁆𑀢𑀸 𑀔𑀻𑀡𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀸𑀦𑁂 𑀲𑀦𑁆𑀢𑀸𑀦𑁂 𑀤𑀸𑀦𑀸𑀤𑀺 𑀯𑀺𑀬. 𑀅𑀣 𑀤𑀼𑀢𑀺𑀬𑁄, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀪𑀺𑀫𑀢𑀲𑁆𑀲𑀸𑀧𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀦𑁆𑀥𑀺𑀤𑀸𑀦𑁂 𑀲𑀢𑀺 𑀅𑀧𑀸𑀬𑀕𑀫𑀦𑀻𑀬𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀯𑀺𑀭𑀼𑀚𑁆𑀛𑀦𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀢𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂𑀢𑀺 𑀲𑀫𑁆𑀧𑀼𑀡𑁆𑀡𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂. 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀯𑀺𑀓𑀮𑀨𑀮𑀼𑀧𑁆𑀧𑀸𑀤𑀦𑀸𑀥𑀺𑀓𑀸𑀭𑁂 𑀢𑀤𑀪𑀸𑀯𑀢𑁄 𑀬𑀤𑀺𑀧𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸, 𑀅𑀯𑀺𑀚𑁆𑀚𑀸𑀬 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀕𑀳𑁂𑀢𑀩𑁆𑀩𑀸𑀢𑀺 𑀇𑀫𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄. 𑀲𑀩𑁆𑀩𑀸𑀧𑀻𑀢𑀺 𑀯𑀻𑀲𑀢𑀺𑀧𑀺. 𑀢𑁂𑀦𑀸𑀳 ‘‘𑀏𑀓𑀯𑀻𑀲𑀢𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀅𑀕𑁆𑀕𑀳𑀡𑀁, 𑀢𑀁 𑀓𑀸𑀭𑀡𑀁. 𑀇𑀢𑀭𑀸𑀯𑀘𑀦𑀲𑁆𑀲𑀸𑀧𑀻𑀢𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀯𑀘𑀦𑀲𑁆𑀲𑀸𑀧𑀺. 𑀓𑀺𑀁 𑀧𑀦 𑀢𑀁? 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑁄 𑀏𑀯. 𑀪𑁂𑀤𑀸𑀪𑀸𑀯𑀸𑀢𑀺 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀯𑀲𑁂𑀦 𑀯𑀺𑀪𑀸𑀕𑀸𑀪𑀸𑀯𑀢𑁄. 𑀲𑀁𑀬𑁄𑀕𑁄𑀢𑀺 𑀢𑀺𑀓𑀦𑁆𑀢𑀭𑀧𑀤𑀯𑀲𑁂𑀦 𑀲𑀁𑀬𑁄𑀚𑀦𑀁, 𑀢𑀣𑀸 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄.

𑀲𑀼𑀔𑀲𑀜𑁆𑀜𑀸𑀬 𑀕𑀳𑀡𑀁 𑀅𑀲𑁆𑀲𑀸𑀤𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀲𑀼𑀔𑀲𑀜𑁆𑀜𑀸𑀬…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. ‘‘𑀲𑀼𑀔𑀲𑀜𑁆𑀜𑀸𑀬𑀸’’𑀢𑀺 𑀘 𑀇𑀤𑀁 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀯𑀺𑀧𑀮𑁆𑀮𑀸𑀲𑁄 𑀳𑀺 𑀤𑀼𑀓𑁆𑀔𑁂 𑀲𑀼𑀔𑀲𑀜𑁆𑀜𑀸. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀸𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁 𑀯𑀺𑀧𑀮𑁆𑀮𑀸𑀲𑀲𑁆𑀲𑀸𑀤𑀦𑀸𑀦𑀁 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼𑀪𑀸𑀯𑀤𑀲𑁆𑀲𑀦𑀢𑁄. ‘‘𑀭𑀣𑁄 𑀲𑁂𑀢𑀧𑀭𑀺𑀓𑁆𑀔𑀸𑀭𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀧𑀭𑀺𑀯𑀸𑀭𑀢𑁆𑀣𑁄𑀧𑀺 𑀧𑀭𑀺𑀓𑁆𑀔𑀸𑀭𑀲𑀤𑁆𑀤𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀬 𑀧𑀭𑀺𑀯𑀸𑀭𑁂’’𑀢𑀺. 𑀢𑀡𑁆𑀳𑀸𑀧𑀭𑀺𑀯𑀸𑀭𑁂𑀢𑀺 𑀘 𑀢𑀡𑁆𑀳𑀸𑀬 𑀓𑀺𑀘𑁆𑀘𑀲𑀸𑀥𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀲𑀳𑀓𑀸𑀭𑀺𑀓𑀸𑀭𑀡𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀸𑀭𑀝𑁆𑀞𑁄 𑀲𑀗𑁆𑀔𑀸𑀭𑀝𑁆𑀞𑁄 𑀯𑀺𑀬 𑀪𑀽𑀲𑀦𑀝𑁆𑀞𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀔𑀢𑁂 𑀅𑀮𑀗𑁆𑀓𑀢𑁂’’𑀢𑀺 𑀆𑀳. 𑀧𑀭𑀺𑀓𑁆𑀔𑀭𑁄𑀢𑀺 𑀬𑀣𑀸 𑀨𑀮𑀤𑀸𑀦𑀲𑀫𑀢𑁆𑀣𑀸 𑀳𑁄𑀦𑁆𑀢𑀺, 𑀢𑀣𑀸 𑀲𑀗𑁆𑀔𑀭𑁄𑀢𑀺. 𑀅𑀫𑀭𑀡𑀢𑁆𑀣𑀸𑀢𑀺 𑀅𑀫𑀢𑀢𑁆𑀣𑀸, 𑀦𑀺𑀩𑁆𑀩𑀸𑀦𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀢𑀺 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀸𑀤𑀺𑀤𑀼𑀓𑁆𑀓𑀭𑀘𑀭𑀺𑀬𑀸. 𑀤𑁂𑀯𑀪𑀸𑀯𑀸𑀬 𑀢𑀧𑁄 𑀤𑁂𑀯𑀪𑀸𑀯𑀢𑁆𑀣𑀁 𑀢𑀧𑁄. 𑀫𑀸𑀭𑁂𑀢𑀻𑀢𑀺 𑀫𑀭𑁄 𑀳𑁂𑀢𑀼𑀅𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸. 𑀅𑀫𑀗𑁆𑀕𑀮𑀫𑁆𑀧𑀺 𑀫𑀗𑁆𑀕𑀮𑀧𑀭𑀺𑀬𑀸𑀬𑁂𑀦 𑀯𑁄𑀳𑀭𑀦𑁆𑀢𑀺 𑀫𑀗𑁆𑀕𑀮𑀺𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀲𑀤𑁆𑀤𑁄 𑀯𑀺𑀬𑀸’’𑀢𑀺 𑀬𑀣𑀸 ‘‘𑀅𑀲𑀺𑀯𑁂 𑀲𑀺𑀯𑀸’’𑀢𑀺.

𑀧𑀧𑀸𑀢𑀁 𑀧𑀢𑀦𑀤𑀼𑀓𑁆𑀔𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀸𑀢𑀺𑀆𑀤𑀺𑀧𑀧𑀸𑀢𑀤𑀼𑀓𑁆𑀔’’𑀦𑁆𑀢𑀺. 𑀇𑀦𑁆𑀤𑀤𑀼𑀤𑁆𑀤𑀩𑁆𑀭𑀳𑁆𑀫𑀓𑀽𑀝𑀲𑀜𑁆𑀜𑀺𑀢𑀧𑀩𑁆𑀩𑀢𑀲𑀺𑀔𑀭𑀧𑁆𑀧𑀧𑀸𑀢𑁄 𑀫𑀭𑀼𑀧𑀧𑀸𑀢𑁄. 𑀢𑀁 𑀧𑀼𑀜𑁆𑀜𑀨𑀮𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀏𑀢𑀲𑁆𑀲𑀸𑀢𑀺 𑀢𑀤𑀢𑁆𑀣𑁄.

𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀺𑀬𑀸. 𑀅𑀲𑀯𑀲𑁄 𑀅𑀲𑁂𑀭𑀺𑀯𑀺𑀳𑀸𑀭𑀻. 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀧𑀡𑁆𑀟𑀺𑀢𑁂𑀳𑀺 𑀚𑀺𑀕𑀼𑀘𑁆𑀙𑀦𑀻𑀬𑀁. 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑁂𑀦, 𑀓𑀝𑀼𑀓𑀯𑀺𑀧𑀸𑀓𑀢𑀸𑀬 𑀘 𑀤𑀼𑀓𑁆𑀔𑀁. 𑀆𑀭𑀪𑀢𑀺 𑀓𑀭𑁄𑀢𑀺. 𑀲𑀪𑀬𑀲𑁆𑀲𑀸𑀧𑀺 𑀧𑀺𑀲𑀸𑀘𑀦𑀕𑀭𑀲𑁆𑀲 𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀺𑀬𑀸 𑀲𑀼𑀔𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀪𑀺𑀦𑁆𑀦𑀚𑀸𑀢𑀺𑀬𑁂𑀦 𑀅𑀯𑁄𑀫𑀺𑀲𑁆𑀲𑀢𑀸 𑀦𑀺𑀭𑀦𑁆𑀢𑀭𑀢𑀸. 𑀚𑀭𑀸𑀬 𑀫𑀭𑀡𑁂𑀦 𑀘 𑀅𑀜𑁆𑀜𑀣𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑁄.

‘‘𑀦 𑀢𑀸𑀯𑀸𑀳𑀁 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀢𑁄 ‘‘𑀢𑀸𑀢 𑀏𑀳𑀺, 𑀢𑀸𑀯 𑀇𑀤𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺𑀆𑀤𑀻𑀲𑀼 𑀬𑀤𑀺𑀧𑀺 𑀧𑀭𑀺𑀫𑀸𑀡𑀦𑀺𑀬𑀫𑀦𑀓𑀫𑀧𑀤𑀧𑀽𑀭𑀡𑀫𑀢𑁆𑀢𑀸𑀤𑀻𑀲𑀼𑀧𑀺 𑀢𑀸𑀯-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀇𑀥 𑀧𑀦 𑀯𑀓𑁆𑀔𑀫𑀸𑀦𑀢𑁆𑀢𑀸𑀧𑁂𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀢𑀸𑀯𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀭𑀸𑀧𑁂𑀓𑁆𑀔𑁄 𑀦𑀺𑀧𑀸𑀢𑁄’’𑀢𑀺. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦…𑀧𑁂… 𑀤𑀲𑁆𑀲𑁂𑀢𑀻𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀺𑀭𑀼𑀚𑁆𑀛𑀦𑀫𑀸𑀳.

𑀭𑀸𑀕𑀸𑀤𑀺𑀅𑀲𑁆𑀲𑀸𑀤𑀦𑀓𑀸𑀮𑁂𑀲𑀽𑀢𑀺 𑀭𑀸𑀕𑀸𑀤𑀻𑀦𑀁 𑀅𑀲𑁆𑀲𑀸𑀤𑀦𑀓𑀸𑀮𑁂𑀲𑀼. ‘‘𑀭𑀸𑀕𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀬𑀸’’𑀢𑀺 𑀏𑀢𑁆𑀣 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀢𑀸𑀯 𑀅𑀯𑀺𑀚𑁆𑀚𑀸𑀬 𑀬𑁄𑀚𑀦𑀸 𑀳𑁄𑀢𑀼 𑀭𑀸𑀕𑀲𑁆𑀲 𑀅𑀲𑁆𑀲𑀸𑀤𑀦𑀪𑀸𑀯𑀢𑁄, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀢𑀤𑀯𑀺𑀧𑁆𑀧𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀻…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲. 𑀅𑀯𑀺𑀚𑁆𑀚𑀸𑀭𑀫𑁆𑀫𑀡𑀸𑀤𑀺𑀢𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀆𑀭𑀫𑁆𑀫𑀡𑀸𑀤𑀺𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁂, 𑀅𑀦𑀦𑁆𑀢𑀭𑀸𑀤𑀺𑀓𑁂 𑀘 𑀧𑀘𑁆𑀘𑀬𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀯𑀺𑀚𑁆𑀚𑀸𑀭𑀫𑁆𑀫𑀡𑀲𑁆𑀲𑀸𑀢𑀺 𑀦 𑀅𑀯𑀺𑀚𑁆𑀚𑀸𑀭𑀫𑁆𑀫𑀡𑀲𑁆𑀲 𑀅𑀯𑀺𑀚𑁆𑀚𑀁 𑀅𑀦𑀸𑀭𑀩𑁆𑀪 𑀧𑀯𑀢𑁆𑀢𑀲𑁆𑀲. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀘𑀦𑁂𑀲𑀽𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀘𑀦𑁂𑀲𑀼 𑀅𑀯𑀼𑀢𑁆𑀢𑀲𑁆𑀲 𑀅𑀦𑀯𑀺𑀚𑁆𑀚𑀸𑀭𑀫𑁆𑀫𑀡𑀲𑁆𑀲, 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀘𑀦𑁂𑀲𑀼 𑀅𑀯𑀼𑀢𑁆𑀢𑀲𑁆𑀲 𑀧𑀞𑀫𑀚𑀯𑀦𑀲𑁆𑀲, 𑀤𑁆𑀯𑀻𑀲𑀼𑀧𑀺 𑀯𑀼𑀢𑁆𑀢𑀲𑁆𑀲 𑀅𑀯𑀺𑀚𑁆𑀚𑀸𑀭𑀫𑁆𑀫𑀡𑀲𑁆𑀲 𑀤𑀼𑀢𑀺𑀬𑀸𑀤𑀺𑀚𑀯𑀦𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀦𑁆𑀢𑀭𑀧𑀘𑁆𑀘𑀬𑀮𑀸𑀪𑀺𑀦𑁄 𑀅𑀦𑀦𑁆𑀢𑀭𑀸𑀤𑀺𑀦𑀸, 𑀲𑀳𑀚𑀸𑀢𑀲𑁆𑀲 𑀳𑁂𑀢𑀼𑀆𑀤𑀺𑀦𑀸, 𑀅𑀲𑀳𑀚𑀸𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀸𑀤𑀺𑀦𑀸 𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 ‘‘𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀢𑀺𑀓𑁆𑀓𑀫𑀪𑀯𑀧𑀢𑁆𑀣𑀦𑀸𑀯𑀲𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲, 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑁆𑀢𑀸 𑀅𑀭𑀽𑀧𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑁂𑀢𑁆𑀯𑀸 𑀢𑀸𑀦𑁂𑀯 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑁂𑀦 𑀦𑀬𑁂𑀦, 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀺 𑀬𑀣𑀸 𑀧𑀓𑀢𑀺𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀸𑀤𑀺𑀯𑀸𑀤𑀸. 𑀏𑀓𑀲𑁆𑀫𑀺𑀁𑀬𑁂𑀯 𑀮𑁄𑀓𑀲𑁆𑀲 𑀓𑀸𑀭𑀡𑀪𑀽𑀢𑁂 𑀲𑀢𑀺 𑀢𑀢𑁄 𑀲𑀓𑀮𑀸𑀬 𑀧𑀯𑀢𑁆𑀢𑀺𑀬𑀸 𑀅𑀦𑀯𑀲𑁂𑀲𑀢𑁄, 𑀲𑀩𑁆𑀩𑀤𑀸 𑀘 𑀧𑀯𑀢𑁆𑀢𑀺𑀢𑀩𑁆𑀩𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀲𑁆𑀲 𑀓𑀸𑀭𑀡𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀦 𑀘𑁂𑀢𑀁 𑀅𑀢𑁆𑀣𑀺 𑀓𑀫𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀤𑀲𑁆𑀲𑀦𑀢𑁄. 𑀓𑀸𑀭𑀡𑀦𑁆𑀢𑀭𑀸𑀧𑁂𑀓𑁆𑀔𑀢𑀸𑀬 𑀧𑀦 𑀏𑀓𑀓𑀸𑀭𑀡𑀯𑀸𑀤𑁄 𑀅𑀧𑀳𑀢𑁄 𑀲𑀺𑀬𑀸 𑀏𑀓𑀲𑁆𑀲 𑀘 𑀅𑀦𑁂𑀓𑀲𑀪𑀸𑀯𑀢𑀸𑀪𑀸𑀯𑀸. 𑀬𑀢𑁆𑀢𑀓𑀸 𑀢𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀲𑀫𑀸𑀦𑀲𑀪𑀸𑀯𑁂𑀳𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀯𑀺𑀲𑀤𑀺𑀲𑁂𑀳𑀺, 𑀇𑀢𑀭𑀣𑀸 𑀢𑀲𑁆𑀲 𑀏𑀓𑀪𑀸𑀯𑁄 𑀏𑀯 𑀦 𑀲𑀺𑀬𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀲𑀩𑁆𑀩𑀲𑁆𑀲…𑀧𑁂… 𑀧𑀢𑁆𑀢𑀺𑀢𑁄 𑀘𑀸’’𑀢𑀺. 𑀧𑀸𑀭𑀺𑀲𑁂𑀲𑁂𑀦𑀸𑀢𑀺 𑀏𑀓𑀢𑁄 𑀏𑀓𑀁, 𑀏𑀓𑀢𑁄 𑀅𑀦𑁂𑀓𑀁, 𑀅𑀦𑁂𑀓𑀢𑁄 𑀏𑀓𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀦𑀼𑀧𑀮𑀩𑁆𑀪𑀫𑀸𑀦𑁂𑀲𑀼 𑀧𑀸𑀭𑀺𑀲𑁂𑀲𑀜𑀸𑀬𑁂𑀦. 𑀅𑀦𑁂𑀓𑀢𑁄 𑀅𑀦𑁂𑀓𑀦𑁆𑀢𑀺 𑀏𑀓𑀲𑁆𑀫𑀺𑀁 𑀘𑀢𑀼𑀢𑁆𑀣𑁂 𑀏𑀯 𑀘 𑀧𑀓𑀸𑀭𑁂 𑀯𑀺𑀚𑁆𑀚𑀫𑀸𑀦𑁂. 𑀬𑀤𑀺𑀤𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀏𑀓𑀳𑁂𑀢𑀼𑀨𑀮𑀤𑀻𑀧𑀦𑀁, 𑀢𑀁 𑀏𑀢𑁆𑀣 𑀤𑁂𑀲𑀦𑀸𑀯𑀺𑀮𑀸𑀲𑁂𑀦, 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀥𑀫𑁆𑀫𑀸𑀦𑀁 𑀧𑀥𑀸𑀦𑀧𑀸𑀓𑀝𑀸𑀲𑀸𑀥𑀸𑀭𑀡𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀦𑁆𑀢𑀺 𑀏𑀓𑀳𑁂𑀢𑀼𑀨𑀮𑀤𑀻𑀧𑀦𑀁 𑀦 𑀦𑀼𑀧𑀧𑀚𑁆𑀚𑀢𑀺 𑀉𑀧𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸.

𑀬𑀣𑀸𑀨𑀲𑁆𑀲𑀦𑁆𑀢𑀺 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀢𑀁𑀢𑀁𑀨𑀲𑁆𑀲𑀸𑀦𑀼𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀯𑁂𑀤𑀦𑀻𑀬’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀯𑁂𑀤𑀦𑀸𑀯𑀯𑀢𑁆𑀣𑀸𑀦𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀸𑀦𑁂𑀲𑀽𑀢𑀺 𑀅𑀯𑀺𑀲𑀺𑀝𑁆𑀞𑁂𑀲𑀼. 𑀨𑀲𑁆𑀲𑀯𑀲𑁂𑀦𑀸𑀢𑀺 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀨𑀲𑁆𑀲𑀯𑀲𑁂𑀦. 𑀯𑀺𑀧𑀭𑀺𑀬𑀸𑀬𑀸𑀪𑀸𑀯𑀢𑁄𑀢𑀺 𑀩𑁆𑀬𑀢𑁆𑀢𑀬𑀸𑀪𑀸𑀯𑀢𑁄. 𑀦 𑀳𑀺 𑀓𑀤𑀸𑀘𑀺 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀤𑀼𑀓𑁆𑀔𑀯𑁂𑀤𑀦𑀸, 𑀤𑀼𑀓𑁆𑀔𑀸𑀤𑀺𑀯𑁂𑀤𑀦𑀻𑀬𑀁 𑀯𑀸 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀲𑀼𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀻𑀦𑀦𑁆𑀢𑀺 𑀲𑀼𑀔𑀸𑀤𑀻𑀦𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀻𑀦𑀜𑁆𑀘 𑀯𑁂𑀤𑀦𑀸𑀦𑀁. 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀳𑀻𑀦𑀧𑀡𑀻𑀢𑀸𑀤𑀺𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀬𑀁 𑀉𑀧𑀸𑀤𑀸𑀬 𑀬𑀸 𑀯𑁂𑀤𑀦𑀸 ‘‘𑀑𑀴𑀸𑀭𑀺𑀓𑀸, 𑀳𑀻𑀦𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀦 𑀢𑀁𑀬𑁂𑀯 𑀉𑀧𑀸𑀤𑀸𑀬 𑀢𑀲𑁆𑀲𑀸 𑀓𑀤𑀸𑀘𑀺𑀧𑀺 𑀲𑀼𑀔𑀼𑀫𑀢𑀸 𑀧𑀡𑀻𑀢𑀢𑀸 𑀯𑀸 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀺𑀲𑀗𑁆𑀓𑀭𑀸𑀪𑀸𑀯𑀢𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀲𑀫𑁆𑀨𑀲𑁆𑀲𑀲𑁆𑀲𑀸𑀢𑀺 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀨𑀲𑁆𑀲𑀲𑁆𑀲. 𑀲𑀼𑀔𑀯𑁂𑀤𑀦𑀻𑀬𑀨𑀲𑁆𑀲𑀢𑁄𑀬𑁂𑀯 𑀲𑀼𑀔𑀯𑁂𑀤𑀦𑀸, 𑀦 𑀇𑀢𑀭𑀨𑀲𑁆𑀲𑀢𑁄. 𑀲𑀼𑀔𑀯𑁂𑀤𑀦𑀻𑀬𑀨𑀲𑁆𑀲𑀢𑁄 𑀲𑀼𑀔𑀯𑁂𑀤𑀦𑀸𑀯, 𑀦 𑀇𑀢𑀭𑀯𑁂𑀤𑀦𑀸. 𑀢𑀣𑀸 𑀲𑁂𑀲𑁂𑀲𑀼𑀧𑀻𑀢𑀺 𑀉𑀪𑀬𑀧𑀤𑀦𑀺𑀬𑀫𑀯𑀲𑁂𑀦 𑀬𑀣𑀸𑀨𑀲𑁆𑀲𑀁 𑀯𑁂𑀤𑀦𑀸𑀯𑀯𑀢𑁆𑀣𑀸𑀦𑀁, 𑀬𑀣𑀸𑀯𑁂𑀤𑀦𑀁 𑀨𑀲𑁆𑀲𑀯𑀯𑀢𑁆𑀣𑀸𑀦𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀓𑀸𑀭𑀡𑀦𑁆𑀢𑀭𑀸𑀲𑀫𑁆𑀫𑀺𑀲𑁆𑀲𑀢𑀸 𑀨𑀮𑀲𑁆𑀲, 𑀨𑀮𑀦𑁆𑀢𑀭𑀸𑀲𑀫𑁆𑀫𑀺𑀲𑁆𑀲𑀢𑀸 𑀘 𑀓𑀸𑀭𑀡𑀲𑁆𑀲 𑀤𑀲𑁆𑀲𑀺𑀢𑀸 𑀧𑀞𑀫𑀧𑀓𑁆𑀔𑁂 𑀅𑀲𑀁𑀓𑀺𑀡𑁆𑀡𑀢𑀸𑀯𑀯𑀢𑁆𑀣𑀸𑀦𑀦𑁆𑀢𑀺 𑀓𑀢𑁆𑀯𑀸. 𑀤𑀼𑀢𑀺𑀬𑀧𑀓𑁆𑀔𑁂 𑀧𑀦 𑀧𑀘𑁆𑀘𑀬𑀪𑁂𑀤𑀪𑀺𑀦𑁆𑀦𑁂𑀦 𑀓𑀸𑀭𑀡𑀯𑀺𑀲𑁂𑀲𑁂𑀦 𑀨𑀮𑀯𑀺𑀲𑁂𑀲𑁄, 𑀨𑀮𑀯𑀺𑀲𑁂𑀲𑁂𑀦 𑀘 𑀓𑀸𑀭𑀡𑀯𑀺𑀲𑁂𑀲𑁄 𑀦𑀺𑀘𑁆𑀙𑀻𑀬𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀓𑀢𑁆𑀯𑀸. 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀓𑁆𑀔𑁂 𑀥𑀫𑁆𑀫𑀸𑀦𑀁 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀦𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀲𑁆𑀫𑀺𑀜𑁆𑀘 𑀬𑀣𑀸𑀯𑀯𑀢𑁆𑀣𑀺𑀢𑀪𑀸𑀯𑀚𑀸𑀦𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀉𑀢𑀼𑀆𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀺𑀢𑁆𑀢𑀯𑀺𑀲𑀫𑀸𑀘𑀸𑀭𑀸 𑀧𑀺𑀢𑁆𑀢𑀯𑀸𑀢𑀸𑀤𑀬𑁄𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀤𑁄𑀲𑁂 𑀓𑀼𑀧𑀺𑀢𑁂 𑀇𑀢𑀭𑁂𑀧𑀺 𑀔𑁄𑀪𑀁 𑀕𑀘𑁆𑀙𑀦𑁆𑀢𑀺. 𑀲𑀦𑁆𑀢𑁂𑀲𑀼𑀧𑀺 𑀢𑁂𑀲𑀼 𑀲𑁂𑀫𑁆𑀳𑀧𑀝𑀺𑀓𑀸𑀭𑁂𑀦 𑀭𑁄𑀕𑀯𑀽𑀧𑀲𑀫𑀢𑁄 𑀲𑁂𑀫𑁆𑀳𑁄 𑀧𑀸𑀓𑀝𑁄𑀢𑀺 𑀅𑀢𑁆𑀣𑁄.

‘‘𑀪𑀯𑁄’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀲𑁆𑀲 𑀧𑀓𑀸𑀭𑀡𑀁, 𑀓𑀸𑀭𑀡𑀫𑁂𑀯 𑀯𑀸 𑀢𑀡𑁆𑀳𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑀲𑁆𑀲𑀸𑀧𑀻𑀢𑀺 𑀢𑀡𑁆𑀳𑀸𑀬𑀧𑀺. 𑀢𑀡𑁆𑀳𑀸 𑀳𑀺 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀘. 𑀓𑀸𑀫𑀸𑀲𑀯𑀪𑀯𑀸𑀲𑀯𑀸 𑀓𑀸𑀫𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀸𑀲𑀯𑁄 𑀇𑀢𑀭𑀼𑀧𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀭𑀼𑀧𑀸𑀤𑀸𑀦𑀪𑀽𑀢𑀸 𑀓𑀸𑀫𑀪𑀯𑀤𑀺𑀝𑁆𑀞𑀸𑀲𑀯𑀸’’𑀢𑀺. 𑀢𑁂 𑀘 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀯𑀘𑀦𑀢𑁄 𑀉𑀧𑀸𑀤𑀸𑀦𑀜𑁆𑀘, ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀘𑀦𑀢𑁄 𑀢𑀡𑁆𑀳𑀸 𑀘 𑀲𑀗𑁆𑀔𑀸𑀭𑀲𑁆𑀲 𑀓𑀸𑀭𑀡𑀦𑁆𑀢𑀺 𑀧𑀸𑀓𑀝𑀸. 𑀅𑀦𑀲𑁆𑀲𑀸𑀤𑀦𑀻𑀬𑁂𑀲𑀼 𑀅𑀦𑁂𑀓𑀸𑀤𑀻𑀦𑀯𑀯𑁄𑀓𑀺𑀡𑁆𑀡𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄…𑀧𑁂… 𑀤𑀲𑁆𑀲𑀺𑀢𑀸 𑀳𑁄𑀢𑀻’’𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀲𑀗𑁆𑀔𑀸𑀭𑀸𑀪𑀸𑀯𑀢𑁄𑀢𑀺 𑀩𑁆𑀬𑀢𑀺𑀭𑁂𑀓𑁂𑀦𑀧𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀏𑀓𑀦𑁆𑀢𑁂𑀦 𑀳𑀺 𑀔𑀻𑀡𑀸𑀲𑀯𑁄𑀯 𑀯𑀺𑀤𑁆𑀤𑀲𑀼. 𑀏𑀢𑁂𑀦 𑀩𑀸𑀮𑀸𑀦𑀁 𑀏𑀯 𑀲𑀫𑁆𑀪𑀯𑀢𑁄 𑀅𑀯𑀺𑀚𑁆𑀚𑀸𑀬 𑀅𑀲𑀸𑀥𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀺 𑀳𑀺 𑀇𑀢𑀭𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀸𑀦𑀺. 𑀯𑀢𑁆𑀣𑀸𑀭𑀫𑁆𑀫𑀡𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀻𑀦𑀺 𑀯𑀺𑀬 𑀅𑀯𑀺𑀚𑁆𑀚𑀸𑀧𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀓𑀸𑀭𑀡𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀼𑀜𑁆𑀜𑀪𑀯𑀸𑀤𑀻’’𑀢𑀺𑀆𑀤𑀺. 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀼𑀜𑁆𑀜𑀸𑀦𑁂𑀜𑁆𑀚𑀪𑀯𑀸 𑀕𑀳𑁂𑀢𑀩𑁆𑀩𑀸. 𑀧𑀼𑀜𑁆𑀜𑀪𑀯𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀳𑁂𑀢𑀼𑀓𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀏𑀢𑁆𑀣 𑀘 𑀓𑀺𑀘𑁆𑀘𑀓𑀭𑀡𑀝𑁆𑀞𑀸𑀦𑀪𑁂𑀤𑁂𑀦 𑀓𑀺𑀘𑁆𑀘𑀯𑀢𑀻 𑀅𑀯𑀺𑀚𑁆𑀚𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀦 𑀳𑀺 𑀬𑀤𑀯𑀢𑁆𑀣𑀸 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀉𑀧𑀦𑀺𑀲𑁆𑀲𑀬𑁄, 𑀢𑀤𑀯𑀢𑁆𑀣𑀸 𑀏𑀯 𑀇𑀢𑀭𑁂𑀲𑀁 𑀉𑀧𑀦𑀺𑀲𑁆𑀲𑀬𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀏𑀢𑁆𑀣 𑀘 𑀪𑀯𑀸𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀅𑀢𑁆𑀣𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀢𑀁𑀢𑀁𑀪𑀯𑀲𑀗𑁆𑀔𑀸𑀢𑀤𑀼𑀓𑁆𑀔𑀳𑁂𑀢𑀼𑀲𑀪𑀸𑀯𑀸𑀦𑀪𑀺𑀲𑀫𑀬𑀦𑀺𑀫𑀺𑀢𑁆𑀢𑀢𑀸.

𑀞𑀸𑀦𑀦𑁆𑀢𑀺 𑀥𑀭𑀫𑀸𑀦𑀢𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀞𑀸𑀦𑀯𑀺𑀭𑀼𑀤𑁆𑀥𑁄𑀢𑀺 𑀅𑀢𑁆𑀣𑀺𑀢𑀸𑀯𑀺𑀭𑀼𑀤𑁆𑀥𑁄’’𑀢𑀺. 𑀞𑀸𑀦𑀸𑀯𑀺𑀭𑀼𑀤𑁆𑀥𑀸 𑀘𑀓𑁆𑀔𑀼𑀭𑀽𑀧𑀸𑀤𑀬𑁄. ‘‘𑀧𑀼𑀭𑀺𑀫𑀘𑀺𑀢𑁆𑀢𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀞𑀸𑀦𑀯𑀺𑀭𑀼𑀤𑁆𑀥𑁄 𑀘 𑀉𑀤𑀸𑀳𑀝𑁄𑀢𑀺 𑀆𑀳 ‘‘𑀦 𑀇𑀤𑀁 𑀏𑀓𑀦𑁆𑀢𑀺𑀓𑀁 𑀲𑀺𑀬𑀸’’𑀢𑀺. ‘‘𑀘𑀓𑁆𑀔𑀼𑀭𑀽𑀧𑀸𑀤𑀬𑁄’’𑀢𑀺𑀆𑀤𑀺𑀦𑀸 𑀳𑀺 𑀧𑀭𑀢𑁄 𑀞𑀸𑀦𑀸𑀯𑀺𑀭𑀼𑀤𑁆𑀥𑀸 𑀉𑀤𑀸𑀳𑀭𑀻𑀬𑀦𑁆𑀢𑀻𑀢𑀺. 𑀧𑀼𑀭𑀺𑀫𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸 𑀳𑀺 𑀧𑀘𑁆𑀙𑀸 𑀧𑀯𑀢𑁆𑀢𑀫𑀸𑀦𑀲𑀺𑀧𑁆𑀧𑀸𑀤𑀺𑀓𑀺𑀭𑀺𑀬𑀸𑀦𑀁 𑀲𑀫𑁄𑀥𑀸𑀦𑀸𑀲𑀫𑁆𑀪𑀯𑀸 𑀞𑀸𑀦𑀯𑀺𑀭𑁄𑀥𑁄𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀦 𑀘 𑀲𑀺𑀧𑁆𑀧𑀸𑀤𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀆𑀤𑀺𑀞𑀸𑀦𑀁. 𑀇𑀥𑀸𑀢𑀺 𑀞𑀸𑀦𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑁂. 𑀆𑀤𑀺-𑀲𑀤𑁆𑀤𑁂𑀦 𑀆𑀭𑀫𑁆𑀫𑀡𑀪𑀽𑀫𑀺𑀲𑀦𑁆𑀢𑀸𑀦𑀸𑀤𑀺𑀯𑀺𑀭𑀼𑀤𑁆𑀥𑀸 𑀕𑀳𑁂𑀢𑀩𑁆𑀩𑀸, 𑀢𑁂 𑀘 𑀅𑀦𑀼𑀮𑁄𑀫𑀢𑁄 𑀕𑁄𑀢𑁆𑀭𑀪𑀼𑀲𑁆𑀲, 𑀕𑁄𑀢𑁆𑀭𑀪𑀼𑀢𑁄 𑀫𑀕𑁆𑀕𑀲𑁆𑀲 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀸. 𑀦𑀫𑀦𑀭𑀼𑀧𑁆𑀧𑀦𑀯𑀺𑀭𑁄𑀥𑀸 𑀲𑀪𑀸𑀯𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀦𑀫𑀦𑀭𑀼𑀧𑁆𑀧𑀦𑀦𑁆𑀢𑀺 𑀅𑀭𑀽𑀧𑀭𑀽𑀧𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀁 𑀘𑁂𑀢𑀦𑀸𑀲𑀪𑀸𑀯𑀁, 𑀭𑀽𑀧𑀁 𑀭𑀼𑀧𑁆𑀧𑀦𑀲𑀪𑀸𑀯𑀦𑁆𑀢𑀺 𑀲𑀪𑀸𑀯𑀯𑀺𑀭𑀼𑀤𑁆𑀥𑀁. 𑀫𑀥𑀼𑀭𑀫𑁆𑀩𑀺𑀮𑀭𑀲𑀸𑀤𑀻𑀢𑀺 𑀔𑀻𑀭𑀁 𑀫𑀥𑀼𑀭𑀭𑀲𑀁 𑀧𑀺𑀢𑁆𑀢𑀼𑀧𑀲𑀫𑀦𑀁 𑀫𑀥𑀼𑀭𑀯𑀺𑀧𑀸𑀓𑀲𑀪𑀸𑀯𑀁, 𑀤𑀥𑀺 𑀅𑀫𑁆𑀩𑀺𑀮𑀭𑀲𑀁 𑀧𑀺𑀢𑁆𑀢𑀩𑁆𑀭𑀽𑀳𑀦𑀁 𑀓𑀝𑀼𑀓𑀯𑀺𑀧𑀸𑀓𑀲𑀪𑀸𑀯𑀦𑁆𑀢𑀺 𑀅𑀢𑁄 𑀲𑀪𑀸𑀯𑀯𑀺𑀭𑁄𑀥𑀸.

𑀤𑀥𑀺𑀆𑀤𑀻𑀦𑀻𑀢𑀺 𑀤𑀥𑀺𑀧𑀮𑀸𑀮𑀸𑀦𑀺. 𑀪𑀽𑀢𑀺𑀡𑀓𑀲𑁆𑀲𑀸𑀢𑀺 𑀪𑀽𑀢𑀺𑀡𑀓𑀦𑀸𑀫𑀓𑀲𑁆𑀲 𑀑𑀲𑀥𑀺𑀯𑀺𑀲𑁂𑀲𑀲𑁆𑀲. 𑀅𑀯𑀻 𑀦𑀸𑀫 𑀏𑀴𑀓𑀸, 𑀢𑀸 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀮𑁄𑀫𑀓𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀢𑁆𑀢𑀸 𑀏𑀴𑀓𑀸’’𑀢𑀺. 𑀯𑀺𑀧𑀸𑀓𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑀢𑁄, 𑀅𑀯𑀺𑀧𑀸𑀓𑀸𑀦𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀢𑁄 𑀦 𑀯𑀺𑀧𑀸𑀓𑀥𑀫𑁆𑀫𑀯𑀺𑀧𑀸𑀓𑀸𑀧𑁂𑀓𑁆𑀔𑀸 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀸𑀓𑀸𑀬𑁂𑀯 𑀢𑁂 𑀘 𑀦𑀸’’𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀤𑀯𑀺𑀧𑀸𑀓𑀸𑀦𑀦𑁆𑀢𑀺 𑀢𑀲𑁆𑀲𑀸 𑀅𑀯𑀺𑀚𑁆𑀚𑀸𑀬 𑀅𑀯𑀺𑀧𑀸𑀓𑀪𑀽𑀢𑀸𑀦𑀁. 𑀦 𑀦 𑀬𑀼𑀚𑁆𑀚𑀢𑀺 𑀬𑀼𑀚𑁆𑀚𑀢𑀺 𑀏𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀫𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀤𑀯𑀺𑀭𑀼𑀤𑁆𑀥𑀸𑀦𑀦𑁆𑀢𑀺 𑀢𑀸𑀬 𑀅𑀯𑀺𑀚𑁆𑀚𑀸𑀬 𑀅𑀯𑀺𑀭𑀼𑀤𑁆𑀥𑀸𑀦𑀁.

𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑀦𑁆𑀢𑀺 𑀓𑀸𑀬𑀧𑀯𑀢𑁆𑀢𑀺𑀕𑀢𑀺𑀚𑀸𑀢𑀺𑀆𑀤𑀻𑀦𑀁 𑀬𑀣𑀸𑀭𑀳𑀁 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑀺, 𑀲𑀸 𑀧𑀦 𑀓𑁂𑀦𑀘𑀺 𑀅𑀓𑀝𑀸 𑀅𑀓𑀝𑀯𑀺𑀥𑀸 𑀧𑀝𑀺𑀦𑀺𑀬𑀢𑀲𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀦𑀺𑀬𑀢𑀺𑀯𑀸𑀤𑀺𑀦𑀸 𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀁 𑀆𑀳𑀭𑀦𑁆𑀢𑁄 ‘‘𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀻𑀦𑀁 𑀯𑀺𑀬𑀸’’𑀢𑀺 𑀆𑀳. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀲𑀗𑁆𑀕𑀢𑀻𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀬𑀸𑀤𑀺𑀘𑁆𑀙𑀺𑀓𑀢𑀸, 𑀬𑀁 𑀲𑀦𑁆𑀥𑀸𑀬 ‘‘𑀬𑀤𑀺𑀘𑁆𑀙𑀸𑀬 𑀧𑀯𑀢𑁆𑀢𑀦𑀁 𑀦𑀺𑀯𑀢𑁆𑀢𑀦𑀁 𑀬𑀤𑀺𑀘𑁆𑀙𑀸𑀬𑀸’’𑀢𑀺𑀆𑀤𑀺 𑀯𑀼𑀘𑁆𑀘𑀢𑀺. 𑀪𑀸𑀯𑁄𑀢𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀺𑀤𑁆𑀥𑀺𑀢𑀸, 𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 ‘‘𑀓𑀡𑁆𑀝𑀓𑀲𑁆𑀲 𑀓𑁄𑀝𑀺𑀢𑀺𑀔𑀺𑀡𑀪𑀸𑀯𑀁, 𑀓𑀧𑀺𑀝𑁆𑀞𑀨𑀮𑀲𑁆𑀲 𑀯𑀝𑁆𑀝𑀪𑀸𑀯𑀁, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀸 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀢𑀁 𑀓𑁄 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀓𑁂𑀯𑀮𑀁 𑀲𑀪𑀸𑀯𑀲𑀺𑀤𑁆𑀥𑁄𑀯𑀸𑀬𑀁 𑀯𑀺𑀲𑁂𑀲𑁄’’𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁂 𑀲𑀢𑁆𑀢𑀸, 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸, 𑀲𑀩𑁆𑀩𑁂 𑀚𑀻𑀯𑀸 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮). 𑀏𑀢𑁂𑀳𑀺 𑀯𑀺𑀓𑀧𑁆𑀧𑀦𑁂𑀳𑀻𑀢𑀺 𑀘𑀼𑀢𑀺𑀆𑀤𑀻𑀲𑀼 𑀲𑀫𑁆𑀫𑀽𑀴𑁆𑀳𑀢𑀸𑀬 ‘‘𑀲𑀢𑁆𑀢𑁄 𑀫𑀭𑀢𑀻’’𑀢𑀺𑀆𑀤𑀺𑀯𑀺𑀓𑀧𑁆𑀧𑀦𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺. 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀩𑁆𑀭𑀽𑀳𑀦𑁂𑀦 𑀘𑀺𑀢𑁆𑀢𑀁 𑀅𑀓𑀼𑀲𑀮𑀁 𑀓𑀢𑁆𑀯𑀸.

𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀦𑁆𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀳𑀺 𑀲𑀫𑁆𑀫𑀤𑁂𑀯 𑀚𑀸𑀦𑀦𑁆𑀢𑁄 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀝𑀺𑀯𑁂𑀥𑀥𑀫𑁆𑀫𑁂 𑀧𑀢𑀺𑀝𑁆𑀞𑀳𑀢𑀺. 𑀢𑀦𑁆𑀢𑀺 𑀢𑀁 𑀚𑀸𑀦𑀦𑀁, 𑀦𑀺𑀩𑁆𑀩𑀸𑀦𑀸𑀪𑀺𑀲𑀫𑀬𑁄𑀢𑀺 𑀅𑀢𑁆𑀣𑁄.

𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁭. 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀗𑁆𑀔𑀸𑀭𑀧𑀘𑁆𑀘𑀬𑀸. 𑀯𑀺𑀜𑁆𑀜𑀸𑀡𑀸𑀤𑀬𑁄 𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸 𑀏𑀢𑀭𑀳𑀺 𑀯𑀺𑀧𑀸𑀓𑀯𑀝𑁆𑀝𑀪𑀽𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀢𑀁𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀫𑁂𑀯 𑀯𑀺𑀜𑁆𑀜𑀸𑀡𑀁 𑀪𑀯𑀺𑀢𑀼𑀁 𑀅𑀭𑀳𑀢𑀻’’𑀢𑀺. 𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 𑀥𑀸𑀢𑀼𑀓𑀣𑀸𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀸𑀢𑀼𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀸𑀢𑀼𑀓𑀣𑀸𑀬𑀁 𑀯𑀘𑀦𑀢𑁄 𑀲𑀩𑁆𑀩𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀓𑀢𑁄 𑀥𑀸𑀢𑀼𑀓𑀣𑀸𑀬𑀦𑁆𑀢𑀺 𑀬𑁄𑀚𑀦𑀸. 𑀲𑀧𑁆𑀧𑀤𑁂𑀲𑀸𑀢𑀺 𑀲𑀸𑀯𑀲𑁂𑀲𑀸, 𑀯𑀺𑀧𑀸𑀓𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀳𑀺 𑀯𑀺𑀧𑀸𑀓𑁂𑀲𑀼𑀬𑁂𑀯 𑀅𑀥𑀺𑀧𑁆𑀧𑁂𑀢𑁂𑀲𑀼 𑀬𑀣𑀸 𑁋

‘‘𑀯𑀺𑀧𑀸𑀓𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀸𑀤𑀲𑀳𑀸𑀬𑀢𑀦𑁂𑀳𑀺 𑀢𑁂𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀧𑀜𑁆𑀘𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁪𑁭𑁭) 𑁋

𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀏𑀯𑀫𑀺𑀥𑀸𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸𑀢𑀺 𑀇𑀫𑀲𑁆𑀲 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀲𑀺𑀬𑀸’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀦𑀺𑀧𑁆𑀧𑀤𑁂𑀲𑀸𑀯 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸 𑀕𑀳𑀺𑀢𑀸, 𑀢𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀥𑀸𑀢𑀼𑀓𑀣𑀸𑀬𑀁. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦. 𑀢𑁂𑀦𑀸𑀳 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀘𑀸’’𑀢𑀺𑀆𑀤𑀺. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀡𑁆𑀡𑀦𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑀁 𑀯𑀺𑀭𑁄𑀥𑀁 𑀧𑀭𑀺𑀳𑀭𑀢𑀺. 𑀬𑀤𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀥𑀸𑀢𑀼𑀓𑀣𑀸𑀧𑀸𑀴𑀺 𑀧𑀯𑀢𑁆𑀢𑀸, 𑀅𑀣 𑀓𑀲𑁆𑀫𑀸 ‘‘𑀓𑀸𑀫𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀭𑀽𑀧𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀧𑀜𑁆𑀘𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁬𑁭-𑁬𑁮) 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀯𑀲𑁂𑀦 𑀪𑀯𑁄 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀪𑀯𑁄 𑀧𑀦…𑀧𑁂… 𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀕𑀳𑀺𑀢𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸 𑀏𑀯. 𑀢𑀢𑁆𑀣𑀸𑀢𑀺 𑀥𑀸𑀢𑀼𑀓𑀣𑀸𑀬𑀁. 𑀯𑀺𑀧𑀸𑀓𑀜𑁆𑀳𑁂𑀢𑀦𑁆𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀩𑀸𑀢𑁆𑀢𑀺𑀁𑀲𑀯𑀺𑀥𑀯𑀺𑀜𑁆𑀜𑀸𑀡𑀁 𑀯𑀺𑀧𑀸𑀓𑀁, 𑀢𑀲𑁆𑀫𑀸 𑀢𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑀸𑀓𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳.

‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀫𑁆𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀘𑀢𑀼𑀦𑁆𑀦𑀁 𑀧𑀦 𑀤𑀼𑀳𑁂𑀢𑀼𑀓𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀚𑀯𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀅𑀳𑁂𑀢𑀼𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑀯𑀢𑁆𑀯𑀸 ‘‘𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀦 𑀲𑀦𑁆𑀢𑀻𑀭𑀡𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀓𑀼𑀲𑀮𑀜𑁆𑀳𑀺 𑀅𑀪𑀺𑀇𑀝𑁆𑀞𑀫𑁆𑀧𑀺 𑀆𑀭𑀫𑁆𑀫𑀡𑀁 𑀢𑀣𑀸𑀪𑀺𑀲𑀗𑁆𑀔𑀭𑀡𑁂𑀦 𑀓𑀤𑀸𑀘𑀺 𑀦 𑀫𑀚𑁆𑀛𑀢𑁆𑀢𑀁 𑀓𑀢𑁆𑀯𑀸 𑀦 𑀧𑀯𑀢𑁆𑀢𑀢𑀺, 𑀯𑀺𑀧𑀸𑀓𑀁 𑀧𑀦 𑀬𑀣𑀸𑀲𑀪𑀸𑀯𑀢𑁄𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺. 𑀢𑁂𑀦𑀸𑀳 ‘‘𑀦 𑀲𑀓𑁆𑀓𑀸 𑀯𑀺𑀧𑀸𑀓𑀁 𑀯𑀜𑁆𑀘𑁂𑀢𑀼’’𑀦𑁆𑀢𑀺. 𑀓𑀺𑀭𑀺𑀬𑀚𑀯𑀦𑀸𑀦𑀁 𑀧𑀦 𑀯𑀺𑀲𑀬𑀸𑀪𑀺𑀲𑀗𑁆𑀔𑀭𑀡𑀲𑁆𑀲 𑀩𑀮𑀯𑀪𑀸𑀯𑀢𑁄 𑀢𑀤𑀦𑀦𑁆𑀢𑀭𑀸𑀦𑀁 𑀢𑀤𑀸𑀭𑀫𑁆𑀫𑀡𑀸𑀦𑀁 𑀬𑀣𑀸𑀯𑀺𑀲𑀬𑀁 𑀯𑁂𑀤𑀦𑀸𑀯𑀲𑁂𑀦 𑀢𑀤𑀦𑀼𑀕𑀼𑀡𑀢𑀸 𑀇𑀘𑁆𑀙𑀺𑀢𑀸. 𑀬𑁂 𑀧𑀦 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀦 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀁 𑀧𑀦 ‘‘𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀁 𑀦𑀺𑀬𑀫𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀼𑀲𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀘 𑀤𑀼𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄 𑀘-𑀲𑀤𑁆𑀤𑁄. 𑀓𑁂𑀘𑀺 𑀧𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀓𑀼𑀲𑀮𑀚𑀯𑀦𑀸𑀯𑀲𑀸𑀦𑁂𑀧𑀺 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 ‘𑀬𑁂𑀪𑀼𑀬𑁆𑀬𑁂𑀦𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀮𑁄𑀪𑀘𑀺𑀢𑁆𑀢𑀲𑁆𑀲 𑀯𑀸 𑀲𑀢𑁆𑀢𑀸𑀦𑀁 𑀩𑀳𑀼𑀮𑀁 𑀉𑀧𑁆𑀧𑀚𑁆𑀚𑀦𑀢𑁄 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀓𑀺𑀁 𑀯𑀸’’𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀝𑁆𑀞 𑀯𑀸 𑀤𑀲 𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀸𑀤𑀻𑀲𑀼 𑀯𑀺𑀬 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀯𑀸-𑀲𑀤𑁆𑀤𑀲𑁆𑀲 𑀅𑀪𑀸𑀯𑀸𑀢𑀺 𑀲𑀼𑀬𑁆𑀬𑀫𑀸𑀦𑀲𑁆𑀲 𑀯𑀸-𑀲𑀤𑁆𑀤𑀲𑁆𑀲 𑀅𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀢𑀢𑁆𑀣𑀸𑀧𑀺 𑀯𑀸-𑀲𑀤𑁆𑀤𑁄 𑀮𑀩𑁆𑀪𑀢𑁂𑀯. 𑀢𑀺𑀭𑀢𑁆𑀢𑀁 𑀧𑀦 𑀯𑀸𑀲𑀸𑀤𑀺𑀓𑁂 𑀮𑀩𑁆𑀪𑀫𑀸𑀦𑁂 𑀤𑀺𑀭𑀢𑁆𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀺𑀲𑀼𑀁 𑀦 𑀬𑁄𑀚𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑁂𑀯𑀮𑀁 ‘‘𑀢𑀺𑀭𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑀢𑁆𑀣 𑀯𑀸𑀲𑀸𑀤𑀺𑀦𑀸 𑀅𑀦𑁆𑀢𑀭𑀺𑀢𑀫𑁆𑀧𑀺 𑀢𑀺𑀭𑀢𑁆𑀢𑀁 𑀕𑀡𑁆𑀳𑁂𑀬𑁆𑀬, 𑀤𑀺𑀭𑀢𑁆𑀢𑀯𑀺𑀲𑀺𑀝𑁆𑀞𑀁 𑀧𑀦 𑀢𑀺𑀭𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀢𑁂𑀦 𑀅𑀦𑀦𑁆𑀢𑀭𑀺𑀢𑀫𑁂𑀯 𑀢𑀺𑀭𑀢𑁆𑀢𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀢𑀺𑀭𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀸’’𑀢𑀺. 𑀩𑀮𑀯𑀭𑀽𑀧𑀸𑀤𑀺𑀓𑁂 𑀆𑀭𑀫𑁆𑀫𑀡𑁂𑀢𑀺 𑀅𑀢𑀺𑀫𑀳𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂. ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀢𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂𑀧𑀺 𑀯𑀺𑀲𑀬𑁂 𑀓𑀤𑀸𑀘𑀺 𑀢𑀤𑀸𑀭𑀫𑁆𑀫𑀡𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀲𑀓𑀺𑀁 𑀏𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. ‘‘𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑁂 𑀤𑁆𑀯𑁂 𑀏𑀯 𑀘𑀺𑀢𑁆𑀢𑀯𑀸𑀭𑀸 𑀆𑀕𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑁂𑀦 𑀧𑀝𑀺𑀲𑀦𑁆𑀥𑀸𑀦𑀓𑀺𑀘𑁆𑀘𑁂𑀦.

‘‘𑀓𑀢𑀺 𑀧𑀝𑀺𑀲𑀦𑁆𑀥𑀺𑀬𑁄, 𑀓𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀦𑁆𑀥𑀺𑀯𑀺𑀘𑀸𑀭𑁄 𑀧𑀭𑀢𑁄 𑀯𑀺𑀢𑁆𑀣𑀸𑀭𑀢𑁄 𑀓𑀣𑀻𑀬𑀢𑀻𑀢𑀺 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀓𑀣𑀸 𑀫𑀳𑀸𑀯𑀺𑀲𑀬𑀸𑀢𑀺 𑀓𑀢𑁆𑀯𑀸 𑀧𑀯𑀢𑁆𑀢𑀺𑀫𑁂𑀯 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀅𑀳𑁂𑀢𑀼𑀓𑀤𑁆𑀯𑀬𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀯𑀺𑀧𑀸𑀓𑀫𑀳𑀕𑁆𑀕𑀢𑀯𑀺𑀧𑀸𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀤𑁆𑀯𑀸𑀭𑀦𑀺𑀬𑀫𑀸𑀦𑀺𑀬𑀫𑀸𑀯𑀘𑀦𑀦𑁆𑀢𑀺 𑀤𑁆𑀯𑀸𑀭𑀲𑁆𑀲 𑀦𑀺𑀬𑀢𑀸𑀦𑀺𑀬𑀢𑀸𑀯𑀘𑀦𑀁, 𑀦𑀺𑀬𑀢𑀤𑁆𑀯𑀸𑀭𑀁 𑀅𑀦𑀺𑀬𑀢𑀤𑁆𑀯𑀸𑀭𑀦𑁆𑀢𑀺 𑀯𑀸 𑀅𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀬𑀤𑀺𑀧𑀺 ‘‘𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀧𑀺 𑀳𑁂𑀝𑁆𑀞𑀸 𑀕𑀳𑀺𑀢𑀸, ‘‘𑀧𑀯𑀢𑁆𑀢𑀺𑀬𑀁 𑀧𑀦𑀸’’𑀢𑀺 𑀅𑀥𑀺𑀓𑀢𑀢𑁆𑀢𑀸 𑀧𑀦 𑀧𑀯𑀢𑁆𑀢𑀺𑀬𑁂𑀯 𑀧𑀘𑁆𑀘𑀸𑀫𑀝𑁆𑀞𑀸. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀧𑀞𑀫𑀼𑀤𑁆𑀤𑀺𑀝𑁆𑀞𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀮𑁄𑀓𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀅𑀦𑁆𑀯𑀸𑀤𑁂𑀲𑀁 𑀅𑀭𑀳𑀦𑁆𑀢𑀻𑀢𑀺 𑀆𑀳 ‘‘𑀢𑀢𑁆𑀭𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀬𑀁 𑀩𑀸𑀢𑁆𑀢𑀺𑀁𑀲𑀯𑀺𑀥𑀲𑁆𑀲𑀸’’𑀢𑀺.

𑀬𑀣𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀩𑀻𑀚𑀲𑁆𑀲 𑀅𑀪𑀸𑀯𑁂𑀧𑀺 𑀭𑀽𑀧𑀪𑀯𑁂 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑁆𑀪𑀯𑁄, 𑀏𑀯𑀁 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀫𑁆𑀧𑀺 𑀢𑀢𑁆𑀣 𑀲𑀫𑁆𑀪𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀦𑁆𑀤𑁆𑀭𑀺𑀬𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀏𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀲𑁄𑀢𑀤𑁆𑀯𑀸𑀭𑀪𑁂𑀤𑁂𑀦𑀸𑀢𑀺 𑀘𑀓𑁆𑀔𑀼𑀲𑁄𑀢𑀤𑁆𑀯𑀸𑀭𑀯𑀺𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀲𑁄𑀢𑀤𑁆𑀯𑀸𑀭𑀲𑁆𑀲. 𑀤𑁆𑀯𑀸𑀭𑀯𑀦𑁆𑀢𑀸𑀧𑁂𑀓𑁆𑀔𑁄 𑀤𑁆𑀯𑀸𑀭𑀪𑀸𑀯𑁄𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀯𑀻𑀣𑀺𑀪𑁂𑀤𑀸𑀬𑀢𑁆𑀢𑀢𑁆𑀢𑀸’’𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀤𑁆𑀯𑀸𑀭𑀪𑁂𑀤𑁂 𑀯𑀻𑀣𑀺𑀪𑁂𑀤𑁂 𑀘 𑀲𑀢𑀺. 𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺. 𑀚𑀦𑀓𑀁 𑀅𑀦𑀼𑀩𑀦𑁆𑀥𑀢𑀺 𑀦𑀸𑀫𑀸𑀢𑀺 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀇𑀤𑀁 𑀧𑀦 𑀯𑀢𑁆𑀯𑀸𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀢𑀤𑀸𑀭𑀫𑁆𑀫𑀡𑀸𑀦𑀼𑀧𑁆𑀧𑀢𑁆𑀢𑀺𑀁 𑀯𑀢𑁆𑀯𑀸. 𑀪𑀸𑀯𑀦𑀸𑀬𑀸𑀢𑀺 𑀅𑀓𑀼𑀲𑀮𑀪𑀸𑀯𑀦𑀸𑀬 𑀲𑀁𑀓𑀺𑀮𑁂𑀲𑀯𑀟𑁆𑀠𑀦𑁂𑀦, 𑀲𑀁𑀓𑀺𑀮𑀺𑀝𑁆𑀞𑀲𑀫𑀸𑀥𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀮𑁄𑀪𑀤𑁄𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀧𑀺 𑀲𑀫𑀸𑀥𑀺 ‘‘𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧) 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀝𑁆𑀞𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀦𑀸𑀭𑀫𑁆𑀫𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

‘‘𑀓𑁂𑀦 𑀓𑀢𑁆𑀣𑀸’’𑀢𑀺 𑀧𑀤𑀲𑁆𑀲 ‘‘𑀓𑁂𑀦 𑀘𑀺𑀢𑁆𑀢𑁂𑀦 𑀓𑀲𑁆𑀫𑀺𑀁 𑀪𑀯𑁂’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀽𑀦𑀯𑀻𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀅𑀳𑁂𑀢𑀼𑀓𑀤𑁆𑀯𑀬𑀸𑀤𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀯𑀢𑁆𑀢𑀫𑀸𑀦𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀓𑀽𑀦𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀬𑁄𑀢𑀺 𑀬𑁄𑀚𑀦𑀸. 𑀢𑁂𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀯𑀸. 𑀢𑀢𑁆𑀣 𑀢𑀢𑁆𑀣 𑀪𑀯𑁂.

𑀅𑀦𑀼𑀲𑁆𑀲𑀭𑀡𑀢𑁆𑀣𑁄 𑀩𑁆𑀬𑀸𑀧𑀸𑀭𑁄 𑀅𑀦𑀼𑀲𑁆𑀲𑀭𑀡𑀩𑁆𑀬𑀸𑀧𑀸𑀭𑁄. 𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀻𑀲𑀼 𑀚𑀯𑀦𑀯𑀸𑀭𑁂𑀲𑀼…𑀧𑁂… 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑀫𑁆𑀫𑀸𑀤𑀺𑀉𑀧𑀝𑁆𑀞𑀸𑀦𑀲𑁆𑀲 𑀧𑀭𑀢𑁄 𑀢𑀻𑀳𑀺 𑀚𑀯𑀦𑀯𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑁂𑀓…𑀧𑁂… 𑀅𑀪𑀺𑀧𑁆𑀧𑀮𑀫𑁆𑀩𑀦𑀜𑁆𑀘 𑀳𑁄𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀚𑀯𑀦𑀯𑀸𑀭𑀲𑁆𑀲𑁂𑀯 𑀓𑀫𑁆𑀫𑀸𑀤𑀺𑀉𑀧𑀝𑁆𑀞𑀸𑀦𑁂𑀦 𑀫𑀭𑀡𑀁 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸. 𑀨𑁄𑀝𑁆𑀞𑀩𑁆𑀩𑀲𑁆𑀲𑀸𑀢𑀺 𑀧𑀳𑀸𑀭𑀨𑁄𑀝𑁆𑀞𑀩𑁆𑀩𑀲𑁆𑀲. 𑀪𑀯𑀗𑁆𑀕𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂, 𑀅𑀦𑁆𑀢𑀭𑀦𑁆𑀢𑀭𑀸 𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀬𑀸 𑀯𑀸 𑀯𑀢𑁆𑀢𑀫𑀸𑀦𑀸𑀬 𑀨𑁄𑀝𑁆𑀞𑀩𑁆𑀩𑀲𑀫𑀸𑀬𑁄𑀕𑁂 𑀧𑀞𑀫𑀁 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸, 𑀢𑀣𑀸𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀘𑀺𑀦𑁆𑀢𑀺𑀬𑀫𑀸𑀦𑁂 𑀢𑀫𑁂𑀯𑀸𑀭𑀩𑁆𑀪 𑀏𑀓𑀲𑁆𑀫𑀺𑀁 𑀚𑀯𑀦𑀯𑀸𑀭𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀢𑁄𑀢𑀺 𑀓𑁂𑀘𑀺𑀯𑀸𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀲𑀫𑀸𑀬𑁄𑀕𑁂𑀦 𑀧𑀩𑀼𑀚𑁆𑀛𑀦𑀓𑀸𑀮𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑁂𑀯 𑀆𑀯𑀝𑁆𑀝𑁂𑀢𑀺, 𑀦 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀁. ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀧𑀝𑀺𑀩𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑁭𑁫𑁧) 𑀳𑀺 𑀯𑀼𑀢𑁆𑀢𑀁. 𑀏𑀯𑀁𑀲𑀫𑁆𑀧𑀤𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀮𑀳𑀼𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀮𑀳𑀼𑀉𑀧𑀝𑁆𑀞𑀸𑀦𑀁. 𑀫𑀦𑁄𑀤𑁆𑀯𑀸𑀭𑀲𑁆𑀲 𑀯𑀺𑀲𑀬𑁄 𑀓𑀫𑁆𑀫𑀸𑀤𑀺𑀓𑁄. 𑀮𑀳𑀼𑀓𑀢𑀸𑀢𑀺 𑀮𑀳𑀼𑀧𑀝𑁆𑀞𑀸𑀦𑀢𑀸. 𑀭𑀽𑀧𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀺𑀭𑀽𑀧𑀥𑀫𑁆𑀫𑀸𑀦𑀁. 𑀯𑀺𑀲𑀬𑀪𑀸𑀯𑁂𑀧𑀻𑀢𑀺 𑀭𑀽𑀧𑀸𑀬𑀢𑀦𑀸𑀤𑀺𑀯𑀺𑀲𑀬𑀲𑀩𑁆𑀪𑀸𑀯𑁂𑀧𑀺. 𑀬𑁂𑀲𑀁 𑀯𑀺𑀲𑀬𑁄 𑀅𑀢𑁆𑀣𑀻𑀢𑀺 𑀬𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀲𑀬𑁄 𑀅𑀢𑁆𑀣𑀺. 𑀢𑀁𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀢𑁂𑀲𑀁 𑀲𑀸𑀭𑀫𑁆𑀫𑀡𑀸𑀦𑀁𑀬𑁂𑀯 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀢𑀺 𑀢𑀲𑁆𑀫𑀸.

‘‘𑀪𑀽𑀫𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦𑀸’’𑀢𑀺 𑀇𑀤𑀁 𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀧𑀺 𑀯𑀲𑁂𑀦 𑀮𑀩𑁆𑀪𑀢𑁂𑀯 𑀢𑀲𑁆𑀲 𑀙𑀴𑀸𑀭𑀫𑁆𑀫𑀡𑀪𑀸𑀯𑀢𑁄. 𑀕𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀦 𑀧𑀪𑁂𑀤𑁄 𑀦𑀻𑀮𑀸𑀤𑀺𑀓𑁄𑀬𑁂𑀯.

𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀲𑀼 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑁂𑀲𑀼. 𑀢𑀜𑁆𑀘 𑀓𑀫𑁆𑀫𑀸𑀤𑀺𑀁. 𑀪𑀯𑀦𑁆𑀢𑀭𑀦𑀺𑀦𑁆𑀦𑀸𑀤𑀺𑀢𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀪𑀯𑀧𑀢𑁆𑀣𑀦𑀸𑀬 𑀢𑀣𑀸𑀪𑀺𑀲𑀗𑁆𑀔𑀢𑀢𑁆𑀢𑀸. 𑀬𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀼𑀜𑁆𑀜𑀸𑀤𑀺𑀘𑁂𑀢𑀦𑀸𑀬 𑀯𑀺𑀬 𑀪𑀯𑀧𑀢𑁆𑀣𑀦𑀸𑀬 𑀧𑀭𑀺𑀪𑀸𑀯𑀦𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸, 𑀢𑀢𑁆𑀣𑁂𑀯 𑀪𑀯𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺. 𑀢𑀁 𑀧𑀦 𑀘𑀺𑀢𑁆𑀢𑀁 𑀢𑀣𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀸𑀬 𑀯𑀺𑀦𑀸𑀫𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢’’𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼. 𑀇𑀢𑀭𑀸𑀬𑀸𑀢𑀺 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀦𑀺𑀦𑁆𑀦𑀸𑀬 𑀘𑀼𑀢𑀺𑀬𑀸. ‘‘𑀦𑀺𑀘𑁆𑀙𑀺𑀦𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀦𑀺𑀘𑁆𑀙𑀬𑀲𑁆𑀲 𑀦𑀺𑀩𑀦𑁆𑀥𑀦𑀁 𑀆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀓𑀼𑀲𑀮𑁂 𑀳𑀺 𑀤𑀼𑀕𑁆𑀕𑀢𑀽𑀧𑀦𑀺𑀲𑁆𑀲𑀬𑁂 𑀦𑀺𑀬𑀫𑀺𑀢𑁂 𑀓𑀼𑀲𑀮𑀁 𑀲𑀼𑀕𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀦𑀺𑀬𑀫𑀺𑀢𑀫𑁂𑀯 𑀳𑁄𑀢𑀻𑀢𑀺.

𑀅𑀦𑀺𑀝𑁆𑀞𑀁 𑀆𑀭𑀫𑁆𑀫𑀡𑀁 𑀆𑀳 𑀬𑀢𑁄 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀤𑀲𑁆𑀲𑀻𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 ‘‘𑀭𑀸𑀕𑀸𑀤𑀺𑀳𑁂𑀢𑀼𑀪𑀽𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀫𑁆𑀧𑀺 𑀳𑀺…𑀧𑁂… 𑀳𑁄𑀢𑀻’’𑀢𑀺. 𑀢𑀫𑁆𑀧𑀻𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀺. 𑀬𑀲𑁆𑀫𑀸 𑀧𑀦 𑀳𑀻𑀦𑀁 𑀆𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀪𑀽𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀅𑀓𑀼𑀲𑀮𑀯𑀺𑀧𑀸𑀓𑀚𑀦𑀓𑀓𑀫𑁆𑀫𑀲𑀳𑀚𑀸𑀢𑀸𑀦𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀦𑀺𑀫𑀺𑀢𑁆𑀢𑀪𑀽𑀢𑀜𑁆𑀳𑀺 𑀆𑀭𑀫𑁆𑀫𑀡𑀁 𑀬𑀁 𑀯𑀺𑀧𑀸𑀓𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁, 𑀢𑁂𑀦 𑀲𑀳𑀚𑀸𑀢𑀸𑀦𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀤𑀺𑀲𑀸𑀲𑀦𑁆𑀦𑀚𑀯𑀦𑀲𑀳𑀚𑀸𑀢𑀸𑀦𑀜𑁆𑀘 𑀭𑀸𑀕𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀗𑁆𑀔𑀸𑀢𑁄 𑀳𑁂𑀢𑀼 𑀳𑁄𑀢𑀺, 𑀲𑁄 𑀏𑀯 𑀘𑀲𑁆𑀲 𑀳𑀻𑀦𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀲𑁂𑀦 𑀅𑀦𑀺𑀝𑁆𑀞𑀦𑁆𑀢𑀺 𑀳𑀻𑀦𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀢𑁄 𑀆𑀭𑀫𑁆𑀫𑀡𑀢𑀸𑀯𑀲𑁂𑀦 𑀳𑀻𑀦𑀦𑁆𑀢𑀺 𑀓𑀢𑁆𑀯𑀸 𑀅𑀦𑀺𑀝𑁆𑀞𑀁, 𑀲𑀪𑀸𑀯𑁂𑀦 𑀇𑀝𑁆𑀞𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀜𑁆𑀜𑀣𑀸 𑀘𑀸’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀦 𑀲𑀫𑁆𑀪𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀆𑀲𑀦𑁆𑀦𑀓𑀢𑀓𑀫𑁆𑀫𑀸𑀭𑀫𑁆𑀫𑀡𑀲𑀦𑁆𑀢𑀢𑀺𑀬𑀦𑁆𑀢𑀺 𑀆𑀲𑀦𑁆𑀦𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀲𑀦𑁆𑀢𑀸𑀦𑁂. 𑀢𑀁𑀲𑀤𑀺𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀸𑀭𑀫𑁆𑀫𑀡𑀲𑀤𑀺𑀲𑀁. 𑀧𑀝𑀺𑀲𑀦𑁆𑀥𑀺𑀆𑀭𑀫𑁆𑀫𑀡𑀽𑀧𑀝𑁆𑀞𑀸𑀧𑀓𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀧𑀓𑀁. 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀢𑁆𑀢𑁂 𑀅𑀬𑀫𑀢𑁆𑀣𑁄 𑀮𑀩𑁆𑀪𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀦 𑀘 𑀧𑀝𑀺𑀲𑀦𑁆𑀥𑀺𑀬𑀸’’𑀢𑀺𑀆𑀤𑀺. 𑀢𑀁𑀲𑀫𑀸𑀦𑀯𑀻𑀣𑀺𑀬𑀦𑁆𑀢𑀺 𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀯𑀻𑀣𑀺𑀬𑀁. 𑀦 𑀅𑀲𑁆𑀲𑀸𑀤𑀺𑀢𑀸𑀦𑀻𑀢𑀺 𑀅𑀲𑁆𑀲𑀸𑀤𑀦𑀪𑀽𑀢𑀸𑀬 𑀢𑀡𑁆𑀳𑀸𑀬 𑀦 𑀆𑀫𑀝𑁆𑀞𑀸𑀦𑀺.

𑀲𑀫𑀢𑁆𑀢𑀸𑀢𑀺 𑀧𑀭𑀺𑀧𑀼𑀡𑁆𑀡𑀸, 𑀧𑀭𑀺𑀬𑀢𑁆𑀢𑀸 𑀯𑀸. ‘‘𑀫𑀭𑀡𑀓𑀸𑀮𑁂…𑀧𑁂… 𑀲𑀫𑀸𑀤𑀺𑀦𑁆𑀦𑀸’’𑀢𑀺 𑀯𑀘𑀦𑀢𑁄 𑀬𑀣𑀸𑀯𑀼𑀢𑁆𑀢𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀲𑀺𑀤𑁆𑀥𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀘 𑀤𑀼𑀩𑁆𑀩𑀮𑁂𑀳𑀻’’𑀢𑀺𑀆𑀤𑀺. ‘‘𑀯𑀓𑁆𑀔𑀢𑀺 𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀘𑀬𑁂𑀦 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀜𑀸𑀡𑀯𑀢𑁆𑀣𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀜𑁆𑀳𑀺 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 𑀧𑀤𑀸𑀦𑀁 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀫𑁆𑀧𑀺…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻’’𑀢𑀺. 𑀢𑀢𑁆𑀣 𑀧𑀝𑀺𑀯𑀺𑀚𑀸𑀦𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀓𑀸𑀬𑀯𑀘𑀻𑀓𑀫𑁆𑀫𑀼𑀧𑀝𑁆𑀞𑀸𑀧𑀦𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀧𑀧𑀚𑁆𑀚𑀦𑀲𑀼𑀧𑀺𑀦𑀤𑀲𑁆𑀲𑀦𑀸𑀤𑀻𑀦𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀧𑀯𑀢𑁆𑀢𑀺 𑀧𑀸𑀓𑀝𑀸𑀢𑀺 𑀢𑀸𑀦𑀺 𑀩𑀳𑀺 𑀓𑀭𑁄𑀦𑁆𑀢𑁄 ‘‘𑀘𑀯𑀦𑀧𑀭𑀺𑀬𑁄𑀲𑀸𑀦𑀁 𑀓𑀺𑀘𑁆𑀘’’𑀦𑁆𑀢𑀺 𑀆𑀳. 𑀲𑀳𑀚𑀯𑀦𑀓𑀸𑀦𑀻𑀢𑀺 𑀚𑀯𑀦𑀲𑀳𑀺𑀢𑀸𑀦𑀺, 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 𑀧𑀸𑀴𑀺𑀯𑀡𑁆𑀡𑀦𑀸𑀬𑀁. 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀦 𑀲𑀩𑁆𑀩𑁂 𑀭𑀽𑀧𑀸𑀤𑀺𑀥𑀫𑁆𑀫𑀸 𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀫𑁆𑀧𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀪𑀸𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀲𑀺𑀤𑁆𑀥𑀸 𑀯𑀺𑀧𑀸𑀓𑀥𑀫𑁆𑀫𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸, 𑀬𑀸𑀬 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀢𑀁𑀲𑀦𑁆𑀢𑀸𑀦𑁂 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺, 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀲𑀸 𑀯𑀺𑀧𑀸𑀓𑀥𑀫𑁆𑀫𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀝𑀺𑀲𑁂𑀥𑀺𑀢𑀸𑀢𑀺. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀧𑀝𑀺𑀯𑀺𑀚𑀸𑀦𑀦𑀲𑀤𑀺𑀲𑀫𑁂𑀯. 𑀬𑀤𑀺 𑀧𑀜𑁆𑀘𑀤𑁆𑀯𑀸𑀭𑁂 𑀬𑀣𑀸𑀯𑀼𑀢𑁆𑀢𑀓𑀺𑀘𑁆𑀘𑀲𑁆𑀲 𑀓𑀭𑀡𑁂 𑀲𑀳𑀚𑀯𑀦𑀓𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺, 𑀓𑀣𑀁 𑀢𑀢𑁆𑀣 𑀘𑀯𑀦𑀼𑀧𑀧𑀚𑁆𑀚𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑀁 𑀧𑀦𑀸’’𑀢𑀺𑀆𑀤𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀫𑀦𑁄𑀤𑁆𑀯𑀸𑀭𑀺𑀓𑀪𑀸𑀯𑁄 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀧𑀼𑀩𑁆𑀩𑀓𑁄𑀢𑀺 𑀢𑀤𑀪𑀸𑀯𑁂𑀦𑀸𑀳 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺. 𑀅𑀯𑀲𑁂𑀲𑁂𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀭𑀽𑀧𑀸𑀤𑀺𑀫𑁆𑀳𑀻𑀢𑀺 𑀬𑁄𑀚𑀦𑀸.

𑀉𑀧𑀘𑀸𑀭𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑁆𑀢𑀸, 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑀸 𑀘. 𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀫𑀳𑀕𑁆𑀕𑀢𑀸𑀯𑀲𑀸𑀦𑀁 𑀯𑀤𑀦𑁆𑀢𑀻𑀢𑀺 𑀬𑀣𑀸𑀧𑀘𑁆𑀘𑀬𑀁 𑀫𑀳𑀕𑁆𑀕𑀢𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀲𑀸 𑀯𑀻𑀣𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀘𑀼𑀢𑀺𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀏𑀓𑀸𑀤𑀲𑀯𑀺𑀥𑀸𑀢𑀺 𑀦𑀯 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀘𑀼𑀢𑀺𑀬𑁄, 𑀤𑁆𑀯𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀆𑀭𑀼𑀧𑁆𑀧𑀘𑀼𑀢𑀺𑀬𑁄𑀢𑀺 𑀏𑀯𑀁 𑀅𑀢𑀻𑀢𑀸𑀭𑀫𑁆𑀫𑀡𑀸 𑀏𑀓𑀸𑀤𑀲𑀯𑀺𑀥𑀸 𑀲𑀼𑀕𑀢𑀺𑀘𑀼𑀢𑀺𑀬𑁄. 𑀧𑀜𑁆𑀘 𑀭𑀽𑀧𑀸𑀯𑀘𑀭𑀸, 𑀯𑀼𑀢𑁆𑀢𑀸𑀯𑀲𑁂𑀲𑀸 𑀤𑁆𑀯𑁂 𑀅𑀭𑀽𑀧𑀸𑀯𑀘𑀭𑀸𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀲𑀢𑁆𑀢𑀯𑀺𑀥𑀸 𑀘𑀼𑀢𑀺𑀬𑁄. 𑀤𑀼𑀕𑁆𑀕𑀢𑀺𑀘𑀼𑀢𑀺 𑀧𑀦 𑀧𑀭𑀢𑁄 𑀯𑀼𑀘𑁆𑀘𑀢𑀻𑀢𑀺 𑀇𑀥 𑀦 𑀕𑀳𑀺𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀧𑀦…𑀧𑁂… 𑀦 𑀤𑀲𑁆𑀲𑀺𑀢𑀸’’𑀢𑀺.

𑀏𑀯𑀫𑀸𑀤𑀺𑀓𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑀼𑀤𑁆𑀥𑀸𑀬 𑀯𑀸 𑀚𑀯𑀦𑀯𑀻𑀣𑀺𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀼𑀤𑁆𑀥𑀸𑀬 𑀯𑀸𑀢𑀺 𑀫𑀳𑀕𑁆𑀕𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀚𑀯𑀦𑀯𑀻𑀣𑀺𑀬𑀸’’𑀢𑀺. ‘‘𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀇𑀫𑀺𑀦𑀸 𑀬𑀤𑀺𑀧𑀺 ‘‘𑀧𑀣𑀯𑀻𑀓𑀲𑀺𑀡𑀸𑀤𑀻’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀭𑀫𑁆𑀫𑀡𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀲𑀫𑁆𑀪𑀯𑀢𑀺, ‘‘𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀸’’𑀢𑀺 𑀧𑀦 𑀤𑁆𑀯𑀸𑀭𑀤𑁆𑀯𑀬𑀲𑁆𑀲𑁂𑀯 𑀯𑀲𑁂𑀦 𑀯𑀺𑀓𑀧𑁆𑀧𑀦𑁆𑀢𑀭𑀓𑀭𑀡𑀁 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀜𑀸𑀧𑀓𑀜𑁆𑀘 𑀦𑀸𑀫 𑀅𑀕𑀢𑀺𑀓𑀸 𑀕𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀜𑀸𑀧𑀓𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀅𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀬𑁄 𑀬𑀢𑁆𑀣 𑀲𑀫𑁆𑀪𑀯𑀢𑀺, 𑀢𑀲𑁆𑀲 𑀬𑁄𑀚𑀦𑀸 𑀬𑀣𑀸𑀲𑀫𑁆𑀪𑀯𑀬𑁄𑀚𑀦𑀸, 𑀢𑀸𑀬. 𑀅𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀻𑀢𑀺 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀥𑀺𑀁 𑀯𑀤𑀢𑀺. 𑀢𑀢𑁆𑀣𑁂𑀯𑀸𑀢𑀺 ‘‘𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀯𑀸 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀞𑀫𑁂 𑀯𑀺𑀓𑀧𑁆𑀧𑁂 𑀏𑀯. 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀢𑀢𑁄𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀼𑀢𑀺𑀢𑁄. 𑀢𑀢𑁆𑀣𑁂𑀯𑀸𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂 𑀏𑀯. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺, 𑀢𑀢𑁄 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀼𑀢𑀺𑀢𑁄 𑀓𑀸𑀫𑀸𑀯𑀘𑀭𑁂 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺. 𑀇𑀢𑀭𑀸𑀳𑀻𑀢𑀺 𑀆𑀭𑀼𑀧𑁆𑀧𑀘𑀼𑀢𑀻𑀳𑀺. 𑀤𑀼𑀢𑀺𑀬𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀇𑀢𑀭𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀆𑀳 ‘‘𑀬𑀣𑀸𑀲𑀫𑁆𑀪𑀯’’𑀦𑁆𑀢𑀺. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀘 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀻𑀢𑀺 𑀏𑀢𑁆𑀣𑀸𑀧𑀺 𑀇𑀢𑀭𑀸𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣 𑀘 ‘‘𑀬𑁄𑀚𑁂𑀢𑀩𑁆𑀩𑀸’’𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲𑀸𑀢𑀺 ‘‘𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀲𑁆𑀲. 𑀯𑀺𑀲𑀼𑀁 𑀉𑀤𑁆𑀥𑀭𑀡𑀁 𑀓𑀢𑀁 𑀅𑀥𑀺𑀓𑀯𑀘𑀦𑀫𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺.

𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀯𑀺𑀥𑀸𑀬𑀸𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀏𑀓𑀯𑀺𑀥𑀸𑀬. 𑀤𑀼𑀯𑀺𑀥𑀸𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀘𑀸𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑀸. 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀆𑀭𑀫𑁆𑀫𑀡𑀯𑀲𑁂𑀦 ‘‘𑀏𑀓𑀯𑀺𑀥𑀸𑀬𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸𑀬 𑀤𑁆𑀯𑀺𑀧𑁆𑀧𑀓𑀸𑀭𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸𑀬 𑀏𑀓𑀧𑁆𑀧𑀓𑀸𑀭𑀸 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺, 𑀦𑀯𑀢𑁆𑀢𑀩𑁆𑀩𑀸𑀢𑀻𑀢𑀸𑀭𑀫𑁆𑀫𑀡𑀢𑀸𑀬 𑀤𑁆𑀯𑀺𑀧𑁆𑀧𑀓𑀸𑀭𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀻𑀢𑀺 𑀆𑀳 ‘‘𑀤𑁆𑀯𑀺𑀏𑀓𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀓𑀸𑀫𑀭𑀽𑀧𑀸𑀭𑀼𑀧𑁆𑀧𑀸𑀦𑀁 𑀯𑀲𑁂𑀦𑀸’’𑀢𑀺. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀤𑁆𑀯𑀺𑀏𑀓𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀓𑀸𑀫𑀭𑀽𑀧𑀸𑀭𑀼𑀧𑁆𑀧𑀸𑀦𑀁 𑀯𑀲𑁂𑀦𑀸’’𑀢𑀺 𑀧𑀤𑀤𑁆𑀯𑀬𑀁 𑀆𑀓𑀟𑁆𑀠𑀢𑀺. 𑀤𑀼𑀯𑀺𑀥𑀸𑀬𑀸𑀢𑀺 𑀦𑀯𑀢𑁆𑀢𑀩𑁆𑀩𑀸𑀢𑀻𑀢𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀤𑀼𑀯𑀺𑀥𑀸𑀬. 𑀧𑀘𑁆𑀘𑁂𑀓𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀫𑀸𑀭𑀼𑀧𑁆𑀧𑀸𑀦𑀦𑁆𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀘 𑀤𑁆𑀯𑁂 𑀓𑀸𑀫𑀧𑀝𑀺𑀲𑀦𑁆𑀥𑀻, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀘 𑀤𑁆𑀯𑁂 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀻, 𑀢𑀣𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀬𑀧𑀻𑀢𑀺 𑀇𑀫𑀸𑀲𑀁 𑀯𑀲𑁂𑀦 𑀅𑀝𑁆𑀞𑀯𑀺𑀥𑀸.

‘‘𑀤𑁆𑀯𑀺𑀤𑁆𑀯𑀻’’𑀢𑀺 𑀕𑀸𑀣𑀸𑀬 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 ‘‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸𑀧𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄 𑀕𑀳𑀺𑀢𑁄𑀬𑁂𑀯 𑀳𑁄𑀢𑀺, ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀲𑀼𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀻𑀬𑀢𑀻𑀢𑀺 ‘‘𑀓𑀸𑀫𑀸𑀯𑀘𑀭𑀲𑁆𑀲…𑀧𑁂… 𑀆𑀤𑀺𑀦𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑁄’’𑀢𑀺 𑀆𑀳.

𑀆𑀤𑀺𑀦𑀸 𑀯𑀺𑀫𑀺𑀲𑁆𑀲𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀏𑀓𑀲𑁆𑀲 𑀪𑀯𑀲𑁆𑀲 𑀆𑀤𑀺𑀪𑀽𑀢𑁂𑀦 𑀭𑀽𑀧𑀯𑀺𑀫𑀺𑀲𑁆𑀲𑁂𑀦 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀁. 𑀅𑀯𑀘𑀦𑀁 𑀧𑀝𑀺𑀓𑁆𑀔𑁂𑀧𑀁 𑀫𑀜𑁆𑀜𑀫𑀸𑀦𑁄 ‘‘𑀕𑀦𑁆𑀥𑀭𑀲𑀸𑀳𑀸𑀭𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀭𑀽𑀧𑀪𑀯𑁂 𑀢𑁂 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀲𑀢𑁆𑀢𑀓𑀚𑀻𑀯𑀺𑀢𑀙𑀓𑁆𑀓𑀪𑀸𑀯𑁂𑀧𑀻’’𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀧𑀸𑀴𑀺𑀬𑀁. 𑀧𑀜𑁆𑀘𑀸𑀬𑀢𑀦𑀸𑀦𑀻𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑀭𑀽𑀧𑀥𑀫𑁆𑀫𑀸𑀬𑀢𑀦𑀸𑀦𑀺. 𑀧𑀜𑁆𑀘 𑀥𑀸𑀢𑀼𑀬𑁄𑀢𑀺 𑀢𑀸 𑀏𑀯 𑀧𑀜𑁆𑀘 𑀥𑀸𑀢𑀼𑀬𑁄. 𑀯𑀼𑀢𑁆𑀢𑀜𑁆𑀳𑀺 𑁋 ‘‘𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀢𑀫𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺? 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀁. 𑀇𑀫𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀢𑀫𑀸 𑀧𑀜𑁆𑀘 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀺? 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀥𑀫𑁆𑀫𑀥𑀸𑀢𑀼. 𑀇𑀫𑀸 𑀧𑀜𑁆𑀘 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁧𑁬). 𑀙 𑀆𑀬𑀢𑀦𑀸𑀦𑀺 𑀲𑀤𑁆𑀤𑀸𑀬𑀢𑀦𑁂𑀦 𑀲𑀤𑁆𑀥𑀺𑀁 𑀢𑀸𑀦𑀺𑀬𑁂𑀯. 𑀦𑀯 𑀥𑀸𑀢𑀼𑀬𑁄𑀢𑀺 𑀘𑀓𑁆𑀔𑀼𑀭𑀽𑀧𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁄𑀢𑀲𑀤𑁆𑀤𑀲𑁄𑀢𑀯𑀺𑀜𑁆𑀜𑀸𑀡𑀫𑀦𑁄𑀥𑀫𑁆𑀫𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀕𑁆𑀕𑀳𑀯𑀲𑁂𑀦. 𑀢𑀢𑁆𑀣𑀸𑀢𑀺 𑀭𑀽𑀧𑀥𑀸𑀢𑀼𑀬𑀁. ‘‘𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘𑀸’’𑀢𑀺𑀆𑀤𑀺𑀦𑀸 𑀦 𑀓𑁂𑀯𑀮𑀁 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀧𑀸𑀴𑀺𑀬𑀁𑀬𑁂𑀯, 𑀅𑀣 𑀔𑁄 𑀧𑀓𑀭𑀡𑀦𑁆𑀢𑀭𑁂𑀧𑀺 𑀕𑀦𑁆𑀥𑀸𑀤𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀯𑀺𑀬𑀸𑀢𑀺 𑀲𑀤𑀺𑀲𑀽𑀤𑀸𑀳𑀭𑀡𑀤𑀲𑁆𑀲𑀦𑀁. 𑀬𑀣𑀸 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀢𑀢𑁆𑀣 𑀭𑀽𑀧𑀪𑀯𑁂 𑀪𑀸𑀯𑁄 𑀅𑀢𑁆𑀣𑀺, 𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀏𑀯𑀁 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀜𑁆𑀘𑀸𑀢𑀺. 𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀸𑀬𑀢𑀦𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀬𑀜𑁆𑀳𑀺 𑀢𑀢𑁆𑀣 𑀆𑀬𑀢𑀦𑀁 𑀦𑀢𑁆𑀣𑀺, 𑀢𑀲𑁆𑀲 𑀯𑀲𑁂𑀦𑀸𑀬𑀁 𑀘𑁄𑀤𑀦𑀸. 𑀢𑀢𑁄 𑀧𑀭𑀯𑀸𑀤𑀻 𑀬𑀁 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀁 𑀖𑀸𑀦𑀸𑀤𑀺𑀓𑀁 𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑀁, 𑀢𑀤𑁂𑀯 𑀆𑀬𑀢𑀦𑀦𑁆𑀢𑀺 𑀮𑀤𑁆𑀥𑀺𑀬𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀩𑀸𑀳𑀺𑀭𑀸𑀦𑀁 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀯𑀲𑁂𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀖𑀸𑀦𑀧𑁆𑀧𑀲𑀸𑀤𑀸𑀤𑀬𑁄 𑀢𑀢𑁆𑀣 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀕𑁄𑀘𑀭𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀢𑁆𑀣𑀺 𑀢𑀢𑁆𑀣 𑀚𑀺𑀯𑁆𑀳𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀢𑀢𑁆𑀣 𑀭𑀲𑀸𑀬𑀢𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀁𑀲𑀦𑁆𑀤𑀦𑀧𑀜𑁆𑀳𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀦𑁆𑀢𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀪𑀸𑀯𑀭𑀳𑀺𑀢𑀸𑀦𑀁, 𑀅𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀦𑀸𑀬𑀢𑀦𑀲𑀪𑀸𑀯𑁂 𑀕𑀦𑁆𑀥𑀭𑀲𑁂 𑀧𑀝𑀺𑀚𑀸𑀦𑀺𑀢𑁆𑀯𑀸𑀧𑀺 𑀤𑁄𑀲𑀁 𑀯𑀤𑀦𑁆𑀢𑁄 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀘𑀦𑁂 𑀦𑀢𑁆𑀣𑀺 𑀓𑀸𑀭𑀡𑀁 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑁂, 𑀢𑁂𑀲𑀁 𑀯𑀸 𑀦𑀺𑀲𑀢𑁆𑀢𑀦𑀺𑀚𑁆𑀚𑀻𑀯𑀲𑀪𑀸𑀯𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀥𑀸𑀢𑀼𑀪𑀸𑀯𑁄, 𑀏𑀯𑀁 𑀥𑀫𑁆𑀫𑀪𑀸𑀯𑁄 𑀘 𑀢𑁂𑀲𑀁 𑀏𑀓𑀦𑁆𑀢𑀺𑀓𑁄, 𑀢𑀣𑀸 𑀆𑀬𑀢𑀦𑀪𑀸𑀯𑁄 𑀘𑀸𑀢𑀺 𑀲𑀩𑁆𑀩𑀣𑀸𑀧𑀺 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀸𑀦𑀁 𑀕𑀦𑁆𑀥𑀭𑀲𑀸𑀦𑀁 𑀆𑀬𑀢𑀦𑁂𑀲𑀼 𑀅𑀯𑀘𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀪𑀸𑀯𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀜𑁆𑀜𑀲𑁆𑀲 𑀧𑀭𑀫𑀢𑁆𑀣𑀲𑁆𑀲 𑀅𑀪𑀸𑀯𑀸. 𑀓𑁄𑀘𑀺 𑀆𑀬𑀢𑀦𑀲𑀪𑀸𑀯𑁄𑀢𑀺 𑀥𑀫𑁆𑀫𑀸𑀬𑀢𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦 𑀬𑀤𑀺 𑀭𑀽𑀧𑀪𑀯𑁂 𑀕𑀦𑁆𑀥𑀭𑀲𑀸 𑀯𑀺𑀚𑁆𑀚𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑁂𑀦 𑀅𑀯𑀼𑀘𑁆𑀘𑀫𑀸𑀦𑀸𑀧𑀺 𑀥𑀫𑁆𑀫𑀸𑀬𑀢𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀘 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀦𑀢𑁆𑀣𑁂𑀯 𑀭𑀽𑀧𑀪𑀯𑁂 𑀕𑀦𑁆𑀥𑀭𑀲𑀸’’𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘 𑀭𑀽𑀧𑀥𑀸𑀢𑀼𑀬𑀁 𑀕𑀦𑁆𑀥𑀭𑀲𑀪𑀸𑀯𑁂𑀦 𑀅𑀯𑀼𑀢𑁆𑀢𑀸𑀦𑀁, 𑀓𑀸𑀫𑀥𑀸𑀢𑀼𑀬𑀁 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀓𑀺𑀁 𑀕𑀦𑁆𑀥𑀭𑀲𑀪𑀸𑀯𑀢𑁄 𑀅𑀜𑁆𑀜𑁂𑀦 𑀲𑀪𑀸𑀯𑁂𑀦 𑀭𑀽𑀧𑀥𑀸𑀢𑀼𑀬𑀁 𑀅𑀢𑁆𑀣𑀺𑀪𑀸𑀯𑁄, 𑀉𑀤𑀸𑀳𑀼 𑀕𑀦𑁆𑀥𑀭𑀲𑀪𑀸𑀯𑁂𑀦. 𑀬𑀤𑀺 𑀧𑀼𑀭𑀺𑀫𑁄 𑀧𑀓𑁆𑀔𑁄 𑀥𑀫𑁆𑀫𑀸𑀬𑀢𑀦𑁂 𑀢𑁂𑀲𑀁 𑀲𑀗𑁆𑀕𑀳𑁄 𑀲𑀺𑀬𑀸 𑀅𑀦𑀸𑀬𑀢𑀦𑀲𑀪𑀸𑀯𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀸, 𑀅𑀣 𑀤𑀼𑀢𑀺𑀬𑁄 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀦𑁂𑀲𑀁 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀦𑁆𑀥𑀭𑀲𑀸 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀦 𑀯𑀼𑀢𑁆𑀢𑀸, 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘 𑀢𑁂𑀲𑀁 𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀧𑀣𑀯𑀻𑀆𑀤𑀬𑁄 𑀯𑀺𑀬 𑀖𑀸𑀬𑀺𑀢𑀼𑀁 𑀲𑀸𑀬𑀺𑀢𑀼𑀜𑁆𑀘 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀢𑁂 𑀦𑀢𑁆𑀣𑀺, 𑀥𑀸𑀢𑀼𑀲𑀤𑁆𑀤𑁂𑀦 𑀘 𑀢𑁂 𑀕𑀳𑀺𑀢𑀸, 𑀥𑀫𑁆𑀫𑀪𑀸𑀯𑁄 𑀘 𑀢𑁂𑀲𑀁 𑀏𑀓𑀦𑁆𑀢𑀺𑀓𑁄, 𑀢𑀲𑁆𑀫𑀺𑀜𑁆𑀘 𑀲𑀢𑀺 𑀲𑀺𑀤𑁆𑀥𑁄 𑀆𑀬𑀢𑀦𑀪𑀸𑀯𑁄, 𑀢𑀲𑁆𑀫𑀸. 𑀢𑀣𑀸𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀥𑀫𑁆𑀫𑁂 𑀳𑀸𑀧𑁂𑀢𑁆𑀯𑀸 𑀘𑀓𑁆𑀔𑀼𑀲𑀢𑁆𑀢𑀓𑀸𑀤𑀺𑀯𑀲𑁂𑀦. 𑀏𑀯𑀦𑁆𑀢𑀺 𑀘𑀓𑁆𑀔𑀼𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀭𑀽𑀧𑀕𑀡𑀦𑀸𑀬 𑀓𑀭𑀺𑀬𑀫𑀸𑀦𑀸𑀬. 𑀥𑀫𑁆𑀫𑀢𑀸𑀢𑀺 𑀧𑀸𑀴𑀺𑀥𑀫𑁆𑀫𑁄, 𑀭𑀽𑀧𑀪𑀯𑁂 𑀯𑀸 𑀧𑀯𑀢𑁆𑀢𑀦𑀓𑀭𑀽𑀧𑀥𑀫𑁆𑀫𑀢𑀸. ‘‘𑀦 𑀯𑀺𑀮𑁄𑀫𑀺𑀢𑀸’’𑀢𑀺 𑀇𑀫𑀺𑀦𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀁 𑀥𑀫𑁆𑀫𑀁 𑀤𑀻𑀧𑀺𑀢𑀁 𑀉𑀮𑁆𑀮𑀺𑀗𑁆𑀕𑁂𑀢𑀺.

𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀖𑀸𑀦𑀚𑀺𑀯𑁆𑀳𑀸𑀬𑀢𑀦𑀸𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀧𑀺 𑀕𑀦𑁆𑀥𑀭𑀲𑀸 𑀆𑀬𑀢𑀦𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀙 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀬𑁄 𑀆𑀳𑀸𑀭𑀸’’𑀢𑀺 𑀘 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀲𑁆𑀲 𑀆𑀳𑀸𑀭𑀲𑁆𑀲 𑀅𑀪𑀸𑀯𑁂𑀦 𑀑𑀚𑀝𑁆𑀞𑀫𑀓𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀲𑀗𑁆𑀔𑀸𑀢𑀲𑁆𑀲 𑀆𑀳𑀸𑀭𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀕𑀦𑁆𑀥𑀭𑀲𑀸𑀦𑀁 𑀑𑀚𑀸𑀬 𑀘 𑀅𑀪𑀸𑀯𑀢𑁄. 𑀇𑀢𑀺 𑀯𑀺𑀲𑀬𑀺𑀦𑁄 𑀓𑀺𑀘𑁆𑀘𑀲𑁆𑀲 𑀘 𑀅𑀪𑀸𑀯𑁂𑀦 𑀯𑀺𑀲𑀬𑁄, 𑀓𑀺𑀘𑁆𑀘𑀯𑀸 𑀘 𑀥𑀫𑁆𑀫𑁄 𑀦 𑀯𑀼𑀢𑁆𑀢𑁄. 𑀬𑀲𑁆𑀫𑀺𑀜𑁆𑀳𑀺 𑀪𑀯𑁂 𑀯𑀺𑀲𑀬𑀻 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀢𑀁𑀳𑁂𑀢𑀼𑀓𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀲𑀬𑀲𑁆𑀲 𑀆𑀬𑀢𑀦𑀪𑀸𑀯𑁄 𑀦𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀅𑀯𑀘𑀦𑀁, 𑀬𑀣𑀸 𑀭𑀽𑀧𑀪𑀯𑁂 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀪𑀸𑀯𑁂𑀦. 𑀬𑀲𑁆𑀲 𑀧𑀦 𑀬𑀢𑁆𑀣 𑀯𑀘𑀦𑀁, 𑀢𑀲𑁆𑀲 𑀢𑀢𑁆𑀣 𑀯𑀺𑀲𑀬𑀻𑀲𑀩𑁆𑀪𑀸𑀯𑀳𑁂𑀢𑀼𑀓𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄 𑀯𑀼𑀢𑁆𑀢𑁄 𑀤𑀺𑀝𑁆𑀞𑁄 𑀬𑀣𑀸 𑀢𑀢𑁆𑀣𑁂𑀯 𑀭𑀽𑀧𑀸𑀬𑀢𑀦𑀲𑁆𑀲. 𑀬𑀤𑀺 𑀯𑀺𑀲𑀬𑀻𑀲𑀩𑁆𑀪𑀸𑀯𑀳𑁂𑀢𑀼𑀓𑁄 𑀯𑀺𑀲𑀬𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄, 𑀓𑀣𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀳𑀺 𑀘𑀓𑁆𑀔𑀸𑀬𑀢𑀦𑀁 𑀦𑀢𑁆𑀣𑀺, 𑀅𑀘𑀓𑁆𑀔𑀸𑀬𑀢𑀦𑀪𑀸𑀯𑁂𑀦 𑀘 𑀦𑁂𑀲𑀁 𑀭𑀽𑀧𑀸𑀬𑀢𑀦𑀁 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀭𑀽𑀧𑀥𑀸𑀢𑀼𑀬𑀁 𑀲𑀜𑁆𑀜𑀻𑀦𑀁 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀯𑀘𑀦𑀁, 𑀢𑁂𑀦 𑀭𑀽𑀧𑀸𑀬𑀢𑀦𑀲𑁆𑀲𑀸𑀧𑀺 𑀅𑀯𑀘𑀦𑀦𑁆𑀢𑀺 𑀅𑀲𑀜𑁆𑀜𑀻𑀦𑀁 𑀏𑀓𑀁 𑀆𑀬𑀢𑀦𑀁 𑀯𑀢𑁆𑀢𑀩𑁆𑀩𑀁. 𑀬𑀣𑀸𑀲𑀓𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀪𑀸𑀯𑀸𑀧𑁂𑀓𑁆𑀔𑀸𑀬 𑀬𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄 𑀅𑀢𑁆𑀣𑀺, 𑀢𑁂𑀲𑀼 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁂𑀲𑀼 𑀢𑀤𑀪𑀸𑀯𑀢𑁄 𑀭𑀽𑀧𑀥𑀸𑀢𑀼𑀬𑀁 𑀲𑀜𑁆𑀜𑀻𑀦𑀁 𑀕𑀦𑁆𑀥𑀸𑀤𑀺𑀓𑁂 𑀯𑀺𑀲𑀼𑀁 𑀆𑀬𑀢𑀦𑀪𑀸𑀯𑁂𑀦 𑀅𑀯𑀢𑁆𑀯𑀸 𑀥𑀫𑁆𑀫𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄, 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀘 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀥𑀫𑁆𑀫𑀸𑀬𑀢𑀦𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀏𑀢𑀤𑀢𑁆𑀣𑀜𑁆𑀳𑀺 ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀦𑀸𑀫𑀓𑀭𑀡𑀁, 𑀧𑀺𑀝𑁆𑀞𑀺𑀯𑀝𑁆𑀝𑀓𑀸𑀦𑀺 𑀯𑀸 𑀢𑀸𑀦𑀺 𑀓𑀢𑁆𑀯𑀸 ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀘 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 𑀅𑀲𑀜𑁆𑀜𑀻𑀦𑀁 𑀭𑀽𑀧𑀸𑀬𑀢𑀦𑀁 𑀯𑀼𑀢𑁆𑀢𑀁, 𑀢𑁂𑀦 𑀲𑀜𑁆𑀜𑀻𑀦𑀫𑁆𑀧𑀺 𑀕𑀦𑁆𑀥𑀸𑀤𑀻𑀦𑀁 𑀯𑀺𑀲𑀼𑀁 𑀕𑀳𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀲 𑀦𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁧𑁭) 𑀯𑀼𑀢𑁆𑀢𑀁. 𑀅𑀲𑀢𑀺𑀧𑀺 𑀳𑀺 𑀅𑀢𑁆𑀢𑀦𑁄 𑀇𑀦𑁆𑀤𑁆𑀭𑀺𑀬𑁂 𑀭𑀽𑀧𑀲𑁆𑀲 𑀯𑀡𑁆𑀡𑀸𑀬𑀢𑀦𑀲𑀪𑀸𑀯𑀸𑀢𑀺𑀓𑁆𑀓𑀫𑁄 𑀦𑀢𑁆𑀣𑁂𑀯𑀸𑀢𑀺 𑀢𑀁 𑀭𑀽𑀧𑀸𑀬𑀢𑀦𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀘 𑀦𑀬𑀤𑀲𑁆𑀲𑀦𑁂𑀦 𑀕𑀦𑁆𑀥𑀸𑀤𑀻𑀦𑀺 𑀢𑀻𑀡𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀜𑁆𑀜𑀻𑀦𑀁 𑀅𑀝𑁆𑀞 𑀆𑀬𑀢𑀦𑀸𑀦𑀺, 𑀅𑀲𑀜𑁆𑀜𑀻𑀦𑀁 𑀧𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀭𑀽𑀧𑀮𑁄𑀓𑁂 𑀨𑀼𑀲𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀣𑀯𑀻𑀆𑀤𑀻𑀦𑀁 𑀯𑀘𑀻𑀖𑁄𑀲𑁄 𑀏𑀯 𑀦 𑀲𑀺𑀬𑀸. 𑀦 𑀳𑀺 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑀫𑀦𑁆𑀢𑀭𑁂𑀦 𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀦 𑀘 𑀨𑀼𑀲𑀦𑀲𑀪𑀸𑀯𑀸𑀦𑀁 𑀓𑀢𑁆𑀣𑀘𑀺 𑀅𑀨𑀼𑀲𑀦𑀲𑀪𑀸𑀯𑀢𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑀗𑁆𑀔𑀸𑀢𑀲𑁆𑀲 𑀘 𑀪𑀽𑀢𑀢𑁆𑀢𑀬𑀲𑁆𑀲 𑀅𑀪𑀸𑀯𑁂 𑀭𑀽𑀧𑀪𑀯𑁂 𑀭𑀽𑀧𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀲𑀫𑁆𑀪𑀯𑁄 𑀏𑀯 𑀦 𑀲𑀺𑀬𑀸, 𑀢𑀲𑁆𑀫𑀸 𑀨𑀼𑀲𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬𑀧𑀺 𑀧𑀣𑀯𑀻𑀆𑀤𑀻𑀦𑀁 𑀢𑀢𑁆𑀣 𑀓𑀸𑀬𑀺𑀦𑁆𑀤𑁆𑀭𑀺𑀬𑀸𑀪𑀸𑀯𑁂𑀦 𑀢𑁂𑀲𑀁 𑀨𑁄𑀝𑁆𑀞𑀩𑁆𑀩𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀥𑀸𑀢𑀼𑀬𑀁 𑀢𑁂𑀲𑀁 𑀲𑀧𑁆𑀧𑀝𑀺𑀖𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀺 (𑀧𑀝𑁆𑀞𑀸. 𑁨.𑁨𑁨.𑁧𑁭). 𑀧𑀝𑀺𑀖𑁄 𑀳𑁂𑀢𑁆𑀣 𑀪𑀽𑀢𑀢𑁆𑀢𑀬𑀲𑁆𑀲 𑀓𑀸𑀬𑀧𑁆𑀧𑀲𑀸𑀤𑀁 𑀧𑀢𑀺 𑀢𑀁𑀦𑀺𑀲𑁆𑀲𑀬𑀪𑀽𑀢𑀖𑀝𑁆𑀝𑀦𑀤𑁆𑀯𑀸𑀭𑁂𑀦 𑀅𑀪𑀺𑀫𑀼𑀔𑀪𑀸𑀯𑁄, 𑀲𑁄 𑀘 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑀪𑀸𑀯𑀲𑁆𑀲 𑀖𑀝𑁆𑀝𑀦𑀸𑀬 𑀅𑀪𑀸𑀯𑀢𑁄 𑀦𑀢𑁆𑀣𑀺. 𑀦𑀦𑀼 ‘‘𑀤𑁆𑀯𑁂 𑀆𑀬𑀢𑀦𑀸𑀦𑀻’’𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬𑀸𑀬𑀢𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀓𑀲𑁆𑀫𑀸 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀺𑀧𑀺 𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺? ‘‘𑀦𑀬𑀤𑀲𑁆𑀲𑀦𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣 𑀭𑀽𑀧𑀸𑀬𑀢𑀦𑀲𑁆𑀲𑁂𑀯 𑀯𑀘𑀦𑀁 𑀓𑀤𑀸𑀘𑀺 𑀅𑀜𑁆𑀜𑀪𑀽𑀫𑀺𑀓𑀸𑀦𑀁 𑀧𑀲𑀸𑀤𑀲𑁆𑀲 𑀯𑀺𑀲𑀬𑀪𑀸𑀯𑀁 𑀲𑀦𑁆𑀥𑀸𑀬, 𑀦 𑀧𑀦 𑀇𑀢𑀭𑁂𑀲𑀁 𑀅𑀪𑀸𑀯𑀢𑁄. 𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀆𑀬𑀢𑀦𑀲𑀪𑀸𑀯𑀸𑀪𑀸𑀯𑀢𑁄. 𑀅𑀲𑀜𑁆𑀜𑀻𑀦𑀜𑁆𑀳𑀺 𑀭𑀽𑀧𑀸𑀬𑀢𑀦𑀁 𑀲𑀫𑀸𑀦𑀪𑀽𑀫𑀺𑀓𑀸𑀦𑀁 𑀯𑁂𑀳𑀧𑁆𑀨𑀮𑀸𑀦𑀁, 𑀉𑀧𑀭𑀺𑀪𑀽𑀫𑀺𑀓𑀸𑀦𑀜𑁆𑀘 𑀲𑀼𑀤𑁆𑀥𑀯𑀸𑀲𑀸𑀦𑀁 𑀧𑀲𑀸𑀤𑀲𑁆𑀲 𑀯𑀺𑀲𑀬𑀪𑀸𑀯𑀁 𑀕𑀘𑁆𑀙𑀢𑀺, 𑀦 𑀧𑀦 𑀕𑀦𑁆𑀥𑀭𑀲𑀸𑀢𑀺 𑀢𑁂𑀲𑀁𑀬𑁂𑀯 𑀢𑀢𑁆𑀣𑀸𑀯𑀘𑀦𑀁 𑀬𑀼𑀢𑁆𑀢𑀁. 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀲𑁂𑀥𑁄 𑀓𑀢𑁄. 𑀬𑀤𑀺𑀧𑀺 𑀘𑁂𑀢𑀁 𑀯𑀘𑀦𑀁 𑀢𑀢𑁆𑀣 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀪𑀸𑀯𑀯𑀺𑀪𑀸𑀯𑀦𑀁 𑀦 𑀳𑁄𑀢𑀺, 𑀅𑀢𑁆𑀣𑀺𑀪𑀸𑀯𑀤𑀻𑀧𑀦𑀫𑁆𑀧𑀺 𑀧𑀦 𑀅𑀜𑁆𑀜𑀯𑀘𑀦𑀁 𑀦𑀢𑁆𑀣𑁂𑀯𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀅𑀝𑁆𑀞𑀓𑀣𑀸𑀲𑀼 𑀢𑀢𑁆𑀣 𑀦𑁂𑀲𑀁 𑀅𑀢𑁆𑀣𑀺𑀪𑀸𑀯𑀲𑁆𑀲 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀬𑀜𑁆𑀳𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀸𑀴𑀺𑀬𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀁 𑀧𑀸𑀴𑀺 𑀯𑀺𑀬 𑀧𑀫𑀸𑀡𑀪𑀽𑀢𑀁 𑀅𑀕𑀭𑀳𑀺𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯𑀚𑁆𑀚𑀢𑀦𑀸 𑀆𑀕𑀢𑀢𑁆𑀢𑀸. 𑀢𑀢𑁆𑀣 𑀲𑀺𑀬𑀸 𑁋 𑀬𑀁 𑀧𑀸𑀴𑀺𑀬𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀢𑀁 𑀧𑀫𑀸𑀡𑀁. 𑀇𑀤𑀁 𑀧𑀦 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦𑀬𑀺𑀤𑀫𑁂𑀯𑀁 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀧𑀝𑀺𑀧𑀸𑀤𑀺𑀢𑀢𑁆𑀢𑀸. 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀸𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀦𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀁 𑀲𑀢𑁆𑀢𑀲𑀼𑀜𑁆𑀜𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑁄 𑀥𑀸𑀢𑀼𑀤𑁂𑀲𑀦𑀸𑀢𑀺 𑀆𑀬𑀢𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀁𑀬𑁂𑀯 𑀥𑀸𑀢𑀼𑀪𑀸𑀯𑀤𑀻𑀧𑀦𑀢𑁄 𑀥𑀸𑀢𑀼𑀪𑀸𑀯𑀲𑁆𑀲𑀸𑀧𑀺 𑀦𑁂𑀲𑀁 𑀅𑀯𑀘𑀦𑀁 𑀬𑀼𑀚𑁆𑀚𑀢𑀺 𑀏𑀯, 𑀢𑀲𑁆𑀫𑀸 𑀬𑀣𑀸 𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀣𑀸 𑀘𑀓𑁆𑀔𑀼𑀤𑀲𑀓𑀸𑀤𑀺𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀭𑀽𑀧𑀕𑀡𑀦𑀸 𑀓𑀢𑀸𑀢𑀺 𑀦 𑀏𑀢𑁆𑀣 𑀥𑀫𑁆𑀫𑀢𑀸𑀯𑀺𑀮𑁄𑀫𑀦𑀸𑀲𑀗𑁆𑀓𑀸𑀬 𑀑𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀴𑀓𑀲𑁆𑀲 𑀚𑀸𑀢𑀓𑀸𑀮𑁂 𑀉𑀡𑁆𑀡𑀸 𑀚𑀸𑀢𑀺𑀉𑀡𑁆𑀡𑀸𑀢𑀺 𑀧𑀞𑀫𑁄 𑀅𑀢𑁆𑀣𑁄. 𑀢𑀢𑁄 𑀲𑀼𑀔𑀼𑀫𑀢𑀭𑀢𑀁 𑀲𑀦𑁆𑀥𑀸𑀬 ‘‘𑀕𑀩𑁆𑀪𑀁…𑀧𑁂… 𑀇𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀪𑀯𑀦𑀲𑁆𑀲 𑀪𑁂𑀤𑁄 𑀯𑀸 𑀲𑀫𑁆𑀪𑀯𑀪𑁂𑀤𑁄, 𑀧𑀯𑀢𑁆𑀢𑀺𑀪𑁂𑀤𑁄𑀢𑀺 𑀅𑀢𑁆𑀣𑁄.

𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀽𑀢𑀺 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀁, 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀳𑀺 𑀭𑀽𑀧𑀻𑀩𑁆𑀭𑀳𑁆𑀫𑁂 𑀦𑀺𑀤𑁆𑀥𑀸𑀭𑁂𑀢𑀻’’𑀢𑀺 𑀆𑀳. 𑀢𑁂𑀦 ‘‘𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀭𑀸𑀲𑀺𑀢𑁄 ‘‘𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀽’’𑀢𑀺 𑀯𑀺𑀲𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀦 𑀲𑀫𑁂𑀢𑀻𑀢𑀺 𑀦 𑀲𑀁𑀲𑀦𑁆𑀤𑀢𑀺, 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀳𑀻’’𑀢𑀺𑀆𑀤𑀺𑀫𑀸𑀳.

𑀏𑀓𑀸𑀤𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀲𑁆𑀲 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀸𑀦𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺. 𑀓𑀲𑁆𑀲𑀘𑀺 𑀤𑀲𑀸𑀬𑀢𑀦𑀸𑀦𑀻𑀢𑀺 𑀅𑀦𑁆𑀥𑀲𑁆𑀲 𑀘𑀓𑁆𑀔𑀸𑀬𑀢𑀦𑀯𑀚𑁆𑀚𑀸𑀦𑀺. 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀻𑀢𑀺 𑀩𑀥𑀺𑀭𑀲𑁆𑀲 𑀲𑁄𑀢𑀸𑀬𑀢𑀦𑀯𑀚𑁆𑀚𑀸𑀦𑀺. 𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀻𑀢𑀺 𑀅𑀦𑁆𑀥𑀩𑀥𑀺𑀭𑀲𑁆𑀲 𑀘𑀓𑁆𑀔𑀼𑀲𑁄𑀢𑀸𑀬𑀢𑀦𑀯𑀚𑁆𑀚𑀸𑀦𑀺. 𑀓𑀲𑁆𑀲𑀘𑀺 𑀲𑀢𑁆𑀢𑀸𑀬𑀢𑀦𑀸𑀦𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀭𑀽𑀧𑀕𑀦𑁆𑀥𑀭𑀲𑀓𑀸𑀬𑀨𑁄𑀝𑁆𑀞𑀩𑁆𑀩𑀫𑀦𑁄𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀁.

‘‘𑀦 𑀯𑀼𑀢𑁆𑀢𑀁 𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀇𑀤𑀁 ‘‘𑀦 𑀳𑀺 𑀧𑀸𑀴𑀺𑀬𑀁…𑀧𑁂… 𑀯𑀼𑀢𑁆𑀢𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁. 𑀘𑀓𑁆𑀔𑀼𑀲𑁄𑀢𑀖𑀸𑀦𑀯𑀺𑀓𑀮𑀲𑁆𑀲 𑀳𑀺 𑀉𑀧𑀧𑀚𑁆𑀚𑀫𑀸𑀦𑀲𑁆𑀲 𑀅𑀝𑁆𑀞𑁂𑀯 𑀆𑀬𑀢𑀦𑀸𑀦𑀺 𑀲𑀺𑀬𑀼𑀦𑁆𑀢𑀺. 𑀲𑀢𑀺 𑀘 𑀅𑀖𑀸𑀦𑀓𑀼𑀧𑀧𑀢𑁆𑀢𑀺𑀬𑀁 𑀧𑀼𑀦𑀧𑀺 ‘‘𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀬𑀣𑀸 𑀅𑀦𑁆𑀥𑀩𑀥𑀺𑀭𑀲𑁆𑀲 𑀯𑀲𑁂𑀦 ‘‘𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁦𑁭) 𑀏𑀓𑀯𑀸𑀭𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀦𑁆𑀥𑀸𑀖𑀸𑀦𑀓𑀲𑁆𑀲, 𑀩𑀥𑀺𑀭𑀸𑀖𑀸𑀦𑀓𑀲𑁆𑀲 𑀘 𑀯𑀲𑁂𑀦 ‘‘𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀦𑀯𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀢𑀣𑀸…𑀧𑁂… 𑀦 𑀘 𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀁 𑀥𑀸𑀢𑀼𑀧𑀸𑀢𑀼𑀪𑀸𑀯𑀸𑀤𑀺𑀧𑀜𑁆𑀳𑁂𑀲𑀽𑀢𑀺 ‘‘𑀓𑀲𑁆𑀲𑀘𑀺 𑀏𑀓𑀸𑀤𑀲 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑀲 𑀥𑀸𑀢𑀼𑀬𑁄, 𑀓𑀲𑁆𑀲𑀘𑀺 𑀅𑀧𑀭𑀸 𑀤𑀲 𑀥𑀸𑀢𑀼𑀬𑁄, 𑀓𑀲𑁆𑀲𑀘𑀺 𑀦𑀯 𑀥𑀸𑀢𑀼𑀬𑁄, 𑀓𑀲𑁆𑀲𑀘𑀺 𑀲𑀢𑁆𑀢 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁦𑁭) 𑀏𑀯𑀁 𑀥𑀸𑀢𑀼𑀧𑀸𑀢𑀼𑀪𑀸𑀯𑀧𑀜𑁆𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀲𑁆𑀲𑀘𑀺 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀆𑀤𑀺 (𑀯𑀺𑀪. 𑁧𑁦𑁦𑁭) 𑀦𑀬𑀧𑁆𑀧𑀯𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀧𑀜𑁆𑀳𑀸𑀤𑀬𑁄 𑀲𑀗𑁆𑀕𑀳𑀺𑀢𑀸.

𑀏𑀢𑁆𑀣 𑀘 𑀬𑀣𑀸 ‘‘𑀲𑀢𑁆𑀢𑀢𑀺 𑀉𑀓𑁆𑀓𑀁𑀲𑀢𑁄 𑀘 𑀭𑀽𑀧𑀸𑀦𑀻’’𑀢𑀺 𑀧𑀤𑀁 ‘‘𑀲𑀁𑀲𑁂𑀤𑀚𑁄𑀧𑀧𑀸𑀢𑀻𑀲𑀽’’𑀢𑀺 𑀏𑀢𑁆𑀣 𑀬𑁄𑀦𑀺𑀤𑁆𑀯𑀬𑀯𑀲𑁂𑀦 𑀬𑁄𑀚𑀻𑀬𑀢𑀺, 𑀦 𑀏𑀯𑀁 ‘‘𑀅𑀯𑀓𑀁𑀲𑀢𑁄 𑀢𑀺𑀁𑀲𑀸’’𑀢𑀺 𑀇𑀤𑀁, 𑀇𑀤𑀁 𑀧𑀦 𑀲𑀁𑀲𑁂𑀤𑀚𑀬𑁄𑀦𑀺𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁, 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸𑀧𑀺 𑀏𑀓𑀤𑁂𑀲𑁄 𑀲𑀫𑁆𑀩𑀦𑁆𑀥𑀁 𑀮𑀪𑀢𑀻𑀢𑀺. 𑀲𑀁𑀲𑁂𑀤𑀚𑀲𑁆𑀲𑁂𑀯 𑀘 𑀚𑀘𑁆𑀘𑀦𑁆𑀥𑀩𑀥𑀺𑀭𑀅𑀖𑀸𑀦𑀓𑀦𑀧𑀼𑀁𑀲𑀓𑀲𑁆𑀲 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀦 𑀑𑀧𑀧𑀸𑀢𑀺𑀓𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀧𑀦 ‘‘𑀑𑀧𑀧𑀸𑀢𑀺𑀓𑀲𑁆𑀲 𑀚𑀘𑁆𑀘𑀦𑁆𑀥…𑀧𑁂… 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑁄 𑀳𑀺 𑀧𑀫𑀸𑀤𑀧𑀸𑀞𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸𑀬 ‘‘𑀓𑀸𑀫𑀥𑀸𑀢𑀼𑀬𑀁 𑀧𑀦 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, ‘𑀓𑀲𑁆𑀲𑀘𑀺 𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’𑀢𑀺 𑀯𑀤𑁂𑀬𑁆𑀬𑀸’’𑀢𑀺 (𑀬𑀫. 𑀅𑀝𑁆𑀞. 𑀆𑀬𑀢𑀦𑀬𑀫𑀓 𑁧𑁮-𑁨𑁧) 𑀯𑀓𑁆𑀔𑀢𑀺. 𑀅𑀧𑀭𑁂 𑀧𑀦𑀸𑀳𑀼 ‘‘𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀸𑀯 ‘𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀻’𑀢𑀺 𑀧𑀸𑀴𑀺 𑀑𑀧𑀧𑀸𑀢𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀢𑀣𑀸 𑀘 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀬𑀸 𑀅𑀬𑀫𑀢𑁆𑀣𑀯𑀡𑁆𑀡𑀦𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺𑀬𑁂𑀯𑀸’’𑀢𑀺. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀑𑀧𑀧𑀸𑀢𑀺𑀓𑀕𑁆𑀕𑀳𑀡𑁂𑀦 𑀲𑀁𑀲𑁂𑀤𑀚𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 ‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’𑀢𑀺𑀆𑀤𑀻𑀦𑀁 (𑀯𑀺𑀪. 𑁧𑁦𑁦𑁭) 𑀉𑀤𑁆𑀤𑁂𑀲𑁂 ‘𑀑𑀧𑀧𑀸𑀢𑀺𑀓𑀸𑀦𑀁 𑀧𑁂𑀢𑀸𑀦’𑀦𑁆𑀢𑀺𑀆𑀤𑀺𑀦𑀸 𑀑𑀧𑀧𑀸𑀢𑀺𑀓𑀕𑁆𑀕𑀳𑀡𑀫𑁂𑀯 𑀓𑀢𑀁, 𑀦 𑀲𑀁𑀲𑁂𑀤𑀚𑀕𑁆𑀕𑀳𑀡’’𑀦𑁆𑀢𑀺, 𑀢𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁𑀬𑁂𑀯 𑀲𑀁𑀲𑁂𑀤𑀚𑀸𑀦𑀁 𑀑𑀧𑀧𑀸𑀢𑀺𑀓𑁂𑀲𑀼 𑀲𑀗𑁆𑀕𑀳𑀡𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀁𑀲𑁂𑀤𑀚𑀬𑁄𑀦𑀺𑀓𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑁂𑀦 𑀑𑀧𑀧𑀸𑀢𑀺𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸’’𑀢𑀺 ‘‘𑀧𑀥𑀸𑀦𑀸𑀬 𑀯𑀸 𑀬𑁄𑀦𑀺𑀬𑀸 𑀲𑀩𑁆𑀩𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀬𑁄𑀦𑀺𑀁 𑀤𑀲𑁆𑀲𑁂𑀢𑀼𑀁 ‘𑀑𑀧𑀧𑀸𑀢𑀺𑀓𑀸𑀦’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑁄𑀦𑀺𑀤𑁆𑀯𑀬𑀁 𑀲𑀭𑀽𑀧𑁂𑀦𑁂𑀯 𑀧𑀓𑀸𑀲𑁂𑀢𑀼𑀁, 𑀲𑀁𑀲𑁂𑀤𑀚𑀬𑁄𑀦𑀺𑀯𑀲𑁂𑀦𑁂𑀯 𑀘 𑀅𑀯𑀓𑀁𑀲𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸 𑀇𑀢𑀭𑀁 𑀅𑀲𑀗𑁆𑀕𑀳𑁂𑀢𑁆𑀯𑀸 ‘‘𑀲𑀁𑀲𑁂𑀤𑀚𑁄𑀧𑀧𑀸𑀢𑀻𑀲𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀲𑀩𑁆𑀩𑀁 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀦𑁆𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀘𑀼𑀢𑀺𑀬𑀸, 𑀢𑀤𑀦𑀦𑁆𑀢𑀭𑀸𑀬 𑀫𑀺𑀲𑁆𑀲𑀸𑀫𑀺𑀲𑁆𑀲𑀪𑁂𑀤𑀸𑀬 𑀧𑀝𑀺𑀲𑀦𑁆𑀥𑀺𑀬𑀸. 𑀔𑀦𑁆𑀥𑀸𑀤𑀻𑀳𑀻𑀢𑀺 𑀔𑀦𑁆𑀥𑀸𑀭𑀫𑁆𑀫𑀡𑀕𑀢𑀺𑀳𑁂𑀢𑀼𑀯𑁂𑀤𑀦𑀸𑀧𑀻𑀢𑀺𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺. 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺 𑀏𑀯𑀫𑀸𑀤𑀺𑀦𑁄 𑀅𑀭𑀽𑀧𑀪𑀽𑀫𑀻𑀲𑀼𑀬𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀪𑁂𑀤𑀸𑀪𑁂𑀤𑀯𑀺𑀲𑁂𑀲𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀦𑀬𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀘𑁆𑀘𑀲𑀼𑀕𑀢𑀻𑀢𑀺 𑀫𑀳𑀕𑁆𑀕𑀢𑀯𑀚𑁆𑀚𑀲𑀼𑀕𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦’’𑀦𑁆𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀬𑀣𑀸 𑀫𑀳𑀕𑁆𑀕𑀢𑀸𑀯𑀚𑁆𑀚𑀸, 𑀏𑀯𑀁 𑀉𑀢𑁆𑀢𑀭𑀓𑀼𑀭𑀼𑀓𑀯𑀚𑁆𑀚𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸𑀢𑀺 𑀯𑀼𑀢𑁆𑀢𑀲𑀼𑀕𑀢𑀺𑀘𑀼𑀢𑀺𑀬𑀸. 𑀬𑀤𑀺𑀧𑀺 ‘‘𑀅𑀬𑀁 𑀦𑀸𑀫 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀻’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀤𑁂𑀲𑀦𑀸 𑀧𑀦 𑀲𑁄𑀢𑀧𑀢𑀺𑀢𑀸 𑀕𑀢𑀸𑀢𑀺 𑀯𑀤𑀦𑁆𑀢𑀺. 𑀦𑀺𑀬𑀢𑀩𑁄𑀥𑀺𑀲𑀢𑁆𑀢𑀸𑀧𑁂𑀓𑁆𑀔𑀸𑀬 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺 𑀅𑀯𑀻𑀘𑀺𑀆𑀤𑀻𑀲𑀼 𑀅𑀦𑀼𑀧𑀧𑀚𑁆𑀚𑀦𑀢𑁄. ‘‘𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀘𑁆𑀘𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀻𑀢𑀺 𑀧𑀦 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀬𑀫𑁂𑀯𑀸𑀢𑀺 𑀅𑀢𑁆𑀢𑀦𑀸 𑀏𑀯. ‘‘𑀪𑁂𑀤𑀯𑀺𑀲𑁂𑀲𑁄 𑀏𑀯 𑀘 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑀺𑀢𑁄’’𑀢𑀺 𑀇𑀤𑀁 ‘‘𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬𑀸’’𑀢𑀺𑀆𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀘𑀢𑀼𑀓𑁆𑀔𑀦𑁆𑀥𑀸𑀬…𑀧𑁂… 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀇𑀤𑀁 𑀧𑀦 𑀅𑀪𑁂𑀤𑀯𑀺𑀲𑁂𑀲𑀤𑀲𑁆𑀲𑀦𑀫𑁂𑀯𑀸𑀢𑀺. 𑀏𑀓𑁂𑀓𑀲𑁆𑀫𑀺𑀁 𑀪𑁂𑀤𑁂𑀢𑀺 ‘‘𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀓𑁂 𑀏𑀓𑁂𑀓𑀲𑁆𑀫𑀺𑀁 𑀪𑀸𑀕𑁂. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 ‘‘𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀫𑀳𑀕𑁆𑀕𑀢𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑁂𑀤𑁂, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀸 𑀪𑀯𑀸𑀤𑀺𑀓𑁂 𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀼𑀫𑁆𑀫𑀢𑁆𑀣𑁂 𑀅𑀬𑀁 𑀢𑁄-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸𑀢𑀺 𑀢𑀢𑁆𑀣 𑀳𑁂𑀢𑀼𑀁 𑀯𑀺𑀦𑀸’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀲𑁆𑀫𑀺𑀁 𑀧𑀼𑀭𑀺𑀫𑀪𑀯𑁂 𑀦𑀺𑀧𑁆𑀨𑀦𑁆𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀓𑀁 𑀓𑀸𑀭𑀡𑀁 𑀯𑀺𑀦𑀸 𑀦 𑀳𑁄𑀢𑀻𑀢𑀺.

𑀅𑀢𑀺𑀫𑀦𑁆𑀤𑀪𑀸𑀯𑀽𑀧𑀕𑀫𑀦𑀁 𑀲𑀓𑀺𑀘𑁆𑀘𑀸𑀲𑀫𑀢𑁆𑀣𑀢𑀸. 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀯𑀲𑁂𑀦 𑀘𑀼𑀢𑀺 𑀧𑀝𑀺𑀲𑀺𑀤𑁆𑀥𑀸, 𑀦 𑀢𑀤𑀦𑀦𑁆𑀢𑀭𑀯𑀺𑀜𑁆𑀜𑀸𑀡𑀯𑀲𑁂𑀦. 𑀲𑁆𑀯𑀸𑀬𑀫𑀢𑁆𑀣𑁄 ‘‘𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀫𑀸𑀕𑀢𑁄𑀢𑀺 𑀆𑀳 ‘‘𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀫𑁆𑀧𑀺 𑀳𑀺 𑀧𑀼𑀩𑁆𑀩𑁂 𑀘𑀼𑀢𑀺 𑀤𑀲𑁆𑀲𑀺𑀢𑀸’’𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀫𑀓𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀡𑀢𑀢𑁆𑀢𑀸𑀢𑀺 𑀧𑀭𑀺𑀧𑀸𑀓𑀯𑀲𑁂𑀦 𑀧𑀭𑀺𑀬𑁄𑀲𑀸𑀦𑀁 𑀕𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀨𑀲𑁆𑀲𑀸𑀤𑀬𑁄 𑀬𑀣𑀸𑀯𑀼𑀢𑁆𑀢𑀘𑁂𑀢𑀦𑀸𑀲𑀳𑀚𑀸𑀢𑀨𑀲𑁆𑀲𑀸𑀤𑀬𑁄. 𑀬𑀣𑀸𑀉𑀧𑀝𑁆𑀞𑀺𑀢𑁂 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑁂 𑀅𑀦𑁂𑀓𑀯𑀸𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀲𑀦𑁆𑀢𑀸𑀦𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀁 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁄.

𑀲𑀦𑁆𑀢𑀸𑀦𑀯𑀲𑁂𑀦 𑀦𑀺𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀦𑀫𑀦𑀸𑀤𑀺𑀓𑀺𑀭𑀺𑀬𑀸𑀦𑀁 𑀏𑀓𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀬𑁂𑀯 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀫𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀧𑀣𑀯𑀺𑀬𑀁 𑀲𑀩𑀮𑀧𑀬𑁄𑀕𑁂𑀳𑀻𑀢𑀺 𑀧𑀣𑀯𑀺𑀬𑀸 𑀆𑀥𑀸𑀭𑀡𑀪𑀽𑀢𑀸𑀬 𑀅𑀢𑁆𑀢𑀦𑁄 𑀩𑀮𑁂𑀦 𑀧𑀬𑁄𑀕𑁂𑀦 𑀘 𑀓𑀭𑀡𑀪𑀽𑀢𑁂𑀦.

𑀲𑀤𑁆𑀤𑀳𑁂𑀢𑀼𑀓𑁄𑀢𑀺 𑀲𑀤𑁆𑀤𑀲𑁆𑀲 𑀧𑀥𑀸𑀦𑀸𑀤𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀤𑀺𑀲𑁄 𑀧𑀩𑁆𑀩𑀢𑀓𑀼𑀘𑁆𑀙𑀺𑀆𑀤𑀺𑀧𑀤𑁂𑀲𑁄𑀧𑀺 𑀢𑀲𑁆𑀲 𑀳𑁂𑀢𑀼𑀬𑁂𑀯. 𑀧𑀤𑀻𑀧𑀦𑁆𑀢𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑁂𑀮𑀯𑀝𑁆𑀝𑀺𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁄 𑀲𑀤𑁆𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸. 𑀧𑀝𑀺𑀖𑁄𑀲𑀸𑀤𑀻𑀦𑀜𑁆𑀳𑀺 𑀲𑀤𑁆𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄 𑀲𑀢𑀺 𑀧𑀼𑀭𑀺𑀫𑀲𑀺𑀤𑁆𑀥𑀺𑀬𑀁 𑀢𑁂 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀤𑁂𑀲𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀧𑀦 𑀢𑁂 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸’’𑀢𑀺. 𑀉𑀧𑀫𑁂𑀬𑁆𑀬𑁂𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀬𑀣𑀸 𑀘 𑀳𑁂𑀢𑀼𑀤𑁂𑀲𑀁 𑀦 𑀕𑀘𑁆𑀙𑀢𑀺 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁, 𑀏𑀯𑀁 𑀢𑀢𑁄 𑀦𑀸𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸 𑀦…𑀧𑁂… 𑀆𑀕𑀢’’𑀦𑁆𑀢𑀺. 𑀢𑁂 𑀲𑀤𑁆𑀤𑀸𑀤𑀬𑁄 𑀧𑀘𑁆𑀘𑀬𑀸 𑀏𑀢𑁂𑀲𑀦𑁆𑀢𑀺 𑀢𑀧𑁆𑀧𑀘𑁆𑀘𑀬𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀉𑀧𑀫𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀧𑀼𑀭𑀺𑀫𑀪𑀯𑀳𑁂𑀢𑀼𑀤𑁂𑀲𑁂 𑀲𑀦𑁆𑀦𑀺𑀳𑀺𑀢𑀁 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀢𑀢𑁄 𑀅𑀜𑁆𑀜𑀢𑁆𑀭 𑀪𑀯𑀦𑁆𑀢𑀭𑁂 𑀢𑀁 𑀉𑀧𑀕𑀦𑁆𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀢𑁄 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀧𑀘𑁆𑀘𑀬𑀤𑁂𑀲𑀁 𑀅𑀦𑀼𑀧𑀕𑀢𑀫𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀧𑀞𑀫𑁄 𑀅𑀢𑁆𑀣𑁄. 𑀧𑀞𑀫𑀁 𑀧𑀘𑁆𑀘𑀬𑁂𑀦 𑀲𑀫𑁄𑀥𑀸𑀦𑀕𑀢𑀁 𑀳𑀼𑀢𑁆𑀯𑀸 𑀢𑀢𑁄 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀪𑀸𑀯𑀁 𑀦𑀸𑀧𑀚𑁆𑀚𑀢𑀻𑀢𑀺 𑀤𑀼𑀢𑀺𑀬𑁄 𑀅𑀢𑁆𑀣𑁄. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀬𑀸𑀬 ‘‘𑀦 𑀔𑀻𑀭𑀢𑁄 𑀤𑀥𑀺 𑀲𑀫𑁆𑀪𑀽𑀢𑀁 𑀲𑀺𑀬𑀸, 𑀦 𑀔𑀻𑀭𑀲𑀸𑀫𑀺𑀦𑁄 𑀤𑀥𑀺 𑀲𑀺𑀬𑀸’’𑀢𑀺 𑀘 𑀔𑀻𑀭𑀤𑀥𑀻𑀲𑀼 𑀏𑀓𑀦𑁆𑀢𑀁 𑀏𑀓𑀢𑀸𑀬 𑀦𑀸𑀦𑀢𑀸𑀬 𑀘 𑀤𑁄𑀲𑀬𑁄𑀚𑀦𑀸 𑀓𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀩𑀻𑀚𑀸𑀤𑀻𑀲𑀼 𑀲𑀩𑁆𑀩𑀳𑁂𑀢𑀽𑀲𑀼, 𑀅𑀗𑁆𑀓𑀼𑀭𑀸𑀤𑀻𑀲𑀼 𑀲𑀩𑁆𑀩𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀳𑁂𑀢𑀼𑀅𑀦𑀼𑀭𑀽𑀧𑀁, 𑀳𑁂𑀢𑀼𑀲𑀫𑀼𑀧𑀦𑁆𑀦𑀸𑀦𑀼𑀭𑀽𑀧𑀜𑁆𑀘 𑀤𑁄𑀲𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀦𑁆𑀢𑀸𑀦𑀩𑀤𑁆𑀥𑁂𑀲𑀼 𑀥𑀫𑁆𑀫𑁂𑀲𑀼 𑀏𑀓𑀦𑁆𑀢𑀏𑀓𑀢𑀸𑀧𑀝𑀺𑀲𑁂𑀥𑁂𑀦 𑀲𑀲𑁆𑀲𑀢𑀕𑀸𑀳𑀲𑁆𑀲 𑀧𑀝𑀺𑀲𑁂𑀥𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀻’’𑀢𑀺. 𑀢𑀣𑀸 𑀏𑀓𑀦𑁆𑀢𑀦𑀸𑀦𑀢𑀸𑀧𑀝𑀺𑀲𑁂𑀥𑁂𑀦 𑀉𑀘𑁆𑀙𑁂𑀤𑀕𑀸𑀳𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀻’’𑀢𑀺. 𑀢𑁂𑀦 𑀓𑀢𑀦𑀸𑀲𑁄, 𑀅𑀓𑀢𑀸𑀕𑀫𑁄 𑀘 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀻𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀦𑀺𑀯𑀸𑀭𑀡𑁂𑀦𑁂𑀯 𑀦𑀺𑀬𑀢𑀺𑀲𑀪𑀸𑀯𑀯𑀸𑀤𑀧𑀝𑀺𑀲𑁂𑀥𑁄𑀧𑀺 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣𑀸𑀢𑀺 𑀅𑀗𑁆𑀓𑀼𑀭𑀸𑀤𑀺𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑁂 𑀪𑀽𑀢𑀼𑀧𑀸𑀤𑀸𑀭𑀽𑀧𑀲𑀦𑁆𑀢𑀸𑀦𑁂. 𑀢𑀦𑁆𑀢𑀺 𑀯𑀺𑀚𑁆𑀚𑀸𑀧𑀸𑀝𑀯𑀸𑀤𑀺. 𑀅𑀜𑁆𑀜𑀲𑁆𑀲𑀸𑀢𑀺 𑀩𑀸𑀮𑀓𑀸𑀮𑁂 𑀓𑀢𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀢𑁄 𑀅𑀜𑁆𑀜𑀲𑁆𑀲. 𑀲𑀗𑁆𑀔𑀸𑀭𑀢𑁄 𑀅𑀜𑁆𑀜𑁄 𑀢𑀡𑁆𑀳𑀸𑀤𑀺𑀓𑁄 𑀅𑀜𑁆𑀜𑀧𑀘𑁆𑀘𑀬𑁄.

𑀦𑀺𑀬𑁆𑀬𑀸𑀢𑀦𑀸𑀤𑀺 𑀏𑀯 𑀨𑀮𑀁 𑀦𑀺𑀬𑁆𑀬𑀸𑀢𑀦𑀸𑀤𑀺𑀨𑀮𑀁, 𑀅𑀨𑀮𑀺𑀢𑀁 𑀦𑀺𑀬𑁆𑀬𑀸𑀢𑀦𑀸𑀤𑀺𑀨𑀮𑀁 𑀏𑀢𑀲𑁆𑀲𑀸𑀢𑀺 𑀅𑀨𑀮𑀺…𑀧𑁂… 𑀨𑀮𑀁, 𑀬𑀣𑀸𑀯𑀼𑀢𑁆𑀢𑀓𑀺𑀭𑀺𑀬𑀸𑀓𑀭𑀡𑀁.

𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀅𑀓𑀢𑀸𑀯𑀬𑀯𑀯𑀺𑀪𑀸𑀕𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀯𑀲𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁 𑀧𑀘𑁆𑀘𑀬𑀥𑀫𑁆𑀫𑁂, 𑀧𑀝𑀺𑀲𑀦𑁆𑀥𑀺𑀪𑁂𑀤𑁂 𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂. 𑀩𑀮𑀯𑀓𑀫𑁆𑀫𑀲𑁆𑀲 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀳𑀺 𑀉𑀧𑀦𑀺𑀲𑁆𑀲𑀬𑁄. ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀯𑀢𑁆𑀢𑁂, 𑀇𑀢𑀭𑁄 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀸𑀤𑀻𑀦𑀁 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺 𑀢𑀁 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀲𑀩𑁆𑀩𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀲𑀳 𑀲𑀗𑁆𑀕𑀡𑁆𑀳𑀸𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 𑀦𑀬𑀺𑀤𑀁 𑀲𑀫𑀸𑀲𑀧𑀤𑀁, 𑀲𑀦𑁆𑀥𑀺𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀤𑁆𑀯𑀸𑀤𑀲𑀲𑀼 𑀅𑀓𑀼𑀲𑀮𑀘𑁂𑀢𑀦𑀸𑀲𑀼. 𑀅𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 𑀏𑀓𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀧𑀪𑁂𑀤𑁄, 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀧𑀪𑁂𑀤𑁄 𑀘𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀦 𑀏𑀢𑁆𑀣 𑀓𑀺𑀜𑁆𑀘𑀺 𑀯𑀺𑀘𑀸𑀭𑁂𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 𑀇𑀤𑀁 ‘𑀙𑀦𑁆𑀦𑀁 𑀧𑀯𑀢𑁆𑀢𑁂’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀬 𑀕𑀳𑀡𑁂 𑀧𑀬𑁄𑀚𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀏𑀓𑀲𑁆𑀲𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀦𑀺𑀬𑀫𑁄’’𑀢𑀺. 𑀫𑀺𑀮𑀸𑀢𑀫𑀸𑀮𑀸𑀤𑀻𑀦𑀦𑁆𑀢𑀺 𑀫𑀺𑀮𑀸𑀢𑀫𑀸𑀮𑀓𑀺𑀮𑀺𑀝𑁆𑀞𑀯𑀢𑁆𑀣𑀸𑀤𑀻𑀦𑀁. 𑀫𑀦𑁄𑀧𑀤𑁄𑀲𑀺𑀓𑀸𑀦𑀁 𑀢𑀤𑀜𑁆𑀜𑀯𑀢𑁆𑀣𑀽𑀦𑀫𑁆𑀧𑀺 𑀅𑀦𑀺𑀝𑁆𑀞𑀢𑀸 𑀓𑀣𑀁 𑀦 𑀲𑀺𑀬𑀸, 𑀲𑀺𑀬𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀧𑀦 𑀧𑀘𑀼𑀭𑀢𑀸𑀪𑀸𑀯𑀢𑁄 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀢𑀣𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀤𑁂𑀯𑀮𑁄𑀓𑁂 𑀅𑀦𑀺𑀝𑁆𑀞𑀁 𑀦𑀸𑀫 𑀧𑀭𑀺𑀓𑀧𑁆𑀧𑀦𑀯𑀲𑁂𑀦, 𑀲𑀪𑀸𑀯𑀢𑁄 𑀧𑀦 𑀢𑀢𑁆𑀣𑀼𑀧𑁆𑀧𑀦𑁆𑀦𑀁 𑀇𑀝𑁆𑀞𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺.

‘‘𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀪𑁂𑀤𑀫𑁆𑀧𑀻’’𑀢𑀺 𑀇𑀫𑀺𑀦𑀸 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀬𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀢𑀁 𑀅𑀦𑀼𑀚𑀸𑀦𑀸𑀢𑀺, 𑀅𑀝𑁆𑀞𑀓𑀣𑀸𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀸 𑀏𑀯𑀫𑀸𑀳. 𑀧𑀜𑁆𑀘𑀤𑀲𑀦𑁆𑀦𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀜𑁆𑀘𑀝𑁆𑀞𑀸𑀦𑀸𑀦𑀺 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀢𑁂𑀭𑀲𑀦𑁆𑀦𑀁. 𑀤𑁆𑀯𑁂 𑀤𑁆𑀯𑁂 𑀘𑀓𑁆𑀔𑀼𑀲𑁄𑀢𑀲𑀫𑁆𑀧𑀝𑀺𑀘𑁆𑀙𑀦𑀯𑀺𑀜𑁆𑀜𑀸𑀡𑀸𑀦𑀺, 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀻𑀢𑀺 𑀦𑀯𑀦𑁆𑀦𑀁. 𑀏𑀓𑀤𑁂𑀲𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀏𑀓𑀤𑁂𑀲𑀲𑁆𑀲 𑀯𑀻𑀲𑀢𑀺𑀘𑁂𑀢𑀦𑀸𑀪𑁂𑀤𑀲𑁆𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀪𑁂𑀤𑁄 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄. 𑀲𑁆𑀯𑁂𑀯𑀸𑀢𑀺 𑀅𑀯𑀬𑀯𑀕𑀢𑁂𑀦𑀸𑀧𑀺 𑀯𑀺𑀲𑁂𑀲𑁂𑀦 𑀲𑀫𑀼𑀤𑀸𑀬𑁄 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀅𑀮𑀗𑁆𑀓𑀢𑁄 𑀭𑀸𑀚𑀓𑀼𑀫𑀸𑀭𑁄’’𑀢𑀺.

𑀬𑀢𑁆𑀣𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 ‘‘𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀢𑀸𑀯 𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀬𑀜𑁆𑀘 𑀯𑀺𑀧𑀸𑀓𑀲𑁆𑀲 𑀯𑀺𑀢𑁆𑀣𑀸𑀭𑀧𑁆𑀧𑀓𑀸𑀲𑀦𑀁 𑀓𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀻𑀢𑀺 𑀯𑁂𑀳𑀧𑁆𑀨𑀮𑀪𑀽𑀫𑀺𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀲𑀜𑁆𑀜𑀸𑀭𑀼𑀧𑁆𑀧𑀯𑀚𑁆𑀚𑀸’’𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀳𑀺 𑀪𑀸𑀯𑀦𑀸𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀁 𑀅𑀲𑀜𑁆𑀜𑀪𑀽𑀫𑀺𑀁 𑀆𑀭𑀼𑀧𑁆𑀧𑀪𑀽𑀫𑀺𑀜𑁆𑀘 𑀦𑀺𑀧𑁆𑀨𑀸𑀤𑁂𑀢𑀺, 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀯𑀸 𑀲𑀁𑀯𑀡𑁆𑀡𑀦𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸, 𑀧𑀭𑀺𑀢𑁆𑀢𑀯𑀺𑀧𑀸𑀓𑁂𑀲𑀼 𑀧𑀘𑁆𑀙𑀺𑀫𑁄, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀢𑀺 𑀏𑀯𑀁 𑀘𑀼𑀤𑁆𑀤𑀲𑀦𑁆𑀦𑀁. 𑀲𑀢𑁆𑀢𑀦𑁆𑀦𑀦𑁆𑀢𑀺 𑀲𑁂𑀲𑀸𑀦𑀁 𑀧𑀭𑀺𑀢𑁆𑀢𑀯𑀺𑀧𑀸𑀓𑀸𑀦𑀁𑀬𑁂𑀯 𑀲𑀢𑁆𑀢𑀦𑁆𑀦𑀁.

𑀪𑀯𑀸𑀤𑀬𑁄𑀢𑀺 𑀪𑀯𑀬𑁄𑀦𑀺𑀕𑀢𑀺𑀲𑀢𑁆𑀢𑀸𑀯𑀸𑀲𑁂. 𑀢𑀺𑀡𑁆𑀡𑀁 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀆𑀭𑀼𑀧𑁆𑀧𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁. 𑀢𑀻𑀲𑀽𑀢𑀺 𑀧𑀜𑁆𑀘𑀫𑀸𑀤𑀻𑀲𑀼 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀓𑀸𑀫𑀪𑀯𑁂 𑀧𑀦 𑀤𑀼𑀕𑁆𑀕𑀢𑀺𑀬𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀭𑀺𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁮. 𑀬𑀤𑀺𑀧𑀺 𑀲𑀼𑀢𑁆𑀢𑀦𑁆𑀢𑁂 𑀅𑀪𑀺𑀥𑀫𑁆𑀫𑁂 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀧𑀤𑀲𑁆𑀲 𑀤𑁂𑀲𑀦𑀸𑀪𑁂𑀤𑁄 𑀦𑀢𑁆𑀣𑀺, 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀽’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮𑁪) 𑀲𑀼𑀢𑁆𑀢𑀦𑁆𑀢𑀢𑁄 𑀢𑀲𑁆𑀲 𑀤𑁂𑀲𑀦𑀸𑀪𑁂𑀤𑁄 𑀅𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀸…𑀧𑁂… 𑀪𑁂𑀤𑁄’’𑀢𑀺. 𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀧𑀭𑀺𑀘𑁆𑀙𑁂𑀤𑀢𑁄 𑀕𑀳𑀺𑀢𑁂𑀲𑀼 𑀅𑀢𑁆𑀣𑀲𑀺𑀤𑁆𑀥𑁄 𑀢𑀢𑁆𑀣 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀧𑀦 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺.

𑀑𑀧𑀧𑀸𑀢𑀺𑀓𑀲𑀢𑁆𑀢𑁂𑀲𑀽𑀢𑀺 𑀯𑀸 𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑁂 𑀑𑀧𑀧𑀸𑀢𑀺𑀓𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀕𑁆𑀕𑀳𑀡𑁂𑀦 𑀭𑀽𑀧𑀸𑀯𑀘𑀭𑀸𑀯 𑀯𑀼𑀢𑁆𑀢𑀸𑀢𑀺 𑀢𑀤𑀜𑁆𑀜𑁂 𑀲𑀦𑁆𑀥𑀸𑀬 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀲𑁂𑀲𑀕𑁆𑀕𑀳𑀡𑀁 𑀲𑀸𑀢𑁆𑀣𑀓𑀫𑁂𑀯. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸, 𑀑𑀫𑀢𑁄 𑀆𑀤𑀺𑀦𑀸 𑀲𑀳𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀭𑀽𑀧𑀫𑀺𑀲𑁆𑀲𑀓𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀦𑀬𑁂𑀦.

‘‘𑀤𑁆𑀯𑁂 𑀲𑀦𑁆𑀢𑀢𑀺𑀲𑀻𑀲𑀸𑀦𑀻’’𑀢𑀺 𑀆𑀭𑀩𑁆𑀪 𑀬𑀸𑀯 ‘‘𑀲𑀢𑁆𑀢 𑀲𑀦𑁆𑀢𑀢𑀺𑀲𑀻𑀲𑀸𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁮) 𑀏𑀢𑁆𑀢𑀓𑀁 𑀅𑀝𑁆𑀞𑀓𑀣𑀸𑀧𑀸𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀓𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀢𑀺𑀓𑁆𑀔𑀢𑁆𑀢𑀼𑀁 𑀭𑀽𑀧𑀼𑀧𑁆𑀧𑀢𑁆𑀢𑀺𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 𑀆𑀳 ‘‘𑀇𑀫𑀺𑀦𑀸𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺. 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑀁 𑀭𑀽𑀧𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀳𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀭𑀽𑀧𑀸𑀚𑀦𑀓𑀓𑀫𑁆𑀫𑀚’’𑀦𑁆𑀢𑀺 𑀇𑀤𑀁 𑀪𑀽𑀢𑀓𑀣𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀅𑀢𑀁𑀲𑀪𑀸𑀯𑀢𑀸𑀪𑀸𑀯𑀸. 𑀭𑀽𑀧𑀸𑀚𑀦𑀓𑀓𑀫𑁆𑀫𑀚𑀦𑁆𑀢𑀺 𑀯𑀸 𑀘𑀼𑀢𑀺𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀦 ‘‘𑀧𑀯𑀢𑁆𑀢𑀺𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀦𑀺𑀯𑀢𑁆𑀢𑀺𑀢𑀁. ‘‘𑀲𑀩𑁆𑀩𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 (𑀥. 𑀲. 𑀫𑀽𑀮𑀝𑀻. 𑁬𑁩𑁬) 𑀅𑀝𑁆𑀞𑀲𑀸𑀮𑀺𑀦𑀻𑀝𑀻𑀓𑀸𑀬𑀁 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀧𑀜𑁆𑀘𑀯𑀺𑀜𑁆𑀜𑀸𑀡𑀓𑁆𑀔𑀡𑁂 𑀢𑀧𑁆𑀧𑀘𑁆𑀘𑀬𑀸 𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀓𑀸𑀮𑀁 𑀲𑀦𑁆𑀥𑀸𑀬𑀸’’𑀢𑀺. 𑀢𑀢𑁆𑀣𑀸𑀧𑀺 𑀅𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀅𑀢𑁆𑀣𑁂𑀯 𑀭𑀽𑀧𑀼𑀧𑁆𑀧𑀢𑁆𑀢𑀻𑀢𑀺 𑀆𑀳 ‘‘𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀜𑁆𑀘𑀸’’𑀢𑀺. 𑀪𑀯𑀗𑁆𑀕𑀸𑀤𑀻𑀢𑀺 𑀪𑀯𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀺. 𑀅𑀜𑁆𑀜𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀯𑀺𑀜𑁆𑀜𑀸𑀡𑀢𑁄 𑀅𑀜𑁆𑀜𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀦. 𑀭𑀽𑀧𑀫𑁂𑀯 𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀸𑀫𑀁 𑀪𑀯𑀗𑁆𑀕𑀁. 𑀢𑀁𑀚𑀦𑀓𑁂𑀦𑀸𑀢𑀺 𑀪𑀯𑀗𑁆𑀕𑀸𑀤𑀺𑀚𑀦𑀓𑁂𑀦. 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑁆𑀧𑀘𑁆𑀘𑀬𑀸 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀯𑀺𑀧𑀸𑀓𑀦𑀸𑀫𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀯𑀲𑁂𑀦. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀦 𑀇𑀢𑀭𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀯𑀺𑀧𑀸𑀓𑁄 𑀯𑀺𑀧𑀸𑀓𑀦𑀸𑀫𑀯𑀲𑁂𑀦, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀘 𑀦𑀸𑀫𑀭𑀽𑀧𑀲𑁆𑀲 𑀲𑀫𑁆𑀪𑀯𑁄 𑀤𑀲𑁆𑀲𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀳𑀚𑀸𑀢…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀭𑀽𑀧𑀲𑀤𑁆𑀤𑁂𑀦 𑀘 𑀅𑀢𑁆𑀢𑀦𑁄 𑀏𑀓𑀤𑁂𑀲𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀭𑀽𑀧𑀸𑀦𑀁 𑀏𑀓𑀤𑁂𑀲𑁄 𑀏𑀓𑀯𑀺𑀪𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀡𑀺𑀦𑀻 𑁧.𑁨.𑁬𑁪) 𑀲𑀤𑁆𑀤𑀮𑀓𑁆𑀔𑀡𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀭𑀽𑀧𑀸𑀦𑀁 𑀏𑀓𑀤𑁂𑀲𑁄’’𑀢𑀺. 𑀇𑀘𑁆𑀙𑀺𑀢𑁄 𑀳𑀺 𑀏𑀓𑀤𑁂𑀲𑀭𑀽𑀧𑀸𑀦𑀫𑁆𑀧𑀺 𑀏𑀓𑀤𑁂𑀲𑁄 𑀬𑀣𑀸 ‘‘𑀦𑀺𑀤𑀲𑁆𑀲𑀺𑀢𑀯𑀺𑀧𑀓𑁆𑀔𑁂𑀳𑀻’’𑀢𑀺. 𑀦𑀺𑀤𑀲𑁆𑀲𑀺𑀢𑁄 𑀘 𑀦𑀺𑀤𑀲𑁆𑀲𑀺𑀢𑀯𑀺𑀧𑀓𑁆𑀔𑁄 𑀘 𑀦𑀺𑀤𑀲𑁆𑀲𑀺𑀢𑀯𑀺𑀧𑀓𑁆𑀔𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. ‘‘𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁂𑀲𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀲𑀭𑀽𑀧𑁂𑀦 𑀞𑀧𑀦𑀜𑁆𑀳𑀺 𑀇𑀥 𑀲𑁂𑀲𑀦𑀁.

𑀬𑀁-𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀢𑁆𑀢𑀸 𑀅𑀯𑀼𑀢𑁆𑀢𑀫𑁆𑀧𑀺 𑀢𑀢𑁄-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀆𑀳 ‘‘𑀢𑀢𑁄 𑀬𑀼𑀢𑁆𑀢𑀫𑁂𑀯 𑀇𑀤𑀦𑁆𑀢𑀺 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀯𑀺𑀧𑀸𑀓𑀲𑁆𑀲 𑀅𑀚𑀦𑀓𑀁 𑀯𑀺𑀧𑀸𑀓𑀸𑀚𑀦𑀓𑀁, 𑀦𑀺𑀲𑁆𑀲𑀦𑁆𑀤𑀨𑀮𑀫𑀢𑁆𑀢𑀤𑀸𑀬𑀓𑀓𑀫𑁆𑀫𑀁, 𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀯𑀺𑀧𑀸𑀓𑀸𑀚𑀦𑀓𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀯𑀢𑁆𑀣𑀼𑀓𑀸𑀬𑀯𑀲𑁂𑀦 𑀭𑀽𑀧𑀢𑁄 𑀤𑁆𑀯𑁂 𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁨𑁮) 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀉𑀪𑀬𑀦𑁆𑀢𑀺 𑀦𑀸𑀫𑀁 𑀭𑀽𑀧𑀜𑁆𑀘.

𑀓𑀫𑁆𑀫𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀸𑀮𑁂𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁.

𑀬𑀤𑀺𑀧𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀥. 𑀲. 𑁫𑁮𑁪) 𑀭𑀽𑀧𑀲𑁆𑀲𑀧𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀲𑀼𑀢𑁆𑀢𑀢𑁄 𑀚𑀸𑀦𑀺𑀢𑀩𑁆𑀩𑀸, 𑀯𑀺𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀺𑀢𑀸 𑀇𑀝𑁆𑀞𑀸𑀦𑀼𑀪𑀯𑀦𑀸𑀤𑀬𑁄 𑀢𑀲𑁆𑀫𑀺𑀁 𑀲𑀢𑀺 𑀲𑀩𑁆𑀪𑀸𑀯𑀢𑁄, 𑀅𑀲𑀢𑀺 𑀘 𑀅𑀪𑀸𑀯𑀢𑁄 𑀬𑀣𑀸 𑀲𑀤𑁆𑀥𑁂𑀬𑁆𑀬𑀸𑀤𑀺𑀯𑀢𑁆𑀣𑀼𑀫𑁆𑀳𑀺 𑀲𑀤𑁆𑀥𑀸𑀤𑀬𑁄𑀢𑀺 𑀦𑀸𑀫𑀲𑁆𑀲𑀧𑀺 𑀬𑀼𑀢𑁆𑀢𑀺𑀢𑁄 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀲𑀺𑀤𑁆𑀥𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀢𑁆𑀢𑀢𑁄 𑀦𑀸𑀫𑀁…𑀧𑁂… 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀬𑀸𑀯𑀤𑁂𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀫𑀢𑁆𑀢𑀢𑀸𑀯𑀺𑀪𑀸𑀯𑀦𑀫𑀼𑀔𑁂𑀦 𑀅𑀯𑀺𑀧𑀭𑀻𑀢𑀢𑁄 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸, 𑀢𑀸𑀯𑀤𑁂𑀯 𑀘 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀧𑀦 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀺𑀪𑀸𑀯𑀦𑀢𑁄 𑀲𑀘𑁆𑀘𑀤𑁂𑀲𑀦𑀸𑀯 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀲𑀘𑁆𑀘𑀤𑁂𑀲𑀦𑀸 𑀘 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁. 𑀬𑀣𑀸𑀳 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀫𑁂 𑀪𑀺𑀓𑁆𑀔𑀯𑁂…𑀧𑁂… 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺𑀆𑀤𑀺, 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀧𑀤𑀲𑁆𑀲 𑀲𑀘𑁆𑀘𑀤𑁂𑀲𑀦𑀸𑀪𑀸𑀯𑀤𑀻𑀧𑀦𑁂𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀫𑀭𑀽𑀧𑀫𑀢𑁆𑀢𑀢𑀸𑀯𑀘𑀦𑁂𑀦𑁂𑀯 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁯. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀸𑀦𑀼𑀭𑀽𑀧𑀁. 𑀢𑁂𑀦 𑀘𑀢𑀼𑀦𑁆𑀦𑀁 𑀢𑀸𑀯 𑀪𑀽𑀢𑀸𑀦𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀯𑀢𑁆𑀣𑀽𑀲𑀼 𑀧𑀦 𑀳𑀤𑀬𑀯𑀢𑁆𑀣𑀼𑀦𑁄 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦, 𑀧𑀯𑀢𑁆𑀢𑀺𑀬𑀁 𑀬𑀲𑁆𑀫𑀸 𑀅𑀦𑀦𑁆𑀢𑀭𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀫𑁂𑀯 𑀯𑀢𑁆𑀣𑀼 𑀞𑀺𑀢𑀺𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀪𑀸𑀯𑁂𑀦 𑀢𑀲𑁆𑀲 𑀦𑀺𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀲𑀳𑀚𑀸𑀢𑀁, 𑀢𑀲𑁆𑀫𑀸 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦. 𑀇𑀢𑀭𑀯𑀢𑁆𑀣𑀽𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀙𑀝𑁆𑀞𑀸𑀬𑀢𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀯𑀲𑁂𑀦 𑀘, 𑀚𑀻𑀯𑀺𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀓𑀧𑁆𑀧𑀓𑀸𑀭𑁂𑀦𑁂𑀯𑀸𑀢𑀺 𑀬𑀣𑀸 𑀘𑀓𑁆𑀔𑀸𑀤𑀻𑀦𑀁 𑀫𑀦𑀸𑀬𑀢𑀦𑀲𑁆𑀲 𑀧𑀝𑀺𑀦𑀺𑀬𑀢𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀸𑀦𑀼𑀯𑀺𑀥𑀸𑀦𑀢𑁄 𑀦𑀺𑀬𑀢𑁄 𑀏𑀓𑀧𑁆𑀧𑀓𑀸𑀭𑁂𑀦𑁂𑀯 𑀧𑀘𑁆𑀘𑀬𑀪𑀸𑀯𑁄, 𑀦 𑀏𑀯𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀁, 𑀢𑁂𑀲𑀁 𑀧𑀦 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀦𑀸 𑀧𑀓𑀸𑀭𑀦𑁆𑀢𑀭𑁂𑀦 𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺 ‘‘𑀅𑀦𑀺𑀬𑀫𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀦𑀺𑀬𑀫𑀢𑁄’’𑀢𑀺 𑀧𑀤𑀁 ‘‘𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀣𑀁 𑀯𑀤𑀦𑁆𑀢𑀺 ‘‘𑀏𑀓𑀦𑁆𑀢𑁂𑀦 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺.

‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀕𑁆𑀕𑀳𑁂𑀦 𑀅𑀢𑁆𑀣𑀢𑁄, 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀲𑀤𑁆𑀤𑀢𑁄𑀧𑀺 𑀅𑀢𑁆𑀣𑀢𑁄𑀧𑀺 𑀲𑀭𑀽𑀧𑀢𑀁 𑀤𑀲𑁆𑀲𑁂𑀢𑀺. ‘‘𑀘𑀓𑁆𑀔𑀸𑀤𑀻𑀳𑀺 𑀲𑀳 ‘𑀲𑀴𑀸𑀬𑀢𑀦’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀏𑀓𑀲𑁂𑀲𑀁 𑀓𑀢𑁆𑀯𑀸 𑀫𑀦𑀸𑀬𑀢𑀦𑀁 𑀘𑀓𑁆𑀔𑀸𑀤𑀻𑀳𑀺 𑀲𑀤𑁆𑀥𑀺𑀁 ‘‘𑀲𑀴𑀸𑀬𑀢𑀦’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑁄𑀢𑀺 ‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀦𑀸𑀫𑀭𑀽𑀧𑀲𑀤𑁆𑀤𑁂𑀦 𑀲𑀴𑀸𑀬𑀢𑀦𑀲𑀤𑁆𑀤𑁂𑀦 𑀘 𑀲𑀤𑁆𑀤𑀲𑀭𑀽𑀧𑀢𑀸𑀲𑀼, 𑀅𑀢𑁆𑀣𑀲𑀭𑀽𑀧𑀢𑀸𑀲𑀼 𑀯𑀸. 𑀬𑀤𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀯𑀺𑀧𑀸𑀓𑀙𑀝𑁆𑀞𑀸𑀬𑀢𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀓𑀲𑁆𑀫𑀸 ‘‘𑀇𑀢𑀭𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀧𑀸𑀓𑀜𑁆𑀳𑀺 𑀢𑀢𑁆𑀣 𑀇𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀘𑁆𑀘𑀬𑀦𑀬𑁂 𑀧𑀦𑀸’’𑀢𑀺𑀆𑀤𑀺.

𑀲𑀳𑀚𑀸𑀢𑀸𑀤𑀻𑀲𑀼 𑀳𑁂𑀢𑀼𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀥𑀸, 𑀢𑀢𑁄 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀦𑀯𑀥𑀸, 𑀢𑀢𑁄 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀅𑀝𑁆𑀞𑀥𑀸 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀢𑁆𑀣 𑀲𑀸𑀥𑀸𑀭𑀡𑀯𑀲𑁂𑀦 𑀅𑀯𑀓𑀁𑀲𑁄, 𑀳𑁂𑀢𑀼𑀆𑀤𑀺𑀅𑀲𑀸𑀥𑀸𑀭𑀡𑀯𑀲𑁂𑀦 𑀉𑀓𑁆𑀓𑀁𑀲𑁄𑀢𑀺 𑀛𑀸𑀦𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀲𑀦𑁆𑀥𑀺𑀬𑀁 𑀅𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀚𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 ‘‘𑀧𑀯𑀢𑁆𑀢𑁂’’𑀢𑀺 𑀯𑀺𑀲𑁂𑀲𑁂𑀢𑀺. ‘‘𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀬𑁄 𑀏𑀯𑀸’’𑀢𑀺 𑀦𑀺𑀬𑀫𑁂𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺.

‘‘𑀅𑀯𑀲𑁂𑀲𑀫𑀦𑀸𑀬𑀢𑀦𑀲𑁆𑀲𑀸’’𑀢𑀺 𑀅𑀯𑀲𑁂𑀲𑀕𑁆𑀕𑀳𑀡𑀫𑁆𑀧𑀺 𑀧𑀓𑀭𑀡𑀢𑁄 𑀯𑀺𑀲𑀺𑀝𑁆𑀞𑀯𑀺𑀲𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀪𑀯𑁂’’𑀢𑀺𑀆𑀤𑀺𑀫𑀸𑀳, 𑀬𑀢𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀢𑁆𑀣𑀼𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀦𑀸𑀫𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀲𑀳𑀚𑀸𑀢𑀸𑀤𑀺𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄, 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀳𑁂𑀢𑀼𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀅𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄.

𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁦. 𑀢𑀤𑀪𑁂𑀤𑀯𑀲𑁂𑀦𑀸𑀢𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀅𑀪𑁂𑀤𑀯𑀲𑁂𑀦, 𑀨𑀲𑁆𑀲𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀬𑀼𑀢𑁆𑀢𑀁 𑀏𑀓𑀲𑁆𑀲𑁂𑀯 𑀯𑀘𑀦𑀁. 𑀅𑀜𑁆𑀜𑀲𑁆𑀲𑀸𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑀲𑁆𑀲𑀸𑀧𑀺. 𑀲𑀩𑁆𑀩𑀸𑀬𑀢𑀦𑀢𑁄 𑀳𑀺 𑀏𑀓𑀲𑁆𑀲 𑀨𑀲𑁆𑀲𑀲𑁆𑀲 𑀅𑀲𑀫𑁆𑀪𑀯𑀘𑁄𑀤𑀦𑀸𑀬𑀁 𑀢𑀧𑁆𑀧𑀲𑀗𑁆𑀕𑁂𑀦 𑀏𑀓𑀸𑀬𑀢𑀦𑀢𑁄 𑀅𑀦𑁂𑀓𑀲𑁆𑀲𑀸𑀧𑀺 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀘𑁄𑀤𑀦𑀸 ‘‘𑀈𑀤𑀺𑀲𑀻 𑀥𑀫𑁆𑀫𑀢𑀸 𑀦𑀢𑁆𑀣𑀻’’𑀢𑀺 𑀜𑀸𑀧𑀦𑀢𑁆𑀣𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀜𑁆𑀜𑀲𑁆𑀲𑀸𑀧𑀻’’𑀢𑀺𑀆𑀤𑀺𑀦𑀸. 𑀦𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀉𑀤𑀸𑀳𑀭𑀡𑀤𑀲𑁆𑀲𑀦𑀯𑀲𑁂𑀦. 𑀏𑀓𑀨𑀲𑁆𑀲𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀓𑀸𑀭𑀡𑀸𑀧𑀤𑁂𑀲𑁄. 𑀏𑀓𑀨𑀲𑁆𑀲𑀲𑀫𑁆𑀪𑀯𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀧𑀭𑀺𑀳𑀸𑀭𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀲𑁂𑀲𑁂𑀲𑀽𑀢𑀺 𑀏𑀓𑀦𑁆𑀢𑀺𑀆𑀤𑀻𑀲𑀼. 𑀦𑀯𑀥𑀸 𑀧𑀘𑁆𑀘𑀬𑀢𑁆𑀢𑁂 𑀏𑀓𑀁 𑀯𑀺𑀧𑀸𑀓𑀫𑀦𑀸𑀬𑀢𑀦𑀁 𑀯𑀺𑀪𑀸𑀯𑀬𑁂. 𑀢𑀣𑀸 𑀘𑀸𑀢𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦. 𑀬𑁆𑀯𑀸𑀬𑀁 𑀧𑀘𑁆𑀘𑀬𑀪𑀸𑀯𑁄 𑀬𑀸𑀤𑀺𑀲𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺…𑀧𑁂… 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀯𑀺𑀫𑀼𑀢𑁆𑀢𑀸𑀦𑀫𑁆𑀧𑀺 𑀆𑀭𑀫𑁆𑀫𑀡𑀫𑀢𑁆𑀢𑀢𑀸𑀬 𑀲𑀫𑁆𑀪𑀯𑀢𑁄 𑀆𑀳 ‘‘𑀆𑀭𑀫𑁆𑀫𑀡…𑀧𑁂… 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀢𑀦𑁆𑀢𑀺 𑀭𑀽𑀧𑀸𑀬𑀢𑀦𑀸𑀤𑀺𑀁.

𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁧. 𑀅𑀦𑀦𑁆𑀢𑀭𑀸𑀤𑀻𑀳𑀻𑀢𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺. 𑀉𑀧𑀦𑀺𑀲𑁆𑀲𑀬𑁂𑀢𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸 𑀳𑀺 𑀅𑀦𑀦𑁆𑀢𑀭𑀢𑀸𑀯𑀲𑁂𑀦𑁂𑀯 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀅𑀦𑁆𑀢𑁄𑀕𑀥𑀸. 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀧𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀥𑀫𑁆𑀫𑀸𑀦𑀁𑀬𑁂𑀯 𑀢𑀣𑀸𑀪𑀸𑀯𑀢𑁄 𑀢𑀤𑀦𑁆𑀢𑁄𑀕𑀥𑀸. 𑀢𑀲𑁆𑀲𑀸𑀢𑀺 𑀉𑀧𑀦𑀺𑀲𑁆𑀲𑀬𑀲𑁆𑀲.

𑀲𑀩𑁆𑀩𑀲𑁆𑀲𑀸𑀢𑀺 𑀯𑀺𑀧𑀸𑀓𑀲𑁆𑀲, 𑀅𑀯𑀺𑀧𑀸𑀓𑀲𑁆𑀲 𑀘. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀬 𑀳𑀺 𑀯𑁂𑀤𑀦𑀸𑀬 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑁄 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀦𑀦𑁆𑀢𑀭𑁄 𑀅𑀦𑀦𑁆𑀢𑀭𑀸𑀤𑀺𑀦𑀸, 𑀅𑀦𑀸𑀦𑀦𑁆𑀢𑀭𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀫𑁆𑀪𑀯𑀤𑀲𑁆𑀲𑀦𑀜𑁆𑀘𑁂𑀢𑀁, 𑀦 𑀢𑀸𑀲𑀁 𑀫𑀦𑁄𑀤𑁆𑀯𑀸𑀭𑀺𑀓𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁨. 𑀬𑀣𑀸 𑀘 𑀭𑀲𑀸𑀬𑀦𑀚𑀸𑀦𑀺 𑀑𑀚𑀸𑀚𑀻𑀯𑀺𑀢𑀸𑀦𑀺, 𑀏𑀯𑀁 𑀢𑀁𑀦𑀺𑀫𑀺𑀢𑁆𑀢𑀁 𑀲𑀼𑀔𑀁, 𑀢𑀤𑀧𑀦𑁂𑀬𑁆𑀬𑀁 𑀚𑀭𑀸𑀤𑀺𑀤𑀼𑀓𑁆𑀔𑀜𑁆𑀘 𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀓𑀫𑁆𑀫𑀨𑀮𑀸𑀪𑀺𑀧𑀢𑁆𑀣𑀦𑀸𑀯𑀲𑁂𑀦 𑀲𑀢𑁆𑀢𑀸 𑀓𑀫𑁆𑀫𑀸𑀦𑀺𑀧𑀺 𑀆𑀬𑀽𑀳𑀦𑁆𑀢𑀻𑀢𑀺 𑀲𑀸𑀢𑀺𑀲𑀬𑀁 𑀢𑀡𑁆𑀳𑀸𑀬 𑀯𑀺𑀧𑀸𑀓𑀯𑁂𑀤𑀦𑀸 𑀉𑀧𑀦𑀺𑀲𑁆𑀲𑀬𑁄, 𑀦 𑀢𑀣𑀸 𑀇𑀢𑀭𑀸𑀢𑀺 𑀆𑀳 ‘‘𑀯𑀺𑀧𑀸𑀓𑀸 𑀯𑀺𑀲𑁂𑀲𑁂𑀦…𑀧𑁂… 𑀅𑀯𑀺𑀲𑁂𑀲𑁂𑀦 𑀇𑀢𑀭𑀸 𑀘𑀸’’𑀢𑀺. 𑀇𑀢𑀭𑀸𑀢𑀺 𑀅𑀯𑀺𑀧𑀸𑀓𑀸𑀢𑀺 𑀅𑀢𑁆𑀣𑁄. ‘‘𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺 𑀇𑀤𑀁 𑀇𑀝𑁆𑀞𑀲𑀪𑀸𑀯𑀁𑀬𑁂𑀯 𑀉𑀧𑁂𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀦𑀺𑀝𑁆𑀞𑀲𑀪𑀸𑀯𑀁. 𑀢𑁂𑀦𑀸𑀳 ‘‘𑀉𑀧𑁂𑀓𑁆𑀔𑀸 𑀧𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀲𑁆𑀲𑀸𑀢𑀺 𑀅𑀯𑀻𑀢𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀲𑁆𑀲 𑀘 𑀯𑁂𑀤𑀦𑀸𑀯𑀢𑁄 𑀧𑀼𑀕𑁆𑀕𑀮𑀲𑁆𑀲.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀏𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀦𑀺𑀬𑀫𑀦𑁆𑀢𑀭𑀦𑀺𑀯𑀢𑁆𑀢𑀦𑀧𑀭𑁄𑀢𑀺 𑀦𑀸𑀲𑁆𑀲 𑀧𑀘𑁆𑀘𑀬𑀦𑁆𑀢𑀭𑀦𑀺𑀯𑀢𑁆𑀢𑀦𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀭𑀧𑀝𑀺𑀓𑁆𑀔𑁂𑀧𑁄𑀧𑀺 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀺.

𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁩. 𑀧𑀼𑀭𑀺𑀫𑀤𑀺𑀝𑁆𑀞𑀺𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁧.𑁩𑁧) 𑀧𑀕𑁂𑀯 𑀅𑀪𑀺𑀦𑀺𑀯𑀺𑀝𑁆𑀞𑀁 𑀲𑀲𑁆𑀲𑀢𑀕𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀕𑁆𑀕𑀳𑀡𑀁…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀉𑀧𑀸𑀤𑀺𑀬𑀫𑀸𑀦𑀦𑁆𑀢𑀺 𑀕𑀡𑁆𑀳𑀦𑁆𑀢𑀁. 𑀮𑁄𑀓𑁄𑀢𑀺 𑀯𑀸 𑀕𑀳𑀡𑀦𑁆𑀢𑀺 𑀬𑀁 ‘‘𑀮𑁄𑀓𑁄 𑀲𑀲𑁆𑀲𑀢𑁄’’𑀢𑀺 𑀕𑀳𑀡𑀁, 𑀲𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀼𑀧𑀸𑀤𑀸𑀦𑀪𑀽𑀢’’𑀦𑁆𑀢𑀺. ‘‘𑀥𑀫𑁆𑀫𑀲𑀗𑁆𑀔𑁂𑀧…𑀧𑁂… 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯𑀸’’𑀢𑀺 𑀇𑀤𑀁 𑀩𑁆𑀬𑀯𑀳𑀺𑀢𑀸𑀦𑀁 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁, 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄𑀢𑀺 𑀲𑀫𑀼𑀤𑀸𑀬𑀪𑀽𑀢𑀢𑁄 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄 𑀢𑀤𑀯𑀬𑀯𑀪𑀽𑀢𑀁 𑀲𑀗𑁆𑀔𑁂𑀧𑀁 𑀯𑀺𑀢𑁆𑀣𑀸𑀭𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑀺.

𑀲𑀲𑁆𑀲𑀢𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄, 𑀉𑀘𑁆𑀙𑁂𑀤𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄 𑀘 𑀅𑀢𑁆𑀢𑀕𑀸𑀳𑁄𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑀸𑀳𑀸𑀦𑀁 𑀫𑀽𑀮𑀪𑀸𑀯𑁂𑀦 𑀯𑀺𑀥𑀸𑀬𑀓𑀢𑁆𑀢𑀸 𑀲𑀸𑀫𑀺𑀪𑀽𑀢𑁄. 𑀆𑀤𑀺𑀦𑀸 𑀯𑀸𑀢𑀺 ‘‘𑀧𑀞𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀸 𑀯𑀸𑀓𑁆𑀬𑁂𑀦.

𑀬𑁂𑀦 𑀪𑀯𑀲𑁆𑀲𑀸𑀤𑁂𑀦 𑀕𑀥𑀺𑀢𑀘𑀺𑀢𑁆𑀢𑁄 𑀪𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀧𑀦𑁆𑀦𑁄, 𑀲𑀸 𑀪𑀯𑀦𑀺𑀓𑀦𑁆𑀢𑀺 𑀲𑀦𑁆𑀢𑀸𑀦𑁂 𑀘𑀺𑀭𑀸𑀦𑀼𑀩𑀦𑁆𑀥𑀸 𑀅𑀪𑀺𑀡𑁆𑀳𑀼𑀧𑁆𑀧𑀢𑁆𑀢𑀺𑀓𑀸 𑀉𑀧𑀧𑀦𑁆𑀦𑀫𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀬𑀤𑀺𑀧𑀺…𑀧𑁂… 𑀧𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸’’𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑁆𑀢𑀸 𑀪𑀯𑀭𑀸𑀕𑀲𑁆𑀲𑀧𑀺 𑀓𑀸𑀫𑀼𑀧𑀸𑀤𑀸𑀦𑀪𑀸𑀯𑁄 𑀅𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄’’𑀢𑀺. 𑀪𑀯𑀭𑀸𑀕𑁄𑀧𑀺 𑀳𑀺 𑀲𑀯𑀺𑀲𑀬𑁂 𑀤𑀴𑁆𑀳𑀁 𑀧𑀯𑀢𑁆𑀢𑀢𑀻𑀢𑀺. 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑀸 𑀯𑀼𑀢𑁆𑀢𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸 𑀦 𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀢𑀺 𑀔𑀦𑁆𑀥𑀸𑀦𑀁 𑀆𑀮𑀬𑀪𑀸𑀯𑁂𑀦. 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸. 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀦𑀁.

𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀯𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁪. ‘‘𑀪𑀯𑀢𑀻’’𑀢𑀺 𑀇𑀤𑀁 𑀉𑀧𑀧𑀢𑁆𑀢𑀺𑀪𑀯𑀦𑀺𑀩𑁆𑀩𑀘𑀦𑀁. 𑀤𑁆𑀯𑀬𑀲𑁆𑀲𑀸𑀢𑀺 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑀯𑀤𑁆𑀯𑀬𑀲𑁆𑀲. 𑀦𑀺𑀧𑁆𑀨𑀸𑀤𑀦𑀨𑀮𑀁 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸. 𑀦𑀺𑀩𑁆𑀩𑀢𑁆𑀢𑀦𑀁 𑀦𑀺𑀧𑁆𑀨𑀸𑀤𑀦𑀁.

‘‘𑀪𑀕𑀯𑀁𑀫𑀽𑀮𑀓𑀸’’𑀢𑀺 (𑀅. 𑀦𑀺. 𑁮.𑁮𑁩; 𑁯.𑁧; 𑁧𑁦.𑁫𑁮; 𑁧𑁧.𑁧𑁯) 𑀯𑀺𑀬 ‘‘𑀲𑀜𑁆𑀜𑀸𑀯𑀁𑀪𑀯𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑀺-𑀅𑀢𑁆𑀣𑁂 𑀯𑀸 𑀯𑀁-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀲𑀜𑁆𑀜𑀸𑀪𑀯𑁄’’𑀢𑀺. 𑀢𑀲𑁆𑀲 𑀯𑀸 𑀅𑀢𑁆𑀣𑁂𑀢𑀺 𑀢𑀲𑁆𑀲 𑀯𑀦𑁆𑀢𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑁂, 𑀅𑀢𑁆𑀣𑀺-𑀅𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀅𑀓𑀸𑀭𑀁 𑀓𑀢𑁆𑀯𑀸𑀢𑀺 𑀬𑀣𑀸 ‘‘𑀧𑀻𑀢𑀺𑀲𑀼𑀔𑀁 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀅𑀢𑁆𑀣𑁂 𑀅𑀓𑀸𑀭𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀜𑁆𑀜𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀜𑁄, 𑀪𑀯𑁄, 𑀲𑁄𑀯 𑀲𑀜𑁆𑀜𑀪𑀯𑁄. 𑀏𑀓𑀲𑁆𑀫𑀺𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑁂 𑀏𑀯. 𑀧𑀯𑀢𑁆𑀢𑀢𑁆𑀢𑀸𑀢𑀺 𑀧𑀯𑀢𑁆𑀢𑀓𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀁 𑀅𑀪𑁂𑀤𑁂𑀧𑀺 𑀉𑀧𑀘𑀸𑀭𑀯𑀲𑁂𑀦 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀓𑀫𑁆𑀫𑀲𑀗𑁆𑀔𑀸𑀢𑀢𑀦𑁆𑀢𑀺 ‘‘𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁, 𑀓𑀫𑁆𑀫𑀓𑁄𑀝𑁆𑀞𑀸𑀲𑀢𑀁 𑀯𑀸. ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁬.𑁬𑁩) 𑀲𑀼𑀢𑁆𑀢𑁂𑀧𑀺 𑀘𑁂𑀢𑀦𑀸𑀬 𑀓𑀫𑁆𑀫𑀪𑀸𑀯𑁄 𑀆𑀕𑀢𑁄𑀯. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀘𑁂𑀢𑀦𑀸𑀯 𑀓𑀫𑁆𑀫𑀪𑀯𑁄𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀪𑀺𑀥𑀫𑁆𑀫𑀧𑀸𑀴𑀺𑀬𑀸𑀯 𑀲𑀸𑀥𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀇𑀫𑀸𑀬 𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺, 𑀫𑀦𑀸𑀬𑀢𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁂𑀦 𑀘 𑀓𑀫𑁆𑀫𑀪𑀯𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀢𑀁 𑀯𑀤𑀦𑁆𑀢𑀺𑀬𑀸 𑀥𑀸𑀢𑀼𑀓𑀣𑀸𑀧𑀸𑀴𑀺𑀬𑀸 𑀢𑀲𑁆𑀲 𑀘𑁂𑀢𑀦𑀸𑀪𑀸𑀯𑁄 𑀤𑀻𑀧𑀺𑀢𑁄𑀢𑀺.

𑀥𑀫𑁆𑀫𑀪𑁂𑀤𑀢𑁄𑀢𑀺 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀸𑀯𑁂𑀦 𑀘 𑀥𑀫𑁆𑀫𑀯𑀺𑀪𑀸𑀕𑀢𑁄. ‘‘𑀧𑀼𑀦𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸𑀯 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀧𑀢𑁆𑀢𑀺 𑀧𑀝𑀺𑀜𑁆𑀜𑀸𑀢𑀸𑀢𑀺 𑀧𑀭𑀲𑁆𑀲 𑀆𑀲𑀗𑁆𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦𑀦𑁆𑀢𑀺 𑀏𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁂’’𑀢𑀺 𑀆𑀳. 𑀪𑀯𑁂𑀓𑀤𑁂𑀲𑀪𑀸𑀯𑁂𑀦𑀸𑀢𑀺 𑀓𑀫𑁆𑀫𑀪𑀯𑀲𑁆𑀲 𑀏𑀓𑀤𑁂𑀲𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁. 𑀢𑁂𑀦 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀸𑀬𑁄 𑀪𑀯𑁄 𑀯𑀼𑀢𑁆𑀢𑁄, 𑀢𑀤𑁂𑀓𑀤𑁂𑀲𑀸 𑀲𑀗𑁆𑀔𑀸𑀭𑀸, 𑀲𑀫𑀼𑀤𑀸𑀬𑁂𑀓𑀤𑁂𑀲𑀸 𑀘 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀦 𑀬𑀣𑀸𑀯𑀼𑀢𑁆𑀢𑀫𑁂𑀯 𑀪𑁂𑀤𑀁 𑀫𑀦𑀲𑀺 𑀓𑀢𑁆𑀯𑀸 𑀅𑀢𑁆𑀣𑀢𑁄 𑀧𑀼𑀦𑀯𑀘𑀦𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀦𑁆𑀢𑁄𑀕𑀥𑁂𑀢𑀺 𑀓𑀸𑀫𑀪𑀯𑀸𑀤𑀺𑀅𑀦𑁆𑀢𑁄𑀕𑀥𑁂 𑀲𑀜𑁆𑀜𑀸𑀪𑀯𑀸𑀤𑀺𑀓𑁂. 𑀓𑀸𑀫𑀪𑀯𑀸𑀤𑀺𑀓𑁂𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂.

𑀉𑀧𑀸𑀤𑀸𑀦𑀪𑁂𑀤𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀉𑀧𑀸𑀤𑀸𑀦𑀯𑀺𑀲𑁂𑀲𑀁.

𑀢𑁂𑀦𑀸𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑁂𑀦. 𑀯𑀓𑁆𑀔𑀫𑀸𑀦𑁂𑀦𑀸𑀢𑀺 ‘‘𑀇𑀤𑀁 𑀲𑀻𑀮𑀩𑁆𑀩𑀢𑀁 𑀦𑀸𑀫𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁩𑁪) 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀫𑀸𑀦𑁂𑀦 𑀧𑀓𑀸𑀭𑁂𑀦. 𑀧𑀼𑀭𑀸𑀡𑀁 𑀩𑁆𑀭𑀳𑁆𑀫𑀡𑁆𑀟𑀮𑀺𑀗𑁆𑀕𑀔𑀦𑁆𑀤𑀧𑀼𑀭𑀸𑀡𑀸𑀤𑀺. ‘‘𑀲𑁂𑀢𑀯𑀥𑀬𑀚𑁆𑀚𑀁 𑀆𑀭𑀪𑀢𑁂 𑀪𑀽𑀢𑀺𑀓𑀸𑀫𑁄’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁬𑁫𑁦) 𑀧𑀲𑀼𑀫𑀸𑀭𑀡𑀯𑀺𑀥𑀸𑀦𑀬𑀼𑀢𑁆𑀢𑁄 𑀬𑀜𑁆𑀜𑀯𑀺𑀥𑀺 𑀧𑀲𑀼𑀩𑀦𑁆𑀥𑀯𑀺𑀥𑀺.

𑀅𑀢𑁆𑀢𑀦𑁄 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀸𑀲𑀫𑀢𑁆𑀢𑀢𑁆𑀢𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑀁.