𑁭. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁩𑁫𑁫. 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀅𑀢𑁆𑀣𑀸𑀦𑀁 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄. 𑀲𑁄 𑀬𑀲𑁆𑀫𑀸 𑀲𑀤𑁆𑀤𑀢𑁆𑀣𑀯𑀺𑀘𑀸𑀭𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀇𑀥…𑀧𑁂… 𑀅𑀢𑁆𑀣𑀤𑀲𑁆𑀲𑀦’’𑀦𑁆𑀢𑀺. 𑀧-𑀲𑀤𑁆𑀤𑁄 𑀧𑀥𑀸𑀦𑀢𑁆𑀣𑀤𑀻𑀧𑀓𑁄 ‘‘𑀧𑀡𑀻𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁪) 𑀯𑀺𑀬.

𑀅𑀦𑀯𑀲𑁆𑀲𑀼𑀢𑀢𑀸 𑀅𑀦𑀼𑀧𑀓𑀺𑀮𑀺𑀝𑁆𑀞𑀢𑀸. 𑀢𑁂𑀦𑀸𑀳 ‘‘𑀢𑀤𑀼𑀪𑀬𑀯𑀻𑀢𑀺𑀯𑀢𑁆𑀢𑀢𑀸’’𑀢𑀺.

𑀪𑀼𑀲𑀢𑁆𑀣𑀁 𑀧𑀓𑁆𑀔𑀦𑁆𑀤𑀦𑀦𑁆𑀢𑀺 𑀪𑀼𑀲𑀢𑁆𑀣𑀯𑀺𑀲𑀺𑀝𑁆𑀞𑀁 𑀧𑀓𑁆𑀔𑀦𑁆𑀤𑀦𑀁 𑀅𑀦𑀼𑀧𑀯𑀺𑀲𑀦𑀁.

𑀅𑀲𑁆𑀲𑀸𑀤𑀲𑁆𑀲𑀸𑀢𑀺 𑀢𑀡𑁆𑀳𑀸𑀬. ‘‘𑀦𑀺𑀘𑁆𑀘𑀁 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀸𑀦𑀁 𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀢𑀡𑁆𑀳𑀸𑀬𑀧𑀺 𑀯𑀢𑁆𑀣𑀼𑀪𑀸𑀯𑀢𑁄 𑀯𑀺𑀲𑁂𑀲𑀕𑁆𑀕𑀳𑀡𑀁, 𑀢𑀣𑀸 𑀓𑀸𑀬𑀯𑁂𑀤𑀦𑀸𑀦𑀁 𑀤𑀺𑀝𑁆𑀞𑀺𑀬𑀸𑀧𑀺 𑀯𑀢𑁆𑀣𑀼𑀪𑀸𑀯𑀲𑀫𑁆𑀪𑀯𑀢𑁄 ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀭𑀸𑀕𑀯𑀻𑀢𑀭𑀸𑀕𑀸𑀤𑀺𑀯𑀺𑀪𑀸𑀕𑀤𑁆𑀯𑀬𑀯𑀲𑁂𑀦𑁂𑀯 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀁 ‘‘𑀦𑀸𑀢𑀺𑀧𑀪𑁂𑀤𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀇𑀥 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀅𑀥𑀺𑀧𑁆𑀧𑁂𑀢𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀘 𑀨𑀲𑁆𑀲𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑁄𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 ‘‘𑀅𑀢𑀺𑀧𑀪𑁂𑀤𑀕𑀢𑀸’’𑀢𑀺 𑀯𑀼𑀢𑁆𑀢𑀸. 𑀲𑀭𑀸𑀕𑀸𑀤𑀺𑀯𑀺𑀪𑀸𑀕𑀯𑀲𑁂𑀦 𑀲𑁄𑀴𑀲𑀪𑁂𑀤𑀢𑁆𑀢𑀸 𑀯𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀢𑀺𑀧𑀪𑁂𑀤𑀕𑀢𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀦𑀻𑀯𑀭𑀡𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀢𑁆𑀢𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀅𑀢𑀺𑀧𑀪𑁂𑀤𑀕𑀢𑀸 𑀯𑀼𑀢𑁆𑀢𑀸. ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀸𑀦𑀻’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀸 𑀅𑀦𑀼𑀧𑀲𑁆𑀲𑀦𑀸 𑀏𑀢𑁂𑀲𑀦𑁆𑀢𑀺 𑀢𑀤𑀦𑀼𑀧𑀲𑁆𑀲𑀦𑀸, 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀦𑁄 𑀧𑀼𑀕𑁆𑀕𑀮𑀸, 𑀢𑁂𑀲𑀁.

𑀢𑀢𑁆𑀣 ‘‘𑀅𑀲𑀼𑀪𑀪𑀸𑀯𑀤𑀲𑁆𑀲𑀦𑁂𑀦𑀸’’𑀢𑀺 𑀬𑀣𑀸𑀞𑀺𑀢𑀯𑀲𑁂𑀦𑀸𑀧𑀺 𑀬𑁄𑀚𑀦𑀸 𑀮𑀩𑁆𑀪𑀢𑁂𑀯. 𑀪𑀯𑁄𑀖𑀲𑁆𑀲 𑀯𑁂𑀤𑀦𑀸 𑀯𑀢𑁆𑀣𑀼 𑀪𑀯𑀲𑁆𑀲𑀸𑀤𑀪𑀸𑀯𑀢𑁄. 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀲𑁆𑀲 𑀦𑀺𑀘𑁆𑀘𑀕𑁆𑀕𑀳𑀡𑀲𑁆𑀲 𑀯𑀲𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀲𑁆𑀲𑀢𑀲𑁆𑀲 𑀅𑀢𑁆𑀢𑀦𑁄’’𑀢𑀺. 𑀑𑀖𑁂𑀲𑀼 𑀯𑀼𑀢𑁆𑀢𑀦𑀬𑀸 𑀏𑀯 𑀬𑁄𑀕𑀸𑀲𑀯𑁂𑀲𑀼𑀧𑀺 𑀬𑁄𑀚𑀦𑀸 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀢𑁆𑀢𑀸𑀢𑀺 𑀢𑁂 𑀦 𑀕𑀳𑀺𑀢𑀸. 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀲𑁆𑀲 𑀦𑀺𑀘𑁆𑀘𑀕𑁆𑀕𑀳𑀡𑀲𑁆𑀲 𑀯𑀲𑁂𑀦. 𑀧𑀞𑀫𑁄𑀖𑀢𑀢𑀺𑀬𑀘𑀢𑀼𑀢𑁆𑀣𑀕𑀦𑁆𑀣𑀬𑁄𑀚𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀬𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀇𑀢𑀭𑀼𑀧𑀸𑀤𑀸𑀦𑀯𑀢𑁆𑀣𑀼𑀢𑀸 𑀕𑀳𑁂𑀢𑀩𑁆𑀩𑀸𑀢𑀺 𑀯𑁂𑀤𑀦𑀸𑀬 𑀤𑀺𑀝𑁆𑀞𑀼𑀧𑀸𑀤𑀸𑀦𑀯𑀢𑁆𑀣𑀼𑀢𑀸 𑀤𑀲𑁆𑀲𑀺𑀢𑀸. 𑀢𑀣𑀸 𑀓𑀸𑀬𑀯𑁂𑀤𑀦𑀸𑀦𑀁 𑀙𑀦𑁆𑀤𑀤𑁄𑀲𑀸𑀕𑀢𑀺𑀯𑀢𑁆𑀣𑀼𑀢𑀸 𑀓𑀸𑀫𑁄𑀖𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀯𑀢𑁆𑀣𑀼𑀢𑀸𑀯𑀘𑀦𑁂𑀦 𑀯𑀼𑀢𑁆𑀢𑀸𑀢𑀺. 𑀢𑁂𑀦𑀸𑀳 ‘‘𑀅𑀯𑀼𑀢𑁆𑀢𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄’’𑀢𑀺.

𑀥𑀸𑀭𑀡𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸, 𑀅𑀦𑀼𑀲𑁆𑀲𑀭𑀡𑀫𑁂𑀯 𑀯𑀸. 𑀏𑀓𑀢𑁆𑀢𑁂𑀢𑀺 𑀏𑀓𑀲𑀪𑀸𑀯𑁂 𑀦𑀺𑀲𑁆𑀲𑀭𑀡𑀸𑀤𑀺𑀯𑀲𑁂𑀦. 𑀲𑀫𑀸𑀕𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸. 𑀲𑀢𑀺𑀧𑀝𑁆𑀞𑀸𑀦𑀲𑀪𑀸𑀯𑁄 𑀲𑀫𑁆𑀫𑀸𑀲𑀢𑀺𑀢𑀸 𑀦𑀺𑀬𑁆𑀬𑀸𑀦𑀲𑀢𑀺𑀢𑀸 𑀲𑀫𑀸𑀦𑀪𑀸𑀕𑀢𑀸 𑀏𑀓𑀚𑀸𑀢𑀺𑀢𑀸 𑀲𑀪𑀸𑀕𑀢𑀸. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 ‘‘𑀏𑀓𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀯𑀺𑀲𑀼𑀦𑁆𑀢𑀺 𑀦𑀸𑀦𑀸𑀅𑀢𑁆𑀣𑀤𑁆𑀯𑀬𑀪𑀸𑀯𑁂𑀦. 𑀢𑀤𑁂𑀯 𑀕𑀫𑀦𑀁 𑀲𑀫𑁄𑀲𑀭𑀡𑀦𑁆𑀢𑀺 𑀲𑀢𑀺𑀲𑀤𑁆𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀸…𑀧𑁂… 𑀏𑀓𑀪𑀸𑀯𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀢𑀺𑀲𑀤𑁆𑀤𑀢𑁆𑀣𑀯𑀲𑁂𑀦 𑀅𑀯𑀼𑀘𑁆𑀘𑀫𑀸𑀦𑁂𑀢𑀺 ‘‘𑀏𑀓𑁄 𑀲𑀢𑀺𑀧𑀝𑁆𑀞𑀸𑀦𑀲𑀪𑀸𑀯𑁄 𑀏𑀓𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀼𑀘𑁆𑀘𑀫𑀸𑀦𑁂, ‘‘𑀏𑀓𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡’’𑀦𑁆𑀢𑀺 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀥𑀸𑀭𑀡𑀢𑀸𑀯 𑀲𑀢𑀻𑀢𑀺 ‘‘𑀲𑀭𑀡𑀢𑀸’’𑀢𑀺 (𑀥. 𑀲. 𑁧𑁪) 𑀯𑀼𑀢𑁆𑀢𑀥𑀸𑀭𑀡𑀢𑀸 𑀏𑀯 𑀲𑀢𑀻𑀢𑀺 𑀓𑀢𑁆𑀯𑀸. 𑀲𑀢𑀺𑀲𑀤𑁆𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀸𑀢𑀺 𑀲𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀭𑀡𑁂𑀓𑀢𑁆𑀢𑀲𑀫𑁄𑀲𑀭𑀡𑀲𑀤𑁆𑀤𑀢𑁆𑀣𑀢𑁄 𑀅𑀜𑁆𑀜𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑀸𑀯𑀸. 𑀧𑀼𑀭𑀺𑀫𑀦𑁆𑀢𑀺 𑀲𑀭𑀡𑀧𑀤𑀁. 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑁂𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑁂 𑀤𑀼𑀢𑀺𑀬𑁂 𑀅𑀢𑁆𑀣𑁂 𑀲𑀭𑀡𑁂𑀓𑀢𑁆𑀢𑀲𑀫𑁄𑀲𑀭𑀡𑀧𑀤𑀸𑀦𑀺 𑀲𑀳𑀺𑀢𑀸𑀦𑁂𑀯 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀜𑀸𑀧𑀓𑀸𑀦𑀺, 𑀏𑀯𑀁 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑁂𑀧𑀺 ‘‘𑀏𑀓𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡’’𑀦𑁆𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀅𑀢𑁆𑀣𑁂 𑀲𑀢𑀺…𑀧𑁂… 𑀓𑀸𑀭𑀡𑀸𑀦𑀺.

𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀻𑀦𑀦𑁆𑀢𑀺 𑀆𑀦𑀸𑀧𑀸𑀦𑀧𑀩𑁆𑀩𑀇𑀭𑀺𑀬𑀸𑀧𑀣𑀘𑀢𑀼𑀲𑀫𑁆𑀧𑀚𑀜𑁆𑀜 𑀓𑁄𑀝𑁆𑀞𑀸𑀲 𑀥𑀸𑀢𑀼𑀫𑀦𑀲𑀺𑀓𑀸𑀭𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀏𑀢𑁂𑀲𑀁. 𑀇𑀫𑁂𑀲𑀼 𑀧𑀦 𑀬𑀲𑁆𑀫𑀸 𑀓𑁂𑀲𑀼𑀘𑀺 𑀤𑁂𑀯𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀬𑀤𑀺𑀧𑀺 𑀓𑁄𑀝𑁆𑀞𑀸𑀲𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦𑁂𑀯𑁂𑀢𑁆𑀣 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀤𑁂𑀲𑀦𑀦𑁆𑀢𑀭𑁂 𑀧𑀦 𑀆𑀕𑀢𑀁 𑀅𑀦𑀯𑀲𑁂𑀲𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁩𑁫𑁫) 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦’’𑀦𑁆𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁮𑁨) 𑀯𑀼𑀢𑁆𑀢𑀸𑀦’’𑀦𑁆𑀢𑀺 𑀇𑀫𑀫𑁂𑀯 𑀉𑀧𑀲𑀁𑀳𑀭𑀢𑀺. 𑀧𑀜𑁆𑀘𑀯𑀺𑀥𑁂𑀦𑀸𑀢𑀺 𑀦𑀻𑀯𑀭𑀡𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀬𑀢𑀦𑀩𑁄𑀚𑁆𑀛𑀗𑁆𑀕𑀅𑀭𑀺𑀬𑀲𑀘𑁆𑀘𑀸𑀦𑀁 𑀯𑀲𑁂𑀦 𑀧𑀜𑁆𑀘𑀥𑀸. 𑀪𑀸𑀯𑀦𑀸𑀦𑀼𑀪𑀸𑀯𑁄 𑀅𑀭𑀺𑀬𑀫𑀕𑁆𑀕𑀕𑁆𑀕𑀳𑀡𑀲𑀫𑀢𑁆𑀣𑀢𑀸.

𑀢𑀁𑀦𑀺𑀬𑀫𑀢𑁄𑀢𑀺 𑀢𑀲𑁆𑀲𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀬𑀫𑀢𑁄. 𑀢𑀲𑁆𑀲𑀸 𑀪𑀺𑀓𑁆𑀔𑀼𑀪𑀸𑀯𑁂 𑀦𑀺𑀬𑀢𑁂 𑀲𑀸𑀧𑀺 𑀪𑀺𑀓𑁆𑀔𑀼𑀪𑀸𑀯𑁂 𑀦𑀺𑀬𑀢𑀸𑀬𑁂𑀯 𑀦𑀸𑀫 𑀳𑁄𑀢𑀺.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀏𑀢𑁆𑀣𑀸𑀢𑀺 𑀓𑀸𑀬𑁂. 𑀅𑀯𑀬𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀯𑀬𑀯𑀻, 𑀲𑀫𑀼𑀤𑀸𑀬𑁄, 𑀲𑀫𑀽𑀳𑁄𑀢𑀺 𑀅𑀢𑁆𑀣𑁄, 𑀲𑁄 𑀧𑀦 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀁 𑀤𑁆𑀭𑀩𑁆𑀬𑀦𑁆𑀢𑀭𑀦𑁆𑀢𑀺 𑀕𑀸𑀳𑁄 𑀮𑀤𑁆𑀥𑀺 𑀅𑀯𑀬𑀯𑀻𑀕𑀸𑀳𑁄. 𑀳𑀢𑁆𑀣𑀧𑀸𑀤𑀸𑀤𑀺𑀅𑀗𑁆𑀕𑀼𑀮𑀺𑀦𑀔𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑁂 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑁂 𑀉𑀧𑀸𑀤𑀸𑀬 𑀬𑀸𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀜𑁆𑀜𑀸 𑀘𑁂𑀯 𑀓𑀸𑀬𑀲𑀫𑀜𑁆𑀜𑀸 𑀘, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀭𑀣𑀖𑀝𑀸𑀤𑀺𑀤𑁆𑀭𑀩𑁆𑀬𑀦𑁆𑀢𑀺𑀧𑀭𑀺𑀓𑀧𑁆𑀧𑀦𑀁 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀲𑀫𑀜𑁆𑀜𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀓𑀢𑀺𑀆𑀤𑀺𑀤𑁆𑀭𑀩𑁆𑀬𑀸𑀤𑀺𑀚𑀻𑀯𑀸𑀤𑀺𑀓𑀸𑀬𑀸𑀤𑀺𑀧𑀤𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀁 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁. 𑀦𑀺𑀘𑁆𑀘𑀲𑀸𑀭𑀸𑀤𑀺𑀕𑀸𑀳𑀪𑀽𑀢𑁄 𑀅𑀪𑀺𑀦𑀺𑀯𑁂𑀲𑁄 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑁄.

𑀦 𑀢𑀁 𑀤𑀺𑀝𑁆𑀞𑀦𑁆𑀢𑀺 𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀤𑀺𑀝𑁆𑀞𑀁 𑀦 𑀳𑁄𑀢𑀺. 𑀤𑀺𑀝𑁆𑀞𑀁 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀯𑀼𑀢𑁆𑀢𑀦𑁆𑀢𑀺 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁.

𑀓𑁂𑀲𑀸𑀤𑀺𑀧𑀣𑀯𑀺𑀦𑁆𑀢𑀺 𑀓𑁂𑀲𑀸𑀤𑀺𑀲𑀜𑁆𑀜𑀺𑀢𑀁 𑀲𑀲𑀫𑁆𑀪𑀸𑀭𑀧𑀣𑀯𑀺𑀁. 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦𑀸𑀢𑀺 𑀲𑀦𑁆𑀢𑀸𑀦𑀯𑀲𑁂𑀦. 𑀅𑀜𑁆𑀜𑀢𑁆𑀣𑀸𑀢𑀺 ‘‘𑀆𑀧𑁄𑀓𑀸𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼.

𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀺 𑀲𑀧𑀭𑀲𑀦𑁆𑀢𑀸𑀦𑁂 𑀓𑀸𑀬𑁄 𑀯𑀼𑀢𑁆𑀢𑁄𑀢𑀺. ‘‘𑀓𑀸𑀬𑁄’’𑀢𑀺 𑀘𑁂𑀢𑁆𑀣 𑀲𑀫𑁆𑀫𑀲𑀦𑀼𑀧𑀕𑀸 𑀭𑀽𑀧𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀥𑀫𑁆𑀫𑀸𑀦’’𑀦𑁆𑀢𑀺. 𑀖𑀝𑀺𑀢𑀁 𑀏𑀓𑀸𑀩𑀤𑁆𑀥𑀁 𑀆𑀭𑀫𑁆𑀫𑀡𑀁 𑀖𑀝𑀺𑀢𑀸𑀭𑀫𑁆𑀫𑀡𑀁, 𑀏𑀓𑀸𑀭𑀫𑁆𑀫𑀡𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀢𑁄 𑀆𑀭𑀫𑁆𑀫𑀡𑀪𑀸𑀯𑁄 𑀦𑀢𑁆𑀣𑀻’’𑀢𑀺.

𑀅𑀦𑁆𑀢𑁄𑀑𑀮𑀻𑀬𑀦𑀸 𑀅𑀦𑁆𑀢𑁄𑀲𑀗𑁆𑀓𑁄𑀘𑁄 𑀅𑀦𑁆𑀢𑀭𑀸𑀯𑁄𑀲𑀸𑀦𑀁.

𑀤𑁆𑀯𑀻𑀳𑀻𑀢𑀺 𑀅𑀪𑀺𑀚𑁆𑀛𑀸𑀯𑀺𑀦𑀬𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀳𑀺.

𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀢𑁂𑀦. 𑀏𑀢𑁂𑀦 𑀓𑀭𑀡𑀪𑀽𑀢𑁂𑀦. 𑀯𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀦𑀦𑁆𑀢𑀭𑀺𑀢𑀢𑁆𑀢𑀸 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲. 𑀢𑀲𑁆𑀲 𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀲𑁆𑀲.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀼𑀔𑀸𑀤𑀻𑀦𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀤𑀼𑀓𑁆𑀔𑀫𑀲𑀼𑀔𑀸𑀦𑀁.

𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀘 𑀲𑁂𑀲𑁂𑀲𑀼𑀧𑀺. 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀳𑀻𑀦𑀸𑀤𑀺𑀬𑁄𑀦𑀺𑀆𑀤𑀺𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀢𑁆𑀣𑀸𑀢𑀺 𑀓𑀸𑀬𑀸𑀤𑀻𑀲𑀼 𑀏𑀓𑀲𑁆𑀫𑀺𑀁. 𑀧𑀼𑀭𑀺𑀫𑀘𑁄𑀤𑀦𑀸𑀬𑀸𑀢𑀺 ‘‘𑀧𑀼𑀩𑁆𑀩𑁂 𑀧𑀳𑀻𑀦𑀢𑁆𑀢𑀸 𑀧𑀼𑀦 𑀧𑀳𑀸𑀦𑀁 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀘𑁄𑀤𑀦𑀸𑀬. 𑀧𑀳𑀻𑀦𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀁. 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬𑀸𑀢𑀺 𑀫𑀕𑁆𑀕𑀪𑀸𑀯𑀦𑀸𑀬. 𑀉𑀪𑀬𑀢𑁆𑀣𑀸𑀢𑀺 𑀉𑀪𑀬𑀘𑁄𑀤𑀦𑀸𑀬. 𑀉𑀪𑀬𑀦𑁆𑀢𑀺 𑀧𑀭𑀺𑀳𑀸𑀭𑀤𑁆𑀯𑀬𑀁. 𑀬𑀲𑁆𑀫𑀸 𑀧𑀼𑀭𑀺𑀫𑀘𑁄𑀤𑀦𑀸𑀬 𑀦𑀸𑀦𑀸𑀧𑀼𑀕𑁆𑀕𑀮𑀧𑀭𑀺𑀳𑀸𑀭𑁄, 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑀭𑀺𑀳𑀸𑀭𑁄 𑀘 𑀲𑀫𑁆𑀪𑀯𑀢𑀺, 𑀤𑀼𑀢𑀺𑀬𑀘𑁄𑀤𑀦𑀸𑀬 𑀧𑀦 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑀭𑀺𑀳𑀸𑀭𑁄𑀬𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀪𑀯𑀢𑁄 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀓𑀸𑀬𑀸𑀤𑀻𑀲𑀼.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁫𑁬. 𑀅𑀚𑁆𑀛𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀥 𑀯𑀼𑀢𑁆𑀢𑀸 𑀩𑀳𑀺𑀤𑁆𑀥𑀸𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀅𑀦𑀼𑀧𑀲𑁆𑀲𑀦𑀧𑁆𑀧𑀓𑀸𑀭𑀸 𑀯𑀺𑀬 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀆𑀤𑀺𑀅𑀦𑀼𑀧𑀲𑁆𑀲𑀦𑀧𑁆𑀧𑀓𑀸𑀭𑀸𑀧𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀢𑁄 𑀕𑀳𑀺𑀢𑀸 𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀅𑀚𑁆𑀛𑀢𑁆𑀢𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀬𑀁. 𑀘𑀼𑀤𑁆𑀤𑀲 𑀧𑀓𑀸𑀭𑀸 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀆𑀕𑀢𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑀸𑀤𑀺𑀓𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀥 𑀯𑀼𑀢𑁆𑀢𑀸. 𑀅𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀓𑀸𑀭𑁄 𑀏𑀓𑁄 𑀧𑀓𑀸𑀭𑁄𑀢𑀺 𑀆𑀳 ‘‘𑀏𑀓𑀧𑁆𑀧𑀓𑀸𑀭𑀦𑀺𑀤𑁆𑀤𑁂𑀲𑁂𑀦𑀸’’𑀢𑀺. 𑀩𑀸𑀳𑀺𑀭𑁂𑀲𑀽𑀢𑀺 𑀏𑀓𑀘𑁆𑀘𑁂𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼. 𑀢𑁂𑀲𑀫𑁆𑀧𑀺 𑀳𑀺 𑀆𑀦𑀸𑀧𑀸𑀦𑀸𑀤𑀺𑀯𑀲𑁂𑀦 𑀲𑀫𑀣𑀧𑀓𑁆𑀔𑀺𑀓𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀲𑀫𑁆𑀪𑀯𑀢𑁄’’𑀢𑀺.

𑀢𑀘𑀲𑁆𑀲 𑀘 𑀅𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀢𑀘𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀤𑀻𑀖𑀩𑀸𑀳𑀼 𑀦𑀘𑁆𑀘𑀢𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀧𑀤𑀢𑁆𑀣𑁂𑀧𑀺 𑀲𑀫𑀸𑀲𑁂 𑀅𑀯𑀬𑀯𑀧𑀤𑀢𑁆𑀣𑀲𑀗𑁆𑀕𑀳𑁄 𑀮𑀩𑁆𑀪𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀓𑀤𑁂𑀲𑀪𑀽𑀢𑁄 𑀢𑀘𑁄 𑀕𑀳𑀺𑀢𑁄 𑀏𑀯𑀸’’𑀢𑀺. 𑀢𑀘𑀧𑀝𑀺𑀩𑀤𑁆𑀥𑀸𑀦𑀁 𑀦𑀔𑀤𑀦𑁆𑀢𑀦𑁆𑀳𑀸𑀭𑀼𑀫𑀁𑀲𑀸𑀦𑀁, 𑀢𑀘𑀧𑀝𑀺𑀩𑀤𑁆𑀥𑀸𑀦𑀁 𑀢𑀤𑀦𑀼𑀧𑁆𑀧𑀯𑀺𑀝𑁆𑀞𑀫𑀽𑀮𑀸𑀦𑀁 𑀓𑁂𑀲𑀮𑁄𑀫𑀸𑀦𑀁, 𑀢𑀧𑁆𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑀸𑀦𑀁 𑀇𑀢𑀭𑁂𑀲𑀁 𑀲𑀫𑀽𑀳𑀪𑀽𑀢𑁄 𑀲𑀩𑁆𑀩𑁄 𑀓𑀸𑀬𑁄 ‘‘𑀢𑀘𑀧𑀭𑀺𑀬𑀦𑁆𑀢𑁄’’𑀢𑁆𑀯𑁂𑀯 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀧𑁆𑀧𑀝𑀺𑀩𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀺 𑀓𑁂𑀲𑀸, 𑀅𑀢𑁆𑀣𑀺 𑀮𑁄𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀧𑀼𑀣𑀼𑀢𑁆𑀢𑀯𑀸𑀘𑀻 𑀏𑀓𑀁 𑀦𑀺𑀧𑀸𑀢𑀧𑀤𑀁, 𑀦 𑀓𑀺𑀭𑀺𑀬𑀸𑀧𑀤𑀁. 𑀓𑀺𑀭𑀺𑀬𑀸𑀧𑀤𑀢𑁆𑀢𑁂 𑀳𑀺 𑀲𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸 𑀯𑀼𑀢𑁆𑀢𑀦𑁆𑀢𑀺.

𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀸𑀘𑀼𑀕𑁆𑀕𑀢𑀓𑀭𑀡𑀸𑀤𑀺𑀦𑀸 𑀉𑀕𑁆𑀕𑀡𑁆𑀳𑀦𑀁 𑀉𑀕𑁆𑀕𑀳𑁄. 𑀓𑁄𑀝𑁆𑀞𑀸𑀲𑀧𑀸𑀴𑀺𑀬𑀸 𑀳𑀺 𑀯𑀸𑀘𑀼𑀕𑁆𑀕𑀢𑀓𑀭𑀡𑀁, 𑀫𑀦𑀲𑀺𑀓𑀺𑀭𑀺𑀬𑀸𑀬 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑀸𑀤𑀺𑀢𑁄 𑀉𑀧𑀥𑀸𑀭𑀡𑀲𑁆𑀲 𑀘 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑀁 𑀇𑀥 𑀉𑀕𑁆𑀕𑀳𑁄. 𑀬𑁂𑀦 𑀧𑀦 𑀦𑀬𑁂𑀦 𑀬𑁄𑀕𑀸𑀯𑀘𑀭𑁄 𑀢𑀢𑁆𑀣 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀯𑀺𑀥𑀻𑀢𑀺 𑀯𑀼𑀢𑁆𑀢𑁄.

𑀧𑀼𑀭𑀺𑀫𑁂𑀳𑀻𑀢𑀺 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀜𑁆𑀘𑀓𑀙𑀓𑁆𑀓𑁂𑀳𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. ‘‘𑀫𑀁𑀲𑀁…𑀧𑁂… 𑀯𑀓𑁆𑀓’’𑀦𑁆𑀢𑀺 𑀳𑀺 𑀅𑀦𑀼𑀮𑁄𑀫𑀢𑁄 𑀯𑀓𑁆𑀓𑀧𑀜𑁆𑀘𑀓𑀲𑁆𑀲 𑀧𑀼𑀦 ‘‘𑀯𑀓𑁆𑀓𑀁…𑀧𑁂… 𑀓𑁂𑀲𑀸’’𑀢𑀺 𑀯𑀓𑁆𑀓𑀧𑀜𑁆𑀘𑀓𑀲𑁆𑀲, 𑀢𑀘𑀧𑀜𑁆𑀘𑀓𑀲𑁆𑀲 𑀘 𑀧𑀝𑀺𑀮𑁄𑀫𑀢𑁄 𑀲𑀚𑁆𑀛𑀸𑀬𑀓𑁆𑀓𑀫𑁄 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄. 𑀲𑁆𑀯𑀸𑀬𑀁 𑀲𑀚𑁆𑀛𑀸𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀦𑁆𑀢𑀺 𑀅𑀦𑀼𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀦𑁆𑀢𑀺 𑀏𑀯𑀁 𑀧𑀜𑁆𑀘𑀓𑀙𑀓𑁆𑀓𑁂𑀲𑀼 𑀧𑀘𑁆𑀘𑁂𑀓𑀁 𑀢𑀺𑀧𑀜𑁆𑀘𑀸𑀳𑀁. 𑀧𑀼𑀭𑀺𑀫𑁂𑀳𑀺 𑀏𑀓𑀢𑁄 𑀢𑀺𑀧𑀜𑁆𑀘𑀸𑀳𑀦𑁆𑀢𑀺 𑀢𑀘𑀧𑀜𑁆𑀘𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀦𑀼𑀮𑁄𑀫𑀢𑁄 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀧𑀜𑁆𑀘𑀸𑀳𑀁. 𑀆𑀤𑀺𑀅𑀦𑁆𑀢𑀤𑀲𑁆𑀲𑀦𑀯𑀲𑁂𑀦𑀸𑀢𑀺𑀆𑀤𑀺𑀪𑀽𑀢𑀲𑁆𑀲 𑀅𑀦𑀼𑀮𑁄𑀫𑀢𑁄 𑀲𑀚𑁆𑀛𑀸𑀬𑀲𑁆𑀲, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀚𑁆𑀛𑀸𑀬𑁂 𑀅𑀦𑁆𑀢𑀪𑀽𑀢𑀲𑁆𑀲 𑀧𑀝𑀺𑀮𑁄𑀫𑀢𑁄 𑀲𑀚𑁆𑀛𑀸𑀬𑀲𑁆𑀲 𑀤𑀲𑁆𑀲𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀅𑀦𑀼𑀮𑁄𑀫…𑀧𑁂… 𑀅𑀦𑁆𑀢𑀺𑀫𑁄’’𑀢𑀺. 𑀏𑀢𑀫𑁆𑀧𑀻𑀢𑀺 𑀬𑀤𑀺𑀤𑀁 𑀧𑀼𑀭𑀺𑀫𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀲𑁆𑀲 𑀧𑀜𑁆𑀘𑀓𑀸𑀤𑀺𑀦𑁄 𑀏𑀓𑀢𑁄 𑀲𑀚𑁆𑀛𑀸𑀬𑀓𑀭𑀡𑀁, 𑀧𑀜𑁆𑀘𑀓𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀅𑀦𑀼𑀮𑁄𑀫𑀸𑀤𑀺𑀦𑀸 𑀲𑀚𑁆𑀛𑀸𑀬𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑁄 𑀲𑀚𑁆𑀛𑀸𑀬𑀧𑁆𑀧𑀓𑀸𑀭𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀳𑀢𑁆𑀣𑀸𑀦𑀁 𑀏𑀓𑀫𑀼𑀔𑀸 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸 𑀞𑀧𑀺𑀢𑀸 𑀅𑀗𑁆𑀕𑀼𑀮𑀺𑀬𑁄 𑀇𑀥 𑀳𑀢𑁆𑀣𑀲𑀗𑁆𑀔𑀮𑀺𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀗𑁆𑀕𑀼𑀮𑀺𑀧𑀦𑁆𑀢𑀻’’𑀢𑀺. 𑀅𑀲𑀼𑀪𑀮𑀓𑁆𑀔𑀡𑀁 𑀓𑁂𑀲𑀸𑀤𑀻𑀦𑀁 𑀧𑀝𑀺𑀓𑁆𑀓𑀽𑀮𑀪𑀸𑀯𑁄. 𑀣𑀤𑁆𑀥𑀸𑀤𑀺𑀪𑀸𑀯𑁄 𑀥𑀸𑀢𑀼𑀮𑀓𑁆𑀔𑀡𑀁.

𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁄, 𑀲𑀫𑀸𑀦𑁄 𑀯𑀸 𑀓𑁄𑀝𑁆𑀞𑀸𑀲𑁄 𑀲𑀓𑁄𑀝𑁆𑀞𑀸𑀲𑁄, 𑀢𑀢𑁆𑀣 𑀪𑀯𑁄 𑀲𑀓𑁄𑀝𑁆𑀞𑀸𑀲𑀺𑀓𑁄, 𑀓𑀫𑁆𑀫𑀝𑁆𑀞𑀸𑀦𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀳𑀺𑀢𑁆𑀯𑀸𑀢𑀺 𑀅𑀲𑀼𑀪𑀢𑁄 𑀯𑀸 𑀥𑀸𑀢𑀼𑀢𑁄 𑀅𑀦𑀼𑀧𑀲𑁆𑀲𑀦𑀁 𑀫𑀦𑀲𑀺𑀓𑀸𑀭𑀁 𑀅𑀓𑀢𑁆𑀯𑀸. 𑀧𑀼𑀩𑁆𑀩𑁂 𑀯𑀺𑀬 𑀧𑀭𑀺𑀬𑀦𑁆𑀢𑀢𑀸𑀮𑀜𑁆𑀘 𑀆𑀤𑀺𑀢𑀸𑀮𑀜𑁆𑀘 𑀅𑀕𑀦𑁆𑀢𑁆𑀯𑀸.

𑀲𑀫𑀸𑀥𑀸𑀦𑀸𑀤𑀺𑀯𑀺𑀲𑁂𑀲𑀬𑁄𑀕𑁂𑀦 𑀅𑀥𑀺𑀓𑀁 𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢’’𑀦𑁆𑀢𑀺. 𑀫𑀦𑀲𑀺𑀓𑀭𑀡𑀁 𑀘𑀺𑀢𑁆𑀢𑀦𑁆𑀢𑀺 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑁆𑀲𑁂𑀯 𑀲𑀫𑀦𑁆𑀦𑀸𑀳𑀸𑀭𑀓𑀁 𑀘𑀺𑀢𑁆𑀢𑀁. 𑀯𑀺𑀓𑁆𑀔𑁂𑀧𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀲𑀝𑀧𑁆𑀧𑀯𑀢𑁆𑀢𑀺 𑀇𑀥 𑀧𑀪𑀜𑁆𑀚𑀦𑀁, 𑀲𑀫𑀸𑀥𑀸𑀦𑁂𑀦 𑀢𑀤𑀪𑀸𑀯𑀢𑁄 𑀦 𑀘 𑀧𑀪𑀜𑁆𑀚𑀦𑀲𑀪𑀸𑀯𑀁.

𑀲𑀓𑁆𑀔𑀺𑀪𑀯𑀦𑀢𑀸 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸. 𑀧𑀼𑀩𑁆𑀩𑀳𑁂𑀢𑀸𑀤𑀺𑀓𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀦𑀼𑀭𑀽𑀧𑀫𑀦𑀲𑀺𑀓𑀸𑀭𑀸𑀦𑀼𑀬𑁄𑀕𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀫𑀧𑁆𑀧𑀯𑀢𑁆𑀢𑀦𑁆𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑀁. 𑀢𑀣𑀸𑀧𑀯𑀢𑁆𑀢𑀺𑀬𑀸𑀢𑀺 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀢𑁆𑀢𑀺𑀬𑀸, 𑀢𑀢𑁆𑀣 𑀘 𑀧𑀓𑁆𑀔𑀦𑁆𑀤𑀦𑁂𑀦 𑀲𑀺𑀤𑁆𑀥𑀸𑀬 𑀬𑀣𑀸𑀯𑀼𑀢𑁆𑀢𑀲𑀫𑀧𑁆𑀧𑀯𑀢𑁆𑀢𑀺𑀬𑀸. 𑀧𑀜𑁆𑀜𑀸𑀬 𑀢𑁄𑀲𑁂𑀢𑀻𑀢𑀺 𑀬𑀸𑀬𑀁 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀢𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀸, 𑀆𑀲𑁂𑀯𑀦𑀸𑀢𑀺 𑀇𑀫𑀸𑀲𑀁 𑀲𑀸𑀥𑀺𑀓𑀸 𑀪𑀸𑀯𑀦𑀸𑀧𑀜𑁆𑀜𑀸, 𑀢𑀸𑀬 𑀅𑀥𑀺𑀘𑀺𑀢𑁆𑀢𑀁 𑀢𑁄𑀲𑁂𑀢𑀺 𑀧𑀳𑀝𑁆𑀞𑀁 𑀓𑀭𑁄𑀢𑀺. 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀲𑀺𑀤𑁆𑀥𑀺𑀬𑀸𑀯 𑀳𑀺 𑀢𑀁𑀲𑀸𑀥𑀺𑀓𑀸𑀬 𑀧𑀜𑁆𑀜𑀸𑀬 𑀢𑀁 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀫𑁆𑀧𑀳𑀁𑀲𑀦𑁆𑀢𑁄 𑀘 𑀬𑀲𑁆𑀫𑀸 𑀲𑀩𑁆𑀩𑀲𑁄 𑀧𑀭𑀺𑀩𑀦𑁆𑀥𑀯𑀺𑀲𑁄𑀥𑀦𑁂𑀦 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑁄𑀤𑀸𑀧𑁂𑀢𑀻𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀲𑀫𑀼𑀢𑁆𑀢𑁂𑀚𑁂𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀮𑀸𑀪𑁂𑀦 𑀪𑀸𑀯𑀦𑀸𑀭𑀲𑀯𑀺𑀭𑀳𑀺𑀢𑀁. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀪𑀸𑀯𑀦𑀸𑀬 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀧𑀳𑀸𑀲𑁂𑀢𑀺 𑀧𑀫𑁄𑀤𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑁆𑀫𑀸 𑀢𑀢𑁆𑀣 𑀉𑀢𑁆𑀢𑁂𑀚𑁂𑀢𑀺.

𑀆𑀲𑀬𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀁.

𑀯𑀯𑀢𑁆𑀣𑀺𑀢𑀢𑀦𑁆𑀢𑀺 𑀅𑀲𑀁𑀓𑀺𑀡𑁆𑀡𑀢𑀁.

𑀅𑀦𑁆𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑁄𑀝𑁆𑀞𑀸𑀲𑁂. 𑀲𑀼𑀔𑀼𑀫𑀦𑁆𑀢𑀺 𑀲𑀼𑀔𑀼𑀫𑀦𑁆𑀳𑀸𑀭𑀼𑀆𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀢𑀸𑀮𑀧𑀝𑁆𑀝𑀺𑀓𑀸 𑀢𑀸𑀮𑀧𑀢𑁆𑀢𑀯𑀺𑀮𑀺𑀯𑁂𑀳𑀺 𑀓𑀢𑀓𑀝𑀲𑀸𑀭𑀓𑁄.

𑀕𑀡𑀦𑀸𑀬 𑀫𑀢𑁆𑀢𑀸-𑀲𑀤𑁆𑀤𑁄 𑀓𑀢𑀺𑀧𑀬𑁂𑀳𑀺 𑀊𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀘𑁆𑀘𑀢𑀺. 𑀤𑀦𑁆𑀢𑀝𑁆𑀞𑀺𑀯𑀚𑁆𑀚𑀺𑀢𑀸𑀦𑀺 𑀢𑀻𑀳𑀺 𑀊𑀦𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺. 𑀢𑀲𑁆𑀫𑀸 ‘‘𑀢𑀺𑀫𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀅𑀢𑀺𑀭𑁂𑀓𑀢𑀺𑀲𑀢𑀅𑀝𑁆𑀞𑀺𑀓𑀲𑀫𑀼𑀲𑁆𑀲𑀬’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁨) 𑀯𑀼𑀢𑁆𑀢𑀁, 𑀢𑀁 𑀤𑀦𑁆𑀢𑀝𑁆𑀞𑀻𑀦𑀺𑀧𑀺 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁂𑀦 𑀯𑀼𑀢𑁆𑀢𑀁. ‘‘𑀕𑁄𑀧𑁆𑀨𑀓𑀝𑁆𑀞𑀺𑀓𑀸𑀤𑀻𑀦𑀺 𑀅𑀯𑀼𑀢𑁆𑀢𑀸𑀦𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑁂 𑀕𑁄𑀧𑁆𑀨𑀓𑀝𑁆𑀞𑀻𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, ‘‘𑀆𑀦𑀺𑀲𑀤𑀝𑁆𑀞𑀺𑀆𑀤𑀻𑀦𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁.

𑀢𑁂𑀦 𑀅𑀝𑁆𑀞𑀺𑀦𑀸𑀢𑀺 𑀊𑀭𑀼𑀝𑁆𑀞𑀺𑀦𑀸.

𑀫𑀭𑀼𑀫𑁆𑀧𑁂𑀳𑀻𑀢𑀺 𑀫𑀭𑀼𑀫𑁆𑀧𑀘𑀼𑀡𑁆𑀡𑁂𑀳𑀺.

𑀲𑀼𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀦𑀸𑀦𑀸𑀭𑀫𑁆𑀫𑀡𑀯𑀺𑀧𑁆𑀨𑀦𑁆𑀤𑀦𑀯𑀺𑀭𑀳𑁂𑀦𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑁂𑀦 𑀯𑀺𑀧𑁆𑀨𑀦𑁆𑀤𑀦𑀁 𑀦𑀸𑀦𑀸𑀭𑀫𑁆𑀫𑀡𑀯𑀺𑀧𑁆𑀨𑀦𑁆𑀤𑀦𑀁, 𑀢𑁂𑀦 𑀯𑀺𑀭𑀳𑁂𑀦. 𑀅𑀦𑀢𑀺𑀓𑁆𑀓𑀦𑁆𑀢𑀧𑀻𑀢𑀺𑀲𑀼𑀔𑀲𑁆𑀲 𑀛𑀸𑀦𑀘𑀺𑀢𑁆𑀢𑀲𑁆𑀲. 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀲𑁆𑀲 𑀯𑀸.

𑀧𑀝𑀺𑀓𑁆𑀓𑀽𑀮𑀥𑀸𑀢𑀼𑀯𑀡𑁆𑀡𑀯𑀺𑀲𑁂𑀲𑀦𑁆𑀢𑀺 𑀧𑀝𑀺𑀓𑁆𑀓𑀽𑀮𑀯𑀺𑀲𑁂𑀲𑀁, 𑀥𑀸𑀢𑀼𑀯𑀺𑀲𑁂𑀲𑀁, 𑀯𑀡𑁆𑀡𑀓𑀲𑀺𑀡𑀯𑀺𑀲𑁂𑀲𑀁. 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀯𑀺𑀲𑀼𑀁, 𑀳𑁂𑀝𑁆𑀞𑀺𑀫𑁂𑀳𑀺 𑀏𑀓𑀢𑁄 𑀘 𑀲𑀚𑁆𑀛𑀸𑀬𑁂 𑀙𑀦𑁆𑀦𑀁 𑀙𑀦𑁆𑀦𑀁 𑀧𑀜𑁆𑀘𑀸𑀳𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀫𑀸𑀲𑀸 𑀧𑀭𑀺𑀧𑀼𑀡𑁆𑀡𑀸 𑀮𑀩𑁆𑀪𑀦𑁆𑀢𑀺, 𑀢𑀘𑀧𑀜𑁆𑀘𑀓𑁂 𑀧𑀦 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀫𑁂𑀯𑀸𑀢𑀺 𑀆𑀳 ‘‘𑀅𑀤𑁆𑀥𑀫𑀸𑀲𑁂 𑀊𑀦𑁂𑀧𑀻’’𑀢𑀺. 𑀫𑀸𑀲𑀦𑁆𑀢𑀭𑀕𑀫𑀦𑀁 𑀲𑀚𑁆𑀛𑀸𑀬𑀲𑁆𑀲 𑀲𑀢𑁆𑀢𑀫𑀸𑀤𑀺𑀫𑀸𑀲𑀕𑀫𑀦𑀁.

𑀬𑀫𑁂𑀦𑁆𑀢𑀦𑁆𑀢𑀺 𑀩𑀦𑁆𑀥𑁂𑀦𑁆𑀢𑀁.

‘‘𑀦𑀻𑀮𑀁 𑀧𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀖𑀸𑀝𑁂 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀦𑀁 𑀢𑀁𑀦𑀺𑀲𑁆𑀲𑀬𑀢𑁆𑀢𑀸 𑀫𑀳𑀸𑀪𑀽𑀢𑁂 𑀉𑀧𑀸𑀤𑀸𑀬𑀸𑀢𑀺 𑀆𑀳 ‘‘𑀫𑀳𑀸𑀪𑀽𑀢𑀁…𑀧𑁂… 𑀤𑀼𑀕𑁆𑀕𑀦𑁆𑀥𑀦𑁆𑀢𑀺𑀆𑀤𑀺𑀦𑀸’’𑀢𑀺. 𑀉𑀧𑀸𑀤𑀸𑀬𑀭𑀽𑀧𑀁 𑀫𑀳𑀸𑀪𑀽𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀤𑀸𑀭𑀽𑀧𑀲𑁆𑀲. 𑀢𑀢𑁄𑀢𑀺 𑀫𑀳𑀸𑀪𑀽𑀢𑀢𑁄. 𑀙𑀸𑀬𑀸𑀬 𑀆𑀢𑀧𑀧𑀘𑁆𑀘𑀬𑀪𑀸𑀯𑁄 𑀆𑀢𑀧𑁄 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺, 𑀆𑀢𑀧𑀲𑁆𑀲 𑀙𑀸𑀬𑀸𑀬 𑀉𑀧𑁆𑀧𑀸𑀤𑀓𑀪𑀸𑀯𑁄 𑀙𑀸𑀬𑀸𑀢𑀧𑀸𑀦𑀁 𑀆𑀢𑀧𑀧𑀘𑁆𑀘𑀬𑀙𑀸𑀬𑀼𑀧𑁆𑀧𑀸𑀤𑀓𑀪𑀸𑀯𑁄. 𑀢𑁂𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀉𑀧𑁆𑀧𑀸𑀤𑀓𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑁂𑀤𑀓𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀬𑀢𑀦𑀸𑀦𑀺 𑀘 𑀤𑁆𑀯𑀸𑀭𑀸𑀦𑀺 𑀘𑀸𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀢𑀤𑁂𑀓𑀤𑁂𑀲𑀪𑀽𑀢𑀸𑀦𑀺 𑀤𑁆𑀯𑀸𑀭𑀸𑀦𑀺 𑀘.

𑀲𑀧𑁆𑀧𑀘𑁆𑀘𑀬𑀪𑀸𑀯𑀸𑀢𑀺 𑀲𑀧𑁆𑀧𑀘𑁆𑀘𑀬𑀢𑁆𑀢𑀸.

𑀬𑀣𑀸𑀯𑀼𑀢𑁆𑀢𑁂𑀦 𑀆𑀓𑀸𑀭𑁂𑀦𑀸𑀢𑀺 ‘‘𑀇𑀢𑀺 𑀇𑀤𑀁 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁩𑁫𑁬), ‘‘𑀇𑀫𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀓𑀸𑀫𑁂𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁩𑁫𑁬) 𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀥𑀺𑀦𑀸. ‘‘𑀅𑀯𑀺𑀲𑁂𑀲𑀢𑁄 𑀧𑀦 𑀲𑀸𑀥𑀸𑀭𑀡𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸’’𑀢𑀺, ‘‘𑀇𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀘 𑀯𑀤𑀦𑁆𑀢𑀺. 𑀯𑀡𑁆𑀡𑀸𑀤𑀺𑀫𑀼𑀔𑁂𑀦𑀸𑀢𑀺 𑀯𑀡𑁆𑀡𑀧𑀝𑀺𑀓𑁆𑀓𑀽𑀮𑀲𑀼𑀜𑁆𑀜𑀢𑀸𑀫𑀼𑀔𑁂𑀦. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀁, 𑀬𑁄 𑀉𑀕𑁆𑀕𑀳𑁄𑀢𑀺 𑀯𑀼𑀢𑁆𑀢𑁄. 𑀏𑀢𑁆𑀣𑀸𑀢𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀧𑀞𑀫𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀲𑀼 𑀏𑀓𑀲𑁆𑀫𑀺𑀁 𑀲𑀦𑁆𑀥𑀻𑀬𑀢𑀺. 𑀓𑁂𑀦? 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦𑁂𑀯, 𑀢𑀲𑁆𑀫𑀸 𑀉𑀕𑁆𑀕𑀳𑁄𑀯 𑀲𑀦𑁆𑀥𑀺 𑀉𑀕𑁆𑀕𑀳𑀲𑀦𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀝𑁆𑀞𑀸𑀦𑀓𑀁 𑀉𑀧𑁆𑀧𑀚𑁆𑀚𑀦𑀓𑀁. 𑀲𑀸𑀢𑀺𑀭𑁂𑀓𑀸𑀦𑀺 𑀙 𑀅𑀫𑁆𑀩𑀡𑀸𑀦𑀺 𑀓𑀼𑀫𑁆𑀪𑀁. 𑀢𑀢𑁄𑀢𑀺 𑀫𑀼𑀔𑀥𑁄𑀯𑀦𑀔𑀸𑀤𑀦𑀪𑁄𑀚𑀦𑀓𑀺𑀘𑁆𑀘𑀢𑁄. 𑀦𑀺𑀯𑀢𑁆𑀢𑀢𑀻𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀅𑀘𑁆𑀘𑀦𑁆𑀢𑀦𑀺𑀯𑀢𑁆𑀢𑀺𑀯𑀲𑁂𑀦 𑀦𑀺𑀯𑀢𑁆𑀢𑀢𑀺.

𑀓𑀫𑁆𑀫𑀫𑁂𑀯𑀸𑀢𑀺 𑀫𑀦𑀲𑀺𑀓𑀸𑀭𑀓𑀫𑁆𑀫𑀫𑁂𑀯. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀭𑀫𑁆𑀫𑀡𑀁.

𑀢𑀣𑀸𑀢𑀺 𑀯𑀦𑀫𑀓𑁆𑀓𑀝𑁄 𑀯𑀺𑀬.

𑀏𑀓𑀦𑁆𑀢𑀺 𑀏𑀓𑀁 𑀓𑁄𑀝𑁆𑀞𑀸𑀲𑀁.

𑀲𑀢𑁆𑀢𑀕𑀳𑀡𑀭𑀳𑀺𑀢𑁂𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀅𑀦𑀸𑀫𑀲𑀺𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀲𑀦𑁆𑀢𑀸𑀦𑀢𑀸𑀬 𑀅𑀳𑀁𑀓𑀸𑀭𑀯𑀢𑁆𑀣𑀼𑀫𑁆𑀳𑀺 𑀅𑀧𑁆𑀧𑀳𑀻𑀦𑀫𑀸𑀦𑀲𑁆𑀲 𑀧𑀳𑀻𑀦𑀸𑀓𑀸𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀤𑁆𑀥𑀲𑁆𑀢𑀸𑀳𑀁𑀓𑀸𑀭𑁂’’𑀢𑀺. 𑀢𑀢𑁆𑀣𑀸𑀢𑀺 𑀧𑀭𑀲𑁆𑀲 𑀓𑀸𑀬𑁂.

𑁩𑁫𑁭. 𑀆𑀤𑀺𑀫𑁆𑀳𑀺 𑀲𑁂𑀯𑀦𑀸 𑀫𑀦𑀲𑀺𑀓𑀸𑀭𑀲𑁆𑀲 𑀉𑀧𑁆𑀧𑀸𑀤𑀦𑀸 𑀆𑀭𑀫𑁆𑀪𑁄.

𑁩𑁬𑁨. 𑀕𑀫𑀺𑀢𑀸𑀢𑀺 𑀯𑀺𑀕𑀫𑀺𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁩. 𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀲𑀫𑁆𑀫𑀸 𑀧𑀓𑀸𑀭𑁂𑀳𑀺 𑀚𑀸𑀦𑀦𑁆𑀢𑀲𑁆𑀲, 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀲𑀼𑀔𑀲𑀸𑀫𑀺𑀲𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀅𑀯𑀺𑀧𑀭𑀻𑀢𑀁 𑀯𑁂𑀤𑀦𑀁 𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀯𑁄𑀳𑀸𑀭𑀸𑀦𑀼𑀲𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀯𑁄𑀳𑀸𑀭𑀫𑀢𑁆𑀢𑁂𑀦𑀸’’𑀢𑀺. 𑀯𑁂𑀤𑀬𑀸𑀫𑀻𑀢𑀺 ‘‘𑀅𑀳𑀁 𑀯𑁂𑀤𑀬𑀸𑀫𑀻’’𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑀸 𑀯𑀼𑀢𑁆𑀢𑀸𑀢𑀺, 𑀧𑀭𑀺𑀜𑁆𑀜𑀸𑀢𑀯𑁂𑀤𑀦𑁄𑀧𑀺 𑀯𑀸 𑀉𑀧𑁆𑀧𑀦𑁆𑀦𑀸𑀬 𑀲𑀼𑀔𑀯𑁂𑀤𑀦𑀸𑀬 𑀮𑁄𑀓𑀯𑁄𑀳𑀸𑀭𑁂𑀦 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀚𑀸𑀦𑀸𑀢𑀺, 𑀯𑁄𑀳𑀭𑀢𑀺 𑀘, 𑀧𑀕𑁂𑀯 𑀇𑀢𑀭𑁄. 𑀢𑁂𑀦𑀸𑀳 ‘‘𑀯𑁄𑀳𑀸𑀭𑀫𑀢𑁆𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺.

𑀉𑀪𑀬𑀦𑁆𑀢𑀺 𑀯𑀻𑀭𑀺𑀬𑀲𑀫𑀸𑀥𑀺𑀁. 𑀲𑀳 𑀬𑁄𑀚𑁂𑀢𑁆𑀯𑀸𑀢𑀺 𑀲𑀫𑀥𑀼𑀭𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀁 𑀓𑀢𑁆𑀯𑀸. 𑀅𑀢𑁆𑀣𑀥𑀫𑁆𑀫𑀸𑀤𑀻𑀲𑀼 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀫𑀕𑁆𑀕𑀧𑀜𑁆𑀜𑀸 𑀏𑀯 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀫𑁆𑀪𑀺𑀤𑀸.

𑀯𑀡𑁆𑀡𑀫𑀼𑀔𑀸𑀤𑀻𑀲𑀼 𑀢𑀻𑀲𑀼𑀧𑀺 𑀫𑀼𑀔𑁂𑀲𑀼. 𑀧𑀭𑀺𑀕𑁆𑀕𑀳𑀲𑁆𑀲𑀸𑀢𑀺 𑀅𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲. ‘‘𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄’’𑀢𑀺 𑀯𑀘𑀦𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘𑀓𑁆𑀔𑀸𑀤𑀻𑀦𑀺 𑀙 𑀯𑀢𑁆𑀣𑀽𑀦𑀻’’𑀢𑀺 𑀆𑀳. 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀫𑁆𑀪𑁂𑀦 𑀞𑀺𑀢𑁂𑀲𑀼 𑀤𑁆𑀯𑀻𑀲𑀼 𑀦𑀴𑀓𑀮𑀸𑀧𑁂𑀲𑀼 𑀏𑀓𑀲𑁆𑀲 𑀇𑀢𑀭𑀧𑀝𑀺𑀩𑀤𑁆𑀥𑀝𑁆𑀞𑀺𑀢𑀺𑀢𑀸 𑀯𑀺𑀬 𑀦𑀸𑀫𑀓𑀸𑀬𑀲𑁆𑀲 𑀭𑀽𑀧𑀓𑀸𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀤𑀲𑁆𑀲𑀦𑀜𑁆𑀳𑁂𑀢𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀦𑁆𑀢𑀺.

𑀢𑁂𑀲𑀦𑁆𑀢𑀺 𑀬𑁂𑀲𑀁 𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀦𑀺 𑀧𑀸𑀓𑀝𑀸𑀦𑀺, 𑀢𑁂𑀲𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀢𑀢𑁄 𑀅𑀜𑁆𑀜𑁂𑀲𑀁, 𑀬𑁂𑀲𑀁 𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀦𑀺 𑀦 𑀧𑀸𑀓𑀝𑀸𑀦𑀺. 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀲𑀼𑀯𑀺𑀪𑀽𑀢𑀯𑀼𑀢𑁆𑀢𑀺𑀢𑀸𑀬 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑁂𑀤𑀦𑀸 𑀧𑀸𑀓𑀝𑀸’’𑀢𑀺. 𑀯𑀺𑀮𑀸𑀧𑁂𑀢𑁆𑀯𑀸 𑀯𑀺𑀮𑀸𑀧𑁂𑀢𑁆𑀯𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀦𑀯𑀦𑀻𑀢𑀁 𑀯𑀺𑀮𑀸𑀧𑁂𑀢𑁆𑀯𑀸 𑀲𑀻𑀢𑀺𑀪𑀽𑀢𑀁 𑀅𑀢𑀺𑀲𑀻𑀢𑀮𑁂 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀣𑀺𑀦𑁆𑀦𑀁 𑀞𑀺𑀢𑀁 𑀫𑀢𑁆𑀣𑁂𑀢𑁆𑀯𑀸 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀧𑀼𑀦 𑀯𑀺𑀮𑀸𑀧𑁂𑀢𑁆𑀯𑀸𑀢𑀺 𑀲𑀢𑀯𑀸𑀭𑀁 𑀏𑀯𑀁 𑀓𑀢𑁆𑀯𑀸.

𑀢𑀢𑁆𑀣𑀸𑀧𑀻𑀢𑀺 𑀬𑀢𑁆𑀣 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀏𑀯…𑀧𑁂… 𑀤𑀲𑁆𑀲𑀺𑀢𑀁, 𑀢𑀢𑁆𑀣𑀸𑀧𑀺. 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀢𑀤𑀦𑁆𑀢𑁄𑀕𑀥𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑀦𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁫. 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦 𑀯𑀺𑀲𑀼𑀤𑁆𑀥𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀳𑀺𑀧𑀻𑀢𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀺𑀮𑁂𑀲𑀢𑁄 𑀇𑀢𑀭𑁂𑀳𑀺𑀧𑀺 𑀅𑀲𑀫𑁆𑀧𑀬𑀼𑀢𑁆𑀢𑁂𑀳𑀺. 𑀯𑀺𑀲𑀼𑀁 𑀯𑀘𑀦𑀦𑁆𑀢𑀺 𑀅𑀜𑁆𑀜𑀸𑀓𑀼𑀲𑀮𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀘𑀦𑀁. 𑀯𑀺𑀲𑀺𑀝𑁆𑀞𑀕𑁆𑀕𑀳𑀡𑀦𑁆𑀢𑀺 𑀯𑀺𑀲𑀺𑀝𑁆𑀞𑀢𑀸𑀕𑀳𑀡𑀁, 𑀆𑀯𑁂𑀡𑀺𑀓𑀲𑀫𑁄𑀳𑀢𑀸𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄, 𑀬𑀢𑁄 𑀢𑀤𑀼𑀪𑀬𑀁 𑀫𑁄𑀫𑀽𑀳𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑁄

𑀓. 𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁩𑁬𑁭. 𑀏𑀓𑀲𑁆𑀫𑀺𑀁 𑀬𑀼𑀕𑁂 𑀩𑀤𑁆𑀥𑀕𑁄𑀡𑀸𑀦𑀁 𑀯𑀺𑀬 𑀏𑀓𑀢𑁄 𑀧𑀯𑀢𑁆𑀢𑀺 𑀬𑀼𑀕𑀦𑀤𑁆𑀥𑀢𑀸.

𑀕𑀳𑀡𑀸𑀓𑀸𑀭𑁂𑀦𑀸𑀢𑀺 𑀅𑀲𑀼𑀪𑁂𑀧𑀺 𑀆𑀭𑀫𑁆𑀫𑀡𑁂 ‘‘𑀲𑀼𑀪’’𑀦𑁆𑀢𑀺 𑀕𑀳𑀡𑀸𑀓𑀸𑀭𑁂𑀦. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑀸𑀢𑀺 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀁𑀲𑁂𑀦 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀫𑁂𑀯 𑀆𑀲𑀻𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀆𑀓𑀗𑁆𑀔𑀺𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲𑀸’’𑀢𑀺. 𑀅𑀦𑀼𑀧𑀸𑀬𑁄 𑀏𑀯 𑀘 𑀳𑀺𑀢𑀯𑀺𑀲𑀺𑀝𑁆𑀞𑀲𑁆𑀲 𑀲𑀼𑀔𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀆𑀓𑀗𑁆𑀔𑀺𑀢𑀲𑁆𑀲 𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲 𑀅𑀦𑀼𑀧𑀸𑀬𑀪𑀽𑀢𑁄. 𑀅𑀯𑀺𑀚𑁆𑀚𑀦𑁆𑀥𑀸 𑀳𑀺 𑀢𑀸𑀤𑀺𑀲𑁂𑀧𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁂 𑀓𑀸𑀫𑀘𑁆𑀙𑀦𑁆𑀤𑁂𑀢𑀺 𑀅𑀢𑁆𑀣𑁄.

𑀢𑀤𑀦𑀼𑀓𑀽𑀮𑀢𑁆𑀢𑀸𑀢𑀺 𑀢𑁂𑀲𑀁 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺, ‘‘𑀅𑀲𑀼𑀪’’𑀦𑁆𑀢𑀺 𑀘 𑀧𑀯𑀢𑁆𑀢𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀦𑀁 𑀅𑀦𑀼𑀓𑀽𑀮𑀢𑁆𑀢𑀸. 𑀭𑀽𑀧𑀸𑀤𑀻𑀲𑀼 𑀅𑀦𑀺𑀘𑁆𑀘𑀸𑀤𑀺𑀅𑀪𑀺𑀦𑀺𑀯𑁂𑀲𑀲𑁆𑀲, 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀫𑀦𑀲𑀺𑀓𑀸𑀭𑀽𑀧𑀦𑀺𑀲𑁆𑀲𑀬𑀢𑀸 𑀢𑀤𑀦𑀼𑀓𑀽𑀮𑀢𑀸.

𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀲𑁄 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲𑀸𑀢𑀺 𑀪𑁄𑀚𑀦𑀧𑀭𑀺𑀡𑀸𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑀸𑀤𑀺𑀓𑀲𑁆𑀲. 𑀢𑀤𑀸𑀥𑀸𑀭𑀲𑁆𑀲𑀸𑀢𑀺 𑀉𑀤𑀭𑀲𑁆𑀲, 𑀓𑀸𑀬𑀲𑁆𑀲𑁂𑀯 𑀯𑀸. 𑀲𑁄𑀢𑀺 𑀪𑁄𑀚𑀦𑁂𑀫𑀢𑁆𑀢𑀜𑁆𑀜𑀽. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀓𑀸𑀫𑀭𑀸𑀕𑁄 ‘‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦𑀸’’𑀢𑀺. 𑀅𑀪𑀺𑀥𑀫𑁆𑀫𑁂 𑀳𑀺 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀭𑀽𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀪𑀯𑀭𑀸𑀕𑁄𑀧𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡’’𑀦𑁆𑀢𑀺.

𑀲𑀻𑀫𑀸𑀪𑁂𑀤𑁂 𑀓𑀢𑁂𑀢𑀺 𑀅𑀢𑁆𑀢𑀸𑀤𑀺𑀫𑀭𑀺𑀬𑀸𑀤𑀸𑀬 𑀪𑀺𑀦𑁆𑀦𑀸𑀬, 𑀅𑀢𑁆𑀢𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀏𑀓𑀭𑀽𑀧𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀸𑀤𑀺𑀉𑀤𑁆𑀤𑁂𑀲𑀭𑀳𑀺𑀢𑀦𑁆𑀢𑀺 𑀯𑀺𑀳𑀸𑀭𑀸𑀤𑀺𑀧𑀤𑁂𑀲𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀁. 𑀉𑀕𑁆𑀕𑀳𑀺𑀢𑀸𑀬 𑀫𑁂𑀢𑁆𑀢𑀸𑀬. 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸𑀢𑀺 𑀇𑀢𑁆𑀣𑀺𑀆𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀸 𑀧𑀘𑁆𑀘𑁂𑀓𑀁 𑀅𑀯𑁂𑀭𑀸𑀤𑀻𑀳𑀺 𑀬𑁄𑀚𑀦𑀸𑀯𑀲𑁂𑀦 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸. 𑀲𑀢𑁆𑀢𑀸𑀤𑀺𑀇𑀢𑁆𑀣𑀺𑀆𑀤𑀺𑀅𑀯𑁂𑀭𑀸𑀤𑀺𑀬𑁄𑀕𑁂𑀦𑀸𑀢𑀺 𑀏𑀢𑁆𑀣 𑀲𑀢𑁆𑀢𑀸𑀤𑀺𑀅𑀯𑁂𑀭𑀸𑀤𑀺𑀬𑁄𑀕𑁂𑀦 𑀯𑀻𑀲𑀢𑀺, 𑀇𑀢𑁆𑀣𑀺𑀆𑀤𑀺𑀅𑀯𑁂𑀭𑀸𑀤𑀺𑀬𑁄𑀕𑁂𑀦 𑀅𑀝𑁆𑀞𑀯𑀻𑀲𑀢𑀻𑀢𑀺 𑀅𑀝𑁆𑀞𑀘𑀢𑁆𑀢𑀸𑀭𑀻𑀲𑀁 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬. 𑀢𑀣𑀸 𑀲𑁂𑀲𑀤𑀺𑀲𑀸𑀲𑀼𑀧𑀻𑀢𑀺 𑀲𑀩𑁆𑀩𑀸 𑀲𑀗𑁆𑀕𑀳𑁂𑀢𑁆𑀯𑀸 𑀆𑀳 ‘‘𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸’’𑀢𑀺.

𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀜𑁆𑀘 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀩𑀳𑀼𑀓𑀁 𑀲𑀼𑀢𑀁 𑀳𑁄𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁪.𑁬) 𑀩𑀳𑀼𑀲𑁆𑀲𑀼𑀢𑀢𑀸 𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀯𑀺𑀦𑀬𑀫𑀢𑁆𑀢𑀲𑁆𑀲𑁂𑀯𑀸𑀢𑀺 𑀯𑀼𑀟𑁆𑀠𑀢𑀁 𑀧𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀩𑀳𑀼𑀲𑁆𑀲𑀼𑀢𑀢𑀜𑁆𑀘𑀸𑀢𑀺.

𑀢𑀺𑀝𑁆𑀞𑀢𑀺 𑀅𑀦𑀼𑀧𑁆𑀧𑀦𑁆𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀏𑀢𑁆𑀣 𑀏𑀢𑁂𑀲𑀼 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀓𑀸𑀬 (𑀫. 𑀦𑀺. 𑁧.𑁧𑁮; 𑀲. 𑀦𑀺. 𑁨.𑁨𑁦) 𑀧𑀯𑀢𑁆𑀢𑀺𑀬𑀸 𑀅𑀦𑁂𑀓𑀪𑁂𑀤𑁂𑀲𑀼 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀥𑀫𑁆𑀫𑁂𑀲𑀽𑀢𑀺 𑀢𑁂 𑀞𑀸𑀦𑀻𑀬𑀸 𑀯𑀼𑀢𑁆𑀢𑀸.

𑀅𑀝𑁆𑀞𑀯𑀢𑁆𑀣𑀼𑀓𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀲𑁄𑀴𑀲𑀯𑀢𑁆𑀣𑀼𑀓𑀸, 𑀦𑀸𑀧𑀺 𑀭𑀢𑀦𑀢𑁆𑀢𑀬𑀯𑀢𑁆𑀣𑀼𑀓𑀸 𑀘, 𑀅𑀣 𑀔𑁄 𑀅𑀝𑁆𑀞𑀯𑀢𑁆𑀣𑀼𑀓𑀸𑀧𑀺. 𑀭𑀢𑀦𑀢𑁆𑀢𑀬𑁂 𑀲𑀁𑀲𑀬𑀸𑀧𑀦𑁆𑀦𑀲𑁆𑀲 𑀲𑀺𑀓𑁆𑀔𑀸𑀤𑀻𑀲𑀼 𑀓𑀗𑁆𑀔𑀸𑀲𑀫𑁆𑀪𑀯𑀢𑁄, 𑀢𑀢𑁆𑀣 𑀦𑀺𑀩𑁆𑀩𑁂𑀫𑀢𑀺𑀓𑀲𑁆𑀲 𑀢𑀤𑀪𑀸𑀯𑀢𑁄 𑀘 𑀲𑁂𑀲𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀭𑀢𑀦𑀢𑁆𑀢𑀬𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀺𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀦𑀼𑀧𑀯𑀺𑀲𑀦𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀤𑁆𑀤𑀳𑀦𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀧𑀓𑁆𑀔𑀦𑁆𑀤𑀦𑀁.

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔. 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸

𑀢𑁂𑀦𑀸𑀢𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀕𑁆𑀕𑀳𑀡𑁂𑀦.

𑀧𑀘𑁆𑀘𑀬𑀯𑀲𑁂𑀦 𑀤𑀼𑀩𑁆𑀩𑀮𑀪𑀸𑀯𑁄 𑀫𑀦𑁆𑀤𑀢𑀸.

𑀧𑀩𑁆𑀩𑀢𑀧𑀤𑁂𑀲𑀯𑀦𑀕𑀳𑀦𑀦𑁆𑀢𑀭𑀺𑀢𑁄𑀧𑀺 𑀕𑀸𑀫𑁄 𑀦 𑀤𑀽𑀭𑁂, 𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀢𑀸𑀬 𑀆𑀯𑀸𑀲𑁄 𑀅𑀭𑀜𑁆𑀜𑀮𑀓𑁆𑀔𑀡𑀽𑀧𑁂𑀢𑁄, 𑀢𑀲𑁆𑀫𑀸 𑀫𑀁𑀲𑀲𑁄𑀢𑁂𑀦𑁂𑀯 𑀅𑀲𑁆𑀲𑁄𑀲𑀻𑀢𑀺 𑀯𑀤𑀦𑁆𑀢𑀺.

𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀧𑀲𑀸𑀤𑁄 𑀲𑀺𑀦𑁂𑀳𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄.

𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀪𑀸𑀯𑀸𑀧𑀸𑀤𑀦𑀁 𑀢𑁂𑀚𑀦𑀁. 𑀢𑁄𑀲𑀦𑀁 𑀧𑀫𑁄𑀤𑀦𑀁.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀞𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲, 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀇𑀢𑀭𑁂𑀲𑀁. 𑀆𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁 𑀅𑀜𑁆𑀜𑀣𑀸 𑀫𑀕𑁆𑀕𑀲𑀫𑁆𑀫𑀸𑀲𑀢𑀺𑀬𑀸 𑀓𑀣𑀁 𑀓𑀸𑀬𑀸𑀭𑀫𑁆𑀫𑀡𑀢𑀸 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀬𑀸𑀦𑀼𑀧𑀲𑁆𑀲𑀺𑀆𑀤𑀻𑀦𑀁 𑀘𑀢𑀼𑀩𑁆𑀩𑀺𑀥𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀼𑀢𑁆𑀢𑀸𑀦𑀁. 𑀢𑁂𑀦𑀸𑀳 ‘‘𑀦 𑀳𑀺 𑀲𑀓𑁆𑀓𑀸 𑀏𑀓𑀲𑁆𑀲…𑀧𑁂… 𑀯𑀢𑁆𑀢𑀼’’𑀦𑁆𑀢𑀺. 𑀅𑀦𑁂𑀓𑀲𑀢𑀺𑀲𑀫𑁆𑀪𑀯𑀸𑀯𑀩𑁄𑀥𑀧𑀲𑀗𑁆𑀕𑀸𑀢𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀅𑀦𑁂𑀓𑀺𑀲𑁆𑀲𑀸 𑀲𑀢𑀺𑀬𑀸 𑀲𑀫𑁆𑀪𑀯𑀲𑁆𑀲, 𑀲𑀢𑀺 𑀘 𑀢𑀲𑁆𑀫𑀺𑀁 𑀅𑀦𑁂𑀓𑀸𑀯𑀩𑁄𑀥𑀲𑁆𑀲 𑀘 𑀆𑀧𑀚𑁆𑀚𑀦𑀢𑁄. 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑀺𑀦𑁆𑀦𑁂𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁂. 𑀥𑀫𑁆𑀫𑀪𑁂𑀤𑁂𑀦𑀸𑀢𑀺 𑀆𑀭𑀫𑁆𑀫𑀡𑀪𑁂𑀤𑀯𑀺𑀲𑀺𑀝𑁆𑀞𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦. 𑀦 𑀥𑀫𑁆𑀫𑀲𑁆𑀲 𑀥𑀫𑁆𑀫𑁄 𑀓𑀺𑀘𑁆𑀘𑀦𑁆𑀢𑀺 𑀏𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀜𑁆𑀜𑀥𑀫𑁆𑀫𑁄 𑀓𑀺𑀘𑁆𑀘𑀁 𑀦𑀸𑀫 𑀦 𑀳𑁄𑀢𑀺 𑀢𑀤𑀪𑀸𑀯𑀢𑁄. 𑀥𑀫𑁆𑀫𑀪𑁂𑀤𑁂𑀦 𑀥𑀫𑁆𑀫𑀲𑁆𑀲 𑀯𑀺𑀪𑀸𑀕𑁂𑀦. 𑀢𑀲𑁆𑀲 𑀪𑁂𑀤𑁄𑀢𑀺 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀪𑁂𑀤𑁄 𑀦𑀢𑁆𑀣𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦𑀬𑀺𑀥 𑀥𑀫𑁆𑀫𑀲𑁆𑀲 𑀯𑀺𑀪𑀸𑀕𑁂𑀦 𑀓𑀺𑀘𑁆𑀘𑀪𑁂𑀤𑁄 𑀇𑀘𑁆𑀙𑀺𑀢𑁄, 𑀓𑀺𑀘𑁆𑀘𑀪𑁂𑀤𑁂𑀦 𑀧𑀦 𑀥𑀫𑁆𑀫𑀯𑀺𑀪𑀸𑀕𑁄 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀸𑀯𑀸’’𑀢𑀺𑀆𑀤𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁭𑁪. ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀇𑀤𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀲𑀢𑀺𑀧𑀝𑁆𑀞𑀸𑀦𑀯𑀺𑀲𑁂𑀲𑀦𑀁, 𑀢𑀜𑁆𑀘 𑀆𑀕𑀫𑀦𑀲𑀺𑀤𑁆𑀥𑀁, 𑀅𑀜𑁆𑀜𑀣𑀸 𑀢𑀲𑁆𑀲 𑀅𑀲𑀫𑁆𑀪𑀯𑀢𑁄𑀢𑀺 𑀆𑀳 ‘‘𑀆𑀕𑀫𑀦𑀯𑀲𑁂𑀦…𑀧𑁂… 𑀤𑁂𑀲𑁂𑀢𑁆𑀯𑀸’’𑀢𑀺. 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀢𑀣𑀸 𑀅𑀦𑀸𑀫𑀲𑀦𑀢𑁄 𑀏𑀯 𑀆𑀕𑀫𑀦𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸. 𑀦𑀬𑀤𑁆𑀯𑀬𑁂𑀢𑀺 𑀅𑀦𑀼𑀧𑀲𑁆𑀲𑀦𑀸𑀦𑀬𑁄, 𑀲𑀼𑀤𑁆𑀥𑀺𑀓𑀦𑀬𑁄𑀢𑀺 𑀏𑀢𑀲𑁆𑀫𑀺𑀁 𑀦𑀬𑀤𑁆𑀯𑀬𑁂.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.