𑁫. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁧𑁯. 𑀘𑀓𑁆𑀔𑀼𑀤𑁆𑀯𑀸𑀭𑀪𑀸𑀯𑁂𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀪𑀸𑀯𑀳𑁂𑀢𑀼. 𑀢𑀁𑀤𑁆𑀯𑀸𑀭𑀺𑀓𑁂𑀳𑀻𑀢𑀺 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀧𑀯𑀢𑁆𑀢𑀦𑀓𑁂𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺. 𑀢𑁂 𑀳𑀺 ‘‘𑀢𑀁 𑀤𑁆𑀯𑀸𑀭𑀁 𑀧𑀯𑀢𑁆𑀢𑀺𑀑𑀓𑀸𑀲𑀪𑀽𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻’’𑀢𑀺 𑀢𑀁𑀤𑁆𑀯𑀸𑀭𑀺𑀓𑀸. 𑀦𑀦𑀼 𑀘 𑀢𑀩𑁆𑀩𑀢𑁆𑀣𑀼𑀓𑁂𑀳𑀺𑀧𑀺 𑀢𑀁 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀺𑀓𑁆𑀔𑁂 𑀢𑀺𑀓𑁆𑀔𑀢𑁆𑀢𑀸, 𑀫𑀦𑁆𑀤𑁂 𑀘 𑀫𑀦𑁆𑀤𑀢𑁆𑀢𑀸’’𑀢𑀺? 𑀲𑀘𑁆𑀘𑀁 𑀓𑀸𑀭𑁂𑀢𑀺, 𑀢𑀩𑁆𑀩𑀢𑁆𑀣𑀼𑀓𑀸𑀧𑀺 𑀧𑀦 𑀇𑀥 ‘‘𑀢𑀁𑀤𑁆𑀯𑀸𑀭𑀺𑀓𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀸. 𑀅𑀧𑀭𑀺𑀘𑁆𑀘𑀢𑁆𑀢𑀤𑁆𑀯𑀸𑀭𑀪𑀸𑀯𑀁𑀬𑁂𑀯 𑀳𑀺 𑀘𑀓𑁆𑀔𑀼 𑀦𑀺𑀲𑁆𑀲𑀬𑀝𑁆𑀞𑁂𑀦 ‘‘𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀢𑀁𑀤𑁆𑀯𑀸𑀭𑀺𑀓𑁂𑀲𑀼 𑀢𑀲𑁆𑀲 𑀇𑀦𑁆𑀤𑀝𑁆𑀞𑁄 𑀧𑀸𑀓𑀝𑁄𑀢𑀺 ‘‘𑀢𑀁𑀤𑁆𑀯𑀸𑀭𑀺𑀓𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀇𑀦𑁆𑀤𑀝𑁆𑀞𑁄 𑀧𑀭𑁂𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸 𑀧𑀭𑀫𑀺𑀲𑁆𑀲𑀭𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀜𑁆𑀳𑀺…𑀧𑁂… 𑀅𑀦𑀼𑀯𑀢𑁆𑀢𑀦𑁆𑀢𑀻’’𑀢𑀺 𑀆𑀳. 𑀢𑀢𑁆𑀣 𑀢𑀦𑁆𑀢𑀺 𑀘𑀓𑁆𑀔𑀼𑀁. 𑀢𑁂𑀢𑀺 𑀢𑀁𑀤𑁆𑀯𑀸𑀭𑀺𑀓𑁂. 𑀓𑀺𑀭𑀺𑀬𑀸𑀦𑀺𑀝𑁆𑀞𑀸𑀦𑀯𑀸𑀘𑀻 𑀆𑀯𑀻-𑀲𑀤𑁆𑀤𑁄 ‘‘𑀯𑀺𑀚𑀺𑀢𑀸𑀯𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁮; 𑁨.𑁩𑁩; 𑁩.𑁧𑁯𑁯) 𑀯𑀺𑀬𑀸𑀢𑀺 𑀆𑀳 ‘‘𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀚𑀸𑀦𑀦’’𑀦𑁆𑀢𑀺.

‘‘𑀙 𑀇𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀙? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁫-𑁪𑁯𑁯) 𑀏𑀯𑀁 𑀓𑀢𑁆𑀣𑀘𑀺 𑀙𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀆𑀕𑀢𑀸𑀦𑀺, 𑀓𑀲𑁆𑀫𑀸 𑀧𑀦 𑀲𑀼𑀢𑁆𑀢𑀦𑁆𑀢𑁂 𑀔𑀦𑁆𑀥𑀸𑀤𑀬𑁄 𑀯𑀺𑀬 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀓𑀚𑁆𑀛𑀁 𑀦 𑀯𑀼𑀢𑁆𑀢𑀸𑀦𑀺, 𑀅𑀪𑀺𑀥𑀫𑁆𑀫𑁂 𑀘 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑁂’’𑀢𑀺𑀆𑀤𑀺. 𑀦𑀺𑀲𑁆𑀲𑀭𑀡𑀽𑀧𑀸𑀬𑀸𑀤𑀺𑀪𑀸𑀯𑀢𑁄𑀢𑀺 𑀏𑀢𑁆𑀣 𑀮𑁄𑀓𑀼𑀢𑁆𑀢𑀭𑁂𑀲𑀼 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀦𑀺𑀲𑁆𑀲𑀭𑀡𑀁, 𑀇𑀢𑀭𑀸𑀦𑀺 𑀦𑀺𑀲𑁆𑀲𑀭𑀡𑀨𑀮𑀁, 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀦𑀺𑀲𑁆𑀲𑀭𑀡𑀽𑀧𑀸𑀬𑁄, 𑀇𑀢𑀭𑁂𑀲𑀼 𑀓𑀸𑀦𑀺𑀘𑀺 𑀧𑀯𑀢𑁆𑀢𑀺𑀪𑀽𑀢𑀸𑀦𑀺, 𑀓𑀸𑀦𑀺𑀘𑀺 𑀧𑀯𑀢𑁆𑀢𑀺𑀉𑀧𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀔𑀻𑀡𑀸𑀲𑀯𑀲𑁆𑀲 𑀪𑀸𑀯𑀪𑀽𑀢𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲𑁂𑀯 𑀥𑀫𑁆𑀫𑀪𑀽𑀢𑁄.

𑀤𑁆𑀯𑁂 𑀅𑀢𑁆𑀣𑀸𑀢𑀺 𑀇𑀦𑁆𑀤𑀮𑀺𑀗𑁆𑀕𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑀸. 𑀅𑀢𑁆𑀢𑀦𑁄 𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀯𑀲𑁂𑀦. 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑀳𑀺𑀢𑁂, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀘 𑀲𑀦𑁆𑀢𑀸𑀦𑁂. 𑀅𑀜𑁆𑀜𑀸𑀓𑀸𑀭𑁂𑀦𑀸𑀢𑀺 𑀇𑀢𑁆𑀣𑀺𑀆𑀤𑀺𑀢𑁄 𑀅𑀜𑁆𑀜𑁂𑀦 𑀆𑀓𑀸𑀭𑁂𑀦. 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁄 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑀘𑁆𑀘𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀜𑁆𑀘𑀢𑁆𑀣𑁂𑀢𑀺 𑀆𑀥𑀺𑀧𑀘𑁆𑀘𑀢𑁆𑀣𑁂.

𑀢𑁂𑀲𑀦𑁆𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀢𑀺𑀡𑁆𑀡𑀁. 𑀬𑀸 𑀲𑀼𑀔𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀢𑀸 𑀯𑀼𑀢𑁆𑀢𑀸, 𑀲𑀸 𑀆𑀭𑀫𑁆𑀫𑀡𑀲𑀪𑀸𑀯𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀦 𑀏𑀓𑀘𑁆𑀘𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀬 𑀧𑀭𑀺𑀓𑀧𑁆𑀧𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳.

𑀬𑀤𑀺𑀧𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀓𑀡𑁆𑀟𑁂𑀧𑀺 (𑀥. 𑀲. 𑁫𑁮𑁪) 𑀤𑁂𑀲𑀺𑀢𑀁, 𑀢𑀁 𑀧𑀦 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀘 𑀢𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀢𑁆𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀥 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀇𑀦𑁆𑀤𑁆𑀭𑀺𑀬𑀸𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄 𑀲𑀩𑁆𑀩𑀸𑀓𑀸𑀭𑁂𑀦 𑀬𑀫𑀓𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀇𑀦𑁆𑀤𑁆𑀭𑀺𑀬𑀬𑀫𑀓𑀤𑁂𑀲𑀦𑀸𑀬 𑀲𑀫𑁂𑀢𑀻’’𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀧𑀼𑀭𑀺𑀫𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀘𑁆𑀙𑀺𑀫𑀸𑀦𑀁 𑀩𑀸𑀳𑀺𑀭𑀸𑀦𑀁. 𑀢𑁂𑀲𑀁 𑀫𑀚𑁆𑀛𑁂 𑀯𑀼𑀢𑁆𑀢𑀁 𑀉𑀪𑀬𑁂𑀲𑀁 𑀉𑀧𑀓𑀸𑀭𑀓𑀢𑀸𑀤𑀻𑀧𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀏𑀯𑀫𑁆𑀧𑀺 𑀤𑁂𑀲𑀦𑀦𑁆𑀢𑀭𑀸𑀦𑀼𑀭𑁄𑀥𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀓𑁆𑀓𑀫𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀏𑀯𑀁 𑀯𑀼𑀢𑁆𑀢𑀁, 𑀧𑀭𑀢𑁄 𑀧𑀦 𑀓𑀺𑀘𑁆𑀘𑀯𑀺𑀦𑀺𑀘𑁆𑀙𑀬𑁂 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀦𑀺𑀬𑀸𑀫𑁂𑀦𑁂𑀯 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲, 𑀢𑀤𑀦𑀦𑁆𑀢𑀭𑀜𑁆𑀘 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀘𑁆𑀘𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀲𑁆𑀲𑀢𑀺. 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑁂𑀦, 𑀬𑀣𑀸𑀭𑀳𑀁 𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀪𑀸𑀯𑁂𑀦. 𑀤𑀼𑀯𑀺𑀥𑀢𑁆𑀢𑀪𑀸𑀯𑀸𑀦𑀼𑀧𑀸𑀮𑀓𑀲𑁆𑀲𑀸𑀢𑀺 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑀼𑀯𑀺𑀥𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀼𑀧𑀸𑀮𑀓𑀲𑁆𑀲. 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀇𑀥 𑀕𑀳𑀺𑀢𑀁. ‘‘𑀧𑀯𑀢𑁆𑀢𑀻’’𑀢𑀺 𑀏𑀢𑁂𑀦 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀦𑀭𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀯𑁂𑀤𑀬𑀺𑀢𑀸𑀦𑀁 𑀧𑀯𑀢𑁆𑀢𑁂𑀢𑀩𑁆𑀩𑀢𑀁 𑀤𑀻𑀧𑁂𑀢𑀺. ‘‘𑀪𑀸𑀯𑀦𑀸𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀨𑀮𑀪𑀽𑀢𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀪𑀸𑀯𑀦𑀸𑀕𑀳𑀡𑀜𑁆𑀘𑁂𑀢𑁆𑀣 𑀲𑀓𑁆𑀓𑀸 𑀅𑀯𑀢𑁆𑀢𑀼𑀁. ‘‘𑀪𑀸𑀯𑁂𑀢𑀩𑁆𑀩𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀪𑀸𑀯𑁄 𑀧𑀸𑀓𑀝𑁄𑀯. 𑀤𑀲𑁆𑀲𑀦𑀸𑀦𑀦𑁆𑀢𑀭𑀸𑀢𑀺 𑀲𑀫𑀸𑀦𑀚𑀸𑀢𑀺𑀪𑀽𑀫𑀺𑀓𑁂𑀦 𑀅𑀩𑁆𑀬𑀯𑀳𑀺𑀢𑀢𑀁 𑀲𑀦𑁆𑀥𑀸𑀬𑀸𑀳, 𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀁.

𑀢𑀲𑁆𑀲𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑀲𑁆𑀲. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀅𑀜𑁆𑀜𑁂𑀳𑀺 𑀅𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸. 𑀏𑀯𑀁 𑀲𑀸𑀫𑀢𑁆𑀣𑀺𑀬𑀢𑁄 𑀓𑀺𑀘𑁆𑀘𑀯𑀺𑀲𑁂𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀓𑀭𑀡𑀢𑁄𑀧𑀺 𑀢𑀁 𑀤𑀲𑁆𑀲𑁂𑀢𑀺 ‘‘𑀇𑀦𑁆𑀤𑁆𑀭𑀺𑀬𑀓𑀣𑀸𑀬 𑀘 𑀧𑀯𑀢𑁆𑀢𑀢𑁆𑀢𑀸’’𑀢𑀺. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀇𑀦𑁆𑀤𑁆𑀭𑀺𑀬𑀲𑀪𑀸𑀯𑀸𑀦𑀫𑁆𑀧𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁. 𑀬𑁂𑀳𑀺 𑀢𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀦𑁆𑀢𑀺, 𑀢𑁂𑀲𑀁 𑀯𑀲𑀯𑀢𑁆𑀢𑀸𑀧𑀦𑀁 𑀦𑀢𑁆𑀣𑀺, 𑀬𑀣𑀸 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀲𑀪𑀸𑀯𑀸𑀪𑀸𑀯𑀢𑁄 𑀲𑀬𑀜𑁆𑀘 𑀢𑁂 𑀅𑀜𑁆𑀜𑀤𑀢𑁆𑀣𑀼 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀳𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀓𑀣𑀁 𑀢𑁂𑀲𑀁 𑀇𑀦𑁆𑀤𑀝𑁆𑀞𑁄𑀢𑀺? ‘‘𑀲𑀼𑀔𑀦𑀸𑀤𑀺𑀮𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀺𑀥𑀸𑀧𑀦𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. ‘‘𑀘𑁂𑀢𑀲𑀺𑀓𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀲𑁆𑀲 𑀧𑀥𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁄 𑀳𑀺 ‘‘𑀘𑁂𑀢𑀲𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀯𑀲𑀯𑀢𑁆𑀢𑀸𑀧𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀼𑀧𑀸𑀮𑀦𑀦𑁆𑀢𑀺 𑀏𑀯𑀁 𑀬𑀸𑀯 𑀅𑀫𑀢𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀬𑀢𑀸 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀢𑀁𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁂. ‘‘𑀅𑀦𑀼𑀧𑁆𑀧𑀸𑀤𑀦𑁂, 𑀅𑀦𑀼𑀧𑀢𑁆𑀣𑀫𑁆𑀪𑁂 𑀘 𑀲𑀢𑀻’’𑀢𑀺 𑀧𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦 𑀳𑀺 𑀧𑀤𑀢𑁆𑀣𑁄 𑀲𑀩𑁆𑀪𑀸𑀯𑀁 𑀩𑁆𑀬𑀪𑀺𑀘𑀭𑀢𑀻𑀢𑀺 𑀚𑀦𑀓𑀼𑀧𑀢𑁆𑀣𑀫𑁆𑀪𑀓𑀢𑁆𑀢𑀸𑀪𑀸𑀯𑁂𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀸𑀤𑀺𑀧𑀘𑁆𑀘𑀬𑀸𑀦𑀁 𑀓𑀫𑁆𑀫𑀸𑀤𑀻𑀦𑀁. 𑀢𑀧𑁆𑀧𑀯𑀢𑁆𑀢𑀦𑁂 𑀦𑀺𑀫𑀺𑀢𑁆𑀢𑀪𑀸𑀯𑁄𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀸𑀤𑀺𑀆𑀓𑀸𑀭𑀭𑀽𑀧𑀦𑀺𑀩𑁆𑀩𑀢𑁆𑀢𑀦𑁂 𑀓𑀸𑀭𑀡𑀪𑀸𑀯𑁄. 𑀲𑁆𑀯𑀸𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀺𑀜𑁆𑀳𑀺 𑀲𑀢𑀺 𑀬𑀁 𑀳𑁄𑀢𑀺, 𑀅𑀲𑀢𑀺 𑀘 𑀦 𑀳𑁄𑀢𑀺, 𑀢𑀁 𑀢𑀲𑁆𑀲 𑀓𑀸𑀭𑀡𑀦𑁆𑀢𑀺. ‘‘𑀦𑀺𑀫𑀺𑀢𑁆𑀢𑀪𑀸𑀯𑁄 𑀅𑀦𑀼𑀯𑀺𑀥𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀯𑀺𑀥𑀸𑀦𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀲𑀼𑀔𑀤𑀼𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀸 𑀯𑀺𑀬𑀸𑀢𑀺 𑀲𑀬𑀁 𑀲𑀼𑀔𑀤𑀼𑀓𑁆𑀔𑀲𑀪𑀸𑀯𑀧𑁆𑀧𑀢𑁆𑀢𑀸 𑀯𑀺𑀬, 𑀲𑀼𑀔𑀦𑁆𑀢𑀸 𑀤𑀼𑀓𑁆𑀔𑀦𑁆𑀢𑀸 𑀘 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑀲𑁆𑀲…𑀧𑁂… 𑀫𑀚𑁆𑀛𑀢𑁆𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀸𑀦𑀚𑀸𑀢𑀺𑀬𑀦𑁆𑀢𑀺 𑀅𑀓𑀼𑀲𑀮𑁂𑀳𑀺 𑀲𑀼𑀔𑀤𑀼𑀓𑁆𑀔𑁂𑀳𑀺 𑀅𑀓𑀼𑀲𑀮𑀽𑀧𑁂𑀓𑁆𑀔𑀸𑀬, 𑀅𑀩𑁆𑀬𑀸𑀓𑀢𑁂𑀳𑀺 𑀅𑀩𑁆𑀬𑀸𑀓𑀢𑀽𑀧𑁂𑀓𑁆𑀔𑀸𑀬, 𑀓𑀼𑀲𑀮𑀲𑀼𑀔𑀢𑁄 𑀓𑀼𑀲𑀮𑀽𑀧𑁂𑀓𑁆𑀔𑀸𑀬. 𑀢𑀢𑁆𑀣𑀸𑀧𑀺 𑀪𑀽𑀫𑀺𑀯𑀺𑀪𑀸𑀕𑁂𑀦𑀸𑀬𑀫𑀢𑁆𑀣𑁄 𑀪𑀺𑀦𑁆𑀤𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀢𑀁 𑀲𑀩𑁆𑀩𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀑𑀴𑀸𑀭𑀺𑀓𑀲𑀼𑀔𑀼𑀫𑀯𑀺𑀪𑀸𑀕𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀆𑀤𑀺𑀲𑀤𑁆𑀤𑁂𑀦𑀸𑀢𑀺 ‘‘𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀆𑀤𑀺𑀲𑀤𑁆𑀤𑁂𑀦. 𑀲𑀁𑀬𑁄𑀚𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑀤𑀼𑀧𑀦𑀺𑀲𑁆𑀲𑀬𑀢𑀸 𑀏𑀯 𑀲𑀦𑁆𑀥𑀸𑀬 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀺𑀘𑁆𑀘𑀦𑁆𑀢𑀭𑀸𑀧𑀲𑀼𑀢𑀢𑀸 𑀯𑀼𑀢𑁆𑀢𑀸, 𑀢𑀲𑁆𑀲𑀸𑀧𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀢𑀸 𑀮𑀩𑁆𑀪𑀢𑁂𑀯. 𑀅𑀩𑁆𑀬𑀸𑀧𑀻𑀪𑀸𑀯𑀢𑁄 𑀯𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁, 𑀢𑀢𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀧𑀺 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀤𑁆𑀥𑀝𑀁. 𑀫𑀕𑁆𑀕𑀸𑀦𑀦𑁆𑀢𑀭𑀜𑁆𑀳𑀺 𑀨𑀮𑀁 ‘‘𑀢𑀸𑀬 𑀲𑀤𑁆𑀥𑀸𑀬 𑀅𑀯𑀽𑀧𑀲𑀦𑁆𑀢𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀥. 𑀲. 𑀅𑀝𑁆𑀞. 𑁫𑁦𑁫) 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀇𑀢𑀭𑀁. 𑀅𑀜𑁆𑀜𑀣𑀸 𑀅𑀭𑀺𑀬𑀸 𑀲𑀩𑁆𑀩𑀓𑀸𑀮𑀁 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀤𑀭𑀣𑀸 𑀲𑀺𑀬𑀼𑀁. 𑀇𑀢𑀭𑀲𑁆𑀲 𑀧𑀦 𑀦𑀺𑀘𑁆𑀙𑀦𑁆𑀤𑀭𑀸𑀕𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄 𑀯𑀺𑀬 𑀭𑀼𑀴𑁆𑀳𑀺𑀯𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦 𑀏𑀢𑁆𑀢𑀓𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀏𑀯 𑀘 𑀯𑀼𑀢𑁆𑀢𑀸𑀦𑀻𑀢𑀺? 𑀆𑀥𑀺𑀧𑀘𑁆𑀘𑀢𑁆𑀣𑀲𑀫𑁆𑀪𑀯𑀢𑁄𑀢𑀺 𑀘𑁂. 𑀆𑀥𑀺𑀧𑀘𑁆𑀘𑀁 𑀦𑀸𑀫 𑀇𑀲𑁆𑀲𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀫𑁂𑀢𑀁. 𑀢𑀬𑀺𑀤𑀁 𑀆𑀥𑀺𑀧𑀘𑁆𑀘𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀩𑀮𑀯𑀦𑁆𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀮𑀩𑁆𑀪𑀢𑁂𑀯. 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀸 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀢𑀲𑁆𑀫𑀸 𑀢𑁂 𑀢𑁂𑀳𑀺 𑀅𑀦𑀼𑀯𑀢𑁆𑀢𑀻𑀬𑀦𑁆𑀢𑀺, 𑀢𑁂 𑀘 𑀢𑁂 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀅𑀢𑁆𑀣𑀺 𑀢𑁂𑀲𑀁 𑀯𑀺𑀲𑁂𑀲𑁄. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀘𑀓𑁆𑀔𑀸𑀤𑀻𑀦𑀁 𑀲𑀺𑀤𑁆𑀥𑀫𑀸𑀥𑀺𑀧𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁧𑁯) 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄𑀬𑁂𑀯.

𑀅𑀧𑀺𑀘 𑀔𑀦𑁆𑀥𑀧𑀜𑁆𑀘𑀓𑁂 𑀬𑀸𑀬𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀸 𑀯𑀺𑀲𑁂𑀲𑀦𑀺𑀲𑁆𑀲𑀬𑁄 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀢𑀸𑀦𑀺 𑀢𑀸𑀯 𑀆𑀥𑀺𑀧𑀘𑁆𑀘𑀢𑁆𑀣𑀁 𑀉𑀧𑀸𑀤𑀸𑀬 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺𑀢𑁄 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀬𑁂𑀦 𑀥𑀫𑁆𑀫𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀅𑀬𑀁 𑀲𑁄 𑀥𑀫𑁆𑀫𑁄 𑀢𑁂𑀲𑀁 𑀞𑀺𑀢𑀺𑀳𑁂𑀢𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 𑀚𑀻𑀯𑀺𑀢𑀁. 𑀢𑀬𑀺𑀫𑁂 𑀇𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀸 𑀥𑀫𑁆𑀫𑀸 𑀇𑀫𑁂𑀲𑀁 𑀯𑀲𑁂𑀦 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀯𑁄𑀳𑀭𑀻𑀬𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀪𑀸𑀯𑀤𑁆𑀯𑀬𑀁. 𑀲𑁆𑀯𑀸𑀬𑀁 𑀲𑀢𑁆𑀢𑀲𑀜𑁆𑀜𑀺𑀢𑁄 𑀥𑀫𑁆𑀫𑀧𑀼𑀜𑁆𑀚𑁄 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀇𑀫𑀸𑀳𑀺 𑀯𑁂𑀤𑀦𑀸𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑁂𑀤𑀦𑀸𑀧𑀜𑁆𑀘𑀓𑀁. 𑀢𑀢𑁄 𑀯𑀺𑀲𑀼𑀤𑁆𑀥𑀢𑁆𑀣𑀺𑀓𑀸𑀦𑀁 𑀯𑁄𑀤𑀸𑀦𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀁. 𑀢𑀢𑁄 𑀯𑁄𑀤𑀸𑀦𑀲𑀫𑁆𑀪𑀸𑀭𑀸 𑀇𑀫𑁂𑀳𑀺 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀸, 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸 𑀘 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀢𑀻𑀡𑀺 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀢𑁆𑀣 ‘‘𑀆𑀥𑀺𑀧𑀘𑁆𑀘𑀢𑁆𑀣𑀁 𑀉𑀧𑀸𑀤𑀸𑀬𑀸’’𑀢𑀺 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕𑀳𑀡𑀁.

𑀅𑀣 𑀯𑀸 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀦𑀁 𑀦𑀺𑀲𑁆𑀲𑀬𑀸𑀤𑀺𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀏𑀢𑀸𑀦𑀺 𑀏𑀯 𑀯𑀼𑀢𑁆𑀢𑀸𑀦𑀺. 𑀧𑀯𑀢𑁆𑀢𑀺𑀬𑀸 𑀳𑀺 𑀯𑀺𑀲𑁂𑀲𑀢𑁄 𑀫𑀽𑀮𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀬𑀣𑀸𑀳 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺 (𑀲𑀼. 𑀦𑀺. 𑁧𑁭𑁧). 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀳𑀺. 𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑀭𑀸𑀕𑀦𑀺𑀫𑀺𑀢𑁆𑀢𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀓𑀸𑀬𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀺𑀡𑁆𑀡𑀁 𑀔𑁄 𑀧𑀦, 𑀫𑀳𑀸𑀭𑀸𑀚, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀩𑁆𑀪𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮; 𑁨.𑁪𑁧𑁧; 𑀫𑀺. 𑀧. 𑁪.𑁧.𑁬). 𑀅𑀯𑀝𑁆𑀞𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀢𑁂𑀦 𑀅𑀦𑀼𑀧𑀸𑀮𑁂𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸’’𑀢𑀺𑀆𑀤𑀺. 𑀉𑀧𑀪𑁄𑀕𑁄 𑀯𑁂𑀤𑀦𑀸𑀳𑀺. 𑀯𑁂𑀤𑀦𑀸𑀯𑀲𑁂𑀦 𑀳𑀺 𑀇𑀝𑁆𑀞𑀸𑀤𑀺𑀲𑀩𑁆𑀩𑀯𑀺𑀲𑀬𑀼𑀧𑀪𑁄𑀕𑁄. 𑀬𑀣𑀸𑀳 𑁋 ‘‘𑀯𑁂𑀤𑀬𑀢𑀺 𑀯𑁂𑀤𑀬𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯). 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑀲𑀫𑀼𑀧𑁆𑀧𑀸𑀤𑀝𑁆𑀞𑀺𑀢𑀺𑀲𑀫𑁆𑀪𑁄𑀕𑀤𑀲𑁆𑀲𑀦𑀢𑁆𑀣𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀬𑀸𑀯 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀬𑀣𑀸 𑀘𑁂𑀢𑀸𑀦𑀺 𑀧𑀯𑀢𑁆𑀢𑀺𑀬𑀸, 𑀏𑀯𑀁 𑀇𑀢𑀭𑀸𑀦𑀺 𑀦𑀺𑀯𑀢𑁆𑀢𑀺𑀬𑀸. 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀯𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑁄. 𑀉𑀧𑁆𑀧𑀸𑀤𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑁂𑀦 𑀢𑀲𑁆𑀲 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀅𑀯𑀝𑁆𑀞𑀸𑀦𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦. 𑀉𑀧𑀪𑁄𑀕𑁄 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀅𑀕𑁆𑀕𑀨𑀮𑀲𑀫𑀼𑀧𑀪𑁄𑀕𑀢𑁄. 𑀏𑀯𑀫𑁆𑀧𑀺 𑀏𑀢𑀸𑀦𑀺 𑀏𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀜𑁆𑀜𑁂𑀲𑀁 𑀅𑀕𑁆𑀕𑀳𑀡𑀁. 𑀏𑀢𑁂𑀦𑀸𑀧𑀺 𑀦𑁂𑀲𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑁄𑀧𑀺 𑀲𑀁𑀯𑀡𑁆𑀡𑀺𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁨𑁦. 𑀓𑀼𑀲𑀮𑀸𑀓𑀼𑀲𑀮𑀯𑀻𑀭𑀺𑀬𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀲𑀮𑀲𑀫𑀸𑀥𑀺𑀆𑀤𑀻𑀦𑀁, 𑀅𑀩𑁆𑀬𑀸𑀓𑀢𑀯𑀻𑀭𑀺𑀬𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀘𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀲𑀸𑀭𑀫𑁆𑀫𑀡𑀸𑀤𑀬𑁄 𑀕𑀳𑀺𑀢𑀸, 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀸𑀤𑀻𑀦𑀺, 𑀘𑀓𑁆𑀔𑀸𑀤𑀻𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸𑀦𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀤𑀸𑀦𑀺, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀧𑀤𑀸𑀦𑀺 𑀘. 𑀢𑁂𑀦𑀸𑀢𑀺 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀪𑀽𑀫𑀺𑀯𑀺𑀪𑀸𑀕𑀓𑀣𑀦𑁂𑀦. 𑀢𑀦𑁆𑀦𑀺𑀯𑀢𑁆𑀢𑀦𑁂𑀦𑀸𑀢𑀺 𑀲𑀩𑁆𑀩𑁂𑀲𑀁 𑀲𑀩𑁆𑀩𑀪𑀽𑀫𑀺𑀓𑀢𑁆𑀢𑀦𑀺𑀯𑀢𑁆𑀢𑀦𑁂𑀦. 𑀅𑀯𑀺𑀚𑁆𑀚𑀫𑀸𑀦𑀲𑀗𑁆𑀕𑀸𑀳𑀓𑀢𑁆𑀢𑀦𑁆𑀢𑀺 𑀢𑀲𑁆𑀲𑀁 𑀢𑀲𑁆𑀲𑀁 𑀪𑀽𑀫𑀺𑀬𑀁 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑁆𑀲 𑀲𑀗𑁆𑀕𑀸𑀳𑀓𑀢𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀇𑀥 𑀇𑀫𑀲𑁆𑀫𑀺𑀁 ‘‘𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸’’𑀢𑀺 𑀏𑀯𑀁 𑀏𑀓𑀦𑁆𑀢𑀸𑀦𑀸𑀭𑀫𑁆𑀫𑀡𑀢𑁆𑀢𑁂 𑀯𑀼𑀘𑁆𑀘𑀫𑀸𑀦𑁂 𑀦 𑀆𑀪𑀝𑁆𑀞𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀪𑀸𑀲𑀺𑀢𑀁. 𑀝𑀻𑀓𑀸𑀬𑀁 𑀧𑀦 𑀅𑀦𑀸𑀪𑀝𑁆𑀞𑀦𑁆𑀢𑀺 𑀓𑀢𑀲𑀫𑀸𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀭𑀽𑀧𑀥𑀫𑁆𑀫𑁂𑀲𑀼 𑀲𑀗𑁆𑀕𑀳𑀺𑀢𑀢𑀦𑁆𑀢𑀺 ‘‘𑀭𑀽𑀧’’𑀦𑁆𑀢𑀺 𑀕𑀡𑀺𑀢𑀢𑀁. 𑀅𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀅𑀭𑀽𑀧𑀪𑀸𑀯𑁂𑀦 𑀲𑀺𑀬𑀸𑀧𑀓𑁆𑀔𑁂 𑀲𑀗𑁆𑀕𑀳𑀺𑀢𑀁. 𑀓𑀲𑁆𑀫𑀸? 𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀢𑀸 𑀅𑀢𑁆𑀣𑀻𑀢𑀺. 𑀬𑀲𑁆𑀫𑀸 𑀧𑀦 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑀲𑁆𑀲𑁂𑀯 𑀯𑀲𑁂𑀦 𑀲𑀺𑀬𑀸𑀧𑀓𑁆𑀔𑀲𑀗𑁆𑀕𑀳𑁄 𑀬𑀼𑀢𑁆𑀢𑁄, 𑀦 𑀏𑀓𑀤𑁂𑀲𑀲𑁆𑀲, 𑀢𑀲𑁆𑀫𑀸 𑀏𑀓𑀤𑁂𑀲𑀲𑁆𑀲 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀆𑀳 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀅𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀯𑀢𑁆𑀢𑀩𑁆𑀩𑀢𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸. 𑀓𑀣𑀁 𑀧𑀦 𑀭𑀽𑀧𑀓𑁄𑀝𑁆𑀞𑀸𑀲𑁂𑀦𑀲𑁆𑀲𑀸𑀦𑀸𑀭𑀫𑁆𑀫𑀡𑀲𑁆𑀲 𑀦𑀯𑀢𑁆𑀢𑀩𑁆𑀩𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀳𑀺 𑀅𑀦𑀸𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺. ‘‘𑀅𑀯𑀺𑀚𑁆𑀚𑀫𑀸𑀦𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑁂𑀲𑀽’’𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀭𑀫𑁆𑀫𑀡𑀸’’𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀅𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀯𑀢𑁆𑀢𑀩𑁆𑀩𑁂𑀲𑀽𑀢𑀺 𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑁂𑀲𑀼. 𑀅𑀦𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀭𑀳𑀺𑀢𑀢𑁆𑀢𑀸. ‘‘𑀦𑀯𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 ‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’𑀢𑀺𑀧𑀻’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁨𑁩) 𑀯𑀺𑀬 𑀦 𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀦𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀦 𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀦𑀯𑀢𑁆𑀢𑀩𑁆𑀩𑀢𑀸𑀧𑀭𑀺𑀬𑀸𑀬𑁄, 𑀅𑀣 𑀔𑁄 𑀅𑀦𑀸𑀭𑀫𑁆𑀫𑀡𑀲𑁆𑀲𑀸𑀧𑀻𑀢𑀺 𑀲𑀸𑀭𑀫𑁆𑀫𑀡𑁂 𑀦𑀺𑀬𑀫𑀸𑀪𑀸𑀯𑁄. 𑀏𑀯𑀁 𑀦𑀯𑀢𑁆𑀢𑀩𑁆𑀩𑀁 𑀲𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀯𑀢𑁆𑀢𑀩𑁆𑀩𑀲𑁆𑀲 𑀯𑀸 𑀲𑀸𑀭𑀫𑁆𑀫𑀡𑀢’’𑀦𑁆𑀢𑀺 𑀆𑀳. 𑀢𑀲𑁆𑀲 𑀦 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺.

𑀢𑀢𑁆𑀣 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀼𑀔𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸, 𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀅𑀣𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀣𑀸𑀧𑀺 𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀦𑀸𑀭𑀫𑁆𑀫𑀡𑀁 𑀥𑀫𑁆𑀫𑀸𑀬𑀢𑀦𑀁 𑀲𑀸𑀭𑀫𑁆𑀫𑀡𑁂𑀳𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀏𑀯𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦𑀯𑀢𑁆𑀢𑀩𑁆𑀩-𑀲𑀤𑁆𑀤𑁄 𑀬𑀤𑀺 𑀲𑀸𑀭𑀫𑁆𑀫𑀡𑁂𑀲𑁆𑀯𑁂𑀯 𑀯𑀢𑁆𑀢𑁂𑀬𑁆𑀬, 𑀦 𑀘𑁂𑀯𑀁 𑀯𑀼𑀢𑁆𑀢𑀁, 𑀅𑀯𑀘𑀦𑁂 𑀘 𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺 𑀧𑀜𑁆𑀳𑀧𑀼𑀘𑁆𑀙𑀓𑁂 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀅𑀢𑁆𑀣𑀻’’𑀢𑀺. 𑀢𑀲𑁆𑀫𑀸 𑀦𑀯𑀢𑁆𑀢𑀩𑁆𑀩-𑀲𑀤𑁆𑀤𑁄 𑀅𑀦𑀸𑀭𑀫𑁆𑀫𑀡𑁂𑀲𑀼𑀧𑀺 𑀯𑀢𑁆𑀢𑀢𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀸𑀧𑀺 ‘‘𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸, 𑀲𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀸𑀮𑁂 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀫𑀢𑁆𑀢𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀦 𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀦𑀯𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁, 𑀦𑀸𑀧𑀺 𑀅𑀦𑀸𑀭𑀫𑁆𑀫𑀡𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀢𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀅𑀯𑀲𑀺𑀝𑁆𑀞𑀧𑀸𑀴𑀺𑀲𑀗𑁆𑀕𑀡𑁆𑀳𑀦𑁂𑀦 ‘‘𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 ‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’𑀢𑀺𑀧𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀼𑀢𑁆𑀢𑀫𑀢𑁆𑀣𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲…𑀧𑁂… 𑀦𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.