𑁪. 𑀲𑀘𑁆𑀘𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮𑁯. 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀲𑀘𑁆𑀘𑁂𑀲𑀼 𑀓𑀫𑀢𑀻𑀢𑀺 𑀲𑀘𑁆𑀘𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀧𑀯𑀢𑁆𑀢𑀢𑀺. 𑀤𑁂𑀲𑁂𑀢𑀩𑁆𑀩𑀢𑁆𑀣𑀯𑀺𑀲𑀬𑀸 𑀳𑀺 𑀤𑁂𑀲𑀦𑀸𑀢𑀺. 𑀏𑀢𑁂𑀲𑀼 𑀓𑀫𑀢𑀻𑀢𑀺 𑀏𑀢𑁂𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑀺. ‘‘𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀲𑀪𑀸𑀯𑀁 𑀓𑀫𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀸𑀯𑁂𑀦 𑀕𑀳𑀺𑀢𑀦𑁆𑀢𑀺 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀓𑀫𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀢𑀩𑁆𑀩𑁄𑀳𑀸𑀭𑁂𑀦𑀸𑀢𑀺 𑀢𑀤𑀼𑀧𑀘𑀸𑀭𑁂𑀦. 𑀏𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑀲𑀪𑀸𑀯𑀁 𑀲𑀸𑀲𑀦𑀁, 𑀧𑀭𑀺𑀬𑀸𑀬𑁂𑀦 𑀯𑀘𑀦𑀲𑀪𑀸𑀯𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀁𑀲𑀪𑀸𑀯𑀸𑀢𑀺 𑀤𑀼𑀓𑁆𑀔𑀸𑀤𑀺𑀲𑀪𑀸𑀯𑀸. 𑀅𑀫𑀼𑀲𑀸𑀲𑀪𑀸𑀯𑀸𑀢𑀺 𑀩𑀸𑀥𑀦𑀸𑀤𑀺𑀪𑀸𑀯𑁂𑀦 𑀪𑀽𑀢𑀲𑀪𑀸𑀯𑀸. 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀸𑀢𑀺 𑀅𑀩𑀸𑀥𑀦𑀸𑀤𑀺𑀆𑀓𑀸𑀭𑀯𑀺𑀯𑀺𑀢𑁆𑀢𑀸. 𑀤𑁆𑀯𑀺𑀥𑀸𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀢𑀦𑁆𑀦𑀺𑀫𑀺𑀢𑁆𑀢𑀢𑀸𑀳𑀺. 𑀭𑀸𑀕𑀸𑀤𑀺𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀓𑀺𑀮𑁂𑀲𑀤𑀸𑀳𑁄. 𑀲𑀦𑁆𑀢𑀸𑀦𑀲𑁆𑀲 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁 𑀧𑀼𑀕𑁆𑀕𑀮𑀳𑀺𑀁𑀲𑀦𑀁. 𑀅𑀢𑁆𑀢𑀦𑁄 𑀏𑀯 𑀢𑀺𑀔𑀺𑀡𑀪𑀸𑀯𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀭𑀼𑀚𑀸𑀯𑀳𑀢𑀺𑀓𑁆𑀔𑀪𑀸𑀯𑁄. 𑀲𑀭𑀲𑁂𑀦𑁂𑀯𑀸𑀢𑀺 𑀲𑀪𑀸𑀯𑁂𑀦𑁂𑀯. 𑀲𑀫𑁆𑀧𑀺𑀡𑁆𑀟𑀓𑀲𑁆𑀲 𑀲𑀫𑀼𑀤𑀬𑀲𑁆𑀲, 𑀓𑀺𑀮𑁂𑀲𑀲𑀦𑁆𑀢𑀸𑀧𑀭𑀳𑀺𑀢𑀲𑁆𑀲 𑀫𑀕𑁆𑀕𑀲𑁆𑀲, 𑀅𑀯𑀺𑀧𑀭𑀺𑀡𑀸𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀬𑀣𑀸𑀲𑀗𑁆𑀔𑁆𑀬𑀁 𑀤𑀼𑀓𑁆𑀔𑀲𑁆𑀲 𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑀸 𑀆𑀯𑀺 𑀪𑀯𑀦𑁆𑀢𑀻𑀢𑀺 𑀆𑀳 ‘‘𑀇𑀢𑀭𑁂 𑀬𑀣𑀸𑀓𑁆𑀓𑀫𑀁 𑀲𑀫𑀼𑀤𑀬𑀫𑀕𑁆𑀕𑀦𑀺𑀭𑁄𑀥𑀤𑀲𑁆𑀲𑀦𑁂𑀳𑀺 𑀆𑀯𑀺𑀪𑀯𑀦𑀸𑀓𑀸𑀭𑀸’’𑀢𑀺. 𑀩𑁆𑀬𑀸𑀧𑁂𑀢𑁆𑀯𑀸𑀢𑀺 𑀪𑀯𑀸𑀤𑀻𑀲𑀼 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘 𑀯𑀺𑀲𑀝𑀸 𑀳𑀼𑀢𑁆𑀯𑀸. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 ‘‘𑀊𑀳𑀦𑀁 𑀭𑀸𑀲𑀺𑀓𑀭𑀡’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀦’’𑀦𑁆𑀢𑀺. 𑀏𑀓𑀯𑁄𑀓𑀸𑀭𑀪𑀯𑁂𑀧𑀺 𑀳𑀺 𑀭𑀸𑀲𑀺𑀪𑀽𑀢𑀫𑁂𑀯 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀢𑀺 𑀅𑀦𑁂𑀓𑀥𑀫𑁆𑀫𑀲𑀫𑀽𑀳𑀢𑁄, 𑀧𑀕𑁂𑀯 𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼. 𑀏𑀢𑁆𑀣 𑀘 𑀩𑁆𑀬𑀸𑀧𑀦𑀢𑁆𑀣𑀁 𑀆𑀓𑀸𑀭𑀁, 𑀢𑀲𑁆𑀲 𑀘 𑀬-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀆𑀬𑀽𑀳𑀦𑀦𑁆𑀢𑀺 𑀧𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀤𑀤𑀸𑀢𑀻𑀢𑀺 𑀤𑀼𑀓𑁆𑀔𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀢𑁆𑀢𑀸 𑀢𑀁 𑀦𑀺𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀚𑀦𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳. 𑀤𑀼𑀓𑁆𑀔…𑀧𑁂… 𑀆𑀯𑀺 𑀪𑀯𑀢𑀺 𑀭𑁄𑀕𑀤𑀲𑁆𑀲𑀦𑁂𑀦 𑀯𑀺𑀬 𑀭𑁄𑀕𑀦𑀺𑀤𑀸𑀦𑀁. 𑀲𑀁𑀬𑁄𑀕…𑀧𑁂… 𑀤𑀲𑁆𑀲𑀦𑁂𑀳𑀻𑀢𑀺 𑀲𑀁𑀬𑁄𑀕𑀝𑁆𑀞𑁄 𑀯𑀺𑀲𑀁𑀬𑁄𑀕𑀲𑀪𑀸𑀯𑀲𑁆𑀲 𑀦𑀺𑀭𑁄𑀥𑀲𑁆𑀲, 𑀧𑀮𑀺𑀩𑁄𑀥𑀝𑁆𑀞𑁄 𑀦𑀺𑀬𑁆𑀬𑀸𑀦𑀲𑀪𑀸𑀯𑀲𑁆𑀲 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀆𑀯𑀺 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑀸.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑀪𑀽𑀢𑁂 𑀲𑀢𑀺. 𑀲𑀫𑀼𑀤𑀬𑀢𑁄 𑀯𑀺𑀯𑁂𑀓𑁄 𑀯𑀺𑀯𑁂𑀓𑀝𑁆𑀞𑁄. 𑀦𑀺𑀭𑁄𑀥𑁄 𑀘 𑀢𑀡𑁆𑀳𑀸𑀓𑁆𑀔𑀬𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀯𑀺𑀯𑀺𑀢𑁆𑀢𑁄, 𑀢𑀲𑁆𑀫𑀸 𑀅𑀯𑀺𑀯𑁂𑀓𑀪𑀽𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀤𑀲𑁆𑀲𑀦𑁂𑀦 𑀦𑀺𑀭𑁄𑀥𑀲𑁆𑀲 𑀯𑀺𑀯𑁂𑀓𑀝𑁆𑀞𑁄 𑀆𑀯𑀺 𑀪𑀯𑀢𑀺, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀲𑁆𑀲𑀸𑀧𑀺 𑀫𑀕𑁆𑀕𑀲𑁆𑀲 𑀲𑀧𑁆𑀧𑀘𑁆𑀘𑀬𑀢𑀸𑀬 𑀲𑀗𑁆𑀔𑀢𑀪𑀸𑀯𑀁 𑀧𑀲𑁆𑀲𑀢𑁄 𑀅𑀧𑁆𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀲𑁆𑀲 𑀅𑀲𑀗𑁆𑀔𑀢𑀝𑁆𑀞𑁄 𑀆𑀯𑀺 𑀪𑀯𑀢𑀺, 𑀢𑀣𑀸 𑀫𑀭𑀡𑀥𑀫𑁆𑀫𑀢𑀸𑀬 𑀤𑀼𑀓𑁆𑀔𑀁 𑀯𑀺𑀦𑀲𑁆𑀲𑀦𑁆𑀢𑀁 𑀧𑀲𑁆𑀲𑀢𑁄 𑀅𑀫𑀭𑀡𑀥𑀫𑁆𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀅𑀫𑀢𑀝𑁆𑀞𑁄 𑀆𑀯𑀺 𑀪𑀯𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀯𑁂𑀓𑀸’’𑀢𑀺𑀆𑀤𑀺𑀦𑀸. 𑀇𑀢𑀭𑁂 𑀲𑀫𑀼𑀤𑀬𑀦𑀺𑀭𑁄𑀥𑀤𑀼𑀓𑁆𑀔𑀤𑀲𑁆𑀲𑀦𑁂𑀳𑀻𑀢𑀺 𑀏𑀢𑁆𑀣 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 ‘‘𑀦𑀸𑀬𑀁 𑀳𑁂𑀢𑀼 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬, 𑀅𑀬𑀁 𑀧𑀦 𑀳𑁂𑀢𑀽’’𑀢𑀺 𑀳𑁂𑀢𑀼𑀝𑁆𑀞𑁄 𑀆𑀯𑀺 𑀪𑀯𑀢𑀺. 𑀢𑀣𑀸 𑀧𑀭𑀫𑀕𑀫𑁆𑀪𑀻𑀭𑀲𑁆𑀲 𑀦𑀺𑀧𑀼𑀡𑀢𑀭𑀲𑁆𑀲 𑀤𑀼𑀤𑁆𑀤𑀲𑀲𑁆𑀲 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀤𑀲𑁆𑀲𑀦𑀝𑁆𑀞𑁄 𑀲𑀼𑀔𑀼𑀫𑀭𑀽𑀧𑀤𑀲𑁆𑀲𑀦𑁂𑀦 𑀘𑀓𑁆𑀔𑀼𑀦𑁄 𑀯𑀺𑀬, 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀧𑀦 𑀅𑀦𑁂𑀓𑀭𑁄𑀕𑀸𑀢𑀼𑀭𑀓𑀧𑀡𑀚𑀦𑀤𑀲𑁆𑀲𑀦𑁂𑀦 𑀇𑀲𑁆𑀲𑀭𑀚𑀦𑀲𑁆𑀲 𑀉𑀴𑀸𑀭𑀪𑀸𑀯𑁄 𑀯𑀺𑀬 𑀫𑀕𑁆𑀕𑀲𑁆𑀲 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀆𑀯𑀺 𑀪𑀯𑀢𑀺.

𑀢𑁂 𑀧𑀦𑁂𑀢𑁂 𑀳𑁂𑀢𑀼𑀝𑁆𑀞𑀸𑀤𑀺𑀓𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀯𑀲𑁂𑀦. ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀘𑀦𑀢𑁄𑀢𑀺 𑀬𑀲𑁆𑀫𑀸 𑀲𑀢𑀺𑀧𑀺 𑀛𑀸𑀦𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂 ‘‘𑀛𑀸𑀦𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀺 𑀦 𑀯𑀼𑀢𑁆𑀢𑀁, ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’ 𑀇𑀘𑁆𑀘𑁂𑀯 𑀧𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀸𑀢𑀺𑀲𑀬𑁄 𑀫𑀕𑁆𑀕𑀗𑁆𑀕𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄. 𑀢𑁂𑀦𑀸𑀳 ‘‘𑀯𑀺𑀲𑁂𑀲𑀢𑁄 𑀯𑀸 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀽𑀢𑀸 𑀫𑀕𑁆𑀕𑀗𑁆𑀕𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺. 𑀲𑁄 𑀢𑁂𑀲𑀁 𑀆𑀓𑀸𑀭𑁄𑀢𑀺 𑀬𑁄 𑀫𑀕𑁆𑀕𑀗𑁆𑀕𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀲𑀗𑁆𑀔𑀸𑀢𑁄 𑀆𑀓𑀸𑀭𑁄, 𑀲𑁄 𑀫𑀕𑁆𑀕𑀲𑁆𑀲 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀧𑀼𑀭𑀺𑀫𑁄 𑀧𑀦 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀪𑀺𑀲𑀫𑁂𑀢𑀩𑁆𑀩𑀝𑁆𑀞𑁄𑀢𑀺 𑀬𑀣𑀸𑀯𑀼𑀢𑁆𑀢𑀧𑀻𑀴𑀦𑀸𑀤𑀺𑀅𑀢𑁆𑀣𑀫𑁂𑀯 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸𑀬 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀤𑀢𑀺. 𑀢𑁂𑀦 𑀅𑀪𑀺𑀲𑀫𑀬𑀲𑀤𑁆𑀤𑀁 𑀓𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀪𑀺𑀲𑀫𑀬𑀲𑁆𑀲𑀸𑀢𑀺 𑀜𑀸𑀡𑀲𑁆𑀲. 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀧𑀭𑀺𑀚𑀸𑀦𑀦𑀸𑀤𑀺𑀯𑀺𑀲𑁂𑀲𑀸𑀓𑀸𑀭𑁄. 𑀲𑁄 𑀳𑀺 𑀫𑀕𑁆𑀕𑀓𑁆𑀔𑀡𑁂 𑀅𑀲𑀫𑁆𑀫𑁄𑀳𑀢𑁄 𑀲𑀺𑀤𑁆𑀥𑁄, 𑀧𑀘𑁆𑀙𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀦𑀸 𑀧𑀸𑀓𑀝𑁄 𑀳𑁄𑀢𑀺. 𑀆𑀓𑀸𑀭𑁄𑀧𑀺 𑀜𑀸𑀡𑁂𑀦 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀯𑀸 𑀢𑀢𑀺𑀬𑀦𑀬𑁄 𑀤𑀲𑁆𑀲𑀺𑀢𑁄. 𑀧𑀻𑀴𑀦𑀸𑀤𑀺𑀦𑀸 𑀤𑀲𑁆𑀲𑀺𑀢𑁄 𑀯𑀺𑀲𑀬𑀯𑀺𑀪𑀸𑀕𑁂𑀦𑀧𑀺 𑀯𑀺𑀲𑀬𑀺𑀯𑀺𑀪𑀸𑀕𑁄 𑀳𑁄𑀢𑀺 𑀬𑀣𑀸 ‘‘𑀭𑀽𑀧𑀲𑀜𑁆𑀜𑀸, 𑀲𑀤𑁆𑀤𑀲𑀜𑁆𑀜𑀸’’𑀢𑀺 (𑀲𑀁. 𑀦𑀺. 𑁩.𑁫𑁭).

𑀓𑀼𑀘𑁆𑀙𑀺𑀢𑀁 𑀔𑀦𑁆𑀢𑀺 𑀕𑀭𑀳𑀺𑀢𑀁 𑀳𑀼𑀢𑁆𑀯𑀸 𑀅𑀲𑀸𑀭𑀁. ‘‘𑀲𑀫𑀸𑀕𑀫𑁄’’𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀁-𑀲𑀤𑁆𑀤𑀲𑁆𑀲 𑀲𑀁𑀬𑁄𑀕𑀢𑁆𑀣𑀚𑁄𑀢𑀓𑀢𑁆𑀢𑀫𑀸𑀳. ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀓𑁂𑀯𑀮𑀲𑁆𑀲 𑀧𑀦𑁆𑀦-𑀲𑀤𑁆𑀤𑀲𑁆𑀲, 𑀇𑀢-𑀲𑀤𑁆𑀤𑀲𑁆𑀲 𑀘 𑀧𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀅𑀢𑁆𑀣𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀉-𑀲𑀤𑁆𑀤𑀲𑁆𑀲 𑀘 𑀧𑀬𑁄𑀕𑁂 𑀉𑀧𑀮𑀩𑁆𑀪𑀦𑀢𑁄 𑀲𑁄 𑀉𑀧𑁆𑀧𑀢𑁆𑀢𑀺𑀅𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀏𑀯𑀁 𑀉𑀧𑁆𑀧𑀦𑁆𑀦𑀁 𑀉𑀤𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀻’’𑀢𑀺. 𑀯𑀺𑀲𑀼𑀁 𑀧𑀬𑀼𑀚𑁆𑀚𑀫𑀸𑀦𑀸𑀢𑀺 𑀆𑀕𑀫-𑀇𑀢-𑀧𑀤𑁂𑀳𑀺 𑀯𑀺𑀦𑀸 𑀧𑀬𑀼𑀚𑁆𑀚𑀫𑀸𑀦𑀸. 𑀲𑀥𑀸𑀢𑀼𑀓𑀦𑁆𑀢𑀺 𑀅𑀦𑁆𑀢𑁄𑀦𑀻𑀢𑁂𑀦 𑀥𑀸𑀢𑀼𑀦𑀸 𑀲𑀥𑀸𑀢𑀼𑀓𑀁. 𑀢𑁂𑀦𑁂𑀯 𑀢𑁂 ‘‘𑀉𑀧𑀲𑀕𑁆𑀕𑀸’’𑀢𑀺 𑀘 𑀯𑀼𑀢𑁆𑀢𑀸.

𑀤𑀼𑀓𑁆𑀔𑀯𑀺𑀯𑁂𑀓𑀪𑀸𑀯𑀦𑁆𑀢𑀺 𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀢𑀁. 𑀦𑀺𑀯𑀢𑁆𑀢𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀦𑀼𑀧𑁆𑀧𑀸𑀤𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀦𑀺𑀭𑁄𑀥𑀧𑀘𑁆𑀘𑀬𑀢𑀸 𑀦𑀺𑀭𑁄𑀥𑀲𑁆𑀲 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸. 𑀧𑀼𑀕𑁆𑀕𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀥𑀫𑁆𑀫𑀪𑀸𑀯𑁂𑀳𑀻𑀢𑀺 𑀧𑀼𑀕𑁆𑀕𑀮𑀥𑀫𑁆𑀫𑀪𑀸𑀯𑁂𑀦 𑀲𑀘𑁆𑀙𑀺𑀓𑀭𑀡𑀥𑀫𑁆𑀫𑀪𑀸𑀯𑁂𑀦 𑀘. 𑀨𑀮𑀦𑁆𑀢𑀺 𑀅𑀭𑀺𑀬𑀨𑀮𑀁. 𑀢𑀲𑁆𑀲𑀸𑀢𑀺 𑀦𑀺𑀝𑁆𑀞𑀸𑀦𑀪𑀽𑀢𑀸𑀬 𑀨𑀮𑀲𑀗𑁆𑀔𑀸𑀢𑀸𑀬 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀲𑀫𑀬𑀪𑀽𑀢𑀸𑀬 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀤𑀢𑀸 𑀤𑀝𑁆𑀞𑀩𑁆𑀩𑀸.

𑀧𑀝𑀺𑀯𑀺𑀚𑁆𑀛𑀦𑀓𑀸𑀮𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀸𑀤𑀺𑀲𑀫𑀜𑁆𑀜𑀸𑀢𑀺 𑀆𑀳 ‘‘𑀧𑀝𑀺𑀯𑀺𑀤𑁆𑀥𑀓𑀸𑀮𑁂 𑀧𑀯𑀢𑁆𑀢’’𑀦𑁆𑀢𑀺. 𑀢𑀢𑁄 𑀏𑀯𑀸𑀢𑀺 𑀢𑁂𑀦 𑀧𑀓𑀸𑀲𑀺𑀢𑀢𑁆𑀢𑀸 𑀏𑀯.

𑀢𑀦𑁆𑀦𑀺𑀫𑀺𑀢𑁆𑀢𑀪𑀸𑀯𑁄𑀢𑀺 𑀚𑀸𑀢𑀺𑀆𑀤𑀺 𑀯𑀺𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀪𑀸𑀯𑁄, 𑀦 𑀲𑀫𑀼𑀤𑀬𑀲𑀘𑁆𑀘𑀁 𑀯𑀺𑀬 𑀧𑀪𑀯𑀪𑀸𑀯𑁂𑀦. 𑀉𑀤𑀬𑀩𑁆𑀩𑀬𑀧𑀻𑀴𑀺𑀢𑀪𑀸𑀯𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸. 𑀧𑀯𑀢𑁆𑀢𑀦𑀫𑁂𑀯𑀸𑀢𑀺 𑀧𑀯𑀢𑁆𑀢𑀺 𑀏𑀯. 𑀓𑀺𑀘𑁆𑀘𑀁 𑀭𑀲𑁄𑀢𑀺 𑀭𑀲𑀲𑁆𑀲 𑀓𑀺𑀘𑁆𑀘𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀅𑀯𑀺𑀓𑀸𑀭𑀢𑀸 𑀯𑀺𑀓𑀸𑀭𑀸𑀪𑀸𑀯𑁄 𑀦𑀺𑀘𑁆𑀘𑀢𑀸.

𑀫𑀭𑀻𑀘𑀺𑀫𑀸𑀬𑀸𑀅𑀢𑁆𑀢𑀸𑀦𑀦𑁆𑀢𑀺 𑀫𑀭𑀻𑀘𑀺𑀬𑀸 𑀫𑀸𑀬𑀸𑀬 𑀅𑀢𑁆𑀢𑀦𑁄 𑀘 𑀅𑀭𑀺𑀬𑀜𑀸𑀡𑀲𑁆𑀲𑀸𑀢𑀺 𑀅𑀭𑀺𑀬𑀸𑀦𑀁 𑀜𑀸𑀡𑀲𑁆𑀲. 𑀢𑁂𑀦 𑀅𑀭𑀺𑀬𑀸𑀦𑀁 𑀫𑀕𑁆𑀕𑀜𑀸𑀡𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀦𑀓𑀜𑀸𑀡𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀢𑀣𑀕𑀸𑀳𑀓𑀲𑁆𑀲𑀸’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸 𑀕𑁄𑀘𑀭𑀪𑀸𑀯𑁄, 𑀇𑀢𑀭𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁄. 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸, 𑀆𑀭𑀫𑁆𑀫𑀡𑀪𑀸𑀯𑁄 𑀯𑀸 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄, 𑀇𑀢𑀭𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁄𑀯.

𑀩𑀸𑀥𑀓𑀧𑁆𑀧𑀪𑀯𑀪𑀸𑀯𑁂𑀦𑀸𑀢𑀺 𑀩𑀸𑀥𑀓𑀲𑁆𑀲 𑀉𑀧𑁆𑀧𑀸𑀤𑀓𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀦 𑀢𑀡𑁆𑀳𑀸 𑀩𑀸𑀥𑀓𑀪𑀸𑀯𑁂𑀦 𑀕𑀳𑀺𑀢𑀸 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀽𑀦𑀁 𑀅𑀲𑀗𑁆𑀓𑀭𑀯𑀲𑁂𑀦 𑀩𑁄𑀥𑀦𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀅𑀬𑀫𑀢𑁆𑀣𑀯𑀡𑁆𑀡𑀦𑀸 𑀬𑀼𑀚𑁆𑀚𑀢𑁂𑀯. 𑀬𑀤𑀺𑀧𑀺 𑀏𑀯𑀁 ‘‘𑀤𑀼𑀓𑁆𑀔𑀫𑁂𑀯 𑀩𑀸𑀥𑀓’’𑀦𑁆𑀢𑀺 𑀦𑀺𑀬𑀫𑀸𑀦𑀼𑀧𑀧𑀢𑁆𑀢𑀺, 𑀲𑀫𑀼𑀤𑀬𑀪𑀸𑀯𑀧𑁆𑀧𑀲𑀗𑁆𑀕𑁄 𑀘𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀚𑀸𑀢𑀺𑀆𑀤𑀻𑀦𑀁 𑀯𑀺𑀬 𑀯𑀸’’𑀢𑀺𑀆𑀤𑀺. 𑀩𑀸𑀥𑀓𑀢𑁆𑀢𑀲𑁆𑀲 𑀩𑀸𑀥𑀓𑀢𑁆𑀢𑁂 𑀘 𑀦𑀺𑀬𑀫𑁄𑀢𑀺 𑀆𑀳 ‘‘𑀤𑁆𑀯𑀺𑀥𑀸𑀧𑀺 𑀩𑀸𑀥𑀓𑀢𑁆𑀣𑀸𑀯𑀥𑀸𑀭𑀡𑁂𑀦𑀸’’𑀢𑀺. 𑀬𑀣𑀸 𑀳𑀺 𑀩𑀸𑀥𑀓𑀢𑁆𑀢𑀲𑁆𑀲 𑀤𑀼𑀓𑁆𑀔𑁂 𑀦𑀺𑀬𑀢𑀢𑀸, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀘 𑀩𑀸𑀥𑀓𑀢𑁆𑀢𑁂 𑀦𑀺𑀬𑀢𑀢𑀸𑀢𑀺. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀡𑁆𑀳𑀸𑀬 𑀏𑀯 𑀲𑀫𑀼𑀤𑀬𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀢𑀡𑁆𑀳𑀸𑀯𑀲𑁂𑀦 𑀦𑀺𑀬𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀢𑀡𑁆𑀳𑀸𑀬 𑀯𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀳𑁂𑀲𑀸𑀢𑀺. ‘‘𑀓𑀼𑀲𑀮𑁂𑀳𑀺 𑀯𑀺𑀦𑀸’’𑀢𑀺𑀆𑀤𑀺𑀦𑀸 𑀤𑀼𑀓𑁆𑀔𑀳𑁂𑀢𑀼𑀢𑀸𑀬 𑀢𑀡𑁆𑀳𑀸𑀬 𑀧𑀥𑀸𑀦𑀪𑀸𑀯𑀫𑀸𑀳. 𑀢𑀣𑀸 𑀳𑀺 𑀲𑀸 𑀓𑀫𑁆𑀫𑀯𑀺𑀘𑀺𑀢𑁆𑀢𑀢𑀸𑀬 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀯𑀺𑀲𑁂𑀲𑁂𑀦 𑀓𑀫𑁆𑀫𑀲𑁆𑀲 𑀲𑀳𑀓𑀸𑀭𑀺𑀓𑀸𑀭𑀡𑀁 𑀳𑁄𑀢𑀻𑀢𑀺. 𑀤𑁆𑀯𑀺𑀥𑀸𑀧𑀺 𑀦𑀺𑀬𑀫𑁂𑀦𑀸𑀢𑀺 𑀫𑀕𑁆𑀕𑁄𑀯 𑀦𑀺𑀬𑁆𑀬𑀸𑀦𑀁, 𑀦𑀺𑀬𑁆𑀬𑀸𑀦𑀫𑁂𑀯 𑀘 𑀫𑀕𑁆𑀕𑁄𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑁂𑀦 𑀦𑀺𑀬𑀫𑁂𑀦.

𑀯𑀘𑀻𑀲𑀘𑁆𑀘𑀁 𑀲𑀘𑁆𑀘𑀯𑀸𑀘𑀸, 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀘𑀸𑀢𑀺 𑀆𑀳 ‘‘𑀯𑀺𑀭𑀢𑀺𑀲𑀘𑁆𑀘𑁂𑀢𑀺 𑀫𑀼𑀲𑀸𑀯𑀸𑀤𑀯𑀺𑀭𑀢𑀺𑀬’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀺𑀭𑀢𑀺𑀲𑀘𑁆𑀘𑀁 𑀲𑀫𑀸𑀤𑀸𑀦𑀯𑀺𑀭𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀦 𑀲𑀫𑀸𑀤𑀸𑀦𑀫𑀢𑁆𑀢𑀁 𑀯𑀺𑀭𑀢𑀺𑀲𑀘𑁆𑀘𑀁, 𑀅𑀣 𑀔𑁄 𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑀁. 𑀢𑀁 𑀧𑀦 𑀧𑀝𑀺𑀜𑁆𑀜𑀸𑀲𑀘𑁆𑀘𑀢𑁆𑀢𑀸 𑀫𑀼𑀲𑀸𑀯𑀸𑀤𑀯𑀺𑀭𑀢𑀺𑀬𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀦 𑀳𑀺 𑀅𑀜𑁆𑀜𑀯𑀺𑀭𑀢𑀻𑀲𑀼 𑀲𑀘𑁆𑀘𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄’’𑀢𑀺. 𑀲𑀢𑀺𑀧𑀺 𑀤𑀼𑀓𑁆𑀔𑀲𑀫𑀼𑀤𑀬𑀸𑀯𑀩𑁄𑀥𑁂 𑀬𑀸𑀯𑀤𑁂𑀯 𑀦𑀺𑀭𑁄𑀥𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸 𑀧𑀜𑁆𑀜𑀸𑀪𑀸𑀯𑀦𑀸𑀢𑀺 𑀧𑀘𑁆𑀙𑀺𑀫𑀤𑁆𑀯𑀬𑀲𑁆𑀲𑁂𑀯 𑀲𑀘𑁆𑀘𑀢𑁆𑀣𑀁 𑀲𑀸𑀢𑀺𑀲𑀬𑀁, 𑀢𑀤𑀥𑀺𑀕𑀫𑀲𑁆𑀲 𑀘 𑀅𑀯𑀺𑀯𑀸𑀤𑀳𑁂𑀢𑀼𑀓𑀁 𑀲𑀼𑀢𑁆𑀢𑁂 𑀯𑀺𑀪𑀸𑀯𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀞𑀸𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀢𑀦𑁄 𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦𑁂𑀯 𑀲𑀢𑁆𑀢𑀸𑀦𑀁 𑀚𑀸𑀢𑀺𑀆𑀤𑀻𑀦𑀁 𑀧𑀢𑁆𑀢𑀺 𑀲𑀫𑁆𑀫𑀼𑀔𑀻𑀪𑀸𑀯𑁄 𑀘 𑀚𑀸𑀬𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀢𑀸, 𑀧𑀘𑁆𑀘𑀓𑁆𑀔𑀢𑀸 𑀘 𑀧𑀞𑀫𑀢𑀸’’𑀢𑀺. 𑀪𑀕𑀯𑀢𑁄 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 𑀯𑀸 𑀧𑀞𑀫𑀸𑀤𑀺𑀢𑀸 𑀤𑀝𑁆𑀞𑀩𑁆𑀩𑀸.

𑀧𑀭𑀺𑀚𑀦𑀦𑀸𑀤𑀻𑀳𑀻𑀢𑀺 𑀧𑀭𑀺𑀜𑁆𑀜𑀸𑀧𑁆𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀳𑀺, 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘𑁂𑀢𑀁 𑀅𑀜𑁆𑀜𑀲𑀤𑁆𑀤𑀧𑁂𑀓𑁆𑀔𑀸𑀬. 𑀥𑀫𑁆𑀫𑀜𑀸𑀡𑀓𑀺𑀘𑁆𑀘𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀯𑀩𑁄𑀥𑀓𑀺𑀘𑁆𑀘𑀁. 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀺 𑀏𑀢𑀧𑁆𑀧𑀭𑀫𑀸𑀦𑁂𑀯𑀸𑀢𑀺 𑀇𑀢𑁄 𑀧𑀭𑀁 𑀦𑁂𑀬𑁆𑀬𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀤𑀼𑀓𑁆𑀔𑀸𑀤𑀻𑀦𑀁 𑀅𑀭𑀺𑀬𑀲𑀘𑁆𑀘𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀁 𑀬𑀼𑀢𑁆𑀢𑀁, 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀕𑀢𑀁 𑀯𑀸 𑀲𑀯𑀦𑀁 𑀅𑀦𑀼𑀲𑁆𑀲𑀯𑁄. 𑀲𑀼𑀢𑀸𑀦𑀼𑀲𑀸𑀭𑁂𑀦, 𑀅𑀜𑁆𑀜𑀣𑀸 𑀯𑀸 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀲𑀸𑀫𑀜𑁆𑀜𑀸𑀓𑀸𑀭𑀧𑀭𑀺𑀕𑁆𑀕𑀡𑁆𑀳𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄. 𑀬𑀣𑀸𑀯𑀺𑀢𑀓𑁆𑀓𑀺𑀢𑀸𑀓𑀸𑀭𑀲𑁆𑀲 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸𑀬 𑀤𑀲𑁆𑀲𑀦𑀪𑀽𑀢𑀸𑀬 𑀧𑀜𑁆𑀜𑀸𑀬 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀭𑁄𑀘𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺. 𑀆𑀤𑀺𑀘𑁆𑀘𑁄 𑀯𑀺𑀬 𑀧𑀪𑀸𑀬 𑀦𑀺𑀭𑁄𑀥𑀁 𑀨𑀼𑀲𑀢𑀺 𑀲𑀘𑁆𑀙𑀺𑀓𑀭𑁄𑀢𑀺 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑀺. 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸.

𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀦𑁆𑀢𑀺 𑀦𑀸𑀦𑀸𑀪𑀺𑀲𑀫𑀬𑀁 𑀯𑀤𑀢𑀺. 𑀏𑀓𑀤𑀲𑁆𑀲𑀺𑀦𑁄𑀢𑀺 𑀏𑀓𑀲𑀘𑁆𑀘𑀤𑀲𑁆𑀲𑀺𑀦𑁄. 𑀦 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸𑀬𑀜𑁆𑀘 𑀲𑀩𑁆𑀩𑀤𑀲𑁆𑀲𑀦𑀁 𑀤𑀲𑁆𑀲𑀦𑀦𑁆𑀢𑀭𑀧𑀭𑀫𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀧𑀭𑀫𑁄 𑀆𑀧𑀚𑁆𑀚𑁂𑀬𑁆𑀬, 𑀲𑀘𑁆𑀘𑀸𑀦𑀜𑁆𑀘 𑀦𑀸𑀦𑀸𑀪𑀺𑀲𑀫𑀬𑁂 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀧𑀞𑀫𑀫𑀕𑁆𑀕𑀸𑀤𑀺𑀧𑁆𑀧𑀳𑁂𑀬𑁆𑀬𑀸𑀦𑀁 𑀲𑀁𑀬𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀏𑀓𑀤𑁂𑀲𑀧𑁆𑀧𑀳𑀸𑀦𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀘 𑀲𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀢𑀸, 𑀢𑀤𑀦𑀦𑁆𑀢𑀭𑀜𑁆𑀘 𑀧𑀢𑁆𑀢𑀩𑁆𑀩𑁂𑀦 𑀨𑀮𑁂𑀦 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀢𑀸 𑀘 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀲𑀘𑁆𑀘𑀸𑀦𑀁 𑀦𑀸𑀦𑀸𑀪𑀺𑀲𑀫𑀬𑁄 𑀬𑀼𑀢𑁆𑀢𑁄. 𑀬𑀣𑀸 𑀘 𑀦𑀸𑀦𑀸𑀪𑀺𑀲𑀫𑀬𑁄 𑀦 𑀬𑀼𑀢𑁆𑀢𑁄, 𑀏𑀯𑀁 𑀆𑀭𑀫𑁆𑀫𑀡𑀸𑀪𑀺𑀲𑀫𑀬𑁄𑀧𑀺. 𑀬𑀤𑀺 𑀳𑀺 𑀆𑀭𑀫𑁆𑀫𑀡𑀓𑀭𑀡𑁂𑀦 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀇𑀘𑁆𑀙𑀺𑀢𑁄, 𑀦 𑀫𑀕𑁆𑀕𑁄 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀅𑀧𑀭𑀺𑀧𑀼𑀡𑁆𑀡𑁄 𑀲𑀘𑁆𑀘𑀸𑀪𑀺𑀲𑀫𑀬𑁄 𑀲𑀺𑀬𑀸. 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀫𑀕𑁆𑀕𑁄 𑀆𑀮𑀫𑁆𑀩𑀻𑀬𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑁄𑀯𑀸𑀢𑀺 𑀘𑁂? 𑀏𑀯𑀁 𑀲𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀫𑀕𑁆𑀕𑁄 𑀆𑀮𑀫𑁆𑀩𑀺𑀢𑁄, 𑀲𑁄𑀧𑀺 𑀅𑀜𑁆𑀜𑁂𑀦, 𑀲𑁄𑀧𑀺 𑀅𑀜𑁆𑀜𑁂𑀦𑀸𑀢𑀺 𑀅𑀦𑀯𑀝𑁆𑀞𑀸𑀦𑀁 𑀲𑀺𑀬𑀸, 𑀢𑀲𑁆𑀫𑀸 𑀦 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀢𑁄 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀬𑀼𑀢𑁆𑀢𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀦 𑀬𑀼𑀢𑁆𑀢𑁄. 𑀓𑀺𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀜𑁆𑀘 𑀆𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀲𑀫𑀼𑀘𑁆𑀙𑁂𑀤𑀪𑀸𑀯𑀦𑀸 𑀫𑀕𑁆𑀕𑀜𑀸𑀡𑀲𑁆𑀲 𑀦 𑀬𑀼𑀢𑁆𑀢𑀸 𑀢𑀢𑁄 𑀅𑀦𑀺𑀲𑁆𑀲𑀝𑀪𑀸𑀯𑀢𑁄, 𑀲𑀩𑁆𑀩𑀲𑀗𑁆𑀔𑀢𑀯𑀺𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀫𑁂𑀯 𑀧𑀦 𑀆𑀭𑀫𑁆𑀫𑀡𑀢𑀸 𑀬𑀼𑀢𑁆𑀢𑀸. 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀳𑁂𑀢𑀼𑀩𑁆𑀬𑀸𑀧𑀸𑀭𑁄𑀯 𑀧𑀭𑀫𑀢𑁆𑀣𑀢𑁄 𑀓𑀺𑀭𑀺𑀬𑀸𑀢𑀺 𑀓𑀢𑁆𑀯𑀸.

𑀧𑀯𑀢𑁆𑀢𑁂𑀢𑀻𑀢𑀺 𑀲𑀚𑁆𑀚𑀢𑀺, 𑀧𑀯𑀢𑁆𑀢𑀺𑀬𑀸 𑀯𑀸 𑀳𑁂𑀢𑀼 𑀳𑁄𑀢𑀺. 𑀦𑀺𑀯𑀢𑁆𑀢𑁂𑀢𑀻𑀢𑀺 𑀲𑀁𑀳𑀭𑀢𑀺 𑀧𑀮𑀬𑀁 𑀕𑀫𑁂𑀢𑀺, 𑀧𑀮𑁄𑀓𑀢𑀸𑀤𑀺𑀯𑀲𑁂𑀦 𑀯𑀸 𑀫𑁄𑀓𑁆𑀔𑀳𑁂𑀢𑀼 𑀳𑁄𑀢𑀺. 𑀧𑀥𑀸𑀦𑀢𑁄𑀢𑀺 𑀧𑀓𑀢𑀺𑀢𑁄, 𑀬𑀁 ‘‘𑀅𑀩𑁆𑀬𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

‘‘𑀓𑀸𑀮𑁄 𑀓𑀭𑁄𑀢𑀺 𑀪𑀽𑀢𑀸𑀦𑀺, 𑀓𑀸𑀮𑁄 𑀲𑀁𑀳𑀭𑀢𑀻 𑀧𑀚𑀸;

𑀓𑀸𑀮𑁄 𑀲𑀼𑀢𑁆𑀢𑁂 𑀚𑀸𑀕𑀭𑀢𑀺, 𑀓𑀸𑀮𑁄 𑀳𑀺 𑀤𑀼𑀭𑀢𑀺𑀓𑁆𑀓𑀫𑁄’’𑀢𑀺. 𑁋

𑀏𑀯𑀁𑀯𑀸𑀤𑀸 𑀓𑀸𑀮𑀯𑀸𑀤𑀺𑀦𑁄. ‘‘𑀓𑀡𑁆𑀝𑀓𑀲𑁆𑀲 𑀢𑀺𑀔𑀺𑀡𑀢𑀸, 𑀓𑀧𑀺𑀝𑁆𑀞𑀨𑀮𑀸𑀤𑀻𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀺𑀲𑀭𑀻𑀲𑀧𑀸𑀤𑀻𑀦𑀁 𑀯𑀺𑀘𑀺𑀢𑁆𑀢𑀪𑀸𑀯𑁄𑀢𑀺 𑀏𑀯𑀫𑀸𑀤𑀬𑁄 𑀓𑁂𑀦 𑀓𑀸𑀭𑀺𑀢𑀸? 𑀲𑀪𑀸𑀯𑁂𑀦𑁂𑀯 𑀲𑀺𑀤𑁆𑀥𑀸, 𑀏𑀯𑀁 𑀲𑀩𑁆𑀩𑀫𑁆𑀧𑀺, 𑀦 𑀏𑀢𑁆𑀣 𑀓𑀲𑁆𑀲𑀘𑀺 𑀓𑀸𑀫𑀓𑀸𑀭𑁄’’𑀢𑀺 𑀏𑀯𑀁𑀯𑀸𑀤𑀸 𑀲𑀪𑀸𑀯𑀯𑀸𑀤𑀺𑀦𑁄. ‘‘𑀮𑁄𑀓𑁄 𑀦𑀺𑀬𑀢𑁄 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺𑀲𑀤𑀺𑀲𑁄, 𑀦 𑀏𑀢𑁆𑀣 𑀓𑀲𑁆𑀲𑀘𑀺 𑀧𑀼𑀭𑀺𑀲𑀓𑀸𑀭𑁄’’𑀢𑀺 𑀏𑀯𑀁𑀧𑀯𑀢𑁆𑀢𑀯𑀸𑀤𑀸 𑀦𑀺𑀬𑀢𑀺𑀯𑀸𑀤𑀺𑀦𑁄, 𑁋

‘‘𑀬𑀤𑀺𑀘𑁆𑀙𑀸𑀬 𑀧𑀯𑀢𑁆𑀢𑀦𑁆𑀢𑀺, 𑀬𑀤𑀺𑀘𑁆𑀙𑀸𑀬 𑀦𑀺𑀯𑀢𑁆𑀢𑀭𑁂;

𑀬𑀤𑀺𑀘𑁆𑀙𑀸𑀬 𑀲𑀼𑀔𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀬𑀤𑀺𑀘𑁆𑀙𑀢𑀻 𑀧𑀚𑀸’’𑀢𑀺. 𑁋

𑀏𑀯𑀁𑀧𑀯𑀢𑁆𑀢𑀯𑀸𑀤𑀸 𑀬𑀤𑀺𑀘𑁆𑀙𑀸𑀯𑀸𑀤𑀺𑀲𑀗𑁆𑀔𑀸𑀢𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀯𑀸𑀤𑀺𑀦𑁄 𑀘 𑀏𑀢𑁆𑀣 𑀲𑀪𑀸𑀯𑀯𑀸𑀤𑁂 𑀏𑀯 𑀅𑀦𑁆𑀢𑁄𑀕𑀥𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀡𑀽𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀆𑀚𑀻𑀯𑀓𑀯𑀸𑀤𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀅𑀓𑀸𑀭𑀡𑀧𑀭𑀺𑀕𑁆𑀕𑀳𑁄. 𑀓𑀡𑀸𑀤𑀯𑀸𑀤𑁄 𑀧𑀦 𑀇𑀲𑁆𑀲𑀭𑀺𑀘𑁆𑀙𑀸𑀯𑀲𑁂𑀦 𑀅𑀡𑀽𑀦𑀁 𑀲𑀁𑀬𑁄𑀕𑀯𑀺𑀬𑁄𑀕𑀢𑁄 𑀮𑁄𑀓𑀲𑁆𑀲 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀁 𑀯𑀤𑀢𑀺. 𑀧𑀥𑀸𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑀻𑀢𑀺 𑀫𑀳𑀢𑀸𑀤𑀺𑀪𑀸𑀯𑁂𑀦 𑀅𑀧𑀭𑀺𑀡𑀸𑀫𑁄, 𑀅𑀦𑀪𑀺𑀩𑁆𑀬𑀢𑁆𑀢𑀺 𑀯𑀸. ‘‘𑀅𑀳𑀫𑀜𑁆𑀜𑁄, 𑀧𑀓𑀢𑀺 𑀅𑀜𑁆𑀜𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀚𑀸𑀦𑀦𑁂𑀦 𑀅𑀢𑁆𑀢𑀲𑀼𑀔𑀤𑀼𑀓𑁆𑀔𑀫𑁄𑀳𑁂𑀲𑀼 𑀅𑀯𑀺𑀪𑀸𑀕𑀕𑁆𑀕𑀳𑀡𑁂 𑀦𑀺𑀯𑀢𑁆𑀢𑀺𑀢𑁂 𑀓𑀺𑀭 𑀯𑀼𑀢𑁆𑀢𑀦𑀬𑁂𑀦 𑀧𑀥𑀸𑀦𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀲𑁄 𑀯𑀺𑀫𑁄𑀓𑁆𑀔𑁄𑀢𑀺 𑀓𑀸𑀧𑀺𑀮𑀸. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀫𑀻𑀧𑀢𑀸, 𑀲𑀁𑀬𑁄𑀕𑁄𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀢𑁆𑀢𑀸𑀢𑀺 𑀏𑀓𑀪𑀸𑀯𑀢𑁄 𑀏𑀓𑁄𑀧𑀺 𑀯𑀼𑀢𑁆𑀢𑁄. 𑀢𑀬𑁄𑀢𑀺 𑀓𑀺𑀘𑁆𑀘𑀯𑀺𑀪𑀸𑀕𑁂𑀦. 𑀢𑀸𑀦𑀻𑀢𑀺 𑀲𑀫𑁆𑀫𑀸𑀯𑀸𑀘𑀸𑀤𑀺𑀲𑀻𑀮𑀸𑀦𑀺. 𑀙𑀦𑁆𑀤𑀲𑁆𑀲 𑀲𑀤𑁆𑀤𑀳𑀦𑀸𑀦𑀼𑀓𑀽𑀮𑀸𑀧𑀺 𑀙𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑁂𑀳𑀺 𑀲𑀤𑁆𑀥𑀺𑀁 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀯𑀼𑀢𑁆𑀢𑁄. 𑀢𑀸𑀤𑀺𑀲𑁂 𑀓𑀸𑀮𑁂 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀭𑀽𑀳𑀦𑁂𑀦 𑀉𑀧𑀓𑀸𑀭𑀸 𑀲𑀫𑀸𑀥𑀺𑀲𑁆𑀲 𑀲𑀫𑀯𑀸𑀳𑀺𑀢𑀸𑀯𑀲𑁂𑀦 𑀢𑀸𑀤𑀺𑀲𑀓𑀺𑀘𑁆𑀘𑀸𑀯 𑀉𑀧𑁂𑀓𑁆𑀔𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀖𑀸𑀢𑀓𑀢𑁆𑀢𑀸𑀢𑀺 𑀲𑀁𑀳𑀭𑀡𑀻𑀬𑀯𑀲𑁂𑀦 𑀯𑀺𑀳𑀦𑁆𑀢𑀪𑀸𑀯𑀢𑁄.

𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀦𑁆𑀢𑀺 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀤𑁆𑀯𑀬𑀁. 𑀢𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀔𑀸𑀤𑀺𑀲𑀤𑁆𑀤𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀘𑀓𑀢𑁆𑀢𑀸 𑀏𑀯. 𑀆𑀤𑀺𑀧𑀤𑀲𑀗𑁆𑀕𑀳𑁄𑀢𑀺 ‘‘𑀤𑀼𑀓𑁆𑀔𑀁, 𑀦 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀘𑀢𑀼𑀓𑁆𑀓𑁂 𑀆𑀤𑀺𑀧𑀤𑁂 𑀲𑀗𑁆𑀕𑀳𑁄. 𑀢𑀤𑀧𑁂𑀓𑁆𑀔𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀲𑀤𑁆𑀤𑀸𑀧𑁂𑀓𑁆𑀔𑀁 𑀤𑀼𑀓𑁆𑀔𑀲𑀤𑁆𑀤𑀁. 𑀘𑀢𑀼𑀢𑁆𑀣𑀧𑀤𑀲𑀗𑁆𑀕𑀳𑁄𑀢𑀺 ‘‘𑀦𑁂𑀯 𑀤𑀼𑀓𑁆𑀔𑀁, 𑀦 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀗𑁆𑀕𑀳𑁄. 𑀅𑀯𑀲𑁂𑀲𑀓𑀺𑀮𑁂𑀲𑀸𑀤𑀬𑁄𑀢𑀺 𑀢𑀡𑁆𑀳𑀸𑀯𑀚𑁆𑀚𑀓𑀺𑀮𑁂𑀲𑀸 𑀅𑀯𑀲𑁂𑀲𑀸𑀓𑀼𑀲𑀮𑀸, 𑀲𑀸𑀲𑀯𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀲𑀯𑀸 𑀘 𑀓𑀼𑀲𑀮𑀥𑀫𑁆𑀫𑀸. 𑀢𑁂 𑀳𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀲𑀫𑀼𑀤𑀬𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀅𑀭𑀺𑀬𑀲𑀘𑁆𑀘𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺. 𑀅𑀜𑁆𑀜𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀻𑀢𑀺 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀅𑀢𑁆𑀣𑀺 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁, 𑀅𑀢𑁆𑀣𑀺 𑀅𑀭𑀺𑀬𑀲𑀘𑁆𑀘𑀁, 𑀦 𑀲𑀫𑀼𑀤𑀬𑁄, 𑀅𑀢𑁆𑀣𑀺 𑀲𑀫𑀼𑀤𑀬𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀅𑀢𑁆𑀣𑀺 𑀦𑁂𑀯 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀢𑀢𑁆𑀣 𑀧𑀞𑀫𑀧𑀤𑀁 𑀯𑀼𑀢𑁆𑀢𑀢𑁆𑀣𑀁. 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀲𑀫𑀼𑀤𑀬𑁄, 𑀢𑀡𑁆𑀳𑀸 𑀲𑀫𑀼𑀤𑀬𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀧𑀳𑀸𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀢𑀤𑀪𑀸𑀯𑀢𑁄 𑀦𑁂𑀯 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀇𑀢𑀭𑀲𑀘𑁆𑀘𑀤𑁆𑀯𑀬𑀁 𑀅𑀭𑀺𑀬𑀲𑀘𑁆𑀘𑀁 𑀢𑀲𑁆𑀲 𑀢𑀲𑁆𑀲 𑀧𑀪𑀸𑀯𑀓𑀝𑁆𑀞𑁂𑀦 𑀲𑀺𑀬𑀸 𑀲𑀫𑀼𑀤𑀬𑁄, 𑀦 𑀧𑀦 𑀬𑀲𑁆𑀲 𑀧𑀳𑀸𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦. 𑀇𑀢𑀭𑀘𑀢𑀼𑀓𑁆𑀓𑀤𑁆𑀯𑀬𑁂𑀧𑀺 𑀆𑀤𑀺𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀲𑁂𑀲𑁂𑀲𑀼 𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀦𑀺𑀭𑁄𑀥𑁄, 𑀅𑀲𑀗𑁆𑀔𑀢𑀥𑀸𑀢𑀼 𑀦𑀺𑀭𑁄𑀥𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦 𑀦𑁂𑀯 𑀦𑀺𑀭𑁄𑀥𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀇𑀢𑀭𑀲𑀘𑁆𑀘𑀤𑁆𑀯𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀦𑀺𑀭𑁄𑀥𑀥𑀫𑁆𑀫𑀢𑀸𑀬 𑀲𑀺𑀬𑀸 𑀦𑀺𑀭𑁄𑀥𑁄, 𑀦 𑀧𑀦 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦. 𑀢𑀣𑀸 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀫𑀕𑁆𑀕𑁄, 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀪𑀸𑀯𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦 𑀦𑁂𑀯 𑀫𑀕𑁆𑀕𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀇𑀢𑀭𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀫𑀕𑁆𑀕𑁄 𑀉𑀧𑀧𑀢𑁆𑀢𑀺𑀫𑀕𑁆𑀕𑀪𑀸𑀯𑀢𑁄, 𑀦 𑀧𑀦 𑀬𑀲𑁆𑀲 𑀪𑀸𑀯𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦.

𑀲𑀦𑁆𑀢𑀦𑁆𑀢𑀺 𑀲𑀫𑀸𑀦𑀁. 𑀏𑀯𑀁 𑀇𑀢𑀭𑁂𑀲𑀼𑀧𑀻𑀢𑀺 𑀓𑀸𑀢𑀩𑁆𑀩𑀸𑀧𑀺 𑀓𑀺𑀭𑀺𑀬𑀸 𑀓𑀸𑀭𑀓𑀭𑀳𑀺𑀢𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀢𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀧𑀘𑁆𑀘𑀬𑀲𑀸𑀫𑀕𑁆𑀕𑀻 𑀓𑀺𑀭𑀺𑀬𑀁 𑀓𑀭𑁄𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀦𑀺𑀩𑁆𑀩𑀼𑀢𑀺𑀕𑀫𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀸𑀲𑀯𑀢𑀸 𑀅𑀲𑀼𑀪𑀢𑀸 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄. 𑀤𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑀕𑁆𑀕𑀸𑀦𑀁. 𑀲𑀫𑀼𑀤𑀬𑀸𑀤𑀺𑀪𑀸𑀯𑁄𑀢𑀺 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀫𑀕𑁆𑀕𑀪𑀸𑀯𑁄, 𑀲𑀫𑀼𑀤𑀬𑀲𑁆𑀲 𑀫𑀕𑁆𑀕𑀤𑀼𑀓𑁆𑀔𑀪𑀸𑀯𑁄, 𑀫𑀕𑁆𑀕𑀲𑁆𑀲 𑀤𑀼𑀓𑁆𑀔𑀲𑀫𑀼𑀤𑀬𑀪𑀸𑀯𑁄 𑀘, 𑀦 𑀧𑀦 𑀦𑀺𑀭𑁄𑀥𑀪𑀸𑀯𑁄 𑀤𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀫𑀜𑁆𑀜𑀲𑀫𑀗𑁆𑀕𑀺𑀢𑀸𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀇𑀢𑀭𑀻𑀢𑀭𑀲𑀪𑀸𑀯𑀬𑁄𑀕𑁄. 𑀢𑀡𑁆𑀳𑀸𑀬𑀸𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁. 𑀧𑀼𑀦𑀩𑁆𑀪𑀯𑀲𑁆𑀲𑀸𑀢𑀺 𑀧𑀼𑀦𑀪𑀯𑀲𑀗𑁆𑀔𑀸𑀢𑀲𑁆𑀲 𑀆𑀬𑀢𑀺𑀤𑀼𑀓𑁆𑀔𑀲𑁆𑀲. 𑀧𑀓𑀢𑀺𑀯𑀸𑀤𑀻𑀦𑀦𑁆𑀢𑀺 𑀓𑀸𑀧𑀺𑀮𑀸𑀦𑀁. 𑀯𑀺𑀓𑀸𑀭𑀸𑀢𑀺 𑀫𑀳𑀢𑀸𑀤𑀬𑁄 𑀩𑁆𑀬𑀢𑁆𑀢𑀸. 𑀯𑀺𑀪𑀸𑀯𑀢𑁄𑀢𑀺 𑀅𑀪𑀺𑀩𑁆𑀬𑀢𑁆𑀢𑀺𑀢𑁄, 𑀧𑀭𑀺𑀡𑀸𑀫𑀢𑁄 𑀯𑀸 𑀧𑀼𑀩𑁆𑀩𑁂. 𑀧𑀝𑀺𑀧𑁆𑀧𑀮𑀻𑀦𑀸 𑀘𑀸𑀢𑀺 𑀧𑀘𑁆𑀙𑀸 𑀧𑀓𑀢𑀺𑀬𑀁 𑀧𑀮𑀬𑀁 𑀕𑀢𑀸 𑀯𑁂𑀲𑀫𑁆𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀲𑀫𑀪𑀸𑀯𑁂𑀦 𑀅𑀦𑁆𑀢𑁄 𑀲𑀫𑁄𑀭𑀼𑀤𑁆𑀥𑀸. 𑀢𑁂𑀦𑀸𑀳 ‘‘𑀧𑀓𑀢𑀺𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀻’’𑀢𑀺. 𑀧𑀓𑀢𑀺𑀪𑀸𑀯𑁂𑀦𑁂𑀯𑀸𑀢𑀺 𑀅𑀩𑁆𑀬𑀢𑁆𑀢𑀪𑀸𑀯𑁂𑀦𑁂𑀯. 𑀲𑀫𑀼𑀤𑀬𑀪𑀸𑀯𑁂𑀦𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀧𑀪𑀯𑀪𑀸𑀯𑁂𑀦. 𑀅𑀜𑁆𑀜𑀣𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀅𑀯𑀺𑀚𑁆𑀚𑀸𑀤𑀻𑀦𑀫𑁆𑀧𑀺 𑀲𑀫𑀼𑀤𑀬𑀪𑀸𑀯𑁄 𑀮𑀩𑁆𑀪𑀢𑁂𑀯𑀸𑀢𑀺. 𑀅𑀯𑀺𑀪𑀢𑁆𑀢𑁂𑀳𑀻𑀢𑀺 𑀯𑁂𑀲𑀫𑁆𑀫𑀯𑀺𑀭𑀳𑁂𑀦 𑀧𑀓𑀢𑀺𑀪𑀸𑀯𑀁 𑀕𑀢𑁂𑀳𑀺. ‘‘𑀯𑀺𑀓𑀸𑀭𑁂𑀳𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂 ‘‘𑀫𑀳𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀫𑀳𑀦𑁆𑀢𑁄𑀢𑀺 𑀫𑀳𑀸𑀩𑀼𑀤𑁆𑀥𑀺. 𑀢𑀜𑁆𑀳𑀺 𑀓𑀸𑀧𑀺𑀮𑀸 ‘‘𑀫𑀳𑀸𑀅𑀚𑁆𑀛𑀸𑀲𑀬𑁄’’𑀢𑀺 𑀘 𑀯𑁄𑀳𑀭𑀦𑁆𑀢𑀺. 𑀭𑀽𑀧𑀢𑀫𑁆𑀫𑀢𑁆𑀢𑀸𑀤𑀬𑁄 𑀧𑀜𑁆𑀘 𑀢𑀫𑁆𑀫𑀢𑁆𑀢𑀸, 𑀅𑀳𑀁𑀓𑀸𑀭𑁄 𑀘𑀸𑀢𑀺 𑀙 𑀅𑀯𑀺𑀲𑁂𑀲𑀸. 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀯𑀸𑀘𑀸 𑀧𑀸𑀡𑀺 𑀧𑀸𑀤𑁄 𑀧𑀸𑀬𑀼 𑀉𑀧𑀢𑁆𑀣𑀁 𑀫𑀦𑁄𑀢𑀺 𑀏𑀓𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺. 𑀧𑀣𑀯𑀻 𑀆𑀧𑁄 𑀢𑁂𑀚𑁄 𑀯𑀸𑀬𑁄 𑀆𑀓𑀸𑀲𑀦𑁆𑀢𑀺 𑀧𑀜𑁆𑀘 𑀪𑀽𑀢𑀯𑀺𑀲𑁂𑀲𑀸, 𑀢𑁂𑀳𑀺. ‘‘𑀧𑀓𑀢𑀺𑀪𑀸𑀯𑁂𑀦𑁂𑀯 𑀞𑀺𑀢𑁂𑀳𑀻’’𑀢𑀺 𑀇𑀫𑀺𑀦𑀸 ‘‘𑀅𑀯𑀺𑀪𑀢𑁆𑀢𑁂𑀳𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀲𑀕𑀩𑁆𑀪𑀸𑀢𑀺 𑀲𑀩𑀻𑀚𑀸 𑀅𑀲𑀼𑀜𑁆𑀜𑀢𑀸. 𑀢𑀦𑁆𑀢𑀽𑀲𑀽𑀢𑀺 𑀲𑀼𑀢𑁆𑀢𑁂𑀲𑀼 𑀲𑀫𑀯𑀸𑀬𑀺𑀓𑀸𑀭𑀡𑀪𑀽𑀢𑁂𑀲𑀼. 𑀢𑀣𑀸 𑀓𑀧𑀸𑀮𑁂𑀲𑀼. 𑀢𑀺𑀯𑀺𑀥𑀜𑁆𑀳𑀺 𑀢𑁂 𑀓𑀸𑀭𑀡𑀁 𑀯𑀤𑀦𑁆𑀢𑀺 𑀉𑀧𑀸𑀤𑀸𑀦𑀓𑀸𑀭𑀡𑀁 𑀦𑀺𑀫𑀺𑀢𑁆𑀢𑀓𑀸𑀭𑀡𑀁 𑀲𑀫𑀯𑀸𑀬𑀺𑀓𑀸𑀭𑀡𑀦𑁆𑀢𑀺. 𑀢𑀢𑁆𑀣 𑀢𑀼𑀭𑀺𑀯𑁂𑀫𑀲𑀮𑀸𑀓𑀸𑀤𑀬𑁄 𑀉𑀧𑀸𑀤𑀸𑀦𑀓𑀸𑀭𑀡𑀁. 𑀢𑀦𑁆𑀢𑀯𑀸𑀬𑁄 𑀦𑀺𑀫𑀺𑀢𑁆𑀢𑀓𑀸𑀭𑀡𑀁. 𑀢𑀦𑁆𑀢𑀯𑁄 𑀲𑀫𑀯𑀸𑀬𑀺𑀓𑀸𑀭𑀡𑀦𑁆𑀢𑀺. 𑀤𑁆𑀯𑀻𑀲𑀼 𑀅𑀡𑀽𑀲𑀽𑀢𑀺 𑀧𑀣𑀯𑀻𑀪𑀽𑀢𑁂𑀲𑀼 𑀯𑀸 𑀆𑀧𑁄𑀢𑁂𑀚𑁄𑀯𑀸𑀬𑁄𑀪𑀽𑀢𑁂𑀲𑀼 𑀯𑀸 𑀤𑁆𑀯𑀻𑀲𑀼 𑀧𑀭𑀫𑀸𑀡𑀽𑀲𑀼. 𑀇𑀥𑀩𑀼𑀤𑁆𑀥𑀺𑀯𑁄𑀳𑀸𑀭𑀚𑀦𑀓𑁄𑀢𑀺 ‘‘𑀇𑀥 𑀢𑀦𑁆𑀢𑀽𑀲𑀼 𑀧𑀝𑁄, 𑀇𑀥 𑀓𑀧𑀸𑀮𑁂𑀲𑀼 𑀖𑀝𑁄, 𑀇𑀥 𑀩𑀻𑀭𑀡𑁂𑀲𑀼 𑀖𑀝𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑁂𑀢𑀼𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑀪𑀽𑀢𑁂𑀦 𑀲𑀢𑁆𑀢𑀸𑀦𑀁 𑀇𑀥𑀩𑀼𑀤𑁆𑀥𑀺𑀯𑁄𑀳𑀸𑀭𑀸 𑀚𑀸𑀬𑀦𑁆𑀢𑀺. 𑀲𑁄 𑀕𑁄𑀯𑀺𑀲𑀸𑀡𑀸𑀦𑀁 𑀯𑀺𑀬 𑀅𑀯𑀺𑀲𑀼𑀁 𑀲𑀳𑀲𑀺𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀫𑀯𑀸𑀬𑁄. 𑀔𑀸𑀡𑀼𑀲𑁂𑀦𑀸𑀦𑀁 𑀯𑀺𑀬 𑀧𑀦 𑀯𑀺𑀲𑀼𑀁𑀲𑀺𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀁𑀬𑁄𑀕𑁄. 𑀢𑀻𑀲𑀼 𑀅𑀡𑀽𑀲𑀼 𑀢𑀺𑀅𑀡𑀼𑀓𑀁 𑀨𑀮𑀁 𑀲𑀫𑀯𑁂𑀢𑀁 𑀏𑀓𑀻𑀪𑀽𑀢𑀫𑀺𑀯 𑀲𑀫𑁆𑀩𑀦𑁆𑀥𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀫𑀯𑁂𑀢’’𑀦𑁆𑀢𑀺 𑀏𑀢𑀲𑁆𑀲 ‘‘𑀏𑀓𑀻𑀪𑀽𑀢𑀫𑀺𑀯 𑀲𑀫𑁆𑀩𑀦𑁆𑀥’’𑀦𑁆𑀢𑀺 𑀇𑀤𑀁 𑀅𑀢𑁆𑀣𑀯𑀺𑀯𑀭𑀡𑀁. 𑀫𑀳𑀸𑀧𑀭𑀺𑀫𑀸𑀡𑀦𑁆𑀢𑀺 𑀫𑀳𑀦𑁆𑀢𑀧𑀭𑀺𑀫𑀸𑀡𑀁 𑀫𑀳𑀸𑀧𑀣𑀯𑀻𑀆𑀤𑀺𑀓𑀁 𑀏𑀓𑀁 𑀨𑀮𑀁, 𑀬𑀁 𑀢𑁂 ‘‘𑀓𑀸𑀭𑀺𑀬𑀁 𑀤𑁆𑀭𑀩𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀆𑀭𑀤𑁆𑀥𑀁 𑀓𑀸𑀭𑀺𑀬𑀤𑁆𑀭𑀩𑁆𑀬𑀁, 𑀢𑀤𑀦𑁆𑀢𑁄𑀕𑀥𑀸𑀦𑀺 𑀏𑀯 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀫𑀜𑁆𑀜𑀦𑁆𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀅𑀦𑁆𑀢𑁄𑀕𑀥𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺. 𑀲𑀢𑀺 𑀲𑀫𑀯𑀸𑀬𑁂 𑀳𑁂𑀢𑀼𑀫𑁆𑀳𑀺 𑀨𑀮𑀁 𑀲𑀫𑀯𑁂𑀢𑀦𑁆𑀢𑀺 𑀨𑀮𑁂 𑀳𑁂𑀢𑀼 𑀲𑀺𑀬𑀸, 𑀢𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀯𑀸𑀬𑀸𑀪𑀸𑀯𑀸 𑀨𑀮𑁂 𑀳𑁂𑀢𑀼 𑀦𑀢𑁆𑀣𑀻𑀢𑀺 𑀳𑁂𑀢𑀼𑀲𑀼𑀜𑁆𑀜𑀁 𑀨𑀮’’𑀦𑁆𑀢𑀺.

𑀆𑀳𑀸𑀭𑀪𑁂𑀤𑁂𑀢𑀺 𑀓𑀩𑀴𑀻𑀓𑀸𑀭𑀸𑀤𑀺𑀆𑀳𑀸𑀭𑀯𑀺𑀲𑁂𑀲𑁂. 𑀢𑀧𑁆𑀧𑀘𑁆𑀘𑀬𑀥𑀫𑁆𑀫𑀪𑁂𑀤𑁂𑀢𑀺 𑀅𑀚𑁆𑀛𑁄𑀳𑀭𑀡𑀻𑀬𑀯𑀢𑁆𑀣𑀼𑀲𑀴𑀸𑀬𑀢𑀦𑀅𑀯𑀺𑀚𑁆𑀚𑀸𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂 𑀢𑁂𑀲𑀁 𑀧𑀘𑁆𑀘𑀬𑀪𑀽𑀢𑀥𑀫𑁆𑀫𑀯𑀺𑀲𑁂𑀲𑁂, 𑀑𑀚𑀝𑁆𑀞𑀫𑀓𑀭𑀽𑀧𑀯𑁂𑀤𑀦𑀸𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀗𑁆𑀔𑀸𑀢𑁂 𑀯𑀸 𑀢𑀦𑁆𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀯𑀺𑀲𑁂𑀲𑁂, 𑀢𑁂 𑀧𑀘𑁆𑀘𑀬𑀸 𑀏𑀢𑁂𑀲𑀁 𑀥𑀫𑁆𑀫𑀯𑀺𑀲𑁂𑀲𑀸𑀦𑀦𑁆𑀢𑀺 𑀢𑀧𑁆𑀧𑀘𑁆𑀘𑀬𑀥𑀫𑁆𑀫𑀪𑁂𑀤𑀸. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀯𑀸𑀢𑀺 𑀬𑁄𑀚𑀦𑀸. 𑀬𑀸𑀦𑀤𑁆𑀯𑀬𑀯𑀲𑁂𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀬𑀸𑀦𑀤𑁆𑀯𑀬𑀯𑀲𑁂𑀦. 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀓𑁆𑀔𑀡𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸𑀯, 𑀬𑀣𑀸 𑀧𑀦 𑀲𑀼𑀜𑁆𑀜𑀢𑀸𑀤𑀺𑀲𑀫𑀜𑁆𑀜𑀸, 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀫𑀜𑁆𑀜𑀸𑀧𑀺 𑀆𑀕𑀫𑀦𑀢𑁄 𑀫𑀕𑁆𑀕𑀲𑁆𑀲 𑀲𑀺𑀬𑀼𑀦𑁆𑀢𑀺 𑀆𑀳 ‘‘𑀆𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺. 𑀬𑀲𑁆𑀲 𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀓𑀁, 𑀢𑀲𑁆𑀲 𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸, 𑀇𑀢𑀭𑀲𑁆𑀲 𑀲𑀫𑀣𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀫𑀸𑀥𑀺𑀚𑀸𑀢𑀺 𑀲𑀫𑀸𑀥𑀸𑀦𑀝𑁆𑀞𑁄𑀯. 𑀢𑀢𑁄 𑀏𑀯𑀸𑀢𑀺 𑀲𑀫𑀸𑀥𑀺𑀅𑀦𑀼𑀕𑀼𑀡𑀓𑀺𑀭𑀺𑀬𑀢𑁆𑀢𑀸𑀯.

𑀆𑀤𑀸𑀬 𑀊𑀳𑀺𑀢𑁆𑀯𑀸𑀢𑀺 𑀕𑀳𑁂𑀢𑁆𑀯𑀸 𑀯𑀺𑀬 𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀦𑀁. 𑀧𑀼𑀭𑀺𑀫𑀓𑀸𑀮𑀲𑁆𑀲 𑀯𑀺𑀬 𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺, ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸’’𑀢𑀺 𑀘.

𑀑𑀕𑀸𑀳𑀺𑀢𑀼𑀦𑁆𑀢𑀺 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁. 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀡𑁆𑀳𑀢𑁆𑀢𑀁. 𑀲𑀼𑀔𑀼𑀫𑀸𑀬 𑀧𑀜𑁆𑀜𑀸𑀬 𑀕𑀳𑁂𑀢𑀩𑁆𑀩𑀢𑀸𑀬 𑀲𑀼𑀔𑀼𑀫𑀢𑁆𑀢𑀁. 𑀇𑀢𑀻𑀢𑀺 𑀇𑀫𑀺𑀦𑀸 𑀓𑀫𑁂𑀦𑀸𑀢𑀺 𑀅𑀬𑀫𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀇𑀢𑀺𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀻’’𑀢𑀺. 𑀏𑀯𑀁 𑀧𑀓𑀸𑀭𑁂𑀳𑀻𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀚𑁄𑀢𑀺𑀬𑀫𑀸𑀦𑁄 𑀏𑀯 𑀅𑀢𑁆𑀣𑁄 𑀧𑀓𑀸𑀭-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 ‘‘𑀏𑀯𑀁-𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑀸𑀭𑀡𑀪𑀽𑀢𑁂 𑀦𑀬𑁂 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀻𑀢𑀺 𑀯𑀸 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 𑀦𑀺𑀤𑀲𑁆𑀲𑁂𑀢𑀺. 𑀏𑀯𑀁-𑀲𑀤𑁆𑀤𑁄 𑀇𑀤𑀫𑀢𑁆𑀣𑁄. 𑀢𑁂𑀦 𑀏𑀯𑀁 𑀧𑀓𑀸𑀭𑁂𑀳𑀻𑀢𑀺 𑀇𑀤𑀁𑀧𑀓𑀸𑀭𑁂𑀳𑀺, 𑀈𑀤𑀺𑀲𑁂𑀳𑀻𑀢𑀺 𑀅𑀢𑁆𑀣𑁄.

𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑀚𑀸𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁦. ‘‘𑀚𑀸𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂’’𑀢𑀺 𑀇𑀫𑀺𑀦𑀸 ‘‘𑀢𑀢𑁆𑀣𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀤𑀼𑀓𑁆𑀔𑀫𑀸𑀢𑀺𑀓𑀸𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀻𑀦𑀁 𑀤𑀼𑀓𑁆𑀔𑀯𑀺𑀲𑁂𑀲𑀸𑀦𑀁 𑀉𑀤𑁆𑀤𑁂𑀲𑁄. 𑀧𑀤𑀤𑁆𑀯𑀬𑁂𑀢𑀺 ‘‘𑀧𑀭𑀺𑀬𑀸𑀬𑀤𑀼𑀓𑁆𑀔𑀁, 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂.

𑀤𑀼𑀓𑁆𑀔𑀢𑁆𑀢𑀸𑀬𑁂𑀯𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀢𑀁 𑀯𑀤𑀢𑀺. 𑀲𑀪𑀸𑀯𑁂𑀦 𑀦𑀸𑀫𑀁 𑀯𑀺𑀲𑁂𑀲𑁂𑀢𑀻𑀢𑀺 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑁂𑀦 𑀲𑀪𑀸𑀯𑀤𑀼𑀓𑁆𑀔𑀯𑀸𑀘𑀓𑁂𑀦 𑀤𑀼𑀓𑁆𑀔𑀲𑀤𑁆𑀤𑁂𑀦. 𑀲𑁄 𑀳𑀺 𑀯𑀺𑀲𑁂𑀲𑀦𑀁 𑀅𑀯𑀘𑁆𑀙𑁂𑀤𑀓𑀪𑀸𑀯𑀢𑁄 𑀧𑀘𑁆𑀙𑀺𑀫𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀝𑁆𑀞𑀁 𑀯𑀺𑀲𑁂𑀲𑁂𑀢𑀺. 𑀲𑁄 𑀳𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀅𑀯𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀯𑀺𑀧𑀭𑀺𑀡𑀸𑀫𑀅𑀥𑀺𑀝𑁆𑀞𑀸𑀦𑀸𑀤𑀺𑀧𑀓𑀸𑀭𑀯𑀺𑀲𑁂𑀲𑁂𑀦.

𑀤𑁂𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀲𑀗𑁆𑀔𑀺𑀧𑀦𑀁 𑀇𑀥 𑀲𑀗𑁆𑀔𑁂𑀧𑁄, 𑀲𑁄 𑀘 𑀢𑀩𑁆𑀩𑀺𑀪𑀸𑀕𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁄𑀢𑀺 𑀆𑀳 ‘‘𑀲𑀗𑁆𑀔𑁂𑀧𑁄 𑀲𑀸𑀫𑀜𑁆𑀜’’𑀦𑁆𑀢𑀺. 𑀅𑀦𑁆𑀢𑁄𑀓𑀭𑀺𑀢𑁆𑀯𑀸𑀢𑀺 𑀅𑀦𑁆𑀢𑁄𑀕𑀥𑁂 𑀓𑀢𑁆𑀯𑀸, 𑀲𑀗𑁆𑀕𑀳𑁂𑀢𑁆𑀯𑀸 𑀯𑀸. 𑀉𑀪𑀬𑀣𑀸𑀧𑀻𑀢𑀺 𑀲𑀗𑁆𑀔𑁂𑀧𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺. 𑀲𑀸𑀥𑀸𑀭𑀡𑀪𑀸𑀕𑀸𑀦𑀁 𑀯𑀺𑀪𑀚𑀦𑀁 𑀯𑀺𑀪𑀸𑀕𑁄, 𑀯𑀺𑀢𑁆𑀣𑀸𑀭𑁄𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑁂𑀲𑁄’’𑀢𑀺. 𑀯𑀺𑀲𑁂𑀲𑀦𑁆𑀢𑀭𑀦𑀺𑀯𑀢𑁆𑀢𑀓𑁄𑀢𑀺 𑀯𑀺𑀪𑀸𑀕𑀦𑁆𑀢𑀭𑀸𑀲𑀗𑁆𑀕𑀸𑀳𑀓𑁄.

𑁧𑁯𑁧. 𑀅𑀧𑀭𑀢𑁆𑀣𑀸𑀢𑀺 𑀪𑀼𑀫𑁆𑀫𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂 𑀬𑀣𑀸 ‘‘𑀲𑀩𑁆𑀩𑀢𑁆𑀣 𑀧𑀸𑀤𑀓’’𑀦𑁆𑀢𑀺 𑀆𑀳 ‘‘𑀲𑀸𑀫𑀺𑀅𑀢𑁆𑀣𑁂𑀧𑀺 𑀳𑀺 𑀅𑀧𑀭𑀢𑁆𑀣𑀲𑀤𑁆𑀤𑁄 𑀲𑀺𑀚𑁆𑀛𑀢𑀻’’𑀢𑀺. 𑀲𑀺𑀤𑁆𑀥𑀺 𑀧𑀦 ‘‘𑀇𑀢𑀭𑀸𑀳𑀺𑀧𑀺 𑀤𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘 𑀏𑀯𑀁 𑀲𑀤𑁆𑀤𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀲𑀸𑀫𑀺𑀯𑀲𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑀪𑀼𑀫𑁆𑀫𑀯𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲𑀦𑁆𑀢𑀺 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀧𑀭𑀲𑁆𑀲𑀸𑀢𑀺 𑀅𑀧𑀭𑀲𑁆𑀲 𑀲𑀢𑁆𑀢𑀲𑁆𑀲. 𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑁄 𑀉𑀧𑀧𑀢𑁆𑀢𑀺𑀪𑀯𑁄 𑀕𑀢𑀺, 𑀢𑀩𑁆𑀩𑀺𑀲𑁂𑀲𑀪𑀽𑀢𑀸 𑀔𑀢𑁆𑀢𑀺𑀬𑀸𑀤𑀺𑀲𑀸𑀫𑀜𑁆𑀜𑀸𑀥𑀺𑀝𑁆𑀞𑀸𑀦𑀸 𑀔𑀦𑁆𑀥𑀸 𑀚𑀸𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀕𑀢𑀺𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀺𑀡𑀸𑀓𑀸𑀭𑁄𑀢𑀺 𑀢𑀺𑀡𑀯𑀺𑀓𑀧𑁆𑀧𑁄, 𑀢𑀺𑀡𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀦𑁂. 𑀢𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀧𑀸𑀢𑀼𑀪𑀸𑀯𑀁 𑀧𑀘𑁆𑀘𑀸𑀫𑀲𑀢𑀺. 𑀢𑀤𑀼𑀧𑀸𑀤𑀸𑀬𑀸𑀢𑀺 𑀢𑀢𑁄 𑀧𑀝𑁆𑀞𑀸𑀬. 𑀅𑀭𑀺𑀬𑀪𑀸𑀯𑀓𑀭𑀡𑀢𑁆𑀢𑀸𑀢𑀺 𑀅𑀭𑀺𑀬𑀪𑀸𑀯𑀓𑀸𑀭𑀡𑀢𑁆𑀢𑀸. 𑀓𑀭𑁄𑀢𑀻𑀢𑀺 𑀳𑀺 𑀓𑀭𑀡𑀁. 𑀅𑀭𑀺𑀬𑀲𑀤𑀺𑀲𑀢𑁆𑀢𑀸 𑀯𑀸 𑀅𑀭𑀺𑀬𑀲𑀻𑀮𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀦𑀫𑁆𑀧𑀺 𑀳𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀅𑀭𑀺𑀬𑀲𑀻𑀮𑀲𑀤𑀺𑀲𑀁. 𑀆𑀓𑀸𑀭𑀯𑀺𑀓𑀸𑀭𑀸𑀢𑀺 𑀉𑀧𑁆𑀧𑀚𑁆𑀚𑀦𑀸𑀤𑀺𑀆𑀓𑀸𑀭𑀯𑀺𑀓𑀢𑀺𑀬𑁄. 𑀲𑀳𑀼𑀧𑁆𑀧𑀸𑀤𑀓𑀸𑀢𑀺 𑀉𑀧𑁆𑀧𑀸𑀤𑀲𑀳𑀺𑀢𑀸 𑀉𑀧𑁆𑀧𑀸𑀤𑀸𑀯𑀢𑁆𑀣𑀸 𑀔𑀦𑁆𑀥𑀸. 𑀆𑀬𑀢𑀦𑀯𑀲𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦. 𑀬𑁄𑀦𑀺𑀯𑀲𑁂𑀦𑀸𑀢𑀺 𑀅𑀡𑁆𑀟𑀚𑀸𑀤𑀺𑀬𑁄𑀦𑀺𑀯𑀲𑁂𑀦. 𑀏𑀓𑁂𑀓𑁂𑀦𑁂𑀯 𑀧𑀤𑁂𑀦𑀸𑀢𑀺 𑀬𑀣𑀸 𑀤𑀼𑀢𑀺𑀬𑀦𑀬𑁂 𑀚𑀸𑀢𑀺𑀆𑀤𑀺𑀧𑀤𑁂𑀲𑀼 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀬𑁄𑀦𑀺𑀯𑀺𑀪𑀸𑀕𑁂𑀦 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺 𑀤𑀲𑁆𑀲𑀺𑀢𑀸, 𑀦 𑀏𑀯𑀫𑀺𑀥. 𑀇𑀥 𑀧𑀦𑁂𑀢𑁂𑀲𑀼 𑀏𑀓𑁂𑀓𑁂𑀦𑁂𑀯 𑀧𑀤𑁂𑀦 𑀅𑀯𑀺𑀪𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸. 𑀉𑀪𑀬𑀢𑁆𑀣𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀦𑀬𑁂𑀲𑀼 𑀪𑀸𑀯𑀦𑀺𑀤𑁆𑀤𑁂𑀲𑁄𑀯 𑀬𑀼𑀢𑁆𑀢𑁄. 𑀅𑀦𑀪𑀺𑀳𑀺𑀢𑁂 𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑀁, 𑀦𑀸𑀪𑀺𑀳𑀺𑀢𑁂𑀢𑀺. 𑀧𑀸𑀓𑀝𑀸 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀪𑀺𑀩𑁆𑀬𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀺.

𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀤𑁆𑀯𑀺𑀦𑁆𑀦𑀁, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀤𑁆𑀯𑀺𑀦𑁆𑀦𑀁. 𑀲𑁂𑀲𑁂𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀧𑀜𑁆𑀘𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑁄𑀭𑀽𑀧𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀧𑀜𑁆𑀘𑀦𑁆𑀦𑀁. 𑀢𑀸𑀦𑀺 𑀳𑀺 𑀭𑀽𑀧𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀸𑀫𑀥𑀸𑀢𑀼𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀓𑀮𑀸𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀅𑀧𑀭𑀺𑀧𑀼𑀡𑁆𑀡𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀲𑀢𑁆𑀢𑀸𑀦𑀁. 𑀇𑀦𑁆𑀤𑁆𑀭𑀺𑀬𑀯𑀲𑁂𑀦𑁂𑀯 𑀳𑀺 𑀆𑀬𑀢𑀦𑀸𑀦𑀁 𑀯𑁂𑀓𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑁆𑀢𑀦𑁆𑀦𑀁 𑀦𑀯𑀦𑁆𑀦𑀁 𑀤𑀲𑀦𑁆𑀦𑀁 𑀧𑀼𑀦𑀧𑀺 𑀤𑀲𑀦𑁆𑀦𑀁, 𑀇𑀢𑀭𑀲𑁆𑀲 𑀏𑀓𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀦𑁆𑀦𑀦𑁆𑀢𑀺 𑀓𑀸𑀬𑀫𑀦𑁄𑀭𑀽𑀧𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀲𑀢𑁆𑀢𑀦𑁆𑀦𑀁. 𑀕𑀩𑁆𑀪𑀲𑁂𑀬𑁆𑀬𑀓𑀜𑁆𑀳𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀯𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀸𑀦𑀁 𑀦𑀯𑀦𑁆𑀦𑀁. 𑀅𑀦𑁆𑀥𑀩𑀥𑀺𑀭𑀯𑀲𑁂𑀦 𑀳𑀺𑀤𑀁 𑀯𑀼𑀢𑁆𑀢𑀁. 𑀤𑀲𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑀤𑁆𑀤𑀯𑀚𑁆𑀚𑀸𑀦𑀁. 𑀧𑀼𑀦 𑀤𑀲𑀦𑁆𑀦𑀦𑁆𑀢𑀺 𑀲𑁄𑀢𑀲𑀤𑁆𑀤𑀯𑀚𑁆𑀚𑀸𑀦𑀁. 𑀅𑀦𑁆𑀥𑀯𑀲𑁂𑀦, 𑀩𑀥𑀺𑀭𑀯𑀲𑁂𑀦 𑀘𑁂𑀢𑀁 𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀏𑀓𑀸𑀤𑀲𑀦𑁆𑀦𑀦𑁆𑀢𑀺 𑀲𑀤𑁆𑀤𑀯𑀚𑁆𑀚𑀸𑀦𑀁.

𑀢𑀁𑀤𑀼𑀓𑁆𑀔𑀪𑀸𑀯𑁄𑀢𑀺 𑀧𑀭𑀺𑀬𑀸𑀬𑀤𑀼𑀓𑁆𑀔𑀪𑀸𑀯𑁄. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀦𑀺𑀯𑀸𑀭𑀡𑁂𑀦𑀸𑀢𑀺 𑀉𑀧𑁆𑀧𑀮𑀧𑀤𑀼𑀫𑀸𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀧𑀝𑀺𑀓𑁆𑀔𑁂𑀧𑁂𑀦 𑀅𑀪𑀸𑀯𑀓𑀣𑀦𑁂𑀦. 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂.

𑀫𑀭𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁩. 𑀔𑀦𑁆𑀥𑀪𑁂𑀤𑀲𑁆𑀲𑀸𑀢𑀺 𑀔𑀦𑁆𑀥𑀯𑀺𑀦𑀸𑀲𑀲𑁆𑀲. 𑀲𑁄𑀢𑀺 𑀔𑀦𑁆𑀥𑀪𑁂𑀤𑁄. 𑀧𑀩𑀦𑁆𑀥𑀲𑀫𑀼𑀘𑁆𑀙𑁂𑀤𑁄𑀢𑀺 𑀧𑀩𑀦𑁆𑀥𑀲𑁆𑀲 𑀅𑀘𑁆𑀘𑀦𑁆𑀢𑀲𑀫𑀼𑀘𑁆𑀙𑁂𑀤𑁄. 𑀢𑀩𑁆𑀪𑀸𑀯𑀢𑁄𑀢𑀺 𑀲𑀫𑁆𑀫𑀼𑀢𑀺𑀫𑀭𑀡𑀪𑀸𑀯𑀢𑁄. 𑀢𑀤𑁂𑀓𑀤𑁂𑀲𑀪𑀸𑀯𑀢𑁄𑀢𑀺 𑀢𑀤𑀯𑀬𑀯𑀪𑀸𑀯𑀢𑁄. 𑀢𑀲𑁆𑀲𑁂𑀯 𑀦𑀸𑀫𑀦𑁆𑀢𑀺 𑀅𑀲𑀫𑁆𑀫𑁄𑀳𑀢𑁆𑀣𑀁 𑀯𑀼𑀢𑁆𑀢𑀁 𑀲𑀩𑁆𑀩𑀲𑁆𑀲𑀸𑀧𑀺 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀪𑀸𑀯𑀢𑁄. 𑀲𑀫𑁆𑀫𑀼𑀢𑀺𑀫𑀭𑀡𑀫𑁂𑀯 𑀳𑀺 𑀚𑀸𑀢𑀺𑀓𑁆𑀔𑀬𑀫𑀭𑀡𑀁, 𑀢𑀁 𑀧𑀦 𑀚𑀸𑀢𑀺𑀓𑁆𑀔𑀬𑀫𑀭𑀡𑀁 𑀉𑀧𑀓𑁆𑀓𑀫𑀫𑀭𑀡𑀁, 𑀲𑀭𑀲𑀫𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀭𑀲𑀫𑀭𑀡𑀫𑁆𑀧𑀺 𑀆𑀬𑀼𑀓𑁆𑀔𑀬𑀫𑀭𑀡𑀁, 𑀧𑀼𑀜𑁆𑀜𑀓𑁆𑀔𑀬𑀫𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀏𑀯𑀫𑁂𑀢𑁂𑀲𑀁 𑀢𑀤𑁂𑀓𑀤𑁂𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀜𑁆𑀘𑁂𑀢𑁆𑀣 𑀉𑀧𑀓𑁆𑀓𑀫𑀫𑀭𑀡𑀁, 𑀢𑀁 𑀅𑀓𑀸𑀮𑀫𑀭𑀡𑀁. 𑀲𑀭𑀲𑀫𑀭𑀡𑀁 𑀓𑀸𑀮𑀫𑀭𑀡𑀁. 𑀫𑀭𑀡𑁂𑀦 𑀲𑀢𑁆𑀢𑀸 𑀬𑀣𑀸𑀮𑀤𑁆𑀥𑀅𑀢𑁆𑀢𑀪𑀸𑀯𑁂𑀦 𑀯𑀺𑀬𑀼𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀺𑀪𑀯𑀓𑁆𑀔𑀦𑁆𑀥𑁂𑀳𑀺 𑀯𑀺𑀬𑁄𑀚𑁂𑀢𑀻’’𑀢𑀺.

𑀓𑀸𑀭𑀡𑀢𑁆𑀣𑁄𑀢𑀺 𑀫𑀽𑀮𑀢𑁆𑀣𑁄. 𑀫𑀽𑀮𑀜𑁆𑀳𑀺 ‘‘𑀆𑀤𑀻’’𑀢𑀺 𑀯𑀼𑀘𑁆𑀘𑀢𑀺 ‘‘𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁, 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁩𑁬𑁯). 𑀢𑁂𑀦𑀸𑀳 ‘‘𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀫𑀽𑀮𑀓𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀨𑀮𑀓𑀺𑀭𑀺𑀬𑀸𑀕𑀩𑁆𑀪𑀸 𑀈𑀤𑀺𑀲𑀻 𑀳𑁂𑀢𑀼𑀓𑀺𑀭𑀺𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀕𑀥𑀸’’𑀢𑀺. 𑀩𑁆𑀬𑀲𑀦𑀲𑁆𑀲 𑀳𑀺 𑀆𑀧𑀸𑀤𑀓𑁂𑀳𑀺 𑀆𑀧𑀸𑀤𑀦𑀁 𑀆𑀧𑀸𑀤𑁂𑀢𑀩𑁆𑀩𑀆𑀧𑀢𑁆𑀢𑀺𑀬𑀸 𑀲𑀳𑁂𑀯 𑀲𑀺𑀚𑁆𑀛𑀢𑀻𑀢𑀺.

𑀲𑁄𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁪. 𑀲𑀼𑀔𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀲𑀼𑀔𑀓𑀸𑀭𑀡𑀁 𑀳𑀺𑀢𑀁. 𑀪𑁄𑀕𑀩𑁆𑀬𑀲𑀦𑀸𑀤𑀺𑀧𑀤𑀢𑁆𑀣𑀯𑀺𑀲𑁂𑀲𑀦𑁆𑀢𑀺 𑀪𑁄𑀕𑀩𑁆𑀬𑀲𑀦𑀁, 𑀲𑀻𑀮𑀩𑁆𑀬𑀲𑀦𑀦𑁆𑀢𑀺 𑀏𑀯𑀁 𑀪𑁄𑀕𑀲𑀻𑀮𑀧𑀤𑀸𑀦𑀁 𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀁. 𑀲𑀫𑀸𑀲𑀯𑀺𑀲𑁂𑀲𑀦𑁆𑀢𑀺 ‘‘𑀭𑁄𑀕𑁄𑀬𑁂𑀯 𑀩𑁆𑀬𑀲𑀦𑀁, 𑀤𑀺𑀝𑁆𑀞𑀺 𑀏𑀯 𑀩𑁆𑀬𑀲𑀦’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀲𑀫𑀸𑀲𑀯𑀺𑀲𑁂𑀲𑀁. 𑀅𑀦𑁆𑀦𑀧𑀸𑀦𑀯𑀢𑁆𑀣𑀬𑀸𑀦𑀸𑀤𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀪𑁄𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀥𑀫𑁆𑀫𑀲𑀫𑀽𑀳𑀪𑀸𑀯𑁂𑀦. 𑀢𑀩𑁆𑀩𑀺𑀦𑀸𑀲𑀸𑀢𑀺 𑀜𑀸𑀢𑀺𑀪𑁄𑀕𑀩𑁆𑀬𑀲𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀢𑁂 𑀯𑀺𑀓𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀸. 𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀦𑀸𑀫 𑀔𑀦𑁆𑀥𑀧𑀜𑁆𑀘𑀓𑀁. 𑀅𑀢𑀁𑀲𑀪𑀸𑀯𑀢𑁆𑀢𑀸 𑀧𑀡𑁆𑀡𑀢𑁆𑀢𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀅𑀦𑀺𑀧𑁆𑀨𑀦𑁆𑀦𑀸 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀁 𑀲𑀦𑁆𑀥𑀸𑀬 𑀅𑀦𑀺𑀧𑁆𑀨𑀦𑁆𑀦𑀸𑀦𑀻𑀢𑀺 𑀆𑀳𑀸’’𑀢𑀺. 𑀦 𑀳𑀺 𑀧𑀡𑁆𑀡𑀢𑁆𑀢𑀺 𑀓𑁂𑀦𑀘𑀺 𑀦𑀺𑀧𑁆𑀨𑀸𑀤𑀻𑀬𑀢𑀺. 𑀅𑀜𑁆𑀜𑀢𑁆𑀣𑀸𑀧𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑁂 𑀅𑀦𑀺𑀧𑁆𑀨𑀦𑁆𑀦𑀯𑁄𑀳𑀸𑀭𑁄 𑀆𑀕𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀁𑀬𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁 ‘‘𑀅𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀧𑀦 𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀫𑁂𑀯 𑀯𑀼𑀘𑁆𑀘𑀢𑀺, 𑀦𑀸𑀧𑀺 𑀲𑀩𑁆𑀩𑁄 𑀲𑀪𑀸𑀯𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀦𑁆𑀥𑀯𑀺𑀪𑀗𑁆𑀕𑁂 𑀘𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀺𑀧𑁆𑀨𑀦𑁆𑀦𑀢𑀸 𑀲𑀪𑀸𑀯𑀥𑀫𑁆𑀫𑀢𑁆𑀢𑁂𑀧𑀺 𑀓𑁂𑀦𑀘𑀺 𑀦 𑀦𑀺𑀧𑁆𑀨𑀸𑀤𑀻𑀬𑀢𑀻𑀢𑀺 𑀓𑀢𑁆𑀯𑀸.

𑀲𑀗𑁆𑀓𑀼𑀘𑀺𑀢𑀁 𑀘𑀺𑀦𑁆𑀢𑀦𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀧𑀝𑀺𑀧𑀓𑁆𑀔𑀢𑁄, 𑀤𑁄𑀲𑀲𑀫𑁆𑀧𑀬𑁄𑀕𑀢𑁄 𑀘 𑀆𑀭𑀫𑁆𑀫𑀡𑁂 𑀅𑀦𑀪𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀫𑀸𑀳. 𑀅𑀦𑁆𑀢𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑁆𑀲 𑀦𑀺𑀤𑁆𑀤𑀳𑀦𑀯𑀲𑁂𑀦 𑀯𑀸 𑀛𑀸𑀦𑀁 𑀘𑀺𑀦𑁆𑀢𑀦𑀁 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁. 𑀲𑀢𑀺𑀧𑀺 𑀅𑀦𑀼𑀲𑁄𑀘𑀦𑀪𑀸𑀯𑁂 𑀅𑀢𑁆𑀢𑀦𑁄 𑀓𑀢𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬𑁄 𑀫𑀦𑁄𑀯𑀺𑀮𑁂𑀔𑀪𑀽𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀁, 𑀬𑀣𑀸𑀯𑀼𑀢𑁆𑀢𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑁄𑀓𑁄𑀢𑀺 𑀉𑀪𑀺𑀦𑁆𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀫𑀦𑁄𑀤𑁆𑀯𑀸𑀭𑀚𑀯𑀦𑀓𑁆𑀔𑀡𑁂’’𑀢𑀺 𑀧𑀭𑀺𑀩𑁆𑀬𑀢𑁆𑀢𑀫𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑀦𑁆𑀥𑀸𑀬𑀸𑀳, 𑀇𑀢𑀭𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑁂𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻’’𑀢𑀺𑀆𑀤𑀺. 𑀤𑁄𑀫𑀦𑀲𑁆𑀲𑀲𑁆𑀲𑀸𑀢𑀺 𑀅𑀲𑁄𑀘𑀦𑀸𑀓𑀸𑀭𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲, 𑀲𑁄𑀘𑀦𑀸𑀓𑀸𑀭𑀲𑁆𑀲𑀸𑀧𑀺 𑀯𑀸 𑀦𑀸𑀦𑀸𑀯𑀻𑀣𑀺𑀓𑀲𑁆𑀲. 𑀢𑀫𑁆𑀧𑀺 𑀳𑀺 𑀤𑀼𑀓𑁆𑀔𑀫𑁂𑀯𑀸𑀢𑀺. 𑀅𑀜𑁆𑀜𑀣𑀸𑀢𑀺 𑀫𑀦𑁄𑀤𑁆𑀯𑀸𑀭𑀚𑀯𑀦𑁂 𑀏𑀯 𑀕𑀳𑀺𑀢𑁂. 𑀢𑀢𑁆𑀣𑀸𑀢𑀺 𑀓𑀸𑀬𑀯𑀢𑁆𑀣𑀼𑀓𑀫𑀦𑁄𑀤𑁆𑀯𑀸𑀭𑀺𑀓𑁂𑀲𑀼.

𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁫. 𑀆𑀤𑁂𑀯𑀦𑀲𑀤𑁆𑀤𑀁 𑀓𑀢𑁆𑀯𑀸𑀢𑀺 𑀆𑀤𑁂𑀯𑀺𑀢𑁆𑀯𑀸, 𑀯𑀺𑀮𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀪𑀫𑀪𑀸𑀯𑁄𑀢𑀺 𑀬𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀦𑀯𑀝𑁆𑀞𑀸𑀦𑀪𑀸𑀯𑁄. 𑀲𑀫𑁆𑀪𑀫𑀁 𑀯𑀸 𑀅𑀩𑁆𑀪𑀦𑁆𑀢𑀭𑀕𑀢𑀁 𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀧𑀸𑀓𑀝𑀪𑀸𑀯𑀓𑀭𑀡𑁂𑀦𑀸𑀢𑀺 𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀫𑀼𑀝𑁆𑀞𑀻𑀳𑀺 𑀧𑁄𑀣𑀦𑀸𑀤𑀻𑀦𑀺 𑀫𑀼𑀝𑁆𑀞𑀺𑀧𑁄𑀣𑀦𑀸𑀤𑀻𑀦𑀺.

𑀬𑁂𑀦 𑀤𑁄𑀫𑀦𑀲𑁆𑀲𑁂𑀦. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑀼𑀓𑁆𑀔𑀢𑁄𑀢𑀺 ‘‘𑀅𑀢𑁆𑀢𑀦𑁄 𑀔𑀦𑁆𑀥𑀁 𑀫𑀼𑀝𑁆𑀞𑀻𑀳𑀺 𑀧𑁄𑀣𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀤𑀼𑀓𑁆𑀔𑀢𑁄. 𑀢𑀁𑀦𑀺𑀤𑀸𑀦𑀦𑁆𑀢𑀺 𑀧𑀭𑀺𑀤𑁂𑀯𑀦𑀺𑀤𑀸𑀦𑀁.

𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁬-𑁭. 𑀓𑀸𑀬𑀤𑀼𑀓𑁆𑀔𑀸𑀪𑀺𑀪𑀽𑀢𑀲𑁆𑀲 𑀧𑀢𑀺𑀓𑀸𑀭𑀸𑀪𑀺𑀮𑀸𑀲𑀸𑀬 𑀢𑀸𑀤𑀺𑀲𑀤𑀼𑀓𑁆𑀔𑀸𑀯𑀳𑀧𑀬𑁄𑀕𑀓𑀸𑀮𑀸𑀤𑀻𑀲𑀼 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀢𑀤𑀼𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦 𑀤𑀼𑀓𑁆𑀔𑁂𑀦𑀸𑀢𑀺 𑀅𑀦𑀸𑀣𑀢𑀸𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀸𑀤𑀺𑀤𑀼𑀓𑁆𑀔𑁂𑀦.

𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁮. 𑀤𑀼𑀓𑁆𑀔𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀦𑀺 𑀤𑀼𑀓𑁆𑀔𑀝𑁆𑀞𑀸𑀦𑀸𑀤𑀻𑀦𑀺. 𑀤𑁄𑀫𑀦𑀲𑁆𑀲𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺 𑀉𑀧𑀸𑀬𑀸𑀲𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁯. 𑀅𑀜𑁆𑀜𑀲𑀸𑀧𑁂𑀓𑁆𑀔𑀲𑀤𑁆𑀤𑁄 𑀅𑀲𑀫𑀢𑁆𑀣𑀲𑀫𑀸𑀲𑁄𑀢𑀺 𑀢𑀁 𑀤𑀲𑁆𑀲𑁂𑀢𑀺 ‘‘𑀬𑁂𑀦 𑀲𑀫𑀸𑀲𑁄, 𑀦 𑀢𑀲𑁆𑀲𑀸𑀬𑀁 𑀧𑀝𑀺𑀲𑁂𑀥𑀓𑁄 𑀅-𑀓𑀸𑀭𑁄’’𑀢𑀺.

𑀧𑀘𑁆𑀙𑀺𑀫𑀤𑁆𑀯𑀬𑀦𑁆𑀢𑀺 ‘‘𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄’’𑀢𑀺 𑀇𑀤𑀁 𑀧𑀤𑀤𑁆𑀯𑀬𑀁. 𑀢𑀤𑀢𑁆𑀣𑀯𑀲𑁂𑀦𑀸𑀢𑀺 𑀲𑀫𑁄𑀥𑀸𑀦𑀢𑁆𑀣𑀲𑁆𑀲, 𑀫𑀺𑀲𑁆𑀲𑀻𑀪𑀸𑀯𑀢𑁆𑀣𑀲𑁆𑀲 𑀘 𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀮𑀩𑁆𑀪𑀢𑀺. 𑀆𑀕𑀢𑁂𑀳𑀺 𑀘 𑀢𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀧𑀼𑀕𑁆𑀕𑀮𑀲𑁆𑀲 𑀲𑀁𑀬𑁄𑀕𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀢𑀁𑀕𑀳𑀡𑀫𑀢𑁆𑀢𑀦𑁆𑀢𑀺 𑀆𑀧𑀸𑀣𑀕𑀢𑀸𑀭𑀫𑁆𑀫𑀡𑀕𑁆𑀕𑀳𑀡𑀫𑀢𑁆𑀢𑀁.

𑀇𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁧. 𑀢𑀁 𑀓𑀸𑀮𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀦𑀺𑀭𑁄𑀥𑀢𑁄 𑀉𑀤𑁆𑀥𑀁 𑀓𑀸𑀮𑀁. ‘‘𑀬𑀫𑁆𑀧𑀻’’𑀢𑀺 𑀬𑀁-𑀲𑀤𑁆𑀤𑁄 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀦𑁆𑀢𑀺 𑀬𑁂𑀦𑀧𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. ‘‘𑀬𑀁 𑀇𑀘𑁆𑀙’’𑀦𑁆𑀢𑀺 𑀬𑀁-𑀲𑀤𑁆𑀤𑁄 𑀬𑀤𑀸 𑀇𑀘𑁆𑀙𑀸𑀧𑁂𑀓𑁆𑀔𑁄, 𑀢𑀤𑀸 ‘‘𑀦 𑀮𑀪𑀢𑀻’’𑀢𑀺 𑀏𑀢𑁆𑀣 𑀅𑀮𑀸𑀪𑀧𑀥𑀸𑀦𑀸𑀪𑀸𑀯𑀢𑁄 𑀇𑀘𑁆𑀙𑀸 𑀯𑀺𑀲𑁂𑀲𑀻𑀬𑀢𑀻𑀢𑀺 𑀆𑀳 ‘‘𑀅𑀮𑀸𑀪𑀯𑀺𑀲𑀺𑀝𑁆𑀞𑀸 𑀇𑀘𑁆𑀙𑀸 𑀯𑀼𑀢𑁆𑀢𑀸 𑀳𑁄𑀢𑀻’’𑀢𑀺. ‘‘𑀇𑀘𑁆𑀙𑀁 𑀦 𑀮𑀪𑀢𑀺 𑀬’’𑀦𑁆𑀢𑀺 𑀏𑀯𑀁 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀪𑀽𑀢𑁄 𑀬𑀁-𑀲𑀤𑁆𑀤𑁄 𑀬𑀤𑀸 ‘‘𑀦 𑀮𑀪𑀢𑀻’’𑀢𑀺 𑀏𑀢𑀁 𑀅𑀧𑁂𑀓𑁆𑀔𑀢𑀺, 𑀢𑀢𑁆𑀣 𑀕𑀼𑀡𑀪𑀽𑀢𑀸 𑀇𑀘𑁆𑀙𑀸, 𑀧𑀥𑀸𑀦𑀪𑀽𑀢𑁄 𑀅𑀮𑀸𑀪𑁄𑀢𑀺 𑀆𑀳 ‘‘𑀢𑀤𑀸 𑀇𑀘𑁆𑀙𑀸𑀯𑀺𑀲𑀺𑀝𑁆𑀞𑁄 𑀅𑀮𑀸𑀪𑁄 𑀯𑀼𑀢𑁆𑀢𑁄 𑀳𑁄𑀢𑀻’’𑀢𑀺.

𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸 𑀙𑀺𑀦𑁆𑀦𑀺𑀓𑀸, 𑀥𑀼𑀢𑁆𑀢𑀺𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀙𑀺𑀦𑁆𑀦𑀪𑀺𑀦𑁆𑀦𑀕𑀡𑁂𑀦𑀸𑀢𑀺 𑀦𑀺𑀮𑁆𑀮𑀚𑁆𑀚𑁂𑀦 𑀥𑀼𑀢𑁆𑀢𑀕𑀡𑁂𑀦𑀸’’𑀢𑀺. 𑀓𑀧𑁆𑀧𑀝𑀺𑀓𑀸 𑀲𑀺𑀩𑁆𑀩𑀺𑀢𑀧𑀺𑀮𑁄𑀢𑀺𑀓𑀥𑀸𑀭𑀺𑀦𑁄.

𑀅𑀮𑀩𑁆𑀪𑀦𑁂𑀬𑁆𑀬𑀇𑀘𑁆𑀙𑀦𑁆𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀇𑀘𑁆𑀙𑀁.

𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀢𑀸𑀤𑀺𑀲𑀲𑁆𑀲 𑀯𑀢𑁆𑀣𑀼𑀦𑁄 𑀲𑀩𑁆𑀪𑀸𑀯𑀸𑀢𑀺 𑀲𑀸𑀫𑀜𑁆𑀜𑀢𑁄 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀲𑀦𑁆𑀥𑀸𑀬𑀸𑀳.

𑀅𑀢𑀺𑀧𑀸𑀓𑀝𑁂𑀦 𑀅𑀢𑀺 𑀯𑀺𑀬 𑀧𑀓𑀸𑀲𑁂𑀦 𑀤𑀼𑀓𑁆𑀔𑁂𑀦𑀸𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀫𑀦𑁄 𑀯𑀺𑀬𑀸𑀢𑀺 𑀫𑀦𑁄-𑀲𑀤𑁆𑀤𑀲𑁆𑀲 𑀯𑀺𑀬. 𑀇𑀓-𑀲𑀤𑁆𑀤𑁂𑀦𑀸𑀢𑀺 ‘‘𑀧𑁄𑀦𑁄𑀪𑀯𑀺𑀓𑀸’’𑀢𑀺 𑀏𑀢𑁆𑀣 𑀇𑀓-𑀲𑀤𑁆𑀤𑁂𑀦. 𑀕𑀫𑀺𑀬𑀢𑁆𑀣𑀢𑁆𑀢𑀸𑀢𑀺 𑀜𑀸𑀧𑀺𑀢𑀢𑁆𑀣𑀢𑁆𑀢𑀸. 𑀓𑀭𑀡𑀲𑀻𑀮𑀢𑀸 𑀳𑀺 𑀇𑀥 𑀲𑀻𑀮𑀢𑁆𑀣𑁄, 𑀲𑁄 𑀘 𑀇𑀓-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀓𑀺𑀭𑀺𑀬𑀸𑀯𑀸𑀘𑀓𑀲𑁆𑀲 𑀓𑀭𑀡𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀁 𑀅𑀧𑁆𑀧𑀬𑁄𑀕𑁄. 𑀯𑀼𑀢𑁆𑀢𑀢𑁆𑀣𑀸𑀦𑀜𑁆𑀳𑀺 𑀅𑀧𑁆𑀧𑀬𑁄𑀕𑁄. 𑀲𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀧𑀼𑀦𑀩𑁆𑀪𑀯𑀲𑁆𑀲 𑀤𑀸𑀬𑀺𑀓𑀸, 𑀢𑀤𑀪𑀸𑀯𑁂 𑀅𑀤𑀸𑀬𑀺𑀓𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀤𑀸𑀬𑀺𑀓𑀸𑀧𑀺 𑀧𑀼𑀦𑀩𑁆𑀪𑀯𑀁 𑀤𑁂𑀢𑀺𑀘𑁆𑀘𑁂𑀯𑀸’’𑀢𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀫𑀸𑀦𑀲𑀪𑀸𑀯𑀢𑁆𑀢𑀸, 𑀢𑀤𑀸𑀦𑀼𑀪𑀸𑀯𑀢𑁆𑀢𑀸 𑀘𑀸’’𑀢𑀺. 𑀢𑀢𑁆𑀣 𑀲𑀪𑀸𑀯𑁄 𑀢𑀡𑁆𑀳𑀸𑀬𑀦𑀁. 𑀆𑀦𑀼𑀪𑀸𑀯𑁄 𑀧𑀘𑁆𑀘𑀬𑀲𑀫𑀯𑀸𑀬𑁂 𑀨𑀮𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀸. 𑀇𑀢𑀭𑁂𑀲𑀽𑀢𑀺 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀻𑀲𑀼. 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀲𑀳𑀸𑀬𑀪𑀽𑀢𑀸 𑀢𑀡𑁆𑀳𑀸 ‘‘𑀉𑀧𑀥𑀺𑀯𑁂𑀧𑀓𑁆𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀉𑀧𑀥𑀺𑀫𑁆𑀳𑀺 𑀬𑀣𑀸𑀦𑀺𑀩𑁆𑀩𑀢𑁆𑀢𑁂’’𑀢𑀺𑀆𑀤𑀺. 𑀬𑀣𑀸𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑀧𑁆𑀧𑀓𑀸𑀭𑁂. 𑀦𑀦𑁆𑀤𑀦𑀁 𑀲𑀁𑀉𑀧𑁆𑀧𑀺𑀮𑀸𑀯𑀦𑀁 𑀅𑀪𑀺𑀢𑀲𑁆𑀲𑀦𑀁. 𑀭𑀜𑁆𑀚𑀦𑀁 𑀯𑀢𑁆𑀣𑀲𑁆𑀲 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀦𑀁, 𑀭𑀫𑀸𑀧𑀦𑀁 𑀯𑀸. 𑀭𑀸𑀕𑀲𑀫𑁆𑀩𑀦𑁆𑀥𑁂𑀦𑀸𑀢𑀺 𑀭𑀸𑀕𑀧𑀤𑀲𑀫𑁆𑀩𑀦𑁆𑀥𑁂𑀦 ‘‘𑀉𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑁄 𑀯𑀺𑀲𑀼𑀁 𑀯𑀓𑁆𑀔𑀢𑀻𑀢𑀺 𑀏𑀢𑁆𑀣 𑀯𑀓𑁆𑀔𑀢𑀺-𑀓𑀺𑀭𑀺𑀬𑀸𑀧𑀤𑀁 𑀓𑀫𑁆𑀫𑀢𑁆𑀣𑁂 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀯𑀢𑁆𑀣𑀼𑀓𑀁 𑀘𑀓𑁆𑀔𑀼’’𑀦𑁆𑀢𑀺 𑀇𑀫𑀺𑀦𑀸 𑀲𑀓𑀮𑀁 𑀘𑀓𑁆𑀔𑀼𑀤𑀲𑀓𑀫𑀸𑀳, 𑀤𑀼𑀢𑀺𑀬𑁂𑀦 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀁. 𑀙𑀺𑀤𑁆𑀤𑀦𑁆𑀢𑀺 𑀓𑀡𑁆𑀡𑀲𑁆𑀲 𑀙𑀺𑀤𑁆𑀤𑀧𑀤𑁂𑀲𑀁. 𑀓𑀡𑁆𑀡𑀩𑀤𑁆𑀥𑀦𑁆𑀢𑀺 𑀓𑀡𑁆𑀡𑀧𑀸𑀴𑀺. 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑀁 𑀯𑀺𑀬, 𑀓𑀺𑀘𑁆𑀘𑀢𑁄 𑀫𑀼𑀤𑀼𑀲𑀺𑀦𑀺𑀤𑁆𑀥𑀫𑀥𑀼𑀭𑀭𑀲𑀤𑀁 𑀫𑀜𑁆𑀜𑀦𑁆𑀢𑀺. 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀸𑀢𑀺 𑀯𑀺𑀲𑀬𑁂𑀦 𑀅𑀯𑀺𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑀸. 𑀯𑀺𑀲𑀬𑀯𑀺𑀲𑀺𑀝𑁆𑀞𑀸𑀢𑀺 𑀘𑀓𑁆𑀔𑀸𑀤𑀺𑀯𑀺𑀲𑀬𑀯𑀺𑀲𑀺𑀝𑁆𑀞𑀸. 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑀼𑀤𑀸𑀬𑀸𑀯𑀬𑀯𑁂𑀳𑀺 𑀯𑀺𑀬 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀳𑀺 𑀦 𑀦𑀸𑀦𑀢𑁆𑀢𑀯𑁄𑀳𑀸𑀭𑁄 𑀦 𑀳𑁄𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁄 𑀲𑀺𑀁𑀲𑀧𑀸’’𑀢𑀺. 𑀦 𑀳𑀺 𑀲𑀩𑁆𑀩𑁄 𑀭𑀼𑀓𑁆𑀔𑁄 𑀲𑀺𑀁𑀲𑀧𑀸. 𑀢𑀲𑁆𑀫𑀸 𑀓𑀺𑀭𑀺𑀬𑀸𑀪𑁂𑀤𑀲𑀩𑁆𑀪𑀸𑀯𑀢𑁄 ‘‘𑀲𑀬𑀸𑀦𑀸 𑀪𑀼𑀜𑁆𑀚𑀦𑁆𑀢𑀺 𑀲𑀥𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀉𑀧𑁆𑀧𑀚𑁆𑀚𑀫𑀸𑀦𑀸’’𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸𑀬 𑀮𑀓𑁆𑀔𑀡𑀢𑀸, 𑀇𑀢𑀭𑀢𑁆𑀣 𑀮𑀓𑁆𑀔𑀺𑀢𑀩𑁆𑀩𑀢𑀸 𑀘 𑀯𑀼𑀢𑁆𑀢𑀸. 𑀬𑀤𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀻𑀢𑀺 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀸𑀲𑀗𑁆𑀓𑀁 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 𑀅𑀢𑁆𑀣𑀺𑀪𑀸𑀯𑀫𑀸𑀳. 𑀢𑁂𑀦 𑀉𑀧𑁆𑀧𑀸𑀤𑁂 𑀲𑀢𑀻𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 ‘‘𑀉𑀧𑁆𑀧𑀚𑁆𑀚𑀫𑀸𑀦𑀸’’𑀢𑀺 𑀏𑀢𑁆𑀣 𑀉𑀧𑁆𑀧𑀸𑀤𑁄 𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀇𑀢𑀭𑁄 𑀘 𑀢𑀲𑁆𑀲 𑀨𑀮𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑁄 𑀳𑀺 𑀢𑁂𑀦 𑀉𑀧𑀬𑁄𑀚𑀺𑀢𑁄 𑀯𑀺𑀬 𑀳𑁄𑀢𑀻’’𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀯𑀸 𑀢𑀡𑁆𑀳𑀸𑀬 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀲𑀻𑀮𑀢𑀸 𑀉𑀧𑁆𑀧𑀚𑁆𑀚𑀦𑀲𑀪𑀸𑀯𑁄, 𑀉𑀧𑁆𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀯𑀸 𑀯𑀼𑀢𑁆𑀢𑀸. 𑀢𑀢𑁆𑀣𑁂𑀯 𑀘𑀲𑁆𑀲𑀸 𑀉𑀧𑁆𑀧𑀚𑁆𑀚𑀦𑀲𑀻𑀮𑀢𑀸 𑀲𑀓𑁆𑀓𑀸𑀬𑀢𑁄 𑀅𑀜𑁆𑀜𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀲𑀫𑀢𑁆𑀣𑀢𑀸 𑀧𑀘𑁆𑀘𑀬𑀲𑀫𑀯𑀸𑀬𑁂𑀦, 𑀅𑀜𑁆𑀜𑀣𑀸 𑀅𑀲𑀫𑀢𑁆𑀣𑀢𑀸, 𑀬𑀢𑁄 𑀓𑀤𑀸𑀘𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁪. 𑀢𑀡𑁆𑀳𑀸𑀬 𑀯𑀺𑀭𑀚𑁆𑀚𑀦𑀁 𑀳𑀮𑀺𑀤𑁆𑀤𑀺𑀭𑀸𑀕𑀲𑁆𑀲 𑀯𑀺𑀬 𑀧𑀮𑀼𑀚𑁆𑀚𑀦𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀔𑀬𑀕𑀫𑀦𑀯𑀲𑁂𑀦𑀸’’𑀢𑀺. 𑀯𑀺𑀘𑁆𑀙𑀺𑀦𑁆𑀦𑀁 𑀦𑀺𑀭𑀼𑀚𑁆𑀛𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀯𑀢𑁆𑀢𑀺𑀕𑀫𑀦𑀯𑀲𑁂𑀦𑀸’’𑀢𑀺. 𑀘𑀚𑀦𑀁 𑀙𑀟𑁆𑀟𑀦𑀁, 𑀳𑀸𑀧𑀦𑀁 𑀯𑀸𑀢𑀺 𑀆𑀳 ‘‘𑀅𑀦𑀧𑁂𑀓𑁆𑀔𑀢𑀸𑀬 𑀘𑀚𑀦𑀯𑀲𑁂𑀦, 𑀳𑀸𑀦𑀺𑀯𑀲𑁂𑀦 𑀘𑀸’’𑀢𑀺.

𑀢𑀤𑀧𑁆𑀧𑀯𑀢𑁆𑀢𑀺 𑀯𑀺𑀬𑀸𑀢𑀺 𑀢𑀲𑁆𑀲𑀸 𑀢𑀺𑀢𑁆𑀢𑀅𑀮𑀸𑀩𑀼𑀯𑀮𑁆𑀮𑀺𑀬𑀸 𑀅𑀧𑁆𑀧𑀯𑀢𑁆𑀢𑀺 𑀯𑀺𑀬. 𑀅𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺 𑀯𑀺𑀬 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀢𑀤𑀧𑁆𑀧𑀯𑀢𑁆𑀢𑀺 𑀯𑀺𑀬𑀸’’𑀢𑀺 𑀬𑀣𑀸 ‘‘𑀭𑀸𑀕𑀓𑁆𑀔𑀬𑁄’’𑀢𑀺 (𑀲𑀁. 𑀦𑀺. 𑁪.𑁩𑁧𑁫, 𑁩𑁩𑁦). 𑀅𑀧𑁆𑀧𑀯𑀢𑁆𑀢𑀺𑀪𑀽𑀢𑀦𑁆𑀢𑀺 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺𑀬𑀸 𑀧𑀢𑁆𑀢𑀁, 𑀧𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀬𑀧𑀺 𑀢𑀡𑁆𑀳𑀸𑀬 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀦𑀺𑀭𑀼𑀤𑁆𑀥𑀸𑀢𑀺 𑀯𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀬𑀲𑁆𑀫𑀸 𑀫𑀕𑁆𑀕𑁄, 𑀦𑀺𑀩𑁆𑀩𑀸𑀦𑀜𑁆𑀘 𑀢𑀡𑁆𑀳𑀸𑀬 𑀲𑀫𑀼𑀘𑁆𑀙𑁂𑀤𑀲𑀸𑀥𑀦𑀁, 𑀢𑀲𑁆𑀫𑀸 ‘‘𑀧𑀼𑀭𑀺𑀫𑀸 𑀯𑀸 𑀉𑀧𑀫𑀸’’𑀢𑀺𑀆𑀤𑀺𑀦𑀸 𑀉𑀧𑀫𑀸𑀤𑁆𑀯𑀬𑀁 𑀉𑀪𑀬𑀢𑁆𑀣 𑀬𑀣𑀸𑀓𑁆𑀓𑀫𑀁 𑀬𑁄𑀚𑀺𑀢𑀁, 𑀉𑀪𑀬𑀝𑁆𑀞𑀸𑀦𑀺𑀬𑀁 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀮𑀩𑁆𑀪𑀢𑁂𑀯.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁫. 𑀢𑀺𑀢𑁆𑀣𑀺𑀬𑁂𑀳𑀺 𑀓𑀧𑁆𑀧𑀺𑀢𑀲𑁆𑀲 𑀫𑀕𑁆𑀕𑀲𑁆𑀲 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀜𑀸𑀡𑀸𑀤𑀺𑀓𑀲𑁆𑀲. 𑀅𑀭𑀺𑀬𑀁 𑀮𑀪𑀸𑀧𑁂𑀢𑀻𑀢𑀺 𑀅𑀭𑀺𑀬𑀁 𑀲𑀸𑀫𑀜𑁆𑀜𑀨𑀮𑀁 𑀮𑀪𑀸𑀧𑁂𑀢𑀺.

𑀢𑀩𑁆𑀩𑀺𑀧𑀓𑁆𑀔𑀯𑀺𑀭𑀢𑀺𑀲𑀪𑀸𑀯𑀸𑀢𑀺 𑀢𑀲𑁆𑀲𑀸 𑀲𑀫𑁆𑀫𑀸𑀯𑀸𑀘𑀸𑀬 𑀯𑀺𑀧𑀓𑁆𑀔𑀢𑁄 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀭𑀢𑀺𑀲𑀪𑀸𑀯𑀸. 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸 𑀧𑀺𑀲𑀼𑀡𑀯𑀸𑀘𑀸, 𑀲𑀩𑁆𑀩𑀸𑀧𑀺 𑀯𑀸 𑀫𑀺𑀘𑁆𑀙𑀸𑀯𑀸𑀘𑀸 𑀯𑀺𑀲𑀁𑀯𑀸𑀤𑀦𑀸𑀤𑀺𑀯𑀲𑁂𑀦 𑀪𑁂𑀤𑀓𑀭𑀻𑀢𑀺 𑀆𑀳 ‘‘𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸𑀧𑀳𑀸𑀦𑁂𑀦𑀸’’𑀢𑀺. 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀳𑀺 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀲𑀺𑀦𑀺𑀤𑁆𑀥𑀪𑀸𑀯𑁂𑀦 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀢𑀧𑁆𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑁂 𑀚𑀦𑁂, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸. 𑀢𑁂𑀦𑀸𑀳 ‘‘𑀚𑀦𑁂, 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻’’𑀢𑀺. 𑀘𑀻𑀯𑀭𑀓𑀫𑁆𑀫𑀸𑀤𑀺𑀓𑁄 𑀢𑀸𑀤𑀺𑀲𑁄 𑀧𑀬𑁄𑀕𑁄. 𑀓𑀸𑀢𑀩𑁆𑀩𑀁 𑀘𑀻𑀯𑀭𑀭𑀚𑀦𑀸𑀤𑀺𑀓𑀁. 𑀦𑀺𑀭𑀯𑀚𑁆𑀚𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸𑀢𑀺 𑀦𑀺𑀭𑀯𑀚𑁆𑀚𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲, 𑀦𑀺𑀭𑀯𑀚𑁆𑀚𑀸𑀓𑀸𑀭𑁂𑀦 𑀯𑀸 𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄𑀢𑀺 𑀏𑀢𑁆𑀣 𑀲𑀫𑀼𑀝𑁆𑀞𑀸𑀧𑀦𑀁 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑀝𑀺𑀧𑀓𑁆𑀔𑀪𑀽𑀢𑀲𑁆𑀲 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑁆𑀲 𑀅𑀦𑀼𑀕𑀼𑀡𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀯𑀢𑁆𑀢𑀦𑀫𑁂𑀯, 𑀉𑀓𑁆𑀔𑀺𑀧𑀦𑀁 𑀯𑀸 𑀦𑁂𑀲𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀯𑀺𑀲𑁄𑀥𑀦𑀁 𑀯𑁄𑀤𑀸𑀧𑀦𑀁.

𑀤𑀺𑀝𑁆𑀞𑁂𑀓𑀝𑁆𑀞𑀸𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀧𑀳𑀸𑀦𑁂𑀓𑀝𑁆𑀞𑀸, 𑀧𑀞𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀢𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀤𑀺𑀝𑁆𑀞𑁂𑀓𑀝𑁆𑀞𑀅𑀯𑀺𑀚𑁆𑀚𑀸𑀤𑀬𑁄’’𑀢𑀺𑀧𑀺 𑀧𑀸𑀞𑁄. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀘𑀢𑀼𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀉𑀧𑀭𑀺𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀦 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑁄 𑀫𑀸𑀦𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 ‘‘𑀅𑀳’’𑀦𑁆𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀺𑀬𑁄. 𑀧𑀓𑀸𑀲𑁂𑀢𑀻𑀢𑀺 𑀓𑀺𑀘𑁆𑀘𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀢𑁂𑀦𑁂𑀯 𑀳𑀺 𑀅𑀗𑁆𑀕𑁂𑀦𑀸𑀢𑀺 𑀢𑁂𑀦𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑀗𑁆𑀕𑁂𑀦. 𑀢𑀣𑀸𑀧𑀯𑀢𑁆𑀢𑀺𑀢𑁂𑀦 𑀓𑀭𑀡𑀪𑀽𑀢𑁂𑀦, 𑀢𑁂𑀦 𑀯𑀸 𑀓𑀸𑀭𑀡𑁂𑀦. 𑀅𑀗𑁆𑀕-𑀲𑀤𑁆𑀤𑁄 𑀳𑀺 𑀓𑀸𑀭𑀡𑀢𑁆𑀣𑁄𑀧𑀺 𑀳𑁄𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀫𑀕𑁆𑀕𑁂, 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀸.

𑀇𑀫𑀲𑁆𑀲𑁂𑀯𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑁂𑀯. 𑀬𑀤𑀺𑀧𑀺 𑀯𑀺𑀭𑀫𑀺𑀢𑀩𑁆𑀩𑀢𑁄 𑀯𑀺𑀭𑀫𑀦𑁆𑀢𑀲𑁆𑀲 𑀘𑁂𑀢𑀦𑀸𑀧𑀺 𑀮𑀩𑁆𑀪𑀢𑁂𑀯, 𑀯𑀺𑀭𑀢𑀺𑀬𑀸 𑀏𑀯 𑀧𑀦 𑀢𑀤𑀸 𑀧𑀥𑀸𑀦𑀪𑀸𑀯𑁄𑀢𑀺 𑀆𑀳 ‘‘𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄’’𑀢𑀺. 𑀲𑀼𑀪𑀸𑀲𑀺𑀢𑀸𑀤𑀻𑀢𑀺 𑀅𑀲𑀫𑁆𑀨𑀧𑁆𑀧𑀮𑀸𑀧𑀸𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀺𑀲𑀼𑀡𑀸𑀤𑀺 𑀲𑀗𑁆𑀕𑀳𑀺𑀢𑀸. 𑀪𑀸𑀲𑀦𑀸𑀤𑀻𑀢𑀺 𑀏𑀢𑁆𑀣 𑀧𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀺. 𑀅𑀫𑀕𑁆𑀕𑀗𑁆𑀕𑀢𑁆𑀢𑀸𑀢𑀺 𑀅𑀫𑀕𑁆𑀕𑀲𑀪𑀸𑀯𑀢𑁆𑀢𑀸. 𑀢𑀫𑁂𑀯 𑀘𑁂𑀢𑀦𑀸𑀬 𑀅𑀫𑀕𑁆𑀕𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀲𑁆𑀲 𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀁 𑀦𑀸𑀫 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁, 𑀫𑀕𑁆𑀕𑀘𑁂𑀢𑀦𑀸 𑀘 𑀢𑀁𑀲𑀪𑀸𑀯𑀸 𑀦 𑀳𑁄𑀢𑀻𑀢𑀺 𑀦 𑀢𑀲𑁆𑀲𑀸 𑀫𑀕𑁆𑀕𑀓𑁆𑀔𑀡𑁂 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀲𑀺𑀤𑁆𑀥𑀺. 𑀢𑀁𑀲𑀺𑀤𑁆𑀥𑀺𑀬𑀦𑁆𑀢𑀺 𑀓𑀺𑀘𑁆𑀘𑀢𑁆𑀢𑀬𑀲𑀺𑀤𑁆𑀥𑀺𑀬𑀁. 𑀬𑀣𑀸 𑀧𑀦𑀲𑁆𑀲𑀸 𑀧𑀼𑀩𑁆𑀩𑀪𑀸𑀕𑁂 𑀲𑀼𑀪𑀸𑀲𑀺𑀢𑀯𑀸𑀘𑀸𑀤𑀺𑀪𑀸𑀯𑁄, 𑀏𑀯𑀁 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀢𑀢𑁆𑀣 𑀏𑀓𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀢𑀺𑀓𑀺𑀘𑁆𑀘𑀢𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀜𑁆𑀘 𑀏𑀓𑁂𑀓𑀸𑀦𑀁 𑀘𑀢𑀼𑀓𑀺𑀘𑁆𑀘𑀢𑀸, 𑀏𑀯𑀁 𑀏𑀓𑀸 𑀫𑀕𑁆𑀕𑀘𑁂𑀢𑀦𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑁆𑀲 𑀲𑀸𑀥𑀺𑀓𑀸 𑀪𑀯𑁂𑀬𑁆𑀬, 𑀢𑀣𑀸 𑀘 𑀲𑀢𑀺 𑀫𑀕𑁆𑀕𑁂 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀦 𑀪𑀯𑁂𑀬𑁆𑀬𑀼𑀁, 𑀙𑀴𑀗𑁆𑀕𑀺𑀓𑁄 𑀘 𑀅𑀭𑀺𑀬𑀫𑀕𑁆𑀕𑁄 𑀲𑀺𑀬𑀸𑀢𑀺 𑀢𑀬𑀺𑀤𑀫𑀸𑀳 ‘‘𑀏𑀓𑀸𑀬 𑀘𑁂𑀢𑀦𑀸𑀬𑀸’’𑀢𑀺𑀆𑀤𑀺𑀦𑀸. 𑀬𑀲𑁆𑀫𑀸 𑀧𑀦𑁂𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑀕𑁆𑀕𑀧𑀘𑁆𑀘𑀬𑀢𑀸𑀯𑀘𑀦𑀢𑁄 𑀘 𑀦 𑀘𑁂𑀢𑀦𑀸𑀬 𑀫𑀕𑁆𑀕𑀪𑀸𑀯𑁄𑀢𑀺 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀬𑁄𑀯 𑀲𑀫𑁆𑀫𑀸𑀯𑀸𑀘𑀸𑀤𑀬𑁄.

𑀩𑁆𑀭𑀽𑀳𑀦𑀁 𑀲𑀼𑀔𑀁. 𑀲𑀦𑁆𑀢𑀲𑀼𑀔𑀁 𑀉𑀧𑁂𑀓𑁆𑀔𑀸. 𑀲𑀸 𑀳𑀺 ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪; 𑀯𑀺𑀪. 𑀅𑀝𑁆𑀞. 𑁨𑁩𑁨) 𑀯𑀼𑀢𑁆𑀢𑀸. 𑀯𑀺𑀢𑀓𑁆𑀓𑀸𑀤𑀻𑀦𑀦𑁆𑀢𑀺 𑀢𑁂𑀬𑁂𑀯 𑀅𑀪𑀺𑀦𑀺𑀭𑁄𑀧𑀦𑀸𑀤𑀬𑁄 𑀧𑀸𑀓𑀝𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸.

𑀯𑀘𑀻𑀲𑀗𑁆𑀔𑀸𑀭𑀪𑀸𑀯𑀢𑁄 𑀯𑀘𑀻𑀪𑁂𑀤𑀲𑁆𑀲 𑀉𑀧𑀓𑀸𑀭𑀓𑁄 𑀯𑀺𑀢𑀓𑁆𑀓𑁄. ‘‘𑀲𑀸𑀯𑀚𑁆𑀚𑀸…𑀧𑁂… 𑀉𑀧𑀓𑀸𑀭𑀓𑁄 𑀏𑀯𑀸’’𑀢𑀺 𑀇𑀫𑀺𑀦𑀸 𑀯𑀘𑀻𑀪𑁂𑀤𑀢𑀁 𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀦𑀁 𑀯𑀺𑀬 𑀯𑀺𑀭𑀢𑀺𑀬𑀸𑀧𑀺 𑀯𑀺𑀲𑁂𑀲𑀧𑀘𑁆𑀘𑀬𑁄 𑀯𑀺𑀢𑀓𑁆𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀘𑀻𑀪𑁂𑀤𑀦𑀺𑀬𑀸𑀫𑀺𑀓𑀸 𑀯𑀸𑀘𑀸𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺𑀫𑀸𑀳. 𑀲𑀸 𑀳𑀺 𑀲𑀫𑁆𑀫𑀸𑀯𑀸𑀘𑀸𑀪𑀽𑀢𑀸 𑀫𑀺𑀘𑁆𑀙𑀸𑀯𑀸𑀘𑀸𑀲𑀼 𑀲𑀁𑀬𑀫𑀺𑀦𑀻. 𑀢𑀢𑁆𑀣 𑀬𑀣𑀸 𑀯𑀺𑀲𑀁𑀯𑀸𑀤𑀦𑀸𑀤𑀺𑀫𑀺𑀘𑁆𑀙𑀸𑀯𑀸𑀘𑀢𑁄 𑀅𑀯𑀺𑀭𑀢𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀢𑁄𑀧𑀺 𑀦 𑀯𑀺𑀭𑀫𑀢𑁂𑀯. 𑀬𑀣𑀸𑀳 𑁋 ‘‘𑀏𑀓𑀁 𑀥𑀫𑁆𑀫𑀁…𑀧𑁂… 𑀅𑀓𑀸𑀭𑀺𑀬’’𑀦𑁆𑀢𑀺 (𑀥. 𑀧. 𑁧𑁭𑁬). 𑀢𑀣𑀸 𑀅𑀯𑀺𑀲𑀁𑀯𑀸𑀤𑀦𑀸𑀤𑀺𑀦𑀸 𑀲𑀫𑁆𑀫𑀸𑀯𑀸𑀘𑀸𑀬 𑀞𑀺𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀫𑁆𑀧𑀺 𑀧𑀽𑀭𑁂𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀯𑀘𑀻𑀪𑁂𑀤…𑀧𑁂… 𑀉𑀧𑀓𑀸𑀭𑀺𑀓𑀸’’𑀢𑀺. 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀦𑀺𑀝𑁆𑀞𑀸𑀪𑀸𑀯𑀢𑁄 𑀬𑀣𑀸 𑀕𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑀯𑀢𑁆𑀢𑀺𑀪𑀸𑀯𑀢𑁄 𑀭𑀲𑀮𑀓𑁆𑀔𑀡𑀸𑀦𑀺𑀧𑀻𑀢𑀺 𑀆𑀳 ‘‘𑀓𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀯𑀸’’𑀢𑀺.

𑀅𑀪𑀺𑀦𑀦𑁆𑀤𑀦𑀦𑁆𑀢𑀺 𑀢𑀡𑁆𑀳𑀸𑀤𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑀁.

𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄, 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸𑀢𑀺 𑀢𑀤𑀼𑀪𑀬𑀁 𑀲𑀯𑀦𑀸𑀥𑀻𑀦𑀦𑁆𑀢𑀺 𑀆𑀳 ‘‘𑀲𑀯𑀦𑀜𑀸𑀡𑁂 𑀏𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀧𑀭𑀺𑀕𑁆𑀕𑀡𑁆𑀳𑀦𑀁.

𑀢𑀲𑁆𑀲𑀸𑀢𑀺 𑀧𑀬𑁄𑀕𑀲𑁆𑀲.

𑀲𑁄𑀢𑀺 𑀓𑀸𑀫𑀯𑀺𑀢𑀓𑁆𑀓𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑁄 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑀲𑁆𑀲𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀲𑁆𑀲. 𑀕𑀢𑀁 𑀕𑀫𑀦𑀁 𑀧𑀯𑀢𑁆𑀢𑀺, 𑀢𑀲𑁆𑀲 𑀉𑀧𑀸𑀬𑁄𑀢𑀺 𑀕𑀢𑀫𑀕𑁆𑀕𑁄.

𑀧𑀳𑀸𑀢𑀩𑁆𑀩𑀏𑀓𑀢𑁆𑀢𑀦𑁆𑀢𑀺 𑀧𑀳𑀸𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑀁.

𑀫𑀕𑁆𑀕𑀪𑀸𑀯𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀏𑀓𑀢𑁆𑀢𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀫𑀕𑁆𑀕𑀪𑀸𑀯𑁂𑀦 𑀏𑀓𑀢𑁆𑀢𑁂𑀦 𑀲𑀸𑀫𑀜𑁆𑀜𑀢𑁄 𑀕𑀳𑁂𑀢𑁆𑀯𑀸 ‘‘𑀅𑀲𑁆𑀲𑀸’’𑀢𑀺 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀲 𑀫𑀕𑁆𑀕𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀢𑀸, 𑀢𑀣𑀸 𑀅𑀲𑀤𑀺𑀲𑀢𑀸 𑀘 𑀏𑀓𑀘𑁆𑀘𑀲𑀤𑀺𑀲𑀢𑀸 𑀘 𑀛𑀸𑀦𑀗𑁆𑀕𑀯𑀲𑁂𑀦 𑀲𑀩𑁆𑀩𑀲𑀤𑀺𑀲𑀲𑀩𑁆𑀩𑀸𑀲𑀤𑀺𑀲𑀏𑀓𑀘𑁆𑀘𑀲𑀤𑀺𑀲𑀢𑀸, 𑀲𑁄 𑀏𑀯 𑀯𑀺𑀲𑁂𑀲𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑀁 𑀥𑀼𑀭𑀁 𑀓𑀢𑁆𑀯𑀸 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥 𑀧𑀦𑀸𑀢𑀺 𑀇𑀫𑀺𑀲𑁆𑀲𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁. 𑀲𑀫𑁆𑀫𑀲𑀺…𑀧𑁂… 𑀦𑀺𑀯𑀢𑁆𑀢𑀦𑀢𑁄𑀢𑀺 𑀧𑀞𑀫𑀢𑁆𑀣𑁂𑀭𑀯𑀸𑀤𑀁 𑀯𑀤𑀦𑁆𑀢𑁄 𑀢𑀤𑀚𑁆𑀛𑀸𑀲𑀬𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀇𑀢𑀭𑀯𑀸𑀤𑀸𑀧𑁂𑀢𑁆𑀣 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺. 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑀁 𑀥𑀼𑀭𑀁 𑀓𑀢𑁆𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸. ‘‘𑀯𑀺𑀧𑀲𑁆𑀲𑀦𑀸 …𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀲𑀸 𑀇𑀥 𑀧𑀝𑀺𑀓𑁆𑀔𑁂𑀧𑀢𑀸 𑀅𑀢𑁆𑀣𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑁂𑀘𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀦𑀺𑀬𑀸𑀫𑁂𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺? 𑀦𑀬𑀺𑀤𑀫𑁂𑀯𑀁. 𑀇𑀥𑀸𑀧𑀻𑀢𑀺 𑀇𑀥 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑁂𑀧𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁄 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀸𑀥𑀸𑀭𑀡𑀢𑁆𑀢𑀸’’𑀢𑀺. ‘‘𑀇𑀥 𑀧𑀦𑀸’’𑀢𑀺 𑀇𑀫𑀺𑀦𑀸𑀧𑀺 𑀧𑀞𑀫𑀢𑁆𑀣𑁂𑀭𑀯𑀸𑀤𑁄 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁄 𑀯𑀺𑀲𑀼𑀁 𑀕𑀳𑀺𑀢𑁄𑀢𑀺? 𑀯𑀸𑀤𑀢𑁆𑀢𑀬𑀸𑀯𑀺𑀥𑀼𑀭𑀢𑀸𑀤𑀲𑁆𑀲𑀦𑀢𑁆𑀣𑀁. 𑀅𑀜𑁆𑀜𑁂 𑀘𑀸𑀘𑀭𑀺𑀬𑀯𑀸𑀤𑀸𑀢𑀺 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀸𑀤𑀸.

‘‘𑀆𑀭𑀼𑀧𑁆𑀧𑁂 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁…𑀧𑁂… 𑀦 𑀮𑁄𑀓𑀺𑀬’’𑀦𑁆𑀢𑀺 𑀇𑀤𑀁 𑀣𑁂𑀭𑀯𑀸𑀤𑁂 𑀆𑀕𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀢𑀦𑁆𑀢𑀺𑀁 𑀓𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀬𑁂𑀲𑀽𑀢𑀺 𑀧𑀘𑁆𑀙𑀺𑀫𑀚𑁆𑀛𑀸𑀦𑀯𑀚𑁆𑀚𑀸𑀦𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀳𑀺 𑀅𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀁 𑀲𑀁𑀲𑀬𑁄, 𑀦 𑀇𑀢𑀭𑀲𑁆𑀫𑀺𑀁. ‘‘𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀯𑀺𑀲𑁂𑀲𑀢𑁄 𑀲𑀸𑀲𑀯𑀸𑀦𑀸𑀲𑀯𑀁 𑀅𑀧𑁂𑀓𑁆𑀔𑀻𑀬𑀢𑀺, 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀯𑀘𑀦𑁂𑀦𑁂𑀢𑁆𑀣 𑀲𑀸𑀲𑀯𑀢𑁄 𑀅𑀯𑀘𑁆𑀙𑀺𑀦𑁆𑀤𑀦𑀢𑁆𑀣𑀁 ‘‘𑀢𑀜𑁆𑀘 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 ‘‘𑀦 𑀮𑁄𑀓𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀼𑀤𑀸𑀬𑀜𑁆𑀘…𑀧𑁂… 𑀆𑀳𑀸’’𑀢𑀺. 𑀇𑀢𑀭𑀣𑀸 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 ‘‘𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀢𑀬𑁄 𑀫𑀕𑁆𑀕𑀸𑀢𑀺 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄. 𑀢𑀚𑁆𑀛𑀸𑀦𑀺𑀓𑀦𑁆𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀁. 𑀅𑀜𑁆𑀜𑀛𑀸𑀦𑀺𑀓𑀸𑀧𑀻𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀢𑁄 𑀅𑀜𑁆𑀜𑀛𑀸𑀦𑀺𑀓𑀸𑀧𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀧𑀺 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀺-𑀲𑀤𑁆𑀤𑁂𑀦 𑀢𑀚𑁆𑀛𑀸𑀦𑀺𑀓𑀸𑀧𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀘𑀢𑀼𑀯𑁄𑀓𑀸𑀭𑀪𑀯𑁂𑀧𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀺𑀬 𑀫𑀕𑁆𑀕𑀲𑁆𑀲 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀪𑀸𑀯𑁂 𑀓𑁂𑀦𑀲𑁆𑀲 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀸𑀫𑁄𑀢𑀺 𑀆𑀳 ‘‘𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀸𑀫𑀺𑀓𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑀫𑀸𑀧𑀢𑁆𑀢𑀻’’𑀢𑀺. 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑀫𑀸𑀧𑀢𑁆𑀢𑀻𑀢𑀺 𑀘 𑀧𑀸𑀤𑀓𑀪𑀽𑀢𑀸 𑀅𑀢𑁆𑀢𑀦𑀸 𑀅𑀢𑀺𑀓𑁆𑀓𑀦𑁆𑀢𑀥𑀫𑁆𑀫𑀯𑀺𑀭𑀸𑀕𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀓𑀸𑀭𑀻 𑀅𑀭𑀽𑀧𑀲𑀫𑀸𑀧𑀢𑁆𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺 𑀯𑀸. 𑀢𑁂𑀦𑀸𑀳 ‘‘𑀧𑀸𑀤𑀓’’𑀦𑁆𑀢𑀺. 𑀦 𑀲𑀫𑁆𑀫𑀲𑀺𑀢𑀩𑁆𑀩𑀸𑀢𑀺 𑀦 𑀲𑀫𑁆𑀫𑀲𑀺𑀢𑀩𑁆𑀩𑀸 𑀲𑀫𑀸𑀧𑀢𑁆𑀢𑀺 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀸𑀫𑀺𑀓𑀸 𑀲𑀫𑁆𑀫𑀲𑀺𑀢𑀩𑁆𑀩𑀸𑀦𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀁 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀇𑀢𑀭𑀢𑁆𑀣 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀨𑀮𑀲𑁆𑀲𑀧𑀻𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀨𑀮𑀲𑁆𑀲𑀧𑀺.

𑀤𑀼𑀓𑁆𑀔𑀜𑀸𑀡𑀸𑀤𑀻𑀦𑀦𑁆𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀜𑀸𑀡𑀸𑀦𑀁. 𑀢𑀁𑀢𑀁𑀓𑀼𑀲𑀮𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀓𑀸𑀫𑀸𑀯𑀘𑀭𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀓𑀼𑀲𑀮𑁂𑀦 𑀲𑀤𑁆𑀥𑀺𑀁 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀢𑀁𑀢𑀁𑀓𑀼𑀲𑀮𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀢𑀩𑁆𑀪𑀸𑀯𑀢𑁄. 𑀢𑀁𑀢𑀁𑀯𑀺𑀭𑀫𑀺𑀢𑀩𑁆𑀩𑀸𑀤𑀺𑀆𑀭𑀫𑁆𑀫𑀡𑀢𑁆𑀢𑀸𑀢𑀺 𑀯𑀺𑀲𑀁𑀯𑀸𑀤𑀦𑀯𑀢𑁆𑀣𑀼𑀆𑀤𑀺𑀆𑀭𑀫𑁆𑀫𑀡𑀢𑁆𑀢𑀸. 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀏𑀯 𑀳𑀺 𑀯𑀺𑀭𑀢𑀻𑀢𑀺. ‘‘𑀅𑀗𑁆𑀕𑀸𑀦’’𑀦𑁆𑀢𑀺 𑀇𑀤𑀁 ‘‘𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁 𑀅𑀯𑀬𑀯𑁂𑀦 𑀯𑀺𑀦𑀸 𑀲𑀫𑀼𑀤𑀸𑀬𑀸𑀪𑀸𑀯𑀢𑁄. 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀪𑀺𑀦𑁆𑀦𑀲𑀻𑀮𑀲𑁆𑀲, 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀯𑀸 𑀲𑀫𑁆𑀫𑀧𑁆𑀧𑀥𑀸𑀦𑀸𑀲𑀫𑁆𑀪𑀯𑀢𑁄 𑀲𑀫𑀸𑀥𑀸𑀦𑀲𑁆𑀲 𑀯𑀺𑀬 𑀯𑀸𑀬𑀸𑀫𑀲𑁆𑀲 𑀲𑀻𑀮𑀁 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀬𑀤𑀺𑀧𑀺 𑀧𑀼𑀭𑀺𑀫𑀲𑀺𑀤𑁆𑀥𑀲𑀻𑀮𑀯𑀲𑁂𑀦 𑀬𑀼𑀢𑁆𑀢𑁄, 𑀲𑀳𑀚𑀸𑀢𑀯𑀲𑁂𑀦𑀸𑀧𑀺 𑀧𑀦 𑀮𑀩𑁆𑀪𑀢𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸𑀧𑀻’’𑀢𑀺 𑀆𑀳. 𑀲𑀳𑀚𑀫𑁂𑀯 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀘𑀸’’𑀢𑀺𑀆𑀤𑀺. 𑀲𑀫𑁆𑀫𑁄𑀲𑁄 𑀧𑀫𑀸𑀤𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀲𑀫𑁆𑀫𑁄𑀲𑁄 𑀅𑀧𑁆𑀧𑀫𑀸𑀤𑁄, 𑀲𑁄 𑀘𑀺𑀢𑁆𑀢𑀲𑁆𑀲 𑀆𑀭𑀓𑁆𑀔𑀸𑀢𑀺 𑀆𑀳 ‘‘𑀘𑁂𑀢𑀲𑁄 𑀭𑀓𑁆𑀔𑀺𑀢𑀢𑀸’’𑀢𑀺.

𑀲𑀻𑀮𑀓𑁆𑀔𑀦𑁆𑀥𑁄 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘. 𑀔𑀦𑁆𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀲𑀻𑀮𑀲𑁆𑀲 𑀅𑀤𑁄𑀲𑀲𑀸𑀥𑀦𑀢𑀸, 𑀦𑀻𑀯𑀭𑀡𑀚𑁂𑀝𑁆𑀞𑀓𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀲𑀫𑀸𑀥𑀺𑀲𑁆𑀲 𑀅𑀮𑁄𑀪𑀲𑀸𑀥𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀸𑀲𑀦𑀦𑁆𑀢𑀺 𑀧𑀝𑀺𑀯𑁂𑀥𑀲𑀸𑀲𑀦𑀁, ‘‘𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁦𑁬-𑁨𑁧𑁪. ‘‘𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀭𑀳𑀺𑀢𑁂 𑀏𑀓𑀦𑁆𑀢𑀧𑀳𑀸𑀢𑀩𑁆𑀩𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀡𑁆𑀳𑀸𑀬𑀧𑀺 𑀘𑀓𑁆𑀔𑀸𑀤𑀻𑀦𑀁 𑀯𑀺𑀬 𑀢𑀡𑁆𑀳𑀸𑀯𑀢𑁆𑀣𑀼𑀢𑀸𑀯𑀘𑀦𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸. 𑀬𑀣𑀸𑀳 ‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩). 𑀢𑀧𑁆𑀧𑀝𑀺𑀩𑀤𑁆𑀥𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑀸 𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑀸. 𑀏𑀓𑀦𑁆𑀢𑀧𑀳𑀸𑀢𑀩𑁆𑀩𑀢𑀸 𑀘 𑀦 𑀢𑀡𑁆𑀳𑀸𑀬 𑀏𑀯, 𑀅𑀣 𑀔𑁄 𑀅𑀯𑀲𑁂𑀲𑀸𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀫𑁆𑀧𑀺. 𑀢𑀣𑀸 𑀳𑀺 𑀢𑁂𑀲𑀁 𑀲𑀩𑁆𑀩𑀲𑁄 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀬𑀺𑀓𑀸 𑀤𑀲𑁆𑀲𑀦𑀪𑀸𑀯𑀦𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀬𑀣𑀸 ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁯) 𑀢𑀡𑁆𑀳𑀸𑀯𑀚𑁆𑀚𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁂 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀦𑀺𑀭𑀼𑀴𑁆𑀳𑁄, 𑀦 𑀢𑀣𑀸 𑀢𑀡𑁆𑀳𑀸𑀬, 𑀢𑀡𑁆𑀳𑀸𑀬 𑀧𑀦 ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁦𑁩; 𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁯𑁧, 𑁪𑁬𑁦; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁪; 𑀧𑀝𑀺. 𑀫. 𑁧.𑁩𑁪) 𑀲𑀫𑀼𑀤𑀬𑀪𑀸𑀯𑁄 𑀯𑀺𑀬 𑀲𑀸𑀢𑀺𑀲𑀬𑀁 𑀧𑀳𑀸𑀢𑀩𑁆𑀩𑀪𑀸𑀯𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀭𑀳𑀺𑀢𑁂 𑀏𑀓𑀦𑁆𑀢𑀧𑁆𑀧𑀳𑀸𑀢𑀩𑁆𑀩𑁂’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀅𑀲𑀗𑁆𑀕𑀳𑀺𑀢𑁄 𑀧𑀤𑁂𑀲𑁄 𑀅𑀢𑁆𑀣𑀺, 𑀲𑁄 𑀲𑀧𑁆𑀧𑀤𑁂𑀲𑁄, 𑀏𑀓𑀤𑁂𑀲𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀅𑀭𑀺𑀬𑀲𑀘𑁆𑀘𑀲𑀤𑁆𑀤𑁂. 𑀲𑀫𑀼𑀤𑀬𑁄𑀢𑀺 𑀲𑀫𑀼𑀤𑀬𑀢𑁆𑀣𑁄. ‘‘𑀦𑀺𑀧𑁆𑀧𑀤𑁂𑀲𑀢𑁄 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀲𑀫𑀼𑀤𑀬𑀲𑁆𑀲𑁂𑀯𑁂𑀢𑁆𑀣 𑀕𑀳𑀡𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑀦𑀺𑀭𑁄𑀥𑀸𑀢𑀺 𑀤𑀼𑀓𑁆𑀔𑀁, 𑀦𑀺𑀭𑁄𑀥𑁄 𑀘. 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬𑀫𑁆𑀧𑀺 𑀲𑀘𑁆𑀘𑀤𑁂𑀲𑀦𑀸𑀬𑀁 𑀯𑀺𑀬. 𑀥𑀫𑁆𑀫𑀢𑁄𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀢𑁄 𑀦𑀺𑀧𑁆𑀧𑀤𑁂𑀲𑀸 𑀏𑀯. ‘‘𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀪𑁂𑀤𑁄 𑀏𑀯 𑀳𑀺 𑀢𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀦 𑀳𑀺 𑀢𑀢𑁄 𑀅𑀜𑁆𑀜𑁄’’𑀢𑀺𑀆𑀤𑀺. 𑀅𑀧𑀼𑀩𑁆𑀩𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑀢𑁄 𑀅𑀧𑀼𑀩𑁆𑀩𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀲𑀫𑀼𑀤𑀬𑀲𑁆𑀲. 𑀲𑀩𑁆𑀩𑀢𑁆𑀣 𑀢𑀻𑀲𑀼𑀧𑀺 𑀯𑀸𑀭𑁂𑀲𑀽𑀢𑀺 𑀅𑀝𑁆𑀞𑀗𑁆𑀕𑀺𑀓𑀧𑀜𑁆𑀘𑀗𑁆𑀕𑀺𑀓𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀪𑁂𑀤𑁂𑀲𑀼 𑀫𑀳𑀸𑀯𑀸𑀭𑁂𑀲𑀼, 𑀢𑀤𑀦𑁆𑀢𑁄𑀕𑀥𑁂𑀲𑀼 𑀘 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀅𑀧𑀼𑀩𑁆𑀩𑀲𑁆𑀲𑀸𑀢𑀺 ‘‘𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀬 𑀅𑀧𑀼𑀩𑁆𑀩𑀲𑁆𑀲. 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀻𑀦𑀜𑁆𑀳𑀺 𑀲𑀫𑀼𑀤𑀬𑀢𑀸𑀯𑀘𑀦𑀁 𑀇𑀥 𑀅𑀧𑀼𑀩𑁆𑀩𑀤𑀲𑁆𑀲𑀦𑀁. 𑀢𑀲𑁆𑀲 𑀬𑀤𑀺𑀧𑀺 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑁂𑀲𑀼 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀧𑀜𑁆𑀘𑀲𑀼 𑀧𑀦 𑀓𑁄𑀝𑁆𑀞𑀸𑀲𑁂𑀲𑀼 𑀉𑀧𑀭𑀽𑀧𑀭𑀺 𑀅𑀧𑀼𑀩𑁆𑀩𑀁 𑀤𑀲𑁆𑀲𑀺𑀢𑀦𑁆𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀲𑀫𑀼𑀤𑀬𑀯𑀺𑀲𑁂𑀲𑀤𑀲𑁆𑀲𑀦𑀁, 𑀇𑀢𑀭𑀁 𑀧𑀦 𑀫𑀕𑁆𑀕𑀯𑀺𑀲𑁂𑀲𑀤𑀲𑁆𑀲𑀦𑀁. 𑀢𑀲𑁆𑀲 𑀘 𑀥𑀫𑁆𑀫𑀢𑁄 𑀅𑀧𑀼𑀩𑁆𑀩𑀸𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯. 𑀬𑀤𑀺 𑀏𑀯𑀁 𑀤𑀼𑀢𑀺𑀬𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼, 𑀧𑀞𑀫𑀓𑁄𑀝𑁆𑀞𑀸𑀲𑁂𑀧𑀺 𑀯𑀸 𑀓𑀲𑁆𑀫𑀸 𑀢𑀡𑁆𑀳𑀸 𑀕𑀳𑀺𑀢𑀸𑀢𑀺 𑀆𑀳 ‘‘𑀅𑀧𑀼𑀩𑁆𑀩𑀲𑀫𑀼𑀤𑀬𑀤𑀲𑁆𑀲𑀦𑀢𑁆𑀣𑀸𑀬𑀧𑀺 𑀳𑀻’’𑀢𑀺𑀆𑀤𑀺. 𑀓𑁂𑀯𑀮𑀸𑀬𑀸𑀢𑀺 𑀢𑀤𑀜𑁆𑀜𑀓𑀺𑀮𑁂𑀲𑀸𑀤𑀺𑀦𑀺𑀭𑀧𑁂𑀓𑁆𑀔𑀸𑀬. 𑀤𑁂𑀲𑀦𑀸𑀯𑀲𑁂𑀦 𑀦 𑀯𑀼𑀢𑁆𑀢𑁄𑀢𑀺 𑀦 𑀥𑀫𑁆𑀫𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀤𑀼𑀓𑁆𑀔𑀸𑀤𑀻𑀦𑀺 𑀢𑀢𑁆𑀣 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬𑀁 𑀲𑀧𑁆𑀧𑀤𑁂𑀲𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀺𑀧𑁆𑀧𑀤𑁂𑀲𑀢𑁄 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀲𑀗𑁆𑀔𑀸𑀢𑀦𑁆𑀢𑀺 𑀧𑀘𑁆𑀘𑀬𑀸𑀪𑀺𑀫𑀢𑀁 𑀧𑀘𑁆𑀘𑀬𑀪𑀽𑀢𑀁, 𑀧𑀘𑁆𑀘𑀬𑀓𑁄𑀝𑁆𑀞𑀸𑀲𑀁 𑀯𑀸.

𑀢𑁂𑀲𑀦𑁆𑀢𑀺 𑀓𑀼𑀲𑀮𑀥𑀫𑁆𑀫𑀸𑀦𑀁. 𑀧𑀘𑁆𑀘𑀬𑀸𑀦𑀁 𑀧𑀳𑀸𑀦𑀯𑀲𑁂𑀦𑀸𑀢𑀺 𑀳𑁂𑀢𑀼𑀦𑀺𑀭𑁄𑀥𑁂𑀦 𑀨𑀮𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺, 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀯𑀸 𑀓𑀼𑀲𑀮𑀸𑀦𑀁 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀬𑀣𑀸 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁧.𑁨𑁪𑁦). 𑀇𑀢𑀺 𑀧𑀭𑀺𑀬𑀸𑀬𑀢𑁄 𑀓𑀼𑀲𑀮𑀸𑀦𑀁 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑀤𑀪𑀸𑀯𑀢𑁄𑀢𑀺 𑀆𑀳 ‘‘𑀦 𑀳𑀺 𑀓𑀼𑀲𑀮𑀸 𑀧𑀳𑀸𑀢𑀩𑁆𑀩𑀸’’𑀢𑀺. 𑀬𑀣𑀸 𑀘 𑀓𑀼𑀲𑀮𑀥𑀫𑁆𑀫𑁂𑀲𑀼, 𑀅𑀩𑁆𑀬𑀸𑀓𑀢𑀥𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀭𑁄𑀥𑀦𑁆𑀢𑀺 𑀅𑀲𑀗𑁆𑀔𑀢𑀥𑀸𑀢𑀼𑀁. 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁄𑀢𑀺 𑀬𑁄 𑀦𑀺𑀭𑁄𑀥𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀢𑀡𑁆𑀳𑀸𑀤𑀺𑀅𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀢𑀁 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀬𑀓𑀫𑁆𑀫𑀸𑀤𑀺𑀲𑀼𑀤𑁆𑀥𑀺𑀬𑀸𑀢𑀺 𑀧𑀼𑀩𑁆𑀩𑀪𑀸𑀕𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀆𑀚𑀻𑀯𑀲𑀼𑀤𑁆𑀥𑀺𑀬𑀸 𑀤𑀽𑀭𑀢𑀭𑀽𑀧𑀦𑀺𑀲𑁆𑀲𑀬𑀢𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀗𑁆𑀕𑀺𑀓𑀁…𑀧𑁂… 𑀧𑀯𑀢𑁆𑀢𑀢𑀁 𑀤𑀻𑀧𑁂𑀢𑀺, 𑀦 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀸𑀧𑀓𑀦𑀺𑀤𑀲𑁆𑀲𑀦𑀦𑁆𑀢𑀺 𑀜𑀸𑀧𑀓𑀪𑀸𑀯𑀦𑀺𑀤𑀲𑁆𑀲𑀦𑀁, 𑀏𑀢𑁂𑀦 ‘‘𑀯𑀘𑀦𑀢𑁄’’𑀢𑀺 𑀇𑀤𑀁 𑀳𑁂𑀢𑀼𑀅𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀘𑀦𑀢𑁄𑀢𑀺 𑀯𑀸 𑀈𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀧𑀝𑀺𑀧𑀤𑀸𑀬 𑀏𑀓𑀤𑁂𑀲𑁄𑀧𑀺 𑀧𑀝𑀺𑀧𑀤𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑀺𑀝𑁆𑀞𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀲𑀗𑁆𑀕𑀸𑀬𑀦𑀯𑀲𑁂𑀦.

𑀛𑀸𑀦𑁂𑀳𑀺 𑀤𑁂𑀲𑀦𑀸𑀧𑀯𑁂𑀲𑁄 ‘‘𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁨𑁭𑁭) 𑀛𑀸𑀦𑀲𑀻𑀲𑁂𑀦 𑀤𑁂𑀲𑀦𑀸𑀯. 𑀢𑀣𑀸 𑀪𑀸𑀯𑀦𑀸𑀧𑀯𑁂𑀲𑁄. 𑀧𑀸𑀴𑀺𑀕𑀫𑀦𑀦𑁆𑀢𑀺 𑀧𑀸𑀴𑀺𑀧𑀯𑀢𑁆𑀢𑀺 𑀧𑀸𑀞𑀤𑁂𑀲𑀦𑀸. 𑀬𑀣𑀸𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀯𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀮𑀩𑁆𑀪𑀫𑀸𑀦𑀯𑀺𑀢𑀓𑁆𑀓𑀸𑀤𑀺𑀥𑀫𑁆𑀫𑀯𑀲𑁂𑀦.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁨𑁧𑁫. 𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲. 𑀏𑀯𑀁 𑀧𑀦𑀸𑀢𑀺 ‘‘𑀅𑀧𑀺𑀘𑁂𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲𑁂𑀯 𑀫𑀕𑁆𑀕𑀲𑀘𑁆𑀘𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀉𑀤𑁆𑀤𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.