𑁩. 𑀥𑀸𑀢𑀼𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀅𑀪𑀺𑀥𑀫𑁆𑀫𑁂 𑀘 𑀆𑀕𑀢𑀸𑀢𑀺 𑀇𑀫𑀲𑁆𑀫𑀺𑀁 𑀥𑀸𑀢𑀼𑀯𑀺𑀪𑀗𑁆𑀕𑁂 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀧𑀼𑀘𑁆𑀙𑀓𑁂𑀲𑀼, 𑀦𑀺𑀓𑁆𑀔𑁂𑀧𑀓𑀡𑁆𑀟𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀸𑀤𑀻𑀲𑀼 𑀘 𑀤𑁂𑀲𑀦𑀸𑀭𑀼𑀴𑁆𑀳𑀸. 𑀬𑀣𑀸 𑀧𑀦 𑀲𑀼𑀢𑁆𑀢𑀦𑁆𑀢𑁂 𑀅𑀪𑀺𑀥𑀫𑁆𑀫𑁂 𑀘 𑀆𑀕𑀢𑀸 𑀔𑀦𑁆𑀥𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀢𑀦𑀺𑀬𑀸𑀫𑁂𑀦 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀲𑁂𑀦 𑀯𑀺𑀪𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀘𑀓𑁆𑀔𑀼𑀥𑀸𑀢𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀲𑁂𑀦 𑀯𑀺𑀪𑀚𑀺𑀢𑀩𑁆𑀩𑀸 𑀲𑀺𑀬𑀼𑀁. 𑀢𑀢𑁆𑀣 𑀔𑀦𑁆𑀥𑀸𑀤𑀻𑀦𑀁 𑀲𑀩𑁆𑀩𑀲𑀗𑁆𑀕𑀸𑀳𑀓𑁄 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀯𑀺𑀲𑀺𑀝𑁆𑀞𑁄 𑀲𑀼𑀢𑁆𑀢𑀦𑁆𑀢𑁂 𑀆𑀕𑀢𑁄 𑀅𑀜𑁆𑀜𑁄 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑁄 𑀦𑀢𑁆𑀣𑀻𑀢𑀺 𑀢𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦𑁂𑀯 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀤𑁂𑀲𑀺𑀢𑀸, 𑀥𑀸𑀢𑀽𑀦𑀁 𑀧𑀦 𑀲𑁄 𑀅𑀢𑁆𑀣𑀻𑀢𑀺 𑀢𑁂 𑀢𑀺𑀡𑁆𑀡𑀁 𑀥𑀸𑀢𑀼𑀙𑀓𑁆𑀓𑀸𑀦𑀁 𑀯𑀲𑁂𑀦 𑀇𑀥 𑀤𑁂𑀲𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑁂𑀲𑁆𑀯𑁂𑀯…𑀧𑁂… 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀸 𑀥𑀸𑀢𑀼𑀬𑁄 𑀙𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀲𑀗𑁆𑀔𑀺𑀧𑀺𑀢𑁆𑀯𑀸’’𑀢𑀺.

𑀓𑀣𑀁 𑀧𑀦 𑀙𑀲𑀼 𑀙𑀲𑀼 𑀥𑀸𑀢𑀽𑀲𑀼 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀯𑀭𑁄𑀥𑁄𑀢𑀺? 𑀲𑀪𑀸𑀯𑀦𑀺𑀲𑁆𑀲𑀬𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀫𑁆𑀧𑀬𑁄𑀕𑀲𑀸𑀫𑀜𑁆𑀜𑀢𑁄. 𑀢𑀢𑁆𑀣 𑀧𑀞𑀫𑀙𑀓𑁆𑀓𑁂 𑀢𑀸𑀯 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄 𑀲𑀪𑀸𑀯𑀢𑁄 𑀨𑁄𑀝𑁆𑀞𑀩𑁆𑀩𑀥𑀸𑀢𑀼. 𑀆𑀧𑁄𑀥𑀸𑀢𑀼𑀆𑀓𑀸𑀲𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀘𑀢𑀼𑀥𑀸𑀢𑀼𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸 𑀦𑀺𑀲𑁆𑀲𑀬𑀸𑀧𑀤𑁂𑀲𑁂𑀦, 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀅𑀯𑀲𑀺𑀝𑁆𑀞𑀸 𑀭𑀽𑀧𑀥𑀸𑀢𑀼𑀬𑁄 𑀲𑀫𑀯𑀭𑀼𑀤𑁆𑀥𑀸, 𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀁𑀲𑀫𑁆𑀧𑀬𑁄𑀕𑀢𑁄 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄𑀢𑀺 𑀏𑀯𑀁 𑀲𑀩𑁆𑀩𑀥𑀸𑀢𑀼𑀲𑀫𑀯𑀭𑁄𑀥𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑁂 𑀙𑀧𑀺 𑀥𑀸𑀢𑀼𑀬𑁄 𑀲𑀪𑀸𑀯𑀢𑁄, 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄, 𑀢𑀁𑀲𑀫𑁆𑀧𑀬𑁄𑀕𑀢𑁄 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀬𑀣𑀸𑀭𑀳𑀁 𑀢𑁂𑀲𑀁 𑀦𑀺𑀲𑁆𑀲𑀬𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑀢𑁄 𑀅𑀯𑀲𑀺𑀝𑁆𑀞𑀥𑀸𑀢𑀼𑀬𑁄 𑀲𑀫𑀯𑀭𑀼𑀤𑁆𑀥𑀸. 𑀢𑀢𑀺𑀬𑀙𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀙𑀲𑀼 𑀙𑀲𑀼 𑀥𑀸𑀢𑀽𑀲𑀼 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀯𑀭𑁄𑀥𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸 𑀥𑀸𑀢𑀼𑀬𑁄 𑀙𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀲𑀗𑁆𑀔𑀺𑀧𑀺𑀢𑁆𑀯𑀸’’𑀢𑀺.

𑀲𑀼𑀜𑁆𑀜𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑁄, 𑀢𑁂𑀦 𑀲𑀲𑀪𑀸𑀯𑀢𑀸𑀬 𑀘 𑀇𑀥 𑀥𑀸𑀢𑀼𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀲𑀼𑀜𑁆𑀜𑁂 𑀲𑀪𑀸𑀯𑀫𑀢𑁆𑀢𑁂 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼𑀲𑀤𑁆𑀤𑁄’’𑀢𑀺. 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄𑀯 𑀆𑀓𑀸𑀲𑁄𑀢𑀺 𑀬𑁂𑀳𑀺 𑀯𑀺𑀯𑀺𑀢𑁆𑀢𑁄, 𑀬𑁂𑀲𑀜𑁆𑀘 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸 𑀢𑁂𑀲𑀁 𑀩𑁆𑀬𑀸𑀧𑀓𑀪𑀸𑀯𑁂 𑀲𑀢𑀺 𑀦 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀅𑀩𑁆𑀬𑀸𑀧𑀺𑀢𑀪𑀸𑀯𑁄’’𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀯𑀼𑀢𑁆𑀢𑀻𑀦𑀺 𑀳𑀺 𑀪𑀽𑀢𑀸𑀦𑀻𑀢𑀺.

𑁧𑁭𑁩. 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀧𑀼𑀭𑀺𑀫𑀢𑁆𑀣𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀤𑁆𑀯𑁂 𑀏𑀯 𑀯𑀸’’𑀢𑀺𑀆𑀤𑀺𑀦𑀸 𑀲𑀫𑀼𑀤𑀸𑀬𑁂𑀦 𑀯𑀺𑀦𑀸 𑀤𑀼𑀢𑀺𑀬𑀢𑁆𑀣𑀫𑀸𑀳. 𑀧𑀘𑁆𑀘𑀢𑁆𑀢𑀁 𑀅𑀢𑁆𑀢𑀦𑀺 𑀚𑀸𑀢𑀢𑀦𑁆𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀢𑀁.

𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀯𑀸 𑀮𑁄𑀫𑀸𑀤𑀺𑀇𑀢𑀭𑀓𑁄𑀝𑁆𑀞𑀸𑀲𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄 𑀯𑀺𑀲𑀼𑀁 𑀏𑀓𑁄 𑀧𑀣𑀯𑀻𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄.

𑀧𑀬𑁄𑀕𑀦𑁆𑀢𑀺 𑀪𑀸𑀯𑀦𑀸𑀧𑀬𑁄𑀕𑀁. 𑀯𑀻𑀭𑀺𑀬𑀦𑁆𑀢𑀺 𑀪𑀸𑀯𑀦𑀸𑀦𑀺𑀧𑁆𑀨𑀸𑀤𑀓𑀁 𑀉𑀲𑁆𑀲𑀸𑀳𑀁. 𑀆𑀬𑀽𑀳𑀦𑀦𑁆𑀢𑀺 𑀢𑀸𑀤𑀺𑀲𑀁 𑀘𑁂𑀢𑀦𑀁.

𑀥𑀸𑀢𑀼𑀧𑀝𑀺𑀓𑁆𑀓𑀽𑀮𑀯𑀡𑁆𑀡𑀫𑀦𑀲𑀺𑀓𑀸𑀭𑀸𑀦𑀦𑁆𑀢𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀯𑀡𑁆𑀡𑀫𑀦𑀲𑀺𑀓𑀸𑀭𑀸𑀦𑀁. 𑀅𑀩𑁆𑀬𑀸𑀧𑀸𑀭𑀢𑀸𑀬𑀸𑀢𑀺 ‘‘𑀅𑀳𑀫𑁂𑀢𑀁 𑀦𑀺𑀧𑁆𑀨𑀸𑀤𑁂𑀫𑀺, 𑀫𑀫 𑀏𑀲𑀸 𑀦𑀺𑀧𑁆𑀨𑀸𑀤𑀦𑀸’’𑀢𑀺 𑀘𑁂𑀢𑀦𑀸𑀭𑀳𑀺𑀢𑀢𑀸𑀬. 𑀓𑀭𑁄𑀦𑁆𑀢𑀻𑀢𑀺 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀲𑀪𑀸𑀯𑀯𑀲𑁂𑀦. 𑀲𑁄 𑀧𑀦 𑀬𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀓𑀓𑁆𑀔𑀴𑀔𑀭𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀓𑀓𑁆𑀔𑀴𑀁 𑀔𑀭𑀺𑀕𑀢𑀦𑁆𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺.

𑀯𑁂𑀓𑀦𑁆𑀢𑀓𑀁 𑀦𑀸𑀫 𑀲𑀩𑁆𑀩𑀮𑁄𑀳𑀘𑁆𑀙𑁂𑀤𑀦𑀲𑀫𑀢𑁆𑀣𑀁 𑀮𑁄𑀳𑀁. 𑀢𑀣𑀸 𑀳𑀺 𑀢𑀁 𑀯𑀺𑀓𑀦𑁆𑀢𑀢𑀺 𑀙𑀺𑀦𑁆𑀤𑀢𑀻𑀢𑀺 𑀯𑀺𑀓𑀦𑁆𑀢𑀁, 𑀯𑀺𑀓𑀦𑁆𑀢𑀫𑁂𑀯 𑀯𑁂𑀓𑀦𑁆𑀢𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀳𑀲𑀤𑀺𑀲𑀦𑁆𑀢𑀺 𑀮𑁄𑀳𑀸𑀓𑀸𑀭𑀁 𑀮𑁄𑀳𑀫𑀮𑀁 𑀯𑀺𑀬 𑀖𑀦𑀲𑀳𑀺𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀸𑀧𑁂𑀢𑁆𑀯𑀸 𑀢𑀸𑀴𑀺𑀢𑀁 𑀧𑀦 𑀙𑀺𑀦𑁆𑀦𑀁 𑀙𑀺𑀦𑁆𑀦𑀁 𑀳𑀼𑀢𑁆𑀯𑀸 𑀯𑀺𑀲𑀭𑀢𑀺, 𑀫𑀼𑀤𑀼 𑀫𑀝𑁆𑀞𑀁 𑀓𑀫𑁆𑀫𑀦𑀺𑀬𑀁 𑀯𑀸 𑀦 𑀳𑁄𑀢𑀺, 𑀢𑁂𑀦 ‘‘𑀮𑁄𑀳𑀯𑀺𑀚𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀺𑀧𑀼𑀢𑀫𑁆𑀩𑀸𑀤𑀻𑀳𑀻𑀢𑀺 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁, 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁, 𑀚𑀲𑀤𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀆𑀭𑀓𑀽𑀝𑀁. 𑀬𑀁 𑀧𑀦 𑀓𑁂𑀯𑀮𑀁 𑀚𑀲𑀤𑀥𑀸𑀢𑀼𑀯𑀺𑀦𑀺𑀕𑁆𑀕𑀢𑀁, 𑀬𑀁 ‘‘𑀧𑀺𑀢𑁆𑀢𑀮’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀬𑀣𑀸𑀯𑀼𑀢𑁆𑀢𑀫𑀺𑀲𑁆𑀲𑀓𑀫𑁂𑀯 𑀧𑀦 𑀕𑀳𑁂𑀢𑁆𑀯𑀸 ‘‘𑀓𑀺𑀢𑁆𑀢𑀺𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀸𑀦𑀁 𑀚𑀸𑀢𑀺𑀢𑁄 𑀅𑀦𑁂𑀓𑀪𑁂𑀤𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀳𑀢𑁆𑀣𑀺𑀓𑀼𑀫𑁆𑀪𑀁 𑀯𑀭𑀸𑀳𑀤𑀸𑀞𑀁 𑀪𑀼𑀚𑀗𑁆𑀕𑀲𑀻𑀲𑀁 𑀯𑀮𑀸𑀳𑀓𑀽𑀝𑀁 𑀯𑁂𑀡𑀼𑀧𑀩𑁆𑀩𑀁 𑀫𑀘𑁆𑀙𑀲𑀺𑀭𑁄 𑀲𑀗𑁆𑀔𑁄 𑀲𑀺𑀧𑁆𑀧𑀻𑀢𑀺 𑀅𑀝𑁆𑀞 𑀫𑀼𑀢𑁆𑀢𑀸𑀬𑁄𑀦𑀺𑀬𑁄. 𑀢𑀢𑁆𑀣 𑀳𑀢𑁆𑀣𑀺𑀓𑀼𑀫𑁆𑀪𑀚𑀸 𑀧𑀻𑀢𑀯𑀡𑁆𑀡𑀸 𑀧𑀪𑀸𑀳𑀻𑀦𑀸. 𑀯𑀭𑀸𑀳𑀤𑀸𑀞𑀚𑀸 𑀯𑀭𑀸𑀳𑀤𑀸𑀞𑀯𑀡𑁆𑀡𑀸𑀯. 𑀪𑀼𑀚𑀗𑁆𑀕𑀲𑀻𑀲𑀚𑀸 𑀦𑀻𑀮𑀸𑀤𑀺𑀯𑀡𑁆𑀡𑀸 𑀲𑀼𑀯𑀺𑀲𑀼𑀤𑁆𑀥𑀸, 𑀯𑀝𑁆𑀝𑀮𑀸 𑀘. 𑀯𑀮𑀸𑀳𑀓𑀚𑀸 𑀪𑀸𑀲𑀼𑀭𑀸 𑀤𑀼𑀩𑁆𑀩𑀺𑀪𑀸𑀕𑀭𑀽𑀧𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀤𑁂𑀯𑀽𑀧𑀪𑁄𑀕𑀸 𑀏𑀯 𑀳𑁄𑀦𑁆𑀢𑀺. 𑀯𑁂𑀡𑀼𑀧𑀩𑁆𑀩𑀚𑀸 𑀓𑀸𑀭𑀨𑀮𑀲𑀫𑀸𑀦𑀯𑀡𑁆𑀡𑀸, 𑀦 𑀪𑀸𑀲𑀼𑀭𑀸, 𑀢𑁂 𑀘 𑀯𑁂𑀴𑀯𑁄 𑀅𑀫𑀦𑀼𑀲𑁆𑀲𑀕𑁄𑀘𑀭𑁂 𑀏𑀯 𑀧𑀤𑁂𑀲𑁂 𑀚𑀸𑀬𑀦𑁆𑀢𑀺. 𑀫𑀘𑁆𑀙𑀲𑀻𑀲𑀚𑀸 𑀧𑀸𑀞𑀻𑀦𑀧𑀺𑀝𑁆𑀞𑀺𑀲𑀫𑀸𑀦𑀯𑀡𑁆𑀡𑀸, 𑀯𑀝𑁆𑀝𑀮𑀸, 𑀮𑀖𑀯𑁄 𑀘 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸, 𑀢𑁂 𑀘 𑀫𑀘𑁆𑀙𑀸 𑀲𑀫𑀼𑀤𑁆𑀤𑀫𑀚𑁆𑀛𑁂𑀬𑁂𑀯 𑀚𑀸𑀬𑀦𑁆𑀢𑀺. 𑀲𑀗𑁆𑀔𑀚𑀸 𑀲𑀗𑁆𑀔𑁄𑀭𑀘𑁆𑀙𑀯𑀺𑀯𑀡𑁆𑀡𑀸, 𑀓𑁄𑀮𑀧𑁆𑀧𑀫𑀸𑀡𑀸𑀧𑀺 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸𑀯. 𑀲𑀺𑀧𑁆𑀧𑀺𑀚𑀸 𑀧𑀦 𑀧𑀪𑀸𑀯𑀺𑀲𑁂𑀲𑀬𑀼𑀢𑁆𑀢𑀸𑀯 𑀳𑁄𑀦𑁆𑀢𑀺 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀯𑀁 𑀚𑀸𑀢𑀺𑀢𑁄 𑀅𑀝𑁆𑀞𑀯𑀺𑀥𑀸𑀲𑀼 𑀫𑀼𑀢𑁆𑀢𑀸𑀲𑀼 𑀬𑀸 𑀫𑀘𑁆𑀙𑀲𑀗𑁆𑀔𑀲𑀺𑀧𑁆𑀧𑀺𑀚𑀸, 𑀢𑀸 𑀲𑀸𑀫𑀼𑀤𑁆𑀤𑀺𑀓𑀸. 𑀪𑀼𑀚𑀗𑁆𑀕𑀚𑀸𑀧𑀺 𑀓𑀸𑀘𑀺 𑀲𑀸𑀫𑀼𑀤𑁆𑀤𑀺𑀓𑀸𑀢𑀺 𑀯𑀤𑀦𑁆𑀢𑀺, 𑀇𑀢𑀭𑀸 𑀅𑀲𑀸𑀫𑀼𑀤𑁆𑀤𑀺𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀲𑀩𑁆𑀩𑀸𑀧𑀺 𑀧𑀦 𑀫𑀼𑀢𑁆𑀢𑀸 𑀫𑀼𑀢𑁆𑀢𑀸 𑀏𑀯𑀸’’𑀢𑀺. 𑀩𑀳𑀼𑀮𑀢𑁄 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀏𑀢𑀁 𑀯𑀼𑀢𑁆𑀢𑀁 ‘‘𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸’’𑀢𑀺. 𑀩𑀳𑀼𑀮𑀜𑁆𑀳𑀺 𑀮𑁄𑀓𑁂 𑀲𑀸𑀫𑀼𑀤𑁆𑀤𑀺𑀓𑀸𑀯 𑀫𑀼𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣𑀸𑀧𑀺 𑀲𑀺𑀧𑁆𑀧𑀺𑀚𑀸𑀯, 𑀇𑀢𑀭𑀸 𑀓𑀤𑀸𑀘𑀺 𑀓𑀸𑀘𑀻𑀢𑀺.

𑁧𑁭𑁪. 𑀇𑀥 𑀦𑀢𑁆𑀣𑀺 𑀦𑀺𑀬𑀫𑁄 𑀓𑁂𑀯𑀮𑀁 𑀤𑁆𑀭𑀯𑀪𑀸𑀯𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑁧𑁭𑁫. 𑀦𑀺𑀲𑀺𑀢𑀪𑀸𑀯𑁂𑀦𑀸𑀢𑀺 𑀲𑀦𑁆𑀢𑀸𑀧𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀦 𑀢𑀺𑀔𑀺𑀡𑀪𑀸𑀯𑁂𑀦. 𑀉𑀲𑁆𑀫𑀸𑀓𑀸𑀭𑀜𑁆𑀳𑀺 𑀦𑀺𑀲𑀸𑀦𑀁 𑀇𑀥 𑀦𑀺𑀲𑀺𑀢𑀪𑀸𑀯𑁄. 𑀧𑀸𑀓𑀢𑀺𑀓𑁄𑀢𑀺 𑀲𑀸𑀪𑀸𑀯𑀺𑀓𑁄 𑀓𑀸𑀬𑀼𑀲𑁆𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀢𑀺. 𑀧𑁂𑀢𑀕𑁆𑀕𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀕𑁆𑀕𑀺. 𑀇𑀥𑀸𑀢𑀺 𑀩𑀸𑀳𑀺𑀭𑀢𑁂𑀚𑁄𑀥𑀸𑀢𑀼𑀓𑀣𑀸𑀬𑀁.

𑁧𑁭𑁬. 𑀯𑀸𑀬𑀦𑀁 𑀩𑀻𑀚𑀦𑀁, 𑀢𑀁 𑀧𑀦 𑀣𑀸𑀫𑀲𑀸 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀯𑁂𑀕𑀕𑀫𑀦𑀯𑀲𑁂𑀦𑀸’’𑀢𑀺. 𑀲𑀫𑀼𑀤𑀻𑀭𑀡𑀁 𑀅𑀮𑁆𑀮𑀧𑀭𑀺𑀲𑁄𑀲𑀦𑀁, 𑀪𑀽𑀢𑀲𑀗𑁆𑀖𑀸𑀢𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀯𑀸.

𑁧𑁭𑁭. 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀅𑀚𑀝𑀸𑀓𑀸𑀲𑀁 𑀦𑀺𑀲𑁆𑀲𑀸𑀬𑁂𑀯 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑀲𑁆𑀲 𑀧𑀭𑀺𑀓𑀫𑁆𑀫𑀓𑀭𑀡𑀦𑁆𑀢𑀺 𑀆𑀳 ‘‘𑀅𑀚𑀝𑀸𑀓𑀸𑀲𑀲𑁆𑀲 𑀘 𑀓𑀣𑀺𑀢𑀢’’𑀦𑁆𑀢𑀺.

𑁧𑁭𑁯. 𑀲𑀼𑀔𑀤𑀼𑀓𑁆𑀔𑀨𑁄𑀝𑁆𑀞𑀩𑁆𑀩𑀲𑀫𑀼𑀝𑁆𑀞𑀸𑀧𑀦𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀁 𑀦𑀺𑀩𑁆𑀩𑀢𑁆𑀢𑀓𑀪𑀽𑀢𑁂𑀦 𑀧𑀘𑁆𑀘𑀬𑀪𑀸𑀯𑁂𑀦. 𑀓𑀲𑁆𑀲 𑀧𑀦 𑀲𑁄 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀲𑀭𑀻𑀭𑀝𑁆𑀞𑀓𑀉𑀢𑀼𑀲𑁆𑀲𑀸’’𑀢𑀺. 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀢𑁂𑀦 𑀳𑀺 𑀓𑀸𑀭𑀡𑀪𑀽𑀢𑁂𑀦 𑀲𑀼𑀔𑀤𑀼𑀓𑁆𑀔𑀨𑁄𑀝𑁆𑀞𑀩𑁆𑀩𑀸𑀦𑀁 𑀬𑀣𑀸𑀯𑀼𑀢𑁆𑀢𑀲𑀫𑀢𑁆𑀣𑀢𑀸 𑀳𑁄𑀢𑀻𑀢𑀺. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀬𑀣𑀸𑀩𑀮𑀁 𑀲𑀭𑀻𑀭𑁂𑀓𑀤𑁂𑀲𑀲𑀓𑀮𑀲𑀭𑀻𑀭’’𑀦𑁆𑀢𑀺 𑀇𑀤𑀁 𑀅𑀦𑀼𑀓𑀟𑁆𑀠𑀢𑀺. 𑀏𑀯𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀽𑀧𑀘𑀸𑀭𑀲𑀺𑀤𑁆𑀥𑁂𑀦 𑀨𑀭𑀡𑀧𑁆𑀧𑀓𑀸𑀭𑁂𑀦. 𑀏𑀢𑁂𑀲𑀦𑁆𑀢𑀺 𑀲𑀼𑀔𑀸𑀤𑀻𑀦𑀁. ‘‘𑀑𑀴𑀸𑀭𑀺𑀓𑀧𑁆𑀧𑀯𑀢𑁆𑀢𑀺 𑀏𑀯 𑀯𑀸 𑀨𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀭𑀼𑀧𑀘𑀸𑀭𑀁 𑀏𑀢𑁂𑀲𑀁 𑀨𑀭𑀡𑀝𑁆𑀞𑀁 𑀤𑀲𑁆𑀲𑁂𑀢𑀺. 𑀉𑀪𑀬𑀯𑀢𑁄𑀢𑀺 𑀲𑀼𑀔𑀤𑀼𑀓𑁆𑀔𑀯𑀢𑁄, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀯𑀢𑁄 𑀘, 𑀨𑀭𑀡𑀸𑀨𑀭𑀡𑀝𑁆𑀞𑀸𑀦𑀯𑀢𑁄 𑀯𑀸.

𑁧𑁮𑁧. 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀗𑁆𑀓𑀧𑁆𑀧𑀦𑁆𑀢𑀺 𑀏𑀢𑀲𑁆𑀫𑀺𑀁 ‘‘𑀲𑀗𑁆𑀓𑀧𑁆𑀧𑁄 𑀓𑀸𑀫𑁄’’𑀢𑀺𑀆𑀤𑀺𑀓𑁂 (𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮) 𑀦𑀺𑀤𑁆𑀤𑁂𑀲𑀧𑀤𑁂𑀲𑁂 𑀯𑀼𑀢𑁆𑀢𑀁 𑀲𑀗𑁆𑀓𑀧𑁆𑀧𑀁. 𑀢𑀢𑁆𑀣 𑀳𑀺 𑀓𑀺𑀮𑁂𑀲𑀓𑀸𑀫𑁄𑀯 ‘‘𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁬.𑁬𑁩; 𑀓𑀣𑀸. 𑁫𑁧𑁩) 𑀯𑀺𑀬. 𑀯𑀢𑁆𑀣𑀼𑀓𑀸𑀫𑀲𑁆𑀲 𑀢𑀣𑀸 𑀢𑀣𑀸 𑀲𑀗𑁆𑀓𑀧𑁆𑀧𑀦𑀢𑁄 𑀧𑀭𑀺𑀓𑀧𑁆𑀧𑀦𑀢𑁄 ‘‘𑀲𑀗𑁆𑀓𑀧𑁆𑀧𑁄’’𑀢𑀺 𑀯𑀼𑀢𑁆𑀢𑁄, 𑀦 𑀯𑀺𑀢𑀓𑁆𑀓𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀝𑀻𑀓𑀸𑀬𑀁 𑀧𑀦 𑀯𑀺𑀢𑀓𑁆𑀓𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀧𑀼𑀭𑀺𑀫𑁄 𑀏𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀘𑁂, 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸, ‘‘𑀓𑀺𑀮𑁂𑀲𑀲𑀦𑁆𑀣𑀯𑀲𑀫𑁆𑀪𑀯𑀢𑁄’’𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀧𑀭𑀢𑁄 𑀘 ‘‘𑀩𑁆𑀬𑀸𑀧𑀸𑀤𑀯𑀘𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀓𑁆𑀔𑀢𑀺. 𑀓𑀺𑀮𑁂𑀲𑀓𑀸𑀫𑁄 𑀯𑀺𑀪𑀢𑁆𑀢𑁄 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀧𑀝𑀺𑀩𑀤𑁆𑀥𑀸𑀢𑀺 𑀏𑀢𑁆𑀣 𑀓𑀸𑀫-𑀲𑀤𑁆𑀤𑁂𑀦 𑀯𑀢𑁆𑀣𑀼𑀓𑀸𑀫𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁧𑁮𑁨. 𑀉𑀪𑀬𑀢𑁆𑀣 𑀉𑀧𑁆𑀧𑀦𑁆𑀦𑁄𑀢𑀺 𑀲𑀢𑁆𑀢𑁂𑀲𑀼, 𑀲𑀗𑁆𑀔𑀸𑀭𑁂𑀲𑀽𑀢𑀺 𑀉𑀪𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀲𑀢𑁆𑀢𑀸𑀓𑀸𑀭𑁄, 𑀲𑀗𑁆𑀔𑀸𑀭𑀸𑀓𑀸𑀭𑁄𑀢𑀺 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀉𑀪𑀬𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑁄. 𑀓𑀫𑁆𑀫𑀧𑀣𑀯𑀺𑀲𑁂𑀲𑁄, 𑀓𑀫𑁆𑀫𑀧𑀣𑀯𑀺𑀦𑀸𑀲𑀓𑁄 𑀘 𑀓𑀫𑁆𑀫𑀧𑀣𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀚𑁆𑀛𑀸𑀲𑀁𑀬𑁄𑀕𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑀺𑀳𑀺𑀁𑀲𑀸𑀬 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀯𑀺𑀳𑀺𑀁𑀲𑀸𑀬𑀸𑀢𑀺 𑀘 𑀯𑀺𑀳𑀺𑀁𑀲𑀸𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀲𑀫𑁆𑀪𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀨𑀭𑀼𑀲𑀯𑀸𑀘𑀸𑀲𑀫𑁆𑀨𑀧𑁆𑀧𑀮𑀸𑀧𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩…𑀧𑁂… 𑀲𑀗𑁆𑀕𑀸𑀳𑀓𑁂𑀳𑀺 𑀓𑀸𑀫𑀦𑁂𑀓𑁆𑀔𑀫𑁆𑀫𑀥𑀸𑀢𑀽𑀳𑀺. 𑀤𑁆𑀯𑁂 𑀤𑁆𑀯𑁂𑀢𑀺 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄, 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀘. ‘‘𑀏𑀢𑁆𑀣𑀸𑀢𑀺 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀸𑀦𑀁 𑀲𑀗𑁆𑀓𑀭𑀪𑀸𑀯𑀲𑁆𑀲 𑀅𑀦𑀺𑀝𑁆𑀞𑀸𑀧𑀚𑁆𑀚𑀦𑀲𑁆𑀲 𑀘 𑀤𑀲𑁆𑀲𑀦𑁂𑀦 𑀧𑀼𑀭𑀺𑀫𑀁𑀬𑁂𑀯 𑀅𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀲𑀫𑁆𑀧𑀸𑀤𑁂𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁮𑁩. 𑀆𑀯𑁂𑀡𑀺𑀓𑀢𑁆𑀣𑁄 𑀅𑀢𑀺𑀲𑀬𑀢𑁆𑀣𑁄 𑀘 𑀯𑀺𑀲𑁂𑀲𑀲𑀤𑁆𑀤𑁄 𑀳𑁄𑀢𑀻𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑀦𑁆𑀢𑀭𑀸𑀲𑀸𑀥𑀸𑀭𑀡𑀁, 𑀦𑀻𑀮𑀸𑀤𑀺𑀲𑀩𑁆𑀩𑀭𑀽𑀧𑀲𑀸𑀥𑀸𑀭𑀡𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀥𑀸𑀭𑀡𑀓𑀸𑀭𑀡𑁂𑀦𑀸𑀧𑀺 𑀳𑀺 𑀦𑀺𑀤𑁆𑀤𑁂𑀲𑁄 𑀳𑁄𑀢𑀺 𑀬𑀣𑀸 ‘‘𑀪𑁂𑀭𑀺𑀲𑀤𑁆𑀤𑁄, 𑀬𑀯𑀗𑁆𑀓𑀼𑀭𑁄’’𑀢𑀺. 𑀅𑀢𑀺𑀲𑀬𑀓𑀸𑀭𑀡𑁂𑀦𑀧𑀺 𑀬𑀣𑀸 ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀓𑀣𑀸. 𑁩𑁫𑁫; 𑀧𑀝𑀺. 𑀫. 𑁨.𑁪𑁪). 𑀥𑀸𑀢𑀼𑀅𑀢𑁆𑀣𑁄 𑀏𑀯𑀸𑀢𑀺 ‘‘𑀥𑀸𑀢𑀼’’𑀇𑀢𑀺 𑀇𑀫𑀲𑁆𑀲 𑀥𑀸𑀢𑀼𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑁄. 𑀥𑀸𑀢𑀼𑀯𑀘𑀦𑀻𑀬𑁄 𑀳𑀺 𑀅𑀢𑁆𑀣𑁄 𑀉𑀧𑀲𑀕𑁆𑀕𑁂𑀦 𑀚𑁄𑀢𑀻𑀬𑀢𑀺.

𑀧𑀼𑀭𑀺𑀫𑁂𑀦 𑀅𑀲𑀤𑀺𑀲𑁄 𑀯𑀺𑀥𑀸𑀦𑀥𑀸𑀭𑀡𑀢𑁆𑀣𑀸𑀦𑀁 𑀧𑀸𑀓𑀝𑁄 𑀪𑁂𑀤𑁄𑀢𑀺. 𑀯𑀺𑀲𑀪𑀸𑀕𑀮𑀓𑁆𑀔𑀡𑀸 𑀯𑀺𑀲𑀤𑀺𑀲𑀲𑀪𑀸𑀯𑀸 𑀅𑀯𑀬𑀯𑀸 𑀪𑀸𑀕𑀸, 𑀢𑁂𑀲𑀼.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀦𑀸𑀧𑀺, 𑀇𑀢𑀭𑀲𑁆𑀲 𑀲𑀩𑁆𑀩𑀸𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯. 𑀥𑀫𑁆𑀫𑀥𑀸𑀢𑀼 𑀧𑀦 𑀯𑁂𑀤𑀦𑀸𑀤𑀺𑀓𑀸 𑀲𑀳𑀚𑀸𑀢𑀸 𑀲𑀳𑀚𑀸𑀢𑀸𑀤𑀺𑀦𑀸, 𑀅𑀲𑀳𑀚𑀸𑀢𑀸 𑀅𑀦𑀦𑁆𑀢𑀭𑀸𑀤𑀺𑀦𑀸, 𑀉𑀧𑀦𑀺𑀲𑁆𑀲𑀬𑁂𑀦 𑀆𑀭𑀫𑁆𑀫𑀡𑀸𑀤𑀺𑀦𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀫𑀦𑁄𑀥𑀸𑀢𑀼𑀥𑀫𑁆𑀫𑀥𑀸𑀢𑀽𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀤𑁆𑀯𑀸𑀭𑀪𑀽𑀢𑀫𑀦𑁄𑀧𑀺 𑀲𑀼𑀢𑁆𑀢𑁂 ‘‘𑀫𑀦𑁄𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀭𑀪𑀽𑀢𑀫𑀦𑁄𑀯𑀲𑁂𑀦 𑀯𑀸’’𑀢𑀺. 𑀢𑀲𑁆𑀲𑀸 𑀫𑀦𑁄𑀥𑀸𑀢𑀼𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀯𑀺𑀲𑁂𑀲𑀦𑀁 𑀤𑀼𑀢𑀺𑀬𑀦𑀬𑀲𑁆𑀲 𑀳𑀻𑀦𑀢𑁆𑀢𑀺𑀓𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀢𑁆𑀢𑀸. 𑀦𑀸𑀦𑀸𑀥𑀸𑀢𑀽𑀦𑀜𑁆𑀘 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀦 𑀳𑀺 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀦𑁆𑀢𑀺 𑀅𑀝𑁆𑀞𑀸𑀭𑀲𑀥𑀸𑀢𑀼𑀯𑀺𑀪𑀸𑀕𑀤𑀲𑁆𑀲𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀦𑁆𑀥𑀸𑀬𑀢𑀦𑀥𑀸𑀢𑀺𑀦𑁆𑀤𑁆𑀭𑀺𑀬𑀸𑀦𑀁𑀬𑁂𑀯 𑀯𑀲𑁂𑀦 𑀲𑀗𑁆𑀔𑁂𑀧𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀁 𑀢𑁂𑀲𑀁 𑀩𑀳𑀼𑀮𑀁 𑀧𑀭𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀲𑀗𑁆𑀕𑀡𑁆𑀳𑀦𑀢𑁄. 𑀲𑀘𑁆𑀘𑀤𑁂𑀲𑀦𑀸 𑀧𑀦 𑀅𑀢𑀺𑀲𑀁𑀔𑀺𑀢𑁆𑀢𑀪𑀸𑀯𑀢𑁄𑀬𑁂𑀯𑁂𑀢𑁆𑀣 𑀩𑀳𑀺𑀓𑀢𑀸.

𑀦𑀺𑀚𑁆𑀚𑀻𑀯𑀲𑁆𑀲𑀸𑀢𑀺𑀆𑀤𑀺 𑀯𑀺𑀲𑁂𑀲𑀢𑁄 𑀲𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀧𑀦𑀢𑁆𑀣𑀸 𑀥𑀸𑀢𑀼𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁄 𑀅𑀜𑁆𑀜𑁂𑀲𑀫𑁆𑀧𑀺 𑀓𑀫𑀯𑀼𑀢𑁆𑀢𑀻𑀦𑀁 𑀥𑀸𑀢𑀽𑀦𑀁 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑁄𑀢𑀺 ‘‘𑀫𑀦𑁄𑀥𑀸𑀢𑀼𑀬𑁂𑀯 𑀯𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀼𑀭𑁂𑀘𑀭𑀸𑀦𑀼𑀘𑀭𑀪𑀸𑀯𑁂𑀢𑀺 𑀧𑀼𑀭𑁂𑀘𑀭𑀸𑀦𑀼𑀘𑀭𑀸𑀪𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑁂𑀧𑀺 𑀓𑁂𑀯𑀮𑀁 𑀅𑀦𑀦𑁆𑀢𑀭𑀧𑀼𑀩𑁆𑀩𑀓𑀸𑀮𑀅𑀦𑀦𑁆𑀢𑀭𑀸𑀧𑀭𑀓𑀸𑀮𑀢𑀸𑀬 𑀫𑀦𑁄𑀥𑀸𑀢𑀼 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺 𑀯𑀼𑀢𑁆𑀢𑀸.

‘‘𑀅𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬𑀸’’𑀢𑀺 𑀏𑀢𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀏𑀓𑀦𑁆𑀢𑀲𑀸𑀭𑀫𑁆𑀫𑀡𑀢𑀸𑀤𑀲𑁆𑀲𑀦𑁂𑀦 ‘‘𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀦𑀻𑀮𑀸𑀤𑀺𑀆𑀪𑀸𑀲𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀁 𑀯𑀺𑀜𑁆𑀜𑀸𑀡𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺.

𑁧𑁮𑁪. 𑀏𑀓𑀦𑀸𑀦𑀸𑀲𑀦𑁆𑀢𑀸𑀦𑀕𑀢𑀸𑀦𑀦𑁆𑀢𑀺 𑀏𑀓𑀲𑀦𑁆𑀢𑀸𑀦𑀕𑀢𑀸𑀦𑀁 𑀅𑀪𑀺𑀦𑁆𑀦𑀲𑀦𑁆𑀢𑀸𑀦𑀕𑀢𑀸𑀦𑀁 𑀤𑁆𑀯𑀸𑀭𑀸𑀦𑀁, 𑀦𑀸𑀦𑀸𑀲𑀦𑁆𑀢𑀸𑀦𑀕𑀢𑀸𑀦𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑀕𑀢𑀸𑀦𑀁 𑀆𑀭𑀫𑁆𑀫𑀡𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀏𑀓𑀦𑀸𑀦𑀸𑀚𑀸𑀢𑀺𑀓𑀢𑁆𑀢𑀸𑀢𑀺 𑀘𑀓𑁆𑀔𑀸𑀤𑀺𑀏𑀓𑁂𑀓𑀚𑀸𑀢𑀺𑀓𑀢𑁆𑀢𑀸 𑀤𑁆𑀯𑀸𑀭𑀸𑀦𑀁, 𑀦𑀻𑀮𑀸𑀤𑀺𑀅𑀦𑁂𑀓𑀚𑀸𑀢𑀺𑀓𑀢𑁆𑀢𑀸 𑀆𑀭𑀫𑁆𑀫𑀡𑀸𑀦𑀁.

𑀘𑀓𑁆𑀔𑀸𑀤𑀺 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀸𑀤𑀺 𑀧𑀦 𑀅𑀦𑁂𑀓𑀫𑁂𑀯 𑀲𑀁𑀳𑀢𑀦𑁆𑀢𑀺 𑀇𑀫𑀲𑁆𑀲 𑀯𑀸 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀯𑀘𑀦𑀪𑁂𑀤𑁄 𑀓𑀢𑁄. 𑀓𑀺𑀁 𑀧𑀦 𑀓𑀸𑀭𑀡𑀁 𑀘𑀓𑁆𑀔𑀸𑀤𑀺 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀸𑀤𑀺 𑀧𑀦 𑀅𑀦𑁂𑀓𑀫𑁂𑀯𑀸𑀢𑀺? 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀢𑁄. 𑀘𑀓𑁆𑀔𑀼 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 𑀳𑁄𑀢𑀺 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲 𑀪𑀸𑀯𑀢𑁄, 𑀅𑀲𑀢𑀺 𑀅𑀪𑀸𑀯𑀢𑁄, 𑀬𑀢𑁄 𑀢𑀁 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀁𑀦𑀺𑀲𑁆𑀲𑀬𑀢𑀸 𑀘𑀲𑁆𑀲 𑀦 𑀏𑀓𑀤𑁂𑀲𑁂𑀦 𑀅𑀮𑁆𑀮𑀻𑀬𑀦𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀸 𑀅𑀭𑀽𑀧𑀪𑀸𑀯𑀢𑁄, 𑀅𑀣 𑀔𑁄 𑀕𑀭𑀼𑀭𑀸𑀚𑀸𑀤𑀻𑀲𑀼 𑀲𑀺𑀲𑁆𑀲𑀭𑀸𑀚𑀧𑀼𑀭𑀺𑀲𑀸𑀤𑀻𑀦𑀁 𑀯𑀺𑀬 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀇𑀢𑀭𑁂 𑀘 𑀧𑀘𑁆𑀘𑀬𑀸 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑁆𑀯𑀸𑀬𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀏𑀓𑀲𑁆𑀫𑀺𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀭𑀽𑀧𑀁 𑀧𑀦 𑀬𑀤𑀺𑀧𑀺 𑀘𑀓𑁆𑀔𑀼 𑀯𑀺𑀬 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂𑀬𑁂𑀯 𑀉𑀧𑀓𑀸𑀭𑀓𑀢𑁆𑀢𑀸, 𑀢𑀣𑀸𑀧𑀺 𑀅𑀦𑁂𑀓𑀫𑁂𑀯 𑀲𑀁𑀳𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀬𑀜𑁆𑀳𑀺 𑀧𑀘𑁆𑀘𑀬𑀥𑀫𑁆𑀫𑀁 𑀲𑀪𑀸𑀯𑀪𑀽𑀢𑀁, 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀫𑀢𑁆𑀢𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀜𑁆𑀜𑁂𑀲𑀜𑁆𑀘 𑀲𑀢𑀺𑀧𑀺 𑀧𑀘𑁆𑀘𑀬𑀪𑀸𑀯𑁂 𑀲𑁄 𑀢𑀲𑁆𑀲 𑀲𑀸𑀭𑀫𑁆𑀫𑀡𑀲𑀪𑀸𑀯𑀢𑁄 𑀬𑀁 𑀓𑀺𑀜𑁆𑀘𑀺 𑀅𑀦𑀸𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀑𑀮𑀼𑀩𑁆𑀪 𑀧𑀯𑀢𑁆𑀢𑀺𑀓𑀸𑀭𑀡𑀢𑀸𑀬 𑀆𑀮𑀫𑁆𑀩𑀦𑀻𑀬𑀢𑁄 𑀆𑀭𑀫𑁆𑀫𑀡𑀁 𑀦𑀸𑀫. 𑀢𑀲𑁆𑀲 𑀬𑀲𑁆𑀫𑀸 𑀬𑀣𑀸 𑀬𑀣𑀸 𑀲𑀪𑀸𑀯𑀽𑀧𑀮𑀤𑁆𑀥𑀺 𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀮𑀸𑀪𑁄, 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀲𑀸 𑀘𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑀪𑀸𑀯𑀽𑀧𑀮𑀤𑁆𑀥𑀺 𑀦 𑀏𑀓𑀤𑁆𑀯𑀺𑀓𑀮𑀸𑀧𑀕𑀢𑀯𑀡𑁆𑀡𑀯𑀲𑁂𑀦𑁂𑀯 𑀳𑁄𑀢𑀺, 𑀦𑀸𑀧𑀺 𑀓𑀢𑀺𑀧𑀬𑀓𑀮𑀸𑀧𑀯𑀡𑁆𑀡𑀯𑀲𑁂𑀦, 𑀅𑀣 𑀔𑁄 𑀆𑀪𑁄𑀕𑀸𑀦𑀼𑀭𑀽𑀧𑀁 𑀆𑀧𑀸𑀣𑀕𑀢𑀯𑀡𑁆𑀡𑀯𑀲𑁂𑀦𑀸𑀢𑀺 𑀅𑀦𑁂𑀓𑀫𑁂𑀯 𑀭𑀽𑀧𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀭𑀽𑀧𑁂 𑀘𑀸’’𑀢𑀺 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀺.

𑀬𑀁 𑀧𑀦 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧) 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀬𑀸𑀤𑀺𑀲𑀁 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀢𑀸𑀤𑀺𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀻𑀤𑀺𑀲𑀁 𑀧𑀦 𑀢𑀦𑁆𑀢𑀺? 𑀲𑀫𑀼𑀤𑀺𑀢𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀆𑀬𑀢𑀦𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀲𑀮𑁆𑀮𑀓𑁆𑀔𑀡𑀸𑀭𑀫𑁆𑀫𑀡𑀸, 𑀦 𑀤𑀩𑁆𑀬𑀲𑀮𑁆𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺, 𑀢𑀁 𑀬𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀦 𑀘𑁂𑀢𑁆𑀣 𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀢𑀸 𑀆𑀲𑀗𑁆𑀓𑀺𑀢𑀩𑁆𑀩𑀸 𑀲𑀫𑀼𑀤𑀸𑀬𑀸𑀪𑁄𑀕𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀲𑀫𑀼𑀤𑀺𑀢𑀸 𑀧𑀦 𑀯𑀡𑁆𑀡𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀣𑀁 𑀧𑀦 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀸 𑀲𑀫𑀼𑀤𑀺𑀢𑀸 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀦 𑀳𑀺 𑀧𑀘𑁆𑀘𑁂𑀓𑀁 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑁆𑀥𑀸 𑀲𑀫𑀼𑀤𑀺𑀢𑀸 𑀧𑀲𑁆𑀲𑀦𑁆𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀸𑀦𑀁 𑀲𑀺𑀯𑀺𑀓𑀸𑀯𑀳𑀦𑀸𑀤𑀻𑀲𑀼 𑀲𑀫𑀢𑁆𑀣𑀢𑀸𑀬 𑀤𑀲𑁆𑀲𑀦𑀢𑁄. 𑀓𑁂𑀲𑀸𑀤𑀻𑀦𑀜𑁆𑀘 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀸𑀦𑀁 𑀧𑀘𑁆𑀘𑁂𑀓𑀁 𑀯𑀡𑁆𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀫𑀼𑀤𑀺𑀢𑀸𑀦𑀁 𑀢𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀪𑀺𑀬𑁆𑀬𑁄𑀧𑀺 𑀢𑁂𑀲𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸 𑀧𑀭𑀺𑀩𑁆𑀬𑀢𑁆𑀢𑀸. 𑀏𑀢𑁂𑀦 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀭𑀫𑀸𑀡𑀼𑀭𑀽𑀧𑀁 𑀆𑀭𑀫𑁆𑀫𑀡𑀁, 𑀉𑀤𑀸𑀳𑀼 𑀢𑀁𑀲𑀫𑀼𑀤𑀸𑀬𑁄𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀬𑀫𑁂𑀯 𑀦𑀬𑁄.

𑀏𑀯𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 ‘‘𑀫𑀦𑁄𑀥𑀸𑀢𑀼𑀬𑀸𑀧𑀻’’𑀢𑀺 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀚𑀯𑀦𑀧𑀭𑀺𑀬𑁄𑀲𑀸𑀦𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁂𑀯 𑀲𑀫𑁆𑀧𑀺𑀡𑁆𑀟𑀻𑀬𑀢𑀺, 𑀅𑀣 𑀔𑁄 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀲𑀗𑁆𑀔𑀸𑀢𑀸𑀧𑀺 𑀲𑀫𑁆𑀧𑀺𑀡𑁆𑀟𑀻𑀬𑀢𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀲𑀫𑁆𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀢𑀻𑀢𑀺 𑀏𑀯𑀁 𑀅𑀜𑁆𑀜𑀫𑀦𑁄𑀥𑀸𑀢𑀼𑀧𑁆𑀧𑀯𑀢𑁆𑀢𑀺𑀬𑀸 𑀑𑀭𑀁 𑀧𑀯𑀢𑁆𑀢𑀘𑀺𑀢𑁆𑀢𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀸𑀤𑀲𑁆𑀲𑀦𑁂 𑀲𑀢𑀺. 𑀲𑀢𑀺𑀧𑀺 𑀫𑀦𑀲𑁄 𑀲𑀫𑁆𑀪𑀽𑀢𑀪𑀸𑀯𑁂 𑀫𑀦𑁄𑀥𑀸𑀢𑀼𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀧𑁆𑀧𑀲𑀗𑁆𑀕𑁄 𑀦 𑀳𑁄𑀢𑀺𑀬𑁂𑀯 𑀢𑀁𑀲𑀪𑀸𑀯𑀲𑁆𑀲𑁂𑀯 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂𑀦𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀲𑀤𑀺𑀲𑀲𑀪𑀸𑀯𑁂𑀦. 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂𑀦 𑀘𑀸𑀢𑀺 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂𑀦 𑀘. 𑀇𑀤𑀸𑀦𑀺 𑀏𑀓𑀢𑁆𑀢𑀕𑁆𑀕𑀳𑀡𑀁 𑀯𑀺𑀦𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑀦𑀻𑀢𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺 𑀲𑀤𑀺𑀲𑀢𑀸𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑁆𑀲. 𑀅𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀸𑀲𑀺𑀤𑁆𑀥𑀺𑀢𑁄𑀢𑀺 𑀫𑀦𑁄𑀥𑀸𑀢𑀼𑀪𑀸𑀯𑀸𑀲𑀺𑀤𑁆𑀥𑀺𑀢𑁄. 𑀦 𑀳𑀺 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀇𑀤𑀁 𑀯𑀘𑀦𑀁 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀫𑀦𑁄𑀥𑀸𑀢𑀼𑀪𑀸𑀯𑀁 𑀲𑀸𑀥𑁂𑀢𑀺. 𑀲𑀺𑀤𑁆𑀥𑁂 𑀳𑀺 𑀫𑀦𑁄𑀥𑀸𑀢𑀼𑀪𑀸𑀯𑁂 𑀢𑀁 𑀢𑀲𑁆𑀲 𑀦𑀺𑀯𑀢𑁆𑀢𑀓𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀦 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀤𑀻𑀧𑀓𑀁 𑀯𑀘𑀦𑀁 𑀢𑀸𑀤𑀺𑀲𑀸𑀬 𑀫𑀦𑁄𑀥𑀸𑀢𑀼𑀬𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀫𑁂𑀯 𑀤𑀻𑀧𑁂𑀬𑁆𑀬𑀸𑀢𑀺 𑀓𑀣𑀁 𑀢𑀲𑁆𑀲𑀸 𑀦𑀺𑀯𑀢𑁆𑀢𑀓𑀁 𑀲𑀺𑀬𑀸𑀢𑀺 𑀆𑀳 ‘‘𑀦 𑀳𑀺 𑀬𑀁 𑀘𑁄𑀤𑀻𑀬𑀢𑀺, 𑀢𑀤𑁂𑀯 𑀧𑀭𑀺𑀳𑀸𑀭𑀸𑀬 𑀳𑁄𑀢𑀻’’𑀢𑀺.

𑀬𑀤𑀺 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀸𑀧𑀢𑁆𑀢𑀺 𑀏𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀫𑀦𑁄𑀥𑀸𑀢𑀼𑀬𑀸𑀧𑀻’’𑀢𑀺𑀆𑀤𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀫𑀦𑁄𑀥𑀸𑀢𑀽𑀳𑀺 𑀘 𑀯𑀺𑀲𑀺𑀝𑁆𑀞𑁄 𑀲𑀪𑀸𑀯𑁄 𑀧𑀜𑁆𑀘𑀯𑀺𑀜𑁆𑀜𑀸𑀡…𑀧𑁂… 𑀲𑀪𑀸𑀯𑁄, 𑀢𑀲𑁆𑀲 𑀯𑀲𑁂𑀦. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀪𑀯𑀗𑁆𑀕𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀚𑀯𑀦𑀸𑀯𑀲𑀸𑀦𑀸𑀦𑀻𑀢𑀺 𑀯𑀸 𑀚𑀯𑀦𑀸𑀭𑀫𑁆𑀫𑀡𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀕𑀳𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀳𑀺 𑀯𑀸’’𑀢𑀺𑀆𑀤𑀺.

𑀯𑀺𑀲𑀼𑀁 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀫𑁆𑀧𑀺 𑀬𑀤𑀺𑀧𑀺 𑀭𑀽𑀧𑀸𑀤𑀺𑀯𑀺𑀲𑀬𑀁 𑀳𑁄𑀢𑀺, 𑀚𑀯𑀦𑀁 𑀯𑀺𑀬 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀧𑀦 𑀦 𑀳𑁄𑀢𑀻𑀢𑀺 𑀏𑀤𑀺𑀲𑁂 𑀞𑀸𑀦𑁂 𑀯𑀺𑀲𑀼𑀁 𑀓𑀸𑀢𑀩𑁆𑀩𑀫𑁂𑀯. 𑀫𑀦𑁄 𑀘𑀸𑀢𑀺 𑀘-𑀲𑀤𑁆𑀤𑁄 ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀅𑀣 𑀔𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸𑀢𑀺 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 ‘‘𑀧𑀜𑁆𑀘𑀧𑀡𑁆𑀡𑀸𑀲 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁧𑁫𑁦; 𑁧𑁬𑁮) 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂 𑀤𑀲𑁆𑀲𑀺𑀬𑀫𑀸𑀦𑁂 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀯𑀲𑁂𑀦 𑀢𑀁 𑀢𑀁 𑀲𑀫𑀼𑀤𑀸𑀬𑀁 𑀏𑀓𑁂𑀓𑀁 𑀥𑀫𑁆𑀫𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀫𑀽𑀮𑀝𑀻. 𑁧𑁫𑁦) 𑀢𑀤𑀢𑁆𑀣𑀲𑁆𑀲 𑀔𑀦𑁆𑀥𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.