𑁨. 𑀆𑀬𑀢𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁪. 𑀅𑀲𑀸𑀥𑀸𑀭𑀡𑀢𑁄𑀢𑀺 𑀆𑀯𑁂𑀡𑀺𑀓𑀢𑁄. 𑀢𑀁 𑀦𑁂𑀲𑀁 𑀅𑀲𑀸𑀥𑀸𑀭𑀡𑀪𑀸𑀯𑀁 𑀯𑀺𑀧𑀓𑁆𑀔𑀯𑀲𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀸𑀥𑀸𑀭𑀡𑀁 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀯𑀺𑀬𑀸’’𑀢𑀺. 𑀅𑀣 𑀯𑀸 𑀘𑀓𑁆𑀔𑀸𑀤𑀺𑀅𑀢𑁆𑀣𑁄 𑀏𑀯 𑀘𑀓𑁆𑀔𑀸𑀤𑀺𑀲𑀤𑁆𑀤𑀯𑀺𑀲𑁂𑀲𑀺𑀢𑁄 𑀆𑀬𑀢𑀦𑀢𑁆𑀣𑁄𑀢𑀺 𑀢𑀁 𑀢𑀸𑀤𑀺𑀲𑀁 𑀆𑀬𑀢𑀦𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀯𑀺𑀬 𑀅𑀲𑀸𑀥𑀸𑀭𑀡𑀢𑁄’’𑀢𑀺.

𑀬𑀤𑀺 𑀯𑀺𑀲𑀬𑀲𑁆𑀲𑀸𑀤𑀦𑀢𑁆𑀣𑁄 𑀘𑀓𑁆𑀔𑀼-𑀲𑀤𑁆𑀤𑁄, 𑀲𑁄𑀢𑀸𑀤𑀻𑀦𑀫𑁆𑀧𑀺 𑀅𑀬𑀁 𑀲𑀫𑀜𑁆𑀜𑀸 𑀲𑀺𑀬𑀸𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀢𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀘𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀢𑀺, 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬, 𑀯𑀺𑀪𑀸𑀯𑁂𑀦𑁆𑀢𑀁 𑀯𑀺𑀬 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀫𑀺𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀯𑀺𑀬 𑀲𑀯𑀺𑀕𑁆𑀕𑀳𑀫𑀺𑀯 𑀲𑀩𑀺𑀫𑁆𑀩𑀓𑀁 𑀯𑀺𑀬 𑀯𑀡𑁆𑀡𑀯𑀸𑀘𑀓𑁄 𑀭𑀽𑀧-𑀲𑀤𑁆𑀤𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀡𑀁 𑀯𑀸 𑀭𑀽𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺.

𑀯𑀘𑀦𑀫𑁂𑀯𑀸𑀢𑀺 𑀲𑀯𑀺𑀜𑁆𑀜𑀢𑁆𑀢𑀺𑀓𑀲𑀤𑁆𑀤𑀫𑁂𑀯. 𑀕𑀫𑀻𑀬𑀢𑀻𑀢𑀺 𑀉𑀧𑀦𑀻𑀬𑀢𑀺. 𑀅𑀚𑁆𑀛𑁄𑀳𑀭𑀡𑀲𑁆𑀲 𑀭𑀲𑀕𑁆𑀕𑀳𑀡𑀫𑀽𑀮𑀢𑀸𑀯𑀘𑀦𑁂𑀦 𑀭𑀲𑀲𑁆𑀲 𑀧𑀭𑀫𑁆𑀧𑀭𑀸𑀬 𑀚𑀻𑀯𑀺𑀢𑀳𑁂𑀢𑀼𑀢𑀁 𑀤𑀲𑁆𑀲𑁂𑀢𑀺. 𑀭𑀲𑀦𑀺𑀫𑀺𑀢𑁆𑀢𑀜𑁆𑀳𑀺 𑀭𑀲𑀕𑁆𑀕𑀳𑀡𑀁, 𑀭𑀲𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀡𑀁, 𑀢𑀁𑀦𑀺𑀫𑀺𑀢𑁆𑀢𑀁 𑀚𑀻𑀯𑀺𑀢𑀦𑁆𑀢𑀺. 𑀭𑀲𑀕𑁆𑀕𑀳𑀡𑀫𑀽𑀮𑀢𑀸 𑀘 𑀅𑀚𑁆𑀛𑁄𑀳𑀭𑀡𑀲𑁆𑀲 𑀬𑁂𑀪𑀼𑀬𑁆𑀬𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺 𑀏𑀢𑁂𑀦 𑀨𑀮𑀦𑁆𑀢𑀺 𑀤𑁂𑀲𑁄, 𑀳𑁂𑀢𑀽𑀢𑀺 𑀆𑀳 ‘‘𑀉𑀧𑁆𑀧𑀢𑁆𑀢𑀺𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡’’𑀦𑁆𑀢𑀺. 𑀢𑀣𑀸𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑁆𑀧𑀓𑀸𑀭𑁂𑀦. 𑀫𑀦𑁄𑀕𑁄𑀘𑀭𑀪𑀽𑀢𑀸𑀢𑀺 𑀫𑀦𑀲𑁄 𑀏𑀯 𑀕𑁄𑀘𑀭𑀪𑀽𑀢𑀸. 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑁂𑀯𑀸𑀢𑀺 𑀅𑀦𑀼𑀪𑀯𑀦𑀸𑀤𑀺𑀯𑀺𑀲𑁂𑀲𑀮𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀪𑀸𑀯𑀲𑀗𑁆𑀔𑀸𑀢𑀲𑀸𑀥𑀸𑀭𑀡𑀮𑀓𑁆𑀔𑀡𑁂𑀦𑁂𑀯. 𑀏𑀓𑀸𑀬𑀢𑀦𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲 𑀏𑀓𑀲𑀪𑀸𑀯𑀢𑁆𑀢𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀘𑀦𑁂 𑀧𑀬𑁄𑀚𑀦𑀸𑀪𑀸𑀯𑀸. 𑀤𑁆𑀯𑀸𑀭𑀸𑀮𑀫𑁆𑀩𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀸 𑀳𑀺 𑀆𑀬𑀢𑀦𑀤𑁂𑀲𑀦𑀸𑀢𑀺.

𑀧𑀼𑀩𑁆𑀩𑀦𑁆𑀢𑀢𑁄𑀢𑀺 𑀧𑀼𑀭𑀺𑀫𑀪𑀸𑀕𑀢𑁄 𑀧𑀸𑀓𑀪𑀸𑀯𑀢𑁄. 𑀧𑀸𑀓𑀪𑀸𑀯𑁄 𑀳𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑁄, 𑀯𑀺𑀤𑁆𑀥𑀁𑀲𑀸𑀪𑀸𑀯𑁄 𑀅𑀧𑀭𑀦𑁆𑀢𑁄.

𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀻𑀲𑀼 𑀆𑀬𑀢𑀦-𑀲𑀤𑁆𑀤𑁄 𑀦 𑀆𑀬𑀢𑀦𑀢𑁆𑀣𑀸𑀤𑀻𑀲𑀼 𑀯𑀺𑀬 𑀧𑀤𑀢𑁆𑀣𑀯𑀺𑀯𑀭𑀡𑀫𑀼𑀔𑁂𑀦 𑀧𑀯𑀢𑁆𑀢𑁄, 𑀅𑀣 𑀔𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀯𑀖𑀭𑀸𑀤𑀺𑀓𑁂 𑀦𑀺𑀭𑀼𑀴𑁆𑀳𑀢𑀸𑀬 𑀏𑀯𑀫𑀢𑁆𑀣𑁄𑀢𑀺 𑀆𑀳 ‘‘𑀭𑀼𑀴𑁆𑀳𑀺𑀯𑀲𑁂𑀦 𑀆𑀬𑀢𑀦𑀲𑀤𑁆𑀤𑀲𑁆𑀲𑀢𑁆𑀣𑀁 𑀯𑀢𑁆𑀢𑀼’’𑀦𑁆𑀢𑀺. 𑀫𑀦𑁄𑀢𑀺 𑀤𑁆𑀯𑀸𑀭𑀪𑀽𑀢𑀫𑀦𑁄. 𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀲𑀤𑀺𑀲𑁄 𑀦𑀺𑀲𑁆𑀲𑀬𑁄, 𑀲𑀤𑀺𑀲𑀢𑀸 𑀘 𑀨𑀮𑀲𑁆𑀲 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀤𑀝𑁆𑀞𑀩𑁆𑀩𑀸. 𑀯𑀘𑀦𑀻𑀬𑀢𑁆𑀣𑁄 𑀪𑀸𑀯𑀢𑁆𑀣𑁄.

𑀢𑀸𑀯𑀢𑁆𑀯𑀢𑁄𑀢𑀺 𑀢𑀢𑁆𑀢𑀓𑀢𑁄. 𑀊𑀦𑀘𑁄𑀤𑀦𑀸𑀢𑀺 𑀤𑁆𑀯𑀸𑀤𑀲𑀢𑁄 𑀊𑀦𑀸𑀦𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀘𑁄𑀤𑀦𑀸. 𑀬𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁 𑀥𑀫𑁆𑀫𑀚𑀸𑀢𑀁 𑀥𑀫𑁆𑀫𑀸𑀬𑀢𑀦𑀁, 𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀥𑀫𑁆𑀫𑀸𑀬𑀢𑀦𑀪𑀸𑀯𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀢𑀺𑀧𑀻’’𑀢𑀺𑀆𑀤𑀺. 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀻𑀢𑀺 𑀦 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀯 𑀅𑀲𑀸𑀥𑀸𑀭𑀡𑀁, 𑀅𑀣 𑀔𑁄 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀘𑀦𑀲𑁂𑀲𑁄.

𑀬𑁂𑀪𑀼𑀬𑁆𑀬𑀲𑀳𑀼𑀧𑁆𑀧𑀢𑁆𑀢𑀺𑀆𑀤𑀻𑀳𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀓𑀲𑁆𑀲𑀘𑀺 𑀓𑀤𑀸𑀘𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀆𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀦 𑀧𑀳𑀸𑀦𑀓𑁆𑀓𑀫𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄, 𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀅𑀓𑀼𑀲𑀮𑀸𑀦𑀁, 𑀏𑀓𑀘𑁆𑀘𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄, 𑀦 𑀪𑀽𑀫𑀺𑀓𑁆𑀓𑀫𑁄 𑀅𑀟𑁆𑀠𑁂𑀓𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀢𑁆𑀢𑀸, 𑀇𑀢𑀭𑁂𑀲𑀁 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀏𑀓𑀘𑁆𑀘𑀲𑁆𑀲 𑀮𑁄𑀓𑀼𑀢𑁆𑀢𑀭𑀪𑀸𑀯𑀢𑁄 𑀘. 𑀏𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀺𑀅𑀬𑀼𑀢𑁆𑀢𑀺𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀪𑀸𑀯𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀢𑁂 ‘‘𑀫𑀬𑁆𑀳𑀁 𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀪𑀽𑀢𑀸 𑀘𑀓𑁆𑀔𑀸𑀤𑀬𑁄 𑀬𑀣𑀸 𑀅𑀚𑁆𑀛𑀢𑁆𑀢𑀺𑀓𑀢𑀸𑀬, 𑀏𑀯𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀓𑀭𑀇𑀦𑁆𑀤𑁆𑀭𑀺𑀬𑀢𑀸 𑀘 𑀧𑀥𑀸𑀦𑀸𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁂𑀦, 𑀯𑀺𑀲𑀬𑀺𑀪𑀸𑀯𑁂𑀦 𑀘𑀸’’𑀢𑀺. 𑀖𑀸𑀦𑀸𑀤𑀺𑀓𑁆𑀓𑀫𑁂𑀦𑀸𑀢𑀺 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄𑀢𑀺 𑀇𑀫𑀺𑀦𑀸 𑀓𑀫𑁂𑀦.

𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀫𑀦𑁄 𑀧𑀦 𑀓𑀺𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀓𑀺𑀜𑁆𑀘𑀺 𑀬𑀸𑀯𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼𑀧𑀺 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀘𑀢𑁆𑀢𑀸𑀭𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀢𑀢𑁄 𑀪𑀽𑀢𑀭𑀽𑀧𑀸𑀭𑀫𑁆𑀫𑀡𑀁. 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀤𑀽𑀭𑀢𑀭𑁂 𑀤𑀽𑀭𑁂, 𑀲𑀻𑀖𑀢𑀭𑀁 𑀲𑀻𑀖𑀜𑁆𑀘 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀤𑀻𑀧𑀦𑀢𑁆𑀣𑀁 𑀘𑀓𑁆𑀔𑀸𑀤𑀻𑀦𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀘𑀓𑁆𑀔𑀼𑀲𑁄𑀢𑀤𑁆𑀯𑀬𑀜𑁆𑀳𑀺 𑀤𑀽𑀭𑀕𑁄𑀘𑀭𑀦𑁆𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀘𑀓𑁆𑀔𑀼 𑀤𑀽𑀭𑀢𑀭𑀕𑁄𑀘𑀭𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀲𑁆𑀲𑀦𑁆𑀢𑁄𑀧𑀺 𑀳𑀺 𑀤𑀽𑀭𑀢𑀭𑁂 𑀦𑀤𑀺𑀲𑁄𑀢𑀁 𑀦 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀖𑀸𑀦𑀚𑀺𑀯𑁆𑀳𑀸𑀲𑀼𑀧𑀺 𑀖𑀸𑀦𑀁 𑀲𑀻𑀖𑀢𑀭𑀯𑀼𑀢𑁆𑀢𑀻𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀼𑀭𑀢𑁄 𑀞𑀧𑀺𑀢𑀫𑀢𑁆𑀢𑀲𑁆𑀲 𑀳𑀺 𑀪𑁄𑀚𑀦𑀲𑁆𑀲 𑀕𑀦𑁆𑀥𑁄 𑀕𑀬𑁆𑀳𑀢𑀻𑀢𑀺. 𑀬𑀣𑀸𑀞𑀸𑀦𑀁 𑀯𑀸 𑀢𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀭𑀻𑀭𑁂 𑀲𑀩𑁆𑀩𑀼𑀧𑀭𑀺 𑀘𑀓𑁆𑀔𑀼𑀲𑁆𑀲 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀲 𑀅𑀥𑁄 𑀲𑁄𑀢𑀲𑁆𑀲, 𑀢𑀲𑁆𑀲 𑀅𑀥𑁄 𑀖𑀸𑀦𑀲𑁆𑀲, 𑀢𑀲𑁆𑀲 𑀅𑀥𑁄 𑀚𑀺𑀯𑁆𑀳𑀸𑀬, 𑀢𑀣𑀸 𑀓𑀸𑀬𑀲𑁆𑀲 𑀬𑁂𑀪𑀼𑀬𑁆𑀬𑁂𑀦, 𑀫𑀦𑁄 𑀧𑀦 𑀅𑀭𑀽𑀧𑀻𑀪𑀸𑀯𑀢𑁄 𑀲𑀩𑁆𑀩𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀢𑀁𑀢𑀁𑀕𑁄𑀘𑀭𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲𑀸𑀦𑀦𑁆𑀢𑀭𑀁 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀏𑀯𑀫𑁆𑀧𑀺 𑀇𑀫𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄𑀢𑀺 𑀳𑀤𑀬𑀯𑀢𑁆𑀣𑀼𑀪𑁂𑀤𑀢𑁄. 𑀬𑀜𑁆𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀏𑀓𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀦 𑀢𑀤𑁂𑀯 𑀦𑀺𑀲𑁆𑀲𑀸𑀬 𑀅𑀜𑁆𑀜𑀁 𑀧𑀯𑀢𑁆𑀢𑀢𑀺. 𑀦𑀺𑀤𑁆𑀤𑁂𑀲𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀺𑀤𑁆𑀤𑁂𑀲𑀯𑀲𑁂𑀦. 𑀬𑁄𑀚𑁂𑀢𑀩𑁆𑀩𑀁 ‘‘𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀪𑀸𑀕’’𑀦𑁆𑀢𑀺𑀆𑀤𑀺𑀦𑀸.

𑀲𑀪𑀸𑀯𑁄𑀢𑀺 𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀜𑁆𑀘 𑀬𑁄𑀕𑁆𑀬𑀢𑀸. 𑀓𑀸𑀭𑀡𑀲𑀫𑀢𑁆𑀣𑀢𑀸𑀢𑀺 𑀓𑀸𑀭𑀡𑀪𑀽𑀢𑀸 𑀲𑀫𑀢𑁆𑀣𑀢𑀸 𑀧𑀘𑁆𑀘𑀬𑀪𑀸𑀯𑁄. 𑀤𑁆𑀯𑀸𑀭𑀸𑀤𑀺𑀪𑀸𑀯𑁄𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑁂 𑀤𑁆𑀯𑀸𑀭𑀯𑀼𑀢𑁆𑀢𑀺𑀪𑀸𑀯𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀅𑀢𑁆𑀣𑁂. 𑀬𑀲𑁆𑀫𑀸𑀢𑀺 𑀬𑀸𑀬 𑀥𑀫𑁆𑀫𑀢𑀸𑀬 𑀬𑁂𑀦 𑀤𑁆𑀯𑀸𑀭𑀸𑀤𑀺𑀪𑀸𑀯𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀲𑀫𑁆𑀪𑀯𑀦𑀯𑀺𑀲𑁂𑀲𑀦𑀦𑁆𑀢𑀺 𑀓𑀺𑀭𑀺𑀬𑀸𑀬 𑀧𑀭𑀸𑀫𑀲𑀦𑀫𑀸𑀳. 𑀬𑀁 𑀲𑀫𑁆𑀪𑀯𑀦𑀁, 𑀥𑀫𑁆𑀫𑀢𑀸𑀯𑁂𑀲𑀸𑀢𑀺 𑀅𑀢𑁆𑀣𑁄. 𑀭𑀺𑀢𑁆𑀢𑀓𑀸𑀦𑁂𑀯𑀸𑀢𑀺 𑀥𑀼𑀯𑀸𑀤𑀺𑀪𑀸𑀯𑀭𑀺𑀢𑁆𑀢𑀓𑀸𑀦𑁂𑀯. 𑀯𑀺𑀲𑀫𑀸𑀤𑀻𑀲𑀼 𑀅𑀚𑁆𑀛𑀸𑀲𑀬𑁄 𑀏𑀢𑁂𑀲𑀦𑁆𑀢𑀺 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺, 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑀸𑀦𑀺, 𑀘𑀓𑁆𑀔𑀸𑀤𑀻𑀦𑀺. 𑀯𑀺𑀲𑀫𑀪𑀸𑀯…𑀧𑁂… 𑀯𑀦𑀪𑀸𑀯𑁂𑀳𑀻𑀢𑀺 𑀯𑀺𑀲𑀫𑀪𑀸𑀯𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀅𑀳𑀺𑀆𑀤𑀺𑀲𑀤𑀺𑀲𑀼𑀧𑀸𑀤𑀺𑀦𑁆𑀦𑀥𑀫𑁆𑀫𑁂𑀳𑀺 𑀘𑀓𑁆𑀔𑀸𑀤𑀻𑀳𑀺, 𑀯𑀦𑀲𑀦𑁆𑀦𑀺𑀲𑁆𑀲𑀺𑀢𑀫𑀓𑁆𑀓𑀝𑀲𑀤𑀺𑀲𑁂𑀦 𑀘𑀺𑀢𑁆𑀢𑁂𑀦 𑀘 𑀅𑀪𑀺𑀭𑀫𑀺𑀢𑀢𑁆𑀢𑀸. 𑀯𑀦𑀪𑀸𑀯𑁄𑀢𑀺 𑀳𑀺 𑀯𑀦𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀦𑁆𑀢𑀯𑀺𑀯𑀺𑀢𑁆𑀢𑀢𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑀺𑀭𑀳𑁄. 𑀉𑀧𑁆𑀧𑀸𑀤𑀢𑁄 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁄 𑀳𑀺 𑀇𑀥 𑀧𑀼𑀭𑀺𑀫𑀦𑁆𑀢𑁄. 𑀅𑀧𑀭𑀦𑁆𑀢𑁂𑀢𑀺 𑀅𑀧𑀭𑀪𑀸𑀕𑁂, 𑀪𑀗𑁆𑀕𑀢𑁄 𑀉𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑀺 𑀲𑀪𑀸𑀯𑀥𑀫𑁆𑀫𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂’’𑀢𑀺 (𑀫𑀳𑀸𑀦𑀺. 𑁧𑁦). 𑀲𑀤𑀸 𑀅𑀪𑀸𑀯𑁄𑀢𑀺 𑀦 𑀲𑀤𑀸 𑀅𑀪𑀸𑀯𑀧𑀢𑀺𑀝𑁆𑀞𑀸𑀧𑀦𑀁 𑀲𑀩𑁆𑀩𑀓𑀸𑀮𑀫𑁆𑀧𑀺 𑀦𑀢𑁆𑀣𑀻𑀢𑀺, 𑀅𑀣 𑀔𑁄 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀤𑀸𑀪𑀸𑀯𑀧𑀝𑀺𑀓𑁆𑀔𑁂𑀧𑁄𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀮𑀓𑁆𑀔𑀡’’𑀦𑁆𑀢𑀺. 𑀲𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳. 𑀯𑀺𑀧𑀭𑀺𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑀚𑀭𑀸𑀯𑀢𑁆𑀣𑀸𑀳𑀺 𑀲𑀦𑁆𑀢𑀸𑀦𑀁 𑀯𑀺𑀦𑀸 𑀦 𑀯𑀺𑀓𑀸𑀭𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀲𑀦𑁆𑀢𑀸𑀦𑀯𑀺𑀓𑀸𑀭𑀸𑀧𑀢𑁆𑀢𑀺 𑀯𑀸’’𑀢𑀺.

𑀚𑀸𑀢𑀺𑀥𑀫𑁆𑀫𑀢𑀸𑀤𑀻𑀳𑀻𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀺𑀲𑀪𑀸𑀯𑀢𑀸𑀳𑀺. 𑀅𑀦𑀺𑀝𑁆𑀞𑀢𑀸𑀢𑀺 𑀦 𑀇𑀝𑁆𑀞𑀢𑀸, 𑀤𑀼𑀓𑁆𑀔𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 ‘‘𑀧𑀝𑀺𑀧𑀻𑀴𑀦𑀝𑁆𑀞𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀤𑀼𑀓𑁆𑀔𑀮𑀓𑁆𑀔𑀡𑀁. 𑀧𑀘𑁆𑀘𑀬𑀯𑀲𑁂𑀦 𑀤𑀼𑀓𑁆𑀔𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀦𑀁 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀲𑁂𑀦 𑀤𑀼𑀓𑁆𑀔𑀫𑀢𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲 𑀧𑀻𑀴𑀦𑀢𑁄 𑀤𑀼𑀓𑁆𑀔𑀫’’𑀦𑁆𑀢𑀺. 𑀤𑀼𑀓𑁆𑀔𑀯𑀘𑀦𑀦𑁆𑀢𑀺 ‘‘𑀤𑀼𑀓𑁆𑀔’’𑀦𑁆𑀢𑀺 𑀲𑀢𑁆𑀣𑀼 𑀯𑀘𑀦𑀁.

‘‘𑀦𑀢𑁆𑀣𑀺 𑀏𑀢𑀲𑁆𑀲 𑀯𑀲𑀯𑀢𑁆𑀢𑀓𑁄’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀦𑀸𑀧𑀺 𑀇𑀤𑀁 𑀯𑀲𑀯𑀢𑁆𑀢𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀦 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸𑀢𑀺. 𑀅𑀢𑁆𑀢𑀦𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀭𑀲𑁆𑀫𑀺𑀦𑁆𑀢𑀺 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀧𑀭𑀲𑁆𑀲 𑀘 𑀅𑀢𑁆𑀢𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀧𑀭𑀧𑀭𑀺𑀓𑀧𑁆𑀧𑀺𑀢𑀁 𑀯𑀲𑀯𑀢𑁆𑀢𑀓𑀁 𑀏𑀢𑀲𑁆𑀲 𑀘𑀓𑁆𑀔𑀸𑀤𑀺𑀦𑁄 𑀦𑀢𑁆𑀣𑀺, 𑀏𑀢𑁂𑀦 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀬 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀲𑀼𑀜𑁆𑀜𑀁 𑀢𑀁 𑀢𑁂𑀦 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀪𑀬𑀣𑀸𑀧𑀺 𑀅𑀯𑀲𑀯𑀢𑁆𑀢𑀦𑀝𑁆𑀞𑁂 𑀤𑀲𑁆𑀲𑀺𑀢𑀩𑁆𑀩𑁂 𑀢𑀢𑁆𑀣 𑀢𑀸𑀯 𑀏𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀇𑀢𑀭𑀁 𑀤𑀲𑁆𑀲𑁂𑀢𑀺. 𑀲𑀸𑀫𑀺 𑀏𑀯 𑀲𑀸𑀫𑀺𑀓𑁄, 𑀦 𑀲𑀸𑀫𑀺𑀓𑁄 𑀅𑀲𑁆𑀲𑀸𑀫𑀺𑀓𑁄𑀢𑀺 𑀏𑀯𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 ‘‘𑀅𑀲𑁆𑀲𑀸𑀫𑀺𑀓𑀢𑁄’’𑀢𑀺 𑀧𑀤𑀲𑁆𑀲 𑀲𑀼𑀜𑁆𑀜𑀯𑀺𑀲𑁂𑀲𑀦𑀢𑀸𑀬 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀓𑀸𑀫𑀓𑀸𑀭𑀺𑀬𑀦𑁆𑀢𑀺 𑀬𑀣𑀸𑀓𑀸𑀫𑀓𑀭𑀡𑀻𑀬𑀁. 𑀅𑀯𑀲𑀯𑀢𑁆𑀢𑀦𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀲𑀫𑀸𑀲𑀤𑁆𑀯𑀬𑀢𑁆𑀣𑀲𑀗𑁆𑀕𑀳𑀢𑁄.

𑀲𑀲𑀦𑁆𑀢𑀸𑀦𑁂 𑀥𑀫𑁆𑀫𑀸𑀦𑀁 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀇𑀥 𑀪𑀸𑀯𑀲𑀗𑁆𑀓𑀦𑁆𑀢𑀺𑀕𑀫𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀲𑀦𑁆𑀢𑀢𑀺𑀬𑀁 𑀪𑀸𑀯𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯𑀸’’𑀢𑀺. 𑀢𑀣𑀸 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑀁 𑀧𑀼𑀭𑀺𑀫𑀸𑀓𑀸𑀭𑀯𑀺𑀕𑀫𑁄 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀆𑀳 ‘‘𑀲𑀦𑁆𑀢𑀢𑀺𑀬𑀸 𑀬𑀣𑀸𑀧𑀯𑀢𑁆𑀢𑀸𑀓𑀸𑀭𑀯𑀺𑀚𑀳𑀦’’𑀦𑁆𑀢𑀺. 𑀪𑀯𑀢𑀻𑀢𑀺 𑀯𑀸 𑀪𑀸𑀯𑁄, 𑀅𑀯𑀢𑁆𑀣𑀸𑀯𑀺𑀲𑁂𑀲𑁄, 𑀢𑀲𑁆𑀲 𑀲𑀗𑁆𑀓𑀫𑀦𑀁 𑀪𑀸𑀯𑀲𑀗𑁆𑀓𑀦𑁆𑀢𑀺. 𑀲𑀪𑀸𑀯𑀥𑀫𑁆𑀫𑁄 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑀁 𑀞𑀺𑀢𑀺𑀓𑁆𑀔𑀡𑀜𑁆𑀘 𑀧𑀢𑁆𑀯𑀸 𑀪𑀺𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀚𑀭𑀸𑀯𑀢𑁆𑀣𑀁, 𑀢𑀢𑁄 𑀪𑀗𑁆𑀕𑀸𑀯𑀢𑁆𑀣𑀁 𑀲𑀗𑁆𑀓𑀫𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀲𑀗𑁆𑀓𑀫𑀢𑁄 𑀘 𑀅𑀢𑁆𑀢𑀮𑀸𑀪𑀓𑁆𑀔𑀡𑀢𑁄 𑀉𑀤𑁆𑀥𑀁 𑀚𑀭𑀸𑀫𑀭𑀡𑁂𑀳𑀺 𑀢𑀁𑀲𑀪𑀸𑀯𑀧𑀭𑀺𑀘𑁆𑀘𑀸𑀕𑁄 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀦𑁆𑀢𑀺 𑀔𑀡𑀯𑀲𑁂𑀦 𑀘𑁂𑀢𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀘 𑀔𑀡𑀸𑀦𑀁 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀏𑀓𑀢𑁆𑀣𑀢𑁆𑀢𑀸𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸, 𑀦 𑀧𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀸𑀦𑀁 𑀏𑀓𑀢𑁆𑀢𑀸. ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀺𑀘𑁆𑀘𑀁 𑀘𑀓𑁆𑀔𑀼’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀬𑀁 𑀘𑀓𑁆𑀔𑀼, 𑀢𑀁 𑀅𑀦𑀺𑀘𑁆𑀘𑀁, 𑀬𑀁 𑀅𑀦𑀺𑀘𑁆𑀘𑀁, 𑀢𑀁 𑀘𑀓𑁆𑀔𑀼’’𑀦𑁆𑀢𑀺 𑀆𑀧𑀦𑁆𑀦𑀫𑁂𑀯𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀸𑀦𑀁 𑀲𑁂𑀲𑀥𑀫𑁆𑀫𑀸𑀦𑀫𑁆𑀧𑀺 𑀘𑀓𑁆𑀔𑀼𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺.

𑀢𑁂𑀳𑀺 𑀘 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑁂𑀳𑀺 𑀘 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀁 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬, 𑁮𑁫; 𑁨.𑁪.𑁧, 𑁨; 𑀧𑀝𑀺. 𑀫. 𑁨.𑁧𑁦) 𑀯𑀺𑀬. 𑀤𑁄𑀲𑀮𑀓𑁆𑀔𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀤𑁄𑀲𑀲𑁆𑀲 𑀮𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀁 𑀤𑀼𑀓𑁆𑀔𑁂𑀦𑀸𑀢𑀺 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀅𑀓𑁆𑀔𑀺𑀭𑁄𑀕𑀸𑀤𑀺𑀤𑀼𑀓𑁆𑀔𑁂𑀦 𑀆𑀩𑀸𑀥𑀢𑀸𑀬. 𑀅𑀦𑀢𑁆𑀢𑀮𑀓𑁆𑀔𑀡𑀤𑀻𑀧𑀓𑀸𑀦𑀦𑁆𑀢𑀺 𑀅𑀦𑀢𑁆𑀢𑀢𑀸𑀧𑀜𑁆𑀜𑀸𑀧𑀦𑀲𑁆𑀲 𑀚𑁄𑀢𑀓𑀸𑀦𑀁 𑀉𑀧𑀸𑀬𑀪𑀽𑀢𑀸𑀦𑀁. 𑀦 𑀳𑀺 𑀖𑀝𑀪𑁂𑀤𑀓𑀡𑁆𑀝𑀓𑀯𑁂𑀥𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀢𑁄 𑀅𑀦𑀢𑁆𑀢𑀢𑀸𑀥𑀺𑀕𑀫𑀳𑁂𑀢𑀽 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀢𑀸𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀦 𑀮𑀩𑁆𑀪𑀫𑀸𑀦𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀘𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀤𑀺𑀫𑀳𑀸𑀪𑀽𑀢𑀸𑀤𑀺𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀦𑀺, 𑀢𑀢𑁄 𑀏𑀯 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀸𑀦𑀺, 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀸𑀦𑀺, 𑀏𑀯𑀁𑀪𑀽𑀢𑀸𑀦𑀺 𑀘 𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀓𑀸𑀦𑀻𑀢𑀺 𑀧𑀭𑀺𑀕𑁆𑀕𑀳𑁂 𑀞𑀺𑀢𑁂𑀳𑀺 𑀲𑀫𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑀸.

𑀓𑀣𑀁 𑀧𑀦𑁂𑀢𑁂𑀲𑀁 𑀳𑀼𑀢𑁆𑀯𑀸 𑀅𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀤𑀲𑁆𑀲𑀦𑀢𑁄. 𑀢𑀁 𑀓𑀣𑀁 𑀜𑀸𑀬𑀢𑀻𑀢𑀺? 𑀬𑀼𑀢𑁆𑀢𑀺𑀢𑁄. 𑀓𑀸 𑀧𑀦𑁂𑀢𑁆𑀣 𑀬𑀼𑀢𑁆𑀢𑀻𑀢𑀺? 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀬𑀤𑀺 𑀘𑀓𑁆𑀔𑀸𑀤𑀻𑀦𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀦 𑀲𑀺𑀬𑀸, 𑀩𑀳𑀺𑀧𑀘𑁆𑀘𑀬𑀪𑁂𑀤𑁂 𑀬𑀤𑀺𑀤𑀁 𑀧𑀘𑁆𑀙𑀸 𑀯𑀺𑀲𑁂𑀲𑀕𑁆𑀕𑀳𑀡𑀁, 𑀢𑀁 𑀦 𑀲𑀺𑀬𑀸. 𑀬𑀲𑁆𑀲 𑀳𑀺 𑀢𑀸𑀤𑀺𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀲 𑀅𑀲𑀢𑀺 𑀩𑀳𑀺𑀧𑀘𑁆𑀘𑀬𑀯𑀺𑀲𑁂𑀲𑁂 𑀓𑀣𑀁 𑀧𑀘𑁆𑀙𑀸 𑀯𑀺𑀲𑁂𑀲𑀕𑁆𑀕𑀳𑀡𑀁 𑀪𑀯𑁂𑀬𑁆𑀬, 𑀪𑀯𑀢𑀺 𑀘 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑀲𑁆𑀫𑀸 𑀅𑀢𑁆𑀣𑀺 𑀦𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀬𑀁 𑀲𑀡𑀺𑀓𑀁 𑀲𑀡𑀺𑀓𑀁 𑀯𑀟𑁆𑀠𑁂𑀦𑁆𑀢𑀁 𑀧𑀘𑁆𑀙𑀸 𑀧𑀸𑀓𑀝𑀢𑀭𑀁 𑀚𑀸𑀬𑀢𑀻𑀢𑀺. 𑀢𑀣𑀸 𑀳𑀺 𑀲𑀭𑀻𑀭𑀲𑁆𑀲 𑀢𑀸𑀯 𑀆𑀦𑀸𑀧𑀸𑀦𑀸𑀦𑀁 𑀅𑀦𑀯𑀢𑁆𑀣𑀸𑀦𑀢𑁄 𑀧𑀭𑀺𑀲𑁆𑀲𑀫𑀢𑁄 𑀘 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀅𑀦𑀯𑀢𑁆𑀣𑀺𑀢𑀸 𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀸𑀢𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀤𑀺 𑀳𑀺 𑀅𑀲𑁆𑀲𑀲𑀺𑀢𑁂 𑀯𑀸 𑀧𑀲𑁆𑀲𑀲𑁆𑀲𑀺𑀢𑁂 𑀯𑀸 𑀲𑀭𑀻𑀭𑀲𑁆𑀲 𑀓𑁄𑀘𑀺 𑀧𑀘𑁆𑀙𑀸 𑀯𑀺𑀲𑁂𑀲𑁄 𑀦 𑀲𑀺𑀬𑀸, 𑀦 𑀦𑁂𑀲𑀁 𑀓𑁄𑀘𑀺 𑀪𑁂𑀤𑁄 𑀲𑀺𑀬𑀸, 𑀤𑀺𑀝𑁆𑀞𑁄 𑀘 𑀲𑁄. 𑀢𑀲𑁆𑀫𑀸 𑀅𑀲𑁆𑀲𑀲𑀺𑀢𑀁 𑀲𑀭𑀻𑀭𑀁 𑀅𑀜𑁆𑀜𑀣𑀸 𑀳𑁄𑀦𑁆𑀢𑀁 𑀓𑀫𑁂𑀦 𑀢𑀸𑀤𑀺𑀲𑀁 𑀅𑀯𑀢𑁆𑀣𑀁 𑀧𑀸𑀧𑀼𑀡𑀸𑀢𑀺. 𑀬𑀸 𑀧𑀲𑁆𑀲𑀸𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀲𑁆𑀲𑀲𑀺𑀢𑁂 𑀘 𑀧𑀼𑀦 𑀢𑀣𑁂𑀯 𑀅𑀲𑁆𑀲𑀸𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀦𑀸𑀧𑀸𑀦𑀸𑀦𑀁 𑀅𑀦𑀯𑀢𑁆𑀣𑀸𑀦𑀢𑁄𑀧𑀺 𑀲𑀭𑀻𑀭𑀲𑁆𑀲 𑀯𑀺𑀲𑁂𑀲𑀕𑁆𑀕𑀳𑀡𑀁 𑀅𑀜𑁆𑀜𑀣𑀢𑁆𑀢𑀲𑀺𑀤𑁆𑀥𑀺. 𑀢𑀣𑀸 𑀧𑀭𑀺𑀲𑁆𑀲𑀫𑁄𑀧𑀺 𑀅𑀲𑀢𑀺 𑀯𑀺𑀲𑁂𑀲𑁂 𑀧𑀘𑁆𑀙𑀸 𑀲𑀭𑀻𑀭𑀲𑁆𑀲 𑀦 𑀲𑀺𑀬𑀸, 𑀬𑁂𑀦𑀸𑀬𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀸𑀤𑀻𑀦𑀺 𑀲𑁂𑀯𑀦𑁂𑀦 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀁 𑀓𑀭𑁄𑀢𑀺.

𑀅𑀣 𑀯𑀸 𑀭𑀽𑀧𑀸𑀤𑀺𑀪𑁂𑀤𑀢𑁄𑀧𑀺 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀭𑀽𑀧𑀕𑀦𑁆𑀥𑀭𑀲𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀯𑀺𑀲𑁂𑀲𑁂𑀦 𑀬𑁄 𑀲𑀭𑀻𑀭𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀘 𑀔𑀻𑀭𑀽𑀤𑀓𑀯𑀢𑁆𑀣𑀧𑀼𑀧𑁆𑀨𑀨𑀮𑁄𑀲𑀥𑀺𑀥𑀜𑁆𑀜𑀸𑀤𑀻𑀦𑀁 𑀧𑀘𑁆𑀙𑀸 𑀯𑀺𑀲𑁂𑀲𑁄 𑀕𑀬𑁆𑀳𑀢𑀺, 𑀲𑁄 𑀅𑀲𑀢𑀺 𑀩𑀳𑀺𑀧𑀘𑁆𑀘𑀬𑀯𑀺𑀲𑁂𑀲𑁂 𑀦𑁂𑀲𑀁 𑀚𑀭𑀸𑀤𑀺𑀅𑀯𑀢𑁆𑀣𑀸𑀲𑀼 𑀯𑀡𑁆𑀡𑀩𑀮𑀸𑀤𑀺𑀪𑁂𑀤𑁄, 𑀭𑀲𑀯𑀻𑀭𑀺𑀬𑀯𑀺𑀧𑀸𑀓𑀸𑀦𑀼𑀪𑀸𑀯𑀪𑁂𑀤𑁄 𑀘 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑀺𑀦𑀸 𑀓𑀣𑀫𑀼𑀧𑀮𑀩𑁆𑀪𑁂𑀬𑁆𑀬. 𑀬𑀁 𑀧𑀦 𑀢𑀁 𑀥𑀫𑁆𑀫𑀢𑀸𑀭𑀽𑀧𑀁 𑀲𑀺𑀮𑀸𑀤𑀺, 𑀢𑀢𑁆𑀣 𑀓𑀣𑀦𑁆𑀢𑀺? 𑀢𑀲𑁆𑀲𑀸𑀧𑀺 𑀲𑀻𑀢𑀼𑀡𑁆𑀳𑀲𑀫𑁆𑀨𑀲𑁆𑀲𑀪𑁂𑀤𑀢𑁄 𑀅𑀢𑁆𑀣𑁂𑀯 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑀺𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺. 𑀲𑀢𑀺 𑀘 𑀭𑀽𑀧𑀸𑀤𑀺𑀪𑁂𑀤𑁂 𑀲𑀺𑀤𑁆𑀥𑁄𑀯 𑀢𑀁𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑀪𑁂𑀤𑁄𑀧𑀺. 𑀦 𑀳𑀺 𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑀪𑁂𑀤𑁂𑀦 𑀯𑀺𑀦𑀸 𑀦𑀺𑀲𑁆𑀲𑀺𑀢𑀪𑁂𑀤𑁄 𑀲𑀫𑁆𑀪𑀯𑀢𑀻𑀢𑀺. 𑀏𑀯𑀁 𑀢𑀸𑀯 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀢𑁄 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀢𑀢𑁄 𑀘 𑀳𑀼𑀢𑁆𑀯𑀸 𑀅𑀪𑀸𑀯𑀲𑀺𑀤𑁆𑀥𑀺.

𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀆𑀭𑀫𑁆𑀫𑀡𑀸𑀤𑀺𑀪𑁂𑀤𑁂𑀦 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀆𑀭𑀫𑁆𑀫𑀡𑁂 𑀅𑀭𑀽𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀢𑁂 𑀪𑀺𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑀁 𑀲𑀗𑁆𑀓𑀫𑀦𑁆𑀢𑀺, 𑀆𑀭𑀫𑁆𑀫𑀡𑀥𑀫𑁆𑀫𑀸 𑀘 𑀬𑀣𑀸𑀲𑀓𑀁 𑀔𑀡𑀢𑁄 𑀉𑀤𑁆𑀥𑀁 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀤𑀻𑀧𑀸𑀤𑀺𑀉𑀤𑀸𑀳𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂 𑀏𑀯 𑀳𑀺 𑀔𑀡𑁂 𑀔𑀡𑁂 𑀭𑀽𑀧𑀸𑀤𑀬𑁄 𑀧𑀤𑀻𑀧𑀚𑀸𑀮𑀸𑀬, 𑀢𑀣𑀸 𑀔𑀻𑀭𑀥𑀸𑀭𑀸𑀤𑀻𑀲𑀼 𑀧𑀢𑀦𑁆𑀢𑀻𑀲𑀼, 𑀯𑀸𑀬𑀼𑀫𑁆𑀳𑀺 𑀘 𑀧𑀳𑀭𑀦𑁆𑀢𑁂 𑀲𑀫𑁆𑀨𑀲𑁆𑀲𑀸𑀦𑀺. 𑀬𑀣𑀸 𑀘𑁂𑀢𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀓𑀺𑀫𑀗𑁆𑀕𑀁 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁. 𑀓𑀺𑀜𑁆𑀘 𑀲𑀤𑁆𑀤𑀪𑁂𑀤𑀢𑁄, 𑀲𑀤𑁆𑀤𑀯𑀺𑀲𑁂𑀲𑀢𑁄𑀧𑀺 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁, 𑀢𑀢𑁄 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀧𑀕𑀼𑀡𑀜𑁆𑀳𑀺 𑀕𑀦𑁆𑀣𑀁 𑀲𑀻𑀖𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀲𑀤𑁆𑀤𑀸𑀦𑀁 𑀪𑁂𑀤𑁄 𑀤𑀺𑀝𑁆𑀞𑁄. 𑀦 𑀳𑀺 𑀓𑀸𑀭𑀡𑀪𑁂𑀤𑁂𑀦 𑀯𑀺𑀦𑀸 𑀨𑀮𑀪𑁂𑀤𑁄 𑀅𑀢𑁆𑀣𑀺. 𑀬𑀣𑀸 𑀢𑀁 𑀯𑀸𑀤𑀺𑀢𑀲𑀤𑁆𑀤𑀸𑀦𑀁, 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀁. 𑀢𑁂𑀦𑁂𑀯 𑀦𑁂𑀲𑀁 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀺𑀪𑀽𑀫𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑁂𑀤𑁂𑀦 𑀯𑀺𑀲𑁂𑀲𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀕𑁆𑀕𑀳𑀡𑀢𑁄 𑀔𑀡𑁂 𑀔𑀡𑁂 𑀅𑀜𑁆𑀜𑀣𑀢𑁆𑀢𑀲𑀺𑀤𑁆𑀥𑀺. 𑀬𑀢𑁄 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀘𑀓𑁆𑀔𑀸𑀤𑀻𑀦𑀺 𑀅𑀦𑀺𑀘𑁆𑀘𑀸𑀦𑀻𑀢𑀺 𑀲𑀺𑀤𑁆𑀥𑀸𑀦𑀺, 𑀅𑀦𑀺𑀘𑁆𑀘𑀢𑁆𑀢𑀸 𑀏𑀯 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀸𑀦𑀺, 𑀢𑀢𑁄 𑀘 𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀓𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬, 𑁮𑁫; 𑁨.𑁪.𑁧, 𑁨; 𑀧𑀝𑀺. 𑀫. 𑁨.𑁧𑁦).

𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀲𑁆𑀲𑀸𑀢𑀺 𑀅𑀪𑀺𑀡𑁆𑀳𑀲𑀤𑁆𑀤𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀢𑀺. 𑀥𑀸𑀢𑀼𑀫𑀢𑁆𑀢𑀢𑀸𑀬𑀸𑀢𑀺 𑀥𑀸𑀢𑀼𑀫𑀢𑁆𑀢𑀪𑀸𑀯𑁂𑀦. 𑀲𑀫𑀽𑀳𑀢𑁄𑀢𑀺 𑀲𑀲𑀫𑁆𑀪𑀸𑀭𑀘𑀓𑁆𑀔𑀸𑀤𑀺𑀧𑀺𑀡𑁆𑀟𑀢𑁄. ‘‘𑀘𑀓𑁆𑀔𑀸𑀤𑀻𑀦’’𑀦𑁆𑀢𑀺 𑀇𑀤𑀁 ‘‘𑀲𑀫𑀽𑀳𑀢𑁄’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, ‘‘𑀯𑀺𑀦𑀺𑀩𑁆𑀪𑀼𑀚𑀦’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀫𑁆𑀫𑀢𑁆𑀣𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑀺𑀧𑀺 𑀖𑀦𑀸𑀦𑀻𑀢𑀺 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀸𑀦𑀺. 𑀧𑀯𑀢𑁆𑀢𑀭𑀽𑀧𑀸𑀤𑀺𑀕𑁆𑀕𑀳𑀡𑀢𑁄𑀢𑀺 𑀭𑀼𑀧𑁆𑀧𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀜𑁆𑀘 𑀢𑀁 𑀭𑀽𑀧𑀸𑀤𑀺𑀕𑁆𑀕𑀳𑀡𑀜𑁆𑀘𑀸𑀢𑀺 𑀧𑀯𑀢𑁆𑀢𑀭𑀽𑀧𑀸𑀤𑀺𑀕𑁆𑀕𑀳𑀡𑀁, 𑀢𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀲𑁆𑀲 𑀲𑀩𑁆𑀪𑀸𑀯𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀜𑀸𑀡𑀢𑁄 𑀪𑀺𑀦𑁆𑀦𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀜𑀸𑀡𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦 𑀲𑀢𑀺𑀧𑀺 𑀭𑀽𑀧𑀸𑀤𑀺𑀅𑀢𑁆𑀣𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂 𑀭𑀼𑀧𑁆𑀧𑀦𑀸𑀤𑀺𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀲𑁆𑀲 𑀪𑁂𑀤𑀫𑀸𑀳. 𑀇𑀤𑀸𑀦𑀺 𑀢𑀫𑁂𑀯 𑀪𑁂𑀤𑀁 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀺𑀲𑀬𑀢𑀸𑀬 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀸𑀢𑀺𑀥𑀸𑀯𑀺𑀢𑀼𑀦𑁆𑀢𑀺 𑀇𑀥 𑀮𑀓𑁆𑀔𑀡𑀮𑀓𑁆𑀔𑀡𑀯𑀦𑁆𑀢𑀸 𑀪𑀺𑀦𑁆𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀔𑀦𑁆𑀥𑀸𑀭𑀫𑁆𑀫𑀡𑀢𑀸𑀯𑀘𑀦𑁂𑀦 𑀅𑀪𑀺𑀦𑁆𑀦𑀸𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀸𑀧𑀸𑀤𑀦𑁂𑀦 𑀅𑀢𑀺𑀥𑀸𑀯𑀺𑀢𑀼𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀯𑀼𑀢𑁆𑀢𑀁 ‘‘𑀢𑁂 𑀧𑀦𑀸𑀓𑀸𑀭𑀸’’𑀢𑀺𑀆𑀤𑀺. 𑀅𑀥𑀺𑀧𑁆𑀧𑀸𑀬𑁄𑀧𑀺 𑀘𑁂𑀢𑁆𑀣 𑀮𑀓𑁆𑀔𑀡𑀸𑀦𑀁 𑀭𑀽𑀧𑀸𑀤𑀺𑀆𑀓𑀸𑀭𑀫𑀢𑁆𑀢𑀢𑀸𑀯𑀺𑀪𑀸𑀯𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀳𑀺 𑀲𑀗𑁆𑀔𑀸𑀭𑁂 𑀲𑀪𑀸𑀯𑀢𑁄 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀬𑁂𑀯 𑀮𑀓𑁆𑀔𑀡𑀸𑀦𑀺 𑀘 𑀲𑀮𑁆𑀮𑀓𑁆𑀔𑁂𑀢𑀻𑀢𑀺. 𑀬𑀣𑀸 𑀅𑀦𑀺𑀘𑁆𑀘𑀸𑀤𑀺𑀢𑁄 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀯𑀼𑀢𑁆𑀢𑀦𑀬𑁂𑀦 𑀪𑁂𑀤𑁄, 𑀏𑀯𑀁 𑀅𑀦𑀺𑀘𑁆𑀘𑀢𑀸𑀤𑀻𑀦𑀫𑁆𑀧𑀺 𑀲𑀢𑀺𑀧𑀺 𑀮𑀓𑁆𑀔𑀡𑀪𑀸𑀯𑀲𑀸𑀫𑀜𑁆𑀜𑁂 𑀦𑀸𑀦𑀸𑀜𑀸𑀡𑀕𑁄𑀘𑀭𑀢𑀸𑀬, 𑀦𑀸𑀦𑀸𑀧𑀝𑀺𑀧𑀓𑁆𑀔𑀢𑀸𑀬, 𑀦𑀸𑀦𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀢𑀸𑀬 𑀘 𑀯𑀺𑀫𑁄𑀓𑁆𑀔𑀫𑀼𑀔𑀢𑁆𑀢𑀬𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀪𑁂𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀘 𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁫. 𑀧𑀘𑁆𑀘𑀬𑀬𑀼𑀕𑀴𑀯𑀲𑁂𑀦𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀧𑀘𑁆𑀘𑀬𑀤𑁆𑀯𑀬𑀯𑀲𑁂𑀦. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀅𑀩𑁆𑀩𑁄𑀓𑀸𑀭𑀢𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀯𑀲𑁂𑀦 𑀘𑁂𑀯 𑀩𑀸𑀳𑀺𑀭𑀯𑀲𑁂𑀦 𑀘 𑀅𑀲𑀗𑁆𑀓𑀭𑀢𑁄.

𑁧𑁬𑁭. 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑁄𑀡𑀲𑁆𑀲. 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀳𑀺 𑀲𑀫𑀼𑀔𑁂𑀦, 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀘 𑀲𑀼𑀝𑁆𑀞𑀼 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦, 𑀕𑀢𑀺𑀪𑀸𑀯𑁂𑀦 𑀘 𑀧𑀢𑀺𑀝𑁆𑀞𑀸𑀦𑀪𑀽𑀢𑁂. ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀝𑀺. 𑁩𑁩𑁯) 𑀳𑀺 𑀯𑀼𑀢𑁆𑀢𑀁. 𑀞𑀺𑀢𑀺𑀪𑀸𑀯𑁂𑀦𑀸𑀢𑀺 𑀘 𑀧𑀸𑀞𑁄. 𑀢𑀁𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂𑀢𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂. 𑀦𑀻𑀢𑁄𑀢𑀺 𑀧𑀸𑀧𑀺𑀢𑁄, 𑀧𑀓𑀸𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀘𑀼𑀡𑁆𑀡𑀺𑀢𑀦𑁆𑀢𑀺 𑀪𑁂𑀤𑀺𑀢𑀁. 𑀢𑁆𑀯𑀫𑁂𑀯 𑀓𑀺𑀁 𑀦 𑀚𑀸𑀦𑀸𑀲𑀻𑀢𑀺 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀓𑀺𑀁 𑀢𑁆𑀯𑀁 𑀏𑀓𑀁 𑀦𑀸𑀦𑀁 𑀚𑀸𑀦𑀸𑀲𑀺, 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀏𑀯𑀸’’𑀢𑀺 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀁 𑀧𑀭𑀯𑀸𑀤𑀺𑀁 ‘‘𑀦𑀦𑀼 𑀜𑀸𑀢𑁂’’𑀢𑀺𑀆𑀤𑀺𑀦𑀸 𑀲𑀓𑀯𑀸𑀤𑀻 𑀦𑀺𑀩𑀦𑁆𑀥𑀢𑀺. 𑀯𑀺𑀪𑀚𑀺𑀢𑁆𑀯𑀸𑀢𑀺 ‘‘𑀭𑀸𑀕𑀸𑀤𑀻𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀪𑀸𑀯𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸. 𑀭𑀸𑀕𑀸𑀤𑀻𑀦𑀁 𑀔𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀲𑀪𑀸𑀯𑀢𑀸 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀆𑀧𑀦𑁆𑀦𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀳𑁂𑀢𑀼𑀅𑀢𑁆𑀣𑁂 𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀢𑀁 𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀇𑀘𑁆𑀙𑀢𑁄 𑀓𑀺𑀮𑁂𑀲𑀓𑁆𑀔𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀁 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀔𑁂𑀧𑁂𑀢𑀩𑁆𑀩𑀸 𑀓𑀺𑀮𑁂𑀲𑀸 𑀩𑀳𑀼𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀸, 𑀫𑀕𑁆𑀕𑁄 𑀘 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺. 𑀲𑁆𑀯𑀸𑀬𑀁 ‘‘𑀓𑀢𑀫𑀁 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀢𑀫𑁂 𑀓𑀺𑀮𑁂𑀲𑁂 𑀔𑁂𑀧𑁂𑀢𑀻’’𑀢𑀺 𑀧𑀼𑀭𑀺𑀫𑀧𑀼𑀘𑁆𑀙𑀸𑀤𑁆𑀯𑀬𑀫𑁂𑀯 𑀯𑀤𑀢𑀺. 𑀢𑀤𑁂𑀯𑀸𑀢𑀺 𑀬𑀁 ‘‘𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀓𑀺𑀜𑁆𑀘𑀺 𑀏𑀓𑀤𑁂𑀲𑀫𑀢𑁆𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯.

𑀏𑀢𑁆𑀣 𑀘 𑀬𑀸𑀬𑀁 ‘‘𑀓𑀺𑀮𑁂𑀲𑀓𑁆𑀔𑀬𑁄𑀯 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑀢𑀸𑀘𑁄𑀤𑀦𑀸, 𑀢𑀢𑁆𑀭𑀸𑀬𑀁 𑀆𑀕𑀫𑀢𑁄 𑀬𑀼𑀢𑁆𑀢𑀺𑀢𑁄 𑀘𑀲𑁆𑀲 𑀪𑀸𑀯𑀸𑀪𑀸𑀯𑀯𑀺𑀪𑀸𑀯𑀦𑀸. 𑀢𑀜𑁆𑀳𑀺 𑀪𑀕𑀯𑀢𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀉𑀤𑀸. 𑁭𑁩; 𑀇𑀢𑀺𑀯𑀼. 𑁪𑁩).

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻 𑀦 𑀆𑀧𑁄 𑀦 𑀢𑁂𑀚𑁄 𑀦 𑀯𑀸𑀬𑁄’’𑀢𑀺 (𑀉𑀤𑀸. 𑁭𑁧) 𑁋

𑀘 𑀆𑀤𑀺𑀦𑀸, 𑀢𑀣𑀸 𑁋

‘‘𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄’’𑀢𑀺 (𑀫. 𑀦𑀺. 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭-𑁮) 𑁋

‘‘𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁, 𑀅𑀦𑀢𑀁, 𑀅𑀦𑀸𑀲𑀯𑀁, 𑀲𑀘𑁆𑀘𑀁, 𑀧𑀸𑀭𑀁, 𑀦𑀺𑀧𑀼𑀡𑀁, 𑀲𑀼𑀤𑀼𑀤𑁆𑀤𑀲𑀁, 𑀅𑀚𑀚𑁆𑀚𑀭𑀁, 𑀥𑀼𑀯𑀁, 𑀅𑀧𑀮𑁄𑀓𑀺𑀢𑀁, 𑀅𑀦𑀺𑀤𑀲𑁆𑀲𑀦𑀁, 𑀦𑀺𑀧𑁆𑀧𑀧𑀜𑁆𑀘𑀁, 𑀲𑀦𑁆𑀢𑀁, 𑀅𑀫𑀢𑀁, 𑀧𑀡𑀻𑀢𑀁, 𑀲𑀺𑀯𑀁, 𑀔𑁂𑀫𑀁, 𑀢𑀡𑁆𑀳𑀸𑀓𑁆𑀔𑀬𑀁, 𑀅𑀘𑁆𑀙𑀭𑀺𑀬𑀁, 𑀅𑀩𑁆𑀪𑀼𑀢𑀁, 𑀅𑀦𑀻𑀢𑀺𑀓𑀁, 𑀅𑀦𑀻𑀢𑀺𑀓𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁, 𑀅𑀩𑁆𑀬𑀸𑀩𑀚𑁆𑀛𑀁, 𑀯𑀺𑀭𑀸𑀕𑀁, 𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁, 𑀅𑀦𑀸𑀮𑀬𑀁, 𑀤𑀻𑀧𑀁, 𑀮𑁂𑀡𑀁, 𑀢𑀸𑀡𑀁, 𑀲𑀭𑀡𑀁, 𑀧𑀭𑀸𑀬𑀡𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀧𑀭𑀸𑀬𑀡𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁭𑁭) 𑁋

𑀏𑀯𑀫𑀸𑀤𑀻𑀳𑀺 𑀘 𑀲𑀼𑀢𑁆𑀢𑀧𑀤𑁂𑀳𑀺 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭), 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽’’𑀢𑀺𑀆𑀤𑀻𑀳𑀺 (𑀥. 𑀲. 𑁧𑁧𑁯𑁨, 𑁧𑁧𑁯𑁮, 𑁧𑁨𑁦𑁦) 𑀅𑀪𑀺𑀥𑀫𑁆𑀫𑀧𑀤𑁂𑀲𑁂𑀳𑀺 𑀘 𑀧𑀭𑀫𑀢𑁆𑀣𑀪𑀸𑀯𑁂𑀦𑁂𑀯 𑀤𑁂𑀲𑀺𑀢𑀁. 𑀦 𑀳𑀺 𑀲𑀪𑀸𑀯𑀯𑀺𑀭𑀳𑀺𑀢𑀲𑁆𑀲 𑀅𑀪𑀸𑀯𑀫𑀢𑁆𑀢𑀲𑁆𑀲 𑀕𑀫𑁆𑀪𑀻𑀭𑀸𑀲𑀗𑁆𑀔𑀢𑀸𑀤𑀺𑀪𑀸𑀯𑁄 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀺𑀪𑀸𑀯𑁄 𑀘 𑀬𑀼𑀢𑁆𑀢𑁄, 𑀯𑀼𑀢𑁆𑀢𑁄 𑀘 𑀲𑁄. 𑀢𑀲𑁆𑀫𑀸 𑀦 𑀅𑀪𑀸𑀯𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁.

𑀅𑀧𑀺 𑀘𑀸𑀬𑀁 𑀅𑀪𑀸𑀯𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀬𑀤𑀺 𑀓𑀺𑀮𑁂𑀲𑀸𑀪𑀸𑀯𑁄 𑀦𑀺𑀩𑁆𑀩𑀸𑀦𑀁, 𑀲𑁆𑀯𑀸𑀬𑀫𑀪𑀸𑀯𑁄 𑀏𑀓𑁄 𑀯𑀸 𑀲𑀺𑀬𑀸 𑀅𑀦𑁂𑀓𑁄 𑀯𑀸? 𑀬𑀤𑀺 𑀏𑀓𑁄, 𑀏𑀓𑁂𑀦𑁂𑀯 𑀫𑀕𑁆𑀕𑁂𑀦 𑀓𑀢𑁄 𑀲𑀘𑁆𑀙𑀺𑀓𑀢𑁄 𑀘 𑀳𑁄𑀢𑀻𑀢𑀺 𑀉𑀧𑀭𑀺𑀫𑀸𑀦𑀁 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺. 𑀦 𑀳𑀺 𑀏𑀓𑀁 𑀅𑀦𑁂𑀓𑁂𑀳𑀺 𑀓𑀫𑁆𑀫𑀧𑁆𑀧𑀯𑀢𑁆𑀢𑁂𑀳𑀺 𑀲𑀸𑀥𑁂𑀢𑀩𑁆𑀩𑀁 𑀤𑀺𑀝𑁆𑀞𑀁. 𑀅𑀣 𑀲𑀺𑀬𑀸 𑀏𑀓𑁄𑀯 𑀲𑁄 𑀓𑀺𑀮𑁂𑀲𑀸𑀪𑀸𑀯𑁄, 𑀦 𑀧𑀦 𑀫𑀕𑁆𑀕𑁂𑀳𑀺 𑀓𑀸𑀢𑀩𑁆𑀩𑁄, 𑀅𑀣 𑀔𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀢𑀺 𑀲𑀼𑀝𑁆𑀞𑀼𑀢𑀭𑀁 𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀸𑀦𑀢𑁄. 𑀅𑀓𑀭𑁄𑀦𑁆𑀢𑁄 𑀘 𑀫𑀕𑁆𑀕𑁄 𑀓𑀺𑀮𑁂𑀲𑀸𑀪𑀸𑀯𑀁 𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀓𑀫𑀢𑁆𑀣𑀁 𑀲𑀸𑀥𑁂𑀬𑁆𑀬, 𑀅𑀣 𑀫𑀕𑁆𑀕𑀸𑀦𑀁 𑀲𑀁𑀬𑁄𑀚𑀦𑀢𑁆𑀢𑀬𑀧𑁆𑀧𑀳𑀸𑀦𑀸𑀤𑀺𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀢𑀸𑀬 𑀧𑀳𑀸𑀬𑀓𑀯𑀺𑀪𑀸𑀕𑁂𑀦 𑀓𑀺𑀮𑁂𑀲𑀸𑀪𑀸𑀯𑀪𑁂𑀤𑁄, 𑀏𑀯𑀁 𑀲𑀢𑀺 𑀯𑀺𑀦𑀸 𑀲𑀪𑀸𑀯𑀪𑁂𑀤𑀁 𑀩𑀳𑀼𑀪𑀸𑀯𑁄 𑀦𑀢𑁆𑀣𑀻𑀢𑀺 𑀩𑀳𑀼𑀪𑀸𑀯𑀢𑀸𑀧𑀤𑁂𑀲𑁂𑀦𑀲𑁆𑀲 𑀲𑀲𑀪𑀸𑀯𑀢𑀸 𑀆𑀧𑀦𑁆𑀦𑀸. 𑀅𑀣𑀸𑀧𑀺 𑀲𑀺𑀬𑀸 ‘‘𑀬𑁂𑀲𑀁 𑀅𑀪𑀸𑀯𑁄, 𑀢𑁂𑀲𑀁 𑀩𑀳𑀼𑀪𑀸𑀯𑁂𑀦 𑀩𑀳𑀼𑀪𑀸𑀯𑁄𑀧𑀘𑀸𑀭𑁄’’𑀢𑀺, 𑀏𑀯𑀁 𑀲𑀢𑀺 𑀬𑁂𑀲𑀁 𑀅𑀪𑀸𑀯𑁄, 𑀢𑁂𑀲𑀁 𑀲𑀪𑀸𑀯𑀢𑀸𑀬 𑀲𑀲𑀪𑀸𑀯𑁄𑀧𑀘𑀸𑀭𑁄𑀧𑀺 𑀲𑀺𑀬𑀸. 𑀢𑀣𑀸 𑀢𑁂𑀲𑀁 𑀓𑀺𑀮𑁂𑀲𑀲𑀗𑁆𑀔𑀢𑀸𑀤𑀺𑀢𑀸𑀬 𑀓𑀺𑀮𑁂𑀲𑀲𑀗𑁆𑀔𑀢𑀸𑀤𑀺𑀪𑀸𑀯𑀸 𑀘 𑀲𑀺𑀬𑀼𑀁, 𑀦 𑀘𑁂𑀢𑀁 𑀬𑀼𑀢𑁆𑀢𑀦𑁆𑀢𑀺 𑀦 𑀢𑁂𑀲𑀁 𑀩𑀳𑀼𑀪𑀸𑀯𑁄𑀧𑀘𑀸𑀭𑁄 𑀬𑀼𑀢𑁆𑀢𑁄. 𑀏𑀓𑀪𑀸𑀯𑁄𑀧𑀺 𑀘𑀲𑁆𑀲 𑀅𑀲𑀪𑀸𑀯𑀢𑀸𑀬 𑀏𑀯 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀘𑁂? 𑀦, 𑀅𑀪𑀸𑀯𑀲𑀸𑀫𑀜𑁆𑀜𑀢𑁄, 𑀅𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀪𑁂𑀤𑀲𑀫𑀜𑁆𑀜𑀸𑀬 𑀏𑀓𑀢𑁆𑀢𑀦𑀺𑀤𑁆𑀤𑁂𑀲𑁄. 𑀲𑀢𑀺 𑀘 𑀏𑀓𑀢𑁆𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀺.

𑀩𑀳𑀼𑀪𑀸𑀯𑁂 𑀘 𑀲𑀲𑀪𑀸𑀯𑀢𑀸 𑀲𑀺𑀤𑁆𑀥𑀸. 𑀬𑀤𑀺𑀧𑀺 𑀲𑀺𑀬𑀸 𑀬𑀣𑀸 𑀩𑀳𑀼𑀪𑀸𑀯𑁄 𑀲𑀲𑀪𑀸𑀯𑀢𑀁, 𑀏𑀯𑀁 𑀲𑀸𑀫𑀜𑁆𑀜𑁂𑀦 𑀲𑀲𑀪𑀸𑀯𑀢𑀸 𑀩𑀳𑀼𑀪𑀸𑀯𑀁 𑀦 𑀩𑁆𑀬𑀪𑀺𑀘𑀭𑁂𑀬𑁆𑀬𑀸𑀢𑀺 𑀲𑀲𑀪𑀸𑀯𑀧𑀓𑁆𑀔𑁂𑀧𑀺 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀢𑀁 𑀦, 𑀓𑀲𑁆𑀫𑀸? 𑀢𑀣𑀸 𑀲𑀸𑀫𑀜𑁆𑀜𑀸𑀪𑁂𑀤𑀢𑁄. 𑀦 𑀳𑀺 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀸 𑀬𑀣𑀸 𑀔𑀭𑀪𑀸𑀯𑁄 𑀲𑀲𑀪𑀸𑀯𑀢𑀁 𑀦 𑀩𑁆𑀬𑀪𑀺𑀘𑀭𑀢𑀺, 𑀏𑀯𑀁 𑀲𑀲𑀪𑀸𑀯𑀢𑀸𑀧𑀺 𑀔𑀭𑀪𑀸𑀯𑀁 𑀦 𑀩𑁆𑀬𑀪𑀺𑀘𑀭𑁂𑀬𑁆𑀬𑀸𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀢𑀤𑀜𑁆𑀜𑀲𑀩𑁆𑀩𑀥𑀫𑁆𑀫𑀸𑀪𑀸𑀯𑀧𑁆𑀧𑀲𑀗𑁆𑀕𑁄 𑀲𑀺𑀬𑀸, 𑀢𑀲𑁆𑀫𑀸 𑀩𑀳𑀼𑀪𑀸𑀯𑁄 𑀲𑀲𑀪𑀸𑀯𑀢𑀸𑀧𑁂𑀓𑁆𑀔𑁄, 𑀦 𑀲𑀲𑀪𑀸𑀯𑀢𑀸 𑀩𑀳𑀼𑀪𑀸𑀯𑀸𑀧𑁂𑀓𑁆𑀔𑀸𑀢𑀺 𑀦 𑀲𑀲𑀪𑀸𑀯𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀪𑀸𑀯𑀸𑀧𑀢𑁆𑀢𑀺. ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀺 (𑀲𑀼. 𑀦𑀺. 𑁮𑁯𑁦; 𑀫𑀳𑀸𑀦𑀺. 𑁧𑁧𑁯), 𑀏𑀓𑀸 𑀦𑀺𑀝𑁆𑀞𑀸 𑀦 𑀧𑀼𑀣𑀼𑀦𑀺𑀝𑁆𑀞𑀸’’𑀢𑀺𑀆𑀤𑀺𑀯𑀘𑀦𑀢𑁄.

𑀅𑀧𑀺 𑀘𑁂𑀢𑁆𑀣 𑀓𑀺𑀮𑁂𑀲𑀸𑀪𑀸𑀯𑁄 𑀦𑀸𑀫 𑀭𑀸𑀕𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑁄 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀢𑀲𑁆𑀲 𑀘 𑀏𑀓𑀢𑁆𑀢𑁂 𑀏𑀓𑁂𑀦𑁂𑀯 𑀫𑀕𑁆𑀕𑁂𑀦 𑀲𑀸𑀥𑁂𑀢𑀩𑁆𑀩𑀢𑀸 𑀓𑀺𑀘𑁆𑀘𑀯𑀺𑀲𑁂𑀲𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑀦𑀸𑀤𑀺𑀫𑀕𑁆𑀕𑀯𑀺𑀪𑀸𑀕𑁄 𑀦 𑀲𑀺𑀬𑀸. 𑀇𑀘𑁆𑀙𑀺𑀢𑁄 𑀘 𑀲𑁄 𑀑𑀥𑀺𑀲𑁄𑀯 𑀓𑀺𑀮𑁂𑀲𑀸𑀦𑀁 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀲𑁄 𑀘 𑀫𑀕𑁆𑀕𑀯𑀺𑀪𑀸𑀕𑁄 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀢𑀺𑀢𑀺𑀓𑁆𑀔𑀢𑀺𑀓𑁆𑀔𑀢𑀺𑀓𑁆𑀔𑀢𑀭𑀢𑀺𑀓𑁆𑀔𑀢𑀫𑀪𑀸𑀯𑁂𑀦 𑀏𑀓𑀲𑁆𑀫𑀺𑀫𑁆𑀧𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀬𑁄𑀕𑁆𑀬𑀪𑀸𑀯𑁂 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀦 𑀳𑁄𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀲𑀪𑀸𑀯𑀢𑀸𑀬𑀬𑁂𑀯 𑀬𑀼𑀢𑁆𑀢𑁄. 𑀅𑀪𑀸𑀯𑁄 𑀧𑀦 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀓𑀸𑀢𑀩𑁆𑀩𑁄 𑀲𑀺𑀬𑀸 ‘‘𑀫𑀸 𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑀸 𑀅𑀳𑁄𑀲𑀻’’𑀢𑀺, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. 𑀓𑁄 𑀳𑀺 𑀢𑀲𑁆𑀲 𑀲𑀪𑀸𑀯𑁄, 𑀬𑁄 𑀢𑁂𑀦 𑀲𑀘𑁆𑀙𑀺𑀓𑀭𑀺𑀬𑁂𑀬𑁆𑀬. 𑀲𑁄 𑀘 𑀓𑀺𑀮𑁂𑀲𑀸𑀪𑀸𑀯𑁄 𑀏𑀓𑁂𑀦𑁂𑀯 𑀫𑀕𑁆𑀕𑁂𑀦 𑀲𑀸𑀥𑁂𑀢𑀩𑁆𑀩𑁄 𑀲𑀺𑀬𑀸, 𑀦 𑀘𑀢𑀽𑀳𑀺 ‘‘𑀫𑀸 𑀘𑀢𑀼𑀪𑀸𑀯𑀦𑀺𑀩𑁆𑀩𑀸𑀦𑀢𑀸𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀯𑀺𑀲𑁂𑀲𑀸𑀧𑀢𑁆𑀢𑀺 𑀘 𑀅𑀳𑁄𑀲𑀻’’𑀢𑀺. 𑀢𑀢𑁄 𑀤𑀲𑁆𑀲𑀦𑀸𑀤𑀺𑀫𑀕𑁆𑀕𑀯𑀺𑀪𑀸𑀕𑁄 𑀦 𑀲𑀺𑀬𑀸𑀢𑀺 𑀲𑀩𑁆𑀩𑀁 𑀆𑀯𑀢𑁆𑀢𑀢𑀺.

𑀬𑀤𑀺 𑀘 𑀅𑀪𑀸𑀯𑁄 𑀪𑀸𑀯𑀲𑁆𑀲 𑀲𑀺𑀬𑀸𑀢𑀺 𑀢𑀲𑁆𑀲 𑀪𑀸𑀯𑀥𑀫𑁆𑀫𑀢𑀸 𑀇𑀘𑁆𑀙𑀺𑀢𑀸, 𑀏𑀯𑀁 𑀲𑀢𑀺 𑀬𑀣𑀸 𑀲𑀗𑁆𑀔𑀢𑀥𑀫𑁆𑀫𑀲𑁆𑀲 𑀢𑀲𑁆𑀲 𑀚𑀭𑀸𑀫𑀭𑀡𑀸𑀤𑀻𑀦𑀁 𑀯𑀺𑀬 𑀲𑀗𑁆𑀔𑀢𑀥𑀫𑁆𑀫𑀢𑀸𑀧𑀺 𑀆𑀧𑀦𑁆𑀦𑀸, 𑀏𑀯𑀁 𑀩𑀳𑀽𑀦𑀁 𑀓𑀺𑀮𑁂𑀲𑀸𑀦𑀁 𑀥𑀫𑁆𑀫𑀲𑁆𑀲 𑀢𑀲𑁆𑀲 𑀩𑀳𑀼𑀪𑀸𑀯𑀸𑀤𑀺𑀧𑁆𑀧𑀲𑀗𑁆𑀕𑁄𑀧𑀺 𑀤𑀼𑀦𑁆𑀦𑀺𑀯𑀸𑀭𑁄𑀢𑀺 𑀅𑀢𑀁𑀲𑀪𑀸𑀯𑀲𑁆𑀲 𑀅𑀲𑀗𑁆𑀔𑀢𑀲𑁆𑀲𑁂𑀓𑀲𑁆𑀲 𑀲𑀲𑀪𑀸𑀯𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 (𑀲𑀁. 𑀦𑀺. 𑁪.𑁩𑁧𑁫, 𑁩𑁩𑁦) 𑀯𑀼𑀢𑁆𑀢𑀦𑁆𑀢𑀺? 𑀔𑀬𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸. 𑀔𑀬𑁄 𑀳𑀺 𑀅𑀭𑀺𑀬𑀫𑀕𑁆𑀕𑁄. 𑀬𑀣𑀸𑀳 ‘‘𑀔𑀬𑁂 𑀜𑀸𑀡𑀁, 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡’’𑀦𑁆𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨). 𑀢𑁂𑀦 𑀭𑀸𑀕𑀸𑀤𑀺𑀓𑁆𑀔𑀬𑀧𑀭𑀺𑀬𑀸𑀬𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 ‘‘𑀧𑀭𑀫𑀢𑁆𑀣𑀁 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀤𑀼𑀤𑁆𑀤𑀲𑀁 𑀤𑀼𑀭𑀦𑀼𑀩𑁄𑀥𑀁 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀺𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀧𑁆𑀧𑀳𑀸𑀦𑀫𑀼𑀔𑁂𑀦 𑀯𑀸 𑀢𑀣𑀸 𑀧𑀢𑁆𑀢𑀩𑁆𑀩𑀢𑁄, 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 𑀯𑀼𑀢𑁆𑀢𑀁 ‘‘𑀫𑀤𑀦𑀺𑀫𑁆𑀫𑀤𑁆𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀅𑀧𑀺𑀘 𑀬𑀣𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀲𑀉𑀢𑁆𑀢𑀭𑀸𑀦𑀁 𑀓𑀸𑀫𑀸𑀦𑀁 𑀭𑀽𑀧𑀸𑀦𑀜𑁆𑀘 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀁 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀲𑀪𑀸𑀯𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂𑀦 𑀦𑀺𑀲𑁆𑀲𑀭𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀜𑁆𑀘 𑀢𑀦𑁆𑀦𑀺𑀲𑁆𑀲𑀭𑀡𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀧𑀺 𑀅𑀦𑀼𑀮𑁄𑀫𑀜𑀸𑀡𑀁 𑀓𑀺𑀮𑁂𑀲𑁂 𑀢𑀤𑀗𑁆𑀕𑀯𑀲𑁂𑀦 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀜𑀸𑀡𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦. 𑀇𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲, 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀲𑁆𑀲 𑀘 𑀜𑀸𑀡𑀲𑁆𑀲 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄 𑀢𑁂𑀲𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀭𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀉𑀤𑀸. 𑁭𑁩; 𑀇𑀢𑀺𑀯𑀼. 𑁪𑁩) 𑀇𑀤𑀁 𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀚𑁄𑀢𑀓𑀁 𑀯𑀘𑀦𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸. 𑀬𑀜𑁆𑀳𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀬𑀣𑀸 𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀥. 𑀧. 𑁨𑁭𑁭-𑁨𑁭𑁯; 𑀣𑁂𑀭𑀕𑀸. 𑁬𑁭𑁬-𑁬𑁭𑁮; 𑀦𑁂𑀢𑁆𑀢𑀺. 𑁫), 𑀢𑀣𑀸 𑀦𑀺𑀩𑁆𑀩𑀸𑀦-𑀲𑀤𑁆𑀤𑁄 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀬𑀣𑀸𑀪𑀽𑀢𑀧𑀭𑀫𑀢𑁆𑀣𑀯𑀺𑀲𑀬𑁄 𑀉𑀧𑀘𑀸𑀭𑀯𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑁂𑀬𑁆𑀬𑀣𑀸𑀧𑀺 𑀲𑀻𑀳-𑀲𑀤𑁆𑀤𑁄. 𑀅𑀣 𑀯𑀸 𑀅𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀇𑀢𑀭𑀢𑀩𑁆𑀩𑀺𑀧𑀭𑀻𑀢𑀯𑀺𑀫𑀼𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀲𑁂𑀬𑁆𑀬𑀣𑀸𑀧𑀺 ‘‘𑀧𑀣𑀯𑀻𑀥𑀸𑀢𑀼 𑀯𑁂𑀤𑀦𑀸 𑀘𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀬𑀼𑀢𑁆𑀢𑀺𑀢𑁄𑀧𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁬𑁮. 𑀓𑀺𑀜𑁆𑀘𑀻𑀢𑀺 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁. 𑀆𑀮𑀫𑁆𑀩𑀦𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀢𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.