𑁧𑁮. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄

𑁧. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑀯𑀡𑁆𑀡𑀦𑀸

𑁯𑁭𑁮. 𑀥𑀸𑀢𑀼𑀲𑀫𑁆𑀪𑀯…𑀧𑁂… 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀔𑀦𑁆𑀥𑀸𑀤𑀻𑀦𑀁 𑀓𑀸𑀫𑀥𑀸𑀢𑀼𑀆𑀤𑀺𑀥𑀸𑀢𑀽𑀲𑀼 𑀲𑀫𑁆𑀪𑀯𑀪𑁂𑀤𑀪𑀺𑀦𑁆𑀦𑀸𑀦𑀁 𑀦𑀺𑀭𑀯𑀲𑁂𑀲𑀢𑁄 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀯𑀺𑀪𑀸𑀕𑁂𑀦 𑀬𑁄𑀚𑀦𑀸, 𑀢𑀣𑀸 𑀲𑁂𑀲𑁂𑀲𑀼𑀧𑀺 𑀧𑀭𑀺𑀬𑀸𑀧𑀦𑁆𑀦𑀧𑀪𑁂𑀤𑀪𑀺𑀦𑁆𑀦𑀸𑀦𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀦𑀺𑀭𑀯𑀲𑁂𑀲𑀢𑁄 𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄’’𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀸 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀔𑀦𑁆𑀥𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀅𑀦𑀯𑀲𑁂𑀲𑀲𑀗𑁆𑀕𑀳𑁄, 𑀢𑀲𑁆𑀫𑀸 𑀏𑀯𑀁 𑀤𑀼𑀢𑀺𑀬𑀯𑀸𑀭𑀸𑀤𑀻𑀦𑀜𑁆𑀘𑁂𑀢𑁆𑀣 𑀅𑀦𑀼𑀧𑁆𑀧𑀯𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀦𑁆𑀥𑀸𑀤𑀻𑀦𑀫𑁂𑀯 𑀳𑀺 𑀢𑁂𑀲𑀁 𑀲𑀫𑁆𑀪𑀯𑀸𑀤𑀺𑀯𑀺𑀘𑀸𑀭𑁄 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀸𑀭𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀅𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀅𑀢𑁆𑀣𑀸𑀧𑀢𑁆𑀢𑀺𑀲𑀺𑀤𑁆𑀥𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀢𑀢𑁆𑀣 ‘‘𑀓𑀢𑀺 𑀔𑀦𑁆𑀥𑀸 𑀦 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀆𑀤𑀺𑀧𑀸𑀴𑀺 𑀅𑀢𑁆𑀣𑀺.

𑁯𑁭𑁯. 𑀧𑀼𑀘𑁆𑀙𑀸𑀦𑀼𑀭𑀽𑀧𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀸 𑀓𑀢𑀸, 𑀢𑀤𑀦𑀼𑀭𑀽𑀧𑀁. 𑀅𑀯𑀺𑀢𑀣𑀩𑁆𑀬𑀸𑀓𑀭𑀡𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀏𑀯 𑀆𑀯𑁂𑀡𑀺𑀓𑀁, 𑀅𑀜𑁆𑀜𑁂𑀲𑀁 𑀢𑀁 𑀬𑀸𑀤𑀺𑀘𑁆𑀙𑀺𑀓𑀁 𑀲𑀼𑀢𑀓𑁆𑀔𑀭𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀯𑀘𑀦𑀁 𑀯𑀺𑀜𑁆𑀜𑀸𑀬 𑀓𑀢𑀢𑁆𑀢𑀸’’𑀢𑀺.

𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁯𑁯𑁧. ‘‘𑀓𑀸𑀫𑀪𑀯𑁂’’𑀢𑀺 𑀇𑀤𑀁 𑀑𑀓𑀸𑀲𑀯𑀲𑁂𑀦 𑀯𑀢𑁆𑀯𑀸 𑀧𑀼𑀦 𑀲𑀢𑁆𑀢𑀲𑀦𑁆𑀢𑀸𑀦𑀯𑀲𑁂𑀦 𑀯𑀢𑁆𑀢𑀼𑀁 ‘‘𑀓𑀸𑀫𑀥𑀸𑀢𑀼𑀲𑀫𑁆𑀪𑀽𑀢𑀸𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑁆𑀥𑀺𑀬𑀸…𑀧𑁂… 𑀅𑀢𑁆𑀣𑁄’’𑀢𑀺 𑀆𑀳. ‘‘𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀬𑀤𑀺𑀧𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀘𑀓𑁆𑀔𑀼𑀓𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀢𑁆𑀢𑀸 𑀳𑁂𑀝𑁆𑀞𑀺𑀫𑀪𑀽𑀫𑀺𑀓𑀸𑀦𑀜𑁆𑀘 𑀅𑀕𑁄𑀘𑀭𑁄, 𑀲𑀫𑀸𑀦𑀪𑀽𑀫𑀺𑀓𑀸𑀦𑀁 𑀧𑀦 𑀯𑁂𑀳𑀧𑁆𑀨𑀮𑀸𑀦𑀁, 𑀉𑀧𑀭𑀺𑀪𑀽𑀫𑀺𑀓𑀸𑀦𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀘𑀓𑁆𑀔𑀸𑀬𑀢𑀦𑀲𑁆𑀲 𑀕𑁄𑀘𑀭𑁄 𑀳𑁄𑀢𑀻𑀢𑀺 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀓𑀭𑁄𑀢𑀺𑀬𑁂𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑀁 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁭) 𑀯𑀼𑀢𑁆𑀢𑀧𑀤𑁂𑀲𑀸 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑀸. 𑀢𑁂 𑀲𑀢𑁆𑀢𑀦𑀺𑀓𑀸𑀬𑀸 𑀘 𑀥𑀸𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀸𑀥𑀸𑀭𑀪𑀸𑀯𑀢𑁄 𑀬𑀣𑀸 ‘‘𑀫𑀸𑀲𑀧𑀼𑀜𑁆𑀚𑁄 𑀫𑀸𑀲𑁄’’𑀢𑀺. 𑀲𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀢𑁆𑀢𑀼𑀧𑁆𑀧𑀢𑁆𑀢𑀺, 𑀉𑀧𑁆𑀧𑀚𑁆𑀚𑀦𑀝𑁆𑀞𑁂𑀦 𑀲𑀢𑁆𑀢𑀸𑀯 𑀉𑀧𑁆𑀧𑀢𑁆𑀢𑀺 𑀲𑀢𑁆𑀢𑀼𑀧𑁆𑀧𑀢𑁆𑀢𑀻𑀢𑀺 𑀏𑀯𑀁 𑀑𑀓𑀸𑀲𑀲𑀢𑁆𑀢𑀮𑁄𑀓𑀤𑁆𑀯𑀬𑀲𑁆𑀲 𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺, 𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸 𑀯𑀺𑀬 𑀲𑀗𑁆𑀔𑀸𑀭𑀪𑀸𑀯𑁂𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂 𑀧𑀦 𑀢𑁂𑀢𑀺 𑀆𑀳 ‘‘𑀲𑀢𑁆𑀢𑀸𑀯𑀸𑀲𑀯𑀲𑁂𑀦…𑀧𑁂… 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸’’𑀢𑀺. 𑀢𑀁𑀢𑀁𑀧𑀭𑀺𑀬𑀸𑀧𑀦𑁆𑀦𑀸𑀦𑀦𑁆𑀢𑀺 𑀢𑀁𑀢𑀁𑀲𑀢𑁆𑀢𑀸𑀯𑀸𑀲𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁, 𑀲𑀗𑁆𑀔𑀸𑀭𑀸𑀦𑀫𑁂𑀯 𑀯𑀸. 𑀲𑀤𑀺𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦𑀸𑀢𑀺 𑀲𑀤𑀺𑀲𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀔𑀦𑁆𑀥𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀲𑁆𑀫𑀺𑀁 𑀲𑀢𑁆𑀢𑀸𑀯𑀸𑀲𑁂 𑀥𑀫𑁆𑀫𑀸 𑀲𑀫𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀺.

𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀬𑀸𑀧𑀦𑁆𑀦𑀸𑀧𑀭𑀺𑀬𑀸𑀧𑀦𑁆𑀦𑀯𑀸𑀭𑀯𑀡𑁆𑀡𑀦𑀸

𑁯𑁯𑁯. 𑀢𑀢𑁆𑀣, 𑀅𑀜𑁆𑀜𑀢𑁆𑀣 𑀘𑀸𑀢𑀺 𑀢𑀲𑁆𑀫𑀺𑀁, 𑀅𑀜𑁆𑀜𑀲𑁆𑀫𑀺𑀜𑁆𑀘 𑀪𑀯𑁂, 𑀑𑀓𑀸𑀲𑁂 𑀘. 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀓𑀸𑀫𑀸𑀤𑀺𑀢𑀡𑁆𑀳𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀆𑀧𑀦𑁆𑀦𑀸 𑀕𑀳𑀺𑀢𑀸𑀢𑀺 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀢𑀁𑀢𑀁𑀪𑀯𑀸𑀤𑀺𑀅𑀦𑁆𑀢𑁄𑀕𑀥𑀸 𑀢𑀁𑀢𑀁𑀧𑀭𑀺𑀬𑀸𑀧𑀦𑁆𑀦𑀸.

𑀧𑀭𑀺𑀬𑀸𑀧𑀦𑁆𑀦𑀸𑀧𑀭𑀺𑀬𑀸𑀧𑀦𑁆𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑁆𑀧𑀸𑀤𑀓𑀓𑀫𑁆𑀫𑀆𑀬𑀼𑀧𑁆𑀧𑀫𑀸𑀡𑀯𑀸𑀭𑁄

𑁧. 𑀉𑀧𑁆𑀧𑀸𑀤𑀓𑀓𑀫𑁆𑀫𑀯𑀡𑁆𑀡𑀦𑀸

𑁧𑁦𑁨𑁧. 𑀥𑀸𑀢𑀼𑀢𑁆𑀢𑀬𑀪𑀽𑀢𑀤𑁂𑀯𑀯𑀲𑁂𑀦𑀸𑀢𑀺 𑀓𑀸𑀫𑀸𑀤𑀺𑀥𑀸𑀢𑀼𑀢𑁆𑀢𑀬𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀸𑀦𑀁 𑀯𑀲𑁂𑀦.

𑀉𑀧𑁆𑀧𑀸𑀤𑀓𑀓𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀬𑀼𑀧𑁆𑀧𑀫𑀸𑀡𑀯𑀡𑁆𑀡𑀦𑀸

𑁧𑁦𑁨𑁬. 𑀲𑀼𑀧𑀭𑀺𑀫𑀚𑁆𑀚𑀺𑀢𑀓𑀜𑁆𑀘𑀦𑀸𑀤𑀸𑀲𑀁 𑀯𑀺𑀬 𑀲𑁄𑀪𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺 𑀲𑀼𑀪𑁄, 𑀲𑀭𑀻𑀭𑁄𑀪𑀸𑀲𑁄, 𑀢𑁂𑀦 𑀲𑀼𑀪𑁂𑀦 𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸𑀢𑀺 𑀲𑀼𑀪𑀓𑀺𑀡𑁆𑀡𑀸.

𑁧𑁦𑁨𑁭. 𑀢𑀁𑀢𑀁𑀫𑀦𑀲𑀺𑀓𑀸𑀭𑀦𑁆𑀢𑀺 𑀧𑀭𑀺𑀢𑁆𑀢𑀧𑀣𑀯𑀻𑀓𑀲𑀺𑀡𑀸𑀤𑀺𑀕𑀢𑀫𑀦𑀲𑀺𑀓𑀸𑀭𑀁. 𑀅𑀧𑁆𑀧𑀦𑀸𑀓𑁆𑀔𑀡𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀧𑀼𑀩𑁆𑀩𑀪𑀸𑀕𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀙𑀦𑁆𑀤𑀦𑀁 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀁 𑀙𑀦𑁆𑀤𑁄, 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄. 𑀧𑀡𑀺𑀥𑀸𑀦𑀁 𑀘𑀺𑀢𑁆𑀢𑀝𑁆𑀞𑀧𑀦𑀸 𑀧𑀡𑀺𑀥𑀺, 𑀲𑀜𑁆𑀜𑀸𑀯𑀺𑀭𑀸𑀕𑀸𑀤𑀻𑀳𑀺 𑀆𑀭𑀫𑁆𑀫𑀡𑀲𑁆𑀲 𑀯𑀺𑀲𑁂𑀲𑀦𑀁 𑀢𑀣𑀸𑀧𑀯𑀢𑁆𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀓𑀭𑀡𑀫𑁂𑀯.

𑀯𑀺𑀧𑀼𑀮𑀁 𑀯𑀼𑀘𑁆𑀘𑀢𑀺 𑀫𑀳𑀦𑁆𑀢𑀁, 𑀲𑀦𑁆𑀢𑀪𑀸𑀯𑁄𑀧𑀺 𑀫𑀳𑀦𑀻𑀬𑀢𑀸𑀬 𑀫𑀳𑀦𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀯𑀺𑀧𑀼𑀮𑀸 𑀨𑀮𑀸𑀢𑀺 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀸𑀬𑀼𑀯𑀡𑁆𑀡𑀸𑀤𑀺𑀨𑀮𑀸’’𑀢𑀺.

𑁧𑁦𑁨𑁮. 𑀬𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀲𑀜𑁆𑀚𑀻𑀯𑁂 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄, 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲 𑀭𑀢𑁆𑀢𑀺𑀬𑁄 𑀫𑀸𑀲𑁄, 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀓𑁄 𑀲𑀁𑀯𑀘𑁆𑀙𑀭𑁄, 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀲𑀜𑁆𑀚𑀻𑀯𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀬𑀁 𑀢𑀸𑀯𑀢𑀺𑀁𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀏𑀲𑁄 𑀓𑀸𑀴𑀲𑀼𑀢𑁆𑀢𑁂 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄…𑀧𑁂… 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀯𑀲𑁆𑀲𑀲𑀳𑀲𑁆𑀲𑀁 𑀓𑀸𑀴𑀲𑀼𑀢𑁆𑀢𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀬𑀁 𑀬𑀸𑀫𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀏𑀲𑁄 𑀲𑀗𑁆𑀖𑀸𑀢𑁂 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄…𑀧𑁂… 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑁆𑀯𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀗𑁆𑀖𑀸𑀢𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀬𑀁 𑀢𑀼𑀲𑀺𑀢𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀭𑁄𑀭𑀼𑀯𑁂 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄…𑀧𑁂… 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑁄𑀭𑀼𑀯𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀬𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀫𑀳𑀸𑀭𑁄𑀭𑀼𑀯𑁂 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄…𑀧𑁂… 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀅𑀝𑁆𑀞 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀫𑀳𑀸𑀭𑁄𑀭𑀼𑀯𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀬𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀸𑀧𑀦𑁂 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄…𑀧𑁂… 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀲𑁄𑀴𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀸𑀧𑀦𑁂 𑀆𑀬𑀼𑀧𑁆𑀧𑀫𑀸𑀡𑀁. 𑀫𑀳𑀸𑀢𑀸𑀧𑀦𑁂 𑀉𑀧𑀟𑁆𑀠𑀦𑁆𑀢𑀭𑀓𑀧𑁆𑀧𑁄. 𑀅𑀯𑀻𑀘𑀺𑀬𑀁 𑀏𑀓𑁄 𑀅𑀦𑁆𑀢𑀭𑀓𑀧𑁆𑀧𑁄 𑀘 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀤𑁂𑀯𑀸𑀦𑀁 𑀅𑀥𑀺𑀫𑀼𑀢𑁆𑀢𑀓𑀸𑀮𑀓𑀺𑀭𑀺𑀬𑀸 𑀯𑀺𑀬 𑀢𑀸𑀤𑀺𑀲𑁂𑀦 𑀧𑀼𑀜𑁆𑀜𑀩𑀮𑁂𑀦 𑀅𑀦𑁆𑀢𑀭𑀸𑀧𑀺 𑀫𑀭𑀡𑀁 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀫𑁂𑀯 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀩𑁆𑀩𑀼𑀤𑀸𑀤𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑁄𑀧𑀺 𑀬𑀼𑀢𑁆𑀢𑀢𑀭𑁄 𑀳𑁄𑀢𑀻𑀢𑀺.

𑀓𑀺𑀁 𑀛𑀸𑀦𑀦𑁆𑀢𑀺 𑀅𑀝𑁆𑀞𑀲𑀼 𑀛𑀸𑀦𑁂𑀲𑀼 𑀓𑀢𑀭𑀁 𑀛𑀸𑀦𑀁. 𑀪𑀯𑀲𑀻𑀲𑀸𑀦𑀻𑀢𑀺 𑀪𑀯𑀕𑁆𑀕𑀸𑀦𑀺, 𑀧𑀼𑀣𑀼𑀚𑁆𑀚𑀦𑀪𑀯𑀕𑁆𑀕𑀁 𑀅𑀭𑀺𑀬𑀪𑀯𑀕𑁆𑀕𑀁 𑀲𑀩𑁆𑀩𑀪𑀯𑀕𑁆𑀕𑀦𑁆𑀢𑀺 𑀯𑁂𑀳𑀧𑁆𑀨𑀮𑀸𑀤𑀻𑀦𑀁 𑀲𑀫𑀜𑁆𑀜𑀸. 𑀓𑀲𑁆𑀲𑀘𑀺 𑀲𑀢𑁆𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀓𑀲𑁆𑀲𑀘𑀺 𑀧𑀜𑁆𑀘𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀲𑀓𑀤𑀸𑀕𑀸𑀫𑀺𑀦𑁄 𑀘, 𑀓𑀲𑁆𑀲𑀘𑀺 𑀢𑀬𑁄𑀢𑀺 𑀅𑀦𑀸𑀕𑀸𑀫𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑁄 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀳𑀺 𑀘𑀼𑀢𑁄 𑀅𑀭𑀽𑀧𑀁 𑀉𑀧𑀧𑀚𑁆𑀚𑀦𑁆𑀢𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑁂𑀯 𑀳𑁄𑀢𑀺, 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁦𑁨𑁮) 𑀅𑀬𑀁 𑀅𑀝𑁆𑀞𑀓𑀣𑀸𑀧𑀸𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺, 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀻’’𑀢𑀺 𑀧𑀦 𑀧𑀸𑀞𑁄𑀢𑀺 𑀢𑁂𑀦 ‘‘𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀬𑁂𑀯 𑀦𑀺𑀯𑀸𑀭𑀺𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀅𑀭𑀽𑀧𑀥𑀸𑀢𑀽𑀧𑀧𑀢𑁆𑀢𑀺 𑀘 𑀦 𑀦𑀺𑀯𑀸𑀭𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀽𑀧𑀥𑀸𑀢𑀽𑀧𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸 ‘‘𑀫𑀢𑁆𑀣𑀓𑁂 𑀞𑀺𑀢𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀻’’𑀢𑀺 𑀦𑀺𑀬𑀫𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸.

𑀅𑀜𑁆𑀜𑀢𑁆𑀣𑀸𑀢𑀺 𑀓𑀸𑀫𑀮𑁄𑀓𑁂. 𑀢𑀢𑁆𑀣𑀸𑀢𑀺 𑀭𑀽𑀧𑀮𑁄𑀓𑁂. 𑀅𑀬𑀁 𑀅𑀝𑁆𑀞𑀓𑀣𑀸𑀢𑀺 ‘‘𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸. 𑀢𑁂𑀦𑁂𑀯𑀸𑀢𑀺 𑀬𑀲𑁆𑀫𑀸 𑀭𑀽𑀧𑀥𑀸𑀢𑀼𑀬𑀁 𑀉𑀧𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀉𑀧𑀧𑀚𑁆𑀚𑀦𑀸𑀭𑀳𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀭𑀽𑀧𑀥𑀸𑀢𑀼𑀬𑀁 𑀉𑀧𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲. 𑀬𑁂𑀦 𑀭𑀽𑀧𑀭𑀸𑀕𑁂𑀦 𑀢𑀢𑁆𑀣 𑀭𑀽𑀧𑀪𑀯𑁂 𑀉𑀧𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀅𑀭𑀽𑀧𑀚𑁆𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁂 𑀲𑀫𑁆𑀫𑀤𑁂𑀯 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼 𑀬𑀣𑀸 𑀓𑀸𑀫𑀭𑀽𑀧𑀪𑀯𑁂𑀲𑀼 𑀆𑀬𑀢𑀺𑀁 𑀪𑀯𑀸𑀪𑀺𑀮𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀅𑀭𑀽𑀧𑀪𑀯𑁂𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦…𑀧𑁂… 𑀪𑀯𑀺𑀲𑁆𑀲𑀢𑀺𑀬𑁂𑀯𑀸’’𑀢𑀺. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄𑀢𑀺 𑀭𑀽𑀧𑀥𑀸𑀢𑀼𑀬𑀁 𑀉𑀧𑀧𑀦𑁆𑀦𑁄. 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸𑀢𑀺 𑀳𑁂𑀝𑁆𑀞𑀺𑀫𑀁 𑀅𑀭𑀺𑀬𑀫𑀕𑁆𑀕𑀁 𑀲𑀫𑁆𑀧𑀸𑀤𑁂𑀢𑁆𑀯𑀸. 𑀦𑀺𑀩𑁆𑀩𑀢𑁆𑀢𑀪𑀯𑀸𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀢𑁆𑀣𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦. 𑀅𑀦𑀺𑀯𑀢𑁆𑀢𑀺𑀢𑀪𑀯𑀸𑀪𑀺𑀮𑀸𑀲𑁄𑀢𑀺 𑀉𑀧𑀭𑀺 𑀅𑀭𑀽𑀧𑀪𑀯𑁂 𑀅𑀯𑀺𑀲𑁆𑀲𑀝𑁆𑀞𑀪𑀯𑀧𑀢𑁆𑀣𑀦𑁄, 𑀬𑀢𑁄 𑀅𑀭𑀽𑀧𑀥𑀸𑀢𑀼𑀬𑀁 𑀉𑀧𑀧𑀚𑁆𑀚𑀦𑀸𑀭𑀳𑁄. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀸𑀤𑀺𑀲𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀲𑁂𑀦. ‘‘𑀓𑀲𑁆𑀲𑀘𑀺 𑀧𑀜𑁆𑀘, 𑀓𑀲𑁆𑀲𑀘𑀺 𑀢𑀬𑁄 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀬𑀫𑀓𑀧𑀸𑀴𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩𑁧𑁨) 𑀧𑀯𑀢𑁆𑀢𑀸.

𑀆𑀬𑀼𑀧𑁆𑀧𑀫𑀸𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑀯𑀡𑁆𑀡𑀦𑀸

𑁧𑁦𑁩𑁦. ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸. ‘‘𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑀸𑀢𑀮𑀓𑁆𑀔𑀡𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸.

‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 𑀇𑀥 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀬𑀤𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀝𑀻𑀓𑀸𑀬 𑀮𑀻𑀦𑀢𑁆𑀣𑀯𑀡𑁆𑀡𑀦𑀸

𑀯𑀺𑀪𑀗𑁆𑀕-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.