𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪𑁩-𑁪. 𑀅𑀢𑁆𑀣𑀺𑀧𑀝𑀺𑀘𑁆𑀘𑀁 𑀦𑀸𑀫𑀸𑀢𑀺 𑀅𑀢𑁆𑀣𑀺𑀢𑀸 𑀧𑀝𑀺𑀘𑁆𑀘𑀢𑁆𑀣𑁄 𑀦𑀸𑀫, 𑀅𑀲𑀢𑀺𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀤𑀺𑀪𑀸𑀯𑁂 𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀓𑀢𑁆𑀯𑀸 𑀬𑀣𑀸 𑀢𑀣𑀸 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀇𑀥 𑀧𑀝𑀺𑀘𑁆𑀘𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀧𑀝𑀺𑀘𑁆𑀘𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀔𑀸𑀤𑀺 ‘‘𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀺𑀲𑁆𑀲𑀸 𑀲𑁂𑀡𑀺𑀬𑀸𑀢𑀺 𑀅𑀝𑁆𑀞𑀸𑀭𑀲𑀲𑀼 𑀲𑁂𑀡𑀻𑀲𑀼 𑀫𑀬𑀁 𑀅𑀫𑀼𑀓𑀸𑀬 𑀲𑁂𑀡𑀺𑀬𑀸 𑀚𑀸𑀢𑀸𑀫𑁆𑀳, 𑀦 𑀅𑀜𑁆𑀜𑁂 𑀯𑀺𑀬 𑀅𑀧𑁆𑀧𑀜𑁆𑀜𑀸𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀧𑀼𑀭𑀢𑁄 𑀓𑀭𑀡𑀁 𑀧𑀫𑀼𑀔𑀪𑀸𑀯𑀓𑀭𑀡𑀁. 𑀦𑀺𑀥𑀸𑀦𑀭𑀸𑀲𑀻𑀢𑀺 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀥𑀦𑀦𑀺𑀘𑀬𑁄. 𑀬𑀲𑁄𑀢𑀺 𑀇𑀲𑁆𑀲𑀭𑀺𑀬𑀁. 𑀢𑀁 𑀧𑀦 𑀬𑁂𑀲𑀼 𑀯𑀢𑁆𑀢𑀢𑀺, 𑀢𑁂𑀲𑀼 𑀧𑀝𑁆𑀞𑀸𑀧𑀓𑀆𑀡𑀸𑀓𑀭𑀡𑁂𑀳𑀺 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀧𑀝𑁆𑀞𑀸𑀧𑀓𑀫𑀤𑁄, 𑀆𑀡𑀸𑀓𑀭𑀡𑀫𑀤𑁄’’𑀢𑀺 𑀘 𑀯𑀼𑀢𑁆𑀢𑀁.

𑁮𑁪𑁫. 𑀯𑀢𑁆𑀣𑀼𑀦𑀸𑀢𑀺 𑀚𑀸𑀢𑀺𑀆𑀤𑀺𑀧𑀯𑀢𑁆𑀢𑀺𑀳𑁂𑀢𑀼𑀦𑀸.

𑁮𑁪𑁬. 𑀧𑀢𑀺𑀝𑁆𑀞𑀸𑀪𑀸𑀯𑁄𑀢𑀺 𑀓𑀼𑀲𑀮𑀓𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀦𑀸𑀪𑀸𑀯𑁄, 𑀲𑁄 𑀧𑀦 𑀬𑀲𑁆𑀫𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀞𑀸𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀼𑀲𑀮𑀓𑀭𑀡𑁂 𑀅𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀧𑀫𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀯𑀫𑀸𑀤𑀺𑀓𑁄 𑀧𑀭𑀺𑀬𑀸𑀬𑁄𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 ‘‘𑀯𑀘𑀻𑀤𑀼𑀘𑁆𑀘𑀭𑀺𑀢𑁂, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄, 𑀫𑀓𑁆𑀔𑁄, 𑀧𑀴𑀸𑀲𑁄’’𑀢𑀺 𑀘 𑀏𑀯𑀫𑀸𑀤𑀺𑀓𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀧𑀫𑀸𑀤𑁄 𑀧𑀫𑀚𑁆𑀚𑀦𑀸𑀤𑀻’’𑀢𑀺𑀆𑀤𑀺𑀓𑁄 𑀢𑀤𑀢𑁆𑀣𑀧𑁆𑀧𑀓𑀸𑀲𑀓𑁄, ‘‘𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀸𑀤𑀦’’𑀦𑁆𑀢𑀺𑀆𑀤𑀺𑀓𑁄 𑀢𑀧𑁆𑀧𑀭𑀺𑀬𑀸𑀬𑀧𑁆𑀧𑀓𑀸𑀲𑀓𑁄 𑀩𑁆𑀬𑀜𑁆𑀚𑀦𑀧𑀭𑀺𑀬𑀸𑀬𑁄 𑀘 𑀅𑀧𑀭𑀺𑀬𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀤𑀲𑁆𑀲𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀢𑀺𑀯𑁄𑀲𑁆𑀲𑀕𑁆𑀕𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸 𑀧𑀫𑀸𑀤𑁄𑀢𑀺 𑀯𑀤𑀢𑀺.

𑁮𑁪𑁭. 𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸𑀬 𑀳𑁂𑀢𑀼𑀪𑀽𑀢𑁄 𑀘𑀺𑀢𑁆𑀢𑀲𑀫𑁆𑀧𑀕𑁆𑀕𑀳𑁄 𑀫𑀸𑀦𑀯𑀺𑀲𑁂𑀲𑁄.

𑁮𑁪𑁮. 𑀉𑀢𑁆𑀢𑀭𑀪𑀸𑀯𑁄 𑀉𑀢𑁆𑀢𑀭𑀺𑀬𑀁, 𑀓𑀭𑀡𑁂𑀦 𑀉𑀢𑁆𑀢𑀭𑀺𑀬𑀁 𑀓𑀭𑀡𑀼𑀢𑁆𑀢𑀭𑀺𑀬𑀁, 𑀲𑀸𑀭𑀫𑁆𑀪𑁂𑀦 𑀧𑀭𑀲𑁆𑀲 𑀓𑀺𑀭𑀺𑀬𑀢𑁄 𑀉𑀢𑁆𑀢𑀭𑀺𑀓𑀺𑀭𑀺𑀬𑀸.

𑁮𑁪𑁯. 𑀦𑁂𑀭𑀼𑀢𑁆𑀢𑀺𑀓𑀯𑀺𑀥𑀸𑀦𑁂𑀦𑀸𑀢𑀺 𑀇-𑀓𑀸𑀭𑀘𑁆𑀘-𑀓𑀸𑀭𑀸𑀦𑀜𑁆𑀘 𑀭-𑀓𑀸𑀭𑀢𑀸𑀧𑀸𑀤𑀦𑁂𑀦.

𑀅𑀢𑁆𑀢𑀳𑀺𑀢𑀁 𑀅𑀢𑁆𑀢𑀸𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑀫𑀸𑀳 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧𑀁, 𑀪𑀻𑀫𑀲𑁂𑀦𑁄 𑀪𑀻𑀫𑁄’’𑀢𑀺 𑀘. 𑀆𑀤𑀺𑀦𑁆𑀦𑁄, 𑀧𑀢𑁆𑀢𑁄 𑀯𑀸 𑀅𑀢𑁆𑀣𑁄 𑀅𑀢𑁆𑀢𑀸𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀫𑀼𑀤𑁆𑀤𑀺𑀢𑀲𑁆𑀲𑀸𑀢𑀺 𑀅𑀗𑁆𑀓𑀺𑀢𑀲𑁆𑀲.

𑁮𑁫𑁦. 𑀚𑀸𑀦𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲. 𑀉𑀧𑀸𑀤𑀸𑀦𑀸𑀤𑀺𑀧𑀘𑁆𑀘𑀬𑁂𑀢𑀺 𑀇𑀦𑁆𑀥𑀦𑀼𑀤𑀓𑀘𑀻𑀯𑀭𑀸𑀤𑀺𑀓𑁂 𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀓𑁂.

𑁮𑁫𑁧. 𑀕𑀡𑁆𑀞𑀺𑀓𑀸 𑀲𑀬𑀁 𑀕𑀡𑁆𑀞𑀺𑀓𑀭𑀡𑀢𑁄. 𑀧𑀢𑀺𑀭𑀽𑀧𑀯𑀘𑀦𑀢𑁄, 𑀅𑀜𑁆𑀜𑁂𑀲𑀁 𑀕𑀡𑁆𑀞𑀺𑀪𑁂𑀤𑀢𑁄 𑀘 𑀕𑀡𑁆𑀞𑀺𑀪𑀽𑀢𑀸.

𑁮𑁫𑁨. 𑀅𑀪𑁂𑀚𑁆𑀚𑀦𑁆𑀢𑀭𑀢𑀸𑀬 𑀲𑀫𑀸𑀲𑁂𑀯𑀺𑀢𑀢𑀸𑀬 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀢𑀸𑀬.

𑁮𑁫𑁩. 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀢𑁆𑀢𑁂𑀦 𑀢𑁂𑀫𑀦𑀓𑀭𑀡𑀁 𑀅𑀮𑁆𑀮𑀪𑀸𑀯𑀓𑀭𑀡𑀁, 𑀮𑁄𑀪𑀯𑀲𑁂𑀦 𑀅𑀯𑀲𑁆𑀲𑀯𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀦𑁆𑀢𑁂 𑀓𑀣𑀁 𑀔𑀻𑀬𑀦𑀦𑁆𑀢𑀺 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀔𑀻𑀬𑀦𑀦𑁆𑀢𑀺 𑀘𑀸’’𑀢𑀺𑀆𑀤𑀺.

𑁮𑁫𑁪. 𑀘𑀻𑀯𑀭𑀫𑀡𑁆𑀟𑀦𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸𑀢𑀺 𑀇𑀫𑁂𑀲𑀁. 𑀇𑀤𑀸𑀦𑀺 𑀢𑀁 𑀯𑀺𑀲𑁂𑀲𑀦𑀪𑀸𑀯𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀻𑀯𑀭𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁫𑁫. 𑀲𑀪𑀸𑀕𑀭𑀳𑀺𑀢𑁄, 𑀲𑀪𑀸𑀕𑀧𑀝𑀺𑀧𑀓𑁆𑀔𑁄 𑀯𑀸 𑀅𑀲𑀪𑀸𑀕𑁄, 𑀅𑀦𑀦𑀼𑀓𑀽𑀮𑀸𑀦𑀁 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸. 𑀢𑁂𑀦𑀸𑀳 ‘‘𑀫𑀸𑀦𑀣𑀤𑁆𑀥𑀢𑀸, 𑀯𑀺𑀭𑁄𑀥𑁄 𑀯𑀸’’𑀢𑀺.

𑁮𑁫𑁬. 𑀲𑀗𑁆𑀓𑀫𑁆𑀧𑀦𑀸 𑀉𑀓𑁆𑀓𑀡𑁆𑀞𑀦𑀸𑀯𑀲𑁂𑀦 𑀅𑀦𑀯𑀝𑁆𑀞𑀸𑀦𑀁, 𑀅𑀦𑀯𑀥𑀸𑀦𑀁 𑀯𑀸. 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀢𑀡𑁆𑀳𑀸𑀬𑀦𑀸.

𑁮𑁫𑁭. 𑀓𑀸𑀬𑀲𑁆𑀲𑀸𑀢𑀺 𑀦𑀸𑀫𑀓𑀸𑀬𑀲𑁆𑀲. 𑀢𑀲𑁆𑀫𑀺𑀜𑁆𑀳𑀺 𑀅𑀯𑀺𑀧𑁆𑀨𑀸𑀭𑀺𑀓𑁂 𑀭𑀽𑀧𑀓𑀸𑀬𑁄𑀧𑀺 𑀅𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺.

𑁮𑁬𑁦. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀫𑁄𑀳𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀦𑀁.

𑁮𑁬𑁧. 𑀢𑀺𑀯𑀺𑀥𑀫𑁆𑀧𑀺 𑀓𑀼𑀳𑀦𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂. ‘‘𑀢𑀢𑁆𑀣 𑀓𑀢𑀫𑀸 𑀓𑀼𑀳𑀦𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁬𑁧) 𑀇𑀥 𑀔𑀼𑀤𑁆𑀤𑀓𑀯𑀺𑀪𑀗𑁆𑀕𑁂 𑀆𑀕𑀢𑀁 𑀤𑁂𑀲𑀦𑀸𑀦𑀬𑀁 𑀦𑀺𑀲𑁆𑀲𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀦𑀺𑀲𑁆𑀲𑀬𑀪𑀽𑀢𑀸𑀬 𑀇𑀫𑀸𑀬 𑀧𑀸𑀴𑀺𑀬𑀸’’𑀢𑀺.

𑀅𑀦𑁆𑀢𑀭𑀳𑀺𑀢𑀸𑀦𑀻𑀢𑀺 𑀅𑀦𑁆𑀢𑀯𑀺𑀓𑀮𑀸𑀦𑀺 𑀙𑀺𑀦𑁆𑀤𑀦𑁆𑀢𑀸𑀦𑀺.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀳𑁂𑀢𑀼 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀁𑀬𑀢𑀸𑀓𑀸𑀭𑀤𑀲𑁆𑀲𑀦𑀁 𑀓𑁄𑀳𑀜𑁆𑀜𑀦𑁆𑀢𑀺 𑀆𑀳 ‘‘𑀧𑀸𑀧𑀺𑀘𑁆𑀙𑀢𑀸𑀬 𑀦𑀺𑀭𑀢𑁆𑀣𑀓𑀓𑀸𑀬𑀯𑀘𑀻𑀯𑀺𑀧𑁆𑀨𑀦𑁆𑀤𑀦𑀺𑀕𑁆𑀕𑀳𑀡𑀁 𑀓𑁄𑀭𑀚’’𑀦𑁆𑀢𑀺. 𑀬𑁄 𑀲𑀁𑀯𑁂𑀕𑀩𑀳𑀼𑀮𑁄 𑀓𑀼𑀓𑁆𑀓𑀼𑀘𑁆𑀘𑀓𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀢𑁆𑀢𑀦𑁄𑀧𑀺 𑀓𑀺𑀭𑀺𑀬𑀁 𑀧𑀭𑀺𑀲𑀗𑁆𑀓𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀢𑀺𑀝𑁆𑀞𑀢𑀺, 𑀢𑀸𑀤𑀺𑀲𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑀺𑀧𑀭𑀺𑀲𑀗𑁆𑀓𑀺𑀢𑁄’’𑀢𑀺 𑀯𑀼𑀢𑁆𑀢𑁄.

𑁮𑁬𑁪. 𑀧𑀲𑀁𑀲𑀸𑀫𑀼𑀔𑁂𑀦 𑀦𑀺𑀦𑁆𑀤𑀦𑀦𑁆𑀢𑀺 𑀧𑀲𑀁𑀲𑀸𑀯𑀢𑁆𑀣𑀼𑀢𑁄 𑀔𑀺𑀧𑀦𑀁 𑀩𑀳𑀺 𑀙𑀟𑁆𑀟𑀦𑀁 𑀬𑀣𑀸 ‘‘𑀅𑀤𑀸𑀬𑀓𑀁 𑀅𑀳𑁄 𑀤𑀸𑀦𑀧𑀢𑀻’’𑀢𑀺.

𑁮𑁬𑁫. 𑀕𑀯𑁂𑀲𑀦𑀓𑀫𑁆𑀫𑀦𑁆𑀢𑀺 𑀅𑀧𑁆𑀧𑀓𑁂𑀦 𑀮𑀸𑀪𑁂𑀦 𑀫𑀳𑀦𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀓𑀩𑁆𑀬𑀸𑀧𑀸𑀭𑁄.

𑁮𑁬𑁬. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀁, 𑀯𑀡𑁆𑀡𑀲𑁆𑀲 𑀲𑀼𑀦𑁆𑀤𑀭𑀪𑀸𑀯𑁄 𑀯𑀡𑁆𑀡𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺 𑀆𑀳 ‘‘𑀯𑀡𑁆𑀡𑀧𑀸𑀭𑀺𑀧𑀽𑀭𑀻 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸’’𑀢𑀺.

𑁮𑁭𑁯. 𑀲𑁂𑀬𑁆𑀬𑀫𑀸𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀽𑀢𑀺 ‘‘𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁬𑁯) 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀦𑀯𑀲𑀼 𑀫𑀸𑀦𑀦𑀺𑀤𑁆𑀤𑁂𑀲𑁂𑀲𑀼. ‘‘𑀲𑁂𑀬𑁆𑀬𑀸𑀤𑀺𑀧𑀼𑀕𑁆𑀕𑀮𑁄’’𑀢𑀺 𑀇𑀤𑀁 𑀢𑀢𑁆𑀣 𑀧𑀸𑀴𑀺𑀬𑀁 𑀲𑁂𑀬𑁆𑀬𑀸𑀤𑀻𑀦𑀁 𑀦𑀯𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀫𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀼𑀕𑁆𑀕𑀮𑀸𑀫𑀲𑀦𑁂 𑀲𑀢𑀺 𑀲𑁂𑀬𑁆𑀬𑀧𑀼𑀕𑁆𑀕𑀮𑁄 𑀘 𑀆𑀫𑀲𑀺𑀢𑀩𑁆𑀩𑁄 𑀲𑀺𑀬𑀸. 𑀢𑁂𑀦𑁂𑀯𑀸𑀳 ‘‘𑀲𑁂𑀬𑁆𑀬𑀫𑀸𑀦𑀪𑀸𑀯𑁂𑀧𑀻’’𑀢𑀺. 𑀲𑁂𑀬𑁆𑀬𑀫𑀸𑀦𑀪𑀸𑀯𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀆𑀓𑀟𑁆𑀠𑀓𑁄 𑀅𑀲𑁂𑀬𑁆𑀬𑀫𑀸𑀦𑀦𑀺𑀤𑁆𑀤𑁂𑀲𑁂𑀧𑀺 𑀧𑀼𑀕𑁆𑀕𑀮𑀸𑀫𑀲𑀦𑀲𑁆𑀲 𑀓𑀢𑀢𑁆𑀢𑀸. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀲𑁂𑀬𑁆𑀬𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲.

𑁮𑁮𑁦. 𑀧𑀼𑀭𑀺𑀫𑀫𑀸𑀦𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀲𑁆𑀲 𑀲𑀤𑀺𑀲𑀫𑀸𑀦𑀲𑁆𑀲, 𑀳𑀻𑀦𑀫𑀸𑀦𑀲𑁆𑀲 𑀯𑀸, 𑀲𑀤𑀺𑀲𑀫𑀸𑀦𑀯𑀲𑁂𑀦𑁂𑀯 𑀧𑀦 𑀧𑀸𑀴𑀺 𑀆𑀕𑀢𑀸.

𑁮𑁮𑁧. ‘‘𑀫𑀺𑀕𑀸𑀦𑀁 𑀓𑁄𑀢𑁆𑀣𑀼𑀓𑁄 𑀅𑀦𑁆𑀢𑁄, 𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄’’𑀢𑀺 (𑀚𑀸. 𑁧.𑁩.𑁧𑁩𑁫) 𑀯𑀘𑀦𑀢𑁄 𑀆𑀳 ‘‘𑀧𑀓𑁆𑀔𑀺𑀚𑀸𑀢𑀻𑀲𑀼 𑀯𑀸𑀬𑀲𑁄 𑀅𑀦𑁆𑀢𑁄 𑀮𑀸𑀫𑀓𑁄’’𑀢𑀺.

𑁮𑁮𑁨. 𑀯𑀺𑀭𑀸𑀕𑀦𑁆𑀢𑀺 𑀅𑀭𑀳𑀢𑁆𑀢𑀁.

𑁮𑁮𑁩. 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀘𑁆𑀙𑀦𑁆𑀤𑁄 𑀢𑀡𑁆𑀳𑀸𑀙𑀦𑁆𑀤𑁄. 𑀫𑀸𑀦𑀲𑀪𑀸𑀯𑀁 𑀅𑀦𑀼𑀕𑀢𑁄 𑀲𑁂𑀬𑁆𑀬𑀸𑀤𑀺𑀢𑁄 𑀲𑀫𑁆𑀧𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀯𑀸 𑀫𑀸𑀦𑀘𑁆𑀙𑀦𑁆𑀤𑁄.

𑁮𑁮𑁪. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀮𑀫𑁆𑀩𑀦𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂. 𑀬𑀼𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀫𑀼𑀢𑁆𑀢𑀁 𑀯𑀺𑀲𑁆𑀲𑀝𑁆𑀞𑀁. 𑀲𑀺𑀮𑀺𑀝𑁆𑀞𑀁 𑀲𑀳𑀺𑀢𑀁, 𑀅𑀢𑁆𑀣𑀤𑁆𑀯𑀬𑀯𑀺𑀪𑀸𑀯𑀓𑀁 𑀯𑀸.

𑁮𑁮𑁮. 𑀅𑀦𑀼𑀤𑁆𑀤𑀬𑀲𑁆𑀲𑁂𑀯𑀸𑀢𑀺 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀯𑀺𑀬 𑀅𑀦𑀼𑀓𑀫𑁆𑀧𑀦𑁆𑀢𑀲𑁆𑀲 𑀯𑀺𑀬 𑀯𑀺𑀓𑀧𑁆𑀧𑀦𑀸𑀢𑀺 𑀆𑀳 ‘‘𑀲𑀳𑀦𑀦𑁆𑀤𑀺𑀢𑀸𑀤𑀺𑀓𑀲𑁆𑀲𑀸’’𑀢𑀺, 𑀫𑁂𑀢𑁆𑀢𑀸𑀤𑀺𑀧𑀢𑀺𑀭𑀽𑀧𑁂𑀦 𑀧𑀯𑀢𑁆𑀢𑀕𑁂𑀳𑀲𑀺𑀢𑀲𑀺𑀦𑁂𑀳𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀸𑀤𑀺𑀲𑁄 𑀭𑀸𑀕𑁄’’𑀢𑀺. 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀏𑀯𑀫𑁆𑀧𑀺 ‘‘𑀢𑀢𑁆𑀣𑀸’’𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀧𑀭𑀸𑀦𑀼𑀤𑁆𑀤𑀬𑀢𑀸𑀳𑁂𑀢𑀼𑀓𑁄 𑀳𑀺 𑀧𑀭𑀸𑀦𑀼𑀤𑁆𑀤𑀬𑀢𑀸𑀲𑀳𑀺𑀢𑁄 𑀲𑁄 𑀯𑀺𑀢𑀓𑁆𑀓𑁄𑀢𑀺.

𑁮𑁯𑁦. 𑀓𑀸𑀫𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀮𑁄𑀓𑁄 𑀲𑀫𑁆𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀅𑀦𑀯𑀜𑁆𑀜𑀢𑁆𑀢𑀢𑁆𑀣𑀫𑁂𑀯 𑀓𑀸𑀫𑀕𑀼𑀡𑁂 𑀘 𑀧𑀢𑁆𑀣𑁂𑀢𑀻’’𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.