𑁧𑁭. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪𑁩-𑁪. 𑀅𑀢𑁆𑀣𑀺𑀧𑀝𑀺𑀘𑁆𑀘𑀁 𑀦𑀸𑀫𑀸𑀢𑀺 𑀅𑀢𑁆𑀣𑀺𑀢𑀸 𑀧𑀝𑀺𑀘𑁆𑀘𑀢𑁆𑀣𑁄 𑀦𑀸𑀫, 𑀅𑀲𑀢𑀺𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀤𑀺𑀪𑀸𑀯𑁂 𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀓𑀢𑁆𑀯𑀸 𑀬𑀣𑀸 𑀢𑀣𑀸 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀇𑀥 𑀧𑀝𑀺𑀘𑁆𑀘𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀧𑀝𑀺𑀘𑁆𑀘𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀔𑀸𑀤𑀺 ‘‘𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀺𑀲𑁆𑀲𑀸 𑀲𑁂𑀡𑀺𑀬𑀸𑀢𑀺 𑀅𑀝𑁆𑀞𑀸𑀭𑀲𑀲𑀼 𑀲𑁂𑀡𑀻𑀲𑀼 𑀫𑀬𑀁 𑀅𑀫𑀼𑀓𑀸𑀬 𑀲𑁂𑀡𑀺𑀬𑀸 𑀚𑀸𑀢𑀸𑀫𑁆𑀳, 𑀦 𑀅𑀜𑁆𑀜𑁂 𑀯𑀺𑀬 𑀅𑀧𑁆𑀧𑀜𑁆𑀜𑀸𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀧𑀼𑀭𑀢𑁄 𑀓𑀭𑀡𑀁 𑀧𑀫𑀼𑀔𑀪𑀸𑀯𑀓𑀭𑀡𑀁. 𑀦𑀺𑀥𑀸𑀦𑀭𑀸𑀲𑀻𑀢𑀺 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀥𑀦𑀦𑀺𑀘𑀬𑁄. 𑀬𑀲𑁄𑀢𑀺 𑀇𑀲𑁆𑀲𑀭𑀺𑀬𑀁. 𑀢𑀁 𑀧𑀦 𑀬𑁂𑀲𑀼 𑀯𑀢𑁆𑀢𑀢𑀺, 𑀢𑁂𑀲𑀼 𑀧𑀝𑁆𑀞𑀸𑀧𑀓𑀆𑀡𑀸𑀓𑀭𑀡𑁂𑀳𑀺 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀧𑀝𑁆𑀞𑀸𑀧𑀓𑀫𑀤𑁄, 𑀆𑀡𑀸𑀓𑀭𑀡𑀫𑀤𑁄’’𑀢𑀺 𑀘 𑀯𑀼𑀢𑁆𑀢𑀁.

𑁮𑁪𑁫. 𑀯𑀢𑁆𑀣𑀼𑀦𑀸𑀢𑀺 𑀚𑀸𑀢𑀺𑀆𑀤𑀺𑀧𑀯𑀢𑁆𑀢𑀺𑀳𑁂𑀢𑀼𑀦𑀸.

𑁮𑁪𑁬. 𑀧𑀢𑀺𑀝𑁆𑀞𑀸𑀪𑀸𑀯𑁄𑀢𑀺 𑀓𑀼𑀲𑀮𑀓𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀦𑀸𑀪𑀸𑀯𑁄, 𑀲𑁄 𑀧𑀦 𑀬𑀲𑁆𑀫𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀞𑀸𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀼𑀲𑀮𑀓𑀭𑀡𑁂 𑀅𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀧𑀫𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀯𑀫𑀸𑀤𑀺𑀓𑁄 𑀧𑀭𑀺𑀬𑀸𑀬𑁄𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 ‘‘𑀯𑀘𑀻𑀤𑀼𑀘𑁆𑀘𑀭𑀺𑀢𑁂, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄, 𑀫𑀓𑁆𑀔𑁄, 𑀧𑀴𑀸𑀲𑁄’’𑀢𑀺 𑀘 𑀏𑀯𑀫𑀸𑀤𑀺𑀓𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀧𑀫𑀸𑀤𑁄 𑀧𑀫𑀚𑁆𑀚𑀦𑀸𑀤𑀻’’𑀢𑀺𑀆𑀤𑀺𑀓𑁄 𑀢𑀤𑀢𑁆𑀣𑀧𑁆𑀧𑀓𑀸𑀲𑀓𑁄, ‘‘𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀸𑀤𑀦’’𑀦𑁆𑀢𑀺𑀆𑀤𑀺𑀓𑁄 𑀢𑀧𑁆𑀧𑀭𑀺𑀬𑀸𑀬𑀧𑁆𑀧𑀓𑀸𑀲𑀓𑁄 𑀩𑁆𑀬𑀜𑁆𑀚𑀦𑀧𑀭𑀺𑀬𑀸𑀬𑁄 𑀘 𑀅𑀧𑀭𑀺𑀬𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀤𑀲𑁆𑀲𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀢𑀺𑀯𑁄𑀲𑁆𑀲𑀕𑁆𑀕𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸 𑀧𑀫𑀸𑀤𑁄𑀢𑀺 𑀯𑀤𑀢𑀺.

𑁮𑁪𑁭. 𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸𑀬 𑀳𑁂𑀢𑀼𑀪𑀽𑀢𑁄 𑀘𑀺𑀢𑁆𑀢𑀲𑀫𑁆𑀧𑀕𑁆𑀕𑀳𑁄 𑀫𑀸𑀦𑀯𑀺𑀲𑁂𑀲𑁄.

𑁮𑁪𑁮. 𑀉𑀢𑁆𑀢𑀭𑀪𑀸𑀯𑁄 𑀉𑀢𑁆𑀢𑀭𑀺𑀬𑀁, 𑀓𑀭𑀡𑁂𑀦 𑀉𑀢𑁆𑀢𑀭𑀺𑀬𑀁 𑀓𑀭𑀡𑀼𑀢𑁆𑀢𑀭𑀺𑀬𑀁, 𑀲𑀸𑀭𑀫𑁆𑀪𑁂𑀦 𑀧𑀭𑀲𑁆𑀲 𑀓𑀺𑀭𑀺𑀬𑀢𑁄 𑀉𑀢𑁆𑀢𑀭𑀺𑀓𑀺𑀭𑀺𑀬𑀸.

𑁮𑁪𑁯. 𑀦𑁂𑀭𑀼𑀢𑁆𑀢𑀺𑀓𑀯𑀺𑀥𑀸𑀦𑁂𑀦𑀸𑀢𑀺 𑀇-𑀓𑀸𑀭𑀘𑁆𑀘-𑀓𑀸𑀭𑀸𑀦𑀜𑁆𑀘 𑀭-𑀓𑀸𑀭𑀢𑀸𑀧𑀸𑀤𑀦𑁂𑀦.

𑀅𑀢𑁆𑀢𑀳𑀺𑀢𑀁 𑀅𑀢𑁆𑀢𑀸𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑀫𑀸𑀳 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧𑀁, 𑀪𑀻𑀫𑀲𑁂𑀦𑁄 𑀪𑀻𑀫𑁄’’𑀢𑀺 𑀘. 𑀆𑀤𑀺𑀦𑁆𑀦𑁄, 𑀧𑀢𑁆𑀢𑁄 𑀯𑀸 𑀅𑀢𑁆𑀣𑁄 𑀅𑀢𑁆𑀢𑀸𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀫𑀼𑀤𑁆𑀤𑀺𑀢𑀲𑁆𑀲𑀸𑀢𑀺 𑀅𑀗𑁆𑀓𑀺𑀢𑀲𑁆𑀲.

𑁮𑁫𑁦. 𑀚𑀸𑀦𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲. 𑀉𑀧𑀸𑀤𑀸𑀦𑀸𑀤𑀺𑀧𑀘𑁆𑀘𑀬𑁂𑀢𑀺 𑀇𑀦𑁆𑀥𑀦𑀼𑀤𑀓𑀘𑀻𑀯𑀭𑀸𑀤𑀺𑀓𑁂 𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀓𑁂.

𑁮𑁫𑁧. 𑀕𑀡𑁆𑀞𑀺𑀓𑀸 𑀲𑀬𑀁 𑀕𑀡𑁆𑀞𑀺𑀓𑀭𑀡𑀢𑁄. 𑀧𑀢𑀺𑀭𑀽𑀧𑀯𑀘𑀦𑀢𑁄, 𑀅𑀜𑁆𑀜𑁂𑀲𑀁 𑀕𑀡𑁆𑀞𑀺𑀪𑁂𑀤𑀢𑁄 𑀘 𑀕𑀡𑁆𑀞𑀺𑀪𑀽𑀢𑀸.

𑁮𑁫𑁨. 𑀅𑀪𑁂𑀚𑁆𑀚𑀦𑁆𑀢𑀭𑀢𑀸𑀬 𑀲𑀫𑀸𑀲𑁂𑀯𑀺𑀢𑀢𑀸𑀬 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀢𑀸𑀬.

𑁮𑁫𑁩. 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀢𑁆𑀢𑁂𑀦 𑀢𑁂𑀫𑀦𑀓𑀭𑀡𑀁 𑀅𑀮𑁆𑀮𑀪𑀸𑀯𑀓𑀭𑀡𑀁, 𑀮𑁄𑀪𑀯𑀲𑁂𑀦 𑀅𑀯𑀲𑁆𑀲𑀯𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀦𑁆𑀢𑁂 𑀓𑀣𑀁 𑀔𑀻𑀬𑀦𑀦𑁆𑀢𑀺 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀔𑀻𑀬𑀦𑀦𑁆𑀢𑀺 𑀘𑀸’’𑀢𑀺𑀆𑀤𑀺.

𑁮𑁫𑁪. 𑀘𑀻𑀯𑀭𑀫𑀡𑁆𑀟𑀦𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸𑀢𑀺 𑀇𑀫𑁂𑀲𑀁. 𑀇𑀤𑀸𑀦𑀺 𑀢𑀁 𑀯𑀺𑀲𑁂𑀲𑀦𑀪𑀸𑀯𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀻𑀯𑀭𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁫𑁫. 𑀲𑀪𑀸𑀕𑀭𑀳𑀺𑀢𑁄, 𑀲𑀪𑀸𑀕𑀧𑀝𑀺𑀧𑀓𑁆𑀔𑁄 𑀯𑀸 𑀅𑀲𑀪𑀸𑀕𑁄, 𑀅𑀦𑀦𑀼𑀓𑀽𑀮𑀸𑀦𑀁 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸. 𑀢𑁂𑀦𑀸𑀳 ‘‘𑀫𑀸𑀦𑀣𑀤𑁆𑀥𑀢𑀸, 𑀯𑀺𑀭𑁄𑀥𑁄 𑀯𑀸’’𑀢𑀺.

𑁮𑁫𑁬. 𑀲𑀗𑁆𑀓𑀫𑁆𑀧𑀦𑀸 𑀉𑀓𑁆𑀓𑀡𑁆𑀞𑀦𑀸𑀯𑀲𑁂𑀦 𑀅𑀦𑀯𑀝𑁆𑀞𑀸𑀦𑀁, 𑀅𑀦𑀯𑀥𑀸𑀦𑀁 𑀯𑀸. 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀢𑀡𑁆𑀳𑀸𑀬𑀦𑀸.

𑁮𑁫𑁭. 𑀓𑀸𑀬𑀲𑁆𑀲𑀸𑀢𑀺 𑀦𑀸𑀫𑀓𑀸𑀬𑀲𑁆𑀲. 𑀢𑀲𑁆𑀫𑀺𑀜𑁆𑀳𑀺 𑀅𑀯𑀺𑀧𑁆𑀨𑀸𑀭𑀺𑀓𑁂 𑀭𑀽𑀧𑀓𑀸𑀬𑁄𑀧𑀺 𑀅𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺.

𑁮𑁬𑁦. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀫𑁄𑀳𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀦𑀁.

𑁮𑁬𑁧. 𑀢𑀺𑀯𑀺𑀥𑀫𑁆𑀧𑀺 𑀓𑀼𑀳𑀦𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂. ‘‘𑀢𑀢𑁆𑀣 𑀓𑀢𑀫𑀸 𑀓𑀼𑀳𑀦𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁬𑁧) 𑀇𑀥 𑀔𑀼𑀤𑁆𑀤𑀓𑀯𑀺𑀪𑀗𑁆𑀕𑁂 𑀆𑀕𑀢𑀁 𑀤𑁂𑀲𑀦𑀸𑀦𑀬𑀁 𑀦𑀺𑀲𑁆𑀲𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀦𑀺𑀲𑁆𑀲𑀬𑀪𑀽𑀢𑀸𑀬 𑀇𑀫𑀸𑀬 𑀧𑀸𑀴𑀺𑀬𑀸’’𑀢𑀺.

𑀅𑀦𑁆𑀢𑀭𑀳𑀺𑀢𑀸𑀦𑀻𑀢𑀺 𑀅𑀦𑁆𑀢𑀯𑀺𑀓𑀮𑀸𑀦𑀺 𑀙𑀺𑀦𑁆𑀤𑀦𑁆𑀢𑀸𑀦𑀺.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀳𑁂𑀢𑀼 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀁𑀬𑀢𑀸𑀓𑀸𑀭𑀤𑀲𑁆𑀲𑀦𑀁 𑀓𑁄𑀳𑀜𑁆𑀜𑀦𑁆𑀢𑀺 𑀆𑀳 ‘‘𑀧𑀸𑀧𑀺𑀘𑁆𑀙𑀢𑀸𑀬 𑀦𑀺𑀭𑀢𑁆𑀣𑀓𑀓𑀸𑀬𑀯𑀘𑀻𑀯𑀺𑀧𑁆𑀨𑀦𑁆𑀤𑀦𑀺𑀕𑁆𑀕𑀳𑀡𑀁 𑀓𑁄𑀭𑀚’’𑀦𑁆𑀢𑀺. 𑀬𑁄 𑀲𑀁𑀯𑁂𑀕𑀩𑀳𑀼𑀮𑁄 𑀓𑀼𑀓𑁆𑀓𑀼𑀘𑁆𑀘𑀓𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀢𑁆𑀢𑀦𑁄𑀧𑀺 𑀓𑀺𑀭𑀺𑀬𑀁 𑀧𑀭𑀺𑀲𑀗𑁆𑀓𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀢𑀺𑀝𑁆𑀞𑀢𑀺, 𑀢𑀸𑀤𑀺𑀲𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑀺𑀧𑀭𑀺𑀲𑀗𑁆𑀓𑀺𑀢𑁄’’𑀢𑀺 𑀯𑀼𑀢𑁆𑀢𑁄.

𑁮𑁬𑁪. 𑀧𑀲𑀁𑀲𑀸𑀫𑀼𑀔𑁂𑀦 𑀦𑀺𑀦𑁆𑀤𑀦𑀦𑁆𑀢𑀺 𑀧𑀲𑀁𑀲𑀸𑀯𑀢𑁆𑀣𑀼𑀢𑁄 𑀔𑀺𑀧𑀦𑀁 𑀩𑀳𑀺 𑀙𑀟𑁆𑀟𑀦𑀁 𑀬𑀣𑀸 ‘‘𑀅𑀤𑀸𑀬𑀓𑀁 𑀅𑀳𑁄 𑀤𑀸𑀦𑀧𑀢𑀻’’𑀢𑀺.

𑁮𑁬𑁫. 𑀕𑀯𑁂𑀲𑀦𑀓𑀫𑁆𑀫𑀦𑁆𑀢𑀺 𑀅𑀧𑁆𑀧𑀓𑁂𑀦 𑀮𑀸𑀪𑁂𑀦 𑀫𑀳𑀦𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀓𑀩𑁆𑀬𑀸𑀧𑀸𑀭𑁄.

𑁮𑁬𑁬. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀁, 𑀯𑀡𑁆𑀡𑀲𑁆𑀲 𑀲𑀼𑀦𑁆𑀤𑀭𑀪𑀸𑀯𑁄 𑀯𑀡𑁆𑀡𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺 𑀆𑀳 ‘‘𑀯𑀡𑁆𑀡𑀧𑀸𑀭𑀺𑀧𑀽𑀭𑀻 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸’’𑀢𑀺.

𑁮𑁭𑁯. 𑀲𑁂𑀬𑁆𑀬𑀫𑀸𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀽𑀢𑀺 ‘‘𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁬𑁯) 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀦𑀯𑀲𑀼 𑀫𑀸𑀦𑀦𑀺𑀤𑁆𑀤𑁂𑀲𑁂𑀲𑀼. ‘‘𑀲𑁂𑀬𑁆𑀬𑀸𑀤𑀺𑀧𑀼𑀕𑁆𑀕𑀮𑁄’’𑀢𑀺 𑀇𑀤𑀁 𑀢𑀢𑁆𑀣 𑀧𑀸𑀴𑀺𑀬𑀁 𑀲𑁂𑀬𑁆𑀬𑀸𑀤𑀻𑀦𑀁 𑀦𑀯𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀫𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀼𑀕𑁆𑀕𑀮𑀸𑀫𑀲𑀦𑁂 𑀲𑀢𑀺 𑀲𑁂𑀬𑁆𑀬𑀧𑀼𑀕𑁆𑀕𑀮𑁄 𑀘 𑀆𑀫𑀲𑀺𑀢𑀩𑁆𑀩𑁄 𑀲𑀺𑀬𑀸. 𑀢𑁂𑀦𑁂𑀯𑀸𑀳 ‘‘𑀲𑁂𑀬𑁆𑀬𑀫𑀸𑀦𑀪𑀸𑀯𑁂𑀧𑀻’’𑀢𑀺. 𑀲𑁂𑀬𑁆𑀬𑀫𑀸𑀦𑀪𑀸𑀯𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀆𑀓𑀟𑁆𑀠𑀓𑁄 𑀅𑀲𑁂𑀬𑁆𑀬𑀫𑀸𑀦𑀦𑀺𑀤𑁆𑀤𑁂𑀲𑁂𑀧𑀺 𑀧𑀼𑀕𑁆𑀕𑀮𑀸𑀫𑀲𑀦𑀲𑁆𑀲 𑀓𑀢𑀢𑁆𑀢𑀸. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀲𑁂𑀬𑁆𑀬𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲.

𑁮𑁮𑁦. 𑀧𑀼𑀭𑀺𑀫𑀫𑀸𑀦𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀲𑁆𑀲 𑀲𑀤𑀺𑀲𑀫𑀸𑀦𑀲𑁆𑀲, 𑀳𑀻𑀦𑀫𑀸𑀦𑀲𑁆𑀲 𑀯𑀸, 𑀲𑀤𑀺𑀲𑀫𑀸𑀦𑀯𑀲𑁂𑀦𑁂𑀯 𑀧𑀦 𑀧𑀸𑀴𑀺 𑀆𑀕𑀢𑀸.

𑁮𑁮𑁧. ‘‘𑀫𑀺𑀕𑀸𑀦𑀁 𑀓𑁄𑀢𑁆𑀣𑀼𑀓𑁄 𑀅𑀦𑁆𑀢𑁄, 𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄’’𑀢𑀺 (𑀚𑀸. 𑁧.𑁩.𑁧𑁩𑁫) 𑀯𑀘𑀦𑀢𑁄 𑀆𑀳 ‘‘𑀧𑀓𑁆𑀔𑀺𑀚𑀸𑀢𑀻𑀲𑀼 𑀯𑀸𑀬𑀲𑁄 𑀅𑀦𑁆𑀢𑁄 𑀮𑀸𑀫𑀓𑁄’’𑀢𑀺.

𑁮𑁮𑁨. 𑀯𑀺𑀭𑀸𑀕𑀦𑁆𑀢𑀺 𑀅𑀭𑀳𑀢𑁆𑀢𑀁.

𑁮𑁮𑁩. 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀘𑁆𑀙𑀦𑁆𑀤𑁄 𑀢𑀡𑁆𑀳𑀸𑀙𑀦𑁆𑀤𑁄. 𑀫𑀸𑀦𑀲𑀪𑀸𑀯𑀁 𑀅𑀦𑀼𑀕𑀢𑁄 𑀲𑁂𑀬𑁆𑀬𑀸𑀤𑀺𑀢𑁄 𑀲𑀫𑁆𑀧𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀯𑀸 𑀫𑀸𑀦𑀘𑁆𑀙𑀦𑁆𑀤𑁄.

𑁮𑁮𑁪. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀮𑀫𑁆𑀩𑀦𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂. 𑀬𑀼𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀫𑀼𑀢𑁆𑀢𑀁 𑀯𑀺𑀲𑁆𑀲𑀝𑁆𑀞𑀁. 𑀲𑀺𑀮𑀺𑀝𑁆𑀞𑀁 𑀲𑀳𑀺𑀢𑀁, 𑀅𑀢𑁆𑀣𑀤𑁆𑀯𑀬𑀯𑀺𑀪𑀸𑀯𑀓𑀁 𑀯𑀸.

𑁮𑁮𑁮. 𑀅𑀦𑀼𑀤𑁆𑀤𑀬𑀲𑁆𑀲𑁂𑀯𑀸𑀢𑀺 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀯𑀺𑀬 𑀅𑀦𑀼𑀓𑀫𑁆𑀧𑀦𑁆𑀢𑀲𑁆𑀲 𑀯𑀺𑀬 𑀯𑀺𑀓𑀧𑁆𑀧𑀦𑀸𑀢𑀺 𑀆𑀳 ‘‘𑀲𑀳𑀦𑀦𑁆𑀤𑀺𑀢𑀸𑀤𑀺𑀓𑀲𑁆𑀲𑀸’’𑀢𑀺, 𑀫𑁂𑀢𑁆𑀢𑀸𑀤𑀺𑀧𑀢𑀺𑀭𑀽𑀧𑁂𑀦 𑀧𑀯𑀢𑁆𑀢𑀕𑁂𑀳𑀲𑀺𑀢𑀲𑀺𑀦𑁂𑀳𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀸𑀤𑀺𑀲𑁄 𑀭𑀸𑀕𑁄’’𑀢𑀺. 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀏𑀯𑀫𑁆𑀧𑀺 ‘‘𑀢𑀢𑁆𑀣𑀸’’𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀧𑀭𑀸𑀦𑀼𑀤𑁆𑀤𑀬𑀢𑀸𑀳𑁂𑀢𑀼𑀓𑁄 𑀳𑀺 𑀧𑀭𑀸𑀦𑀼𑀤𑁆𑀤𑀬𑀢𑀸𑀲𑀳𑀺𑀢𑁄 𑀲𑁄 𑀯𑀺𑀢𑀓𑁆𑀓𑁄𑀢𑀺.

𑁮𑁯𑁦. 𑀓𑀸𑀫𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀮𑁄𑀓𑁄 𑀲𑀫𑁆𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀅𑀦𑀯𑀜𑁆𑀜𑀢𑁆𑀢𑀢𑁆𑀣𑀫𑁂𑀯 𑀓𑀸𑀫𑀕𑀼𑀡𑁂 𑀘 𑀧𑀢𑁆𑀣𑁂𑀢𑀻’’𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯𑁧. 𑀩𑀦𑁆𑀥𑀢𑀻𑀢𑀺 𑀓𑀼𑀚𑁆𑀛𑀦𑀸𑀓𑀸𑀭𑀁 𑀩𑀦𑁆𑀥𑀢𑀺 𑀖𑀝𑁂𑀢𑀺. 𑀉𑀧𑀦𑀸𑀳𑁄 𑀳𑀺 𑀆𑀖𑀸𑀢𑀯𑀢𑁆𑀣𑀼𑀦𑀸 𑀘𑀺𑀢𑁆𑀢𑀁 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀬𑀢𑁄 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀢𑁆𑀯𑀸𑀧𑀺 𑀅𑀯𑀺𑀤𑀺𑀢𑁂 𑀉𑀧𑀦𑀸𑀳𑁂 𑀆𑀖𑀸𑀢𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑁄𑀯 𑀳𑁄𑀢𑀺.

𑁮𑁯𑁨. 𑀤𑀦𑁆𑀢𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀤𑀦𑁆𑀢𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀬 𑀏𑀓𑀤𑁂𑀲𑀁 𑀅𑀧𑀦𑁂𑀢𑁆𑀯𑀸 𑀏𑀓𑀤𑁂𑀲𑀁 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁯𑁪. 𑀅𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸. 𑀧𑀝𑀺𑀘𑁆𑀙𑀸𑀤𑀦𑁂𑀢𑀺 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀅𑀘𑁆𑀘𑀬𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑁂. 𑀯𑁄𑀘𑁆𑀙𑀺𑀦𑁆𑀤𑀦𑀁 𑀯𑀻𑀢𑀺𑀓𑁆𑀓𑀫𑀓𑀺𑀭𑀺𑀬𑀸𑀬 𑀅𑀧𑁆𑀧𑀝𑀺𑀚𑀸𑀦𑀯𑀲𑁂𑀦 𑀉𑀧𑀘𑁆𑀙𑀺𑀦𑁆𑀤𑀦𑀁, 𑀯𑁄𑀘𑁆𑀙𑀺𑀦𑁆𑀤𑀦𑁂𑀦 𑀙𑀸𑀤𑀦𑀸 𑀯𑁄𑀘𑁆𑀙𑀺𑀦𑁆𑀤𑀦𑀙𑀸𑀤𑀦𑀸.

𑀅𑀲𑀫𑁆𑀫𑀸𑀪𑀸𑀲𑀦𑁂 𑀲𑀞-𑀲𑀤𑁆𑀤𑁄 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀬𑁄 𑀦 𑀲𑀫𑁆𑀫𑀸 𑀪𑀸𑀲𑀢𑀺, 𑀲𑁄 𑀲𑀞𑁄’’𑀢𑀺. 𑀲𑀞𑀲𑁆𑀲 𑀬𑀓𑁆𑀔𑀲𑀽𑀓𑀭𑀲𑀤𑀺𑀲𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀘𑁆𑀙𑀺 𑀯𑀸 𑀧𑀺𑀞𑀺 𑀯𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀆𑀳, 𑀇𑀦𑁆𑀤𑀚𑀸𑀮𑀲𑀤𑀺𑀲𑁄 𑀯𑀸 𑀏𑀲𑁄 𑀤𑀝𑁆𑀞𑀩𑁆𑀩𑁄.

𑀬𑁄 𑀲𑀩𑁆𑀩𑀣𑀸 𑀯𑀺𑀧𑀦𑁆𑀦𑀚𑁆𑀛𑀸𑀲𑀬𑁄𑀧𑀺 𑀲𑀫𑀸𑀦𑁄 𑀓𑀸𑀬𑀯𑀘𑀻𑀪𑁂𑀤𑀫𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀲𑀫𑁆𑀧𑀦𑁆𑀦𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑁄 𑀅𑀜𑁆𑀜𑀣𑀸 𑀲𑀦𑁆𑀢𑀁 𑀅𑀜𑁆𑀜𑀣𑀸 𑀧𑀯𑁂𑀤𑁂𑀢𑀺. 𑀢𑁂𑀦𑀸𑀳 ‘‘𑀢𑁂𑀦𑁂𑀢𑀁 𑀲𑀸𑀞𑁂𑀬𑁆𑀬𑀁 𑀫𑀸𑀬𑀸𑀢𑁄 𑀩𑀮𑀯𑀢𑀭𑀸 𑀯𑀜𑁆𑀘𑀦𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀫𑁂𑀯 𑀳𑀺 𑀫𑀸𑀬𑀸. 𑀢𑁂𑀦𑁂𑀯𑀸𑀢𑀺 𑀩𑀮𑀯𑀢𑀭𑀯𑀜𑁆𑀘𑀦𑀸𑀪𑀸𑀯𑁂𑀦𑁂𑀯. 𑀤𑀴𑁆𑀳𑀓𑁂𑀭𑀸𑀝𑀺𑀬𑀜𑁆𑀳𑀺 ‘‘𑀧𑀭𑀺𑀓𑁆𑀔𑀢𑀢𑀸’’𑀢𑀺 𑀯𑀼𑀢𑁆𑀢𑀁.

𑁯𑁦𑁮. 𑀅𑀪𑀸𑀯𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 ‘‘𑀓𑁄 𑀧𑀦 𑀯𑀸𑀤𑁄 𑀪𑀸𑀯𑁂’’𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀏𑀓𑀘𑁆𑀘𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀬𑀣𑀸𑀭𑀳𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀳𑀺 𑀓𑀢𑀽𑀧𑀓𑀸𑀭𑀁 𑀭𑀽𑀧𑀭𑀸𑀕𑀸𑀤𑀺𑀲𑀁𑀬𑁄𑀚𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀏𑀓𑀘𑁆𑀘𑀸𑀦𑀁 𑀧𑀦 𑀯𑀺𑀦𑀸 𑀏𑀯 𑀢𑁂𑀳𑀻𑀢𑀺 𑀓𑀲𑁆𑀲𑀘𑀺𑀧𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑀣𑀜𑁆𑀘𑀺𑀧𑀺 𑀅𑀯𑀺𑀫𑀼𑀢𑁆𑀢𑁄 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀪𑀸𑀯𑀢𑁄 ‘‘𑀩𑀳𑀺𑀤𑁆𑀥𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀭𑀽𑀧𑀸𑀭𑀽𑀧𑀪𑀯𑁂 𑀓𑁂𑀯𑀮𑀫𑁆𑀧𑀺 𑀲𑀁𑀬𑁄𑀚𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀧𑀯𑀢𑁆𑀢𑀢𑀻𑀢𑀺, 𑀢𑀢𑁄 𑀏𑀯 𑀭𑀽𑀧𑀸𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀪𑀸𑀯𑀳𑁂𑀢𑀚𑀸𑀢𑀦𑁆𑀢𑀺 𑀘 ‘‘𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁…𑀧𑁂… 𑀬𑁄𑀚𑀦𑀁 𑀦𑀸𑀫𑀸’’𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁦𑁯. 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀳𑀺 𑀯𑀺𑀬 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀤𑁄𑀫𑀦𑀲𑁆𑀲𑀸𑀤𑀺𑀲𑀳𑀸𑀬𑀪𑀽𑀢𑁂𑀦 𑀤𑁄𑀲𑁂𑀦𑀧𑀺 𑀪𑀯𑀸𑀪𑀺𑀲𑀗𑁆𑀔𑀭𑀡𑀁 𑀳𑁄𑀢𑀻𑀢𑀺 ‘‘𑀅𑀓𑀼𑀲𑀮𑀫𑀽𑀮𑀸𑀦𑁂𑀯 𑀯𑀝𑁆𑀝𑀫𑀽𑀮𑀸𑀦𑀻’’𑀢𑀺. 𑀢𑁂𑀦𑀸𑀳 ‘‘𑀢𑀻𑀳𑀺…𑀧𑁂… 𑀓𑀣𑀺𑀢𑁄’’𑀢𑀺.

𑁯𑁧𑁯. 𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀲𑀦𑁆𑀢𑀧𑀡𑀻𑀢𑀪𑀸𑀯𑁂𑀦 𑀉𑀴𑀸𑀭𑀢𑀫𑀢𑁆𑀢𑀸 𑀢𑀢𑁆𑀣 𑀲𑀸𑀢𑀺𑀲𑀬𑁄 𑀪𑀯𑀭𑀸𑀕𑁄 𑀯𑀼𑀢𑁆𑀢𑁄.

𑁯𑁨𑁦. 𑀫𑀸𑀦𑁂𑀦 𑀞𑀧𑀦𑀸𑀢𑀺 𑀫𑀸𑀦𑁂𑀦 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀞𑀧𑀦𑀸. 𑀞𑀧𑀦𑀸𑀢𑀺 𑀘 𑀤𑀳𑀦𑀸, 𑀧𑀕𑁆𑀕𑀡𑁆𑀳𑀦𑀸 𑀯𑀸.

𑁯𑁨𑁧. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀸.

𑁯𑁨𑁨. 𑀢𑁂𑀲𑀁 𑀯𑀡𑁆𑀡𑀪𑁂𑀤𑀦𑁆𑀢𑀺 𑀢𑁂𑀲𑀁 𑀚𑀻𑀯𑀸𑀦𑀁 𑀯𑀡𑁆𑀡𑀯𑀺𑀲𑁂𑀲𑀁, 𑀢𑁂𑀲𑀁 𑀯𑀸 𑀢𑀣𑀸 𑀓𑀣𑁂𑀦𑁆𑀢𑀸𑀦𑀁 𑀲𑀼𑀢𑁆𑀯𑀸. 𑀩𑁆𑀬𑀸𑀧𑀻𑀢𑀺 𑀲𑀓𑀮𑀮𑁄𑀓𑀩𑁆𑀬𑀸𑀧𑀻, 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀻 𑀯𑀸. 𑀧𑀭𑀺𑀫𑀡𑁆𑀟𑀮𑁄𑀢𑀺 𑀧𑀭𑀫𑀸𑀡𑀼𑀧𑁆𑀧𑀫𑀸𑀡𑁄 𑀳𑀼𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀯𑀬𑀧𑁆𑀧𑀫𑀸𑀡𑁄𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁯𑁨𑁩. 𑀉𑀢𑀼𑀯𑀺𑀧𑀭𑀺𑀡𑀸𑀫𑀚𑁄 𑀲𑀻𑀢𑀸𑀤𑀺𑀉𑀢𑀼𑀯𑀺𑀧𑀭𑀺𑀯𑀢𑁆𑀢𑀚𑀸𑀢𑁄. 𑀑𑀧𑀓𑁆𑀓𑀫𑀺𑀓𑁄 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀢𑀸𑀤𑀺𑀲𑀉𑀧𑀓𑁆𑀓𑀫𑀦𑀺𑀩𑁆𑀩𑀢𑁆𑀢𑁄. 𑀯𑀺𑀲𑀫𑀧𑀭𑀺𑀳𑀸𑀭𑀚𑁄 𑀘𑀺𑀭𑀸𑀲𑀦𑀘𑀺𑀭𑀝𑁆𑀞𑀸𑀦𑀸𑀤𑀺𑀦𑀸 𑀓𑀸𑀬𑀲𑁆𑀲 𑀯𑀺𑀲𑀫𑀧𑀭𑀺𑀳𑀭𑀡𑀢𑁄 𑀚𑀸𑀢𑁄. 𑀲𑀦𑁆𑀦𑀺𑀧𑀸𑀢𑀚𑁄 𑀲𑀜𑁆𑀘𑀬𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑁂𑀓𑀁 𑀯𑀺𑀲𑀫𑀸𑀓𑀸𑀭𑀢𑁄 𑀤𑁄𑀲𑀢𑁆𑀢𑀬𑀲𑀫𑁄𑀥𑀸𑀦𑀢𑁄 𑀚𑀸𑀢𑁄. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀉𑀢𑀼𑀯𑀺𑀧𑀭𑀺𑀡𑀸𑀫𑀸𑀤𑀻𑀳𑀺 𑀯𑀺𑀦𑀸 𑀓𑀫𑁆𑀫𑀢𑁄 𑀲𑀫𑀼𑀝𑁆𑀞𑀺𑀢𑁄. 𑀧𑀺𑀢𑁆𑀢𑀲𑁂𑀫𑁆𑀳𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀧𑀦 𑀧𑀺𑀢𑁆𑀢𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀸. 𑀲𑀩𑁆𑀩𑀲𑁆𑀲𑀸𑀧𑀺 𑀳𑀺 𑀭𑁄𑀕𑀲𑁆𑀲 𑀤𑁄𑀲𑀢𑁆𑀢𑀬𑀁 𑀆𑀲𑀦𑁆𑀦𑀓𑀸𑀭𑀡𑀁 𑀤𑁄𑀲𑀧𑁆𑀧𑀓𑁄𑀧𑁂𑀦 𑀯𑀺𑀦𑀸 𑀅𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀥𑀸𑀦𑀓𑀸𑀭𑀡𑀁 𑀓𑀢𑁄𑀓𑀸𑀲𑁂 𑀏𑀯 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀢𑁄, 𑀇𑀢𑀭𑀁 𑀧𑀦 𑀢𑀲𑁆𑀲 𑀲𑀳𑀓𑀸𑀭𑀺𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀬𑀺𑀤𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀯𑀸𑀤𑀺𑀦𑁄 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀨𑀮𑀫𑁆𑀧𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀓𑀧𑀓𑁆𑀔𑀺𑀓𑀫𑁂𑀯 𑀅𑀢𑀻𑀢𑀤𑁆𑀥𑀺𑀓𑀢𑁆𑀢𑀸 𑀓𑀫𑁆𑀫𑀲𑁆𑀲𑀸𑀢𑀺 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑀁 𑀓𑀺𑀭-𑀲𑀤𑁆𑀤𑀕𑁆𑀕𑀳𑀡𑀁 𑀓𑀭𑁄𑀢𑀺 ‘‘𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀓𑀺𑀭 𑀧𑀝𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺.

𑁯𑁨𑁪. 𑀤𑀸𑀳𑀓𑀸𑀭𑀡𑀢𑀸𑀬𑀸𑀢𑀺 𑀭𑀸𑀕𑀸𑀤𑀺𑀤𑀲𑀯𑀺𑀥𑀕𑁆𑀕𑀺𑀤𑀸𑀳𑀲𑁆𑀲, 𑀦𑀭𑀓𑀕𑁆𑀕𑀺𑀤𑀸𑀳𑀲𑁆𑀲 𑀘 𑀓𑀸𑀭𑀡𑀢𑀸𑀬.

𑁯𑁨𑁬. 𑀧𑀼𑀣𑀼𑀦𑀺𑀫𑀺𑀢𑁆𑀢𑀲𑀪𑀸𑀯𑁂𑀲𑀽𑀢𑀺 𑀧𑀼𑀣𑀼 𑀦𑀸𑀦𑀸𑀓𑀺𑀮𑁂𑀲𑀸𑀤𑀻𑀦𑀁 𑀓𑀸𑀭𑀡𑀲𑀪𑀸𑀯𑁂𑀲𑀼.

𑁯𑁩𑁧. 𑀅𑀤𑁆𑀤𑀦𑀁 𑀅𑀤𑁆𑀤𑀸 𑀫𑀤𑁆𑀤𑀯𑁄, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀤𑁆𑀤𑀸𑀢𑀺 𑀆𑀳 ‘‘𑀅𑀫𑀼𑀤𑀼𑀢𑀸 𑀯𑀸 𑀅𑀦𑀤𑁆𑀤𑀸’’𑀢𑀺.

𑁯𑁩𑁬. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀢𑁆𑀢𑀸 𑀆𑀯𑀚𑁆𑀚𑀦𑀸𑀬 𑀅𑀓𑀼𑀲𑀮𑀸𑀦𑀼𑀓𑀽𑀮𑀓𑀺𑀘𑁆𑀘𑀢𑀸 𑀤𑀝𑁆𑀞𑀩𑁆𑀩𑀸.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁩𑁯. 𑀏𑀯𑀁-𑀲𑀤𑁆𑀤𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂𑀦 𑀏𑀯𑀁-𑀲𑀤𑁆𑀤𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀯𑁄 𑀏𑀯 𑀅𑀪𑀺𑀯𑀼𑀤𑁆𑀥𑁄 𑀅𑀪𑀯𑁄 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁧). 𑀤𑀼𑀢𑀺𑀬𑀲𑁆𑀫𑀺𑀁 𑀧𑀓𑁆𑀔𑁂 𑀪𑀯𑀸𑀪𑀯𑀲𑀤𑁆𑀤𑁂𑀦 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄, 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀕𑀢𑀺𑀬𑀸𑀢𑀺 𑀅𑀬𑀼𑀢𑁆𑀢𑀕𑀢𑀺𑀬𑀸, 𑀅𑀧𑁆𑀧𑀢𑀺𑀭𑀽𑀧𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄.

𑀓𑁄𑀥𑀽𑀧𑀸𑀬𑀸𑀲…𑀧𑁂… 𑀫𑀸𑀢𑀼𑀕𑀸𑀫𑀸 𑀯𑀸 𑀊𑀫𑀺𑀆𑀤𑀺𑀪𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀓𑀸𑀫𑀕𑀼𑀡𑀫𑀸𑀢𑀼𑀕𑀸𑀫𑀕𑁆𑀕𑀳𑀡𑁂𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀕𑁆𑀕𑀳𑀡𑁂, 𑀫𑀸𑀢𑀼𑀕𑀸𑀫𑀕𑁆𑀕𑀳𑀡𑁂 𑀘.

‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀓𑀸 𑀤𑀺𑀝𑁆𑀞𑀺 𑀬𑀤𑀺𑀧𑀺 𑀅𑀜𑁆𑀜𑁂𑀲𑀫𑁆𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀅𑀢𑁆𑀣𑁂𑀯, 𑀢𑀺𑀫𑁆𑀩𑀭𑀼𑀓𑁄 𑀧𑀦 𑀢𑀣𑀸𑀤𑀺𑀝𑁆𑀞𑀺𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀻𑀢𑀺 𑀲𑀸 𑀤𑀺𑀝𑁆𑀞𑀺 ‘‘𑀢𑀺𑀫𑁆𑀩𑀭𑀼𑀓𑀤𑀺𑀝𑁆𑀞𑀻’’𑀢𑀺 (𑀲𑀁. 𑀦𑀺. 𑁨.𑁧𑁮) 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀺𑀫𑁆𑀩𑀭𑀼𑀓𑁄…𑀧𑁂… 𑀆𑀕𑀢𑀢𑁆𑀢𑀸’’𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁦. 𑀆𑀕𑀫𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁪𑁧. 𑀉𑀧𑀘𑀬𑀦𑀢𑁄𑀢𑀺 𑀯𑀟𑁆𑀠𑀦𑀢𑁄. 𑀅𑀜𑁆𑀜𑀣𑀸𑀢𑀺 𑀮𑀸𑀪𑀢𑁄 𑀢𑀓𑁆𑀓𑀦𑀢𑁄 𑀘 𑀅𑀜𑁆𑀜𑀧𑁆𑀧𑀓𑀸𑀭𑁄 𑀕𑀳𑀺𑀢𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸𑀭𑀼𑀘𑀺𑀆𑀤𑀻𑀳𑀻’’𑀢𑀺 𑀆𑀳. 𑀅𑀦𑀼𑀲𑁆𑀲𑀯𑀢𑁄 𑀳𑀺 𑀲𑀤𑁆𑀤𑀳𑀦𑀁, 𑀭𑀼𑀘𑁆𑀘𑀦𑀁 𑀧𑀦 𑀚𑀸𑀢𑀺𑀲𑁆𑀲𑀭𑀜𑀸𑀡𑀢𑁄𑀧𑀺 𑀳𑁄𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀔𑀦𑁆𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄.

𑁯𑁪𑁨. 𑀅𑀓𑁆𑀔𑀦𑁆𑀢𑀺 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀅𑀓𑁆𑀔𑀦𑁆𑀢𑀺𑀫𑀽𑀮𑀓𑀸. 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀢𑀸𑀤𑀺𑀤𑁄𑀲𑀸 𑀢𑀸𑀤𑀺𑀲𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺.

𑁯𑁪𑁩. 𑀉𑀤𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀅𑀯𑀽𑀧𑀲𑀫𑁄 𑀦 𑀉𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑁄𑀢𑀺 𑀧𑀻𑀢𑀺𑀬𑀸 𑀏𑀯 𑀲𑀯𑀺𑀧𑁆𑀨𑀸𑀭𑀺𑀓𑀢𑀸𑀲𑀗𑁆𑀔𑀸𑀢𑀁 𑀅𑀲𑀦𑁆𑀢𑀲𑀪𑀸𑀯𑀁 𑀆𑀳. 𑀅𑀯𑀽𑀧𑀲𑀫𑀳𑁂𑀢𑀼𑀪𑀽𑀢𑁄𑀢𑀺 𑀯𑀺𑀓𑁆𑀔𑁂𑀧𑀳𑁂𑀢𑀼𑀪𑀽𑀢𑁄. 𑀧𑀻𑀢𑀺𑀬𑀸 𑀆𑀓𑀸𑀭𑁄𑀢𑀺 𑀧𑀻𑀢𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑁄.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁪. 𑀢𑁂𑀦𑀸𑀢𑀺 𑀓𑁄𑀥𑀸𑀤𑀻𑀦𑀁𑀬𑁂𑀯 𑀯𑀺𑀯𑀸𑀤𑀫𑀽𑀮𑀢𑁆𑀢𑀸.

𑁯𑁪𑁫. 𑀓𑀼𑀲𑀮𑀸𑀦𑀼𑀬𑁄𑀕𑁂 𑀲𑀸𑀢𑀘𑁆𑀘𑀁 𑀓𑀼𑀲𑀮𑀸𑀦𑀼𑀬𑁄𑀕𑀲𑀸𑀢𑀘𑁆𑀘𑀁.

𑀕𑀡𑁂𑀦 𑀲𑀢𑁆𑀢𑀲𑀫𑀽𑀳𑁂𑀦 𑀲𑀗𑁆𑀕𑀡𑀺 𑀲𑀦𑁆𑀦𑀺𑀧𑀢𑀦𑀁 𑀬𑁂𑀦 𑀲𑀤𑁆𑀥𑀺𑀁, 𑀢𑁂𑀦 𑀲𑀗𑁆𑀕𑀢𑀺 𑀕𑀡𑀲𑀗𑁆𑀕𑀡𑀺𑀓𑀸. 𑀓𑀲𑁆𑀲𑀘𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀓𑀲𑁆𑀲.

𑁯𑁪𑁬. 𑀉𑀧𑀯𑀺𑀢𑀓𑁆𑀓𑁂𑀢𑀻𑀢𑀺 𑀆𑀭𑀫𑁆𑀫𑀡𑀁 𑀉𑀧𑁂𑀘𑁆𑀘 𑀢𑀓𑁆𑀓𑁂𑀢𑀺.

𑁯𑁪𑁮. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑁄𑀢𑀺 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀏𑀯𑀁𑀯𑀸𑀤𑀻.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁫𑁨. 𑀑𑀲𑀻𑀤𑀦𑀸𑀓𑀸𑀭𑁂𑀦𑀸𑀢𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂 𑀅𑀦𑀼𑀲𑁆𑀲𑀳𑀦𑀸𑀓𑀸𑀭𑁂𑀦.

𑁯𑁫𑁮. 𑀢𑁂 𑀅𑀪𑀺𑀦𑀺𑀯𑁂𑀲𑀸 𑀅𑀲𑀜𑁆𑀜𑀻𑀯𑀸𑀤𑀸 𑀯𑀤𑀦𑁆𑀢𑀺 𑀏𑀢𑁂𑀳𑀻𑀢𑀺.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁦-𑁯𑁬𑁩. 𑀤𑀲𑀫𑀲𑁆𑀲𑀸𑀢𑀺 𑀅𑀝𑁆𑀞𑀸𑀦𑀖𑀸𑀢𑀲𑁆𑀲.

𑀅𑀚𑁆𑀛𑀢𑁆𑀢𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀢𑀲𑁆𑀲 𑀕𑀸𑀣𑀸𑀯𑀘𑀦𑀲𑁆𑀲. 𑀦𑀺𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀪𑀺𑀦𑀺𑀯𑀺𑀲𑁆𑀲.

𑁯𑁬𑁪. 𑀅𑀜𑁆𑀜𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀲𑀗𑁆𑀔𑀢𑀪𑀸𑀯𑁂 𑀬𑀣𑀸𑀲𑀓𑀁𑀧𑀘𑁆𑀘𑀬𑁂𑀳𑀺. 𑀬𑁂𑀦𑀸𑀓𑀸𑀭𑁂𑀦 𑀫𑀸𑀦𑀲𑁆𑀲 𑀲𑀸𑀢𑀺𑀲𑀬𑀸 𑀧𑀯𑀢𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀦𑁆𑀢𑀺, 𑀅𑀲𑁆𑀫𑀻𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄𑀢𑀺 𑀤𑀺𑀝𑁆𑀞𑀺𑀕𑀢𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄. 𑀬𑀣𑀸 𑀫𑀸𑀦𑀲𑁆𑀲 𑀲𑀫𑁆𑀧𑀕𑁆𑀕𑀳𑀯𑀲𑁂𑀦, 𑀏𑀯𑀁 𑀢𑀡𑁆𑀳𑀸𑀬 𑀫𑀫𑀢𑁆𑀢𑀯𑀲𑁂𑀦, 𑀤𑀺𑀝𑁆𑀞𑀺𑀬𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺 𑀯𑀺𑀲𑁂𑀲𑀯𑀢𑀻 𑀲𑀫𑀸𑀦𑁂𑀧𑀺 𑀅𑀦𑀸𑀕𑀢𑀓𑀸𑀮𑀸𑀫𑀲𑀦𑁂𑀢𑀺 𑀆𑀳 ‘‘𑀪𑀯𑀺𑀲𑁆𑀲𑀦𑁆𑀢𑀻…𑀧𑁂… 𑀯𑀼𑀢𑁆𑀢𑁄’’𑀢𑀺. ‘‘𑀅𑀳𑀫𑀲𑁆𑀫𑀻’’𑀢𑀺 𑀧𑀦 𑀧𑀯𑀢𑁆𑀢𑀫𑀸𑀦𑀲𑁆𑀲𑁂𑀯 𑀪𑀯𑀢𑀻𑀢𑀺 𑀲𑀩𑁆𑀩𑀧𑀤𑀲𑀸𑀥𑀸𑀭𑀡𑀲𑁆𑀲 𑀫𑀸𑀦𑀲𑁆𑀲𑁂𑀯 𑀯𑀲𑁂𑀦 𑀇𑀜𑁆𑀚𑀺𑀢𑀸𑀤𑀺𑀢𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸.

𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁦. 𑀲𑀗𑁆𑀓𑀧𑁆𑀧𑀦𑀦𑁆𑀢𑀺 ‘‘𑀓𑀼𑀲𑀮𑀢𑀸’’𑀢𑀺 𑀯𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀢𑀲𑁆𑀲𑀸 𑀉𑀧𑀸𑀬𑀘𑀺𑀦𑁆𑀢𑀸𑀬. 𑀫𑀺𑀘𑁆𑀙𑀸𑀪𑀸𑀯𑁄 𑀲𑀸𑀯𑀚𑁆𑀚𑀪𑀸𑀯𑁄. 𑀢𑀤𑀸𑀓𑀸𑀭𑁄 𑀫𑁄𑀳𑁄𑀢𑀺 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀫𑁄𑀳𑁄. 𑀢𑀲𑁆𑀲𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑀧𑀺 𑀬𑀣𑀸𑀓𑀢𑀧𑀸𑀧𑁂𑀧𑀺. 𑀅𑀥𑀺𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀲𑀜𑁆𑀚𑀸𑀦𑀦𑀁 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀨𑀮𑀁 𑀯𑀺𑀬 𑀯𑀺𑀫𑀼𑀢𑁆𑀢𑀦𑁆𑀢𑀺 𑀕𑀳𑀺𑀢𑀁 𑀤𑀝𑁆𑀞𑀩𑁆𑀩𑀁.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁩. 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸𑀢𑀺 𑀅𑀦𑀼𑀧𑀦𑀺𑀥𑀸𑀦𑀁, 𑀲𑀫𑀢𑁄 𑀘 𑀅𑀲𑀫𑀢𑁄 𑀘 𑀉𑀧𑀦𑀺𑀥𑀸𑀦𑀦𑁆𑀢𑀺 𑀇𑀫𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸, 𑀬𑁄 ‘‘𑀇𑀢𑁆𑀣𑀁, 𑀏𑀯𑀁, 𑀅𑀜𑁆𑀜𑀣𑀸’’𑀢𑀺 𑀧𑀤𑁂𑀳𑀺 𑀧𑀓𑀸𑀲𑀺𑀢𑁄.

𑀯𑀺𑀲𑁂𑀲𑀲𑁆𑀲𑀸𑀢𑀺 ‘‘𑀇𑀢𑁆𑀣𑀁, 𑀏𑀯𑀁, 𑀅𑀜𑁆𑀜𑀣𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯 𑀯𑀺𑀲𑁂𑀲𑀲𑁆𑀲. 𑀤𑀺𑀝𑁆𑀞𑀺𑀬𑀸𑀢𑀺 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀢𑀤𑀯𑀺𑀦𑀸𑀪𑀸𑀯𑀺𑀦𑀻 𑀢𑀡𑁆𑀳𑀸 𑀤𑀲𑁆𑀲𑀺𑀢𑀸. 𑀲𑀻𑀲𑀲𑀻𑀲𑀫𑀽𑀮𑀓𑁂𑀳𑀻𑀢𑀺 𑀘𑀢𑀽𑀳𑀺 𑀲𑀻𑀲𑁂𑀳𑀺, 𑀤𑁆𑀯𑀸𑀤𑀲𑀳𑀺 𑀘 𑀲𑀻𑀲𑀫𑀽𑀮𑀓𑁂𑀳𑀺. 𑀲𑀬𑀫𑁂𑀯 𑀘 𑀢𑀡𑁆𑀳𑀸 𑀤𑀲𑁆𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀬𑀤𑀺 𑀤𑀺𑀝𑁆𑀞𑀺𑀫𑀸𑀦𑀕𑀸𑀳𑁄𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀬𑀢𑁄 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀽𑀳𑀕𑀸𑀳𑀢𑁄’’𑀢𑀺 (𑀯𑀺𑀪. 𑀅𑀝𑁆𑀞. 𑁯𑁭𑁩) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀓𑀣𑀁 ‘‘𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺 𑀯𑀘𑀦𑀦𑁆𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀫𑀸𑀦𑁂𑀲𑀽’’𑀢𑀺𑀆𑀤𑀺. 𑀢𑀁𑀫𑀽𑀮𑀓𑀢𑁆𑀢𑀸𑀢𑀺 𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸.

𑁯𑁭𑁪. 𑀦 𑀅𑀯𑀓𑁆𑀓𑀭𑀻𑀬𑀢𑀻𑀢𑀺 𑀅𑀦𑀯𑀓𑀸𑀭𑀻, 𑀢𑀁 𑀅𑀦𑀯𑀓𑀸𑀭𑀺𑀁 𑀓𑀢𑁆𑀯𑀸, 𑀢𑀁 𑀧𑀤𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀦𑀯𑀓𑁆𑀓𑀭𑀺, 𑀢𑀁 𑀓𑀢𑁆𑀯𑀸’’𑀢𑀺 𑀆𑀳. 𑀯𑀺𑀓𑁆𑀔𑁂𑀧𑀦𑀁 𑀅𑀯𑀬𑀯𑀢𑁄 𑀯𑀺𑀪𑀸𑀕𑁄. 𑀅𑀢𑁆𑀢𑀢𑁄 𑀅𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀬𑁆𑀯𑀸𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸, 𑀢𑀢𑁄 𑀅𑀯𑀺𑀲𑀼𑀁 𑀓𑀢𑁆𑀯𑀸.

𑁯𑁭𑁬. 𑀩𑀳𑀺𑀓𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀉𑀧𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀉𑀧𑀸𑀤𑀸𑀬𑀸𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀲𑁆𑀲𑀘𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑁆𑀲 𑀅𑀲𑀫𑁆𑀪𑀯𑁄, 𑀓𑀲𑁆𑀲𑀘𑀺𑀤𑁂𑀯 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀓𑀲𑁆𑀲𑀘𑀺 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.