𑁧𑁬. 𑀜𑀸𑀡𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁭𑁫𑁧. 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬, 𑀆𑀭𑀫𑁆𑀫𑀡𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀑𑀓𑀸𑀲𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀳𑁂𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀳𑁂𑀢𑀼𑀓𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀁 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀁 𑀦𑀳𑁂𑀢𑀽𑀢𑀺 𑀦𑀳𑁂𑀢𑀼𑀢𑀸𑀬 𑀏𑀓𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀁 𑀦𑀳𑁂𑀢𑀽𑀢𑀺 𑀯𑀼𑀢𑁆𑀢𑀸 𑀢𑁂𑀲𑀁 𑀦𑀳𑁂𑀢𑀼𑀢𑀸. 𑀏𑀓𑀦𑁆𑀢𑀸𑀳𑁂𑀢𑀼𑀪𑀸𑀯𑁂𑀦 𑀳𑀺 𑀢𑁂 𑀏𑀓𑀧𑁆𑀧𑀓𑀸𑀭𑀸𑀯𑀸𑀢𑀺. 𑀅𑀜𑁆𑀜𑀫𑁆𑀧𑀻𑀢𑀺 𑀅𑀳𑁂𑀢𑀼𑀓𑀸𑀤𑀺. 𑀅𑀯𑀺𑀢𑀣𑀲𑀸𑀫𑀜𑁆𑀜𑀬𑀼𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀅𑀳𑁂𑀢𑀼𑀓𑀢𑀸𑀤𑀺𑀦𑀸 𑀬𑀣𑀸𑀪𑀽𑀢𑁂𑀦 𑀲𑀫𑀸𑀦𑀪𑀸𑀯𑁂𑀦 𑀬𑀼𑀢𑁆𑀢𑀁. 𑀜𑀸𑀡𑀸𑀭𑀫𑁆𑀫𑀡𑀦𑁆𑀢𑀺 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀺. 𑀯𑀢𑁆𑀣𑀼𑀯𑀺𑀪𑀸𑀯𑀦𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀺𑀓𑀲𑁆𑀲 𑀜𑀸𑀡𑀯𑀢𑁆𑀣𑀼𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑁂𑀦 𑀯𑀺𑀪𑀸𑀯𑀦𑀸 𑀧𑀓𑀸𑀲𑀦𑀸 𑀧𑀜𑁆𑀜𑀸.

𑀑𑀲𑀸𑀦𑀤𑀼𑀓𑀲𑁆𑀲𑀸𑀢𑀺 ‘‘𑀅𑀢𑁆𑀣𑀚𑀸𑀧𑀺𑀓𑀸 𑀧𑀜𑁆𑀜𑀸, 𑀚𑀸𑀧𑀺𑀢𑀢𑁆𑀣𑀸 𑀧𑀜𑁆𑀜𑀸’’𑀢𑀺 𑀇𑀫𑀲𑁆𑀲 𑀤𑀼𑀓𑀲𑁆𑀲. 𑀤𑀼𑀓𑀫𑀸𑀢𑀺𑀓𑀸 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀼𑀢𑁆𑀢𑀤𑀼𑀓𑀫𑀸𑀢𑀺𑀓𑀸𑀢𑀺 𑀆𑀳 ‘‘𑀤𑀼𑀓𑀫𑀸𑀢𑀺𑀓𑀁 𑀅𑀦𑀺𑀲𑁆𑀲𑀸𑀬𑀸’’𑀢𑀺.

‘‘𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸’’𑀢𑀺𑀆𑀤𑀺𑀓𑀸 𑀢𑀺𑀓𑀫𑀸𑀢𑀺𑀓𑀁 𑀅𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀏𑀯𑀁 𑀢𑀺𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀬𑀤𑀺𑀧𑀺 𑀚𑀸𑀧-𑀲𑀤𑁆𑀤𑁄 𑀩𑁆𑀬𑀢𑁆𑀢𑀯𑀘𑀦𑁂, 𑀫𑀸𑀦𑀲𑁂 𑀘 𑀧𑀯𑀢𑁆𑀢𑀢𑀺, 𑀚𑀦𑀦𑀢𑁆𑀣𑁂𑀧𑀺 𑀧𑀦 𑀤𑀝𑁆𑀞𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦’’𑀦𑁆𑀢𑀺𑀆𑀤𑀺. 𑀓𑀼𑀲𑀮𑀧𑀜𑁆𑀜𑀸 𑀯𑀺𑀧𑀸𑀓𑀲𑀗𑁆𑀔𑀸𑀢𑀲𑁆𑀲, 𑀓𑀺𑀭𑀺𑀬𑀧𑀜𑁆𑀜𑀸 𑀧𑀭𑀺𑀓𑀫𑁆𑀫𑀸𑀤𑀺𑀪𑀽𑀢𑀸 𑀅𑀢𑁆𑀢𑀦𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀨𑀮𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀅𑀢𑁆𑀣𑀚𑀸𑀧𑀺𑀓𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀢𑁆𑀣𑀚𑀸𑀧𑀺𑀓𑀸 𑀓𑀸𑀭𑀡𑀕𑀢𑀸 𑀧𑀜𑁆𑀜𑀸’’𑀢𑀺. 𑀯𑀺𑀧𑀸𑀓𑀧𑀜𑁆𑀜𑀸, 𑀓𑀺𑀭𑀺𑀬𑀧𑀜𑁆𑀜𑀸 𑀘 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀢𑀁𑀢𑀁𑀯𑀺𑀧𑀸𑀓𑀸𑀤𑀺𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀻𑀢𑀺 𑀆𑀳 ‘‘𑀚𑀸𑀧𑀺𑀢𑁄 𑀚𑀦𑀺𑀢𑁄 𑀅𑀢𑁆𑀣𑁄 𑀏𑀢𑀺𑀲𑁆𑀲𑀸𑀢𑀺 𑀚𑀸𑀧𑀺𑀢𑀢𑁆𑀣𑀸’’𑀢𑀺. 𑀲𑀢𑀺𑀧𑀺 𑀲𑀳𑀚𑀸𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀓𑀺𑀭𑀺𑀬𑀧𑀜𑁆𑀜𑀸 𑀦 𑀓𑀼𑀲𑀮𑀸 𑀯𑀺𑀬 𑀯𑀺𑀧𑀸𑀓𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀸𑀭𑀡𑀯𑁄𑀳𑀸𑀭𑀁 𑀮𑀪𑀢𑀻𑀢𑀺 𑀆𑀳 ‘‘𑀓𑀸𑀭𑀡𑀧𑀜𑁆𑀜𑀸𑀲𑀤𑀺𑀲𑀻’’𑀢𑀺. 𑀯𑀺𑀪𑀸𑀯𑀦𑀢𑁆𑀣𑁂𑀦 𑀧𑀜𑁆𑀜𑀸 𑀆𑀭𑀫𑁆𑀫𑀡𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑁂𑀧𑀺 𑀧𑀓𑀸𑀲𑁂𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀨𑀮𑀧𑁆𑀧𑀓𑀸𑀲𑀦𑀪𑀽𑀢𑀸’’𑀢𑀺. 𑀬𑀢𑁄 𑀲𑀸 𑀆𑀮𑁄𑀓𑁄𑀪𑀸𑀲𑀧𑀚𑁆𑀚𑁄𑀢𑀧𑀭𑀺𑀬𑀸𑀬𑁂𑀳𑀺 𑀯𑀺𑀪𑀸𑀯𑀺𑀢𑀸.

𑁧𑁦. 𑀤𑀲𑀓𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁭𑁬𑁦. ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡𑀁. 𑀪𑀯𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀲𑀁. 𑀦𑀺. 𑁨.𑁩𑁪) 𑀏𑀯𑀫𑀸𑀕𑀢𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀺. ‘‘𑀚𑀭𑀸𑀫𑀭𑀡𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀚𑀸𑀢𑀺𑀬𑀸 𑀜𑀸𑀡𑀁…𑀧𑁂… 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁…𑀧𑁂… 𑀧𑀝𑀺𑀧𑀤𑀸𑀬 𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁩𑁩) 𑀏𑀯𑀫𑀸𑀕𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀁 𑀜𑀸𑀡𑀸𑀦𑀺. 𑀲𑀼𑀢𑀫𑀬𑀜𑀸𑀡𑀸𑀤𑀻𑀦𑀺 𑀅𑀦𑀸𑀯𑀭𑀡𑀜𑀸𑀡𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁧 𑀆𑀤𑀬𑁄) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺. 𑀢𑁂𑀦𑀸𑀳 ‘‘𑀢𑁂𑀲𑀢𑁆𑀢𑀢𑀺 𑀧𑀦…𑀧𑁂… 𑀦 𑀲𑀁𑀬𑀼𑀢𑁆𑀢𑀓𑁂’’𑀢𑀺. ‘‘𑀲𑀁𑀬𑀼𑀢𑁆𑀢𑀓𑁂’’𑀢𑀺 𑀯𑀸 𑀇𑀤𑀁 ‘‘𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀦 ‘‘𑀢𑁂𑀲𑀢𑁆𑀢𑀢𑀻’’𑀢𑀺 𑀇𑀫𑀺𑀦𑀸. 𑀅𑀜𑁆𑀜𑀢𑁆𑀣 𑀦𑀺𑀓𑁆𑀔𑁂𑀧𑀓𑀡𑁆𑀟𑀸𑀤𑀻𑀲𑀼. 𑀬𑀣𑀸 𑀲𑀫𑁆𑀫𑀸𑀧𑀝𑀺𑀯𑁂𑀥𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀜𑀸𑀡𑀸𑀤𑀺 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼𑀓𑁄 𑀯𑀺𑀬 𑀆𑀭𑀫𑁆𑀫𑀡𑁂 𑀘𑀜𑁆𑀘𑀮𑀁 𑀳𑁄𑀢𑀺, 𑀦 𑀏𑀯𑀁 𑀳𑁄𑀢𑀺 𑀬𑀣𑀸𑀪𑀽𑀢𑀸𑀯𑀩𑁄𑀥𑀓𑀁 𑀜𑀸𑀡𑀦𑁆𑀢𑀺 𑀆𑀳 ‘‘𑀬𑀸𑀣𑀸𑀯𑀧𑀝𑀺𑀯𑁂𑀥𑀢𑁄 𑀲𑀬𑀜𑁆𑀘 𑀅𑀓𑀫𑁆𑀧𑀺𑀬’’𑀦𑁆𑀢𑀺. 𑀅𑀥𑀺𑀩𑀮𑀓𑀭𑀡𑀁 𑀉𑀧𑀢𑁆𑀣𑀫𑁆𑀪𑀦𑀦𑁆𑀢𑀺 𑀢𑀁 𑀧𑀼𑀕𑁆𑀕𑀮𑁂 𑀆𑀭𑁄𑀧𑁂𑀦𑁆𑀢𑁄 𑀆𑀳 ‘‘𑀧𑀼𑀕𑁆𑀕𑀮𑀜𑁆𑀘…𑀧𑁂… 𑀓𑀭𑁄𑀢𑀻’’𑀢𑀺. 𑀯𑀺𑀲𑀪𑀸𑀕𑀥𑀫𑁆𑀫𑁂𑀲𑀼 𑀯𑀸 𑀅𑀓𑀫𑁆𑀧𑀺𑀬𑀢𑁆𑀣𑁄, 𑀲𑀪𑀸𑀕𑀥𑀫𑁆𑀫𑁂𑀲𑀼 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀉𑀧𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀉𑀧𑀕𑀫𑀦𑀜𑁆𑀘𑁂𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀸𑀬 𑀧𑀝𑀺𑀚𑀸𑀦𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀚𑀸𑀦𑀦𑀯𑀲𑁂𑀦𑀸’’𑀢𑀺. 𑀅𑀝𑁆𑀞 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀧𑀝𑀺𑀚𑀸𑀦𑀦𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀤𑀲𑁆𑀲𑀺𑀢𑀅𑀓𑀫𑁆𑀧𑀺𑀬𑀜𑀸𑀡𑀬𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀨𑀮𑀲𑀫𑁆𑀧𑀢𑁆𑀢𑀺𑀧𑀯𑀢𑁆𑀢𑀻𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀻𑀦𑀁 𑀓𑀸𑀭𑀡𑀲𑀫𑁆𑀧𑀢𑁆𑀢𑀻𑀦𑀁 𑀨𑀮𑀪𑀽𑀢𑀸𑀬 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀢𑁆𑀢𑀲𑁂𑀲𑀸 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀓𑁂. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀫𑀸𑀦𑁂 𑀅𑀢𑁆𑀣𑀓𑀺𑀘𑁆𑀘𑁂 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀯𑀺𑀬 𑀤𑁂𑀲𑀦𑀸𑀜𑀸𑀡𑀲𑁆𑀲𑀸𑀧𑀺 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸’’𑀢𑀺𑀆𑀤𑀺. 𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸𑀢𑀺 𑀧𑀝𑀺𑀯𑁂𑀥𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑁆𑀢𑀸. 𑀢𑁂𑀦𑀸𑀢𑀺 𑀧𑀝𑀺𑀯𑁂𑀥𑀧𑀭𑀺𑀬𑁄𑀲𑀸𑀦𑀪𑀽𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦. 𑀢𑀤𑀥𑀺𑀕𑀫𑁂𑀦 𑀳𑀺 𑀲𑀫𑁆𑀧𑀢𑁆𑀢𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁄 𑀪𑀕𑀯𑀸 𑀅𑀦𑀦𑁆𑀢𑀧𑀝𑀺𑀪𑀸𑀦𑁄 𑀅𑀦𑀼𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺. ‘‘𑀧𑀝𑀺𑀮𑀤𑁆𑀥𑀲𑁆𑀲𑀸𑀧𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀣𑀸 𑀮𑀪𑀸𑀧𑀓𑀲𑁆𑀲 𑀧𑀝𑀺𑀯𑁂𑀥𑀸𑀦𑀼𑀭𑀽𑀧𑀢𑀸 𑀤𑁂𑀲𑀦𑀸𑀜𑀸𑀡𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺, 𑀢𑁂𑀦 𑀘 𑀧𑀝𑀺𑀯𑁂𑀥𑀦𑀫𑀢𑁆𑀢𑁂𑀦𑁂𑀢𑁆𑀣 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺.

𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀯𑀸 𑀳𑀸𑀦𑀪𑀸𑀕𑀺𑀬𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀓𑀸𑀫𑀲𑀳𑀕𑀢𑀲𑀜𑁆𑀜𑀸𑀤𑀺𑀥𑀫𑁆𑀫𑀦𑁆𑀢𑀺 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀤𑀺𑀁. 𑀧𑀼𑀩𑁆𑀩𑁂𑀯 𑀓𑀢𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀦𑁆𑀢𑀺 ‘‘𑀘𑀦𑁆𑀤𑁂 𑀯𑀸 𑀲𑀽𑀭𑀺𑀬𑁂 𑀯𑀸 𑀏𑀢𑁆𑀢𑀓𑀁 𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀧𑀚𑁆𑀚𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀧𑀭𑀺𑀓𑀫𑁆𑀫𑀸𑀤𑀺𑀁.

𑀢𑀤𑀪𑀸𑀯𑀕𑁆𑀕𑀳𑀡𑁂𑀦𑀸𑀢𑀺 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀕𑁆𑀕𑀳𑀡𑁂𑀦. 𑀞𑀺𑀢𑀺𑀦𑁆𑀢𑀺 𑀅𑀢𑁆𑀣𑀺𑀪𑀸𑀯𑀁. 𑀢𑀩𑁆𑀩𑀺𑀧𑀭𑀻𑀢𑀸𑀬𑀸𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀞𑀸𑀦𑀸𑀪𑀸𑀯𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀁, 𑀦𑀢𑁆𑀣𑀺𑀪𑀸𑀯𑀁 𑀯𑀸. 𑀉𑀧𑀭𑀻𑀢𑀺 𑀇𑀫𑀺𑀲𑁆𑀲𑀸 𑀩𑀮𑀸𑀦𑀁 𑀅𑀦𑀼𑀓𑁆𑀓𑀫𑀓𑀣𑀸𑀬 𑀉𑀧𑀭𑀺 𑀅𑀦𑀦𑁆𑀢𑀭𑀫𑁂𑀯. 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀤𑀲𑁆𑀲𑀦𑀸𑀤𑀺𑀓𑀲𑁆𑀲𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀫𑁆𑀫𑀸𑀯𑀭𑀡𑀸𑀪𑀸𑀯𑀤𑀲𑁆𑀲𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀢𑀭𑀦𑁆𑀢𑀺 𑀅𑀥𑀺𑀕𑀫𑀲𑁆𑀲 𑀅𑀝𑁆𑀞𑀸𑀦𑀤𑀲𑁆𑀲𑀦𑀁. 𑀢𑀁𑀲𑀳𑀺𑀢𑀸𑀦𑀁 𑀥𑀸𑀢𑀽𑀦𑀦𑁆𑀢𑀺 𑀭𑀸𑀕𑀸𑀤𑀺𑀲𑀳𑀺𑀢𑀸𑀦𑀁 𑀲𑀪𑀸𑀯𑀸𑀦𑀁. 𑀯𑁂𑀫𑀢𑁆𑀢𑀢𑀸 𑀘 𑀢𑁂𑀲𑀁 𑀧𑀘𑁆𑀘𑀬𑀯𑀺𑀲𑁂𑀲𑀲𑀺𑀤𑁆𑀥𑁂𑀦 𑀅𑀯𑀢𑁆𑀣𑀸𑀤𑀺𑀯𑀺𑀲𑁂𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀘𑀭𑀺𑀬𑀸𑀳𑁂𑀢𑀽𑀦𑀦𑁆𑀢𑀺 𑀭𑀸𑀕𑀸𑀤𑀺𑀘𑀭𑀺𑀬𑀸𑀓𑀸𑀭𑀡𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁.

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁧. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀲𑀫𑀸𑀦𑁂𑀧𑀺 𑀦𑀬𑀤𑁆𑀯𑀬𑀲𑁆𑀲 𑀢𑁂𑀲𑀁 𑀅𑀳𑁂𑀢𑀼𑀪𑀸𑀯𑀸𑀤𑀺𑀤𑀻𑀧𑀦𑁂 𑀏𑀓𑀲𑁆𑀲 𑀳𑁂𑀢𑀼𑀪𑀸𑀯𑀸𑀤𑀺𑀧𑀝𑀺𑀲𑁂𑀥𑀢𑀸, 𑀇𑀢𑀭𑀲𑁆𑀲 𑀭𑀸𑀲𑀦𑁆𑀢𑀭𑀸𑀲𑀗𑁆𑀕𑀳𑁄𑀢𑀺 𑀇𑀤𑀁 𑀦𑀸𑀦𑀸𑀓𑀭𑀡𑀁. 𑀏𑀓𑀸𑀬 𑀚𑀸𑀢𑀺𑀬𑀸𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀏𑀓𑀲𑁆𑀲 𑀪𑀯𑀲𑁆𑀲. 𑀢𑀤𑀦𑁆𑀢𑁄𑀕𑀥𑀢𑀸𑀬𑀸𑀢𑀺 𑀕𑀢𑀺𑀅𑀦𑁆𑀢𑁄𑀕𑀥𑀢𑀸𑀬. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀁𑀢𑀁𑀕𑀢𑀺𑀘𑀼𑀢𑀺𑀪𑀯𑁂𑀲𑀼.

𑁭𑁬𑁨. 𑀢𑀣𑀸𑀢𑀺 𑀅𑀜𑁆𑀜𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑀸𑀬. 𑀔𑀻𑀭𑀸𑀤𑀻𑀦𑀁…𑀧𑁂… 𑀯𑀺𑀮𑀓𑁆𑀔𑀡𑀢𑀸𑀢𑀺 𑀬𑀣𑀸 𑀔𑀻𑀭𑀲𑁆𑀲 𑀤𑀥𑀺𑀪𑀸𑀯𑁂𑀦, 𑀤𑀥𑀺𑀦𑁄 𑀢𑀓𑁆𑀓𑀪𑀸𑀯𑁂𑀦 𑀯𑀺𑀮𑀓𑁆𑀔𑀡𑀢𑀸𑀧𑀢𑁆𑀢𑀺, 𑀦 𑀏𑀯𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀦𑀳𑁂𑀢𑀼𑀪𑀸𑀯𑀸𑀤𑀺𑀢𑁄 𑀅𑀜𑁆𑀜𑀲𑁆𑀲 𑀲𑀪𑀸𑀯𑀸𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁭𑁬𑁩. 𑀫𑀳𑀢𑁆𑀢𑁂𑀧𑀻𑀢𑀺 𑀧𑀼𑀣𑀼𑀢𑁆𑀢𑁂𑀧𑀺. 𑀩𑀳𑀼𑀪𑀸𑀯𑀯𑀸𑀘𑀓𑁄 𑀳𑀺 𑀅𑀬𑀁 𑀫𑀳𑀸-𑀲𑀤𑁆𑀤𑁄 ‘‘𑀫𑀳𑀸𑀚𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀭𑀽𑀧𑀲𑀗𑁆𑀖𑀸𑀝𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀲𑀪𑀸𑀯𑀥𑀫𑁆𑀫𑀲𑁆𑀲 𑀓𑀸 𑀫𑀳𑀦𑁆𑀢𑀢𑀸, 𑀲𑀼𑀔𑀼𑀫𑀢𑀸 𑀯𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀘𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀘𑀓𑁆𑀔𑀼𑀧𑀲𑀸𑀤𑁂 𑀫𑀫 𑀯𑀢𑁆𑀣𑀼𑀫𑁆𑀳𑀻’’𑀢𑀺. 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀦𑁆𑀢𑀺 𑀇𑀲𑁆𑀲𑀭𑀺𑀬𑀧𑀯𑀢𑁆𑀢𑀦𑀝𑁆𑀞𑀸𑀦𑀁. 𑀢𑀣𑀸 𑀳𑀺 𑀦𑀁 𑀅𑀜𑁆𑀜𑀢𑁆𑀣 𑀪𑀸𑀯𑀺𑀢𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀢𑀺𑀝𑁆𑀞𑀢𑀺, 𑀅𑀜𑁆𑀜𑀯𑀺𑀜𑁆𑀜𑀸𑀡𑀸𑀦𑀺 𑀘 𑀢𑁂𑀦 𑀤𑀺𑀦𑁆𑀦𑀦𑀬𑀸𑀦𑁂𑀯 𑀢𑀢𑁆𑀣 𑀧𑀯𑀢𑁆𑀢𑀦𑁆𑀢𑀺, 𑀅𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀬𑀢𑁄 𑀢𑀁 𑀅𑀦𑁆𑀥𑀲𑁆𑀲 𑀦 𑀦𑀺𑀧𑁆𑀨𑀚𑁆𑀚𑀢𑀺.

𑁭𑁬𑁪. 𑀯𑀯𑀢𑁆𑀣𑀺𑀢𑀸𑀦𑀫𑁆𑀧𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀸𑀦𑀫𑁆𑀧𑀺. 𑀧𑀝𑀺𑀧𑀸𑀝𑀺𑀦𑀺𑀬𑀫𑁄 𑀦𑀺𑀬𑀢𑀸𑀦𑀼𑀧𑀼𑀩𑁆𑀩𑀺𑀓𑀢𑀸. 𑀢𑁂𑀦𑀸𑀢𑀺 ‘‘𑀅𑀩𑁆𑀩𑁄𑀓𑀺𑀡𑁆𑀡𑀸’’𑀢𑀺 𑀯𑀘𑀦𑁂𑀦.

𑁭𑁬𑁬. 𑀆𑀯𑀝𑁆𑀝𑀦𑀪𑀸𑀯𑁄 𑀆𑀯𑀚𑁆𑀚𑀦𑀓𑀺𑀘𑁆𑀘𑀢𑀸.

𑀢𑁂𑀲𑀦𑁆𑀢𑀺 𑀭𑀽𑀧𑀸𑀤𑀻𑀦𑀁. 𑀏𑀢𑁂𑀲𑀜𑁆𑀳𑀺 𑀭𑀽𑀧𑀸𑀤𑀻𑀦𑀁 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑀸𑀕𑀫𑁄. 𑀅𑀪𑀺𑀦𑀺𑀧𑀢𑀺𑀢𑀩𑁆𑀩𑀸𑀦𑀺 𑀆𑀮𑀫𑁆𑀩𑀺𑀢𑀩𑁆𑀩𑀸𑀦𑀺, 𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀓𑀭𑀡𑁂𑀦 𑀧𑀝𑀺𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀻’’𑀢𑀺. 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀸𑀦𑀁 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸…𑀧𑁂… 𑀅𑀓𑀼𑀲𑀮𑀁 𑀯𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁬𑁬) 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀧𑀝𑀺𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀁 𑀧𑀝𑀺𑀯𑀺𑀚𑀸𑀦𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀳𑀚𑀧𑀼𑀩𑁆𑀩𑀗𑁆𑀕𑀫𑀥𑀫𑁆𑀫𑁂𑀦𑀸𑀢𑀺 𑀤𑀲𑁆𑀲𑀦𑀸𑀤𑀻𑀳𑀺 𑀲𑀳𑀚𑀸𑀢𑀨𑀲𑁆𑀲𑀸𑀤𑀺𑀦𑀸 𑀧𑀼𑀩𑁆𑀩𑀗𑁆𑀕𑀫𑁂𑀦 𑀆𑀯𑀚𑁆𑀚𑀦𑀸𑀤𑀺𑀦𑀸. 𑀓𑀺𑀘𑁆𑀘𑀦𑁆𑀢𑀭𑀦𑁆𑀢𑀺 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀢𑁄 𑀅𑀜𑁆𑀜𑀁 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀓𑀺𑀘𑁆𑀘𑀁.

𑀅𑀯𑀺𑀧𑀸𑀓𑀪𑀸𑀯𑁂𑀦 𑀓𑀸𑀭𑀡𑁂𑀦, 𑀢𑁂𑀦 𑀯𑀸 𑀲𑀤𑁆𑀥𑀺𑀁. 𑀅𑀜𑁆𑀜𑀦𑁆𑀢𑀺 𑀭𑀽𑀧𑀪𑀸𑀯𑀸𑀤𑀺𑀁. 𑀪𑀸𑀲𑀦𑀓𑀭𑀡𑀓𑀭𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑁂 𑀏𑀯 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀸 𑀢𑀁𑀲𑀤𑀺𑀲𑀸. 𑀧𑀼𑀩𑁆𑀩𑀗𑁆𑀕𑀫𑀧𑀝𑀺𑀯𑀺𑀚𑀸𑀦𑀦𑀦𑁆𑀢𑀺 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁂𑀦 𑀯𑀺𑀚𑀸𑀦𑀦𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀧𑀼𑀭𑁂𑀘𑀭𑀪𑀸𑀯𑁂𑀦 𑀕𑀳𑀡𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑁂. ‘‘𑀦 𑀧𑀝𑀺𑀲𑀺𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀲𑁆𑀯𑀸𑀬𑀫𑀧𑁆𑀧𑀝𑀺𑀲𑁂𑀥𑁄 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑀸𑀬𑀓𑀫𑁆𑀫𑀁…𑀧𑁂… 𑀅𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀣𑀸’’𑀢𑀺 𑀇𑀤𑀁 𑀬𑀣𑀸 𑀓𑀸𑀬𑀯𑀘𑀻𑀓𑀫𑁆𑀫𑀧𑀝𑁆𑀞𑀧𑀦𑀁, 𑀏𑀯𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀲𑀫𑀸𑀤𑀸𑀦𑀫𑁆𑀧𑀺 𑀦𑀢𑁆𑀣𑀻𑀢𑀺 𑀉𑀧𑀲𑀁𑀳𑀭𑀡𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀦 𑀪𑀯𑀢𑁄 𑀘𑀯𑀢𑀺, 𑀓𑀣𑀁 𑀧𑀜𑁆𑀘𑀤𑁆𑀯𑀸𑀭𑁂 𑀘𑀼𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦 𑀧𑀜𑁆𑀘𑀤𑁆𑀯𑀸𑀭𑀺𑀓…𑀧𑁂… 𑀅𑀢𑀁𑀤𑁆𑀯𑀸𑀭𑀺𑀓𑀢𑁆𑀢𑀸’’𑀢𑀺. 𑀢𑀲𑁆𑀲𑀸 𑀧𑀸𑀴𑀺𑀬𑀸. 𑀆𑀧𑀸𑀣𑀫𑀢𑁆𑀢𑀦𑁆𑀢𑀺 𑀆𑀧𑀸𑀣𑀕𑀫𑀦𑀫𑀢𑁆𑀢𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀁. 𑀅𑀜𑁆𑀜𑀦𑁆𑀢𑀺 ‘‘𑀭𑀽𑀧𑀁 𑀦𑀻𑀮’’𑀦𑁆𑀢𑀺 𑀏𑀯𑀫𑀸𑀤𑀺𑀥𑀫𑁆𑀫𑀯𑀺𑀲𑁂𑀲𑀁. 𑀢𑁂𑀦𑀸𑀳 ‘‘𑀥𑀫𑁆𑀫𑀲𑀪𑀸𑀯’’𑀦𑁆𑀢𑀺. 𑀭𑀽𑀧𑀦𑁆𑀢𑀺 𑀘 𑀦 𑀕𑀡𑁆𑀳𑀸𑀢𑀻𑀢𑀺 𑀭𑀽𑀧𑀸𑀭𑀫𑁆𑀫𑀡𑀫𑁆𑀧𑀺 𑀲𑀫𑀸𑀦𑀁 ‘‘𑀭𑀽𑀧𑀁 𑀦𑀸𑀫𑁂𑀢’’𑀦𑁆𑀢𑀺 𑀦 𑀕𑀡𑁆𑀳𑀸𑀢𑀺. 𑀢𑀣𑀸 𑀘𑀸𑀳𑀼 𑀏𑀓𑁂 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀦𑀻𑀮𑀁 𑀯𑀺𑀚𑀸𑀦𑀸𑀢𑀺, 𑀦𑁄 𑀢𑀼 𑀦𑀻𑀮’’𑀦𑁆𑀢𑀺. 𑀭𑀽𑀧𑀦𑀻𑀮𑀸𑀤𑀺𑀆𑀓𑀸𑀭𑁄 𑀭𑀽𑀧𑀸𑀭𑀫𑁆𑀫𑀡𑀭𑀽𑀧𑀸𑀤𑀸𑀦𑀸𑀓𑀸𑀭𑀧𑀜𑁆𑀜𑀢𑁆𑀢𑀺. 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀳𑁂𑀲𑀸 𑀬𑀣𑀸 𑀅𑀦𑀺𑀘𑁆𑀘𑀢𑀸𑀤𑀺. 𑀲𑀸𑀢𑀺𑀲𑀬𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑁆𑀢𑀸. 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀲𑀤𑁆𑀤𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀁, 𑀅𑀜𑁆𑀜𑀣𑀸 𑀲𑀳𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑁄 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀦𑁄𑀤𑁆𑀯𑀸𑀭𑁂𑀧𑀻𑀢𑀺 𑀦 𑀧𑀜𑁆𑀘𑀤𑁆𑀯𑀸𑀭𑁂𑀬𑁂𑀯 𑀤𑀼𑀢𑀺𑀬𑁂 𑀫𑁄𑀖𑀯𑀸𑀭𑁂, 𑀅𑀣 𑀔𑁄 𑀫𑀦𑁄𑀤𑁆𑀯𑀸𑀭𑁂𑀧𑀺. 𑀆𑀯𑀚𑁆𑀚𑀦𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁…𑀧𑁂… 𑀤𑀝𑁆𑀞𑀩𑁆𑀩𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 𑀢𑀣𑀸 𑀅𑀲𑀫𑁆𑀪𑀯𑀢𑁄.

𑀢𑀲𑁆𑀲𑀸𑀢𑀺 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸𑀬 𑀧𑀜𑁆𑀜𑀸𑀬.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁭. 𑀅𑀥𑀺𑀓𑀭𑀡𑁂𑀲𑀽𑀢𑀺 𑀧𑀤𑀢𑁆𑀣𑁂𑀲𑀼. 𑀅𑀜𑁆𑀜𑀢𑁆𑀭 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑀲𑀤𑁆𑀤𑀲𑁆𑀲 𑀢𑀢𑁆𑀣 𑀧𑀯𑀢𑁆𑀢𑀦𑀸𑀓𑀸𑀭𑀤𑀲𑁆𑀲𑀦𑀁, 𑀢𑁂𑀦 𑀅𑀢𑁆𑀣𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀓𑀭𑀡𑀯𑀲𑁂𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀺𑀁 𑀕𑀘𑁆𑀙𑀢𑀺. ‘‘𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀁 𑀮𑀺𑀗𑁆𑀕𑀯𑀘𑀦𑀸𑀦𑀻’’𑀢𑀺 𑀳𑀺 𑀲𑀤𑁆𑀤𑀯𑀺𑀤𑀽 𑀯𑀤𑀦𑁆𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁮. 𑀧𑀭𑀺𑀧𑀸𑀘𑀺𑀢𑁂𑀲𑀽𑀢𑀺 𑀲𑀸𑀥𑀺𑀢𑁂𑀲𑀼. ‘‘𑀯𑀺𑀳𑀺𑀢𑁂𑀲𑀽’’𑀢𑀺 𑀏𑀢𑁆𑀣 𑀤𑀼𑀤𑁆𑀥𑀸𑀤𑀻𑀲𑀼 𑀯𑀺𑀬 𑀪𑀽𑀢𑀓𑀸𑀮𑀢𑀸 𑀦𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀯𑀺𑀲𑀬𑀯𑀺𑀲𑁂𑀲𑀦𑀫𑀢𑁆𑀢𑀫𑁂𑀯𑀸’’𑀢𑀺. ‘‘𑀓𑀫𑁆𑀫𑀁, 𑀲𑀺𑀧𑁆𑀧’’𑀦𑁆𑀢𑀺 𑀧𑀜𑁆𑀜𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀜𑁆𑀜𑀸 𑀏𑀯 𑀯𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑀼𑀲𑀮𑀁 𑀓𑀫𑁆𑀫𑀁 𑀲𑀓𑀁 𑀏𑀓𑀦𑁆𑀢𑀁 𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀇𑀢𑀭𑀁 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀦𑁄𑀲𑀓𑀁. 𑀲𑀘𑁆𑀘𑀧𑀝𑀺𑀯𑁂𑀥𑀸𑀦𑀼𑀮𑁄𑀫𑀦𑀁 𑀲𑀘𑁆𑀘𑀸𑀦𑀼𑀮𑁄𑀫𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀧𑁆𑀧𑀝𑀺𑀯𑁂𑀥𑀧𑀘𑁆𑀘𑀬𑀪𑀸𑀯𑁂𑀦𑀸’’𑀢𑀺. 𑀫𑀕𑁆𑀕𑀲𑀘𑁆𑀘𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀢𑀸, 𑀢𑀣𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀅𑀦𑀼𑀮𑁄𑀫𑀦𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀕𑁆𑀕𑀲𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀧𑀜𑁆𑀜𑀸 𑀯𑀼𑀢𑁆𑀢𑀸 𑀧𑀜𑁆𑀜𑀸𑀯𑀺𑀲𑀬𑁂 𑀧𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. ‘‘𑀬𑁄𑀕𑀯𑀺𑀳𑀺𑀢𑁂𑀲𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀪𑀽𑀫𑀺𑀦𑀺𑀤𑁆𑀤𑁂𑀲𑁄, ‘‘𑀓𑀫𑁆𑀫𑀲𑁆𑀲𑀓𑀢𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀲𑀭𑀽𑀧𑀦𑀺𑀤𑁆𑀤𑁂𑀲𑁄, ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀺𑀤𑁆𑀤𑁂𑀲𑁄 𑀘 𑀬𑀣𑀸𑀯𑀼𑀢𑁆𑀢𑀸…𑀧𑁂… 𑀦𑀺𑀤𑁆𑀤𑁂𑀲𑀸. ‘‘𑀬𑁄𑀕𑀯𑀺𑀳𑀺𑀢𑁂𑀲𑀼 𑀓𑀫𑁆𑀫𑀸𑀬𑀢𑀦𑁂𑀲𑀼 𑀔𑀦𑁆𑀢𑀺𑀁, 𑀓𑀫𑁆𑀫𑀲𑁆𑀲𑀓𑀢𑀁 𑀔𑀦𑁆𑀢𑀺𑀁, ‘𑀭𑀽𑀧𑀁 𑀅𑀦𑀺𑀘𑁆𑀘’𑀦𑁆𑀢𑀺 𑀔𑀦𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸 𑀔𑀦𑁆𑀢𑀺𑀆𑀤𑀺𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀸. 𑀑𑀮𑁄𑀓𑀦𑀁 𑀧𑀘𑁆𑀘𑀓𑁆𑀔𑀓𑀭𑀡𑀁. 𑀥𑀫𑁆𑀫𑀸 𑀑𑀮𑁄𑀓𑀦𑀁 𑀔𑀫𑀦𑁆𑀢𑀻𑀢𑀺 𑀧𑀜𑁆𑀜𑀸𑀬 𑀢𑀤𑁄𑀮𑁄𑀓𑀦𑀲𑀫𑀢𑁆𑀣𑀢𑀫𑀸𑀳.

𑁭𑁬𑁯. 𑀫𑀼𑀜𑁆𑀘𑀢𑀻𑀢𑀺 𑀧𑀚𑀳𑀢𑀺. 𑀆𑀭𑀩𑁆𑀪-𑀓𑀺𑀭𑀺𑀬𑀸𑀬 𑀅𑀥𑀺𑀝𑁆𑀞𑀸𑀦𑀁 𑀲𑀫𑀗𑁆𑀕𑀺𑀪𑀸𑀯𑁄, 𑀅𑀥𑀺𑀓𑀭𑀡𑀁 𑀧𑀝𑁆𑀞𑀧𑀦𑀦𑁆𑀢𑀺 𑀆𑀳 ‘‘𑀫𑀼𑀜𑁆𑀘…𑀧𑁂… 𑀯𑀢𑁆𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺.

𑁭𑁭𑁦. 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀦𑀺 𑀓𑀫𑁆𑀫𑀯𑀝𑁆𑀝𑁂𑀓𑀤𑁂𑀲𑀪𑀽𑀢𑀸𑀦𑀺 𑀲𑀦𑁆𑀥𑀸𑀬 𑀢𑁂𑀲𑀁 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀲𑀫𑀯𑀭𑁄𑀥𑁄 𑀯𑀼𑀢𑁆𑀢𑁄. 𑀲𑀢𑀺𑀧𑀺 𑀲𑀯𑀦𑁂𑀢𑀺 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁩𑁯; 𑀓𑀢𑀸. 𑁪𑁮𑁦) 𑀢𑀣𑀸𑀕𑀢𑀢𑁄 𑀲𑀯𑀦𑁂 𑀲𑀢𑀺𑀧𑀺. 𑀪𑀺𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀢𑀁 𑀯𑀼𑀢𑁆𑀢𑀁 𑀅𑀥𑀺𑀲𑀻𑀮𑀧𑀜𑁆𑀜𑀸𑀧𑀦𑀁 𑀯𑀺𑀬 𑀦 𑀩𑀼𑀤𑁆𑀥𑀸𑀯𑁂𑀡𑀺𑀓𑀦𑁆𑀢𑀺.

𑀅𑀥𑀺𑀧𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑁂𑀲𑀽𑀢𑀺 𑀞𑀧𑁂𑀢𑁆𑀯𑀸 𑀅𑀥𑀺𑀧𑀜𑁆𑀜𑀁 𑀢𑀤𑀜𑁆𑀜𑁂𑀲𑀼 𑀫𑀕𑁆𑀕𑀨𑀮𑀥𑀫𑁆𑀫𑁂𑀲𑀼. 𑀢𑀤𑀥𑀺𑀝𑁆𑀞𑀸𑀦𑁂𑀲𑀽𑀢𑀺 𑀢𑀲𑁆𑀲𑀸 𑀅𑀥𑀺𑀧𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼.

𑁭𑁭𑁧. 𑀅𑀧𑀸𑀬𑀼𑀧𑁆𑀧𑀸𑀤𑀦𑀁 𑀅𑀯𑀟𑁆𑀠𑀺𑀦𑀺𑀩𑁆𑀩𑀢𑁆𑀢𑀦𑀁. 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁯𑁩. 𑀧𑀭𑀺𑀢𑀲𑁆𑀲𑀦𑀁 𑀧𑀭𑀺𑀢𑁆𑀢𑀸𑀲𑁄, 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀘𑀸𑀢𑀺 ‘‘𑀦 𑀧𑀭𑀺𑀢𑀲𑁆𑀲𑀢𑀻’’𑀢𑀺 𑀧𑀤𑀲𑁆𑀲 ‘‘𑀦 𑀧𑀢𑁆𑀣𑁂𑀢𑀺 𑀦 𑀉𑀢𑁆𑀢𑀲𑀢𑀻’’𑀢𑀺 𑀅𑀢𑁆𑀣𑀫𑀸𑀳.

𑁭𑁯𑁬. 𑀅𑀭𑀺𑀬𑀲𑀘𑁆𑀘𑁂𑀲𑀼 𑀥𑀫𑁆𑀫𑀲𑀤𑁆𑀤𑁄 ‘‘𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀭𑀺𑀬𑀫𑀕𑁆𑀕𑁄, 𑀢𑀲𑁆𑀲 𑀘 𑀨𑀮𑀁 𑀥𑀫𑁆𑀫𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀦𑁆𑀦𑁂 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺. 𑀢𑀢𑁆𑀣 𑀧𑀜𑁆𑀜𑀸𑀢𑀺 𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑀨𑀮𑁂 𑀦𑀺𑀲𑁆𑀲𑀬𑀪𑀽𑀢𑁂 𑀧𑀜𑁆𑀜𑀸. 𑀢𑁂𑀦𑀸𑀳 ‘‘𑀢𑀁𑀲𑀳𑀕𑀢𑀸’’𑀢𑀺. 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀯𑀺𑀬 𑀦𑁂𑀢𑀺 𑀜𑀸𑀧𑁂𑀢𑀻𑀢𑀺 𑀦𑀬𑁄, 𑀅𑀦𑀼𑀫𑀸𑀦𑀁, 𑀢𑀲𑁆𑀲 𑀦𑀬𑀦𑀁 𑀧𑀯𑀢𑁆𑀢𑀦𑀁, 𑀢𑀁 𑀧𑀦 𑀯𑀺𑀲𑀼𑀁𑀬𑁂𑀯𑁂𑀓𑀁 𑀜𑀸𑀡𑀼𑀧𑁆𑀧𑀸𑀤𑀦𑀦𑁆𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀦 𑀅𑀜𑁆𑀜…𑀧𑁂… 𑀯𑀺𑀲𑁂𑀲𑁄’’𑀢𑀺. 𑀅𑀢𑁆𑀢𑀦𑁄 𑀳𑀺 𑀅𑀥𑀺𑀕𑀫𑀸𑀦𑀼𑀲𑀸𑀭𑁂𑀦 𑀧𑀭𑀸𑀥𑀺𑀕𑀢𑀸𑀦𑀁 𑀓𑀸𑀮𑀢𑁆𑀢𑀬𑁂 𑀫𑀕𑁆𑀕𑀸𑀤𑀻𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀸𑀦𑀼𑀫𑀸𑀦𑀁 𑀦𑀬𑀦𑀬𑀦𑀁. 𑀅𑀦𑀼𑀫𑀺𑀦𑀦𑀸𑀓𑀸𑀭𑀫𑁂𑀯 𑀳𑀺𑀲𑁆𑀲 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀜𑀸𑀡𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄’’𑀢𑀺. 𑀓𑀸𑀭𑀡𑀜𑁆𑀘 𑀦𑀬𑀦𑀬𑀦𑀲𑁆𑀲 𑀲𑀘𑁆𑀘𑁂𑀲𑀼 𑀧𑀘𑁆𑀘𑀓𑁆𑀔𑀧𑀯𑀢𑁆𑀢𑀦𑀢𑁄. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀬𑀣𑀸 𑀫𑀕𑁆𑀕𑀜𑀸𑀡𑀢𑁄 𑀅𑀜𑁆𑀜𑀸𑀧𑀺 ‘‘𑀇𑀫𑀺𑀦𑀸 𑀥𑀫𑁆𑀫𑁂𑀦𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀣𑀸 𑀧𑀓𑀸𑀭𑀦𑁆𑀢𑀭𑁂𑀦𑀧𑀺 ‘‘𑀇𑀫𑀺𑀦𑀸 𑀥𑀫𑁆𑀫𑁂𑀦 𑀜𑀸𑀡𑁂𑀦𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. 𑀢𑁂𑀦𑀸𑀢𑀺 𑀢𑀲𑁆𑀫𑀸 𑀜𑀸𑀡𑁂𑀦 𑀜𑀸𑀢𑀢𑁄 𑀲𑀫𑁆𑀧𑀬𑁄𑀕𑁂𑀳𑀺 𑀦𑀬𑀦𑀬𑀦𑀢𑁄. 𑀜𑀸𑀡𑀯𑀺𑀲𑀬𑀪𑀸𑀯𑁂𑀦𑀸𑀢𑀺 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑁂𑀦. 𑀜𑀸𑀢𑁂𑀦 𑀧𑀝𑀺𑀯𑀺𑀤𑁆𑀥𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀦, 𑀜𑀸𑀡𑀲𑀫𑁆𑀧𑀬𑁄𑀕𑁂𑀦 𑀯𑀸 𑀜𑀸𑀢𑁂𑀦 𑀚𑀸𑀦𑀺𑀢𑁆𑀯𑀸 𑀞𑀺𑀢𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑁂𑀦.

𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀁, 𑀅𑀦𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀜𑁆𑀳𑀺 𑀲𑀩𑁆𑀩𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀕𑀢𑀁 𑀲𑀫𑁆𑀫𑀲𑀻𑀬𑀢𑀺. 𑀦𑀬𑀦𑀢𑁄𑀢𑀺 𑀦𑀬𑀕𑁆𑀕𑀸𑀳𑀢𑁄. 𑀅𑀦𑀼𑀭𑀽𑀧𑀢𑁆𑀣𑀯𑀸𑀘𑀓𑁄 𑀯𑀸 𑀓𑀸𑀭𑀡𑀲𑀤𑁆𑀤𑁄 ‘‘𑀓𑀸𑀭𑀡𑀁 𑀯𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬.

𑀅𑀦𑁆𑀯𑀬𑀜𑀸𑀡𑀲𑁆𑀲𑀧𑀺 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀲𑀯𑀺𑀲𑁂𑀲𑁄 𑀯𑀺𑀲𑀬𑀸𑀯𑀩𑁄𑀥𑁄𑀢𑀺 𑀯𑀼𑀢𑁆𑀢𑀁 ‘‘𑀥𑀫𑁆𑀫𑁂 𑀜𑀸𑀡…𑀧𑁂… 𑀅𑀪𑀸𑀯𑀸’’𑀢𑀺. 𑀯𑀺𑀲𑀬𑁄𑀪𑀸𑀲𑀦𑀫𑀢𑁆𑀢𑀚𑀸𑀦𑀦𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀲𑀢𑀺𑀧𑀺 𑀅𑀪𑀺𑀲𑀫𑁂𑀘𑁆𑀘 𑀕𑀳𑀡𑁂 𑀯𑀺𑀲𑀬𑀯𑀺𑀪𑀸𑀯𑀦𑀲𑀗𑁆𑀔𑀸𑀢𑀅𑀯𑀩𑁄𑀥𑀲𑀸𑀫𑀜𑁆𑀜𑀫𑀢𑁆𑀢𑁂𑀦. ‘‘𑀜𑀸𑀡’’𑀦𑁆𑀢𑀺 𑀲𑀫𑁆𑀫𑀢𑁂𑀲𑀽𑀢𑀺 ‘‘𑀜𑀸𑀡’’𑀦𑁆𑀢𑀺 𑀯𑁄𑀳𑀭𑀺𑀢𑁂𑀲𑀼 𑀮𑀤𑁆𑀥𑀜𑀸𑀡𑀯𑁄𑀳𑀸𑀭𑁂𑀲𑀼. 𑀲𑀫𑁆𑀫𑀼𑀢𑀺𑀯𑀲𑁂𑀦𑀸𑀢𑀺 𑀥𑀫𑁆𑀫𑀜𑀸𑀡𑀸𑀤𑀺 𑀯𑀺𑀬 𑀲𑀫𑀼𑀔𑁂𑀦 𑀯𑀺𑀲𑀬𑁂 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦 𑀧𑀯𑀢𑁆𑀢𑀁. 𑀅𑀯𑀲𑁂𑀲𑀦𑁆𑀢𑀺 𑀲𑀫𑁆𑀫𑀼𑀢𑀺𑀜𑀸𑀡𑀫𑁂𑀯𑀸𑀳. 𑀇𑀢𑀭𑀜𑀸𑀡𑀢𑁆𑀢𑀬𑀯𑀺𑀲𑀪𑀸𑀕𑀦𑁆𑀢𑀺 𑀥𑀫𑁆𑀫𑀜𑀸𑀡𑀸𑀤𑀺𑀜𑀸𑀡𑀢𑁆𑀢𑀬𑀯𑀺𑀥𑀼𑀭𑀁.

𑁭𑁯𑁭. 𑀓𑀸𑀫𑀪𑀯𑀥𑀫𑁆𑀫𑁂𑀢𑀺 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀥𑀫𑁆𑀫𑁂.

𑁭𑁯𑁮. 𑀲𑀸𑀢𑀺 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸. 𑀯𑀻𑀢𑀭𑀸𑀕𑀪𑀸𑀯𑀦𑀸𑀯𑀢𑁆𑀣𑀲𑁆𑀲𑀸𑀢𑀺 ‘‘𑀯𑀻𑀢𑀭𑀸𑀕𑁄 𑀳𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑁆𑀲. 𑀢𑀦𑁆𑀢𑀺 𑀙𑀝𑁆𑀞𑀸𑀪𑀺𑀜𑁆𑀜𑀁. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀓𑀺𑀘𑁆𑀘𑀢𑁄 𑀫𑀕𑁆𑀕𑀲𑀘𑁆𑀘𑀫𑁆𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀢𑀭𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀧𑀜𑁆𑀜𑀸. 𑀢𑀤𑀼𑀧𑀦𑀺𑀲𑁆𑀲𑀬𑀢𑁆𑀢𑀸𑀢𑀺 𑀢𑀲𑁆𑀲𑀸 𑀙𑀝𑁆𑀞𑀸𑀪𑀺𑀜𑁆𑀜𑀸𑀬, 𑀢𑀲𑁆𑀲 𑀯𑀸 𑀧𑀝𑀺𑀯𑀺𑀚𑁆𑀛𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀧𑀝𑀺𑀯𑀺𑀚𑁆𑀛𑀢𑀺 𑀦𑀸𑀫. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀤𑀺𑀝𑁆𑀞𑀸𑀲𑀯𑀸𑀤𑀻𑀦𑀁 𑀬𑀣𑀸𑀦𑀼𑀭𑀽𑀧𑀁. 𑀆𑀲𑀯𑀓𑁆𑀔𑀬𑁂𑀢𑀺 𑀆𑀲𑀯𑀓𑁆𑀔𑀬𑀧𑀭𑀺𑀬𑀸𑀬𑁂 𑀓𑀸𑀭𑀡𑀽𑀧𑀘𑀸𑀭𑁂𑀦. 𑀢𑀁𑀦𑀺𑀩𑁆𑀩𑀢𑁆𑀢𑀦𑀢𑁄𑀢𑀺 𑀢𑀲𑁆𑀲 𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀇𑀤𑀜𑁆𑀘 ‘‘𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀙𑀝𑁆𑀞𑀸𑀪𑀺𑀜𑁆𑀜𑀸’’𑀢𑀺 𑀲𑀼𑀢𑁆𑀢𑁂 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁮𑁦𑁧. 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀯𑀸 𑀜𑀸𑀡𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀕𑀫𑀯𑀲𑁂𑀦 𑀧𑀓𑀸𑀲𑀁 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑀲𑁆𑀲.

𑁮𑁦𑁨. 𑀯𑀲𑀺𑀢𑀸𑀧𑀜𑁆𑀘𑀓𑀭𑀳𑀺𑀢𑀁 𑀯𑀲𑀺𑀪𑀸𑀯𑀁 𑀅𑀧𑀸𑀧𑀺𑀢𑀁 𑀧𑀝𑀺𑀮𑀤𑁆𑀥𑀫𑀢𑁆𑀢𑀁. 𑀧𑀝𑀺𑀧𑀤𑀸𑀭𑀫𑁆𑀫𑀡𑀲𑀳𑀕𑀢𑀸 𑀧𑀜𑁆𑀜𑀸 𑀧𑀝𑀺𑀧𑀤𑀸𑀭𑀫𑁆𑀫𑀡𑀲𑀫𑁆𑀩𑀦𑁆𑀥𑀺𑀦𑀻𑀢𑀺 𑀆𑀳 ‘‘𑀧𑀜𑁆𑀜𑀸𑀬 𑀧𑀝𑀺𑀧𑀤𑀸𑀭𑀫𑁆𑀫𑀡𑀼𑀤𑁆𑀤𑁂𑀲𑁂𑀦𑀸’’𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁪. 𑀢𑀫𑁂𑀯 𑀧𑀜𑁆𑀜𑀁 ‘‘𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑀢𑀺. 𑀅𑀪𑀺𑀲𑀦𑁆𑀤𑀦𑀧𑀭𑀺𑀲𑀦𑁆𑀤𑀦𑀧𑀭𑀺𑀧𑀽𑀭𑀡𑀸𑀦𑀺𑀧𑀺 𑀧𑀭𑀺𑀧𑁆𑀨𑀭𑀡𑀁 𑀯𑀺𑀬 𑀨𑀭𑀡𑀸𑀧𑀻𑀢𑀺𑀬𑀸, 𑀢𑀁𑀲𑀳𑀕𑀢𑀲𑀼𑀔𑀲𑁆𑀲 𑀘 𑀓𑀺𑀘𑁆𑀘𑀯𑀺𑀲𑁂𑀲𑀪𑀽𑀢𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀆𑀳 ‘‘𑀅𑀪𑀺𑀲𑀦𑁆𑀤𑁂𑀢𑀻𑀢𑀺…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁪𑁨𑁭) 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦. 𑀨𑀭𑀡𑀜𑁆𑀘𑁂𑀢𑁆𑀣 𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀺𑀢𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀅𑀪𑀺𑀩𑁆𑀬𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀆𑀭𑀫𑁆𑀫𑀡𑁂𑀢𑀺 𑀧𑀻𑀢𑀺𑀨𑀭𑀡𑀢𑀸𑀲𑀼𑀔𑀨𑀭𑀡𑀢𑀸𑀲𑀻𑀲𑁂𑀦 𑀯𑀼𑀢𑁆𑀢𑀸𑀦𑀁 𑀢𑀺𑀓𑀤𑀼𑀓𑀛𑀸𑀦𑀸𑀦𑀁 𑀆𑀭𑀫𑁆𑀫𑀡𑁂. 𑀢𑀸𑀢𑀺 𑀧𑀻𑀢𑀺𑀨𑀭𑀡𑀢𑀸𑀲𑀼𑀔𑀨𑀭𑀡𑀢𑀸.

𑀲𑀫𑀸𑀥𑀺𑀫𑀼𑀔𑁂𑀦𑀸𑀢𑀺 𑀲𑀫𑀸𑀥𑀺𑀁 𑀫𑀼𑀔𑀁 𑀧𑀫𑀼𑀔𑀁 𑀓𑀢𑁆𑀯𑀸, 𑀲𑀫𑀸𑀥𑀺𑀲𑀻𑀲𑁂𑀦𑀸𑀢𑀺 𑀅𑀢𑁆𑀣𑁄, 𑀲𑀫𑀸𑀥𑀺𑀧𑀫𑀼𑀔𑁂𑀦 𑀯𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀦. 𑀅𑀜𑁆𑀜𑁂 𑀓𑀺𑀮𑁂𑀲𑀸 𑀤𑀺𑀝𑁆𑀞𑀺𑀫𑀸𑀦𑀸𑀤𑀬𑁄. 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀦𑀁 𑀯𑀺𑀬 𑀉𑀧𑁆𑀧𑀸𑀤𑀦𑀻𑀬𑀧𑀭𑀺𑀓𑀫𑁆𑀫𑀧𑀬𑁄𑀕𑁂𑀦 𑀯𑀺𑀦𑀸. 𑀆𑀯𑀚𑁆𑀚𑀦𑀸𑀲𑀤𑀺𑀲𑁄 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑁄 𑀲𑀫𑁆𑀫𑀲𑀦𑀘𑀸𑀭𑁄. 𑀞𑀧𑀺𑀢𑀢𑁆𑀢𑀸𑀢𑀺 𑀧𑀯𑀢𑁆𑀢𑀺𑀢𑀢𑁆𑀢𑀸. 𑀲𑀢𑀺𑀩𑀳𑀼𑀮𑀢𑀸𑀬𑀸𑀢𑀺 𑀲𑀢𑀺𑀬𑀸 𑀅𑀪𑀺𑀡𑁆𑀳𑀼𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀢𑀺𑀬𑀸 𑀓𑀸𑀮𑀲𑁆𑀲 𑀲𑀢𑁄𑀢𑀺 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁫. 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀬𑀸 𑀲𑀩𑁆𑀪𑀸𑀯𑀁. ‘‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀓𑀤𑁂𑀲𑀢𑁆𑀢𑀸’’𑀢𑀺 𑀇𑀤𑀁 𑀢𑀲𑁆𑀲 𑀧𑀭𑀺𑀪𑀡𑁆𑀟𑀜𑀸𑀡𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁪𑁭) 𑀆𑀭𑀪𑀺𑀢𑁆𑀯𑀸 ‘‘𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁪𑁬) 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀲𑁆𑀲 𑀢𑀺𑀭𑁄𑀳𑀺𑀢𑀯𑀺𑀧𑁆𑀧𑀓𑀝𑁆𑀞𑀸𑀤𑀺𑀪𑁂𑀤𑀲𑁆𑀲, 𑀇𑀢𑀭𑀲𑁆𑀲 𑀘 𑀭𑀽𑀧𑀸𑀬𑀢𑀦𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀲𑁆𑀲𑀸𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀲𑀺𑀔𑀸𑀧𑀢𑁆𑀢𑀺 𑀘𑀯𑀫𑀸𑀦𑁄𑀧𑀧𑀚𑁆𑀚𑀫𑀸𑀦𑀲𑀢𑁆𑀢𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀫𑀼𑀤𑁆𑀥𑀧𑁆𑀧𑀢𑁆𑀢𑁂𑀦 𑀘𑀸’’𑀢𑀺𑀆𑀤𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁬. 𑀙𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁦𑁬) 𑀯𑀼𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁. 𑀲𑀳 𑀕𑀳𑁂𑀢𑁆𑀯𑀸𑀢𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀭𑀫𑁆𑀫𑀡𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸. 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁂𑀦𑀸𑀢𑀺 𑀧𑀼𑀩𑁆𑀩𑁂 𑀙𑀥𑀸 𑀯𑀼𑀢𑁆𑀢𑀁 𑀯𑀺𑀬 𑀤𑀲𑁆𑀲𑀺𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀏𑀯𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁂𑀦. ‘‘𑀔𑀬𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀭𑁂𑀦 𑀤𑀲𑁆𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀯𑀢𑁆𑀢𑀜𑀸𑀡𑀲𑁆𑀲𑀸𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑁆𑀲 𑀜𑀸𑀡𑀲𑁆𑀲, 𑀧𑀯𑀢𑁆𑀢𑁂 𑀯𑀸 𑀲𑀁𑀲𑀸𑀭𑀯𑀝𑁆𑀝𑁂 𑀜𑀸𑀡𑀲𑁆𑀲. 𑀜𑀸𑀡𑀸𑀭𑀫𑁆𑀫𑀡𑀸 𑀯𑀺𑀧𑀲𑁆𑀲𑀦𑀸 𑀜𑀸𑀡𑀯𑀺𑀧𑀲𑁆𑀲𑀦𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀘 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀯𑀺𑀪𑀸𑀕𑁂𑀦 𑀤𑀲𑁆𑀲𑀦𑀢𑁄 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀲𑁆𑀲 𑀔𑀬𑀥𑀫𑁆𑀫𑀢𑀸𑀤𑀺𑀚𑀸𑀦𑀦𑀁 𑀧𑀝𑀺𑀯𑀺𑀧𑀲𑁆𑀲𑀦𑀸. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀫𑀢𑁆𑀢’’𑀦𑁆𑀢𑀺.

𑀏𑀯𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀴𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀤𑁆𑀥𑀢𑁆𑀢𑀬𑁂 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑁂. 𑀜𑀸𑀡𑀯𑀘𑀦𑁂𑀦𑀸𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀜𑀸𑀡𑀲𑁆𑀲 𑀕𑀳𑀡𑁂𑀦. 𑀅𑀗𑁆𑀕𑀸𑀦𑀦𑁆𑀢𑀺 𑀲𑀢𑁆𑀢𑀲𑀢𑁆𑀢𑀢𑀺𑀬𑀸 𑀅𑀗𑁆𑀕𑀸𑀦𑀁. 𑀇𑀢𑀺𑀲𑀤𑁆𑀤𑁂𑀦𑀸𑀢𑀺 ‘‘𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀇𑀢𑀺𑀲𑀤𑁆𑀤𑁂𑀦. 𑀧𑀓𑀸𑀲𑁂𑀢𑁆𑀯𑀸𑀢𑀺 𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀁 𑀚𑁄𑀢𑁂𑀢𑁆𑀯𑀸. 𑀢𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀢𑁄 𑀅𑀜𑁆𑀜𑀁𑀬𑁂𑀯 𑀧𑀭𑀺𑀬𑁄𑀲𑀸𑀦𑁂 𑀯𑀼𑀢𑁆𑀢𑀁 𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀢𑁆𑀢𑀫𑀁 𑀜𑀸𑀡’’𑀦𑁆𑀢𑀺. 𑀅𑀬𑀫𑁂𑀯 𑀘𑁂𑀢𑁆𑀣 𑀅𑀢𑁆𑀣𑁄 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑀫𑁆𑀧𑀺 𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 𑀦 𑀳𑁄𑀢𑀻’’𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀦 𑀬𑀼𑀢𑁆𑀢𑁄 𑀅𑀗𑁆𑀕𑀦𑁆𑀢𑀭𑀪𑀸𑀯𑀲𑁆𑀲 𑀅𑀯𑀺𑀪𑀸𑀯𑀦𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁𑀜𑀸𑀡…𑀧𑁂… 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸’’𑀢𑀺. 𑀦 𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑀫𑁂𑀯 𑀏𑀓𑀚𑁆𑀛𑀁 𑀯𑀘𑀦𑀫𑀢𑁆𑀢𑁂𑀦 𑀅𑀢𑁆𑀣𑀦𑁆𑀢𑀭𑀁 𑀳𑁄𑀢𑀻𑀢𑀺. ‘‘𑀔𑀬𑀥𑀫𑁆𑀫𑀁…𑀧𑁂… 𑀘𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀉𑀧𑀘𑀬𑁂𑀦 𑀤𑁄𑀲𑀫𑀸𑀳.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁮. 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀢𑀺 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑁂. 𑀤𑀼𑀓𑁆𑀔𑀦𑁆𑀢𑀺 𑀲𑀫𑀸𑀧𑀚𑁆𑀚𑀦𑁂 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀁.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑁄

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁯. 𑀦 𑀞𑀸𑀦𑀦𑁆𑀢𑀺 𑀅𑀝𑁆𑀞𑀸𑀦𑀁, 𑀅𑀦𑀼𑀧𑀮𑀩𑁆𑀪𑀦𑀢𑁆𑀣𑁄 𑀅𑀬𑀫𑀓𑀸𑀭𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀫𑀸𑀦𑀁 𑀞𑀸𑀦𑀁 𑀅𑀝𑁆𑀞𑀸𑀦’’𑀦𑁆𑀢𑀺. 𑀅𑀪𑀸𑀯𑀢𑁆𑀣𑁄 𑀯𑀸, 𑀦 𑀅𑀜𑁆𑀜𑀧𑀝𑀺𑀧𑀓𑁆𑀔𑀸𑀤𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀦𑀢𑁆𑀣𑀺 𑀞𑀸𑀦𑀦𑁆𑀢𑀺 𑀯𑀸 𑀅𑀝𑁆𑀞𑀸𑀦’’𑀦𑁆𑀢𑀺. 𑀓𑁄 𑀧𑀦𑁂𑀢𑀲𑁆𑀲 𑀅𑀢𑁆𑀣𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑁄𑀢𑀺? 𑀧𑀞𑀫𑁄 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑀁 𑀯𑀤𑀢𑀺, 𑀤𑀼𑀢𑀺𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀻𑀦𑀫𑁆𑀧𑀺 𑀲𑀼𑀔𑀢𑁄 𑀉𑀧𑀕𑀫𑀦𑀲𑁆𑀲 𑀳𑁂𑀢𑀼𑀪𑀸𑀯𑁂 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀲𑁆𑀲 𑀲𑁄 𑀲𑀸𑀢𑀺𑀲𑀬𑁄 𑀅𑀲𑀼𑀔𑁂𑀧𑀺 𑀤𑀴𑁆𑀳𑀁 𑀧𑀯𑀢𑁆𑀢𑀸𑀧𑀦𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀯…𑀧𑁂… 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. ‘‘𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺 𑀓𑀲𑁆𑀫𑀸 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀬𑁄 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀅𑀢𑁆𑀢𑀤𑀺𑀝𑁆𑀞𑀺𑀲𑀦𑁆𑀦𑀺𑀲𑁆𑀲𑀬𑀸 𑀧𑀦 𑀲𑀩𑁆𑀩𑀤𑀺𑀝𑁆𑀞𑀺𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀧𑀥𑀸𑀦𑀤𑀺𑀝𑁆𑀞𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀪𑁂𑀤𑀸𑀦𑀼𑀭𑀽𑀧𑀲𑁆𑀲 𑀯𑀢𑁆𑀣𑀼𑀦𑁄. 𑀪𑁂𑀤𑀸𑀦𑀼𑀭𑀽𑀧𑁂𑀦 ‘‘𑀅𑀥𑀫𑁆𑀫𑁂 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦.

𑀲𑁄 𑀏𑀯𑀸𑀢𑀺 𑀬𑁄 𑀮𑀺𑀗𑁆𑀕𑁂 𑀅𑀧𑀭𑀺𑀯𑀢𑁆𑀢𑁂 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀪𑀯𑀗𑁆𑀕𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑁄, 𑀲𑁄 𑀏𑀯. 𑀢𑀜𑁆𑀳𑀺 𑀉𑀧𑀸𑀤𑀸𑀬 𑀏𑀓𑀚𑀸𑀢𑀺𑀲𑀫𑀜𑁆𑀜𑀸, 𑀦 𑀘𑁂𑀢𑁆𑀣 𑀪𑀸𑀯𑀓𑀮𑀸𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸 𑀢𑀤𑀜𑁆𑀜𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀜𑁆𑀳𑀺 𑀢𑀢𑁆𑀣 𑀅𑀯𑀺𑀘𑁆𑀙𑁂𑀤𑀯𑀼𑀢𑁆𑀢𑀺𑀬𑀸 𑀧𑀩𑀦𑁆𑀥𑀯𑁄𑀳𑀸𑀭𑀁 𑀮𑀪𑀢𑀺, 𑀇𑀢𑀭𑀫𑁆𑀧𑀺 𑀯𑀸 𑀪𑀸𑀯𑀸𑀦𑀼𑀧𑀸𑀮𑀦𑀢𑀸𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀦𑁄𑀓𑀸𑀲𑀸𑀯 𑀘𑁄𑀤𑀦𑀸.

𑀲𑀧𑀢𑁆𑀢𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 ‘‘𑀲𑀧𑀢𑁆𑀢𑀁 𑀫𑀸𑀭𑁂𑀫𑀻𑀢𑀺 𑀅𑀪𑀺𑀲𑀦𑁆𑀥𑀺𑀦𑀸 𑀲𑀧𑀢𑁆𑀢𑁂𑀦 𑀦𑀺𑀧𑀦𑁆𑀦𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑀁 𑀫𑀦𑀼𑀲𑁆𑀲𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼. 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀺𑀬𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀫𑀸𑀡𑀁 𑀢𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀅𑀪𑀸𑀯𑀢𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀬𑀣𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀤𑀸𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀧𑀳𑀸𑀭𑁂𑀦 𑀫𑀢𑁂 𑀓𑀲𑁆𑀫𑀸 𑀅𑀭𑀳𑀦𑁆𑀢𑀖𑀸𑀢𑁄𑀬𑁂𑀯 𑀳𑁄𑀢𑀺, 𑀦 𑀧𑀼𑀣𑀼𑀚𑁆𑀚𑀦𑀖𑀸𑀢𑁄𑀢𑀺? 𑀯𑀺𑀲𑁂𑀲𑀲𑀫𑁆𑀪𑀯𑀢𑁄. 𑀬𑀣𑀸 𑀳𑀺 𑀤𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀸𑀕𑀫𑀢𑁆𑀢𑁂𑀦 𑀳𑁄𑀢𑀺, 𑀦 𑀏𑀯𑀁 𑀯𑀥𑁄. 𑀲𑁄 𑀳𑀺 𑀧𑀸𑀡𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑁂𑀢𑀦𑀸, 𑀉𑀧𑀓𑁆𑀓𑀫𑁄, 𑀢𑁂𑀦 𑀫𑀭𑀡𑀦𑁆𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸𑀯 𑀳𑁄𑀢𑀺, 𑀦 𑀅𑀧𑀸𑀭𑀺𑀧𑀽𑀭𑀺𑀬𑀸. 𑀢𑀲𑁆𑀫𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲𑁂𑀯 𑀫𑀭𑀡𑀦𑁆𑀢𑀺 𑀅𑀭𑀳𑀦𑁆𑀢𑀖𑀸𑀢𑁄𑀬𑁂𑀯 𑀳𑁄𑀢𑀺, 𑀦 𑀧𑀼𑀣𑀼𑀚𑁆𑀚𑀦𑀖𑀸𑀢𑁄. 𑀬𑀲𑁆𑀫𑀸 𑀧𑀦 ‘‘𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀬𑀁 𑀲𑀦𑁆𑀢𑀸𑀦𑀁 𑀆𑀭𑀩𑁆𑀪 𑀫𑀸𑀭𑀡𑀺𑀘𑁆𑀙𑀸, 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀪𑀸𑀯𑁂𑀦 𑀧𑀬𑁄𑀕𑀫𑀭𑀡𑀓𑁆𑀔𑀡𑀸𑀦𑀁 𑀯𑀲𑁂𑀦 𑀲𑀢𑀺𑀧𑀺 𑀲𑀦𑁆𑀢𑀸𑀦𑀪𑁂𑀤𑁂 𑀅𑀪𑁂𑀤𑁄𑀬𑁂𑀯. 𑀬𑀤𑀸 𑀘 𑀅𑀢𑁆𑀣𑀲𑀺𑀤𑁆𑀥𑀺, 𑀢𑀤𑀸 𑀔𑀻𑀡𑀸𑀲𑀯𑀪𑀸𑀯𑁄. 𑀢𑀲𑁆𑀫𑀸 𑀅𑀭𑀳𑀦𑁆𑀢𑀖𑀸𑀢𑁄𑀯 𑀳𑁄𑀢𑀻𑀢𑀺 𑀦𑀺𑀘𑁆𑀙𑀺𑀢𑀁. 𑀓𑀣𑀁 𑀧𑀦𑁂𑀢𑁆𑀣 𑀯𑀥𑀓𑀘𑁂𑀢𑀦𑀸 𑀯𑀢𑁆𑀢𑀫𑀸𑀦𑀯𑀺𑀲𑀬𑀸 𑀲𑀺𑀬𑀸𑀢𑀺 𑀆𑀳 ‘‘𑀯𑀥𑀓𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀫𑁆𑀧𑀺…𑀧𑁂… 𑀧𑀯𑀢𑁆𑀢𑀢𑀻’’𑀢𑀺. 𑀢𑀢𑁆𑀣 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀬𑁂𑀦 𑀧𑀩𑀦𑁆𑀥𑁄 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀸𑀤𑀺𑀲𑀁 𑀧𑀬𑁄𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀬𑀤𑀸 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑁄, 𑀢𑀤𑀸 𑀅𑀭𑀳𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀭𑀳𑀦𑁆𑀢𑀖𑀸𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀦 𑀏𑀯𑀦𑁆𑀢𑀺 𑀬𑀣𑀸 𑀓𑀸𑀮𑀦𑁆𑀢𑀭𑀸𑀧𑁂𑀓𑁆𑀔𑀓𑀺𑀘𑁆𑀘𑀲𑀺𑀤𑁆𑀥𑀁 𑀯𑀥𑀓𑀘𑀺𑀢𑁆𑀢𑀁, 𑀦 𑀏𑀯𑀁 𑀘𑀸𑀕𑀘𑁂𑀢𑀦𑀸. ‘‘𑀲𑀸 𑀳𑀻’’𑀢𑀺𑀆𑀤𑀺𑀦𑀸 𑀘𑀸𑀕𑀘𑁂𑀢𑀦𑀸𑀬 𑀓𑀸𑀮𑀦𑁆𑀢𑀭𑀸𑀦𑀧𑁂𑀓𑁆𑀔𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀅𑀜𑁆𑀜𑀲𑀓𑀓𑀭𑀡𑀦𑁆𑀢𑀺 𑀅𑀢𑁆𑀢𑀢𑁄 𑀯𑀺𑀦𑀺𑀫𑁄𑀘𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀲𑀦𑁆𑀢𑀓𑀪𑀸𑀯𑀓𑀭𑀡𑀁. 𑀢𑀲𑁆𑀲𑀸𑀢𑀺 𑀘𑀚𑀺𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀦𑁄. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀢𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑀘𑁂𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦 𑀧𑀭𑀺𑀪𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

‘‘𑀓𑀧𑁆𑀧𑀯𑀺𑀦𑀸𑀲𑁂’’𑀢𑀺 𑀇𑀤𑀁 ‘‘𑀲𑀡𑁆𑀞𑀳𑀦𑁆𑀢𑁂 𑀓𑀧𑁆𑀧𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀳𑀸𑀓𑀧𑁆𑀧𑀯𑀺𑀦𑀸𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀧𑁆𑀧𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀻’’𑀢𑀺 𑀏𑀢𑁆𑀣 𑀆𑀬𑀼𑀓𑀧𑁆𑀧𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀆𑀬𑀼𑀓𑀧𑁆𑀧𑁄 𑀘𑁂𑀢𑁆𑀣 𑀅𑀯𑀻𑀘𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀅𑀦𑁆𑀢𑀭𑀓𑀧𑁆𑀧𑀧𑀭𑀺𑀫𑀸𑀡𑀁 𑀧𑀭𑀫𑀸𑀬𑀼 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀏𑀓𑀁 𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮’’𑀦𑁆𑀢𑀺 (𑀓𑀣𑀸. 𑀅𑀝𑁆𑀞. 𑁬𑁫𑁪-𑁬𑁫𑁭) 𑀯𑀼𑀢𑁆𑀢𑀁. 𑀢𑀬𑀺𑀤𑀁 ‘‘𑀏𑀓𑀁 𑀓𑀧𑁆𑀧’’𑀦𑁆𑀢𑀺 𑀬𑀤𑀺 𑀏𑀓𑀁 𑀫𑀳𑀸𑀓𑀧𑁆𑀧𑀦𑁆𑀢𑀺 𑀅𑀢𑁆𑀣𑁄, 𑀢𑀣𑀸 𑀲𑀢𑀺 𑀯𑀻𑀲𑀢𑀺𑀅𑀦𑁆𑀢𑀭𑀓𑀧𑁆𑀧𑀧𑀭𑀺𑀫𑀸𑀡𑁄 𑀏𑀓𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀦𑁆𑀢𑀺 𑀅𑀢𑁆𑀣𑁄, 𑀲𑀩𑁆𑀩𑀣𑀸𑀧𑀺 ‘‘𑀘𑀢𑀼𑀲𑀝𑁆𑀞𑀺 𑀅𑀦𑁆𑀢𑀭𑀓𑀧𑁆𑀧𑀸’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀬𑀣𑀸 𑀧𑀦 𑀓𑀧𑁆𑀧𑀝𑁆𑀞𑀓𑀣𑀸𑀬 𑀅𑀬𑀁 𑀅𑀝𑁆𑀞𑀓𑀣𑀸 𑀲𑀫𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀧𑀓𑀢𑀢𑁆𑀢𑁄 𑀯𑀸 𑀅𑀧𑀸𑀭𑀸𑀚𑀺𑀓𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄 𑀓𑀫𑁆𑀫𑀮𑀤𑁆𑀥𑀻𑀦𑀁 𑀯𑀲𑁂𑀦 𑀅𑀦𑀸𑀦𑀸𑀲𑀁𑀯𑀸𑀲𑀓𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑀁 𑀧𑀝𑀺𑀲𑁂𑀥𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀝𑀺𑀲𑁂𑀥𑁂𑀢𑁆𑀯𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀧𑀦 𑀦𑀺𑀬𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀯𑀁 𑀧𑀝𑀺𑀲𑁂𑀥𑁂𑀢𑁆𑀯𑀸. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀦𑀁 𑀯𑀺𑀬 𑀲𑀪𑀸𑀯𑀢𑁄’’𑀢𑀺. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀜𑁆𑀳𑁂𑀢𑀁 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀦𑀺𑀲𑁆𑀲𑀬𑀁, 𑀬𑀤𑀺𑀤𑀁 𑀦𑀺𑀬𑀢𑁄 𑀧𑀼𑀕𑁆𑀕𑀮𑁄𑀢𑀺. 𑀬𑀣𑀸𑀧𑀼𑀘𑁆𑀙𑀺𑀢𑀦𑁆𑀢𑀺 ‘‘𑀓𑀺𑀁 𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀧𑁆𑀧𑀓𑀸𑀭𑀁 𑀦𑀺𑀬𑀸𑀫𑀓𑀳𑁂𑀢𑀼𑀁. 𑀬𑁂𑀦𑀸𑀢𑀺 𑀬𑁂𑀦 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦. 𑀦𑀺𑀬𑀢𑀸𑀦𑀺𑀬𑀢𑀪𑁂𑀤𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑀺𑀬𑀢𑀪𑁂𑀤𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀅𑀦𑀺𑀬𑀢𑀪𑁂𑀤𑀜𑁆𑀘. 𑀲𑁄𑀢𑀸𑀧𑀦𑁆𑀦𑁄 𑀏𑀯 𑀳𑀺 𑀏𑀓𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺, 𑀏𑀓𑁄 𑀓𑁄𑀮𑀁𑀓𑁄𑀮𑁄 𑀦𑀸𑀫, 𑀏𑀓𑁄 𑀏𑀓𑀩𑀻𑀚𑀻 𑀦𑀸𑀫𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀦𑀺𑀬𑀢𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀲𑁄𑀢𑀸𑀧𑀦𑁆𑀦𑁄 𑀘 𑀦𑀺𑀬𑀢𑁄’’𑀢𑀺. 𑀩𑁆𑀬𑀢𑀺𑀭𑁂𑀓𑀢𑁆𑀣𑁄 𑀳𑀺 𑀅𑀬𑀁 𑀘-𑀲𑀤𑁆𑀤𑁄. 𑀢𑀢𑁄 𑀧𑀼𑀩𑁆𑀩𑁂𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁄 𑀧𑀼𑀩𑁆𑀩𑁂. ‘‘𑀧𑀼𑀩𑁆𑀩𑀳𑁂𑀢𑀼𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀦𑀺𑀬𑀢𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀯𑀓𑁆𑀔𑀫𑀸𑀦𑀜𑁆𑀘 𑀤𑁄𑀲𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀧𑀭𑀺𑀫𑀕𑁆𑀕𑀸𑀦𑀁 𑀲𑀉𑀧𑀦𑀺𑀲𑁆𑀲𑀬𑀢𑁆𑀢𑁂 𑀧𑀞𑀫𑀫𑀕𑁆𑀕𑀲𑁆𑀲𑀸𑀧𑀺 𑀲𑀉𑀧𑀦𑀺𑀲𑁆𑀲𑀬𑀢𑀸 𑀲𑀺𑀤𑁆𑀥𑀸 𑀏𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺. 𑀢𑀜𑁆𑀘 𑀦𑀺𑀬𑀢𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲.

𑀢𑁂𑀦𑁂𑀯 𑀔𑀻𑀡𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀔𑀻𑀡𑀸. 𑀓𑀸𑀭𑀡𑀼𑀧𑀘𑁆𑀙𑁂𑀤𑁂𑀦 𑀳𑀺 𑀨𑀮𑀼𑀧𑀘𑁆𑀙𑁂𑀤𑁄 𑀲𑀺𑀬𑀸. 𑀢𑀢𑁄𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀢𑁄. 𑀲𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀢𑀸. 𑀧𑀯𑀢𑁆𑀢𑀺𑀢𑁄𑀢𑀺 𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑀢𑁄. 𑀢𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀯𑀼𑀝𑁆𑀞𑀸𑀦𑁂𑀢𑀺 𑀯𑀼𑀝𑁆𑀞𑀸𑀦𑁂 𑀲𑀢𑀺. 𑀓𑀸𑀭𑀡𑁂𑀦 𑀯𑀺𑀦𑀸 𑀨𑀮𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀓𑁆𑀓𑀸𑀬…𑀧𑁂… 𑀪𑀯𑀺𑀢𑀩𑁆𑀩’’𑀦𑁆𑀢𑀺. ‘‘𑀦𑀸𑀫𑀓𑀭𑀡𑀦𑀺𑀫𑀺𑀢𑁆𑀢𑀢𑁄’’𑀢𑀺 𑀇𑀫𑀺𑀦𑀸 𑀦𑀸𑀫𑀓𑀭𑀡𑀳𑁂𑀢𑀼𑀢𑀸𑀬 𑀦𑀺𑀬𑀸𑀫𑀓𑀢𑀁 𑀯𑀺𑀪𑀸𑀯𑁂𑀢𑀺 𑀏𑀓𑀩𑀻𑀚𑀺𑀆𑀤𑀺𑀲𑀫𑀜𑁆𑀜𑀸𑀦𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺.

𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀻𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺𑀆𑀤𑀻𑀦𑀺 (𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫. 𑀦𑀺. 𑁧.𑁨𑁮𑁫) 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀏𑀢𑁆𑀣 𑀘 ‘‘𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺, 𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 (𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫. 𑀦𑀺. 𑁧.𑁨𑁮𑁫). ‘𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀕𑀯𑀢𑀸 𑀲𑀫𑀲𑀫𑀸 𑀲𑀫𑁆𑀩𑁄𑀥𑀺𑀬’𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, ‘𑀦𑁄’𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁧𑁬𑁧) 𑀯𑀘𑀦𑁂𑀳𑀺 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀯𑀺𑀬 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀜𑁆𑀜𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄 𑀦𑀺𑀯𑀸𑀭𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑀺𑀚𑁆𑀚𑀫𑀸𑀦𑁂 ‘‘𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀮𑁄𑀓𑀥𑀸𑀢𑀼𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢’’𑀦𑁆𑀢𑀺, 𑀢𑀫𑁆𑀧𑀺 𑀦𑀢𑁆𑀣𑀺 𑀢𑀣𑀸 𑀯𑀺𑀲𑁂𑀲𑀦𑀲𑁆𑀲 𑀅𑀪𑀸𑀯𑀢𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲 𑀘 𑀅𑀲𑀫𑀢𑁆𑀣𑀪𑀸𑀯𑀯𑀺𑀪𑀸𑀯𑀦𑀢𑁄. 𑀆𑀡𑀸𑀔𑁂𑀢𑁆𑀢𑀓𑀺𑀢𑁆𑀢𑀦𑀜𑁆𑀘𑁂𑀢𑁆𑀣 𑀥𑀫𑁆𑀫𑀢𑀸𑀤𑀲𑁆𑀲𑀦𑀢𑁆𑀣𑀁. 𑀲𑀓𑁆𑀓𑁄𑀢𑀺 𑀳𑀺 𑀪𑀕𑀯𑀸 𑀬𑀢𑁆𑀣 𑀬𑀢𑁆𑀣 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀡𑀁 𑀯𑀢𑁆𑀢𑁂𑀢𑀼𑀁. ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀘 𑀇𑀤𑀁 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑀸𑀬 𑀮𑁄𑀓𑀥𑀸𑀢𑀼𑀬𑀸 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀬𑀫𑀢𑁆𑀣𑁄 𑁋 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑀸 𑀏𑀓𑀸𑀯𑀸𑀬𑀁 𑀮𑁄𑀓𑀥𑀸𑀢𑀼. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀏𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀔𑁂𑀢𑁆𑀢…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀥𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀧𑀲𑀫𑁆𑀧𑀤𑀸 𑀘 𑀧𑀩𑁆𑀩𑀚𑁆𑀚𑀸𑀥𑀻𑀦𑀸, 𑀢𑀲𑁆𑀫𑀸. 𑀧𑀸𑀢𑀺𑀫𑁄𑀓𑁆𑀔𑁂 𑀲𑀺𑀤𑁆𑀥𑁂, 𑀲𑀺𑀤𑁆𑀥𑀸𑀲𑀼 𑀢𑀸𑀲𑀼 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀲𑀼. 𑀢𑀢𑁄 𑀧𑀭𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀧𑀝𑀺𑀯𑁂𑀥𑀢𑁄 𑀧𑀭𑀁 𑀧𑀝𑀺𑀯𑁂𑀥𑀲𑀸𑀲𑀦𑀁, 𑀧𑀘𑁆𑀙𑀺𑀫𑀲𑀻𑀮𑀪𑁂𑀤𑀢𑁄 𑀘 𑀧𑀭𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀲𑀸𑀲𑀦𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀉𑀪𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀙𑀺𑀫…𑀧𑁂… 𑀏𑀓𑀢𑁄 𑀓𑀢𑁆𑀯𑀸’’𑀢𑀺 𑀆𑀳.

𑀧𑀭𑀺𑀤𑁂𑀯𑀦𑀓𑀸𑀭𑀼𑀜𑁆𑀜𑀦𑁆𑀢𑀺 𑀧𑀭𑀺𑀤𑁂𑀯𑀦𑁂𑀦 𑀓𑀭𑀼𑀡𑀸𑀬𑀺𑀢𑀩𑁆𑀩𑀢𑀸 𑀓𑀭𑀼𑀡𑀸𑀬𑀦𑀸.

𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀲𑁂𑀲𑁄 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼𑀁, 𑀬𑀢𑁄 𑀧𑀸𑀭𑀫𑀻𑀧𑀯𑀺𑀘𑀬𑀸𑀤𑀻𑀲𑀼 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺, 𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀘 𑀞𑀧𑁂𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀪𑀽𑀫𑀺𑀪𑀸𑀕𑁄 𑀫𑀳𑀸𑀧𑀼𑀭𑀺𑀲𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀜𑁆𑀜𑀤𑀢𑁆𑀣𑀼 𑀏𑀓𑀧𑀲𑁆𑀲𑁂 𑀧𑀓𑁆𑀔𑀺𑀢𑁆𑀢𑀅𑀢𑀺𑀪𑀸𑀭𑀪𑀭𑀺𑀢𑀦𑀸𑀯𑀸 𑀯𑀺𑀬 𑀘𑀓𑁆𑀓𑀯𑀸𑀴𑀕𑀩𑁆𑀪𑁄 𑀯𑀺𑀧𑀭𑀺𑀯𑀢𑁆𑀢𑁄. ‘‘𑀲𑀫𑀼𑀧𑁆𑀧𑀸𑀤𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲-𑀓𑀸𑀭𑁂 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑁄, 𑀏𑀓𑀲𑁆𑀲 𑀘 𑀧-𑀓𑀸𑀭𑀲𑁆𑀲 𑀮𑁄𑀧𑁄 𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀁 𑀉𑀤𑁆𑀥𑀁 𑀧𑀚𑁆𑀚𑀢𑀻𑀢𑀺 𑀲𑀸𑀫𑀼𑀧𑀸𑀤𑀺𑀓𑀸’’𑀢𑀺. 𑀲𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀯𑀸 𑀲𑀫𑀼𑀧𑀸𑀤𑀸, 𑀲𑀫𑀼𑀧𑀸𑀤𑀸 𑀏𑀯 𑀲𑀸𑀫𑀼𑀧𑀸𑀤𑀺𑀓𑀸, 𑀲𑀫𑀼𑀧𑀸𑀳𑀺𑀦𑀻𑀢𑀺 𑀅𑀢𑁆𑀣𑁄.

𑀲𑀦𑁆𑀢𑀢𑀺𑀔𑀡𑀯𑀲𑁂𑀦𑀸𑀢𑀺 𑀲𑀦𑁆𑀢𑀢𑀺𑀯𑀲𑁂𑀦 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀲𑀧𑀼𑀩𑁆𑀩𑀧𑀘𑁆𑀙𑀸𑀪𑀸𑀕𑀲𑁆𑀲 𑀕𑀳𑀡𑀯𑀲𑁂𑀦 𑀘𑁂𑀢𑀦𑀸𑀓𑁆𑀔𑀡𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀏𑀓𑀲𑁆𑀫𑀺𑀁 𑀉𑀧𑀝𑁆𑀞𑀺𑀢𑁂 𑀧𑀘𑁆𑀘𑀬𑀯𑀲𑁂𑀦 𑀢𑀤𑀜𑁆𑀜𑀲𑁆𑀲 𑀉𑀧𑀝𑁆𑀞𑀸𑀦𑀁 𑀧𑀭𑀺𑀯𑀢𑁆𑀢𑀦𑀁.

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁦. 𑀪𑁄𑀕𑁂 𑀪𑀼𑀜𑁆𑀚𑀺𑀢𑀼𑀁 𑀦 𑀚𑀸𑀦𑀸𑀢𑀺, 𑀯𑀺𑀦𑀸𑀲𑁂𑀢𑀻𑀢𑀺 𑀬𑁄𑀚𑀦𑀸.

𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀚𑀻𑀯𑀺𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦 𑀅𑀤𑀸𑀲𑀺 𑀧𑀬𑀼𑀢𑁆𑀢𑀯𑀸𑀘𑀸𑀬 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦.

𑀲𑀫𑁆𑀫𑀸𑀧𑀬𑁄𑀕𑁂𑀦𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁩. 𑀥𑀸𑀢𑀼𑀲𑀪𑀸𑀯𑁄𑀢𑀺 𑀪𑀽𑀢𑀸𑀤𑀺𑀲𑀗𑁆𑀔𑀸𑀢𑀥𑀸𑀢𑀽𑀦𑀁 𑀲𑀪𑀸𑀯𑁄. 𑀲𑀪𑀸𑀕𑀯𑀲𑁂𑀦 𑀨𑀮𑀪𑀽𑀢𑁂𑀦. 𑀅𑀚𑁆𑀛𑀸𑀲𑀬𑀥𑀸𑀢𑀼𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄𑀢𑀺 𑀅𑀚𑁆𑀛𑀸𑀲𑀬𑀲𑀪𑀸𑀯𑀲𑁆𑀲 ‘‘𑀳𑀻𑀦𑀁, 𑀧𑀡𑀻𑀢’’𑀦𑁆𑀢𑀺 𑀯𑀸 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀢𑁄, 𑀯𑀼𑀝𑁆𑀞𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀬 𑀫𑀳𑁄𑀖𑁂𑀦 𑀉𑀧𑀭𑀺𑀫𑁂𑀖𑀯𑀼𑀝𑁆𑀞𑀺𑀬𑀸.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀤𑁆𑀤𑀢𑁆𑀣𑁄 𑀲𑀫𑁆𑀪𑀯𑀢𑀺 𑀲𑀫𑀸𑀲𑀦𑁆𑀢𑁂𑀦𑁂𑀯 𑀢𑀣𑀸 𑀲𑀤𑁆𑀤𑀲𑀺𑀤𑁆𑀥𑀺𑀢𑁄. 𑀢𑁂𑀲𑀦𑁆𑀢𑀺 𑀧𑀭𑁄𑀧𑀭𑀸𑀦𑀁 𑀯𑀺𑀲𑀤𑀸𑀯𑀺𑀲𑀤𑀸𑀦𑀁 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀁. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀆𑀲𑀬𑀸𑀤𑀺𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀲𑁆𑀲, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀢𑁄 𑀘 𑀅𑀥𑀺𑀫𑀼𑀢𑁆𑀢𑀺𑀪𑁂𑀤𑀲𑁆𑀲 𑀯𑀺𑀲𑀺𑀝𑁆𑀞𑀲𑀪𑀸𑀯𑀢𑁆𑀢𑀸 𑀏𑀯.

𑁮𑁧𑁫. ‘‘𑀓𑁂 𑀧𑀦 𑀢𑁂 𑀅𑀭𑀺𑀬𑀸𑀯𑀸𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂 𑀲𑀼𑀢𑁆𑀢𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀯𑀼𑀢𑁆𑀢𑀸’’𑀢𑀺 𑀦𑀺𑀕𑀫𑁂𑀢𑁆𑀯𑀸 𑀧𑀼𑀦 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀢𑁂𑀲𑀁 𑀅𑀥𑀺𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀭𑁂𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀫𑀏𑀓𑀸𑀭𑀓𑁆𑀔𑀸𑀲𑀗𑁆𑀔𑀸𑀬𑀧𑀝𑀺𑀲𑁂𑀯𑀦𑀸𑀤𑀬𑁄.

𑁮𑁧𑁬. 𑀆𑀭𑀫𑁆𑀫𑀡𑀲𑀦𑁆𑀢𑀸𑀦𑀸𑀦𑀼𑀲𑀬𑀦𑁂𑀲𑀽𑀢𑀺 𑀆𑀭𑀫𑁆𑀫𑀡𑀸𑀦𑀼𑀲𑀬𑀦𑀁, 𑀲𑀦𑁆𑀢𑀸𑀦𑀸𑀦𑀼𑀲𑀬𑀦𑀦𑁆𑀢𑀺 𑀤𑁆𑀯𑀻𑀲𑀼 𑀅𑀦𑀼𑀲𑀬𑀦𑁂𑀲𑀼. 𑀬𑀣𑀸 𑀳𑀺 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀭𑀸𑀕𑁄 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀣𑀸𑀫𑀕𑀢𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀇𑀝𑁆𑀞𑀸𑀭𑀫𑁆𑀫𑀡𑁂𑀧𑀻𑀢𑀺 𑀢𑀲𑁆𑀲 𑀆𑀭𑀫𑁆𑀫𑀡𑀸𑀦𑀼𑀲𑀬𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦𑀲𑁆𑀲 𑀅𑀦𑀼𑀲𑀬𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 (𑀯𑀺𑀪. 𑀅𑀝𑁆𑀞. 𑁮𑁧𑁬) 𑀯𑀼𑀢𑁆𑀢𑀁. ‘‘𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸’’𑀢𑀺 𑀏𑀢𑁂𑀦 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀲𑁆𑀲 𑀘𑀺𑀭𑀧𑀭𑀺𑀪𑀸𑀯𑀦𑀁 𑀯𑀺𑀪𑀸𑀯𑁂𑀢𑀺. 𑀬𑀲𑁆𑀫𑀸 𑀧𑀦 𑀏𑀯𑀁 𑀘𑀺𑀭𑀧𑀭𑀺𑀪𑀸𑀯𑀺𑀢𑀁 𑀧𑀭𑀺𑀯𑁂𑀞𑁂𑀢𑁆𑀯𑀸 𑀯𑀺𑀬 𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀫𑀦𑁆𑀢𑀢𑁄 𑀯𑁂𑀞𑁂𑀢𑁆𑀯𑀸 𑀯𑀺𑀬 𑀞𑀺𑀢𑀪𑀸𑀯𑁂𑀦 𑀅𑀦𑀼𑀲𑀬𑀺𑀢𑀢𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀉𑀤𑀓𑁂 𑀦𑀺𑀫𑀼𑀕𑁆𑀕𑀲𑀤𑀺𑀲𑁄 𑀉𑀤𑀸𑀳𑀝𑁄. ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸’’𑀢𑀺𑀆𑀤𑀺𑀧𑀸𑀴𑀺𑀯𑀲𑁂𑀦 𑀪𑀯𑀭𑀸𑀕𑀲𑁆𑀲𑀸𑀧𑀺 𑀯𑀢𑁆𑀣𑀼𑀓𑀸𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀸𑀕𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀭𑀚𑁆𑀚𑀦𑀯𑀲𑁂𑀦.

𑁮𑁧𑁮. 𑀇𑀦𑁆𑀤𑁆𑀭𑀺𑀬𑀯𑀺𑀲𑁂𑀲𑁄 𑀯𑀺𑀦𑁂𑀬𑁆𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁.

𑁮𑁧𑁯. 𑀧𑀳𑀸𑀢𑀩𑁆𑀩𑁂𑀦 𑀉𑀧𑀤𑁆𑀤𑀼𑀢𑀦𑀺𑀭𑁄𑀥𑀦𑀢𑁆𑀣𑀁 𑀧𑀳𑀸𑀬𑀓𑀁 𑀧𑀭𑀺𑀬𑁂𑀲𑀢𑀻𑀢𑀺 𑀧𑀞𑀫𑀁 𑀧𑀳𑀸𑀢𑀩𑁆𑀩𑀁, 𑀧𑀘𑁆𑀙𑀸 𑀧𑀳𑀸𑀬𑀓𑀦𑁆𑀢𑀺 𑀅𑀬𑀁 𑀧𑀳𑀸𑀢𑀩𑁆𑀩𑀧𑀚𑀳𑀦𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑀧𑀤𑁂𑀦 𑀯𑀼𑀢𑁆𑀢𑁄. 𑀬𑀲𑁆𑀲𑀸𑀢𑀺 𑀧𑀳𑀸𑀢𑀩𑁆𑀩𑀲𑁆𑀲. 𑀢𑀦𑁆𑀢𑀺 𑀧𑀳𑀸𑀢𑀩𑁆𑀩𑀁. 𑀧𑀞𑀫𑀁 𑀯𑀼𑀘𑁆𑀘𑀢𑀻𑀢𑀺 𑀧𑀳𑀸𑀦𑀯𑀺𑀘𑀸𑀭𑀡𑀸𑀦𑀁 𑀧𑀞𑀫𑀁 𑀯𑀼𑀘𑁆𑀘𑀢𑀺. 𑀢𑀢𑁄 𑀧𑀘𑁆𑀙𑀸 𑀅𑀧𑁆𑀧𑀳𑀸𑀢𑀩𑁆𑀩𑀁 𑀬𑀣𑀸 𑀢𑀁 𑀤𑀲𑁆𑀲𑀦𑀢𑁆𑀢𑀺𑀓𑀸𑀤𑀻𑀲𑀼.

𑁮𑁨𑁬. 𑀢𑀦𑁆𑀢𑀺 𑀪𑀯𑀗𑁆𑀕𑀁. 𑀢𑀲𑁆𑀲𑀸𑀢𑀺 𑀮𑁄𑀓𑀼𑀢𑁆𑀢𑀭𑀲𑁆𑀲. 𑀧𑀸𑀤𑀓𑀦𑁆𑀢𑀺 𑀅𑀦𑁆𑀢𑀺𑀫𑀪𑀯𑀺𑀓𑀲𑁆𑀲 𑀪𑀯𑀗𑁆𑀕𑀁 𑀲𑀦𑁆𑀥𑀸𑀬𑀸𑀳.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁨𑁮. 𑀲𑀫𑀸𑀧𑀦𑁆𑀦𑁄𑀫𑁆𑀳𑀻𑀢𑀺 𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀸𑀥𑀺 𑀯𑀸 𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀘𑀺𑀢𑁆𑀢𑀫𑀜𑁆𑀚𑀽𑀲𑀸𑀢𑀺 𑀬𑁄𑀚𑀦𑀸. 𑀞𑀧𑁂𑀢𑀼𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀮𑀁 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀢𑀼𑀁.

𑀢𑁂𑀳𑀻𑀢𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀳𑀺. 𑀢𑀁𑀲𑀪𑀸𑀯𑀢𑀸𑀢𑀺 𑀓𑀸𑀫𑀸𑀤𑀺𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀲𑀪𑀸𑀯𑀢𑀸. 𑀧𑀕𑀼𑀡𑀯𑁄𑀤𑀸𑀦𑀁 𑀧𑀕𑀼𑀡𑀪𑀸𑀯𑀲𑀺𑀤𑁆𑀥𑀸 𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀤𑁆𑀥𑀺.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁩𑁧. 𑀧𑀜𑁆𑀜𑀸𑀯 𑀯𑀺𑀫𑀼𑀢𑁆𑀢𑀻𑀢𑀺 𑀭𑀸𑀕𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀺𑀪𑀽𑀢𑀸 𑀧𑀜𑁆𑀜𑀸𑀯 𑀯𑀺𑀫𑀼𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄 𑀯𑀺𑀧𑀸𑀓𑀦𑁆𑀢𑀭𑀚𑀸𑀦𑀦𑀲𑁆𑀲𑁂𑀯 𑀤𑀼𑀢𑀺𑀬𑀩𑀮𑀓𑀺𑀘𑁆𑀘𑀢𑁆𑀢𑀸, 𑀓𑀫𑁆𑀫𑀦𑁆𑀢𑀭𑀚𑀸𑀦𑀦𑀲𑁆𑀲 𑀘 𑀢𑀢𑀺𑀬𑀩𑀮𑀓𑀺𑀘𑁆𑀘𑀢𑁆𑀢𑀸. 𑀩𑀮𑀲𑀤𑀺𑀲𑀢𑀦𑁆𑀢𑀺 𑀏𑀓𑀘𑁆𑀘𑀩𑀮𑀲𑀤𑀺𑀲𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀮𑀜𑀸𑀡𑀓𑀺𑀘𑁆𑀘𑁂 𑀯𑀼𑀘𑁆𑀘𑀫𑀸𑀦𑁂 𑀛𑀸𑀦𑀸𑀤𑀺𑀅𑀩𑀮𑀜𑀸𑀡𑀁 𑀉𑀤𑀸𑀳𑀝𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀤𑀺𑀧𑀻’’𑀢𑀺𑀆𑀤𑀺. 𑀢𑀤𑀦𑁆𑀢𑁄𑀕𑀥𑀦𑁆𑀢𑀺 𑀢𑀲𑁆𑀫𑀺𑀁 𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀪𑀸𑀯𑁂 𑀲𑀢𑁆𑀢𑀫𑀩𑀮𑀜𑀸𑀡𑁂 𑀅𑀦𑁆𑀢𑁄𑀕𑀥𑀁. 𑀏𑀯𑀦𑁆𑀢𑀺 𑀛𑀸𑀦𑀸𑀤𑀺𑀜𑀸𑀡𑀁 𑀯𑀺𑀬. 𑀅𑀧𑁆𑀧𑁂𑀢𑀼𑀁, 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘𑀸𑀢𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀸𑀓𑀸𑀭𑀁 𑀲𑀦𑁆𑀥𑀸𑀬𑀸𑀳. 𑀲𑀫𑀼𑀤𑀬𑀧𑁆𑀧𑀳𑀸𑀦𑀸𑀤𑀺𑀏𑀓𑀘𑁆𑀘𑀜𑀸𑀡𑀓𑀺𑀘𑁆𑀘𑀫𑁆𑀧𑀺 𑀅𑀓𑀭𑁄𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀓𑀣𑀫𑀧𑁆𑀧𑀦𑀸𑀤𑀺𑀓𑀁 𑀛𑀸𑀦𑀸𑀤𑀺𑀓𑀺𑀘𑁆𑀘𑀁 𑀓𑀭𑁂𑀬𑁆𑀬, 𑀩𑀮𑀜𑀸𑀡𑁂𑀳𑀺 𑀧𑀦 𑀚𑀸𑀦𑀺𑀢𑀩𑁆𑀩𑀁, 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀚𑀸𑀦𑀦𑁆𑀢𑀫𑁆𑀧𑀺 𑀬𑀲𑁆𑀫𑀸 𑀏𑀓𑀘𑁆𑀘𑀩𑀮𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀸𑀦𑁂𑀯 𑀩𑀮𑀜𑀸𑀡𑀸𑀦𑀺, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀻’’𑀢𑀺𑀆𑀤𑀺 (𑀯𑀺𑀪. 𑀅𑀝𑁆𑀞. 𑁮𑁩𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀩𑀮𑀓𑀺𑀘𑁆𑀘𑀁 𑀏𑀓𑀘𑁆𑀘𑀁 𑀦 𑀓𑀭𑁄𑀢𑀺, 𑀏𑀯𑀁 𑀩𑀮𑀓𑀺𑀘𑁆𑀘𑀫𑁆𑀧𑀻𑀢𑀺 𑀉𑀤𑀸𑀳𑀭𑀡𑀤𑀲𑁆𑀲𑀦𑀯𑀲𑁂𑀦 ‘‘𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀜𑀸𑀡𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.