𑁧𑁫. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸

𑁭𑁧𑁮. ‘‘𑀏𑀲𑁂𑀯 𑀦𑀬𑁄’’𑀢𑀺 𑀥𑀫𑁆𑀫𑀸𑀤𑀻𑀲𑀼 𑀓𑀢𑁄 𑀅𑀢𑀺𑀤𑁂𑀲𑁄 𑀲𑀗𑁆𑀔𑁂𑀧𑀢𑁄 𑀢𑁂𑀲𑀁 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀢𑁂𑀲𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀸𑀦𑀁 𑀯𑀺𑀲𑀬𑀸 𑀢𑀩𑁆𑀩𑀺𑀲𑀬𑀸, 𑀢𑁂𑀲𑀁, 𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀯𑀺𑀲𑀬𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑁂𑀳𑀻𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀩𑁆𑀩𑀸𑀦𑀪𑀸𑀲𑀺𑀢𑀢𑁆𑀣𑀸𑀤𑀺𑀪𑁂𑀤𑁂𑀳𑀺.

𑀤𑀼𑀓𑁆𑀔𑀳𑁂𑀢𑀼𑀨𑀮𑀚𑀸𑀢𑀸𑀤𑀺𑀥𑀫𑁆𑀫𑀚𑀭𑀸𑀫𑀭𑀡𑀸𑀦𑀺 𑀤𑀼𑀓𑁆𑀔𑀸𑀤𑀻𑀦𑀺. 𑀲𑀘𑁆𑀘𑀳𑁂𑀢𑀼𑀥𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁂𑀦 𑀆𑀕𑀢𑁄 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀅𑀭𑀺𑀬𑀫𑀕𑁆𑀕𑁄, 𑀧𑀭𑀺𑀬𑀢𑁆𑀢𑀺𑀯𑀸𑀭𑁂 𑀪𑀸𑀲𑀺𑀢𑀁, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀓𑀼𑀲𑀮𑀁, 𑀅𑀓𑀼𑀲𑀮𑀦𑁆𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀁𑀬𑁂𑀯 𑀯𑀲𑁂𑀦 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀢𑀣𑀸 𑀥𑀫𑁆𑀫𑀸 𑀘𑀸’’𑀢𑀺 𑀇𑀫𑀺𑀦𑀸.

𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀆𑀤𑀻𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀓𑀲𑀫𑁆𑀧𑀸𑀧𑀓𑀜𑀸𑀧𑀓𑀸𑀦𑀁. 𑀧𑀼𑀭𑀺𑀫𑁄𑀢𑀺 𑀧𑀯𑀢𑁆𑀢𑀦𑀢𑁆𑀣𑁄. 𑀢𑀲𑁆𑀫𑀺𑀦𑁆𑀢𑀺 𑀫𑀕𑁆𑀕𑁂. 𑀧𑀘𑁆𑀙𑀺𑀫𑁄𑀢𑀺 𑀧𑀸𑀧𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀯𑀺𑀧𑀭𑀻𑀢𑀦𑀺𑀭𑀼𑀢𑁆𑀢𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀘𑀺𑀡𑁆𑀡𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑀪𑀸𑀯𑁂 𑀦𑀺𑀭𑀼𑀴𑁆𑀳𑀸 𑀬𑀸𑀣𑀸𑀯𑀦𑀺𑀭𑀼𑀢𑁆𑀢𑀺. 𑀬𑀲𑁆𑀫𑀸 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑁄 𑀲𑀤𑁆𑀤𑁄 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀧𑀭𑀫𑀢𑀢𑁄 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀘𑀦𑀪𑀽𑀢𑀸𑀬𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀓𑁂𑀘𑀺 𑀯𑀡𑁆𑀡𑀬𑀦𑁆𑀢𑀻’’𑀢𑀺 𑀆𑀳. 𑀏𑀯𑀁 𑀲𑀢𑀻𑀢𑀺 𑀏𑀯𑀁 𑀦𑀺𑀭𑀼𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀲𑀢𑀺. 𑀧𑀜𑁆𑀜𑀢𑁆𑀢𑀺 𑀅𑀪𑀺𑀮𑀧𑀺𑀢𑀩𑁆𑀩𑀸𑀢𑀺 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑁂, 𑀳𑁄𑀢𑀼, 𑀓𑁄 𑀤𑁄𑀲𑁄 𑀢𑀲𑁆𑀲𑀸 𑀯𑀘𑀦𑀻𑀬𑀪𑀸𑀯𑀢𑁄𑀢𑀺 𑀓𑀤𑀸𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀦𑁆𑀢𑁄 𑀆𑀳 ‘‘𑀦 𑀘 𑀯𑀘𑀦𑀢𑁄…𑀧𑁂… 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺. 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑀸𑀦𑀁. 𑀦 𑀯𑀘𑀦𑀦𑁆𑀢𑀺 𑀅𑀯𑀘𑀦𑀁 𑀅𑀯𑀘𑀦𑀲𑀪𑀸𑀯𑀁. 𑀏𑀯𑀁𑀧𑀓𑀸𑀭𑀦𑁆𑀢𑀺 𑀏𑀯𑀁𑀯𑀺𑀥𑀁 𑀏𑀯𑀁 𑀦𑀺𑀬𑀢𑀮𑀺𑀗𑁆𑀕𑀯𑀺𑀲𑁂𑀲𑀚𑁄𑀢𑀦𑀸𑀓𑀸𑀭𑀁.

𑀧𑀭𑀢𑁄𑀢𑀺 𑀧𑀭𑀪𑀸𑀕𑁂 𑀅𑀦𑀦𑁆𑀢𑀭𑀫𑀦𑁄𑀤𑁆𑀯𑀸𑀭𑁂. 𑀲𑀤𑁆𑀤𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀦𑀸𑀫𑀦𑀺𑀭𑀼𑀢𑁆𑀢𑀺𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦𑀺𑀭𑀼𑀢𑁆𑀢𑀺…𑀧𑁂… 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀧𑀘𑁆𑀙𑀸 𑀚𑀸𑀦𑀦𑀦𑁆𑀢𑀺 𑀲𑀤𑁆𑀤𑀕𑁆𑀕𑀳𑀡𑀼𑀢𑁆𑀢𑀭𑀓𑀸𑀮𑀁 𑀦𑀸𑀫𑀦𑀺𑀭𑀼𑀢𑁆𑀢𑀺𑀬𑀸 𑀚𑀸𑀦𑀦𑀁. 𑀏𑀯𑀦𑁆𑀢𑀺 𑀏𑀯𑀁 𑀲𑀤𑁆𑀤𑀕𑁆𑀕𑀳𑀡𑀢𑁄 𑀧𑀘𑁆𑀙𑀸 𑀦𑀸𑀫𑀦𑀺𑀭𑀼𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀕𑀬𑁆𑀳𑀫𑀸𑀦𑁂. 𑀏𑀯𑀁 𑀦𑀺𑀭𑀼𑀢𑁆𑀢𑀺𑀬𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑁂 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑁆𑀯𑀸 𑀲𑀤𑁆𑀤𑀧𑀓𑁆𑀔𑁂 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁𑀢𑀁𑀲𑀤𑁆𑀤𑀯𑀺𑀪𑀸𑀯𑀓𑀦𑁆𑀢𑀺 𑀬𑀣𑀸 𑀢𑀲𑁆𑀲 𑀢𑀲𑁆𑀲 𑀲𑀤𑁆𑀤𑀧𑁆𑀧𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀲𑀤𑁆𑀤𑀸𑀭𑀫𑁆𑀫𑀡𑀫𑁂𑀯 𑀢𑀁 𑀢𑀁 𑀲𑀤𑁆𑀤𑀁 𑀯𑀺𑀪𑀽𑀢𑀁 𑀓𑀭𑁄𑀢𑀺, 𑀏𑀯𑀁 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀫𑁂𑀯 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀢𑀁 𑀯𑀺𑀪𑀽𑀢𑀁 𑀓𑀭𑁄𑀢𑀻𑀢𑀺 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀲𑀤𑁆𑀤𑀁 𑀧𑀦 𑀯𑀺𑀪𑀸𑀯𑁂𑀦𑁆𑀢𑀁 𑀏𑀓𑀦𑁆𑀢𑀢𑁄 𑀲𑀤𑁆𑀤𑀽𑀧𑀦𑀺𑀩𑀦𑁆𑀥𑀁 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀯𑀺𑀪𑀸𑀯𑁂𑀢𑀺𑀬𑁂𑀯, 𑀬𑀢𑁄 𑀲𑀪𑀸𑀯𑀸𑀲𑀪𑀸𑀯𑀯𑀺𑀲𑁂𑀲𑀯𑀺𑀪𑀸𑀯𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀅𑀜𑁆𑀜𑀣𑀸 𑀳𑀺 𑀲𑀤𑁆𑀤𑀫𑀢𑁆𑀢𑀕𑁆𑀕𑀳𑀡𑁂 𑀯𑀺𑀲𑁂𑀲𑀸𑀯𑀩𑁄𑀥𑁄 𑀏𑀯 𑀦 𑀲𑀺𑀬𑀸𑀢𑀺 𑀧𑁄𑀭𑀸𑀡𑀸 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀯𑀦𑀫𑁆𑀧𑀺 𑀢𑀲𑁆𑀲 𑀇𑀘𑁆𑀙𑀦𑁆𑀢𑀺. 𑀢𑀁𑀯𑀺𑀪𑀸𑀯𑀓𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀯𑀺𑀪𑀸𑀯𑀓𑀁. 𑀦 𑀧𑀸𑀴𑀺𑀯𑀺𑀭𑁄𑀥𑁄 𑀳𑁄𑀢𑀻𑀢𑀺 𑀬𑀤𑀺𑀧𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ‘‘𑀬𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀢𑁆𑀢𑀺 𑀳𑁄𑀢𑀻’’𑀢𑀺 (𑀯𑀺𑀪. 𑁭𑁨𑁭) 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑁂𑀦 𑀥𑀫𑁆𑀫𑀸𑀦𑀁 𑀧𑀩𑁄𑀥𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀦𑁆𑀢𑀺 ‘‘𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀕𑀳𑀺𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑀁𑀬𑁂𑀯𑀸𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀯𑀺𑀲𑀬𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀧𑀕𑁂𑀯 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀅𑀢𑁆𑀣𑀲𑀸𑀥𑀦𑀯𑀲𑁂𑀦 𑀅𑀪𑀺𑀜𑁆𑀜𑀸𑀜𑀸𑀡𑀁 𑀯𑀺𑀬 𑀢𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀦𑀺𑀭𑀼𑀢𑁆𑀢𑀺𑀁 𑀪𑀺𑀦𑁆𑀤𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀧𑀪𑁂𑀤𑀕𑀫𑀦𑀜𑁆𑀘𑁂𑀢𑁆𑀣 𑀅𑀦𑀯𑀲𑁂𑀲𑀢𑁄 𑀦𑀺𑀭𑀼𑀢𑁆𑀢𑀺𑀯𑀺𑀪𑀸𑀕𑀚𑀸𑀦𑀦𑀁. 𑀢𑀣𑀸 𑀲𑁂𑀲𑁂𑀲𑀼. 𑀲𑀓𑁆𑀓𑀝𑀦𑀸𑀫𑀸𑀤𑀻𑀢𑀺 𑀲𑀓𑁆𑀓𑀝𑀯𑀲𑁂𑀦 𑀯𑀼𑀢𑁆𑀢𑀦𑀸𑀫𑀸𑀔𑁆𑀬𑀸𑀢𑀸𑀤𑀺. 𑀦𑀺𑀧𑀸𑀢𑀧𑀤𑀁 𑀦𑀸𑀫𑀸𑀤𑀺𑀧𑀤𑀸𑀦𑀺 𑀯𑀺𑀬 𑀅𑀢𑁆𑀣𑀁 𑀦 𑀯𑀤𑀢𑀺, 𑀅𑀣 𑀔𑁄 𑀩𑁆𑀬𑀜𑁆𑀚𑁂𑀢𑀺 𑀚𑁄𑀢𑁂𑀢𑀻𑀢𑀺 ‘‘𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀦𑀺𑀧𑀸𑀢𑀧𑀤𑀁.

𑀩𑁄𑀥𑀺 𑀜𑀸𑀡𑀁 𑀫𑀡𑁆𑀟𑀪𑀽𑀢𑀁 𑀏𑀢𑁆𑀣𑀸𑀢𑀺 𑀩𑁄𑀥𑀺𑀫𑀡𑁆𑀟𑁄, 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀝𑁆𑀞𑀸𑀦𑁂’’𑀢𑀺. 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦𑀸𑀢𑀺 𑀉𑀕𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑁂𑀦.

𑀅𑀜𑁆𑀜𑀣𑀸 𑀳𑁄𑀦𑁆𑀢𑀻𑀢𑀺 𑀧𑀼𑀭𑀺𑀲𑀬𑀼𑀕𑁂 𑀧𑀼𑀭𑀺𑀲𑀬𑀼𑀕𑁂 𑀏𑀓𑀤𑁂𑀲𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑀸 𑀓𑀸𑀮𑀦𑁆𑀢𑀭𑁂 𑀅𑀜𑁆𑀜𑀸𑀓𑀸𑀭𑀸 𑀪𑀯𑀦𑁆𑀢𑀺. 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀢𑀁𑀢𑀁𑀪𑀸𑀲𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀦𑀸𑀲𑁂𑀦 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀤𑀼𑀭𑀼𑀕𑁆𑀕𑀳𑀡𑀸𑀤𑀺𑀦𑀸 𑀓𑀢𑁆𑀣𑀘𑀺 𑀓𑀤𑀸𑀘𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀧𑀺 𑀩𑁆𑀭𑀳𑁆𑀫𑀮𑁄𑀓𑀸𑀤𑀻𑀲𑀼 𑀬𑀣𑀸𑀲𑀪𑀸𑀯𑁂𑀦𑁂𑀯 𑀅𑀯𑀝𑁆𑀞𑀸𑀦𑀢𑁄 𑀦 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸, 𑀲𑀩𑁆𑀩𑀣𑀸 𑀘 𑀧𑀭𑀺𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀓𑀧𑁆𑀧𑀯𑀺𑀦𑀸𑀲𑁂𑀧𑀺 𑀢𑀺𑀝𑁆𑀞𑀢𑀺𑀬𑁂𑀯𑀸’’𑀢𑀺. 𑀏𑀢𑀲𑁆𑀲 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀲𑁆𑀲.

𑀅𑀢𑁆𑀣𑀸𑀤𑀻𑀲𑀼 𑀜𑀸𑀡𑀦𑁆𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀺. 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀢𑀻𑀲𑀼. 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀯𑀲𑁂𑀦 𑀘𑀢𑀽𑀲𑀼𑀧𑀺 𑀯𑀸. 𑀅𑀢𑁆𑀣𑀥𑀫𑁆𑀫𑀸𑀤𑀺𑀦𑀸 𑀅𑀢𑁆𑀢𑀦𑀸 𑀚𑁄𑀢𑁂𑀢𑀩𑁆𑀩𑁂𑀦 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑀓𑀸𑀦𑀺. 𑀲𑀩𑁆𑀩𑁄 𑀅𑀢𑁆𑀣𑀥𑀫𑁆𑀫𑀸𑀤𑀺𑀓𑁄 𑀅𑀢𑁆𑀣𑁄 𑀯𑀺𑀲𑀬𑀪𑀽𑀢𑁄 𑀏𑀢𑀲𑁆𑀲 𑀜𑀸𑀡𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀢𑁆𑀣𑀓𑀁. 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀣𑀸𑀤𑀺𑀓𑁂 𑀯𑀺𑀲𑀬𑁂 𑀔𑀺𑀢𑁆𑀢𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀞𑀧𑀺𑀢𑀁 𑀧𑀯𑀢𑁆𑀢𑀺𑀢𑀁. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀲𑀩𑁆𑀩𑀲𑁄 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀧𑀜𑁆𑀘𑀦𑁆𑀦𑀦𑁆𑀢𑀺 𑀅𑀥𑀺𑀕𑀫𑀧𑀭𑀺𑀬𑀢𑁆𑀢𑀺𑀲𑀯𑀦𑀧𑀭𑀺𑀧𑀼𑀘𑁆𑀙𑀸𑀧𑀼𑀩𑁆𑀩𑀬𑁄𑀕𑀸𑀦𑀁. 𑀬𑀣𑀸𑀬𑁄𑀕𑀦𑁆𑀢𑀺 𑀬𑀁 𑀬𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀤𑀢𑀸𑀬 𑀬𑀼𑀚𑁆𑀚𑀢𑀺, 𑀢𑀣𑀸 𑀬𑁄𑀚𑁂𑀢𑀩𑁆𑀩𑀁.

𑀧𑀭𑀺𑀧𑀼𑀘𑁆𑀙𑀸𑀳𑁂𑀢𑀼 𑀧𑀯𑀢𑁆𑀢𑀸 𑀓𑀣𑀸 𑀧𑀭𑀺𑀧𑀼𑀘𑁆𑀙𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀼𑀘𑁆𑀙𑀸𑀬…𑀧𑁂… 𑀧𑀭𑀺𑀧𑀼𑀘𑁆𑀙𑀸𑀢𑀺 𑀯𑀼𑀢𑁆𑀢𑀸’’𑀢𑀺.

𑀢𑁂𑀳𑀻𑀢𑀺 𑀫𑀕𑁆𑀕𑁂𑀳𑀺. 𑀧𑀝𑀺𑀮𑀸𑀪𑁄 𑀦𑀸𑀫 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀸𑀤𑀺𑀯𑀺𑀲𑀬𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀁, 𑀢𑀁 𑀧𑀦 𑀫𑀕𑁆𑀕𑀓𑀺𑀘𑁆𑀘𑀫𑁂𑀯𑀸𑀢𑀺 𑀆𑀳 ‘‘𑀲𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺. 𑀅𑀢𑁆𑀣𑀸𑀤𑀻𑀦𑀁 𑀧𑀪𑁂𑀤𑀢𑁄 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀧𑀦𑀸 𑀬𑀣𑀸𑀭𑀳𑀁 𑀧𑀭𑀺𑀢𑁆𑀢𑀓𑀼𑀲𑀮𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀯𑀲𑁂𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀪𑁂𑀤𑁄 𑀓𑀸𑀫𑀸𑀯𑀘𑀭𑁄’’𑀢𑀺. 𑀬𑀣𑀸 𑀧𑀼𑀩𑁆𑀩𑀬𑁄𑀕𑁄 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑁄 𑀲𑀪𑀸𑀯𑀳𑁂𑀢𑀼𑀪𑀸𑀯𑀢𑁄, 𑀦 𑀢𑀣𑀸 𑀧𑀪𑁂𑀤𑀲𑁆𑀲 𑀅𑀲𑀪𑀸𑀯𑀳𑁂𑀢𑀼𑀢𑀸𑀬, 𑀧𑀭𑀫𑁆𑀧𑀭𑀧𑀘𑁆𑀘𑀬𑀢𑀸𑀬 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀢𑁆𑀢𑀺𑀆𑀤𑀻𑀦𑀁 𑀧𑀪𑁂𑀤𑀲𑁆𑀲 𑀩𑀮𑀯𑀧𑀘𑁆𑀘𑀬𑀢𑀸𑀬, 𑀅𑀥𑀺𑀕𑀫𑀲𑁆𑀲 𑀘 𑀢𑀤𑀪𑀸𑀯𑁂 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀢𑀸𑀲𑀼 𑀧𑀭𑀺𑀬𑀢𑁆𑀢𑀺𑀲𑀯𑀦𑀧𑀭𑀺𑀧𑀼𑀘𑁆𑀙𑀸𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑀸𑀲𑀽𑀢𑀺 𑀅𑀢𑁆𑀣𑁄. 𑀬𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀏𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀬𑀁 𑀅𑀢𑁆𑀣𑀚𑀸𑀢𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. ‘‘𑀧𑀼𑀩𑁆𑀩𑀬𑁄𑀕𑀸𑀥𑀺𑀕𑀫𑀸’’𑀢𑀺 𑀯𑀢𑁆𑀯𑀸 ‘‘𑀤𑁆𑀯𑁂𑀧𑀻’’𑀢𑀺 𑀯𑀘𑀦𑀁 𑀅𑀥𑀺𑀕𑀫𑀲𑀳𑀺𑀢𑁄𑀬𑁂𑀯 𑀧𑀼𑀩𑁆𑀩𑀬𑁄𑀕𑁄 𑀧𑀪𑁂𑀤𑀲𑁆𑀲 𑀩𑀮𑀯𑀧𑀘𑁆𑀘𑀬𑁄, 𑀦 𑀓𑁂𑀯𑀮𑁄𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁆𑀯𑁂𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮). ‘‘𑀤𑁆𑀯𑁂𑀧𑀺 𑀯𑀺𑀲𑀤𑀓𑀸𑀭𑀡𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑀬𑁄𑀕𑀲𑁆𑀲𑀸𑀧𑀺 𑀯𑀺𑀲𑀤𑀓𑀸𑀭𑀡𑀢𑁆𑀢𑀁 𑀮𑀩𑁆𑀪𑀢𑁂𑀯𑀸𑀢𑀺 𑀆𑀳 ‘‘𑀤𑁆𑀯𑁂𑀧𑀺 𑀯𑀺𑀲𑀤𑀓𑀸𑀭𑀡𑀸𑀢𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀘𑁆𑀘𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁭𑁧𑁯. 𑀓𑀸𑀮𑀢𑁆𑀢𑀬𑁂𑀧𑀻𑀢𑀺 𑀅𑀢𑀻𑀢𑀸𑀤𑀻𑀲𑀼 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼. 𑀳𑁂𑀢𑀼𑀨𑀮𑀥𑀫𑁆𑀫𑀸 𑀳𑁂𑀢𑀽𑀦𑀁 𑀨𑀮𑀪𑀽𑀢𑀸 𑀥𑀫𑁆𑀫𑀸, 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀘 𑀳𑁂𑀢𑀼𑀥𑀫𑁆𑀫𑀸𑀢𑀺 𑀢𑁂𑀲𑀁 𑀳𑁂𑀢𑀼𑀨𑀮𑀸𑀦𑀁 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀦𑀁 𑀳𑁂𑀢𑀼𑀪𑀽𑀢𑀸 𑀥𑀫𑁆𑀫𑀸 ‘‘𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀯𑀺𑀦𑁂𑀬𑁆𑀬𑀯𑀲𑁂𑀦𑀸𑀢𑀺 𑀢𑀣𑀸𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦. 𑀉𑀧𑁆𑀧𑀦𑁆𑀦𑀸 𑀲𑀫𑀼𑀧𑁆𑀧𑀦𑁆𑀦𑀸𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀲𑀫𑀼𑀧𑁆𑀧𑀦𑁆𑀦𑀸 𑀉𑀝𑁆𑀞𑀺𑀢𑀸 𑀲𑀫𑀼𑀝𑁆𑀞𑀺𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀲𑀗𑁆𑀕𑀸𑀳𑀓𑀢𑁆𑀢𑀸. 𑀢𑀁𑀦𑀺𑀩𑁆𑀩𑀢𑁆𑀢𑀓𑀸𑀢𑀺 𑀢𑁂𑀲𑀁 𑀅𑀢𑁆𑀣𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀁 𑀦𑀺𑀧𑁆𑀨𑀸𑀤𑀓𑀸. 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸 𑀥𑀫𑁆𑀫𑀪𑀸𑀯𑁂𑀦 𑀓𑀣𑀺𑀢𑀸.

𑀲𑀘𑁆𑀘𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁨𑁫. 𑀲𑀸𑀫𑀜𑁆𑀜𑁂𑀦 𑀯𑀢𑁆𑀯𑀸 𑀯𑀺𑀲𑁂𑀲𑁂𑀦 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 ‘‘𑀢𑁂𑀲𑀁 𑀯𑀺𑀧𑀸𑀓𑁂’’𑀢𑀺 𑀬𑀣𑀸𑀯𑀼𑀢𑁆𑀢𑀓𑀼𑀲𑀮𑀯𑀺𑀧𑀸𑀓𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀯𑀢𑁆𑀯𑀸 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀯𑀺𑀲𑁂𑀲𑁂𑀦 𑀅𑀯𑀼𑀢𑁆𑀢𑀢𑁆𑀢𑀸, 𑀲𑀭𑀽𑀧𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀧𑀸𑀓𑀢𑁆𑀢𑀸𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸. 𑀬𑀤𑀺 𑀏𑀯𑀦𑁆𑀢𑀺 𑀧𑀘𑁆𑀘𑀬𑀪𑀸𑀯𑀢𑁄 𑀮𑀩𑁆𑀪𑀫𑀸𑀦𑁄𑀧𑀺 𑀥𑀫𑁆𑀫𑀪𑀸𑀯𑁄 𑀅𑀯𑀺𑀧𑀸𑀓𑀥𑀫𑁆𑀫𑀢𑀸𑀬 𑀓𑀺𑀭𑀺𑀬𑀸𑀦𑀁 𑀬𑀤𑀺 𑀦 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺. 𑀲𑀢𑀺𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀅𑀯𑀺𑀧𑀸𑀓𑀪𑀸𑀯𑀢𑁄 𑀅𑀢𑁆𑀣𑀪𑀸𑀯𑁄𑀧𑀺 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑀪𑀸𑀯𑁄 𑀘 𑀦 𑀯𑀢𑁆𑀢𑀩𑁆𑀩𑁄’’𑀢𑀺. 𑀏𑀯𑀜𑁆𑀘𑁂𑀢𑀺 𑀬𑀤𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀓𑀺𑀭𑀺𑀬𑀸𑀦𑀁 𑀅𑀢𑁆𑀣𑀪𑀸𑀯𑁄 𑀯𑀼𑀢𑁆𑀢𑁄. 𑀦𑀧𑁆𑀧𑀝𑀺𑀲𑀺𑀤𑁆𑀥𑁄 𑀇𑀘𑁆𑀙𑀺𑀢𑁄𑀯𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀯𑀺𑀧𑀸𑀓𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁, 𑀯𑀺𑀧𑀸𑀓𑀓𑀺𑀭𑀺𑀬𑀥𑀫𑁆𑀫𑀸𑀦𑀜𑁆𑀘. 𑀅𑀢𑁆𑀣𑀥𑀫𑁆𑀫𑀢𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀮𑀩𑁆𑀪𑀫𑀸𑀦𑁄𑀧𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀣𑀪𑀸𑀯𑁄, 𑀥𑀫𑁆𑀫𑀪𑀸𑀯𑁄 𑀘 𑀦 𑀯𑀼𑀢𑁆𑀢𑁄. 𑀧𑀘𑁆𑀘𑀬𑀪𑀸𑀯𑀁 𑀲𑀢𑁆𑀢𑀺𑀯𑀺𑀲𑁂𑀲𑀁 𑀲𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑀦𑁆𑀢𑀺 𑀧𑀤𑀢𑁆𑀢𑀬𑁂𑀦𑀸𑀧𑀺 𑀯𑀺𑀧𑀸𑀓𑀥𑀫𑁆𑀫𑀢𑀫𑁂𑀯𑀸𑀳. 𑀲𑀸 𑀳𑀺 𑀯𑀺𑀧𑀸𑀓𑀸𑀦𑀁 𑀳𑁂𑀢𑀼𑀪𑀸𑀯𑀢𑁄 𑀧𑀘𑁆𑀘𑀬𑀪𑀸𑀯𑁄, 𑀢𑀤𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀢𑀺𑀯𑀺𑀲𑁂𑀲𑁄, 𑀢𑁂𑀳𑀺 𑀲𑀕𑀩𑁆𑀪𑀸 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀁 𑀧𑀲𑁆𑀲𑀦𑁆𑀢𑀻 𑀦𑀺𑀧𑁆𑀨𑀸𑀤𑀓𑀯𑀺𑀲𑁂𑀲𑀸𑀧𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀧𑁂𑀓𑁆𑀔𑀸 𑀳𑁄𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀢𑀁𑀲𑀫𑁆𑀩𑀦𑁆𑀥𑁂𑀦𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑀫𑁆𑀩𑀦𑁆𑀥𑁂𑀦. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀁 𑀯𑀤𑀦𑁆𑀢𑁂𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀺 𑀯𑀼𑀢𑁆𑀢𑀸.

𑀲𑀪𑀸𑀯𑀥𑀫𑁆𑀫𑁂 𑀧𑀜𑁆𑀜𑀢𑁆𑀢𑀺 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 𑀆𑀳 ‘‘𑀦 𑀲𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺. 𑀲𑀪𑀸𑀯𑁂𑀦, 𑀦𑀺𑀭𑀼𑀢𑁆𑀢𑀺𑀬𑁂𑀯 𑀯𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀯𑀺𑀧𑀭𑀻𑀢𑀧𑀜𑁆𑀜𑀢𑁆𑀢𑀺𑀬𑀸 𑀯𑀸’’𑀢𑀺.

𑁭𑁪𑁬. 𑀯𑁄𑀳𑀸𑀭𑀪𑀽𑀫𑀺𑀁, 𑀅𑀥𑀺𑀕𑀫𑀪𑀽𑀫𑀺𑀜𑁆𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀆𑀳 ‘‘𑀓𑀸𑀫𑀸𑀯𑀘𑀭𑀸, 𑀮𑁄𑀓𑀼𑀢𑁆𑀢𑀭𑀸 𑀘 𑀪𑀽𑀫𑀺 𑀪𑀽𑀫𑀻’’𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀪𑀽𑀫𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁪𑁭. 𑀲𑀩𑁆𑀩𑀜𑀸𑀡𑀸𑀭𑀫𑁆𑀫𑀡𑀢𑀸𑀬𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀭𑀫𑁆𑀫𑀡𑀢𑀸𑀬. ‘‘𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀧𑀦…𑀧𑁂… 𑀲𑀺𑀬𑀸’’𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀯𑀸 𑀲𑀸𑀯𑀲𑁂𑀲𑀤𑁂𑀲𑀦𑀢𑀸 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂’’𑀢𑀺𑀆𑀤𑀺. 𑀦𑀺𑀭𑀯𑀲𑁂𑀲𑀓𑀣𑀦𑀦𑁆𑀢𑀺 𑀅𑀲𑁂𑀲𑁂𑀢𑁆𑀯𑀸 𑀓𑀣𑀦𑀁. 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀕𑀳𑀺𑀢𑁂 𑀅𑀢𑁆𑀣𑁂 𑀅𑀲𑁂𑀲𑁂𑀢𑁆𑀯𑀸 𑀤𑁂𑀲𑀦𑀸 𑀇𑀥 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀲𑁆𑀲 𑀪𑀸𑀭𑁄, 𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀤𑀲𑁆𑀲𑀺𑀢𑀯𑀺𑀲𑀬𑀯𑀘𑀦𑀯𑀲𑁂𑀦𑀸𑀢𑀺 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀯𑀺𑀲𑀬𑀲𑁆𑀲 𑀓𑀣𑀦𑀯𑀲𑁂𑀦, 𑀥𑀫𑁆𑀫𑀢𑁆𑀣𑀯𑀲𑁂𑀦 𑀤𑀲𑁆𑀲𑀺𑀢𑁂 𑀢𑀁𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀢𑀢𑁆𑀣 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂𑀦 𑀜𑀸𑀡𑀲𑁆𑀲 𑀓𑀣𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀭𑀫𑁆𑀫𑀡𑀢𑀁 𑀦 𑀧𑀝𑀺𑀲𑁂𑀥𑁂𑀢𑀺 𑀅𑀢𑀧𑁆𑀧𑀭𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀦𑀺𑀭𑀯𑀲𑁂𑀲𑁂𑀦 𑀓𑀣𑀦𑀁 𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀯𑀺𑀲𑀬𑀲𑁆𑀲 𑀅𑀓𑀣𑀺𑀢𑀢𑁆𑀢𑀸. 𑀏𑀯𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀲𑁆𑀲𑀸𑀧𑀺 𑀦 𑀦𑀺𑀭𑀯𑀲𑁂𑀲𑁂𑀦 𑀓𑀣𑀦𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀅𑀯𑀺𑀲𑁂𑀲𑀯𑀘𑀦𑁂𑀦 𑀲𑀩𑁆𑀩𑀜𑀸𑀡𑀸𑀭𑀫𑁆𑀫𑀡𑀢𑀁𑀬𑁂𑀯 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀢𑀣𑀸 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺𑀆𑀤𑀺𑀧𑀜𑁆𑀳𑀧𑀼𑀘𑁆𑀙𑀓𑀧𑀸𑀴𑀺𑀬𑀸𑀧𑀺. 𑀢𑀺𑀲𑁆𑀲𑁄𑀢𑀺 𑀅𑀢𑁆𑀣𑀥𑀫𑁆𑀫𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀳𑀺 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑁂𑀯 𑀯𑀼𑀢𑁆𑀢𑀸.

𑀬𑀤𑀺𑀧𑀺 𑀲𑀺𑀬𑀸 𑀦 𑀢𑀲𑁆𑀲𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀳𑀺 𑀫𑀕𑁆𑀕𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀦 𑀳𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺 𑀯𑀘𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀸𑀥𑀓𑀢𑀁 𑀯𑀺𑀪𑀸𑀯𑁂𑀢𑀺. 𑀢𑀲𑁆𑀲𑀸𑀢𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀦 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑀸 𑀲𑀫𑁆𑀪𑀯𑀢𑀺 𑀦𑀦𑀼 𑀦𑀬𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑁂𑀧𑀻𑀢𑀺 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 𑀘 𑀤𑁆𑀯𑁂𑀧𑀺 𑀏𑀢𑀸 𑀧𑀸𑀴𑀺𑀬𑁄. 𑀢𑀸𑀲𑀼 𑀩𑀮𑀯𑀢𑀭𑀸𑀬 𑀞𑀸𑀦𑀲𑁆𑀲, 𑀇𑀢𑀭𑀸𑀬 𑀅𑀥𑀺𑀧𑁆𑀧𑀸𑀬𑀫𑀕𑁆𑀕𑀦𑀲𑁆𑀲 𑀘 𑀉𑀧𑀸𑀬𑀤𑀲𑁆𑀲𑀦𑀫𑀼𑀔𑁂𑀦 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀦𑀺𑀧𑁆𑀧𑀭𑀺𑀬𑀸𑀬𑀸 𑀢𑀢𑁆𑀣 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀢𑀢𑁆𑀣 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀭𑀺𑀬𑀸𑀬𑀪𑀸𑀯𑀫𑀸𑀳. 𑀢𑀣𑀸 𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀦𑁆𑀢𑀺𑀆𑀤𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀤𑀲𑁆𑀲𑀦𑀁. 𑀉𑀪𑀬𑁂𑀦𑀧𑀺 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁪𑁯) 𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀦𑀬𑀸𑀦𑀼𑀕𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁆𑀣𑀲𑁆𑀲 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘𑀺 𑀧𑀦 𑀜𑀸𑀡𑀦𑁆𑀢𑀺𑀆𑀤𑀺 ‘‘𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀲𑀫𑀢𑁆𑀣𑀓𑀁. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀪𑀸𑀦𑀁 𑀤𑀻𑀧𑀦𑀁 𑀧𑀝𑀺𑀪𑀸𑀦𑀁. 𑀢𑁂𑀦𑀸𑀳 ‘‘𑀜𑁂𑀬𑁆𑀬𑀧𑁆𑀧𑀓𑀸𑀲𑀦𑀢𑁄’’𑀢𑀺. 𑀇𑀢𑀺 𑀬𑀸 ‘‘𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀧𑀸𑀴𑀺, 𑀢𑀲𑁆𑀲𑀸 𑀩𑀮𑀯𑀪𑀸𑀯𑀯𑀺𑀪𑀸𑀯𑀦𑁂𑀦 𑀇𑀢𑀭𑀸𑀬 𑀅𑀥𑀺𑀧𑁆𑀧𑀸𑀬𑀫𑀕𑁆𑀕𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑀸𑀢𑀺 𑀧𑀭𑀺𑀬𑀸𑀬𑀭𑀳𑀺𑀢𑀸 𑀉𑀚𑀼𑀓𑀁 𑀲𑀭𑀽𑀧𑁂𑀦𑁂𑀯 𑀧𑀯𑀢𑁆𑀢𑀸. 𑀦𑀺𑀧𑁆𑀧𑀭𑀺𑀬𑀸𑀬…𑀧𑁂… 𑀧𑀯𑀢𑁆𑀢𑀺𑀬𑀦𑁆𑀢𑀺 𑀏𑀓𑀦𑁆𑀢𑀺𑀓𑀅𑀢𑁆𑀣𑀸𑀭𑀫𑁆𑀫𑀡𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑀸𑀭𑀫𑁆𑀫𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀕𑀳𑁂𑀢𑁆𑀯𑀸 𑀤𑁂𑀲𑀦𑀸𑀬𑀁.

𑀲𑁄 𑀏𑀯𑀸𑀢𑀺 𑀧𑀭𑀲𑁆𑀲 𑀅𑀪𑀺𑀮𑀸𑀧𑀲𑀤𑁆𑀤𑁄 𑀏𑀯. 𑀅𑀦𑀼𑀯𑀢𑁆𑀢𑀫𑀸𑀦𑀢𑀸 𑀘𑀲𑁆𑀲 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀻, 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀦𑁆𑀢𑀻𑀢𑀺 𑀘 𑀆𑀤𑀺𑀯𑀘𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.