𑁧𑁪. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁦𑁩. 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀜𑁆𑀘 𑀲𑀻𑀮𑀗𑁆𑀕𑀸𑀦𑀺 𑀦𑀺𑀲𑁆𑀲𑀬𑀪𑀸𑀯𑁂𑀦 𑀯𑀸 𑀧𑀢𑀺𑀝𑁆𑀞𑀸 𑀲𑀺𑀬𑀼𑀁, 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀯𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀧𑀬𑁄𑀕𑀯𑀲𑁂𑀦, 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀑𑀓𑀸𑀲𑀪𑀸𑀯𑁂𑀦𑀸’’𑀢𑀺.

𑁭𑁦𑁪. ‘‘𑀓𑀫𑁆𑀫𑀧𑀣𑀸 𑀏𑀯𑀸’’𑀢𑀺 𑀦𑀺𑀬𑀫𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀲𑀩𑁆𑀩𑀲𑀸𑀥𑀸𑀭𑀡𑁂𑀲𑀽’’𑀢𑀺. 𑀦 𑀳𑀺 𑀲𑀓𑁆𑀓𑀸 𑀇𑀦𑁆𑀤𑁆𑀭𑀺𑀬𑀸𑀤𑀺𑀲𑀸𑀥𑀸𑀭𑀡𑀓𑁄𑀝𑁆𑀞𑀸𑀲𑀯𑀲𑁂𑀦 𑀦𑀺𑀬𑀫𑀁 𑀓𑀸𑀢𑀼𑀁. 𑀓𑀫𑁆𑀫𑀧𑀣𑀓𑁄𑀝𑁆𑀞𑀸𑀲𑀺𑀓𑀸 𑀏𑀯, 𑀦 𑀛𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀺𑀓𑀸. 𑀓𑀫𑁆𑀫𑀧𑀣𑀪𑀸𑀯𑁂𑀦 𑀆𑀕𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀤𑀼𑀕𑁆𑀕𑀢𑀺𑀬𑀸, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀤𑀼𑀓𑁆𑀔𑀲𑁆𑀲 𑀘 𑀧𑀯𑀢𑁆𑀢𑀺𑀉𑀧𑀸𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲 𑀲𑀼𑀭𑀸𑀧𑀸𑀦𑀲𑁆𑀲. 𑀉𑀧𑀓𑀸𑀭𑀓𑀢𑁆𑀢𑀁 𑀲𑀩𑁆𑀩𑁂𑀲𑀁. 𑀲𑀪𑀸𑀕𑀢𑁆𑀢𑀁 𑀫𑀺𑀘𑁆𑀙𑀸𑀘𑀸𑀭𑀲𑁆𑀲.

𑀢𑀣𑀸𑀕𑀳𑀺𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸𑀬𑀸𑀢𑀺 ‘‘𑀲𑀢𑁆𑀢𑀁 𑀅𑀯𑀳𑀭𑀸𑀫𑀺, 𑀲𑀢𑁆𑀢𑁂 𑀯𑀺𑀧𑁆𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀸𑀓𑀸𑀭𑁂𑀦 𑀕𑀳𑀺𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸𑀬, 𑀦 𑀧𑀦 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺.

𑀢𑀲𑁆𑀲 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀬𑀲𑁆𑀲 𑀩𑁆𑀬𑀲𑀦𑀢𑁆𑀣𑀸𑀬. 𑀲𑀬𑀁 𑀯𑀸 𑀉𑀲𑀼𑀆𑀤𑀺𑀁 𑀔𑀺𑀧𑀢𑀺, 𑀑𑀧𑀸𑀢𑀔𑀡𑀦𑀸𑀤𑀺𑀁 𑀓𑀭𑁄𑀢𑀺, 𑀢𑀸𑀤𑀺𑀲𑀁 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀢𑀺, 𑀓𑀫𑁆𑀫𑀚𑀇𑀤𑁆𑀥𑀺𑀁 𑀯𑀴𑀜𑁆𑀚𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀢𑀁 𑀲𑀩𑁆𑀩𑀁 𑀓𑀸𑀭𑁂𑀢𑀻𑀢𑀺 𑀆𑀳 ‘‘𑀦𑀺𑀲𑁆𑀲𑀕𑁆𑀕𑀺𑀬…𑀧𑁂… 𑀤𑁆𑀯𑁂 𑀏𑀯 𑀕𑀳𑀺𑀢𑀸’’𑀢𑀺.

𑀬𑀤𑀺𑀧𑀺 𑀓𑁄𑀝𑁆𑀞𑀸𑀲𑀯𑀸𑀭𑁂 𑀯𑀺𑀭𑀢𑀺 𑀲𑀭𑀽𑀧𑁂𑀦 𑀦𑀸𑀕𑀢𑀸 ‘‘𑀬𑁂𑀯𑀸𑀧𑀦𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸, 𑀪𑀚𑀸𑀧𑀺𑀬𑀫𑀸𑀦𑀸 𑀧𑀦 𑀫𑀕𑁆𑀕𑀪𑀸𑀯𑀁𑀬𑁂𑀯 𑀪𑀚𑀢𑀻𑀢𑀺 𑀆𑀳 ‘‘𑀯𑀺𑀭𑀢𑀺𑀲𑀻𑀮𑀁 𑀧𑀦 𑀫𑀕𑁆𑀕𑀓𑁄𑀝𑁆𑀞𑀸𑀲𑀺𑀓’’𑀦𑁆𑀢𑀺. 𑀲𑁂𑀲𑀲𑀻𑀮𑀸𑀦𑀦𑁆𑀢𑀺 𑀲𑁂𑀲𑀅𑀯𑀻𑀢𑀺𑀓𑁆𑀓𑀦𑁆𑀢𑀲𑀻𑀮𑀸𑀦𑀁.

𑁭𑁧𑁨. 𑀅𑀪𑀩𑁆𑀩𑀝𑁆𑀞𑀸𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄. 𑀬𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀁, 𑀏𑀯𑀁 𑀢𑀤𑀜𑁆𑀜𑁂𑀧𑀺 𑀅𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀁𑀲𑀪𑀸𑀕𑀢𑀸𑀬 𑀯𑁂𑀭𑀪𑀽𑀢𑀸𑀦’’𑀦𑁆𑀢𑀺. 𑀯𑀺𑀭𑀢𑀻𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀦 𑀪𑀯𑀺𑀲𑁆𑀲𑀢𑀺 𑀲𑁂𑀓𑁆𑀔𑀸𑀦𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀓𑀼𑀲𑀮𑀲𑀫𑀼𑀝𑁆𑀞𑀺𑀢𑀸𑀦𑀺 𑀘𑀸’’𑀢𑀺𑀆𑀤𑀺𑀦𑀸𑀧𑀺 𑀲𑁂𑀓𑁆𑀔𑀸𑀦𑀁 𑀉𑀪𑀬𑁂𑀦 𑀯𑀺𑀭𑀢𑀺𑀲𑀩𑁆𑀪𑀸𑀯𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀸𑀦𑀺 𑀅𑀓𑀼𑀲𑀮𑀲𑀫𑀼𑀝𑁆𑀞𑀺𑀢𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺, 𑀢𑀸𑀦𑀺 𑀢𑁂𑀲𑀁 𑀲𑁂𑀓𑁆𑀔𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀻𑀢𑀺 𑀯𑁂𑀭𑀸𑀦𑀺𑀬𑁂𑀯, 𑀢𑁂𑀳𑀺 𑀯𑁂𑀭𑁂𑀳𑀺 𑀢𑁂𑀲𑀁 𑀲𑁂𑀓𑁆𑀔𑀸𑀦𑀁 𑀯𑀺𑀭𑀢𑀺𑀬𑁄 𑀲𑀫𑁆𑀪𑀯𑀦𑁆𑀢𑀺𑀬𑁂𑀯. 𑀬𑀢𑁄𑀢𑀺 𑀬𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀫𑀺𑀢𑀩𑁆𑀩𑀦𑀺𑀧𑁆𑀧𑀭𑀺𑀬𑀸𑀬𑀯𑁂𑀭𑀸𑀪𑀸𑀯𑁂𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑁂𑀭𑀫𑀢𑁆𑀢𑀢𑁄 𑀲𑁂𑀓𑁆𑀔𑀸𑀦𑀁 𑀯𑀺𑀭𑀢𑀺𑀲𑀫𑁆𑀪𑀯𑀢𑁄. 𑀦𑀨𑀮𑀪𑀽𑀢𑀲𑁆𑀲𑀸𑀧𑀻𑀢𑀺 𑀬𑀣𑀸 𑀨𑀮𑀲𑁆𑀲 𑀫𑀕𑁆𑀕𑀧𑀝𑀺𑀩𑀺𑀫𑁆𑀩𑀪𑀽𑀢𑀢𑁆𑀢𑀸 𑀫𑀕𑁆𑀕𑀲𑀤𑀺𑀲𑀁 𑀲𑀢𑁆𑀢𑀅𑀝𑁆𑀞𑀗𑁆𑀕𑀺𑀓𑀢𑀸 𑀲𑀺𑀬𑀸, 𑀏𑀯𑀁 𑀅𑀨𑀮𑀪𑀽𑀢𑀲𑁆𑀲𑀸𑀧𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀓𑀲𑁆𑀲 𑀬𑀢𑁄 𑀯𑀺𑀭𑀢𑀺𑀲𑀫𑁆𑀪𑀯𑀢𑁄 𑀅𑀝𑁆𑀞𑀗𑁆𑀕𑀺𑀓𑀢𑀸 𑀳𑁄𑀢𑀺, 𑀅𑀜𑁆𑀜𑀣𑀸 𑀧𑀜𑁆𑀘𑀗𑁆𑀕𑀺𑀓𑁄 𑀏𑀯 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁧𑁪. 𑀬𑀣𑀸𑀯𑀺𑀭𑀫𑀺𑀢𑀩𑁆𑀩𑀢𑁄𑀢𑀺 𑀬𑁄 𑀬𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀯𑀺𑀭𑀫𑀺𑀢𑀩𑁆𑀩𑁄, 𑀢𑀢𑁄 𑀯𑀺𑀭𑀢𑀺𑀯𑀲𑁂𑀦.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.