𑁧𑁧. 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁄

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁯𑁦. 𑀅𑀪𑀺𑀥𑀫𑁆𑀫𑁂𑀢𑀺 𑀥𑀫𑁆𑀫𑀲𑀗𑁆𑀕𑀳𑁂. 𑀲𑁄 𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸𑀪𑀺𑀥𑀫𑁆𑀫𑀤𑁂𑀲𑀦𑀸, 𑀦 𑀯𑀺𑀪𑀗𑁆𑀕𑀤𑁂𑀲𑀦𑀸 𑀯𑀺𑀬 𑀲𑀼𑀢𑁆𑀢𑀦𑁆𑀢𑀦𑀬𑀯𑀺𑀫𑀺𑀲𑁆𑀲𑀸. 𑀅𑀭𑀺𑀬𑁄𑀧𑀧𑀤𑀢𑀁 𑀦 𑀓𑀭𑁄𑀢𑀺 𑀯𑀺𑀦𑀸𑀧𑀺 𑀢𑁂𑀦𑀲𑁆𑀲 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺.

𑁪𑁯𑁩. ‘‘𑀮𑁄𑀓𑀺𑀬𑀓𑀸𑀮𑁂𑀦𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀺𑀘𑁆𑀘𑀸𑀢𑀺𑀭𑁂𑀓𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁂𑀲𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁. 𑀅𑀧𑁆𑀧𑀳𑀸𑀦𑁂, 𑀧𑀳𑀸𑀦𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀸𑀤𑀺𑀦𑀸 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀺 𑀧𑀚𑀳𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀫𑀺𑀘𑁆𑀙𑀸𑀯𑀸𑀘𑀸𑀤𑀺𑀢𑁄 𑀦𑀺𑀯𑀢𑁆𑀢𑀺 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀭𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀭𑀺𑀬𑀸 𑀳𑀺 𑀯𑀺𑀭𑀢𑀻’’𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀯𑀺𑀬 𑀦 𑀓𑀸𑀭𑀸𑀧𑀓𑀪𑀸𑀯𑁂𑀦, 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀯𑀺𑀬 𑀦 𑀓𑀢𑁆𑀢𑀼𑀪𑀸𑀯𑁂𑀦. 𑀮𑁄𑀓𑀼𑀢𑁆𑀢𑀭𑀓𑁆𑀔𑀡𑁂𑀧𑀻𑀢𑀺 𑀦 𑀓𑁂𑀯𑀮𑀁 𑀮𑁄𑀓𑀺𑀬𑀓𑁆𑀔𑀡𑁂𑀬𑁂𑀯, 𑀅𑀣 𑀔𑁄 𑀮𑁄𑀓𑀼𑀢𑁆𑀢𑀭𑀓𑁆𑀔𑀡𑁂𑀧𑀺.

𑀔𑀦𑁆𑀥𑁄𑀧𑀥𑀺𑀁 𑀯𑀺𑀧𑀘𑁆𑀘𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀤𑀸𑀬𑀺𑀓𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀯𑀺𑀧𑀘𑁆𑀘𑀢𑀻𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀓𑀁.

𑀏𑀓𑁂𑀓𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀏𑀓𑁂𑀓𑀁 𑀅𑀗𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸. 𑀢𑀲𑁆𑀲 𑀢𑀲𑁆𑀲𑁂𑀯𑀸𑀢𑀺 𑀏𑀓𑁂𑀓𑀅𑀗𑁆𑀕𑀲𑁆𑀲𑁂𑀯, 𑀦 𑀅𑀗𑁆𑀕𑀲𑀫𑀼𑀤𑀸𑀬𑀲𑁆𑀲. 𑀲𑀳 𑀧𑀦 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀢𑀢𑁆𑀣 𑀓𑀢𑀫𑁄 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸. 𑀏𑀓𑀢𑁄 𑀯𑀺𑀲𑁆𑀲𑀚𑁆𑀚𑀦𑀧𑀝𑀺𑀦𑀺𑀤𑁆𑀤𑁂𑀲𑀢𑁆𑀢𑀸𑀢𑀺 𑀬𑀤𑀺𑀧𑀺 ‘‘𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺? 𑀬𑀸 𑀧𑀜𑁆𑀜𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁯𑁫) 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, ‘‘𑀢𑀢𑁆𑀣 𑀓𑀢𑀫𑁄 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 (𑀯𑀺𑀪. 𑁪𑁯𑁪) 𑀧𑀦 𑀏𑀓𑀢𑁄 𑀓𑀢𑀸𑀬 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑀢𑁄 𑀦 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁂 𑀏𑀯 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, 𑀦 𑀅𑀝𑁆𑀞𑀗𑁆𑀕𑀺𑀓𑀯𑀸𑀭𑁂𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀏𑀓𑁂𑀓𑀫𑀼𑀔𑀸𑀬𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀫𑀼𑀔𑀸𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨𑁮). 𑀧𑀼𑀩𑁆𑀩𑀲𑀼𑀤𑁆𑀥𑀺𑀬𑀸 𑀲𑀺𑀚𑁆𑀛𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧), 𑀢𑀲𑁆𑀫𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀫𑀼𑀔𑀸 𑀪𑀸𑀯𑀦𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦 𑀫𑀕𑁆𑀕𑀲𑁆𑀲 𑀉𑀧𑀘𑀸𑀭𑁂𑀦𑀸’’𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.