𑁧𑁨. 𑀛𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫𑁦𑁮. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀢𑀺 𑀏𑀯𑀫𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑀼𑀪𑀸𑀦𑀼𑀲𑁆𑀲𑀢𑀺𑀬𑁄𑀢𑀺 𑀅𑀲𑀼𑀪𑀛𑀸𑀦𑀸𑀦𑀺, 𑀅𑀦𑀼𑀲𑁆𑀲𑀢𑀺𑀛𑀸𑀦𑀸𑀦𑀺 𑀘. 𑀲𑀢𑀺 𑀲𑀫𑀡𑀪𑀸𑀯𑀓𑀭𑀧𑀼𑀩𑁆𑀩𑀪𑀸𑀕𑀓𑀭𑀡𑀻𑀬𑀲𑀫𑁆𑀧𑀢𑁆𑀢𑀺𑀬𑀁 𑀲𑀫𑀡𑀪𑀸𑀯𑁄𑀧𑀺 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀜𑁆𑀜𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀓𑀸𑀭𑀡𑁂 𑀳𑀺 𑀲𑀺𑀤𑁆𑀥𑁂 𑀨𑀮𑀫𑁆𑀧𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺. 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀭𑀽𑀧𑀁, 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀁, 𑀲𑀗𑁆𑀔𑁂𑀧𑀢𑁄 𑀯𑀺𑀪𑀸𑀕𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀓𑀸𑀬𑀸𑀤𑀺𑀯𑀲𑁂𑀦𑀸𑀢𑀺 𑀦𑀸𑀫𑀓𑀸𑀬𑀧𑀤𑀓𑀸𑀬𑀩𑁆𑀬𑀜𑁆𑀚𑀦𑀓𑀸𑀬𑀯𑀲𑁂𑀦 𑀯𑀼𑀢𑁆𑀢𑁂𑀲𑀼. 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀺𑀓𑁆𑀔𑀸𑀬 𑀅𑀥𑀺𑀕𑀫𑀽𑀧𑀸𑀬𑀪𑀽𑀢𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁄 𑀲𑀢𑁆𑀣𑀼𑀆𑀡𑀸𑀦𑀢𑀺𑀓𑁆𑀓𑀫𑁄𑀬𑁂𑀯𑀸𑀢𑀺 𑀆𑀳 ‘‘𑀯𑀘…𑀧𑁂… 𑀢𑀩𑁆𑀩𑁂𑀲𑀽’’𑀢𑀺. 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀪𑀸𑀕𑁂𑀲𑀼. 𑀢𑁂𑀲𑀼 𑀲𑀫𑀸𑀤𑀸𑀦𑀫𑁂𑀯 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀧𑀽𑀭𑀡𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑁂𑀲𑀽’’𑀢𑀺. 𑀲𑀺𑀓𑁆𑀔𑀸𑀧𑀤𑁂𑀓𑀤𑁂𑀲𑀪𑀽𑀢𑀸𑀢𑀺 𑀲𑀺𑀓𑁆𑀔𑀸𑀧𑀤𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑀸. 𑀪𑀺𑀓𑁆𑀔𑀼𑀲𑀺𑀓𑁆𑀔𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸 ‘‘𑀇𑀥 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑁂𑀲𑀲𑀺𑀓𑁆𑀔𑀸 𑀧𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀺𑀓𑁆𑀔𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁫𑁧𑁬).

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁦𑁯. 𑀤𑀺𑀝𑁆𑀞𑀢𑁆𑀢𑀸𑀢𑀺 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸. 𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀘𑁆𑀙𑀺𑀓𑀭𑀡𑀯𑀲𑁂𑀦𑁂𑀯 𑀳𑀺 𑀪𑀕𑀯𑀢𑁄 𑀔𑀫𑀦𑀭𑀼𑀘𑁆𑀘𑀦𑀸𑀤𑀬𑁄, 𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸𑀤𑀺𑀫𑀼𑀔𑁂𑀦. 𑀅𑀯𑀺𑀧𑀭𑀻𑀢𑀝𑁆𑀞𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀺𑀓𑁆𑀔𑀺𑀬𑀫𑀸𑀦𑁄𑀢𑀺 𑀲𑀺𑀓𑁆𑀔𑀸𑀬 𑀧𑀝𑀺𑀧𑀚𑁆𑀚𑀺𑀬𑀫𑀸𑀦𑁄. 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀺𑀓𑁆𑀔𑀸𑀧𑀤𑀧𑀸𑀴𑀺𑀁 𑀯𑀤𑀢𑀺. 𑀔𑀦𑁆𑀥𑀢𑁆𑀢𑀬𑀦𑁆𑀢𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁. ‘‘𑀲𑀩𑁆𑀩𑀧𑀸𑀧𑀲𑁆𑀲…𑀧𑁂… 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁧.𑁯𑁦; 𑀦𑁂𑀢𑁆𑀢𑀺. 𑁩𑁦) 𑀯𑀘𑀦𑀢𑁄 𑀆𑀳 ‘‘𑀅𑀦𑀼𑀲𑀸𑀲𑀦𑀤𑀸𑀦𑀪𑀽𑀢𑀁 𑀲𑀺𑀓𑁆𑀔𑀢𑁆𑀢𑀬’’𑀦𑁆𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀢𑁆𑀢𑀸𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀏𑀓𑀦𑁆𑀢𑀳𑁂𑀢𑀼𑀪𑀸𑀯𑀢𑁄. 𑀏𑀢𑁆𑀣 𑀘 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺, 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺 𑀘. 𑀨𑀮𑀓𑀸𑀭𑀡𑁄𑀧𑀘𑀸𑀭𑁂𑀳𑀻𑀢𑀺 𑀨𑀮𑀽𑀧𑀘𑀸𑀭𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀢𑁆𑀢𑀸, 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸. 𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀢𑁆𑀢𑀦𑁄 𑀏𑀓𑀤𑁂𑀲𑀪𑀽𑀢𑁂𑀳𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀓𑀼𑀲𑀮𑀧𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀁 𑀯𑀸 𑀧𑀚𑀸𑀦𑀦𑀯𑀺𑀚𑀸𑀦𑀦𑀯𑀲𑁂𑀦 𑀤𑀲𑁆𑀲𑀦𑀁 𑀤𑀺𑀝𑁆𑀞𑀻𑀢𑀺. 𑀢𑁂𑀦 𑀅𑀯𑀬𑀯𑀥𑀫𑁆𑀫𑁂𑀦 𑀲𑀫𑀼𑀤𑀸𑀬𑀲𑁆𑀲 𑀉𑀧𑀘𑀭𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀦𑀬𑀦𑀓𑀺𑀭𑀺𑀬𑀢𑁆𑀢𑀸𑀢𑀺 𑀤𑁂𑀲𑀦𑀸𑀪𑀽𑀢𑀁 𑀲𑀺𑀓𑁆𑀔𑀢𑁆𑀢𑀬𑀫𑀸𑀳. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦. 𑀅𑀯𑀺𑀲𑀫𑀲𑀪𑀸𑀯𑁂𑀦𑀸𑀢𑀺 𑀅𑀯𑀺𑀲𑀫𑁂𑀦 𑀲𑀪𑀸𑀯𑁂𑀦, 𑀲𑀫𑁂𑀦𑀸𑀢𑀺 𑀅𑀢𑁆𑀣𑁄.

𑁫𑁧𑁦. 𑀅𑀦𑀜𑁆𑀜𑀢𑁆𑀣𑁂𑀦𑀸𑀢𑀺 𑀕𑀭𑀳𑀸𑀤𑀺𑀅𑀜𑁆𑀜𑀢𑁆𑀣𑀭𑀳𑀺𑀢𑁂𑀦 𑀲𑀓𑀢𑁆𑀣𑁂𑀦. 𑀪𑀺𑀦𑁆𑀦𑀧𑀝𑀥𑀭𑁂𑀢𑀺 𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀜𑁆𑀘𑀔𑀡𑁆𑀟𑀸𑀤𑀺𑀦𑀸 𑀙𑁂𑀤𑁂𑀦 𑀙𑀺𑀦𑁆𑀦𑀘𑀻𑀯𑀭𑀥𑀭𑁂.

𑀪𑁂𑀤𑀦𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀓𑀺𑀮𑁂𑀲𑀸𑀦𑀁 𑀪𑁂𑀤𑀸 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀕𑀼𑀡𑀯𑀲𑁂𑀦𑀸𑀢𑀺 𑀲𑁂𑀓𑁆𑀔𑀥𑀫𑁆𑀫𑀸𑀤𑀺𑀕𑀼𑀡𑀸𑀦𑀁 𑀯𑀲𑁂𑀦. 𑀢𑁂𑀦 𑀪𑀸𑀯𑀢𑁆𑀣𑀢𑁄 𑀪𑀺𑀓𑁆𑀔𑀼𑀲𑀤𑁆𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀇𑀤𑀁 𑀤𑁆𑀯𑀬𑀦𑁆𑀢𑀺 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀧𑀭𑀢𑁄 𑀲𑀗𑁆𑀕𑀳𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀲𑁂𑀓𑁆𑀔𑁄’’𑀢𑀺𑀆𑀤𑀺𑀓𑀁 𑀯𑀘𑀦𑀤𑁆𑀯𑀬𑀁. 𑀇𑀫𑀺𑀦𑀸𑀢𑀺 ‘‘𑀲𑁂𑀓𑁆𑀔𑁄 𑀪𑀺𑀓𑁆𑀔𑀼 𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦’’𑀦𑁆𑀢𑀺 𑀧𑀤𑀸𑀦𑀁 𑀅𑀢𑁆𑀣𑀤𑀲𑁆𑀲𑀦𑁂𑀦. 𑀦 𑀲𑀫𑁂𑀢𑀺 𑀲𑁂𑀓𑁆𑀔𑀅𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀲𑁂𑀓𑁆𑀔𑀤𑀻𑀧𑀦𑀢𑁄. 𑀢𑀤𑀺𑀤𑀦𑁆𑀢𑀺 𑀧𑀞𑀫𑀤𑁆𑀯𑀬𑀁. 𑀦𑀺𑀧𑁆𑀧𑀭𑀺𑀬𑀸𑀬𑀤𑀲𑁆𑀲𑀦𑀁 𑀅𑀭𑀺𑀬𑀸𑀦𑀁, 𑀅𑀲𑁂𑀓𑁆𑀔𑀸𑀦𑀁𑀬𑁂𑀯 𑀘 𑀲𑁂𑀓𑁆𑀔𑀪𑀺𑀦𑁆𑀦𑀓𑀺𑀮𑁂𑀲𑀪𑀸𑀯𑀤𑀻𑀧𑀦𑀢𑁄. 𑀯𑀼𑀢𑁆𑀢𑁄𑀢𑀺 𑀧𑀝𑀺𑀜𑁆𑀜𑀸𑀯𑀘𑀦𑀁, 𑀲𑀘𑁆𑀘𑀁 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀦 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑀺𑀢𑀢𑁆𑀢𑀸.

𑀪𑀕𑀯𑀢𑁄 𑀯𑀘𑀦𑀦𑁆𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀸𑀘𑀫𑀸𑀳. 𑀢𑀤𑀦𑀼𑀭𑀽𑀧𑀦𑁆𑀢𑀺 𑀢𑀤𑀦𑀼𑀘𑁆𑀙𑀯𑀺𑀓𑀁, 𑀬𑀣𑀸𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀸𑀯𑀢𑁆𑀣𑀼𑀲𑀻𑀫𑀸𑀲𑀫𑁆𑀧𑀢𑁆𑀢𑀺𑀬𑁄 ‘‘𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀅𑀓𑀼𑀧𑁆𑀧𑁂𑀦𑀸’’𑀢𑀺 (𑀯𑀺𑀪. 𑁫𑁧𑁦) 𑀇𑀫𑀺𑀦𑀸 𑀧𑀓𑀸𑀲𑀺𑀢𑀸𑀢𑀺 ‘‘𑀞𑀸𑀦𑀸𑀭𑀳’’𑀦𑁆𑀢𑀺 𑀧𑀤𑀲𑁆𑀲 ‘‘𑀅𑀦𑀽𑀦…𑀧𑁂… 𑀅𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀅𑀢𑁆𑀣𑀫𑀸𑀳.

𑁫𑁧𑁧. 𑀅𑀯𑀻𑀢𑀺𑀓𑁆𑀓𑀫𑀦𑀯𑀺𑀭𑀢𑀺𑀪𑀸𑀯𑀢𑁄𑀢𑀺 𑀅𑀯𑀻𑀢𑀺𑀓𑁆𑀓𑀫𑀲𑀫𑀸𑀤𑀸𑀦𑀪𑀽𑀢𑀸 𑀯𑀺𑀭𑀢𑀻𑀢𑀺 𑀓𑀢𑁆𑀯𑀸 𑀯𑀸𑀭𑀺𑀢𑁆𑀢𑀲𑀻𑀮𑀁 𑀧𑀢𑁆𑀯𑀸 𑀯𑀺𑀭𑀢𑀺 𑀏𑀯 𑀧𑀥𑀸𑀦𑀦𑁆𑀢𑀺 𑀘𑁂𑀢𑀦𑀸𑀲𑀻𑀮𑀲𑁆𑀲𑀧𑀺 𑀧𑀭𑀺𑀬𑀸𑀬𑀢𑀸 𑀯𑀼𑀢𑁆𑀢𑀸. ‘‘𑀦𑀕𑀭𑀯𑀟𑁆𑀠𑀓𑀻 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄’’𑀢𑀺 𑀇𑀤𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑀕𑀭𑀯𑀟𑁆𑀠𑀓𑀻𑀤𑀲𑁆𑀲𑀦𑀁. 𑀯𑀢𑁆𑀣𑀼𑀯𑀺𑀚𑁆𑀚𑀸, 𑀧𑀸𑀲𑀸𑀤𑀯𑀺𑀚𑁆𑀚𑀸𑀢𑀺 𑀤𑀼𑀯𑀺𑀥𑀸 𑀳𑀺 𑀯𑀟𑁆𑀠𑀓𑀻𑀯𑀺𑀚𑁆𑀚𑀸. 𑀮𑁂𑀳𑀺𑀢𑀩𑁆𑀩𑀦𑁆𑀢𑀺 𑀲𑀸𑀬𑀺𑀢𑀩𑁆𑀩𑀁. 𑀘𑀼𑀩𑀺𑀢𑀩𑁆𑀩𑀦𑁆𑀢𑀺 𑀧𑀸𑀢𑀩𑁆𑀩𑀁.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀳𑀸𑀭𑀢𑁆𑀢𑀸𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀳𑁂𑀢𑀼𑀓𑀢𑁆𑀢𑀸. 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁 𑀦 𑀧𑀓𑀢𑀺𑀲𑀻𑀮𑀸𑀤𑀺𑀓𑁂𑀦 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀢𑁄 𑀅𑀜𑁆𑀜𑀁 𑀲𑀻𑀮𑀁 𑀓𑀸𑀬𑀺𑀓𑀅𑀯𑀻𑀢𑀺𑀓𑁆𑀓𑀫𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢’’𑀦𑁆𑀢𑀺. 𑀢𑀁 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂𑀦 𑀦 𑀲𑀗𑁆𑀕𑀬𑁆𑀳𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑀲𑁆𑀲 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀆𑀳.

𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄, 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀺𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀸𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄𑀧𑀺 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁦), ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘. 𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀻. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪; 𑁩.𑁯𑁯; 𑁫.𑁫𑁨𑁦; 𑀓𑀣𑀸. 𑁭𑁫) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. ‘‘𑀓𑀡𑁆𑀞𑁂𑀓𑀸𑀴𑁄’’𑀢𑀺𑀆𑀤𑀻𑀦𑀁 𑀯𑀺𑀬 𑀢𑀲𑁆𑀲 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑁂 𑀯𑀸𑀢𑀺 𑀧𑀸𑀢𑀻, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁫-𑁫𑁭), 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸 𑀦𑀺𑀤𑁆𑀤𑁂𑀲 𑁧𑁦𑁭) 𑀘 𑀆𑀤𑀺. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀻𑀦𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁦; 𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄, 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄, 𑀧𑀢𑀺𑀫𑁄𑀓𑁆𑀔𑁄𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀫𑁄𑀓𑁆𑀔𑁄 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑀁. 𑀲𑀻𑀮𑀲𑀁𑀯𑀭𑁄 𑀳𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀯𑀺𑀬 𑀳𑁄𑀢𑀺 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀁𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀫𑁄𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀺, 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀁𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀇𑀤𑀫𑁆𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀫𑁂𑀯. 𑀲𑀩𑁆𑀩𑀸𑀓𑀆𑀭𑁂𑀦 𑀧𑀦 𑀚𑀺𑀦𑀧𑀸𑀢𑀺𑀫𑁄𑀓𑁆𑀔𑁄 𑀪𑀕𑀯𑀸𑀯 𑀅𑀦𑀯𑀚𑁆𑀚𑀧𑀢𑀺𑀫𑁄𑀓𑁆𑀔𑀁 𑀧𑀸𑀢𑀺𑀫𑁄𑀓𑁆𑀔𑀁 𑀲𑀁𑀯𑀡𑁆𑀡𑁂𑀬𑁆𑀬.

𑁫𑁧𑁩. 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀓𑀭𑀡𑀪𑀽𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀁. 𑀕𑀭𑀼𑀪𑀡𑁆𑀟𑀦𑁆𑀢𑀭𑀪𑀽𑀢𑀁 𑀣𑀸𑀯𑀭𑀸𑀤𑀺. 𑀊𑀦𑀓𑀁 𑀦 𑀯𑀝𑁆𑀝𑀢𑀻𑀢𑀺 𑀨𑀸𑀢𑀺𑀓𑀫𑁆𑀫𑀁 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀕𑁆𑀖𑀦𑀓𑀁, 𑀢𑀤𑀕𑁆𑀖𑀦𑀓𑀫𑁂𑀯 𑀯𑀸 𑀯𑀝𑁆𑀝𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢𑀦𑁆𑀢𑀺 𑀧𑁄𑀓𑁆𑀔𑀭𑀡𑀺𑀢𑁄 𑀧𑀁𑀲𑀼𑀉𑀤𑁆𑀥𑀭𑀡𑀸𑀤𑀺𑀣𑀸𑀯𑀭𑀓𑀫𑁆𑀫𑀁.

𑀥𑀸𑀭𑁂𑀢𑀺, 𑀧𑁄𑀲𑁂𑀢𑀺 𑀯𑀸 𑀧𑀭𑁂𑀲𑀁 𑀤𑀸𑀭𑀓𑁂.

𑀕𑀺𑀳𑀻𑀦𑀁 𑀓𑀭𑀺𑀬𑀫𑀸𑀦𑀁 𑀯𑀼𑀢𑁆𑀢𑀁, 𑀦 𑀲𑀗𑁆𑀖𑀲𑁆𑀲, 𑀕𑀡𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑀁, 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀺𑀡𑁆𑀟𑀢𑁆𑀣’’𑀦𑁆𑀢𑀺𑀆𑀤𑀺. 𑀅𑀬𑁄𑀦𑀺𑀲𑁄 𑀯𑀺𑀘𑀸𑀭𑀡𑀁 𑀅𑀬𑀸𑀣𑀸𑀯𑀧𑀝𑀺𑀧𑀢𑁆𑀢𑀺.

𑁫𑁧𑁪. 𑀕𑀘𑁆𑀙𑀦𑁆𑀢𑀺 𑀬𑀣𑀸𑀲𑀓𑀁 𑀯𑀺𑀲𑀬𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀕𑀸𑀯𑁄, 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺.

𑀯𑀺𑀥𑀼𑀦𑀦𑀁 𑀧𑀧𑁆𑀨𑁄𑀝𑀦𑀁, 𑀧𑀯𑀸𑀳𑀦𑀦𑁆𑀢𑀺 𑀅𑀢𑁆𑀣𑁄.

𑁫𑁧𑁫. 𑀬𑀣𑀸 𑀓𑀭𑀡𑀢𑁆𑀣𑁄 𑀓𑀭𑀡𑀻𑀬𑀲𑀤𑁆𑀤𑁄, 𑀏𑀯𑀁 𑀯𑀺𑀓𑀺𑀭𑀡𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀻’’𑀢𑀺, 𑀯𑀺𑀤𑁆𑀥𑀁𑀲𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀁𑀬𑀫𑀦𑀻𑀬𑀸𑀦𑀺 𑀯𑀸 𑀲𑀁𑀬𑀫𑀓𑀭𑀡𑀻𑀬𑀸𑀦𑀺, ‘‘𑀦 𑀧𑀼𑀦 𑀏𑀯𑀁 𑀓𑀭𑁄𑀫𑀻’’𑀢𑀺 𑀅𑀢𑁆𑀢𑀦𑁄 𑀤𑀳𑀦𑀁 𑀫𑀦𑀲𑀸 𑀅𑀥𑀺𑀝𑁆𑀞𑀸𑀦𑀁 𑀲𑀁𑀬𑀫𑀦𑀁, 𑀲𑀁𑀬𑀫𑀦𑀓𑀭𑀡𑀻𑀬𑀸𑀦𑀺 𑀲𑀁𑀯𑀭𑀓𑀭𑀡𑀻𑀬𑀸𑀦𑀻𑀢𑀺 𑀘𑀺𑀢𑁆𑀢𑀫𑀢𑁆𑀢𑀸𑀬𑀢𑁆𑀢𑀸 𑀏𑀯 𑀲𑀁𑀬𑀫𑀲𑀁𑀯𑀭𑀸 𑀆𑀘𑀭𑀺𑀬𑁂𑀦 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑀸𑀦𑀻’’𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑀢𑁆𑀣𑁂𑀭𑁄 𑀧𑀦 𑀤𑁂𑀲𑀦𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑁂𑀳𑀺 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀤𑁂𑀲𑀦𑀸𑀯𑀺𑀲𑀼𑀤𑁆𑀥𑀺𑀁 𑀦𑀺𑀲𑁆𑀲𑀭𑀡𑀁 𑀯𑀤𑀢𑀺.

𑁫𑁧𑁬. ‘‘𑀅𑀮𑀗𑁆𑀓𑀢𑁄 𑀘𑁂𑀧𑀺…𑀧𑁂… 𑀲 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁪𑁨) 𑀯𑀺𑀬 𑀇𑀥𑀸𑀧𑀺 𑀕𑀼𑀡𑀢𑁄 𑀪𑀺𑀓𑁆𑀔𑀼 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀇𑀥 𑀪𑀺𑀓𑁆𑀔𑀽𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄 𑀏𑀯𑀫𑀸𑀳𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁩𑁫𑁫). 𑀬𑀢𑁆𑀢𑀓𑀁 𑀏𑀓𑁂𑀦 𑀧𑀼𑀕𑁆𑀕𑀮𑁂𑀦 𑀅𑀲𑁂𑀲𑁂𑀢𑁆𑀯𑀸 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑀸, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀬𑁂𑀦 𑀲𑀫𑀸𑀤𑀸𑀦𑁂𑀦 𑀲𑀩𑁆𑀩𑀸𑀧𑀺 𑀲𑀺𑀓𑁆𑀔𑀸 𑀲𑀫𑀸𑀤𑀺𑀦𑁆𑀦𑀸 𑀳𑁄𑀦𑁆𑀢𑀻’’𑀢𑀺 𑀬𑀣𑀸 𑀉𑀧𑀲𑀫𑁆𑀧𑀤𑀸𑀧𑀸𑀭𑀺𑀧𑀽𑀭𑀺𑀬𑀸 𑀅𑀲𑁂𑀲𑀁 𑀉𑀧𑀲𑀫𑁆𑀧𑀦𑁆𑀦𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁. 𑀢𑀦𑁆𑀢𑀺 𑀲𑀫𑀸𑀤𑀸𑀦𑀁. 𑀅𑀦𑁂𑀓𑁂𑀲𑀽𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑀸𑀤𑀸𑀦𑁂𑀲𑀼. 𑀬𑀣𑀸 𑀲𑀫𑀸𑀤𑀺𑀦𑁆𑀦𑀸𑀬 𑀲𑀺𑀓𑁆𑀔𑀸𑀬 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀻𑀢𑀺𑀓𑁆𑀓𑀫𑀦𑀁 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁄, 𑀏𑀯𑀁 𑀲𑀢𑀺 𑀯𑀻𑀢𑀺𑀓𑁆𑀓𑀫𑁂 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀤𑁂𑀲𑀦𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀼𑀝𑁆𑀞𑀸𑀦𑀁 𑀢𑀤𑀼𑀧𑀸𑀬𑀪𑀽𑀢𑀁 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀘𑀭𑀡𑀸𑀤𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀻𑀢𑀺…𑀧𑁂… 𑀆𑀓𑀸𑀭𑁂𑀦𑀸’’𑀢𑀺. 𑀬𑀁 𑀲𑀺𑀓𑁆𑀔𑀸𑀧𑀤𑀁 𑀧𑀫𑀸𑀤𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀢𑀁 𑀲𑀺𑀓𑁆𑀔𑀺𑀬𑀫𑀸𑀦𑀁 𑀦 𑀳𑁄𑀢𑀻𑀢𑀺 𑀲𑁂𑀲𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀲𑁂𑀲𑀲𑁆𑀲𑀸’’𑀢𑀺.

𑁫𑁧𑁯. 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑀪𑀸𑀯𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑁄𑀥𑀦𑀪𑀽𑀢𑀸 𑀆𑀯𑀭𑀡𑀻𑀬𑀥𑀫𑁆𑀫𑀯𑀺𑀓𑁆𑀔𑀫𑁆𑀪𑀺𑀓𑀸 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑀪𑀸𑀯𑀦𑀸. 𑀲𑀼𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑀦𑁆𑀢𑀺 𑀦𑀺𑀤𑁆𑀤𑀸𑀧𑀭𑀺𑀕𑁆𑀕𑀸𑀳𑀓𑀁. 𑀇𑀤𑀦𑁆𑀢𑀺 𑀇𑀤𑀁 𑀅𑀩𑁆𑀩𑁄𑀓𑀺𑀡𑁆𑀡𑀪𑀯𑀗𑁆𑀕𑁄𑀢𑁆𑀢𑀭𑀡𑀲𑀗𑁆𑀔𑀸𑀢𑀁 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀸𑀦𑀁 𑀅𑀧𑁆𑀧𑀯𑀢𑁆𑀢𑀦𑀁 𑀲𑀼𑀧𑁆𑀧𑀁 𑀦𑀸𑀫. 𑀇𑀢𑁄 𑀪𑀯𑀗𑁆𑀕𑁄𑀢𑁆𑀢𑀭𑀡𑀢𑁄. 𑀧𑀼𑀩𑁆𑀩𑁂 𑀇𑀢𑁄 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀢𑁄 𑀧𑀭𑀜𑁆𑀘 𑀦𑀢𑁆𑀣𑀺. 𑀅𑀬𑀁 𑀓𑀸𑀬𑀓𑀺𑀮𑀫𑀣𑁄, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀏𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑁄.

𑁫𑁨𑁨. 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀸, 𑀏𑀓𑀘𑁆𑀘𑁂 𑀘 𑀫𑀕𑁆𑀕𑀥𑀫𑁆𑀫𑀸 𑀲𑀳 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂 𑀢𑀸𑀯 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀳 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦 𑀕𑀡𑁆𑀳𑁂𑀬𑁆𑀬𑀼𑀁, 𑀇𑀦𑁆𑀤𑁆𑀭𑀺𑀬𑀩𑀮𑀸𑀦𑀺 𑀓𑀲𑁆𑀫𑀸 𑀦 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀧𑀯𑀢𑁆𑀢…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀏𑀯𑀫𑁆𑀧𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀩𑀮𑀸𑀦𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀦 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀓𑀣𑀁 𑀢𑁂𑀲𑀁 𑀢𑀤𑀦𑁆𑀢𑁄𑀕𑀥𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀻𑀢𑀺…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺.

𑁫𑁨𑁩. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀪𑀸𑀕𑁂𑀲𑀼 𑀲𑀩𑁆𑀩𑁂𑀲𑀼 𑀅𑀪𑀺𑀓𑁆𑀓𑀫𑀸𑀤𑀻𑀲𑀼, 𑀲𑀩𑁆𑀩𑀪𑀸𑀕𑀢𑁄 𑀯𑀸 𑀢𑁂𑀲𑀼 𑀏𑀯 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀢𑁆𑀣𑀸𑀦𑀢𑁆𑀣𑀸𑀤𑀺𑀲𑀩𑁆𑀩𑀪𑀸𑀕𑀢𑁄 𑀲𑀩𑁆𑀩𑀸𑀓𑀸𑀭𑀢𑁄. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁 𑀬𑁄𑀦𑀺𑀲𑁄. 𑀲𑀫𑀦𑁆𑀢𑀺 𑀅𑀯𑀺𑀲𑀫𑀁, 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀭𑀸𑀕𑀸𑀤𑀺𑀯𑀺𑀲𑀫𑀭𑀳𑀺𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀸 𑀘𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑁄, 𑀪𑀺𑀓𑁆𑀔𑀸𑀬 𑀘𑀭𑀡𑀝𑁆𑀞𑀸𑀦𑀁, 𑀲𑁄 𑀏𑀯 𑀕𑁄𑀘𑀭𑁄, 𑀪𑀺𑀓𑁆𑀔𑀸𑀬 𑀘𑀭𑀡𑀫𑁂𑀯 𑀯𑀸 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀺𑀲𑀬𑀪𑀸𑀯𑀢𑁄 𑀕𑁄𑀘𑀭𑁄, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂. 𑀲𑁄 𑀧𑀦 𑀅𑀪𑀺𑀓𑁆𑀓𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀦𑁆𑀢𑀺 𑀯𑀺𑀲𑁂𑀲𑀦𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀦𑀸’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀢𑀺 𑀬𑁄𑀕𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂, 𑀪𑀸𑀯𑀦𑀸𑀓𑀫𑁆𑀫𑁂𑀬𑁂𑀯 𑀯𑀸, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀳𑁂𑀢𑀼𑀢𑀸𑀬 𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀕𑁄𑀘𑀭𑁂. 𑀅𑀪𑀺𑀓𑁆𑀓𑀫𑀸𑀤𑀻𑀲𑀽𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀻𑀲𑀼 𑀘𑁂𑀯 𑀘𑀻𑀯𑀭𑀧𑀸𑀭𑀼𑀧𑀦𑀸𑀤𑀻𑀲𑀼 𑀘. 𑀅𑀲𑀫𑁆𑀫𑀼𑀬𑁆𑀳𑀦𑀁 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑁂𑀯 𑀢𑁂𑀲𑀁 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁.

𑀓𑀫𑁆𑀫𑀝𑁆𑀞𑀸𑀦𑀁 𑀧𑀥𑀸𑀦𑀁 𑀓𑀢𑁆𑀯𑀸𑀢𑀺 𑀘𑀻𑀯𑀭𑀧𑀸𑀭𑀼𑀧𑀦𑀸𑀤𑀺𑀲𑀭𑀻𑀭𑀧𑀭𑀺𑀳𑀭𑀡𑀓𑀺𑀘𑁆𑀘𑀓𑀸𑀮𑁂𑀧𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀫𑁂𑀯 𑀧𑀥𑀸𑀦𑀁 𑀓𑀢𑁆𑀯𑀸.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀲𑁆𑀲𑀼𑀓𑁆𑀓𑀚𑀸𑀢𑁄 𑀳𑀼𑀢𑁆𑀯𑀸 𑀅𑀢𑀺𑀯𑀺𑀬 𑀫𑀁 𑀬𑀸𑀘𑀲𑀺, 𑀬𑀲𑁆𑀫𑀸 𑀘 𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀦𑀁 𑀤𑀼𑀚𑁆𑀚𑀸𑀦𑀢𑀁 𑀯𑀤𑀲𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀢𑁂 𑀧𑀭𑀺𑀧𑀸𑀓𑀁 𑀕𑀢𑀸𑀦𑀺, 𑀢𑀲𑁆𑀫𑀸. 𑀢𑀺𑀳𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑁂 𑀢𑀬𑀸. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀯𑀤𑀢𑀺. 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀲𑀺𑀓𑁆𑀔𑀸𑀦𑀁 𑀯𑀲𑁂𑀦 𑀲𑀺𑀓𑁆𑀔𑀦𑀁 𑀓𑀸𑀢𑀩𑁆𑀩𑀁. 𑀬𑀣𑀸 𑀧𑀦 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀦𑁆𑀢𑀺 𑀭𑀽𑀧𑀸𑀬𑀢𑀦𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀫𑀢𑁆𑀢𑀁. 𑀬𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑁂 𑀭𑀽𑀧𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁, 𑀏𑀯𑀁 𑀲𑁂𑀲𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺𑀧𑀺 𑀫𑁂 𑀏𑀢𑁆𑀣 𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀽𑀧𑁂 𑀭𑀽𑀧𑀯𑀺𑀚𑀸𑀦𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀁. 𑀤𑀺𑀝𑁆𑀞𑀁 𑀫𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀤𑀺𑀝𑁆𑀞𑀫𑀢𑁆𑀢𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀫𑁂 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀆𑀧𑀸𑀣𑀕𑀢𑁂 𑀭𑀽𑀧𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀭𑀸𑀕𑀸𑀤𑀺𑀯𑀺𑀭𑀳𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀫𑁂 𑀚𑀯𑀦𑀁 𑀪𑀯𑀺𑀲𑁆𑀲𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑁆𑀧𑀫𑀸𑀡𑁂𑀦𑁂𑀯 𑀦𑀁 𑀞𑀧𑁂𑀲𑁆𑀲𑀸𑀫𑀻𑀢𑀺. 𑀅𑀣 𑀯𑀸 𑀤𑀺𑀝𑁆𑀞𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀭𑀽𑀧𑀁. 𑀤𑀺𑀝𑁆𑀞𑁂 𑀤𑀺𑀝𑁆𑀞𑀁 𑀦𑀸𑀫 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀢𑁆𑀢𑀬𑀁. 𑀬𑀣𑀸 𑀢𑀁 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀆𑀧𑀸𑀣𑀕𑀢𑁂 𑀭𑀽𑀧𑁂 𑀢𑁂𑀦𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀧𑁆𑀧𑀫𑀸𑀡𑁂𑀦 𑀚𑀯𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀦𑀸𑀲𑁆𑀲 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀲𑀼𑀢𑀫𑀼𑀢𑁂𑀲𑀼. 𑀫𑀼𑀢𑀦𑁆𑀢𑀺 𑀘 𑀢𑀤𑀸𑀭𑀫𑁆𑀫𑀡𑀯𑀺𑀜𑁆𑀜𑀸𑀡𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦 𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀢𑁂. 𑀯𑀺𑀜𑁆𑀜𑀸𑀢𑀫𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀧𑁆𑀧𑀫𑀸𑀡𑀁. 𑀬𑀣𑀸 𑀆𑀯𑀚𑁆𑀚𑀦𑀁 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀤𑀢𑁆𑀯𑀸 𑀆𑀯𑀚𑁆𑀚𑀦𑀧𑁆𑀧𑀫𑀸𑀡𑁂𑀦𑁂𑀯 𑀘𑀺𑀢𑁆𑀢𑀁 𑀞𑀧𑁂𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀢𑁂 𑀩𑀸𑀳𑀺𑀬 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀢𑀬𑀸 𑀩𑀸𑀳𑀺𑀬 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀅𑀦𑀼𑀧𑀯𑀢𑁆𑀢𑀦𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀸 𑀩𑀸𑀳𑀺𑀬𑀲𑁆𑀲 𑀲𑀁𑀔𑀺𑀢𑁆𑀢𑀭𑀼𑀘𑀺𑀢𑀸𑀬 𑀙𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑁂𑀳𑀺 𑀲𑀤𑁆𑀥𑀺𑀁 𑀙𑀴𑀸𑀭𑀫𑁆𑀫𑀡𑀪𑁂𑀤𑀪𑀺𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑀁 𑀤𑀺𑀝𑁆𑀞𑀸𑀤𑀻𑀳𑀺 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀢𑀢𑁆𑀣𑀲𑁆𑀲 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀁 𑀤𑀲𑁆𑀲𑁂𑀢𑀺.

𑀓𑀣𑀁? 𑀏𑀢𑁆𑀣 𑀳𑀺 𑀭𑀽𑀧𑀸𑀬𑀢𑀦𑀁 𑀧𑀲𑁆𑀲𑀺𑀢𑀩𑁆𑀩𑀝𑁆𑀞𑁂𑀦 𑀤𑀺𑀝𑁆𑀞𑀁 𑀦𑀸𑀫, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀦 𑀲𑀤𑁆𑀥𑀺𑀁 𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀤𑀲𑁆𑀲𑀦𑀝𑁆𑀞𑁂𑀦, 𑀢𑀤𑀼𑀪𑀬𑀫𑁆𑀧𑀺 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀫𑁂𑀯, 𑀦 𑀏𑀢𑁆𑀣 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸. 𑀬𑀢𑁄 𑀢𑀁 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸𑀢𑀺 𑀓𑀼𑀢𑁄 𑀢𑀢𑁆𑀣 𑀧𑀡𑁆𑀟𑀺𑀢𑀲𑁆𑀲 𑀭𑀚𑁆𑀚𑀦𑀸𑀤𑀻𑀦𑀁 𑀑𑀓𑀸𑀲𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼𑀧𑀺.

𑀇𑀤𑀸𑀦𑀺 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀲𑀼 𑀧𑀢𑀺𑀝𑁆𑀞𑀺𑀢𑀲𑁆𑀲 𑀉𑀧𑀭𑀺 𑀲𑀳 𑀨𑀮𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁄 𑀔𑁄 𑀢𑁂 𑀩𑀸𑀳𑀺𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸, 𑀬𑀲𑁆𑀫𑀸 𑀯𑀸. 𑀢𑁂𑀢𑀺 𑀢𑀯. 𑀢𑀢𑁄𑀢𑀺 𑀢𑀤𑀸, 𑀢𑀲𑁆𑀫𑀸 𑀯𑀸. 𑀢𑁂𑀦𑀸𑀢𑀺 𑀢𑁂𑀦 𑀤𑀺𑀝𑁆𑀞𑀸𑀤𑀺𑀦𑀸, 𑀤𑀺𑀝𑁆𑀞𑀸𑀤𑀺𑀧𑀝𑀺𑀩𑀤𑁆𑀥𑁂𑀦 𑀯𑀸 𑀭𑀸𑀕𑀸𑀤𑀺𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀩𑀸𑀳𑀺𑀬, 𑀢𑀯 𑀬𑀲𑁆𑀫𑀺𑀁 𑀓𑀸𑀮𑁂, 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀤𑀺𑀝𑁆𑀞𑀸𑀤𑀻𑀲𑀼 𑀫𑀬𑀸 𑀯𑀼𑀢𑁆𑀢𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁂𑀦 𑀤𑀺𑀝𑁆𑀞𑀸𑀤𑀺𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂, 𑀢𑁂𑀦 𑀯𑀸 𑀓𑀸𑀭𑀡𑁂𑀦 𑀢𑁆𑀯𑀁 𑀢𑁂𑀦 𑀤𑀺𑀝𑁆𑀞𑀸𑀤𑀺𑀧𑀝𑀺𑀩𑀤𑁆𑀥𑁂𑀦 𑀭𑀸𑀕𑀸𑀤𑀺𑀦𑀸 𑀲𑀳 𑀦 𑀪𑀯𑀺𑀲𑁆𑀲𑀲𑀺, 𑀭𑀢𑁆𑀢𑁄 𑀯𑀸 𑀤𑀼𑀝𑁆𑀞𑁄 𑀯𑀸 𑀫𑀽𑀴𑁆𑀳𑁄 𑀯𑀸 𑀦 𑀪𑀯𑀺𑀲𑁆𑀲𑀲𑀺 𑀧𑀳𑀻𑀦𑀭𑀸𑀕𑀸𑀤𑀺𑀓𑀢𑁆𑀢𑀸, 𑀢𑁂𑀦 𑀯𑀸 𑀤𑀺𑀝𑁆𑀞𑀸𑀤𑀺𑀦𑀸 𑀲𑀳 𑀧𑀝𑀺𑀩𑀤𑁆𑀥𑁄 𑀦 𑀪𑀯𑀺𑀲𑁆𑀲𑀲𑀻𑀢𑀺. 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣𑀸𑀢𑀺 𑀬𑀤𑀸, 𑀬𑀲𑁆𑀫𑀸 𑀯𑀸 𑀢𑁆𑀯𑀁 𑀢𑁂𑀦 𑀭𑀸𑀕𑁂𑀦 𑀯𑀸 𑀭𑀢𑁆𑀢𑁄, 𑀤𑁄𑀲𑁂𑀦 𑀯𑀸 𑀤𑀼𑀝𑁆𑀞𑁄, 𑀫𑁄𑀳𑁂𑀦 𑀯𑀸 𑀫𑀽𑀴𑁆𑀳𑁄 𑀦 𑀪𑀯𑀺𑀲𑁆𑀲𑀲𑀺, 𑀢𑀤𑀸, 𑀢𑀲𑁆𑀫𑀸 𑀯𑀸 𑀢𑁆𑀯𑀁 𑀢𑀢𑁆𑀣 𑀤𑀺𑀝𑁆𑀞𑀸𑀤𑀺𑀓𑁂 𑀦 𑀪𑀯𑀺𑀲𑁆𑀲𑀲𑀺, 𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀯𑀸 𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂 𑀯𑀸 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀫𑀳𑀸𑀯. 𑁨𑁧) 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀅𑀮𑁆𑀮𑀻𑀦𑁄 𑀧𑀢𑀺𑀝𑁆𑀞𑀺𑀢𑁄 𑀦 𑀪𑀯𑀺𑀲𑁆𑀲𑀲𑀺. 𑀏𑀢𑁆𑀢𑀸𑀯𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀔𑀻𑀡𑀸𑀲𑀯𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦𑁂𑀯𑀺𑀥, 𑀦 𑀳𑀼𑀭𑀁, 𑀦 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀬𑀤𑀸 𑀢𑁆𑀯𑀁, 𑀩𑀸𑀳𑀺𑀬, 𑀢𑁂𑀦 𑀭𑀸𑀕𑀸𑀤𑀺𑀦𑀸 𑀢𑀢𑁆𑀣 𑀤𑀺𑀝𑁆𑀞𑀸𑀤𑀻𑀲𑀼 𑀧𑀝𑀺𑀩𑀤𑁆𑀥𑁄 𑀦 𑀪𑀯𑀺𑀲𑁆𑀲𑀲𑀺, 𑀢𑀤𑀸 𑀢𑁆𑀯𑀁 𑀦𑁂𑀯 𑀇𑀥 𑀮𑁄𑀓𑁂, 𑀦 𑀧𑀭𑀮𑁄𑀓𑁂, 𑀦 𑀉𑀪𑀬𑀢𑁆𑀣 𑀳𑁄𑀲𑀺. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀅𑀬𑀫𑁂𑀯 𑀅𑀦𑁆𑀢𑁄 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀯𑀝𑀼𑀫𑀪𑀸𑀯𑁄𑀢𑀺 𑀅𑀬𑀫𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑁄. 𑀬𑁂 𑀧𑀦 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀧𑀤𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀪𑀯𑀁 𑀦𑀸𑀫 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀺𑀘𑁆𑀙𑀸. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀅𑀦𑁆𑀢𑀭𑀸𑀪𑀯𑀓𑀣𑀸𑀬𑀁 (𑀓𑀣𑀸. 𑁫𑁦𑁫 𑀆𑀤𑀬𑁄 ) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀏𑀢𑁂𑀲𑀦𑁆𑀢𑀺 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁.

‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀁 𑀧𑀼𑀭𑁂𑀢𑀭𑀁 𑀧𑀯𑀢𑁆𑀢𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀸𑀤𑀺𑀦𑀸 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀮𑁄𑀪𑀸𑀤𑀺𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀁 𑀳𑁄𑀢𑀺, 𑀦 𑀧𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀺𑀓𑀧𑁆𑀧𑀕𑀸𑀳𑁄, 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀧𑀦 𑀲𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺𑀓𑀲𑁆𑀲. 𑀪𑀯𑀗𑁆𑀕𑀸𑀤𑀻𑀢𑀺 𑀪𑀯𑀗𑁆𑀕𑀆𑀯𑀚𑁆𑀚𑀦𑀤𑀲𑁆𑀲𑀦𑀸𑀦𑀺, 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀜𑁆𑀘. 𑀅𑀧𑀼𑀩𑁆𑀩𑀢𑀺𑀢𑁆𑀢𑀭𑀢𑀸𑀯𑀲𑁂𑀦𑀸𑀢𑀺 𑀅𑀧𑀼𑀩𑁆𑀩𑀢𑀸𑀇𑀢𑁆𑀢𑀭𑀪𑀸𑀯𑀸𑀦𑀁 𑀯𑀲𑁂𑀦.

𑀅𑀢𑀺𑀳𑀭𑀢𑀻𑀢𑀺 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑀭𑀢𑀺. 𑀢𑀁𑀢𑀁𑀯𑀺𑀚𑀸𑀦𑀦𑀦𑀺𑀧𑁆𑀨𑀸𑀤𑀓𑁄𑀢𑀺 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀬𑁂𑀲𑀦𑀸𑀤𑀺𑀯𑀺𑀲𑀬𑀲𑁆𑀲, 𑀯𑀺𑀚𑀸𑀦𑀦𑀲𑁆𑀲 𑀘 𑀦𑀺𑀧𑁆𑀨𑀸𑀤𑀓𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀲𑁄 𑀢𑀩𑁆𑀩𑀺𑀲𑀬𑀁 𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀳𑁄𑀢𑀺. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀥𑀫𑁆𑀫𑁂𑀲𑀼 𑀅𑀯𑀺𑀧𑀭𑀻𑀢𑀧𑀝𑀺𑀧𑀢𑁆𑀢𑀺𑀁 𑀬𑀣𑀸𑀪𑀽𑀢𑀸𑀯𑀩𑁄𑀥𑀁.

𑀕𑀫𑀦𑁂𑀧𑀻𑀢𑀺 𑀕𑀫𑀦𑀧𑀬𑁄𑀕𑁂𑀧𑀺. 𑀅𑀢𑀺𑀳𑀭𑀡𑀁 𑀬𑀣𑀸𑀞𑀺𑀢𑀲𑁆𑀲𑁂𑀯 𑀓𑀸𑀬𑀲𑁆𑀲 𑀇𑀘𑁆𑀙𑀺𑀢𑀤𑁂𑀲𑀸𑀪𑀺𑀫𑀼𑀔𑀓𑀭𑀡𑀁. 𑀕𑀫𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺. 𑀯𑀓𑁆𑀔𑀫𑀸𑀦𑁄𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺…𑀧𑁂… 𑀅𑀤𑁆𑀥𑀸𑀕𑀫𑀦𑀯𑀲𑁂𑀦 𑀓𑀣𑀺𑀢𑁄. 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀘𑀼𑀡𑁆𑀡𑀺𑀓𑀧𑀸𑀤𑀼𑀤𑁆𑀥𑀸𑀭𑀇𑀭𑀺𑀬𑀸𑀧𑀣𑀯𑀲𑁂𑀦 𑀓𑀣𑀺𑀢𑁄’’𑀢𑀺 (𑀯𑀺𑀪. 𑀅𑀝𑁆𑀞. 𑁫𑁨𑁩) 𑀯𑀓𑁆𑀔𑀫𑀸𑀦𑁄 𑀯𑀺𑀲𑁂𑀲𑁄.

𑀧𑀯𑀢𑁆𑀢𑁂𑀢𑀺 𑀘𑀗𑁆𑀓𑀫𑀸𑀤𑀻𑀲𑀼 𑀧𑀯𑀢𑁆𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑁂. 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀢𑁄.

𑀓𑀸𑀬𑀺𑀓𑀓𑀺𑀭𑀺𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀚𑀯𑀦𑀁 𑀨𑀮𑀽𑀧𑀘𑀸𑀭𑁂𑀦 ‘‘𑀓𑀸𑀬𑀸𑀤𑀺𑀓𑀺𑀭𑀺𑀬𑀸𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸𑀢𑀺 𑀧𑀦 𑀓𑀸𑀭𑀡𑀽𑀧𑀘𑀸𑀭𑁂𑀦.

𑁫𑁨𑁬. 𑀓𑀫𑁆𑀫𑀝𑁆𑀞𑀸𑀦𑀉𑀧𑀸𑀲𑀦𑀲𑁆𑀲𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬. 𑀬𑁄𑀕𑀧𑀣𑀦𑁆𑀢𑀺 𑀪𑀸𑀯𑀦𑀸𑀬𑁄𑀕𑁆𑀕𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀦𑀫𑀕𑁆𑀕𑀁.

𑁫𑁩𑁭. 𑀓𑀸𑀬𑀸𑀤𑀻𑀲𑀽𑀢𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼. 𑀲𑀼𑀝𑁆𑀞𑀼 𑀧𑀯𑀢𑁆𑀢𑀺𑀬𑀸𑀢𑀺 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸. 𑀦𑀺𑀬𑁆𑀬𑀸𑀦𑀲𑀪𑀸𑀯𑁄 𑀲𑀫𑁆𑀫𑀸𑀲𑀢𑀺𑀢𑀸 𑀏𑀯. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀁 𑀓𑀺𑀘𑁆𑀘𑀢𑁄 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑁄 𑀧𑀭𑀺𑀕𑁆𑀕𑀳𑁄 𑀚𑀸𑀢𑁄 𑀏𑀢𑀺𑀲𑁆𑀲𑀸𑀢𑀺 𑀧𑀭𑀺𑀕𑁆𑀕𑀳𑀺𑀢𑀸, 𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀦𑀺𑀬𑁆𑀬𑀸𑀦𑀪𑀽𑀢𑀁 𑀲𑀢𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁪𑁨-𑁩. 𑀧𑀓𑀼𑀧𑁆𑀧𑀦𑀁 𑀇𑀥 𑀯𑀺𑀓𑀸𑀭𑀸𑀧𑀢𑁆𑀢𑀺𑀪𑀸𑀯𑁄.

𑁫𑁫𑁦. 𑀢𑀧𑁆𑀧𑀝𑀺𑀧𑀓𑁆𑀔𑀲𑀜𑁆𑀜𑀸𑀢𑀺 𑀣𑀺𑀦𑀫𑀺𑀤𑁆𑀥𑀧𑀝𑀺𑀧𑀓𑁆𑀔𑀲𑀜𑁆𑀜𑀸. 𑀲𑀸 𑀅𑀢𑁆𑀣𑀢𑁄 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀓𑀼𑀲𑀮𑀯𑀺𑀢𑀓𑁆𑀓𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸, 𑀢𑀣𑀸𑀪𑀽𑀢𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁫𑁩. 𑀲𑀸𑀭𑀫𑁆𑀪𑀦𑁆𑀢𑀺 𑀆𑀭𑀫𑁆𑀪𑀯𑀦𑁆𑀢𑀁, 𑀲𑀳𑀸𑀭𑀫𑁆𑀪𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀭𑀸𑀯𑀭𑀡𑀸𑀪𑁄𑀕𑀸 𑀣𑀺𑀦𑀫𑀺𑀤𑁆𑀥𑀦𑁆𑀥𑀓𑀸𑀭𑀯𑀺𑀕𑀫𑁂𑀦 𑀦𑀺𑀭𑀸𑀯𑀭𑀡𑀲𑀫𑀦𑁆𑀦𑀸𑀳𑀸𑀭𑀲𑀜𑁆𑀜𑀸. 𑀯𑀺𑀯𑀝𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑀸.

𑁫𑁬𑁪. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁧𑁧).

𑁫𑁮𑁮. 𑀬𑀣𑀸 𑀓𑁂𑀦𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 ‘‘𑀇𑀤𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀓𑀢𑀺𑀜𑀸𑀡𑁂𑀦 𑀦 𑀜𑀸𑀬𑀢𑀺, 𑀏𑀯𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀅𑀯𑀺𑀤𑀺𑀢𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀣𑀸 𑀅𑀜𑁆𑀜𑀸𑀢𑀢𑀸 𑀦𑀺𑀓𑁆𑀓𑀼𑀚𑁆𑀚𑀺𑀢𑀪𑀸𑀯𑁄’’𑀢𑀺. 𑀦𑀺𑀭𑀯𑀲𑁂𑀲𑀧𑀭𑀺𑀘𑁆𑀙𑀺𑀦𑁆𑀤𑀦𑀸𑀪𑀸𑀯𑁄𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀦𑀺𑀭𑀯𑀲𑁂𑀲𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑀸𑀪𑀸𑀯𑁄, 𑀧𑀭𑀺𑀘𑁆𑀙𑀺𑀦𑁆𑀤𑀺𑀓𑀸𑀪𑀸𑀯𑁄 𑀯𑀸. 𑀏𑀓𑀤𑁂𑀲𑁂𑀦𑁂𑀯 𑀳𑀺 𑀕𑀫𑁆𑀪𑀻𑀭𑀁 𑀜𑀸𑀬𑀢𑀺.

𑀆𑀘𑀺𑀓𑁆𑀔𑀦𑁆𑀢𑀻𑀢𑀺𑀆𑀤𑀺𑀢𑁄 𑀧𑀭𑀺𑀩𑁆𑀬𑀢𑁆𑀢𑀁 𑀓𑀣𑁂𑀦𑁆𑀢𑀺. 𑀤𑁂𑀲𑁂𑀦𑁆𑀢𑀻𑀢𑀺 𑀉𑀧𑀤𑀺𑀲𑀦𑀯𑀲𑁂𑀦 𑀯𑀤𑀦𑁆𑀢𑀺, 𑀧𑀩𑁄𑀥𑁂𑀦𑁆𑀢𑀺 𑀯𑀸. 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀧𑀚𑀸𑀦𑀸𑀧𑁂𑀦𑁆𑀢𑀺, 𑀲𑀁𑀧𑀓𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀧𑀓𑀸𑀭𑁂𑀳𑀺 𑀅𑀲𑀗𑁆𑀓𑀭𑀢𑁄 𑀞𑀧𑁂𑀦𑁆𑀢𑀺. 𑀯𑀺𑀯𑀭𑀦𑁆𑀢𑀻𑀢𑀺 𑀯𑀺𑀯𑀝𑀁 𑀓𑀭𑁄𑀦𑁆𑀢𑀺. 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀁 𑀓𑀭𑁄𑀦𑁆𑀢𑀺. 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀣 𑀘 ‘‘𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀅𑀢𑁆𑀣𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. ‘‘𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀻’’𑀢𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀩𑁆𑀬𑀜𑁆𑀚𑀦𑀧𑀤𑀸𑀦𑀻𑀢𑀺 𑀏𑀯𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀤𑀲𑀫𑁆𑀧𑀦𑁆𑀦𑀸𑀬 𑀉𑀴𑀸𑀭𑀸𑀬 𑀧𑀲𑀁𑀲𑀸𑀬 𑀧𑀲𑀁𑀲𑀦𑀁 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁂𑀲𑀼 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀤𑁂𑀲𑀼 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁩 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁬𑁦𑁨. 𑀏𑀢𑁆𑀣𑁂𑀯 𑀬𑁄𑀚𑁂𑀢𑀩𑁆𑀩𑀁 𑀢𑀲𑁆𑀲 𑀳𑁂𑀝𑁆𑀞𑀸𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀦𑀫𑀼𑀔𑁂𑀦 𑀪𑀽𑀫𑀺𑀯𑀺𑀲𑁂𑀲𑀸𑀥𑀺𑀕𑀫𑀼𑀧𑀸𑀬𑀤𑀻𑀧𑀦𑀢𑁄. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 ‘‘𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺 𑀲𑀩𑁆𑀩𑁂𑀲𑀼𑀧𑀺 𑀲𑀫𑀢𑀺𑀓𑁆𑀓𑀫𑀯𑀘𑀦𑁂𑀲𑀼.

𑁬𑁧𑁦. 𑀢𑀁𑀬𑁂𑀯 𑀆𑀓𑀸𑀲𑀁 𑀨𑀼𑀝𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁𑀬𑁂𑀯 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 ‘‘𑀅𑀦𑀦𑁆𑀢’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁂𑀦 𑀨𑀼𑀝𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀢𑀺𑀝𑁆𑀞𑀢𑀻𑀢𑀺 ‘‘𑀨𑀼𑀝’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀨𑀼𑀝𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀫𑀸𑀳. 𑀢𑀜𑁆𑀳𑀺 𑀆𑀓𑀸𑀲𑀲𑁆𑀲 𑀲𑀨𑀭𑀡𑀓𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀘 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀢𑀜𑁆𑀘 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀯𑀤𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑁂𑀦 𑀫𑀦𑀲𑀺 𑀓𑀭𑁄𑀢𑀻’’𑀢𑀺. 𑀢𑁂𑀦𑀸𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂𑀦. 𑀕𑀳𑀺𑀢𑀸𑀓𑀸𑀭𑀦𑁆𑀢𑀺 𑀅𑀦𑀦𑁆𑀢𑀨𑀭𑀡𑀯𑀲𑁂𑀦 𑀕𑀳𑀺𑀢𑀸𑀓𑀸𑀭𑀁. 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂𑀦 𑀅𑀦𑀦𑁆𑀢𑀨𑀭𑀡𑀯𑀲𑁂𑀦 𑀬𑁄 𑀕𑀳𑀺𑀢𑀸𑀓𑀸𑀭𑁄, 𑀢𑀁 𑀫𑀦𑀲𑀺 𑀓𑀭𑁄𑀦𑁆𑀢𑀁𑀬𑁂𑀯. 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁. 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺 ‘‘𑀅𑀦𑀦𑁆𑀢’’𑀦𑁆𑀢𑀺 𑀨𑀭𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑁄𑀬𑁂𑀯𑀢𑁆𑀣𑁄 𑀬𑀼𑀢𑁆𑀢𑁄𑀢𑀺. ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀁𑀨𑀭𑀡𑀸𑀓𑀸𑀭𑀲𑀳𑀺𑀢𑀦𑁆𑀢𑀺 𑀢𑀲𑁆𑀫𑀺𑀁 𑀆𑀓𑀸𑀲𑁂 𑀨𑀭𑀡𑀸𑀓𑀸𑀭𑀲𑀳𑀺𑀢𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁.

𑁬𑁧𑁫. 𑀧𑀼𑀩𑁆𑀩𑁂𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀧𑀭𑀺𑀓𑀫𑁆𑀫𑀓𑀸𑀮𑁂. 𑀬𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀫𑀦𑀲𑀺 𑀓𑀢𑀁, 𑀢𑀁𑀬𑁂𑀯 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀫𑁂𑀯. 𑀢𑀁𑀬𑁂𑀯 𑀳𑀺 𑀅𑀪𑀸𑀯𑁂𑀢𑀺. 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀯𑀲𑁂𑀦 𑀳𑀺 𑀏𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀮𑀤𑁆𑀥𑀩𑁆𑀩𑀸𑀢𑀺.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁨𑁩. 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀬𑁂𑀲𑀁 𑀯𑀺𑀘𑀸𑀭𑁄 𑀑𑀴𑀸𑀭𑀺𑀓𑀢𑁄 𑀦 𑀉𑀧𑀝𑁆𑀞𑀸𑀢𑀺, 𑀬𑁂𑀲𑀜𑁆𑀘 𑀉𑀧𑀝𑁆𑀞𑀸𑀢𑀺, 𑀢𑁂𑀲𑀁 𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑀢𑁄 𑀧𑀜𑁆𑀘𑀓𑀦𑀬𑁄 𑀦𑀻𑀳𑀢𑁄𑀢𑀺 𑀆𑀳 ‘‘𑀉𑀤𑁆𑀥𑀝𑀸𑀦𑀁𑀬𑁂𑀯 𑀘𑀢𑀼𑀦𑁆𑀦𑀁…𑀧𑁂… 𑀤𑀲𑁆𑀲𑀦𑀢𑁄 𑀘𑀸’’𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁬𑁪𑁦. 𑀢𑀻𑀲𑀽𑀢𑀺 𑀧𑀞𑀫𑀸𑀤𑀻𑀲𑀼 𑀢𑀻𑀲𑀼. 𑀘𑀢𑀼𑀓𑁆𑀓𑀦𑀬𑁂𑀦 𑀳𑀺 𑀢𑀁 𑀯𑀼𑀢𑁆𑀢𑀁. 𑀏𑀯𑀁𑀓𑁄𑀝𑁆𑀞𑀸𑀲𑀺𑀓𑀸𑀢𑀺 𑀅𑀧𑁆𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀮𑁄𑀓𑀼𑀢𑁆𑀢𑀭𑀪𑀽𑀢𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲…𑀧𑁂… 𑀘𑀢𑀼𑀢𑁆𑀣𑀸𑀦𑀁 𑀯𑀝𑁆𑀝𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑁂 𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀅𑀬𑀁 𑀓𑀣𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀓𑀣𑀸. 𑀳𑁂𑀝𑁆𑀞𑀺𑀫𑁄 𑀅𑀭𑀺𑀬𑁄 𑀉𑀧𑀭𑀺𑀫𑀲𑁆𑀲 𑀅𑀭𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀘…𑀧𑁂… 𑀲𑀓𑁆𑀓𑁄𑀢𑀻’’𑀢𑀺.

‘‘𑀓𑀺𑀭𑀺𑀬𑀢𑁄 𑀤𑁆𑀯𑀸𑀤𑀲𑀦𑁆𑀦’’𑀦𑁆𑀢𑀺 𑀘 𑀧𑀸𑀞𑁄 𑀅𑀢𑁆𑀣𑀺. 𑀲𑀳 𑀯𑀤𑀢𑀺 𑀮𑁄𑀓𑀼𑀢𑁆𑀢𑀭𑀨𑀮𑀘𑀢𑀼𑀢𑁆𑀣𑀢𑀸𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀲𑀩𑁆𑀩𑀲𑀤𑁆𑀤𑀲𑁆𑀲 𑀧𑀤𑁂𑀲𑀲𑀩𑁆𑀩𑀯𑀸𑀘𑀺𑀪𑀸𑀯𑀢𑁄 𑀏𑀓𑀤𑁂𑀲𑀲𑁆𑀲 𑀅𑀲𑀫𑁆𑀪𑀯𑁂𑀧𑀺 𑀲𑀩𑁆𑀩𑀢𑁆𑀣𑀧𑀸𑀤𑀓𑀢𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀢𑁆𑀣…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀦𑀯𑀢𑁆𑀢𑀩𑁆𑀩𑀢𑀸𑀬𑀸𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸𑀬.

𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀯𑀢𑁆𑀢𑀩𑁆𑀩𑀁 𑀢𑀤𑀸𑀭𑀫𑁆𑀫𑀡𑀲𑁆𑀲𑀸𑀧𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀪𑀸𑀯𑀢𑁄.

‘‘𑀲𑀲𑀦𑁆𑀢𑀸𑀦𑀕𑀢𑀫𑁆𑀧𑀻’’𑀢𑀺 𑀇𑀤𑀁 𑀭𑀽𑀧-𑀲𑀤𑁆𑀤𑁂𑀦, 𑀓𑀫𑁆𑀫-𑀲𑀤𑁆𑀤𑁂𑀦 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀲𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀅𑀧𑀸𑀓𑀝𑀁 𑀭𑀽𑀧𑀁 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀬 𑀲𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀅𑀧𑀸𑀓𑀝𑀁 𑀓𑀫𑁆𑀫𑀁 𑀯𑀺𑀪𑀸𑀯𑁂𑀢𑀻’’𑀢𑀺. 𑀧𑀸𑀓𑀝𑁂 𑀧𑀦 𑀲𑀲𑀦𑁆𑀢𑀸𑀦𑀕𑀢𑁂 𑀭𑀽𑀧𑁂, 𑀓𑀫𑁆𑀫𑁂 𑀘 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 ‘‘𑀅𑀧𑀸𑀓𑀝’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.