𑁩. 𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁧-𑁨𑁩. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀯𑀺𑀧𑀸𑀓𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀯𑀺𑀧𑀸𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘. 𑀲𑀫𑀸𑀲𑁂𑀦𑀧𑀺 𑀳𑀺 𑀲𑁄𑀬𑁂𑀯𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀧𑀸𑀴𑀺𑀬𑀁 𑀲𑀫𑀸𑀲𑀁 𑀓𑀢𑁆𑀯𑀸 𑀮𑀺𑀔𑀺𑀢𑀁.

𑁨𑁪-𑁫𑁨. ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀯𑀺𑀧𑀸𑀓𑀧𑀘𑁆𑀘𑀬𑀸’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺. 𑀢𑀁 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀢𑁆𑀢𑀸 𑀦 𑀯𑀼𑀢𑁆𑀢𑀁. 𑀦 𑀳𑁂𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀬𑀲𑁆𑀲 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀧𑀯𑀢𑁆𑀢𑀺𑀬𑀁 𑀧𑀦 𑀓𑀝𑀢𑁆𑀢𑀸𑀭𑀽𑀧𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁂𑀦𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀭𑀽𑀧𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀦𑀸𑀳𑀸𑀭𑀧𑀘𑁆𑀘𑀬𑁂 𑀘 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀁 𑀦 𑀉𑀤𑁆𑀥𑀝𑀁. 𑀢𑀫𑁆𑀧𑀺 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀆𑀳𑀸𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.