𑁧. 𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀁

(𑁧) 𑀯𑀺𑀪𑀗𑁆𑀕𑀯𑀸𑀭𑁄

𑁫𑁩. 𑀬𑀸 𑀓𑀼𑀲𑀮𑀢𑁆𑀢𑀺𑀓𑁂 𑀮𑀪𑀦𑁆𑀢𑀺, 𑀦 𑀢𑀸𑀬𑁂𑀯 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀽𑀢𑀺 𑀢𑀺𑀓𑀧𑀤𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀺𑀦𑀸 𑀫𑀽𑀮𑀸𑀯𑀲𑀸𑀦𑀯𑀲𑁂𑀦 𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 ‘‘𑀦 𑀢𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀓𑁂𑀯𑀮𑀁 𑀢𑀺𑀓𑀦𑁆𑀢𑀭𑁂𑀬𑁂𑀯, 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀧𑀦 𑀬𑀸 𑀧𑀝𑀺𑀘𑁆𑀘𑀯𑀸𑀭𑁂 𑀮𑀪𑀦𑁆𑀢𑀺, 𑀦 𑀢𑀸𑀬𑁂𑀯 𑀧𑀘𑁆𑀘𑀬𑀯𑀸𑀭𑀸𑀤𑀻𑀲𑀽𑀢𑀺 𑀲𑀩𑁆𑀩𑀧𑀼𑀘𑁆𑀙𑀸𑀲𑀫𑀸𑀳𑀭𑀡𑀁 𑀇𑀥 𑀓𑀢𑁆𑀢𑀩𑁆𑀩𑀫𑁂𑀯. 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀘 𑀢𑀺𑀓𑀧𑀝𑁆𑀞𑀸𑀦𑁂 𑀯𑀺𑀢𑀓𑁆𑀓𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀩𑁆𑀩𑀸𑀧𑁂𑀢𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀻𑀢𑀺 𑀏𑀢𑁆𑀣 𑀧𑀻𑀢𑀺𑀢𑁆𑀢𑀺𑀓𑀕𑁆𑀕𑀳𑀡𑀁 𑀦 𑀓𑀸𑀢𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀻𑀢𑀺.

𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀪𑀽𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀸𑀯 𑀦𑀺𑀭𑁄𑀥𑀕𑀫𑀦𑀸 𑀉𑀤𑁆𑀥𑀁 𑀧𑀚𑁆𑀚𑀢𑀻’’𑀢𑀺 𑀘 ‘‘𑀉𑀧𑁆𑀧𑀸𑀤𑀸𑀤𑀬𑁄 𑀯𑀸 𑀧𑀸𑀧𑀼𑀡𑀸𑀢𑀻’’𑀢𑀺 𑀘 𑀯𑀘𑀦𑁂𑀳𑀺 𑀔𑀡𑀢𑁆𑀢𑀬𑀲𑀫𑀗𑁆𑀕𑀻 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑀁 𑀯𑀺𑀬 𑀳𑁄𑀢𑀺, 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀻𑀬𑁂𑀯 𑀧𑀦 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀏𑀓𑁄 𑀔𑀦𑁆𑀥𑁄 𑀏𑀓𑀲𑁆𑀲𑀸𑀢𑀺𑀆𑀤𑀺 𑀇𑀥 𑀓𑀼𑀲𑀮𑀯𑀘𑀦𑁂𑀦 𑀕𑀳𑀺𑀢𑁂 𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼 𑀧𑀦 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑀺𑀦𑁆𑀦𑀁, 𑀤𑁆𑀯𑁂 𑀧𑀝𑀺𑀘𑁆𑀘 𑀏𑀓𑀲𑁆𑀲𑀧𑀺, 𑀳𑁂𑀢𑀼𑀤𑀼𑀓𑀸𑀤𑀻𑀲𑀼 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀁 𑀧𑀝𑀺𑀘𑁆𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲𑀧𑀺 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀏𑀓𑁂𑀓𑀲𑁆𑀲𑀧𑀺 𑀤𑀼𑀓𑀢𑀺𑀓𑀸𑀤𑀺𑀪𑁂𑀤𑀸𑀦𑀜𑁆𑀘 𑀧𑀘𑁆𑀘𑀬𑁄 𑀦𑀸𑀫 𑀳𑁄𑀢𑀺𑀬𑁂𑀯, 𑀢𑀣𑀸 𑀤𑀼𑀓𑀸𑀤𑀺𑀪𑁂𑀤𑀸𑀦𑀜𑁆𑀘𑀸𑀢𑀺.

‘‘𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀆𑀭𑀼𑀧𑁆𑀧𑀯𑀺𑀧𑀸𑀓𑀜𑁆𑀘 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀲𑀩𑁆𑀩𑀲𑁆𑀫𑀺𑀁 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀕𑀳𑁂𑀢𑀩𑁆𑀩𑀁, 𑀅𑀣 𑀔𑁄 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀏𑀢𑁆𑀣𑁂𑀯. 𑀦 𑀓𑁂𑀯𑀮𑀜𑁆𑀘 𑀆𑀭𑀼𑀧𑁆𑀧𑀯𑀺𑀧𑀸𑀓𑁄𑀯, 𑀅𑀣 𑀔𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀫𑁆𑀧𑀺 𑀆𑀭𑀼𑀧𑁆𑀧𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀏𑀢𑁆𑀣 𑀦 𑀕𑀳𑁂𑀢𑀩𑁆𑀩𑀁. ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺 𑀏𑀢𑁆𑀣 𑀧𑀦 𑀦 𑀓𑀺𑀜𑁆𑀘𑀺 𑀭𑀽𑀧𑁂𑀦 𑀯𑀺𑀦𑀸 𑀲𑀳 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀳𑁂𑀢𑀼𑀓𑀁 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀅𑀕𑁆𑀕𑀳𑀺𑀢𑀁 𑀦𑀸𑀫 𑀅𑀢𑁆𑀣𑀺. 𑀢𑀢𑁆𑀣 𑀧𑀦 𑀬𑀁 𑀭𑀽𑀧𑁂𑀦 𑀲𑀳 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀏𑀢𑁆𑀢𑀓𑁂 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 ‘‘𑀓𑀝𑀢𑁆𑀢𑀸 𑀘 𑀭𑀽𑀧’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀸𑀫𑀜𑁆𑀜𑀯𑀘𑀦𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀯𑀸 𑀯𑀢𑁆𑀣𑀼𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀯𑀘𑀦𑀤𑁆𑀯𑀬𑀁 𑀯𑀼𑀢𑁆𑀢𑀁 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀫𑁆𑀧𑀺 𑀯𑀺𑀲𑀼𑀁 𑀉𑀤𑁆𑀥𑀝𑀁.

𑀫𑀳𑀸𑀪𑀽𑀢𑁂𑀧𑀺 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀢𑀦𑁆𑀢𑀺 𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀉𑀧𑀸𑀤𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑁂𑀦 𑀯𑀺𑀦𑀸 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀫𑀳𑀸𑀪𑀽𑀢𑁂𑀧𑀺 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀫𑀺𑀁 𑀧𑀦 𑀤𑀲𑁆𑀲𑀦𑁂 𑀔𑀦𑁆𑀥𑀧𑀘𑁆𑀘𑀬𑀲𑀳𑀺𑀢𑀸𑀲𑀳𑀺𑀢𑀜𑁆𑀘 𑀲𑀩𑁆𑀩𑀁 𑀉𑀧𑀸𑀤𑀸𑀭𑀽𑀧𑀁 𑀇𑀢𑁄 𑀧𑀭𑁂𑀲𑀼 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀓𑀝𑀢𑁆𑀢𑀸𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀻’’𑀢𑀺 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀢𑁄 𑀅𑀬𑀁 𑀦𑀬𑁄 𑀯𑀼𑀢𑁆𑀢𑁄𑀢𑀺 𑀲𑀦𑁆𑀥𑀸𑀬𑀸𑀳.

𑁫𑁪. 𑀭𑀽𑀧𑀫𑀺𑀲𑁆𑀲𑀓𑀸 𑀧𑀳𑀸𑀬𑀸𑀢𑀺 𑀬𑀸𑀲𑀼 𑀧𑀼𑀘𑁆𑀙𑀸𑀲𑀼 𑀭𑀽𑀧𑁂𑀦 𑀯𑀺𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦 𑀮𑀩𑁆𑀪𑀢𑀺, 𑀅𑀣 𑀔𑁄 𑀭𑀽𑀧𑀫𑀺𑀲𑁆𑀲𑀓𑀫𑁂𑀯 𑀮𑀩𑁆𑀪𑀢𑀺, 𑀢𑀸 𑀧𑀳𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁭. ‘‘𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 𑀯𑀘𑀦𑀢𑁄𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀧𑀝𑀺𑀲𑀦𑁆𑀥𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀲𑀩𑁆𑀪𑀸𑀯𑁂𑀦 𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀸 𑀲𑀩𑁆𑀩𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺 𑀑𑀓𑁆𑀓𑀦𑁆𑀢𑀺𑀦𑀸𑀫𑀓𑀸𑀢𑀺 𑀲𑀸𑀥𑁂𑀢𑀺. 𑀧𑀭𑀺𑀧𑀼𑀡𑁆𑀡𑀥𑀫𑁆𑀫𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑀸.

𑀏𑀢𑁆𑀣 𑀘 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁫𑁩) 𑀏𑀢𑁆𑀢𑀸𑀯𑀢𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀩𑁆𑀩𑀁 𑀘𑀺𑀢𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀤𑀲𑁆𑀲𑀺𑀢𑀁. 𑀅𑀯𑀲𑁂𑀲𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀩𑀸𑀳𑀺𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀸𑀳𑀺𑀭𑀦𑁆𑀢𑀺 𑀏𑀢𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁 𑀤𑀲𑁆𑀲𑁂𑀢𑀺, 𑀧𑀼𑀦 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀢𑁂𑀳𑀺 𑀲𑀩𑁆𑀩𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀆𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀢𑀢𑁆𑀣 ‘‘𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀏𑀓’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀫𑁆𑀧𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀢𑀲𑁆𑀲 𑀯𑀚𑁆𑀚𑀦𑁂 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺. 𑀆𑀤𑀺𑀫𑁆𑀳𑀺 𑀧𑀦 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀅𑀯𑀺𑀲𑁂𑀲𑀯𑀘𑀦𑀁 𑀲𑀳𑀚𑀸𑀢𑀁 𑀅𑀭𑀽𑀧𑀫𑁆𑀧𑀺 𑀧𑀘𑁆𑀘𑀬𑀁 𑀳𑁂𑀢𑀸𑀤𑀺𑀓𑁂 𑀘 𑀧𑀘𑁆𑀘𑀬𑁂 𑀩𑀳𑀼𑀢𑀭𑁂 𑀮𑀪𑀦𑁆𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀝𑀢𑁆𑀢𑀸𑀭𑀽𑀧𑀤𑁆𑀯𑀬𑀁 𑀲𑀳 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀫𑁆𑀩𑀦𑁆𑀥𑀁 𑀢𑀁𑀲𑀫𑀸𑀦𑀕𑀢𑀺𑀓𑀁 𑀧𑀜𑁆𑀘𑀯𑁄𑀓𑀸𑀭𑁂 𑀯𑀢𑁆𑀢𑀫𑀸𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀅𑀕𑁆𑀕𑀳𑀺𑀢𑀁 𑀓𑀝𑀢𑁆𑀢𑀸𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀸𑀤𑀸𑀭𑀽𑀧𑀁 𑀇𑀥𑀧𑀺 𑀓𑀫𑁆𑀫𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀯𑀺𑀬 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁬𑁩) 𑀓𑀝𑀢𑁆𑀢𑀸𑀭𑀽𑀧𑀪𑀸𑀯𑀯𑀺𑀲𑀺𑀝𑁆𑀞𑀁 𑀉𑀧𑀸𑀤𑀸𑀭𑀽𑀧𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑀼𑀢𑁆𑀢𑀲𑁆𑀲 𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀼𑀦𑀯𑀘𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺.

𑀓𑀲𑁆𑀫𑀸 𑀧𑀦 𑀬𑀣𑀸 𑀩𑀸𑀳𑀺𑀭𑀸𑀤𑀻𑀲𑀼 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀯𑀢𑁆𑀯𑀸 𑀘𑀺𑀢𑁆𑀢𑀓𑀫𑁆𑀫𑀚𑀉𑀧𑀸𑀤𑀸𑀭𑀽𑀧𑀸𑀦𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀲𑀳 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀲𑀼 𑀯𑀺𑀲𑀼𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀪𑀸𑀯𑀓𑀝𑀢𑁆𑀢𑀸𑀭𑀽𑀧𑀪𑀸𑀯𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸𑀯 𑀯𑀼𑀢𑁆𑀢𑀸𑀦𑀻𑀢𑀺? 𑀢𑀢𑁆𑀣 𑀩𑀸𑀳𑀺𑀭𑀕𑁆𑀕𑀳𑀡𑀸𑀤𑀻𑀳𑀺 𑀯𑀺𑀬 𑀏𑀢𑁆𑀣 𑀫𑀳𑀸𑀪𑀽𑀢𑀸𑀦𑀁 𑀓𑁂𑀦𑀘𑀺 𑀅𑀯𑀺𑀲𑁂𑀲𑀺𑀢𑀢𑁆𑀢𑀸. 𑀅𑀧𑀺𑀘 𑀇𑀤𑁆𑀥𑀺𑀘𑀺𑀢𑁆𑀢𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸𑀦𑀜𑁆𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀩𑀸𑀳𑀺𑀭𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀘𑀺𑀢𑁆𑀢𑀁 𑀓𑀫𑁆𑀫𑀜𑁆𑀘 𑀳𑁂𑀢𑀸𑀤𑀻𑀲𑀼 𑀦 𑀓𑁄𑀘𑀺 𑀧𑀘𑁆𑀘𑀬𑁄, 𑀆𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀦 𑀘𑀺𑀢𑁆𑀢𑀁 𑀧𑀘𑁆𑀙𑀸𑀚𑀸𑀢𑀪𑀸𑀯𑁂𑀦 𑀉𑀧𑀢𑁆𑀣𑀫𑁆𑀪𑀓𑀫𑁂𑀯, 𑀦 𑀚𑀦𑀓𑀁, 𑀫𑀳𑀸𑀪𑀽𑀢𑀸𑀦𑁂𑀯 𑀧𑀦 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀪𑀸𑀯𑁂𑀦 𑀚𑀦𑀓𑀸𑀦𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀘𑀺𑀢𑁆𑀢𑁂𑀦 𑀓𑀫𑁆𑀫𑁂𑀦 𑀘 𑀯𑀺𑀦𑀸 𑀅𑀪𑀸𑀯𑁂 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀳𑀺 𑀅𑀭𑀽𑀧𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀝𑀢𑁆𑀢𑀸𑀭𑀽𑀧𑀪𑀽𑀢𑀸𑀦𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀸𑀦𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀓𑀫𑁆𑀫𑀚𑁂𑀲𑁆𑀯𑁂𑀯 𑀉𑀧𑀸𑀤𑀸𑀭𑀽𑀧𑁂𑀲𑀼 𑀯𑀺𑀲𑁂𑀲𑀦𑀁 𑀓𑀢𑀁. 𑀅𑀜𑁆𑀜𑀸𑀦𑀺 𑀯𑀸 𑀲𑀫𑀸𑀦𑀚𑀸𑀢𑀺𑀓𑁂𑀦 𑀭𑀽𑀧𑁂𑀦 𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀸𑀓𑀝𑀯𑀺𑀲𑁂𑀲𑀦𑀸𑀦𑁂𑀯𑀸𑀢𑀺 𑀦 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺, 𑀏𑀢𑀸𑀦𑀺 𑀧𑀦 𑀅𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀅𑀭𑀽𑀧𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀦𑀺 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀻𑀢𑀺 𑀯𑀺𑀲𑁂𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀯𑀸 𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀘𑀺𑀢𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀲𑀯𑀺𑀲𑁂𑀲𑁂𑀦 𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀫𑀽𑀮𑀓𑀭𑀡𑀪𑀸𑀯𑀢𑁄 𑀘, 𑀦 𑀏𑀯𑀁 𑀉𑀢𑀼𑀆𑀳𑀸𑀭𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀘𑀺𑀢𑁆𑀢𑀓𑀫𑁆𑀫𑀚𑀸𑀦𑁂𑀯 𑀯𑀺𑀲𑀼𑀁 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺. 𑀇𑀢𑀭𑀸𑀦𑀺 𑀧𑀦 𑀫𑀳𑀸𑀪𑀽𑀢𑀯𑀺𑀲𑁂𑀲𑁂𑀦𑁂𑀯 𑀯𑀺𑀲𑁂𑀲𑀺𑀢𑀸𑀦𑀺, 𑀇𑀥 𑀉𑀧𑀸𑀤𑀸𑀭𑀽𑀧𑀯𑀺𑀲𑁂𑀲𑀦𑁂𑀦 𑀫𑀳𑀸𑀪𑀽𑀢𑀸𑀦𑀺 𑀯𑀺𑀬. 𑀦 𑀳𑀺 𑀅𑀜𑁆𑀜𑀢𑀭𑀯𑀺𑀲𑁂𑀲𑀦𑀁 𑀉𑀪𑀬𑀯𑀺𑀲𑁂𑀲𑀦𑀁 𑀦 𑀳𑁄𑀢𑀻𑀢𑀺.

𑁫𑁮. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀔𑀦𑁆𑀥𑀯𑀢𑁆𑀣𑀽𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑁂𑀦 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀧𑀘𑁆𑀘𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀯𑀢𑁆𑀣𑀼𑀦𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺. ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀇𑀤𑀁 𑀧𑀦 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀢𑀸𑀤𑀲𑁆𑀲𑀦𑀢𑁆𑀣𑀁, ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀣𑀼𑀲𑁆𑀲. 𑀦 𑀓𑁂𑀯𑀮𑀜𑁆𑀘 𑀔𑀦𑁆𑀥𑀸𑀦𑀁 𑀇𑀥𑁂𑀯, 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀦𑀬𑁄. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀯𑀺𑀲𑀼𑀁 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀣𑀼𑀲𑁆𑀲𑀧𑀺 𑀤𑀲𑁆𑀲𑀺𑀢𑀸𑀬 ‘‘𑀏𑀓𑀁 𑀔𑀦𑁆𑀥𑀜𑁆𑀘 𑀯𑀢𑁆𑀣𑀼𑀜𑁆𑀘 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀯𑀢𑁆𑀣𑀽𑀦𑀜𑁆𑀘 𑀤𑀲𑁆𑀲𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸, 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀫𑀳𑀸𑀪𑀽𑀢𑀸’’𑀢𑀺 𑀏𑀯𑀫𑀸𑀤𑀺 𑀦 𑀯𑀼𑀢𑁆𑀢𑀁, 𑀦𑀦𑀼 𑀬𑀤𑁂𑀯 𑀧𑀝𑀺𑀘𑁆𑀘𑀢𑁆𑀣𑀁 𑀨𑀭𑀢𑀺, 𑀦 𑀢𑁂𑀦𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀯𑀺𑀬. 𑀦 𑀳𑀺 𑀬𑀁 ‘‘𑀏𑀓𑀁 𑀢𑀬𑁄 𑀤𑁆𑀯𑁂 𑀘 𑀔𑀦𑁆𑀥𑁂 𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀳𑁂𑀢𑀼𑀧𑀘𑁆𑀘𑀬𑀪𑀽𑀢𑀸 𑀏𑀯 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺. 𑀧𑀘𑁆𑀘𑀬𑀯𑀸𑀭𑁂 𑀘 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁫𑁬) 𑀯𑀼𑀢𑁆𑀢𑀁, 𑀦 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀘 𑀧𑀦 𑀢𑀁𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀏𑀯. 𑀬𑀤𑀺𑀧𑀺 𑀓𑀼𑀲𑀮𑀸 𑀔𑀦𑁆𑀥𑀸 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀢𑁂 𑀧𑀝𑀺𑀘𑁆𑀘 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺? 𑀦 𑀯𑀢𑁆𑀢𑀩𑁆𑀩𑀸 𑀔𑀦𑁆𑀥𑀲𑀳𑀚𑀸𑀢𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄. 𑀅𑀜𑁆𑀜𑀫𑀜𑁆𑀜𑀲𑀤𑁆𑀤𑁄 𑀳𑀺 𑀦 𑀳𑁂𑀢𑀸𑀤𑀺𑀲𑀤𑁆𑀤𑁄 𑀯𑀺𑀬 𑀦𑀺𑀭𑀧𑁂𑀓𑁆𑀔𑁄, 𑀲𑀳𑀚𑀸𑀢𑀸𑀤𑀺𑀲𑀤𑁆𑀤𑁄 𑀯𑀺𑀬 𑀯𑀸 𑀅𑀜𑁆𑀜𑀢𑀭𑀸𑀧𑁂𑀓𑁆𑀔𑁄, 𑀅𑀣 𑀔𑁄 𑀬𑀣𑀸𑀯𑀼𑀢𑁆𑀢𑁂𑀢𑀭𑁂𑀢𑀭𑀸𑀧𑁂𑀓𑁆𑀔𑁄. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀔𑀦𑁆𑀥𑀸 𑀫𑀳𑀸𑀪𑀽𑀢𑀸 𑀇𑀥 𑀬𑀣𑀸𑀯𑀼𑀢𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀢𑁂𑀲𑀼 𑀘 𑀫𑀳𑀸𑀪𑀽𑀢𑀸 𑀔𑀦𑁆𑀥𑀸𑀦𑀁 𑀦 𑀓𑁄𑀘𑀺 𑀧𑀘𑁆𑀘𑀬𑁄. 𑀬𑀲𑁆𑀲 𑀘 𑀲𑀬𑀁 𑀧𑀘𑁆𑀘𑀬𑁄, 𑀢𑀢𑁄 𑀢𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀯𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀬𑀣𑀸 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀔𑀦𑁆𑀥𑀸, 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀔𑀦𑁆𑀥𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀢𑀤𑀧𑁂𑀓𑁆𑀔𑀢𑁆𑀢𑀸 𑀘 𑀅𑀜𑁆𑀜𑀫𑀜𑁆𑀜𑀲𑀤𑁆𑀤𑀲𑁆𑀲 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸 𑀘 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸, 𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀘 𑀯𑀼𑀢𑁆𑀢𑀸. 𑀔𑀦𑁆𑀥𑀸 𑀧𑀦 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀢𑁆𑀣𑀼𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺.

𑁫𑁯. 𑀦 𑀲𑀸 𑀕𑀳𑀺𑀢𑀸𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀧𑀝𑀺𑀘𑁆𑀘𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀧𑀦 𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀯𑀺𑀬 𑀦 𑀕𑀳𑀺𑀢𑀸𑀦𑀻𑀢𑀺.

𑁬𑁦. 𑀤𑁆𑀯𑀻𑀲𑀼 𑀉𑀧𑀦𑀺𑀲𑁆𑀲𑀬𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀫𑁆𑀧𑀺 𑀧𑀦 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺 𑀆𑀳. 𑀢𑀢𑁆𑀣 ‘‘𑀦 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀁 𑀮𑀪𑀦𑁆𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄. 𑀓𑀼𑀲𑀮𑀸𑀧𑀺 𑀧𑀦 𑀫𑀳𑀕𑁆𑀕𑀢𑀸 𑀏𑀓𑀦𑁆𑀢𑁂𑀦, 𑀓𑀸𑀫𑀸𑀯𑀘𑀭𑀸 𑀘 𑀓𑀤𑀸𑀘𑀺 𑀦 𑀮𑀪𑀦𑁆𑀢𑀻𑀢𑀺 ‘‘𑀦 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸’’𑀢𑀺 𑀧𑀞𑀦𑁆𑀢𑀺.

𑁬𑁧. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀬𑀣𑀸 𑀅𑀜𑁆𑀜𑀢𑁆𑀣 𑀧𑀘𑁆𑀘𑀬𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀯 𑀤𑁂𑀲𑀦𑀸 𑀓𑀢𑀸, 𑀏𑀯𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 ‘‘𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀺𑀬𑀫𑀲𑀩𑁆𑀪𑀸𑀯𑀸. 𑀳𑁂𑀢𑀼𑀆𑀤𑀻𑀲𑀼 𑀳𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀦 𑀳𑀺 𑀢𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀮𑁄𑀪𑀸𑀤𑀻𑀲𑀼 𑀓𑀼𑀲𑀮𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀬𑀫𑁂𑀯 𑀧𑀘𑁆𑀘𑀬𑁄𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺, 𑀇𑀥 𑀧𑀦 𑀯𑀢𑁆𑀣𑀼 𑀦 𑀯𑀢𑁆𑀣𑀼𑀥𑀫𑁆𑀫𑁂𑀲𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀦𑀺𑀬𑀫𑀢𑁄 𑀙𑀩𑁆𑀩𑀺𑀥𑀁 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀫𑁆𑀧𑀺 𑀳𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁂 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀮𑀩𑁆𑀪𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀲𑁆𑀲 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀏𑀯 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲𑀧𑀺 𑀢𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀉𑀤𑁆𑀥𑀝𑁄. ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁 𑀧𑀝𑀺𑀘𑁆𑀘 𑀯𑀺𑀧𑀸𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀏𑀢𑀲𑁆𑀲𑀧𑀺 𑀅𑀮𑀸𑀪𑀢𑁄 𑀢𑀢𑁆𑀣 ‘‘𑀧𑀼𑀭𑁂𑀚𑀸𑀢𑁂 𑀢𑀻𑀡𑀻’’𑀢𑀺 (𑀧𑀝𑁆𑀞𑀸. 𑁧.𑁩.𑁧𑁨𑁪) 𑀯𑀼𑀢𑁆𑀢𑀦𑁆𑀢𑀺.

𑁬𑁩. 𑀢𑀣𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀫𑀳𑀸𑀪𑀽𑀢𑀸𑀦𑀁 𑀏𑀓𑀓𑁆𑀔𑀡𑀺𑀓𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦𑁂𑀯 𑀢𑀤𑀼𑀧𑀸𑀤𑀸𑀭𑀽𑀧𑀸𑀦𑀫𑁆𑀧𑀺 𑀯𑀤𑀢𑀻𑀢𑀺 𑀘 𑀤𑀝𑁆𑀞𑀩𑁆𑀩𑀁. 𑀓𑀝𑀢𑁆𑀢𑀸𑀭𑀽𑀧𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪. 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑁂𑀲𑀼 𑀬𑀁 𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦.

𑁬𑁯. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀦𑀺𑀬𑀫𑀢𑁄 𑀯𑀢𑁆𑀣𑀼 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀓𑁂𑀲𑀜𑁆𑀘𑀺 𑀔𑀦𑁆𑀥𑀸, 𑀦 𑀘 𑀲𑀫𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀏𑀯 𑀓𑀼𑀲𑀮𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀦𑀸𑀦𑀸𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀧𑀺, 𑀢𑀲𑁆𑀫𑀸 𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀧𑀘𑁆𑀘𑀬𑀁 𑀧𑀘𑁆𑀘𑀬𑀁 𑀓𑀭𑁄𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀼𑀁 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀓𑀭𑀡𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺, 𑀇𑀤𑀁 𑀧𑀦 𑀧𑀝𑀺𑀘𑁆𑀘𑀲𑀤𑁆𑀤𑁂𑀦 𑀅𑀬𑁄𑀚𑁂𑀢𑁆𑀯𑀸 ‘‘𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸’’𑀢𑀺 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲𑀢𑁆𑀣𑁄 ‘‘𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀺𑀁 𑀧𑀦 𑀧𑀝𑀺𑀘𑁆𑀘𑀸𑀢𑀺? 𑀬𑀁 ‘‘𑀏𑀓𑀁 𑀔𑀦𑁆𑀥’’𑀦𑁆𑀢𑀺𑀆𑀤𑀺𑀓𑀁 𑀧𑀸𑀴𑀺𑀬𑀁 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 ‘‘𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀔𑀦𑁆𑀥𑀸, 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀧𑀞𑀦𑁆𑀢𑀺. 𑀅𑀦𑀦𑁆𑀢𑀭𑀢𑁆𑀢𑀸 𑀧𑀸𑀓𑀝𑀲𑁆𑀲 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀕𑀳𑀡𑀁 𑀫𑀸 𑀳𑁄𑀢𑀽𑀢𑀺 ‘‘𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀻’’𑀢𑀺 𑀆𑀳. 𑀆𑀲𑀦𑁆𑀦𑀫𑁆𑀧𑀺 𑀤𑀽𑀭𑀫𑁆𑀧𑀺 𑀲𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑁭𑁧-𑁭𑁨. ‘‘𑀇𑀫𑁂 𑀯𑀻𑀲𑀢𑀺 𑀧𑀘𑁆𑀘𑀬𑀸𑀢𑀺 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀏𑀓𑁂𑀦𑀧𑀺 𑀤𑁂𑀲𑀦𑀁 𑀲𑀁𑀔𑀺𑀢𑁆𑀢𑀁 𑀲𑀁𑀔𑀺𑀢𑁆𑀢𑀫𑁂𑀯, 𑀆𑀤𑀺𑀫𑁆𑀳𑀺 𑀧𑀦 𑀢𑀬𑁄 𑀧𑀘𑁆𑀘𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀏𑀓𑀫𑁆𑀧𑀺 𑀧𑀤𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀙𑀸𑀚𑀸𑀢𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 ‘‘𑀇𑀫𑁂 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀢𑁆𑀢𑀓𑀸 𑀳𑀺 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺. 𑀬𑁂 𑀧𑀦 𑀧𑀸𑀴𑀺𑀬𑀁 𑀯𑀺𑀢𑁆𑀣𑀸𑀭𑀺𑀢𑀁 𑀅𑀯𑀺𑀢𑁆𑀣𑀸𑀭𑀺𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 ‘‘𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀆𑀤𑀺𑀫𑁆𑀳𑀺 𑀧𑀦 𑀢𑀬𑁄 𑀧𑀘𑁆𑀘𑀬𑁂 𑀯𑀺𑀢𑁆𑀣𑀸𑀭𑀺𑀢𑁂 𑀯𑀚𑁆𑀚𑁂𑀢𑁆𑀯𑀸 𑀬𑀢𑁄 𑀧𑀪𑀼𑀢𑀺 𑀲𑀗𑁆𑀔𑁂𑀧𑁄 𑀆𑀭𑀤𑁆𑀥𑁄, 𑀢𑀢𑁄 𑀘𑀢𑀼𑀢𑁆𑀣𑀢𑁄 𑀧𑀪𑀼𑀢𑀺 𑀲𑀁𑀔𑀺𑀢𑁆𑀢𑀁 𑀯𑀺𑀢𑁆𑀣𑀸𑀭𑀺𑀢𑀜𑁆𑀘 𑀲𑀳 𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀪𑀗𑁆𑀕𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨) 𑀲𑀗𑁆𑀔𑁆𑀬𑀸𑀯𑀸𑀭𑁄

𑁭𑁩. 𑀢𑀣𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀢𑀺 𑀬𑀣𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀯𑀺𑀲𑁂𑀲𑁄 𑀯𑀺𑀪𑀗𑁆𑀕𑁂 𑀅𑀢𑁆𑀣𑀺, 𑀢𑀣𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀧𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀳𑀺 𑀢𑀢𑁆𑀣 𑀯𑀺𑀲𑁂𑀲𑁄 𑀧𑀝𑀺𑀲𑀦𑁆𑀥𑀺𑀅𑀪𑀸𑀯𑁄 𑀘𑀸𑀢𑀺. 𑀯𑀺𑀧𑀸𑀓𑀸𑀦𑀺 𑀘𑁂𑀯 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁂𑀦 ‘‘𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀓𑁂 (𑀧𑀝𑁆𑀞𑀸. 𑁧.𑁧.𑁫𑁩) 𑀯𑀺𑀪𑀗𑁆𑀕𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀪𑀸𑀯𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂 𑀘 𑀅𑀚𑀯𑀦𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀮𑀩𑁆𑀪𑀫𑀸𑀦𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑁭𑁪. 𑀏𑀓𑀫𑀽𑀮𑀓𑁂 𑀤𑀲𑁆𑀲𑀺𑀢𑀸𑀬 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀕𑀡𑀦𑀜𑁆𑀜𑁂𑀯 𑀆𑀤𑀸𑀬𑀸𑀢𑀺 𑀇𑀤𑀁 𑀏𑀢𑀲𑁆𑀫𑀺𑀁 𑀅𑀦𑀼𑀮𑁄𑀫𑁂 𑀲𑀼𑀤𑁆𑀥𑀺𑀓𑀦𑀬𑁂 𑀤𑀲𑁆𑀲𑀺𑀢𑀕𑀡𑀦𑀢𑁄 𑀢𑀢𑁄 𑀧𑀭𑁂𑀲𑀼 𑀦𑀬𑁂𑀲𑀼 𑀅𑀜𑁆𑀜𑀺𑀲𑁆𑀲𑀸 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀩𑀳𑀼𑀕𑀡𑀦𑁂𑀦 𑀬𑀼𑀢𑁆𑀢𑀲𑁆𑀲 𑀢𑁂𑀦 𑀲𑀫𑀸𑀦𑀕𑀡𑀦𑀢𑀸 𑀘 𑀇𑀫𑀲𑁆𑀫𑀺𑀁 𑀅𑀦𑀼𑀮𑁄𑀫𑁂𑀬𑁂𑀯 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀘𑀦𑀻𑀬𑁂 𑀧𑀦 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺𑀁 (𑀧𑀝𑁆𑀞𑀸. 𑁧.𑁧.𑁧𑁦𑁪) 𑀯𑀓𑁆𑀔𑀢𑀻𑀢𑀺.

𑁭𑁬-𑁭𑁯. 𑀢𑁂 𑀧𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑁂𑀯𑀻𑀲𑀢𑀺𑀫𑀽𑀮𑀓𑁄𑀯𑁂𑀢𑁆𑀣 𑀤𑀲𑁆𑀲𑀺𑀢𑁄𑀢𑀺 𑀏𑀢𑁆𑀣 𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀸𑀦𑀁 𑀧𑀭𑀺𑀳𑀻𑀦𑀢𑁆𑀢𑀸 ‘‘𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀲𑀸𑀲𑁂𑀯𑀦𑀲𑀯𑀺𑀧𑀸𑀓𑀸𑀦𑀁 𑀯𑀲𑁂𑀦. 𑀤𑀼𑀯𑀺𑀥𑀫𑁆𑀧𑀺 𑀧𑀦 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑀁 𑀲𑀳 𑀕𑀳𑁂𑀢𑁆𑀯𑀸 𑀲𑀗𑁆𑀕𑀳𑀺𑀢𑁂 𑀢𑀲𑁆𑀫𑀺𑀁 𑀉𑀪𑀬𑀲𑀩𑁆𑀪𑀸𑀯𑀢𑁄 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑁂𑀯𑀦𑀯𑀺𑀧𑀸𑀓𑀸𑀦𑀁 𑀯𑀸 𑀯𑀺𑀭𑁄𑀥𑀸𑀪𑀸𑀯𑁂 𑀲𑀢𑀺 𑀧𑀼𑀘𑁆𑀙𑀸𑀬 𑀤𑀲𑁆𑀲𑀺𑀢𑀦𑀬𑁂𑀦 𑀢𑁂𑀯𑀻𑀲𑀢𑀺𑀫𑀽𑀮𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀲 𑀘 𑀦𑀸𑀫𑀁 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻.

𑀆𑀭𑀫𑁆𑀫𑀡𑀧𑀤𑁂 𑀘𑁂𑀯𑀸𑀢𑀺 𑀏𑀢𑁂𑀦 𑀏𑀓𑀫𑀽𑀮𑀓𑁂 𑀅𑀜𑁆𑀜𑀧𑀤𑀸𑀦𑀺 𑀯𑀚𑁆𑀚𑁂𑀢𑀺. 𑀦 𑀳𑀺 𑀏𑀓𑀫𑀽𑀮𑀓𑁂 𑀳𑁂𑀢𑀸𑀤𑀻𑀲𑀼 𑀢𑀬𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀤𑁆𑀥𑀺𑀓𑀦𑀬𑁄 𑀧𑀦 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦 𑀮𑀩𑁆𑀪𑀢𑀻𑀢𑀺 𑀆𑀭𑀫𑁆𑀫𑀡𑀫𑀽𑀮𑀓𑁂 ‘‘𑀦𑀯𑀸’’𑀢𑀺 𑀏𑀢𑀸𑀬 𑀅𑀥𑀺𑀓𑀕𑀡𑀦𑀸𑀬 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀆𑀭𑀫𑁆𑀫𑀡𑁂 𑀞𑀺𑀢𑁂𑀦 𑀲𑀩𑁆𑀩𑀢𑁆𑀣 𑀢𑀻𑀡𑁂𑀯 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀢𑀩𑁆𑀩𑀸𑀢𑀺 𑀯𑀘𑀦𑀲𑁂𑀲𑁄. 𑀢𑀻𑀡𑁂𑀯𑀸𑀢𑀺 𑀘 𑀢𑀢𑁄 𑀉𑀤𑁆𑀥𑀁 𑀕𑀡𑀦𑀁 𑀦𑀺𑀯𑀸𑀭𑁂𑀢𑀺, 𑀦 𑀅𑀥𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦 ‘‘𑀯𑀺𑀧𑀸𑀓𑁂 𑀏𑀓’’𑀦𑁆𑀢𑀺 𑀕𑀡𑀦𑀸 𑀦 𑀦𑀺𑀯𑀸𑀭𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀻𑀲𑀼 𑀏𑀓𑀲𑁆𑀲 𑀅𑀦𑁆𑀢𑁄𑀕𑀥𑀢𑀸𑀬 𑀘 ‘‘𑀢𑀻𑀡𑁂𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀢𑀻𑀢𑀺𑀆𑀤𑀺𑀦𑀸 ‘‘𑀲𑀩𑁆𑀩𑀢𑁆𑀣 𑀢𑀻𑀡𑁂𑀯𑀸’’𑀢𑀺 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀤𑀴𑁆𑀳𑀁 𑀓𑀭𑁄𑀢𑀺.

𑁮𑁦-𑁮𑁫. 𑀬𑁂 …𑀧𑁂… 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺𑀧𑀺 𑀅𑀯𑀺𑀕𑀢𑀸𑀦𑀦𑁆𑀢𑀭𑀁 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀬𑀸 𑀕𑀡𑀦𑀸 𑀮𑀩𑁆𑀪𑀢𑀺, 𑀲𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀢𑀣𑀸𑀧𑀺 𑀊𑀦𑀢𑀭𑀕𑀡𑀦𑁂𑀳𑀺 𑀲𑀫𑀸𑀦𑀕𑀡𑀦𑁂𑀳𑀺 𑀘 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀸 𑀲𑀫𑀸𑀦𑀸 𑀘 𑀳𑁄𑀢𑀺, 𑀦 𑀏𑀯𑀁 𑀆𑀯𑀺𑀓𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀯𑀺𑀧𑀮𑁆𑀮𑀸𑀲𑀬𑁄𑀚𑀦𑀸𑀬 𑀧𑀦 𑀢𑀣𑀸 𑀤𑀲𑁆𑀲𑁂𑀢𑀺. 𑀯𑀘𑀦𑁂𑀦 𑀯𑀸 𑀳𑀺 𑀮𑀺𑀗𑁆𑀕𑁂𑀦 𑀯𑀸 𑀅𑀢𑁆𑀣𑀯𑀺𑀲𑁂𑀲𑀸𑀯𑀺𑀓𑀭𑀡𑀁 𑀳𑁄𑀢𑀻𑀢𑀺. 𑀢𑁂𑀦𑁂𑀢𑀁 𑀆𑀯𑀺𑀓𑀭𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀅𑀥𑀺𑀧𑁆𑀧𑀸𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀘𑁆𑀘𑀦𑀻𑀬𑀸𑀤𑀻𑀲𑀼𑀧𑀺 𑀧𑀦 ‘‘𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀏𑀓𑀁…𑀧𑁂… 𑀦𑁄𑀯𑀺𑀕𑀢𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀏𑀓’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧𑁦𑁭) 𑀫𑀽𑀮𑀧𑀤𑀁 𑀆𑀤𑀺𑀫𑁆𑀳𑀺𑀬𑁂𑀯 𑀞𑀧𑁂𑀢𑁆𑀯𑀸 𑀬𑁄𑀚𑀦𑀸 𑀓𑀢𑀸, 𑀦 𑀘 𑀢𑀢𑁆𑀣 𑀏𑀢𑀁 𑀮𑀓𑁆𑀔𑀡𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀫𑀽𑀮𑀧𑀤𑀲𑁆𑀲 𑀆𑀤𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀬𑁄𑀚𑀦𑀫𑁂𑀯 𑀓𑀫𑁄, 𑀦 𑀘𑀓𑁆𑀓𑀩𑀦𑁆𑀥𑀦𑀦𑁆𑀢𑀺 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺𑀆𑀤𑀺 𑀬𑁄𑀚𑀺𑀢𑀁, 𑀦 𑀘 𑀯𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀯𑀘𑀦𑁂𑀦 𑀮𑀺𑀗𑁆𑀕𑁂𑀦 𑀘 𑀧𑀬𑁄𑀚𑀦𑀫𑀢𑁆𑀣𑀻𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀯𑀸𑀭𑁄

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁮𑁬-𑁮𑁭. ‘‘𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺 𑀇𑀤𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦𑁂𑀢𑀁 𑀦 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁.

𑁯𑁩. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀘 𑀲𑀳𑀚𑀸𑀢𑀸 𑀘 𑀳𑁂𑀢𑀸𑀤𑀬𑁄 𑀧𑀼𑀭𑁂𑀚𑀸𑀢𑀸 𑀘 𑀆𑀭𑀫𑁆𑀫𑀡𑀸𑀤𑀬𑁄 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀦𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑁆𑀯𑀻𑀳𑁂𑀯 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀧𑀘𑁆𑀙𑀸𑀚𑀸𑀢𑀯𑀚𑁆𑀚𑁂𑀳𑀺 𑀲𑀩𑁆𑀩𑁂𑀳𑀻𑀢𑀺.

𑁯𑁪-𑁯𑁭. 𑀦𑀸𑀳𑀸𑀭𑀧𑀘𑁆𑀘𑀬𑁂 𑀏𑀓𑀘𑁆𑀘𑀁 𑀭𑀽𑀧𑀫𑁂𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺 𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀧𑀘𑁆𑀘𑀬𑁄 𑀭𑀽𑀧𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀅𑀭𑀽𑀧𑀫𑁆𑀧𑀺 𑀳𑁄𑀢𑀺 𑀬𑀣𑀸 𑀓𑀫𑁆𑀫𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲.

𑁯𑁯-𑁧𑁦𑁨. 𑀦𑀫𑀕𑁆𑀕𑀧𑀘𑁆𑀘𑀬𑁂 𑀬𑀤𑀺𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂 𑀭𑀽𑀧𑀓𑁄𑀝𑁆𑀞𑀸𑀲𑀸 𑀮𑀩𑁆𑀪𑀦𑁆𑀢𑀺, 𑀢𑀣𑀸𑀧𑀺 𑀬𑀁 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀺, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 ‘‘𑀏𑀓𑀘𑁆𑀘𑀁 𑀭𑀽𑀧𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑁂𑀯 𑀧𑀦 𑀦𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀓𑀘𑁆𑀘𑀭𑀽𑀧𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀤𑀝𑁆𑀞𑀩𑁆𑀩𑀸.

𑁧𑁦𑁭-𑁧𑁩𑁦. 𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑀦𑀛𑀸𑀦𑀦𑀫𑀕𑁆𑀕𑀧𑀘𑁆𑀘𑀬𑀸 𑀲𑀩𑁆𑀩𑀢𑁆𑀣 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀇𑀤𑀁 𑀏𑀢𑁂𑀲𑀼 𑀫𑀽𑀮𑀪𑀸𑀯𑁂𑀦 𑀞𑀺𑀢𑁂𑀲𑀼 𑀕𑀡𑀦𑀸𑀬 𑀲𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀽𑀮𑀸𑀦𑀜𑁆𑀳𑀺 𑀇𑀥 𑀯𑀺𑀲𑁆𑀲𑀚𑁆𑀚𑀦𑀁 𑀕𑀡𑀦𑀸𑀬𑁂𑀯, 𑀦 𑀲𑀭𑀽𑀧𑀤𑀲𑁆𑀲𑀦𑀦𑁆𑀢𑀺. 𑀦𑀲𑀳𑀚𑀸𑀢𑀸𑀤𑀺𑀘𑀢𑀼𑀓𑁆𑀓𑀁 𑀇𑀥𑀸𑀧𑀺 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀲𑀼𑀤𑁆𑀥𑀺𑀓𑀦𑀬𑁂 𑀯𑀺𑀬 𑀫𑀽𑀮𑁂𑀲𑀼𑀧𑀺 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁧𑁩𑁧-𑁧𑁮𑁯. 𑀳𑁂𑀢𑀸𑀥𑀺𑀧𑀢𑀺𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼…𑀧𑁂… 𑀅𑀝𑁆𑀞 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀢𑀺𑀡𑁆𑀡𑀫𑁆𑀧𑀺 𑀲𑀸𑀥𑀸𑀭𑀡𑀸𑀦𑀁 𑀧𑀘𑁆𑀘𑀦𑀻𑀬𑀢𑁄 𑀅𑀮𑀩𑁆𑀪𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀕𑁆𑀕𑀧𑀘𑁆𑀘𑀬𑁂 𑀇𑀢𑀭𑁂𑀳𑀺 𑀲𑀸𑀥𑀸𑀭𑀡𑀸 𑀲𑀢𑁆𑀢𑁂𑀯 𑀬𑁄𑀚𑁂𑀢𑀩𑁆𑀩𑀸. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂 𑀳𑁂𑀢𑀼𑀧𑀘𑁆𑀘𑀬𑁄𑀧𑀺 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀢𑀺, 𑀲𑁄 𑀧𑀦 𑀫𑀕𑁆𑀕𑁂𑀦 𑀅𑀲𑀸𑀥𑀸𑀭𑀡𑁄𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑁂𑀳𑀺 𑀯𑀺𑀦𑀸 𑀅𑀭𑀽𑀧𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑁂 𑀏𑀓𑀦𑁆𑀢𑀺𑀓𑀢𑁆𑀢𑀸 𑀅𑀭𑀽𑀧𑀝𑁆𑀞𑀸𑀦𑀺𑀓𑀸𑀢𑀺 𑀇𑀥 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀢𑁂𑀦 𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀧𑀘𑁆𑀘𑀬𑀸 𑀢𑁂𑀳𑀺 𑀯𑀺𑀦𑀸𑀧𑀺 𑀅𑀭𑀽𑀧𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀅𑀜𑁆𑀜𑀫𑀜𑁆𑀜𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀘 𑀢𑁂𑀳𑀺 𑀯𑀺𑀦𑀸 𑀅𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀲𑀗𑁆𑀕𑀳𑀺𑀢𑀸𑀢𑀺. 𑀊𑀦𑀢𑀭𑀕𑀡𑀦𑀸𑀦𑀁𑀬𑁂𑀯 𑀯𑀲𑁂𑀦𑀸𑀢𑀺 𑀬𑀤𑀺 𑀅𑀦𑀼𑀮𑁄𑀫𑀢𑁄 𑀞𑀺𑀢𑀸 𑀏𑀓𑀓𑀸𑀤𑀬𑁄 𑀤𑁆𑀯𑀸𑀯𑀻𑀲𑀢𑀺𑀧𑀭𑀺𑀬𑁄𑀲𑀸𑀦𑀸 𑀊𑀦𑀢𑀭𑀕𑀡𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑁄 𑀊𑀦𑀢𑀭𑀕𑀡𑀦𑁄, 𑀢𑀲𑁆𑀲 𑀯𑀲𑁂𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲𑀧𑀺 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁧𑁪𑁬) 𑀧𑀦 𑀦 𑀇𑀤𑀁 𑀮𑀓𑁆𑀔𑀡𑀁 𑀏𑀓𑀦𑁆𑀢𑀺𑀓𑀁.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁯𑁦. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀦 𑀓𑁂𑀯𑀮𑀁 𑀳𑁂𑀢𑀼𑀫𑁆𑀳𑀺𑀬𑁂𑀯, 𑀅𑀣 𑀔𑁄 𑀲𑀩𑁆𑀩𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀼𑀭𑁂𑀚𑀸𑀢𑀁 𑀆𑀲𑁂𑀯𑀦𑀜𑁆𑀘 𑀅𑀮𑀪𑀦𑁆𑀢𑀁 𑀓𑀜𑁆𑀘𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳.

‘‘𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀲𑁂𑀯𑀦𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀻’’𑀢𑀺 𑀇𑀤𑀁 𑀅𑀯𑀲𑁂𑀲𑀸𑀦𑀁 𑀮𑀸𑀪𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀲𑀩𑁆𑀩𑁂𑀲𑀁 𑀅𑀯𑀲𑁂𑀲𑀸𑀦𑀁 𑀮𑀸𑀪𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺𑀧𑀺 𑀳𑀺 𑀧𑀘𑁆𑀙𑀸𑀚𑀸𑀢𑁂 𑀧𑀲𑀗𑁆𑀕𑁄 𑀦𑀢𑁆𑀣𑀺 ‘‘𑀅𑀦𑀼𑀮𑁄𑀫𑀢𑁄 𑀲𑀩𑁆𑀩𑀢𑁆𑀣𑁂𑀯 𑀦 𑀮𑀩𑁆𑀪𑀢𑀻’’𑀢𑀺 𑀅𑀧𑀯𑀸𑀤𑀲𑁆𑀲 𑀓𑀢𑀢𑁆𑀢𑀸, 𑀧𑀼𑀭𑁂𑀚𑀸𑀢𑁄 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀢𑀻𑀢𑀺 𑀇𑀤𑀫𑁆𑀧𑀺 𑀅𑀯𑀲𑁂𑀲𑀸 𑀲𑀩𑁆𑀩𑁂𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀆𑀧𑀚𑁆𑀚𑁂𑀬𑁆𑀬. 𑀬𑀫𑁆𑀧𑀺 𑀓𑁂𑀘𑀺 ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀭𑀳𑀺𑀢𑁂 𑀆𑀭𑀼𑀧𑁆𑀧𑁂𑀧𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀲𑀫𑁆𑀪𑀯𑀁 𑀜𑀸𑀧𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀢𑁂𑀲𑀁 𑀭𑀼𑀘𑀺𑀫𑀢𑁆𑀢𑀫𑁂𑀯. 𑀦 𑀳𑀺 𑀬𑀢𑁆𑀣 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀦 𑀮𑀩𑁆𑀪𑀢𑀺, 𑀢𑀢𑁆𑀣 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺. 𑀬𑀼𑀚𑁆𑀚𑀫𑀸𑀦𑀓𑀯𑀲𑁂𑀦𑀸𑀢𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑀲𑁆𑀲 𑀞𑀧𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁, 𑀬𑀼𑀚𑁆𑀚𑀫𑀸𑀦𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸𑀢𑀺 𑀅𑀢𑁆𑀣𑁄. ‘‘𑀫𑀕𑁆𑀕𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀳𑁂𑀢𑀼𑀧𑀘𑁆𑀘𑀬𑁄 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀧𑀦 𑀦 𑀮𑀩𑁆𑀪𑀢𑀻𑀢𑀺 ‘‘𑀳𑁂𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀧𑀘𑁆𑀙𑀸𑀚𑀸𑀢𑀢𑁄 𑀅𑀜𑁆𑀜𑁄 𑀅𑀦𑀼𑀮𑁄𑀫𑀢𑁄 𑀅𑀮𑀩𑁆𑀪𑀫𑀸𑀦𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀺𑀘𑀸𑀭𑀺𑀢𑀁. 𑀅𑀜𑁆𑀜𑀫𑀜𑁆𑀜𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 ‘‘𑀅𑀭𑀽𑀧𑀸𑀦𑀁𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀸 𑀦𑀯 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀢𑀫𑁆𑀧𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀳𑀺 𑀲𑀤𑀺𑀲𑀢𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀦 𑀯𑀺𑀘𑀸𑀭𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺.

𑁧𑁯𑁧-𑁧𑁯𑁫. 𑀬𑀸𑀯 𑀆𑀲𑁂𑀯𑀦𑀸 𑀲𑀩𑁆𑀩𑀁 𑀲𑀤𑀺𑀲𑀦𑁆𑀢𑀺 𑀦 𑀅𑀜𑁆𑀜𑀫𑀜𑁆𑀜𑁂𑀦 𑀖𑀝𑀺𑀢𑀲𑁆𑀲 𑀫𑀽𑀮𑀲𑁆𑀲 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 𑀢𑀢𑁄 𑀧𑀭𑀸𑀦𑀺 𑀫𑀽𑀮𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀼 𑀳𑀺 𑀅𑀦𑀼𑀮𑁄𑀫𑀢𑁄 𑀬𑁄𑀚𑁂𑀢𑀩𑁆𑀩𑀧𑀘𑁆𑀘𑀬𑀸 𑀘 𑀧𑀜𑁆𑀳𑀸 𑀘𑀸𑀢𑀺 𑀲𑀩𑁆𑀩𑀁 𑀲𑀤𑀺𑀲𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀢𑀺 𑀏𑀢𑀲𑁆𑀲 ‘‘𑀇𑀫𑁂𑀲𑀫𑁆𑀧𑀺 𑀧𑀓𑀺𑀡𑁆𑀡𑀓𑀸𑀦𑀁 𑀯𑀲𑁂𑀦𑁂𑀢𑁆𑀣 𑀕𑀡𑀦𑀯𑀸𑀭𑁄 𑀅𑀲𑀫𑁆𑀫𑁄𑀳𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀘𑁆𑀘𑀬𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀮𑀩𑁆𑀪𑀫𑀸𑀦𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼𑀧𑀻𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦 𑀓𑁂𑀯𑀮𑀁 𑀧𑀘𑁆𑀘𑀬𑁂𑀲𑁆𑀯𑁂𑀯 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀓𑁂𑀘𑀺 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼𑀧𑀺 𑀓𑁄𑀘𑀺 𑀏𑀓𑀘𑁆𑀘𑀁 𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀓𑀜𑁆𑀘𑀺 𑀧𑀘𑁆𑀘𑀬𑀁 𑀦 𑀮𑀪𑀢𑀻𑀢𑀺. 𑀢𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀮𑀪𑀢𑀺, 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀳𑁂𑀢𑀼𑀧𑀘𑁆𑀘𑀬𑀁, 𑀢𑀣𑀸 𑀘 𑀛𑀸𑀦𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀫𑀕𑁆𑀕𑀧𑀘𑁆𑀘𑀬𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀮𑀸𑀪𑀸𑀮𑀸𑀪𑀸 𑀯𑀺𑀘𑀸𑀭𑀺𑀢𑀸. 𑀬𑀢𑁆𑀣𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀧𑀯𑀢𑁆𑀢𑁂 𑀅𑀲𑀜𑁆𑀜𑁂𑀲𑀼 𑀘. 𑀭𑀽𑀧𑀥𑀫𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀳𑀺 𑀧𑀜𑁆𑀘𑀯𑁄𑀓𑀸𑀭𑀧𑀯𑀢𑁆𑀢𑁂 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀳𑁂𑀢𑀸𑀤𑀻𑀦𑀺 𑀦 𑀮𑀪𑀦𑁆𑀢𑀻𑀢𑀺. ‘‘𑀳𑁂𑀢𑀸𑀥𑀺𑀧𑀢𑀺𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀛𑀸𑀦𑀫𑀕𑁆𑀕𑁂𑀧𑀺 𑀧𑀦 𑀦 𑀮𑀪𑀦𑁆𑀢𑀻𑀢𑀺 ‘‘𑀳𑁂𑀢𑀸𑀥𑀺𑀧𑀢𑀺𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺. 𑀬𑁂 𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀭𑀽𑀧𑀝𑁆𑀞𑀸𑀦𑀺𑀓𑀯𑀚𑁆𑀚𑁂𑀲𑀼 𑀏𑀢𑁂𑀬𑁂𑀯 𑀦 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀺 𑀳𑀺 𑀧𑀯𑀢𑁆𑀢𑁂 𑀓𑀝𑀢𑁆𑀢𑀸𑀭𑀽𑀧𑀁 𑀮𑀪𑀢𑀻𑀢𑀺. 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀦 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺𑀅𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀦𑁆𑀢𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀮𑀸𑀪𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄 𑀲𑀺𑀬𑀸. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀳𑀺 𑀥𑀫𑁆𑀫𑀯𑀲𑁂𑀦 𑀧𑀘𑁆𑀙𑀸𑀚𑀸𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀅𑀮𑀪𑀦𑁆𑀢𑀁 𑀦𑀸𑀫 𑀓𑀝𑀢𑁆𑀢𑀸𑀭𑀽𑀧𑀁 𑀦𑀢𑁆𑀣𑀺. 𑀓𑁄 𑀧𑀦 𑀯𑀸𑀤𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀓𑀫𑁆𑀫𑁂𑀲𑀼. 𑀇𑀦𑁆𑀤𑁆𑀭𑀺𑀬𑀁 𑀧𑀦 𑀅𑀮𑀪𑀦𑁆𑀢𑀁 𑀅𑀢𑁆𑀣𑀺, 𑀓𑀺𑀦𑁆𑀢𑀁? 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀬𑀤𑀺 𑀏𑀯𑀁 𑀉𑀧𑀸𑀤𑀸𑀭𑀽𑀧𑀸𑀦𑀺 𑀲𑀦𑁆𑀥𑀸𑀬 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀫𑁆𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀦 𑀧𑀸𑀓𑀝𑀦𑁆𑀢𑀺 𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀮𑀸𑀪𑀁 𑀯𑀸 𑀲𑀦𑁆𑀥𑀸𑀬 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀮𑀸𑀪𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁧𑁯𑁬-𑁧𑁯𑁭. 𑀦𑀸𑀭𑀫𑁆𑀫𑀡𑀫𑀽𑀮𑀓𑁂𑀲𑀼 𑀤𑀼𑀓𑀸𑀤𑀻𑀲𑀼 𑀳𑁂𑀢𑀼𑀬𑀸 𑀧𑀜𑁆𑀘𑀸𑀢𑀺 𑀬𑀤𑀺𑀧𑀺 𑀢𑀺𑀓𑀸𑀤𑀻𑀲𑀼 ‘‘𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺 𑀇𑀤𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀤𑀼𑀓𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀅𑀦𑀼𑀢𑁆𑀢𑀸𑀦𑀁 𑀯𑀢𑁆𑀢𑀼𑀓𑀸𑀫𑁄 ‘‘𑀤𑀼𑀓𑀸𑀤𑀻𑀲𑀽’’𑀢𑀺 𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦 𑀯𑀢𑁆𑀯𑀸 𑀢𑀢𑁆𑀣 𑀬𑀁 𑀆𑀤𑀺𑀤𑀼𑀓𑁂 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺, 𑀢𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀓𑁂𑀘𑀺 𑀧𑀦 ‘‘𑀦𑀸𑀭𑀫𑁆𑀫𑀡𑀫𑀽𑀮𑀓𑁂 𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺 𑀧𑀸𑀞𑀁 𑀯𑀤𑀦𑁆𑀢𑀺. ‘‘𑀅𑀜𑁆𑀜𑀫𑀜𑁆𑀜𑁂 𑀏𑀓𑀦𑁆𑀢𑀺 𑀪𑀽𑀢𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀯𑀢𑁆𑀣𑀼𑀧𑀺 𑀧𑀦 𑀮𑀩𑁆𑀪𑀢𑀻𑀢𑀺 ‘‘𑀪𑀽𑀢𑀭𑀽𑀧𑀸𑀦𑀺 𑀘𑁂𑀯 𑀯𑀢𑁆𑀣𑀼𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀧𑀞𑀦𑁆𑀢𑀺. 𑀢𑀺𑀫𑀽𑀮𑀓𑁂𑀢𑀺 𑀇𑀥𑀸𑀧𑀺 𑀤𑀼𑀫𑀽𑀮𑀓𑀁 𑀢𑀺𑀫𑀽𑀮𑀓𑀦𑁆𑀢𑀺 𑀯𑀤𑀦𑁆𑀢𑀺.

𑁨𑁦𑁩-𑁨𑁩𑁩. 𑀦𑀓𑀫𑁆𑀫𑀫𑀽𑀮𑀓𑁂 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺𑀆𑀤𑀻𑀲𑀼 𑀘𑁂𑀢𑀦𑀸𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀢𑀺 𑀇𑀤𑀁 ‘‘𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺 𑀏𑀯𑀁𑀧𑀓𑀸𑀭𑁂 𑀘𑁂𑀢𑀦𑀸𑀫𑀢𑁆𑀢𑀲𑀗𑁆𑀕𑀸𑀳𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀢𑁆𑀣𑁄𑀯 𑀳𑁄𑀢𑀻𑀢𑀺. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀳𑀸𑀭𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀧𑀦 𑀭𑀽𑀧𑀫𑁆𑀧𑀺 𑀮𑀩𑁆𑀪𑀢𑀻𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸

𑁨𑁩𑁪-𑁨𑁪𑁨. 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄, 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀲𑀳𑀚𑀸𑀢𑁄𑀢𑀺𑀆𑀤𑀻𑀲𑀼 𑀲𑀳𑀚𑀸𑀢𑀲𑀤𑁆𑀤𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀁 𑀲𑀳𑀚𑀸𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀓𑀭𑀡𑀲𑁆𑀲 𑀕𑀫𑀦𑀲𑁆𑀲 𑀯𑀸 𑀓𑀼𑀲𑀮𑀸𑀤𑀻𑀦𑀁 𑀓𑀫𑁆𑀫𑀪𑀸𑀯𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀧𑀘𑁆𑀘𑀬𑀯𑀸𑀭𑀸𑀤𑀻𑀲𑀼𑀧𑀺. 𑀢𑀢𑁆𑀭𑀸𑀧𑀺 𑀳𑀺 𑀧𑀘𑁆𑀘𑀬𑀲𑀤𑁆𑀤𑁂𑀦 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑀓𑀭𑀡𑀁 𑀦𑀺𑀲𑁆𑀲𑀬𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸 𑀯𑀼𑀢𑁆𑀢𑀁, 𑀲𑀁𑀲𑀝𑁆𑀞𑀲𑀤𑁆𑀤𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀓𑀭𑀡𑀁 𑀲𑀫𑁆𑀧𑀬𑀼𑀢𑁆𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸𑀢𑀺 𑀢𑀁𑀓𑀫𑁆𑀫𑀪𑀸𑀯𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀼𑀲𑀮𑀸𑀤𑀻𑀲𑀼 𑀓𑀢𑀦𑁆𑀢𑀺. 𑀲𑀳𑀚𑀸𑀢𑀫𑁆𑀧𑀺 𑀘 𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 ‘‘𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀻𑀧𑀺𑀢𑁄 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀲𑁆𑀲𑀸’’𑀢𑀺 𑀘 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑀸𑀤𑀸𑀭𑀽𑀧𑀲𑁆𑀲𑀧𑀺 𑀳𑀺 𑀉𑀧𑀸𑀤𑀸𑀭𑀽𑀧𑀁 𑀬𑀣𑀸𑀯𑀼𑀢𑁆𑀢𑁄 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀯𑀢𑁆𑀣𑀼𑀯𑀚𑁆𑀚𑀸𑀦𑀺 𑀭𑀽𑀧𑀸𑀦𑀺 𑀘 𑀅𑀭𑀽𑀧𑀸𑀦𑀦𑁆𑀢𑀺.

𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁪𑁩. 𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀧𑀢𑀺 𑀅𑀬𑁄 𑀧𑀘𑁆𑀘𑀬𑁄. 𑀧𑀢𑀺-𑀲𑀤𑁆𑀤𑁄 𑀧𑀢𑀺𑀝𑁆𑀞𑀢𑁆𑀣𑀁 𑀤𑀻𑀧𑁂𑀢𑀺, 𑀅𑀬-𑀲𑀤𑁆𑀤𑁄 𑀕𑀢𑀺𑀁, 𑀧𑀢𑀺𑀝𑁆𑀞𑀸𑀪𑀽𑀢𑀸 𑀕𑀢𑀺 𑀦𑀺𑀲𑁆𑀲𑀬𑁄 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁄 𑀧𑀘𑁆𑀘𑀬𑀸, 𑀧𑀘𑁆𑀘𑀬𑀓𑀭𑀡𑀢𑁄 𑀢𑀤𑀸𑀬𑀢𑁆𑀢𑀪𑀸𑀯𑀕𑀫𑀦𑀢𑁄 𑀯𑀸𑀢𑀺 𑀅𑀢𑁆𑀣𑁄.

‘‘𑀫𑀳𑀸𑀪𑀽𑀢𑁂 𑀧𑀘𑁆𑀘𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁨𑁪𑁫) 𑀪𑀽𑀢𑀼𑀧𑀸𑀤𑀸𑀭𑀽𑀧𑀸𑀦𑀺 𑀲𑀳 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂 𑀘 𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀲𑀬𑀁 𑀦𑀺𑀲𑁆𑀲𑀬𑁄 𑀅𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀉𑀧𑀸𑀤𑀸𑀭𑀽𑀧𑁂𑀦 𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁫𑁫. 𑀅𑀲𑀜𑁆𑀜…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀏𑀢𑁆𑀣 𑀬𑁄 𑀧𑀝𑀺𑀘𑁆𑀘𑀯𑀸𑀭𑁂 𑀲𑀳𑀚𑀸𑀢𑁂 𑀓𑀫𑁆𑀫𑀉𑀢𑀼𑀚𑀸𑀦𑀁, 𑀓𑀫𑁆𑀫𑁂 𑀘 𑀏𑀓𑀦𑁆𑀢𑀸𑀦𑁂𑀓𑀦𑁆𑀢𑀓𑀫𑁆𑀫𑀚𑀸𑀦𑀁 𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀲𑁄 𑀦𑀸𑀥𑀺𑀧𑁆𑀧𑁂𑀢𑁄 𑀏𑀯 ‘‘𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑁂𑀯 𑀲𑀩𑁆𑀩𑀲𑁆𑀲 𑀘 𑀕𑀳𑀺𑀢𑀢𑁆𑀢𑀸𑀢𑀺 𑀢𑀁 𑀧𑀳𑀸𑀬 𑀬𑀣𑀸𑀕𑀳𑀺𑀢𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀯𑀺𑀲𑁂𑀲𑀦𑀯𑀲𑁂𑀦 ‘‘𑀉𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑀁 𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀅𑀢𑁆𑀣𑀫𑀸𑀳. 𑀫𑀳𑀸𑀪𑀽𑀢𑁂 𑀧𑀦 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸 𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑁂𑀢𑀩𑁆𑀩𑀸𑀢𑀺 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑁂𑀦 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑁂𑀦𑁂𑀯 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁.

𑁨𑁬𑁯-𑁨𑁭𑁬. ‘‘𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢’’𑀦𑁆𑀢𑀺, ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲𑀸𑀢𑀺 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺 𑀘 𑀧𑀼𑀭𑀺𑀫𑀧𑀸𑀞𑁂 𑀧𑀫𑀸𑀤𑀮𑁂𑀔𑀸 𑀤𑀝𑁆𑀞𑀩𑁆𑀩𑀸.

𑁨𑁮𑁬-𑁨𑁮𑁭. 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀧𑀼𑀭𑁂𑀚𑀸𑀢𑁂 𑀤𑁆𑀯𑁂𑀢𑀺 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑀼𑀧𑁆𑀧𑁂 𑀧𑀦 𑀅𑀳𑁂𑀢𑀼𑀓𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀓𑀺𑀭𑀺𑀬𑀲𑁆𑀲 𑀘 𑀯𑀲𑁂𑀦 𑀤𑁆𑀯𑁂𑀢𑀺 𑀯𑀼𑀢𑁆𑀢𑀸, 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑁂𑀢𑀺 𑀆𑀭𑀼𑀧𑁆𑀧𑁂 𑀅𑀳𑁂𑀢𑀼𑀓𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀮𑀩𑁆𑀪𑀫𑀸𑀦𑁂𑀲𑀼 𑀏𑀓𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀭𑀼𑀧𑁆𑀧𑁂 𑀧𑀦 𑀅𑀳𑁂𑀢𑀼𑀓𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀬 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀘𑁆𑀘𑀲𑁆𑀲 𑀘 𑀭𑀽𑀧𑀲𑁆𑀲 𑀯𑀲𑁂𑀦 𑀤𑁆𑀯𑁂 𑀯𑀼𑀢𑁆𑀢𑀸𑀢𑀺, 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑁂𑀢𑀺 𑀆𑀭𑀼𑀧𑁆𑀧𑁂 𑀅𑀳𑁂𑀢𑀼𑀓𑀸𑀓𑀼𑀲𑀮𑀓𑀺𑀭𑀺𑀬𑀸𑀏𑀓𑀘𑁆𑀘𑀭𑀽𑀧𑀸𑀦𑀁 𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. ‘‘𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑁂𑀲𑀼 𑀏𑀓𑀦𑁆𑀢𑀺 𑀲𑀩𑁆𑀩𑀭𑀽𑀧𑀲𑁆𑀲 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦𑀳𑁂𑀢𑀼𑀫𑀽𑀮𑀓𑀢𑁆𑀢𑀸 𑀇𑀫𑀲𑁆𑀲 𑀦𑀬𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀁 𑀮𑀪𑀦𑁆𑀢𑀁 𑀦 𑀮𑀩𑁆𑀪𑀢𑀻𑀢𑀺 ‘‘𑀏𑀓𑀘𑁆𑀘𑀲𑁆𑀲 𑀭𑀽𑀧𑀲𑁆𑀲 𑀯𑀲𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀁. 𑀘𑀓𑁆𑀔𑀸𑀤𑀺𑀥𑀫𑁆𑀫𑀯𑀲𑁂𑀦 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀯𑀸 𑀲𑀩𑁆𑀩𑀁 𑀮𑀩𑁆𑀪𑀢𑀻𑀢𑀺 ‘‘𑀲𑀩𑁆𑀩𑀭𑀽𑀧𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

𑁨𑁮𑁯-𑁨𑁯𑁬. 𑀆𑀕𑀢𑀸𑀦𑀸𑀕𑀢𑀦𑁆𑀢𑀺 𑀧𑀜𑁆𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀦𑁆𑀢𑀺 𑀆𑀕𑀢𑁂 𑀘 𑀧𑀜𑁆𑀳𑁂 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀥𑀫𑁆𑀫𑀯𑀲𑁂𑀦.

𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸

𑁩𑁨𑁯-𑁩𑁩𑁭. 𑀧𑀘𑁆𑀘𑀬𑀯𑀸𑀭𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀦𑁆𑀢𑀺 𑀦𑀺𑀲𑁆𑀲𑀬𑀯𑀸𑀭𑁂 𑀯𑀼𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀁 𑀦𑀺𑀬𑀫𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸

𑁩𑁫𑁧-𑁩𑁬𑁮. 𑀲𑀁𑀲𑀝𑁆𑀞𑀯𑀸𑀭𑁂 𑀧𑀘𑁆𑀘𑀦𑀻𑀬𑁂 ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻’’𑀢𑀺 𑀇𑀤𑀁 𑀯𑀢𑁆𑀣𑀼𑀯𑀺𑀭𑀳𑀺𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀲𑀼𑀁 𑀅𑀦𑀼𑀤𑁆𑀥𑀭𑀡𑀢𑁄 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀳𑀺 𑀲𑀳𑀚𑀸𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀯𑀢𑁆𑀣𑀼𑀓𑀸 𑀧𑀝𑀺𑀲𑀦𑁆𑀥𑀺 𑀉𑀤𑁆𑀥𑀝𑀸, 𑀲𑀸 𑀇𑀥𑀸𑀧𑀺 𑀅𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑁂𑀲𑀼 𑀦𑀓𑀫𑁆𑀫𑀦𑀯𑀺𑀧𑀸𑀓𑀦𑀛𑀸𑀦𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀦 𑀮𑀩𑁆𑀪𑀢𑀺, 𑀅𑀜𑁆𑀜𑁂𑀲𑀼 𑀘 𑀅𑀦𑀼𑀮𑁄𑀫𑀢𑁄 𑀧𑀘𑁆𑀘𑀦𑀻𑀬𑀢𑁄 𑀘 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂𑀲𑀼 𑀮𑀩𑁆𑀪𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀥𑀝𑀸𑀢𑀺. 𑀲𑁂𑀲𑀸 𑀢𑁂𑀭𑀲 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀲𑁂𑀲𑀸 𑀘𑀼𑀤𑁆𑀤𑀲𑀸’’𑀢𑀺 𑀪𑀯𑀺𑀢𑀩𑁆𑀩𑀁. 𑀦 𑀛𑀸𑀦𑁂 𑀏𑀓𑀦𑁆𑀢𑀺 𑀅𑀳𑁂𑀢𑀼𑀓𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀲𑁂𑀦𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑀺𑀢𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, ‘‘𑀦𑀫𑀕𑁆𑀕𑁂 𑀏𑀓𑀦𑁆𑀢𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀁.

𑁩𑁬𑁯-𑁩𑁯𑁧. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀝𑀺𑀘𑁆𑀘𑀯𑀸𑀭𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀯𑀼𑀢𑁆𑀢𑀦𑀬𑁂𑀦. ‘‘𑀦𑀳𑁂𑀢𑀼𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀅𑀳𑁂𑀢𑀼𑀓𑀫𑁄𑀳𑁄𑀯 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀺, 𑀲𑁂𑀲𑀸 𑀦 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑁂𑀲𑁂𑀲𑀼 𑀧𑀦 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀸𑀳𑁂𑀢𑀼𑀓𑀓𑁆𑀔𑀦𑁆𑀥𑀸 𑀢𑀁𑀲𑀫𑀼𑀝𑁆𑀞𑀸𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀛𑀸𑀦𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀦 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑁂𑀦 𑀲𑀳 𑀬𑁄𑀚𑀦𑀸 𑀅𑀢𑁆𑀣𑀻𑀢𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀁 𑀲𑀳𑀺𑀢𑀁 𑀮𑀪𑀢𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘‘𑀅𑀳𑁂𑀢𑀼𑀓𑀫𑁄𑀳𑁄𑀯 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸

𑁩𑁯𑁨-𑁪𑁦𑁦. 𑀲𑀤𑀺𑀲𑀁 𑀲𑀫𑁆𑀧𑀬𑀼𑀢𑁆𑀢𑀁 𑀲𑀁𑀲𑀝𑁆𑀞𑀁 𑀯𑁄𑀓𑀺𑀡𑁆𑀡𑀜𑁆𑀘 𑀲𑀁𑀲𑀝𑁆𑀞𑀁 𑀦 𑀳𑁄𑀢𑀻𑀢𑀺 𑀉𑀪𑀬𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀯𑀼𑀘𑁆𑀘𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀺𑀬𑀸𑀫𑀓𑀁 𑀳𑁄𑀢𑀻𑀢𑀺.

𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁦𑁧-𑁪𑁦𑁩. 𑀬𑁂𑀳𑀺 𑀧𑀘𑁆𑀘𑀬𑁂𑀳𑀺 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑀣𑀸𑀓𑁆𑀓𑀫𑁂𑀦 𑀆𑀕𑀢𑀸𑀕𑀢𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀢𑁂𑀦 𑀓𑀼𑀲𑀮𑁄 𑀓𑀼𑀲𑀮𑀸𑀤𑀻𑀦𑀁, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀸𑀤𑀻𑀦𑀁, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀸𑀤𑀻𑀦𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀤𑀻𑀦𑀦𑁆𑀢𑀺𑀆𑀤𑀺𑀓𑁄 𑀲𑀩𑁆𑀩𑁄 𑀧𑀪𑁂𑀤𑁄 𑀦𑀺𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀬𑀣𑀸𑀦𑀺𑀤𑀲𑁆𑀲𑀺𑀢𑁂 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸 𑀆𑀳 ‘‘𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑁪𑁦𑁪. 𑀤𑀢𑁆𑀯𑀸𑀢𑀺 𑀏𑀢𑁆𑀣 𑀤𑀸-𑀲𑀤𑁆𑀤𑁄 𑀲𑁄𑀥𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀫𑀦𑁆𑀢𑁆𑀯𑀸 𑀆𑀳 ‘‘𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸’’𑀢𑀺. 𑀢𑁂𑀲𑀜𑁆𑀳𑀺 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀢𑁂𑀲𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀸𑀭𑀳𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀧𑀼𑀭𑁂𑀘𑀸𑀭𑀺𑀓𑀁 𑀢𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀲𑁆𑀲𑀦𑀸𑀓𑀼𑀲𑀮𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀪𑀽𑀫𑀺𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀢𑁂𑀦𑁂𑀯𑀸𑀢𑀺 𑀥𑀫𑁆𑀫𑀯𑀲𑁂𑀦𑁂𑀯 𑀤𑀲𑁆𑀲𑀦𑀢𑁄, 𑀤𑁂𑀲𑀦𑀦𑁆𑀢𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁫. 𑀅𑀲𑁆𑀲𑀸𑀤𑀦𑀁 𑀲𑀭𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀲𑀲𑁄𑀫𑀦𑀲𑁆𑀲𑀲𑁆𑀲 𑀭𑀸𑀕𑀲𑁆𑀲 𑀘 𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀅𑀦𑀼𑀪𑀯𑀢𑀺 𑀘𑁂𑀯 𑀭𑀚𑁆𑀚𑀢𑀺 𑀘𑀸’’𑀢𑀺. 𑀅𑀪𑀺𑀦𑀦𑁆𑀤𑀦𑀁 𑀧𑀻𑀢𑀺𑀓𑀺𑀘𑁆𑀘𑀲𑀳𑀺𑀢𑀸𑀬 𑀢𑀡𑁆𑀳𑀸𑀬 𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦𑀸’’𑀢𑀺. 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀤𑀺𑀝𑁆𑀞𑀺𑀬𑁂𑀯. 𑀏𑀢𑁆𑀣 𑀧𑀦 𑀧𑀘𑁆𑀙𑀺𑀫𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀅𑀢𑁆𑀢𑀸 𑀅𑀢𑁆𑀢𑀦𑀺𑀬𑀦𑁆𑀢𑀺𑀆𑀤𑀺𑀯𑀲𑁂𑀦…𑀧𑁂… 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀦𑁆𑀤𑀦𑀸 𑀧𑀦 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬𑁂𑀯𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡…𑀧𑁂… 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁 𑀭𑀸𑀕𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻’’𑀢𑀺 (𑀧𑀝𑁆𑀞𑀸. 𑁨.𑁮.𑁭𑁨) 𑀯𑀘𑀦𑀢𑁄, 𑀢𑀲𑁆𑀫𑀸 𑀧𑀼𑀭𑀺𑀫𑁄𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀻𑀲𑀼 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 𑀭𑀸𑀕𑁂𑀦 𑀘 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀢𑁂𑀲𑀼𑀬𑁂𑀯 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀘𑀢𑀽𑀲𑀼𑀧𑀺 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀘 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺𑀧𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀲𑀼𑀘𑀺𑀡𑁆𑀡𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁪𑁦𑁬. 𑀢𑀤𑀸𑀭𑀫𑁆𑀫𑀡𑀢𑀸𑀢𑀺 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦. 𑀯𑀺𑀪𑀢𑁆𑀢𑀺𑀮𑁄𑀧𑁄 𑀳𑁂𑀢𑁆𑀣 𑀓𑀢𑁄𑀢𑀺. 𑀪𑀸𑀯𑀯𑀦𑁆𑀢𑀢𑁄 𑀯𑀸 𑀅𑀜𑁆𑀜𑁄 𑀪𑀸𑀯𑁄 𑀦𑀢𑁆𑀣𑀻𑀢𑀺 𑀪𑀸𑀯𑁂𑀦𑁂𑀯 𑀯𑀺𑀧𑀸𑀓𑀁 𑀯𑀺𑀲𑁂𑀲𑁂𑀢𑀺, 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀪𑀸𑀯𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀸𑀦𑀁 𑀯𑀺𑀬 𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀦𑀺𑀬𑁄𑀕𑀢𑁄 𑀯𑀯𑀢𑁆𑀣𑀺𑀢𑀁 𑀇𑀤𑀜𑁆𑀘 𑀓𑀫𑁆𑀫𑀁 𑀆𑀭𑀫𑁆𑀫𑀡𑀦𑁆𑀢𑀺 𑀢𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀯𑀼𑀢𑁆𑀢𑀁. 𑀢𑀤𑀸𑀭𑀫𑁆𑀫𑀡𑁂𑀦 𑀧𑀦 𑀓𑀼𑀲𑀮𑀸𑀭𑀫𑁆𑀫𑀡𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀓𑀫𑁆𑀫𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺𑀆𑀤𑀬𑁄𑀧𑀺 𑀤𑀲𑁆𑀲𑀺𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀯𑀸𑀢𑀺 𑀯𑀤𑀦𑁆𑀢𑁂𑀦 𑀅𑀦𑀼𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁂 𑀬𑁂𑀪𑀼𑀬𑁆𑀬𑁂𑀦 𑀆𑀲𑀦𑁆𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀦 𑀧𑀝𑀺𑀮𑁄𑀫𑀢𑁄 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀘 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀲𑀦𑁆𑀦𑀸𑀧𑀺 𑀲𑀫𑀸𑀧𑀢𑁆𑀢𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀯𑀁 𑀅𑀦𑀼𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲𑀧𑀺 𑀪𑀯𑁂𑀬𑁆𑀬𑀸𑀢𑀺. ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲𑀸𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀚𑁆𑀚𑀦𑀸𑀬 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀯𑀸 ‘‘𑀬𑀸 𑀏𑀢𑁂𑀲𑀁 𑀆𑀯𑀚𑁆𑀚𑀦𑀸, 𑀢𑀲𑁆𑀲𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 ‘‘𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀸’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸 𑀔𑀦𑁆𑀥𑀸 𑀅𑀩𑁆𑀬𑀸𑀓𑀢𑀲𑁆𑀲 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺 𑀢𑀁 𑀦 𑀯𑀼𑀢𑁆𑀢𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀦𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀁 𑀬𑀸𑀬 𑀓𑀸𑀬𑀘𑀺 𑀆𑀯𑀚𑁆𑀚𑀦𑀸𑀬 𑀘 𑀓𑀼𑀲𑀮𑀸𑀭𑀫𑁆𑀫𑀡𑀸𑀬 𑀓𑀼𑀲𑀮𑀸 𑀔𑀦𑁆𑀥𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁪𑁦𑁭-𑁪𑁦𑁯. 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀯𑀲𑁂𑀦 𑀯𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀲𑀪𑀸𑀯𑀢𑁄 𑀘 𑀅𑀦𑀺𑀝𑁆𑀞𑀢𑀸𑀫𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀅𑀓𑁆𑀔𑀦𑁆𑀢𑀺𑀪𑁂𑀤𑀸 𑀯𑀸.

𑁪𑁧𑁦. 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀡𑀓𑀸𑀬𑁂𑀳𑀺 𑀦𑀺𑀬𑀢𑀸𑀭𑀫𑁆𑀫𑀡𑁂𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀅𑀩𑁆𑀬𑀸𑀓𑀢𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀩𑁆𑀩𑀲𑁆𑀲 𑀳𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑀁 𑀓𑀭𑁄𑀢𑀻𑀢𑀺.

𑁪𑁧𑁩-𑁪𑁧𑁬. 𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯.

𑁪𑁧𑁭. 𑀅𑀧𑀼𑀩𑁆𑀩𑀢𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀼𑀝𑁆𑀞𑀸𑀦𑀁 𑀪𑀯𑀗𑁆𑀕𑀫𑁂𑀯, 𑀢𑀁 𑀧𑀦 𑀫𑀽𑀮𑀸𑀕𑀦𑁆𑀢𑀼𑀓𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀢𑀤𑀸𑀭𑀫𑁆𑀫𑀡𑀁 𑀧𑀓𑀢𑀺𑀪𑀯𑀗𑁆𑀕𑀜𑁆𑀘. 𑀅𑀦𑀼𑀮𑁄𑀫𑀁 𑀲𑁂𑀓𑁆𑀔𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀓𑀸𑀬𑀘𑀺 𑀲𑁂𑀓𑁆𑀔𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀚𑁆𑀚𑁂𑀢𑀩𑁆𑀩𑀢𑁆𑀢𑀸 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀇𑀫𑀁 𑀦𑀺𑀩𑁆𑀩𑀺𑀲𑁂𑀲𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸 𑀤𑀼𑀯𑀺𑀥𑀲𑁆𑀲𑀧𑀺 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀯𑀼𑀝𑁆𑀞𑀸𑀦𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀼𑀢𑁆𑀢𑀫𑁂𑀯.

𑀢𑀸 𑀉𑀪𑁄𑀧𑀺…𑀧𑁂… 𑀤𑁆𑀯𑀸𑀤𑀲𑀦𑁆𑀦𑀦𑁆𑀢𑀺 𑀇𑀤𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀲𑁆𑀲 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨𑁩. 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀢𑁆𑀢𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀦𑁂𑀢𑀁 𑀏𑀓𑀦𑁆𑀢𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 ‘‘𑀩𑀮𑀯𑀘𑁂𑀢𑀦𑀸𑀯 𑀮𑀩𑁆𑀪𑀢𑀺, 𑀦 𑀤𑀼𑀩𑁆𑀩𑀮𑀸’’𑀢𑀺 𑀏𑀢𑀁 𑀏𑀓𑀦𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀤𑀴𑁆𑀳𑀁 𑀯𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀓𑀸𑀭𑀡𑀦𑁆𑀢𑀺? 𑀩𑀮𑀯𑀢𑁄 𑀤𑀼𑀩𑁆𑀩𑀮𑀲𑁆𑀲 𑀯𑀸 𑀓𑀢𑁄𑀓𑀸𑀲𑀲𑁆𑀲 𑀅𑀦𑁆𑀢𑀭𑀸𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀯𑀺𑀧𑀘𑁆𑀘𑀦𑀢𑁄 ‘‘𑀬𑀁𑀓𑀜𑁆𑀘𑀺 𑀬𑀤𑀺 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀻’’𑀢𑀺 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀢𑁄𑀓𑀸𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀧𑀦 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀯𑀺𑀧𑀸𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁩.𑁯𑁩) 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀯𑀺𑀲𑀼𑀁 𑀉𑀤𑁆𑀥𑀝𑀢𑁆𑀢𑀸, 𑀯𑁂𑀤𑀦𑀸𑀢𑁆𑀢𑀺𑀓𑁂 𑀘 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑁂 𑀅𑀝𑁆𑀞𑀸’’𑀢𑀺 (𑀧𑀝𑁆𑀞𑀸. 𑁧.𑁨.𑁮𑁭) 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀺𑀧𑀸𑀓𑀚𑀦𑀓𑀫𑁆𑀧𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀢𑀲𑁆𑀫𑀺𑀁 𑀯𑀸 𑀯𑀺𑀭𑀼𑀤𑁆𑀥𑁄𑀢𑀺 𑀢𑀁𑀦𑀺𑀫𑀺𑀢𑁆𑀢𑀁 𑀯𑀺𑀭𑀼𑀤𑁆𑀥𑁄, 𑀯𑀺𑀭𑀼𑀤𑁆𑀥𑀦𑁆𑀢𑀺 𑀯𑀸 𑀧𑀸𑀞𑁄. 𑀑𑀫𑀸𑀦𑀦𑁆𑀢𑀺 𑀧𑀭𑀲𑁆𑀲 𑀧𑀯𑀢𑁆𑀢𑀑𑀫𑀸𑀦𑀁. 𑀭𑀸𑀕𑁄 𑀭𑀜𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀭𑀸𑀕𑀢𑀡𑁆𑀳𑀸, ‘‘𑀇𑀢𑀺 𑀫𑁂 𑀘𑀓𑁆𑀔𑀼𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀭𑀽𑀧𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀧𑀡𑀺𑀤𑀳𑀦𑀢𑀡𑁆𑀳𑀸 𑀧𑀢𑁆𑀣𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑁂𑀲𑀼 𑀅𑀜𑁆𑀜𑀫𑁆𑀧𑀻𑀢𑀺 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀳𑀦𑀺𑀢𑀢𑁄 𑀅𑀜𑁆𑀜𑀫𑁆𑀧𑀺 𑀧𑀸𑀡𑀁 𑀳𑀦𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑀦𑀯𑀲𑁂𑀦 𑀯𑀸𑀢𑀺 𑀫𑀸𑀢𑀼𑀖𑀸𑀢𑀓𑀫𑁆𑀫𑁂𑀦 𑀲𑀤𑀺𑀲𑀢𑀸𑀬 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸𑀬𑀧𑀺 𑀆𑀡𑀢𑁆𑀢𑀘𑁂𑀢𑀦𑀸𑀬 𑀫𑀸𑀢𑀼𑀖𑀸𑀢𑀓𑀫𑁆𑀫𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀏𑀲 𑀦𑀬𑁄 𑀤𑁆𑀯𑀻𑀳𑀺 𑀧𑀳𑀸𑀭𑁂𑀳𑀻𑀢𑀺 𑀏𑀢𑁆𑀣𑀸𑀧𑀺.

𑀬𑀣𑁂𑀯 𑀳𑀺…𑀧𑁂… 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫𑀸𑀢𑀺 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻𑀢𑀺 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀯𑀲𑁂𑀦 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀬𑀣𑀸 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻𑀢𑀺𑀏𑀯𑀫𑀸𑀤𑀺 𑀳𑁄𑀢𑀺, 𑀏𑀯𑀁 𑀭𑀸𑀕𑀸𑀤𑀬𑁄 𑀲𑀤𑁆𑀥𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀤𑀫𑁆𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀬𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀦𑀁 𑀏𑀓𑀢𑁄 𑀤𑀲𑁆𑀲𑀦𑁂𑀦 𑀯𑀺𑀲𑀼𑀁𑀬𑁂𑀯 𑀦 𑀏𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄, 𑀅𑀣 𑀔𑁄 𑀏𑀓𑀢𑁄𑀧𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨𑁫. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀧𑀘𑁆𑀘𑀬𑀢𑁆𑀢𑀸𑀬𑁂𑀯𑀸𑀢𑀺 𑀏𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀦 𑀧𑀼𑀭𑀺𑀫𑀯𑀸𑀭𑁂𑀲𑀼 𑀯𑀺𑀬 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀣 𑀔𑁄 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑁄, 𑀦 𑀘 𑀧𑀘𑁆𑀙𑀸𑀚𑀸𑀢𑀓𑁆𑀔𑀦𑁆𑀥𑀸 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑁂𑀦𑁂𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀇𑀥 𑀅𑀦𑀼𑀮𑁄𑀫𑀢𑁄 𑀆𑀕𑀢𑁄𑀢𑀺.

𑁪𑁨𑁭. 𑀘𑁂𑀢𑀦𑀸 𑀯𑀢𑁆𑀣𑀼𑀲𑁆𑀲𑀧𑀺 𑀧𑀘𑁆𑀘𑀬𑁄𑀢𑀺 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀪𑀽𑀢𑀲𑁆𑀲𑀧𑀺 𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀘𑁆𑀘𑀬𑀯𑀸𑀭𑁂 𑀯𑀺𑀬 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀤𑀼𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀧𑀜𑁆𑀳𑀸 𑀦 𑀉𑀤𑁆𑀥𑀝𑀸𑀢𑀺? 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑀢𑁆𑀣 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑁆𑀧𑀥𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁪𑁬) 𑀯𑀼𑀢𑁆𑀢𑀁. 𑀬𑀢𑁄 𑀢𑀢𑁄 𑀯𑀸 𑀉𑀪𑀬𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀁𑀬𑁂𑀯 𑀳𑀺 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀁, 𑀦 𑀉𑀪𑀬𑀲𑁆𑀲 𑀉𑀪𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑁄𑀢𑀺. 𑀇𑀥 𑀧𑀦 𑀧𑀘𑁆𑀘𑀬𑀧𑁆𑀧𑀥𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀉𑀪𑀺𑀦𑁆𑀦𑀁 𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁.

𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸

𑁪𑁩𑁯. ‘‘𑀏𑀢𑁆𑀣 𑀧𑀦 𑀧𑀼𑀭𑁂𑀚𑀸𑀢𑀫𑁆𑀧𑀺 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀢𑀣𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? ‘‘𑀢𑀻𑀡𑀻’’𑀢𑀺 𑀕𑀡𑀦𑀫𑀢𑁆𑀢𑀲𑀸𑀫𑀜𑁆𑀜𑀢𑁄.

𑁪𑁪𑁦. ‘‘𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀁 𑀲𑁂𑀲𑀸𑀥𑀺𑀧𑀢𑀺𑀦𑁄 𑀯𑀺𑀲𑀪𑀸𑀕𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀯𑀺𑀲𑀪𑀸𑀕𑁂𑀦 𑀏𑀓𑁂𑀦 𑀆𑀭𑀫𑁆𑀫𑀡𑁂𑀦 𑀦𑀺𑀤𑀲𑁆𑀲𑀦𑀁 𑀅𑀓𑀢𑁆𑀯𑀸 𑀅𑀦𑀦𑁆𑀢𑀭𑀸𑀤𑀻𑀦𑀺 𑀯𑀤𑀦𑁆𑀢𑁄 𑀲𑀩𑁆𑀩𑁂 𑀯𑀺𑀲𑀪𑀸𑀕𑁂 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸 𑀘 𑀯𑀺𑀲𑀪𑀸𑀕𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 ‘‘𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀞𑀧𑁂𑀢𑁆𑀯𑀸 𑀧𑀜𑁆𑀜𑀁 𑀲𑁂𑀲𑀸 𑀥𑀫𑁆𑀫𑀸 𑀯𑀺𑀲𑀪𑀸𑀕𑀸’’𑀢𑀺 𑀧𑀞𑀦𑁆𑀢𑀺. 𑀢𑀣𑀸 𑀪𑀸𑀯𑀸𑀪𑀸𑀯𑀢𑁄 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄. 𑀦𑀦𑀼 𑀬𑀣𑀸 𑀅𑀫𑁄𑀳𑀯𑀚𑁆𑀚𑀸𑀦𑀁 𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀻𑀢𑀺 𑀧𑀜𑁆𑀜𑀸𑀯𑀚𑁆𑀚𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀦𑀁 𑀯𑀺𑀲𑀪𑀸𑀕𑀢𑀸, 𑀏𑀯𑀁 𑀓𑀼𑀲𑀮𑀸𑀤𑀺𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄 𑀳𑁂𑀢𑀼𑀯𑀚𑁆𑀚𑀸𑀦𑀁 𑀯𑀺𑀧𑀸𑀓𑀸𑀦𑀁 𑀯𑀺𑀲𑀪𑀸𑀕𑀢𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁, 𑀉𑀪𑀬𑀧𑀘𑁆𑀘𑀬𑀲𑀳𑀺𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀫𑁆𑀳𑀺 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀳𑁂𑀢𑀼𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀺𑀢𑀭𑀸𑀲𑀺𑀫𑁆𑀳𑀺 𑀲𑀢𑀺𑀧𑀺 𑀳𑁂𑀢𑀼𑀯𑀚𑁆𑀚𑀲𑀩𑁆𑀪𑀸𑀯𑁂 𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄 𑀦𑀢𑁆𑀣𑀻𑀢𑀺 𑀦 𑀳𑁂𑀢𑀼𑀯𑀚𑁆𑀚𑀸𑀦𑀁 𑀲𑀳𑀚𑀸𑀢𑀸𑀦𑀁 𑀳𑁂𑀢𑀼𑀲𑁆𑀲 𑀯𑀺𑀲𑀪𑀸𑀕𑀢𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺. 𑀏𑀲 𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀺. 𑀅𑀧𑀺𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀧𑀘𑁆𑀘𑀬𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀢𑀣𑀸 𑀪𑀸𑀯𑀸𑀪𑀸𑀯𑀯𑀲𑁂𑀦 𑀲𑀪𑀸𑀕𑀢𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀦𑀸𑀦𑀸𑀓𑁆𑀔𑀡𑀯𑀲𑁂𑀦 𑀯𑀺𑀲𑀪𑀸𑀕𑀢𑀸 𑀢𑀲𑁆𑀲𑁂𑀯 𑀦 𑀯𑀢𑁆𑀢𑀩𑁆𑀩𑀸𑀢𑀺.

𑀓𑀼𑀲𑀮𑀸 𑀯𑀻𑀫𑀁𑀲𑀸𑀢𑀺 𑀇𑀤𑀁 ‘‘𑀓𑀼𑀲𑀮𑀸 𑀯𑀻𑀫𑀁𑀲𑀸𑀥𑀺𑀧𑀢𑀻’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀅𑀦𑀥𑀺𑀧𑀢𑀺𑀪𑀽𑀢𑀸 𑀯𑀻𑀫𑀁𑀲𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑁪𑁪𑁧-𑁪𑁪𑁩. ‘‘𑀲𑀘𑁂 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀇𑀢𑀭𑀸𑀦𑀺 𑀤𑁆𑀯𑁂 𑀮𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘𑀸’’𑀢𑀺 𑀇𑀤𑀁 𑀧𑀦 𑀦 𑀮𑀩𑁆𑀪𑀢𑀻𑀢𑀺 ‘‘𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀤𑁆𑀯𑁂 𑀮𑀪𑀢𑀻’’𑀢𑀺 𑀧𑀞𑀦𑁆𑀢𑀺. 𑀊𑀦𑀢𑀭𑀕𑀡𑀦𑁂𑀲𑀽𑀢𑀺 𑀬𑁂𑀲𑀼 𑀧𑀯𑀺𑀝𑁆𑀞𑁂𑀲𑀼 𑀊𑀦𑀢𑀭𑀸 𑀕𑀡𑀦𑀸 𑀳𑁄𑀢𑀺, 𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀏𑀯𑀁 𑀊𑀦𑀢𑀭𑀕𑀡𑀦𑁂𑀲𑀼 𑀯𑀸 𑀅𑀜𑁆𑀜𑀫𑀜𑁆𑀜𑀸𑀤𑀻𑀲𑀼 𑀧𑀯𑀺𑀲𑀦𑁆𑀢𑁂𑀲𑀼 𑀢𑁂𑀲𑀁 𑀯𑀲𑁂𑀦 𑀢𑀺𑀓𑀢𑁄 𑀊𑀦𑀁 𑀬𑀣𑀸𑀮𑀤𑁆𑀥𑀜𑁆𑀘 𑀏𑀓𑀦𑁆𑀢𑀺 𑀕𑀡𑀦𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀅𑀯𑀺𑀧𑀸𑀓𑀸𑀦𑀻𑀢𑀺 𑀅𑀦𑀸𑀫𑀝𑁆𑀞𑀯𑀺𑀧𑀸𑀓𑀸𑀦𑀻𑀢𑀺 𑀅𑀢𑁆𑀣𑁄, 𑀦 𑀯𑀺𑀧𑀸𑀓𑀳𑁂𑀢𑀼𑀭𑀳𑀺𑀢𑀸𑀦𑀻𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀧𑀺 𑀲𑀳𑀚𑀸𑀢𑀯𑀺𑀧𑀸𑀓𑀸 𑀘𑁂𑀯𑀸𑀢𑀺 𑀢𑀢𑁆𑀣 𑀬𑁂 𑀲𑀳𑀚𑀸𑀢𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀲𑀳𑀚𑀸𑀢𑀭𑀽𑀧𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸 𑀘𑀸𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀝𑀢𑁆𑀢𑀸𑀭𑀽𑀧𑀸 𑀘 𑀮𑀩𑁆𑀪𑀦𑁆𑀢𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺𑀧𑀺 𑀧𑀦 𑀧𑀞𑀦𑁆𑀢𑀺.

𑀏𑀯𑀫𑁆𑀧𑀻𑀢𑀺 ‘‘𑀏𑀢𑁂𑀲𑀼 𑀧𑀦 𑀖𑀝𑀦𑁂𑀲𑀼 𑀲𑀩𑁆𑀩𑀧𑀞𑀫𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑀧𑀺. 𑀖𑀝𑀦𑁂𑀲𑀼 𑀧𑀦 𑀬𑁄 𑀬𑁄 𑀧𑀘𑁆𑀘𑀬𑁄 𑀫𑀽𑀮𑀪𑀸𑀯𑁂𑀦 𑀞𑀺𑀢𑁄, 𑀢𑀁𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀦𑀺𑀭𑀯𑀲𑁂𑀲𑀊𑀦𑀊𑀦𑀢𑀭𑀊𑀦𑀢𑀫𑀮𑀸𑀪𑀓𑁆𑀓𑀫𑁂𑀦 𑀖𑀝𑀦𑀸 𑀯𑀼𑀘𑁆𑀘𑀢𑀺, 𑀦𑀺𑀭𑀯𑀲𑁂𑀲𑀮𑀸𑀪𑁂 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑀯𑀲𑁂𑀲𑀮𑀸𑀪𑀓𑁆𑀓𑀫𑁂𑀦. 𑀢𑀣𑀸 𑀊𑀦𑀮𑀸𑀪𑀸𑀤𑀻𑀲𑀽𑀢𑀺 𑀅𑀬𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀳𑁂𑀢𑀼𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁪𑁫. 𑀯𑀢𑁆𑀣𑀼𑀯𑀲𑁂𑀦 𑀲𑀦𑀺𑀲𑁆𑀲𑀬𑀁 𑀯𑀓𑁆𑀔𑀢𑀻𑀢𑀺 𑀦 𑀇𑀤𑀁 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀖𑀝𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀯𑀸’’𑀢𑀺.

𑁪𑁪𑁬. 𑀲𑀳𑀚𑀸𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀘 𑀲𑀤𑁆𑀥𑀺𑀁 𑀲𑀳𑀚𑀸𑀢𑀁 𑀦 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀬𑀣𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸 𑀏𑀓𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀘 𑀳𑁄𑀦𑁆𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀁 𑀏𑀓𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀬𑀪𑀸𑀯𑁄 𑀳𑀺 𑀅𑀢𑁆𑀣𑀺𑀅𑀯𑀺𑀕𑀢𑀪𑀸𑀯𑁄 𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀻𑀦𑀁 𑀲𑀫𑀸𑀦𑁄, 𑀦 𑀧𑀦𑁂𑀯𑀁 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄 𑀲𑀫𑀸𑀦𑁄. 𑀲𑀳𑀚𑀸𑀢𑁄 𑀳𑀺 𑀆𑀭𑀫𑁆𑀫𑀡𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀯𑀢𑁆𑀢𑀦𑀯𑀲𑁂𑀦 𑀅𑀥𑀺𑀧𑀢𑀺 𑀳𑁄𑀢𑀺, 𑀇𑀢𑀭𑁄 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀅𑀢𑁆𑀢𑀦𑀺 𑀦𑀺𑀦𑁆𑀦𑀢𑀸𑀓𑀭𑀡𑁂𑀦. 𑀲𑀳𑀚𑀸𑀢𑁄 𑀘 𑀯𑀺𑀚𑁆𑀚𑀫𑀸𑀦𑀪𑀸𑀯𑁂𑀦𑁂𑀯 𑀉𑀧𑀓𑀸𑀭𑀓𑁄, 𑀇𑀢𑀭𑁄 𑀅𑀢𑀻𑀢𑀸𑀦𑀸𑀕𑀢𑁄𑀧𑀺 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀯, 𑀢𑀲𑁆𑀫𑀸 𑀲𑀳𑀚𑀸𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀯𑀺𑀬 𑀪𑀺𑀦𑁆𑀦𑀲𑀪𑀸𑀯𑀸 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄𑀢𑀺 𑀦 𑀢𑁂 𑀏𑀓𑀢𑁄 𑀏𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀁 𑀪𑀚𑀦𑁆𑀢𑀺, 𑀢𑁂𑀦𑁂𑀯 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑁂 𑀘 ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺.

𑁪𑁪𑁭-𑁪𑁫𑁨. 𑀲𑀸𑀳𑀸𑀭𑀓𑀖𑀝𑀦𑀸𑀦𑀁 𑀧𑀼𑀭𑀢𑁄 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀅𑀦𑀸𑀳𑀸𑀭𑀓𑀸𑀫𑀕𑁆𑀕𑀓𑀸𑀦𑀺 𑀲𑀇𑀦𑁆𑀤𑁆𑀭𑀺𑀬𑀖𑀝𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁 ‘‘𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀲𑀢𑁆𑀢. 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀢𑀻𑀡𑀺. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀢𑀻𑀡𑀺. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀏𑀓𑀁. 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀯𑀺𑀕𑀢𑀦𑁆𑀢𑀺 𑀏𑀓𑀁. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀏𑀓’’𑀦𑁆𑀢𑀺. 𑀓𑀲𑁆𑀫𑀸 𑀢𑀸𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀇𑀦𑁆𑀤𑁆𑀭𑀺𑀬𑀪𑀽𑀢𑀲𑁆𑀲 𑀅𑀥𑀺𑀧𑀢𑀺𑀲𑁆𑀲 𑀆𑀳𑀸𑀭𑀫𑀕𑁆𑀕𑁂𑀳𑀺 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸. 𑀘𑀺𑀢𑁆𑀢𑀸𑀥𑀺𑀧𑀢𑀺 𑀳𑀺 𑀆𑀳𑀸𑀭𑁄, 𑀯𑀻𑀭𑀺𑀬𑀯𑀻𑀫𑀁𑀲𑀸 𑀘 𑀫𑀕𑁆𑀕𑁄 𑀳𑁄𑀢𑀺, 𑀦 𑀘 𑀅𑀜𑁆𑀜𑁄 𑀇𑀦𑁆𑀤𑁆𑀭𑀺𑀬𑀪𑀽𑀢𑁄 𑀅𑀥𑀺𑀧𑀢𑀺 𑀅𑀢𑁆𑀣𑀺, 𑀬𑀲𑁆𑀲 𑀯𑀲𑁂𑀦 𑀅𑀦𑀸𑀳𑀸𑀭𑀓𑀸𑀫𑀕𑁆𑀕𑀓𑀸𑀦𑀺 𑀲𑀇𑀦𑁆𑀤𑁆𑀭𑀺𑀬𑀖𑀝𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀲𑁆𑀫𑀸 𑀢𑀸𑀦𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀸𑀥𑀺𑀧𑀢𑀺𑀆𑀤𑀻𑀦𑀁 𑀏𑀓𑀦𑁆𑀢𑁂𑀦 𑀆𑀳𑀸𑀭𑀫𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀸𑀳𑀸𑀭𑀓𑀲𑀫𑀕𑁆𑀕𑀓𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀘 𑀲𑀫𑀕𑁆𑀕𑀓𑁂𑀲𑀼 𑀤𑁆𑀯𑁂 𑀧𑀘𑁆𑀘𑀬𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀺, 𑀲𑀸𑀳𑀸𑀭𑀓𑁂𑀲𑀼 𑀏𑀓𑁄𑀬𑁂𑀯𑀸𑀢𑀺 𑀲𑀫𑀕𑁆𑀕𑀓𑀸𑀦𑀺 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁. 𑀲𑀇𑀦𑁆𑀤𑁆𑀭𑀺𑀬𑀓𑀸𑀦𑀺 𑀧𑀦 𑀬𑁂𑀳𑀺 𑀆𑀳𑀸𑀭𑀫𑀕𑁆𑀕𑁂𑀳𑀺 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀢𑁂𑀲𑀁 𑀓𑀫𑀯𑀲𑁂𑀦 𑀧𑀘𑁆𑀙𑀸 𑀯𑀼𑀢𑁆𑀢𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀤𑀺𑀲𑀢𑁆𑀢𑀸𑀢𑀺 𑀲𑀫𑀕𑁆𑀕𑀓𑀢𑁆𑀢𑁂𑀦 𑀲𑀫𑀸𑀦𑀢𑁆𑀢𑀸, 𑀅𑀦𑀦𑁆𑀢𑀭𑀭𑀽𑀧𑀢𑁆𑀢𑀸𑀢𑀺 𑀯𑀸 𑀅𑀢𑁆𑀣𑁄.

𑁪𑁫𑁭-𑁪𑁬𑁦. 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀘𑀢𑁆𑀢𑀸𑀭𑀻𑀢𑀺 𑀅𑀩𑁆𑀬𑀸𑀓𑀢𑀲𑀳𑀺𑀢𑀲𑁆𑀲 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀓𑀼𑀲𑀮𑀫𑀽𑀮𑀓𑁂𑀲𑁆𑀯𑁂𑀯 𑀤𑀼𑀫𑀽𑀮𑀓𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀩𑁆𑀬𑀸𑀓𑀢𑁂 𑀯𑀢𑁆𑀣𑀼𑀭𑀽𑀧𑀫𑁆𑀧𑀻𑀢𑀺 𑀇𑀤𑀁 ‘‘𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀻’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. ‘‘𑀤𑀼𑀢𑀺𑀬𑀖𑀝𑀦𑁂 𑀅𑀩𑁆𑀬𑀸𑀓𑀢𑀯𑀺𑀲𑁆𑀲𑀚𑁆𑀚𑀦𑁂 𑀭𑀽𑀧𑁂𑀲𑀼 𑀯𑀢𑁆𑀣𑀼𑀫𑁂𑀯 𑀮𑀩𑁆𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀪𑀽𑀢𑀭𑀽𑀧𑀫𑁆𑀧𑀺 𑀧𑀦 𑀮𑀩𑁆𑀪𑀢𑀻𑀢𑀺 ‘‘𑀯𑀢𑁆𑀣𑀼𑀜𑁆𑀘 𑀪𑀽𑀢𑀭𑀽𑀧𑀜𑁆𑀘 𑀮𑀩𑁆𑀪𑀢𑀻’’𑀢𑀺 𑀧𑀞𑀦𑁆𑀢𑀺. ‘‘𑀘𑀢𑀼𑀢𑁆𑀣𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀲𑀯𑀺𑀧𑀸𑀓𑁂𑀲𑀼 𑀧𑀞𑀫𑁂 𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘𑀸𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀇𑀥 𑀘 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺𑀧𑀺 𑀧𑀦 𑀧𑀞𑀦𑁆𑀢𑀺. 𑀏𑀢𑁆𑀣 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺 𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀖𑀝𑀦𑁂𑀲𑀼 𑀳𑁂𑀢𑀼𑀓𑀫𑁆𑀫𑀛𑀸𑀦𑀫𑀕𑁆𑀕𑁂𑀳𑀺 𑀖𑀝𑀦𑀸𑀦𑀺 𑀦 𑀬𑁄𑀚𑀺𑀢𑀸𑀦𑀺, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀯𑀚𑁆𑀚𑁂𑀲𑀼 𑀆𑀳𑀸𑀭𑁂𑀦, 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀚𑁆𑀚𑁂𑀲𑀼 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑁂𑀳𑀺 𑀘. 𑀓𑀲𑁆𑀫𑀸𑀢𑀺? 𑀢𑁂𑀲𑀼 𑀳𑀺 𑀬𑁄𑀚𑀺𑀬𑀫𑀸𑀦𑁂𑀲𑀼 𑀢𑀁𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀓𑀤𑁂𑀲𑀪𑀽𑀢𑀸 𑀳𑁂𑀢𑀼𑀆𑀤𑀬𑁄 𑀅𑀭𑀽𑀧𑀥𑀫𑁆𑀫𑀸𑀯 𑀧𑀘𑁆𑀘𑀬𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀺. 𑀢𑁂𑀦 𑀢𑁂𑀳𑀺 𑀖𑀝𑀦𑀸𑀦𑀺 𑀳𑁂𑀢𑀼𑀫𑀽𑀮𑀓𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸𑀪𑀸𑀯𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀻𑀢𑀺 𑀦 𑀯𑀼𑀢𑁆𑀢𑀸𑀦𑀺. 𑀅𑀢𑁆𑀣𑀺𑀅𑀯𑀺𑀕𑀢𑁂𑀳𑀺 𑀧𑀦 𑀬𑁄𑀚𑀺𑀬𑀫𑀸𑀦𑁄 𑀆𑀳𑀸𑀭𑁄 𑀦𑀺𑀲𑁆𑀲𑀬𑀸𑀤𑀻𑀳𑀺 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀭𑀽𑀧𑀫𑀺𑀲𑁆𑀲𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀸𑀦𑀺𑀧𑀺 𑀖𑀝𑀦𑀸𑀦𑀺 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀦𑀺𑀲𑁆𑀲𑀬𑀸𑀤𑀺𑀫𑀽𑀮𑀓𑁂𑀲𑀼 𑀘 𑀆𑀳𑀸𑀭𑁂𑀦 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀘 𑀲𑀼𑀧𑀸𑀓𑀝𑀪𑀸𑀯𑀢𑁆𑀣𑀁 𑀬𑁄𑀚𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺.

𑁪𑁬𑁨-𑁪𑁬𑁪. 𑀦𑀺𑀲𑁆𑀲𑀬𑀫𑀽𑀮𑀓𑁂 ‘‘𑀙𑀝𑁆𑀞𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀘𑀓𑁆𑀔𑀸𑀤𑀻𑀦𑀺 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀅𑀩𑁆𑀬𑀸𑀓𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀘𑀸’’𑀢𑀺 𑀧𑀞𑀦𑁆𑀢𑀺.

𑁪𑁬𑁬. 𑀉𑀧𑀦𑀺𑀲𑁆𑀲𑀬𑀫𑀽𑀮𑀓𑁂 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀧𑀞𑀫𑁂 ‘‘𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀧𑀘𑁆𑀘𑀬𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀮𑁄𑀓𑀼𑀢𑁆𑀢𑀭𑀸𑀧𑀺 𑀧𑀦 𑀕𑀳𑁂𑀢𑀩𑁆𑀩𑀸𑀯.

𑁪𑁭𑁩-𑁪𑁭𑁭. 𑀓𑀫𑁆𑀫𑀫𑀽𑀮𑀓𑁂 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀧𑀻𑀢𑀺 𑀏𑀢𑁆𑀣 𑀦 𑀧𑀯𑀢𑁆𑀢𑁂 𑀯𑀺𑀬 𑀔𑀦𑁆𑀥𑀸𑀬𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀞𑀫𑁂 ‘‘𑀅𑀭𑀽𑀧𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀓𑀫𑁆𑀫𑀫𑀽𑀮𑀓𑁂 ‘‘𑀓𑀫𑁆𑀫𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀤𑁆𑀯𑁂’’𑀢𑀺, 𑀆𑀭𑀫𑁆𑀫𑀡𑀫𑀽𑀮𑀓𑁂 𑀘 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀓𑀫𑁆𑀫𑁂 𑀤𑁆𑀯𑁂’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁, 𑀦𑀦𑀼 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀓𑀫𑁆𑀫𑀸𑀭𑀫𑁆𑀫𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀸𑀤𑀻𑀦𑀁 𑀓𑀫𑁆𑀫𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘 𑀳𑁄𑀢𑀺. 𑀬𑀣𑀸 𑀘 𑀆𑀭𑀫𑁆𑀫𑀡𑀪𑀽𑀢𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀫𑁆𑀫𑀫𑁆𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀓𑁆𑀔𑁂𑀧𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀳𑀺 𑀯𑀢𑁆𑀣𑀼 𑀦𑀺𑀲𑁆𑀲𑀬𑀪𑀸𑀯𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀆𑀮𑀫𑁆𑀩𑀺𑀬𑀫𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀓𑀫𑁆𑀫𑀁 𑀧𑀦 𑀢𑀲𑁆𑀫𑀺𑀁 𑀓𑀢𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀢𑀽𑀧𑀘𑀺𑀢𑀪𑀸𑀯𑁂𑀦 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀸𑀭𑀫𑁆𑀫𑀡𑀸𑀓𑀸𑀭𑁂𑀦, 𑀯𑀺𑀲𑀬𑀫𑀢𑁆𑀢𑀢𑀸𑀯𑀲𑁂𑀦 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀲𑀦𑁆𑀢𑀸𑀦𑀯𑀺𑀲𑁂𑀲𑀁 𑀓𑀢𑁆𑀯𑀸 𑀨𑀮𑀼𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑁂𑀦, 𑀢𑀲𑁆𑀫𑀸 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀘 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀦𑁆𑀢𑀺 ‘‘𑀓𑀫𑁆𑀫𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀲 𑀘 𑀲𑀪𑀸𑀯𑁄 𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀦𑀁 𑀯𑀢𑁆𑀣𑀼𑀘𑀓𑁆𑀔𑀸𑀤𑀻𑀦𑀁, 𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀲𑀳 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀸, 𑀅𑀢𑀻𑀢𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀅𑀬𑀁 𑀲𑀪𑀸𑀯𑁄, 𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀲𑀳 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀢𑀸. 𑀬𑀣𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀦𑀁 𑀲𑀳 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀸 𑀲𑀪𑀸𑀯𑁄, 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀜𑁆𑀘 𑀲𑀳 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺.

𑁪𑁭𑁮-𑁪𑁮𑁩. 𑀦𑀺𑀭𑀸𑀥𑀺𑀧𑀢𑀺𑀯𑀺𑀜𑁆𑀜𑀸𑀡𑀸𑀳𑀸𑀭𑀯𑀲𑁂𑀦𑀸𑀢𑀺 𑀅𑀦𑀸𑀫𑀝𑁆𑀞𑀸𑀥𑀺𑀧𑀢𑀺𑀪𑀸𑀯𑀲𑁆𑀲 𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑁆𑀲 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀼 𑀧𑀭𑀺𑀳𑀸𑀬𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀮𑀪𑀦𑁆𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀲𑀩𑁆𑀩𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀭𑀺𑀳𑀸𑀦𑀁 𑀤𑀲𑁆𑀲𑁂𑀢𑀺.

𑁪𑁮𑁪-𑁪𑁯𑁫. ‘‘𑀢𑀢𑀺𑀬𑁂 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀓𑁆𑀔𑀸𑀤𑀻𑀦𑀺 𑀘 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀮𑀩𑁆𑀪𑀦𑁆𑀢𑀺. 𑀢𑀢𑁄 𑀯𑀻𑀭𑀺𑀬𑀯𑀲𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀙𑀸𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀯𑀻𑀫𑀁𑀲𑀸 𑀮𑀩𑁆𑀪𑀢𑀺, 𑀯𑀻𑀭𑀺𑀬𑀲𑁆𑀲 𑀧𑀦 𑀯𑀲𑁂𑀦 𑀢𑀁𑀲𑀫𑀸𑀦𑀕𑀢𑀺𑀓𑀸 𑀯𑀻𑀫𑀁𑀲𑀸𑀧𑀺 𑀕𑀳𑀺𑀢𑀸𑀢𑀺 ‘‘𑀯𑀻𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁫𑁧𑁧-𑁫𑁧𑁪. 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 ‘‘𑀤𑀲𑀫𑁂 𑀓𑀼𑀲𑀮𑀸𑀤𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 ‘‘𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀢𑁆𑀣𑀼 𑀘 𑀔𑀦𑁆𑀥𑀸𑀦’’𑀦𑁆𑀢𑀺 𑀇𑀤𑀫𑁆𑀧𑀺 𑀮𑀩𑁆𑀪𑀢𑀺. ‘‘𑀏𑀓𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼 𑀔𑀦𑁆𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀧𑀸𑀓𑀧𑀘𑁆𑀘𑀬𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀬𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀖𑀝𑀦𑀁 𑀓𑀢𑀁, 𑀢𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀔𑀦𑁆𑀥𑀸 𑀘 𑀯𑀢𑁆𑀣𑀼𑀲𑁆𑀲𑀸’’𑀢𑀺 𑀇𑀤𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. ‘‘𑀤𑁆𑀯𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦’’𑀦𑁆𑀢𑀺 𑀧𑀼𑀩𑁆𑀩𑀧𑀸𑀞𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀦 𑀦 𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 ‘‘𑀤𑁆𑀯𑀸𑀤𑀲𑀫𑁂 𑀔𑀦𑁆𑀥𑀸 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘𑀸’’𑀢𑀺 𑀧𑀞𑀦𑁆𑀢𑀺.

𑁫𑁧𑁫-𑁫𑁧𑁮. 𑀅𑀢𑁆𑀣𑀺𑀧𑀘𑁆𑀘𑀬𑀫𑀽𑀮𑀓𑁂 𑀧𑀞𑀫𑀖𑀝𑀦𑁂 ‘‘𑀅𑀭𑀽𑀧𑀯𑀢𑁆𑀣𑀸𑀭𑀫𑁆𑀫𑀡𑀫𑀳𑀸𑀪𑀽𑀢𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀘𑀸’’𑀢𑀺𑀧𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀸𑀤𑀬𑁄 𑀮𑀩𑁆𑀪𑀦𑁆𑀢𑀻𑀢𑀺. ‘‘𑀤𑀼𑀢𑀺𑀬𑁂 𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀸𑀳𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀸𑀦𑀺𑀧𑀺 𑀧𑀦 𑀅𑀮𑀩𑁆𑀪𑀫𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀸𑀳𑀸𑀭𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺, 𑀙𑀝𑁆𑀞𑀁 𑀲𑀩𑁆𑀩𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀢𑁆𑀢𑀫𑁂 𑀢𑀢𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀢𑁆𑀢𑀁 𑀧𑀭𑀺𑀳𑀸𑀬𑀢𑀻𑀢𑀺 𑀏𑀯𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁄 𑀏𑀓𑀸𑀤𑀲𑀫𑁂𑀢𑀺 𑀏𑀢𑁆𑀣 𑀢𑀢𑁄𑀢𑀺 𑀦𑀯𑀫𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀭𑀲𑀫𑁂 𑀯𑀢𑁆𑀣𑀸𑀭𑀫𑁆𑀫𑀡𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀕𑁆𑀕𑀳𑀡𑁂𑀦 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀦𑀺𑀧𑀺 𑀕𑀳𑀺𑀢𑀸𑀦𑀺, 𑀢𑀣𑀸 𑀘𑀼𑀤𑁆𑀤𑀲𑀫𑁂 𑀯𑀢𑁆𑀣𑀼𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺. ‘‘𑀲𑀢𑁆𑀢𑀭𑀲𑀫𑁂 𑀧𑀦 𑀢𑀤𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦, 𑀅𑀝𑁆𑀞𑀸𑀭𑀲𑀫𑁂𑀧𑀺 𑀢𑀤𑁂𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀅𑀬𑀁 𑀧𑀦 𑀲𑀢𑁆𑀢𑀭𑀲𑀫𑀢𑁄 𑀯𑀺𑀲𑁂𑀲𑁄 𑀦 𑀳𑁄𑀢𑀺, 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀦 𑀲𑀢𑁆𑀢𑀭𑀲𑀫𑁂 𑀅𑀝𑁆𑀞𑀸𑀭𑀲𑀫𑁂 𑀘 𑀯𑀢𑁆𑀣𑀼𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑁄 𑀯𑀺𑀲𑁂𑀲𑁄𑀢𑀺 ‘‘𑀲𑀢𑁆𑀢𑀭𑀲𑀫𑁂 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦 𑀘𑀓𑁆𑀔𑀸𑀤𑀻𑀦𑀺 𑀘, 𑀅𑀝𑁆𑀞𑀸𑀭𑀲𑀫𑁂 𑀯𑀢𑁆𑀣𑀼𑀲𑁆𑀲𑁂𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀧𑀞𑀦𑁆𑀢𑀺.

𑁫𑁧𑁯. 𑀲𑀳𑀚𑀸𑀢𑀸𑀦𑀺 𑀯𑀺𑀬 𑀲𑀳𑀚𑀸𑀢𑁂𑀦 𑀓𑁂𑀦𑀘𑀺 𑀏𑀓𑁂𑀦 𑀧𑀘𑁆𑀘𑀬𑁂𑀦 𑀅𑀦𑀺𑀬𑀫𑀺𑀢𑀢𑁆𑀢𑀸 𑀢𑀸𑀦𑀺 𑀧𑀓𑀺𑀡𑁆𑀡𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀳𑀚𑀸𑀢𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀲𑀸𑀫𑀜𑁆𑀜𑀯𑀲𑁂𑀦 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀆𑀭𑀫𑁆𑀫𑀡𑀫𑀽𑀮𑀓𑁂 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀼𑀭𑁂𑀚𑀸𑀢𑀸𑀢𑀺 𑀏𑀢𑁆𑀣 𑀉𑀧𑀦𑀺𑀲𑁆𑀲𑀬𑁄𑀧𑀺 𑀧𑀞𑀺𑀢𑀩𑁆𑀩𑁄.

𑀬𑁂𑀲𑀼 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀢𑀼𑀫𑀽𑀮𑀓𑀸𑀤𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀮𑁄𑀪𑀸𑀤𑀺𑀢𑀁𑀢𑀁𑀦𑀸𑀫𑀯𑀲𑁂𑀦 𑀧𑀦 𑀳𑁂𑀢𑀼𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀥𑀫𑁆𑀫𑀸 𑀏𑀯𑀁 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀦 𑀧𑀜𑁆𑀜𑀸𑀬𑁂𑀬𑁆𑀬𑀼𑀦𑁆𑀢𑀺 𑀢𑁂 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀸𑀤𑀲𑁂𑀯 𑀳𑀺 𑀳𑁂𑀢𑀽’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀏𑀢𑁆𑀢𑀓𑀸𑀬𑁂𑀯 𑀧𑀘𑁆𑀘𑀬𑀥𑀫𑁆𑀫𑀸’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀅𑀧𑀜𑁆𑀜𑀸𑀬𑀫𑀸𑀦𑁄𑀧𑀺 𑀢𑁂𑀲𑁆𑀯𑁂𑀯 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀙 𑀆𑀭𑀫𑁆𑀫𑀡𑀸𑀢𑀺 𑀏𑀢𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀪𑀸𑀯𑀢𑁄 𑀲𑀗𑁆𑀕𑀳𑀺𑀢𑁄𑀢𑀺 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀬𑁄’’𑀢𑀺 𑀯𑀼𑀢𑁆𑀢𑀁. 𑀏𑀓𑀦𑁆𑀢𑁂𑀦 𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀮𑀩𑁆𑀪𑀢𑀺. 𑀏𑀓𑀦𑁆𑀢𑁂𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀇𑀤𑀁 𑀧𑀦 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀛𑀸𑀦𑀗𑁆𑀕𑁂𑀲𑁆𑀯𑀧𑀺 𑀳𑀺 𑀤𑀼𑀓𑁆𑀔𑀁 𑀅𑀓𑀼𑀲𑀮𑀫𑁂𑀯 𑀯𑀺𑀧𑀸𑀓𑀲𑁆𑀲 𑀅𑀛𑀸𑀦𑀗𑁆𑀕𑀢𑁆𑀢𑀸. 𑀘𑀺𑀢𑁆𑀢𑀝𑁆𑀞𑀺𑀢𑀺𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸 𑀳𑁄𑀢𑀻𑀢𑀺. 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀇𑀦𑁆𑀤𑁆𑀭𑀺𑀬𑁂𑀲𑀼 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀮𑀩𑁆𑀪𑁂𑀬𑁆𑀬, 𑀓𑀼𑀲𑀮𑀯𑀺𑀧𑀸𑀓𑀸𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑁂𑀲𑁂𑀦 𑀧𑀦 𑀧𑀘𑁆𑀘𑀬𑀬𑁄𑀚𑀦𑀸 𑀦𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁫𑁨𑁭. 𑀏𑀓𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀳𑁂𑀢𑀼𑀧𑀘𑁆𑀘𑀬𑀢𑁄 𑀅𑀜𑁆𑀜𑁂𑀦 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀧𑀘𑁆𑀘𑀬𑀢𑁄 𑀘 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀅𑀝𑁆𑀞 𑀳𑁄𑀦𑁆𑀢𑀺, 𑀢𑁂𑀲𑀼 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄, 𑀅𑀓𑀼𑀲𑀮𑀲𑁆𑀲 𑀤𑁆𑀯𑀻𑀳𑀺, 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀢𑀢𑁄 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀇𑀫𑁂𑀲𑁆𑀯𑁂𑀯 𑀆𑀭𑀫𑁆𑀫𑀡𑀸𑀤𑀻𑀲𑀼 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀘 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸 𑀯𑀼𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀲𑁆𑀲 𑀯𑀲𑁂𑀦 𑀧𑀼𑀭𑁂𑀚𑀸𑀢𑀁, 𑀲𑀳𑀚𑀸𑀢𑀢𑁄 𑀉𑀧𑀦𑀺𑀲𑁆𑀲𑀬𑀢𑁄 𑀘, 𑀅𑀜𑁆𑀜𑀺𑀲𑁆𑀲𑀸 𑀘𑁂𑀢𑀦𑀸𑀬 𑀯𑀲𑁂𑀦 𑀓𑀫𑁆𑀫𑀁, 𑀲𑀳𑀚𑀸𑀢𑀢𑁄 𑀅𑀜𑁆𑀜𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀯𑀲𑁂𑀦 𑀆𑀳𑀸𑀭𑁄, 𑀲𑀳𑀚𑀸𑀢𑀢𑁄 𑀧𑀼𑀭𑁂𑀚𑀸𑀢𑀢𑁄 𑀘 𑀅𑀜𑁆𑀜𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀘𑁆𑀘𑁂𑀯 (𑀧𑀝𑁆𑀞𑀸. 𑁧.𑁧.𑁪𑁦𑁪, 𑁪𑁧𑁯, 𑁪𑁨𑁩) 𑀯𑀼𑀢𑁆𑀢𑀁, 𑀢𑀤𑀜𑁆𑀜𑀸𑀪𑀸𑀯𑀸 𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁬𑁬, 𑁭𑁪) 𑀏𑀢𑁆𑀣 𑀆𑀭𑀫𑁆𑀫𑀡𑀲𑁆𑀲 𑀅𑀯𑀘𑀦𑀁, 𑀢𑀁 𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀺𑀢𑀯𑀺𑀯𑀚𑁆𑀚𑀦𑀸𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑀢𑁄 𑀅𑀜𑁆𑀜𑀸𑀭𑀫𑁆𑀫𑀡𑀸𑀪𑀸𑀯𑀢𑁄 𑀘, 𑀦 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀲𑁆𑀲 𑀆𑀭𑀫𑁆𑀫𑀡𑁂 𑀅𑀲𑀗𑁆𑀕𑀳𑀺𑀢𑀢𑁆𑀢𑀸.

𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸 𑀬𑀤𑀺𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀯, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀧𑀦 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀸𑀦𑀁 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀳𑀸𑀧𑀺 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀦 𑀢𑀺𑀡𑁆𑀡𑀁 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀺𑀬 𑀯𑀺𑀲𑀼𑀁𑀬𑁂𑀯𑀸𑀢𑀺 ‘‘𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀘 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀙𑀳𑀺 𑀪𑁂𑀤𑁂𑀳𑀺 𑀞𑀺𑀢𑀸’’𑀢𑀺 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀮𑀓𑁆𑀔𑀡𑁂𑀲𑀼 𑀏𑀓𑁂𑀓𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

‘‘𑀭𑀽𑀧𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀤𑀼𑀯𑀺𑀥𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀢𑁄’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁.

𑀘𑀢𑀼𑀯𑀻𑀲𑀢𑀺𑀬𑀸𑀧𑀻𑀢𑀺 𑀦 𑀲𑁄𑀴𑀲𑀦𑁆𑀦𑀁𑀬𑁂𑀯, 𑀦𑀸𑀧𑀺 𑀅𑀝𑁆𑀞𑀦𑁆𑀦𑀁𑀬𑁂𑀯, 𑀅𑀣 𑀔𑁄 𑀘𑀢𑀼𑀯𑀻𑀲𑀢𑀺𑀬𑀸𑀧𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀪𑀽𑀢𑀸𑀦𑀁 𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀉𑀧𑀦𑀺𑀲𑁆𑀲𑀬𑁂 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑁂 𑀲𑀗𑁆𑀕𑀳𑁄 𑀅𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀬𑁂𑀯 𑀞𑀧𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑀲𑁆𑀲 𑀢𑁂𑀲𑀜𑁆𑀘 𑀉𑀧𑀦𑀺𑀲𑁆𑀲𑀬𑀸𑀤𑀻𑀲𑀼 𑀲𑀗𑁆𑀕𑀳𑀁 𑀯𑀢𑁆𑀢𑀼𑀓𑀸𑀫𑁄 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀦 𑀲𑁂𑀲𑀸 𑀢𑁂𑀯𑀻𑀲𑀢𑀻’’𑀢𑀺 𑀆𑀳. 𑀘𑀢𑀼𑀢𑁆𑀣𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀢𑀺 𑀏𑀢𑁆𑀣 𑀬𑀣𑀸 ‘‘𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀧𑀼𑀭𑁂𑀚𑀸𑀢𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀣 𑀧𑀦 ‘‘𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀧𑀼𑀭𑁂𑀚𑀸𑀢𑀕𑁆𑀕𑀳𑀡𑁂𑀦 𑀕𑀳𑀺𑀢’’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀉𑀧𑀦𑀺𑀲𑁆𑀲𑀬𑀕𑁆𑀕𑀳𑀡𑁂𑀦𑀧𑀺 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀲 𑀕𑀳𑀺𑀢𑀢𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀬𑁂𑀲𑀼 𑀧𑀜𑁆𑀳𑁂𑀲𑀼…𑀧𑁂… 𑀏𑀓𑁄𑀯 𑀧𑀘𑁆𑀘𑀬𑁄 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀕𑀢𑁄𑀯𑀸𑀢𑀺 𑀏𑀯𑀁 𑀏𑀯𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦 𑀤𑁆𑀯𑀸𑀤𑀲𑀫𑀘𑀼𑀤𑁆𑀤𑀲𑀫𑁂𑀲𑀼 𑀧𑀜𑁆𑀳𑁂𑀲𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑁂𑀲𑀼 𑀏𑀓𑁂𑀓𑁄 𑀧𑀘𑁆𑀘𑀬𑁄 𑀦 𑀅𑀦𑀸𑀕𑀢𑁄 𑀳𑁄𑀢𑀺, 𑀅𑀣 𑀔𑁄 𑀆𑀕𑀢𑁄𑀯𑀸𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀧𑀝𑀺𑀓𑁆𑀔𑁂𑀧𑁂 𑀢𑁂𑀧𑀺 𑀧𑀜𑁆𑀳𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀜𑁆𑀳𑁂𑀢𑀺 𑀤𑀼𑀢𑀺𑀬𑀙𑀝𑁆𑀞𑀧𑀜𑁆𑀳𑁂𑀲𑀼 𑀏𑀓𑁂𑀓𑀯𑀲𑁂𑀦 𑀕𑀳𑁂𑀢𑁆𑀯𑀸 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀏𑀯𑀦𑁆𑀢𑀺 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀤𑁆𑀯𑀸𑀤𑀲𑀫𑀘𑀼𑀤𑁆𑀤𑀲𑀫𑁂 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀲𑀼𑀧𑀺 𑀳𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀆𑀕𑀢𑀸, 𑀦 𑀧𑀦 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦𑀸𑀢𑀺 𑀅𑀯𑀲𑁂𑀲𑀸𑀦𑀁 𑀮𑀩𑁆𑀪𑀫𑀸𑀦𑀸𑀦𑀁 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑁂𑀭𑀲𑀫𑀧𑀦𑁆𑀦𑀭𑀲𑀫𑁂𑀲𑀼 𑀧𑀘𑁆𑀙𑀸𑀚𑀸𑀢𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀢𑁂 𑀧𑀜𑁆𑀳𑀸 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀲𑀳𑀚𑀸𑀢𑀲𑁆𑀲𑁂𑀯 𑀯𑀲𑁂𑀦𑀸𑀢𑀺. 𑀇𑀤𑀫𑁂𑀯 𑀘𑁂𑀢𑁆𑀣 𑀮𑀓𑁆𑀔𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀕𑀸𑀳𑀓𑀢𑁆𑀢𑀁, 𑀉𑀓𑁆𑀓𑀝𑁆𑀞𑀯𑀲𑁂𑀦 𑀧𑀜𑁆𑀳𑀸𑀧𑀭𑀺𑀘𑁆𑀙𑁂𑀤𑁄, 𑀢𑁂 𑀢𑁂 𑀧𑀘𑁆𑀘𑀬𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀲 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀧𑀭𑀺𑀳𑀸𑀦𑀸𑀧𑀭𑀺𑀳𑀸𑀦𑀻𑀢𑀺 𑀏𑀢𑀁 𑀲𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀧𑀪𑁂𑀤𑀧𑀭𑀺𑀳𑀸𑀦𑀻𑀲𑀼. 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁄 𑀲𑀩𑁆𑀩𑀧𑀘𑁆𑀘𑀦𑀻𑀬𑀲𑁆𑀲 𑀲𑀸𑀥𑀸𑀭𑀡𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑁄, 𑀦 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣𑁂𑀯 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀳𑁂𑀢𑀼𑀤𑀼𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀳𑁂𑀢𑀼𑀥𑀫𑁆𑀫𑁄 𑀳𑁂𑀢𑀼𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁪𑁩) 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑁂 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀩𑁆𑀩𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀲𑀗𑁆𑀕𑀳𑀯𑀲𑁂𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀓𑀣𑀸’’𑀢𑀺, 𑀢𑀢𑁆𑀭 𑀧𑀪𑁂𑀤𑁂 𑀯𑀺𑀢𑁆𑀣𑀸𑀭𑀓𑀣𑀁 𑀯𑀢𑁆𑀯𑀸 𑀧𑀭𑀺𑀳𑀸𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑁂…𑀧𑁂… 𑀢𑁂 𑀧𑀭𑀢𑁄 𑀯𑀓𑁆𑀔𑀸𑀫𑀸’’𑀢𑀺 𑀆𑀳.

𑁫𑁨𑁮. 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑁂𑀲𑀼𑀧𑀺 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀢𑁂 𑀢𑁂𑀬𑁂𑀯 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀓𑀼𑀲𑀮𑀸𑀤𑀺𑀓𑁂𑀲𑀼 𑀤𑀲𑁆𑀲𑀺𑀢𑁂𑀳𑀺 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 ‘‘𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀢𑀬𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸, 𑀅𑀣 𑀔𑁄 𑀤𑁆𑀯𑁂𑀬𑁂𑀯, 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀅𑀓𑀼𑀲𑀮𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺.

𑁫𑁩𑁦. 𑀲𑀳𑀚𑀸𑀢𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺 𑀯𑀢𑁆𑀣𑀼𑀫𑀺𑀲𑁆𑀲𑀓𑀢𑁆𑀢𑀸𑀢𑀺 𑀅𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀯𑀢𑁆𑀣𑀼𑀦𑀸 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀳𑀚𑀸𑀢𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀦 𑀧𑀦 𑀲𑀼𑀤𑁆𑀥𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀯𑀢𑁆𑀣𑀼𑀦𑀸 𑀧𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀺𑀲𑁆𑀲𑀬𑀸𑀤𑀺𑀦𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀫𑁂𑀯 𑀦𑀺𑀲𑁆𑀲𑀬𑀸𑀤𑀺𑀁 𑀯𑀺𑀲𑁂𑀲𑁂𑀢𑀼𑀁 𑀲𑀳𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀇𑀫𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁂 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀅𑀢𑁆𑀣𑀺𑀧𑀘𑁆𑀘𑀬𑁂𑀲𑀼 𑀘𑀢𑀽𑀲𑀼 𑀲𑀩𑁆𑀩𑀧𑀘𑁆𑀘𑀬𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀓𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁄 𑀦 𑀓𑀢𑁄𑀢𑀺? 𑀫𑀺𑀲𑁆𑀲𑀓𑀸𑀫𑀺𑀲𑁆𑀲𑀓𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀪𑀸𑀕𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀦 𑀳𑀺 ‘‘𑀅𑀯𑀺𑀪𑀸𑀕𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑁂 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘‘𑀓𑀺𑀁 𑀲𑀼𑀤𑁆𑀥𑁂𑀦 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀯𑀸, 𑀅𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀫𑀺𑀲𑁆𑀲𑀓𑁂𑀦 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀫𑀺𑀲𑁆𑀲𑀓𑁂𑀦 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀫𑀺𑀲𑁆𑀲𑀓𑁂𑀦 𑀯𑀸’’𑀢𑀺. 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀧𑀦 𑀲𑀳𑀚𑀸𑀢𑀸𑀤𑀻𑀲𑀼 𑀲𑀭𑀽𑀧𑀢𑁄 𑀯𑀼𑀘𑁆𑀘𑀫𑀸𑀦𑁂𑀲𑀼 𑀬𑀢𑁆𑀣 𑀲𑀼𑀤𑁆𑀥𑀸𑀦𑀁 𑀲𑀳𑀚𑀸𑀢𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁆𑀣 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀸𑀦𑀁, 𑀬𑀢𑁆𑀣 𑀘 𑀫𑀺𑀲𑁆𑀲𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁆𑀣 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀸𑀦𑀁 𑀕𑀳𑀡𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀳𑀚𑀸𑀢𑀸𑀤𑀬𑁄 𑀕𑀳𑀺𑀢𑀸, 𑀢𑁂𑀦 𑀘 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀓𑀲𑁆𑀫𑀸 𑀧𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀬𑁄, 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀸 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀪𑀸𑀯𑁂𑀦 𑀦 𑀯𑀼𑀢𑁆𑀢𑁄𑀢𑀺? 𑀅𑀯𑀢𑁆𑀢𑀩𑁆𑀩𑀢𑁆𑀢𑀸, 𑀦𑀺𑀲𑁆𑀲𑀬𑁄 𑀢𑀸𑀯 𑀦 𑀯𑀢𑁆𑀢𑀩𑁆𑀩𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀲𑀼𑀤𑁆𑀥𑀸𑀦𑀁 𑀫𑀺𑀲𑁆𑀲𑀓𑀸𑀦𑀜𑁆𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄 𑀯𑀺𑀪𑀚𑀺𑀢𑀩𑁆𑀩𑀢𑀸𑀬 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀅𑀯𑀺𑀲𑀺𑀝𑁆𑀞𑀢𑁆𑀢𑀸, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀸𑀯𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀬 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀲𑁄 𑀯𑀺𑀬 𑀦 𑀯𑀢𑁆𑀢𑀩𑁆𑀩𑁄. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀜𑁆𑀘 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁄. 𑀢𑀣𑀸 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀜𑁆𑀘 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁪.𑁮𑁪), 𑀦 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄, 𑀢𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑁂𑀦 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀕𑁆𑀕𑀳𑀡𑀢𑁄 𑀦 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀪𑀺𑀬𑁆𑀬𑁄𑀧𑀺 𑀦 𑀯𑀢𑁆𑀢𑀩𑁆𑀩𑁄.

𑀦𑀦𑀼 𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀘 𑀳𑁂𑀢𑀼𑀆𑀤𑀻𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀲𑁄𑀧𑀺 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑀺𑀬 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑁂𑀳𑀺 𑀅𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸. 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀬 𑀉𑀧𑁆𑀧𑀢𑁆𑀢𑀺𑀓𑀸𑀮𑀯𑀺𑀭𑀼𑀤𑁆𑀥𑁂𑀳𑀺 𑀧𑀘𑁆𑀘𑀬𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀸, 𑀦 𑀧𑀦 𑀲𑀳𑀚𑀸𑀢𑁄. 𑀳𑁂𑀢𑀼𑀆𑀤𑀬𑁄 𑀳𑀺 𑀲𑀳𑀚𑀸𑀢𑀸 𑀏𑀯, 𑀦 𑀉𑀧𑁆𑀧𑀢𑁆𑀢𑀺𑀓𑀸𑀮𑀯𑀺𑀭𑀼𑀤𑁆𑀥𑀸𑀢𑀺.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸

𑁫𑁩𑁨. 𑀲𑀼𑀤𑁆𑀥𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀻𑀢𑀺 𑀏𑀢𑁆𑀣 𑀲𑀼𑀤𑁆𑀥𑀕𑁆𑀕𑀳𑀡𑁂𑀦 𑀦 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁. 𑀆𑀭𑀫𑁆𑀫𑀡𑁂 𑀳𑀺 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀺𑀬𑁂𑀯𑀸𑀢𑀺. 𑀲𑀼𑀤𑁆𑀥𑁄𑀢𑀺 𑀯𑀸 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀓𑁂𑀯𑀮𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀺, 𑀦 𑀲𑁂𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀸𑀤𑀲𑀦𑁆𑀦𑀦𑁆𑀢𑀺 𑀲𑀳𑀚𑀸𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀏𑀓𑀸𑀤𑀲𑀦𑁆𑀦𑀁 𑀯𑀲𑁂𑀦. 𑀢𑁂𑀢𑀺 𑀢𑁂 𑀲𑀳𑀚𑀸𑀢𑁂 𑀅𑀦𑁆𑀢𑁄𑀕𑀥𑀸𑀬𑁂𑀯 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀅𑀦𑀦𑁆𑀢𑁄𑀕𑀥𑀸 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀬𑁄 𑀆𑀭𑀫𑁆𑀫𑀡𑀸𑀤𑀺𑀆𑀓𑀸𑀭𑁂𑀦 𑀮𑀪𑀦𑁆𑀢𑀻𑀢𑀺.

𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄𑀬𑁂𑀯 𑀦𑀢𑁆𑀣𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀇𑀫𑁂 𑀯𑀸𑀭𑀸 𑀦 𑀮𑀩𑁆𑀪𑁂𑀬𑁆𑀬𑀼𑀁, 𑀅𑀣 𑀔𑁄 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀏𑀢𑁂 𑀮𑀪𑀺𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀬𑀤𑀺𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀬𑀲𑁆𑀫𑀸 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑀥𑀫𑁆𑀫𑁂 𑀞𑀺𑀢𑀸 𑀏𑀢𑁂 𑀦 𑀦𑀺𑀲𑁆𑀲𑀬𑀸𑀤𑀬𑁄 𑀦 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂 𑀇𑀥 𑀲𑀳𑀚𑀸𑀢𑀧𑀝𑀺𑀓𑁆𑀔𑁂𑀧𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀧𑀺 𑀯𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀞𑀧𑁂𑀢𑁆𑀯𑀸 𑀲𑀳𑀚𑀸𑀢𑀧𑀘𑁆𑀘𑀬𑀦𑁆𑀢𑀺 𑀏𑀢𑁂𑀦 𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀢𑁄 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀓𑀼𑀲𑀮𑀲𑁆𑀲 𑀓𑀼𑀲𑀮𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄’’𑀢𑀺. 𑀬𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸 𑀬𑁂 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀢𑀺 𑀲𑀗𑁆𑀕𑀳𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁄 𑀘 𑀓𑀼𑀲𑀮𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀢𑀺 𑀓𑀢𑁆𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑁂𑀳𑁂𑀯 𑀥𑀫𑁆𑀫𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀫𑀼𑀤𑀸𑀬𑀪𑀽𑀢𑁄 𑀏𑀓𑀤𑁂𑀲𑀪𑀽𑀢𑁂𑀳𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑁂𑀳𑁂𑀯 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀲𑀳𑀚𑀸𑀢𑀸𑀤𑀻𑀳𑀺, 𑀦 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑀫𑀜𑁆𑀜𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑁄𑀯𑀸𑀢𑀺 𑀲𑀳𑀚𑀸𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑀳𑀚𑀸𑀢𑀸 𑀳𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑁄𑀯 𑀳𑁄𑀦𑁆𑀢𑀺. 𑀢𑁂𑀢𑀺 𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑀸.

𑁫𑁩𑁩. ‘‘𑀤𑀼𑀫𑀽𑀮𑀓𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀕𑀡𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀮𑀺𑀔𑀺𑀢𑀁, ‘‘𑀧𑀘𑁆𑀘𑀦𑀻𑀬𑀕𑀡𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀧𑀘𑁆𑀘𑀦𑀻𑀬𑀯𑀸𑀭𑀕𑀡𑀦𑀸 𑀳𑀺 𑀤𑀲𑁆𑀲𑀺𑀢𑀸𑀢𑀺.

‘‘𑀯𑀺𑀧𑀸𑀓𑀁 𑀧𑀦𑁂𑀢𑁆𑀣 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀯𑀺𑀧𑀸𑀓𑀲𑁆𑀲𑀧𑀺 𑀧𑀦 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑁄 𑀅𑀳𑀼𑀢𑁆𑀯𑀸𑀧𑀺 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀧𑀸𑀓𑀢𑁆𑀢𑀺𑀓𑁂 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺.

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁩𑁪. 𑀲𑀢𑁆𑀢 𑀧𑀜𑁆𑀘 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀻𑀢𑀺 𑀲𑀢𑁆𑀢𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀳𑁂𑀢𑀼𑀫𑀽𑀮𑀓𑁂 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳.

𑁫𑁩𑁮. 𑀦𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻𑀢𑀺 𑀫𑀽𑀮𑀓𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑀫𑀽𑀮𑀓𑁂 ‘‘𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀁 𑀕𑀡𑀦𑀁 𑀉𑀤𑁆𑀥𑀭𑀢𑀺. ‘‘𑀢𑁂𑀲𑀼 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀤𑁆𑀯𑀻𑀲𑀼 𑀧𑀦 𑀯𑀺𑀧𑀸𑀓𑁄 𑀢𑀢𑀺𑀬𑁂 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀳𑁄𑀢𑀺𑀬𑁂𑀯.

𑁫𑁪𑁫. 𑀅𑀩𑁆𑀬𑀸𑀓𑀢𑁄 𑀘 𑀲𑀳𑀚𑀸𑀢𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 ‘‘𑀅𑀭𑀽𑀧𑀸𑀩𑁆𑀬𑀸𑀓𑀢𑁄 𑀅𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲, 𑀭𑀽𑀧𑀸𑀩𑁆𑀬𑀸𑀓𑀢𑁄 𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀏𑀢𑀁 𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀸𑀩𑁆𑀬𑀸𑀓𑀢𑁄 𑀧𑀦 𑀅𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲, 𑀅𑀭𑀽𑀧𑀸𑀩𑁆𑀬𑀸𑀓𑀢𑁄 𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. ‘‘𑀅𑀩𑁆𑀬𑀸𑀓𑀢𑁄 𑀲𑀳𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀏𑀯𑀁 𑀧𑀜𑁆𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁.

𑁫𑁪𑁬. 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀦𑀯𑀸𑀢𑀺 𑀏𑀢𑁆𑀣 ‘‘𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀺𑀧𑀘𑁆𑀘𑀬𑁂 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺, 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀸𑀦𑀺 𑀞𑀺𑀢𑀸𑀦𑀻𑀢𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀞𑀺𑀢𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀳𑀺 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀬𑁂 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑁂 𑀢𑁂 𑀅𑀧𑀦𑁂𑀢𑁆𑀯𑀸 𑀬𑁂 𑀬𑁂 𑀞𑀺𑀢𑀸, 𑀢𑁂𑀲𑀁 𑀯𑀲𑁂𑀦 𑀢𑁂 𑀢𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀦𑁆𑀢𑀺. 𑀬𑀸𑀯 𑀦𑀺𑀲𑁆𑀲𑀬𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀦𑀸𑀭𑀫𑁆𑀫𑀡𑁂𑀬𑁂𑀯 𑀞𑀢𑁆𑀯𑀸, 𑀅𑀣 𑀔𑁄 𑀬𑀸𑀯 𑀦𑀺𑀲𑁆𑀲𑀬𑀁, 𑀢𑀸𑀯 𑀞𑀢𑁆𑀯𑀸𑀧𑀺 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦𑀉𑀧𑀦𑀺𑀲𑁆𑀲𑀬𑀢𑁄 𑀳𑀺 𑀧𑀼𑀭𑀺𑀫𑁂𑀲𑀼 𑀘 𑀦𑀯𑀧𑀺 𑀮𑀩𑁆𑀪𑀦𑁆𑀢𑀺, 𑀦𑀉𑀧𑀦𑀺𑀲𑁆𑀲𑀬𑁂 𑀧𑀦 𑀧𑀯𑀢𑁆𑀢𑁂 𑀅𑀢𑁆𑀣𑀺𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀧𑀝𑀺𑀓𑁆𑀔𑁂𑀧𑁂𑀦 𑀲𑀢𑁆𑀢 𑀧𑀘𑁆𑀘𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀯𑀲𑀺𑀝𑁆𑀞𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀤𑁆𑀯𑁂𑀬𑁂𑀯𑀸𑀢𑀺.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁫𑁫𑁦. 𑀲𑀤𑀺𑀲𑀯𑀸𑀭𑀸𑀢𑀺 𑀅𑀦𑀼𑀭𑀽𑀧𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀦𑀅𑀜𑁆𑀜𑀫𑀜𑁆𑀜𑁂 𑀮𑀤𑁆𑀥𑁂𑀲𑀼 𑀳𑀺 𑀏𑀓𑀸𑀤𑀲𑀲𑀼 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑁂 𑀳𑁂𑀢𑀼𑀬𑀸 𑀮𑀤𑁆𑀥𑁂𑀲𑀼 𑀲𑀢𑁆𑀢𑀲𑀼 𑀇𑀫𑁂𑀳𑁂𑀯 𑀤𑁆𑀯𑀻𑀳𑀺 𑀲𑀫𑀸𑀦𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀸𑀪𑀸𑀯𑀢𑁄 𑀧𑀦 𑀦 𑀅𑀦𑀼𑀭𑀽𑀧𑀸𑀢𑀺. 𑀅𑀣 𑀯𑀸 𑀯𑀘𑀦𑀢𑁄 𑀅𑀢𑁆𑀣𑀢𑁄 𑀘 𑀉𑀤𑁆𑀤𑁂𑀲𑀢𑁄 𑀬𑀣𑀸𑀬𑁄𑀕𑀁 𑀦𑀺𑀤𑁆𑀤𑁂𑀲𑀢𑁄 𑀘𑀸𑀢𑀺 𑀲𑀩𑁆𑀩𑀣𑀸 𑀲𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀲𑀤𑀺𑀲𑀯𑀸𑀭𑀸’’𑀢𑀺 𑀆𑀳.

𑁫𑁫𑁧. 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀲𑀦𑁆𑀥𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀳𑁂𑀢𑀼𑀦𑀸𑀫𑀧𑀘𑁆𑀘𑀬𑀁 𑀯𑀢𑁆𑀣𑀼𑀭𑀽𑀧𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬. 𑀢𑀻𑀡𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀩𑁆𑀬𑀸𑀓𑀢𑁄 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀘𑀸’’𑀢𑀺 𑀇𑀤𑀫𑁆𑀧𑀺 𑀯𑀢𑁆𑀢𑀩𑁆𑀩𑀁.

𑁫𑁫𑁬. 𑀅𑀥𑀺𑀧𑀢𑀺𑀫𑀽𑀮𑀓𑁂 𑀦𑀳𑁂𑀢𑀼𑀬𑀸 𑀤𑀲𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀲𑁆𑀲, 𑀦𑀲𑀳𑀚𑀸𑀢𑁂 𑀲𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀖𑀝𑀦𑁂𑀲𑀼 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀖𑀝𑀺𑀢𑁂 𑀫𑀽𑀮𑀪𑀸𑀯𑁂𑀦 𑀞𑀺𑀢𑁂 𑀧𑀘𑁆𑀘𑀬𑁂 𑀬𑁂 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀬𑁂 𑀘 𑀢𑀺𑀝𑁆𑀞𑀦𑁆𑀢𑀺, 𑀢𑁂 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑁂 𑀥𑀫𑁆𑀫𑀸 𑀞𑀺𑀢𑀸 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀕𑀡𑀦𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑀖𑀝𑀺𑀢𑁂 𑀳𑀺 𑀫𑀽𑀮𑀪𑀸𑀯𑁂𑀦 𑀞𑀧𑁂𑀢𑁆𑀯𑀸 𑀖𑀝𑀺𑀢𑀸𑀯𑀲𑁂𑀲𑀸 𑀧𑀘𑁆𑀘𑀬𑀸 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑀸𑀢𑀺 𑀢𑀢𑁆𑀣 𑀮𑀤𑁆𑀥𑀸𑀬𑁂𑀯 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀲𑀫𑀸𑀦𑀸 𑀊𑀦𑀸 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁬𑁩𑁧. 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀼𑀮𑁄𑀫𑀢𑁄 𑀬𑁄𑀚𑀺𑀬𑀫𑀸𑀦𑁂𑀦 𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀲𑁆𑀲 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀳𑀸𑀧𑀦𑀕𑀡𑀦𑀸𑀬 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀢𑁆𑀢𑀜𑁆𑀘 𑀦 𑀏𑀓𑀦𑁆𑀢𑀺𑀓𑀁. 𑀦𑀳𑁂𑀢𑀼𑀦𑀸𑀭𑀫𑁆𑀫𑀡𑀤𑀼𑀓𑀲𑁆𑀲 𑀳𑀺 𑀕𑀡𑀦𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀬𑁄𑀚𑀺𑀬𑀫𑀸𑀦𑁂𑀦 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀧𑀭𑀺𑀳𑀻𑀦𑀸𑀧𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀮𑀤𑁆𑀥𑀕𑀡𑀦𑀸𑀬 𑀦 𑀲𑀫𑀸𑀦𑀸, 𑀅𑀣 𑀔𑁄 𑀢𑀢𑁄𑀧𑀺 𑀊𑀦𑀢𑀭𑀸 𑀳𑁄𑀢𑀻𑀢𑀺 𑀆𑀳 ‘‘𑀦 𑀧𑀦𑁂𑀢𑀁 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀕𑀘𑁆𑀙𑀢𑀻’’𑀢𑀺.

𑀦𑀺𑀲𑁆𑀲𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀲𑀳𑀚𑀸𑀢𑁂 𑀘 𑀅𑀦𑀼𑀮𑁄𑀫𑀢𑁄 𑀅𑀢𑀺𑀝𑁆𑀞𑀫𑀸𑀦𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀲𑀳𑀚𑀸𑀢𑀲𑁆𑀲 𑀘 𑀅𑀝𑁆𑀞𑀸𑀦𑀁 𑀧𑀸𑀓𑀝𑀦𑁆𑀢𑀺 𑀅𑀧𑀸𑀓𑀝𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀻’’𑀢𑀺 𑀆𑀳. 𑀆𑀳𑀸𑀭𑁂 𑀯𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀲𑀳𑀚𑀸𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀦𑀼𑀮𑁄𑀫𑀢𑁄 𑀅𑀢𑀺𑀝𑁆𑀞𑀫𑀸𑀦𑀸 𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀆𑀳𑀸𑀭𑁂 𑀯𑀸 𑀇𑀦𑁆𑀤𑁆𑀭𑀺𑀬𑁂 𑀯𑀸 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀳𑁂𑀢𑀼𑀆𑀤𑀬𑁄𑀧𑀺 𑀢𑀺𑀝𑁆𑀞𑀦𑁆𑀢𑀺. 𑀲𑀩𑁆𑀩𑀛𑀸𑀦𑀫𑀕𑁆𑀕𑁂𑀳𑀺 𑀧𑀦 𑀘𑀢𑀼𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀽𑀢𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀦 𑀘 𑀘𑀢𑀼𑀓𑁆𑀔𑀦𑁆𑀥𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀢𑀭𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀸𑀢𑀺 𑀆𑀭𑀫𑁆𑀫𑀡𑀫𑀺𑀲𑁆𑀲𑀸𑀦𑀫𑁆𑀧𑀺 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀤𑀲𑁆𑀲𑁂𑀢𑀺.

‘‘𑀇𑀦𑁆𑀤𑁆𑀭𑀺𑀬𑁂 𑀏𑀓𑀦𑁆𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀯𑀲𑁂𑀦𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀓𑀫𑁂𑀦 𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀇𑀤𑀁 𑀧𑀸𑀓𑀝𑀪𑀸𑀯𑀢𑁆𑀣𑀁 ‘‘𑀦𑀯𑀫𑀽𑀮𑀓𑀸𑀤𑀻𑀲𑀼 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻’’𑀢𑀺 𑀏𑀯𑀁 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀉𑀤𑁆𑀥𑀝𑀁. 𑀇𑀫𑀸𑀦𑀺 𑀘 𑀤𑁆𑀯𑁂 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀇𑀤𑀁 ‘‘𑀇𑀫𑀸𑀦𑀺 𑀘 𑀤𑁆𑀯𑁂 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁.