𑀧𑀼𑀘𑁆𑀙𑀸𑀯𑀸𑀭𑁄

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑀏𑀓𑁂𑀓𑀁 𑀢𑀺𑀓𑀤𑀼𑀓𑀦𑁆𑀢𑀺 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀜𑁆𑀘𑀸𑀢𑀺 𑀅𑀢𑁆𑀣𑁄, 𑀦 𑀢𑀺𑀓𑀤𑀼𑀓𑀦𑁆𑀢𑀺.

𑀧𑀘𑁆𑀘𑀬𑀸 𑀘𑁂𑀯𑀸𑀢𑀺 𑀬𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀘𑁆𑀘𑀢𑁆𑀣𑀁 𑀨𑀭𑀦𑁆𑀢𑀸 𑀓𑀼𑀲𑀮𑀸𑀤𑀺𑀧𑀘𑁆𑀘𑀬𑀸 𑀘𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑁂 𑀘 𑀔𑁄 𑀲𑀳𑀚𑀸𑀢𑀸𑀯𑀸’’𑀢𑀺. 𑀬𑁂𑀳𑀺 𑀧𑀦 𑀳𑁂𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑁂 𑀲𑀳𑀚𑀸𑀢𑀸𑀧𑀺 𑀳𑁄𑀦𑁆𑀢𑀺 𑀅𑀲𑀳𑀚𑀸𑀢𑀸𑀧𑀻𑀢𑀺. 𑀏𑀢𑁆𑀣 𑀧𑀝𑀺𑀘𑁆𑀘𑀲𑀳𑀚𑀸𑀢𑀯𑀸𑀭𑁂𑀳𑀺 𑀲𑀫𑀸𑀦𑀢𑁆𑀣𑁂𑀳𑀺 𑀧𑀝𑀺𑀘𑁆𑀘𑀲𑀳𑀚𑀸𑀢𑀸𑀪𑀺𑀥𑀸𑀦𑁂𑀳𑀺 𑀲𑀫𑀸𑀦𑀢𑁆𑀣𑀁 𑀩𑁄𑀥𑁂𑀦𑁆𑀢𑁂𑀦 𑀪𑀕𑀯𑀢𑀸 𑀧𑀘𑁆𑀙𑀺𑀫𑀯𑀸𑀭𑁂𑀦 𑀧𑀼𑀭𑀺𑀫𑀯𑀸𑀭𑁄, 𑀧𑀼𑀭𑀺𑀫𑀯𑀸𑀭𑁂𑀦 𑀘 𑀧𑀘𑁆𑀙𑀺𑀫𑀯𑀸𑀭𑁄 𑀘 𑀩𑁄𑀥𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀧𑀘𑁆𑀘𑀬𑀦𑀺𑀲𑁆𑀲𑀬𑀯𑀸𑀭𑁂𑀲𑀼 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁂𑀲𑀼 𑀘, 𑀏𑀯𑀜𑁆𑀘 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀁 𑀚𑀦𑀺𑀢𑀁 𑀳𑁄𑀢𑀻𑀢𑀺.

‘‘𑀢𑁂 𑀢𑁂 𑀧𑀦 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀓𑀼𑀲𑀮𑁄 𑀳𑁂𑀢𑀼 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁧) 𑀧𑀜𑁆𑀳𑀸𑀯𑀸𑀭𑀧𑀸𑀞𑁄𑀢𑀺 𑀧𑀫𑀸𑀤𑀮𑁂𑀔𑀸 𑀏𑀲𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑀧𑀸𑀞𑀫𑁂𑀯 𑀧𑀞𑀦𑁆𑀢𑀺. 𑀧𑀼𑀭𑀺𑀫𑀯𑀸𑀭𑁂𑀲𑀼 𑀲𑀳𑀚𑀸𑀢𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁂𑀳𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀦𑀺𑀬𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀬𑀫𑁂 𑀓𑀼𑀲𑀮𑀸𑀤𑀻𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀉𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, 𑀦 𑀢𑀢𑁆𑀣 ‘‘𑀇𑀫𑁂 𑀦𑀸𑀫 𑀢𑁂 𑀥𑀫𑁆𑀫𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸’’𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁫) 𑀏𑀯𑀫𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑁂 𑀧𑀝𑀺𑀘𑁆𑀘𑀢𑁆𑀣𑀸𑀤𑀺𑀨𑀭𑀡𑀓𑀪𑀸𑀯𑁂 𑀳𑁂𑀢𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀳𑁂𑀢𑀸𑀤𑀺𑀧𑀘𑁆𑀘𑀬𑀸𑀦𑀁 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀦 𑀯𑀺𑀪𑀢𑁆𑀢𑀸, 𑀇𑀥 𑀧𑀦 ‘‘𑀲𑀺𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸 𑀓𑀼𑀲𑀮𑀸𑀤𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀦𑀺𑀘𑁆𑀙𑀺𑀢𑀸, 𑀦 𑀓𑁄𑀘𑀺 𑀧𑀼𑀘𑁆𑀙𑀸𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑁄 𑀅𑀦𑀺𑀘𑁆𑀙𑀺𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀧𑀺 𑀢𑁂 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀯𑀺𑀪𑀢𑁆𑀢𑀸’’𑀢𑀺. 𑀧𑀜𑁆𑀳𑀸 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀲𑀩𑁆𑀩𑀢𑁆𑀣 𑀲𑀫𑀸𑀦𑀦𑁆𑀢𑀺 𑀦 𑀢𑀁 𑀲𑀦𑁆𑀥𑀸𑀬 𑀦𑀺𑀚𑁆𑀚𑀝𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀉𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀧𑀼𑀘𑁆𑀙𑀸𑀫𑀢𑁆𑀢𑁂𑀦𑁂𑀯 𑀉𑀧𑁆𑀧𑀢𑁆𑀢𑀺𑀬𑀸 𑀞𑀧𑀺𑀢𑀢𑁆𑀢𑀸 𑀧𑀓𑀸𑀲𑀺𑀢𑀢𑁆𑀢𑀸, 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀸 𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁨𑁫-𑁩𑁪. 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀯𑀺𑀥𑀺𑀧𑀼𑀘𑁆𑀙𑀸. 𑀓𑀺𑀁 𑀲𑀺𑀬𑀸𑀢𑀺 𑀏𑀲𑁄 𑀯𑀺𑀥𑀺 𑀓𑀺𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀲𑀺𑀬𑀸, 𑀅𑀣 𑀦 𑀲𑀺𑀬𑀸𑀢𑀺 𑀲𑀫𑁆𑀧𑀼𑀘𑁆𑀙𑀦𑀁 𑀯𑀸 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀯𑀤𑀢𑀺. 𑀓𑀺𑀫𑀺𑀤𑀁 𑀲𑀫𑁆𑀧𑀼𑀘𑁆𑀙𑀦𑀁 𑀦𑀸𑀫? 𑀲𑀫𑁂𑀘𑁆𑀘 𑀧𑀼𑀘𑁆𑀙𑀦𑀁, ‘‘𑀓𑀺𑀁 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬, 𑀅𑀣 𑀅𑀪𑀺𑀥𑀫𑁆𑀫’’𑀦𑁆𑀢𑀺 𑀅𑀜𑁆𑀜𑁂𑀦 𑀲𑀳 𑀲𑀫𑁆𑀧𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸, 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺 𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀧𑀘𑁆𑀘𑀬𑁂𑀲𑀼𑀧𑀺 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 𑀧𑀯𑀢𑁆𑀢𑀺𑀢𑁄 ‘‘𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀯𑀺𑀧𑀸𑀓𑀧𑀘𑁆𑀘𑀬𑀸, 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀢𑀣𑀸 𑀘 𑀲𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀯𑀺𑀧𑀸𑀓𑀧𑀘𑁆𑀘𑀬𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀪𑀯𑀦𑀲𑁆𑀲 𑀧𑀼𑀘𑁆𑀙𑀦𑀢𑁄 𑀓𑀼𑀲𑀮𑀸𑀦𑀁 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀢𑀁𑀢𑀁𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀝𑀺𑀘𑁆𑀘 𑀪𑀯𑀦𑀫𑀢𑁆𑀣𑀺𑀢𑀸 𑀏𑀢𑁆𑀣 𑀧𑀼𑀘𑁆𑀙𑀺𑀢𑀸, 𑀅𑀣 𑀔𑁄 𑀉𑀧𑁆𑀧𑀢𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀧𑁆𑀧𑀢𑁆𑀢𑀺𑀬𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺, 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀲𑀤𑁄𑀲𑁄𑀢𑀺 ‘‘𑀅𑀣 𑀯𑀸’’𑀢𑀺 𑀅𑀢𑁆𑀣𑀦𑁆𑀢𑀭𑀯𑀘𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀣 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀲𑀺𑀬𑀸 𑀏𑀢’’𑀦𑁆𑀢𑀺 𑀢𑀲𑁆𑀲𑀸 𑀳𑁂𑀢𑀼𑀧𑀘𑁆𑀘𑀬𑀸 𑀪𑀯𑀦𑀧𑀼𑀘𑁆𑀙𑀦𑀁, ‘‘𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑀲𑁆𑀲𑀸 ‘‘𑀲𑀺𑀬𑀸 𑀏𑀢’’𑀦𑁆𑀢𑀺 𑀪𑀯𑀦𑀧𑀼𑀘𑁆𑀙𑀦𑀜𑁆𑀘 𑀦 𑀬𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀢𑀜𑁆𑀳𑀺 𑀦𑀺𑀘𑁆𑀙𑀺𑀢𑀫𑁂𑀯𑀸𑀢𑀺. 𑀢𑀲𑁆𑀫𑀸 𑀅𑀦𑀦𑀼𑀚𑀸𑀦𑀺𑀢𑁆𑀯𑀸 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀦𑀁 𑀓𑀺𑀁 𑀲𑀺𑀬𑀸𑀢𑀺 𑀧𑀼𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀸 𑀇𑀤𑀫𑁆𑀧𑀺 𑀲𑀫𑁆𑀧𑀼𑀘𑁆𑀙𑀦𑀫𑁂𑀯, 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀺𑀁 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀲𑀺𑀬𑀸𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀲𑁆𑀲 𑀲𑀫𑁆𑀪𑀯𑀁 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀏𑀯𑀁 𑀉𑀧𑁆𑀧𑀚𑁆𑀚𑀦𑀁 𑀲𑀺𑀬𑀸 𑀲𑀫𑁆𑀪𑀯𑁂𑀬𑁆𑀬𑀸’’𑀢𑀺, 𑀅𑀬𑀁 𑀦𑀬𑁄 𑀲𑀺𑀬𑀸𑀲𑀤𑁆𑀤𑀲𑁆𑀲 𑀧𑀘𑁆𑀙𑀸𑀬𑁄𑀚𑀦𑁂. 𑀬𑀣𑀸𑀞𑀸𑀦𑁂𑀬𑁂𑀯 𑀧𑀦 𑀞𑀺𑀢𑀸 ‘‘𑀲𑀺𑀬𑀸’’𑀢𑀺 𑀏𑀲𑀸 𑀲𑀸𑀫𑀜𑁆𑀜𑀧𑀼𑀘𑁆𑀙𑀸, 𑀢𑀸𑀬 𑀧𑀦 𑀧𑀼𑀘𑁆𑀙𑀸𑀬 ‘‘𑀇𑀤𑀁 𑀦𑀸𑀫 𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀲𑁆𑀲𑀸𑀬𑁂𑀯 𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀧𑀼𑀘𑁆𑀙𑀢𑀺, 𑀏𑀯𑀁 𑀯𑀺𑀲𑁂𑀲𑀺𑀢𑀩𑁆𑀩𑀯𑀺𑀲𑁂𑀲𑀦𑀪𑀸𑀯𑁂𑀦 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸 𑀏𑀓𑀸𑀬𑁂𑀯 𑀧𑀼𑀘𑁆𑀙𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀕𑀫𑀦𑀼𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀕𑀫𑀦𑀲𑁆𑀲 𑀲𑀫𑀸𑀦𑀓𑀢𑁆𑀢𑀼𑀓𑀧𑀘𑁆𑀙𑀺𑀫𑀓𑀸𑀮𑀓𑀺𑀭𑀺𑀬𑀸𑀧𑁂𑀓𑁆𑀔𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀧𑀝𑀺𑀕𑀫𑀦𑀼𑀧𑁆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀸 𑀦𑀢𑁆𑀣𑀺, 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺 𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀅𑀢𑁆𑀢𑀧𑀝𑀺𑀮𑀸𑀪𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀕𑀫𑀦𑀼𑀧𑁆𑀧𑀢𑁆𑀢𑀺𑀓𑀺𑀭𑀺𑀬𑀸𑀦𑀫𑁆𑀧𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀯𑁄𑀳𑀸𑀭𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀕𑀫𑀦𑀁 𑀯𑀸 𑀉𑀧𑁆𑀧𑀢𑁆𑀢𑀺 𑀏𑀯𑀸𑀢𑀺 𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀕𑀫𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀧𑀝𑀺𑀉𑀧𑁆𑀧𑀚𑁆𑀚𑀦𑀁 𑀲𑀫𑀸𑀦𑀓𑀺𑀭𑀺𑀬𑀸. 𑀧𑀝𑀺𑀓𑀭𑀡𑀜𑁆𑀳𑀺 𑀧𑀝𑀺𑀲𑀤𑁆𑀤𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀓𑀼𑀲𑀮𑀁 𑀥𑀫𑁆𑀫’’𑀦𑁆𑀢𑀺 𑀉𑀧𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀁 𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀝𑀺𑀘𑁆𑀘 𑀢𑀤𑀸𑀬𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀕𑀦𑁆𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄, 𑀢𑁂𑀦 𑀧𑀝𑀺𑀘𑁆𑀘𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀪𑀺𑀫𑀼𑀔𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀝𑀺𑀕𑀫𑀦𑀁, 𑀢𑀁 𑀓𑀢𑁆𑀯𑀸𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑁄𑀢𑀺.

𑁩𑁫-𑁩𑁮. 𑀢𑀸𑀲𑀼 𑀧𑀸𑀴𑀺𑀬𑀁 𑀤𑁆𑀯𑁂𑀬𑁂𑀯 𑀤𑀲𑁆𑀲𑀺𑀢𑀸𑀢𑀺 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀏𑀓𑀫𑀽𑀮𑀓𑀸𑀤𑀺𑀪𑀸𑀯𑁄 𑀧𑀼𑀘𑁆𑀙𑀸𑀦𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀧𑀘𑁆𑀘𑀬𑀸𑀦𑀁 𑀧𑀦 𑀯𑀲𑁂𑀦 𑀲𑀩𑁆𑀩𑀧𑀞𑀫𑁄 𑀧𑀘𑁆𑀘𑀬𑀦𑁆𑀢𑀭𑁂𑀦 𑀅𑀯𑁄𑀫𑀺𑀲𑁆𑀲𑀓𑀢𑁆𑀢𑀸 𑀲𑀼𑀤𑁆𑀥𑀺𑀓𑀦𑀬𑁄, 𑀤𑀼𑀢𑀺𑀬𑁄 𑀆𑀭𑀫𑁆𑀫𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑁂𑀢𑀼 𑀏𑀯 𑀏𑀓𑀫𑀽𑀮𑀓𑀦𑁆𑀢𑀺 𑀓𑀢𑁆𑀯𑀸 𑀏𑀓𑀫𑀽𑀮𑀓𑀦𑀬𑁄. 𑀏𑀯𑀁 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑀸𑀤𑀻𑀦𑀁 𑀅𑀥𑀺𑀧𑀢𑀺𑀆𑀤𑀻𑀦𑀁 𑀫𑀽𑀮𑀪𑀸𑀯𑀢𑁄 𑀤𑀼𑀓𑀫𑀽𑀮𑀓𑀸𑀤𑀬𑁄 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀯𑀻𑀲𑀢𑀺𑀫𑀽𑀮𑀓𑀦𑀬𑁄 𑀘 𑀢𑀢𑁄 𑀧𑀭𑀁 𑀫𑀽𑀮𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀢𑀢𑁆𑀣 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁂𑀦 𑀏𑀓…𑀧𑁂… 𑀲𑀩𑁆𑀩𑀫𑀽𑀮𑀓𑀁 𑀧𑀘𑁆𑀘𑀬𑀕𑀫𑀦𑀁 𑀧𑀸𑀴𑀺𑀕𑀫𑀦𑀁 𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀓…𑀧𑁂… 𑀲𑀩𑁆𑀩𑀫𑀽𑀮𑀓𑀁 𑀦𑀬𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦𑀸𑀢𑀺 𑀉𑀧𑀬𑁄𑀕𑁄 𑀯𑀸, 𑀇𑀥 𑀘 𑀲𑀩𑁆𑀩𑀫𑀽𑀮𑀓𑀦𑁆𑀢𑀺 𑀘 𑀢𑁂𑀯𑀻𑀲𑀢𑀺𑀫𑀽𑀮𑀓𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀦𑀻𑀬𑁂 𑀯𑀓𑁆𑀔𑀢𑀺 ‘‘𑀬𑀣𑀸 𑀅𑀦𑀼𑀮𑁄𑀫𑁂 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀁…𑀧𑁂… 𑀬𑀸𑀯 𑀢𑁂𑀯𑀻𑀲𑀢𑀺𑀫𑀽𑀮𑀓𑀁, 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁪𑁨-𑁪𑁪).

𑁩𑁯-𑁪𑁦. ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀬𑁄𑀲𑀸𑀦𑁄 𑀏𑀓𑀫𑀽𑀮𑀓𑀦𑀬𑁄 𑀤𑀲𑁆𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀯𑀺𑀦𑀬𑁂 𑀯𑀺𑀬 𑀘𑀓𑁆𑀓𑀩𑀦𑁆𑀥𑀦𑀯𑀲𑁂𑀦 𑀧𑀸𑀴𑀺𑀕𑀢𑀺 𑀆𑀧𑀚𑁆𑀚𑀢𑀺, 𑀦 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦. 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀘 𑀇𑀥 𑀅𑀪𑀺𑀥𑀫𑁆𑀫𑁂 𑀧𑀸𑀴𑀺 𑀕𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀢𑀻𑀡𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀦𑀯, 𑀆𑀭𑀫𑁆𑀫𑀡𑁂 𑀢𑀻𑀡𑀻’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀺𑀫𑀁 𑀲𑁄𑀥𑁂𑀢𑁆𑀯𑀸𑀯 𑀧𑀸𑀴𑀺 𑀧𑀯𑀢𑁆𑀢𑀸. 𑀬𑁄 𑀘𑁂𑀢𑁆𑀣 ‘‘𑀏𑀓𑀫𑀽𑀮𑀓𑀦𑀬𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑀼𑀤𑁆𑀥𑀺𑀓𑀦𑀬𑁄𑀯. 𑀲𑁄 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦 𑀮𑀩𑁆𑀪𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑀸𑀤𑀻𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑁂𑀧𑀺 𑀧𑀘𑁆𑀘𑀬𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑁂𑀦 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀲𑀼𑀤𑁆𑀥𑀺𑀓𑀢𑁄 𑀯𑀺𑀲𑁂𑀲𑀢𑁆𑀣𑁄 𑀮𑀩𑁆𑀪𑀢𑀺, 𑀢𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀲𑀼𑀤𑁆𑀥𑀺𑀓𑀦𑀬𑁄 𑀦 𑀤𑀲𑁆𑀲𑀺𑀢𑁄𑀢𑀺, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸…𑀧𑁂… 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁩𑁯) 𑀅𑀬𑀁 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀓𑁂 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄 𑀏𑀓𑀫𑀽𑀮𑀓𑀦𑀬𑁄 𑀤𑀝𑁆𑀞𑀩𑁆𑀩𑁄. ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀯𑀸 𑀏𑀓𑀫𑀽𑀮𑀓𑁂𑀲𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑁆𑀲 𑀫𑀽𑀮𑀓𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀦𑀺 𑀲𑀁𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀫𑀽𑀮𑀓𑀲𑁆𑀲𑀸𑀯𑀲𑀸𑀦𑁂𑀦 𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸 𑀲𑀳𑀚𑀸𑀢𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀢𑀺 𑀇𑀤𑀁 𑀫𑀽𑀮𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀦𑀁 𑀲𑀁𑀔𑀺𑀧𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀲𑀼𑀤𑁆𑀥𑀺𑀓𑀤𑀲𑁆𑀲𑀦𑀁, 𑀦𑀸𑀧𑀺 𑀲𑀩𑁆𑀩𑀫𑀽𑀮𑀓𑁂 𑀓𑀢𑀺𑀧𑀬𑀧𑀘𑁆𑀘𑀬𑀤𑀲𑁆𑀲𑀦𑀁.

𑁪𑁧. 𑀢𑀢𑁄 𑀦𑀺𑀲𑁆𑀲𑀬𑀸𑀤𑀻𑀦𑀺 𑀫𑀽𑀮𑀸𑀦𑀺𑀧𑀺 𑀲𑀁𑀔𑀺𑀧𑀺𑀢𑁆𑀯𑀸 𑀅𑀯𑀺𑀕𑀢𑀫𑀽𑀮𑀓𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑀲𑁆𑀫𑀺𑀜𑁆𑀘 𑀲𑀼𑀤𑁆𑀥𑀺𑀓𑀲𑁆𑀲 𑀅𑀤𑀲𑁆𑀲𑀦𑁂𑀦 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀼𑀤𑁆𑀥𑀺𑀓𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀜𑀸𑀧𑀺𑀢𑁄 𑀳𑁄𑀢𑀺. 𑀦 𑀳𑀺 𑀆𑀤𑀺 𑀓𑀢𑁆𑀣𑀘𑀺 𑀲𑀁𑀔𑁂𑀧𑀦𑁆𑀢𑀭𑀕𑀢𑁄 𑀳𑁄𑀢𑀺. 𑀆𑀤𑀺𑀅𑀦𑁆𑀢𑁂𑀳𑀺 𑀫𑀚𑁆𑀛𑀺𑀫𑀸𑀦𑀁 𑀤𑀲𑁆𑀲𑀦𑀜𑁆𑀳𑀺 𑀲𑀗𑁆𑀔𑁂𑀧𑁄, 𑀆𑀤𑀺𑀢𑁄 𑀧𑀪𑀼𑀢𑀺 𑀓𑀢𑀺𑀘𑀺 𑀯𑀢𑁆𑀯𑀸 𑀕𑀢𑀺𑀤𑀲𑁆𑀲𑀦𑀁 𑀯𑀸𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑀁 𑀯𑀢𑁆𑀯𑀸 ‘‘𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀁. 𑀢𑁂𑀦 𑀑𑀲𑀸𑀦𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑀺. 𑀢𑀢𑀺𑀬𑀘𑀢𑀼𑀓𑁆𑀓𑀢𑁄 𑀧𑀪𑀼𑀢𑀺 𑀯𑀸 𑀧𑀜𑁆𑀘𑀓𑀫𑀽𑀮𑀸𑀦𑀺 𑀲𑀁𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀫𑀽𑀮𑀓𑀲𑁆𑀲 𑀅𑀯𑀲𑀸𑀦𑁂𑀦 𑀦𑀺𑀝𑁆𑀞𑀧𑁂𑀢𑀺.

𑀏𑀢𑁆𑀣 𑀘 𑀤𑀼𑀓𑀫𑀽𑀮𑀓𑀸𑀤𑀻𑀲𑀼 𑀬𑀣𑀸 𑀳𑁂𑀢𑀼𑀆𑀭𑀫𑁆𑀫𑀡𑀤𑀼𑀓𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀸 𑀧𑀘𑁆𑀘𑀬𑀸 𑀬𑁄𑀚𑀺𑀢𑀸, 𑀳𑁂𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀢𑀺𑀓𑀸𑀤𑀻𑀳𑀺 𑀘 𑀅𑀯𑀲𑁂𑀲𑀸𑀯𑀲𑁂𑀲𑀸, 𑀏𑀯𑀁 𑀳𑁂𑀢𑀼𑀅𑀥𑀺𑀧𑀢𑀺𑀤𑀼𑀓𑀸𑀤𑀻𑀳𑀺 𑀳𑁂𑀢𑀼𑀅𑀥𑀺𑀧𑀢𑀺𑀅𑀦𑀦𑁆𑀢𑀭𑀢𑀺𑀓𑀸𑀤𑀻𑀳𑀺 𑀘 𑀅𑀯𑀲𑁂𑀲𑀸𑀯𑀲𑁂𑀲𑀸 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀼𑀁. 𑀬𑀤𑀺 𑀘 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸𑀦𑀁 𑀫𑀽𑀮𑀪𑀸𑀯𑁂𑀦 𑀬𑁄𑀚𑀺𑀢𑀢𑁆𑀢𑀸 𑀳𑁂𑀢𑀼𑀫𑀽𑀮𑀓𑁂 𑀳𑁂𑀢𑀼𑀅𑀥𑀺𑀧𑀢𑀺𑀆𑀤𑀺𑀤𑀼𑀓𑀸𑀦𑀁 𑀅𑀥𑀺𑀧𑀢𑀺𑀫𑀽𑀮𑀓𑀸𑀤𑀻𑀲𑀼 𑀅𑀥𑀺𑀧𑀢𑀺𑀳𑁂𑀢𑀼𑀆𑀤𑀺𑀤𑀼𑀓𑁂𑀳𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀢𑁂 𑀏𑀯 𑀳𑀺 𑀧𑀘𑁆𑀘𑀬𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀤𑀼𑀓𑀸𑀤𑀻𑀦𑀁 𑀅𑀯𑀲𑁂𑀲𑀸𑀯𑀲𑁂𑀲𑁂𑀳𑀺, 𑀳𑁂𑀢𑀼𑀫𑀽𑀮𑀓𑁂 𑀘 𑀳𑁂𑀢𑀼𑀅𑀥𑀺𑀧𑀢𑀺𑀅𑀦𑀦𑁆𑀢𑀭𑀢𑀺𑀓𑀸𑀤𑀻𑀦𑀁 𑀅𑀯𑀲𑁂𑀲𑀸𑀯𑀲𑁂𑀲𑁂𑀳𑀺 𑀬𑁄𑀚𑀦𑁂 𑀅𑀢𑁆𑀣𑀺 𑀯𑀺𑀲𑁂𑀲𑁄𑀢𑀺. 𑀬𑀲𑁆𑀫𑀸 𑀧𑀦 𑀏𑀯𑀁 𑀬𑁄𑀚𑀺𑀬𑀫𑀸𑀦𑁂𑀲𑀼𑀧𑀺 𑀲𑀼𑀔𑀕𑁆𑀕𑀳𑀡𑀁 𑀦 𑀳𑁄𑀢𑀺, 𑀦 𑀘 𑀬𑀣𑀸𑀯𑀼𑀢𑁆𑀢𑀸𑀬 𑀬𑁄𑀚𑀦𑀸𑀬 𑀲𑀩𑁆𑀩𑀸 𑀲𑀸 𑀬𑁄𑀚𑀦𑀸 𑀧𑀜𑁆𑀜𑀯𑀢𑀸 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀢𑀲𑁆𑀫𑀸 𑀢𑀣𑀸 𑀅𑀬𑁄𑀚𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦𑁂𑀯 𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸𑀯𑀺𑀥𑀸𑀦𑁂 𑀳𑀺 𑀪𑀕𑀯𑀸𑀯 𑀧𑀫𑀸𑀡𑀦𑁆𑀢𑀺. 𑀕𑀡𑀦𑀸𑀕𑀸𑀣𑀸 𑀆𑀤𑀺𑀫𑀧𑀸𑀞𑁂 𑀓𑀸𑀘𑀺 𑀯𑀺𑀭𑀼𑀤𑁆𑀥𑀸, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀕𑀡𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

‘‘𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀸𑀦𑀁 𑀲𑀢𑁂𑀦 𑀲𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀓𑁂𑀲𑀜𑁆𑀘𑀺 𑀧𑁄𑀢𑁆𑀣𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑁂𑀲𑀼𑀘𑀺 𑀧𑀦 𑀏𑀓𑁂𑀓𑁄 𑀤𑀼𑀓𑁄 𑀤𑁆𑀯𑀸𑀯𑀻𑀲𑀢𑀺𑀬𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀬𑁄𑀚𑀺𑀢𑁄, 𑀢𑀜𑁆𑀘 𑀕𑀫𑀦𑀁 𑀬𑀼𑀢𑁆𑀢𑀁. 𑀦 𑀳𑀺 𑀢𑀢𑁆𑀣 𑀢𑀺𑀓𑀲𑁆𑀲 𑀬𑁄𑀚𑀦𑀸 𑀅𑀢𑁆𑀣𑀺, 𑀅𑀣 𑀔𑁄 𑀢𑀺𑀓𑀸𑀦𑀁 𑀏𑀓𑁂𑀓𑁂𑀦 𑀧𑀤𑁂𑀦 𑀤𑀼𑀓𑀲𑁆𑀲𑀸𑀢𑀺. 𑀢𑀢𑁆𑀣 𑀙𑀲𑀝𑁆𑀞𑀺𑀬𑀸 𑀢𑀺𑀓𑀧𑀤𑁂𑀲𑀼 𑀏𑀓𑁂𑀓𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀙𑀲𑀝𑁆𑀞𑀺 𑀳𑁂𑀢𑀼𑀤𑀼𑀓𑀸, 𑀢𑀣𑀸 𑀲𑀳𑁂𑀢𑀼𑀓𑀤𑀼𑀓𑀸𑀤𑀬𑁄 𑀘𑀸𑀢𑀺 𑀤𑀼𑀓𑀸𑀦𑀁 𑀙𑀲𑀢𑀸𑀥𑀺𑀓𑀸𑀦𑀺 𑀙𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀲𑀢𑁆𑀢 𑀯𑀸𑀭𑀸 𑀦𑀬𑀸 𑀧𑀼𑀘𑁆𑀙𑀸 𑀘 𑀲𑀩𑁆𑀩𑀸 𑀤𑀼𑀓𑀧𑀝𑁆𑀞𑀸𑀦𑁂 𑀳𑁂𑀢𑀼𑀤𑀼𑀓𑁂𑀦 𑀲𑀫𑀸𑀦𑀸.

‘‘𑀤𑀼𑀓𑀲𑀢𑁂 𑀏𑀓𑁂𑀓𑀁 𑀤𑀼𑀓𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 𑀓𑁂𑀲𑀜𑁆𑀘𑀺 𑀧𑁄𑀢𑁆𑀣𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀬𑀼𑀢𑁆𑀢𑀕𑀫𑀦𑁂𑀲𑀼 𑀏𑀓𑁂𑀓𑁄 𑀢𑀺𑀓𑁄 𑀤𑀼𑀓𑀲𑀢𑁂𑀦 𑀬𑁄𑀚𑀺𑀢𑁄. 𑀢𑀢𑁆𑀣 𑀳𑁂𑀢𑀼𑀧𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁄 𑀏𑀓𑁄 𑀓𑀼𑀲𑀮𑀢𑁆𑀢𑀺𑀓𑁄, 𑀢𑀣𑀸 𑀦𑀳𑁂𑀢𑀼𑀧𑀤𑀁…𑀧𑁂… 𑀅𑀭𑀡𑀧𑀤𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀦𑀁 𑀤𑁆𑀯𑁂 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀦𑀫𑁆𑀧𑀻𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀲𑀢𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑀦𑀬𑀧𑀼𑀘𑁆𑀙𑀸 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀫𑀸𑀦𑀸.

‘‘𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀘𑀦𑀢𑁄 𑀧𑀦𑀸𑀢𑀺 𑀏𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀦𑀼𑀮𑁄𑀫𑀫𑁆𑀳𑀻’’𑀢𑀺 ‘‘𑀢𑀺𑀓𑀸𑀤𑀬𑁄 𑀙𑀦𑀬𑀸’’𑀢𑀺 𑀘 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀫𑁆𑀧𑀺 𑀅𑀦𑀼𑀮𑁄𑀫𑀁 𑀲𑀳 𑀕𑀳𑁂𑀢𑁆𑀯𑀸 ‘‘𑀙 𑀅𑀦𑀼𑀮𑁄𑀫𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀢𑀺𑀓𑀧𑀝𑁆𑀞𑀸𑀦𑀁 𑀲𑀳 𑀕𑀳𑁂𑀢𑁆𑀯𑀸 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭’’𑀦𑁆𑀢𑀺, 𑀢𑀣𑀸 𑀘𑀢𑀼𑀩𑁆𑀩𑀺𑀥𑀸𑀦𑀺 𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀦𑀺 𑀲𑀳 𑀕𑀳𑁂𑀢𑁆𑀯𑀸 ‘‘𑀤𑀼𑀓𑀼𑀢𑁆𑀢𑀫’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀲𑀢𑁆𑀢𑀧𑁆𑀧𑀪𑁂𑀤𑁂 𑀙𑀧𑀺 𑀏𑀢𑁂 𑀧𑀝𑁆𑀞𑀸𑀦𑀸 𑀧𑀝𑁆𑀞𑀸𑀦𑀦𑀬𑀸 𑀘𑀢𑀼𑀧𑁆𑀧𑀪𑁂𑀤𑀸 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺. 𑀏𑀯𑀜𑁆𑀳𑀺 𑀲𑀩𑁆𑀩𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀲𑀩𑁆𑀩𑁄 𑀧𑀘𑁆𑀘𑀬𑀸𑀦𑀼𑀮𑁄𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀧𑀘𑁆𑀘𑀦𑀻𑀬𑀕𑀸𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀲𑁂𑀲𑀺𑀢𑀩𑁆𑀩𑁂𑀳𑀺 𑀢𑀺𑀓𑁂𑀳𑀺 𑀧𑀝𑁆𑀞𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀁. 𑀤𑀼𑀓𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁. 𑀤𑀼𑀓𑀯𑀺𑀲𑁂𑀲𑀺𑀢𑀸 𑀯𑀸 𑀢𑀺𑀓𑀸 𑀤𑀼𑀓𑀢𑀺𑀓𑀸, 𑀤𑀼𑀓𑀢𑀺𑀓𑀸𑀦𑀁 𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑀸𑀤𑀺𑀯𑀺𑀲𑁂𑀲𑀺𑀢𑀲𑁆𑀲 𑀘𑁂𑀢𑁆𑀣 𑀢𑀺𑀓𑀸𑀤𑀺𑀧𑀤𑀲𑁆𑀲 𑀤𑀼𑀓𑀸𑀤𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀓𑀧𑀝𑁆𑀞𑀸𑀦𑀫𑁂𑀯 𑀳𑀺 𑀢𑀺𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀤𑀼𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀜𑁆𑀘, 𑀢𑀣𑀸 𑀢𑀺𑀓𑀧𑀝𑁆𑀞𑀸𑀦𑀫𑁂𑀯 𑀤𑀼𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀢𑀺𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀜𑁆𑀘𑀸𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁨-𑁪𑁪. 𑀢𑁂𑀯𑀻𑀲𑀢𑀺𑀫𑀽𑀮𑀓𑀦𑁆𑀢𑀺 𑀇𑀤𑀜𑁆𑀘𑁂𑀢𑁆𑀣 𑀤𑀼𑀫𑀽𑀮𑀓𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀤𑀼𑀓𑀫𑀽𑀮𑀓𑁂 𑀧𑀼𑀘𑁆𑀙𑀸𑀦𑀁 𑀫𑀽𑀮𑀪𑀽𑀢𑀸 𑀢𑁂𑀯𑀻𑀲𑀢𑀺 𑀤𑀼𑀓𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀢𑀲𑁆𑀲 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀬𑀸𑀯 𑀬𑀢𑁆𑀢𑀓𑁄 𑀧𑀪𑁂𑀤𑁄 𑀅𑀢𑁆𑀣𑀺, 𑀢𑀸𑀯 𑀢𑀢𑁆𑀢𑀓𑀁 𑀢𑁂𑀯𑀻𑀲𑀢𑀺𑀫𑀽𑀮𑀓𑀁 𑀬𑀣𑀸𑀦𑀼𑀮𑁄𑀫𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀼𑀓𑀫𑀽𑀮𑀓𑁂𑀦 𑀢𑀺𑀓𑀫𑀽𑀮𑀓𑀸𑀤𑀻𑀲𑀼 𑀦𑀬𑀁 𑀤𑀲𑁆𑀲𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀬𑀤𑀺 𑀧𑀦 𑀬𑀸𑀯 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮𑀁 𑀬𑀣𑀸 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, ‘‘𑀬𑀸𑀯 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮’’𑀦𑁆𑀢𑁆𑀯𑁂𑀯 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸. 𑀦 𑀳𑀺 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀏𑀢𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮𑀓𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀣𑀸 𑀅𑀦𑀼𑀮𑁄𑀫𑁂 ‘‘𑀏𑀓𑁂𑀓𑀧𑀤𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀦 𑀏𑀓𑀫𑀽𑀮𑀸𑀤𑀺𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀁 𑀢𑀢𑁆𑀣 𑀦𑀬𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑀁 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀲𑀩𑁆𑀩𑀫𑀽𑀮𑀓𑀫𑁂𑀯 𑀘𑁂𑀢𑁆𑀣 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀯𑀲𑁂𑀲𑀲𑁆𑀲 𑀧𑀘𑁆𑀘𑀬𑀲𑁆𑀲 𑀫𑀽𑀮𑀪𑀸𑀯𑀢𑁄 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀘 𑀢𑀢𑁄 𑀧𑀭𑀁 𑀫𑀽𑀮𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁫-𑁪𑁮. 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀓𑀫𑀽𑀮𑀓𑀸𑀤𑀻𑀲𑀼 𑀏𑀓𑁂𑀓𑀁 𑀧𑀤𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀢𑀢𑁆𑀣 𑀏𑀓𑀫𑀽𑀮𑀓𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀧𑀤𑀸𑀦𑀺 𑀇𑀥 𑀏𑀓𑀫𑀽𑀮𑀓𑁂 𑀢𑁂𑀯𑀻𑀲𑀢𑀺, 𑀏𑀓𑁄 𑀧𑀦 𑀧𑀘𑁆𑀘𑀬𑁄 𑀫𑀽𑀮𑀪𑀸𑀯𑁂𑀦 𑀞𑀺𑀢𑁄 𑀅𑀧𑀼𑀩𑁆𑀩𑀢𑀸𑀪𑀸𑀯𑀢𑁄 𑀅𑀕𑀡𑀦𑀽𑀧𑀕𑁄. 𑀢𑀢𑁆𑀣 𑀤𑀼𑀫𑀽𑀮𑀓𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀧𑀤𑀸𑀦𑀺 𑀕𑀡𑀦𑀽𑀧𑀕𑀸𑀦𑀺, 𑀇𑀥 𑀤𑀼𑀫𑀽𑀮𑀓𑁂 𑀤𑁆𑀯𑀸𑀯𑀻𑀲𑀢𑀻𑀢𑀺 𑀏𑀯𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲 𑀧𑀘𑁆𑀘𑀦𑀻𑀬𑀢𑁄 𑀅𑀮𑀩𑁆𑀪𑀫𑀸𑀦𑀸𑀦𑀁 𑀲𑀼𑀤𑁆𑀥𑀺𑀓𑀧𑀘𑁆𑀘𑀬𑀸𑀦𑀜𑁆𑀘 𑀅𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀮𑀩𑁆𑀪𑀫𑀸𑀦𑀧𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑀣𑀸 𑀧𑀼𑀘𑁆𑀙𑀸𑀯𑀲𑁂𑀦 𑀓𑁄𑀘𑀺 𑀧𑀘𑁆𑀘𑀬𑁄 𑀅𑀮𑀩𑁆𑀪𑀫𑀸𑀦𑁄 𑀦𑀸𑀫 𑀅𑀢𑁆𑀣𑀻𑀢𑀺. 𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑁂𑀦𑁂𑀯 𑀯𑀸 𑀧𑀯𑀢𑁆𑀢𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀤𑁂𑀲𑀦𑀁 𑀲𑀦𑁆𑀥𑀸𑀬 ‘‘𑀮𑀩𑁆𑀪𑀫𑀸𑀦𑀧𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀓𑀼𑀲𑀮𑀢𑁆𑀢𑀺𑀓𑀁