𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨-𑁩. 𑀔𑀦𑁆𑀥𑀬𑀫𑀓𑁂 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀧𑀼𑀕𑁆𑀕𑀮𑀑𑀓𑀸𑀲𑀧𑀼𑀕𑁆𑀕𑀮𑁄𑀓𑀸𑀲𑀯𑀲𑁂𑀦 𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀢𑁂𑀲𑀁 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸. 𑀢𑁂 𑀧𑀦 𑀔𑀦𑁆𑀥𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀤𑀲 𑀅𑀯𑀬𑀯𑀧𑀤𑀸𑀦𑀺. 𑀢𑀢𑁆𑀣 𑀬𑁄 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑀸𑀪𑀺𑀳𑀺𑀢𑁄 𑀥𑀫𑁆𑀫𑁄, 𑀓𑀺𑀁 𑀲𑁄 𑀏𑀯 𑀲𑀫𑀼𑀤𑀸𑀬𑀧𑀤𑀲𑁆𑀲 𑀅𑀢𑁆𑀣𑁄. 𑀬𑁄 𑀘 𑀲𑀫𑀼𑀤𑀸𑀬𑀧𑀤𑁂𑀦 𑀯𑀼𑀢𑁆𑀢𑁄, 𑀲𑁄 𑀏𑀯 𑀅𑀯𑀬𑀯𑀧𑀤𑀲𑁆𑀲𑀸𑀢𑀺 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀯𑀼𑀢𑁆𑀢𑁄 𑀏𑀓𑀤𑁂𑀲𑁄 𑀲𑀓𑀮𑁄 𑀯𑀸 𑀲𑀫𑀼𑀤𑀸𑀬𑀧𑀤𑀸𑀦𑀁 𑀅𑀢𑁆𑀣𑁄, 𑀲𑀫𑀼𑀤𑀸𑀬𑀧𑀤𑁂𑀳𑀺 𑀧𑀦 𑀯𑀼𑀢𑁆𑀢𑁄 𑀏𑀓𑀦𑁆𑀢𑁂𑀦 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑀸𑀦𑀁 𑀅𑀢𑁆𑀣𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀯𑀸𑀭𑁄 𑀯𑀼𑀢𑁆𑀢𑁄.

𑀧𑀼𑀦 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀁 𑀲𑀫𑀸𑀲𑀧𑀤𑀸𑀦𑀁 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀧𑀥𑀸𑀦𑀪𑀽𑀢𑀲𑁆𑀲 𑀔𑀦𑁆𑀥𑀧𑀤𑀲𑁆𑀲 𑀯𑁂𑀤𑀦𑀸𑀤𑀺𑀉𑀧𑀧𑀤𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄 𑀬𑀣𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 𑀭𑀽𑀧𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁄 𑀳𑁄𑀢𑀺 𑀭𑀽𑀧𑀲𑀤𑁆𑀤𑀲𑁆𑀲 𑀔𑀦𑁆𑀥𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄𑀢𑀺, 𑀏𑀯𑀁 𑀢𑀢𑁆𑀣 𑀧𑀥𑀸𑀦𑀪𑀽𑀢𑁂𑀦 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀳𑁄𑀢𑀺 𑀔𑀦𑁆𑀥𑀧𑀤𑁂𑀦 𑀯𑁂𑀤𑀦𑀸𑀤𑀺𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸𑀢𑀺 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄 𑀓𑁄𑀘𑀺 𑀓𑁂𑀦𑀘𑀺 𑀲𑀫𑀼𑀤𑀸𑀬𑀧𑀤𑁂𑀦 𑀯𑀼𑀘𑁆𑀘𑀢𑀺, 𑀦 𑀲𑀩𑁆𑀩𑁄 𑀲𑀩𑁆𑀩𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 𑀭𑀽𑀧𑀸𑀤𑀺𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁄, 𑀔𑀦𑁆𑀥𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄, 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀢𑁂𑀦𑁂𑀢𑁆𑀣 𑀲𑀁𑀲𑀬𑁄 𑀳𑁄𑀢𑀺 𑁋 𑀓𑀺𑀁 𑀔𑀦𑁆𑀥𑀢𑁄 𑀅𑀜𑁆𑀜𑀫𑁆𑀧𑀺 𑀭𑀽𑀧𑀁 𑀅𑀢𑁆𑀣𑀺, 𑀬𑀢𑁄 𑀯𑀺𑀦𑀺𑀯𑀢𑁆𑀢𑀁 𑀭𑀽𑀧𑀁 𑀔𑀦𑁆𑀥𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀯 𑀔𑀦𑁆𑀥𑀸 𑀓𑀺𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑁂𑀦 𑀭𑀽𑀧𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺, 𑀓𑀺𑀁 𑀧𑀦 𑀢𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀁 𑀭𑀽𑀧𑀦𑁆𑀢𑀺? 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀁 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸. 𑀦𑀺𑀤𑁆𑀤𑁂𑀲𑁂 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺. 𑀏𑀯𑀁 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀦 𑀔𑀦𑁆𑀥𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀅𑀢𑁆𑀣𑀺, 𑀢𑁂𑀦𑁂𑀯 𑀘𑁂𑀢𑁂𑀦 𑀭𑀽𑀧𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀲𑀼𑀤𑁆𑀥𑁂𑀦 𑀔𑀦𑁆𑀥𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑁂, 𑀦 𑀘 𑀲𑀩𑁆𑀩𑁂 𑀔𑀦𑁆𑀥𑀸 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑁂𑀦 𑀭𑀽𑀧𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀸, 𑀢𑁂𑀦𑁂𑀯 𑀢𑁂 𑀯𑀺𑀪𑀚𑀺𑀢𑀩𑁆𑀩𑀸, 𑀏𑀲 𑀦𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀯𑀼𑀢𑁆𑀢𑁄.

𑀢𑀢𑁄 ‘‘𑀭𑀽𑀧𑀁 𑀔𑀦𑁆𑀥𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀬𑀫𑀸𑀦𑁂 ‘‘𑀦 𑀓𑁂𑀯𑀮𑀁 𑀅𑀬𑀁 𑀔𑀦𑁆𑀥𑀲𑀤𑁆𑀤𑁄 𑀭𑀽𑀧𑀯𑀺𑀲𑁂𑀲𑀦𑁄𑀯, 𑀅𑀣 𑀔𑁄 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀦𑁄 𑀘𑀸’’𑀢𑀺 𑀭𑀽𑀧𑀲𑁆𑀲 𑀔𑀦𑁆𑀥𑀪𑀸𑀯𑀦𑀺𑀘𑁆𑀙𑀬𑀸𑀦𑀦𑁆𑀢𑀭𑀁 𑀔𑀦𑁆𑀥𑀸𑀦𑀁 𑀭𑀽𑀧𑀯𑀺𑀲𑁂𑀲𑀦𑀬𑁄𑀕𑁂 𑀘 𑀲𑀁𑀲𑀬𑁄 𑀳𑁄𑀢𑀺. 𑀢𑀢𑁆𑀣 𑀦 𑀲𑀩𑁆𑀩𑁂 𑀔𑀦𑁆𑀥𑀸 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀦𑀬𑀼𑀢𑁆𑀢𑀸, 𑀅𑀣 𑀔𑁄 𑀓𑁂𑀘𑀺 𑀓𑁂𑀦𑀘𑀺 𑀯𑀺𑀲𑁂𑀲𑀦𑁂𑀦 𑀬𑀼𑀜𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀬𑁂𑀲𑀁 𑀉𑀧𑁆𑀧𑀸𑀤𑀸𑀤𑀬𑁄 𑀯𑀢𑁆𑀢𑀩𑁆𑀩𑀸, 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀯𑀲𑁂𑀦 𑀢𑀦𑁆𑀦𑀺𑀘𑁆𑀙𑀬𑀢𑁆𑀣𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸𑀢𑀺 𑀏𑀢𑁆𑀣 𑀘𑀓𑁆𑀓𑀸𑀯𑀬𑀯𑀪𑀸𑀯𑀢𑁄 𑀘𑀓𑁆𑀓𑀸𑀦𑀻𑀢𑀺 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸𑀢𑀺. 𑀇𑀫𑀺𑀦𑀸 𑀳𑀺 𑀏𑀢𑁆𑀣 𑀅𑀢𑁆𑀣𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺 𑀬𑀣𑀸 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀫𑀽𑀮𑀧𑀤𑀁 𑀦𑀸𑀪𑀺𑀁 𑀓𑀢𑁆𑀯𑀸 ‘‘𑀔𑀦𑁆𑀥𑀸’’𑀢𑀺 𑀇𑀤𑀁 𑀦𑁂𑀫𑀺𑀁, ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀺 𑀅𑀭𑁂 𑀓𑀢𑁆𑀯𑀸 𑀘𑀓𑁆𑀓𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀦 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀦𑀢𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀤𑀻𑀲𑀼𑀧𑀺 𑀳𑀺 𑀳𑁂𑀝𑁆𑀞𑀺𑀫𑀁 𑀲𑁄𑀥𑁂𑀢𑁆𑀯𑀸𑀯 𑀧𑀸𑀞𑁄 𑀕𑀢𑁄, 𑀦 𑀫𑀡𑁆𑀟𑀮𑀲𑀫𑁆𑀩𑀦𑁆𑀥𑁂𑀦𑀸𑀢𑀺. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦𑀸𑀢𑀺 𑀲𑀼𑀤𑁆𑀥𑀔𑀦𑁆𑀥𑀮𑀸𑀪𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀔𑀦𑁆𑀥𑀯𑀺𑀲𑁂𑀲𑀦𑁂 𑀭𑀽𑀧𑀸𑀤𑀺𑀫𑁆𑀳𑀺 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀢𑀸𑀬 𑀅𑀝𑁆𑀞𑀢𑁆𑀯𑀸 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑀲𑀗𑁆𑀔𑀸𑀢𑀁 𑀭𑀽𑀧𑀸𑀤𑀺𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀔𑀦𑁆𑀥𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑁆𑀯𑀸 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀣𑀲𑁆𑀲 𑀯𑀺𑀪𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁬. 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁…𑀧𑁂… 𑀭𑀽𑀧𑀸 𑀮𑁄𑀓𑁂…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀭𑀽𑀧𑀲𑀜𑁆𑀜𑀸…𑀧𑁂… 𑀭𑀽𑀧𑀲𑀜𑁆𑀘𑁂𑀢𑀦𑀸…𑀧𑁂… 𑀭𑀽𑀧𑀢𑀡𑁆𑀳𑀸…𑀧𑁂… 𑀭𑀽𑀧𑀯𑀺𑀢𑀓𑁆𑀓𑁄…𑀧𑁂… 𑀭𑀽𑀧𑀯𑀺𑀘𑀸𑀭𑁄’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩) 𑀏𑀯𑀁 𑀯𑀼𑀢𑁆𑀢𑀁 𑀢𑀡𑁆𑀳𑀸𑀯𑀢𑁆𑀣𑀼𑀪𑀽𑀢𑀁 𑀢𑁂𑀪𑀽𑀫𑀓𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑀁 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀁, 𑀢𑀁 𑀏𑀓𑀤𑁂𑀲𑁂𑀦 𑀭𑀽𑀧𑀓𑁆𑀔𑀦𑁆𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀧𑀺𑀬𑀲𑀪𑀸𑀯𑀢𑀸𑀬 𑀯𑀸 𑀭𑀽𑀧𑀓𑁆𑀔𑀦𑁆𑀥𑁄 𑀧𑀺𑀬𑀭𑀽𑀧𑁂 𑀧𑀯𑀺𑀲𑀢𑀺, 𑀦 𑀭𑀼𑀧𑁆𑀧𑀦𑀲𑀪𑀸𑀯𑁂𑀦𑀸𑀢𑀺 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀬𑀫𑀓𑁂 𑀢𑀸𑀯 𑀤𑀺𑀝𑁆𑀞𑀺𑀲𑀜𑁆𑀜𑀸𑀢𑀺 ‘‘𑀯𑀺𑀲𑁂𑀲𑁄’’𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀤𑀺𑀝𑁆𑀞𑀺 𑀏𑀯 𑀲𑀜𑁆𑀜𑀸 𑀤𑀺𑀝𑁆𑀞𑀺𑀲𑀜𑁆𑀜𑀸. ‘‘𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄’’𑀢𑀺 (𑀲𑀼. 𑀦𑀺. 𑁭𑁯𑁮), ‘‘𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸’’𑀢𑀺 (𑀲𑀼. 𑀦𑀺. 𑁮𑁫𑁩) 𑀘 𑀏𑀯𑀫𑀸𑀤𑀻𑀲𑀼 𑀳𑀺 𑀤𑀺𑀝𑁆𑀞𑀺 𑀘 ‘‘𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸𑀢𑀺.

𑁨𑁮. ‘‘𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀪𑀸𑀯𑁄𑀢𑀺 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀅𑀜𑁆𑀜𑀥𑀫𑁆𑀫𑀲𑀩𑁆𑀪𑀸𑀯𑁄 𑀏𑀯𑁂𑀢𑁆𑀣 𑀧𑀫𑀸𑀡𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀦𑀸𑀬𑀢𑀦𑀸 𑀦 𑀲𑁄𑀢𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀻𑀢𑀺.

𑁩𑁯. 𑀭𑀽𑀧𑀢𑁄 𑀅𑀜𑁆𑀜𑁂 𑀯𑁂𑀤𑀦𑀸𑀤𑀬𑁄𑀢𑀺 𑀏𑀢𑁆𑀣 𑀮𑁄𑀓𑀼𑀢𑁆𑀢𑀭𑀸 𑀯𑁂𑀤𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀢𑁂 𑀳𑀺 𑀧𑀺𑀬𑀭𑀽𑀧𑀸 𑀘 𑀲𑀸𑀢𑀭𑀽𑀧𑀸 𑀘 𑀦 𑀳𑁄𑀦𑁆𑀢𑀺 𑀢𑀡𑁆𑀳𑀸𑀬 𑀅𑀦𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀭𑀽𑀧𑀢𑁄 𑀅𑀜𑁆𑀜𑁂 𑀳𑁄𑀦𑁆𑀢𑀻𑀢𑀺. 𑀭𑀽𑀧𑀜𑁆𑀘 𑀔𑀦𑁆𑀥𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀢𑀺 𑀇𑀤𑀫𑁆𑀧𑀺 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀦-𑀲𑀤𑁆𑀤𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑀓𑁆𑀔𑀼𑀜𑁆𑀘 𑀆𑀬𑀢𑀦𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀘𑀓𑁆𑀔𑀼 𑀦 𑀘 𑀆𑀬𑀢𑀦𑀸’’𑀢𑀺𑀆𑀤𑀺𑀁 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁫) 𑀯𑀓𑁆𑀔𑀢𑀺. 𑀦 𑀳𑀺 𑀢𑀢𑁆𑀣 𑀅𑀯𑀲𑁂𑀲𑀕𑁆𑀕𑀳𑀡𑁂𑀦 𑀕𑀬𑁆𑀳𑀫𑀸𑀦𑀁 𑀓𑀜𑁆𑀘𑀺 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸. 𑀯𑀓𑁆𑀔𑀢𑀺 𑀳𑀺 ‘‘𑀥𑀫𑁆𑀫𑁄 𑀆𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁬). 𑀢𑀡𑁆𑀳𑀸𑀯𑀢𑁆𑀣𑀼 𑀘 𑀦 𑀢𑀁 𑀲𑀺𑀬𑀸. 𑀬𑀤𑀺 𑀲𑀺𑀬𑀸, 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀪𑀸𑀯𑀢𑁄 𑀭𑀽𑀧𑀁 𑀲𑀺𑀬𑀸 ‘‘𑀭𑀽𑀧𑀁 𑀔𑀦𑁆𑀥𑁄𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁧.𑀔𑀦𑁆𑀥𑀬𑀫𑀓.𑁪𑁦) 𑀯𑀘𑀦𑀢𑁄 𑀔𑀦𑁆𑀥𑁄 𑀘𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀯𑀺𑀚𑁆𑀚𑀫𑀸𑀦𑀁 𑀉𑀧𑀸𑀤𑀸𑀬 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀕𑁆𑀕𑀳𑀡𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀅𑀯𑀲𑁂𑀲𑀸𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁫𑁦-𑁨𑁦𑁫. 𑀧𑀯𑀢𑁆𑀢𑀺𑀯𑀸𑀭𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑀸𑀦𑀺 𑀧𑀘𑁆𑀙𑀺𑀫𑁂𑀦𑁂𑀯 𑀲𑀳 𑀬𑁄𑀚𑁂𑀢𑁆𑀯𑀸 𑀢𑀻𑀡𑀺 𑀤𑁆𑀯𑁂 𑀏𑀓𑀜𑁆𑀘 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀧𑀼𑀭𑀺𑀫𑁂𑀦. 𑀓𑀲𑁆𑀫𑀸? 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀯𑀸𑀭𑁂𑀲𑀼 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄. 𑀧𑀼𑀭𑀺𑀫𑀲𑁆𑀲 𑀳𑀺 𑀧𑀘𑁆𑀙𑀺𑀫𑁂𑀦 𑀬𑁄𑀚𑀺𑀢𑀬𑀫𑀓𑀫𑁂𑀯 𑀧𑀘𑁆𑀙𑀺𑀫𑀲𑁆𑀲 𑀧𑀼𑀭𑀺𑀫𑁂𑀦 𑀬𑁄𑀚𑀦𑀸𑀬 𑀧𑀼𑀘𑁆𑀙𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀘𑁆𑀘𑁂𑀬𑁆𑀬, 𑀅𑀢𑁆𑀣𑁂 𑀧𑀦 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑁂𑀦 𑀢𑀣𑀸 𑀬𑁄𑀚𑀦𑀸 𑀦 𑀓𑀢𑀸𑀢𑀺. 𑀓𑀸𑀮𑀪𑁂𑀤𑀸 𑀧𑀦𑁂𑀢𑁆𑀣 𑀙 𑀏𑀯 𑀯𑀼𑀢𑁆𑀢𑀸. 𑀅𑀢𑀻𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀦𑀸𑀕𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀦𑀸𑀕𑀢𑁂𑀦𑀸𑀢𑀻𑀢𑁄𑀢𑀺 𑀏𑀢𑁂 𑀧𑀦 𑀢𑀬𑁄 𑀬𑀣𑀸𑀤𑀲𑁆𑀲𑀺𑀢𑀸 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑀸 𑀏𑀯 𑀢𑀬𑁄, 𑀦 𑀯𑀺𑀲𑀼𑀁 𑀯𑀺𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸. 𑀢𑀢𑁆𑀣 𑀢𑀢𑁆𑀣 𑀳𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀳𑀺 𑀅𑀢𑀻𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀬𑁄 𑀓𑀸𑀮𑀪𑁂𑀤𑀸 𑀤𑀲𑁆𑀲𑀺𑀢𑀸, 𑀢𑁂𑀦𑁂𑀯 𑀘 𑀦𑀬𑁂𑀦 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁. 𑀢𑁂𑀦𑁂𑀯 𑀳𑀺 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀘 𑀦 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀲𑁆𑀲 𑀔𑀦𑁆𑀥𑀲𑁆𑀲 𑀧𑀼𑀭𑀺𑀫𑀧𑀼𑀭𑀺𑀫𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀕𑀳𑀺𑀢𑀦𑀺𑀬𑀸𑀫𑁂𑀦 𑀲𑀼𑀔𑀕𑁆𑀕𑀳𑀡𑀢𑁆𑀣𑀫𑁆𑀧𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀻𑀢𑀺.

𑀇𑀫𑀺𑀦𑀸𑀬𑁂𑀯 𑀘 𑀮𑀓𑁆𑀔𑀡𑁂𑀦𑀸𑀢𑀺𑀆𑀤𑀺𑀦𑀸 𑀬𑁂𑀦 𑀓𑀸𑀭𑀡𑁂𑀦 ‘‘𑀧𑀼𑀭𑁂𑀧𑀜𑁆𑀳𑁄’’𑀢𑀺 𑀘 ‘‘𑀧𑀘𑁆𑀙𑀸𑀧𑀜𑁆𑀳𑁄’’𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺, 𑀲𑁄 𑀧𑀭𑀺𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁆𑀣𑀲𑀗𑁆𑀕𑀡𑁆𑀳𑀦𑀢𑁄 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀦𑀸𑀫. 𑀢𑀁𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀦 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂𑀦 𑀲𑀤𑀺𑀲𑀢𑁆𑀣𑀢𑀸𑀬 𑀧𑀼𑀭𑁂𑀧𑀜𑁆𑀳𑁄, 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀲𑀤𑀺𑀲𑀢𑁆𑀣𑀢𑀸𑀬 ‘‘𑀧𑀘𑁆𑀙𑀸𑀧𑀜𑁆𑀳𑁄’’𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀁. 𑀲𑀤𑀺𑀲𑀢𑁆𑀣𑀢𑀸 𑀘 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀧𑀤𑀯𑀺𑀲𑁂𑀲𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀓𑁂𑀦 𑀧𑀤𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑀦𑀺𑀭𑁄𑀥𑀮𑀸𑀪𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀧𑀼𑀭𑁂𑀧𑀜𑁆𑀳𑁂 𑀤𑀝𑁆𑀞𑀩𑁆𑀩𑀸. 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀲𑁆𑀲 𑀯𑀸 𑀔𑀦𑁆𑀥𑀲𑁆𑀲 𑀅𑀦𑀼𑀜𑁆𑀜𑀸𑀢𑀯𑀲𑁂𑀦 𑀧𑀼𑀭𑁂𑀧𑀜𑁆𑀳𑁄 𑀯𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀁.

𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀧𑀦𑀁 𑀧𑀝𑀺𑀓𑁆𑀔𑁂𑀧𑁄, 𑀲𑀁𑀲𑀬𑀢𑁆𑀣𑀦𑀺𑀯𑀸𑀭𑀡𑀁 𑀧𑀝𑀺𑀲𑁂𑀥𑁄𑀢𑀺 𑀅𑀬𑀁 𑀧𑀝𑀺𑀓𑁆𑀔𑁂𑀧𑀧𑀝𑀺𑀲𑁂𑀥𑀸𑀦𑀁 𑀯𑀺𑀲𑁂𑀲𑁄. 𑀧𑀸𑀴𑀺𑀧𑀤𑀫𑁂𑀯 𑀳𑀼𑀢𑁆𑀯𑀸𑀢𑀺 𑀧𑀼𑀘𑁆𑀙𑀸𑀧𑀸𑀴𑀺𑀬𑀸 ‘‘𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀬𑀁 𑀧𑀤𑀁 𑀯𑀼𑀢𑁆𑀢𑀁, 𑀦-𑀓𑀸𑀭𑀯𑀺𑀭𑀳𑀺𑀢𑀁 𑀢𑀤𑁂𑀯 𑀧𑀤𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀧𑀝𑀺𑀲𑁂𑀥𑀲𑁆𑀲 𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀸𑀴𑀺𑀕𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀉𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀸𑀦𑀫𑁂𑀯 𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀝𑀺𑀲𑁂𑀥𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑁂𑀧𑁄 𑀢𑀤𑁂𑀓𑀤𑁂𑀲𑀧𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀏𑀯 𑀳𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀘 𑀯𑀺𑀲𑁆𑀲𑀚𑁆𑀚𑀦𑀁 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺.

𑀓𑀺𑀁 𑀦𑀼 𑀲𑀓𑁆𑀓𑀸 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀧𑀸𑀴𑀺𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀸𑀤𑀺𑀢𑁄 𑀅𑀜𑁆𑀜𑁄 𑀓𑀺𑀁 𑀦𑀼 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀜𑁆𑀜𑀲𑁆𑀲 𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀏𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀻𑀲𑀼 𑀏𑀓𑀪𑀽𑀫𑀺𑀬𑀫𑁆𑀧𑀺 𑀤𑀼𑀢𑀺𑀬𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀜𑀸𑀧𑀺𑀢𑀁 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 𑀳𑀺 𑀬𑀸𑀯 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀓𑀫𑁆𑀫𑀚𑀲𑀦𑁆𑀢𑀸𑀦𑀁 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁂 𑀓𑀼𑀲𑀮𑀸𑀤𑀻𑀦𑀜𑁆𑀘 𑀧𑀯𑀢𑁆𑀢𑀺 𑀳𑁄𑀢𑀺, 𑀯𑁄𑀘𑁆𑀙𑀺𑀦𑁆𑀦𑁂 𑀘 𑀅𑀧𑁆𑀧𑀯𑀢𑁆𑀢𑀻𑀢𑀺 𑀢𑁂𑀦𑁂𑀯 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀢𑀲𑁆𑀲 𑀏𑀓𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀉𑀧𑁆𑀧𑀸𑀤𑀢𑁄 𑀬𑀸𑀯 𑀘𑀼𑀢𑀺𑀦𑀺𑀭𑁄𑀥𑁄, 𑀢𑀸𑀯 𑀅𑀢𑀻𑀢𑀢𑀸 𑀦𑀢𑁆𑀣𑀺, 𑀦 𑀘 𑀢𑀢𑁄 𑀧𑀼𑀩𑁆𑀩𑁂 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀫𑁆𑀫𑀚𑀲𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀔𑀦𑁆𑀥𑀤𑁆𑀯𑀬𑀫𑁆𑀧𑀺 ‘‘𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀏𑀢𑀸𑀬 𑀧𑀸𑀴𑀺𑀬𑀸 𑀲𑀓𑀮𑁂𑀧𑀺 𑀲𑀼𑀤𑁆𑀥𑀸𑀯𑀸𑀲𑁂 𑀤𑀼𑀢𑀺𑀬𑀸 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀉𑀤𑁆𑀥𑀁𑀲𑁄𑀢𑀧𑀸𑀴𑀺𑀲𑀩𑁆𑀪𑀸𑀯𑀸. 𑀤𑁆𑀯𑁂𑀧𑀺 𑀳𑀺 𑀧𑀸𑀴𑀺𑀬𑁄 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀢𑀺.

‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀺𑀲𑁂𑀲𑀺𑀢𑀸 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀲𑀦𑁆𑀢𑀻𑀢𑀺 𑀢𑁂 𑀏𑀯 𑀕𑀳𑁂𑀢𑁆𑀯𑀸 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑁂 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀚𑁆𑀚𑀺𑀢𑀸, 𑀢𑁂 𑀢𑀢𑁄 𑀧𑀜𑁆𑀘𑀯𑁄𑀓𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁂𑀲𑀁 𑀧𑀼𑀦 𑀅𑀲𑀜𑁆𑀜𑁂 𑀉𑀧𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀅𑀢𑁆𑀣𑀻𑀢𑀺 𑀢𑁂 𑀲𑀦𑁆𑀥𑀸𑀬𑀸𑀳 𑁋 ‘‘𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 (𑀬𑀫. 𑁧.𑀔𑀦𑁆𑀥𑀬𑀫𑀓.𑁬𑁫). 𑀏𑀢𑁆𑀣 𑀓𑀺𑀁 𑀧𑀜𑁆𑀘𑀯𑁄𑀓𑀸𑀭𑀸𑀤𑀺𑀪𑀸𑀯𑁄 𑀯𑀺𑀬 𑀧𑀘𑁆𑀙𑀺𑀫𑀪𑀯𑁄𑀧𑀺 𑀓𑁄𑀘𑀺 𑀅𑀢𑁆𑀣𑀺, 𑀬𑀢𑁆𑀣 𑀢𑁂𑀲𑀫𑀦𑀼𑀧𑁆𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺 𑀧𑀜𑁆𑀘𑀯𑁄𑀓𑀸𑀭𑀸𑀤𑀺𑀪𑀯𑁂𑀲𑁆𑀯𑁂𑀯 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀞𑀺𑀢𑀸𑀦𑀁 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀇𑀢𑀭𑀸𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑀜𑁆𑀘 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀳𑀸𑀢𑀺.

‘‘𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦’’𑀦𑁆𑀢𑀺 𑀇𑀤𑀁 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀢𑀁𑀢𑀁𑀪𑀽𑀫𑀺𑀬𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀜𑁆𑀳𑀺 𑀢𑁂𑀲𑀁 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺. 𑀬𑀣𑀸 𑀧𑀦 ‘‘𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀫𑁆𑀳𑀺 𑀧𑀯𑀢𑁆𑀢𑀢𑀺, 𑀦 𑀏𑀯𑀁 ‘‘𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀘𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑁂 𑀅𑀢𑀻𑀢𑁂 𑀏𑀯, 𑀢𑀲𑁆𑀫𑀸 ‘‘𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁 𑀉𑀧𑁆𑀧𑀦𑁆𑀦𑀲𑀦𑁆𑀢𑀸𑀦𑀲𑁆𑀲 𑀅𑀯𑀺𑀕𑀢𑀢𑁆𑀢𑀸. 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄𑀢𑀺 𑀑𑀓𑀸𑀲𑀲𑁆𑀲 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀑𑀓𑀸𑀲𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀫𑁆𑀧𑀺 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀲𑀁𑀓𑀺𑀡𑁆𑀡𑀢𑀸 𑀳𑁄𑀢𑀻𑀢𑀺 ‘‘𑀬𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁨𑁦𑁬-𑁨𑁦𑁮. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 𑀮𑀩𑁆𑀪𑀫𑀸𑀦𑁄𑀧𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀑𑀓𑀸𑀲𑀯𑀸𑀭𑀲𑁆𑀲 𑀅𑀮𑀸𑀪𑁂 𑀢𑀲𑁆𑀲𑀧𑀺 𑀅𑀮𑀸𑀪𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦, 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀜𑁆𑀜𑀸𑀯𑀘𑀦𑀢𑁄. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀧𑀺 𑀳𑀺 𑀑𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀜𑁆𑀜𑀸 𑀯𑀼𑀘𑁆𑀘𑀢𑀺, 𑀦 𑀑𑀓𑀸𑀲𑀲𑁆𑀲. 𑀑𑀓𑀸𑀲𑀯𑀸𑀭𑁄𑀧𑀺 𑀘 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀑𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀚𑀸𑀦𑀦𑀯𑀲𑁂𑀦 𑀯𑀼𑀘𑁆𑀘𑁂𑀬𑁆𑀬, 𑀢𑀲𑁆𑀫𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑀲𑁆𑀲𑁂𑀯 𑀮𑀩𑁆𑀪𑀫𑀸𑀦𑀢𑀸 𑀯𑀼𑀢𑁆𑀢𑀸, 𑀦 𑀑𑀓𑀸𑀲𑀯𑀸𑀭𑀲𑁆𑀲𑀸𑀢𑀺. 𑀢𑁂𑀦𑀸𑀳 𑁋 ‘‘𑀆𑀫𑀦𑁆𑀢𑀸…𑀧𑁂… 𑀲𑀺𑀬𑀸’’𑀢𑀺.

𑀢𑁂𑀦𑁂𑀯𑀸𑀢𑀺 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀢𑀺𑀡𑁆𑀡𑀁 𑀅𑀤𑁆𑀥𑀸𑀦𑀁 𑀮𑀸𑀪𑀢𑁄 𑀏𑀯, 𑀅𑀜𑁆𑀜𑀣𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀚𑀸𑀦𑀦𑀲𑁆𑀲 𑀅𑀪𑀸𑀯𑀸 ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀏𑀢𑁆𑀣 ‘‘𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸, ‘‘𑀆𑀫𑀦𑁆𑀢𑀸’’𑀢𑀺 𑀘 𑀓𑀢𑀦𑁆𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀧𑀭𑀺𑀜𑁆𑀜𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀏𑀯 𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺 𑀧𑀜𑁆𑀳𑁂 𑀧𑀼𑀣𑀼𑀚𑁆𑀚𑀦𑀁 𑀲𑀦𑁆𑀥𑀸𑀬 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀩𑁆𑀩𑀣𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. ‘‘𑀅𑀭𑀳𑀸 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺 𑀦𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣, 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀭𑀳𑀦𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀢𑁆𑀣𑀸’’𑀢𑀺 𑀧𑀦 𑀯𑀘𑀦𑁂𑀦 ‘‘𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑁂𑀦 𑀢𑀤𑀯𑀲𑁂𑀲𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀬𑀢𑀦𑀬𑀫𑀓𑀁