𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁯. 𑀆𑀬𑀢𑀦𑀬𑀫𑀓𑀸𑀤𑀻𑀲𑀼 𑀘 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀧𑀤𑀲𑁄𑀥𑀦𑀯𑀸𑀭𑀸𑀤𑀻𑀦𑀁 𑀯𑀘𑀦𑁂 𑀓𑀸𑀭𑀡𑀁 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑀸𑀤𑀲 𑀏𑀓𑀸𑀤𑀲 𑀓𑀢𑁆𑀯𑀸 𑀢𑁂𑀢𑁆𑀢𑀺𑀁𑀲𑀲𑀢𑀁 𑀬𑀫𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀕𑀡𑀦𑀸 𑀮𑀺𑀔𑀺𑀢𑀸, 𑀲𑀸 𑀢𑀣𑀸 𑀦 𑀳𑁄𑀢𑀺. ‘‘𑀤𑁆𑀯𑀢𑁆𑀢𑀺𑀁𑀲𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑀢𑁆𑀣 𑀮𑀺𑀔𑀺𑀢𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧𑁦-𑁧𑁭. 𑀯𑀸𑀬𑀦𑀝𑁆𑀞𑁂𑀦𑀸𑀢𑀺 𑀧𑀲𑀸𑀭𑀡𑀝𑁆𑀞𑁂𑀦, 𑀧𑀸𑀓𑀝𑀪𑀸𑀯𑀝𑁆𑀞𑁂𑀦 𑀯𑀸. ‘‘𑀓𑀸𑀬𑁄 𑀥𑀫𑁆𑀫𑁄’’𑀢𑀺 𑀘 𑀯𑀼𑀘𑁆𑀘𑀫𑀸𑀦𑀁 𑀲𑀩𑁆𑀩𑀁 𑀲𑀲𑀪𑀸𑀯𑀁 𑀆𑀬𑀢𑀦𑀫𑁂𑀯𑀸𑀢𑀺 ‘‘𑀓𑀸𑀬𑁄 𑀆𑀬𑀢𑀦’’𑀦𑁆𑀢𑀺, ‘‘𑀥𑀫𑁆𑀫𑁄 𑀆𑀬𑀢𑀦’’𑀦𑁆𑀢𑀺 𑀘 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀯𑀘𑀦𑁂𑀦 𑀧𑀦 𑀥𑀫𑁆𑀫𑀯𑀘𑀦𑁂𑀦 𑀘 𑀅𑀯𑀼𑀘𑁆𑀘𑀫𑀸𑀦𑀁 𑀓𑀜𑁆𑀘𑀺 𑀲𑀲𑀪𑀸𑀯𑀁 𑀦𑀢𑁆𑀣𑀻𑀢𑀺 ‘‘𑀦 𑀓𑀸𑀬𑁄 𑀦𑀸𑀬𑀢𑀦𑀁, 𑀦 𑀥𑀫𑁆𑀫𑁄 𑀦𑀸𑀬𑀢𑀦’’𑀦𑁆𑀢𑀺 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.