𑁧𑁦. 𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁪𑁭. 𑀯𑁄𑀳𑀸𑀭𑀓𑀣𑀸𑀬𑀁 𑀉𑀤𑀸𑀳𑀼 𑀲𑁄𑀢𑀸𑀤𑀻𑀦𑀺𑀧𑀻𑀢𑀺 𑀏𑀓𑀦𑁆𑀢𑀮𑁄𑀓𑀺𑀬𑁂𑀲𑀼 𑀯𑀺𑀲𑀬𑀯𑀺𑀲𑀬𑀻𑀲𑀼 𑀯𑀺𑀲𑀬𑀲𑁆𑀲𑁂𑀯 𑀮𑁄𑀓𑀼𑀢𑁆𑀢𑀭𑀪𑀸𑀯𑁄, 𑀦 𑀯𑀺𑀲𑀬𑀻𑀦𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀓𑀸𑀭𑀡𑀁. 𑀬𑀣𑀸 𑀘 𑀯𑀺𑀲𑀬𑀻𑀦𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀅𑀲𑀺𑀤𑁆𑀥𑁄, 𑀢𑀣𑀸 𑀯𑀺𑀲𑀬𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲. 𑀢𑀢𑁆𑀣 𑀬𑀣𑀸 𑀅𑀲𑀺𑀤𑁆𑀥𑀮𑁄𑀓𑀼𑀢𑁆𑀢𑀭𑀪𑀸𑀯𑀲𑁆𑀲 𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀢𑀸, 𑀏𑀯𑀁 𑀲𑁄𑀢𑀸𑀤𑀻𑀦𑀁 𑀆𑀧𑀦𑁆𑀦𑀸𑀢𑀺 𑀓𑀺𑀦𑁆𑀢𑀺 𑀢𑀸𑀦𑀺𑀧𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀤𑀺 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑁂𑀬𑁆𑀬, 𑀮𑁄𑀓𑀼𑀢𑁆𑀢𑀭𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀭𑀺𑀓𑀧𑁆𑀧𑀺𑀢𑁂𑀧𑀺 𑀲𑀤𑁆𑀤𑀲𑁆𑀲 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀮𑁄𑀓𑀺𑀬𑁂𑀦 𑀜𑀸𑀡𑁂𑀦𑀸’’𑀢𑀺 𑀉𑀤𑁆𑀥𑀝𑀁, ‘‘𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺 𑀧𑀦 𑀧𑀸𑀴𑀺, 𑀢𑀜𑁆𑀘 𑀯𑀺𑀜𑁆𑀜𑀸𑀡𑀁 𑀲𑁄𑀢𑀲𑀫𑁆𑀩𑀦𑁆𑀥𑁂𑀦 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀅𑀦𑁂𑀓𑀦𑁆𑀢𑀢𑀸𑀢𑀺 𑀮𑁄𑀓𑀺𑀬𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀢𑁄 𑀮𑁄𑀓𑀺𑀬𑁄𑀢𑀺 𑀏𑀢𑀲𑁆𑀲 𑀳𑁂𑀢𑀼𑀲𑁆𑀲 𑀮𑁄𑀓𑀺𑀬𑁂 𑀮𑁄𑀓𑀼𑀢𑁆𑀢𑀭𑁂 𑀘 𑀲𑀫𑁆𑀪𑀯𑀢𑁄 𑀅𑀦𑁂𑀓𑀦𑁆𑀢𑀪𑀸𑀯𑁄 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.