𑁭. 𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁮𑁮𑁭-𑁮𑁮𑁮. 𑀥𑀫𑁆𑀫𑀓𑀣𑀸𑀬𑀁 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀸𑀢𑀺 𑀬𑁄 𑀭𑀽𑀧𑀲𑁆𑀲 𑀦𑀺𑀬𑀸𑀫𑁄 𑀯𑀼𑀘𑁆𑀘𑁂𑀬𑁆𑀬, 𑀲𑁄 𑀭𑀽𑀧𑀝𑁆𑀞𑁄 𑀦𑀸𑀫 𑀓𑁄𑀘𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻𑀢𑀺 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀁 𑀭𑀽𑀧𑀜𑁆𑀘 𑀦 𑀳𑁄𑀢𑀺, 𑀢𑀲𑁆𑀫𑀸 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸 𑀭𑀽𑀧𑀝𑁆𑀞𑁂𑀦 𑀦𑀺𑀬𑀸𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀭𑀽𑀧𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀝𑁆𑀞𑀲𑁆𑀲 𑀅𑀪𑀸𑀯𑁂 𑀤𑀲𑁆𑀲𑀺𑀢𑁂 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀢𑀫𑁂𑀯 𑀭𑀽𑀧𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀝𑁆𑀞𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀲𑀪𑀸𑀯𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀲 𑀯𑁄𑀳𑀸𑀭𑁄𑀢𑀺 𑀭𑀽𑀧𑀲𑁆𑀲 𑀲𑀪𑀸𑀯𑁄 𑀭𑀽𑀧𑀲𑀪𑀸𑀯𑁄, 𑀭𑀽𑀧𑀲𑁆𑀲 𑀅𑀢𑁆𑀣𑁄 𑀭𑀽𑀧𑀝𑁆𑀞𑁄𑀢𑀺 𑀏𑀯𑀁 𑀅𑀜𑁆𑀜𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑁄 𑀭𑀽𑀧𑀲𑀪𑀸𑀯𑀯𑁄𑀳𑀸𑀭𑁄 𑀭𑀽𑀧𑀝𑁆𑀞𑀯𑁄𑀳𑀸𑀭𑁄 𑀯𑀸 𑀯𑁂𑀤𑀦𑀸𑀤𑀻𑀳𑀺 𑀦𑀸𑀦𑀢𑁆𑀢𑀫𑁂𑀯 𑀲𑁄 𑀲𑀪𑀸𑀯𑁄𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀧𑀦𑀢𑁆𑀣𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀭𑀽𑀧𑀲𑁆𑀲 𑀭𑀽𑀧𑀝𑁆𑀞𑁂𑀦 𑀅𑀦𑀜𑁆𑀜𑀢𑁆𑀢𑀸. ‘‘𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀯𑀤𑀢𑁄 𑀢𑀜𑁆𑀘 𑀯𑀘𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀤𑁄𑀲𑀁, 𑀅𑀣 𑀓𑀲𑁆𑀫𑀸 ‘‘𑀭𑀽𑀧𑀜𑁆𑀳𑀺 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑁄 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀢𑀁 𑀅𑀢𑁆𑀢𑀦𑀸𑀯 𑀯𑀼𑀢𑁆𑀢𑀁, 𑀦 𑀧𑀭𑁂𑀦𑀸𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀁 𑀯𑀺𑀬 𑀯𑀘𑀦𑀢𑁄. 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀸 𑀲𑀓𑀯𑀸𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀘 𑀢𑁂𑀦 𑀯𑀢𑁆𑀢𑀩𑁆𑀩𑀁 𑀧𑀝𑀺𑀚𑀸𑀦𑀸𑀢𑀺 𑀘 𑀲𑁄 𑀏𑀢𑀫𑀢𑁆𑀣𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺 𑀲𑀓𑀯𑀸𑀤𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀢𑁆𑀣𑀦𑁆𑀢𑀭𑀯𑀲𑁂𑀦𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯 𑀓𑀸𑀭𑀡𑀁 𑀦𑀺𑀕𑀽𑀳𑀺𑀢𑁆𑀯𑀸 𑀧𑀭𑁂𑀦 𑀘𑁄𑀤𑀺𑀢𑀦𑁆𑀢𑀺 𑀢𑀫𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀭𑀽𑀧𑀸𑀤𑀺𑀲𑀪𑀸𑀯𑀫𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑁂𑀦 𑀧𑀭𑀺𑀓𑀧𑁆𑀧𑀺𑀢𑀁 𑀦𑀺𑀬𑀢𑀁 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀼𑀦 𑀢𑁂𑀦𑁂𑀯 𑀦𑀬𑁂𑀦 𑀘𑁄𑀤𑁂𑀢𑀼𑀁 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.