𑁧𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁦𑁦-𑁮𑁦𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀯𑀺𑀲𑀼𑀚𑁆𑀛𑁂𑀬𑁆𑀬𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀧𑁆𑀨𑀮𑀸 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀤𑀸𑀬𑀓𑀲𑁆𑀲𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀯𑀺𑀧𑀸𑀓𑀤𑀸𑀬𑀺𑀓𑀸 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸 𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀘𑁆𑀘𑀬𑀪𑀽𑀢𑁂𑀦 𑀯𑀺𑀦𑀸 𑀤𑀸𑀬𑀓𑁂𑀦𑁂𑀯 𑀫𑀳𑀸𑀯𑀺𑀧𑀸𑀓𑀘𑁂𑀢𑀦𑀢𑁆𑀢𑀁 𑀆𑀧𑀸𑀤𑀺𑀓𑀸, 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸 𑀯𑀺𑀧𑀸𑀓𑀤𑀸𑀬𑀺𑀓𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀬𑀤𑀺 𑀤𑀸𑀬𑀓𑀲𑁆𑀲 𑀤𑀸𑀦𑀘𑁂𑀢𑀦𑀸 𑀦𑀸𑀫 𑀧𑀝𑀺𑀕𑁆𑀕𑀸𑀳𑀓𑁂𑀦 𑀓𑀢𑀸 𑀪𑀯𑁂𑀬𑁆𑀬, 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀮𑀤𑁆𑀥𑀺𑀓𑀺𑀢𑁆𑀢𑀦𑁂 ‘‘𑀤𑀸𑀬𑀓𑁂𑀦 𑀤𑀸𑀦𑀁 𑀤𑀺𑀦𑁆𑀦𑀁, 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀫𑁆𑀧𑀺 𑀧𑀦 𑀤𑀸𑀦𑀘𑁂𑀢𑀦𑀸𑀦𑀺𑀩𑁆𑀩𑀢𑁆𑀢𑀦𑁂𑀦 𑀬𑀤𑀺 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.