𑁩. 𑀦𑀺𑀓𑁆𑀔𑁂𑀧𑀓𑀡𑁆𑀟𑀁

𑀢𑀺𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁯𑁮𑁫. 𑀲𑀩𑁆𑀩𑁂𑀲𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀭𑀽𑀧𑀸𑀲𑀗𑁆𑀔𑀢𑀯𑀲𑁂𑀦 𑀘 𑀪𑀺𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀨𑀲𑁆𑀲𑀸𑀤𑀺𑀘𑀓𑁆𑀔𑀸𑀤𑀺𑀧𑀤𑀪𑀸𑀚𑀦𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑁄. 𑀢𑀢𑁆𑀣 𑀧𑀦 𑀅𑀲𑀗𑁆𑀔𑀢𑀲𑁆𑀲 𑀪𑁂𑀤𑀸𑀪𑀸𑀯𑀢𑁄 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑁆𑀯𑁂𑀯 𑀧𑀤𑀪𑀸𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀬𑁂𑀯𑀸𑀧𑀦𑀓𑀸𑀦𑀁 𑀧𑀦 𑀲𑀼𑀔𑀼𑀫𑀼𑀧𑀸𑀤𑀸𑀬𑀭𑀽𑀧𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀭𑀽𑀧𑀼𑀧𑀢𑁆𑀣𑀫𑁆𑀪𑀓𑀪𑀸𑀯𑀭𑀳𑀺𑀢𑀲𑁆𑀲 𑀳𑀤𑀬𑀯𑀢𑁆𑀣𑀼𑀲𑁆𑀲 𑀧𑀤𑀼𑀤𑁆𑀥𑀸𑀭𑁂𑀦 𑀇𑀥 𑀦𑀺𑀤𑁆𑀤𑁂𑀲𑀸𑀦𑀭𑀳𑀢𑁆𑀢𑀸 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀺 𑀅𑀢𑁆𑀣𑀻𑀢𑀺. 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀞𑀧𑁂𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸𑀢𑀺 𑀯𑀸. 𑀕𑀸𑀣𑀸𑀢𑁆𑀣𑁄 𑀦𑀺𑀤𑀸𑀦𑁂 𑀯𑀼𑀢𑁆𑀢𑁄 𑀏𑀯.

𑀫𑀽𑀮𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑀼𑀧𑀘𑁆𑀘𑀬𑀢𑁆𑀣𑁄. 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄, 𑀲𑁄 𑀏𑀯 ‘‘𑀚𑀦𑀓𑁄’’𑀢𑀺 𑀯𑀺𑀲𑁂𑀲𑀺𑀢𑁄. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀯𑀺𑀲𑁂𑀲𑀦𑀁 𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀯𑀸 𑀏𑀢𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀅𑀢𑁆𑀣𑀯𑀲𑁂𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀓𑀼𑀲𑀮𑀫𑀽𑀮𑀸𑀦𑀁 𑀳𑁂𑀢𑀼𑀪𑀸𑀯𑀢𑁄 𑀥𑀫𑁆𑀫𑀯𑀲𑁂𑀦𑀸𑀢𑀺 𑀬𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀮𑁄𑀪𑀸𑀤𑀻𑀦𑀁 𑀧𑀦 𑀢𑀺𑀡𑁆𑀡𑀁 𑀲𑀫𑀸𑀦𑀲𑁆𑀲 𑀫𑀽𑀮𑀝𑁆𑀞𑀲𑁆𑀲 𑀯𑀲𑁂𑀦 𑀤𑀲𑁆𑀲𑀺𑀢𑀢𑀁 𑀲𑀦𑁆𑀥𑀸𑀬 ‘‘𑀅𑀢𑁆𑀣𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀥𑀫𑁆𑀫𑁄𑀢𑀺 𑀪𑀸𑀯𑁄, 𑀅𑀢𑁆𑀣𑁄𑀢𑀺 𑀥𑀫𑁆𑀫𑀓𑀺𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁩.𑁩𑁪) 𑀢𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀁. 𑀢𑀁 𑀧𑀦 𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 ‘‘𑀅𑀮𑁄𑀪𑀸𑀤𑀻𑀳𑀺 𑀲𑀫𑀼𑀝𑁆𑀞𑀺𑀢’’𑀦𑁆𑀢𑀺 𑀆𑀳. 𑀢𑁂 𑀓𑀼𑀲𑀮𑀫𑀽𑀮𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀏𑀢𑁆𑀣 𑀧𑀦 𑀘𑁂𑀢𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀲𑀫𑀼𑀝𑁆𑀞𑀸𑀦𑀪𑀸𑀯𑁂 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀫𑀽𑀮𑁂𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀢𑁄 𑀓𑀼𑀲𑀮𑁂 𑀧𑀭𑀺𑀬𑀸𑀤𑀺𑀬𑀢𑀺, 𑀔𑀦𑁆𑀥𑁂𑀳𑀺 𑀲𑀪𑀸𑀯𑀢𑁄, 𑀓𑀫𑁆𑀫𑁂𑀳𑀺 𑀅𑀜𑁆𑀜𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀓𑀺𑀘𑁆𑀘𑀢𑁄. 𑀫𑀽𑀮𑁂𑀳𑀺 𑀘 𑀓𑀼𑀲𑀮𑀸𑀦𑀁 𑀅𑀦𑀯𑀚𑁆𑀚𑀢𑀸𑀬 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺, 𑀔𑀦𑁆𑀥𑁂𑀳𑀺 𑀢𑀁𑀲𑀫𑁆𑀧𑀬𑁄𑀕𑀓𑀢𑀁 𑀅𑀦𑀯𑀚𑁆𑀚𑀲𑀪𑀸𑀯𑀁, 𑀓𑀫𑁆𑀫𑁂𑀳𑀺 𑀲𑀼𑀔𑀯𑀺𑀧𑀸𑀓𑀢𑀁. 𑀫𑀽𑀮𑁂𑀳𑀺 𑀯𑀸 𑀦𑀺𑀤𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑀢𑀁, 𑀔𑀦𑁆𑀥𑁂𑀳𑀺 𑀲𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀢𑀁, 𑀓𑀫𑁆𑀫𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀁.

𑁯𑁮𑁬. 𑀢𑀁 …𑀧𑁂… 𑀉𑀤𑁆𑀥𑀁 𑀅𑀓𑀼𑀲𑀮𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀫𑁄𑀳𑁄 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂𑀦 𑀧𑀦 𑀯𑀺𑀦𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸 𑀦𑀢𑁆𑀣𑀻𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀕𑀳𑀺𑀢𑁂𑀲𑀼 𑀫𑁄𑀳𑁄 𑀕𑀳𑀺𑀢𑁄 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀢𑀢𑁄 𑀉𑀤𑁆𑀥𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁 𑀅𑀜𑁆𑀜𑀢𑁆𑀣 𑀅𑀪𑀸𑀯𑀸. 𑀏𑀓𑀲𑁆𑀫𑀺𑀁 𑀞𑀺𑀢𑀁 𑀏𑀓𑀝𑁆𑀞𑀁, 𑀲𑀳𑀚𑀪𑀸𑀯𑁂𑀦 𑀏𑀓𑀝𑁆𑀞𑀁 𑀲𑀳𑀚𑁂𑀓𑀝𑁆𑀞𑀁. 𑀧𑀳𑀸𑀢𑀩𑁆𑀩𑀦𑁆𑀢𑀺 𑀧𑀳𑀸𑀦𑀁, 𑀧𑀳𑀸𑀦𑀪𑀸𑀯𑁂𑀦 𑀏𑀓𑀝𑁆𑀞𑀁 𑀧𑀳𑀸𑀦𑁂𑀓𑀝𑁆𑀞𑀁. 𑀬𑁂𑀦 𑀳𑀺 𑀬𑀁 𑀲𑀳 𑀧𑀳𑀸𑀢𑀩𑁆𑀩𑀁, 𑀢𑁂𑀦 𑀢𑀁 𑀏𑀓𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀞𑀺𑀢𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀲𑀫𑀼𑀘𑁆𑀙𑀺𑀦𑁆𑀦𑁂 𑀅𑀲𑀫𑀼𑀘𑁆𑀙𑀺𑀦𑁆𑀦𑁂 𑀘 𑀇𑀢𑀭𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀘 𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑀳𑀺𑀢𑀢𑁄.

𑁯𑁮𑁭. 𑀢𑀻𑀡𑀺 𑀮𑀓𑁆𑀔𑀡𑀸𑀦𑀻𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀢𑀸. 𑀦𑀸𑀫𑀓𑀲𑀺𑀡𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑁄 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄. 𑀧𑀭𑀫𑀢𑁆𑀣𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑁄𑀳𑀭𑀺𑀬𑀫𑀸𑀦𑀸 𑀯𑀺𑀳𑀸𑀭𑀫𑀜𑁆𑀘𑀸𑀤𑀺𑀓𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀏𑀢𑀸𑀦𑀺 𑀘 𑀮𑀓𑁆𑀔𑀡𑀸𑀤𑀻𑀦𑀺 𑀳𑁂𑀝𑁆𑀞𑀸 𑀤𑁆𑀯𑀻𑀲𑀼 𑀓𑀡𑁆𑀟𑁂𑀲𑀼 𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀺 𑀯𑀺𑀬 𑀦 𑀯𑀼𑀢𑁆𑀢𑀸𑀦𑀺, 𑀦 𑀘 𑀲𑀪𑀸𑀯𑀥𑀫𑁆𑀫𑀸𑀢𑀺 𑀓𑀢𑁆𑀯𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀦 𑀳𑀺 𑀓𑁄𑀘𑀺 𑀲𑀪𑀸𑀯𑁄 𑀓𑀼𑀲𑀮𑀢𑁆𑀢𑀺𑀓𑀸𑀲𑀗𑁆𑀕𑀳𑀺𑀢𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺.

𑁯𑁮𑁮. 𑀲𑀼𑀔𑀪𑀽𑀫𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀬𑁄𑀧𑀺 𑀬𑀼𑀚𑁆𑀚𑀦𑁆𑀢𑀺. 𑀲𑀼𑀔𑀲𑀳𑀕𑀢𑀸 𑀳𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺 𑀲𑀼𑀔𑀪𑀽𑀫𑀺. 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀻𑀢𑀺 𑀘 𑀓𑀸𑀫𑀸𑀯𑀘𑀭𑀸𑀤𑀺𑀢𑀸𑀬 𑀥𑀫𑁆𑀫𑀸 𑀏𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀔𑀪𑀽𑀫𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀏𑀯 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀽𑀫𑀺-𑀲𑀤𑁆𑀤𑁄 𑀘 𑀅𑀪𑀺𑀥𑀫𑁆𑀫𑁂 𑀓𑀸𑀫𑀸𑀯𑀘𑀭𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑁄𑀢𑀺 ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁮𑁪) 𑀅𑀜𑁆𑀜𑀪𑀽𑀫𑀺𑀕𑁆𑀕𑀳𑀡𑀁 𑀦 𑀳𑁄𑀢𑀻𑀢𑀺. 𑀧𑀸𑀴𑀺𑀢𑁄 𑀘𑀸𑀢𑀺 ‘‘𑀯𑀺𑀲𑀺𑀝𑁆𑀞𑀸𑀦𑀁 𑀧𑀸𑀓𑀸𑀢𑀺 𑀯𑀺𑀧𑀸𑀓𑀸’’𑀢𑀺𑀆𑀤𑀺𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑁂𑀦 𑀧𑀸𑀴𑀺𑀢𑁄. ‘‘𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺𑀦𑀸 𑀪𑀸𑀲𑀺𑀢𑀢𑁆𑀣𑀯𑀺𑀪𑀸𑀯𑀦𑁂𑀦 𑀅𑀢𑁆𑀣𑀢𑁄 𑀘. 𑀦𑀸𑀫𑀧𑀭𑀺𑀘𑁆𑀙𑁂𑀤𑀸𑀤𑀻𑀳𑀺 𑀢𑀺𑀓𑀤𑀼𑀓𑀸𑀦𑀁 𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑁂𑀦 𑀯𑀸 𑀧𑀸𑀴𑀺𑀢𑁄, 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑁂𑀦 𑀅𑀢𑁆𑀣𑀢𑁄.

𑁯𑁯𑁧. 𑀲𑀸𑀮𑀺𑀨𑀮𑀦𑁆𑀢𑀺 𑀲𑀸𑀮𑀺𑀧𑀸𑀓𑀫𑀸𑀳.

𑁯𑁯𑁪. 𑀅𑀫𑁆𑀳𑀸𑀓𑀁 𑀫𑀸𑀢𑀼𑀮𑀢𑁆𑀣𑁂𑀭𑁄𑀢𑀺 𑀧𑀼𑀕𑁆𑀕𑀮𑀸𑀭𑀫𑁆𑀫𑀡𑀲𑁆𑀲𑀧𑀺 𑀉𑀧𑀸𑀤𑀸𑀦𑀲𑁆𑀲 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀏𑀯 𑀧𑀘𑁆𑀘𑀬𑁄, 𑀦 𑀮𑁄𑀓𑀼𑀢𑁆𑀢𑀭𑀸, 𑀓𑁄 𑀧𑀦 𑀯𑀸𑀤𑁄 𑀔𑀦𑁆𑀥𑀸𑀭𑀫𑁆𑀫𑀡𑀲𑁆𑀲. 𑀢𑁂𑀦𑀸𑀳 ‘‘𑀅𑀕𑁆𑀕𑀳𑀺𑀢𑀸𑀦𑀻’’𑀢𑀺.

𑁯𑁯𑁮. 𑀬𑀣𑀸 𑀉𑀧𑀸𑀤𑀸𑀦𑁂𑀳𑀺 𑀅𑀕𑁆𑀕𑀳𑁂𑀢𑀩𑁆𑀩𑀸 𑀅𑀦𑀼𑀧𑀸𑀤𑀸𑀦𑀺𑀬𑀸, 𑀏𑀯𑀁 𑀲𑀁𑀓𑀺𑀮𑁂𑀲𑁂𑀳𑀺 𑀅𑀕𑁆𑀕𑀳𑁂𑀢𑀩𑁆𑀩𑀸 𑀅𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀓𑀢𑁆𑀯𑀸 ‘‘𑀅𑀲𑀁…𑀧𑁂… 𑀏𑀲𑁂𑀯 𑀦𑀬𑁄’’𑀢𑀺 𑀆𑀳.

𑁧𑁦𑁦𑁬. 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑁄 𑀅𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺. 𑀬𑁂𑀲𑀼 𑀧𑀦 𑀯𑀺𑀧𑀮𑁆𑀮𑀢𑁆𑀣𑀕𑀸𑀳𑁄, 𑀢𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀯 𑀯𑀺𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀅𑀯𑀺𑀚𑁆𑀚𑀫𑀸𑀦𑀦𑀺𑀘𑁆𑀘𑀸𑀤𑀺𑀯𑀺𑀧𑀭𑀺𑀬𑀸𑀲𑀸𑀓𑀸𑀭𑀕𑀳𑀡𑀁 𑀅𑀢𑁆𑀣𑀺, 𑀲𑁄𑀯 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁄 𑀓𑀸𑀬𑁄. 𑀢𑀢𑁆𑀣 𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀲𑁆𑀲𑁂𑀯 𑀘 𑀯𑀺𑀚𑁆𑀚𑀫𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀦 𑀓𑀤𑀸𑀘𑀺 𑀅𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀦 𑀇𑀤𑀁 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺. 𑀲𑀓𑁆𑀓𑀸𑀬𑁂 𑀤𑀺𑀝𑁆𑀞𑀺, 𑀲𑀢𑀻 𑀯𑀸 𑀓𑀸𑀬𑁂 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀅𑀢𑁆𑀢𑀦𑀸 𑀕𑀳𑀺𑀢𑀸𑀓𑀸𑀭𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀸𑀬 𑀲𑀬𑀫𑁂𑀯 𑀲𑀢𑀻, 𑀦 𑀢𑀸𑀬 𑀕𑀳𑀺𑀢𑁄 𑀅𑀢𑁆𑀢𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀧𑀼𑀭𑀺𑀫𑁄 𑀏𑀯 𑀧𑀦 𑀧𑀥𑀸𑀦𑁄. 𑀤𑀼𑀢𑀺𑀬𑁂 𑀳𑀺 𑀤𑀺𑀝𑁆𑀞𑀺𑀬𑀸 𑀯𑀢𑁆𑀣𑀼 𑀅𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀓𑀸𑀬𑁄𑀢𑀺 𑀳𑀺 𑀔𑀦𑁆𑀥𑀧𑀜𑁆𑀘𑀓𑁂 𑀯𑀼𑀘𑁆𑀘𑀫𑀸𑀦𑁂 𑀮𑁄𑀓𑀼𑀢𑁆𑀢𑀭𑀸𑀧𑀦𑀬𑀦𑀁 𑀦𑀢𑁆𑀣𑀺. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑁂𑀲𑀼 𑀓𑀸𑀬-𑀲𑀤𑁆𑀤𑁄 𑀦 𑀯𑀢𑁆𑀢𑀢𑀺. 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀻𑀲𑀼 𑀳𑀺 𑀮𑁄𑀓𑀼𑀢𑁆𑀢𑀭𑁂𑀲𑀼 𑀓𑀸𑀬-𑀲𑀤𑁆𑀤𑁄𑀧𑀺 𑀮𑁄𑀓𑀼𑀢𑁆𑀢𑀭𑀓𑁆𑀔𑀦𑁆𑀥𑀯𑀸𑀘𑀓𑁄𑀢𑀺. 𑀲𑀻𑀮𑁂𑀦𑀸𑀢𑀺 𑀲𑀼𑀤𑁆𑀥𑀺𑀬𑀸 𑀅𑀳𑁂𑀢𑀼𑀪𑀽𑀢𑁂𑀦 𑀲𑀻𑀮𑁂𑀦. 𑀕𑀳𑀺𑀢𑀲𑀫𑀸𑀤𑀸𑀦𑀦𑁆𑀢𑀺 𑀉𑀧𑁆𑀧𑀸𑀤𑀺𑀢𑀧𑀭𑀸𑀫𑀸𑀲𑁄𑀯. 𑀲𑁄 𑀳𑀺 𑀲𑀫𑀸𑀤𑀺𑀬𑀦𑁆𑀢𑀺 𑀏𑀢𑁂𑀦 𑀓𑀼𑀓𑁆𑀓𑀼𑀭𑀲𑀻𑀮𑀯𑀢𑀸𑀤𑀻𑀦𑀻𑀢𑀺 ‘‘𑀲𑀫𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀣 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑀸𑀬 𑀲𑀻𑀮𑀁, 𑀪𑀢𑁆𑀢𑀺𑀯𑀲𑁂𑀦 𑀲𑀢𑀢𑀁 𑀘𑀭𑀺𑀢𑀩𑁆𑀩𑀢𑀸𑀬 𑀯𑀢𑀁 𑀤𑀝𑁆𑀞𑀩𑁆𑀩𑀁.

𑁧𑁦𑁦𑁭. 𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀲𑁆𑀲𑀸𑀬𑁂𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀢𑀺𑀝𑁆𑀞𑀫𑀸𑀦𑀲𑁆𑀲. 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸. 𑀓𑀼𑀲𑀮𑁂𑀳𑀺 𑀲𑀳 𑀘𑁄𑀤𑀦𑀸𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀯𑀺𑀦𑀺𑀘𑁆𑀙𑀬𑁄. 𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀦𑀁 𑀅𑀯𑀺𑀳𑀢𑀢𑁆𑀢𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀚𑀦𑀺𑀢𑀸𑀢𑀺 𑀯𑀸 𑀧𑀼𑀣𑀼𑀚𑁆𑀚𑀦𑀸. 𑀅𑀯𑀺𑀖𑀸𑀢𑀫𑁂𑀯 𑀯𑀸 𑀚𑀦-𑀲𑀤𑁆𑀤𑁄 𑀯𑀤𑀢𑀺. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀏𑀢𑁆𑀣 𑀧𑀼𑀣𑀽 𑀚𑀦𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀯𑀘𑀦𑀢𑁆𑀣𑁄. 𑀧𑀼𑀣𑀼…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀚𑀦𑁂𑀢𑀩𑁆𑀩𑀸, 𑀚𑀸𑀬𑀦𑁆𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀚𑀦𑀸, 𑀕𑀢𑀺𑀬𑁄. 𑀧𑀼𑀣𑀽 𑀚𑀦𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀇𑀢𑁄 𑀧𑀭𑁂 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀅𑀪𑀺𑀲𑀗𑁆𑀔𑀸𑀭𑀸𑀤𑀬𑁄. 𑀢𑁂 𑀏𑀢𑁂𑀲𑀁 𑀧𑀼𑀣𑀽 𑀯𑀺𑀚𑁆𑀚𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀪𑀺𑀲𑀗𑁆𑀔𑀭𑀡𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀭𑀸𑀕𑀕𑁆𑀕𑀺𑀆𑀤𑀬𑁄 𑀲𑀦𑁆𑀢𑀸𑀧𑀸. 𑀢𑁂 𑀏𑀯 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀽𑀢𑀺 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀚𑀦𑁄, ‘‘𑀭𑀸𑀕𑁄 𑀕𑁂𑀥𑁄’’𑀢𑀺 𑀏𑀯𑀫𑀸𑀤𑀺𑀓𑁄. 𑀧𑀼𑀣𑀼 𑀚𑀦𑁄 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀽𑀲𑀼 𑀯𑀸 𑀚𑀦𑀸 𑀚𑀸𑀢𑀸 𑀭𑀢𑁆𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀢𑁆𑀣𑁄 𑀏𑀯 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀤𑁆𑀥𑀸 𑀉𑀧𑀤𑁆𑀤𑀼𑀢𑀸 𑀯𑀸. 𑀅𑀲𑁆𑀲𑀼𑀢𑀯𑀸𑀢𑀺 𑀏𑀢𑁂𑀦 𑀅𑀦𑁆𑀥𑀢𑀸 𑀯𑀼𑀢𑁆𑀢𑀸𑀢𑀺 ‘‘𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄’’𑀢𑀺 𑀆𑀳.

𑀅𑀦𑀬𑁂𑀢𑀺 𑀅𑀯𑀟𑁆𑀠𑀺𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁂𑀓𑁂𑀲𑀼 𑀘 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑀁 𑀚𑀸𑀦𑀦𑁆𑀢𑀺, 𑀧𑀸𑀓𑀝𑀜𑁆𑀘 𑀓𑀭𑁄𑀦𑁆𑀢𑀺 𑀉𑀧𑀓𑀸𑀭𑀁 𑀲𑀢𑀺𑀚𑀦𑀦𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸, 𑀢𑀣𑁂𑀯 𑀤𑀼𑀓𑁆𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀓𑀸𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀅𑀧𑁆𑀧𑀫𑁂𑀬𑁆𑀬𑁂𑀲𑀼𑀧𑀺 𑀓𑀢𑀁 𑀉𑀧𑀓𑀸𑀭𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀜𑁆𑀘 𑀚𑀸𑀦𑀸𑀢𑀺, 𑀧𑀸𑀓𑀝𑀜𑁆𑀘 𑀓𑀭𑁄𑀢𑀺, 𑀲𑀻𑀳𑁄 𑀯𑀺𑀬 𑀘 𑀚𑀯𑀁 𑀲𑀩𑁆𑀩𑀢𑁆𑀣 𑀲𑀓𑁆𑀓𑀘𑁆𑀘𑀫𑁂𑀯 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀢𑀺. 𑀅𑀭𑀺𑀬𑀪𑀸𑀯𑁄𑀢𑀺 𑀬𑁂𑀳𑀺 𑀬𑁄𑀕𑀢𑁄 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀫𑀕𑁆𑀕𑀨𑀮𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸. 𑀅𑀭𑀺𑀬𑀓𑀭𑀥𑀫𑁆𑀫𑀸 𑀅𑀦𑀺𑀘𑁆𑀘𑀤𑀲𑁆𑀲𑀦𑀸𑀤𑀬𑁄, 𑀯𑀺𑀧𑀲𑁆𑀲𑀺𑀬𑀫𑀸𑀦𑀸 𑀯𑀸 𑀅𑀦𑀺𑀘𑁆𑀘𑀸𑀤𑀬𑁄.

𑀲𑁄𑀢𑀸𑀦𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀅𑀯𑀺𑀚𑁆𑀚𑀸𑀲𑁄𑀢𑀸𑀦𑀺. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 𑀯𑀢𑁆𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀘𑀦𑁂𑀦 𑀲𑁄𑀢𑀸𑀦𑀁 𑀲𑀁𑀯𑀭𑁄 𑀧𑀺𑀤𑀳𑀦𑀁 𑀲𑀫𑀼𑀘𑁆𑀙𑁂𑀤𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀔𑀦𑁆𑀥𑀸. 𑀧𑀜𑁆𑀜𑀸𑀢𑀺 𑀏𑀓𑁂, 𑀅𑀤𑁄𑀲𑁄 𑀏𑀯 𑀯𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀦𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀦𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀧𑀫𑀸𑀤𑀲𑁆𑀲 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑁆𑀔𑀦𑁆𑀢𑀺𑀅𑀜𑁆𑀜𑀸𑀡𑀓𑁄𑀲𑀚𑁆𑀚𑀸𑀦𑀜𑁆𑀘. 𑀅𑀦𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑁂𑀳𑀺 𑀅𑀯𑀺𑀯𑀝𑁆𑀝𑀦𑀁, 𑀲𑀸𑀮𑀬𑀢𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀧𑀝𑀺𑀮𑁄𑀫𑀪𑀸𑀯𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑀸𑀳𑁄, 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀸. 𑀦𑀺𑀩𑁆𑀩𑀸𑀦𑁂 𑀧𑀝𑀺𑀮𑁄𑀫𑀪𑀸𑀯𑁄 𑀲𑀗𑁆𑀔𑀸𑀭𑁂𑀲𑀼 𑀭𑀢𑀺, 𑀦𑀺𑀩𑁆𑀩𑀸𑀦𑀧𑀝𑀺𑀘𑁆𑀙𑀸𑀤𑀓𑁄 𑀫𑁄𑀳𑁄 𑀯𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀬𑀸𑀤𑀺𑀲𑀲𑁆𑀲 𑀓𑀺𑀮𑁂𑀲𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀦 𑀫𑀼𑀜𑁆𑀘𑀢𑀺, 𑀲𑁄 𑀓𑀺𑀮𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀲𑁆𑀲 𑀅𑀢𑀺𑀓𑁆𑀓𑀫𑀦𑀁 𑀯𑀸 𑀧𑀳𑀸𑀦𑀁.

𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀬𑀁 𑀧𑀳𑀸𑀦𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀦 𑀧𑀦 𑀧𑀳𑀸𑀦𑀦𑁆𑀢𑀺? 𑀅𑀭𑀺𑀬𑀫𑀕𑁆𑀕𑁂𑀳𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁄 𑀅𑀬𑀫𑀢𑁆𑀣𑁄 𑀢𑁂𑀲𑀁 𑀪𑀸𑀯𑀺𑀢𑀢𑁆𑀢𑀸 𑀅𑀧𑁆𑀧𑀯𑀢𑁆𑀢𑀺𑀯𑀘𑀦𑁂𑀦. 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸𑀢𑀺 𑀓𑀢𑁆𑀯𑀸 𑀢𑁂𑀳𑀺 𑀧𑀳𑀸𑀢𑀩𑁆𑀩𑁂𑀦 𑀢𑁂𑀦 𑀢𑁂𑀦 𑀲𑀫𑀼𑀤𑀬𑁂𑀦 𑀲𑀳 𑀧𑀳𑀸𑀢𑀩𑁆𑀩𑀢𑁆𑀢𑀸 𑀲𑀫𑀼𑀤𑀬𑀲𑀪𑀸𑀕𑀢𑁆𑀢𑀸 𑀘 𑀲𑀘𑁆𑀘𑀯𑀺𑀪𑀗𑁆𑀕𑁂 𑀘 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀼𑀤𑀬𑀧𑀓𑁆𑀔𑀺𑀓𑀸’’𑀢𑀺 𑀤𑀺𑀝𑁆𑀞𑀺𑀆𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸𑀦𑀁 𑀯𑀺𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀦𑀬𑀦𑀁 𑀅𑀧𑀬𑀸𑀧𑀦𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀯𑀺𑀦𑀸𑀲𑀦𑀬𑀦𑀁 𑀯𑀸 𑀯𑀺𑀦𑀬𑁄, 𑀢𑁂𑀲𑀁 𑀯𑀸 𑀚𑀺𑀫𑁆𑀳𑀧𑁆𑀧𑀯𑀢𑁆𑀢𑀺𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀚𑀼𑀓𑀦𑀬𑀦𑀁 𑀯𑀺𑀦𑀬𑀦𑀁. 𑀏𑀲𑁂𑀲𑁂𑀢𑀺 𑀏𑀲𑁄 𑀲𑁄 𑀏𑀯, 𑀅𑀢𑁆𑀣𑀢𑁄 𑀅𑀦𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑀚𑁆𑀚𑀸𑀢𑁂𑀢𑀺 𑀅𑀢𑁆𑀣𑀢𑁄 𑀢𑀁𑀲𑀪𑀸𑀯𑁄𑀯. 𑀲𑀧𑁆𑀧𑀼𑀭𑀺𑀲𑁄 𑀅𑀭𑀺𑀬𑀲𑀪𑀸𑀯𑁄, 𑀅𑀭𑀺𑀬𑁄 𑀘 𑀲𑀧𑁆𑀧𑀼𑀭𑀺𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀅𑀤𑁆𑀯𑀬𑀦𑁆𑀢𑀺 𑀤𑁆𑀯𑀬𑀢𑀸𑀭𑀳𑀺𑀢𑀁, 𑀯𑀡𑁆𑀡𑀫𑁂𑀯 ‘‘𑀅𑀘𑁆𑀘𑀻’’𑀢𑀺 𑀕𑀳𑁂𑀢𑁆𑀯𑀸 𑀅𑀘𑁆𑀘𑀺𑀁 𑀯𑀸 ‘‘𑀯𑀡𑁆𑀡𑁄 𑀏𑀯𑀸’’𑀢𑀺 𑀢𑁂𑀲𑀁 𑀏𑀓𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀬𑀣𑀸𑀢𑀓𑁆𑀓𑀺𑀢𑀁 𑀅𑀢𑁆𑀢𑀸𑀦𑀁 ‘‘𑀭𑀽𑀧’’𑀦𑁆𑀢𑀺, 𑀬𑀣𑀸𑀤𑀺𑀝𑁆𑀞𑀁 𑀯𑀸 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀏𑀓𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺 𑀇𑀫𑀺𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀭𑀽𑀧𑁂 𑀅𑀢𑁆𑀢𑀕𑁆𑀕𑀳𑀡𑀁 𑀧𑀯𑀢𑁆𑀢𑀫𑀸𑀦𑀁 𑀅𑀘𑁆𑀘𑀺𑀬𑀁 𑀯𑀡𑁆𑀡𑀕𑁆𑀕𑀳𑀡𑀁 𑀯𑀺𑀬. 𑀉𑀧𑀫𑀸𑀬𑁄 𑀘 𑀅𑀦𑀜𑁆𑀜𑀢𑁆𑀢𑀸𑀤𑀺𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀯𑀡𑁆𑀡𑀸𑀤𑀻𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀯𑀺𑀬 𑀯𑀸 𑀯𑀡𑁆𑀡𑀸𑀤𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁.

𑁧𑁦𑁦𑁮. 𑀲𑀭𑀻𑀭𑀦𑀺𑀧𑁆𑀨𑀢𑁆𑀢𑀺𑀬𑀸𑀢𑀺 𑀲𑀭𑀻𑀭𑀧𑀸𑀭𑀺𑀧𑀽𑀭𑀺𑀬𑀸. 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀪𑀸𑀯𑁄𑀢𑀺 𑀚𑀸𑀢𑀺𑀆𑀤𑀺𑀲𑀪𑀸𑀯𑀫𑁂𑀯 𑀆𑀳, 𑀚𑀸𑀢𑀺𑀆𑀤𑀻𑀦𑀁 𑀯𑀸 𑀚𑀭𑀸𑀫𑀭𑀡𑀸𑀤𑀺𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀁. 𑀲𑀸 𑀧𑀦 𑀚𑀸𑀢𑀺𑀆𑀤𑀺𑀯𑀺𑀦𑀺𑀫𑀼𑀢𑁆𑀢𑀸 𑀦𑀢𑁆𑀣𑀻𑀢𑀺 𑀢𑁂𑀲𑀁𑀬𑁂𑀯𑀸𑀥𑀺𑀯𑀘𑀦𑀁 𑀳𑁄𑀢𑀺 ‘‘𑀇𑀤𑀧𑁆𑀧𑀘𑁆𑀘𑀬𑀢𑀸’’𑀢𑀺.

𑁧𑁦𑁦𑁯. 𑀇𑀥 𑀅𑀦𑀸𑀕𑀢𑀓𑀺𑀮𑁂𑀲𑀸 ‘‘𑀢𑀤𑁂𑀓𑀝𑁆𑀞𑀸 𑀓𑀺𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀺𑀲𑁆𑀲𑀸 𑀘 𑀧𑀸𑀴𑀺𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀳𑀚𑁂𑀓𑀝𑁆𑀞𑀯𑀲𑁂𑀦𑀸𑀢𑀺 𑀢𑀢𑁆𑀣 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀬𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦𑀸𑀢𑀺 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑁂𑀳𑀺 𑀲𑀁𑀬𑁄𑀚𑀦𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑀣𑀸 𑀢𑁂 𑀲𑀁𑀬𑁄𑀚𑀦𑀓𑀺𑀮𑁂𑀲𑀸 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀸. 𑀲𑀁𑀬𑁄𑀚𑀦𑀭𑀳𑀺𑀢𑁂𑀳𑀺 𑀘 𑀧𑀦 𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀫𑀼𑀝𑁆𑀞𑀺𑀢𑀸𑀦𑀜𑁆𑀘 𑀲𑀩𑁆𑀪𑀸𑀯𑀢𑁄 𑀓𑀺𑀮𑁂𑀲𑁂𑀳𑁂𑀯 𑀬𑁄𑀚𑀦𑀸 𑀓𑀢𑀸.

𑁧𑁦𑁧𑁧. 𑀲𑀁𑀬𑁄𑀚𑀦𑀸𑀤𑀻𑀦𑀁 𑀯𑀺𑀬𑀸𑀢𑀺 𑀲𑀁𑀬𑁄𑀚𑀦𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀤𑀻𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀯𑀺𑀬. 𑀢𑁂𑀳𑀻𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀫𑀕𑁆𑀕𑁂𑀳𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀦𑀸𑀫𑀭𑀽𑀧𑀜𑁆𑀘 𑀯𑀺𑀧𑀸𑀓𑀦𑁆𑀢𑀺 𑀓𑀢𑁆𑀯𑀸 ‘‘𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀳𑀸𑀦𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀆𑀳.

𑁧𑁦𑁧𑁩. 𑀳𑁂𑀢𑀽 𑀘𑁂𑀯𑀸𑀢𑀺 ‘‘𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸’’𑀢𑀺 𑀏𑀢𑀲𑁆𑀫𑀺𑀁 𑀲𑀫𑀸𑀲𑀧𑀤𑁂 𑀏𑀓𑀤𑁂𑀲𑁂𑀦 𑀲𑀫𑀸𑀲𑀧𑀤𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂𑀦 ‘‘𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸’’𑀢𑀺 𑀇𑀫𑁂𑀬𑁂𑀯 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀦 𑀇𑀢𑁄 𑀅𑀜𑁆𑀜𑁂𑀢𑀺 𑀅𑀬𑀁 𑀦𑀺𑀬𑀫𑁄 𑀧𑀜𑁆𑀜𑀸𑀬𑀢𑀺, 𑀦 𑀇𑀫𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀬𑁂𑀯𑀸𑀢𑀺. 𑀢𑀲𑁆𑀫𑀸 𑀇𑀫𑁂𑀲𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀪𑀸𑀯𑁄 𑀅𑀦𑀺𑀬𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀢𑁆𑀢𑀸𑀢𑀺 𑀧𑀼𑀭𑀺𑀫𑀦𑀬𑁄 𑀯𑀺𑀯𑀭𑀡𑀻𑀬𑀢𑁆𑀣𑀯𑀸 𑀳𑁄𑀢𑀺. 𑀢𑀲𑁆𑀫𑀸 𑀧𑀼𑀭𑀺𑀫𑀦𑀬𑁂𑀦 𑀥𑀫𑁆𑀫𑀢𑁄 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑀢𑁄 𑀦𑀺𑀓𑁆𑀔𑀺𑀧𑀺𑀢𑀼𑀁 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄.

𑁧𑁦𑁨𑁯. 𑀫𑀳𑀕𑁆𑀕𑀢𑀸 𑀯𑀸 𑀇𑀤𑁆𑀥𑀺𑀯𑀺𑀥𑀸𑀤𑀬𑁄. 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀫𑀳𑀕𑁆𑀕𑀢𑀸 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀸𑀕𑀢𑀁𑀲𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸.

𑁧𑁦𑁩𑁫. 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺, 𑀅𑀦𑀦𑁆𑀢𑀭𑀨𑀮𑀧𑁆𑀧𑀬𑁄𑀚𑀦𑀸𑀦𑀺, 𑀅𑀦𑀦𑁆𑀢𑀭𑀨𑀮𑀓𑀭𑀡𑀲𑀻𑀮𑀸𑀦𑀺 𑀯𑀸 𑀆𑀦𑀦𑁆𑀢𑀭𑀺𑀓𑀸𑀦𑀺. 𑀢𑀸𑀦𑀺 𑀧𑀦 𑀧𑀝𑀺𑀧𑀓𑁆𑀔𑁂𑀦 𑀅𑀦𑀺𑀯𑀸𑀭𑀡𑀻𑀬𑀨𑀮𑀢𑁆𑀢𑀸 𑀅𑀦𑁆𑀢𑀭𑀸𑀬𑀭𑀳𑀺𑀢𑀸𑀦𑀻𑀢𑀺 ‘‘𑀅𑀦𑀦𑁆𑀢𑀭𑀸𑀬𑁂𑀦 𑀨𑀮𑀤𑀸𑀬𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀸𑀬𑀸𑀦𑀺 𑀯𑀸 𑀆𑀦𑀦𑁆𑀢𑀭𑀺𑀓𑀸𑀦𑀻𑀢𑀺 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀲𑁆𑀫𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀦𑁂𑀓𑀲𑁆𑀫𑀺𑀫𑁆𑀧𑀺 𑀆𑀬𑀽𑀳𑀺𑀢𑁂 𑀯𑀢𑁆𑀢𑀩𑁆𑀩𑀫𑁂𑀯𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀸𑀳𑀓𑀢𑁆𑀢𑀁 𑀅𑀢𑁆𑀣𑀺 𑀅𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸, 𑀅𑀧𑁆𑀧𑀝𑀺𑀧𑀓𑁆𑀔𑀢𑀸 𑀘 𑀲𑀫𑀸𑀦𑀨𑀮𑀢𑁆𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀢𑁄 𑀘. ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀏𑀯𑀫𑀸𑀤𑀺𑀓𑁄 𑀅𑀳𑁂𑀢𑀼𑀓𑀯𑀸𑀤𑁄. ‘‘𑀓𑀭𑁄𑀢𑁄 𑀔𑁄 𑀓𑀸𑀭𑀬𑀢𑁄 𑀙𑀺𑀦𑁆𑀤𑀢𑁄 𑀙𑁂𑀤𑀸𑀧𑀬𑀢𑁄…𑀧𑁂… 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀯𑀫𑀸𑀤𑀺𑀓𑁄 𑀅𑀓𑀺𑀭𑀺𑀬𑀯𑀸𑀤𑁄. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁨.𑁯𑁪; 𑁩.𑁯𑁧) 𑀏𑀯𑀫𑀸𑀤𑀺𑀓𑁄 𑀦𑀢𑁆𑀣𑀺𑀓𑀯𑀸𑀤𑁄. 𑀏𑀢𑁂𑀲𑀼 𑀧𑀼𑀭𑀺𑀫𑀯𑀸𑀤𑁄 𑀩𑀦𑁆𑀥𑀫𑁄𑀓𑁆𑀔𑀸𑀦𑀁 𑀳𑁂𑀢𑀼𑀁 𑀧𑀝𑀺𑀲𑁂𑀥𑁂𑀢𑀺, 𑀤𑀼𑀢𑀺𑀬𑁄 𑀓𑀫𑁆𑀫𑀁, 𑀢𑀢𑀺𑀬𑁄 𑀯𑀺𑀧𑀸𑀓𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑀜𑁆𑀳𑀻𑀢𑀺 𑀅𑀳𑁂𑀢𑀼𑀓𑀸𑀤𑀺𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁, 𑀦 𑀧𑀦 𑀦𑀺𑀬𑀢𑀪𑀸𑀯𑀁 𑀅𑀧𑁆𑀧𑀢𑁆𑀢𑀁.

𑁧𑁦𑁩𑁯. 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀫𑀕𑁆𑀕𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑁂𑀦 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀫𑀕𑁆𑀕𑀗𑁆𑀕𑀸𑀦𑀁 𑀞𑀧𑀦𑀁 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑀭𑀳𑀺𑀢𑁂 𑀫𑀕𑁆𑀕𑀳𑁂𑀢𑀼𑀓𑁂 𑀤𑀲𑁆𑀲𑁂𑀢𑀼𑀁, 𑀢𑁂𑀦 𑀫𑀕𑁆𑀕𑀳𑁂𑀢𑀼𑀓𑁂 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀏𑀓𑁂𑀓𑀁 𑀅𑀗𑁆𑀕𑀁 𑀞𑀧𑁂𑀢𑁆𑀯𑀸 𑀢𑀁𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑁂𑀧𑀺 ‘𑀫𑀕𑁆𑀕𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸’𑀢𑀺 𑀇𑀤𑀁 𑀯𑀘𑀦𑀁 𑀬𑀼𑀚𑁆𑀚𑀢𑀻’’𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀢𑀢𑀺𑀬𑀦𑀬𑁂 𑀯𑀺𑀬 𑀇𑀥𑀸𑀧𑀺 ‘‘𑀞𑀧𑁂𑀢𑁆𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀼𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑀗𑁆𑀕𑀸𑀫𑀕𑁆𑀕𑀗𑁆𑀕𑀸𑀦𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑁄 𑀅𑀬𑀁 𑀦𑀬𑁄𑀢𑀺. 𑀲𑁂𑀲𑀫𑀕𑁆𑀕𑀗𑁆𑀕𑀸𑀦𑀁 𑀧𑀼𑀩𑁆𑀩𑁂 𑀞𑀧𑀺𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀧𑀼𑀭𑀺𑀫𑀦𑀬𑁂𑀧𑀺 𑀫𑀕𑁆𑀕𑀳𑁂𑀢𑀼𑀓𑀢𑀸 𑀲𑀺𑀤𑁆𑀥𑀸𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀼𑀢𑀺𑀬𑀦𑀬𑁂𑀧𑀺 𑀞𑀧𑀺𑀢𑀸𑀬 𑀢𑀢𑀺𑀬𑀦𑀬𑁂 𑀲𑀳𑁂𑀢𑀼𑀓𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀓𑀣𑀁 𑀤𑀲𑁆𑀲𑀺𑀢𑁄, 𑀦𑀦𑀼 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 ‘‘𑀅𑀮𑁄𑀪𑁄 𑀅𑀤𑁄𑀲𑁄 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺 (𑀥. 𑀲. 𑁧𑁦𑁩𑁯) 𑀅𑀯𑀢𑁆𑀯𑀸 ‘‘𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺 𑀯𑀺𑀲𑀼𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑁂 𑀫𑀕𑁆𑀕𑀳𑁂𑀢𑀽 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀥. 𑀲. 𑁧𑁦𑁩𑁯) 𑀯𑀺𑀲𑀼𑀁 𑀫𑀕𑁆𑀕𑀳𑁂𑀢𑀼𑀓𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀫𑀕𑁆𑀕𑀳𑁂𑀢𑀽𑀲𑀼 𑀅𑀫𑁄𑀳𑁄’’𑀢𑀺 (𑀥. 𑀲. 𑁧𑁦𑁩𑁯) 𑀯𑀼𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀢𑀸 𑀦 𑀤𑀲𑁆𑀲𑀺𑀢𑀸 𑀲𑀺𑀬𑀸? 𑀦𑁄 𑀦 𑀤𑀲𑁆𑀲𑀺𑀢𑀸. 𑀬𑀣𑀸 𑀳𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀤𑁂𑀓𑀝𑁆𑀞𑁄 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀽’’𑀢𑀺 (𑀥. 𑀲. 𑁧𑁦𑁧𑁭) 𑀯𑀺𑀲𑀼𑀁 𑀧𑀳𑀸𑀢𑀩𑁆𑀩𑀳𑁂𑀢𑀽 𑀦𑀺𑀬𑀫𑁂𑀢𑁆𑀯𑀸 ‘‘𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺𑀆𑀤𑀺𑀯𑀘𑀦𑁂𑀦 (𑀥. 𑀲. 𑁧𑁦𑁧𑁭) 𑀮𑁄𑀪𑀤𑁄𑀲𑀫𑁄𑀳𑀸 𑀘 𑀅𑀜𑁆𑀜𑀫𑀜𑁆𑀜𑀲𑀳𑀚𑁂𑀓𑀝𑁆𑀞𑀸 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀪𑀽𑀢𑀸 𑀘 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀅𑀮𑁄𑀪𑀸𑀤𑀬𑁄 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺 𑀦𑀺𑀕𑀫𑀺𑀢𑀸𑀧𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀪𑀸𑀯𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀘𑀦𑁂𑀦 ‘‘𑀫𑀕𑁆𑀕𑀳𑁂𑀢𑀼𑀓𑀸’’𑀢𑀺 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀧𑀺 𑀅𑀫𑁄𑀳𑁄𑀢𑀺 𑀯𑀼𑀢𑁆𑀢𑀸𑀬 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀬𑁄 𑀤𑀼𑀢𑀺𑀬𑀦𑀬𑁂 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸𑀢𑀺 𑀯𑀼𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀲𑁂𑀯 𑀅𑀜𑁆𑀜𑁂𑀦 𑀅𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦 𑀫𑀕𑁆𑀕𑀳𑁂𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑁄𑀕𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑁄 𑀢𑀢𑀺𑀬𑀦𑀬𑁄 𑀲𑀺𑀬𑀸. ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀅𑀮𑁄𑀪𑁄 𑀅𑀤𑁄𑀲𑁄 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦 ‘‘𑀫𑀕𑁆𑀕𑀳𑁂𑀢𑀽’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀦 𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦 𑀬𑁂𑀲𑀁 𑀫𑀕𑁆𑀕𑀳𑁂𑀢𑀼𑀪𑀸𑀯𑁄 𑀲𑀫𑁆𑀪𑀯𑀢𑀺, 𑀢𑁂 𑀲𑀩𑁆𑀩𑁂 ‘‘𑀫𑀕𑁆𑀕𑀳𑁂𑀢𑀽’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀲𑀁 𑀅𑀜𑁆𑀜𑁂𑀲𑀜𑁆𑀘 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑁄 𑀢𑀢𑀺𑀬𑀦𑀬𑁄, 𑀢𑀲𑁆𑀫𑀸 𑀢𑀢𑁆𑀣 ‘‘𑀅𑀫𑁄𑀳𑁄’’𑀢𑀺𑀧𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑁄 𑀫𑀕𑁆𑀕𑀳𑁂𑀢𑀼 𑀦 𑀳𑁄𑀢𑀻𑀢𑀺. 𑀇𑀫𑁂 𑀧𑀦 𑀢𑀬𑁄𑀧𑀺 𑀦𑀬𑀸 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀢𑁆𑀣𑀢𑁄 𑀦𑀺𑀓𑁆𑀔𑁂𑀧𑀸 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀲𑀭𑀽𑀧𑁂𑀦 𑀯𑀘𑀦𑀁 𑀥𑀫𑁆𑀫𑀢𑁄 𑀦𑀺𑀓𑁆𑀔𑁂𑀧𑁄, 𑀅𑀢𑁆𑀣𑁂𑀦 𑀅𑀢𑁆𑀣𑀢𑁄𑀢𑀺 𑀏𑀯𑀫𑁆𑀧𑀺 𑀬𑁄𑀚𑀦𑀸 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀤𑀼𑀢𑀺𑀬𑀢𑀢𑀺𑀬𑀦𑀬𑀸 𑀲𑀭𑀽𑀧𑀢𑁄 𑀳𑁂𑀢𑀼𑀳𑁂𑀢𑀼𑀫𑀦𑁆𑀢𑀼𑀤𑀲𑁆𑀲𑀦𑀯𑀲𑁂𑀦 𑀥𑀫𑁆𑀫𑀢𑁄 𑀦𑀺𑀓𑁆𑀔𑁂𑀧𑁄. 𑀧𑀞𑀫𑀦𑀬𑁄 𑀢𑀣𑀸𑀅𑀤𑀲𑁆𑀲𑀦𑀢𑁄 𑀅𑀢𑁆𑀣𑁂𑀦 𑀘 𑀫𑀕𑁆𑀕𑀗𑁆𑀕𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀳𑁂𑀢𑀼𑀫𑀦𑁆𑀢𑀼𑀪𑀸𑀯𑀸𑀯𑀕𑀫𑀦𑀢𑁄 𑀅𑀢𑁆𑀣𑀢𑁄 𑀦𑀺𑀓𑁆𑀔𑁂𑀧𑁄𑀢𑀺.

𑁧𑁦𑁪𑁦. 𑀬𑀲𑁆𑀫𑀺𑀁 𑀲𑀪𑀸𑀯𑀥𑀫𑁆𑀫𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀲𑁄 𑀢𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄𑀢𑀺 𑀯𑀼𑀢𑁆𑀢𑁄. 𑀏𑀢𑁆𑀣𑀸𑀧𑀻𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀅𑀝𑁆𑀞𑀓𑀣𑀸𑀯𑀘𑀦𑁂, 𑀏𑀢𑁆𑀣 𑀯𑀸 𑀧𑀝𑁆𑀞𑀸𑀦𑁂 𑀫𑀕𑁆𑀕𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀯𑀘𑀦𑁂𑀦𑁂𑀯 𑀧𑀝𑀺𑀓𑁆𑀔𑁂𑀧𑀧𑀸𑀴𑀺𑀬𑀁. 𑀅𑀬𑀫𑁂𑀯𑀢𑁆𑀣𑁄𑀢𑀺 𑀅𑀢𑁆𑀢𑀦𑁄 𑀫𑀕𑁆𑀕𑀨𑀮𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀧𑀥𑀸𑀦𑁂𑀦 𑀅𑀥𑀺𑀧𑀢𑀺𑀦𑀸 𑀲𑀳𑀚𑀸𑀢𑀸𑀥𑀺𑀧𑀢𑀺 𑀦𑀺𑀤𑀲𑁆𑀲𑀺𑀢𑁄, 𑀢𑀬𑀺𑀤𑀁 𑀦𑀬𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀅𑀜𑁆𑀜𑁄𑀧𑀺 𑀏𑀯𑀁𑀧𑀓𑀸𑀭𑁄 𑀲𑀳𑀚𑀸𑀢𑁄 𑀫𑀕𑁆𑀕𑀸𑀥𑀺𑀧𑀢𑀺 𑀦𑀺𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀫𑁆𑀧𑀺 𑀳𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺.

𑁧𑁦𑁪𑁧. 𑀅𑀢𑁆𑀢𑀦𑁄 𑀲𑀪𑀸𑀯𑁄 𑀅𑀢𑁆𑀢𑀪𑀸𑀯𑁄. 𑀮𑀤𑁆𑀥𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀓𑀧𑁆𑀧𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂 𑀉𑀧𑁆𑀧𑀚𑁆𑀚𑀢𑀺 𑀅𑀦𑁂𑀓𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀸𑀦𑀁 𑀲𑀢𑁆𑀢𑀸𑀦𑀁, 𑀓𑀧𑁆𑀧𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂𑀧𑀺 𑀯𑀸 𑀮𑀤𑁆𑀥𑁄𑀓𑀸𑀲𑀁 𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀤𑀧𑀺 𑀮𑀤𑁆𑀥𑁄𑀓𑀸𑀲𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺. 𑀦𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑁆𑀧𑀸𑀤𑀻𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸 𑀦𑀸𑀫 𑀚𑀸𑀢𑁄’’𑀢𑀺. 𑀅𑀭𑀽𑀧𑀲𑀗𑁆𑀔𑀸𑀢𑁄 𑀅𑀢𑁆𑀢𑀸𑀢𑀺 𑀅𑀭𑀽𑀧𑀪𑀯𑀗𑁆𑀕𑀁 𑀆𑀳. 𑀢𑀢𑁆𑀣 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀤𑀺𑀫𑀬𑁄 𑀅𑀢𑁆𑀢𑀸𑀢𑀺 𑀳𑀺 𑀅𑀢𑁆𑀣𑀢𑁄 𑀯𑁄𑀳𑀸𑀭𑁄 𑀧𑀯𑀢𑁆𑀢𑁄𑀢𑀺.

𑀬𑀤𑀺 𑀧𑀦 𑀆𑀬𑀽…𑀧𑁂… 𑀲𑀩𑁆𑀩𑀁 𑀯𑀺𑀧𑀸𑀓𑀁 𑀤𑀤𑁂𑀬𑁆𑀬, 𑀅𑀮𑀤𑁆𑀥𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀓𑀢𑁆𑀯𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀜𑁆𑀘 𑀤𑀤𑁂𑀬𑁆𑀬, 𑀢𑀢𑁄 𑀏𑀓𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀲𑀩𑁆𑀩𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬 𑀦𑀺𑀭𑀢𑁆𑀣𑀓𑀢𑁆𑀢𑀸, 𑀉𑀧𑁆𑀧𑀢𑁆𑀢𑀺𑀬𑀸𑀬𑁂𑀯 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀨𑀮𑀤𑀸𑀦𑁂. 𑀅𑀣 𑀯𑀸 𑀅𑀮𑀤𑁆𑀥𑁄𑀓𑀸𑀲𑀲𑁆𑀲 𑀯𑀺𑀧𑀸𑀓𑀤𑀸𑀦𑁂 𑀧𑀘𑁆𑀘𑀬𑀦𑁆𑀢𑀭𑀭𑀳𑀺𑀢𑀲𑁆𑀲𑀧𑀺 𑀯𑀺𑀧𑀸𑀓𑀤𑀸𑀦𑀁 𑀆𑀧𑀦𑁆𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀔𑁂𑀧𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀧𑀘𑀬𑀕𑀸𑀫𑀺𑀓𑀫𑁆𑀫𑀲𑁆𑀲 𑀓𑀫𑁆𑀫𑀓𑁆𑀔𑀬𑀓𑀭𑀲𑁆𑀲 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬. 𑀪𑀸𑀯𑀺𑀢𑁂𑀧𑀺 𑀫𑀕𑁆𑀕𑁂 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀭𑀳𑀺𑀢𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀢𑁄 𑀲𑀫𑀢𑁆𑀣𑀢𑀸 𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑀸 𑀯𑀸 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀪𑀯𑀺𑀢𑀩𑁆𑀩𑀢𑁆𑀢𑀸 𑀯𑀺𑀧𑀸𑀓𑀢𑁄 𑀅𑀜𑁆𑀜𑀲𑁆𑀲 𑀧𑀯𑀢𑁆𑀢𑀺𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬. 𑀢𑀁 𑀧𑀦𑀸𑀢𑀺 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁. 𑀇𑀤𑀁 𑀧𑀦 𑀥𑀼𑀯𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑁂𑀦 𑀅𑀥𑀼𑀯𑀯𑀺𑀧𑀸𑀓𑀲𑁆𑀲𑀧𑀺 𑀮𑀤𑁆𑀥𑁄𑀓𑀸𑀲𑀲𑁆𑀲 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀩𑀮𑀯𑀯𑀺𑀭𑀳𑁂 𑀅𑀕𑁆𑀕𑀫𑀕𑁆𑀕𑀪𑀸𑀯𑀦𑀸𑀯𑀺𑀭𑀳𑁂 𑀘 𑀅𑀧𑁆𑀧𑀳𑀻𑀦𑀲𑀪𑀸𑀯𑀢𑁄 𑀥𑀼𑀯𑀁 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀥𑀼𑀯𑀯𑀺𑀧𑀸𑀓𑀸𑀢𑀺 𑀯𑀼𑀢𑁆𑀢𑀸. 𑀆𑀬𑀽𑀳𑀺𑀢𑀓𑀫𑁆𑀫𑁂 𑀯𑀼𑀘𑁆𑀘𑀫𑀸𑀦𑁂 𑀅𑀦𑀼𑀧𑁆𑀧𑀦𑁆𑀦𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀬𑀁 𑀆𑀬𑀽𑀳𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣𑀸𑀧𑀺 𑀆𑀬𑀽𑀳𑀺𑀢-𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸.

𑁧𑁦𑁫𑁦. 𑀉𑀧𑀸𑀤𑀺𑀦𑁆𑀦𑀸𑀢𑀺 𑀏𑀢𑁆𑀣 𑀦 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸𑀢𑀺 𑀅𑀬𑀫𑀢𑁆𑀣𑁄, 𑀉𑀧𑀲𑀤𑁆𑀤𑁄 𑀧𑀦 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀸𑀭𑀫𑁆𑀫𑀡𑀸 𑀉𑀧𑀸𑀤𑀸𑀦𑁂𑀳𑀺, 𑀅𑀜𑁆𑀜𑁂 𑀘 𑀅𑀦𑀪𑀺𑀦𑀺𑀯𑁂𑀲𑁂𑀦 ‘‘𑀅𑀳𑀁 𑀫𑀕𑁆𑀕𑀁 𑀪𑀸𑀯𑀬𑀺𑀁, 𑀫𑀫 𑀫𑀕𑁆𑀕𑁄 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀓𑁂𑀦 𑀕𑀳𑀡𑁂𑀦 𑀆𑀤𑀺𑀦𑁆𑀦𑀸 𑀇𑀘𑁆𑀘𑁂𑀯 𑀉𑀧𑀸𑀤𑀺𑀦𑁆𑀦𑀸. 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑁂𑀦 𑀯𑀸 𑀅𑀫𑀕𑁆𑀕𑀨𑀮𑀥𑀫𑁆𑀫𑀸𑀬𑁂𑀯 𑀯𑀼𑀢𑁆𑀢𑀸, 𑀇𑀢𑀭𑁂𑀳𑀺 𑀫𑀕𑁆𑀕𑀨𑀮𑀥𑀫𑁆𑀫𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁧𑁦𑁬𑁨. 𑀫𑁂𑀢𑁆𑀢𑀸𑀬𑀦𑀯𑀲𑁂𑀦𑀸𑀢𑀺 𑀫𑁂𑀢𑁆𑀢𑀸𑀨𑀭𑀡𑀯𑀲𑁂𑀦. ‘‘𑀫𑁂𑀢𑁆𑀢𑀬𑀦𑀯𑀲𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑁂𑀢𑁆𑀢𑀸, 𑀫𑁂𑀤𑀦𑀁 𑀯𑀸 𑀫𑁂𑀢𑁆𑀢𑀸𑀬𑀦𑀁, 𑀢𑀜𑁆𑀘 𑀲𑀺𑀦𑁂𑀳𑀯𑀲𑁂𑀦. 𑀅𑀦𑀼𑀤𑀬𑀢𑀻𑀢𑀺 𑀅𑀦𑀼𑀤𑀸𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀦𑀼𑀤𑁆𑀤𑀸’’𑀢𑀺 𑀤-𑀓𑀸𑀭𑀸𑀕𑀫𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀦𑀼𑀤𑁆𑀤𑀸𑀬𑀦𑀸𑀓𑀸𑀭𑁄𑀢𑀺 𑀅𑀦𑀼𑀭𑀓𑁆𑀔𑀡𑀸𑀓𑀸𑀭𑁄. 𑀭𑀓𑁆𑀔𑀡𑀜𑁆𑀳𑀺 𑀤𑀸𑀬𑀦𑀸. 𑀅𑀦𑀼𑀤𑁆𑀤𑀸𑀬𑀺𑀢𑀲𑁆𑀲𑀸𑀢𑀺 𑀅𑀦𑀼𑀤𑁆𑀤𑀸𑀬 𑀅𑀬𑀺𑀢𑀲𑁆𑀲. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀁 𑀲𑀼𑀡𑀦𑁆𑀢𑀲𑁆𑀲 𑀲𑀯𑀦𑁂, 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀫𑁆𑀫𑀲𑀦𑁂, 𑀫𑀕𑁆𑀕𑁂𑀦𑁂𑀢𑁆𑀣 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀧𑀝𑀺𑀯𑁂𑀥𑁂, 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑁂𑀢𑀺 𑀘𑀢𑀽𑀲𑀼 𑀓𑀸𑀮𑁂𑀲𑀼 𑀤𑀼𑀓𑁆𑀔𑁂 𑀜𑀸𑀡𑀁 𑀯𑀢𑁆𑀢𑀢𑀺.

𑁧𑁦𑁬𑁫. 𑀘𑀺𑀢𑁆𑀢𑀲𑁆𑀲 𑀲𑀁𑀭𑀜𑁆𑀚𑀦𑀁 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄. 𑀕𑀺𑀚𑁆𑀛𑀦𑁆𑀢𑀻𑀢𑀺 𑀅𑀪𑀺𑀓𑀗𑁆𑀔𑀦𑁆𑀢𑀺. 𑀲𑀜𑁆𑀚𑀁𑀦𑁆𑀢𑀻𑀢𑀺 𑀩𑀦𑁆𑀥𑀦𑁆𑀢𑀺. 𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀲𑀁𑀯𑀭𑀡𑀝𑁆𑀞𑁂𑀦, 𑀑𑀮𑀫𑁆𑀩𑀦𑀝𑁆𑀞𑁂𑀦 𑀯𑀸. 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲𑀸𑀢𑀺 𑀓𑀸𑀫𑀪𑀯𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀧𑀭𑀺𑀓𑀟𑁆𑀠𑀢𑀺. 𑀘𑀺𑀢𑁆𑀢𑀫𑀲𑁆𑀲 𑀪𑀯𑀦𑁆𑀢𑀭𑁂 𑀯𑀺𑀥𑀸𑀯𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀡𑁆𑀳𑀸𑀯𑀺𑀧𑁆𑀨𑀦𑁆𑀤𑀺𑀢𑀦𑀺𑀯𑁂𑀲𑁄 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀤𑀺𑀪𑀸𑀯𑁂𑀦 𑀢𑀡𑁆𑀳𑀸𑀧𑀯𑀢𑁆𑀢𑀺𑀬𑁂𑀯.

𑀲𑀭𑀺𑀢𑀸𑀦𑀻𑀢𑀺 𑀭𑀸𑀕𑀯𑀲𑁂𑀦 𑀅𑀮𑁆𑀮𑀸𑀦𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀧𑀻𑀢𑀺𑀯𑀲𑁂𑀦 𑀲𑀺𑀦𑀺𑀤𑁆𑀥𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺. 𑀯𑀺𑀲𑀢𑀸𑀢𑀺 𑀯𑀺𑀢𑁆𑀣𑀢𑀸. 𑀭𑀽𑀧𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀩𑁆𑀬𑀸𑀧𑀦𑀯𑀲𑁂𑀦 𑀯𑀺𑀲𑀝𑀸. 𑀧𑀼𑀭𑀺𑀫𑀯𑀘𑀦𑀫𑁂𑀯 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀧𑁆𑀧𑀢𑀺, 𑀲𑀳𑀢𑀺 𑀯𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀢𑀸𑀮𑀺𑀬𑀫𑀸𑀦𑁄𑀧𑀺 𑀲𑀳𑀢𑀻𑀢𑀺. 𑀑𑀲𑀓𑁆𑀓𑀦𑀁, 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 𑀯𑀺𑀲𑀓𑁆𑀓𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀯𑀺𑀲𑀁𑀳𑀭𑀢𑀻𑀢𑀺 𑀢𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀻 𑀯𑀺𑀯𑀺𑀥𑁂𑀳𑀸𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀗𑁆𑀔𑀺𑀧𑀢𑀺. 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀯𑁂𑀤𑀦𑀸𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀢𑀡𑁆𑀳𑀸𑀬 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀳𑁄𑀢𑀺, 𑀦 𑀅𑀫𑀢𑀲𑁆𑀲𑀸𑀢𑀺 𑀲𑀸 ‘‘𑀯𑀺𑀲𑀧𑀭𑀺𑀪𑁄𑀕𑀸’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑁆𑀣 𑀧𑀥𑀸𑀦𑁄 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀯𑀺𑀲𑀢𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑀤𑁂𑀯𑀸𑀤𑀺𑀪𑀸𑀯𑀪𑀽𑀢𑀁.

𑀧𑀡𑀺𑀥𑀸𑀦𑀓𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀭𑀽𑀧𑀸𑀤𑀻𑀲𑀼 𑀞𑀧𑀦𑀓𑀯𑀲𑁂𑀦. 𑀅𑀜𑁆𑀜𑁄𑀧𑀺 𑀩𑀦𑁆𑀥𑀼 𑀢𑀡𑁆𑀳𑀸𑀬 𑀏𑀯 𑀳𑁄𑀢𑀺, 𑀲𑁄 𑀧𑀦 𑀅𑀩𑀦𑁆𑀥𑀼𑀧𑀺 𑀳𑁄𑀢𑀺. 𑀢𑀡𑁆𑀳𑀸 𑀧𑀦 𑀦𑀺𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀸𑀢𑀺 ‘‘𑀧𑀸𑀝𑀺𑀬𑁂𑀓𑁆𑀓𑁄 𑀩𑀦𑁆𑀥𑀽’’𑀢𑀺 𑀯𑀼𑀢𑁆𑀢𑀸. 𑀅𑀲𑀦𑀢𑁄𑀢𑀺 𑀩𑁆𑀬𑀸𑀧𑀦𑀢𑁄 𑀪𑀼𑀜𑁆𑀚𑀦𑀢𑁄 𑀘. 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀺 ‘‘𑀅𑀚𑁆𑀛𑁄𑀢𑁆𑀣𑀭𑀡𑀢𑁄’’𑀢𑀺𑀆𑀤𑀺𑀦𑀸. 𑀆𑀲𑀻𑀲𑀦𑀯𑀲𑁂𑀦𑀸𑀢𑀺 𑀇𑀘𑁆𑀙𑀦𑀯𑀲𑁂𑀦. 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀢𑀺 𑀚𑀧𑁆𑀧𑀦𑀸𑀚𑀧𑁆𑀧𑀺𑀢𑀢𑁆𑀢𑀸𑀦𑀁 𑀚𑀧𑁆𑀧𑀸𑀬 𑀅𑀦𑀜𑁆𑀜𑀢𑁆𑀢𑀤𑀲𑁆𑀲𑀦𑀸𑀓𑀸𑀭𑁂𑀦. 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀻𑀢𑀺 𑀘𑀺𑀢𑁆𑀢𑀁 𑀫𑀽𑀲𑀢𑀺. 𑀫𑀸𑀭𑀧𑀸𑀲𑁄𑀢𑀺 𑀫𑀸𑀭𑁂𑀦 𑀕𑀳𑀺𑀢𑀢𑀸𑀬 𑀭𑀸𑀕𑁄 𑀫𑀸𑀭𑀧𑀸𑀲𑁄.

𑁧𑁦𑁬𑁬. 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀫𑁆𑀫𑀧𑀣𑀪𑁂𑀤𑀁 𑀦 𑀓𑀭𑁄𑀢𑀻𑀢𑀺 𑀏𑀢𑁂𑀦 𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀅𑀝𑁆𑀞𑀸𑀦𑀓𑁄𑀧𑁄 𑀓𑀭𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀢𑁆𑀣𑀁 𑀫𑁂 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀻’’𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀳𑀺 𑀓𑁄𑀧𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀝𑁆𑀞𑀸𑀦𑀓𑁄𑀧𑁄 𑀏𑀯 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄. 𑀆𑀖𑀸𑀢𑁂𑀦𑁆𑀢𑁄𑀢𑀺 𑀳𑀦𑀦𑁆𑀢𑁄. 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀧𑀝𑀺𑀲𑁂𑀥𑀺𑀢𑁄𑀢𑀺 𑀤𑁄𑀲-𑀧𑀤𑀲𑁆𑀲 𑀧𑀝𑀺𑀯𑀺𑀭𑁄𑀥-𑀧𑀤𑀲𑁆𑀲 𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀝𑀺𑀖𑀲𑁆𑀲 𑀯𑀸 𑀯𑀺𑀲𑁂𑀲𑀦𑀢𑁆𑀣𑀁 𑀧𑀼𑀩𑁆𑀩𑁂 ‘‘𑀧𑀝𑀺𑀯𑀺𑀭𑁄𑀥𑁄’’𑀢𑀺, 𑀧𑀤𑁄𑀲𑀸𑀤𑀺𑀯𑀺𑀲𑁂𑀲𑀦𑀢𑁆𑀣𑀁 ‘‘𑀤𑁄𑀲𑁄’’𑀢𑀺 𑀘 𑀯𑀼𑀢𑁆𑀢𑀁, 𑀤𑀼𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑀦𑀢𑁆𑀣𑀁 𑀧𑀘𑁆𑀙𑀸 ‘‘𑀤𑁄𑀲𑁄’’𑀢𑀺, 𑀯𑀺𑀭𑁄𑀥𑀯𑀺𑀲𑁂𑀲𑀦𑀢𑁆𑀣𑀜𑁆𑀘 ‘‘𑀧𑀝𑀺𑀯𑀺𑀭𑁄𑀥𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄.

𑁧𑁦𑁯𑁧. 𑀅𑀦𑀺𑀤𑁆𑀥𑀸𑀭𑀺𑀢𑀧𑀭𑀺𑀘𑁆𑀙𑁂𑀤𑁂 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀤𑀻𑀧𑀓𑁂 𑀫𑀸𑀢𑀺𑀓𑀼𑀤𑁆𑀤𑁂𑀲𑁂 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑁂𑀲𑁄 𑀓𑀢𑁄𑀢𑀺 𑀩𑀳𑀼𑀯𑀘𑀦𑁂𑀦𑁂𑀯 𑀧𑀼𑀘𑁆𑀙𑀢𑀺 𑁋 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸’’𑀢𑀺. 𑀲𑀪𑀸𑀯𑀲𑀗𑁆𑀔𑀸𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀳𑀺 𑀥𑀫𑁆𑀫𑁂 𑀅𑀚𑀸𑀦𑀦𑁆𑀢𑀲𑁆𑀲 𑀯𑀲𑁂𑀦 𑀉𑀤𑁆𑀤𑁂𑀲𑁄 𑀧𑀼𑀘𑁆𑀙𑀸 𑀘 𑀓𑀭𑀻𑀬𑀢𑀻𑀢𑀺. 𑀢𑀲𑁆𑀫𑀸 𑀧𑀭𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀉𑀤𑁆𑀤𑀺𑀝𑁆𑀞𑀸 𑀧𑀼𑀘𑁆𑀙𑀺𑀢𑀸 𑀘. 𑀇𑀫𑁂𑀢𑀺 𑀅𑀲𑀗𑁆𑀔𑀢𑀥𑀸𑀢𑀼𑀢𑁄 𑀉𑀤𑁆𑀥𑀁 𑀦𑀢𑁆𑀣𑀻𑀢𑀺 𑀤𑀻𑀧𑀦𑀢𑁆𑀣𑀁 𑀏𑀓𑀫𑁆𑀧𑀺 𑀢𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀩𑀳𑀼𑀯𑀘𑀦𑁂𑀦𑁂𑀯 𑀦𑀺𑀕𑀫𑀦𑀁 𑀓𑀢𑀁 𑀦𑀺𑀤𑁆𑀤𑁂𑀲𑀢𑁄 𑀧𑀼𑀩𑁆𑀩𑁂 𑀩𑁄𑀥𑀦𑁂𑀬𑁆𑀬𑀲𑁆𑀲 𑀅𑀚𑀸𑀦𑀦𑀓𑀸𑀮𑀁 𑀉𑀧𑀸𑀤𑀸𑀬.

𑁧𑁧𑁦𑁧. 𑀓𑀺𑀁 𑀧𑀦 𑀦𑀢𑁆𑀣𑀺, 𑀓𑀺𑀁 𑀢𑁂𑀦 𑀦 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀤𑀫𑁂𑀯 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀦𑀺𑀬𑀫𑀸𑀪𑀸𑀯𑁄 𑀯𑀯𑀢𑁆𑀣𑀸𑀦𑀸𑀪𑀸𑀯𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑁂𑀬𑁆𑀬𑀫𑁂𑀯 𑀘𑀓𑁆𑀔𑀸𑀤𑀺𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑁂𑀦𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬 ‘‘𑀓𑀺𑀁 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀤𑀁 𑀓𑀸𑀫𑀸𑀯𑀘𑀭𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀭𑀽𑀧𑀸𑀯𑀘𑀭𑀸𑀤𑀺𑀆𑀭𑀫𑁆𑀫𑀡𑁂𑀦 𑀳𑀺 𑀓𑀸𑀫𑀸𑀯𑀘𑀭𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀘 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀦 𑀯𑀺𑀜𑁆𑀜𑁂𑀬𑁆𑀬𑀸, 𑀇𑀢𑀭𑁂𑀦 𑀘 𑀯𑀺𑀜𑁆𑀜𑁂𑀬𑁆𑀬𑀸. 𑀏𑀯𑀁 𑀓𑀸𑀫𑀸𑀯𑀘𑀭𑀸𑀦𑀫𑁂𑀯 𑀆𑀭𑀫𑁆𑀫𑀡𑀸𑀦𑀁 𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀤𑀻𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀳𑀺 𑀅𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀺𑀜𑁆𑀜𑁂𑀬𑁆𑀬𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸, 𑀢𑀣𑀸 𑀤𑁆𑀯𑀸𑀭𑀪𑁂𑀤𑀯𑀲𑁂𑀦. 𑀅𑀣 𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀇𑀝𑁆𑀞𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀇𑀢𑀭𑀁 𑀢𑁂𑀦 𑀦 𑀯𑀺𑀜𑁆𑀜𑁂𑀬𑁆𑀬𑀁. 𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀓𑀼𑀲𑀮𑀯𑀺𑀧𑀸𑀓𑁂 𑀅𑀓𑀼𑀲𑀮𑀯𑀺𑀧𑀸𑀓𑁂 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀭𑀽𑀧𑀸𑀯𑀘𑀭𑀸𑀤𑀬𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀤𑀻𑀳𑀺 𑀅𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀘𑀺𑀤𑁂𑀯 𑀯𑀺𑀜𑁆𑀜𑁂𑀬𑁆𑀬𑀸 𑀅𑀭𑀽𑀧𑀸𑀯𑀘𑀭𑁂𑀳𑀻𑀢𑀺 𑀬𑁄𑀚𑁂𑀢𑀩𑁆𑀩𑀁 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸. 𑀦𑀺𑀩𑁆𑀩𑀸𑀦𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸𑀢𑀺 ‘‘𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀫𑁆𑀪𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀯𑀢𑁆𑀢𑀫𑀸𑀦𑀫𑀦𑁄𑀯𑀺𑀜𑁆𑀜𑀸𑀡𑀪𑀸𑀯𑀢𑁄.

𑁧𑁧𑁦𑁨. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀯𑀸𑀲𑀯𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀸𑀲𑀯𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 ‘‘𑀪𑀯𑀸𑀲𑀯𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀪𑀯𑀸𑀲𑀯𑁄 𑀧𑀦 ‘‘𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀲𑁄𑀧𑀺 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀦𑀁 𑀓𑀸𑀭𑀡𑀪𑀽𑀢𑀸 𑀓𑀸𑀫𑀸𑀲𑀯𑀸𑀤𑀬𑁄𑀧𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸.

𑁧𑁧𑁦𑁩. 𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 𑀘 𑀓𑀸𑀫𑁂𑀲𑀽𑀢𑀺 𑀓𑀸𑀫𑀭𑀸𑀕𑀤𑀺𑀝𑁆𑀞𑀺𑀭𑀸𑀕𑀸𑀤𑀺𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀢𑁂𑀪𑀽𑀫𑀓𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀽𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀸 𑀢𑀡𑁆𑀳𑀸 𑀲𑀩𑁆𑀩𑀸𑀧𑀺 𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸𑀫𑀁 𑀦 𑀮𑀪𑀢𑀻𑀢𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀅𑀓𑀼𑀲𑀮𑁂𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀦 𑀥𑀫𑁆𑀫𑀘𑁆𑀙𑀦𑁆𑀤𑁄.

𑁧𑁧𑁦𑁫. 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀕𑀳𑀡𑀁 𑀬𑀤𑀺𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀺, 𑀭𑀽𑀧𑁂…𑀧𑁂… 𑀯𑀺𑀜𑁆𑀜𑀸𑀡𑁂 𑀯𑀸 𑀧𑀦 𑀦 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁄 𑀅𑀜𑁆𑀜𑀁 𑀓𑀢𑁆𑀯𑀸 𑀚𑀻𑀯𑀁 𑀕𑀡𑁆𑀳𑀸𑀢𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀳𑁄𑀢𑀻𑀢𑀺. 𑀩𑁆𑀭𑀳𑁆𑀫𑀸𑀤𑀺𑀁 𑀏𑀓𑀘𑁆𑀘𑀁 𑀅𑀢𑁆𑀢𑀸𑀦𑀁 ‘‘𑀳𑁄𑀢𑀻’’𑀢𑀺 𑀦𑀺𑀘𑁆𑀘𑀢𑁄 𑀅𑀜𑁆𑀜𑀜𑁆𑀘 ‘‘𑀦 𑀳𑁄𑀢𑀻’’𑀢𑀺 𑀅𑀦𑀺𑀘𑁆𑀘𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀻’’𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺. ‘‘𑀳𑁄𑀢𑀻’’𑀢𑀺 𑀘 𑀧𑀼𑀝𑁆𑀞𑁂 ‘‘𑀦𑁂𑀯𑀸’’𑀢𑀺, ‘‘𑀦 𑀳𑁄𑀢𑀻’’𑀢𑀺 𑀘 𑀧𑀼𑀝𑁆𑀞𑁂 ‘‘𑀦’’𑀇𑀢𑀺 𑀲𑀩𑁆𑀩𑀢𑁆𑀣 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺, 𑀅𑀫𑀭𑀸 𑀅𑀦𑀼𑀧𑀘𑁆𑀙𑁂𑀤𑀸, 𑀅𑀫𑀭𑀫𑀘𑁆𑀙𑀲𑀤𑀺𑀲𑀻 𑀯𑀸 𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄𑀢𑀺 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀤𑀻𑀲𑀼 𑀭𑀸𑀕𑀲𑁆𑀲 𑀤𑀺𑀝𑁆𑀞𑀺𑀭𑀸𑀕𑀲𑁆𑀲 𑀘 𑀓𑀸𑀫𑀸𑀲𑀯𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀤𑀺 𑀧𑀦 𑀮𑁄𑀪𑁄 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀣𑀺, 𑀲𑁄 𑀬𑀤𑀸 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁄 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀤𑁄𑀫𑀦𑀲𑁆𑀲𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀬 𑀢𑀲𑁆𑀲𑀧𑀺 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 ‘‘𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺. ‘‘𑀓𑀸𑀫𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺, ‘‘𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧) 𑀘 𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀲𑀯𑀸𑀦𑀁 𑀯𑀘𑀦𑀁 𑀧𑀳𑀸𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀓𑀢𑁆𑀯𑀸 𑀢𑁂 𑀧𑀳𑀸𑀦𑁂 𑀆𑀳𑀭𑀺𑀬𑀫𑀸𑀦𑀸 𑀧𑀳𑀸𑀢𑀩𑁆𑀩𑀸𑀦𑀫𑁆𑀧𑀺 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀆𑀳𑀭𑀺𑀢𑀼𑀁 𑀯𑀝𑁆𑀝𑀦𑁆𑀢𑀺 𑀧𑀚𑀳𑀦𑀓𑀸𑀦𑀁 𑀫𑀕𑁆𑀕𑀸𑀦𑀫𑁆𑀧𑀻𑀢𑀺 𑀅𑀢𑁆𑀣𑁄.

𑁧𑁧𑁨𑁧. 𑀧𑀞𑀫𑀓𑀫𑀸𑀦𑀪𑀸𑀚𑀦𑀻𑀬𑁂𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀲𑁆𑀲 𑀦𑀺𑀤𑁆𑀤𑁂𑀲𑁂. 𑀢𑀢𑁆𑀣 𑀳𑀺 ‘‘𑀏𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸…𑀧𑁂… 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 (𑀯𑀺𑀪. 𑁮𑁬𑁬) 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑀲𑁆𑀲 𑀳𑀻𑀦𑀲𑁆𑀲 𑀘 𑀧𑀯𑀢𑁆𑀢𑀫𑀸𑀦𑁄 𑀧𑀼𑀕𑁆𑀕𑀮𑀯𑀺𑀲𑁂𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑁂𑀬𑁆𑀬𑀫𑀸𑀦𑁄 𑀯𑀺𑀪𑀢𑁆𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀏𑀓𑁄 𑀫𑀸𑀦𑁄 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀣𑀺𑀢𑁄’’𑀢𑀺 𑀆𑀳. 𑀦 𑀓𑁂𑀯𑀮𑀜𑁆𑀘𑀸𑀬𑀁 𑀧𑀞𑀫𑀓𑀫𑀸𑀦𑀪𑀸𑀚𑀦𑀻𑀬𑁂 𑀏𑀯 𑀏𑀯𑀁 𑀓𑀣𑀺𑀢𑁄, 𑀤𑀼𑀢𑀺𑀬𑀓𑀢𑀢𑀺𑀬𑀓𑀫𑀸𑀦𑀪𑀸𑀚𑀦𑀻𑀬𑁂𑀧𑀺 𑀓𑀣𑀺𑀢𑁄 𑀏𑀯𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀣𑀁 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀼𑀕𑁆𑀕𑀮𑁂 𑀅𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀫𑀸𑀦𑀸𑀦𑀁 𑀪𑀸𑀚𑀦𑀻𑀬𑀁 ‘‘𑀧𑀞𑀫𑀓𑀫𑀸𑀦𑀪𑀸𑀚𑀦𑀻𑀬𑁂’’𑀢𑀺 𑀆𑀳. 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’𑀢𑀺𑀆𑀤𑀻𑀦𑀜𑁆𑀳𑀺 𑀧𑀼𑀕𑁆𑀕𑀮𑀁 𑀆𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀁 𑀦𑀯𑀦𑁆𑀦𑀁 𑀫𑀸𑀦𑀸𑀦𑀁 𑀪𑀸𑀚𑀦𑀻𑀬𑀁 𑀤𑀼𑀢𑀺𑀬𑀓𑀫𑀸𑀦𑀪𑀸𑀚𑀦𑀻𑀬𑀁 𑀳𑁄𑀢𑀺, 𑀢𑀲𑁆𑀲 𑀫𑀸𑀦𑀭𑀸𑀲𑀺𑀲𑁆𑀲 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀫𑀸𑀦𑀭𑀸𑀲𑀺𑀢𑁄 𑀤𑀼𑀢𑀺𑀬𑀢𑀢𑀺𑀬𑀓𑀢𑁆𑀢𑀸𑀢𑀺, 𑀅𑀣𑀸𑀧𑀺 𑀘 𑀬𑀣𑀸𑀯𑀼𑀢𑁆𑀢𑁂 𑀤𑀼𑀢𑀺𑀬𑀓𑀫𑀸𑀦𑀪𑀸𑀚𑀦𑀻𑀬𑁂 ‘‘𑀏𑀓𑁂𑀓𑀲𑁆𑀲 𑀢𑀬𑁄 𑀢𑀬𑁄 𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀣𑀺𑀢’’𑀦𑁆𑀢𑀺 𑀇𑀥 𑀯𑀼𑀢𑁆𑀢𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀲𑀫𑀸𑀦𑀤𑀲𑁆𑀲𑀦𑀢𑁆𑀣𑀁 ‘‘𑀧𑀞𑀫𑀓𑀫𑀸𑀦𑀪𑀸𑀚𑀦𑀻𑀬𑁂’’𑀢𑀺 𑀯𑀼𑀢𑁆𑀢𑀁. 𑀲𑁄 𑀏𑀯 𑀫𑀸𑀦𑁄 𑀇𑀥𑀸𑀕𑀢𑁄𑀢𑀺 𑀢𑀢𑁆𑀣 𑀓𑀣𑀺𑀢𑁄 𑀏𑀯 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀦𑀓𑀭𑀡𑀯𑀲𑁂𑀦𑀸𑀢𑀺 ‘‘𑀲𑁂𑀬𑁆𑀬𑁄’’𑀢𑀺𑀆𑀤𑀺𑀓𑀺𑀘𑁆𑀘𑀓𑀭𑀡𑀯𑀲𑁂𑀦. 𑀅𑀧𑀭𑀸𑀧𑀭𑁂 𑀉𑀧𑀸𑀤𑀸𑀬𑀸𑀢𑀺 𑀇𑀤𑀁 𑀧𑀼𑀭𑀺𑀫𑀧𑀼𑀭𑀺𑀫𑀸 𑀫𑀸𑀦𑀸 𑀅𑀧𑀭𑀸𑀧𑀭𑁂 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑁂 𑀉𑀧𑁆𑀧𑀸𑀤𑁂𑀦𑁆𑀢𑀸 𑀅𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀢𑀼𑀓𑀫𑁆𑀬𑀢𑀸𑀘𑀺𑀢𑁆𑀢𑀁 𑀅𑀘𑁆𑀘𑀼𑀕𑁆𑀕𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀯𑀺𑀲𑁂𑀲𑀺𑀢𑀁.

𑁧𑁧𑁨𑁬. 𑀅𑀓𑁆𑀔𑀫𑀦𑀪𑀸𑀯𑀧𑁆𑀧𑀓𑀸𑀲𑀦𑀁 𑀔𑀺𑀬𑁆𑀬𑀦𑀁. 𑀫𑀦𑁂𑀦 𑀧𑀺𑀬𑀓𑀭𑀡𑀦𑁆𑀢𑀺 𑀏𑀯𑀁𑀧𑀓𑀸𑀭𑀁 𑀧𑀽𑀚𑀦𑀁 𑀫𑀸𑀦𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀇𑀲𑁆𑀲𑀸𑀓𑀭𑀡𑀯𑀲𑁂𑀦𑀸𑀢𑀺 𑀮𑀸𑀪𑀸𑀤𑀺𑀅𑀓𑁆𑀔𑀫𑀦𑀓𑀺𑀘𑁆𑀘𑀯𑀲𑁂𑀦.

𑁧𑁧𑁨𑁭. 𑀅𑀭𑀺𑀬𑀲𑀸𑀯𑀓𑀸𑀢𑀺 𑀯𑀘𑀦𑀁 ‘‘𑀅𑀭𑀺𑀬𑀲𑀸𑀯𑀓𑀸𑀦𑀁𑀬𑁂𑀯 𑀧𑀝𑀺𑀯𑁂𑀥𑁄 𑀅𑀢𑁆𑀣𑀺, 𑀢𑁂 𑀘 𑀢𑀁 𑀦 𑀫𑀘𑁆𑀙𑀭𑀸𑀬𑀦𑁆𑀢𑀻’’𑀢𑀺 𑀧𑀝𑀺𑀯𑁂𑀥𑀥𑀫𑁆𑀫𑁂 𑀫𑀘𑁆𑀙𑀭𑀺𑀬𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀕𑀦𑁆𑀣𑁄𑀢𑀺 𑀧𑀸𑀴𑀺. 𑀓𑀣𑀸𑀫𑀕𑁆𑀕𑁄𑀢𑀺 𑀅𑀝𑁆𑀞𑀓𑀣𑀸𑀧𑀩𑀦𑁆𑀥𑁄. 𑀥𑀫𑁆𑀫𑀦𑁆𑀢𑀭𑀦𑁆𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑀼𑀲𑀮𑀸𑀤𑀺𑀁 𑀅𑀢𑁆𑀢𑀦𑁄 𑀮𑁄𑀮𑀢𑀸𑀬 𑀢𑀣𑀸𑀕𑀢𑀪𑀸𑀲𑀺𑀢𑀁 𑀢𑀺𑀢𑁆𑀣𑀺𑀬𑀪𑀸𑀲𑀺𑀢𑀁 𑀯𑀸 𑀓𑀭𑁄𑀦𑁆𑀢𑁄 𑀆𑀮𑁄𑀮𑁂𑀲𑁆𑀲𑀢𑀺. 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀁 𑀅𑀜𑁆𑀜𑀣𑀸 𑀲𑀦𑁆𑀢𑀁 𑀅𑀜𑁆𑀜𑀣𑀸 𑀧𑀯𑁂𑀤𑀬𑀺𑀢𑁆𑀯𑀸. 𑀬𑁄 𑀧𑀦𑀸𑀢𑀺 𑀢𑀺𑀢𑁆𑀣𑀺𑀬𑁄 𑀕𑀳𑀝𑁆𑀞𑁄 𑀯𑀸 𑀅𑀢𑁆𑀢𑀦𑁄 𑀲𑀫𑀬𑀲𑁆𑀲 𑀲𑀤𑁄𑀲𑀪𑀸𑀯𑀁 𑀤𑀝𑁆𑀞𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀅𑀜𑁆𑀜𑀸𑀡𑁂𑀦 𑀅𑀪𑀺𑀦𑀺𑀯𑁂𑀲𑁂𑀦 𑀯𑀸.

𑀩𑁆𑀬𑀸𑀧𑀺𑀢𑀼𑀫𑀦𑀺𑀘𑁆𑀙𑁄𑀢𑀺 𑀯𑀺𑀯𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀯𑁂𑀯𑀺𑀘𑁆𑀙𑀁. 𑀅𑀦𑀸𑀤𑀭𑁄𑀢𑀺 𑀫𑀘𑁆𑀙𑀭𑀺𑀬𑁂𑀦 𑀤𑀸𑀦𑁂 𑀆𑀤𑀭𑀭𑀳𑀺𑀢𑁄. 𑀓𑀝𑀘𑁆𑀙𑀼𑀦𑀸 𑀕𑀸𑀳𑁄 𑀪𑀢𑁆𑀢𑀲𑁆𑀲 𑀓𑀝𑀘𑁆𑀙𑀼𑀕𑁆𑀕𑀸𑀳𑁄, 𑀓𑀝𑀘𑁆𑀙𑀼𑀕𑁆𑀕𑀸𑀳𑁄 𑀯𑀺𑀬 𑀓𑀝𑀘𑁆𑀙𑀼𑀕𑁆𑀕𑀸𑀳𑁄. 𑀬𑀣𑀸 𑀳𑀺 𑀓𑀝𑀘𑁆𑀙𑀼𑀕𑁆𑀕𑀸𑀳𑁄 𑀬𑀣𑀸𑀯𑀼𑀢𑁆𑀢𑁂 𑀪𑀢𑁆𑀢𑁂 𑀦 𑀲𑀁𑀧𑀲𑀸𑀭𑀬𑀢𑀺, 𑀏𑀯𑀁 𑀫𑀘𑁆𑀙𑀭𑀺𑀬𑀫𑁆𑀧𑀺 𑀆𑀯𑀸𑀲𑀸𑀤𑀻𑀲𑀽𑀢𑀺. 𑀕𑀬𑁆𑀳𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀕𑀸𑀳𑁄, 𑀓𑀝𑀘𑁆𑀙𑀼 𑀏𑀯 𑀕𑀸𑀳𑁄 𑀓𑀝𑀘𑁆𑀙𑀼𑀕𑁆𑀕𑀸𑀳𑁄. 𑀲𑁄 𑀬𑀣𑀸 𑀲𑀗𑁆𑀓𑀼𑀝𑀺𑀢𑀕𑁆𑀕𑁄 𑀦 𑀲𑀁𑀧𑀲𑀸𑀭𑀬𑀢𑀺, 𑀏𑀯𑀁 𑀫𑀘𑁆𑀙𑀭𑀺𑀬𑀫𑁆𑀧𑀻𑀢𑀺. 𑀆𑀯𑀭𑀺𑀢𑁆𑀯𑀸 𑀕𑀳𑀺𑀢𑀁 𑀅𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀪𑀸𑀯𑁄 𑀅𑀕𑁆𑀕𑀳𑀺𑀢𑀢𑁆𑀢𑀁, 𑀫𑀘𑁆𑀙𑀭𑀺𑀬𑀁. ‘‘𑀆𑀯𑀸𑀲𑀸𑀤𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀫𑀲𑀸𑀥𑀸𑀭𑀡𑀁 𑀯𑀸 𑀫𑀬𑁆𑀳𑁂𑀯 𑀳𑁄𑀢𑀽’’𑀢𑀺 𑀧𑀯𑀢𑁆𑀢𑀺𑀯𑀲𑁂𑀦 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀮𑀓𑁆𑀔𑀡𑀢𑀸, ‘‘𑀫𑀸 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀯𑀢𑁆𑀢𑀺𑀯𑀲𑁂𑀦 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀡𑀮𑀓𑁆𑀔𑀡𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀬𑀁 𑀧𑀦 ‘‘𑀧𑀭𑀲𑀦𑁆𑀢𑀓𑀁 𑀕𑀡𑁆𑀳𑀺𑀢𑀼𑀓𑀸𑀫𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀫𑀘𑁆𑀙𑀭𑀺𑀬𑀲𑁆𑀲 𑀧𑀭𑀲𑀦𑁆𑀢𑀓𑀮𑁄𑀪𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀢𑀁 𑀫𑀘𑁆𑀙𑀭𑀺𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀁, 𑀧𑀭𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀮𑀓𑁆𑀔𑀡𑀢𑀸 𑀘 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺.

𑁧𑁧𑁪𑁦. 𑀅𑀪𑀺𑀚𑁆𑀛𑀸𑀓𑀸𑀫𑀭𑀸𑀕𑀸𑀦𑀁 𑀯𑀺𑀲𑁂𑀲𑁄 𑀆𑀲𑀯𑀤𑁆𑀯𑀬𑀏𑀓𑀸𑀲𑀯𑀪𑀸𑀯𑁄 𑀲𑀺𑀬𑀸, 𑀦𑀅𑀪𑀺𑀚𑁆𑀛𑀸𑀬 𑀦𑁄𑀆𑀲𑀯𑀪𑀸𑀯𑁄 𑀘𑀸𑀢𑀺 𑀦𑁄𑀆𑀲𑀯𑀮𑁄𑀪𑀲𑁆𑀲 𑀲𑀩𑁆𑀪𑀸𑀯𑁄 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀦 𑀳𑀺 𑀅𑀢𑁆𑀣𑀺 ‘‘𑀆𑀲𑀯𑁄 𑀘 𑀦𑁄𑀆𑀲𑀯𑁄 𑀘 𑀥𑀫𑁆𑀫𑀸 𑀆𑀲𑀯𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑀯𑀲𑁆𑀲 𑀘 𑀦𑁄𑀆𑀲𑀯𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀲𑀢𑁆𑀢𑀫𑁄 𑀘 𑀦𑀯𑀫𑁄 𑀘 𑀧𑀜𑁆𑀳𑁄. 𑀕𑀡𑀦𑀸𑀬 𑀘 ‘‘𑀳𑁂𑀢𑀼𑀬𑀸 𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀦𑀯𑀸’’𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀮𑁄𑀪𑁂 𑀦𑁄𑀆𑀲𑀯𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑁆𑀢𑀫𑀦𑀯𑀫𑀸𑀧𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑁂𑀬𑁆𑀬𑀼𑀁, 𑀕𑀡𑀦𑀸 𑀘 ‘‘𑀳𑁂𑀢𑀼𑀬𑀸 𑀦𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀘 𑀮𑁄𑀪𑁂 𑀦𑁄𑀆𑀲𑀯𑁂 𑀯𑀺𑀚𑁆𑀚𑀫𑀸𑀦𑁂 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑁄 𑀤𑁄𑀲𑁄𑀢𑀺.

𑁧𑁧𑁫𑁯. 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑀺𑀤𑁆𑀤𑁂𑀲𑁂 𑀓𑀸𑀫𑁂𑀲𑀽𑀢𑀺 𑀢𑁂𑀪𑀽𑀫𑀓𑁂𑀲𑀼 𑀲𑀸𑀲𑀯𑁂𑀲𑀼 𑀲𑀩𑁆𑀩𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀲𑀩𑁆𑀩𑁄 𑀳𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀢𑁂𑀦𑁂𑀯 𑀢𑀲𑁆𑀲 𑀆𑀭𑀼𑀧𑁆𑀧𑁂 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸. 𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁. 𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁮.𑁧).

𑁧𑁧𑁬𑁨. 𑀇𑀭𑀺𑀬𑀸𑀧𑀣𑀺𑀓𑀘𑀺𑀢𑁆𑀢𑀦𑁆𑀢𑀺 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁 𑀅𑀝𑁆𑀞𑀧𑀜𑁆𑀜𑀸𑀲𑀯𑀺𑀥𑀁 𑀘𑀺𑀢𑁆𑀢𑀁. 𑀢𑀢𑁆𑀣 𑀧𑀦 𑀩𑀮𑀯𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑀁 𑀘𑀺𑀢𑁆𑀢𑀁 ‘‘𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀮𑀻𑀬𑀢𑀻𑀢𑀺 𑀑𑀮𑀫𑁆𑀩𑀢𑀺.

𑁧𑁧𑁬𑁩. 𑀑𑀦𑀬𑁆𑀳𑀢𑀻𑀢𑀺 𑀙𑀸𑀤𑁂𑀢𑀺, 𑀅𑀯𑀢𑁆𑀣𑀭𑀢𑀺 𑀯𑀸. 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦, 𑀯𑀺𑀧𑁆𑀨𑀸𑀭𑀺𑀓𑀢𑀸𑀦𑀺𑀯𑀸𑀭𑀡𑁂𑀦𑁂𑀯 𑀯𑀸 𑀅𑀦𑁆𑀢𑁄𑀲𑀫𑁄𑀭𑁄𑀥𑁄. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀲𑀺𑀭𑀻𑀲𑀸𑀤𑀺𑀭𑀼𑀓𑁆𑀔𑀸𑀦𑀁. 𑀭𑀽𑀧𑀓𑀸𑀬𑁂𑀦𑁂𑀯 𑀲𑀺𑀬𑀼𑀁, 𑀢𑁂𑀦 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀦𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀁 𑀭𑀽𑀧𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 ‘‘𑀓𑀸𑀬𑀲𑁆𑀲𑀸’’𑀢𑀺 𑀯𑀘𑀦𑀲𑁆𑀲 𑀭𑀽𑀧𑀢𑁆𑀢𑀸𑀲𑀸𑀥𑀓𑀢𑁆𑀢𑀸. 𑀦 𑀳𑀺 𑀦𑀸𑀫𑀓𑀸𑀬𑁄 𑀲𑀼𑀧𑀢𑀻𑀢𑀺 𑀇𑀤𑀁 𑀣𑀺𑀦𑀫𑀺𑀤𑁆𑀥𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀤𑀻𑀦𑀁 𑀲𑀁𑀲𑀻𑀤𑀦𑀁 𑀲𑁄𑀧𑁆𑀧𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀚𑀸𑀕𑀭𑀡𑀘𑀺𑀢𑁆𑀢𑀭𑀳𑀺𑀢𑀁 𑀪𑀯𑀗𑁆𑀕𑀲𑀦𑁆𑀢𑀢𑀺𑀦𑁆𑀢𑀺. 𑀢𑀲𑁆𑀲 𑀨𑀮𑀢𑁆𑀢𑀸𑀢𑀺 𑀨𑀮𑀽𑀧𑀘𑀸𑀭𑁂𑀦 𑀇𑀦𑁆𑀤𑁆𑀭𑀺𑀬𑀁 𑀯𑀺𑀬 𑀫𑀺𑀤𑁆𑀥𑀁 𑀤𑀲𑁆𑀲𑁂𑀢𑀼𑀁 𑀫𑀺𑀤𑁆𑀥𑀲𑁆𑀲 𑀨𑀮𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀺𑀬 𑀮𑀺𑀗𑁆𑀕𑀸𑀤𑀻𑀦𑀺 𑀫𑀺𑀤𑁆𑀥𑀦𑀺𑀤𑁆𑀤𑁂𑀲𑁂𑀧𑀺 𑀲𑁄𑀧𑁆𑀧𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀭𑀽𑀧𑀓𑀸𑀬𑀲𑁆𑀲 𑀅𑀦𑁆𑀢𑁄𑀲𑀫𑁄𑀭𑁄𑀥𑁄 𑀦𑀢𑁆𑀣𑀻𑀢𑀺 𑀲𑁄 𑀦𑀸𑀫𑀓𑀸𑀬𑁂 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦 𑀲𑀳 𑀯𑀼𑀢𑁆𑀢𑀸 𑀑𑀦𑀸𑀳𑀧𑀭𑀺𑀬𑁄𑀦𑀸𑀳𑀸 𑀘. 𑀭𑀽𑀧𑀓𑀸𑀬𑀲𑁆𑀲 𑀯𑀸 𑀯𑀺𑀧𑁆𑀨𑀸𑀭𑀺𑀓𑀸𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀦𑀢𑁆𑀣𑀺, 𑀦𑀸𑀫𑀓𑀸𑀬𑀲𑁆𑀲 𑀦𑀸𑀫𑀓𑀸𑀬𑁂 𑀯𑀺𑀧𑁆𑀨𑀸𑀭𑀺𑀓𑁂 𑀮𑀳𑀼𑀓𑁄, 𑀅𑀯𑀺𑀧𑁆𑀨𑀸𑀭𑀺𑀓𑁂 𑀕𑀭𑀼𑀓𑁄𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁂𑀦 𑀑𑀦𑀸𑀳𑀦𑀸𑀤𑀺 𑀦𑀸𑀫𑀓𑀸𑀬𑀲𑁆𑀲𑁂𑀯 𑀳𑁄𑀢𑀻𑀢𑀺 𑀑𑀦𑀸𑀳𑀦𑀸𑀤𑀬𑁄𑀧𑀺 𑀦𑀸𑀫𑀓𑀸𑀬𑁂 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀢𑁂𑀦𑀸𑀳 ‘‘𑀦 𑀳𑀺 𑀭𑀽𑀧𑀁 𑀦𑀸𑀫𑀓𑀸𑀬𑀲𑁆𑀲 𑀑𑀦𑀸𑀳𑁄…𑀧𑁂… 𑀳𑁄𑀢𑀻’’𑀢𑀺. 𑀆𑀯𑀭𑀡𑀪𑀸𑀯𑁄 𑀯𑀺𑀬 𑀳𑀺 𑀑𑀦𑀸𑀳𑀦𑀸𑀤𑀺𑀪𑀸𑀯𑁄𑀧𑀺 𑀦𑀸𑀫𑀓𑀸𑀬𑀲𑁆𑀲𑁂𑀯 𑀳𑁄𑀢𑀻𑀢𑀺. 𑀇𑀢𑀭𑁄 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀫𑁂𑀖𑀸𑀤𑀻𑀳𑀺 𑀭𑀽𑀧𑁂𑀳𑀺 𑀭𑀽𑀧𑀸𑀦𑀁 𑀑𑀦𑀸𑀳𑀦𑀸𑀤𑀺𑀁 𑀧𑀲𑁆𑀲𑀦𑁆𑀢𑁄 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀭𑀽𑀧𑀲𑁆𑀲 𑀑𑀦𑀸𑀳𑀦𑀸𑀤𑀺𑀢𑀸 𑀲𑀺𑀤𑁆𑀥𑀸, 𑀅𑀭𑀽𑀧𑀲𑁆𑀲 𑀦 𑀲𑀺𑀬𑀸, 𑀲𑁂𑀢𑀼𑀩𑀦𑁆𑀥𑀸𑀤𑀻𑀲𑀼 𑀭𑀽𑀧𑀲𑁆𑀲 𑀆𑀯𑀭𑀡𑀁 𑀤𑀺𑀝𑁆𑀞𑀦𑁆𑀢𑀺 𑀆𑀯𑀭𑀡𑀫𑁆𑀧𑀺 𑀅𑀭𑀽𑀧𑀲𑁆𑀲 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀲𑀼𑀭𑀸𑀫𑁂𑀭𑀬𑀧𑀸𑀦𑀁 𑀅𑀓𑀼𑀲𑀮𑀦𑁆𑀢𑀺 𑀓𑀢𑁆𑀯𑀸 𑀬𑀼𑀢𑁆𑀢𑁄 𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀪𑀸𑀯𑁄, 𑀲𑀼𑀭𑀸…𑀧𑁂… 𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑁆𑀲 𑀘 𑀅𑀓𑀼𑀲𑀮𑀢𑁆𑀢𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀪𑀸𑀯𑁄 𑀬𑀼𑀢𑁆𑀢𑁄, 𑀢𑀣𑀸𑀧𑀺 𑀧𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀢𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀢𑀸 𑀘 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸𑀦𑀜𑁆𑀘 𑀧𑀘𑁆𑀘𑀬𑀢𑁆𑀢𑀸 𑀨𑀮𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦, 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄’’𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀚𑀸𑀢𑀭𑀽𑀧𑀲𑁆𑀲 𑀅𑀬𑁄 𑀮𑁄𑀳𑀁 𑀢𑀺𑀧𑀼 𑀲𑀻𑀲𑀁 𑀲𑀚𑁆𑀚𑀦𑁆𑀢𑀺 𑀧𑀜𑁆𑀘𑀼𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺, 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬, 𑀏𑀯𑀫𑁂𑀯. 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄𑀢𑀺 𑀉𑀧𑀓𑁆𑀓𑀺𑀮𑁂𑀲𑀧𑀜𑁆𑀜𑀸𑀤𑀼𑀩𑁆𑀩𑀮𑀻𑀓𑀭𑀡𑀸𑀦𑀁 𑀧𑀘𑁆𑀘𑀬𑀪𑀸𑀯𑀦𑀺𑀤𑁆𑀤𑁂𑀲𑀢𑁄, 𑀧𑀘𑁆𑀘𑀬𑁂 𑀨𑀮𑀦𑀺𑀤𑁆𑀤𑁂𑀲𑀢𑁄𑀢𑀺 𑀅𑀢𑁆𑀣𑁄. 𑀲𑀬𑀫𑁂𑀯 𑀓𑀺𑀮𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑀦𑀺𑀤𑁆𑀤𑁂𑀲𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀻𑀯𑀭𑀡𑀁 𑀳𑀼𑀢𑁆𑀯𑀸𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑁂 𑀤𑀲𑁆𑀲𑀺𑀬𑀫𑀸𑀦𑁂 𑀦 𑀦𑀻𑀯𑀭𑀡𑀢𑀸𑀤𑀲𑁆𑀲𑀦𑀢𑁆𑀣𑁄 𑀆𑀭𑀫𑁆𑀪𑁄, 𑀅𑀣 𑀔𑁄 𑀲𑀺𑀤𑁆𑀥𑀦𑀻𑀯𑀭𑀡𑀪𑀸𑀯𑀲𑁆𑀲 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀤𑀲𑁆𑀲𑀦𑀢𑁆𑀣𑁄𑀢𑀺 𑀬𑀣𑀸𑀮𑀸𑀪𑀯𑀲𑁂𑀦 𑀘 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺. 𑀬𑀣𑀸 𑀳𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀻𑀢𑀺 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸𑀤𑀻𑀲𑀼 𑀬𑀣𑀸𑀮𑀸𑀪𑀲𑀫𑁆𑀪𑀯𑀁 𑀢𑀁 𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀦 𑀏𑀯𑀁 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀺 𑀅𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀻’’𑀢𑀺 𑀯𑀘𑀦𑀁 𑀅𑀢𑁆𑀣𑀺, 𑀬𑀁 𑀬𑀣𑀸𑀮𑀸𑀪𑀁 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀘𑀺𑀢𑁆𑀢𑀚𑀲𑁆𑀲𑀸𑀲𑀫𑁆𑀪𑀯𑀯𑀘𑀦𑀢𑁄𑀢𑀺 ‘‘𑀘𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀛𑀸𑀦𑀓𑁆𑀔𑀡𑁂 𑀘𑀺𑀢𑁆𑀢𑀚𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀲𑀫𑁆𑀪𑀯𑀯𑀘𑀦𑀪𑀸𑀯𑀢𑁄𑀢𑀺 𑀅𑀢𑁆𑀣𑁄, ‘‘𑀘𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀸 𑀅𑀲𑀫𑁆𑀪𑀯𑀲𑁆𑀲 𑀯𑀘𑀦𑀢𑁄 𑀧𑀓𑀸𑀲𑀦𑀢𑁄𑀢𑀺 𑀅𑀢𑁆𑀣𑁄.

𑀓𑀸𑀫𑁂𑀲𑀼 𑀔𑁄 𑀧𑀦…𑀧𑁂… 𑀲𑀼𑀤𑀺𑀝𑁆𑀞𑁄𑀢𑀺 𑀇𑀫𑀺𑀦𑀸 𑀓𑀸𑀫𑀸𑀤𑀻𑀦𑀯𑁂 𑀅𑀜𑁆𑀜𑀸𑀡𑀲𑁆𑀲 𑀧𑀳𑀸𑀦𑀫𑀸𑀳. 𑀢𑀁 𑀢𑀢𑁆𑀣 𑀧𑀳𑀸𑀦𑀦𑁆𑀢𑀺 𑀢𑀁 𑀢𑀢𑁆𑀣 𑀭𑀽𑀧𑁂 𑀧𑀳𑀸𑀦𑀦𑁆𑀢𑀺 𑀧𑀳𑀸𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀦𑀬𑀦𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦 𑀭𑀽𑀧𑀲𑁆𑀲 𑀅𑀧𑁆𑀧𑀳𑀸𑀢𑀩𑁆𑀩𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀧𑀦 ‘‘𑀙 𑀥𑀫𑁆𑀫𑁂 𑀧𑀳𑀸𑀬𑀸’’𑀢𑀺𑀆𑀤𑀻𑀲𑀼 𑀫𑀺𑀤𑁆𑀥𑀲𑁆𑀲 𑀅𑀧𑁆𑀧𑀳𑀸𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁄 𑀅𑀜𑁆𑀜𑁄 𑀧𑀓𑀸𑀭𑁄 𑀯𑀼𑀢𑁆𑀢𑁄. 𑀦 𑀬𑀣𑀸…𑀧𑁂… 𑀯𑀼𑀢𑁆𑀢𑀦𑁆𑀢𑀺 𑀙 𑀥𑀫𑁆𑀫𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘 𑀬𑀣𑀸 𑀧𑀳𑀸𑀢𑀩𑁆𑀩𑀸𑀦𑁂𑀯 𑀳𑁄𑀦𑁆𑀢𑀸𑀦𑀺 ‘‘𑀧𑀳𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀦 𑀏𑀯𑀁 𑀭𑀽𑀧𑀁 𑀧𑀳𑀸𑀢𑀩𑁆𑀩𑀫𑁂𑀯 𑀳𑁄𑀦𑁆𑀢𑀁 ‘‘𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀜𑁆𑀜𑁂𑀳𑀺 𑀘 𑀲𑀼𑀢𑁆𑀢𑁂𑀳𑀻𑀢𑀺 𑀯𑀼𑀢𑁆𑀢𑀲𑀼𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀆𑀯𑀭𑀦𑁆𑀢𑀻𑀢𑀺 𑀆𑀯𑀭𑀡𑀸. 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀘𑀺𑀢𑁆𑀢𑀁 𑀅𑀪𑀺𑀪𑀯𑀦𑁆𑀢𑀸 𑀆𑀭𑁄𑀳𑀦𑁆𑀢𑀻𑀢𑀺 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸. 𑀆𑀯𑀭𑀡𑀸𑀤𑀺𑀓𑀺𑀘𑁆𑀘𑀜𑁆𑀘 𑀅𑀭𑀽𑀧𑀲𑁆𑀲𑁂𑀯 𑀬𑀼𑀚𑁆𑀚𑀢𑀺, 𑀢𑀣𑀸 𑀅𑀦𑁆𑀥𑀓𑀭𑀡𑀸𑀤𑀺𑀓𑀺𑀘𑁆𑀘𑀁. 𑀢𑀢𑁆𑀣 𑀘𑀢𑀽𑀲𑀼 𑀧𑀤𑁂𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑁄 𑀅𑀢𑁆𑀣𑁄. 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀖𑀸𑀢𑁄, 𑀢𑀁𑀚𑀦𑀓𑀢𑀸𑀬 𑀯𑀺𑀖𑀸𑀢𑀧𑀓𑁆𑀔𑀺𑀓𑀁. 𑀘𑁂𑀢𑀲𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁄 𑀉𑀧𑁆𑀧𑀢𑁆𑀢𑀺 𑀅𑀓𑀼𑀲𑀮𑀭𑀸𑀲𑀺𑀪𑀸𑀯𑁄 𑀘 𑀅𑀭𑀽𑀧𑀲𑁆𑀲𑁂𑀯 𑀳𑁄𑀢𑀻𑀢𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀁.

𑁧𑁧𑁬𑁬. 𑀕𑀡𑀪𑁄𑀚𑀦𑀸𑀤𑀺𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀓𑀧𑁆𑀧𑀺𑀬𑀲𑀜𑁆𑀜𑀻 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀚𑀸𑀦𑀺𑀢𑁆𑀯𑀸 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀅𑀦𑀯𑀚𑁆𑀚𑀜𑁆𑀘 𑀪𑀺𑀓𑁆𑀔𑀼𑀤𑀲𑁆𑀲𑀦𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀁 𑀯𑀚𑁆𑀚𑀲𑀜𑁆𑀜𑀻 𑀅𑀓𑀢𑁆𑀯𑀸 𑀓𑀢𑁆𑀯𑀸 𑀘 𑀓𑁄𑀘𑀺 𑀅𑀲𑁆𑀲𑀤𑁆𑀥𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀯𑀢𑁆𑀣𑀼𑀦𑁆𑀢𑀺 𑀫𑀽𑀮𑀁. 𑀏𑀯𑀭𑀽𑀧𑀦𑁆𑀢𑀺 𑀫𑀽𑀮𑀯𑀲𑁂𑀦 𑀏𑀯𑀁𑀧𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀘𑁆𑀘𑀧𑀤𑀁 𑀬𑁂𑀯𑀸𑀧𑀦𑀓𑁂𑀲𑀼 ‘‘𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸𑀓𑀸𑀭𑁄𑀢𑀺 𑀓𑀼𑀓𑁆𑀓𑀼𑀘𑁆𑀘𑀪𑀸𑀯𑀦𑀸𑀓𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀓𑀭𑀡𑀸𑀓𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀕𑀫𑀦𑀸𑀓𑀸𑀭𑁄 𑀯𑀸. 𑀏𑀢𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀓𑀺𑀭𑀺𑀬𑀪𑀸𑀯𑁂𑀦 𑀤𑀲𑁆𑀲𑁂𑀢𑀺. ‘‘𑀓𑀧𑁆𑀧𑀢𑀺 𑀦 𑀓𑀧𑁆𑀧𑀢𑀻’’𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁.

𑁧𑁧𑁭𑁬. 𑀘𑀺𑀢𑁆𑀢𑀯𑀺𑀓𑁆𑀔𑀺𑀧𑀦𑀓𑀺𑀘𑁆𑀘𑀲𑀸𑀫𑀜𑁆𑀜𑁂𑀦 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀲𑀳 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀸𑀦𑀁 𑀉𑀓𑁆𑀓𑀝𑁆𑀞𑀦𑀻𑀯𑀭𑀡𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀳𑀺 𑀮𑁄𑀪𑁄 𑀦𑁄𑀦𑀻𑀯𑀭𑀡𑁄 𑀲𑀺𑀬𑀸, ‘‘𑀦𑁄𑀦𑀻𑀯𑀭𑀡𑁄 𑀥𑀫𑁆𑀫𑁄 𑀦𑀻𑀯𑀭𑀡𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀕𑀡𑀦𑀸𑀬 𑀘 ‘‘𑀳𑁂𑀢𑀼𑀬𑀸 𑀘𑀢𑁆𑀢𑀸𑀭𑀻’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀦𑀯𑀸’’𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀲𑁆𑀲 𑀧𑀳𑀸𑀦𑀯𑀘𑀦𑀁 𑀬𑀼𑀢𑁆𑀢𑀁.

𑁧𑁨𑁧𑁯. 𑀓𑀸𑀫𑁄 𑀘𑀸𑀢𑀺 𑀓𑀺𑀮𑁂𑀲𑀓𑀸𑀫𑁄 𑀘. 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀻𑀢𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 ‘‘𑀲𑀲𑁆𑀲𑀢𑁄’’𑀢𑀺 𑀕𑀡𑁆𑀳𑀦𑁆𑀢𑀻 𑀉𑀧𑀸𑀤𑀺𑀬𑀢𑀺, 𑀧𑀼𑀭𑀺𑀫𑀤𑀺𑀝𑁆𑀞𑀺𑀆𑀓𑀸𑀭𑁂𑀦𑁂𑀯 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀢𑁆𑀢𑀭𑀤𑀺𑀝𑁆𑀞𑀺 𑀢𑁂𑀦𑁂𑀯 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑀻 𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀻𑀢𑀺 𑀢𑀣𑀸𑀪𑀽𑀢𑀁 𑀤𑀺𑀝𑁆𑀞𑀺𑀫𑀸𑀳. 𑀅𑀪𑀺𑀦𑀺𑀯𑁂𑀲𑀢𑁄𑀢𑀺 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄, 𑀅𑀪𑀺𑀦𑀺𑀯𑀺𑀲𑀦𑀢𑁄 𑀯𑀸. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀢𑀲𑁆𑀲 𑀅𑀪𑀸𑀯𑀸 ‘‘𑀅𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀫𑀢𑁆𑀢𑀫𑁂𑀯. 𑀉𑀧𑀸𑀤𑀺𑀬𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑀺. 𑀓𑀣𑀁? 𑀅𑀢𑁆𑀢𑀸𑀢𑀺. 𑀅𑀢𑁆𑀢𑀸𑀢𑀺 𑀳𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀯𑀘𑀦𑀫𑁂𑀯 𑀤𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀯𑀸𑀤𑀫𑀢𑁆𑀢’’𑀦𑁆𑀢𑀺 𑀯𑀸 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑀸𑀳. 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯 𑀳𑀺 ‘‘𑀅𑀢𑁆𑀢𑀸’’𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀅𑀢𑁆𑀣𑀲𑁆𑀲 𑀅𑀪𑀸𑀯𑀸𑀢𑀺.

𑁧𑁨𑁨𑁧. 𑀤𑀺𑀦𑁆𑀦𑀦𑁆𑀢𑀺 𑀤𑀸𑀦𑀫𑀸𑀳, 𑀢𑀁 𑀅𑀨𑀮𑀢𑁆𑀢𑀸 𑀭𑀽𑀧𑀁 𑀯𑀺𑀬 𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑁄 𑀬𑀜𑁆𑀜𑁄 𑀫𑀳𑀸𑀬𑀸𑀕𑁄. 𑀆𑀫𑀦𑁆𑀢𑁂𑀢𑁆𑀯𑀸 𑀳𑀯𑀦𑀁 𑀤𑀸𑀦𑀁 𑀆𑀳𑀼𑀦𑀁, 𑀧𑀸𑀳𑀼𑀦𑀸𑀦𑀁 𑀅𑀢𑀺𑀣𑀻𑀦𑀁 𑀅𑀢𑀺𑀣𑀺𑀓𑀺𑀭𑀺𑀬𑀸 𑀧𑀸𑀳𑀼𑀦𑀁, 𑀆𑀯𑀸𑀳𑀸𑀤𑀻𑀲𑀼 𑀫𑀗𑁆𑀕𑀮𑀢𑁆𑀣𑀁 𑀤𑀸𑀦𑀁 𑀫𑀗𑁆𑀕𑀮𑀓𑀺𑀭𑀺𑀬𑀸. 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 ‘‘𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀇𑀫𑀁 𑀮𑁄𑀓𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀮𑁄𑀓𑁄, 𑀧𑀭𑀜𑁆𑀘 𑀅𑀯𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 𑀮𑁄𑀓𑁄 𑀳𑁄𑀢𑀺 𑀕𑀦𑁆𑀢𑀩𑁆𑀩𑀢𑁄 𑀆𑀕𑀦𑁆𑀢𑀩𑁆𑀩𑀢𑁄 𑀘𑀸𑀢𑀺 𑀧𑀭𑀮𑁄𑀓𑀢𑁄 𑀇𑀥𑀸𑀕𑀫𑀦𑀲𑁆𑀲 𑀅𑀪𑀸𑀯𑀸 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄 𑀘𑀺𑀢𑁆𑀢𑁂𑀦 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 ‘‘𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀅𑀬𑀁 𑀤𑀺𑀝𑁆𑀞𑀺 𑀧𑀭𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑁂𑀯 𑀳𑁄𑀢𑀻𑀢𑀺. 𑀇𑀥𑀮𑁄𑀓𑁂 𑀞𑀺𑀢𑁄𑀢𑀺 𑀏𑀢𑁆𑀣𑀸𑀧𑀺 𑀅𑀬𑀫𑁂𑀯 𑀦𑀬𑁄. 𑀅𑀬𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 ‘‘𑀲𑀁𑀲𑀭𑀡𑀧𑁆𑀧𑀤𑁂𑀲𑁄 𑀇𑀥𑀮𑁄𑀓𑁄 𑀘 𑀧𑀭𑀮𑁄𑀓𑁄 𑀘 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺 𑀲𑀁𑀲𑀭𑀡𑀲𑁆𑀲 𑀅𑀪𑀸𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄’’𑀢𑀺. 𑀧𑀼𑀭𑀺𑀫𑀪𑀯𑀢𑁄 𑀧𑀘𑁆𑀙𑀺𑀫𑀪𑀯𑁂 𑀉𑀧𑀧𑀢𑀦𑀁 𑀉𑀧𑀧𑀸𑀢𑁄, 𑀲𑁄 𑀬𑁂𑀲𑀁 𑀲𑀻𑀮𑀁, 𑀢𑁂 𑀑𑀧𑀧𑀸𑀢𑀺𑀓𑀸. 𑀢𑁂 𑀧𑀦 𑀘𑀯𑀦𑀓𑀸 𑀉𑀧𑀧𑀚𑁆𑀚𑀦𑀓𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀻’’𑀢𑀺. 𑀅𑀦𑀼𑀮𑁄𑀫𑀧𑁆𑀧𑀝𑀺𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀸𑀦𑀼𑀓𑀽𑀮𑀁 𑀲𑀻𑀮𑀸𑀤𑀺𑀧𑁆𑀧𑀝𑀺𑀧𑀤𑀁.

𑁧𑁨𑁩𑁬. 𑀦𑀺𑀧𑁆𑀧𑀤𑁂𑀲𑀢𑁄𑀯 𑀕𑀳𑀺𑀢𑁄𑀢𑀺 𑀇𑀫𑀺𑀦𑀸 𑀬𑀁 𑀆𑀲𑀯𑀕𑁄𑀘𑁆𑀙𑀓𑁂 𑀩𑁆𑀭𑀳𑁆𑀫𑀸𑀦𑀁 𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀲𑀼 𑀭𑀸𑀕𑀲𑁆𑀲 𑀘 𑀤𑀺𑀝𑁆𑀞𑀺𑀭𑀸𑀕𑀲𑁆𑀲 𑀘 𑀅𑀲𑀗𑁆𑀕𑀳𑀡𑁂𑀦 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀢𑀸𑀤𑀲𑁆𑀲𑀦𑁂𑀦 𑀲𑀧𑁆𑀧𑀤𑁂𑀲𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀦𑀺𑀯𑀸𑀭𑀺𑀢𑀁 𑀳𑁄𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺 𑀯𑀘𑀦𑁂𑀦 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀧𑀼𑀭𑀺𑀫𑁂𑀳𑀺 𑀅𑀢𑀦𑀼𑀓𑀢𑀸 𑀫𑁄𑀳𑀸𑀤𑀬𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻𑀢𑀺.

𑁧𑁨𑁮𑁭. 𑀦𑀺𑀭𑀢𑀺𑀅𑀢𑁆𑀣𑁂𑀦𑀸𑀢𑀺 𑀧𑀻𑀢𑀺𑀯𑀺𑀭𑀳𑁂𑀦, 𑀩𑀮𑀯𑀦𑀺𑀓𑀦𑁆𑀢𑀺𑀯𑀺𑀭𑀳𑁂𑀦 𑀯𑀸. 𑀦 𑀳𑀺 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀚𑁆𑀚𑀦𑁆𑀢𑀻𑀢𑀺. 𑀅𑀯-𑀲𑀤𑁆𑀤𑁂𑀦 𑀅𑀯𑀕𑀸𑀳𑀢𑁆𑀣𑁄 𑀅𑀥𑁄𑀅𑀢𑁆𑀣𑁄 𑀘𑀸𑀢𑀺 𑀤𑁆𑀯𑀺𑀥𑀸 𑀅𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑁧𑁩𑁦𑁧. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀫𑁄𑀳𑀭𑀡𑁄 𑀧𑀳𑀸𑀦𑁂𑀓𑀝𑁆𑀞𑁂𑀦 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀭𑀸𑀕𑀭𑀡𑁂𑀦 𑀲𑀭𑀡𑁄, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑁂𑀦. 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁩𑁩) 𑀧𑀦 ‘‘𑀬𑁄 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀨𑀮𑀪𑀽𑀢𑀤𑀼𑀓𑁆𑀔𑀉𑀧𑀖𑀸𑀢𑀉𑀧𑀸𑀬𑀸𑀲𑀧𑀭𑀺𑀴𑀸𑀳𑀲𑀪𑀸𑀯𑀪𑀽𑀢𑁄 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀪𑀸𑀯𑁄𑀯 ‘‘𑀲𑀭𑀡𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀲𑀭𑀡𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁧𑁩𑁦𑁩. 𑀯𑀺𑀯𑁂𑀘𑀺𑀢𑀢𑁆𑀢𑀸𑀢𑀺 𑀯𑀺𑀲𑀼𑀁 𑀓𑀢𑀢𑁆𑀢𑀸 𑀧𑀓𑀸𑀲𑀺𑀢𑀢𑁆𑀢𑀸. 𑀅𑀲𑁂𑀲𑁂𑀢𑁆𑀯𑀸 𑀔𑁂𑀧𑁂𑀢𑀻𑀢𑀺 𑀯𑀚𑀺𑀭𑀁 𑀅𑀢𑁆𑀢𑀦𑀸 𑀧𑀢𑀺𑀢𑀝𑁆𑀞𑀸𑀦𑀁 𑀅𑀲𑁂𑀲𑁂𑀢𑁆𑀯𑀸 𑀔𑁂𑀧𑁂𑀢𑀺 𑀧𑀼𑀦 𑀅𑀧𑀸𑀓𑀢𑀺𑀓𑀢𑀸𑀆𑀧𑀸𑀤𑀦𑁂𑀦.

𑁧𑁩𑁧𑁧. 𑀢𑀧𑁆𑀧𑀢𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀅𑀦𑀼𑀲𑁄𑀘𑀢𑀺 𑀯𑀸.

𑁧𑁩𑁧𑁩. 𑀅𑀳𑀦𑁆𑀢𑀺 𑀇𑀢𑀺-𑀲𑀤𑁆𑀤𑀧𑀭𑁂𑀦 𑀅𑀳𑀁-𑀲𑀤𑁆𑀤𑁂𑀦 𑀳𑁂𑀢𑀼𑀪𑀽𑀢𑁂𑀦 𑀬𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀲𑁄 𑀲𑀁𑀓𑀣𑀻𑀬𑀢𑀺, 𑀉𑀤𑀻𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀳𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀯𑀘𑀦𑁂𑀦 𑀧𑀓𑀸𑀲𑀺𑀬𑀫𑀸𑀦𑀲𑁆𑀲 𑀧𑀤𑀢𑁆𑀣𑀲𑁆𑀲 𑀲𑀗𑁆𑀔𑀸𑀤𑀺𑀪𑀸𑀯𑁂 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀯𑀘𑀦𑀸𑀤𑀺𑀢𑀸 𑀲𑀺𑀬𑀸𑀢𑀺. 𑀪𑀸𑀯𑁄𑀢𑀺 𑀲𑀢𑁆𑀢𑀯𑁂𑀯𑀘𑀦𑀦𑁆𑀢𑀺 𑀪𑀡𑀦𑁆𑀢𑀺, 𑀥𑀸𑀢𑀼𑀬𑀸 𑀯𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑀢𑁆𑀢𑁄𑀢𑀺 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀜𑁆𑀘𑁄’’𑀢𑀺𑀆𑀤𑀺𑀫𑀸𑀳. 𑀅𑀳𑀦𑁆𑀢𑀺 𑀘 𑀧𑀯𑀢𑁆𑀢𑀁 𑀅𑀥𑀺𑀯𑀘𑀦𑀁 𑀯𑀤𑀦𑁆𑀢𑁂𑀦 𑀲𑀼𑀡𑀦𑁆𑀢𑁂𑀦 𑀘 𑀧𑀼𑀩𑁆𑀩𑁂 𑀕𑀳𑀺𑀢𑀲𑀜𑁆𑀜𑁂𑀦 𑀅𑀢𑁆𑀣𑀧𑁆𑀧𑀓𑀸𑀲𑀦𑀪𑀸𑀯𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀅𑀯𑀺𑀜𑁆𑀜𑀸𑀢𑁂 𑀢𑀤𑀢𑁆𑀣𑀯𑀺𑀚𑀸𑀦𑀦𑀁 𑀅𑀢𑁆𑀣𑀻𑀢𑀺 𑀯𑀺𑀲𑁂𑀲𑁂𑀦 𑀅𑀥𑀺𑀯𑀘𑀦𑀁 ‘‘𑀜𑀸𑀬𑀢𑀻𑀢𑀺 𑀲𑀫𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀲𑁆𑀲𑀢𑁆𑀣𑀲𑁆𑀲 𑀅𑀳𑀦𑁆𑀢𑀺 𑀇𑀤𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀯𑀁 𑀯𑀸 𑀲𑀜𑁆𑀜𑀸𑀕𑀳𑀡𑀯𑀲𑁂𑀦 𑀜𑀸𑀬𑀢𑀺 𑀲𑀫𑀜𑁆𑀜𑀸𑀬𑀢𑀺 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀲𑀫𑀜𑁆𑀜𑀸. 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀅𑀳𑀦𑁆𑀢𑀺 𑀇𑀤𑀁 𑀏𑀢𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀏𑀯𑀁 𑀞𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀯𑁄𑀳𑀭𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀥𑁂𑀬𑁆𑀬𑀦𑁆𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄𑀢𑀺 𑀅𑀦𑁂𑀓𑁂𑀳𑀺𑀧𑀺 𑀦𑀸𑀫𑀲𑀳𑀲𑁆𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀬𑀫𑁂𑀯 𑀉𑀧𑀧𑀢𑀦𑀲𑀻𑀮𑀁 𑀦𑀸𑀫𑀁 ‘‘𑀑𑀧𑀧𑀸𑀢𑀺𑀓𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀦𑀸𑀫𑀫𑁂𑀯 𑀓𑀫𑁆𑀫𑀁 𑀦𑀸𑀫𑀓𑀫𑁆𑀫𑀁. 𑀢𑀣𑀸 𑀦𑀸𑀫𑀥𑁂𑀬𑁆𑀬𑀁. 𑀓𑀭𑀡𑀞𑀧𑀦𑀲𑀤𑁆𑀤𑀸𑀧𑀺 𑀳𑀺 𑀓𑀫𑁆𑀫𑀢𑁆𑀣𑀸 𑀳𑁄𑀦𑁆𑀢𑀻𑀢𑀺. 𑀅𑀣 𑀓𑀭𑀡𑀢𑁆𑀣𑀸, 𑀓𑀭𑀻𑀬𑀢𑀺 𑀘 𑀞𑀧𑀻𑀬𑀢𑀺 𑀘 𑀏𑀢𑁂𑀦 𑀅𑀢𑁆𑀣𑁄 𑀏𑀯𑀁𑀦𑀸𑀫𑁄𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀓𑀭𑀡𑀁 𑀞𑀧𑀦𑀜𑁆𑀘 𑀦𑀸𑀫 𑀳𑁄𑀢𑀺. 𑀅𑀣 𑀪𑀸𑀯𑀢𑁆𑀣𑀸, 𑀜𑀸𑀧𑀦𑀫𑀢𑁆𑀢𑀫𑁂𑀯 𑀓𑀭𑀡𑀁 𑀞𑀧𑀦𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀦𑀸𑀫𑀦𑀺𑀭𑀼𑀢𑁆𑀢𑀺 𑀦𑀸𑀫𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀸𑀫𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀧𑀣𑀯𑀻𑀲𑀗𑁆𑀔𑀸𑀢𑀁 𑀅𑀢𑁆𑀣𑀧𑁆𑀧𑀓𑀸𑀭𑀫𑀢𑁆𑀢𑀁 𑀦𑀺𑀯𑀤𑀢𑀺 𑀩𑁆𑀬𑀜𑁆𑀚𑀬𑀢𑀺 𑀯𑀸 𑀧𑀣𑀯𑀻𑀢𑀺 𑀦𑀸𑀫𑀁 𑀦𑀺𑀯𑀤𑀢𑀺 𑀩𑁆𑀬𑀜𑁆𑀚𑀬𑀢𑀺 𑀯𑀸, 𑀢𑀲𑁆𑀫𑀸 𑀅𑀦𑀸𑀫𑀲𑁆𑀲 𑀦𑀺𑀭𑀼𑀢𑁆𑀢𑀺𑀩𑁆𑀬𑀜𑁆𑀚𑀦𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀦𑀸𑀫𑀦𑀺𑀭𑀼𑀢𑁆𑀢𑀺 𑀦𑀸𑀫𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀦𑀸𑀫𑀸𑀪𑀺𑀮𑀸𑀧𑁄𑀢𑀺 𑀏𑀢𑁆𑀣𑀸𑀧𑀺 𑀦𑀬𑁄. 𑀏𑀢𑁆𑀣 𑀧𑀦 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁄 𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀢𑀭𑁂𑀳𑀺 𑀧𑀜𑁆𑀜𑀸𑀧𑀦𑀢𑁄.

𑀢𑀢𑁆𑀣 𑀘 ‘‘𑀧𑀼𑀭𑀺𑀫𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀸𑀤𑀯𑀬𑀓𑀺𑀘𑁆𑀘𑀭𑀳𑀺𑀢𑀸 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑀸, 𑀧𑀘𑁆𑀙𑀺𑀫𑀸 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀬𑀸𑀬 𑀧𑀼𑀭𑀺𑀫𑀸 𑀧𑀜𑁆𑀜𑀢𑁆𑀢𑀺 𑀭𑀽𑀧𑀸𑀤𑀬𑁄 𑀘 𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀸𑀦𑀦𑁆𑀢𑀭𑀫𑀼𑀧𑁆𑀧𑀦𑁆𑀦𑁂𑀦 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀕𑀳𑀺𑀢𑀸𑀬 𑀧𑀜𑁆𑀜𑀸𑀧𑀻𑀬𑀦𑁆𑀢𑀻’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀢𑁆𑀣𑁂 𑀲𑀢𑀺 𑀬𑀁 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀬𑀁 ‘‘𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸 𑀦𑀸𑀫, 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀅𑀪𑀺𑀮𑀸𑀧𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫, 𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧𑁦𑁧-𑁧𑁦𑁮), 𑀢𑁂𑀦 𑀯𑀺𑀭𑁄𑀥𑁄 𑀲𑀺𑀬𑀸. 𑀦 𑀳𑀺 𑀉𑀧𑁆𑀧𑀸𑀤𑀯𑀬𑀓𑀺𑀘𑁆𑀘𑀭𑀳𑀺𑀢𑀲𑁆𑀲 𑀯𑀘𑀦𑀫𑀢𑁆𑀢𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺 𑀅𑀢𑁆𑀣𑀺 𑀉𑀧𑁆𑀧𑀸𑀤𑀸𑀤𑀺𑀲𑀳𑀺𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄, 𑀦 𑀘 𑀯𑀘𑀦𑀯𑀘𑀦𑀢𑁆𑀣𑀯𑀺𑀫𑀼𑀢𑁆𑀢𑀲𑁆𑀲 𑀦𑀸𑀫𑀲𑁆𑀲 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀢𑀸 𑀅𑀢𑁆𑀣𑀺, 𑀦𑀸𑀧𑀺 𑀅𑀦𑀺𑀤𑁆𑀥𑀸𑀭𑀺𑀢𑀲𑀪𑀸𑀯𑀲𑁆𑀲 𑀧𑀤𑀢𑁆𑀣𑀲𑁆𑀲 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑀦𑀁 𑀅𑀢𑁆𑀣𑀻𑀢𑀺.

𑀤𑀼𑀯𑀺𑀥𑀸 𑀘𑀸𑀬𑀁 𑀧𑀜𑁆𑀜𑀢𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀦 𑀤𑀺𑀲𑁆𑀲𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀙 𑀧𑀜𑁆𑀜𑀢𑁆𑀢𑀺𑀬𑁄𑀯 𑀯𑀼𑀢𑁆𑀢𑀸. 𑀢𑀢𑁆𑀣 ‘‘𑀭𑀽𑀧𑀁 𑀯𑁂𑀤𑀦𑀸’’𑀢𑀺𑀆𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄’’𑀢𑀺𑀆𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀇𑀢𑁆𑀣𑀺𑀲𑀤𑁆𑀤𑁄 𑀧𑀼𑀭𑀺𑀲𑀲𑀤𑁆𑀤𑁄’’𑀢𑀺𑀆𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄’’𑀢𑀺𑀆𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀦 𑀘𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀺 𑀲𑀗𑁆𑀔𑀸…𑀧𑁂… 𑀅𑀪𑀺𑀮𑀸𑀧𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀲𑀗𑁆𑀔𑀸𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑁂𑀲𑀁𑀬𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀧𑀯𑀢𑁆𑀢𑀸 𑀲𑀗𑁆𑀔𑀸𑀤𑀬𑁄 𑀇𑀢𑀭𑀸𑀢𑀺.

𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀘𑀦𑁂𑀦 𑀧𑀜𑁆𑀜𑀸𑀧𑀺𑀢𑀩𑁆𑀩𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀸 𑀧𑀜𑁆𑀜𑀸𑀧𑀦𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀘 𑀯𑀼𑀢𑁆𑀢𑀸, 𑀇𑀢𑀭𑁂𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀸𑀢𑀺 𑀘𑁂? 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀲𑀢𑀺 𑀳𑀺 𑀉𑀚𑀼𑀓𑁂 𑀧𑀼𑀭𑀺𑀫𑁂 𑀧𑀸𑀴𑀺𑀅𑀦𑀼𑀕𑀢𑁂 𑀅𑀢𑁆𑀣𑁂 𑀅𑀬𑀫𑀢𑁆𑀣𑁄 𑀇𑀫𑀸𑀬 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑁄𑀢𑀺 𑀅𑀲𑀺𑀤𑁆𑀥𑀫𑁂𑀢𑀁. 𑀬𑀤𑀺 𑀘 𑀲𑀢𑁆𑀢𑀭𑀣𑀖𑀝𑀸𑀤𑀺𑀤𑀺𑀲𑀸𑀓𑀸𑀮𑀓𑀲𑀺𑀡𑀅𑀚𑀝𑀸𑀓𑀸𑀲𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀲𑀬𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀆𑀤𑀺𑀧𑁆𑀧𑀓𑀸𑀭𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀏𑀢𑁂𑀦𑁂𑀯 𑀯𑀘𑀦𑁂𑀦 𑀢𑀲𑁆𑀲𑀸 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀼𑀢𑁆𑀢𑀸𑀢𑀺 𑀦 𑀲𑀸 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀸. 𑀬𑀣𑀸 𑀘 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀢𑁆𑀢𑀸𑀤𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄, 𑀏𑀯𑀁 𑀭𑀽𑀧𑀸𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑀸𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀢𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀢𑀢𑁄 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀜𑁆𑀜𑀢𑁆𑀢𑀺𑀧𑀣𑁂𑀳𑀺 𑀅𑀯𑀺𑀲𑀺𑀝𑁆𑀞𑁄 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀅𑀣𑀸𑀧𑀺 𑀧𑀜𑁆𑀜𑀸𑀧𑀺𑀢𑀩𑁆𑀩𑀧𑀜𑁆𑀜𑀸𑀧𑀦𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑁄 𑀲𑀗𑁆𑀔𑀸𑀤𑀺𑀦𑀺𑀤𑁆𑀤𑁂𑀲𑁄, 𑀢𑀣𑀸𑀧𑀺 ‘‘𑀏𑀓𑀥𑀫𑁆𑀫𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀦𑀺𑀧𑀢𑀢𑀺, 𑀲𑀩𑁆𑀩𑀥𑀫𑁆𑀫𑀸 𑀏𑀓𑀥𑀫𑁆𑀫𑀲𑁆𑀫𑀺𑀁 𑀦𑀺𑀧𑀢𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀺𑀧𑀣𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀧𑀜𑁆𑀜𑀢𑁆𑀢𑀺𑀧𑀣𑀸 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑁂𑀦𑁂𑀯 𑀯𑀼𑀢𑁆𑀢𑀸𑀢𑀺 𑀧𑀜𑁆𑀜𑀢𑁆𑀢𑀺𑀧𑀣𑀧𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦𑀸𑀧𑀺 𑀲𑀓𑁆𑀓𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀧𑀜𑁆𑀜𑀸𑀧𑀦𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑁄 𑀲𑀗𑁆𑀔𑀸𑀤𑀺𑀦𑀺𑀤𑁆𑀤𑁂𑀲𑁄𑀢𑀺 𑀯𑀢𑁆𑀢𑀼𑀁 𑀲𑀗𑁆𑀔𑀸𑀤𑀺𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺, 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀻’’𑀢𑀺 (𑀫𑀳𑀸𑀦𑀺. 𑁪𑁧) 𑀏𑀢𑁆𑀣 ‘‘𑀧𑀼𑀭𑀺𑀲𑁄𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸…𑀧𑁂… 𑀅𑀪𑀺𑀮𑀸𑀧𑁄’’𑀢𑀺 (𑀫𑀳𑀸𑀦𑀺. 𑁪𑁧). 𑀢𑀣𑀸 ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺𑀆𑀤𑀺 (𑀫𑀳𑀸𑀦𑀺. 𑁭𑁩). 𑀦 𑀘 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀲𑀗𑁆𑀓𑁂𑀢𑀕𑁆𑀕𑀳𑀡𑀁 ‘‘𑀭𑀽𑀧𑀁 𑀢𑀺𑀲𑁆𑀲𑁄’’𑀢𑀺𑀆𑀤𑀺𑀯𑀘𑀦𑀕𑁆𑀕𑀳𑀡𑀜𑁆𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀅𑀲𑀺𑀤𑁆𑀥𑀲𑀪𑀸𑀯𑀲𑁆𑀲 𑀅𑀢𑁆𑀣𑀧𑀜𑁆𑀜𑀸𑀧𑀦𑁂 𑀲𑀫𑀢𑁆𑀣𑀢𑀸 𑀲𑀫𑁆𑀪𑀯𑀢𑀺, 𑀢𑁂𑀲𑀜𑁆𑀘 𑀅𑀲𑀫𑀢𑁆𑀣𑀢𑀸. 𑀬𑀤𑀺 𑀳𑀺 𑀢𑁂𑀲𑀁 𑀯𑀺𑀦𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀧𑀜𑁆𑀜𑀸𑀧𑀦𑁂 𑀅𑀲𑀫𑀢𑁆𑀣𑀢𑀸 𑀲𑀺𑀬𑀸, 𑀧𑀜𑁆𑀜𑀢𑁆𑀢𑀺𑀧𑀜𑁆𑀜𑀸𑀧𑀦𑁂 𑀘 𑀅𑀲𑀫𑀢𑁆𑀣𑀢𑀸𑀢𑀺 𑀢𑀲𑁆𑀲𑀸 𑀅𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀢𑀲𑁆𑀲𑀸 𑀢𑀲𑁆𑀲𑀸𑀢𑀺 𑀅𑀦𑀯𑀢𑁆𑀣𑀸𑀦𑀁, 𑀢𑀢𑁄 𑀅𑀢𑁆𑀣𑀯𑀺𑀚𑀸𑀦𑀦𑀫𑁂𑀯 𑀦 𑀲𑀺𑀬𑀸, 𑀦𑀸𑀧𑀺 𑀲𑀗𑁆𑀓𑁂𑀢𑀕𑁆𑀕𑀳𑀡𑀁 𑀲𑀗𑁆𑀓𑁂𑀢𑀲𑁆𑀲 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 ‘‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀯𑀸, ‘‘𑀇𑀫𑀲𑁆𑀲𑀢𑁆𑀣𑀲𑁆𑀲 𑀇𑀤𑀁 𑀯𑀘𑀦𑀁 𑀚𑁄𑀢𑀓’’𑀦𑁆𑀢𑀺 𑀯𑀸. 𑀲𑀜𑁆𑀜𑀼𑀧𑁆𑀧𑀸𑀤𑀫𑀢𑁆𑀢𑁂 𑀧𑀦 𑀲𑀗𑁆𑀓𑁂𑀢𑀕𑁆𑀕𑀳𑀡𑁂 𑀯𑀘𑀦𑀲𑁆𑀲 𑀯𑀘𑀦𑀢𑁆𑀣𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀧𑁆𑀧𑀦𑁂 𑀧𑀬𑁄𑀚𑀦𑀁 𑀦𑀢𑁆𑀣𑀺. ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺’’ (𑀓𑀣𑀸. 𑁩𑁪𑁭), ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁 𑀆𑀦𑀦𑁆𑀤 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑀁 𑀬𑀤𑀺𑀤𑀁 𑀚𑀦𑀯𑀲𑀪𑁄’’𑀢𑀺 (𑀤𑀻. 𑀦𑀺. 𑁨.𑁨𑁮𑁦), ‘‘𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑀓𑁄𑀡𑁆𑀟𑀜𑁆𑀜𑁄 𑀅𑀳𑀁 𑀪𑀕𑀯𑀸’’𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁧.𑁨𑁧𑁭) 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀯𑀘𑀦𑀪𑀸𑀯𑁄 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑁄 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀬𑀤𑀺 𑀲𑀢𑁆𑀢𑀸𑀤𑀬𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦 𑀳𑁄𑀦𑁆𑀢𑀺, 𑀓𑀸 𑀧𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺? 𑀧𑀓𑀸𑀲𑀺𑀢𑁄 𑀅𑀬𑀫𑀢𑁆𑀣𑁄 ‘‘𑀅𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀢𑁆𑀢𑀸𑀤𑀻𑀦𑀁 𑀲𑀗𑁆𑀔𑀸…𑀧𑁂… 𑀅𑀪𑀺𑀮𑀸𑀧𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀲𑀢𑁆𑀢𑀸𑀤𑀻𑀦𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀢𑁆𑀣𑀺𑀢𑀸 𑀦𑁂𑀯 𑀯𑀢𑁆𑀢𑀩𑁆𑀩𑀸, 𑀬𑁂 𑀘 𑀯𑀤𑁂𑀬𑁆𑀬𑀼𑀁 ‘‘𑀭𑀽𑀧𑀸𑀤𑀻𑀦𑀺 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀼𑀢𑁆𑀢𑀸, 𑀦 𑀦𑀢𑁆𑀣𑀺𑀪𑀸𑀯𑀢𑁄’’𑀢𑀺, 𑀅𑀬𑀜𑁆𑀘 𑀯𑀸𑀤𑁄 𑀳𑁂𑀯𑀢𑁆𑀣𑀺𑀓𑀣𑀸𑀬 𑀧𑀝𑀺𑀲𑀺𑀤𑁆𑀥𑁄, 𑀦 𑀘 𑀭𑀽𑀧𑀁 𑀯𑁂𑀤𑀦𑀸 𑀦 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀢𑁆𑀢𑀸𑀤𑀬𑁄𑀧𑀺 𑀬𑀤𑀺 𑀅𑀢𑁆𑀣𑀺, 𑀭𑀽𑀧𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀸𑀤𑀻𑀲𑀼 𑀘 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 ‘‘𑀲𑀢𑁆𑀢𑁄 𑀇𑀢𑁆𑀣𑀻 𑀭𑀣𑁄 𑀖𑀝𑁄’’𑀢𑀺𑀆𑀤𑀺𑀓𑀸 𑀯𑀺𑀘𑀺𑀢𑁆𑀢𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀜𑀸𑀦𑀼𑀮𑁄𑀫𑀸𑀦𑀺 𑀘 𑀅𑀥𑀺𑀯𑀘𑀦𑀸𑀦𑀺, 𑀢𑁂𑀳𑀺 𑀭𑀽𑀧𑀘𑀓𑁆𑀔𑀸𑀤𑀻𑀳𑀺 𑀅𑀜𑁆𑀜𑁄 𑀲𑀢𑁆𑀢𑀭𑀣𑀸𑀤𑀺𑀲𑀜𑁆𑀜𑀸𑀯𑀮𑀫𑁆𑀩𑀺𑀢𑁄 𑀯𑀘𑀦𑀢𑁆𑀣𑁄 𑀯𑀺𑀚𑁆𑀚𑀫𑀸𑀦𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀭𑀣𑀸𑀤𑀺𑀅𑀪𑀺𑀮𑀸𑀧𑀸 ‘‘𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀘 𑀢𑁂 ‘‘𑀫𑀼𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀢𑀢𑁄 𑀏𑀯 𑀢𑁂 𑀅𑀪𑀺𑀮𑀸𑀧𑀸 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀘 𑀯𑀘𑀦𑀢𑁆𑀣𑁄 𑀲𑀬𑀁 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀘𑀦𑀲𑁆𑀲𑁂𑀯 𑀯𑀲𑁂𑀦 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀮𑀪𑀢𑀺, ‘‘𑀲𑀫𑁆𑀫𑀼𑀢𑀺𑀲𑀘𑁆𑀘’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺 𑀬𑀣𑀸𑀕𑀳𑀺𑀢𑀲𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀯𑀘𑀦𑀢𑁆𑀣𑀪𑀸𑀯𑀢𑁄. ‘‘𑀲𑀫𑁆𑀫𑀼𑀢𑀺𑀜𑀸𑀡𑀁 𑀲𑀘𑁆𑀘𑀸𑀭𑀫𑁆𑀫𑀡𑀫𑁂𑀯, 𑀦𑀸𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺 (𑀓𑀣𑀸. 𑁪𑁩𑁪) 𑀓𑀣𑀸𑀬 𑀘 ‘‘𑀧𑀣𑀯𑀻𑀓𑀲𑀺𑀡𑀸𑀤𑀺 𑀘𑀻𑀯𑀭𑀸𑀤𑀺 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀫𑁆𑀳𑀻’’𑀢𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀫𑀸 𑀭𑀽𑀧𑀸𑀤𑀻𑀲𑀼 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 𑀏𑀓𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀢𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀁 𑀲𑀢𑁆𑀢𑀸𑀤𑀺𑀕𑁆𑀕𑀳𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀬 𑀭𑀽𑀧𑀸𑀤𑀻𑀲𑀼 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀘 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁 𑀲𑀢𑁆𑀢𑀭𑀣𑀸𑀤𑀺𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀬𑀁 𑀔𑀦𑁆𑀥𑀲𑀫𑀽𑀳𑀲𑀦𑁆𑀢𑀸𑀦𑀁 𑀏𑀓𑀢𑁆𑀢𑁂𑀦 𑀕𑀳𑀺𑀢𑀁 𑀉𑀧𑀸𑀤𑀸𑀬 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺 𑀕𑀳𑀡𑀁 𑀧𑀜𑁆𑀜𑀢𑁆𑀢𑀺 𑀘 𑀧𑀯𑀢𑁆𑀢𑀢𑀺, 𑀢𑀁 𑀢𑀤𑀼𑀧𑀸𑀤𑀸𑀦𑀪𑀽𑀢𑀁 𑀧𑀼𑀕𑁆𑀕𑀮𑀲𑀜𑁆𑀜𑀸𑀬 𑀲𑁂𑀯𑀫𑀸𑀦𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 ‘‘𑀧𑀼𑀕𑁆𑀕𑀮𑁄𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁯) 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀼𑀕𑁆𑀕𑀮𑁄 𑀦𑀸𑀫 𑀓𑁄𑀘𑀺 𑀪𑀸𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸 𑀆𑀧𑁄𑀥𑀸𑀢𑀼𑀆𑀤𑀻𑀦𑀺 𑀘𑀺𑀢𑁆𑀢𑁂𑀦 𑀯𑀺𑀯𑁂𑀘𑁂𑀢𑁆𑀯𑀸 𑀧𑀣𑀯𑀻𑀥𑀸𑀢𑀼 𑀉𑀧𑀮𑀩𑁆𑀪𑀢𑀺, 𑀦 𑀏𑀯𑀁 𑀭𑀽𑀧𑀸𑀤𑀬𑁄 𑀔𑀦𑁆𑀥𑁂 𑀯𑀺𑀯𑁂𑀘𑁂𑀢𑁆𑀯𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺. 𑀧𑀝𑀺𑀲𑁂𑀥𑀺𑀢𑀸 𑀘 𑀧𑀼𑀕𑁆𑀕𑀮𑀓𑀣𑀸𑀬 𑀧𑀼𑀕𑁆𑀕𑀮𑀤𑀺𑀝𑁆𑀞𑀺. 𑀯𑀚𑀺𑀭𑀸𑀬 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀢𑁆𑀢𑀁 𑁋

‘‘𑀓𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧; 𑀫𑀳𑀸𑀦𑀺. 𑁧𑁮𑁬; 𑀓𑀣𑀸. 𑁨𑁩𑁩);

𑀲𑀢𑁆𑀢𑁄𑀢𑀺 𑀧𑀦 𑀯𑀘𑀦𑀲𑁆𑀲 𑀧𑀜𑁆𑀜𑀢𑁆𑀢𑀺𑀬𑀸 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀲𑀸 𑀏𑀯𑀫𑀸𑀳 𑁋

‘‘𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧; 𑀫𑀳𑀸𑀦𑀺. 𑁧𑁮𑁬; 𑀓𑀣𑀸. 𑁨𑁩𑁩);

𑀬𑀤𑀺 𑀧𑀼𑀕𑁆𑀕𑀮𑁄 𑀦 𑀯𑀺𑀚𑁆𑀚𑀢𑀺, 𑀓𑀣𑀁 𑀧𑀼𑀕𑁆𑀕𑀮𑀕𑁆𑀕𑀳𑀡𑀲𑁆𑀲 𑀲𑀸𑀭𑀫𑁆𑀫𑀡𑀢𑀸 𑀲𑀺𑀬𑀸𑀢𑀺? 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀢𑁄. 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀳𑀺 𑀧𑀭𑀺𑀓𑀧𑁆𑀧𑀺𑀢𑀁 𑀮𑁄𑀓𑀲𑀜𑁆𑀜𑀸𑀢𑀁 𑀯𑀸 𑀯𑀺𑀚𑁆𑀚𑀫𑀸𑀦𑀁 𑀯𑀸 𑀲𑀪𑀸𑀯𑀪𑀽𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀦𑀢𑁄 𑀲𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀲𑀸𑀭𑀫𑁆𑀫𑀡𑀸𑀢𑀺 𑀳𑀺 𑀯𑀘𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀺𑀜𑁆𑀜𑁂𑀯 𑀤𑀻𑀧𑁂𑀢𑀺, 𑀦 𑀢𑁂𑀳𑀺 𑀕𑀳𑀺𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑀁 𑀯𑀸𑀢𑀺. 𑀅𑀬𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸𑀧𑀝𑀺𑀲𑁂𑀥𑀁 𑀲𑀩𑁆𑀩𑀣𑀸 𑀅𑀦𑀼𑀯𑀢𑁆𑀢𑀦𑁆𑀢𑀸𑀦𑀁 𑀯𑀺𑀦𑀺𑀘𑁆𑀙𑀬𑁄.

𑁧𑁩𑁧𑁬. 𑀦𑀸𑀫𑀓𑀭𑀡𑀝𑁆𑀞𑁂𑀦𑀸𑀢𑀺 𑀅𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀦𑀸𑀫𑀓𑀭𑀡𑀲𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀧𑀭𑀲𑁆𑀲 𑀦𑀸𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀘 𑀢𑀤𑀧𑁂𑀓𑁆𑀔𑀢𑁆𑀢𑀸 𑀅𑀜𑁆𑀜𑀸𑀧𑁂𑀓𑁆𑀔𑀁 𑀦𑀸𑀫𑀓𑀭𑀡𑀦𑁆𑀢𑀺 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦 𑀳𑁄𑀢𑀺. 𑀢𑀲𑁆𑀫𑀸 𑀫𑀳𑀸𑀚𑀦𑀲𑁆𑀲 𑀜𑀸𑀢𑀻𑀦𑀁 𑀕𑀼𑀡𑀸𑀦𑀜𑁆𑀘 𑀲𑀸𑀫𑀜𑁆𑀜𑀦𑀸𑀫𑀸𑀤𑀺𑀓𑀸𑀭𑀓𑀸𑀦𑀁 𑀦𑀸𑀫𑀪𑀸𑀯𑁄 𑀦𑀸𑀧𑀚𑁆𑀚𑀢𑀺. 𑀬𑀲𑁆𑀲 𑀘 𑀅𑀜𑁆𑀜𑁂𑀳𑀺 𑀦𑀸𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀘 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦𑀢𑁆𑀣𑀻𑀢𑀺 𑀦𑀢𑁆𑀣𑀺𑀬𑁂𑀯 𑀦𑀸𑀫𑀪𑀸𑀯𑁄, 𑀯𑁂𑀤𑀦𑀸𑀤𑀻𑀦𑀁 𑀧𑀦 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀯𑁂𑀤𑀦𑀸𑀤𑀺𑀦𑀸𑀫𑀲𑁆𑀲 𑀦𑀸𑀫𑀓𑀭𑀡𑀲𑀪𑀸𑀯𑀢𑁄 𑀦𑀸𑀫𑀢𑀸 𑀯𑀼𑀢𑁆𑀢𑀸. 𑀧𑀣𑀯𑀻𑀆𑀤𑀺𑀦𑀺𑀤𑀲𑁆𑀲𑀦𑁂𑀦 𑀦𑀸𑀫𑀲𑁆𑀲 𑀲𑀪𑀸𑀯𑀲𑀺𑀤𑁆𑀥𑀢𑀁𑀬𑁂𑀯 𑀦𑀺𑀤𑀲𑁆𑀲𑁂𑀢𑀺, 𑀦 𑀦𑀸𑀫𑀪𑀸𑀯𑀲𑀸𑀫𑀜𑁆𑀜𑀁, 𑀦𑀺𑀭𑀼𑀴𑁆𑀳𑀢𑁆𑀢𑀸 𑀧𑀦 𑀦𑀸𑀫𑀲𑀤𑁆𑀤𑁄 𑀅𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀯𑀼𑀢𑁆𑀢𑁄, 𑀦 𑀧𑀣𑀯𑀻𑀆𑀤𑀻𑀲𑀽𑀢𑀺 𑀦 𑀢𑁂𑀲𑀁 𑀦𑀸𑀫𑀪𑀸𑀯𑁄. 𑀫𑀸𑀢𑀺𑀓𑀸𑀬 𑀘 𑀧𑀣𑀯𑀻𑀆𑀤𑀻𑀦𑀁 𑀦𑀸𑀫𑀢𑀸𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸𑀯. 𑀦 𑀳𑀺 𑀧𑀣𑀯𑀻𑀆𑀤𑀺𑀦𑀸𑀫𑀁 𑀯𑀺𑀚𑀳𑀺𑀢𑁆𑀯𑀸 𑀓𑁂𑀲𑀸𑀤𑀺𑀦𑀸𑀫𑁂𑀳𑀺 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀯𑁂𑀤𑀦𑀸𑀤𑀺𑀦𑀸𑀫𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑁂𑀦 𑀦𑀸𑀫𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑁄𑀳𑀭𑀺𑀢𑀩𑁆𑀩𑁂𑀦 𑀧𑀺𑀡𑁆𑀟𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺.

𑀅𑀣 𑀯𑀸 𑀭𑀽𑀧𑀥𑀫𑁆𑀫𑀸 𑀘𑀓𑁆𑀔𑀸𑀤𑀬𑁄 𑀭𑀽𑀧𑀸𑀤𑀬𑁄 𑀘 𑀢𑁂𑀲𑀁 𑀧𑀓𑀸𑀲𑀓𑀧𑀓𑀸𑀲𑀺𑀢𑀩𑁆𑀩𑀪𑀸𑀯𑀢𑁄 𑀯𑀺𑀦𑀸 𑀦𑀸𑀫𑁂𑀦 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀦 𑀏𑀯𑀁 𑀅𑀭𑀽𑀧𑀥𑀫𑁆𑀫𑀸𑀢𑀺 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬 𑀦𑀸𑀫𑀸𑀬𑀢𑁆𑀢𑀕𑀳𑀡𑀻𑀬𑀪𑀸𑀯𑁂𑀦 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀸, 𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀧𑀺 𑀦 𑀘𑀓𑁆𑀔𑀸𑀤𑀻𑀦𑀺 𑀯𑀺𑀬 𑀦𑀸𑀫𑁂𑀦 𑀯𑀺𑀦𑀸 𑀧𑀸𑀓𑀝𑁄𑀢𑀺 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀭𑀽𑀧𑀢𑀸𑀬 𑀯𑀸 𑀅𑀜𑁆𑀜𑀦𑀸𑀫𑀲𑀪𑀸𑀕𑀢𑁆𑀢𑀸 𑀲𑀗𑁆𑀕𑀳𑀺𑀢𑁄𑀬𑀁, 𑀅𑀜𑁆𑀜𑀨𑀲𑁆𑀲𑀲𑀪𑀸𑀕𑀢𑁆𑀢𑀸 𑀯𑀸. 𑀯𑀘𑀦𑀢𑁆𑀣𑁄𑀧𑀺 𑀳𑀺 ‘‘𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀦𑀸𑀫𑀬𑀢𑀻𑀢𑀺 𑀦𑀸𑀫’’𑀦𑁆𑀢𑀺 𑀇𑀥 𑀧𑀘𑁆𑀙𑀺𑀫𑀧𑀼𑀭𑀺𑀫𑀸𑀦𑀁 𑀲𑀫𑁆𑀪𑀯𑀢𑀺. 𑀭𑀽𑀧𑀬𑀢𑀻𑀢𑀺 𑀯𑀺𑀦𑀸𑀧𑀺 𑀦𑀸𑀫𑁂𑀦 𑀅𑀢𑁆𑀢𑀸𑀦𑀁 𑀧𑀓𑀸𑀲𑀬𑀢𑀻𑀢𑀺 𑀅𑀢𑁆𑀣𑁄, 𑀦𑀸𑀫𑀬𑀢𑀻𑀢𑀺 𑀦𑀸𑀫𑁂𑀦 𑀯𑀺𑀦𑀸 𑀅𑀧𑀸𑀓𑀝𑀪𑀸𑀯𑀢𑁄 𑀅𑀢𑁆𑀢𑀦𑁄 𑀧𑀓𑀸𑀲𑀓𑀁 𑀦𑀸𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬𑀸𑀢𑀺 𑀲𑀢𑀺𑀧𑀺 𑀭𑀽𑀧𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂 𑀦 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀲𑀸𑀢𑀺𑀲𑀬𑀁 𑀢𑀁𑀦𑀸𑀫𑀦𑀲𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁩𑁧𑁮. 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀢𑁆𑀢𑀸𑀦𑀁 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄 𑀦𑀸𑀫 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀢𑀁𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀫𑀼𑀤𑀸𑀘𑀭𑀢𑀻𑀢𑀺 𑀲𑀫𑀼𑀤𑀸𑀘𑀸𑀭𑁄, 𑀯𑀝𑁆𑀝𑀫𑀽𑀮𑀫𑁂𑀯 𑀲𑀫𑀼𑀤𑀸𑀘𑀸𑀭𑁄 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄, 𑀯𑀝𑁆𑀝𑀫𑀽𑀮𑀤𑀲𑁆𑀲𑀦𑁂𑀦 𑀯𑀝𑁆𑀝𑀫𑀽𑀮𑀸𑀦𑀁 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀯𑀝𑁆𑀝𑀫𑀽𑀮𑀸𑀦𑀁 𑀲𑀫𑀼𑀤𑀸𑀘𑀸𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺𑀧𑀺 𑀅𑀢𑁆𑀣𑁄.

𑁧𑁩𑁨𑁦. 𑀏𑀓𑁂𑀓𑀲𑁆𑀫𑀺𑀜𑁆𑀘 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑀡𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀁 𑀯𑀸 𑀔𑀦𑁆𑀥𑀁 𑀅𑀢𑁆𑀢𑀢𑁄 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀉𑀧𑀪𑁄𑀕𑀪𑀽𑀢𑁄 𑀮𑁄𑀓𑁄𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 ‘‘𑀮𑁄𑀓𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀯𑀸 𑀯𑀲𑁂𑀦 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀁 𑀤𑁆𑀯𑀺𑀥𑀸𑀧𑀺 𑀕𑀳𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀯𑀺𑀝𑁆𑀞𑀸 𑀧𑀭𑀸𑀫𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁩𑁨. 𑀲𑀳 𑀲𑀺𑀓𑁆𑀔𑀺𑀢𑀩𑁆𑀩𑁄 𑀥𑀫𑁆𑀫𑁄 𑀲𑀳𑀥𑀫𑁆𑀫𑁄, 𑀢𑀢𑁆𑀣 𑀪𑀯𑀁 𑀲𑀳𑀥𑀫𑁆𑀫𑀺𑀓𑀁. 𑀓𑀫𑁆𑀫𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀤𑁄𑀯𑀘𑀲𑁆𑀲𑀲𑀤𑁆𑀤𑀢𑁄 𑀆𑀬-𑀲𑀤𑁆𑀤𑀁 𑀅𑀦𑀜𑁆𑀜𑀢𑁆𑀣𑀁 𑀓𑀢𑁆𑀯𑀸 ‘‘𑀤𑁄𑀯𑀘𑀲𑁆𑀲𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀼𑀩𑁆𑀩𑀘𑀲𑁆𑀲 𑀓𑀫𑁆𑀫’’𑀦𑁆𑀢𑀺 𑀆𑀳. 𑀤𑁄𑀯𑀘𑀲𑁆𑀲𑀲𑁆𑀲 𑀯𑀸 𑀅𑀬𑀦𑀁 𑀧𑀯𑀢𑁆𑀢𑀺 𑀤𑁄𑀯𑀘𑀲𑁆𑀲𑀸𑀬𑀁. 𑀯𑀘𑀦𑀲𑁆𑀲 𑀧𑀝𑀺𑀯𑀺𑀭𑀼𑀤𑁆𑀥𑀯𑀘𑀦𑀁 𑀧𑀝𑀸𑀡𑀺𑀓𑀕𑀳𑀡𑀁. 𑀕𑀼𑀡𑁂𑀳𑀺 𑀕𑀭𑀽𑀲𑀼 𑀕𑀸𑀭𑀯𑁂𑀦 𑀯𑀲𑀦𑀁 𑀕𑀭𑀼𑀯𑀸𑀲𑁄. 𑀚𑀸𑀢𑀺𑀆𑀤𑀻𑀳𑀺 𑀚𑁂𑀝𑁆𑀞𑀓𑁂𑀲𑀼 𑀧𑀝𑀺𑀲𑁆𑀲𑀼𑀡𑀺𑀢𑀩𑁆𑀩𑁂𑀲𑀼 𑀯𑀲𑀦𑀁 𑀲𑀚𑁂𑀝𑁆𑀞𑀓𑀯𑀸𑀲𑁄. 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑀸 𑀯𑀸 𑀕𑀭𑀼𑀦𑁄. 𑀳𑀺𑀭𑀺𑀬𑀺𑀢𑀩𑁆𑀩𑀸 𑀚𑁂𑀝𑁆𑀞𑀓𑀸. 𑀬𑀸𑀬 𑀘𑁂𑀢𑀦𑀸𑀬 𑀤𑀼𑀩𑁆𑀩𑀘𑁄 𑀳𑁄𑀢𑀺, 𑀲𑀸 𑀤𑁄𑀯𑀘𑀲𑁆𑀲𑀢𑀸 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀬𑁂𑀯𑀸’’𑀢𑀺 𑀆𑀳.

𑁧𑁩𑁩𑁩. 𑀤𑀼-𑀲𑀤𑁆𑀤𑁂𑀦 𑀬𑀼𑀢𑁆𑀢𑀁 𑀦𑀸𑀫𑀁 𑀤𑀼𑀦𑁆𑀦𑀸𑀫𑀁. 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀧𑀺 𑀅𑀦𑀼𑀲𑀺𑀓𑁆𑀔𑀦𑀁 𑀲𑁂𑀯𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀚𑀦𑀸𑀢𑀺 𑀉𑀧𑀲𑀗𑁆𑀓𑀫𑀦𑀸’’𑀢𑀺 𑀆𑀳. 𑀲𑀩𑁆𑀩𑀢𑁄𑀪𑀸𑀕𑁂𑀦𑀸𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘.

𑁧𑁩𑁩𑁬. 𑀯𑀺𑀦𑀬𑁄𑀢𑀺 𑀯𑀺𑀪𑀗𑁆𑀕𑀔𑀦𑁆𑀥𑀓𑀸 𑀯𑀼𑀢𑁆𑀢𑀸. 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀲𑀳 𑀯𑀢𑁆𑀣𑀼𑀦𑀸 𑀆𑀧𑀢𑁆𑀢𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀢𑁂𑀦𑀸𑀳 ‘‘𑀲𑀳 𑀯𑀢𑁆𑀣𑀼𑀦𑀸…𑀧𑁂… 𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀦𑀸𑀫𑀸’’𑀢𑀺. 𑀲𑀳 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀅𑀩𑁆𑀪𑀸𑀦𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀯𑀸𑀘𑀸𑀬 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀓𑀸𑀬 𑀘. 𑀲𑀳𑁂𑀯 𑀳𑀺 𑀓𑀫𑁆𑀫𑀯𑀸𑀘𑀸𑀬 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺. 𑀆𑀧𑀢𑁆𑀢𑀺𑀬𑀸 𑀯𑀸 𑀓𑀸𑀭𑀡𑀁 𑀯𑀢𑁆𑀣𑀼, 𑀯𑀼𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀁 𑀓𑀫𑁆𑀫𑀯𑀸𑀘𑀸𑀢𑀺 𑀓𑀸𑀭𑀡𑁂𑀦 𑀲𑀳 𑀨𑀮𑀲𑁆𑀲 𑀚𑀸𑀦𑀦𑀯𑀲𑁂𑀦 ‘‘𑀲𑀳 𑀯𑀢𑁆𑀣𑀼𑀦𑀸 𑀲𑀳 𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑁧𑁩𑁩𑁮. 𑀅𑀬𑀫𑁂𑀯𑀢𑁆𑀣𑁄 𑀲𑀳 𑀧𑀭𑀺𑀓𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄. 𑀯𑀼𑀝𑁆𑀞𑀸𑀦𑀓𑀧𑀜𑁆𑀜𑀸𑀬𑀸𑀢𑀺 𑀯𑀼𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀪𑀽𑀢𑀸𑀬 𑀧𑀭𑀺𑀓𑀫𑁆𑀫𑀧𑀜𑁆𑀜𑀸𑀬.

𑁧𑁩𑁪𑁦. 𑀥𑀸𑀢𑀼𑀯𑀺𑀲𑀬𑀸 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 𑀥𑀸𑀢𑀼𑀓𑀼𑀲𑀮𑀢𑀸, 𑀢𑀤𑁂𑀓𑀤𑁂𑀲𑀸 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀭𑀺𑀫𑀧𑀤𑁂𑀧𑀺 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀚𑀸𑀦𑀦𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀧𑀼𑀭𑀺𑀫𑀧𑀤𑁂 𑀯𑀸 𑀯𑀸𑀘𑀼𑀕𑁆𑀕𑀢𑀸𑀬 𑀥𑀸𑀢𑀼𑀧𑀸𑀴𑀺𑀬𑀸 𑀫𑀦𑀲𑀺𑀓𑀭𑀡𑀁 ‘‘𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀕𑁆𑀕𑀡𑁆𑀳𑀦𑁆𑀢𑀻 𑀫𑀦𑀲𑀺𑀓𑀭𑁄𑀦𑁆𑀢𑀻 𑀥𑀸𑀢𑀼𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀼𑀡𑀦𑁆𑀢𑀻 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀥𑀸𑀭𑁂𑀦𑁆𑀢𑀻 ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀲𑀪𑀸𑀯𑀢𑁄 𑀅𑀝𑁆𑀞𑀸𑀭𑀲𑁂𑀯𑀸𑀢𑀺 𑀕𑀡𑀦𑀢𑁄 𑀘 𑀧𑀭𑀺𑀘𑁆𑀙𑁂𑀤𑀁 𑀚𑀸𑀦𑀦𑁆𑀢𑀻 𑀘 𑀧𑀜𑁆𑀜𑀸 𑀉𑀕𑁆𑀕𑀳𑀧𑀜𑁆𑀜𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀧𑀘𑁆𑀙𑀺𑀫𑀧𑀤𑁂 𑀧𑀜𑁆𑀘𑀯𑀺𑀥𑀸𑀧𑀺 𑀲𑀸 𑀧𑀜𑁆𑀜𑀸 𑀉𑀕𑁆𑀕𑀳𑁄𑀢𑀺 𑀢𑀢𑁄 𑀘 𑀧𑀯𑀢𑁆𑀢𑁄 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑁄 ‘‘𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀚𑀸𑀦𑀦𑀁 𑀧𑀯𑀢𑁆𑀢𑀦𑀫𑁂𑀯, 𑀬𑀣𑀸 𑀧𑀯𑀢𑁆𑀢𑀁 𑀯𑀸 𑀉𑀕𑁆𑀕𑀳𑀁, 𑀏𑀯𑀫𑁂𑀯 𑀧𑀯𑀢𑁆𑀢𑁄 𑀉𑀕𑁆𑀕𑀳𑁄𑀢𑀺 𑀚𑀸𑀦𑀦𑀁 𑀉𑀕𑁆𑀕𑀳𑀚𑀸𑀦𑀦𑀁. 𑀫𑀦𑀲𑀺𑀓𑀸𑀭𑁄𑀧𑀺 ‘‘𑀏𑀯𑀁 𑀧𑀯𑀢𑁆𑀢𑁂𑀢𑀩𑁆𑀩𑁄 𑀏𑀯𑀜𑁆𑀘 𑀧𑀯𑀢𑁆𑀢𑁄’’𑀢𑀺 𑀚𑀸𑀦𑀦𑀁 𑀫𑀦𑀲𑀺𑀓𑀸𑀭𑀚𑀸𑀦𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄𑀧𑀺 𑀳𑀺 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑁄𑀕𑀢𑁄 𑀫𑀦𑀲𑀺𑀓𑀸𑀭𑀦𑀺𑀭𑀼𑀢𑁆𑀢𑀺𑀁 𑀮𑀤𑁆𑀥𑀼𑀁 𑀬𑀼𑀢𑁆𑀢𑁄𑀢𑀺 𑀬𑁄 𑀘 𑀫𑀦𑀲𑀺 𑀓𑀸𑀢𑀩𑁆𑀩𑁄, 𑀬𑁄 𑀘 𑀫𑀦𑀲𑀺𑀓𑀭𑀡𑀼𑀧𑀸𑀬𑁄, 𑀲𑀩𑁆𑀩𑁄 𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀢𑁆𑀣 𑀘 𑀓𑁄𑀲𑀮𑁆𑀮𑀁 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺.

𑁧𑁩𑁪𑁨. 𑀢𑀻𑀲𑀼𑀧𑀺 𑀯𑀸…𑀧𑁂… 𑀯𑀝𑁆𑀝𑀢𑀻𑀢𑀺 𑀢𑀲𑁆𑀲𑀸 𑀘 𑀉𑀕𑁆𑀕𑀳𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀲𑀫𑁆𑀫𑀲𑀦𑀁 𑀧𑀜𑁆𑀜𑀸, 𑀲𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀚𑀳𑀦𑀢𑁄. 𑀫𑀦𑀲𑀺𑀓𑀸𑀭𑁄 𑀲𑀫𑁆𑀫𑀲𑀦𑀲𑀫𑁆𑀧𑀬𑀼𑀢𑁆𑀢𑁄 𑀢𑀣𑁂𑀯 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑀓𑀺𑀘𑁆𑀘𑀁 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀥𑁂𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸’’𑀢𑀺. 𑀇𑀫𑀺𑀦𑀸 𑀧𑀦 𑀧𑀘𑁆𑀘𑀬𑁂𑀦 𑀇𑀤𑀁 𑀳𑁄𑀢𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀚𑀸𑀦𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁪𑁪. 𑀅𑀫𑁆𑀩𑀩𑀻𑀚𑀸𑀤𑀻𑀦𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀺𑀲𑀪𑀸𑀕𑀸 𑀅𑀦𑀦𑀼𑀭𑀽𑀧𑀸 𑀅𑀦𑀼𑀧𑁆𑀧𑀸𑀤𑀓𑀸𑀬𑁂𑀯 𑀘𑀓𑁆𑀔𑀸𑀤𑀬𑁄 ‘‘𑀯𑀺𑀲𑀪𑀸𑀕𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀳𑀺 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑁂𑀯 𑀘 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 ‘‘𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸’’𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀯𑀺𑀲𑀪𑀸𑀕𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀺𑀲𑀪𑀸𑀕𑀧𑀘𑁆𑀘𑀬𑁄, 𑀘𑀓𑁆𑀔𑀸𑀬𑀢𑀦𑀲𑁆𑀲 𑀯𑀺𑀲𑀪𑀸𑀕𑁂𑀦 𑀲𑁄𑀢𑀸𑀬𑀢𑀦𑁂𑀦 𑀧𑀘𑁆𑀘𑀬𑁂𑀦 𑀲𑀫𑀼𑀧𑁆𑀧𑀦𑁆𑀦𑁄 𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁄.

𑁧𑁩𑁪𑁬. 𑀅𑀚𑁆𑀚𑀯𑀦𑀺𑀤𑁆𑀤𑁂𑀲𑁂 𑀅𑀚𑁆𑀚𑀯𑁄 𑀅𑀚𑁆𑀚𑀯𑀢𑀸𑀢𑀺 𑀉𑀚𑀼𑀢𑀸 𑀉𑀚𑀼𑀓𑀢𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀚𑁆𑀚𑀯𑀫𑀤𑁆𑀤𑀯𑀦𑀺𑀤𑁆𑀤𑁂𑀲𑁂𑀲𑀼 𑀉𑀚𑀼𑀓𑀢𑀸𑀫𑀼𑀤𑀼𑀢𑀸𑀦𑀺𑀤𑁆𑀤𑁂𑀲𑁂𑀳𑀺 𑀯𑀺𑀲𑁂𑀲𑀁 𑀫𑀤𑁆𑀤𑀯𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁 ‘‘𑀦𑀻𑀘𑀘𑀺𑀢𑁆𑀢𑀢𑀸’’𑀢𑀺𑀧𑀤𑀫𑀸𑀳. 𑀢𑀢𑁆𑀣 ‘‘𑀦𑀻𑀘𑀘𑀺𑀢𑁆𑀢𑀢𑀸 𑀫𑀼𑀤𑀼𑀢𑀸’’𑀢𑀺 𑀧𑀼𑀦 𑀫𑀼𑀤𑀼𑀢𑀸𑀯𑀘𑀦𑀁 𑀦𑀻𑀘𑀘𑀺𑀢𑁆𑀢𑀢𑀸𑀬 𑀯𑀺𑀲𑁂𑀲𑀦𑀢𑁆𑀣𑀁. 𑀑𑀫𑀸𑀦𑁄𑀧𑀺 𑀳𑀺 𑀦𑀻𑀘𑀘𑀺𑀢𑁆𑀢𑀢𑀸 𑀳𑁄𑀢𑀺, 𑀦 𑀧𑀦 𑀫𑀼𑀤𑀼𑀢𑀸𑀢𑀺.

𑁧𑁩𑁪𑁮. 𑀧𑀭𑁂𑀲𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀢𑁆𑀢𑀜𑁆𑀘 𑀧𑀝𑀺𑀯𑀺𑀭𑁄𑀥𑀸𑀓𑀭𑀡𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀦𑁆𑀢𑀺. 𑀘𑀺𑀢𑁆𑀢𑀲𑁆𑀲 𑀲𑀓𑀫𑀦𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀩𑁆𑀬𑀸𑀧𑀦𑁆𑀦𑁄 𑀲𑀓𑁄 𑀫𑀦𑁄𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀦𑁆𑀢𑀺 𑀯𑀸 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑀁 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑁂𑀦 𑀧𑀻𑀢𑀺𑀲𑀳𑀕𑀢𑀫𑀦𑁂𑀦 𑀲𑀓𑀫𑀦𑀢𑁆𑀢𑀁 𑀆𑀳. 𑀅𑀢𑁆𑀢𑀫𑀦𑁄 𑀯𑀸 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀢𑀫𑀦𑀢𑀸. 𑀲𑀸 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀤𑀺𑀝𑁆𑀞𑀺𑀦𑀺𑀯𑀸𑀭𑀡𑀢𑁆𑀢𑀁 ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑁧𑁩𑁪𑁯. 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑁂𑀦 𑀅𑀲𑀸𑀤𑀺𑀬𑀺𑀢𑀩𑁆𑀩𑀲𑁆𑀲 𑀲𑀸𑀤𑀺𑀬𑀦𑁂𑀦 𑀘 𑀫𑀦𑀲𑀸𑀧𑀺 𑀆𑀘𑀭𑀢𑀺 𑀏𑀯, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀪𑁂𑀤𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁫𑁦. 𑀲𑀤𑁄𑀲𑀯𑀡𑁂 𑀭𑀼𑀓𑁆𑀔𑁂 𑀦𑀺𑀬𑁆𑀬𑀸𑀲𑀧𑀺𑀡𑁆𑀟𑀺𑀬𑁄, 𑀅𑀳𑀺𑀘𑁆𑀙𑀢𑁆𑀢𑀓𑀸𑀦𑀺 𑀯𑀸 𑀉𑀝𑁆𑀞𑀺𑀢𑀸𑀦𑀺 ‘‘𑀅𑀡𑁆𑀟𑀓𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀨𑁂𑀕𑁆𑀕𑀼𑀭𑀼𑀓𑁆𑀔𑀲𑁆𑀲 𑀧𑀦 𑀓𑀼𑀣𑀺𑀢𑀲𑁆𑀲 𑀅𑀡𑁆𑀟𑀸𑀦𑀺 𑀯𑀺𑀬 𑀉𑀝𑁆𑀞𑀺𑀢𑀸 𑀘𑀼𑀡𑁆𑀡𑀧𑀺𑀡𑁆𑀟𑀺𑀬𑁄 𑀕𑀡𑁆𑀞𑀺𑀬𑁄 𑀯𑀸 ‘‘𑀅𑀡𑁆𑀟𑀓𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀤𑀼𑀫𑀦𑀸𑀴𑀁 𑀯𑀺𑀬 𑀲𑁄𑀢𑀁 𑀖𑀁𑀲𑀬𑀫𑀸𑀦𑀸 𑀯𑀺𑀬 𑀧𑀯𑀺𑀲𑀦𑁆𑀢𑀻 𑀓𑀓𑁆𑀓𑀲𑀸 𑀤𑀝𑁆𑀞𑀩𑁆𑀩𑀸. 𑀓𑁄𑀥𑁂𑀦 𑀦𑀺𑀩𑁆𑀩𑀢𑁆𑀢𑀸 𑀢𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸 𑀓𑁄𑀥𑀲𑀸𑀫𑀦𑁆𑀢𑀸. 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀧𑁄𑀭𑀻, 𑀲𑀸 𑀯𑀺𑀬 𑀲𑀼𑀓𑀼𑀫𑀸𑀭𑀸 𑀫𑀼𑀤𑀼𑀓𑀸 𑀯𑀸𑀘𑀸 𑀧𑁄𑀭𑀻 𑀯𑀺𑀬𑀸𑀢𑀺 𑀧𑁄𑀭𑀻. 𑀢𑀢𑁆𑀣𑀸𑀢𑀺 ‘‘𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀓𑀺𑀭𑀺𑀬𑀸𑀬𑀸𑀢𑀺𑀧𑀺 𑀬𑁄𑀚𑀦𑀸 𑀲𑀫𑁆𑀪𑀯𑀢𑀺, 𑀢𑀢𑁆𑀣 𑀯𑀸𑀘𑀸𑀬𑀸𑀢𑀺 𑀯𑀸. 𑀲𑀡𑁆𑀳𑀯𑀸𑀘𑀢𑀸𑀢𑀺𑀆𑀤𑀺𑀦𑀸 𑀢𑀁 𑀯𑀸𑀘𑀁 𑀧𑀯𑀢𑁆𑀢𑀬𑀫𑀸𑀦𑀁 𑀘𑁂𑀢𑀦𑀁 𑀤𑀲𑁆𑀲𑁂𑀢𑀺.

𑁧𑁩𑁫𑁧. 𑀆𑀫𑀺𑀲𑀸𑀮𑀸𑀪𑁂𑀦 𑀬𑀁 𑀙𑀺𑀤𑁆𑀤𑀁 𑀳𑁄𑀢𑀺, 𑀢𑀁 𑀆𑀫𑀺𑀲𑀸𑀮𑀸𑀪𑁂𑀦 ‘‘𑀙𑀺𑀤𑁆𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁆𑀯𑁂𑀬𑁂𑀯 𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀆𑀫𑀺𑀲𑀥𑀫𑁆𑀫𑀸𑀮𑀸𑀪𑁂𑀳𑀺 𑀧𑀯𑀢𑁆𑀢𑀫𑀸𑀦𑀸𑀦𑀺 𑀙𑀺𑀤𑁆𑀤𑀸𑀦𑀺 𑀆𑀳. 𑀕𑀫𑀦𑀲𑀪𑀸𑀕𑁂𑀦𑀸𑀢𑀺 𑀕𑀫𑀦𑀫𑀕𑁆𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀤𑀺𑀲𑀸𑀪𑀸𑀕𑁂𑀦. 𑀲𑀗𑁆𑀕𑀳𑀧𑀓𑁆𑀔𑁂 𑀞𑀢𑁆𑀯𑀸𑀢𑀺 𑀲𑀗𑁆𑀕𑀳𑀁 𑀓𑀭𑁄𑀫𑀺𑀘𑁆𑀘𑁂𑀯 𑀓𑀣𑁂𑀢𑀩𑁆𑀩𑀁, 𑀦 𑀮𑀸𑀪𑀲𑀓𑁆𑀓𑀸𑀭𑀓𑀸𑀫𑀢𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁, 𑀇𑀢𑀭𑀁 𑀓𑀭𑀡𑀻𑀬𑀁. 𑀅𑀩𑁆𑀪𑀸𑀦𑀢𑁄 𑀅𑀜𑁆𑀜𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁩𑁫𑁨. 𑀲𑀲𑀫𑁆𑀪𑀸𑀭𑀓𑀣𑀸𑀢𑀺 𑀤𑀲𑁆𑀲𑀦𑀲𑁆𑀲 𑀓𑀸𑀭𑀡𑀲𑀳𑀺𑀢𑀸𑀢𑀺 𑀅𑀢𑁆𑀣𑁄, 𑀲𑀲𑀫𑁆𑀪𑀸𑀭𑀲𑁆𑀲 𑀯𑀸 𑀤𑀲𑁆𑀲𑀦𑀲𑁆𑀲 𑀓𑀣𑀸 𑀲𑀲𑀫𑁆𑀪𑀸𑀭𑀓𑀣𑀸. 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀽𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀲𑀁𑀯𑀭𑀲𑁆𑀲𑀸𑀢𑀺. 𑀢𑀤𑀺𑀤𑀁 𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀅𑀪𑀺𑀚𑁆𑀛𑀸𑀤𑀺𑀅𑀦𑁆𑀯𑀸𑀲𑁆𑀲𑀯𑀦𑀁 𑀤𑀲𑁆𑀲𑀺𑀢𑀁, 𑀢𑀁 𑀅𑀲𑀁𑀯𑀼𑀢𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀳𑁂𑀢𑀼𑀧𑀯𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀬𑀢𑁆𑀯𑀸𑀥𑀺𑀓𑀭𑀡𑀦𑁆𑀢𑀺 𑀳𑀺 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀲 𑀘 𑀓𑀸𑀭𑀡𑀸𑀢𑀺? 𑀅𑀲𑀁𑀯𑀼𑀢𑀲𑁆𑀲. 𑀓𑀺𑀜𑁆𑀘 𑀅𑀲𑀁𑀯𑀼𑀢𑀁? 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀢𑀤𑀼𑀧𑀮𑀓𑁆𑀔𑀺𑀢𑀁, 𑀢𑀲𑁆𑀲 𑀲𑀁𑀯𑀭𑀸𑀬𑀸𑀢𑀺 𑀅𑀬𑀫𑀢𑁆𑀣𑀬𑁄𑀚𑀦𑀸.

𑀚𑀯𑀦𑀓𑁆𑀔𑀡𑁂 𑀧𑀦 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸𑀢𑀺𑀆𑀤𑀺 𑀧𑀼𑀦 𑀅𑀯𑀘𑀦𑀢𑁆𑀣𑀁 𑀇𑀥𑁂𑀯 𑀲𑀩𑁆𑀩𑀁 𑀯𑀼𑀢𑁆𑀢𑀦𑁆𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀢𑁆𑀣𑀻𑀢𑀺. 𑀬𑀣𑀸 𑀓𑀺𑀦𑁆𑀢𑀺𑀆𑀤𑀺𑀦𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀖𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸 𑀯𑀺𑀬 𑀚𑀯𑀦𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀤𑁆𑀯𑀸𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸𑀢𑀺 𑀏𑀯𑀁 𑀅𑀜𑁆𑀜𑁂𑀲𑀁 𑀲𑀁𑀯𑀭𑁂, 𑀅𑀜𑁆𑀜𑁂𑀲𑀁 𑀲𑀁𑀯𑀼𑀢𑀢𑀸𑀲𑀸𑀫𑀜𑁆𑀜𑀫𑁂𑀯 𑀦𑀺𑀤𑀲𑁆𑀲𑁂𑀢𑀺, 𑀦 𑀧𑀼𑀩𑁆𑀩𑀸𑀧𑀭𑀲𑀸𑀫𑀜𑁆𑀜𑀁 𑀅𑀦𑁆𑀢𑁄 𑀩𑀳𑀺 𑀲𑀸𑀫𑀜𑁆𑀜𑀁 𑀯𑀸. 𑀲𑀢𑀺 𑀯𑀸 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀓𑁂 𑀧𑀼𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀚𑀯𑀦𑀁 𑀩𑀸𑀳𑀺𑀭𑀁 𑀯𑀺𑀬 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀸𑀦𑀁 𑀯𑀼𑀢𑁆𑀢𑀁, 𑀇𑀢𑀭𑀜𑁆𑀘 𑀅𑀦𑁆𑀢𑁄𑀦𑀕𑀭𑀤𑁆𑀯𑀸𑀭𑀲𑀫𑀸𑀦𑀁. 𑀚𑀯𑀦𑁂 𑀯𑀸 𑀅𑀲𑀁𑀯𑀭𑁂 𑀉𑀧𑁆𑀧𑀦𑁆𑀦𑁂 𑀢𑀢𑁄 𑀧𑀭𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀅𑀲𑀁𑀯𑀭𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄 𑀦𑀕𑀭𑀤𑁆𑀯𑀸𑀭𑀲𑀤𑀺𑀲𑁂𑀦 𑀚𑀯𑀦𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀘𑁄𑀭𑀸𑀦𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀫𑀽𑀲𑀦𑀁 𑀓𑀼𑀲𑀮𑀪𑀡𑁆𑀟𑀯𑀺𑀦𑀸𑀲𑀦𑀁 𑀓𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁫𑁩. 𑀇𑀫𑀺𑀦𑀸 𑀆𑀳𑀸𑀭𑁂𑀦 𑀦𑀺𑀢𑁆𑀣𑀭𑀡𑀢𑁆𑀣𑁂𑀦 𑀅𑀢𑁆𑀣𑀺𑀓𑀪𑀸𑀯𑁄 𑀇𑀤𑀫𑀢𑁆𑀣𑀺𑀓𑀢𑀸. 𑀆𑀳𑀸𑀭𑀧𑀭𑀺𑀪𑁄𑀕𑁂 𑀅𑀲𑀦𑁆𑀢𑀼𑀲𑁆𑀲𑀦𑀸𑀢𑀺 𑀆𑀳𑀸𑀭𑀧𑀭𑀺𑀪𑁄𑀕𑀓𑁆𑀔𑀡𑁂 𑀧𑀯𑀢𑁆𑀢𑀸 𑀅𑀲𑀦𑁆𑀢𑀼𑀲𑁆𑀲𑀦𑀸, 𑀤𑀯𑀢𑁆𑀣𑀸𑀤𑀺𑀅𑀪𑀺𑀮𑀸𑀲𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀮𑁄𑀪𑁄, 𑀅𑀫𑀢𑁆𑀢𑀜𑁆𑀜𑀼𑀢𑀸 𑀅𑀧𑁆𑀧𑀝𑀺𑀲𑀗𑁆𑀔𑀸 𑀘 𑀫𑁄𑀳𑁄𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 ‘‘𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁩𑁫𑁫. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀫𑀸𑀦𑁄𑀯 𑀫𑀸𑀦𑀫𑀤𑁄. 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀲𑀫𑀢𑁆𑀣𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀫𑀸𑀦𑁄, 𑀭𑀸𑀕𑁄 𑀏𑀯 𑀯𑀸 𑀧𑀼𑀭𑀺𑀲𑀫𑀤𑁄. 𑀲𑀓𑁆𑀓𑀭𑀲𑀧𑁆𑀧𑀺𑀔𑀻𑀭𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀩𑀳𑀮𑀧𑀓𑁆𑀓𑀁 𑀪𑁄𑀚𑀦𑀁 𑀧𑀺𑀡𑁆𑀟𑀭𑀲𑀪𑁄𑀚𑀦𑀁, 𑀩𑀳𑀮𑀧𑀓𑁆𑀓𑀁 𑀯𑀸 𑀫𑀁𑀲𑀭𑀲𑀸𑀤𑀺𑀪𑁄𑀚𑀦𑀁. 𑀫𑀦𑁆𑀤𑀦𑁆𑀢𑀺 𑀅𑀧𑁆𑀧𑀁. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀢𑀤𑀢𑁆𑀣𑀜𑁆𑀘 𑀪𑀼𑀜𑁆𑀚𑀦𑁆𑀢𑁄 𑀬𑀲𑁆𑀫𑀸 ‘‘𑀓𑀸𑀬𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀼𑀜𑁆𑀚𑀢𑀺, 𑀢𑀲𑁆𑀫𑀸 ‘‘𑀞𑀧𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀸𑀢𑀺 𑀇𑀤𑀁 𑀔𑀼𑀤𑀸𑀬 𑀯𑀺𑀲𑁂𑀲𑀦𑀁 𑀬𑀲𑁆𑀲𑀸 𑀅𑀧𑁆𑀧𑀯𑀢𑁆𑀢𑀺 𑀪𑁄𑀚𑀦𑁂𑀦 𑀓𑀸𑀢𑀩𑁆𑀩𑀸, 𑀢𑀲𑁆𑀲𑀸 𑀤𑀲𑁆𑀲𑀦𑀢𑁆𑀣𑀁. 𑀲𑀓𑀮𑀁 𑀲𑀸𑀲𑀦𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀫𑁆𑀧𑀺 𑀲𑀩𑁆𑀩𑀓𑀼𑀲𑀮𑁂𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸𑀢𑀺 𑀏𑀢𑀸𑀲𑀁 𑀓𑁄 𑀯𑀺𑀲𑁂𑀲𑁄? 𑀧𑀼𑀭𑀺𑀫𑀸 𑀬𑀣𑀸𑀧𑀯𑀢𑁆𑀢𑀸 𑀚𑀺𑀖𑀘𑁆𑀙𑀸𑀦𑀺𑀫𑀺𑀢𑁆𑀢𑀸 𑀯𑁂𑀤𑀦𑀸. 𑀲𑀸 𑀳𑀺 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀬𑁆𑀬𑁄 𑀧𑀯𑀢𑁆𑀢𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀧𑀘𑁆𑀙𑀺𑀫𑀸𑀧𑀺 𑀔𑀼𑀤𑀸𑀦𑀺𑀫𑀺𑀢𑁆𑀢𑀸𑀯 𑀅𑀗𑁆𑀕𑀤𑀸𑀳𑀲𑀽𑀮𑀸𑀤𑀺𑀯𑁂𑀤𑀦𑀸 𑀅𑀧𑁆𑀧𑀯𑀢𑁆𑀢𑀸. 𑀲𑀸 𑀳𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀸𑀯 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀢𑀸 𑀘𑁂𑀢𑀸𑀲𑀁 𑀯𑀺𑀳𑀺𑀁𑀲𑀸𑀬 𑀯𑀺𑀲𑁂𑀲𑁄.

𑀬𑀸𑀢𑁆𑀭𑀸𑀢𑀺 𑀬𑀸𑀧𑀦𑀸 𑀯𑀼𑀢𑁆𑀢𑀸, 𑀧𑀼𑀩𑁆𑀩𑁂𑀧𑀺 ‘‘𑀬𑀸𑀧𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄? 𑀧𑀼𑀩𑁆𑀩𑁂 ‘‘𑀬𑀸𑀧𑀦𑀸𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀅𑀯𑀺𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀬𑀸𑀧𑀦𑀸 𑀬𑀸𑀢𑁆𑀭𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀤𑀸𑀬𑀓𑀤𑁂𑀬𑁆𑀬𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀘 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀁, 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀢𑁆𑀣𑀁 𑀯𑀸 𑀧𑀝𑀺𑀕𑁆𑀕𑀳𑀡𑀁 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀡𑀁, 𑀬𑁂𑀦 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀅𑀥𑀫𑁆𑀫𑁂𑀦 𑀧𑀭𑀺𑀪𑁄𑀕𑁄. 𑀅𑀦𑀯𑀚𑁆𑀚𑁂 𑀅𑀦𑀺𑀦𑁆𑀤𑀺𑀢𑀩𑁆𑀩𑁂 𑀧𑀘𑁆𑀘𑀬𑁂 𑀲𑀸𑀯𑀚𑁆𑀚𑀁 𑀲𑀦𑀺𑀦𑁆𑀤𑀁 𑀧𑀭𑀺𑀪𑁄𑀕𑁂𑀦 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺. 𑀅𑀦𑀯𑀚𑁆𑀚𑀢𑀸 𑀘 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀅𑀕𑁆𑀕𑀺𑀩𑀮𑀸𑀤𑀺𑀁 𑀚𑀸𑀦𑀺𑀢𑁆𑀯𑀸 ‘‘𑀏𑀯𑀁 𑀫𑁂 𑀅𑀕𑀭𑀳𑀺𑀢𑀩𑁆𑀩𑀢𑀸 𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀫𑀸𑀡𑀬𑀼𑀢𑁆𑀢𑀁 𑀆𑀳𑀸𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀔𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀨𑀸𑀲𑀼𑀯𑀺𑀳𑀸𑀭𑁄. 𑀏𑀢𑁆𑀢𑀓𑀜𑁆𑀳𑀺 𑀪𑀼𑀜𑁆𑀚𑀺𑀢𑁆𑀯𑀸…𑀧𑁂… 𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀭𑀺𑀬𑀸𑀧𑀣𑀸𑀦𑀁 𑀲𑀼𑀔𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀁 𑀪𑀼𑀜𑁆𑀚𑀦𑀁 𑀧𑀺𑀯𑀦𑀜𑁆𑀘 𑀇𑀭𑀺𑀬𑀸𑀧𑀣𑁂𑀳𑀺 𑀓𑀸𑀭𑀡𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀢𑁂𑀳𑀺 𑀲𑀸𑀥𑀺𑀢𑀁 𑀯𑀺𑀬 𑀯𑀼𑀢𑁆𑀢𑀁. ‘‘𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂’’𑀢𑀺 𑀮𑀺𑀔𑀦𑁆𑀢𑀺, ‘‘𑀪𑀼𑀢𑁆𑀯𑀸𑀦𑀸’’𑀢𑀺 𑀧𑀦 𑀧𑀸𑀞𑁄. 𑀧𑀼𑀦𑀧𑀺 𑀳𑀺 𑀅𑀧𑁆𑀧𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀯𑀲𑁂𑀦 𑁋

‘‘𑀓𑀧𑁆𑀧𑀺𑀬𑀁 𑀢𑀁 𑀘𑁂 𑀙𑀸𑀤𑁂𑀢𑀺, 𑀘𑀻𑀯𑀭𑀁 𑀇𑀤𑀫𑀢𑁆𑀣𑀺𑀓𑀁;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬.

‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲, 𑀚𑀡𑁆𑀡𑀼𑀓𑁂 𑀦𑀸𑀪𑀺𑀯𑀲𑁆𑀲𑀢𑀺;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺. (𑀣𑁂𑀭𑀕𑀸. 𑁯𑁮𑁪-𑁯𑁮𑁫) 𑁋

𑀆𑀳.

𑀪𑁄𑀚𑀦𑀸𑀦𑀺𑀲𑀁𑀲𑁄𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑁄𑀚𑀦𑀲𑁆𑀲 𑀅𑀕𑀭𑀳𑀺𑀢𑀩𑁆𑀩𑀢𑀸 𑀲𑀼𑀔𑀯𑀺𑀳𑀸𑀭𑁄 𑀘 𑀆𑀦𑀺𑀲𑀁𑀲𑁄𑀢𑀺 𑀅𑀢𑁆𑀣𑁄. 𑀬𑀼𑀢𑁆𑀢𑀲𑁆𑀲 𑀦𑀺𑀤𑁆𑀤𑁄𑀲𑀲𑁆𑀲 𑀪𑁄𑀚𑀦𑀲𑁆𑀲 𑀧𑀭𑀺𑀫𑀸𑀡𑀲𑁆𑀲 𑀘 𑀯𑀲𑁂𑀦 𑀚𑀸𑀦𑀦𑀁 𑀬𑀼𑀢𑁆𑀢𑀧𑀫𑀸𑀡𑀚𑀸𑀦𑀦𑀁 𑀦𑀸𑀫.

𑁧𑁩𑁫𑁬. 𑀯𑀺𑀦𑀸𑀲𑀁 𑀧𑀢𑁆𑀢𑀺𑀬𑀸 𑀦𑀝𑁆𑀞𑀸, 𑀧𑀝𑀺𑀧𑀓𑁆𑀔𑁂𑀳𑀺 𑀅𑀪𑀺𑀪𑀽𑀢𑀢𑁆𑀢𑀸 𑀫𑀼𑀝𑁆𑀞𑀸 𑀘 𑀲𑀢𑀺 𑀬𑀲𑁆𑀲, 𑀲𑁄 𑀦𑀝𑁆𑀞𑀫𑀼𑀝𑁆𑀞𑀲𑁆𑀲𑀢𑀺, 𑀢𑀲𑁆𑀲 𑀪𑀸𑀯𑁄 𑀦𑀝𑁆𑀞𑀫𑀼𑀝𑁆𑀞𑀲𑁆𑀲𑀢𑀺𑀢𑀸.

𑁧𑁩𑁬𑁮. 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀦𑁆𑀢𑀺 𑀫𑀕𑁆𑀕𑀨𑀮𑀲𑀻𑀮𑀁 𑀯𑀼𑀘𑁆𑀘𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀲𑀢𑀺𑀆𑀤𑀺𑀥𑀫𑁆𑀫𑀸𑀯. 𑀲𑀻𑀮𑀲𑀫𑁆𑀧𑀤𑀸 𑀧𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀦𑀢𑁆𑀣𑀻𑀢𑀺 𑀲𑀫𑁆𑀪𑀯𑀢𑁄 𑀬𑁄𑀚𑁂𑀢𑀩𑁆𑀩𑀸.

𑁧𑁩𑁭𑁩. 𑀪𑁄𑀕𑀽𑀧𑀓𑀭𑀡𑁂𑀳𑀺 𑀲𑀪𑁄𑀕𑁄. 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀮𑁄𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀮𑁄𑀫𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀘𑁆𑀘𑀸𑀦’’𑀦𑁆𑀢𑀺 𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁂𑀳𑀺 𑀧𑀝𑀺𑀯𑁂𑀥𑁄 𑀯𑀼𑀢𑁆𑀢𑁄, 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀯𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀮𑁄𑀫𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁩𑁭𑁮. ‘‘𑀫𑀫 𑀖𑀭𑀁 𑀥𑀼𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀁 𑀧𑀯𑀺𑀲𑀣𑀸’’𑀢𑀺 𑀤𑀺𑀬𑁆𑀬𑀫𑀸𑀦𑀁 𑀥𑀼𑀭𑀪𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀺𑀘𑁆𑀘𑀪𑀢𑁆𑀢𑀸𑀤𑀺 𑀯𑀸 𑀅𑀜𑁆𑀜𑁂𑀧𑀺 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀥𑀼𑀭𑀁 𑀳𑀼𑀢𑁆𑀯𑀸 𑀤𑀺𑀦𑁆𑀦𑀁 𑀥𑀼𑀭𑀪𑀢𑁆𑀢𑀁.

𑁧𑁩𑁭𑁯. 𑀧𑀝𑀺𑀯𑀸𑀲𑁂𑀢𑀺 𑀦𑀸𑀫𑀸𑀢𑀺 𑀦𑀺𑀯𑀢𑁆𑀢𑁂𑀢𑀺 𑀦𑀸𑀫 𑀑𑀲𑀓𑁆𑀓𑁂𑀢𑀺 𑀦𑀸𑀫.

𑁧𑁩𑁮𑁦. 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀢𑀺 𑀧𑀼𑀭𑀺𑀫𑀚𑀸𑀢𑀻𑀲𑀼 𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀆𑀳. 𑀔𑀦𑁆𑀥𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀢𑁆𑀣𑀸𑀪𑀭𑀡𑀬𑀸𑀦𑀕𑀸𑀫𑀚𑀦𑀧𑀤𑀸𑀤𑀺. 𑀔𑀬𑀲𑀫𑀬𑁂𑀢𑀺 𑀫𑀕𑁆𑀕𑀓𑁆𑀔𑀡𑀁 𑀆𑀳.

𑁧𑁩𑁮𑁧. 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦𑀸𑀢𑀺 𑀅𑀦𑀺𑀕𑁆𑀕𑀳𑀺𑀢𑀧𑀓𑁆𑀔𑀦𑁆𑀤𑀦𑀲𑀗𑁆𑀔𑀸𑀢𑁂𑀦 𑀬𑀣𑀸𑀲𑀼𑀔𑀁 𑀧𑀯𑀢𑁆𑀢𑀦𑀝𑁆𑀞𑁂𑀦.

𑁧𑁩𑁮𑁨. 𑀔𑀻𑀡𑀸𑀦𑀁 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀦𑀺𑀝𑁆𑀞𑀺𑀢𑀪𑀸𑀯𑁄 𑀔𑀻𑀡𑀦𑁆𑀢𑁄, 𑀔𑀻𑀡𑀸𑀦𑀁 𑀯𑀸 𑀆𑀤𑀺𑀓𑀸𑀮𑁄, 𑀢𑀲𑁆𑀫𑀺𑀁 𑀔𑀻𑀡𑀦𑁆𑀢𑁂. 𑀏𑀲 𑀦𑀬𑁄 𑀦𑀺𑀭𑀼𑀤𑁆𑀥𑀦𑁆𑀢𑁂𑀢𑀺𑀆𑀤𑀻𑀲𑀼.

𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀓𑁆𑀔𑁂𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.