𑁪. 𑀅𑀝𑁆𑀞𑀓𑀣𑀸𑀓𑀡𑁆𑀟𑀁

𑀢𑀺𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁩𑁮𑁪. 𑀦𑀬𑀫𑀕𑁆𑀕𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀺𑀦𑀬𑀕𑀫𑀦𑀁 𑀅𑀦𑀼𑀮𑁄𑀫𑀸𑀤𑀺𑀦𑀬𑀕𑀫𑀦𑀜𑁆𑀘. 𑀢𑀫𑁆𑀧𑀺 𑀳𑀺 𑀏𑀢𑁆𑀣 𑀅𑀢𑁆𑀣𑁂𑀲𑀼 𑀦𑀺𑀘𑁆𑀙𑀺𑀢𑁂𑀲𑀼 𑀲𑀼𑀔𑀁 𑀲𑀫𑀸𑀦𑁂𑀦𑁆𑀢𑀺. 𑀧𑀜𑁆𑀳𑀼𑀤𑁆𑀥𑀸𑀭𑀦𑁆𑀢𑀺 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀦𑀯𑀲𑀼 𑀦𑀯𑀲𑀼 𑀘 𑀧𑀜𑁆𑀳𑁂𑀲𑀼 𑀮𑀩𑁆𑀪𑀫𑀸𑀦𑀲𑁆𑀲 𑀉𑀤𑁆𑀥𑀭𑀡𑀁, 𑀢𑁂𑀲𑀼𑀬𑁂𑀯 𑀮𑀩𑁆𑀪𑀫𑀸𑀦𑀸𑀦𑀁 𑀕𑀡𑀦𑀸𑀦𑀁 𑀞𑀧𑀦𑀁 𑀕𑀡𑀦𑀸𑀘𑀸𑀭𑁄. 𑀅𑀢𑁆𑀣𑀼𑀤𑁆𑀥𑀸𑀭𑀦𑁆𑀢𑀺 ‘‘𑀇𑀫𑁂 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀬𑁄 𑀅𑀢𑁆𑀣𑀸 𑀓𑀼𑀲𑀮𑀸𑀤𑀺𑀓𑀸’’𑀢𑀺 𑀉𑀤𑁆𑀥𑀭𑀡𑀁. 𑀓𑀡𑁆𑀡𑀺𑀓𑀁 𑀓𑀡𑁆𑀡𑀺𑀓𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀭𑀽𑀧𑀓𑀡𑁆𑀟𑁂𑀲𑀼 𑀯𑀺𑀪𑀢𑁆𑀢𑁂 𑀧𑀲𑀝𑁂 𑀥𑀫𑁆𑀫𑁂 ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 𑀭𑀸𑀲𑀺𑀭𑀸𑀲𑀺𑀯𑀲𑁂𑀦 𑀲𑀳 𑀕𑀦𑁆𑀣𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀖𑀝𑀕𑁄𑀘𑁆𑀙𑀓𑀸 𑀓𑀡𑁆𑀡𑀺𑀓𑀯𑁂𑀯𑀘𑀦𑀸𑀦𑁂𑀯. 𑀏𑀢𑁆𑀣 𑀧𑀦 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀦𑁆𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀘𑀢𑀼𑀪𑀽𑀫𑀓𑀸𑀦𑀁 𑀓𑀼𑀲𑀮𑀨𑀲𑁆𑀲𑀸𑀤𑀻𑀦𑀁 𑀓𑀼𑀲𑀮𑀪𑀸𑀯𑁂 𑀏𑀓𑀢𑁆𑀢𑀽𑀧𑀕𑀫𑀦𑀢𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀭𑀽𑀧𑀓𑀡𑁆𑀟𑁂𑀲𑀼 𑀘𑀢𑀼𑀪𑀽𑀫𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀯𑀺𑀜𑁆𑀜𑀸𑀢𑀥𑀫𑁆𑀫𑀲𑁆𑀲 𑀯𑀲𑁂𑀦𑀸𑀬𑀁 𑀅𑀢𑁆𑀣𑀼𑀤𑁆𑀥𑀸𑀭𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀢𑀢𑁆𑀣 𑀬𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁 𑀯𑀺𑀪𑀢𑁆𑀢𑀁 𑀬𑀸𑀯 𑀯𑀺𑀜𑁆𑀜𑀸𑀢𑀁, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀅𑀢𑁆𑀣𑁄.

𑀬𑀤𑀺𑀧𑀺 𑀓𑀼𑀲𑀮𑀢𑁆𑀢𑀺𑀓𑀯𑀺𑀢𑁆𑀣𑀸𑀭𑁄 𑀧𑀼𑀩𑁆𑀩𑁂 𑀯𑀺𑀜𑁆𑀜𑀸𑀢𑁄, 𑀢𑀣𑀸𑀧𑀺 𑀢𑀢𑁆𑀣 𑀥𑀫𑁆𑀫𑀸 𑀲𑀫𑀬𑀯𑀲𑁂𑀦 𑀨𑀲𑁆𑀲𑀸𑀤𑀺𑀲𑀪𑀸𑀯𑀯𑀲𑁂𑀦 𑀘 𑀯𑀺𑀪𑀢𑁆𑀢𑀸 𑀪𑀺𑀦𑁆𑀦𑀸 𑀯𑀺𑀜𑁆𑀜𑀸𑀢𑀸, 𑀦 𑀧𑀦 𑀏𑀓𑀲𑁆𑀫𑀺𑀁 𑀮𑀓𑁆𑀔𑀡𑁂 𑀲𑀫𑀸𑀦𑁂𑀢𑁆𑀯𑀸, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀁 𑀲𑀫𑀬𑀸𑀤𑀺𑀪𑁂𑀤𑀁 𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀪𑁂𑀤𑀪𑀺𑀦𑁆𑀦𑀸𑀦𑀁 𑀏𑀓𑀲𑁆𑀫𑀺𑀁 𑀓𑀼𑀲𑀮𑀸𑀤𑀺𑀮𑀓𑁆𑀔𑀡𑁂 𑀲𑀫𑀸𑀦𑁂𑀢𑁆𑀯𑀸 𑀩𑁄𑀥𑀦𑀢𑁆𑀣𑀁 𑀇𑀥 𑀓𑀼𑀲𑀮𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀧𑀼𑀦 𑀯𑀺𑀪𑀢𑁆𑀢𑁄. 𑀏𑀢𑁆𑀣 𑀘 𑀏𑀓𑀯𑀘𑀦𑁂𑀦 𑀓𑀼𑀲𑀮𑀦𑀺𑀤𑁆𑀤𑁂𑀲𑀁 𑀓𑀢𑁆𑀯𑀸 𑀩𑀳𑀼𑀯𑀘𑀦𑁂𑀦 𑀦𑀺𑀕𑀫𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀬𑀤𑀺 𑀥𑀫𑁆𑀫𑀸𑀦𑀁 𑀓𑀼𑀲𑀮𑀢𑁆𑀢𑁂 𑀏𑀓𑀢𑁆𑀢𑀽𑀧𑀕𑀫𑀦𑀁, 𑀓𑀲𑁆𑀫𑀸 𑀏𑀓𑀯𑀘𑀦𑁂𑀦 𑀧𑀼𑀘𑁆𑀙𑀸𑀧𑀺 𑀦 𑀓𑀢𑀸? 𑀉𑀤𑁆𑀤𑁂𑀲𑁂 𑀓𑀼𑀲𑀮-𑀲𑀤𑁆𑀤𑀲𑁆𑀲 𑀥𑀫𑁆𑀫𑀯𑀺𑀲𑁂𑀲𑀦𑀪𑀸𑀯𑀢𑁄 𑀢𑀩𑁆𑀩𑀺𑀲𑁂𑀲𑀦𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀺𑀢𑀢𑁆𑀢𑀸 𑀢𑁂𑀲𑀜𑁆𑀘 𑀅𑀦𑀺𑀤𑁆𑀥𑀸𑀭𑀺𑀢𑀲𑀗𑁆𑀔𑀸𑀯𑀺𑀲𑁂𑀲𑀢𑁆𑀢𑀸, 𑀦𑀺𑀤𑁆𑀤𑁂𑀲𑁂 𑀧𑀦 𑀘𑀢𑀽𑀳𑀺 𑀪𑀽𑀫𑀻𑀳𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀜𑁆𑀜𑀸𑀢𑀸𑀳𑀺 𑀓𑀼𑀲𑀮𑁂 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀬𑀼𑀢𑁆𑀢𑀁 ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮’’𑀦𑁆𑀢𑀺 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 𑀯𑀘𑀦𑀁. 𑀓𑀼𑀲𑀮𑀧𑀤𑀜𑁆𑀳𑀺 𑀏𑀢𑁆𑀣 𑀧𑀥𑀸𑀦𑀁, 𑀢𑀜𑁆𑀘 𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀧𑁂𑀓𑁆𑀔𑀁 𑀓𑀼𑀲𑀮𑀸𑀓𑀸𑀭𑀫𑁂𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂 𑀞𑀺𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀏𑀓𑀢𑁆𑀢𑀫𑁂𑀯 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑀺, 𑀦 𑀪𑁂𑀤𑀦𑁆𑀢𑀺.

𑁧𑁩𑁮𑁫. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣𑀸𑀧𑀺 𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀬𑀨𑀲𑁆𑀲𑀸𑀤𑀺𑀯𑀲𑁂𑀦 𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀸𑀯𑁂 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀏𑀯𑀁 𑀬𑀸𑀯 𑀤𑁆𑀯𑀸𑀤𑀲𑀫𑁄𑀢𑀺 ‘‘𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀉𑀧𑁆𑀧𑀸𑀤𑁄, 𑀓𑀺𑀁 𑀉𑀧𑁆𑀧𑀚𑁆𑀚𑀢𑀺? 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀏𑀯𑀁 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀸𑀤𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀅𑀜𑁆𑀜𑀲𑁆𑀲𑀼𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀘𑀺𑀢𑁆𑀢𑀕𑁆𑀕𑀳𑀡𑀁 𑀓𑀢𑀁, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀓𑀪𑀸𑀯𑀦𑀺𑀯𑀢𑁆𑀢𑀦𑀢𑁆𑀣𑀁 𑀉𑀧𑁆𑀧𑀸𑀤𑀕𑁆𑀕𑀳𑀡𑀁, 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀸 ‘‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀪𑀸𑀯𑁄 𑀧𑀸𑀓𑀝𑁄𑀢𑀺 𑀓𑀢𑁆𑀯𑀸 ‘‘𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀩𑁆𑀪𑀸𑀯𑀸 𑀉𑀧𑁆𑀧𑀸𑀤𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀘𑀢𑁆𑀣𑁄 ‘‘𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀘𑀺𑀢𑁆𑀢𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁧𑁪𑁨𑁦. 𑀙𑀲𑀼 𑀤𑁆𑀯𑀸𑀭𑁂𑀲𑀽𑀢𑀺 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯 𑀚𑀯𑀦𑀁 𑀢𑀤𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀪𑀯𑀗𑁆𑀕𑀁 𑀅𑀦𑀼𑀩𑀦𑁆𑀥𑀢𑀺. 𑀢𑀜𑁆𑀳𑀺 𑀧𑀭𑀺𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄, 𑀯𑀺𑀧𑀸𑀓𑁄 𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀁, 𑀓𑀫𑁆𑀫𑀸𑀦𑀼𑀭𑀽𑀧𑁄 𑀘 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺 𑀧𑀭𑀺𑀢𑁆𑀢𑀓𑀫𑁆𑀫𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀲𑁆𑀲𑁂𑀯 𑀅𑀦𑀼𑀪𑀯𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀁 𑀢𑀤𑀸𑀭𑀫𑁆𑀫𑀡𑀁 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀫𑀳𑀕𑁆𑀕𑀢𑀯𑀺𑀧𑀸𑀓𑁄𑀧𑀺 𑀫𑀳𑀕𑁆𑀕𑀢𑀸𑀦𑀼𑀪𑀯𑀦𑀫𑁂𑀯 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑁆𑀲 𑀓𑀫𑁆𑀫𑀲𑁆𑀲 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲 𑀲𑀜𑁆𑀜𑀸𑀯𑀲𑀸𑀭𑀫𑁆𑀫𑀡𑀲𑁆𑀲 𑀢𑀸𑀤𑀺𑀲𑁂𑀦𑁂𑀯 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀢𑁆𑀢𑀸. 𑀢𑀲𑁆𑀫𑀸 𑀲𑀫𑀸𑀥𑀺 𑀲𑀼𑀔𑀸𑀦𑀼𑀪𑀯𑀦𑀪𑀽𑀢𑁄, 𑀲𑁄𑀧𑀺 𑀓𑀫𑁆𑀫𑀸𑀦𑀼𑀭𑀽𑀧𑀢𑁄𑀬𑁂𑀯 𑀓𑀫𑁆𑀫𑀸𑀭𑀫𑁆𑀫𑀡𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀫𑁆𑀫𑀸𑀦𑀼𑀭𑀽𑀧𑀢𑁄 𑀏𑀯 𑀘 𑀢𑀤𑀸𑀭𑀫𑁆𑀫𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀫𑀳𑀕𑁆𑀕𑀢𑀚𑀯𑀦𑀁 𑀦𑀸𑀦𑀼𑀩𑀦𑁆𑀥𑀢𑀺. 𑀢𑀢𑁄 𑀏𑀯 𑀧𑀝𑀺𑀲𑀦𑁆𑀥𑀺𑀆𑀤𑀺𑀪𑀽𑀢𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁆𑀧𑀺 𑀧𑀭𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀦 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀯𑀸. 𑀬𑀲𑁆𑀫𑀸 𑀧𑀦 𑀯𑀼𑀢𑁆𑀢𑀁 ‘‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀦 𑀘 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄 𑀅𑀢𑁆𑀣𑀺, 𑀇𑀥 𑀘 𑀲𑀩𑁆𑀩𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀯 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀓𑀫𑁆𑀫𑀸𑀦𑀼𑀭𑀽𑀧𑀢𑁄 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀫𑁆𑀧𑀺 𑀧𑀭𑀺𑀢𑁆𑀢𑀓𑀫𑁆𑀫𑀁 𑀬𑀤𑀺 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀓𑀫𑁆𑀫𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯 𑀤𑁂𑀢𑀺. 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑁆𑀧𑀺 𑀭𑀽𑀧𑀸𑀤𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀻𑀡𑀸𑀲𑀯𑀸𑀦𑀁 𑀯𑀸𑀲𑀦𑀸𑀯𑀲𑁂𑀦 𑀲𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀳𑀲𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀭𑀺𑀢𑁆𑀢𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀺, 𑀦 𑀇𑀢𑀭𑁂𑀲𑀼 𑀓𑀺𑀮𑁂𑀲𑀯𑀺𑀭𑀳𑁂 𑀢𑀸𑀤𑀺𑀲𑀳𑀲𑀦𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀔𑀻𑀡𑀸𑀲𑀯𑀸𑀦𑀁 𑀅𑀲𑀓𑁆𑀓𑀘𑁆𑀘𑀤𑀸𑀦𑀸𑀤𑀻𑀦𑀺 𑀆𑀤𑀭𑀸𑀓𑀭𑀡𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀓𑁄𑀲𑀚𑁆𑀚𑀸𑀤𑀺𑀅𑀓𑀼𑀲𑀮𑀯𑀲𑁂𑀦. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀸 𑀳𑀺 𑀢𑁂 𑀉𑀢𑁆𑀢𑀫𑀧𑀼𑀭𑀺𑀲𑀸𑀢𑀺. 𑀢𑁂𑀲𑀁 𑀆𑀤𑀭𑀸𑀓𑀭𑀡𑀜𑁆𑀘 𑀦𑀺𑀭𑀼𑀲𑁆𑀲𑀼𑀓𑁆𑀓𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁨𑁧. 𑀅𑀢𑀺𑀧𑀕𑀼𑀡𑀸𑀦𑀦𑁆𑀢𑀺 𑀯𑀘𑀦𑀁 𑀦𑀺𑀭𑀸𑀤𑀭𑀲𑁆𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀁, 𑀦 𑀢𑀲𑁆𑀲𑁂𑀯𑀸𑀢𑀺 𑀯𑀺𑀲𑀬𑀦𑀺𑀬𑀫𑀦𑀁. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀧𑀺 𑀳𑀺 𑀅𑀢𑀺𑀧𑀕𑀼𑀡𑀸𑀦𑀁 𑀯𑀺𑀲𑀬𑀢𑀸 𑀲𑀼𑀝𑁆𑀞𑀼𑀢𑀭𑀁 𑀳𑁄𑀢𑀺 𑀏𑀯. 𑀬𑀣𑀸 𑀧𑀕𑀼𑀡𑀁 𑀕𑀦𑁆𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀤𑁆𑀯𑁂 𑀢𑀬𑁄 𑀯𑀸𑀘𑀦𑀸𑀫𑀕𑁆𑀕𑁂 𑀕𑀢𑁂𑀧𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑀢𑀺𑀫𑀦𑁆𑀢𑁂𑀦 𑀲𑀚𑁆𑀛𑀸𑀬𑀺𑀢𑀢𑁆𑀢𑀸, 𑀏𑀯𑀁 𑀧𑀕𑀼𑀡𑀚𑁆𑀛𑀸𑀦𑁂𑀲𑀼𑀧𑀺 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀺𑀧𑀕𑀼𑀡𑀸𑀦’’𑀦𑁆𑀢𑀺𑀆𑀤𑀺. 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀻𑀢𑀺 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀁 𑀲𑀩𑁆𑀩𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑀸𑀳. 𑀢𑀁 𑀧𑀦 𑀭𑀽𑀧𑀸𑀤𑀬𑁄 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁄 𑀘 𑀅𑀢𑁆𑀣𑁄𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀲𑀫𑁆𑀫𑀼𑀢𑀺𑀲𑀘𑁆𑀘𑁂 𑀧𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀢𑁄 𑀯𑀘𑀦𑀯𑁄𑀳𑀸𑀭𑁂𑀦𑁂𑀯 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀳𑀺 𑀧𑀜𑁆𑀜𑀸𑀧𑀦𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀧𑀦 𑀢𑀁 𑀯𑀺𑀚𑁆𑀚𑀫𑀸𑀦𑀫𑀺𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀲𑀜𑁆𑀜𑀸𑀬 𑀧𑀭𑀺𑀢𑁆𑀢𑀸𑀤𑀻𑀲𑀼 ‘‘𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀆𑀭𑀫𑁆𑀫𑀡’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑁂 𑀏𑀯 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀫𑀸𑀦𑀸𑀬𑀧𑀺 𑀥𑀫𑁆𑀫𑁂𑀲𑁆𑀯𑁂𑀯 𑀅𑀝𑁆𑀞𑀸𑀦𑀢𑁄. 𑀢𑀲𑁆𑀫𑀸 𑀲𑀸 𑀲𑀲𑀫𑁆𑀧𑀬𑀼𑀢𑁆𑀢𑀸 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀬𑀣𑀸𑀕𑀳𑀺𑀢𑀸𑀓𑀸𑀭𑀲𑁆𑀲 𑀲𑀜𑁆𑀜𑀸𑀯𑀺𑀲𑀬𑀲𑁆𑀲 𑀦𑀯𑀢𑁆𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀦𑀯𑀢𑁆𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀘𑀢𑀼𑀧𑀜𑁆𑀜𑀸𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀭𑀽𑀧𑀲𑁆𑀲 𑀘 𑀯𑀲𑁂𑀦 𑀧𑀜𑁆𑀘𑀧𑀡𑁆𑀡𑀸𑀲𑀸𑀬. 𑀓𑁂𑀯𑀮𑀦𑁆𑀢𑀺 𑀯𑀺𑀦𑀸 𑀧𑀭𑀸𑀫𑀲𑀦𑁂𑀦. 𑀅𑀦𑀺𑀝𑁆𑀞𑀗𑁆𑀕𑀢𑀯𑀲𑁂𑀦𑀸𑀢𑀺 𑀅𑀦𑀺𑀘𑁆𑀙𑀬𑀕𑀫𑀦𑀯𑀲𑁂𑀦, 𑀅𑀦𑀺𑀘𑁆𑀙𑀬𑀁 𑀯𑀸 𑀤𑁆𑀯𑁂𑀴𑁆𑀳𑀁 𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀦𑀺𑀝𑁆𑀞𑀗𑁆𑀕𑀢𑁄, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 ‘‘𑀅𑀦𑀺𑀝𑁆𑀞𑀗𑁆𑀕𑀢𑀯𑀲𑁂𑀦 𑀧𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑀺𑀓𑁆𑀔𑀺𑀧𑀦𑀁 𑀯𑀺𑀓𑁆𑀔𑁂𑀧𑁄. 𑀅𑀦𑀯𑀝𑁆𑀞𑀸𑀦𑀁 𑀅𑀯𑀽𑀧𑀲𑀫𑁄. 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑁂 𑀕𑁄𑀢𑁆𑀭𑀪𑀽𑀢𑀺 𑀕𑀳𑁂𑀢𑁆𑀯𑀸 ‘‘𑀕𑁄𑀢𑁆𑀭𑀪𑀼𑀓𑀸𑀮𑁂’’𑀢𑀺 𑀆𑀳.

𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀦𑁆𑀢𑀺 𑀇𑀥 𑀲𑀩𑁆𑀩𑀢𑁆𑀣-𑀲𑀤𑁆𑀤𑁄 𑀲𑀸𑀫𑀺𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀲𑀩𑁆𑀩𑁂𑀲𑀼 𑀯𑀸 𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀧𑀸𑀤𑀓𑀁 𑀓𑀸𑀭𑀡𑀁 𑀲𑀩𑁆𑀩𑀢𑁆𑀣𑀧𑀸𑀤𑀓𑀦𑁆𑀢𑀺 𑀨𑀮𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀦𑀺𑀤𑁆𑀤𑁂𑀲𑁄. 𑀆𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀫𑀸𑀳. 𑀢𑀜𑁆𑀳𑀺 𑀭𑀽𑀧𑀸𑀯𑀘𑀭𑀁, 𑀦 𑀇𑀢𑀭𑀦𑁆𑀢𑀺. 𑀓𑀼𑀲𑀮𑀢𑁄𑀧𑀺 𑀤𑁆𑀯𑀸𑀤𑀲𑀯𑀺𑀥𑀁 𑀓𑀺𑀭𑀺𑀬𑀢𑁄𑀧𑀻𑀢𑀺 𑀘𑀢𑀼𑀯𑀻𑀲𑀢𑀺𑀯𑀺𑀥𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀝𑁆𑀝𑀲𑁆𑀲𑀧𑀺 𑀧𑀸𑀤𑀓𑀁 𑀳𑁄𑀢𑀺𑀬𑁂𑀯𑀸𑀢𑀺 𑀓𑀼𑀲𑀮𑀁 𑀓𑀺𑀭𑀺𑀬𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣𑀧𑀸𑀤𑀓𑀁 𑀯𑀼𑀢𑁆𑀢𑀦𑁆𑀢𑀺 𑀓𑀺𑀭𑀺𑀬𑀚𑁆𑀛𑀸𑀦𑀲𑁆𑀲 𑀅𑀯𑀝𑁆𑀝𑀧𑀸𑀤𑀓𑀢𑁆𑀢𑀸 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀫𑀳𑀕𑁆𑀕𑀢𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀻𑀢𑀺 𑀇𑀤𑀁 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀸𑀓𑀝𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀧𑀭𑀺𑀓𑀫𑁆𑀫𑁂𑀳𑀺 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑁂 𑀭𑀽𑀧𑀓𑀸𑀬𑀁 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀫𑁄𑀤𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀭𑀽𑀧𑀓𑀸𑀬𑁂 𑀲𑀫𑁄𑀤𑀳𑀢𑀻𑀢𑀺 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀭𑀽𑀧𑀓𑀸𑀬𑁂 𑀲𑀫𑁄𑀤𑀳𑀺𑀢𑀁 𑀢𑀤𑀦𑀼𑀕𑀢𑀺𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀅𑀥𑀺𑀝𑁆𑀞𑀸𑀦𑀤𑁆𑀯𑀬𑀁 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑀢𑀁 𑀤𑀺𑀲𑁆𑀲𑀫𑀸𑀦𑀓𑀸𑀬𑀢𑀜𑁆𑀘 𑀆𑀧𑀸𑀤𑁂𑀢𑀺. 𑀕𑀦𑁆𑀢𑀼𑀓𑀸𑀫𑀢𑀸𑀧𑀭𑀺𑀓𑀫𑁆𑀫𑀯𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀼𑀔𑀲𑀜𑁆𑀜𑀸𑀮𑀳𑀼𑀲𑀜𑁆𑀜𑀸𑀪𑀸𑀯𑀢𑁄 𑀕𑀫𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁄𑀢𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀫𑀕𑁆𑀕𑀨𑀮𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀭𑀸𑀤𑀻𑀦𑀜𑁆𑀳𑀺 𑀪𑀕𑀯𑀢𑁄 𑀘𑀺𑀢𑁆𑀢𑀚𑀸𑀦𑀦𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀓𑀲𑁆𑀫𑀸 𑀲𑀸𑀲𑀯𑀘𑀺𑀢𑁆𑀢𑀁 𑀦 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀙𑀺𑀦𑁆𑀦𑀯𑀝𑀼𑀫𑀓𑀸 𑀙𑀺𑀦𑁆𑀦𑀲𑀁𑀲𑀸𑀭𑀯𑀝𑁆𑀝𑀸 𑀩𑀼𑀤𑁆𑀥𑀸. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀧𑀻𑀢𑀺 𑀏𑀢𑁆𑀣 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀫𑀕𑁆𑀕𑀨𑀮𑁂𑀲𑀼 𑀜𑀸𑀢𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀲𑀼 𑀅𑀧𑁆𑀧𑀫𑀸𑀡𑀥𑀫𑁆𑀫𑁂𑀲𑀼 𑀜𑀸𑀢𑁂𑀲𑀽𑀢𑀺 𑀫𑀕𑁆𑀕𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀁 𑀲𑀸𑀥𑁂𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀅𑀧𑁆𑀧𑀫𑀸𑀡𑀸 𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀇𑀘𑁆𑀘𑁂𑀯 (𑀧𑀝𑁆𑀞𑀸. 𑁨.𑁧𑁨.𑁫𑁮) 𑀳𑀺 𑀯𑀼𑀢𑁆𑀢𑀁, 𑀦 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀏𑀯 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑁂 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀲𑁆𑀲𑀧𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀤𑀺𑀲𑁆𑀲𑀢𑀺. 𑀓𑀸𑀫𑀸𑀯𑀘𑀭𑁂𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀚𑀸𑀦𑀦𑀫𑀸𑀳. 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀳𑀺 𑀫𑀕𑁆𑀕𑀨𑀮𑁂𑀳𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀪𑀽𑀢𑁂𑀳𑀺 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺.

𑁧𑁪𑁨𑁯. 𑀅𑀲𑀳𑀚𑀸𑀢𑀢𑁆𑀢𑀸𑀢𑀺 𑀅𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀭𑀽𑀧𑀥𑀫𑁆𑀫𑁂𑀳𑀺 𑀲𑀳𑀚𑀸𑀢𑀢𑀸 𑀲𑀫𑁆𑀧𑀬𑁄𑀕𑀢𑁄 𑀅𑀜𑁆𑀜𑀸 𑀅𑀢𑁆𑀣𑀻𑀢𑀺. ‘‘𑀅𑀜𑁆𑀜𑀥𑀫𑁆𑀫𑀸𑀭𑀫𑁆𑀫𑀡𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁, 𑀫𑀕𑁆𑀕𑀸𑀭𑀫𑁆𑀫𑀡𑀓𑀸𑀮𑁂𑀧𑀺 𑀧𑀦 𑀕𑀭𑀼𑀁 𑀅𑀓𑀭𑀡𑁂 𑀫𑀕𑁆𑀕𑀸𑀥𑀺𑀧𑀢𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸 𑀬𑁄𑀚𑁂𑀢𑀩𑁆𑀩𑀸.

𑁧𑁪𑁩𑁩. 𑀦𑀺𑀬𑁄𑀕𑀸𑀢𑀺 𑀦𑀺𑀬𑁄𑀕𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀦𑀺𑀬𑀫𑁂𑀦𑀸’’𑀢𑀺 𑀆𑀳, 𑀦𑀺𑀬𑁄𑀕𑀯𑀦𑁆𑀢𑁄 𑀯𑀸 𑀦𑀺𑀬𑁄𑀕𑀸, 𑀦𑀺𑀬𑀢𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀳𑀺 𑀩𑁄𑀥𑀺𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀏𑀓𑀦𑁆𑀢𑁂𑀦 𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀓𑁄𑀘𑀺 𑀦𑀢𑁆𑀣𑀻𑀢𑀺.

𑁧𑁪𑁩𑁪. 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀯𑀸𑀢𑀺 𑀯𑀼𑀢𑁆𑀢𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀧𑀦 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀪𑀸𑀯𑀜𑁆𑀘 𑀧𑀝𑀺𑀲𑀦𑁆𑀥𑀺𑀬𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀢𑀺. 𑀢𑀲𑁆𑀫𑀸 𑀇𑀤𑀁 𑀫𑀦𑁄𑀤𑁆𑀯𑀸𑀭𑀘𑀼𑀢𑀺𑀬𑀁 𑀅𑀢𑀻𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑀤𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑀸𑀬𑀼𑀓𑁂 𑀕𑀢𑀺𑀦𑀺𑀫𑀺𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀸𑀬 𑀘𑀢𑁆𑀢𑀸𑀭𑀺 𑀪𑀯𑀗𑁆𑀕𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀺, 𑀇𑀢𑀭𑀢𑁆𑀣 𑀘 𑀙 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁄 𑀧𑀭𑀁 𑀪𑀯𑀗𑁆𑀕𑀓𑀸𑀮𑁂 𑀘𑀸’’𑀢𑀺. 𑀬𑀤𑀸 𑀳𑀺 𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁂 𑀚𑀯𑀦𑁂 𑀧𑀯𑀢𑁆𑀢𑁂 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀢𑀤𑀸𑀭𑀫𑁆𑀫𑀡𑁂 𑀘𑀼𑀢𑀺 𑀳𑁄𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀲𑀢𑁆𑀢𑀲𑁆𑀲 𑀯𑀺𑀬 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀭𑀸𑀦𑀺 𑀙 𑀪𑀯𑀗𑁆𑀕𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀅𑀲𑁆𑀲𑀸𑀤𑀦𑀸𑀤𑀻𑀦𑀺 𑀲𑀧𑀭𑀸𑀫𑀸𑀲𑀸𑀦𑁂𑀯 𑀤𑀝𑁆𑀞𑀩𑁆𑀩𑀸𑀦𑀺. 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀜𑁆𑀘 𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂𑀢𑀺 𑀬𑁂𑀲𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂 𑀏𑀓𑀦𑁆𑀢𑁂𑀦 𑀆𑀯𑀚𑁆𑀚𑀦𑀸𑀬 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸, 𑀢𑁂𑀲𑀁 𑀯𑀲𑁂𑀦 𑀦𑀬𑀁 𑀤𑀲𑁆𑀲𑁂𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀫𑁆𑀧𑀺 𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂 𑀲𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸, 𑀦 𑀧𑀦 𑀏𑀓𑀦𑁆𑀢𑁂𑀦 𑀫𑀕𑁆𑀕𑀨𑀮𑀯𑀻𑀣𑀻𑀲𑀼 𑀢𑀲𑁆𑀲𑀸 𑀅𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸.

𑀇𑀫𑁂 𑀕𑀦𑁆𑀥𑀸𑀢𑀺 𑀦𑀦𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀕𑀦𑁆𑀥𑀸 𑀕𑀳𑀺𑀢𑀸, 𑀓𑀣𑀁 𑀏𑀢𑁆𑀣 𑀅𑀦𑀸𑀕𑀢𑀸𑀭𑀫𑁆𑀫𑀡𑀢𑀸 𑀳𑁄𑀢𑀻𑀢𑀺? ‘‘𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺 𑀫𑀸 𑀲𑀼𑀲𑁆𑀲𑀺𑀁𑀲𑀽’’𑀢𑀺 𑀧𑀯𑀢𑁆𑀢𑀺𑀢𑁄, 𑀅𑀦𑀸𑀕𑀢𑁂 𑀫𑀸 𑀲𑀼𑀲𑁆𑀲𑀺𑀁 𑀲𑀽𑀢𑀺 𑀳𑀺 𑀅𑀦𑀸𑀕𑀢𑀁 𑀕𑀦𑁆𑀥𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀦𑁆𑀢𑁄 𑀅𑀪𑀺𑀫𑀼𑀔𑀻𑀪𑀽𑀢𑀁 𑀢𑀤𑀸 𑀯𑀺𑀚𑁆𑀚𑀫𑀸𑀦𑀫𑁂𑀯 𑀓𑀸𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀤𑀻𑀖𑀭𑀲𑁆𑀲𑀸𑀡𑀼𑀣𑀽𑀮𑀦𑀻𑀮𑀸𑀤𑀺𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀅𑀜𑁆𑀜𑀲𑁆𑀲 𑀘 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀓𑀭𑀡𑁂 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀸 𑀭𑀽𑀧𑀲𑀦𑁆𑀢𑀢𑀺𑀅𑀭𑀽𑀧𑀲𑀦𑁆𑀢𑀢𑀺𑀯𑀸𑀭𑀸 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀅𑀢𑀺𑀧𑀭𑀺𑀢𑁆𑀢𑀲𑀪𑀸𑀯𑀉𑀢𑀼𑀆𑀤𑀺𑀲𑀫𑀼𑀝𑁆𑀞𑀸𑀦𑀸 𑀯𑀸 ‘‘𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀏𑀢𑀁 𑀉𑀪𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀳𑀻𑀭𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀳𑀺 𑀆𑀓𑀟𑁆𑀠𑀻𑀬𑀢𑀺.

𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀢𑀺 𑀯𑀤𑀦𑁆𑀢𑀺, 𑀢𑁂 𑀧𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀁 𑀦 𑀇𑀘𑁆𑀙𑀦𑁆𑀢𑀻𑀢𑀺 ‘‘𑀞𑀺𑀢𑀺𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀬𑁂 ‘‘𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 ‘‘𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀯𑀘𑀦𑀁 𑀦 𑀲𑀫𑁂𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀔𑀡𑀤𑁆𑀯𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀭𑀘𑀺𑀢𑁆𑀢𑁂𑀦 𑀲𑀳 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺. 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀏𑀓𑀤𑁂𑀲𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀏𑀓𑀤𑁂𑀲𑀁 𑀅𑀢𑀻𑀢𑀸𑀭𑀫𑁆𑀫𑀡𑀁 𑀆𑀧𑀚𑁆𑀚𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀭𑀸𑀲𑀺𑀯𑀲𑁂𑀦 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂’’𑀢𑀺, 𑀏𑀢𑁆𑀣 𑀘 𑀫𑀳𑀸𑀚𑀦𑁄 𑀅𑀢𑁆𑀢𑀦𑀸 𑀧𑀭𑁂 𑀅𑀦𑁂𑀓𑁂 𑀧𑀼𑀕𑁆𑀕𑀮𑀸𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀆𑀯𑀚𑁆𑀚𑀦𑀧𑁆𑀧𑀯𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀅𑀣𑀸𑀧𑀺 𑀧𑀭𑀲𑁆𑀲𑀸𑀢𑀺 𑀫𑀳𑀸𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑁂𑀬𑁆𑀬, 𑀢𑀣𑀸𑀧𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀸 𑀘𑀺𑀢𑁆𑀢𑀭𑀸𑀲𑀺𑀁 𑀆𑀯𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀁 𑀅𑀬𑀼𑀢𑁆𑀢𑀁. 𑀦 𑀳𑀺 𑀭𑀸𑀲𑀺𑀆𑀯𑀚𑁆𑀚𑀦𑀁 𑀏𑀓𑀤𑁂𑀲𑀸𑀯𑀚𑁆𑀚𑀦𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀢𑁂𑀳𑀺 ‘‘𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁.

𑀬𑀁 𑀧𑀦 𑀢𑁂 𑀯𑀤𑀦𑁆𑀢𑀺 ‘‘𑀬𑀲𑁆𑀫𑀸 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺, 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀸𑀢𑀼𑀓𑀸𑀫𑁄 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀸𑀫𑀜𑁆𑀜𑁂𑀦𑁂𑀯 𑀘𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀯𑀸 𑀧𑀭𑀺𑀓𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀭𑀘𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀢𑀺 𑀯𑀺𑀪𑀸𑀯𑁂𑀢𑀺 𑀭𑀽𑀧𑀁 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸. 𑀢𑀢𑁄 𑀧𑀭𑀁 𑀧𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀭𑀸𑀕𑀸𑀤𑀺𑀯𑀯𑀢𑁆𑀣𑀸𑀦𑀁 𑀳𑁄𑀢𑀺 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀦𑀁 𑀯𑀺𑀬. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀳𑀤𑀬𑀯𑀢𑁆𑀣𑀼𑀭𑀽𑀧𑀲𑁆𑀲 𑀲𑀢𑁆𑀢𑀲𑁆𑀲 𑀅𑀪𑀺𑀫𑀼𑀔𑀻𑀪𑀽𑀢𑀲𑁆𑀲 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦 𑀘𑀺𑀢𑁆𑀢𑀁 𑀆𑀯𑀚𑁆𑀚𑀬𑀫𑀸𑀦𑀁 𑀆𑀯𑀚𑁆𑀚𑀦𑀁 𑀅𑀪𑀺𑀫𑀼𑀔𑀻𑀪𑀽𑀢𑀁 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀆𑀯𑀚𑁆𑀚𑁂𑀢𑀺. 𑀧𑀭𑀺𑀓𑀫𑁆𑀫𑀸𑀦𑀺 𑀘 𑀢𑀁 𑀢𑀁 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀚𑀸𑀦𑀦𑀧𑀭𑀺𑀓𑀫𑁆𑀫𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀦 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑀁 𑀢𑁂𑀦 𑀲𑀳 𑀏𑀓𑀓𑁆𑀔𑀡𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀲𑀦𑁆𑀢𑀸𑀦𑀲𑁆𑀲 𑀲𑀦𑁆𑀢𑀸𑀦𑀕𑁆𑀕𑀳𑀡𑀢𑁄 𑀏𑀓𑀢𑁆𑀢𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀻𑀦𑀺 𑀘𑀺𑀢𑁆𑀢𑀦𑁆𑀢𑁆𑀯𑁂𑀯 𑀧𑀯𑀢𑁆𑀢𑀸𑀦𑀺, 𑀢𑀜𑁆𑀘 𑀘𑀺𑀢𑁆𑀢𑀫𑁂𑀯, 𑀬𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀯𑀺𑀪𑀸𑀯𑀺𑀢𑀁, 𑀢𑀲𑁆𑀫𑀸 𑀲𑀫𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀦 𑀅𑀦𑀺𑀝𑁆𑀞𑁂 𑀫𑀕𑁆𑀕𑀨𑀮𑀯𑀻𑀣𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀦𑀸𑀦𑀸𑀭𑀫𑁆𑀫𑀡𑀢𑀸 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀜𑁆𑀘 𑀧𑀭𑀺𑀓𑀫𑁆𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀢𑀻𑀢𑀢𑁆𑀢𑀺𑀓𑁄 𑀘 𑀏𑀯𑀁 𑀅𑀪𑀺𑀦𑁆𑀦𑁄 𑀳𑁄𑀢𑀺. 𑀅𑀜𑁆𑀜𑀣𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀇𑀥 𑀯𑀼𑀘𑁆𑀘𑀫𑀸𑀦𑁂 𑀅𑀢𑀻𑀢𑀸𑀦𑀸𑀕𑀢𑀸𑀦𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀆𑀧𑀚𑁆𑀚𑁂𑀬𑁆𑀬, 𑀢𑀣𑀸 𑀘 𑀲𑀢𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀁 𑀯𑀼𑀢𑁆𑀢𑀁. ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀢𑀻𑀢𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭…𑀧𑁂… 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁫) 𑀧𑀦 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑁆𑀯𑁂𑀯 𑀅𑀦𑀦𑁆𑀢𑀭𑀸𑀢𑀻𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀢𑀻𑀢𑀸𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀦 𑀘 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬 𑀆𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀲𑁆𑀲 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀢𑁆𑀣𑀢𑀸 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀳𑀺 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀬𑀤𑀸 𑀧𑀦 ‘‘𑀬𑀁 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀧𑀯𑀢𑁆𑀢𑀁, 𑀢𑀁 𑀚𑀸𑀦𑀸𑀫𑀺. 𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀤𑀸 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀦𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀘 𑀅𑀢𑀻𑀢𑀸𑀦𑀸𑀕𑀢𑀸𑀭𑀫𑁆𑀫𑀡𑀸𑀦𑁂𑀯 𑀳𑁄𑀦𑁆𑀢𑀺 𑀆𑀯𑀚𑁆𑀚𑀦𑁂𑀦𑁂𑀯 𑀯𑀺𑀪𑀸𑀕𑀲𑁆𑀲 𑀓𑀢𑀢𑁆𑀢𑀸.

𑀬𑁂 𑀧𑀦 ‘‘𑀇𑀤𑁆𑀥𑀺𑀫𑀸 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀆𑀯𑀚𑁆𑀚𑁂𑀢𑀺, 𑀆𑀯𑀚𑁆𑀚𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺. 𑀬𑁂𑀲𑀁 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀘 𑀢𑀸𑀦𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀅𑀤𑁆𑀥𑀸𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀦𑀸𑀦𑀸𑀭𑀫𑁆𑀫𑀡𑀢𑁆𑀢𑀸𑀪𑀸𑀯𑁄 𑀯𑀺𑀬 𑀏𑀓𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀦𑀸𑀕𑀢𑁂𑀲𑀼𑀧𑀺 𑀘𑀺𑀢𑁆𑀢𑁂𑀲𑀼 𑀆𑀯𑀚𑁆𑀚𑀺𑀢𑁂𑀲𑀼 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀦𑀸𑀦𑀸𑀭𑀫𑁆𑀫𑀡𑀢𑀸 𑀦 𑀲𑀺𑀬𑀸, 𑀢𑁂𑀦 𑀘𑀢𑀼𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀦𑀸𑀕𑀢𑁂 𑀆𑀯𑀚𑁆𑀚𑀺𑀢𑁂 𑀅𑀦𑀸𑀕𑀢𑀸𑀭𑀫𑁆𑀫𑀡𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀲𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑁄 ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀅𑀦𑀼𑀤𑁆𑀥𑀝𑀢𑁆𑀢𑀸 𑀕𑀡𑀦𑀸𑀬 𑀘 ‘‘𑀆𑀲𑁂𑀯𑀦𑁂 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀺𑀚𑁆𑀛𑀢𑀺. 𑀦 𑀳𑀺 𑀓𑀼𑀲𑀮𑀓𑀺𑀭𑀺𑀬𑀫𑀳𑀕𑁆𑀕𑀢𑀁 𑀅𑀦𑀸𑀲𑁂𑀯𑀦𑀁 𑀅𑀢𑁆𑀣𑀻𑀢𑀺.

𑀏𑀢𑀲𑁆𑀲 𑀘 𑀯𑀸𑀤𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑁄 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀢𑀸𑀯𑀘𑀦𑀲𑁆𑀲 𑀦 𑀲𑀺𑀚𑁆𑀛𑀢𑀺, 𑀬𑀁 𑀧𑀯𑀢𑁆𑀢𑀁 𑀬𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀯𑀸 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀕𑀳𑀡𑁂 𑀆𑀯𑀚𑁆𑀚𑀦𑀲𑁆𑀲 𑀅𑀦𑀸𑀕𑀢𑀕𑁆𑀕𑀳𑀡𑀪𑀸𑀯𑀁, 𑀢𑀤𑀪𑀸𑀯𑀸 𑀚𑀯𑀦𑀸𑀦𑀫𑁆𑀧𑀺 𑀯𑀢𑁆𑀢𑀫𑀸𑀦𑀕𑁆𑀕𑀳𑀡𑀸𑀪𑀸𑀯𑀜𑁆𑀘 𑀲𑀦𑁆𑀥𑀸𑀬𑁂𑀯 𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀢𑀤𑀸 𑀳𑀺 𑀪𑀯𑀗𑁆𑀕𑀘𑀮𑀦𑀸𑀦𑀦𑁆𑀢𑀭𑀁 𑀅𑀪𑀺𑀫𑀼𑀔𑀻𑀪𑀽𑀢𑀫𑁂𑀯 𑀘𑀺𑀢𑁆𑀢𑀁 𑀆𑀭𑀩𑁆𑀪 𑀆𑀯𑀚𑁆𑀚𑀦𑀸 𑀧𑀯𑀢𑁆𑀢𑀢𑀻𑀢𑀺. 𑀚𑀸𑀦𑀦𑀘𑀺𑀢𑁆𑀢𑀲𑁆𑀲𑀧𑀺 𑀯𑀢𑁆𑀢𑀫𑀸𑀦𑀸𑀭𑀫𑁆𑀫𑀡𑀪𑀸𑀯𑁂 𑀆𑀯𑀚𑁆𑀚𑀦𑀚𑀸𑀦𑀦𑀘𑀺𑀢𑁆𑀢𑀸𑀦𑀁 𑀲𑀳𑀝𑁆𑀞𑀸𑀦𑀤𑁄𑀲𑀸𑀧𑀢𑁆𑀢𑀺𑀬𑀸 𑀭𑀸𑀲𑀺𑀏𑀓𑀤𑁂𑀲𑀸𑀯𑀚𑁆𑀚𑀦𑀧𑀝𑀺𑀯𑁂𑀥𑁂 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀯𑀚𑁆𑀚𑀦𑀚𑀸𑀦𑀦𑁂 𑀘 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀤𑁄𑀲𑀸𑀧𑀢𑁆𑀢𑀺𑀬𑀸 𑀘 𑀬𑀁 𑀯𑀼𑀢𑁆𑀢𑀁 ‘‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺, 𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀸𑀧𑀢𑁆𑀢𑀺𑀓𑀸𑀮𑀯𑀲𑁂𑀦𑁂𑀯 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀦𑀸𑀦𑀸𑀭𑀫𑁆𑀫𑀡𑀢𑀸𑀪𑀸𑀯𑀁 𑀤𑀺𑀲𑁆𑀯𑀸 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀯𑀢𑁆𑀢𑀫𑀸𑀦𑀢𑀁 𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺, 𑀢𑀫𑁆𑀧𑀺 𑀯𑀘𑀦𑀁 𑀧𑀼𑀭𑀺𑀫𑀯𑀸𑀤𑀺𑀦𑁄 𑀦𑀸𑀦𑀼𑀚𑀸𑀦𑁂𑀬𑁆𑀬𑀼𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀢𑀺 𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀧𑀤𑀲𑀗𑁆𑀕𑀳𑀺𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀺𑀥𑀸𑀦𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀆𑀯𑀚𑁆𑀚𑀦𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀦𑁆𑀢𑀺.

𑀓𑀲𑁆𑀫𑀸 𑀧𑀦𑁂𑀯𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀺𑀘𑀸𑀭𑀺𑀢𑀸, 𑀦𑀦𑀼 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀦𑀸𑀕𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂𑀲𑀼 ‘‘𑀅𑀢𑀻𑀢𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁨), ‘‘𑀅𑀦𑀸𑀕𑀢𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁭.𑁩-𑁪), 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 ‘‘𑀅𑀦𑀼𑀧𑁆𑀧𑀦𑁆𑀦𑀸𑀔𑀦𑁆𑀥𑀸, 𑀉𑀧𑁆𑀧𑀸𑀤𑀺𑀦𑁄 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁩), 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 ‘‘𑀉𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁭.𑁨) 𑀏𑀢𑁆𑀢𑀓𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀧𑀯𑀢𑁆𑀢𑁂𑀬𑁆𑀬, 𑀧𑀼𑀭𑀺𑀫𑁂𑀲𑀼 𑀯𑀺𑀬 𑀇𑀢𑀭𑁂𑀲𑀼 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀲𑀘𑁆𑀘𑀁 𑀓𑀢𑁆𑀢𑀩𑁆𑀩𑀁, 𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀦𑁂𑀢𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀬 𑀧𑀸𑀴𑀺𑀬𑀸 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀢𑀻𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀧𑀝𑁆𑀞𑀸. 𑁨.𑁧𑁯.𑁨𑁦), 𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁨) 𑀏𑀢𑁂𑀲𑀜𑁆𑀳𑀺 𑀯𑀺𑀪𑀗𑁆𑀕𑁂𑀲𑀼 ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁨), ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀅𑀦𑀸𑀕𑀢𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁…𑀧𑁂… 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁧) 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀢𑁂𑀦𑁂𑀯𑀸𑀬𑀁 𑀯𑀺𑀘𑀸𑀭𑀡𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀦𑁆𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀜𑀸𑀡𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀓𑀼𑀲𑀮𑀸 𑀔𑀦𑁆𑀥𑀸𑀢𑀺 𑀇𑀤𑁆𑀥𑀺𑀯𑀺𑀥𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀸𑀕𑀢𑀁𑀲𑀜𑀸𑀡𑀸𑀧𑁂𑀓𑁆𑀔𑁄 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄, 𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀸𑀧𑁂𑀓𑁆𑀔𑁄𑀢𑀺. 𑀢𑁂𑀲𑀁 𑀘𑀢𑀼𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀪𑀸𑀯𑀲𑁆𑀲 𑀅𑀲𑀸𑀥𑀓𑁄𑀢𑀺 𑀘𑁂? 𑀦, 𑀅𑀜𑁆𑀜𑀢𑁆𑀣 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁬.𑁭𑁨) ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀔𑀦𑁆𑀥𑀸 𑀘 𑀯𑀺𑀢𑀓𑁆𑀓𑁄 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁬.𑁬𑁯) 𑀘 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀧𑁂𑀓𑁆𑀔𑁄𑀧𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀢𑁄. 𑀏𑀯𑀫𑀧𑀺 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘𑀸’’𑀢𑀺𑀆𑀤𑀻𑀲𑀼 𑀅𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀢𑀸 𑀦 𑀲𑀺𑀚𑁆𑀛𑀢𑀻𑀢𑀺? 𑀦, 𑀢𑀢𑁆𑀣 𑀅𑀯𑀘𑀦𑀲𑁆𑀲 𑀅𑀜𑁆𑀜𑀓𑀸𑀭𑀡𑀢𑁆𑀢𑀸. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀳𑀺 𑀓𑀫𑁆𑀫𑀲𑀁𑀲𑀝𑁆𑀞𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀓𑀫𑁆𑀫𑀧𑁆𑀧𑀫𑀼𑀔𑁂𑀦 𑀕𑀬𑁆𑀳𑀦𑁆𑀢𑀺. 𑀢𑀜𑁆𑀳𑀺 𑀬𑀣𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀭𑀺𑀫𑀧𑀭𑀺𑀓𑀫𑁆𑀫𑀯𑀲𑁂𑀦 𑀲𑀯𑀺𑀢𑀓𑁆𑀓𑀸𑀤𑀺𑀯𑀺𑀪𑀸𑀕𑀁 𑀲𑀭𑀸𑀕𑀸𑀤𑀺𑀯𑀺𑀪𑀸𑀕𑀜𑁆𑀘 𑀘𑀺𑀢𑁆𑀢𑀁 𑀯𑀺𑀪𑀸𑀯𑁂𑀢𑀺, 𑀦 𑀏𑀯𑀁 𑀲𑀯𑀺𑀪𑀸𑀕𑀁 𑀯𑀺𑀪𑀸𑀯𑁂𑀢𑀺, 𑀓𑀫𑁆𑀫𑀯𑀲𑁂𑀦𑁂𑀯 𑀧𑀦 𑀲𑀫𑀼𑀤𑀸𑀬𑀁 𑀯𑀺𑀪𑀸𑀯𑁂𑀢𑀻𑀢𑀺 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘𑀸’’𑀢𑀺𑀆𑀤𑀺𑀓𑁂 𑀯𑀺𑀪𑀸𑀕𑀓𑀭𑀡𑁂 𑀢𑀁 𑀦 𑀯𑀼𑀢𑁆𑀢𑀁, 𑀦 𑀘𑀢𑀼𑀓𑁆𑀔𑀦𑁆𑀥𑀸𑀦𑀸𑀭𑀫𑁆𑀫𑀡𑀢𑁄𑀢𑀺. 𑀇𑀤𑀁 𑀧𑀦 𑀅𑀯𑀘𑀦𑀲𑁆𑀲 𑀓𑀸𑀭𑀡𑀦𑁆𑀢𑀺. 𑀓𑁂𑀘𑀺 𑀢𑀢𑁆𑀣𑀸𑀧𑀺 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸’’𑀢𑀺 𑀧𑀞𑀦𑁆𑀢𑀺 𑀏𑀯. 𑀦 𑀳𑀺 𑀢𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀪𑀸𑀕𑀁 𑀯𑀺𑀬 𑀲𑀯𑀺𑀢𑀓𑁆𑀓𑀸𑀤𑀺𑀯𑀺𑀪𑀸𑀕𑀁 𑀓𑀫𑁆𑀫𑀁 𑀯𑀺𑀪𑀸𑀯𑁂𑀢𑀼𑀁 𑀅𑀲𑀫𑀢𑁆𑀣𑀁. 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀪𑀸𑀯𑀯𑀺𑀪𑀸𑀯𑀦𑀫𑁆𑀧𑀺 𑀳𑀺 𑀮𑁄𑀪𑀸𑀤𑀺𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀯𑀺𑀲𑁂𑀲𑀯𑀺𑀪𑀸𑀯𑀦𑀁 𑀳𑁄𑀢𑀻𑀢𑀺.

𑁧𑁪𑁩𑁫. 𑀦𑀺𑀬𑀓𑀚𑁆𑀛𑀢𑁆𑀢𑀧𑀭𑀺𑀬𑀸𑀬𑀲𑁆𑀲 𑀅𑀪𑀸𑀯𑁂𑀦𑀸𑀢𑀺 𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀳𑁄𑀦𑁆𑀢𑀁 𑀲𑀩𑁆𑀩𑀣𑀸 𑀩𑀳𑀺𑀤𑁆𑀥𑀸𑀪𑀸𑀯𑁂𑀦𑁂𑀯 ‘‘𑀏𑀓𑀦𑁆𑀢𑀩𑀳𑀺𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀧𑀺 𑀅𑀳𑁄𑀦𑁆𑀢𑀁 𑀓𑀲𑀺𑀡𑀸𑀤𑀺 𑀯𑀺𑀬 𑀦𑀺𑀬𑀓𑀚𑁆𑀛𑀢𑁆𑀢𑀫𑀢𑁆𑀢𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀏𑀯 𑀳𑀺 𑀓𑀲𑀺𑀡𑀸𑀤𑀺𑀅𑀚𑁆𑀛𑀢𑁆𑀢𑀥𑀫𑁆𑀫𑀪𑀽𑀢𑁄 𑀘 𑀓𑁄𑀘𑀺 𑀪𑀸𑀯𑁄 𑀦 𑀳𑁄𑀢𑀻𑀢𑀺 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀲𑀩𑁆𑀩𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀤𑀺 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 ‘‘𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀘𑀦𑀢𑁄𑀢𑀺 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀦𑁆𑀢𑀺 ‘‘𑀏𑀢𑀜𑁆𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀢𑀁-𑀲𑀤𑁆𑀤𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀯𑀤𑀢𑀺. 𑀬𑁄 𑀧𑀦𑀸𑀬𑀫𑁂𑀢𑁆𑀣 𑀅𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀏𑀓𑀫𑁆𑀧𑀺 𑀇𑀥 𑀯𑀼𑀘𑁆𑀘𑀫𑀸𑀦𑀁 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀢𑁂𑀦 𑀲𑀳𑁂𑀓𑀸𑀭𑀫𑁆𑀫𑀡𑀢𑀫𑁆𑀧𑀺 𑀲𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀢𑁂𑀲𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀢𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀻’’𑀢𑀺, 𑀢𑀫𑀜𑁆𑀜𑁂 𑀦𑀸𑀦𑀼𑀚𑀸𑀦𑀦𑁆𑀢𑀺. 𑀦 𑀳𑀺 𑀈𑀤𑀺𑀲𑀁 𑀮𑁂𑀲𑀯𑀘𑀦𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀬𑁂𑀲𑀁 𑀲𑀫𑀸𑀦𑀸𑀭𑀫𑁆𑀫𑀡𑀸𑀦𑀁 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀸 𑀦𑀯𑀢𑁆𑀢𑀩𑁆𑀩𑀢𑀸 𑀘 𑀯𑀼𑀢𑁆𑀢𑀸. 𑀧𑀼𑀦 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀢𑁂𑀲𑀼 𑀏𑀓𑀫𑁂𑀯 𑀯𑀢𑁆𑀯𑀸 𑀅𑀜𑁆𑀜𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀯𑁂𑀤𑀦𑀸𑀢𑁆𑀢𑀺𑀓𑁂 𑀲𑀫𑀸𑀦𑀯𑁂𑀤𑀦𑀸𑀦𑀁 𑀬𑁂𑀲𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀏𑀓𑀫𑁂𑀯 𑀧𑀻𑀢𑀺𑀢𑁆𑀢𑀺𑀓𑁂 𑀲𑀼𑀔𑀲𑀳𑀕𑀢𑀦𑀺𑀤𑁆𑀤𑁂𑀲𑁂 𑀯𑀢𑁆𑀯𑀸 𑀅𑀜𑁆𑀜𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀮𑁂𑀲𑁂𑀦 𑀧𑀦 𑀯𑀺𑀦𑀸 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀅𑀢𑁆𑀣𑀼𑀤𑁆𑀥𑀸𑀭𑀲𑁆𑀲 𑀓𑀢𑀢𑁆𑀢𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀯𑀺𑀬 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦𑀯𑀢𑁆𑀢𑀩𑁆𑀩𑀢𑀸𑀬 𑀲𑀢𑀺 𑀢𑀸𑀦𑀺𑀧𑀺 𑀦𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀦 𑀧𑀦 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀅𑀪𑀸𑀯𑀦𑀸𑀲𑀸𑀫𑀜𑁆𑀜𑁂𑀧𑀺 𑀬𑀸𑀬 𑀅𑀪𑀸𑀯𑀦𑀸𑀦𑀺𑀝𑁆𑀞𑀧𑁆𑀧𑀯𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀯𑀢𑁆𑀢𑀫𑀸𑀦𑀁 𑀦𑀯𑀢𑁆𑀢𑀩𑁆𑀩𑀁 𑀚𑀸𑀢𑀁, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀢𑀸𑀦𑀺 𑀦𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀦 𑀯𑀼𑀢𑁆𑀢𑀸𑀦𑀺. 𑀕𑀳𑀡𑀯𑀺𑀲𑁂𑀲𑀦𑀺𑀫𑁆𑀫𑀺𑀢𑀸𑀦𑁂𑀯 𑀳𑀺 𑀓𑀲𑀺𑀡𑀸𑀤𑀻𑀦𑀺 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀻𑀢𑀺 𑀢𑀤𑀸𑀭𑀫𑁆𑀫𑀡𑀸𑀦𑀁 𑀩𑀳𑀺𑀤𑁆𑀥𑀸𑀕𑀳𑀡𑀯𑀲𑁂𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀦 𑀦 𑀩𑀳𑀺𑀤𑁆𑀥𑀸𑀕𑀳𑀡𑀪𑀸𑀯𑁂𑀦 𑀧𑀯𑀢𑁆𑀢𑀢𑀺, 𑀦𑀸𑀧𑀺 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀧𑀦 𑀕𑀳𑀡𑀸𑀓𑀸𑀭𑁂𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀯𑀢𑁆𑀢𑀢𑀺, 𑀦 𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀢𑀺. 𑀬𑀤𑀺 𑀧𑀯𑀢𑁆𑀢𑁂𑀬𑁆𑀬, 𑀢𑀫𑁆𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀯 𑀪𑀯𑁂𑀬𑁆𑀬. 𑀬𑀣𑀸 𑀳𑀺 𑀓𑀺𑀮𑁂𑀲𑀸𑀦𑀁 𑀕𑁄𑀘𑀭𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑀜𑁆𑀘 𑀲𑀩𑁆𑀩𑀁 𑀚𑀸𑀦𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦 𑀬𑀣𑀸 𑀢𑁂 𑀕𑀡𑁆𑀳𑀦𑁆𑀢𑀺, 𑀢𑀣𑀸 𑀕𑀡𑁆𑀳𑀸𑀢𑀺 𑀢𑀲𑁆𑀲𑀧𑀺 𑀓𑀺𑀮𑁂𑀲𑀪𑀸𑀯𑀸𑀧𑀢𑁆𑀢𑀺𑀢𑁄, 𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀘 𑀧𑀯𑀢𑁆𑀢𑀦𑀸𑀓𑀸𑀭𑀁 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀦𑁆𑀢𑀁 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑀺𑀯 𑀦 𑀕𑀡𑁆𑀳𑀸𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀦𑁆𑀢𑀺. 𑀢𑁂𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀁 𑀦𑀯𑀢𑁆𑀢𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸𑀢𑀺. 𑀅𑀬𑀁 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀧𑀕𑀫𑁄 𑀦𑀸𑀫 𑀏𑀓𑁄 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀅𑀦𑀺𑀘𑁆𑀙𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀧𑀸𑀓𑀁 𑀧𑀦 𑀦 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑀺𑀧𑀸𑀓𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀧𑀸𑀓𑀸𑀤𑀻𑀲𑀼 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂𑀲𑀼 𑀦 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀢𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀜𑁆𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲. 𑀬𑀣𑀸 𑀳𑀺 𑀯𑀺𑀧𑀸𑀓𑀢𑁆𑀢𑀺𑀓𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀫𑀽𑀮𑀓𑁂𑀲𑀼 𑀧𑀜𑁆𑀳𑁂𑀲𑀼 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀲𑁆𑀲, 𑀢𑀣𑀸 𑀯𑀺𑀧𑀸𑀓𑀲𑁆𑀲 𑀓𑀺𑀭𑀺𑀬𑀲𑁆𑀲. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀲𑁆𑀲. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁬, 𑁪𑁧𑁦) 𑀯𑀼𑀢𑁆𑀢𑀁, 𑀦 𑀢𑀣𑀸 𑀯𑀺𑀧𑀸𑀓𑀥𑀫𑁆𑀫𑀫𑀽𑀮𑀓𑁂𑀲𑀼 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸. 𑀯𑀺𑀧𑀸𑀓𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑀸𑀲𑀫𑁆𑀪𑀯𑀢𑁄𑀢𑀺 𑀯𑀺𑀧𑀸𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀪𑀺𑀦𑀻𑀳𑀸𑀭𑀸𑀲𑀫𑁆𑀪𑀯𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑀲𑁆𑀲 𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀢𑁆𑀣𑀺 𑀅𑀪𑀺𑀦𑀻𑀳𑀸𑀭𑁄𑀢𑀺.

𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀻𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑁂 ‘‘𑀔𑀦𑁆𑀥𑀸’’𑀢𑀺 𑀕𑀳𑁂𑀢𑁆𑀯𑀸 𑀆𑀤𑀺-𑀲𑀤𑁆𑀤𑁂𑀦 𑀭𑀽𑀧𑀁 𑀕𑀡𑁆𑀳𑀸𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸 𑀕𑀬𑁆𑀳𑀫𑀸𑀦𑀁 𑀅𑀳𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀁 𑀆𑀤𑀺-𑀲𑀤𑁆𑀤𑁂𑀦 𑀕𑀡𑁆𑀳𑀸𑀢𑀺. 𑀏𑀲 𑀦𑀬𑁄 𑀧𑀭𑁂𑀲𑀁 𑀔𑀦𑁆𑀥𑀸𑀤𑀺𑀕𑁆𑀕𑀳𑀡𑁂 𑀘. 𑀧𑀼𑀦 𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑁂𑀦 𑀓𑀲𑀺𑀡𑀯𑀺𑀳𑀸𑀭𑀸𑀤𑀺𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀼𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀫𑀸𑀳. 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀅𑀳𑀁 𑀧𑀭𑀁 𑀧𑀡𑁆𑀡𑀢𑁆𑀢𑀺𑀕𑁆𑀕𑀳𑀡𑁂 𑀲𑀩𑁆𑀩𑀁 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀁. 𑀓𑀫𑁆𑀫𑀸𑀤𑀻𑀲𑀼 𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀉𑀪𑀬𑀁, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀩𑀳𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀏𑀯 𑀓𑀺𑀫𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲 𑀕𑀢𑀺𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀚𑁆𑀛𑀢𑁆𑀢𑀁 𑀲𑀺𑀬𑀸. 𑀫𑀮𑁆𑀮𑀺𑀓𑀸𑀬 𑀓𑀼𑀫𑁆𑀫𑀸𑀲𑀁 𑀤𑀤𑀫𑀸𑀦𑀸𑀬 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀮𑀸𑀪𑀁, 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀲𑁆𑀲 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁, 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑁆𑀲 𑀘 𑀧𑀼𑀧𑁆𑀨𑀫𑀼𑀝𑁆𑀞𑀺𑀦𑀸 𑀧𑀽𑀚𑁂𑀦𑁆𑀢𑀲𑁆𑀲 𑀧𑀘𑁆𑀘𑁂𑀓𑀩𑁄𑀥𑀺𑀲𑀘𑁆𑀙𑀺𑀓𑀺𑀭𑀺𑀬𑀁 𑀦𑀺𑀲𑁆𑀲𑀸𑀬 𑀪𑀕𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺.

𑀇𑀫𑀲𑁆𑀫𑀺𑀁 𑀢𑀺𑀓𑁂 𑀑𑀓𑀸𑀲𑀁 𑀮𑀪𑀦𑁆𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀅𑀮𑀤𑁆𑀥𑁄𑀓𑀸𑀲𑀸𑀦𑀺 𑀦𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀇𑀥 𑀧𑀦 𑀦𑀯𑀢𑁆𑀢𑀩𑁆𑀩𑀸𑀦𑀺 𑀦 𑀳𑁄𑀦𑁆𑀢𑀺, 𑀅𑀚𑁆𑀛𑀢𑁆𑀢𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀢𑀁 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀸𑀦𑀺 𑀳𑀺 𑀧𑀜𑁆𑀘 𑀲𑀩𑁆𑀩𑀢𑁆𑀣𑀧𑀸𑀤𑀓𑀸𑀓𑀸𑀲𑀸𑀮𑁄𑀓𑀓𑀲𑀺𑀡𑀘𑀢𑀼𑀢𑁆𑀣𑀸𑀦𑀁 𑀓𑀲𑀺𑀡𑀸𑀭𑀫𑁆𑀫𑀡𑀢𑁆𑀢𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀢𑁆𑀢𑀸, 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀲𑁆𑀲 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀻𑀢𑀺. 𑀲𑀓𑀸𑀬𑀘𑀺𑀢𑁆𑀢𑀸𑀦𑀦𑁆𑀢𑀺 𑀲𑀓𑀓𑀸𑀬𑀘𑀺𑀢𑁆𑀢𑀸𑀦𑀁, 𑀢𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀯𑀸 𑀭𑀽𑀧𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀢𑀺𑀲𑁆𑀲𑀦𑁆𑀦𑀁 𑀯𑀸 𑀧𑀜𑁆𑀜𑀢𑁆𑀢𑀻𑀦’’𑀦𑁆𑀢𑀺 𑀇𑀤𑀫𑁆𑀧𑀺 𑀯𑀸-𑀲𑀤𑁆𑀤𑁂𑀦 𑀆𑀳𑀭𑀺𑀢𑀩𑁆𑀩𑀁, 𑀦𑀬𑀤𑀲𑁆𑀲𑀦𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀈𑀤𑀺𑀲𑁂 𑀳𑀺 𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺.

𑀢𑀺𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁪𑁭𑁩. 𑀫𑀸𑀦𑁄 …𑀧𑁂… 𑀏𑀓𑀥𑀸𑀯𑀸𑀢𑀺 𑀇𑀤𑀁 𑀅𑀯𑀼𑀢𑁆𑀢𑀧𑁆𑀧𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀫𑀸𑀦𑁄 𑀓𑀸𑀫𑀭𑀸𑀕𑀸𑀯𑀺𑀚𑁆𑀚𑀸𑀲𑀜𑁆𑀜𑁄𑀚𑀦𑁂𑀳𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁆𑀯𑀺𑀥𑀸𑀢𑀺 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀏𑀲 𑀦𑀬𑁄 𑀪𑀯𑀭𑀸𑀕𑀸𑀤𑀻𑀲𑀼. 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀏𑀢𑁆𑀣 𑀢𑀣𑀸𑀢𑀺 𑀏𑀢𑀲𑁆𑀲 𑀏𑀓𑀥𑀸𑀯𑀸𑀢𑀺 𑀅𑀢𑁆𑀣𑁄.

𑁧𑁫𑁧𑁧. 𑀲𑀲𑀗𑁆𑀔𑀸𑀭𑀺𑀓𑁂𑀲𑀽𑀢𑀺 𑀇𑀤𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀢𑀻𑀳𑀺 𑀦𑀻𑀯𑀭𑀡𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀦𑀺𑀬𑀫𑀢𑁄 𑀢𑀢𑁆𑀣 𑀢𑀲𑁆𑀲 𑀢𑁂𑀳𑀺 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀺𑀬𑀢𑀢𑁆𑀢𑀸. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀉𑀤𑁆𑀥𑀘𑁆𑀘𑀲𑁆𑀲 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀦𑀢𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀤𑁆𑀯𑁂, 𑀅𑀜𑁆𑀜𑁂𑀲𑀼 𑀣𑀺𑀦𑀫𑀺𑀤𑁆𑀥𑀓𑀼𑀓𑁆𑀓𑀼𑀘𑁆𑀘𑀯𑀺𑀭𑀳𑁂 𑀢𑀻𑀡𑀺 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀤𑁆𑀯𑁂 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀢𑀓𑀸𑀦𑀁 𑀧𑀦 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀬𑀁 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀧𑀯𑀢𑁆𑀢𑀺𑀬𑀁 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑁂 𑀢𑀻𑀡𑀻𑀢𑀺 𑀘 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄𑀢𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘 𑀯𑀸𑀢𑀺𑀧𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀢𑁆𑀣 𑀲𑀳𑀼𑀧𑁆𑀧𑀢𑁆𑀢𑀺, 𑀢𑀢𑁆𑀣 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀏𑀢𑀲𑁆𑀲 𑀯𑀸 𑀮𑀓𑁆𑀔𑀡𑀲𑁆𑀲 𑀤𑀲𑁆𑀲𑀦𑀫𑁂𑀢𑀦𑁆𑀢𑀺. 𑀬𑀢𑁆𑀣 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀘𑀸𑀬𑀫𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀘 ‘‘𑀤𑁆𑀯𑁂 𑀢𑀬𑁄’’𑀢𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀤𑀲𑁆𑀲𑀦𑀯𑀲𑁂𑀦 𑀳𑀺 𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘 𑀯𑀼𑀢𑁆𑀢𑀸, 𑀦 𑀲𑀩𑁆𑀩𑁂𑀲𑀁 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑀭𑀽𑀧𑁂𑀦 𑀤𑀲𑁆𑀲𑀦𑀯𑀲𑁂𑀦𑀸𑀢𑀺.

𑀬𑀤𑀺 𑀉𑀤𑁆𑀥𑀘𑁆𑀘𑀁 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺? 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀅𑀜𑁆𑀜𑀦𑀻𑀯𑀭𑀡𑀭𑀳𑀺𑀢𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀙𑀝𑁆𑀞𑀁 𑀧𑀦 𑀦𑀻𑀯𑀭𑀡𑀁 𑀅𑀪𑀺𑀥𑀫𑁆𑀫𑁂 𑀇𑀢𑀭𑁂𑀳𑀺 𑀲𑀳𑀕𑀢𑀦𑁆𑀢𑀺 𑀢𑀲𑁆𑀲 𑀅𑀜𑁆𑀜𑀦𑀻𑀯𑀭𑀡𑀭𑀳𑀺𑀢𑀲𑁆𑀲 𑀦 𑀓𑁄𑀘𑀺 𑀯𑀺𑀲𑀬𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀅𑀢𑁆𑀢𑀦𑀸 𑀲𑀳𑀕𑀢𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀸𑀪𑀸𑀯𑀸 𑀢𑀤𑀼𑀧𑀮𑀓𑁆𑀔𑀺𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀸 𑀘 𑀦𑀢𑁆𑀣𑁂𑀯 𑀯𑀺𑀲𑀬𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀢𑀁 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀧𑀦 𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑁂𑀲𑀥𑀫𑁆𑀫𑀸𑀦𑀁 𑀉𑀤𑁆𑀥𑀘𑁆𑀘𑀸𑀦𑀼𑀯𑀢𑁆𑀢𑀦𑀪𑀸𑀯𑁂𑀦 𑀢𑀤𑀼𑀧𑀮𑀓𑁆𑀔𑀺𑀢𑁄 𑀉𑀤𑁆𑀥𑀘𑁆𑀘𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀤𑁆𑀥𑀘𑁆𑀘𑀁 𑀲𑀸𑀫𑀜𑁆𑀜𑁂𑀦 ‘‘𑀉𑀤𑁆𑀥𑀘𑁆𑀘𑀦𑀻𑀯𑀭𑀡’’𑀦𑁆𑀢𑀺 𑀕𑀳𑁂𑀢𑁆𑀯𑀸𑀧𑀺 𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀯𑀺𑀲𑁂𑀲𑁂𑀦 𑀧𑀓𑀸𑀲𑁂𑀢𑀼𑀁 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀆𑀳. 𑀏𑀯𑀜𑁆𑀘 𑀧𑀓𑀸𑀲𑀦𑀁 𑀯𑀺𑀲𑀬𑀯𑀺𑀲𑁂𑀲𑁂𑀲𑀼 𑀮𑁄𑀪𑀤𑁄𑀫𑀦𑀲𑁆𑀲𑀲𑀳𑀕𑀢𑀲𑀲𑀗𑁆𑀔𑀸𑀭𑀺𑀓𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑁂𑀲𑀼 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀲𑀁 𑀩𑁆𑀬𑀸𑀧𑀓𑀪𑀸𑀯𑁂𑀦 𑀙𑀝𑁆𑀞𑀁 𑀧𑀓𑀸𑀲𑁂𑀢𑀼𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁂𑀢𑀺 𑀲𑀸𑀫𑀜𑁆𑀜𑁂𑀦 𑀲𑀩𑁆𑀩𑀁 𑀉𑀤𑁆𑀥𑀘𑁆𑀘𑀁 ‘𑀉𑀤𑁆𑀥𑀘𑁆𑀘’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂’’𑀢𑀺 𑀯𑀤𑀦𑁆𑀢𑀺, 𑀅𑀬𑀁 𑀧𑀦𑀢𑁆𑀣𑁄 𑀦 𑀩𑀳𑀼𑀫𑀢𑁄 𑀤𑁆𑀯𑀸𑀤𑀲𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀺𑀬 𑀲𑀩𑁆𑀩𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀉𑀤𑁆𑀥𑀘𑁆𑀘𑁂𑀦 𑀅𑀦𑀼𑀧𑀮𑀓𑁆𑀔𑀺𑀢𑀢𑁆𑀢𑀸, 𑀲𑀢𑀺 𑀘 𑀉𑀧𑀮𑀓𑁆𑀔𑀺𑀢𑀢𑁆𑀢𑁂 ‘‘𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀤𑁆𑀯𑀸𑀤𑀲𑀲𑀼 𑀉𑀤𑁆𑀥𑀘𑁆𑀘𑀲𑀳𑀕𑀢𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀉𑀤𑁆𑀥𑀘𑁆𑀘𑀸𑀦𑀼𑀧𑀮𑀓𑁆𑀔𑀺𑀢𑀢𑁆𑀢𑀸 𑀧𑀦 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀯𑀺𑀬 𑀇𑀤𑀫𑁆𑀧𑀺 ‘‘𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀯𑀺𑀬 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀜𑁆𑀘 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 ‘‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀏𑀓𑀲𑁆𑀫𑀺𑀁𑀬𑁂𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑁄 𑀫𑀕𑁆𑀕𑀺𑀢𑀩𑁆𑀩𑁄𑀢𑀺.

𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀮𑁄𑀪𑀸𑀤𑀻𑀦𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀥𑁂𑀯 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀦𑀺. 𑀢𑀲𑁆𑀫𑀸 𑀇𑀥𑁂𑀯 𑀯𑀼𑀢𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀓𑀺𑀮𑁂𑀲𑀲𑁆𑀲 𑀅𑀢𑁆𑀢𑀦𑀸 𑀲𑀳 𑀯𑀼𑀢𑁆𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀭𑀳𑀺𑀢𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀯𑀺𑀲𑀬𑀯𑀺𑀲𑁂𑀲𑁂𑀦 𑀧𑀓𑀸𑀲𑀦𑀁 𑀅𑀓𑀢𑁆𑀯𑀸 ‘‘𑀉𑀤𑁆𑀥𑀘𑁆𑀘𑀜𑁆𑀘 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀧𑀤𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀧𑀤𑀁 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀧𑀤𑁂𑀦 𑀅𑀲𑀫𑀸𑀦𑀢𑁆𑀣𑀁 𑀓𑁂𑀯𑀮𑀁 𑀫𑀮𑁂𑀦 𑀉𑀧𑀢𑀸𑀧𑀺𑀢𑀢𑀁 𑀯𑀺𑀩𑀸𑀥𑀺𑀢𑀢𑀜𑁆𑀘 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂𑀦 𑀲𑀫𑀸𑀦𑀁 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 ‘‘𑀢𑁂𑀯 𑀓𑀺𑀮𑁂𑀲𑀸 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀸 𑀘𑀸’’𑀢𑀺 𑀯𑀼𑀢𑁆𑀢𑀁.

𑁧𑁫𑁭𑁭. 𑀤𑁆𑀯𑁂 𑀢𑀬𑁄 𑀓𑀺𑀮𑁂𑀲𑀸𑀢𑀺 𑀏𑀢𑁆𑀣 ‘‘𑀤𑁆𑀯𑁂 𑀢𑀬𑁄𑀢𑀺 𑀳𑁂𑀢𑀼𑀕𑁄𑀘𑁆𑀙𑀓𑀸𑀤𑀻𑀲𑀼 𑀯𑀼𑀢𑁆𑀢𑀸𑀥𑀺𑀓𑀸𑀭𑀯𑀲𑁂𑀦 𑀭𑀼𑀴𑁆𑀳𑀺𑀬𑀸 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀬𑀤𑀺 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀭𑀼𑀴𑁆𑀳𑀺𑀬𑀸 𑀯𑀼𑀘𑁆𑀘𑁂𑀬𑁆𑀬, 𑀕𑀦𑁆𑀣𑀕𑁄𑀘𑁆𑀙𑀓𑁂 𑀘 ‘‘𑀬𑀢𑁆𑀣 𑀤𑁆𑀯𑁂 𑀢𑀬𑁄 𑀕𑀦𑁆𑀣𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀜𑁆𑀘 𑀯𑀤𑀦𑁆𑀢𑀺 ‘‘𑀬𑀢𑁆𑀣 𑀤𑁆𑀯𑁂 𑀢𑀬𑁄 𑀅𑀜𑁆𑀜𑁂𑀳𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 𑀏𑀓𑀢𑁄-𑀲𑀤𑁆𑀤𑁄 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀲𑀸𑀢𑁆𑀣𑀓𑁄, 𑀦 𑀳𑁂𑀢𑀼𑀕𑁄𑀘𑁆𑀙𑀓𑀸𑀤𑀻𑀲𑀼 𑀢𑁂𑀦 𑀯𑀺𑀦𑀸𑀧𑀺 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑀢𑁄’’𑀢𑀺, 𑀢𑀫𑁆𑀧𑀺 𑀦, 𑀳𑁂𑀢𑀼𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀦𑀸𑀦𑀸𑀉𑀧𑁆𑀧𑀢𑁆𑀢𑀺𑀬𑀁 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀕𑁆𑀕𑀳𑀡𑀦𑀺𑀯𑀸𑀭𑀡𑀢𑁆𑀣𑀢𑁆𑀢𑀸 𑀏𑀓𑀢𑁄-𑀲𑀤𑁆𑀤𑀲𑁆𑀲, 𑀢𑀲𑁆𑀫𑀸 𑀭𑀼𑀴𑁆𑀳𑀻𑀅𑀦𑁆𑀯𑀢𑁆𑀣𑀓𑀣𑀸𑀭𑁄𑀧𑀦𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀮𑁄𑀪𑁄 𑀙𑀥𑀸𑀢𑀺𑀆𑀤𑀺𑀦𑀸 𑀮𑁄𑀪𑀧𑀝𑀺𑀖𑀫𑁄𑀳𑀸𑀦𑀁 𑀅𑀜𑁆𑀜𑁂𑀳𑀺 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦𑁂𑀯 𑀢𑁂𑀲𑀫𑁆𑀧𑀺 𑀮𑁄𑀪𑀸𑀤𑀻𑀳𑀺 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑁆𑀢𑀸𑀭𑀺 𑀘 𑀲𑀳𑀲𑁆𑀲𑀸𑀦𑀺, 𑀧𑀼𑀦 𑀢𑀻𑀡𑀺 𑀲𑀢𑀸𑀦𑀺 𑀘;

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀏𑀢𑁂, 𑀧𑀤𑀸 𑀮𑀻𑀦𑀢𑁆𑀣𑀚𑁄𑀢𑀓𑀸.

𑀥𑀫𑁆𑀫𑀫𑀺𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄;

𑀆𑀦𑀦𑁆𑀤𑁄𑀇𑀢𑀺 𑀦𑀸𑀫𑁂𑀦, 𑀓𑀢𑀸 𑀕𑀦𑁆𑀣𑀸 𑀲𑀼𑀩𑀼𑀤𑁆𑀥𑀺𑀦𑀸𑀢𑀺.

𑀇𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀮𑀻𑀦𑀢𑁆𑀣𑀧𑀤𑀯𑀡𑁆𑀡𑀦𑀸

𑀥𑀫𑁆𑀫𑀲𑀗𑁆𑀕𑀡𑀻-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.