𑀤𑀼𑀓𑀦𑀺𑀤𑁆𑀤𑁂𑀲𑁄

𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸

𑁫𑁯𑁬. 𑀅𑀧𑁆𑀧𑀭𑀚𑀓𑁆𑀔𑀸𑀤𑀺𑀲𑀢𑁆𑀢𑀲𑀫𑀽𑀳𑀤𑀲𑁆𑀲𑀦𑀁 𑀩𑀼𑀤𑁆𑀥𑀘𑀓𑁆𑀔𑀼, 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀲𑀗𑁆𑀔𑀢𑀸𑀲𑀗𑁆𑀔𑀢𑀤𑀲𑁆𑀲𑀦𑀁 𑀲𑀫𑀦𑁆𑀢𑀘𑀓𑁆𑀔𑀼. ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫) 𑀏𑀯𑀫𑀸𑀤𑀺𑀦𑀸 𑀆𑀓𑀸𑀭𑁂𑀦 𑀧𑀯𑀢𑁆𑀢𑀁 𑀜𑀸𑀡𑀤𑀲𑁆𑀲𑀦𑀁 𑀜𑀸𑀡𑀘𑀓𑁆𑀔𑀼, 𑀢𑀫𑁆𑀧𑀺 𑀧𑀼𑀭𑀺𑀫𑀤𑁆𑀯𑀬𑀫𑀺𑀯 𑀓𑀸𑀫𑀸𑀯𑀘𑀭𑀁. 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁 𑀥𑀫𑁆𑀫𑀘𑀓𑁆𑀔𑀼. 𑀉𑀧𑀢𑁆𑀣𑀫𑁆𑀪𑀪𑀽𑀢𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀦𑁆𑀢𑀢𑀺𑀬𑁄 𑀲𑀫𑁆𑀪𑀸𑀭𑀸. 𑀲𑀳 𑀲𑀫𑁆𑀪𑀸𑀭𑁂𑀳𑀺 𑀲𑀲𑀫𑁆𑀪𑀸𑀭𑀁, 𑀲𑀫𑁆𑀪𑀸𑀭𑀯𑀦𑁆𑀢𑀁. 𑀲𑀫𑁆𑀪𑀯𑁄𑀢𑀺 𑀆𑀧𑁄𑀥𑀸𑀢𑀼𑀫𑁂𑀯 𑀲𑀫𑁆𑀪𑀯𑀲𑀫𑁆𑀪𑀽𑀢𑀫𑀸𑀳. 𑀲𑀡𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀸𑀬𑀢𑀦𑀫𑁂𑀯 𑀧𑀭𑀺𑀫𑀡𑁆𑀟𑀮𑀸𑀤𑀺𑀲𑀡𑁆𑀞𑀸𑀦𑀪𑀽𑀢𑀁. 𑀢𑁂𑀲𑀁 𑀧𑀦 𑀯𑀺𑀲𑀼𑀁 𑀯𑀘𑀦𑀁 𑀢𑀣𑀸𑀪𑀽𑀢𑀸𑀦𑀁 𑀅𑀢𑀣𑀸𑀪𑀽𑀢𑀸𑀦𑀜𑁆𑀘 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑁂 𑀫𑀁𑀲𑀧𑀺𑀡𑁆𑀟𑁂 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀘𑀼𑀤𑁆𑀤𑀲𑀲𑀫𑁆𑀪𑀸𑀭𑁄 𑀳𑀺 𑀫𑀁𑀲𑀧𑀺𑀡𑁆𑀟𑁄. 𑀲𑀫𑁆𑀪𑀯𑀲𑁆𑀲 𑀘𑀢𑀼𑀥𑀸𑀢𑀼𑀦𑀺𑀲𑁆𑀲𑀺𑀢𑁂𑀳𑀺 𑀲𑀳 𑀯𑀼𑀢𑁆𑀢𑀲𑁆𑀲 𑀥𑀸𑀢𑀼𑀢𑁆𑀢𑀬𑀦𑀺𑀲𑁆𑀲𑀺𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑀸𑀦𑀫𑁂𑀯 𑀯𑀸 𑀲𑀫𑁆𑀪𑀯𑀲𑀡𑁆𑀞𑀸𑀦𑀸𑀪𑀸𑀯𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺 𑀘𑀢𑀼𑀥𑀸𑀢𑀼𑀦𑀺𑀲𑁆𑀲𑀺𑀢𑀢𑀸 𑀘 𑀦 𑀯𑀺𑀭𑀼𑀚𑁆𑀛𑀢𑀺. 𑀬𑀁 𑀫𑀁𑀲𑀧𑀺𑀡𑁆𑀟𑀁 𑀲𑁂𑀢𑀸𑀤𑀺𑀦𑀸 𑀲𑀜𑁆𑀚𑀸𑀦𑀦𑁆𑀢𑁄 𑀦 𑀧𑀲𑀸𑀤𑀘𑀓𑁆𑀔𑀼𑀁 𑀲𑀜𑁆𑀚𑀸𑀦𑀸𑀢𑀺, 𑀧𑀢𑁆𑀣𑀺𑀡𑁆𑀡𑀢𑀸𑀤𑀺𑀯𑀺𑀲𑁂𑀲𑀁 𑀯𑀢𑁆𑀢𑀼𑀓𑀸𑀫𑁄 ‘‘𑀧𑀣𑀯𑀻𑀧𑀺 𑀅𑀢𑁆𑀣𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀫𑁆𑀧𑀺 𑀯𑀤𑀢𑀺.

𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂𑀢𑀺 𑀏𑀢𑁂𑀦 𑀅𑀯𑀲𑁂𑀲𑀁 𑀓𑀡𑁆𑀳𑀫𑀡𑁆𑀟𑀮𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁆𑀦𑁂𑀳𑀫𑀺𑀯 𑀲𑀢𑁆𑀢𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀸𑀳𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀢𑀁𑀦𑀺𑀲𑁆𑀲𑀺𑀢𑁂𑀳𑀺 𑀏𑀯 𑀆𑀬𑀼𑀯𑀡𑁆𑀡𑀸𑀤𑀻𑀳𑀺 𑀅𑀦𑀼𑀧𑀸𑀮𑀺𑀢𑀧𑀭𑀺𑀯𑀸𑀭𑀺𑀢𑀁 𑀢𑀺𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑁂𑀳𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀲𑀢𑁆𑀢𑀓𑁆𑀔𑀺𑀧𑀝𑀮𑀸𑀦𑀁 𑀩𑁆𑀬𑀸𑀧𑀦𑀯𑀘𑀦𑁂𑀦 𑀘 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀁 𑀘𑀓𑁆𑀔𑀼𑀲𑁆𑀲 𑀤𑀲𑁆𑀲𑁂𑀢𑀺. 𑀧𑀫𑀸𑀡𑀢𑁄 𑀊𑀓𑀸𑀲𑀺𑀭𑀫𑀢𑁆𑀢𑀦𑁆𑀢𑀺 𑀊𑀓𑀸𑀲𑀺𑀭𑀫𑀢𑁆𑀢𑁂 𑀧𑀤𑁂𑀲𑁂 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁. 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀻𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀣 𑀯𑀸 𑀫𑀦𑀽𑀢𑀺 𑀫𑀘𑁆𑀘𑁄. 𑀉𑀧𑀓𑀸𑀭𑀪𑀽𑀢𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀧𑀲𑀸𑀤𑁄 𑀢𑁂𑀲𑀼 𑀏𑀓𑀲𑁆𑀲 𑀤𑁆𑀯𑀺𑀦𑁆𑀦𑀜𑁆𑀘𑀸𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄 𑀲𑀫𑀸𑀦𑀥𑀦𑀸𑀦𑀁 𑀥𑀦𑀁 𑀯𑀺𑀬𑀸𑀢𑀺 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦. 𑀲𑀭𑀻𑀭𑀁 𑀭𑀽𑀧𑀓𑁆𑀔𑀦𑁆𑀥𑁄 𑀏𑀯. 𑀧𑀝𑀺𑀖𑀝𑁆𑀝𑀦𑀫𑁂𑀯 𑀦𑀺𑀖𑀁𑀲𑁄 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄. 𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀧𑀝𑀺𑀖𑀝𑁆𑀝𑀦𑀢𑁄 𑀚𑀸𑀢𑁄 𑀯𑀸 𑀦𑀺𑀖𑀁𑀲𑁄 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄.

𑀧𑀭𑀺𑀓𑀧𑁆𑀧𑀯𑀘𑀦𑀁 ‘‘𑀲𑀘𑁂 𑀆𑀧𑀸𑀣𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀳𑁂𑀢𑀼𑀓𑀺𑀭𑀺𑀬𑀁, ‘‘𑀧𑀲𑁆𑀲𑁂𑀬𑁆𑀬𑀸’’𑀢𑀺 𑀨𑀮𑀓𑀺𑀭𑀺𑀬𑀜𑁆𑀘 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀢𑁂𑀦 𑀧𑀭𑀺𑀓𑀧𑁆𑀧𑁂𑀦 𑀯𑀘𑀦𑀁. 𑀏𑀢𑁆𑀣 𑀘 𑀳𑁂𑀢𑀼𑀓𑀺𑀭𑀺𑀬𑀸 𑀅𑀦𑁂𑀓𑀢𑁆𑀢𑀸 𑀅𑀯𑀼𑀢𑁆𑀢𑀸𑀧𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀧𑀲𑁆𑀲𑁂 𑀯𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑀁 𑀘𑀓𑁆𑀔𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀲𑁆𑀲𑀦𑁂 𑀧𑀭𑀺𑀡𑀸𑀬𑀓𑀪𑀸𑀯𑁄 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁄. 𑀬𑀣𑀸 𑀳𑀺 𑀇𑀲𑁆𑀲𑀭𑁄 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀣𑀸’’𑀢𑀺 𑀯𑀤𑀦𑁆𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀲𑀧𑀼𑀭𑀺𑀲𑁂 𑀧𑀭𑀺𑀡𑀸𑀬𑀢𑀺 𑀧𑀯𑀢𑁆𑀢𑀬𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑁂 𑀥𑀫𑁆𑀫𑁂 𑀤𑀲𑁆𑀲𑀦𑀓𑀺𑀘𑁆𑀘𑁂 𑀆𑀡𑀸𑀧𑁂𑀦𑁆𑀢𑀁 𑀯𑀺𑀬 𑀧𑀭𑀺𑀡𑀸𑀬𑀢𑀻𑀢𑀺 𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺. 𑀘𑀓𑁆𑀔𑀢𑀻𑀢𑀺 𑀳𑀺 𑀘𑀓𑁆𑀔𑀼, 𑀬𑀣𑀸𑀯𑀼𑀢𑁆𑀢𑁂𑀦 𑀦𑀬𑁂𑀦 𑀆𑀘𑀺𑀓𑁆𑀔𑀢𑀺 𑀧𑀭𑀺𑀡𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑀯𑀺𑀲𑀫𑀸𑀦𑀺 𑀭𑀽𑀧𑀸𑀦𑀺 𑀘𑀓𑁆𑀔𑀢𑀺 𑀆𑀘𑀺𑀓𑁆𑀔𑀢𑀺, 𑀧𑀓𑀸𑀲𑁂𑀢𑀻𑀢𑀺 𑀯𑀸 𑀘𑀓𑁆𑀔𑀼. 𑀲𑀜𑁆𑀚𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀜𑁆𑀚𑀸𑀢𑀺. 𑀓𑁂 𑀲𑀜𑁆𑀚𑀸𑀬𑀦𑁆𑀢𑀺? 𑀨𑀲𑁆𑀲𑀸𑀤𑀻𑀦𑀺. 𑀢𑀣𑀸 𑀲𑀫𑁄𑀲𑀭𑀡𑀁. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀪𑀸𑀯𑀸𑀦𑀼𑀧𑀯𑀢𑁆𑀢𑀦𑁂𑀦 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺. 𑀦𑀺𑀘𑁆𑀘𑀁 𑀥𑀼𑀯𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑀲𑁆𑀲𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦. 𑀯𑀴𑀜𑁆𑀚𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀴𑀜𑁆𑀚𑀦𑀁, 𑀢𑀁𑀤𑁆𑀯𑀸𑀭𑀺𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀯𑀴𑀜𑁆𑀚𑀦𑀝𑁆𑀞𑁂𑀦.

𑁫𑁯𑁭. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀧𑀭𑀺𑀓𑀧𑁆𑀧𑁄 𑀏𑀯 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀖𑀝𑁆𑀝𑀬𑀫𑀸𑀦𑀫𑁂𑀯𑀸𑀢𑀺 𑀧𑀲𑀸𑀤𑀲𑁆𑀲 𑀅𑀪𑀺𑀫𑀼𑀔𑀪𑀸𑀯𑀯𑀺𑀲𑁂𑀲𑀁 𑀕𑀘𑁆𑀙𑀦𑁆𑀢𑀫𑁂𑀯.

𑁫𑁯𑁯. 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀯𑀘𑀦𑁂𑀦𑁂𑀯 𑀢𑁂𑀲𑀁 𑀢𑀁𑀤𑁆𑀯𑀸𑀭𑀺𑀓𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀭𑀽𑀧𑀁 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀬𑀣𑀸 𑀘 𑀢𑁂𑀲𑀁 𑀭𑀽𑀧𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀦 𑀧𑀘𑁆𑀘𑀬𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀢𑀤𑀸𑀮𑀫𑁆𑀩𑀦𑀭𑀽𑀧𑀸𑀭𑀫𑁆𑀫𑀡𑀢𑀸𑀬 𑀢𑀁𑀲𑀤𑀺𑀲𑀸𑀦𑀁 𑀫𑀦𑁄𑀥𑀸𑀢𑀼𑀆𑀤𑀻𑀦𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀸𑀦𑀺 𑀳𑀺 𑀭𑀽𑀧𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀪𑀽𑀢𑀸𑀦𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸𑀦𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦𑁂𑀯𑀸𑀢𑀺 𑀏𑀯𑀁 ‘‘𑀆𑀭𑀩𑁆𑀪𑀸’’𑀢𑀺 𑀯𑀘𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄 𑀅𑀜𑁆𑀜𑀧𑀘𑁆𑀘𑀬𑀪𑀸𑀯𑀲𑁆𑀲𑀧𑀺 𑀤𑀻𑀧𑀓𑀁, 𑀆𑀭𑀫𑁆𑀫𑀡𑀯𑀘𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲𑁂𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁬𑁦𑁦. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀼𑀡𑀸𑀢𑀺. 𑀚𑀺𑀯𑁆𑀳𑀸𑀲𑀤𑁆𑀤𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀸 𑀓𑀺𑀭𑀺𑀬𑀸 𑀲𑀸𑀬𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀲𑀸𑀬𑀦𑀝𑁆𑀞𑁂𑀦𑀸’’𑀢𑀺 𑀆𑀳. 𑀓𑀼𑀘𑁆𑀙𑀺𑀢𑀸𑀦𑀁 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄, 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀦𑀁 𑀯𑀸. 𑀓𑀸𑀬𑀸𑀬𑀢𑀦𑀲𑁆𑀲 𑀩𑁆𑀬𑀸𑀧𑀺𑀢𑀸𑀬 𑀘𑀓𑁆𑀔𑀼𑀧𑀲𑀸𑀤𑁂 𑀓𑀸𑀬𑀧𑀲𑀸𑀤𑀪𑀸𑀯𑁄𑀧𑀺 𑀅𑀢𑁆𑀣𑀺, 𑀢𑁂𑀦 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀅𑀦𑀼𑀯𑀺𑀤𑁆𑀥𑀢𑁆𑀢𑀸 𑀦𑁄 𑀩𑁆𑀬𑀸𑀧𑀺𑀢𑀸 𑀘 𑀦 𑀲𑀺𑀬𑀸, 𑀯𑀼𑀢𑁆𑀢𑀸 𑀘 𑀲𑀸. 𑀢𑀲𑁆𑀫𑀸 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀨𑁄𑀝𑁆𑀞𑀩𑁆𑀩𑀸𑀯𑀪𑀸𑀲𑀦𑀁 𑀓𑀸𑀬𑀧𑀲𑀸𑀤𑀲𑁆𑀲 𑀘 𑀭𑀽𑀧𑀸𑀯𑀪𑀸𑀲𑀦𑀁 𑀆𑀧𑀦𑁆𑀦𑀦𑁆𑀢𑀺 𑀮𑀓𑁆𑀔𑀡𑀲𑀫𑁆𑀫𑀺𑀲𑁆𑀲𑀢𑀁 𑀘𑁄𑀤𑁂𑀢𑀺. 𑀘𑀓𑁆𑀔𑀼𑀓𑀸𑀬𑀸𑀦𑀁 𑀅𑀜𑁆𑀜𑀦𑀺𑀲𑁆𑀲𑀬𑀢𑁆𑀢𑀸 𑀓𑀮𑀸𑀧𑀦𑁆𑀢𑀭𑀕𑀢𑀢𑀸𑀬 ‘‘𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁆𑀣 𑀅𑀪𑀸𑀯𑀢𑁄’’𑀢𑀺 𑀆𑀳. 𑀭𑀽𑀧𑀭𑀲𑀸𑀤𑀺𑀦𑀺𑀤𑀲𑁆𑀲𑀦𑀁 𑀲𑀫𑀸𑀦𑀦𑀺𑀲𑁆𑀲𑀬𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀲𑀪𑀸𑀯𑀸𑀦𑀼𑀧𑀕𑀫𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀪𑀸𑀯𑁄, 𑀓𑁄 𑀧𑀦 𑀯𑀸𑀤𑁄 𑀅𑀲𑀫𑀸𑀦𑀦𑀺𑀲𑁆𑀲𑀬𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑁄 𑀘 𑀲𑁄 𑀪𑀽𑀢𑀧𑁆𑀧𑀲𑀸𑀤𑁄 𑀘𑀸𑀢𑀺 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑁄. 𑀏𑀯𑀁𑀮𑀓𑁆𑀔𑀡𑀁 𑀘𑀓𑁆𑀔𑀼. 𑀭𑀽𑀧𑀸𑀪𑀺𑀖𑀸𑀢𑁄𑀢𑀺 𑀘 𑀭𑀽𑀧𑁂, 𑀭𑀽𑀧𑀲𑁆𑀲 𑀯𑀸 𑀅𑀪𑀺𑀖𑀸𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀤𑀸𑀦𑀪𑀽𑀢𑀸 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀘 𑀢𑀤𑀸𑀬𑀢𑀦𑀺𑀓𑀪𑀯𑀧𑀢𑁆𑀣𑀦𑀸𑀪𑀸𑀯𑀢𑁄 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀯𑁄𑀳𑀸𑀭𑀁 𑀅𑀭𑀳𑀢𑀻𑀢𑀺 𑀤𑀼𑀢𑀺𑀬𑁄 𑀦𑀬𑁄 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑁄. 𑀢𑀢𑁆𑀣 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀁 𑀓𑀫𑁆𑀫𑀁 𑀲𑀫𑀼𑀝𑁆𑀞𑀸𑀦𑀫𑁂𑀢𑁂𑀲𑀦𑁆𑀢𑀺 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀯𑀁𑀯𑀺𑀥𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑀮𑀓𑁆𑀔𑀡𑀁 𑀘𑀓𑁆𑀔𑀼, 𑀏𑀯𑀁𑀯𑀺𑀥𑁄 𑀯𑀸 𑀪𑀽𑀢𑀧𑁆𑀧𑀲𑀸𑀤𑁄 𑀤𑀝𑁆𑀞𑀼𑀓𑀸𑀫𑀢𑀸𑀦𑀺…𑀧𑁂… 𑀧𑀲𑀸𑀤𑁄. 𑀏𑀯𑀁𑀮𑀓𑁆𑀔𑀡𑀁 𑀘𑀓𑁆𑀔𑀼. 𑀭𑀽𑀧𑁂𑀲𑀼 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀆𑀯𑀺𑀜𑁆𑀙𑀦𑀭𑀲𑀁.

𑀓𑀸𑀬𑁄 𑀲𑀩𑁆𑀩𑁂𑀲𑀦𑁆𑀢𑀺 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄, 𑀦𑀦𑀼 𑀢𑁂𑀚𑀸𑀤𑀺𑀅𑀥𑀺𑀓𑀸𑀦𑀜𑁆𑀘 𑀪𑀽𑀢𑀸𑀦𑀁 𑀧𑀲𑀸𑀤𑀸 𑀲𑀩𑁆𑀩𑁂𑀲𑀁𑀬𑁂𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀤𑀁 𑀧𑀦 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀯𑀘𑀦𑀁 ‘‘𑀲𑀫𑀸𑀦𑀸𑀦’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀲𑁆𑀲 𑀏𑀓𑀤𑁂𑀲𑀸𑀥𑀺𑀓𑀪𑀸𑀯𑀲𑁆𑀲 𑀦𑀺𑀯𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀚𑀸𑀤𑀻𑀦𑀦𑁆𑀢𑀺 𑀧𑀤𑀻𑀧𑀲𑀗𑁆𑀔𑀸𑀢𑀲𑁆𑀲 𑀢𑁂𑀚𑀲𑁆𑀲 𑀑𑀪𑀸𑀲𑁂𑀦 𑀯𑀸𑀬𑀼𑀲𑁆𑀲 𑀲𑀤𑁆𑀤𑁂𑀦 𑀧𑀣𑀯𑀺𑀬𑀸 𑀕𑀦𑁆𑀥𑁂𑀦 𑀔𑁂𑀴𑀲𑀗𑁆𑀔𑀸𑀢𑀲𑁆𑀲 𑀉𑀤𑀓𑀲𑁆𑀲 𑀭𑀲𑁂𑀦𑀸𑀢𑀺 𑀧𑀼𑀭𑀺𑀫𑀯𑀸𑀤𑁂 𑀧𑀘𑁆𑀙𑀺𑀫𑀯𑀸𑀤𑁂 𑀘 𑀬𑀣𑀸𑀬𑁄𑀕𑀁 𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀺 𑀅𑀦𑀼𑀕𑁆𑀕𑀬𑁆𑀳𑀪𑀸𑀯𑀢𑁄 𑀭𑀽𑀧𑀸𑀤𑀺𑀕𑁆𑀕𑀳𑀡𑁂 𑀉𑀧𑀓𑀭𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀅𑀕𑁆𑀕𑀺𑀫𑁆𑀳𑀺 𑀭𑀽𑀧𑀲𑁆𑀲 𑀧𑀪𑀲𑁆𑀲𑀭𑀲𑁆𑀲 𑀯𑀸𑀬𑀼𑀫𑁆𑀳𑀺 𑀲𑀤𑁆𑀤𑀲𑁆𑀲 𑀲𑀪𑀸𑀯𑁂𑀦 𑀲𑀼𑀬𑁆𑀬𑀫𑀸𑀦𑀲𑁆𑀲 𑀧𑀣𑀯𑀺𑀬𑀸 𑀲𑀼𑀭𑀪𑀺𑀆𑀤𑀺𑀦𑁄 𑀕𑀦𑁆𑀥𑀲𑁆𑀲 𑀆𑀧𑁂 𑀘 𑀭𑀲𑀲𑁆𑀲 𑀫𑀥𑀼𑀭𑀲𑁆𑀲 𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁄 ‘‘𑀭𑀽𑀧𑀸𑀤𑀬𑁄 𑀢𑁂𑀲𑀁 𑀕𑀼𑀡𑀸’’𑀢𑀺 𑀧𑀞𑀫𑀯𑀸𑀤𑀻 𑀆𑀳. 𑀢𑀲𑁆𑀲𑁂𑀯 𑀘 ‘‘𑀇𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀭𑀫𑀸𑀳. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀤𑀼𑀢𑀺𑀬𑀯𑀸𑀤𑀺𑀲𑁆𑀲𑀧𑀺 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺.

𑀅𑀣 𑀯𑀸 𑀭𑀽𑀧𑀸𑀤𑀺𑀯𑀺𑀲𑁂𑀲𑀕𑀼𑀡𑁂𑀳𑀺 𑀢𑁂𑀚𑀆𑀓𑀸𑀲𑀧𑀣𑀯𑀻𑀆𑀧𑀯𑀸𑀬𑀽𑀳𑀺 𑀘𑀓𑁆𑀔𑀸𑀤𑀻𑀦𑀺 𑀓𑀢𑀸𑀦𑀻𑀢𑀺 𑀯𑀤𑀦𑁆𑀢𑀲𑁆𑀲 𑀓𑀡𑀸𑀤𑀲𑁆𑀲 𑀯𑀸𑀤𑀁 𑀢𑀢𑀺𑀬𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀁 𑀦𑀺𑀕𑁆𑀕𑀳𑁂𑀢𑀼𑀁 ‘‘𑀅𑀣𑀸𑀧𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑀯𑁂 𑀉𑀧𑀮𑀩𑁆𑀪𑀫𑀸𑀦𑁄𑀧𑀺 𑀕𑀦𑁆𑀥𑁄 𑀧𑀣𑀯𑀺𑀬𑀸 𑀆𑀧𑁄𑀲𑀁𑀬𑀼𑀢𑁆𑀢𑀸𑀬 𑀓𑀧𑁆𑀧𑀸𑀲𑀢𑁄 𑀯𑀺𑀲𑀤𑀺𑀲𑀸𑀬𑀸𑀢𑀺 𑀦 𑀓𑀧𑁆𑀧𑀸𑀲𑀕𑀦𑁆𑀥𑀲𑁆𑀲 𑀅𑀥𑀺𑀓𑀪𑀸𑀯𑀸𑀧𑀢𑁆𑀢𑀻𑀢𑀺 𑀘𑁂? 𑀦, 𑀅𑀦𑀪𑀺𑀪𑀽𑀢𑀢𑁆𑀢𑀸. 𑀆𑀲𑀯𑁂𑀳𑀺 𑀉𑀤𑀓𑀲𑀁𑀬𑀼𑀢𑁆𑀢𑀸 𑀧𑀣𑀯𑀻 𑀉𑀤𑀓𑁂𑀦 𑀅𑀪𑀺𑀪𑀽𑀢𑀸, 𑀦 𑀓𑀧𑁆𑀧𑀸𑀲𑀧𑀣𑀯𑀻𑀢𑀺 𑀢𑀲𑁆𑀲𑀸𑀬𑁂𑀯 𑀅𑀥𑀺𑀓𑁂𑀦 𑀕𑀦𑁆𑀥𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀉𑀡𑁆𑀳𑁄𑀤𑀓𑀲𑀜𑁆𑀜𑀼𑀢𑁆𑀢𑁄 𑀘 𑀅𑀕𑁆𑀕𑀺 𑀉𑀧𑀮𑀩𑁆𑀪𑀦𑀻𑀬𑁄 𑀫𑀳𑀦𑁆𑀢𑁄𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀨𑀲𑁆𑀲𑁄 𑀯𑀺𑀬 𑀯𑀡𑁆𑀡𑁄𑀧𑀺 𑀧𑀪𑀲𑁆𑀲𑀭𑁄 𑀉𑀧𑀮𑀩𑁆𑀪𑀺𑀢𑀩𑁆𑀩𑁄𑀢𑀺 𑀉𑀡𑁆𑀳𑁄𑀤𑀓𑀯𑀡𑁆𑀡𑀢𑁄 𑀅𑀕𑁆𑀕𑀺𑀦𑀸 𑀅𑀦𑀪𑀺𑀲𑀫𑁆𑀩𑀦𑁆𑀥𑀲𑁆𑀲 𑀲𑀻𑀢𑀼𑀤𑀓𑀲𑁆𑀲 𑀯𑀡𑁆𑀡𑁄 𑀧𑀭𑀺𑀳𑀸𑀬𑁂𑀣. 𑀢𑀲𑁆𑀫𑀸𑀢𑀺 𑀏𑀢𑀲𑁆𑀲𑀼𑀪𑀬𑀲𑁆𑀲 𑀅𑀪𑀸𑀯𑀸. 𑀢𑀤𑀪𑀸𑀯𑁂𑀦 𑀳𑀺 𑀭𑀽𑀧𑀸𑀤𑀻𑀦𑀁 𑀢𑁂𑀚𑀸𑀤𑀺𑀯𑀺𑀲𑁂𑀲𑀕𑀼𑀡𑀢𑀸 𑀦𑀺𑀯𑀢𑁆𑀢𑀺𑀢𑀸, 𑀢𑀁𑀦𑀺𑀯𑀢𑁆𑀢𑀦𑁂𑀦 ‘‘𑀢𑁂𑀚𑀸𑀤𑀻𑀦𑀁 𑀕𑀼𑀡𑁂𑀳𑀺 𑀭𑀽𑀧𑀸𑀤𑀻𑀳𑀺 𑀅𑀦𑀼𑀕𑁆𑀕𑀬𑁆𑀳𑀪𑀸𑀯𑀢𑁄’’𑀢𑀺 𑀇𑀤𑀁 𑀓𑀸𑀭𑀡𑀁 𑀦𑀺𑀯𑀢𑁆𑀢𑀺𑀢𑀦𑁆𑀢𑀺. 𑀏𑀯𑀁 𑀧𑀭𑀫𑁆𑀧𑀭𑀸𑀬 𑀉𑀪𑀬𑀸𑀪𑀸𑀯𑁄 𑀯𑀺𑀲𑁂𑀲𑀓𑀧𑁆𑀧𑀦𑀧𑁆𑀧𑀳𑀸𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸 𑀧𑀳𑀸𑀬𑁂𑀣𑁂𑀢’’𑀦𑁆𑀢𑀺𑀆𑀤𑀺. 𑀏𑀓𑀓𑀮𑀸𑀧𑁂𑀧𑀺 𑀭𑀽𑀧𑀭𑀲𑀸𑀤𑀬𑁄 𑀯𑀺𑀲𑀤𑀺𑀲𑀸, 𑀓𑁄 𑀧𑀦 𑀯𑀸𑀤𑁄 𑀦𑀸𑀦𑀸𑀓𑀮𑀸𑀧𑁂 𑀘𑀓𑁆𑀔𑀸𑀤𑀬𑁄 𑀪𑀽𑀢𑀯𑀺𑀲𑁂𑀲𑀸𑀪𑀸𑀯𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 𑀭𑀽𑀧𑀭𑀲𑀸𑀤𑀺𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁.

𑀬𑀤𑀺 𑀪𑀽𑀢𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀓𑀺𑀁 𑀧𑀦 𑀘𑀓𑁆𑀔𑀸𑀤𑀺𑀯𑀺𑀲𑁂𑀲𑀲𑁆𑀲 𑀓𑀸𑀭𑀡𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀧𑀜𑁆𑀘𑀸𑀬𑀢𑀦𑀺𑀓𑀢𑁆𑀢𑀪𑀸𑀯𑀧𑀢𑁆𑀣𑀦𑀸𑀦𑀺𑀧𑁆𑀨𑀦𑁆𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑀳𑁂𑀢𑀼𑀢𑁆𑀢𑀸 ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀸𑀥𑀸𑀭𑀡’’𑀦𑁆𑀢𑀺 𑀘 ‘‘𑀓𑀫𑁆𑀫𑀯𑀺𑀲𑁂𑀲𑁄’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀁 𑀬𑁂𑀦 𑀯𑀺𑀲𑁂𑀲𑁂𑀦 𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀬𑁄, 𑀢𑁂𑀦𑁂𑀯 𑀲𑁄𑀢𑀲𑁆𑀲 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑀸𑀪𑀸𑀯𑀧𑁆𑀧𑀢𑁆𑀢𑀺𑀢𑁄. ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀕𑁆𑀕𑀢𑀸 𑀏𑀓𑀸 𑀘𑁂𑀢𑀦𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁭𑁮) 𑀯𑀘𑀦𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀏𑀓𑀸 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦𑀸𑀦𑀸𑀘𑁂𑀢𑀦𑀸𑀬 𑀳𑀺 𑀢𑀤𑀸 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀁 𑀲𑀢𑀺 𑀧𑀭𑀺𑀢𑁆𑀢𑁂𑀦 𑀘 𑀫𑀳𑀕𑁆𑀕𑀢𑁂𑀦 𑀘 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀝𑀢𑁆𑀢𑀸𑀭𑀽𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦 𑀘𑁂𑀓𑀸 𑀧𑀝𑀺𑀲𑀦𑁆𑀥𑀺 𑀅𑀦𑁂𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀳𑁄𑀢𑀻𑀢𑀺 𑀲𑀺𑀤𑁆𑀥𑀫𑁂𑀓𑁂𑀦 𑀓𑀫𑁆𑀫𑁂𑀦 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀅𑀦𑀮𑁆𑀮𑀻𑀦𑁄 𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀮𑁆𑀮𑀻𑀦𑀦𑀺𑀲𑁆𑀲𑀬𑁄, 𑀭𑀽𑀧𑀲𑀤𑁆𑀤𑀲𑀗𑁆𑀔𑀸𑀢𑁄 𑀯𑀺𑀲𑀬𑁄. 𑀕𑀦𑁆𑀥𑀭𑀲𑀸𑀦𑀁 𑀦𑀺𑀲𑁆𑀲𑀬𑀸 𑀖𑀸𑀦𑀚𑀺𑀯𑁆𑀳𑀸𑀦𑀺𑀲𑁆𑀲𑀬𑁂 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀢𑁂 𑀦𑀺𑀲𑁆𑀲𑀬𑀯𑀲𑁂𑀦 𑀅𑀮𑁆𑀮𑀻𑀦𑀸, 𑀨𑁄𑀝𑁆𑀞𑀩𑁆𑀩𑀁 𑀲𑀬𑀁 𑀓𑀸𑀬𑀦𑀺𑀲𑁆𑀲𑀬𑀅𑀮𑁆𑀮𑀻𑀦𑀁 𑀪𑀽𑀢𑀢𑁆𑀢𑀬𑀢𑁆𑀢𑀸. 𑀤𑀽𑀭𑁂…𑀧𑁂… 𑀲𑀫𑁆𑀧𑀢𑁆𑀢𑁄 𑀏𑀯 𑀦𑀸𑀫 𑀧𑀝𑀺𑀖𑀝𑁆𑀝𑀦𑀦𑀺𑀖𑀁𑀲𑀚𑀦𑀓𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀤𑁆𑀤𑁄 𑀧𑀦 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀯𑀸𑀬𑀼 𑀯𑀺𑀬 𑀆𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑀬𑀯𑀲𑁂𑀦 𑀲𑁄𑀢𑀦𑀺𑀲𑁆𑀲𑀬𑁂 𑀅𑀮𑁆𑀮𑀻𑀬𑀺𑀢𑁆𑀯𑀸 𑀲𑁄𑀢𑀁 𑀖𑀝𑁆𑀝𑁂𑀢𑁆𑀯𑀸 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀦𑁆𑀢𑁄 𑀲𑀡𑀺𑀓𑀁 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀧𑀦 𑀲𑀢𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀓𑀤𑀸𑀘𑀺𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀲𑀺𑀬𑀸. 𑀦 𑀳𑀺 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺 𑀉𑀧𑀧𑀚𑁆𑀚𑀢𑀻𑀢𑀺.

𑀘𑀺𑀭𑁂𑀦 𑀲𑀼𑀬𑁆𑀬𑁂𑀬𑁆𑀬𑀸𑀢𑀺 𑀓𑀲𑁆𑀫𑀸 𑀏𑀢𑀁 𑀯𑀼𑀢𑁆𑀢𑀁, 𑀦𑀦𑀼 𑀤𑀽𑀭𑁂 𑀞𑀺𑀢𑁂𑀳𑀺 𑀭𑀚𑀓𑀸𑀤𑀺𑀲𑀤𑁆𑀤𑀸 𑀘𑀺𑀭𑁂𑀦 𑀲𑀼𑀬𑁆𑀬𑀦𑁆𑀢𑀻𑀢𑀺? 𑀦, 𑀤𑀽𑀭𑀸𑀲𑀦𑁆𑀦𑀸𑀦𑀁 𑀬𑀣𑀸𑀧𑀸𑀓𑀝𑁂 𑀲𑀤𑁆𑀤𑁂 𑀕𑀳𑀡𑀯𑀺𑀲𑁂𑀲𑀢𑁄. 𑀬𑀣𑀸 𑀳𑀺 𑀤𑀽𑀭𑀸𑀲𑀦𑁆𑀦𑀸𑀦𑀁 𑀯𑀘𑀦𑀲𑀤𑁆𑀤𑁂 𑀬𑀣𑀸 𑀧𑀸𑀓𑀝𑀻𑀪𑀽𑀢𑁂 𑀕𑀳𑀡𑀯𑀺𑀲𑁂𑀲𑀢𑁄 𑀆𑀓𑀸𑀭𑀯𑀺𑀲𑁂𑀲𑀸𑀦𑀁 𑀅𑀕𑁆𑀕𑀳𑀡𑀁 𑀕𑀳𑀡𑀜𑁆𑀘 𑀳𑁄𑀢𑀺, 𑀏𑀯𑀁 𑀭𑀚𑀓𑀸𑀤𑀺𑀲𑀤𑁆𑀤𑁂𑀧𑀺 𑀆𑀲𑀦𑁆𑀦𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀬𑀸𑀯𑀸𑀯𑀲𑀸𑀦𑀸 𑀓𑀫𑁂𑀦 𑀧𑀸𑀓𑀝𑀻𑀪𑀽𑀢𑁂 𑀤𑀽𑀭𑀲𑁆𑀲 𑀘𑀸𑀯𑀲𑀸𑀦𑁂 𑀫𑀚𑁆𑀛𑁂 𑀯𑀸 𑀧𑀺𑀡𑁆𑀟𑀯𑀲𑁂𑀦 𑀧𑀯𑀢𑁆𑀢𑀺𑀧𑀸𑀓𑀝𑀻𑀪𑀽𑀢𑁂 𑀦𑀺𑀘𑁆𑀙𑀬𑀕𑀳𑀡𑀸𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀧𑀯𑀢𑁆𑀢𑀸𑀦𑀁 𑀯𑀺𑀲𑁂𑀲𑀢𑁄 𑀮𑀳𑀼𑀓𑀁 𑀲𑀼𑀢𑁄 𑀘𑀺𑀭𑁂𑀦 𑀲𑀼𑀢𑁄𑀢𑀺 𑀅𑀪𑀺𑀫𑀸𑀦𑁄 𑀳𑁄𑀢𑀺. 𑀲𑁄 𑀧𑀦 𑀲𑀤𑁆𑀤𑁄 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀁 𑀦𑀺𑀲𑁆𑀲𑀺𑀢𑁄𑀯 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀲𑁄𑀢𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀤𑀽𑀭𑁂 𑀞𑀺𑀢𑁄 𑀧𑀦 𑀲𑀤𑁆𑀤𑁄 𑀅𑀜𑁆𑀜𑀢𑁆𑀣 𑀧𑀝𑀺𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀸 𑀪𑀸𑀚𑀦𑀸𑀤𑀺𑀘𑀮𑀦𑀲𑁆𑀲 𑀘 𑀅𑀬𑁄𑀓𑀦𑁆𑀢𑁄 𑀯𑀺𑀬 𑀅𑀬𑁄𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀯𑀸 𑀖𑀡𑁆𑀝𑀸𑀪𑀺𑀖𑀸𑀢𑀸𑀦𑀼𑀚𑀸𑀦𑀺 𑀪𑀽𑀢𑀸𑀦𑀺 𑀅𑀦𑀼𑀭𑀯𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀖𑀝𑁆𑀝𑀦𑀲𑀪𑀸𑀯𑀸𑀦𑀺, 𑀏𑀯𑀁 𑀖𑀝𑁆𑀝𑀦𑀸𑀦𑀼𑀚𑀸𑀦𑀺 𑀬𑀸𑀯 𑀲𑁄𑀢𑀧𑁆𑀧𑀲𑀸𑀤𑀸 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀆𑀕𑀢𑀸𑀦𑀺 𑀪𑀽𑀢𑀸𑀦𑀺 𑀖𑀝𑁆𑀝𑀦𑀲𑀪𑀸𑀯𑀸𑀦𑁂𑀯𑀸𑀢𑀺 𑀢𑀁𑀦𑀺𑀲𑁆𑀲𑀺𑀢𑁄 𑀲𑀤𑁆𑀤𑁄 𑀦𑀺𑀲𑁆𑀲𑀬𑀯𑀲𑁂𑀦 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀖𑀝𑁆𑀝𑁂𑀢𑁆𑀯𑀸 𑀲𑀡𑀺𑀓𑀁 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑁄. 𑀅𑀲𑀼𑀓𑀤𑀺𑀲𑀸𑀬 𑀦𑀸𑀫𑀸𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀓𑀲𑁆𑀫𑀸? 𑀲𑁄𑀢𑀧𑁆𑀧𑀤𑁂𑀲𑀲𑁆𑀲𑁂𑀯 𑀲𑀤𑁆𑀤𑀲𑁆𑀲 𑀕𑀳𑀡𑀢𑁄.

𑀯𑀺𑀲𑀫𑁂 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀯𑀺𑀲𑀫𑀚𑁆𑀛𑀸𑀲𑀬𑁄, 𑀅𑀚𑁆𑀛𑀸𑀲𑀬𑀭𑀳𑀺𑀢𑀫𑁆𑀧𑀺 𑀘𑀓𑁆𑀔𑀼 𑀯𑀺𑀲𑀫𑀦𑀺𑀦𑁆𑀦𑀢𑁆𑀢𑀸 𑀯𑀺𑀲𑀫𑀚𑁆𑀛𑀸𑀲𑀬𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀯𑀺𑀲𑀫𑀚𑁆𑀛𑀸𑀲𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀫𑀢𑁄 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀘𑀓𑁆𑀔𑀼 ‘‘𑀯𑀺𑀲𑀫𑀚𑁆𑀛𑀸𑀲𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀡𑁆𑀡𑀓𑀽𑀧𑀙𑀺𑀤𑁆𑀤𑁂𑀬𑁂𑀯 𑀧𑀯𑀢𑁆𑀢𑀦𑀢𑁄 𑀆𑀭𑀫𑁆𑀫𑀡𑀕𑁆𑀕𑀳𑀡𑀳𑁂𑀢𑀼𑀢𑁄 𑀘 𑀢𑀢𑁆𑀣𑁂𑀯 ‘‘𑀅𑀚𑁆𑀛𑀸𑀲𑀬𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀲𑁄𑀢𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀤𑁆𑀤𑀲𑀯𑀦𑁂. 𑀅𑀚𑀝𑀸𑀓𑀸𑀲𑁄𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀅𑀦𑁆𑀢𑁄𑀮𑁂𑀡𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑁄 ‘‘𑀓𑀺𑀁 𑀏𑀢𑀸𑀬 𑀥𑀫𑁆𑀫𑀢𑀸𑀬𑀸’’𑀢𑀺𑀆𑀤𑀺𑀫𑀯𑁄𑀘.

𑀯𑀸𑀢𑀽𑀧𑀦𑀺𑀲𑁆𑀲𑀬𑁄 𑀕𑀦𑁆𑀥𑁄 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀯𑀸𑀢𑀽𑀧𑀦𑀺𑀲𑁆𑀲𑀬𑀕𑀦𑁆𑀥𑀕𑁄𑀘𑀭𑀁. 𑀏𑀢𑁆𑀣 𑀘 𑀕𑀦𑁆𑀥𑀕𑁆𑀕𑀳𑀡𑀲𑁆𑀲 𑀯𑀸𑀢𑁄 𑀉𑀧𑀦𑀺𑀲𑁆𑀲𑀬𑁄, 𑀢𑀩𑁆𑀩𑁄𑀳𑀸𑀭𑁂𑀦 𑀧𑀦 𑀕𑀦𑁆𑀥𑁄 ‘‘𑀯𑀸𑀢𑀽𑀧𑀦𑀺𑀲𑁆𑀲𑀬𑁄’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀯𑀸𑀢𑁄 𑀏𑀯 𑀉𑀧𑀦𑀺𑀲𑁆𑀲𑀬𑁄 𑀯𑀸𑀢𑀽𑀧𑀦𑀺𑀲𑁆𑀲𑀬𑁄. 𑀓𑀲𑁆𑀲𑀸𑀢𑀺? 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲. 𑀲𑁄 𑀲𑀳𑀓𑀸𑀭𑀻𑀧𑀘𑁆𑀘𑀬𑀦𑁆𑀢𑀭𑀪𑀽𑀢𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸𑀢𑀽𑀧𑀦𑀺𑀲𑁆𑀲𑀬𑁄, 𑀕𑀦𑁆𑀥𑁄 𑀧𑀘𑁆𑀘𑀬𑁄.

𑀆𑀧𑁄 𑀘 𑀲𑀳𑀓𑀸𑀭𑀻𑀧𑀘𑁆𑀘𑀬𑀦𑁆𑀢𑀭𑀪𑀽𑀢𑁄 𑀔𑁂𑀴𑀸𑀤𑀺𑀓𑁄. 𑀢𑀣𑀸 𑀧𑀣𑀯𑀻. 𑀕𑀳𑁂𑀢𑀩𑁆𑀩𑀲𑁆𑀲 𑀳𑀺 𑀨𑁄𑀝𑁆𑀞𑀩𑁆𑀩𑀲𑁆𑀲 𑀉𑀧𑁆𑀧𑀻𑀴𑀺𑀬𑀫𑀸𑀦𑀲𑁆𑀲 𑀆𑀥𑀸𑀭𑀪𑀽𑀢𑀸 𑀧𑀣𑀯𑀻 𑀓𑀸𑀬𑀲𑁆𑀲 𑀘 𑀨𑁄𑀝𑁆𑀞𑀩𑁆𑀩𑁂𑀦 𑀉𑀧𑁆𑀧𑀻𑀴𑀺𑀬𑀫𑀸𑀦𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀆𑀥𑀸𑀭𑀪𑀽𑀢𑀸 𑀲𑀩𑁆𑀩𑀤𑀸 𑀨𑁄𑀝𑁆𑀞𑀩𑁆𑀩𑀕𑀳𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑁄𑀢𑀺. 𑀉𑀧𑁆𑀧𑀻𑀴𑀦𑁂𑀦 𑀧𑀦 𑀯𑀺𑀦𑀸 𑀨𑁄𑀝𑁆𑀞𑀩𑁆𑀩𑀕𑀳𑀡𑁂 𑀓𑀸𑀬𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀧𑀣𑀯𑀻 𑀉𑀧𑀦𑀺𑀲𑁆𑀲𑀬𑁄𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑀤𑀸𑀧𑀺 𑀘 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀬𑀼𑀢𑁆𑀢𑁄 𑀏𑀯.

𑀧𑀜𑁆𑀘𑀯𑀡𑁆𑀡𑀸𑀦𑀦𑁆𑀢𑀺 𑀯𑀘𑀦𑀁 𑀢𑀤𑀸𑀥𑀸𑀭𑀸𑀦𑀁 𑀲𑀼𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀧𑀜𑁆𑀘𑀧𑁆𑀧𑀓𑀸𑀭𑀸 𑀧𑀜𑁆𑀘𑀯𑀡𑁆𑀡𑀸. 𑀏𑀓𑀦𑁆𑀢𑀢𑁄𑀢𑀺 𑀇𑀤𑀁 𑀲𑀩𑁆𑀩𑀤𑀸 𑀉𑀧𑁆𑀧𑀻𑀴𑀦𑁂𑀦 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀁 𑀓𑀮𑀸𑀧𑀦𑁆𑀢𑀭𑀭𑀽𑀧𑀸𑀦𑀁 𑀲𑀩𑁆𑀪𑀸𑀯𑀸 𑀢𑁂𑀲𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀳𑀺 𑀢𑀸𑀦𑀺 𑀏𑀓𑀦𑁆𑀢𑁂𑀦 𑀅𑀯𑀺𑀦𑀺𑀪𑀼𑀢𑁆𑀢𑀸𑀦𑀺 𑀓𑀮𑀸𑀧𑀦𑁆𑀢𑀭𑀕𑀢𑀢𑁆𑀢𑀸𑀢𑀺.

𑁬𑁧𑁬. 𑀯𑀡𑁆𑀡𑀦𑀺𑀪𑀸𑀢𑀺 𑀭𑀽𑀧𑀸𑀬𑀢𑀦𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀢𑀤𑁂𑀯 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀦𑀺𑀤𑀲𑁆𑀲𑀦’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀲𑁆𑀫𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀭𑀽𑀧𑀸𑀦𑀁 𑀦𑀻𑀮𑀸𑀤𑀻𑀦𑀁 𑀨𑀼𑀲𑀺𑀢𑁆𑀯𑀸 𑀅𑀚𑀸𑀦𑀺𑀢𑀩𑁆𑀩𑀢𑁄 𑀤𑀻𑀖𑀸𑀤𑀻𑀦𑀜𑁆𑀘 𑀨𑀼𑀲𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀢𑁄 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀻𑀖𑀁 𑀭𑀽𑀧𑀸𑀬𑀢𑀦𑀁. 𑀢𑀁 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀤𑀻𑀖𑀸𑀤𑀺𑀲𑀦𑁆𑀦𑀺𑀯𑁂𑀲𑀁 𑀪𑀽𑀢𑀲𑀫𑀼𑀤𑀸𑀬𑀁 𑀦𑀺𑀲𑁆𑀲𑀸𑀬. 𑀢𑀣𑀸 𑀢𑀣𑀸 𑀞𑀺𑀢𑀦𑁆𑀢𑀺 𑀤𑀻𑀖𑀸𑀤𑀺𑀲𑀦𑁆𑀦𑀺𑀯𑁂𑀲𑁂𑀦 𑀞𑀺𑀢𑀁 𑀯𑀡𑁆𑀡𑀲𑀫𑀼𑀤𑀸𑀬𑀪𑀽𑀢𑀁 𑀭𑀽𑀧𑀸𑀬𑀢𑀦𑀫𑁂𑀯 𑀤𑀻𑀖𑀸𑀤𑀺𑀯𑁄𑀳𑀸𑀭𑁂𑀦 𑀪𑀸𑀲𑀺𑀢𑀁. 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑀁 𑀏𑀓𑀲𑁆𑀫𑀺𑀁 𑀇𑀢𑀭𑀲𑁆𑀲 𑀅𑀪𑀸𑀯𑀸. 𑀯𑀺𑀲𑀬𑀕𑁄𑀘𑀭𑀸𑀦𑀁 𑀯𑀺𑀲𑁂𑀲𑁄 𑀅𑀦𑀜𑁆𑀜𑀢𑁆𑀣𑀪𑀸𑀯𑁄 𑀢𑀩𑁆𑀩𑀳𑀼𑀮𑀘𑀸𑀭𑀺𑀢𑀸 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲.

𑁬𑁨𑁦. 𑀪𑁂𑀭𑀺𑀲𑀤𑁆𑀤𑀸𑀤𑀻𑀦𑀜𑁆𑀘 𑀯𑀸𑀤𑀺𑀢𑀲𑀤𑁆𑀤𑀢𑁆𑀢𑀸 ‘‘𑀯𑀼𑀢𑁆𑀢𑀸𑀯𑀲𑁂𑀲𑀸𑀦’’𑀦𑁆𑀢𑀺 𑀆𑀳. 𑀅𑀫𑀦𑀼𑀲𑁆𑀲𑀯𑀘𑀦𑁂𑀦 𑀦 𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂 𑀧𑀸𑀡𑀺𑀦𑁄 𑀏𑀯 𑀕𑀳𑀺𑀢𑀸, 𑀅𑀣 𑀔𑁄 𑀓𑀝𑁆𑀞𑀸𑀤𑀬𑁄𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑁂𑀲𑁄 𑀲𑀩𑁆𑀩𑁄𑀧𑀻’’𑀢𑀺 𑀆𑀳. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀢𑁆𑀣𑀼𑀯𑀺𑀲𑁂𑀲𑀓𑀺𑀢𑁆𑀢𑀦𑀯𑀲𑁂𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑁄 𑀢𑀣𑀸 𑀓𑀺𑀢𑁆𑀢𑁂𑀢𑀩𑁆𑀩𑁄 𑀬𑁂 𑀯𑀸 𑀧𑀦𑀸𑀢𑀺 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁨𑁪. 𑀯𑀺𑀲𑁆𑀲𑀕𑀦𑁆𑀥𑁄𑀢𑀺 𑀯𑀺𑀭𑀽𑀧𑁄 𑀫𑀁𑀲𑀸𑀤𑀺𑀕𑀦𑁆𑀥𑁄. 𑀮𑀫𑁆𑀩𑀺𑀮𑀦𑁆𑀢𑀺 𑀫𑀥𑀼𑀭𑀫𑁆𑀩𑀺𑀮𑀁.

𑁬𑁩𑁨. 𑀲𑀜𑁆𑀚𑀸𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀜𑁆𑀚𑀸𑀦𑀦𑀁, 𑀉𑀧𑀮𑀓𑁆𑀔𑀡𑀁. 𑀲𑀓𑁂𑀦 𑀲𑀓𑁂𑀦 𑀓𑀫𑁆𑀫𑀘𑀺𑀢𑁆𑀢𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀲𑀫𑀼𑀝𑁆𑀞𑀺𑀢𑀸𑀦𑀺𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀲𑀭𑀻𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀢𑀁𑀢𑀤𑀸𑀓𑀸𑀭𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀲𑀫𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀏𑀯 𑀘 𑀅𑀥𑀺𑀧𑀢𑀺𑀪𑀸𑀯𑀸 𑀏𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀢𑀸 𑀯𑀼𑀢𑁆𑀢𑀸, 𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀲𑀦𑁆𑀢𑀸𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀭𑀽𑀧𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀣𑀸 𑀅𑀦𑀼𑀧𑁆𑀧𑀸𑀤𑀦𑀢𑁄 𑀇𑀢𑁆𑀣𑀺𑀕𑁆𑀕𑀳𑀡𑀲𑁆𑀲 𑀘 𑀢𑁂𑀲𑀁 𑀭𑀽𑀧𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀦 𑀪𑀸𑀯𑀤𑀲𑀓𑁂𑀧𑀺 𑀭𑀽𑀧𑀸𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀚𑀦𑀓𑀁, 𑀦𑀸𑀧𑀺 𑀅𑀦𑀼𑀧𑀸𑀮𑀓𑀁 𑀉𑀧𑀢𑁆𑀣𑀫𑁆𑀪𑀓𑀁 𑀯𑀸, 𑀦 𑀘 𑀅𑀜𑁆𑀜𑀓𑀮𑀸𑀧𑀭𑀽𑀧𑀸𑀦𑀁, 𑀢𑀲𑁆𑀫𑀸 𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀲𑀓𑀮𑀸𑀧𑀭𑀽𑀧𑀸𑀦𑀁 𑀆𑀳𑀸𑀭𑁄 𑀯𑀺𑀬 𑀯𑀸 𑀓𑀮𑀸𑀧𑀦𑁆𑀢𑀭𑀭𑀽𑀧𑀸𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀦 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀧𑀺. 𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑁂𑀲𑀼 𑀭𑀽𑀧𑁂𑀲𑀼 𑀭𑀽𑀧𑀸𑀬𑀢𑀦𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀮𑀺𑀗𑁆𑀕𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸.

𑁬𑁩𑁩. 𑀉𑀪𑀬𑀫𑁆𑀧𑀺…𑀧𑁂… 𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀲𑀼𑀕𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀕𑁆𑀕𑀢𑀺𑀬𑀜𑁆𑀳𑀺 𑀧𑀝𑀺𑀲𑀦𑁆𑀥𑀺 𑀅𑀓𑀼𑀲𑀮𑁂𑀦𑁂𑀯𑀸𑀢𑀺 𑀢𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀪𑀸𑀯𑁄𑀧𑀺 𑀅𑀓𑀼𑀲𑀮𑁂𑀦𑁂𑀯 𑀪𑀯𑁂𑀬𑁆𑀬, 𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀬 𑀧𑀯𑀢𑁆𑀢𑁂𑀧𑀻𑀢𑀺. 𑀢𑀬𑀺𑀤𑀁 𑀤𑁆𑀯𑀬𑀁 𑀬𑀲𑁆𑀫𑀸 𑀲𑀦𑁆𑀢𑀸𑀦𑁂 𑀲𑀳 𑀦 𑀧𑀯𑀢𑁆𑀢𑀢𑀺 ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮), 𑀢𑀲𑁆𑀫𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲𑀧𑀺 𑀏𑀓𑀫𑁂𑀯𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑁬𑁩𑁫. 𑀏𑀓𑀦𑁆𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀓𑀸𑀬𑀯𑁄𑀳𑀸𑀭𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀽’’𑀢𑀺 (𑀥. 𑀧. 𑁩𑁬𑁧; 𑀲𑀁. 𑀦𑀺. 𑁧.𑁧𑁧𑁬) 𑀲𑀸𑀥𑀓𑀲𑀼𑀢𑁆𑀢𑀁 𑀆𑀳𑀝𑀁. 𑀪𑀸𑀯𑀲𑁆𑀲 𑀕𑀫𑀦𑀁 𑀧𑀓𑀸𑀲𑀦𑀁 𑀘𑁄𑀧𑀦𑀁. 𑀣𑀫𑁆𑀪𑀦𑀸𑀢𑀺 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀣𑀫𑁆𑀪𑀦𑀸𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀗𑁆𑀕𑀫𑀯𑀸𑀢𑀸𑀤𑀬𑁄 𑀯𑀺𑀬 𑀳𑀺 𑀬𑁄 𑀯𑀸𑀢𑀸𑀥𑀺𑀓𑁄 𑀓𑀮𑀸𑀧𑁄, 𑀢𑀢𑁆𑀣 𑀪𑀽𑀢𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀆𑀓𑀸𑀭𑀢𑀸 𑀳𑁄𑀢𑀻𑀢𑀺. 𑀢𑁂𑀦𑁂𑀯 ‘‘𑀓𑀸𑀬𑀁 𑀣𑀫𑁆𑀪𑁂𑀢𑁆𑀯𑀸 𑀣𑀤𑁆𑀥𑀁 𑀓𑀭𑁄𑀢𑀻𑀢𑀺 𑀣𑀫𑁆𑀪𑀦𑀸’’𑀢𑀺 𑀯𑀸𑀬𑁄𑀥𑀸𑀢𑀼𑀓𑀺𑀘𑁆𑀘𑀯𑀲𑁂𑀦 𑀯𑀺𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀢𑁄 𑀏𑀯 𑀘 ‘‘𑀯𑀸𑀬𑁄𑀥𑀸𑀢𑀼𑀬𑀸 𑀆𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸 ‘‘𑀧𑀣𑀯𑀻𑀥𑀸𑀢𑀼𑀬𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀧𑀣𑀯𑀻𑀥𑀸𑀢𑀼𑀅𑀥𑀺𑀓𑀪𑀽𑀢𑀯𑀺𑀓𑀸𑀭𑀢𑁄.

𑁬𑁩𑁬. 𑀧𑀪𑁂𑀤𑀕𑀢𑀸 𑀯𑀸𑀘𑀸 𑀏𑀯𑀸𑀢𑀺 𑀢𑀺𑀲𑁆𑀲 𑀨𑀼𑀲𑁆𑀲𑀸𑀢𑀺 𑀧𑀪𑁂𑀤𑀕𑀢𑀸. 𑀅𑀣 𑀯𑀸 𑀯𑀘𑀻𑀲𑀗𑁆𑀔𑀸𑀭𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀸 𑀲𑀯𑀦𑀯𑀺𑀲𑀬𑀪𑀸𑀯𑀁 𑀅𑀦𑀼𑀧𑀦𑀻𑀢𑀢𑀸𑀬 𑀅𑀪𑀺𑀦𑁆𑀦𑀸 𑀢𑀩𑁆𑀪𑀸𑀯𑀁 𑀦𑀻𑀬𑀫𑀸𑀦𑀸 𑀯𑀸𑀘𑀸 ‘‘𑀯𑀘𑀻𑀪𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀭𑀺𑀬𑀸𑀧𑀣𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀻𑀢𑀺 𑀬𑀣𑀸𑀧𑀯𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺. 𑀬𑀣𑀸 𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑁂 𑀪𑀯𑀗𑁆𑀕𑁂 𑀯𑀢𑁆𑀢𑀫𑀸𑀦𑁂 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺 𑀧𑀯𑀺𑀝𑁆𑀞𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺, 𑀦 𑀏𑀯𑀁 ‘‘𑀤𑁆𑀯𑀢𑁆𑀢𑀺𑀁𑀲 𑀙𑀩𑁆𑀩𑀻𑀲𑀸’’𑀢𑀺 𑀯𑀼𑀢𑁆𑀢𑁂𑀲𑀼 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼. 𑀢𑁂𑀲𑀼 𑀧𑀦 𑀯𑀢𑁆𑀢𑀫𑀸𑀦𑁂𑀲𑀼 𑀅𑀗𑁆𑀕𑀸𑀦𑀺 𑀉𑀧𑀢𑁆𑀣𑀤𑁆𑀥𑀸𑀦𑀺 𑀬𑀣𑀸𑀧𑀯𑀢𑁆𑀢𑀺𑀭𑀺𑀬𑀸𑀧𑀣𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁, ‘‘𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁, 𑀬𑁂 𑀘 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁮𑁮) 𑀧𑀦 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑁆𑀲 𑀕𑀩𑁆𑀪𑀕𑀫𑀦𑀸𑀤𑀺𑀯𑀺𑀦𑀺𑀩𑀤𑁆𑀥𑀸𑀪𑀸𑀯𑁂𑀦 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀁 𑀅𑀢𑁆𑀣𑀺, 𑀦 𑀘 𑀬𑀼𑀢𑁆𑀢𑀁 ‘‘𑀘𑀼𑀢𑁄 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘𑀲𑁆𑀲 𑀧𑀯𑀢𑁆𑀢𑀢𑀻’’𑀢𑀺, 𑀦𑀸𑀧𑀺 ‘‘𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀧𑀸𑀴𑀺 𑀅𑀢𑁆𑀣𑀻𑀢𑀺.

𑁬𑁩𑁭. 𑀦 𑀓𑀲𑁆𑀲𑀢𑀻𑀢𑀺 𑀦 𑀯𑀺𑀮𑁂𑀔𑀺𑀬𑀢𑀺. 𑀕𑀢𑀦𑁆𑀢𑀺 𑀯𑀺𑀜𑁆𑀜𑀸𑀢𑀁. 𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻𑀢𑀺 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑁂𑀯 𑀅𑀲𑀫𑁆𑀨𑀼𑀝𑁆𑀞𑀁. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀳𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑀲𑀫𑁆𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀅𑀜𑁆𑀜𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑁄 𑀦 𑀲𑀺𑀬𑀸 𑀢𑁂𑀲𑀁 𑀪𑀽𑀢𑀸𑀦𑀁 𑀩𑁆𑀬𑀸𑀧𑀺𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀩𑁆𑀬𑀸𑀧𑀺𑀢𑀸 𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸𑀢𑀺.

𑁬𑁩𑁮. 𑀮𑀳𑀼𑀢𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀚𑀳𑀦𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀸 𑀯𑀼𑀢𑁆𑀢𑀸𑀢𑀺 𑀢𑀁𑀢𑀁𑀯𑀺𑀓𑀸𑀭𑀸𑀥𑀺𑀓𑀭𑀽𑀧𑁂𑀳𑀺 𑀢𑀁𑀢𑀁𑀦𑀸𑀦𑀢𑁆𑀢𑀧𑁆𑀧𑀓𑀸𑀲𑀦𑀢𑁆𑀣𑀁 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀬𑀣𑀸𑀯𑀼𑀢𑁆𑀢𑀸 𑀘 𑀧𑀘𑁆𑀘𑀬𑀸 𑀢𑀁𑀢𑀁𑀯𑀺𑀓𑀸𑀭𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄 𑀯𑀼𑀢𑁆𑀢𑀸, 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸𑀢𑀺.

𑁬𑁪𑁧. 𑀆𑀤𑀺𑀢𑁄 𑀘𑀬𑁄 𑀆𑀘𑀬𑁄, 𑀧𑀞𑀫𑀼𑀧𑁆𑀧𑀢𑁆𑀢𑀺. 𑀉𑀧𑀭𑀺 𑀘𑀬𑁄 𑀉𑀧𑀘𑀬𑁄. 𑀧𑀩𑀦𑁆𑀥𑁄 𑀲𑀦𑁆𑀢𑀢𑀺. 𑀢𑀢𑁆𑀣 𑀉𑀤𑁆𑀤𑁂𑀲𑁂 𑀅𑀯𑀼𑀢𑁆𑀢𑁄𑀧𑀺 𑀆𑀘𑀬𑁄 𑀉𑀧𑀘𑀬𑀲𑀤𑁆𑀤𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁, 𑀲𑁄𑀯 𑀭𑀽𑀧𑀲𑁆𑀲 𑀉𑀧𑀘𑀬𑁄’’𑀢𑀺 𑀆𑀳. 𑀧𑀸𑀴𑀺𑀬𑀁 𑀧𑀦 𑀉𑀧-𑀲𑀤𑁆𑀤𑁄 𑀧𑀞𑀫𑀢𑁆𑀣𑁄 𑀉𑀧𑀭𑀺𑀅𑀢𑁆𑀣𑁄 𑀘 𑀳𑁄𑀢𑀻𑀢𑀺 ‘‘𑀆𑀤𑀺𑀘𑀬𑁄 𑀉𑀧𑀘𑀬𑁄, 𑀉𑀧𑀭𑀺𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀅𑀜𑁆𑀜𑀣𑀸 𑀳𑀺 𑀆𑀘𑀬𑀲𑀗𑁆𑀔𑀸𑀢𑀲𑁆𑀲 𑀧𑀞𑀫𑀼𑀧𑁆𑀧𑀸𑀤𑀲𑁆𑀲 𑀅𑀯𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬.

𑀏𑀯𑀦𑁆𑀢𑀺 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂𑀦 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀆𑀬𑀢𑀦𑁂𑀦 𑀆𑀘𑀬𑁄 𑀓𑀣𑀺𑀢𑁄. 𑀆𑀘𑀬𑀽𑀧𑀘𑀬𑀲𑀦𑁆𑀢𑀢𑀺𑀬𑁄 𑀳𑀺 𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑁂𑀦 𑀆𑀘𑀬𑁄 𑀏𑀯𑀸𑀢𑀺 𑀆𑀬𑀢𑀦𑁂𑀳𑀺 𑀆𑀘𑀬𑀸𑀤𑀻𑀦𑀁 𑀧𑀓𑀸𑀲𑀺𑀢𑀢𑁆𑀢𑀸 𑀢𑁂𑀳𑀺 𑀆𑀘𑀬𑁄 𑀓𑀣𑀺𑀢𑁄. 𑀆𑀬𑀢𑀦𑀸𑀦𑀁 𑀆𑀘𑀬𑀸𑀤𑀺𑀯𑀘𑀦𑁂𑀦𑁂𑀯 𑀆𑀘𑀬𑀲𑀪𑀸𑀯𑀸𑀦𑀺 𑀉𑀧𑁆𑀧𑀸𑀤𑀥𑀫𑁆𑀫𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀆𑀘𑀬𑁂𑀦 𑀢𑀁𑀧𑀓𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀮𑀓𑁆𑀔𑀡𑀜𑁆𑀳𑀺 𑀉𑀧𑁆𑀧𑀸𑀤𑁄, 𑀦 𑀭𑀽𑀧𑀭𑀽𑀧𑀦𑁆𑀢𑀺. 𑀢𑁂𑀦𑁂𑀯𑀸𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀆𑀬𑀢𑀦𑀫𑁂𑀯 𑀓𑀣𑀺𑀢’’𑀦𑁆𑀢𑀺. 𑀆𑀘𑀬𑀜𑁆𑀳𑀺 𑀮𑀓𑁆𑀔𑀡𑀁 𑀓𑀣𑀬𑀦𑁆𑀢𑁂𑀦 𑀢𑀁𑀮𑀓𑁆𑀔𑀡𑀸𑀦𑀺 𑀆𑀬𑀢𑀦𑀸𑀦𑁂𑀯 𑀓𑀣𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁆𑀧𑀺 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺 𑀆𑀬𑀢𑀦𑀸𑀘𑀬𑁂𑀳𑀺 𑀆𑀘𑀬𑀸𑀬𑀢𑀦𑁂𑀳𑀺 𑀆𑀘𑀬𑀫𑁂𑀯 𑀆𑀬𑀢𑀦𑀫𑁂𑀯 𑀓𑀣𑁂𑀦𑁆𑀢𑁂𑀦 𑀉𑀤𑁆𑀤𑁂𑀲𑁂 𑀦𑀺𑀤𑁆𑀤𑁂𑀲𑁂 𑀘 𑀆𑀘𑀬𑁄𑀢𑀺 𑀇𑀤𑀫𑁂𑀯 𑀅𑀯𑀢𑁆𑀯𑀸 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀲𑀁 𑀯𑀺𑀪𑀚𑀦𑀯𑀲𑁂𑀦 𑀆𑀬𑀢𑀦𑁂𑀦 𑀆𑀘𑀬𑀓𑀣𑀦𑀸𑀤𑀺𑀦𑀸 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀬𑁄𑀢𑀺 𑀉𑀧𑀘𑀬𑀫𑀸𑀳, 𑀉𑀧𑀘𑀬𑁄𑀢𑀺 𑀘 𑀲𑀦𑁆𑀢𑀢𑀺𑀁. 𑀢𑀤𑁂𑀯𑀼𑀪𑀬𑀁 𑀬𑀣𑀸𑀓𑁆𑀓𑀫𑀁 𑀯𑀺𑀯𑀭𑀦𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺 𑀯𑀟𑁆𑀠𑀺 𑀓𑀣𑀺𑀢𑀸’’𑀢𑀺 𑀆𑀳. 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀳𑀺 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀆𑀘𑀬𑁄𑀯𑀸𑀢𑀺 𑀢𑀤𑀼𑀤𑁆𑀤𑁂𑀲𑀯𑀺𑀪𑀚𑀦𑀯𑀲𑁂𑀦 𑀆𑀬𑀢𑀦𑁂𑀦 𑀆𑀘𑀬𑀓𑀣𑀦𑀸𑀤𑀺𑀦𑀸 𑀦𑀺𑀩𑁆𑀩𑀢𑁆𑀢𑀺𑀯𑀟𑁆𑀠𑀺𑀆𑀓𑀸𑀭𑀦𑀸𑀦𑀢𑁆𑀢𑀁 𑀆𑀘𑀬𑀲𑁆𑀲 𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀢𑁆𑀣𑀢𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀘 𑀉𑀪𑀬𑀫𑁆𑀧𑀺 𑀏𑀢𑀁 𑀚𑀸𑀢𑀺𑀭𑀽𑀧𑀲𑁆𑀲𑁂𑀯𑀸𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀚𑀸𑀢𑀺𑀭𑀽𑀧𑀲𑁆𑀲 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑁂𑀲𑀼 𑀆𑀘𑀬𑀸𑀤𑀻𑀲𑀼 𑀧𑀯𑀢𑁆𑀢𑀺𑀆𑀤𑀻𑀲𑀼 𑀘 𑀆𑀘𑀬𑀸𑀤𑀺𑀮𑀓𑁆𑀔𑀡𑀸𑀤𑀺𑀓𑁄 𑀉𑀧𑀘𑀬𑁄, 𑀧𑀯𑀢𑁆𑀢𑀺𑀆𑀤𑀺𑀮𑀓𑁆𑀔𑀡𑀸𑀤𑀺𑀓𑀸 𑀲𑀦𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁬𑁪𑁩. 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀨𑀮𑀯𑀺𑀧𑀘𑁆𑀘𑀦𑀧𑀓𑀢𑀺𑀬𑀸 𑀦𑀺𑀤𑁆𑀤𑁂𑀲𑀸, 𑀚𑀭𑀸𑀬 𑀧𑀸𑀧𑀼𑀡𑀺𑀢𑀩𑁆𑀩𑀁 𑀨𑀮𑀫𑁂𑀯 𑀯𑀸 𑀧𑀓𑀢𑀺. 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸𑀢𑀺 𑀓𑀮𑀮𑀓𑀸𑀮𑀢𑁄 𑀧𑀪𑀼𑀢𑀺 𑀧𑀼𑀭𑀺𑀫𑀭𑀽𑀧𑀸𑀦𑀁 𑀚𑀭𑀸𑀧𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀧𑀘𑁆𑀙𑀺𑀫𑀭𑀽𑀧𑀸𑀦𑀺 𑀧𑀭𑀺𑀧𑀓𑁆𑀓𑀭𑀽𑀧𑀸𑀦𑀼𑀭𑀽𑀧𑀸𑀦𑀺 𑀧𑀭𑀺𑀡𑀢𑀧𑀭𑀺𑀡𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀼𑀧𑀭𑀺𑀡𑀢𑀭𑀽𑀧𑀧𑀭𑀺𑀧𑀸𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀔𑀡𑁆𑀟𑀺𑀘𑁆𑀘𑀸𑀤𑀺𑀲𑀪𑀸𑀯𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀉𑀤𑀓𑀸𑀤𑀺𑀫𑀕𑁆𑀕𑁂𑀲𑀼 𑀢𑀺𑀡𑀭𑀼𑀓𑁆𑀔𑀲𑀁𑀪𑀕𑁆𑀕𑀢𑀸𑀤𑀬𑁄 𑀯𑀺𑀬 𑀧𑀭𑀺𑀧𑀸𑀓𑀕𑀢𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀧𑀭𑀺𑀧𑀓𑁆𑀓𑀭𑀽𑀧𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺 𑀚𑀭𑀸𑀬 𑀕𑀢𑀫𑀕𑁆𑀕𑁄𑀇𑀘𑁆𑀘𑁂𑀯 𑀯𑀼𑀢𑁆𑀢𑀸𑀦𑀺, 𑀦 𑀚𑀭𑀸𑀢𑀺. 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀚𑀭𑀸 𑀅𑀯𑀻𑀘𑀺𑀚𑀭𑀸. 𑀫𑀭𑀡𑁂 𑀉𑀧𑀦𑀬𑀦𑀭𑀲𑀸.

𑁬𑁪𑁪. 𑀢𑀁 𑀧𑀢𑁆𑀯𑀸𑀢𑀺 𑀢𑀁 𑀅𑀢𑁆𑀢𑀦𑁄 𑀏𑀯 𑀔𑀬𑀯𑀬𑀲𑀗𑁆𑀔𑀸𑀢𑀁 𑀲𑀪𑀸𑀯𑀁 𑀧𑀢𑁆𑀯𑀸 𑀭𑀽𑀧𑀁 𑀔𑀻𑀬𑀢𑀺 𑀯𑁂𑀢𑀺 𑀪𑀺𑀚𑁆𑀚𑀢𑀺. 𑀧𑁄𑀣𑁂𑀢𑁆𑀯𑀸 𑀧𑀸𑀢𑀺𑀢𑀲𑁆𑀲 𑀤𑀼𑀩𑁆𑀩𑀮𑀢𑀸 𑀧𑀭𑀸𑀥𑀻𑀦𑀢𑀸 𑀲𑀬𑀦𑀧𑀭𑀸𑀬𑀡𑀢𑀸 𑀘 𑀳𑁄𑀢𑀺, 𑀢𑀣𑀸 𑀚𑀭𑀸𑀪𑀺𑀪𑀽𑀢𑀲𑁆𑀲𑀸𑀢𑀺 𑀧𑁄𑀣𑀓𑀲𑀤𑀺𑀲𑀻 𑀚𑀭𑀸.

𑁬𑁪𑁫. 𑀓𑀢𑁆𑀢𑀩𑁆𑀩𑀢𑁄𑀢𑀺 𑀓𑀢𑁆𑀢𑀩𑁆𑀩𑀲𑀪𑀸𑀯𑀢𑁄. 𑀯𑀺𑀲𑀸𑀡𑀸𑀤𑀻𑀦𑀁 𑀢𑀭𑀘𑁆𑀙𑀔𑁂𑀴𑀢𑁂𑀫𑀺𑀢𑀸𑀦𑀁 𑀧𑀸𑀲𑀸𑀡𑀸𑀦𑀁 𑀯𑀺𑀬 𑀣𑀤𑁆𑀥𑀪𑀸𑀯𑀸𑀪𑀸𑀯𑀢𑁄 𑀅𑀳𑀺𑀯𑀺𑀘𑁆𑀙𑀺𑀓𑀸𑀦𑀁 𑀯𑀺𑀬 𑀲𑀯𑀺𑀲𑀢𑁆𑀢𑀸𑀪𑀸𑀯𑀢𑁄 𑀘 𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸. 𑀑𑀚𑀸𑀮𑀓𑁆𑀔𑀡𑁄𑀢𑀺 𑀏𑀢𑁆𑀣 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀭𑀲𑀲𑁆𑀲 𑀲𑀸𑀭𑁄 𑀉𑀧𑀢𑁆𑀣𑀫𑁆𑀪𑀩𑀮𑀓𑀸𑀭𑁄 𑀪𑀽𑀢𑀦𑀺𑀲𑁆𑀲𑀺𑀢𑁄 𑀏𑀓𑁄 𑀯𑀺𑀲𑁂𑀲𑁄 𑀑𑀚𑀸𑀢𑀺.

𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑁄𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸

𑁬𑁪𑁬. 𑀦 𑀉𑀧𑀸𑀤𑀺𑀬𑀢𑁂𑀯𑀸𑀢𑀺 𑀦 𑀦𑀺𑀲𑁆𑀲𑀬𑀢𑀺 𑀏𑀯, 𑀓𑀺𑀦𑁆𑀢𑀼 𑀦𑀺𑀲𑁆𑀲𑀬𑀢𑀺 𑀘 𑀦𑀺𑀲𑁆𑀲𑀻𑀬𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑁬𑁪𑁭. 𑀧𑀼𑀭𑀺𑀫𑀸 𑀧𑀦𑀸𑀢𑀺 𑀧𑀜𑁆𑀘𑀯𑀺𑀥𑀲𑀗𑁆𑀕𑀳𑁂 𑀧𑀣𑀯𑀻𑀥𑀸𑀢𑀼𑀆𑀧𑁄𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀽𑀦𑀁 𑀧𑀼𑀭𑀺𑀫𑀼𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀸 𑀯𑀼𑀢𑁆𑀢𑀸𑀦𑀁 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑀺𑀫𑀸 𑀉𑀤𑁆𑀤𑁂𑀲𑁂 𑀯𑀼𑀢𑁆𑀢𑀸 𑀆𑀧𑁄𑀥𑀸𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀯𑀼𑀢𑁆𑀢𑀲𑁆𑀲 𑀯𑀸 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲 𑀅𑀢𑀻𑀢𑀢𑀸𑀬 𑀧𑀘𑁆𑀙𑀺𑀫𑀢𑀸, 𑀅𑀦𑀸𑀕𑀢𑀢𑀸𑀬 𑀘 𑀆𑀧𑁄𑀥𑀸𑀢𑀼𑀬𑀸 𑀧𑀼𑀭𑀺𑀫𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀆𑀬𑀽𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀓𑀫𑁆𑀫𑀚𑀢𑁂𑀚𑀁 𑀉𑀲𑁆𑀫𑀸. 𑀬𑀁 𑀓𑀺𑀜𑁆𑀘𑀺 𑀥𑀸𑀢𑀼𑀁…𑀧𑁂… 𑀏𑀓𑀧𑁆𑀧𑀳𑀸𑀭𑁂𑀦 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑁂𑀓𑀸𑀲𑀼 𑀧𑀣𑀯𑀻𑀲𑀼 𑀆𑀧𑀸𑀣𑀕𑀢𑀸𑀲𑀼 𑀢𑀸𑀲𑀼 𑀢𑀸𑀲𑀼 𑀲𑀳 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀢𑁂𑀚𑀯𑀸𑀬𑀽𑀲𑀼 𑀘𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀓𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀆𑀪𑀼𑀚𑀺𑀢𑀯𑀲𑁂𑀦 𑀆𑀭𑀫𑁆𑀫𑀡𑀧𑀲𑀸𑀤𑀸𑀥𑀺𑀫𑀢𑁆𑀢𑀢𑀸𑀯𑀲𑁂𑀦 𑀘 𑀧𑀞𑀫𑀁 𑀓𑀢𑁆𑀣𑀘𑀺 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀅𑀜𑁆𑀜𑀢𑁆𑀣 𑀘 𑀧𑀦 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺 𑀏𑀯. 𑀲𑀸𑀬𑀁 𑀆𑀭𑀫𑁆𑀫𑀡𑀢𑁄 𑀆𑀭𑀫𑁆𑀫𑀡𑀦𑁆𑀢𑀭𑀲𑀗𑁆𑀓𑀦𑁆𑀢𑀺 𑀬𑁂𑀦 𑀉𑀧𑀸𑀬𑁂𑀦 𑀳𑁄𑀢𑀺, 𑀢𑀲𑁆𑀲 𑀯𑀺𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀢𑀺 ‘‘𑀓𑀣𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀢𑁄 𑀲𑀗𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺.

𑁬𑁫𑁧. 𑀅𑀬𑀧𑀺𑀡𑁆𑀟𑀺𑀆𑀤𑀻𑀲𑀼 𑀧𑀣𑀯𑀻𑀥𑀸𑀢𑀼 𑀢𑀸𑀤𑀺𑀲𑀸𑀬 𑀆𑀧𑁄𑀥𑀸𑀢𑀼𑀬𑀸 𑀅𑀦𑀸𑀩𑀤𑁆𑀥𑀸 𑀲𑀦𑁆𑀢𑀻 𑀯𑀺𑀲𑀭𑁂𑀬𑁆𑀬, 𑀢𑀲𑁆𑀫𑀸 ‘‘𑀢𑀸𑀦𑀺 𑀆𑀧𑁄𑀥𑀸𑀢𑀼 𑀆𑀩𑀦𑁆𑀥𑀺𑀢𑁆𑀯𑀸 𑀩𑀤𑁆𑀥𑀸𑀦𑀺 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀬𑀼𑀢𑁆𑀢𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀁𑀲𑀼𑀘𑀼𑀡𑁆𑀡𑀸𑀦𑀺 𑀆𑀩𑀦𑁆𑀥𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀓𑀢𑁆𑀯𑀸 𑀞𑀧𑁂𑀢𑀺, 𑀏𑀯𑀁 𑀅𑀬𑁄𑀧𑀺𑀡𑁆𑀟𑀺𑀆𑀤𑀻𑀲𑀼𑀧𑀺 𑀢𑀤𑀦𑀼𑀭𑀽𑀧𑀧𑀘𑁆𑀘𑀬𑁂𑀳𑀺 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀸 𑀆𑀧𑁄𑀥𑀸𑀢𑀼 𑀢𑀣𑀸 𑀆𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀨𑀼𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺 𑀆𑀧𑁄𑀥𑀸𑀢𑀼𑀬𑀸 𑀅𑀨𑁄𑀝𑁆𑀞𑀩𑁆𑀩𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀢𑀣𑀸 ‘‘𑀅𑀨𑀼𑀲𑀺𑀢𑁆𑀯𑀸𑀯 𑀆𑀩𑀦𑁆𑀥𑀢𑀻’’𑀢𑀺. 𑀦 𑀳𑀺 𑀬𑀣𑀸 𑀨𑁄𑀝𑁆𑀞𑀩𑁆𑀩𑀥𑀸𑀢𑀽𑀦𑀁 𑀨𑁄𑀝𑁆𑀞𑀩𑁆𑀩𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀸, 𑀏𑀯𑀁 𑀨𑁄𑀝𑁆𑀞𑀩𑁆𑀩𑀸𑀨𑁄𑀝𑁆𑀞𑀩𑁆𑀩𑀥𑀸𑀢𑀽𑀦𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀻𑀲𑀼 𑀳𑀺 𑀪𑀽𑀢𑁂𑀲𑀼 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑁂𑀲𑀼 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁, 𑀦𑀸𑀧𑀺 𑀲𑀳𑀚𑀸𑀢𑁂𑀲𑀼 𑀅𑀯𑀺𑀦𑀺𑀩𑁆𑀪𑁄𑀕𑀢𑀸𑀬 𑀏𑀓𑀻𑀪𑀽𑀢𑁂𑀲𑀼 𑀨𑀼𑀲𑀦𑀸𑀨𑀼𑀲𑀦𑀸𑀦𑀺 𑀯𑀺𑀘𑀸𑀭𑁂𑀢𑀼𑀁 𑀬𑀼𑀢𑁆𑀢𑀸𑀦𑀻𑀢𑀺. 𑀦 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀛𑀸𑀬𑀢𑀻𑀢𑀺 𑀢𑁂𑀚𑁄𑀲𑀪𑀸𑀯𑀢𑀁𑀬𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀲𑀻𑀢𑀢𑁆𑀢𑀁 𑀅𑀦𑀼𑀚𑀸𑀦𑀸𑀢𑀺, 𑀢𑁂𑀚𑁄𑀲𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀘 𑀲𑀻𑀢𑀢𑁆𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀢𑁂𑀚𑁄 𑀏𑀯 𑀳𑀺 𑀲𑀻𑀢𑀁 𑀳𑀺𑀫𑀧𑀸𑀢𑀲𑀫𑀬𑀸𑀤𑀻𑀲𑀼 𑀲𑀻𑀢𑀲𑁆𑀲 𑀧𑀭𑀺𑀧𑀸𑀘𑀓𑀢𑀸𑀤𑀲𑁆𑀲𑀦𑀢𑁄, 𑀲𑀻𑀢𑀼𑀡𑁆𑀳𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀉𑀡𑁆𑀳𑁂𑀦 𑀲𑀳 𑀦 𑀲𑀻𑀢𑀁 𑀪𑀽𑀢𑀦𑁆𑀢𑀭𑀁 𑀧𑀯𑀢𑁆𑀢𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀉𑀡𑁆𑀳𑀓𑀮𑀸𑀧𑁂 𑀧𑀦 𑀲𑀻𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀲𑀻𑀢𑀓𑀮𑀸𑀧𑁂 𑀘 𑀉𑀡𑁆𑀳𑀲𑁆𑀲 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑁂𑀚𑁄𑀯𑀺𑀲𑁂𑀲𑀪𑀸𑀯𑁂 𑀬𑀼𑀚𑁆𑀚𑀢𑀻𑀢𑀺. 𑀪𑀸𑀯𑀜𑁆𑀜𑀣𑀢𑁆𑀢𑀦𑁆𑀢𑀺 𑀔𑀭𑀸𑀦𑀁 𑀕𑀼𑀴𑀸𑀤𑀻𑀦𑀁 𑀤𑀯𑀢𑀸 𑀫𑀼𑀤𑀼𑀢𑀸 𑀭𑀲𑀸𑀤𑀻𑀦𑀜𑁆𑀘 𑀤𑀯𑀸𑀦𑀁 𑀔𑀭𑀢𑀸 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀧𑀣𑀯𑀻𑀥𑀸𑀢𑀼𑀆𑀤𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀯𑀺𑀚𑀳𑀦𑀁, 𑀢𑀁 𑀏𑀢𑁂𑀲𑀁 𑀦 𑀳𑁄𑀢𑀺, 𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀢𑀸𑀲𑀗𑁆𑀔𑀸𑀢𑀁 𑀪𑀸𑀯𑀜𑁆𑀜𑀣𑀢𑁆𑀢𑀁𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁬𑁫𑁨. 𑀅𑀦𑀼𑀧𑀸𑀤𑀺𑀦𑁆𑀦𑀸𑀤𑀻𑀦𑀁𑀬𑁂𑀯𑀸𑀢𑀺 𑀏𑀓𑀦𑁆𑀢𑀅𑀦𑀼𑀧𑀸𑀤𑀺𑀦𑁆𑀦𑀏𑀓𑀦𑁆𑀢𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁂𑀲𑀼 𑀕𑀳𑀡𑁂𑀲𑀼 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺 𑀧𑀦 𑀯𑀘𑀦𑁂𑀦 𑀧𑀼𑀭𑀺𑀫𑀸𑀦𑀫𑁆𑀧𑀺 𑀦𑀓𑀫𑁆𑀫𑀲𑁆𑀲𑀓𑀢𑀢𑁆𑀢𑀸𑀪𑀸𑀯𑀸𑀤𑀺𑀓𑀁 𑀤𑀻𑀧𑁂𑀢𑀺. 𑀢𑀸 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀤𑀺𑀦𑀓𑀫𑁆𑀫𑀲𑁆𑀲𑀓𑀢𑀢𑁆𑀢𑀸𑀤𑀺𑀯𑀘𑀦𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑀸 𑀏𑀓𑁂𑀦 𑀅𑀯𑀢𑁆𑀢𑀩𑁆𑀩𑀢𑁆𑀢𑁂 𑀇𑀢𑀭𑁂𑀦𑀧𑀺 𑀅𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀯𑀢𑁆𑀢𑀩𑁆𑀩𑀢𑁆𑀢𑁂 𑀯𑀸 𑀯𑀢𑁆𑀢𑀩𑁆𑀩𑀸. 𑀢𑀲𑁆𑀫𑀸 𑀏𑀓𑀦𑁆𑀢𑀸𑀓𑀫𑁆𑀫𑀚𑀸𑀤𑀻𑀲𑁆𑀯𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸 𑀢𑀸 𑀅𑀦𑁂𑀓𑀦𑁆𑀢𑁂𑀲𑀼 𑀦 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁬𑁬𑁬. 𑀏𑀓𑀦𑁆𑀢 …𑀧𑁂… 𑀧𑀜𑁆𑀜𑀸𑀬𑀢𑀺 𑀢𑁂𑀲𑀁 𑀯𑀺𑀓𑀸𑀭𑀢𑁆𑀢𑀸, 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀧𑀦 𑀢𑀲𑁆𑀲 𑀉𑀧𑁆𑀧𑀸𑀤𑁄 𑀦 𑀓𑁂𑀦𑀘𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁬. 𑀧𑀘𑁆𑀙𑀺𑀫𑀧𑀤𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀢𑀧𑀤𑀲𑁆𑀲. 𑀲𑀩𑁆𑀩𑀫𑁂𑀯 𑀳𑀺 𑀭𑀽𑀧𑀁 𑀯𑀺𑀜𑁆𑀜𑀸𑀢𑀦𑁆𑀢𑀺 𑀢𑀲𑁆𑀲 𑀅𑀪𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸 𑀯𑀺𑀜𑁆𑀜𑀸𑀢𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀜𑁆𑀘 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀦 𑀳𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀢𑁄 𑀅𑀜𑁆𑀜𑀁 ‘‘𑀓𑀢𑀫𑀁 𑀭𑀽𑀧𑀁 𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀳𑀺 𑀤𑁆𑀯𑀻𑀲𑀼 𑀉𑀤𑁆𑀤𑀺𑀝𑁆𑀞𑁂𑀲𑀼 𑀦𑁄𑀧𑀸𑀤𑀢𑁄 𑀅𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸’’𑀢𑀺 𑀧𑀼𑀘𑁆𑀙𑀺𑀢𑀁, 𑀏𑀯𑀁 𑀤𑀺𑀝𑁆𑀞𑀸𑀤𑀻𑀲𑀼 𑀘𑀢𑀽𑀲𑀼 𑀉𑀤𑁆𑀤𑀺𑀝𑁆𑀞𑁂𑀲𑀼 𑀲𑀼𑀢𑀸𑀤𑀻𑀳𑀺 𑀢𑀻𑀳𑀺𑀧𑀺 𑀅𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸, 𑀢𑀤𑀪𑀸𑀯𑁄 𑀦 𑀧𑀼𑀘𑁆𑀙𑀺𑀢𑀁, 𑀏𑀯𑀁 𑀲𑀼𑀢𑀸𑀤𑀻𑀲𑀼𑀧𑀻𑀢𑀺. 𑀤𑀲𑁆𑀲𑀦𑀸𑀤𑀺𑀕𑁆𑀕𑀳𑀡𑀯𑀺𑀲𑁂𑀲𑀢𑁄 𑀧𑀦 𑀤𑀺𑀝𑁆𑀞𑀸𑀤𑀻𑀳𑀺 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀸𑀢𑀲𑁆𑀲 𑀲𑀩𑁆𑀪𑀸𑀯𑀢𑁄 𑀘 𑀘𑀢𑀼𑀓𑁆𑀓𑁄 𑀯𑀼𑀢𑁆𑀢𑁄.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁯. 𑀢𑁂𑀚𑁄𑀪𑀸𑀯𑀁 𑀕𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀢𑁂𑀚𑁄𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀲𑁆𑀲𑀧𑀺 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀲𑀗𑁆𑀕𑀳𑀸𑀭𑀳𑀲𑁆𑀲 𑀲𑀗𑁆𑀕𑀡𑁆𑀳𑀦𑀁 𑀦𑀬𑀓𑀭𑀡𑀁 𑀇𑀥 𑀤𑀝𑁆𑀞𑀩𑁆𑀩𑀁, 𑀢𑀬𑀺𑀤𑀁 ‘‘𑀯𑀺𑀜𑁆𑀜𑀸𑀢’’𑀦𑁆𑀢𑀺 𑀘𑀢𑀼𑀓𑁆𑀓𑀧𑀤𑁂𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀨𑁄𑀝𑁆𑀞𑀩𑁆𑀩𑀲𑁆𑀲 𑀪𑁂𑀤𑀲𑀩𑁆𑀪𑀸𑀯𑁄 𑀅𑀝𑁆𑀞𑀓𑁂 𑀦𑀬𑁄.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁯𑁭𑁫. 𑀦𑀢𑁆𑀣𑀺 𑀦𑀻𑀯𑀭𑀡𑀸𑀢𑀺 𑀯𑀘𑀦𑁂𑀦 𑀫𑀺𑀤𑁆𑀥𑀲𑁆𑀲𑀧𑀺 𑀦𑀻𑀯𑀭𑀡𑀲𑁆𑀲 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀦 𑀘 𑀭𑀽𑀧𑀁 𑀧𑀳𑀸𑀢𑀩𑁆𑀩𑀁, 𑀦 𑀘 𑀭𑀽𑀧𑀓𑀸𑀬𑀕𑁂𑀮𑀜𑁆𑀜𑀁 𑀫𑀼𑀦𑀺𑀦𑁄 𑀦𑀢𑁆𑀣𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁨) 𑀯𑀘𑀦𑀢𑁄. 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀡𑁂𑀦 𑀧𑀯𑀢𑁆𑀢𑀺𑀢𑁄 𑀯𑀘𑀻𑀖𑁄𑀲𑀸𑀤𑀺𑀲𑀤𑁆𑀤𑁄. 𑀦 𑀳𑀺 𑀏𑀢𑀸𑀦𑀺 𑀚𑀸𑀬𑀦𑁆𑀢𑀻𑀢𑀺 𑀧𑀭𑀺𑀧𑀘𑁆𑀘𑀫𑀸𑀦𑀲𑁆𑀲 𑀭𑀽𑀧𑀲𑁆𑀲 𑀧𑀭𑀺𑀧𑀘𑁆𑀘𑀦𑀁 𑀚𑀭𑀸, 𑀔𑀻𑀬𑀫𑀸𑀦𑀲𑁆𑀲 𑀔𑀬𑁄 𑀅𑀦𑀺𑀘𑁆𑀘𑀢𑀸𑀢𑀺 𑀭𑀽𑀧𑀪𑀸𑀯𑀫𑀢𑁆𑀢𑀸𑀦𑀺 𑀏𑀢𑀸𑀦𑀺, 𑀦 𑀲𑀬𑀁 𑀲𑀪𑀸𑀯𑀯𑀦𑁆𑀢𑀸𑀦𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀚𑀸𑀬𑀫𑀸𑀦𑀲𑁆𑀲 𑀚𑀦𑀦𑀁 𑀚𑀸𑀢𑀺, 𑀲𑀸 𑀘 𑀭𑀽𑀧𑀪𑀸𑀯𑁄𑀯, 𑀦 𑀲𑀬𑀁 𑀲𑀪𑀸𑀯𑀯𑀢𑀻𑀢𑀺 ‘‘𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀚𑀸𑀢𑀺 𑀚𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑁂𑀲𑀁 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀢𑀧𑁆𑀧𑀘𑁆𑀘𑀬𑀸, 𑀢𑀧𑁆𑀧𑀘𑁆𑀘𑀬𑀸𑀬 𑀪𑀸𑀯𑁄 𑀢𑀧𑁆𑀧𑀘𑁆𑀘𑀬𑀪𑀸𑀯𑁄, 𑀢𑀧𑁆𑀧𑀘𑁆𑀘𑀬𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑁄, 𑀢𑀁 𑀮𑀪𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀥𑀫𑁆𑀫𑀓𑁆𑀔𑀡𑀲𑁆𑀫𑀺𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀥𑀫𑁆𑀫𑀓𑁆𑀔𑀡𑀲𑁆𑀫𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀢𑀤𑀸 𑀢𑁂 𑀥𑀫𑁆𑀫𑀸 𑀦 𑀚𑀸𑀬𑀦𑁆𑀢𑀻𑀢𑀺 𑀚𑀸𑀬𑀫𑀸𑀦𑀪𑀸𑀯𑁄𑀯 𑀚𑀸𑀢𑀻𑀢𑀺 𑀬𑀼𑀢𑁆𑀢𑀸 𑀢𑀲𑁆𑀲𑀸 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀢𑀸 𑀢𑀁𑀦𑀺𑀩𑁆𑀩𑀢𑁆𑀢𑀢𑀸 𑀘, 𑀦 𑀧𑀦 𑀢𑀤𑀸 𑀢𑁂 𑀥𑀫𑁆𑀫𑀸 𑀚𑀻𑀬𑀦𑁆𑀢𑀺 𑀔𑀻𑀬𑀦𑁆𑀢𑀺 𑀘, 𑀢𑀲𑁆𑀫𑀸 𑀦 𑀢𑁂𑀲𑀁 𑀢𑁂 𑀚𑀻𑀭𑀡𑀪𑀺𑀚𑁆𑀚𑀦𑀪𑀸𑀯𑀸 𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸 𑀢𑀁𑀦𑀺𑀩𑁆𑀩𑀢𑁆𑀢𑀸 𑀘𑀸𑀢𑀺 𑀯𑀘𑀦𑀁 𑀅𑀭𑀳𑀦𑁆𑀢𑀺. 𑀏𑀯𑀫𑀧𑀺 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑁄 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀆𑀤𑀺𑀦𑁆𑀦𑀢𑀁 𑀯𑀤𑀢𑀺, 𑀦 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀧𑀸𑀓𑀪𑁂𑀤𑀸𑀦𑀁 𑀉𑀧𑀸𑀤𑀺𑀦𑁆𑀦𑀢𑀸 𑀢𑁂𑀲𑀁 𑀯𑀢𑁆𑀢𑀩𑁆𑀩𑀸𑀢𑀺 𑀘𑁂? 𑀦, 𑀆𑀤𑀺𑀦𑁆𑀦-𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀯𑀸𑀘𑀓𑀢𑁆𑀢𑀸. 𑀉𑀧𑁂𑀢𑁂𑀦 𑀦𑀺𑀩𑁆𑀩𑀢𑁆𑀢𑀜𑁆𑀳𑀺 𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀧𑀘𑁆𑀘𑀬𑀸𑀦𑀼𑀪𑀸𑀯𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸𑀯 𑀧𑀯𑀢𑁆𑀢𑁄 𑀅𑀬𑀁 𑀯𑁄𑀳𑀸𑀭𑁄 𑀢𑀤𑀸 𑀅𑀪𑀸𑀯𑀸 𑀚𑀭𑀸𑀫𑀭𑀡𑁂 𑀦 𑀧𑀯𑀢𑁆𑀢𑀢𑀻𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀢𑁆𑀢𑀸 𑀢𑁂𑀲𑀁 𑀉𑀧𑁆𑀧𑀸𑀤𑁂 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀺. 𑀦 𑀳𑀺 𑀅𑀚𑀸𑀢𑀁 𑀧𑀭𑀺𑀧𑀘𑁆𑀘𑀢𑀺 𑀪𑀺𑀚𑁆𑀚𑀢𑀺 𑀯𑀸, 𑀢𑀲𑁆𑀫𑀸 𑀚𑀸𑀢𑀺𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 ‘‘𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁄𑀢𑀺 𑀚𑀸𑀬𑀫𑀸𑀦𑀧𑀭𑀺𑀧𑀘𑁆𑀘𑀫𑀸𑀦𑀪𑀺𑀚𑁆𑀚𑀫𑀸𑀦𑀸𑀦𑀁 𑀚𑀸𑀬𑀫𑀸𑀦𑀸𑀤𑀺𑀪𑀸𑀯𑀫𑀢𑁆𑀢𑀢𑁆𑀢𑀸 𑀚𑀸𑀬𑀫𑀸𑀦𑀸𑀤𑀺𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸 𑀚𑀸𑀢𑀺𑀆𑀤𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 𑀉𑀧𑀸𑀤𑀸𑀬𑀭𑀽𑀧𑀸𑀦𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀉𑀧𑁆𑀧𑀸𑀤𑀸𑀤𑀺𑀲𑀪𑀸𑀯𑀪𑀽𑀢𑀸 𑀚𑀸𑀢𑀺𑀆𑀤𑀬𑁄 𑀢𑀁𑀦𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀪𑀽𑀢𑀦𑀺𑀲𑁆𑀲𑀺𑀢𑀸𑀦𑀁 𑀢𑁂𑀲𑀁 𑀮𑀓𑁆𑀔𑀡𑀸𑀦𑀁 𑀉𑀧𑀸𑀤𑀸𑀬𑀪𑀸𑀯𑁄 𑀯𑀺𑀬 𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀺𑀢𑀸𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀪𑀽𑀢𑀧𑀝𑀺𑀩𑀤𑁆𑀥𑀉𑀧𑀸𑀤𑀸𑀬𑀭𑀽𑀧𑀮𑀓𑁆𑀔𑀡𑀸𑀦𑀜𑁆𑀘 𑀪𑀽𑀢𑀧𑀝𑀺𑀩𑀤𑁆𑀥𑀪𑀸𑀯𑀲𑁆𑀲 𑀅𑀯𑀺𑀦𑀺𑀯𑀢𑁆𑀢𑀦𑀢𑁄. 𑀅𑀧𑀺𑀘 𑀏𑀓𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀸𑀦𑀁 𑀲𑀳𑁂𑀯 𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄 𑀏𑀓𑀲𑁆𑀲 𑀓𑀮𑀸𑀧𑀲𑁆𑀲 𑀉𑀧𑁆𑀧𑀸𑀤𑀸𑀤𑀬𑁄 𑀏𑀓𑁂𑀓𑀸𑀯 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀏𑀓𑁂𑀓𑀲𑁆𑀲 𑀓𑀮𑀸𑀧𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀮𑀸𑀧𑀸𑀦𑀼𑀧𑀸𑀮𑀓𑀁 ‘‘𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀮𑀸𑀧𑀼𑀧𑁆𑀧𑀸𑀤𑀸𑀤𑀺𑀲𑀪𑀸𑀯𑀸 𑀚𑀸𑀢𑀺𑀆𑀤𑀬𑁄 ‘‘𑀉𑀧𑀸𑀤𑀸𑀬𑀭𑀽𑀧𑀸𑀦𑀺’’𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀯𑀺𑀓𑀸𑀭𑀧𑀭𑀺𑀘𑁆𑀙𑁂𑀤𑀭𑀽𑀧𑀸𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑀫𑁆𑀩𑀦𑁆𑀥𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀓𑀫𑁆𑀫𑀯𑀺𑀲𑁂𑀲𑁂𑀦 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀲𑀼𑀲𑀡𑁆𑀞𑀺𑀢𑀤𑀼𑀲𑁆𑀲𑀡𑁆𑀞𑀺𑀢𑀸𑀤𑀺𑀯𑀺𑀲𑁂𑀲𑀁 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀧𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀺𑀧𑀸𑀓𑀸𑀦𑀼𑀪𑀯𑀦𑀲𑁆𑀲 𑀓𑀸𑀭𑀡𑀪𑀽𑀢𑀁 𑀩𑀸𑀳𑀺𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁. 𑀓𑀫𑁆𑀫𑀲𑀳𑀸𑀬𑁄 𑀧𑀘𑁆𑀘𑀬𑁄, 𑀓𑀫𑁆𑀫𑀲𑁆𑀲 𑀯𑀸 𑀲𑀳𑀸𑀬𑀪𑀽𑀢𑁄 𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑁄, 𑀲𑁄𑀯 𑀉𑀢𑀼 𑀓𑀫𑁆𑀫𑀧𑀘𑁆𑀘𑀬𑀉𑀢𑀼, 𑀲𑁄 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀘𑀦𑀢𑁆𑀣𑁄. 𑀲𑀻𑀢𑁂 𑀉𑀡𑁆𑀳𑁂 𑀯𑀸 𑀓𑀺𑀲𑁆𑀫𑀺𑀜𑁆𑀘𑀺 𑀉𑀢𑀼𑀫𑁆𑀳𑀺 𑀲𑀫𑀸𑀕𑀢𑁂 𑀢𑀢𑁄 𑀲𑀼𑀤𑁆𑀥𑀝𑁆𑀞𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄 𑀉𑀢𑀼 𑀲𑀫𑀼𑀝𑁆𑀞𑀸𑀦𑀁. 𑀤𑀼𑀢𑀺𑀬𑀲𑁆𑀲 𑀲𑀼𑀤𑁆𑀥𑀝𑁆𑀞𑀓𑀲𑁆𑀲 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀧𑀝𑀺𑀩𑀦𑁆𑀥𑀓𑀲𑁆𑀲 𑀲𑁄 𑀏𑀯 𑀧𑀼𑀭𑀺𑀫𑁄 𑀉𑀢𑀼 𑀧𑀘𑁆𑀘𑀬𑁄. 𑀢𑀢𑀺𑀬𑀁 𑀧𑀦 𑀲𑀼𑀤𑁆𑀥𑀝𑁆𑀞𑀓𑀁 𑀧𑀼𑀭𑀺𑀫𑀉𑀢𑀼𑀲𑀳𑀸𑀬𑁂𑀦 𑀉𑀢𑀼𑀦𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀫𑀬𑀁 𑀧𑀼𑀭𑀺𑀫𑁄 𑀉𑀢𑀼 𑀢𑀺𑀲𑁆𑀲𑁄 𑀲𑀦𑁆𑀢𑀢𑀺𑀬𑁄 𑀖𑀝𑁆𑀝𑁂𑀢𑀺, 𑀢𑀢𑁄 𑀧𑀭𑀁 𑀅𑀜𑁆𑀜𑀉𑀢𑀼𑀲𑀫𑀸𑀕𑀫𑁂 𑀅𑀜𑁆𑀜𑀲𑀦𑁆𑀢𑀢𑀺𑀢𑁆𑀢𑀬𑀁, 𑀢𑀢𑁄 𑀘 𑀅𑀜𑁆𑀜𑁂𑀦 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀤𑁂𑀢𑀁 𑀲𑀻𑀢𑀼𑀡𑁆𑀳𑀸𑀦𑀁 𑀅𑀧𑁆𑀧𑀩𑀳𑀼𑀪𑀸𑀯𑁂 𑀢𑀁𑀲𑀫𑁆𑀨𑀲𑁆𑀲𑀲𑁆𑀲 𑀅𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀸 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀯𑁂𑀤𑀺𑀢𑀩𑁆𑀩𑀁, 𑀅𑀦𑀼𑀧𑀸𑀤𑀺𑀦𑁆𑀦𑁂𑀦 𑀤𑀻𑀧𑀦𑀸 𑀦 𑀲𑀦𑁆𑀢𑀢𑀺𑀢𑁆𑀢𑀬𑀯𑀲𑁂𑀦, 𑀅𑀣 𑀔𑁄 𑀫𑁂𑀖𑀲𑀫𑀼𑀝𑁆𑀞𑀸𑀧𑀓𑀫𑀽𑀮𑀉𑀢𑀼𑀯𑀲𑁂𑀦 𑀧𑀓𑀸𑀭𑀦𑁆𑀢𑀭𑁂𑀦 𑀤𑀝𑁆𑀞𑀩𑁆𑀩𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀦𑀸𑀫 𑀯𑀮𑀸𑀳𑀓𑁄’’𑀢𑀺𑀆𑀤𑀺𑀫𑀸𑀳. 𑀭𑀽𑀧𑀭𑀽𑀧𑀸𑀦𑀁 𑀯𑀺𑀓𑀸𑀭𑀸𑀤𑀺𑀫𑀢𑁆𑀢𑀪𑀸𑀯𑀢𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀭𑀽𑀧𑀯𑀺𑀓𑀸𑀭𑀸𑀤𑀺𑀪𑀸𑀯𑀢𑁄 𑀭𑀽𑀧𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀯𑀺𑀓𑀸𑀭𑀸𑀤𑀺𑀪𑀸𑀯𑀢𑁄 𑀏𑀯 𑀧𑀦 𑀭𑀽𑀧𑁂 𑀲𑀢𑀺 𑀲𑀦𑁆𑀢𑀺, 𑀅𑀲𑀢𑀺 𑀦 𑀲𑀦𑁆𑀢𑀻𑀢𑀺 𑀅𑀲𑀗𑁆𑀔𑀢𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺.

𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.