(𑁮) 𑁩. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧-𑁨. 𑀧𑀥𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁭𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑀯𑀢𑀺 𑀢𑁂𑀦 𑀨𑀮𑀁 𑀫𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀬𑁄𑀦𑀺, 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁. 𑀅𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀯𑀺𑀓𑀮𑀁 𑀅𑀦𑀯𑀲𑁂𑀲𑀁. 𑀆𑀲𑀯𑁂 𑀔𑁂𑀧𑁂𑀢𑀻𑀢𑀺 𑀆𑀲𑀯𑀓𑁆𑀔𑀬𑁄, 𑀅𑀕𑁆𑀕𑀫𑀕𑁆𑀕𑁄. 𑀇𑀥 𑀧𑀦 𑀅𑀭𑀳𑀢𑁆𑀢𑀨𑀮𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀢𑁆𑀣𑀸𑀬𑀸’’𑀢𑀺. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀥𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁫. 𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁩-𑁭𑁫. 𑀢𑀢𑀺𑀬𑁂 𑀧𑀜𑁆𑀳𑀢𑁆𑀣𑀸𑀬 𑀅𑀪𑀺𑀦𑀻𑀢𑁄𑀢𑀺 𑀧𑀜𑁆𑀳𑀓𑀭𑀡𑀢𑁆𑀣𑀸𑀬 𑀅𑀪𑀺𑀫𑀼𑀔𑀁 𑀦𑀻𑀢𑁄. 𑀅𑀮𑀫𑁆𑀩𑀺𑀢𑀁 𑀓𑀢𑁆𑀯𑀸𑀢𑀺 𑀅𑀮𑀫𑁆𑀩𑀁 𑀓𑀢𑁆𑀯𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀯𑀺𑀧𑀮𑀫𑁆𑀩𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀯𑀚𑀸𑀦𑀸𑀢𑀻𑀢𑀺 𑀅𑀯𑀜𑁆𑀜𑀁 𑀓𑀭𑁄𑀢𑀺, 𑀦𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀉𑀬𑁆𑀬𑀸𑀦𑀢𑁄 𑀉𑀧𑁂𑀘𑁆𑀘 𑀯𑀢𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀢𑁆𑀢𑀦𑀁. 𑀬𑀣𑁂𑀯 𑀳𑀺 𑀓𑀮𑀫𑁆𑀩𑀦𑀤𑀺𑀢𑀻𑀭𑀢𑁄 𑀭𑀸𑀚𑀫𑀸𑀢𑀼𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀣𑀽𑀧𑀸𑀭𑀸𑀫𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀳𑀺𑀭𑀜𑁆𑀜𑀯𑀢𑀺𑀓𑀸𑀬 𑀧𑀸𑀭𑀺𑀫𑀢𑀻𑀭𑀢𑁄 𑀲𑀸𑀮𑀯𑀦𑀁 𑀉𑀬𑁆𑀬𑀸𑀦𑀁, 𑀬𑀣𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬, 𑀏𑀯𑀁 𑀢𑀁 𑀉𑀬𑁆𑀬𑀸𑀦𑀁 𑀓𑀼𑀲𑀺𑀦𑀸𑀭𑀸𑀬 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬 𑀳𑁄𑀢𑀺. 𑀬𑀣𑀸 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀢𑀁 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀲𑀸𑀮𑀭𑀼𑀓𑁆𑀔𑀸𑀦𑀁 𑀯𑁂𑀫𑀚𑁆𑀛𑁂. 𑀢𑀢𑁆𑀣 𑀳𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀲𑁆𑀲 𑀫𑀜𑁆𑀘𑀲𑁆𑀲 𑀏𑀓𑀸 𑀲𑀸𑀮𑀧𑀦𑁆𑀢𑀺 𑀲𑀻𑀲𑀪𑀸𑀕𑁂 𑀳𑁄𑀢𑀺, 𑀏𑀓𑀸 𑀧𑀸𑀤𑀪𑀸𑀕𑁂. 𑀢𑀢𑁆𑀭𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲. 𑀅𑀧𑀺𑀘 𑀬𑀫𑀓𑀲𑀸𑀮𑀸 𑀦𑀸𑀫 𑀫𑀽𑀮𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀲𑀸𑀮𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀤𑁆𑀯𑁂𑀴𑁆𑀳𑀓𑀦𑁆𑀢𑀺 𑀤𑁆𑀯𑀺𑀥𑀸𑀕𑀸𑀳𑁄, 𑀅𑀦𑁂𑀓𑀁𑀲𑀕𑁆𑀕𑀸𑀳𑁄𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀻𑀢𑀺 𑀲𑀁𑀲𑀬𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀫𑀢𑁆𑀣𑀢𑀸’’𑀢𑀺. 𑀢𑀁 𑀯𑁄 𑀯𑀤𑀸𑀫𑀻𑀢𑀺 𑀢𑀁 𑀲𑀁𑀲𑀬𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑁄 𑀢𑀼𑀫𑁆𑀳𑁂 𑀯𑀤𑀸𑀫𑀻𑀢𑀺. 𑀦𑀺𑀓𑁆𑀓𑀗𑁆𑀔𑀪𑀸𑀯𑀧𑀘𑁆𑀘𑀓𑁆𑀔𑀓𑀭𑀡𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀦𑀺𑀓𑁆𑀓𑀗𑁆𑀔𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀬𑀸 𑀬𑀸𑀣𑀸𑀯𑀢𑁄 𑀢𑀫𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀘𑀺𑀦𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀮𑁄𑀓𑀘𑀺𑀦𑁆𑀢𑀸𑀢𑀺 𑀮𑁄𑀓𑀲𑀦𑁆𑀦𑀺𑀯𑁂𑀲𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀻𑀫𑀁𑀲𑀸. 𑀢𑁂𑀦𑀸𑀳 ‘‘𑀓𑁂𑀦 𑀦𑀼 𑀔𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸’’𑀢𑀺𑀆𑀤𑀺. 𑀦𑀸𑀴𑀺𑀓𑁂𑀭𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀸𑀦𑀁 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀏𑀯𑀭𑀽𑀧𑀸 𑀮𑁄𑀓𑀘𑀺𑀦𑁆𑀢𑀸𑀢𑀺 𑀏𑀤𑀺𑀲𑀸 𑀯𑀼𑀢𑁆𑀢𑀲𑀤𑀺𑀲𑀸 𑀅𑀜𑁆𑀜𑀸𑀧𑀺 𑀲𑀸 𑀮𑁄𑀓𑀘𑀺𑀦𑁆𑀢𑀸.

𑀅𑀘𑀺𑀦𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀓𑁆𑀔𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀅𑀝𑁆𑀞𑀫𑁂 𑀤𑀸𑀦𑀲𑀗𑁆𑀔𑀸𑀢𑀸𑀬 𑀤𑀓𑁆𑀔𑀺𑀡𑀸𑀬𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀗𑁆𑀔𑀸𑀢𑀸𑀬 𑀤𑀓𑁆𑀔𑀺𑀡𑀸𑀬. 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀫𑀳𑀸𑀚𑀼𑀢𑀺𑀓𑀢𑀸. 𑀲𑀸 𑀧𑀦 𑀫𑀳𑀧𑁆𑀨𑀮𑀢𑀸𑀬 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀳𑀧𑁆𑀨𑀮𑀪𑀸𑀯𑁂𑀦𑀸’’𑀢𑀺. 𑀯𑀺𑀲𑀼𑀚𑁆𑀛𑀢𑀻𑀢𑀺 𑀦 𑀓𑀺𑀮𑀺𑀲𑁆𑀲𑀢𑀺, 𑀅𑀫𑀮𑀺𑀦𑀸 𑀫𑀳𑀸𑀚𑀼𑀢𑀺𑀓𑀸 𑀫𑀳𑀸𑀯𑀺𑀧𑁆𑀨𑀸𑀭𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀥𑀫𑁆𑀫𑁄𑀢𑀺 𑀭𑀸𑀕𑀸𑀤𑀺𑀅𑀲𑀼𑀘𑀺𑀯𑀺𑀥𑀫𑀦𑁂𑀦 𑀲𑀼𑀘𑀺𑀲𑀪𑀸𑀯𑁄. 𑀮𑀸𑀫𑀓𑀥𑀫𑁆𑀫𑁄𑀢𑀺 𑀳𑀻𑀦𑀲𑀪𑀸𑀯𑁄 𑀧𑀸𑀧𑀓𑀺𑀭𑀺𑀬𑀸𑀬. 𑀅𑀓𑀼𑀲𑀮𑀥𑀫𑁆𑀫𑀸 𑀳𑀺 𑀏𑀓𑀦𑁆𑀢𑀦𑀺𑀳𑀻𑀦𑀸. 𑀚𑀽𑀚𑀓𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀦 𑀳𑁄𑀢𑀺, 𑀢𑀲𑁆𑀲 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀦𑀁 𑀤𑀸𑀦𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀕𑀡𑁆𑀳𑀦𑁆𑀢𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀲𑀫𑀢𑁆𑀣𑀁 𑀚𑀸𑀢𑀁. 𑀲𑁆𑀯𑀸𑀬𑀁 𑀤𑀸𑀬𑀓𑀕𑀼𑀡𑁄𑀢𑀺 𑀆𑀳 ‘‘𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸 𑀓𑀣𑁂𑀢𑀩𑁆𑀩𑁄’’𑀢𑀺𑀆𑀤𑀺. 𑀉𑀤𑁆𑀥𑀭𑀢𑀻𑀢𑀺 𑀩𑀳𑀼𑀮𑀁 𑀧𑀸𑀧𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀩𑁆𑀩𑀯𑀺𑀦𑀺𑀧𑀸𑀢𑀢𑁄 𑀉𑀤𑁆𑀥𑀭𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀢𑁆𑀣𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑁂𑀢𑀤𑀓𑁆𑀔𑀺𑀡𑀦𑁆𑀢𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀤𑀓𑁆𑀔𑀺𑀡𑀁. 𑀧𑀸𑀧𑀺𑀢𑀓𑀸𑀮𑁂𑀬𑁂𑀯𑀸𑀢𑀺 ‘‘𑀇𑀤𑀁 𑀤𑀸𑀦𑀁 𑀅𑀲𑀼𑀓𑀲𑁆𑀲 𑀧𑁂𑀢𑀲𑁆𑀲 𑀳𑁄𑀢𑀽’’𑀢𑀺 𑀢𑀁𑀉𑀤𑁆𑀤𑀺𑀲𑀦𑀯𑀲𑁂𑀦 𑀧𑀢𑁆𑀢𑀺𑀬𑀸 𑀧𑀸𑀧𑀺𑀢𑀓𑀸𑀮𑁂𑀬𑁂𑀯. 𑀅𑀲𑁆𑀲𑀸𑀢𑀺 𑀧𑁂𑀢𑀲𑁆𑀲. 𑀧𑀸𑀧𑀼𑀡𑀻𑀢𑀺 𑀨𑀮𑀲𑀫𑁆𑀧𑀢𑁆𑀢𑀺𑀮𑀪𑀸𑀧𑀦𑀯𑀲𑁂𑀦 𑀧𑀸𑀧𑀼𑀡𑀺. 𑀅𑀬𑀜𑁆𑀳𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑁂 𑀥𑀫𑁆𑀫𑀢𑀸. 𑀢𑀤𑀸 𑀓𑁄𑀲𑀮𑀭𑀜𑁆𑀜𑁄 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀅𑀢𑀺𑀯𑀺𑀬 𑀤𑀸𑀦𑀚𑁆𑀛𑀸𑀲𑀬𑀢𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀉𑀓𑁆𑀓𑀁𑀲𑀕𑀢𑀕𑀼𑀡𑀯𑀺𑀲𑀺𑀝𑁆𑀞𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀲𑀤𑀺𑀲𑀤𑀸𑀦𑀁 𑀓𑀣𑁂𑀢𑀩𑁆𑀩’’𑀦𑁆𑀢𑀺.

𑀤𑀓𑁆𑀔𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀯𑀡𑀺𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁯-𑁮𑁦. 𑀦𑀯𑀫𑁂 𑀢𑀁𑀲𑀤𑀺𑀲𑀸𑀢𑀺 𑀬𑀸𑀤𑀺𑀲𑀸 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀅𑀬𑀣𑀸𑀥𑀺𑀧𑁆𑀧𑀸𑀬𑀸 𑀅𑀜𑁆𑀜𑀸 𑀯𑀸 𑀲𑀫𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀸𑀯𑀸𑀢𑀺 𑀅𑀢𑁆𑀣𑁄. 𑀙𑁂𑀤𑀁 𑀕𑀘𑁆𑀙𑀢𑀻𑀢𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀅𑀥𑀺𑀧𑁆𑀧𑀸𑀬𑀢𑁄 𑀧𑀭𑀸 𑀯𑀺𑀲𑀺𑀝𑁆𑀞𑀸𑀢𑀺 𑀧𑀭𑀸𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀅𑀚𑁆𑀛𑀸𑀲𑀬𑀢𑁄 𑀅𑀥𑀺𑀓𑀢𑀭𑀨𑀮𑀸 𑀳𑁄𑀢𑀻’’𑀢𑀺. 𑀘𑀻𑀯𑀭𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀯𑀤𑁂𑀬𑁆𑀬𑀸𑀲𑀻𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀳𑁂𑀢𑀼 𑀫𑀁 𑀯𑀤𑁂𑀬𑁆𑀬𑀸𑀲𑀺 𑀧𑀢𑁆𑀣𑁂𑀬𑁆𑀬𑀸𑀲𑀺. 𑀅𑀣 𑀯𑀸 𑀬𑀤𑀸 𑀘𑀻𑀯𑀭𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀫𑀁 𑀬𑀸𑀘𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀯𑀡𑀺𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀡𑁆𑀡𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.