.𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀘𑀢𑀼𑀓𑁆𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀪𑀡𑁆𑀟𑀕𑀸𑀫𑀯𑀕𑁆𑀕𑁄

𑁧-𑁨. 𑀅𑀦𑀼𑀩𑀼𑀤𑁆𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀘𑀢𑀼𑀓𑁆𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀅𑀦𑀼𑀩𑁄𑀥𑁄 𑀧𑀼𑀩𑁆𑀩𑀪𑀸𑀕𑀺𑀬𑀁 𑀜𑀸𑀡𑀁, 𑀧𑀝𑀺𑀯𑁂𑀥𑁄 𑀅𑀦𑀼𑀩𑁄𑀥𑁂𑀦 𑀅𑀪𑀺𑀲𑀫𑀬𑁄. 𑀢𑀢𑁆𑀣 𑀬𑀲𑁆𑀫𑀸 𑀅𑀦𑀼𑀩𑁄𑀥𑀧𑀼𑀩𑁆𑀩𑀓𑁄 𑀧𑀝𑀺𑀯𑁂𑀥𑁄 𑀅𑀦𑀼𑀩𑁄𑀥𑁂𑀦 𑀯𑀺𑀦𑀸 𑀦 𑀳𑁄𑀢𑀺. 𑀅𑀦𑀼𑀩𑁄𑀥𑁄 𑀳𑀺 𑀏𑀓𑀘𑁆𑀘𑁄 𑀧𑀝𑀺𑀯𑁂𑀥𑀲𑀫𑁆𑀩𑀤𑁆𑀥𑁄, 𑀢𑀤𑀼𑀪𑀬𑀸𑀪𑀸𑀯𑀳𑁂𑀢𑀼𑀓𑀜𑁆𑀘 𑀯𑀝𑁆𑀝𑁂 𑀲𑀁𑀲𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀅𑀦𑀦𑀼𑀩𑁄𑀥𑀸…𑀧𑁂… 𑀢𑀼𑀫𑁆𑀳𑀸𑀓𑀜𑁆𑀘𑀸’’𑀢𑀺. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀪𑀯𑀢𑁄 𑀪𑀯𑀦𑁆𑀢𑀭𑀽𑀧𑀕𑀫𑀦𑀁 𑀲𑀦𑁆𑀥𑀸𑀯𑀦𑀁, 𑀅𑀧𑀭𑀸𑀧𑀭𑀁 𑀘𑀯𑀦𑀽𑀧𑀧𑀚𑁆𑀚𑀦𑀯𑀲𑁂𑀦 𑀲𑀜𑁆𑀘𑀭𑀡𑀁 𑀲𑀁𑀲𑀭𑀡𑀦𑁆𑀢𑀺 𑀆𑀳 ‘‘𑀪𑀯𑀢𑁄’’𑀢𑀺𑀆𑀤𑀺. 𑀲𑀦𑁆𑀥𑀸𑀯𑀺𑀢𑀲𑀁𑀲𑀭𑀺𑀢𑀧𑀤𑀸𑀦𑀁 𑀓𑀫𑁆𑀫𑀲𑀸𑀥𑀦𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘𑀸’’𑀢𑀺 𑀧𑀞𑀫𑀯𑀺𑀓𑀧𑁆𑀧𑁂. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀪𑀸𑀯𑀲𑀸𑀥𑀦𑀢𑀁 𑀳𑀤𑀬𑁂 𑀓𑀢𑁆𑀯𑀸 ‘‘𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸’’𑀢𑀺 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀤𑀻𑀖𑀭𑀚𑁆𑀚𑀼𑀦𑀸 𑀩𑀤𑁆𑀥𑀲𑀓𑀼𑀡𑀁 𑀯𑀺𑀬 𑀭𑀚𑁆𑀚𑀼𑀳𑀢𑁆𑀣𑁄 𑀧𑀼𑀭𑀺𑀲𑁄 𑀤𑁂𑀲𑀦𑁆𑀢𑀭𑀁 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀩𑀤𑁆𑀥𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀪𑀯𑀦𑁆𑀢𑀭𑀁 𑀦𑁂𑀢𑀺 𑀏𑀢𑀸𑀬𑀸𑀢𑀺 𑀪𑀯𑀦𑁂𑀢𑁆𑀢𑀺. 𑀢𑁂𑀦𑀸𑀳 ‘‘𑀪𑀯𑀭𑀚𑁆𑀚𑀽’’𑀢𑀺𑀆𑀤𑀻.

𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑁄𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀓𑀲𑀦𑁆𑀢𑀸𑀦𑁂 𑀧𑀭𑀲𑀦𑁆𑀢𑀸𑀦𑁂 𑀘 𑀯𑀺𑀦𑀸𑀲𑀓𑀭𑁄 𑀅𑀪𑀸𑀯𑀓𑀭𑁄. 𑀩𑀼𑀤𑁆𑀥𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀼𑀫𑀁𑀲𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀸𑀢𑀺𑀲𑀬𑀁 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀦𑀼𑀩𑀼𑀤𑁆𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀧𑀞𑀫𑀔𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩-𑁪. 𑀢𑀢𑀺𑀬𑁂 𑀓𑀮𑀺𑀦𑁆𑀢𑀺 𑀅𑀧𑀭𑀸𑀥𑀁. 𑀯𑀺𑀘𑀺𑀦𑀸𑀢𑀻𑀢𑀺 𑀆𑀘𑀺𑀦𑁄𑀢𑀺 𑀧𑀲𑀯𑀢𑀺. 𑀢𑁂𑀦 𑀘 𑀓𑀮𑀺𑀦𑀸 𑀲𑀼𑀔𑀁 𑀦 𑀧𑀝𑀺𑀮𑀪𑀢𑀻𑀢𑀺 𑀢𑁂𑀦 𑀅𑀧𑀭𑀸𑀥𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺. 𑀦𑀺𑀦𑁆𑀤𑀺𑀬𑀧𑁆𑀧𑀲𑀁𑀲𑀸𑀬 𑀳𑀺 𑀧𑀲𑀁𑀲𑀺𑀬𑀦𑀺𑀦𑁆𑀤𑀸𑀬 𑀘 𑀲𑀫𑀓𑁄𑀯 𑀯𑀺𑀧𑀸𑀓𑁄. 𑀧𑀲𑀁𑀲𑀺𑀬𑀦𑀺𑀦𑁆𑀤𑀸𑀢𑀺 𑀘 𑀲𑀫𑁆𑀧𑀦𑁆𑀦𑀕𑀼𑀡𑀧𑀭𑀺𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀓𑀝𑀼𑀓𑀢𑀭𑀯𑀺𑀧𑀸𑀓𑀸. 𑀦𑀺𑀦𑁆𑀤𑀺𑀬𑀧𑁆𑀧𑀲𑀁𑀲𑀸 𑀧𑀦 𑀓𑀣𑀁 𑀢𑀸𑀬 𑀲𑀫𑀯𑀺𑀧𑀸𑀓𑀸𑀢𑀺 𑀘𑁂? 𑀢𑀲𑁆𑀫𑀺𑀁 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀲𑀫𑀸𑀭𑁄𑀧𑀦𑁂𑀦 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀧𑀲𑀁𑀲𑀺𑀬𑁂𑀦 𑀢𑀲𑁆𑀲 𑀲𑀩𑁆𑀪𑀸𑀯𑀓𑀭𑀡𑀢𑁄 𑀘. 𑀮𑁄𑀓𑁂𑀧𑀺 𑀳𑀺 𑀅𑀲𑀽𑀭𑀁 𑀲𑀽𑀭𑁂𑀦 𑀲𑀫𑀁 𑀓𑀭𑁄𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀺, 𑀧𑀕𑁂𑀯 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑁂𑀦 𑀲𑀫𑀁 𑀓𑀭𑁄𑀦𑁆𑀢𑁄𑀢𑀺. 𑀲𑀓𑁂𑀦 𑀥𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑁂𑀦. 𑀅𑀧𑁆𑀧𑀫𑀢𑁆𑀢𑀓𑁄𑀯 𑀓𑀮𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀢𑀸 𑀲𑀧𑁆𑀧𑀝𑀺𑀓𑀸𑀭𑀢𑁆𑀢𑀸 𑀘 𑀅𑀧𑁆𑀧𑀫𑀢𑁆𑀢𑀓𑁄 𑀅𑀧𑀭𑀸𑀥𑁄. 𑀅𑀬𑀁…𑀧𑁂… 𑀫𑀳𑀦𑁆𑀢𑀢𑀭𑁄 𑀓𑀮𑀺 𑀓𑀢𑀽𑀧𑀘𑀺𑀢𑀢𑁆𑀢𑀸 𑀲𑀫𑁆𑀧𑀭𑀸𑀬𑀺𑀓𑀢𑁆𑀢𑀸 𑀅𑀧𑁆𑀧𑀝𑀺𑀓𑀸𑀭𑀢𑁆𑀢𑀸 𑀘.

𑀦𑀺𑀭𑀩𑁆𑀩𑀼𑀤𑁄𑀢𑀺 𑀕𑀡𑀦𑀸𑀯𑀺𑀲𑁂𑀲𑁄 𑀏𑀲𑁄𑀢𑀺 𑀆𑀳 ‘‘𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬𑀸’’𑀢𑀺, 𑀲𑀢𑀲𑀳𑀲𑁆𑀲𑀁 𑀦𑀺𑀭𑀩𑁆𑀩𑀼𑀤𑀸𑀢𑀺 𑀅𑀢𑁆𑀣𑁄. 𑀦𑀺𑀭𑀩𑁆𑀩𑀼𑀤𑀧𑀭𑀺𑀫𑀸𑀡𑀁 𑀧𑀦 𑀯𑀲𑁆𑀲𑀕𑀡𑀦𑀸𑀬 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑁂𑀯 𑀳𑀺 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀁 𑀓𑁄𑀝𑀺 𑀳𑁄𑀢𑀺, 𑀏𑀯𑀁 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀁 𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫 𑀳𑁄𑀢𑀺, 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀁 𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑀓𑁄𑀝𑀺, 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑀁 𑀅𑀩𑁆𑀩𑀼𑀤𑀁, 𑀢𑀢𑁄 𑀯𑀻𑀲𑀢𑀺𑀕𑀼𑀡𑀺𑀢𑀁 𑀦𑀺𑀭𑀩𑁆𑀩𑀼𑀤𑀁. 𑀬𑀁 𑀅𑀭𑀺𑀬𑁂 𑀕𑀭𑀳𑀦𑁆𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻𑀢𑀺 𑀅𑀭𑀺𑀬𑁂 𑀕𑀭𑀳𑀦𑁆𑀢𑁄 𑀬𑀁 𑀦𑀺𑀭𑀩𑁆𑀩𑀼𑀤𑀲𑀗𑁆𑀔𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺, 𑀦𑀺𑀭𑀩𑁆𑀩𑀼𑀤𑁄𑀢𑀺 𑀘 𑀧𑀸𑀝𑀺𑀬𑁂𑀓𑁆𑀓𑁄 𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀧𑀦 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀔𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑀼𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀅𑀦𑀼𑀲𑁄𑀢𑀁 𑀕𑀘𑁆𑀙𑀢𑀻𑀢𑀺 𑀲𑀁𑀲𑀸𑀭𑀲𑁄𑀢𑀲𑁆𑀲 𑀅𑀦𑀼𑀓𑀽𑀮𑀪𑀸𑀯𑁂𑀦 𑀕𑀘𑁆𑀙𑀢𑀺. 𑀧𑀘𑁆𑀘𑀦𑀻𑀓𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀁𑀲𑀸𑀭𑀲𑁄𑀢𑀲𑁆𑀲 𑀧𑀝𑀺𑀓𑀽𑀮𑀯𑀲𑁂𑀦 𑀧𑀯𑀢𑁆𑀢𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸. 𑀞𑀺𑀢𑀲𑀪𑀸𑀯𑁄𑀢𑀺 𑀅𑀘𑀮𑀧𑁆𑀧𑀲𑀸𑀤𑀸𑀤𑀺𑀲𑀫𑀦𑁆𑀦𑀸𑀕𑀫𑁂𑀦 𑀞𑀺𑀢𑀲𑀪𑀸𑀯𑁄. 𑀅𑀦𑀸𑀕𑀸𑀫𑀻 𑀳𑀺 𑀅𑀲𑁆𑀲𑀤𑁆𑀥𑀺𑀬𑁂𑀳𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂𑀳𑀺 𑀅𑀓𑀫𑁆𑀧𑀦𑀺𑀬𑀘𑀺𑀢𑁆𑀢𑀢𑀸𑀬 𑀢𑀫𑁆𑀳𑀸 𑀮𑁄𑀓𑀸 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀘 𑀞𑀺𑀢𑀲𑀪𑀸𑀯𑁄 𑀦𑀸𑀫. 𑀑𑀖𑀁 𑀢𑀭𑀺𑀢𑁆𑀯𑀸𑀢𑀺 𑀓𑀸𑀫𑁄𑀖𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀧𑀭𑀢𑀻𑀭𑀁 𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀢𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀗𑁆𑀔𑀁 𑀕𑀢𑁄 𑀔𑀻𑀡𑀸𑀲𑀯𑁄. 𑀢𑁂𑀦𑀸𑀳 ‘‘𑀲𑁂𑀝𑁆𑀞𑁄 𑀦𑀺𑀤𑁆𑀤𑁄𑀲𑁄’’𑀢𑀺. 𑀧𑀜𑁆𑀘𑀯𑁂𑀭𑀓𑀫𑁆𑀫𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀤𑀼𑀘𑁆𑀘𑀭𑀺𑀢𑀁. 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦𑀸𑀢𑀺 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑁂 𑀲𑀢𑀺 𑀉𑀧𑁆𑀧𑀦𑁆𑀦𑁂𑀦 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀫𑁆𑀧𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀏𑀓𑀸𑀬𑀧𑀺 𑀅𑀦𑀽𑀦𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁. 𑀇𑀫𑀺𑀦𑀸 𑀯𑀸𑀭𑁂𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀓𑀣𑀺𑀢𑀸. 𑀓𑀺𑀁 𑀧𑀦 𑀢𑁂 𑀭𑀼𑀤𑀦𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻𑀢𑀺? 𑀆𑀫, 𑀓𑀺𑀮𑁂𑀲𑀭𑁄𑀤𑀦𑁂𑀦 𑀭𑁄𑀤𑀦𑁆𑀢𑀸 𑀘𑀭𑀦𑁆𑀢𑀺 𑀦𑀸𑀫, 𑀲𑀻𑀮𑀲𑀫𑁆𑀧𑀦𑁆𑀦𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑁄.

𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀜𑀸𑀡𑀁. 𑀙𑀳𑀸𑀓𑀸𑀭𑁂𑀳𑀺 𑀧𑀸𑀭𑀕𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀪𑀸𑀯𑀦𑀸𑀧𑀸𑀭𑀕𑀽, 𑀧𑀳𑀸𑀦𑀧𑀸𑀭𑀕𑀽, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀏𑀯𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀧𑁆𑀧𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀅𑀧𑁆𑀧𑀓𑀁 𑀲𑀼𑀢𑀁 𑀳𑁄𑀢𑀻𑀢𑀺 𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑁂 𑀓𑀺𑀜𑁆𑀘𑀺𑀤𑁂𑀯 𑀲𑀼𑀢𑀁 𑀳𑁄𑀢𑀺. 𑀢𑀤𑁂𑀯 𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀢𑁆𑀢𑀸𑀤𑀻𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀓𑁆𑀔𑀦𑁆𑀥𑀓𑀧𑀭𑀺𑀯𑀸𑀭𑀸’’𑀢𑀺𑀆𑀤𑀺𑀫𑀸𑀳. 𑀓𑀣𑀁 𑀧𑀦𑀸𑀬𑀁 𑀯𑀺𑀪𑀸𑀕𑁄 𑀬𑀼𑀚𑁆𑀚𑁂𑀬𑁆𑀬. 𑀲𑀕𑀸𑀣𑀓𑀜𑁆𑀳𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀁. 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀲𑀼𑀢𑁆𑀢𑀁 𑀉𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀜𑁆𑀜𑀸𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸. 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀜𑁆𑀘 (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁬𑁧 𑀆𑀤𑀬𑁄) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬. 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀯𑀺𑀬. 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

‘‘𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄’’. (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸; 𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸)

𑀲𑀩𑁆𑀩𑀲𑁆𑀲𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑁂𑀦𑁂𑀯𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭𑁄) ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺. 𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 (𑀧𑀸𑀘𑀺. 𑁬𑁫𑁫, 𑁧𑁨𑁪𑁨) 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯𑀫𑀸𑀤𑀺 𑀘 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂 𑀲𑀦𑀺𑀫𑀺𑀢𑁆𑀢𑀸 𑀢𑀤𑁂𑀓𑀤𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀯𑀸 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘‘𑀕𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀁. 𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄, ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀬𑀼𑀢𑁆𑀢𑁂𑀲𑀼 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀻𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼 𑀅𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸, 𑀲𑀢𑀺𑀧𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄. 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄. 𑀦𑀦𑀼 𑀘 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀬𑀜𑁆𑀘 𑀯𑀼𑀢𑁆𑀢𑀁 𑁋 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺, 𑀢𑀁 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀅𑀣 𑀔𑁄 𑀲𑀼𑀢𑁆𑀢𑀪𑀸𑀯𑁂𑀦𑁂𑀯, 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑁆𑀢𑀦𑀸𑀫𑀓’’𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺, 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳 𑀕𑀸𑀣𑀸𑀳𑀻𑀢𑀺 𑀳𑀺 𑀲𑀕𑀸𑀣𑀓𑀁. 𑀲𑀳𑀪𑀸𑀯𑁄 𑀦𑀸𑀫 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀬𑀤𑀧𑀺 𑀯𑀼𑀢𑁆𑀢𑀁 𑁋 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦, 𑀅𑀜𑁆𑀜𑀢𑁄. 𑀅𑀜𑁆𑀜𑀸 𑀏𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀸 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀅𑀫𑁆𑀳𑁂𑀳𑀺 𑀧𑀓𑀸𑀲𑀺𑀢𑁄, 𑀇𑀘𑁆𑀙𑀦𑁆𑀢𑁂𑀳𑀺 𑀢𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄.

𑀦 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀦 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀦 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀅𑀝𑁆𑀞𑀓𑀣𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸…𑀧𑁂… 𑀦 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺.

𑀅𑀧𑁆𑀧𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑁄𑀪𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀸𑀤𑀺𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦. 𑀯𑀺𑀦𑀬𑀁 𑀉𑀧𑁂𑀢𑀸𑀢𑀺 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀦𑀬𑀁 𑀉𑀧𑁂𑀢𑀸. 𑀯𑁂𑀲𑀸𑀭𑀚𑁆𑀚𑁂𑀦𑀸𑀢𑀺 𑀲𑀸𑀭𑀚𑁆𑀚𑀓𑀭𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀕𑀫𑀦𑀢𑁄 𑀯𑁂𑀲𑀸𑀭𑀚𑁆𑀚𑁂𑀦, 𑀲𑀸𑀭𑀚𑁆𑀚𑀭𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀧𑀺𑀝𑀓𑀯𑀲𑁂𑀦 𑀩𑀳𑀼 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀫𑁂𑀯 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀁 𑀯𑀺𑀬 𑀯𑀺𑀦𑀲𑁆𑀲𑀦𑁆𑀢𑀁 𑀅𑀓𑀢𑁆𑀯𑀸 𑀲𑀼𑀧𑁆𑀧𑀕𑀼𑀡𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀳𑀤𑀬𑁂 𑀞𑀧𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀏𑀤𑀺𑀲𑀸 𑀘 𑀅𑀢𑁆𑀢𑀦𑀸 𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀥𑀸𑀭𑀪𑀽𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀢𑀥𑀫𑁆𑀫𑀸𑀦𑀁 𑀆𑀥𑀸𑀭𑀪𑀽𑀢𑀸’’𑀢𑀺.

𑀲𑁄𑀪𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑁂𑀲𑀸𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀩𑁆𑀬𑀸𑀫𑁄𑀳𑀯𑀲𑁂𑀦 𑀲𑀭𑀡𑀧𑀭𑀺𑀬𑁂𑀲𑀦𑀁 𑀲𑀸𑀭𑀚𑁆𑀚𑀦𑀁 𑀲𑀸𑀭𑀤𑁄, 𑀩𑁆𑀬𑀸𑀫𑁄𑀳𑀪𑀬𑀁. 𑀯𑀺𑀕𑀢𑁄 𑀲𑀸𑀭𑀤𑁄 𑀏𑀢𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄, 𑀢𑀲𑁆𑀲 𑀪𑀸𑀯𑁄 𑀯𑁂𑀲𑀸𑀭𑀚𑁆𑀚𑀁. 𑀢𑀁 𑀧𑀦 𑀜𑀸𑀡𑀲𑀫𑁆𑀧𑀤𑀁, 𑀧𑀳𑀸𑀦𑀲𑀫𑁆𑀧𑀤𑀁, 𑀤𑁂𑀲𑀦𑀸𑀯𑀺𑀲𑁂𑀲𑀲𑀫𑁆𑀧𑀤𑀁 𑀔𑁂𑀫𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀢𑁂𑀦𑀸𑀳 ‘‘𑀘𑀢𑀽𑀲𑀼 𑀞𑀸𑀦𑁂𑀲𑀽’’𑀢𑀺𑀆𑀤𑀺. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀅𑀝𑁆𑀞 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀆𑀲𑀪𑀸, 𑀧𑀼𑀩𑁆𑀩𑀩𑀼𑀤𑁆𑀥𑀸. 𑀇𑀤𑀁 𑀧𑀦𑀸𑀢𑀺 𑀩𑀼𑀤𑁆𑀥𑀸𑀦𑀁 𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀫𑁂𑀯 𑀯𑀤𑀢𑀺. 𑀢𑀺𑀝𑁆𑀞𑀫𑀸𑀦𑁄𑀯𑀸𑀢𑀺 𑀅𑀯𑀤𑀦𑁆𑀢𑁄𑀧𑀺 𑀢𑀺𑀝𑁆𑀞𑀫𑀸𑀦𑁄𑀯 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀉𑀧𑀕𑀘𑁆𑀙𑀢𑀻𑀢𑀺 𑀅𑀦𑀼𑀚𑀸𑀦𑀸𑀢𑀺.

𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀽𑀢𑀺 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑀸…𑀧𑁂… 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀕𑀳𑀧𑀢𑀺𑀧𑀭𑀺𑀲𑀁, 𑀲𑀫𑀡𑀧𑀭𑀺𑀲𑀁, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀁, 𑀢𑀸𑀯𑀢𑀺𑀁𑀲𑀧𑀭𑀺𑀲𑀁, 𑀫𑀸𑀭𑀧𑀭𑀺𑀲𑀁, 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑀸, 𑀢𑀢𑁆𑀭𑀧𑀺 𑀫𑀬𑀸 𑀲𑀦𑁆𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀜𑁆𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀜𑁆𑀘 𑀲𑀸𑀓𑀘𑁆𑀙𑀸 𑀘 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸. 𑀢𑀢𑁆𑀭 𑀯𑀢 𑀫𑀁 ‘𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀑𑀓𑁆𑀓𑀫𑀺𑀲𑁆𑀲𑀢𑀻’𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁧) 𑀏𑀯𑀁 𑀯𑀼𑀢𑁆𑀢𑀧𑀭𑀺𑀲𑀸𑀲𑀼. 𑀅𑀪𑀻𑀢𑀦𑀸𑀤𑀁 𑀦𑀤𑀢𑀻𑀢𑀺 𑀧𑀭𑀢𑁄 𑀤𑀲𑁆𑀲𑀺𑀢𑀜𑀸𑀡𑀬𑁄𑀕𑁂𑀦 𑀯𑀺𑀲𑀸𑀭𑀤𑁄 𑀅𑀳𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦𑀸𑀢𑀺 𑀔𑀦𑁆𑀥𑀯𑀕𑁆𑀕𑁂 𑀆𑀕𑀢𑁂𑀦 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦.

‘‘𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀲𑀼𑀢𑁆𑀢𑀲𑁂𑀲𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀨𑀮𑀲𑀫𑁆𑀧𑀢𑁆𑀢𑀺𑀧𑀯𑀢𑁆𑀢𑀺 𑀯𑀼𑀢𑁆𑀢𑀸, 𑀧𑀼𑀭𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀉𑀧𑀦𑀺𑀲𑁆𑀲𑀬𑀸 𑀧𑀘𑁆𑀙𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀧𑀯𑀢𑁆𑀢𑀺 𑀯𑀸 𑀯𑀼𑀢𑁆𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀢𑀢𑁆𑀣 𑀘 𑀘𑀓𑁆𑀓𑀲𑀤𑁆𑀤𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀘𑀓𑁆𑀓𑀲𑀡𑁆𑀞𑀸𑀦𑀸 𑀅𑀲𑀦𑀺 𑀏𑀯 𑀅𑀲𑀦𑀺𑀯𑀺𑀘𑀓𑁆𑀓𑀁. 𑀉𑀭𑀘𑀓𑁆𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀡𑀸𑀲𑀫𑀽𑀳𑀸𑀤𑀻𑀲𑀼𑀧𑀺 𑀘𑀓𑁆𑀓𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀗𑁆𑀖𑀪𑁂𑀤𑀁 𑀓𑀭𑀺𑀲𑁆𑀲𑀸𑀫 𑀘𑀓𑁆𑀓𑀪𑁂𑀤’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀳𑀺 𑀆𑀡𑀸 ‘‘𑀘𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀸. ‘‘𑀤𑁂𑀯𑀘𑀓𑁆𑀓𑀁 𑀅𑀲𑀼𑀭𑀘𑀓𑁆𑀓’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑁄𑀢𑀺.

𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑁂𑀥𑁄𑀢𑀺 ‘‘𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀧𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀧𑀭𑀲𑁆𑀲 𑀩𑀼𑀚𑁆𑀛𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀤𑁂𑀲𑀦𑀸𑀜𑀸𑀡𑀧𑁆𑀧𑀯𑀢𑁆𑀢𑀺 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀥𑀫𑁆𑀫𑁂𑀲𑀼. 𑀯𑀘𑀦𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀁, 𑀦 𑀧𑀦 𑀤𑀲𑁆𑀲𑀦𑀁 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀪𑀕𑀯𑀢𑁄 𑀏𑀯 𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀭𑀲𑁆𑀲 𑀯𑀘𑀦𑀯𑀲𑁂𑀦 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮-𑁭𑁨𑁧) 𑀯𑀺𑀬 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀦𑀸’’𑀢𑀺. 𑀳𑁂𑀢𑀽𑀢𑀺 𑀘 𑀉𑀧𑀧𑀢𑁆𑀢𑀺𑀲𑀸𑀥𑀦𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑀸𑀭𑀓𑁄, 𑀲𑀫𑁆𑀧𑀸𑀧𑀓𑁄 𑀯𑀸. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀬 𑀓𑀸𑀭𑀡𑀁. 𑀢𑀢𑁆𑀣 𑀘𑁄𑀤𑀓𑁄 𑀘𑁄𑀤𑀦𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁, 𑀥𑀫𑁆𑀫𑁄 𑀘𑁄𑀤𑀦𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀧𑀼𑀕𑁆𑀕𑀮𑁄𑀧𑀻’’𑀢𑀺𑀆𑀤𑀺. 𑀔𑁂𑀫𑀦𑁆𑀢𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀩𑀸𑀳𑀺𑀬𑀪𑀸𑀯𑁂𑀦 𑀅𑀦𑀼𑀧𑀤𑁆𑀤𑀼𑀢𑀁.

𑀅𑀦𑁆𑀢𑀭𑀸𑀬𑁄 𑀏𑀢𑁂𑀲𑀁 𑀅𑀢𑁆𑀣𑀺, 𑀅𑀦𑁆𑀢𑀭𑀸𑀬𑁂 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀏𑀯𑀁𑀪𑀽𑀢𑀸 𑀧𑀦 𑀢𑁂 𑀬𑀲𑁆𑀫𑀸 𑀅𑀦𑁆𑀢𑀭𑀸𑀬𑀓𑀭𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺. 𑀅𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑁂 𑀦𑀸𑀢𑀺𑀲𑀸𑀯𑀚𑁆𑀚𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸’’𑀢𑀺. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀇𑀢𑀭𑁂𑀲𑀫𑁆𑀧𑀺 𑀘𑀢𑀼𑀦𑁆𑀦𑀁 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀢𑀩𑁆𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄. 𑀇𑀥 𑀧𑀦 𑀫𑁂𑀣𑀼𑀦𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀇𑀤𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁪𑁧𑁭) 𑀯𑀺𑀬. 𑀬𑀲𑁆𑀫𑀸 𑀢𑀁𑀔𑀡𑀫𑁆𑀧𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀭𑀢𑁄 𑀳𑁄𑀢𑀺 𑀘𑁂, 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀦 𑀓𑀸𑀫𑁂𑀲𑀼 𑀆𑀲𑀢𑁆𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦…𑀧𑁂…𑀅𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺. 𑀢𑀢𑁆𑀣 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀦 𑀓𑁂𑀯𑀮𑀁 𑀧𑀩𑁆𑀩𑀚𑀺𑀢𑀲𑁆𑀲𑁂𑀯, 𑀅𑀣 𑀔𑁄 𑀬𑀲𑁆𑀲 𑀓𑀲𑁆𑀲𑀘𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, 𑀫𑀼𑀲𑁆𑀲𑀢𑁂𑀯𑀸𑀧𑀺 𑀲𑀸𑀲𑀦’’𑀦𑁆𑀢𑀺 (𑀲𑀼. 𑀦𑀺. 𑁮𑁨𑁦).

𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀦𑀺𑀫𑀺𑀢𑁆𑀢𑀁. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀇𑀤𑀁 𑀓𑀫𑁆𑀫𑀲𑀁𑀬𑁄𑀕𑁂 𑀪𑀼𑀫𑁆𑀫𑀁.

𑀉𑀧𑀦𑀺𑀩𑀤𑁆𑀥𑀸𑀢𑀺 𑀯𑀺𑀭𑀘𑀺𑀢𑀸. 𑀢𑁂𑀦𑀸𑀳 ‘‘𑀅𑀪𑀺𑀲𑀗𑁆𑀔𑀢𑀸’’𑀢𑀺. 𑀧𑀼𑀣𑀼𑀪𑀸𑀯𑀦𑁆𑀢𑀺 𑀩𑀳𑀼𑀪𑀸𑀯𑀁. 𑀧𑀼𑀣𑀽𑀳𑀺 𑀯𑀸 𑀲𑀺𑀢𑀸𑀢𑀺 𑀩𑀳𑀽𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀺𑀢𑀸 𑀉𑀧𑀦𑀺𑀩𑀤𑁆𑀥𑀸.

𑀯𑁂𑀲𑀸𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀡𑁆𑀳𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀪𑀯𑀢𑀺 𑀏𑀢𑁂𑀦 𑀆𑀭𑁄𑀕𑁆𑀬𑀦𑁆𑀢𑀺 𑀪𑀯𑁄, 𑀕𑀺𑀮𑀸𑀦𑀧𑀘𑁆𑀘𑀬𑁄. 𑀧𑀭𑀺𑀯𑀼𑀤𑁆𑀥𑁄 𑀪𑀯𑁄 𑀅𑀪𑀯𑁄. 𑀯𑀼𑀤𑁆𑀥𑀺𑀅𑀢𑁆𑀣𑁄 𑀳𑀺 𑀅𑀬𑀫𑀓𑀸𑀭𑁄 𑀬𑀣𑀸 ‘‘𑀲𑀁𑀯𑀭𑀸𑀲𑀁𑀯𑀭𑁄, 𑀨𑀮𑀸𑀨𑀮’’𑀦𑁆𑀢𑀺 𑀘. 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀁 𑀕𑀳𑀡𑀁. 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀲𑀩𑁆𑀩𑀲𑁆𑀲𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀪𑀯𑀸𑀪𑀯𑁄𑀢𑀺 𑀯𑀸 𑀔𑀼𑀤𑁆𑀤𑀓𑁄 𑀘𑁂𑀯 𑀫𑀳𑀦𑁆𑀢𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽’’𑀢𑀺𑀆𑀤𑀺. 𑀪𑀯𑁄𑀢𑀺 𑀯𑀸 𑀲𑀫𑁆𑀧𑀢𑁆𑀢𑀺, 𑀅𑀪𑀯𑁄𑀢𑀺 𑀯𑀺𑀧𑀢𑁆𑀢𑀺. 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀢𑀁𑀦𑀺𑀫𑀺𑀢𑁆𑀢𑀜𑁆𑀘 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀯𑀸𑀪𑀯𑀳𑁂𑀢𑀼 𑀯𑀸’’𑀢𑀺.

𑀢𑀡𑁆𑀳𑀸𑀤𑀼𑀢𑀺𑀬𑁄𑀢𑀺 𑀢𑀡𑁆𑀳𑀸𑀲𑀳𑀸𑀬𑁄. 𑀢𑀡𑁆𑀳𑀸 𑀳𑀺 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑁂 𑀫𑀭𑀻𑀘𑀺𑀓𑀸𑀬 𑀉𑀤𑀓𑀲𑀜𑁆𑀜𑀸 𑀯𑀺𑀬 𑀧𑀺𑀧𑀸𑀲𑀸𑀪𑀺𑀪𑀽𑀢𑀁 𑀢𑀲𑀺𑀢𑀁 𑀲𑀢𑁆𑀢𑀁 𑀅𑀲𑁆𑀲𑀸𑀲𑀤𑀲𑁆𑀲𑀦𑀯𑀲𑁂𑀦 𑀲𑀳𑀸𑀬𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻 𑀪𑀯𑀸𑀤𑀻𑀲𑀼 𑀅𑀦𑀺𑀩𑁆𑀩𑀺𑀦𑁆𑀦𑀁 𑀓𑀢𑁆𑀯𑀸 𑀧𑀭𑀺𑀩𑁆𑀪𑀫𑀸𑀧𑁂𑀢𑀺. 𑀢𑀣𑀸 𑀳𑀺 𑀢𑀁 𑀧𑀧𑀸𑀢𑀓𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀫𑀥𑀼𑀕𑁆𑀕𑀡𑁆𑀳𑀦𑀓𑀮𑀼𑀤𑁆𑀤𑀓𑀸 𑀯𑀺𑀬 𑀅𑀦𑁂𑀓𑀸𑀤𑀻𑀦𑀯𑀸𑀓𑀼𑀮𑁂𑀲𑀼 𑀪𑀯𑁂𑀲𑀼 𑀆𑀦𑀺𑀲𑀁𑀲𑀫𑁂𑀯 𑀤𑀲𑁆𑀲𑁂𑀦𑁆𑀢𑀻 𑀅𑀦𑀢𑁆𑀣𑀚𑀸𑀮𑁂 𑀲𑀸 𑀧𑀭𑀺𑀩𑁆𑀪𑀫𑀸𑀧𑁂𑀢𑀺, 𑀢𑀲𑁆𑀫𑀸 𑀢𑀡𑁆𑀳𑀸 ‘‘𑀧𑀼𑀭𑀺𑀲𑀲𑁆𑀲 𑀤𑀼𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀦𑀦𑀼 𑀘 𑀅𑀜𑁆𑀜𑁂𑀧𑀺 𑀓𑀺𑀮𑁂𑀲𑀸𑀤𑀬𑁄 𑀪𑀯𑀦𑀺𑀩𑁆𑀩𑀢𑁆𑀢𑀺𑀧𑀘𑁆𑀘𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀦 𑀧𑀦 𑀢𑀣𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀬𑀣𑀸 𑀢𑀡𑁆𑀳𑀸. 𑀢𑀣𑀸 𑀳𑀺 𑀲𑀸 𑀓𑀼𑀲𑀮𑁂𑀳𑀺 𑀯𑀺𑀦𑀸 𑀅𑀓𑀼𑀲𑀮𑁂𑀳𑀺, 𑀓𑀸𑀫𑀸𑀯𑀘𑀭𑀸𑀤𑀺𑀓𑀼𑀲𑀮𑁂𑀳𑀺 𑀘 𑀯𑀺𑀦𑀸 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑁂𑀳𑀺 𑀪𑀯𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀬𑀢𑁄 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀇𑀢𑁆𑀣𑀪𑀸𑀯𑁄 𑀘 𑀅𑀜𑁆𑀜𑀣𑀸𑀪𑀸𑀯𑁄 𑀘 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑁄, 𑀲𑀁𑀲𑀸𑀭𑁄, 𑀢𑀁 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁. 𑀢𑀢𑁆𑀣 𑀇𑀢𑁆𑀣𑀪𑀸𑀯𑁄 𑀫𑀦𑀼𑀲𑁆𑀲𑀢𑁆𑀢𑀁, 𑀅𑀜𑁆𑀜𑀣𑀸𑀪𑀸𑀯𑁄 𑀢𑀢𑁄 𑀅𑀯𑀲𑀺𑀝𑁆𑀞𑀲𑀢𑁆𑀢𑀸𑀯𑀸𑀲𑀸. 𑀇𑀢𑁆𑀣𑀪𑀸𑀯𑁄 𑀯𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀅𑀜𑁆𑀜𑀣𑀸𑀪𑀸𑀯𑁄 𑀅𑀦𑀸𑀕𑀢𑀢𑁆𑀢𑀪𑀸𑀯𑁄. 𑀏𑀯𑀭𑀽𑀧𑁄 𑀯𑀸 𑀅𑀜𑁆𑀜𑁄𑀧𑀺 𑀅𑀢𑁆𑀢𑀪𑀸𑀯𑁄 𑀇𑀢𑁆𑀣𑀪𑀸𑀯𑁄, 𑀦 𑀏𑀯𑀭𑀽𑀧𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀢𑁂𑀦𑁂𑀯𑀸𑀳 ‘‘𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀏𑀢𑁆𑀣 𑀇𑀢𑁆𑀣𑀪𑀸𑀯𑁄 𑀦𑀸𑀫 𑀅𑀬𑀁 𑀅𑀢𑁆𑀢𑀪𑀸𑀯𑁄’’𑀢𑀺𑀆𑀤𑀺. 𑀲𑀁𑀲𑀭𑀡𑀁 𑀲𑀁𑀲𑀸𑀭𑁄.

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺’’. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑁄; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪);

𑀢𑁂𑀦𑀸𑀳 ‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀧𑀝𑀺𑀧𑀸𑀝𑀺’’𑀦𑁆𑀢𑀺, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁂𑀦 𑀅𑀧𑀭𑀸𑀧𑀭𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀏𑀢𑁆𑀣 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺𑀧𑀺 𑀧𑀞𑀦𑁆𑀢𑀺, 𑀏𑀢𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁 𑀲𑀫𑀼𑀤𑀬𑀁 𑀢𑀡𑁆𑀳𑀁 𑀆𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀲𑀁𑀲𑀸𑀭𑀸𑀦𑀢𑀺𑀯𑀢𑁆𑀢𑀦𑀆𑀤𑀻𑀦𑀯𑀁 𑀤𑁄𑀲𑀁 𑀜𑀢𑁆𑀯𑀸. 𑀦𑀺𑀕𑁆𑀕𑀳𑀡𑁄𑀢𑀺 𑀘𑀢𑀼𑀭𑀽𑀧𑀸𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀲𑁆𑀲 𑀕𑀳𑀡𑀲𑁆𑀲 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂𑀦 𑀦𑀺𑀕𑁆𑀕𑀳𑀡𑁄, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀅𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀡𑁆𑀳𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀬𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀬𑁄𑀚𑁂𑀦𑁆𑀢𑀻𑀢𑀺 𑀓𑀫𑁆𑀫𑀁 𑀯𑀺𑀧𑀸𑀓𑁂𑀦 𑀪𑀯𑀸𑀤𑀺𑀁, 𑀪𑀯𑀦𑁆𑀢𑀭𑀸𑀤𑀻𑀳𑀺 𑀤𑀼𑀓𑁆𑀔𑁂𑀦 𑀲𑀢𑁆𑀢𑀁 𑀬𑁄𑀚𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀓𑀸𑀫𑀦𑀝𑁆𑀞𑁂𑀦 𑀓𑀸𑀫𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀬𑁄𑀕𑁄 𑀘𑀸𑀢𑀺 𑀓𑀸𑀫𑀬𑁄𑀕𑁄. 𑀪𑀯𑀬𑁄𑀕𑁄 𑀦𑀸𑀫 𑀪𑀯𑀭𑀸𑀕𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀭𑀽𑀧𑀪𑀯𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑁄 𑀉𑀧𑀧𑀢𑁆𑀢𑀺𑀪𑀯𑁂𑀲𑀼 𑀭𑀸𑀕𑁄, 𑀤𑀼𑀢𑀺𑀬𑁄 𑀓𑀫𑁆𑀫𑀪𑀯𑁂𑀲𑀼, 𑀢𑀢𑀺𑀬𑁄 𑀪𑀯𑀤𑀺𑀝𑁆𑀞𑀺𑀲𑀳𑀕𑀢𑁄 𑀬𑀣𑀸 𑀭𑀚𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀏𑀯𑀁 𑀬𑀼𑀚𑁆𑀚𑀦𑀝𑁆𑀞𑁂𑀦 𑀬𑁄𑀕𑁄𑀢𑀺 𑀯𑀼𑀢𑁆𑀢𑁄. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀳𑁂𑀲𑀸𑀢𑀺, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀤𑀻𑀦𑀁.

𑀲𑀫𑀼𑀤𑀬𑀦𑁆𑀢𑀺 𑀤𑁆𑀯𑁂 𑀲𑀫𑀼𑀤𑀬𑀸 𑀔𑀡𑀺𑀓𑀲𑀫𑀼𑀤𑀬𑁄 𑀧𑀘𑁆𑀘𑀬𑀲𑀫𑀼𑀤𑀬𑁄 𑀘. 𑀉𑀧𑁆𑀧𑀸𑀤𑀓𑁆𑀔𑀡𑁄 𑀔𑀡𑀺𑀓𑀲𑀫𑀼𑀤𑀬𑁄, 𑀧𑀘𑁆𑀘𑀬𑁄𑀯 𑀧𑀘𑁆𑀘𑀬𑀲𑀫𑀼𑀤𑀬𑁄. 𑀲𑀫𑀼𑀤𑀬𑀢𑁂 𑀲𑀫𑀼𑀤𑀬𑀦𑀁 𑀲𑀫𑀼𑀤𑀬𑁄, 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀤𑀬𑁄𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀲𑀫𑀼𑀤𑀬𑀸𑀦𑀁 𑀲𑀤𑁆𑀤𑀢𑁆𑀣𑀢𑁄𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑁄𑀧𑀺 𑀪𑀺𑀓𑁆𑀔𑀼 𑀔𑀡𑀺𑀓𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀔𑀡𑀺𑀓𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑁄𑀧𑀺 𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺. 𑀧𑀘𑁆𑀘𑀬𑀢𑁄 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀁 𑀧𑀲𑁆𑀲𑀢𑁄 𑀔𑀡𑀢𑁄 𑀘 𑀦𑁂𑀲𑀁 𑀉𑀤𑀬𑀤𑀲𑁆𑀲𑀦𑀁 𑀲𑀼𑀔𑀁 𑀳𑁄𑀢𑀺, 𑀔𑀡𑀢𑁄 𑀘 𑀦𑁂𑀲𑀁 𑀉𑀤𑀬𑀁 𑀧𑀲𑁆𑀲𑀢𑁄 𑀧𑀕𑁂𑀯 𑀧𑀘𑁆𑀘𑀬𑀸𑀦𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑀬𑀢𑁄 𑀤𑀲𑁆𑀲𑀦𑀁 𑀲𑀼𑀔𑁂𑀦 𑀇𑀚𑁆𑀛𑀢𑀺. 𑀇𑀥 𑀧𑀦 𑀔𑀡𑀺𑀓𑀲𑀫𑀼𑀤𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀼𑀤𑀬𑀦𑁆𑀢𑀺 𑀉𑀧𑁆𑀧𑀢𑁆𑀢𑀺’’𑀦𑁆𑀢𑀺.

𑀅𑀢𑁆𑀣𑀗𑁆𑀕𑀫𑁄𑀧𑀺 𑀤𑀼𑀯𑀺𑀥𑁄 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑁄, 𑀪𑁂𑀤𑀢𑁆𑀣𑀗𑁆𑀕𑀫𑁄𑀢𑀺. 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑁄 𑀅𑀧𑁆𑀧𑀯𑀢𑁆𑀢𑀺𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑁂𑀘𑀺. 𑀪𑁂𑀤𑀢𑁆𑀣𑀗𑁆𑀕𑀫𑁄 𑀔𑀡𑀺𑀓𑀦𑀺𑀭𑁄𑀥𑁄. 𑀢𑀤𑀼𑀪𑀬𑀁 𑀧𑀼𑀩𑁆𑀩𑀪𑀸𑀕𑁂 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀲𑁆𑀲𑀢𑁄 𑀅𑀜𑁆𑀜𑀢𑀭𑀤𑀲𑁆𑀲𑀦𑁂𑀦 𑀇𑀢𑀭𑀤𑀲𑁆𑀲𑀦𑀫𑁆𑀧𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀆𑀭𑀫𑁆𑀫𑀡𑀯𑀲𑁂𑀦 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂 𑀪𑁂𑀤𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀅𑀦𑀼𑀲𑁆𑀲𑀯𑀸𑀤𑀺𑀢𑁄 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀆𑀭𑀫𑁆𑀫𑀡𑀢𑁄 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄 𑀅𑀲𑀫𑁆𑀫𑁄𑀳𑀢𑁄 𑀇𑀢𑀭𑀫𑁆𑀧𑀺 𑀧𑀲𑁆𑀲𑀢𑀺. 𑀇𑀥 𑀧𑀦 𑀪𑁂𑀤𑀢𑁆𑀣𑀗𑁆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣𑀗𑁆𑀕𑀫𑀦𑁆𑀢𑀺 𑀪𑁂𑀤’’𑀦𑁆𑀢𑀺. 𑀓𑀸𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀪𑁂𑀤𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀬𑀣𑀸 𑀓𑀸𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸 𑀯𑀺𑀪𑀸𑀯𑀺𑀢𑀸, 𑀏𑀯𑀁 𑀓𑀸𑀫𑀯𑀢𑁆𑀣𑀼𑀦𑁄𑀧𑀻𑀢𑀺 𑀉𑀪𑀬𑁂𑀲𑀫𑁆𑀧𑀺 𑀅𑀦𑀺𑀘𑁆𑀘𑀢𑀸 𑀤𑀼𑀓𑁆𑀔𑀢𑀸 𑀅𑀦𑀢𑁆𑀢𑀢𑀸 𑀘 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀥𑀼𑀭𑀪𑀸𑀯𑀦𑁆𑀢𑀺 𑀇𑀫𑀺𑀦𑀸 𑀓𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀤𑀲𑁆𑀲𑁂𑀢𑀺. ‘‘𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀳𑀺 𑀯𑀼𑀢𑁆𑀢𑀁. 𑀅𑀫𑀥𑀼𑀭𑀪𑀸𑀯𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀓𑀸𑀫𑀳𑁂𑀢𑀼𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀤𑀲𑁆𑀲𑁂𑀢𑀺.

𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀙𑀤𑁆𑀯𑀸𑀭𑀺𑀓𑀲𑁆𑀲 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑀸𑀦𑀁 𑀘𑀓𑁆𑀔𑀸𑀤𑀺𑀆𑀬𑀢𑀦𑀸𑀦𑀁. 𑀢𑁂𑀦𑀸𑀳 ‘‘𑀘𑀓𑁆𑀔𑀸𑀤𑀻𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑀸𑀭𑀡𑀸𑀦’’𑀦𑁆𑀢𑀺. 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑁄𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀫𑀦𑁄-𑀲𑀤𑁆𑀤𑀲𑁆𑀲 𑀯𑀺𑀬 𑀘 𑀧𑀼𑀭𑀺𑀫𑀧𑀤𑀲𑁆𑀲 𑀑𑀓𑀸𑀭𑀦𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀼𑀦𑁄𑀪𑀯𑁄 𑀲𑀻𑀮𑀫𑁂𑀢𑁂𑀲𑀦𑁆𑀢𑀺 𑀧𑁄𑀦𑁄𑀪𑀯𑀺𑀓𑀸. 𑀅𑀣 𑀯𑀸 𑀲𑀻𑀮𑀢𑁆𑀣𑁂𑀦 𑀇𑀓𑀲𑀤𑁆𑀤𑁂𑀦 𑀕𑀫𑀺𑀢𑀢𑁆𑀣𑀢𑁆𑀢𑀸 𑀓𑀺𑀭𑀺𑀬𑀸𑀯𑀸𑀘𑀓𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀬𑀣𑀸 𑀅𑀧𑀽𑀧𑀪𑀓𑁆𑀔𑀦𑀲𑀻𑀮𑁄 𑀆𑀧𑀽𑀧𑀺𑀓𑁄. 𑀅𑀣 𑀯𑀸 𑀧𑀼𑀦𑀩𑁆𑀪𑀯𑀁 𑀤𑁂𑀦𑁆𑀢𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀧𑁄𑀦𑁄𑀪𑀯𑀺𑀓𑀸. ‘‘𑀢𑀤𑁆𑀥𑀺𑀢𑀸’’𑀢𑀺 𑀳𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀸 𑀯𑀺𑀘𑀺𑀢𑁆𑀢𑀢𑁆𑀢𑀸 𑀯𑀸 𑀢𑀤𑁆𑀥𑀺𑀢𑀸𑀦𑀁 𑀅𑀪𑀺𑀥𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸 ‘‘𑀧𑀼𑀦𑀩𑁆𑀪𑀯𑀁 𑀤𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁂𑀲𑀼 𑀧𑁄𑀦𑁄𑀪𑀯𑀺𑀓𑀲𑀤𑁆𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸.

𑀯𑀺𑀲𑀁𑀬𑁄𑀚𑁂𑀦𑁆𑀢𑀺 𑀧𑀝𑀺𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀓𑀸𑀫𑀬𑁄𑀕𑀸𑀤𑀺𑀢𑁄 𑀯𑀺𑀬𑁄𑀚𑁂𑀦𑁆𑀢𑀻𑀢𑀺 𑀯𑀺𑀲𑀁𑀬𑁄𑀕𑀸, 𑀅𑀲𑀼𑀪𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀲𑀁𑀬𑁄𑀚𑀦𑀓𑀸𑀭𑀡𑀸𑀦𑀺. 𑀢𑁂𑀦𑀸𑀳 ‘‘𑀯𑀺𑀲𑀁𑀬𑁄𑀕𑀸𑀢𑀺 𑀯𑀺𑀲𑀁𑀬𑁄𑀚𑀦𑀓𑀸𑀭𑀡𑀸𑀦𑀻’’𑀢𑀺𑀆𑀤𑀺.

𑀬𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀡𑁆𑀟𑀕𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑀭𑀯𑀕𑁆𑀕𑁄

𑁧. 𑀘𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀘𑀭𑀢𑁄𑀢𑀺 𑀕𑀘𑁆𑀙𑀦𑁆𑀢𑀲𑁆𑀲, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀯𑀸. 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀢𑀸𑀬 𑀢𑀸𑀤𑀺𑀲𑁂 𑀧𑀘𑁆𑀘𑀬𑁂 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂, 𑀬𑀤𑀺 𑀉𑀧𑁆𑀧𑀚𑁆𑀚𑀢𑀺. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸𑀢𑀺 𑀆𑀖𑀸𑀢𑀯𑀺𑀦𑀬𑁂 𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀲𑁆𑀲 𑀅𑀤𑀫𑀺𑀢𑀢𑁆𑀢𑀸 𑀆𑀖𑀸𑀢𑀦𑀺𑀫𑀺𑀢𑁆𑀢𑁂 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄, 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀢𑀺 𑀧𑀭𑀳𑀺𑀁𑀲𑀦𑀯𑀲𑁂𑀦 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀁 𑀬𑀣𑀸𑀧𑀘𑁆𑀘𑀬𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 ‘‘𑀇𑀢𑀺𑀧𑀸𑀬𑀁 𑀯𑀺𑀢𑀓𑁆𑀓𑁄 𑀧𑀸𑀧𑀓𑁄, 𑀇𑀢𑀺𑀧𑀺 𑀅𑀓𑀼𑀲𑀮𑁄, 𑀇𑀢𑀺𑀧𑀺 𑀲𑀸𑀯𑀚𑁆𑀚𑁄, 𑀲𑁄 𑀘 𑀔𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀪𑀸𑀯𑀢𑁄 𑀅𑀥𑀺𑀯𑀸𑀲𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺. 𑀅𑀥𑀺𑀯𑀸𑀲𑁂𑀦𑁆𑀢𑁄𑀬𑁂𑀯 𑀘 𑀦𑀧𑁆𑀧𑀚𑀳𑀢𑀺 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀯𑀲𑁂𑀦 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀢𑀢𑁄 𑀏𑀯 𑀘 𑀦 𑀯𑀺𑀦𑁄𑀤𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀦 𑀦𑀼𑀤𑀢𑀺 𑀦 𑀦𑀻𑀳𑀭𑀢𑀺. 𑀢𑀣𑀸 𑀅𑀯𑀺𑀦𑁄𑀤𑀦𑀢𑁄 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺. 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀬𑀣𑀸 𑀢𑁂𑀲𑀁 𑀅𑀦𑁆𑀢𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺, 𑀏𑀯𑀁 𑀓𑀭𑁄𑀢𑀺, 𑀅𑀬𑀁 𑀧𑀦 𑀢𑀣𑀸 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑁄 𑀧𑀦 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀦 𑀕𑀫𑁂𑀢𑀺. 𑀦 𑀧𑀚𑀳𑀢𑀺 𑀘𑁂, 𑀦 𑀯𑀺𑀦𑁄𑀤𑁂𑀢𑀺 𑀘𑁂𑀢𑀺 𑀇𑀢𑀺𑀆𑀤𑀺𑀦𑀸 𑀘𑁂-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁𑀪𑀽𑀢𑁄𑀢𑀺 𑀏𑀯𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀸𑀧𑀯𑀺𑀢𑀓𑁆𑀓𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄. 𑀅𑀦𑀸𑀢𑀸𑀧𑀻𑀢𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀬𑀺𑀓𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀢𑀸𑀧𑀻. 𑀧𑀸𑀧𑀼𑀢𑁆𑀭𑀸𑀲𑀮𑀓𑁆𑀔𑀡𑀲𑁆𑀲 𑀑𑀢𑁆𑀢𑀧𑁆𑀧𑀲𑁆𑀲 𑀅𑀪𑀸𑀯𑁂𑀦 𑀅𑀦𑁄𑀢𑁆𑀢𑀸𑀧𑀻. 𑀲𑀢𑀢𑀁 𑀲𑀫𑀺𑀢𑀁 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀁. 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀧𑀬𑀺𑀢𑁆𑀯𑀸 𑀅𑀓𑀼𑀲𑀮𑀧𑀓𑁆𑀔𑁂 𑀓𑀼𑀘𑁆𑀙𑀺𑀢𑀁 𑀲𑀻𑀤𑀦𑀢𑁄 𑀓𑁄𑀲𑀚𑁆𑀚𑀲𑀫𑀦𑁆𑀦𑀸𑀕𑀫𑁂𑀦 𑀘 𑀓𑀼𑀲𑀻𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀸𑀪𑀸𑀯𑁂𑀦 𑀳𑀻𑀦𑀯𑀻𑀭𑀺𑀬𑁄 𑀯𑀻𑀭𑀺𑀬𑀯𑀺𑀭𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺. 𑀞𑀺𑀢𑀲𑁆𑀲𑀸𑀢𑀺 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑁄. 𑀲𑀬𑀦𑀇𑀭𑀺𑀬𑀸𑀧𑀣𑀲𑁆𑀲 𑀯𑀺𑀲𑁂𑀲𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀢𑁆𑀢𑀸 𑀬𑀣𑀸 𑀢𑀁𑀲𑀫𑀗𑁆𑀕𑀺𑀦𑁄 𑀪𑀸𑀯𑀺𑀢𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀕𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀲𑀼𑀓𑁆𑀓𑀧𑀓𑁆𑀔𑁂 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀧𑀺 𑀯𑀺𑀳𑀭𑀢𑁄 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀘𑀺𑀭𑀓𑀸𑀮𑀪𑀸𑀯𑀺𑀢𑀢𑁆𑀢𑀸 𑀢𑀣𑀸𑀭𑀽𑀧𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂, 𑀢𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀯𑀸𑀲𑁂𑀢𑀺, 𑀅𑀩𑁆𑀪𑀦𑁆𑀢𑀭𑁂 𑀦 𑀯𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀺𑀁 𑀓𑀭𑁄𑀢𑀺? 𑀧𑀚𑀳𑀢𑀺 𑀙𑀟𑁆𑀟𑁂𑀢𑀺. 𑀓𑀺𑀁 𑀓𑀘𑀯𑀭𑀁 𑀯𑀺𑀬 𑀧𑀺𑀝𑀓𑁂𑀦𑀸𑀢𑀺? 𑀦, 𑀅𑀧𑀺𑀘 𑀔𑁄 𑀢𑀁 𑀯𑀺𑀦𑁄𑀤𑁂𑀢𑀺 𑀦𑀼𑀤𑀢𑀺 𑀦𑀻𑀳𑀭𑀢𑀺. 𑀓𑀺𑀁 𑀩𑀮𑀺𑀩𑀤𑁆𑀤𑀁 𑀯𑀺𑀬 𑀧𑀢𑁄𑀤𑁂𑀦𑀸𑀢𑀺? 𑀦, 𑀅𑀣 𑀔𑁄 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺, 𑀬𑀣𑀸 𑀢𑁂𑀲𑀁 𑀅𑀦𑁆𑀢𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺, 𑀢𑀣𑀸 𑀢𑁂 𑀓𑀭𑁄𑀢𑀺. 𑀓𑀣𑀁 𑀧𑀦 𑀢𑁂 𑀢𑀣𑀸 𑀓𑀭𑁄𑀢𑀺? 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀕𑀫𑁂𑀢𑀺, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀬𑀣𑀸 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀦𑁂 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁𑀪𑀽𑀢𑁄𑀢𑀺𑀆𑀤𑀻𑀲𑀼 𑀏𑀯𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀅𑀦𑀥𑀺𑀯𑀸𑀲𑁂𑀦 𑀲𑀼𑀯𑀺𑀲𑀼𑀤𑁆𑀥𑀸𑀲𑀬𑁄 𑀲𑀫𑀸𑀦𑁄 𑀢𑀸𑀬 𑀘 𑀆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀢𑀦𑁆𑀦𑀺𑀫𑀺𑀢𑁆𑀢𑀸𑀬 𑀘 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀮𑀓𑁆𑀔𑀡𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀢𑀸𑀧𑀻. 𑀲𑀩𑁆𑀩𑀲𑁄 𑀧𑀸𑀧𑀼𑀢𑁆𑀭𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁. 𑀲𑀫𑀺𑀢𑀁 𑀦𑀺𑀭𑀦𑁆𑀢𑀭𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀺𑀤𑁆𑀥𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄. 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀕𑀸𑀣𑀸𑀲𑀼 𑀕𑁂𑀳𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀢𑁆𑀣 𑀕𑁂𑀳𑀯𑀸𑀲𑀻𑀳𑀺 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀕𑁂𑀳𑀯𑀸𑀲𑀺𑀲𑀪𑀸𑀯𑀢𑁆𑀢𑀸 𑀕𑁂𑀳𑀥𑀫𑁆𑀫𑀢𑁆𑀢𑀸 𑀯𑀸 𑀕𑁂𑀳𑀁 𑀯𑀼𑀘𑁆𑀘𑀢𑀺 𑀯𑀢𑁆𑀣𑀼𑀓𑀸𑀫𑁄. 𑀅𑀣 𑀯𑀸 𑀕𑁂𑀳𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑀢𑁄, 𑀓𑀺𑀮𑁂𑀲𑀓𑀸𑀫𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀪𑀸𑀯𑀢𑁄 𑀯𑀸 𑀕𑁂𑀳𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀯𑀢𑁆𑀣𑀼𑀓𑀢𑁆𑀢𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺 𑀕𑁂𑀳𑀦𑀺𑀲𑁆𑀲𑀺𑀢𑀁 𑀦𑀸𑀫. 𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺 𑀬𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑁆𑀧𑀣𑀪𑀸𑀯𑀢𑁄 𑀅𑀪𑀺𑀚𑁆𑀛𑀸𑀤𑀬𑁄 𑀢𑀤𑁂𑀓𑀝𑁆𑀞𑀥𑀫𑁆𑀫𑀸 𑀘 𑀓𑀼𑀫𑁆𑀫𑀕𑁆𑀕𑁄, 𑀢𑀲𑁆𑀫𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑁄. 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄𑀢𑀺 𑀫𑁄𑀳𑀲𑀁𑀯𑀢𑁆𑀢𑀦𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀫𑀼𑀘𑁆𑀙𑀺𑀢𑁄 𑀲𑀫𑁆𑀫𑀢𑁆𑀢𑁄 𑀅𑀚𑁆𑀛𑁄𑀧𑀦𑁆𑀦𑁄. 𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀁. 𑀨𑀼𑀝𑁆𑀞𑀦𑁆𑀢𑀺 𑀨𑀼𑀲𑀺𑀢𑀼𑀁 𑀧𑀢𑁆𑀢𑀼𑀁 𑀧𑀸𑀧𑁄 𑀲𑁄 𑀢𑀸𑀤𑀺𑀲𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄, 𑀦 𑀓𑀤𑀸𑀘𑀺 𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀢𑀓𑁆𑀓𑀁 𑀲𑀫𑀬𑀺𑀢𑁆𑀯𑀸𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀁 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑁂𑀦 𑀯𑀽𑀧𑀲𑀫𑁂𑀢𑁆𑀯𑀸. 𑀯𑀺𑀢𑀓𑁆𑀓𑀽𑀧𑀲𑀫𑁂 𑀭𑀢𑁄𑀢𑀺 𑀦𑀯𑀦𑁆𑀦𑀫𑁆𑀧𑀺 𑀫𑀳𑀸𑀯𑀺𑀢𑀓𑁆𑀓𑀸𑀦𑀁 𑀅𑀘𑁆𑀘𑀦𑁆𑀢𑀽𑀧𑀲𑀫𑀪𑀽𑀢𑁂 𑀅𑀭𑀳𑀢𑁆𑀢𑁂, 𑀦𑀺𑀩𑁆𑀩𑀸𑀦𑁂 𑀏𑀯 𑀯𑀸 𑀅𑀚𑁆𑀛𑀸𑀲𑀬𑁂𑀦 𑀭𑀢𑁄 𑀅𑀪𑀺𑀭𑀢𑁄. 𑀪𑀩𑁆𑀩𑁄 𑀲𑁄𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑁄 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀩𑁆𑀩𑀯𑀺𑀢𑀓𑁆𑀓𑁂 𑀬𑀣𑀸𑀭𑀳𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀯𑀽𑀧𑀲𑀫𑁂𑀢𑁆𑀯𑀸 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀲𑀫𑁆𑀩𑁄𑀥𑀺𑀁 𑀨𑀼𑀝𑁆𑀞𑀼𑀁 𑀅𑀥𑀺𑀕𑀦𑁆𑀢𑀼𑀁 𑀪𑀩𑁆𑀩𑁄 𑀅𑀭𑀳𑀸. 𑀏𑀯𑀫𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀘𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀏𑀢𑁆𑀣 𑀢𑀺𑀯𑀺𑀥𑀁 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀲𑀫𑀗𑁆𑀕𑀺𑀫𑀥𑀼𑀭𑀯𑀲𑁂𑀦. 𑀢𑀢𑁆𑀣 𑁋

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂’’𑀢𑀺. (𑀚𑀸. 𑁧.𑁧𑁪.𑁧) 𑁋

𑀇𑀤𑀁 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀁 𑀦𑀸𑀫. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀇𑀤𑀁 𑀲𑀫𑀗𑁆𑀕𑀺𑀲𑀫𑁆𑀧𑀦𑁆𑀦𑀁 𑀦𑀸𑀫. ‘‘𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀁, 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀮𑀓𑀁, 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺 (𑀧𑀸𑀭𑀸. 𑁧𑁭) 𑀇𑀤𑀁 𑀫𑀥𑀼𑀭𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀇𑀥 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸’’𑀢𑀺 𑀆𑀳. 𑀲𑀫𑀗𑁆𑀕𑀺𑀲𑀫𑁆𑀧𑀦𑁆𑀦𑀯𑀲𑁂𑀦𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸 𑀳𑀼𑀢𑁆𑀯𑀸𑀢𑀺𑀧𑀺 𑀲𑀻𑀮𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸𑀢𑀺𑀧𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀲𑀻𑀮𑀲𑁆𑀲 𑀅𑀦𑀯𑀲𑁂𑀲𑀲𑀫𑀸𑀤𑀸𑀦𑁂𑀦 𑀅𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑀼𑀡𑁆𑀡𑀲𑀻𑀮𑀸, 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀅𑀯𑀺𑀘𑁆𑀙𑀺𑀦𑁆𑀤𑀦𑀢𑁄 𑀲𑀻𑀮𑀲𑀫𑀗𑁆𑀕𑀺𑀦𑁄. 𑀲𑀫𑀸𑀤𑀸𑀦𑀯𑀢𑁄 𑀳𑀺 𑀅𑀘𑁆𑀘𑀦𑁆𑀢𑀯𑀺𑀭𑁄𑀥𑀺𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀲𑀻𑀮𑀲𑀫𑀗𑁆𑀕𑀺𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀘𑁂𑀢𑀦𑀸𑀤𑀻𑀦𑀁 𑀧𑀦 𑀲𑀻𑀮𑀦𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀮𑀓𑁆𑀔𑀡𑁂𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀢𑀢𑁆𑀣 ‘‘𑀧𑀭𑀺𑀧𑀼𑀡𑁆𑀡𑀲𑀻𑀮𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀔𑁂𑀢𑁆𑀢𑀤𑁄𑀲𑀯𑀺𑀕𑀫𑁂𑀦 𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀻 𑀯𑀺𑀬 𑀲𑀻𑀮𑀤𑁄𑀲𑀯𑀺𑀕𑀫𑁂𑀦 𑀲𑀻𑀮𑀧𑀸𑀭𑀺𑀧𑀽𑀭𑀻 𑀯𑀼𑀢𑁆𑀢𑀸 𑀳𑁄𑀢𑀺. 𑀬𑀣𑀸 𑀳𑀺 𑀔𑁂𑀢𑁆𑀢𑀁 𑀩𑀻𑀚𑀔𑀡𑁆𑀟𑀁, 𑀯𑀧𑁆𑀧𑀔𑀡𑁆𑀟𑀁, 𑀉𑀤𑀓𑀔𑀡𑁆𑀟𑀁, 𑀊𑀲𑀔𑀡𑁆𑀟𑀦𑁆𑀢𑀺 𑀘𑀢𑀼𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺. 𑀢𑀢𑁆𑀣 𑀩𑀻𑀚𑀔𑀡𑁆𑀟𑀁 𑀦𑀸𑀫 𑀬𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀩𑀻𑀚𑀸𑀦𑀺 𑀔𑀡𑁆𑀟𑀸𑀦𑀺 𑀯𑀸 𑀧𑀽𑀢𑀻𑀦𑀺 𑀯𑀸 𑀳𑁄𑀦𑁆𑀢𑀺, 𑀢𑀸𑀦𑀺 𑀬𑀢𑁆𑀣 𑀧𑀢𑀦𑁆𑀢𑀺, 𑀢𑀢𑁆𑀣 𑀲𑀲𑁆𑀲𑀁 𑀦 𑀉𑀝𑁆𑀞𑁂𑀢𑀺, 𑀔𑁂𑀢𑁆𑀢𑀁 𑀔𑀡𑁆𑀟𑀁 𑀳𑁄𑀢𑀺, 𑀅𑀧𑀭𑀺𑀧𑀽𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀧𑁆𑀧𑀔𑀡𑁆𑀟𑀁 𑀦𑀸𑀫 𑀬𑀢𑁆𑀣 𑀅𑀓𑀼𑀲𑀮𑁄 𑀩𑀻𑀚𑀸𑀦𑀺 𑀯𑀧𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀧𑀸𑀢𑁂𑀢𑀺. 𑀏𑀯𑀜𑁆𑀳𑀺 𑀲𑀩𑁆𑀩𑀢𑁆𑀣 𑀲𑀲𑁆𑀲𑀁 𑀦 𑀉𑀝𑁆𑀞𑁂𑀢𑀺, 𑀔𑁂𑀢𑁆𑀢𑀁 𑀔𑀡𑁆𑀟𑀁 𑀳𑁄𑀢𑀺. 𑀉𑀤𑀓𑀔𑀡𑁆𑀟𑀁 𑀦𑀸𑀫 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀤𑀓𑀁 𑀅𑀢𑀺𑀩𑀳𑀼𑀁 𑀯𑀸 𑀳𑁄𑀢𑀺, 𑀦 𑀯𑀸 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀳𑀺 𑀲𑀲𑁆𑀲𑀸𑀦𑀺 𑀦 𑀉𑀝𑁆𑀞𑁂𑀦𑁆𑀢𑀺, 𑀔𑁂𑀢𑁆𑀢𑀁 𑀔𑀡𑁆𑀟𑀁 𑀳𑁄𑀢𑀺. 𑀊𑀲𑀔𑀡𑁆𑀟𑀁 𑀦𑀸𑀫 𑀬𑀢𑁆𑀣 𑀓𑀲𑁆𑀲𑀓𑁄 𑀓𑀺𑀲𑁆𑀫𑀺𑀜𑁆𑀘𑀺 𑀧𑀤𑁂𑀲𑁂 𑀦𑀗𑁆𑀕𑀮𑁂𑀦 𑀪𑀽𑀫𑀺𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀯𑀸𑀭𑁂 𑀓𑀲𑀦𑁆𑀢𑁄 𑀅𑀢𑀺𑀕𑀫𑁆𑀪𑀻𑀭𑀁 𑀓𑀭𑁄𑀢𑀺, 𑀢𑀢𑁄 𑀊𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀸𑀧𑀺 𑀳𑀺 𑀲𑀲𑁆𑀲𑀁 𑀦 𑀉𑀝𑁆𑀞𑁂𑀢𑀺, 𑀔𑁂𑀢𑁆𑀢𑀁 𑀔𑀡𑁆𑀟𑀁 𑀳𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀔𑁂𑀢𑁆𑀢𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀢𑀢𑁆𑀭𑀸𑀧𑀺 𑀩𑀳𑀼𑀫𑁆𑀧𑀺 𑀯𑀧𑀺𑀢𑁆𑀯𑀸 𑀅𑀧𑁆𑀧𑀁 𑀮𑀪𑀢𑀺. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀤𑁄𑀲𑀸𑀦𑀁 𑀯𑀺𑀕𑀫𑀸 𑀔𑁂𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀔𑁂𑀢𑁆𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀏𑀯𑀫𑁂𑀯 𑀔𑀡𑁆𑀟𑀁, 𑀙𑀺𑀤𑁆𑀤𑀁, 𑀲𑀩𑀮𑀁, 𑀓𑀫𑁆𑀫𑀸𑀲𑀦𑁆𑀢𑀺 𑀘𑀢𑀼𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀁 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀲𑀻𑀮𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀤𑁄𑀲𑀸𑀦𑀁 𑀯𑀺𑀕𑀫𑀸 𑀲𑀻𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀲𑀻𑀮𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁.

‘‘𑀲𑀻𑀮𑀲𑀫𑀗𑁆𑀕𑀺𑀦𑁄’’𑀢𑀺 𑀇𑀫𑀺𑀦𑀸 𑀧𑀦𑀢𑁆𑀣𑁂𑀦 𑀲𑀻𑀮𑁂𑀦 𑀲𑀫𑀗𑁆𑀕𑀺𑀪𑀽𑀢𑀸 𑀲𑀫𑁄𑀥𑀸𑀦𑀕𑀢𑀸 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣𑀸𑀢𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀲𑀻𑀮𑀢𑀸 𑀳𑁄𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀘 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦. 𑀢𑀤𑀼𑀪𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪) 𑀯𑀺𑀢𑁆𑀣𑀸𑀭𑀺𑀢𑀁. 𑀢𑀢𑁆𑀣 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀓𑀺𑀭 𑀪𑀕𑀯𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸’𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀚𑁂𑀝𑁆𑀞𑀓𑀲𑀻𑀮𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺 𑀤𑀺𑀯𑀸𑀯𑀺𑀳𑀸𑀭𑀯𑀸𑀲𑀻 𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦𑀲𑁆𑀲 𑀢𑁂𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀆𑀳 𑁋 ‘‘𑀉𑀪𑀬𑀢𑁆𑀣𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀬𑁂𑀯 𑀳𑀺 𑀲𑀻𑀮𑀁, 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 𑀆𑀳 𑁋 ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀦𑀸𑀫 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀫𑁂𑀯, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀁, 𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀁 𑀧𑀝𑀺𑀮𑀤𑁆𑀥𑀧𑀘𑁆𑀘𑀬𑁂 𑀇𑀤𑀫𑀢𑁆𑀣𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀫𑀢𑁆𑀢𑀓𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁. 𑀬𑀲𑁆𑀲 𑀲𑁄 𑀪𑀺𑀦𑁆𑀦𑁄, 𑀅𑀬𑀁 𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀳𑀢𑁆𑀣𑀧𑀸𑀤𑁂, 𑀲𑁂𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀲𑁄 𑀅𑀭𑁄𑀕𑁄, 𑀅𑀬𑀁 𑀅𑀘𑁆𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀚𑀻𑀯𑀺𑀢𑀁, 𑀲𑁂𑀲𑀸𑀦𑀺 𑀧𑀼𑀦 𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 ‘𑀲𑀫𑁆𑀧𑀦𑁆𑀦𑀲𑀻𑀮𑀸’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸’𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀯𑀢𑁆𑀯𑀸 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀁𑀯𑀼𑀢𑀸𑀢𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀺𑀓𑁆𑀔𑀸𑀧𑀤𑀲𑀻𑀮𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑀸. 𑀏𑀯𑀁𑀪𑀽𑀢𑀸 𑀘 𑀢𑁂𑀦 𑀉𑀧𑁂𑀢𑀸 𑀲𑀫𑀦𑁆𑀦𑀸𑀕𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀧𑁂𑀢𑀸 𑀳𑀼𑀢𑁆𑀯𑀸’’𑀢𑀺. 𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑁂𑀦, 𑀦-𑀯𑁂𑀲𑀺𑀬𑀕𑁄𑀘𑀭𑀢𑀸𑀤𑀺𑀲𑀗𑁆𑀔𑀸𑀢𑁂𑀦 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀸, 𑀲𑀫𑁆𑀧𑀦𑁆𑀦𑀆𑀘𑀸𑀭𑀕𑁄𑀘𑀭𑀸𑀢𑀺 𑀅𑀢𑁆𑀣𑁄. 𑀅𑀡𑀼𑀧𑁆𑀧𑀫𑀸𑀡𑁂𑀲𑀽𑀢𑀺 𑀅𑀢𑀺𑀧𑀭𑀺𑀢𑁆𑀢𑀓𑁂𑀲𑀼 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑁂𑀲𑀼. 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑁂𑀲𑀽𑀢𑀺 𑀅𑀧𑀭𑁂. 𑀤𑁄𑀲𑁂𑀲𑀽𑀢𑀺 𑀕𑀸𑀭𑀬𑁆𑀳𑁂𑀲𑀼 𑀅𑀓𑀼𑀲𑀮𑀥𑀫𑁆𑀫𑁂𑀲𑀼. 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑀸𑀢𑀺 𑀧𑀭𑀫𑀸𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑀁 𑀯𑀺𑀬 𑀓𑀢𑁆𑀯𑀸 𑀪𑀸𑀬𑀦𑀲𑀻𑀮𑀸. 𑀲𑀩𑁆𑀩𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀫𑀽𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑁂𑀲𑀼. 𑀢𑀁 𑀢𑀁 𑀲𑀫𑀸𑀤𑀸𑀢𑀩𑁆𑀩𑀁 𑀲𑀫𑀸𑀤𑀸𑀬𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀫𑀽𑀮𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀧𑀽𑀭𑀺𑀢𑀩𑁆𑀩𑀁 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀯𑀸 𑀲𑀻𑀮𑀁, 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀸𑀬, 𑀲𑀫𑁆𑀫𑀤𑁂𑀯 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀲𑁄 𑀘 𑀆𑀤𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀻𑀢𑀺 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸…𑀧𑁂… 𑀓𑀫𑁆𑀫𑀲𑀫𑀼𑀤𑀬𑀸…𑀧𑁂… 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸…𑀧𑁂… 𑀓𑀫𑁆𑀫𑀲𑀫𑀼𑀤𑀬𑀸…𑀧𑁂… 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀉𑀤𑀬𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀯𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀻𑀢𑀺 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸…𑀧𑁂… 𑀓𑀫𑁆𑀫𑀦𑀺𑀭𑁄𑀥𑀸…𑀧𑁂… 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸…𑀧𑁂… 𑀢𑀡𑁆𑀳𑀸𑀦𑀺𑀭𑁄𑀥𑀸…𑀧𑁂… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀻. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀯𑀬𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀧𑁂𑀲𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀓𑀣𑀬𑀦𑁆𑀢𑀻𑀢𑀺 𑀢𑀣𑀸𑀯𑀺𑀥𑀁 𑀪𑀺𑀓𑁆𑀔𑀼𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺.

𑀬𑀢𑀁 𑀘𑀭𑁂𑀢𑀺 𑀯𑀸𑀬𑀫𑀫𑀸𑀦𑁄 𑀘𑀭𑁂𑀬𑁆𑀬, 𑀘𑀗𑁆𑀓𑀫𑀦𑀸𑀤𑀺𑀯𑀲𑁂𑀦 𑀕𑀫𑀦𑀁 𑀓𑀧𑁆𑀧𑁂𑀦𑁆𑀢𑁄𑀧𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁩𑁨) 𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀬𑀣𑀸 𑀅𑀓𑀼𑀲𑀮𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀓𑀼𑀲𑀮𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀕𑀫𑀦𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀢𑀫𑁂𑀦𑀁 𑀧𑀲𑀸𑀭𑀬𑁂𑀢𑀺 𑀏𑀢𑀁 𑀧𑀲𑀸𑀭𑁂𑀢𑀩𑁆𑀩𑀁 𑀳𑀢𑁆𑀣𑀧𑀸𑀤𑀸𑀤𑀺𑀁 𑀬𑀢𑀁 𑀬𑀢𑀫𑀸𑀦𑁄 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀧𑀲𑀸𑀭𑁂𑀬𑁆𑀬, 𑀲𑀩𑁆𑀩𑀢𑁆𑀣 𑀧𑀥𑀸𑀦𑀁 𑀦 𑀚𑀳𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀬𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀬𑀢𑀁 𑀬𑀢𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺. 𑀢𑀺𑀭𑀺𑀬𑀦𑁆𑀢𑀺 𑀧𑀭𑀺𑀢𑁄, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀺𑀯𑀲𑁂𑀦 𑀲𑀫𑀦𑁆𑀢𑀢𑁄 𑀤𑀺𑀲𑀸𑀪𑀸𑀕𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀧𑀸𑀘𑀻𑀦𑀦𑁆𑀢𑀺 𑀳𑁂𑀝𑁆𑀞𑀸. 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀲𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀲𑁆𑀲 𑀮𑁄𑀓𑀲𑁆𑀲 𑀧𑀯𑀢𑁆𑀢𑀺, 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀅𑀦𑀯𑀲𑁂𑀲𑀢𑀸 𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀯𑀺𑀲𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀫𑀯𑁂𑀓𑁆𑀔𑀺𑀢𑀸𑀢𑀺 𑀲𑀫𑀸 𑀳𑁂𑀢𑀼𑀦𑀸 𑀜𑀸𑀬𑁂𑀦 𑀅𑀯𑁂𑀓𑁆𑀔𑀺𑀢𑀸, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀲𑀼𑀜𑁆𑀜𑀸𑀦𑀁. 𑀔𑀦𑁆𑀥𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀉𑀤𑀬𑀩𑁆𑀩𑀬𑀦𑁆𑀢𑀺 𑀉𑀤𑀬𑀜𑁆𑀘 𑀯𑀬𑀜𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀧𑀭𑀺 𑀢𑀺𑀭𑀺𑀬𑀁 𑀅𑀥𑁄𑀢𑀺 𑀢𑀺𑀥𑀸 𑀲𑀗𑁆𑀕𑀳𑀺𑀢𑁂 𑀲𑀩𑁆𑀩𑀲𑁆𑀫𑀺𑀁 𑀮𑁄𑀓𑁂 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸𑀦𑀁 𑀲𑀩𑁆𑀩𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀸𑀥𑀺𑀕𑀢𑁂𑀦 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀧𑀜𑁆𑀘𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀉𑀤𑀬𑀁, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀯𑀬𑀁 𑀲𑀫𑀯𑁂𑀓𑁆𑀔𑀺𑀢𑀸 𑀲𑀫𑀦𑀼𑀧𑀲𑁆𑀲𑀺𑀢𑀸 𑀪𑀯𑁂𑀬𑁆𑀬𑀸𑀢𑀺.

𑀘𑁂𑀢𑁄𑀲𑀫𑀣𑀲𑀸𑀫𑀻𑀘𑀺𑀦𑁆𑀢𑀺 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑀦𑀢𑁄 𑀘𑁂𑀢𑁄𑀲𑀫𑀣𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁. 𑀲𑀺𑀓𑁆𑀔𑀫𑀸𑀦𑀦𑁆𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀁 𑀪𑀸𑀯𑁂𑀦𑁆𑀢𑀁 𑀜𑀸𑀡𑀧𑀭𑀫𑁆𑀧𑀭𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘. 𑀲𑀢𑀦𑁆𑀢𑀺 𑀘𑀢𑀼𑀲𑀫𑁆𑀧𑀚𑀜𑁆𑀜𑀲𑀫𑀦𑁆𑀦𑀸𑀕𑀢𑀸𑀬 𑀲𑀢𑀺𑀬𑀸 𑀲𑀢𑁄𑀓𑀸𑀭𑀻. 𑀏𑀯𑀫𑁆𑀧𑁂𑀢𑁆𑀣 𑀕𑀸𑀣𑀸𑀯𑀡𑁆𑀡𑀦𑀸 𑀤𑀝𑁆𑀞𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀉𑀢𑁆𑀢𑀫𑀯𑀻𑀭𑀺𑀬𑀸𑀦𑀻𑀢𑀺 𑀲𑁂𑀝𑁆𑀞𑀯𑀻𑀭𑀺𑀬𑀸𑀦𑀺 𑀯𑀺𑀲𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄. 𑀫𑀸𑀭𑁄 𑀥𑀺𑀬𑁆𑀬𑀢𑀺 𑀏𑀢𑁆𑀣𑀸𑀢𑀺 𑀫𑀸𑀭𑀥𑁂𑀬𑁆𑀬𑀁, 𑀓𑀺𑀮𑁂𑀲𑀫𑀸𑀭𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁, 𑀢𑀁 𑀢𑁂𑀪𑀽𑀫𑀓𑀯𑀝𑁆𑀝𑀦𑁆𑀢𑀺 𑀆𑀳 ‘‘𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀫𑀸𑀭𑀥𑁂𑀬𑁆𑀬’’𑀦𑁆𑀢𑀺. 𑀚𑀸𑀢𑀺𑀫𑀭𑀡𑀢𑁄 𑀚𑀸𑀢𑀁 𑀪𑀬𑀁 𑀚𑀸𑀢𑀺𑀫𑀭𑀡𑀪𑀬𑀁, 𑀚𑀸𑀢𑀺𑀫𑀭𑀡𑀫𑁂𑀯 𑀯𑀸 𑀪𑀬𑀳𑁂𑀢𑀼𑀢𑁄 𑀪𑀬𑀦𑁆𑀢𑀺 𑀚𑀸𑀢𑀺𑀫𑀭𑀡𑀪𑀬𑀁. 𑀢𑁂𑀦𑀸𑀳 ‘‘𑀚𑀸𑀢𑀺𑀜𑁆𑀘 𑀫𑀭𑀡𑀜𑁆𑀘…𑀧𑁂… 𑀪𑀬𑀲𑁆𑀲𑀸’’𑀢𑀺 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀲𑀁𑀯𑀭𑀸𑀤𑀻𑀦𑀁 𑀲𑀸𑀥𑀦𑀯𑀲𑁂𑀦 𑀧𑀤𑀳𑀢𑀺 𑀏𑀢𑁂𑀳𑀻𑀢𑀺 𑀧𑀥𑀸𑀦𑀸𑀦𑀺. 𑀲𑀁𑀯𑀭𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀦𑁆𑀢𑀺 𑀬𑀣𑀸 𑀅𑀪𑀺𑀚𑁆𑀛𑀸𑀤𑀬𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑁂 𑀘𑀓𑁆𑀔𑀸𑀤𑀻𑀦𑀁 𑀧𑀺𑀤𑀳𑀦𑁂 𑀅𑀦𑀮𑀲𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀯𑀺𑀦𑁄𑀤𑁂𑀦𑁆𑀢𑀲𑁆𑀲. 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀦𑁆𑀢𑀺 𑀢𑀲𑁆𑀲𑁂𑀯 𑀧𑀳𑀸𑀦𑀲𑁆𑀲 𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁. 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺 𑀏𑀯. 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑀫𑀸𑀥𑀺 𑀳𑀺 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 ‘‘𑀲𑀫𑀸𑀥𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀉𑀧𑀥𑀺𑀯𑀺𑀯𑁂𑀓𑀢𑁆𑀢𑀸𑀢𑀺 𑀔𑀦𑁆𑀥𑀽𑀧𑀥𑀺𑀆𑀤𑀺𑀉𑀧𑀥𑀻𑀳𑀺 𑀯𑀺𑀯𑀺𑀢𑁆𑀢𑀢𑁆𑀢𑀸 𑀯𑀺𑀦𑀺𑀲𑁆𑀲𑀝𑀢𑁆𑀢𑀸. 𑀢𑀁 𑀆𑀕𑀫𑁆𑀫𑀸𑀢𑀺 𑀢𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑁂𑀦 𑀅𑀥𑀺𑀕𑀫𑀳𑁂𑀢𑀼. 𑀭𑀸𑀕𑀸𑀤𑀬𑁄 𑀯𑀺𑀭𑀚𑁆𑀚𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄. 𑀏𑀯𑀁 𑀦𑀺𑀭𑁄𑀥𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀇𑀥 𑀩𑁄𑀚𑁆𑀛𑀗𑁆𑀕𑀫𑀺𑀲𑁆𑀲𑀓𑀯𑀲𑁂𑀦 𑀇𑀘𑁆𑀙𑀺𑀢𑀸, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀯𑀲𑁂𑀦 𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑀯𑀲𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀥𑀺𑀕𑀦𑁆𑀢𑀩𑁆𑀩𑀯𑀲𑁂𑀦𑀸𑀢𑀺 𑀢𑀦𑁆𑀦𑀺𑀦𑁆𑀦𑀢𑀸𑀯𑀲𑁂𑀦. 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀧𑀭𑀺𑀡𑀸𑀫𑀺𑀢𑀁 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀘𑁂𑀯 𑀧𑀓𑁆𑀔𑀦𑁆𑀤𑀦𑀯𑀲𑁂𑀦 𑀘 𑀧𑀭𑀺𑀡𑀸𑀫𑀦𑀲𑀻𑀮𑀁. 𑀢𑁂𑀦𑀸𑀳 ‘‘𑀤𑁆𑀯𑁂 𑀯𑁄𑀲𑁆𑀲𑀕𑁆𑀕𑀸’’𑀢𑀺𑀆𑀤𑀺. 𑀔𑀦𑁆𑀥𑀸𑀦𑀁 𑀧𑀭𑀺𑀘𑁆𑀘𑀚𑀦𑀁 𑀦𑀸𑀫 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀲𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀯𑀺𑀧𑀲𑁆𑀲𑀦𑀸 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀦𑁆𑀦𑀺𑀫𑀺𑀢𑁆𑀢𑀓𑁆𑀔𑀦𑁆𑀥𑁂 𑀘 𑀧𑀚𑀳𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀧𑀭𑀺𑀘𑁆𑀘𑀚𑀢𑀻’’𑀢𑀺. 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀻 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀏𑀓𑀁𑀲𑀢𑁄 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺, 𑀫𑀕𑁆𑀕𑁄 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑁂 𑀔𑀦𑁆𑀥𑁂 𑀘 𑀭𑀸𑀕𑀁 𑀧𑀭𑀺𑀘𑁆𑀘𑀚𑀢𑀺, 𑀢𑀲𑁆𑀫𑀸 𑀬𑀣𑀸𑀓𑁆𑀓𑀫𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸𑀦𑀁 𑀯𑀲𑁂𑀦 𑀧𑀓𑁆𑀔𑀦𑁆𑀤𑀦𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀯𑁄𑀲𑀕𑁆𑀕𑀢𑁆𑀣𑀸𑀬𑀸𑀢𑀺 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀢𑁆𑀣𑀸𑀬 𑀘𑁂𑀯 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑀸𑀬 𑀘. 𑀧𑀭𑀺𑀡𑀫𑀢𑀻𑀢𑀺 𑀧𑀭𑀺𑀘𑁆𑀘𑀚𑀢𑀺. 𑀢𑀁 𑀧𑀦 𑀧𑀭𑀺𑀡𑀸𑀫𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘𑁂𑀯 𑀅𑀭𑀺𑀬𑀫𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀪𑀸𑀯𑀜𑁆𑀘 𑀫𑀕𑁆𑀕𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀻’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀻𑀲𑀼 𑀲𑁂𑀲𑀲𑀫𑁆𑀩𑁄𑀚𑁆𑀛𑀗𑁆𑀕𑀓𑁄𑀝𑁆𑀞𑀸𑀲𑁂𑀲𑀼.

𑀪𑀤𑁆𑀤𑀓𑀦𑁆𑀢𑀺 𑀅𑀪𑀤𑁆𑀤𑀓𑀸𑀦𑀁 𑀦𑀻𑀯𑀭𑀡𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀭𑀸𑀕𑀯𑀺𑀕𑀫𑀦𑁂𑀦 𑀏𑀓𑀦𑁆𑀢𑀳𑀺𑀢𑀢𑁆𑀢𑀸 𑀤𑀼𑀮𑁆𑀮𑀪𑀢𑁆𑀢𑀸 𑀘 𑀪𑀤𑁆𑀤𑀓𑀁 𑀲𑀼𑀦𑁆𑀤𑀭𑀁. 𑀦 𑀳𑀺 𑀅𑀜𑁆𑀜𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀏𑀯𑀁 𑀤𑀼𑀮𑁆𑀮𑀪𑀁 𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀁 𑀅𑀢𑁆𑀣𑀺. 𑀅𑀦𑀼𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 𑀅𑀦𑀼𑀭𑀓𑁆𑀔𑀦𑀸 𑀦𑀸𑀫 𑀅𑀥𑀺𑀕𑀢𑀲𑀫𑀸𑀥𑀺𑀢𑁄 𑀬𑀣𑀸 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀺, 𑀏𑀯𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦-𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀕𑀫𑀦𑁂𑀦𑀸𑀢𑀺 𑀆𑀳 ‘‘𑀲𑀫𑀸𑀥𑀻’’𑀢𑀺𑀆𑀤𑀺. 𑀅𑀝𑁆𑀞𑀺𑀓𑀲𑀜𑁆𑀜𑀸𑀤𑀺𑀓𑀸𑀢𑀺 𑀅𑀝𑁆𑀞𑀺𑀓𑀚𑁆𑀛𑀸𑀦𑀸𑀤𑀺𑀓𑀸. 𑀲𑀜𑁆𑀜𑀸𑀲𑀻𑀲𑁂𑀦 𑀳𑀺 𑀛𑀸𑀦𑀁 𑀯𑀤𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀜𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀅𑀢𑁆𑀢𑀪𑀸𑀯𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀢𑁆𑀢𑀪𑀸𑀯𑀺𑀦𑁄, 𑀢𑁂𑀲𑀁 𑀅𑀢𑁆𑀢𑀪𑀸𑀯𑀻𑀦𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀪𑀸𑀯𑀯𑀦𑁆𑀢𑀸𑀦’’𑀦𑁆𑀢𑀺. 𑀬𑀸𑀯 𑀙𑀢𑁆𑀢𑀺𑀁𑀲𑀸𑀬 𑀇𑀦𑁆𑀤𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀸𑀯 𑀧𑀡𑀻𑀢𑁂 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀻𑀢𑀺 𑀫𑀦𑁆𑀥𑀸𑀢𑀼𑀭𑀸𑀚𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀭𑀫𑀡𑀻𑀬𑀢𑀭𑀁 𑀞𑀸𑀦’’𑀦𑁆𑀢𑀺. 𑀓𑀲𑁆𑀫𑀸 𑀤𑁂𑀯 𑀏𑀯𑀁 𑀪𑀡𑀲𑀺, 𑀓𑀺𑀁 𑀦 𑀧𑀲𑁆𑀲𑀲𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀆𑀦𑀼𑀪𑀸𑀯𑀁, 𑀦𑀦𑀼 𑀏𑀢𑁂𑀲𑀁 𑀞𑀸𑀦𑀁 𑀇𑀢𑁄 𑀭𑀫𑀡𑀻𑀬𑀢𑀭𑀦𑁆𑀢𑀺? 𑀭𑀸𑀚𑀸 𑀘𑀓𑁆𑀓𑀭𑀢𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺.

𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 ‘‘𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀸𑀯𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀭𑀸𑀚𑀸 𑀦 𑀲𑀓𑁆𑀓𑀸 𑀬𑀼𑀤𑁆𑀥𑁂𑀦 𑀧𑀝𑀺𑀩𑀸𑀳𑀺𑀢𑀼’’𑀦𑁆𑀢𑀺 𑀲𑀓𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀼𑀁. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄 𑀭𑀫𑀡𑀻𑀬𑀢𑀭𑀁 𑀞𑀸𑀦’’𑀦𑁆𑀢𑀺. 𑀅𑀣𑀲𑁆𑀲 𑀢𑀸𑀯𑀢𑀺𑀁𑀲𑀪𑀯𑀦𑀁 𑀓𑀣𑀬𑀺𑀁𑀲𑀼. ‘‘𑀢𑀸𑀯𑀢𑀺𑀁𑀲𑀪𑀯𑀦𑀁, 𑀤𑁂𑀯, 𑀭𑀫𑀡𑀻𑀬𑀁, 𑀢𑀢𑁆𑀣 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀧𑀸𑀭𑀺𑀘𑀸𑀭𑀺𑀓𑀸 𑀤𑁄𑀯𑀸𑀭𑀺𑀓𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀢𑀲𑁆𑀲𑀺𑀫𑀸𑀦𑀺 𑀉𑀧𑀪𑁄𑀕𑀝𑁆𑀞𑀸𑀦𑀸𑀦𑀺 𑁋 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁄, 𑀧𑀜𑁆𑀘𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀸 𑀲𑀼𑀥𑀫𑁆𑀫𑀤𑁂𑀯𑀲𑀪𑀸, 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀯𑁂𑀚𑀬𑀦𑁆𑀢𑀭𑀣𑁄, 𑀢𑀣𑀸 𑀏𑀭𑀸𑀯𑀡𑁄 𑀳𑀢𑁆𑀣𑀻, 𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀦𑀦𑁆𑀤𑀦𑀯𑀦𑀁, 𑀘𑀺𑀢𑁆𑀢𑀮𑀢𑀸𑀯𑀦𑀁, 𑀨𑀸𑀭𑀼𑀲𑀓𑀯𑀦𑀁, 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀢𑀲𑁆𑀲 𑀳𑁂𑀝𑁆𑀞𑀸 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀸 𑀧𑀜𑁆𑀜𑀸𑀲𑀬𑁄𑀚𑀦𑀯𑀺𑀢𑁆𑀣𑀸𑀭𑀸 𑀧𑀜𑁆𑀘𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀸 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸, 𑀬𑀲𑁆𑀲𑀸 𑀫𑀼𑀤𑀼𑀢𑀸𑀬 𑀲𑀓𑁆𑀓𑀲𑁆𑀲 𑀦𑀺𑀲𑀻𑀤𑀢𑁄 𑀉𑀧𑀟𑁆𑀠𑀓𑀸𑀬𑁄 𑀅𑀦𑀼𑀧𑁆𑀧𑀯𑀺𑀲𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀢𑀁 𑀆𑀓𑀸𑀲𑁂 𑀉𑀝𑁆𑀞𑀳𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀅𑀣 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀯𑁂𑀫𑀚𑁆𑀛𑀢𑁄 𑀘𑀓𑁆𑀓𑀭𑀢𑀦𑀁 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀸 𑀆𑀲𑀦𑁆𑀦𑁂 𑀞𑀸𑀦𑁂 𑀅𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀭𑀸𑀚𑀸 𑀏𑀓𑀓𑁄𑀯 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀕𑀫𑀸𑀲𑀺. 𑀲𑀓𑁆𑀓𑁄 ‘‘𑀫𑀦𑁆𑀥𑀸𑀢𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀲𑁆𑀯𑀸𑀕𑀢𑀁, 𑀫𑀳𑀸𑀭𑀸𑀚, 𑀲𑀓𑀁, 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀲𑀤𑁆𑀥𑀺𑀁 𑀦𑀸𑀝𑀓𑁂𑀳𑀺 𑀭𑀚𑁆𑀚𑀁 𑀤𑁆𑀯𑁂 𑀪𑀸𑀕𑁂 𑀓𑀢𑁆𑀯𑀸 𑀏𑀓𑀁 𑀪𑀸𑀕𑀫𑀤𑀸𑀲𑀺. 𑀭𑀜𑁆𑀜𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀕𑀦𑁆𑀥𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑀸𑀤𑀺𑀫𑀦𑀼𑀲𑁆𑀲𑀪𑀸𑀯𑁄 𑀯𑀺𑀕𑀘𑁆𑀙𑀺, 𑀤𑁂𑀯𑀮𑁄𑀓𑁂 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑁄𑀓𑀸𑀲𑀢𑁆𑀢𑀸 𑀲𑀩𑁆𑀩𑀤𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀢𑀸𑀫𑀸𑀮𑀸𑀫𑀺𑀮𑀸𑀬𑀦𑀸𑀤𑀺𑀤𑁂𑀯𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀲𑁆𑀲 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀅𑀓𑁆𑀔𑀺𑀦𑀺𑀫𑀺𑀲𑀦𑀫𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀢𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀤𑁂𑀯𑀸 𑀲𑀓𑁆𑀓𑀲𑁆𑀲 𑀘 𑀢𑀲𑁆𑀲 𑀘 𑀦𑀸𑀦𑀢𑁆𑀢𑁂 𑀫𑀼𑀬𑁆𑀳𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀢𑀤𑀸 𑀫𑀦𑀼𑀲𑁆𑀲𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀢𑀸𑀬 𑀬𑀸𑀯 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀉𑀧𑀧𑀚𑁆𑀚𑀺𑀢𑁆𑀯𑀸 𑀘𑀼𑀢𑀸, 𑀢𑀸𑀯 𑀲𑀓𑁆𑀓𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀉𑀧𑀟𑁆𑀠𑀭𑀚𑁆𑀚𑁂𑀦𑀸’’𑀢𑀺 𑀅𑀢𑀺𑀢𑁆𑀢𑁄 𑀓𑀸𑀫𑁂𑀳𑀺 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀧𑀢𑀺𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀉𑀢𑀼𑀓𑀓𑁆𑀔𑀴𑀢𑀸𑀬 𑀯𑀸𑀢𑀸𑀢𑀧𑁂𑀦 𑀨𑀼𑀲𑀺𑀢𑀕𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁂𑀯𑀮𑁄𑀓𑁂 𑀧𑀦 𑀬𑀸𑀯 𑀙𑀢𑁆𑀢𑀺𑀁𑀲𑀸𑀬 𑀇𑀦𑁆𑀤𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀸𑀯 𑀧𑀡𑀻𑀢𑁂 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀻’’𑀢𑀺.

𑀧𑀜𑁆𑀜𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁄𑀔𑀼𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀲𑀼𑀔𑀼𑀫𑀮𑀓𑁆𑀔𑀡𑀧𑁆𑀧𑀝𑀺𑀯𑀺𑀚𑁆𑀛𑀦𑀓𑀸𑀦𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀲𑀼𑀔𑀼𑀫𑀮𑀓𑁆𑀔𑀡𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀓𑀸𑀦𑀺. 𑀲𑀼𑀔𑀼𑀫𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀜𑀸𑀡𑁂𑀦𑀸𑀢𑀺 𑀲𑀼𑀔𑀼𑀫𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑁂𑀦 𑀜𑀸𑀡𑁂𑀦. 𑀧𑀭𑀢𑁄 𑀚𑀸𑀦𑀺𑀢𑁆𑀯𑀸𑀢𑀺 𑀅𑀯𑀲𑀯𑀢𑁆𑀢𑀦𑁂𑀦 𑀅𑀜𑁆𑀜𑀢𑁄 𑀚𑀸𑀦𑀺𑀢𑁆𑀯𑀸. 𑀲𑀗𑁆𑀔𑀸𑀭𑀸 𑀳𑀺 ‘‘𑀫𑀸 𑀪𑀺𑀚𑁆𑀚𑀺𑀁𑀲𑀽’’𑀢𑀺 𑀇𑀘𑁆𑀙𑀺𑀢𑀸𑀧𑀺 𑀪𑀺𑀚𑁆𑀚𑀦𑁆𑀢𑁂𑀯, 𑀢𑀲𑁆𑀫𑀸 𑀢𑁂 𑀅𑀯𑀲𑀯𑀢𑁆𑀢𑀺𑀢𑀸𑀬 𑀧𑀭𑁂 𑀦𑀸𑀫. 𑀲𑀸 𑀘 𑀦𑁂𑀲𑀁 𑀧𑀭𑀢𑀸 𑀅𑀦𑀺𑀘𑁆𑀘𑀤𑀲𑁆𑀲𑀦𑁂 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀳𑀺 𑀧𑀤𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀲𑁄𑀔𑀼𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀧𑀞𑀫𑀅𑀕𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁨𑁦. 𑀲𑀢𑁆𑀢𑀫𑁂 𑀙𑀦𑁆𑀤𑀸𑀕𑀢𑀺𑀦𑁆𑀢𑀺 𑀏𑀢𑁆𑀣 𑀲𑀦𑁆𑀥𑀺𑀯𑀲𑁂𑀦 𑀲𑀭𑀮𑁄𑀧𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀦𑁆𑀤𑁂𑀦 𑀅𑀕𑀢𑀺’’𑀦𑁆𑀢𑀺. 𑀙𑀦𑁆𑀤𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀙𑀦𑁆𑀤𑁂𑀦𑀸’’𑀢𑀺, 𑀧𑁂𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀲𑀤𑁆𑀤𑁄 𑀳𑁂𑀢𑁆𑀣 𑀢𑀡𑁆𑀳𑀸𑀧𑀭𑀺𑀬𑀸𑀬𑁄, 𑀅𑀓𑀼𑀲𑀮𑀘𑁆𑀙𑀦𑁆𑀤𑀧𑀭𑀺𑀬𑀸𑀬𑁄 𑀯𑀸. 𑀲𑁂𑀲𑁂𑀲𑀽𑀢𑀺 ‘‘𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼.

𑀏𑀢𑁆𑀣 𑀘 𑀬𑁄 ‘‘𑀅𑀬𑀁 𑀫𑁂 𑀫𑀺𑀢𑁆𑀢𑁄𑀢𑀺 𑀯𑀸, 𑀲𑀦𑁆𑀤𑀺𑀝𑁆𑀞𑁄𑀢𑀺 𑀯𑀸, 𑀜𑀸𑀢𑀓𑁄𑀢𑀺 𑀯𑀸, 𑀮𑀜𑁆𑀘𑀁 𑀯𑀸 𑀧𑀦 𑀫𑁂 𑀤𑁂𑀢𑀻’’𑀢𑀺 𑀙𑀦𑁆𑀤𑀯𑀲𑁂𑀦 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀙𑀦𑁆𑀤𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺 𑀦𑀸𑀫. 𑀬𑁄 ‘‘𑀅𑀬𑀁 𑀫𑁂 𑀯𑁂𑀭𑀻’’𑀢𑀺 𑀘𑀺𑀭𑀓𑀸𑀮𑀸𑀦𑀼𑀩𑀤𑁆𑀥𑀯𑁂𑀭𑀯𑀲𑁂𑀦 𑀯𑀸, 𑀢𑀗𑁆𑀔𑀡𑀼𑀧𑁆𑀧𑀦𑁆𑀦𑀓𑁄𑀥𑀯𑀲𑁂𑀦 𑀯𑀸 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀤𑁄𑀲𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀅𑀬𑀼𑀢𑁆𑀢𑀁 𑀅𑀓𑀸𑀭𑀡𑀁 𑀯𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀫𑁄𑀳𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 ‘‘𑀅𑀬𑀁 𑀭𑀸𑀚𑀯𑀮𑁆𑀮𑀪𑁄𑀢𑀺 𑀯𑀸 𑀯𑀺𑀲𑀫𑁂 𑀘𑁄𑀭𑀸𑀤𑀺𑀓𑁂 𑀯𑀺𑀲𑀫𑀸𑀦𑀺 𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁂𑀦 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀯𑀸, 𑀅𑀦𑀢𑁆𑀣𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬𑀸’’𑀢𑀺 𑀪𑀻𑀢𑁄 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀪𑀬𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺 𑀦𑀸𑀫.

𑀬𑁄 𑀧𑀦 𑀓𑀺𑀜𑁆𑀘𑀺 𑀪𑀸𑀚𑁂𑀦𑁆𑀢𑁄 ‘‘𑀅𑀬𑀁 𑀫𑁂 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸’’𑀢𑀺 𑀧𑁂𑀫𑀯𑀲𑁂𑀦 𑀅𑀢𑀺𑀭𑁂𑀓𑀁 𑀤𑁂𑀢𑀺, ‘‘𑀅𑀬𑀁 𑀫𑁂 𑀯𑁂𑀭𑀻’’𑀢𑀺 𑀤𑁄𑀲𑀯𑀲𑁂𑀦 𑀊𑀦𑀓𑀁 𑀤𑁂𑀢𑀺, 𑀬𑁄 𑀫𑀼𑀬𑁆𑀳𑀦𑁆𑀢𑁄 𑀤𑀺𑀦𑁆𑀦𑀸𑀤𑀺𑀦𑁆𑀦𑀁 𑀅𑀚𑀸𑀦𑀫𑀸𑀦𑁄 𑀓𑀲𑁆𑀲𑀘𑀺 𑀊𑀦𑀁, 𑀓𑀲𑁆𑀲𑀘𑀺 𑀅𑀥𑀺𑀓𑀁 𑀤𑁂𑀢𑀺, ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀤𑀻𑀬𑀫𑀸𑀦𑁂 𑀫𑀬𑁆𑀳𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀲𑀻𑀢𑁄 𑀓𑀲𑁆𑀲𑀘𑀺 𑀅𑀢𑀺𑀭𑁂𑀓𑀁 𑀤𑁂𑀢𑀺, 𑀲𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀬𑀣𑀸𑀦𑀼𑀓𑁆𑀓𑀫𑁂𑀦 𑀙𑀦𑁆𑀤𑀸𑀕𑀢𑀺𑀆𑀤𑀻𑀦𑀺 𑀕𑀘𑁆𑀙𑀦𑁆𑀢𑁄 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺 𑀦𑀸𑀫.

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄𑀢𑀺 𑀢𑀲𑁆𑀲 𑀅𑀕𑀢𑀺𑀕𑀸𑀫𑀺𑀦𑁄 𑀓𑀺𑀢𑁆𑀢𑀺𑀬𑀲𑁄𑀧𑀺 𑀧𑀭𑀺𑀯𑀸𑀭𑀬𑀲𑁄𑀧𑀺 𑀦𑀺𑀳𑀻𑀬𑀢𑀺 𑀧𑀭𑀺𑀳𑀸𑀬𑀢𑀺. 𑀬𑀲𑁆𑀲𑀢𑀺 𑀢𑁂𑀦 𑀓𑀺𑀢𑁆𑀢𑀻𑀬𑀢𑀻𑀢𑀺 𑀳𑀺 𑀬𑀲𑁄, 𑀓𑀺𑀢𑁆𑀢𑀺 𑀣𑀼𑀢𑀺𑀖𑁄𑀲𑁄. 𑀬𑀲𑁆𑀲𑀢𑀺 𑀢𑁂𑀦 𑀧𑀼𑀭𑁂𑀘𑀭𑀸𑀦𑀼𑀘𑀭𑀪𑀸𑀯𑁂𑀦 𑀧𑀭𑀺𑀯𑀸𑀭𑀬𑀢𑀻𑀢𑀺 𑀬𑀲𑁄, 𑀧𑀭𑀺𑀯𑀸𑀭𑁄. 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀘𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀉𑀭𑀼𑀯𑁂𑀮𑀯𑀕𑁆𑀕𑁄

𑁧. 𑀧𑀞𑀫𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀫𑀳𑀸𑀯𑁂𑀮𑀸 𑀯𑀺𑀬 𑀫𑀳𑀸𑀯𑁂𑀮𑀸, 𑀯𑀺𑀧𑀼𑀮𑀯𑀸𑀮𑀺𑀓𑀧𑀼𑀜𑁆𑀚𑀢𑀸𑀬 𑀫𑀳𑀦𑁆𑀢𑁄 𑀯𑁂𑀮𑀸𑀢𑀝𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄’’𑀢𑀺. 𑀉𑀭𑀼, 𑀫𑀭𑀼, 𑀲𑀺𑀓𑀢𑀸, 𑀯𑀸𑀮𑀼𑀓𑀸, 𑀯𑀡𑁆𑀡𑀼, 𑀯𑀸𑀮𑀺𑀓𑀸𑀢𑀺 𑀇𑀫𑁂 𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀢𑁂𑀦𑀸𑀳 ‘‘𑀉𑀭𑀽𑀢𑀺 𑀯𑀸𑀮𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺.

𑀦𑀚𑁆𑀚𑀸𑀢𑀺 𑀦𑀤𑀢𑀺 𑀲𑀤𑁆𑀤𑀸𑀬𑀢𑀻𑀢𑀺 𑀦𑀤𑀻, 𑀢𑀲𑁆𑀲𑀸 𑀦𑀚𑁆𑀚𑀸, 𑀦𑀤𑀺𑀬𑀸 𑀦𑀺𑀦𑁆𑀦𑀕𑀸𑀬𑀸𑀢𑀺 𑀅𑀢𑁆𑀣𑁄. 𑀦𑁂𑀭𑀜𑁆𑀚𑀭𑀸𑀬𑀸𑀢𑀺 ‘‘𑀦𑁂𑀮𑀜𑁆𑀚𑀮𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮-𑀓𑀸𑀭𑀲𑁆𑀲 𑀭-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑁂𑀭𑀜𑁆𑀚𑀭𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑀤𑁆𑀤𑀫𑀲𑁂𑀯𑀸𑀮𑀧𑀡𑀓𑀸𑀤𑀺𑀤𑁄𑀲𑀭𑀳𑀺𑀢𑀲𑀮𑀺𑀮𑀸𑀬𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀦𑀻𑀮𑀁-𑀚𑀮𑀸𑀬𑀸𑀢𑀺 𑀯𑀢𑁆𑀢𑀩𑁆𑀩𑁂 𑀦𑁂𑀭𑀜𑁆𑀚𑀭𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀦𑀸𑀫𑀫𑁂𑀯 𑀯𑀸 𑀏𑀢𑀁 𑀢𑀲𑁆𑀲𑀸 𑀦𑀤𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀬𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑀸𑀬𑀁 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀦𑀸𑀫 𑀚𑀸𑀢𑁄𑀢𑀺 𑀆𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀢𑀢𑁆𑀣 𑀯𑁂𑀤𑁂 𑀲𑀚𑁆𑀛𑀸𑀬𑀺𑀢𑀼𑀁 𑀅𑀲𑀫𑀢𑁆𑀣𑀸 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀬𑀼𑀢𑁆𑀢𑀸𑀦𑀺 𑀦𑀺𑀯𑁂𑀲𑀦𑀸𑀦𑀺 𑀓𑀢𑁆𑀯𑀸 𑀲𑀩𑁆𑀩𑁂 𑀯𑀲𑀺𑀁𑀲𑀼, 𑀢𑀲𑁆𑀫𑀸𑀲𑁆𑀲 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄𑀢𑀺 𑀦𑀸𑀫𑀁 𑀚𑀸𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦 𑀚𑀧𑀦𑁆𑀢𑀻𑀢𑀺 𑀅𑀚𑀧𑀸, 𑀫𑀦𑁆𑀢𑀸𑀦𑀁 𑀅𑀦𑀚𑁆𑀛𑀸𑀬𑀓𑀸𑀢𑀺 𑀅𑀢𑁆𑀣𑁄. 𑀅𑀚𑀧𑀸𑀮𑀦𑁆𑀢𑀺 𑀆𑀤𑀺𑀬𑀦𑁆𑀢𑀺 𑀦𑀺𑀯𑀸𑀲𑀁 𑀏𑀢𑁆𑀣𑀸𑀢𑀺 𑀅𑀚𑀧𑀸𑀮𑁄𑀢𑀺. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺 ‘‘𑀬𑀲𑁆𑀫𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀅𑀦𑁆𑀢𑁄𑀧𑀯𑀺𑀝𑁆𑀞𑁂 𑀅𑀚𑁂 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀧𑀸𑀮𑁂𑀢𑀺 𑀭𑀓𑁆𑀔𑀢𑀺, 𑀢𑀲𑁆𑀫𑀸 ‘𑀅𑀚𑀧𑀸𑀮𑁄’𑀢𑀺𑀲𑁆𑀲 𑀦𑀸𑀫𑀁 𑀭𑀼𑀴𑁆𑀳’’𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀧𑀺 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲.

𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀞𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀢𑁂𑀦𑁂𑀯𑀸𑀳 ‘‘𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀫𑁂𑀯𑀸’’𑀢𑀺. 𑀧𑀞𑀫𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀯𑀺𑀳𑀭𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀺𑀢𑀓𑁆𑀓𑁄𑀢𑀺 𑀅𑀬𑀁 ‘‘𑀓𑀺𑀦𑁆𑀦𑀼 𑀔𑁆𑀯𑀸𑀳𑀁…𑀧𑁂… 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀯𑀺𑀢𑀓𑁆𑀓𑁄. 𑀳𑀢𑁆𑀣𑀻 𑀘 𑀯𑀸𑀦𑀭𑁄 𑀘 𑀢𑀺𑀢𑁆𑀢𑀺𑀭𑁄 𑀘 𑀳𑀢𑁆𑀣𑀺𑀯𑀸𑀦𑀭𑀢𑀺𑀢𑁆𑀢𑀺𑀭𑀸.

𑀬𑁂 𑀯𑀼𑀤𑁆𑀥𑀫𑀧𑀘𑀸𑀬𑀦𑁆𑀢𑀻𑀢𑀺 𑀚𑀸𑀢𑀺𑀯𑀼𑀤𑁆𑀥𑁄, 𑀯𑀬𑁄𑀯𑀼𑀤𑁆𑀥𑁄, 𑀕𑀼𑀡𑀯𑀼𑀤𑁆𑀥𑁄𑀢𑀺 𑀢𑀬𑁄 𑀯𑀼𑀤𑁆𑀥𑀸. 𑀢𑁂𑀲𑀼 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀚𑀸𑀢𑀺𑀯𑀼𑀤𑁆𑀥𑁄 𑀦𑀸𑀫, 𑀯𑀬𑁂 𑀞𑀺𑀢𑁄 𑀯𑀬𑁄𑀯𑀼𑀤𑁆𑀥𑁄 𑀦𑀸𑀫, 𑀕𑀼𑀡𑀲𑀫𑁆𑀧𑀦𑁆𑀦𑁄 𑀕𑀼𑀡𑀯𑀼𑀤𑁆𑀥𑁄 𑀦𑀸𑀫. 𑀢𑁂𑀲𑀼 𑀕𑀼𑀡𑀲𑀫𑁆𑀧𑀦𑁆𑀦𑁄 𑀯𑀬𑁄𑀯𑀼𑀤𑁆𑀥𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀼𑀤𑁆𑀥𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀧𑀘𑀸𑀬𑀦𑁆𑀢𑀻𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸𑀓𑀫𑁆𑀫𑁂𑀦 𑀧𑀽𑀚𑁂𑀦𑁆𑀢𑀺. 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 𑀓𑀼𑀲𑀮𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀸𑀭𑀳𑀸. 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻𑀢𑀺 𑀲𑀫𑁆𑀧𑀭𑁂𑀢𑀩𑁆𑀩𑁂 𑀇𑀫𑀁 𑀮𑁄𑀓𑀁 𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑁂 𑀧𑀭𑀮𑁄𑀓𑁂𑀧𑀺 𑀢𑁂𑀲𑀁 𑀲𑀼𑀕𑀢𑀺𑀬𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀔𑀢𑁆𑀢𑀺𑀬𑀸 𑀯𑀸 𑀳𑁄𑀦𑁆𑀢𑀼 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑁂𑀲𑁆𑀲𑀸 𑀯𑀸 𑀲𑀼𑀤𑁆𑀤𑀸 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀯𑀸, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀫𑁆𑀫𑁂𑀦 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀯𑀬𑁄𑀯𑀼𑀤𑁆𑀥𑀸𑀦𑀁 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀸𑀭𑀓𑀸𑀢𑀺 𑀧𑀲𑀁𑀲𑀁 𑀯𑀡𑁆𑀡𑀦𑀁 𑀣𑁄𑀫𑀦𑀁 𑀮𑀪𑀦𑁆𑀢𑀺, 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺.

𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀧𑀭𑀲𑁆𑀫𑀺𑀁. 𑀅𑀢𑁆𑀢𑀸 𑀦 𑀳𑁄𑀢𑀻𑀢𑀺 𑀅𑀜𑁆𑀜𑁄, 𑀧𑀭𑁄. 𑀲𑁄 𑀧𑀦𑁂𑀢𑁆𑀣 𑀦 𑀬𑁄 𑀓𑁄𑀘𑀺 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀕𑀭𑀼𑀝𑁆𑀞𑀸𑀦𑀺𑀬𑁄. 𑀢𑁂𑀦𑀸𑀳 ‘‘𑀓𑀜𑁆𑀘𑀺 𑀕𑀭𑀼𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀧𑀢𑀺𑀲𑁆𑀲𑀢𑀺 𑀕𑀭𑀼𑀦𑁄 𑀆𑀡𑀁 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀧𑀢𑀺𑀲𑁆𑀲𑁄, 𑀦 𑀧𑀢𑀺𑀲𑁆𑀲𑁄 𑀅𑀧𑁆𑀧𑀢𑀺𑀲𑁆𑀲𑁄, 𑀧𑀢𑀺𑀲𑁆𑀲𑀬𑀭𑀳𑀺𑀢𑁄, 𑀕𑀭𑀼𑀧𑀲𑁆𑀲𑀬𑀭𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀲𑀤𑁂𑀯𑀓𑁂𑀢𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀫𑀸𑀭𑁄 𑀚𑀸𑀢𑁄 𑀢𑀦𑁆𑀦𑀺𑀯𑀸𑀲𑀻 𑀘 𑀳𑁄𑀢𑀺. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦𑁂𑀯. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬𑀸𑀢𑀺 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀲𑀫𑀺𑀢𑀸𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀦𑁂𑀯 𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓𑁂’’𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁.

𑀤𑁂𑀯𑀪𑀸𑀯𑀲𑀸𑀫𑀜𑁆𑀜𑁂𑀦 𑀫𑀸𑀭𑀩𑁆𑀭𑀳𑁆𑀫𑁂𑀲𑀼 𑀕𑀳𑀺𑀢𑁂𑀲𑀼𑀧𑀺 𑀇𑀢𑀭𑁂𑀳𑀺 𑀢𑁂𑀲𑀁 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀭𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀫𑀸𑀭𑁄 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀧𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀲’’𑀦𑁆𑀢𑀺. 𑀉𑀧𑀭𑀻𑀢𑀺 𑀉𑀧𑀭𑀺𑀪𑀸𑀕𑁂. 𑀩𑁆𑀭𑀳𑁆𑀫𑀸𑀢𑀺 𑀤𑀲𑀲𑀳𑀲𑁆𑀲𑀺𑀩𑁆𑀭𑀳𑁆𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀣𑀸 𑀘𑀸𑀳 ‘‘𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀻’’𑀢𑀺𑀆𑀤𑀺. 𑀇𑀥 𑀤𑀻𑀖𑀦𑀺𑀓𑀸𑀬𑀸𑀤𑀬𑁄 𑀯𑀺𑀬 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀕𑀦𑁆𑀣𑀦𑀺𑀓𑀸𑀬𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀏𑀓𑀦𑀺𑀓𑀸𑀬𑀸𑀤𑀺𑀯𑀲𑁂𑀦𑀸’’𑀢𑀺. 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀚𑀸𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀚𑀸, 𑀲𑀢𑁆𑀢𑀦𑀺𑀓𑀸𑀬𑁄, 𑀢𑀲𑁆𑀲𑀸 𑀧𑀚𑀸𑀬. 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑀯𑀸 𑀇𑀫𑀺𑀦𑀸 𑀲𑀫𑁆𑀫𑀼𑀢𑀺𑀤𑁂𑀯𑀕𑁆𑀕𑀳𑀡𑀁 𑀢𑀤𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀮𑁄𑀓𑀕𑁆𑀕𑀳𑀡𑀜𑁆𑀘 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑁄𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 ‘‘𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀁 𑀓𑀫𑁆𑀫𑀨𑀮𑀸𑀦𑀻’’𑀢𑀺 𑀓𑀢𑁆𑀯𑀸. 𑀧𑀚𑀸𑀯𑀲𑁂𑀦 ‘‘𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀧𑀚𑀸𑀢𑀸’’𑀢𑀺 𑀓𑀢𑁆𑀯𑀸. 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀦𑁆𑀢𑀺 𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀢𑀸 𑀅𑀥𑀺𑀧𑁆𑀧𑁂𑀢𑀸 ‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁪.𑁧) 𑀯𑀺𑀬. 𑀢𑁂𑀦𑀸𑀳 ‘‘𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀜𑁆𑀳𑀺 𑀅𑀥𑀺𑀓𑀢𑀭𑀦𑁆𑀢𑀺 𑀯𑀢𑁆𑀢𑀼𑀁 𑀅𑀭𑀳𑀢𑀺. 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀺𑀁. 𑀅𑀢𑁆𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑀁. 𑀯𑀟𑁆𑀠𑀺𑀦𑁆𑀢𑀺 𑀅𑀢𑀺𑀯𑀟𑁆𑀠𑀺𑀦𑀺𑀫𑀺𑀢𑁆𑀢𑀁.

𑀇𑀫𑀺𑀦𑀸 𑀯𑀘𑀦𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀯𑀘𑀦𑁂𑀦. 𑀦 𑀓𑁂𑀯𑀮𑀁 𑀇𑀫𑀺𑀦𑀸𑀯, 𑀲𑀼𑀢𑁆𑀢𑀦𑁆𑀢𑀭𑀫𑁆𑀧𑀺 𑀆𑀦𑁂𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀦𑀸𑀫 𑀦𑀢𑁆𑀣𑀺. 𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀫𑁆𑀧𑀺 𑀬𑀸𑀤𑀺𑀲𑁄 𑀮𑁄𑀓𑀦𑀸𑀣𑀲𑁆𑀲 𑀅𑀥𑀺𑀕𑀫𑁄, 𑀦 𑀢𑀸𑀤𑀺𑀲𑁄 𑀅𑀥𑀺𑀕𑀫𑁄 𑀧𑀭𑀽𑀧𑀤𑁂𑀲𑁄 𑀅𑀢𑁆𑀣𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀦𑀲𑁆𑀲 𑀮𑁂𑀲𑁄𑀧𑀺 𑀦𑀢𑁆𑀣𑀺. 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀫𑀬𑁆𑀳𑀁 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀝𑀺𑀦𑀺𑀥𑀺𑀪𑀽𑀢𑁄 𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀺. 𑀲𑀭𑀦𑁆𑀢𑀺 𑀓𑀭𑀡𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀭𑀦𑁆𑀢𑁂𑀦𑀸’’𑀢𑀺, 𑀲𑀭𑀦𑁆𑀢𑀺 𑀯𑀸 𑀲𑀭𑀡𑀳𑁂𑀢𑀼 𑀘𑀸𑀢𑀺 𑀅𑀢𑁆𑀣𑁄.

𑀬𑀢𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀢𑁄𑀲𑀤𑁆𑀤𑁄𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽, 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺, 𑀘𑀺𑀭𑀧𑀩𑁆𑀩𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑁆𑀢𑀜𑁆𑀜𑀽𑀦𑀁 𑀫𑀳𑀦𑁆𑀢𑀪𑀸𑀯𑁄 𑀭𑀢𑁆𑀢𑀜𑁆𑀜𑀼𑀫𑀳𑀦𑁆𑀢𑀁. 𑀪𑀸𑀯𑀧𑁆𑀧𑀥𑀸𑀦𑁄 𑀏𑀲 𑀦𑀺𑀤𑁆𑀤𑁂𑀲𑁄. ‘‘𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢’’𑀦𑁆𑀢𑀺 𑀯𑀸 𑀧𑀸𑀞𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀯𑀲𑁂𑀦 𑀯𑀺𑀧𑀼𑀮𑀪𑀸𑀯𑁄 𑀯𑁂𑀧𑀼𑀮𑁆𑀮𑀫𑀳𑀦𑁆𑀢𑀁. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀲𑁆𑀲 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀛𑀸𑀦𑀸𑀪𑀺𑀜𑁆𑀜𑀸𑀤𑀺𑀯𑀲𑁂𑀦 𑀯𑀺𑀧𑀼𑀮𑀪𑀸𑀯𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑀳𑀦𑁆𑀢𑀁. 𑀯𑀺𑀲𑀺𑀝𑁆𑀞𑀲𑁆𑀲 𑀧𑀘𑁆𑀘𑀬𑀮𑀸𑀪𑀲𑁆𑀲 𑀯𑀺𑀧𑀼𑀮𑀪𑀸𑀯𑁄 𑀮𑀸𑀪𑀕𑁆𑀕𑀫𑀳𑀦𑁆𑀢𑀁. 𑀘𑀢𑀼𑀩𑁆𑀩𑀺𑀥𑁂𑀦 𑀫𑀳𑀦𑁆𑀢𑁂𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀫𑀳𑀦𑁆𑀢𑀪𑀸𑀯𑁂𑀦. 𑀫𑀳𑀸𑀧𑀚𑀸𑀧𑀢𑀺𑀬𑀸 𑀤𑀼𑀲𑁆𑀲𑀬𑀼𑀕𑀤𑀸𑀦𑀓𑀸𑀮𑁂𑀢𑀺 𑀪𑀕𑀯𑀢𑁄 𑀲𑀗𑁆𑀖𑁂 𑀕𑀸𑀭𑀯𑀲𑁆𑀲 𑀧𑀸𑀓𑀝𑀓𑀸𑀮𑀤𑀲𑁆𑀲𑀦𑀫𑀢𑁆𑀢𑀁. 𑀦 𑀳𑀺 𑀪𑀕𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀲𑀗𑁆𑀖𑁂 𑀕𑀸𑀭𑀯𑀭𑀳𑀺𑀢𑁄 𑀯𑀺𑀳𑀸𑀲𑀺.

𑀧𑀞𑀫𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨.𑀤𑀼𑀢𑀺𑀬𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀳𑀼𑀳𑀼𑀗𑁆𑀓𑀚𑀸𑀢𑀺𑀓𑁂𑀦𑀸𑀢𑀺 𑀲𑁄 𑀓𑀺𑀭 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀫𑀸𑀦𑀯𑀲𑁂𑀦 𑀓𑁄𑀥𑀯𑀲𑁂𑀦 𑀘 ‘‘𑀳𑀼𑀳𑀼’’𑀦𑁆𑀢𑀺 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀸 𑀳𑀼𑀳𑀼𑀗𑁆𑀓𑀚𑀸𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀳𑀼𑀳𑀼𑀓𑁆𑀓𑀚𑀸𑀢𑀺𑀓𑁄’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀚𑀭𑀸𑀚𑀺𑀡𑁆𑀡𑀸𑀢𑀺 𑀚𑀭𑀸𑀬 𑀔𑀡𑁆𑀟𑀤𑀦𑁆𑀢𑀧𑀮𑀺𑀢𑀓𑁂𑀲𑀸𑀤𑀺𑀪𑀸𑀯𑀁 𑀆𑀧𑀸𑀤𑀺𑀢𑀸. 𑀯𑀬𑁄𑀯𑀼𑀤𑁆𑀥𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀼𑀤𑁆𑀥𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀸. 𑀚𑀸𑀢𑀺𑀫𑀳𑀮𑁆𑀮𑀓𑀸𑀢𑀺 𑀉𑀧𑀧𑀢𑁆𑀢𑀺𑀬𑀸 𑀫𑀳𑀮𑁆𑀮𑀓𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀫𑀳𑀢𑁆𑀢𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀻𑀢𑀺 𑀫𑀳𑀮𑁆𑀮𑀓𑀸, 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑀸, 𑀦 𑀯𑀺𑀪𑀯𑀸𑀤𑀺𑀦𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀸. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑀸, 𑀧𑀘𑁆𑀙𑀺𑀫𑀯𑀬𑁄 𑀦𑀸𑀫 𑀯𑀲𑁆𑀲𑀲𑀢𑀲𑁆𑀲 𑀧𑀘𑁆𑀙𑀺𑀫𑁄 𑀢𑀢𑀺𑀬𑁄 𑀪𑀸𑀕𑁄. 𑀚𑀺𑀡𑁆𑀡𑀸𑀢𑀺 𑀯𑀸 𑀧𑁄𑀭𑀸𑀡𑀸, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀤𑁆𑀥𑀸𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀼𑀢𑁆𑀢𑀸. 𑀫𑀳𑀮𑁆𑀮𑀓𑀸𑀢𑀺 𑀯𑀺𑀪𑀯𑀫𑀳𑀦𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀫𑀳𑀤𑁆𑀥𑀦𑀸𑀢𑀺 𑀫𑀳𑀸𑀪𑁄𑀕𑀸. 𑀅𑀤𑁆𑀥𑀕𑀢𑀸𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀘𑀭𑀺𑀬𑀸𑀤𑀺𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫 𑀘𑀭𑀫𑀸𑀦𑀸. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀚𑀸𑀢𑀺𑀯𑀼𑀤𑁆𑀥𑀪𑀸𑀯𑀁 𑀅𑀦𑁆𑀢𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀲𑀼𑀢𑀁 𑀦𑁂𑀢𑀦𑁆𑀢𑀺 𑀏𑀢𑁆𑀣 𑀲𑀼𑀢𑀁 𑀦𑁄 𑀏𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀦𑁄𑀢𑀺 𑀘 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀅𑀫𑁆𑀳𑁂𑀳𑀺 𑀲𑀼𑀢’’𑀦𑁆𑀢𑀺.

𑀅𑀓𑀸𑀮𑁂𑀢𑀺 𑀅𑀬𑀼𑀢𑁆𑀢𑀓𑀸𑀮𑁂. 𑀅𑀲𑀪𑀸𑀯𑀁 𑀯𑀤𑀢𑀻𑀢𑀺 𑀬𑀁 𑀦𑀢𑁆𑀣𑀺, 𑀢𑀁 𑀯𑀤𑀢𑀺. 𑀅𑀦𑀢𑁆𑀣𑀁 𑀯𑀤𑀢𑀻𑀢𑀺 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀯𑀤𑀢𑀺. 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀘 𑀦𑀺𑀧𑁆𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀨𑀮𑀜𑁆𑀳𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁. 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀢𑀸 𑀘 𑀢𑀤𑀯𑀺𑀦𑀸𑀪𑀸𑀯𑀢𑁄 𑀅𑀓𑀸𑀭𑀡𑁂 𑀦𑀺𑀲𑁆𑀲𑀺𑀢𑀁, 𑀦𑀺𑀧𑁆𑀨𑀮𑀁 𑀲𑀫𑁆𑀨𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀦𑀬𑀁 𑀯𑀤𑀢𑀻𑀢𑀺 𑀦 𑀲𑀁𑀯𑀭𑀯𑀺𑀦𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀤𑀢𑀺, 𑀅𑀢𑁆𑀢𑀦𑁄 𑀲𑀼𑀡𑀦𑁆𑀢𑀲𑁆𑀲 𑀘 𑀦 𑀲𑀁𑀯𑀭𑀯𑀺𑀦𑀬𑀸𑀯𑀳𑀁 𑀯𑀤𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀤𑀬𑁂 𑀦𑀺𑀥𑁂𑀢𑀩𑁆𑀩𑀬𑀼𑀢𑁆𑀢𑀓𑀦𑁆𑀢𑀺 𑀅𑀳𑀺𑀢𑀲𑀁𑀳𑀺𑀢𑀢𑁆𑀢𑀸 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀯𑁂𑀲𑁂𑀢𑁆𑀯𑀸 𑀦𑀺𑀥𑁂𑀢𑀼𑀁 𑀅𑀬𑀼𑀢𑁆𑀢𑀁. 𑀓𑀣𑁂𑀢𑀼𑀁 𑀅𑀬𑀼𑀢𑁆𑀢𑀓𑀸𑀮𑁂𑀦𑀸𑀢𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦 𑀬𑁄 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀓𑀸𑀮𑁂 𑀯𑀢𑁆𑀢𑀩𑁆𑀩𑁄, 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀢𑀲𑁆𑀲 𑀅𑀓𑀸𑀮𑁄, 𑀢𑀲𑁆𑀫𑀺𑀁 𑀅𑀬𑀼𑀢𑁆𑀢𑀓𑀸𑀮𑁂 𑀯𑀢𑁆𑀢𑀸. 𑀅𑀧𑀤𑁂𑀲𑀭𑀳𑀺𑀢𑀦𑁆𑀢𑀺 𑀲𑀼𑀢𑁆𑀢𑀸𑀧𑀤𑁂𑀲𑀭𑀳𑀺𑀢𑀁. 𑀲𑀸𑀧𑀤𑁂𑀲𑀁 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀻𑀢𑀺 ‘‘𑀪𑀕𑀯𑀢𑀸 𑀅𑀲𑀼𑀓𑁂 𑀲𑀼𑀢𑁆𑀢𑁂 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀲𑀸𑀧𑀤𑁂𑀲𑀁 𑀓𑀸𑀭𑀡𑀲𑀳𑀺𑀢𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀺.

𑀧𑀭𑀺𑀬𑀦𑁆𑀢𑀭𑀳𑀺𑀢𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀁, 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀅𑀦𑀼𑀬𑁄𑀕𑀁 𑀉𑀧𑀫𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀬𑀁 𑀲𑀼𑀢𑁆𑀢𑀁 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀺𑀧𑀺𑀢𑀁, 𑀢𑀲𑁆𑀲 𑀲𑀭𑀻𑀭𑀪𑀽𑀢𑀁 𑀓𑀣𑀁 𑀅𑀦𑀸𑀫𑀲𑀺𑀢𑁆𑀯𑀸 𑀩𑀸𑀳𑀺𑀭𑀓𑀣𑀁𑀬𑁂𑀯 𑀓𑀣𑁂𑀢𑀺, 𑀦𑀺𑀓𑁆𑀔𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, ‘‘𑀲𑀼𑀢𑁆𑀢𑀁 𑀦𑀼 𑀔𑁄 𑀓𑀣𑁂𑀢𑀺 𑀚𑀸𑀢𑀓𑀁 𑀦𑀼 𑀔𑁄, 𑀦𑀸𑀲𑁆𑀲 𑀅𑀦𑁆𑀢𑀁 𑀯𑀸 𑀓𑁄𑀝𑀺𑀁 𑀯𑀸 𑀧𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀬𑀣𑀸 𑀯𑀝𑀭𑀼𑀓𑁆𑀔𑀲𑀸𑀔𑀸𑀦𑀁 𑀕𑀢𑀕𑀢𑀝𑁆𑀞𑀸𑀦𑁂 𑀧𑀸𑀭𑁄𑀳𑀸 𑀑𑀢𑀭𑀦𑁆𑀢𑀺, 𑀑𑀢𑀺𑀡𑁆𑀡𑁄-𑀢𑀺𑀡𑁆𑀡𑀝𑁆𑀞𑀸𑀦𑁂 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑀦𑁆𑀢𑀺𑀬𑁂𑀯, 𑀏𑀯𑀁 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀬𑁄𑀚𑀦𑀫𑁆𑀧𑀺 𑀕𑀘𑁆𑀙𑀢𑀺𑀬𑁂𑀯. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀧𑀦 𑀫𑀽𑀮𑀭𑀼𑀓𑁆𑀔𑁄 𑀯𑀺𑀦𑀲𑁆𑀲𑀢𑀺, 𑀅𑀦𑀼𑀚𑀸𑀢𑀧𑀸𑀭𑁄𑀳𑀫𑀽𑀮𑀸𑀦𑀺𑀬𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀦𑀺𑀕𑁆𑀭𑁄𑀥𑀥𑀫𑁆𑀫𑀓𑀣𑀺𑀓𑁄 𑀦𑀸𑀫 𑀳𑁄𑀢𑀺. 𑀦𑀺𑀓𑁆𑀔𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀫𑁂𑀯 𑀓𑀢𑁆𑀯𑀸 𑀧𑀲𑁆𑀲𑁂𑀦𑁂𑀯 𑀧𑀭𑀺𑀳𑀭𑀦𑁆𑀢𑁄 𑀕𑀘𑁆𑀙𑀢𑀺. 𑀬𑁄 𑀧𑀦 𑀩𑀳𑀼𑀫𑁆𑀧𑀺 𑀪𑀡𑀦𑁆𑀢𑁄 ‘‘𑀏𑀢𑀤𑀢𑁆𑀣𑀫𑀺𑀤𑀁 𑀯𑀼𑀢𑁆𑀢’’𑀦𑁆𑀢𑀺 𑀦𑀺𑀓𑁆𑀔𑀺𑀢𑁆𑀢𑀲𑀼𑀢𑁆𑀢𑀢𑁄 𑀅𑀜𑁆𑀜𑀫𑁆𑀧𑀺 𑀅𑀦𑀼𑀬𑁄𑀕𑀽𑀧𑀫𑀸𑀯𑀢𑁆𑀣𑀼𑀯𑀲𑁂𑀦 𑀢𑀤𑀼𑀧𑀬𑁄𑀕𑀻𑀦𑀁 𑀆𑀳𑀭𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀚𑀸𑀦𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀩𑀳𑀼𑀫𑁆𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀸𑀯𑀳𑀁.

𑀧𑀓𑀝𑁆𑀞𑀸𑀦𑀁 𑀉𑀓𑁆𑀓𑀝𑁆𑀞𑀸𑀦𑀁 𑀲𑀻𑀮𑀸𑀤𑀺𑀅𑀢𑁆𑀣𑀸𑀦𑀁 𑀩𑁄𑀥𑀦𑀢𑁄 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀘 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀲𑀺𑀢𑀢𑁆𑀢𑀸 𑀧𑀓𑀝𑁆𑀞𑀸𑀦𑀁 𑀯𑀘𑀦𑀧𑁆𑀧𑀩𑀦𑁆𑀥𑀸𑀦𑀁 𑀆𑀴𑀻𑀢𑀺 𑀧𑀸𑀴𑀺, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀅𑀦𑀼𑀲𑀦𑁆𑀥𑀸𑀦𑀁 𑀅𑀦𑀼𑀲𑀦𑁆𑀥𑀺, 𑀅𑀢𑁆𑀣𑀫𑀼𑀔𑁂𑀦 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑀸𑀦𑀫𑁆𑀧𑀺 𑀅𑀦𑀼𑀲𑀦𑁆𑀥𑀺 𑀳𑁄𑀢𑀺𑀬𑁂𑀯. 𑀲𑁆𑀯𑀸𑀬𑀁 𑀅𑀦𑀼𑀲𑀦𑁆𑀥𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀬𑀣𑀸𑀦𑀼𑀲𑀦𑁆𑀥𑀺𑀆𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀢𑀁𑀢𑀁𑀤𑁂𑀲𑀦𑀸𑀦𑀁 𑀧𑀦 𑀧𑀼𑀩𑁆𑀩𑀸𑀧𑀭𑀧𑀸𑀴𑀺𑀯𑀲𑁂𑀦 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀩𑁆𑀬𑀜𑁆𑀚𑀦𑀲𑁄 𑀅𑀢𑁆𑀣𑀲𑁄 𑀘 𑀉𑀤𑁆𑀥𑀁 𑀉𑀤𑁆𑀥𑀁 𑀕𑀳𑀺𑀢𑀁, 𑀧𑀭𑀺𑀬𑀸𑀧𑀼𑀡𑀦𑀯𑀲𑁂𑀦 𑀘𑁂𑀯 𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀘 𑀳𑀤𑀬𑁂𑀦 𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀲𑁄𑀢𑀩𑁆𑀩𑀢𑁄 𑀲𑀼𑀢𑀁, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀢𑀁 𑀥𑀸𑀭𑁂𑀢𑀻𑀢𑀺 𑀲𑀼𑀢𑀥𑀭𑁄. 𑀬𑁄 𑀳𑀺 𑀲𑀼𑀢𑀥𑀭𑁄, 𑀲𑀼𑀢𑀁 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀅𑀭𑁄𑀕𑀺𑀓𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀢𑀲𑁆𑀲 𑀆𑀥𑀸𑀭𑀪𑀽𑀢𑁄’’𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀏𑀓𑀁 𑀧𑀤𑀁 𑀏𑀓𑀓𑁆𑀔𑀭𑀫𑁆𑀧𑀺 𑀅𑀯𑀺𑀦𑀝𑁆𑀞𑀁 𑀳𑀼𑀢𑁆𑀯𑀸 𑀲𑀦𑁆𑀦𑀺𑀘𑀻𑀬𑀢𑀻𑀢𑀺 𑀲𑀦𑁆𑀦𑀺𑀘𑀬𑁄, 𑀲𑀼𑀢𑀁 𑀲𑀦𑁆𑀦𑀺𑀘𑀬𑁄 𑀏𑀢𑀲𑁆𑀫𑀺𑀦𑁆𑀢𑀺 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀅𑀚𑁆𑀛𑁄𑀲𑀸𑀬𑀸𑀢𑀺 𑀅𑀦𑀼𑀧𑁆𑀧𑀯𑀺𑀲𑀺𑀢𑁆𑀯𑀸. 𑀢𑀺𑀝𑁆𑀞𑀢𑀻𑀢𑀺 𑀦 𑀲𑀫𑁆𑀫𑀼𑀲𑁆𑀲𑀢𑀺.

𑀧𑀕𑀼𑀡𑀸𑀢𑀺 𑀯𑀸𑀘𑀼𑀕𑁆𑀕𑀢𑀸. 𑀦𑀺𑀘𑁆𑀘𑀮𑀺𑀓𑀦𑁆𑀢𑀺 𑀅𑀯𑀺𑀧𑀭𑀺𑀯𑀢𑁆𑀢𑀁. 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀅𑀜𑁆𑀜𑁂𑀳𑀺 𑀲𑀁𑀲𑀦𑁆𑀤𑀺𑀢𑁆𑀯𑀸. 𑀲𑀫𑀦𑀼𑀕𑁆𑀕𑀸𑀳𑀺𑀢𑁆𑀯𑀸𑀢𑀺 𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀅𑀢𑁆𑀣𑀁 𑀑𑀕𑀸𑀳𑀺𑀢𑁆𑀯𑀸. 𑀧𑀩𑀦𑁆𑀥𑀲𑁆𑀲 𑀯𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀕𑀗𑁆𑀕𑀸𑀲𑁄𑀢𑀲𑀤𑀺𑀲𑀁. ‘‘𑀪𑀯𑀗𑁆𑀕𑀲𑁄𑀢𑀲𑀤𑀺𑀲’’𑀦𑁆𑀢𑀺 𑀯𑀸 𑀧𑀸𑀞𑁄, 𑀅𑀓𑀺𑀢𑁆𑀢𑀺𑀫𑀁 𑀲𑀼𑀔𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂𑀓𑀤𑁂𑀲𑀲𑁆𑀲 𑀲𑀼𑀢𑁆𑀢𑀫𑀢𑁆𑀢𑀲𑁆𑀲 𑀘 𑀯𑀘𑀲𑀸 𑀧𑀭𑀺𑀘𑀬𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀯𑀕𑁆𑀕𑀸𑀤𑀺𑀯𑀲𑁂𑀦 𑀧𑀦 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀼𑀢𑁆𑀢𑀤𑀲𑀓…𑀧𑁂… 𑀲𑀚𑁆𑀛𑀸𑀬𑀺𑀢𑀸’’𑀢𑀺, ‘‘𑀤𑀲𑀲𑀼𑀢𑁆𑀢𑀸𑀦𑀺 𑀕𑀢𑀸𑀦𑀺, 𑀤𑀲𑀯𑀕𑁆𑀕𑀸𑀦𑀺 𑀕𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀦𑀲𑀸 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀺𑀢𑀸 𑀪𑀸𑀕𑀲𑁄 𑀦𑀺𑀚𑁆𑀛𑀸𑀬𑀺𑀢𑀸 𑀘𑀺𑀦𑁆𑀢𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸. 𑀭𑀽𑀧𑀕𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀻𑀢𑀺 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀲𑁆𑀲 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀲𑀼𑀝𑁆𑀞𑀼 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀤𑁆𑀥𑀸.

𑀅𑀥𑀺𑀓𑀁 𑀘𑁂𑀢𑁄𑀢𑀺 𑀅𑀪𑀺𑀘𑁂𑀢𑁄, 𑀉𑀧𑀘𑀸𑀭𑀚𑁆𑀛𑀸𑀦𑀘𑀺𑀢𑁆𑀢𑀁. 𑀢𑀲𑁆𑀲 𑀧𑀦 𑀅𑀥𑀺𑀓𑀢𑀸 𑀧𑀸𑀓𑀢𑀺𑀓𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀼𑀦𑁆𑀤𑀭𑀢𑀸𑀬, 𑀲𑀸 𑀧𑀝𑀺𑀧𑀓𑁆𑀔𑀢𑁄 𑀲𑀼𑀤𑁆𑀥𑀺𑀬𑀸𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢’’𑀦𑁆𑀢𑀺. 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺𑀫𑀸𑀳. 𑀲𑁄𑀧𑀺 𑀉𑀧𑀘𑀸𑀭𑀲𑀫𑀸𑀥𑀺 𑀤𑀝𑁆𑀞𑀩𑁆𑀩𑁄. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁, 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁, 𑀅𑀧𑀻𑀢𑀺𑀚𑀁 𑀓𑀸𑀬𑀲𑀼𑀔𑀁, 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚𑀁 𑀜𑀸𑀡𑀲𑀼𑀔𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀛𑀸𑀦𑀲𑀼𑀔𑀁 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑀁 𑀉𑀧𑀸𑀤𑀸𑀬 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀢𑀻’’𑀢𑀺. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀇𑀫𑀺𑀦𑀸 𑀢𑁂𑀲𑀼 𑀛𑀸𑀦𑁂𑀲𑀼 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀫𑀸𑀳. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀧𑀦 𑀯𑀘𑀦𑀢𑁄 𑀆𑀯𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀬𑁄𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑁂𑀦𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀏𑀢𑁂𑀦 𑀢𑁂𑀲𑀁 𑀛𑀸𑀦𑀸𑀦𑀁 𑀲𑀼𑀔𑀧𑁆𑀧𑀝𑀺𑀧𑀤𑀢𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀜𑁆𑀘 𑀤𑀲𑁆𑀲𑁂𑀢𑀺.

𑀯𑀺𑀧𑀼𑀮𑀸𑀦𑀦𑁆𑀢𑀺 𑀯𑁂𑀧𑀼𑀮𑁆𑀮𑀁 𑀧𑀸𑀧𑀺𑀢𑀸𑀦𑀁 𑀛𑀸𑀦𑀸𑀦𑀁. 𑀯𑀺𑀧𑀼𑀮𑀢𑀸 𑀦𑀸𑀫 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀬𑀸, 𑀲𑀸 𑀘 𑀧𑀭𑀺𑀘𑁆𑀙𑁂𑀤𑀸𑀦𑀼𑀭𑀽𑀧𑀸𑀯 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 ‘‘𑀯𑀺𑀧𑀼𑀮𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀧𑀭𑀺𑀘𑁆𑀙𑁂𑀤𑀓𑀸𑀮𑀜𑁆𑀳𑀺 𑀅𑀧𑁆𑀧𑀢𑁆𑀯𑀸𑀯 𑀯𑀼𑀝𑁆𑀞𑀳𑀦𑁆𑀢𑁄 𑀅𑀓𑀲𑀺𑀭𑀮𑀸𑀪𑀻 𑀦 𑀳𑁄𑀢𑀺 𑀬𑀸𑀯𑀤𑀺𑀘𑁆𑀙𑀺𑀢𑀁 𑀧𑀯𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂 𑀲𑀫𑀸𑀧𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑁂 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀮𑀸𑀪𑀻𑀬𑁂𑀯 𑀳𑁄𑀢𑀻𑀢𑀺 𑀇𑀤𑀁 𑀧𑀝𑀺𑀮𑀤𑁆𑀥𑀫𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂. 𑀧𑀸𑀭𑀺𑀧𑀦𑁆𑀣𑀺𑀓𑁂𑀢𑀺 𑀯𑀲𑀻𑀪𑀸𑀯𑀲𑁆𑀲 𑀧𑀘𑁆𑀘𑀦𑀻𑀓𑀥𑀫𑁆𑀫𑁂. 𑀛𑀸𑀦𑀸𑀥𑀺𑀕𑀫𑀲𑁆𑀲 𑀧𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑀸 𑀧𑀕𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀅𑀜𑁆𑀜𑀣𑀸 𑀛𑀸𑀦𑀸𑀥𑀺𑀕𑀫𑁄 𑀏𑀯 𑀦 𑀲𑀺𑀬𑀸. 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀓𑀺𑀘𑁆𑀙𑁂𑀦 𑀯𑀺𑀲𑁄𑀥𑁂𑀢𑀺. 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀯𑀺𑀬 𑀅𑀜𑁆𑀜𑁂𑀲𑀫𑁆𑀧𑀺 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀸𑀦𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀡𑀁 𑀇𑀥 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀲𑁄𑀥𑀦𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀴𑀺𑀓𑀬𑀦𑁆𑀢𑀦𑁆𑀢𑀺 𑀓𑀸𑀮𑀫𑀸𑀦𑀦𑀸𑀴𑀺𑀓𑀬𑀦𑁆𑀢𑀫𑀸𑀳.

𑀅𑀝𑁆𑀞𑀧𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀦 𑀲𑀫𑁆𑀫𑀸𑀧𑀡𑀺𑀳𑀺𑀢𑀲𑀗𑁆𑀓𑀧𑁆𑀧𑁄. 𑀅𑀪𑀺𑀜𑁆𑀜𑀸𑀧𑀸𑀭𑀕𑀽𑀢𑀺 𑀲𑀩𑁆𑀩𑁂𑀲𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀸𑀭𑀁 𑀕𑀢𑁄, 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀜𑁆𑀜𑀸𑀧𑀸𑀭𑀕𑀽𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀬 𑀧𑀸𑀭𑀁 𑀕𑀢𑁄, 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀧𑀸𑀭𑀕𑀽𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀪𑀸𑀯𑀦𑀸𑀬 𑀧𑀸𑀭𑀁 𑀕𑀢𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀪𑀸𑀯𑁂𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀳𑀸𑀦𑀧𑀸𑀭𑀕𑀽𑀢𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑁂𑀦 𑀧𑀸𑀭𑀁 𑀕𑀢𑁄, 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽𑀢𑀺 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀸𑀭𑀁 𑀕𑀢𑁄, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀧𑀚𑁆𑀚𑀦𑁂𑀦 𑀧𑀸𑀭𑀁 𑀕𑀢𑁄, 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻𑀢𑀺 𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀁 𑀲𑀓𑀮𑀪𑀸𑀯𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀓𑀮𑀘𑀢𑀼𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀓𑀮𑀩𑁆𑀭𑀳𑁆𑀫𑀘𑀭𑀺𑀬𑁄’’𑀢𑀺, 𑀧𑀭𑀺𑀧𑀼𑀡𑁆𑀡𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀢𑀺𑀬𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀮𑁄𑀓𑁄𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀅𑀢𑁆𑀣𑀢𑁄 𑀧𑀼𑀭𑀺𑀫𑀲𑁆𑀫𑀺𑀁 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁, 𑀇𑀥 𑀧𑀦 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀮𑁄𑀓𑁄𑀢𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀯𑀺𑀲𑀁𑀲𑀝𑁆𑀞𑁄 𑀦 𑀧𑀝𑀺𑀩𑀤𑁆𑀥𑁄, 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀲𑀫𑁆𑀫𑀤𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀲𑀫𑀼𑀤𑀬𑁄𑀢𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀢𑀡𑁆𑀳𑀸, 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀅𑀪𑀺𑀲𑀗𑁆𑀔𑀸𑀭𑁂𑀳𑀺 𑀲𑀤𑁆𑀥𑀺𑀁 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁. 𑀮𑁄𑀓𑀦𑀺𑀭𑁄𑀥𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀘𑁆𑀙𑀺𑀓𑀢𑁄𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁄 𑀓𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁄 𑀳𑀺 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀅𑀥𑀺𑀕𑀘𑁆𑀙𑀢𑀺, 𑀢𑀤𑀢𑁆𑀣𑀁 𑀅𑀭𑀺𑀬𑁂𑀳𑀺 𑀧𑀝𑀺𑀧𑀚𑁆𑀚𑀻𑀬𑀢𑀺 𑀘𑀸𑀢𑀺 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀯𑀼𑀘𑁆𑀘𑀢𑀺.

𑀏𑀢𑁆𑀢𑀸𑀯𑀢𑀸 𑀢𑀣𑀸𑀦𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀬𑀸𑀣𑀸𑀯𑀢𑁄 𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀳𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀦𑀸𑀫. 𑀬𑀣𑀸𑀳 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦; 𑀧𑀝𑀺. 𑀫. 𑁨.𑁮) 𑀯𑀺𑀢𑁆𑀣𑀸𑀭𑁄.

𑀅𑀧𑀺𑀘 𑀢𑀣𑀸𑀬 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀕𑀢𑁄𑀢𑀺 𑀘 𑀅𑀯𑀕𑀢𑁄 𑀅𑀢𑀻𑀢𑁄 𑀧𑀢𑁆𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀪𑀕𑀯𑀸 𑀲𑀓𑀮𑀮𑁄𑀓𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀅𑀯𑀺𑀧𑀭𑀻𑀢𑀸𑀬 𑀕𑀢𑁄 𑀅𑀯𑀕𑀢𑁄, 𑀢𑀲𑁆𑀫𑀸 𑀮𑁄𑀓𑁄 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀕𑀢𑁄 𑀅𑀢𑀻𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀢𑀣𑀸𑀬 𑀕𑀢𑁄 𑀧𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀢𑀣𑀁 𑀅𑀯𑀺𑀧𑀭𑀻𑀢𑀁 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄𑀢𑀺. 𑀏𑀯𑀁 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀢𑀣𑀸𑀕𑀢𑀪𑀸𑀯𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀪𑀕𑀯𑀸 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀯𑀲𑁂𑀦 𑀅𑀢𑁆𑀢𑀦𑁄 𑀢𑀣𑀸𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀤𑀺𑀝𑁆𑀞𑀸𑀤𑀺𑀅𑀪𑀺𑀲𑀫𑁆𑀩𑁄𑀥𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀓𑀣𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀣𑀸𑀕𑀢𑀲𑀤𑁆𑀤𑀩𑀼𑀤𑁆𑀥𑀲𑀤𑁆𑀤𑀸𑀦𑀁 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀣𑀸 𑀘𑁂𑀯 𑀳𑀺 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺. 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁 𑀤𑀝𑁆𑀞𑀩𑁆𑀩𑀢𑁄. 𑀢𑁂𑀦 𑀬𑀁 𑀤𑀺𑀝𑁆𑀞𑀁 𑀬𑀁 𑀤𑀺𑀲𑁆𑀲𑀢𑀺, 𑀬𑀁 𑀤𑀓𑁆𑀔𑀢𑀺, 𑀬𑀁 𑀲𑀫𑀯𑀸𑀬𑁂 𑀧𑀲𑁆𑀲𑁂𑀬𑁆𑀬, 𑀢𑀁 𑀲𑀩𑁆𑀩𑀁 𑀤𑀺𑀝𑁆𑀞𑀦𑁆𑀢𑁂𑀯 𑀕𑀳𑀺𑀢𑀁 𑀓𑀸𑀮𑀯𑀺𑀲𑁂𑀲𑀲𑁆𑀲 𑀅𑀦𑀸𑀫𑀝𑁆𑀞𑀪𑀸𑀯𑀢𑁄 𑀬𑀣𑀸 ‘‘𑀤𑀼𑀤𑁆𑀥’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀩𑁆𑀩𑀢𑁄. 𑀫𑀼𑀢𑀦𑁆𑀢𑀺 𑀲𑀦𑀺𑀲𑁆𑀲𑀬𑁂 𑀇𑀦𑁆𑀤𑁆𑀭𑀺𑀬𑁂 𑀦𑀺𑀲𑁆𑀲𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄’’𑀢𑀺. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑀁. 𑀢𑀁 𑀧𑀦 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀲𑀼𑀔𑀤𑀼𑀓𑁆𑀔𑀸𑀤𑀺 𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺. 𑀧𑀢𑁆𑀢𑀦𑁆𑀢𑀺 𑀬𑀣𑀸 𑀢𑀣𑀸 𑀧𑀢𑁆𑀯𑀸 𑀳𑀢𑁆𑀣𑀕𑀢𑀁, 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸’’𑀢𑀺. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀺𑀬𑀸 𑀅𑀢𑁆𑀣𑀁 𑀧𑀭𑀺𑀬𑀺𑀝𑁆𑀞𑀁. 𑀢𑀁 𑀧𑀦 𑀧𑀢𑁆𑀢𑀁 𑀯𑀸 𑀲𑀺𑀬𑀸 𑀅𑀧𑁆𑀧𑀢𑁆𑀢𑀁 𑀯𑀸, 𑀉𑀪𑀬𑀣𑀸𑀧𑀺 𑀧𑀭𑀺𑀬𑁂𑀲𑀺𑀢𑀫𑁂𑀯𑀸𑀢𑀺 𑀆𑀳 ‘‘𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸’’𑀢𑀺. 𑀤𑁆𑀯𑀬𑁂𑀦𑀧𑀺 𑀤𑁆𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀧𑀢𑁆𑀢𑀁 𑀤𑁆𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀧𑀭𑀺𑀬𑁂𑀲𑀺𑀢𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀦𑁆𑀢𑀺 𑀢𑁂 𑀧𑀦 𑀅𑀧𑀸𑀧𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀦𑀼 𑀅𑀦𑀼 𑀲𑀜𑁆𑀘𑀭𑀺𑀢𑀁, 𑀯𑀺𑀧𑀭𑀺𑀢𑀓𑁆𑀓𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀻𑀢𑀓𑀦𑁆𑀢𑀺𑀆𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀮𑁄𑀳𑀺𑀢𑀑𑀤𑀸𑀢𑀸𑀤𑀺𑀲𑀩𑁆𑀩𑀁 𑀭𑀽𑀧𑀸𑀭𑀫𑁆𑀫𑀡𑀪𑀸𑀕𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀫𑀦𑁄𑀢𑀺 𑀭𑀸𑀕𑀯𑀲𑁂𑀦 𑀮𑁄𑀪𑀯𑀲𑁂𑀦 𑀲𑀤𑁆𑀥𑀸𑀤𑀺𑀯𑀲𑁂𑀦 𑀯𑀸 𑀲𑀼𑀫𑀦𑁄. 𑀤𑀼𑀫𑁆𑀫𑀦𑁄𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀲𑁂𑀦 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀲𑁂𑀦 𑀯𑀸 𑀤𑀼𑀫𑁆𑀫𑀦𑁄. 𑀫𑀚𑁆𑀛𑀢𑁆𑀢𑁄𑀢𑀺 𑀅𑀜𑁆𑀜𑀸𑀡𑀯𑀲𑁂𑀦, 𑀜𑀸𑀡𑀯𑀲𑁂𑀦 𑀯𑀸 𑀫𑀚𑁆𑀛𑀢𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁄, 𑀧𑀡𑀯𑀲𑀤𑁆𑀤𑁄, 𑀧𑀢𑁆𑀢𑀕𑀦𑁆𑀥𑁄, 𑀧𑀼𑀧𑁆𑀨𑀕𑀦𑁆𑀥𑁄, 𑀧𑀼𑀧𑁆𑀨𑀭𑀲𑁄, 𑀨𑀮𑀭𑀲𑁄, 𑀉𑀧𑀸𑀤𑀺𑀦𑁆𑀦𑀁, 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀓𑀼𑀲𑀮𑀓𑀫𑁆𑀫𑀁 𑀅𑀓𑀼𑀲𑀮𑀓𑀫𑁆𑀫𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀧𑁆𑀧𑀢𑁆𑀢𑀦𑁆𑀢𑀺 𑀜𑀸𑀡𑁂𑀦 𑀅𑀲𑀫𑁆𑀧𑀢𑁆𑀢𑀁, 𑀅𑀯𑀺𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢’’𑀦𑁆𑀢𑀺. 𑀮𑁄𑀓𑁂𑀦 𑀕𑀢𑀦𑁆𑀢𑀺 𑀮𑁄𑀓𑁂𑀦 𑀜𑀸𑀢𑀁. 𑀢𑀣𑁂𑀯 𑀕𑀢𑀢𑁆𑀢𑀸𑀢𑀺 𑀢𑀣𑁂𑀯 𑀜𑀸𑀢𑀢𑁆𑀢𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸, 𑀕𑀢𑀲𑀤𑁆𑀤𑁂𑀦 𑀏𑀓𑀢𑁆𑀢𑀁 𑀩𑀼𑀤𑁆𑀥𑀺𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀕𑀢𑀺𑀅𑀢𑁆𑀣𑁄 𑀳𑀺 𑀥𑀸𑀢𑀯𑁄 𑀩𑀼𑀤𑁆𑀥𑀺𑀅𑀢𑁆𑀣𑀸 𑀪𑀯𑀦𑁆𑀢𑀻𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸.

𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀬𑀲𑁆𑀲𑀜𑁆𑀘 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀁 𑀢𑀣𑀸𑀆𑀕𑀢𑀢𑁆𑀢𑀸𑀤𑀺𑀅𑀢𑁆𑀣𑁂𑀦 𑀢𑀣𑀸𑀕𑀢𑁄 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀥𑀺𑀕𑀘𑁆𑀙𑀢𑀺. 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀬𑀲𑁆𑀲𑀜𑁆𑀘 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀁𑀬𑁂𑀯 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀽𑀦𑀁 𑀫𑀚𑁆𑀛𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑁂 𑀧𑀞𑀫𑀩𑁄𑀥𑀺𑀬𑀫𑁆𑀧𑀺 𑀫𑀚𑁆𑀛𑀺𑀫𑀩𑁄𑀥𑀺𑀬𑀫𑁆𑀧𑀺 𑀧𑀘𑁆𑀙𑀺𑀫𑀩𑁄𑀥𑀺𑀬𑀫𑁆𑀧𑀺 𑀬𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀧𑁆𑀧𑀪𑁂𑀤𑀁 𑀥𑀫𑁆𑀫𑀁 𑀪𑀸𑀲𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀮𑀧𑀢𑀺 𑀉𑀤𑁆𑀤𑀺𑀲𑀦𑀯𑀲𑁂𑀦, 𑀦𑀺𑀤𑁆𑀤𑀺𑀲𑀢𑀺 𑀧𑀭𑀺𑀦𑀺𑀤𑁆𑀤𑀺𑀲𑀦𑀯𑀲𑁂𑀦. 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀻𑀢𑀺 𑀢𑀁 𑀏𑀢𑁆𑀣𑀦𑁆𑀢𑀭𑁂 𑀤𑁂𑀲𑀺𑀢𑀁 𑀲𑀩𑁆𑀩𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀭𑀸𑀕𑀫𑀤𑀦𑀺𑀫𑁆𑀫𑀤𑀦𑀁 𑀤𑁄𑀲𑀫𑀤𑀦𑀺𑀫𑁆𑀫𑀤𑀦𑀁 𑀫𑁄𑀳𑀫𑀤𑀦𑀺𑀫𑁆𑀫𑀤𑀦𑀁, 𑀦𑀢𑁆𑀣𑀺 𑀢𑀢𑁆𑀣 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁, 𑀏𑀓𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑀁 𑀯𑀺𑀬 𑀏𑀓𑀸𑀬 𑀦𑀸𑀴𑀺𑀬𑀸 𑀫𑀺𑀢𑀁 𑀯𑀺𑀬 𑀏𑀓𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀘 𑀢𑀁 𑀢𑀣𑁂𑀯 𑀳𑁄𑀢𑀺 𑀬𑀲𑁆𑀲𑀢𑁆𑀣𑀸𑀬 𑀪𑀸𑀲𑀺𑀢𑀁, 𑀏𑀓𑀦𑁆𑀢𑁂𑀦𑁂𑀯 𑀢𑀲𑁆𑀲 𑀲𑀸𑀥𑀦𑀢𑁄, 𑀦𑁄 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀢𑀣𑀁 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁. 𑀏𑀢𑁂𑀦 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀤𑀅𑀢𑁆𑀣𑁄 𑀅𑀬𑀁 𑀕𑀢𑀲𑀤𑁆𑀤𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸, 𑀢𑀲𑁆𑀫𑀸 𑀢𑀣𑀁 𑀕𑀤𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀆𑀕𑀤𑀦𑀁 𑀆𑀕𑀤𑁄, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄 𑀅𑀲𑁆𑀲𑀸𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸𑀯𑀸𑀤𑀻𑀢𑀺 𑀬𑁂 𑀥𑀫𑁆𑀫𑁂 𑀪𑀕𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀲𑀸𑀯𑀚𑁆𑀚𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑀤𑀢𑀺, 𑀢𑁂 𑀥𑀫𑁆𑀫𑁂 𑀏𑀓𑀦𑁆𑀢𑁂𑀦𑁂𑀯 𑀲𑀬𑀁 𑀧𑀳𑀸𑀲𑀺. 𑀬𑁂 𑀧𑀦 𑀥𑀫𑁆𑀫𑁂 𑀪𑀕𑀯𑀸 𑁋 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀅𑀦𑀯𑀚𑁆𑀚𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀤𑀢𑀺, 𑀢𑁂 𑀥𑀫𑁆𑀫𑁂 𑀏𑀓𑀦𑁆𑀢𑁂𑀦𑁂𑀯 𑀲𑀬𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀸𑀤𑀻 𑀪𑀕𑀯𑀸 𑀢𑀣𑀸𑀓𑀸𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀲𑀫𑁆𑀫𑀤𑁂𑀯 𑀲𑀻𑀮𑀸𑀤𑀺𑀧𑀭𑀺𑀧𑀽𑀭𑀡𑀯𑀲𑁂𑀦 𑀲𑀫𑁆𑀫𑀸𑀧𑀝𑀺𑀧𑀤𑀸𑀬𑀁 𑀬𑀣𑀸𑀓𑀸𑀭𑀻 𑀪𑀕𑀯𑀸, 𑀢𑀣𑁂𑀯 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑁂𑀲𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀢𑀣𑀸𑀯𑀸𑀤𑀻. 𑀪𑀕𑀯𑀢𑁄 𑀳𑀺 𑀯𑀸𑀘𑀸𑀬 𑀓𑀸𑀬𑁄 𑀅𑀦𑀼𑀮𑁄𑀫𑁂𑀢𑀺, 𑀓𑀸𑀬𑀲𑁆𑀲𑀧𑀺 𑀯𑀸𑀘𑀸, 𑀢𑀲𑁆𑀫𑀸 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀘 𑀳𑁄𑀢𑀺. 𑀏𑀯𑀁𑀪𑀽𑀢𑀲𑁆𑀲 𑀘 𑀬𑀣𑀸 𑀯𑀸𑀘𑀸, 𑀓𑀸𑀬𑁄𑀧𑀺 𑀢𑀣𑀸 𑀕𑀢𑁄 𑀧𑀯𑀢𑁆𑀢𑁄. 𑀬𑀣𑀸 𑀘 𑀓𑀸𑀬𑁄, 𑀯𑀸𑀘𑀸𑀧𑀺 𑀢𑀣𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄𑀢𑀺 𑀉𑀧𑀭𑀺 𑀪𑀯𑀕𑁆𑀕𑀁, 𑀳𑁂𑀝𑁆𑀞𑀸 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀲𑀻𑀮𑁂𑀦𑀧𑀺 𑀲𑀫𑀸𑀥𑀺𑀦𑀸𑀧𑀺 𑀧𑀜𑁆𑀜𑀸𑀬𑀧𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺, 𑀦 𑀢𑀲𑁆𑀲 𑀢𑀼𑀮𑀸 𑀯𑀸 𑀧𑀫𑀸𑀡𑀁 𑀯𑀸 𑀅𑀢𑁆𑀣𑀺. 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀅𑀢𑀼𑀮𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄 𑀥𑀫𑁆𑀫𑀭𑀸𑀚𑀸 𑀤𑁂𑀯𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸, 𑀢𑀢𑁄 𑀏𑀯 𑀅𑀬𑀁 𑀦 𑀓𑁂𑀦𑀘𑀺 𑀅𑀪𑀺𑀪𑀽𑀢𑁄. 𑀤𑀓𑁆𑀔𑀢𑀻𑀢𑀺 𑀲𑀩𑁆𑀩𑀁 𑀧𑀲𑁆𑀲𑀢𑀺. 𑀯𑀺𑀲𑁂𑀲𑀯𑀘𑀦𑀺𑀘𑁆𑀙𑀸𑀬𑀧𑀺 𑀅𑀪𑀸𑀯𑀢𑁄 𑀅𑀦𑀯𑀲𑁂𑀲𑀯𑀺𑀲𑀬𑁄 𑀤𑀲𑀲𑀤𑁆𑀤𑁄. 𑀢𑁂𑀦 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫, 𑀲𑀩𑁆𑀩𑀁 𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀯𑀺𑀧𑀭𑀻𑀢𑀁 𑀆𑀲𑀬𑀸𑀤𑀺𑀅𑀯𑀩𑁄𑀥𑁂𑀦 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀦𑀸 𑀘 𑀲𑀢𑁆𑀢𑁂, 𑀪𑀸𑀯𑀜𑁆𑀜𑀢𑁆𑀣𑀢𑁆𑀢𑀽𑀧𑀦𑀬𑀯𑀲𑁂𑀦 𑀲𑀗𑁆𑀔𑀸𑀭𑁂, 𑀲𑀩𑁆𑀩𑀸𑀓𑀸𑀭𑁂𑀦 𑀲𑀼𑀘𑀺𑀡𑁆𑀡𑀯𑀲𑀺𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑁄, 𑀘𑀺𑀢𑁆𑀢𑀜𑁆𑀘 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀘𑀢𑀼𑀦𑁆𑀦𑀁 𑀬𑁄𑀕𑀸𑀦𑀁 𑀧𑀳𑀸𑀦𑁂𑀦 𑀯𑀺𑀲𑀁𑀬𑀼𑀢𑁆𑀢𑁄’’𑀢𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑁂𑀳𑀺 𑀯𑀺𑀭𑀳𑀺𑀢𑁄𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀮𑁄𑀓𑁂 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀳𑀺 𑀉𑀧𑀬𑁂𑀳𑀺 𑀯𑀺𑀭𑀳𑀺𑀢𑁄.

𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄𑀢𑀺 𑀢𑀩𑁆𑀩𑀺𑀲𑀬𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀅𑀪𑀺𑀪𑀼𑀬𑁆𑀬 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀘𑀢𑁆𑀢𑀸𑀭𑁄𑀧𑀺 𑀕𑀦𑁆𑀣𑁂 𑀫𑁄𑀘𑁂𑀢𑁆𑀯𑀸 𑀞𑀺𑀢𑁄𑀢𑀺 𑀲𑀩𑁆𑀩𑁂 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀺𑀓𑁂 𑀲𑀓𑀲𑀦𑁆𑀢𑀸𑀦𑀢𑁄 𑀫𑁄𑀘𑁂𑀢𑁆𑀯𑀸 𑀞𑀺𑀢𑁄. 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀢𑁂𑀲𑀁 𑀧𑀫𑁄𑀘𑀦𑁄𑀢𑀺 𑀲𑀩𑁆𑀩𑀕𑀦𑁆𑀣𑀧𑁆𑀧𑀫𑁄𑀘𑀦𑁄. 𑀨𑀼𑀝𑁆𑀞𑀲𑁆𑀲 𑀧𑀭𑀫𑀸 𑀲𑀦𑁆𑀢𑀻𑀢𑀺 𑀅𑀲𑁆𑀲 𑀅𑀦𑁂𑀦 𑀔𑀻𑀡𑀸𑀲𑀯𑁂𑀦 𑀩𑀼𑀤𑁆𑀥𑁂𑀦 𑀧𑀭𑀫𑀸 𑀲𑀦𑁆𑀢𑀺 𑀜𑀸𑀡𑀨𑀼𑀲𑀦𑁂𑀦 𑀨𑀼𑀝𑁆𑀞𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀨𑀼𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺. 𑀦𑀺𑀩𑁆𑀩𑀸𑀦𑁂 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀻𑀢𑀺 𑀓𑀼𑀢𑁄𑀘𑀺 𑀪𑀬𑀓𑀸𑀭𑀡𑀢𑁄 𑀦𑀺𑀩𑁆𑀩𑀸𑀦𑁂 𑀪𑀬𑀁 𑀦𑀢𑁆𑀣𑀺 𑀅𑀲𑀗𑁆𑀔𑀢𑀪𑀸𑀯𑁂𑀦 𑀲𑀩𑁆𑀩𑀲𑁄 𑀔𑁂𑀫𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀔𑁂𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀔𑁂𑀫𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁩𑁭𑁯-𑁪𑁦𑁮). 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀲𑁆𑀲 𑀯𑀸 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀓𑀼𑀢𑁄𑀘𑀺 𑀪𑀬𑀁 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂𑀢𑀺 𑀅𑀓𑀼𑀢𑁄𑀪𑀬𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀺𑀩𑁆𑀩𑀘𑀦𑀜𑁆𑀘 𑀤𑀝𑁆𑀞𑀩𑁆𑀩𑀁.

𑀅𑀦𑀻𑀖𑁄 𑀦𑀺𑀤𑁆𑀤𑀼𑀓𑁆𑀔𑁄. 𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 𑀲𑀩𑁆𑀩𑁂𑀲𑀁 𑀓𑀫𑁆𑀫𑀸𑀦𑀁 𑀔𑀬𑀁 𑀧𑀭𑀺𑀬𑁄𑀲𑀸𑀦𑀁 𑀅𑀘𑁆𑀘𑀦𑁆𑀢𑀪𑀸𑀯𑀁 𑀧𑀢𑁆𑀢𑁄. 𑀉𑀧𑀥𑀻 𑀲𑀫𑁆𑀫𑀤𑁂𑀯 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑀥𑀺𑀲𑀗𑁆𑀔𑀬𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 ‘‘𑀉𑀧𑀥𑀺𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂’’𑀢𑀺. 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀧𑀯𑀢𑁆𑀢𑀬𑀻𑀢𑀺 𑀢𑁂𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀫𑀳𑀦𑁆𑀢𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑀁. 𑀯𑀻𑀢𑀲𑀸𑀭𑀤𑀦𑁆𑀢𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀬𑁄𑀕𑁂𑀦 𑀯𑀻𑀢𑀲𑀸𑀭𑀤𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀩𑀸𑀴𑁆𑀳𑀁 𑀔𑁄 𑀦𑁂 𑀧𑀲𑀁𑀲𑀲𑀻𑀢𑀺 𑀦𑁂 𑀲𑀫𑀡𑁂 𑀩𑀸𑀴𑁆𑀳𑀁 𑀓𑀢𑁆𑀯𑀸 𑀧𑀲𑀁𑀲𑀲𑀺 𑀯𑀡𑁆𑀡𑀬𑀲𑀺. 𑀓𑀻𑀤𑀺𑀲𑀁 𑀲𑀻𑀮𑀁 𑀏𑀢𑁂𑀲𑀦𑁆𑀢𑀺 𑀓𑀺𑀁𑀲𑀻𑀮𑀸. 𑀓𑁄 𑀲𑀫𑀸𑀘𑀸𑀭𑁄 𑀏𑀢𑁂𑀲𑀦𑁆𑀢𑀺 𑀓𑀺𑀁𑀲𑀫𑀸𑀘𑀸𑀭𑀸. 𑀕𑀼𑀡𑀫𑀕𑁆𑀕𑀲𑀡𑁆𑀞𑀺𑀢𑀸𑀢𑀺 𑀕𑀼𑀡𑀕𑁆𑀕𑀲𑀡𑁆𑀞𑀺𑀢𑀸. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀕𑁆𑀕𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀲𑀦𑁆𑀢𑀫𑀸𑀦𑀲𑀸, ‘‘𑀲𑀦𑁆𑀢𑀁 𑀢𑁂𑀲𑀁 𑀕𑀢𑀁 𑀞𑀺𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀏𑀓𑀓𑀺𑀬𑀸𑀢𑀺 𑀏𑀓𑀓𑀸, 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀅𑀤𑀼𑀢𑀺𑀬𑀸’’𑀢𑀺. 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫𑀸𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑁋

‘‘𑀓𑀸𑀬𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀯𑀸𑀘𑀸𑀓𑀫𑁆𑀫𑀁 𑀅𑀦𑀸𑀯𑀺𑀮𑀁;

𑀫𑀦𑁄𑀓𑀫𑁆𑀫𑀁 𑀲𑀼𑀯𑀺𑀲𑀼𑀤𑁆𑀥𑀁, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀯𑀺𑀫𑀮𑀸 𑀲𑀗𑁆𑀔𑀫𑀼𑀢𑁆𑀢𑀸𑀪𑀸, 𑀲𑀼𑀤𑁆𑀥𑀸 𑀅𑀦𑁆𑀢𑀭𑀩𑀸𑀳𑀺𑀭𑀸;

𑀧𑀼𑀡𑁆𑀡𑀸 𑀲𑀼𑀤𑁆𑀥𑁂𑀳𑀺 𑀥𑀫𑁆𑀫𑁂𑀳𑀺, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀮𑀸𑀪𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀅𑀮𑀸𑀪𑁂𑀦 𑀘 𑀑𑀦𑀢𑁄;

𑀮𑀸𑀪𑀸𑀮𑀸𑀪𑁂𑀦 𑀏𑀓𑀝𑁆𑀞𑀸, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀬𑀲𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀅𑀬𑀲𑁂𑀦 𑀘 𑀑𑀦𑀢𑁄;

𑀬𑀲𑀸𑀬𑀲𑁂𑀦 𑀏𑀓𑀝𑁆𑀞𑀸, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀧𑀲𑀁𑀲𑀸𑀬𑀼𑀦𑁆𑀦𑀢𑁄 𑀮𑁄𑀓𑁄, 𑀦𑀺𑀦𑁆𑀤𑀸𑀬𑀧𑀺 𑀘 𑀑𑀦𑀢𑁄;

𑀲𑀫𑀸 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀲𑀼𑀔𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀤𑀼𑀓𑁆𑀔𑁂𑀦𑀧𑀺 𑀘 𑀑𑀦𑀢𑁄;

𑀅𑀓𑀫𑁆𑀧𑀸 𑀲𑀼𑀔𑀤𑀼𑀓𑁆𑀔𑁂𑀲𑀼, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫𑀸’’𑀢𑀺. (𑀥. 𑀧. 𑀅𑀝𑁆𑀞. 𑁨.𑁩𑁦𑁩 𑀘𑀽𑀴𑀲𑀼𑀪𑀤𑁆𑀤𑀸𑀯𑀢𑁆𑀣𑀼) 𑁋