(𑁯) 𑁪. 𑀫𑀘𑀮𑀯𑀕𑁆𑀕𑁄

𑁧-𑁬. 𑀧𑀸𑀡𑀸𑀢𑀺𑀧𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁧-𑁮𑁬. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀧𑀜𑁆𑀘𑀫𑁂 (𑀲𑀁. 𑀦𑀺. 𑀝𑀻. 𑁧.𑁧.𑁧𑁩𑁨) ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀅𑀧𑁆𑀧𑀓𑀸𑀲𑀪𑀸𑀯𑁂𑀦 𑀢𑀫𑀢𑀻𑀢𑀺 𑀢𑀫𑁄, 𑀢𑁂𑀦 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀢𑀁𑀬𑁄𑀕𑀢𑁄 𑀧𑀼𑀕𑁆𑀕𑀮𑀲𑁆𑀲 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀫𑀘𑁆𑀙𑁂𑀭𑀬𑁄𑀕𑀢𑁄 𑀫𑀘𑁆𑀙𑀭𑁄’’𑀢𑀺, 𑀢𑀲𑁆𑀫𑀸 𑀢𑀫𑁄𑀢𑀺 𑀅𑀧𑁆𑀧𑀓𑀸𑀲𑀪𑀸𑀯𑁂𑀦 𑀢𑀫𑁄 𑀢𑀫𑀪𑀽𑀢𑁄 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀚𑀸𑀢𑁄, 𑀅𑀦𑁆𑀥𑀓𑀸𑀭𑀢𑁆𑀢𑀁 𑀯𑀸 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀮𑀓𑁆𑀔𑀡𑀁 𑀢𑀫𑀫𑁂𑀯 𑀧𑀭𑀫𑁆𑀧𑀭𑀢𑁄 𑀅𑀬𑀦𑀁 𑀕𑀢𑀺 𑀦𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀢𑀫𑀧𑀭𑀸𑀬𑀡𑁄. 𑀉𑀪𑀬𑁂𑀦𑀧𑀺 𑀢𑀫𑀕𑁆𑀕𑀳𑀡𑁂𑀦 𑀔𑀦𑁆𑀥𑀢𑀫𑁄 𑀓𑀣𑀺𑀢𑁄, 𑀦 𑀅𑀦𑁆𑀥𑀓𑀸𑀭𑀢𑀫𑁄. 𑀔𑀦𑁆𑀥𑀢𑀫𑁄𑀢𑀺 𑀘 𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀸 𑀔𑀦𑁆𑀥𑀧𑀯𑀢𑁆𑀢𑀺𑀬𑁂𑀯 𑀤𑀝𑁆𑀞𑀩𑁆𑀩𑀸. ‘‘𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀧𑀓𑀸𑀲𑀪𑀸𑀯𑁂𑀦 𑀚𑁄𑀢𑁂𑀢𑀻𑀢𑀺 𑀚𑁄𑀢𑀺, 𑀢𑁂𑀦 𑀚𑁄𑀢𑀺𑀦𑀸𑀬𑀼𑀢𑁆𑀢𑁄𑀢𑀺𑀆𑀤𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁂 𑀤𑁆𑀯𑁂𑀢𑀺 𑀚𑁄𑀢𑀺𑀢𑀫𑀧𑀭𑀸𑀬𑀡𑁄, 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀡𑁄𑀢𑀺 𑀇𑀢𑀭𑁂 𑀤𑁆𑀯𑁂 𑀧𑀼𑀕𑁆𑀕𑀮𑁂.

𑀯𑁂𑀡𑀼𑀯𑁂𑀢𑁆𑀢𑀸𑀤𑀺𑀯𑀺𑀮𑀻𑀯𑁂𑀳𑀺 𑀧𑁂𑀴𑀪𑀸𑀚𑀦𑀸𑀤𑀺𑀓𑀸𑀭𑀓𑀸 𑀯𑀺𑀮𑀻𑀯𑀓𑀸𑀭𑀓𑀸. 𑀫𑀺𑀕𑀫𑀘𑁆𑀙𑀸𑀤𑀻𑀦𑀁 𑀦𑀺𑀲𑀸𑀤𑀦𑀢𑁄 𑀦𑁂𑀲𑀸𑀤𑀸, 𑀫𑀸𑀕𑀯𑀺𑀓𑀫𑀘𑁆𑀙𑀩𑀦𑁆𑀥𑀸𑀤𑀬𑁄. 𑀭𑀣𑁂𑀲𑀼 𑀘𑀫𑁆𑀫𑁂𑀦 𑀦𑀳𑀡𑀓𑀭𑀡𑀢𑁄 𑀭𑀣𑀓𑀸𑀭𑀸, 𑀘𑀫𑁆𑀫𑀓𑀸𑀭𑀸. 𑀧𑀼𑀇𑀢𑀺 𑀓𑀭𑀻𑀲𑀲𑁆𑀲 𑀦𑀸𑀫𑀁, 𑀢𑀁 𑀓𑀼𑀲𑁂𑀦𑁆𑀢𑀺 𑀅𑀧𑀦𑁂𑀦𑁆𑀢𑀻𑀢𑀺 𑀧𑀼𑀓𑁆𑀓𑀼𑀲𑀸, 𑀧𑀼𑀧𑁆𑀨𑀙𑀟𑁆𑀟𑀓𑀸. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀯𑀺𑀭𑀽𑀧𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀆𑀭𑁄𑀳𑀸𑀪𑀸𑀯𑁂𑀦 𑀳𑁂𑀝𑁆𑀞𑀺𑀫𑀓𑁄, 𑀭𑀲𑁆𑀲𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀮𑀓𑀼𑀡𑁆𑀟𑀓𑁄’’𑀢𑀺. 𑀮𑀓𑀼 𑀯𑀺𑀬 𑀖𑀝𑀺𑀓𑀸 𑀯𑀺𑀬 𑀟𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀮𑀓𑀼𑀡𑁆𑀟𑀓𑁄, 𑀭𑀲𑁆𑀲𑁄. 𑀓𑀡𑀢𑀺 𑀦𑀺𑀫𑀻𑀮𑀢𑀻𑀢𑀺 𑀓𑀸𑀡𑁄. 𑀢𑀁 𑀧𑀦𑀲𑁆𑀲 𑀦𑀺𑀫𑀻𑀮𑀦𑀁 𑀏𑀓𑁂𑀦 𑀅𑀓𑁆𑀔𑀺𑀦𑀸 𑀤𑁆𑀯𑀻𑀳𑀺𑀧𑀺 𑀯𑀸𑀢𑀺 𑀆𑀳 ‘‘𑀏𑀓𑀘𑁆𑀙𑀺𑀓𑀸𑀡𑁄 𑀯𑀸 𑀉𑀪𑀬𑀘𑁆𑀙𑀺𑀓𑀸𑀡𑁄 𑀯𑀸’’𑀢𑀺. 𑀓𑀼𑀡𑀦𑀁 𑀓𑀼𑀡𑁄, 𑀳𑀢𑁆𑀣𑀯𑁂𑀓𑀮𑁆𑀮𑀁, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀼𑀡𑀻. 𑀔𑀜𑁆𑀚𑁄 𑀯𑀼𑀘𑁆𑀘𑀢𑀺 𑀧𑀸𑀤𑀯𑀺𑀓𑀮𑁄. 𑀳𑁂𑀝𑁆𑀞𑀺𑀫𑀓𑀸𑀬𑀲𑀗𑁆𑀔𑀸𑀢𑁄 𑀲𑀭𑀻𑀭𑀲𑁆𑀲 𑀧𑀓𑁆𑀔𑁄 𑀧𑀤𑁂𑀲𑁄 𑀳𑀢𑁄 𑀅𑀲𑁆𑀲𑀸𑀢𑀺 𑀧𑀓𑁆𑀔𑀳𑀢𑁄. 𑀢𑁂𑀦𑀸𑀳 ‘‘𑀧𑀻𑀞𑀲𑀧𑁆𑀧𑀻’’𑀢𑀺. 𑀧𑀤𑀻𑀧𑁂 𑀧𑀤𑀻𑀧𑀦𑁂 𑀏𑀢𑀩𑁆𑀩𑀁 𑀦𑁂𑀢𑀩𑁆𑀩𑀦𑁆𑀢𑀺 𑀧𑀤𑀻𑀧𑁂𑀬𑁆𑀬𑀁, 𑀢𑁂𑀮𑀓𑀧𑀸𑀮𑀸𑀤𑀺𑀉𑀧𑀓𑀭𑀡𑀁. 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀆𑀕𑀫𑀦𑀯𑀺𑀧𑀢𑁆𑀢𑀻𑀢𑀺 𑀆𑀕𑀫𑀦𑀝𑁆𑀞𑀸𑀦𑀯𑀲𑁂𑀦 𑀯𑀺𑀧𑀢𑁆𑀢𑀺 ‘‘𑀆𑀕𑀫𑁄 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀲𑁂𑀦 𑀯𑀺𑀧𑀭𑀸𑀯𑀢𑁆𑀢𑀺. 𑀘𑀡𑁆𑀟𑀸𑀮𑀸𑀤𑀺𑀲𑀪𑀸𑀯𑀸 𑀳𑀺𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑁄. 𑀧𑀯𑀢𑁆𑀢𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀧𑀯𑀢𑁆𑀢𑁂 𑀲𑀼𑀔𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀢𑀸𑀤𑀺𑀲𑁂 𑀦𑀺𑀳𑀻𑀦𑀓𑀼𑀮𑁂 𑀉𑀧𑁆𑀧𑀦𑁆𑀦𑁄𑀧𑀺 𑀓𑁄𑀘𑀺 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀺𑀬𑀸, 𑀅𑀬𑀁 𑀧𑀦 𑀤𑀼𑀕𑁆𑀕𑀢𑁄 𑀤𑀼𑀭𑀽𑀧𑁄. 𑀆𑀚𑀻𑀯𑀼𑀧𑀸𑀬𑀯𑀺𑀧𑀢𑁆𑀢𑀻𑀢𑀺 𑀆𑀚𑀻𑀯𑀦𑀼𑀧𑀸𑀬𑀯𑀲𑁂𑀦 𑀯𑀺𑀧𑀢𑁆𑀢𑀺. 𑀲𑀼𑀔𑁂𑀦 𑀳𑀺 𑀚𑀻𑀯𑀺𑀓𑀁 𑀧𑀯𑀢𑁆𑀢𑁂𑀢𑀼𑀁 𑀉𑀧𑀸𑀬𑀪𑀽𑀢𑀸 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀬𑁄 𑀇𑀫𑀲𑁆𑀲 𑀦𑀢𑁆𑀣𑀺, 𑀧𑀼𑀧𑁆𑀨𑀙𑀟𑁆𑀟𑀦𑀲𑀺𑀮𑀸𑀓𑁄𑀝𑁆𑀝𑀦𑀸𑀤𑀺𑀓𑀫𑁆𑀫𑀁 𑀧𑀦 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀧𑀯𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀓𑀲𑀺𑀭𑀯𑀼𑀢𑁆𑀢𑀺𑀓𑁂’’𑀢𑀺. 𑀅𑀢𑁆𑀢𑀪𑀸𑀯𑀯𑀺𑀧𑀢𑁆𑀢𑀻𑀢𑀺 𑀉𑀧𑀥𑀺𑀯𑀺𑀧𑀢𑁆𑀢𑀺. 𑀤𑀼𑀓𑁆𑀔𑀓𑀸𑀭𑀡𑀲𑀫𑀸𑀬𑁄𑀕𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀫𑁄𑀥𑀸𑀦𑀁. 𑀲𑀼𑀔𑀓𑀸𑀭𑀡𑀯𑀺𑀧𑀢𑁆𑀢𑀻𑀢𑀺 𑀲𑀼𑀔𑀧𑀘𑁆𑀘𑀬𑀧𑀭𑀺𑀳𑀸𑀦𑀺. 𑀉𑀧𑀪𑁄𑀕𑀯𑀺𑀧𑀢𑁆𑀢𑀻𑀢𑀺 𑀉𑀧𑀪𑁄𑀕𑀲𑀼𑀔𑀲𑁆𑀲 𑀯𑀺𑀦𑀸𑀲𑁄 𑀅𑀦𑀼𑀧𑀮𑀤𑁆𑀥𑀺. 𑀚𑁄𑀢𑀺 𑀘𑁂𑀯 𑀚𑁄𑀢𑀺𑀧𑀭𑀸𑀬𑀡𑀪𑀸𑀯𑁄 𑀘 𑀲𑀼𑀓𑁆𑀓𑀧𑀓𑁆𑀔𑁄. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀸𑀡𑀸𑀢𑀺𑀧𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀲𑀢𑁆𑀢𑀫𑁂 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀦𑀺𑀘𑁆𑀘𑀮𑀲𑀫𑀡𑁄𑀢𑀺 𑀣𑀺𑀭𑀲𑀫𑀡𑁄. 𑀅𑀪𑀺𑀲𑀺𑀜𑁆𑀘𑀺𑀢𑀩𑁆𑀩𑁄𑀢𑀺 𑀅𑀪𑀺𑀲𑁂𑀓𑁄𑀢𑀺 𑀓𑀫𑁆𑀫𑀲𑀸𑀥𑀦𑁄 𑀅𑀪𑀺𑀲𑁂𑀓𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀅𑀪𑀺𑀲𑁂𑀓𑀁 𑀓𑀸𑀢𑀼𑀁 𑀬𑀼𑀢𑁆𑀢𑁄’’𑀢𑀺.

𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀣𑁂𑀭𑁄 𑀳𑀺 𑀫𑀳𑀸𑀬𑀲𑀲𑁆𑀲𑀻, 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀦𑀢𑁆𑀢𑀼𑀧𑀦𑀢𑁆𑀢𑀓𑀸 𑀲𑀼𑀔𑀼𑀫𑀲𑀸𑀝𑀓𑁂𑀳𑀺 𑀘𑀻𑀯𑀭𑀸𑀦𑀺 𑀓𑀸𑀭𑁂𑀢𑁆𑀯𑀸 𑀭𑀚𑀸𑀧𑁂𑀢𑁆𑀯𑀸 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀳𑀺𑀡𑀦𑁆𑀢𑀺. 𑀣𑁂𑀭𑀲𑁆𑀲 𑀦𑀳𑀸𑀦𑀓𑀸𑀮𑁂 𑀦𑀳𑀸𑀦𑀓𑁄𑀝𑁆𑀞𑀓𑁂 𑀞𑀧𑁂𑀦𑁆𑀢𑀺. 𑀣𑁂𑀭𑁄 𑀢𑀸𑀦𑀺 𑀦𑀺𑀯𑀸𑀲𑁂𑀢𑀺 𑀘𑁂𑀯 𑀧𑀸𑀭𑀼𑀧𑀢𑀺 𑀘. 𑀢𑁂𑀦𑁂𑀯𑁂𑀢𑀁 𑀯𑀼𑀢𑁆𑀢𑀁.

𑀔𑀤𑀺𑀭𑀯𑀦𑀫𑀕𑁆𑀕𑁂 𑀲𑀻𑀯𑀮𑀺𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀲𑀢𑁆𑀣𑀭𑀺 𑀓𑀺𑀭 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁂 𑀤𑁂𑀯𑀢𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑁂𑀓𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀏𑀓𑀬𑁄𑀚𑀦𑀢𑁄 𑀉𑀤𑁆𑀥𑀁 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀤𑀺𑀩𑁆𑀩𑀸𑀦𑀺 𑀬𑀸𑀕𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀲𑀻𑀯𑀮𑀺𑀢𑁆𑀣𑁂𑀭𑁄 𑀓𑀳𑀁 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀺𑀘𑀭𑀦𑁆𑀢𑀺. 𑀣𑁂𑀭𑁄 𑀅𑀢𑁆𑀢𑀦𑁄 𑀅𑀪𑀺𑀳𑀝𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀏𑀯𑀁 𑀲𑀢𑁆𑀣𑀸 𑀲𑀧𑀭𑀺𑀯𑀸𑀭𑁄 𑀢𑀺𑀁𑀲𑀬𑁄𑀚𑀦𑀺𑀓𑀁 𑀓𑀦𑁆𑀢𑀸𑀭𑀁 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀧𑀼𑀜𑁆𑀜𑀨𑀮𑀁 𑀅𑀦𑀼𑀪𑀯𑀫𑀸𑀦𑁄𑀯 𑀅𑀕𑀫𑀸𑀲𑀺. 𑀢𑁂𑀦𑁂𑀯𑁂𑀢𑀁 𑀯𑀼𑀢𑁆𑀢𑀁.

𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀅𑀝𑁆𑀞𑀓𑀦𑀸𑀕𑀭𑀓𑁄 𑀓𑀺𑀭 𑀕𑀳𑀧𑀢𑀺 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀲𑀧𑁆𑀧𑀺𑀆𑀤𑀻𑀦𑀺 𑀩𑀳𑀽𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀪𑀺𑀳𑀭𑀺𑀁𑀲𑀼. 𑀧𑀓𑀢𑀺𑀬𑀸𑀧𑀺 𑀘 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀮𑀸𑀪𑀻 𑀳𑁄𑀢𑀺 𑀧𑀜𑁆𑀘𑀦𑁆𑀦𑀁 𑀪𑁂𑀲𑀚𑁆𑀚𑀸𑀦𑀁, 𑀮𑀤𑁆𑀥𑀁 𑀮𑀤𑁆𑀥𑀁 𑀧𑀭𑀺𑀲𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀕𑀺𑀮𑀸𑀦𑀧𑀘𑁆𑀘𑀬𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺.

𑀢𑀺𑀡𑁆𑀡𑀫𑁆𑀧𑀺 𑀲𑀦𑁆𑀦𑀺𑀧𑀸𑀢𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀧𑀺𑀢𑁆𑀢𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀯𑀺𑀲𑀫𑀸𑀦𑀁 𑀲𑀦𑁆𑀦𑀺𑀧𑀸𑀢𑁂𑀦 𑀚𑀸𑀢𑀸𑀦𑀺. 𑀅𑀢𑀺𑀲𑀻𑀢𑀸𑀤𑀺𑀪𑀸𑀯𑁂𑀦 𑀉𑀢𑀽𑀦𑀁 𑀧𑀭𑀺𑀡𑀸𑀫𑁄𑀢𑀺 𑀆𑀳 ‘‘𑀅𑀢𑀺𑀲𑀻𑀢𑀅𑀢𑀺𑀉𑀡𑁆𑀳𑀉𑀢𑀼𑀢𑁄 𑀚𑀸𑀢𑀸𑀦𑀻’’𑀢𑀺. 𑀧𑀼𑀭𑀺𑀫𑀉𑀢𑀼𑀢𑁄 𑀯𑀺𑀲𑀤𑀺𑀲𑁄 𑀉𑀢𑀼 𑀉𑀢𑀼𑀧𑀭𑀺𑀡𑀸𑀫𑁄, 𑀢𑀢𑁄 𑀚𑀸𑀢𑀸𑀦𑀺 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺, 𑀯𑀺𑀲𑀪𑀸𑀕𑀉𑀢𑀼𑀢𑁄 𑀚𑀸𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀚𑀗𑁆𑀕𑀮𑀤𑁂𑀲𑀯𑀸𑀲𑀻𑀦𑀜𑁆𑀳𑀺 𑀅𑀦𑀽𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀯𑀺𑀲𑀪𑀸𑀕𑁄𑀯 𑀉𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀽𑀧𑀤𑁂𑀲𑀯𑀸𑀲𑀻𑀦𑀜𑁆𑀘 𑀚𑀗𑁆𑀕𑀮𑀤𑁂𑀲𑁂𑀢𑀺. 𑀏𑀯𑀁 𑀫𑀮𑀬𑀲𑀫𑀼𑀤𑁆𑀤𑀢𑀻𑀭𑀸𑀤𑀺𑀯𑀲𑁂𑀦𑀧𑀺 𑀉𑀢𑀼𑀯𑀺𑀲𑀪𑀸𑀕𑀢𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀢𑀢𑁄 𑀚𑀸𑀢𑀸𑀦𑀺 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺 𑀦𑀸𑀫.

𑀅𑀢𑁆𑀢𑀦𑁄 𑀧𑀓𑀢𑀺𑀘𑀭𑀺𑀬𑀸𑀦𑀁 𑀯𑀺𑀲𑀫𑀁 𑀓𑀸𑀬𑀲𑁆𑀲 𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺. 𑀢𑀸𑀦𑀺 𑀧𑀦 𑀅𑀘𑁆𑀘𑀸𑀲𑀦𑀅𑀢𑀺𑀝𑁆𑀞𑀸𑀦𑀸𑀤𑀺𑀦𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀅𑀘𑁆𑀘𑀸𑀲𑀦𑀅𑀢𑀺𑀝𑁆𑀞𑀸𑀦𑀸𑀤𑀺𑀓𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀪𑀸𑀭𑀯𑀳𑀡𑀲𑀼𑀥𑀸𑀓𑁄𑀝𑁆𑀝𑀦𑀅𑀤𑁂𑀲𑀓𑀸𑀮𑀘𑀭𑀡𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀲𑁆𑀲 𑀉𑀧𑀓𑁆𑀓𑀫𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺 𑀑𑀧𑀓𑁆𑀓𑀫𑀺𑀓𑀸𑀦𑀺, 𑀅𑀬𑀁 𑀘𑁄𑀭𑁄𑀢𑀺 𑀯𑀸 𑀧𑀸𑀭𑀤𑀸𑀭𑀺𑀓𑁄𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀚𑀡𑁆𑀡𑀼𑀓𑀓𑀧𑁆𑀧𑀭𑀫𑀼𑀕𑁆𑀕𑀭𑀸𑀤𑀻𑀳𑀺 𑀦𑀺𑀧𑁆𑀧𑁄𑀣𑀦𑀉𑀧𑀓𑁆𑀓𑀫𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀥𑀩𑀦𑁆𑀥𑀦𑀸𑀤𑀺𑀉𑀧𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀻’’𑀢𑀺. 𑀓𑁂𑀯𑀮𑀦𑁆𑀢𑀺 𑀩𑀸𑀳𑀺𑀭𑀁 𑀧𑀘𑁆𑀘𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁, 𑀢𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦𑁂𑀯 𑀚𑀸𑀢𑀸𑀦𑀻’’𑀢𑀺.

𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁦. 𑀲𑀁𑀬𑁄𑀚𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁮-𑁯𑁦. 𑀅𑀝𑁆𑀞𑀫𑁂 𑀲𑁄𑀢𑀸𑀧𑀦𑁆𑀦𑁄 𑀘𑀢𑀽𑀳𑀺 𑀯𑀸𑀢𑁂𑀳𑀺 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀧𑀭𑀧𑁆𑀧𑀯𑀸𑀤𑁂𑀳𑀺 𑀅𑀓𑀫𑁆𑀧𑀺𑀬𑁄 𑀅𑀘𑀮𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀸𑀲𑀦𑁂 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄 𑀲𑀫𑀡𑀫𑀘𑀮𑁄 𑀦𑀸𑀫𑀸𑀢𑀺 𑀆𑀳 ‘‘𑀲𑀸𑀲𑀦𑁂 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀢𑁆𑀢𑀸’’𑀢𑀺𑀆𑀤𑀺. 𑀣𑀤𑁆𑀥𑀪𑀸𑀯𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀓𑀭𑀸𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀸 𑀲𑀫𑀡𑀲𑀼𑀔𑀼𑀫𑀸𑀮𑁄 𑀦𑀸𑀫 𑀲𑀼𑀔𑀼𑀫𑀸𑀮𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀦𑀯𑀫𑀤𑀲𑀫𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑀲𑀁𑀬𑁄𑀚𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀘𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.