(𑁧𑁦) 𑁫. 𑀅𑀲𑀼𑀭𑀯𑀕𑁆𑀕𑁄

𑁧-𑁨. 𑀅𑀲𑀼𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁧-𑁯𑁨. 𑀧𑀜𑁆𑀘𑀫𑀲𑁆𑀲 𑀧𑀞𑀫𑀤𑀼𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀅𑀲𑀼𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀢𑀢𑀺𑀬𑁂 𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀪𑀸𑀯𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀦𑀺𑀯𑀢𑁆𑀢𑀦𑀢𑀸’’𑀢𑀺. ‘‘𑀅𑀧𑁆𑀧𑀝𑀺𑀯𑀸𑀦𑀺𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀧𑁆𑀧𑀝𑀺𑀯𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀻𑀭𑀺𑀬𑀧𑁆𑀧𑀯𑀸𑀳𑁂 𑀯𑀢𑁆𑀢𑀫𑀸𑀦𑁂 𑀅𑀦𑁆𑀢𑀭𑀸 𑀏𑀯 𑀧𑀝𑀺𑀕𑀫𑀦𑀁 𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀝𑀺𑀯𑀸𑀦𑀻, 𑀦 𑀧𑀝𑀺𑀯𑀸𑀦𑀻 𑀅𑀧𑁆𑀧𑀝𑀺𑀯𑀸𑀦𑀻, 𑀢𑀲𑁆𑀲 𑀪𑀸𑀯𑁄 𑀅𑀧𑁆𑀧𑀝𑀺𑀯𑀸𑀦𑀺𑀢𑀸, 𑀅𑀦𑀺𑀯𑀢𑁆𑀢𑀦𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦𑁂𑀯𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀅𑀦𑁆𑀢𑀭𑀸𑀬𑁂𑀯 𑀧𑀝𑀺𑀕𑀫𑀦𑀁 𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀻, 𑀦 𑀧𑀝𑀺𑀯𑀸𑀦𑀻 𑀅𑀧𑁆𑀧𑀝𑀺𑀯𑀸𑀦𑀻, 𑀅𑀦𑀺𑀯𑀢𑁆𑀢𑀦𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀢𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀘𑀢𑀼𑀢𑁆𑀣𑁂 𑀲𑀡𑁆𑀞𑀧𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀫𑀤𑁂𑀯 𑀞𑀧𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀞𑀧𑀺𑀢𑀁 𑀲𑀡𑁆𑀞𑀧𑀺𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀲𑀫𑀸𑀥𑀺𑀧𑁆𑀧𑀝𑀺𑀧𑀓𑁆𑀔𑁂 𑀓𑀺𑀮𑁂𑀲𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀦𑁆𑀢𑁂𑀦 𑀘𑀺𑀢𑁆𑀢𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀩𑁆𑀩𑀦𑁆𑀢𑀺. 𑀏𑀓𑁄𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀅𑀩𑁆𑀬𑀕𑁆𑀕𑀪𑀸𑀯𑀸𑀧𑀸𑀤𑀦𑁂𑀦 𑀏𑀓𑀕𑁆𑀕𑀁 𑀓𑀸𑀢𑀩𑁆𑀩𑀁. 𑀲𑀫𑀸𑀤𑀳𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀸 𑀲𑀫𑁆𑀫𑀤𑁂𑀯 𑀆𑀤𑀳𑀺𑀢𑀩𑁆𑀩𑀁, 𑀲𑀼𑀝𑁆𑀞𑀼 𑀆𑀭𑁄𑀧𑁂𑀢𑀩𑁆𑀩𑀁 𑀲𑀫𑀸𑀳𑀺𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀙𑀯𑀸𑀮𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁫-𑁯𑁬. 𑀧𑀜𑁆𑀘𑀫𑁂 𑀙𑀯𑀸𑀮𑀸𑀢𑀦𑁆𑀢𑀺 𑀙𑀯𑀸𑀦𑀁 𑀤𑀟𑁆𑀠𑀝𑁆𑀞𑀸𑀦𑁂 𑀅𑀮𑀸𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀼𑀲𑀸𑀦𑁂 𑀅𑀮𑀸𑀢’’𑀦𑁆𑀢𑀺. 𑀫𑀚𑁆𑀛𑀝𑁆𑀞𑀸𑀦𑁂 𑀕𑀽𑀣𑀫𑀓𑁆𑀔𑀺𑀢𑀦𑁆𑀢𑀺 𑀧𑀫𑀸𑀡𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀫𑀓𑁆𑀔𑀺𑀢𑀁. 𑀓𑀝𑁆𑀞𑀢𑁆𑀣𑀦𑁆𑀢𑀺 𑀓𑀝𑁆𑀞𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀯𑀸𑀮𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁭-𑁧𑁦𑁦. 𑀲𑀢𑁆𑀢𑀫𑁂 𑀔𑀺𑀧𑁆𑀧𑀦𑀺𑀲𑀦𑁆𑀢𑀻𑀢𑀺 𑀔𑀺𑀧𑁆𑀧𑀧𑀜𑁆𑀜𑁄. 𑀢𑁂𑀦𑀸𑀳 ‘‘𑀔𑀺𑀧𑁆𑀧𑀦𑀺𑀲𑀸𑀫𑀦𑁄’’𑀢𑀺𑀆𑀤𑀺. 𑀅𑀦𑀼𑀭𑀽𑀧𑀥𑀫𑁆𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀥𑀺𑀕𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀲𑀪𑀸𑀯𑀁. 𑀓𑀮𑁆𑀬𑀸𑀡𑀸 𑀲𑀼𑀦𑁆𑀤𑀭𑀸 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸 𑀯𑀸𑀘𑀸 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀘𑁄. 𑀢𑁂𑀦𑀸𑀳 ‘‘𑀲𑀼𑀦𑁆𑀤𑀭𑀯𑀘𑀦𑁄’’𑀢𑀺. 𑀓𑀮𑁆𑀬𑀸𑀡𑀁 𑀫𑀥𑀼𑀭𑀁 𑀯𑀸𑀓𑁆𑀓𑀭𑀡𑀁 𑀉𑀤𑀸𑀳𑀸𑀭𑀖𑁄𑀲𑁄 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀧𑀽𑀭𑁂 𑀧𑀼𑀡𑁆𑀡𑀪𑀸𑀯𑁂 𑀪𑀯𑀸𑀢𑀺 𑀧𑁄𑀭𑀻, 𑀢𑀸𑀬 𑀧𑁄𑀭𑀺𑀬𑀸. 𑀢𑁂𑀦𑀸𑀳 ‘‘𑀕𑀼𑀡𑀧𑀭𑀺𑀧𑀼𑀡𑁆𑀡𑀸𑀬𑀸’’𑀢𑀺. 𑀧𑀼𑀭𑁂 𑀪𑀯𑀢𑁆𑀢𑀸 𑀧𑁄𑀭𑀺𑀬𑀸 𑀦𑀸𑀕𑀭𑀺𑀓𑀺𑀢𑁆𑀣𑀺𑀬𑀸 𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦 𑀲𑀤𑀺𑀲𑀸𑀢𑀺 𑀧𑁄𑀭𑀻, 𑀢𑀸𑀬 𑀧𑁄𑀭𑀺𑀬𑀸. ‘‘𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀫𑀼𑀤𑀼𑀲𑀡𑁆𑀳𑀪𑀸𑀯𑁄 𑀯𑀼𑀢𑁆𑀢𑁄. 𑀅𑀧𑀮𑀺𑀩𑀼𑀤𑁆𑀥𑀸𑀬𑀸𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀦 𑀧𑀮𑀺𑀯𑁂𑀞𑀺𑀢𑀸𑀬. 𑀅𑀤𑁄𑀲𑀸𑀬𑀸𑀢𑀺 𑀲𑀦𑁆𑀤𑀺𑀤𑁆𑀥𑀯𑀺𑀮𑀫𑁆𑀩𑀺𑀢𑀸𑀤𑀺𑀤𑁄𑀲𑀭𑀳𑀺𑀢𑀸𑀬 𑀅𑀕𑀴𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬𑀸𑀢𑀺 𑀅𑀧𑀢𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬 𑀅𑀯𑀺𑀭𑀳𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬. 𑀉𑀪𑀬𑀫𑁂𑀢𑀁 𑀅𑀦𑁂𑀮𑀕𑀮𑀸𑀬𑀸𑀢𑀺 𑀇𑀫𑀲𑁆𑀲𑁂𑀯 𑀅𑀢𑁆𑀣𑀯𑀘𑀦𑀁. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀳𑀺 𑀅𑀦𑁂𑀮𑀸𑀬 𑀘𑁂𑀯 𑀅𑀕𑀮𑀸𑀬 𑀘𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀫𑀢𑁆𑀣𑀸𑀬𑀸𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀪𑀸𑀲𑀺𑀢𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀲𑀢𑁆𑀣𑀸𑀬. 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀼𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁