(𑁧𑁧) 𑁧. 𑀯𑀮𑀸𑀳𑀓𑀯𑀕𑁆𑀕𑁄

𑁧-𑁨. 𑀯𑀮𑀸𑀳𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁦𑁧-𑁨. 𑀢𑀢𑀺𑀬𑀧𑀡𑁆𑀡𑀸𑀲𑀓𑀲𑁆𑀲 𑀧𑀞𑀫𑁂 𑀕𑀚𑁆𑀚𑀺𑀢𑀸𑀢𑀺 𑀣𑀦𑀺𑀢𑀸. 𑀢𑀢𑁆𑀣 𑀕𑀚𑁆𑀚𑀺𑀢𑁆𑀯𑀸 𑀦𑁄𑀯𑀲𑁆𑀲𑀦𑀪𑀸𑀯𑁄 𑀦𑀸𑀫 𑀧𑀸𑀧𑀓𑁄. 𑀫𑀦𑀼𑀲𑁆𑀲𑀸 𑀳𑀺 𑀬𑀤𑀸 𑀤𑁂𑀯𑁄 𑀕𑀚𑁆𑀚𑀢𑀺, 𑀢𑀤𑀸 ‘‘𑀲𑀼𑀯𑀼𑀝𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑀻𑀚𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀧𑀦𑁆𑀢𑀺. 𑀅𑀣 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀔𑁂𑀢𑁆𑀢𑁂 𑀩𑀻𑀚𑀸𑀦𑀺 𑀔𑁂𑀢𑁆𑀢𑁂𑀬𑁂𑀯 𑀦𑀲𑁆𑀲𑀦𑁆𑀢𑀺, 𑀕𑁂𑀳𑁂 𑀩𑀻𑀚𑀸𑀦𑀺 𑀕𑁂𑀳𑁂𑀬𑁂𑀯 𑀦𑀲𑁆𑀲𑀦𑁆𑀢𑀻𑀢𑀺 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺. 𑀦𑁄𑀕𑀚𑁆𑀚𑀺𑀢𑁆𑀯𑀸 𑀯𑀲𑁆𑀲𑀦𑀪𑀸𑀯𑁄𑀧𑀺 𑀧𑀸𑀧𑀓𑁄. 𑀫𑀦𑀼𑀲𑁆𑀲𑀸 𑀳𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂 ‘‘𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀦𑁆𑀦𑀝𑁆𑀞𑀸𑀦𑁂𑀲𑀼𑀬𑁂𑀯 𑀯𑀧𑁆𑀧𑀁 𑀓𑀭𑁄𑀦𑁆𑀢𑀺. 𑀅𑀣 𑀤𑁂𑀯𑁄 𑀯𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀩𑀻𑀚𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀫𑁂𑀯 𑀳𑁄𑀢𑀺. 𑀕𑀚𑁆𑀚𑀺𑀢𑁆𑀯𑀸 𑀯𑀲𑁆𑀲𑀦𑀪𑀸𑀯𑁄 𑀧𑀦 𑀪𑀤𑁆𑀤𑀓𑁄. 𑀢𑀤𑀸 𑀳𑀺 𑀲𑀼𑀪𑀺𑀓𑁆𑀔𑀁 𑀳𑁄𑀢𑀺. 𑀦𑁄𑀕𑀚𑁆𑀚𑀺𑀢𑁆𑀯𑀸 𑀦𑁄𑀯𑀲𑁆𑀲𑀦𑀪𑀸𑀯𑁄 𑀏𑀓𑀦𑁆𑀢𑀧𑀸𑀧𑀓𑁄𑀯. 𑀪𑀸𑀲𑀺𑀢𑀸 𑀳𑁄𑀢𑀺 𑀦𑁄 𑀓𑀢𑁆𑀢𑀸𑀢𑀺 ‘‘𑀇𑀤𑀸𑀦𑀺 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀺, 𑀯𑀸𑀲𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀓𑀣𑁂𑀢𑀺𑀬𑁂𑀯, 𑀦 𑀉𑀤𑁆𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀺.

𑀓𑀢𑁆𑀢𑀸 𑀳𑁄𑀢𑀺 𑀦𑁄 𑀪𑀸𑀲𑀺𑀢𑀸𑀢𑀺 ‘‘𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀺, 𑀯𑀸𑀲𑀥𑀼𑀭𑀁 𑀯𑀸’’𑀢𑀺 𑀦 𑀪𑀸𑀲𑀢𑀺, 𑀲𑀫𑁆𑀧𑀢𑁆𑀢𑁂 𑀧𑀦 𑀓𑀸𑀮𑁂 𑀲𑀫𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀲𑀩𑁆𑀩𑀁 𑀧𑀦𑁂𑀢𑀁 𑀧𑀘𑁆𑀘𑀬𑀤𑀸𑀬𑀓𑁂𑀳𑁂𑀯 𑀓𑀣𑀺𑀢𑀁. 𑀏𑀓𑁄 𑀳𑀺 ‘‘𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀦𑁄 𑀓𑀭𑁄𑀢𑀺. 𑀅𑀬𑀁 𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑁂𑀦 𑀧𑀭𑀺𑀳𑀸𑀬𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀦 𑀮𑀸𑀪𑁂𑀦 𑀧𑀭𑀺𑀳𑀸𑀬𑀢𑀺. 𑀅𑀧𑀭𑁄 𑀲𑀗𑁆𑀖𑀁 𑀅𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘‘𑀪𑀺𑀓𑁆𑀔𑀽 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀦 𑀮𑀪𑀺, 𑀲𑀩𑁆𑀩𑁂 𑀅𑀜𑁆𑀜𑀢𑁆𑀣 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀧𑀼𑀜𑁆𑀜𑁂𑀦 𑀧𑀭𑀺𑀳𑀸𑀬𑀢𑀺, 𑀲𑀗𑁆𑀖𑁄𑀧𑀺 𑀮𑀸𑀪𑁂𑀦 𑀧𑀭𑀺𑀳𑀸𑀬𑀢𑀺. 𑀅𑀧𑀭𑁄 𑀧𑀞𑀫𑀁 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀅𑀬𑀁 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺. 𑀅𑀧𑀭𑁄 𑀦𑁂𑀯 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀦 𑀤𑀸𑀦𑀁 𑀤𑁂𑀢𑀺, 𑀅𑀬𑀁 𑀧𑀸𑀧𑀧𑀼𑀕𑁆𑀕𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀯𑀮𑀸𑀳𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀼𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑁂 𑀭𑀺𑀢𑁆𑀢𑀓𑁄𑀢𑀺 𑀅𑀦𑁆𑀢𑁄 𑀭𑀺𑀢𑁆𑀢𑁄. 𑀧𑀺𑀳𑀺𑀢𑀫𑀼𑀔𑁄𑀢𑀺 𑀧𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑁄. 𑀅𑀧𑀸𑀭𑀼𑀢𑀫𑀼𑀔𑁄𑀢𑀺 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄, 𑀉𑀧𑀫𑀺𑀢𑀧𑀼𑀕𑁆𑀕𑀮𑁂𑀲𑀼 𑀧𑀦𑁂𑀢𑁆𑀣 𑀅𑀦𑁆𑀢𑁄𑀕𑀼𑀡𑀲𑀸𑀭𑀯𑀺𑀭𑀳𑀺𑀢𑁄 𑀘 𑀢𑀼𑀘𑁆𑀙𑁄, 𑀩𑀸𑀳𑀺𑀭𑀲𑁄𑀪𑀦𑀢𑀸𑀬 𑀧𑀺𑀳𑀺𑀢𑁄 𑀧𑀼𑀕𑁆𑀕𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀼𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀤𑀓𑀭𑀳𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀘𑀢𑀼𑀢𑁆𑀣𑁂 𑀉𑀤𑀓𑀭𑀳𑀤𑁄 𑀚𑀡𑁆𑀡𑀼𑀓𑀫𑀢𑁆𑀢𑁂𑀧𑀺 𑀉𑀤𑀓𑁂 𑀲𑀢𑀺 𑀧𑀡𑁆𑀡𑀭𑀲𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀢𑁆𑀢𑀸 𑀯𑀸 𑀩𑀳𑀮𑀢𑁆𑀢𑀸 𑀯𑀸 𑀉𑀤𑀓𑀲𑁆𑀲 𑀅𑀧𑀜𑁆𑀜𑀸𑀬𑀫𑀸𑀦𑀢𑀮𑁄 𑀉𑀢𑁆𑀢𑀸𑀦𑁄 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭𑀸𑀡𑀧𑀡𑁆𑀡𑀭𑀲…𑀧𑁂… 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫𑀸’’𑀢𑀺. 𑀢𑀺𑀧𑁄𑀭𑀺𑀲𑀘𑀢𑀼𑀧𑁄𑀭𑀺𑀲𑁂 𑀧𑀦 𑀉𑀤𑀓𑁂 𑀲𑀢𑀺 𑀅𑀘𑁆𑀙𑀢𑁆𑀢𑀸 𑀉𑀤𑀓𑀲𑁆𑀲 𑀧𑀜𑁆𑀜𑀸𑀬𑀫𑀸𑀦𑀢𑀮𑁄 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑁄𑀪𑀸𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀘𑁆𑀙𑀯𑀺𑀧𑁆𑀧𑀲𑀦𑁆𑀦𑀫𑀡𑀺𑀯𑀡𑁆𑀡𑀉𑀤𑀓𑁄 𑀉𑀢𑁆𑀢𑀸𑀦𑁄𑀪𑀸𑀲𑁄 𑀦𑀸𑀫𑀸’’𑀢𑀺. 𑀉𑀪𑀬𑀓𑀸𑀭𑀡𑀲𑀫𑁆𑀪𑀯𑀢𑁄 𑀧𑀦 𑀇𑀢𑀭𑁂 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀕𑁆𑀕𑀮𑁂𑀧𑀺 𑀓𑀺𑀮𑁂𑀲𑀼𑀲𑁆𑀲𑀤𑀪𑀸𑀯𑀢𑁄 𑀕𑀼𑀡𑀕𑀫𑁆𑀪𑀻𑀭𑀢𑀸𑀬 𑀘 𑀅𑀪𑀸𑀯𑀢𑁄 𑀕𑀼𑀡𑀕𑀫𑁆𑀪𑀻𑀭𑀸𑀦𑀁 𑀲𑀤𑀺𑀲𑁂𑀳𑀺 𑀅𑀪𑀺𑀓𑁆𑀓𑀫𑀦𑀸𑀤𑀻𑀳𑀺 𑀬𑀼𑀢𑁆𑀢𑁄 𑀉𑀢𑁆𑀢𑀸𑀦𑁄 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸.

𑀉𑀤𑀓𑀭𑀳𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀅𑀫𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁫-𑁬. 𑀧𑀜𑁆𑀘𑀫𑁂 𑀆𑀫𑀓𑀁 𑀳𑀼𑀢𑁆𑀯𑀸𑀢𑀺 𑀅𑀦𑁆𑀢𑁄 𑀆𑀫𑀁 𑀳𑀼𑀢𑁆𑀯𑀸. 𑀧𑀓𑁆𑀓𑀁 𑀆𑀫𑀯𑀡𑁆𑀡𑀻𑀢𑀺 𑀅𑀦𑁆𑀢𑁄 𑀧𑀓𑁆𑀓𑀁 𑀩𑀳𑀺 𑀆𑀫𑀲𑀤𑀺𑀲𑀁. 𑀢𑀢𑁆𑀣 𑀬𑀣𑀸 𑀅𑀫𑁆𑀩𑁂 𑀅𑀧𑀓𑁆𑀓𑀪𑀸𑀯𑁄 𑀆𑀫𑀢𑀸 𑀳𑁄𑀢𑀺, 𑀏𑀯𑀁 𑀧𑀼𑀕𑁆𑀕𑀮𑁂𑀧𑀺 𑀧𑀼𑀣𑀼𑀚𑁆𑀚𑀦𑀢𑀸. 𑀬𑀣𑀸 𑀘 𑀢𑀢𑁆𑀣 𑀧𑀓𑁆𑀓𑀲𑀤𑀺𑀲𑀢𑀸 𑀧𑀓𑁆𑀓𑀯𑀡𑁆𑀡𑀺𑀢𑀸, 𑀏𑀯𑀁 𑀧𑀼𑀕𑁆𑀕𑀮𑁂𑀧𑀺 𑀅𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀫𑀦𑀸𑀤𑀺𑀲𑀤𑀺𑀲𑀢𑀸 𑀧𑀓𑁆𑀓𑀯𑀡𑁆𑀡𑀺𑀢𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀫𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀽𑀲𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀲𑀢𑁆𑀢𑀫𑁂 𑀆𑀯𑀸𑀝𑀁 𑀔𑀦𑀢𑀻𑀢𑀺 𑀅𑀢𑁆𑀢𑀦𑁄 𑀆𑀲𑀬𑀁 𑀩𑀺𑀮𑀓𑀽𑀧𑀁 𑀔𑀦𑀢𑀺. 𑀦 𑀘 𑀢𑀢𑁆𑀣 𑀯𑀲𑀢𑀻𑀢𑀺 𑀢𑀢𑁆𑀣 𑀅𑀯𑀲𑀺𑀢𑁆𑀯𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀯𑀲𑀢𑀺, 𑀏𑀯𑀁 𑀩𑀺𑀴𑀸𑀭𑀸𑀤𑀺𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺. 𑀯𑀲𑀺𑀢𑀸 𑀦𑁄 𑀕𑀸𑀥𑀁 𑀓𑀢𑁆𑀢𑀸𑀢𑀺 𑀲𑀬𑀁 𑀦 𑀔𑀦𑀢𑀺, 𑀧𑀭𑁂𑀦 𑀓𑀢𑁂 𑀩𑀺𑀮𑁂 𑀯𑀲𑀢𑀺, 𑀏𑀯𑀁 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺. 𑀢𑀢𑀺𑀬𑀸 𑀤𑁆𑀯𑁂𑀧𑀺 𑀓𑀭𑁄𑀦𑁆𑀢𑀻 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺. 𑀘𑀢𑀼𑀢𑁆𑀣𑀻 𑀤𑁆𑀯𑁂𑀧𑀺 𑀅𑀓𑀭𑁄𑀦𑁆𑀢𑀻 𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺. 𑀇𑀫𑀸𑀬 𑀧𑀦 𑀉𑀧𑀫𑀸𑀬 𑀉𑀧𑀫𑀺𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀞𑀫𑁄 𑀬𑀣𑀸 𑀲𑀸 𑀫𑀽𑀲𑀺𑀓𑀸 𑀕𑀸𑀥𑀁 𑀔𑀦𑀢𑀺, 𑀏𑀯𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀬𑀣𑀸 𑀧𑀦 𑀲𑀸 𑀢𑀢𑁆𑀣 𑀦 𑀯𑀲𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀯𑀲𑀦𑁆𑀢𑀻 𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺, 𑀢𑀣𑀸 𑀅𑀬𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀮𑁄𑀓𑀸𑀫𑀺𑀲𑀝𑁆𑀞𑀸𑀦𑁂𑀲𑀼 𑀯𑀺𑀘𑀭𑀦𑁆𑀢𑁄 𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑀗𑁆𑀔𑀸𑀢𑀸𑀦𑀁 𑀯𑀲𑀁 𑀕𑀘𑁆𑀙𑀢𑀺. 𑀤𑀼𑀢𑀺𑀬𑁄 𑀬𑀣𑀸 𑀫𑀽𑀲𑀺𑀓𑀸 𑀕𑀸𑀥𑀁 𑀦 𑀔𑀦𑀢𑀺, 𑀏𑀯𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺. 𑀬𑀣𑀸 𑀧𑀦 𑀧𑀭𑁂𑀦 𑀔𑀦𑀺𑀢𑁂 𑀩𑀺𑀮𑁂 𑀯𑀲𑀦𑁆𑀢𑀻 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺, 𑀏𑀯𑀁 𑀧𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀯𑀲𑀁 𑀅𑀢𑀺𑀓𑁆𑀓𑀫𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼𑀧𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀫𑀽𑀲𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀩𑀮𑀻𑀩𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮. 𑀅𑀝𑁆𑀞𑀫𑁂 𑀩𑀮𑀻𑀩𑀤𑁆𑀤𑁄 𑀢𑀸𑀯 𑀬𑁄 𑀅𑀢𑁆𑀢𑀦𑁄 𑀕𑁄𑀕𑀡𑀁 𑀖𑀝𑁆𑀝𑁂𑀢𑀺 𑀉𑀩𑁆𑀩𑁂𑀚𑁂𑀢𑀺, 𑀧𑀭𑀕𑁄𑀡𑁂 𑀧𑀦 𑀲𑀽𑀭𑀢𑁄 𑀲𑀼𑀔𑀲𑀻𑀮𑁄 𑀳𑁄𑀢𑀺, 𑀅𑀬𑀁 𑀲𑀕𑀯𑀘𑀡𑁆𑀟𑁄 𑀦𑁄 𑀧𑀭𑀕𑀯𑀘𑀡𑁆𑀟𑁄 𑀦𑀸𑀫. 𑀧𑀼𑀕𑁆𑀕𑀮𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀖𑀝𑁆𑀝𑁂𑀦𑁆𑀢𑁄 𑀯𑀺𑀚𑁆𑀛𑀦𑁆𑀢𑁄 𑀨𑀭𑀼𑀲𑁂 𑀲𑀫𑀼𑀤𑀸𑀘𑀭𑀦𑁆𑀢𑁄, 𑀧𑀭𑀧𑀭𑀺𑀲𑀸𑀬 𑀧𑀦 𑀲𑁄𑀭𑀘𑁆𑀘𑀁 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀲𑀕𑀯𑀘𑀡𑁆𑀟𑁄 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀩𑀮𑀻𑀩𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀦𑀯𑀫𑁂 𑀭𑀼𑀓𑁆𑀔𑁄 𑀢𑀸𑀯 𑀨𑁂𑀕𑁆𑀕𑀼 𑀲𑀸𑀭𑀧𑀭𑀺𑀯𑀸𑀭𑁄𑀢𑀺 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑁄 𑀲𑀬𑀁 𑀨𑁂𑀕𑁆𑀕𑀼 𑀳𑁄𑀢𑀺, 𑀧𑀭𑀺𑀯𑀸𑀭𑀭𑀼𑀓𑁆𑀔𑀸 𑀧𑀦𑀲𑁆𑀲 𑀲𑀸𑀭𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀕𑁆𑀕𑀮𑁂𑀲𑀼 𑀧𑀦 𑀲𑀻𑀮𑀲𑀸𑀭𑀯𑀺𑀭𑀳𑀺𑀢𑀢𑁄 𑀨𑁂𑀕𑁆𑀕𑀼𑀢𑀸, 𑀲𑀻𑀮𑀸𑀘𑀸𑀭𑀲𑀫𑀦𑁆𑀦𑀸𑀕𑀫𑁂𑀦 𑀘 𑀲𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀤𑀲𑀫𑁂 𑀬𑀲𑁆𑀲 𑀯𑀺𑀲𑀁 𑀧𑀚𑁆𑀚𑀮𑀺𑀢𑀢𑀺𑀡𑀼𑀓𑁆𑀓𑀸𑀬 𑀅𑀕𑁆𑀕𑀺 𑀯𑀺𑀬 𑀲𑀻𑀖𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀕𑀳𑁂𑀢𑁆𑀯𑀸 𑀔𑀦𑁆𑀥𑀁 𑀕𑀳𑁂𑀢𑁆𑀯𑀸 𑀲𑀻𑀲𑀁 𑀕𑀳𑁂𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀫𑀡𑀺𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀫𑀦𑁆𑀢𑀁 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀡𑁆𑀡𑀯𑀸𑀢𑀁 𑀤𑀢𑁆𑀯𑀸 𑀤𑀡𑁆𑀟𑀓𑁂𑀦 𑀧𑀳𑀝𑀫𑀢𑁆𑀢𑁂 𑀑𑀢𑀭𑀺𑀢𑁆𑀯𑀸 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀅𑀬𑀁 𑀆𑀕𑀢𑀯𑀺𑀲𑁄 𑀦 𑀖𑁄𑀭𑀯𑀺𑀲𑁄 𑀦𑀸𑀫. 𑀬𑀲𑁆𑀲 𑀧𑀦 𑀯𑀺𑀲𑀁 𑀲𑀡𑀺𑀓𑀁 𑀅𑀪𑀺𑀭𑀼𑀳𑀢𑀺, 𑀆𑀭𑀼𑀴𑁆𑀳𑀸𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀦 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀳𑁄𑀢𑀺 𑀉𑀤𑀓𑀲𑀧𑁆𑀧𑀸𑀤𑀻𑀦𑀁 𑀯𑀺𑀬, 𑀤𑁆𑀯𑀸𑀤𑀲𑀯𑀲𑁆𑀲𑀘𑁆𑀘𑀬𑁂𑀦𑀧𑀺 𑀓𑀡𑁆𑀡𑀯𑀺𑀤𑁆𑀥𑀔𑀦𑁆𑀥𑀧𑀺𑀝𑁆𑀞𑀺𑀓𑀸𑀤𑀻𑀲𑀼 𑀧𑀜𑁆𑀜𑀸𑀬𑀢𑀺, 𑀫𑀦𑁆𑀢𑀧𑀭𑀺𑀯𑀢𑁆𑀢𑀦𑀸𑀤𑀻𑀲𑀼 𑀘 𑀓𑀭𑀺𑀬𑀫𑀸𑀦𑁂𑀲𑀼 𑀲𑀻𑀖𑀁 𑀦 𑀑𑀢𑀭𑀢𑀺, 𑀅𑀬𑀁 𑀖𑁄𑀭𑀯𑀺𑀲𑁄 𑀦 𑀆𑀕𑀢𑀯𑀺𑀲𑁄 𑀦𑀸𑀫. 𑀬𑀲𑁆𑀲 𑀧𑀦 𑀯𑀺𑀲𑀁 𑀲𑀻𑀖𑀁 𑀅𑀪𑀺𑀭𑀼𑀳𑀢𑀺, 𑀦 𑀲𑀻𑀖𑀁 𑀑𑀢𑀭𑀢𑀺 𑀅𑀦𑁂𑀴𑀓𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀅𑀬𑀁 𑀆𑀕𑀢𑀯𑀺𑀲𑁄 𑀘 𑀖𑁄𑀭𑀯𑀺𑀲𑁄 𑀘. 𑀅𑀦𑁂𑀴𑀓𑀲𑀧𑁆𑀧𑁄 𑀦𑀸𑀫 𑀫𑀳𑀸𑀆𑀲𑀻𑀯𑀺𑀲𑁄. 𑀬𑀲𑁆𑀲 𑀯𑀺𑀲𑀁 𑀫𑀦𑁆𑀤𑀁 𑀳𑁄𑀢𑀺, 𑀑𑀳𑀸𑀭𑀺𑀬𑀫𑀸𑀦𑀫𑁆𑀧𑀺 𑀲𑀼𑀔𑁂𑀦𑁂𑀯 𑀑𑀢𑀭𑀢𑀺 𑀦𑀻𑀮𑀲𑀧𑁆𑀧𑀥𑀫𑀦𑀺𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀅𑀬𑀁 𑀦𑁂𑀯 𑀆𑀕𑀢𑀯𑀺𑀲𑁄 𑀦 𑀖𑁄𑀭𑀯𑀺𑀲𑁄. 𑀦𑀻𑀮𑀲𑀧𑁆𑀧𑁄 𑀦𑀸𑀫 𑀲𑀸𑀔𑀯𑀡𑁆𑀡𑁄 𑀭𑀼𑀓𑁆𑀔𑀕𑁆𑀕𑀸𑀤𑀻𑀲𑀼 𑀯𑀺𑀘𑀭𑀡𑀲𑀧𑁆𑀧𑁄.

𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀮𑀸𑀳𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.