(𑁭) 𑁨. 𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑁄

𑁧-𑁪. 𑀧𑀢𑁆𑀢𑀓𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁧-𑁬𑁪. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀬𑁂 𑀅𑀦𑀺𑀝𑁆𑀞𑀸 𑀦 𑀳𑁄𑀦𑁆𑀢𑀺, 𑀢𑁂 𑀇𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀦𑀺𑀝𑁆𑀞𑀧𑀝𑀺𑀓𑁆𑀔𑁂𑀧𑁂𑀦 𑀇𑀝𑁆𑀞𑀸’’𑀢𑀺. 𑀇𑀝𑁆𑀞𑀸𑀢𑀺 𑀘 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀢𑀼 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀕𑀯𑁂𑀲𑀺𑀢𑀫𑁆𑀧𑀺 𑀳𑀺 𑀇𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀫𑀦𑁂𑀢𑀺 𑀫𑀦𑀲𑁆𑀫𑀺𑀁. 𑀓𑀦𑁆𑀢𑀸𑀢𑀺 𑀯𑀸 𑀓𑀫𑀦𑀻𑀬𑀸, 𑀓𑀸𑀫𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀻𑀢𑀺 𑀇𑀝𑁆𑀞𑀪𑀸𑀯𑁂𑀦 𑀫𑀦𑀁 𑀯𑀟𑁆𑀠𑁂𑀦𑁆𑀢𑀺. 𑀓𑀫𑁆𑀫𑀲𑀸𑀥𑀦𑁄 𑀇𑀥 𑀪𑁄𑀕-𑀲𑀤𑁆𑀤𑁄𑀢𑀺 𑀆𑀳 ‘‘𑀪𑁄𑀕𑀸𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀸’’𑀢𑀺𑀆𑀤𑀺. 𑀥𑀫𑁆𑀫𑀽𑀧𑀖𑀸𑀢𑀁 𑀓𑀢𑁆𑀯𑀸 𑀓𑀼𑀲𑀮𑀥𑀫𑁆𑀫𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀉𑀧𑀦𑀺𑀚𑁆𑀛𑀸𑀬𑀻𑀬𑀦𑁆𑀢𑀻𑀢𑀺 𑀉𑀧𑀚𑁆𑀛𑀸𑀬𑀸𑀢𑀺 𑀆𑀳 ‘‘𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀧𑀦𑀺𑀚𑁆𑀛𑀸𑀬𑀺𑀢𑀩𑁆𑀩𑀢𑁆𑀢𑀸’’𑀢𑀺, 𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁂𑀳𑀻𑀢𑀺 𑀏𑀢𑁆𑀣 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀫𑀢𑁆𑀢𑀸 𑀦𑀸𑀢𑀺𑀤𑀴𑁆𑀳𑀫𑀺𑀢𑁆𑀢𑀸 𑀲𑀦𑁆𑀤𑀺𑀝𑁆𑀞𑀸, 𑀲𑀼𑀝𑁆𑀞𑀼 𑀪𑀢𑁆𑀢𑀸 𑀲𑀺𑀦𑁂𑀳𑀯𑀦𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑀸 𑀲𑀫𑁆𑀪𑀢𑁆𑀢𑀸.

𑀯𑀺𑀲𑀫𑀮𑁄𑀪𑀦𑁆𑀢𑀺 𑀩𑀮𑀯𑀮𑁄𑀪𑀁. 𑀲𑀼𑀔𑀺𑀢𑀦𑁆𑀢𑀺 𑀲𑀜𑁆𑀚𑀸𑀢𑀲𑀼𑀔𑀁. 𑀧𑀻𑀡𑀺𑀢𑀦𑁆𑀢𑀺 𑀥𑀸𑀢𑀁 𑀲𑀼𑀳𑀺𑀢𑀁. 𑀢𑀣𑀸𑀪𑀽𑀢𑁄 𑀧𑀦 𑀬𑀲𑁆𑀫𑀸 𑀩𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀩𑀮𑀲𑀫𑁆𑀧𑀦𑁆𑀦𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑁄𑀪𑀦𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀫𑁆𑀫𑁂 𑀭𑀢𑁄𑀢𑀺 𑀲𑀽𑀭𑀢𑁄 𑀉𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀲𑀼𑀲𑀻𑀮𑀪𑀸𑀯𑁄𑀢𑀺 𑀆𑀳 ‘‘𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀜𑁆𑀘 𑀲𑀼𑀲𑀻𑀮𑀢𑀸𑀬 𑀘 𑀦𑀺𑀯𑀺𑀝𑁆𑀞𑀸’’𑀢𑀺. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀏𑀓𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀦𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑀺𑀬𑀁 𑀤𑀫𑀦𑀸𑀤𑀺 𑀧𑀘𑁆𑀘𑁂𑀓𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀦 𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀏𑀓𑀚𑁆𑀛𑀁 𑀧𑀝𑀺𑀲𑀗𑁆𑀔𑀸𑀦𑀫𑀼𑀔𑁂𑀦 𑀧𑀚𑀳𑀦𑀢𑁄. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀏𑀓𑀁 𑀏𑀓𑀸𑀓𑀺𑀦𑀁 𑀅𑀢𑁆𑀢𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀏𑀓𑀁 𑀅𑀢𑁆𑀢𑀦𑁄𑀯 𑀅𑀢𑁆𑀢𑀪𑀸𑀯’’𑀦𑁆𑀢𑀺𑀆𑀤𑀺. 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀽𑀢𑀺 𑀙𑀓𑀸𑀫𑀲𑀕𑁆𑀕𑀲𑀗𑁆𑀔𑀸𑀢𑀸𑀲𑀼 𑀉𑀧𑀭𑀽𑀧𑀭𑀺𑀓𑀸𑀫𑀪𑀽𑀫𑀻𑀲𑀼. 𑀓𑀫𑁆𑀫𑀲𑁆𑀲 𑀨𑀮𑀁 𑀅𑀕𑁆𑀕𑀁 𑀦𑀸𑀫. 𑀢𑀁 𑀧𑀦𑁂𑀢𑁆𑀣 𑀉𑀘𑁆𑀘𑀕𑀸𑀫𑀻𑀢𑀺 𑀆𑀳 ‘‘𑀉𑀤𑁆𑀥𑀫𑀕𑁆𑀕𑀫𑀲𑁆𑀲𑀸’’𑀢𑀺. 𑀲𑀼𑀯𑀕𑁆𑀕𑁂 𑀦𑀺𑀬𑀼𑀢𑁆𑀢𑀸, 𑀲𑀼𑀯𑀕𑁆𑀕𑀧𑁆𑀧𑀬𑁄𑀚𑀦𑀸𑀢𑀺 𑀯𑀸 𑀲𑁄𑀯𑀕𑁆𑀕𑀺𑀓𑀸. 𑀤𑀲𑀦𑁆𑀦𑀁 𑀯𑀺𑀲𑁂𑀲𑀸𑀦𑀦𑁆𑀢𑀺 𑀤𑀺𑀩𑁆𑀩𑀆𑀬𑀼𑀯𑀡𑁆𑀡𑀬𑀲𑀲𑀼𑀔𑀆𑀥𑀺𑀧𑀢𑁂𑀬𑁆𑀬𑀸𑀦𑀜𑁆𑀘𑁂𑀯 𑀇𑀝𑁆𑀞𑀭𑀽𑀧𑀸𑀤𑀻𑀦𑀜𑁆𑀘 𑀨𑀮𑀯𑀺𑀲𑁂𑀲𑀸𑀦𑀁. 𑀯𑀡𑁆𑀡𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀓𑁄 𑀅𑀢𑁆𑀢𑀪𑀸𑀯𑀯𑀡𑁆𑀡𑁄 𑀕𑀳𑀺𑀢𑁄, 𑀭𑀽𑀧𑀕𑁆𑀕𑀳𑀡𑁂𑀦 𑀩𑀳𑀺𑀤𑁆𑀥𑀸 𑀭𑀽𑀧𑀸𑀭𑀫𑁆𑀫𑀡𑀁. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀢𑁆𑀢𑀓𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀧𑀫𑀺𑀦𑁄𑀢𑀺 𑀉𑀴𑀸𑀭𑀢𑀸𑀤𑀺𑀯𑀺𑀲𑁂𑀲𑀁 𑀏𑀢𑁂𑀦𑀸𑀢𑀺 𑀧𑀫𑀸𑀡𑀁, 𑀭𑀼𑀧𑀓𑀸𑀬𑁄 𑀧𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀭𑀽𑀧𑀧𑁆𑀧𑀫𑀸𑀡𑁄. 𑀢𑀢𑁄 𑀏𑀯 𑀭𑀽𑀧𑁂 𑀧𑀲𑀦𑁆𑀦𑁄𑀢𑀺 𑀭𑀽𑀧𑀧𑁆𑀧𑀲𑀦𑁆𑀦𑁄. 𑀖𑁄𑀲𑁄𑀢𑀺 𑀘𑁂𑀢𑁆𑀣 𑀣𑀼𑀢𑀺𑀖𑁄𑀲𑁄. 𑀮𑀽𑀔𑀦𑁆𑀢𑀺 𑀧𑀘𑁆𑀘𑀬𑀮𑀽𑀔𑀢𑀸. 𑀥𑀫𑁆𑀫𑀸𑀢𑀺 𑀲𑀻𑀮𑀸𑀤𑀬𑁄 𑀕𑀼𑀡𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑁄𑀳𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀭𑀺𑀡𑀸𑀳𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀸𑀭𑀺𑀧𑀽𑀭𑀺𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄.

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀭𑀯𑀡𑁆𑀡𑀦𑀸𑀬 𑀧𑀭𑀣𑁄𑀫𑀦𑀸𑀬 𑀧𑀭𑀧𑀲𑀁𑀲𑀦𑀸𑀬 𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄.

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀘𑀻𑀯𑀭𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀢𑁆𑀢𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀲𑁂𑀦𑀸𑀲𑀦𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀯𑀺𑀯𑀺𑀥𑀁 𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄.

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀲𑀫𑀸𑀥𑀺𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀜𑁆𑀜𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄’’𑀢𑀺 (𑀧𑀼. 𑀧. 𑁧𑁭𑁧-𑁧𑁭𑁨).

𑀢𑀢𑁆𑀣 𑀆𑀭𑁄𑀳𑀦𑁆𑀢𑀺 𑀉𑀘𑁆𑀘𑀢𑀁. 𑀲𑀸 𑀘 𑀔𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀫𑀸𑀡𑀬𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀭𑀺𑀡𑀸𑀳𑀦𑁆𑀢𑀺 𑀦𑀸𑀢𑀺𑀓𑀺𑀲𑀣𑀽𑀮𑀢𑀸𑀯𑀲𑁂𑀦 𑀧𑀻𑀡𑀢𑀁. 𑀲𑀡𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀼𑀲𑀡𑁆𑀞𑀺𑀢𑀢𑀁 𑀤𑀻𑀖𑀭𑀲𑁆𑀲𑀯𑀝𑁆𑀝𑀸𑀤𑀺𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀪𑀸𑀯𑀁. 𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀭𑀻𑀭𑀸𑀯𑀬𑀯𑀸𑀦𑀁 𑀧𑀭𑀺𑀧𑀼𑀡𑁆𑀡𑀢𑀁 𑀅𑀯𑀺𑀓𑀮𑀢𑀁. 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑁂 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀁 𑀧𑀫𑀸𑀡𑀪𑀸𑀯𑀁 𑀉𑀧𑀸𑀤𑀸𑀬. 𑀧𑀲𑀸𑀤𑀁 𑀚𑀦𑁂𑀢𑀻𑀢𑀺 𑀅𑀥𑀺𑀫𑁄𑀓𑁆𑀔𑀁 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺.

𑀧𑀭𑀯𑀡𑁆𑀡𑀦𑀸𑀬𑀸𑀢𑀺 ‘‘𑀅𑀲𑀼𑀓𑁄 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸’’𑀢𑀺 𑀧𑀭𑀲𑁆𑀲 𑀕𑀼𑀡𑀯𑀘𑀦𑁂𑀦. 𑀧𑀭𑀣𑁄𑀫𑀦𑀸𑀬𑀸𑀢𑀺 𑀧𑀭𑀫𑁆𑀫𑀼𑀔𑀸 𑀧𑀭𑀲𑁆𑀲 𑀲𑀺𑀮𑀸𑀖𑀼𑀧𑁆𑀧𑀸𑀤𑀓𑁂𑀦 𑀅𑀪𑀺𑀢𑁆𑀣𑀯𑀦𑁂𑀦 𑀧𑀭𑁂𑀦 𑀣𑀼𑀢𑀺𑀯𑀲𑁂𑀦, 𑀕𑀸𑀣𑀸𑀤𑀺𑀉𑀧𑀦𑀺𑀩𑀦𑁆𑀥𑀦𑁂𑀦 𑀯𑀼𑀢𑁆𑀢𑀸𑀬 𑀣𑁄𑀫𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀧𑀲𑀁𑀲𑀦𑀸𑀬𑀸𑀢𑀺 𑀧𑀭𑀫𑁆𑀫𑀼𑀔𑀸 𑀧𑀭𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦. 𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬𑀸𑀢𑀺 𑀧𑀭𑀫𑁆𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬 𑀧𑀭𑀫𑁆𑀧𑀭𑀸𑀬 𑀧𑀭𑀲𑁆𑀲 𑀓𑀺𑀢𑁆𑀢𑀦𑀲𑀤𑁆𑀤𑀲𑁆𑀲 𑀉𑀧𑀲𑀁𑀳𑀸𑀭𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀣𑀼𑀢𑀺𑀖𑁄𑀲𑁂.

𑀘𑀻𑀯𑀭𑀮𑀽𑀔𑀦𑁆𑀢𑀺 𑀣𑀽𑀮𑀚𑀺𑀡𑁆𑀡𑀩𑀳𑀼𑀢𑀼𑀦𑁆𑀦𑀓𑀢𑀸𑀤𑀺𑀘𑀻𑀯𑀭𑀲𑁆𑀲 𑀮𑀽𑀔𑀪𑀸𑀯𑀁. 𑀧𑀢𑁆𑀢𑀮𑀽𑀔𑀦𑁆𑀢𑀺 𑀅𑀦𑁂𑀓𑀕𑀦𑁆𑀣𑀺𑀓𑀸𑀳𑀝𑀢𑀸𑀤𑀺𑀧𑀢𑁆𑀢𑀲𑁆𑀲 𑀮𑀽𑀔𑀪𑀸𑀯𑀁. 𑀯𑀺𑀯𑀺𑀥𑀁 𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀦𑁆𑀢𑀺 𑀥𑀼𑀢𑀗𑁆𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀸𑀦𑀸𑀯𑀺𑀥𑀁 𑀤𑀼𑀓𑁆𑀓𑀭𑀘𑀭𑀺𑀬𑀁. 𑀲𑀻𑀮𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸𑀢𑀺 𑀲𑀻𑀮𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀯𑀺𑀲𑀼𑀤𑁆𑀥𑀁 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸, 𑀛𑀸𑀦𑀸𑀤𑀺𑀅𑀥𑀺𑀕𑀫𑀲𑀼𑀤𑁆𑀥𑀺𑀲𑀫𑀸𑀥𑀺𑀁 𑀯𑀸 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀁 𑀧𑀜𑁆𑀜𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀢𑀲𑁆𑀫𑀺𑀁 𑀘𑀢𑀼𑀧𑁆𑀧𑀫𑀸𑀡𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀩𑀼𑀤𑁆𑀥𑁂𑀲𑀼 𑀅𑀧𑁆𑀧𑀲𑀦𑁆𑀦𑀸 𑀫𑀦𑁆𑀤𑀸, 𑀧𑀲𑀦𑁆𑀦𑀸 𑀩𑀳𑀼𑀓𑀸. 𑀭𑀽𑀧𑀧𑁆𑀧𑀫𑀸𑀡𑀲𑁆𑀲 𑀳𑀺 𑀩𑀼𑀤𑁆𑀥𑀭𑀽𑀧𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑀁 𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀖𑁄𑀲𑀧𑁆𑀧𑀫𑀸𑀡𑀲𑁆𑀲 𑀩𑀼𑀤𑁆𑀥𑀸𑀦𑀁 𑀓𑀺𑀢𑁆𑀢𑀺𑀖𑁄𑀲𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑁄 𑀖𑁄𑀲𑁄 𑀦𑀸𑀫 𑀦𑀢𑁆𑀣𑀺. 𑀮𑀽𑀔𑀧𑁆𑀧𑀫𑀸𑀡𑀲𑁆𑀲 𑀓𑀸𑀲𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀫𑀳𑀸𑀭𑀳𑀸𑀦𑀺 𑀓𑀜𑁆𑀘𑀦𑀪𑀸𑀚𑀦𑀸𑀦𑀺 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂 𑀧𑀸𑀲𑀸𑀤𑀯𑀭𑁂 𑀧𑀳𑀸𑀬 𑀧𑀁𑀲𑀼𑀓𑀽𑀮𑀘𑀻𑀯𑀭𑀲𑁂𑀮𑀫𑀬𑀧𑀢𑁆𑀢𑀭𑀼𑀓𑁆𑀔𑀫𑀽𑀮𑀸𑀤𑀺𑀲𑁂𑀦𑀸𑀲𑀦𑀲𑁂𑀯𑀺𑀦𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀮𑀽𑀔𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑀁 𑀅𑀜𑁆𑀜𑀁 𑀮𑀽𑀔𑀁 𑀦𑀸𑀫 𑀦𑀢𑁆𑀣𑀺. 𑀥𑀫𑁆𑀫𑀧𑁆𑀧𑀫𑀸𑀡𑀲𑁆𑀲 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀲𑀸𑀥𑀸𑀭𑀡𑀲𑀻𑀮𑀸𑀤𑀺𑀕𑀼𑀡𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑁄 𑀅𑀜𑁆𑀜𑁄 𑀲𑀻𑀮𑀸𑀤𑀺𑀕𑀼𑀡𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀪𑀕𑀯𑀸 𑀇𑀫𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑀁 𑀫𑀼𑀝𑁆𑀞𑀺𑀦𑀸 𑀕𑀳𑁂𑀢𑁆𑀯𑀸 𑀯𑀺𑀬 𑀞𑀺𑀢𑁄𑀢𑀺.

𑀧𑀫𑀸𑀡𑀺𑀁𑀲𑀽𑀢𑀺 𑀧𑀫𑀸𑀡𑀁 𑀅𑀕𑁆𑀕𑀳𑁂𑀲𑀼𑀁. 𑀦𑀺𑀬𑀓𑀚𑁆𑀛𑀢𑁆𑀢𑁂 𑀢𑀲𑁆𑀲 𑀕𑀼𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀯𑀢𑁆𑀢𑀫𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀁 𑀦 𑀚𑀸𑀦𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀳𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀤𑀝𑁆𑀞𑀯𑀺𑀲𑀸𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀤𑀺𑀝𑁆𑀞𑀯𑀺𑀲𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀓𑀝𑁆𑀞𑀫𑀼𑀔𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀤𑀝𑁆𑀞𑀯𑀺𑀲𑁄, 𑀤𑀺𑀝𑁆𑀞𑀯𑀺𑀲𑁄, 𑀨𑀼𑀝𑁆𑀞𑀯𑀺𑀲𑁄, 𑀯𑀸𑀢𑀯𑀺𑀲𑁄𑀢𑀺 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑀺𑀲𑀯𑁂𑀕𑀯𑀺𑀓𑀸𑀭𑀯𑀲𑁂𑀦 𑀲𑁄𑀴𑀲 𑀯𑀼𑀢𑁆𑀢𑀸. 𑀢𑁂𑀲𑀼 𑀤𑀝𑁆𑀞𑀯𑀺𑀲𑀸𑀦𑀁𑀬𑁂𑀯 𑀇𑀥 𑀕𑀳𑀡𑀁, 𑀦 𑀇𑀢𑀭𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀳𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀅𑀝𑁆𑀞𑀫𑁂 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂𑀢𑀺 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀯𑀺𑀚𑀸𑀬𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑁂. 𑀧𑁄𑀢𑀓𑀦𑁆𑀢𑀺 𑀅𑀲𑁆𑀲𑀢𑀭𑀺𑀬𑀸 𑀧𑀼𑀢𑁆𑀢𑀁. ‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀻’’𑀢𑀺𑀆𑀤𑀺𑀕𑀸𑀣𑀸𑀬 𑀓𑀼𑀓𑁆𑀓𑀼𑀚𑀓𑁂𑀦𑁂𑀯 𑀧𑀢𑁆𑀢𑀯𑀝𑁆𑀝𑀺𑀧𑀲𑀯𑀲𑁆𑀲 𑀉𑀘𑁆𑀙𑀺𑀦𑁆𑀦𑀢𑁆𑀢𑀸 𑀨𑀮𑀼𑀧𑁆𑀧𑀢𑁆𑀢𑀺 𑀓𑀤𑀮𑀺𑀬𑀸 𑀧𑀭𑀸𑀪𑀯𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀻’’𑀢𑀺. 𑀓𑀼𑀓𑁆𑀓𑀼𑀚𑀓𑀁 𑀦𑀸𑀫 𑀓𑀤𑀮𑀺𑀬𑀸 𑀧𑀼𑀧𑁆𑀨𑀦𑀸𑀴𑀁. 𑀢𑀣𑀸 𑀨𑀮𑀧𑀸𑀓𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀑𑀲𑀥𑀻𑀦𑀁 ‘‘𑀨𑀮𑀁 𑀯𑁂𑀴𑀼𑀁 𑀦𑀴’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀬𑀣𑀸 𑀅𑀢𑁆𑀢𑀦𑁄 𑀨𑀮𑀁 𑀓𑀤𑀮𑀺𑀯𑁂𑀴𑀼𑀦𑀴𑁂 𑀯𑀺𑀦𑀸𑀲𑁂𑀢𑀺, 𑀕𑀩𑁆𑀪𑁄 𑀘 𑀅𑀲𑁆𑀲𑀢𑀭𑀺𑀁, 𑀏𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑀪𑀽𑀢𑁄 𑀲𑀓𑁆𑀓𑀸𑀭𑁄 𑀅𑀲𑀧𑁆𑀧𑀼𑀭𑀺𑀲𑀁 𑀯𑀺𑀦𑀸𑀲𑁂𑀢𑀻𑀢𑀺.

𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀧𑀤𑀳𑀢𑀺 𑀏𑀢𑁂𑀳𑀻𑀢𑀺 𑀧𑀥𑀸𑀦𑀸𑀦𑀺. 𑀉𑀢𑁆𑀢𑀫𑀯𑀻𑀭𑀺𑀬𑀸𑀦𑀺 𑀲𑁂𑀝𑁆𑀞𑀯𑀻𑀭𑀺𑀬𑀸𑀦𑀺 𑀯𑀺𑀲𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄. 𑀓𑀺𑀮𑁂𑀲𑀸𑀦𑀁 𑀲𑀁𑀯𑀭𑀢𑁆𑀣𑀸𑀬𑀸𑀢𑀺 𑀬𑀣𑀸 𑀅𑀪𑀺𑀚𑁆𑀛𑀸𑀤𑀬𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑁂𑀦 𑀓𑀺𑀮𑁂𑀲𑀸𑀦𑀁 𑀲𑀁𑀯𑀭𑀡𑀢𑁆𑀣𑀸𑀬. 𑀧𑀚𑀳𑀦𑀢𑁆𑀣𑀸𑀬𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀦𑁄𑀤𑀦𑀢𑁆𑀣𑀸𑀬. 𑀧𑀥𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀧𑀚𑀳𑀦𑀲𑁆𑀲 𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀩𑁆𑀭𑀽𑀳𑀦𑀢𑁆𑀣𑀸𑀬𑀸𑀢𑀺 𑀩𑁄𑀚𑁆𑀛𑀗𑁆𑀕𑀲𑀗𑁆𑀔𑀸𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀟𑁆𑀠𑀦𑀢𑁆𑀣𑀸𑀬. 𑀧𑀥𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑀟𑁆𑀠𑀦𑀲𑁆𑀲 𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁.

𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀯𑀺𑀲𑀫𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁. 𑀢𑁂𑀦𑀸𑀳 ‘‘𑀯𑀺𑀲𑀫𑀸 𑀳𑀼𑀢𑁆𑀯𑀸’’𑀢𑀺. 𑀅𑀲𑀫𑀬𑁂𑀦𑀸𑀢𑀺 𑀅𑀓𑀸𑀮𑁂. 𑀪𑀼𑀫𑁆𑀫𑀢𑁆𑀣𑁂 𑀳𑁂𑀢𑀁 𑀓𑀭𑀡𑀯𑀘𑀦𑀁. 𑀧𑀓𑀝𑁆𑀞𑀁 𑀧𑀥𑀸𑀦𑀁 𑀅𑀜𑁆𑀚𑀲𑀁 𑀏𑀢𑁂𑀲𑀦𑁆𑀢𑀺 𑀧𑀜𑁆𑀚𑀲𑀸, 𑀅𑀜𑁆𑀚𑀲𑀁 𑀧𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺 𑀯𑀸 𑀧𑀜𑁆𑀚𑀲𑀸, 𑀧𑀓𑀢𑀺𑀫𑀕𑁆𑀕𑀕𑀸𑀫𑀺𑀦𑁄. 𑀦 𑀧𑀜𑁆𑀚𑀲𑀸 𑀅𑀧𑀜𑁆𑀚𑀲𑀸, 𑀅𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸. 𑀢𑁂 𑀧𑀦 𑀬𑀲𑁆𑀫𑀸 𑀫𑀕𑁆𑀕𑀢𑁄 𑀅𑀧𑀕𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀢𑁄 𑀅𑀧𑀕𑀢𑀸’’𑀢𑀺𑀆𑀤𑀺.

𑀕𑀸𑀣𑀸𑀲𑀼 𑀧𑀦 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀼𑀦𑁆𑀦𑀁 𑀘𑁂 𑀢𑀭𑀫𑀸𑀦𑀸𑀦𑀦𑁆𑀢𑀺 𑀕𑀸𑀯𑀻𑀲𑀼 𑀫𑀳𑁄𑀖𑀁 𑀢𑀭𑀦𑁆𑀢𑀻𑀲𑀼. 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄𑀢𑀺 𑀬𑀤𑀺 𑀬𑀽𑀣𑀧𑀢𑀺 𑀉𑀲𑀪𑁄 𑀓𑀼𑀝𑀺𑀮𑀁 𑀕𑀘𑁆𑀙𑀢𑀺. 𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀩𑁆𑀩𑀸 𑀢𑀸 𑀕𑀸𑀯𑀺𑀬𑁄 𑀓𑀼𑀝𑀺𑀮𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀓𑀲𑁆𑀫𑀸? 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺 𑀢𑀲𑁆𑀲 𑀓𑀼𑀝𑀺𑀮𑀕𑀢𑀢𑁆𑀢𑀸. 𑀲𑁄 𑀳𑀺 𑀢𑀸𑀲𑀁 𑀧𑀘𑁆𑀘𑀬𑀺𑀓𑁄 𑀉𑀧𑀤𑁆𑀤𑀯𑀳𑀭𑁄 𑀘. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀘𑁂𑀢𑀁, 𑀏𑀯𑀫𑁂𑀯 𑀬𑁄 𑀫𑀦𑀼𑀲𑁆𑀲𑁂𑀲𑀼 𑀧𑀥𑀸𑀦𑀲𑀫𑁆𑀫𑀢𑁄, 𑀬𑀤𑀺 𑀲𑁄 𑀅𑀥𑀫𑁆𑀫𑀘𑀸𑀭𑀻 𑀲𑀺𑀬𑀸, 𑀬𑁂 𑀢𑀲𑁆𑀲 𑀅𑀦𑀼𑀚𑀻𑀯𑀺𑀦𑁄, 𑀲𑀩𑁆𑀩𑁂𑀧𑀺 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀲𑀸𑀫𑀺𑀲𑀫𑁆𑀧𑀤𑀸 𑀳𑀺 𑀧𑀓𑀢𑀺𑀲𑀫𑁆𑀧𑀤𑀁 𑀲𑀫𑁆𑀧𑀸𑀤𑁂𑀢𑀺. 𑀬𑀲𑁆𑀫𑀸 𑀏𑀢𑀤𑁂𑀯𑀁, 𑀢𑀲𑁆𑀫𑀸 𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

𑀅𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.