𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸𑀢𑀺 𑀯𑀸 𑀧𑀼𑀜𑁆𑀜𑀦𑀤𑀺𑀬𑁄. 𑀅𑀯𑀺𑀘𑁆𑀙𑁂𑀤𑁂𑀦 𑀦𑀺𑀘𑁆𑀘𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀦𑀺 𑀳𑀺 𑀧𑀼𑀜𑁆𑀜𑀸𑀦𑀺 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸’’𑀢𑀺 𑀯𑀼𑀢𑁆𑀢𑀸. 𑀅𑀧𑀭𑀺𑀫𑀺𑀢𑀦𑁆𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀅𑀧𑀭𑀺𑀫𑀺𑀢𑀁, 𑀬𑁄𑀚𑀦𑀯𑀲𑁂𑀦 𑀧𑀦𑀲𑁆𑀲 𑀧𑀭𑀺𑀫𑀸𑀡𑀁 𑀅𑀢𑁆𑀣𑀺. 𑀢𑀣𑀸 𑀳𑀺 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀉𑀧𑀭𑀺 𑀆𑀓𑀸𑀲𑁂𑀦 𑀧𑀭𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀞𑀺𑀢𑁂𑀳𑀺 𑀤𑀻𑀧𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑁄𑀚𑀦𑀢𑁄 𑀲𑀓𑁆𑀓𑀸 𑀧𑀫𑀸𑀡𑀁 𑀓𑀸𑀢𑀼𑀁. 𑀪𑁂𑀭𑀯𑀸𑀭𑀫𑁆𑀫𑀡𑁂𑀳𑀻𑀢𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑁂𑀳𑀺 𑀪𑁂𑀭𑀯𑀸𑀭𑀫𑁆𑀫𑀡𑁂𑀳𑀺. 𑀢𑀣𑀸 𑀳𑀺 𑀢𑀁 𑀫𑀳𑀸𑀲𑀭𑀻𑀭𑀫𑀘𑁆𑀙𑀓𑀼𑀫𑁆𑀪𑀻𑀮𑀬𑀓𑁆𑀔𑀭𑀓𑁆𑀔𑀲𑀫𑀳𑀸𑀦𑀸𑀕𑀤𑀸𑀦𑀯𑀸𑀤𑀻𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀯𑀴𑀯𑀸𑀫𑀼𑀔𑀧𑀸𑀢𑀸𑀮𑀸𑀤𑀻𑀦𑀁 𑀅𑀯𑀺𑀜𑁆𑀜𑀸𑀡𑀓𑀸𑀦𑀜𑁆𑀘 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 ‘‘𑀩𑀳𑀼𑀪𑁂𑀭𑀯’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.