(𑁬) 𑁧. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸𑀢𑀺 𑀯𑀸 𑀧𑀼𑀜𑁆𑀜𑀦𑀤𑀺𑀬𑁄. 𑀅𑀯𑀺𑀘𑁆𑀙𑁂𑀤𑁂𑀦 𑀦𑀺𑀘𑁆𑀘𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀦𑀺 𑀳𑀺 𑀧𑀼𑀜𑁆𑀜𑀸𑀦𑀺 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸’’𑀢𑀺 𑀯𑀼𑀢𑁆𑀢𑀸. 𑀅𑀧𑀭𑀺𑀫𑀺𑀢𑀦𑁆𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀅𑀧𑀭𑀺𑀫𑀺𑀢𑀁, 𑀬𑁄𑀚𑀦𑀯𑀲𑁂𑀦 𑀧𑀦𑀲𑁆𑀲 𑀧𑀭𑀺𑀫𑀸𑀡𑀁 𑀅𑀢𑁆𑀣𑀺. 𑀢𑀣𑀸 𑀳𑀺 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀉𑀧𑀭𑀺 𑀆𑀓𑀸𑀲𑁂𑀦 𑀧𑀭𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀞𑀺𑀢𑁂𑀳𑀺 𑀤𑀻𑀧𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑁄𑀚𑀦𑀢𑁄 𑀲𑀓𑁆𑀓𑀸 𑀧𑀫𑀸𑀡𑀁 𑀓𑀸𑀢𑀼𑀁. 𑀪𑁂𑀭𑀯𑀸𑀭𑀫𑁆𑀫𑀡𑁂𑀳𑀻𑀢𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑁂𑀳𑀺 𑀪𑁂𑀭𑀯𑀸𑀭𑀫𑁆𑀫𑀡𑁂𑀳𑀺. 𑀢𑀣𑀸 𑀳𑀺 𑀢𑀁 𑀫𑀳𑀸𑀲𑀭𑀻𑀭𑀫𑀘𑁆𑀙𑀓𑀼𑀫𑁆𑀪𑀻𑀮𑀬𑀓𑁆𑀔𑀭𑀓𑁆𑀔𑀲𑀫𑀳𑀸𑀦𑀸𑀕𑀤𑀸𑀦𑀯𑀸𑀤𑀻𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀯𑀴𑀯𑀸𑀫𑀼𑀔𑀧𑀸𑀢𑀸𑀮𑀸𑀤𑀻𑀦𑀁 𑀅𑀯𑀺𑀜𑁆𑀜𑀸𑀡𑀓𑀸𑀦𑀜𑁆𑀘 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 ‘‘𑀩𑀳𑀼𑀪𑁂𑀭𑀯’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀕𑁆𑀕𑁂𑀦𑀸𑀕𑀢𑀸 𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸.

𑀤𑀼𑀢𑀺𑀬𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀧𑀞𑀫𑀲𑀁𑀯𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁩-𑁫𑁪. 𑀢𑀢𑀺𑀬𑁂 𑀬𑀣𑀸𑀓𑀫𑁆𑀫𑀁 𑀢𑀸 𑀢𑀸 𑀕𑀢𑀺𑀬𑁄 𑀅𑀭𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀭𑀺𑀬𑀸, 𑀲𑀢𑁆𑀢𑀸. 𑀇𑀫𑁂 𑀧𑀦 𑀓𑀼𑀘𑁆𑀙𑀺𑀢𑀸 𑀅𑀭𑀺𑀬𑀸𑀢𑀺 𑀓𑀤𑀭𑀺𑀬𑀸. 𑀣𑀤𑁆𑀥𑀫𑀘𑁆𑀙𑀭𑀺𑀦𑁄, 𑀣𑀤𑁆𑀥𑁂𑀦 𑀫𑀘𑁆𑀙𑀭𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀣𑀤𑁆𑀥𑀫𑀘𑁆𑀙𑀭𑀺𑀬𑀲𑀤𑀺𑀲𑀜𑁆𑀳𑀺 𑀓𑀼𑀘𑁆𑀙𑀺𑀢𑀁 𑀲𑀩𑁆𑀩𑀤𑀸 𑀦𑀺𑀳𑀻𑀦𑀁 𑀦𑀢𑁆𑀣𑀺 𑀲𑀩𑁆𑀩𑀕𑀼𑀡𑀸𑀦𑀁 𑀆𑀤𑀺𑀪𑀽𑀢𑀲𑁆𑀲 𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀪𑀽𑀢𑀲𑁆𑀲 𑀤𑀸𑀦𑀲𑁆𑀲 𑀦𑀺𑀲𑁂𑀥𑀦𑀢𑁄. 𑀢𑁂𑀦𑀸𑀳 ‘‘𑀓𑀤𑀭𑀺𑀬𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀦𑁄’’𑀢𑀺. 𑀏𑀓𑀘𑁆𑀘𑁄 𑀳𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀪𑀺𑀓𑁆𑀔𑀽 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸𑀧𑀺 𑀦 𑀯𑀦𑁆𑀤𑀢𑀺. 𑀅𑀜𑁆𑀜𑀢𑁆𑀣 𑀕𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀫𑀥𑀼𑀭𑀧𑁆𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺 ‘‘𑀓𑀺𑀁, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀦𑀸𑀕𑀘𑁆𑀙𑀣, 𑀲𑀫𑁆𑀧𑀦𑁆𑀦𑁄 𑀧𑀤𑁂𑀲𑁄, 𑀧𑀝𑀺𑀩𑀮𑀸𑀳𑀁 𑀅𑀬𑁆𑀬𑀸𑀦𑀁 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀁 𑀓𑀸𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀼 ‘‘𑀲𑀤𑁆𑀥𑁄 𑀅𑀬𑀁 𑀉𑀧𑀸𑀲𑀓𑁄’’𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀣𑁂𑀓𑁄 𑀣𑁂𑀭𑁄 𑀢𑀲𑁆𑀲 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑁂𑀦 𑀯𑀸 𑀕𑀘𑁆𑀙𑀢𑀺, 𑀖𑀭𑀁 𑀯𑀸 𑀧𑀯𑀺𑀲𑀢𑀺. 𑀲𑀘𑁂𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀢𑀺, 𑀳𑀢𑁆𑀣𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀁 𑀤𑁂𑀣, 𑀅𑀳𑀁 𑀏𑀓𑁂𑀦 𑀓𑀫𑁆𑀫𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀧𑀓𑁆𑀓𑀫𑀢𑀺. 𑀣𑁂𑀭𑁄 𑀲𑀓𑀮𑀕𑀸𑀫𑀁 𑀘𑀭𑀺𑀢𑁆𑀯𑀸 𑀢𑀼𑀘𑁆𑀙𑀧𑀢𑁆𑀢𑁄𑀯 𑀦𑀺𑀓𑁆𑀔𑀫𑀢𑀺. 𑀇𑀤𑀁 𑀢𑀸𑀯 𑀫𑀼𑀤𑀼𑀫𑀘𑁆𑀙𑀭𑀺𑀬𑀁 𑀦𑀸𑀫. 𑀬𑁂𑀦 𑀅𑀤𑀸𑀬𑀓𑁄𑀧𑀺 𑀤𑀸𑀬𑀓𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀇𑀥 𑀧𑀦 𑀣𑀤𑁆𑀥𑀫𑀘𑁆𑀙𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀁. 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀽𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂𑀲𑀼 ‘‘𑀣𑁂𑀭𑀸 𑀞𑀺𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀫𑀬𑁆𑀳𑀁 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑁄 𑀯𑀺𑀬 𑀔𑀸𑀡𑀼𑀓𑁄 𑀯𑀺𑀬 𑀘 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸𑀫𑀻𑀘𑀺𑀫𑁆𑀧𑀺 𑀦 𑀓𑀭𑁄𑀢𑀺, 𑀓𑀼𑀢𑁄 𑀤𑀸𑀦𑀁. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀣𑀤𑁆𑀥𑀫𑀘𑁆𑀙𑀭𑀺𑀦𑁄𑀢𑀺 𑀣𑀤𑁆𑀥𑁂𑀦 𑀫𑀘𑁆𑀙𑀭𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄’’𑀢𑀺. 𑀫𑀘𑁆𑀙𑀭𑀁 𑀫𑀘𑁆𑀙𑁂𑀭𑀁 𑀫𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁.

𑀧𑀭𑀺𑀪𑀸𑀲𑀓𑀸𑀢𑀺 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑁂 𑀞𑀺𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑀼𑀫𑁆𑀳𑁂 𑀓𑀲𑀺𑀢𑁆𑀯𑀸 𑀆𑀕𑀢𑀸 𑀯𑀧𑀺𑀢𑁆𑀯𑀸 𑀮𑀸𑀬𑀺𑀢𑁆𑀯𑀸, 𑀫𑀬𑀁 𑀅𑀢𑁆𑀢𑀦𑁄𑀧𑀺 𑀦 𑀮𑀪𑀸𑀫, 𑀓𑀼𑀢𑁄 𑀢𑀼𑀫𑁆𑀳𑀸𑀓𑀁, 𑀲𑀻𑀖𑀁 𑀦𑀺𑀓𑁆𑀔𑀫𑀣𑀸’’𑀢𑀺𑀆𑀤𑀻𑀳𑀺 𑀲𑀦𑁆𑀢𑀚𑁆𑀚𑀓𑀸. 𑀬𑀸𑀘𑀓𑀸𑀦𑀁 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑁂 𑀞𑀺𑀢𑀸 𑀢𑀼𑀡𑁆𑀳𑀻 𑀳𑁄𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 ‘‘𑀪𑀺𑀓𑁆𑀔𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺 𑀦𑀸𑀫 𑀅𑀭𑀺𑀬𑀸𑀬 𑀬𑀸𑀘𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 (𑀫𑀺. 𑀧. 𑁪.𑁫.𑁯). 𑀢𑀢𑁆𑀭 𑀬𑁂 ‘‘𑀫𑀬𑀁 𑀧𑀘𑀸𑀫, 𑀇𑀫𑁂 𑀦 𑀧𑀘𑀦𑁆𑀢𑀺, 𑀧𑀘𑀫𑀸𑀦𑁂 𑀧𑀢𑁆𑀯𑀸 𑀅𑀮𑀪𑀦𑁆𑀢𑀸 𑀓𑀼𑀳𑀺𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀲𑀁𑀯𑀺𑀪𑀚𑀦𑁆𑀢𑀺, 𑀢𑁂 𑀯𑀤𑀜𑁆𑀜𑀽 𑀬𑀸𑀘𑀓𑀸𑀦𑀁 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺 𑀦𑀸𑀫 𑀜𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀭𑀡𑀢𑁄. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀲𑀁𑀯𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀲𑀫𑀚𑀻𑀯𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁫-𑁫𑁬. 𑀧𑀜𑁆𑀘𑀫𑁂 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀦𑁆𑀢𑀺 𑀦𑀓𑀼𑀮𑀫𑀸𑀢𑀸 𑀦𑀓𑀼𑀮𑀧𑀺𑀢𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀕𑀳𑀢𑁆𑀣𑀸𑀬. 𑀦𑀓𑀼𑀮𑀲𑁆𑀲 𑀤𑀸𑀭𑀓𑀲𑁆𑀲 𑀧𑀺𑀢𑀸 𑀦𑀓𑀼𑀮𑀧𑀺𑀢𑀸. 𑀦𑀓𑀼𑀮𑀫𑀸𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀙𑀝𑁆𑀞𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀲𑀫𑀚𑀻𑀯𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁭-𑁬𑁦. 𑀲𑀢𑁆𑀢𑀫𑁂 𑀆𑀬𑀼𑀪𑀸𑀕𑀧𑀝𑀺𑀮𑀸𑀪𑀺𑀦𑀻 𑀳𑁄𑀢𑀻𑀢𑀺 𑀆𑀬𑀼𑀓𑁄𑀝𑁆𑀞𑀸𑀲𑀲𑁆𑀲 𑀧𑀝𑀺𑀮𑀸𑀪𑀺𑀦𑀻 𑀳𑁄𑀢𑀺. 𑀢𑀺𑀯𑀺𑀥𑀮𑁄𑀓𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀁 𑀮𑁄𑀓𑀁. 𑀯𑀺𑀤𑀺𑀢𑀁 𑀓𑀢𑁆𑀯𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀮𑁄𑀓𑀯𑀺𑀤𑀽𑀦𑀦𑁆𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑁂𑀳𑀺 𑀧𑀲𑀢𑁆𑀣𑀸’’𑀢𑀺. 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.