𑁫. 𑀭𑁄𑀳𑀺𑀢𑀲𑁆𑀲𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬, 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀦𑀺𑀭𑀸𑀫𑀺𑀲𑁂𑀦 𑀲𑀼𑀔𑁂𑀦 𑀯𑀺𑀳𑀭𑀡𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘𑀢𑁆𑀢𑀸𑀭𑀺 𑀨𑀮𑀲𑀫𑀸𑀧𑀢𑁆𑀢𑀺𑀚𑁆𑀛𑀸𑀦𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀢𑁄 𑀅𑀧𑀭𑀪𑀸𑀕𑁂 𑀅𑀥𑀺𑀕𑀢𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀺 𑀘 𑀓𑀣𑀺𑀢𑀸𑀦𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀜𑁆𑀳𑀺 𑀭𑀽𑀧𑀕𑀢𑀲𑁆𑀲 𑀤𑀺𑀩𑁆𑀩𑀲𑁆𑀲 𑀇𑀢𑀭𑀲𑁆𑀲 𑀘 𑀤𑀲𑁆𑀲𑀦𑀝𑁆𑀞𑁂𑀦 𑀇𑀥 ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸 𑀲𑀽𑀭𑀺𑀬𑀤𑀻𑀧𑀘𑀦𑁆𑀤𑀫𑀡𑀺𑀉𑀓𑁆𑀓𑀸𑀯𑀺𑀚𑁆𑀚𑀼𑀮𑀢𑀸𑀤𑀻𑀦𑀁 𑀆𑀮𑁄𑀓𑁄 𑀤𑀺𑀯𑀸 𑀭𑀢𑁆𑀢𑀺𑀜𑁆𑀘 𑀉𑀧𑀮𑀤𑁆𑀥𑁄, 𑀬𑀣𑀸𑀮𑀤𑁆𑀥𑀯𑀲𑁂𑀦𑁂𑀯 𑀆𑀮𑁄𑀓𑀁 𑀫𑀦𑀲𑀺 𑀓𑀭𑁄𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑀺, 𑀢𑀣𑀸 𑀘 𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀬𑀣𑀸𑀲𑁆𑀲 𑀲𑀼𑀪𑀸𑀯𑀺𑀢𑀸𑀮𑁄𑀓𑀓𑀲𑀺𑀡𑀲𑁆𑀲 𑀯𑀺𑀬 𑀓𑀲𑀺𑀡𑀸𑀮𑁄𑀓𑁄 𑀬𑀣𑀺𑀘𑁆𑀙𑀓𑀁 𑀬𑀸𑀯𑀤𑀺𑀘𑁆𑀙𑀓𑀜𑁆𑀘 𑀲𑁄 𑀆𑀮𑁄𑀓𑁄 𑀭𑀢𑁆𑀢𑀺𑀬𑀁 𑀉𑀧𑀢𑀺𑀝𑁆𑀞𑀢𑀺, 𑀬𑁂𑀦 𑀢𑀢𑁆𑀣 𑀤𑀺𑀯𑀸𑀲𑀜𑁆𑀜𑀁 𑀞𑀧𑁂𑀢𑀺, 𑀤𑀺𑀯𑀸 𑀯𑀺𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺’’𑀦𑁆𑀢𑀺.

𑀬𑀣𑀸 𑀤𑀺𑀯𑀸 𑀆𑀮𑁄𑀓𑀲𑀜𑁆𑀜𑀸 𑀫𑀦𑀲𑀺 𑀓𑀢𑀸, 𑀢𑀣𑁂𑀯 𑀦𑀁 𑀭𑀢𑁆𑀢𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀬𑀣𑀸 𑀤𑀺𑀯𑀸 𑀤𑀺𑀝𑁆𑀞𑁄 𑀆𑀮𑁄𑀓𑁄, 𑀢𑀣𑁂𑀯 𑀢𑀁 𑀭𑀢𑁆𑀢𑀺𑀁 𑀫𑀦𑀲𑀺 𑀓𑀭𑁄𑀢𑀺. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀯𑀸𑀓𑁆𑀬𑁂. 𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸 𑀭𑀢𑁆𑀢𑀺𑀬𑀁 𑀘𑀦𑁆𑀤𑀸𑀮𑁄𑀓𑀸𑀤𑀺 𑀆𑀮𑁄𑀓𑁄 𑀤𑀺𑀝𑁆𑀞𑁄, 𑀏𑀯𑀫𑁂𑀯 𑀭𑀢𑁆𑀢𑀺𑀁 𑀤𑀺𑀝𑁆𑀞𑀸𑀓𑀸𑀭𑁂𑀦𑁂𑀯 𑀤𑀺𑀯𑀸 𑀢𑀁 𑀆𑀮𑁄𑀓𑀁 𑀫𑀦𑀲𑀺 𑀓𑀭𑁄𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸𑀢𑀺 𑀏𑀯𑀁 𑀅𑀧𑀺𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀣𑀺𑀦𑀫𑀺𑀤𑁆𑀥𑀸𑀧𑀺𑀥𑀸𑀦𑁂𑀦 𑀅𑀧𑀺𑀳𑀺𑀢𑀘𑀺𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀭𑀺𑀬𑁄𑀦𑀤𑁆𑀥𑁂𑀦𑀸𑀢𑀺 𑀲𑀫𑀦𑁆𑀢𑀢𑁄 𑀅𑀦𑀤𑁆𑀥𑁂𑀦 𑀅𑀲𑀜𑁆𑀙𑀸𑀤𑀺𑀢𑁂𑀦. 𑀓𑀺𑀜𑁆𑀘𑀸𑀧𑀻𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀆𑀮𑁄𑀓𑀲𑀤𑀺𑀲𑀁 𑀓𑀢𑀁 ‘‘𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸.

𑀲𑀢𑁆𑀢𑀝𑁆𑀞𑀸𑀦𑀺𑀓𑀲𑁆𑀲𑀸𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁪; 𑁨.𑁩𑁭𑁬; 𑀫. 𑀦𑀺. 𑁧.𑁧𑁦𑁯) 𑀯𑀼𑀢𑁆𑀢𑀲𑁆𑀲 𑀲𑀢𑁆𑀢𑀝𑁆𑀞𑀸𑀦𑀺𑀓𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀅𑀢𑁆𑀣𑀸𑀬. 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀸𑀭𑀫𑁆𑀫𑀡𑀢𑀸𑀬𑀸𑀢𑀺 𑀯𑀢𑁆𑀣𑀼𑀦𑁄 𑀆𑀭𑀫𑁆𑀫𑀡𑀲𑁆𑀲 𑀘 𑀬𑀸𑀣𑀸𑀯𑀢𑁄 𑀯𑀺𑀤𑀺𑀢𑀪𑀸𑀯𑁂𑀦. 𑀬𑀣𑀸 𑀳𑀺 𑀲𑀧𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑁂𑀦 𑀢𑀲𑁆𑀲 𑀆𑀲𑀬𑁂 𑀯𑀺𑀤𑀺𑀢𑁂 𑀲𑁄𑀧𑀺 𑀯𑀺𑀤𑀺𑀢𑁄 𑀕𑀳𑀺𑀢𑁄 𑀏𑀯 𑀘 𑀳𑁄𑀢𑀺 𑀫𑀦𑁆𑀢𑀸𑀕𑀤𑀩𑀮𑁂𑀦 𑀢𑀲𑁆𑀲 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸, 𑀏𑀯𑀁 𑀯𑁂𑀤𑀦𑀸𑀬 𑀆𑀲𑀬𑀪𑀽𑀢𑁂 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑁂 𑀘 𑀯𑀺𑀤𑀺𑀢𑁂 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀧𑀺 𑀯𑁂𑀤𑀦𑀸 𑀯𑀺𑀤𑀺𑀢𑀸 𑀕𑀳𑀺𑀢𑀸 𑀏𑀯 𑀳𑁄𑀢𑀺 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀢𑀲𑁆𑀲𑀸 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸. 𑀧𑀕𑁂𑀯 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀢𑀲𑁆𑀲 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀞𑀺𑀢𑀺𑀓𑁆𑀔𑀡𑁂𑀧𑀺 𑀪𑀗𑁆𑀕𑀓𑁆𑀔𑀡𑁂𑀧𑀺 𑀯𑁂𑀤𑀦𑀸 𑀯𑀺𑀤𑀺𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺 ‘‘𑀢𑀸 𑀯𑁂𑀤𑀦𑀸 𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀦 𑀓𑁂𑀯𑀮𑀜𑁆𑀘 𑀯𑁂𑀤𑀦𑀸 𑀏𑀯, 𑀇𑀥 𑀯𑀼𑀢𑁆𑀢𑀸 𑀲𑀜𑁆𑀜𑀸𑀤𑀬𑁄𑀧𑀺 𑀅𑀯𑀼𑀢𑁆𑀢𑀸 𑀘𑁂𑀢𑀦𑀸𑀤𑀬𑁄𑀧𑀺 𑀯𑀺𑀤𑀺𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀧𑀸𑀴𑀺𑀬𑀁 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀢𑀓𑁆𑀓𑀕𑁆𑀕𑀳𑀡𑀁. 𑀢𑁂𑀦 𑀅𑀦𑀯𑀲𑁂𑀲𑀢𑁄 𑀲𑀩𑁆𑀩𑀥𑀫𑁆𑀫𑀸𑀦𑀫𑁆𑀧𑀺 𑀉𑀧𑁆𑀧𑀸𑀤𑀸𑀤𑀺𑀢𑁄 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀧𑀺𑀘 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺, 𑀅𑀢𑁆𑀣𑀗𑁆𑀕𑀫𑁄 𑀯𑀺𑀤𑀺𑀢𑁄 𑀳𑁄𑀢𑀺. 𑀓𑀣𑀁 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀯𑀺𑀤𑀺𑀢𑁄 𑀳𑁄𑀢𑀺? 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀢𑀡𑁆𑀳𑀸𑀲𑀫𑀼𑀤𑀬𑀸 𑀓𑀫𑁆𑀫𑀲𑀫𑀼𑀤𑀬𑁄, 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑀁 𑀧𑀲𑁆𑀲𑀢𑀺. 𑀏𑀯𑀁 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀯𑀺𑀤𑀺𑀢𑁄 𑀳𑁄𑀢𑀺. 𑀓𑀣𑀁 𑀯𑁂𑀤𑀦𑀸𑀬 𑀉𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀔𑀬𑀢𑀼𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀪𑀬𑀢𑀼𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑀼𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀁 𑀯𑁂𑀤𑀦𑀸𑀬 𑀉𑀧𑀝𑁆𑀞𑀸𑀦𑀁 𑀯𑀺𑀤𑀺𑀢𑀁 𑀳𑁄𑀢𑀺. 𑀇𑀢𑀺 𑀔𑀬𑀢𑁄 𑀪𑀬𑀢𑁄 𑀲𑀼𑀜𑁆𑀜𑀢𑁄 𑀚𑀸𑀦𑀸𑀢𑀺. 𑀓𑀣𑀁 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄 𑀯𑀺𑀤𑀺𑀢𑁄 𑀳𑁄𑀢𑀺? 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄…𑀧𑁂… 𑀏𑀯𑀁 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄 𑀯𑀺𑀤𑀺𑀢𑁄 𑀳𑁄𑀢𑀺. 𑀇𑀫𑀺𑀦𑀸𑀧𑀺 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀅𑀦𑀯𑀲𑁂𑀲𑀢𑁄 𑀭𑀽𑀧𑀲𑁆𑀲 𑀲𑀭𑀽𑀧𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀢𑀲𑁆𑀲 𑀇𑀤𑀁 𑀭𑀽𑀧𑀦𑁆𑀢𑀺 𑀏𑀢𑁂𑀦 𑀲𑀸𑀥𑀸𑀭𑀡𑀢𑁄 𑀲𑀭𑀽𑀧𑀦𑀺𑀤𑀲𑁆𑀲𑀦𑀫𑀸𑀳, 𑀏𑀢𑁆𑀢𑀓𑀁 𑀭𑀽𑀧𑀦𑁆𑀢𑀺 𑀏𑀢𑁂𑀦 𑀅𑀦𑀯𑀲𑁂𑀲𑀢𑁄, 𑀦 𑀇𑀢𑁄 𑀧𑀭𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀁. 𑀇𑀢𑀺 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀯𑁂𑀤𑀦𑀸, 𑀏𑀢𑁆𑀢𑀓𑀸 𑀯𑁂𑀤𑀦𑀸, 𑀇𑀢𑁄 𑀧𑀭𑀁 𑀯𑁂𑀤𑀦𑀸 𑀦𑀢𑁆𑀣𑀺. 𑀅𑀬𑀁 𑀲𑀜𑁆𑀜𑀸…𑀧𑁂… 𑀇𑀫𑁂 𑀲𑀗𑁆𑀔𑀸𑀭𑀸…𑀧𑁂… 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀏𑀢𑁆𑀢𑀓𑀁 𑀯𑀺𑀜𑁆𑀜𑀸𑀡𑀁, 𑀇𑀢𑁄 𑀧𑀭𑀁 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀧𑀭𑁄𑀧𑀭𑀸𑀦𑀺. 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘. 𑀉𑀢𑁆𑀢𑀫𑀸𑀥𑀫𑀸𑀦𑀻𑀢𑀺 𑀧𑀭𑀢𑁆𑀢𑀪𑀸𑀯𑀲𑀓𑀢𑁆𑀢𑀪𑀸𑀯𑀸𑀤𑀻𑀦𑀺 𑀉𑀢𑁆𑀢𑀫𑀸𑀥𑀫𑀸𑀦𑀺. 𑀘𑀮𑀺𑀢𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁. 𑀅𑀦𑀻𑀖𑁄𑀢𑀺 𑀭𑀸𑀕𑀸𑀤𑀺𑀈𑀖𑀭𑀳𑀺𑀢𑁄. 𑀅𑀢𑀸𑀭𑀺 𑀲𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀅𑀭𑀳𑀸 𑀚𑀸𑀢𑀺𑀚𑀭𑀁 𑀅𑀢𑀭𑀺.

𑀲𑀫𑀸𑀥𑀺𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁪. 𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁨-𑁪𑁪. 𑀤𑀼𑀢𑀺𑀬𑁂 𑀏𑀢𑁂𑀲𑀁 𑀧𑀜𑁆𑀳𑀸𑀦𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀩𑁆𑀬𑀸𑀓𑀭𑀡𑀁 𑀚𑀸𑀦𑀸𑀢𑀻𑀢𑀺 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩𑀁. ‘‘𑀅𑀦𑀺𑀘𑁆𑀘𑀸 𑀦𑀸𑀫 𑀘𑀓𑁆𑀔𑀼’’𑀦𑁆𑀢𑀺 𑀧𑀼𑀝𑁆𑀞𑁂 𑀧𑀦 ‘‘𑀦 𑀓𑁂𑀯𑀮𑀁 𑀘𑀓𑁆𑀔𑀼𑀫𑁂𑀯, 𑀲𑁄𑀢𑀫𑁆𑀧𑀺 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀁. ‘‘𑀬𑀣𑀸 𑀘𑀓𑁆𑀔𑀼𑀁 𑀢𑀣𑀸 𑀲𑁄𑀢𑀁, 𑀬𑀣𑀸 𑀲𑁄𑀢𑀁 𑀢𑀣𑀸 𑀘𑀓𑁆𑀔𑀼’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀓𑁂𑀦𑀝𑁆𑀞𑁂𑀦 𑀧𑀼𑀘𑁆𑀙𑀲𑀻’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀲𑁆𑀲𑀦𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀳𑀻’’𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁. ‘‘𑀅𑀦𑀺𑀘𑁆𑀘𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀫𑀸’’𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁂𑀦 𑀧𑀦 ‘‘𑀅𑀩𑁆𑀬𑀸𑀓𑀢𑀫𑁂𑀢𑀁 𑀪𑀕𑀯𑀢𑀸’’𑀢𑀺 𑀞𑀧𑁂𑀢𑀩𑁆𑀩𑁄, 𑀏𑀲 𑀧𑀜𑁆𑀳𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄𑀢𑀺 𑀏𑀯𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀫𑀸𑀕𑀫𑁂𑀦𑀸𑀢𑀺 𑀅𑀢𑁆𑀣𑀲𑁆𑀲 𑀧𑀝𑀺𑀮𑀸𑀪𑁂𑀦 𑀮𑀤𑁆𑀥𑀩𑁆𑀩𑁂𑀦. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀬𑁄 𑀏𑀯 𑀅𑀪𑀺𑀲𑀫𑀬𑁄, 𑀅𑀪𑀺𑀫𑀼𑀔𑀪𑀸𑀯𑁂𑀦 𑀯𑀸 𑀲𑀫𑀬𑁄 𑀅𑀪𑀺𑀲𑀫𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁫-𑁪𑁬. 𑀧𑀜𑁆𑀘𑀫𑁂 (𑀲𑀁. 𑀦𑀺. 𑀝𑀻. 𑁧.𑁧.𑁧𑁦𑁭) 𑀏𑀓𑁄𑀓𑀸𑀲𑁂𑀢𑀺 𑀘𑀓𑁆𑀓𑀯𑀸𑀴𑀲𑁆𑀲 𑀧𑀭𑀺𑀬𑀦𑁆𑀢𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂. 𑀪𑀼𑀫𑁆𑀫𑀦𑁆𑀢𑀺 ‘‘𑀬𑀢𑁆𑀣𑀸’’𑀢𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁. 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁆𑀧𑀺 ‘‘𑀲𑁄 𑀮𑁄𑀓𑀲𑁆𑀲 𑀅𑀦𑁆𑀢𑁄’’𑀢𑀺 𑀯𑀘𑀦𑀢𑁄 𑀯𑀺𑀲𑀺𑀝𑁆𑀞𑀯𑀺𑀲𑀬𑀫𑁂𑀯 𑀳𑁄𑀢𑀺. ‘‘𑀦 𑀚𑀸𑀬𑀢𑀺, 𑀦 𑀫𑀻𑀬𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀘𑀯𑀢𑀺, 𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀅𑀧𑀭𑀸𑀧𑀭𑀁…𑀧𑁂… 𑀕𑀳𑀺𑀢’’𑀦𑁆𑀢𑀺. 𑀧𑀤𑀕𑀫𑀦𑁂𑀦𑀸𑀢𑀺 𑀧𑀤𑀲𑀸 𑀕𑀫𑀦𑁂𑀦. 𑀲𑀢𑁆𑀣𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀉𑀧𑀭𑀺 𑀲𑀩𑁆𑀩𑀸𑀦𑀺 𑀧𑀓𑀸𑀲𑁂𑀢𑀼𑀓𑀸𑀫𑁄. 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀳𑀺 𑀅𑀦𑁆𑀢𑁄 𑀦𑀺𑀩𑁆𑀩𑀸𑀦𑀁.

𑀤𑀴𑁆𑀳𑀁 𑀣𑀺𑀭𑀁 𑀥𑀦𑀼 𑀏𑀢𑀲𑁆𑀲𑀸𑀢𑀺 𑀤𑀴𑁆𑀳𑀥𑀦𑁆𑀯𑀸, 𑀲𑁄 𑀏𑀯 ‘‘𑀤𑀴𑁆𑀳𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀤𑀴𑁆𑀳𑀥𑀦𑀽’’𑀢𑀺. 𑀉𑀢𑁆𑀢𑀫𑀧𑁆𑀧𑀫𑀸𑀡𑀁 𑀦𑀸𑀫 𑀲𑀳𑀲𑁆𑀲𑀣𑀸𑀫𑀥𑀦𑀼. 𑀥𑀦𑀼𑀕𑁆𑀕𑀡𑁆𑀳𑀦𑀲𑀺𑀧𑁆𑀧𑀘𑀺𑀢𑁆𑀢𑀓𑀢𑀸𑀬 𑀥𑀦𑀼𑀕𑁆𑀕𑀳𑁄, 𑀦 𑀥𑀦𑀼𑀕𑁆𑀕𑀳𑀡𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀥𑀦𑀼𑀕𑁆𑀕𑀳𑁄𑀢𑀺 𑀥𑀦𑀼𑀆𑀘𑀭𑀺𑀬𑁄’’𑀢𑀺. ‘‘𑀥𑀦𑀼𑀕𑁆𑀕𑀳𑁄’’𑀢𑀺 𑀯𑀢𑁆𑀯𑀸 ‘‘𑀲𑀺𑀓𑁆𑀔𑀺𑀢𑁄’’𑀢𑀺 𑀯𑀼𑀢𑁆𑀢𑁂 𑀥𑀦𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀺𑀓𑁆𑀔𑀸 𑀘 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀺𑀓𑁆𑀔𑀦𑁆𑀢𑀲𑁆𑀲 𑀉𑀓𑁆𑀓𑀁𑀲𑀕𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀥𑀦𑀼𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁄’’𑀢𑀺. 𑀉𑀲𑀪𑀧𑁆𑀧𑀫𑀸𑀡𑁂𑀢𑀺 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄 𑀉𑀲𑀪𑀁, 𑀢𑀲𑁆𑀫𑀺𑀁 𑀉𑀲𑀪𑀧𑁆𑀧𑀫𑀸𑀡𑁂 𑀧𑀤𑁂𑀲𑁂. 𑀯𑀸𑀮𑀕𑁆𑀕𑀦𑁆𑀢𑀺 𑀯𑀸𑀮𑀓𑁄𑀝𑀺𑀁. 𑀓𑀢𑀳𑀢𑁆𑀣𑁄𑀢𑀺 𑀧𑀭𑀺𑀘𑀺𑀢𑀳𑀢𑁆𑀣𑁄. 𑀓𑀢𑀲𑀭𑀓𑁆𑀔𑁂𑀧𑁄𑀢𑀺 𑀣𑀺𑀭𑀮𑀓𑁆𑀔𑁂 𑀘 𑀘𑀮𑀮𑀓𑁆𑀔𑁂 𑀘 𑀧𑀭𑁂𑀲𑀁 𑀤𑀲𑁆𑀲𑀦𑀯𑀲𑁂𑀦 𑀲𑀭𑀓𑁆𑀔𑁂𑀧𑀲𑁆𑀲 𑀓𑀢𑀸𑀧𑀻. 𑀢𑁂𑀦𑀸𑀳 ‘‘𑀤𑀲𑁆𑀲𑀺𑀢𑀲𑀺𑀧𑁆𑀧𑁄’’𑀢𑀺, ‘‘𑀓𑀢𑀬𑁄𑀕𑁆𑀕𑁄’’𑀢𑀺 𑀓𑁂𑀘𑀺. 𑀅𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀲𑀦𑀁, 𑀓𑀡𑁆𑀟𑁄. 𑀢𑀸𑀮𑀘𑁆𑀙𑀸𑀤𑀺𑀦𑁆𑀢𑀺 𑀢𑀸𑀮𑀘𑁆𑀙𑀸𑀬𑀁. 𑀲𑀸 𑀧𑀦 𑀭𑀢𑀦𑀫𑀢𑁆𑀢𑀸 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀸.

𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸𑀢𑀺 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸. 𑀲𑀫𑀼𑀤𑁆𑀤𑀲𑀻𑀲𑁂𑀦 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀯𑀤𑀢𑀺. 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀧𑁆𑀧𑀧𑀜𑁆𑀘𑀢𑀦𑁆𑀢𑀺 𑀅𑀤𑀦𑁆𑀢𑀓𑀸𑀭𑀺𑀢𑀁. 𑀲𑀫𑁆𑀧𑀢𑁆𑀢𑁂𑀢𑀺 𑀢𑀸𑀤𑀺𑀲𑁂𑀦 𑀚𑀯𑁂𑀦 𑀕𑀘𑁆𑀙𑀦𑁆𑀢𑁂𑀦 𑀲𑀫𑁆𑀧𑀢𑁆𑀢𑁂. 𑀅𑀦𑁄𑀢𑀢𑁆𑀢𑁂𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀫𑁆𑀧𑀢𑁆𑀢𑁂’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄, 𑀢𑀣𑀸 ‘‘𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀢𑀤𑀸𑀢𑀺 𑀬𑀤𑀸 𑀲𑁄 𑀮𑁄𑀓𑀦𑁆𑀢𑀕𑀯𑁂𑀲𑀓𑁄 𑀅𑀳𑁄𑀲𑀺, 𑀢𑀤𑀸. 𑀤𑀻𑀖𑀸𑀬𑀼𑀓𑀓𑀸𑀮𑁄𑀢𑀺 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁄. 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲𑀸𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀏𑀓𑀯𑀘𑀦𑀁, 𑀘𑀓𑁆𑀓𑀯𑀸𑀴𑀮𑁄𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀺𑀧𑀼𑀩𑁆𑀩𑀧𑀭𑀺𑀘𑀬𑀲𑀺𑀤𑁆𑀥𑀸𑀬 𑀦𑀺𑀓𑀦𑁆𑀢𑀺𑀬𑀸.

𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂𑀢𑀺 𑀦 𑀭𑀽𑀧𑀥𑀫𑁆𑀫𑀫𑀢𑁆𑀢𑀓𑁂, 𑀅𑀣 𑀔𑁄 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑁂𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀺𑀢𑀧𑀸𑀧𑁄𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀲𑀁𑀓𑀺𑀮𑁂𑀲𑀥𑀫𑁆𑀫𑁄. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀼𑀯𑀺𑀤𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀼𑀯𑀺𑀤𑀽𑀭𑀯𑀺𑀤𑀽𑀭-𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀸𑀦𑀁𑀬𑁂𑀯 𑀏𑀓𑀢𑁆𑀣 𑀕𑀳𑀡𑀁 𑀇𑀥 𑀦𑀺𑀤𑁆𑀤𑁂𑀲𑁄 𑀤𑀽𑀭𑀸𑀲𑀦𑁆𑀦𑀪𑀸𑀯𑀲𑁆𑀲 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀢𑁆𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀤𑀽𑀭𑀪𑀸𑀯𑀲𑁆𑀲 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀦𑀸𑀲𑀦𑁆𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀆𑀳 ‘‘𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀦𑀸𑀲𑀦𑁆𑀦𑀸𑀦𑀺 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀼𑀯𑀺𑀤𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀯𑀸𑀓𑁆𑀓𑀭𑀡𑀘𑀸𑀢𑀼𑀭𑀺𑀬𑀢𑁄 𑀯𑀘𑀦𑀕𑀼𑀡𑀳𑁂𑀢𑀽𑀦𑀁 𑀧𑀽𑀭𑀺𑀬𑀸 𑀧𑁄𑀭𑀻, 𑀧𑁄𑀭𑀺𑀬𑀁 𑀪𑀯𑀸𑀢𑀺 𑀧𑁄𑀭𑀻, 𑀢𑀸𑀬 𑀧𑁄𑀭𑀺𑀬𑀸. 𑀢𑁂𑀦𑀸𑀳 ‘‘𑀧𑀭𑀺𑀧𑀼𑀡𑁆𑀡𑀯𑀸𑀘𑀸𑀬𑀸’’𑀢𑀺, 𑀅𑀓𑁆𑀔𑀭𑀧𑀤𑀧𑀭𑀺𑀧𑀼𑀡𑁆𑀡𑀸𑀬 𑀯𑀸𑀘𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀧𑀮𑀺𑀩𑀼𑀤𑁆𑀥𑀸𑀬𑀸𑀢𑀺 𑀧𑀺𑀢𑁆𑀢𑀸𑀤𑀻𑀳𑀺 𑀦 𑀯𑀺𑀩𑀤𑁆𑀥𑀸𑀬 𑀅𑀦𑀦𑀼𑀩𑀼𑀦𑁆𑀥𑀺𑀢𑀸𑀬. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀅𑀦𑁂𑀮𑀸𑀬 𑀅𑀕𑀮𑀸𑀬 𑀦𑀺𑀤𑁆𑀤𑁄𑀲𑀸𑀬 𑀅𑀕𑀴𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬 𑀘. 𑀣𑁂𑀭𑀲𑁆𑀲 𑀳𑀺 𑀓𑀣𑀬𑀢𑁄 𑀧𑀤𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀦 𑀧𑀭𑀺𑀳𑀸𑀬𑀢𑀺. 𑀢𑁂𑀦𑀸𑀳 ‘‘𑀅𑀦𑁂𑀮𑀕𑀮𑀸𑀬𑀸𑀢𑀺 𑀦𑀺𑀤𑁆𑀤𑁄𑀲𑀸𑀬 𑀘𑁂𑀯 𑀅𑀕𑀴𑀺𑀢𑀸𑀬 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀤𑁆𑀤𑁄𑀲𑀸𑀬𑀸𑀢𑀺 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀯𑀺𑀕𑀢𑀤𑁄𑀲𑀸𑀬. 𑀅𑀧𑀢𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬𑀸𑀢𑀺 𑀅𑀯𑀺𑀭𑀳𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬. 𑀅𑀣 𑀯𑀸 𑀅𑀦𑁂𑀮𑀕𑀮𑀸𑀬𑀸𑀢𑀺 𑀦 𑀏𑀮𑀁 𑀤𑁄𑀲𑀁 𑀕𑀮𑀢𑀻𑀢𑀺 𑀅𑀦𑁂𑀮𑀕𑀮𑀸. 𑀅𑀯𑀺𑀘𑁆𑀙𑀺𑀦𑁆𑀦𑀯𑀸𑀘𑀸𑀬 𑀅𑀦𑁂𑀮𑀕𑀮𑀸𑀬 𑀬𑀣𑀸 𑀤𑀦𑁆𑀥𑀫𑀦𑀼𑀲𑁆𑀲𑀸 𑀫𑀼𑀔𑁂𑀦 𑀔𑁂𑀴𑀁 𑀕𑀴𑀦𑁆𑀢𑁂𑀦 𑀯𑀸𑀘𑀁 𑀪𑀸𑀲𑀦𑁆𑀢𑀺, 𑀦 𑀏𑀯𑀭𑀽𑀧𑀸𑀬. 𑀅𑀣 𑀔𑁄 𑀦𑀺𑀤𑁆𑀤𑁄𑀲𑀸𑀬 𑀯𑀺𑀲𑀤𑀯𑀸𑀘𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀧𑁆𑀧𑀓𑀸𑀲𑀺𑀦𑀻 𑀯𑀸𑀘𑀸 𑀦 𑀓𑀤𑀸𑀘𑀺 𑀯𑀺𑀯𑀝𑁆𑀝𑀫𑀼𑀢𑁆𑀢𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑀸𑀬𑀸’’𑀢𑀺, 𑀯𑀺𑀯𑀝𑁆𑀝𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀧𑁆𑀧𑀓𑀸𑀲𑀺𑀦𑀻 𑀳𑀺 𑀯𑀸𑀘𑀸 𑀯𑀺𑀯𑀝𑁆𑀝𑀁 𑀧𑀭𑀺𑀘𑁆𑀙𑀺𑀚𑁆𑀚 𑀆𑀧𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀩𑁆𑀩𑀥𑀫𑁆𑀫𑁂𑀳𑀺 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀘 𑀥𑀚𑁄 𑀦𑀸𑀫𑀸𑀢𑀺 𑀆𑀳 ‘‘𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦𑀸’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀧𑀮𑁆𑀮𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀅𑀦𑀺𑀘𑁆𑀘𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀭𑀻𑀢𑀢𑁄 𑀅𑀲𑀦𑁆𑀢𑀻𑀢𑀺 𑀯𑀺𑀧𑀮𑁆𑀮𑀸𑀲𑀸, 𑀲𑀜𑁆𑀜𑀸𑀬 𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀇𑀢𑀭𑁂𑀲𑀼𑀧𑀺 𑀢𑀻𑀲𑀼 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁂 𑀘𑀢𑀼𑀦𑁆𑀦𑀁 𑀯𑀢𑁆𑀣𑀽𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀝𑁆𑀞 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀓𑀸 𑀳𑁄𑀦𑁆𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀯𑀺𑀧𑀮𑁆𑀮𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑁂𑀦𑀸𑀢𑀺 𑀫𑀮𑀻𑀦𑀪𑀸𑀯𑀓𑀭𑀡𑁂𑀦. 𑀧𑀜𑁆𑀘𑀯𑀺𑀥𑀸𑀬 𑀲𑀼𑀭𑀸𑀬 𑀘𑀢𑀼𑀩𑁆𑀩𑀺𑀥𑀲𑁆𑀲 𑀘 𑀫𑁂𑀭𑀬𑀲𑁆𑀲𑀸𑀢𑀺 𑀏𑀢𑁆𑀣 𑀧𑀽𑀯𑀲𑀼𑀭𑀸, 𑀧𑀺𑀝𑁆𑀞𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘 𑀲𑀼𑀭𑀸. 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀕𑀼𑀴𑀸𑀲𑀯𑁄𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑀼𑀩𑁆𑀩𑀺𑀥𑀁 𑀫𑁂𑀭𑀬𑀁 𑀦𑀸𑀫. 𑀢𑀢𑁆𑀣 𑀧𑀽𑀯𑁂 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀚𑁆𑀚𑀁 𑀉𑀤𑀓𑀁 𑀤𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑀢𑀸 𑀧𑀽𑀯𑀲𑀼𑀭𑀸. 𑀏𑀯𑀁 𑀲𑁂𑀲𑀲𑀼𑀭𑀸𑀧𑀺. 𑀓𑀺𑀡𑁆𑀡𑀸𑀢𑀺 𑀧𑀦 𑀢𑀲𑁆𑀲𑀸 𑀲𑀼𑀭𑀸𑀬 𑀩𑀻𑀚𑀁 𑀯𑀼𑀘𑁆𑀘𑀢𑀺. 𑀬𑁂 𑀲𑀼𑀭𑀸 ‘‘𑀫𑁄𑀤𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸. 𑀥𑀸𑀢𑀓𑀺𑀆𑀲𑀯𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀲𑀁𑀬𑁄𑀚𑀺𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸.𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀧𑀼𑀧𑁆𑀨𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀧𑀼𑀧𑁆𑀨𑀸𑀲𑀯𑁄. 𑀧𑀦𑀲𑀸𑀤𑀺𑀨𑀮𑀭𑀲𑁄 𑀨𑀮𑀸𑀲𑀯𑁄. 𑀫𑀼𑀤𑁆𑀤𑀺𑀓𑀸𑀭𑀲𑁄 𑀫𑀥𑁆𑀯𑀸𑀲𑀯𑁄. 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀲𑀯𑁄.

𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑁄𑀳𑀺𑀢𑀲𑁆𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁