𑁪. 𑀘𑀓𑁆𑀓𑀯𑀕𑁆𑀕𑁄

𑁧. 𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀻𑀢𑀺 𑀏𑀢𑁆𑀣 𑀘𑀓𑁆𑀓𑀁 𑀦𑀸𑀫 𑀤𑀸𑀭𑀼𑀘𑀓𑁆𑀓𑀁, 𑀭𑀢𑀦𑀘𑀓𑁆𑀓𑀁, 𑀥𑀫𑁆𑀫𑀘𑀓𑁆𑀓𑀁, 𑀇𑀭𑀺𑀬𑀸𑀧𑀣𑀘𑀓𑁆𑀓𑀁, 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀦𑁆𑀢𑀺 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 ‘‘𑀬𑀁 𑀧𑀦𑀺𑀤𑀁, 𑀲𑀫𑁆𑀫, 𑀭𑀣𑀓𑀸𑀭𑀘𑀓𑁆𑀓𑀁 𑀙𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀁 𑀙𑀸𑀭𑀢𑁆𑀢𑀽𑀦𑁂𑀳𑀻’’𑀢𑀺 (𑀅. 𑀦𑀺. 𑁩.𑁧𑁫) 𑀇𑀤𑀁 𑀤𑀸𑀭𑀼𑀘𑀓𑁆𑀓𑀁. ‘‘𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀅𑀦𑀼𑀯𑀢𑁆𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁧𑁫) 𑀇𑀤𑀁 𑀭𑀢𑀦𑀘𑀓𑁆𑀓𑀁. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨; 𑀩𑀼. 𑀯𑀁. 𑁨𑁭.𑁧𑁭; 𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁦, 𑁧𑁦𑁩) 𑀇𑀤𑀁 𑀥𑀫𑁆𑀫𑀘𑀓𑁆𑀓𑀁. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯, 𑁧𑁦𑁯) 𑀇𑀤𑀁 𑀇𑀭𑀺𑀬𑀸𑀧𑀣𑀘𑀓𑁆𑀓𑀁. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀧𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀇𑀤𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁. 𑀇𑀥𑀸𑀧𑀺 𑀏𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀦𑀼𑀘𑁆𑀙𑀯𑀺𑀓𑁂 𑀤𑁂𑀲𑁂𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀤𑁂𑀲𑁂. 𑀲𑁂𑀯𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁. 𑀪𑀚𑀦𑀁 𑀪𑀢𑁆𑀢𑀺𑀯𑀲𑁂𑀦 𑀧𑀬𑀺𑀭𑀼𑀧𑀸𑀲𑀦𑀁. 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀞𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀬𑁄𑀦𑀺𑀲𑁄 𑀞𑀧𑀦𑀁. 𑀲𑀤𑁆𑀥𑀸𑀤𑀻𑀲𑀼 𑀦𑀺𑀯𑁂𑀲𑀦𑀦𑁆𑀢𑀺 𑀆𑀳 ‘‘𑀲𑀘𑁂’’𑀢𑀺𑀆𑀤𑀺. 𑀇𑀤𑀫𑁂𑀯 𑀘𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀇𑀤𑀫𑁂𑀯 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁 𑀏𑀯 𑀏𑀢𑁂𑀲𑀼 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀲𑀼 𑀧𑀫𑀸𑀡𑀪𑀽𑀢𑀁 𑀇𑀢𑀭𑁂𑀲𑀁 𑀓𑀸𑀭𑀡𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀲𑁄 𑀏𑀯 𑀘 𑀓𑀢𑀧𑀼𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀞𑀧𑁂𑀢𑀺 𑀅𑀓𑀢𑀧𑀼𑀜𑁆𑀜𑀲𑁆𑀲 𑀢𑀤𑀪𑀸𑀯𑀢𑁄.

𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀢𑀲𑁆𑀲 𑀤𑀸𑀦𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁 𑀧𑀢𑁆𑀢𑀘𑀻𑀯𑀭𑀸𑀤𑀺, 𑀕𑀺𑀳𑀺𑀦𑁄 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑀁 𑀯𑀢𑁆𑀣𑀸𑀯𑀼𑀥𑀬𑀸𑀦𑀲𑀬𑀦𑀸𑀤𑀺 𑀤𑀸𑀢𑀩𑁆𑀩𑀁. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀉𑀧𑀓𑀸𑀭𑀁. 𑀫𑀓𑁆𑀔𑁂𑀢𑁆𑀯𑀸 𑀦𑀸𑀲𑁂𑀢𑀺 𑀫𑀓𑁆𑀔𑀺𑀪𑀸𑀯𑁂 𑀞𑀢𑁆𑀯𑀸. 𑀢𑁂𑀮𑁂𑀦 𑀯𑀺𑀬 𑀫𑀓𑁆𑀔𑁂𑀢𑀻𑀢𑀺 𑀲𑀢𑀥𑁄𑀢𑀢𑁂𑀮𑁂𑀦 𑀫𑀓𑁆𑀔𑁂𑀢𑀺 𑀯𑀺𑀬. 𑀅𑀢𑁆𑀣𑀯𑀟𑁆𑀠𑀦𑀓𑀣𑀸𑀢𑀺 𑀳𑀺𑀢𑀸𑀯𑀳𑀓𑀣𑀸. 𑀓𑀣𑀸𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀧𑀭𑁂𑀲𑀁 𑀳𑀺𑀢𑀸𑀯𑀳𑁄 𑀓𑀸𑀬𑀧𑁆𑀧𑀬𑁄𑀕𑁄𑀧𑀺 𑀅𑀢𑁆𑀣𑀘𑀭𑀺𑀬𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀘𑀺𑀧𑁆𑀧𑀬𑁄𑀕𑀯𑀲𑁂𑀦𑁂𑀯 𑀅𑀢𑁆𑀣𑀘𑀭𑀺𑀬𑀸 𑀯𑀼𑀢𑁆𑀢𑀸. 𑀲𑀫𑀸𑀦𑀢𑁆𑀢𑀢𑀸𑀢𑀺 𑀲𑀤𑀺𑀲𑀪𑀸𑀯𑁄, 𑀲𑀫𑀸𑀦𑀝𑁆𑀞𑀸𑀦𑁂 𑀞𑀧𑀦𑀁, 𑀢𑀁 𑀧𑀦𑀲𑁆𑀲 𑀲𑀫𑀸𑀦𑀝𑁆𑀞𑀧𑀦𑀁 𑀅𑀢𑁆𑀢𑀲𑀤𑀺𑀲𑀢𑀸𑀓𑀭𑀡𑀫𑀼𑀔𑁂𑀦 𑀏𑀓𑀲𑀫𑁆𑀪𑁄𑀕𑀢𑀸. 𑀅𑀢𑁆𑀢𑀦𑁄 𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀁 𑀢𑀲𑁆𑀲 𑀘 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀢𑁂𑀦 𑀤𑀼𑀓𑁆𑀔𑁂𑀦 𑀅𑀢𑁆𑀢𑀦𑀸 𑀏𑀓𑀲𑀫𑁆𑀪𑁄𑀕𑀢𑀸𑀢𑀺 𑀆𑀳 ‘‘𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀪𑀸𑀯𑁄’’𑀢𑀺. 𑀲𑀸 𑀘 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸 𑀏𑀓𑀢𑁄 𑀦𑀺𑀲𑀚𑁆𑀚𑀸𑀤𑀺𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀸𑀲𑀦𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀚𑀸𑀢𑀺𑀬𑀸 𑀳𑀻𑀦𑁄 𑀪𑁄𑀕𑁂𑀦 𑀅𑀥𑀺𑀓𑁄 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑁄 𑀓𑀸𑀢𑀼𑀁 𑀚𑀸𑀢𑀺𑀬𑀸 𑀳𑀻𑀦𑀢𑁆𑀢𑀸. 𑀢𑀲𑁆𑀲 𑀢𑀣𑀸 𑀅𑀓𑀭𑀺𑀬𑀫𑀸𑀦𑁂 𑀘 𑀲𑁄 𑀓𑀼𑀚𑁆𑀛𑀢𑀺 𑀪𑁄𑀕𑁂𑀦 𑀅𑀥𑀺𑀓𑀢𑁆𑀢𑀸, 𑀢𑀲𑁆𑀫𑀸 𑀲𑁄 𑀤𑀼𑀲𑁆𑀲𑀗𑁆𑀕𑀳𑁄. 𑀪𑁄𑀕𑁂𑀦 𑀳𑀻𑀦𑁄 𑀚𑀸𑀢𑀺𑀬𑀸 𑀅𑀥𑀺𑀓𑁄𑀧𑀺 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀲𑁄 𑀳𑀺 ‘‘𑀅𑀳𑀁 𑀚𑀸𑀢𑀺𑀫𑀸’’𑀢𑀺 𑀪𑁄𑀕𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺 𑀏𑀓𑀧𑀭𑀺𑀪𑁄𑀕𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀓𑀭𑀺𑀬𑀫𑀸𑀦𑁂 𑀓𑀼𑀚𑁆𑀛𑀢𑀺. 𑀉𑀪𑁄𑀳𑀺𑀧𑀺 𑀳𑀻𑀦𑁄 𑀲𑀼𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑁄 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑀁 𑀇𑀘𑁆𑀙𑀢𑀺 𑀚𑀸𑀢𑀺𑀬𑀸 𑀳𑀻𑀦𑀪𑀸𑀯𑀢𑁄, 𑀦 𑀅𑀓𑀭𑀺𑀬𑀫𑀸𑀦𑁄 𑀓𑀼𑀚𑁆𑀛𑀢𑀺 𑀪𑁄𑀕𑁂𑀦 𑀳𑀻𑀦𑀪𑀸𑀯𑀢𑁄. 𑀉𑀪𑁄𑀳𑀺 𑀲𑀤𑀺𑀲𑁄𑀧𑀺 𑀲𑀼𑀲𑀗𑁆𑀕𑀳𑁄𑀬𑁂𑀯. 𑀲𑀤𑀺𑀲𑀪𑀸𑀯𑁂𑀦𑁂𑀯 𑀇𑀢𑀭𑁂𑀦 𑀲𑀳 𑀏𑀓𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀸𑀲𑀻𑀲𑀸𑀬, 𑀅𑀓𑀭𑀡𑁂 𑀘 𑀢𑀲𑁆𑀲 𑀓𑀼𑀚𑁆𑀛𑀦𑀲𑁆𑀲 𑀅𑀪𑀸𑀯𑀢𑁄. 𑀪𑀺𑀓𑁆𑀔𑀼 𑀤𑀼𑀲𑁆𑀲𑀻𑀮𑁄 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑀁 𑀓𑀸𑀢𑀼𑀁, 𑀅𑀓𑀭𑀺𑀬𑀫𑀸𑀦𑁂 𑀘 𑀓𑀼𑀚𑁆𑀛𑀢𑀺. 𑀲𑀻𑀮𑀯𑀸 𑀧𑀦 𑀲𑀼𑀲𑀗𑁆𑀕𑀳𑁄 𑀳𑁄𑀢𑀺. 𑀲𑀻𑀮𑀯𑀸 𑀳𑀺 𑀅𑀤𑀻𑀬𑀫𑀸𑀦𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀆𑀫𑀺𑀲𑁂 𑀅𑀓𑀭𑀺𑀬𑀫𑀸𑀦𑁂𑀧𑀺 𑀲𑀗𑁆𑀕𑀳𑁂 𑀦 𑀓𑀼𑀚𑁆𑀛𑀢𑀺, 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀅𑀓𑀭𑁄𑀦𑁆𑀢𑀫𑁆𑀧𑀺 𑀦 𑀧𑀸𑀧𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺 𑀧𑁂𑀲𑀮𑀪𑀸𑀯𑀢𑁄. 𑀢𑀢𑁄 𑀏𑀯 𑀧𑀭𑀺𑀪𑁄𑀕𑁄𑀧𑀺 𑀅𑀦𑁂𑀦 𑀲𑀤𑁆𑀥𑀺𑀁 𑀲𑀼𑀓𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀺𑀳𑀺 𑀘𑁂, 𑀉𑀪𑁄𑀳𑀺 𑀲𑀤𑀺𑀲𑁄. 𑀧𑀩𑁆𑀩𑀚𑀺𑀢𑁄 𑀘𑁂, 𑀲𑀻𑀮𑀯𑀸 𑀧𑀼𑀕𑁆𑀕𑀮𑁄. 𑀏𑀯𑀁 𑀲𑀫𑀸𑀦𑀢𑁆𑀢𑀢𑀸𑀬 𑀲𑀗𑁆𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀲𑁄 𑀲𑀘𑁂 𑀕𑀳𑀝𑁆𑀞𑀲𑁆𑀲 𑀚𑀸𑀢𑀺𑀬𑀸 𑀧𑀩𑁆𑀩𑀚𑀺𑀢𑀲𑁆𑀲 𑀲𑀻𑀮𑁂𑀦 𑀲𑀤𑀺𑀲𑁄 𑀳𑁄𑀢𑀺, 𑀢𑀲𑁆𑀲𑀸𑀬𑀁 𑀲𑀫𑀸𑀦𑀢𑁆𑀢𑀢𑀸 𑀓𑀸𑀢𑀩𑁆𑀩𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀗𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀲𑀻𑀳𑁄𑀢𑀺 𑀧𑀭𑀺𑀲𑁆𑀲𑀬𑀲𑀳𑀦𑀢𑁄 𑀧𑀝𑀺𑀧𑀓𑁆𑀔𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀫𑀺𑀕𑀸𑀥𑀺𑀧𑀢𑀺. 𑀘𑀢𑁆𑀢𑀸𑀭𑁄𑀢𑀺 𑀲𑀫𑀸𑀦𑁂𑀧𑀺 𑀲𑀻𑀳𑀚𑀸𑀢𑀺𑀪𑀸𑀯𑁂 𑀯𑀡𑁆𑀡𑀯𑀺𑀲𑁂𑀲𑀸𑀤𑀺𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑁂𑀦 𑀘𑀢𑁆𑀢𑀸𑀭𑁄 𑀲𑀻𑀳𑀸. 𑀢𑁂 𑀇𑀤𑀸𑀦𑀺 𑀦𑀸𑀫𑀢𑁄 𑀯𑀡𑁆𑀡𑀢𑁄 𑀆𑀳𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀲𑀻𑀳𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀺𑀡𑀲𑀻𑀳𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀺𑀡𑀪𑀓𑁆𑀔𑁄 𑀲𑀻𑀳𑁄 𑀢𑀺𑀡𑀲𑀻𑀳𑁄 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀲𑀸𑀓𑀧𑀢𑁆𑀣𑀺𑀯𑁄’’𑀢𑀺 (𑀧𑀸𑀡𑀺𑀦𑀺 𑁨.𑁧.𑁬𑁦). 𑀓𑀸𑀴𑀯𑀡𑁆𑀡𑀢𑀸𑀬 𑀓𑀸𑀴𑀲𑀻𑀳𑁄. 𑀢𑀣𑀸 𑀧𑀡𑁆𑀟𑀼𑀲𑀻𑀳𑁄. 𑀢𑁂𑀦𑀸𑀳 ‘‘𑀓𑀸𑀴𑀕𑀸𑀯𑀺𑀲𑀤𑀺𑀲𑁄, 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄’’𑀢𑀺 𑀘. 𑀭𑀢𑁆𑀢𑀓𑀫𑁆𑀩𑀮𑀲𑁆𑀲 𑀯𑀺𑀬 𑀓𑁂𑀲𑀭𑁄 𑀓𑁂𑀲𑀭𑀓𑀮𑁄𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑁂𑀲𑀭𑀻. 𑀮𑀸𑀔𑀸𑀧𑀭𑀺𑀓𑀫𑁆𑀫𑀓𑀢𑁂𑀳𑀺 𑀯𑀺𑀬 𑀧𑀸𑀤𑀧𑀭𑀺𑀬𑀦𑁆𑀢𑁂𑀳𑀻𑀢𑀺 𑀘 𑀬𑁄𑀚𑀦𑀸.

𑀓𑀫𑁆𑀫𑀸𑀦𑀼𑀪𑀸𑀯𑀲𑀺𑀤𑁆𑀥𑀅𑀥𑀺𑀧𑀘𑁆𑀘𑀫𑀳𑁂𑀲𑀓𑁆𑀔𑀢𑀸𑀳𑀺 𑀲𑀩𑁆𑀩𑀫𑀺𑀕𑀕𑀡𑀲𑁆𑀲 𑀭𑀸𑀚𑀸. 𑀲𑀼𑀯𑀡𑁆𑀡𑀕𑀼𑀳𑀢𑁄 𑀯𑀸𑀢𑀺𑀆𑀤𑀺 ‘‘𑀲𑀻𑀳𑀲𑁆𑀲 𑀯𑀺𑀳𑀸𑀭𑁄 𑀓𑀺𑀭𑀺𑀬𑀸 𑀏𑀯𑀁 𑀳𑁄𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀲𑀫𑀫𑁂𑀯 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀆𑀓𑀟𑁆𑀠𑀺𑀢𑁆𑀯𑀸𑀢𑀺 𑀧𑀼𑀭𑀢𑁄 𑀆𑀓𑀟𑁆𑀠𑀺𑀢𑁆𑀯𑀸. 𑀅𑀪𑀺𑀳𑀭𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸. 𑀲𑀗𑁆𑀖𑀸𑀢𑀦𑁆𑀢𑀺 𑀯𑀺𑀦𑀸𑀲𑀁. 𑀯𑀻𑀲𑀢𑀺𑀬𑀝𑁆𑀞𑀺𑀓𑀁 𑀞𑀸𑀦𑀁 𑀉𑀲𑀪𑀁.

𑀲𑀫𑀲𑀻𑀳𑁄𑀢𑀺 𑀲𑀫𑀚𑀸𑀢𑀺𑀓𑁄 𑀲𑀫𑀧𑁆𑀧𑀪𑀸𑀯𑁄 𑀘 𑀲𑀻𑀳𑁄. 𑀲𑀫𑀸𑀦𑁄𑀲𑁆𑀫𑀻𑀢𑀺 𑀤𑁂𑀲𑀦𑀸𑀫𑀢𑁆𑀢𑀁, 𑀲𑀫𑀧𑁆𑀧𑀪𑀸𑀯𑀢𑀸𑀬 𑀏𑀯 𑀦 𑀪𑀸𑀬𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀩𑀮𑀯𑀢𑀸𑀬𑀸𑀢𑀺 ‘‘𑀓𑁂 𑀅𑀜𑁆𑀜𑁂 𑀅𑀫𑁆𑀳𑁂𑀳𑀺 𑀉𑀢𑁆𑀢𑀭𑀺𑀢𑀭𑀸, 𑀅𑀣 𑀔𑁄 𑀫𑀬𑀫𑁂𑀯 𑀫𑀳𑀸𑀩𑀮𑀸’’𑀢𑀺 𑀏𑀯𑀁 𑀩𑀮𑀸𑀢𑀺𑀫𑀸𑀦𑀦𑀺𑀫𑀺𑀢𑁆𑀢𑀸𑀬 𑀅𑀳𑀁𑀓𑀸𑀭𑀳𑁂𑀢𑀼𑀪𑀽𑀢𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀩𑀮𑀯𑀪𑀸𑀯𑁂𑀦. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸𑀢𑀺 𑀦𑀺𑀭𑀳𑀁𑀓𑀸𑀭𑀢𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀲𑀼𑀝𑁆𑀞𑀼 𑀲𑀫𑀼𑀕𑁆𑀖𑀸𑀢𑀢𑁆𑀢𑀸 𑀦 𑀪𑀸𑀬𑀢𑀺.

𑀢𑀣𑀸 𑀢𑀣𑀸𑀢𑀺 𑀲𑀻𑀳𑀲𑀤𑀺𑀲𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀓𑀣𑁂𑀲𑀻𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀳𑁄𑀢𑀺 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀪𑀸𑀯𑀻 𑀩𑀼𑀤𑁆𑀥𑀪𑀸𑀯𑁄𑀢𑀺 𑀓𑀢𑁆𑀯𑀸 ‘‘𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀦𑀺𑀯𑀸𑀲𑀓𑀸𑀮𑁄, 𑀫𑀕𑀥𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀤𑀸𑀦𑀓𑀸𑀮𑁄, 𑀧𑀸𑀬𑀸𑀲𑀲𑁆𑀲 𑀧𑀭𑀺𑀪𑀼𑀢𑁆𑀢𑀓𑀸𑀮𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀭𑀺𑀫𑀸𑀯𑀢𑁆𑀣𑀸𑀧𑀺 𑀲𑀻𑀳𑀲𑀤𑀺𑀲𑀸 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀪𑀸𑀯𑀺𑀦𑀺 𑀪𑀽𑀢𑀽𑀧𑀘𑀸𑀭𑁄𑀧𑀺 𑀳𑀺 𑀮𑁄𑀓𑀯𑁄𑀳𑀸𑀭𑁄. 𑀯𑀺𑀚𑁆𑀚𑀸𑀪𑀸𑀯𑀲𑀸𑀫𑀜𑁆𑀜𑀢𑁄 𑀤𑁆𑀯𑀺𑀯𑀺𑀚𑁆𑀚𑀁 𑀇𑀢𑀭𑀯𑀺𑀚𑁆𑀚𑀫𑁆𑀧𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀫𑁆𑀫𑀲𑀦𑀢𑁄 𑀢𑀁 𑀧𑀼𑀭𑁂𑀢𑀭𑀲𑀺𑀤𑁆𑀥𑀁 𑀯𑀺𑀬 𑀓𑀢𑁆𑀯𑀸 𑀆𑀳 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑁄𑀥𑁂𑀢𑁆𑀯𑀸’’𑀢𑀺. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀜𑀸𑀡𑀲𑁆𑀲 𑀯𑀲𑁂𑀦 ‘‘𑀬𑀫𑀓𑀜𑀸𑀡𑀫𑀦𑁆𑀣𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀯𑀺𑀳𑀭𑀦𑁆𑀢𑀲𑁆𑀲𑀸𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀯𑀺𑀳𑀭𑀦𑁆𑀢𑀲𑁆𑀲. 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂𑀢𑀺 𑀲𑀢𑁆𑀢𑀲𑀢𑁆𑀢𑀸𑀳𑀢𑁄 𑀧𑀭𑀁 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂. 𑀅𑀘𑀮𑀧𑀮𑁆𑀮𑀗𑁆𑀓𑁂𑀢𑀺 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑁂. 𑀢𑀫𑁆𑀧𑀺 𑀳𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀦𑀺𑀲𑀚𑁆𑀚𑀸𑀢𑀺 𑀓𑀢𑁆𑀯𑀸 𑀯𑀚𑀺𑀭𑀸𑀲𑀦𑀁 𑀯𑀺𑀬 𑀅𑀘𑀮𑀧𑀮𑁆𑀮𑀗𑁆𑀓𑀁 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀧𑀤𑁂𑀢𑀺 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀘 𑀇𑀫𑀲𑁆𑀫𑀺𑀁 𑀲𑀤𑁆𑀥𑀫𑁆𑀫𑀓𑁄𑀝𑁆𑀞𑀸𑀲𑁂. 𑀥𑀫𑁆𑀫𑀖𑁄𑀲𑁄…𑀧𑁂… 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀧𑀝𑀺𑀘𑁆𑀙𑀸𑀤𑁂𑀲𑀺 ‘‘𑀲𑀩𑁆𑀩𑀢𑁆𑀣 𑀞𑀺𑀢𑀸 𑀲𑀼𑀡𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦. 𑀲𑁄𑀴𑀲𑀳𑀸𑀓𑀸𑀭𑁂𑀳𑀻𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸, 𑀲𑀫𑀼𑀤𑀬𑀧𑁆𑀧𑀳𑀸𑀦𑀁, 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸, 𑀫𑀕𑁆𑀕𑀪𑀸𑀯𑀦𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺.

𑀧𑀞𑀫𑁂𑀦 𑀦𑀬𑁂𑀦 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀭𑀺𑀫𑀢𑀭𑀸𑀯𑀢𑁆𑀣𑀸𑀧𑀺 𑀅𑀯𑀲𑁆𑀲𑀁𑀪𑀸𑀯𑀺𑀢𑀸𑀬 𑀕𑀳𑁂𑀢𑁆𑀯𑀸 𑀲𑀻𑀳𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀯𑀢𑁆𑀣𑀸𑀲𑀼 𑀏𑀯 𑀲𑀻𑀳𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀻𑀢𑀺 ‘‘𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁩; 𑀩𑀼. 𑀯𑀁. 𑀅𑀝𑁆𑀞. 𑁧.𑁨 𑀦𑀺𑀤𑀸𑀦𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪; 𑀧𑀝𑀺. 𑀫. 𑁧.𑁩𑁭) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀢𑀣𑀸𑀕𑀢𑀲𑀸𑀥𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀬𑀤𑀺𑀧𑀺 𑀪𑀕𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀦 𑀚𑀸𑀢𑁄, 𑀢𑀣𑀸𑀧𑀺 𑀢𑀸𑀬 𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑁄𑀯 𑀧𑀦𑀼𑀚𑁆𑀚 𑀲𑀩𑁆𑀩𑀁 𑀧𑀭𑀺𑀲𑁆𑀲𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀚𑀸𑀢𑁄. 𑀢𑀣𑀸 𑀳𑀺 𑀢𑀁 ‘‘𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀬𑀸𑀯 𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀅𑀧𑀭𑀺𑀢𑀼𑀲𑁆𑀲𑀦𑁆𑀢𑁄 ‘‘𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸 𑀯𑀸’’𑀢𑀺 𑀆𑀳.

𑀇𑀢𑀺 𑀲𑀓𑁆𑀓𑀸𑀬𑁄𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀢𑁂𑀦 𑀲𑀓𑁆𑀓𑀸𑀬𑁄 𑀲𑀭𑀽𑀧𑀢𑁄 𑀧𑀭𑀺𑀫𑀸𑀡𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀘 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀅𑀬𑀁 𑀲𑀓𑁆𑀓𑀸𑀬𑁄’’𑀢𑀺𑀆𑀤𑀺. ‘‘𑀅𑀬𑀁 𑀲𑀓𑁆𑀓𑀸𑀬𑁄’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀸. ‘‘𑀏𑀢𑁆𑀢𑀓𑁄 𑀲𑀓𑁆𑀓𑀸𑀬𑁄’’𑀢𑀺 𑀇𑀫𑀺𑀦𑀸 𑀢𑁂 𑀧𑀭𑀺𑀫𑀸𑀡𑀢𑁄 𑀤𑀲𑁆𑀲𑀺𑀢𑀸. 𑀢𑀲𑁆𑀲 𑀘 𑀧𑀭𑀺𑀫𑀸𑀡𑀲𑁆𑀲 𑀏𑀓𑀦𑁆𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀦 𑀇𑀢𑁄 𑀪𑀺𑀬𑁆𑀬𑁄 𑀲𑀓𑁆𑀓𑀸𑀬𑁄 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀢𑁄𑀢𑀺 𑀲𑀮𑀓𑁆𑀔𑀡𑀢𑁄. 𑀲𑀭𑀲𑀢𑁄𑀢𑀺 𑀲𑀓𑀺𑀘𑁆𑀘𑀢𑁄. 𑀧𑀭𑀺𑀬𑀦𑁆𑀢𑀢𑁄𑀢𑀺 𑀧𑀭𑀺𑀫𑀸𑀡𑀧𑀭𑀺𑀬𑀦𑁆𑀢𑀢𑁄. 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀢𑀲𑁆𑀲 𑀧𑀯𑀢𑁆𑀢𑀺𑀢𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄. 𑀧𑀭𑀺𑀯𑀝𑀼𑀫𑀢𑁄𑀢𑀺 𑀧𑀭𑀺𑀬𑁄𑀲𑀸𑀦𑀧𑁆𑀧𑀯𑀢𑁆𑀢𑀺𑀢𑁄. 𑀲𑀩𑁆𑀩𑁂𑀧𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀪𑀸𑀕𑁂𑀦. 𑀅𑀬𑀁 𑀲𑀓𑁆𑀓𑀸𑀬𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫𑀸𑀢𑀺 𑀅𑀬𑀁 𑀆𑀳𑀸𑀭𑀸𑀤𑀺𑀲𑀓𑁆𑀓𑀸𑀬𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺. 𑀅𑀢𑁆𑀣𑀗𑁆𑀕𑀫𑁄𑀢𑀺 𑀦𑀺𑀭𑁄𑀥𑁄. ‘‘𑀆𑀳𑀸𑀭𑀲𑀫𑀼𑀤𑀬𑀸 𑀆𑀳𑀸𑀭𑀦𑀺𑀭𑁄𑀥𑀸’’𑀢𑀺 𑀘 𑀅𑀲𑀸𑀥𑀸𑀭𑀡𑀫𑁂𑀯 𑀢𑀁 𑀕𑀳𑁂𑀢𑁆𑀯𑀸 𑀲𑁂𑀲𑁂𑀲𑀼 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀡𑁆𑀡𑀸𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀧𑀡𑁆𑀡𑀸𑀲𑀉𑀤𑀬𑀯𑀬𑀮𑀓𑁆𑀔𑀡𑀯𑀺𑀪𑀽𑀲𑀺𑀢𑀁 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀕𑁆𑀕𑀳𑀡𑀢𑁄. 𑀔𑀻𑀡𑀸𑀲𑀯𑀢𑁆𑀢𑀸𑀢𑀺 𑀅𑀦𑀯𑀲𑁂𑀲𑀁 𑀲𑀸𑀯𑀲𑁂𑀲𑀜𑁆𑀘 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀅𑀦𑀸𑀕𑀸𑀫𑀻𑀦𑀫𑁆𑀧𑀺 𑀳𑀺 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀜𑁆𑀘 𑀦 𑀳𑁄𑀢𑀻𑀢𑀺. 𑀜𑀸𑀡𑀲𑀁𑀯𑁂𑀕𑁄 𑀪𑀬𑀢𑀼𑀧𑀝𑁆𑀞𑀸𑀦𑀧𑀜𑁆𑀜𑀸. 𑀇𑀢𑀭𑀸𑀲𑀁 𑀧𑀦 𑀤𑁂𑀯𑀢𑀸𑀦𑀦𑁆𑀢𑀺 𑀅𑀔𑀻𑀡𑀸𑀲𑀯𑀤𑁂𑀯𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀫𑀢𑁆𑀢𑀦𑁆𑀢𑀺 𑀲𑀪𑀸𑀯𑀓𑀣𑀦𑀫𑀢𑁆𑀢𑀁.

𑀘𑀓𑁆𑀓𑀦𑁆𑀢𑀺 𑀲𑀢𑁆𑀣𑀼 𑀆𑀡𑀸𑀘𑀓𑁆𑀓𑀁. 𑀢𑀁 𑀧𑀦 𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀯𑁂𑀥𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀇𑀢𑀭𑁂𑀲𑀁 𑀤𑁂𑀲𑀦𑀸𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀤𑀼𑀯𑀺𑀥𑁂𑀧𑀺 𑀜𑀸𑀡𑀁 𑀧𑀥𑀸𑀦𑀦𑁆𑀢𑀺 𑀜𑀸𑀡𑀲𑀻𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀻’’𑀢𑀺. 𑀇𑀤𑀸𑀦𑀺 𑀢𑀁 𑀜𑀸𑀡𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀯𑁂𑀥𑀜𑀸𑀡𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀢𑀲𑁆𑀲 𑀜𑀸𑀡𑀲𑁆𑀲 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀪𑀕𑀯𑀸 𑀢𑀸𑀦𑀺 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑁂𑀦𑁂𑀬𑁆𑀬𑀸𑀦𑀁 𑀤𑀲𑁆𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀺 𑀢𑁂𑀦 𑀜𑀸𑀡𑁂𑀦 𑀲𑀤𑁆𑀥𑀺𑀁𑀬𑁂𑀯 𑀲𑀺𑀤𑁆𑀥𑀸𑀦𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀧𑀝𑀺𑀯𑀺𑀚𑁆𑀛𑀻’’𑀢𑀺 𑀆𑀳. 𑀢𑀺𑀧𑀭𑀺𑀯𑀝𑁆𑀝𑀦𑁆𑀢𑀺 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀘 ‘‘𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀘 ‘‘𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀘 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁, 𑀢𑀁𑀬𑁂𑀯 𑀤𑁆𑀯𑀸𑀤𑀲𑀸𑀓𑀸𑀭𑀁. 𑀢𑀦𑁆𑀢𑀺 𑀤𑁂𑀲𑀦𑀸𑀜𑀸𑀡𑀁. 𑀏𑀲 𑀪𑀕𑀯𑀸. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀧𑀝𑀺𑀦𑀺𑀥𑀺𑀪𑀽𑀢𑀧𑀼𑀕𑁆𑀕𑀮𑀭𑀳𑀺𑀢𑁄. 𑀏𑀓𑀲𑀤𑀺𑀲𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀲𑁆𑀲.

𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀕𑁆𑀕𑀧𑀲𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀅𑀕𑁆𑀕𑁂𑀲𑀼 𑀧𑀲𑀸𑀤𑀸𑀢𑀺 𑀲𑁂𑀝𑁆𑀞𑁂𑀲𑀼 𑀧𑀲𑀸𑀤𑀸. 𑀅𑀕𑁆𑀕𑀸 𑀯𑀸 𑀧𑀲𑀸𑀤𑀸𑀢𑀺 𑀲𑁂𑀝𑁆𑀞𑀪𑀽𑀢𑀸 𑀧𑀲𑀸𑀤𑀸. 𑀲𑁂𑀝𑁆𑀞𑀯𑀘𑀦𑁄 𑀳𑁂𑀢𑁆𑀣 𑀅𑀕𑁆𑀕𑀲𑀤𑁆𑀤𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀕𑁆𑀕𑀲𑀤𑁆𑀤𑁂𑀦 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀁 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀪𑀕𑀯𑀸 𑀢𑀸𑀯 𑀅𑀲𑀤𑀺𑀲𑀝𑁆𑀞𑁂𑀦, 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦, 𑀅𑀲𑀫𑀲𑀫𑀝𑁆𑀞𑁂𑀦 𑀘 𑀅𑀕𑁆𑀕𑁄. 𑀲𑁄 𑀳𑀺 𑀫𑀳𑀸𑀪𑀺𑀦𑀻𑀳𑀸𑀭𑀁 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀯𑀺𑀘𑀬𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀕𑀼𑀡𑁂𑀳𑀺 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀧𑀬𑁄𑀚𑀦𑁂𑀳𑀺 𑀘 𑀲𑁂𑀲𑀚𑀦𑁂𑀳𑀺 𑀅𑀲𑀤𑀺𑀲𑁄𑀢𑀺 𑀅𑀲𑀤𑀺𑀲𑀝𑁆𑀞𑁂𑀦𑀧𑀺 𑀅𑀕𑁆𑀕𑁄. 𑀬𑁂 𑀘𑀲𑁆𑀲 𑀢𑁂 𑀕𑀼𑀡𑀸 𑀫𑀳𑀸𑀓𑀭𑀼𑀡𑀸𑀤𑀬𑁄, 𑀢𑁂𑀳𑀺 𑀲𑁂𑀲𑀲𑀢𑁆𑀢𑀸𑀦𑀁 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀝𑁆𑀞𑁂𑀦𑀧𑀺 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀢𑀸𑀬 𑀅𑀕𑁆𑀕𑁄. 𑀬𑁂 𑀧𑀦 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀬𑀫𑁂𑀯 𑀭𑀽𑀧𑀓𑀸𑀬𑀕𑀼𑀡𑁂𑀳𑀺 𑀘𑁂𑀯 𑀥𑀫𑁆𑀫𑀓𑀸𑀬𑀕𑀼𑀡𑁂𑀳𑀺 𑀘 𑀲𑀫𑁄𑀢𑀺 𑀅𑀲𑀫𑀲𑀫𑀝𑁆𑀞𑁂𑀦𑀧𑀺 𑀅𑀕𑁆𑀕𑁄. 𑀢𑀣𑀸 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀢𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀪𑀸𑀯𑀢𑁄 𑀩𑀳𑀼𑀚𑀦𑀳𑀺𑀢𑀲𑀼𑀔𑀸𑀯𑀳𑀢𑁄 𑀅𑀤𑀼𑀢𑀺𑀬𑀅𑀲𑀳𑀸𑀬𑀸𑀤𑀺𑀪𑀸𑀯𑀢𑁄 𑀘 𑀪𑀕𑀯𑀸 𑀮𑁄𑀓𑁂 𑀅𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀏𑀓𑀧𑀼𑀕𑁆𑀕𑀮𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀫𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲? 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀫𑀼𑀤𑁆𑀥𑀲𑁆𑀲. 𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀢𑀺𑀬𑁄 𑀅𑀲𑀳𑀸𑀬𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁧-𑁧𑁭𑁩).

𑀥𑀫𑁆𑀫𑀲𑀗𑁆𑀖𑀸 𑀅𑀜𑁆𑀜𑀥𑀫𑁆𑀫𑀲𑀗𑁆𑀖𑁂𑀳𑀺 𑀅𑀲𑀤𑀺𑀲𑀝𑁆𑀞𑁂𑀦 𑀯𑀺𑀲𑀺𑀝𑁆𑀞𑀕𑀼𑀡𑀢𑀸𑀬 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀸𑀤𑀺𑀦𑀸 𑀘 𑀅𑀕𑁆𑀕𑀸. 𑀢𑀣𑀸 𑀳𑀺 𑀢𑁂𑀲𑀁 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑁂𑀳𑀺 𑀅𑀜𑁆𑀜𑁂 𑀥𑀫𑁆𑀫𑀲𑀗𑁆𑀖𑀲𑀤𑀺𑀲𑀸 𑀅𑀧𑁆𑀧𑀢𑀭𑀁 𑀦𑀺𑀳𑀻𑀦𑀸 𑀯𑀸 𑀦𑀢𑁆𑀣𑀺, 𑀓𑀼𑀢𑁄 𑀲𑁂𑀝𑁆𑀞𑀸. 𑀲𑀬𑀫𑁂𑀯 𑀢𑁂𑀳𑀺 𑀯𑀺𑀲𑀺𑀝𑁆𑀞𑀕𑀼𑀡𑀢𑀸𑀬 𑀲𑁂𑀝𑁆𑀞𑀸. 𑀢𑀣𑀸 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑀅𑀘𑁆𑀙𑀭𑀺𑀬𑀪𑀸𑀯𑀩𑀳𑀼𑀚𑀦𑀳𑀺𑀢𑀲𑀼𑀔𑀸𑀯𑀳𑀅𑀤𑀼𑀢𑀺𑀬𑀸𑀲𑀳𑀸𑀬𑀸𑀤𑀺𑀲𑀪𑀸𑀯𑀸 𑀘 𑀢𑁂. 𑀬𑀤𑀕𑁆𑀕𑁂𑀦 𑀳𑀺 𑀪𑀕𑀯𑀸 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑁄, 𑀢𑀤𑀕𑁆𑀕𑁂𑀦 𑀥𑀫𑁆𑀫𑀲𑀗𑁆𑀖𑀸𑀧𑀻𑀢𑀺. 𑀅𑀘𑁆𑀙𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀅𑀕𑁆𑀕𑁂𑀲𑀼 𑀲𑁂𑀝𑁆𑀞𑁂𑀲𑀼 𑀉𑀢𑁆𑀢𑀫𑁂𑀲𑀼 𑀧𑀯𑀭𑁂𑀲𑀼 𑀕𑀼𑀡𑀯𑀺𑀲𑀺𑀝𑁆𑀞𑁂𑀲𑀼 𑀧𑀲𑀸𑀤𑀸𑀢𑀺 𑀅𑀕𑁆𑀕𑀧𑁆𑀧𑀲𑀤𑀸.

𑀤𑀼𑀢𑀺𑀬𑀲𑁆𑀫𑀺𑀁 𑀧𑀦𑀢𑁆𑀣𑁂 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀕𑁆𑀕𑁂𑀲𑀼 𑀩𑀼𑀤𑁆𑀥𑀸𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀅𑀕𑁆𑀕𑀪𑀽𑀢𑀸 𑀧𑀲𑀸𑀤𑀸 𑀅𑀕𑁆𑀕𑀧𑁆𑀧𑀲𑀸𑀤𑀸. 𑀬𑁂 𑀧𑀦 𑀅𑀭𑀺𑀬𑀫𑀕𑁆𑀕𑁂𑀦 𑀆𑀕𑀢𑀸 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸, 𑀢𑁂 𑀏𑀓𑀦𑁆𑀢𑁂𑀦𑁂𑀯 𑀅𑀕𑁆𑀕𑀪𑀽𑀢𑀸 𑀧𑀲𑀸𑀤𑀸𑀢𑀺 𑀅𑀕𑁆𑀕𑀧𑁆𑀧𑀲𑀸𑀤𑀸. 𑀬𑀣𑀸𑀳 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁦𑁩𑁭-𑁧𑁦𑁩𑁮). 𑀅𑀕𑁆𑀕𑀯𑀺𑀧𑀸𑀓𑀢𑁆𑀢𑀸𑀧𑀺 𑀘𑁂𑀢𑁂 𑀅𑀕𑁆𑀕𑀧𑁆𑀧𑀲𑀸𑀤𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀅𑀧𑀤𑀸 𑀯𑀸𑀢𑀺𑀆𑀤𑀻𑀲𑀼 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀦 𑀯𑀺𑀓𑀧𑁆𑀧𑀢𑁆𑀣𑁄. 𑀬𑀣𑀸 ‘‘𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀯𑀟𑁆𑀠𑀢𑀻’’𑀢𑀺 (𑀫. 𑀦𑀺. 𑁧.𑁧𑁭) 𑀏𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑁄 𑀘 𑀉𑀧𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 ‘‘𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀏𑀢𑁆𑀣 𑀪𑀽𑀢𑀸𑀦𑀜𑁆𑀘 𑀲𑀫𑁆𑀪𑀯𑁂𑀲𑀻𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 ‘‘𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀫𑀺𑀣𑀼𑀪𑁂𑀤𑀢𑁄 𑀯𑀸’’𑀢𑀺 (𑀤𑀻. 𑀦𑀺. 𑁨.𑁧𑁫𑁨) 𑀏𑀢𑁆𑀣 𑀅𑀕𑁆𑀕𑀺𑀢𑁄 𑀘 𑀉𑀤𑀓𑀢𑁄 𑀘 𑀫𑀺𑀣𑀼𑀪𑁂𑀤𑀢𑁄 𑀘𑀸𑀢𑀺 𑀅𑀢𑁆𑀣𑁄, 𑀏𑀯𑀁 ‘‘𑀅𑀧𑀤𑀸 𑀯𑀸…𑀧𑁂… 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀏𑀢𑁆𑀣𑀸𑀧𑀺 𑀅𑀧𑀤𑀸 𑀘 𑀤𑁆𑀯𑀺𑀧𑀤𑀸 𑀘𑀸𑀢𑀺 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀦 𑀯𑀺𑀓𑀧𑁆𑀧𑀢𑁆𑀣𑁄’’𑀢𑀺.

𑀭𑀽𑀧𑀺𑀦𑁄𑀢𑀺 𑀭𑀽𑀧𑀯𑀦𑁆𑀢𑁄. 𑀦 𑀭𑀽𑀧𑀺𑀦𑁄𑀢𑀺 𑀅𑀭𑀽𑀧𑀺𑀦𑁄. 𑀲𑀜𑁆𑀜𑀺𑀦𑁄𑀢𑀺 𑀲𑀜𑁆𑀜𑀯𑀦𑁆𑀢𑁄. 𑀦 𑀲𑀜𑁆𑀜𑀺𑀦𑁄𑀢𑀺 𑀅𑀲𑀜𑁆𑀜𑀺𑀦𑁄. ‘‘𑀅𑀧𑀤𑀸 𑀯𑀸’’𑀢𑀺𑀆𑀤𑀺𑀲𑀩𑁆𑀩𑀧𑀤𑁂𑀳𑀺 𑀓𑀸𑀫𑀪𑀯𑁄, 𑀭𑀽𑀧𑀪𑀯𑁄, 𑀅𑀭𑀽𑀧𑀪𑀯𑁄, 𑀏𑀓𑀯𑁄𑀓𑀸𑀭𑀪𑀯𑁄, 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀲𑀜𑁆𑀜𑀺𑀪𑀯𑁄, 𑀅𑀲𑀜𑁆𑀜𑀺𑀪𑀯𑁄, 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀪𑀯𑁄𑀢𑀺 𑀦𑀯𑀯𑀺𑀥𑁂𑀧𑀺 𑀪𑀯𑁂 𑀲𑀢𑁆𑀢𑁂𑀧𑀺 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀳𑀺 𑀭𑀽𑀧𑀺𑀕𑁆𑀕𑀳𑀡𑁂𑀦 𑀓𑀸𑀫𑀪𑀯𑁄, 𑀭𑀽𑀧𑀪𑀯𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀏𑀓𑀯𑁄𑀓𑀸𑀭𑀪𑀯𑁄 𑀘 𑀤𑀲𑁆𑀲𑀺𑀢𑁄, 𑀅𑀭𑀽𑀧𑀺𑀕𑁆𑀕𑀳𑀡𑁂𑀦 𑀅𑀭𑀽𑀧𑀪𑀯𑁄, 𑀘𑀢𑀼𑀯𑁄𑀓𑀸𑀭𑀪𑀯𑁄 𑀘 𑀤𑀲𑁆𑀲𑀺𑀢𑁄, 𑀲𑀜𑁆𑀜𑀺𑀪𑀯𑀸𑀤𑀬𑁄 𑀧𑀦 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸. 𑀅𑀧𑀤𑀸𑀤𑀺𑀕𑁆𑀕𑀳𑀡𑁂𑀦 𑀓𑀸𑀫𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀲𑀜𑁆𑀜𑀺𑀪𑀯𑀸𑀦𑀁 𑀏𑀓𑀤𑁂𑀲𑁄𑀯 𑀤𑀲𑁆𑀲𑀺𑀢𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀅𑀤𑀼𑀢𑀺𑀬𑀲𑀼𑀢𑁆𑀢𑁂 ‘‘𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄’’𑀢𑀺 𑀤𑁆𑀯𑀺𑀧𑀤𑀸 𑀏𑀯 𑀕𑀳𑀺𑀢𑀸, 𑀏𑀯𑀁 𑀤𑁆𑀯𑀺𑀧𑀤𑀕𑁆𑀕𑀳𑀡𑀫𑁂𑀯 𑀅𑀓𑀢𑁆𑀯𑀸 𑀅𑀧𑀤𑀸𑀤𑀺𑀕𑁆𑀕𑀳𑀡𑀁 𑀓𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀤𑀼𑀢𑀺𑀬𑀲𑀼𑀢𑁆𑀢𑁂 𑀢𑀸𑀯 𑀲𑁂𑀝𑁆𑀞𑀢𑀭𑀯𑀲𑁂𑀦 𑀤𑁆𑀯𑀺𑀧𑀤𑀕𑁆𑀕𑀳𑀡𑀫𑁂𑀯 𑀓𑀢𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀮𑁄𑀓𑁂 𑀲𑁂𑀝𑁆𑀞𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑀤𑀘𑀢𑀼𑀧𑁆𑀧𑀤𑀩𑀳𑀼𑀧𑀤𑁂𑀲𑀼 𑀦 𑀉𑀧𑁆𑀧𑀚𑁆𑀚𑀢𑀺, 𑀤𑁆𑀯𑀺𑀧𑀤𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀭𑁂𑀲𑀼 𑀤𑁆𑀯𑀺𑀧𑀤𑁂𑀲𑀼? 𑀫𑀦𑀼𑀲𑁆𑀲𑁂𑀲𑀼 𑀘𑁂𑀯 𑀤𑁂𑀯𑁂𑀲𑀼 𑀘. 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀓𑀮𑀮𑁄𑀓𑀁 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀲𑁂 𑀯𑀢𑁆𑀢𑀦𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀲𑀫𑁆𑀧𑀚𑁆𑀚𑀢𑀺. 𑀇𑀢𑀺 𑀢𑀢𑁄𑀧𑀺 𑀲𑁂𑀝𑁆𑀞𑀢𑀭𑀯𑀲𑁂𑀦𑁂𑀲 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀇𑀥 𑀧𑀦 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀕𑁆𑀕𑁄 𑀅𑀓𑁆𑀔𑀸𑀬𑀢𑀻𑀢𑀺 𑀧𑀤𑀯𑀺𑀪𑀸𑀕𑁄. 𑀢𑁂𑀦𑁂𑀯𑀸𑀳 ‘‘𑀕𑀼𑀡𑁂𑀳𑀺 𑀅𑀕𑁆𑀕𑁄’’𑀢𑀺𑀆𑀤𑀺.

𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺 𑀅𑀕𑁆𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀲𑀦𑁆𑀦𑀸𑀦𑀁 𑀬𑁄 𑀧𑀲𑀸𑀤𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑀓𑁄𑀝𑀺𑀪𑀽𑀢𑁄 𑀯𑀸, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀧𑀸𑀓𑁄𑀧𑀺 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑀓𑁄𑀝𑀺𑀪𑀽𑀢𑁄 𑀉𑀴𑀸𑀭𑀢𑀫𑁄 𑀧𑀡𑀻𑀢𑀢𑀫𑁄 𑀳𑁄𑀢𑀺. 𑀲𑁄 𑀧𑀦 𑀧𑀲𑀸𑀤𑁄 𑀤𑀼𑀯𑀺𑀥𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀢𑁄. 𑀢𑁂𑀲𑀼 𑀮𑁄𑀓𑀺𑀬𑀲𑁆𑀲 𑀢𑀸𑀯 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂,

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁,

𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀇𑀢𑀺𑀯𑀼. 𑀅𑀝𑁆𑀞. 𑁯𑁦; 𑀲𑀁. 𑀦𑀺. 𑁧.𑁩𑁭);

‘‘𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸 𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲. (𑀤𑀻. 𑀦𑀺. 𑀅𑀝𑁆𑀞. 𑁧.𑁬; 𑀇𑀢𑀺𑀯𑀼. 𑀅𑀝𑁆𑀞. 𑁯𑁦);

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁’’. (𑀘𑀽𑀴𑀯. 𑁩𑁦𑁫);

‘‘𑀲𑀸𑀥𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀳𑁂𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸, 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦, 𑀤𑀺𑀩𑁆𑀩𑁂𑀦 𑀲𑀼𑀔𑁂𑀦, 𑀤𑀺𑀩𑁆𑀩𑁂𑀦 𑀬𑀲𑁂𑀦, 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦, 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺, 𑀤𑀺𑀩𑁆𑀩𑁂𑀳𑀺 𑀲𑀤𑁆𑀤𑁂𑀳𑀺, 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺, 𑀤𑀺𑀩𑁆𑀩𑁂𑀳𑀺 𑀭𑀲𑁂𑀳𑀺, 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁧) 𑁋

𑀏𑀯𑀫𑀸𑀤𑀻𑀦𑀁 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 𑀧𑀲𑀸𑀤𑀨𑀮𑀯𑀺𑀲𑁂𑀲𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀲𑁄 𑀅𑀧𑀸𑀬𑀤𑀼𑀓𑁆𑀔𑀯𑀺𑀦𑀺𑀯𑀢𑁆𑀢𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀼 𑀲𑀼𑀔𑀯𑀺𑀲𑁂𑀲𑀤𑀸𑀬𑀓𑁄𑀯 𑀤𑀝𑁆𑀞𑀩𑁆𑀩𑁄.

𑀮𑁄𑀓𑀼𑀢𑁆𑀢𑀭𑁄 𑀧𑀦 𑀲𑀸𑀫𑀜𑁆𑀜𑀨𑀮𑀯𑀺𑀧𑀸𑀓𑀤𑀸𑀬𑀓𑁄 𑀯𑀝𑁆𑀝𑀤𑀼𑀓𑁆𑀔𑀯𑀺𑀦𑀺𑀯𑀢𑁆𑀢𑀓𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀧𑀲𑀸𑀤𑁄 𑀧𑀭𑀫𑁆𑀧𑀭𑀸𑀬 𑀯𑀝𑁆𑀝𑀤𑀼𑀓𑁆𑀔𑀁 𑀯𑀺𑀦𑀺𑀯𑀢𑁆𑀢𑁂𑀢𑀺𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀥𑀫𑁆𑀫𑀸𑀢𑀺 𑀲𑀪𑀸𑀯𑀥𑀫𑁆𑀫𑀸. 𑀲𑀗𑁆𑀔𑀢𑀸𑀢𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀸𑀢𑀺 𑀲𑀗𑁆𑀔𑀢𑀸, 𑀲𑀧𑀘𑁆𑀘𑀬𑀸 𑀥𑀫𑁆𑀫𑀸. 𑀳𑁂𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀘 𑀦 𑀓𑁂𑀳𑀺𑀘𑀺 𑀓𑀢𑀸 𑀲𑀗𑁆𑀔𑀢𑀸𑀢𑀺 𑀅𑀲𑀗𑁆𑀔𑀢𑀸, 𑀅𑀧𑀘𑁆𑀘𑀬𑁄 𑀦𑀺𑀩𑁆𑀩𑀸𑀦𑀁. 𑀲𑀗𑁆𑀔𑀢𑀸𑀦𑀁 𑀧𑀭𑀺𑀬𑁄𑀲𑀺𑀢𑀪𑀸𑀯𑁂𑀦 ‘‘𑀅𑀲𑀗𑁆𑀔𑀢𑀸’’𑀢𑀺 𑀧𑀼𑀣𑀼𑀯𑀘𑀦𑀁. 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀢𑁂𑀲𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀬𑁄 𑀯𑀺𑀭𑀸𑀕𑀲𑀗𑁆𑀔𑀸𑀢𑁄 𑀅𑀲𑀗𑁆𑀔𑀢𑀥𑀫𑁆𑀫𑁄, 𑀲𑁄 𑀲𑀪𑀸𑀯𑁂𑀦𑁂𑀯 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀢𑁄 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀪𑀸𑀯𑀢𑁄 𑀕𑀫𑁆𑀪𑀻𑀭𑀸𑀤𑀺𑀪𑀸𑀯𑀢𑁄 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀪𑀸𑀯𑀢𑁄 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀫𑀤𑀦𑀺𑀫𑁆𑀫𑀤𑀦𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀯𑀺𑀭𑀸𑀕𑁄𑀢𑀺𑀆𑀤𑀻𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀻’’𑀢𑀺. 𑀭𑀸𑀕𑀫𑀤𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀸 𑀧𑀺𑀧𑀸𑀲𑀸𑀢𑀺 𑀓𑀸𑀫𑀧𑀺𑀧𑀸𑀲𑀸𑀤𑀺𑀓𑀸 𑀲𑀩𑁆𑀩𑀸 𑀧𑀺𑀧𑀸𑀲𑀸. 𑀲𑀩𑁆𑀩𑁂 𑀆𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀸𑀫𑀸𑀮𑀬𑀸𑀤𑀺𑀓𑀸 𑀲𑀩𑁆𑀩𑁂𑀧𑀺 𑀆𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀬𑀦𑁆𑀢𑀺. 𑀯𑀝𑁆𑀝𑀸𑀦𑀻𑀢𑀺 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀸𑀦𑀺. 𑀢𑀡𑁆𑀳𑀸𑀢𑀺 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸.

𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑁋

‘‘𑀬𑁂 𑀓𑁂𑀘𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸𑀲𑁂…𑀧𑁂…’’. (𑀤𑀻. 𑀦𑀺. 𑁨.𑁩𑁩𑁨; 𑀲𑀁 𑀦𑀺. 𑁧.𑁩𑁭);

‘‘𑀥𑀫𑁆𑀫𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺…𑀧𑁂…’’. (𑀤𑀻. 𑀦𑀺. 𑀅𑀝𑁆𑀞. 𑁧.𑁬; 𑀇𑀢𑀺𑀯𑀼. 𑀅𑀝𑁆𑀞. 𑁯𑁦);

‘‘𑀲𑀸𑀥𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀥𑀫𑁆𑀫𑀁 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀕𑀫𑀦𑀳𑁂𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀏𑀯𑀫𑀺𑀥𑁂𑀓𑀘𑁆𑀘𑁂…𑀧𑁂… 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁧) 𑁋

𑀏𑀯𑀫𑀸𑀤𑀻𑀦𑀁 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 𑀥𑀫𑁆𑀫𑁂 𑀧𑀲𑀸𑀤𑀲𑁆𑀲 𑀨𑀮𑀯𑀺𑀲𑁂𑀲𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸𑀢𑀺 𑀚𑀦𑀲𑀫𑀽𑀳𑀲𑀗𑁆𑀔𑀸𑀢𑀸 𑀬𑀸𑀯𑀢𑀸 𑀮𑁄𑀓𑁂 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸. 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄𑀢𑀺 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑀲𑀗𑁆𑀔𑀸𑀢𑁄 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀲𑀗𑁆𑀖𑁄. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀅𑀢𑁆𑀢𑀦𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀆𑀤𑀺𑀕𑀼𑀡𑀯𑀺𑀲𑁂𑀲𑁂𑀦 𑀢𑁂𑀲𑀁 𑀲𑀗𑁆𑀖𑀸𑀦𑀁 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀧𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺𑀤𑀦𑁆𑀢𑀺 𑀬𑀸𑀦𑀺 𑀇𑀫𑀸𑀦𑀺. 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀬𑀼𑀕𑀴𑀯𑀲𑁂𑀦, 𑀧𑀞𑀫𑀫𑀕𑁆𑀕𑀝𑁆𑀞𑁄 𑀧𑀞𑀫𑀨𑀮𑀝𑁆𑀞𑁄𑀢𑀺 𑀇𑀤𑀫𑁂𑀓𑀁 𑀬𑀼𑀕𑀴𑀁, 𑀬𑀸𑀯 𑀘𑀢𑀼𑀢𑁆𑀣𑀫𑀕𑁆𑀕𑀝𑁆𑀞𑁄 𑀘𑀢𑀼𑀢𑁆𑀣𑀨𑀮𑀝𑁆𑀞𑁄𑀢𑀺 𑀇𑀤𑀫𑁂𑀓𑀁 𑀬𑀼𑀕𑀴𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺. 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀯𑀲𑁂𑀦 𑀏𑀓𑁄 𑀧𑀞𑀫𑀫𑀕𑁆𑀕𑀝𑁆𑀞𑁄, 𑀏𑀓𑁄 𑀧𑀞𑀫𑀨𑀮𑀝𑁆𑀞𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸. 𑀏𑀢𑁆𑀣 𑀘 𑀧𑀼𑀭𑀺𑀲𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀏𑀓𑀢𑁆𑀣𑀸𑀦𑀺 𑀏𑀢𑀸𑀦𑀺 𑀧𑀤𑀸𑀦𑀺, 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁. 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺 𑀬𑀸𑀦𑀺𑀫𑀸𑀦𑀺 𑀬𑀼𑀕𑀴𑀯𑀲𑁂𑀦 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑀢𑁄 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄. 𑀆𑀳𑀼𑀦𑁂𑀬𑁆𑀬𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀇𑀥𑀸𑀧𑀺 𑁋

‘‘𑀬𑁂 𑀓𑁂𑀘𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸𑀲𑁂…𑀧𑁂…’’. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

‘‘𑀲𑀗𑁆𑀖𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺…𑀧𑁂…’’. (𑀤𑀻. 𑀦𑀺. 𑀅𑀝𑁆𑀞. 𑁧.𑁬; 𑀇𑀢𑀺𑀯𑀼. 𑀅𑀝𑁆𑀞. 𑁯𑁦);

‘‘𑀲𑀸𑀥𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀗𑁆𑀖𑀁 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀕𑀫𑀦𑀳𑁂𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤…𑀧𑁂… 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁧) 𑁋

𑀆𑀤𑀻𑀦𑀁 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 𑀲𑀗𑁆𑀖𑁂 𑀧𑀲𑀸𑀤𑀲𑁆𑀲 𑀨𑀮𑀯𑀺𑀲𑁂𑀲𑀬𑁄𑀕𑁄 𑀢𑀲𑁆𑀲 𑀅𑀕𑁆𑀕𑀯𑀺𑀧𑀸𑀓𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀦𑀼𑀢𑁆𑀢𑀭𑀺𑀬𑀧𑀝𑀺𑀮𑀸𑀪𑁄 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀘𑁆𑀙𑁂𑀤𑁄 𑀅𑀦𑀼𑀢𑁆𑀢𑀭𑀲𑀼𑀔𑀸𑀥𑀺𑀕𑀫𑁄𑀢𑀺 𑀏𑀯𑀫𑀸𑀤𑀺𑀉𑀴𑀸𑀭𑀨𑀮𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀅𑀕𑁆𑀕𑀯𑀺𑀧𑀸𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀕𑀸𑀣𑀸𑀲𑀼 𑀅𑀕𑁆𑀕𑀢𑁄𑀢𑀺 𑀅𑀕𑁆𑀕𑁂 𑀭𑀢𑀦𑀢𑁆𑀢𑀬𑁂, 𑀅𑀕𑁆𑀕𑀪𑀸𑀯𑀢𑁄 𑀯𑀸 𑀧𑀲𑀦𑁆𑀦𑀸𑀦𑀁. 𑀅𑀕𑁆𑀕𑀁 𑀥𑀫𑁆𑀫𑀦𑁆𑀢𑀺 𑀅𑀕𑁆𑀕𑀲𑀪𑀸𑀯𑀁 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁, 𑀭𑀢𑀦𑀢𑁆𑀢𑀬𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀉𑀢𑁆𑀢𑀫𑀲𑀪𑀸𑀯𑀁, 𑀤𑀲𑀩𑀮𑀸𑀤𑀺𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀕𑀼𑀡𑀲𑀪𑀸𑀯𑀁 𑀯𑀸. 𑀯𑀺𑀚𑀸𑀦𑀢𑀦𑁆𑀢𑀺 𑀯𑀺𑀚𑀸𑀦𑀦𑁆𑀢𑀸𑀦𑀁. 𑀏𑀯𑀁 𑀲𑀸𑀥𑀸𑀭𑀡𑀢𑁄 𑀅𑀕𑁆𑀕𑀧𑁆𑀧𑀲𑀸𑀤𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀲𑀸𑀥𑀸𑀭𑀡𑀢𑁄 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀕𑁆𑀕𑁂 𑀩𑀼𑀤𑁆𑀥𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀲𑀦𑁆𑀦𑀸𑀦𑀦𑁆𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀘 𑀇𑀢𑀭𑀧𑁆𑀧𑀲𑀸𑀤𑁂𑀦 𑀘 𑀧𑀲𑀦𑁆𑀦𑀸𑀦𑀁 𑀅𑀥𑀺𑀫𑀼𑀢𑁆𑀢𑀸𑀦𑀁. 𑀯𑀺𑀭𑀸𑀕𑀽𑀧𑀲𑀫𑁂𑀢𑀺 𑀯𑀺𑀭𑀸𑀕𑁂 𑀉𑀧𑀲𑀫𑁂 𑀘, 𑀲𑀩𑁆𑀩𑀲𑁆𑀲 𑀭𑀸𑀕𑀲𑁆𑀲 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀳𑁂𑀢𑀼𑀪𑀽𑀢𑁂 𑀅𑀘𑁆𑀘𑀦𑁆𑀢𑀉𑀧𑀲𑀫𑀳𑁂𑀢𑀼𑀪𑀽𑀢𑁂 𑀘𑀸𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀢𑀺 𑀯𑀝𑁆𑀝𑀤𑀼𑀓𑁆𑀔𑀓𑁆𑀔𑀬𑀪𑀸𑀯𑁂𑀦 𑀲𑀗𑁆𑀔𑀸𑀭𑀽𑀧𑀲𑀫𑀲𑀼𑀔𑀪𑀸𑀯𑁂𑀦 𑀲𑀼𑀔𑁂.

𑀅𑀕𑁆𑀕𑀲𑁆𑀫𑀺𑀁 𑀤𑀸𑀦𑀁 𑀤𑀤𑀢𑀦𑁆𑀢𑀺 𑀅𑀕𑁆𑀕𑁂 𑀭𑀢𑀦𑀢𑁆𑀢𑀬𑁂 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀺𑀘𑁆𑀘𑀚𑀦𑁆𑀢𑀸𑀦𑀁. 𑀢𑀢𑁆𑀣 𑀥𑀭𑀫𑀸𑀦𑀁 𑀪𑀕𑀯𑀦𑁆𑀢𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀲𑀓𑁆𑀓𑀭𑁄𑀦𑁆𑀢𑀸, 𑀧𑀭𑀺𑀦𑀺𑀩𑁆𑀩𑀼𑀢𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀥𑀸𑀢𑀼𑀘𑁂𑀢𑀺𑀬𑀸𑀤𑀺𑀓𑁂 𑀉𑀧𑀝𑁆𑀞𑀳𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀲𑀓𑁆𑀓𑀭𑁄𑀦𑁆𑀢𑀸 𑀩𑀼𑀤𑁆𑀥𑁂 𑀤𑀸𑀦𑀁 𑀤𑀤𑀦𑁆𑀢𑀺 𑀦𑀸𑀫. ‘‘𑀥𑀫𑁆𑀫𑀁 𑀧𑀽𑀚𑁂𑀲𑁆𑀲𑀸𑀫𑀸’’𑀢𑀺 𑀥𑀫𑁆𑀫𑀥𑀭𑁂 𑀧𑀼𑀕𑁆𑀕𑀮𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀲𑀓𑁆𑀓𑀭𑁄𑀦𑁆𑀢𑀸 𑀥𑀫𑁆𑀫𑀜𑁆𑀘 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀭𑁄𑀦𑁆𑀢𑀸 𑀥𑀫𑁆𑀫𑁂 𑀤𑀸𑀦𑀁 𑀤𑀤𑀦𑁆𑀢𑀺 𑀦𑀸𑀫. 𑀢𑀣𑀸 𑀅𑀭𑀺𑀬𑀲𑀗𑁆𑀖𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀲𑀓𑁆𑀓𑀭𑁄𑀦𑁆𑀢𑀸 𑀢𑀁 𑀉𑀤𑁆𑀤𑀺𑀲𑁆𑀲 𑀇𑀢𑀭𑀲𑁆𑀫𑀺𑀫𑁆𑀧𑀺 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀗𑁆𑀖𑁂 𑀤𑀸𑀦𑀁 𑀤𑀤𑀦𑁆𑀢𑀺 𑀦𑀸𑀫. 𑀅𑀕𑁆𑀕𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀏𑀯𑀁 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀉𑀴𑀸𑀭𑀁 𑀧𑀭𑀺𑀘𑁆𑀘𑀸𑀕𑀁 𑀉𑀴𑀸𑀭𑀜𑁆𑀘 𑀧𑀽𑀚𑀸𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀸𑀦𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀕𑁆𑀕𑀁 𑀉𑀴𑀸𑀭𑀁 𑀓𑀼𑀲𑀮𑀁 𑀉𑀧𑀘𑀻𑀬𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀕𑁆𑀕𑀯𑀺𑀧𑀸𑀓𑀢𑀸𑀬 𑀅𑀕𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀕𑁆𑀕𑀁 𑀆𑀬𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀽𑀢𑀺 𑀤𑀺𑀩𑁆𑀩𑀁 𑀯𑀸 𑀫𑀸𑀦𑀼𑀲𑀁 𑀯𑀸 𑀅𑀕𑁆𑀕𑀁 𑀉𑀴𑀸𑀭𑀁 𑀧𑀭𑀫𑀁 𑀆𑀬𑀼 𑀧𑀯𑀟𑁆𑀠𑀢𑀺 𑀉𑀧𑀭𑀽𑀧𑀭𑀺 𑀩𑁆𑀭𑀽𑀳𑀢𑀺. 𑀯𑀡𑁆𑀡𑁄𑀢𑀺 𑀭𑀽𑀧𑀲𑀫𑁆𑀧𑀤𑀸. 𑀬𑀲𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀤𑀸. 𑀓𑀺𑀢𑁆𑀢𑀻𑀢𑀺 𑀣𑀼𑀢𑀺𑀖𑁄𑀲𑁄. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀲𑀼𑀔𑀁. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀜𑁆𑀘𑁂𑀯 𑀜𑀸𑀡𑀩𑀮𑀜𑁆𑀘.

𑀅𑀕𑁆𑀕𑀲𑁆𑀲 𑀭𑀢𑀦𑀢𑁆𑀢𑀬𑀲𑁆𑀲 𑀤𑀸𑀦𑀁 𑀤𑀸𑀢𑀸. 𑀅𑀣 𑀯𑀸 𑀅𑀕𑁆𑀕𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀦𑀁 𑀉𑀴𑀸𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀼𑀜𑁆𑀜𑀁 𑀧𑀯𑀢𑁆𑀢𑁂𑀢𑀸. 𑀅𑀕𑁆𑀕𑀥𑀫𑁆𑀫𑀲𑀫𑀸𑀳𑀺𑀢𑁄𑀢𑀺 𑀅𑀕𑁆𑀕𑁂𑀦 𑀧𑀲𑀸𑀤𑀥𑀫𑁆𑀫𑁂𑀦 𑀤𑀸𑀦𑀸𑀤𑀺𑀥𑀫𑁆𑀫𑁂𑀦 𑀘 𑀲𑀁𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀘𑀮𑀧𑁆𑀧𑀲𑀸𑀤𑀬𑀼𑀢𑁆𑀢𑁄, 𑀢𑀲𑁆𑀲 𑀯𑀸 𑀯𑀺𑀧𑀸𑀓𑀪𑀽𑀢𑁂𑀳𑀺 𑀩𑀳𑀼𑀚𑀦𑀲𑁆𑀲 𑀧𑀺𑀬𑀫𑀦𑀸𑀧𑀢𑀸𑀤𑀺𑀥𑀫𑁆𑀫𑁂𑀳𑀺 𑀬𑀼𑀢𑁆𑀢𑁄. 𑀅𑀕𑁆𑀕𑀧𑁆𑀧𑀢𑁆𑀢𑁄 𑀧𑀫𑁄𑀤𑀢𑀻𑀢𑀺 𑀬𑀢𑁆𑀣 𑀬𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑁂 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀢𑀢𑁆𑀣 𑀅𑀕𑁆𑀕𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀅𑀥𑀺𑀕𑀢𑁄, 𑀅𑀕𑁆𑀕𑀪𑀸𑀯𑀁 𑀯𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀨𑀮𑀁 𑀅𑀥𑀺𑀕𑀢𑁄 𑀧𑀫𑁄𑀤𑀢𑀺 𑀅𑀪𑀺𑀭𑀫𑀢𑀺 𑀧𑀭𑀺𑀢𑀼𑀲𑁆𑀲𑀢𑀻𑀢𑀺.

𑀅𑀕𑁆𑀕𑀧𑀲𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀅𑀭𑀺𑀬𑁂 𑀜𑀸𑀬𑁂𑀢𑀺 𑀲𑀁𑀓𑀺𑀮𑁂𑀲𑀢𑁄 𑀆𑀭𑀓𑀢𑁆𑀢𑀸 𑀅𑀭𑀺𑀬𑁂 𑀦𑀺𑀤𑁆𑀤𑁄𑀲𑁂 𑀧𑀭𑀺𑀲𑀼𑀤𑁆𑀥𑁂 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀪𑀸𑀯𑀢𑁄 𑀜𑀸𑀬𑁂 𑀓𑀸𑀭𑀡𑁂𑀢𑀺 𑀅𑀢𑁆𑀣𑁄. 𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀻 𑀜𑀸𑀬𑁄, 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀏𑀯 𑀘 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑀢𑁄 𑀓𑀸𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀓𑁂 𑀫𑀕𑁆𑀕𑁂’’𑀢𑀺. 𑀕𑀸𑀣𑀸𑀲𑀼 ‘‘𑀜𑀸𑀬𑀁 𑀥𑀫𑁆𑀫’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀉𑀓𑁆𑀓𑀸𑀳𑀺 𑀥𑀸𑀭𑀺𑀬𑀫𑀸𑀦𑀸𑀳𑀻𑀢𑀺 𑀤𑀻𑀧𑀺𑀓𑀸𑀳𑀺 𑀥𑀸𑀭𑀺𑀬𑀫𑀸𑀦𑀸𑀳𑀺, 𑀤𑀡𑁆𑀟𑀤𑀻𑀧𑀺𑀓𑀸𑀲𑀼 𑀚𑀸𑀮𑁂𑀢𑁆𑀯𑀸 𑀥𑀸𑀭𑀺𑀬𑀫𑀸𑀦𑀸𑀲𑀼 𑀫𑀸𑀧𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀳𑀺 𑀦𑀕𑀭𑀁 ‘‘𑀫𑀗𑁆𑀕𑀮𑀤𑀺𑀯𑀲𑁂 𑀲𑀼𑀔𑀡𑁂 𑀲𑀼𑀦𑀓𑁆𑀔𑀢𑁆𑀢𑀁 𑀫𑀸 𑀅𑀢𑀺𑀓𑁆𑀓𑀫𑀻’’𑀢𑀺 𑀭𑀢𑁆𑀢𑀺𑀫𑁆𑀧𑀺 𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀼 𑀫𑀸𑀧𑀺𑀢𑀁. 𑀉𑀓𑁆𑀓𑀸𑀲𑀼 𑀞𑀸𑀢𑀺 𑀉𑀓𑁆𑀓𑀝𑁆𑀞𑀸, 𑀉𑀓𑁆𑀓𑀸𑀲𑀼 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀲𑀼 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀽𑀮𑀯𑀺𑀪𑀽𑀚𑀸𑀤𑀺𑀧𑀓𑁆𑀔𑁂𑀧𑁂𑀦 (𑀧𑀸𑀡𑀺𑀦𑀺 𑁩.𑁨.𑁫) 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸 𑀆𑀲𑀻𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀸 𑀦𑀕𑀭𑀻 𑀉𑀓𑁆𑀓𑀝𑁆𑀞𑀕𑀼𑀡𑀬𑁄𑀕𑀢𑁄 𑀉𑀓𑁆𑀓𑀝𑁆𑀞𑀸𑀢𑀺 𑀦𑀸𑀫𑀁 𑀮𑀪𑀢𑀻’’𑀢𑀺. 𑀲𑁂𑀢𑀩𑁆𑀬𑀦𑁆𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀸𑀫𑀁. 𑀢𑀁 𑀧𑀦 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀚𑀸𑀢𑀦𑀕𑀭𑀦𑁆𑀢𑀺 𑀆𑀳 ‘‘𑀅𑀢𑀻𑀢𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀚𑀸𑀢𑀦𑀕𑀭’’𑀦𑁆𑀢𑀺.

𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀓𑁆𑀔𑀡𑁂. 𑀅𑀦𑁆𑀢𑀭𑀢𑁄𑀢𑀺 𑀳𑀤𑀬𑁂. 𑀅𑀦𑁆𑀢𑀭𑀸𑀢𑀺 𑀆𑀭𑀫𑁆𑀪𑀦𑀺𑀩𑁆𑀩𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑁂. 𑀅𑀦𑁆𑀢𑀭𑀺𑀓𑀸𑀬𑀸𑀢𑀺 𑀅𑀦𑁆𑀢𑀭𑀸𑀴𑁂. 𑀏𑀢𑁆𑀣 𑀘 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 (𑀅. 𑀦𑀺. 𑁬.𑁪𑁪; 𑁧𑁦.𑁭𑁫), 𑀏𑀢𑁂𑀲𑀁 𑀅𑀦𑁆𑀢𑀭𑀸 𑀓𑀧𑁆𑀧𑀸 𑀕𑀡𑀦𑀢𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 (𑀩𑀼. 𑀯𑀁. 𑁨𑁮.𑁩), 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀧𑀸𑀢𑁂𑀢𑀻’’𑀢𑀺 (𑀫. 𑀦𑀺. 𑁨.𑁪𑁨𑁬) 𑀘 𑀆𑀤𑀻𑀲𑀼 𑀯𑀺𑀬 𑀓𑀸𑀭𑀡𑀯𑁂𑀫𑀚𑁆𑀛𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀸𑀲𑀤𑁆𑀤𑀸 𑀏𑀯 𑀉𑀤𑀸𑀳𑀭𑀺𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀧𑀦 𑀘𑀺𑀢𑁆𑀢𑀓𑁆𑀔𑀡𑀯𑀺𑀯𑀭𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀅𑀦𑁆𑀢𑀭𑀺𑀓𑀲𑀤𑁆𑀤𑀸. 𑀅𑀦𑁆𑀢𑀭𑀸𑀲𑀤𑁆𑀤𑀲𑁆𑀲 𑀳𑀺 𑀅𑀬𑀫𑀢𑁆𑀣𑀼𑀤𑁆𑀥𑀸𑀭𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑁂𑀲𑀼 𑀅𑀦𑁆𑀢𑀭𑀸𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑁂𑀲𑀼 𑀅𑀦𑁆𑀢𑀭𑀲𑀤𑁆𑀤𑁄𑀧𑀺 𑀯𑀢𑁆𑀢𑀢𑀻𑀢𑀺 𑀲𑀫𑀸𑀦𑀢𑁆𑀣𑀢𑁆𑀢𑀸 𑀅𑀦𑁆𑀢𑀭𑀸𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀭𑀲𑀤𑁆𑀤𑁄 𑀉𑀤𑀸𑀳𑀝𑁄. 𑀅𑀦𑁆𑀢𑀭𑀸𑀲𑀤𑁆𑀤𑁄 𑀏𑀯 𑀯𑀸 ‘‘𑀬𑀲𑁆𑀲𑀦𑁆𑀢𑀭𑀢𑁄’’𑀢𑀺 𑀏𑀢𑁆𑀣 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑁆𑀢𑀭𑀸𑀲𑀤𑁆𑀤𑁄 𑀏𑀯 𑀧𑀦 𑀇𑀓𑀲𑀤𑁆𑀤𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀅𑀦𑁆𑀢𑀭𑀺𑀓𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀉𑀤𑀸𑀳𑀭𑀡𑁄𑀤𑀸𑀳𑀭𑀺𑀢𑀩𑁆𑀩𑀸𑀦𑀁 𑀯𑀺𑀭𑁄𑀥𑀸𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀯𑀘𑀦𑀲𑁆𑀲 𑀧𑀲𑀗𑁆𑀕𑁂 𑀅𑀦𑁆𑀢𑀭𑀸𑀲𑀤𑁆𑀤𑀬𑁄𑀕𑁂𑀦 𑀉𑀧𑀬𑁄𑀕𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢’’𑀦𑁆𑀢𑀺.

𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑀁 𑀫𑀳𑀸𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀥𑀸𑀢𑀽𑀦𑀁 𑀅𑀢𑁆𑀣𑀸𑀬 𑀓𑀼𑀲𑀺𑀦𑀸𑀭𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀳𑀺 𑀲𑁂𑀲𑀭𑀸𑀚𑀽𑀳𑀺 ‘‘𑀅𑀫𑁆𑀳𑀸𑀓𑀁 𑀥𑀸𑀢𑀼𑀬𑁄 𑀯𑀸 𑀤𑁂𑀦𑁆𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺𑀆𑀤𑀺𑀦𑀸 𑀓𑁄𑀲𑀺𑀦𑀸𑀭𑀓𑁂𑀳𑀺 𑀫𑀮𑁆𑀮𑁂𑀳𑀺 𑀲𑀤𑁆𑀥𑀺𑀁 𑀓𑀢𑀁 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑁆𑀯𑀸. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁 𑀯𑀺𑀯𑀸𑀤𑀁 𑀲𑀼𑀢𑁆𑀯𑀸 ‘‘𑀏𑀢𑁂 𑀭𑀸𑀚𑀸𑀦𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁, 𑀅𑀮𑀁 𑀇𑀫𑀺𑀦𑀸 𑀓𑀮𑀳𑁂𑀦, 𑀯𑀽𑀧𑀲𑀫𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀉𑀦𑁆𑀦𑀢𑁂 𑀧𑀤𑁂𑀲𑁂 𑀞𑀢𑁆𑀯𑀸 𑀤𑁆𑀯𑁂𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀤𑁄𑀡𑀕𑀚𑁆𑀚𑀺𑀢𑀁 𑀦𑀸𑀫 𑀅𑀯𑁄𑀘. 𑀢𑀢𑁆𑀣 𑀧𑀞𑀫𑀪𑀸𑀡𑀯𑀸𑀭𑁂 𑀢𑀸𑀯 𑀏𑀓𑀧𑀤𑀫𑁆𑀧𑀺 𑀢𑁂 𑀦 𑀚𑀸𑀦𑀺𑀁𑀲𑀼. 𑀤𑀼𑀢𑀺𑀬𑀪𑀸𑀡𑀯𑀸𑀭𑀧𑀭𑀺𑀬𑁄𑀲𑀸𑀦𑁂 𑀘 ‘‘𑀆𑀘𑀭𑀺𑀬𑀲𑁆𑀲 𑀯𑀺𑀬 𑀪𑁄 𑀲𑀤𑁆𑀤𑁄, 𑀆𑀘𑀭𑀺𑀬𑀲𑁆𑀲 𑀯𑀺𑀬 𑀪𑁄 𑀲𑀤𑁆𑀤𑁄’’𑀢𑀺 𑀲𑀩𑁆𑀩𑁂 𑀦𑀺𑀭𑀯𑀸 𑀅𑀳𑁂𑀲𑀼𑀁. 𑀚𑀫𑁆𑀩𑀼𑀤𑀻𑀧𑀢𑀮𑁂 𑀓𑀺𑀭 𑀓𑀼𑀮𑀖𑀭𑁂 𑀚𑀸𑀢𑁄 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀲 𑀦-𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀅𑀣 𑀔𑁄 𑀲𑁄 𑀅𑀢𑁆𑀢𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀭𑀯𑁂 𑀢𑀼𑀡𑁆𑀳𑀻𑀪𑀽𑀢𑁂 𑀯𑀺𑀤𑀺𑀢𑁆𑀯𑀸 𑀧𑀼𑀦 𑁋

‘‘𑀲𑀼𑀡𑀦𑁆𑀢𑀼 𑀪𑁄𑀦𑁆𑀢𑁄 𑀫𑀫 𑀏𑀓𑀯𑀸𑀘𑀁,

𑀅𑀫𑁆𑀳𑀸𑀓 𑀩𑀼𑀤𑁆𑀥𑁄 𑀅𑀳𑀼 𑀔𑀦𑁆𑀢𑀺𑀯𑀸𑀤𑁄;

𑀦 𑀳𑀺 𑀲𑀸𑀥𑀼𑀬𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲,

𑀲𑀭𑀻𑀭𑀪𑀸𑀕𑁂 𑀲𑀺𑀬𑀸 𑀲𑀫𑁆𑀧𑀳𑀸𑀭𑁄.

‘‘𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀳𑀺𑀢𑀸 𑀲𑀫𑀕𑁆𑀕𑀸,

𑀲𑀫𑁆𑀫𑁄𑀤𑀫𑀸𑀦𑀸 𑀓𑀭𑁄𑀫𑀝𑁆𑀞𑀪𑀸𑀕𑁂;

𑀯𑀺𑀢𑁆𑀣𑀸𑀭𑀺𑀓𑀸 𑀳𑁄𑀦𑁆𑀢𑀼 𑀤𑀺𑀲𑀸𑀲𑀼 𑀣𑀽𑀧𑀸,

𑀩𑀳𑀽 𑀚𑀦𑀸 𑀘𑀓𑁆𑀔𑀼𑀫𑀢𑁄 𑀧𑀲𑀦𑁆𑀦𑀸’’𑀢𑀺. (𑀤𑀻. 𑀦𑀺. 𑁨.𑁨𑁩𑁭) 𑁋

𑀇𑀫𑀁 𑀕𑀸𑀣𑀸𑀤𑁆𑀯𑀬𑀁 𑀯𑀢𑁆𑀯𑀸 𑀢𑀁 𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀅𑀝𑁆𑀞𑀥𑀸 𑀪𑀸𑀚𑁂𑀢𑁆𑀯𑀸 𑀅𑀤𑀸𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑀁 𑀫𑀳𑀸𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀪𑀸𑀚𑁂𑀲𑁆𑀲𑀢𑀻’’𑀢𑀺. 𑀮𑀓𑁆𑀔𑀡𑀘𑀓𑁆𑀓𑀸𑀦𑀻𑀢𑀺 𑀤𑁆𑀯𑀻𑀲𑀼 𑀧𑀸𑀤𑀢𑀮𑁂𑀲𑀼 𑀤𑁆𑀯𑁂 𑀮𑀓𑁆𑀔𑀡𑀘𑀓𑁆𑀓𑀸𑀦𑀺.

𑀆𑀲𑀯𑁂𑀦𑀸𑀢𑀺 𑀓𑀫𑁆𑀫𑀓𑀺𑀮𑁂𑀲𑀓𑀸𑀭𑀡𑁂𑀦 𑀆𑀲𑀯𑁂𑀦. 𑀏𑀢𑁆𑀣 𑀳𑀺 𑀢𑁂𑀪𑀽𑀫𑀓𑀜𑁆𑀘 𑀓𑀫𑁆𑀫𑀁, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 ‘‘𑀆𑀲𑀯𑀸’’𑀢𑀺 𑀯𑀼𑀢𑁆𑀢𑀸. 𑀤𑁂𑀯𑀽𑀧𑀧𑀢𑁆𑀢𑀻𑀢𑀺 𑀤𑁂𑀯𑁂𑀲𑀼 𑀉𑀧𑁆𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀏𑀢𑁆𑀣 𑀘 𑀬𑀓𑁆𑀔𑀕𑀦𑁆𑀥𑀩𑁆𑀩𑀢𑀸𑀬 𑀯𑀺𑀦𑀺𑀫𑀼𑀢𑁆𑀢𑀸 𑀲𑀩𑁆𑀩𑁂 𑀤𑁂𑀯𑀸 𑀤𑁂𑀯𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄 𑀆𑀓𑀸𑀲𑀘𑀸𑀭𑀻. 𑀅𑀳𑀦𑁆𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀤𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀧𑀭𑀺𑀳𑀸𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂𑀬𑁂𑀯 𑀘𑀭𑀢𑀻𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀘 𑀲𑀦𑁆𑀢𑀺𑀓𑁂𑀬𑁂𑀯 𑀘𑀭𑀢𑀺 ‘‘𑀦 𑀘𑀺𑀭𑀲𑁆𑀲𑁂𑀯 𑀅𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 𑀓𑀢𑁆𑀯𑀸. 𑀕𑀸𑀣𑀸𑀬 𑀅𑀧𑁆𑀧𑀫𑀸𑀤𑀭𑀢𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀅𑀧𑁆𑀧𑀫𑀚𑁆𑀚𑀦𑁂 𑀭𑀢𑁄 𑀅𑀪𑀺𑀭𑀢𑁄, 𑀅𑀧𑁆𑀧𑀫𑀸𑀤𑁂𑀦𑁂𑀯 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀫𑀸𑀤𑀁 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄𑀢𑀺 𑀦𑀺𑀭𑀬𑀽𑀧𑀧𑀢𑁆𑀢𑀺𑀆𑀤𑀺𑀪𑀬𑀳𑁂𑀢𑀼𑀢𑁄 𑀧𑀫𑀸𑀤𑀁 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄. 𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬𑀸𑀢𑀺 𑀲𑁄 𑀏𑀯𑀭𑀽𑀧𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀫𑀕𑁆𑀕𑀨𑀮𑁂𑀳𑀺 𑀯𑀸 𑀧𑀭𑀺𑀳𑀸𑀦𑀸𑀬 𑀅𑀪𑀩𑁆𑀩𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑁄 𑀳𑀺 𑀲𑀫𑁆𑀧𑀢𑁆𑀢𑀢𑁄 𑀦 𑀧𑀭𑀺𑀳𑀸𑀬𑀢𑀺, 𑀇𑀢𑀭𑀸𑀦𑀺 𑀘 𑀅𑀧𑁆𑀧𑀢𑁆𑀢𑀸𑀦𑀺 𑀧𑀸𑀧𑀼𑀡𑀸𑀢𑀻𑀢𑀺.

𑀅𑀧𑀭𑀺𑀳𑀸𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀢𑀺𑀮𑀻𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀏𑀓𑀧𑀲𑁆𑀲𑁂𑀦 𑀯𑀟𑁆𑀠𑀺𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 ‘‘𑀮𑁄𑀓𑁄’’𑀢𑀺 𑀕𑀸𑀳𑁂𑀦 𑀯𑀸 𑀢𑀓𑁆𑀓𑁂𑀦 𑀯𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀮𑀸𑀪𑀻 𑀳𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀇𑀢𑀭𑁄 𑀢𑀓𑁆𑀓𑀫𑀢𑁆𑀢𑁂𑀦. 𑀅𑀦𑀦𑁆𑀢𑀯𑀸𑀢𑀺 𑀲𑀫𑀦𑁆𑀢𑀢𑁄 𑀯𑀟𑁆𑀠𑀺𑀢𑀁 𑀅𑀧𑁆𑀧𑀫𑀸𑀡𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 ‘‘𑀮𑁄𑀓𑁄’’𑀢𑀺 𑀕𑀸𑀳𑁂𑀦 𑀯𑀸 𑀢𑀓𑁆𑀓𑁂𑀦 𑀯𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀚𑀻𑀯𑁄 𑀲𑀭𑀻𑀭𑀜𑁆𑀘 𑀏𑀓𑀫𑁂𑀯 𑀯𑀢𑁆𑀣𑀽𑀢𑀺 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀯𑀺𑀲𑁆𑀲𑀝𑁆𑀞𑀸𑀦𑀻𑀢𑀺 𑀲𑀓𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀦𑀺𑀲𑁆𑀲𑀝𑁆𑀞𑀸𑀦𑀺. 𑀯𑀦𑁆𑀢𑀸𑀦𑀻𑀢𑀺 𑀇𑀤𑀁 𑀧𑀼𑀦 𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀢𑁆𑀢𑀫𑁆𑀧𑀺 𑀳𑀺 𑀓𑁂𑀘𑀺 𑀕𑀡𑁆𑀳𑀦𑁆𑀢𑀺, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀦𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀁 𑀬𑁂𑀦 𑀯𑀦𑁆𑀢𑀁, 𑀦 𑀲𑁄 𑀢𑀁 𑀧𑀼𑀦 𑀆𑀤𑀻𑀬𑀢𑀺. 𑀯𑀦𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀲𑀲𑀦𑁆𑀢𑀢𑀺𑀮𑀕𑁆𑀕𑀁 𑀲𑀺𑀬𑀸, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀙𑀺𑀦𑁆𑀦𑀩𑀦𑁆𑀥𑀦𑀸𑀦𑀺 𑀓𑀢𑀸𑀦𑀻’’𑀢𑀺, 𑀲𑀦𑁆𑀢𑀢𑀺𑀢𑁄 𑀯𑀺𑀦𑀺𑀫𑁄𑀘𑀦𑀯𑀲𑁂𑀦 𑀙𑀺𑀦𑁆𑀦𑀩𑀦𑁆𑀥𑀦𑀸𑀦𑀺 𑀓𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀩𑀦𑁆𑀥𑀦𑀁 𑀯𑀺𑀬 𑀨𑀮𑀁 𑀓𑀼𑀳𑀺𑀜𑁆𑀘𑀺 𑀢𑀺𑀝𑁆𑀞𑀢𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀳𑀻𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀓𑀺𑀜𑁆𑀘𑀺 𑀤𑀼𑀦𑁆𑀦𑀺𑀲𑁆𑀲𑀝𑁆𑀞𑀁 𑀧𑀼𑀦 𑀆𑀤𑀸𑀬 𑀲𑀫𑁆𑀫𑀤𑁂𑀯 𑀦𑀺𑀲𑁆𑀲𑀝𑁆𑀞𑀁 ‘‘𑀧𑀝𑀺𑀦𑀺𑀲𑁆𑀲𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑀝𑁆𑀞𑀸𑀦𑀺 𑀆𑀤𑀺𑀦𑁆𑀦𑀲𑀤𑀺𑀲𑀸𑀦𑀺 𑀫𑀕𑁆𑀕𑁂𑀦 𑀧𑀳𑀻𑀦𑀸𑀦𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀬𑀣𑀸 𑀦 𑀧𑀼𑀦 𑀘𑀺𑀢𑁆𑀢𑀁 𑀆𑀭𑁄𑀳𑀦𑁆𑀢𑀺, 𑀏𑀯𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀸𑀦𑀻’’𑀢𑀺.

𑀓𑀸𑀫𑁂𑀲𑀦𑀸𑀢𑀺 𑀓𑀸𑀫𑀸𑀦𑀁 𑀏𑀲𑀦𑀸, 𑀓𑀸𑀫𑀲𑀗𑁆𑀔𑀸𑀢𑀸 𑀯𑀸 𑀏𑀲𑀦𑀸 𑀓𑀸𑀫𑁂𑀲𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑁂𑀲𑀦𑀸? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀦𑀸’’𑀢𑀺, 𑀢𑀲𑁆𑀫𑀸 𑀓𑀸𑀫𑀭𑀸𑀕𑁄 ‘‘𑀓𑀸𑀫𑁂𑀲𑀦𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀓𑀸𑀫𑁂𑀲𑀦𑀸…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀦𑀸’’𑀢𑀺. 𑀪𑀯𑀸𑀦𑀁 𑀏𑀲𑀦𑀸 𑀪𑀯𑁂𑀲𑀦𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀸 𑀪𑀯𑁂𑀲𑀦𑀸? 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄…𑀧𑁂… 𑀪𑀯𑀚𑁆𑀛𑁄𑀲𑀸𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑁂𑀲𑀦𑀸’’𑀢𑀺, 𑀢𑀲𑁆𑀫𑀸 𑀪𑀯𑁂𑀲𑀦𑀭𑀸𑀕𑁄 𑀭𑀽𑀧𑀸𑀭𑀽𑀧𑀪𑀯𑀧𑀢𑁆𑀣𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀪𑀯𑁂𑀲𑀦𑀸 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀢𑀻’’𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸. 𑀲𑀸 𑀘 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀕𑀯𑁂𑀲𑀦𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸𑀧𑀺 𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸? 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀢𑀺𑀝𑁆𑀞𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯).

𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸 𑀤𑀺𑀝𑁆𑀞𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀤𑀺𑀝𑁆𑀞𑀺𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀭𑀸𑀕𑀤𑀺𑀝𑁆𑀞𑀺𑀬𑁄 𑀏𑀲𑀦𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀭𑀸𑀕𑀤𑀺𑀝𑁆𑀞𑀺𑀬𑁄 𑀏𑀯 𑀏𑀲𑀦𑀸, 𑀢𑀤𑁂𑀓𑀝𑁆𑀞𑀁 𑀓𑀫𑁆𑀫𑀫𑁆𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑁂𑀲𑀦𑀸? 𑀓𑀸𑀫𑀭𑀸𑀕𑁄 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀦𑀸. 𑀢𑀢𑁆𑀣 𑀓𑀢𑀫𑀸 𑀪𑀯𑁂𑀲𑀦𑀸? 𑀪𑀯𑀭𑀸𑀕𑁄 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑁂𑀲𑀦𑀸. 𑀢𑀢𑁆𑀣 𑀓𑀢𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸? 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯).

𑀦𑀯𑀯𑀺𑀥𑀫𑀸𑀦𑁄𑀢𑀺 ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁧𑁦𑁮; 𑀥. 𑀲. 𑁧𑁧𑁨𑁧; 𑀯𑀺𑀪. 𑁮𑁬𑁬; 𑀫𑀳𑀸𑀦𑀺. 𑁨𑁧) 𑀆𑀕𑀢𑁄 𑀦𑀯𑀯𑀺𑀥𑀫𑀸𑀦𑁄.

‘‘𑀓𑀸𑀫𑁂𑀲𑀦𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀲𑀳𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀲𑀤𑁆𑀥𑀺𑀁. 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀓𑀭𑀡𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀲𑀤𑁆𑀥𑀺𑀁 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸𑀢𑀺 𑀢𑀺𑀲𑁆𑀲𑁄 𑀏𑀲𑀦𑀸’’𑀢𑀺. 𑀢𑀸𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺𑀲𑀘𑁆𑀘𑀧𑀭𑀸𑀫𑀸𑀲𑁄, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀼𑀲𑁆𑀲𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀇𑀢𑀺 𑀏𑀯𑀁 𑀲𑀘𑁆𑀘𑀦𑁆𑀢𑀺 𑀧𑀭𑀸𑀫𑀸𑀲𑁄 𑀇𑀢𑀺𑀲𑀘𑁆𑀘𑀧𑀭𑀸𑀫𑀸𑀲𑁄. 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀺𑀬𑁄 𑀏𑀯 𑀲𑀩𑁆𑀩𑀸𑀦𑀢𑁆𑀣𑀳𑁂𑀢𑀼𑀪𑀸𑀯𑀢𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦). 𑀢𑀸 𑀏𑀯 𑀘 𑀉𑀧𑀭𑀽𑀧𑀭𑀺 𑀯𑀼𑀤𑁆𑀥𑀺𑀬𑀸 𑀫𑀸𑀦𑀮𑁄𑀪𑀸𑀤𑀺𑀓𑀺𑀮𑁂𑀲𑀲𑀫𑀼𑀲𑁆𑀲𑀬𑀦𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀲𑁆𑀲𑀬𑀦𑁂𑀦 𑀘 𑀲𑀫𑀼𑀲𑁆𑀲𑀬𑀸, ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀲𑀫𑀸𑀦𑀸 𑀲𑀩𑁆𑀩𑀸𑀦𑀢𑁆𑀣𑀳𑁂𑀢𑀼𑀓𑀸 𑀓𑀺𑀮𑁂𑀲𑀤𑀼𑀓𑁆𑀔𑀽𑀧𑀘𑀬𑀢𑁄 𑀳𑁂𑀢𑀼𑀪𑀽𑀢𑀸 𑀘 𑀤𑀺𑀝𑁆𑀞𑀺𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀩𑁆𑀩𑀭𑀸𑀕𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑁂𑀳𑀺 𑀓𑀸𑀫𑀪𑀯𑀭𑀸𑀕𑁂𑀳𑀺 𑀯𑀺𑀭𑀢𑁆𑀢𑀲𑁆𑀲. 𑀢𑀢𑁄 𑀏𑀯 𑀢𑀡𑁆𑀳𑀸𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁄 𑀅𑀭𑀳𑀢𑁄. 𑀏𑀲𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸 𑀲𑀩𑁆𑀩𑀲𑁄 𑀦𑀺𑀲𑁆𑀲𑀝𑁆𑀞𑀸 𑀧𑀳𑀻𑀦𑀸. 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀽𑀳𑀢𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀘 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀸. 𑀏𑀯𑀫𑁆𑀧𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀢𑀺𑀮𑀻𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀚𑁆𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀅𑀦𑀼𑀓𑀼𑀮𑀬𑀜𑁆𑀜𑀦𑁆𑀢𑀺 𑀅𑀦𑀼𑀓𑀼𑀮𑀁 𑀓𑀼𑀮𑀸𑀦𑀼𑀓𑁆𑀓𑀫𑀁 𑀉𑀧𑀸𑀤𑀸𑀬 𑀤𑀸𑀢𑀩𑁆𑀩𑀤𑀸𑀦𑀁. 𑀢𑁂𑀦𑀸𑀳 ‘‘𑀅𑀫𑁆𑀳𑀸𑀓𑀁…𑀧𑁂… 𑀓𑀼𑀮𑀸𑀦𑀼𑀓𑀼𑀮𑀯𑀲𑁂𑀦 𑀬𑀚𑀺𑀢𑀩𑁆𑀩’’𑀦𑁆𑀢𑀺. 𑀯𑀁𑀲𑀧𑀭𑀫𑁆𑀧𑀭𑀸𑀬 𑀧𑀘𑁆𑀙𑀸 𑀤𑀼𑀕𑁆𑀕𑀢𑀧𑀼𑀭𑀺𑀲𑁂𑀳𑀺 𑀧𑀤𑀸𑀢𑀩𑁆𑀩𑀤𑀸𑀦𑀁. 𑀏𑀯𑀭𑀽𑀧𑀁 𑀓𑀼𑀮𑀁 𑀲𑀻𑀮𑀯𑀦𑁆𑀢𑁂 𑀉𑀤𑁆𑀤𑀺𑀲𑁆𑀲 𑀦𑀺𑀩𑀤𑁆𑀥𑀤𑀸𑀦𑀁, 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀮𑀺𑀤𑁆𑀤𑀸𑀦𑀺𑀧𑀺 𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀖𑀭𑁂 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀲𑀢𑀸𑀦𑀺 𑀤𑀻𑀬𑀺𑀁𑀲𑀼. 𑀤𑀦𑁆𑀢𑀫𑀬𑀲𑀮𑀸𑀓𑀸𑀦𑀁 𑀧𑀜𑁆𑀘𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀣 𑀢𑀁 𑀓𑀼𑀮𑀁 𑀅𑀦𑀼𑀓𑁆𑀓𑀫𑁂𑀦 𑀤𑀸𑀮𑀺𑀤𑁆𑀤𑀺𑀬𑁂𑀦 𑀅𑀪𑀺𑀪𑀽𑀢𑀁. 𑀏𑀓𑀸 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀸𑀭𑀺𑀓𑀸 𑀏𑀓𑀲𑀮𑀸𑀓𑀢𑁄 𑀉𑀤𑁆𑀥𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀸𑀧𑀺 𑀧𑀘𑁆𑀙𑀸 𑀲𑀸𑀢𑀯𑀸𑀳𑀦𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀔𑀮𑀁 𑀲𑁄𑀥𑁂𑀢𑁆𑀯𑀸 𑀮𑀤𑁆𑀥𑀥𑀜𑁆𑀜𑁂𑀦 𑀢𑀁 𑀲𑀮𑀸𑀓𑀁 𑀅𑀤𑀸𑀲𑀺. 𑀏𑀓𑁄 𑀣𑁂𑀭𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀧𑀜𑁆𑀘𑀧𑀺 𑀲𑀮𑀸𑀓𑀲𑀢𑀸𑀦𑀺 𑀧𑀯𑀢𑁆𑀢𑁂𑀲𑀺.

𑀅𑀲𑁆𑀲𑀫𑁂𑀥𑀦𑁆𑀢𑀺𑀆𑀤𑀻𑀲𑀼 𑀧𑁄𑀭𑀸𑀡𑀓𑀭𑀸𑀚𑀓𑀸𑀮𑁂 𑀓𑀺𑀭 𑀲𑀲𑁆𑀲𑀫𑁂𑀥𑀁, 𑀧𑀼𑀭𑀺𑀲𑀫𑁂𑀥𑀁, 𑀲𑀫𑁆𑀫𑀸𑀧𑀸𑀲𑀁, 𑀯𑀸𑀘𑀸𑀧𑁂𑀬𑁆𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀅𑀳𑁂𑀲𑀼𑀁, 𑀬𑁂𑀳𑀺 𑀭𑀸𑀚𑀸𑀦𑁄 𑀮𑁄𑀓𑀁 𑀲𑀗𑁆𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀢𑁄 𑀤𑀲𑀫𑀪𑀸𑀕𑀕𑁆𑀕𑀳𑀡𑀁 𑀲𑀲𑁆𑀲𑀫𑁂𑀥𑀁 𑀦𑀸𑀫, 𑀲𑀲𑁆𑀲𑀲𑀫𑁆𑀧𑀸𑀤𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀬𑁄𑀥𑀸𑀦𑀁 𑀙𑀫𑀸𑀲𑀺𑀓𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑀁 𑀧𑀼𑀭𑀺𑀲𑀫𑁂𑀥𑀁 𑀦𑀸𑀫, 𑀧𑀼𑀭𑀺𑀲𑀲𑀗𑁆𑀕𑀡𑁆𑀳𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑁂 𑀮𑁂𑀔𑀁 𑀕𑀳𑁂𑀢𑁆𑀯𑀸 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀺𑀦𑀸 𑀯𑀟𑁆𑀠𑀺𑀬𑀸 𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀫𑀢𑁆𑀢𑀥𑀦𑀸𑀦𑀼𑀧𑁆𑀧𑀤𑀸𑀦𑀁 𑀲𑀫𑁆𑀫𑀸𑀧𑀸𑀲𑀁 𑀦𑀸𑀫. 𑀢𑀜𑁆𑀳𑀺 𑀲𑀫𑁆𑀫𑀸 𑀫𑀦𑀼𑀲𑁆𑀲𑁂 𑀧𑀸𑀲𑁂𑀢𑀺 𑀳𑀤𑀬𑁂 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀧𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸𑀧𑀸𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀸𑀢, 𑀫𑀸𑀢𑀼𑀮𑀸’’𑀢𑀺𑀆𑀤𑀺𑀦𑀸 𑀧𑀦 𑀲𑀡𑁆𑀳𑀯𑀸𑀘𑀸𑀪𑀡𑀦𑀁 𑀯𑀸𑀘𑀸𑀧𑁂𑀬𑁆𑀬𑀁 𑀦𑀸𑀫, 𑀧𑁂𑀬𑁆𑀬𑀯𑀚𑁆𑀚𑀁 𑀧𑀺𑀬𑀯𑀘𑀦𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑀺𑀢𑀁 𑀭𑀝𑁆𑀞𑀁 𑀇𑀤𑁆𑀥𑀜𑁆𑀘𑁂𑀯 𑀳𑁄𑀢𑀺 𑀨𑀻𑀢𑀜𑁆𑀘 𑀧𑀳𑀽𑀢𑀅𑀦𑁆𑀦𑀧𑀸𑀦𑀁 𑀔𑁂𑀫𑀁 𑀦𑀺𑀭𑀩𑁆𑀩𑀼𑀤𑀁, 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀤𑁆𑀯𑀸𑀭𑀸 𑀯𑀺𑀳𑀭𑀦𑁆𑀢𑀺. 𑀇𑀤𑀁 𑀖𑀭𑀤𑁆𑀯𑀸𑀭𑁂𑀲𑀼 𑀅𑀕𑁆𑀕𑀴𑀸𑀦𑀁 𑀅𑀪𑀸𑀯𑀢𑁄 𑀦𑀺𑀭𑀕𑁆𑀕𑀴𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑁄𑀭𑀸𑀡𑀺𑀓𑀸 𑀧𑀯𑁂𑀡𑀻. 𑀅𑀧𑀭𑀪𑀸𑀕𑁂 𑀧𑀦 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀸 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀇𑀫𑀜𑁆𑀘 𑀭𑀝𑁆𑀞𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀸 𑀉𑀫𑁆𑀫𑀽𑀮𑀁 𑀓𑀢𑁆𑀯𑀸 𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀦𑁆𑀢𑀺𑀆𑀤𑀺𑀓𑁂 𑀧𑀜𑁆𑀘 𑀬𑀜𑁆𑀜𑁂 𑀦𑀸𑀫 𑀅𑀓𑀁𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀬𑀲𑀼𑀢𑁆𑀢𑁂 𑁋

‘‘𑀢𑁂𑀲𑀁 𑀆𑀲𑀺 𑀯𑀺𑀧𑀮𑁆𑀮𑀸𑀲𑁄, 𑀤𑀺𑀲𑁆𑀯𑀸𑀦 𑀅𑀡𑀼𑀢𑁄 𑀅𑀡𑀼𑀁…𑀧𑁂…;

𑀢𑁂 𑀢𑀢𑁆𑀣 𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸, 𑀑𑀓𑁆𑀓𑀸𑀓𑀁 𑀢𑀤𑀼𑀧𑀸𑀕𑀫𑀼’’𑀦𑁆𑀢𑀺. (𑀲𑀼. 𑀦𑀺. 𑁩𑁦𑁧-𑁩𑁦𑁪);

𑀇𑀤𑀸𑀦𑀺 𑀢𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀧𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀲𑀫𑁂𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀯𑀥𑁂𑀦𑁆𑀢𑀺. 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀻𑀢𑀺 𑀫𑀳𑀸𑀬𑀜𑁆𑀜𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀘𑁆𑀙𑀸 𑀘 𑀧𑀯𑀢𑁆𑀢𑁂𑀢𑀩𑁆𑀩𑁂𑀳𑀺 𑀤𑁆𑀯𑀻𑀳𑀺 𑀧𑀭𑀺𑀯𑀸𑀭𑀬𑀜𑁆𑀜𑁂𑀳𑀺. 𑀲𑀢𑁆𑀢𑀦𑀯𑀼𑀢𑀺𑀧𑀜𑁆𑀘𑀧𑀲𑀼𑀲𑀢𑀖𑀸𑀢𑀪𑀺𑀁𑀲𑀦𑀲𑁆𑀲𑀸𑀢𑀺 𑀲𑀢𑁆𑀢𑀦𑀯𑀼𑀢𑀸𑀥𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀲𑀼𑀲𑀢𑀸𑀦𑀁 𑀫𑀸𑀭𑀡𑁂𑀦 𑀪𑁂𑀭𑀯𑀲𑁆𑀲 𑀧𑀸𑀧𑀪𑀻𑀭𑀼𑀓𑀸𑀦𑀁 𑀪𑀬𑀸𑀯𑀳𑀲𑁆𑀲. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀙𑀲𑀢𑀸𑀦𑀺 𑀦𑀺𑀬𑀼𑀚𑁆𑀚𑀦𑁆𑀢𑀺, 𑀧𑀲𑀽𑀦𑀁 𑀫𑀚𑁆𑀛𑀺𑀫𑁂 𑀳𑀦𑀺;

𑀅𑀲𑁆𑀲𑀫𑁂𑀥𑀲𑁆𑀲 𑀬𑀜𑁆𑀜𑀲𑁆𑀲, 𑀊𑀦𑀸𑀦𑀺 𑀧𑀲𑀽𑀳𑀺 𑀢𑀻𑀳𑀻’’𑀢𑀺. (𑀲𑀁. 𑀦𑀺. 𑀝𑀻. 𑁧.𑁧.𑁧𑁨𑁦);

𑀲𑀫𑁆𑀫𑀦𑁆𑀢𑀺 𑀬𑀼𑀕𑀘𑁆𑀙𑀺𑀤𑁆𑀤𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑀤𑀡𑁆𑀟𑀓𑀁. 𑀧𑀸𑀲𑀦𑁆𑀢𑀻𑀢𑀺 𑀔𑀺𑀧𑀦𑁆𑀢𑀺. 𑀲𑀁𑀳𑀸𑀭𑀺𑀫𑁂𑀳𑀻𑀢𑀺 𑀲𑀓𑀝𑁂𑀳𑀺 𑀯𑀳𑀺𑀢𑀩𑁆𑀩𑁂𑀳𑀺. 𑀧𑀼𑀩𑁆𑀩𑁂 𑀓𑀺𑀭 𑀏𑀓𑁄 𑀭𑀸𑀚𑀸 𑀲𑀫𑁆𑀫𑀸𑀧𑀸𑀲𑀁 𑀬𑀚𑀦𑁆𑀢𑁄 𑀲𑀭𑀲𑁆𑀲𑀢𑀺𑀦𑀤𑀺𑀢𑀻𑀭𑁂 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀦𑀺𑀫𑀼𑀕𑁆𑀕𑁄𑀬𑁂𑀯 𑀅𑀳𑁄𑀲𑀺, 𑀅𑀦𑁆𑀥𑀩𑀸𑀮𑀩𑁆𑀭𑀸𑀳𑁆𑀫𑀡𑀸 𑀕𑀢𑀸𑀦𑀼𑀕𑀢𑀺𑀕𑀢𑀸 ‘‘𑀅𑀬𑀁 𑀢𑀲𑁆𑀲 𑀲𑀕𑁆𑀕𑀕𑀫𑀦𑀫𑀕𑁆𑀕𑁄’’𑀢𑀺 𑀲𑀜𑁆𑀜𑀸𑀬 𑀢𑀢𑁆𑀣 𑀲𑀫𑁆𑀫𑀸𑀧𑀸𑀲𑀬𑀜𑁆𑀜𑀁 𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀻’’𑀢𑀺. 𑀅𑀬𑀽𑀧𑁄 𑀅𑀧𑁆𑀧𑀓𑀤𑀺𑀯𑀲𑁄 𑀬𑀸𑀕𑁄, 𑀲𑀬𑀽𑀧𑁄 𑀩𑀳𑀼𑀤𑀺𑀯𑀲𑀁 𑀦𑁂𑀬𑁆𑀬𑁄 𑀲𑀢𑁆𑀭𑀬𑀸𑀕𑁄𑀢𑀺. 𑀫𑀦𑁆𑀢𑀧𑀤𑀸𑀪𑀺𑀲𑀗𑁆𑀔𑀢𑀸𑀦𑀁 𑀲𑀧𑁆𑀧𑀺𑀫𑀥𑀽𑀦𑀁 𑀯𑀸𑀚𑀫𑀺𑀢𑀺 𑀲𑀫𑀜𑁆𑀜𑀸. 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁𑀲𑀸𑀤𑀺 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲. 𑀲𑀸𑀭𑀕𑀩𑁆𑀪𑀓𑁄𑀝𑁆𑀞𑀸𑀕𑀸𑀭𑀸𑀤𑀻𑀲𑀼 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀦𑁆𑀢𑀺 𑀦𑀺𑀭𑀕𑁆𑀕𑀴𑁄. 𑀢𑀢𑁆𑀣 𑀓𑀺𑀭 𑀬𑀜𑁆𑀜𑁂 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑀁 𑀅𑀦𑀯𑀲𑁂𑀲𑀢𑁄 𑀅𑀦𑀺𑀕𑀽𑀳𑀺𑀢𑁆𑀯𑀸 𑀦𑀺𑀬𑁆𑀬𑀸𑀢𑀻𑀬𑀢𑀺.

𑀫𑀳𑀸𑀭𑀫𑁆𑀪𑀸𑀢𑀺 𑀩𑀳𑀼𑀧𑀲𑀼𑀖𑀸𑀢𑀓𑀫𑁆𑀫𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀯𑀺𑀥𑀸 𑀬𑀢𑁆𑀣 𑀳𑀜𑁆𑀜𑀭𑁂’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀫𑀳𑀸𑀓𑀺𑀘𑁆𑀘𑀸 𑀫𑀳𑀸𑀓𑀭𑀡𑀻𑀬𑀸’’𑀢𑀺 𑀧𑀞𑀫𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀤𑀼𑀢𑀺𑀬𑁄 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁄 ‘‘𑀫𑀳𑀸𑀭𑀫𑁆𑀪𑀸𑀢𑀺 𑀧𑀧𑀜𑁆𑀘𑀯𑀲𑁂𑀦 𑀅𑀚𑁂𑀴𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀆𑀭𑀤𑁆𑀥𑁄. 𑀦𑀺𑀭𑀸𑀭𑀫𑁆𑀪𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀦𑀼 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀨𑀮𑀁 𑀦𑀼𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀦𑀺𑀧𑁆𑀨𑀮𑀪𑀸𑀯𑀁 𑀅𑀯𑀢𑁆𑀯𑀸 ‘‘𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀺𑀭𑀯𑀲𑁂𑀲𑀢𑁆𑀣𑁂’’𑀢𑀺𑀆𑀤𑀺. 𑀅𑀦𑀼𑀕𑀢𑀁 𑀓𑀼𑀮𑀦𑁆𑀢𑀺 𑀅𑀦𑀼𑀓𑀼𑀮𑀁, 𑀓𑀼𑀮𑀸𑀦𑀼𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀬𑁂 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀁 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀧𑀝𑁆𑀞𑀧𑀺𑀢𑀁 𑀅𑀧𑀭𑀸𑀧𑀭𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀦𑁆𑀢𑀸 𑀫𑀦𑀼𑀲𑁆𑀲𑀸 𑀤𑀤𑀦𑁆𑀢𑀺, 𑀢𑁂 𑀅𑀦𑀼𑀓𑀼𑀮𑀁 𑀬𑀚𑀦𑁆𑀢𑀺 𑀦𑀸𑀫. 𑀢𑁂𑀦𑁂𑀯𑀸𑀳 ‘‘𑀬𑁂 𑀅𑀜𑁆𑀜𑁂 𑀅𑀦𑀼𑀓𑀼𑀮𑀁 𑀬𑀚𑀦𑁆𑀢𑀻’’𑀢𑀺𑀆𑀤𑀺.

𑀉𑀚𑁆𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀧𑀸𑀡𑀲𑀫𑀸𑀭𑀫𑁆𑀪𑀭𑀳𑀺𑀢𑀦𑁆𑀢𑀺 𑀧𑀸𑀡𑀖𑀸𑀢𑀭𑀳𑀺𑀢𑀁. 𑀅𑀩𑁆𑀬𑀸𑀩𑀚𑁆𑀛𑀁 𑀲𑀼𑀔𑀁 𑀮𑁄𑀓𑀁, 𑀧𑀡𑁆𑀟𑀺𑀢𑁄 𑀉𑀧𑀧𑀚𑁆𑀚𑀢𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀩𑁆𑀬𑀸𑀧𑀸𑀤𑀯𑀺𑀭𑀳𑀺𑀢𑀢𑁆𑀢𑀸 𑀅𑀩𑁆𑀬𑀸𑀩𑀚𑁆𑀛𑀁 𑀦𑀺𑀤𑁆𑀤𑀼𑀓𑁆𑀔𑀁. 𑀧𑀭𑀧𑀻𑀴𑀸𑀪𑀸𑀯𑁂 𑀧𑀦 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀼𑀔𑀩𑀳𑀼𑀮𑀢𑁆𑀢𑀸 𑀲𑀼𑀔𑀁 𑀏𑀓𑀦𑁆𑀢𑀲𑀼𑀔𑀁 𑀩𑁆𑀭𑀳𑁆𑀫𑀮𑁄𑀓𑀁 𑀛𑀸𑀦𑀧𑀼𑀜𑁆𑀜𑁂𑀦, 𑀇𑀢𑀭𑀧𑀼𑀜𑁆𑀜𑁂𑀦 𑀧𑀦 𑀢𑀤𑀜𑁆𑀜𑀲𑀫𑁆𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑀁 𑀲𑀼𑀔𑀁 𑀮𑁄𑀓𑀁 𑀧𑀡𑁆𑀟𑀺𑀢𑁄 𑀲𑀧𑁆𑀧𑀜𑁆𑀜𑁄 𑀉𑀧𑁂𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀉𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀓𑁆𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.